\id PHM
\h Filemón
\mt DIZRAꞌ BZUAJ SAN PABLO CHEE̱ FILEMÓN
\c 1
\s Pablo dxugape̱ꞌ diuzre Filemón
\p
\v 1 Nedaꞌ, Pablo, xuꞌa lizre xia laweꞌ da dxunaꞌ zrin chee̱ Jesucristo, nen bi bíchedxu Timoteo. Dxugápantuꞌ lueꞌ diuzre, Filemón, benneꞌ nazríꞌite̱ lázrentuꞌ. Nacuꞌ bi ljwézrentuꞌ lu zrin chee̱ Cristo.
\v 2 Dxugapaꞌ diuzre benneꞌ bíchedxu caꞌ dxelezrague̱ꞌ lizruꞌ, ne nuꞌula zandxu Apia, ne Arquipo, bi ljwézredxu nácabeꞌ benneꞌ zeje̱ꞌ wedil-la chee̱ Cristo.
\v 3 Dxenabaꞌ Xradxu Dios ne Xránadxu Jesucristo gune̱ꞌ da chaweꞌ chee̱le, ne gunne̱ꞌ leꞌe xel-laꞌ dxebeza zri lazreꞌ.
\s Ca naca chee̱ Filemón
\p
\v 4 Dxápequezaꞌ Dios xcalenuꞌ gate dxuchálajle̱naꞌ Le̱ꞌ ne dxeajsá lázrquezaꞌ lueꞌ,
\v 5 laweꞌ da ba bendaꞌ ca nazriꞌinuꞌ Xránadxu Jesucristo ne ca dxeajlí lazruꞌ Le̱ꞌ, ne ca nazriꞌinuꞌ xúgute̱ bi caꞌ chee̱ Dios.
\v 6 Dxenabaꞌ lau Dios guzéajniꞌine̱ꞌ benneꞌ caꞌ dxeleajlí lazre̱ꞌ Le̱ꞌ ne̱ chee̱ xel-laꞌ dxeajlí lazreꞌ chiuꞌ, ca naca xúgute̱ da chaweꞌ caꞌ da nápadxu ne̱ chee̱ Jesucristo.
\v 7 Xel-laꞌ zriꞌi lazreꞌ chiuꞌ, bi bichaꞌ, dxúnnale̱ꞌe̱ na nedaꞌ xel-laꞌ dxebé, ne dxutipa na lazraꞌ, ca dxutipa na lazreꞌ xúgute̱ bi chee̱ Dios.
\s Pablo dxenabe̱ꞌ Filemón tu da gune̱ꞌ chee̱ Onésimo, bi naꞌu Filemón
\p
\v 8 Chee̱ le̱ naꞌ, lácala xuꞌu lu naꞌa nna beꞌedaꞌ lueꞌ ca dxal-laꞌ gunuꞌ laweꞌ da nacaꞌ gubáz chee̱ Cristo,
\v 9 dxataꞌ xúedaꞌ lueꞌ lu xel-laꞌ zriꞌi lazreꞌ chee̱dxu, nedaꞌ, Pablo, benneꞌ gula, ne xuꞌa lizre xia laweꞌ da dxunaꞌ zrin chee̱ Cristo.
\v 10 Dxataꞌ xúedaꞌ lueꞌ tu da gunuꞌ chee̱ Onésimo, bi nácabeꞌ ca zríꞌinequezaꞌ lu da naca chee̱ Cristo, nedaꞌ, xuꞌa lizre xia nigá.
\p
\v 11 Gate nate Onésimo, bi naꞌu lueꞌ gúcabeꞌ tu bi we̱n da cale̱la, san naꞌa nácabeꞌ we̱n zrin li lazreꞌ chiuꞌ lueꞌ, ne chiaꞌ nedaꞌ.
\v 12 Dxesel-laꞌ-beꞌ naga zuꞌ. Bezíꞌ lu naꞌu-beꞌ, nácabeꞌ bi nazríꞌite̱ lazraꞌ.
\v 13 Guzá lazraꞌ nedaꞌ xegáꞌanale̱beꞌ nedaꞌ nigá chee̱ gunbeꞌ zrin chiaꞌ nedaꞌ waláz chiuꞌ lueꞌ dxácate̱ ne xuꞌa lizre xia laweꞌ da dxunaꞌ zrin chee̱ dizraꞌ chaweꞌ.
\v 14 Quebe dxaca lazraꞌ bi gunaꞌ che quebe naca na da nnauꞌ lueꞌ, chee̱ gácale̱nuꞌ nedaꞌ laweꞌ da naca na ca dxaca lazruꞌ lueꞌ, ne quegá laweꞌ da dxenná beꞌedaꞌ lueꞌ.
\v 15 Becuasa Onésimo nen lueꞌ tu chíꞌidauꞌ, san naꞌa súale̱tequezebeꞌ lueꞌ,
\v 16 quegá ca tu bi naꞌu lueꞌ, san gácabeꞌ tu bi cháwedxa ca tu bi naꞌu lueꞌ, da zéaje̱ na, gácabeꞌ tu bi bichuꞌ nazriꞌite̱ lazruꞌ. Nedaꞌ nazríꞌile̱ꞌe̱daꞌ-beꞌ, san lueꞌ dxal-laꞌ zríꞌidxenuꞌ-beꞌ, quegaze ca bénneacheze, san cáꞌanqueze ca bi bíchedxu, bi chee̱ Cristo.
\p
\v 17 Chee̱ le̱ naꞌ, che dxéquenuꞌ nedaꞌ ca bi ljwezruꞌ, bezíꞌ lu naꞌu-beꞌ ca dxezíꞌ lu naꞌu nedaꞌ.
\v 18 Che bi da cale̱la ba be̱nbeꞌ chiuꞌ, u che bi dxál-labeꞌ chiuꞌ, nedaꞌ quízrujaꞌ na.
\v 19 Nedaꞌ, Pablo, dxuzúajaꞌ da nigá nen náꞌaquezaꞌ: Nedaꞌ quízrujaꞌ na, lácala nedaꞌ la gusáꞌa lazruꞌ lueꞌ dxál-laquezuꞌ chiaꞌ cuínquezuꞌ.
\v 20 Lueꞌ, bi bichaꞌ, dxataꞌ xúedaꞌ lueꞌ lu La Xránadxu, be̱n da guzúa na nedaꞌ lu da ba neza.
\p
\v 21 Dxuzúajaꞌ chiuꞌ laweꞌ da nuxrén lazraꞌ gunuꞌ ca da dxapaꞌ lueꞌ, ne nezdaꞌ gundxuꞌ ca da dxenabaꞌ lueꞌ.
\v 22 Cáꞌanqueze bcueza latja naga suaꞌ nedaꞌ laweꞌ da dxebeza lazraꞌ gun Dios da dxenábale Le̱ꞌ, gunne̱ꞌ nedaꞌ lataj xidaꞌ xedajnnáꞌa leꞌe.
\s Bi chee̱ Cristo dxulugápabeꞌ diuzre Filemón
\p
\v 23 Epafras, bi ljwezraꞌ, xúꞌule̱beꞌ nedaꞌ lizre xia laweꞌ da dxunbeꞌ zrin chee̱ Jesucristo,
\v 24 ne Marcos, ne Aristarco, ne Demas, ne Lucas, bi caꞌ dxelácale̱beꞌ nedaꞌ lu zrin chee̱ Cristo dxulugápabeꞌ lueꞌ diuzre.
\p
\v 25 Dxenabaꞌ lau Xránadxu Jesucristo gune̱ꞌ da chaweꞌ chee̱le leꞌe. Caꞌan gaca na.