\id HEB
\h Hebreos
\mt DIZRAꞌ DA NAZÚAJ CHEE̱ BENNEꞌ HEBREO CAꞌ
\c 1
\s Dios ba bchálajle̱ne̱ꞌ dxiꞌu lu dxuꞌa Zríꞌinequeze̱ꞌ
\p
\v 1 Dios bchálajle̱ne̱ꞌ xra xrtáudxu caꞌ gate nate zaneꞌ lasa, ne zaneꞌ ca bchálaje̱ꞌ lu dxuꞌa benneꞌ caꞌ buluchálaje̱ꞌ waláz chee̱ꞌ.
\v 2 Naꞌa, lu zra caní, Dios ba bchálajle̱ne̱ꞌ dxiꞌu lu dxuꞌa Zríꞌinequeze̱ꞌ. Dios be̱ne̱ꞌ xe̱zr la xu nigá lu naꞌ Zríꞌine̱ꞌ nigá, ne ba be̱ne̱ꞌ naca chee̱ꞌ xúgute̱ da caꞌ be̱ne̱ꞌ.
\v 3 Zriꞌine Dios nigá naque̱ꞌ Benneꞌ dxuléꞌene̱ꞌ ca naca xel-laꞌ szren chee̱ Dios, ne naque̱ꞌ ca da nácaqueze Dios, naꞌ nuxre̱ꞌ xúgute̱ da caꞌ nune̱ꞌ, dxuchínene̱ꞌ dizraꞌ chee̱ꞌ da nápale̱ꞌe̱ na xel-laꞌ waca. Gate ba gudúe̱ꞌ dul-la da nabágadxu xeajxedxéꞌe̱ chaláꞌa xabe̱la chee̱ lataj blau chee̱ Dios xabáa.
\s Zriꞌine Dios nácadxe̱ꞌ blau ca gubáz chee̱ xabáa caꞌ
\p
\v 4 Zriꞌine Dios nácadxe̱ꞌ blau ca gubáz chee̱ xabáa caꞌ chee̱ Dios, ca naca La Cristo da bzua Dios, nácadxa na blau ca la gubáz chee̱ xabáa caꞌ.
\v 5 Dios cabataꞌ guzre̱ꞌ tu gubáz chee̱ xabáa ca guzre̱ꞌ Cristo, gunné̱ꞌ:
\q Lueꞌ nacuꞌ Zriꞌinaꞌ.
\q Nedaꞌ nácaquezaꞌ Xrauꞌ naꞌa zra.
\m Cáꞌanqueze cabataꞌ guzre̱ꞌ tu gubáz chee̱ xabáa ca gunné̱ꞌ chee̱ Cristo:
\q Nedaꞌ gacaꞌ Xre̱ꞌ,
\q naꞌ Le̱ꞌ gaque̱ꞌ Zriꞌinaꞌ.
\m
\v 6 Gate bzue̱ꞌ Zríꞌine̱ꞌ lu xe̱zr la xu nigá, gunné̱ꞌ:
\q Xúgute̱ gubáz chee̱ xabáa caꞌ xelue láꞌane̱ꞌ Le̱ꞌ.
\m
\v 7 Ca naca chee̱ gubáz chee̱ xabáa caꞌ, Dios gunné̱ꞌ:
\q Dsesel-le̱ꞌ gubáz chee̱ꞌ caꞌ ca tu beꞌ da dxaca,
\q ne dxuchínene̱ꞌ gubáz we̱n zrin chee̱ꞌ caꞌ ca tu xiꞌ.
\m
\v 8 Ca naca chee̱ Zríꞌine̱ꞌ, gunná Dios:
\q Lataj blau chiuꞌ lueꞌ, Dios, zúate̱queze.
\q Xel-laꞌ dxenná bea chiuꞌ naca na xlátaje̱.
\q
\v 9 Nazriꞌinuꞌ da xlátaje̱, ne dxezraꞌu da cale̱la.
\q Chee̱ le̱ naꞌ Dios chiuꞌ ba bé̱nnadxe̱ꞌ Lueꞌ
\q xel-la dxebé ca da bnézruje̱ꞌ bi ljwezruꞌ caꞌ.
\m
\v 10 Cáꞌanqueze guzre̱ꞌ Le̱ꞌ:
\q Lueꞌ, Xran, nédxudaute̱ be̱nuꞌ xe̱zr la xu.
\q Nen xel-laꞌ waca chiuꞌ be̱nuꞌ xabáa.
\q
\v 11 Da caní weledé chee̱ na, san Lueꞌ súate̱quezuꞌ.
\q Xúgute̱ da caní welaca gula ca zra lana bénneache.
\q
\v 12 Naꞌ xutubuꞌ na ca tu ladxeꞌ,
\q ne guchaꞌu na ca dxun tu benneꞌ dxuché̱ꞌe̱ zra lane̱ꞌ.
\q Lueꞌ zúaquezuꞌ chadía chacanna,
\q naꞌ xel-laꞌ nabán chiuꞌ quebe téqueze chee̱ na.
\m
\v 13 Dios cabataꞌ guzre̱ꞌ tu gubáz chee̱ xabáa ca guzre̱ꞌ Zríꞌine̱ꞌ, gunné̱ꞌ:
\q Gudxeꞌe chaláꞌa xabe̱la chiaꞌ,
\q cadxa guzúaꞌ benneꞌ caꞌ dxeledábague̱ꞌ Lueꞌ zran niꞌu.
\m
\v 14 Xúgute̱ gubáz chee̱ xabáa caꞌ zaj naque̱ꞌ beꞌ caꞌ dxelún zrin chee̱ Dios, naꞌ dxesel-le̱ꞌ gubáz chee̱ xabáa caꞌ chee̱ xelácale̱ne̱ꞌ benneꞌ caꞌ dxeleziꞌe̱ xel-laꞌ weselá.
\c 2
\s Quebe dxal-laꞌ guzúadxu chaláꞌala xel-laꞌ weselá
\p
\v 1 Chee̱ le̱ naꞌ dxal-laꞌ nnaꞌ xánnedxu dizraꞌ da ba bendxu chee̱ quebe cuásadxu lu neza chee̱ xel-laꞌ li.
\v 2 Dizraꞌ da gusel-la Dios gate nate lu naꞌ gubáz chee̱ xabáa caꞌ guca na li lazreꞌ, naꞌ xúgute̱ benneꞌ caꞌ buluzúe̱ꞌ na chaláꞌala, ne quebe buluzúe̱ꞌ dizraꞌ ca da gunná Dios, Dios bdee̱ꞌ le̱ꞌ xel-laꞌ ziꞌ ca da dxal-laꞌ xelezíꞌe̱.
\v 3 ¿Ájazra gaca ladxu che guzúadxu chaláꞌala tu xel-laꞌ weselá zren caní? Xránaquezdxu bchálaje̱ꞌ chee̱ xel-laꞌ weselá nigá nédxute̱, naꞌ gudé naꞌ buluchálaj benneꞌ caꞌ belenne̱ꞌ na, naꞌ gulenné̱ꞌ naca na da li laudxu dxiꞌu.
\v 4 Cáꞌanqueze ba bzua chacha Dios na ne̱ chee̱ da dxelunna bea na, ne ne̱ chee̱ da zren caꞌ be̱n Dios, ne ne̱ chee̱ xel-laꞌ waca zan caꞌ, ne ne̱ chee̱ Beꞌ Láꞌazxa, Bénneaꞌ be̱nne̱ꞌ dxiꞌu xel-laꞌ waca caꞌ, ca da guca lázrequeze Le̱ꞌ.
\s Jesucristo be̱n cuine̱ꞌ ca nácadxu dxiꞌu
\p
\v 5 Dios quebe bzue̱ꞌ lu naꞌ gubáz chee̱ xabáa caꞌ xe̱zr la xu da za zaꞌ, chee̱ da naꞌ dxuchálajdxu naꞌa.
\v 6 Naca na ca naxúaj na lu xiche láꞌazxa, ca da gunná tu benneꞌ:
\q ¿Ájazra naca bénneache che Lueꞌ, Dios, dxeajsá lazruꞌ chee̱ꞌ?
\q ¿Ájazra naca bénneache, che Lueꞌ dxeꞌu gunne xue chee̱ le̱ꞌ?
\q
\v 7 Tu chíꞌidauꞌze bzuꞌ bénneache látezdxa ca gubáz chee̱ xabáa caꞌ.
\q Nunuꞌ chee̱ꞌ siꞌe̱ xel-laꞌ szren, ne xel-laꞌ ba láꞌana,
\q ne bzuꞌ lu ne̱ꞌe̱ xúgute̱ da be̱nuꞌ.
\q
\v 8 Xúgute̱ ba bzuꞌ na zran niꞌa le̱ꞌ.
\m Caní naca, gate Dios bzue̱ꞌ xúgute̱ zran niꞌa bénneache, quebe bi de̱ da quebe guzúa na dizraꞌ chee̱ bénneache, naꞌ quebe ne xuluzúa ca naca da caꞌ dizraꞌ chee̱ꞌ.
\v 9 Naꞌa dxeléꞌedxu Jesús, Bénneaꞌ bzua Dios guque̱ꞌ tu chíꞌidauꞌ látezdxa ca gubáz chee̱ xabáa caꞌ. Dios gúnene̱ꞌ gate Jesús waláz chee̱ xúgute̱ bénneache laweꞌ da nazriꞌine̱ꞌ bénneache, naꞌ naꞌa nunézruje̱ꞌ Le̱ꞌ xel-laꞌ szren, ne xel-laꞌ ba láꞌana laweꞌ da gudée̱ꞌ lu xel-laꞌ gute zi xaꞌ.
\p
\v 10 Dios be̱ne̱ꞌ xúgute̱ da zaj zua, naꞌ zaj zua na chee̱ gaca ba Le̱ꞌ. Le̱ꞌ dxaca lazre̱ꞌ xelezíꞌ xúgute̱ bi chee̱ꞌ ca naca xel-laꞌ szren chee̱ꞌ. Chee̱ le̱ naꞌ be̱n na ba xen be̱n Dios naca Jesucristo dute̱ weselá chee̱dxu, ne̱ chee̱ da ziꞌ da xaꞌ da gudée̱ꞌ chee̱ séquene̱ꞌ guselé̱ꞌ bénneache chadía chacanna.
\v 11 Benneꞌ caní dxegúa Jesús dul-la da zaj nabague̱ꞌ, naꞌ be̱nneꞌ caní, ne Lé̱queze̱ꞌ zaj naque̱ꞌ bi caꞌ chee̱ tuze Xradxu. Chee̱ le̱ naꞌ quebe dxeduéꞌe Jesús nne̱ꞌ chee̱ benneꞌ caꞌ, zaj naque̱ꞌ bi biche̱ꞌ.
\v 12 Naca na ca dxenná lu xiche láꞌazxa:
\q Guchálajquezaꞌ da naca chiuꞌ Lueꞌ láwela bichaꞌ caꞌ,
\q naꞌ gúl-laquezaꞌ da güe láꞌanaꞌ Lueꞌ ládujla benneꞌ caꞌ zaj nazrague̱ꞌ lau Lueꞌ.
\m
\v 13 Cáꞌanqueze dxenná xiche láꞌazxa:
\q Nedaꞌ guxrén lazraꞌ Dios.
\m Cáꞌanqueze dxenná na:
\q Nigá zuaꞌ nen bi chiaꞌ caꞌ, bi caꞌ be̱nna Dios nedaꞌ.
\p
\v 14 Laweꞌ da zaj naca be̱laꞌ dxen benneꞌ caꞌ zaj naque̱ꞌ bi chee̱ꞌ, Le̱ꞌ be̱n cuine̱ꞌ be̱laꞌ dxen chee̱ guzéquene̱ꞌ gutie̱ꞌ, ne caní be̱ne̱ꞌ chee̱ séquene̱ꞌ guzría xiꞌe̱ da xriwe̱ꞌ, da naꞌ napa na xel-laꞌ dxenná bea gute na bénneache.
\v 15 Caní guca bselé̱ꞌ xúgute̱ benneꞌ gulaque̱ꞌ ca benneꞌ zaj nadaꞌu xúgute̱ iza zaj naca bane̱ꞌ laweꞌ da belezrebe̱ꞌ xel-laꞌ gute.
\v 16 Da li quebe ble̱ꞌe̱ nigá chee̱ gácale̱ne̱ꞌ gubáz chee̱ xabáa caꞌ, san naca na ca dxenná xiche láꞌazxa: Ble̱ꞌe̱ chee̱ gácale̱ne̱ꞌ benneꞌ zaj naque̱ꞌ zriꞌine zre sua Abraham.
\v 17 Chee̱ le̱ naꞌ be̱n na ba xen guque̱ꞌ dute̱ ca zaj naca bi biche̱ꞌ caꞌ, chee̱ séquene̱ꞌ gaque̱ꞌ lau Dios tu bxruze blau naque̱ꞌ li lazreꞌ, ne dxexache lazre̱ꞌ bénneache, ne chee̱ séquene̱ꞌ gun cuine̱ꞌ tu da dxegúa na dul-la zaj nabaga bénneache.
\v 18 Laweꞌ da gudéqueze Le̱ꞌ xel-laꞌ ziꞌ gate guca lazre Satanás gun zréaje Le̱ꞌ, dxezéquene̱ꞌ naꞌa gácale̱ne̱ꞌ benneꞌ caꞌ dxun zréaje da xriwe̱ꞌ le̱ꞌ.
\c 3
\s Jesús nácadxe̱ꞌ blau ca Moisés
\p
\v 1 Leꞌe, benneꞌ bíchaꞌdauꞌ, nácale bi chee̱ Dios, laweꞌ da nácale benneꞌ caꞌ ba gunné̱ Dios, le nnaꞌ xanneꞌ Jesucristo, Bénneaꞌ gusel-la Dios chee̱ gaque̱ꞌ bxruze blau chee̱ da dxéajle̱dxu.
\v 2 Jesús nigá guque̱ꞌ li lazreꞌ lau Dios, Bénneaꞌ bzue̱ꞌ Le̱ꞌ lu zrin naꞌ da ba be̱ne̱ꞌ, ca guca Moisés, guque̱ꞌ li lazreꞌ lu zrin naꞌ be̱ne̱ꞌ lau benneꞌ caꞌ gulaque̱ꞌ bi chee̱ Dios.
\v 3 Jesús dxal-laꞌ sidxe̱ꞌ xel-laꞌ ba láꞌana ca da siꞌ Moisés, ca dxaca chee̱ benneꞌ dxune̱ꞌ tu xuꞌu, dxezidxe̱ꞌ xel-laꞌ ba láꞌana ca da dxezíꞌ xuꞌu náꞌqueze.
\v 4 Tu tu xuꞌu naca na da be̱n benneꞌ, san Dios nune̱ꞌ xúgute̱ da zaj zua.
\v 5 Ca we̱n zrin chee̱ Dios guca Moisés li lazreꞌ lu zrin naꞌ be̱ne̱ꞌ lau benneꞌ caꞌ gulaque̱ꞌ bi chee̱ Dios, naꞌ bchálaje̱ꞌ ca naca da nne̱ Dios ca te naꞌ.
\v 6 Cristo naque̱ꞌ li lazreꞌ ca Zríꞌinequeze Dios laudxu dxiꞌu. Nácadxu ca lizre Dios che se̱ cháchadxu lu da dxuxrén lázredxu ca zrindxa zra cheajsé̱ chee̱dxu, ne dxebéle̱ꞌe̱dxu lu da dxebeza lázredxu.
\s Bi caꞌ chee̱ Dios xelexezíꞌ lazre̱ꞌ naga zua Dios
\p
\v 7 Caní naca, naca na ca da dxenná Beꞌ Láꞌazxa lu xiche láꞌazxa, dxenné̱ꞌ:
\q Naꞌa, che leꞌe dxenle ca da dxenná Dios,
\q
\v 8 quebe gácale lázrdau zideꞌ ca gulaca benneꞌ caꞌ guledábague̱ꞌ Dios,
\q naꞌ belune̱ꞌ Dios ze̱de le̱ꞌe̱ xixreꞌ laweꞌ lataj.
\q
\v 9 Belún xra xrtaule caꞌ nedaꞌ ze̱de chee̱ gunaꞌ ca gunníaꞌ,
\q lácala beleléꞌene̱ꞌ da be̱naꞌ láwela chua iza.
\q
\v 10 Chee̱ le̱ naꞌ bzraꞌa xichjaꞌ benneꞌ caꞌ,
\q naꞌ gunníaꞌ: Tu dxelebéaj xíchajzqueze benneꞌ caní nedaꞌ,
\q ne dxeledábague̱ꞌ ca naca da bdxíxrujaꞌ.
\q
\v 11 Chee̱ le̱ naꞌ bzraꞌa xichjaꞌ benneꞌ caꞌ, ne bzua chúchuaꞌ da guchaꞌ benneꞌ caꞌ,
\q gunníaꞌ quebe xelexúꞌe̱ naga xelexezíꞌ lazre̱ꞌ naga zúaquezaꞌ nedaꞌ.
\p
\v 12 Leꞌe, benneꞌ bíchaꞌdauꞌ, le guxúe cuínale chee̱ quebe gaca lázrdau zideꞌ netule leꞌe, quebe cuásale lau Dios ban laweꞌ da quebe dxéajle̱le chee̱ Le̱ꞌ.
\v 13 Le gutipa lázrele tule xetule tu zra tu zra, dxácate̱ ne zúadxu lu zra da nunna Dios dxiꞌu, chee̱ quebe si xe̱ dul-la netule leꞌe, naꞌ gácale lázrdau zideꞌ.
\v 14 Che se̱ cháchadxu ca zrin zra cheajsé̱ chee̱dxu ca naca da dxuxrén lázrequezdxu nédxute̱, naꞌa nácadxu bi chee̱ Cristo.
\p
\v 15 Naca na ca dxenná na lu xiche láꞌazxa:
\q Naꞌa, che leꞌe dxenle ca da dxenná Dios,
\q quebe gácale lázrdau zideꞌ ca gulaca benneꞌ caꞌ guledábague̱ꞌ Dios.
\m
\v 16 ¿Nuzra benneꞌ caꞌ belenne̱ꞌ dizraꞌ chee̱ Dios, naꞌ ca gudé naꞌ guledábague̱ꞌ Dios? Zaj naca xúgute̱ benneꞌ caꞌ bebéaj Moisés lu xe̱zr la xu Egipto.
\v 17 ¿Nuzra benneꞌ caꞌ bzraꞌa Dios le̱ꞌ láwela chua iza? Zaj naca benneꞌ caꞌ belún dul-la, naꞌ gulátie̱ꞌ le̱ꞌe̱ xixreꞌ laweꞌ lataj.
\v 18 ¿Nuzra benneꞌ caꞌ bzua chuchu Dios xrtizre̱ꞌ gate guzre̱ꞌ le̱ꞌ quebe xelexúꞌe̱ naga xelexezíꞌ lazre̱ꞌ naga zua Le̱ꞌ? Zaj naca benneꞌ caꞌ guledábague̱ꞌ xrtizra Dios.
\v 19 Naꞌa dxeléꞌedxu quebe guca xelexúꞌe̱ laweꞌ da quebe guléajle̱ꞌe̱ chee̱ Le̱ꞌ.
\c 4
\p
\v 1 Caní naca, dxácate̱ ne zua chee̱dxu da nache̱be lazreꞌ Dios chee̱ xexúꞌudxu naga xezíꞌ lázredxu naga zua Dios, dxal-laꞌ guxúe cuínadxu gagáze nule leꞌe quebe xexúꞌule.
\v 2 Cáꞌanqueze dxiꞌu ba bendxu dizraꞌ chaweꞌ chee̱ Dios ca da belén benneꞌ caꞌ, san benneꞌ caꞌ quebe bi da ba neza gulezíꞌe̱ chee̱ dizraꞌ da belenne̱ꞌ laweꞌ da quebe guléajle̱ꞌe̱ chee̱ na.
\v 3 Dxiꞌu ba guxéajle̱dxu, naꞌ chúꞌudxu naga xezíꞌ lázredxu, ca da gunná Dios gate gunné̱ꞌ:
\q Chee̱ le̱ naꞌ bzraꞌa xichjaꞌ benneꞌ caꞌ,
\q naꞌ bzua chúchuaꞌ da guchaꞌ benneꞌ caꞌ, gunníaꞌ:
\q Quebe xelexúꞌe̱ naga xelexezíꞌ lazre̱ꞌ naga zua nedaꞌ.
\m Caní gunná Dios lácala ba bsexuzre̱ꞌ zrin chee̱ꞌ gate naꞌ be̱nte̱ꞌ xe̱zr la xu,
\v 4 laweꞌ da naxúaj na lu xiche láꞌazxa ca naca chee̱ zra gazreꞌ, dxenná na:
\q Lu zra gazre bezíꞌ lazreꞌ Dios lu zrin da be̱ne̱ꞌ.
\m
\v 5 Xetú dizraꞌ da naxúaj na lu xiche láꞌazxa dxenná na:
\q Quebe xelexúꞌe̱ naga xelexezíꞌ lazre̱ꞌ naga zua nedaꞌ.
\m
\v 6 Benneꞌ caꞌ belenne̱ꞌ dizraꞌ chaweꞌ nigá chee̱ Dios nédxute̱ quebe belexúꞌe̱ laweꞌ da quebe buluzúe̱ꞌ dizraꞌ ca naca da gunná Dios. Naꞌa ne zaj zraꞌ benneꞌ dxal-laꞌ xelexúꞌuqueze̱ꞌ naga xelexezíꞌ lazre̱ꞌ.
\v 7 Chee̱ le̱ naꞌ Dios ba guléaje̱ꞌ xetú zra, gunné̱ꞌ: Naꞌa zra. Caní naca laweꞌ da dxuchálajle̱ Dios dxiꞌu dxuchínene̱ꞌ dizraꞌ da gunná David gudé naꞌ, da naxúaj na lu xiche láꞌazxa naga dxenná na:
\q Naꞌa, che leꞌe dxenle ca da dxenná Dios,
\q quebe gácale lázrdau zideꞌ.
\m
\v 8 Chela belexezíꞌ lazreꞌ benneꞌ caꞌ be̱ Josué lataj guluꞌe̱ xe̱zr la xu naꞌ, quegá guchálajdxa Dios chee̱ xetú zra.
\v 9 Caní naca na, de̱ lataj xelúꞌu bi caꞌ chee̱ Dios naga xelexezíꞌ lazre̱ꞌ naga zua Dios,
\v 10 laweꞌ da xezíꞌ lazreꞌ lu zrin dxun nu benneꞌ chuꞌe̱ naga xezíꞌ lazre̱ꞌ naga zua Dios, ca be̱n Dios, bezíꞌ lazre̱ꞌ lu zrin be̱n Le̱ꞌ.
\v 11 Dxal-laꞌ gun zi lázredxu séquedxu chúꞌudxu naga xezíꞌ lázredxu gagáze nu benneꞌ gune̱ꞌ ca belún benneꞌ caꞌ quebe guléajle̱ꞌe̱.
\p
\v 12 Dizraꞌ chee̱ Dios naca na da bane, ne napa na xel-laꞌ waca. Naládxa na ca tu xia da nalá na dxupa laꞌate̱, ne dxaze na naga dxelezraga bénneꞌdu xúꞌudxu, ne beꞌ nácaquezdxu, ne dxaze na lu xichaj lázrdau bénneache, naꞌ dxuchiꞌa na ca naca da dxugúꞌu bea bénneache ne ca da dxéquene̱ꞌ gune̱ꞌ.
\v 13 Quebe bi de̱ da be̱n Dios da sequeꞌ gucache cuina na lau Dios. Xúgute̱ zaj naláꞌ na, ne zaj naxalaj na lau Bénneaꞌ dxal-laꞌ xuléꞌedxu Le̱ꞌ ca da be̱ndxu.
\s Jesús naque̱ꞌ bxruze blau zrente̱
\p
\v 14 Jesús, Zriꞌine Dios naque̱ꞌ bxruze blau zrente̱ chee̱dxu, Bénneaꞌ ba bexuꞌe̱ lau Dios. Chee̱ le̱ naꞌ dxal-laꞌ se̱ típadxu lu da dxéajle̱dxu chee̱ Dios.
\v 15 Bxruze blau chee̱dxu wazéquene̱ꞌ xexache lazre̱ꞌ dxiꞌu che dxiꞌu dxate niꞌa nadxu lu xel-laꞌ dxeajlí lazreꞌ chee̱dxu, laweꞌ da gudéqueze Le̱ꞌ lu xel-laꞌ ziꞌ caꞌ gate guca lazre da xriwe̱ꞌ gun zréaje na Le̱ꞌ, ca da dxededxu dxiꞌu naꞌa, naꞌ Le̱ꞌ quebe be̱ne̱ꞌ dul-la.
\v 16 Chee̱ le̱ naꞌ dxal-laꞌ bígadxu du lázredxu lu lataj blau chee̱ Dios chee̱dxu, Bénneaꞌ nazriꞌine̱ꞌ dxiꞌu, chee̱ xexache lazre̱ꞌ dxiꞌu, ne dute̱ xel-laꞌ xrlátaje chee̱ꞌ gácale̱ne̱ꞌ dxiꞌu gate nachínedxu nu gácale̱ dxiꞌu.
\c 5
\p
\v 1 Tu tu bxruze blau dxecáꞌa Dios ládujla bénneache, ne dxuzúe̱ꞌ le̱ꞌ chee̱ gune̱ꞌ zrin lau Dios waláz chee̱ bénneache caꞌ, ne cuꞌe̱ gunaꞌ lau Dios, ne gutie̱ꞌ béadu caꞌ ne̱ chee̱ dul-la zaj nabagaꞌ bénneache.
\v 2 Cáꞌanqueze bxruze blau nigá dxate niꞌa ne̱ꞌe̱ lu da caꞌ dxune̱ꞌ ca da dxaca chee̱dxu dxiꞌu. Chee̱ le̱ naꞌ wape̱ꞌ xel-laꞌ zren lazreꞌ chee̱ benneꞌ caꞌ quebe dxeléajniꞌine̱ꞌ, ne dxelune̱ꞌ da cale̱la,
\v 3 naꞌ laweꞌ da dxate niꞌa ne̱ꞌe̱, dxal-laꞌ gutie̱ꞌ béadu caꞌ ne̱ chee̱ dul-la da nabágaqueze̱ꞌ, cáte̱ze dxune̱ꞌ ne̱ chee̱ dul-la da zaj nabaga xezícadxa bénneache.
\p
\v 4 Quebe nu gaca gun cuina bxruze blau, san Diósqueze dxenné̱ꞌ bénneaꞌ, ne dxunézruje̱ꞌ le̱ꞌ xel-laꞌ szren naꞌ, ca be̱ne̱ꞌ chee̱ Aarón.
\v 5 Cáꞌanqueze naca na chee̱ Cristo, quebe bzua cuine̱ꞌ bxruze blau, san Dios be̱ꞌe̱ Le̱ꞌ xel-laꞌ szren naꞌ ca da guzre̱ꞌ Le̱ꞌ:
\q Lueꞌ nacuꞌ Zriꞌinaꞌ.
\q Nedaꞌ nácaquezaꞌ Xrauꞌ naꞌa.
\m
\v 6 Cáꞌanqueze naxúaj na lu xiche láꞌazxa ca guzre̱ꞌ Le̱ꞌ:
\q Lueꞌ nacuꞌ bxruze blau chadía chacanna
\q ca gúcaqueze Melquisedec.
\m
\v 7 Gate zua Cristo lu xe̱zr la xu nigá, bchálajle̱ne̱ꞌ Dios, ne gutaꞌ xuene̱ꞌ Dios nen chiꞌe̱ zizraj, ne gudxézrele̱ꞌe̱, laweꞌ da napa Dios xel-laꞌ waca guselé̱ꞌ Le̱ꞌ lu xel-laꞌ gute, naꞌ Dios benne̱ꞌ chee̱ꞌ laweꞌ da gudape̱ꞌ Xre̱ꞌ ba láꞌana.
\v 8 Caꞌan guca, lácala naca Cristo Zriꞌine Dios, bsé̱die̱ꞌ guque̱ꞌ wezúa dizraꞌ ne̱ chee̱ xel-laꞌ ziꞌ da gudée̱ꞌ,
\v 9 naꞌ gate guque̱ꞌ dute̱ Weselá chee̱dxu ne̱ chee̱ da caní, nadxa guzéquene̱ꞌ bselé̱ꞌ bénneache chadía chacanna, benneꞌ caꞌ dxuluzúe̱ꞌ dizraꞌ chee̱ꞌ,
\v 10 naꞌ Dios bzue̱ꞌ Le̱ꞌ bxruze blau ca gúcaqueze Melquisedec.
\s Quebe dxal-laꞌ gusandxu xel-laꞌ dxeajlí lazreꞌ chee̱dxu
\p
\v 11 Dé̱le̱ꞌe̱ da dxal-laꞌ guchálajaꞌ ca naca chee̱ da nigá, san naca na ste̱be guzéajniꞌidaꞌ leꞌe naꞌa, laweꞌ da quebe ne gaca chéajniꞌile na.
\v 12 Zaneꞌ iza ba guca dxéajle̱le chee̱ Cristo, naꞌ ba gul-laꞌ gusé̱dele benneꞌ xula ca naca chee̱ Le̱ꞌ, san dxun na ba xen nu guzéajniꞌi leꞌe da xula da quebe nácate̱ca ste̱be ca naca dizraꞌ chee̱ Dios. Ne nácale ca bidauꞌ ne dxázrebeꞌ nizreꞌ. Quebe ne gaca gágule xel-laꞌ wagu chee̱ benneꞌ waca.
\v 13 Benneꞌ caꞌ zaj naca ca bidauꞌ ne dxázrebeꞌ nizreꞌ zaj naque̱ꞌ benneꞌ caꞌ quebe ne xuluchínene̱ꞌ dizraꞌ chee̱ xel-laꞌ li.
\v 14 Xel-laꞌ wagu chee̱ benneꞌ waca naca na chee̱ benneꞌ caꞌ ba zaj nézene̱ꞌ xelexúnbeꞌe̱ da naca da xrlátaje, ne da naca da cale̱la.
\c 6
\p
\v 1 Chee̱ le̱ naꞌ québedxa dxal-laꞌ gusé̱dedxu ca da bsé̱dedxu nédxute̱ ca naca chee̱ Cristo, san chéajte̱zedxu gusé̱dedxu da naca chee̱ꞌ chee̱ gácadxu benneꞌ waca. Québedxa bi dxal-laꞌ guchálajdxu chee̱ da du caꞌ da bsé̱dedxu nédxute̱, ca dxal-laꞌ xexéaje lázredxu chee̱ da caꞌ be̱ndxu da zaj nua na xel-laꞌ gute, ne ca dxal-laꞌ chéajle̱dxu chee̱ Dios,
\v 2 ne ca dxal-laꞌ xedxúadxu nisa, ne ca dxal-laꞌ xuluzé̱ ne̱ꞌe̱ xíchajdxu, ne ca xelexebán benneꞌ gate, ne ca gun Dios, guchiꞌe̱ da nun tu tu bénneache chee̱ gudée̱ꞌ benneꞌ caꞌ dxelune̱ꞌ da cale̱la lu lataj ba xaꞌ chadía chacanna.
\v 3 Chee̱ le̱ naꞌ chéajte̱dxu lu da naca chee̱ Cristo, che Dios gunne̱ꞌ dxiꞌu lataj.
\p
\v 4 Benneꞌ caꞌ ba gulezíꞌe̱ ca naca xel-laꞌ naxaníꞌ chee̱ Dios, ne ba gulezú laweꞌ xelúnbeꞌe̱ da dxunna Dios, ne ba gulezíꞌe̱ Beꞌ Láꞌazxa,
\v 5 ne ba gulezú laweꞌ xelúnbeꞌe̱ da xrlátaje caꞌ chee̱ Dios ca naca da xelezíꞌe̱ lu xe̱zr la xu da za zaꞌ,
\v 6 naꞌ te naꞌ che xuluzúe̱ꞌ Dios chaláꞌala, québedxa gaca xelexexéaje lazre̱ꞌ laweꞌ da gaca na ca xuludé̱ꞌe̱ Cristo le̱ꞌe̱ xaga begúaj da xula, ne dxelún le̱ꞌ chee̱ꞌ láwela xúgute̱ bénneache.
\v 7 Zaj naque̱ꞌ ca xe̱zr la xu da dxezí na nisa xiuj. Che xe̱zr la xu naꞌ dxunna lina chaweꞌ chee̱ benneꞌ dxelune̱ꞌ na zrin, naca na da dxun chaweꞌ Dios,
\v 8 san che dxachuj na xecheꞌ, ne xixreꞌ da quebe bi culuén napa na, quebe bi zaca xe̱zr la xu naꞌ, san naca na tu da xuꞌu deꞌ, naꞌ naga chéajse̱te̱ chezxe na.
\s Xel-laꞌ dxebeza lazreꞌ da nápadxu
\p
\v 9 Leꞌe, benneꞌ bíchaꞌdauꞌ, lácala dxuchálajntuꞌ caní, dxuxrén lázrentuꞌ ca naca chee̱le leꞌe wazile leꞌe da chaweꞌ chee̱ xel-laꞌ weselá.
\v 10 Dios dxune̱ꞌ da xlátaje̱, ne quebe gal-la lazre̱ꞌ ca naca zrin da ba be̱nle, ne ca bzriꞌile Le̱ꞌ gate gúcale̱le benneꞌ bíchedxu caꞌ, ne ca da tu dxúnzquezle.
\v 11 Dxaca lázrentuꞌ chéajte̱ze tu tule gunle da caní dute̱ lázrdaule ca zrin zra cheajsé̱ chee̱le, chee̱ zruéꞌele da dxebeza lázrele.
\v 12 Quebe dxaca lázrentuꞌ xewé̱dele. Dxaca lázrentuꞌ gunle leꞌe ca belún benneꞌ caꞌ guleajlí lazre̱ꞌ Dios, ne gulaque̱ꞌ zren lazreꞌ, naꞌ gulezíꞌe̱ ca da guche̱be lazreꞌ Dios gunézruje̱ꞌ chee̱ꞌ.
\p
\v 13 Gate guche̱be lazreꞌ Dios bi gunézruje̱ꞌ chee̱ Abraham, naꞌ bzétajqueze cuine̱ꞌ laweꞌ da québedxa nu zua nácadxa szren ca Le̱ꞌ, nu guzétaje̱ꞌ,
\v 14 gunné̱ꞌ: “Da li gúnquezaꞌ da chaweꞌ chiuꞌ lueꞌ, ne guzánquezaꞌ zriꞌine zre suꞌ.”
\v 15 Abraham guleze̱ꞌ dute̱ xel-laꞌ zren lazreꞌ, naꞌ chee̱ le̱ naꞌ guziꞌe̱ da guche̱be lazreꞌ Dios gunézruje̱ꞌ chee̱ꞌ.
\v 16 Gate nu dxuluzetaj bénneache, dxuluzétaje̱ꞌ benneꞌ nácadxe̱ꞌ szren ca lé̱queze̱ꞌ, ne gate bi dxuluzúa chúchue̱ꞌ, ne dxuluzétaje̱ꞌ Dios, québedxa bi de̱ da bi xelenné̱ꞌ.
\v 17 Chee̱ le̱ naꞌ Dios bzua chúchue̱ꞌ da guche̱be lazre̱ꞌ, ne bzetaj cuine̱ꞌ, laweꞌ da guca lazre̱ꞌ guléꞌene̱ꞌ benneꞌ caꞌ xelezíꞌe̱ da guche̱be lazre̱ꞌ, Le̱ꞌ gune̱ꞌ ca naca da guche̱be lazre̱ꞌ, ne quebe guché̱ꞌe̱ ca gune̱ꞌ.
\v 18 Caní naca, da chupa caní quebe gaca cha na, naꞌ lu da caní Dios quebe gaca gun lazre̱ꞌ, ne ne̱ chee̱ da caꞌ Dios ba nunne̱ꞌ dxiꞌu tu da gun na dxiꞌu dipa lazreꞌ, dxiꞌu naꞌ ba nézedxu dxuxúe Le̱ꞌ dxiꞌu, ne nuxrén lázredxu siꞌ lu nnadxu da dxebeza lázredxu ca naca da gunne̱ꞌ dxiꞌu.
\v 19 Da nigá dxebeza lázredxu nuxru chacha na bénneꞌdu xúꞌudxu ca dxun tu xia da dxuxru chacha na tu da dxedá laweꞌ nísadauꞌ gate zria na laweꞌ nísadauꞌ. Da naꞌ dxebeza lázredxu zúale̱ na Cristo cuzru ladxeꞌ da ze̱ lu xudauꞌ da zua xabáa,
\v 20 naga guxúꞌu Jesús waláz chee̱dxu chee̱ gusálaje̱ꞌ neza naga tedxu, naꞌ Le̱ꞌ naque̱ꞌ tu bxruze blau chadía chacanna ca guca Melquisedec.
\c 7
\s Jesús naque̱ꞌ bxruze blau ca guca Melquisedec
\p
\v 1 Melquisedec nigá guque̱ꞌ wenná bea chee̱ xe̱zre Salem, ne bxruze chee̱ Dios szrente̱. Gate ze zaꞌ Abraham lu wedil-la gate bzétaje̱ꞌ benneꞌ wenná bea caꞌ, naꞌ Melquisedec nigá xeajchague̱ꞌ le̱ꞌ, ne gunabe̱ꞌ lau Dios gune̱ꞌ da chaweꞌ chee̱ Abraham,
\v 2 naꞌ Abraham bnézruje̱ꞌ chee̱ le̱ꞌ tu cueꞌ chee̱ da chi cueꞌ caꞌ ca naca da bzruéꞌene̱ꞌ lu wedil-la naꞌ. La Melquisedec zéaje̱ na wenná bea xlátaje̱, ne laweꞌ da guque̱ꞌ benneꞌ wenná bea chee̱ xe̱zre Salem, da zéaje̱ na xel-laꞌ dxebeza zri lazreꞌ, le̱ꞌ zéaje̱queze na wenná bea chee̱ xel-laꞌ dxebeza zri lazreꞌ.
\v 3 Quebe naxúaj na zua xre̱ꞌ, ne xrne̱ꞌe̱, ne xra xrtawe̱ꞌ, ne quebe naxúaj na che gúlaje̱ꞌ, ne che gutie̱ꞌ. Caní naca na, da guca Melquisedec dxuléꞌe na ca naca chee̱ Zriꞌine Dios, naque̱ꞌ bxruze blau chadía chacanna.
\p
\v 4 Le naꞌ xque naꞌa ca szren guca Melquisedec, che bnezruj xra xrtáudxu Abraham chee̱ le̱ꞌ tu cueꞌ chee̱ da chi cueꞌ chee̱ da guqué̱ꞌe̱ lu naꞌ wenná bea caꞌ lu wedil-la naꞌ.
\v 5 Ca naca da bdxixruj bea Moisés, bxruze caꞌ, benneꞌ caꞌ zaj naque̱ꞌ xrtia Leví dxal-laꞌ xelezíꞌe̱ tu cueꞌ chee̱ da chi cueꞌ caꞌ da xelizruj benneꞌ Israel caꞌ, benneꞌ zaj naque̱ꞌ xrtia ljwezre̱ꞌ, lácala zaj naque̱ꞌ zriꞌine zre sua Abraham ca zaj nácaqueze benneꞌ caꞌ.
\v 6 Melquisedec, benneꞌ quebe naque̱ꞌ xrtia Leví guziꞌe̱ tu cueꞌ chee̱ da chi cueꞌ caꞌ da gudizruj Abraham, bénneaꞌ dxal-laꞌ siꞌe̱ da guche̱be lazreꞌ Dios. Cáꞌanqueze Melquisedec gunabe̱ꞌ lau Dios gune̱ꞌ da chaweꞌ chee̱ Abraham,
\v 7 naꞌ dxelenná xúgute̱ bénneache nácadxa blau bénneaꞌ dxenabe̱ꞌ lau Dios gune̱ꞌ chaweꞌ chee̱ benneꞌ xula caꞌ quézcala bénneaꞌ siꞌe̱ da chaweꞌ naꞌ dxenabe̱ꞌ.
\v 8 Naꞌa benneꞌ caꞌ dxeleziꞌe̱ tu cueꞌ chee̱ da chi cueꞌ caꞌ zaj naque̱ꞌ benneꞌ dxelate, san ca naca chee̱ Melquisedec, naque̱ꞌ ca tu benneꞌ naca bánqueze̱ꞌ laweꞌ da quebe naxúaj na lu xiche láꞌazxa che gutie̱ꞌ.
\v 9 Ca naca chee̱ Leví, ne ca naca chee̱ xúgute̱ bxruze caꞌ zaj naque̱ꞌ zriꞌine zre sua Leví naꞌ, benneꞌ caꞌ dxelezíꞌe̱ naꞌa tu cueꞌ chee̱ da chi cueꞌ caꞌ, wácaqueze nnadxu cáꞌanqueze benneꞌ caní gulízruje̱ꞌ chee̱ Melquisedec tu cueꞌ chee̱ da chi cueꞌ gate naꞌ bezrague̱ꞌ Abraham,
\v 10 laweꞌ da wazequeꞌ nnadxu ne zaj zua zriꞌine zre sua Abraham lu be̱l-laꞌ dxen chee̱ꞌ, benneꞌ quebe ne xelalaj gate naꞌ bdxuaj Melquisedec xeajchague̱ꞌ Abraham naꞌ.
\p
\v 11 Benneꞌ Israel caꞌ gulezíꞌ lu ne̱ꞌe̱ da bdxixruj bea Dios lu naꞌ bxruze caꞌ zaj naque̱ꞌ xrtia Leví. Chela guzequeꞌ da belún bxruze caꞌ gun na li lazreꞌ benneꞌ caꞌ buluzúe̱ꞌ dizraꞌ chee̱ da bdxixruj bea Dios naꞌ, naꞌ quebe be̱n na ba xen laꞌ xetú bxruze ca guca Melquisedec, ne quegá ca guca Aarón.
\v 12 Che xezráꞌ ca dxal-laꞌ gaca bxruze naꞌ, naꞌ dxál-laꞌqueze xezráꞌ da nadxixruj bea naꞌ.
\v 13 Xránadxu, Bénneaꞌ naxúaj na chee̱ꞌ gaque̱ꞌ bxruze ca guca Melquisedec, nababe̱ꞌ xetú cueꞌ xrtia Israel caꞌ, benneꞌ caꞌ netue̱ꞌ quebe ne gaque̱ꞌ bxruze.
\v 14 Naca bea na nababa Xránadxu xrtia Judá, naꞌ Moisés quebe gunné̱ꞌ xelaca benneꞌ caní bxruze.
\p
\v 15 Da nigá naca béadxa na che bxruze cube naꞌ dxal-laꞌ gaque̱ꞌ ca guca Melquisedec,
\v 16 ne bxruze cube nigá quebe gaque̱ꞌ bxruze ne̱ chee̱ tu da nadxixruj bea da dxenná na nu xrtia dxal-laꞌ gaque̱ꞌ. Gaque̱ꞌ bxruze laweꞌ da nape̱ꞌ xel-laꞌ waca chee̱ tu xel-laꞌ nabán da quebe te chee̱ na.
\v 17 Naca chee̱ꞌ ca da dxenná Dios:
\q Lueꞌ nacuꞌ bxruze chadía chacanna
\q ca da guca Melquisedec.
\m
\v 18 Caní guca, bedxúaj chaláꞌala da bdxixruj bea Dios gate nate laweꞌ da quebe guzequeꞌ bi gun na, ne quebe bi culuén gudapa na,
\v 19 laweꞌ da quebe guca da gunná bea Moisés gun na bénneache li lazreꞌ. Naꞌa nápadxu tu xel-laꞌ dxebeza lazreꞌ da cháwedxa, naꞌ ne̱ chee̱ na dxebígadxu lau Dios.
\p
\v 20 Gate Dios be̱ne̱ꞌ Jesús bxruze, bzetaj cuine̱ꞌ.
\v 21 Quebe bzetaj cuine̱ꞌ gate bzue̱ꞌ xezícadxa bxruze caꞌ. Gate be̱ne̱ꞌ Jesús bxruze bzetaj cuine̱ꞌ ca da naxúaj na lu xiche láꞌazxa, dxenná na:
\q Xránadxu Dios bzetaj cuine̱ꞌ, ne quebe guché̱ꞌe̱ xrtizre̱ꞌ.
\q Gunné̱ꞌ: “Lueꞌ nacuꞌ bxruze chadía chacanna
\q ca da guca Melquisedec.”
\m
\v 22 Chee̱ le̱ naꞌ Jesús dxun chúchue̱ꞌ tu xel-laꞌ wezría da nácadxa chaweꞌ ca da nedxu.
\v 23 Xezícadxa bxruze caꞌ, benneꞌ gulezráꞌ nédxula be̱n na ba xen gulaque̱ꞌ benneꞌ zan laweꞌ da gulate tu tue̱ꞌ, naꞌ quebe guca xeledíe̱ꞌ.
\v 24 Jesús naque̱ꞌ tu bxruze chadía chacanna laweꞌ da quebe gatie̱ꞌ.
\v 25 Chee̱ le̱ naꞌ dxezéquene̱ꞌ guselé̱ꞌ chadía chacanna benneꞌ caꞌ xelebigue̱ꞌ lau Dios ne̱ chee̱ Le̱ꞌ, laweꞌ da naca ban Le̱ꞌ chadía chacanna chee̱ gudée̱ꞌ dizraꞌ chee̱ benneꞌ caꞌ lau Dios.
\p
\v 26 Jesús naque̱ꞌ bxruze blau, bxruze naꞌ dxechínedxu. Naque̱ꞌ láꞌazxa, ne quebe bi da cale̱la be̱ne̱ꞌ, ne quebe nabague̱ꞌ dul-la. Quebe naque̱ꞌ tuze ca zaj naca benneꞌ dul-la, naꞌ Dios nucáꞌana szrendxe̱ꞌ Le̱ꞌ ca xúgute̱ da zaj zua xabáa.
\v 27 Quebe naque̱ꞌ ca xezícadxa bxruze caꞌ, benneꞌ caꞌ be̱n na ba xen belutie̱ꞌ béadu caꞌ tu zra tu zra, béadu caꞌ buluzúe̱ꞌ nedxu ne̱ chee̱ xtúl-laqueze̱ꞌ, naꞌ ca gudé naꞌ buluzúe̱ꞌ béadu xula caꞌ ne̱ chee̱ xtul-la bénneache. Jesús tu lásaze bzua cuine̱ꞌ ne̱ chee̱ dul-la zaj nabaga xúgute̱ bénneache.
\v 28 Da bdxixruj bea Moisés dxuzúa na bxruze blau caꞌ zaj naque̱ꞌ benneꞌ quebe zaj naque̱ꞌ li lazreꞌ. Gate Dios bzetaj cuine̱ꞌ ca gudé blaꞌ da nadxixruj bea naꞌ, bzue̱ꞌ tu bxruze blau naque̱ꞌ Zríꞌinequeze̱ꞌ, Bénneaꞌ be̱n Dios naque̱ꞌ tu bxruze blau li lazreꞌ chadía chacanna.
\c 8
\s Jesús naque̱ꞌ bxruze blau chee̱dxu
\p
\v 1 Da naca blaudxa chee̱ da caní dxennantuꞌ naca na da nigá: Zua tu bxruze blau chee̱dxu caní, Bénneaꞌ dxeꞌe̱ chaláꞌa xabe̱la chee̱ lataj blau chee̱ Dios xabáa,
\v 2 ne naque̱ꞌ bxruze blau dxune̱ꞌ zrin lu lataj láꞌazxa li, da be̱n Xránadxu, quegá bénneache.
\v 3 Xúgute̱ bxruze blau nuzúa Dios le̱ꞌ chee̱ xelegúꞌe̱ gunaꞌ lau Dios, ne xelútie̱ꞌ béadu caꞌ lau Dios. Chee̱ le̱ naꞌ dxun na ba xen bi guzúa Cristo lau Dios.
\v 4 La zua Cristo xe̱zr la xu nigá, quebe gaque̱ꞌ bxruze laweꞌ da ne zaj zraꞌ bxruze caꞌ dxelegúꞌe̱ gunaꞌ ca nadxixruj bea da bde Moisés.
\v 5 Zrin dxelún bxruze caní naca na ca tu da dxuléꞌeze na, ne ca tu zrúlaze chee̱ da naꞌ zua xabáa. Nezdxu naca na tu da dxuléꞌeze laweꞌ da gunná Dios, guzre̱ꞌ Moisés gate ba zue̱ꞌ gune̱ꞌ lataj láꞌazxa: “Bxue xanneꞌ gunuꞌ xúgute̱ na cáte̱ze naca da bleꞌedaꞌ lueꞌ lu xiꞌa naꞌ.”
\v 6 Naꞌa bxruze blau chee̱dxu nigá dxune̱ꞌ tu zrin zácadxa laweꞌ da naque̱ꞌ wedé dizraꞌ chee̱ tu xel-laꞌ wezría cháwedxa, da nun Dios ne̱ chee̱ da caꞌ guche̱be lazre̱ꞌ da zaj naca na cháwedxa.
\p
\v 7 La guca li lazreꞌ xel-laꞌ wezría da be̱ne̱ꞌ nedxu, quebe be̱n na ba xen gune̱ꞌ xel-laꞌ wezría gudxupeꞌ naꞌ.
\v 8 Gate Dios gudil-le̱ꞌ benneꞌ caꞌ zaj naque̱ꞌ bi che, gunné̱ꞌ:
\q Dxenná Xránale: Wazrín zra
\q gate gunaꞌ tu xel-laꞌ wezría cube
\q nen benneꞌ Israel caꞌ, ne benneꞌ Judá caꞌ.
\q
\v 9 Quebe gaca na ca guca xel-laꞌ wezría
\q da be̱naꞌ nen xra xrtaule caꞌ gate becáꞌa ne̱ꞌe̱,
\q ne bebéajaꞌ benneꞌ caꞌ lu xe̱zr la xu Egipto.
\q Caní gunaꞌ laweꞌ da quebe buluzúe̱ꞌ dizraꞌ
\q xel-laꞌ wezría da nunaꞌ,
\q naꞌ chee̱ le̱ naꞌ guleaj xichjaꞌ benneꞌ caꞌ.
\q Da ni dxenná Xránale.
\q
\v 10 Xel-laꞌ wezría gunaꞌ nen benneꞌ Israel caꞌ
\q ca te chee̱ lu zra caní gaca na caní, dxenná Xránale:
\q Guzúaꞌ da gudxixruj beꞌa lu xichaj lázrdau benneꞌ caꞌ,
\q ne guzúajaꞌ na lu lázrdawe̱ꞌ.
\q Nadxa gacaꞌ nedaꞌ Dios chee̱ benneꞌ caꞌ,
\q naꞌ le̱ꞌ xelaque̱ꞌ bi chiaꞌ caꞌ.
\q
\v 11 Quebe gun na ba xen xuluse̱de ljwezre̱ꞌ,
\q ne quegá nu benneꞌ xe̱ꞌe̱ bi biche̱ꞌ: Be̱nbea Xránadxu.
\q Xúgute̱ꞌ xelúnbeꞌe̱ nedaꞌ,
\q benneꞌ cáꞌaze, ne benneꞌ blau.
\q
\v 12 Gunite lawaꞌ chee̱ benneꞌ caꞌ
\q ca naca da cale̱la da zaj nune̱ꞌ,
\q ne québedxa cheajsá lazraꞌ chee̱ dul-la da zaj nune̱ꞌ.
\p
\v 13 Gate dxuchalaj Dios chee̱ tu xel-laꞌ wezría cube, naca na laweꞌ da ba gunné̱ꞌ chee̱ da nedxu naca na da gula, naꞌ da ba dxaca na da gula, ne da gulasa la xenítete̱ na.
\c 9
\s Lataj láꞌazxa da zua lu xe̱zr la xu, ne da zua xabáa
\p
\v 1 Gate ne zua xel-laꞌ wezría nedxu, zaj de̱ da nadxixruj bea ca dxal-laꞌ xelún bxruze caꞌ tu lu xudauꞌ da zua xe̱zr la xu nigá.
\v 2 Xudauꞌ nedxu caní guca na tu xuꞌu xide zren. Lu lataj nedxu chee̱ xudauꞌ naꞌ da nazí le na Lataj Láꞌazxa zaj zua da dxusaꞌníꞌ, ne tu taꞌa naga zria xeta xtila láꞌazxa.
\v 3 Cuzre naga ze̱ ladxeꞌ gudxupeꞌ zua xetú lataj da nazí le na Lataj Láꞌazxa Blau.
\v 4 Lu lataj nigá zaj zua tu táꞌadauꞌ naga xezxe xala, ne tu xiꞌina chee̱ xel-laꞌ wezría da nun Dios, da nacu na oro du ca nácaqueze na. Luꞌule xiꞌina naꞌ xuꞌu tu zruágadauꞌ xuꞌu na xeta maná. Cáꞌanqueze luꞌule na xuꞌu xágadauꞌ da be̱xru Aarón da naꞌ bezría na, ne zaj xuꞌu na xiaj caꞌ naga zaj naxúaj dizraꞌ chee̱ xel-laꞌ wezría.
\v 5 Laweꞌ xiꞌina nigá zaj zua gubáz chee̱ xabáa caꞌ zaj naca na oro, da dxululéꞌe na zua Dios naꞌ, naꞌ zaj nugacu xrile na naga dxuluzríe̱ꞌ dxen ne̱ chee̱ dul-la zaj nabaga bénneache. Québedxa séquentuꞌ guchálajntuꞌ ca naca chee̱ da caní naꞌa.
\p
\v 6 Gate ba nagáꞌana chaweꞌ da caní, naꞌ bxruze caꞌ dxelúꞌuqueze̱ꞌ lu lataj nedxu chee̱ lataj láꞌazxa chee̱ xelune̱ꞌ zrin chee̱ xel-laꞌ bxruze chee̱ꞌ.
\v 7 Lu lataj gudxupeꞌ dxuꞌu tuze bxruze blau tu lásaze tu tu iza, naꞌ gate dxuꞌe̱ naꞌ dxun na ba xen guꞌe̱ dxen chee̱ béadu caꞌ da guzríe̱ꞌ ne̱ chee̱ dul-la nabágaqueze̱ꞌ, ne ne̱ chee̱ dul-la zaj nabaga bénneache caꞌ.
\v 8 Beꞌ Láꞌazxa dxuzéajniꞌine̱ꞌ dxiꞌu quebe naxalaj neza chee̱ chúꞌudxu Lataj Láꞌazxa Blau naꞌ dxácate̱ dxelune̱ꞌ zrin chee̱ xel-laꞌ bxruze chee̱ꞌ lu lataj nedxu chee̱ lataj láꞌazxa naꞌ.
\v 9 Xúgute̱ da caní zaj naca na da dxululéꞌeze, da dxaca lu zra naꞌa zra, laweꞌ da gunaꞌ caꞌ, ne dxen chee̱ béadu caꞌ da dxuluzúa bxruze caꞌ lau Dios quebe gaca xelún na bénneache dute̱ li lazreꞌ.
\v 10 Da caní zaj naca na chee̱ da dxeléꞌaj dxelawe̱ꞌ, ne chee̱ da dxulucáꞌana chaweꞌ cuine̱ꞌ, ne chee̱ da nadxixruj bea ca naca chee̱ be̱laꞌ dxen chee̱ bénneache, da caꞌ bzua Dios ca zrindxa zra guché̱ꞌe̱ da caꞌ.
\p
\v 11 Naꞌa ba blaꞌ Cristo, ne naca Le̱ꞌ bxruze blau chee̱ da xrlátaje caꞌ da ba beleláꞌ. Lataj Láꞌazxa naga dxun Le̱ꞌ zrin ca bxruze blau naca na blaudxa, ne da li lázredxa. Quebe naca na tu da zaj nun bénneache, da zéaje̱ na, quebe naca na chee̱ xe̱zr la xu nigá.
\v 12 Cristo ba guxúꞌe̱ Lataj Láꞌazxa Blau, quegá chee̱ guzúe̱ꞌ dxen chee̱ béadu caꞌ, ne chee̱ me̱du caꞌ, san chee̱ guzúe̱ꞌ dxen cheé̱queze̱ꞌ, naꞌ guxúꞌe̱ ga naꞌ tu lásaze laweꞌ da ba be̱ne̱ꞌ xel-laꞌ weselá chadía chacanna chee̱dxu dxiꞌu.
\v 13 Da li dxen chee̱ be̱zre, ne chee̱ béadu caꞌ, ne de chee̱ bé̱zredu caꞌ, bea caꞌ dxuluzezxe̱ꞌ lu taꞌa chee̱ Dios, da caꞌ dxuluzré̱ꞌe̱ xichaj benneꞌ caꞌ zaj naque̱ꞌ sban, zaj napa na xel-laꞌ waca xelibe na benneꞌ caꞌ cúzreze, ne chee̱ xulucáꞌana chawe na le̱ꞌ lau Dios.
\v 14 Che caní naca na, wazéquedxa dxen chee̱ Cristo, Bénneaꞌ bzua cuine̱ꞌ lau Dios ne̱ chee̱ Beꞌ Láꞌazxa dute̱ xel-laꞌ li lazreꞌ chee̱ꞌ, naꞌ dxen chee̱ꞌ naꞌ dxibe na xichaj lázrdaudxu chee̱ da be̱ndxu da nua na xel-laꞌ gute, chee̱ séquedxu gundxu zrin chee̱ Dios ban.
\p
\v 15 Chee̱ le̱ naꞌ naca Jesucristo wedé dizraꞌ chee̱ tu xel-laꞌ wezría cube. Xel-laꞌ gute chee̱ Cristo dxun na zrin chee̱ gaca gunite lau Dios chee̱dxu ca naca dul-la da be̱ndxu gate ne zúadxu lu xel-laꞌ wezría nedxu, naꞌ naꞌa benneꞌ caꞌ ba gunné̱ Dios waca xelezíꞌe̱ ca naca da caꞌ guche̱be lazreꞌ Dios, da zaj naca na chadía chacanna.
\v 16 Gate tu benneꞌ dxune̱ꞌ tu xiche da dxeláꞌa na da de̱ chee̱ꞌ, dxun na ba xen guléꞌedxu ba nate bénneaꞌ chee̱ gundxu ca dxenná xiche naꞌ.
\v 17 Xiche naꞌ quebe bi seque na dxácate̱ ne naca ban benneꞌ be̱ne̱ꞌ na, san gate ba gute bénneaꞌ, naꞌ seque na.
\v 18 Chee̱ le̱ naꞌ, xel-laꞌ wezría nedxu naꞌ guzúa chuchu na ne̱ chee̱ dxen da buluzríe̱ꞌ na.
\v 19 Moisés blabe̱ꞌ xúgute̱ da nadxixruj bea da zaj naxúaj na lu dizraꞌ chee̱ Dios lau xúgute̱ bénneache, naꞌ ca gudé naꞌ guqué̱ꞌe̱ zrilaꞌ da nadxé na da xrna, ne tu zruze xaga hisopo, naꞌ gusebise̱ꞌ na dxen chee̱ me̱du caꞌ, ne dxen chee̱ béadu caꞌ, ne nisa, naꞌ bzre̱ꞌe̱ na laweꞌ xiche naga naxúaj xtizra Dios, ne bzre̱ꞌe̱ na bénneache caꞌ.
\v 20 Nadxa guzre̱ꞌ benneꞌ caꞌ: “Dxen nigá naca na da dxuzúa chuchu na xel-laꞌ wezría da nun Dios nen leꞌe.”
\v 21 Cáꞌanqueze bzra Moisés dxen lu lataj láꞌazxa, ne lu xúgute̱ da dxuluchínene̱ꞌ lu zrin da dxelún bxruze caꞌ.
\v 22 Ca naca da bdxixruj bea Dios, dxal-laꞌ xulucáꞌana chawe̱ꞌ xúgute̱ da caꞌ nen dxen, naꞌ che quebe nu gulalaj dxen, Dios quebe gunite lawe̱ꞌ chee̱ bénneache ca naca dul-la da zaj nabague̱ꞌ.
\s Dxen chee̱ Jesucristo dxegúa na dul-la
\p
\v 23 Caní be̱n na ba xen xulucáꞌana chawe̱ꞌ da caꞌ zaj naca na da dxululéꞌeze na ca zaj naca da zaj zua xabáa, naꞌ da caꞌ zaj zua xabáa dxun na ba xen xulucáꞌana chawe̱ꞌ na nen tu da zácadxa.
\v 24 Cristo quebe guxúꞌe̱ lu lataj láꞌazxa da zaj nun bénneache, da naꞌ naca na tu da dxuléꞌeze ca naca lataj láꞌazxa li da zua xabáa, san guxúꞌe̱ xabáqueze, naga zue̱ꞌ naꞌa lau Dios, dxudée̱ꞌ dizraꞌ chee̱dxu dxiꞌu.
\v 25 Bxruze blau chee̱ benneꞌ judío caꞌ dxuꞌe̱ lu lataj láꞌazxa blau tu iza tu iza chee̱ guzúe̱ꞌ ga naꞌ dxen da quebe naca cheé̱queze̱ꞌ. Naꞌa Cristo quebe dxuzúa cuine̱ꞌ zaneꞌ lasa.
\v 26 La be̱n na ba xen guzúa cuine̱ꞌ zaneꞌ lasa, cáꞌanqueze zaneꞌ lasa gatie̱ꞌ ca gudé be̱ne̱ꞌ xe̱zr la xu nigá. Naꞌa, gate ba bzrin zra dxaca li ca da guche̱be lazreꞌ Dios, Cristo ba ble̱ꞌe̱ tu lásaze, naꞌ bzua cuine̱ꞌ chee̱ cue̱ꞌ dul-la zaj nabaga bénneache.
\v 27 Ca dxun na ba xen xelate xúgute̱ bénneache tu lásaze, naꞌ te naꞌ Dios guchiꞌe̱ da zaj nun tu tue̱ꞌ,
\v 28 cáꞌanqueze Cristo bzua cuine̱ꞌ chee̱ gutie̱ꞌ tu lásaze chee̱ gudúe̱ꞌ dul-la zaj nabagaꞌ benneꞌ zante̱. Te nigá xelé̱ꞌe̱ da gudxupeꞌ, quegádxa chee̱ cue̱ꞌ dul-la, san chee̱ xedajselé̱ꞌ xúgute̱ benneꞌ dxelebeze̱ꞌ Le̱ꞌ.
\c 10
\p
\v 1 Da nadxixruj bea da bde Moisés guca na ca tu zrúl-laze chee̱ da chaweꞌ caꞌ da dxal-laꞌ xeleláꞌ, ne quegá naca na lé̱queze na. Chee̱ le̱ naꞌ da caꞌ buluzúa bxruze caꞌ lau Dios ca nadxixruj bea naꞌ, da caꞌ buluzúe̱ꞌ tu iza tu iza, quebe gulezeque na xelún na benneꞌ caꞌ li lazreꞌ, benneꞌ caꞌ gulebigue̱ꞌ lau Dios.
\v 2 La guzequeꞌ da nadxixruj bea naꞌ gun na benneꞌ caꞌ li lazreꞌ, québedxa nu guzúa da caꞌ lau Dios laweꞌ da la guladxe benneꞌ caꞌ lu dul-la zaj nabague̱ꞌ, québedxa zaj nabague̱ꞌ dul-la.
\v 3 Naꞌa da caꞌ buluzúe̱ꞌ lau Dios tu iza tu iza bulusá na lazre̱ꞌ chee̱ dul-la da zaj nabague̱ꞌ,
\v 4 laweꞌ da quebe guzequeꞌ dxen chee̱ be̱zre caꞌ, ne dxen chee̱ béadu caꞌ cua na dul-la zaj nabaga bénneache.
\p
\v 5 Chee̱ le̱ naꞌ, gate blaꞌ Cristo lu xe̱zr la xu nigá, guzre̱ꞌ Dios:
\q Quebe dxaca lazruꞌ gunaꞌ, ne béadu caꞌ nu gute le̱baꞌ lauꞌ.
\q Naꞌa ba be̱nuꞌ be̱l-laꞌ dxen chiaꞌ nigá.
\q
\v 6 Quebe dxezaca ba lazruꞌ béadu caꞌ dxuluzezxe̱ꞌ lauꞌ,
\q ne béadu caꞌ dxelutie̱ꞌ lauꞌ chee̱ cua na dul-la zaj nabague̱ꞌ.
\q
\v 7 Nadxa gunníaꞌ: “Nigá zaꞌa nedaꞌ chee̱ gunaꞌ ca da nnauꞌ Lueꞌ, Dios,
\q ca naxúaj na chiaꞌ nedaꞌ lu xiche láꞌazxa.”
\m
\v 8 Nédxula gunné̱ꞌ: “Quebe dxaca lazruꞌ, ne quebe dxezaca ba lazruꞌ gunaꞌ, ne béadu caꞌ nu gute le̱baꞌ lauꞌ, ne béadu caꞌ dxuluzezxe̱ꞌ lauꞌ, ne béadu caꞌ dxelutie̱ꞌ lauꞌ chee̱ cua na dul-la zaj nabaga bénneache.” Caní gunné̱ꞌ lácala zaj naca na da nadxixruj bea na xuluzúe̱ꞌ na lau Dios.
\v 9 Ca gudé naꞌ gunné̱ꞌ: “Nigá zaꞌa nedaꞌ chee̱ gunaꞌ ca da nnauꞌ Lueꞌ, Dios.” Da nigá zéaje̱ na gudée̱ꞌ lu waláz chee̱ da caꞌ buluzúa bxruze caꞌ lau Dios, gate bzua cuine̱ꞌ lau Dios ne̱ chee̱ dul-la zaj nabaga bénneache.
\v 10 Dios ba bcaꞌana chawe̱ꞌ dxiꞌu lu dul-la nabágadxu laweꞌ da be̱n Cristo ca da gunná Dios gate bde cuine̱ꞌ lau Dios tu lásaze gate gutie̱ꞌ le̱ꞌe̱ xaga begúaj.
\p
\v 11 Xúgute̱ bxruze judío dxelune̱ꞌ zrin lau Dios tu zra tu zra, ne zaneꞌ lasa dxuluzríe̱ꞌ lau Dios da cáꞌanqueze lácala da caꞌ cabataꞌ xelezeque na xelegúa na dul-la chee̱ bénneache.
\v 12 Jesucristo bzrie̱ꞌ lau Dios tuze da dxugúa na dul-la, naꞌ gudé naꞌ gudxéꞌe̱ chaláꞌa xabe̱la chee̱ Dios.
\v 13 Zue̱ꞌ naꞌa dxebeze̱ꞌ zra gate guzúa Dios benneꞌ caꞌ dxeledábague̱ꞌ chee̱ꞌ zran niꞌe̱.
\v 14 Caní dxune̱ꞌ laweꞌ da bcaꞌana chawe̱ꞌ chadía chacanna benneꞌ caꞌ zaj naque̱ꞌ bi chee̱ Dios. Caní be̱ne̱ꞌ gate bzua cuine̱ꞌ lau Dios tu lásaze.
\v 15 Caníqueze dxenná Beꞌ Láꞌazxa laweꞌ da gunné̱ꞌ nédxula:
\q
\v 16 Caní naca xel-laꞌ wezría gunaꞌ nen benneꞌ Israel caꞌ
\q ca te chee̱ lu zra caní, dxenná Xránale:
\q Guzúaꞌ da nadxixruj bea naꞌ lu xichaj lázrdau benneꞌ caꞌ,
\q ne guzúajaꞌ na lu lázrdawe̱ꞌ.
\m
\v 17 Ca gudé naꞌ dxenné̱ꞌ:
\q Cabátadxa cheajsá lazraꞌ chee̱ dul-la da zaj nabague̱ꞌ,
\q ne chee̱ da cale̱la caꞌ da zaj nune̱ꞌ.
\m
\v 18 Caꞌan naca, gate Dios ba bnite lawe̱ꞌ chee̱ bénneache ca naca dul-la da zaj nabague̱ꞌ, québedxa dxun na ba xen bi xuluzúe̱ꞌ lau Dios chee̱ cua na dul-la caꞌ.
\s Dxal-laꞌ bígadxu lau Dios
\p
\v 19 Chee̱ le̱ naꞌ, benneꞌ bíchaꞌdauꞌ, waca chúꞌudxu lu lataj láꞌazxa blau dute̱ lázrdaudxu ne̱ chee̱ dxen chee̱ Jesucristo da blalje̱ꞌ.
\v 20 Dxezrindxu lau Dios, dxededxu tu neza cube, da quebe naca na ca da xjácale̱ bxruze caꞌ lu lataj láꞌazxa. Dxededxu neza da naca Crístoqueze, Bénneaꞌ zúale̱ Dios xabáa.
\v 21 Jesús naque̱ꞌ bxruze blau chee̱dxu, ne zaj xuꞌu lu ne̱ꞌe̱ bénneache chee̱ Dios.
\v 22 Chee̱ le̱ naꞌ dxal-laꞌ bígadxu lau Dios dute̱ lázrdaudxu ne dute̱ xel-laꞌ dxeajlí lazreꞌ li, laweꞌ da bcaꞌana chaweꞌ Le̱ꞌ lázrdaudxu chee̱ québedxa sua da ste̱be lu xichaj lázrdaudxu ca naca chee̱ dul-la, ne naca chee̱dxu cáte̱ze ba gudibe̱ꞌ be̱l-laꞌ dxen chee̱dxu nen da naca ca tu nisa chaweꞌ.
\v 23 Dxal-laꞌ sua cháchadxu ca naca da dxebeza lázredxu chee̱ da dxéajle̱dxu, ne quebe guchadxu ca dxundxu, laweꞌ da gun Dios ca da guche̱be lazre̱ꞌ gune̱ꞌ chee̱dxu.
\v 24 Dxal-laꞌ quilaj lázredxu ca gundxu gácale̱ ljwézredxu tudxu xetudxu chee̱ zriꞌi ljwézredxu, ne gundxu da xrlátaje.
\v 25 Quebe dxal-laꞌ gusandxu xezrágadxu lau Dios ca dxelún bal-la benneꞌ. Dxal-laꞌ gutipa lazreꞌ ljwézredxu tudxu xetudxu, naꞌ gúndxadxu caní naꞌa laweꞌ da dxeléꞌedxu ba za bagu zra xeláꞌ Xránadxu.
\p
\v 26 Che núnbeadxu ca naca xel-laꞌ li chee̱ Dios, ne chéajdxadxu gundxu dul-la, québedxa bi de̱ da cua na dul-la bágadxu.
\v 27 Lu xel-laꞌ dxezrebe súadxu da naca chee̱ zra guchiꞌa Dios, ne chee̱ xiꞌ da guzría xi na benneꞌ caꞌ dxeledábague̱ꞌ chee̱ Dios.
\v 28 Gate nu benneꞌ bzue̱ꞌ chaláꞌala da gunná bea Mnoisés, ne gulezráꞌ chupa u chunna benneꞌ belexeche̱be̱ꞌ chee̱ da be̱n bénneaꞌ, naꞌ belutie̱ꞌ bénneaꞌ, ne quebe belexache lazre̱ꞌ le̱ꞌ.
\v 29 Tu da ste̱be zrendxa dxal-laꞌ xelezíꞌ benneꞌ caꞌ dxuluzúe̱ꞌ chaláꞌala Zriꞌine Dios, ne dxulucáꞌana dítaje̱ꞌ dxen chee̱ꞌ, da blalje̱ꞌ, dxen naꞌ dxuzúa chuchu na xel-laꞌ wezría chee̱ Dios, ne dxucáꞌana chawe na benneꞌ caꞌ, naꞌ dxelenné̱ꞌ schanniꞌ chee̱ Beꞌ Láꞌazxa chee̱ Dios, Bénneaꞌ nazriꞌine̱ꞌ le̱ꞌ.
\v 30 Ba núnbeadxu Xránadxu, Bénneaꞌ gunnáqueze̱ꞌ: “Nedaꞌ xebéaj lazraꞌ bénneache. Nedaꞌ gunézrujaꞌ lazruj chee̱ benneꞌ caꞌ.” Cáꞌanqueze gunné̱ꞌ: “Xránale guchiꞌe̱ chee̱ bénneache chee̱ꞌ.”
\v 31 Da dxal-laꞌ xelezrebe bénneache naca da ste̱be da gun Dios benneꞌ caꞌ.
\v 32 Le gusá lázrele leꞌe iza da ba guledé, gate za guzíte̱le xel-laꞌ naxaníꞌ chee̱ Dios, naꞌ dute̱ xel-laꞌ zren lazreꞌ bchaga laule xel-laꞌ ziꞌ da gudele.
\v 33 Bál-lale leꞌe bulucháchale̱ne̱ꞌ, ne belúꞌe̱ leꞌe láwela bénneache, naꞌ xebál-lale leꞌe guzácaꞌle gate gunáꞌale benneꞌ caꞌ guledée̱ꞌ xel-laꞌ ziꞌ caní.
\v 34 Bexache lázrele benneꞌ gulezráꞌ lizre xia, ne dute̱ xel-laꞌ dxebé bchaga laule da belune̱ꞌ gate gulequé̱ꞌe̱ ca da nápale, laweꞌ da nézele nápale xabáa da zácadxa na, ne da naca na da chadía chacanna.
\v 35 Quebe gusanle ca da dxuxrén lázrele, laweꞌ da nusá xel-laꞌ dxuxrén lazreꞌ chee̱le tu da zren da siꞌle.
\v 36 Leꞌe dxal-laꞌ gácale zren lazreꞌ chee̱ gunle ca da nna Dios, naꞌ sile ca da guche̱be lazreꞌ Dios gunne̱ꞌ chee̱le.
\v 37 Naca na ca dxenná xiche láꞌazxa:
\q Xátedauze de̱,
\q naꞌ xeláꞌ Bénneaꞌ dxal-laꞌ xeláꞌ, ne quebe chene̱ꞌ.
\q
\v 38 Benneꞌ naque̱ꞌ xlátaje̱ lawaꞌ nedaꞌ,
\q gataꞌ chee̱ꞌ xel-laꞌ nabán li lazreꞌ laweꞌ da dxéajle̱ꞌe̱ chiaꞌ,
\q naꞌ che cueaj xíchaje̱ꞌ nedaꞌ quebe xezaca ba lazraꞌ nen bénneaꞌ.
\m
\v 39 Naꞌa dxiꞌu quebe nácadxu tuze nen benneꞌ caꞌ dxelebéaj xíchaje̱ꞌ Dios, ne xelebía xiꞌe̱. Nácadxu tuze nen benneꞌ dxeléajle̱ꞌe̱ chee̱ Dios, naꞌ xelelá bénneꞌdu zaj xuꞌe̱.
\c 11
\s Xel-laꞌ dxeajlí lazreꞌ
\p
\v 1 Che nápadxu xel-laꞌ dxeajlí lazreꞌ dxuxrén lazrdxu sidxu da dxebézadxu, ne nézquezdxu naca da li da quebe dxeléꞌedxu.
\v 2 Xra xrtáudxu caꞌ belexegáꞌane̱ꞌ xrlátaje lau Dios laweꞌ da guléajle̱ꞌe̱ chee̱ꞌ.
\p
\v 3 Lu xel-laꞌ dxeajlí lazreꞌ chee̱dxu nezdxu be̱n Dios xe̱zr la xu nigá, bchínene̱ꞌ dizraꞌ chee̱ꞌ, naꞌ ca naca da dxeléꞌedxu naꞌa be̱n Dios le̱ na nen da quebe naláꞌ gate nate.
\p
\v 4 Abel, lu xel-laꞌ dxeajlí lazreꞌ chee̱ꞌ, bzue̱ꞌ lau Dios tu gunaꞌ da zácadxa na ca da bzua Caín, naꞌ chee̱ le̱ naꞌ Dios gunné̱ꞌ naca xlátaje̱ Abel, ne guziꞌe̱ gunaꞌ chee̱ꞌ. Caꞌan naca, lácala ba gute Abel, ne dxusé̱dene̱ꞌ dxiꞌu ne̱ chee̱ da be̱ne̱ꞌ laweꞌ da gudape̱ꞌ xel-laꞌ dxeajlí lazreꞌ.
\p
\v 5 Enoc, lu xel-laꞌ dxeajlí lazreꞌ chee̱ꞌ, Dios beche̱ꞌe̱ le̱ꞌ. Quebe gutie̱ꞌ, naꞌ québedxa nu bleꞌe le̱ꞌ laweꞌ da beché̱ Dios le̱ꞌ. Naxúaj na lu xiche láꞌazxa da dxenná na, gate quebe ne xeché̱ Dios le̱ꞌ, be̱n Enoc ca da bezaca ba lazreꞌ Dios.
\v 6 Quebe gaca nu gun da xezaca ba lazreꞌ Dios che quebe dxeajlí lazre̱ꞌ Le̱ꞌ. Bénneaꞌ dxebigue̱ꞌ lau Dios, dxun na ba xen chéajle̱ꞌe̱ zua Dios, ne xunézruje̱ꞌ chee̱ benneꞌ caꞌ dxelexílaje̱ꞌ Le̱ꞌ.
\p
\v 7 Noé, lu xel-laꞌ dxeajlí lazreꞌ chee̱ꞌ, gate Dios guzre̱ꞌ le̱ꞌ nédxula ca da dxal-laꞌ gaca, bzue̱ꞌ dizraꞌ chee̱ Dios, ne be̱ne̱ꞌ tu da zren da dxedá laweꞌ nísadauꞌ chee̱ xelelá xrtie̱ꞌ caꞌ. Guxeajlí lazreꞌ Noé Dios, san gulebía xiꞌ bénneache zaj zre̱ꞌe̱ xe̱zr la xu naꞌ, laweꞌ da quebe guleajlí lazre̱ꞌ Dios. Dios bcaꞌane̱ꞌ Noé xrlátaje laweꞌ da guxeajlí lazre̱ꞌ Le̱ꞌ.
\p
\v 8 Abraham, lu xel-laꞌ dxeajlí lazreꞌ chee̱ꞌ, gate Dios gunné̱ꞌ le̱ꞌ, bzue̱ꞌ dizraꞌ, ne guzé̱ꞌe̱ zéaje̱ꞌ tu lu xe̱zr la xu da guchebe lazreꞌ Dios gunézruje̱ꞌ chee̱ꞌ. Bdxuaje̱ꞌ lázrie̱ꞌ, ne quebe nézene̱ꞌ naga zéaje̱ꞌ.
\v 9 Laweꞌ da guxeajlí lazre̱ꞌ Dios, guzúa Abraham lu xe̱zr la xu naꞌ da guche̱be lazreꞌ Dios gunézruje̱ꞌ chee̱ꞌ, naga naca xe̱zr la xu chee̱ benneꞌ zituꞌ caꞌ. Guzúe̱ꞌ tu lu xuꞌu ladxeꞌ, ne cáꞌanqueze be̱n Isaac, ne Jacob, benneꞌ caꞌ, cáꞌanqueze Dios guche̱be lazre̱ꞌ xelezíꞌe̱ da naꞌ gunezruj Dios le̱ꞌ.
\v 10 Caní be̱n Abraham laweꞌ da guleza lazre̱ꞌ chuꞌe̱ lu xe̱zre naꞌ da quebe te chee̱ na, da naꞌ guleche Dios, ne da be̱n Lé̱queze̱ꞌ.
\p
\v 11 Cáꞌanqueze Sara, lácala ba nácale̱ꞌe̱ benneꞌ gula, ne quebe nu bi chee̱ꞌ dxalaj, san xel-laꞌ dxeajlí lazreꞌ chee̱ꞌ guque̱ꞌ xrna bidauꞌ. Guzúa tu bi biu chee̱ꞌ laweꞌ da guxeajlí lazre̱ꞌ Dios gune̱ꞌ ca da guche̱be lazre̱ꞌ.
\v 12 Caní guca, Abraham, lácala ba gúxrule̱ꞌe̱, guxánle̱ꞌe̱ zriꞌine zre sue̱ꞌ ca naxán xuzreꞌ da zaj dxeꞌ dxuꞌa tu yegu zren, da quebe nazequeꞌ gulábadxu.
\p
\v 13 Xúgute̱ benneꞌ caní gulatie̱ꞌ, ne quebe ne xelezíꞌe̱ da caꞌ nache̱be lazreꞌ Dios, san laweꞌ da guleajlí lazre̱ꞌ Dios, beleléꞌene̱ꞌ na zítuꞌla, naꞌ belexezaca ba lázrele̱ne̱ꞌ na. Caní bululéꞌene̱ꞌ gulaque̱ꞌ ca benneꞌ zituꞌ, benneꞌ guledeze lu xe̱zr la xu nigá.
\v 14 Benneꞌ dxuluchálaje̱ꞌ caní dxululéꞌene̱ꞌ dxeledé̱ꞌ dxelexílaje̱ꞌ tu lazrie̱ꞌ.
\v 15 La buluwía lazre̱ꞌ ca naca xe̱zr la xu naga gusáꞌaque̱ꞌ, naꞌ waca xelexezrine̱ꞌ naꞌ.
\v 16 Gulaca lazre̱ꞌ tu lazrie̱ꞌ da naca na cháweꞌdxa, da naꞌ naca na lazrie̱ꞌ da zua xabáa. Chee̱ le̱ naꞌ Dios quebe dxexeduéꞌene̱ꞌ gate dxelenná benneꞌ caꞌ naque̱ꞌ Dios chee̱ꞌ, naꞌ nucueze̱ꞌ tu xe̱zre naga xelezúa benneꞌ caꞌ.
\p
\v 17 Gate guca lazreꞌ Dios nézene̱ꞌ ca naca xel-laꞌ dxeajlí lazreꞌ chee̱ Abraham, naꞌ lu xel-laꞌ dxeajlí lazreꞌ chee̱ꞌ guché̱ꞌe̱ Isaac chee̱ gutie̱ꞌ-beꞌ lau Dios. Ba zue̱ꞌ gutie̱ꞌ bi tu lichaꞌ chee̱ꞌ lácala ba nache̱be lazreꞌ Dios, gunné̱ꞌ:
\v 18 “Ne̱ chee̱ Isaac wazrále̱ꞌe̱ zriꞌine zre suꞌ.”
\v 19 Abraham bxren lazre̱ꞌ Dios wazéquene̱ꞌ gusebane̱ꞌ benneꞌ gate, naꞌ waca nnadxu bezíꞌ lu ne̱ꞌe̱ zríꞌine̱ꞌ Isaac ládujla benneꞌ gate.
\p
\v 20 Isaac, lu xel-laꞌ dxeajlí lazreꞌ chee̱ꞌ, guche̱be lazre̱ꞌ xelezíꞌ zríꞌine̱ꞌ Jacob, ne Esaú da xrlátaje caꞌ.
\v 21 Jacob, lu xel-laꞌ dxeajlí lazreꞌ chee̱ꞌ, gate zua gatie̱ꞌ, guche̱be lazre̱ꞌ xelezíꞌ tu tu zriꞌine José da xrlátaje caꞌ, ne be̱ láꞌane̱ꞌ Dios, nuchiche tipe̱ꞌ xágadu nuxre̱ꞌ.
\v 22 José, lu xel-laꞌ dxeajlí lazreꞌ chee̱ꞌ, gate ba zua gatie̱ꞌ gunné̱ꞌ welexedxúaj benneꞌ Israel caꞌ lu xe̱zr la xu Egipto, ne bdxixruj beꞌe̱ ca dxal-laꞌ xelune̱ꞌ chee̱ zrita xuꞌe̱.
\p
\v 23 Gate gulaj Moisés, xra xrne̱ꞌe̱, lu xel-laꞌ dxeleajlí lazreꞌ chee̱ꞌ bulucache̱ꞌ le̱beꞌ laweꞌ chunna beuꞌ, laweꞌ da beleléꞌene̱ꞌ naca bidu naꞌ xrtanle̱ꞌe̱, ne quebe belezrebe̱ꞌ benneꞌ wenná bea, bénneaꞌ bdxixruj beꞌe̱ xelate bidu caꞌ.
\v 24 Moisés, lu xel-laꞌ dxeajlí lazreꞌ chee̱ꞌ, gate guque̱ꞌ benneꞌ waca, quebe guca lazre̱ꞌ gaque̱ꞌ zriꞌine nuꞌula zriꞌine benneꞌ wenná bea chee̱ xe̱zr la xu Egipto,
\v 25 san guca lázredxe̱ꞌ tée̱ꞌ xel-laꞌ ziꞌ nen bi caꞌ chee̱ Dios quézcala sue̱ꞌ tu chíꞌidauꞌ lu da ba neza chee̱ da naca dul-la.
\v 26 Gúquene̱ꞌ nácadxa chaweꞌ gate belún lala bénneache chee̱ꞌ ca da guca chee̱ Cristo, quézcala gape̱ꞌ ca naca da gunníꞌa chee̱ xe̱zr la xu Egipto, laweꞌ da dxenné̱ꞌe̱ da gunezruj Dios le̱ꞌ.
\v 27 Moisés, lu xel-laꞌ dxeajlí lazreꞌ chee̱ꞌ, bedxúaje̱ꞌ lu xe̱zr la xu Egipto, ne quebe bezrebe̱ꞌ xel-laꞌ dxezráꞌa chee̱ benneꞌ wenná bea, naꞌ guzúa chúchue̱ꞌ ca tu benneꞌ dxeléꞌene̱ꞌ Dios, Bénneaꞌ quebe gaca nu leꞌe.
\p
\v 28 Moisés, lu xel-laꞌ dxeajlí lazreꞌ chee̱ꞌ, be̱ne̱ꞌ Laní Pascua gate naꞌ bdxixruj beꞌe̱ xuluzrá benneꞌ Israel caꞌ dxen le̱ꞌe̱ xaga dxa xuꞌu chee̱ quebe gute gubáz chee̱ xabáa chee̱ xel-laꞌ gute netú zriꞌine benneꞌ Israel caꞌ, bi biu nedxu.
\v 29 Benneꞌ Israel caꞌ, lu xel-laꞌ dxeleajlí lazreꞌ chee̱ꞌ, beledée̱ꞌ lu Nísadauꞌ Xrna ca benneꞌ dxeledé lu xu bizre, san gate gulúꞌu benneꞌ Egipto caꞌ naga ba guledé benneꞌ caꞌ, naꞌ bezraga nisa naꞌ, naꞌ gulebéꞌ chiꞌi benneꞌ Egipto caꞌ, naꞌ gulatie̱ꞌ.
\p
\v 30 Benneꞌ Israel caꞌ, lu xel-laꞌ dxeleajlí lazreꞌ chee̱ꞌ, guzréꞌe zeꞌe da naxechaj na xe̱zre Jericó ca gudé guledé benneꞌ Israel caꞌ bezúate̱ xe̱zre naꞌ tu tu lasa du gazre zra.
\v 31 Rahab, nuꞌula dxezíꞌ lu ne̱ꞌe̱ benneꞌ zaj xuꞌe̱ neza, lu xel-laꞌ dxeajlí lazreꞌ chee̱ꞌ, quebe gutie̱ꞌ tu zren nen benneꞌ Jericó caꞌ, benneꞌ quebe buluzúa dizraꞌ chee̱ Dios, laweꞌ da gudapa le̱ꞌ ba láꞌana benneꞌ Israel caꞌ, benneꞌ xeajlennáꞌ lane̱ꞌ xe̱zre naꞌ.
\p
\v 32 ¿Bízradxa nniaꞌ? Québedxa bi lataj napaꞌ guchálajaꞌ ca be̱n Gedeón, ne ca be̱n Barac, ne ca be̱n Sansón, ne ca be̱n Jefté, ne ca be̱n David, ne ca be̱n Samuel, ne ca belún benneꞌ caꞌ gulenné̱ꞌ waláz chee̱ Dios.
\v 33 Benneꞌ caꞌ lu xel-laꞌ dxeleajlí lazreꞌ chee̱ꞌ gulezíꞌe̱ xe̱zr la xu caꞌ chee̱ benneꞌ xula, ne gulenná beꞌene̱ꞌ cháweꞌdauꞌ benneꞌ walázr chee̱ꞌ caꞌ, naꞌ gulezíꞌe̱ da guche̱be lazreꞌ Dios, laweꞌ da gúcale̱ne̱ꞌ le̱ꞌ.
\q Belelé̱ꞌ lu dxuꞌa be̱zre xixreꞌ caꞌ.
\q
\v 34 Buluxusule̱ꞌ xiꞌ da dxéneaca.
\q Belelé̱ꞌ lu xia nalá.
\q Benneꞌ caꞌ zaj nate niꞌa naꞌ belexaque̱ꞌ dipa lazreꞌ.
\q Gulaque̱ꞌ benneꞌ wala lu wedil-la, ne gulaca lu ne̱ꞌe
\q da gutaꞌ chee̱ benneꞌ caꞌ guledábague̱ꞌ le̱ꞌ.
\q
\v 35 Nuꞌula caꞌ belezíꞌ lu ne̱ꞌe̱ benneꞌ gate chee̱ꞌ caꞌ, benneꞌ belexebáne̱ꞌ.
\q Xebal-le̱ꞌ gulátie̱ꞌ gate buludée̱ꞌ le̱ꞌ ba xaꞌ,
\q laweꞌ da quebe belúꞌe̱ lataj nu gusán le̱ꞌ,
\q chee̱ xelezruéꞌene̱ꞌ xel-laꞌ dxexebán
\q chee̱ xeleziꞌe̱ xetú xel-laꞌ nabán da naca na da li.
\q
\v 36 Xebal-le̱ꞌ belún le̱ꞌ chee̱ꞌ,
\q naꞌ xebal-le̱ꞌ belúꞌe̱ le̱ꞌ,
\q naꞌ xebal-le̱ꞌ buluchéaje̱ꞌ le̱ꞌ du xia ne guleguꞌe̱ le̱ꞌ lizre xia.
\q
\v 37 Belutie̱ꞌ xebal-le̱ꞌ nen xiaj,
\q naꞌ xebal-le̱ꞌ gulecheze̱ꞌ le̱ꞌ nen xia.
\q Xebal-le̱ꞌ buludée̱ꞌ le̱ꞌ lu da ste̱be caꞌ,
\q naꞌ xebal-le̱ꞌ belutie̱ꞌ nen xia nalá.
\q Xebal-le̱ꞌ guledée̱ꞌ nila naꞌla,
\q zaj nacue̱ꞌ zra zrilaꞌ ne zra béadu caꞌ.
\q Baxacheꞌ gulaque̱ꞌ, naꞌ guledée̱ꞌ lu da ziꞌ da xaꞌ,
\q naꞌ buluzalje̱ꞌ le̱ꞌ.
\p
\v 38 Bénneache zaj zraꞌ lu xe̱zr la xu nigá quebe zaj naca chee̱ꞌ xelezíꞌe̱ ba neza chee̱ benneꞌ caní. Tu guledázqueze̱ꞌ le̱ꞌe̱ xixreꞌ, ne lu xiꞌa caꞌ, ne lu bluaj caꞌ, ne lu bluaj xu caꞌ.
\v 39 Xúgute̱ benneꞌ caꞌ bcaꞌana chaweꞌ Dios le̱ꞌ laweꞌ da guleajlí lazre̱ꞌ Le̱ꞌ, san quebe ne xelezíꞌe̱ ca naca da guche̱be lazreꞌ Dios,
\v 40 laweꞌ da nucueza Dios tu da nácadxa chaweꞌ chee̱dxu dxiꞌu, chee̱ xelexaca benneꞌ caꞌ li lazreꞌ tu zren nen dxiꞌu.
\c 12
\s Dxal-laꞌ nnaꞌdxu Jesús
\p
\v 1 Laweꞌ da zaj naxéchaj benneꞌ zante̱ dxiꞌu, benneꞌ caꞌ ba bululéꞌene̱ꞌ ca guléajle̱ꞌe̱ chee̱ Dios, dxal-laꞌ guzúadxu chaláꞌala xúgute̱ da dxululale na dxiꞌu, ne dul-la da naxe̱l-la na dxiꞌu, naꞌ lu dute̱ xel-laꞌ zren lazreꞌ chee̱dxu gundxu zrin chee̱ Dios, da naca na ca dxezáꞌ chégudxu chee̱ zruéꞌeledxu da dxeléꞌedxu tu chi naꞌ.
\v 2 Dxal-laꞌ nnaꞌdxu Jesús, Bénneaꞌ dxune̱ꞌ nápadxu xel-laꞌ dxeajlí lazreꞌ, ne dxune̱ꞌ li lazreꞌ xel-laꞌ dxeajlí lazreꞌ naꞌ. Jesús gudée̱ꞌ xel-laꞌ ziꞌ le̱ꞌe̱ xaga begúaj, ne quebe beduéꞌene̱ꞌ laweꞌ da guné̱ꞌe̱ xel-laꞌ dxebé naꞌ da dxebeza na Le̱ꞌ, naꞌ gudxéꞌe̱ chaláꞌa xabe̱la chee̱ lataj blau chee̱ Dios.
\p
\v 3 Le nnaꞌ xanneꞌ ca da be̱n Jesús, gudéle̱ꞌe̱ xel-laꞌ ziꞌ da bulusaca benneꞌ dul-la caꞌ Le̱ꞌ. Chee̱ le̱ naꞌ quebe chajxréquele gunle zrin chee̱ꞌ, ne quebe gute lázrele.
\v 4 Ba gudíl-lale̱le dul-la, naꞌ quebe ne gátele lu wedil-la naꞌ.
\v 5 Quebe gal-la lázrele leꞌe ca dxun Dios, dxuzéajniꞌine̱ꞌ leꞌe ca zríꞌinequeze̱ꞌ, gate dxenné̱ꞌ:
\q Zriꞌinaꞌ, quebe guzúꞌ chaláꞌala da dxun Xranuꞌ gate dxusízrene̱ꞌ lueꞌ,
\q ne quebe gate lazruꞌ gate dxedil-le̱ꞌ lueꞌ.
\q
\v 6 Xránadxu dxusízrene̱ꞌ bi caꞌ nazriꞌine̱ꞌ,
\q naꞌ xúgute̱ bi dxezíꞌ lu ne̱ꞌe̱ ca zríꞌinequeze̱ꞌ dxudée̱ꞌ-beꞌ xel-laꞌ ziꞌ.
\p
\v 7 Le guchaga lau leꞌe xel-laꞌ ziꞌ da dxedele, laweꞌ da dxuxúe Dios leꞌe ca zríꞌinequeze̱ꞌ. ¿Zra bi quebe dxusizre xrabeꞌ le̱beꞌ?
\v 8 Che Dios quebe dxusízrene̱ꞌ leꞌe ca dxusízrene̱ꞌ xúgute̱ bi chee̱ꞌ caꞌ, quebe nácale zríꞌinequeze Le̱ꞌ. Nácale ca bi lan caꞌ.
\v 9 Gate ne nácadxu bidauꞌ, bulusizre xra xrnadxu dxiꞌu, naꞌ gudápadxu le̱ꞌ ba láꞌana. Dxal-laꞌ guzúadxadxu dizraꞌ Xradxu zue̱ꞌ xabáa, naꞌ gaca bandxu.
\v 10 Xra xrnadxu bulusízrene̱ꞌ dxiꞌu tu chíꞌidauze ca da guléquene̱ꞌ chaweꞌ, san Dios dxusízrene̱ꞌ dxiꞌu chee̱ gaca tu da ba neza chee̱dxu da naca na li lazreꞌ, chee̱ gácadxu láꞌazxa ca naca láꞌazxa Lé̱queze̱ꞌ.
\v 11 Da li quebe dxedánnedxu da dxusizre xradxu dxiꞌu, san dxéquedxu ziꞌ, naꞌ dxedé naꞌ, che dxéajniꞌidxu ca da dxusízrene̱ꞌ dxiꞌu, naꞌ gundxu da xrlátaje caꞌ, ne cueza zri lázredxu lau Dios.
\s Quebe dxal-laꞌ guzúadxu chaláꞌala da dxenná Dios
\p
\v 12 Chee̱ le̱ naꞌ le guzazraj naꞌle, ne zríbele da ba dxelate niꞌa naꞌ,
\v 13 ne le saꞌ lu neza da zaj naca na li, chee̱ quebe chegu níꞌale da quebe zaj zua chacha, ne chee̱ xelexaca chacha na.
\p
\v 14 Le gun ba xuzre suale lu xel-laꞌ dxebeza zri lazreꞌ nen xúgute̱ bénneache, ne le gaca li lazreꞌ lau Dios. Che quebe gunle caní, quebe gaca léꞌelele Xránadxu.
\v 15 Le guxúe xanneꞌ chee̱ quebe gusanle da chaweꞌ caꞌ dxunna Dios leꞌe, ne̱ chee̱ quebe gaca netule leꞌe ca tu xixreꞌ slaꞌ da dxulala na, ne dxuxrinnaj na da xezícala.
\v 16 Le guxúe xanneꞌ chee̱ quebe gunle da sban, ne quebe guzúale chaláꞌala ca da dxunna Dios, ca be̱n Esaú, bénneaꞌ bsane̱ꞌ xúgute̱ da gunezruj xre̱ꞌ le̱ꞌ chee̱ guziꞌe̱ tu cueze xel-laꞌ wagu.
\v 17 Ba nézele ca da guca gudé naꞌ, gate guca lazreꞌ Esaú naꞌ siꞌe̱ da chaweꞌ da naba xre̱ꞌ lau Dios, naꞌ xre̱ꞌ bzue̱ꞌ le̱ꞌ chaláꞌala, ne lácala gudxézrele̱ꞌe̱, quebe guca xuché̱ꞌe̱ ca da ba be̱ne̱ꞌ.
\p
\v 18 Quebe dxaca chee̱le ca da guca chee̱ benneꞌ Israel caꞌ, gulebigue̱ꞌ naga zua tu xiꞌa, da naꞌ wazequeꞌ nu guchiche, ne naga dxala na xiꞌ, naga zua da chul-la, ne dxeꞌ zren, ne dxaca beꞌ bdunuꞌ.
\v 19 Belenne̱ꞌ gudxezre luzu da dxulucuezre̱ꞌ, ne chiꞌi Dios bchálajle̱ne̱ꞌ le̱ꞌ. Benneꞌ caꞌ belenne̱ꞌ chiꞌi Dios naꞌ gulataꞌ xúene̱ꞌ québedxa guchálajle̱ne̱ꞌ le̱ꞌ.
\v 20 Caꞌan guca laweꞌ da quebe gulezéquene̱ꞌ xuluchaga lawe̱ꞌ ca naca da bdxixruj beꞌe Dios, gunné̱ꞌ: “Che tu béadauze guléajbaꞌ lu xiꞌa naꞌ, dxal-laꞌ xelútie̱ꞌ-baꞌ nen xiaj u nen tu xia nalá xécheꞌze.”
\v 21 Da naꞌ beleléꞌene̱ꞌ bchébele̱ꞌe̱ na le̱ꞌ, naꞌ Moisés gunné̱ꞌ: “Dxezrízeteaꞌ xel-laꞌ dxezrebe.”
\p
\v 22 Naꞌa leꞌe ba nabígale naga zua xiꞌa láꞌazxa da nazí le na Sión, ne lu xe̱zre chee̱ Dios ban, da naca na Jerusalén da zua xabáa, ne naga zaj zraꞌ gázxue gázxue gubáz chee̱ xabáa,
\v 23 ne naga zaj nazraga benneꞌ caꞌ gulaca bi chee̱ Dios nédxute̱, benneꞌ caꞌ ba zaj naxúaj le̱ꞌ xabáa, ne lau Dios, Bénneaꞌ guchiꞌe̱ chee̱ xúgute̱ bénneache, ne naga zaj zraꞌ beꞌ gulácaqueze benneꞌ caꞌ ba nun Dios le̱ꞌ li lazreꞌ,
\v 24 ne lau Jesús, Benneꞌ wedé dizraꞌ chee̱ xel-laꞌ wezría cube, ne naga bzre̱ꞌe̱ dxen da dxuchalaj na da cháwedxa ca da bchalaj dxen chee̱ Abel.
\p
\v 25 Chee̱ le̱ naꞌ, le guxúe xanneꞌ cuínale chee̱ quebe guzúale chaláꞌala Bénneaꞌ dxuchálajle̱ne̱ꞌ dxiꞌu. Quebe belegache benneꞌ caꞌ buluzúe̱ꞌ chaláꞌala Dios gate naꞌ bchálajle̱ne̱ꞌ le̱ꞌ lu xe̱zr la xu nigá, ne quebe gáchedxu dxiꞌu che guzúadxu chaláꞌala Bénneaꞌ dxuchálajle̱ne̱ꞌ dxiꞌu, zue̱ꞌ xabáa.
\v 26 Lu zra naꞌ gate gunná Dios, naꞌ guzrúꞌ xe̱zr la xu nigá. Naꞌa dxenné̱ꞌ: “Xetú lásaze gunibaꞌ quegaze xe̱zr la xu nigá, san cáꞌanqueze xabáa.”
\v 27 Gate gunné̱ꞌ: “Xetú lásaze”, zéaje̱ na xecáꞌa Dios ca naca da dxeledá, da caꞌ be̱ne̱ꞌ, naꞌ xegáꞌana da quebe sequeꞌ nu gutá.
\v 28 Dxal-laꞌ xe̱dxu Dios: Xcalenuꞌ laweꞌ da gunne̱ꞌ dxiꞌu tu lataj naga dxenná bea Le̱ꞌ da quebe sequeꞌ nu gutá. Dxal-laꞌ güe láꞌanadxu Dios du lázredxu ne dute̱ xel-laꞌ ba láꞌana, ca da dxezaca ba lazre̱ꞌ,
\v 29 laweꞌ da naca Dios chee̱dxu ca tu xiꞌ da guzría xi na da sban.
\c 13
\s Da dxezaca ba lazreꞌ Dios
\p
\v 1 Quebe gusanle ca nazríꞌi ljwézrele tule xetule ca bíchequezle.
\v 2 Le gusá lázrele dxal-laꞌ siꞌ lu naꞌle benneꞌ záꞌaque̱ꞌ lízrele, laweꞌ da gate belún caní bal-la benneꞌ, gulezíꞌ lu ne̱ꞌe̱ gubáz chee̱ xabáa caꞌ, ne quebe guleque beꞌene̱ꞌ.
\p
\v 3 Le gusá lázrele gácale̱le benneꞌ zaj xuꞌe̱ lizre xia, gun cuínale ca benneꞌ xúꞌuqueze lizre xia nen benneꞌ caꞌ. Le gusá lázrele gácale̱le benneꞌ caꞌ dxeledée̱ꞌ xel-laꞌ ziꞌ, gun cuínale ca benneꞌ dxeledéqueze̱ꞌ xel-laꞌ ziꞌ.
\p
\v 4 Xúgute̱le dxal-laꞌ gápale ba láꞌana xel-laꞌ wechaga naꞌ, ne gunle da xlátaje̱ lu xel-laꞌ wechaga naꞌ chee̱le, laweꞌ da guchiꞌa Dios chee̱ benneꞌ caꞌ dxuluzúe̱ꞌ chaláꞌala xel-laꞌ wechaga naꞌ chee̱ꞌ, ne chee̱ benneꞌ caꞌ dxelune̱ꞌ da sban.
\p
\v 5 Quebe sa lázrele xel-laꞌ gunníꞌa. Le xezaca ba lázrele ca da nápale laweꞌ da ba gunná Dios: “Cabataꞌ gusanaꞌ lueꞌ, ne quebe cueaj xíchajquezaꞌ lueꞌ.”
\v 6 Caní naca, du lázredxu waca nnadxu:
\q Xranaꞌ Dios dxácale̱ne̱ꞌ nedaꞌ.
\q Quebe zrebaꞌ bi da gusaca bénneache nedaꞌ.
\p
\v 7 Le gusá lázrele gácale̱le benneꞌ caꞌ dxuluxúe̱ꞌ leꞌe, ne dxuluchálajle̱ne̱ꞌ leꞌe dizraꞌ chee̱ Dios. Le naꞌ xque ca da dxelúne̱ꞌ, ne le chéajle̱ chee̱ Dios ca dxelún benneꞌ caꞌ.
\p
\v 8 Túzqueze ca naca Jesucristo neaje, ne naꞌa zra, ne chadía chacanna.
\v 9 Quebe sile ca da dxuluchalaj benneꞌ dxulusé̱dene̱ꞌ da quebe naca na ca da naxúaj na lu xiche láꞌazxa chee̱ Dios. Cháwedxa naca guzúa chuchu lázrdaudxu lu xel-laꞌ zriꞌi lazreꞌ chee̱ Dios, ne quebe chéajle̱dxu da dxeledxixruj bea benneꞌ ca naca da dxal-laꞌ xiꞌaj gágudxu, laweꞌ da benneꞌ caꞌ zjácale̱ne̱ꞌ da caꞌ cabataꞌ ne xelezíꞌ ba neza ne̱ chee̱ da caꞌ.
\p
\v 10 Bxruze judío caꞌ gulawe̱ꞌ béadu caꞌ belutie̱ꞌ lataj láꞌazxa. Quebe zaj naca chee̱ꞌ xelawe̱ꞌ gunaꞌ da dxugúꞌudxu dxiꞌu chee̱ Dios.
\v 11 Bxruze blau judío bzrie̱ꞌ dxen chee̱ béadu caꞌ lu lataj láꞌazxa blau ca tu gunaꞌ da dxegúa na dul-la. Buluzezxe̱ꞌ da nagáꞌana chee̱ béadu caꞌ cúzrela xe̱zre.
\v 12 Cáꞌanqueze gute Jesús cúzrela xe̱zre naꞌ chee̱ bcaꞌana chawe̱ꞌ bénneache ne̱ chee̱ dxen cheé̱queze̱ꞌ.
\v 13 Le dxuaj, gundxu tu zren Cristo, lácala xuluzúa bénneache dxiꞌu chaláꞌala ca belune̱ꞌ chee̱ Le̱ꞌ.
\v 14 Lu xe̱zr la xu nigá quebe de̱ chee̱dxu tu xe̱zre da súate̱queze. Dxebézadxu tu da za zaꞌ.
\v 15 Chee̱ le̱ naꞌ tu dxál-lazqueze güe láꞌanadxu Dios nen dxúꞌaquezdxu ne̱ chee̱ Jesucristo, da naca na ca tu gunaꞌ da dxugúꞌudxu chee̱ Dios.
\v 16 Dxal-laꞌ gusá lázredxu gundxu da xrlátaje, ne bi gunézrujdxu chee̱ benneꞌ caꞌ quebe bi zaj nape̱ꞌ, laweꞌ da dxezaca ba lazreꞌ Dios le̱ na.
\p
\v 17 Le guzúa dizraꞌ chee̱ benneꞌ caꞌ dxuluxúe̱ꞌ leꞌe, ne le gun ca da dxelenné̱ꞌ. Benneꞌ caní dxuluxúe̱ꞌ bénneꞌdu xuꞌule, ne xuluxudée̱ꞌ lau Dios ca da zaj nune̱ꞌ. Che gunle caní, naꞌ benneꞌ caní welune̱ꞌ zrin chee̱ꞌ du lazre̱ꞌ, ne quebe xelezúa xache̱ꞌ, laweꞌ da che quebe gunle caní, quebe bi da ba neza gaca na chee̱le.
\p
\v 18 Le naba lau Dios gaca chaweꞌ chee̱ntuꞌ. Quebe bi zua lu lázrdauntuꞌ da dxagu na zria netuꞌ laweꞌ da dxun ziꞌ lázrentuꞌ guntuꞌ da xrlátaje ca naca xúgute̱ da dxuntuꞌ.
\v 19 Dxenabaꞌ leꞌe nábale lau Dios gunne̱ꞌ nedaꞌ lataj xídazegaꞌ súale̱naꞌ leꞌe naga zúale.
\p
\v 20 Dxenabaꞌ lau Dios, Bénneaꞌ dxunne̱ꞌ dxiꞌu xel-laꞌ dxebeza zri lazreꞌ, ne bsebane̱ꞌ Xránadxu Jesucristo ládujla benneꞌ gate. Lé̱queze̱ꞌ naque̱ꞌ Benneꞌ Blau Dxuxúe̱ꞌ Dxiꞌu, nácadxu zrilaꞌ chee̱ꞌ, naꞌ caní naque̱ꞌ laweꞌ da blalje̱ꞌ dxen chee̱ꞌ da bzua chuchu na xel-laꞌ wezría chadía chacanna da be̱ne̱ꞌ.
\v 21 Dxenabaꞌ Dios gune̱ꞌ leꞌe li lazreꞌ chee̱ séquele gunle da xrlátaje ca da dxaca lazreꞌ Le̱ꞌ, ne gune̱ꞌ chee̱ntuꞌ ca da dxaca lazre̱ꞌ ne̱ chee̱ Jesucristo. ¡Gaca ba Cristo chadía chacanna! ¡Caꞌan gaca na!
\p
\v 22 Leꞌe, benneꞌ bíchaꞌdauꞌ, dxataꞌ xuedaꞌ leꞌe gácale zren lazreꞌ ca naca dizraꞌ caní, da dxulusizre na leꞌe, naꞌ látega da du nigá dxuzúajaꞌ chee̱le.
\v 23 Dxuzendaꞌ leꞌe ba bedxúaj bi bíchedxu Timoteo lizre xia, ne che xeláꞌ zé̱ꞌe̱beꞌ, naꞌ che̱ꞌa-beꞌ gate xedajnnáꞌa leꞌe.
\p
\v 24 Le gugapa diuzre xúgute̱ benneꞌ caꞌ dxuluchálajle̱ne̱ꞌ leꞌe dizraꞌ chee̱ Dios, ne le gugapa diuzre xúgute̱ benneꞌ bíchedxu caꞌ. Benneꞌ zaj zre̱ꞌe̱ xe̱zr la xu Italia nigá dxulugape̱ꞌ leꞌe diuzre.
\p
\v 25 Dxenabaꞌ lau Dios gune̱ꞌ da chaweꞌ chee̱ xúgute̱le leꞌe. ¡Caꞌan gaca na!