\id JAS
\h Santiago
\mt DIZRAꞌ CHEE̱ DIOS DA BZUAJ SANTIAGO
\c 1
\s Santiago dxuzuaje̱ꞌ chee̱ benneꞌ caꞌ zaj nadxúaje̱ꞌ lazrie̱ꞌ
\p
\v 1 Nedaꞌ, Jacobo, nacaꞌ we̱n zrin chee̱ Dios, ne chee̱ Xránadxu Jesucristo. Dxugapaꞌ leꞌe diuzre. Nácale chazrinnu cueꞌ zriꞌine zre sua Israel, ne nase dínnajle du gabíꞌi xe̱zr la xu nigá.
\s Xel-laꞌ sina da za lu naꞌ Dios
\p
\v 2 Benneꞌ bíchaꞌdauꞌ, dxal-laꞌ béle̱ꞌe̱le gate dxedele zane cueꞌ da ste̱be caꞌ,
\v 3 laweꞌ da nézele gate dxedé xel-laꞌ dxeajlí lazreꞌ chee̱le lu da ste̱be, da nigá dxundxa na leꞌe zren lazreꞌ.
\v 4 Le gun ba xuzre gaca li lazreꞌ xel-laꞌ zren lazreꞌ chee̱le chee̱ gácale benneꞌ xrlátaje̱ ne li lazreꞌ, ne quebe bi xázrjele.
\p
\v 5 Che núlale leꞌe dxexázrjele xel-laꞌ sina, le naba na lau Dios, naꞌ Le̱ꞌ gunne̱ꞌ na leꞌe, laweꞌ da dxunézrujle̱ꞌe̱ Dios chee̱ xúgute̱ bénneache, ne quebe dxexezúene̱ꞌ ziꞌ.
\v 6 Dxal-laꞌ nábale nen dute̱ xel-laꞌ dxeajlí lazreꞌ chee̱le, ne quebe gun chupa lázrele. Benneꞌ dxun chupa lazre̱ꞌ naque̱ꞌ ca xeajxruza chee̱ nísadauꞌ da dxua beꞌ nila naꞌla.
\v 7-8 Benneꞌ dxune̱ꞌ caní, ne quebe zrize dxezúa lázrdawe̱ꞌ, ne quebe tuz ca dxun xichaj lázrdawe̱ꞌ quebe dxal-laꞌ guéquene̱ꞌ bi da xunezruj Xránadxu chee̱ꞌ.
\p
\v 9 Tu benneꞌ bíchedxu naque̱ꞌ baxacheꞌ dxal-laꞌ bene̱ꞌ laweꞌ da guzúa Dios le̱ꞌ ca tu benneꞌ zaca.
\v 10 Benneꞌ nape̱ꞌ xel-laꞌ gunníꞌa dxal-laꞌ bene̱ꞌ gate gun Dios le̱ꞌ dxexruj lazreꞌ laweꞌ da naca benneꞌ gunníꞌa ca tu xiaj xixreꞌ da quebe dxezí béateca na.
\v 11 Gate dxalaj gubizra, ne dxennále̱ꞌe̱ na, naꞌ dxebizre xixreꞌ naꞌ, naꞌ dxexruj xiaj chee̱ na, naꞌ dxedé xel-laꞌ xrtan chee̱ na. Cáꞌanqueze gaca chee̱ benneꞌ gunníꞌa, xenitie̱ꞌ dxácate̱ naꞌ dxezíꞌ lu ne̱ꞌe̱ xel-laꞌ gunníꞌa.
\s Ca naca chee̱ da ste̱be caꞌ da dxededxu
\p
\v 12 Ba neza naca na chee̱ benneꞌ dxuchaga lawe̱ꞌ da ste̱be caꞌ dute̱ xel-laꞌ zren lazreꞌ chee̱ꞌ, laweꞌ da che ba bedxúaje̱ꞌ chaweꞌ lu da ste̱be da dxedée̱ꞌ, naꞌ siꞌ lu ne̱ꞌe̱ da nache̱be lazreꞌ Dios gunézruje̱ꞌ chee̱ benneꞌ caꞌ zaj nazriꞌine̱ꞌ Le̱ꞌ.
\v 13 Gate nu benneꞌ zua da dxegúꞌu xel-laꞌ na le̱ꞌ chee̱ gune̱ꞌ da cale̱la, quebe dxal-laꞌ guéquene̱ꞌ dxuzúa Dios da naꞌ dxegúꞌu xel-laꞌ na le̱ꞌ, laweꞌ da quebe bi de̱ da sequeꞌ xegúꞌu xel-laꞌ na Dios chee̱ gune̱ꞌ da cale̱la, ne quebe bi guzúa Dios da xegúꞌu xel-laꞌ na dxiꞌu chee̱ gundxu da cale̱la.
\v 14 Tu benneꞌ zua da dxegúꞌu xel-laꞌ na le̱ꞌ chee̱ gune̱ꞌ da cale̱la gate xel-laꞌ dxezá lazreꞌ da cale̱la chee̱ꞌ dxecáꞌa na le̱ꞌ, ne dxenná beꞌe na le̱ꞌ.
\v 15 Nadxa ca naca xel-laꞌ dxezá lazreꞌ da cale̱la caní dxuluzán na dul-la, naꞌ gate ba guzequeꞌ zua dul-la naꞌ, naꞌ dxute na bénneaꞌ.
\p
\v 16 Benneꞌ bíchaꞌdauꞌ nazriꞌite̱ lazraꞌ, quebe güele lataj nu si xe̱ leꞌe.
\v 17 Xúgute̱ da zaj naca xrlátaje ne da zaj naca li lazreꞌ da dxezidxu záꞌaca na xabáa lu naꞌ Dios, Bénneaꞌ be̱ne̱ꞌ da caꞌ dxulusení na zran xabáa. Dios quegá dxuchá cuine̱ꞌ, ne quebe dxuché̱ꞌe̱ ca dxune̱ꞌ.
\v 18 Ca naca da guca lazreꞌ Dios, ba be̱nne̱ꞌ dxiꞌu xel-laꞌ nabán. Bchínene̱ꞌ dizraꞌ li chee̱ꞌ, chee̱ gácadxu ca tu lina nedxu chee̱ꞌ, chee̱ da ba be̱n Le̱ꞌ.
\s Xel-laꞌ dxucáꞌana szren Dios da naca na li lazreꞌ
\p
\v 19 Chee̱ le̱ naꞌ, benneꞌ bíchaꞌdauꞌ nazriꞌite̱ lazraꞌ, tu tule leꞌe dxal-laꞌ gácale ban lazreꞌ chee̱ xénele, san dxal-laꞌ cueza lázrele ca da nne̱le ne quebe laꞌ zráꞌate̱le.
\v 20 Tu benneꞌ xichaj zraꞌa quebe dxune̱ꞌ da dxezaca ba lazreꞌ Dios.
\v 21 Chee̱ le̱ naꞌ, le gusán xúgute̱ da sban ne ca naca da cale̱la da dxanle̱ꞌe̱ na, naꞌ dute̱ xel-laꞌ dxexruj lazreꞌ chee̱le le siꞌ ca naca dizraꞌ chee̱ Dios da ba naxaza na lu xichaj lázrdaule, laweꞌ da wazequeꞌ dizraꞌ naꞌ guselá na bénneꞌdu xuꞌule.
\p
\v 22 Le gun ca da dxuléꞌe dizraꞌ naꞌ leꞌe, ne quegá xénezele na. Benneꞌ dxénzene̱ꞌ na dxezí xe̱ze cuine̱ꞌ.
\v 23 Bénneaꞌ dxénzene̱ꞌ dizraꞌ naꞌ, ne quebe dxune̱ꞌ ca dxenná na, naque̱ꞌ ca tu benneꞌ dxenné̱ꞌe̱ lawe̱ꞌ tu lu wanaꞌ.
\v 24 Dxenné̱ꞌe̱ ca naque̱ꞌ, naꞌ gate ze xeajze̱ꞌ naꞌ, naꞌ dxal-la lazre̱ꞌ ca naque̱ꞌ.
\v 25 Benneꞌ dxennáꞌ xánnie̱ꞌ ca da bdxixruj beꞌe Dios da naca na li lazreꞌ, ne da dxuselá na dxiꞌu, ne dxusé̱die̱ꞌ ca naca na, ne quegá dxénzene̱ꞌ na, quebe dxal-la lazrte̱ꞌ na. Che dxune̱ꞌ ca naca na, benneꞌ nigá gaca tu da ba neza chee̱ꞌ lu xúgute̱ da dxune̱ꞌ.
\p
\v 26 Che nu benneꞌ dxéquene̱ꞌ naque̱ꞌ benneꞌ dxucáꞌana szren Dios, ne quebe dxezéquene̱ꞌ nna beꞌene̱ꞌ luzre̱ꞌ, benneꞌ nigá dxezí xe̱ze cuine̱ꞌ, naꞌ ca naca xel-laꞌ dxucáꞌana szren Dios chee̱ꞌ dácheze naca na.
\v 27 Xel-laꞌ dxucáꞌana szren Dios da naca na du lazreꞌ, ne da naca na da dxezaca ba lazreꞌ Xradxu Dios naca na caní: Gácale̱dxu bidu caꞌ zaj naze̱be, ne nuꞌula caꞌ ba zaj nate benneꞌ biu chee̱ꞌ gate zaj zue̱ꞌ lu da ziꞌ da xaꞌ, ne quebe gundxu ca naca da sban chee̱ xe̱zr la xu nigá.
\c 2
\s Quebe guchale ca gunle chee̱ tu tu benneꞌ
\p
\v 1 Benneꞌ bíchaꞌdauꞌ, leꞌe dxéajle̱le chee̱ Xránadxu, Benneꞌ xabáa Jesucristo, quebe dxal-laꞌ guchale ca gunle chee̱ tu tu benneꞌ.
\v 2 Che chuꞌu tu benneꞌ naga nazrágale, ne nácue̱ꞌ zra lane̱ꞌ da zaca, ne xuꞌu da naca na oro lu xrube ne̱ꞌe̱, naꞌ cáꞌanqueze che chuꞌu tu benneꞌ xacheꞌ, ne nácue̱ꞌ zra lane̱ꞌ tuzruj,
\v 3 naꞌ che dxeléꞌele cháwedauꞌ bénneaꞌ nácue̱ꞌ zra lane̱ꞌ da zaca, ne dxe̱le le̱ꞌ: “Gudxeꞌe nigala naga nácadxa na chaweꞌ”, naꞌ dxe̱le benneꞌ xacheꞌ naꞌ: “Xeajsé̱ naꞌla, u gudxeꞌe lu xu náꞌte̱ze.”
\v 4 Che dxunle caní, dxuchale ca dxunle chee̱ tu tu benneꞌ, ne dxuchíꞌale ca zaj naca bénneache, quebe naca xrlátaje xichaj lázrdaule.
\p
\v 5 Benneꞌ bíchaꞌdauꞌ nazriꞌite̱ lazraꞌ, le xen da nigá: Dios ba guqué̱ꞌe̱ benneꞌ caꞌ zaj naque̱ꞌ benneꞌ xacheꞌ lu xe̱zr la xu nigá chee̱ xelaque̱ꞌ benneꞌ gunníꞌa lu xel-laꞌ dxeajlí lazreꞌ, ne chee̱ xelezíꞌ lu ne̱ꞌe̱ da nucueza Dios naga dxenná bea Le̱ꞌ, da naꞌ guche̱be lazreꞌ Le̱ꞌ gunézruje̱ꞌ chee̱ benneꞌ caꞌ zaj nazriꞌine̱ꞌ Le̱ꞌ.
\v 6 Leꞌe dxuzúale chaláꞌala benneꞌ xacheꞌ caꞌ. ¿Quegá benneꞌ gunníꞌa caꞌ benneꞌ dxuluchínene̱ꞌ leꞌe, ne dxeleché̱ꞌe̱ leꞌe lau benneꞌ xulaweꞌ caꞌ?
\v 7 ¿Quegá benneꞌ gunníꞌa caꞌ benneꞌ dxelenné̱ꞌ schanniꞌ chee̱ da xrlátaje ca nazíꞌ lale, dxennale nácale bi chee̱ Cristo?
\p
\v 8 Che da li dxunle ca dxenná da nadxixruj beꞌe Dios, da nácadxa blau ca da naxúaj na lu xiche láꞌazxa, dxenná na: Bzriꞌi biche ljwezruꞌ ca nazríꞌi cuinuꞌ, xrlátaje dxunle.
\v 9 Naꞌa che dxuchale ca dxunle chee̱ tu tu benneꞌ, dul-la dxunle, ne nabágale zria laweꞌ da quebe dxunle du ca bdxixruj beꞌe Dios.
\v 10 Che tu benneꞌ dxune̱ꞌ ca zaj naca da nadxixruj beꞌe Dios, san che dxenéguene̱ꞌ ca naca tuze da nadxixruj beꞌene̱ꞌ, naca na cáte̱ze nabague̱ꞌ zria ca zaj naca xúgute̱ da nadxixruj beꞌe Dios.
\v 11 Lé̱queze Dios gunné̱ꞌ: “Quebe gunle dul-la da dxichaj na xrba chee̱ xel-laꞌ wechaga naꞌ”, cáꞌanqueze gunné̱ꞌ: “Quebe gútele benneꞌ.” Caní naca, che tu benneꞌ quebe dxune̱ꞌ dul-la da dxichaj na xrba chee̱ xel-laꞌ wechaga naꞌ, san che dxutie̱ꞌ benneꞌ, ba gunéguene̱ꞌ ca da nadxixruj beꞌe Dios.
\v 12 Leꞌe dxal-laꞌ guchálajle, ne gunle ca dxal-laꞌ xelún benneꞌ caꞌ guchiꞌa Dios ca da dxelune̱ꞌ, benneꞌ caꞌ zaj nalá lu naꞌ da gunná bea Le̱ꞌ.
\v 13 Benneꞌ caꞌ quebe dxelexexache lazre̱ꞌ chee̱ benneꞌ xula, Dios guchiꞌe̱ ca da dxelún benneꞌ caꞌ, ne quebe xexache lazre̱ꞌ chee̱ benneꞌ caꞌ, san benneꞌ caꞌ dxelexexache lazre̱ꞌ chee̱ benneꞌ xula quebe bi zria xelebague̱ꞌ gate Dios guchiꞌe̱ ca da zaj nun benneꞌ caní.
\s Ca naca chee̱ xel-laꞌ dxeajlí lazreꞌ, ne chee̱ zrin dxundxu
\p
\v 14 Leꞌe, benneꞌ bíchaꞌdauꞌ, ¿bizra culuén gapa na che tu benneꞌ dxenné̱ꞌ dxeajlí lazre̱ꞌ Cristo, naꞌ quebe bi dxune̱ꞌ da dxácale̱n nu benneꞌ dxexázrjene̱ꞌ? ¿Wazequeꞌ xel-laꞌ dxeajlí lazreꞌ naꞌ guselá na le̱ꞌ?
\v 15 Che zraꞌ benneꞌ bíchedxu u nuꞌula zandxu, benneꞌ quebe bi zaj de̱ zra lane̱ꞌ u da xelawe̱ꞌ,
\v 16 naꞌ che núlale leꞌe xe̱le benneꞌ caꞌ: “Bexiajzé̱ cháwedauꞌ. Nazréꞌenuꞌ, ne gáguguꞌ szriꞌ”, san che quebe bi gunézrujle ca da dxexázrjene̱ꞌ, ¿bizra culuén gapa da naꞌ gunnále?
\v 17 Caní naca na chee̱ xel-laꞌ dxeajlí lazreꞌ. Che quebe bi zaj de̱ da chaweꞌ da xululéꞌe na che dxeajlí lazreꞌ bénneaꞌ Cristo, xel-laꞌ dxeajlí lazreꞌ chee̱ꞌ naca na ca tu da gate.
\p
\v 18 Wannalja nu benneꞌ: Lueꞌ dxennáuꞌ dxéajle̱ꞌu chee̱ Cristo, naꞌ nedaꞌ dxunaꞌ da chaweꞌ caꞌ. Bleꞌe nedaꞌ dxéajle̱ꞌu chee̱ Cristo ne quebe dxunuꞌ da chaweꞌ caꞌ, naꞌ nedaꞌ guléꞌedaꞌ lueꞌ dxeajlí lazraꞌ Cristo ne̱ chee̱ da chaweꞌ caꞌ da dxunaꞌ.
\v 19 Dxéajle̱ꞌu lueꞌ zua tuze Dios. Nácaqueze na caꞌ. Cáꞌanqueze da xriwe̱ꞌ caꞌ dxeléajle̱ na, ne dxelezrize na lu xel-laꞌ dxelezrebe.
\v 20 Lueꞌ, benneꞌ xala, ¿dxaca lazruꞌ guléꞌedaꞌ lueꞌ naca xel-laꞌ dxeajlí lazreꞌ ca tu da gate che nu benneꞌ dxeajlí lazre̱ꞌ Cristo naꞌ quebe bi zaj de̱ da chaweꞌ da xelunna bea na?
\v 21 ¿Ájazra guca chee̱ xra xrtáudxu Abraham guque̱ꞌ benneꞌ xrlátaje̱ lau Dios? Guca na ne̱ chee̱ da be̱ne̱ꞌ gate guxúe̱ꞌ zríꞌine̱ꞌ Isaac lu bdupa xiaj chee̱ guzezxe̱ꞌ-beꞌ.
\v 22 ¿Quebe dxeleꞌenuꞌ? Ca da be̱n Abraham dxuléꞌe na guxeajlí lazre̱ꞌ Dios, naꞌ xel-laꞌ dxeajlí lazreꞌ chee̱ꞌ guca na du lazreꞌ ne̱ chee̱ da be̱ne̱ꞌ.
\v 23 Caní guca li ca da dxenná na lu xiche láꞌazxa: Abraham guxéajle̱ꞌe̱ chee̱ Dios, naꞌ Dios bléꞌene̱ꞌ le̱ꞌ benneꞌ xrlátaje̱. Naꞌ bchálaje̱ꞌ ca naca chee̱ Abraham, gunné̱ꞌ: “Bi zrágaquezaꞌ, Abraham.”
\p
\v 24 Naꞌa dxeléꞌele Dios dxezíꞌ lu ne̱ꞌe̱ tu benneꞌ ne̱ chee̱ da chaweꞌ da dxune̱ꞌ, ne quegá tuze laweꞌ da dxeajlí lazre̱ꞌ Le̱ꞌ.
\v 25 Cáꞌanqueze guca chee̱ Rahab, nuꞌula we̱n da sban. Nuꞌula nigá guluꞌe̱ lizre̱ꞌ benneꞌ caꞌ gusel-la Josué, naꞌ bsiꞌe̱ benneꞌ caꞌ neza xula chee̱ belelé̱ꞌ lu naꞌ benneꞌ caꞌ dxjaque̱ꞌ wedil-la, naꞌ ne̱ chee̱ da be̱ne̱ꞌ, Dios guzíꞌ lu ne̱ꞌe̱ nuꞌula naꞌ.
\v 26 Ca naca chee̱ be̱laꞌ dxen chee̱dxu, che ba bedxúaj beꞌ chee̱ na, ba nate na, cáꞌanqueze naca chee̱ xel-laꞌ dxeajlí lazreꞌ chee̱dxu. Che quebe bi zaj de̱ da chaweꞌ da xululéꞌe na dxeajlí lazrdxu Cristo, naca na ca tu da gate.
\c 3
\s Ca naca chee̱ lúzredxu
\p
\v 1 Benneꞌ bíchaꞌdauꞌ, quebe dxal-laꞌ gun cuínale benneꞌ dxuluse̱de dizraꞌ chee̱ Dios, laweꞌ da nézele ca gun Dios, guchiꞌa xánnedxe̱ꞌ chee̱ da dxundxu dxiꞌu, dxuchálajdxu xrtizre̱ꞌ.
\v 2 Xúgute̱dxu dxúnle̱ꞌe̱dxu da cale̱la. Che nu benneꞌ quebe bi da cale̱la dxune̱ꞌ ca naca da dxuchálaje̱ꞌ, naque̱ꞌ benneꞌ li lazreꞌ, naꞌ wazéquene̱ꞌ nna beꞌene̱ꞌ ca nácaqueze be̱laꞌ dxen chee̱ꞌ.
\v 3 Gate dxugúꞌudxu xia dxuꞌa bzrinaꞌ chee̱ gunbaꞌ da dxaca lazrdxu, wazéquedxu nna beꞌedxu dute̱baꞌ.
\v 4 Le naꞌ xque ca naca chee̱ da caꞌ dxeledán laweꞌ nísadauꞌ. Lácala zaj naca na da zriꞌa, naꞌ beꞌ da dxuzriga na le̱ na dxácale̱ꞌe̱ na, benneꞌ dxusé̱ꞌe̱ na dxuchínene̱ꞌ tu xágadauze, naꞌ dxenná beꞌene̱ꞌ na chee̱ cheaj na naga dxaca lazreꞌ le̱ꞌ.
\v 5 Cáꞌanqueze naca chee̱ lúzredxu. Naca na tu da dauze da naca chee̱ be̱laꞌ dxen chee̱dxu, naꞌ da zrente̱ da dxenná na. Tu xíꞌdauze waca guzezxe na tu xiꞌa zren.
\v 6 Lúzredxu naca na ca tu xiꞌ. Lúzredxu naca na ca tu xe̱zr la xu sban da zua lu be̱laꞌ dxen chee̱dxu, ne dxuxrinnaj na du ca nácadxu. Zúale̱ ca tu xiꞌ lúzredxu da zaꞌ lataj ba xaꞌ, ne naca na ca tu da dxegúꞌu na xiꞌ ca naca xúgute̱ da dxundxu.
\v 7 Wazequeꞌ nu benneꞌ nna béꞌene̱ꞌ xúgute̱ be̱ xixreꞌ caꞌ, ne be̱ zaj zua xrila, ne be̱ snia caꞌ, ne be̱ zaj zraꞌ lu nísadauꞌ, ne ba gunná béꞌene̱ꞌ-baꞌ.
\v 8 Quebe nu benneꞌ dxezéquene̱ꞌ nna béꞌene̱ꞌ dute̱ da dxenná luzre̱ꞌ. Naca na tu da cale̱la da quebe dxue na lataj nu nna beꞌe le̱ na, ne naca na ca tu be̱ snia, be̱ dxútebaꞌ bénneache caꞌ.
\v 9 Nen lúzredxu níqueze dxue láꞌanadxu Xradxu Dios, ne nen le̱ na dxenné̱quezdxu da cale̱la chee̱ bénneache, benneꞌ caꞌ nun Dios naꞌ luꞌa le saca Lé̱queze̱ꞌ.
\v 10 Lu dxúꞌadxu náꞌqueze dxeledxúaj da xrlátaje ne da cale̱la. Benneꞌ bíchaꞌdauꞌ, da nigá quebe dxal-laꞌ gaca na caꞌ.
\v 11 ¿Waca galaj nisa chaweꞌ ne nisa slaꞌ lu tuze beaj?
\v 12 Benneꞌ bíchaꞌdauꞌ, ¿waca tu xaga higo cuía na da zixre chee̱ xaga olivo? ¿Waca tu lba uva cuía na da zixre chee̱ xaga higo? Cáꞌanqueze, tu beaj quebe gaca gunna na nisa xeneꞌ, ne nisa zri lazreꞌ.
\s Xel-laꞌ sina da naca li lazreꞌ
\p
\v 13 Che zua tu benneꞌ ládujla leꞌe naque̱ꞌ benneꞌ sina, ne dxéajniꞌine̱ꞌ, dxal-laꞌ guléꞌene̱ꞌ na ne̱ chee̱ da chaweꞌ da dxune̱ꞌ dute̱ xel-laꞌ dxexruj lazreꞌ chee̱ꞌ da dxunezruj xel-laꞌ sina le̱ꞌ.
\v 14 Che zua lu lázrdaule xel-laꞌ zreꞌe lazreꞌ ne xel-laꞌ xa lazreꞌ, quebe dxal-laꞌ gucáꞌana szren cuínale ca naca xel-laꞌ sina chee̱le laweꞌ da caní nne̱le da we̱n lazreꞌ chee̱ da naca da li.
\v 15 Xel-laꞌ sina caní quebe naca na chee̱ Dios. Naca na chee̱ xe̱zr la xu nigá, ne chee̱ bénneache, ne za na lu naꞌ da xriwe̱ꞌ.
\v 16 Naga zua xel-laꞌ zreꞌe lazreꞌ ne xel-laꞌ xa lazreꞌ, naꞌ zaj zraꞌ benneꞌ wechacha caꞌ, ne dxelune̱ꞌ xúgute̱ da cale̱la.
\v 17 Benneꞌ zaj nape̱ꞌ xel-laꞌ sina da dxunna Dios zaj naque̱ꞌ du lazreꞌ, ne zren lazreꞌ, ne dxeꞌene lazreꞌ, ne dxexruj lazreꞌ. Dxelexache lazreꞌ ljwezre̱ꞌ, ne dxelune̱ꞌ da chaweꞌ. Zaj naque̱ꞌ li lazreꞌ ne quebe dxelune̱ꞌ cúzreze da chaweꞌ.
\v 18 Benneꞌ dxelebeche zrie̱ꞌ da ba xaꞌ dxelune̱ꞌ tu zrin da naca ca tu binne da dxunna na da chaweꞌ.
\c 4
\s Ca naca chee̱ benneꞌ zaj nazriꞌine̱ꞌ da zaj naca chee̱ xe̱zr la xu nigá
\p
\v 1 ¿Bizr chee̱ naꞌ dxedíl-lale ne dxeꞌ da ba xaꞌ ládujla leꞌe? Dxaca caní laweꞌ da dxezá lázrele da zaj naca chee̱ da cale̱la, da dxuluzúa na leꞌe lu da ba xaꞌ.
\v 2 Leꞌe dxaca lázrele bi gápale, naꞌ laweꞌ da quebe dxezruéꞌele na, naꞌ dxútele benneꞌ. Dxezá lázrele tu da sile, naꞌ laweꞌ da quebe dxezéquele sile na, naꞌ dxedíl-lale̱ ljwézrele, ne dxebéquele da ba xaꞌ. Quebe dxezile ca da dxezá lázrele laweꞌ da quebe dxenábale na lau Dios.
\v 3 Che dxenábale na, quebe dxezile na laweꞌ da dxenábale na cale̱la, laweꞌ da dxedánele na chee̱ guchínele na ca da dxaca lázrele.
\v 4 Leꞌe, benneꞌ quebe nácale li lazreꞌ, ¿quebe nézele che nu benneꞌ dxedánnene̱ꞌ da cale̱la da de̱ lu xe̱zr la xu nigá, benneꞌ nigá dxecuídene̱ꞌ Dios? Nútete̱ze benneꞌ dxaca lazre̱ꞌ siꞌe̱ ba neza ca da dxaca lu xe̱zr la xu nigá naque̱ꞌ benneꞌ dxecuídene̱ꞌ Dios.
\v 5 Chee̱ le̱ naꞌ dxenná xiche láꞌazxa: Beꞌ da nuzúa Dios lázrdaudxu cadite dxeꞌe̱ gunne xue chee̱dxu.
\v 6 Dios dxácale̱dxene̱ꞌ dxiꞌu lu xel-laꞌ xrlátaje chee̱ꞌ, ca dxenná xiche láꞌazxa: Dios dxezré̱ꞌe̱ benneꞌ caꞌ dxulucáꞌana szren cuina, naꞌ dute̱ xel-laꞌ xrlátaje chee̱ꞌ dxácale̱ne̱ꞌ benneꞌ dxexruj lazreꞌ caꞌ.
\q
\v 7 Le guzúa dizraꞌ chee̱ Dios.
\q Le til-la da xriwe̱ꞌ, naꞌ le̱ na xuzrunnuj na naga zrale.
\q
\v 8 Le biga lau Dios, naꞌ Le̱ꞌ bigue̱ꞌ naga zúale leꞌe.
\q Leꞌe, benneꞌ dul-la, le gupáꞌa cuínale chee̱ dul-la da nabágale.
\q Leꞌe, benneꞌ quebe nazriꞌile Dios du lázrele, le gaca benneꞌ du lazreꞌ.
\q
\v 9 Le guzua ba xaꞌ lázreꞌle.
\q Le cuezre, ne le gaca xacheꞌ lazreꞌ.
\q Québedxa guzrízrele, naꞌ le cuezre.
\q Québedxa bele, ne le xewine lazreꞌ.
\q
\v 10 Le gaca dxexruj lazreꞌ lau Xránadxu, naꞌ Le̱ꞌ gucáꞌana szrene̱ꞌ leꞌe.
\s Quebe dxal-laꞌ guchíꞌadxu ca da dxun tu benneꞌ bíchedxu
\p
\v 11 Leꞌe, benneꞌ bíchaꞌdauꞌ, quebe nne̱le chee̱ ljwézrele tule xetule. Benneꞌ dxenné̱ꞌ chee̱ tu benneꞌ bíchedxu, u dxuchiꞌe̱ ca da dxun bénneaꞌ, naque̱ꞌ benneꞌ dxenné̱ꞌ cale̱la chee̱ da bdxixruj beꞌe Dios, ne dxebée̱ꞌ ca zaj naca da bdxixruj beꞌe Dios. Che dxebéuꞌ ca zaj naca da bdxixruj beꞌe Dios, dxun cuinuꞌ ca benneꞌ dxuchiꞌe̱ da dxaca, ne quebe dxuzúꞌ dizraꞌ da bdxixruj beꞌe̱.
\v 12 Zua tuze Dios, Bénneaꞌ bdxixruj beꞌe̱ da caꞌ, ne dxuchiꞌe̱ da dxaca, naꞌ Lé̱queze̱ꞌ wazéquene̱ꞌ guselé̱ꞌ dxiꞌu, ne guzría xiꞌe̱ dxiꞌu. Lueꞌ, ¿núzraqueze nacuꞌ, dxuchiꞌu da dxun benneꞌ xula?
\s Quebe nezdxu bi gaca wxre
\p
\v 13 Naꞌa, le xene da nigá, leꞌe dxennale: Naꞌa u wxre chéajdxu tu xe̱zre ne cheajsúadxu naꞌ tu iza. Gáꞌudxu, ne gútedxu chee̱ gucúdedxu dumí.
\v 14 Quebe nézele ca da gaca wxre. ¿Ájazra naca chee̱ xel-laꞌ nabán chee̱dxu? Naca na ca tu beuj da dxebéꞌ tu chiꞌi, naꞌ chadí dxenite na.
\v 15 Da dxal-laꞌ guchálajle naca caní: Che Xránadxu dxaca lazre̱ꞌ, gaca bandxu ne gundxu da nigá u da naꞌ.
\v 16 Leꞌe dxucáꞌana szren cuínale ca da dxuchálajle. Xel-laꞌ dxucáꞌana szren cuina caní naca na da cale̱la.
\v 17 Che nu benneꞌ ba nézene̱ꞌ ca da chaweꞌ da dxal-laꞌ gune̱ꞌ, naꞌ quebe dxune̱ꞌ na, naꞌ bágale̱ꞌe̱ dul-la.
\c 5
\s Santiago dxusízrene̱ꞌ benneꞌ gunníꞌa caꞌ
\p
\v 1 Le xene da nigá, leꞌe, benneꞌ gunníꞌa. Le cuezre ne le xewine lazreꞌ ca naca da ziꞌ da xaꞌ da léꞌele.
\v 2 Ca naca xel-laꞌ gunníꞌa chee̱le ba zaj nuzru na, naꞌ zra lánale zaca ba zaj nagu béadu caꞌ le̱ na.
\v 3 Ca naca oro chee̱le ne plata chee̱le, ba gulezén xrche̱ꞌe̱ na, naꞌ laweꞌ da quebe bchínele da gunníꞌa chee̱le lu da xrlátaje, da caní dxululéꞌe na nabágale zria lau Dios, naꞌ Le̱ꞌ gudée̱ꞌ leꞌe lu da ba xaꞌ. Caní gaca chee̱le laweꞌ da btúbele xel-laꞌ gunníꞌa chee̱ gápale na gate ba dxéxrule.
\v 4 Quebe gudízrujle ca naca chee̱ na benneꞌ caꞌ belexelape̱ꞌ lina chee̱le, naꞌ dxelawe̱ꞌ zria chee̱ da quebe gudízrujle, naꞌ Xránadxu, Bénneaꞌ nape̱ꞌ dute̱ xel-laꞌ dxenná bea, ba benne̱ꞌ ca naca zria da dxelagu benneꞌ caꞌ chee̱le leꞌe.
\v 5 Lu xe̱zr la xu nigá ba guzile ba neza xel-laꞌ gunníꞌa chee̱le ne xúgute̱ da zaca caꞌ, ne guzrenle ca tu be̱zre dxánnele̱ꞌe̱, naꞌ ba dxezrín zra xelútie̱ꞌ-baꞌ.
\v 6 Leꞌe ba bzria xile, ne ba bé̱tele benneꞌ quebe bi da cale̱la zaj nune̱ꞌ, naꞌ benneꞌ caꞌ quebe guledábague̱ꞌ leꞌe.
\s Dxal-laꞌ gácadxu benneꞌ zren lazreꞌ ne guchálajle̱dxu Dios
\p
\v 7 Chee̱ le̱ naꞌ, benneꞌ bíchaꞌdauꞌ, le gaca zren lazreꞌ ca zrindxa zra xeláꞌ Xránadxu. Benneꞌ dxaza dxaꞌana dxal-laꞌ cueze̱ꞌ dute̱ xel-laꞌ zren lazreꞌ chee̱ꞌ ca zrindxa zra xeláꞌ xiuj ba ne xiuj lina, chee̱ xezíꞌ lu ne̱ꞌe̱ lina chaweꞌ chee̱ꞌ.
\v 8 Cáꞌanqueze le gaca zren lazreꞌ, ne quebe gute lázrele, laweꞌ da ba zua gagu zra xeláꞌ Xránadxu.
\v 9 Leꞌe, benneꞌ bíchaꞌdauꞌ, quebe gágule zria chee̱ ljwézrele, chee̱ quebe guchiꞌa Dios chee̱ da dxunle, laweꞌ da zua gágute̱ zra xeláꞌ Dios, Bénneaꞌ dxuchiꞌe̱ da dxaca.
\v 10 Leꞌe, benneꞌ bíchaꞌdauꞌ, le gusá lázrele ca guca chee̱ benneꞌ caꞌ gulenné̱ꞌ waláz chee̱ Dios, gulaque̱ꞌ zren lazreꞌ lácala guledéeꞌ xel-laꞌ ziꞌ.
\v 11 Dxennadxu guca da ba neza zren chee̱ benneꞌ caꞌ buluchaga lawe̱ꞌ xel-laꞌ ziꞌ caꞌ. Leꞌe ba benle ca benneꞌ zren lazreꞌ guca Job, ne ba nézele ca da chaweꞌ be̱n Dios chee̱ꞌ ca gudé naꞌ. Xránadxu naque̱ꞌ zriꞌi lazreꞌ, ne dxexache lazre̱ꞌ dxiꞌu.
\p
\v 12 Da dxundxa na ba xen, benneꞌ bíchaꞌdauꞌ, quebe guzétajle xabáa, ne quebe guzétajle da zua xe̱zr la xu nigá, ne quebe bi da xula guzétajle. Gate nnale: Aweꞌ, le nnaze: Aweꞌ, ne gate nnale: Cabí, le nnaze: Cabí, chee̱ quebe guzría xiꞌ Dios leꞌe.
\p
\v 13 Che núlale dxedele lu da ziꞌ da xaꞌ, dxal-laꞌ guchálajle̱nle Dios. Che nu benneꞌ zue̱ꞌ xel-laꞌ dxebé, dxal-laꞌ gul-le̱ꞌ da güe láꞌane̱ꞌ Dios.
\v 14 Che nu benneꞌ quebe chaweꞌ zue̱ꞌ, dxal-laꞌ nne̱ꞌ benneꞌ gula caꞌ dxuluxúe̱ꞌ bi chee̱ Cristo, chee̱ xelenabe̱ꞌ lau Dios xexune̱ꞌ benneꞌ we̱ꞌ naꞌ, ne xelegúꞌe̱ le̱ꞌ da za lu La Xránadxu.
\v 15 Gate dxuluchálajle̱ne̱ꞌ Dios dute̱ xel-laꞌ dxeleajlí lazreꞌ chee̱ꞌ, naꞌ xexaca benneꞌ we̱ꞌ naꞌ, naꞌ Xránadxu xechise̱ꞌ le̱ꞌ, ne che bi dul-la nune̱ꞌ, naꞌ gunite lau Dios chee̱ bénneaꞌ.
\v 16 Chee̱ le̱ naꞌ, le xrúale̱pe lau ljwézrele tule xetule dul-la da nunle, ne le guchálajle̱ Dios chee̱ tule xetule, chee̱ xexune̱ꞌ leꞌe. Da dxenaba benneꞌ xrlátaje̱ du lazre̱ꞌ lau Dios wazruéꞌene̱ꞌ na.
\v 17 Elías, bénneaꞌ gunné̱ꞌ waláz chee̱ Dios, guque̱ꞌ tu bénneache ca dxiꞌu, naꞌ gate gunabe̱ꞌ lau Dios chee̱ quebe gaca xiuj, naꞌ quebe guca xiuj lu xe̱zr la xu dute̱ chun iza xugachaj.
\v 18 Gudé naꞌ, gate gunabe̱ꞌ lau Dios da xula, naꞌ beláꞌ xiuj, naꞌ xe̱zr la xu naꞌ be̱nna na lina.
\p
\v 19 Leꞌe, benneꞌ bíchaꞌdauꞌ, che nu benneꞌ ládujla leꞌe dxecuase̱ꞌ lu da li, naꞌ che núlale leꞌe xeguꞌule le̱ꞌ lu xel-laꞌ li,
\v 20 dxal-laꞌ nézele, nútete̱ze benneꞌ xucuase̱ꞌ tu benneꞌ dul-la lu neza cale̱la da zeajle̱ne̱ꞌ, guselé̱ꞌ bénneꞌdu xuꞌu benneꞌ dul-la naꞌ lu xel-laꞌ gute, naꞌ xunite lau Dios dul-la zan da nabaga bénneaꞌ.