\id 1PE
\h 1 San Pedro
\mt DÍZRAꞌDAUꞌ NEDXU DA BZUAJ SAN PEDRO
\c 1
\s Dizraꞌ gusel-la Pedro chee̱ benneꞌ caꞌ gucáꞌa Jesús, ne zaj nase dínnaje̱ꞌ
\p
\v 1 Nedaꞌ, Pedro, nacaꞌ benneꞌ gubáz chee̱ Jesucristo. Dxuzúajaꞌ da nigá chee̱le leꞌe nadxúajle lázrele, ne zrale xe̱zre caꞌ zaj nababa Ponto, ne xe̱zre caꞌ zaj nababa Galacia, ne xe̱zre caꞌ zaj nababa Capadocia, ne xe̱zre caꞌ zaj nababa Asia, ne xe̱zre caꞌ zaj nababa Bitinia.
\v 2 Xradxu Dios ba guqué̱ꞌe̱ leꞌe ca da gunné̱ꞌ gate nate. Ne̱ chee̱ Beꞌ Láꞌazxa ba gucáꞌa Dios leꞌe chee̱ guzúale dizraꞌ chee̱ꞌ, ne chee̱ chádxele lu dxen chee̱ Jesucristo. Dxenabaꞌ lau Dios gúnnale̱ꞌe̱ leꞌe da chaweꞌ, ne xel-laꞌ dxebeza zri lazreꞌ.
\s Ca da dxebeza lázredxu
\p
\v 3 Dxue láꞌanadxu Dios, Xra Xránadxu Jesucristo. Laweꞌ da dxexache lázrele̱ꞌe̱ dxiꞌu ba be̱ne̱ꞌ chee̱dxu bexálajdxu laweꞌ da bebán Jesucristo ládujla benneꞌ gate. Da nigá nuzaga na dxiꞌu chee̱ cueza lázredxu,
\v 4 ne gun na sile ca da nucueza Dios chee̱le xabáa, da naꞌ quebe cuia xi na, ne quebe xexúe na, ne quebe te chee̱ na.
\v 5 Laweꞌ da dxéajle̱le chee̱ Dios, Le̱ꞌ guxre̱ꞌ leꞌe nen xel-laꞌ waca chee̱ꞌ ca zrindxa zra naꞌ sile du ca naca xel-laꞌ weselá da nucueze̱ꞌ chee̱dxu, naꞌ guléꞌene̱ꞌ na lu zra bze̱be niꞌ.
\p
\v 6 Chee̱ le̱ naꞌ dxebéle̱ꞌe̱le lácala dxun na ba xen tele xel-laꞌ ziꞌ tu chíꞌidauꞌ.
\v 7 Xel-laꞌ dxeajlí lazreꞌ chee̱le gaca chee̱ na ca dxaca chee̱ oro da dxedé na lu xiꞌ chee̱ xegáꞌana chaweꞌ na. Caní naca chee̱ xel-laꞌ dxeajlí lazreꞌ chee̱le, gate ba gudé na lu xel-laꞌ ziꞌ, naꞌ xegáꞌana na da zácadxa chee̱ sile xel-laꞌ szren, ne xel-laꞌ ba láꞌana lu zra naꞌ gate xeláꞌ Jesucristo.
\p
\v 8 Leꞌe nazriꞌile Jesucristo lácala quebe ne léꞌele Le̱ꞌ, naꞌ laweꞌ da nuxrén lázrele Le̱ꞌ lácala quebe ne xeléꞌele Le̱ꞌ, dxebéle̱ꞌe̱le. Ca naca xel-laꞌ dxebé chee̱le naca na da zrente̱ da quebe séquentuꞌ xuzájlaꞌantuꞌ
\v 9 laweꞌ da nalá bénneꞌdu xuꞌule laweꞌ da dxéajle̱le chee̱ Dios.
\v 10 Lu iza da ba guledé gate nate, benneꞌ caꞌ gulenné̱ꞌ waláz chee̱ Dios buluxúe xánnie̱ꞌ, ne belexebéajniꞌe̱ ca naca chee̱ xel-laꞌ weselá nigá, naꞌ buluchálaje̱ꞌ ca naca xel-laꞌ chaweꞌ chee̱ Dios da gunne̱ꞌ leꞌe.
\v 11 Beꞌ Láꞌazxa, Bénneaꞌ gusel-la Cristo, bzéajniꞌine̱ꞌ benneꞌ caꞌ buluchálaje̱ꞌ waláz chee̱ Dios gate nate ca da saca Cristo, ne ca naca xel-laꞌ szren da siꞌe̱ te naꞌ, naꞌ benneꞌ caꞌ belexexílaje̱ꞌ nuzra benneꞌ nigá, ne bátala gaca da dxenná Beꞌ Láꞌazxa, Bénneaꞌ zúale̱ le̱ꞌ.
\v 12 Dios bzéajniꞌine̱ꞌ benneꞌ caꞌ ca naca chee̱ da naꞌ dxuluchálaje̱ꞌ, gunné̱ꞌ quebe naca na chee̱ lé̱queze̱ꞌ, san naca na chee̱dxu dxiꞌu. Naꞌa, da nigá naca dizraꞌ chaweꞌ da ba bénquezle, da buluchalaj benneꞌ caꞌ ne̱ chee̱ Beꞌ Láꞌazxa, Bénneaꞌ ze̱ꞌe̱ xabáa. Da caní gulaca lazreꞌ gubáz chee̱ xabáa xeléajniꞌine̱ꞌ.
\s Dios dxenné̱ꞌ dxiꞌu chee̱ gácadxu bi láꞌazxa chee̱ꞌ
\p
\v 13 Chee̱ le̱ naꞌ, le guxúe xanneꞌ ca da gunle. Tu dxál-lazqueze gunle da xrlátaje. Dute̱ lázrdaule le guxrén lazreꞌ xel-laꞌ chaweꞌ chee̱ Dios, ne le cueza da gunne̱ꞌ leꞌe lu zra naꞌ gate xeláꞌ Jesucristo.
\v 14 Laweꞌ da nácale bi chee̱ Dios, le guzúa dizraꞌ chee̱ꞌ, ne québedxa gunle ca da guzá lázrele gate quebe ne gúnbeale Dios.
\v 15 Naꞌa, le ta lu xel-laꞌ láꞌazxa chee̱ꞌ laweꞌ da naca Dios láꞌazxa, Bénneaꞌ gunné̱ꞌ leꞌe.
\v 16 Cáꞌanqueze naxúajqueze na lu xiche láꞌazxa chee̱ꞌ, dxenné̱ꞌ: “Le gaca láꞌazxa, laweꞌ da nacaꞌ nedaꞌ láꞌazxa.”
\p
\v 17 Che dxennale leꞌe naca Dios Xrale, naꞌ Le̱ꞌ dxuchiꞌe̱ ca da dxelún bénneache, dxal-laꞌ zrébele Le̱ꞌ dxácate̱ ne zúale lu xe̱zr la xu nigá.
\v 18 Dios ba bselé̱ꞌ leꞌe lu da benle gate naꞌ guxíajle̱le ca da belún xra xrtaule, da cale̱la, naꞌ ba nézquezle quebe guca na ne̱ chee̱ tu da dxuzru na ca oro, ne plata.
\v 19 Bselé̱ꞌ leꞌe ne̱ chee̱ dxen zácale̱ꞌe̱ chee̱ Cristo, Bénneaꞌ bzua cuine̱ꞌ lau Dios ca tu zrílaꞌdauꞌ du lazreꞌ, ne quebe nadxenbaꞌ, be̱ dxelutie̱ꞌ chee̱ xunite lau Dios dul-la zaj nabague̱ꞌ.
\v 20 Cristo ba nácaqueze chee̱ꞌ gate nate saque̱ꞌ da nigá, naꞌ ble̱ꞌe̱ lu zra caní chee̱ gaca chaweꞌ chee̱le.
\v 21 Ne̱ chee̱ Cristo dxéajle̱le chee̱ Dios, Bénneaꞌ bsebane̱ꞌ Le̱ꞌ ládujla benneꞌ gate, ne bcaꞌane̱ꞌ Le̱ꞌ szren. Chee̱ le̱ naꞌ dxéajle̱le chee̱ Dios, ne dxuxrén lázrele Le̱ꞌ.
\p
\v 22 Naꞌa, ba bzúale dizraꞌ chee̱ xel-laꞌ li ne̱ chee̱ Beꞌ Láꞌazxa, chee̱ zriꞌile dute̱ lázrdaule benneꞌ zaj nababe̱ꞌ dxiꞌu. Chee̱ le̱ naꞌ dxal-laꞌ zriꞌile ljwézrele tule xetule dute̱ lázrdaule, ne dute̱ xel-laꞌ wala chee̱le.
\v 23 Caní naca na laweꞌ da ba bexálajle, quegá chee̱ bénneache, benneꞌ dxelate. Nálajle ne̱ chee̱ dizraꞌ chee̱ Dios, da naca ban na, ne da zua na chadía chacanna.
\v 24 Caní naca na laweꞌ da naxúaj na lu xiche láꞌazxa, da dxenná na:
\q Xúgute̱ bénneache zaj naque̱ꞌ ca xixreꞌ,
\q naꞌ xel-laꞌ szren chee̱ꞌ naca na ca xiaj chee̱ xíxreꞌdu caꞌ.
\q Xixreꞌ naꞌ dxebizre na, naꞌ xiaj chee̱ na dxexruj na.
\p
\v 25 Dizraꞌ chee̱ Xránadxu zúatequeze na chadía chacanna.
\m Dizraꞌ nigá ba benle leꞌe ne̱ chee̱ dizraꞌ chaweꞌ da dxuchálajntuꞌ.
\c 2
\p
\v 1 Chee̱ le̱ naꞌ, québedxa gunle da cale̱la. Québedxa nu si xe̱le, ne quebe gunle láweze da xrlátaje. Québedxa gácale xa lazreꞌ, ne quebe bi nne̱le chee̱ ljwézrele.
\v 2 Cáte̱ze dxeledane bidu dxeꞌene caꞌ nizreꞌ, caꞌ le gane xrtizra Dios, da naca na du lazreꞌ, chee̱ gun na se̱ cháchale, ne lale lu naꞌ dul-la.
\v 3 Che da li ba guzú laule nézele naca Xránadxu chaweꞌ, naꞌ gaca lázrele sídxale xrtizre̱ꞌ.
\s Cristo naque̱ꞌ ca xiaj xre ban
\p
\v 4 Le biga lau Xránadxu, Bénneaꞌ naque̱ꞌ ca xiaj xre ban. Bénneache buluzúe̱ꞌ Le̱ꞌ chaláꞌala, san lau Dios naque̱ꞌ tu xiaj chaweꞌ da zácale̱ꞌe̱ na.
\v 5 Cáꞌanqueze leꞌe nácale ca xiaj ban caꞌ. Le güe Dios lataj guchínene̱ꞌ leꞌe chee̱ gune̱ꞌ tu xudauꞌ chee̱ Beꞌ Láꞌazxa chee̱ꞌ, gácale bxruze chee̱ Dios chee̱ guzúale lau Dios ca da dxunna Beꞌ Láꞌazxa leꞌe. Da nigá waca gunle ne̱ chee̱ Jesucristo, da xezaca ba lazreꞌ Dios.
\v 6 Chee̱ le̱ naꞌ lu xiche láꞌazxa dxenná Dios:
\q Nedaꞌ nuzúaꞌ lu xe̱zre láꞌazxa tu benneꞌ
\q naque̱ꞌ ca tu xiaj blau chee̱ xuꞌu,
\q da naca na tu xiaj du lazreꞌ,
\q ne da zácale̱ꞌe̱ na,
\q naꞌ nu benneꞌ chéajle̱ꞌe̱ chee̱ Le̱ꞌ
\q quebe gaca xel-laꞌ stu chee̱ꞌ.
\m
\v 7 Chee̱le leꞌe dxéajle̱le chee̱ꞌ, xiaj nigá zácale̱ꞌe̱ na, san chee̱ benneꞌ caꞌ quebe dxéajle̱ꞌe̱ naca na ca da dxenná xiche láꞌazxa:
\q Xiaj naꞌ buluzúa benneꞌ we̱n xuꞌu caꞌ chaláꞌala,
\q le̱ naꞌ naca na xiaj blau.
\m
\v 8 Cáꞌanqueze naca na ca dxenná xiche láꞌazxa:
\q Naque̱ꞌ tu xiaj da dxechegu bénneache,
\q naꞌ laweꞌ le̱ naꞌ dxeajlecházie̱ꞌ.
\m Caní naca na, dxeajlecházie̱ꞌ laweꞌ da quebe dxeleziꞌe̱ dizraꞌ chee̱ Dios. Dios ba núnqueze̱ꞌ gaca caní chee̱ benneꞌ caꞌ.
\s Benneꞌ zaj naque̱ꞌ bi chee̱ Dios
\p
\v 9 Leꞌe nácale benneꞌ ba gucáꞌa Dios. Nácale bxuze lu zrin chee̱ Benneꞌ Wenná Bea, Jesús. Nácale tu xe̱zre láꞌazxa chee̱ Dios, naꞌ Le̱ꞌ naxáꞌawene̱ꞌ leꞌe chee̱ guzenle bénneache ca naca xel-laꞌ szren chee̱ Dios. Le̱ꞌ gunné̱ꞌ leꞌe chee̱ xedxúajle lu da chul-la, naꞌ súale lu xel-laꞌ naxaníꞌ li lazreꞌ chee̱ꞌ.
\v 10 Gate nate quebe nu bexache lazreꞌ leꞌe, san naꞌa Diósqueze̱ꞌ dxexache lazre̱ꞌ leꞌe.
\s Zúale chee̱ gunle zrin chee̱ Dios
\p
\v 11 Bi bichaꞌ nazriꞌite̱ lazraꞌ, dxataꞌ xuedaꞌ leꞌe, nácale ca benneꞌ zaj zre̱ꞌe̱ zituꞌ naga zua lazre̱ꞌ, chee̱ quebe gunle ca da dxenná be̱laꞌ dxen chee̱le, da dxedíl-lale̱ na bénneꞌdu xuꞌule.
\v 12 Ca da dxunle, dxal-laꞌ gaca na xrlátaje lau bénneache quebe zaj núnbeꞌe̱ Dios. Caní gaca na, lácala naꞌa dxelenné̱ꞌ chee̱le, dxelennéꞌ nácale benneꞌ caꞌ dxelune̱ꞌ da zrinnaj, naꞌ weleléꞌequezne̱ꞌ da xrlátaje da dxunle, naꞌ xelúe láꞌanaqueze̱ꞌ Dios gate zrin zra xenaba Dios da be̱n tu tu bénneache.
\p
\v 13 Laweꞌ da nácale bi chee̱ Xránadxu, le guzúa dizraꞌ ca da dxenná benneꞌ xuꞌu laweꞌ, bénneaꞌ buluzúa benneꞌ xe̱zre caꞌ. Le guzúa dizraꞌ chee̱ benneꞌ nape̱ꞌ xel-laꞌ dxenná bea zren,
\v 14 ne chee̱ benneꞌ dxelenná bea, benneꞌ caꞌ nasel-la le̱ꞌ chee̱ xuludée̱ꞌ xel-laꞌ ziꞌ benneꞌ caꞌ dxelune̱ꞌ da zrinnaj, ne xeluꞌe̱ ba láꞌana benneꞌ caꞌ dxelune̱ꞌ da xrlátaje.
\v 15 Dios dxaca lazre̱ꞌ gunle leꞌe da xrlátaje chee̱ guzúa zrile benneꞌ caꞌ quebe zaj naxéajniꞌine̱ꞌ, gate dxelenné̱ꞌ cale̱la chee̱ dizraꞌ chaweꞌ da nazile.
\p
\v 16 Le gaca ca benneꞌ quebe zaj nadaꞌu, san quebe guchínele da naꞌ nazile, quebe gunle da cale̱la. Le gaca ca benneꞌ caꞌ dxenná beꞌe Dios.
\v 17 Le gapa ba láꞌana xúgute̱ bénneache. Le zriꞌi bi bíchedxu caꞌ. Le zrebe Dios, ne le gapa ba láꞌana benneꞌ dxenná beꞌe̱.
\s Ca da guzaca ziꞌ Cristo dxuzéajniꞌi na dxiꞌu
\p
\v 18 Leꞌe, bi we̱n zrin, le guzúa dizraꞌ chee̱ xránale dute̱ xel-laꞌ ba láꞌana, quegaze chee̱ benneꞌ zaj naque̱ꞌ zriꞌi lazreꞌ, ne dxelebéꞌe̱ gunne xue chee̱le, san cáꞌanqueze gunle chee̱ benneꞌ snia caꞌ zaj naque̱ꞌ xránale.
\v 19 Naca na tu da xrlátaje che guchaga laudxu xel-laꞌ ziꞌ da dxulusaca bénneache dxiꞌu gate dxundxu da nezdxu naca na da dxezaca ba lazreꞌ Dios.
\v 20 Che dxunle tu da cale̱la, naꞌ dxulusaca ziꞌe̱ leꞌe, ¿bizra da ba neza gaca na chee̱le? Naꞌa, che dxedele xel-laꞌ ziꞌ laweꞌ da dxunle da xrlátaje, ne dxuchaga laule na dute̱ xel-laꞌ zren lazreꞌ chee̱le, da nigá naca na xrlátaje lau Dios.
\v 21 Dios gunnéꞌ leꞌe chee̱ tele xel-laꞌ ziꞌ caní, laweꞌ da gudé Cristo xel-laꞌ ziꞌ waláz chee̱le leꞌe, da dxuzéajniꞌi na leꞌe gunle ca da be̱n Le̱ꞌ.
\q
\v 22 Le̱ꞌ quebe be̱neꞌ dul-la, ne quebe nu guzí xe̱ꞌe̱.
\q
\v 23 Gate bulucháchale̱ne̱ꞌ Le̱ꞌ, quebe bi dizraꞌ schanniꞌ beche̱be̱ꞌ.
\q Gate buludée̱ꞌ Le̱ꞌ xel-laꞌ ziꞌ, Le̱ꞌ quebe bexéchaje̱ꞌ.
\m Bzua cuine̱ꞌ lu naꞌ Dios, Bénneaꞌ dxuchiꞌe̱ ca da naca na.
\v 24 Biáꞌqueze Cristo naꞌ lu be̱laꞌ dxen chee̱ꞌ ca naca dul-la chee̱dxu gate gude̱ꞌe̱ le̱ꞌe̱ xaga begúaj, chee̱ gácadxu ca benneꞌ gate, québedxa gundxu dul-la, naꞌ gaca bandxu chee̱ gundxu da xrlátaje.
\q Le̱ꞌ guzríe̱ꞌ we̱ꞌ chee̱ xexácale leꞌe chaweꞌ.
\q
\v 25 Leꞌe gudale gate nate ca zrilaꞌ zaj nanítebaꞌ.
\m Naꞌa ba belaꞌle lau Cristo, Bénneaꞌ dxuxúe̱ꞌ leꞌe ca dxun tu benneꞌ dxuxúe̱ꞌ zrílaꞌdu caꞌ, ne dxeꞌe̱ gunne xue chee̱ bénneꞌdu xúꞌule.
\c 3
\s Ca dxal-laꞌ xelún benneꞌ zaj nuchaga naꞌ
\p
\v 1 Cáꞌanqueze leꞌe, nuꞌula nuchaga naꞌle, le guzúa dizraꞌ chee̱ benneꞌ chee̱le, naꞌ che núlale zua benneꞌ biu chee̱le quebe dxéajle̱ꞌe̱ xrtizra Dios, xexúnbeꞌe̱ naca na da li gate léꞌene̱ꞌ da xrlátaje da dxun zruꞌule̱ꞌ, ne quebe gun na ba xen bi guchalaj zruꞌule̱ꞌ,
\v 2 laweꞌ da léꞌezene̱ꞌ da xrlátaje dxune̱ꞌ laweꞌ da naque̱ꞌ xrlátaje, ne dxape̱ꞌ le̱ꞌ ba láꞌana.
\v 3 Ca lechítaje̱ chee̱ tu nuꞌula quebe dxal-laꞌ gaca na cúzreze ca xel-laꞌ dxupáꞌa xicha xíchaje̱ꞌ, ne lechítaje̱ da naca na oro, ne zra lane̱ꞌ da zácale̱ꞌe̱.
\v 4 Lechítaje̱ chee̱ꞌ dxal-laꞌ gaca na lu xichaj lázrdaweꞌ, da naca na tu da xrtan da quebe te chee̱ na. Da xrtan nigá naca na tu beꞌ dxexruj lazreꞌ, ne zren lazreꞌ, da naꞌ zácale̱ꞌe̱ na lau Dios.
\v 5 Cáꞌanqueze guca lechítaje̱ chee̱ nuꞌula caꞌ gulaque̱ꞌ bi chee̱ Dios gate nate. Nuꞌula caꞌ buluxrén lazre̱ꞌ Dios, ne buluzúe̱ꞌ dizraꞌ chee̱ benneꞌ chee̱ꞌ.
\v 6 Cáꞌanqueze guca Sara, bzue̱ꞌ dizraꞌ chee̱ Abraham, naꞌ guzre̱ꞌ le̱ꞌ: “Xran.” Leꞌe wácaquezle ca guca Sara naꞌ che gunle da xrlátaje, ne quebe bi guchebe lázrele.
\p
\v 7 Cáꞌanqueze leꞌe, benneꞌ biu, zúale̱le nuꞌula, le gaca dxexruj lazreꞌ nen zrúꞌulale. Le gapa ba láꞌana zrúꞌulale laweꞌ da quebe zaj naque̱ꞌ benneꞌ wal-la ca leꞌe, ne cáꞌanqueze zaj nape̱ꞌ xel-laꞌ nabán ca da nunna Dios leꞌe dute̱ xel-laꞌ chaweꞌ chee̱ꞌ. Dxal-laꞌ gunle caní chee̱ quebe bi guzaga na leꞌe gate guchálajle̱le Dios.
\s Benneꞌ dxeledée̱ꞌ xel-laꞌ ziꞌ laweꞌ da dxelune̱ꞌ da chaweꞌ
\p
\v 8 Naꞌa:
\q Le gaca tuze
\q Le xexache lazreꞌ ljwézrele, ne le zriꞌi ljwézrele.
\q Le gaca benneꞌ zriꞌi lazreꞌ, ne zren lazreꞌ.
\m
\v 9 Quebe gunle da cale̱la chee̱ benneꞌ dxune̱ꞌ chee̱le da cale̱la, ne quebe gucháchale̱le benneꞌ dxulucháchale̱ne̱ꞌ leꞌe. Le gun da chaweꞌ chee̱ benneꞌ caꞌ laweꞌ da gunné̱ꞌ Dios leꞌe chee̱ sile da chaweꞌ.
\v 10 Caní naca na laweꞌ da dxenná xiche láꞌazxa:
\q Benneꞌ dxaca lazre̱ꞌ gaca tu da ba neza chee̱ꞌ,
\q ne sue̱ꞌ xel-laꞌ dxebé
\q dxal-laꞌ guxúe̱ꞌ luzreꞌ chee̱ quebe nne̱ꞌ dizraꞌ schanniꞌ,
\q ne guxúe̱ꞌ dxuꞌe̱ chee̱ quebe nne̱ na da we̱n lazreꞌ.
\q
\v 11 Dxal-laꞌ gusane̱ꞌ ca da cale̱la be̱ne̱ꞌ,
\q ne québedxa gune̱ꞌ na, chee̱ gune̱ꞌ da chaweꞌ.
\q Dxal-laꞌ cueche zrie̱ꞌ da ba xaꞌ,
\q ne gaque̱ꞌ benneꞌ zren lazreꞌ.
\q
\v 12 Xránadxu dxuxúe̱ꞌ benneꞌ chaweꞌ caꞌ,
\q ne dxenne̱ꞌ ca da dxelenaba benneꞌ caꞌ.
\q Dxuzúe̱ꞌ chaláꞌala benneꞌ we̱n da zrinnaj caꞌ.
\p
\v 13 ¿Núzraqueze benneꞌ gune̱ꞌ chee̱le da zrinnaj che leꞌe cuele gunne xue gunle da chaweꞌ?
\v 14 Lácala tele xel-laꞌ ziꞌ laweꞌ da dxunle da chaweꞌ, gaca na da ba neza chee̱le. Quebe nu zrébele, ne quebe xrúsale.
\v 15 Le gapa ba láꞌana Cristo ca Xránale lu xichaj lázrdaule. Le súateze ban lazreꞌ xeché̱bele lau benneꞌ caꞌ dxelenabe̱ꞌ leꞌe bizr chee̱ naꞌ dxuxrén lázrele Le̱ꞌ. Le gun na lu xel-laꞌ dxexruj lazreꞌ, ne le gapa ba láꞌana benneꞌ caꞌ.
\v 16 Le gun da chaweꞌ chee̱ quebe bi sua da gagu na zria lu xichaj lázrdaule, naꞌ benneꞌ caꞌ dxelenné̱ꞌ schanniꞌ chee̱ da chaweꞌ da dxunle laweꞌ da dxéajle̱l-le chee̱ Cristo, xelapa stuꞌe̱ ca dizraꞌ da dxelennéꞌ.
\v 17 Zácadxa tele xel-laꞌ ziꞌ laweꞌ da dxunle da chaweꞌ cáte̱ze dxaca lazre Dios, ne quegá tele xel-laꞌ ziꞌ laweꞌ da dxunle da cale̱la.
\p
\v 18 Caní naca na laweꞌ da gudé Cristo tu lásaze lu xel-laꞌ gute zi xaꞌ ne̱ chee̱ dul-la da nabágadxu. Le̱ꞌ guque̱ꞌ benneꞌ xrlátaje, naꞌ gudée̱ꞌ xel-laꞌ ziꞌ waláz chee̱dxu dxiꞌu, benneꞌ we̱n da zrinnaj, chee̱ gaca xeché̱ꞌe̱ dxiꞌu lau Dios. Gute Cristo lu be̱l-laꞌ dxen chee̱ꞌ, san bebánqueze̱ꞌ lu beꞌ nácaqueze̱ꞌ.
\v 19 Cáꞌanqueze lu beꞌ nácaqueze̱ꞌ guxíaje̱ꞌ lataj chul-la naga xeajchálajle̱ne̱ꞌ beꞌ zaj nácaqueze benneꞌ caꞌ nuzaga xel-laꞌ gute lu lataj naꞌ.
\v 20 Benneꞌ caní quebe buluzúe̱ꞌ dizraꞌ ca da bchalaj Noé gate nate, gate naꞌ guleza Dios dute̱ xel-laꞌ zren lazreꞌ chee̱ꞌ dxácate̱ naꞌ be̱n Noé da zren naꞌ da dxedá laweꞌ nísadauꞌ. Lu da dxedá laweꞌ nísadauꞌ gulelá xrúnuze benneꞌ ne̱ chee̱ nisa xiuj da naꞌ bzria xi na ca naca bénneache.
\v 21 Nisa xiuj naꞌ dxuléꞌe na ca naca nisa naga dxelexedxúa benneꞌ nisa, naꞌ lu le̱ naꞌ naladxu naꞌa. Nisa nigá quegá le̱ naꞌ quibe na dxiꞌu, san dxuléꞌe na dxaca lázredxu chádxedxu lau Dios, naꞌ ladxu laweꞌ da bebán Jesucristo ládujla benneꞌ gate,
\v 22 ne begüene̱ꞌ xabáa, ne zue̱ꞌ chaláꞌa xabe̱la chee̱ Dios, naꞌ dizraꞌ chee̱ Le̱ꞌ dxuluzúa gubáz chee̱ xabáa, gubáz caꞌ zaj napeꞌ xel-laꞌ dxenná bea, ne gubáz blau caꞌ.
\c 4
\s Dxal-laꞌ gundxu zrin chee̱ Dios guchínedxu ca da ba nunna Dios dxiꞌu
\p
\v 1 Chee̱ le̱ naꞌ, ca be̱n Cristo, gudée̱ꞌ xel-laꞌ ziꞌ lu be̱laꞌ dxen chee̱ꞌ, cáꞌanqueze leꞌe dxal-laꞌ si lu nale tele xel-laꞌ ziꞌ laweꞌ da che tu benneꞌ ba gudée̱ꞌ xel-laꞌ ziꞌ lu be̱laꞌ dxen chee̱ꞌ, ba bzua bénneaꞌ chaláꞌala da naca dul-la,
\v 2 chee̱ gune̱ꞌ ca da dxaca lazreꞌ Dios dxácate̱ naca bane̱ꞌ, ne quebe gune̱ꞌ ca da dxenná be̱laꞌ dxen chee̱ꞌ.
\v 3 Naze cátite da ba be̱nle gate nate da dxeledanne benneꞌ quebe zaj núnbeꞌe̱ Dios. Ca lu iza da ba guledé be̱nle da sban caꞌ, ne da zrinnaj caꞌ da guzá lázrele, ne guzúzrele, ne be̱nle laní sban caꞌ. Güéꞌele̱ꞌe̱le, ne bcaꞌana szrenle bedauꞌ xiaj xaga caꞌ da naꞌ dxecuide Dios.
\v 4 Benneꞌ caꞌ quebe zaj núnbeꞌe̱ Dios dxelexebánene̱ꞌ laweꞌ da québedxa dxunle le̱ꞌ tuze ca naca da sban da dxelune̱ꞌ, naꞌ chee̱ le̱ naꞌ dxelenné̱ꞌ schanniꞌ chee̱le.
\v 5 Benneꞌ caꞌ, dxun na ba xen xululéꞌene̱ꞌ ca da zaj nune̱ꞌ lau Bénneaꞌ naca chee̱ꞌ guchiꞌe̱ chee̱ benneꞌ ban caꞌ, ne chee̱ benneꞌ gate caꞌ.
\v 6 Benneꞌ caꞌ zaj nate belenne̱ꞌ ca naca dizraꞌ chee̱ Dios chee̱ xelexaca bane̱ꞌ lu beꞌ zaj nácaquezeꞌ ca naca ban Dios, lácala lu xe̱zr la xu nigá Dios bchiꞌe̱ ca da belune̱ꞌ ca guchiꞌe̱ chee̱ xúgute̱ bénneache.
\p
\v 7 Ba za cheajsé̱ chee̱ xúgute̱ da dxeléꞌedxu. Chee̱ le̱ naꞌ, le sua ban lazreꞌ, ne le guchálajle̱queze Dios.
\v 8 Da nácadxa blau, le zríꞌile̱ꞌe̱ ljwézrele. Che nazríꞌidxu benneꞌ bíchedxu caꞌ, naꞌ gunite laudxu da calela da belune̱ꞌ chee̱dxu.
\v 9 Le guzúa lízrele ljwézrele tule xetule, ne quebe nne̱le chee̱ ljwézrele.
\v 10 Tu tule leꞌe dxal-laꞌ gunle zrin chee̱ ljwézrele ca da nunna Dios chee̱le, ca benneꞌ dxuluchínene̱ꞌ chaweꞌ ca da chaweꞌ da dxunezruj Dios chee̱ꞌ.
\v 11 Che nu benneꞌ dxuchálaje̱ꞌ, dxal-laꞌ guchálaje̱ꞌ da gunezruj Dios le̱ꞌ. Che nu benneꞌ gune̱ꞌ zrin chee̱le, dxal-laꞌ gune̱ꞌ na guchínene̱ꞌ xel-laꞌ waca chee̱ꞌ da nunezruj Dios le̱ꞌ. Ca naca xúgute̱ da dxunle, dxal-laꞌ gaca ba Dios laweꞌ da nácale bi chee̱ Jesucristo, naꞌ chee̱ Le̱ꞌ gaca xel-laꞌ szren, ne xel-laꞌ dxenná bea chadía chacanna. ¡Caꞌan gaca na!
\s Wadedxu xel-laꞌ ziꞌ laweꞌ da nácadxu bi chee̱ Cristo
\p
\v 12 Benneꞌ bíchaꞌdauꞌ nazriꞌite̱ lazraꞌ, quebe xebánele ca naca xel-laꞌ ziꞌ zren da tele, quebe guéquele naca na tu da quebe dxal-laꞌ gaca.
\v 13 Le be laweꞌ da tele xel-laꞌ ziꞌ ca xel-laꞌ ziꞌ da gudé Cristo chee̱ cáꞌanqueze béle̱ꞌe̱le gate léꞌele xel-laꞌ szren chee̱ Cristo gate zezé̱ꞌe̱.
\v 14 Che dxulugazjaꞌ benneꞌ leꞌe dizraꞌ laweꞌ da nácale bi chee̱ Cristo, ba neza zren naca na chee̱le, laweꞌ da zúale̱ Beꞌ Láꞌazxa chee̱ Dios leꞌe, Bénneaꞌ ze̱ꞌe̱ xabáa. Dxelenné̱ bénneache schanniꞌ chee̱ Le̱ꞌ, san leꞌe dxápale Le̱ꞌ ba láꞌana.
\v 15 Che núlale leꞌe dxedele xel-laꞌ ziꞌ, quebe dxal-laꞌ gaca na laweꞌ da bé̱tele benneꞌ, u bi gulanle chee̱ benneꞌ, u bi da zrinnaj be̱nle, u laweꞌ da guchixre chee̱le da naca chee̱ benneꞌ xula.
\v 16 Che nu benneꞌ dxedée̱ꞌ xel-laꞌ ziꞌ laweꞌ da naque̱ꞌ bi chee̱ Cristo, quebe dxal-laꞌ xeduéꞌene̱ꞌ, san dxal-laꞌ güe láꞌane̱ꞌ Dios laweꞌ da nazí le̱ꞌ bi chee̱ Cristo.
\v 17 Ba bzrin zra su lau Dios guchiꞌe̱ ca da zaj nun tu tu bi nácabeꞌ chee̱ Le̱ꞌ. Che Dios su lawe̱ꞌ guchiꞌe̱ ca da nundxu dxiꞌu, ¿ájala gaca chee̱ benneꞌ caꞌ quebe dxelune̱ꞌ ca dxenná dizraꞌ chaweꞌ chee̱ Dios?
\v 18 Che benneꞌ xrlátaje caꞌ cánnaze xelelé̱ꞌ ¿ájazraqueze gaca chee̱ benneꞌ we̱n da zrinnaj caꞌ, ne chee̱ benneꞌ we̱n dul-la caꞌ?
\v 19 Caní naca, benneꞌ dxeledée̱ꞌ xel-laꞌ ziꞌ laweꞌ da dxelune̱ꞌ da xrlátaje da dxaca lazreꞌ Dios, dxal-laꞌ xelúnqueze̱ꞌ da xrlátaje, ne xuluzúe̱ꞌ bénneꞌdu zaj xuꞌe̱ lu naꞌ Dios, Bénneaꞌ be̱ne̱ꞌ leꞌ, laweꞌ da naca Le̱ꞌ li lazreꞌ.
\c 5
\s Pedro dxuzéajniꞌine̱ꞌ bi caꞌ chee̱ Cristo
\p
\v 1 Dxuzéajniꞌidaꞌ leꞌe, benneꞌ gula dxuxúele tu tu cueꞌ bi caꞌ chee̱ Cristo laweꞌ da nacaꞌ nedaꞌ benneꞌ gula ca leꞌe, ne dxexeche̱baꞌ ca xel-laꞌ ziꞌ da gudé Cristo, ne cáꞌanqueze laweꞌ da gúnnaqueze̱ꞌ nedaꞌ, ne leꞌe, chee̱ sidxu da xabáa chee̱ꞌ da guléꞌene̱ꞌ te chee̱ zra caní.
\v 2 Ca dxelún benneꞌ dxuluxúe̱ꞌ zrilaꞌ caꞌ, le guxúe bidu caꞌ chee̱ Dios, bénneꞌdu caꞌ nabágale. Le gun na dute̱ lázrdaule ca dxaca lazreꞌ Dios, quebe gun na ba xen nu benneꞌ nna béꞌene̱ꞌ leꞌe, ne quebe gunle ba chee̱ dumí. Le gun zrin du lázrele,
\v 3 ne quebe gun cuínale ca xrane bénneꞌdu caꞌ nabágale. Le gun ba xuzre gácale tu da guléꞌe na ca dxal-laꞌ xelún bénneꞌdu caꞌ.
\v 4 Caní gaca, gate xeláꞌ Xránadxu, Benneꞌ Blau dxuxúe̱ꞌ zrilaꞌ caꞌ, sile tu lazruj da naca na chee̱ xabáa, da quebe te chee̱ na.
\v 5 Cáꞌanqueze leꞌe, benneꞌ cuideꞌ, le gun ca da dxelenná benneꞌ gula caꞌ. Xúgute̱le dxal-laꞌ guzúale dizraꞌ chee̱ ljwézrele tule xetule lu xel-laꞌ dxexruj lazreꞌ chee̱le laweꞌ da dxenná xiche láꞌazxa:
\q Dios dxezré̱ꞌe̱ benneꞌ caꞌ dxulucáꞌana szren cuine̱ꞌ.
\q Dute̱ xel-laꞌ chaweꞌ chee̱ꞌ dxácale̱ne̱ꞌ benneꞌ dxexruj lazreꞌ caꞌ.
\m
\v 6 Le guzexruj lázrele lu xel-laꞌ dxenná bea zren chee̱ Dios, naꞌ xechisa Le̱ꞌ leꞌe ca zrin zra chee̱ na.
\v 7 Le guzúa lu naꞌ Dios xúgute̱ da dxele gunne xue, laweꞌ da dxeꞌ Le̱ꞌ gunne xue da naca chee̱le.
\p
\v 8 Le gaca benneꞌ li lazreꞌ, ne le sua ban lazreꞌ laweꞌ da dxedá da xriweꞌ, da naꞌ dxezráꞌa na leꞌe, ne naca na ca tu be̱zre xixreꞌ, dxebezre xaꞌabaꞌ, dxíljabaꞌ nu gué̱bebaꞌ.
\v 9 Le tíl-lale̱ da xriweꞌ, ne le se̱ chacha lu xel-laꞌ dxeajlí lazreꞌ chee̱le, laweꞌ da nézquezle dxeledéqueze xúgute̱ bíchele zaj zre̱ꞌe̱ lu xe̱zr la xu nigá xel-laꞌ ziꞌ ca da dxedele leꞌe.
\v 10 Gate bache gudele xel-laꞌ ziꞌ tu chiꞌi, Dios gune̱ꞌ leꞌe li lazreꞌ, ne guzúa chawe̱ꞌe̱ leꞌe. Dios náꞌqueze dxunne̱ꞌ dxiꞌu xúgute̱ da chaweꞌ chee̱ꞌ, ne ba gunné̱ꞌ dxiꞌu chee̱ gápadxu da naca chee̱ xabáa chee̱ꞌ laweꞌ da nácadxu bi chee̱ Jesucristo.
\v 11 Gaca ba Le̱ꞌ, ne chee̱ꞌ Le̱ꞌ gaca xel-laꞌ dxenná bea chadía chacanna. ¡Caꞌan gaca na!
\s Pedro dxugape̱ꞌ diuzre bi bíchedxu caꞌ
\p
\v 12 Silvano, benneꞌ nigá dxéquedaꞌ naqueꞌ tu bi bíchedxu li lazreꞌ, ba bzuaje̱ꞌ dizraꞌ caní chee̱le leꞌe cáte̱ze nedaꞌ, Pedro, ba guchaꞌ le̱ꞌ guzúaje̱ꞌ. Dxuzéajniꞌidaꞌ leꞌe, ne dxapaꞌ leꞌe ca naca da xrlátaje da ba guzile da dxululéꞌe na Dios nazriꞌine̱ꞌ leꞌe. Le se̱ chacha ca zaj naca da caní.
\p
\v 13 Bi chee̱ Cristo zaj zre̱ꞌe̱ Babilonia nigá, benneꞌ caꞌ gucáꞌa Dios ca guqué̱ꞌe̱ leꞌe, dxulugape̱ꞌ leꞌe diuzre. Cáꞌanqueze Marcos, bi naꞌ nácabeꞌ ca bi cheé̱quezaꞌ dxugápabeꞌ leꞌe diuzre.
\v 14 Le gugapa diuzre ljwézrele tule xetule, ne le gunidaꞌ ljwézrele lu xel-laꞌ zriꞌi lazreꞌ.
\p Dxenabaꞌ lau Dios gunne̱ꞌ leꞌe xel-laꞌ dxebeza zri lazreꞌ, leꞌe nácale bi caꞌ chee̱ Jesucristo. ¡Caꞌan gaca na!