\id 2PE
\h 2 San Pedro
\mt DIZRAꞌ GUDXUPEꞌ DA BZUAJ SAN PEDRO
\c 1
\s Dizraꞌ da gusel-la San Pedro chee̱ bi caꞌ chee̱ Jesús
\p
\v 1 Nedaꞌ, Simón Pedro, nacaꞌ we̱n zrin chee̱ Jesucristo, ne benneꞌ gubáz chee̱ꞌ. Dxuzúajaꞌ da nigá chee̱le leꞌe, ba nápale xel-laꞌ dxeajlí lazreꞌ da zácale̱ꞌe̱, ne naca tuze ca da nápantuꞌ netuꞌ. Caní naca laweꞌ da naca li lazreꞌ Dios chee̱dxu, ne Benneꞌ Weselá chee̱dxu Jesucristo.
\v 2 Dxenabaꞌ lau Dios gúnnale̱ꞌe̱ leꞌe da chaweꞌ chee̱ꞌ, ne xel-laꞌ dxebeza zri lazreꞌ, laweꞌ da núnbeale Dios, ne Xránadxu Jesús.
\s Ca dxal-laꞌ gaca bi chee̱ Cristo
\p
\v 3 Dios lu xel-laꞌ waca chee̱ꞌ ba nunne̱ꞌ dxiꞌu xúgute̱ da nachínedxu chee̱ gápadxu xel-laꞌ nabán chee̱ Le̱ꞌ, ne chee̱ gaca gundxu zrin chee̱ꞌ, laweꞌ da núnbeadxu Bénneaꞌ gunné̱ꞌ dxiꞌu chee̱ gápadxu da xabáa chee̱ Le̱ꞌ, ne xel-laꞌ szren chee̱ꞌ.
\v 4 Caní naca na, ba nunne̱ꞌ dxiꞌu ca da nache̱be lazre̱ꞌ, da zaj naca na szrénle̱ꞌe̱, ne da zaj zácale̱ꞌe̱ na, chee̱ ne̱ chee̱ da guche̱be lazre̱ꞌ wazruéꞌele leꞌe gácale ca nácaqueze Dios, ne chee̱ lale lu da sban da dxaca lu xe̱zr la xu nigá ne̱ chee̱ da dxezá lazreꞌ be̱laꞌ dxen chee̱ bénneache.
\v 5 Chee̱ le̱ naꞌ dxal-laꞌ cueꞌle gunne xue gun xel-laꞌ dxeajlí lazreꞌ chee̱le gunle da xrlátaje, ne chee̱ gun da xrlátaje da dxunle gácale benneꞌ sina.
\v 6 Xel-laꞌ sina chee̱le dxal-laꞌ gun na nna beꞌe cuínale, naꞌ xel-laꞌ dxenná beꞌe cuina chee̱le dxal-laꞌ gun na gácale benneꞌ zren lazreꞌ, naꞌ xel-laꞌ zren lazreꞌ chee̱le dxal-laꞌ gun na zriꞌile Dios.
\v 7 Xel-laꞌ zriꞌi lazreꞌ chee̱le nen Dios dxal-laꞌ gun na zriꞌile benneꞌ bíchedxu caꞌ, naꞌ xel-laꞌ zriꞌi lazreꞌ chee̱le nen bíchele caꞌ dxal-laꞌ gun na gácale zriꞌi lazreꞌ.
\p
\v 8 Che leꞌe dxunle da caní, ne dxele̱pe ban na, quebe xegáꞌana cáꞌaze xel-laꞌ nabán chee̱le, ne quebe naca na níteze núnbeale Xránadxu Jesucristo.
\v 9 Benneꞌ quebe dxune̱ꞌ da caní naque̱ꞌ ca benneꞌ la chul-la, u ca benneꞌ quebe dxenné̱ꞌe̱ ca da za zaꞌ. Ba gul-la lazre̱ꞌ guxádxie̱ꞌ ca naca chee̱ dul-la caꞌ da be̱ne̱ꞌ gate nate.
\v 10 Chee̱ le̱ naꞌ, benneꞌ bíchaꞌdauꞌ, le gun ba xuzre nézele Dios gunné̱ꞌ leꞌe, ne ba guqué̱ꞌe̱ leꞌe, naꞌ che gunle da nigá, cabataꞌ cheajcházele.
\v 11 Caní gun Dios, gúnnale̱ꞌe̱ leꞌe lataj chuꞌule naga nna bea Xránadxu, ne weselá chee̱dxu Jesucristo chadía chacanna.
\p
\v 12 Chee̱ le̱ naꞌ tu dxusáꞌazquezaꞌ lázrele da caní, lácala ba nézele na, ne ba ze̱ cháchale lu xel-laꞌ li da ba nápale.
\v 13 Dxácate̱ naca banaꞌ dxéquedaꞌ dxun na ba xen gusáꞌa lázrele chee̱ da caní
\v 14 laweꞌ da ba nezdaꞌ wátezeaꞌ ca ba gunná Xránadxu Jesucristo, guzre̱ꞌ nedaꞌ.
\v 15 Naꞌa gunaꞌ ca da séquedaꞌ chee̱ gate te gatiaꞌ nedaꞌ, cheajsá lázrquezle chee̱ da caní.
\s Benneꞌ beleléꞌene̱ꞌ xel-laꞌ szren chee̱ Cristo
\p
\v 16 Da bsé̱dentuꞌ leꞌe ca naca chee̱ xel-laꞌ szren chee̱ Xránadxu Jesucristo, ne ca xelé̱ꞌe̱ xecha lasa quebe naca na ca da dxenná xichaj lázrdau bénneache. Netuꞌ bléꞌequezentuꞌ ca naca xel-laꞌ szren chee̱ Xránadxu.
\v 17 Bléꞌentuꞌ Le̱ꞌ gate Xradxu Dios be̱ꞌe̱ Le̱ꞌ xel-laꞌ ba láꞌana, ne xel-laꞌ szren, naꞌ Dios gúzrequeze̱ꞌ Le̱ꞌ lu da xabáa chee̱ꞌ: “Benneꞌ nigá naque̱ꞌ Zriꞌinaꞌ nazriꞌite̱ lazraꞌ, ne dxezaca ba lazraꞌ nen Le̱ꞌ.”
\v 18 Nétuꞌqueze bénentuꞌ chiꞌi naꞌ da za na xabáa gate zúantuꞌ nen Xránadxu lu xiꞌa láꞌazxa naꞌ.
\v 19 Chee̱ le̱ naꞌ dxuxrén lázredxantuꞌ dizraꞌ da buluzúaj benneꞌ caꞌ gulenné̱ꞌ waláz chee̱ Dios. Da xrlátaje dxunle leꞌe laweꞌ da dxenle ca naca dizraꞌ nigá. Naca na ca tu xiꞌ da dxusení na tu lataj naga naca chul-la ca zrin zra chaníꞌ, naꞌ Cristo, Bénneaꞌ naque̱ꞌ ca belaj zila súale̱ne̱ꞌ leꞌe chee̱ guseníꞌe̱ lu xichaj lázrdaule.
\v 20 Le guxúe xanneꞌ ca naca da nigá. Netú da naxúaj na lu xiche láꞌazxa quebe nu benneꞌ sequeꞌ xuzájle̱ꞌe̱ na lu xel-laꞌ dxéajniꞌi chee̱ze̱ꞌ.
\v 21 Benneꞌ caꞌ buluchálaje̱ꞌ waláz chee̱ Dios quebe buluchálaje̱ꞌ ca da gulaca lázrequeze le̱ꞌ. Gulaque̱ꞌ benneꞌ chee̱ Dios, naꞌ gulenné̱ꞌ waláz chee̱ꞌ ca da bnezruj Beꞌ Láꞌazxa le̱ꞌ.
\c 2
\s Ca naca chee̱ benneꞌ caꞌ dxulusé̱dene̱ꞌ da we̱n lazreꞌ
\r (Judas 4-13)
\p
\v 1 Cáꞌanqueze gulezráꞌ ládujla benneꞌ Israel benneꞌ we̱n lazreꞌ caꞌ, benneꞌ belún cuine̱ꞌ ca benneꞌ dxelenné̱ꞌ waláz chee̱ Dios. Cáꞌanqueze welezráꞌ ládujla leꞌe benneꞌ we̱n lazreꞌ, benneꞌ xelún cuine̱ꞌ ca benneꞌ dxulusé̱dene̱ꞌ bénneache dizraꞌ chee̱ Dios. Benneꞌ caní wuluzéajniꞌine̱ꞌ bénneache bagácheze ca naca dizraꞌ we̱n lazreꞌ da guxrinnaj na, naꞌ caní xeledábague̱ꞌ Xránadxu, Bénneaꞌ bselé̱ꞌ dxiꞌu, naꞌ laweꞌ da dxulusé̱dene̱ꞌ da caní xelebía xiꞌ zé̱queze̱ꞌ.
\v 2 Benneꞌ zan chjácale̱ne̱ꞌ ca da sban dxulusé̱de benneꞌ caꞌ, naꞌ ne̱ chee̱ benneꞌ caní xelenné̱ bénneache schanniꞌ chee̱ dizraꞌ li chee̱ xel-laꞌ weselá.
\v 3 Laweꞌ da dxelezá lazre̱ꞌ xelezíꞌe̱ dumí, xelebéaje̱ꞌ leꞌe dumí ne̱ chee̱ da we̱n lazreꞌ da dxuluzéajniꞌine̱ꞌ leꞌe. Dios ba nucueze̱ꞌ da guzría xi na benneꞌ caní, laweꞌ da ba guchugue̱ꞌ gate nate ca da gaca chee̱ benneꞌ caꞌ.
\p
\v 4 Dios quebe bnite lawe̱ꞌ chee̱ gubáz chee̱ xabáa caꞌ belún dul-la. Bdee̱ꞌ gubáz chee̱ xabáa caꞌ lu lataj ba xaꞌ, ne bzre̱ꞌe̱ le̱ꞌ lu da chul-la, ne bcheaje̱ꞌ le̱ꞌ du xia naga zaj nadxéaje̱ꞌ ca zrin zra chugu Dios ca da gaca chee̱ gubáz chee̱ xabáa caꞌ.
\v 5 Cáꞌanqueze Dios quebe bnite lawe̱ꞌ chee̱ benneꞌ caꞌ gulezráꞌ gate nate. Gusel-le̱ꞌ nisa xiuj da bzria xi na benneꞌ caꞌ belune̱ꞌ da cale̱la. Bselé̱ꞌ Noé, bénneaꞌ bchálaje̱ꞌ ca naca da xrlátaje da dxal-laꞌ xelún bénneache. Bselé̱ꞌ gázreze benneꞌ.
\v 6 Cáꞌanqueze guchugu Dios chee̱ xe̱zre Sodoma, ne xe̱zre Gomorra chee̱ xelebía xi na. Bzézxie̱ꞌ dxúpate̱ xe̱zre caꞌ, naꞌ belexegáꞌanate̱ na de. Caní dxuluzéajniꞌi na benneꞌ caꞌ xelune̱ꞌ da cale̱la, benneꞌ xelezré̱ꞌe̱ te naꞌ.
\v 7 Dios bselé̱ꞌ Lot lu xe̱zre Sodoma naꞌ laweꞌ da guque̱ꞌ tu benneꞌ xrlátaje, ne bexíajele̱ꞌe̱ne̱ꞌ gate bléꞌene̱ꞌ ca naca da sban da dxelún benneꞌ caꞌ dxelune̱ꞌ da cale̱la.
\v 8 Benneꞌ xrlátaje nigá guzúe̱ꞌ ládujla benneꞌ caꞌ, naꞌ tu zra tu zra guzúa ba xaꞌ lázrdawe̱ꞌ ca dxenné̱ꞌe̱, ne dxenne̱ꞌ ca da cale̱la da dxelún benneꞌ caꞌ.
\v 9 Nézqueze Xránadxu guselé̱ꞌ benneꞌ zaj naca bi chee̱ꞌ che bi da dxusaca zi na le̱ꞌ, naꞌ guzráqueze̱ꞌ benneꞌ caꞌ dxelune̱ꞌ da cale̱la, ca tu lizre xia, ca zrin zra chugue̱ꞌ chee̱ꞌ chjaque̱ꞌ lataj ba xaꞌ.
\p
\v 10 Dios xudée̱ꞌ xel-laꞌ ziꞌ zrendxa benneꞌ caꞌ dxelune̱ꞌ cáte̱ze da sban da dxelezá lazre̱ꞌ, ne dxuluzúe̱ꞌ chaláꞌala xel-laꞌ dxenná bea chee̱ Xránadxu. Benneꞌ caní zaj naque̱ꞌ lazreꞌ dxugu dxelune̱ꞌ da sban, ne dxulucáꞌana szren cuine̱ꞌ. Quebe dxelezrebe̱ꞌ dxelenné̱ꞌ schanniꞌ chee̱ gubáz chee̱ xabáa caꞌ.
\v 11 Gubáz caꞌ zaj nápadxe̱ꞌ xel-laꞌ dxenná bea, ne xel-laꞌ szren ca benneꞌ caní, quebe dxelenné̱ꞌ da cale̱la chee̱ benneꞌ caꞌ gate dxelawe̱ꞌ zria chee̱ꞌ lau Xránadxu.
\p
\v 12 Benneꞌ caní zaj naque̱ꞌ ca bea caꞌ quebe zaj naxéajniꞌibaꞌ, be̱ dxelunbaꞌ ca da zaj nézezebaꞌ, ne zrabaꞌ chee̱ xelé̱l-le̱ꞌ-baꞌ, ne xelutie̱ꞌ-baꞌ. Benneꞌ caní dxelenné̱ꞌ schanniꞌ chee̱ da quebe dxeléajniꞌine̱ꞌ, naꞌ xelátequeze̱ꞌ ca dxelate bea caꞌ,
\v 13 ne xeledée̱ꞌ xel-laꞌ ziꞌ ca xel-laꞌ ziꞌ buludée̱ꞌ benneꞌ xula. Dxeléquene̱ꞌ zaj zre̱ꞌe̱ lu da ba neza gate dxelebene̱ꞌ ca da dxaca tu zra tu zra. Zaj naque̱ꞌ ca tu da sban da dxusíꞌi na leꞌe xel-laꞌ stuꞌ gate zaj zre̱ꞌe̱ nen leꞌe lu laní chee̱le, dxácate̱ ne dxelezúe̱ꞌ lu xel-laꞌ dxebé lu da cale̱la da dxelune̱ꞌ.
\p
\v 14 Dxelezá lazre̱ꞌ xúgute̱ nuꞌula dxeleléꞌene̱ꞌ, ne quebe dxelálene̱ꞌ dxelune̱ꞌ dul-la. Dxulusiꞌe̱ neza xula benneꞌ bíchedxu quebe zaj ze̱ chache̱ꞌ. Dxulucúdequeze̱ꞌ, ne zaj naque̱ꞌ benneꞌ zaj xuꞌe̱ deꞌ.
\v 15 Zaj nanítie̱ꞌ laweꞌ da gulecuase̱ꞌ lu neza li chee̱ Dios. Dxelune̱ꞌ ca da be̱n Balaam, zriꞌine Beor. Balaam nigá be̱ne̱ꞌ ba chee̱ dumí, ne gudé̱ꞌ dxune̱ꞌ da cale̱la,
\v 16 naꞌ bea naꞌ, be̱ dxua xuaꞌ, gunne̱baꞌ ca benneꞌ, ne gudíl-labaꞌ Balaam ca naca dul-la da dxune̱ꞌ, naꞌ guchúgubaꞌ da xala da dxun Balaam.
\p
\v 17 Benneꞌ caní zaj naque̱ꞌ ca tu beaj bizre, ne ca tu beuj da dxua beꞌ bdunuꞌ. Ba zaj naca chee̱ benneꞌ caꞌ xelexegáꞌane̱ꞌ chadía chacanna lu da chul-la.
\v 18 Dxelenné̱ꞌ dizraꞌ da dxulucáꞌana szren na le̱ꞌ, ne da zaj naca na dácheze. Dxuluchínene̱ꞌ da sban caꞌ, ne da dxezá lazreꞌ be̱laꞌ dxen chee̱ bénneache chee̱ dxulusiꞌe̱ chaláꞌala benneꞌ caꞌ za dxelexedxúajteque̱ꞌ ládujla benneꞌ caꞌ dxelune̱ꞌ da cale̱la.
\v 19 Dxeleche̱be lazre̱ꞌ xulunézruje̱ꞌ benneꞌ caꞌ tu xel-laꞌ weselá, san lé̱queze benneꞌ caꞌ zaj naque̱ꞌ we̱n zrin chee̱ da sban. Tu tu bénneache naque̱ꞌ benneꞌ nadaꞌu chee̱ da dxenná beꞌe na le̱ꞌ.
\v 20 Benneꞌ ba zaj núnbeꞌe̱ Xránadxu, ne Weselá chee̱dxu Jesucristo, ne ba gulelé̱ꞌ lu da sban chee̱ xe̱zr la xu nigá, naꞌ te naꞌ che xelexexuꞌe̱ xecha lasa lu da sban naꞌ, ne xeluꞌe̱ lataj xenná beꞌe na le̱ꞌ, naꞌ gácadxa da ba xaꞌ chee̱ benneꞌ caꞌ ca da guca chee̱ꞌ gate nate.
\v 21 Cháweꞌdxela gaca na chee̱ benneꞌ caní la quebe zaj núnbeꞌe̱ Cristo, quegala gate ba belúnbeꞌe̱ Le̱ꞌ, naꞌ xelexecuase̱ꞌ ca naca xel-laꞌ dxixruj bea láꞌazxa da guzre Dios le̱ꞌ xelune̱ꞌ.
\v 22 Ca da guca chee̱ benneꞌ caní dxuléꞌe na naca da li dizraꞌ nigá da dxenná na:
\q Becuꞌ dxexágubaꞌ ca da ba bexé̱bebaꞌ,
\q naꞌ cuche za bexíbebaꞌ bexúꞌubaꞌ xecha lasa lu guzraꞌ chee̱baꞌ.
\c 3
\s Ca naca chee̱ zra xeláꞌ Xránadxu
\p
\v 1 Benneꞌ bíchaꞌdauꞌ nazriꞌite̱ lazraꞌ, da nigá naca na dizraꞌ gudxupeꞌ da dxuzúajaꞌ chee̱le. Lu dxúpate̱ xiche caní guca lazraꞌ guzéajniꞌidaꞌ leꞌe chee̱ gulaba lázrele chee̱ da caní.
\v 2 Le gusá lazreꞌ ca da gulenná benneꞌ láꞌazxa caꞌ, benneꞌ buluchálajeꞌ waláz chee̱ Dios, ne ca naca da gudixruj beꞌe Xránadxu, Benneꞌ Weselá chee̱dxu, da naꞌ buluse̱de benneꞌ gubáz chee̱ꞌ caꞌ leꞌe.
\p
\v 3 Dxunna ba xen gúnbeale, lu zra da za záꞌaca weleláꞌ benneꞌ xelún le̱ꞌ chee̱ da zaj naca na da láꞌazxa, ne xelune̱ꞌ cáte̱ze da dxelezá lazre̱ꞌ,
\v 4 ne xuluche̱be̱ꞌ bénneache: ¿Bizra guca chee̱ da guche̱be lazreꞌ Cristo, gunné̱ꞌ: Weláꞌa? Xra xrtáudxu caꞌ ba gulatie̱ꞌ, naꞌ túzqueze ca guca, gaca na gate guzrete̱ xe̱zr la xu.
\v 5 Benneꞌ caní quebe dxeleque beꞌene̱ꞌ gulezúa xabáa, ne xe̱zr la xu gate nate, Dios gunné̱ꞌ bedxúaj na lu nisa, naꞌ guzúa chacha na lu nisa,
\v 6 naꞌ xe̱zr la xu da zua gate nate guzría xi na ne̱ chee̱ nisa xiuj,
\v 7 naꞌ xabáa, ne xe̱zr la xu da zaj zua na naꞌa, ba naca chee̱ na xelezxe na ca ba núnqueze Dios chee̱ na. Xiꞌ naꞌ guzezxe na da caní lu zra guchiꞌa Dios, gate xelebía xiꞌ benneꞌ caꞌ dxelune̱ꞌ da cale̱la.
\p
\v 8 Benneꞌ bíchaꞌdauꞌ nazriꞌite̱ lazraꞌ, quebe gal-la lázrele da nigá: Lau Xránadxu tu zraze naca na ca chi gaxúa iza, naꞌ chi gaxúa iza zaj naca na ca tu zraze.
\v 9 Quebe dxezré Xránadxu gune̱ꞌ da nache̱be lazre̱ꞌ ca dxeleque bénneache. Naque̱ꞌ zren lazreꞌ nen dxiꞌu laweꞌ da quebe dxaca lazre̱ꞌ nu cuía xiꞌ. Dxaca lazre̱ꞌ xelexexíaje lazreꞌ xúgute̱ bénneache.
\p
\v 10 Zra xeláꞌ Xránadxu zrin na gate quebe nu dxeque caꞌ, ca zaꞌ tu gubán chizrela. Lu zra naꞌ cuía xiꞌ xabáa da dxeléꞌedxu, naꞌ gunle̱ꞌe̱ na schaga, ne ca naca da dxeléꞌedxu zran xabáa xelebía xi na lu xiꞌ, naꞌ xe̱zr la xu nigá chezxe na tu zren nen da de̱ lawe na.
\p
\v 11 Che ba nézele xelebía xiꞌ xúgute̱ da caní, ¿ájala dxal-laꞌ gunle? Dxal-laꞌ gácale li lazreꞌ ne guzúa cuínale lu naꞌ Dios
\v 12 dxácate̱ ne dxebézale zra naꞌ, ne dxal-laꞌ gunle ca da séquele zrinte̱ zra naꞌ. Lu zra naꞌ cuia xiꞌ xabáa lu xiꞌ, naꞌ da zaj zria zran xabáa xelexuna na lu xiꞌ naꞌ.
\v 13 Dxiꞌu dxebézadxu tu xabáa cube, ne tu xe̱zr la xu cube da ba guche̱be lazreꞌ Dios naga gaca xlátaje̱ xúgute̱.
\p
\v 14 Chee̱ le̱ naꞌ, benneꞌ bíchaꞌdauꞌ nazriꞌite̱ lazraꞌ, dxácate̱ dxebézale da caní, le gun ca da séquele chee̱ quebe bi bágale, ne quebe bi nadxenle chee̱ dul-la lau Dios, ne suale lu xel-laꞌ dxebeza zri lazreꞌ.
\v 15 Le gusá lázrele naca Xránadxu zren lazreꞌ nen dxiꞌu chee̱ ladxu. Cáꞌanqueze Pablo, benneꞌ bíchedxu nazriꞌite̱ lázredxu, bzuaje̱ꞌ chee̱le, bchínene̱ꞌ ca naca xel-laꞌ sina da bnezruj Dios le̱ꞌ.
\v 16 Lu xúgute̱ xiche da ba bzuaje̱ꞌ, ba bchálajle̱ne̱ꞌ leꞌe ca naca chee̱ da caní, lácala bal-la na nácale̱ꞌe̱ na ste̱be chéajniꞌidxu na, naꞌ benneꞌ caꞌ quebe dxeléajniꞌine̱ꞌ na, ne benneꞌ caꞌ quebe zaj zua chache̱ꞌ dxuluchuque̱ꞌ na, ca dxuluchuque̱ꞌ xezícala xrtizra Dios, naꞌ chee̱ le̱ naꞌ Dios guzría xiꞌe̱ benneꞌ caꞌ.
\p
\v 17 Chee̱ le̱ naꞌ, benneꞌ bíchaꞌdauꞌ nazriꞌite̱ lazraꞌ, che leꞌe ba nézele da nigá nédxula, le guxúe cuínale chee̱ da we̱n lazreꞌ chee̱ benneꞌ caꞌ dxelune̱ꞌ da cale̱la chee̱ quebe xeleché̱ leꞌe chaláꞌala, ne quebe nite xel-laꞌ li lazreꞌ chee̱le lau Dios.
\v 18 Le gúnbea xanneꞌ Xránadxu, Benneꞌ Weselá chee̱dxu, Jesucristo, ne le gula lu xel-laꞌ zriꞌi lazreꞌ chee̱ꞌ. ¡Gaca ba Le̱ꞌ naꞌa, ne chadía chacanna! ¡Caꞌan gaca na!