\id 1JN
\h 1 Juan
\mt DIZRAꞌ NÉDXUDAUꞌ DA BZUAJ SAN JUAN
\c 1
\s Xtizra Dios da dxunna na xel-laꞌ nabán li lazreꞌ
\p
\v 1 Dxuzúajaꞌ chee̱le da nigá ca naca chee̱ Bénneaꞌ zúaqueze̱ꞌ gate guzú lau zua xúgute̱ da dxeléꞌedxu. Dxuzúajaꞌ ca naca chee̱ Bénneaꞌ ba bénentuꞌ chee̱ꞌ, ne ca naca da ba bléꞌequezentuꞌ be̱ne̱ꞌ, nedaꞌ ne xezícadxa benneꞌ caꞌ bse̱de Jesús. Ca naca chee̱ Benneꞌ nigá guzúantuꞌ dxennantuꞌ, ne btantuꞌ Le̱ꞌ nen naꞌntuꞌ. Dxuchálajntuꞌ ca naca chee̱ Bénneaꞌ naque̱ꞌ Dizraꞌ da dxunna na xel-laꞌ nabán li lazreꞌ.
\v 2 Bénneaꞌ dxunne̱ꞌ xel-laꞌ nabán zeajlí canna ba ble̱ꞌe̱, naꞌ netuꞌ bléꞌentuꞌ Le̱ꞌ. Dxixruj béantuꞌ da naca chee̱ꞌ, ne dxuzentuꞌ leꞌe ca naca chee̱ꞌ. Lé̱queze̱ꞌ zúale̱ne̱ꞌ Xradxu Dios, naꞌ ble̱ꞌe̱ naga zúadxu.
\v 3 Da bléꞌentuꞌ, ne da bénentuꞌ dxuzentuꞌ leꞌe chee̱ gácale tuze nen netuꞌ. Da lítegaze, nácadxu tuze nen Xradxu Dios, ne nen Jesucristo, Zriꞌine Dios.
\v 4 Ca naca da caní dxuzúajaꞌ chee̱le chee̱ gaca du lazreꞌ xel-laꞌ dxebé chee̱le.
\s Dios naque̱ꞌ leníꞌ chee̱ xichaj lázrdau bénneache
\p
\v 5 Da nigá naca dizraꞌ da bchálajle̱ Jesús netuꞌ, ne da dxuzentuꞌ leꞌe. Gunné̱ꞌ: Dios naque̱ꞌ leníꞌ, ne quebe bi zúale̱ Le̱ꞌ da naca chee̱ da chul-la.
\v 6 Che dxennadxu nácadxu tuze nen Le̱ꞌ, naꞌ che dxundxu da naca na chee̱ da chul-la, dxun lázredxu ca naca da dxennadxu, naꞌ ca naca da dxundxu quebe dxundxu da li.
\v 7 Che dxundxu da li da naca chee̱ xel-laꞌ naxaníꞌ, ca naca Dios, Bénneaꞌ naque̱ꞌ li lazreꞌ, ne zue̱ꞌ lu xel-laꞌ naxaníꞌ, nadxa zúadxu tuze tudxu xetudxu, naꞌ dxen chee̱ Jesús, Zriꞌine Dios, dxibe na dxiꞌu ca naca xúgute̱ dul-la nabágadxu.
\p
\v 8 Che dxennadxu quebe nabágadxu dul-la, dxezí xé̱queze cuínadxu, naꞌ da li quebe zúale̱ na dxiꞌu.
\v 9 Che xrúale̱pedxu ca naca dul-la da nabágadxu, Dios naque̱ꞌ li lazreꞌ, ne xlátaje̱, naꞌ chee̱ le̱ naꞌ Le̱ꞌ gunite lawe̱ꞌ chee̱dxu ca naca dul-la da nabágadxu, ne quibe̱ꞌ dxiꞌu ca naca xúgute̱ da sban da ba be̱ndxu.
\v 10 Che dxennadxu quebe nundxu dul-la, dxucáꞌanadxu Dios ca we̱n lazreꞌ, ne quebe ne sidxu du lázredxu ca naca dizraꞌ chee̱ꞌ.
\c 2 
\p 
\v 1 Leꞌe, bi nazriꞌite̱ lazraꞌ, dxuzúajaꞌ da nigá chee̱le chee̱ quebe gunle dul-la. Che nu benneꞌ gune̱ꞌ dul-la, zua wenaba chee̱dxu lau Dios, Jesucristo, Benneꞌ xlátaje̱.
\v 2 Le̱ꞌ gutie̱ꞌ waláz chee̱dxu chee̱ gudúe̱ꞌ da nabágadxu lau Dios ca naca dul-la chee̱dxu, ne quegaze da nabágadxu dxiꞌu, san gudúe̱ꞌ da zaj nabaga xúgute̱ bénneache.
\p 
\v 3 Che dxuzúadxu dizraꞌ ca naca da bdxixruj beꞌe Dios, nezdxu ba núnbeadxu Le̱ꞌ. 
\v 4 Che nu dxenná: Nedaꞌ núnbeꞌa Le̱ꞌ, ne che quebe dxuzúe̱ꞌ dizraꞌ ca naca da bdxixruj beꞌe Dios, benneꞌ nigá naque̱ꞌ we̱n lazreꞌ, ne quebe dxenné̱ꞌ da li. 
\v 5 Che nu benneꞌ dxuzúe̱ꞌ dizraꞌ ca naca da bdxixruj beꞌe Dios, benneꞌ nigá nazriꞌine̱ꞌ Dios du lazre̱ꞌ. Che dxundxu caní nezdxu ba zúadxu tuze nen Le̱ꞌ. 
\v 6 Bénneaꞌ dxenné̱ꞌ naque̱ꞌ tuze nen Dios dxal-laꞌ gaque̱ꞌ ca guca Jesús. 

\s Tu da cube da bdxixruj beꞌe Jesús
\p 
\v 7 Leꞌe, bi nazríꞌite̱ lazraꞌ, dxuzúajaꞌ chee̱le ca naca da dxenná na dxal-laꞌ zriꞌidxu le saꞌ ljwézredxu. Quebe naca na tu da cube da bdxixruj bea Dios. Naca na da gula naꞌ da ba guzile nédxudaute̱. Da gula da bdxixruj bea Dios naca na dizraꞌ da ba bénequezle. 
\v 8 Naca na ca dxuzúajaꞌ chee̱le tu da cube da dxixruj bea Dios, da naca béaqueze na naca da li laweꞌ da be̱n Jesús ca naca na, ne laweꞌ da dxunle leꞌe ca naca na. Caní naca na laweꞌ da ba dxuseníꞌ xel-laꞌ naxaníꞌ li chee̱ xel-laꞌ zriꞌi lazreꞌ lu xichaj lázrdaudxu, da dxegúa na da naca na chee̱ da chul-la. 
\p 
\v 9 Che nu benneꞌ dxenné̱ꞌ dxune̱ꞌ da naca na chee̱ xel-laꞌ naxaníꞌ, ne che dxecuídene̱ꞌ le saꞌ ljwezre̱ꞌ, benneꞌ nigá ne dxedé̱ꞌ lu da naca na chee̱ da chul-la. 
\v 10 Benneꞌ nazriꞌine̱ꞌ le saꞌ ljwezre̱ꞌ dxune̱ꞌ da naca chee̱ xel-laꞌ naxaníꞌ, ne quebe dxune̱ꞌ da guzría xi na le saꞌ ljwezre̱ꞌ. 
\v 11 Bénneaꞌ quebe chaweꞌ dxeléꞌene̱ꞌ le saꞌ ljwezre̱ꞌ, lu da naca na chee̱ da chul-la zua bénneaꞌ, ne lu da naꞌ dxedé̱ꞌ, ne quebe nézene̱ꞌ ga zéaje̱ꞌ laweꞌ da dxucáꞌana da chul-la le̱ꞌ ca tu benneꞌ la chul-la. 
\p 
\v 12 Leꞌe, bi nazriꞌite̱ lazraꞌ, dxuzúajaꞌ chee̱le laweꞌ da ba bnite lau Dios chee̱le ca naca dul-la chee̱le, laweꞌ da gute Jesucristo waláz chee̱dxu. 
\v 13 Leꞌe, benneꞌ nazriꞌite̱ lazraꞌ, dxuzúajaꞌ chee̱le laweꞌ da ba núnbeale Bénneaꞌ zúaqueze̱ꞌ nédxudaute̱.
\p Leꞌe, benneꞌ cuideꞌ, dxuzúajaꞌ chee̱le laweꞌ da ba bsanle da dxenná da xriwe̱ꞌ. 
\p Leꞌe, bi nazriꞌite̱ lazraꞌ, dxuzúajaꞌ chee̱le laweꞌ da ba núnbeale Xradxu Dios. 
\p
\v 14 Leꞌe, xruze xrnaꞌ, dxuzúajaꞌ chee̱le laweꞌ da ba núnbeale Bénneaꞌ zúaqueze̱ꞌ nédxudaute̱.
\p Leꞌe, benneꞌ cuideꞌ, dxuzúajaꞌ chee̱le laweꞌ da nácale benneꞌ wal-la, ne dizraꞌ chee̱ Dios nápale, ne bsanle da dxenná da xriwe̱ꞌ.
\p 
\v 15 Quebe sa lázrele da cale̱la caꞌ da zaj naca na chee̱ xe̱zr la xu nigá, ne quegá da zaj de̱ lu xe̱zr la xu nigá. Che nu benneꞌ dxezá lazre̱ꞌ da zaj de̱ lu xe̱zr la xu nigá, quebe nazriꞌine̱ꞌ Xradxu Dios. 
\v 16 Da caní zaj naca na chee̱ xe̱zr la xu nigá, da dxezá lázredxu da dxezaca ba lazreꞌ be̱laꞌ dxen chee̱dxu, ne da dxezaca ba lazreꞌ xiaj laudxu, ne ca naca xel-laꞌ dxucáꞌana szren cuina chee̱ da nápadxu. Xúgute̱ da caní quebe zaj naca na da dxunna Dios, san zaj naca na chee̱ xe̱zr la xu nigá. 
\v 17 Ba za zra xuzre lazreꞌ xe̱zr la xu nigá, ne ca naca da dxezá lázredxu da naca na chee̱ xe̱zr la xu nigá. Bénneaꞌ dxune̱ꞌ da dxaca lazreꞌ Dios wazúatecaze̱ꞌ.

\s Ca naca da li, ne da we̱n lazreꞌ 
\p 
\v 18 Leꞌe, bi nazriꞌite̱ lazraꞌ, zra caní zaj naca na zra bze̱be. Ba bénele guléꞌe lawe̱ꞌ benneꞌ tábague̱ꞌ Cristo. Nedaꞌ dxapaꞌ leꞌe naꞌa, bache beleláꞌ benneꞌ zante̱ benneꞌ dxeledábague̱ꞌ Cristo. Chee̱ le̱ naꞌ nezdxu ba zúadxu zra bze̱be. 
\v 19 Benneꞌ caní belexedxúajqueze̱ꞌ ládujla dxiꞌu. Da líqueze quebe gulaque̱ꞌ tuze nen dxiꞌu. La gulaque̱ꞌ tuze nen dxiꞌu, naꞌ belexegáꞌanale̱queze̱ꞌ dxiꞌu. Caní guca chee̱ nezdxu quebe zaj naca xúgute̱ꞌ tuze nen dxiꞌu. 
\p 
\v 20 Ca naca chee̱le leꞌe, ba zúale̱ Beꞌ Láꞌazxa leꞌe, Bénneaꞌ gusel-la Xradxu Láꞌazxa. Chee̱ le̱ naꞌ ba nézele xúgute̱ da caní. 
\v 21 Dxuzúajaꞌ chee̱le da nigá laweꞌ da ba nézele da li, ne quegá dxenniaꞌ quebe nézele da li. Ba nézquezle leꞌe quebe dxun lazreꞌ Bénneaꞌ naque̱ꞌ da li. 
\p 
\v 22 ¿Nuzraꞌ naca benneꞌ we̱n lazreꞌ? Naca bénneaꞌ dxenné̱ꞌ Jesús quebe naque̱ꞌ Cristo, Benneꞌ nasel-la Dios. Benneꞌ we̱n lazreꞌ nigá dxenné̱ꞌ Dios quebe naque̱ꞌ Xra Jesús, ne Jesús quebe naque̱ꞌ Zriꞌine Dios. 
\v 23 Xúgute̱ benneꞌ dxelenné̱ꞌ Jesús quebe naque̱ꞌ Zriꞌine Dios, Dios quebe zúale̱ne̱ꞌ benneꞌ caꞌ. Bénneaꞌ dxexeche̱be̱ꞌ Jesús naque̱ꞌ Zriꞌine Dios, Dios zúale̱queze̱ꞌ bénneaꞌ.
\p 
\v 24 Chee̱ le̱ naꞌ, le cuꞌu lu xichaj lázrdaule dizraꞌ da ba bénele nédxudaute̱. Che da ba bénele nédxudaute̱ zua na lu xichaj lázrdaule, leꞌe súatequezle tuze nen Zriꞌine Dios, ne nen Xradxu Dios. 
\v 25 Da nigá naca na da nache̱be lazreꞌ Dios, gunne̱ꞌ dxiꞌu xel-laꞌ nabán zeajlí canna. 
\p 
\v 26 Ba bzuajaꞌ chee̱le da nigá ca naca chee̱ benneꞌ caꞌ dxelezí xe̱ꞌe̱ leꞌe. 
\v 27 Naꞌa zúale̱ Beꞌ Láꞌazxa leꞌe, Bénneaꞌ gusel-la Jesucristo chee̱le, naꞌ Beꞌ Láꞌazxa nigá zue̱ꞌ xichaj lázrdaule. Chee̱ le̱ naꞌ quebe nachínele nu guse̱de leꞌe laweꞌ da dxuse̱de Beꞌ Láꞌazxa leꞌe ca naca xúgute̱ da caní, naꞌ da dxusé̱dene̱ꞌ leꞌe naca na da li, ne quebe naca na da we̱n lazreꞌ. Chee̱ le̱ naꞌ, le súatequeze tuze nen Cristo ca naca da ba bse̱de Beꞌ Láꞌazxa leꞌe. 

\s Ca naca chee̱ benneꞌ zaj naque̱ꞌ zriꞌine Dios 
\p 
\v 28 Naꞌa, bi nazriꞌite̱ lazraꞌ, le súatequeze tuze nen Cristo, chee̱ súadxu li lazreꞌ gate xeláꞌ Le̱ꞌ, ne quebe xeduéꞌedxu lau Le̱ꞌ gate xelé̱ꞌe̱. 
\v 29 Ba nézele naca xlátaje̱ Dios. Chee̱ le̱ naꞌ dxal-laꞌ nézele xúgute̱ benneꞌ caꞌ dxelúnqueze̱ꞌ da naca na xlátaje̱ zaj naque̱ꞌ zriꞌine Dios. 

\c 3
\p
\v 1 Le nnaꞌ xque ca nazríꞌile̱ꞌe̱ Dios dxiꞌu laweꞌ da nazí ladxu bi chee̱ Dios, ne caní nácadxu. Chee̱ le̱ naꞌ quebe zaj neze bénneache lu xe̱zr la xu nigá da nácadxu laweꞌ da quebe belúnbeꞌe̱ Jesús.
\v 2 Leꞌe, bi nazríꞌite̱ lazraꞌ, naꞌa nácadxu bi chee̱ Dios. Quebe ne guléꞌe laweꞌ da gácadxu. Nezdxu gate xeláꞌ Le̱ꞌ, gácadxu ca naca Le̱ꞌ laweꞌ da léꞌedxu Le̱ꞌ ca nácaqueze Le̱ꞌ.
\v 3 Nu benneꞌ dxebeza lazre̱ꞌ gaque̱ꞌ ca naca Jesús dxue lazre̱ꞌ gaque̱ꞌ du lazreꞌ ca naca Jesús, naque̱ꞌ du lazreꞌ.
\p
\v 4 Nu benneꞌ dxune̱ꞌ dul-la quebe dxuzúe̱ꞌ dizraꞌ ca naca da bdxixruj beꞌe Dios laweꞌ da naca dul-la da dxedábaga da bdxixruj beꞌe Dios.
\v 5 Ba nézele blaꞌ Jesucristo chee̱ gudúe̱ꞌ dul-la nabágadxu, ne Le̱ꞌ quebe bi dul-la be̱ne̱ꞌ.
\v 6 Xúgute̱ benneꞌ zaj zúatequeze̱ꞌ tuze nen Jesús quebe dxelune̱ꞌ dul-la, naꞌ xúgute̱ benneꞌ dxelune̱ꞌ dul-la quebe ne xeleléꞌene̱ꞌ Cristo, ne quebe ne xelúnbeꞌe̱ Le̱ꞌ.
\v 7 Leꞌe, zríꞌinaꞌdauꞌ, quebe güele lataj nu si xe̱ leꞌe. Bénneaꞌ dxune̱ꞌ da xlátaje̱, xlátaje̱ naque̱ꞌ, ca naca Dios, naque̱ꞌ xlátaje̱.
\v 8 Benneꞌ dxune̱ꞌ dul-la naque̱ꞌ chee̱ da xriwe̱ꞌ laweꞌ da dxun da xriwe̱ꞌ dul-la nédxudaute̱. Chee̱ le̱ naꞌ blaꞌ Zriꞌine Dios, chee̱ bzria xiꞌe̱ xúgute̱ da nun da xriwe̱ꞌ lu xe̱zr la xu nigá.
\p
\v 9 Xúgute̱ benneꞌ zaj naca bi chee̱ Dios quebe dxelune̱ꞌ dul-la laweꞌ da zúale̱tequeze Beꞌ chee̱ Dios benneꞌ caꞌ. Chee̱ le̱ naꞌ québedxa gaca xelezúe̱ꞌ xelune̱ꞌ dul-la laweꞌ da zaj naque̱ꞌ bi chee̱ Dios.
\v 10 Naca bea nu naca bi chee̱ Dios ne nu naca bi chee̱ da xriwe̱ꞌ. Bénneaꞌ quebe dxune̱ꞌ da xrlátaje ne quebe nazriꞌine̱ꞌ le saꞌ ljwezre̱ꞌ quebe naque̱ꞌ bi chee̱ Dios.
\s Dxal-laꞌ zriꞌidxu tu xetudxu
\p
\v 11 Da nigá naca na dizraꞌ da ba bénequezle nédxudaute̱, da dxenná na: Dxal-laꞌ zriꞌidxu tudxu xetudxu.
\v 12 Quebe gundxu ca be̱n Caín, bi naꞌ gúcabeꞌ chee̱ da xriwe̱ꞌ, naꞌ bé̱tebeꞌ bi bíchebeꞌ. ¿Bizr chee̱ naꞌ bé̱tebeꞌ le̱beꞌ? Bé̱tebeꞌ le̱beꞌ laweꞌ da naca da zrinnaj da be̱n Caín, naꞌ da be̱n bi bíchebeꞌ naca na da xrlátaje.
\p
\v 13 Leꞌe, benneꞌ bíchaꞌdauꞌ, quebe xebánele che bénneache lu xe̱zr la xu nigá dxuluzúe̱ꞌ leꞌe chaláꞌala.
\v 14 Nezdxu ba bdxúajdxu lu naꞌ xel-laꞌ gute, ne ba guxúꞌudxu lu xel-laꞌ nabán laweꞌ da nazriꞌidxu bíchedxu caꞌ. Bénneaꞌ quebe nazriꞌine̱ꞌ bíchedxu caꞌ zúaqueze̱ꞌ lu xel-laꞌ gute.
\v 15 Bénneaꞌ dxuzúe̱ꞌ chaláꞌala bíchedxu caꞌ naque̱ꞌ ca tu benneꞌ dxute benneꞌ, naꞌ ba nézquezle leꞌe nu benneꞌ dxute benneꞌ quebe nape̱ꞌ xel-laꞌ nabán zeajlí canna.
\v 16 Ba nezdxu da naca xel-laꞌ zriꞌi lazreꞌ laweꞌ da bzanne Jesucristo xel-laꞌ nabán chee̱ꞌ, naꞌ gutie̱ꞌ waláz chee̱dxu. Cáꞌanqueze dxiꞌu dxal-laꞌ guzúadxu xel-laꞌ nabán chee̱dxu chee̱ gácale̱dxu bíchedxu caꞌ.
\v 17 Che tu benneꞌ nape̱ꞌ xel-laꞌ gunníꞌa da naca na chee̱ xe̱zr la xu nigá, ne che dxeléꞌene̱ꞌ le saꞌ ljwezre̱ꞌ dxexázrjene̱ꞌ, naꞌ che quebe xexache lazre̱ꞌ le̱ꞌ, benneꞌ nigá quebe nazriꞌine̱ꞌ Dios.
\v 18 Leꞌe, zríꞌinaꞌdauꞌ, dxal-laꞌ zriꞌidxu tudxu xetudxu, quegá nen dízraꞌze, ne quegá nen da nné̱zedxu. Dxal-laꞌ gúntequezdxu na, naꞌ gaca bea na da li nazríꞌidxu bíchedxu caꞌ.
\s Zua zri lázrdaudxu lau Dios
\p
\v 19 Che gundxu caní ba nezdxu nácadxu chee̱ da li, naꞌ sua zri lázrdaudxu lau Dios,
\v 20 gate zua tu da dxagu na zria lu lázrdaudxu, laweꞌ da nezdxu naca Dios zrendxa ca lázrdaudxu. Le̱ꞌ nézquezne̱ꞌ ca naca da dxundxu.
\v 21 Caꞌan naca, bi nazríꞌite̱ lazraꞌ, che quebe zua tu da dxagu na zria lu lázrdaudxu, waca sua zrize lázrdaudxu lau Dios,
\v 22 naꞌ Le̱ꞌ gunne̱ꞌ dxiꞌu xúgute̱ da nábadxu lawe̱ꞌ. Caꞌan gaca laweꞌ da dxuzúadxu dizraꞌ da bdxixruj beꞌe Dios, ne dxundxu da dxezaca ba lazreꞌ Le̱ꞌ.
\v 23 Da bdxixruj beꞌene̱ꞌ dxiꞌu naca na chéajle̱dxu chee̱ Jesucristo, Zriꞌine Dios, ne zriꞌidxu tudxu xetudxu ca bdxixruj beꞌe Le̱ꞌ.
\v 24 Bénneaꞌ dxuzúe̱ꞌ dizraꞌ da bdxixruj beꞌe Le̱ꞌ zúale̱queze̱ꞌ Dios, naꞌ Dios zúale̱queze̱ꞌ bénneaꞌ. Ba nezdxu Le̱ꞌ zúale̱queze̱ꞌ dxiꞌu laweꞌ da bache be̱nne̱ꞌ dxiꞌu Beꞌ chee̱ꞌ.
\c 4
\s Naca bea Beꞌ chee̱ Dios
\p
\v 1 Leꞌe, bi nazríꞌite̱ lazraꞌ, quebe chéajle̱le chee̱ xúgute̱ benneꞌ dxelenné̱ꞌ zúale̱ Beꞌ chee̱ Dios le̱ꞌ. Le nnaꞌ xque ca naca da dxulusé̱dene̱ꞌ chee̱ nézele che zúale̱ꞌ Beꞌ chee̱ Dios le̱ꞌ. Caní dxal-laꞌ gunle laweꞌ da ba beleláꞌ benneꞌ zante̱, benneꞌ we̱n lazreꞌ, dxelenné̱ꞌ dxuluchálaje̱ꞌ waláz chee̱ Dios.
\v 2 Caní gaca nézele che zúale̱ Beꞌ chee̱ Dios tu benneꞌ. Xúgute̱ benneꞌ dxelexeche̱be̱ꞌ ba blaꞌ Jesucristo, ne guque̱ꞌ bénneache, benneꞌ caní zaj naque̱ꞌ chee̱ Dios.
\v 3 Xúgute̱ benneꞌ quebe dxelexeche̱be̱ꞌ ca guca Jesucristo quebe zaj naque̱ꞌ chee̱ Dios. Zaj naque̱ꞌ chee̱ bénneaꞌ dxedábague̱ꞌ Jesucristo. Ba bénele guléꞌe lawe̱ꞌ bénneaꞌ, naꞌ naꞌa ba zue̱ꞌ lu xe̱zr la xu nigá.
\p
\v 4 Leꞌe, bi nazriꞌite̱ lazraꞌ, nácale chee̱ Dios, ne bache bzúale chaláꞌala benneꞌ caꞌ dxelezí xe̱ꞌe̱ laweꞌ da szrendxa naca Beꞌ zúale̱ na leꞌe ca beꞌ zua na lu xe̱zr la xu nigá.
\v 5 Benneꞌ caꞌ zaj naque̱ꞌ chee̱ xe̱zr la xu nigá. Chee̱ le̱ naꞌ dxuluchálaje̱ꞌ chee̱ da naca na chee̱ xe̱zr la xu nigá, naꞌ benneꞌ zaj zre̱ꞌe̱ xe̱zr la xu nigá dxelenne̱ꞌ da dxuluchalaj benneꞌ caꞌ.
\v 6 Dxiꞌu nácadxu chee̱ Dios. Benneꞌ zaj núnbeꞌe̱ Dios dxuluzé̱ nague̱ꞌ chee̱dxu. Benneꞌ quebe zaj naque̱ꞌ chee̱ Dios quebe dxuluzé̱ nague̱ꞌ chee̱dxu. Chee̱ le̱ naꞌ nezdxu nu benneꞌ zúale̱ Beꞌ chee̱ xel-laꞌ li le̱ꞌ, ne nu benneꞌ zúale̱ beꞌ chee̱ da dxezí xe̱ na le̱ꞌ.
\s Tu dxúnzqueze Dios da naca chee̱ xel-la nazríꞌi lazreꞌ
\p
\v 7 Leꞌe, bi nazríꞌite̱ lazraꞌ, dxal-laꞌ zriꞌidxu tudxu xetudxu laweꞌ da dxunna Dios dxiꞌu xel-laꞌ nazríꞌi lazreꞌ naꞌ. Xúgute̱ benneꞌ zaj naque̱ꞌ zriꞌi lazreꞌ caní zaj naque̱ꞌ zriꞌine Dios ne zaj núnbeꞌe̱ Dios.
\v 8 Bénneaꞌ quebe naque̱ꞌ zriꞌi lazreꞌ caní quebe núnbeꞌe̱ Dios laweꞌ da tu dxúnzqueze Dios da naca chee̱ xel-la nazríꞌi lázreꞌ.
\v 9 Naca béaqueze Dios nazríꞌile̱ꞌe̱ne̱ꞌ dxiꞌu laweꞌ da gusel-le̱ꞌ Zríꞌine̱ꞌ tu lichaꞌ lu xe̱zr la xu nigá chee̱ zruéꞌedxu xel-laꞌ nabán da naca na chee̱ Zríꞌine̱ꞌ naꞌ.
\v 10 Xel-laꞌ zriꞌi lazreꞌ li naca na caní: Quegá dxiꞌu naꞌ bzriꞌidxu Dios. Le̱ꞌ bzriꞌine̱ꞌ dxiꞌu, ne gusel-le̱ꞌ Zríꞌine̱ꞌ chee̱ guque̱ꞌ da gudúa na da nabágadxu lau Dios laweꞌ da nabágadxu dul-la.
\p
\v 11 Leꞌe, bi nazríꞌite̱ lazraꞌ, che Dios bzriꞌine̱ꞌ dxiꞌu caní, dxiꞌu dxal-laꞌ zriꞌidxu tudxu xetudxu.
\v 12 Quebe nu ne leꞌe Dios, san che zriꞌidxu tudxu xetudxu, Dios zúaqueze̱ꞌ lu xichaj lázrdaudxu, naꞌ xel-laꞌ zriꞌi lazreꞌ chee̱ꞌ dxun na li lazreꞌ xel-laꞌ zriꞌi lazreꞌ chee̱dxu.
\v 13 Nezdxu nácadxu tuze nen Dios, naꞌ Dios naque̱ꞌ tuze nen dxiꞌu laweꞌ da bzue̱ꞌ Beꞌ chee̱ꞌ lu lázrdaudxu.
\v 14 Ba bléꞌentuꞌ, ne dxuzentuꞌ leꞌe ca naca da be̱n Xradxu Dios, gusel-le̱ꞌ Zríꞌine̱ꞌ chee̱ bedajselé̱ꞌ bénneache chee̱ xe̱zr la xu nigá.
\v 15 Bénneaꞌ dxexeche̱be̱ꞌ naca Jesús Zriꞌine Dios, Dios zúale̱queze̱ꞌ bénneaꞌ, naꞌ le̱ꞌ zúale̱queze̱ꞌ Dios.
\p
\v 16 Ba núnbeadxu ca nazríꞌi Dios dxiꞌu, ne ba guxéajle̱dxu nazriꞌine̱ꞌ dxiꞌu. Tu dxúnzqueze Dios da naca chee̱ xel-la nazríꞌi lazreꞌ, naꞌ bénneaꞌ naque̱ꞌ zriꞌi lazreꞌ caní zúale̱queze̱ꞌ Dios, naꞌ Dios zúale̱queze̱ꞌ le̱ꞌ.
\v 17 Caní dxaca li xel-laꞌ zriꞌi lazreꞌ chee̱dxu, chee̱ sua zrize lázrdaudxu lu zra guzría xiꞌ Dios bénneache, benneꞌ caꞌ dxelune̱ꞌ da cale̱la, laweꞌ da nácadxu lu xe̱zr la xu nigá ca nácaqueze Jesucristo.
\v 18 Bénneaꞌ naque̱ꞌ zriꞌi lazreꞌ caní quebe dxezrebe̱ꞌ da gaca na lu zra naꞌ. Xel-laꞌ zriꞌi lazreꞌ li dxebéaj na chaláꞌala xel-laꞌ dxezrebe naꞌ. Nu benneꞌ dxezrebeꞌ dxebeze̱ꞌ bi da saque̱ꞌ, naꞌ bénneaꞌ dxezrebe̱ꞌ quebe dxaca li xel-laꞌ zriꞌi lazreꞌ chee̱ꞌ.
\p
\v 19 Dxiꞌu nazriꞌidxu Dios laweꞌ da bzriꞌi Dios dxiꞌu nédxudaute̱.
\v 20 Che nu benneꞌ dxenné̱ꞌ: Nazriꞌidaꞌ Dios, ne che benneꞌ nigá dxuzúe̱ꞌ chaláꞌala le saꞌ ljwezre̱ꞌ, dxun lazre̱ꞌ. Che quebe nazriꞌine̱ꞌ le saꞌ ljwezre̱ꞌ, bi dxeléꞌete̱ne̱ꞌ, ¿ájazra gune̱ꞌ, zríꞌine̱ꞌ Dios, ne quebe dxeléꞌene̱ꞌ Le̱ꞌ?
\v 21 Dios ba bdxixruj beꞌene̱ꞌ dxiꞌu caní, gunné̱ꞌ: Bénneaꞌ nazriꞌine̱ꞌ Dios, zríꞌiquezne̱ꞌ le saꞌ ljwezre̱ꞌ.
\c 5
\s Ca bdxúajdxu chaweꞌ lu xe̱zr la xu nigá
\p
\v 1 Xúgute̱ benneꞌ dxeléajle̱ꞌe̱ Jesús naque̱ꞌ Cristo, Benneꞌ nasel-la Dios, benneꞌ caní zaj naque̱ꞌ bi chee̱ Dios, naꞌ che zaj nazriꞌine̱ꞌ Xradxu Dios, dxal-laꞌ xelezríꞌiquezne̱ꞌ xúgute̱ benneꞌ zaj naque̱ꞌ bi chee̱ Dios.
\v 2 Nezdxu nazriꞌidxu benneꞌ zaj naque̱ꞌ bi chee̱ Dios chete nazriꞌidxu Dios, ne dxundxu ca naca da dxiꞌe̱ dxiꞌu.
\v 3 Che da li nazriꞌidxu Dios, dxundxu da dxiꞌe̱ dxiꞌu. Da dxiꞌe̱ dxiꞌu quebe naca na ste̱be.
\v 4 Xúgute̱ benneꞌ zaj naque̱ꞌ bi chee̱ Dios dxedxúaje̱ꞌ chaweꞌ lau da cale̱la da dxaca na lu xe̱zr la xu nigá. Dxedxúajdxu chaweꞌ lau da cale̱la da dxaca na lu xe̱zr la xu nigá laweꞌ da dxéajle̱dxu da naca na chee̱ Jesucristo.
\v 5 Benneꞌ dxedxuajeꞌ chaweꞌ lau da cale̱la da dxaca na lu xe̱zr la xu nigá naque̱ꞌ bénneaꞌ dxéajle̱ꞌe̱ naca Jesús Zriꞌine Dios.
\s Da dxenná Dios ca naca chee̱ Zríꞌine̱ꞌ
\p
\v 6 Guca bea Jesús naque̱ꞌ Cristo gate gudxúe̱ꞌ nisa, ne gate gulalaj dxen chee̱ꞌ. Quegá gudxúaze̱ꞌ nisa san cáꞌanqueze gulalaj dxen chee̱ꞌ. Beꞌ chee̱ Dios gudxixruj lie̱ꞌ da nigá, naꞌ Le̱ꞌ dxuchálaje̱ꞌ da li.
\v 7 Chunne̱ꞌ dxelixruj lie̱ꞌ chee̱ da nigá xabáa, Xradxu Dios, ne Zríꞌine̱ꞌ, ne Beꞌ Láꞌazxa, naꞌ chunne̱ꞌ caní zaj naque̱ꞌ tuze.
\v 8 Cáꞌanqueze chunna da dxelixruj li na chee̱ da nigá lu xe̱zr la xu nigá, Beꞌ Láꞌazxa, ne da guca gate gudxúa Jesús nisa, ne da guca gate gulalaj dxen chee̱ꞌ, naꞌ da chunna caní, túzqueze da dxelixruj li na.
\v 9 Dxéajle̱dxu da dxelixruj li bénneache, san da nadxixruj li Dios zácadxa na, naꞌ Le̱ꞌ nadxixruj lie̱ꞌ naca Jesús Zríꞌinequeze̱ꞌ.
\v 10 Bénneaꞌ dxéajle̱ꞌe̱ naca Jesús Zriꞌine Dios ba guziꞌe̱ xichaj lázrdawe̱ꞌ da ba gudxixruj li Dios, san bénneaꞌ quebe dxéajle̱ꞌe̱ chee̱ Dios dxucáꞌane̱ꞌ Dios ca tu benneꞌ we̱n lazreꞌ, laweꞌ da quebe guxéajle̱ꞌe̱ chee̱ da ba gudxixruj li Dios ca naca chee̱ Zríꞌine̱ꞌ.
\v 11 Da nigá naca na da nadxixruj li Dios, dxenné̱ꞌ ba be̱nne̱ꞌ dxiꞌu xel-laꞌ nabán zeajlí canna, naꞌ xel-laꞌ nabán nigá za na lu naꞌ Zríꞌine̱ꞌ, Jesucristo.
\v 12 Bénneaꞌ zua Zriꞌine Dios naꞌ lu xichaj lázrdawe̱ꞌ zúale̱ xel-la nabán nigá le̱ꞌ, san bénneaꞌ quebe zua Zríꞌine̱ꞌ lu xichaj lázrdawe̱ꞌ quebe zúale̱ xel-laꞌ nabán nigá le̱ꞌ.
\s Ca gaca nezdxu nápadxu xel-laꞌ nabán zeajlí canna
\p
\v 13 Da nigá dxuzúajaꞌ chee̱le dxéajle̱le chee̱ Zriꞌine Dios chee̱ nézele zúale̱ xel-laꞌ nabán zeajlí canna leꞌe.
\p
\v 14 Dxuxrén lázredxu Dios laweꞌ da nezdxu che bi nábadxu lau Le̱ꞌ ca naca da dxaca lazreꞌ Le̱ꞌ, Lé̱queze̱ꞌ wenne̱ꞌ chee̱dxu.
\v 15 Laweꞌ da nezdxu Dios dxenne̱ꞌ chee̱dxu, cáꞌanqueze ba nezdxu gunna Le̱ꞌ da ba gunábadxu lau Le̱ꞌ.
\p
\v 16 Che tu benneꞌ dxeléꞌene̱ꞌ dxun bíchedxu dul-la da quebe nua na xel-laꞌ gute, dxal-laꞌ nabe̱ꞌ lau Dios ne̱ chee̱ bíchedxu naꞌ, naꞌ Dios gunézruje̱ꞌ xel-laꞌ nabán chee̱ꞌ, che naca na tu dul-la da quebe nua na xel-laꞌ gute. De̱ dul-la da nua na xel-laꞌ gute, naꞌ quebe dxenníaꞌ nábale lau Dios ne̱ chee̱ bénneaꞌ dxune̱ꞌ dul-la nigá.
\v 17 Xúgute̱ da cale̱la naca na dul-la, naꞌ de̱ dul-la da quebe nua na xel-laꞌ gute.
\p
\v 18 Nezdxu nu benneꞌ naca bi chee̱ Dios québedxa dxúnqueze̱ꞌ dul-la laweꞌ da dxuwía dxuxúe Zriꞌine Dios le̱ꞌ, naꞌ da xriwe̱ꞌ quebe bi dxezeque gune na le̱ꞌ.
\p
\v 19 Nezdxu nácadxu bi chee̱ Dios, naꞌ xúgute̱ benneꞌ zaj naca chee̱ xe̱zr la xu nigá zaj xuꞌe̱ lu naꞌ da xriwe̱ꞌ.
\p
\v 20 Nezdxu ba blaꞌ Zriꞌine Dios, ne ba bzéajniꞌine̱ꞌ dxiꞌu chee̱ gúnbeadxu Dios li. Nácadxu tuze nen Bénneaꞌ naque̱ꞌ li lazreꞌ, Jesucristo, Zriꞌine Dios. Benneꞌ nigá naque̱ꞌ Dios li, ne Lé̱queze̱ꞌ naque̱ꞌ xel-laꞌ nabán zeajlí canna da zúale̱ na dxiꞌu.
\v 21 Leꞌe, zríꞌinaꞌdauꞌ, le guxúe xanneꞌ cuínale chee̱ quebe gucáꞌana szrenle bedauꞌ xiaj xaga caꞌ.