\id 3JN
\h 2 Juan
\mt DIZRAꞌDAUꞌ GUXUNNEꞌ DA BZUAJ SAN JUAN
\c 1
\s San Juan dxenné̱ꞌ da chaweꞌ chee̱ benneꞌ le̱ꞌ Gayo
\p
\v 1 Nedaꞌ, benneꞌ gula we̱n zrin chee̱ Cristo, dxuzúajaꞌ da nigá chiuꞌ lueꞌ, Gayo, bi nazríꞌite̱ lazraꞌ. Da líqueze nazríꞌidaꞌ lueꞌ.
\p
\v 2 Lueꞌ, bi nazríꞌite̱ lazraꞌ, dxenabaꞌ lau Dios gaca da chaweꞌ chiuꞌ, ne suꞌ chaweꞌ, ca dxaca chee̱ bénneꞌdu xuꞌu.
\v 3 Gubéle̱ꞌe̱daꞌ gate beleláꞌ tu chupa benneꞌ bíchedxu, ne gulé̱ꞌe̱ nedaꞌ ca dxéajle̱ꞌu chee̱ Xránadxu, ne ca dxunuꞌ ca naca da li.
\v 4 Québequeze bi de̱ da gundxa na nedaꞌ súale̱ꞌa xel-laꞌ dxebé, ca xel-laꞌ dxebé da zuaꞌ gate dxendaꞌ dxelún benneꞌ zaj naque̱ꞌ ca zríꞌinequezaꞌ ca naca da li.
\p
\v 5 Lueꞌ, bi nazríꞌite̱ lazraꞌ, nacuꞌ benneꞌ li lazreꞌ ca naca da dxunuꞌ dxácale̱nuꞌ bi bíchedxu caꞌ, ne da naca blaudxa dxácale̱nuꞌ bi bíchedxu zaꞌaque̱ꞌ xe̱zre xula.
\v 6 Lau benneꞌ zaj nazrague̱ꞌ chee̱ Dios nigá dxuluchalaj bi bíchedxu caní ca nazriꞌinuꞌ bi bíchedxu caꞌ. Da cháwedauꞌ dxunuꞌ gate dxugúꞌu benneꞌ caní neza, dxácale̱nuꞌ le̱ꞌ ca naca da dxezaca ba lazreꞌ Dios.
\v 7 Benneꞌ caní zjaque̱ꞌ dxelune̱ꞌ zrin nigá laweꞌ da zaj nazriꞌine̱ꞌ Cristo, ne quebe bi dxeleziꞌe̱ da xelunna benneꞌ quebe zaj núnbeꞌe̱ Dios.
\v 8 Chee̱ le̱ naꞌ dxal-laꞌ gápadxu ba láꞌana benneꞌ caní chee̱ gúnle̱dxu le̱ꞌ zrin chee̱ da li.
\s Da cale̱la da dxun benneꞌ le̱ꞌ Diótrefes
\p
\v 9 Ba bzuajaꞌ chee̱ benneꞌ zaj nazrague̱ꞌ chee̱ Dios naga zuꞌ, naꞌ bénneaꞌ le̱ꞌ Diótrefes quebe dxape̱ꞌ netuꞌ ba láꞌana laweꞌ da dxaca lazre̱ꞌ gaque̱ꞌ blau láwela benneꞌ caꞌ.
\v 10 Chee̱ le̱ naꞌ, che xidaꞌ naga zuꞌ, guzéajniꞌidaꞌ benneꞌ caꞌ ca naca da dxun bénneaꞌ, dxezí tizre̱ꞌ netuꞌ, ne dxenné̱le̱ꞌe̱ chee̱ntuꞌ. Quegá da nigáze dxune̱ꞌ, san cáꞌanqueze quebe dxezíꞌ lu ne̱ꞌe̱ benneꞌ bíchedxu záꞌaque̱ꞌ ga naꞌ, ne quebe dxuꞌe̱ lataj benneꞌ caꞌ dxelaca lazre̱ꞌ xelezíꞌ lu ne̱ꞌe̱ benneꞌ caní, ne dxexebéaje̱ꞌ le̱ꞌ ládujla benneꞌ caꞌ zaj nazrague̱ꞌ chee̱ Dios.
\p
\v 11 Lueꞌ, bi nazríꞌite̱ lazraꞌ, quebe gunuꞌ lueꞌ ca naca da cale̱la da dxelún benneꞌ caní. Be̱n ca naca da xrlátaje. Bénneaꞌ dxune̱ꞌ da xrlátaje naque̱ꞌ chee̱ Dios, san nu benneꞌ dxune̱ꞌ da cale̱la, quebe ne gúnbeaqueze̱ꞌ Dios.
\s Da xrlátaje da dxun benneꞌ le̱ꞌ Demetrio
\p
\v 12 Xúgute̱ benneꞌ dxelenné̱ꞌ da chaweꞌ ca naca da dxun Demetrio, naꞌ da líqueze naca bea na ca dxune̱ꞌ. Cáꞌanqueze netuꞌ dxixruj beantuꞌ ca naca da dxune̱ꞌ, naꞌ lueꞌ nézqueznuꞌ dxuchálajntuꞌ da li.
\s Dizraꞌ bze̱be
\p
\v 13 Dé̱le̱ꞌe̱ da dxal-laꞌ guchálajle̱naꞌ lueꞌ, san quebe dxaca lazraꞌ guzúajaꞌ na lu xícheze,
\v 14 laweꞌ da dxebeza lazraꞌ léꞌete̱quezdaꞌ lueꞌ. Nadxa guchálajdxu caníqueze.
\p
\v 15 Dxenabaꞌ lau Dios sua zrize lazrdaꞌu. Bi bíchedxu zaj zraꞌ nigá dxulugape̱ꞌ lueꞌ diuzre. Bgapa lueꞌ diuzre tu tu benneꞌ bíchedxu zaj zre̱ꞌe̱ naga zuꞌ. Caꞌan gaca na.