\id JUD
\h Judas
\mt XTIZRA DIOS DA BZUAJ SAN JUDAS
\c 1
\s Dizraꞌ da gusel-la San Judas chee̱ bi caꞌ chee̱ Dios
\p
\v 1 Nedaꞌ, Judas, we̱n zrin chee̱ Jesucristo, nacaꞌ benneꞌ biche Jacobo, naꞌ dxesel-laꞌ dizraꞌ nigá chee̱le leꞌe, nácale benneꞌ caꞌ ba gunné̱ Xradxu Dios, ne ba guqué̱ꞌe̱ leꞌe chee̱ gácale bi chee̱ꞌ, ne dxuxúe̱ꞌ leꞌe laweꞌ da nácale tuze nen Jesucristo.
\v 2 Dxenabaꞌ lau Dios xache lázrele̱ꞌe̱ leꞌe, ne gúnnale̱ꞌe̱ chee̱le xel-laꞌ dxebeza zri lazreꞌ, ne xel-laꞌ zriꞌi lazreꞌ.
\s Ca naca chee̱ benneꞌ caꞌ dxulusé̱dene̱ꞌ da we̱n lazreꞌ
\r (2 Pedro 2.1-17)
\p
\v 3 Benneꞌ bíchaꞌdauꞌ nazriꞌite̱ lazraꞌ, ba guca lázreliꞌa guchálajle̱naꞌ leꞌe ca naca chee̱ xel-laꞌ weselá da ba nazile leꞌe, ne cáꞌanqueze nedaꞌ, san naꞌa dxun na ba xen guchálajle̱naꞌ leꞌe, ne gataꞌ xuedaꞌ leꞌe gapa típale da naca chee̱ xel-laꞌ dxeajlí lazreꞌ da ba be̱nna Dios chalásaze chee̱ bi chee̱ꞌ caꞌ.
\v 4 Caní naca laweꞌ da ba gulúꞌu benneꞌ we̱n lazreꞌ caꞌ ládujla dxiꞌu, benneꞌ caꞌ ba gunná Dios gate nate dxal-laꞌ xelebía xiꞌe̱. Zaj naque̱ꞌ benneꞌ dxelune̱ꞌ da sban, naꞌ laweꞌ da dxunite lau Dios chee̱ benneꞌ dul-la, dxeléquene̱ꞌ zaj nápaqueze̱ꞌ lataj xelune̱ꞌ cáte̱ze da dxelaca lazre̱ꞌ, ne dxuluzúe̱ꞌ chaláꞌala Dios tu lichaꞌ, Bénneaꞌ dxenná bea, ne Xránadxu Jesucristo.
\p
\v 5 Lácala ba nézquezle leꞌe da nigá, dxaca lazraꞌ gusáꞌa lázrele ca be̱n Xradxu Dios gate bebéaje̱ꞌ benneꞌ Israel caꞌ ládujla benneꞌ Egipto, naꞌ gudé naꞌ bzria xiꞌe̱ benneꞌ Israel caꞌ, benneꞌ quebe guléajle̱ꞌe̱ chee̱ꞌ.
\v 6 Cáꞌanqueze gubáz chee̱ xabáa, gubáz caꞌ chee̱ Dios, quebe belune̱ꞌ ca da guzre Dios le̱ꞌ, san bulucáꞌane̱ꞌ lataj chee̱ꞌ. Dios nuzague̱ꞌ le̱ꞌ lu da chul-la, ne nuchéaje̱ꞌ gubáz caꞌ chalásaze nen du xia, chee̱ guzría xiꞌe̱ le̱ꞌ lu zra bze̱be niꞌ.
\v 7 Cáꞌanqueze guca chee̱ xe̱zre Sodoma, ne xe̱zre Gomorra ne chee̱ xe̱zre walízredu caꞌ. Ca belún gubáz chee̱ xabáa caꞌ, cáꞌanqueze belún bénneache chee̱ xe̱zre caní. Buluzúa cuine̱ꞌ lu da sban, ne belune̱ꞌ cáte̱ze da gulaca lazre̱ꞌ, ne buluzúe̱ꞌ chaláꞌala ca da bdxixruj bea Dios chee̱ xel-laꞌ zúale̱ nuꞌula. Naꞌa, laweꞌ da bzria xiꞌ Dios benneꞌ caꞌ, bdee̱ꞌ le̱ꞌ tu lu xiꞌ da québedxa xexula na, naꞌ da naꞌ guca chee̱ benneꞌ caní dxuzéajniꞌi na dxiꞌu chee̱ quebe gúnquezdxu caꞌ.
\p
\v 8 Láqueze gulaca caní chee̱ benneꞌ caꞌ, cáꞌanqueze dxelún benneꞌ caní, zjácale̱ne̱ꞌ xel-laꞌ bchigala, ne dxulucaꞌane̱ꞌ sban be̱laꞌ dxen chee̱ꞌ, ne dxuluzúe̱ꞌ chaláꞌala xel-laꞌ dxenná bea chee̱ Xránadxu, ne dxelenné̱ꞌ schanniꞌ chee̱ gubáz chee̱ xabáa, gubáz caꞌ chee̱ Dios.
\v 9 Lé̱queze Miguel, gubáz blau chee̱ xabáa chee̱ Dios gate gudíl-lale̱ne̱ꞌ da xriwe̱ꞌ, ne btil-le̱ꞌ dizraꞌ nen le̱ na chee̱ guca bexuꞌe̱ be̱l-laꞌ dxen chee̱ Moisés, quebe bexázrjene̱ꞌ nnabe̱ꞌ da ba xaꞌ, san guzre̱ꞌ na: “Xránadxu Dios tíl-laqueze̱ꞌ lueꞌ.”
\v 10 Naꞌa benneꞌ caní dxelenné̱ꞌ schanniꞌ chee̱ da quebe zaj núnbeꞌe̱, naꞌ da ba zaj núnbeaqueze̱ꞌ, ca da zaj neze be̱ xixreꞌ, be̱ quebe zaj naxéajniꞌibaꞌ, da caní dxuluchínene̱ꞌ chee̱ xuluzría xiꞌ cuine̱ꞌ.
\p
\v 11 Edxugua benneꞌ caní laweꞌ da dxelune̱ꞌ ca da be̱n Caín, chee̱ gulezíꞌ lu ne̱ꞌe̱ dumí, buluzúe̱ꞌ chaláꞌala da dxenná Dios ca be̱n Balaam, naꞌ welexenite̱ꞌ ca guca chee̱ Coré, bénneaꞌ bzria xiꞌ Dios laweꞌ da gudábague̱ꞌ xrtizra Dios.
\v 12 Benneꞌ caní, gate dxelágule̱ne̱ꞌ leꞌe lu laní chee̱le dxelune̱ꞌ cheajlechaze bénneache. Dxeléꞌaj dxelawe̱ꞌ nen leꞌe, ne quebe dxelape̱ꞌ ba láꞌana Dios. Dxelún cuine̱ꞌ ca benneꞌ dxuluxúe̱ꞌ zrilaꞌ, san dxuluxúeze cuine̱ꞌ. Zaj naque̱ꞌ ca beuj caꞌ quebe zaj xuzru nisa, beuj caꞌ da dxua beꞌ. Zaj naque̱ꞌ ca xaga caꞌ quebe dxelebía na da zixre chee̱ na, ne zaj nabizre na du lue na, ne ba zaj zua na chee̱ le̱pe na.
\v 13 Zaj naque̱ꞌ ca xeajxruza chee̱ nísadauꞌ da dxedxúꞌu na bzrinaꞌ sgute, da dxuléꞌe na ca da sban da dxelune̱ꞌ. Zaj naque̱ꞌ ca belaj caꞌ dxelecuasa na lu xrneze na, ne zaj nabía xi na chee̱ cheajsúa na chadía chacanna lu da chul-la.
\p
\v 14 Cáꞌanqueze Enoc, benneꞌ chee̱ gazre cueꞌ zre sua Adán gunné̱ꞌ waláz chee̱ Dios ca naca chee̱ benneꞌ caní, gunné̱ꞌ: “Bleꞌedaꞌ Xránadxu ze̱ꞌe̱ nen gaxúane gaxúane bi chee̱ caꞌ
\v 15 chee̱ guchiꞌe̱ ca da zaj nun xúgute̱ bénneache. Gulezría xiꞌ xúgute̱ benneꞌ we̱n da sban ne̱ chee̱ da cale̱la da belune̱ꞌ lu xel-laꞌ cale̱la chee̱ꞌ, nen benneꞌ dul-la caꞌ ne̱ chee̱ xúgute̱ dizraꞌ schanniꞌ da gulenné̱ chee̱ Dios.”
\v 16 Zaj naque̱ꞌ benneꞌ wagu zria, ne benneꞌ wezí tizraꞌ, benneꞌ dxelunze̱ꞌ cáte̱ze dxelezaca ba lazre̱ꞌ. Dxuluchálaje̱ꞌ dizraꞌ da dxucáꞌana szren na le̱ꞌ, ne dxelennáze̱ꞌ da chaweꞌ chee̱ bénneache chee̱ xelezíꞌe̱ da zaj de̱ chee̱ benneꞌ caꞌ.
\s San Judas dxenné̱ xuene̱ꞌ bi caꞌ chee̱ Xránadxu
\p
\v 17 Leꞌe, benneꞌ bíchaꞌdauꞌ nazriꞌite̱ lazraꞌ, le gusá lázrele ca zánete̱ iza gulenná benneꞌ gubáz chee̱ Xránadxu Jesucristo,
\v 18 gulé̱ꞌe̱ leꞌe: Lu zra bze̱be welezráꞌ benneꞌ xelún le̱ꞌ chee̱ da caꞌ zaj naca láꞌazxa, ne xelune̱ꞌ cáte̱ze zaj naca da sban da dxelezá lazre̱ꞌ.
\v 19 Benneꞌ caní dxelune̱ꞌ chupa laꞌa bénneache. Zaj naque̱ꞌ benneꞌ chee̱ xe̱zr la xu nigá, ne quebe zúale̱ Beꞌ Láꞌazxa chee̱ Dios le̱ꞌ.
\p
\v 20 Leꞌe, benneꞌ nazriꞌite̱ lazraꞌ, le se̱ chacha ca naca lu xel-laꞌ dxeajlí lazreꞌ láꞌazxa da nápale. Le guchálajle̱ Dios, zúale̱ xel-laꞌ waca chee̱ Beꞌ Láꞌazxa leꞌe.
\v 21 Le chaꞌ lu xel-laꞌ zriꞌi lazreꞌ chee̱ Dios, ne le cueza zra gate gunna Xránadxu Jesucristo dxiꞌu xel-laꞌ nabán da zeajlí canna lu xel-laꞌ zriꞌi lazreꞌ chee̱ꞌ.
\p
\v 22 Le gácale̱ benneꞌ caꞌ dxelaca chupa lazre̱ꞌ ca naca chee̱ Cristo.
\v 23 Le gun xelelá benneꞌ xula chee̱ quebe chjaque̱ꞌ lu xiꞌ chee̱ lataj ba xaꞌ, ne le xexache lazreꞌ xezícala bénneache. Le guxúe xanneꞌ ca naca da sban da dxelún benneꞌ caꞌ chee̱ quebe caꞌa le̱ na leꞌe.
\s San Judas dxue láꞌane̱ꞌ Dios
\p
\v 24-25 Dios tu lichaꞌ, Benneꞌ naque̱ꞌ sina, ne naque̱ꞌ Weselá chee̱dxu, wazéquene̱ꞌ guxúe̱ꞌ leꞌe chee̱ quebe cuásale Le̱ꞌ, ne chee̱ guzúe̱ꞌ leꞌe lau Le̱ꞌ lu xel-laꞌ szren chee̱ꞌ, ne chee̱ quebe dxenle da naca chee̱ dul-la, ne chee̱ súale̱queze xel-laꞌ dxebé leꞌe.
\p ¡Gaca ba Le̱ꞌ, ne gaca chee̱ꞌ xel-laꞌ szren, ne xel-laꞌ waca, ne xel-laꞌ dxenná bea, ne̱ chee̱ Xránadxu Jesucristo, naꞌa zra, ne chadía chacanna! ¡Caꞌan gaca na!