\id REV
\h Apocalipsis
\mt DIZRAꞌ DA BLEꞌE JESUCRISTO JUAN
\c 1
\s Da bleꞌe Jesucristo Juan
\p
\v 1 Da nigá naca tu da bnezruj Dios Jesucristo da guléꞌene̱ꞌ we̱n zrin chee̱ꞌ caꞌ ca naca da dxal-laꞌ gácate̱. Jesucristo gusel-le̱ꞌ gubáz chee̱ xabáa chee̱ꞌ, naꞌ le̱ꞌ bzéajniꞌine̱ꞌ nedaꞌ, Juan, nacaꞌ we̱n zrin chee̱ Jesús.
\v 2 Nedaꞌ dxuléꞌedaꞌ leꞌe da li ca naca xúgute̱ da bleꞌedaꞌ, ne dxexeche̱baꞌ ca naca dizraꞌ chee̱ Dios, ne ca naca da gunná Jesucristo.
\p
\v 3 Ba neza zrente̱ naca na chee̱ benneꞌ gulabe̱ꞌ, ne cáꞌanqueze ba neza zrente̱ naca na chee̱ benneꞌ caꞌ dxuluzé̱ nague̱ꞌ chee̱ bénneaꞌ gulabe̱ꞌ dizraꞌ nigá da be̱nna Dios, ne xelune̱ꞌ ca naca da naxúaj nigá, laweꞌ da ba za gáguze zra gaca na.
\s Juan dxuzuaje̱ꞌ chee̱ gazre cueꞌ benneꞌ dxeléajle̱ꞌe̱ chee̱ Jesús
\p
\v 4 Nedaꞌ, Juan, dxuzúajaꞌ chee̱ gazre cueꞌ benneꞌ dxeléajle̱ꞌe̱ chee̱ Jesús, zaj zre̱ꞌe̱ naga nababa Asia. Dxenabaꞌ lau Dios gaca chaweꞌ chee̱le, ne gunne̱ꞌ leꞌe xel-laꞌ dxebeza zri lazreꞌ. Le̱ꞌ guzúaqueze̱ꞌ nédxudaute̱, ne zúaqueze̱ꞌ naꞌa, ne tu súazqueze̱ꞌ chadía chacanna. Gazre Beꞌ caꞌ zaj zraꞌ ca li naga dxeꞌ Dios zaj naca Le̱ꞌ tuze,
\v 5 ne cáꞌanqueze Jesucristo naque̱ꞌ Le̱ꞌ tuze ca naca da chaweꞌ da dxun Dios chee̱le. Jesucristo naque̱ꞌ benneꞌ li lazreꞌ dxexeche̱be̱ꞌ ca da zaj naca chee̱ Dios, ne naque̱ꞌ benneꞌ nedxu bebane̱ꞌ chalásaze ládujla benneꞌ gate caꞌ, ne nape̱ꞌ xel-laꞌ dxenná bea láwela xúgute̱ wenná bea zaj zre̱ꞌe̱ xe̱zr la xu nigá. Cristo nazriꞌine̱ꞌ dxiꞌu, ne ba gudibe̱ꞌ xichaj lázrdaudxu. Begüe̱ꞌ dul-la chee̱dxu gate blálaje̱ꞌ dxen cheé̱queze̱ꞌ le̱ꞌe̱ xaga begúaj.
\v 6 Be̱ne̱ꞌ dxiꞌu ca benneꞌ wenná bea caꞌ, ne bxruze caꞌ chee̱ gundxu zrin chee̱ Dios chee̱ꞌ, Bénneaꞌ naque̱ꞌ Xre̱ꞌ. ¡Gaca ba Le̱ꞌ, ne gape̱ꞌ xel-laꞌ dxenná bea chadía chacanna! ¡Caꞌan gaca na!
\p
\v 7 Le naꞌ xque. Cristo ze̱ꞌe̱ lu beuj bza. Xúgute̱ bénneache xeleléꞌene̱ꞌ Le̱ꞌ, ne cáꞌanqueze benneꞌ caꞌ belune̱ꞌ Le̱ꞌ we̱ꞌ, naꞌ ca naca bénneache zaj zraꞌ lu xe̱zr la xu xelebezre xache̱ꞌe̱ ca xeleléꞌene̱ꞌ Le̱ꞌ. ¡Aweꞌ, caꞌan gaca na!
\p
\v 8 Le̱ꞌ dxenné̱ꞌ: “Nedaꞌ zúaquezaꞌ nédxudaute̱, ne zúaquezaꞌ bzé̱bedxa. Dxunaꞌ su lau sua xúgute̱ ne gunaꞌ xexuzre na.” Caní dxenná Xránadxu, nape̱ꞌ dute̱ xel-laꞌ dxenná bea, naque̱ꞌ Bénneaꞌ guzúaqueze̱ꞌ, ne zúaqueze̱ꞌ, ne tu súazqueze̱ꞌ.
\s Juan dxeléꞌene̱ꞌ tu da bleꞌe Dios le̱ꞌ da naca na da xabáa chee̱ Cristo
\p
\v 9 Nedaꞌ, Juan, nacaꞌ benneꞌ bíchele leꞌe, ne nacaꞌ tuze nen leꞌe lu xel-laꞌ ziꞌ, ne lu xel-laꞌ dxenná bea, ne lu xel-laꞌ dxuchaga lau da dxunna Jesucristo dxiꞌu. Ca tu benneꞌ xuꞌe̱ lizre xia guzúaꞌ lu xe̱zr la xu Patmos da naxechaj nísadauꞌ, laweꞌ da bchálajaꞌ dizraꞌ chee̱ Dios ne dxunaꞌ ba nalí ca naca chee̱ Jesucristo.
\v 10 Guzúale̱ Beꞌ Láꞌazxa nedaꞌ lu zra chee̱ Xránadxu, naꞌ bendaꞌ cúzrulaꞌ chiꞌi tu benneꞌ dxenné̱ꞌ zizraj ca chiꞌi luzu da dxulucuezre̱ꞌ.
\v 11 Gunné̱ꞌ:
\p ―Nedaꞌ nacaꞌ nedxu, ne bze̱be ca naca da dxezú lau, ne da dxexuzre na. Bzuaj tu lu xiche da dxeléꞌenuꞌ, naꞌ gusel-la na chee̱ gazre cueꞌ bénneache dxeléajle̱ꞌe̱ chiaꞌ, zaj zre̱ꞌe̱ naga nababa Asia, benneꞌ caꞌ zaj zre̱ꞌe̱ xe̱zre Efeso, ne xe̱zre Esmirna, ne xe̱zre Pérgamo, ne xe̱zre Tiatira, ne xe̱zre Sardis, ne xe̱zre Filadelfia, ne xe̱zre Laodicea.
\p
\v 12 Bexéchajaꞌ chee̱ leꞌedaꞌ nu chiꞌi naꞌ gunné̱ nedaꞌ, naꞌ ca bexéchajaꞌ naꞌ, bleꞌedaꞌ gazre da zua na xiꞌ daꞌ zaj naca na oro.
\v 13 Laduj da zaj zua na xiꞌ caꞌ bleꞌedaꞌ tu benneꞌ naque̱ꞌ ca Bénneaꞌ gulje̱ꞌ bénneache, nácue̱ꞌ zra lane̱ꞌ da dxezrinte̱ lu niꞌe̱ dxeꞌela, naꞌ xuꞌu tu bazxu oro lachuꞌe̱.
\v 14 Xicha xíchaje̱ꞌ zaj naca na chiche ca zrilaꞌ chiche, u ca bezxeꞌ, naꞌ xiaj lawe̱ꞌ dxelácatite legala na ca xiꞌ.
\v 15 Niꞌe̱ dxelácatite na ca xia da gudete̱ bea guxúꞌu na lu xiꞌ, naꞌ chiꞌe̱ naca na zizraj ca naca chiꞌi zaneꞌ xe̱gu zriꞌa caꞌ.
\v 16 Lu ne̱ꞌe̱ da zua xabe̱la nuxre̱ꞌ da caꞌ zaj naca ca gazre belaj xabáa, naꞌ dxuꞌe̱ dxedxuaj da naca na ca tu xia da nalá dxupa laꞌate̱. Dxuꞌa lawe̱ꞌ dxácatite na ca gubizra gate dxennále̱ꞌe̱ na.
\p
\v 17 Ca bleꞌedaꞌ Le̱ꞌ, xeajchaziaꞌ zran niꞌe̱ ca tu benneꞌ gate. Naꞌ Le̱ꞌ guxrúa ne̱ꞌe̱ xabe̱la nedaꞌ, naꞌ gunné̱ꞌ:
\p ―Quebe zrebuꞌ. Nedaꞌ zúaquezaꞌ nédxudaute̱, ne zúaquezaꞌ bzé̱bedxa.
\v 18 Naca bánquezaꞌ. Gutiaꞌ, naꞌ naꞌa nabánquezaꞌ chadía chacanna. Nedaꞌ nuxraꞌ zren xia chee̱ xel-laꞌ gute, ne chee̱ lataj ba xaꞌ.
\v 19 Bzuaj da ba bléꞌenuꞌ ne da dxaca naꞌa, ne da gaca te nigá.
\v 20 Caní naca da zéaje̱ ca gazre belaj caꞌ bléꞌenuꞌ nuxraꞌ naꞌa xabe̱la, ne ca naca chee̱ gazre da zua na xiꞌ daꞌ zaj naca na oro. Gazre da zaj naca ca belaj caꞌ zéaje̱ na gubáz caꞌ nasel-laꞌ chee̱ gazre cueꞌ bénneache chiaꞌ caꞌ, naꞌ gazre da zua na xiꞌ zéaje̱ na gazre cueꞌ bénneache chiaꞌ caꞌ.
\c 2
\s Dizraꞌ gusel-la Cristo chee̱ gazre cueꞌ bénneache chee̱ꞌ
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Efeso
\p
\v 1 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Efeso. Bzuaj da nigá: Caní dxenná Jesús, Bénneaꞌ nuxre̱ꞌ gazre belaj ne̱ꞌe̱ xabe̱la, ne dxedé̱ꞌ laduj gazre da zua na xiꞌ da zaj naca na oro.
\v 2 Nedaꞌ nezdaꞌ xúgute̱ da dxunle. Nezdaꞌ dxúnle̱ꞌe̱le zrin ne nácale zren lazreꞌ, ne quebe dxuele lataj benneꞌ we̱n da zrinnaj caꞌ. Nedaꞌ nezdaꞌ ba bxue xánnele benneꞌ caꞌ dxelenné̱ꞌ zaj naque̱ꞌ gubáz chiaꞌ ne quebe zaj naque̱ꞌ, naꞌ ba bleꞌele zaj naque̱ꞌ benneꞌ we̱n lazreꞌ.
\v 3 Gúcale zren lazreꞌ, ne gudele xel-laꞌ ziꞌ, naꞌ bé̱nle̱ꞌe̱le zrin chiaꞌ, ne quebe gute niꞌa naꞌle.
\v 4 Naꞌa zua tu da dxagu na zria chee̱le, québedxa nazriꞌile nedaꞌ ca bzriꞌile nedaꞌ nédxute̱.
\v 5 Chee̱ le̱ naꞌ, le gusá lazreꞌ ca bzriꞌile nedaꞌ nédxute̱, ne le xexíaje lazreꞌ, naꞌ le gun ca da be̱nle nédxute̱. Che quebe gunle caní xídaquezaꞌ naga zúale, naꞌ xecáꞌa xrlátajle lu da naca chiaꞌ chee̱ québedxa gácale ca da zua na xiꞌ chiaꞌ. Caní gunaꞌ che quebe xexíaje lázrele.
\v 6 Zua tu da dxexecáꞌa na leꞌe, dxecuídele da dxelún benneꞌ caꞌ zaj nazí le̱ꞌ nicolaíta caꞌ, benneꞌ caꞌ dxulucáꞌana szrene̱ꞌ bedauꞌ xiaj xaga caꞌ, da naꞌ dxecuídequezaꞌ nedaꞌ.
\v 7 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ. Benneꞌ caꞌ xeledxúaje̱ꞌ xrlátaje laweꞌ da zrinnaj, nedaꞌ gunézrujaꞌ da xelawe̱ꞌ da dxebía xaga da dxunna na xel-laꞌ nabán, ne zua na lu lataj xrlátaje chee̱ Dios.
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Esmirna
\p
\v 8 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Esmirna. Bzuaj da nigá: Caní dxenná Jesús, Bénneaꞌ zúaqueze̱ꞌ nédxudaute̱, ne zúaqueze̱ꞌ bzé̱bedxa, Bénneaꞌ gutie̱ꞌ, ne bebánqueze̱ꞌ.
\v 9 Nedaꞌ nezdaꞌ xúgute̱ da dxunuꞌ. Nezdaꞌ gudele xel-laꞌ ziꞌ, ne nácale benneꞌ xacheꞌ. Da li nácale benneꞌ gunníꞌa. Nezdaꞌ ca dxelenné̱ schanniꞌ chee̱le benneꞌ caꞌ dxelenné̱ꞌ zaj naque̱ꞌ judío, san zaj naque̱ꞌ tu cueꞌ benneꞌ dxulucáꞌana szrene̱ꞌ da xriwe̱ꞌ.
\v 10 Quebe zrébele ca naca xel-l aꞌ ziꞌ da tele, laweꞌ da guzráꞌ da xriwe̱ꞌ bál-lale leꞌe lizre xia chee̱ guléꞌe lau da nácale, naꞌ tele xel-laꞌ ziꞌ laweꞌ chi zra. Le gaca li lazreꞌ lácala xelutie̱ꞌ leꞌe, naꞌ nedaꞌ gunnaꞌ leꞌe xel-laꞌ nabán ca tu da dxunna bea na be̱dxuajle chaweꞌ.
\v 11 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ. Benneꞌ caꞌ xeledxúaje̱ꞌ chaweꞌ laweꞌ da zrinnaj, quebe bi gune da ziꞌ da xaꞌ da zeajlí canna chee̱ benneꞌ caꞌ.
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Pérgamo
\p
\v 12 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Pérgamo. Bzuaj da nigá: Caní dxenná Jesús, Bénneaꞌ nuxre̱ꞌ xia da nalá dxupa laꞌa.
\v 13 Nedaꞌ nezdaꞌ xúgute̱ da dxunle. Nezdaꞌ zúale naga dxenná bea da xriwe̱ꞌ. Quebe nusanle da naca chiaꞌ. Quebe bsanle dxexeché̱bele chiaꞌ, ne lu zra caꞌ gate belutie̱ꞌ Antipas, benneꞌ beche̱be̱ꞌ du lazre̱ꞌ da naca chiaꞌ ládujla leꞌe, naga zua da xriwe̱ꞌ.
\v 14 Naꞌa, zua tu da dxagu na zria chee̱le, dxuele lataj zaj zraꞌ ládujla leꞌe benneꞌ caꞌ ne zjácale̱ne̱ꞌ da bse̱de Balaam, bénneaꞌ gulúꞌu xel-le̱ꞌ Balac, bennenꞌ be̱ne̱ꞌ belún benneꞌ Israel caꞌ dul-la, naꞌ gulawe̱ꞌ da buluzríe̱ꞌ lau bedauꞌ xiaj xaga caꞌ, ne belune̱ꞌ da sban.
\v 15 Cáꞌanqueze zaj zraꞌ ládujla leꞌe bal-la benneꞌ ne zjácale̱ne̱ꞌ da dxuluse̱de benneꞌ zaj nazí le̱ꞌ nicolaíta, da naꞌ dxecuídequezaꞌ nedaꞌ.
\v 16 Chee̱ le̱ naꞌ le xexíaje lázrele laweꞌ da che quebe xexíaje lázrele xidaꞌ naga zúale, naꞌ tíl-lale̱naꞌ benneꞌ caꞌ nen xia nalá da dxedxuaj na dxuꞌa.
\v 17 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ. Benneꞌ xedxuaje̱ꞌ chaweꞌ laweꞌ da zrinnaj, nedaꞌ gunézrujaꞌ da gawe̱ꞌ da naca na xeta maná da nagache na xabáa, ne gunézrujaꞌ le̱ꞌ tu xiaj chiche, naꞌ le̱ꞌe̱ xiaj naꞌ naxúaj tu la cube chee̱ bénneaꞌ, da quebe nu neze, san tuze bénneaꞌ siꞌe̱ na.
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Tiatira
\p
\v 18 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Tiatira. Bzuaj da nigá: Caní dxenná Jesús, Bénneaꞌ zaj zra xiaj lawe̱ꞌ da dxelácatite na ca xiꞌ, naꞌ niꞌe̱ zaj naca na ca xia gache da nabáꞌale̱ꞌe̱ na.
\v 19 Nedaꞌ nezdaꞌ xúgute̱ da dxunle. Nezdaꞌ ca nazriꞌile nedaꞌ, ne ca dxéajle̱le chiaꞌ, ne ca dxunle zrin chiaꞌ, ne ca nácale zren lazreꞌ, naꞌ dxúndxale naꞌa da zrendxa ca da be̱nle nédxute̱.
\v 20 Naꞌa, zua tu da dxagu na zria chee̱le, dxuele lataj nuꞌula naꞌ le̱ꞌ Jezabel, nuꞌula naꞌ dxenné̱ꞌ dxuchálaje̱ꞌ waláz chee̱ Dios, naꞌ dxezí xe̱ꞌe̱ benneꞌ we̱n zrin chiaꞌ caꞌ ca naca da dxusé̱dene̱ꞌ chee̱ xelune̱ꞌ da sban, ne xelawe̱ꞌ da dxuluzríe̱ꞌ lau bedauꞌ xiaj xaga caꞌ.
\v 21 Nedaꞌ ba beꞌa nuꞌula naꞌ lataj xexíaje lazre̱ꞌ, naꞌ quebe guca lazre̱ꞌ. Quebe dxusane̱ꞌ ca naca da sban da dxune̱ꞌ.
\v 22 Naꞌa, che benneꞌ caꞌ quebe xulusane̱ꞌ ca da dxelune̱ꞌ ca dxun nuꞌula naꞌ, nedaꞌ cuꞌa le̱ꞌ xel-laꞌ we̱ꞌ da quixruj na le̱ꞌ, naꞌ weledéle̱ꞌe̱ xel-laꞌ ziꞌ benneꞌ caꞌ dxelune̱ꞌ dul-la nen nuꞌula naꞌ,
\v 23 naꞌ gútequezaꞌ benneꞌ caꞌ zaj de̱ꞌe̱ nuꞌula naꞌ. Caní gaca, xúgute̱ cueꞌ bi chiaꞌ caꞌ xeleque beꞌene̱ꞌ nedaꞌ nezdaꞌ ca naca dute̱ da zua lu xichaj lázrdau bénneache, naꞌ tu tule leꞌe gunnaꞌ leꞌe cáte̱ze naca da be̱nle.
\v 24 Xezícadxale leꞌe zrale xe̱zre Tiatira, quebe zéajle̱le da naꞌ dxuse̱de nuꞌula naꞌ, ne quebe ne sile da dxenné̱ꞌ naca na da nagache chee̱ da xriwe̱ꞌ, nedaꞌ dxapaꞌ leꞌe, quebe bi xetú da guchaꞌ leꞌe gunle.
\v 25 Le gapa chiꞌi xel-laꞌ dxixruj beꞌe da ba guchaꞌ leꞌe gunle ca zrindxa zra xeláꞌa nedaꞌ.
\v 26 Benneꞌ caꞌ xeledxúaje̱ꞌ chaweꞌ laweꞌ da zrinnaj, ne xelune̱ꞌ ca dxaca lazraꞌ nedaꞌ ca zrindxa zra bze̱be niꞌ, nedaꞌ gunézrujaꞌ chee̱ benneꞌ caꞌ xel-laꞌ dxenná bea laweꞌ xe̱zre caꞌ,
\v 27 ca be̱n Xraꞌ, be̱nne̱ꞌ nedaꞌ xel-laꞌ dxenná bea, naꞌ xelenná beꞌene̱ꞌ benneꞌ xe̱zre caꞌ nen tu var xia, naꞌ xuluzría xiꞌe̱ xe̱zre caꞌ ca dxun tu benneꞌ dxelé̱ꞌe̱ tu xesuꞌ xu.
\v 28 Cáꞌanqueze guꞌa benneꞌ caꞌ lataj xelezúale̱ne̱ꞌ nedaꞌ, nacaꞌ ca belaj zila.
\v 29 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
\c 3
\s Dizraꞌ gusel-le̱ꞌ chee̱ bi chee̱ꞌ caꞌ zaj zre̱ꞌe̱ xe̱zre Sardis
\p
\v 1 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Sardis. Bzuaj da nigá: Caní dxenná Jesús, Bénneaꞌ zaj zúale̱ gazre Beꞌ chee̱ Dios Le̱ꞌ, ne nuxre̱ꞌ da gazre caꞌ zaj naca ca belaj caꞌ. Nedaꞌ nezdaꞌ xúgute̱ da dxunle. Nezdaꞌ ba nácale ca benneꞌ gate caꞌ lau Dios lácala dxeleque bénneache naca banle.
\v 2 Le guxúe, ne le sua chacha chee̱ québedxa gácale ca benneꞌ caꞌ ba zúate̱ xelátie̱ꞌ. Dxeleꞌedaꞌ da dxunle, quebe naca na li lazreꞌ lau Dios chiaꞌ.
\v 3 Le gusá lazreꞌ ca naca da ba nazé̱dele. Le chéajle̱ na, ne le xexíaje lazreꞌ. Che quebe guxúe cuínale widaꞌ naga zúale ca za tu gubán, ne quebe nézele bi zra xidaꞌ.
\v 4 Zaj zraꞌ ládujla leꞌe bábaze benneꞌ quebe ne xelune̱ꞌ da sban, naꞌ benneꞌ caní xeledále̱ne̱ꞌ nedaꞌ, ne xelácue̱ꞌ zra lane̱ꞌ chiche laweꞌ da caní dxal-laꞌ gaca chee̱ꞌ.
\v 5 Benneꞌ caꞌ xeledxúaje̱ꞌ chaweꞌ laweꞌ da zrinnaj xelácue̱ꞌ zra lane̱ꞌ chiche ne quebe xusulaꞌ la benneꞌ caꞌ lu xiche naga zaj naxúaj la benneꞌ caꞌ zúale̱ xel-laꞌ nabán le̱ꞌ, naꞌ xeche̱baꞌ chee̱ benneꞌ caꞌ lau Xraꞌ ne lau gubáz chee̱ xabáa chee̱ꞌ caꞌ.
\v 6 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Filadelfia
\p
\v 7 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Filadelfia. Bzuaj da nigá: Caní dxenná Jesús, Bénneaꞌ naque̱ꞌ láꞌazxa ne li lazreꞌ, Bénneaꞌ nuxre̱ꞌ zren xia da dxunna bea na nape̱ꞌ xel-laꞌ dxenná bea ca da gudapa wenná bea David, naꞌ gate salje̱ꞌ, netú quebe nu gaca xusezxuj, naꞌ gate xusézxuje̱ꞌ netú quebe nu gaca salaj.
\v 8 Nedaꞌ nezdaꞌ xúgute̱ da dxunle. Nuzúaꞌ laule leꞌe tu dxa xuꞌu da naxalaj, da quebe nu gaca xusezxuj. Lácala quebe nadípate̱cale, zéajle̱le dizraꞌ chiaꞌ, ne quebe ne gusán lázrele da naca chiaꞌ.
\v 9 Benneꞌ caꞌ dxulucáꞌana szrene̱ꞌ da xriwe̱ꞌ, benneꞌ we̱n lazreꞌ caꞌ, benneꞌ dxelenné̱ꞌ zaj naque̱ꞌ judío ne quebe zaj naque̱ꞌ, nedaꞌ gunaꞌ xuluzú zribe̱ꞌ zran níꞌale chee̱ xelenézene̱ꞌ nedaꞌ nazríꞌidaꞌ leꞌe.
\v 10 Ba be̱nle ca da guchaꞌ leꞌe gunle chee̱ gácale zren lazreꞌ, naꞌ chee̱ le̱ naꞌ guxúequezaꞌ leꞌe laweꞌ xel-laꞌ ziꞌ da xeledé xúgute̱ bénneache zaj zre̱ꞌe̱ lu xe̱zr la xu, chee̱ guléꞌe lau da zaj naque̱ꞌ.
\v 11 Wídaze̱quezaꞌ. Le gapa chiꞌi da nápale chee̱ quebe nu caꞌa ca da dxal-laꞌ siꞌle.
\v 12 Benneꞌ caꞌ xeledxúaje̱ꞌ chaweꞌ laweꞌ da zrinnaj, nedaꞌ gun chachaꞌ benneꞌ caꞌ, naꞌ xelaque̱ꞌ ca zeꞌe xiaj caꞌ zaj zua na lizre Xraꞌ, ne cabátaquezdxa xelexedxúaje̱ꞌ naꞌ, naꞌ lu lázrdawe̱ꞌ guzúajaꞌ La Xraꞌ, ne la xe̱zre chee̱ Dios chiaꞌ da naca na Jerusalén cube da zaꞌ xabáa, ne Laꞌ cube.
\v 13 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
\s Dizraꞌ gusel-le̱ꞌ chee̱ bi chee̱ꞌ zaj zre̱ꞌe̱ xe̱zre Laodicea
\p
\v 14 Guzre Jesús nedaꞌ:
\p ―Bzuaj chee̱ gubáz chiaꞌ zúale̱ne̱ꞌ bi chiaꞌ zaj zre̱ꞌe̱ xe̱zre Laodicea. Bzuaj da nigá: Caní dxenná Jesús, Bénneaꞌ naque̱ꞌ li lazreꞌ, Bénneaꞌ dxexeche̱be̱ꞌ da li, Bénneaꞌ naque̱ꞌ naga guzú lau xúgute̱ da be̱n Dios.
\v 15 Nedaꞌ nezdaꞌ xúgute̱ da dxunle. Nezdaꞌ quebe nácale zaga ca dxunle da naca chiaꞌ, ne quebe nácale láte̱la. Dxaca lazraꞌ la gácale zaga u la.
\v 16 Nácale ca nisa bate, ne quebe nácale zaga, ne quebe nácale la, naꞌ chuꞌunaꞌ leꞌe ca tu benneꞌ dxexe̱be̱ꞌ nisa bate.
\v 17 Leꞌe dxennale nácale gunníꞌa, ne dxaca chaweꞌ chee̱le ne quebe bi dxexázrjele, naꞌ quebe dxéquebeꞌeleꞌ dxaca ba xaꞌ chee̱le ne dxezaca ziꞌle, ne nácale xacheꞌ, ne nácale la chul-la, ne nácale gala xide.
\v 18 Chee̱ le̱ naꞌ dxuzéajniꞌidaꞌ leꞌe siꞌle lu naꞌ nedaꞌ da naca ca oro da nabáꞌa na lu xiꞌ, chee̱ gápale xel-laꞌ gunníꞌa li lazreꞌ, ne siꞌle zra lánale chiche chee̱ gácule, da gunnaꞌ leꞌe, naꞌ xenite xel-laꞌ stuꞌ chee̱ da gúcale gala xide, ne siꞌle da cuꞌule xiaj laule chee̱ xeléꞌele.
\v 19 Nedaꞌ dxusízredaꞌ, ne dxudéaꞌ xel-laꞌ ziꞌ xúgute̱ benneꞌ caꞌ nazríꞌidaꞌ. Chee̱ le̱ naꞌ dxal-laꞌ xexíaje lázrele ne gunle zrin chiaꞌ du lázrele.
\v 20 Le naꞌ xque. Nedaꞌ zeaꞌ dxa xuꞌu dxenniaꞌ. Che nu benneꞌ xenne̱ꞌ chiꞌa, ne salje̱ꞌ xuꞌu, naꞌ chuꞌa gágule̱naꞌ le̱ꞌ, naꞌ le̱ꞌ gágule̱ne̱ꞌ nedaꞌ.
\v 21 Benneꞌ caꞌ xeledxúaje̱ꞌ chaweꞌ laweꞌ da zrinnaj, nedaꞌ gunézrujaꞌ le̱ꞌ lataj xelebéꞌle̱ne̱ꞌ nedaꞌ naga dxenná beꞌa, ca nedaꞌ bedxúajaꞌ chaweꞌ, ne dxéꞌle̱naꞌ Xraꞌ naga dxenná bea Le̱ꞌ.
\v 22 Benneꞌ zua nague̱ꞌ dxal-laꞌ xenne̱ꞌ da nigá dxe̱ Beꞌ Láꞌazxa bi chiaꞌ caꞌ.
\c 4
\s Dxulucáꞌana szrene̱ꞌ Dios lu xabáa
\p
\v 1 Ca gudé naꞌ gunnáꞌa, naꞌ bleꞌedaꞌ tu dxa xuꞌu da naxalaj na xabáa, naꞌ bendaꞌ chiꞌi Bénneaꞌ bendaꞌ chee̱ꞌ nédxute̱ da naca na ca chiꞌi luzu da dxulucuezre̱ꞌ, naꞌ guzre̱ꞌ nedaꞌ:
\p ―Guluén nigá, naꞌ guléꞌedaꞌ lueꞌ da caꞌ dxal-laꞌ gaca ca te chee̱ da nigá.
\p
\v 2 Ca gunné̱ꞌ caꞌ guzúale̱ Beꞌ Láꞌazxa nedaꞌ, naꞌ bleꞌedaꞌ tu lataj blau xabáa, ne bleꞌedaꞌ tu Benneꞌ zaca dxeꞌe̱ lataj blau naꞌ.
\v 3 Bénneaꞌ dxeꞌe̱ lu lataj blau naꞌ nalé̱ꞌ ca tu xiaj jaspe da dxácatite na, u ca tu xiaj cornalina, naꞌ dxuꞌa lataj blau naꞌ naxechaj ca tu bchitaꞌ da dxácatite na ca tu xiaj esmeralda.
\v 4 Dxuꞌa lataj blau naꞌ zaj zua tape dxua lataj naga zaj dxeꞌ tape dxua benneꞌ gula caꞌ, zaj nacue̱ꞌ zra lane̱ꞌ chiche, ne zaj zria xíchaje̱ꞌ da zaj naca na oro.
\v 5 Lu lataj blau naꞌ dxeledxúaj xesa, ne dxaca nine, ne dxelenné̱ guziuꞌ, naꞌ lau lataj blau naꞌ zaj zua gazre xiꞌ dxelala na, da zaj naca na gazre Beꞌ chee̱ Dios.
\v 6 Le naꞌ lau lataj blau naꞌ de̱ ca tu nísadauꞌ da naca na ca xiaj esaꞌ xaníꞌle̱ꞌe̱.
\p Laduj naꞌ dxuꞌa lataj blau naꞌ zaj zraꞌ xetapa da zaj naca ban, zaj zua xiaj lau cuzre̱ꞌ, ne laule̱ꞌ.
\v 7 Benneꞌ nedxu nalé̱ꞌe̱ ca tu be̱zre xixreꞌ, naꞌ benneꞌ gudxupeꞌ nalé̱ꞌe̱ ca tu be̱zre, naꞌ benneꞌ guxunneꞌ naca lawe̱ꞌ ca lau bénneache, naꞌ benneꞌ gudapeꞌ nalé̱ꞌe̱ ca tu bsia nachiluj xílabaꞌ.
\v 8 Dápate̱ benneꞌ caní zaj zua xrupa xrile̱ꞌ tu tue̱ꞌ, naꞌ dxupa laꞌa le̱ꞌe̱ xrila benneꞌ caní zaj zria zaneꞌ xiaj lawe̱ꞌ. Te zra ne chizrela quebe dxulusane̱ꞌ dxelenné̱ꞌ:
\q Láꞌazxa, láꞌazxa, láꞌazxa naca
\q Xránadxu Dios nape̱ꞌ dute̱ xel-laꞌ dxenná bea,
\q Bénneaꞌ guzúaqueze̱ꞌ, ne zúaqueze̱ꞌ, ne tu súazqueze̱ꞌ.
\p
\v 9 Tu tu lasa gate dápate̱ benneꞌ ban caní dxelegúꞌe̱ ba Dios, ne dxulucáꞌana szrene̱ꞌ Le̱ꞌ, ne dxelé̱ꞌe̱ Le̱ꞌ: Xcalenuꞌ, Bénneaꞌ zúaqueze̱ꞌ chadía chacanna,
\v 10 naꞌ dape dxuate̱ benneꞌ gula caꞌ dxuluzú zribe̱ꞌ lau Le̱ꞌ, ne dxulucáꞌana szrene̱ꞌ Bénneaꞌ zúaqueze̱ꞌ chadía chacanna, ne dxuluzúe̱ꞌ da caꞌ zaj zría xíchaje̱ꞌ caꞌ lau lataj blau naꞌ, dxelenné̱ꞌ:
\q
\v 11 Xránantuꞌ Dios, Lueꞌ naca chiuꞌ siꞌ lu naꞌu xel-laꞌ szren,
\q ne xel-laꞌ ba láꞌana, ne xel-laꞌ dxenná bea,
\q laweꞌ da be̱nuꞌ Lueꞌ xúgute̱ da de̱,
\q naꞌ ca dxaca lazruꞌ Lueꞌ zaj zua na, ne gulá gulebinna na.
\c 5
\s Tu xiche nadube, ne Bénneaꞌ naque̱ꞌ Zrílaꞌdauꞌ
\p
\v 1 Lu naꞌ xabe̱la chee̱ Dios, Bénneaꞌ dxeꞌe̱ lataj blau naꞌ, bleꞌedaꞌ tu xiche nadube, da naxúaj dxupa laꞌate̱ na, naꞌ nazriche na gazre da dxelunna bea na.
\v 2 Bleꞌedaꞌ tu gubáz chee̱ xabáa nápale̱ꞌe̱ xel-laꞌ waca, naꞌ gunné̱ꞌ zizraj:
\p ―¿Nuzra naca chee̱ꞌ chíluje̱ꞌ xiche naꞌ, ne cheze̱ꞌ da caꞌ dxelunna bea na?
\p
\v 3 Queba nu chiláꞌ xabáa, ne lu xe̱zr la xu, ne zranla xe̱zr la xu naca chee̱ꞌ chílujeꞌ xiche naꞌ, ne quebe nu gaca nne̱ꞌe̱ na chee̱ léꞌene̱ꞌ ca naca na.
\v 4 Nedaꞌ gudxézreliꞌa laweꞌ da quebe nu chiláꞌ benneꞌ naca chee̱ꞌ chíluje̱ꞌ xiche naꞌ, ne gulabe̱ꞌ na, ne quebe gaca nne̱ꞌe̱ na.
\v 5 Nadxa tu benneꞌ ládujla benneꞌ gula caꞌ guzre̱ꞌ nedaꞌ:
\p ―Québedxa cuezruꞌ laweꞌ da ba bzruéꞌe Jesús, Bénneaꞌ naziꞌi le̱ꞌ Be̱zre Xixreꞌ chee̱ xrtia Judá laweꞌ da nape̱ꞌ xel-laꞌ dxenná bea zrente̱, ne naque̱ꞌ zriꞌine zre sua David, naꞌ Le̱ꞌ naca chee̱ꞌ chíluje̱ꞌ xiche naꞌ, ne cheze̱ꞌ da gazre caꞌ dxelunna bea na.
\p
\v 6 Nadxa ládujla naga zua lataj blau naꞌ, ládujla tapa benneꞌ ban caꞌ, ne ládujla tape dxua benneꞌ gula caꞌ, bleꞌedaꞌ Jesús, Bénneaꞌ naque̱ꞌ Zrílaꞌdauꞌ chee̱ Dios. Ze̱ꞌe̱ naꞌ, lácala zrie̱ꞌ we̱ꞌ laweꞌ da belutie̱ꞌ Le̱ꞌ. Zria gazre lúzubaꞌ ne gazre xiaj laubaꞌ, naꞌ xiaj laubaꞌ caꞌ zaj naca na gazre Beꞌ chee̱ Dios da caꞌ nasel-la Dios du ca naca xe̱zr la xu.
\v 7 Bénneaꞌ naque̱ꞌ Zrílaꞌdauꞌ guxíaje̱ꞌ guqué̱ꞌe̱ xiche naꞌ lu naꞌ xabe̱la Bénneaꞌ dxeꞌe̱ lataj blau naꞌ.
\v 8 Ca guqué̱ꞌe̱ xiche naꞌ, naꞌ tapa benneꞌ ban caꞌ, ne tape dxua benneꞌ gula caꞌ buluzú zribe̱ꞌ lau Bénneaꞌ naque̱ꞌ Zrílaꞌdauꞌ. Tu tu benneꞌ gula caꞌ zaj nuxre̱ꞌ tu da dxelúl-lale̱ne̱ꞌ da can zríadiꞌi na du, nazí le na árpa, ne zaj nuꞌe̱ xéꞌena bzri da naca na oro zaj xuꞌu na xala zixre, da zéaje̱ na xel-laꞌ dxuláwizra Dios da dxelún bi caꞌ chee̱ Dios.
\v 9 Dxelul-le̱ꞌ tu da cube caní:
\q Lueꞌ naca chiuꞌ caꞌu xiche naꞌ,
\q ne chezuꞌ da caꞌ dxelunna bea na,
\q laweꞌ da belutie̱ꞌ Lueꞌ, naꞌ nen dxen chiuꞌ
\q bexaꞌu bénneache chee̱ xelaque̱ꞌ chee̱ Dios,
\q Zaj naque̱ꞌ benneꞌ xúgute̱ cueꞌ bénneache,
\q ne dxelenné̱ꞌ xúgute̱ dizraꞌ walazreꞌ,
\q ne zaj naque̱ꞌ benneꞌ xúgute̱ xe̱zre
\q ne xúgute̱ cueꞌ xe̱zr la xu.
\q
\v 10 Be̱nuꞌ le̱ꞌ benneꞌ wenná bea caꞌ,
\q ne bxruze caꞌ lau Dios chee̱dxu,
\q naꞌ xelenná beꞌe̱ lu xe̱zr la xu.
\p
\v 11 Nadxa gunnáꞌa, naꞌ bendaꞌ chiꞌi zaneꞌ gubáz caꞌ chee̱ xabáa zaj naxéchaje̱ꞌ lataj blau naꞌ, ne tapa benneꞌ ban caꞌ, ne tape dxua benneꞌ gula caꞌ. Zaj zraꞌ benneꞌ zantauꞌ gubáz caꞌ,
\v 12 naꞌ dxelenné̱ꞌ zizraj:
\q Bénneaꞌ naque̱ꞌ Zrílaꞌdauꞌ belutie̱ꞌ,
\q naca chee̱ꞌ siꞌe̱ xel-laꞌ dxenná bea, ne xel-laꞌ gunníꞌa,
\q ne xel-laꞌ sina, ne xel-laꞌ waca,
\q ne xel-laꞌ ba láꞌana, ne xel-laꞌ szren,
\q ne xel-laꞌ dxue láꞌana.
\p
\v 13 Cáꞌanqueze bendaꞌ dxelenná xúgute̱ da caꞌ be̱n Dios, da caꞌ zaj zraꞌ xabáa, ne da caꞌ zaj zraꞌ xe̱zr la xu, ne da caꞌ zaj zraꞌ lu nísadauꞌ, ne xúgute̱ da caꞌ zaj nita xúgute̱ lataj caꞌ, dxelenná na:
\q Xel-laꞌ dxue láꞌana, ne xel-laꞌ ba láꞌana,
\q ne xel-laꞌ szren, ne xel-laꞌ dxenná bea
\q zaj naca na chee̱ Bénneaꞌ dxeꞌe̱ lataj blau naꞌ,
\q ne chee̱ bénneaꞌ naque̱ꞌ Zrílaꞌdauꞌ,
\q gaxúane gaxúane iza.
\p
\v 14 Dápate̱ benneꞌ ban caꞌ gulenné̱ꞌ:
\p ―¡Caꞌan gaca na!
\p Naꞌ dape dxuate̱ benneꞌ gula caꞌ buluzú zribe̱ꞌ, ne bulucáꞌana szrene̱ꞌ Bénneaꞌ naca bane̱ꞌ gaxúane gaxúane iza.
\c 6
\s Dxecheze̱ꞌ xrupa da gazre caꞌ da dxelunna bea na
\p
\v 1 Nadxa bleꞌedaꞌ gate Bénneaꞌ naque̱ꞌ Zrílaꞌdauꞌ gucheze̱ꞌ da nedxu da gazre caꞌ dxelunna bea na. Naꞌ bendaꞌ dxenná tu benneꞌ tapa caꞌ zaj naca bane̱ꞌ, naꞌ chiꞌe̱ ben na ca guziuꞌ, dxenné̱ꞌ:
\p ―Gudá, leꞌenuꞌ.
\p
\v 2 Gunnáꞌa, naꞌ bleꞌedaꞌ tu bzrinaꞌ chiche, naꞌ benneꞌ zrie̱ꞌ-baꞌ nuxre̱ꞌ tu da dxedxúꞌuna na xágadauꞌ nalá xécheꞌze. Bulunézruje̱ꞌ le̱ꞌ tu da naquen oro da guzúeꞌ xíchaje̱ꞌ, naꞌ nen dute̱ xel-laꞌ dxenná bea bdxuaje̱ꞌ chee̱ zruéꞌene̱ꞌ lu wedil-la.
\p
\v 3 Gate Bénneaꞌ naque̱ꞌ Zrílaꞌdauꞌ gucheze̱ꞌ da gudxupeꞌ da dxunna bea na, naꞌ bendaꞌ benneꞌ gudxupeꞌ chee̱ benneꞌ tapa caꞌ zaj naca baneꞌ, dxenné̱ꞌ:
\p ―Gudá, leꞌenuꞌ.
\p
\v 4 Naꞌ bdxuaj xetú bzrinaꞌ, nácabaꞌ be̱ xrna, naꞌ bénneaꞌ zrie̱ꞌ-baꞌ guziꞌe̱ xel-laꞌ dxenná bea chee̱ cue̱ꞌ xel-laꞌ dxebeza zri lazreꞌ lu xe̱zr la xu, ne chee̱ gune̱ꞌ xelute bénneache ljwezreꞌ caꞌ, naꞌ bulunézruje̱ꞌ le̱ꞌ tu xia tunna da nalá.
\p
\v 5 Gate Bénneaꞌ naque̱ꞌ Zrílaꞌdauꞌ gucheze̱ꞌ da guxunneꞌ da dxunna bea na, naꞌ bendaꞌ benneꞌ guxunneꞌ chee̱ benneꞌ tapa caꞌ zaj naca baneꞌ, gunné̱ꞌ:
\p ―Gudá, leꞌenuꞌ.
\p Gunnáꞌa, ne bleꞌedaꞌ tu bzrinaꞌ gasaj, naꞌ benneꞌ zrie̱ꞌ-baꞌ nuxre̱ꞌ zrgúꞌunsa.
\v 6 Bendaꞌ tu chiꞌi dxenné̱ na ládujla tapa benneꞌ ban caꞌ, gunná na:
\p ―Chupa xia zruaꞌ xtila saca na lazruj chee̱ tu zra, ne xrupa xia zruaꞌ cebada saca na lazruj chee̱ tu zra, san quebe cuꞌ za xel-laꞌ wagu, ne quebe cuꞌ xrise uva wal-la.
\p
\v 7 Gate Bénneaꞌ naque̱ꞌ Zrílaꞌdauꞌ gucheze̱ꞌ da gudapeꞌ da dxunna bea na, naꞌ bendaꞌ benneꞌ gudapeꞌ chee̱ benneꞌ ban caꞌ, gunné̱ꞌ:
\p ―Gudá, leꞌenuꞌ.
\p
\v 8 Gunnáꞌa, ne bleꞌedaꞌ tu bzrinaꞌ gache, naꞌ benneꞌ zrie̱ꞌ-baꞌ le̱ꞌ Xel-laꞌ Gute, naꞌ cuzru bénneaꞌ za tu benneꞌ ze̱ꞌe̱ waláz chee̱ lataj chul-la ga nnita benneꞌ gate caꞌ. Bénneaꞌ le̱ꞌ Xel-laꞌ Gute guziꞌe̱ xel-laꞌ dxenná bea chee̱ gutie̱ꞌ tu cueꞌ chee̱ tapa cueꞌ ca naca bénneache zaj zre̱ꞌe̱ xe̱zr la xu. Gutie̱ꞌ benneꞌ caꞌ lu wedil-la, ne lu xel-laꞌ dxedún, ne lu xízrawe̱ꞌ caꞌ, ne lu naꞌ be̱ snia zaj zrabaꞌ lu xe̱zr la xu.
\p
\v 9 Gate Bénneaꞌ naque̱ꞌ Zrílaꞌdauꞌ gucheze̱ꞌ da gázxue da dxunna bea na, naꞌ bleꞌedaꞌ zran cugu bénneꞌdu caꞌ gulúꞌu benneꞌ caꞌ belute bénneache le̱ꞌ laweꞌ da buluchálaje̱ꞌ dizraꞌ chee̱ Dios, ne belexeche̱be̱ꞌ ca naca chee̱ꞌ.
\v 10 Bénneꞌdu caꞌ gulúꞌu benneꞌ caꞌ gulenné̱ꞌ zizraj:
\p ―Xran láꞌazxa, ne li lazreꞌ, ¿xeajáte̱ chenuꞌ chee̱ guchiꞌu chee̱ntuꞌ, ne xebéaj lazruꞌ benneꞌ caꞌ belutie̱ꞌ netuꞌ, benneꞌ caꞌ zaj zre̱ꞌe̱ lu xe̱zr la xu?
\p
\v 11 Nadxa bénneꞌdu caꞌ gulúꞌu benneꞌ caꞌ gulezíꞌe zra lane̱ꞌ chiche, naꞌ guzre̱ꞌ le̱ꞌ xelebeze̱ꞌ xetú chíꞌidauꞌ, cadxa cha benneꞌ biche̱ꞌ caꞌ dxelune̱ꞌ zrin chee̱ Cristo, xelute bénneache le̱ꞌ ca belutie̱ꞌ benneꞌ caꞌ.
\p
\v 12 Gate Bénneaꞌ naque̱ꞌ Zrílaꞌdauꞌ gucheze̱ꞌ da xrupe da dxunna bea na, naꞌ gunáꞌa, naꞌ guzrúꞌle̱ꞌe̱ lu xe̱zr la xu. Gubizra bexaca na da chul-la ca ladxeꞌ gasaj, naꞌ beuꞌ bexaca na xrna ca dxen,
\v 13 naꞌ belaj zaj zria xabáa belexruj na lu xe̱zr la xu, ca dxelexruj higo dxeꞌene caꞌ gate dxácale̱ꞌe̱ beꞌ dxunibe na xaga higo naꞌ.
\v 14 Xabáa benite na ca tu xiche da dxexedube, naꞌ xúgute̱ xiꞌa caꞌ, ne xe̱zr la xu caꞌ da zaj naxechaj nísadauꞌ gulecuasa na naga zaj zua na.
\v 15 Benneꞌ wenná bea caꞌ zaj zre̱ꞌe̱ lu xe̱zr la xu bulucache cuine̱ꞌ lu bluaj caꞌ ne ládujla xiaj caꞌ zaj nita lu xiꞌa caꞌ, naꞌ tuze gulaca benneꞌ blau caꞌ ne benneꞌ gunníꞌa caꞌ, ne benneꞌ xíchaje̱ caꞌ chee̱ benneꞌ dxjaca wedil-la, ne benneꞌ caꞌ dxelenná bea, ne benneꞌ zaj nadaꞌu, ne benneꞌ zaj nadxúaje̱ꞌ lu naꞌ xrane̱ꞌ caꞌ,
\v 16 naꞌ benneꞌ caní gulé̱ꞌe̱ xiꞌa caꞌ, ne xiaj xre caꞌ:
\p ―Le quia cha netuꞌ, ne le gucache netuꞌ lau Dios, Bénneaꞌ dxeꞌe̱ lataj blau, ne lu xel-laꞌ ziꞌ zren da gunna Bénneaꞌ naque̱ꞌ Zrílaꞌdauꞌ.
\p
\v 17 Ba bzrin zra chee̱ xel-laꞌ ziꞌ zren. ¿Núzraqueze sue le̱ na?
\c 7
\s Benneꞌ Israel caꞌ gucáꞌa Dios
\p
\v 1 Ca gudé chee̱ da nigá, bleꞌedaꞌ tapa gubáz chee̱ xabáa zaj ze̱ꞌ dapa saca chee̱ xe̱zr la xu, naꞌ zaj nuzague̱ꞌ beꞌ da záꞌaca na dapa saca, chee̱ quebe bi beꞌ gaca lu xe̱zr la xu, ne laweꞌ nísadauꞌ, ne laweꞌ xaga caꞌ.
\v 2 Cáꞌanqueze bleꞌedaꞌ xetú gubáz chee̱ xabáa ze̱ꞌe̱ naga dxalaj gubizra, naꞌ nuxre̱ꞌ da gunna bea na nu benneꞌ naque̱ꞌ che̱ Dios ban. Gubáz nigá gunné̱ꞌ zizraj, dxe̱ꞌe̱ dápate̱ gubáz chee̱ xabáa caꞌ bache zaj naziꞌe̱ xel-laꞌ dxenná bea xuluzría xiꞌe̱ xe̱zr la xu, ne nísadauꞌ, gunné̱ꞌ:
\p
\v 3 ―Quebe guzría xile xe̱zr la xu, ne nísadauꞌ, ne xaga caꞌ, dxácate̱ quebe ne guchíchentuꞌ luzrgá benneꞌ caꞌ tu da gunna bea na zaj naque̱ꞌ chee̱ Dios chee̱dxu.
\p
\v 4 Bendaꞌ cátite zaj naca benneꞌ caꞌ gulezriche luzrgue̱ꞌ da naꞌ dxunna bea na. Zaj naque̱ꞌ tu gaxúe tape xun cueꞌ da zaj naca na chi gaxúa weaj láwela xúgute̱ cueꞌ benneꞌ Israel.
\v 5 Gulezriche luzrgue̱ꞌ da naꞌ:
\q Chazrinnu cueꞌ benneꞌ xrtia Judá, ne
\q chazrinnu cueꞌ benneꞌ xrtia Rubén, ne
\q chazrinnu cueꞌ benneꞌ xrtia Gad, ne
\q
\v 6 chazrinnu cueꞌ benneꞌ xrtia Aser, ne
\q chazrinnu cueꞌ benneꞌ xrtia Neftalí, ne
\q chazrinnu cueꞌ benneꞌ xrtia Manasés, ne
\q
\v 7 chazrinnu cueꞌ benneꞌ xrtia Simeón, ne
\q chazrinnu cueꞌ benneꞌ xrtia Leví, ne
\q chazrinnu cueꞌ benneꞌ xrtia Isacar, ne
\q
\v 8 chazrinnu cueꞌ benneꞌ xrtia Zabulón, ne
\q chazrinnu cueꞌ benneꞌ xrtia José, ne
\q chazrinnu cueꞌ benneꞌ xrtia Benjamín.
\s Benneꞌ zan zaj nacu zra lane̱ꞌ chiche
\p
\v 9 Gudé naꞌ gunnáꞌa ne bleꞌedaꞌ benneꞌ zan chee̱ xúgute̱ cueꞌ bénneache:
\q Benneꞌ xúgute̱ cueꞌ xe̱zr la xu,
\q ne benneꞌ dxelenné̱ꞌ xúgute̱ dizraꞌ walazreꞌ cha chee̱ꞌ,
\q ne benneꞌ xúgute̱ xe̱zre caꞌ.
\m Zaj ze̱ꞌ le naꞌ naga zua lataj blau naꞌ, ne naga ze̱ Bénneaꞌ naque̱ꞌ Zrílaꞌdauꞌ. Benneꞌ caní zaj nacue̱ꞌ zra lane̱ꞌ chiche, ne zaj nuxre̱ꞌ zinaꞌ.
\v 10 Xúgute̱ꞌ dxelenné̱ꞌ zizraj:
\q Xel-laꞌ weselá za na lu naꞌ Dios chee̱dxu,
\q Bénneaꞌ dxeꞌe̱ lataj blau,
\q ne lu naꞌ Bénneaꞌ naque̱ꞌ Zrílaꞌdauꞌ.
\m
\v 11 Xúgute̱ gubáz chee̱ xabáa caꞌ zaj ze̱ꞌ zaj naxéchaje̱ꞌ lataj blau naꞌ, ne naga zaj zraꞌ benneꞌ gula caꞌ, ne tapa benneꞌ ban caꞌ, naꞌ buluzú zribe̱ꞌ belíxrujte̱ lawe̱ꞌ zran niꞌe̱, naꞌ bulucáꞌana szrene̱ꞌ Dios.
\v 12 Dxelenné̱ꞌ:
\q ¡Caꞌan gaca na!
\q ¡Xel-laꞌ dxue láꞌana, ne da xabáa,
\q ne xel-laꞌ sina, ne xel-laꞌ dxezaca ba lazreꞌ,
\q ne xel-laꞌ ba láꞌana, ne xel-laꞌ dxenná bea,
\q ne xel-laꞌ szren,
\q zaj naca na chee̱ Dios chee̱dxu chadía chacanna!
\q ¡Caꞌan gaca na!
\p
\v 13 Nadxa tu benneꞌ gula caꞌ bche̱be̱ꞌ nedaꞌ:
\p ―¿Nuzra benneꞌ caní zaj nacue̱ꞌ zra lane̱ꞌ chiche, ne gazra zesíꞌaque̱ꞌ?
\p
\v 14 Nedaꞌ guchaꞌ le̱ꞌ:
\p ―Xran, lueꞌ nézqueznuꞌ.
\p Le̱ꞌ guzre̱ꞌ nedaꞌ:
\p ―Benneꞌ caní ba guledée̱ꞌ lu xel-laꞌ ziꞌ zren naꞌ, naꞌ benneꞌ caní ba zaj nacue̱ꞌ zra lane̱ꞌ chiche laweꞌ da Bénneaꞌ naque̱ꞌ Zrílaꞌdauꞌ ba gudibe̱ꞌ xichaj lázrdawe̱ꞌ nen dxen chee̱ꞌ.
\v 15 Chee̱ le̱ naꞌ zaj zre̱ꞌe̱ dxuꞌa lataj blau naga dxeꞌ Dios, ne dxelúe láꞌane̱ꞌ Le̱ꞌ te zra ne chizrela lu xudauꞌ chee̱ꞌ, naꞌ Bénneaꞌ dxeꞌe̱ lataj blau naꞌ guxúequeze̱ꞌ benneꞌ caꞌ, ne súale̱tecaze̱ꞌ le̱ꞌ.
\v 16 Québedxa xeledune̱ꞌ ne québedxa xelebílene̱ꞌ, ne québedxa guzezxe gubizra benneꞌ caꞌ, ne québedxa xeléquene̱ꞌ da la,
\v 17 laweꞌ da zua Bénneaꞌ naque̱ꞌ Zrílaꞌdauꞌ cuita lataj blau naꞌ, naꞌ guxúe̱ꞌ benneꞌ caꞌ ca dxun benneꞌ dxuxúe̱ꞌ zrilaꞌ caꞌ, ne che̱ꞌe̱ benneꞌ caꞌ naga dxelalaj nisa da dxunna na xel-laꞌ nabán, naꞌ Diósqueze tu súale̱zqueze̱ꞌ benneꞌ caꞌ chee̱ québedxa xelebezre̱ꞌ.
\c 8
\s Dxecheze̱ꞌ da gazre da caꞌ dxelunna bea na
\p
\v 1 Gate Bénneaꞌ naque̱ꞌ Zrílaꞌdauꞌ gucheze̱ꞌ da gazre da caꞌ dxelunna bea na, da caꞌ zaj nuchiche na xiche naꞌ, naꞌ gudxéꞌ zri xabáa tu chiꞌi zrénqueze.
\v 2 Nadxa bleꞌedaꞌ gazre gubáz chee̱ xabáa caꞌ zaj ze̱ꞌ lau Dios, naꞌ bulunézruje̱ꞌ gubáz chee̱ xabáa caꞌ gazre luzu da xulucuezre̱ꞌ.
\v 3 Gudé naꞌ blaꞌ xetú gubáz chee̱ xabáa nuxre̱ꞌ tu xéꞌena bzri da naca na oro ne guzé̱ꞌ dxuꞌa cugu, naꞌ bulunézrujle̱ꞌe̱ le̱ꞌ xala zixre chee̱ guzúe̱ꞌ na lau Dios tu zren nen xel-laꞌ dxuláwizra Dios caꞌ da belún benneꞌ caꞌ zaj naque̱ꞌ chee̱ Dios. Bzue̱ꞌ na lu cugu naca na oro, da zua na lau lataj blau naꞌ.
\v 4 Zren chee̱ xala naꞌ guluén na lau Dios tu zren nen xel-laꞌ dxuláwizra Dios caꞌ belún benneꞌ caꞌ zaj naque̱ꞌ chee̱ Dios.
\v 5 Nadxa tu gubáz chee̱ xabáa guqué̱ꞌe̱ xéꞌena bzri naꞌ, naꞌ bzre̱ꞌe̱ na xiꞌ da guqué̱ꞌe̱ lu cugu naꞌ, naꞌ gudxúꞌune̱ꞌ xiꞌ naꞌ lu xe̱zr la xu, naꞌ gulenné̱ guziuꞌ, ne gulenínnele̱ꞌe̱, ne gulé̱pele̱ꞌe̱ xesa, ne guzrúꞌ xe̱zr la xu.
\s Dxuluchine gubáz caꞌ da dxulucuezre̱ꞌ
\p
\v 6 Nadxa gázrete̱ gubáz chee̱ xabáa caꞌ zaj nuxre̱ꞌ gazre luzu da dxulucuezre̱ꞌ gulezé̱ chawe̱ꞌ xuluchínene̱ꞌ na.
\p
\v 7 Gubáz nedxu naꞌ bchínene̱ꞌ da dxucuezre̱ꞌ, naꞌ gulinnaj xiaj bezxeꞌ, ne xiꞌ da zaj nachixre na dxen da belexruj na lu xe̱zr la xu. Xáteze quebe bedú gachaj xe̱zr la xu guzezxe na late weaj du ca naca lu xe̱zr la xu. Xáteze quebe gudache gáchajte̱ xaga caꞌ zaj ze̱ lu xe̱zr la xu gulezxe na, ne cáꞌanqueze guca chee̱ xixreꞌ xaꞌa caꞌ.
\p
\v 8 Gubáz chee̱ xabáa gudxupeꞌ bchínene̱ꞌ da dxucuezre̱ꞌ, naꞌ bexruj da naca na ca tu xiꞌa zren da dxala na xiꞌ lu nísadauꞌ, naꞌ xáteze quebe guca gáchajte̱ nísadauꞌ naꞌ bexaca na dxen.
\v 9 Xáteze quebe guca gáchajte̱ bea zaj zrabaꞌ lu nísadauꞌ gulátebaꞌ, naꞌ xáteze quebe guca gáchajte̱ da caꞌ dxeledán laweꞌ nísadauꞌ gulebía xi na.
\p
\v 10 Gubáz chee̱ xabáa guxunneꞌ bchínene̱ꞌ da dxucuezre̱ꞌ, naꞌ bexruj tu belaj zrente̱ zran xabáa, da dxala na ca tu xiꞌ xedxe. Naga bexruj na, xáteze quebe gudache gáchajte̱ xe̱gu caꞌ, ne beaj caꞌ gulebía xi na.
\v 11 Belaj naꞌ le̱ na Ajenjo, da zéaje̱ na da naca na slaꞌ, naꞌ xáteze quebe guca gáchajte̱ nisa da de̱ lu xe̱zr la xu bexaca na ajenjo, naꞌ benneꞌ zante̱ gulatie̱ꞌ ne̱ chee̱ nisa naꞌ laweꞌ da bexaca na slaꞌ.
\p
\v 12 Gubáz chee̱ xabáa gudapeꞌ bchínene̱ꞌ da dxucuezre̱ꞌ, naꞌ xáteze quebe bedú gachaj xel-laꞌ naxaníꞌ chee̱ gubizra, ne xel-laꞌ naxaníꞌ chee̱ beuꞌ, ne xel-laꞌ naxaníꞌ chee̱ belaj caꞌ belexaca na chul-la, naꞌ quebe bulusení na du lazreꞌ xáteze quebe guca gachaj zra, ne cáꞌanqueze che zrela.
\p
\v 13 Nadxa gunnáꞌa, ne bendaꞌ chiꞌi tu gubáz chee̱ xabáa dxedé̱ꞌ lu beꞌ, dxenné̱ꞌ zizraj:
\p ―Edxugua bénneache zaj zraꞌ xe̱zr la xu gate xelebezre luzu da xuluchine xechunna gubáz chee̱ xabáa caꞌ.
\c 9
\p
\v 1 Gubáz chee̱ xabáa gázxue bchínene̱ꞌ da dxucuezre̱ꞌ, naꞌ bleꞌedaꞌ tu benneꞌ naque̱ꞌ ca tu belaj bexruj na lu xe̱zr la xu, naꞌ bulunézruje̱ꞌ le̱ꞌ zren xia chee̱ lataj chul-la chee̱ benneꞌ gate caꞌ.
\v 2 Gusálaje̱ꞌ lataj chul-la naꞌ, naꞌ luꞌule naꞌ bdxuaj zren ca naca da dxedxuaj na naga dxeluzre̱ꞌ blaꞌdauꞌ, naꞌ zren naꞌ bchul-la na lau gubizra, ne lu beꞌ.
\v 3 Lu zren naꞌ beledxúaj biche zu. Guledabaꞌ du ca naca xe̱zr la xu, naꞌ biche zu caꞌ gulezibaꞌ lataj xeládubaꞌ bénneache ca da dxelún bé̱xrujni.
\v 4 Dios guzre̱ꞌ biche zu caꞌ quebe xuluzría xibaꞌ xixreꞌ xaꞌa caꞌ, ne netú xaga, san xeláduzebaꞌ bénneache quebe nazriche luzrgue̱ꞌ da dxunna bea na benneꞌ caꞌ zaj naque̱ꞌ chee̱ Dios.
\v 5 Quebe zaj nazibaꞌ lataj xelútebaꞌ bénneache, san xuludézebaꞌ bénneache ba xaꞌ laweꞌ gazxuꞌ beuꞌ, naꞌ xel-laꞌ dxelá chee̱ naga dxeládubaꞌ naca na ca naca da dxun bé̱xrujni, be̱ dxelútebaꞌ bénneache.
\v 6 Lu zra caꞌ xelaca lazreꞌ bénneache xelexute cuine̱ꞌ, ne quebe xelezéquene̱ꞌ. Xelaca lazre̱ꞌ xelatie̱ꞌ ne quebe xelatie̱ꞌ.
\p
\v 7 Biche zu caꞌ zaj nácabaꞌ ca bzrinaꞌ caꞌ ba zaj nabézabaꞌ chjácabaꞌ lu wedil-la. Xíchajbaꞌ zaj zria na ca tu da naca na oro, naꞌ dxuꞌa lau biche zu caꞌ naca na ca lau bénneache.
\v 8 Xicha xíchajbaꞌ zaj naca na ca xicha xichaj nuꞌula caꞌ, naꞌ lázxabaꞌ zaj naca na ca lazxa be̱zre xixreꞌ.
\v 9 Lachuꞌubaꞌ xuꞌu na ca zrabaꞌ xia, naꞌ xrílabaꞌ dxeleninne na ca dxeleninne da dxelecáꞌa bzrinaꞌ caꞌ zjaca chégubaꞌ lu wedil-la.
\v 10 Zaj zua xrbanbaꞌ ca xrban bé̱xrujni, zaj zua na libaꞌ. Zaj naziꞌbaꞌ lataj xeládubaꞌ bénneache laweꞌ gazxuꞌ beuꞌ.
\v 11 Zua tu xrane biche zu caꞌ naca gubáz chee̱ lataj chul-la, ne le̱ na Abadón nen dizraꞌ hebreo, ne nen dizraꞌ griego le̱ na Apolión, da zéaje̱ na da dxuzría xi na.
\p
\v 12 Caní guca da nedxu da ba xaꞌ da xeledé bénneache, naꞌ daꞌ zíꞌaca xechupan caꞌ.
\p
\v 13 Nadxa gubáz chee̱ xabáa xrupe bchínene̱ꞌ da dxucuezre̱ꞌ, naꞌ bendaꞌ tu chiꞌi da gunná ládujla tapa luzu cugu láꞌazxa naꞌ naca na oro da zua na lau Dios.
\v 14 Chiꞌi naꞌ guzre na gubáz chee̱ xabáa xrupe naꞌ nuxre̱ꞌ luzu da dxucuezre̱ꞌ:
\p ―Bsan dápate̱ gubáz caꞌ zaj nadxéaje̱ꞌ dxuꞌa xe̱gu zren le̱ na Eufrates.
\p
\v 15 Caꞌ guca na, naꞌ gulelá gubáz caꞌ chee̱ xelutie̱ꞌ xáteze ca gaca gáchajte̱ bénneache laweꞌ da ba zaj nabeza gubáz caꞌ chee̱ zra naꞌ, ne beuꞌ naꞌ, ne iza naꞌ.
\v 16 Bendaꞌ cátite zaj naca benneꞌ dxjaca wedil-la caꞌ zaj zrie̱ꞌ bzrinaꞌ zrále̱ne̱ꞌ gubáz caꞌ. Zaj naque̱ꞌ chupa cueꞌ gaxua da zaj naca gaxúane gaxúane.
\p
\v 17 Lu da bleꞌe Dios nedaꞌ bleꞌedaꞌ ca zaj naca bzrinaꞌ caꞌ, ne ca zaj naca benneꞌ dxjaca wedil-la caꞌ zaj zrie̱ꞌ-baꞌ. Zaj xuꞌu lachuꞌe̱ zre̱ꞌ xrna da naca na xia, ne da naláꞌ ca zran xabáa, ne da gache. Xichaj bzrinaꞌ caꞌ zaj naca na ca xichaj be̱zre xixreꞌ, naꞌ dxúꞌabaꞌ caꞌ beledxúaj xiꞌ, ne zren, ne tu da gache da dxuzézxele̱ꞌe̱ na.
\v 18 Xáteze quebe gudache gáchajte̱ bénneache gulatie̱ꞌ lu da caꞌ beledxúaj na dxuꞌa bzrinaꞌ caꞌ, xiꞌ, ne zren, ne da gache naꞌ.
\v 19 Xel-laꞌ snia chee̱ bzrinaꞌ caꞌ zua na dxúꞌabaꞌ, ne xrbanbaꞌ laweꞌ da zaj naca xrbanbaꞌ ca be̱laꞌ caꞌ zaj zua xíchajbaꞌ, naꞌ nen da caꞌ dxuluzría xibaꞌ bénneache.
\p
\v 20 Benneꞌ caꞌ xezica, benneꞌ quebe belútebaꞌ, belúnqueze̱ꞌ da zrinnaj ca da dxelúnqueze̱ꞌ, ne bulucáꞌana szrénqueze̱ꞌ beꞌ xriwe̱ꞌ caꞌ, ne bedauꞌ oro caꞌ, ne bedauꞌ plata caꞌ, ne bedauꞌ xia gache caꞌ, ne bedauꞌ xiaj caꞌ, ne bedauꞌ xaga caꞌ, da caꞌ quebe dxaca xeleléꞌe na, ne quebe dxaca xelén na, ne quebe dxaca siꞌaca na.
\v 21 Cáꞌanqueze belútequeze̱ꞌ benneꞌ caꞌ, ne belúnqueze̱ꞌ xel-laꞌ wazráꞌ, ne belúnqueze̱ꞌ da sban, ne gulebánqueze̱ꞌ.
\c 10
\s Tu gubáz chee̱ xabáa nuxre̱ꞌ tu xíchedauꞌ nazriluj na
\p
\v 1 Nadxa bleꞌedaꞌ xetú gubáz chee̱ xabáa nápale̱ꞌe̱ xel-laꞌ dxenná bea. Bétaje̱ꞌ xabáa, xuꞌe̱ tu lu beuj, ne zua tu bchitaꞌ xíchaje̱ꞌ. Dxuꞌa lawe̱ꞌ dxácatite na ca gubizra, naꞌ niꞌe̱ zaj naca na ca xiꞌ.
\v 2 Nuxre̱ꞌ tu xíchedauꞌ da nazriluj na, naꞌ bzue̱ꞌ niꞌe̱ zua xabe̱la laweꞌ nísadauꞌ, ne niꞌe̱ zua xéglala laweꞌ xe̱zr la xu bizre.
\v 3 Nadxa gudxezre xe̱ꞌe̱ ca dxun be̱zre xixreꞌ dxebezre xaꞌabaꞌ, naꞌ ca gudxezre xe̱ꞌe̱ gulenné̱ gazre guziuꞌ.
\v 4 Ca gudé gulenné̱ gazre guziuꞌ caꞌ, ba zúate̱ guzúajaꞌ, naꞌ bendaꞌ tu chiꞌe̱ za xabáa, guzre nedaꞌ:
\p ―Bcache naze da gulenná gazre guziuꞌ caꞌ. Quebe guzúajuꞌ na.
\p
\v 5 Nadxa gubáz chee̱ xabáa naꞌ bleꞌedaꞌ ze̱ꞌ laweꞌ nísadauꞌ, ne laweꞌ xe̱zr la xu bizre guchisa ne̱ꞌe̱ da zua xabe̱la zran xabáa,
\v 6 naꞌ bzétaje̱ꞌ La Bénneaꞌ zue̱ꞌ chadía chacanna, ne be̱ne̱ꞌ xabáa, ne xe̱zr la xu, ne nísadauꞌ, ne xúgute̱ da zaj de̱ laweꞌ da caꞌ be̱ne̱ꞌ, naꞌ gunné̱ꞌ:
\p ―Québedxa che na,
\v 7 laweꞌ da gate su lau gubáz chee̱ xabáa gazre guchínene̱ꞌ luzu da xulucuezre̱ꞌ, ba guca li ca naca da nun Dios dxal-laꞌ gaca ca bzenne̱ꞌ benneꞌ we̱n zrin chee̱ꞌ caꞌ, benneꞌ gulenné̱ꞌ waláz chee̱ꞌ.
\p
\v 8 Ca naca chiꞌe̱ da bendaꞌ, da za xabáa, bchálajle̱ne̱ꞌ nedaꞌ xetú, gunné̱ꞌ:
\p ―Guxíaj xeajcáꞌa xíchedu naꞌ nuxru gubáz chee̱ xabáa naꞌ ze̱ꞌ laweꞌ nísadauꞌ, ne laweꞌ xe̱zr la xu bizre.
\p
\v 9 Nadxa guxáꞌa lau gubáz chee̱ xabáa naꞌ, naꞌ gunabaꞌ gunne̱ꞌ nedaꞌ xíchedu naꞌ, naꞌ guzre̱ꞌ nedaꞌ:
\p ―Gucáꞌa na. Gudagu na. Lu dxuꞌu gaca na zixre ca bzrínaꞌdauꞌ, naꞌ lu le̱ꞌu xexaca na da slaꞌ.
\p
\v 10 Nadxa gucáꞌa xíchedu naꞌ lu naꞌ gubáz chee̱ xabáa naꞌ, naꞌ gudawaꞌ na, naꞌ lu dxuꞌa guca na zixre ca bzrínaꞌdauꞌ. Ca gudé gudawaꞌ na, bexaca na slaꞌ lu le̱ꞌa.
\v 11 Nadxa gulé̱ꞌe̱ nedaꞌ:
\p ―Dxun na ba xen guchálajuꞌ waláz chee̱ Dios lau benneꞌ zaj zre̱ꞌe̱ zane cueꞌ xe̱zr la xu, ne lau benneꞌ zaj zre̱ꞌe̱ xe̱zre zan caꞌ, ne lau benneꞌ dxelenné̱ꞌ dizraꞌ walazreꞌ cha chee̱ꞌ caꞌ, ne lau benneꞌ wenná bea caꞌ.
\c 11
\s Chupa benneꞌ dxelexeche̱be̱ꞌ
\p
\v 1 Nadxa belunne̱ꞌ nedaꞌ tu xia xtíladauꞌ da naca na ca tu xaga da dxudxíxredxu, naꞌ gulé̱ꞌe̱ nedaꞌ:
\p ―Guxasa, bdxixreꞌ xudauꞌ chee̱ Dios ne lu cugu, naꞌ blaba bal-la benneꞌ zaj zre̱ꞌe̱ naꞌ dxulucáꞌana szrene̱ꞌ Dios.
\v 2 Quebe gudxixruꞌ chaleꞌaj chee̱ xudauꞌ naꞌ laweꞌ da ba gudé na lu naꞌ benneꞌ zituꞌ caꞌ, naꞌ benneꞌ caꞌ xululéaje̱ꞌ xe̱zre láꞌazxa laweꞌ chupe xun beuꞌ.
\v 3 Nedaꞌ sel-laꞌ chupa benneꞌ zaj nacue̱ꞌ ladxeꞌ tuzruj, naꞌ xelenné̱ꞌ waláz chiaꞌ laweꞌ chazrinnu gaxúa ga xun zra.
\p
\v 4 Benneꞌ chupa caní zaj naque̱ꞌ ca chupa xaga olivo caꞌ, ne ca zaj naca chupa da zaj zuan xiꞌ, da caꞌ zaj zua na lau Dios, Xrane xe̱zr la xu.
\v 5 Che nu benneꞌ dxaca lazre̱ꞌ guzría xiꞌe̱ benneꞌ caní, naꞌ le̱ꞌ xululube̱ꞌ xiꞌ da dxuaj lu dxuꞌe̱ caꞌ, naꞌ guzézxete̱ na benneꞌ caꞌ dxeledábague̱ꞌ le̱ꞌ. Caní gate nútete̱ze benneꞌ tábague̱ꞌ benneꞌ chupa caní.
\v 6 Benneꞌ chupa caní zaj nape̱ꞌ xel-laꞌ dxenná bea xelune̱ꞌ ga quebe gaca xiuj dxácate̱ naꞌ dxelenné̱ꞌ waláz chee̱ Dios. Cáꞌanqueze zaj nape̱ꞌ xel-laꞌ dxenná bea xelune̱ꞌ xaca nisa dxen, ne chee̱ xulusaca ziꞌe̱ bénneache nen xúgute̱ xízrawe̱ꞌ caꞌ, bátate̱zla dxelaca lazre̱ꞌ.
\v 7 Gate bache belexuzre belune̱ꞌ zrin chee̱ꞌ, naꞌ be̱ xixreꞌ snia, be̱ dxedxúajbaꞌ lataj chul-la, tíl-lale̱baꞌ benneꞌ chupa caꞌ, naꞌ qué̱l-labaꞌ le̱ꞌ, ne gútebaꞌ le̱ꞌ.
\v 8 Be̱laꞌ dxen gate chee̱ benneꞌ caní xelexegáꞌana na la neza chee̱ xe̱zre zrentauꞌ naga gudáꞌ Xránadxu xaga begúaj, ne ca dxutil-la Dios le̱be, le̱ na Sodoma, ne Egipto.
\v 9 Laweꞌ chunna zra xugachaj, bénneache chee̱ xúgute̱ cueꞌ benneꞌ, ne benneꞌ xe̱zre caꞌ, ne benneꞌ zra du gabíꞌi xe̱zr la xu, ne benneꞌ dxelenné̱ꞌ dizraꞌ walazreꞌ cha chee̱ꞌ xeleléꞌene̱ꞌ be̱laꞌ dxen gate chee̱ benneꞌ caní, ne quebe xeluꞌe̱ lataj nu benneꞌ gucacheꞌ le̱ꞌ.
\v 10 Benneꞌ zaj zre̱ꞌe̱ lu xe̱zr la xu xelebene̱ꞌ laweꞌ da zaj nate benneꞌ caní, naꞌ xelexezaca ba lázrele̱ꞌe̱, ne xelesel-le̱ꞌ da xulunezruj ljwezre̱ꞌ tue̱ꞌ xetue̱ꞌ laweꞌ da bulusaca ziꞌ benneꞌ caní gulenné̱ꞌ waláz chee̱ Dios bénneache caꞌ.
\v 11 Gate guca chunna zra xugachaj, naꞌ Dios bsebane̱ꞌ benneꞌ caní, naꞌ belexase̱ꞌ, naꞌ xúgute̱ benneꞌ caꞌ beleléꞌene̱ꞌ le̱ꞌ belezrébele̱ꞌe̱.
\v 12 Nadxa dxúpate̱ benneꞌ caꞌ dxelexeche̱be belenne̱ꞌ chiꞌi tu benneꞌ dxenné̱ꞌ zizraj xabáa, dxe̱ꞌe̱ benneꞌ caꞌ:
\p ―Le xegüén nigá.
\p Naꞌ belexegüene̱ꞌ, naꞌ beleléꞌe benneꞌ caꞌ dxeledábague̱ꞌ le̱ꞌ ca guca.
\v 13 Caꞌan gúcate̱ guzrúꞌle̱ꞌe̱ xe̱zr la xu, naꞌ xuꞌu zaj nita na lu xe̱zre naꞌ gulebía xi na, naꞌ gulate gazre cueꞌ da nacan chi gaxúa bénneache weaj ne̱ chee̱ da guzrúꞌ. Benneꞌ caꞌ, benneꞌ quebe gulate lu xe̱zre naꞌ, nen dute̱ xel-laꞌ dxelezrebe belúe láꞌane̱ꞌ Dios zue̱ꞌ xabáa.
\p
\v 14 Ba gudé da gudxupeꞌ da ba xaꞌ da xeledé bénneache, naꞌ la zaꞌte̱ da guxunneꞌ.
\s Gubáz gazre dxuchínene̱ꞌ da dxucuezre̱ꞌ
\p
\v 15 Gubáz gazre bchínene̱ꞌ da dxucuezre̱ꞌ, naꞌ ben chiꞌi benneꞌ zan xabáa dxelenné̱ꞌ zizraj:
\q Naga dxelenná bea bénneache lu xe̱zr la xu ba guledé na
\q lu naꞌ Xránadxu Dios, ne lu naꞌ Cristo chee̱ꞌ,
\q naꞌ Le̱ꞌ nna beꞌene̱ꞌ lataj caꞌ chadía chacanna.
\m
\v 16 Nadxa tape dxua benneꞌ gula caꞌ zaj dxeꞌe̱ dxuꞌa lataj blau naga dxeꞌ Dios buluzú zribe̱ꞌ zaj nuzuate̱ lawe̱ꞌ zran niꞌe̱, dxulucáꞌana szrene̱ꞌ Dios,
\v 17 dxelenné̱ꞌ:
\q Xcalenuꞌ, Xran.
\q Dios, napuꞌ dute̱ xel-laꞌ dxenná bea.
\q Guzúaquezuꞌ, ne zúaquezuꞌ, ne tu súazquezuꞌ,
\q laweꞌ da ba guziꞌu xel-laꞌ dxenná bea zrente̱ chiuꞌ,
\q ne ba guzú lauꞌ dxenná beꞌu.
\q
\v 18 Bénneache xúgute̱ xe̱zre caꞌ dxelezré̱ꞌe̱
\q san ba bzrin zra gudéuꞌ benneꞌ caꞌ ba xaꞌ,
\q zra naꞌ guchiꞌu chee̱ benneꞌ gate caꞌ.
\q Xunézrujuꞌ da naca chee̱ benneꞌ caꞌ gulenné̱ꞌ waláz chiuꞌ,
\q ne da naca chee̱ benneꞌ caꞌ zaj naque̱ꞌ chiuꞌ,
\q ne da naca chee̱ benneꞌ caꞌ belune̱ꞌ Lueꞌ ba láꞌana,
\q benneꞌ blau caꞌ, ne benneꞌ quebe nu zaj naca.
\q Ba bzrin zra guzría xiꞌu benneꞌ caꞌ buluzría xiꞌe̱ xe̱zr la xu.
\p
\v 19 Nadxa bxalaj xudauꞌ chee̱ Dios da zua xabáa, naꞌ bleꞌe lau xiꞌina naga xuꞌu xel-laꞌ wezría xrlátaje chee̱ꞌ, da zua na lu xudauꞌ naꞌ. Gule̱pe xesa, ne guleninne na, ne gulenné̱ guziuꞌ, ne guzrúꞌ xe̱zr la xu, naꞌ bxínnajle̱ꞌe̱ xiaj bezxeꞌ.
\c 12
\s Tu nuꞌula ne be̱ snia schanniꞌ zrente̱
\p
\v 1 Nadxa bleꞌe lau tu da zrente̱ xabáa. Zua tu nuꞌula naca zra lane̱ꞌ ca gubizra, naꞌ zran niꞌe̱ zua da naca ca beuꞌ, naꞌ xíchaje̱ꞌ zria tu da zaca zaj zria na chazrinnu belaj.
\v 2 Nuꞌula nigá zue̱ꞌ ziꞌi, ne dxebezre xe̱ꞌe̱ xel-laꞌ dxudiꞌa sane̱ꞌ tu bidauꞌ, dxedéle̱ꞌe̱ xel-laꞌ ziꞌ chee̱ galaj bidu naꞌ.
\v 3 Nadxa bleꞌe lau xabáa xetú da zrente̱, zua tu be̱ snia schanniꞌ, be̱ xrna, zua gazre xíchajbaꞌ ne chi lúzubaꞌ, naꞌ zria tu da zaca tu tu xíchajbaꞌ caꞌ.
\v 4 Nen xrbanbaꞌ gucáꞌa dxé̱gubaꞌ xáteze quebe guca gáchajte̱ belaj zaj zria zran xabáa, naꞌ bzálabaꞌ na lu xe̱zr la xu. Be̱ snia schanniꞌ naꞌ guze̱baꞌ lau nuꞌula naꞌ sane̱ꞌ bidauꞌ chee̱ gágubaꞌ bidu naꞌ gate ze gálajbeꞌ.
\v 5 Nuꞌula naꞌ guzane̱ꞌ tu bi biudauꞌ, bi naꞌ nna beꞌebeꞌ dute̱ xe̱zr la xu nen tu var xia. Nadxa bi biu chee̱ nuꞌula naꞌ gucáꞌa Dios le̱beꞌ, naꞌ bexuꞌe̱-beꞌ lataj blau chee̱ꞌ naga dxeꞌe̱.
\v 6 Naꞌ nuꞌula naꞌ bzrúnnuje̱ꞌ zéaje̱ꞌ le̱ꞌe̱ xixreꞌ laweꞌ lataj naga nucueza Dios tu lataj naga sua nuꞌula naꞌ, naga xulugawe̱ꞌ le̱ꞌ laweꞌ chazrinnu gaxúa ga xun zra.
\p
\v 7 Gudé naꞌ guxúꞌu wedil-la xabáa gate gubáz chee̱ xabáa blau le̱ꞌ Miguel nen gubáz chee̱ xabáa zaj daꞌ le̱ꞌ guledíl-lalene̱ꞌ be̱ snia schanniꞌ zrente̱. Be̱ snia schanniꞌ naꞌ, ne gubáz zaj de̱ꞌe̱-baꞌ belune̱ꞌ wedil-la.
\v 8 Quebe bi gulezéquene̱ꞌ lu wedil-la naꞌ, naꞌ québedxa gutaꞌ lataj chee̱ gubáz caꞌ lu xabáa.
\v 9 Caꞌan guca gulebéaje̱ꞌ be̱ snia schanniꞌ naꞌ xabáa, be̱ snia naꞌ zúabaꞌ nédxute̱, naꞌ nazí labaꞌ da xriwe̱ꞌ, ne Satanás, da naꞌ dxezí xe̱ na xúgute̱ bénneache. Da xriwe̱ꞌ naꞌ, ne gubáz caꞌ zaj de̱ꞌe̱ na guledxúꞌune̱ꞌ na lu xe̱zr la xu.
\p
\v 10 Nadxa bendaꞌ tu chiꞌi benneꞌ gunné̱ꞌ zizraj xabáa:
\p ―Ba blaꞌ xel-laꞌ weselá, ne xel-laꞌ szren, ne xel-laꞌ dxenná bea chee̱ Dios chee̱dxu, ne xel-laꞌ dxenná bea chee̱ Cristo chee̱ꞌ, laweꞌ da ba guledxúꞌune̱ꞌ da naꞌ gudagu zria na chee̱ benneꞌ bíchedxu, da naꞌ dxagu zria na chee̱ benneꞌ caꞌ te zra, ne chizrela lau Dios chee̱dxu.
\v 11 Benneꞌ bíchedxu caꞌ beledxúaje̱ꞌ chaweꞌ ne̱ chee̱ dxen chee̱ Bénneaꞌ naque̱ꞌ Zrílaꞌdauꞌ, ne ne̱ chee̱ da belexeche̱be̱ꞌ ca naca chee̱ dizraꞌ chee̱ Cristo, ne quebe belezrebe̱ꞌ nu benneꞌ gutie̱ꞌ le̱ꞌ.
\v 12 Chee̱ le̱ naꞌ gataꞌ xel-laꞌ dxebé xabáa.
\q ¡Le be leꞌe zrale xabáa!
\q ¡Edxugua benneꞌ caꞌ zaj zre̱ꞌe̱ xe̱zr la xu, ne laweꞌ nísadauꞌ
\q laweꞌ da ba blaꞌ da xriwe̱ꞌ naga zúale,
\q dute̱ xel-laꞌ dxezráꞌa chee̱ na,
\q laweꞌ da neze na xáteꞌga ne de̱ chee̱ na!
\p
\v 13 Gate guque beꞌe da xriwe̱ꞌ ba buluzale̱ꞌ na lu xe̱zr la xu, naꞌ gudxéꞌ nau na nuꞌula naꞌ guzane̱ꞌ bi biudu naꞌ.
\v 14 Nuꞌula naꞌ bulunézruje̱ꞌ le̱ꞌ chupa xrile̱ꞌ zren ca xrila bsia chee̱ gaca xexiaje̱ꞌ xezue̱ꞌ le̱ꞌe̱ xixreꞌ laweꞌ lataj, zituꞌ naga zua be̱ snia schanniꞌ naꞌ, naꞌ bulugawe̱ꞌ le̱ꞌ laweꞌ chun iza xugachaj.
\v 15 Be̱ snia schanniꞌ naꞌ bexé̱bebaꞌ nisa chee̱ be̱nbaꞌ tu xe̱gu chee̱ gua na nuꞌula naꞌ.
\v 16 Gúcale̱ xe̱zr la xu nuꞌula naꞌ. Bzra xe̱zr la xu, naꞌ gude̱be na xe̱gu naꞌ bexe̱be be̱ snia schanniꞌ naꞌ.
\v 17 Chee̱ le̱ naꞌ bzráꞌle̱ꞌe̱ da xriwe̱ꞌ nuꞌula naꞌ, naꞌ guxíaj na xeajtíl-lale̱ na xrtia nuꞌula naꞌ zaj zre̱ꞌe̱ xe̱zr la xu, benneꞌ caꞌ dxuluzúe̱ꞌ dizraꞌ da bdxixruj beꞌe Dios, ne dxelexeche̱be̱ꞌ ca naca chee̱ Jesucristo.
\c 13
\s Chupa be̱ xixreꞌ snia caꞌ
\p
\v 1 Nadxa guzéaꞌ dxuꞌa nísadauꞌ, ne bleꞌedaꞌ bdxuaj tu be̱ xixreꞌ snia lu nísadauꞌ naꞌ, zua gazre xíchajbaꞌ, ne chi lúzubaꞌ. Zria tu tu lúzubaꞌ naꞌ tu da zaca, naꞌ daꞌ tu labaꞌ xíchajbaꞌ caꞌ da dxecuide Dios.
\v 2 Be̱ xixreꞌ snia nigá nácabaꞌ ca tu be̱zrtauꞌ, naꞌ níꞌabaꞌ zaj naca na wal-la ca niꞌa oso, naꞌ dxúꞌabaꞌ naca na ca dxuꞌa be̱zre xixreꞌ. Be̱ snia schanniꞌ bnézrujbaꞌ xel-laꞌ dxenná bea chee̱baꞌ, ne lataj blau chee̱baꞌ, ne xel-laꞌ waca chee̱baꞌ lu naꞌ be̱ snia naꞌ nácabaꞌ ca be̱zrtauꞌ.
\v 3 Zua tu we̱ꞌ tu xichaj be̱ xixreꞌ snia naꞌ nácabaꞌ ca be̱zrtauꞌ da gute na le̱baꞌ, naꞌ we̱ꞌ naꞌ bexaca na, naꞌ ca naca bénneache caꞌ zaj zre̱ꞌe̱ lu xe̱zr la xu belexebánele̱ꞌe̱ne̱ꞌ, ne zjácale̱ne̱ꞌ be̱ xixreꞌ snia naꞌ.
\v 4 Bulucáꞌana szrene̱ꞌ be̱ snia schanniꞌ naꞌ laweꞌ da bnézrujbaꞌ xel-laꞌ dxenná bea chee̱ be̱ xixreꞌ naꞌ nácabaꞌ ca be̱zrtauꞌ, ne cáꞌanqueze bulucáꞌana szrene̱ꞌ be̱ xixreꞌ snia naꞌ, dxelenné̱ꞌ:
\p ―¿Núzraqueze naca ca be̱ xixreꞌ nigá, ne nu sequeꞌ tíl-lale̱ le̱baꞌ?
\p
\v 5 Nadxa da xriwe̱ꞌ be̱ na le̱baꞌ lataj gunne̱baꞌ dizraꞌ zriꞌa, naꞌ gunne̱baꞌ da cale̱la chee̱ Dios, ne gudápabaꞌ xel-laꞌ dxenná bea laweꞌ chupe xun beuꞌ.
\v 6 Gunne̱baꞌ da cale̱la chee̱ Dios, ne chee̱ La Dios, ne chee̱ lataj láꞌazxa chee̱ꞌ, ne chee̱ benneꞌ caꞌ zaj zre̱ꞌe̱ xabáa.
\v 7 Cáꞌanqueze guzibaꞌ xel-laꞌ dxenná bea tíl-lale̱baꞌ benneꞌ caꞌ zaj naque̱ꞌ chee̱ Dios, ne gútete̱baꞌ benneꞌ caꞌ, naꞌ guzibaꞌ xel-laꞌ dxenná bea lu xúgute̱ cueꞌ bénneache, ne benneꞌ zaj zre̱ꞌe̱ xúgute̱ xe̱zre caꞌ, ne xúgute̱ cueꞌ xe̱zr la xu caꞌ, ne benneꞌ dxelenné̱ꞌ dizraꞌ walazreꞌ cha chee̱ꞌ.
\v 8 Xúgute̱ benneꞌ zaj zre̱ꞌe̱ xe̱zr la xu bulucáꞌana szrene̱ꞌ be̱ xixreꞌ snia naꞌ, benneꞌ caꞌ quebe zaj naxúaj le̱ꞌ lu xiche naga zaj naxúaj la benneꞌ caꞌ zaj nape̱ꞌ xel-laꞌ nabán, xiche naꞌ bzuaj Bénneaꞌ naque̱ꞌ Zrílaꞌdauꞌ belutie̱ꞌ-baꞌ.
\p
\v 9 Che nu benneꞌ zua nague̱ꞌ, dxal-laꞌ xenne̱ꞌ dizraꞌ nigá.
\v 10 Benneꞌ caꞌ dxelegúꞌe̱ bénneache lizre xia, cáꞌanqueze xelúꞌu benneꞌ caꞌ lizre xia, naꞌ benneꞌ caꞌ dxelutie̱ꞌ benneꞌ nen xia nalá, cáꞌanqueze xelatie̱ꞌ lu xia nalá. Chee̱ le̱ naꞌ benneꞌ zaj naque̱ꞌ chee̱ Dios dxal-laꞌ xelaque̱ꞌ zren lazreꞌ, ne xeléajle̱ꞌe̱ chee̱ Dios.
\p
\v 11 Gudé naꞌ bleꞌedaꞌ xetú be̱ xixreꞌ snia bdxúajbaꞌ lu xe̱zr la xu. Bea nigá zua chupa lúzubaꞌ zaj naca na ca luzu zrilaꞌ. Bea nigá gunne̱baꞌ ca be̱ snia schanniꞌ naꞌ.
\v 12 Bea nigá nápabaꞌ dute̱ xel-laꞌ dxenná bea da napa be̱ nedxu naꞌ, gate zúabaꞌ lau be̱ nedxu naꞌ, naꞌ gunná beꞌebaꞌ ca naca bénneache zaj zre̱ꞌe̱ dute̱ xe̱zr la xu xulucáꞌana szrene̱ꞌ be̱ nedxu naꞌ, bea naꞌ bexaca we̱ꞌ chee̱baꞌ da naꞌ naca gute le̱baꞌ.
\v 13 Be̱ gudxupeꞌ naꞌ be̱nbaꞌ xel-laꞌ waca zriꞌa caꞌ, ne be̱nbaꞌ bexruj xiꞌ zran xabáa lu xe̱zr la xu lau bénneache caꞌ.
\v 14 Ne̱ chee̱ xel-laꞌ waca caꞌ da be̱nbaꞌ lau be̱ nedxu naꞌ, guzí xe̱baꞌ benneꞌ zaj zre̱ꞌe̱ xe̱zr la xu, naꞌ gunná beꞌebaꞌ benneꞌ caꞌ xelune̱ꞌ tu bedauꞌ ca naca be̱ nedxu naꞌ, bea naꞌ guzúa we̱ꞌ chee̱ xia nalá, naꞌ naca bánquezebaꞌ.
\v 15 Be̱ gudxupeꞌ naꞌ guzibaꞌ xel-laꞌ dxenná bea gunézrujbaꞌ xel-laꞌ nabán bedauꞌ naꞌ naca na ca be̱ nedxu naꞌ, chee̱ nne̱ bedauꞌ naꞌ, ne gute na xúgute̱ benneꞌ quebe xulucáꞌana szrene̱ꞌ na.
\v 16 Cáꞌanqueze bedauꞌ naꞌ gunná beꞌe na zriche tu da gunna bea na luzrgá u lu naꞌ zua xabe̱la chee̱ xúgute̱ bénneache, benneꞌ blau, ne benneꞌ quebe nu naca, ne benneꞌ gunníꞌa, ne benneꞌ xacheꞌ, ne benneꞌ zaj nadaꞌu, ne benneꞌ zaj zre̱ꞌe̱ cáꞌaze.
\v 17 Netú benneꞌ quebe gaca gaꞌuwe̱ꞌ ne gutie̱ꞌ che quebe zriche da naꞌ dxunna bea na le̱ꞌ, u la be̱ xixreꞌ snia naꞌ, u xrbaba ca naca labaꞌ.
\v 18 Nu benneꞌ gulabe̱ꞌ da nigá dxal-laꞌ gaque̱ꞌ sina. Benneꞌ dxéajniꞌine̱ꞌ waca gulabe̱ꞌ ca naca xrbaba chee̱ labaꞌ. Naca na tuze ca naca xrbaba chee̱ bénneache, naꞌ xrbaba nigá naca na xrupa gaxúa ga xun xrupa.
\c 14
\s Da dxelul-la tu gaxúa tape xun cueꞌ chi gaxúa weaj benneꞌ
\p
\v 1 Gudé naꞌ gunnáꞌa, naꞌ bleꞌedaꞌ Bénneaꞌ naque̱ꞌ Zrílaꞌdauꞌ ze̱ꞌ lu xiꞌa Sión. Tu zren nen Le̱ꞌ zaj zraꞌ tu gaxúa tape xun cueꞌ chi gaxúa weaj benneꞌ, zaj zriche luzrgue̱ꞌ La Bénneaꞌ naque̱ꞌ Zrílaꞌdauꞌ, ne La Xre̱ꞌ.
\v 2 Nadxa bendaꞌ tu da dxeninne na da zaꞌ xabáa, da dxeninne na ca schagaꞌ da dxelún zánete̱ xe̱gu caꞌ, ne ca schagaꞌ da dxun guziuꞌ gate dxenné̱le̱ꞌe̱ na, ne ca dxeninne naga zaj zraꞌ zánete̱ benneꞌ dxelínnie̱ꞌ da caꞌ cun zríadiꞌi na du.
\v 3 Belul-le̱ꞌ tu da cube dxuꞌa lataj blau naga dxeꞌ Dios, ne lau tapa benneꞌ caꞌ zaj zua nabanczeꞌ, ne lau tape dxua benneꞌ gula caꞌ. Netú benneꞌ xezica quebe guca gul-le̱ꞌ ca naca da naꞌ belul-le̱ꞌ. Dxaca dxelul-le na benneꞌ tu gaxúa tape xun cueꞌ chi gaxúa weaj, benneꞌ caꞌ gulelé̱ꞌ láwela benneꞌ zaj zre̱ꞌe̱ xe̱zr la xu.
\v 4 Benneꞌ caní quebe gulezúale̱ne̱ꞌ nuꞌula chee̱ benneꞌ xula, san belexegáꞌana chawe̱ꞌ, naꞌ zjácale̱ne̱ꞌ Bénneaꞌ naque̱ꞌ Zrílaꞌdauꞌ gátete̱ze zéaje̱ꞌ. Benneꞌ caní gulelé̱ꞌ láwela bénneache, ne zaj naque̱ꞌ lau Dios ca tu da blaudxa chee̱ da dxezidxu, da dxuzúadxu lau Dios, ne lau Bénneaꞌ naque̱ꞌ Zrílaꞌdauꞌ.
\v 5 Cabataꞌ dxelún lazre̱ꞌ, naꞌ zaj naque̱ꞌ du lazreꞌ dxuꞌa lataj blau naga dxeꞌ Dios.
\s Dizraꞌ da dxuluzén chunna gubáz chee̱ xabáa bénneache
\p
\v 6 Nadxa bleꞌedaꞌ xetú gubáz chee̱ xabáa dxedé̱ꞌ lu beꞌ zran xabáa, nape̱ꞌ dizraꞌ chaweꞌ da chadía chacanna, chee̱ guzenne̱ꞌ na benneꞌ caꞌ zaj zre̱ꞌe̱ xe̱zr la xu, benneꞌ xúgute̱ cueꞌ bénneache, ne benneꞌ xúgute̱ cueꞌ xe̱zr la xu, ne xúgute̱ xe̱zre, ne benneꞌ dxelenné̱ꞌ dizraꞌ walazreꞌ cha chee̱ꞌ.
\v 7 Gubáz naꞌ gunné̱ꞌ zizraj:
\p ―Le zrebe Dios, ne le güe láꞌana Le̱ꞌ laweꞌ da ba bzrin zra guchiꞌa Le̱ꞌ chee̱ bénneache. Le gucáꞌana szren Bénneaꞌ be̱ne̱ꞌ xabáa, ne xe̱zr la xu, ne nísadauꞌ, ne beaj caꞌ.
\p
\v 8 Xetú gubáz chee̱ xabáa zéaje̱ꞌ cuzru gubáz chee̱ xabáa nedxu naꞌ, dxenné̱ꞌ:
\p ―¡Ba guzría xiꞌ! ¡Ba guzría xiꞌ xe̱zre Babilonia, xe̱zre zren naꞌ, laweꞌ da bulusuzreꞌ benneꞌ xe̱zre caꞌ, ne benneꞌ dute̱ xe̱zr la xu nen da naca ca xrise uva wal-la chee̱ da sban da dxelune̱ꞌ!
\p
\v 9 Xetú gubáz chee̱ xabáa zéaje̱ꞌ cuzru gubáz chupa caꞌ, dxenné̱ꞌ zizraj:
\p ―¡Che nu benneꞌ dxucáꞌana szrene̱ꞌ be̱ snia naꞌ, ne bedauꞌ chee̱baꞌ, ne guꞌe̱ lataj zriche luzrgue̱ꞌ u ne̱ꞌe̱ labaꞌ,
\v 10 benneꞌ nigá tée̱ꞌ lu da ba xaꞌ da nucueza Dios lu xel-laꞌ dxezráꞌa chee̱ꞌ, naꞌ saca ziꞌe̱ lu xiꞌ chee̱ da dxuzézxele̱ꞌe̱ na lau gubáz chee̱ xabáa caꞌ chee̱ Dios, ne lau Bénneaꞌ naque̱ꞌ Zrílaꞌdauꞌ!
\v 11 ¡Zren chee̱ xiꞌ, naga saca ziꞌe̱, cuen na chadía chacanna, naꞌ xelezaca ziꞌ te zra ne chizrela benneꞌ caꞌ dxulucáꞌana szrene̱ꞌ be̱ snia naꞌ, ne bedauꞌ chee̱baꞌ, ne dxeluꞌe̱ lataj zriche labaꞌ luzrgue̱ꞌ!
\v 12 ¡Chee̱ le̱ naꞌ, benneꞌ caꞌ zaj naque̱ꞌ chee̱ Dios, ne dxuluzúe̱ꞌ dizraꞌ ca nadxixruj beꞌene̱ꞌ, ne zjácale̱ne̱ꞌ da naca chee̱ Jesús, dxal-laꞌ xelaque̱ꞌ zren lazreꞌ!
\p
\v 13 Nadxa bendaꞌ chiꞌi tu benneꞌ da za xabáa. Dxe̱ꞌe̱ nedaꞌ:
\p ―Bzuaj da nigá: Naꞌa, ne lu da za zaꞌ ba neza zrente̱ naca na chee̱ benneꞌ gate caꞌ xelute bénneache le̱ꞌ laweꞌ da dxeléajle̱ꞌe̱ chee̱ Xránadxu. Beꞌ Láꞌazxa dxenné̱ꞌ: “¡Caꞌ naca na, laweꞌ da xelexezíꞌ lazre̱ꞌ ca naca lu zrin da belune̱ꞌ, naꞌ da xrlátaje da belune̱ꞌ zeajle̱ na benneꞌ caꞌ!”
\s Lina chee̱ xe̱zr la xu
\p
\v 14 Nadxa gunáꞌa, naꞌ bleꞌedaꞌ tu beuj chiche, naꞌ laweꞌ beuj naꞌ dxeꞌ tu benneꞌ naque̱ꞌ ca Bénneaꞌ gulje̱ꞌ bénneache. Zria tu da naca na oro xíchaje̱ꞌ, ne nuxre̱ꞌ tu xia nalá.
\v 15 Bdxuaj tu gubáz chee̱ xabáa lu xudauꞌ da zua xabáa, naꞌ gunné̱ꞌ zizraj. Dxe̱ꞌe̱ bénneaꞌ dxeꞌe̱ laweꞌ beuj:
\p ―¡Bchine xia nalá chiuꞌ, ne becáꞌa lina, laweꞌ da ba bzrin zra, naꞌ lina chee̱ xe̱zr la xu ba guca na!
\p
\v 16 Nadxa bénneaꞌ dxeꞌe̱ laweꞌ beuj naꞌ gudine̱ꞌ xia nalá chee̱ꞌ naꞌ, naꞌ bequé̱ꞌe̱ lina chee̱ xe̱zr la xu.
\p
\v 17 Nadxa xetú gubáz chee̱ xabáa bdxuaje̱ꞌ xudauꞌ da zua xabáa, nuxre̱ꞌ tu xia nalá.
\v 18 Xetú gubáz chee̱ xabáa bdxuaje̱ꞌ lu cugu, gubáz chee̱ xabáa naꞌ nape̱ꞌ xel-laꞌ dxenná bea lu xiꞌ, naꞌ gunné̱ꞌ zizraj. Dxe̱ꞌe̱ gubáz chee̱ xabáa naꞌ nuxre̱ꞌ xia nalá:
\p ―¡Bchine xia nalá chiuꞌ naꞌ, ne becáꞌa uva caꞌ da zaj de̱n lu xe̱zr la xu laweꞌ da ba güé na!
\p
\v 19 Naꞌ gubáz chee̱ xabáa naꞌ gudine̱ꞌ xia nalá chee̱ꞌ laweꞌ xe̱zr la xu, ne bequé̱ꞌe̱ uva caꞌ da zaj de̱ lu xe̱zr la xu da zéaje̱ na benneꞌ caꞌ dxelune̱ꞌ da zrinnaj, naꞌ bzre̱ꞌe̱ na naga xelesíe̱ꞌ na, da naꞌ zéaje̱ na da ba xaꞌ da nucueza Dios chee̱ benneꞌ caꞌ dxelune̱ꞌ da zrinnaj.
\v 20 Uva caꞌ gulesíe̱ꞌ na naga dxedxuaj xe̱zre, naꞌ naga dxelesíe̱ꞌ na bdxuaj dxen chee̱ benneꞌ caꞌ dxelune̱ꞌ da zrinnaj da gulén na cátite sibe zua dxuꞌa bzrinaꞌ, naꞌ guzáꞌ dxen naꞌ cátite sadxu du gazre zra.
\c 15
\s Gubáz chee̱ xabáa caꞌ zaj nuxre̱ꞌ gazre da ba xaꞌ da xuluzále̱ꞌ xe̱zr la xu
\p
\v 1 Bleꞌedaꞌ xabáa xetú da zrente̱ da xebánedxu, beleláꞌ gazre gubáz chee̱ xabáa zaj nuxre̱ꞌ gazre da ba xaꞌ bze̱be, da zaj naca na naga cheajse̱te̱ xel-laꞌ dxezráꞌa chee̱ Dios.
\p
\v 2 Cáꞌanqueze bleꞌedaꞌ tu da naca na ca nísadauꞌ da naca na ca xiaj esaꞌ, ne nachixre na xiꞌ, naꞌ benneꞌ caꞌ quebe gulezí lu ne̱ꞌe̱ da naca na chee̱ be̱ snia naꞌ, ne da nacan chee̱ bedauꞌ chee̱baꞌ, ne xrbaba chee̱ labaꞌ, zaj ze̱ꞌ lu nísadauꞌ naꞌ da naca na ca xiaj esaꞌ, zaj nuxre̱ꞌ da caꞌ con zríadiꞌi na du da ba bnezruj Dios le̱ꞌ.
\v 3 Dxelul-le̱ꞌ da bil-la Moisés, benneꞌ we̱n zrin chee̱ Dios, ne da dxul-la Bénneaꞌ naque̱ꞌ Zrílaꞌdauꞌ, da dxenná na:
\q Da zrente̱, ne da dxebánedxu zaj naca xúgute̱ da ba be̱nuꞌ Lueꞌ.
\q Xran, nacuꞌ Dios napuꞌ dute̱ xel-laꞌ dxenná bea.
\q Xrlátaje̱, ne li lazreꞌ zaj naca xrba chiuꞌ Lueꞌ.
\q Nacuꞌ Wenná Bea chee̱ dute̱ xe̱zr la xu.
\q
\v 4 ¿Núzraqueze quebe zrebe Lueꞌ, Xran?
\q ¿Núzraqueze quebe güe láꞌana Lueꞌ?
\q Tuze Lueꞌ nacuꞌ láꞌazxa.
\q Xeleláꞌ benneꞌ dute̱ xe̱zr la xu, naꞌ xulucáꞌana szrene̱ꞌ Lueꞌ,
\q laweꞌ da ba beleléꞌene̱ꞌ da xrlátaje̱ da nunuꞌ.
\p
\v 5 Gudé naꞌ gunnáꞌa ne bleꞌedaꞌ bxalaj xudauꞌ da zua na xabáa, naga zua lataj naga zaj naxúaj da caꞌ bdxixruj beꞌe Dios.
\v 6 Lu xudauꞌ naꞌ beledxúaj gazre gubáz chee̱ xabáa caꞌ zaj nuxre̱ꞌ gazre da ba xaꞌ. Zra lane̱ꞌ zaj nacue̱ꞌ naca na ladxeꞌ zaca, da naca na baꞌa, ne dxelácatite na, naꞌ zaj nasíe̱ꞌ lachuꞌe̱ bazxu da naca na oro.
\v 7 Nadxa tu benneꞌ laduj tapa benneꞌ zaj naca bánqueze̱ꞌ bnézruje̱ꞌ tu tu gubáz gazre caꞌ tu xéꞌena bzri da naca na oro, ne zaj nazrate̱ na da ba xaꞌ da nucueza Dios, Bénneaꞌ zue̱ꞌ chadía chacanna.
\v 8 Guzrate̱ xudauꞌ naꞌ nen zren chee̱ xiꞌ da dxuléꞌe na ca zaj naca xel-laꞌ szren, ne xel-laꞌ dxenná bea chee̱ Dios, naꞌ netú benneꞌ quebe guca chuꞌe̱ ga naꞌ cadxa gudé chee̱ da gazre da ba xaꞌ caꞌ da zaj nuxru gazre gubáz chee̱ xabáa caꞌ.
\c 16
\s Da gazre da ba xaꞌ caꞌ
\p
\v 1 Nadxa bendaꞌ chiꞌi tu benneꞌ gunné̱ꞌ zizraj lu xudauꞌ. Dxe̱ꞌe̱ gazre gubáz chee̱ xabáa caꞌ:
\p ―Le chjaca, le cheajzala da ba xaꞌ caꞌ lu xe̱zr la xu, da caꞌ nucueza Dios.
\p
\v 2 Naꞌ guxéaj gubáz chee̱ xabáa nedxu, xeajlatje̱ꞌ xéꞌena bzri chee̱ꞌ laweꞌ xe̱zr la xu, naꞌ xúgute̱ bénneache, benneꞌ zaj nazriche luzrgue̱ꞌ la be̱ snia naꞌ, ne dxulucáꞌana szrene̱ꞌ bedauꞌ chee̱baꞌ, gulebía we̱ꞌ lu be̱laꞌ dxen chee̱ benneꞌ caꞌ da gulále̱ꞌe̱ na.
\p
\v 3 Gubáz gudxupeꞌ xeajlatje̱ꞌ xéꞌena bzri chee̱ꞌ lu nísadauꞌ, naꞌ nísadauꞌ naꞌ bexaca na dxen ca dxen chee̱ benneꞌ gate, naꞌ gulate xúgute̱ bea zaj naca banbaꞌ lu nísadauꞌ naꞌ.
\p
\v 4 Gubáz guxunneꞌ xeajlatje̱ꞌ xéꞌena bzri chee̱ꞌ lu xe̱gu nisa caꞌ, ne lu beaj caꞌ, naꞌ belexaca na dxen.
\v 5 Naꞌ bendaꞌ chiꞌi tu gubáz chee̱ xabáa dxenná beꞌene̱ꞌ nisa caní, gunné̱ꞌ:
\p ―Xran, Dios Láꞌazxa, zúaquezuꞌ, ne guzúaquezuꞌ. Xrlátaje̱ nacuꞌ laweꞌ da guchuguꞌ chee̱ benneꞌ caꞌ guca caní,
\v 6 laweꞌ da bululalje̱ꞌ dxen chee̱ benneꞌ chiuꞌ caꞌ, ne chee̱ benneꞌ caꞌ gulenné̱ꞌ waláz chiuꞌ, naꞌ naꞌa dxuxíꞌajuꞌ benneꞌ caní dxen laweꞌ da caní zaj naca chee̱ꞌ xeléꞌaje̱ꞌ.
\p
\v 7 Cáꞌanqueze bendaꞌ chiꞌi tu benneꞌ zue̱ꞌ lu cugu, dxenné̱ꞌ:
\p ―Caꞌ naca na, Xran. Nacuꞌ Dios napuꞌ dute̱ xel-laꞌ dxenná bea. Ba bchiꞌu chee̱ bénneache caꞌ ca naca da li, ne da xrlátaje̱.
\p
\v 8 Gubáz gudapeꞌ xeajlatje̱ꞌ xéꞌena bzri chee̱ꞌ lau gubizra, naꞌ gubizra guzí na lataj guzezxe na bénneache caꞌ nen xiꞌ chee̱ na.
\v 9 Xúgute̱ bénneache gulézxele̱ꞌe̱, ne quebe belexebíꞌi lazre̱ꞌ, ne quebe belúe láꞌane̱ꞌ Dios, san gulenné̱ꞌ da cale̱la chee̱ Bénneaꞌ nucueze̱ꞌ da ba xaꞌ naꞌ.
\p
\v 10 Gubáz gázxue xeajlatje̱ꞌ xéꞌena bzri chee̱ꞌ laweꞌ lataj naga dxeꞌ be̱ xixreꞌ snia, naꞌ naga dxenná beabaꞌ guchul-la na. Bénneache caꞌ gulagu xaꞌa luzre̱ꞌ lu xel-laꞌ dxudía chee̱ꞌ,
\v 11 ne quebe bulusane̱ꞌ da zrinnaj da dxelune̱ꞌ. Gulenné̱ꞌ da cale̱la chee̱ Dios zue̱ꞌ xabáa, laweꞌ da dxelezaque̱ꞌ caní ne̱ chee̱ we̱ꞌ da zaj zria be̱laꞌ dxen chee̱ꞌ caꞌ.
\p
\v 12 Gubáz xrupe xeajlatje̱ꞌ xéꞌena bzri chee̱ꞌ laweꞌ xe̱gu zren le̱ na Eufrates, naꞌ nisa xe̱gu naꞌ bebizre na, chee̱ xalaj tu neza naga xeledé benneꞌ dxjaca wedil-la chee̱ benneꞌ wenná bea caꞌ záꞌaque̱ꞌ naga dxalaj gubizra.
\p
\v 13 Nadxa bleꞌedaꞌ beledxúaj chunna beꞌ xriwe̱ꞌ dxuꞌa be̱ snia schanniꞌ, ne dxuꞌa be̱ xixreꞌ snia naꞌ, ne dxuꞌa benneꞌ dxenné̱ꞌ waláz chee̱baꞌ. Beꞌ xriwe̱ꞌ caꞌ zaj naca na ca bluzru caꞌ.
\v 14 Beꞌ xriwe̱ꞌ caní belún na xel-laꞌ waca zriꞌa caꞌ, naꞌ beledxúaj na chee̱ xulutupa na xúgute̱ benneꞌ wenná bea chee̱ xe̱zr la xu, chee̱ chjaque̱ꞌ lu wedil-la chee̱ zra zren chee̱ Dios, Bénneaꞌ nape̱ꞌ dute̱ xel-laꞌ dxenná bea.
\p
\v 15 Dxenná Xránadxu:
\p ―Le naꞌ xque, nedaꞌ xidaꞌ gate quebe dxebézale nedaꞌ, ca zaꞌ tu benneꞌ gubán. Ba neza zrente̱ naca na chee̱ bénneaꞌ zue̱ꞌ ban lazreꞌ ne nupé̱ꞌe̱ lázrdawe̱ꞌ ca tu benneꞌ dxuxúe̱ꞌ zra lane̱ꞌ chee̱ quebe te̱ꞌ gala xídeze, ne quebe xeduéꞌene̱ꞌ lau bénneache.
\p
\v 16 Nadxa beledube̱ꞌ benneꞌ wenná bea caꞌ lu lataj naga le̱ na Armagedón nen dizraꞌ hebreo.
\p
\v 17 Gubáz gazre naꞌ xeajlatje̱ꞌ xéꞌena bzri chee̱ꞌ lu beꞌ, naꞌ lu xudauꞌ da zua xabáa ben tu chiꞌi benneꞌ dxenné̱ꞌ zizraj, da za na lataj blau naga dxeꞌ Dios, dxenné̱ꞌ:
\p ―Bache naca na.
\p
\v 18 Nadxa gule̱pe xesa, ne guleninne na, ne gulenné̱ guziuꞌ, naꞌ lu xe̱zr la xu guzrúꞌle̱ꞌe̱ ca netú lasa quebe ne xruꞌ, naꞌ gulálate̱ zaj zraꞌ bénneache lu xe̱zr la xu.
\v 19 Xe̱zre zrentauꞌ naꞌ guzrá na chunna cueꞌ, naꞌ xe̱zre caꞌ zaj nita lu xe̱zr la xu gulebía xi na, naꞌ xeajsá lazreꞌ Dios benneꞌ caꞌ chee̱ xe̱zre zrentauꞌ naꞌ le̱ na Babilonia chee̱ xeledée̱ꞌ lu da ba xaꞌ zren da nucueza Dios lu xel-laꞌ dxezráꞌa chee̱ꞌ.
\v 20 Xúgute̱ xe̱zr la xu caꞌ da naxechaj nísadauꞌ, ne xúgute̱ xiꞌa caꞌ belexenite na.
\v 21 Cáꞌanqueze belexruj zran xabáa xiaj bezxeꞌ zriꞌa laweꞌ bénneache caꞌ, da dxeláꞌa na ca tu gaxúa xia weaj, naꞌ bénneache caꞌ gulenné̱ꞌ da cale̱la chee̱ Dios ne̱ chee̱ da ba xaꞌ da gulezaque̱ꞌ, laweꞌ da guca na tu da ba xaꞌ zrente̱.
\c 17
\s Dios dxuzría xiꞌe̱ nuꞌula dxúnle̱ꞌe̱ da sban
\p
\v 1 Nadxa blaꞌ tu gubáz chee̱ gazre gubáz chee̱ xabáa caꞌ, gubáz caꞌ bululátaje̱ꞌ xéꞌena bzri caꞌ, naꞌ guzre̱ꞌ nedaꞌ:
\p ―Gudá, naꞌ guléꞌedaꞌ lueꞌ ca naca da ba xaꞌ da sacaꞌ nuꞌula naꞌ dxúnle̱ꞌe̱ da sban, nuꞌula naꞌ dxeꞌe̱ laweꞌ nísadauꞌ caꞌ.
\v 2 Benneꞌ wenná bea caꞌ zaj zre̱ꞌe̱ xe̱zr la xu dxelune̱ꞌ da sban nen nuꞌula naꞌ, naꞌ benneꞌ zaj zre̱ꞌe̱ xe̱zr la xu zaj naque̱ꞌ ca benneꞌ dxelezuzreꞌ laweꞌ da dxelune̱ꞌ da sban nen nuꞌula naꞌ.
\p
\v 3 Nadxa, lu da bleꞌe Beꞌ Láꞌazxa nedaꞌ, gubáz chee̱ xabáa naꞌ guché̱ꞌe̱ nedaꞌ le̱ꞌe̱ xixreꞌ laweꞌ lataj, naꞌ lataj naꞌ bleꞌedaꞌ tu nuꞌula zrie̱ꞌ cuzru tu be̱ xixreꞌ schanniꞌ xrna, naꞌ zaj naxúaj lu be̱laꞌ dxen chee̱baꞌ labaꞌ schanniꞌ caꞌ, da caꞌ dxecuide Dios, naꞌ zaj naca gazre xíchajbaꞌ, ne chi lúzubaꞌ.
\v 4 Nuꞌula nigá nacue̱ꞌ zra lane̱ꞌ bzawe, ne da xrna, naꞌ lechítaje̱ chee̱ꞌ zaj naca na oro, ne xiaj xrtante̱, ne bga caꞌ. Nuxre̱ꞌ tu xéꞌena bzri da naca na oro da nazrate̱ na da sgute caꞌ, ne da sban da dxune̱ꞌ.
\v 5 Naxúaj luzrgue̱ꞌ ca le̱ꞌ, da dxenná na: Babilonia, Xe̱zre Szrentauꞌ, Xrnaꞌ Xúgute̱ Nuꞌula Caꞌ Dxelune̱ꞌ Da Sban, ne Xúgute̱ Da Sgute Da De̱ Xe̱zr La Xu.
\v 6 Nadxa bleꞌedaꞌ nuꞌula naꞌ dxezúzrene̱ꞌ nen dxen chee̱ benneꞌ caꞌ zaj naque̱ꞌ chee̱ Dios, ne chee̱ benneꞌ caꞌ belute bénneache le̱ꞌ laweꞌ da belexeche̱be̱ꞌ chee̱ Jesús. Gate bleꞌedaꞌ da naꞌ, bebánele̱ꞌe̱daꞌ.
\v 7 Nadxa gubáz chee̱ xabáa naꞌ guzre̱ꞌ nedaꞌ:
\p ―¿Bizr chee̱ naꞌ dxebánenuꞌ? Guléꞌedaꞌ lueꞌ ca naca da nagache chee̱ nuꞌula nigá, ne chee̱ be̱ xixreꞌ schanniꞌ naꞌ núabaꞌ le̱ꞌ, bea naꞌ zaj napa gazre xíchajbaꞌ, ne chi lúzubaꞌ.
\v 8 Be̱ xixreꞌ schanniꞌ naꞌ bléꞌenuꞌ, nácabaꞌ tu be̱ zúabaꞌ nédxute̱, na naꞌa québedxa zúabaꞌ. Wagüenbaꞌ lu lataj chul-la nédxudxa ca za gátebaꞌ tu chíꞌizqueze. Benneꞌ zaj zraꞌ xe̱zr la xu, ne quebe zaj naxúaj le̱ꞌ lu xiche chee̱ xel-laꞌ nabán ca be̱nte̱ Dios xe̱zr la xu, xelexebánele̱ꞌe̱ne̱ꞌ gate xeleléꞌene̱ꞌ bea nigá, be̱ zúaqueze nédxute̱, naꞌ naꞌa québedxa zúabaꞌ, naꞌ welaꞌbaꞌ.
\p
\v 9 ’Nigá de̱ lateꞌ da guléꞌedaꞌ benneꞌ xeléajniꞌine̱ꞌ na. Gazre xíchajbaꞌ caní zaj zéaje̱ na gazre xiꞌa naga dxenná bea nuꞌula naꞌ.
\v 10 Cáꞌanqueze xíchajbaꞌ caꞌ zaj zéaje̱ na gazre benneꞌ wenná bea. Gazxuꞌ benneꞌ wenná bea caní ba gulatie̱ꞌ. Tu benneꞌ caꞌ dxenná beꞌe̱ naꞌa, naꞌ xetue̱ꞌ quebe ne xide̱ꞌ. Gate laꞌ benneꞌ bze̱be nigá, québedxa súateque̱ꞌ schaꞌ.
\v 11 Be̱ xixreꞌ schanniꞌ naꞌ, be̱ zúabaꞌ nédxute̱, naꞌ naꞌa québedxa zúabaꞌ, zéaje̱ na benneꞌ xrunuꞌ naque̱ꞌ benneꞌ wenná bea. Naque̱ꞌ tu benneꞌ ládujla benneꞌ gazre caꞌ, naꞌ te naꞌ gatie̱ꞌ tu chíꞌizqueze.
\p
\v 12 ’Chi lúzu be̱ xixreꞌ snia naꞌ da bléꞌenuꞌ zaj naca na chi benneꞌ wenná bea caꞌ, benneꞌ quebe ne xelezú lawe̱ꞌ xelenná beꞌe̱, naꞌ xelezíꞌe̱ xel-laꞌ dxenná bea xelaque̱ꞌ wenná bea tu chíꞌidauꞌze tu zren nen be̱ xixreꞌ schanniꞌ naꞌ.
\v 13 Benneꞌ chi wenná bea caní zaj nune̱ꞌ tuze dizraꞌ, naꞌ xulunézruje̱ꞌ xel-laꞌ szren chee̱ꞌ, ne xel-laꞌ dxenná bea chee̱ꞌ lu naꞌ bénneaꞌ naque̱ꞌ be̱ xixreꞌ schanniꞌ naꞌ.
\v 14 Benneꞌ caní xeledíl-lale̱neꞌ Bénneaꞌ naque̱ꞌ Zrílaꞌdauꞌ, naꞌ Benneꞌ nigá guzría xiꞌe̱ benneꞌ wenná bea caꞌ, laweꞌ da naca Le̱ꞌ Benneꞌ Wenná Bea chee̱ benneꞌ wenná bea caꞌ, ne Xrane benneꞌ zaj naque̱ꞌ xrane bénneache, naꞌ benneꞌ caꞌ zrále̱ne̱ꞌ Le̱ꞌ, gunné̱ Dios le̱ꞌ, ne guqué̱ꞌe̱ le̱ꞌ, naꞌ zaj naque̱ꞌ li lazreꞌ.
\p
\v 15 Cáꞌanqueze gubáz chee̱ xabáa naꞌ guzre̱ꞌ nedaꞌ:
\p ―Nísadauꞌ caꞌ bléꞌenuꞌ, naga dxeꞌ nuꞌula naꞌ dxúnle̱ꞌe̱ da sban, zaj naca na xe̱zre bénneache caꞌ, ne benneꞌ dxelenné̱ꞌ dizraꞌ walazreꞌ cha chee̱ꞌ, ne benneꞌ zane cueꞌ xe̱zr la xu.
\v 16 Chi lúzubaꞌ naꞌ bléꞌenuꞌ xichaj be̱ xixreꞌ schanniꞌ naꞌ, da zaj naca na chi benneꞌ wenná bea caꞌ, xelecuídene̱ꞌ nuꞌula naꞌ dxúnle̱ꞌe̱ da sban, naꞌ xelebéaj xíchaje̱ꞌ le̱ꞌ, ne xulucáꞌane̱ꞌ le̱ꞌ gala xídeze. Xelawe̱ꞌ be̱laꞌ dxen chee̱ꞌ, ne xuluzezxe̱ꞌ le̱ꞌ lu xiꞌ.
\v 17 Dios bzue̱ꞌ lu lázrdau benneꞌ wenná bea caꞌ xelune̱ꞌ ca da dxaca lazreꞌ Le̱ꞌ, gate belune̱ꞌ tuze dizraꞌ, ne bulunézruje̱ꞌ xel-laꞌ dxenná bea chee̱ꞌ lu naꞌ bénneaꞌ naque̱ꞌ be̱ xixreꞌ schanniꞌ naꞌ, cadxa gaca ca da ba gunná Dios.
\v 18 Nuꞌula naꞌ bléꞌenuꞌ naque̱ꞌ Babilonia, xe̱zre zrentauꞌ naꞌ dxenná beꞌe na benneꞌ wenná bea caꞌ zaj zre̱ꞌe̱ xe̱zr la xu.
\c 18
\s Dxebía xiꞌ xe̱zre Babilonia
\p
\v 1 Gudé naꞌ bleꞌedaꞌ betaj xetú gubáz chee̱ xabáa, nápale̱ꞌe̱ xel-laꞌ dxenná bea, naꞌ bseníꞌ xel-laꞌ szren chee̱ꞌ lu xe̱zr la xu.
\v 2 Naꞌ gunné̱ꞌ zizraj:
\p ―Ba guzría xiꞌ. Ba guzría xiꞌ Babilonia, xe̱zre zrentauꞌ naꞌ, ne ba bexaca na lataj naga zaj zraꞌ da xriwe̱ꞌ caꞌ, ne lataj naga zaj zraꞌ xúgute̱ cueꞌ beꞌ xriwe̱ꞌ caꞌ, ne lataj naga zaj zraꞌ be̱ zua xrila, be̱ schanniꞌ caꞌ, ne be̱ sgute caꞌ.
\v 3 Xúgute̱ bénneache zaj zre̱ꞌe̱ tu tu cueꞌ xe̱zr la xu zaj naque̱ꞌ ca benneꞌ dxelezuzreꞌ, laweꞌ da dxelune̱ꞌ da sban da dxaca xe̱zre naꞌ, naꞌ benneꞌ wenná bea caꞌ zaj zre̱ꞌe̱ xe̱zr la xu belune̱ꞌ da sban da dxaca xe̱zre naꞌ, naꞌ benneꞌ caꞌ dxelútiꞌe gulaque̱ꞌ benneꞌ gunníꞌa ne̱ chee̱ da zante̱ da gulezá lazreꞌ benneꞌ caꞌ zaj zre̱ꞌe̱ xe̱zre naꞌ.
\p
\v 4 Nadxa bendaꞌ chiꞌi xetú benneꞌ da za xabáa, dxenné̱ꞌ:
\p ―Le dxuaj xe̱zre naꞌ, leꞌe, nácale chiaꞌ, chee̱ quebe gácale benneꞌ caꞌ tuze lu dul-la da dxelune̱ꞌ, ne chee̱ quebe tele lu da ba xaꞌ da xelezaca benneꞌ caꞌ.
\v 5 Dul-la chee̱ benneꞌ caꞌ ba guxán na, naꞌ zaj naca na ca tu da ba bgula, da ba bzrinte̱ na zran xabáa, naꞌ Dios ba xeajsá lazre̱ꞌ ca naca da zrinnaj da dxelún benneꞌ caꞌ.
\v 6 Dios gunézruje̱ꞌ chee̱ benneꞌ caꞌ cáte̱ze da bulunézruje̱ꞌ chee̱ benneꞌ xula, ne xunézruje̱ꞌ le̱ꞌ chupa cuenla ca da zrinnaj da belune̱ꞌ. Ba nucueze̱ꞌ da xelezaque̱ꞌ da nácale̱ꞌe̱dxa ziꞌ ca da bulusaque̱ꞌ benneꞌ xula.
\v 7 Gudée̱ꞌ benneꞌ caꞌ lu da ba xaꞌ, ne gudée̱ꞌ le̱ꞌ xel-laꞌ ziꞌ cáte̱ze naꞌ belune̱ꞌ. Buluzúa cuine̱ꞌ lu xel-laꞌ szren, ne gulezúe̱ꞌ lu xel-laꞌ dxelexezaca ba lazreꞌ chee̱ꞌ, laweꞌ da dxelenné̱ꞌ lu lázrdawe̱ꞌ: Dxéꞌentuꞌ nigá dxenná béantuꞌ. Quebe nácantuꞌ we̱ze̱be, ne quebe bi sácantuꞌ.
\v 8 Chee̱ le̱ naꞌ, tuze zra xelezrín da ba xaꞌ caꞌ da xelezaque̱ꞌ, xel-laꞌ gute, ne xel-laꞌ ziꞌ, ne xel-laꞌ dxedún, naꞌ xelezxe̱ꞌ lu xiꞌ, laweꞌ da napa Xránadxu Dios dute̱ xel-laꞌ dxenná bea, naꞌ naque̱ꞌ Bénneaꞌ guchugue̱ꞌ chee̱ benneꞌ caꞌ xelezaque̱ꞌ caní.
\p
\v 9 Benneꞌ wenná bea caꞌ zaj zre̱ꞌe̱ xe̱zr la xu, ne belúnle̱ne̱ꞌ benneꞌ caꞌ da sban ne da belexezaca ba lazre̱ꞌ, xelebezre xache̱ꞌ gate xeleléꞌene̱ꞌ ca naca zren chee̱ xe̱zre naꞌ, da dxezxe na.
\v 10 Welezé̱ꞌ zítuꞌla laweꞌ da xelezrebe̱ꞌ xelezaque̱ꞌ ca da dxelezaca benneꞌ caꞌ, naꞌ xelenné̱ꞌ:
\p ―Baxacheꞌ nácale leꞌe, benneꞌ zaj zre̱ꞌe̱ xe̱zre zrentauꞌ, Babilonia, laweꞌ da chadite̱ blaꞌ da ba xaꞌ da dxezácale.
\p
\v 11 Cáꞌanqueze benneꞌ caꞌ dxelútiꞌe, benneꞌ zaj zre̱ꞌe̱ xe̱zr la xu, welebezre̱ꞌ, ne welebezre xáchequeze̱ꞌ ca naca da dxaca chee̱ xe̱zre naꞌ, laweꞌ da québedxa nu chiláꞌ benneꞌ siꞌe̱ da dxelutiꞌe̱,
\q
\v 12 da zaj naca oro, ne plata,
\q ne xiaj xrtante̱ caꞌ, ne bga caꞌ,
\q ne ladxeꞌ zaca caꞌ, ne ladxeꞌ bzawe ne da xrna,
\q ne xúgute̱ cueꞌ xaga caꞌ dxelelále̱ꞌe̱ na zixre,
\q ne zrita xrtante̱, ne xaga xrtante̱,
\q ne xia gache, ne xia, ne xiaj esaꞌ,
\q
\v 13 ne lacu zixre, ne xíxreꞌdauꞌ dxelále̱ꞌe̱ na zixre,
\q ne xala, ne da caꞌ dxelelále̱ꞌe̱ na zixre,
\q ne xrise uva wala, ne za xel-laꞌ wagu,
\q ne xrte xezaj, ne zruaꞌ xtila,
\q ne be̱ xixreꞌ, be̱ dxelúa xuaꞌ,
\q ne zrilaꞌ caꞌ, ne bzrinaꞌ caꞌ,
\q ne da caꞌ dxudé xua,
\q ne benneꞌ caꞌ dxelútiꞌe̱ le̱ꞌ lu naꞌ benneꞌ gunníꞌa caꞌ.
\p
\v 14 Benneꞌ caní xelé̱ꞌe̱ benneꞌ zaj zre̱ꞌe̱ xe̱zre naꞌ:
\p ―Naꞌa québedxa gápale da zixre caꞌ da zácale̱ꞌe̱ na da bdánnele̱ꞌe̱le, ne ba bnítele tu chíꞌizqueze xúgute̱ xel-laꞌ gunníꞌa chee̱le, ne da xrtante̱ chee̱le.
\p
\v 15 Benneꞌ caꞌ belútiꞌe̱ da caꞌ xelezé̱ꞌ zítuꞌla laweꞌ da dxelezrebe̱ꞌ xelezaque̱ꞌ ca da dxelezaca benneꞌ zaj zre̱ꞌe̱ xe̱zre naꞌ, naꞌ xelebezre̱ꞌ, ne xelebezre xáchequeze̱ꞌ,
\v 16 naꞌ xelenné̱ꞌ:
\p ―Baxacheꞌ zaj naca benneꞌ caꞌ zaj zre̱ꞌe̱ xe̱zre zrentauꞌ naꞌ. Gulaque̱ꞌ ca tu nuꞌula nacue̱ꞌ ladxeꞌ zácale̱ꞌe̱ da bzawe, ne da xrna, ne nazíꞌe̱ lechítaje̱ da naca na oro, ne xiaj xrtante̱, ne bga caꞌ.
\v 17 Chadite̱ benite xel-laꞌ gunníꞌa naꞌ, ne guxezxe na.
\p Xúgute̱ benneꞌ xrane da caꞌ dxeledán laweꞌ nísadauꞌ, ne benneꞌ zaj zre̱ꞌe̱ luꞌule na, ne benneꞌ dxulusé̱ꞌe̱ da caꞌ dxeledán laweꞌ nísadauꞌ, ne benneꞌ dxelune̱ꞌ zrin lu nísadauꞌ belezé̱ꞌ zítuꞌla,
\v 18 naꞌ gate beleléꞌene̱ꞌ zren chee̱ xe̱zre naꞌ dxezxe na, naꞌ gulenné̱ꞌ zizraj:
\p ―¿Bízraqueze xetú xe̱zre naca na da zren ca xe̱zre zrentauꞌ nigá?
\p
\v 19 Dute̱ xel-laꞌ dxelexewíꞌine lazreꞌ xuluzré̱ꞌe̱ xu xíchaje̱ꞌ caꞌ, ne xelebezre̱ꞌ, ne xelebezre xáchequeze̱ꞌ, xelenné̱ꞌ:
\p ―Baxacheꞌ zaj naca benneꞌ caꞌ zaj zre̱ꞌe̱ xe̱zre zrentauꞌ naꞌ. Nen xel-laꞌ gunníꞌa chee̱ benneꞌ caꞌ gulenniꞌa xúgute̱ benneꞌ caꞌ zaj nape̱ꞌ da caꞌ dxeledán laweꞌ nísadauꞌ. Chadite̱ guzría xiꞌ xe̱zre zrentauꞌ naꞌ.
\p
\v 20 Ca guca chee̱ xe̱zre naꞌ, le be, leꞌe zrale xabáa, ne leꞌe, gubáz chee̱ Cristo, ne leꞌe bchálajle waláz chee̱ Dios, ne xúgute̱le leꞌe nácale bi chee̱ Dios, laweꞌ da gate bzria xiꞌ Dios xe̱zre naꞌ, bebéaj lazre̱ꞌ da naca chee̱le leꞌe.
\p
\v 21 Nadxa tu gubáz chee̱ xabáa, gubáz nápale̱ꞌe̱ xel-laꞌ dxenná bea guchise̱ꞌ tu xiaj zren da naca na ca xiaj xiche, naꞌ bzale̱ꞌ na lu nísadauꞌ, gunné̱ꞌ:
\p ―Cáꞌante cuía xiꞌ Babilonia, xe̱zre zrentauꞌ naꞌ, naꞌ québedxa nu léꞌequezdxa le̱ na,
\v 22 ne québedxa nu xen la neza chee̱ xe̱zre naꞌ da caꞌ dxulugul-la bénneache, da can zríadiꞌi na du, ne bchiuj, ne luzu da dxulucuezre̱ꞌ, ne québedxa nu chiláꞌ gun zrin lu xe̱zre naꞌ, ne québedxa xen schaga da dxun da dxutu na.
\v 23 Québedxa guseníꞌ netú xiꞌ lu xe̱zre naꞌ, ne québedxa xen laní chee̱ wechaga naꞌ ga naꞌ, lácala benneꞌ caꞌ belútiꞌe̱ lu xe̱zre naꞌ gulenná beꞌe̱ laweꞌ xúgute̱ benneꞌ zaj zre̱ꞌe̱ xe̱zr la xu, ne gulezí xe̱ꞌe̱ xúgute̱ cueꞌ xe̱zr la xu nen xel-laꞌ wazráꞌ chee̱ꞌ.
\p
\v 24 Caní guca laweꞌ da lu xe̱zre naꞌ gulalaj dxen chee̱ benneꞌ caꞌ gulenné̱ꞌ waláz chee̱ Dios, ne dxen chee̱ benneꞌ caꞌ zaj naque̱ꞌ bi chee̱ Dios, ne dxen chee̱ benneꞌ caꞌ belute bénneache le̱ꞌ du ca naca xe̱zr la xu.
\c 19
\p
\v 1 Gudé naꞌ bendaꞌ chiꞌi benneꞌ zan zaj zre̱ꞌe̱ xabáa, dxelenné̱ꞌ zizraj:
\q ¡Gaca ba Dios! ¡Xel-laꞌ weselá, ne xel-laꞌ szren, ne xel-laꞌ dxenná bea zaj naca na chee̱ Dios chee̱dxu.
\q
\v 2 Ca dxuchiꞌa Le̱ꞌ, xrlátaje̱, ne li lazreꞌ naca na!
\q ¡Ba bzria xiꞌe̱ xe̱zre naꞌ dxuléꞌe na nuꞌula naꞌ núnle̱ꞌe̱ da sban,
\q nuꞌula naꞌ bxrínnaje̱ꞌ bénneache zaj zre̱ꞌe̱ dute̱ xe̱zr la xu lu da sban da be̱ne̱ꞌ!
\q ¡Dios ba bebéaj lazre̱ꞌ nuꞌula naꞌ laweꞌ da be̱tie̱ꞌ we̱n zrin caꞌ chee̱ Dios!
\p
\v 3 Nadxa gulenné̱ꞌ da xula:
\p ―¡Gaca ba Dios laweꞌ da tu cuénzqueze zren chee̱ xe̱zre naꞌ dxezxe na!
\p
\v 4 Nadxa tape dxua benneꞌ gula caꞌ ne tapa benneꞌ ban caꞌ buluzú zribe̱ꞌ, naꞌ bulucáꞌana szrene̱ꞌ Dios, Bénneaꞌ dxeꞌe̱ lataj blau naꞌ, dxelenné̱ꞌ:
\p ―¡Caꞌ naca na! ¡Gaca ba Dios!
\p
\v 5 Nadxa ben tu chiꞌi benneꞌ lu lataj blau naꞌ, dxenné̱ꞌ:
\q ¡Le güe láꞌana Dios chee̱dxu, xúgute̱le leꞌe dxunle zrin chee̱ꞌ,
\q ne dxezrébele Le̱ꞌ, leꞌe benneꞌ blau, ne benneꞌ quebe nu nácale!
\s Laní chee̱ wechaga naꞌ chee̱ Bénneaꞌ naque̱ꞌ Zrílaꞌdauꞌ
\p
\v 6 Cáꞌanqueze bendaꞌ tu da naca ca chiꞌi benneꞌ zan, ca dxeleninne zánete̱ xe̱gu, ne ca dxelenné̱le̱ꞌe̱ guziuꞌ caꞌ, dxelenné̱ꞌ:
\q ¡Gaca ba Dios laweꞌ da ba guzú lau dxenná bea Xránadxu Dios, Benneꞌ nape̱ꞌ dute̱ xel-laꞌ dxenná bea!
\q
\v 7 ¡Du be! ¡Béle̱ꞌe̱quezdxu, ne güe láꞌanadxu Le̱ꞌ!
\q ¡Ba bzrin zra chee̱ laní wechaga naꞌ chee̱ Bénneaꞌ naque̱ꞌ Zrílaꞌdauꞌ!
\q Nuꞌula naꞌ siꞌe̱ ba nupáꞌa cuínabeꞌ,
\q
\v 8 nuꞌula naꞌ naziꞌibeꞌ lataj nácubeꞌ ladxeꞌ zaca, da quebe nadxén na, ne dxácatite na.
\p Ladxeꞌ zaca naꞌ zéaje̱ na da xrlátaje̱ da zaj nun benneꞌ caꞌ zaj naque̱ꞌ bi chee̱ Dios.
\p
\v 9 Nadxa guzre gubáz chee̱ xabáa nedaꞌ:
\p ―Bzuaj caní: Ba neza zren naca na chee̱ benneꞌ caꞌ gunné̱ Dios xelelé̱ꞌe̱ laní wechaga naꞌ chee̱ Bénneaꞌ naque̱ꞌ Zrílaꞌdauꞌ.
\p Nadxa guzre̱ꞌ nedaꞌ:
\p ―Da caní zaj naca na dizraꞌ li chee̱ Dios.
\p
\v 10 Nadxa bzu zribaꞌ lau gubáz chee̱ xabáa naꞌ chee̱ gucáꞌana szrenaꞌ le̱ꞌ, naꞌ le̱ꞌ guzre̱ꞌ nedaꞌ:
\p ―Quebe gunuꞌ caní laweꞌ da nácaquezaꞌ nedaꞌ we̱n zrin chee̱ Dios ca lueꞌ, ne ca benneꞌ bichuꞌ caꞌ zéajle̱le da li naꞌ da bleꞌe Jesús leꞌe. Bcaꞌana szren Dios. Da li naꞌ da bleꞌe Jesús leꞌe naca na da dxelenná benneꞌ caꞌ dxuluchálaje̱ꞌ waláz chee̱ Dios.
\s Benneꞌ zrie̱ꞌ bzrinaꞌ chiche
\p
\v 11 Nadxa bleꞌedaꞌ ba naxalaj xabáa, naꞌ bleꞌe lau tu bzrinaꞌ chiche, naꞌ Benneꞌ zrie̱ꞌ-baꞌ le̱ꞌ Du Lazreꞌ, ne Li Lazreꞌ, laweꞌ da dxenná beꞌe̱, ne dxune̱ꞌ wedil-la lu da xrlátaje̱.
\v 12 Xiaj lawe̱ꞌ dxelácatite na ca xiꞌ ca, naꞌ xíchaje̱ꞌ zaj zria zánete̱ da zaca caꞌ, naꞌ naxúaj tu le̱ꞌ lawe̱ꞌ, da nézene̱ꞌ tuze Le̱ꞌ.
\v 13 Nacue̱ꞌ tu zre̱ꞌ da nazaj na dxen, naꞌ La Le̱ꞌ naca na Xrtizra Dios.
\v 14 Xúgute̱ benneꞌ caꞌ zaj zre̱ꞌe̱ xabáa zjácale̱ne̱ꞌ Le̱ꞌ, zaj nacue̱ꞌ ladxeꞌ zaca caꞌ, ladxeꞌ chiche zríladauꞌ, ne zaj zrie̱ꞌ bzrinaꞌ chiche caꞌ.
\v 15 Dxuꞌa Bénneaꞌ zua tu da naca na ca tu xia nalále̱ꞌe̱ da quine̱ꞌ benneꞌ xe̱zre caꞌ, naꞌ nna beꞌene̱ꞌ benneꞌ caꞌ nen tu bar xia. Le̱ꞌ guzría xiꞌe̱ benneꞌ caꞌ ca tu benneꞌ dxesíe̱ꞌ uva caꞌ, ne dxuléaje̱ꞌ na, da zéaje̱ na da ba xaꞌ da nucueza Dios lu xel-laꞌ dxezráꞌa chee̱ꞌ, ca da xelezaca bénneache caꞌ.
\v 16 Naxúaj le̱ꞌe̱ zre̱ꞌ, ne zríchuje̱ꞌ da nazí Le̱ꞌ caní: Benneꞌ Dxenná Beꞌene̱ꞌ Benneꞌ Wenná Bea Caꞌ, ne Xrane Benneꞌ Caꞌ Zaj Naque̱ꞌ Xrane Bénneache.
\p
\v 17 Nadxa bleꞌedaꞌ tu gubáz chee̱ xabáa ze̱ꞌ lu gubizra, naꞌ gunné̱ꞌ zizraj xúgute̱ be̱ zua xrila, be̱ dxeledá zran xabáa, dxenné̱ꞌ:
\p ―Le da. Le zraga gágule da dxúnnale̱ꞌe̱ Dios leꞌe,
\v 18 chee̱ gágule be̱la dxen chee̱ benneꞌ wenná bea caꞌ, ne chee̱ benneꞌ dxelenná beꞌe̱ lu wedil-la, ne chee̱ benneꞌ wal-la caꞌ, ne chee̱ bzrinaꞌ caꞌ, ne chee̱ benneꞌ zaj zrie̱ꞌ-baꞌ, ne chee̱ xúgute̱ bénneache, benneꞌ caꞌ zaj nadáꞌue̱ꞌ, ne benneꞌ caꞌ quebe zaj nadáꞌue̱ꞌ, benneꞌ blau caꞌ ne benneꞌ quebe nu zaj naque̱ꞌ.
\p
\v 19 Nadxa bleꞌedaꞌ be̱ xixreꞌ schanniꞌ, ne ca naca benneꞌ wenná bea zaj zre̱ꞌe̱ xe̱zr la xu nen benneꞌ dxjaca wedil-la chee̱ ꞌ caꞌ, ba nazrague̱ꞌ chee̱ xeledíl-lale̱neꞌ Bénneaꞌ zrie̱ꞌ bzrinaꞌ chiche naꞌ, ne nen benneꞌ caꞌ zaj de̱ꞌe̱ Le̱ꞌ.
\v 20 Gule̱l-le̱ꞌ be̱ xixreꞌ schanniꞌ naꞌ tu zren nen bénneaꞌ gunné̱ꞌ waláz chee̱baꞌ, bénneaꞌ bé̱nle̱ꞌe̱ xel-laꞌ waca zren laubaꞌ. Ne̱ chee̱ xel-laꞌ waca caní da be̱ne̱ꞌ, benneꞌ nigá guzí xe̱ꞌe̱ benneꞌ caꞌ belúꞌe̱ lataj guzriche luzrgue̱ꞌ labaꞌ, ne bulucáꞌana szrene̱ꞌ bedauꞌ chee̱baꞌ. Nadxa beleché̱ꞌe̱ be̱ xixreꞌ schanniꞌ naꞌ, ne bénneaꞌ gunné̱ꞌ waláz chee̱baꞌ, naꞌ beleguꞌe̱ le̱ꞌ zaj nabante̱ꞌ lu xiꞌ chee̱ da dxuzézxele̱ꞌe̱ na da dxeꞌ ca tu nísadauꞌ.
\v 21 Nadxa Bénneaꞌ zrie̱ꞌ bzrinaꞌ chiche be̱tie̱ꞌ benneꞌ caꞌ xezícala nen xia nalá naꞌ zua dxuꞌe, naꞌ xúgute̱ bea caꞌ zaj zua xrila gulélajbaꞌ be̱la dxen chee̱ benneꞌ caꞌ.
\c 20
\s Chi gaxúa iza
\p
\v 1 Gudé naꞌ bleꞌedaꞌ betaj tu gubáz chee̱ xabáa, nuxre̱ꞌ zren xia chee̱ lataj chul-la, ne nuxre̱ꞌ tu du xia zren.
\v 2 Gubáz nigá gude̱l-le̱ꞌ be̱ snia schanniꞌ, nácabaꞌ be̱laꞌ zua nédxute̱, ne nácabaꞌ da xriwe̱ꞌ, ne Satanás, naꞌ bcheaje̱ꞌ-baꞌ du xia laweꞌ chi gaxúa iza.
\v 3 Naꞌ gudxúꞌune̱ꞌ-baꞌ lataj chul-la naꞌ naga bsézxuje̱ꞌ-baꞌ, naꞌ bde̱ꞌe̱ le̱ꞌe dxa xuꞌu naꞌ tu da gunna bea na, chee̱ québedxa si xe̱ na bénneache chee̱ xe̱zr la xu caꞌ cadxa te chi gaxúa iza. Te chee̱ chi gaxúa iza, dxal-laꞌ xeláꞌ na tu chíꞌidauꞌ.
\p
\v 4 Nadxa bleꞌedaꞌ lataj blau caꞌ, naga zaj dxeꞌ benneꞌ caꞌ ba zaj naziꞌe̱ xel-laꞌ dxenná bea chee̱ xuluchiꞌe̱ ca da zaj nun bénneache. Cáꞌanqueze bleꞌedaꞌ bénneꞌdu caꞌ gulexúꞌu bénneache caꞌ gulechugu bénneache xíchaje̱ꞌ laweꞌ da belexeche̱be̱ꞌ chee̱ Jesús, ne buluchálaje̱ꞌ xrtizra Dios. Benneꞌ caní quebe bulucáꞌana szrene̱ꞌ be̱ xixreꞌ schanniꞌ naꞌ, ne bedauꞌ chee̱baꞌ, ne quebe belúꞌe̱ lataj zriche labaꞌ luzrgue̱ꞌ, u ne̱ꞌe̱.
\v 5 Benneꞌ gate caꞌ xezícala quebe xelexebane̱ꞌ ca tedxa chee̱ chi gaxúa iza caꞌ. Da nigá guca naca na xel-laꞌ dxexebán nedxu.
\v 6 Ba neza zrente̱ naca na chee̱ benneꞌ caꞌ zaj naque̱ꞌ bi chee̱ Dios, benneꞌ caꞌ xelexebane̱ꞌ nedxu. Da ziꞌ da xaꞌ da zeajlí canna quebe sequeꞌ bi gune na benneꞌ caꞌ. Xelaque̱ꞌ bxruze chee̱ Dios, ne chee̱ Cristo, naꞌ xelenná beꞌe̱ tu zren nen Le̱ꞌ chi gaxúa iza.
\p
\v 7 Ca te chee̱ chi gaxúa iza caꞌ, naꞌ laꞌ Satanás naga nadxéaj na,
\v 8 naꞌ xedxúaj na chee̱ cheajxrí xe̱ na bénneache zaj zre̱ꞌe̱ xúgute̱ cueꞌ xe̱zr la xu caꞌ. Si xe̱ na bénneache xe̱zre Gog, ne xe̱zre Magog, naꞌ guchaga na benneꞌ dxjaque̱ꞌ wedil-la chee̱ xúgute̱ cueꞌ xe̱zr la xu lu wedil-la, naꞌ benneꞌ dxjaque̱ꞌ wedil-la zaj naque̱ꞌ benneꞌ zan ca naxán xuzreꞌ da dxeꞌ dxuꞌa tu xe̱gu zren.
\v 9 Caꞌ guca, beledxúaje̱ꞌ du ca naca lu xe̱zr la xu, naꞌ guléchaje̱ꞌ naga zaj zraꞌ benneꞌ zaj naque̱ꞌ chee̱ Dios, ne xe̱zre naꞌ da nazríꞌi Dios. Nadxa Dios gusel-le̱ꞌ xiꞌ da zaꞌ xabáa, naꞌ bzezxe xiꞌ naꞌ ca naca benneꞌ caꞌ.
\v 10 Nadxa gule̱l-le̱ꞌ da xriwe̱ꞌ, da guzí xe̱ na bénneache caꞌ, naꞌ guledxúꞌune̱ꞌ na lu xiꞌ chee̱ da dxuzézrele̱ꞌe na da dxeꞌ ca tu nísadauꞌ, naga zaj zraꞌ be̱ xixreꞌ schanniꞌ, ne bénneaꞌ gunné̱ꞌ waláz chee̱baꞌ. Lu xiꞌ naꞌ xeledée̱ꞌ lu da ba xaꞌ te zra, ne chizrela chadía chacanna.
\s Dios dxeꞌe̱ lataj blau chiche, dxuchiꞌe̱ chee̱ benneꞌ caꞌ dxeluneꞌ da zrinnaj
\p
\v 11 Nadxa bleꞌedaꞌ tu lataj blau chiche, ne Bénneaꞌ dxeꞌe̱ lataj naꞌ. Lau Le̱ꞌ belexenite xe̱zr la xu, ne xabáa, naꞌ québedxa nu benneꞌ léꞌene̱ꞌ da caꞌ.
\v 12 Nadxa bleꞌedaꞌ benneꞌ gate caꞌ, benneꞌ blau, ne benneꞌ quebe nu zaj naque̱ꞌ, zaj ze̱ꞌ lau Dios, naꞌ belexalaj xiche caꞌ, ne cáꞌanqueze xetú xiche naga zaj naxúaj la benneꞌ caꞌ zaj nape̱ꞌ xel-laꞌ nabán. Dios bchiꞌe̱ chee̱ benneꞌ caꞌ cáte̱ze da belún tu tue̱ꞌ, da caꞌ zaj naxúaj na lu xiche caꞌ.
\v 13 Belexedxúaj benneꞌ gate caꞌ zaj nagache̱ꞌ lu nísadauꞌ, ne belexedxúaj benneꞌ gate caꞌ zaj nagache̱ꞌ lataj chul-la chee̱ benneꞌ gate, naꞌ Dios bchiꞌe̱ chee̱ xúgute̱ꞌ cáte̱ze da belún tu tue̱ꞌ.
\v 14 Nadxa guledxúꞌune̱ꞌ benneꞌ gate caꞌ gulezúe̱ꞌ lataj chul-la naga zraꞌ benneꞌ gate lu xiꞌ chee̱ da dxuzézrele̱ꞌe na da dxeꞌ ca tu nísadauꞌ. Xiꞌ nigá naca na da ziꞌ da xaꞌ da zeajlí canna,
\v 15 naꞌ lu xiꞌ nigá guledxúꞌune̱ꞌ xúgute̱ benneꞌ caꞌ quebe zaj naxúaj le̱ꞌ lu xiche chee̱ xel-laꞌ nabán.
\c 21
\s Tu xabáa cube ne tu xe̱zr la xu cube
\p
\v 1 Ca gudé naꞌ bleꞌedaꞌ tu xabáa cube, ne tu xe̱zr la xu cube, laweꞌ da belexenite xabáa nedxu, ne xe̱zr la xu nedxu, naꞌ québedxa de̱ nísadauꞌ.
\v 2 Nedaꞌ, Juan, bleꞌedaꞌ xe̱zre láꞌazxa, da naca na Jerusalén cube, dxetaj na xabáa, za na naga zua Dios. Xe̱zre naꞌ nabeza na ca tu nuꞌula wechaga naꞌ nupáꞌa cuínabeꞌ chee̱ gácabeꞌ tuze nen benneꞌ chee̱beꞌ.
\v 3 Bendaꞌ chiꞌi tu benneꞌ da zaꞌ xabáa, dxenné̱ꞌ:
\p ―Gunnáꞌxque, Dios zue̱ꞌ ládujla bénneache, naꞌ xelaque̱ꞌ xe̱zre chee̱ꞌ, naꞌ Dios súaqueze̱ꞌ nen benneꞌ caꞌ, ne gaque̱ꞌ Dios chee̱ꞌ.
\v 4 Dios tu súale̱zqueze̱ꞌ benneꞌ caꞌ chee̱ québedxa xelebezre̱ꞌ, naꞌ québedxa gataꞌ xel-laꞌ gute, ne xel-laꞌ gubezre, ne xel-laꞌ dxebezre xacheꞌ, ne xel-laꞌ dxudía, laweꞌ da ba gudé chee̱ xúgute̱ da gulaca nédxute̱.
\p
\v 5 Nadxa Dios, Bénneaꞌ dxeꞌe̱ lataj blau naꞌ gunné̱ꞌ:
\p ―Gunnáꞌxque, nedaꞌ dxunaꞌ cube xúgute̱ da caꞌ.
\p Cáꞌanqueze gunné̱ꞌ:
\p ―Bzuaj dizraꞌ caní laweꞌ da naca li lazreꞌ, naꞌ waca guxrén lázrele le̱ na.
\p
\v 6 Gudé naꞌ guzre̱ꞌ nedaꞌ:
\p ―Ba be̱naꞌ xúgute̱ da ba gunníaꞌ gunaꞌ. Nedaꞌ nacaꞌ Benneꞌ zúaqueze̱ꞌ nédxudaute̱, ne Benneꞌ zúaqueze̱ꞌ bzé̱bedxa. Nacaꞌ Bénneaꞌ dxunaꞌ su lau sua xúgute̱, ne dxunaꞌ xexuzre na. Nu benneꞌ dxebílene̱ꞌ, nedaꞌ gunézrujaꞌ nisa beaj xíꞌaje̱ꞌ da gunezruj na le̱ꞌ xel-laꞌ nabán, ne quebe bi quízruje̱ꞌ.
\v 7 Nu benneꞌ zrueꞌene̱ꞌ siꞌe̱ xúgute̱ da caní, nedaꞌ gacaꞌ Dios chee̱ꞌ, naꞌ le̱ꞌ gaque̱ꞌ zriꞌinaꞌ.
\v 8 Benneꞌ caꞌ zaj naque̱ꞌ zraꞌ chebe, ne benneꞌ caꞌ quebe dxeléajle̱ꞌe̱ chiaꞌ, ne benneꞌ caꞌ dxelune̱ꞌ da zrinnaj, ne benneꞌ caꞌ dxelutie̱ꞌ benneꞌ, ne benneꞌ dxelune̱ꞌ da sban, ne benneꞌ wazráꞌ caꞌ, ne benneꞌ dxulucáꞌana szrene̱ꞌ bedauꞌ xiaj xaga caꞌ, ne xúgute̱ benneꞌ dxelún lazre̱ꞌ, gudéaꞌ le̱ꞌ lu xiꞌ chee̱ da dxuzézrele̱ꞌe na da dxeꞌ ca nísadauꞌ, da naca na da ziꞌ da xaꞌ da zeajlí canna.
\s Jerusalén cube
\p
\v 9 Nadxa blaꞌ tu gubáz chee̱ gazre gubáz chee̱ xabáa caꞌ belúxrue̱ꞌ gazre xéꞌena bzri caꞌ naga zaj xuꞌu da gazre da ba xaꞌ bze̱be caꞌ, naꞌ guzre̱ꞌ nedaꞌ:
\p ―Gudá. Guléꞌedaꞌ lueꞌ nuꞌula wechaga naꞌ, zruꞌula Bénneaꞌ naque̱ꞌ Zrílaꞌdauꞌ.
\p
\v 10 Lu da bleꞌe Beꞌ Láꞌazxa nedaꞌ, gubáz chee̱ xabáa naꞌ guché̱ꞌe̱ nedaꞌ tu xiꞌa zren, ne sibe, naꞌ bléꞌene̱ꞌ nedaꞌ ca naca xe̱zre láꞌazxa zren naꞌ, Jerusalén cube. Dxetaj na xabáa naga zua Dios.
\v 11 Xe̱zre nigá dxácatite na nen da xabáa chee̱ Dios, naꞌ xel-laꞌ dxácatite chee̱ na naca na ca dxácatite tu xiaj xrtante̱, ca tu xiaj jaspe, da naca na ca xiaj esaꞌ xrtante̱.
\v 12 Dxuꞌa xe̱zre naꞌ naxechaj na tu zeꞌe sibe, naꞌ napa na chazrinnu dxa xuꞌu, naꞌ tu tu dxa xuꞌu caꞌ zaj ze̱ tu weaj gubáz chee̱ xabáa, naꞌ le̱ꞌe̱ dxa xuꞌu caꞌ zaj naxúaj la chazrinnu cueꞌ benneꞌ Israel.
\v 13 Zaj zua chunna dxa xuꞌu weaj dapa sácate̱.
\v 14 Lu lane zeꞌe da naxechaj na xe̱zre naꞌ zaj zraꞌ chazrinnu xiaj, naꞌ zaj naxúaj lu xiaj caꞌ la chazrinnu benneꞌ gubáz chee̱ Bénneaꞌ naque̱ꞌ Zrílaꞌdauꞌ.
\p
\v 15 Gubáz chee̱ xabáa naꞌ dxuchálajle̱ne̱ꞌ nedaꞌ nuxre̱ꞌ tu da naca na ca tu xia xtila da naca na oro chee̱ gudxixre̱ꞌ xe̱zre naꞌ, ne dxa xuꞌu chee̱ na caꞌ, ne zeꞌe da naxechaj na.
\v 16 Xe̱zre naꞌ naca na lé̱bete̱ dapa saca. Lé̱bete̱ naca na xel-laꞌ tunna, ne xel-laꞌ laga chee̱ na. Gubáz naꞌ bdxixre̱ꞌ xe̱zre naꞌ nen da nuxre̱ꞌ, naꞌ naca na laga catite̱ sadxu tapa gaxúa zra, naꞌ xel-laꞌ laga, ne xel-laꞌ tunna, ne xel-laꞌ sibe chee̱ na zaj naca na lé̱bete̱.
\v 17 Gudé naꞌ bdxixre̱ꞌ xel-laꞌ sibe chee̱ zeꞌe naꞌ naxechaj na. Naca na tu gaxúa tape xun zrita, naꞌ chazrita chee̱ gubáz chee̱ xabáa naꞌ naca na lé̱bete̱ ca chee̱ bénneache.
\p
\v 18 Zeꞌe naꞌ da naxechaj na xe̱zre naꞌ naca na xiaj jaspe, naꞌ xe̱zre naꞌ naca na oro du lazreꞌ, da naca na ca xiaj esaꞌ du lazreꞌ.
\v 19 Xiaj lane zeꞌe naꞌ zaj naca na xiaj xrtante̱ caꞌ:
\q Xiaj nedxu naca na xiaj jaspe,
\q naꞌ xiaj gudxupeꞌ naca na xiaj zafiro,
\q naꞌ xiaj guxunneꞌ naca na xiaj ágata,
\q naꞌ xiaj gudapeꞌ naca na xiaj esmeralda,
\q
\v 20 naꞌ xiaj gázxue naca na xiaj ónice,
\q naꞌ xiaj xrupe naca na xiaj cornalina,
\q naꞌ xiaj gazre naca na xiaj crisólito,
\q naꞌ xiaj xrunuꞌ naca na xiaj berilo,
\q naꞌ xiaj ga naca na xiaj topacio,
\q naꞌ xiaj chi naca na xiaj crisoprasa,
\q naꞌ xiaj chinéaj naca na xiaj jacinto,
\q naꞌ xiaj chazrinnu naca na xiaj amatista.
\p
\v 21 Chazrinnu da dxusezxuj na dxa xuꞌu caꞌ zaj naca na chazrinnu bga caꞌ. Tu tu na naca na tuze bga. Neza blau chee̱ xe̱zre naꞌ naca na oro du lazreꞌ, ca xiaj esaꞌ du lazreꞌ.
\p
\v 22 Quebe bleꞌedaꞌ netú xudauꞌ xe̱zre naꞌ, laweꞌ da Xránadxu Dios, Bénneaꞌ nape̱ꞌ dute̱ xel-laꞌ dxenná bea, nácaqueze̱ꞌ xudauꞌ chee̱ xe̱zre naꞌ, ne cáꞌanqueze naca Bénneaꞌ naque̱ꞌ Zrílaꞌdauꞌ.
\v 23 Xe̱zre naꞌ quebe nachine na guseníꞌ gubizra naꞌ, ne beuꞌ, laweꞌ da dxuseníꞌqueze da xabáa chee̱ Dios ga naꞌ, naꞌ Bénneaꞌ naque̱ꞌ Zrílaꞌdauꞌ naque̱ꞌ xel-laꞌ naxaníꞌ chee̱ na.
\v 24 Bénneache chee̱ xúgute̱ cueꞌ xe̱zr la xu, bénneache gulelé̱ꞌ, xeledé̱ꞌ lu xel-laꞌ naxaníꞌ chee̱ xe̱zre naꞌ, naꞌ benneꞌ wenná bea caꞌ chee̱ xe̱zr la xu xeluꞌe̱ da gunniꞌa chee̱ꞌ lu xe̱zre naꞌ.
\v 25 Dxa xuꞌu chee̱ xe̱zre naꞌ quebe xelezxuj na te zra, naꞌ québedxa gataꞌ chizrela.
\v 26 Xeluꞌe̱ xel-laꞌ szren, ne xel-laꞌ ba láꞌana chee̱ xúgute̱ cueꞌ xe̱zr la xu lu xe̱zre naꞌ.
\v 27 Cabataꞌ chuꞌu da sban ga naꞌ, ne netú benneꞌ dxune̱ꞌ da zrinnaj, ne netú benneꞌ dxun lazreꞌ. Xelúꞌuze benneꞌ caꞌ zaj naxúaj le̱ꞌ lu xiche chee̱ xel-laꞌ nabán da napa Bénneaꞌ naque̱ꞌ Zrílaꞌdauꞌ.
\c 22
\p
\v 1 Nadxa gubáz chee̱ xabáa naꞌ bléꞌene̱ꞌ nedaꞌ tu xe̱gu nisa da dxunna na xel-laꞌ nabán. Naca na xaníꞌ ca xiaj esaꞌ, naꞌ dxedxuaj na lataj blau naga zaj dxeꞌ Dios, ne Bénneaꞌ naque̱ꞌ Zrílaꞌdauꞌ.
\v 2 Laduj neza blau chee̱ xe̱zre naꞌ zaj naxaza xaga dxupa laꞌa dxuꞌa xe̱gu naꞌ, naꞌ da zixre chee̱ xaga caní zaj naca na da dxunna na xel-laꞌ nabán, ne dxebía na da zixre chazrinnu lasa tu tu iza. Dxebía na da zixre chee̱ na tu tu beuꞌ, naꞌ xrlegue xaga naꞌ naca na da dxexún na benneꞌ zaj zre̱ꞌe̱ du gabíꞌi xe̱zr la xu.
\v 3 Québedxa bi gataꞌ da xuꞌu deꞌ. Lataj blau naga zaj dxeꞌ Dios, ne Bénneaꞌ naque̱ꞌ Zrílaꞌdauꞌ sua na lu xe̱zre naꞌ, naꞌ benneꞌ we̱n zrin chee̱ꞌ caꞌ xulucáꞌana szrene̱ꞌ Le̱ꞌ.
\v 4 Xeleléꞌene̱ꞌ Le̱ꞌ caníqueze, naꞌ La Dios zriche na luzrgá benneꞌ caꞌ.
\v 5 Québedxa gataꞌ chizrela ga naꞌ, naꞌ benneꞌ zaj zre̱ꞌe̱ naꞌ quebe xelechinne̱ꞌ xiꞌ, ne xel-laꞌ naxaníꞌ chee̱ gubizra, laweꞌ da Xránadxu Dios guseniꞌe̱ benneꞌ caꞌ, naꞌ benneꞌ caꞌ xelenná beꞌe̱ chadía chacanna.
\s Ba zua gagu zra xeláꞌ Cristo
\p
\v 6 Nadxa gubáz chee̱ xabáa naꞌ guzre̱ꞌ nedaꞌ:
\p ―Dizraꞌ caní zaj naca na li lazreꞌ, ne waca guxrén lázrele le̱ na. Xránadxu Dios, Bénneaꞌ dxuzúe̱ꞌ Beꞌ chee̱ꞌ xichaj lázrdau benneꞌ caꞌ dxelenné̱ꞌ waláz chee̱ꞌ ba gusel-le̱ꞌ gubáz chee̱ xabáa chee̱ꞌ chee̱ guléꞌene̱ꞌ benneꞌ we̱n zrin chee̱ꞌ da ba zua gaca,
\v 7 dxenné̱ꞌ: “La zátequezaꞌ. Ba neza zrente̱ naca na chee̱ benneꞌ zéajle̱ne̱ꞌ dizraꞌ chee̱ Dios da naxúaj na lu xiche nigá.”
\p
\v 8 Nedaꞌ, Juan, bendaꞌ, ne bleꞌedaꞌ da caní. Ca gudé bendaꞌ na, naꞌ bzu zribaꞌ zran niꞌa gubáz chee̱ xabáa naꞌ, gubáz bléꞌene̱ꞌ nedaꞌ da caní chee̱ gucáꞌana szrenaꞌ le̱ꞌ.
\v 9 Naꞌ le̱ꞌ guzre̱ꞌ nedaꞌ:
\p ―Quebe gunuꞌ caꞌ laweꞌ da nacaꞌ we̱n zrin chee̱ Dios ca nacuꞌ lueꞌ, ne ca zaj naca benneꞌ bichuꞌ caꞌ dxelenné̱ꞌ waláz chee̱ Dios, ne ca zaj naca xúgute̱ benneꞌ caꞌ zjácale̱ne̱ꞌ ca da naxúaj na lu xiche nigá. Bcaꞌana szren Dios.
\p
\v 10 Cáꞌanqueze guzre̱ꞌ nedaꞌ:
\p ―Quebe gucachuꞌ ca naca dizraꞌ chee̱ Dios da naxúaj na lu xiche nigá laweꞌ da ba zua gaca da naxúaj na.
\v 11 Dxácate̱ naꞌ, be̱ꞌ lataj benneꞌ dxelune̱ꞌ da zrinnaj xelúnqueze̱ꞌ da zrinnaj dxelune̱ꞌ, ne benneꞌ caꞌ dxelune̱ꞌ da sban xelúnqueze̱ꞌ da sban naꞌ, san benneꞌ xrlátaje caꞌ xelúnqueze̱ꞌ da xrlátaje, naꞌ benneꞌ zaj naque̱ꞌ bi chee̱ Dios chjácale̱queze̱ꞌ da naca na chee̱ꞌ.
\p
\v 12 Dxenné̱ꞌ:
\p ―Caꞌ naca. La zátequezaꞌ, ne nuꞌa ca naca da gunézrujaꞌ tu tu benneꞌ caꞌ, cáte̱ze da zaj nun tu tue̱ꞌ.
\v 13 Nedaꞌ nacaꞌ benneꞌ zúaquezaꞌ nédxudaute̱, ne benneꞌ zúaquezaꞌ bzé̱bedxa, bénneaꞌ dxunaꞌ su lau sua xúgute̱, ne dxunaꞌ xexuzre na.
\v 14 Ba neza zrente̱ naca na chee̱ benneꞌ caꞌ dxulupé̱ꞌe̱ xichaj lázrdawe̱ꞌ ca tu benneꞌ dxibe̱ꞌ zra lane̱ꞌ, chee̱ xelape̱ꞌ lataj xelawe̱ꞌ da zixre chee̱ xaga da dxunna na xel-laꞌ nabán, naꞌ caní xelezéquene̱ꞌ xeluꞌe̱ lu dxa xuꞌu chee̱ xe̱zre naꞌ.
\v 15 Benneꞌ caꞌ dxelune̱ꞌ da zrinnaj quebe xeluꞌe̱ ga naꞌ, ne québequeze xelúꞌu benneꞌ wazráꞌ caꞌ, ne benneꞌ dxelune̱ꞌ da sban caꞌ, ne benneꞌ we̱te benneꞌ, ne benneꞌ dxulucáꞌana szrene̱ꞌ bedauꞌ xiaj xaga caꞌ, ne benneꞌ zaj nazriꞌine̱ꞌ da we̱n lazreꞌ, ne benneꞌ dxelún lazre̱ꞌ.
\v 16 Nedaꞌ, Jesús, ba gusel-laꞌ gubáz chee̱ xabáa chiaꞌ chee̱ xuluzenne̱ꞌ tu tu cueꞌ bénneache chiaꞌ ca naca da nigá. Nedaꞌ nacaꞌ ca xra xrtau David, benneꞌ wenná bea, ne nacaꞌ zriꞌine zre sua David naꞌ. Nedaꞌ nacaꞌ ca belaj zila da dxácatitele̱ꞌe̱ na.
\p
\v 17 Beꞌ Láꞌazxa, ne benneꞌ caꞌ zaj naca ca zruꞌula Bénneaꞌ naque̱ꞌ Zrílaꞌdauꞌ, dxelenné̱ꞌ:
\p ―Gudá, Xran.
\p Nu benneꞌ xenne̱ꞌ da nigá dxal-laꞌ nne̱ꞌ:
\p ―Gudá, Xran.
\p Benneꞌ dxebílene̱ꞌ, ne dxaca lazre̱ꞌ dxal-laꞌ xide̱ꞌ, naꞌ xíꞌaje̱ꞌ nisa da dxunna na xel-laꞌ nabán, naꞌ quebe bi quízruje̱ꞌ.
\p
\v 18 Xúgute̱le leꞌe dxulábale dizraꞌ chee̱ Dios da naxúaj na lu xiche nigá, nedaꞌ dxuzéajniꞌidaꞌ leꞌe da nigá: Che nu benneꞌ bi gudé̱ꞌe̱ chee̱ da caní, Dios gudé̱ꞌe̱ chee̱ bénneaꞌ da ba xaꞌ caꞌ da zaj naxúaj na lu xiche nigá.
\v 19 Cáꞌanqueze che nu benneꞌ bi xequé̱ꞌe̱ chee̱ da zaj naxúaj na lu xiche nigá, Dios wecáꞌaqueze̱ꞌ da naca chee̱ bénneaꞌ lu xiche chee̱ xel-laꞌ nabán, ne lu xe̱zre láꞌazxa chee̱ꞌ, cáte̱ze naxúaj na lu xiche nigá.
\p
\v 20 Xránadxu, Bénneaꞌ dxuléꞌene̱ꞌ da nigá, dxenné̱ꞌ:
\p ―Caꞌ naca na. La záte̱quezaꞌ.
\p ¡Caꞌ gaca na! ¡Gudá, Xranaꞌ Jesús!
\p
\v 21 Dxenabaꞌ Xránadxu Jesucristo gune̱ꞌ da chaweꞌ chee̱le leꞌe, xúgute̱le. ¡Caꞌan gaca na!