\id MAT
\ide UTF8
\h SAN MATEO
\toc1 San Mateo
\mt1 Dižəꞌ Güen Dižəꞌ Cobə Deꞌen Bzoɉ Sam Mtionꞌ
\c 1
\s1 X̱axtaꞌo Jesocristənꞌ
\p
\v 1 Nga choꞌen dižəꞌ c̱he deꞌe x̱axtaꞌo Jesocristənꞌ dezd ganꞌ gwxete dia c̱heꞌenəꞌ. Naꞌ nyoɉ la yoguəꞌəte deꞌe x̱axtaꞌogüeꞌ caꞌ gwzolaozən len deꞌe x̱axtaꞌocho Abraanṉəꞌ xte ṉaꞌa. Jesoꞌosənꞌ naqueꞌ xiꞌiṉ dia c̱he deꞌe Rei Dabinꞌ, naꞌ deꞌe Dabinꞌ naqueꞌ xiꞌiṉ dia c̱he deꞌe Abraanṉəꞌ.
\p
\v 2 Abraanṉəꞌ naqueꞌ x̱a Isaac, naꞌ Isaaquənꞌ naqueꞌ x̱a Jacob, naꞌ Jacobənꞌ naqueꞌ x̱a Joda len beṉəꞌ bišeꞌe caꞌ yeḻaꞌ.
\v 3 Jodanꞌ naꞌ Tamar zɉənaqueꞌ x̱axnaꞌ Fares naꞌ Sara. Naꞌ Faresənꞌ naqueꞌ x̱a Esrom, naꞌ Esronṉəꞌ naqueꞌ x̱a Aram.
\v 4 Aranṉəꞌ naqueꞌ x̱a Aminadab, naꞌ Aminadabənꞌ naqueꞌ x̱a Naason, naꞌ Naasonṉəꞌ naqueꞌ x̱a Salmon.
\v 5 Salmonṉəꞌ naꞌ Raab zɉənaqueꞌ x̱axnaꞌ Boos. Naꞌ Boosənꞌ naꞌ Rot zɉənaqueꞌ x̱axnaꞌ Obed. Naꞌ Obedənꞌ naqueꞌ x̱a Isai.
\v 6 Naꞌ Isainꞌ naqueꞌ x̱a Rei Dabinꞌ, naꞌ Rei Dabinꞌ naqueꞌ x̱a Salomon. Naꞌ xnaꞌ Salomonṉəꞌ goqueꞌ xoꞌolə deꞌe Orias antslə zeꞌe yecaꞌa Rei Dabinꞌ ḻeꞌ par gaqueꞌ xoꞌoleꞌ.
\p
\v 7 Naꞌ Salomonṉəꞌ naqueꞌ x̱a Roboam, naꞌ Roboanṉəꞌ naqueꞌ x̱a Abias, naꞌ Abiasənꞌ naqueꞌ x̱a Asa.
\v 8 Naꞌ Asanꞌ naqueꞌ x̱a Josafat, naꞌ Josafatənꞌ naqueꞌ x̱a Joram, naꞌ Joranṉəꞌ naqueꞌ x̱a Osias.
\v 9 Naꞌ Osiasənꞌ naqueꞌ x̱a Jotam, naꞌ Jotanṉəꞌ naqueꞌ x̱a Acas, naꞌ Acasənꞌ naqueꞌ x̱a Esequias.
\v 10 Naꞌ Esequiasənꞌ naqueꞌ x̱a Manases, naꞌ Manasesənꞌ naqueꞌ x̱a Amon, naꞌ Amonṉəꞌ naqueꞌ x̱a Josias.
\v 11 Josiasənꞌ naqueꞌ x̱a Jeconias naꞌ bišeꞌe caꞌ. Beṉəꞌ ca gwnitəꞌ ca tyempənꞌ catəꞌ beṉəꞌ Babilonia caꞌ besyəꞌəc̱heꞌex̱ax̱ɉeꞌ deꞌe x̱axtaꞌo chioꞌo beṉəꞌ Izrael Babilonianꞌ.
\p
\v 12 Gwde besyəꞌəc̱heꞌex̱ax̱ɉeꞌ ḻegaꞌaqueꞌ Babilonianꞌ, golɉə Salatiel xiꞌiṉ Jeconiasənꞌ. Naꞌ Salatielənꞌ naqueꞌ x̱a Sorobabel.
\v 13 Naꞌ Sorobabelənꞌ naqueꞌ x̱a Abiod, naꞌ Abiodənꞌ naqueꞌ x̱a Eliaquim. Naꞌ Eliaquinṉəꞌ naqueꞌ x̱a Asor.
\v 14 Asorənꞌ naqueꞌ x̱a Sadoc, naꞌ Sadoquənꞌ naqueꞌ x̱a Aquim. Aquinṉəꞌ naqueꞌ x̱a Eliod.
\v 15 Naꞌ Eliodənꞌ naqueꞌ x̱a Eleasar, naꞌ Eleasarənꞌ naqueꞌ x̱a Matan. Naꞌ Matanṉəꞌ naqueꞌ x̱a Jacob.
\v 16 Nach Jacobənꞌ naqueꞌ x̱a Jwse benꞌ naquə beꞌen c̱he Marianꞌ. Naꞌ Marianꞌ naqueꞌ xnaꞌ Jesoꞌos benꞌ nziꞌ Crist, zeɉe dižəꞌ benꞌ gwleɉ Diozənꞌ par gaquəleneꞌ beṉac̱hənꞌ.
\p
\v 17 Naꞌ tyemp c̱he deꞌe Abraanṉəꞌ xte tyemp c̱he deꞌe Dabinꞌ goc ždaꞌ dia c̱heꞌenəꞌ. Naꞌ goszolaon tyemp c̱he deꞌe Dabinꞌ xte catəꞌən beṉəꞌ Babilonia caꞌ besyəꞌəc̱heꞌex̱ax̱ɉeꞌ deꞌe x̱axtaꞌo chioꞌo beṉəꞌ Izrael Babilonianꞌ gozac yeždaꞌ dia c̱heꞌenəꞌ. Naꞌ ḻeczə dezd tyemp catəꞌən besyəꞌəc̱heꞌex̱ax̱ɉeꞌ ḻegaꞌaqueꞌ Babilonianꞌ xte catəꞌən bžin žanꞌ golɉə Cristənꞌ gozac yeždaꞌ dia c̱heꞌenəꞌ.
\s1 Catəꞌ golɉə Jesoꞌosənꞌ
\p
\v 18 Naꞌ quinganꞌ goquə catəꞌən golɉə Jesocristənꞌ. Banaquən gwšagnaꞌ Marianꞌ len Jwsenꞌ, naꞌ zeꞌe caꞌa Jwsenꞌ ḻeꞌ par gaqueꞌ xoꞌoleꞌ, gwsaꞌacbeꞌineꞌ banoaꞌ Marianꞌ bdaoꞌ. Goc caꞌ c̱hedəꞌ Spirit c̱he Diozənꞌ benən par nic̱h bgüendaoꞌ bdaꞌonəꞌ ḻoꞌo ḻeꞌenəꞌ.
\v 19 Naꞌ Jwsenꞌ benꞌ banaquən siꞌe Marianꞌ par gaqueꞌ xoꞌoleꞌ, goqueꞌ to beṉəꞌ chon deꞌe güen lao Diozənꞌ. Deꞌe naꞌanəꞌ beneꞌ xbab cueɉyic̱hɉeꞌ Marianꞌ šižizə sin cui no gacbeꞌi par nic̱h cui əgwsiꞌe ḻeꞌ ztoꞌ.
\v 20 Žlac choneꞌ xbab goneꞌ caꞌ, to angl c̱he X̱ancho Diozənꞌ bloꞌelaogüeꞌe ḻeꞌ lao bišgal. Naꞌ gožeꞌeneꞌ: —Jwse, leꞌ nacoꞌ xiꞌiṉ dia c̱he deꞌe Dabinꞌ. Bito žeboꞌ siꞌo Marianꞌ par gaqueꞌ xoꞌoloꞌ. Spirit c̱he Diozənꞌ benən par nic̱h noꞌe bdaꞌonəꞌ.
\v 21 Naꞌ saneꞌ to biꞌi byo, naꞌ əgwsiꞌo laboꞌ Jesoꞌos c̱hedəꞌ yebeɉeꞌ beṉəꞌ gwlaž c̱hele caꞌ xniꞌa deꞌe malənꞌ beṉəꞌ seꞌeɉḻeꞌ c̱heꞌ.
\p
\v 22 Naꞌ deꞌen goquə yoguəꞌ deꞌe caꞌ goc complir canꞌ gwna Diozənꞌ deꞌen bzoɉ to profet beṉəꞌ beꞌ xtižəꞌ Diozənꞌ canaꞌ, gwneꞌ:
\q1
\v 23 To noꞌol güegoꞌ beṉəꞌ ṉenaplažəꞌəchgua cuineꞌ güeꞌe to biꞌi byo daoꞌ naꞌ saneꞌeboꞌ.
\q1 Naꞌ siꞌ laboꞌ Emanuel.
\m Naꞌ Emanuel zeɉe dižəꞌ: Zoczə Diozənꞌ len chioꞌo.
\p
\v 24 Naꞌ catəꞌ beban Jwsenꞌ beyož gwneineꞌ yelənꞌ caꞌ, beteyo beneꞌ canꞌ gož angl c̱he X̱ancho Diozənꞌ ḻeꞌ. Ɉəx̱iꞌe Marianꞌ ližeꞌenəꞌ par goqueꞌ xoꞌoleꞌ.
\v 25 Pero Jwsenꞌ gwdapəczeꞌ ḻeꞌ respet xte catəꞌən gwxaneꞌ to biꞌi byo daoꞌ, xiꞌiṉeꞌ nech. Naꞌ gwxiꞌ laboꞌ Jesoꞌos.
\c 2
\s1 Magos caꞌ ɉəsəꞌəlaṉeꞌe Jesoꞌosənꞌ
\p
\v 1 Ca tyemp canꞌ gwnabiaꞌ Rei Erodənꞌ, golɉə Jesoꞌosənꞌ Belenṉəꞌ, to yež ganꞌ mbane Jodeanꞌ. Naꞌ goquənꞌ besəꞌəžin to c̱hopə magos Jerosalenṉəꞌ, beṉəꞌ zaꞌac galənꞌ chlaꞌ bgüižənꞌ.
\v 2 Naꞌ gosəꞌəṉabeneꞌ beṉəꞌ laoꞌ syodanꞌ gwseꞌe: —¿Ganꞌ rei c̱he beṉəꞌ Izrael caꞌ, beꞌen bagolɉənəꞌ? Ṉezetoꞌ bagolɉeꞌenəꞌ c̱hedəꞌ bableꞌitoꞌ belɉw c̱heꞌenəꞌ catəꞌən blaꞌan lažtoꞌonəꞌ galənꞌ chlaꞌ bgüižənꞌ. Naꞌ zaꞌatoꞌ par nic̱h güeꞌelaꞌotoꞌoneꞌ.
\p
\v 3 Catəꞌ bene Rei Erodənꞌ xtižəꞌəgaꞌaqueꞌenəꞌ, deꞌe juisy deꞌe goqueneꞌ, naꞌ ḻeczə caꞌ yoguəꞌəḻoḻ beṉəꞌ laoꞌ syoda Jerosalenṉəꞌ.
\v 4 Nach btob Rei Erodənꞌ yoguəꞌəḻoḻ bx̱oz əblao c̱he chioꞌo beṉəꞌ Izrael naꞌ ḻeczə yoguəꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ, con beṉəꞌ nitəꞌ syodanꞌ. Naꞌ gwṉabeneꞌ ḻegaꞌaqueꞌ ganꞌ naquən galɉə Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ.
\v 5 Nach gwseꞌ beṉəꞌ caꞌ Erodənꞌ: —Belen nanꞌ galɉeꞌ, ganꞌ mbane Jodea, laꞌ canꞌ na to part Xtižəꞌ Diozənꞌ deꞌen bzoɉ to profet beṉəꞌ beꞌ xtižeꞌenəꞌ canaꞌ. Quinga nan:
\q1
\v 6 Ca naquə yež Belen ganꞌ mbane Jodea,
\q1 naquəczən yež deꞌe zaquəꞌəchgua entr yež əblao caꞌ deꞌen zɉəchiꞌ Jodeanꞌ,
\q1 c̱hedəꞌ to beṉəꞌ Belenṉəꞌ gaqueꞌ beṉəꞌ gwnabiaꞌ,
\q1 naꞌ ḻeꞌ əggüia əgwyeꞌ chioꞌo beṉəꞌ Izrael.
\p
\v 7 Nach Erodənꞌ beneꞌ mendad ɉaꞌac magos caꞌ laogüeꞌenəꞌ bgašəꞌəzə par nic̱h gwṉabeneꞌ ḻegaꞌaqueꞌ tchoꞌa tšaoꞌ batəꞌəquənꞌ besəꞌəleꞌineꞌ blaꞌ belɉonꞌ.
\v 8 Nach bseḻeꞌe ḻegaꞌaqueꞌ Belenṉəꞌ, gožeꞌ ḻegaꞌaqueꞌ: —Ḻeꞌe žɉaꞌac Belenṉəꞌ naꞌ ḻeꞌe žɉəyedilɉyožə bidaꞌonəꞌ. Naꞌ catəꞌ yeželeleboꞌ naꞌ deyedix̱ɉueꞌile nadaꞌ par nic̱h ḻeczə šaꞌa əžɉeꞌelaꞌoguaꞌaboꞌ.
\p
\v 9 Beyož bosoꞌozenag magos caꞌ canꞌ gož reinꞌ ḻegaꞌaqueꞌ, nach gwsaꞌaqueꞌ əzɉaꞌaqueꞌ. Naꞌ ca naquə belɉonꞌ deꞌen besəꞌəleꞌineꞌ ganꞌ chlaꞌ bgüižənꞌ catəꞌ cuiṉəꞌ saꞌac lažgaꞌaqueꞌenəꞌ, zdan ḻeꞌe yobanꞌ žialaon laogaꞌaqueꞌenəꞌ bžinten gwzon ganꞌ zo bidaꞌonəꞌ, naꞌ gwlezən.
\v 10 Naꞌ besyəꞌəbeineꞌ xte juisy ca deꞌen besəꞌəleꞌineꞌ belɉonꞌ deꞌe yoblə.
\v 11 Nach catəꞌ gwsoꞌe ḻoꞌo yoꞌonəꞌ naꞌ besəꞌəleꞌineꞌ bidaꞌonəꞌ len xnaꞌaboꞌ Marianꞌ. Nach bosəꞌəzo xibgaꞌaqueꞌ gwsoꞌelaogüeꞌeboꞌ. Naꞌ bosəꞌəsalɉo caj c̱hegaꞌaqueꞌ caꞌ naꞌ gosəꞌəbeɉeꞌ or, yal naꞌ to xnižəꞌ yag deꞌen chlaꞌ zix̱ deꞌen neꞌ mirra par gwsoꞌeboꞌon.
\v 12 Pero naꞌ Diozənꞌ gwdix̱ɉueꞌineꞌ magos caꞌ lao bišgal de que bito yesyəꞌədieꞌ ganꞌ zo Rei Erodənꞌ. Deꞌe naꞌanəꞌ besyəꞌəqueꞌe yetolə nez par ɉəyaꞌaqueꞌ lažgaꞌaqueꞌenəꞌ.
\s1 Jwsenꞌ len Marianꞌ naꞌ len Jesoꞌosənꞌ ɉaꞌaqueꞌ Egiptonꞌ
\p
\v 13 Naꞌ catəꞌ babesaꞌac magos caꞌ, to angl c̱he X̱ancho Diozənꞌ bloeꞌ laogüeꞌ Jwsenꞌ lao bišgal, naꞌ gožeꞌeneꞌ: —Gwyas, gwc̱heꞌ bidaꞌonəꞌ naꞌ xnaꞌaboꞌonəꞌ ḻeꞌe žɉaꞌac Egiptonꞌ naꞌ sole xte catəꞌəch əṉiaꞌ leꞌe batəꞌəquəꞌ guaquə yesaꞌacle, c̱hedəꞌ Erodənꞌ banžiꞌe biaꞌ yeyilɉeꞌ bidaꞌonəꞌ par goteꞌeboꞌ.
\p
\v 14 Nach ṉencal gwyas Jwsenꞌ, gwc̱heꞌe bidaꞌonəꞌ len xnaꞌaboꞌonəꞌ zɉaꞌaqueꞌ Egiptonꞌ.
\v 15 Nach gwniteꞌe Egipto naꞌazə xte catəꞌəch got Erodənꞌ. Naꞌ deꞌen gwsoꞌoneꞌ caꞌ goc complir deꞌen bzoɉ to profet beṉəꞌ beꞌ xtižəꞌ Diozənꞌ canaꞌ. Quinga bzoɉeꞌ deꞌen gwna X̱ancho Diozənꞌ: “C̱hix̱ɉueꞌidaꞌ Xiꞌiṉaꞌanəꞌ yezeꞌe Egiptonꞌ.”
\s1 Erodənꞌ bseḻeꞌe soḻdad par gwsoꞌoteꞌ yoguəꞌ biꞌi byo daoꞌ
\p
\v 16 Naꞌ lao bazɉaꞌaqueꞌ Egiptonꞌ Erodənꞌ ḻechguaḻe bžeɉeneꞌ catəꞌ gocbeꞌineꞌ gosəꞌəx̱oayag magos caꞌ ḻeꞌ deꞌen cuich besyəꞌədieꞌ ganꞌ zoꞌenəꞌ. Naꞌ segon canꞌ gwyeɉniꞌineꞌ catəꞌ gwṉabeneꞌ ḻegaꞌaqueꞌ antslə do batəꞌəquənꞌ blaꞌ belɉonꞌ, bseḻeꞌe soḻdad c̱heꞌ caꞌ par ɉseꞌeteꞌ yoguəꞌəḻoḻ biꞌi byo cheꞌeṉ daoꞌ zelao biꞌi c̱hop ize, biꞌi caꞌ gwsaꞌalɉə Belenṉəꞌ naꞌ yeziquəꞌəchlə yež caꞌ zɉənyec̱hɉ zɉəmbiꞌi Belenṉəꞌ.
\v 17 Naꞌ laogüe deꞌen gwsoꞌoteꞌ biꞌi byo daoꞌ caꞌ, goc complir canꞌ bzoɉ deꞌe profet Jeremiasənꞌ, benꞌ beꞌ xtižəꞌ Diozənꞌ canaꞌ, gwneꞌ:
\q1
\v 18 Gaquə bgüine bgüežənꞌ yež deꞌen nziꞌ Rama.
\q1 Noꞌol caꞌ zɉənaquə xiꞌiṉ dia c̱he deꞌe Raquelənꞌ
\q1 ḻechguaḻe yesyəꞌəyašəꞌ yesyəꞌəgüinḻažeꞌe c̱he yoguəꞌ xiꞌiṉdaꞌogaꞌaqueꞌ caꞌ əsaꞌat.
\q1 Naꞌ bito seꞌeneneꞌ par no yeyoꞌexen ḻegaꞌaqueꞌ.
\p
\v 19 Lao ṉeꞌe nitəꞌ Jwse caꞌ Egiptonꞌ got Erodənꞌ. Nach to angl c̱he X̱ancho Diozənꞌ bloeꞌ laogüeꞌ Jwsenꞌ lao bišgal.
\v 20 Naꞌ gožeꞌeneꞌ: —Gwyas, bec̱heꞌ bidaꞌonəꞌ len xnaꞌaboꞌonəꞌ naꞌ ḻeꞌe žɉəyaꞌac Izraelənꞌ. Bagwsaꞌat beṉəꞌ caꞌ besyəꞌəyilɉ bidaꞌonəꞌ par soꞌoteꞌeboꞌ.
\p
\v 21 Nach gwyas Jwsenꞌ bec̱heꞌe bidaꞌonəꞌ len xnaꞌaboꞌonəꞌ ɉəyaꞌaqueꞌ lažgaꞌaqueꞌ Izraelənꞌ.
\v 22 Pero Jwsenꞌ catəꞌ beneneꞌ de que Arquelaonꞌ bedieꞌ belaneꞌ xlatɉə deꞌe x̱eꞌ Erodənꞌ, bžebeꞌ žɉəyaꞌaqueꞌ ganꞌ mbane Jodeanꞌ. Naꞌ Diozənꞌ gwdix̱ɉueꞌineꞌ ḻeꞌ lao bišgalənꞌ de que bito žɉəyaꞌaqueꞌ Jodeanꞌ sino que žɉəyaꞌaqueꞌ ganꞌ mbane Galileanꞌ.
\v 23 Deꞌe naꞌanəꞌ besyəꞌəžineꞌ syoda Nasaretənꞌ naꞌ ɉəsyəꞌəniteꞌe. Naꞌ deꞌen ɉəsyəꞌəniteꞌe Nasaretənꞌ goc complir deꞌen bosoꞌozoɉ deꞌe profet caꞌ canaꞌ gosəꞌəneꞌ c̱he Jesoꞌosənꞌ de que beṉəꞌ yesəꞌəsiꞌeneꞌ beṉəꞌ Nasaret.
\c 3
\s1 Juan benꞌ bc̱hoa beṉəꞌ nis gwdix̱ɉuiꞌe dižəꞌ güen dižəꞌ cobə c̱he Diozənꞌ
\p
\v 1 Naꞌ gwde zan iz, Juan benꞌ bc̱hoa beṉəꞌ nis gwyeɉeꞌ latɉə dašənꞌ ganꞌ mbane Jodeanꞌ.
\v 2 Naꞌ gwdix̱ɉueꞌineꞌ beṉəꞌ gožeꞌ ḻegaꞌaqueꞌ: —Ḻeꞌe yediṉɉe xtoḻəꞌəle caꞌ, c̱hedəꞌ babžin ža catəꞌ Diozənꞌ benꞌ zo yobanꞌ ṉabiꞌe con notəꞌətezə beṉəꞌ əsoꞌe latɉə.
\p
\v 3 Deꞌe profet Isaiazənꞌ benꞌ beꞌ xtižəꞌ Diozənꞌ canaꞌ bzoɉeꞌ c̱he Juanṉəꞌ, gwneꞌ:
\q1 To beṉəꞌ əṉeꞌ zižɉo latɉə dašənꞌ, əneꞌ:
\q1 “Ḻeꞌe so probnid par əgwzenagle c̱he X̱anchonꞌ catəꞌən yideꞌ.
\q1 Naꞌ šə sole probnid par əgwzenagle c̱heꞌ catəꞌən yideꞌ, deꞌen gonḻe caꞌ gwxaquəꞌəleben canꞌ chonḻe chxiꞌ chloale nez caꞌ catəꞌ chidə to beṉəꞌ blao.”
\p
\v 4 Naꞌ Juanṉəꞌ gwyazeꞌ lachəꞌ deꞌen gwsoꞌoneꞌ len yišəꞌ xa cameyənꞌ. Naꞌ par dobey c̱heꞌ bc̱hineꞌ to pedas yid. Naꞌ gwdaogüeꞌ bišəꞌəzo, naꞌ ḻeczə gwdaogüeꞌ šiꞌin bia ser, bia nitəꞌ yix̱əꞌ.
\v 5 Beṉəꞌ Jerosalenṉəꞌ, naꞌ beṉəꞌ caꞌ žaꞌ yoguəꞌ yež caꞌ ganꞌ mbane Jodeanꞌ, naꞌ ḻeczə beṉəꞌ žaꞌ yež caꞌ nyec̱hɉ mbiꞌi yao Jordanṉəꞌ gwsaꞌaqueꞌ ɉaꞌaqueꞌ ganꞌ zo Juanṉəꞌ par bosoꞌozenagueꞌ xtižeꞌenəꞌ.
\v 6 Naꞌ bosəꞌəx̱oadoḻeꞌe lao Diozənꞌ, naꞌ Juanṉəꞌ bc̱hoeꞌ ḻegaꞌaqueꞌ nis ḻoꞌo yao Jordanṉəꞌ.
\p
\v 7 Naꞌ ḻeczə ɉaꞌac zan beṉəꞌ Izrael beṉəꞌ caꞌ zɉənchoɉ zɉənziꞌ fariseo, naꞌ beṉəꞌ caꞌ zɉənziꞌ sadoseo. Ɉaꞌaqueꞌ par bc̱hoa Juanṉəꞌ ḻegaꞌaqueꞌ nis, Nach Juanṉəꞌ gožeꞌ ḻegaꞌaqueꞌ: —Leꞌe nacle beṉəꞌ gox̱oayag naꞌ nalɉele. ¿Echaquele de que guaquə yexoṉɉele castigonꞌ deꞌen əseḻəꞌ Diozənꞌ par leꞌe?
\v 8 Cheyaḻəꞌ gonḻe deꞌen naquə güen par nic̱h əsaꞌacbeꞌi beṉəꞌ yoblə de que babošaꞌ yic̱hɉlaꞌaždaꞌolenꞌ.
\v 9 Naꞌ bito gonḻe xbab de que Diozənꞌ bito goneꞌ leꞌe castigw c̱he xtoḻəꞌəlenꞌ laogüe deꞌen nacle xiꞌiṉ dia c̱he deꞌe Abraanṉəꞌ. Bito ṉacho de que ḻechguaḻe chyažɉe Diozənꞌ leꞌe. Guaquə goneꞌ par nic̱h yeɉ quinga yesyəꞌəyaquən xiꞌiṉ dia c̱he deꞌe Abraanṉəꞌ.
\v 10 Ca naquə leꞌe šə cui chonḻe canꞌ chazlažəꞌ Diozənꞌ, gwxaquəꞌəlebele ca to yag frot deꞌe cui bi frot chbian. Naꞌ ca naquə yoguəꞌəte yag frot deꞌe cui bi frot chon, chəsəꞌəc̱hog beṉəꞌ ḻen naꞌ chəsəꞌəzeyeꞌen.
\v 11 Naꞌ ca naquə leꞌe chediṉɉele xtoḻəꞌəle caꞌ, nadaꞌ deꞌe ḻi chc̱hoꞌa leꞌe nis. Naꞌ zeꞌe yidə benꞌ gon par nic̱h so Spirit c̱he Diozənꞌ ḻoꞌo yic̱hɉlaꞌaždaꞌochonꞌ naꞌ ṉabiꞌan chioꞌo. Naꞌ Spiritənꞌ naquən ca yiꞌ naꞌ gwxiꞌ gwloan yic̱hɉlaꞌaždaꞌochonꞌ len bitəꞌətezə deꞌe mal. Benꞌ yidə zaquəꞌəcheꞌ ca nadaꞌ naꞌ bito zacaꞌa par gacaꞌ xmoseꞌ.
\v 12 Beꞌenanꞌ goneꞌ len chioꞌo canꞌ choncho catəꞌ chdecho trigonꞌ rner, naꞌ chzeycho yix bebənꞌ. Naꞌ šə chonḻilažəꞌəcho Diozənꞌ, yotobeꞌ chioꞌo par nic̱h socho txen len ḻeꞌ, naꞌ beṉəꞌ caꞌ cui chsoꞌonḻilažəꞌ ḻeꞌ, əseḻeꞌe ḻegaꞌaqueꞌ lao yiꞌ gabiḻənꞌ deꞌen cuiczə cheyol.
\s1 Catəꞌ gwchoa Jesoꞌosənꞌ nis
\p
\v 13 Naꞌ gwzaꞌ Jesoꞌosənꞌ ganꞌ mbane Galileanꞌ naꞌ gwyeɉeꞌ ganꞌ zo Juanṉəꞌ choꞌa yao Jordanṉəꞌ par nic̱h Juanṉəꞌ bc̱hoeꞌ ḻeꞌ nis.
\v 14 Naꞌ Juanṉəꞌ benczə yic̱hɉlaogüeꞌ caguə goneꞌeneꞌ gwc̱hoeꞌ Jesoꞌosənꞌ nis. Gožeꞌeneꞌ: —Chyažɉlədaꞌ əgwc̱hoꞌ nadaꞌ nisənꞌ naꞌ nadəꞌəlanꞌ zedeṉabdoꞌ gwc̱hoaꞌ leꞌ nisənꞌ.
\p
\v 15 Nach Jesoꞌosənꞌ gožeꞌ Juanṉəꞌ: —Goneꞌe bc̱hoa nadaꞌ nisənꞌ. Cheyaḻəꞌ goncho caꞌ par nic̱h gaquə complir yoguəꞌəḻoḻ deꞌen non Diozənꞌ mendad gaquə.
\p Nach gwc̱heb Juanṉəꞌ bc̱hoꞌeneꞌ nisənꞌ.
\v 16 Naꞌ catəꞌ beyož gwchoa Jesoꞌosənꞌ nisənꞌ, ḻeꞌe bechoɉteꞌ ḻoꞌo nisənꞌ, naꞌ ḻeꞌe byalɉwte ḻeꞌe yobanəꞌ naꞌ bleꞌi Jesoꞌosənꞌ ganꞌ zo Diozənꞌ. Bleꞌineꞌ Spirit c̱he Diozənꞌ betɉən ca to ngolbexə naꞌ bžinən gwzon len ḻeꞌ.
\v 17 Naꞌ gwseꞌeneneꞌ gwna Diozənꞌ benꞌ zo yobanꞌ: —Benganꞌ Xiꞌiṉaꞌ, benꞌ chacdaꞌ c̱hei, ḻechguaḻe cheba chezaquəꞌəlažaꞌa ḻeꞌ.
\c 4
\s1 Gwloꞌoyeḻəꞌ gwxiyeꞌenəꞌ Jesoꞌosənꞌ goneꞌ deꞌe mal
\p
\v 1 Naꞌ Spirit c̱he Diozənꞌ benən par nic̱h gwyeɉ Jesoꞌosənꞌ latɉə dašənꞌ, par nic̱h gwloꞌoyeḻəꞌ gwxiyeꞌenəꞌ ḻeꞌ goneꞌ deꞌe malənꞌ.
\p
\v 2 Naꞌ bitobi gwdao Jesoꞌosənꞌ lao c̱hoa ža c̱hoa yel, naꞌ catəꞌ gwde deꞌe c̱hoa žanəꞌ gwdoneꞌ.
\v 3 Naꞌ gwxiyeꞌenəꞌ bgüiguəꞌən ganꞌ zo Jesoꞌosənꞌ, gožəꞌən ḻeꞌ: —Šə lenꞌ nacoꞌ Xiꞌiṉ Diozənꞌ, gož yeɉ quinga yesyəꞌəyaquən yetxtil.
\p
\v 4 Nach gož Jesoꞌosənꞌ ḻen: —Nyoɉczə Xtižəꞌ Diozənꞌ nan: “Caguə yeḻəꞌ guao naꞌazənꞌ əbane chioꞌo beṉac̱h sino ḻeczə chyažɉecho yoguəꞌəḻoḻ dižəꞌ deꞌen na Diozənꞌ par əbancho.”
\p
\v 5 Naꞌ gwc̱heꞌ gwxiyeꞌenəꞌ ḻeꞌ yic̱hɉoꞌ yoꞌodaoꞌ əblao c̱he chioꞌo beṉəꞌ Izrael deꞌen zo Jerosalenṉəꞌ naꞌ gwlequən ḻeꞌ ganꞌ ḻeꞌezelaogüe naquə sibə.
\v 6 Naꞌ gožən ḻeꞌ: —Šə lenꞌ nacoꞌ Xiꞌiṉ Diozənꞌ bexitəꞌ nga par cheꞌelə, laꞌ nyoɉczən ḻeꞌe Xtižəꞌ Diozənꞌ nan:
\q1 Eseḻəꞌ Diozənꞌ angl c̱heꞌ caꞌ par əsaꞌacleneꞌ leꞌ, naꞌ əsoꞌox̱eꞌe leꞌ par nic̱h bito əc̱hegoꞌo no yeɉ.
\p
\v 7 Naꞌ gož Jesoꞌosənꞌ gwxiyeꞌenəꞌ: —Ḻeczə canꞌ nyoɉən ḻeꞌe Xtižəꞌ Diozənꞌ, nan: “Bito con goncho X̱ancho Diozənꞌ prueb šə ḻeineꞌ canꞌ neꞌenəꞌ.”
\p
\v 8 Naꞌ gwxiyeꞌenəꞌ gozc̱heꞌen ḻeꞌ to lao yaꞌa deꞌe naquə ḻechguaḻe sibə, naꞌ bloꞌin ḻeꞌ yoguəꞌ ṉasyon deꞌen zɉəchiꞌ lao yežlyonꞌ ca naquə dechgua yeḻəꞌ chnabiaꞌ c̱hegaꞌaquənṉəꞌ.
\v 9 Nach gožən ḻeꞌ: —Yoguəꞌ deꞌe quinga chleꞌidoꞌ nga goṉaꞌan leꞌ šə gwzo xiboꞌ laoguaꞌ nga par güeꞌelaogoꞌo nadaꞌ.
\p
\v 10 Nach gož Jesoꞌosənꞌ ḻen: —Gwchiꞌižəꞌ caꞌaḻə nga Satanas. Nyoɉczən ḻeꞌe Xtižəꞌ Diozənꞌ nan: “Cheyaḻəꞌ šeɉṉiꞌalažəꞌəcho tozə X̱ancho Diozənꞌ naꞌ tozə ḻeꞌ güeꞌelaꞌocho.”
\p
\v 11 Naꞌ bebiꞌižəꞌ gwxiyeꞌenə len ḻeꞌ, nach besəꞌəžin baḻə angl caꞌ ɉseꞌecleneꞌeneꞌ.
\s1 Jesoꞌosənꞌ gwzolaogüeꞌ chyix̱ɉuiꞌe dižəꞌ güen dižəꞌ cobə c̱he Diozənꞌ
\p
\v 12 Naꞌ Jesoꞌosənꞌ gwzeꞌe Jodeanꞌ par gwyeɉeꞌ Galileanꞌ catəꞌ beneneꞌ de que bade Juanṉəꞌ ližyanꞌ.
\v 13 Naꞌ gwzeꞌe Nasaretənꞌ ɉsoeꞌ syoda Capernaum deꞌen chiꞌ choꞌa nisdaꞌonəꞌ do ganꞌ chiꞌ distrit deꞌen nziꞌ Sabolon naꞌ Neftali.
\v 14 Naꞌ deꞌen ɉəyezoeꞌ syodanꞌ goc complir canꞌ bzoɉ deꞌe profet Isaiazənꞌ, benꞌ beꞌe Xtižəꞌ Diozənꞌ canaꞌ ganꞌ nan:
\q1
\v 15 Ḻeꞌe gwzenag, leꞌe beṉəꞌ Galilea, leꞌe cui nacle beṉəꞌ Izrael,
\q1 naꞌ nitəꞌəle distrit Sabolon naꞌ Neftali deꞌen mbane yešḻaꞌalə nisdaꞌonəꞌ naꞌ yao Jordanṉəꞌ.
\q1
\v 16 Nc̱hoḻ yic̱hɉlaꞌaždaꞌolenꞌ pero Diozənꞌ əseḻeꞌe to beṉəꞌ cueꞌe beꞌeniꞌ xen ḻoꞌo yic̱hɉlaꞌaždaꞌolenꞌ.
\q1 Nacle ca beṉəꞌ guat len yic̱hɉlaꞌaždaꞌolenꞌ por ni c̱he deꞌe malənꞌ chonḻe,
\q1 pero beꞌenəꞌ əseḻəꞌ Diozənꞌ yocobeꞌ yic̱hɉlaꞌaždaꞌolenꞌ.
\p
\v 17 Naꞌ dezd tyemp naꞌ, Jesoꞌosənꞌ gwzolao gwdix̱ɉuiꞌe gwneꞌ: —Ḻeꞌe yediṉɉe xtoḻəꞌəlenꞌ, c̱hedəꞌ babžin ža ṉabiaꞌ Dioz benꞌ zo yobanꞌ con notəꞌətezə beṉəꞌ əsoꞌe latɉə.
\s1 Jesoꞌosənꞌ gwleɉeꞌ tap beṉəꞌ gwxen beḻ par gwsaꞌaqueꞌ disipl c̱heꞌ
\p
\v 18 Naꞌ goquənꞌ lao zda Jesoꞌosənꞌ choꞌa Nisdaoꞌ Galileanꞌ bleꞌineꞌ c̱hopə beṉəꞌ gwxen beḻ, chosoꞌozaḻeꞌe yix̱ɉw beḻ c̱hegaꞌaqueꞌenəꞌ ḻoꞌo nisənꞌ. Zɉənaquə c̱hopə bišeꞌe. Toeꞌ leꞌ Simon Bed, naꞌ yetoeꞌ Ndres.
\v 19 Nach gožeꞌ ḻegaꞌaqueꞌ: —Ḻeꞌe da len nadaꞌ. Leꞌe nacle beṉəꞌ gwxen beḻ, naꞌ ṉaꞌa əgwzeɉniꞌidaꞌ leꞌe par nic̱h gonḻe ca soꞌombiaꞌ beṉəꞌ nadaꞌ.
\p
\v 20 Naꞌ ḻeꞌe gosəꞌəbeɉyic̱hɉtegaꞌaqueꞌ yix̱ɉw beḻ c̱hegaꞌaqueꞌ caꞌ nach ɉaꞌacleneꞌ Jesoꞌosənꞌ.
\p
\v 21 Nach gwsaꞌaqueꞌ yelatəꞌ naꞌ ɉəsyəꞌədiꞌe Jacob len Juan c̱hopə bišeꞌe, len x̱agaꞌaqueꞌ Sebedeo. Žeꞌe to ḻoꞌo barcw chesyəꞌəyoneꞌ yix̱ɉw beḻ c̱hegaꞌaqueꞌenəꞌ. Naꞌ ḻeczə gwṉabe Jesoꞌosənꞌ Jacobənꞌ len Juanṉəꞌ par žɉaꞌacleneꞌ ḻeꞌ.
\v 22 Naꞌ ḻeꞌe bosyoꞌocuaꞌaṉlentieꞌ x̱agaꞌaqueꞌ Sebedeonꞌ barconꞌ naꞌ ɉaꞌacleneꞌ Jesoꞌosənꞌ.
\s1 Jesoꞌosənꞌ bsed bloꞌineꞌ beṉəꞌ zan
\p
\v 23 Naꞌ gozac catəꞌ Jesoꞌosənꞌ gwyeɉeꞌ yoguəꞌ yež caꞌ zɉəchiꞌ ganꞌ mbane Galileanꞌ, gwzolaogüeꞌ bsed bloꞌineꞌ beṉəꞌ caꞌ zɉəžaꞌ ḻoꞌo yoꞌodaoꞌ caꞌ ganꞌ gwsoꞌelaoꞌ beṉəꞌ Izrael caꞌ Diozənꞌ. Naꞌ gwdix̱ɉuiꞌe dižəꞌ güen dižəꞌ cobənꞌ de que Diozənꞌ ṉabiꞌe con notəꞌətezə beṉəꞌ əsoꞌe latɉə. Naꞌ Jesoꞌosənꞌ beyoneꞌ yoguəꞌ beṉəꞌ caꞌ chseꞌi gwde gwde yižgüeꞌ.
\v 24 Naꞌ gosəꞌ gwlalɉə yoguəꞌ deꞌen ben Jesoꞌosənꞌ doxenḻə ṉasyon Siria. Nach beṉəꞌ Siria caꞌ ɉsoꞌe yoguəꞌ beṉəꞌ caꞌ chsaꞌacšene laogüeꞌenəꞌ, beṉəꞌ caꞌ chseꞌi zan cḻas yižgüeꞌ naꞌ beṉəꞌ caꞌ chseꞌey chesəꞌəla, naꞌ len beṉəꞌ caꞌ zɉəyoꞌo zɉəyaz deꞌe x̱ioꞌ yic̱hɉlaꞌaždaꞌogaꞌaqueꞌ, naꞌ len beṉəꞌ caꞌ chsaꞌaz šon, naꞌ beṉəꞌ caꞌ zɉənat to part cuerp c̱hegaꞌaqueꞌenəꞌ. Naꞌ beyoneꞌ yoguəꞌətegaꞌaqueꞌ.
\v 25 Naꞌ zan beṉəꞌ zaꞌac distrit c̱he Galilea, naꞌ beṉəꞌ zaꞌac yež caꞌ ganꞌ nziꞌ Decapolis, naꞌ beṉəꞌ zaꞌac syoda Jerosalenṉəꞌ, naꞌ beṉəꞌ zaꞌac yež caꞌ yeḻaꞌ distrit c̱he Jodea, nach beṉəꞌ zaꞌac yešḻaꞌa yao Jordanṉəꞌ ɉəsəꞌənaogüeꞌ ḻeꞌ.
\c 5
\s1 Dižəꞌ deꞌen bsed bloꞌi Jesoꞌosənꞌ to lao yaꞌa bloꞌineꞌ nonꞌ zɉəzo mbalaz
\p
\v 1 Naꞌ Jesoꞌosənꞌ catəꞌ bleꞌineꞌ beṉəꞌ zan zɉənžag, gwloeꞌ gwchiꞌe to lao yaꞌa. Naꞌ gosəꞌəbiguəꞌ disipl c̱heꞌ caꞌ ganꞌ chiꞌenəꞌ.
\v 2 Nach gwzolao bsed bloꞌineꞌ ḻegaꞌaqueꞌ, gwneꞌ:
\p
\v 3 —Leꞌe chacbeꞌile de que chyažɉele gaquəlen Diozənꞌ leꞌe, zole mbalaz c̱hedəꞌ bachoꞌele latɉə chnabiaꞌ Diozənꞌ leꞌe.
\p
\v 4 Naꞌ leꞌe zole trist ḻoꞌo yic̱hɉlaꞌaždaꞌolenꞌ por ni c̱he xtoḻəꞌəle caꞌ, mbalaz sole c̱hedəꞌ Diozənꞌ yeyonxenḻažeꞌe leꞌe.
\p
\v 5 Naꞌ leꞌe laogüe deꞌen chzex̱ɉw yic̱hɉle len Diozənꞌ naꞌ len beṉac̱hənꞌ, mbalaz sole c̱hedəꞌ Diozənꞌ goneꞌ par nic̱h gaquə güen c̱hele canꞌ baben Diozənꞌ lyebe.
\p
\v 6 Naꞌ leꞌe chzelažəꞌəchguale gacle beṉəꞌ güen lao Diozənꞌ, zole mbalaz c̱hedəꞌ Diozənꞌ bachacleneꞌ leꞌe par nic̱h gacle beṉəꞌ güen laogüeꞌenəꞌ.
\p
\v 7 Naꞌ leꞌe cheyašəꞌəlažəꞌəle beṉəꞌ yoblə, mbalaz zole c̱hedəꞌ ḻeczə caꞌ Diozənꞌ cheyašəꞌ chežiꞌilažeꞌe leꞌe.
\p
\v 8 Naꞌ leꞌe banacle beṉəꞌ laꞌaždaoꞌ xiꞌilažəꞌ, zole mbalaz c̱hedəꞌ žɉəyezole txen len Diozənꞌ.
\p
\v 9 Naꞌ leꞌe chogoꞌole yeḻəꞌ chxenḻažəꞌ c̱he beṉəꞌ lɉuežɉle caꞌ chesəꞌədiḻə, mbalaz zole c̱hedəꞌ laꞌ Diozənꞌ bagwcueꞌe leꞌe ca xiꞌiṉeꞌ.
\p
\v 10 Naꞌ leꞌe chosoꞌoc̱hiꞌ chosoꞌosaquəꞌ beṉəꞌ leꞌe laogüe deꞌe chontezle deꞌen naquə güen lao Diozənꞌ, zole mbalaz c̱hedəꞌ choꞌele latɉə chnabiaꞌ Diozənꞌ leꞌe.
\p
\v 11 Naꞌ catəꞌ chesəꞌəziꞌic̱hižəꞌ beṉəꞌ leꞌe naꞌ chesəꞌəsaquəꞌəziꞌe leꞌe naꞌ chsoꞌe yoguəꞌ cḻaste dižəꞌ güenḻažəꞌ contr leꞌe por ni c̱he deꞌen chonḻilažəꞌəle nadaꞌ, biaꞌaczə sole mbalaz.
\v 12 Cheyaḻəꞌ yeba yezaquəꞌəlažəꞌəchguale ḻaꞌaṉəꞌəczə zaꞌac deꞌe caꞌ contr leꞌe c̱hedəꞌ Diozənꞌ goneꞌ par nic̱h gaquəchgua deꞌe güen c̱hele catəꞌ yežinḻe ganꞌ zoeꞌenəꞌ. Canꞌ chsoꞌone beṉəꞌ caꞌ leꞌe ḻeczə canꞌ gwsoꞌone deꞌe x̱axtaꞌocho caꞌ deꞌe profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ.
\s1 Naccho ca zedəꞌ naꞌ ca beꞌeniꞌ par len beṉəꞌ žaꞌ yežlyo nga
\p
\v 13 Ca zedəꞌ chaclenən par nic̱h caguə cuiayiꞌ no yid beləꞌ, ḻeꞌegatezə caꞌ leꞌe chaclenḻe par nic̱h beṉac̱hənꞌ cui chsoꞌontequeꞌ deꞌe mal. Naꞌ šə zedəꞌən bitoch bi zxiꞌ naquən, ṉezecho bito bi gac goncho par nic̱h yeyaquən zxiꞌ deꞌe yoblə. Naꞌ bitoch bi zaquəꞌən lete goschon fuerlə naꞌ əgwleɉ əgwšošɉ beṉəꞌ ḻen. Canꞌ gaquə len leꞌe šə cuich gonḻe canꞌ cheneꞌe Diozənꞌ.
\p
\v 14 Ca beꞌeniꞌ chaclenən beṉəꞌ par chəsəꞌəṉezeneꞌ ganꞌ cheyaḻəꞌ žɉaꞌaqueꞌ, caꞌaczənꞌ chaclenḻe beṉəꞌ par chəsəꞌəṉezeneꞌ nac cheneꞌe Diozənꞌ soꞌoneꞌ. Naꞌ canꞌ notəꞌətezə beṉəꞌ chac chleꞌineꞌ to syoda xen deꞌen chiꞌ to lao yaꞌa, caꞌaczənꞌ notəꞌətezə beṉəꞌ chac chleꞌineꞌ deꞌe güenṉəꞌ chonḻe.
\v 15 Catəꞌ chgualəꞌəle to yiꞌ bito chdosəꞌəlen žomə sino chdaꞌalen ḻeꞌe zeꞌe par chseꞌeniꞌin len yoguəꞌ beṉəꞌ žaꞌ ḻoꞌo yoꞌonəꞌ.
\v 16 Naꞌ ca naquə leꞌe ža, cheyaḻəꞌ sotezə sole gonḻe deꞌe güenṉəꞌ par nic̱h yesəꞌəleꞌi beṉəꞌ ḻen naꞌ əsoꞌelaogüeꞌe X̱acho Diozənꞌ benꞌ zo yobanꞌ.
\s1 Jesoꞌosənꞌ bsed bloꞌineꞌ canꞌ na ḻei deꞌen bzoɉ deꞌe Moisezənꞌ
\p
\v 17 Bito gonḻe xbab de que nadaꞌ zaꞌa zedeyenaꞌ par nic̱h ḻei deꞌen bzoɉ deꞌe Moisezənꞌ naꞌ deꞌen bosoꞌozoɉ deꞌe profet caꞌ canaꞌ cuich soꞌonən žin. Zaꞌa par nic̱h gaquə complir yoguəꞌəḻoḻ deꞌen bsiꞌ Diozənꞌ xṉeze gaquə ca deꞌen bosoꞌozoɉ beṉəꞌ caꞌ.
\v 18 Deꞌe ḻi chniaꞌ leꞌe, xte ca te c̱he yežlyo nga len deꞌe caꞌ chleꞌicho ḻeꞌe yobanꞌ, ni to ḻetr daoꞌ ni to asento deꞌen nyoɉ ḻeꞌe ḻeinꞌ cui ten caꞌazə xte que gaquə yoguəꞌəḻoḻ deꞌen cheneꞌe Diozənꞌ gaquə.
\v 19 Deꞌe naꞌanəꞌ yoguəꞌ deꞌe caꞌ zɉənyoɉ deꞌen cheneꞌe Diozənꞌ gonḻe, ḻaꞌaṉəꞌəczə šə ḻebeyožə to deꞌe daoꞌ, ḻegonən. Notəꞌətezle šə əc̱hoele cui gonḻe canꞌ noneꞌ mendadənꞌ, naꞌ šə ḻeczə əgwloꞌile beṉəꞌ yoblə cui soꞌoneꞌ canꞌ noneꞌ mendadənꞌ, Diozənꞌ bito goṉeꞌ leꞌe yeḻəꞌ balaꞌaṉ catəꞌ yežinḻe yobanꞌ ganꞌ chnabiꞌenəꞌ. Naꞌ notəꞌətezle šə gonḻe canꞌ noneꞌ mendadənꞌ naꞌ šə ḻeczə gwloꞌile beṉəꞌ yoblə soꞌoneꞌ canꞌ noneꞌ mendadənꞌ, Diozənꞌ goṉeꞌ leꞌe yeḻəꞌ balaꞌaṉ catəꞌ yežinḻe yobanꞌ ganꞌ chnabiꞌenəꞌ.
\v 20 Echniaꞌ leꞌe, beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ bito zɉənaquə yic̱hɉlaꞌaždaꞌogaꞌaqueꞌenəꞌ güen lao Diozənꞌ. Naꞌ šə yic̱hɉlaꞌaždaꞌolenꞌ bito gaquəchən güen lao Diozənꞌ cle ca c̱hegaꞌaqueꞌenəꞌ, bito yežinḻe yobanꞌ ganꞌ zo Diozənꞌ chnabiꞌe.
\s1 Choncho deꞌe mal šə chžaꞌa lɉuežɉcho
\p
\v 21 Naꞌ ḻeczə bsed bloꞌi Jesoꞌosənꞌ ḻegaꞌaqueꞌ gwneꞌ: —Baṉezele canꞌ gož deꞌe Moisezənꞌ deꞌe x̱axtaꞌocho caꞌ: “Cui no gotle. Naꞌ šə no got lɉuežɉ beṉac̱heꞌ, jostis caꞌ c̱hoglaogüeꞌen c̱heꞌ de que cheyaḻəꞌ gateꞌ.”
\v 22 Naꞌ nadaꞌ chniaꞌ leꞌe notəꞌətezle šə chžaꞌa lɉuežɉ beṉac̱hle zaquəꞌəczən par gatle ca to castigw c̱hele žaləꞌ caꞌ, naꞌ notəꞌətezle šə chžia chnitəꞌəle lɉuežɉle zaquəꞌəczən par soꞌon beṉəꞌ golə blao caꞌ chəsəꞌənabiaꞌ ṉasyon Izraelənꞌ castigw c̱helenꞌ. Naꞌ notəꞌətezle šə choḻgüiž lɉuežɉle dižəꞌ pesad, zaquəꞌəczən par yoseḻəꞌ Diozənꞌ leꞌe lao yiꞌ gabiḻ.
\p
\v 23 Cheyaḻəꞌ socho binḻo len lɉuežɉ beṉac̱hcho. Naꞌ ḻaꞌaṉəꞌəczə catəꞌ bazole ḻoꞌo yoꞌodaoꞌ par əgwnežɉwle bi deꞌen əgwnežɉwle güeꞌelaꞌole Diozənꞌ, šə žɉsaꞌalažəꞌəle de que babenḻe contr to beṉəꞌ lɉuežɉlenꞌ,
\v 24 naꞌazə cheyaḻəꞌ yocuaꞌaṉle šlož deꞌen nox̱əꞌəlenꞌ. Zguaꞌatec žɉəyeyeꞌexenḻe beṉəꞌ lɉuežɉlenꞌ, nach guaquə žɉəyenežɉwle deꞌen bagwleɉle par güeꞌelaꞌole Diozənꞌ.
\p
\v 25 Catəꞌ to beṉəꞌ gonḻe xya c̱heꞌ naꞌ əc̱heꞌe leꞌe lao jostis, ḻegonḻeneꞌ regl binḻo lao ngoꞌole nezənꞌ par nic̱h naꞌ cui c̱heꞌe leꞌe lao jostisənꞌ. Šə bito gonḻe caꞌ ža, catəꞌ əžinḻe lao jostisənꞌ goneꞌ leꞌe lao naꞌ poḻsianꞌ par yosəꞌəžeꞌe leꞌe ližya.
\v 26 Echniaꞌ leꞌe, bito yebeɉeꞌ leꞌe xte catəꞌ c̱hixɉwle doxen deꞌen chaḻəꞌəlenꞌ.
\s1 Deꞌe malənꞌ choncho šə chgoꞌo xtocho
\p
\v 27 Baṉezele canꞌ gwna deꞌe Moisezənꞌ: “Bito coꞌo xtole naꞌ bito cueɉyic̱hɉle beꞌen c̱hele o noꞌol c̱hele par solenḻe beṉəꞌ yoblə.”
\v 28 Naꞌ nadaꞌ chniaꞌ leꞌe de que notəꞌətezle šə chgüiale to noꞌolə naꞌ chzelažəꞌəle solenḻeneꞌ, banaple doḻəꞌ c̱hedəꞌ tozəczə ca malənꞌ bachonḻe ḻoꞌo laꞌaždaꞌolenꞌ len deꞌen chon beṉəꞌ chgoꞌo xtoeꞌ.
\p
\v 29 Naꞌ deꞌe naꞌanəꞌ əchniaꞌ leꞌe, šə deꞌen chleꞌile len ɉəlaole chonən par nic̱h əxople gonḻe deꞌe malənꞌ, ncaꞌalə xṉeze žaləꞌ cui žia ɉelaolenꞌ. Len ncaꞌalə xṉeze cueɉlen cle ca cuiayiꞌile lao yiꞌ gabiḻənꞌ por ni c̱he ḻen.
\v 30 Naꞌ šə deꞌen chonḻenḻe naꞌale caꞌ chonən par nic̱h əxople gonḻe deꞌe malənꞌ, ncaꞌalə xṉeze žaləꞌ cui žia naꞌale naꞌanəꞌ. Len ncaꞌalə xṉeze c̱hoggaꞌaclen cle ca cuiayiꞌile lao yiꞌ gabiḻənꞌ por ni c̱he ḻegaꞌaquən.
\s1 Beṉəꞌ csad caꞌ bito cheyaḻəꞌ yesyəꞌəlaꞌa lɉuežɉgaꞌaqueꞌ
\p
\v 31 Ḻeczə ṉezele canꞌ gwna deꞌe Moisezənꞌ: “Notəꞌətezə beṉəꞌ yeleꞌe noꞌol c̱heꞌenəꞌ, cheyaḻəꞌ c̱has to act ga güeꞌen dižəꞌ de que besyəꞌəleꞌenəꞌ.”
\v 32 Naꞌ nadaꞌ əchniaꞌ leꞌe de que notəꞌətezle yelaꞌale noꞌol c̱helenꞌ, šə bito naqueꞌ to noꞌolə goꞌo xtoi, gonḻe par nic̱h gaqueꞌ ca to noꞌolə goꞌo xtoi. Naꞌ notəꞌətezle yošagnaꞌale len to noꞌolə beṉəꞌ belaꞌa benꞌ c̱hei ḻeꞌ, ḻeczə tozəczə ca malənꞌ chonḻe len beṉəꞌ caꞌ chesəꞌəgoꞌo xtoi.
\s1 Jesoꞌosənꞌ bzeɉniꞌineꞌ c̱he jorament caꞌ
\p
\v 33 Naꞌ ḻeczə baṉezele canꞌ gož deꞌe Moisezənꞌ deꞌe x̱axtaꞌocho caꞌ: “Bito əgwzole jorament lao X̱ancho Diozənꞌ catəꞌ ənale to deꞌen gonḻe šə cui gonḻe complir canꞌ nalenəꞌ. Catəꞌən chzole jorament lao X̱ancho Diozənꞌ, cheyaḻəꞌ gonḻe canꞌ chonḻe lyebenꞌ laogüeꞌenəꞌ.”
\v 34 Pero naꞌ nadaꞌ chniaꞌ leꞌe, cuat əgwzole joramentənꞌ por bitəꞌətezə, nic por yoba c̱hedəꞌ naꞌanəꞌ zo Diozənꞌ chnabiꞌe.
\v 35 Naꞌ nic əgwzole joramentənꞌ por yežlyonꞌ c̱hedəꞌ den xniꞌa Diozənꞌ. Naꞌ nic əgwzole joramentənꞌ por syoda Jerosalenṉəꞌ c̱hedəꞌ naquən syoda c̱he Diozənꞌ benꞌ naquə ḻeꞌezelaogüe Rei blao.
\v 36 Naꞌ nic gon yic̱hɉlenꞌ testigw de que choꞌele dižəꞌ ḻi, c̱hedəꞌ bito gaquə gonḻe par nic̱h yišəꞌ yic̱hɉlenꞌ yeyaquən šyiš o yeyaquən gasɉ.
\v 37 Cheyaḻəꞌ güeꞌele por dižəꞌ ḻi nic̱h cui əyažɉən əgwzole jorament par seꞌeɉḻeꞌe beṉəꞌ c̱hele. Šə chyažɉən bichlə dižəꞌ deꞌe əṉale par seꞌeɉḻeꞌe c̱hele, nacbiaꞌ gwxiyeꞌ nanꞌ chnabiaꞌan yic̱hɉlaꞌaždaꞌolenꞌ.
\s1 Bito coꞌolažəꞌəcho beṉəꞌ contr c̱hecho
\p
\v 38 Šə to beṉəꞌ goneꞌ ziꞌ ɉelaolenəꞌ ṉezele de que ḻei deꞌen bzoɉ deꞌe Moisezənꞌ nan de que guaquə gonḻe ziꞌ ɉelaogüeꞌenəꞌ. Naꞌ šə to beṉəꞌ əx̱opeꞌ to leyle ḻeczə ṉezele de que ḻeinꞌ nan guaquə əx̱ople to c̱heꞌenəꞌ.
\v 39 Pero naꞌ nadaꞌ əchniaꞌ leꞌe, bito əgwžonle gon beṉəꞌ deꞌe mal len leꞌe. Šə to beṉəꞌ capeꞌe šḻaꞌa x̱aguəꞌəlenꞌ, ḻeꞌe güeꞌ latɉə capeꞌe deꞌen yešḻaꞌa.
\v 40 Šə to beṉəꞌ cheneꞌeneꞌ əqueꞌe xcamislenꞌ laogüe deꞌen chaḻəꞌəle latəꞌ xmecheꞌ, güeꞌetele latɉə əqueꞌe len xadoṉ c̱helenꞌ.
\v 41 Naꞌ šə to beṉəꞌ blao goneꞌ byen šeɉlenḻeneꞌ guaꞌale yoaꞌ c̱heꞌenəꞌ to kilometro, ḻeꞌe šeɉleneꞌ guaꞌalen yeto kilometro.
\v 42 Naꞌ šə bi deꞌen chṉabe beṉəꞌ leꞌe, ḻeꞌe güeꞌen. Naꞌ ḻeꞌe cueɉe šə bi deꞌe chṉabeꞌ cueɉleneꞌ.
\s1 Cheyaḻəꞌ gaquecho c̱he beṉəꞌ contr c̱hecho
\p
\v 43 Naꞌ ḻeczə baṉezele canꞌ chəsəꞌəneꞌ: “Cheyaḻəꞌ gaquele c̱he beṉəꞌ migw c̱hele naꞌ gueꞌile beṉəꞌ contr c̱hele.”
\v 44 Pero nadaꞌ əchniaꞌ leꞌe, ḻeꞌe gaque c̱he beṉəꞌ contr c̱helenꞌ, ḻeꞌe ṉabe Diozənꞌ gaquə deꞌe güen c̱he beṉəꞌ caꞌ chosoꞌožia chosoꞌonitəꞌ leꞌe. Naꞌ ḻeꞌe gon deꞌe güen len beṉəꞌ caꞌ chəsəꞌəgueꞌi leꞌe, naꞌ ḻeꞌe gon orasyon lao Diozənꞌ par beṉəꞌ caꞌ chsaꞌadəꞌ leꞌe dižəꞌ, naꞌ par beṉəꞌ chəsəꞌəsaquəꞌəziꞌ leꞌe.
\v 45 Šə gonḻe caꞌ naꞌachənꞌ əsaꞌacbeꞌi beṉəꞌ de que nacle xiꞌiṉ X̱acho Diozənꞌ benꞌ zo yobanꞌ. Ḻeꞌenəꞌ choneꞌ ca chlaꞌ bgüižənꞌ par yoguəꞌəḻoḻ beṉəꞌ ḻaꞌaṉəꞌəczə šə chsoꞌoneꞌ deꞌe güen o šə chsoꞌoneꞌ deꞌe mal. Naꞌ ḻeczə choneꞌ par nic̱h chac yeɉw par yoguəꞌəḻoḻ beṉəꞌ žaꞌ yežlyonꞌ ḻaꞌaṉəꞌəczə šə zɉənaqueꞌ beṉəꞌ güen o šə zɉənaqueꞌ beṉəꞌ mal.
\v 46 Šə porzə chaquele c̱he beṉəꞌ caꞌ chsaꞌaque c̱hele ¿bixa zedeguaꞌatguan par leꞌenəꞌ? Ḻeꞌegatezə canꞌ chsoꞌon beṉəꞌ goc̱hixɉw caꞌ, beṉəꞌ caꞌ nale zɉənaqueꞌ beṉəꞌ malchgua.
\v 47 Naꞌ šə con chguaple diox beṉəꞌ lɉuežɉle caꞌazə ¿əchonḻe xbabənꞌ de que chonchle güen cle ca beṉəꞌ yoblə? Bito chonchle güen. Canꞌ chsoꞌon beṉəꞌ caꞌ cui zɉənombiaꞌ Diozənꞌ, con beṉəꞌ lɉuežɉgaꞌaqueꞌ naꞌazə chesəꞌəguapeꞌ diox.
\v 48 Cheyaḻəꞌ gacle beṉəꞌ šaoꞌ ca beṉəꞌ šaoꞌ beṉəꞌ güenṉəꞌ naquə X̱acho Diozənꞌ benꞌ zo yobanꞌ.
\c 6
\s1 Jesoꞌosənꞌ bloꞌineꞌ naquənꞌ cheyaḻəꞌ goncho caridanꞌ
\p
\v 1 Ḻeꞌe gon deꞌen naquə deꞌe güen pero caguə parzə nic̱h yesəꞌəleꞌi beṉəꞌ canꞌ chonḻenꞌ naꞌ soꞌelaogüeꞌe leꞌe, c̱hedəꞌ šə chonḻe caꞌ bito güeꞌelaoꞌ X̱acho Diozənꞌ benꞌ zo yobanꞌ leꞌe.
\v 2 Deꞌe naꞌanəꞌ šə bi deꞌen cheneꞌele əgwnežɉwle to beṉəꞌ par gaquəlenḻeneꞌ, ḻeꞌe əgwnežɉon pero caguə parzə nic̱h yesəꞌəṉeze beṉəꞌ canꞌ chonḻenꞌ naꞌ əsoꞌelaogüeꞌe leꞌe. Beṉəꞌ gox̱oayag caꞌ chəsəꞌənežɉueꞌ bi deꞌen chəsəꞌənežɉueꞌ beṉəꞌ do ḻoꞌo yoꞌodaꞌonəꞌ naꞌ do lao lcueꞌ parzə nic̱h əsoꞌelaoꞌ beṉəꞌ ḻegaꞌaqueꞌ. Deꞌe ḻi chniaꞌ leꞌe, bagwyeɉlaoczəgaꞌaqueꞌenəꞌ pero Diozənꞌ bito güeꞌelaogüeꞌe ḻegaꞌaqueꞌ.
\v 3 Pero naꞌ leꞌe ža, šə bi deꞌen əgwnežɉwle to beṉəꞌ par gaquəlenḻeneꞌ, bito coꞌole beꞌ lban ca deꞌen chonḻe.
\v 4 Gonḻen ca cui əsaꞌacbeꞌi benəꞌ naꞌ cui soꞌelaogüeꞌe leꞌe. X̱acho Diozənꞌ benꞌ chleꞌi yoguəꞌ deꞌen choncho güeꞌelaogüeꞌe leꞌe.
\s1 Bsed bloꞌi Jesoꞌosənꞌ nac cheyaḻəꞌ goncho orasyon
\p
\v 5 Catəꞌ gonḻe orasyon bito gonḻen canꞌ chsoꞌon beṉəꞌ gox̱oayag caꞌ. Ḻegaꞌaqueꞌ chəsyəꞌəbeineꞌ chəsəꞌəzecheꞌ chsoꞌoneꞌ orasyon ḻoꞌo yoꞌodaoꞌ c̱hegaꞌaqueꞌ caꞌ ganꞌ chsoꞌelaogüeꞌe Diozənꞌ naꞌ do squin lquey, chsoꞌoneꞌ orasyonṉəꞌ par chesəꞌəleꞌi beṉəꞌ canꞌ chsoꞌoneꞌenəꞌ. Deꞌe ḻi chniaꞌ leꞌe, bagwyeɉlaoczəgaꞌaqueꞌenəꞌ naꞌ Diozənꞌ bito güeꞌelaogüeꞌe ḻegaꞌaqueꞌ.
\v 6 Naꞌ catəꞌ gonḻe orasyon ḻeꞌe yeyoꞌo ḻoꞌo yoꞌo c̱hele naꞌ əgwseyɉwle puertənꞌ, naꞌ gonḻe orasyonṉəꞌ lao X̱acho Diozənꞌ benꞌ cui chleꞌicho. Naꞌ X̱acho Diozənꞌ benꞌ chleꞌi yoguəꞌ deꞌe choncho ḻeꞌ güeꞌelaogüeꞌe leꞌe.
\p
\v 7-8 Ca naquə beṉəꞌ caꞌ cui zɉənombiaꞌ Diozənꞌ, catəꞌ chsoꞌoneꞌ orasyon chsoꞌechgüeꞌ dižəꞌ. Chsoꞌoneꞌ xbab laogüe deꞌen chsoꞌechgüeꞌ dižəꞌ Diozənꞌ əgwzenagueꞌ c̱hegaꞌaqueꞌ. Bito gonḻe canꞌ chsoꞌoneꞌenəꞌ. Ca naquə X̱acho Diozənꞌ, baṉezczeneꞌ bi deꞌen chyažɉele zeꞌe ṉableleneꞌen.
\v 9 Quinganꞌ gonḻe orasyonṉəꞌ:
\q1 X̱atoꞌ beṉəꞌ zo yoba, chṉabtoꞌ yoguəꞌəḻoḻ beṉac̱hənꞌ əsoꞌelaogüeꞌe leꞌ.
\q1
\v 10 Chṉabtoꞌ gonoꞌ par nic̱h beṉəꞌ zan əsoꞌe latɉə ṉabiꞌo ḻegaꞌaqueꞌ.
\q1 Gaquəšga canꞌ cheꞌendoꞌonəꞌ lao yežlyo nga, canꞌ chac yobanꞌ.
\q1
\v 11 Beṉšga ṉaꞌa deꞌe gaotoꞌ tža tža.
\q1
\v 12 Naꞌ beziꞌixenšga c̱hetoꞌ c̱hedəꞌ ḻeczə cheziꞌixentoꞌ c̱he saꞌalɉuežɉ beṉac̱htoꞌonəꞌ bitəꞌətezə deꞌen chsoꞌoneneꞌ netoꞌ.
\q1
\v 13 Naꞌ bito goꞌo latɉə gaquə deꞌe ṉabiaꞌ netoꞌ len xbab c̱hetoꞌonəꞌ par gontoꞌ deꞌe malənꞌ,
\q1 mas bcuasəꞌ bcueꞌeɉ netoꞌ len gwxiyeꞌenəꞌ.
\q1 Leꞌenəꞌ chnabiꞌo naꞌ napoꞌ yeḻəꞌ guac
\q1 naꞌ napoꞌ yeḻəꞌ balaꞌaṉ par zeɉḻicaṉe. Amen.
\p
\v 14 Naꞌ šə cheziꞌixenḻe xtoḻəꞌ saꞌalɉuežɉ beṉac̱hlenꞌ bitəꞌətezə deꞌen chsoꞌoneneꞌ leꞌe, ḻeczə goziꞌixen X̱acho Diozənꞌ benꞌ zo yobanꞌ xtoḻəꞌəlenꞌ.
\v 15 Pero naꞌ šə leꞌe bito cheziꞌixenḻe c̱he saꞌalɉuežɉ beṉac̱hlenꞌ, ḻeczə caꞌ X̱acho Diozənꞌ bito yeziꞌixeneꞌ c̱helenꞌ.
\s1 Jesoꞌosənꞌ bzeɉniꞌineꞌ naquənꞌ cheyaḻəꞌ goncho catəꞌ socho sin cui yeꞌeɉ gaocho par güeꞌelaꞌocho Diozənꞌ
\p
\v 16 Naꞌ catəꞌən chzole sin cui cheꞌeɉ chaole par nic̱h choꞌelaꞌole Diozənꞌ bito gon choꞌalaolenꞌ ca choꞌalao beṉəꞌ chegüinchgüei canꞌ chsoꞌon beṉəꞌ gox̱oayag caꞌ. Ḻegaꞌaqueꞌ chsoꞌonḻizəgaꞌaqueꞌ ca beṉəꞌ chegüineꞌe parzə nic̱h chsaꞌacbeꞌi beṉac̱hənꞌ de que niteꞌe cui zɉəneꞌeɉ zɉənaogaꞌaqueꞌ. Deꞌe ḻi əchniaꞌ leꞌe bagwyeɉlaoczəgaꞌaqueꞌenəꞌ naꞌ Diozənꞌ bito güeꞌelaogüeꞌe ḻegaꞌaqueꞌ.
\v 17 Pero naꞌ leꞌe catəꞌ zole sin cui neꞌeɉ naole par choꞌelaꞌole Diozənꞌ, ḻeꞌe əgwpaꞌa yic̱hɉle naꞌ xalaꞌanḻe.
\v 18 Ḻegon caꞌ par nic̱h cui əsaꞌacbeꞌi beṉac̱hənꞌ de que zole sin cui neꞌeɉ naole. Tozə X̱acho Diozənꞌ benꞌ cui chleꞌicho ṉezeneꞌ canꞌ chonḻe. Naꞌ X̱acho Diozənꞌ benꞌ chleꞌi yoguəꞌ deꞌe choncho güeꞌelaogüeꞌe leꞌe.
\s1 Quinganꞌ cheyaḻəꞌ goncho par nic̱h gatəꞌ c̱hecho deꞌen cui te c̱hei ganꞌ chnabiaꞌ Diozənꞌ
\p
\v 19 Bito gwtoble deꞌe zan deꞌe zaqueꞌe naꞌ deꞌe xoche lao zole yežlyo nga, laꞌ yesəꞌəbiayiꞌin. Baḻən chsaꞌalɉən bia daoꞌ naꞌ chsaꞌob ḻegaꞌaquən, naꞌ yebaḻən chzen no xc̱heꞌi, naꞌ ḻeczə chaš beṉəꞌ bguan naꞌ soꞌe yesəꞌəqueꞌe bi deꞌen deilenꞌ.
\v 20 Ḻeꞌe gon par nic̱h goṉ Diozənꞌ deꞌe šaoꞌ deꞌe güenchlə c̱hele deꞌe cui te c̱hei catəꞌ yežinḻe yobanꞌ ganꞌ zoeꞌenəꞌ, c̱hedəꞌ naꞌ bito galɉə bia daoꞌ par əsaꞌob ḻen, naꞌ nic sen xc̱heꞌi par cuiayiꞌin, naꞌ nic gaquə šoꞌo beṉəꞌ bguan par əqueꞌen.
\v 21 Ganꞌ de deꞌen chaquele c̱hei nanꞌ zo yic̱hɉlaꞌaždaꞌolenꞌ.
\s1 Žia ɉelaochonꞌ par chleꞌicho
\p
\v 22 Žia ɉelaochonꞌ par chleꞌicho. Con šə bito bi chaquən chleꞌiczecho binḻo.
\v 23 Pero šə nc̱hoḻ ɉelaochonꞌ bito chleꞌicho. Caꞌaczənꞌ naquən len yic̱hɉlaꞌaždaꞌolenꞌ šə nacle beṉəꞌ laꞌaždaoꞌ güen yoꞌo beꞌeniꞌ c̱he Diozənꞌ yic̱hɉlaꞌaždaꞌolenꞌ, pero šə nacle beṉəꞌ mal nc̱hoḻ yic̱hɉlaꞌaždaꞌolenꞌ. Deꞌe ḻi ḻechguaḻe nc̱hoḻ yic̱hɉlaꞌaždaoꞌ leꞌe cui chzenagle c̱he Diozənꞌ.
\s1 Bito gaquə gaquecho c̱he Diozənꞌ naꞌ gacteicho c̱he bien c̱hechonꞌ tšiꞌizə
\p
\v 24 Notono no gaquə so liž c̱hopə x̱an žin par gaqueꞌ xmosgaꞌaqueꞌ tšiꞌizə, c̱hedəꞌ laꞌ šə goneꞌ caꞌ gueꞌineꞌ to x̱an žinṉəꞌ naꞌ gaqueneꞌ c̱he yetoeꞌ, o goneꞌ žin c̱he toeꞌ do yic̱hɉ do lažeꞌe naꞌ bito bi respet gapeꞌ par x̱aneꞌen yeto par goneꞌ xšineꞌenəꞌ. Ḻeczə canꞌ leꞌe bito gaquə gonḻe xšin Diozənꞌ do yic̱hɉ do lažəꞌəle naꞌ gonte xšinḻe par gacle beṉəꞌ gwniꞌa.
\s1 Diozənꞌ chgüia chyeꞌ chioꞌo naccho xiꞌiṉeꞌ
\p
\v 25 Deꞌe naꞌanəꞌ chniaꞌ leꞌe, bito cuec yic̱hɉle tlaozə deꞌen yeꞌeɉ deꞌen gaole lao mbanḻe. Naꞌ ḻeczə caꞌ cuerp c̱helenꞌ bito cuec yic̱hɉle tlaozə deꞌen guacwlenꞌ. Zaquəꞌəch yeḻəꞌ mban c̱helenꞌ ca yeḻəꞌ guaonꞌ. Ḻeꞌegatezə caꞌ cuerp c̱helenꞌ zaquəꞌəchən ca xalaꞌanḻenꞌ.
\v 26 Ḻegontoš xbab c̱hele, ca naquə bia caꞌ zɉəžia x̱ileꞌe bito chsaꞌazəb naꞌ bito chəsyəꞌəlapəb naꞌ nic bi daꞌa xoaꞌ c̱hegaꞌaquəb zo, pero naꞌ chguaoczə X̱acho Diozənꞌ benꞌ zo yobanꞌ ḻegaꞌaquəb. Naquəchxenꞌ zaquəꞌ leꞌe ca bia caꞌ zɉəžia x̱ileꞌenəꞌ.
\v 27 Naꞌ ni tole bito gaquə yostoṉ cuinḻe gašɉə metr šə con cueꞌe yic̱hɉle ətoṉle.
\p
\v 28 Naꞌ ¿bixc̱henꞌ chbec yic̱hɉle c̱he xalaꞌanḻe? Ḻegontoš xbab ca naquə yeɉ sosenṉəꞌ chesəꞌəchaꞌoczən, len bitobi žin chsoꞌonən, nic chsaꞌalɉən do.
\v 29 Naꞌ əchniaꞌ leꞌe, Salomonṉəꞌ goqueꞌ lachəꞌ xoche juisy, pero bito bžinḻažeꞌe xalaꞌaneꞌenəꞌ ca yeḻəꞌ xoche c̱he yeɉ sosen caꞌ.
\v 30 Diozənꞌ noneꞌ xoche yix̱əꞌ deꞌen ze yoba len to termzə zen nach chosoꞌozeyeꞌen, naquəchxe gon Diozənꞌ len leꞌe, güeꞌeczə yic̱hɉeꞌ goṉeꞌ yoguəꞌəte deꞌen chyažɉele, leꞌe cui cheɉḻeꞌetecle de que goṉeꞌ deꞌen chyažɉele.
\v 31 Leꞌe ža, bitoch cuec yic̱hɉle c̱he bi deꞌen chyažɉele ənalizle: “¿Binꞌ yeꞌeɉ gaocho naꞌ binꞌ gacwcho?”
\v 32 Con por deꞌe caꞌazənꞌ zɉəchiꞌ yic̱hɉ beṉəꞌ caꞌ cui chsoꞌonḻilažəꞌ Diozənꞌ, c̱he deꞌen əseꞌeɉ əsaꞌogüeꞌ naꞌ c̱he xalaꞌangaꞌaqueꞌ. Pero naꞌ X̱acho Diozənꞌ benꞌ zo yobanꞌ, ṉezczeneꞌ yoguəꞌ deꞌe caꞌ chyažɉele.
\v 33 Deꞌen güeꞌelažəꞌəle, güeꞌele latɉə par nic̱h Diozənꞌ ṉabiꞌe leꞌe, naꞌ güeꞌelažəꞌəle gonḻe deꞌen na Diozənꞌ naquə güen. Naꞌ yoguəꞌ deꞌe caꞌ deꞌen chyažɉelenꞌ goṉczə Diozənꞌ ḻen, deꞌen yeꞌeɉ deꞌen gaolenꞌ, naꞌ xalaꞌanḻe.
\v 34 Ḻeꞌe gon xbab c̱he deꞌen chac tža tža. Bito cuec yic̱hɉle c̱he bi deꞌen gaquə gwx̱e güižɉ, laꞌ guatəꞌəczə deꞌe zan deꞌe cuec yic̱hɉcho c̱hei catəꞌ əžin žanꞌ.
\c 7
\s1 Bito zaquəꞌəcho par əṉacho c̱he beṉəꞌ de que zɉənapeꞌ doḻəꞌ
\p
\v 1 Bito gonḻe xbab de que zaquəꞌəle par əṉale c̱he beṉəꞌ de que zɉənapeꞌ doḻəꞌ. Šə əṉale c̱hegaꞌaqueꞌ de que zɉəṉapeꞌ doḻəꞌ ḻeczə caꞌ əna Diozənꞌ c̱hele de que naple doḻəꞌ.
\v 2 Canꞌ chosbagueꞌele beṉəꞌ de que zɉənapeꞌ doḻəꞌ ḻeꞌegatezəczə canꞌ yosbagueꞌe Diozənꞌ leꞌe de que naple doḻəꞌ. Con canꞌ chonḻe len beṉəꞌ, ḻeꞌegatezə canꞌ gon Diozənꞌ len leꞌe.
\v 3 Chleꞌile güeꞌ daoꞌ deꞌen žia cožəꞌ beṉəꞌ lɉuežɉle, naꞌ cabi cheleꞌile güeꞌ xen deꞌen žia cožəꞌəlenꞌ.
\v 4 Cheꞌ beṉəꞌ lɉuežɉle: “Beꞌe latɉə gonaꞌ rmech güeꞌ daonꞌ deꞌen žia cožoꞌonəꞌ”, naꞌ bito chonḻe rmech güeꞌ xen deꞌen žia cožəꞌəlenꞌ.
\v 5 ¡Beṉəꞌ gox̱oayag leꞌe! Zguaꞌatec ḻeꞌe gon rmech güeꞌ xenṉəꞌ deꞌen žia cožəꞌəlenꞌ naꞌ techlə əṉezele naquənꞌ gonḻe rmech güeꞌ daonꞌ deꞌen žia cožəꞌ beṉəꞌ lɉuežɉlenꞌ.
\p
\v 6 Pero naꞌ bito güeꞌetezle xtižəꞌ Diozənꞌ len beṉəꞌ caꞌ chsoꞌonczə yic̱hɉlaogaꞌaqueꞌ cui chseꞌeneneꞌ yosoꞌozenagueꞌ c̱hei, c̱hedəꞌ laꞌ guacte soꞌoneneꞌ leꞌe znia canꞌ chon becoꞌ catəꞌən choꞌex̱ax̱ɉchob deꞌen cui choꞌolažəꞌəb. Naꞌ šə güeꞌetezle xtižəꞌ Diozənꞌ len beṉəꞌ caꞌ chsoꞌonczə yic̱hɉlaogaꞌaqueꞌ cui chseꞌeneneꞌ yosoꞌozenagueꞌ c̱hei, con yosəꞌəleɉ yosoꞌošošɉeꞌ dižəꞌ deꞌen güeꞌelengaꞌacleneꞌenəꞌ canꞌ chsoꞌon coš caꞌ len deꞌen cui chseꞌeneꞌeb əsaꞌob.
\s1 Ḻeꞌe ṉabe Diozənꞌ bi deꞌen əṉabeleneꞌ laꞌ goṉczeꞌen
\p
\v 7 Bitəꞌətezə deꞌen cheneꞌecho gaquə, de deꞌe goncho par nic̱h gaquən. Šə to deꞌe cheneꞌecho soꞌoṉ beṉəꞌ chioꞌo, chṉabchon. Šə to deꞌe cheneꞌecho əželecho, chyilɉchon. Šə puert deꞌen cheneꞌecho əsalɉo beṉəꞌ, chṉecho choꞌa puertənꞌ par nic̱h chsalɉueꞌ. Naꞌ caꞌaczənꞌ cheyaḻəꞌ yeꞌecho Diozənꞌ catəꞌən de deꞌen cheneꞌecho gaquə.
\v 8 Naꞌ notəꞌətezcho šə bi deꞌe chṉabechoneꞌ goṉeꞌ, laꞌ deꞌe goṉczeꞌenəꞌ. Naꞌ notəꞌətezcho šə bi deꞌen chṉabechoneꞌ əgwzeɉniꞌineꞌ chioꞌo, əgwzeɉniꞌiczeneꞌ. Naꞌ notəꞌətezcho šə chṉabechoneꞌ gaquə to deꞌen cheneꞌecho gaquə canꞌ chon beṉəꞌ chṉeꞌ choꞌa puertənꞌ, laꞌ deꞌe gaquəczənꞌ.
\p
\v 9 Naꞌ leꞌe nacle x̱a bidaoꞌ, šə xiꞌiṉlenꞌ əṉabeboꞌ leꞌe yetxtil ¿əgwnežɉwleboꞌ to yeɉ?
\v 10 Naꞌ šə əṉabeboꞌ leꞌe to beḻ yaꞌa ¿əgwnežɉwleboꞌ to beḻ bia nxobə ḻeꞌi? Cle bito gonḻe caꞌ.
\v 11 Leꞌe nacle beṉəꞌ mal pero ṉezele chnežɉwle xiꞌiṉlenꞌ deꞌe güen. Naquəchxe güen gon X̱acho Diozənꞌ benꞌ zo yobanꞌ len beṉəꞌ chṉab laogüeꞌenəꞌ bi deꞌen chyažɉeneꞌ.
\p
\v 12 Naꞌ canꞌ naquən, con yoguəꞌ deꞌe güen deꞌe cheneꞌele soꞌon beṉac̱hənꞌ len leꞌe caꞌatezəczənꞌ cheyaḻəꞌ gon leꞌe len ḻegaꞌaqueꞌ, c̱hedəꞌ canꞌ na ḻei deꞌen bzoɉ deꞌe Moisezənꞌ naꞌ deꞌen bosoꞌozoɉ deꞌe profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ.
\s1 Nezənꞌ deꞌen yežin yobanꞌ gwxaquəꞌəleben ca to nez las
\p
\v 13 Lao yeḻəꞌ mban c̱hechonꞌ c̱hopə nez nanꞌ de. To nez las, naꞌ to nez laguəꞌ. Cheyaḻəꞌ goncho byen šoꞌocho to nez šaoꞌ to nez güen ḻaꞌaṉəꞌəczə naquən ca to nez las deꞌe caṉe əželən naꞌ deꞌe chaquecho naquən zdebə par tachon. Naꞌ nez malənꞌ gwxaquəꞌəleben ca to nez yo nez laguəꞌ c̱hedəꞌ chpein chioꞌo par nic̱h yežincho gabiḻənꞌ ganꞌ saquəꞌəziꞌicho zeɉḻicaṉe. Pero beṉəꞌ zan bazɉəyoꞌe nez laguəꞌənəꞌ.
\v 14 Nezənꞌ deꞌen yežin yobanꞌ ganꞌ əbancho zeɉḻicaṉe len Diozənꞌ gwxaquəꞌəleben ca to nez las deꞌe caṉe əželən naꞌ deꞌe chaquecho naquən zdebə par tachon. Deꞌe naꞌanəꞌ baḻga beṉəꞌ chəsyəꞌəželeneꞌen par chɉəsəꞌənaogüeꞌen.
\s1 Segon canꞌ naquə frot deꞌe chbia to to yaguənꞌ ṉezecho bi cḻas yaguənꞌ
\p
\v 15 Cheyaḻəꞌ gapcho cuidad par nic̱h cui šeɉḻeꞌecho xtižəꞌ beṉəꞌ caꞌ chsoꞌonḻažeꞌe chəsəꞌəneꞌ de que xtižəꞌ Diozənꞌ chəsəꞌəyix̱ɉuiꞌe. Xochechguanꞌ chsoꞌe dižəꞌənəꞌ par chosoꞌopeineꞌ chioꞌo, chseꞌeneneꞌ goncho xbab de que zɉənaqueꞌ beṉəꞌ güen. Pero ḻegaꞌaqueꞌ zɉənaqueꞌ beṉəꞌ laꞌaždaoꞌ mal naꞌ chseꞌeneneꞌ yosoꞌožiayiꞌe chioꞌo.
\v 16 Segon canꞌ naquə frot deꞌe chbia to to yaguənꞌ ṉezecho bi cḻas yaguənꞌ. Caꞌaczənꞌ gacbeꞌiczecho de que beṉəꞌ caꞌ chəsəꞌəx̱oayagueꞌ, segon canꞌ chsoꞌoneꞌ naꞌ binꞌ chosoꞌosed chosoꞌoloꞌineꞌ beṉəꞌ. Ca naquə yag yešənꞌ bito chbian obas, naꞌ nic yag bc̱hoꞌonənꞌ chbian yix̱güio.
\v 17 Naꞌ deꞌen naquə yag güen, frot güenczə chbian naꞌ deꞌe cui naquə güen ḻeczə bito chbian frot güen.
\v 18 Yag frot güenṉəꞌ bito chbian frot deꞌe cui naquə güen, naꞌ ḻeczə to yag frot deꞌen cui naquə güen bito chbian frot güen.
\v 19 Naꞌ yoguəꞌ yag frot deꞌe cui chesəꞌəbian frot güen, yesəꞌəc̱hogueꞌen naꞌ yesəꞌəzeyeꞌen.
\v 20 Naꞌ gacbeꞌicho nonꞌ chəsəꞌəx̱oayag, segon canꞌ chsoꞌoneꞌ naꞌ binꞌ chosoꞌosed chosoꞌoloꞌineꞌ beṉəꞌ.
\s1 Caguə yoguəꞌ beṉəꞌ yesyəꞌəžineꞌ yobanꞌ ganꞌ zo Diozənꞌ chnabiꞌe
\p
\v 21 Beṉəꞌ zan chseꞌe nadaꞌ: “Nacoꞌ X̱anaꞌ”, pero caguə yogueꞌe yesyəꞌəžineꞌ yobanꞌ ganꞌ chnabiaꞌ Diozənꞌ. Beṉəꞌ caꞌ chsoꞌon canꞌ chazlažəꞌ X̱aꞌ Diozənꞌ benꞌ zo yobanꞌ, ḻegaꞌaczeꞌenəꞌ yesyəꞌəžineꞌ yobanꞌ ganꞌ zoꞌenəꞌ.
\v 22 Catəꞌ əžin ža yosoꞌodieꞌ cuent lao Diozənꞌ beṉəꞌ zan əseꞌe nadaꞌ: “X̱anaꞌ, goclen netoꞌ ṉaꞌa, laꞌ beṉəꞌ zan gwdix̱ɉueꞌitoꞌ xtižoꞌonəꞌ. Naꞌ ḻeczə beꞌetoꞌ laꞌonəꞌ par bebeɉtoꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ. Naꞌ ḻeczə beꞌetoꞌ laꞌonəꞌ par bentoꞌ deꞌe zan miḻagr.”
\v 23 Pero naꞌ clar yapəꞌəgaꞌacaꞌaneꞌ: “Bito nombiꞌa leꞌe. Ḻežɉəyaꞌac caꞌaḻə leꞌe beṉəꞌ güen deꞌe mal.”
\s1 C̱hopə beṉəꞌ naꞌ yoꞌo deꞌen gwsoꞌon to toeꞌ
\p
\v 24 Beṉəꞌ chzenag xtižaꞌanəꞌ naꞌ choneꞌ canꞌ nanṉəꞌ, gwxaquəꞌəlebeneꞌ ca to beṉəꞌ sinꞌ beṉəꞌ ben ližeꞌ naꞌ gwlequeꞌ lanenꞌ len yeɉ gual.
\v 25 Naꞌ goc yeɉw zil juisy naꞌ bchoɉchgua yaonəꞌ naꞌ gwyec̱hɉən ližeꞌenəꞌ. Naꞌ lei bdobən beꞌ bdonꞌ. Pero bito gosəꞌəzoin par yosoꞌochix̱ən ḻen, c̱hedəꞌ gwlequeꞌ lanenꞌ deꞌe gual.
\v 26 Naꞌ beṉəꞌ chzenag xtižaꞌanəꞌ pero bito choneꞌ canꞌ nanṉəꞌ, gwxaquəꞌəlebeneꞌ ca to beṉəꞌ faḻs beṉəꞌ ben ližeꞌenəꞌ faḻs bzoeꞌen lao yox.
\v 27 Naꞌ goc yeɉw zil juisy, gwyec̱hɉ beꞌ bdonꞌ naꞌ bchoɉchgua yao naꞌ beyožən ganꞌ zo ližeꞌenəꞌ. Nach bebix̱ən gwžiayiꞌin. Naꞌ catəꞌ gwžeꞌenəꞌ xte gwṉiṉ.
\p
\v 28 Naꞌ catəꞌ beyož beꞌ Jesoꞌosənꞌ dižəꞌ caꞌ, beṉəꞌ zan caꞌ gwseꞌene xtižeꞌenəꞌ besyəꞌəbanchgüeineꞌ canꞌ bsed bloꞌineꞌ.
\v 29 Naꞌ canꞌ bzeɉniꞌineꞌ ḻegaꞌaqueꞌ nacbiaꞌ de que napəcheꞌ yeḻəꞌ chnabiaꞌ cle ca beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ.
\c 8
\s1 Jesoꞌosənꞌ beyoneꞌ to beṉəꞌ cheꞌi yižgüeꞌ deꞌen neꞌ ḻepr
\p
\v 1 Beṉəꞌ zan zesyəꞌənaogüeꞌ Jesoꞌosənꞌ catəꞌ beyetɉeꞌ yaꞌanəꞌ.
\v 2 Nach to beṉəꞌ cheꞌi yižgüeꞌ deꞌen neꞌ ḻepr bgüigueꞌe lao Jesoꞌosənꞌ naꞌ bzo xibeꞌ laogüeꞌenəꞌ gožeꞌeneꞌ: —X̱anaꞌ gonšguei ben par nic̱h yeyacdaꞌ.
\p
\v 3 Nach Jesoꞌosənꞌ bḻi neꞌenəꞌ gwdaneꞌeneꞌ gožeꞌeneꞌ: —Guaquəczə, beyaque.
\p Naꞌ ḻeꞌe beyactei beꞌenəꞌ.
\v 4 Nach Jesoꞌosənꞌ gožeꞌeneꞌ: —Ni tozə cui no güeꞌelenoꞌ dižəꞌ ca naquə nga babenaꞌ len leꞌ. Gwyeɉ lao bx̱ozənꞌ nic̱h leꞌineꞌ bac̱h beyacdoꞌ. Naꞌ bnežɉueꞌ bia yix̱əꞌ goteꞌ lao Diozənꞌ canꞌ non deꞌe Moisezənꞌ mendad par nic̱h yesəꞌəṉeze beṉəꞌ de que babeyacdoꞌonəꞌ.
\s1 Jesoꞌosənꞌ beyoneꞌ xmos capitan beṉəꞌ Roma
\p
\v 5 Naꞌ catəꞌ bežin Jesoꞌosənꞌ Capernaunṉəꞌ ḻeꞌe bšagte to capitan beṉəꞌ Roma ḻeꞌ. Naꞌ gotəꞌəyoineꞌ Jesoꞌosənꞌ
\v 6 gožeꞌeneꞌ: —X̱anaꞌ, xmosaꞌan dieꞌ ližaꞌanəꞌ, chacšenchgüeineꞌ. Nat cuerp c̱heꞌenəꞌ naꞌ ḻechguaḻe chžaglaogüeꞌ.
\p
\v 7 Nach Jesoꞌosənꞌ gožeꞌ capitanṉəꞌ: —Saꞌalenaꞌ leꞌ naꞌ yeyonaꞌaneꞌ.
\p
\v 8 Pero naꞌ capitanṉəꞌ gožeꞌeneꞌ: —X̱anaꞌ, bito zacaꞌa par saꞌo ližaꞌanəꞌ. Ngatezə ben mendad yeyaque xmosaꞌanəꞌ nach yeyaqueneꞌ.
\v 9 Reinꞌ chnabiꞌe nadaꞌ pero ḻeczə nitəꞌ soḻdad c̱hiaꞌ caꞌ naꞌ chnabiꞌagaꞌacaꞌaneꞌ naꞌ chosoꞌozenagueꞌ c̱hiaꞌ. Catəꞌ chapaꞌa toeꞌ: “Gwyeɉ”, naꞌ cheɉeꞌ, naꞌ catəꞌ chapaꞌa yetoeꞌ: “Da nga”, naꞌ chideꞌ. Nach catəꞌ chapaꞌa xmosaꞌanəꞌ: “Deꞌe nga gonoꞌ”, naꞌ choneꞌen. Con benšga mendad naꞌ ṉezdaꞌ gaquə canꞌ naꞌonəꞌ.
\p
\v 10 Naꞌ Jesoꞌosənꞌ bebaneneꞌ catəꞌ beneneꞌ xtižəꞌ capitanṉəꞌ, naꞌ gožeꞌ beṉəꞌ caꞌ nao ḻeꞌenəꞌ: —Deꞌe ḻiczə əchniaꞌ leꞌe, notono beṉəꞌ ṉeꞌe žɉətiꞌa beṉəꞌ gonḻilažəꞌətec nadaꞌ ca benga. Ni tozə beṉəꞌ Izrael cui chonḻilažəꞌ nadaꞌ ca ḻeꞌ.
\v 11 Echniaꞌ leꞌe, beṉəꞌ zan žaꞌ doxenḻə yežlyonꞌ soꞌonḻilažeꞌe nada, naꞌ ḻegaꞌaqueꞌ žɉəsyəꞌəniteꞌe txen len deꞌe x̱axtaꞌocho Abraanṉəꞌ naꞌ deꞌe x̱axtaꞌocho Isaaquənꞌ, naꞌ deꞌe x̱axtaꞌocho Jacobənꞌ yobanꞌ ganꞌ zo Diozənꞌ chnabiꞌe.
\v 12 Naꞌ ca naquə ṉasyon Izrael c̱hechonꞌ leꞌen gwleɉ Diozənꞌ par ṉabiꞌe, əchoɉ beṉəꞌ zan bito soꞌe latɉə ṉabiꞌe ḻegaꞌaqueꞌ. Deꞌe naꞌanəꞌ əseḻeꞌe ḻegaꞌaqueꞌ lao yiꞌ gabiḻənꞌ ganꞌ yesəꞌəbežyašeꞌe naꞌ saꞌoyeɉə leygaꞌaqueꞌenəꞌ.
\p
\v 13 Gwde gwna Jesoꞌosənꞌ caꞌ nach gožeꞌ capitanṉəꞌ: —Guaquə yeyeɉoꞌ. Babeyonaꞌ xmosoꞌonəꞌ, c̱hedəꞌ cheɉḻiꞌo c̱hiaꞌ.
\p Naꞌ xmos capitanṉəꞌ lao or naꞌ ḻeꞌe beyacteineꞌ.
\s1 Jesoꞌosənꞌ beyoneꞌ taobinꞌ c̱he Bedənꞌ
\p
\v 14 Naꞌ gwyeɉ Jesoꞌosənꞌ liž Bedənꞌ naꞌ bleꞌineꞌ taobinꞌ c̱he Bedənꞌ dieꞌ lao camənꞌ, naꞌ yoꞌe deꞌe ḻanꞌ.
\v 15 Jesoꞌosənꞌ bex̱eꞌe neꞌenəꞌ naꞌ ḻeꞌe bechoɉteꞌ deꞌe ḻanꞌ. Nach ḻeꞌe gwyaste noꞌolənꞌ beneꞌ deꞌe gwsaꞌogüeꞌ.
\s1 Jesoꞌosənꞌ beyoneꞌ beṉəꞌ zan
\p
\v 16 Naꞌ catəꞌ gwx̱en, besəꞌəžin beṉəꞌ ganꞌ zo Jesoꞌosənꞌ zɉənc̱heꞌe beṉəꞌ zan zɉəyoꞌo zɉəyaz deꞌe x̱ioꞌ yic̱hɉlaꞌaždaꞌogaꞌaqueꞌenəꞌ. Jesoꞌosənꞌ con beneꞌ mendad naꞌ besyəꞌəchoɉ deꞌe x̱ioꞌ caꞌ. Naꞌ beyoneꞌ yoguəꞌ beṉəꞌ caꞌ chsaꞌacšenenəꞌ.
\v 17 Canꞌ beneꞌ par nic̱h goc complir canꞌ bzoɉ deꞌe profet Isaiazənꞌ c̱heꞌ canaꞌ, nan: “Ḻeꞌenəꞌ yequeꞌe deꞌen chžaglaocho naꞌ goneꞌ ca yeyaquecho c̱he yoguəꞌ yižgüeꞌ.”
\s1 Canꞌ gož Jesoꞌosənꞌ beṉəꞌ caꞌ gwseꞌene žɉaꞌaclen ḻeꞌ
\p
\v 18 Gwde naꞌ bleꞌi Jesoꞌosənꞌ babesəꞌəžin beṉəꞌ zan zɉənyec̱hɉeꞌ ḻeꞌ, nach beneꞌ mendad len disipl c̱heꞌ caꞌ yesəꞌəḻagueꞌe yešḻaꞌalə nisdaꞌonəꞌ.
\v 19 Naꞌ bchoɉ to benꞌ chsed chloꞌi ḻei deꞌen bzoɉ deꞌe Moisezənꞌ nach bgüigueꞌe lao Jesoꞌosənꞌ naꞌ gožeꞌeneꞌ: —Maestr, gwzaꞌalenaꞌ leꞌ gatəꞌətezə šeɉoꞌ.
\p
\v 20 Naꞌ par nic̱h beꞌenəꞌ benyaṉeꞌe xbab šə deꞌe ḻiczə cheꞌeneneꞌ šeɉleneꞌ ḻeꞌ, naꞌ Jesoꞌosənꞌ gožeꞌeneꞌ: —Zɉəde liž becoyoꞌo caꞌ naꞌ ḻeczə zɉəde liž bia caꞌ zo x̱ileꞌe bia chaš yoba, pero nadaꞌ bitobi xlatɉaꞌ de ganꞌ gonaꞌ dezcanz ḻaꞌaṉəꞌəczə bseḻəꞌ Diozənꞌ nadaꞌ golɉaꞌ beṉac̱h.
\p
\v 21 Naꞌ bchoɉ yeto benꞌ nao deꞌen chsed chloꞌi Jesoꞌosənꞌ naꞌ gožeꞌeneꞌ: —X̱anaꞌ, gwzaꞌalenaꞌ leꞌ pero zguaꞌatec beꞌešga latɉə yegaꞌaṉlenaꞌ x̱aꞌanəꞌ xte catəꞌəch əžin ža gateꞌ naꞌ əgwcuašaꞌaneꞌ.
\p
\v 22 Jesoꞌosənꞌ gožeꞌeneꞌ: —Da len nadaꞌ. Beṉəꞌ caꞌ zɉənaquə len yic̱hɉlaꞌaždaꞌogaꞌaquenꞌ ca beṉəꞌ guat guaquə yesəꞌəcuašeꞌe beṉəꞌ guat caꞌ.
\s1 Jesoꞌosənꞌ gwlecžieꞌ to beꞌ gual lao nisdaonꞌ
\p
\v 23 Gwde beꞌ Jesoꞌosənꞌ dižəꞌ caꞌ, gwyoꞌe ḻoꞌo barconꞌ len disipl c̱heꞌ caꞌ.
\v 24 Naꞌ lao zda barconꞌ gwtas Jesoꞌosənꞌ. Naꞌ gwzolao gwyec̱hɉ to beꞌ gual lao nisdaꞌonəꞌ, naꞌ gwzolao chož nisənꞌ ḻoꞌo barconꞌ.
\v 25 Nach bosyoꞌosbaneꞌ Jesoꞌosənꞌ gwseꞌeneꞌ: —¡X̱antoꞌ! ¡Bosla chioꞌo! ¡Bac̱h chbiayiꞌicho!
\p
\v 26 Nach Jesoꞌosənꞌ gožeꞌ ḻegaꞌaqueꞌ: –Bito žeble. Ḻeꞌe šeɉḻeꞌech c̱hiaꞌ.
\p Nach gwyaseꞌ ṉeꞌe chas chatəꞌ nisdaꞌonəꞌ nach beneꞌ mendad besyəꞌəbeꞌeži nisdaꞌonəꞌ len beꞌenəꞌ, naꞌ ḻeꞌe besyəꞌəbeꞌežiten.
\v 27 Naꞌ disipl c̱heꞌ caꞌ besyəꞌəbaneneꞌ canꞌ beneꞌenəꞌ, nach gwseꞌ lɉuežɉgaꞌaqueꞌ: —Bitolɉa naquə benga con to beṉac̱hzə, laꞌ ¿nacxa gon to beṉac̱h par yebecžieꞌ beꞌ gualənꞌ len nisdaꞌonəꞌ?
\s1 C̱hopə beṉəꞌ Gadara zɉəyoꞌo zɉəyaz deꞌe x̱ioꞌ yic̱hɉlaꞌaždaꞌogaꞌaquenꞌ
\p
\v 28 Naꞌ besəꞌəžineꞌ yešḻaꞌalə nisdaꞌonəꞌ, laž beṉəꞌ Gadara caꞌ. Naꞌ catəꞌ besyəꞌəchoɉeꞌ barconꞌ, besəꞌəšag c̱hopə beṉəꞌ Jesoꞌosənꞌ, beṉəꞌ zɉəyoꞌo zɉəyaz deꞌe x̱ioꞌ ḻoꞌo yic̱hɉlaꞌaždaꞌogaꞌaquenꞌ. Beṉəꞌ quinga banitəꞌəteꞌ capsant naꞌ chesəꞌəchoɉeꞌ chašeꞌ do tnezənꞌ gaḻəꞌəzə capsantənꞌ chsoꞌoneꞌ znia juisy len beṉəꞌ chesəꞌəžagueꞌ, naꞌ caguə no chac ta tnezənꞌ.
\v 29 Naꞌ deꞌe x̱ioꞌ caꞌ gwsoꞌosyaꞌan gwseꞌen Jesoꞌosənꞌ: —Partlə leꞌ, naꞌ partlə netoꞌ, Jesoꞌos Xiꞌiṉ Dioz. ¿Ezaꞌo par əgwc̱hiꞌi əgwsacoꞌo netoꞌ catəꞌ cuiṉəꞌ əžin ža əžin or par siꞌitoꞌ castigw?
\p
\v 30 Naꞌ gaḻəꞌəzə chaš beṉəꞌ chosoꞌoyeꞌ coš zan.
\v 31 Nach deꞌe x̱ioꞌ caꞌ gwsaꞌatəꞌəyoin Jesoꞌosənꞌ gwseꞌen ḻeꞌ: —Šə yebeɉoꞌ netoꞌ yic̱hɉlaꞌaždaoꞌ beṉəꞌ quinga, güeꞌešgoꞌ latɉə žɉəyežoꞌotoꞌ ḻoꞌo laꞌaždaoꞌ coš caꞌ.
\p
\v 32 Nach gož Jesoꞌosənꞌ ḻegaꞌaquən: —Ḻeyechoɉ.
\p Nach besyəꞌəchoɉən yic̱hɉlaꞌaždaoꞌ beṉəꞌ caꞌ naꞌ ɉəsyəꞌəžoꞌon ḻoꞌo laꞌaždaoꞌ coš caꞌ. Nach besyəꞌədiṉses coš caꞌ ḻeꞌe yaꞌa ganꞌ chašəbənꞌ naꞌ ɉəsyəꞌəxopəb ḻoꞌo nisdaꞌonəꞌ, naꞌ gwsaꞌatəb gwseꞌeɉəb nisənꞌ.
\p
\v 33 Naꞌ beṉəꞌ caꞌ chosəꞌəyeꞌ coš caꞌ besaꞌacdoeꞌ naꞌ besyəꞌəžineꞌ syodanꞌ, ɉəsyəꞌədix̱ɉueꞌineꞌ beṉəꞌ laoꞌ syodanꞌ yoguəꞌ canꞌ bagoc naꞌ canꞌ babesyəꞌəyaque beṉəꞌ caꞌ zɉəyoꞌo zɉəyaz deꞌe x̱ioꞌonəꞌ yic̱hɉlaꞌaždaꞌogaꞌaqueꞌenəꞌ.
\v 34 Nach yoguəꞌ beṉəꞌ caꞌ žaꞌ syodanꞌ ɉaꞌaqueꞌ ganꞌ zo Jesoꞌosənꞌ. Naꞌ catəꞌ besəꞌəžagueꞌ Jesoꞌosənꞌ gwsaꞌatəꞌyoineꞌ ḻeꞌ yezeꞌe lažgaꞌaqueꞌenəꞌ.
\c 9
\s1 Beyon Jesoꞌosənꞌ to beṉəꞌ nat to part cuerp c̱heꞌenəꞌ
\p
\v 1 Nach Jesoꞌosənꞌ beyoꞌe to ḻoꞌo barcw len disipl c̱heꞌ caꞌ naꞌ besyəꞌəḻagueꞌe yešḻaꞌalə nisdaꞌonəꞌ par besyəꞌəžineꞌ Capernaum ganꞌ bazoczeꞌ.
\v 2 Naꞌ besəꞌəžin x̱oṉɉ beṉəꞌ naꞌ zɉənḻeneꞌ to beṉəꞌ nat to part cuerp c̱heꞌenəꞌ, zɉənx̱oeꞌeneꞌ to lao cam daoꞌ. Caꞌ naquə gocbeꞌi Jesoꞌosənꞌ de que gwsoꞌonḻilažeꞌeneꞌ, nach gožeꞌ beṉəꞌ güeꞌenəꞌ: —Bebei, xiꞌiṉdaoguaꞌa. Babeziꞌixenaꞌ xtoḻoꞌonəꞌ.
\p
\v 3 Naꞌ baḻə beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwseꞌeneneꞌ deꞌen gož Jesoꞌosənꞌ beṉəꞌ güeꞌenəꞌ, naꞌ gwsoꞌoneꞌ xbab ḻoꞌo yic̱hɉlaꞌaždaꞌogaꞌaqueꞌenəꞌ gosəꞌəneꞌ: —Benga chžia chniteꞌe Diozənꞌ laogüe deꞌen chon cuineꞌ ca Diozənꞌ.
\p
\v 4 Jesoꞌosənꞌ gocbeꞌineꞌ xbabənꞌ chsoꞌoneꞌenəꞌ, nach gožeꞌ ḻegaꞌaqueꞌ: —¿Bixc̱henꞌ chonḻe xbab malənꞌ caꞌ ḻoꞌo yic̱hɉlaꞌaždaꞌolenꞌ?
\v 5 Šə con yapaꞌaneꞌ de que babeziꞌixenaꞌ xtoḻeꞌenəꞌ, bito ṉezele šə napaꞌ yeḻəꞌ gwnabiaꞌ par yeziꞌixenaꞌan. Pero šə yapaꞌaneꞌ: “Gwyas naꞌ gwda”, guatəꞌəbiaꞌ šə napaꞌ yeḻəꞌ gwnabiaꞌ par gaquə canꞌ niaꞌanəꞌ.
\v 6 Diozənꞌ bseḻeꞌe nadaꞌ golɉaꞌ beṉac̱h naꞌ deꞌe nganꞌ gonaꞌ par nic̱h əṉezele de que napaꞌ yeḻəꞌ gwnabiaꞌ lao yežlyo nga par yeziꞌixenaꞌ xtoḻəꞌ beṉac̱hənꞌ.
\p Nach gožeꞌ beṉəꞌ güeꞌenəꞌ: —Gwyas beyoa xcamoꞌonəꞌ naꞌ beyeɉ ližoꞌonəꞌ to šaoꞌ to güen.
\p
\v 7 Naꞌ beyas beꞌenəꞌ, bezeꞌe zɉəyedeꞌ ližeꞌ.
\v 8 Naꞌ beṉəꞌ caꞌ besəꞌəleꞌi canꞌ goquənꞌ, ḻechguaḻe besəꞌəžebeꞌ. Naꞌ gwsoꞌelaogüeꞌe Diozənꞌ ca naquə beneꞌ yeḻəꞌ guac par nic̱h Jesoꞌosənꞌ goc beneꞌ deꞌe caꞌ zɉənac caꞌ.
\s1 Jesoꞌosənꞌ gwleɉeꞌ Mationꞌ par goqueꞌ disipl c̱heꞌ
\p
\v 9 Gwde naꞌ bezaꞌ Jesoꞌosənꞌ naꞌ bleꞌineꞌ to beṉəꞌ goc̱hixɉw naꞌ leꞌ Matio, chiꞌe latɉə ganꞌ chc̱hixɉueꞌenəꞌ. Naꞌ Jesoꞌosənꞌ gožeꞌeneꞌ: —Da len nadaꞌ.
\p Naꞌ Mationꞌ ḻeꞌe gwzožaꞌateꞌ gwyeɉleneꞌ ḻeꞌ.
\p
\v 10 Naꞌ goquənꞌ chiꞌ Jesoꞌosənꞌ liž Mationꞌ len disipl c̱heꞌ caꞌ chsaꞌogüeꞌ. Naꞌ nitəꞌ beṉəꞌ zan beṉəꞌ goc̱hixɉw caꞌ naꞌ nochlə beṉəꞌ güen deꞌe mal caꞌ chsaꞌoleneꞌ ḻegaꞌaqueꞌ.
\v 11 Naꞌ beṉəꞌ fariseo caꞌ catəꞌ besəꞌəleꞌineꞌ chiꞌ Jesoꞌosənꞌ txen len beṉəꞌ güen deꞌe mal caꞌ, gwseꞌe disipl c̱heꞌ caꞌ: —Malənꞌ chon maestr c̱helenꞌ cheꞌeɉ chaogüeꞌ txen len beṉəꞌ goc̱hixɉw caꞌ naꞌ nochlə beṉəꞌ güen deꞌe mal beṉəꞌ cui chonḻentoꞌ txen.
\p
\v 12 Naꞌ catəꞌ Jesoꞌosənꞌ beneneꞌ xtižəꞌəgaꞌaqueꞌenəꞌ, naꞌ gožeꞌ ḻegaꞌaqueꞌ: —Beṉəꞌ cui chsaꞌacšene bito chəsəꞌəyažɉeneꞌ beṉəꞌ güen rmech. Beṉəꞌ caꞌ chsaꞌacšene ḻegaꞌaqueꞌenəꞌ chəsəꞌəyažɉeneꞌ beṉəꞌ güen rmech.
\v 13 Ḻešeɉ naꞌ ḻegwsed bi zeɉe Xtižəꞌ Diozənꞌ deꞌen nyoɉən nan: “Cheꞌendaꞌ yeyašəꞌ yežiꞌilažəꞌəle beṉəꞌ, caguə tlaozə gotle bia yix̱əꞌ par güeꞌelaꞌole nadaꞌ.” Zaꞌa zedəyenaꞌ par nic̱h beṉəꞌ caꞌ zɉəṉezeneꞌ de que zɉənaqueꞌ beṉəꞌ güen deꞌe mal yesyəꞌədiṉɉeneꞌ xtoḻəꞌəgaꞌaqueꞌenəꞌ, pero bito zedəyenaꞌ par nic̱h beṉəꞌ caꞌ chsaꞌaqueneꞌ bazɉənaqueꞌ beṉəꞌ güen yesyəꞌədiṉɉeneꞌ xtoḻəꞌəgaꞌaqeꞌenəꞌ.
\s1 Chəsəꞌəṉabeneꞌ Jesoꞌosənꞌ bixc̱henꞌ disipl c̱heꞌ caꞌ cui chəsəꞌəniteꞌe sin cui əseꞌeɉ əsaꞌogüeꞌ
\p
\v 14 Nach disipl c̱he Juan benꞌ bc̱hoa nis gosəꞌəbigueꞌe lao Jesoꞌosənꞌ, naꞌ gwseꞌeneꞌ: —Zan las beṉəꞌ fariseo caꞌ naꞌ netoꞌ chzotoꞌ sin cui cheꞌeɉ chaotoꞌ par choꞌelaꞌotoꞌ Diozənꞌ. Pero disipl c̱hioꞌ caꞌ chseꞌeɉ chsaꞌogüeꞌ. ¿Bixc̱henꞌ ža?
\p
\v 15 Nach Jesoꞌosənꞌ gožeꞌ ḻegaꞌaqueꞌ: —Catəꞌ chac to yeḻəꞌ gošagnaꞌ beṉəꞌ migw c̱he beꞌenəꞌ chšagnaꞌanəꞌ bito chəsyəꞌəgüineꞌeneꞌ sino chseꞌeɉ chsaꞌogüeꞌ. Naꞌ caꞌaczənꞌ naquən len nadaꞌ naꞌ len disipl c̱hiaꞌ caꞌ, chseꞌeɉ chsaꞌogüeꞌ lao ṉeꞌe zoaꞌ len ḻegaꞌaqueꞌ. Catəꞌəchənꞌ əžin ža yesəꞌəc̱heꞌex̱ax̱ɉ beṉəꞌ contr c̱hiaꞌ caꞌ nadaꞌ canaꞌachənꞌ əchoɉ catəꞌ cuich əseꞌeɉ əsaꞌo disipl c̱hiaꞌ caꞌ.
\p
\v 16 Notono beṉəꞌ zo beṉəꞌ chc̱hineꞌ to pedas lachəꞌ cuiṉəꞌ x̱oa nis par yodaꞌ xa goleꞌenəꞌ deꞌen bac̱h chyoe. Šə canꞌ goneꞌ, catəꞌ c̱hib xeꞌenəꞌ yebeꞌ lachəꞌ cobənꞌ naꞌ əc̱hezəchən ḻen.
\v 17 Naꞌ ḻeczə notono zo beṉəꞌ chgueꞌe bino cobənꞌ ḻoꞌo yid golənꞌ. Šə goneꞌ caꞌ, bino cobənꞌ əc̱hezəꞌən yid golənəꞌ naꞌ lalɉə binonꞌ naꞌ cuiayiꞌ yidənꞌ. Cle laꞌ cheyaḻəꞌ queꞌe bino cobənꞌ ḻoꞌo yid cobə, par nic̱h caꞌ bito cuiayiꞌ binonꞌ naꞌ yidənꞌ.
\p Gožeꞌ ḻegaꞌaqueꞌ caꞌ par nic̱h bzeɉniꞌineꞌ de que bito gaquə yesəꞌənaogüeꞌ costombr golə c̱hegaꞌaqueꞌenəꞌ naꞌ yesəꞌənaotieꞌ deꞌen chsed chloꞌineꞌ.
\s1 Jesoꞌosənꞌ beyoneꞌ xiꞌiṉ Jaironꞌ naꞌ noꞌolənꞌ gwdan lox xadoṉ c̱heꞌenəꞌ
\p
\v 18 Naꞌ ṉeꞌe choꞌete Jesoꞌosənꞌ dižəꞌ quinga, bžin to beṉəꞌ gwnabiaꞌ bzo xibeꞌ lao Jesoꞌosənꞌ naꞌ gožeꞌeneꞌ: —Zeꞌe gotte to xiꞌiṉaꞌ noꞌolə. Yoꞌošga canoꞌoboꞌ, naꞌ yebamboꞌ.
\p
\v 19 Naꞌ ḻeꞌe gwzožaꞌate Jesoꞌosənꞌ naꞌ txen len disipl c̱heꞌ caꞌ ɉaꞌacleneꞌ beṉəꞌ gwnabianꞌ.
\v 20 Naꞌ lao zɉaꞌaqueꞌ liž beṉəꞌ gwnabianꞌ ɉənao to noꞌolə ḻegaꞌaqueꞌ, beṉəꞌ bagoc šižiṉ iz chzoeꞌ bguaꞌa. Naꞌ beneꞌ byen bgüigueꞌe cožəꞌ Jesoꞌosənꞌ gwdaneꞌ lox xadoṉ c̱heꞌenəꞌ.
\v 21 Laꞌ beneꞌ xbab ḻoꞌo yic̱hɉlaꞌaždaꞌogüeꞌenəꞌ, gwneꞌ: “Con canaꞌ xadoṉ c̱heꞌenəꞌ, goyacczədaꞌ.”
\v 22 Naꞌ gwyec̱hɉ Jesoꞌosənꞌ, bleꞌineꞌ noꞌolənꞌ, naꞌ gožeꞌeneꞌ: —Bebei xiꞌiṉdaoguaꞌa. Babeyacdoꞌ c̱hedəꞌ chonḻilažoꞌo nadaꞌ.
\p Naꞌ ḻeꞌe begaꞌate yižgüeꞌ deꞌen cheꞌi noꞌolənꞌ.
\p
\v 23 Catəꞌ bžin Jesoꞌosənꞌ liž beṉəꞌ gwnabianꞌ, naꞌ bleꞌineꞌ beṉəꞌ zan zɉəžaꞌ naꞌ nitəꞌ beṉəꞌ chəsəꞌəcuež ca bžeɉo, naꞌ beṉəꞌ caꞌ žaꞌanəꞌ chəsəꞌəbežchgüeꞌ.
\v 24 Naꞌ gožeꞌ ḻegaꞌaqueꞌ: —Ḻeꞌe yechoɉ ngalə. Bito nacboꞌ biꞌi guat, con chtasboꞌonəꞌ.
\p Pero naꞌ beṉəꞌ caꞌ gwsoꞌonḻeꞌe c̱heꞌ.
\v 25 Naꞌ beyož besyəꞌəbeɉeꞌ beṉəꞌ caꞌ fuerlə, nach gwyoꞌo Jesoꞌosənꞌ, bex̱eꞌe naꞌ biꞌi noꞌolə guat daꞌonəꞌ, naꞌ beyasboꞌ.
\v 26 Naꞌ ca naquə deꞌe güenṉəꞌ deꞌen ben Jesoꞌosənꞌ gosəꞌ gwlalɉə dižəꞌənəꞌ yoguəꞌ yež caꞌ zɉəchiꞌ do naꞌ.
\s1 Jesoꞌosənꞌ beyoneꞌ c̱hopə beṉəꞌ lc̱hoḻ
\p
\v 27 Naꞌ catəꞌ bezaꞌ Jesoꞌosənꞌ len disipl c̱heꞌ caꞌ, ɉəsəꞌənao c̱hopə beṉəꞌ lc̱hoḻ ḻegaꞌaqueꞌ. Naꞌ gwsaꞌatəꞌəyoineꞌ ḻeꞌ gosəꞌəṉeꞌ zižɉo gosəꞌəneꞌ: —Leꞌ nacoꞌ xiꞌiṉ dia c̱he deꞌe Rei Dabi. Beyašəꞌəlažəꞌəšguei netoꞌ.
\p
\v 28 Naꞌ catəꞌ bežin Jesoꞌosənꞌ len disipl c̱heꞌ caꞌ ližeꞌenəꞌ naꞌ besyəꞌəyoꞌe, naꞌ ḻeczə gwsoꞌo beṉəꞌ lc̱hoḻ caꞌ. Nach Jesoꞌosənꞌ gožeꞌ ḻegaꞌaqueꞌ: —¿Echeɉḻeꞌele de que guac gonaꞌ par nic̱h yeleꞌilenꞌ?
\p Nach gwseꞌeneꞌ: —Cheɉḻeꞌetoꞌ X̱antoꞌ.
\p
\v 29 Nach Jesoꞌosənꞌ gwdaneꞌ ɉlaogaꞌaqueꞌenəꞌ, naꞌ gožeꞌ ḻegaꞌaqueꞌ: —Yeleꞌile, c̱hedəꞌ chonḻilažəꞌəle nadaꞌ.
\p
\v 30 Nach besyəꞌəleꞌineꞌ. Naꞌ Jesoꞌosənꞌ beneꞌ mendad cui no əsoꞌeleneꞌ dižəꞌ ca naquə beneꞌ par nic̱h besyəꞌəleꞌineꞌ.
\p
\v 31 Bixa naꞌ besaꞌaqueꞌ naꞌ gatəꞌətezə ɉaꞌaqueꞌ doxen Galileanꞌ ɉəsyəꞌəyeꞌeleneꞌ beṉəꞌ dižəꞌ ca naquə deꞌen baben Jesoꞌosənꞌ len ḻegaꞌaqueꞌ.
\s1 Jesoꞌosənꞌ beyoneꞌ to beṉəꞌ mod
\p
\v 32 Naꞌ catəꞌ besaꞌac beṉəꞌ caꞌ babesyəꞌəleꞌinəꞌ, ḻeꞌe besəꞌəžinte beṉəꞌ yoblə zɉənc̱heꞌe to beṉəꞌ mod, naꞌ yoꞌo yaz deꞌe x̱ioꞌonəꞌ yic̱hɉlaꞌaždaꞌogüeꞌenəꞌ.
\v 33 Jesoꞌosənꞌ bebeɉeꞌ deꞌe x̱iꞌonəꞌ naꞌ ḻeꞌe benete beꞌenəꞌ. Naꞌ beṉəꞌ zan caꞌ besəꞌəleꞌi canꞌ goquənꞌ besyəꞌəbanchgüeineꞌ, naꞌ gosəꞌəneꞌ: —Chioꞌo beṉəꞌ Izrael deꞌe nechənꞌ bableꞌicho ca naquə miḻagr deꞌen chon benga.
\p
\v 34 Pero naꞌ beṉəꞌ fariseo caꞌ gosəꞌəneꞌ: —Gwxiyeꞌ deꞌen chnabiaꞌ deꞌe x̱ioꞌ caꞌanəꞌ chaclenən ḻeꞌ par nic̱h chebeɉeꞌ deꞌe x̱iꞌonəꞌ.
\s1 Jesoꞌosənꞌ cheyašəꞌ chežiꞌilažeꞌe beṉac̱hənꞌ
\p
\v 35 Naꞌ Jesoꞌosənꞌ len disipl c̱heꞌ caꞌ ɉaꞌaqueꞌ yoꞌodaoꞌ c̱he to to yež naꞌ to to syoda ganꞌ mbane Galileanꞌ naꞌ gwdix̱ɉueꞌineꞌ beṉəꞌ dižəꞌ güen dižəꞌ cobənꞌ canꞌ ṉabiaꞌ Diozənꞌ notəꞌətezə beṉəꞌ soꞌe latɉə. Naꞌ beyoneꞌ yoguəꞌ beṉəꞌ ca chsaꞌacšene len bitəꞌətezə yižgüeꞌ deꞌen chseꞌineꞌ.
\v 36 Naꞌ Jesoꞌosənꞌ bleꞌineꞌ beṉəꞌ zan caꞌ zɉəsəꞌənao ḻeꞌ naꞌ beyašəꞌ bežiꞌilažeꞌe ḻegaꞌaqueꞌ c̱hedəꞌ gocbeꞌineꞌ chsaꞌacžeɉlažeꞌe naclənꞌ soꞌoneꞌ naꞌ gocbeꞌineꞌ caguə no zo no gaquəlen ḻegaꞌaqueꞌ len yoguəꞌ deꞌen chəsəꞌəžaglaogüeꞌenəꞌ. Gwsaꞌaqueꞌ ca xiləꞌ bianꞌ cui no x̱angaꞌaquəb zo par əgwyeꞌ ḻegaꞌaquəb.
\v 37 Nach gožeꞌ disipl c̱heꞌ caꞌ: —Nitəꞌ beṉəꞌ zan beṉəꞌ yosoꞌozenagueꞌ c̱he Diozənꞌ catəꞌ seꞌeneneꞌ xtižeꞌenəꞌ. Naꞌ gwxaquəꞌəlebəgaꞌaqueꞌ ca to cwseš xen deꞌen chetobaꞌ. Naꞌ chyažɉdaꞌ beṉəꞌ zan əsaꞌacleneꞌ nadaꞌ, laꞌ to c̱hopgale nitəꞌ.
\v 38 Deꞌe naꞌanəꞌ ḻeṉabe X̱ancho Diozənꞌ əseḻəꞌəcheꞌ beṉəꞌ zanch par əsaꞌacleneꞌ chioꞌo yetobcho cwseš c̱heꞌenəꞌ.
\c 10
\s1 Jesoꞌosənꞌ gwleɉeꞌ beṉəꞌ šižiṉ caꞌ par əsaꞌaqueꞌ apostol
\p
\v 1 Jesoꞌosənꞌ betobeꞌ disipl c̱heꞌ caꞌ šižiṉ naꞌ bnežɉueꞌ ḻegaꞌaqueꞌ yeḻəꞌ guac par nic̱h əsaꞌaqueꞌ yesyəꞌəbeɉeꞌ deꞌe x̱ioꞌ zɉəyoꞌo zɉəyaz ḻoꞌo yic̱hɉlaꞌaždaoꞌ beṉəꞌ, naꞌ par nic̱h əsaꞌaqueꞌ yesyəꞌəyoneꞌ beṉəꞌ bitəꞌətezə yižgüeꞌ deꞌen chseꞌineꞌ naꞌ bitəꞌətezəchlə deꞌe chsaꞌaqueneꞌ.
\p
\v 2 Quinga zɉəle beṉəꞌ šižiṉ caꞌ: Simon benꞌ ḻeczə leꞌ Bed, naꞌ Ndres beṉəꞌ bišəꞌ Bedənꞌ, naꞌ xiꞌiṉ Sebedeonꞌ Jacob len Juanṉəꞌ,
\v 3 naꞌ Lip naꞌ Bartolome, naꞌ Tomas, naꞌ Matio benꞌ goquə beṉəꞌ goc̱hixɉw, naꞌ Jacob xiꞌiṉ Alfeo, naꞌ Lebeo, benꞌ ḻeczə leꞌ Tadeo,
\v 4 naꞌ Simonṉəꞌ benꞌ ben txen len partid Cananistənꞌ, naꞌ Jod Iscariot benꞌ bdieꞌ Jesoꞌosənꞌ lao naꞌ beṉəꞌ contr caꞌ.
\s1 Jesoꞌosənꞌ bseḻeꞌe disipl c̱heꞌ caꞌ šižiṉ ɉəsəꞌədix̱ɉuiꞌe xtižeꞌenəꞌ
\p
\v 5 Naꞌ catəꞌ Jesoꞌosənꞌ bseḻeꞌe beṉəꞌ šižiṉ quinga ɉəsəꞌədix̱ɉuiꞌe xtižəꞌ Diozənꞌ, gožeꞌ ḻegaꞌaqueꞌ: —Chseḻaꞌa leꞌe žɉeꞌele xtižəꞌ Diozənꞌ len yeziquəꞌəchlə beṉəꞌ Izrael caꞌ. Naꞌ bito əžɉaꞌacle laž beṉəꞌ caꞌ cui zɉənaquə beṉəꞌ Izrael, naꞌ nic əžɉaꞌacle yež caꞌ zɉəchiꞌ Samarianꞌ.
\v 6 Ḻeꞌe žɉaꞌac porzə ganꞌ žaꞌ beṉəꞌ Izrael beṉəꞌ bazɉəmbiayiꞌ c̱hedəꞌ bitoṉəꞌ soꞌombiꞌe Diozənꞌ.
\v 7 Ḻeꞌe žɉaꞌac naꞌ ḻeꞌe žɉətix̱ɉueꞌe de que babžin ža Diozənꞌ benꞌ zo yobanꞌ ṉabiꞌe con notəꞌətezə beṉəꞌ əsoꞌe latɉə.
\v 8 Ḻeꞌe yeyon beṉəꞌ chsaꞌacšene, naꞌ ḻeꞌe yeyon beṉəꞌ caꞌ chseꞌi yižgüeꞌ deꞌen neꞌ ḻepr, naꞌ ḻeꞌe yosban no beṉəꞌ bagwsaꞌat, naꞌ ḻeꞌe yebeɉ deꞌe x̱ioꞌ zɉəyoꞌo zɉəyaz ḻoꞌo yic̱hɉlaꞌaždaoꞌ beṉəꞌ. Diozənꞌ babeṉeꞌ leꞌe yeḻəꞌ guac c̱heꞌenəꞌ dadzə par gonḻe deꞌe quinga, deꞌe naꞌanəꞌ ḻeꞌe gaclen beṉəꞌ caꞌ dadzə.
\p
\v 9 Bitobi gonḻe probnid guaꞌale, ni mech de or, de pḻat, o de cobr ḻoꞌo bols mech c̱helenꞌ lao coꞌole nezənꞌ.
\v 10 Naꞌ nic guaꞌale bsod, o yeto xcamisle, nic guaꞌale yel, naꞌ nic gox̱əꞌəle garrot. Ca naquə leꞌe chonḻe xšinaꞌanəꞌ zaquəꞌəle par goṉ beṉəꞌ deꞌe yeꞌeɉ gaole ganꞌ seḻaꞌa leꞌenəꞌ.
\p
\v 11 Naꞌ gatəꞌətezə syoda o yež ganꞌ əžinḻe, ḻeṉab šə zo to beṉəꞌ güen beṉəꞌ yebei əgüialaogüeꞌe leꞌe ližeꞌenəꞌ. Naꞌ naꞌatezə sole xte catəꞌəch yesaꞌacle.
\v 12 Naꞌ catəꞌ əžinḻe ližeꞌenəꞌ, ḻeꞌe gguapeꞌ diox, naꞌ ḻeꞌe ṉablažəꞌ so cuezeꞌ binḻo len yic̱hɉlaꞌaždaꞌogüeꞌenəꞌ.
\v 13 Naꞌ šə naꞌ nitəꞌ beṉəꞌ chseꞌeneneꞌ yesəꞌəzo yesəꞌəbezəgaꞌaqueꞌ binḻo len yic̱hɉlaꞌaždaꞌogaꞌaqueꞌenəꞌ, naꞌ gaquə canꞌ əṉablažəꞌəle par yesəꞌəzo yesəꞌəbezəgaꞌaqueꞌ binḻo. Pero šə bito no zo no chon ca so cuezeꞌ binḻo len yic̱hɉlaꞌaždaꞌogüeꞌenəꞌ, bito gaquə ca deꞌen bagwṉablažəꞌəlenꞌ.
\v 14 Naꞌ gatəꞌətezə əžinḻe ga cui nono yebei əgüialao leꞌe, naꞌ nic əgwzenagueꞌ c̱hele, ḻeꞌe yesaꞌac liž beꞌenəꞌ o yežənꞌ. Naꞌ catəꞌ yesaꞌaclenꞌ, əgwsiꞌiṉs ṉiꞌalenꞌ par yežib bištenꞌ deꞌen gwžianṉəꞌ, nic̱h əgwloꞌile beṉəꞌ caꞌ de que deꞌe malənꞌ chsoꞌoneꞌ cui chesəꞌəzenagueꞌ xtižəꞌ Diozənꞌ deꞌen choꞌelenꞌ.
\v 15 Diozənꞌ beneꞌ par byiṉɉ yiꞌ naꞌ sofr lao syoda Sodomanꞌ naꞌ syoda Gomorranꞌ por ni c̱he deꞌen cui bosoꞌozenagueꞌ c̱heꞌ. Naꞌ deꞌe ḻi əchniaꞌ leꞌe, catəꞌ əžin ža gon Diozənꞌ castigw zeɉḻicaṉe c̱he yoguəꞌ beṉəꞌ chsoꞌon deꞌe malənꞌ, beṉəꞌ caꞌ cui yosəꞌəgüialao leꞌe yesəꞌəzaquəꞌəziꞌicheꞌ clezə ca beṉəꞌ caꞌ gwnitəꞌ Sodomanꞌ naꞌ Gomorranꞌ.
\s1 Gaquə deꞌe saquəꞌəziꞌicho
\p
\v 16 Ḻeꞌe gon xbab de que nadaꞌ əseḻaꞌa leꞌe žɉətix̱ɉueꞌele xtižaꞌanəꞌ len beṉəꞌ caꞌ gwxaquəꞌəlebe ca bež, naꞌ leꞌe gwxaquəꞌəlebele ca xiləꞌ daoꞌ ladɉogaꞌaqueꞌenəꞌ, c̱hedəꞌ beṉəꞌ caꞌ seꞌeneneꞌ soꞌoteꞌ leꞌe canꞌ chsoꞌon bež caꞌ chsoꞌotəb xiləꞌ daoꞌ. Pero leꞌe cheyaḻəꞌ gacle ḻechguaḻe beṉəꞌ xenḻažəꞌ naꞌ ḻechguaḻe beṉəꞌ bib par len ḻegaꞌaqueꞌ.
\v 17 Nitəꞌ beṉəꞌ soꞌone leꞌe lao naꞌ beṉəꞌ gwnabiaꞌ caꞌ por ni c̱he deꞌen chonḻilažəꞌəle nadaꞌ naꞌ yesəꞌəyineꞌ leꞌe ḻoꞌo yoꞌodaoꞌ c̱hegaꞌaqueꞌ caꞌ. Deꞌe naꞌanəꞌ ḻeꞌe c̱hilɉlažəꞌ naclənꞌ gonḻe par nic̱h cui gacle lao naꞌ beṉəꞌ contr caꞌ.
\v 18 Nach ḻeczə por ni c̱he deꞌen chonḻilažəꞌəle nadaꞌ nitəꞌ beṉəꞌ yesəꞌəc̱heꞌex̱ax̱ɉeꞌ leꞌe lao no goberṉador, naꞌ lao no rei. Naꞌ catəꞌ gaquə caꞌ güeꞌele xtižaꞌanəꞌ lao beṉəꞌ gwnabiaꞌ caꞌ, beṉəꞌ Izrael len beṉəꞌ cui zɉənaquə beṉəꞌ Izrael.
\v 19 Pero catəꞌ yesəꞌəc̱heꞌex̱ax̱ɉeꞌ leꞌe lao beṉəꞌ caꞌ, bito cuec yic̱hɉle nac yožiꞌile xtižəꞌəgaꞌaqueꞌenəꞌ. Lao or naꞌatezə Diozənꞌ əgwzeɉniꞌineꞌ leꞌe binꞌ cheyaḻəꞌ əṉale.
\v 20 Laꞌ caguə leꞌezənꞌ güeꞌele xtižaꞌanəꞌ, Spirit c̱he X̱acho Diozənꞌ əgwzeɉniꞌin leꞌe binꞌ cheyaḻəꞌ ṉale.
\p
\v 21-22 Naꞌ yoguəꞌ beṉəꞌ caꞌ cui zɉənombiaꞌ Diozənꞌ yesəꞌəgueꞌineꞌ leꞌe c̱hedəꞌ chonḻilažəꞌəle nadaꞌ, naꞌ xte no bišəꞌəle naꞌ no x̱ale soꞌoneꞌ leꞌe lao naꞌ beṉəꞌ par nic̱h soꞌoteꞌ leꞌe, naꞌ ḻeczə xte no xiꞌinḻe soꞌoneꞌ leꞌe lao naꞌ beṉəꞌ caꞌ soꞌot leꞌe. Pero šə sotezə sole gonḻilažəꞌəle nadaꞌ xte catəꞌəch əžin ža gatle, nachənꞌ žɉəyezole len Diozənꞌ.
\v 23 Šə beṉəꞌ nitəꞌ to yež yesyəꞌəlagueꞌ leꞌe, ḻeꞌe yesaꞌactele naꞌ žɉəyaꞌacle ga yoblə. Diozənꞌ bseḻeꞌe nadaꞌ golɉaꞌ beṉac̱h, naꞌ deꞌe ḻi chniaꞌ leꞌe bitoṉəꞌ yeyož güeꞌele xtižaꞌa lao yoguəꞌ beṉəꞌ Izrael caꞌ catəꞌən yidaꞌ deꞌe yoblə.
\p
\v 24 Ṉezele canꞌ naquən catəꞌ to beṉəꞌ chsedeꞌ len to maestr, bito əṉacho naqueꞌ beṉəꞌ blaoch ca maestrənꞌ, naꞌ to mos bito naqueꞌ blaoch ca x̱aneꞌenəꞌ.
\v 25 Naꞌ benꞌ chsed bito cheyaḻəꞌ goneꞌ xbab soꞌon beṉəꞌ güench len ḻeꞌ cle ca chsoꞌoneꞌ len maestr c̱heꞌenəꞌ. Ḻeꞌegatezə caꞌ mosənꞌ bito cheyaḻəꞌ goneꞌ xbab soꞌon beṉəꞌ güench len ḻeꞌ cle ca chsoꞌoneꞌ len x̱aneꞌenəꞌ. Nitəꞌ beṉəꞌ chesəꞌəneꞌ chonaꞌ txen len deꞌen chnabiaꞌ deꞌe x̱ioꞌ caꞌ deꞌen le Beelsebo. Nadanꞌ nacaꞌ X̱anḻe naꞌ naquəchxe yesəꞌəneꞌ c̱he leꞌe nacle disipl c̱hiaꞌ.
\s1 Cheyaḻəꞌ žebcho castigw deꞌen goṉ Diozənꞌ chioꞌo
\p
\v 26 Naꞌ ḻaꞌaṉəꞌəczə yosoꞌoc̱hiꞌ yosoꞌosaquəꞌ beṉəꞌ leꞌe laogüe deꞌen cui chseꞌeɉniꞌineꞌ de que chonḻe canꞌ cheneꞌe Diozənꞌ bito žeble ḻegaꞌaqueꞌ. Guaquə canꞌ na dicho deꞌen na: “Yoguəꞌəḻoḻ deꞌen ngašəꞌ ṉaꞌa gwžin ža laꞌalaon, naꞌ yoguə əḻoḻ deꞌe cui no gwseꞌeɉniꞌi antslə ḻeczə gwžin ža seꞌeɉniꞌi beṉəꞌ ḻen.”
\v 27 Deꞌe zan deꞌen chsed chloꞌidaꞌ leꞌe deꞌen cui chsed chloꞌidaꞌ yeziquəꞌəchlə beṉəꞌ. Naꞌ leꞌe ža, ḻegwsed ḻegwloꞌin yoguəꞌəḻoḻ beṉəꞌ, naꞌ ḻeꞌe gon par nic̱h beṉəꞌ zan seꞌeɉniꞌineꞌen.
\v 28 Bito cheyaḻəꞌ žeble beṉəꞌ caꞌ soꞌot leꞌe, c̱hedəꞌ ḻegaꞌaqueꞌ bito gaquə bi soꞌoneneꞌ yic̱hɉlaꞌaždaꞌolenꞌ. Cheyaḻəꞌ žeble Diozənꞌ, laꞌ ḻenꞌ napeꞌ yeḻəꞌ chnabiaꞌ par əgwžiayiꞌe cuerp c̱helenꞌ len yic̱hɉlaꞌaždaꞌolenꞌ ḻoꞌo yiꞌ gabiḻənꞌ.
\p
\v 29 Ṉezecho de que byiṉ daoꞌ caꞌ bitobi zɉəzaquəꞌətequəb, pero bito ṉacho tob gat sin cui əṉeze X̱acho Diozənꞌ.
\v 30 Naꞌ ca naquə chioꞌo ža, deꞌe tant chaque Diozənꞌ c̱hecho xte ṉezeneꞌ baḻə yišəꞌ yic̱hɉ to tocho žia ḻaꞌaṉəꞌəczə ṉezecho bito bi zɉəzaquəꞌ yišəꞌ yic̱hɉchonꞌ.
\v 31 Deꞌe naꞌanəꞌ bito žeble, c̱hedəꞌ zaquəꞌəch leꞌe cle ca bia zan byiṉ daoꞌ.
\s1 Cheyaḻəꞌ güeꞌecho dižəꞌ len beṉəꞌ de que nombiꞌacho Jesocristənꞌ
\p
\v 32 Naꞌ notəꞌətezle šə choꞌele dižəꞌ len beṉac̱hənꞌ de que cheɉḻeꞌele c̱hiaꞌ, ḻeczə caꞌ nadaꞌ guaꞌa dižəꞌ len X̱aꞌanəꞌ benꞌ zo yobanꞌ de que nacle xiꞌiṉaꞌ.
\v 33 Naꞌ notəꞌətezle šə choꞌele dižəꞌ len beṉac̱hənꞌ de que bito cheɉḻeꞌele c̱hiaꞌ, ḻeczə caꞌ nadaꞌ guaꞌa dižəꞌ len X̱aꞌanəꞌ benꞌ zo yobanꞌ de que bito nacle xiꞌiṉaꞌ.
\s1 Yesəꞌədiḻə beṉəꞌ por ni c̱he deꞌen bidə Jesoꞌosənꞌ
\p
\v 34 Bito gonḻe xbab de que beṉəꞌ žaꞌ yežlyo nga yesəꞌəzo yesəꞌəbezeꞌ binḻo len lɉuežɉgaꞌaqueꞌ laogüe deꞌen bidaꞌ. Bito yesəꞌəzo yesəꞌəbezeꞌ binḻo len lɉuežɉgaꞌaqueꞌ laogüe deꞌen bidaꞌ sino yesəꞌədiḻeꞌ.
\v 35 Laogüe deꞌen babidaꞌ yediḻə beṉəꞌ byo len x̱eꞌenəꞌ naꞌ noꞌolənꞌ len xneꞌenəꞌ, naꞌ yediḻə xoꞌoliž beṉəꞌ len taobinꞌ c̱heꞌenəꞌ.
\v 36 Entr ḻoꞌo yoꞌozəgaꞌaqueꞌ yesyəꞌəniteꞌe contr.
\p
\v 37 Notəꞌətezle šə chaquele c̱he x̱ale o c̱he xnaꞌale mazəchlə canꞌ chaquele c̱hiaꞌ nadaꞌ bito zaquəꞌəle par gacle disipl c̱hiaꞌ. Ḻeꞌegatezə caꞌ šə chaquele c̱he xiꞌiṉle mazəchlə canꞌ chaquele c̱hiaꞌ ḻeczə bito zaquəꞌəle par gacle disipl c̱hiaꞌ.
\v 38 Naꞌ notəꞌətezle šə laogüe deꞌen chaquele yosoꞌoc̱hiꞌ yosoꞌosaquəꞌ beṉəꞌ leꞌe o soꞌoteꞌ leꞌe to ḻeꞌe yag coroz deꞌe nanꞌ bito chonḻilažəꞌəle nadaꞌ, bito zaquəꞌəle par gacle disipl c̱hiaꞌ šə caꞌ.
\v 39 Notəꞌətezə beṉəꞌ chaqueneꞌ goneꞌ par nic̱h cui c̱hiꞌ saqueꞌe o par nic̱h cui no soꞌot ḻeꞌ, beꞌenanꞌ cuiayiꞌ. Naꞌ notəꞌətezə beṉəꞌ chsanḻažəꞌ cuineꞌ c̱hiꞌ saqueꞌe o soꞌot beṉəꞌ ḻeꞌ por ni c̱hiaꞌ, beꞌenanꞌ əbaneꞌ zeɉḻicaṉe.
\s1 Beṉəꞌ caꞌ ṉitəꞌ mbalaz catəꞌ yesyəꞌəžineꞌ yobanꞌ
\p
\v 40 Notəꞌətezə beṉəꞌ yebeineꞌ güialaogüeꞌ leꞌe nacle disipl c̱hiaꞌ, nadəꞌəczanꞌ yebeineꞌ güialaogüeꞌ šə caꞌ. Naꞌ šə yebeineꞌ güialaogüeꞌ nadaꞌ ḻeczə Dioz naꞌanəꞌ əgüialaogüeꞌ, Dioz benꞌ bseḻəꞌ nadaꞌ.
\v 41 Beṉəꞌ caꞌ chsoꞌe xtižəꞌ Diozənꞌ, mbalaz gaquə c̱hegaꞌaqueꞌ catəꞌən yesyəꞌəžineꞌ yobanꞌ, naꞌ notəꞌətezə beṉəꞌ yebeineꞌ güialaogüeꞌ ḻegaꞌaqueꞌ, ḻeczə mbalaz soeꞌ catəꞌən yežineꞌ yobanꞌ. Naꞌ mbalaz gaquə c̱he beṉəꞌ caꞌ chsoꞌon canꞌ chazlažəꞌ Diozənꞌ catəꞌən yesyəꞌəžineꞌ yobanꞌ. Naꞌ notəꞌətezə beṉəꞌ yebeineꞌ güialaogüeꞌ ḻegaꞌaqueꞌ, ḻeczə mbalaz soeꞌ catəꞌən yežineꞌ yobanꞌ.
\v 42 Notəꞌətezə beṉəꞌ chnežɉueꞌ ḻaꞌaṉəꞌ tbaszə nis yeꞌeɉ beꞌenəꞌ chonḻilažəꞌ nadaꞌ, deꞌe liczə gonaꞌ ca soeꞌ mbalaz catəꞌən yežineꞌ yobanꞌ, ḻaꞌaṉəꞌəczə benꞌ bnežɉueꞌ nisənꞌ cuitec bi zaqueꞌe len beṉac̱hənꞌ.
\c 11
\s1 Juanṉəꞌ bseḻeꞌe c̱hopə disipl c̱heꞌ ganꞌ zo Jesoꞌosənꞌ
\p
\v 1 Catəꞌ beyož ben Jesoꞌosənꞌ mendad canꞌ soꞌon disipl c̱heꞌ caꞌ šižiṉ, bezeꞌe latɉənꞌ. Naꞌ gwyeɉeꞌ yež caꞌ zɉəchiꞌ do naꞌ ɉəsed ɉəloꞌineꞌ xtižəꞌ Diozənꞌ len beṉəꞌ caꞌ žaꞌanəꞌ.
\p
\v 2 Naꞌ ca naquə Juanṉəꞌ benꞌ bc̱hoa beṉəꞌ nis, lao dieꞌ ližyanꞌ beneneꞌ dižəꞌ ca naquə yoguəꞌ deꞌen chon Jesoꞌosənꞌ benꞌ bseḻəꞌ Diozənꞌ par chacleneꞌ ṉasyon Izraelənꞌ, nach Juanṉəꞌ bseḻeꞌe c̱hopə disipl c̱heꞌ caꞌ ganꞌ zo Jesoꞌosənꞌ,
\v 3 ɉseꞌežeꞌeneꞌ: —¿Elenꞌ benꞌ naquən əseḻəꞌ Diozənꞌ o šə sotoꞌ lez yidə beṉəꞌ yoblənꞌ?
\p
\v 4 Nach Jesoꞌosənꞌ gožeꞌ ḻegaꞌaqueꞌ: —Ḻeꞌe žɉəyaꞌac naꞌ ḻeꞌe žɉəyeyež Juanṉəꞌ doxen canꞌ chenele naꞌ canꞌ chleꞌile chonaꞌ.
\v 5 Bableꞌile chonaꞌ par nic̱h baḻə beṉəꞌ lc̱hoḻ chesyəꞌəleꞌineꞌ, naꞌ baḻə beṉəꞌ coj chesyəꞌədeꞌ, naꞌ yebaḻə beṉəꞌ cuež chesyəꞌəyeneneꞌ. Naꞌ ḻeczə bableꞌile benaꞌ par nic̱h baḻə beṉəꞌ gwseꞌi yižgüeꞌ deꞌen neꞌ ḻepr babesyəꞌəyaqueneꞌ. Bableꞌile bosbanaꞌ baḻə beṉəꞌ guat, naꞌ babenele choꞌa dižəꞌ güen dižəꞌ cobə c̱hiaꞌanəꞌ len beṉəꞌ yašəꞌ caꞌ.
\v 6 Mbalaz zo beṉəꞌ cheɉḻeꞌe de que Diozənꞌ bseḻeꞌe nadaꞌ.
\p
\v 7 Nach catəꞌ besyəꞌəsaꞌac disipl c̱he Juanṉəꞌ, nach Jesoꞌosənꞌ beꞌeleneꞌ beṉəꞌ caꞌ zɉəndobənꞌ xtižəꞌ Juanṉəꞌ, gožeꞌ ḻegaꞌaqueꞌ: —¿Nacxa naquə benꞌ ɉəleꞌitgüeiczele latɉə dašənꞌ? ¿Ešayec̱hə šayen chaqueꞌ? Bito.
\v 8 ¿Nacxanꞌ goqueꞌ catəꞌ ɉəleꞌileneꞌ? ¿Enyazeꞌ lachəꞌ šaoꞌ? ¿Ešə bito? laꞌ beṉəꞌ caꞌ zɉənyaz lachəꞌ šaoꞌ niteꞌe yoꞌo güenchgua ca no liž rei.
\v 9 ¿Noxanꞌ ɉəleꞌilenꞌ ža? ¿Eto profet benꞌ choꞌe xtižəꞌ Diozənꞌ? Deꞌe ḻi naqueꞌ to profet. Pero əchniaꞌ leꞌe, caguə con to profetənꞌ.
\v 10 C̱he benganꞌ nyoɉən ḻeꞌe Xtižəꞌ Diozənꞌ nan:
\q1 Nadaꞌ Dioz əseḻaꞌa to beṉəꞌ cuialaogüeꞌ güeꞌe xtižoꞌonəꞌ
\q1 par nic̱h ṉitəꞌ beṉəꞌ probnid par əsoꞌelaogüeꞌe leꞌ catəꞌən yidoꞌ.
\m
\v 11 Deꞌe ḻi əchniaꞌ leꞌe, notono no beṉac̱h ṉeꞌe so beṉəꞌ naquəch beṉəꞌ blaoch ca Juan benꞌ chc̱hoa beṉəꞌ nis. Naꞌ notəꞌətezəchlə beṉəꞌ güeꞌe latɉə ṉabiaꞌ Diozənꞌ ḻeꞌ, ḻaꞌaṉəꞌəczə bito naqueꞌ beṉəꞌ blao, gwžin ža catəꞌ šeɉniꞌicheneꞌ c̱hiaꞌ clezə ca Juanṉəꞌ.
\p
\v 12 Dezd catəꞌən gwzolao Juanṉəꞌ gwdix̱ɉuiꞌe xtižəꞌ Diozənꞌ naꞌ bc̱hoꞌe beṉəꞌ nis xte ža ṉeža beṉəꞌ zan chosoꞌozenagueꞌ xtižəꞌ Diozənꞌ naꞌ chəsəꞌəyilɉlažeꞌe naclə soꞌoneꞌ par nic̱h ṉabiaꞌ Diozənꞌ ḻegaꞌaqueꞌ.
\v 13 Catəꞌ cuiṉəꞌ solao gwzene Juanṉəꞌ xtižəꞌ Diozənꞌ, con ḻei deꞌen bzoɉ deꞌe Moisezənꞌ naꞌ deꞌen bosoꞌozoɉ yoguəꞌ profet caꞌ, deꞌe caꞌazənꞌ bzeɉniꞌin chioꞌo c̱he Diozənꞌ.
\v 14 Xtižəꞌ Diozənꞌ deꞌen nyoɉən nan de que yeto beṉəꞌ yedəyen canꞌ ben Ḻiazənꞌ benꞌ beꞌ xtižəꞌ Diozənꞌ canaꞌ. Naꞌ c̱he Juan naꞌanəꞌ bosoꞌozoɉeꞌ žaləꞌ šeɉḻeꞌele.
\v 15 Ḻeꞌe žia nagle deꞌe chene, ḻegwzenag xtižaꞌanəꞌ.
\p
\v 16 ¿Nac əgwsaquəꞌəlebetgüeidaꞌ leꞌe mbanḻe ṉaꞌa? Egwsaquəꞌəlebedaꞌ leꞌe ca bidaoꞌ c̱hedəꞌ cuiczə bi de žleb c̱hele. Ca naquə bidaoꞌ caꞌ catəꞌ nitəꞌəboꞌ do ganꞌ chac yaꞌa chseꞌ lɉuežɉgaꞌacboꞌ:
\v 17 “Bentoꞌ ḻegr, bito gwyoꞌolažəꞌəle, naꞌ babentoꞌ bgüine bgüež, peor.”
\v 18 Juanṉəꞌ bideꞌ laole nga. Bito güeꞌeɉ gwdaošaogüeꞌe canꞌ chseꞌeɉ chsaꞌo beṉəꞌ yoblə. Nach gwnale c̱heꞌ: “Yoꞌo yaz deꞌe x̱ioꞌonəꞌ yic̱hɉlaꞌaždaogüeꞌenəꞌ.”
\v 19 Naꞌ nadaꞌ, Diozənꞌ bseḻeꞌe nadaꞌ golɉaꞌ beṉac̱h. Naꞌ chleꞌile cheꞌeɉ chaoguaꞌ canꞌ cheꞌeɉ chaole. Naꞌ nale c̱hiaꞌ de que nacaꞌ beṉəꞌ lia naꞌ beṉəꞌ güeꞌezo, naꞌ ḻeczə nale de que nacaꞌ migw c̱he beṉəꞌ goc̱hixɉw caꞌ naꞌ migw c̱he yeziquəꞌəchlə beṉəꞌ caꞌ chsoꞌon deꞌe mal. Pero naꞌ nacbiaꞌ de que Dioz naꞌanəꞌ naqueꞌ ḻeꞌezelaogüe beṉəꞌ sinꞌ por ni c̱he canꞌ chsoꞌon beṉəꞌ caꞌ chosoꞌozenag c̱heꞌ.
\s1 Yež caꞌ ganꞌ cui bosoꞌozenagueꞌ c̱he Jesoꞌosənꞌ
\p
\v 20 Nach Jesoꞌosənꞌ beꞌe xtižəꞌ beṉəꞌ caꞌ žaꞌ yež caꞌ ganꞌ beneꞌ deꞌe zan deꞌe zaquəꞌ yesyəꞌəbaneneꞌ, naꞌ gwdiḻeꞌ ḻegaꞌaqueꞌ c̱hedəꞌ bito besyəꞌədiṉɉeneꞌ xtoḻəꞌəgaꞌaqueꞌ. Nach gwneꞌ:
\v 21 —¡Probchguazə leꞌe beṉəꞌ Corasin! ¡Probchguazə leꞌe beṉəꞌ Betsaida! Beṉəꞌ caꞌ nitəꞌ Tiro naꞌ Sidon ḻeꞌe besyəꞌədiṉɉteineꞌ xtoḻəꞌəgaꞌaqueꞌenəꞌ žaləꞌ bloꞌigaꞌacdaꞌaneꞌ yeḻəꞌ guac c̱hiaꞌanəꞌ ca deꞌen babloꞌidaꞌ leꞌe. Žaləꞌ goquə caꞌ, saꞌazlɉeꞌ lachəꞌ zešəꞌ naꞌ zosəꞌəžaꞌalɉa cuingaꞌaqueꞌ de par nic̱h saꞌacbeꞌi beṉəꞌ de que babesyəꞌədiṉɉeneꞌ xtoḻəꞌəgaꞌaqueꞌenəꞌ.
\v 22 Echniaꞌ leꞌe saquəꞌəziꞌichle clezə ca beṉə! caꞌ nitəꞌ Tiro naꞌ Sidon catəꞌ əžin ža gon Diozənꞌ castigw zeɉḻicaṉe c̱he yoguəꞌ beṉəꞌ chsoꞌon deꞌe malənꞌ.
\v 23 Leꞌe nitəꞌəle Capernaunṉəꞌ, chonḻe xbabənꞌ de que Diozənꞌ goṉchgüeꞌ leꞌe yeḻəꞌ balaꞌaṉ, pero bito goṉeꞌ leꞌe yeḻəꞌ balaꞌaṉ, sino goṉeꞌ leꞌe castigw zeɉḻicaṉe deꞌen cui cheɉḻeꞌele c̱hiaꞌ. Žaləꞌ benaꞌ deꞌe zaquəꞌ yesyəꞌəbane beṉəꞌ caꞌ gwnitəꞌ Sodomanꞌ canꞌ babenaꞌ laole nga, besyəꞌədiṉɉeneꞌ xtoḻəꞌəgaꞌaqueꞌenəꞌ žaləꞌ caꞌ naꞌ ṉeꞌe chiꞌ syodanꞌ žaləꞌ caꞌ.
\v 24 Echniaꞌ leꞌe, saquəꞌəziꞌichle clezə ca beṉəꞌ caꞌ gwnitəꞌ Sodomanꞌ catəꞌ əžin ža gon Diozənꞌ castigw zeɉḻicaṉe c̱he yoguəꞌ beṉəꞌ chsoꞌon deꞌe malənꞌ.
\s1 Beṉəꞌ caꞌ soꞌonḻilažəꞌ Jesoꞌosənꞌ ṉiteꞌe mbalaz
\p
\v 25 Naꞌ lao orənꞌ Jesoꞌosənꞌ beneꞌ orasyon lao Diozənꞌ gwneꞌ: —X̱aꞌ, lenꞌ chnabiꞌo beṉəꞌ žaꞌ yobanꞌ naꞌ yežlyonꞌ. Naꞌ choṉaꞌ yeḻəꞌ chox̱cwlen c̱hioꞌ de que babzeɉniꞌidoꞌ baḻə beṉəꞌ canꞌ cheꞌendoꞌ soꞌe latɉə ṉabiꞌo yic̱hɉlaꞌaždaꞌogaꞌaqueꞌenəꞌ. Bzeɉniꞌidoꞌon beṉəꞌ caꞌ gwsaꞌacbeꞌi chəsəꞌəyažɉeneꞌ no əgwsed əgwloꞌi ḻegaꞌaqueꞌ naꞌ bito bzeɉniꞌidoꞌon beṉəꞌ caꞌ chsoꞌon xbab de que zɉənaqueꞌ beṉəꞌ sinꞌ naꞌ beṉəꞌ zɉənyeɉniꞌi.
\v 26 Benoꞌ caꞌ ža X̱aꞌ, c̱hedəꞌ canꞌ gwyazlažoꞌo.
\p
\v 27 Nach gožeꞌ beṉəꞌ caꞌ žaꞌanəꞌ: —X̱aꞌanəꞌ babeneꞌ lao naꞌa chonaꞌ par nic̱h chombiaꞌ beṉəꞌ ḻeꞌ. Ḻeꞌ nombiꞌayaṉeꞌe nadaꞌ, naꞌ nadaꞌ nombiꞌayaṉaꞌa ḻeꞌ. Naꞌ beṉəꞌ caꞌ bagwleɉaꞌ par zɉənombiꞌe X̱aꞌanəꞌ, chonaꞌ par nic̱h zɉənombiꞌeneꞌ naꞌ notono no nochlə zɉənombiaꞌ X̱aꞌanəꞌ naꞌ ni nadaꞌ.
\v 28 Ḻegonḻilažəꞌ nadaꞌ, leꞌe zole trist tant pesad chaquele chonḻe yoguəꞌ deꞌe caꞌ chəsəꞌəneꞌ cheneꞌe Diozənꞌ gonḻe. Nadaꞌ gonaꞌ ca sole mbalaz.
\v 29 Ḻegon canꞌ nonaꞌ mendad gonḻe naꞌ ḻegwzenag deꞌen əgwzeɉniꞌidaꞌ leꞌe. Nadaꞌ nacaꞌ beṉəꞌ xenḻažəꞌ naꞌ beṉəꞌ gax̱ɉwlažəꞌ naꞌ gonaꞌ ca sole mbalaz ḻoꞌo yic̱hɉlaꞌaždaꞌolenꞌ.
\v 30 Naꞌ deꞌen nonaꞌ mendad gonḻe bito naquən pesad, naꞌ deꞌen chsed chloꞌidaꞌ bito naquən zdebə.
\c 12
\s1 Bosoꞌolec̱hɉ disipl caꞌ trigonꞌ ža dezcanzənꞌ par gwsaꞌogüeꞌen
\p
\v 1 Naꞌ gozaquən to ža dezcanz Jesoꞌosənꞌ gwdieꞌ len disipl c̱heꞌ caꞌ ganꞌ nyaž trigonꞌ, naꞌ disipl c̱heꞌ caꞌ gosəꞌədoneꞌ, nach gosəꞌəlec̱hɉeꞌ trigonꞌ naꞌ gwsaꞌogüeꞌen.
\v 2 Naꞌ besəꞌəleꞌi baḻə beṉəꞌ fariseo caꞌ canꞌ gwsoꞌon disipl caꞌ, naꞌ gwseꞌe Jesoꞌosənꞌ: —Bgüiašc canꞌ chsoꞌon disipl c̱hioꞌ caꞌ žin deꞌe cui de lsens goncho ža dezcanzənꞌ.
\p
\v 3 Nach gož Jesoꞌosənꞌ beṉəꞌ fariseo caꞌ: —¿Ecabi zaꞌalažəꞌəle deꞌen bablable canꞌ ben deꞌe Rei Dabinꞌ catəꞌ ḻeꞌ naꞌ beṉəꞌ lɉuežɉeꞌ caꞌ gosəꞌədoneꞌ?
\v 4 Gwyeɉeꞌ ḻoꞌo yoꞌodaoꞌ əblaonəꞌ nach gwdaogüeꞌ yetxtil deꞌen bazɉəncuaꞌ bx̱oz caꞌ par Diozənꞌ, naꞌ Dabinꞌ bnežɉueꞌen gwsaꞌo beṉəꞌ lɉuežɉeꞌ caꞌ ḻaꞌaṉəꞌəczə cui zɉənaqueꞌ bx̱oz. Naꞌ yetxtilənꞌ cui de lsens par gao con to beṉəꞌ ḻen letg bx̱oz caꞌ chac saꞌogüeꞌen.
\v 5 ¿Enaꞌ cabi zaꞌalažəꞌəle ca deꞌen bablable ḻeꞌe ḻei deꞌen bzoɉ deꞌe Moisezənꞌ canꞌ chsoꞌonczə bx̱oz caꞌ mendad c̱he yoꞌodaꞌonəꞌ yoguəꞌ ža dezcanz naꞌ bito chsoꞌombaꞌaṉeꞌ žanəꞌ. Naꞌ bito ṉacho de que zɉənapeꞌ doḻəꞌ por ni c̱he deꞌen chsoꞌoneꞌ mendadənꞌ ža dezcanzənꞌ.
\v 6 Echniaꞌ leꞌe, nadaꞌ zoaꞌ nga zaquəꞌəchaꞌ cle ca yoꞌodaoꞌ əblaonəꞌ.
\v 7 Xtižəꞌ Diozənꞌ deꞌen nyoɉən nan: “Cheꞌendaꞌ yeyašəꞌ yežiꞌilažəꞌəle beṉəꞌ, caguə tlaozə gotle bia yix̱əꞌ par güeꞌelaꞌole nadaꞌ.” Žaləꞌ cheɉniꞌile bi zeɉenṉəꞌ bitolɉa əṉale c̱he disipl c̱hiaꞌ quinga de que zɉənapeꞌ doḻəꞌ por ni c̱he šə binꞌ bagwsoꞌoneꞌ ža dezcanzənꞌ.
\v 8 Echniaꞌ leꞌe de que Diozənꞌ bseḻeꞌe nadaꞌ golɉaꞌ beṉac̱h naꞌ naquən lao naꞌa əṉiaꞌ binꞌ naquən güen goncho ža dezcanzənꞌ.
\s1 Beyaque to beṉəꞌ mbižə šḻaꞌa neꞌenəꞌ
\p
\v 9 Naꞌ catəꞌ Jesoꞌosənꞌ bezeꞌe latɉənꞌ, naꞌ gwyoꞌe to ḻoꞌo yoꞌodaoꞌ c̱hechonꞌ.
\v 10 Naꞌ ḻoꞌo yoꞌodaoꞌ naꞌ zo to beṉəꞌ bambižə šḻaꞌa neꞌenəꞌ, nach beṉəꞌ fariseo caꞌ gwseꞌe Jesoꞌosənꞌ: —¿Ede lsens par yeyoncho beṉəꞌ xiṉɉ lao ža dezcanzənꞌ?
\p Gwseꞌeneꞌ caꞌ nic̱h əžel deꞌen yesəꞌədeꞌineꞌ par əsaꞌogüeꞌ xya contr Jesoꞌosənꞌ.
\p
\v 11 Nach Jesoꞌosənꞌ gožeꞌ ḻegaꞌaqueꞌ: —Šə nitəꞌ xiləꞌ daoꞌ c̱hele naꞌ əxopə tob ḻoꞌo yech zitɉw lao ža dezcanzənꞌ, ¿əcabi ḻeꞌe yebeɉteleb ḻoꞌo yechənꞌ lao žanəꞌ?
\v 12 Naꞌ ḻechguaḻe zaquəꞌəch to beṉəꞌ cle ca to xiləꞌ daoꞌ. Naꞌ əchniaꞌ leꞌe de lsens gaquəlencho beṉəꞌ lao ža dezcanzənꞌ.
\p
\v 13 Nach Jesoꞌosənꞌ gožeꞌ beꞌenəꞌ mbižə neꞌinəꞌ: —Bḻi naꞌonəꞌ.
\p Nach catəꞌ bḻi naꞌ beꞌenəꞌ ḻeꞌe beyacten canꞌ naquə deꞌen yešḻaꞌa.
\v 14 Naꞌ beṉəꞌ fariseo caꞌ, catəꞌ besaꞌaqueꞌ yoꞌodaꞌonəꞌ bosoꞌoxiꞌe naclə soꞌoneꞌ par soꞌoteꞌ Jesoꞌosənꞌ.
\s1 To deꞌen bzoɉ deꞌe profet Isaiazənꞌ c̱he Jesoꞌosənꞌ
\p
\v 15 Gocbeꞌi Jesoꞌosənꞌ canꞌ bosoꞌoxiaꞌ beṉəꞌ fariseo caꞌ, naꞌ gwzeꞌe gwyeɉeꞌ ga yoblə. Beṉəꞌ zan ɉəsəꞌənaogüeꞌeneꞌ nach Jesoꞌosənꞌ beyoneꞌ beṉəꞌ caꞌ chsaꞌacšene.
\v 16 Naꞌ beneꞌ mendad cui no əsoꞌeleneꞌ dižəꞌ de que Dioz nanꞌ bseḻeꞌeneꞌ par gaquəleneꞌ ṉasyon c̱hegaꞌaqueꞌenəꞌ.
\v 17 Beneꞌ caꞌ par nic̱h goc complir canꞌ bzoɉ deꞌe profet Isaiazənꞌ c̱heꞌ nan:
\q1
\v 18 Benganꞌ naqueꞌ xmosaꞌ, benꞌ gwleɉaꞌ par goneꞌ canꞌ chazlažaꞌanəꞌ.
\q1 Chacchgüeidaꞌ c̱heꞌ, naꞌ cheba chezaquəꞌəlažaꞌa len ḻeꞌ.
\q1 Naꞌ nadaꞌ əseḻaꞌa Spirit c̱hiaꞌanəꞌ sotezə son len ḻeꞌ.
\q1 Naꞌ beṉəꞌ zɉənaquə beṉəꞌ Izrael len beṉəꞌ cui zɉənaquə beṉəꞌ Izrael c̱hix̱ɉueꞌineꞌ ḻegaꞌaqueꞌ naquənꞌ cheyaḻəꞌ soꞌoneꞌ.
\q1
\v 19 Bito gaquəyožeꞌ beṉəꞌ, nic gosyeꞌe,
\q1 naꞌ nic əṉeꞌ zižɉo lao lqueyənꞌ par əseꞌene beṉəꞌ binꞌ neꞌ.
\q1
\v 20 Gwnežɉueꞌ fuers balor c̱he beṉəꞌ caꞌ chsaꞌacbeꞌi cui bi fuers balor c̱hegaꞌaqueꞌ de par soꞌoneꞌ deꞌe güen,
\q1 naꞌ yeziꞌixeneꞌ c̱he beṉəꞌ caꞌ chsaꞌaqueneꞌ cui no yeziꞌixen c̱hegaꞌaqueꞌ.
\q1 Yoguəꞌ deꞌe canꞌ goneꞌ par nic̱h əžin ža soꞌon beṉac̱hənꞌ canꞌ chazlažeꞌenəꞌ.
\q1
\v 21 Naꞌ beṉəꞌ zɉənaquə beṉəꞌ Izrael len beṉəꞌ cui zɉənaquə beṉəꞌ Izrael yesəꞌəbezeꞌ gaquəleneꞌ ḻegaꞌaqueꞌ.
\s1 Gosəꞌəneꞌ de que Jesoꞌosənꞌ bebeɉeꞌ deꞌe x̱ioꞌ caꞌ len yeḻəꞌ guac c̱he Beelsebo
\p
\v 22 Naꞌ zo to beṉəꞌ Ic̱hoḻ, naꞌ nacteꞌ beṉəꞌ mod, naꞌ yoꞌo yaz deꞌe x̱ioꞌonəꞌ ḻoꞌo yic̱hɉlaꞌaždaꞌogüeꞌenəꞌ naꞌ ɉsoꞌeneꞌ lao Jesoꞌosənꞌ. Naꞌ Jesoꞌosənꞌ bebeɉeꞌ deꞌe x̱ioꞌonəꞌ yoꞌo yaz yic̱hɉlaꞌaždaoꞌ beꞌenəꞌ naꞌ ḻeꞌe beleꞌiteineꞌ naꞌ gocte beṉeꞌ.
\v 23 Naꞌ yoguəꞌ beṉəꞌ caꞌ besəꞌəleꞌi canꞌ goquə ḻechguaḻe besyəꞌəbaneneꞌ. Nach gwseꞌ lɉuežɉgaꞌaqueꞌ: —¿Enaquəlizə beꞌenga benꞌ chbezcho yidə lao dia c̱he deꞌe Rei Dabinꞌ?
\p
\v 24 Naꞌ catəꞌ gwseꞌene beṉəꞌ fariseo caꞌ dižəꞌ quinga gwseꞌe baḻə beṉəꞌ caꞌ: —Bitobi yeḻəꞌ guac napə benga. Con chebeɉeꞌ deꞌe x̱ioꞌ caꞌ len yeḻəꞌ guac c̱he Beelsebo deꞌen chnabiaꞌ deꞌe x̱ioꞌ caꞌ.
\p
\v 25 Gocbeꞌi Jesoꞌosənꞌ canꞌ gwsoꞌon beṉəꞌ fariseo caꞌ xbabənꞌ, nach gožeꞌ ḻegaꞌaqueꞌ: —Šə beṉəꞌ žaꞌ to ṉasyon əsaꞌaqueꞌ c̱hoplə naꞌ yesəꞌədiḻeꞌ entr ḻegaꞌaqueꞌ, əgwžiayiꞌ ṉasyon c̱hegaꞌaqueꞌ naꞌanəꞌ šə caꞌ. Naꞌ ḻeczə caꞌ šə beṉəꞌ nitəꞌ to syoda əsaꞌaqueꞌ c̱hoplə naꞌ yesəꞌədiḻeꞌ entr ḻegaꞌaqueꞌ, ḻeczə cuiayiꞌ syoda c̱hegaꞌaqueꞌ naꞌanəꞌ šə caꞌ. Naꞌ šə to famiḻy əsaꞌaqueꞌ c̱hoplə naꞌ yesəꞌədiḻeꞌ entr ḻegaꞌaczeꞌ ḻeczə yenit famiḻy c̱hegaꞌaqueꞌ naꞌanəꞌ šə caꞌ.
\v 26 Ḻeꞌegatezə caꞌ šə Satanasənꞌ yebeɉ cuinei ḻoꞌo yic̱hɉlaꞌaždaoꞌ beṉəꞌ ḻeczə cuiayiꞌ yeḻəꞌ chnabiaꞌ c̱hei naꞌanəꞌ c̱hedəꞌ chdiḻəlen cuinei žaləꞌ caꞌ.
\v 27 Leꞌe nale de que nadaꞌ chebeɉaꞌ deꞌe x̱ioꞌ caꞌ yoꞌo yaz yic̱hɉlaꞌaždaoꞌ beṉəꞌ len yeḻəꞌ guac c̱he Beelsebonꞌ. Žaləꞌ naquən canꞌ nalenəꞌ, ḻeczə zeɉen de que beṉəꞌ lɉuežɉle caꞌ chəsyəꞌəbeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ len yeḻəꞌ guac c̱hei žaləꞌ caꞌ. Beṉəꞌ lɉuežɉle caꞌ seꞌe leꞌe de que clelənꞌ nale c̱hiaꞌ nadaꞌ canꞌ chebeɉaꞌanṉəꞌ.
\v 28 Naꞌ deꞌen chebeɉaꞌ deꞌe x̱ioꞌ caꞌ len yeḻəꞌ guac c̱he Spirit c̱he Diozənꞌ, chloꞌin de que babžin ža cheneꞌe Diozənꞌ güeꞌele latɉə ṉabiꞌe leꞌe.
\p
\v 29 Ṉezecho notono no gaquə šoꞌ liž to beṉəꞌ gual par žɉəlaneꞌ šinḻazeꞌ caꞌ sin cui əgwc̱heɉeꞌ x̱an yoꞌonəꞌ to do. Con šə əgwc̱heɉeꞌeneꞌ guaquə cuaneꞌ šinḻazeꞌ caꞌ.
\p
\v 30 Šə cui chonḻe txen len nadaꞌ, chonḻe contr nadaꞌ. Naꞌ šə cui chonḻe ca seꞌeɉḻeꞌ beṉəꞌ c̱hiaꞌ zeɉe dižəꞌ de que chonḻe par nic̱h cui yosoꞌozenagueꞌ c̱hiaꞌanəꞌ.
\p
\v 31 Deꞌe naꞌanəꞌ əchniaꞌ leꞌe, bitəꞌətezə deꞌe mal deꞌen chonḻe, naꞌ bitəꞌətezə dižəꞌ mal deꞌe choꞌele, Diozənꞌ yeziꞌixeneꞌ c̱hele šə yediṉɉelen, pero notəꞌətezle šə güeꞌele dižəꞌ contr Spirit c̱he Diozənꞌ cuat yeziꞌixen Diozənꞌ c̱hele.
\v 32 Naꞌ notəꞌətezle šə güeꞌele dižəꞌ contr nadaꞌ, ḻaꞌaṉəꞌəczə Diozənꞌ bseḻeꞌe nadaꞌ golɉaꞌ beṉac̱h, goziꞌixenczeꞌ c̱hele šə yediṉɉele canꞌ nale, pero šə güeꞌele dižəꞌ contr Spirit c̱he Diozənꞌ, cuat yeziꞌixen Diozənꞌ c̱hele ṉaꞌa naꞌ batəꞌətezə.
\s1 Segon canꞌ naquə frot deꞌe chbia to yaguənꞌ ṉezecho nac naquə yaguənꞌ
\p
\v 33 Ṉezecho de que to yag frot naquən yag güen o cui naquən yag güen segon nac naquə frot c̱heinəꞌ. Caꞌaczənꞌ nacbiaꞌ šə naquənꞌ nacle.
\v 34 Ḻechguaḻe beṉəꞌ mal nacle. Bitoczə gaquə güeꞌele dižəꞌ güen c̱hedəꞌ nacle beṉəꞌ laꞌaždaoꞌ mal. Yoguəꞌəte dižəꞌ deꞌe chchoɉ choꞌachonꞌ laꞌ ḻoꞌo yic̱hɉlaꞌaždaꞌocho naꞌanəꞌ zaꞌan.
\v 35 To beṉəꞌ laꞌaždaoꞌ xiꞌilažəꞌ choꞌe dižəꞌ güen, c̱hedəꞌ laꞌ canꞌ nan ḻoꞌo yic̱hɉlaꞌaždaꞌogüeꞌe nanꞌ choꞌe dižəꞌ. Naꞌ to beṉəꞌ laꞌaždaoꞌ mal choꞌe dižəꞌ mal laꞌ canꞌ nan ḻoꞌo yic̱hɉlaꞌaždaꞌogüeꞌenəꞌ.
\v 36 Naꞌ əchniaꞌ leꞌe, catəꞌən əžin ža gon Diozənꞌ castigw zeɉḻicaṉe c̱he yoguəꞌ beṉəꞌ caꞌ chsoꞌon deꞌe malənꞌ, canaꞌ yoguəꞌəḻoḻ beṉəꞌ yesəꞌədieꞌ cuent c̱he yoguəꞌ dižəꞌ deꞌen bagwsoꞌe deꞌe bitobi zɉəzaquəꞌən.
\v 37 Naꞌ segon dižəꞌ deꞌen choꞌele Diozənꞌ c̱hoglaogüeꞌen c̱hele šə naple doḻəꞌ o šə cui naple doḻəꞌ.
\s1 Beṉəꞌ mal caꞌ chəsəꞌəṉabeꞌ gon Jesoꞌosənꞌ to miḻagr
\p
\v 38 Nach baḻə beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ, naꞌ beṉəꞌ fariseo caꞌ gwseꞌe Jesoꞌosənꞌ: —Maestr, cheꞌenetoꞌ gonoꞌ to miḻagr par nic̱h əṉezetoꞌ šə deꞌe ḻiczə Dioz nanꞌ bseḻeꞌe leꞌ.
\p
\v 39 Nach Jesoꞌosənꞌ gožeꞌ ḻegaꞌaqueꞌ: —Leꞌe mbanḻe ṉaꞌa, naquəchguale beṉəꞌ yic̱hɉlaꞌaždaoꞌ mal, naꞌ bito chzenagle c̱he Diozənꞌ. Naꞌ chṉable gonaꞌ to miḻagr par nic̱h əṉezele šə ḻe Dioz nanꞌ bseḻeꞌe nadaꞌ. Pero bito gonaꞌ canꞌ chṉablenəꞌ. Deꞌen gon Diozənꞌ len nadaꞌ par nic̱h əṉezele de que ḻeꞌenəꞌ bseḻeꞌe nadaꞌ, gwxaquəꞌəleben ca deꞌen beneꞌ len deꞌe profet Jonasənꞌ.
\v 40 Antslə zeꞌe šeɉeꞌ Ninibenꞌ Diozənꞌ beneꞌ par nic̱h to beḻ yaꞌa xen gwdebob ḻeꞌ, naꞌ šoṉə ža šoṉə yel gwyoꞌe ḻoꞌo ḻeꞌebənꞌ catəꞌ beyebəb ḻeꞌ mbanczeꞌ. Naꞌ ca naquə nadaꞌ, gataꞌ naꞌ əgašaꞌa, naꞌ te šoṉə ža šoṉə yel yebanaꞌ ladɉo beṉəꞌ guat caꞌ par nic̱h əṉezele de que Diozənꞌ bseḻeꞌe nadaꞌ golɉaꞌ beṉac̱h.
\v 41 Naꞌ catəꞌ əžin ža gon Diozənꞌ castigw c̱he yoguəꞌ beṉəꞌ chsoꞌon deꞌe malənꞌ, ža naꞌ yesyəꞌəban deꞌe beṉəꞌ Ninibe caꞌ naꞌ lao Diozənꞌ yesəꞌəcuišeꞌ leꞌe mbanḻe ṉaꞌa, c̱hedəꞌ besyəꞌədiṉɉeneꞌ xtoḻəꞌəgaꞌaqueꞌenəꞌ catəꞌ deꞌe Jonasənꞌ gwdix̱ɉueꞌineꞌ ḻegaꞌaqueꞌ canꞌ na Diozənꞌ. Ḻeꞌe gonšc xbab de que nadaꞌ zoaꞌ nga naquəchaꞌ beṉəꞌ blaoch cle caꞌ deꞌe Jonasənꞌ, naꞌ bito chzenagle c̱hiaꞌ.
\v 42 Naꞌ ḻeczə žanꞌ gon Diozənꞌ castigw c̱he yoguəꞌ beṉəꞌ chsoꞌon deꞌe malənꞌ, deꞌe noꞌolənꞌ gwnabiaꞌ beṉəꞌ caꞌ gwnitəꞌ galənꞌ chlaꞌ bgüižənꞌ cuiten ḻichalə yebaneꞌ len yeziquəꞌəchlə beṉəꞌ guat caꞌ naꞌ lao Diozənꞌ əgwcuišeꞌ leꞌe mbanḻe ṉaꞌa. Ca naquə ḻeꞌ ža, gwzeꞌe Seba ganꞌ naquə zitəꞌəchgua naꞌ bideꞌ nga par bzenagueꞌ dižəꞌ sinꞌ deꞌen beꞌ deꞌe Rei Salomonṉəꞌ len ḻeꞌ. Naꞌ nadaꞌ zoaꞌ nga naquəꞌəchaꞌ beṉəꞌ blaoch cle ca deꞌe Salomonṉəꞌ, naꞌ bito chzenagle c̱hiaꞌ.
\s1 Deꞌe x̱iꞌonəꞌ yeyoꞌon deꞌe yoblə ḻoꞌo yic̱hɉlaꞌaždaoꞌ beṉəꞌ
\p
\v 43 Naꞌ šə to deꞌe x̱ioꞌ deꞌen yoꞌo yaz yic̱hɉlaꞌaždaoꞌ beṉəꞌ yechoɉən nach lažəꞌən nil naꞌaḻə yeyilɉən ga son mbalaz. Naꞌ šə bitobi latɉə želən, nach ənan:
\v 44 “Deꞌe yobləczə žɉəyežoꞌa yic̱hɉlaꞌaždaoꞌ beꞌenəꞌ ganꞌ gwyoꞌo gwyazaꞌ antslə.” Naꞌ yeyeɉən deꞌe yoblə ganꞌ zo benꞌ. Catəꞌ leꞌin de que bacheyoneꞌ xbab güen naꞌ bazocheꞌ binḻoch naꞌ caguə nochlə yoꞌo yaz yic̱hɉlaꞌaždaogüeꞌenəꞌ deꞌen əgwžon yeyoꞌon deꞌe yoblə, nach yeyoꞌon.
\v 45 Nach žɉəyetobən yegažə deꞌe x̱ioꞌ caꞌ deꞌen zɉənaquə maləch ca ḻen naꞌ txenṉəꞌ soꞌon ḻoꞌo yic̱hɉlaꞌaždaoꞌ beꞌenəꞌ. Naꞌ šə bagwsoꞌonən caꞌ, bachaquəch mal c̱he beꞌenəꞌ clezə canꞌ goc c̱heꞌ antslə. Canꞌ goquə len benga ḻeczə caꞌanəꞌ gaquə c̱he leꞌe mbanḻe ṉaꞌa deꞌen nactecle beṉəꞌ laꞌaždaoꞌ mal.
\s1 Xnaꞌ Jesoꞌosənꞌ naꞌ bišeꞌe caꞌ besəꞌəžineꞌ ganꞌ zoeꞌ
\p
\v 46 Ṉechoꞌete Jesoꞌosənꞌ dižəꞌ chsed chloꞌineꞌ beṉəꞌ zan quinga, catəꞌ bžin xneꞌenəꞌ len bišeꞌe caꞌ. Naꞌ zitəꞌələ gosəꞌəbezeꞌ gosəꞌəṉabeꞌ soꞌeleneꞌ ḻeꞌ dižəꞌ.
\v 47 Entr beṉəꞌ caꞌ nitəꞌ chosoꞌozenagueꞌ xtižəꞌ Jesoꞌosənꞌ, toeꞌ gožeꞌ Jesoꞌosənꞌ: —Bablaꞌ xnaꞌonəꞌ len bišoꞌo caꞌ naꞌ niteꞌe naꞌate chseꞌeneneꞌ əsoꞌeleneꞌ leꞌ dižəꞌ.
\p
\v 48 Nach Jesoꞌosənꞌ gožeꞌ benꞌ gwna caꞌ: —Nitəꞌ beṉəꞌ yoblə beṉəꞌ zɉənaqueꞌ ca xnaꞌanəꞌ naꞌ ca bišaꞌa.
\p
\v 49 Nach bḻi naꞌ Jesoꞌosənꞌ bloꞌe disipl c̱heꞌ caꞌ naꞌ gožeꞌ beꞌenəꞌ: —Beṉəꞌ quinga bazɉənaqueꞌ ca xnaꞌa, naꞌ zɉənaqueꞌ ca bišaꞌa.
\v 50 Canꞌ naquən len notəꞌətezə beṉəꞌ chsoꞌoneꞌ canꞌ chazlažəꞌ X̱aꞌ Diozənꞌ benꞌ zo yobanꞌ, zɉənaqueꞌ ca xnaꞌa naꞌ ca bišaꞌa naꞌ ca zanaꞌ.
\c 13
\s1 Jempl c̱he beṉəꞌ gozənꞌ
\p
\v 1 Naꞌ lao ža naꞌatezə gwzaꞌ Jesoꞌosənꞌ yoꞌonəꞌ ɉəchiꞌe choꞌa nisdaꞌonəꞌ.
\v 2 Nach tant beṉəꞌ zan juisy besəꞌədobə ganꞌ chiꞌenəꞌ xte benən byen gwyoꞌe gwchiꞌe to ḻoꞌo barconꞌ. Naꞌ yoguəꞌ beṉəꞌ caꞌ besəꞌədobənꞌ gosəꞌəniteꞌe lao yoxənꞌ.
\v 3 Nach Jesoꞌosənꞌ bsed bloꞌineꞌ ḻegaꞌaqueꞌ len zan jempl. Naꞌ beꞌeleneꞌ ḻegaꞌaqueꞌ to jemplənꞌ, bsaquəꞌəlebeneꞌ xtižəꞌ Diozənꞌ ca trigonꞌ. Nach gwneꞌ: —To beṉəꞌ gwzeꞌe zdeꞌ güen trigw.
\v 4 Naꞌ lao choseꞌ trigonꞌ baḻən ɉəsəꞌəchazən choꞌa nez, naꞌ bia žia x̱ileꞌe bia chaš ḻeꞌe yobanꞌ gwsaꞌob ḻen.
\v 5 Naꞌ yebaḻənꞌ ɉəsəꞌəchazən ga naquə lao yeɉ, naꞌ bitotec bi yo žia lao yeɉənꞌ, deꞌe naꞌanəꞌ ḻeꞌe blaꞌacten.
\v 6 Pero naꞌ catəꞌ bežaꞌachgua besəꞌəcuadən naꞌ ḻeꞌe gosəꞌəbižten, laꞌ bitobi loi gwsoꞌon.
\v 7 Naꞌ yebaḻən besəꞌəgoꞌoṉən lao yo ga nc̱hix̱ə xsa yešəꞌ naꞌ blaꞌaquən txen len xsa yešəꞌənəꞌ, naꞌ besəꞌəḻoləꞌ yag yešəꞌ caꞌ ḻegaꞌaquənꞌ.
\v 8 Naꞌ yebaḻən besəꞌəgoꞌoṉən lao yo šaoꞌ naꞌ blaꞌaquənꞌ. Baḻən gosəꞌəbian to gueyoa güeɉə, naꞌ yebaḻən gosəꞌəbian gyon gueɉə, naꞌ yebaḻən gosəꞌəbian šichoa güeɉə.
\v 9 Leꞌe žia nagle deꞌe chene, ḻegwzenag.
\s1 Beṉəꞌ caꞌ cui gwseꞌeɉḻeꞌe c̱he Jesoꞌosənꞌ bsed bloꞌineꞌ ḻegaꞌaqueꞌ len jemplənꞌ
\p
\v 10 Nach gosəꞌəbiguəꞌ disipl c̱he Jesoꞌosənꞌ laogüeꞌenəꞌ naꞌ gwseꞌeneꞌ: —¿Bixc̱henꞌ chsed chloꞌidoꞌ beṉəꞌ quinga len jempl?
\p
\v 11 Naꞌ Jesoꞌosənꞌ gožeꞌ ḻegaꞌaqueꞌ: —Diozənꞌ choneꞌ par nic̱h leꞌe ṉezele deꞌen cui no gwṉeze antslə de que ḻeꞌ ṉabiꞌe con notəꞌətezə beṉəꞌ soeꞌ latɉə. Pero beṉəꞌ cui chseꞌeɉḻeꞌe xtižaꞌanəꞌ bito chac seꞌeɉniꞌineꞌ de que ṉabiꞌe beṉəꞌ soeꞌ latɉə.
\v 12 Notəꞌətezə beṉəꞌ chosoꞌozenagueꞌ ca deꞌen bachzeɉniꞌi Diozənꞌ ḻegaꞌaqueꞌ, Diozənꞌ gwzeɉniꞌicheneꞌ ḻegaꞌaqueꞌ par nic̱h šanch deꞌen seꞌeɉniꞌineꞌ. Pero naꞌ notəꞌətezə beṉəꞌ cui chosoꞌozenagueꞌ c̱he Diozənꞌ ca deꞌen chsed chloꞌineꞌ ḻegaꞌaqueꞌ, Diozənꞌ yequeꞌe deꞌen chseꞌeɉniꞌineꞌenəꞌ ḻaꞌaṉəꞌəczə latəꞌəlaszə deꞌen bagwseꞌeɉniꞌineꞌ.
\v 13 Deꞌe naꞌanəꞌ chsed chloꞌidaꞌ beṉəꞌ quinga len jemplənꞌ c̱hedəꞌ chesəꞌəleꞌineꞌ deꞌen chonaꞌ pero bito chsaꞌacbeꞌineꞌ bi zeɉen, naꞌ ḻaꞌaṉəꞌəczə chseꞌeneneꞌ xtižaꞌanəꞌ, bito chseꞌeɉniꞌineꞌen.
\v 14 Len beṉəꞌ quinga bachac complir canꞌ bzoɉ deꞌe profet Isaiazənꞌ, ganꞌ nan:
\q1 Deꞌe ḻi yenele, pero cabi šeɉniꞌile bi zeɉe deꞌen yenele.
\q1 Naꞌ deꞌe ḻi leꞌile, pero cabi gacbeꞌile bi zeɉen deꞌen leꞌilenꞌ.
\q1
\v 15 Beṉəꞌ Izrael quinga cuiczə bi rson chsaꞌazeꞌ, bac̱h nažɉoczə yic̱hɉlaꞌaždaꞌogaꞌaqueꞌ naꞌanəꞌ.
\q1 Chseꞌeneneꞌ pero bito chseꞌeɉniꞌineꞌ binꞌ zeɉe deꞌen chseꞌeneneꞌ.
\q1 Naꞌ chesəꞌəleꞌineꞌ pero cabi chsaꞌacbeꞌineꞌ bi zeɉe deꞌen chəsəꞌəleꞌineꞌenəꞌ c̱hedəꞌ bazɉənaqueꞌ beṉəꞌ laꞌaždaoꞌ žod.
\q1 Žaləꞌ bito zɉənaqueꞌ beṉəꞌ laꞌaždaoꞌ žod, gwseꞌeɉniꞌineꞌ bi zeɉen deꞌen chseꞌeneneꞌenəꞌ, naꞌ saꞌacbeꞌineꞌ bi zeɉe deꞌen chesəꞌəleꞌineꞌenəꞌ.
\q1 Gosyəꞌədiṉɉlɉei xtoḻəꞌəgaꞌaqueꞌenəꞌ, naꞌ gwsoꞌelɉeꞌ latɉə yocobə Diozənꞌ yic̱hɉlaꞌaždaꞌogaꞌaqueꞌenəꞌ žaləꞌ chseꞌeɉniꞌineꞌen naꞌ žaləꞌ chsaꞌacbeꞌineꞌen.
\p
\v 16 Pero naꞌ leꞌe ža, ḻechguaḻe mbalaz zole c̱hedəꞌ chleꞌile deꞌe caꞌ chonaꞌ naꞌ chacbeꞌile bi zeɉen, naꞌ chzenagle xtižaꞌanəꞌ naꞌ cheɉniꞌilen.
\v 17 Deꞌe ḻi əchniaꞌ leꞌe, zan deꞌe profet naꞌ zan deꞌe beṉəꞌ caꞌ yeziquəꞌəchlə beṉəꞌ bosoꞌozenag c̱he Diozənꞌ canaꞌ gwseꞌeneneꞌ yesəꞌəleꞌineꞌ deꞌen chleꞌile, pero bitoch goḻəꞌ yesəꞌəleꞌineꞌen. Naꞌ gwseꞌeneneꞌ əseꞌeneneꞌ deꞌen chenele pero bito goḻəꞌ seꞌeneneꞌen.
\s1 Jesoꞌosənꞌ gwneꞌ bi zeɉe jempl c̱he beṉəꞌ güen trigonꞌ
\p
\v 18 Naꞌ leꞌe ḻegwzenag, quinganꞌ zeɉe jempl c̱he beṉəꞌ güen trigonꞌ.
\v 19 Xtižəꞌ Diozənꞌ gwxaquəꞌəleben ca deꞌen byažənꞌ. Nitəꞌ beṉəꞌ chseꞌeneneꞌ dižəꞌ canꞌ chon Diozənꞌ chnabiꞌe con notəꞌətezə beṉəꞌ chsoꞌe latɉə, pero bito chseꞌeɉniꞌineꞌen, naꞌ chžin gwxiyeꞌenəꞌ chonən par nic̱h cuich chosoꞌozenagueꞌ c̱he xtižəꞌ Diozənꞌ. Deꞌe naꞌanəꞌ gwxaquəꞌəlebəgaꞌaqueneꞌ ca trigonꞌ deꞌen ɉesəꞌəchaz choꞌa nezənꞌ.
\v 20-21 Naꞌ nitəꞌ beṉəꞌ chseꞌene xtižəꞌ Diozənꞌ naꞌ šložga chesyəꞌəbeineꞌ chsoꞌoneꞌen c̱hegaꞌaqueꞌ. Naꞌ catəꞌ chosoꞌoc̱hiꞌ chosoꞌosaquəꞌ beṉəꞌ ḻegaꞌaqueꞌ par nic̱h cui seꞌeɉḻeꞌe xtižəꞌ Diozənꞌ, ḻeꞌe chesyəꞌəbeɉyic̱hɉtieꞌ cuich chosoꞌozenagueꞌ c̱hei. Naꞌ deꞌen chsoꞌoneꞌen gwxaquəꞌəleben ca deꞌen chac c̱he trigonꞌ deꞌen besəꞌəgoꞌoṉən lao yeɉ.
\v 22 Ḻeꞌegatezə caꞌ naquən len beṉəꞌ caꞌ chseꞌene xtižəꞌ Diozənꞌ, pero naꞌ lao mbangaꞌaqueꞌ yežlyo nga, chesyəꞌəlaḻ chesyəꞌəžeɉeneꞌ chsoꞌon xmendadgaꞌaqueꞌ por ni c̱he chseꞌeneneꞌ yesəꞌəniꞌe. Pero yoguəꞌ deꞌen chsoꞌoneꞌ chx̱oayaguən ḻegaꞌaqueꞌ, chonən par nic̱h cui c̱haꞌoxen xtižəꞌ Diozənꞌ ḻoꞌo yic̱hɉlaꞌaždaꞌogaꞌaqueꞌenəꞌ. Ca deꞌen chsoꞌoneꞌenəꞌ gwxaquəꞌəleben ca deꞌen chac c̱he trigonꞌ deꞌen besəꞌəgoꞌoṉən lao yo ganꞌ nc̱hix̱ə xsa yešəꞌ.
\v 23 Pero yebaḻə beṉəꞌ chseꞌeneneꞌ xtižəꞌ Diozənꞌ naꞌ chseꞌeɉniꞌineꞌen naꞌ chosoꞌozenagueꞌ c̱hei. Naꞌ deꞌen chosoꞌozenagueꞌ c̱he xtižəꞌ Diozənꞌ gwxaquəꞌəleben ca trigonꞌ deꞌen besəꞌəgoꞌoṉən lao yo šaoꞌ. Baḻən gosəꞌəbian to gueyoa güeɉə, naꞌ yebaḻən gosəꞌəbian gyon güeɉə, naꞌ yebaḻən gosəꞌəbian šichoa güeɉə.
\s1 Jempl c̱he trigonꞌ naꞌ bgüeyxtil
\p
\v 24 Gwde naꞌ Jesoꞌosənꞌ gozoꞌeleneꞌ beṉəꞌ caꞌ yeto jempl, gozeꞌe ḻegaꞌaqueꞌ: —Yeḻəꞌ gwnabiaꞌ c̱he Dioz benꞌ zo yobanꞌ gwxaquəꞌəleben ca deꞌe nga goquə. To beṉəꞌ ɉezeꞌ trigw biṉnəꞌ yoba c̱heꞌenəꞌ.
\v 25 Naꞌ do šeꞌelə catəꞌ cui no gwsaꞌacbeꞌi gwyeɉ to beṉəꞌ contr c̱heꞌ ɉezeꞌ xsa bgüeyxtil ganꞌ banazə x̱anꞌ yežlyonꞌ trigonꞌ, naꞌ beyož gozeꞌ bgüeyxtilənꞌ bezeꞌe.
\v 26 Naꞌ tšiꞌizə blaꞌaquən, naꞌ trigonꞌ gwzolao chbian. Naꞌ catəꞌ ɉaꞌac xmos x̱an trigonꞌ, gwsaꞌacbeꞌineꞌ nc̱hix̱ə trigonꞌ len bgüeyxtil.
\v 27 Nach ɉəyaꞌaqueꞌ ganꞌ zo x̱angaꞌaqueꞌenəꞌ par ɉəsyəꞌəyežeꞌeneꞌ: “Señor, ¿əcaguə trigw biṉnəꞌ gozoꞌ yoba c̱hioꞌonəꞌ? ¿Bixc̱henꞌ nc̱hix̱ən len bgüeyxtilənꞌ?”
\v 28 Nach x̱angaꞌaqueꞌenəꞌ gožeꞌ ḻegaꞌaqueꞌ: “To beṉəꞌ contr c̱hiaꞌanəꞌ ɉen caꞌ.” Nach xmoseꞌ caꞌ gwseꞌeneꞌ: “¿Echeꞌendoꞌ əlažəꞌətoꞌ bgüeyxtilənꞌ?”
\v 29 Nach x̱angaꞌaqueꞌenəꞌ gožeꞌ ḻegaꞌaqueꞌ: “Bito əḻažəꞌəlen. Laꞌ nxož əlažəꞌəlente trigonꞌ.
\v 30 Lɉoyenṉəꞌ par ṉaꞌa. Guaquə yesəꞌəchaꞌon txen, pero naꞌ chonaꞌ mendad catəꞌ bagoḻə yetoble cwsešənꞌ, canaꞌ zguaꞌatec yebele bgüeyxtilənꞌ naꞌ gonḻen bnoɉ par əseꞌeyən. Nach te naꞌ žɉəyetoble trigonꞌ əgwcuaꞌašaꞌolen.”
\s1 Jempl c̱he xsa moztas
\p
\v 31 Gwde naꞌ gozoꞌeleneꞌ beṉəꞌ caꞌ yeto jempl, gožeꞌ: —Yeḻəꞌ gwnabiaꞌ c̱he Dioz benꞌ zo yobanꞌ gwxaquəꞌəleben ca to xsa moztas deꞌen gozə to beṉəꞌ yežlyo c̱heꞌenəꞌ.
\v 32 Xsa moztasənꞌ naquən ḻeꞌebeyožə deꞌe daoꞌ rizəꞌ lao bitəꞌəchlə semiy. Pero naꞌ catəꞌ chlaꞌan, chchaꞌochən ca bichlə yix̱əꞌ cuan naꞌ chaquən yag chaꞌo daoꞌ. Naꞌ xte bia caꞌ zɉəzo x̱ileꞌe chɉseꞌen liždaꞌogaꞌaquəb lao xozeꞌe caꞌ.
\s1 Jempl c̱he xnaꞌ cuazinꞌ
\p
\v 33 Nach gozoeꞌ yeto jempl, gozneꞌ: —Yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca xnaꞌ cuazinꞌ deꞌen gwlec noꞌolənꞌ len to rob yezɉ par nic̱h bechaꞌo doxenən.
\s1 Jesoꞌosənꞌ bzeɉniꞌineꞌ beṉəꞌ porzə len jempl
\p
\v 34 Yoguəꞌ deꞌe quinga bsed bloꞌi Jesoꞌosənꞌ beṉəꞌ caꞌ besəꞌəžag ganꞌ zoꞌenəꞌ. Bsed bloꞌineꞌ ḻegaꞌaqueꞌ porzə len jempl, bitobi bichlə gwneꞌ par bzeɉniꞌineꞌ ḻegaꞌaqueꞌ.
\v 35 Caꞌ ben Jesoꞌosənꞌ par nic̱h goc complir canꞌ bzoɉ deꞌe profetənꞌ c̱heꞌ, ganꞌ nan:
\q1 Egwsed əgwloꞌigaꞌacdaꞌaneꞌ porzə len jempl,
\q1 naꞌ əgwzeɉniꞌigaꞌacdaꞌaneꞌ deꞌen cui no gwṉeze antslə deꞌen bgašəꞌ dezd catəꞌən gwxe yežlyonꞌ.
\s1 Jesoꞌosənꞌ bzeɉniꞌineꞌ bi zeɉe jempl c̱he trigonꞌ naꞌ bgüeyxtilənꞌ
\p
\v 36 Naꞌ catəꞌ beyož bsed bloꞌi Jesoꞌosənꞌ beṉəꞌ caꞌ zɉəžaꞌ ganꞌ zoꞌenəꞌ, beseꞌe ḻegaꞌaqueꞌ, naꞌ bezaꞌ ḻeꞌ len disipl c̱heꞌ caꞌ. Naꞌ catəꞌ besyəꞌəžineꞌ yoꞌo ganꞌ niteꞌenəꞌ besyəꞌəyoꞌe ḻoꞌinəꞌ. Nach gosəꞌəbiguəꞌ disipl c̱heꞌ caꞌ cuiteꞌenəꞌ gwseꞌeneꞌ: —Bzeɉniꞌišguei netoꞌ bi zeɉen jempl c̱he xsa bgüeyxtilənꞌ.
\p
\v 37 Nach Jesoꞌosənꞌ gožeꞌ ḻegaꞌaqueꞌ: —Quinganꞌ zeɉen: Diozənꞌ bseḻeꞌe nadaꞌ golɉaꞌ beṉac̱h naꞌ gwxaquəꞌəlebedaꞌ ca benꞌ gozə trigw biṉnəꞌ.
\v 38 Naꞌ doxen yežlyo nga gwxaquəꞌəleben ca yoba ganꞌ gozeꞌ trigw biṉnəꞌ, naꞌ beṉəꞌ caꞌ chsoꞌe latɉə chnabiaꞌ Diozənꞌ ḻegaꞌaqueꞌ gwxaquəꞌəlebəgaꞌaqueneꞌ ca trigw biṉnəꞌ. Naꞌ beṉəꞌ caꞌ chsoꞌe latɉə chnabiaꞌ deꞌe gwxiyeꞌenəꞌ ḻegaꞌaqueꞌ gwxaquəꞌəlebəgaꞌaqueneꞌ ca xsa bgüeyxtilənꞌ.
\v 39 Gwxiyeꞌenəꞌ gwxaquəꞌəleben ca beṉəꞌ contrənꞌ gozə xsa bgüeyxtilənꞌ ganꞌ banyaž trigw biṉnəꞌ. Naꞌ žanꞌ gaquə juisyənꞌ gwxaquəꞌəleben ca tyempənꞌ yosyoꞌotobeꞌ trigonꞌ. Naꞌ anglənꞌ zɉənaqueꞌ ca beṉəꞌ caꞌ yosyoꞌotobə cwsešənꞌ.
\v 40 Naꞌ canꞌ gac c̱he bgüeyxtilənꞌ yosyoꞌotobeꞌen šeyənꞌ, canꞌ gaquə c̱he beṉəꞌ caꞌ chnabiaꞌ deꞌe gwxiyeꞌenəꞌ ḻegaꞌaqueꞌ catəꞌ əžin ža gaquə juisyənꞌ.
\v 41 Diozənꞌ bseḻeꞌe nadaꞌ golɉaꞌ beṉac̱h naꞌ catəꞌ əžin žanꞌ, nadaꞌ əseḻaꞌa angl c̱hiaꞌ caꞌ par yosyoꞌotobeꞌ yoguəꞌ beṉəꞌ caꞌ chesəꞌəgoꞌoyeḻeꞌe beṉəꞌ yoblə soꞌoneꞌ deꞌe malənꞌ, naꞌ yosyoꞌotobteꞌ yeziquəꞌəchlə beṉəꞌ caꞌ chsoꞌon deꞌe malənꞌ. Naꞌ angl caꞌ yesyəꞌəbeɉeꞌ ḻegaꞌaqueꞌ nic̱h cuich ṉiteꞌe txen len beṉəꞌ caꞌ bagwsoꞌe latɉə chnabiaꞌ Diozənꞌ ḻegaꞌaqueꞌ.
\v 42 Nach yosəꞌəseḻeꞌe ḻegaꞌaqueꞌ lao yiꞌ gabiḻ ganꞌ seꞌeyeꞌ zeɉḻicaṉe. Naꞌ lao yesəꞌəžaglaogüeꞌenəꞌ yesəꞌəbežyašeꞌe naꞌ saꞌoyeɉə leygaꞌaqueꞌenəꞌ.
\v 43 Naꞌ canaꞌach X̱ancho Diozənꞌ goneꞌ par nic̱h beṉəꞌ caꞌ chsoꞌon deꞌe güenṉəꞌ ṉiteꞌe len ḻeꞌ naꞌ əsaꞌaqueꞌ ca yeḻəꞌ chey cheꞌeniꞌ c̱he bgüižənꞌ catəꞌ yesyəꞌəžineꞌ yobanꞌ ganꞌ chnabiaꞌ Diozənꞌ. Leꞌe žia nagle deꞌen chene, ḻegwzenag.
\s1 Jempl c̱he mech xen deꞌen ngašəꞌ to lao yežlyo
\p
\v 44 Yeḻəꞌ chnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌe nga goquə. To beṉəꞌ ɉəyediꞌe mech xen deꞌe ngašəꞌ to lao yežlyo. Nach bocuašeꞌen deꞌe yoblə. Naꞌ deꞌe tant bebeineꞌ deꞌen ɉəyediꞌe mechənꞌ nach ɉəyeteꞌe yoguəꞌəḻoḻ bi deꞌe de c̱heꞌ par nic̱h gwxiꞌe yežlyonꞌ ganꞌ ngašəꞌ mechənꞌ. Ca mbalazənꞌ gwzo beꞌenəꞌ canꞌ mbalazənꞌ nitəꞌ beṉəꞌ caꞌ chsoꞌe latɉə chnabiaꞌ Diozənꞌ ḻegaꞌaqueꞌ.
\s1 Jempl c̱he to perla deꞌen ḻechguaḻe zaqueꞌe
\p
\v 45 Naꞌ yeḻəꞌ gwnabiaꞌ c̱he Diozənꞌ benꞌ zo yobanꞌ ḻeczə gwxaquəꞌəleben ca deꞌe nga goquə. Zo to comersyant beṉəꞌ chaꞌo chsiꞌ naꞌ cheyoteꞌe perlas deꞌen ḻechguaḻe naquən xoche.
\v 46 Naꞌ bželeneꞌ to perla deꞌe ḻechguaḻe zaquəꞌən. Naꞌ ḻeczə beyoteꞌe yoguəꞌəḻoḻte deꞌen de c̱heꞌ naꞌ gwxiꞌe perlanꞌ. Caꞌaczənꞌ gwxaquəꞌəlebe beṉəꞌ caꞌ chsaꞌacbeꞌi de que deꞌe žialao əsoꞌe latɉə ṉabiaꞌ Diozənꞌ ḻegaꞌaqueꞌ.
\s1 Jempl c̱he yix̱ɉw beḻ
\p
\v 47 Naꞌ yeḻəꞌ gwnabiaꞌ c̱he Diozənꞌ benꞌ zo yobanꞌ ḻeczə gwxaquəꞌəleben ca deꞌe nga goquə. Nitəꞌ baḻə beṉəꞌ gwxen beḻ caꞌ naꞌ bosoꞌozaḻeꞌe yix̱ɉw beḻ c̱hegaꞌaqueꞌenəꞌ ḻoꞌo nisdaꞌonəꞌ naꞌ gwxenən yoguəꞌ cḻas beḻ yaꞌa caꞌ.
\v 48 Nach catəꞌ bagwžaꞌ bia zanṉəꞌ ḻoꞌo yix̱ɉonꞌ, besyəꞌəbeɉeꞌ yix̱ɉonꞌ yobižlə, naꞌ gosəꞌəbiꞌe bia caꞌ zɉənaquə güen par əsaꞌogüeꞌ, naꞌ gosəꞌəgüeꞌeb ḻoꞌo žomə caꞌ. Naꞌ bia caꞌ cui zɉənaquə güen, gosoꞌoc̱hoꞌoneꞌeb.
\v 49-50 Caꞌaczənꞌ gaquə c̱he yoguəꞌ beṉəꞌ catəꞌən əžin ža gaquə juisyənꞌ. Angl caꞌ yesəꞌəbeɉeꞌ beṉəꞌ mal caꞌ naꞌ yosəꞌəzaḻeꞌe ḻegaꞌaqueꞌ ḻoꞌo yiꞌ gabiḻənꞌ ganꞌ yesəꞌəbežyašeꞌe naꞌ saꞌoyeɉə leygaꞌaqueꞌenəꞌ tant yesəꞌəžaglaogüeꞌ.
\p
\v 51 Nach Jesoꞌosənꞌ gožeꞌ disipl c̱heꞌ caꞌ: —¿Ezyeɉniꞌile yoguəꞌ deꞌe caꞌ babloꞌidaꞌ leꞌe?
\p Nach gwseꞌeneꞌ: —Zyeɉniꞌitoꞌon X̱antoꞌ.
\p
\v 52 Nach Jesoꞌosənꞌ gožeꞌ ḻegaꞌaqueꞌ: —Notəꞌətezle šə chac chsed chloꞌile Xtižəꞌ Diozənꞌ deꞌen byoɉ canaꞌ, naꞌ šə ḻeczə chzenagle canꞌ chsed chloꞌidaꞌ de que cheyaḻəꞌ güeꞌele latɉə ṉabiaꞌ Diozənꞌ leꞌe, nachənꞌ guac əgwsed əgwloꞌile beṉəꞌ c̱hopten. Naꞌ gwxaquəꞌəlebele ca to x̱an yoꞌo beṉəꞌ napə yoguəꞌ deꞌen chyažɉ chc̱hine famiḻy c̱heꞌenəꞌ.
\s1 Jesoꞌosənꞌ beyeɉeꞌ Nasaretənꞌ
\p
\v 53 Nach catəꞌ beyož beꞌelen Jesoꞌosənꞌ disipl c̱heꞌ caꞌ jempl caꞌ, bezeꞌe latɉənꞌ len disipl c̱heꞌ caꞌ.
\v 54 Naꞌ beyeɉeꞌ Nasaretənꞌ ganꞌ gwchaꞌogüeꞌ. Naꞌ ɉəyesed ɉəyeloꞌineꞌ beṉəꞌ caꞌ ḻoꞌo yoꞌodaoꞌ c̱hegaꞌaqueꞌenəꞌ. Naꞌ ḻechguaḻe besyəꞌəbaneneꞌ len xtižeꞌenəꞌ, naꞌ gwseꞌe lɉuežɉgaꞌaqueꞌ: —¿Nacxa goquənꞌ ṉezeneꞌ deꞌe caꞌ deꞌen naquə deꞌe sinꞌ? naꞌ ¿nacxa chac choneꞌ miḻagr caꞌ choneꞌ?
\v 55 Nombiꞌachoneꞌ, laꞌ naqueꞌ xiꞌiṉ carpinterənꞌ. Naꞌ xneꞌenəꞌ naqueꞌ noꞌolənꞌ leꞌ Maria. Nombiꞌacho beṉəꞌ bišeꞌe Jacobənꞌ, Jwsenꞌ, Simonṉəꞌ naꞌ Jodasənꞌ.
\v 56 Naꞌ ḻeczə beṉəꞌ zaneꞌ caꞌ nitəꞌ lažcho nga. ¿Nacxa chaquənꞌ choꞌe dižəꞌ caꞌ ža, naꞌ chacte choeꞌ miḻagr?
\p
\v 57 Naꞌ deꞌen gwsoꞌoneꞌ xbab de que Jesoꞌosənꞌ naqueꞌ con to beṉəꞌ gwlaž c̱hegaꞌaqueꞌ, deꞌe naꞌanəꞌ bito gwseꞌeɉḻeꞌe c̱heꞌ. Nach gožeꞌ ḻegaꞌaqueꞌ: —Ḻaꞌaṉəꞌəczə beṉəꞌ zan chseꞌeɉḻeꞌe c̱he beṉəꞌ caꞌ chsoꞌe xtižəꞌ Diozənꞌ naꞌ chsoꞌe ḻegaꞌaqueꞌ yeḻəꞌ balaꞌaṉ, beṉəꞌ gwlaž c̱hegaꞌaqueꞌ caꞌ naꞌ famiḻy c̱hegaꞌaqueꞌ caꞌ bito chseꞌeɉḻeꞌe c̱hegaꞌaqueꞌ.
\p
\v 58 Naꞌ Jesoꞌosənꞌ beneꞌ con to c̱hopzə miḻagr Nasaretənꞌ c̱hedəꞌ bito gwseꞌeɉḻeꞌe c̱heꞌ.
\c 14
\s1 Quinganꞌ goquə got Juan benꞌ bc̱hoa beṉəꞌ nis
\p
\v 1 Naꞌ ca nanꞌ Erodənꞌ benꞌ naquə goberṉador c̱he Galileanꞌ, beneneꞌ dižəꞌ ca naquə yoguəꞌəḻoḻ deꞌe güen deꞌen chon Jesoꞌosənꞌ.
\v 2 Nach gožeꞌ xmoseꞌ caꞌ: —Benganꞌ deꞌe Juanṉəꞌ benꞌ bc̱hoa beṉəꞌ nis. Babebaneꞌ ladɉo beṉəꞌ guat caꞌ naꞌ deꞌe naꞌanəꞌ chac choneꞌ miḻagr caꞌ.
\p
\v 3-4 Quinganꞌ goquə gwsoꞌoteꞌ Juanṉəꞌ: Erodənꞌ bequeꞌe Erodiasənꞌ ca xoꞌoleꞌ, len Erodiasənꞌ naqueꞌ xoꞌolə Lip bišeꞌenəꞌ. Naꞌ Juanṉəꞌ gožeꞌ Erodənꞌ: “Malənꞌ benoꞌ becaꞌo noꞌol c̱he beṉəꞌ bišoꞌon par naqueꞌ xoꞌoloꞌ.” Naꞌ deꞌen gož Juanṉəꞌ Erodənꞌ caꞌ deꞌe naꞌanəꞌ Erodənꞌ beneꞌ mendad gosəꞌəzeneꞌ Juanṉəꞌ naꞌ gosəꞌəgüeꞌeneꞌ ližya naꞌ bosəꞌəc̱heɉeꞌ ṉiꞌaneꞌe caꞌ gden.
\p
\v 5 Erodənꞌ goneꞌeneꞌ goteꞌ Juanṉəꞌ, pero bitobi beneneꞌ ḻeꞌ c̱hedəꞌ bžebeꞌ bi soꞌon beṉəꞌ caꞌ gwseꞌeɉḻeꞌe c̱he Juanṉəꞌ de que choꞌe xtižəꞌ Diozənꞌ.
\v 6 Pero naꞌ catəꞌ gwsoꞌoneꞌ lṉi ža la Erodənꞌ, biꞌi noꞌol c̱he Erodiasənꞌ byaꞌaboꞌ lao beṉəꞌ caꞌ gwnitəꞌ lṉinəꞌ. Naꞌ ḻechguaḻe bebei Erodənꞌ canꞌ bemboꞌonəꞌ.
\v 7 Naꞌ tant beyazlažəꞌ Erodənꞌ canꞌ byaꞌa noꞌol güegonꞌ, bzoeꞌ jorament de que əgwnežɉueꞌeboꞌ bitəꞌətezə əṉabeboꞌ ḻeꞌ.
\v 8 Naꞌ por consejw c̱he xnaꞌaboꞌonəꞌ gožboꞌ Erodənꞌ: —Beṉ nadaꞌ ṉaꞌatec ṉaꞌa yic̱hɉ Juanṉəꞌ benꞌ chc̱hoa beṉəꞌ nis žian to lao plat.
\p
\v 9 Naꞌ gwzo Erodənꞌ trist catəꞌ beyož gož noꞌol güegonꞌ ḻeꞌ caꞌ, pero naꞌ ca naquə babzoeꞌ jorament len ḻeboꞌ lao beṉəꞌ caꞌ zɉənaquə combidənꞌ, benšazeꞌ mendad gaquə canꞌ gwṉabe noꞌol güegonꞌ ḻeꞌ.
\v 10 Caꞌ goquənꞌ beneꞌ mendad ɉəsəꞌəc̱hogueꞌ yen Juanṉəꞌ ḻoꞌo ližya ganꞌ yoꞌenəꞌ.
\v 11 Naꞌ bosoꞌožieꞌ yic̱hɉ deꞌe Juanṉəꞌ to lao plat par ɉsoꞌen lao biꞌi noꞌolənꞌ naꞌ bnežɉwboꞌon xnaꞌaboꞌonəꞌ.
\p
\v 12 Nach disipl c̱he deꞌe Juanṉəꞌ ɉəsyəꞌəxiꞌe cuerp c̱heꞌenəꞌ naꞌ ɉəsəꞌəcuašeꞌen. Gwde naꞌ ɉaꞌaqueꞌ ganꞌ zo Jesoꞌosənꞌ naꞌ ɉseꞌežeꞌeneꞌ canꞌ bagoquənꞌ.
\s1 Jesoꞌosənꞌ bguaogüeꞌ gueyəꞌ mil beṉəꞌ
\p
\v 13 Naꞌ catəꞌ bene Jesoꞌosənꞌ canꞌ goquə c̱he deꞌe Juanṉəꞌ, bezeꞌe latɉənꞌ len disipl c̱heꞌ caꞌ naꞌ besyəꞌəyoꞌe to ḻoꞌo barcw par ɉəyaꞌaqueꞌ latɉə dašənꞌ deꞌen de yešḻaꞌalə nisdaꞌonəꞌ. Naꞌ beṉəꞌ caꞌ žaꞌ yež caꞌ zɉəchiꞌ gaḻəꞌəzə nisdaꞌonəꞌ gwseꞌeneneꞌ rson galənꞌ bazɉəda Jesoꞌosənꞌ. Naꞌ gwsaꞌaqueꞌ lažgaꞌaqueꞌenəꞌ ɉaꞌaqueꞌ yobižlə ɉəsəꞌəšagueꞌ Jesoꞌosənꞌ yešḻaꞌalə nisdaꞌonəꞌ.
\v 14 Naꞌ catəꞌ bžin Jesoꞌosənꞌ choꞌa nisdaꞌonəꞌ, bleꞌineꞌ beṉəꞌ zan caꞌ naꞌ beyašəꞌ bežiꞌilažeꞌe ḻegaꞌaqueꞌ. Naꞌ beyoneꞌ yoguəꞌ beṉəꞌ caꞌ chsaꞌacšene.
\v 15 Naꞌ catəꞌ bachaḻ, gosəꞌəbiguəꞌ disipl c̱heꞌ caꞌ laogüeꞌenəꞌ, naꞌ gwseꞌeneꞌ: —Zocho to latɉə ga cui no nḻaꞌ, naꞌ bagwde or par gaocho xgüe. Bseḻəꞌ beṉəꞌ quinga yež caꞌ deꞌen zɉəchiꞌ gaḻəꞌəzə par nic̱h žɉəsəꞌədilɉeꞌ deꞌe seꞌeɉ əsaꞌogüeꞌ.
\p
\v 16 Naꞌ Jesoꞌosənꞌ gožeꞌ ḻegaꞌaqueꞌ: —Bito cheyaḻəꞌ žɉəyaꞌaqueꞌ. Ḻeꞌe güeꞌegaꞌaqueꞌ deꞌe seꞌeɉ əsaꞌogüeꞌ.
\p
\v 17 Nach gwseꞌeneꞌ: —C̱hopga beḻ yaꞌa c̱hechonꞌ de naꞌ gueyəꞌəga yetxtil.
\p
\v 18 Nach Jesoꞌosənꞌ gožeꞌ ḻegaꞌaqueꞌ: —Ḻeꞌe žɉəx̱iꞌin ni.
\p
\v 19 Nach ben Jesoꞌosənꞌ mendad gosəꞌəbeꞌ beṉəꞌ zan caꞌ lao yixye daquəꞌənəꞌ. Naꞌ gwxiꞌe yetxtil caꞌ gueyəꞌ naꞌ beḻ yaꞌa caꞌ c̱hopə. Naꞌ bgüieꞌ yobalə beꞌe yeḻəꞌ chox̱cwlen c̱he Diozənꞌ. Gwde naꞌ bzoxɉeꞌen nach bnežɉueꞌen disipl c̱heꞌ caꞌ par gosəꞌəyiseꞌ c̱he c̱he beṉəꞌ caꞌ.
\v 20 Naꞌ yogueꞌe gwsaꞌogüeꞌen xte ca gwseꞌelɉeneꞌ. Nach pedas caꞌ deꞌen besyəꞌəgaꞌaṉnəꞌ, bosyoꞌotobeꞌen, naꞌ goquən šižiṉ žomə.
\v 21 Naꞌ beṉəꞌ caꞌ gwsaꞌo yetxtilənꞌ naquə ca do gueyəꞌ mil beṉəꞌ byo cui cuent noꞌolə naꞌ cui cuent bidaoꞌ.
\s1 Jesoꞌosənꞌ gwzeꞌe tlao nisdaꞌonəꞌ
\p
\v 22 Gwde naꞌ Jesoꞌosənꞌ beneꞌ mendad yesyəꞌəyoꞌo disipl c̱heꞌ caꞌ ḻoꞌo barconꞌ par yesyəꞌəbialaogüeꞌ yesyəꞌəḻagueꞌe yešḻaꞌalə nisdaꞌonəꞌ žlac begaꞌaṉ ḻeꞌ bzeineꞌ beṉəꞌ zan caꞌ dižəꞌ.
\v 23 Naꞌ beyož bzei Jesoꞌosənꞌ beṉəꞌ caꞌ dižəꞌ, gwloeꞌ to lao yaꞌa par ɉeneꞌ orasyon tozeꞌ. Dezd goḻte gwzo tozə Jesoꞌosənꞌ lao yaꞌanəꞌ.
\v 24 Naꞌ ca naquə barconꞌ ganꞌ zesyəꞌəyoꞌo disipl c̱heꞌ caꞌ, bazdan gwchoḻte nisdaꞌonəꞌ, nžiguəꞌəx̱ax̱ɉ nisənꞌ ḻen c̱hedəꞌ chas chatəꞌ nisdaꞌonəꞌ por ni c̱he chec̱hɉ beꞌenəꞌ clelə.
\v 25 Naꞌ do šbaḻ beyetɉ Jesoꞌosənꞌ yaꞌanəꞌ naꞌ gwzeꞌe tlao nisdaꞌonəꞌ par gwyeɉeꞌ galənꞌ zɉaꞌac disipl c̱heꞌ caꞌ.
\v 26 Naꞌ catəꞌ besəꞌəleꞌi disipl c̱heꞌ caꞌ ḻeꞌ zdeꞌ lao nisdaꞌonəꞌ, ḻechguaḻe besəꞌəžebeꞌ xte gwsoꞌosyeꞌe gosəꞌəneꞌ: —¡To beṉəꞌ guat chleꞌicho chda tlao nisənꞌ!
\p
\v 27 Naꞌ ḻeꞌe boḻgüižte Jesoꞌosənꞌ ḻegaꞌaqueꞌ, gožeꞌ: —Ḻeyebei. Nadaꞌanəꞌ. Bito žeble.
\p
\v 28 Nach Bedənꞌ gožeꞌeneꞌ: —X̱antoꞌ, šə ḻe leꞌenəꞌ, gwna nadaꞌ saꞌa tlao nisdaꞌonəꞌ yidaꞌ ganꞌ zoꞌonəꞌ.
\p
\v 29 Nach gož Jesoꞌosənꞌ ḻeꞌ: —Da Bed.
\p Naꞌ ḻeꞌe bchoɉte Bedənꞌ ḻoꞌo barconꞌ naꞌ gwzolao gwzeꞌe tlao nisdaꞌonəꞌ par zdeꞌ ganꞌ zo Jesoꞌosənꞌ.
\v 30 Pero naꞌ catəꞌ gocbeꞌineꞌ ca fuertənꞌ chec̱hɉ beꞌenəꞌ, bžebeꞌ naꞌ gwzolao chyišeꞌe ḻoꞌo nisənꞌ. Nach bisyeꞌe gožeꞌ Jesoꞌosənꞌ: —X̱anaꞌ, bosla nadaꞌ, bachetɉaꞌ xan nisənꞌ.
\p
\v 31 Naꞌ ḻeꞌe bḻite naꞌ Jesoꞌosənꞌ bex̱eꞌeneꞌ. Nach gožeꞌ Bedənꞌ: —Bixc̱henꞌ gocžeɉlažoꞌo? Gwyeɉḻeꞌech c̱hiaꞌ.
\p
\v 32 Naꞌ catəꞌ beyoꞌo Jesoꞌosənꞌ len Bedənꞌ ḻoꞌo barconꞌ, ḻeꞌe gwlezte beꞌenəꞌ.
\v 33 Naꞌ beṉəꞌ caꞌ žaꞌ ḻoꞌo barconꞌ gwsoꞌelaogüeꞌe Jesoꞌosənꞌ, gwseꞌeneꞌ: —Deꞌe ḻiczə lenꞌ nacoꞌ Xiꞌiṉ Diozənꞌ.
\s1 Jesoꞌosənꞌ beyoneꞌ beṉəꞌ chsaꞌacšene beṉəꞌ nitəꞌ Genesaret
\p
\v 34 Nach gwzaꞌach barconꞌ xte bžinən choꞌa nisdaꞌonəꞌ to latɉə deꞌen nziꞌ Genesaret. Naꞌ besyəꞌəchoɉeꞌ ḻoꞌo barconꞌ.
\v 35 Naꞌ beṉəꞌ žaꞌ do Genesaretənꞌ besyəꞌəyombiꞌe Jesoꞌosənꞌ, naꞌ bosəꞌəseḻeꞌe rson yoguəꞌ yež caꞌ deꞌen zɉəchiꞌ gaḻəꞌəzə de que Jesoꞌosənꞌ babžineꞌ lažgaꞌaqueꞌenəꞌ. Naꞌ beṉəꞌ caꞌ žaꞌ yež caꞌ gosəꞌəc̱heꞌe yoguəꞌ beṉəꞌ chsaꞌacšene lao Jesoꞌosənꞌ.
\v 36 Nach gosəꞌəṉabeneꞌ Jesoꞌosənꞌ šə güeneꞌeneꞌ yesəꞌəganeꞌ lox xadoṉ c̱heꞌenəꞌ. Naꞌ yoguəꞌ beṉəꞌ caꞌ gosəꞌəgan ḻen besyəꞌəyaqueneꞌ.
\c 15
\s1 Dižəꞌ deꞌen chchoɉ choꞌachonꞌ chonən manch laꞌaždaꞌochonꞌ
\p
\v 1 Naꞌ baḻə beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwsaꞌaqueꞌ Jerosalenṉəꞌ naꞌ besəꞌəžineꞌ ganꞌ zo Jesoꞌosənꞌ, naꞌ gwseꞌeneꞌ:
\v 2 —¿Bixc̱henꞌ disipl c̱hioꞌ caꞌ bito chesəꞌənaogüeꞌ costombr caꞌ deꞌen bosyoꞌocuaꞌaṉlen deꞌe x̱axtaꞌocho caꞌ chioꞌo? ¿Bixc̱henꞌ cui chosyoꞌoneꞌe zan las antslə zeꞌe saꞌogüeꞌ canꞌ chontoꞌ?
\p
\v 3 Nach Jesoꞌosənꞌ gožeꞌ ḻegaꞌaqueꞌ: —Ca naquə leꞌe ža, ¿bixc̱henꞌ chbeɉyic̱hɉle cui chonḻe canꞌ non Diozənꞌ mendad goncho naꞌ con naozechle costombr c̱helenꞌ?
\v 4 Diozənꞌ noneꞌ mendad canꞌ goncho, gwneꞌ: “Leꞌe gwnežɉo yeḻəꞌ balaꞌaṉ x̱axnaꞌale”, naꞌ “Notəꞌətezle šə chžia chnitəꞌəle x̱axnaꞌale cheyaḻəꞌ gatle.”
\v 5 Pero leꞌe nale de que šə beṉəꞌ əṉeꞌ de que babnežɉueꞌ Diozənꞌ mech o bien deꞌen cheyaḻəꞌ əgwnežɉueꞌ x̱axneꞌenəꞌ par gaquəleneꞌ ḻegaꞌaqueꞌ, naꞌ bitoch bi cheyaḻəꞌ əgwnežɉueꞌ x̱axneꞌe.
\v 6 Naꞌ deꞌen chonḻe caꞌ, bachonḻe ḻei c̱he Diozənꞌ ca to deꞌe cui bi bi zaqueꞌe nic̱h caꞌ naozechle costombr c̱helenꞌ.
\v 7 Leꞌe nacle beṉəꞌ gox̱oayag. Chonḻe cayaṉəꞌən bzoɉ deꞌe profet Isaiazənꞌ c̱hele, ganꞌ nan:
\q1
\v 8 Beṉəꞌ Izrael caꞌ chesəꞌəneꞌ de que nadaꞌ Diozənꞌ chsoꞌelaogüeꞌe,
\q1 pero caguə do lažəꞌəgaꞌaqueꞌen chsoꞌelaogüeꞌe nadaꞌ.
\q1
\v 9 Bitobi zeɉen deꞌen chsoꞌelaogüeꞌe nadaꞌ
\q1 c̱hedəꞌ laꞌ chosoꞌosed chosoꞌoloꞌineꞌ beṉəꞌ costombr deꞌen gwsaꞌalɉlažəꞌ beṉac̱hənꞌ.
\p
\v 10 Nach Jesoꞌosənꞌ bozoḻgüižeꞌ beṉəꞌ zan caꞌ zɉənžaguənꞌ par nic̱h gosəꞌəbigueꞌe laogüeꞌenəꞌ, naꞌ gožeꞌ ḻegaꞌaqueꞌ: —Ḻegwzenag deꞌe nga əṉiaꞌ leꞌe nic̱h šeɉniꞌilenꞌ.
\v 11 Bito ṉacho de que deꞌen cheꞌeɉ chaochonꞌ chonən manch laꞌaždaꞌochonꞌ. Echniaꞌ leꞌe, dižəꞌ deꞌen chchoɉ choꞌalenꞌ, ḻenṉəꞌ chonən manch laꞌaždaꞌolenꞌ.
\p
\v 12 Nach gosəꞌəbiguəꞌ disipl c̱he Jesoꞌosənꞌ laogüeꞌenəꞌ gwseꞌeneꞌ: —¿Ebito gocbeꞌidoꞌ de que beṉəꞌ fariseo caꞌ ḻechguaḻe besəꞌəžeꞌe catəꞌ gwseꞌeneneꞌ xtižoꞌonəꞌ?
\p
\v 13 Naꞌ Jesoꞌosənꞌ gožeꞌ ḻegaꞌaqueꞌ: —Gwžin ža catəꞌ X̱aꞌ Diozənꞌ benꞌ zo yobanꞌ gwžiayiꞌe yoguəꞌəḻoḻ beṉəꞌ cui chosoꞌozenag c̱heꞌ. Egwžiayiꞌe ḻegaꞌaqueꞌ canꞌ choncho catəꞌ chḻažəꞌəcho yix̱əꞌ caꞌ chlaꞌac ḻoꞌo yel.
\v 14 Lɉosəꞌəye beṉəꞌ fariseo caꞌ. Zɉənaquəgaꞌaqueꞌ ca to beṉəꞌ lc̱hoḻ beṉəꞌ cheneꞌeneꞌ cueꞌe nez yeto beṉəꞌ lc̱hoḻ. Chsoꞌonczə yic̱hɉlaogaꞌaqueꞌ cui chosoꞌozenagueꞌ c̱he Diozənꞌ naꞌ chosoꞌosedeneꞌ beṉəꞌ deꞌen cui naquə deꞌe ḻi. Ṉezecho de que beṉəꞌ lc̱hoḻənꞌ bito gaquə cueꞌe nez yeto beṉəꞌ lc̱hoḻ laꞌ txenṉəꞌ žɉəsəꞌəbix̱eꞌ to ḻoꞌo yech.
\p
\v 15 Nach Bedənꞌ gožeꞌ Jesoꞌosənꞌ: —Bzeɉniꞌišguei netoꞌ bi zeɉen deꞌen gwnaoꞌ de que deꞌen cheꞌeɉ chaochonꞌ bito chonən manch laꞌaždaꞌochonꞌ.
\p
\v 16 Nach gož Jesoꞌosənꞌ ḻegaꞌaqueꞌ: —¿Eḻeczə lenḻe bito cheɉniꞌile deꞌe quinga bagwniaꞌ leꞌe?
\v 17 ¿Ecabi ṉezele de que yoguəꞌ deꞌen cheꞌeɉ chaochonꞌ chɉc̱heꞌen ḻoꞌo ḻeꞌechonꞌ naꞌ chžin or cheden?
\v 18 Pero əchniaꞌ leꞌe, yoguəꞌ dižəꞌ deꞌen choꞌechonꞌ chəsəꞌəchoɉən yic̱hɉlaꞌaždaꞌochonꞌ, naꞌ šə choꞌecho dižəꞌ malənꞌ, ḻen chsoꞌonən manch yic̱hɉlaꞌaždaꞌochonꞌ.
\v 19 Naꞌ ḻoꞌo yic̱hɉlaꞌaždaoꞌ beṉac̱h naꞌanəꞌ chchoɉ yoguəꞌ xbab mal quinga, ca deꞌen nan soꞌoteꞌ beṉəꞌ, naꞌ nan yosoꞌogoꞌo xtogaꞌaqueꞌ, naꞌ nan yesəꞌəbeɉyic̱hɉ noꞌol c̱hegaꞌaqueꞌ o benꞌ c̱hegaꞌaqueꞌ par yesyəꞌəzoleneꞌ beṉəꞌ yoblə naꞌ nan yesəꞌəbangaꞌaqueꞌ bi de c̱he beṉəꞌ, naꞌ nan soꞌonḻažəꞌəgaꞌaqueꞌ, naꞌ nan yosoꞌožia yosoꞌoniteꞌe lɉuežɉ beṉac̱hgaꞌaqueꞌ.
\v 20 Xbab mal caꞌ zɉənac caꞌ chsoꞌonən manch yic̱hɉlaꞌaždaꞌochonꞌ. Naꞌ bito əṉacho de que deꞌen cui chonaꞌacho zan las antslə zeꞌe gaocho chonən manch yic̱hɉlaꞌaždaꞌochonꞌ.
\s1 To noꞌolə cui naqueꞌ beṉəꞌ Izrael chonḻilažeꞌe Jesoꞌosənꞌ
\p
\v 21 Bezaꞌ Jesoꞌosənꞌ latɉənꞌ len disipl c̱heꞌ caꞌ par ɉaꞌaqueꞌ gaḻəꞌəzə ganꞌ mbane Tiro naꞌ Sidon.
\v 22 Naꞌ to noꞌolə beṉəꞌ cui naquə beṉəꞌ Izrael, gwzeꞌe ganꞌ mbane Tiro naꞌ Sidon par ɉəšagueꞌ Jesoꞌosənꞌ. Naꞌ gwṉeꞌ zižɉo gožeꞌ Jesoꞌosənꞌ: —X̱anaꞌ, leꞌ nacoꞌ xiꞌiṉ dia c̱he deꞌe Rei Dabinꞌ. Beyašəꞌəšguei netoꞌ. To biꞌi noꞌolə c̱hiaꞌ yoꞌo yaz to deꞌe x̱ioꞌ ḻoꞌo yic̱hɉlaꞌaždaꞌoboꞌonəꞌ naꞌ ḻechguaḻe chžaglaoboꞌ.
\p
\v 23 Pero Jesoꞌosənꞌ bito božiꞌe xtižəꞌ noꞌolənꞌ. Nach disipl c̱he Jesoꞌosənꞌ gosəꞌəbigueꞌe cuiteꞌenəꞌ naꞌ gwsaꞌatəꞌəyoineꞌ ḻeꞌ gwseꞌeneꞌ: —Bosaꞌašga noꞌolənꞌ laꞌ con naogüeꞌ chioꞌo naꞌ chatəꞌəyoineꞌ leꞌ zižɉo par gaquəlenoꞌoneꞌ.
\p
\v 24 Nach Jesoꞌosənꞌ gožeꞌ ḻegaꞌaqueꞌ: —Diozənꞌ bseḻeꞌe nadaꞌ gaquəlenaꞌ ṉasyon Izrael naꞌazənꞌ, laꞌ ḻegaꞌaqueꞌ gwxaquəꞌəlebəgaꞌaqueneꞌ ca xiləꞌ daoꞌ bia zɉənaquəžeɉe.
\p
\v 25 Nach noꞌolənꞌ bgüigueꞌe bzo xibeꞌ lao Jesoꞌosənꞌ, naꞌ gožeꞌeneꞌ: —X̱anaꞌ goꞌonšguei goclen netoꞌ.
\p
\v 26 Naꞌ Jesoꞌosənꞌ gožeꞌeneꞌ: —Bito naquən güen yecaꞌacho yeḻəꞌ guao c̱he xiꞌiṉcho naꞌ əgwnežɉwchon gao xicodaꞌocho.
\p
\v 27 Naꞌ gocbeꞌi noꞌolənꞌ bsaquəꞌəlebe Jesoꞌosənꞌ beṉəꞌ caꞌ cui zɉənaquə beṉəꞌ Izrael ca becoꞌ, nach gožeꞌeneꞌ: —Ḻeiczədoꞌ X̱anaꞌ. Pero xicocho caꞌ guaquə əsaꞌob pedas deꞌe chesəꞌəxopə lao yonꞌ.
\p
\v 28 Nach Jesoꞌosənꞌ gožeꞌeneꞌ: —Noꞌolə, ḻechguaḻe chonḻilažoꞌo nadaꞌ. Guaquəlenczaꞌ leꞌ canꞌ cheꞌendoꞌ.
\p Naꞌ lao or naꞌ beyaque xiꞌiṉ noꞌolənꞌ.
\s1 Jesoꞌosənꞌ beyoneꞌ beṉəꞌ zan beṉəꞌ chsaꞌacsene
\p
\v 29 Gwde naꞌ Jesoꞌosənꞌ naꞌ disipl c̱heꞌ caꞌ besaꞌaqueꞌ latɉənꞌ naꞌ gwsoꞌe nezənꞌ deꞌen zda tchoꞌa nisdaoꞌ Galileanꞌ. Nach gwseꞌepeꞌ to lao yaꞌa naꞌ ɉesəꞌəchiꞌe lao yaꞌanəꞌ.
\v 30 Naꞌ besəꞌəžin beṉəꞌ zan lao yaꞌa ganꞌ zo Jesoꞌosənꞌ len disipl c̱heꞌ caꞌ. Zɉənc̱heꞌe no beṉəꞌ coj, naꞌ no beṉəꞌ lc̱hoḻ, naꞌ no beṉəꞌ mod, naꞌ no beṉəꞌ nchog ṉiꞌanaꞌagaꞌaqueꞌ, naꞌ zɉəlen beṉəꞌ chseꞌi gwde gwde yižgüeꞌ na bosoꞌoniteꞌe ḻegaꞌaqueꞌ lao Jesoꞌosənꞌ. Naꞌ Jesoꞌosənꞌ beyoneꞌ yogueꞌe.
\v 31 Naꞌ ḻechguaḻe besyəꞌəbane beṉəꞌ caꞌ catəꞌ besəꞌəleꞌineꞌ canꞌ ben Jesoꞌosənꞌ beyoneꞌ beṉəꞌ caꞌ. Besyəꞌəbaneneꞌ canꞌ besyəꞌəṉe beṉəꞌ mod caꞌ, naꞌ besyəꞌəyaque beṉəꞌ caꞌ zɉənchog no ṉiꞌanaꞌagaꞌaqueꞌenəꞌ, naꞌ besyəꞌəda beṉəꞌ coj caꞌ, naꞌ besyəꞌəleꞌi beṉəꞌ lc̱hoḻ caꞌ. Nach yoguəꞌəḻoḻ beṉəꞌ caꞌ gwsoꞌelaogüeꞌe Diozənꞌ.
\s1 Jesoꞌosənꞌ bguaogüeꞌ tap mil beṉəꞌ
\p
\v 32 Gwde naꞌ Jesoꞌosənꞌ goxeꞌ disipl c̱heꞌ caꞌ naꞌ gožeꞌ ḻegaꞌaqueꞌ: —Ḻechguaḻe cheyašəꞌədaꞌ beṉəꞌ quinga. Bagoc šoṉə ža niteꞌe nga len chioꞌo, naꞌ bitobi de deꞌe saꞌogüeꞌ. Naꞌ bito cheꞌendaꞌ yosaꞌagaꞌacaꞌaneꞌ sin cui saꞌogüeꞌ par nic̱h cui yesyəꞌəc̱hoḻeneꞌ tnezənꞌ.
\p
\v 33 Nach disipl c̱heꞌ caꞌ gwseꞌeneꞌ: —Ganꞌ zocho nga naquən to latɉə ga cui nono nḻaꞌ. ¿Gaxa əželecho deꞌe əsaꞌo yoguəꞌ beṉəꞌ zan quinga?
\p
\v 34 Nach Jesoꞌosənꞌ gožeꞌ ḻegaꞌaqueꞌ: —¿Baḻə yetxtil c̱hechonꞌ de?
\p Nach gwseꞌeneꞌ: —Gažga yetxtil daoꞌ zɉəde naꞌ to c̱hopga beḻ yaꞌa daoꞌ.
\p
\v 35 Nach Jesoꞌosənꞌ beneꞌ mendad yesəꞌəbeꞌ beṉəꞌ caꞌ lao yonꞌ.
\v 36 Naꞌ gwxiꞌe yetxtil daoꞌ caꞌ gažə naꞌ len beḻ yaꞌa daoꞌ caꞌ, nach beꞌe yeḻəꞌ chox̱cwlen c̱he Diozənꞌ. Gwde naꞌ bzoxɉeꞌen bnežɉueꞌen disipl c̱heꞌ caꞌ par gwsoꞌe c̱he yoguəꞌ beṉəꞌ caꞌ.
\v 37 Naꞌ yogueꞌe gwsaꞌogüeꞌ xte ca gwseꞌelɉeneꞌ. Nach pedas caꞌ deꞌen besyəꞌəgaꞌaṉnəꞌ bosyɔꞌotobə disipl caꞌ ḻen, naꞌ goquən gažə žomə.
\v 38 Naꞌ beṉəꞌ caꞌ gwsaꞌo yetxtilənꞌ naquə tap mil beṉəꞌ byo, bito cuent noꞌolə naꞌ bito cuent bidaoꞌ.
\v 39 Nach Jesoꞌosənꞌ boseꞌe beṉəꞌ caꞌ. Gwde naꞌ gwyoꞌe to ḻoꞌo barcw len disipl c̱heꞌ caꞌ naꞌ ɉaꞌaqueꞌ distrit ganꞌ nziꞌ Magdala.
\c 16
\s1 Gosəꞌəṉabeneꞌ Jesoꞌosənꞌ goneꞌ to deꞌe yesəꞌəleꞌineꞌ ḻeꞌe yobanꞌ
\p
\v 1 Naꞌ goquənꞌ baḻə beṉəꞌ fariseo caꞌ naꞌ beṉəꞌ sadoseo caꞌ gosəꞌəbigueꞌe ganꞌ zo Jesoꞌosənꞌ. Naꞌ gosəꞌəṉabeꞌ goneꞌ to miḻagr deꞌen yesəꞌəleꞌineꞌ ḻeꞌe yobanꞌ deꞌen gwsaꞌaqueneꞌ cui gaquə goneꞌ.
\v 2 Nach Jesoꞌosənꞌ gožeꞌ ḻegaꞌaqueꞌ: —Catəꞌ chleꞌile nḻatɉəcha ḻeꞌe yobanꞌ šeꞌelə nach nale: “Gožaꞌa gwx̱e c̱hedəꞌ nḻatɉəcha.”
\v 3 Naꞌ šə chiꞌ beɉw catəꞌən cheꞌeniꞌ nach nale: “Guaquə zag, laꞌ chiꞌichgua beɉw.” Beṉəꞌ gox̱oayag leꞌe. Ṉezele šə guaquə zag o šə guaquə zeyəꞌ catəꞌən chleꞌile nac naquə ḻeꞌe yobanꞌ, pero cabi chacbeꞌile bi zeɉe deꞌe caꞌ chon Diozənꞌ tyemp nga zocho ṉaꞌa.
\v 4 Leꞌe mbanḻe ṉaꞌa ḻechguaḻe beṉəꞌ laꞌaždaoꞌ mal nacle, naꞌ bagwleɉyic̱hɉle Diozənꞌ. Deꞌe naꞌanəꞌ chṉable gonaꞌ to deꞌe leꞌile ḻeꞌe yobanꞌ par nic̱h əṉezele šə Diozənꞌ bseḻeꞌe nadaꞌ. Pero bito gonaꞌ canꞌ chṉablenəꞌ. Deꞌen gon Diozənꞌ len nadaꞌ par nic̱h əṉezele de que ḻeꞌenəꞌ bseḻeꞌe nadaꞌ gwxaquəꞌəleben ca deꞌen beneꞌ len deꞌe Jonasənꞌ benꞌ beꞌ xtižəꞌ Diozənꞌ canaꞌ.
\p Naꞌ beyož gwna Jesoꞌosənꞌ caꞌ, bezeꞌe len disipl c̱heꞌ caꞌ ganꞌ nitəꞌ beṉəꞌ caꞌ.
\s1 Deꞌen chsed chloꞌi beṉəꞌ fariseo caꞌ naꞌ beṉəꞌ sadoseo caꞌ gwxaquəꞌəleben ca xnaꞌ cuazinꞌ
\p
\v 5 Naꞌ catəꞌ besəꞌəžineꞌ yešḻaꞌalə nisdaoꞌ Galileanꞌ, disipl c̱heꞌ caꞌ gwsaꞌacbeꞌineꞌ de que gwsaꞌanḻažeꞌe yetxtil deꞌen əsaꞌogüeꞌ.
\v 6 Nach Jesoꞌosənꞌ gožeꞌ ḻegaꞌaqueꞌ: —Ḻegapə cuidad len xnaꞌ cuazi c̱he beṉəꞌ fariseo caꞌ naꞌ c̱he beṉəꞌ sadoseo caꞌ.
\p
\v 7 Pero disipl c̱heꞌ caꞌ bito gwseꞌeɉniꞌineꞌ bi zeɉe deꞌen gožeꞌ ḻegaꞌaqueꞌ caꞌ, nach gwseꞌ lɉuežɉgaꞌaqueꞌ: —Gwneꞌ caꞌ c̱hedəꞌ gonḻažəꞌəcho guaꞌacho yetxtilənꞌ.
\p
\v 8 Naꞌ Jesoꞌosənꞌ gocbeꞌineꞌ xbab deꞌen chsoꞌoneꞌ, nach gožeꞌ ḻegaꞌaqueꞌ: —¿Bixc̱henꞌ chonḻe xbab c̱he yetxtilənꞌ deꞌen gonḻažəꞌəle? ¿Ecabi ṉeꞌe šeɉḻeꞌele de que napaꞌ yeḻəꞌ guac par guaoguaꞌ leꞌe?
\v 9 ¿Ebito cheɉniꞌile bi zeɉe miḻagr caꞌ chonaꞌ? naꞌ ¿əbagonḻažəꞌəle canꞌ bguaoguaꞌ gueyaꞌa mil beṉəꞌ byo len gueyəꞌəzə yetxtil daoꞌ? ¿Enaꞌ ḻeczə bito zaꞌalažəꞌəle do baḻə žomə pedas yetxtil caꞌ betoble deꞌen besyəꞌəgaꞌaṉ?
\v 10 Naꞌ ¿c̱hexa tapa mil beṉəꞌ byo caꞌ bguaoguaꞌ len gažə yetxtil daoꞌ? ¿Ezaꞌalažəꞌəle baḻə žomə pedas yetxtil canꞌ betoble gwde besyəꞌədaogüeꞌenəꞌ?
\v 11 ¿Bixc̱henꞌ con benḻe xbab c̱he yetxtilənꞌ catəꞌən gwniaꞌ leꞌe gaple cuidad len xnaꞌ cuazi c̱he beṉəꞌ fariseo caꞌ naꞌ c̱he beṉəꞌ sadoceo caꞌ?
\p
\v 12 Nach disipl c̱heꞌ caꞌ gwsaꞌacbeꞌineꞌ de que Jesoꞌosənꞌ caguə biꞌe dižəꞌən caꞌ c̱he xnaꞌ cuazinꞌ deꞌen chəsəꞌəc̱hineꞌ par chechaꞌo yetxtilənꞌ sino biꞌe dižəꞌən caꞌ par nic̱h cui yosoꞌozenagueꞌ c̱he deꞌen chosoꞌosed chosoꞌoloꞌi beṉəꞌ fariseo caꞌ naꞌ beṉəꞌ sadoseo caꞌ.
\s1 Bedənꞌ gwneꞌ c̱he Jesoꞌosənꞌ de que Diozənꞌ bseḻeꞌeneꞌ par gaquəleneꞌ ṉasyon Izraelənꞌ
\p
\v 13 Jesoꞌosənꞌ len disipl c̱heꞌ caꞌ ɉaꞌaqueꞌ ganꞌ mbane to syoda deꞌen nziꞌ Sesarea de Filipo. Nach Jesoꞌosənꞌ gožeꞌ ḻegaꞌaqueꞌ: —Deꞌe ḻi Diozənꞌ bseḻeꞌe nadaꞌ golɉaꞌ beṉac̱h. Pero ¿bi chesəꞌəna beṉəꞌ? ¿nonꞌ nacaꞌ nadaꞌ?
\p
\v 14 Nach gwseꞌeneꞌ: —Baḻeꞌ chesəꞌəneꞌ de que nacoꞌ deꞌe Juan benꞌ bc̱hoa beṉəꞌ nis. Naꞌ yebaḻeꞌ chesəꞌəneꞌ de que nacoꞌ Ḻiaz benꞌ beꞌ xtižəꞌ Diozənꞌ canaꞌ. Naꞌ yebaḻeꞌ chesəꞌəneꞌ de que nacoꞌ deꞌe profet Jeremias, o de que nacoꞌ yetoꞌ beṉəꞌ beꞌ xtižəꞌ Diozənꞌ canaꞌate.
\p
\v 15 Nach gožeꞌ ḻegaꞌaqueꞌ: —C̱hexa leꞌe, ¿bi nale nonꞌ nacaꞌ nadaꞌ?
\p
\v 16 Simon Bedənꞌ gožeꞌeneꞌ: —Lenꞌ nacoꞌ Crist benꞌ gwleɉ Diozənꞌ par gaquəlenoꞌ ṉasyon c̱hechonꞌ, naꞌ nacoꞌ Xiꞌiṉ Dioz benꞌ zo zeɉḻicaṉe.
\p
\v 17 Nach Jesoꞌosənꞌ gožeꞌeneꞌ: —Simon xiꞌiṉ Jonas, mbalaz zoꞌ deꞌen gwnaoꞌ deꞌe caꞌ. Notono beṉac̱h bzeɉniꞌi leꞌ deꞌe caꞌ, tozə X̱aꞌ Diozənꞌ benꞌ zo yobanꞌ, ḻeꞌenəꞌ babzeɉniꞌineꞌen leꞌ.
\v 18 Naꞌ nadaꞌ əniaꞌ de que lenꞌ lioꞌ Bed naꞌ zeɉen dižəꞌ yeɉ. Naꞌ canꞌ naoꞌ cheɉḻiꞌo c̱hiaꞌ gwxaquəꞌəleben ca to yeɉ gual deꞌe gaquə gwc̱hincho par lan yoꞌo. Naꞌ nadaꞌ yetobaꞌ beṉəꞌ zan beṉəꞌ seꞌeɉḻeꞌe de que nacaꞌ Xiꞌiṉ Dioz canꞌ cheɉḻiꞌo c̱hiaꞌ par nic̱h caꞌ əsaꞌaqueꞌ tozə yosoꞌocodəꞌ lɉuežɉeꞌ soꞌelaogüeꞌe nadaꞌ. Naꞌ bitobi gaquə soꞌon deꞌe x̱ioꞌ caꞌ par nic̱h əžin ža catəꞌ cuich no soꞌelaoꞌ nadaꞌ.
\v 19 Naꞌ gonaꞌ lao naꞌo zguaꞌatec leꞌ goꞌo xtižaꞌanəꞌ len beṉəꞌ zan par nic̱h əsoꞌe latɉə ṉabiaꞌ Diozənꞌ ḻegaꞌaqueꞌ, Dioz benꞌ zo yobanꞌ. Naꞌ ḻeczə gaquən lao naꞌo yoꞌo beṉəꞌ caꞌ yosoꞌocodəꞌ lɉuežɉe soꞌelaꞌogüeꞌe nadaꞌ binꞌ naquə güen soꞌoneꞌ naꞌ yeꞌegaꞌacoꞌoneꞌ bi deꞌe caꞌ cui naquə güen soꞌoneꞌ. Naꞌ Diozənꞌ əgwzeɉniꞌineꞌ leꞌ naquənꞌ yeꞌegaꞌacoꞌoneꞌ par nic̱h caꞌ yediḻən len deꞌen na Diozənꞌ.
\p
\v 20 Nach Jesoꞌosənꞌ beneꞌ mendad len ḻegaꞌaqueꞌ de que ni toeꞌ cui əsoꞌe dižəꞌ de que ḻeꞌ naꞌanəꞌ naqueꞌ Crist benꞌ gwleɉ Diozənꞌ par gaquəleneꞌ ṉasyon c̱hechonꞌ.
\s1 Jesoꞌosənꞌ gwdix̱ɉueꞌineꞌ disipl c̱heꞌ caꞌ de que soꞌot beṉəꞌ ḻeꞌ
\p
\v 21 Naꞌ ža naꞌ Jesoꞌosənꞌ gwzolaogüeꞌ bsed bloꞌineꞌ disipl c̱heꞌ caꞌ de que cheyaḻəꞌ šeɉeꞌ Jerosalenṉəꞌ naꞌ gaqueꞌ lao naꞌ beṉəꞌ golə blao c̱he ṉasyon Izrael c̱hechonꞌ, naꞌ lao naꞌ bx̱oz əblao c̱hecho caꞌ, naꞌ lao naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ. Naꞌ gwneꞌ de que yoguəꞌ beṉəꞌ caꞌ deꞌe zan deꞌe yosəꞌəc̱hiꞌ yosəꞌəsaqueꞌe ḻeꞌ naꞌ əsoꞌoteꞌ ḻeꞌ. Pero naꞌ yeyoṉ ža yebaneꞌ ladɉo beṉəꞌ guat caꞌ.
\v 22 Nach Bedənꞌ gwleɉeꞌ Jesoꞌosənꞌ latəꞌ daoꞌ caꞌaḻə naꞌ gožeꞌeneꞌ: —X̱anaꞌ, Diozənꞌ gaquəleneꞌ leꞌ. Bitoczə gac c̱hioꞌ deꞌe quinga naoꞌ nga.
\p
\v 23 Pero naꞌ Jesoꞌosənꞌ gwyec̱hɉeꞌ bgüieꞌ Bedənꞌ naꞌ gožeꞌ gwxiyeꞌenəꞌ deꞌen chnabiaꞌ yic̱hɉlaꞌaždaoꞌ Bedənꞌ: —Gwchiꞌižəꞌ caꞌaḻə Satanas.
\p Nach gožeꞌ Bedənꞌ: —Bito cheꞌendoꞌ gonaꞌ canꞌ non Diozənꞌ mendad gonaꞌ. Chonoꞌ xbab c̱he deꞌen chacdoꞌ gaquən güen naꞌ bito chonoꞌ xbab naquənꞌ cheneꞌe Diozənꞌ gaquə.
\p
\v 24 Gwde naꞌ Jesoꞌosənꞌ gožeꞌ disipl c̱heꞌ caꞌ: —Notəꞌətezle šə cheꞌenele gonḻilažəꞌəle nadaꞌ naꞌ gwzenagle c̱hiaꞌ cheyaḻəꞌ əchoɉ yic̱hɉle deꞌen cheneꞌele gon cuinḻe par nic̱h gonḻe con canꞌ cheneꞌe Diozənꞌ naꞌ bitobi gaquele c̱he deꞌen c̱hiꞌ saquəꞌəle, ḻaꞌaṉəꞌəczə šə soꞌot beṉəꞌ leꞌe to ḻeꞌe yag coroz con gonḻilažəꞌəle nadaꞌ.
\v 25 Notəꞌətezə beṉəꞌ chaqueneꞌ goneꞌ par nic̱h cui c̱hiꞌ saqueꞌe o par nic̱h cui no soꞌot ḻeꞌ, beꞌenanꞌ cuiayiꞌ. Naꞌ notəꞌətezə beṉəꞌ chsanḻažəꞌ cuineꞌ c̱hiꞌ saqueꞌe o soꞌot beṉəꞌ ḻeꞌ por ni c̱hiaꞌ, beꞌenanꞌ əbaneꞌ zeɉḻicaṉe.
\v 26 Bitobi deꞌe güen gaquə c̱he to beṉəꞌ ḻaꞌaṉəꞌəczə ṉabiꞌe doxen yežlyonꞌ šə cuiayiꞌe zeɉḻicaṉe, laꞌ bitəꞌətezə deꞌe gatəꞌ c̱heꞌ, bito gaquəlenən ḻeꞌ par nic̱h cui cuiꞌayiꞌe zeɉḻicaṉe.
\v 27 Diozənꞌ bseḻeꞌe nadaꞌ, golɉaꞌ beṉac̱h, naꞌ catəꞌ yidaꞌ yežlyo nga deꞌe yoblə nsaꞌa yeḻəꞌ chey cheꞌeniꞌ c̱he X̱aꞌ Diozənꞌ naꞌ c̱hiꞌa angl c̱hiaꞌ caꞌ, canaꞌach gonaꞌ par nic̱h to to beṉac̱hənꞌ ṉiteꞌe mbalaz o yesəꞌəziꞌe castigw segon deꞌe gwsoꞌon to togaꞌaqueꞌ.
\v 28 Diozənꞌ bseḻeꞌe nadaꞌ golɉaꞌ beṉac̱h. Naꞌ deꞌe ḻi chniaꞌ ḻeꞌe, baḻle cabiṉəꞌ gatle catəꞌən leꞌile nadaꞌ yidaꞌ deꞌe yoblə par yedəloꞌa yeḻəꞌ gwnabiaꞌ c̱hiaꞌanəꞌ.
\c 17
\s1 Jesoꞌosənꞌ goqueꞌ ca to deꞌe chey cheꞌeniꞌ
\p
\v 1 Gwde x̱op ža gwna Jesoꞌosənꞌ deꞌe caꞌ, gwc̱heꞌe Bedənꞌ len Jacobənꞌ naꞌ Juan beṉəꞌ bišəꞌ Jacobənꞌ, ɉaꞌaqueꞌ to lao yaꞌa sibə.
\v 2 Naꞌ lao niteꞌe lao yaꞌanəꞌ bežaꞌ canꞌ goquə Jesoꞌosənꞌ, bežaꞌateczə choꞌalaogüeꞌenəꞌ naꞌ gwyey gwyeꞌeniꞌin caꞌaczənꞌ chac bgüižənꞌ, naꞌ xalaneꞌenəꞌ beyaquən šyiš xiləꞌ caꞌaczə beꞌeniꞌ.
\v 3 Naꞌ goquən lao niteꞌenəꞌ conczə besəꞌəleꞌineꞌ deꞌe Moisezənꞌ len profet Ḻiazənꞌ benꞌ gwzo canaꞌ, naꞌ chsoꞌeleneꞌ Jesoꞌosənꞌ dižəꞌ.
\v 4 Nach Bedənꞌ gožeꞌeneꞌ: —X̱antoꞌ, güenchgua zocho nga ṉaꞌa. ¿Egüeꞌendoꞌ gontoꞌ šoṉə ranš? ton par leꞌ, naꞌ ton par Moisezənꞌ naꞌ yeton par Ḻiazənꞌ.
\p
\v 5 Ṉeꞌe choꞌeteꞌ dižəꞌənəꞌ catəꞌəczla to beɉw deꞌen chactit bcuašəꞌən ḻegaꞌaqueꞌ, naꞌ ḻoꞌo beɉonꞌ gwseꞌeneneꞌ gwna Diozənꞌ: —Benga Xiꞌiṉaꞌ benꞌ chacchgüeidaꞌ c̱hei. Cheba chezaquəꞌəlažaꞌa len ḻeꞌ. C̱he ḻeꞌenəꞌ ḻeꞌe gwzenag.
\p
\v 6 Naꞌ catəꞌ gwseꞌene disipl caꞌ dižəꞌ caꞌ ḻechguaḻe besəꞌəžebeꞌ, xte ɉesəꞌəchazeꞌ gosc̱hoꞌalə lao yonꞌ.
\v 7 Nach bgüiguəꞌ Jesoꞌosənꞌ bx̱oa neꞌenəꞌ yic̱hɉgaꞌaqueꞌenəꞌ, naꞌ gožeꞌ: —Ḻeyeyas. Bito žeble.
\p
\v 8 Naꞌ catəꞌ besyəꞌəgüieꞌenəꞌ, notono no nochlə besəꞌəleꞌineꞌ sino tozə Jesoꞌosənꞌ.
\p
\v 9 Naꞌ gwde naꞌ lao chesyəꞌəyetɉeꞌ yaꞌanəꞌ, gož Jesoꞌosənꞌ ḻegaꞌaqueꞌ: —Ni tole cui güeꞌele dižəꞌ c̱he deꞌen bableꞌile xte catəꞌəch bagwsoꞌot beṉəꞌ nadaꞌ naꞌ yebanaꞌ ladɉo beṉəꞌ guat caꞌ, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 10 Nach disipl c̱heꞌ caꞌ gwseꞌeneꞌ: —Beṉəꞌ caꞌ chosoꞌosed chosoꞌoloꞌi ḻeinꞌ chosoꞌosedeneꞌ netoꞌ de que zguaꞌatec profet Ḻiaz benꞌ gwzo canaꞌ cheyaḻəꞌ yideꞌ lao yežlyo nga deꞌe yoblə antslə zeꞌe yidə benꞌ əseḻəꞌ Diozənꞌ par gaquəleneꞌ ṉasyon c̱hechonꞌ. ¿Bixc̱henꞌ chəsəꞌəneꞌ caꞌ ža?
\p
\v 11 Nach Jesoꞌosənꞌ gožeꞌ ḻegaꞌaqueꞌ: —Deꞌe ḻiczə chəsəꞌəneꞌ de que zguaꞌatec yidə profet Ḻiazənꞌ deꞌe yoblə benꞌ gwzo canaꞌ par yeyoneꞌ yoguəꞌəḻoḻ deꞌe cheyaḻəꞌ yeyac.
\v 12 Pero ṉaꞌa chniaꞌ leꞌe de que babidə benꞌ bedəyen canꞌ ben profet Ḻiazənꞌ, naꞌ beṉəꞌ Izrael gwlaž c̱hecho caꞌ bito gwsaꞌacbeꞌineꞌ de que ḻeꞌ naqueꞌ benꞌ naquən yidə. Naꞌ gwsoꞌoneneꞌ ḻeꞌ con canꞌ gwseꞌeneneꞌ naꞌ gwsoꞌoteꞌeneꞌ. Naꞌ caꞌaczənꞌ soꞌoneꞌ len nadaꞌ, Diozənꞌ bseḻeꞌe nadaꞌ golɉaꞌ beṉac̱h.
\p
\v 13 Nach gwsaꞌacbeꞌi disipl c̱heꞌ caꞌ de que Jesoꞌosənꞌ choꞌe dižəꞌ c̱he deꞌe Juanṉəꞌ benꞌ bc̱hoa beṉəꞌ nis.
\s1 Jesoꞌosənꞌ beyoneꞌ to biꞌi chaz šon
\p
\v 14 Naꞌ catəꞌ besəꞌəžineꞌ ganꞌ zɉənžag beṉəꞌ zan, to beṉəꞌ bšagueꞌ Jesoꞌosənꞌ naꞌ bzo xibeꞌ laogüeꞌenəꞌ. Naꞌ gožeꞌeneꞌ:
\v 15 —X̱anaꞌ beyašəꞌəlažəꞌəšguei xiꞌiṉaꞌ nga. Chazboꞌ šon naꞌ ḻechguaḻe chžaglaoboꞌ len ḻen. Naꞌ zan las baɉchazboꞌ lao yiꞌ naꞌ ḻeczə caꞌ zan las babxopboꞌ ḻoꞌo nis.
\v 16 Baɉoaꞌaboꞌ lao disipl c̱hioꞌ caꞌ, pero bito gwsaꞌaqueꞌ yesyəꞌəyoneꞌeboꞌ.
\p
\v 17 Nach Jesoꞌosənꞌ gožeꞌ beṉəꞌ caꞌ žaꞌanəꞌ: —Leꞌe chonḻe clelə naꞌ nalɉele. ¿Bixc̱hexaczxanꞌ cui cheɉḻeꞌele c̱hiaꞌ? Bachac sša zoaꞌ napaꞌ yeḻəꞌ chxenḻažəꞌ len leꞌe. ¿Batxanꞌ šeɉḻeꞌele c̱hiaꞌ?
\p Nach gožeꞌ x̱a bidaꞌonəꞌ: —Doaꞌ biꞌi c̱hioꞌon ni.
\p
\v 18 Nach Jesoꞌosənꞌ gwdiḻeꞌ deꞌe x̱ioꞌonəꞌ yoꞌo yaz yic̱hɉlaꞌaždaoꞌ bidaꞌonəꞌ par nic̱h bechoɉən yic̱hɉlaꞌaždaꞌoboꞌonəꞌ. Naꞌ lao or naꞌ beyaqueboꞌ.
\p
\v 19 Naꞌ gwde goc deꞌe caꞌ, gosəꞌəbiguəꞌ disipl c̱he Jesoꞌosənꞌ ganꞌ zoeꞌ tozeꞌ, naꞌ gwseꞌeneꞌ: —¿Bixc̱hexaczxanꞌ cui goquə yebeɉtoꞌ deꞌe x̱ioꞌonəꞌ yic̱hɉlaꞌaždaoꞌ bidaꞌonəꞌ?
\p
\v 20 Jesoꞌosənꞌ gožeꞌ ḻegaꞌaqueꞌ: —Bito goquə yebeɉlen c̱hedəꞌ bito gwyeɉḻeꞌele de que Diozənꞌ gaquəleneꞌ leꞌe. Xsa yag moztasənꞌ naquən deꞌe daoꞌ rizəꞌ. Naꞌ deꞌe ḻi chniaꞌ leꞌe ḻaꞌaṉəꞌəczə šə deꞌen chonḻilažəꞌəle Diozənꞌ gwxaquəꞌəleben ca to xsa moztasənꞌ laogüe deꞌen cuiṉəꞌ gonḻilažəꞌəchgualeneꞌ guac yeꞌele yaꞌa nga: “Gwde gwzo deꞌe naꞌate”, naꞌ gaquə canꞌ chonḻe mendadənꞌ. Bito bi bi de deꞌe cui gaquə gonḻe con šə cheɉḻeꞌele de que Diozənꞌ chacleneꞌ leꞌe.
\v 21 Naꞌ par nic̱h yebeɉle deꞌe x̱ioꞌ caꞌ deꞌen zɉənaquə ca deꞌen bebeɉaꞌ yic̱hɉlaꞌaždaoꞌ biꞌinəꞌ, cheyaḻəꞌ coꞌo gwc̱heɉle cui yeꞌeɉ gaole naꞌ gontezə gonḻe orasyon.
\s1 Deꞌe yoblə gwdix̱ɉueꞌe Jesoꞌosənꞌ de que soꞌot beṉəꞌ ḻeꞌ
\p
\v 22 Naꞌ lao zɉezdaꞌ Jesoꞌosənꞌ len disipl c̱heꞌ caꞌ do ganꞌ mbane Galileanꞌ, Jesoꞌosənꞌ boszeneneꞌ ḻegaꞌaqueꞌ deꞌen zeꞌe gac c̱heꞌ, gwneꞌ: —Diozənꞌ bseḻeꞌe nadaꞌ golɉaꞌ beṉac̱h, naꞌ gacaꞌ lao naꞌ beṉəꞌ
\v 23 naꞌ soꞌoteꞌ nadaꞌ. Pero naꞌ yeyoṉ ža yosban Diozənꞌ nadaꞌ ladɉo beṉəꞌ guat caꞌ.
\p Nach disipl c̱heꞌ caꞌ catəꞌ gwseꞌeneneꞌ xtižeꞌenəꞌ, ḻechguaḻe gwniteꞌe trist.
\s1 Jesoꞌosənꞌ gwdixɉueꞌ impuest c̱he yoꞌodaoꞌ
\p
\v 24 Naꞌ catəꞌ besyəꞌəžineꞌ Capernaunṉəꞌ, baḻə beṉəꞌ caꞌ chəsəꞌəc̱hixɉueꞌ impuest deꞌen chəsəꞌəyixɉw to to beṉəꞌ byo Izrael caꞌ par gast c̱he yoꞌodaoꞌ əblaonəꞌ ɉaꞌaqueꞌ lao Bedənꞌ. Naꞌ gwseꞌeneꞌ: —Ca naquə maestr c̱helenəꞌ, ¿əgwyixɉueꞌ impuest c̱he yoꞌodaꞌonəꞌ?
\p
\v 25 Nach gož Bedənꞌ ḻegaꞌaqueꞌ: —Gwyixɉueꞌen.
\p Gwde naꞌ Jesoꞌosənꞌ len disipl c̱he caꞌ gwsoꞌe ḻoꞌo yoꞌonəꞌ. Nach Jesoꞌosənꞌ ḻeꞌe gožteꞌ Bedənꞌ: —¿Bi xbab chonoꞌ, Bed? Ca naquə rei caꞌ nitəꞌ yežlyo nga chesəꞌənabiꞌe naꞌ chsoꞌoneꞌ byen chesəꞌəyixɉw beṉəꞌ c̱he impuest. ¿Nonꞌ chəsəꞌəc̱hixɉueꞌen ža? ¿əfamiḻy c̱hegaꞌaqueꞌ o šə beṉəꞌ yoblə?
\p
\v 26 Nach Bedənꞌ gožeꞌeneꞌ: —Chəsəꞌəc̱hixɉueꞌ beṉəꞌ yoblə.
\p Nach Jesoꞌosənꞌ gožeꞌ Bedənꞌ: —Beṉəꞌ zɉənaquə famiḻy c̱hegaꞌaqueꞌ caꞌ bitobi chəsəꞌəyixɉueꞌ. Naꞌ ca naquə chioꞌo ža, naccho xiꞌiṉ Rei benꞌ zo yobanꞌ naꞌ bito cheyaḻəꞌ c̱hixɉwcho impuest c̱he yoꞌodaꞌonəꞌ.
\v 27 Pero naꞌ par nic̱h notono no soꞌon xbab de que choncho contr yoꞌodaoꞌ əblaonəꞌ, c̱hixɉwcho impuestənꞌ. Gwyeɉ choꞌa nisdaꞌonəꞌ, naꞌ gwzaḻoꞌo yix̱ɉw beḻ c̱hioꞌonəꞌ, naꞌ beḻ nech bianꞌ senoꞌ ḻoꞌo choꞌab naꞌ əželdoꞌ to mech. Naꞌ yeyox̱oꞌon žɉətixɉoꞌ impuest c̱hechonꞌ. Gwdiḻəczən par c̱hixɉwcho impuest c̱he c̱hopcho.
\c 18
\s1 Gwsaꞌacyožə disipl c̱heꞌ caꞌ noeꞌ naquəch blaoch
\p
\v 1 Naꞌ ca orənꞌ gosəꞌəbiguəꞌ disipl c̱he Jesoꞌosənꞌ cuiteꞌenəꞌ, naꞌ gwseꞌeneꞌ: —Entr netoꞌ ¿notoꞌ gaquəchtoꞌ blao catəꞌən Diozənꞌ benꞌ zo yobanꞌ goneꞌ par nic̱h solao ṉabiꞌo?
\p
\v 2 Naꞌ Jesoꞌosənꞌ goxeꞌ to bidaoꞌ naꞌ bzecheꞌeboꞌ laogaꞌaqueꞌenəꞌ.
\v 3 Naꞌ gožeꞌ ḻegaꞌaqueꞌ: —Deꞌe ḻi əchniaꞌ leꞌe, notəꞌətezle šə bito əgwšaꞌ xbab c̱helenꞌ par əgwzex̱ɉw yic̱hɉle lao Diozənꞌ canꞌ chon bidaoꞌ nga chzex̱ɉw yic̱hɉboꞌ lao x̱axnaꞌaboꞌ, bito gaquə sole len nadaꞌ catəꞌ Diozənꞌ benꞌ zo yobanꞌ goneꞌ par nic̱h solao ṉabiꞌa.
\v 4 Naꞌ notəꞌətezle šə babeyacle ca bidaoꞌ nga laogüe deꞌen chzex̱ɉw yic̱hɉle lao Diozənꞌ, banacle beṉəꞌ blao len nadaꞌ catəꞌ Diozənꞌ benꞌ zo yobanꞌ goneꞌ par nic̱h solao ṉabiꞌa.
\v 5 Naꞌ notəꞌətezle šə chonḻe güen len notəꞌətezə bidaoꞌ ca biꞌi nga laogüe deꞌen chaquele c̱hiaꞌ, chonczle güen len nadaꞌ.
\s1 Nxož əxopcho goncho deꞌe mal
\p
\v 6 Probchguazə benꞌ chon par nic̱h əxopə to beṉəꞌ chonḻilažəꞌ nadaꞌ goneꞌ deꞌe mal, ḻaꞌaṉəꞌəczə benꞌ əxopə bitotec bi zaqueꞌe len beṉac̱hənꞌ. Ncaꞌalə xṉeze žaləꞌ əgwcheɉ yeneꞌenəꞌ to yeɉ yišə naꞌ žɉəxopeꞌ ḻoꞌo nisdaꞌonəꞌ naꞌ gateꞌ, cle ca soeꞌ əx̱opeꞌ beṉəꞌ goneꞌ deꞌe malənꞌ.
\v 7 Probchguazə leꞌe deꞌe zan deꞌe zɉəde yežlyo nga deꞌe chsoꞌon par nic̱h gonḻe deꞌe mal. Bito ṉacho de que bitobi de deꞌe soꞌon par nic̱h əxopə leꞌe bachonḻilažəꞌəle nadaꞌ. Pero probchguazə beṉəꞌ chon ca əxopə beṉəꞌ yoblə goneꞌ deꞌe malənꞌ.
\p
\v 8 Naꞌ deꞌe naꞌanəꞌ əchniaꞌ leꞌe, šə deꞌen chonḻe len ṉiꞌanaꞌalenꞌ chonən par nic̱h əxople gonḻe deꞌe malənꞌ güenchlə žaləꞌ əc̱hog ṉiꞌanaꞌale caꞌ naꞌ c̱hoꞌonḻen cle ca əxople gonḻe deꞌe malənꞌ. Ncaꞌalə xṉeze nacle beṉəꞌ naꞌ chog o beṉəꞌ coj yežinḻe lao Diozənꞌ naꞌ əbanḻe zeɉḻicaṉe cle ca cuiayiꞌilenḻen txen lao yiꞌ gabiḻənꞌ.
\v 9 Naꞌ šə deꞌen chleꞌile len ɉelaole chonən par nic̱h əxople gonḻe deꞌe malənꞌ yeɉniꞌalə žaləꞌ cueɉlenṉəꞌ naꞌ c̱hoꞌonḻen, c̱hedəꞌ ncaꞌalə xṉeze nacle benəꞌ lc̱hoḻ yežinḻe yobanꞌ ganꞌ zo Diozənꞌ naꞌ əbanḻe zeɉḻicaṉe, cle caꞌ cuiayiꞌilenḻen txen lao yiꞌ gabiḻənꞌ.
\s1 Jempl c̱he xiləꞌ bianꞌ goquəžeɉe
\p
\v 10 Ḻeꞌe gon xbab c̱he beṉəꞌ chsoꞌonḻilažəꞌ nadaꞌ beṉəꞌ cuitec bi zɉəzaquəꞌ len beṉac̱hənꞌ, par nic̱h cui gonḻe len notəꞌətezeꞌ ca beṉəꞌ cui bi bi zɉəzaqueꞌe. Chniaꞌ leꞌe, angl caꞌ chapə chyeꞌ ḻegaꞌaqueꞌ nitəꞌətezə niteꞌe lao X̱aꞌ Diozənꞌ yobanꞌ ganꞌ zoꞌenəꞌ.
\v 11 Naꞌ ca nacaꞌ nadaꞌ, Diozənꞌ bseḻeꞌe nadaꞌ golɉaꞌ beṉac̱h par nic̱h zedəloꞌidaꞌ beṉəꞌ caꞌ bachəsəꞌəbiayiꞌ de que nžiꞌilažaꞌa ḻegaꞌaqueꞌ. Bseḻeꞌe nadaꞌ par gonaꞌ ca cui žɉəyaꞌaqueꞌ lao yiꞌ gabiḻənꞌ šə soꞌonḻilažeꞌe nadaꞌ.
\p
\v 12 Naꞌ chniaꞌ leꞌe, šə nitəꞌ to gueyoa xiləꞌ c̱hele naꞌ gaquəžeɉe tob, ¿əcabi yocuaꞌaṉle bia caꞌ taplalɉ tgualɉ do lao yaꞌa ganꞌ zɉəžaꞌab naꞌ žɉəyedilɉle bianꞌ goquəžeɉenəꞌ xte ca yeželeleb?
\v 13 Naꞌ əchniaꞌ leꞌe, catəꞌ yeželeleb, yebeichele deꞌen beželobənꞌ clezə canꞌ chebeile len bia caꞌ taplalɉ tgualɉ cui gwsaꞌacžeɉe.
\v 14 Caꞌaczə naquən len beṉəꞌ caꞌ chsoꞌonḻilažəꞌ nadaꞌ beṉəꞌ cuitec bi zɉəzaquəꞌ len beṉac̱hənꞌ. X̱acho Dioz benꞌ zo yobanꞌ bito cheneꞌeneꞌ cuiayiꞌ ni togaꞌaqueꞌ.
\s1 Cheyaḻəꞌ yeziꞌixencho c̱he beṉəꞌ bišəꞌəcho beṉəꞌ chsoꞌonḻilažəꞌ Diozənꞌ
\p
\v 15 Šə to beṉəꞌ bišəꞌəle beṉəꞌ bachonḻilažəꞌ Diozənꞌ choneꞌ deꞌe malənꞌ contr to leꞌe, tozle šeɉle žɉeꞌelenḻeneꞌ dižəꞌ canꞌ naquə deꞌen choneꞌenəꞌ par nic̱h yediṉɉeneꞌen, naꞌ šə c̱hazeꞌ rson c̱he dižəꞌ deꞌen žɉeꞌelenḻeneꞌ yezoeꞌ binḻo len Diozənꞌ deꞌe yoblə.
\v 16 Pero naꞌ šə bito c̱hazeꞌ rson ca dižəꞌ deꞌen žɉeꞌelenḻeneꞌ, güench əc̱heꞌele yeto o yec̱hopə beṉəꞌ bišəꞌəle par nic̱h əsaꞌaqueꞌ testigw de que dižəꞌ šaoꞌ bagotəꞌəyoile benꞌ yošaꞌ xbab c̱heꞌenəꞌ.
\v 17 Naꞌ šə bitoczə gwzenagueꞌ c̱hele, ḻeꞌe güeꞌ dižəꞌ ca naquə deꞌen choneꞌ lao yoguəꞌəle ncodəꞌ lɉuežɉle choꞌelaꞌole Diozənꞌ. Naꞌ šə ni que gwzenagczeꞌ c̱hele, cuich gonḻeneꞌ cuent entr leꞌe ncodəꞌ lɉuežɉle choꞌelaꞌole Diozənꞌ. Pero ḻegon cuent de que naqueꞌ txen beṉəꞌ caꞌ cui chsoꞌonḻilažəꞌ Diozənꞌ, naꞌ naqueꞌ txen len yeziquəꞌəchlə beṉəꞌ caꞌ chsoꞌon deꞌe malənꞌ canꞌ chonḻe xbab c̱he beṉəꞌ goc̱hixɉw caꞌ.
\p
\v 18 Deꞌe ḻi chniaꞌ leꞌe, bitəꞌətezə deꞌe əgwxiaꞌ leꞌe ncodəꞌ lɉuežɉle choꞌelaꞌole Diozənꞌ par əṉale naquən güen soꞌon beṉəꞌ caꞌ əsaꞌac txen len leꞌe, ḻeczə canꞌ əṉa Diozənꞌ benꞌ zo yobanꞌ. Naꞌ bitəꞌətezə deꞌe əgwxiale əṉale cui naquən güen soꞌoneꞌ, ḻeczə canꞌ əṉa Diozənꞌ benꞌ zo yobanꞌ.
\p
\v 19 Naꞌ ḻeczə caꞌ chniaꞌ leꞌe, šə c̱hople gwxiale binꞌ əṉable lao orasyonṉəꞌ, leꞌe nitəꞌəle yežlyo nga, X̱acho Diozənꞌ benꞌ zo yobanꞌ gonczeꞌ deꞌen əṉablenəꞌ.
\v 20 Naꞌ ganꞌ nžag c̱hopə šoṉle choꞌelaꞌole nadaꞌ, zoczaꞌ txen len leꞌe.
\p
\v 21 Nach Bedənꞌ bgüigueꞌe gožeꞌ Jesoꞌosənꞌ: —X̱anaꞌ, šə beṉəꞌ lɉuežɉaꞌ choneꞌ deꞌe mal len nadaꞌ tapteli, ¿baḻ las cheyaḻəꞌ yeziꞌixenaꞌ c̱heꞌ? ¿əzelao do gaž las?
\p
\v 22 Nach Jesoꞌosənꞌ gožeꞌeneꞌ: —Bito niaꞌ de que cheyaḻəꞌ yeziꞌixenḻe c̱heꞌ zelao do gaž las. Pero deꞌen chniaꞌ leꞌe, bito gonḻe cuent do baḻ las yeziꞌixenḻe c̱he beṉəꞌ lɉuežɉlenꞌ, con leꞌe yeziꞌixentezə c̱heꞌ yoguəꞌ laste.
\s1 Jempl c̱he mosənꞌ benꞌ cui beziꞌixen c̱he deꞌen chaḻəꞌ lɉuežɉeꞌ
\p
\v 23 Ṉaꞌa ža, yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌe nga goquə. Zo to rei benꞌ chsaꞌaḻəꞌ xmoseꞌ caꞌ xmecheꞌenəꞌ. Naꞌ goneꞌeneꞌ goneꞌ cuent len ḻegaꞌaqueꞌ.
\v 24 Naꞌ catəꞌ gwzolaogüeꞌ beziꞌe cuent c̱he to togaꞌaqueꞌ, zguaꞌatec bžin to xmoseꞌ benꞌ chaḻəꞌ zan millon pes.
\v 25 Naꞌ mosənꞌ bito bi xmecheꞌ gotəꞌ par yonežɉueꞌen reinꞌ. Deꞌe naꞌanəꞌ beneꞌ mendad taꞌogaꞌaqueꞌ len xoꞌolenꞌ, naꞌ len xiꞌiṉgaꞌaqueꞌ caꞌ naꞌ len doxen deꞌe zɉədeineꞌ par nic̱h gaquə yosyoꞌonežɉueꞌ deꞌen chsaꞌaḻeꞌe c̱he reinꞌ.
\v 26 Nach mosənꞌ bzo xibeꞌ lao reinꞌ gotəꞌəyoineꞌ ḻeꞌ, gožeꞌeneꞌ: “X̱anaꞌ, gwdapəšga yeḻəꞌ chxenḻažəꞌ len nadaꞌ, naꞌ yeyonaꞌ deꞌen chaḻaꞌa c̱hioꞌonəꞌ.”
\v 27 Nach reinꞌ beyašeꞌeneꞌ ḻeꞌ naꞌ beziꞌixeneꞌ c̱he doxen deꞌen chaḻeꞌenəꞌ naꞌ bsaneꞌ ḻeꞌ.
\v 28 Pero naꞌ catəꞌ bechoɉeꞌ liž reinꞌ, ḻeꞌe bežagteꞌ yeto mos beṉəꞌ chaḻəꞌ c̱heꞌ to c̱hop pes. Nach ḻeꞌe bṉizteꞌ yeneꞌenəꞌ gožeꞌeneꞌ: “Yeyoṉoꞌ deꞌen chaḻoꞌo c̱hiaꞌan ṉaꞌatec ṉaꞌa.”
\v 29 Nach mos lɉuežɉenꞌ bzo xibeꞌ laogüeꞌenəꞌ, gožeꞌeneꞌ: “Gwdapəšga yeḻəꞌ chxenḻažəꞌ c̱hiaꞌ naꞌ yeyoṉaꞌ doxen deꞌen chaḻaꞌa c̱hioꞌonəꞌ.”
\v 30 Pero naꞌ mos nechənꞌ bito bzenagueꞌ c̱he mos lɉuežɉeꞌenəꞌ, ḻeꞌe gwyeɉteꞌ ɉeneꞌ mendad gosəꞌəyix̱ɉueꞌeneꞌ ližya xte ca gatəꞌ deꞌen yonežɉueꞌ c̱heꞌenəꞌ.
\v 31 Naꞌ mos caꞌ yeḻaꞌ catəꞌ besəꞌəleꞌineꞌ canꞌ ben mos nechənꞌ, ḻechguaḻe gwniteꞌe trist. Naꞌ ɉaꞌaqueꞌ lao reinꞌ ɉseꞌežeꞌeneꞌ yoguəꞌəḻoḻ canꞌ goquə.
\v 32 Nach reinꞌ goxeꞌ mos nechənꞌ laogüeꞌeneꞌ deꞌe yoblə, naꞌ gožeꞌeneꞌ: “Leꞌ nacoꞌ to mos malchgua. Nadaꞌ beziꞌixenaꞌ c̱he doxen deꞌen chaḻoꞌo c̱hiaꞌanəꞌ laꞌ gotəꞌəyoidoꞌ nadaꞌ yeziꞌixenaꞌ c̱hioꞌ.
\v 33 ¿Bixc̱henꞌ cui beyašəꞌəlažoꞌo mos lɉuežɉoꞌ benꞌ chaḻeꞌe c̱hioꞌonəꞌ canꞌ beyašəꞌəlažaꞌa leꞌ?”
\v 34 Naꞌ deꞌe tant bžaꞌa reinꞌ beneꞌeneꞌ lao naꞌ beṉəꞌ caꞌ par gosəꞌəyix̱ɉueꞌeneꞌ ližya ganꞌ əžaglaogüeꞌ xte catəꞌəch bade deꞌen chaḻeꞌe c̱he reinꞌ.
\p
\v 35 Nach Jesoꞌosənꞌ gožeꞌ disipl c̱heꞌ caꞌ: —Canꞌ gon X̱aꞌ Diozənꞌ benꞌ zo yobanꞌ goneꞌ castigw c̱he notəꞌətezle cui cheziꞌixenḻe c̱he lɉuežɉle do yic̱hɉ do lažəꞌəle bitəꞌətezə deꞌen chsoꞌoneneꞌ leꞌe.
\c 19
\s1 Bito yelaꞌacho beꞌen c̱hecho o noꞌol c̱hecho par solencho beṉəꞌ yoblə
\p
\v 1 Naꞌ Jesoꞌosənꞌ catəꞌ beyož gwneꞌ deꞌe caꞌ, bezeꞌe Galileanꞌ naꞌ gwḻagueꞌe yao Jordanṉəꞌ par beyeɉeꞌ ganꞌ mbane Jodeanꞌ.
\v 2 Naꞌ beṉəꞌ zan ɉəsəꞌənaogüeꞌeneꞌ, naꞌ beyoneꞌ beṉəꞌ caꞌ chsaꞌacšene.
\p
\v 3 Naꞌ beṉəꞌ fariseo caꞌ ɉaꞌaqueꞌ ganꞌ zoꞌenəꞌ c̱hedəꞌ gwseꞌeneneꞌ yesəꞌəbeɉeꞌeneꞌ dižəꞌ deꞌe yesəꞌəc̱hineꞌ contr ḻeꞌ, nach gwseꞌeneꞌ: —¿Ede lsens par to beṉəꞌ nšagnaꞌ yeleꞌe xoꞌoleꞌ šə bitəꞌətezə deꞌen choneꞌ cui choꞌolažəꞌ beꞌen c̱heꞌenəꞌ?
\p
\v 4 Nach gožeꞌ ḻegaꞌaqueꞌ: —Bablabczle canꞌ nyoɉ Xtižəꞌ Diozənꞌ nan de que catəꞌən gwxe yežlyonꞌ Diozənꞌ beneꞌ beṉəꞌ nech caꞌ beṉəꞌ byo naꞌ noꞌolə.
\v 5 Naꞌ gwna Diozənꞌ: “Beṉəꞌ byonəꞌ ḻeꞌe x̱axneꞌe par əgwšagneꞌe siꞌe to noꞌolə naꞌ beṉəꞌ caꞌ yosoꞌošagnaꞌanəꞌ əsaꞌaqueꞌ tozə.”
\v 6 Bitoch əsaꞌaqueꞌ c̱hopə beṉəꞌ, sino que əsaꞌaqueꞌ tozə beṉəꞌ. Deꞌe naꞌanəꞌ notono zaquəꞌ yoḻeꞌe ḻegaꞌaqueꞌ laꞌ Dioz nanꞌ banoneꞌ ḻegaꞌaqueꞌ tozə cuerp.
\p
\v 7 Nach gwseꞌeneꞌ: —Šə caꞌ ža, ¿bixc̱hexanꞌ ben deꞌe Moisezənꞌ mendad catəꞌ to beṉəꞌ yeleꞌe noꞌolə c̱heꞌenəꞌ, cheyaḻəꞌ c̱has to act ga güeꞌen dižəꞌ de que besyəꞌəleꞌenəꞌ?
\p
\v 8 Jesoꞌosənꞌ gožeꞌ ḻegaꞌaqueꞌ: —Deꞌe Moisezənꞌ beꞌe latɉə yelaꞌa noꞌol c̱helenꞌ c̱hedəꞌ nacle beṉəꞌ yic̱hɉlaꞌaždaoꞌ žod. Pero catəꞌ Diozənꞌ beneꞌ beṉəꞌ nech caꞌ, bito ṉacho gwyazlažeꞌe yesyəꞌəlaꞌagaꞌaqueꞌ.
\v 9 Echniaꞌ leꞌe, notəꞌətezə beṉəꞌ chelaꞌa noꞌol c̱heꞌenəꞌ par yequeꞌe noꞌolə yoblə, len ṉezeneꞌ de que noꞌol c̱heꞌenəꞌ bito naqueꞌ to noꞌolə goꞌo xtoi, tozəczə ca malənꞌ chon beꞌenəꞌ len deꞌen chon beṉəꞌ chgoꞌo xtoeꞌ. Naꞌ notəꞌətezə beṉəꞌ yošagnaꞌaleneꞌ to noꞌolə beṉəꞌ belaꞌa benꞌ c̱hei ḻeꞌ, ḻeczə tozəczə ca malənꞌ goneꞌ len deꞌen chon beꞌenəꞌ chgoꞌo xtoeꞌ.
\p
\v 10 Nach disipl c̱heꞌ caꞌ gwseꞌeneꞌ: —Šə canꞌ naquən c̱he beṉəꞌ byonꞌ naꞌ noꞌolənꞌ naplən cuent cui no no gwšagnaꞌ.
\p
\v 11 Jesoꞌosənꞌ gožeꞌ ḻegaꞌaqueꞌ: —Caguə yoguəꞌ beṉəꞌ chseꞌeɉniꞌineꞌ deꞌe nganꞌ sino beṉəꞌ caꞌ babzeɉniꞌi Diozənꞌ ḻegaꞌaqueꞌ bi zeɉen.
\v 12 Nitəꞌ beṉəꞌ cui nan yosəꞌəšagneꞌe c̱hedəꞌ gwsaꞌalɉeꞌ zɉənaqueꞌ beṉəꞌ güiž, naꞌ ḻeczə nitəꞌ beṉəꞌ cui yosəꞌəšagneꞌe laogüe deꞌen bazɉənon beṉəꞌ ḻegaꞌaqueꞌ güiž. Naꞌ ḻeczə caꞌ nitəꞌ beṉəꞌ cui chesəꞌəšagneꞌe par nic̱h əsoꞌelažəꞌəcheꞌ soꞌoneꞌ ca əsaꞌanch beṉəꞌ caꞌ əsoꞌe latɉə ṉabiaꞌ Dioz benꞌ zo yobanꞌ ḻegaꞌaqueꞌ. Ḻeꞌe gwzenag c̱he deꞌen bagwniꞌanəꞌ šə baben Diozənꞌ par nic̱h cheɉniꞌilen.
\s1 Jesoꞌosənꞌ beneꞌ orasyon par bidaoꞌ caꞌ
\p
\v 13 Naꞌ ɉaꞌac beṉəꞌ əɉsoꞌe bidaoꞌ lao Jesoꞌosənꞌ par nic̱h əx̱oa neꞌenəꞌ yic̱hɉgaꞌacboꞌonəꞌ naꞌ goneꞌ orasyon par ḻegaꞌacboꞌ. Pero disipl c̱heꞌ caꞌ gosəꞌədiḻeꞌ beṉəꞌ caꞌ zɉənc̱heꞌ bidaoꞌ.
\v 14 Nach Jesoꞌosənꞌ gožeꞌ disipl c̱heꞌ caꞌ: —Ḻeꞌe güeꞌ latɉə laꞌac bidaoꞌ caꞌ laoguaꞌ nga, naꞌ cui əgwžonḻe. Naꞌ əchniaꞌ leꞌe beṉəꞌ caꞌ chəsəꞌəzex̱ɉw yic̱hɉgaꞌaqueꞌ lao Diozənꞌ ca bidaoꞌ caꞌ chəsəꞌəzex̱ɉw yic̱hɉgaꞌacboꞌ lao x̱axnaꞌagaꞌacboꞌ, ḻegaꞌaczeꞌenəꞌ chsoꞌe latɉə chnabiaꞌ Diozənꞌ ḻegaꞌaqueꞌ.
\p
\v 15 Naꞌ catəꞌ beyož gwx̱oa naꞌ Jesoꞌosənꞌ yic̱hɉgaꞌacboꞌonəꞌ, beneꞌ orasyon par ḻegaꞌacboꞌ, nach gwyeɉeꞌ ga yoblə.
\s1 Beṉəꞌ güegoꞌ benꞌ goquə beṉəꞌ gwniꞌa beꞌeleneꞌ Jesoꞌosənꞌ dižəꞌ
\p
\v 16 Naꞌ goquənꞌ to beṉəꞌ güegoꞌ bžineꞌ ganꞌ zo Jesoꞌosənꞌ, naꞌ gožeꞌeneꞌ: —Maestr, leꞌ nacoꞌ beṉəꞌ güen, gwna nadaꞌ bi deꞌe güenṉəꞌ cheyaḻəꞌ gonaꞌ par gatəꞌ yeḻəꞌ mban zeɉḻicaṉe c̱hiaꞌ.
\p
\v 17 Jesoꞌosənꞌ božiꞌe xtižeꞌenəꞌ, gožeꞌeneꞌ: —¿Bixc̱henꞌ naoꞌ de que beṉəꞌ güen nadaꞌ? Dioz nanꞌ naqueꞌ ḻeꞌezelaogüe beṉəꞌ güen. Pero naꞌ šə cheꞌendoꞌ gatəꞌ yeḻəꞌ mban zeɉḻicaṉe c̱hioꞌonəꞌ, cheyaḻəꞌ gonoꞌ canꞌ na ḻei deꞌen bzoɉ deꞌe Moisezənꞌ.
\p
\v 18 Nach beꞌenəꞌ gožeꞌ Jesoꞌosənꞌ: —¿Noxanꞌ deꞌe caꞌ nan ža?
\p Nach Jesoꞌosənꞌ gožeꞌeneꞌ: —Cui gotle beṉəꞌ, cui coꞌo xtole naꞌ cui cueɉyic̱hɉ beꞌen c̱hele o noꞌol c̱hele par solenḻe beṉəꞌ yoblə, cui cuanḻe, bito gacle testigw faḻs contr saꞌalɉuežɉle.
\v 19 Ḻeꞌe əgwnežɉo yeḻəꞌ balaꞌaṉ x̱axnaꞌale, naꞌ ḻegaque c̱he saꞌalɉuežɉle canꞌ chaquele c̱he cuinḻe.
\p
\v 20 Nach beṉəꞌ güegonꞌ gožeꞌ Jesoꞌosənꞌ: —Yoguəꞌəḻoḻ deꞌe quinga chzenagaꞌ c̱hei dezd xcuidəꞌətiaꞌ. ¿Bixa deꞌen chaquəch faḻt gonaꞌ ža?
\p
\v 21 Jesoꞌosənꞌ gožeꞌeneꞌ: —Šə deꞌe ḻiczə cheꞌendoꞌ gacoꞌ cayaṉəꞌən cheneꞌe Diozənꞌ, ɉəyeyetəꞌ bi deꞌe de c̱hioꞌ, naꞌ mech deꞌen leꞌidoꞌ c̱he deꞌe caꞌ bnežɉon beṉəꞌ yašəꞌ nach da len nadaꞌ. Naꞌ catəꞌ yežinoꞌ yobanꞌ ganꞌ zo Diozənꞌ, soꞌ mbalaz.
\p
\v 22 Pero naꞌ beṉəꞌ güegonꞌ beyož beneneꞌ canꞌ gož Jesoꞌosənꞌ ḻeꞌ, bezaꞌachoeꞌ trist c̱hedəꞌ laꞌ to beṉəꞌ gwniꞌachguanꞌ.
\p
\v 23 Gwde naꞌ gož Jesoꞌosənꞌ disipl c̱heꞌ caꞌ: —Deꞌe ḻi chniaꞌ leꞌe, zdebəchgua naquən par to beṉəꞌ gwniꞌa güeꞌe latɉə ṉabiaꞌ Diozənꞌ ḻeꞌ.
\v 24 Naꞌ ḻeczə chniaꞌ leꞌe, zdebəchlə naquən c̱he to beṉəꞌ gwniꞌanəꞌ güeꞌe latɉə ṉabiaꞌ Diozənꞌ ḻeꞌ cle ca to camey teb to ḻoꞌo nag yešəꞌ.
\p
\v 25 Naꞌ besyəꞌəbanchgüei disipl c̱heꞌ caꞌ canꞌ gwneꞌenəꞌ, nach gosəꞌəneꞌ: —Notono gaquə yechoɉ xniꞌa deꞌe malənꞌ šə caꞌ.
\p
\v 26 Jesoꞌosənꞌ bgüieꞌ ḻegaꞌaqueꞌ nach gožeꞌ: —Ni to beṉac̱h cui gaquə yebeɉ cuineꞌ xniꞌa deꞌe malənꞌ, pero Diozənꞌ chaqueꞌ. Ḻeꞌ chac choneꞌ bitəꞌətezə.
\p
\v 27 Nach Bedənꞌ gožeꞌ Jesoꞌosənꞌ: —Netoꞌ bagwleɉyic̱hɉtoꞌ famiḻy c̱hetoꞌ caꞌ naꞌ len yoguəꞌəḻoḻ deꞌen deitoꞌ par chzenagtoꞌ c̱hioꞌ. ¿Bi deꞌe güen gaquə c̱hetoꞌ laogüe deꞌen bagwleɉyic̱hɉtoꞌ famiḻy c̱hetoꞌ caꞌ naꞌ len deꞌen deitoꞌ?
\p
\v 28 Jesoꞌosənꞌ gožeꞌ ḻegaꞌaqueꞌ: —Deꞌe ḻi chniaꞌ leꞌe Diozənꞌ bseḻeꞌe nadaꞌ golɉaꞌ beṉac̱h naꞌ catəꞌ yocobeꞌ yežlyonꞌ, nadaꞌ cuiꞌa ganꞌ chey cheꞌeniꞌ naꞌ ṉabiꞌa, naꞌ yoguəꞌ leꞌe chonḻilažəꞌəle nadaꞌ cueꞌele cuitaꞌanəꞌ naꞌ ṉabiꞌale txen len nadaꞌ. Naꞌ leꞌe šižiṉle ṉabiꞌale famiḻy caꞌ šižiṉ, beṉəꞌ caꞌ zɉənaquə xiꞌiṉ dia c̱he deꞌe Izraelənꞌ.
\v 29 Naꞌ notəꞌətezle šə deꞌen chzenagle c̱hiaꞌ bagwleɉyic̱hɉle ližle, o bišəꞌəle, o zanḻe, o x̱axnaꞌale, o xoꞌolle, o xiꞌiṉle, o yežlyo c̱hele, Diozənꞌ goṉeꞌ leꞌe deꞌe zaquəꞌəche clezə ca deꞌe caꞌ naꞌ beṉəꞌ caꞌ gwleɉyic̱hɉle. Naꞌ ḻeczə gon Diozənꞌ par nic̱h əbanḻe zeɉḻicaṉe.
\v 30 Naꞌ beṉəꞌ zan beṉəꞌ zɉənaquə blao ṉaꞌa gwžin ža catəꞌ cuich əsaꞌaqueꞌ beṉəꞌ blao. Naꞌ beṉəꞌ zan beṉəꞌ cui zɉənaquə blao ṉaꞌa, gwžin ža catəꞌ əsaꞌaqueꞌ beṉəꞌ blao.
\c 20
\s1 Jempl c̱he beṉəꞌ güen žin caꞌ
\p
\v 1 Nach bossed bosloꞌi Jesoꞌosənꞌ ḻegaꞌaqueꞌ, gwneꞌ: —Yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌe nga goquə. To beṉəꞌ napə to güert ganꞌ žaꞌachgua yag obas. Naꞌ gwzeꞌe ližeꞌen to zil tempran gwyeɉeꞌ ganꞌ chac yaꞌanəꞌ, ɉtilɉeꞌ mos par soꞌoneꞌ žin ḻoꞌo güert c̱heꞌenəꞌ žanəꞌ.
\v 2 Naꞌ catəꞌ beyož gosəꞌəxenḻažəꞌ mos caꞌ de que to denario c̱hixɉueꞌ to togaꞌaqueꞌ con ca chac mosənꞌ tža žin, nach bseḻeꞌe ḻegaꞌaqueꞌ ḻoꞌo güert ganꞌ soꞌoneꞌ žinṉəꞌ.
\v 3 Nach do cheda ga gozeɉeꞌ ganꞌ chac yaꞌanəꞌ, naꞌ bleꞌineꞌ nitəꞌəch beṉəꞌ cui bi bi žin de soꞌoneꞌ.
\v 4 Naꞌ gožeꞌ ḻegaꞌaqueꞌ: “Ḻežɉaꞌac ḻoꞌo güert c̱hiaꞌanəꞌ ḻežɉen žin naꞌ c̱hixɉwczaꞌ leꞌe.” Nach ɉaꞌac beṉəꞌ caꞌ.
\v 5 Naꞌ gozeɉeꞌ deꞌe yoblə ganꞌ chac yaꞌanəꞌ do gobiž, nach yeto do cheda šoṉə, naꞌ bezleꞌineꞌ nitəꞌ beṉəꞌ cui bi bi žin de soꞌoneꞌ. Nach bozseḻeꞌe ḻegaꞌaqueꞌ par soꞌoneꞌ žin ḻoꞌo güert c̱heꞌenəꞌ.
\v 6 Naꞌ ca do cheda gueyəꞌ šeꞌelə gozeɉeꞌ deꞌe yoblə. Naꞌ bezleꞌiczeneꞌ beṉəꞌ zezniteꞌe cui bi bi žin de soꞌoneꞌ, nach gozeꞌe ḻegaꞌaqueꞌ: “¿Bixc̱henꞌ cui ɉaꞌacle güen žin?”
\v 7 Nach gwseꞌeneꞌ: “Notono no gwna netoꞌ güen žin.” Nach gozeꞌe ḻegaꞌaqueꞌ: “Ḻeꞌe žɉaꞌac ḻeꞌe gon žin ḻoꞌo güert c̱hiaꞌanəꞌ. Naꞌ c̱hixɉwczaꞌ leꞌe.” Nach ɉaꞌac beṉəꞌ caꞌ.
\v 8 Naꞌ catəꞌ bžin or yosaꞌa x̱an güertənꞌ xmoseꞌ caꞌ, nach gožeꞌ mos əblao c̱heꞌenəꞌ: “Beyax beṉəꞌ güen žin caꞌ par c̱hixɉwgaꞌacoꞌoneꞌ, solaotecoꞌ c̱hixɉoꞌ beṉəꞌ caꞌ blaꞌac bzebe, naꞌ yeyožloꞌ len beṉəꞌ caꞌ blaꞌac nechte.” Nach ben mos əblaonꞌ canꞌ ben x̱aneꞌenəꞌ mendad.
\v 9 Gwdixɉueꞌ zguaꞌatec beṉəꞌ caꞌ gosəꞌəzolaogüeꞌ gwsoꞌoneꞌ žin cheda gueyəꞌ šeꞌelə tgüeɉə denario to togaꞌaqueꞌ.
\v 10 Naꞌ catəꞌ gwdixɉueꞌ beṉəꞌ caꞌ gosəꞌəzolao chsoꞌon žinṉəꞌ temprante, gwsaꞌaque beṉəꞌ caꞌ de que c̱hixɉocheꞌ ḻegaꞌaqueꞌ deꞌe sc̱haꞌoch laogüe deꞌen gosəꞌəzolaogüeꞌ chsoꞌoneꞌ žinṉəꞌ temprante. Pero tozəczə canꞌ gwdixɉueꞌ yoguəꞌəḻoḻtegaꞌaqueꞌ.
\v 11 Naꞌ catəꞌ beyož gosəꞌəziꞌ laxɉw beṉəꞌ caꞌ gosəꞌəzolao žinṉəꞌ temprante, gwsaꞌadeꞌe x̱an žinṉəꞌ dižəꞌ.
\v 12 Naꞌ deꞌe tant chesəꞌəloqueꞌ toeꞌ gožeꞌ x̱an žinṉəꞌ: “Bedo žanəꞌ bžaglaochguatoꞌ lao deꞌe zeyəꞌən bentoꞌ žin c̱hioꞌonəꞌ. Naꞌ tozəczə canꞌ gwdixɉoꞌ netoꞌ len beṉəꞌ caꞌ blaꞌac bzebe, len yetor güeɉganꞌ gwsoꞌoneꞌ žinṉəꞌ.”
\v 13 Pero naꞌ x̱an žinṉəꞌ gožeꞌ beꞌenəꞌ: “Migw c̱hiaꞌ, bitobi deꞌe mal chonaꞌ contr leꞌe. ¿Ecaguə tratənꞌ bencho de que to denario c̱hixɉuaꞌ to tole?
\v 14 Laxɉonꞌ bagwxiꞌo, guaquə yeyeɉoꞌ. Bagwdixɉuaꞌ beṉəꞌ caꞌ con canꞌ goꞌondaꞌ ḻaꞌaṉəꞌəczə blaꞌaqueꞌ bzebe.
\v 15 ¿Bixc̱henꞌ chacxiꞌidoꞌ nadaꞌ ni c̱he deꞌen nacaꞌ beṉəꞌ güen? Lao naꞌan naquən gonaꞌ con canꞌ cheꞌendaꞌ len deꞌen deidaꞌ.”
\v 16 Nach Jesoꞌosənꞌ gožeꞌ beṉəꞌ caꞌ bosəꞌəzenag jemplənꞌ: —Canꞌ naquən, nitəꞌ beṉəꞌ bito zɉənaqueꞌ beṉəꞌ blao ṉaꞌa pero gwžin ža catəꞌ əsaꞌaqueꞌ beṉəꞌ blao. Naꞌ nitəꞌ beṉəꞌ zɉənaqueꞌ beṉəꞌ blao ṉaꞌa, pero ḻeczə gwžin ža catəꞌ ḻegaꞌaqueꞌ bitoch əsaꞌaqueꞌ beṉəꞌ blao. Diozənꞌ chaxeꞌ yoguəꞌəḻoḻ beṉəꞌ par seꞌeɉḻeꞌe c̱heꞌ, pero baḻgueꞌen chosoꞌozenagueꞌ c̱heꞌ, naꞌ ḻegaꞌaczeꞌ chqueꞌe ca xiꞌiṉeꞌ.
\s1 Deꞌe yoblə gosyix̱ɉueꞌe Jesoꞌosənꞌ de que soꞌot beṉəꞌ ḻeꞌ
\p
\v 17 Jesoꞌosənꞌ naꞌ zan disipl c̱heꞌ caꞌ zɉaꞌaqueꞌ par Jerosalenṉəꞌ. Naꞌ lao zɉəngüeꞌe nezənꞌ Jesoꞌosənꞌ gwleɉeꞌ partlə disipl c̱heꞌ caꞌ šižiṉnəꞌ naꞌ gožeꞌ ḻegaꞌaqueꞌ:
\v 18 —Diozənꞌ bseḻeꞌe nadaꞌ golɉaꞌ beṉac̱h, naꞌ ṉaꞌa šeɉcho Jerosalenṉəꞌ ganꞌ gacaꞌ lao naꞌ bx̱oz əblao caꞌ naꞌ lao naꞌ beṉəꞌ caꞌ chosoꞌosed chosoꞌoloꞌi ḻeinꞌ, naꞌ yesəꞌəc̱hoglaogüeꞌen c̱hiaꞌ de que soꞌoteꞌ nadaꞌ.
\v 19 Naꞌ ḻeczə soꞌoneꞌ nadaꞌ lao naꞌ beṉəꞌ caꞌ cui zɉənaquə beṉəꞌ Izrael gwlaž c̱hecho par soꞌoneꞌ nadaꞌ borl, naꞌ yesəꞌəyineꞌ nadaꞌ yid sot, nach tenəꞌ yosəꞌədeꞌe nadaꞌ ḻeꞌe yag corozənꞌ, pero naꞌ yeyoṉ ža yebanaꞌ ladɉo beṉəꞌ guat caꞌ.
\s1 Xnaꞌ Jacobənꞌ naꞌ Juanṉəꞌ gwṉabeꞌ yesəꞌəbeꞌ xiꞌiṉeꞌ caꞌ cuit Jesoꞌosənꞌ ganꞌ ṉabiꞌenəꞌ
\p
\v 20 Naꞌ ɉaꞌac xiꞌiṉ Sebedeonꞌ Jacobənꞌ len Juanṉəꞌ naꞌ len xnaꞌagaꞌaqueꞌenəꞌ lao Jesoꞌosənꞌ. Naꞌ xnaꞌagaꞌaqueꞌenəꞌ bzo xibeꞌ lao Jesoꞌosənꞌ gožeꞌeneꞌ: —Chṉabdaꞌ leꞌ to goclen.
\p
\v 21 Nach Jesoꞌosənꞌ gožeꞌeneꞌ: —¿Bi goclenṉəꞌ cheꞌendoꞌ gonaꞌ?
\p Nach xnaꞌagaꞌaqueꞌenəꞌ gožeꞌeneꞌ: —Cheꞌendaꞌ gonoꞌ par nic̱h xiꞌiṉaꞌ quinga yesəꞌəbiꞌe šḻaꞌa güeɉə cuitoꞌon catəꞌ əžin ža ṉabiꞌo ṉasyon c̱hechonəꞌ.
\p
\v 22 Jesoꞌosənꞌ gožeꞌ Jacobənꞌ len Juanṉəꞌ: —Bito chacbeꞌile bi deꞌen chṉabele nadaꞌ. ¿Eguaquə saquəꞌəziꞌile canꞌ saquəꞌəziꞌanəꞌ? ¿Egwzoile gaquə c̱hele canꞌ gaquə c̱hiaꞌanəꞌ?
\p Nach bosyoꞌožiꞌe xtižeꞌenəꞌ gwseꞌeneꞌ: —Gwzoitoꞌ.
\p
\v 23 Nach Jesoꞌosənꞌ gožeꞌ ḻegaꞌaqueꞌ: —Deꞌe ḻiczə c̱hiꞌi saquəꞌəle canꞌ c̱hiꞌi sacaꞌanəꞌ, naꞌ deꞌe ḻiczə gaquə c̱hele canꞌ gaquə c̱hiaꞌanəꞌ, pero bito naquən par əṉiaꞌ nadaꞌ nonꞌ cueꞌ cuitanꞌ catəꞌən əžin ža ṉabiꞌa. Tozə X̱aꞌ Diozənꞌ bagwleɉeꞌ beṉəꞌ caꞌ yesəꞌəbeꞌ cuitaꞌanəꞌ.
\p
\v 24 Nach disipl caꞌ yeši catəꞌ gwseꞌeneneꞌ canꞌ gosəꞌəna disipl caꞌ c̱hopə besəꞌəžeꞌe ḻegaꞌaqueꞌ.
\v 25 Nach Jesoꞌosənꞌ goxeꞌ yogueꞌe par nic̱h gosəꞌəbigueꞌe laogüeꞌenəꞌ, naꞌ gožeꞌ ḻegaꞌaqueꞌ: —Ṉezecho nitəꞌ beṉəꞌ gwnabiaꞌ naꞌ beṉəꞌ blao c̱he to to ṉasyon, naꞌ ḻa fuers chesəꞌənabiꞌe beṉəꞌ nitəꞌ xniꞌagaꞌaqueꞌ.
\v 26 Pero caguə canꞌ cheyaḻəꞌ gonḻe. Šə no leꞌe cheneꞌele gacle beṉəꞌ blao, cheyaḻəꞌ əgwzex̱ɉw yic̱hɉle gaquəlenḻe lɉuežɉle.
\v 27 Naꞌ šə no leꞌe cheneꞌele gacle xen entr lɉuežɉle, cheyaḻəꞌ gon cuinḻe ca xmos beṉəꞌ caꞌ yeḻaꞌ.
\v 28 Diozənꞌ bseḻeꞌe nadaꞌ golɉaꞌ beṉac̱h, naꞌ caguə bidaꞌ par nic̱h beṉac̱hənꞌ saꞌacleneꞌ nadaꞌ, sino que bidaꞌ par gaquəlenaꞌ beṉac̱hənꞌ, naꞌ par əgwnežɉo cuinaꞌ c̱hixɉuaꞌ xtoḻəꞌ yoguəꞌəḻoḻ beṉac̱hənꞌ catəꞌən soꞌoteꞌ nadaꞌ.
\s1 Jesoꞌosənꞌ beneꞌ par nic̱h c̱hopə beṉəꞌ lc̱hoḻ besəꞌəleꞌineꞌ
\p
\v 29 Naꞌ beṉəꞌ zan ɉəsəꞌənaogüeꞌ Jesoꞌosənꞌ len disipl c̱heꞌ caꞌ catəꞌən besaꞌaqueꞌ syoda Jericonꞌ.
\v 30 Naꞌ c̱hopə beṉəꞌ lc̱hoḻ zɉəchiꞌ choꞌa nezənꞌ galənꞌ zɉəyeda Jesoꞌosənꞌ. Catəꞌ gosəꞌəṉezeneꞌ de que Jesoꞌosənꞌ chedieꞌ laogaꞌaqueꞌenəꞌ nach gosəꞌəṉeꞌ zižɉo, gwseꞌe Jesoꞌosənꞌ: —X̱antoꞌ, lenꞌ nacoꞌ xiꞌiṉ dia c̱he deꞌe Rei Dabinꞌ. Beyašəꞌəlažəꞌəšguei netoꞌ.
\p
\v 31 Nach beṉəꞌ caꞌ chesyəꞌəde laogaꞌaqueꞌenəꞌ gosəꞌədiḻeꞌ ḻegaꞌaqueꞌ par nic̱h ṉiteꞌe žizə. Pero nachle gosəꞌəṉeꞌ zižɉochlə gosəꞌəneꞌ: —X̱antoꞌ, lenꞌ nacoꞌ xiꞌiṉ dia c̱he deꞌe Rei Dabinꞌ. Beyašəꞌəlažəꞌəšguei netoꞌ.
\p
\v 32 Jesoꞌosənꞌ gwlezeꞌ ganꞌ niteꞌenəꞌ, nach goxeꞌ ḻegaꞌaqueꞌ par gosəꞌəbigueꞌe laogüeꞌenəꞌ. Nach gožeꞌ ḻegaꞌaqueꞌ: —¿Binꞌ cheneꞌele gonaꞌ len leꞌe?
\p
\v 33 Nach gwseꞌeneꞌ: —X̱antoꞌ benšga par nic̱h yeleꞌitoꞌ.
\p
\v 34 Jesoꞌosənꞌ beyašəꞌəlažeꞌe ḻegaꞌaqueꞌ naꞌ gwdaneꞌ ɉlaogaꞌaqueꞌenəꞌ, nach ḻeꞌe besyəꞌəleꞌiteineꞌ, naꞌ ɉəsəꞌənaogüeꞌ Jesoꞌosənꞌ.
\c 21
\s1 Gwsoꞌelaogüeꞌe Jesoꞌosənꞌ catəꞌ beyoꞌe Jerosalenṉəꞌ
\p
\v 1 Naꞌ lao zɉaꞌac Jesoꞌosənꞌ len disipl c̱heꞌ caꞌ Jerosalenṉəꞌ besəꞌəžineꞌ Betfage, ganꞌ zo yaꞌa deꞌen nziꞌ Olibos gaḻəꞌəzə Jerosalenṉəꞌ. Naꞌ Jesoꞌosənꞌ gwleɉeꞌ c̱hopə disipl c̱heꞌ caꞌ,
\v 2 naꞌ gožeꞌ ḻegaꞌaqueꞌ: —Ḻeꞌe žɉaꞌac yež daoꞌ deꞌen chiꞌ deꞌe naꞌ naꞌ žɉətiꞌile to borr bia noꞌolə daꞌab yag naꞌ nc̱heꞌete to xiꞌiṉdaꞌob. Naꞌ gwsežle xnaꞌabənꞌ naꞌ əc̱heꞌeleb nga len xiꞌiṉdaꞌobənꞌ.
\v 3 Naꞌ šə bi yeꞌe beṉəꞌ leꞌe, naꞌ yeꞌeleneꞌ: “X̱antoꞌ nanꞌ chyažɉeneꞌ ḻegaꞌaquəb.” Naꞌ ḻeꞌe desyəꞌəsanteczeꞌeb len leꞌe.
\p
\v 4 Goc caꞌ par nic̱h goc complir canꞌ bzoɉ deꞌe profet Zequerianꞌ benꞌ beꞌ xtižəꞌ Diozənꞌ canaꞌ gwneꞌ:
\q1
\v 5 Gož beṉəꞌ caꞌ nitəꞌ Jerosalenṉəꞌ:
\q1 “Ḻeꞌe ggüiašc bazaꞌ Rei c̱helenꞌ.
\q1 Žieꞌ cožəꞌ borr daꞌonəꞌ ca to beṉəꞌ cui naquə beṉəꞌ blao.”
\p
\v 6 Naꞌ ɉaꞌac disipl caꞌ yež daoꞌ deꞌen gož Jesoꞌosənꞌ ḻegaꞌaqueꞌ caꞌ, naꞌ gwsoꞌoneꞌ canꞌ ben Jesoꞌosənꞌ mendad.
\v 7 Naꞌ besyəꞌəc̱heꞌe borrənꞌ len xiꞌiṉəbənꞌ lao Jesoꞌosənꞌ, naꞌ besəꞌəx̱oa no xagaꞌaqueꞌ cožəꞌəgaꞌaquəbənꞌ, nach gwžia Jesoꞌosənꞌ bia daꞌonəꞌ par gwyeɉeꞌ Jerosalenṉəꞌ.
\v 8 Naꞌ lao nez ganꞌ zdeꞌenəꞌ beṉəꞌ zan gwsoꞌelaꞌogüeꞌe Jesoꞌosənꞌ bosoꞌošilɉueꞌ no xagaꞌaqueꞌenəꞌ par nic̱h bleɉ borrənꞌ ḻen naꞌ ḻeczə gosəꞌəc̱hogueꞌ no xozəꞌ yag deꞌe nitəꞌ tchoꞌa nezənꞌ naꞌ bosəꞌəniteꞌen lao nezənꞌ.
\v 9 Naꞌ beṉəꞌ zan gosəꞌəbialao lao Jesoꞌosənꞌ naꞌ ḻeczə beṉəꞌ zan ɉəsəꞌənao ḻeꞌ. Nach yogueꞌe gosəꞌəgüeꞌe beꞌ lban c̱heꞌ gosəꞌəneꞌ: —¡Ḻechguaḻe beṉəꞌ güen beꞌenga, naqueꞌ xiꞌiṉ dia c̱he deꞌe Rei Dabinꞌ! Sošga Rei c̱hechonꞌ mbalaz benꞌ bazaꞌ nga bseḻəꞌ X̱ancho Diozənꞌ ḻeꞌ. Ḻedoyeꞌelaꞌocheꞌ txen len beṉəꞌ caꞌ nitəꞌ ganꞌ zo Diozənꞌ.
\p
\v 10 Naꞌ catəꞌ bžin Jesoꞌosənꞌ Jerosalenṉəꞌ yoguəꞌ beṉəꞌ caꞌ žaꞌ syodanꞌ besyəꞌəbaneneꞌ, naꞌ gosəꞌəne: —¿Noxa benga blaꞌ nga?
\p
\v 11 Naꞌ beṉəꞌ caꞌ nžag Jesoꞌosənꞌ catəꞌən bežineꞌ laoꞌ syoda Jerosalenṉəꞌ bosyoꞌožiꞌe xtižəꞌəgaꞌaqueꞌenəꞌ gwseꞌe: —Benga Jesoꞌos beṉəꞌ zaꞌ Nasaret ganꞌ mbane Galileanꞌ naꞌ choꞌe xtižəꞌ Diozənꞌ.
\s1 Jesoꞌosənꞌ bebeɉeꞌ beṉəꞌ caꞌ chsoꞌon yaꞌa yoꞌodaoꞌ əblao c̱he beṉəꞌ Izrael caꞌ
\p
\v 12 Naꞌ gwyeɉ Jesoꞌosənꞌ yoꞌodaoꞌ əblao c̱he chioꞌo beṉəꞌ Izrael naꞌ bebeɉeꞌ yoguəꞌ beṉəꞌ caꞌ chsoꞌon yaꞌa chyoꞌonəꞌ. Nach gwloꞌoṉiꞌaneꞌe mes c̱he beṉəꞌ caꞌ chosoꞌošaꞌ mech, naꞌ ḻeczə caꞌ beneꞌ len yag siy c̱he beṉəꞌ caꞌ chsoꞌotəꞌ ngolbexə.
\v 13 Gwde beyož beneꞌ caꞌ gožeꞌ ḻegaꞌaqueꞌ: —Nyoɉczən canꞌ gwna Diozənꞌ gwneꞌ: “Cheꞌendaꞌ yesəꞌəna beṉəꞌ de que ližaꞌan naquən to latɉə ganꞌ soꞌon beṉəꞌ orasyon”, pero naꞌ leꞌe babenḻen ca to latɉə ganꞌ žaꞌ beṉəꞌ bguan.
\p
\v 14 Naꞌ beṉəꞌ lc̱hoḻ caꞌ naꞌ len beṉəꞌ coj caꞌ gosəꞌəbigueꞌe lao Jesoꞌosənꞌ žlac gwzoeꞌ ḻoꞌo yoꞌodaoꞌonəꞌ. Nach beyoneꞌ ḻegaꞌaqueꞌ.
\v 15 Pero naꞌ bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ ḻechguaḻe besəꞌəžeꞌe catəꞌ besəꞌəleꞌineꞌ miḻagr caꞌ deꞌen ben Jesoꞌosənꞌ. Naꞌ ḻeczə besəꞌəžeꞌe catəꞌ gwseꞌeneneꞌ canꞌ gwsoꞌelaoꞌ biꞌi xcuidəꞌ caꞌ Jesoꞌosənꞌ yoꞌodaoꞌ əblaonəꞌ, deꞌen gosəꞌənaboꞌ: “¡Ḻechguaḻe beṉəꞌ güen beꞌenga, naqueꞌ xiꞌiṉ dia c̱he deꞌe Rei Dabinꞌ!”
\v 16 Nach gwseꞌe Jesoꞌosənꞌ: —¿Ezendoꞌ binꞌ gosəꞌəna biꞌi xcuidəꞌ caꞌ?
\p Jesoꞌosənꞌ božiꞌen gožeꞌ ḻegaꞌaqueꞌ: —Zendaꞌ. ¿Ecabi zaꞌalažəꞌəle canꞌ nyoɉ Xtižəꞌ Diozənꞌ deꞌen gož deꞌe Rei Dabinꞌ Diozənꞌ, nan:
\q1 Leꞌ babenoꞌ par nic̱h biꞌi xcuidəꞌ naꞌ biꞌi choꞌa nižəꞌ caꞌ chsoꞌelaꞌoboꞌ leꞌ canꞌ chazlažoꞌo?
\p
\v 17 Nach bechoɉeꞌ ganꞌ nitəꞌ beṉəꞌ caꞌ, naꞌ bezeꞌe syodanꞌ. Naꞌ žeꞌ naꞌ ɉəyegaꞌaṉeꞌ Betania len disipl c̱heꞌ caꞌ.
\s1 Ben Jesoꞌosənꞌ par nic̱h bgüiž yag yix̱güionꞌ
\p
\v 18 Naꞌ zil beteyo besaꞌaqueꞌ Betanianꞌ ɉəsyaꞌaqueꞌ Jerosalenṉəꞌ deꞌe yoblə. Naꞌ lao zesyəꞌəngüeꞌe nezənꞌ gwdon Jesoꞌosənꞌ.
\v 19 Naꞌ bleꞌineꞌ to yag yix̱güio zon choꞌa nezənꞌ naꞌ gwyeɉeꞌ ɉəgüieꞌ šə žian yix̱güionꞌ. Pero bitobi bželeneꞌ, con zlega xlagueꞌe žia. Nach gožeꞌen: —Caneque cuich bi bi yix̱güionꞌ cuioꞌ.
\p Naꞌ lao or ṉaꞌ ḻeꞌe bgüižten.
\v 20 Catəꞌ besəꞌəleꞌi disipl c̱heꞌ caꞌ canꞌ goquənꞌ, besyəꞌəbaneneꞌ, nach gwseꞌeneꞌ: —¿Bixc̱henꞌ ḻeꞌe bgüižte yaguənꞌ?
\p
\v 21 Naꞌ Jesoꞌosənꞌ gožeꞌ ḻegaꞌaqueꞌ: —Deꞌe ḻi əchniaꞌ leꞌe, šə do yic̱hɉ do lažəꞌəle chonḻilažəꞌəle Diozənꞌ naꞌ bito chac c̱hop lažəꞌəle, guaquə gonḻe canꞌ babenaꞌ par nic̱h bgüiž yaguənꞌ. Naꞌ ḻeczə caꞌ guaquə gonḻe par nic̱h yaꞌa nga žɉəyezon ḻoꞌo nisdaꞌonəꞌ.
\v 22 Naꞌ šə chonḻilažəꞌəcho Diozənꞌ do yic̱hɉ do lažəꞌəcho, bitəꞌətezə deꞌen əṉabechoneꞌ lao orasyonṉəꞌ, goṉczeꞌen chioꞌo.
\s1 Yeḻəꞌ gwnabiaꞌ c̱he Jesoꞌosənꞌ
\p
\v 23 Nach, Jesoꞌosənꞌ gozeɉeꞌ yoꞌodaoꞌ əblaonəꞌ deꞌe yoblə par ɉəsed ɉəloꞌineꞌ beṉəꞌ caꞌ. Naꞌ baḻə beṉəꞌ fariseo caꞌ naꞌ yebaḻə beṉəꞌ chosoꞌosed chosoꞌoloꞌi ḻeinꞌ gosəꞌəbigueꞌe cuit Jesoꞌosənꞌ. Nach gwseꞌe Jesoꞌosənꞌ: —¿Nac goquənꞌ gwxiꞌo yeḻəꞌ gwnabiaꞌanəꞌ naꞌ nonꞌ ben leꞌ yeḻəꞌ gwnabiaꞌanəꞌ par gonoꞌ deꞌe caꞌ chonoꞌ?
\p
\v 24 Nach Jesoꞌosənꞌ gožeꞌ ḻegaꞌaqueꞌ: —Ḻeczə de to deꞌe ṉabdaꞌ leꞌe. Šə gwnale nadaꞌ deꞌen ṉabdaꞌ leꞌe nach əṉiaꞌ leꞌe nonꞌ beṉ nadaꞌ yeḻəꞌ gwnabiaꞌ par gonaꞌ deꞌe caꞌ chonaꞌ.
\v 25 Ḻenašc nadaꞌ: ¿nonꞌ bseḻəꞌ deꞌe Juanṉəꞌ bideꞌ bc̱hoeꞌ beṉəꞌ nis? ¿EDioz nanꞌ bseḻeꞌeneꞌ o šə beṉəꞌ yoblənꞌ?
\p Nach bosoꞌoxiꞌe gosəꞌəneꞌ: —Šə yeꞌechoneꞌ de que Dioz nanꞌ bseḻeꞌe deꞌe Juanṉəꞌ par bc̱hoeꞌ beṉəꞌ nis, naꞌ yeꞌe chioꞌo: “¿Bixc̱hexanꞌ bito gwyeɉḻeꞌele c̱heꞌ?”
\v 26 Naꞌ šə yeꞌechoneꞌ de que to gwlazzenꞌ bideꞌ, cuili biczənꞌ soꞌone beṉəꞌ quinganꞌ chioꞌo, c̱hedəꞌ chseꞌeɉḻeꞌe de que Diozənꞌ bseḻeꞌe deꞌe Juanṉəꞌ par beꞌe xtižeꞌenəꞌ.
\p
\v 27 Nach gwseꞌe Jesoꞌosənꞌ: —Bito ṉezetoꞌ nonꞌ bseḻəꞌ deꞌe Juanṉəꞌ.
\p Nach gož Jesoꞌosənꞌ ḻegaꞌaqueꞌ: —Ḻeczə caꞌ nadaꞌ bito əṉiaꞌ nonꞌ beṉ nadaꞌ yeḻəꞌ gwnabiaꞌanəꞌ par gonaꞌ deꞌe caꞌ chonaꞌ.
\s1 Jempl c̱he c̱hopə xiꞌiṉ beṉəꞌ
\p
\v 28 Ḻeꞌe gon xbab bi zeɉe jempl nga: Gwzo to beṉəꞌ gwnitəꞌ c̱hopə xiꞌiṉeꞌ. Naꞌ gožeꞌ toboꞌ: “Xiꞌiṉaꞌ ṉeža cheꞌendaꞌ šeɉoꞌ güen žin ganꞌ žaꞌ yag obas c̱hiaꞌ caꞌ.”
\v 29 Nach xiꞌiṉeꞌenəꞌ gožboꞌ ḻeꞌ: “Bito šaꞌa.” Pero gwdelə beyomboꞌ xbab, nach gwyeɉboꞌ.
\v 30 Nach gozeɉeꞌ ganꞌ zo xiꞌiṉeꞌen yeto, naꞌ ɉežeꞌeboꞌ canꞌ gožeꞌ biꞌi bišəꞌəboꞌonəꞌ. Naꞌ ḻeꞌe gožte biꞌin ḻeꞌ: “Guaquəczə, naꞌ šaꞌa.” Pero bito gwyeɉboꞌ.
\v 31 Ḻeꞌe našc nadaꞌ: ¿noboꞌ biꞌi caꞌ c̱hopə bosoꞌozenagboꞌ c̱he x̱agaꞌacboꞌonəꞌ?
\p Nach gwseꞌeneꞌ: —Biꞌi nech naꞌ.
\p Nach Jesoꞌosənꞌ gožeꞌ ḻegaꞌaqueꞌ: —Ḻeiczelenꞌ. Naꞌ deꞌe ḻi chniaꞌ leꞌe beṉəꞌ goc̱hixɉw caꞌ naꞌ noꞌolə zargat caꞌ yobəch yosoꞌozenagueꞌ c̱he Diozənꞌ cle ca leꞌe naꞌ yobəch əsoꞌe latɉə ṉabiaꞌ Diozənꞌ ḻegaꞌaqueꞌ.
\v 32 Ca naquə Juanṉəꞌ benꞌ bc̱hoa beṉəꞌ nis bideꞌ laolenꞌ naꞌ gwdix̱ɉueꞌineꞌ leꞌe naquənꞌ cheyaḻəꞌ gonḻe par nic̱h yebei Diozənꞌ leꞌe. Pero bito gwyeɉḻeꞌele c̱heꞌ. Letga beṉəꞌ goc̱hixɉw caꞌ naꞌ noꞌolə zargat caꞌ gwseꞌeɉḻeꞌe c̱heꞌ. Naꞌ catəꞌ gocbeꞌile de que beṉəꞌ caꞌ bagwseꞌeɉḻeꞌe c̱heꞌ, bito bediṉɉele xtoḻəꞌəle caꞌ par šeɉḻeꞌele c̱he deꞌe Juanṉəꞌ.
\s1 Jempl c̱he mos mal caꞌ
\p
\v 33 Ḻeꞌe gwzenag yeto jempl nga. Gwzo to beṉəꞌ naꞌ lao to pedas yežlyo c̱henꞌ gozeꞌ zlezə yag obas naꞌ gwloꞌe leꞌeɉ doxenən. Naꞌ naꞌatezə beneꞌ to tanc ganꞌ bosoꞌosiꞌe obasənꞌ par bechoɉ xiseinꞌ. Naꞌ ḻeczə beneꞌ to campnary ganꞌ yesəꞌəcuaꞌa beṉəꞌ əsaꞌapeꞌ güertənꞌ. Nach beneꞌ güertənꞌ lao naꞌ beṉəꞌ par bosoꞌogüia bosoꞌoyeꞌen, naꞌ gwde naꞌ gwzeꞌe ɉəzoeꞌ ga yoblə.
\v 34 Catəꞌ bžin tyemp par yosyoꞌotobeꞌ cwsešənꞌ, bseḻeꞌe to c̱hopə xmoseꞌ ganꞌ žaꞌ beṉəꞌ caꞌ chsaꞌapə yag obas c̱heꞌenəꞌ par žɉəsyəꞌəx̱iꞌe to tlacw cwsešənꞌ deꞌen cheyaḻəꞌ yeziꞌe.
\v 35 Pero naꞌ beṉəꞌ caꞌ chsaꞌapə yag obas c̱heꞌenəꞌ bito bosəꞌəgüialaogüeꞌ mos c̱heꞌ caꞌ. Gosəꞌəyineꞌ toeꞌ, naꞌ yetoeꞌ bosoꞌošižeꞌeneꞌ yeɉ, nach yetoeꞌ gwsoꞌoteꞌ.
\v 36 Nach bosseḻəꞌ x̱an yag obasənꞌ mos zanch clezə ca beṉəꞌ caꞌ bseḻeꞌe nech, pero ḻeczə canꞌ gwsoꞌoneneꞌ beṉəꞌ nech caꞌ ḻeczə canꞌ gwsoꞌoneneꞌ ḻegaꞌaqueꞌ.
\p
\v 37 Nach x̱an yag obasənꞌ bseḻeꞌe cuinczə xiꞌiṉeꞌenəꞌ, goqueneꞌ əsaꞌapeꞌeneꞌ respet naꞌ yosyoꞌonežɉueꞌeneꞌ cwsešənꞌ.
\v 38 Pero naꞌ beṉəꞌ caꞌ chsaꞌapə güertənꞌ catəꞌ besəꞌəleꞌineꞌ xiꞌiṉeꞌenəꞌ, nach gosəꞌəneꞌ entr ḻegaꞌaczeꞌ: “Beꞌenganꞌ xiꞌiṉ x̱an yag obasənꞌ, naꞌ ḻeꞌenəꞌ yegaꞌaṉlen bienṉəꞌ. Ḻeda gotchoneꞌ par nic̱h yegaꞌaṉlencho yežlyo c̱he x̱eꞌenəꞌ.”
\v 39 Nach bosoꞌoṉizeꞌeneꞌ, besyəꞌəbeɉeꞌeneꞌ fuerlə güertənꞌ naꞌ gwsoꞌoteꞌeneꞌ.
\p
\v 40 Beyož beꞌ Jesoꞌosənꞌ jempl nga, gožeꞌ beṉəꞌ caꞌ žaꞌanəꞌ: —¿Nac chactgüeile gon x̱an güertənꞌ len beṉəꞌ caꞌ bocuaꞌaṉleneꞌ güert c̱heꞌenəꞌ catəꞌ yežin cuineꞌ?
\p
\v 41 Nach gwseꞌeneꞌ: —Goteꞌ ḻegaꞌaqueꞌ yeḻəꞌ beṉəꞌ mal c̱hegaꞌaqueꞌenəꞌ, naꞌ yegüeꞌe güertənꞌ lao naꞌ beṉəꞌ yoblə. Yegüeꞌen lao naꞌ beṉəꞌ soꞌon complir yosyoꞌonežɉueꞌeneꞌ to tlacw cwseš c̱heꞌenəꞌ catəꞌ əžin ža par yesyəꞌətobeꞌen.
\p
\v 42 Jesoꞌosənꞌ gožeꞌ ḻegaꞌaqueꞌ: —Caꞌaczənꞌ. Naꞌ ¿əcabiṉəꞌ šeɉniꞌile bi zeɉen deꞌen nyoɉ Xtižəꞌ Diozənꞌ ganꞌ nan:
\q1 Yeɉ deꞌen cui gwsoꞌolažəꞌ mues güen yoꞌo caꞌ,
\q1 ḻenṉəꞌ banaquən yeɉ squin.
\q1 X̱ancho Diozənꞌ babzoeꞌ yeɉənꞌ ganꞌ cheyaḻəꞌ son
\q1 naꞌ deꞌe zaquəꞌ yebanecho canꞌ beneꞌenəꞌ.
\m
\v 43 Deꞌe naꞌanəꞌ chniaꞌ leꞌe de que Diozənꞌ cueɉyic̱hɉeꞌ cuich ṉabiꞌe ṉasyon c̱helenəꞌ naꞌ cueɉeꞌ beṉəꞌ yoblə beṉəꞌ yosoꞌozenag c̱heꞌ par ṉabiꞌe ḻegaꞌaqueꞌ.
\v 44 Naꞌ ca naquə yeɉənꞌ ža, yoguəꞌ no cui šeɉḻeꞌ c̱hiaꞌ gwxaquəꞌəlebeneꞌ ca beṉəꞌ əxopə lao yeɉənꞌ naꞌ cueꞌežožɉeꞌ. Naꞌ yoguəꞌ no cuiṉəꞌ šeɉḻeꞌ c̱hiaꞌ catəꞌ babžin žanꞌ gaquə juisyənꞌ, gwxaquəꞌəlebeneꞌ ca beṉəꞌ əxopə yeɉ laogüeꞌenəꞌ naꞌ əgwšošɉən ḻeꞌ.
\p
\v 45 Naꞌ bx̱oz əblao caꞌ naꞌ beṉəꞌ fariseo caꞌ, catəꞌ gwseꞌeneneꞌ jempl caꞌ deꞌen beꞌ Jesoꞌosənꞌ, gwsaꞌacbeꞌineꞌ de que beꞌe jempl caꞌ por ni c̱he deꞌen cui chseꞌeɉḻeꞌe c̱heꞌ.
\v 46 Nach gwseꞌeneneꞌ yesəꞌəzeneꞌeneꞌ pero bitobi gwsoꞌoneneꞌ ḻeꞌ. Besəꞌəžebeꞌ šə bi soꞌone beṉəꞌ caꞌ nžagueꞌenəꞌ ḻegaꞌaqueꞌ, c̱hedəꞌ yogueꞌe gwseꞌeɉḻeꞌe de que Diozənꞌ bseḻeꞌe Jesoꞌosənꞌ par choꞌe xtižeꞌenəꞌ.
\c 22
\s1 Jempl c̱he to yeḻəꞌ gošagnaꞌ
\p
\v 1 Naꞌ deꞌe yoblə bsed bloꞌi Jesoꞌosənꞌ beṉəꞌ caꞌ len jemplənꞌ, gozneꞌ:
\v 2 —Yeḻəꞌ gwnabiaꞌ c̱he Diozənꞌ gwxaquəꞌəleben ca deꞌe nga goquənꞌ. Zo to rei, beṉəꞌ ben gast catəꞌ bšagnaꞌ xiꞌiṉeꞌenəꞌ.
\v 3 Naꞌ beneꞌ combid beṉəꞌ zan əžɉaꞌaqueꞌ ližeꞌenəꞌ par əsaꞌogüeꞌ. Naꞌ catəꞌ bžin or par solao lṉinꞌ, reinꞌ bseḻeꞌe xmoseꞌ caꞌ par ɉəsəꞌəxiꞌe beṉəꞌ caꞌ babeneꞌ combidənꞌ. Pero notono no gwseꞌene əžɉaꞌac lao yeḻəꞌ gošagnaꞌ c̱he xiꞌiṉeꞌenəꞌ.
\v 4 Nach gožeꞌ yex̱oṉɉ xmoseꞌ caꞌ: “Ḻeꞌe žɉež beṉəꞌ caꞌ zɉənaquə combidənꞌ de que babsiꞌiniꞌa deꞌen gaochonəꞌ. Babetaꞌ xcoꞌoṉaꞌ caꞌ naꞌ xmeꞌedaoguaꞌa caꞌ bia caꞌ chsaꞌaṉəꞌ, naꞌ yoguəꞌ deꞌe caꞌ yeḻaꞌ babsiꞌiniꞌa par gaocho. Naꞌ yeꞌegaꞌacleneꞌ saꞌaqueꞌ gaocho deꞌen babsiꞌiniꞌanəꞌ.” Nach ɉaꞌac mos caꞌ ɉseꞌežeꞌ ḻegaꞌaqueꞌ caꞌ.
\v 5 Pero beṉəꞌ caꞌ bito gwsoꞌoneꞌ cas. Toeꞌ gwyeɉeꞌ ɉəgüieꞌ yežlyo c̱heꞌenəꞌ, naꞌ yetoeꞌ gwyeɉeꞌ ɉeneꞌ ṉegosy.
\v 6 Naꞌ yebaḻeꞌ bosəꞌəṉizeꞌ mos caꞌ bseḻəꞌ reinꞌ naꞌ gosəꞌəziꞌic̱hižeꞌe ḻegaꞌaqueꞌ naꞌ gwsoꞌoteꞌ baḻeꞌ.
\v 7 Naꞌ ḻechguaḻe bžaꞌa reinꞌ, naꞌ bseḻeꞌe soḻdad c̱heꞌ caꞌ ɉseꞌeteꞌ ḻegaꞌaqueꞌ naꞌ bosəꞌəzeyeꞌ syoda c̱hegaꞌaqueꞌenəꞌ.
\v 8 Nach reinꞌ gožeꞌ xmoseꞌ caꞌ: “Babsiꞌiniꞌa deꞌen gaocho lao lṉinꞌ, pero ca naquə beṉəꞌ caꞌ benaꞌ combidənꞌ nacbiaꞌ bito zɉəzaqueꞌe par laꞌaqueꞌ ližaꞌ nga əsaꞌogüeꞌ.
\v 9 Ḻeꞌe žɉaꞌac yež caꞌ yeḻaꞌ naꞌ ḻeꞌe žɉəta yoguəꞌ lquey caꞌ naꞌ gonḻe combid yoguəꞌ beṉəꞌ chaš par daꞌaqueꞌ saꞌogüeꞌ.”
\v 10 Naꞌ mos caꞌ ɉaꞌaqueꞌ yoguəꞌ nez caꞌ naꞌ ɉəsəꞌətobeꞌ con yoguəꞌ beṉəꞌ besəꞌəžagueꞌ, no beṉəꞌ naquə beṉəꞌ güen naꞌ no beṉəꞌ naquə beṉəꞌ mal, par nic̱h bežaꞌ liž reinꞌ xte cuich bi latɉə gotəꞌ.
\p
\v 11 Pero naꞌ catəꞌ gwyoꞌo reinꞌ ɉəgüieꞌ beṉəꞌ caꞌ bazɉənžaguənꞌ, naꞌ entr ḻegaꞌaqueꞌ bleꞌineꞌ to beṉəꞌ cui nyazeꞌ lachəꞌ deꞌen chnežɉo reinꞌ deꞌen chsaꞌazeꞌ lao lṉinəꞌ.
\v 12 Nach gož reinꞌ ḻeꞌ: “Migw c̱hiaꞌ ¿nac goquənꞌ gwyoꞌo nga? laꞌ bito nyazoꞌ lachəꞌ deꞌen cheyaḻəꞌ c̱hazoꞌ.” Naꞌ beꞌenəꞌ bito bželeneꞌ bi yeꞌe reinꞌ.
\v 13 Nach reinꞌ beneꞌ mendad yosoꞌoc̱heɉ xmoseꞌ caꞌ ṉiꞌanaꞌ beꞌenəꞌ naꞌ yesyəꞌəbeɉeꞌeneꞌ fuerlə, ganꞌ ḻechguaḻe naquə žc̱hoḻ, ganꞌ cuežyašeꞌe naꞌ ganꞌ gaoyeɉə leyeꞌ zeɉḻicaṉe.
\v 14 Canꞌ naquən, Diozənꞌ chaxeꞌ yoguəꞌ beṉəꞌ par əseꞌeɉḻeꞌe c̱heꞌ, pero baḻgueꞌen chosoꞌozenagueꞌ c̱heꞌ, naꞌ chqueꞌe ḻegaꞌaqueꞌ ca xiꞌiṉeꞌ.
\s1 Gosəꞌəṉabeneꞌ Jesoꞌosənꞌ šə naquən güen yesəꞌəyixɉueꞌ impuest c̱he gobierṉ
\p
\v 15 Nach beṉəꞌ fariseo caꞌ besəꞌəžagueꞌ par bosəꞌəxiꞌe naclə soꞌoneꞌ par nic̱h yesəꞌəcueɉeꞌ Jesoꞌosənꞌ dižəꞌ deꞌen yesəꞌəc̱hineꞌ par əsaꞌogüeꞌ xya c̱heꞌ.
\v 16 Naꞌ beṉəꞌ fariseo caꞌ bosoꞌoseḻeꞌe baḻə beṉəꞌ zɉənaquə cuent len ḻegaꞌaqueꞌ lao Jesoꞌosənꞌ na ḻeczə bosoꞌoseḻeꞌe baḻə beṉəꞌ chsoꞌon txen len Erodənꞌ par ɉseꞌežeꞌeneꞌ: —Maestr, ṉezetoꞌ de que choꞌo dižəꞌ ḻi. Ṉezetoꞌ deꞌen chsed chloꞌidoꞌ beṉəꞌ canꞌ cheneꞌe Diozənꞌ goncho naquən dižəꞌ ḻi. Naꞌ ṉezetoꞌ bito chžeboꞌ binꞌ yesəꞌəna beṉəꞌ, laꞌ bito chonoꞌ cuent c̱he beṉəꞌ šə naqueꞌ blao o šə bito naqueꞌ.
\v 17 Deꞌe naꞌanəꞌ zedeṉabetoꞌ leꞌ par ənaoꞌ netoꞌ naquənꞌ cheyaḻəꞌ gontoꞌ. ¿Enaquən güen c̱hixɉwtoꞌ impuest c̱he gobierṉ romanꞌ, o šə bito cheyaḻəꞌ c̱hixɉwtoꞌon?
\p
\v 18 Jesoꞌosənꞌ gocbeꞌineꞌ caguə do lažəꞌəgaꞌaqueꞌenəꞌ gwseꞌeneꞌ caꞌ, nach gožeꞌ ḻegaꞌaqueꞌ: —¡Nacle beṉəꞌ gox̱oayag! ¿Bixc̱henꞌ cheneꞌele cueɉle nadaꞌ dižəꞌ deꞌen gwc̱hinḻe contr nadaꞌ?
\v 19 Ḻeꞌe gwloꞌi nadaꞌ xmechlenꞌ deꞌen chyixɉwle c̱he impuestənꞌ.
\p Nach bosoꞌoloꞌineꞌ ḻeꞌ to denario.
\v 20 Jesoꞌosənꞌ gožeꞌ ḻegaꞌaqueꞌ: —¿No diboj c̱heinəꞌ daꞌ laogüenṉəꞌ, naꞌ no leinꞌ nyoɉ laogüenṉəꞌ?
\p
\v 21 Nach gwseꞌeneꞌ: —C̱he Rei Sesar.
\p Nach Jesoꞌosənꞌ gožeꞌ ḻegaꞌaqueꞌ: —Ḻeꞌe əgwnežɉo Sesarənꞌ deꞌen naquə c̱heꞌ ža, naꞌ ḻeꞌe əgwnežɉo Diozənꞌ deꞌen cheyaḻəꞌ əgwnežɉwleneꞌ.
\p
\v 22 Nach beṉəꞌ caꞌ catəꞌ gwseꞌeneneꞌ xtižəꞌ Jesoꞌosənꞌ besyəꞌəbaneneꞌ. Naꞌ besaꞌaqueꞌ ganꞌ zoeꞌenəꞌ.
\s1 Catəꞌ yesyəꞌəban beṉəꞌ guat caꞌ
\p
\v 23 Naꞌ ḻeꞌe ža naꞌatezəczə besəꞌəzžin baḻə beṉəꞌ sadoseo beṉəꞌ caꞌ cui chseꞌeɉḻeꞌ de que yesyəꞌəban beṉəꞌ guat caꞌ, naꞌ deꞌe naꞌanəꞌ ɉseꞌežeꞌeneꞌ:
\v 24 —Maestr, deꞌe Moisezənꞌ bzoɉeꞌ de que šə to beṉəꞌ byo beṉəꞌ nšagnaꞌ gateꞌ naꞌ yegaꞌaṉ noꞌolə c̱heꞌenəꞌ sin cui no xiꞌiṉeꞌ gwzo, beṉəꞌ bišəꞌ beꞌenəꞌ bagotənꞌ cheyaḻəꞌ yequeꞌe noꞌolənəꞌ par nic̱h nitəꞌ xiꞌiṉ dia c̱he deꞌe beṉəꞌ bišeꞌenəꞌ.
\v 25 Bac̱h bembiꞌatoꞌ gažə bišəꞌəgaꞌaqueꞌ. Naꞌ beṉəꞌ nechənꞌ bšagneꞌe, naꞌ goteꞌ, naꞌ notono xiꞌiṉeꞌ gwzo. Naꞌ bišeꞌe əgwchopənꞌ bequeꞌe noꞌolənꞌ.
\v 26 Naꞌ ḻeczə got beṉəꞌ əgwchopənꞌ naꞌ notono xiꞌiṉeꞌ gwzo. Nach ḻeꞌegatezə caꞌ goquə len beṉəꞌ bišeꞌe əgwyoṉe, nach beṉəꞌ bišəꞌəgaꞌaqueꞌ caꞌ yeḻaꞌ, xte besyəꞌəyategaꞌaqueꞌ besyəꞌəqueꞌe noꞌolənꞌ naꞌ besyəꞌəyategaꞌaqueꞌ gwsaꞌat, naꞌ notoczə no xiꞌiṉgaꞌaqueꞌ gwnitəꞌ.
\v 27 Naꞌ gwde gwsaꞌat beṉəꞌ caꞌ ḻeczə got noꞌolənꞌ.
\v 28 Naꞌ catəꞌ yesyəꞌəban beṉəꞌ guat caꞌ, ¿noeꞌ entr beṉəꞌ gažə caꞌ gaquə beꞌen c̱he noꞌolənꞌ? laꞌ yogueꞌen bosyoꞌošagnaꞌaleneꞌ ḻeꞌ.
\p
\v 29 Nach gož Jesoꞌosənꞌ ḻegaꞌaqueꞌ: —Bito chonḻe xbab šaoꞌ deꞌen nale caꞌ, laꞌ bito ṉezele canꞌ na Xtižəꞌ Diozənꞌ deꞌen nyoɉən naꞌ nic ṉezele naquənꞌ naquə yeḻəꞌ guac c̱he Diozənꞌ.
\v 30 Catəꞌən yesyəꞌəban beṉəꞌ guat caꞌ, bito gacbiaꞌ šə zosoꞌošagneꞌe o šə cui, naꞌ canaꞌ caguə no yosyoꞌošagnaꞌach. Lebzenꞌ əsaꞌaqueꞌ len angl c̱he Diozənꞌ beṉəꞌ caꞌ nitəꞌ yobanꞌ.
\v 31 Naꞌ ca naquənꞌ chaquele bito yesyəꞌəban beṉəꞌ guat caꞌ, ¿əbito zaꞌalažəꞌəle canꞌ nyoɉ Xtižəꞌ Diozənꞌ, nan:
\v 32 “Nadaꞌ nacaꞌ Dioz c̱he deꞌe x̱axtaꞌole Abraanṉəꞌ, naꞌ Dioz c̱he deꞌe x̱axtaꞌole Isaaquənꞌ, naꞌ Dioz c̱he deꞌe x̱axtaꞌole Jacobənꞌ.” Naꞌ ṉezecho beṉəꞌ caꞌ niteꞌe len Diozənꞌ c̱hedəꞌ Diozənꞌ bito naqueꞌ Dioz c̱he beṉəꞌ guat, sino naqueꞌ Dioz c̱he beṉəꞌ caꞌ zɉəmban.
\p
\v 33 Naꞌ beṉəꞌ zan caꞌ zɉənžaguənꞌ besyəꞌəbaneneꞌ catəꞌ gwseꞌeneneꞌ dižəꞌən deꞌen bsed bloꞌineꞌ ḻegaꞌaqueꞌ.
\s1 Deꞌen naquə deꞌe blaoch deꞌen non Diozənꞌ mendad goncho
\p
\v 34 Naꞌ catəꞌ gwseꞌene beṉəꞌ fariseo caꞌ de que Jesoꞌosənꞌ bzožieꞌ beṉəꞌ sadoseo caꞌ, nach ɉezaꞌaqueꞌ lao Jesoꞌosənꞌ.
\v 35 Naꞌ to benꞌ chsed chloꞌi ḻeinꞌ ḻeczə goneꞌeneꞌ cueɉeꞌ Jesoꞌosənꞌ dižəꞌ deꞌe gwc̱hineꞌ contr ḻeꞌ. Naꞌ gožeꞌeneꞌ:
\v 36 —Maestr, lao ḻei c̱he Diozənꞌ ¿nonꞌ deꞌen noneꞌ mendad goncho naquən deꞌe blaoch?
\p
\v 37-38 Jesoꞌosənꞌ gožeꞌeneꞌ: —Deꞌen naquə deꞌe žialaoch naꞌ deꞌe blaoch lao deꞌe caꞌ noneꞌ mendad goncho nan: “Cheyaḻəꞌ gaquecho c̱he X̱ancho Diozənꞌ do yic̱hɉ do lažəꞌəcho do fuers balor c̱hecho.”
\v 39 Naꞌ deꞌe əgwchopenꞌ lebze nan len deꞌe nechenꞌ: “Cheyaḻəꞌ gaquecho c̱he saꞌalɉuežɉcho catg chaquecho c̱he cuincho.”
\v 40 C̱hopə deꞌe caꞌ non Diozənꞌ mendad goncho zɉənox̱əꞌən doxen deꞌen bzoɉ deꞌe Moisezənꞌ naꞌ deꞌen bosoꞌozoɉ beṉəꞌ caꞌ gwsoꞌe xtižəꞌ Diozənꞌ canaꞌ.
\s1 Cristənꞌ naqueꞌ xiꞌiṉ dia c̱he deꞌe Rei Dabinꞌ
\p
\v 41 Naꞌ lao ṉeꞌe zɉənžag beṉəꞌ fariseo caꞌ lao Jesoꞌosənꞌ,
\v 42 gožeꞌ ḻegaꞌaqueꞌ: —¿Binꞌ chontguale xbab c̱he Cristənꞌ benꞌ əseḻəꞌ Diozənꞌ par gaquəleneꞌ ṉasyon c̱hechonꞌ? ¿No xiꞌiṉ dia c̱hei gaqueꞌ?
\p Naꞌ gwseꞌeneꞌ: —Gaqueꞌ xiꞌiṉ dia c̱he deꞌe Rei Dabinꞌ.
\p
\v 43-44 Nach Jesoꞌosənꞌ gožeꞌ ḻegaꞌaqueꞌ: —Deꞌe Dabinꞌ bzoɉeꞌ canꞌ bloꞌi Spirit c̱he Diozənꞌ ḻeꞌ. Gwneꞌ de que Cristənꞌ naqueꞌ X̱aneꞌ. Quinga bzoɉeꞌ:
\q1 X̱ancho Diozənꞌ gožeꞌ X̱anaꞌan:
\q1 “Gwcheꞌedoꞌ cuitaꞌ nga ṉabiꞌacho txen,
\q1 Naꞌ gonaꞌ par nic̱h ṉitəꞌ deꞌe caꞌ chsoꞌon contr leꞌ naꞌ beṉəꞌ contr c̱hioꞌ caꞌ xniꞌonəꞌ.”
\m
\v 45 Naꞌ deꞌen gwna deꞌe Rei Dabinꞌ de que Cristənꞌ naqueꞌ X̱aneꞌ, ¿əcabi zeɉen de que Cristənꞌ naqueꞌ mazəchlə ca xiꞌiṉ dia c̱heꞌ naꞌanəꞌ ža?
\p
\v 46 Naꞌ notoch no goquə yosyoꞌožiꞌi xtižeꞌenəꞌ. Naꞌ dezd ža naꞌ bitoch besyəꞌəyaxɉeneꞌ bi yesəꞌəṉabeneꞌ Jesoꞌosənꞌ.
\c 23
\s1 Xtoḻəꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ
\p
\v 1 Nach Jesoꞌosənꞌ gwzolao beꞌe dižəꞌ len disipl c̱heꞌ caꞌ naꞌ len beṉəꞌ zan caꞌ nitəꞌ ganꞌ zoꞌenəꞌ, gwneꞌ:
\v 2 —Beṉəꞌ caꞌ chosoꞌosed chosoꞌoloꞌi ḻeinꞌ naꞌ beṉəꞌ fariseo caꞌ bazɉənḻaneꞌ xlatɉə deꞌe Moisezənꞌ par chosoꞌozeɉniꞌineꞌ beṉəꞌ ḻei c̱he Diozənꞌ.
\v 3 Naꞌ deꞌe naꞌanəꞌ ḻeꞌe gwzenag c̱hegaꞌaqueꞌ catəꞌ chosoꞌozeneneꞌ leꞌe canꞌ na ḻeinꞌ, naꞌ ḻeꞌe gon canꞌ nanṉəꞌ, pero bito gonḻe canꞌ chsoꞌon ḻegaꞌaqueꞌ, c̱hedəꞌ ḻegaꞌaqueꞌ bito chsoꞌoneꞌ deꞌen chəsəꞌəneꞌ cheyaḻəꞌ gonḻe.
\v 4 Ḻegaꞌaqueꞌ chesəꞌəzancheꞌ canꞌ na ḻeinꞌ, naꞌ chsoꞌoneꞌen ca to yoaꞌ deꞌe cuiczə no doꞌi naꞌ chseꞌeneneꞌ soaꞌ beṉəꞌ yoblə ḻen, naꞌ bito chseꞌene ḻegaꞌaqueꞌ əsoꞌen.
\v 5 Ca naquə beṉəꞌ caꞌ yoguəꞌ deꞌen chsoꞌoneꞌenəꞌ, chsoꞌoneꞌen parzə nic̱h yesəꞌəleꞌi beṉəꞌ canꞌ chsoꞌoneꞌenəꞌ, naꞌ soꞌelaogüeꞌe ḻegaꞌaqueꞌ. Ncheɉ naꞌagaꞌaqueꞌenəꞌ naꞌ ncheɉ lao xgagaꞌaqueꞌenəꞌ caj daoꞌ ganꞌ žaꞌ part güeɉə Xtižəꞌ Diozənꞌ naꞌ chsoꞌoneꞌ caj daoꞌ caꞌ deꞌe chaꞌodaoꞌ. Naꞌ ḻeczə chsoꞌoneꞌ lox xadoṉ c̱hegaꞌaqueꞌenəꞌ deꞌe toṉə.
\v 6 Chesyəꞌəbeineꞌ chesəꞌəbiꞌe ganꞌ chəsəꞌəbeꞌ beṉəꞌ blao caꞌ catəꞌ chɉaꞌaqueꞌ ganꞌ chac no lṉi, naꞌ catəꞌ chɉaꞌaqueꞌ yoꞌodaoꞌ c̱hegaꞌaqueꞌ.
\v 7 Chəsyəꞌəbeineꞌ catəꞌ beṉəꞌ caꞌ chəsəꞌəguapeꞌ ḻegaꞌaqueꞌ diox naꞌ catəꞌ chesəꞌənopeꞌe naꞌagaꞌaqueꞌen do lao lquey, naꞌ chseꞌeneneꞌ yosoꞌosiꞌ beṉəꞌ ḻegaꞌaqueꞌ maestr.
\p
\v 8 Pero əchniaꞌ leꞌe, bito gonḻe byen yeꞌe beṉəꞌ leꞌe “maestr” laogüe deꞌen chsed chloꞌile xtižaꞌanəꞌ, c̱hedəꞌ nadəꞌəzanꞌ gwleɉ Diozənꞌ par nacaꞌ maestr c̱hele, nadanꞌ bseḻeꞌe par gaquəlenaꞌ beṉac̱hənꞌ. Naꞌ yoguəꞌ leꞌe chonḻilažəꞌəle nadaꞌ chaque bišəꞌəlɉuežɉle tole yetole.
\v 9 Naꞌ ḻeczə bito nale c̱he notəꞌətezə beṉəꞌ de que naqueꞌ “Padrecito”. Tozə Dioz benꞌ zo yoba naqueꞌ X̱acho.
\v 10 Naꞌ bito gonḻe byen yeꞌe beṉəꞌ leꞌe “X̱anaꞌ”, c̱hedəꞌ ḻeczə tozə nadaꞌ Cristənꞌ gwleɉ Diozənꞌ par nacaꞌ X̱anḻe.
\v 11 Šə no leꞌe nacle beṉəꞌ blaoch, cheyaḻəꞌ əgwzex̱ɉw yic̱hɉle gaquəlenḻe lɉuežɉle.
\v 12 Notəꞌətezle choꞌelaoꞌ cuinḻe Diozənꞌ goneꞌ par nic̱h gacbeꞌile de que bitobi zaquəꞌəle. Naꞌ notəꞌətezle chonḻe xbab de que bitotec bi zaquəꞌəle, Diozənꞌ goṉeꞌ leꞌe yeḻəꞌ balaꞌaṉ.
\p
\v 13 Probchguazə leꞌe chsed chloꞌile ḻeinꞌ, naꞌ probchguazə leꞌe beṉəꞌ fariseo. Chx̱oayagle beṉəꞌ par nic̱h cui soꞌe latɉə ṉabiaꞌ Diozənꞌ ḻegaꞌaqueꞌ naꞌ ḻeczə leꞌe bito choꞌele latɉə ṉabiaꞌ Diozənꞌ leꞌe.
\p
\v 14 Naꞌ probchguazə leꞌe chsed chloꞌile ḻeinꞌ, naꞌ probchguazə leꞌe beṉəꞌ fariseo. Chx̱oayagle no noꞌolə gozebə par nic̱h noꞌol caꞌ chsoꞌoṉeꞌ leꞌe ližgaꞌaqueꞌ naꞌ len bichlə deꞌen de c̱hegaꞌaqueꞌ. Nach catəꞌ chonḻe orasyon choꞌechguale dižəꞌ par nic̱h əx̱oayagle beṉəꞌ əsaꞌaqueneꞌ nacle beṉəꞌ güen. Goschaꞌoch Diozənꞌ castigw c̱helenꞌ clezə ca c̱he beṉəꞌ caꞌ cuitec zɉəṉezeneꞌ canꞌ na ḻeinꞌ.
\p
\v 15 Probchguazə leꞌe chsed chloꞌile ḻeinꞌ naꞌ probchguazə leꞌe beṉəꞌ fariseo. Nacle beṉəꞌ gox̱oayag. Chɉaꞌactezə chɉaꞌacle chɉətilɉle beṉəꞌ zitəꞌ beṉəꞌ yesəꞌənao deꞌen chsed chloꞌile. Naꞌ catəꞌ chželgaꞌaqueleneꞌ chzeɉniꞌigaꞌaqueleneꞌ par nic̱h əsaꞌaqueꞌ ḻechguaḻe beṉəꞌ maləch clezə ca leꞌe.
\p
\v 16 ¡Probchguazə leꞌe! Nacle ca beṉəꞌ lc̱hoḻ beṉəꞌ chsaꞌaqueneꞌ guaquə yesəꞌəgüeꞌe nez beṉəꞌ yoblə. Nale de que notəꞌətezə beṉəꞌ chzoeꞌ joramentənꞌ por yoꞌodaoꞌ əblaonəꞌ, bitobi zeɉe jorament c̱heꞌenəꞌ. Pero šə chzoeꞌ joramentənꞌ por oro deꞌen de ḻoꞌo yoꞌodaꞌonəꞌ, nachənꞌ zeɉen de que cheyaḻəꞌ goneꞌ canꞌ choneꞌ lyebe.
\v 17 Leꞌe nacle ca beṉəꞌ lc̱hoḻ naꞌ bitobi cheɉniꞌile. Oronꞌ bitotec bi zaquəꞌən. Yoꞌodaꞌonəꞌ ganꞌ yoꞌo oronꞌ ḻenṉəꞌ zaquəꞌəchən, laꞌ deꞌen yoꞌo oronꞌ ḻoꞌinəꞌ deꞌe naꞌanəꞌ oronꞌ naquən c̱he Diozənꞌ.
\v 18 Naꞌ ḻeczə nale de que šə to beṉəꞌ chzoeꞌ joramentənꞌ por mes de yeɉ ganꞌ chosoꞌozeyeꞌ bia yix̱əꞌən par chsoꞌelaogüeꞌe Diozənꞌ, bitobi zeɉe jorament c̱heꞌenəꞌ. Pero naꞌ šə chzoeꞌ joramentənꞌ por deꞌen xoa lao mes de yeɉənꞌ, cheyaḻəꞌ goneꞌ canꞌ choneꞌ lyebe.
\v 19 Leꞌe nacle ca beṉəꞌ lc̱hoḻ naꞌ bitobi cheɉniꞌile. Deꞌen chosoꞌozeyeꞌ par chsoꞌelaogüeꞌe Diozənꞌ bitotec bi zaquəꞌən. Mes ganꞌ chxoa deꞌen chosəꞌənežɉueꞌ Diozənꞌ ḻenṉəꞌ zaquəꞌəchən, laꞌ deꞌen chosoꞌox̱oeꞌ deꞌe caꞌ laogüen, deꞌe naꞌanəꞌ chsaꞌaquən c̱he Dioz.
\v 20 Šə beṉəꞌ chzoeꞌ joramentənꞌ por mes de yeɉənꞌ lenczə por deꞌen xoa laogüenṉəꞌ chzoeꞌen.
\v 21 Naꞌ šə beṉəꞌ chzoeꞌ joramentənꞌ por yoꞌodaꞌonəꞌ, lenczə por Dioz nanꞌ chzoeꞌ joramentənꞌ c̱hedəꞌ yoꞌodaꞌonəꞌ naquə c̱he Diozənꞌ naꞌ nanꞌ zoeꞌ.
\v 22 Naꞌ šə beṉəꞌ chzoeꞌ joramentənꞌ por yobanꞌ, por Dioz nanꞌ chzoeꞌen, c̱hedəꞌ laꞌ nanꞌ chiꞌ Diozənꞌ chnabiꞌe.
\p
\v 23 Probchguazə leꞌe chsed chloꞌile ḻeinꞌ, naꞌ probchguazə leꞌe beṉəꞌ fariseo. ¡Nacle beṉəꞌ gox̱oayag! Ḻaꞌaṉəꞌəczə chnežɉwle Diozənꞌ to part lao ši part c̱he yix̱güeɉ c̱hele, c̱he niz c̱hele, naꞌ c̱he comin c̱hele, bitobi zeɉen, c̱hedəꞌ bito chzenagle c̱he deꞌe caꞌ zɉənaquə deꞌe žialaoch deꞌen na ḻeinꞌ. Bito chonḻe deꞌen naquə güen lao Diozənꞌ. Bito cheyašəꞌəlažəꞌəle saꞌalɉuežɉ beṉac̱hle. Bito chonḻe complir canꞌ nale. Deꞌe quinga zɉənaquə deꞌe žialaoch gonḻe; pero bito cheyaḻəꞌ cueɉyic̱hɉle cui əgwnežɉwle deꞌe caꞌ chnežɉoczleneꞌ.
\v 24 Nacle ca beṉəꞌ lc̱hoḻ beṉəꞌ chsaꞌaqueneꞌ guaquə yesəꞌəgüeꞌe nez beṉəꞌ yoblə. Gwxaquəꞌəlebele ca to beṉəꞌ chebeɉ bizə beb daoꞌ nc̱hix̱ə yeḻəꞌ guao c̱heꞌenəꞌ, pero bito chacbeꞌineꞌ šə nc̱hix̱əꞌəchlən to deꞌe xen deꞌe zaquəꞌ yebeɉeꞌ.
\p
\v 25 Probchguazə leꞌe chsed chloꞌile ḻeinꞌ naꞌ probchguazə leꞌe beṉəꞌ fariseo. ¡Nacle beṉəꞌ gox̱oayag! Gwxaquəꞌəlebele ca tas plat deꞌen chc̱hin beṉəꞌ naꞌ cui chaꞌa chyibeꞌ ḻoꞌinəꞌ binḻo. Chonḻe par nic̱h chsaꞌaque beṉəꞌ de que nacle beṉəꞌ güen pero ḻechguaḻe chzelažəꞌəle bi deꞌe de c̱he beṉəꞌ naꞌ chebeichgüeile chcaꞌalen.
\v 26 Leꞌe beṉəꞌ fariseo, nc̱hoḻ yic̱hɉlaꞌaždaꞌolenꞌ. Ḻeꞌe yediṉɉe xtoḻəꞌəle caꞌ par nic̱h deꞌe ḻiczə gacle beṉəꞌ güen canꞌ cheneꞌele soꞌon beṉəꞌ xbab nacle.
\p
\v 27 Probchguazə leꞌe chsed chloꞌile ḻeinꞌ deꞌen bzoɉ deꞌe Moisezənꞌ, naꞌ probchguazə leꞌe beṉəꞌ fariseo. ¡Nacle beṉəꞌ gox̱oayag! Gwxaquəꞌəlebele ca to ba deꞌen zɉənoneꞌ xochechgua laogüenəꞌ pero ḻoꞌilei žaꞌ žit beṉəꞌ guat naꞌ chiꞌichgua deꞌe zban.
\v 28 Cheneꞌele soꞌon beṉəꞌ xbab c̱hele de que nacle beṉəꞌ güen, pero len yic̱hɉlaꞌaždaꞌolenꞌ nacle beṉəꞌ gox̱oayag naꞌ beṉəꞌ malchgua.
\p
\v 29 ¡Probchguazə leꞌe chsed chloꞌile ḻeinꞌ! naꞌ ¡probchguazə leꞌe beṉəꞌ fariseo! Nacle beṉəꞌ gox̱oayag. Chonḻe moṉoment lao ba c̱he deꞌe profet beṉəꞌ caꞌ gwsoꞌe xtižəꞌ Diozənꞌ canaꞌ, naꞌ chonḻe xochechgua lao ba c̱he yeziquəꞌəchlə beṉəꞌ gwsoꞌon deꞌe güen.
\v 30 Naꞌ nale: “Žaləꞌ chioꞌo bazocho ca tyemp c̱he deꞌe x̱axtaꞌocho caꞌ, bito bencho txen len ḻegaꞌaqueꞌ ca deꞌen gwsoꞌoneꞌ gwsoꞌoteꞌ profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ.”
\v 31 Pero naꞌ yoguəꞌəḻoḻte deꞌen chonḻe chloꞌin de que tozəczə canꞌ nacle len deꞌe x̱axtaꞌole caꞌ beṉəꞌ caꞌ gwsoꞌot deꞌe profet caꞌ.
\v 32 Šə deꞌe tant chebeile chonḻe deꞌe malənꞌ, ḻeꞌe gwzaꞌalao ḻegon biquəꞌəchlə deꞌe mal deꞌen bito goḻəꞌ soꞌon deꞌe x̱axtaꞌole caꞌ.
\p
\v 33 Leꞌe nacle beṉəꞌ gox̱oayag naꞌ nalɉele. ¿Echaquele de que guaquə yexoṉɉele castigonꞌ deꞌen goṉ Diozənꞌ leꞌe ca deꞌen əseḻeꞌe leꞌe lao yiꞌ gabiḻənꞌ?
\v 34 Naꞌ deꞌen gonaꞌ nadaꞌ əseḻaꞌa beṉəꞌ soꞌe xtižaꞌanəꞌ naꞌ no beṉəꞌ sinꞌ laolenəꞌ, naꞌ nochlə beṉəꞌ yosoꞌosedeneꞌ leꞌe xtižaꞌanəꞌ. Naꞌ baḻeꞌ gotle əgwdaꞌagaꞌacleneꞌ to ḻeꞌe yag coroz, naꞌ yebaḻeꞌ c̱hinḻe do ḻoꞌo yoꞌodaoꞌ c̱hele caꞌ, naꞌ yebaḻeꞌ yolagzeɉə yolagzidəgaꞌacleneꞌ gatəꞌətezə yež žɉaꞌaqueꞌ.
\v 35 Naꞌ deꞌen gonḻe caꞌ gaple doḻəꞌ c̱he yeḻəꞌ got c̱he yoguəꞌ beṉəꞌ caꞌ gwsoꞌon deꞌe güen, beṉəꞌ caꞌ gwsoꞌot deꞌe x̱axtaꞌole caꞌ, gwzolaozən len deꞌe Abeḻənꞌ xiꞌiṉ beṉəꞌ nech caꞌ benꞌ naquə beṉəꞌ güen lao Diozənꞌ naꞌ beyožən len deꞌe Zequeria xiꞌiṉ deꞌe Berequias. Zequeria naꞌanəꞌ benꞌ gwsoꞌoteꞌ entr yoꞌodaoꞌ əblaonəꞌ naꞌ entr mes de yeɉ ganꞌ chosoꞌozeyeꞌ bia yix̱əꞌ par chsoꞌelaogüeꞌe Diozənꞌ.
\v 36 Naꞌ deꞌe ḻi leꞌe mbanḻe ṉaꞌa siꞌile castigw c̱he yeḻəꞌ got c̱he yoguəꞌ beṉəꞌ caꞌ gwsoꞌot deꞌe x̱axtaꞌole caꞌ.
\s1 Begüineꞌe Jesoꞌosənꞌ por ni c̱he xtoḻəꞌ beṉəꞌ Jerosalen caꞌ
\p
\v 37 ¡Prob leꞌe beṉəꞌ Jerosalen! Chotle beṉəꞌ caꞌ chsoꞌe xtižəꞌ Diozənꞌ naꞌ beṉəꞌ caꞌ chseḻəꞌ Diozənꞌ par chsoꞌeleneꞌ leꞌe xtižeꞌenəꞌ chšižəꞌəgaꞌacleneꞌ yeɉ. Zan las bagoꞌondaꞌ yotobaꞌ leꞌe canꞌ chon to ɉeid cheyež xiꞌiṉəb, pero bito beꞌele latɉə.
\v 38 Naꞌ ṉaꞌa cueɉyic̱hɉ Diozənꞌ leꞌe. Bitoch goneꞌ cas c̱hele.
\v 39 Naꞌ əchniaꞌ leꞌe, bitoch leꞌile nadaꞌ xte catəꞌəch əžin ža əṉale: “Choꞌelaꞌotoꞌ benꞌ zaꞌ nga, babseḻəꞌ X̱ancho Diozənꞌ ḻeꞌ.”
\c 24
\s1 Jesoꞌosənꞌ gwneꞌ de que gwžin ža yosyoꞌoc̱hiṉɉeꞌ yoꞌodaoꞌ əblaonəꞌ
\p
\v 1 Naꞌ catəꞌ bezaꞌ Jesoꞌosənꞌ yoꞌodaoꞌ əblaonəꞌ par šeɉeꞌ ga yoblə gosəꞌəbiguəꞌ disipl c̱heꞌ caꞌ ganꞌ zoꞌenəꞌ naꞌ lao chəsəꞌəgüiꞌe yoꞌodaoꞌ əblaonəꞌ gwsoꞌe dižəꞌ catec xoche naquən naꞌ ḻeczə caꞌ yoꞌo caꞌ zɉənyec̱hɉən.
\v 2 Nach Jesoꞌosənꞌ gožeꞌ ḻegaꞌaqueꞌ: —Bableꞌile catec xochenꞌ naquə yoguəꞌ deꞌe quinga. Naꞌ deꞌe ḻi chniaꞌ leꞌe ca naquə deꞌen chleꞌile ṉaꞌa, gwžin ža yosyoꞌoc̱hiṉɉ beṉəꞌ doxenən, naꞌ notoch no leꞌi ḻegaꞌaquən.
\s1 Deꞌen gaquə catəꞌən bazon baozə šoꞌo fin c̱he yežlyonꞌ
\p
\v 3 Naꞌ ɉaꞌaqueꞌ yaꞌa Olibosənꞌ naꞌ Jesoꞌosənꞌ gwchiꞌe lao yaꞌanəꞌ tozeꞌ. Naꞌ gosəꞌəbiguəꞌ disipl c̱heꞌ caꞌ laogüeꞌenəꞌ naꞌ gwseꞌeneꞌ: —X̱antoꞌ, ¿do batəꞌəquənꞌ gaquə deꞌe nga naoꞌ nga? Naꞌ ¿nac gaquənꞌ gacbeꞌitoꞌ de que bazon baozə yidoꞌ deꞌe yoblə par šoꞌo fin c̱he yežlyonꞌ?
\p
\v 4 Nach Jesoꞌosənꞌ gožeꞌ ḻegaꞌaqueꞌ: —Ḻeꞌe gon xbab par nic̱h notono əx̱oayag leꞌe.
\v 5 Gwžin ža catəꞌ zan beṉəꞌ gox̱oayag šaꞌ lao yežlyo nga beṉəꞌ seꞌeneꞌeneꞌ yosoꞌoḻaneꞌ xlatɉaꞌ nga. Naꞌ yesəꞌəneꞌ: “Nadaꞌan Cristənꞌ benꞌ gwleɉ Diozənꞌ par gaquəlenaꞌ leꞌe.” Naꞌ beṉəꞌ zan yesəꞌəx̱oayagueꞌ.
\v 6 Naꞌ yeneꞌele dižəꞌ de que chac gwdiḻə, o de que guaquə gwdiḻə, pero naꞌ bito žeble, c̱hedəꞌ zguaꞌatec cheyaḻəꞌ gaquə caꞌ. Naꞌ bito ḻeꞌe žinte žanꞌ par šoꞌo fin c̱he yežlyonꞌ.
\v 7 Naꞌ yesyəꞌədiḻə yež contr yež, naꞌ ṉasyon contr ṉasyon. Naꞌ ḻeczə zan yež deꞌe zɉəchiꞌ doxenḻə yežlyonꞌ gaquə bgua bgüin naꞌ cueꞌe yižgüeꞌ, naꞌ ḻeczə x̱oꞌochgua.
\v 8 Naꞌ te gaquə caꞌ ṉeꞌe yesəꞌəžaglaoch beṉəꞌ žaꞌ yežlyonꞌ.
\p
\v 9 Nach beṉəꞌ caꞌ žaꞌ doxen yežlyo nga yesəꞌəgueꞌineꞌ leꞌe c̱hedəꞌ chonḻilažəꞌəle nadaꞌ. Naꞌ soꞌoneꞌ leꞌe lao naꞌ beṉəꞌ contr caꞌ, naꞌ yesəꞌəsaquəꞌəziꞌe leꞌe, nach soꞌoteꞌ leꞌe.
\v 10 Canaꞌ ža, beṉəꞌ zan beṉəꞌ bachsoꞌonḻilažəꞌ nadaꞌ yesəꞌəbeɉyic̱hɉeꞌ cuich soꞌonḻilažeꞌe nadaꞌ. Naꞌ ḻegaꞌactezeꞌ yesəꞌəgueꞌineꞌ lɉuežɉgaꞌaqueꞌ beṉəꞌ ṉeꞌe chsoꞌonḻilažəꞌ nadaꞌ naꞌ soꞌoneꞌ ḻegaꞌaqueꞌ lao naꞌ beṉəꞌ contr caꞌ.
\v 11 Naꞌ beṉəꞌ zan soꞌonḻažeꞌe yesəꞌəneꞌ de que xtižəꞌ Diozənꞌ chəsəꞌəyix̱ɉuiꞌe naꞌ yesəꞌəx̱oayagueꞌ beṉəꞌ zan.
\v 12 Naꞌ laogüe deꞌen šanch beṉəꞌ caꞌ soꞌon deꞌe malənꞌ, beṉəꞌ zan juisy beṉəꞌ bachsoꞌonḻilažəꞌ nadaꞌ cuich əsaꞌaqueneꞌ c̱he yeziquəꞌəchlə beṉəꞌ chsoꞌonḻilažəꞌ nadaꞌ.
\v 13 Pero naꞌ notəꞌətezle šə coꞌo gwc̱heɉlažəꞌəle len deꞌen c̱hiꞌ saquəꞌəle par gonḻilažəꞌəle nadaꞌ naꞌ gwzenagle c̱hiaꞌ xte catəꞌəch əžin ža gatle, gožɉəyezole len Diozənꞌ.
\v 14 Naꞌ žɉaꞌac beṉəꞌ doxen lao yežlyonꞌ yesəꞌəyix̱ɉuiꞌe dižəꞌ güen dižəꞌ cobənꞌ de que ṉabiaꞌ Diozənꞌ con notəꞌətezə beṉəꞌ əsoꞌe latɉə. Naꞌ catəꞌ bazɉəṉeze beṉəꞌ žaꞌ yoguəꞌ ṉasyonṉəꞌ ḻen, canaꞌachənꞌ əžin ža šoꞌo fin c̱he yežlyonꞌ.
\p
\v 15-16 Bablable canꞌ bzoɉ deꞌe profet Daniel benꞌ beꞌ xtižəꞌ Diozənꞌ canaꞌ. Naꞌ deꞌen bzoɉeꞌ nan de que beṉəꞌ mal soꞌoneꞌ deꞌen naquə deꞌe zban juisy deꞌe chgueꞌi Diozənꞌ ḻoꞌo yoꞌodaoꞌ əblao c̱he chioꞌo beṉəꞌ Izrael naꞌ yoꞌodaꞌonəꞌ bitoch gonən žin. Naꞌ catəꞌ leꞌile gaquə deꞌe quinga, cananꞌ leꞌe nitəꞌəle Jodeanꞌ cheyaḻəꞌ əgwxoṉɉle naꞌ žɉaꞌacle do yaꞌadaꞌote. Leꞌe chlable deꞌen nga ḻeꞌe šeɉniꞌin.
\v 17 Naꞌ šə zo to beṉəꞌ choneꞌ dezcanz lao sotea c̱heꞌ ližeꞌenəꞌ, bito gaḻəꞌ yotobeꞌ šinḻazeꞌ caꞌ žaꞌ ližeꞌenəꞌ, con cueɉyic̱hɉeꞌen.
\v 18 Naꞌ ḻeczə caꞌ beṉəꞌ zda do yoba bito gaḻəꞌ yebiꞌe par žɉəyexiꞌe xadoṉ c̱heꞌenəꞌ ližeꞌ.
\v 19 Naꞌ ca tyempənꞌ ḻechguaḻe zdebə gaquən len noꞌolə caꞌ zɉənoaꞌ bdaoꞌ naꞌ noꞌol caꞌ chesəꞌəguažəꞌ bidaoꞌ.
\v 20 Ḻeꞌe gon orasyon par nic̱h cui cheyaḻəꞌ əgwxoṉɉle tyemp catəꞌ chiꞌ deꞌe zag o lao ža dezcanz.
\v 21 Catəꞌ gaquə deꞌe caꞌ ḻechguaḻe c̱hiꞌ saquəꞌ beṉəꞌ Izrael gwlaž c̱hecho caꞌ. Naꞌ dezd catəꞌən gwxe yežlyonꞌ xte ža ṉeža bito əṉacho bagwdiꞌ bagwxaquəꞌ beṉəꞌ canꞌ c̱hiꞌ saquəꞌ beṉəꞌ Izrael gwlaž c̱hecho caꞌ, naꞌ bito əžinḻažeꞌe gaquə caꞌ len beṉac̱hənꞌ deꞌe yoblə.
\v 22 Žaləꞌ nžia Diozənꞌ biaꞌ yesəꞌəžaglaogüeꞌ sša ni yeto beṉəꞌ cuich zɉəmban catəꞌən yeyož yesəꞌəžaglaogüeꞌenəꞌ žaləꞌ caꞌ. Pero por ni c̱he deꞌen chaque Diozənꞌ c̱he beṉəꞌ caꞌ chsoꞌonḻilažəꞌ ḻeꞌ, beṉəꞌ caꞌ bagwleɉeꞌ par əsaꞌaqueꞌ xiꞌiṉeꞌ, deꞌe naꞌanəꞌ cui güeꞌe latɉə yesəꞌəžaglaogüeꞌ sša.
\p
\v 23 Deꞌe naꞌanəꞌ šə no əyeꞌe leꞌe: “Bgüiašc nga zo Cristənꞌ benꞌ gwleɉ Diozənꞌ par gaquəleneꞌ chioꞌo”, o šə əyeꞌe leꞌe: “Naꞌalə zoeꞌ”, bito šeɉḻeꞌele c̱heꞌ.
\v 24 Zan beṉəꞌ gox̱oayag šaꞌ lao yežlyo nga əseꞌe leꞌe de que zɉənaqueꞌ Cristənꞌ o de que chsoꞌe xtižəꞌ Diozənꞌ. Naꞌ soꞌoneꞌ miḻagr naꞌ soꞌoneꞌ deꞌe naquə yeḻəꞌ goban par nic̱h yesəꞌəx̱oayagueꞌ beṉəꞌ caꞌ bagwleɉ Diozənꞌ par əsaꞌaqueꞌ xiꞌiṉeꞌ žaləꞌ gaquə yesəꞌəx̱oayagueꞌ ḻegaꞌaqueꞌ.
\v 25 Baṉezele canꞌ gaquə laꞌ bagwdix̱ɉueꞌidaꞌ leꞌe c̱he deꞌe caꞌ zeꞌe gaquə.
\v 26 Deꞌe naꞌanəꞌ šə əseꞌe leꞌe: “Zo Cristənꞌ latɉə dašənꞌ”, bito gwzenagle c̱hegaꞌaqueꞌ par əžɉaꞌacle. Naꞌ šə əseꞌe leꞌe de que zo Cristənꞌ ḻoꞌo yoꞌonəꞌ, bito šeɉḻeꞌele c̱hegaꞌaqueꞌ.
\v 27 Canꞌ chac catəꞌ chep yesənꞌ chseꞌeniꞌin doxenḻə ḻeꞌe yobanꞌ to de repentzə, ḻeczə canꞌ gaquə catəꞌən əžin ža yidaꞌ deꞌe yoblə. Diozənꞌ bseḻeꞌe nadaꞌ golɉaꞌ beṉac̱h, naꞌ yidaꞌ to de repentzə naꞌ yoguəꞌəḻoḻ beṉəꞌ yesəꞌəleꞌineꞌ nadaꞌ.
\v 28 Ngaleꞌen chonen c̱he benꞌ neꞌ: “Ganꞌ de bia guat nanꞌ chesəꞌəžag šod caꞌ.”
\s1 Canꞌ gaquə catəꞌ yidə Jesocristənꞌ deꞌe yoblə
\p
\v 29 Naꞌ cate yeyož c̱hiꞌ saquəꞌ beṉac̱hənꞌ lao ža caꞌ, bgüižənꞌ bitoch əgwseꞌeniꞌin, naꞌ ḻeczə caꞌ bioꞌonəꞌ. Naꞌ belɉw caꞌ zɉəžia ḻeꞌe yobanꞌ yesəꞌəxopən c̱hedəꞌ Diozənꞌ əgwsiꞌiṉseꞌ yoguəꞌ deꞌe caꞌ.
\v 30 Naꞌ canaꞌach beṉəꞌ žaꞌ yežlyonꞌ yesəꞌəleꞌineꞌ nadaꞌ yidaꞌ deꞌe yoblə to ḻoꞌo beɉw, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Yidaꞌ nsaꞌa yeḻəꞌ guac xen c̱hiaꞌanəꞌ naꞌ yeḻəꞌ chey cheꞌeniꞌ c̱hiaꞌanəꞌ. Naꞌ beṉəꞌ žaꞌ yoguəꞌ ṉasyon c̱he yežlyonꞌ yesəꞌəbežyašeꞌe, beṉəꞌ cui gwsoꞌonḻilažəꞌ nadaꞌ.
\v 31 Naꞌ catəꞌən yidaꞌ to trompetənꞌ cuežən zižɉo, naꞌ əseḻaꞌa angl c̱hiaꞌ caꞌ doxenḻə yežlyonəꞌ par yesyəꞌətobeꞌ beṉəꞌ caꞌ bagwleɉ Diozənꞌ par zɉənaqueꞌ xiꞌiṉeꞌ gatəꞌətezə zɉənasəlaseꞌ.
\p
\v 32 Ṉezele canꞌ chac do nga len yag yix̱güionꞌ, catəꞌ bac̱h chzolao chebia xḻagueꞌe, chacbeꞌile de que bac̱h zon yelaꞌ yeɉonꞌ.
\v 33 Naꞌ ḻeczə canꞌ catəꞌən leꞌile gaquə deꞌe mal caꞌ bagwniaꞌ gaquə, canaꞌach əṉezele de que bazon əžin ža šoꞌo fin c̱he yežlyonꞌ.
\v 34 Deꞌe ḻi əchniaꞌ leꞌe, bitoṉəꞌ gat leꞌe nitəꞌəle lao tyemp nga ṉaꞌa catəꞌ solao gaquə yoguəꞌəḻoḻ deꞌe caꞌ.
\v 35 Ca naquə deꞌe caꞌ chleꞌicho ḻeꞌe yobanꞌ naꞌ yežlyonꞌ, yesəꞌəde c̱hei, pero ca naquə xtižaꞌanəꞌ caguə deꞌe te cui gaquə canꞌ nanṉəꞌ.
\p
\v 36 Pero ca naquə bi ža bi orənꞌ šoꞌo fin c̱he yežlyonꞌ, notono no ṉeze, ni que zɉəṉeze angl caꞌ nitəꞌ yobanꞌ, naꞌ ni que ṉezdaꞌ nadaꞌ nacaꞌ Xiꞌiṉ Diozənꞌ. Tozə X̱aꞌ Dioz nanꞌ ṉeze.
\p
\v 37 Diozənꞌ bseḻeꞌe nadaꞌ golɉaꞌ beṉac̱h, naꞌ canꞌ goquə ca tyemp c̱he deꞌe Noenəꞌ, ḻeczə canꞌ gaquə catəꞌən nadaꞌ yidaꞌ deꞌe yoblə.
\v 38 Beṉəꞌ caꞌ gwnitəꞌ ca tyemp c̱he deꞌe Noenꞌ gwžaꞌazecheꞌ gwseꞌeɉ gwsaꞌogüeꞌ naꞌ gwsoꞌelaozechgaꞌaqueꞌ bosoꞌošagneꞌe naꞌ bosəꞌəšagueꞌ naꞌ no xiꞌiṉgaꞌaqueꞌ. Ṉeꞌe chsoꞌonteꞌ caꞌ catəꞌən bžin ža gwyoꞌo Noenꞌ ḻoꞌo barconꞌ len famiḻy c̱heꞌ caꞌ.
\v 39 Bito gwsaꞌacbeꞌineꞌ binꞌ gaquə xte catəꞌəchənꞌ goc yeɉw sioꞌ juisyənꞌ naꞌ biaꞌ nisənꞌ yoguəꞌəḻoḻgaꞌaqueꞌ. Caꞌatezəczənꞌ bito saꞌacbeꞌi beṉəꞌ binꞌ gaquə xte catəꞌəchənꞌ yidaꞌ deꞌe yoblə.
\v 40 Quinganꞌ gaquə catəꞌən yidaꞌ deꞌe yoblə, c̱hopə beṉəꞌ niteꞌe do yoba, toeꞌ yeziꞌ yecaꞌ Diozənꞌ, naꞌ yetoeꞌ yocuaꞌaṉeꞌ.
\v 41 Naꞌ c̱hopə noꞌolə niteꞌe chsoꞌoteꞌ, toeꞌ yeziꞌ yecaꞌ Diozənꞌ, naꞌ yetoeꞌ yocuaꞌaṉeꞌ.
\p
\v 42 Deꞌe naꞌanəꞌ ḻeꞌe so probnid par catəꞌən yidaꞌ deꞌe yoblə, c̱hedəꞌ bito ṉezele bi ža bi orənꞌ yidaꞌ deꞌe yoblə, nadaꞌ nacaꞌ X̱anḻe.
\v 43 Ḻeꞌe gon xbab c̱he deꞌe nga, žaləꞌ ṉeze x̱an yoꞌonəꞌ do bi or lao yelənꞌ əžin beṉəꞌ bguanṉəꞌ ližeꞌenəꞌ, laꞌ gwṉazeꞌ par nic̱h bito güeꞌe latɉə šoꞌo beꞌenəꞌ ližeꞌenəꞌ par cuaneꞌ šinḻazeꞌenəꞌ.
\v 44 Deꞌe naꞌanəꞌ ža, ḻeꞌe so probnid par catəꞌən yidaꞌ deꞌe yoblə c̱hedəꞌ catəꞌən cui chonḻe xbab yidaꞌ ca nanꞌ yidaꞌ deꞌe yoblə, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\s1 Mos benꞌ chon güen naꞌ mos benꞌ cui chon güen
\p
\v 45 Notəꞌətezle šə zotezə zole probnid dote tyemp, gwxaquəꞌəlebele ca to mos beṉəꞌ naqueꞌ beṉəꞌ sinꞌ naꞌ beṉəꞌ chon complir canꞌ cheyaḻəꞌ goneꞌ. Naꞌ gwxaquəꞌəlebele ca to mos benꞌ gwloꞌo x̱aneꞌenəꞌ lao neꞌe ližeꞌenəꞌ catəꞌən gwzeꞌenəꞌ par nic̱h chnežɉueꞌ deꞌe chsaꞌo yoguəꞌ mos c̱heꞌ caꞌ yeḻaꞌ catəꞌ chžin or chsaꞌogüeꞌ.
\v 46 Šə to beṉəꞌ mosənꞌ chontezə choneꞌ canꞌ non x̱anenꞌ mendad, mbalaz soczeꞌ catəꞌ yežin x̱aneꞌenəꞌ.
\v 47 Deꞌe ḻi chniaꞌ leꞌe, x̱aneꞌen cueꞌe lao naꞌ xmoseꞌenəꞌ yoguəꞌəḻoḻ deꞌen deineꞌ.
\v 48 Pero šə mosənꞌ naqueꞌ beṉəꞌ mal naꞌ goneꞌ xbab əṉeꞌ: “Bagwžei x̱ananꞌ”.
\v 49 Nach šə solaocleꞌ c̱hineꞌ mos caꞌ yeḻaꞌ naꞌ yeꞌeɉ gaoxattezeꞌ len no beṉəꞌ güeꞌe zo,
\v 50 nach x̱aneꞌenəꞌ yežineꞌ to ža senyaleꞌ ḻeꞌ to or cui nacbeꞌineꞌ.
\v 51 Naꞌ por ni c̱he deꞌen cui chon mosənꞌ canꞌ cheyaḻəꞌ goneꞌ, x̱aneꞌenəꞌ c̱hinchgüeꞌ ḻeꞌ yid sotənꞌ xte ca gateꞌ. Gaquə c̱heꞌ canꞌ chac c̱he notəꞌətezə beṉəꞌ gox̱oayag, chɉəyaꞌaqueꞌ gabiḻənꞌ ganꞌ chesəꞌəbežyašəꞌ beṉəꞌ naꞌ chsaꞌoyeɉə leygaꞌaqueꞌenəꞌ.
\c 25
\s1 Jempl c̱he ši noꞌol güegoꞌ ɉaꞌaqueꞌ to yeḻəꞌ gošagnaꞌ
\p
\v 1 Nach Jesoꞌosənꞌ gozeꞌe disipl c̱heꞌ caꞌ: ―Yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌe nga goquə. Goc to yeḻəꞌ gošagnaꞌ naꞌ bazɉəx̱iꞌ beṉəꞌ gošagnaꞌanəꞌ xoꞌoleꞌenəꞌ. Naꞌ nitəꞌ ši noꞌol güegoꞌ zɉənaqueꞌ migw c̱he beṉəꞌ caꞌ chesəꞌəšagnaꞌanəꞌ. Naꞌ zɉənxobeꞌ lintern c̱hegaꞌaqueꞌen ɉaꞌaqueꞌ ɉəsəꞌəlezeꞌ catəꞌ yesyəꞌəchoɉ beṉəꞌ caꞌ liž noꞌolənꞌ par nic̱h əžɉaꞌaqueꞌ liž beṉəꞌ byonꞌ txen.
\v 2 Naꞌ gueyəꞌ noꞌol caꞌ gwniteꞌe probnid, naꞌ noꞌol caꞌ yegueyəꞌ bito gosəꞌəniteꞌe probnid.
\v 3 Catəꞌ gwsaꞌaqueꞌ ližgaꞌaqueꞌenəꞌ, zɉənxobeꞌ lintern c̱hegaꞌaqueꞌenəꞌ pero bito gwsoꞌox̱eꞌe lmet ganꞌ yožə petroly deꞌen yosoꞌoc̱hineꞌ catəꞌ yebiž deꞌen yožə ḻoꞌo lintern c̱hegaꞌaqueꞌenəꞌ.
\v 4 Naꞌ noꞌol caꞌ gueyəꞌ catəꞌ gwsaꞌaqueꞌ ližgaꞌaqueꞌenəꞌ, gosəꞌəxobeꞌ lintern c̱hegaꞌaqueꞌenəꞌ naꞌ gosəꞌəbecyic̱hɉeꞌ gwsoꞌox̱eꞌe lmet ganꞌ yožə petroly deꞌen yosəꞌəc̱hineꞌ catəꞌ yebiž deꞌen yožəꞌ ḻoꞌo lintern c̱hegaꞌaqueꞌenəꞌ.
\v 5 Naꞌ gosəꞌəžei beṉəꞌ gošagnaꞌ caꞌ, naꞌ yoguəꞌ beṉəꞌ caꞌ gosəꞌəbezə ḻegaꞌaqueꞌ gosəꞌətaseꞌ lao chesəꞌəbezeꞌenəꞌ.
\v 6 Naꞌ do chel, to beṉəꞌ gwneꞌ zižɉo, gožeꞌ ḻegaꞌaqueꞌ: “Bachesyəꞌəchoɉ beṉəꞌ gošagnaꞌ caꞌ. Ḻeꞌe šoꞌo žɉəšaggaꞌacchoneꞌ.”
\v 7 Naꞌ catəꞌ gožeꞌ ḻegaꞌaqueꞌ caꞌ, yoguəꞌ noꞌol caꞌ gosəꞌəzecheꞌ naꞌ gosəꞌəqueꞌe baoꞌ deꞌen zo lao meš c̱he lintern c̱hegaꞌaqueꞌenəꞌ.
\v 8 Naꞌ noꞌol caꞌ cui gosəꞌənitəꞌ probnid gwseꞌe noꞌol caꞌ yegueyəꞌ: “¿Ebito goṉ latəꞌ petroly c̱helenꞌ netoꞌ? laꞌ bachebiž c̱hetoꞌonəꞌ.”
\v 9 Nach noꞌol caꞌ gwseꞌe ḻegaꞌaqueꞌ: “Bito gaquə goṉlatəꞌətoꞌ c̱hele laꞌ deꞌen de c̱hetoꞌ bito gaquen par yoguəꞌəcho. Ḻeꞌe žɉaꞌac ḻeꞌe žɉəx̱iꞌ c̱helenꞌ ganꞌ chsoꞌoteꞌenṉəꞌ.”
\v 10 Nach noꞌol caꞌ cui gosəꞌənitəꞌ probnidənꞌ ɉaꞌaqueꞌ ɉəsəꞌəx̱iꞌe petrolyənꞌ. Naꞌ lao zɉaꞌaqueꞌ gwxiꞌ petrolyənꞌ besyəꞌəžin beṉəꞌ caꞌ chosoꞌošagnaꞌ liž beṉəꞌ byonꞌ. Naꞌ noꞌol caꞌ gosəꞌənitəꞌ probnid gwsoꞌe ḻoꞌo yoꞌonəꞌ ganꞌ chsoꞌoneꞌ gastənꞌ txen len beṉəꞌ caꞌ chosəꞌəšagnaꞌanəꞌ. Nach mos caꞌ bosoꞌoseyɉueꞌ puertənꞌ.
\v 11 Naꞌ catəꞌ besəꞌəžin noꞌol caꞌ ɉəsəꞌəx̱iꞌ petrolyənꞌ naꞌ gosəꞌəṉeꞌ choꞌa puertənꞌ, gwseꞌe benꞌ zo choꞌa puertənꞌ: “Señor, bsalɉwšga puertənꞌ par nic̱h šoꞌotoꞌ.”
\v 12 Pero naꞌ benꞌ zo choꞌa puertənꞌ gožeꞌ ḻegaꞌaqueꞌ: “Deꞌe ḻi chniaꞌ leꞌe, bito salɉuaꞌ par šoꞌole laꞌ bito nombiꞌa leꞌe.”
\p
\v 13 Nach gozeꞌ Jesoꞌosənꞌ disipl c̱heꞌ caꞌ: ―Caꞌaczənꞌ cheyaḻəꞌ sole probnid batəꞌəquənꞌ yidaꞌ, c̱hedəꞌ bito ṉezele bi ža bi orənꞌ yidaꞌ yežlyo nga deꞌe yoblə, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\s1 Jempl c̱he benꞌ bocuaꞌaṉleneꞌ xmoseꞌ caꞌ mechanꞌ
\p
\v 14 Naꞌ yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌen nga. To beṉəꞌ gwyeɉeꞌ ṉasyon zitəꞌ. Naꞌ zeꞌe seꞌe goxeꞌ mos c̱heꞌ caꞌ naꞌ gwloꞌe lao naꞌagaꞌaqueꞌ xmecheꞌenəꞌ par gwsoꞌoneneꞌen ṉegosy.
\p
\v 15 Toeꞌ bocuaꞌaṉleneꞌ gueyaꞌ mil pes. Naꞌ yetoeꞌ bocuaꞌaṉleneꞌ c̱hopa mil. Naꞌ yetoeꞌ bocuaꞌaṉleneꞌ tmil. Bnežɉueꞌen ḻegaꞌaqueꞌ segon canꞌ chac soꞌon to togaꞌaqueꞌ. Beyož beneꞌ caꞌ gwzeꞌe.
\v 16 Benꞌ bocuaꞌaṉleneꞌ gueyaꞌ mil ḻeꞌe gwzolaote choneꞌ ṉegosy len mechənꞌ naꞌ beneꞌ gan yegueyaꞌ mil pes.
\v 17 Ḻeꞌegatezə caꞌ ben benꞌ bocuaꞌaṉleneꞌ c̱hopa mil. Ḻeꞌe gwzolaote choneꞌ ṉegosyənꞌ len mechənꞌ naꞌ beneꞌ gan yec̱hopa mil.
\v 18 Naꞌ benꞌ bnežɉueꞌ tmil gwyeɉeꞌ, ɉəcuašeꞌe xmech x̱aneꞌenəꞌ to ḻoꞌo yech deꞌe əgwc̱heꞌeṉeꞌ ḻoꞌo yonꞌ.
\p
\v 19 Goc sša gwzaꞌ x̱an mos quinga catəꞌ bežineꞌ nach beneꞌ mendad ɉaꞌac xmoseꞌ caꞌ laogüeꞌenəꞌ par bosyoꞌodieꞌ cuent.
\v 20 Naꞌ mosənꞌ benꞌ bocuaꞌaṉleneꞌ gueyaꞌ mil pes bžineꞌ laogüeꞌenəꞌ naꞌ gožeꞌeneꞌ: “X̱anaꞌ, ni de deꞌe gueyaꞌ mil deꞌen beṉoꞌ nadaꞌ. Naꞌ babenaꞌ gan yegueyaꞌ mil.”
\v 21 Naꞌ x̱aneꞌenəꞌ gožeꞌeneꞌ: “Babenoꞌ deꞌe güen. Nacoꞌ mos güen naꞌ syempr chonoꞌ complir canꞌ cheyaḻəꞌ gonoꞌ. Benoꞌ canꞌ cheyaḻəꞌ gonoꞌ len deꞌe daonꞌ bocuaꞌaṉlenaꞌ leꞌ, naꞌ ṉaꞌa gonaꞌ lao naꞌo deꞌe xenchlə. Gwyoꞌo naꞌ gonaꞌ par nic̱h soꞌ mbalaz len nadaꞌ.”
\v 22 Nach catəꞌ bžin benꞌ bocuaꞌaṉleneꞌ c̱hopa milənꞌ gožeꞌeneꞌ: “X̱anaꞌ, ni de deꞌe c̱hopa mil pes deꞌen bocuaꞌaṉlenoꞌ nadaꞌ, naꞌ babenən gan yec̱hopa mil.”
\v 23 Nach gož x̱aneꞌen ḻeꞌ: “Babenoꞌ deꞌe güen. Nacoꞌ mos güen naꞌ syempr chonoꞌ complir canꞌ cheyaḻəꞌ gonoꞌ. Benoꞌ canꞌ cheyaḻəꞌ gonoꞌ len deꞌe daonꞌ bocuaꞌaṉlenaꞌ leꞌ, naꞌ ṉaꞌa gonaꞌ lao naꞌo deꞌe xenchlə. Gwyoꞌo naꞌ gonaꞌ par nic̱h soꞌ mbalaz len nadaꞌ.”
\v 24 Nach catəꞌ bezžin benꞌ bocuaꞌaṉleneꞌ tmil, nach gožeꞌ x̱aneꞌenəꞌ: “Nga de xmechoꞌ deꞌen bocuaꞌaṉlenoꞌ nadaꞌ. Ṉezdaꞌ de que leꞌ nacoꞌ to beṉəꞌ znia. Chelapoꞌ deꞌen gwsaꞌaz beṉəꞌ yoblə, naꞌ chotoboꞌ cwseš ganꞌ gwsoꞌon beṉəꞌ yoblə žin.
\v 25 Deꞌe naꞌanəꞌ gwyaꞌa ɉəc̱heꞌenaꞌ to yech naꞌ bcuašaꞌa xmechoꞌonəꞌ, c̱hedəꞌ bžebaꞌ šə əgwnitlaꞌan. Naꞌ ṉaꞌa beziꞌišganꞌ.”
\v 26 Nach x̱aneꞌen gožeꞌ ḻeꞌ: “¡Nacoꞌ mos mal, naꞌ nacoꞌ xagüed! Chacdoꞌ de que chelapaꞌ ganꞌ gwsaꞌaz beṉəꞌ yoblə, naꞌ chotobaꞌ cwseš ganꞌ gwsoꞌon beṉəꞌ yoblə žin.
\v 27 Naꞌ šə chacdoꞌ chonaꞌ caꞌ, ¿bixc̱henꞌ cui gwleɉoꞌ xmechaꞌan beṉəꞌ yoblə žlac cui gwzoaꞌ? naꞌ ṉaꞌa babelaꞌa yeziꞌan len yic̱hɉei žaləꞌ caꞌ.”
\v 28 Nach gožeꞌ xmoseꞌ caꞌ yeḻaꞌ: “Yecaꞌale mechənꞌ deꞌen bocuaꞌaṉlenaꞌ beꞌenəꞌ naꞌ əgwnežɉwlen benꞌ banox̱əꞌ ši mil pes.
\v 29 Canꞌ naquən, benꞌ chon güen len deꞌen chnežɉo x̱aneꞌen ḻeꞌ, x̱aneꞌen gwnežɉochczeꞌ c̱heꞌ, nic̱h gatəꞌ deꞌe sc̱haꞌoch c̱heꞌ. Pero naꞌ beꞌenəꞌ cui chgon žin deꞌen chnežɉo x̱aneꞌen ḻeꞌ, yecaꞌa x̱aneꞌen deꞌe daꞌon bnežɉueꞌ ḻeꞌ.
\v 30 Naꞌ ca naquə mos mal nga ḻeꞌe yebeɉeꞌ fuerlə ganꞌ ḻechguaḻe naquə žc̱hoḻ naꞌ cuežyašeꞌe naꞌ gaoyeɉə leyeꞌenəꞌ.”
\s1 Canꞌ gaquə catəꞌ Jesoꞌosənꞌ goneꞌ yeḻəꞌ jostis c̱he yoguəꞌ ṉasyon
\p
\v 31 Diozənꞌ bseḻeꞌe nadaꞌ golɉaꞌ beṉac̱h, naꞌ catəꞌ yidaꞌ deꞌe yoblə nsaꞌa yeḻəꞌ chey cheꞌeniꞌ c̱hiaꞌanəꞌ, naꞌ c̱hiꞌa angl c̱hiaꞌ caꞌ naꞌ cuiꞌa ganꞌ chey cheꞌeniꞌ naꞌ ṉabiꞌa.
\v 32 Yoguəꞌ beṉəꞌ ban naꞌ yoguəꞌ beṉəꞌ guat c̱he yoguəꞌ ṉasyon gonaꞌ mendad daꞌaqueꞌ laoguaꞌanəꞌ. Naꞌ catəꞌ banitəꞌ yogueꞌe naꞌ ḻaꞌagaꞌacaꞌaneꞌ canꞌ chon to beṉəꞌ goye xiləꞌ catəꞌ chbeɉeꞌ partlə xiləꞌ caꞌ naꞌ partlə šib caꞌ.
\v 33 Naꞌ beṉəꞌ caꞌ zɉənaquə beṉəꞌ güen lao Diozənꞌ deꞌen babosoꞌozenagueꞌ c̱hiaꞌ əgwnitəꞌəgaꞌacaꞌaneꞌ cuitanꞌ ḻicha. Pero beṉəꞌ mal caꞌ əgwnitəꞌəgaꞌacaꞌaneꞌ cuitanꞌ yeglə.
\v 34 Naꞌ nadaꞌ nacaꞌ Rei yapaꞌa beṉəꞌ caꞌ ṉitəꞌ šḻaꞌa ḻichanꞌ: “Baben X̱aꞌ Diozənꞌ par nic̱h leꞌe zole mba. Ḻeꞌe da nga par nic̱h gonaꞌ ca ṉabiꞌale txen len nadaꞌ canꞌ banžia Diozənꞌ biaꞌ dezd gwxe yežlyonꞌ.
\v 35 Gonaꞌ ca ṉabiꞌale c̱hedəꞌ catəꞌ gwdonaꞌ leꞌe beṉle deꞌen gwdaoguaꞌ. Naꞌ catəꞌ bgüildaꞌ nis, leꞌe beṉle deꞌe güeꞌeɉaꞌ. Naꞌ catəꞌ gocaꞌ ca beṉəꞌ zitəꞌ leꞌe bebeile bgüialaole nadaꞌ ližlenꞌ.
\v 36 Naꞌ catəꞌ cui gotəꞌ deꞌe c̱hazaꞌ, leꞌe beṉle deꞌe gwyazaꞌ. Naꞌ catəꞌ gocšendaꞌ leꞌe bedətiple lažaꞌa. Naꞌ catəꞌ gotaꞌa ližya, leꞌe bedəlaṉəꞌəle nadaꞌ.”
\v 37 Naꞌ yoguəꞌ beṉəꞌ güen caꞌ əseꞌe nadaꞌ: “X̱antoꞌ ¿batənꞌ bleꞌitoꞌ leꞌ gwdonoꞌ naꞌ beṉtoꞌ deꞌe gwdaogoꞌ? Naꞌ ¿batənꞌ bgüildoꞌ naꞌ beṉtoꞌ deꞌe güeꞌeɉoꞌ?
\v 38 Naꞌ ¿batənꞌ gocoꞌ ca beṉəꞌ zitəꞌ naꞌ bebeitoꞌ bgüialaotoꞌ leꞌ? Naꞌ ¿batənꞌ bleꞌitoꞌ leꞌ cui gotəꞌ deꞌe c̱hazoꞌ naꞌ beṉtoꞌ deꞌe gwyazoꞌ?
\v 39 Naꞌ ¿batənꞌ gocšendoꞌ o gotoꞌo ližya naꞌ bedelaṉəꞌətoꞌ leꞌ?”
\v 40 Naꞌ nadaꞌ nacaꞌ Reinꞌ yapəꞌəgaꞌacaꞌaneꞌ: “Deꞌe ḻi chniaꞌ leꞌe, laogüe deꞌen beyašəꞌəlažəꞌəle beṉəꞌ caꞌ zɉənaquə ca bišaꞌa naꞌ ca zanaꞌ por ni c̱he deꞌen chsoꞌonḻilažeꞌe nadaꞌ, ḻaꞌaṉəꞌəczə cuitec bi zɉəzaqueꞌe par len beṉac̱hənꞌ, lenczaꞌ nadaꞌan beyašəꞌəlažəꞌəle.”
\p
\v 41 Nach beṉəꞌ caꞌ ṉitəꞌ yeglə, beṉəꞌ mal caꞌ, yapəꞌəgaꞌacaꞌaneꞌ: “Ḻeꞌe cuiꞌižəꞌ caꞌaḻə. Banchoglaon c̱hele cuiayiꞌile yeḻəꞌ güen deꞌe mal c̱helenꞌ. Ḻeꞌe žɉaꞌac ḻoꞌo yiꞌ gabiḻ deꞌen cui chyol, yiꞌ deꞌen bxen Diozənꞌ ganꞌ yesəꞌəziꞌ deꞌe gwxiyeꞌenəꞌ len angl bzelao c̱hei caꞌ castigw zeɉḻicaṉe.
\v 42 Ḻeꞌe žɉaꞌac gabiḻənꞌ c̱hedəꞌ catəꞌ gwdonaꞌ bito beṉle deꞌen gaoguaꞌ. Catəꞌ bgüildaꞌ bito beṉle deꞌe yeꞌeɉaꞌ.
\v 43 Catəꞌ gocaꞌ ca beṉəꞌ zitəꞌ bito bebeile ggüialaole nadaꞌ ližle. Catəꞌ cui gotəꞌ deꞌe c̱hazaꞌ bito beṉle deꞌe c̱hazaꞌ. Catəꞌ gocšendaꞌ naꞌ catəꞌ gotaꞌa ližya, bito bedəlaṉəꞌəle nadaꞌ.”
\v 44 Nach ḻegaꞌaqueꞌ yosyoꞌožiꞌe xtižaꞌa yesəꞌəneꞌ: “X̱antoꞌ, ¿batənꞌ gwdonoꞌ?, ¿batənꞌ bgüildoꞌ? naꞌ ¿batənꞌ gocoꞌ beṉəꞌ zitəꞌ?, ¿batənꞌ cui gotəꞌ deꞌe c̱hazoꞌ?, ¿batənꞌ gocšendoꞌ? naꞌ ¿batənꞌ gotoꞌo ližya naꞌ bito beyašeꞌetoꞌ leꞌ?”
\v 45 Naꞌ catəꞌ yeyož əsiꞌe nadaꞌ caꞌ, yapəꞌəgaꞌacaꞌaneꞌ: “Laogüe deꞌen cui beyašəꞌəlažəꞌəle beṉəꞌ caꞌ zɉənaquə ca bišaꞌa naꞌ ca zanaꞌ por ni c̱he deꞌen chsoꞌonḻilažeꞌe nadaꞌ, ḻaꞌaṉəꞌəczə cuitec bi zɉəzaqueꞌe par len beṉac̱hənꞌ, lenczaꞌ nadaꞌan cui beyašəꞌəlažəꞌəle.”
\v 46 Nach beṉəꞌ mal caꞌ yesəꞌəziꞌe castigw c̱he xtoḻəꞌəgaꞌaqueꞌenəꞌ zeɉḻicaṉe. Pero beṉəꞌ güen caꞌ yesəꞌəzoeꞌ len nadaꞌ zeɉḻicaṉe.
\c 26
\s1 Bosoꞌoxiꞌe canꞌ soꞌoneꞌ yesəꞌəzeneꞌ Jesoꞌosənꞌ
\p
\v 1 Catəꞌ beyož beꞌ Jesoꞌosənꞌ dižəꞌən caꞌ, gožeꞌ disipl c̱heꞌ caꞌ:
\v 2 —Baṉezele de que yec̱hopə žazənꞌ gaḻəꞌ lṉi pascw c̱hechonꞌ, naꞌ ca naꞌ gacaꞌ lao naꞌ beṉəꞌ contr c̱hiaꞌ caꞌ nic̱h soꞌoteꞌ nadaꞌ yosəꞌədeꞌe nadaꞌ to ḻeꞌe yag coroz, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 3 Nach bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ beṉəꞌ golə blao c̱he chioꞌo beṉəꞌ Izrael besəꞌədobeꞌ chyoꞌo c̱he beṉəꞌ gwnabiaꞌ c̱he bx̱oz caꞌ, benꞌ le Caifas.
\v 4 Naꞌ bosoꞌoxiꞌe naclənꞌ soꞌoneꞌ par yesəꞌəzeneꞌ Jesoꞌosənꞌ bgašəꞌəzə naꞌ soꞌoteꞌeneꞌ.
\v 5 Naꞌ gosəꞌəneꞌ: —Bito gotchoneꞌ ža lṉinəꞌ, par nic̱h cui yesəꞌədopə beṉəꞌ caꞌ banitəꞌ lao syodanꞌ naꞌ yesəꞌədiḻəleneꞌ chioꞌo.
\s1 To noꞌolə bcuaseꞌ set zix̱ yic̱hɉ Jesoꞌosənꞌ
\p
\v 6 Nach Jesoꞌosənꞌ len disipl c̱heꞌ caꞌ ɉaꞌaqueꞌ Betania, liž to beṉəꞌ leꞌ Simon. Naꞌ Simon nanꞌ güeꞌineꞌ yižgüeꞌ deꞌen neꞌ ḻepr antslə.
\v 7 Naꞌ catəꞌ besəꞌəžineꞌ liž Simonṉəꞌ gwcheꞌ Jesoꞌosənꞌ choꞌa mes c̱heꞌenəꞌ. Naꞌ caꞌ chiꞌe catəꞌəczlə bžin to noꞌolə nox̱eꞌe to lmet de yeɉ fin deꞌe yožə to set deꞌe ḻechguaḻe zaqueꞌe deꞌe chḻaꞌ zix̱. Naꞌ noꞌolənꞌ bcuaseꞌ setənꞌ yic̱hɉ Jesoꞌosənꞌ.
\v 8 Naꞌ disipl caꞌ catəꞌ besəꞌəleꞌineꞌ canꞌ ben noꞌolənꞌ besəꞌəžeꞌe naꞌ gwseꞌe lɉuežɉgaꞌaqueꞌ: —¿Bixc̱henꞌ con benditɉeineꞌ setənꞌ?
\v 9 Güenchlə žaləꞌ beteꞌen naꞌ mech xenṉəꞌ deꞌen leꞌineꞌ c̱hei əgwnežɉueꞌen beṉəꞌ yašəꞌ.
\p
\v 10 Naꞌ catəꞌ bene Jesoꞌosənꞌ xtižəꞌəgaꞌaqueꞌenəꞌ, nach gožeꞌ ḻegaꞌaqueꞌ: —¿Bixc̱henꞌ chṉele c̱he noꞌolənꞌ? Güenchgua babeneꞌ len nadaꞌ.
\v 11 Ca naquə beṉəꞌ yašəꞌ caꞌ syempr nitəꞌəczeꞌ len leꞌe, pero ca nacaꞌ nadaꞌ yešložganꞌ soaꞌ len leꞌe.
\v 12 Deꞌen bcuasə noꞌolənꞌ setənꞌ yic̱hɉaꞌanəꞌ beneꞌ deꞌe non goneꞌeneꞌ nadaꞌ žanꞌ soꞌoteꞌ nadaꞌ naꞌ əgašaꞌa, canꞌ choncho len cuerp c̱he beṉəꞌ guatənꞌ.
\v 13 Deꞌe ḻi chniaꞌ leꞌe, catəꞌ c̱hix̱ɉueꞌile dižəꞌ güen dižəꞌ cobə c̱hiaꞌanəꞌ gasəꞌ lalɉən doxenḻə yežlyo nga, naꞌ ḻeczə guasəꞌ gwlalɉə dižəꞌən canꞌ ben noꞌolənꞌ nga len nadaꞌ, naꞌ beṉəꞌ zanṉəꞌ soꞌoneꞌ xbab ca güenṉəꞌ beneꞌ.
\s1 Jod Iscariotənꞌ beneꞌ Jesoꞌosənꞌ lao naꞌ beṉəꞌ contr caꞌ
\p
\v 14 Gwde deꞌe quinga, Jod Iscariotənꞌ benꞌ goquə txen len disipl caꞌ šižiṉ gwyeɉeꞌ lao bx̱oz əblao caꞌ
\v 15 par ɉežeꞌ ḻegaꞌaqueꞌ: —¿Ɉaꞌaquəꞌətəꞌ goṉle nadaꞌ naꞌ gonaꞌ Jesoꞌosənꞌ lao naꞌale?
\p Nach bosoꞌoxiaꞌ beṉəꞌ caꞌ bosoꞌonežɉueꞌeneꞌ šichoa mech pḻat.
\v 16 Nach Jodənꞌ lao orzə gwzolao gwcheꞌenaogüeꞌ batəꞌəquənꞌ so latɉə goneꞌ Jesoꞌosənꞌ lao naꞌagaꞌaqueꞌenəꞌ.
\s1 Lao gwsaꞌogüeꞌ xšeꞌ Jesoꞌosənꞌ bloꞌineꞌ ḻegaꞌaqueꞌ naquənꞌ žɉəsyəꞌəzalažeꞌe ca deꞌen əgwnežɉo cuineꞌ soꞌot beṉəꞌ ḻeꞌ
\p
\v 17 Naꞌ ža nech ža lṉinꞌ catəꞌən chsaꞌogüeꞌ yetxtil sin cui bi xneꞌi nc̱hix̱ə, ɉaꞌac disipl caꞌ ganꞌ zo Jesoꞌosənꞌ naꞌ gwseꞌeneꞌ: —¿Ga cheꞌendoꞌ žɉeꞌeniꞌatoꞌ deꞌen gaocho xšeꞌ lṉi pasconꞌ?
\p
\v 18 Nach Jesoꞌosənꞌ gožeꞌ ḻegaꞌaqueꞌ: —Ḻeꞌe žɉaꞌac lao syodanꞌ liž to beṉəꞌ yežagle naꞌ yeꞌeleneꞌ: “Maestrənꞌ neꞌ de que bazon əžin ža soꞌoteꞌeneꞌ naꞌ ližoꞌ nga cheneꞌeneꞌ gaolentoꞌoneꞌ xšeꞌ lṉi pasconꞌ.”
\p
\v 19 Nach gwsoꞌon disipl caꞌ canꞌ ben Jesoꞌosənꞌ mendad, ɉesəꞌəsiꞌiniꞌe deꞌen gwsaꞌoleneꞌ ḻeꞌ xšeꞌ lṉi pasconꞌ.
\p
\v 20 Naꞌ catəꞌ beyož gwx̱en, Jesoꞌosənꞌ len disipl c̱heꞌ caꞌ šižiṉ gosəꞌəbiꞌe choꞌa mesənꞌ gwsaꞌogüeꞌ.
\v 21 Naꞌ lao chsaꞌogüeꞌenəꞌ gož Jesoꞌosənꞌ ḻegaꞌaqueꞌ: —Deꞌe ḻi əchniaꞌ leꞌe, to leꞌe gonḻe nadaꞌ lao naꞌ beṉəꞌ contr caꞌ.
\p
\v 22 Nach deꞌe juisy deꞌe gwsaꞌaqueneꞌ catəꞌ beyož gwneꞌ caꞌ, nach to toeꞌ gwseꞌe ḻeꞌ: —X̱anaꞌ, ¿ənadaꞌan gonaꞌ leꞌ lao naꞌ beṉəꞌ contr caꞌ?
\p
\v 23 Nach gožeꞌ ḻegaꞌaqueꞌ: —To benꞌ babneꞌ neꞌenəꞌ txen len nadaꞌ ḻoꞌo platənꞌ, ḻeꞌenəꞌ goneꞌ nadaꞌ lao naꞌ beṉəꞌ caꞌ.
\v 24 Banaquəczən soꞌot beṉəꞌ nadaꞌ canꞌ nyoɉ Xtižəꞌ Diozənꞌ nan gaquə c̱hiaꞌ, pero probchguazə beꞌenəꞌ gon nadaꞌ lao naꞌ beṉəꞌ contr caꞌ. Ncaꞌalə xṉeze žaləꞌ cuiclə golɉeꞌenəꞌ.
\p
\v 25 Nach Jodənꞌ, benꞌ beneꞌ Jesoꞌosənꞌ lao naꞌ beṉəꞌ contr caꞌ, gožeꞌeneꞌ: —Maestr, ¿ənadanꞌ gonaꞌ leꞌ lao naꞌ beṉəꞌ contr caꞌ?
\p Jesoꞌosənꞌ gožeꞌeneꞌ: —Ṉezczədoꞌ šə leꞌenəꞌ.
\p
\v 26 Naꞌ lao chsaꞌogüeꞌenəꞌ gwxiꞌ Jesoꞌosənꞌ yetxtilənꞌ, beꞌe yeḻəꞌ chox̱cwlen c̱he Diozənꞌ. Gwde naꞌ bzoxɉeꞌen nach beꞌen disipl c̱heꞌ caꞌ, gožeꞌ ḻegaꞌaqueꞌ: —Ḻeꞌe gaon. Ḻenṉəꞌ cuerp c̱hiaꞌanəꞌ.
\p
\v 27 Nach ḻeczə bex̱eꞌe basənꞌ ganꞌ yožə nis obanꞌ, naꞌ lao nox̱eꞌen beꞌe yeḻəꞌ chox̱cwlen c̱he Diozənꞌ nach boznežɉueꞌen ḻegaꞌaqueꞌ gozeꞌe: —Yoguəꞌəle ḻeꞌe yeꞌeɉ deꞌen yožə ḻoꞌo bas nga.
\v 28 Ḻenṉəꞌ xc̱henaꞌanəꞌ. Naꞌ xc̱henaꞌ naꞌanəꞌ lalɉə par nic̱h yeziꞌixen Diozənꞌ xtoḻəꞌ beṉəꞌ zan, naꞌ deꞌen lalɉənṉəꞌ solao gaquə deꞌe cobə deꞌen ben Diozənꞌ lyebe goneꞌ par gaquəleneꞌ beṉac̱hənꞌ.
\v 29 Echniaꞌ leꞌe ṉaꞌa zelao cheꞌeɉaꞌ nis obanꞌ. Pero de yeto deꞌe yebeichecho mazəchlə canꞌ chebeicho nis obanꞌ, ḻenṉəꞌ deꞌen socho mbalaz zeɉḻicaṉe catəꞌən socho txen ganꞌ ṉabiꞌa len X̱aꞌ Diozənꞌ.
\s1 Jesoꞌosənꞌ gwneꞌ de que Bedənꞌ cui c̱hebeꞌ šə nombiꞌeneꞌ
\p
\v 30 Naꞌ beyož gwseꞌeɉ gwsaꞌogüeꞌ gwsoꞌoḻeꞌ to imno nach besəꞌəchoɉeꞌ ɉaꞌaqueꞌ yaꞌa deꞌen nziꞌ Olibos.
\v 31 Naꞌ lao zɉəngüeꞌe nezənꞌ Jesoꞌosənꞌ gožeꞌ disipl c̱heꞌ caꞌ: —Ṉežeꞌ yoguəꞌəle cueɉyic̱hɉle nadaꞌ por ni c̱he deꞌen gaquə c̱hiaꞌ. Gaquə canꞌ nyoɉ Xtižəꞌ Diozənꞌ nan: “Gotaꞌ beṉəꞌ goye xiləꞌənəꞌ naꞌ xiləꞌ c̱heꞌ caꞌ saꞌasəꞌəlasəb.”
\v 32 Pero naꞌ catəꞌ yosban Diozənꞌ nadaꞌ ladɉo beṉəꞌ guat caꞌ, yobəchdaꞌ nadaꞌ yeyaꞌa Galileanꞌ cle ca leꞌe.
\p
\v 33 Nach Bedənꞌ gožeꞌ Jesoꞌosənꞌ: —Nadaꞌ cuat cueɉəyic̱hɉaꞌ leꞌ ḻaꞌaṉəꞌəczə šə yoguəꞌ beṉəꞌ yeziquəꞌəchlə yesəꞌəbeɉyic̱hɉleꞌ leꞌ.
\p
\v 34 Jesoꞌosənꞌ gožeꞌeneꞌ: —Bed, əchniaꞌ leꞌ bito cuež ḻeconꞌ ṉežeꞌ antslə zeꞌe gaquə šoṉ las cui chc̱heboꞌ de que nombiꞌo nadaꞌ.
\p
\v 35 Nach Bedənꞌ gožeꞌeneꞌ: —Ḻaꞌaṉəꞌəczə šə chonclən byen guatlenczaꞌ leꞌ, bito əṉiaꞌ de que bito nombiꞌa leꞌ.
\p Naꞌ ḻeczə caꞌ əgwseꞌ yoguəꞌ disipl c̱heꞌ caꞌ ḻeꞌ.
\s1 Jesoꞌosənꞌ beneꞌ orasyon ḻoꞌo güert deꞌen nziꞌ Getsemani
\p
\v 36 Naꞌ catəꞌ Jesoꞌosənꞌ len disipl c̱heꞌ caꞌ besəꞌəžineꞌ latɉənꞌ ganꞌ nziꞌ Getsemani, naꞌ gožeꞌ ḻegaꞌaqueꞌ: —Ngazə ḻecueꞌ žlac šaꞌa deꞌe naꞌ žɉenaꞌ orasyon.
\p
\v 37 Naꞌ gwc̱heꞌe Bedənꞌ, len c̱hopə xiꞌiṉ Sebedeonꞌ Jacobənꞌ len Juanṉəꞌ. Naꞌ Jesoꞌosənꞌ gwzolao gwzochgüeꞌ trist, naꞌ deꞌe juisy deꞌe goqueneꞌ ḻoꞌo yic̱hɉlaꞌaždaꞌogüeꞌenəꞌ.
\v 38 Nach gožeꞌ ḻegaꞌaqueꞌ: —Tristchgua zo yic̱hɉlaꞌaždaꞌoguaꞌanəꞌ xte bachonən yeḻəꞌ got. Ḻecuezə nga naꞌ sole əṉaꞌazle len nadaꞌ.
\p
\v 39 Nach gwdieꞌ gwyeɉeꞌ yelatəꞌ delant naꞌ ɉeteꞌe gosc̱hoꞌalə lao yonꞌ nach beneꞌ orasyonṉəꞌ gwneꞌ: —X̱aꞌ, ¿əguaquə te caꞌazə deꞌen c̱hiꞌ sacaꞌanəꞌ?, pero bito cheꞌendaꞌ gaquə deꞌe ṉiaꞌ nadaꞌ, sino gaquə con canꞌ əṉaoꞌ leꞌ.
\p
\v 40 Catəꞌəczlə bežineꞌ ganꞌ nitəꞌ disipl caꞌ šoṉə ɉəyediꞌe ḻegaꞌaqueꞌ chəsəꞌətaseꞌ. Naꞌ gožeꞌ Bedənꞌ: —¿Eni to or bito bcheɉele əṉaꞌazle len nadaꞌ?
\v 41 Ḻeꞌe ṉaꞌ, naꞌ ḻeꞌe gon orasyon nic̱h cui coꞌo gwxiyeꞌen leꞌe nez mal. Ṉezdaꞌ cheneꞌele əṉaꞌazle len nadaꞌ, pero cui chzoile.
\p
\v 42 Naꞌ goszeꞌe ganꞌ niteꞌenəꞌ deꞌe yoblə, ɉezeneꞌ orasyonṉəꞌ, gwneꞌ: —X̱aꞌ, šə cui gaquə te caꞌazə deꞌen c̱hiꞌ sacaꞌanəꞌ, con canꞌ cheꞌendoꞌ leꞌ gaquə.
\p
\v 43 Naꞌ bezžineꞌ ganꞌ niteꞌenəꞌ deꞌe yoblə ɉeyezdiꞌiczeꞌ bachəsəꞌətaseꞌ tant bachac šə tasgaꞌaqueꞌ.
\v 44 Naꞌ gwzeꞌe deꞌe yoblə ganꞌ niteꞌenəꞌ ɉeneꞌ orasyonṉəꞌ deꞌe əgwyoṉ lase, naꞌ gwnaczeꞌ canꞌ bagwneꞌ.
\v 45 Nach bezžineꞌ ganꞌ nitəꞌ disipl caꞌ šoṉə nach gožeꞌ ḻegaꞌaqueꞌ: —¿Eṉeꞌe chtasle? ¿Eṉeꞌe chonḻe dezcanz? Diozənꞌ bseḻeꞌe nadaꞌ golɉaꞌ beṉac̱h naꞌ ṉaꞌa bac̱h bžin or c̱hiaꞌ par gacaꞌ lao naꞌ beṉəꞌ mal caꞌ par soꞌoteꞌ nadaꞌ.
\v 46 Ḻeꞌe secha. Ḻeꞌe šoꞌo. Bazaꞌ benꞌ gon nadaꞌ lažəꞌ naꞌ beṉəꞌ contr caꞌ.
\s1 Jodənꞌ bdieꞌ Jesoꞌosənꞌ lao naꞌ soḻdad caꞌ
\p
\v 47 Ṉechoꞌete Jesoꞌosənꞌ dižəꞌ caꞌ catəꞌ bžin Jodənꞌ benꞌ naquə cuent lao disipl caꞌ šižiṉ. Naꞌ žagueꞌ zan beṉəꞌ bosoꞌoseḻəꞌ bx̱oz əblao caꞌ naꞌ beṉəꞌ golə blao c̱he chioꞌo beṉəꞌ Izrael. Naꞌ zɉənaḻeꞌe spad naꞌ zɉənḻeneꞌ no yag.
\v 48 Naꞌ Jodənꞌ babzeɉniꞌineꞌ ḻegaꞌaqueꞌ canꞌ goneꞌ par əgwdieꞌ Jesoꞌosənꞌ lao naꞌagaꞌaqueꞌenəꞌ, gožeꞌ ḻegaꞌaqueꞌ: —Benꞌ gaoguaꞌ bxidənꞌ, ḻeꞌenəꞌ senḻe.
\p
\v 49 Naꞌ catəꞌ bžineꞌ ganꞌ zo Jesoꞌosənꞌ ḻeꞌe bgüiguəꞌəteꞌ cuiteꞌenəꞌ naꞌ gožeꞌeneꞌ: —Padiox Maestr.
\p Naꞌ gwdaogüeꞌeneꞌ bxidənꞌ pero caguə do lažeꞌen beneꞌ caꞌ.
\v 50 Jesoꞌosənꞌ gožeꞌeneꞌ: —Migw c̱hiaꞌ, ¿bixc̱henꞌ zaꞌo nga?
\p Beyož gwneꞌ caꞌ ḻeꞌe gosəꞌəbiguəꞌəte beṉəꞌ caꞌ gwsoꞌox̱eꞌeneꞌ.
\p
\v 51 Naꞌ to benꞌ naquə txen len Jesoꞌosənꞌ gwleɉ spad c̱henꞌ gwdineꞌen mos c̱he beṉəꞌ gwnabiaꞌ c̱he bx̱oz caꞌ, gwc̱hogtechgüeꞌ šḻaꞌa nagueꞌenəꞌ.
\v 52 Nach Jesoꞌosənꞌ gožeꞌeneꞌ: —Begoꞌo spad c̱hioꞌonəꞌ ḻoꞌo liže, laꞌ yoguəꞌ beṉəꞌ chsoꞌot beṉəꞌ len spad, ḻeczə ḻen chsaꞌateneꞌ.
\v 53 ¿Ebito ṉezdoꞌ de que gaquə ṉabaꞌ lao X̱aꞌanəꞌ par ḻeꞌe seḻəꞌəteꞌ mazlə gyon šižiṉa mil angl beṉəꞌ əsaꞌaclen nadaꞌ?
\v 54 Šə leꞌe tiḻəlenḻe beṉəꞌ quinga par yoslale nadaꞌ, ¿nacxa gaquən gaquə complir canꞌ nyoɉ Xtižəꞌ Diozənꞌ nan canꞌ cheyaḻəꞌ gaquənꞌ?
\p
\v 55 Naꞌ lao bazɉənox̱eꞌe Jesoꞌosənꞌ, gožeꞌ ḻegaꞌaqueꞌ: —¿Eca to beṉəꞌ bguanṉəꞌ chsaquəꞌəlebele nadaꞌ zaꞌacle len spad len yag zedex̱enḻe nadaꞌ? Yoguəꞌ ža gwchiꞌa len leꞌe naꞌ bsed bloꞌidaꞌ beṉəꞌ ḻoꞌo yoꞌodaoꞌ əblaonꞌ naꞌ cui gwzenḻe nadaꞌ.
\v 56 Pero laogüe deꞌen chac yoguəꞌ deꞌe quinga chac complir Xtižəꞌ Diozənꞌ deꞌen bosoꞌozoɉ deꞌe profet caꞌ beṉəꞌ caꞌ gwsoꞌe xtižeꞌenəꞌ canaꞌ.
\p Naꞌ lao or naꞌ bosyoꞌoxoṉɉ yoguəꞌ disipl c̱heꞌ caꞌ gosəꞌəbeɉyic̱hɉeꞌeneꞌ.
\s1 Gosəꞌəc̱heꞌe Jesoꞌosənꞌ lao beṉəꞌ golə beṉəꞌ blao c̱he Izraelənꞌ
\p
\v 57 Naꞌ beṉəꞌ caꞌ gosəꞌəzen Jesoꞌosənꞌ gosəꞌəc̱heꞌeneꞌ lao Caifasənꞌ benꞌ naquəch bx̱oz əblao c̱he chioꞌo beṉəꞌ Izrael ganꞌ bazɉəndobə beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len yeziquəꞌəchlə beṉəꞌ golə blao caꞌ chəsəꞌənabiaꞌ ṉasyon c̱hechonꞌ.
\v 58 Nach Bedənꞌ ɉənaogüeꞌ Jesoꞌosənꞌ zitəꞌ zitəꞌələ xte bžinteꞌ liž bx̱oz əblaonəꞌ, naꞌ gwyoꞌe chyoꞌonəꞌ naꞌ ɉəchiꞌe len beṉəꞌ caꞌ zɉənaquə x̱aꞌag c̱he yoꞌodaoꞌ əblaonəꞌ, c̱hedəꞌ goneꞌeneꞌ leꞌineꞌ naquənꞌ zelao gaquə len Jesoꞌosənꞌ.
\p
\v 59 Nach yoguəꞌ bx̱oz əblao caꞌ naꞌ yeziquəꞌəchlə beṉəꞌ golə blao caꞌ chəsəꞌənabiaꞌ ṉasyon Izrael c̱hechonꞌ chəsyəꞌəyilɉeꞌ beṉəꞌ soꞌe dižəꞌ contr Jesoꞌosənꞌ parzə nic̱h soꞌoteꞌeneꞌ ḻaꞌaṉəꞌəczə šə dižəꞌ güenḻažəꞌənəꞌ.
\v 60 Pero goc sša bito besyəꞌəželeneꞌ c̱hopə beṉəꞌ əsoꞌe dižəꞌ deꞌen yediḻe ḻaꞌaṉəꞌəczə beṉəꞌ zan gosəꞌənitəꞌ testigw faḻs contr ḻeꞌ. Gwde naꞌ besəꞌəchoɉ yec̱hopə testigw faḻs caꞌ naꞌ bediḻe canꞌ gosəꞌəneꞌ.
\v 61 Naꞌ gosəꞌəneꞌ: —Benga gwneꞌ: “Nadaꞌ guaquə yoc̱hiṉɉaꞌ yoꞌodaoꞌ əblao ganꞌ choꞌelaꞌocho Diozənꞌ, naꞌ lao šoṉə žazə yeyonaꞌan.”
\p
\v 62 Nach gwzožaꞌ benꞌ naquəch bx̱oz əblao gožeꞌ Jesoꞌosənꞌ: —¿Ebito bi de bi naoꞌ ca naquə deꞌe nga chosəꞌəcuiš beṉəꞌ quinga leꞌ?
\p
\v 63 Jesoꞌosənꞌ bitobi gwneꞌ. Nach gož bx̱oz əblaonəꞌ ḻeꞌ: —Echniaꞌ leꞌ gwna netoꞌ naꞌ bzo Dioz benꞌ zo zeɉḻicaṉe gaqueꞌ testigw šə ḻe lenꞌ Crist Xiꞌiṉ Diozənꞌ benꞌ gwleɉeꞌ par gaquəleneꞌ ṉasyon c̱hechonꞌ.
\p
\v 64 Jesoꞌosənꞌ gožeꞌeneꞌ: —Ḻe benꞌ naoꞌ naꞌ nadaꞌ. Diozənꞌ bseḻeꞌe nadaꞌ golɉaꞌ beṉac̱h. Naꞌ əchniaꞌ leꞌe, gwžin ža leꞌile nadaꞌ chiꞌa cuit Diozənꞌ benꞌ napə ḻeꞌezelaogüe yeḻəꞌ guac xen, naꞌ ṉabiꞌa txen len ḻeꞌ, naꞌ leꞌile nadaꞌ yetɉaꞌ yobanꞌ to ḻoꞌo beɉw.
\p
\v 65 Cate bene bx̱oz əblaonəꞌ xtižəꞌ Jesoꞌosənꞌ gwšoꞌ gwc̱hezəꞌ xeꞌenəꞌ laꞌ par ḻeꞌ deꞌe mal juisyənꞌ gwna Jesoꞌosənꞌ, nach gwneꞌ: —Babenecho ṉaꞌa babžia bniteꞌe Diozənꞌ. ¿Nochxa testigonꞌ chyažɉecho?
\v 66 Naꞌ ¿naquənꞌ əṉale c̱heꞌ?
\p Nach beṉəꞌ caꞌ bosyoꞌožiꞌen gwseꞌeneꞌ: —Babžia bniteꞌe Diozənꞌ naꞌ cheyaḻəꞌ gateꞌ.
\p
\v 67 Nach bosoꞌožaꞌ x̱eneꞌe choꞌalao Jesoꞌosənꞌ, naꞌ gosəꞌəbažeꞌeneꞌ, naꞌ baḻeꞌ gosəꞌəgapeꞌe x̱agueꞌenəꞌ.
\v 68 Nach gwseꞌeneꞌ: —Šə lenꞌ nacoꞌ Cristənꞌ benꞌ gwleɉ Diozənꞌ par gaquəlenoꞌ ṉasyon c̱hechonꞌ, gwṉeyaꞌašc gwna netoꞌ, ¿nonꞌ chgapəꞌ leꞌ?
\s1 Bedənꞌ bito gwc̱hebeꞌ šə nombiꞌe Jesoꞌosənꞌ
\p
\v 69 Naꞌ lao chac deꞌe quinga, chiꞌ Bedənꞌ chyoꞌonəꞌ catəꞌ bžin to noꞌol criad c̱he Caifasənꞌ gožeꞌeneꞌ: —Ḻeczə lenoꞌ leꞌ nacoꞌ txen len Jesoꞌos beṉəꞌ Galileanꞌ.
\p
\v 70 Naꞌ lao yoguəꞌ beṉəꞌ caꞌ žaꞌanəꞌ, Bedənꞌ bito gwc̱hebeꞌ šə naqueꞌ txen len Jesoꞌosənꞌ naꞌ gožeꞌ noꞌolənꞌ: —Bito ṉezdaꞌ bi dižəꞌən choꞌo.
\p
\v 71 Gwde beyož gožeꞌ noꞌolənꞌ caꞌ gwyeɉeꞌ chaꞌašilənꞌ, naꞌ bezleꞌi yeto noꞌol criadənꞌ ḻeꞌ, naꞌ gozeꞌe beṉəꞌ caꞌ žaꞌanəꞌ: —Benga naqueꞌ txen len Jesoꞌos beṉəꞌ Nasaretənꞌ.
\p
\v 72 Deꞌe yoblə bito gwc̱hebeꞌ šə ḻe naqueꞌ txen len Jesoꞌosənꞌ nach bzoeꞌ joramentənꞌ lao Diozənꞌ gožeꞌ noꞌolənꞌ: —Bito nombiꞌa beꞌenəꞌ naoꞌ caꞌ.
\p
\v 73 Naꞌ chacczə šlož, gosəꞌəbiguəꞌ beṉəꞌ caꞌ žaꞌanəꞌ gosəꞌəzeꞌe Bedənꞌ: —Deꞌe ḻiczə, chonoꞌ txen len beṉəꞌ caꞌ c̱hedəꞌ ca nga chṉioꞌ ngazə nacbiaꞌ.
\p
\v 74 Nach Bedənꞌ gožeꞌ ḻegaꞌaqueꞌ: —Diozənꞌ goṉeꞌ nadaꞌ castigw šə chonḻažaꞌan niaꞌ bito nombiꞌa beꞌenəꞌ. Chzoaꞌ jorament lao Diozənꞌ, bito nombiꞌaneꞌ.
\p Naꞌ ḻeꞌe gwchežte to ḻecw.
\v 75 Nach ɉəzaꞌalažəꞌ Bedənꞌ canꞌ gož Jesoꞌosənꞌ ḻeꞌ: “Šoṉ las gaquə cui chc̱heboꞌ šə nombiꞌo nadaꞌ catəꞌ cuež ḻeconꞌ.” Nach bezaꞌ Bedənꞌ ḻechguaḻe gwchežyašeꞌe tant deꞌe goqueneꞌ.
\c 27
\s1 Gosəꞌəc̱heꞌe Jesoꞌosənꞌ lao Pilatənꞌ
\p
\v 1 Naꞌ catəꞌ gwyeꞌeniꞌ beteyonꞌ, yoguəꞌ bx̱oz əblao caꞌ naꞌ yeziquəꞌəchlə beṉəꞌ golə blao caꞌ chəsəꞌənabiaꞌ ṉasyon c̱hechonꞌ besəꞌədopeꞌ jont naꞌ gosəꞌəc̱hoglaogüeꞌen de que soꞌoteꞌ Jesoꞌosənꞌ.
\v 2 Nach bosoꞌoc̱heɉeꞌeneꞌ naꞌ ḻeꞌe gosəꞌəc̱heꞌeteꞌeneꞌ ɉseꞌeneꞌeneꞌ lao naꞌ Goberṉador Ponsio Pilatənꞌ.
\s1 Jodənꞌ beyot cuineꞌ
\p
\v 3 Naꞌ Jodənꞌ benꞌ bdieꞌ Jesoꞌosənꞌ lao naꞌ beṉəꞌ caꞌ, catəꞌ gocbeꞌineꞌ de que bagosoꞌoc̱hoglaogüeꞌen soꞌoteꞌ Jesoꞌosənꞌ, beyeɉeneꞌ deꞌen bdieꞌ ḻeꞌ lao naꞌ bx̱oz əblao caꞌ naꞌ beṉəꞌ golə blao caꞌ. Nach gwyeɉeꞌ laogaꞌaqueꞌenəꞌ par bonežɉueꞌ ḻegaꞌaqueꞌ šichoa mech pḻatənꞌ.
\v 4 Nach gožeꞌ ḻegaꞌaqueꞌ: —Malənꞌ benaꞌ bdiaꞌ lao naꞌalenꞌ to beṉəꞌ cui napə doḻəꞌ.
\p Naꞌ gwseꞌeneꞌ: —Bitobi doḻəꞌ napə netoꞌ deꞌen benoꞌ caꞌ, laꞌ deꞌe ṉezzədoꞌon benoꞌ.
\p
\v 5 Nach Jodənꞌ bozaḻeꞌe mech caꞌ ḻoꞌo yoꞌodaoꞌ əblaonəꞌ, nach bezeꞌe, naꞌ ɉəyeloꞌo donꞌ yeneꞌ par beyot cuineꞌ.
\p
\v 6 Beyož bezaꞌ Jodənꞌ, bx̱oz əblao caꞌ besyəꞌətobeꞌ mechənꞌ. Naꞌ gwseꞌe lɉuežɉgaꞌaqueꞌ: —Bito de lsens coꞌochon ḻoꞌo caj ganꞌ yoꞌo mech c̱he yoꞌodaꞌonəꞌ, c̱hedəꞌ laꞌ naquən mech deꞌen gwdixɉwcho par nic̱h gotcho beꞌenəꞌ.
\p
\v 7 Naꞌ bosoꞌoxiꞌe yesəꞌəziꞌe to yežlyo deꞌen de c̱he to beṉəꞌ güen yesəꞌ len mechənꞌ. Naꞌ gosəꞌəziꞌen par to capsant ganꞌ yesəꞌəcuašeꞌe beṉəꞌ zitəꞌ.
\v 8 Naꞌ yezlyonəꞌ nziꞌin “Capsant Chen” xte ža ṉeža c̱hedəꞌ gosəꞌəziꞌen len mech deꞌen gosəꞌəyixɉueꞌ par gwsoꞌoteꞌ Jesoꞌosənꞌ.
\v 9 Canꞌ goquə par nic̱h goc complir canꞌ bzoɉ deꞌe profet Jeremiasənꞌ benꞌ beꞌ xtižəꞌ Diozənꞌ canaꞌ, ganꞌ nan: “Besyəꞌəziꞌe šichoa mech pḻatənꞌ, deꞌen gwsaꞌaque baḻə beṉəꞌ Izrael zaquəꞌ benꞌ besəꞌəgueꞌineꞌenəꞌ.
\v 10 Naꞌ len mechənꞌ gosəꞌəziꞌe yežlyo c̱he to beṉəꞌ güen yesəꞌ, canꞌ gwna X̱ancho Diozənꞌ nadaꞌ gaquə.”
\s1 Bosəꞌəcuišeꞌ Jesoꞌosənꞌ lao Pilatənꞌ
\p
\v 11 Naꞌ bžin Jesoꞌosənꞌ gwzecheꞌ lao goberṉadorənꞌ, nach goberṉadorənꞌ gožeꞌeneꞌ: —¿Elenꞌ nacoꞌ Rei c̱he beṉəꞌ Izrael caꞌ?
\p Nach Jesoꞌosənꞌ gožeꞌeneꞌ: —Ḻe benꞌ naoꞌ naꞌ nadaꞌ.
\p
\v 12 Naꞌ bito bi gwna Jesoꞌosənꞌ ca deꞌen bosoꞌocuiš bx̱oz əblao caꞌ ḻeꞌ naꞌ beṉəꞌ golə blao caꞌ.
\v 13 Nach Pilatənꞌ gožeꞌeneꞌ: —¿Ebito chendoꞌ catec deꞌe zan xya nga chsaꞌogüeꞌ contr leꞌ?
\p
\v 14 Pero Jesoꞌosənꞌ ni to xtižeꞌenəꞌ bito božiꞌe, xte bebanchgüeicze goberṉadorənꞌ.
\s1 Gosəꞌəc̱hoglaogüeꞌen soꞌoteꞌ Jesoꞌosənꞌ
\p
\v 15 Naꞌ de to costombr de que ža lṉi pascw əgwsan goberṉadorənꞌ to pres, con beṉəꞌ yesəꞌəṉab beṉəꞌ laoꞌ syoda caꞌ.
\v 16 Naꞌ ližya naꞌ de to pres beṉəꞌ zechgua c̱hei naqueꞌ beṉəꞌ mal naꞌ leꞌ Barrabas.
\v 17 Nach Pilatənꞌ gožeꞌ beṉəꞌ caꞌ zɉəndobənꞌ: —¿Noeꞌ beṉəꞌ quinga cheneꞌele gwsanaꞌ? ¿EBarrabas naꞌ o šə Jesoꞌos nga benꞌ chesəꞌəneꞌ naquə Crist c̱hele?
\p
\v 18 Goneꞌeneꞌ əgwsaneꞌ Jesoꞌosənꞌ laꞌ ṉezeneꞌ ni c̱he deꞌe zɉəžiagueꞌi bx̱oz əblao caꞌ Jesoꞌosənꞌ, deꞌe naꞌanəꞌ bosoꞌodieꞌ ḻeꞌ lao neꞌenəꞌ.
\p
\v 19 Caꞌ chiꞌ Pilatənꞌ ganꞌ choneꞌ yeḻəꞌ jostisənꞌ, bžin to rson deꞌe bseḻəꞌ noꞌol c̱heꞌenəꞌ gožeꞌeneꞌ: “Bitobi non benꞌ par bi castigonꞌ əgwnežɉoꞌoneꞌ, zdaczə benꞌ ḻicha. Deꞌe zan deꞌe bžaglaochguaꞌ bišyele len yel deꞌe gwneidaꞌ por ni c̱he deꞌen chac c̱he beꞌenəꞌ.”
\p
\v 20 Naꞌ bx̱oz əblao caꞌ naꞌ beṉəꞌ golə blao caꞌ gosəꞌəgoꞌoyeḻeꞌe beṉəꞌ caꞌ žaꞌanəꞌ par yesəꞌəṉabeꞌ əgwsaneꞌ Barrabasənꞌ naꞌ yesəꞌəṉabeꞌ goneꞌ mendad soꞌoteꞌ Jesoꞌosənꞌ.
\v 21 Nach goberṉadorənꞌ gožeꞌ ḻegaꞌaqueꞌ deꞌe yoblə: —¿Noeꞌ beṉəꞌ quinga c̱hopə cheneꞌele gwsanaꞌ?
\p Nach gwseꞌeneꞌ: —Barrabas naꞌ.
\p
\v 22 Pilatənꞌ gožeꞌ ḻegaꞌaqueꞌ: —¿Bixa gonaꞌ len Jesoꞌos, benꞌ chesəꞌəneꞌ naquə Crist c̱hele?
\p Naꞌ yogueꞌe gwseꞌeneꞌ: —Bdeꞌe ḻeꞌe yag corozənꞌ.
\p
\v 23 Nach gož goberṉadorənꞌ ḻegaꞌaqueꞌ: —¿Bixa deꞌe mal babeneꞌenəꞌ?
\p Naꞌ ḻegaꞌaqueꞌ gwsoꞌosyeꞌe zižɉoch gosəꞌəneꞌ: —Bdeꞌe ḻeꞌe yag corozənꞌ.
\p
\v 24 Gocbeꞌi Pilatənꞌ cuiczə bi de goneꞌ. Bachyaləꞌəch chsoꞌoneꞌ scandl juisy. Nach bseḻeꞌe to beṉəꞌ ɉəx̱iꞌe nis par boneꞌe lao beṉəꞌ caꞌ žaꞌanəꞌ naꞌ gožeꞌ ḻegaꞌaqueꞌ: —Zdaczə benga ḻicha. Bitobi xbagaꞌa naquən ca deꞌen gateꞌ, c̱hedəꞌ deꞌen ṉezze leꞌenəꞌ gateꞌ.
\p
\v 25 Nach yoguəꞌ beṉəꞌ caꞌ gosəꞌəneꞌ: —Xbaguəꞌ netoꞌ naꞌ xbaguəꞌ xiꞌiṉtoꞌ naquən c̱he yeḻəꞌ got c̱he benga.
\p
\v 26 Nach bsan Pilatənꞌ Barrabasənꞌ. Gwde naꞌ beneꞌ mendad gosəꞌəyin soḻdad caꞌ Jesoꞌosənꞌ, nach beneꞌ ḻeꞌ lao naꞌagaꞌaqueꞌ par yosəꞌədeꞌeneꞌ ḻeꞌe yag corozənꞌ.
\p
\v 27 Nach soḻdad c̱he goberṉadorənꞌ gosəꞌəc̱heꞌe Jesoꞌosənꞌ ḻoꞌo yoꞌo c̱he goberṉadorənꞌ, nach bosyoꞌotobeꞌ yoguəꞌ soḻdad lɉuežɉgaꞌaqueꞌ caꞌ.
\v 28 Naꞌ gosəꞌəyiṉeꞌ xalaꞌan Jesoꞌosənꞌ naꞌ bosəꞌəguacueꞌeneꞌ to lachəꞌ color əxṉa ca deꞌen chsaꞌaz rei caꞌ.
\v 29 Naꞌ gwsoꞌoneꞌ to coron de yešəꞌ bosoꞌožineꞌen yic̱hɉeꞌenəꞌ, naꞌ neꞌe ḻichanꞌ bosoꞌogox̱eꞌeneꞌ to ya. Naꞌ bosoꞌozo xibeꞌ laogüeꞌenəꞌ par gwsoꞌoneꞌeneꞌ borl, nach gwseꞌeneꞌ: —¡Biba Rei c̱he beṉəꞌ Izrael!
\p
\v 30 Nach bosəꞌəžaꞌ x̱eneꞌe ḻeꞌ, naꞌ besyəꞌəqueꞌe yanəꞌ deꞌen nox̱eꞌenəꞌ naꞌ gosəꞌəyineꞌen yic̱hɉeꞌenəꞌ.
\v 31 Naꞌ beyož gwsoꞌoneꞌ ḻeꞌ borlənꞌ, besyəꞌəyiṉeꞌ lachəꞌ color əxṉanəꞌ deꞌen bosəꞌəguacueꞌeneꞌenəꞌ, naꞌ besyəꞌəguacueꞌeneꞌ xaczeꞌ. Nach gosəꞌəc̱heꞌeneꞌ par ɉəsəꞌədeꞌeneꞌ ḻeꞌe yag corozənꞌ.
\s1 Bosoꞌodeꞌe Jesoꞌosənꞌ ḻeꞌe yag corozənꞌ
\p
\v 32 Naꞌ catəꞌ besəꞌəchoɉeꞌ syodanꞌ besyəꞌəžagueꞌ to beṉəꞌ Sirene le Simon naꞌ ḻa fuers bosəꞌəgüeꞌeneꞌ coroz c̱he Jesoꞌosənꞌ.
\p
\v 33 Naꞌ besəꞌəžineꞌ to latɉə ganꞌ nziꞌ Golgota, zeɉen dižəꞌ latɉə c̱he yic̱hɉ beṉəꞌ guat.
\v 34 Naꞌ bosəꞌənežɉueꞌ Jesoꞌosənꞌ bino corrient deꞌe nc̱hix̱ə to rmech zḻaꞌ par yeꞌeɉeꞌ, pero ḻeꞌ con bnix̱eꞌen bito güeꞌeɉeꞌen.
\p
\v 35 Naꞌ catəꞌ beyož bosoꞌodeꞌeneꞌ ḻeꞌe yag corozənꞌ, soḻdad caꞌ gwsoꞌoneꞌ xeꞌenəꞌ rif par gotəꞌəbiaꞌ noeꞌ yechelən. Naꞌ deꞌen gwsoꞌoneꞌ caꞌ goc canꞌ bzoɉ deꞌe profetənꞌ benꞌ beꞌ xtižəꞌ Diozənꞌ canaꞌ, gwneꞌ: “Yosyoꞌoḻeꞌe xalanaꞌanəꞌ entr ḻegaꞌaqueꞌ, soꞌoneꞌen rif.”
\v 36 Nach gosəꞌəbiꞌe gwsaꞌapeꞌeneꞌ.
\v 37 Naꞌ yic̱hɉ yag corozənꞌ ganꞌ deꞌenəꞌ bosoꞌozoɉeꞌ deꞌen bcuiš ḻeꞌ, naꞌ nan: “Benganꞌ Jesoꞌosənꞌ Rei c̱he beṉəꞌ Izrael caꞌ.”
\p
\v 38 Naꞌ ḻeczə canaꞌ bosoꞌodeꞌe c̱hopə beṉəꞌ bguan ḻeꞌe yec̱hopə yag coroz. Toeꞌ gwdaꞌ cuit Jesoꞌosənꞌ ḻicha naꞌ yetoeꞌ cuitenꞌ yeglə.
\v 39 Naꞌ beṉəꞌ caꞌ chseꞌeɉ chəsəꞌədeꞌ ganꞌ daꞌ Jesoꞌosənꞌ chəsəꞌəḻoḻə yic̱hɉeꞌenəꞌ gwsoꞌoneneꞌ borl,
\v 40 gwseꞌeneꞌ: —Lenꞌ gwnaoꞌ yoc̱hiṉɉoꞌ yoꞌodaoꞌ əblaonəꞌ naꞌ šoṉə žazə yeyonoꞌon, bosla cuinoꞌ. Šə lenꞌ nacoꞌ Xiꞌiṉ Diozənꞌ, beyetɉ ḻeꞌe yag corozənꞌ.
\p
\v 41 Naꞌ len bx̱oz əblao caꞌ naꞌ len beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len beṉəꞌ fariseo caꞌ, naꞌ len beṉəꞌ golə blao caꞌ, yogueꞌe gwsoꞌoneꞌeneꞌ borl, naꞌ gosəꞌəneꞌ:
\v 42 —Yeziquəꞌəchlə beṉəꞌ bosleꞌ naꞌ cabi chac yosla cuineꞌ. Šə ḻenꞌ naqueꞌ Rei c̱he chioꞌo beṉəꞌ Izrael, yoletɉ cuineꞌ ḻeꞌe yag corozənꞌ ṉaꞌa naꞌ šeɉḻeꞌecho c̱heꞌ.
\v 43 Ḻeꞌ chonḻilažeꞌe Diozənꞌ, laꞌ gwneꞌ: “Xiꞌiṉ Dioz nadaꞌ.” Naꞌ leꞌicho yosla Diozənꞌ ḻeꞌ ṉaꞌa šə chaqueneꞌ c̱heꞌ.
\p
\v 44 Naꞌ beṉəꞌ bguan caꞌ zɉədaꞌ ḻeꞌe yag corozənꞌ cuiteꞌenəꞌ c̱hopə laꞌa, ḻeczə gwsoꞌoneꞌeneꞌ borl.
\s1 Canꞌ goquə catəꞌən got Jesoꞌosənꞌ
\p
\v 45 Naꞌ do gobiž goc žc̱hoḻ doxen yežlyonꞌ bžinte cheda šoṉə.
\v 46 Naꞌ do cheda šoṉə Jesoꞌosənꞌ gwṉeꞌ zižɉo gwneꞌ: —Eli, Eli, ¿lama sabactani? —zeɉen dižəꞌ: Dioz c̱hiaꞌ, ¿bixc̱henꞌ bagwleɉyic̱hɉoꞌ nadaꞌ?
\p
\v 47 Naꞌ catəꞌ gwseꞌeneneꞌ xtižeꞌenəꞌ, baḻə beṉəꞌ nitəꞌ gaḻəꞌəzə gosəꞌəneꞌ: —Chaxeꞌ profet Ḻiazənꞌ benꞌ beꞌ xtižəꞌ Diozənꞌ canaꞌ.
\p
\v 48 Nach bchoɉ to beṉəꞌ gwsaꞌadoeꞌ ɉəx̱iꞌe to sponj naꞌ bosgažeꞌen bino corrient deꞌen cui bi nc̱hix̱ə, naꞌ bzoꞌen to lao ya daoꞌ naꞌ bosšineꞌen choꞌa Jesoꞌosənꞌ par nic̱h güeꞌeɉeꞌen.
\v 49 Naꞌ yebaḻeꞌ gwseꞌe beꞌenəꞌ: —Gwlezə. Yešc šə yidə Ḻiazənꞌ par yosleꞌeneꞌ.
\p
\v 50 Nach bisyaꞌa Jesoꞌosənꞌ zižɉo naꞌ beꞌe latɉə bchoɉ grasy c̱heꞌenəꞌ goteꞌ.
\v 51 Naꞌ lao orənꞌ catəꞌən got Jesoꞌosənꞌ, ca naquə lachənꞌ deꞌen ze ḻoꞌo yoꞌodaoꞌ əblaonəꞌ gwchezə gwchoḻən gwzaꞌazə yic̱hɉei bechoɉte cheꞌelə. Naꞌ ḻechguaḻe gwxoꞌ xte gwsoꞌoxɉ yeɉ caꞌ.
\v 52 Naꞌ ḻeczə xte besyəꞌəyalɉo bloɉ ba caꞌ. Naꞌ zan deꞌe beṉəꞌ caꞌ gwsoꞌonḻilažəꞌ Diozənꞌ besyəꞌəbaneꞌ ladɉo beṉəꞌ guat caꞌ.
\v 53 Nach catəꞌən beban Jesoꞌosənꞌ ladɉo beṉəꞌ guat caꞌ, besyəꞌəchoɉeꞌ ḻoꞌo ba c̱hegaꞌaqueꞌ caꞌ, naꞌ ɉəyaꞌaqueꞌ Jerosalenṉəꞌ ganꞌ naquə syoda c̱he Diozənꞌ. Naꞌ ɉəsyəꞌəloꞌe laogaꞌaqueꞌ lao zan beṉəꞌ laoꞌ syodanꞌ.
\p
\v 54 Naꞌ ḻeczə lao orənꞌ catəꞌən got Jesoꞌosənꞌ, capitanṉəꞌ len soḻdad c̱heꞌ caꞌ niteꞌe chsaꞌapeꞌ Jesoꞌosənꞌ. Naꞌ besəꞌəžebchgüeꞌ catəꞌ besəꞌəleꞌineꞌ canꞌ gwxoꞌ naꞌ bichlə deꞌe caꞌ goquə, naꞌ gosəꞌəneꞌ: —Deꞌe ḻiczə benga naqueꞌ Xiꞌiṉ Dioz.
\p
\v 55 Naꞌ ḻeczə nitəꞌ zan noꞌolə latɉənꞌ beṉəꞌ gosəꞌəzecha zitəꞌələ naꞌ besəꞌəleꞌineꞌ canꞌ goquənꞌ. Noꞌol quinga gosəꞌənaogüeꞌ Jesoꞌosənꞌ catəꞌ bezeꞌe Galileanꞌ par chsaꞌacleneꞌ ḻeꞌ len bi deꞌe chyažɉeneꞌ.
\v 56 Naꞌ len noꞌol quinga gwzo Maria beṉəꞌ Magdala, naꞌ ḻeczə len Maria benꞌ naquə xnaꞌ Jacob naꞌ Jwse, naꞌ ḻeczə caꞌ xnaꞌ Jacob naꞌ Juan xiꞌiṉ Sebedeonꞌ.
\s1 Bosəꞌəcuašeꞌe Jesoꞌosənꞌ
\p
\v 57 Naꞌ zo to beṉəꞌ gwniꞌa beṉəꞌ Arimatea leꞌ Jwse, ḻeczə goqueꞌ disipl c̱he Jesoꞌosənꞌ. Naꞌ catəꞌ bachzolao chex̱ɉw žeꞌenəꞌ
\v 58 Jwsenꞌ gwyeɉeꞌ lao Pilatənꞌ ɉəyeṉabeꞌ cuerp c̱he Jesoꞌosənꞌ. Nach Pilatənꞌ beneꞌ mendad bosyoꞌonežɉueꞌeneꞌ cuerp c̱he Jesoꞌosənꞌ.
\v 59 Nach Jwsenꞌ begoꞌo lao neꞌe cuerp c̱heꞌenəꞌ naꞌ blažeꞌeneꞌ to lachəꞌ deꞌe nyach.
\v 60 Ca naquə Jwsenꞌ bazo to bloɉ ba c̱heꞌ deꞌe cobə deꞌe gwc̱heꞌeneꞌ ḻeꞌe yeɉ, naꞌ ḻoꞌo ba c̱heꞌ naꞌ gwloꞌe cuerp c̱he Jesoꞌosənꞌ naꞌ bḻoḻeꞌ to yeɉ xen deꞌe bseyɉueꞌeneꞌ choꞌa banꞌ. Nach bezeꞌe.
\v 61 Naꞌ Maria beṉəꞌ Magdalanꞌ, naꞌ yeto Maria yoblə, ɉesəꞌəchiꞌe choꞌa banəꞌ.
\s1 Bosoꞌozoeꞌ beṉəꞌ chsaꞌapeꞌ ba c̱he Jesoꞌosənꞌ
\p
\v 62 Naꞌ beteyo, gwde žanꞌ catəꞌən chosoꞌosiꞌiniꞌe deꞌen chseꞌeɉ chsaꞌogüeꞌ ža lṉi pasconꞌ, besəꞌədobə bx̱oz əblao caꞌ naꞌ beṉəꞌ fariseo caꞌ par ɉaꞌaqueꞌ ganꞌ zo Pilatənꞌ.
\v 63 Naꞌ gwseꞌeneꞌ: —Señor, baɉəyezaꞌalažəꞌətoꞌ canꞌ gwna deꞌe beṉəꞌ gox̱oayaguənꞌ canꞌ ṉembaneꞌ gwneꞌ: “Yeyoṉ ža yebanaꞌ ladɉo beṉəꞌ guat caꞌ.”
\v 64 Bseḻəꞌəšga beṉəꞌ žɉəsəꞌədapeꞌ choꞌa banəꞌ lao šoṉə ža, nic̱h cui žɉaꞌac disipl c̱heꞌ caꞌ šeꞌelə žɉəsyəꞌəleɉeꞌ cuerp c̱heꞌenəꞌ naꞌ əseꞌe beṉəꞌ de que babebaneꞌ ladɉo beṉəꞌ guat caꞌanəꞌ. Laꞌ šə əsaꞌaque beṉəꞌ de que bebaneꞌ ladɉo beṉəꞌ guat caꞌ, gonchən mal cle canꞌ benən antslə catəꞌən bx̱oayagueꞌ beṉəꞌ par gwsaꞌaqueneꞌ de que Diozənꞌ bseḻeꞌeneꞌ.
\p
\v 65 Nach Pilatənꞌ gožeꞌ beṉəꞌ caꞌ: —Goṉaꞌ leꞌe soḻdad caꞌ. Ḻeꞌe c̱heꞌegaꞌaqueꞌ par əsaꞌapeꞌen ga zelao yesəꞌəzaqueꞌeneꞌ.
\p
\v 66 Nach ɉaꞌaqueꞌ len soḻdad caꞌ naꞌ bosoꞌoc̱hišeꞌe sey ḻeꞌe yeɉənꞌ, naꞌ bosoꞌoniteꞌe soḻdad caꞌ gwsaꞌapeꞌ banꞌ.
\c 28
\s1 Jesoꞌosənꞌ bebaneꞌ ladɉo beṉəꞌ guat caꞌ
\p
\v 1 Naꞌ catəꞌ gwde ža dezcanz c̱hechonꞌ, baḻ dmigw Maria beṉəꞌ Magdalanꞌ, naꞌ Maria benꞌ yeto, ɉaꞌaqueꞌ ɉəsəꞌəgüieꞌ choꞌa banəꞌ.
\v 2 Naꞌ goquənꞌ ḻechguaḻe gwxoꞌ c̱hedəꞌ angl c̱he X̱anchonꞌ betɉeꞌ yobanꞌ, naꞌ bžineꞌ gwcueꞌe yeɉ deꞌen nseyɉw choꞌa banꞌ, naꞌ gwchiꞌe lao yeɉənꞌ.
\v 3 Naꞌ anglənꞌ ḻechguaḻe chactit choꞌalaogüeꞌenəꞌ caczə ga chep yes naꞌ xalaꞌaneꞌenəꞌ naquən šyiš xiləꞌ juisy caczə beꞌeyəꞌ.
\v 4 Naꞌ catəꞌ besəꞌəleꞌi beṉəꞌ gop caꞌ ḻeꞌ, ḻechguaḻe besəꞌəžebeꞌ xte gosəꞌəxizeꞌ naꞌ gosəꞌəbix̱eꞌ gwsaꞌateꞌ šlat.
\v 5 Pero naꞌ anglənꞌ gožeꞌ noꞌol caꞌ: —Bito žeble. Nadaꞌ ṉezdaꞌ de que Jesoꞌosənꞌ benꞌ bosoꞌodeꞌe ḻeꞌe yag coroz nanꞌ cheyilɉle.
\v 6 Notoch no nḻaꞌ nga. Babebaneꞌ ladɉo beṉəꞌ guat caꞌ, canꞌ gwnaczeꞌ. Naꞌ ḻeꞌe da ḻeꞌe ggüia latɉə ga nga bosəꞌəx̱oeꞌ cuerp c̱heꞌenəꞌ.
\v 7 Ḻežɉəyaꞌacdo ḻeꞌe žɉəyedix̱ɉueꞌi disipl c̱heꞌ caꞌ de que babebaneꞌ ladɉo beṉəꞌ guat caꞌ. Naꞌ yeꞌegaꞌacleneꞌ de que gwyobe Jesoꞌosənꞌ yežineꞌ Galileanꞌ cle ca leꞌe naꞌ Galilea naꞌ leꞌileneꞌ. Canꞌ ben Diozənꞌ mendad detix̱ɉueꞌidaꞌ leꞌe.
\p
\v 8 Nach noꞌol caꞌ besaꞌaqueꞌ choꞌa banəꞌ do chesəꞌəžebeꞌ pero ḻechguaḻe chesyəꞌəbeineꞌ, zɉəyaꞌacdoeꞌ zɉəsyəꞌədix̱ɉueꞌineꞌ disipl caꞌ dižəꞌ cobənꞌ deꞌen gož anglənꞌ ḻegaꞌaqueꞌ.
\v 9 Naꞌ lao zɉəyaꞌaqueꞌ zɉəsyəꞌədix̱ɉueꞌineꞌ apostol caꞌ canꞌ goquənꞌ, besyəꞌəžagueꞌ Jesoꞌosənꞌ tnez. Nach gožeꞌ ḻegaꞌaqueꞌ: —Dioxei.
\p Naꞌ noꞌol caꞌ gosəꞌəbigueꞌe ganꞌ zo Jesoꞌosənꞌ, bosoꞌozo xibgaꞌaqueꞌ laogüeꞌenəꞌ, naꞌ gosəꞌəyeleꞌe ṉiꞌenəꞌ tant besyəꞌəbeineꞌ, naꞌ gwsoꞌelaogüeꞌeneꞌ.
\v 10 Jesoꞌosənꞌ gožeꞌ ḻegaꞌaqueꞌ: —Bito žeble. Ḻeꞌe žɉəyedix̱ɉueꞌi beṉəꞌ lɉuežɉcho caꞌ de que cheyaḻəꞌ əžɉaꞌaqueꞌ Galileanꞌ nic̱h naꞌ yesəꞌəleꞌineꞌ nadaꞌ.
\s1 Beṉəꞌ gop caꞌ ɉəsyəꞌədix̱ɉueꞌineꞌ bx̱oz caꞌ canꞌ bagoc
\p
\v 11 Naꞌ catəꞌ bezaꞌac noꞌol caꞌ choꞌa banꞌ, baḻə soḻdad caꞌ beṉəꞌ caꞌ gwsaꞌapə ba c̱he Jesoꞌosənꞌ ɉaꞌaqueꞌ syodanꞌ ɉəsyəꞌədix̱ɉueꞌineꞌ bx̱oz əblao caꞌ canꞌ bagoquənꞌ.
\v 12 Nach besyəꞌədobə bx̱oz əblao caꞌ len beṉəꞌ golə blao c̱he ṉasyon c̱hechonꞌ bosəꞌəxiꞌe naclə soꞌoneꞌ ca naquə deꞌen əgwseꞌ soḻdad caꞌ ḻegaꞌaqueꞌ. Naꞌ beyož bosoꞌoxiꞌenəꞌ, bosoꞌonežɉueꞌ soḻdad caꞌ deꞌe sc̱haꞌo mech.
\v 13 Gwseꞌe ḻegaꞌaqueꞌ: —Šə no əṉabe leꞌe binꞌ goquənꞌ, naꞌ yeꞌegaꞌacleneꞌ de que šeꞌelə lao chtasle, disipl c̱heꞌ caꞌ besyəꞌəbeɉeꞌ cuerp c̱heꞌenəꞌ ḻoꞌo banꞌ naꞌ besyəꞌəyoꞌen ga yoblə.
\v 14 Naꞌ šə goberṉadorənꞌ yeneneꞌ dižəꞌ quinga, netoꞌ žɉəyeyeꞌexentoꞌoneꞌ par nic̱h cui əžeꞌe leꞌe naꞌ par nic̱h cui goneꞌ leꞌe castigw.
\p
\v 15 Naꞌ soḻdad caꞌ gosəꞌəziꞌe mechənꞌ deꞌen bosəꞌənežɉueꞌ ḻegaꞌaqueꞌ, nach gwsoꞌoneꞌ con canꞌ gwseꞌ bx̱oz əblao caꞌ naꞌ beṉəꞌ golə blao caꞌ ḻegaꞌaqueꞌ. Naꞌ yoguəꞌ canꞌ gosəꞌəna soḻdad caꞌ gosəꞌ gwlalɉən doxen ganꞌ nitəꞌ beṉəꞌ Izrael gwlaž c̱hechonꞌ. Naꞌ xte ža ṉeža beṉəꞌ gwlaž c̱hechonꞌ chseꞌeɉḻeꞌe xtižəꞌ soḻdad caꞌ.
\s1 Jesoꞌosənꞌ beneꞌ mendad əsoꞌe xtižeꞌenəꞌ yoguəꞌ ṉasyon
\p
\v 16 Nach disipl c̱he Jesoꞌosənꞌ beṉəꞌ caꞌ šneɉ ɉaꞌaqueꞌ Galileanꞌ par ɉəsyəꞌəšagueꞌ Jesoꞌosənꞌ to lao yaꞌa ganꞌ beneꞌ mendad yesyəꞌəžagueꞌ.
\v 17 Naꞌ catəꞌ besəꞌəleꞌineꞌ Jesoꞌosənꞌ, gwsoꞌelaogüeꞌeneꞌ. Pero biaꞌaczə to c̱hopeꞌ gwsaꞌacžeɉlažeꞌe šə ḻeꞌenəꞌ.
\v 18 Nach bgüiguəꞌ Jesoꞌosənꞌ ganꞌ niteꞌenəꞌ naꞌ gožeꞌ ḻegaꞌaqueꞌ: —Baben Diozənꞌ par nic̱h chnabiꞌa doxen yobanꞌ naꞌ yežlyonꞌ.
\v 19 Deꞌe naꞌanəꞌ, ḻeꞌe žɉaꞌac ḻeꞌe žɉəsed ḻeꞌe žɉəloꞌi beṉəꞌ caꞌ žaꞌ yoguəꞌəḻoḻ ṉasyon par nic̱h əsaꞌaqueꞌ disipl c̱hiaꞌ. Naꞌ ḻeꞌe gwc̱hoagaꞌaqueꞌ nis par nic̱h yesəꞌəloꞌe de que chsoꞌonḻilažeꞌe X̱acho Diozənꞌ, naꞌ nadaꞌ Xiꞌiṉeꞌ, naꞌ Spirit c̱heꞌenəꞌ.
\v 20 Naꞌ əgwsed əgwloꞌigaꞌaqueleneꞌ par nic̱h soꞌoneꞌ yoguəꞌəḻoḻ deꞌen babenaꞌ mendad gonḻe. Nadaꞌ zoczaꞌ len leꞌe yoguəꞌ ža xte ca te c̱he yežlyonꞌ.
\p Deꞌe naꞌazənꞌ chzoɉaꞌ.