\id MRK
\ide UTF8
\h SAN MARCOS
\toc1 San Marcos
\mt1 Dižəꞌ Güen Dižəꞌ Cobə Deꞌen Bzoɉ San Marcosənꞌ
\c 1
\s1 Juan benꞌ bc̱hoa beṉəꞌ nis beꞌe xtižəꞌ Diozənꞌ latɉə dašənꞌ
\p
\v 1 Deꞌen nga chzoɉaꞌ naquən dižəꞌ güen dižəꞌ cobə deꞌen chzeɉniꞌin c̱he Jesocristənꞌ benꞌ naquə Xiꞌiṉ Diozənꞌ. Naꞌ ṉaꞌa solaoguaꞌ guaꞌa xtižeꞌenəꞌ.
\p
\v 2 Deꞌe profet Isaiazənꞌ benꞌ beꞌ xtižəꞌ Diozənꞌ canaꞌ bzoɉeꞌ canꞌ gož Diozənꞌ Xiꞌiṉeꞌenəꞌ, gožeꞌeneꞌ:
\q1 Eseḻaꞌa to beṉəꞌ güeꞌe xtižoꞌonəꞌ
\q1 par nic̱h ṉitəꞌ beṉəꞌ probnid par yosoꞌozenagueꞌ c̱hioꞌ catəꞌən əžinoꞌ yežlyonꞌ.
\q1
\v 3 Ḻeꞌ əṉeꞌ zižɉo latɉə dašənꞌ, ṉeꞌ:
\q1 “Ḻeꞌe so probnid par əgwzenagle c̱he X̱anchonꞌ catəꞌən yideꞌ.
\q1 Naꞌ šə sole probnid par əgwzenagle c̱heꞌ catəꞌən yideꞌ,
\q1 deꞌen gonḻe caꞌ gwxaquəꞌəleben canꞌ chonḻe chxiꞌ chloale nez caꞌ catəꞌ chidə to beṉəꞌ blao.”
\m
\v 4 Naꞌ goquənꞌ catəꞌ Juanṉəꞌ benꞌ bc̱hoa beṉəꞌ nis gwyeɉeꞌ latɉə dašənꞌ, naꞌ gwzolaogüeꞌ gwdix̱ɉueꞌineꞌ beṉəꞌ de que cheyaḻəꞌ yesyəꞌədiṉɉeneꞌ xtoḻəꞌəgaꞌaqueꞌenəꞌ naꞌ yesəꞌəṉabeneꞌ Diozənꞌ əgwnitlaogüeꞌen, naꞌ yesəꞌəchoeꞌ nis.
\v 5 Naꞌ beṉəꞌ caꞌ zaꞌac yoguəꞌ yež ganꞌ mbane Jodeanꞌ naꞌ beṉəꞌ Jerosalen caꞌ gwsaꞌaqueꞌ ɉaꞌaqueꞌ yao Jordanṉəꞌ ganꞌ zo Juanṉəꞌ par bosoꞌozenagueꞌ xtižeꞌenəꞌ. Naꞌ bosoꞌox̱oadoḻeꞌe lao Diozənꞌ, naꞌ Juanṉəꞌ bc̱hoeꞌ ḻegaꞌaqueꞌ nis ḻoꞌo yao Jordanṉəꞌ.
\p
\v 6 Juanṉəꞌ gwyazeꞌ lachəꞌ deꞌen gwsoꞌoneꞌ len yišəꞌ xa camey. Naꞌ par dobey c̱heꞌ bc̱hineꞌ to sint de yid. Naꞌ gwdaogüeꞌ bišəꞌəzo, naꞌ ḻeczə gwdaogüeꞌ šiꞌin bia ser bia nitəꞌ yix̱əꞌ.
\v 7 Naꞌ gwdix̱ɉueꞌineꞌ beṉəꞌ gwneꞌ: —Yidə yeto beṉəꞌ zaquəꞌəche ca nadaꞌ, naꞌ nadaꞌ bito zacaꞌa par gacaꞌ xmoseꞌ.
\v 8 Nadaꞌ babc̱hoaꞌ leꞌe nis, pero naꞌ beꞌenəꞌ yidə goneꞌ ca so Spirit c̱he Diozənꞌ ḻoꞌo yic̱hɉlaꞌaždaꞌochonꞌ naꞌ ṉabiꞌan chioꞌo.
\s1 Canꞌ goquə catəꞌən gwchoa Jesoꞌosənꞌ nis
\p
\v 9 Naꞌ ca tyemp catəꞌən bc̱hoa Juanṉəꞌ beṉəꞌ nis, Jesoꞌosənꞌ gwzeꞌe Nasaret ganꞌ mbane Galileanꞌ, naꞌ gwyeɉeꞌ ganꞌ zo Juanṉəꞌ choꞌa yao Jordanṉəꞌ naꞌ Juanṉəꞌ bc̱hoꞌeneꞌ nisənꞌ.
\v 10 Naꞌ catəꞌ beyož gwchoaꞌ Jesoꞌosənꞌ nisənꞌ bechoɉeꞌ ḻoꞌo nisənꞌ. Naꞌ ḻeꞌe bleꞌiteineꞌ byalɉo ḻeꞌe yobanꞌ naꞌ bleꞌineꞌ Spirit c̱he Diozənꞌ betɉən ca to ngolbexə naꞌ bžinən gwzon len ḻeꞌ.
\v 11 Naꞌ beneneꞌ gwna Diozənꞌ benꞌ zo yobanꞌ: —Leꞌ nacoꞌ Xiꞌiṉaꞌ, naꞌ chacchgüeidaꞌ c̱hioꞌ. Ḻechguaḻe cheba chezaquəꞌəlažaꞌa leꞌ.
\s1 Gwloꞌoyeḻəꞌ gwxiyeꞌenəꞌ Jesoꞌosənꞌ goneꞌ deꞌe mal
\p
\v 12 Naꞌ Spiritənꞌ ḻeꞌe benten par nic̱h gwyeɉ Jesoꞌosənꞌ latɉə dašənꞌ.
\v 13 Naꞌ Jesoꞌosənꞌ gwzoeꞌ latɉə dašənꞌ c̱hoa ža ganꞌ chsaꞌaš bia znia caꞌ. Naꞌ lao c̱hoa žanꞌ Satanasənꞌ deꞌen chnabiaꞌ deꞌe x̱ioꞌ caꞌ gwloꞌoyeḻəꞌən ḻeꞌ goneꞌ deꞌe malənꞌ. Naꞌ gwde cui gwzoin coꞌoyeḻəꞌən ḻeꞌ angl caꞌ besəꞌəžineꞌ gwsaꞌacleneꞌ ḻeꞌ.
\s1 Jesoꞌosənꞌ gwzolaogüeꞌ bsed bloꞌineꞌ beṉəꞌ Galilea caꞌ
\p
\v 14 Naꞌ gwde gosoꞌogüeꞌe Juanṉəꞌ ližyanꞌ, Jesoꞌosənꞌ gwyeɉeꞌ ganꞌ mbane Galileanꞌ gwdix̱ɉueꞌineꞌ dižəꞌ güen dižəꞌ cobə canꞌ ṉabiaꞌ Diozənꞌ con notəꞌətezə beṉəꞌ əsoꞌe latɉə.
\v 15 Naꞌ gwneꞌ: —Babžin ža bžin or gaquə canꞌ babžia Diozənꞌ biaꞌ gaquə. Naꞌ babžin ža ṉabiaꞌ Diozənꞌ con notəꞌətezə beṉəꞌ soeꞌ latɉə. Ḻeꞌe yediṉɉe xtoḻəꞌəle caꞌ naꞌ ḻešeɉḻeꞌ dižəꞌ güen dižəꞌ cobə c̱heꞌenəꞌ.
\s1 Jesoꞌosənꞌ gwleɉeꞌ tap beṉəꞌ gwxen beḻ par əsaꞌaqueꞌ disipl c̱heꞌ
\p
\v 16 Naꞌ Jesoꞌosənꞌ gwyeɉeꞌ choꞌa nisdaoꞌ Galileanꞌ, naꞌ lao zdeꞌ choꞌinəꞌ bleꞌineꞌ c̱hopə beṉəꞌ gwxen beḻ, chosoꞌozaḻeꞌe yix̱ɉw beḻ c̱hegaꞌaqueꞌenəꞌ ḻoꞌo nisdaꞌonəꞌ. Zɉənaquə c̱hopə bišeꞌe. Toeꞌ leꞌ Simon naꞌ benꞌ yeto leꞌ Ndres.
\v 17 Nach gož Jesoꞌosənꞌ ḻegaꞌaqueꞌ: —Ḻeꞌe da len nadaꞌ. Leꞌe nacle beṉəꞌ gwxen beḻ. Pero ṉaꞌa gwzeɉniꞌidaꞌ leꞌe par nic̱h gonḻe ca soꞌombiaꞌ beṉəꞌ nadaꞌ.
\p
\v 18 Naꞌ ḻeꞌe gosəꞌəbeɉyic̱hɉtegaꞌaqueꞌ yix̱ɉw beḻ c̱hegaꞌaqueꞌenəꞌ nach ɉaꞌacleneꞌ Jesoꞌosənꞌ.
\p
\v 19 Nach gwsaꞌaqueꞌ yelatəꞌ naꞌ ɉəsyəꞌədiꞌe Jacobənꞌ len Juanṉəꞌ naꞌ len x̱agaꞌaqueꞌ Sebedeonꞌ. Žeꞌe to ḻoꞌo barcw chesyəꞌəyoneꞌ yix̱ɉw beḻ c̱hegaꞌaqueꞌenəꞌ.
\v 20 Nach ḻeꞌe gwṉabtei Jesoꞌosənꞌ Jacobənꞌ naꞌ Juanṉəꞌ par žɉaꞌacleneꞌ ḻegaꞌaqueꞌ. Naꞌ bosyoꞌocuaꞌaṉeꞌ x̱agaꞌaquenꞌ len xmosgaꞌaqueꞌen ḻoꞌo barconꞌ naꞌ ɉaꞌacleneꞌ Jesoꞌosənꞌ naꞌ beṉəꞌ caꞌ banžagueꞌ.
\s1 Jesoꞌosənꞌ bebeɉeꞌ deꞌe x̱ioꞌ deꞌen yoꞌo yaz yic̱hɉlaꞌaždaoꞌ to beṉəꞌ
\p
\v 21 Nach Jesoꞌosənꞌ len disipl c̱heꞌ caꞌ ɉaꞌaqueꞌ syoda deꞌen nziꞌ Capernaum, naꞌ ža dezcanzənꞌ ɉaꞌaqueꞌ yoꞌodaoꞌ c̱he netoꞌ beṉəꞌ Izrael naꞌ Jesoꞌosənꞌ bsed bloꞌineꞌ beṉəꞌ caꞌ žaꞌanəꞌ.
\v 22 Naꞌ beṉəꞌ caꞌ besyəꞌəbaneneꞌ ca naquə deꞌen bsed əbloꞌineꞌ ḻegaꞌaqueꞌ laꞌ canꞌ bzeɉniꞌineꞌ ḻegaꞌaqueꞌ nacbiaꞌ de que napəcheꞌ yeḻəꞌ chnabiaꞌ cle ca beṉəꞌ caꞌ chosoꞌosed chosoꞌoloꞌineꞌ ḻei deꞌen bzoɉ deꞌe Moisezənꞌ.
\v 23 Naꞌ ḻoꞌo yoꞌodaoꞌ naꞌ zo to beṉəꞌ yoꞌo yaz deꞌe x̱ioꞌ yic̱hɉlaꞌaždaogüeꞌenəꞌ. Naꞌ bgosyaꞌan beꞌenəꞌ gwnan:
\v 24 —Partlə leꞌ, partlə netoꞌ Jesoꞌos beṉəꞌ Nasaret. ¿Ezedežiayiꞌo netoꞌonəꞌ? Ṉezczetoꞌ no leꞌ. Leꞌ nacoꞌ beṉəꞌ laꞌaždaoꞌ xiꞌilažəꞌ juisy naꞌ Diozənꞌ bseḻeꞌe leꞌ.
\p
\v 25 Jesoꞌosənꞌ gwdiḻeꞌ deꞌe x̱iꞌonəꞌ naꞌ gožeꞌen: —Sšagoꞌ. Bechoɉ yic̱hɉlaꞌaždaoꞌ benga.
\p
\v 26 Naꞌ deꞌe x̱iꞌonəꞌ benən par gwyaz beꞌenəꞌ šon, naꞌ bgosyaꞌaten ḻeꞌ zižɉo nach bechoɉən yic̱hɉlaꞌaždaogüeꞌenəꞌ.
\v 27 Naꞌ yoguəꞌ beṉəꞌ caꞌ žaꞌanəꞌ ḻechguaḻe besyəꞌəbaneneꞌ, nach gwseꞌ lɉuežɉgaꞌaqueꞌ: —Nžaꞌ canꞌ chzeɉniꞌineꞌ beṉəꞌ, naꞌ nacbiaꞌ napeꞌ yeḻəꞌ chnabiaꞌ deꞌen choneꞌ mendad yesyəꞌəchoɉ deꞌe x̱ioꞌ caꞌ ḻoꞌo yic̱hɉlaꞌaždaoꞌ beṉəꞌ naꞌ chesyəꞌəchoɉən.
\p
\v 28 Naꞌ xtižəꞌ Jesoꞌosənꞌ ḻeꞌe gosəꞌ gwlalɉten doxen Galileanꞌ.
\s1 Jesoꞌosənꞌ beyoneꞌ taobinꞌ c̱he Simon Bedənꞌ
\p
\v 29 Nach catəꞌ bezaꞌ Jesoꞌosənꞌ yoꞌodaꞌonəꞌ len tapte disipl c̱heꞌ caꞌ ɉəyaꞌaqueꞌ liž beṉəꞌ caꞌ c̱hopə, liž Simonṉəꞌ naꞌ Ndresənꞌ.
\v 30 Naꞌ taobinꞌ c̱he Simonṉəꞌ dieꞌ lao camənꞌ yoꞌe deꞌe ḻa, nach gwseꞌe Jesoꞌosənꞌ de que chacšeneneꞌenəꞌ.
\v 31 Jesoꞌosənꞌ bgüigueꞌe bex̱eꞌe naꞌ noꞌolənꞌ naꞌ bcoseꞌeneꞌ. Naꞌ ḻeꞌe bechoɉte deꞌe ḻanꞌ, nach ḻeꞌe gwzožaꞌate noꞌolənꞌ beneꞌ deꞌe gwsaꞌogüeꞌ.
\s1 Jesoꞌosənꞌ beyoneꞌ beṉəꞌ zan
\p
\v 32 Baben bgüižənꞌ catəꞌ ɉsoꞌe yoguəꞌ beṉəꞌ caꞌ chsaꞌacšenenəꞌ naꞌ beṉəꞌ caꞌ zɉəyoꞌo zɉəyaz deꞌe x̱ioꞌ yic̱hɉlaꞌaždaꞌogaꞌaqueꞌenəꞌ ganꞌ zo Jesoꞌosənꞌ.
\v 33 Naꞌ yoguəꞌ beṉəꞌ žaꞌ yežənꞌ ɉəsəꞌədobeꞌ choꞌa puert liž Simonṉəꞌ.
\v 34 Naꞌ Jesoꞌosənꞌ beyoneꞌ zan beṉəꞌ chseꞌi gwde gwde yižgüeꞌ, naꞌ bebeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ zan. Naꞌ bito beꞌe latɉə bi yesəꞌəna deꞌe x̱ioꞌ caꞌ c̱hedəꞌ zɉəṉezen de que naqueꞌ Xiꞌiṉ Diozənꞌ.
\s1 Jesoꞌosənꞌ gwdeꞌ doxenḻə Galilea bsed bloꞌineꞌ
\p
\v 35 Ža beteyo, ṉencal catəꞌ gwyas Jesoꞌosənꞌ bezeꞌe naꞌ gwyeɉeꞌ fuerlə syodanꞌ to latɉə ga cui no nḻaꞌ, ɉeneꞌ orasyon.
\v 36 Naꞌ Simonṉəꞌ len beṉəꞌ lɉuežɉeꞌ caꞌ ɉaꞌaqueꞌ ɉəsyəꞌədilɉeꞌ Jesoꞌosənꞌ.
\v 37 Naꞌ catəꞌ besyəꞌəželeneꞌ ḻeꞌ gwseꞌeneꞌ: —Yoguəꞌ beṉəꞌ žaꞌ syodanꞌ chesyəꞌəyilɉeꞌ leꞌ.
\p
\v 38 Jesoꞌosənꞌ gožeꞌ ḻegaꞌaqueꞌ: —Šeɉcho yež caꞌ zɉəchiꞌ gaḻəꞌəzə, par nic̱h ḻeczə c̱hix̱ɉuiꞌa xtižəꞌ Diozənꞌ len beṉəꞌ caꞌ žaꞌanəꞌ, laꞌ par naꞌanəꞌ bseḻəꞌ Diozənꞌ nadaꞌ.
\p
\v 39 Caꞌ goquənꞌ Jesoꞌosənꞌ len disipl c̱heꞌ caꞌ ɉaꞌaqueꞌ to to yež ganꞌ mbane Galileanꞌ, naꞌ ḻoꞌo yoꞌodaoꞌ c̱he netoꞌ beṉəꞌ Izrael deꞌen nitəꞌ to to yež əbsed əbloꞌineꞌ beṉəꞌ, naꞌ bebeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ.
\s1 Jesoꞌosənꞌ beyoneꞌ to beṉəꞌ cheꞌi yižgüeꞌ deꞌen nziꞌ ḻepr
\p
\v 40 Naꞌ goquən bgüiguəꞌ to beṉəꞌ lao Jesoꞌosənꞌ, beṉəꞌ cheꞌi yižgüeꞌ deꞌen nziꞌ ḻepr, naꞌ beꞌenəꞌ bzo xibeꞌ lao Jesoꞌosənꞌ gožeꞌeneꞌ: —Gonšguei ben par nic̱h yeyacdaꞌ.
\p
\v 41 Jesoꞌosənꞌ beyašeꞌeneꞌ ḻeꞌ, naꞌ bḻi neꞌenəꞌ gwdaneꞌeneꞌ naꞌ gožeꞌeneꞌ: —Guacczə, beyaque.
\p
\v 42 Naꞌ ḻeꞌe beyactei beꞌenəꞌ.
\v 43-44 Nach Jesoꞌosənꞌ beneꞌ mendad len beꞌenəꞌ gožeꞌeneꞌ: —Bzenagšga. Ni tozə cui no güeꞌelenoꞌ dižəꞌ ca naquə nga babenaꞌ len leꞌ. Gwyeɉ lao bx̱ozənꞌ nic̱h leꞌineꞌ bac̱h beyacdoꞌ, naꞌ bnežɉueꞌ bia yix̱əꞌ goteꞌ lao Diozənꞌ par nic̱h yexiꞌ yeyachoꞌ canꞌ na ḻei deꞌen bzoɉ deꞌe Moisezənꞌ naꞌ par nic̱h yesəꞌəṉeze beṉəꞌ de que babeyacdoꞌonəꞌ.
\p
\v 45 Pero naꞌ beꞌenəꞌ bezeꞌe ganꞌ zo Jesoꞌosənꞌ naꞌ beꞌe dižəꞌ len yoguəꞌ beṉəꞌ bežagueꞌ ca naquənꞌ beyon Jesoꞌosənꞌ ḻeꞌ. Nach gosəꞌ gwlalɉə dižəꞌənəꞌ xte benən ca cuich goquə šoꞌ Jesoꞌosənꞌ yež caꞌ naꞌ cuich goquə teꞌ con ca nḻaꞌazə. Gwdeꞌ fuerlə yež caꞌ ganꞌ cui no beṉəꞌ chaš. Pero biaꞌaczə zan beṉəꞌ zaꞌac yoguəꞌ yež caꞌ yeḻaꞌ ɉaꞌaque ganꞌ zoeꞌenəꞌ.
\c 2
\s1 Jesoꞌosənꞌ beyoneꞌ to beṉəꞌ nat to part cuerp c̱heꞌenəꞌ
\p
\v 1 Naꞌ goc to c̱hopə ža gwzaꞌ Jesoꞌosənꞌ Capernaunṉəꞌ catəꞌ beyeɉeꞌ deꞌe yoblə, naꞌ gwseꞌene beṉəꞌ de que babežin Jesoꞌosənꞌ ližeꞌenəꞌ.
\v 2-3 Naꞌ lgüegwzə besəꞌəžag beṉəꞌ zan ližeꞌenəꞌ xte bitoch bi latɉə gotəꞌ ḻoꞌo yoꞌo c̱heꞌenəꞌ nic choꞌa puertənꞌ par šoꞌoch beṉəꞌ. Naꞌ lao chsed chloꞌi Jesoꞌosənꞌ ḻegaꞌaqueꞌ xtižəꞌ Diozənꞌ, besəꞌəžin tap beṉəꞌ zɉənḻeneꞌ to beṉəꞌ nat to part cuerp c̱heꞌenəꞌ, zɉənx̱oeꞌeneꞌ to lao cam daoꞌ.
\v 4 Naꞌ catəꞌ gwsaꞌacbeꞌineꞌ cui gaquə yesəꞌəžinḻeneꞌ beṉəꞌ güeꞌenəꞌ ganꞌ zo Jesoꞌosənꞌ tant beṉəꞌ zan žaꞌanəꞌ, gwseꞌepeꞌ yic̱hɉoꞌolə. Naꞌ bosoꞌosalɉueꞌ yic̱hɉoꞌonəꞌ zaquəꞌ ganꞌ zo Jesoꞌosənꞌ nach bosoꞌoletɉeꞌ beꞌenəꞌ len xcameꞌenəꞌ.
\v 5 Naꞌ gocbeꞌi Jesoꞌosənꞌ de que gwsoꞌonḻilažəꞌ beṉəꞌ caꞌ zɉənḻen beṉəꞌ güeꞌenəꞌ, nach gožeꞌ beṉəꞌ güeꞌenəꞌ: —Xiꞌiṉdaoguaꞌa, babeziꞌixenaꞌ xtoḻoꞌonəꞌ.
\p
\v 6 Pero baḻə beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ zɉəchiꞌe ḻoꞌo yoꞌonəꞌ. Naꞌ catəꞌ gwseꞌeneneꞌ dižəꞌ caꞌ beꞌ Jesoꞌosənꞌ, gwsoꞌoneꞌ xbab ḻoꞌo yic̱hɉlaꞌaždaꞌogaꞌaqueꞌenəꞌ:
\v 7 —¿Bixc̱henꞌ choeꞌ benga dižəꞌ quinga? Chžia chniteꞌe Diozənꞌ ca deꞌen neꞌ de que cheziꞌixeneꞌ xtoḻəꞌ beṉac̱hənꞌ. Notono gaquə yeziꞌixen xtoḻəꞌ beṉac̱hənꞌ šə caguə tozə Diozənꞌ.
\p
\v 8 Jesoꞌosənꞌ ḻeꞌe gocbeꞌiteineꞌ bi xbabənꞌ gwsoꞌoneꞌenəꞌ, nach gožeꞌ ḻegaꞌaqueꞌ: —¿Bixc̱henꞌ chonḻe xbabənꞌ caꞌ ḻoꞌo yic̱hɉlaꞌaždaꞌolenəꞌ?
\v 9 Šə con yapaꞌaneꞌ de que babeziꞌixenaꞌ xtoḻeꞌenəꞌ, bito ṉezele šə napaꞌ yeḻəꞌ gwnabiaꞌ par yeziꞌixenaꞌan. Pero šə yapaꞌaneꞌ: “Gwyas beyoaꞌ xcamoꞌonəꞌ naꞌ beyeɉ ližoꞌonəꞌ to šaoꞌ to güen”, guatəꞌəbiaꞌ šə napaꞌ yeḻəꞌ gwnabiaꞌanəꞌ par gaquə canꞌ niaꞌanəꞌ.
\v 10 Naꞌ ṉaꞌa gonaꞌ par nic̱h əṉezele de que napaꞌ yeḻəꞌ gwnabiaꞌ lao yežlyo nga par yeziꞌixenaꞌ xtoḻəꞌ beṉac̱hənꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p Nach gožeꞌ beṉəꞌ güeꞌenəꞌ:
\v 11 —Nadaꞌ əchniaꞌ leꞌ, gwyas beyoaꞌ xcamoꞌonəꞌ naꞌ beyeɉ ližoꞌonəꞌ to šaoꞌ to güen.
\p
\v 12 Nach ḻeꞌe gwyasseste beꞌenəꞌ, naꞌ beyoaꞌ xcameꞌenəꞌ bezeꞌe zɉəyedeꞌ ližeꞌ, chosəꞌəgüiateꞌ beṉəꞌ caꞌ niteꞌenəꞌ. Naꞌ yoguəꞌ beṉəꞌ caꞌ žaꞌanəꞌ besyəꞌəbaneneꞌ naꞌ gwsoꞌelaogüeꞌe Diozənꞌ gosəꞌəneꞌ: —Bitoṉəꞌ leꞌicho gaquə ca deꞌe nga bagoc.
\s1 Jesoꞌosənꞌ gwleɉeꞌ Lebinꞌ par gwleneꞌ disipl c̱heꞌ caꞌ
\p
\v 13 Gwde naꞌ Jesoꞌosənꞌ gwyeɉeꞌ choꞌa nisdaꞌonəꞌ deꞌe yoblə naꞌ beṉəꞌ zan besəꞌəžag ganꞌ zoeꞌenəꞌ nach bsed bloꞌineꞌ ḻegaꞌaqueꞌ.
\v 14 Naꞌ catəꞌ beyož bzeɉniꞌi Jesoꞌosənꞌ ḻegaꞌaqueꞌ bezeꞌe naꞌ lao zɉəyedeꞌenəꞌ bleꞌineꞌ to beṉəꞌ goc̱hixɉw, beṉəꞌ le Lebi xiꞌiṉ to beṉəꞌ leꞌ Alfeo, chiꞌe latɉə ganꞌ chesəꞌəc̱hixɉueꞌenəꞌ. Naꞌ Jesoꞌosənꞌ gožeꞌeneꞌ: —Da len nadaꞌ.
\p Nach Lebinꞌ gwzožeꞌe ɉənaogüeꞌeneꞌ.
\p
\v 15 Naꞌ goquənꞌ chiꞌ Jesoꞌosənꞌ liž Lebinꞌ len disipl c̱heꞌ caꞌ chsaꞌogüeꞌ. Naꞌ nitəꞌ beṉəꞌ zan beṉəꞌ goc̱hixɉw caꞌ naꞌ nochlə beṉəꞌ güen deꞌe mal caꞌ chsaꞌoleneꞌ ḻegaꞌaqueꞌ. Nitəꞌ beṉəꞌ zan c̱hedəꞌ zaneꞌ chosoꞌozenagueꞌ c̱heꞌ naꞌ chsoꞌonḻilažeꞌeneꞌ.
\v 16 Naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len beṉəꞌ fariseo caꞌ catəꞌ besəꞌəleꞌineꞌ chiꞌ Jesoꞌosənꞌ chaoleneꞌ beṉəꞌ goc̱hixɉw caꞌ naꞌ yebaḻə beṉəꞌ güen deꞌe mal caꞌ, gwseꞌe disipl c̱heꞌ caꞌ: —Malənꞌ chon maestr c̱helenꞌ cheꞌeɉ chaogüeꞌ txen len beṉəꞌ goc̱hixɉw naꞌ nochlə beṉəꞌ güen deꞌe mal beṉəꞌ cui chonḻentoꞌ txen.
\p
\v 17 Naꞌ catəꞌ bene Jesoꞌosənꞌ xtižəꞌəgaꞌaqueꞌenəꞌ, gožeꞌ ḻegaꞌaqueꞌ: —Beṉəꞌ cui chsaꞌacšene bito chesəꞌəyažɉeneꞌ beṉəꞌ güen rmech. Beṉəꞌ caꞌ chsaꞌacšene ḻegaꞌaqueꞌenəꞌ chesəꞌəyažɉeneꞌ beṉəꞌ güen rmech. Nadaꞌ zaꞌa zedəyenaꞌ par nic̱h beṉəꞌ caꞌ zɉəṉeze de que zɉənaqueꞌ beṉəꞌ güen deꞌe mal yesyəꞌədiṉɉeneꞌ xtoḻəꞌəgaꞌaqueꞌenəꞌ, pero bito zedəyenaꞌ par nic̱h beṉəꞌ caꞌ chsaꞌaqueneꞌ bazɉənaqueꞌ beṉəꞌ güen yesyəꞌədiṉɉeneꞌ xtoḻəꞌəgaꞌaqueꞌenəꞌ.
\s1 Gosəꞌəṉabeneꞌ Jesoꞌosənꞌ bixc̱henꞌ bito gwleɉeꞌ tgüeɉə catəꞌ cui əseꞌeɉ əsaꞌo disipl c̱heꞌ caꞌ
\p
\v 18 Naꞌ goquənꞌ to ža catəꞌ disipl c̱he Juanṉəꞌ naꞌ disipl c̱he beṉəꞌ fariseo caꞌ niteꞌe sin cui chseꞌeɉ chsaꞌogüeꞌ. Naꞌ ɉaꞌac baḻə beṉəꞌ lao Jesoꞌosənꞌ naꞌ gwseꞌeneꞌ: —Disipl c̱he Juanṉəꞌ naꞌ ḻeczə disipl c̱he beṉəꞌ fariseo caꞌ chniteꞌe zan las sin cui chseꞌeɉ chsaꞌogüeꞌ par chsoꞌelaꞌocheꞌ Diozənꞌ. Pero disipl c̱hioꞌ caꞌ chseꞌeɉ chsaꞌogüeꞌ. ¿Bixc̱henꞌ ža?
\p
\v 19 Nach Jesoꞌosənꞌ gožeꞌ ḻegaꞌaqueꞌ: —Catəꞌ chac to yeḻəꞌ gošagnaꞌ beṉəꞌ migw c̱he beꞌenəꞌ chžagnaꞌanəꞌ chseꞌeɉ chsaꞌogüeꞌ. Naꞌ caꞌaczənꞌ naquən len nadaꞌ naꞌ len disipl c̱hiaꞌ caꞌ, chseꞌeɉ chsaꞌogüeꞌ lao ṉeꞌe zoaꞌ len ḻegaꞌaqueꞌ.
\v 20 Catəꞌəchənꞌ əžin ža yesəꞌəc̱heꞌex̱ax̱ɉ beṉəꞌ contr c̱hiaꞌ caꞌ nadaꞌ, canaꞌachənꞌ əchoɉ catəꞌ cuich əseꞌeɉ əsaꞌo disipl c̱hiaꞌ caꞌ.
\p
\v 21 Notono beṉəꞌ zo beṉəꞌ chc̱hineꞌ to pedas lachəꞌ cuiṉəꞌ x̱oa nis par yodaꞌ xa goleꞌenəꞌ deꞌen bac̱h chyoe. Šə canꞌ goneꞌ, catəꞌ c̱hib xeꞌenəꞌ, yebeꞌ lachəꞌ cobənꞌ naꞌ əc̱hezəchən ḻen.
\v 22 Naꞌ ḻeczə caꞌ notono zo beṉəꞌ chgueꞌe bino cobənꞌ ḻoꞌo yid golənꞌ. Šə goneꞌ caꞌ, bino cobənꞌ əc̱hezən yid golənꞌ naꞌ lalɉə binonꞌ naꞌ cuiayiꞌ yidənꞌ. Cle laꞌ cheyaḻəꞌ queꞌe bino cobənꞌ ḻoꞌo yid cobə.
\p Jesoꞌosənꞌ gwneꞌ caꞌ par bzeɉniꞌineꞌ ḻegaꞌaqueꞌ de que bito gaquə yesəꞌənaogüeꞌ costombr gol c̱hegaꞌaqueꞌenəꞌ naꞌ yesəꞌənaotieꞌ deꞌen chsed chloꞌineꞌ.
\s1 Bosoꞌolec̱hɉ disipl caꞌ trigonꞌ ža dezcanzənꞌ par gwsaꞌogüeꞌen
\p
\v 23 Naꞌ gozaquənꞌ to ža dezcanz Jesoꞌosənꞌ gwdieꞌ len disipl c̱heꞌ caꞌ ganꞌ nyaž trigonꞌ, nach disipl c̱heꞌ caꞌ gosəꞌəlec̱hɉeꞌ trigonꞌ lao gosəꞌədiꞌenəꞌ.
\v 24 Nach besəꞌəleꞌi baḻə beṉəꞌ fariseo caꞌ canꞌ gwsoꞌon disipl caꞌ naꞌ gwseꞌe Jesoꞌosənꞌ: —Bgüiašc canꞌ chsoꞌon disipl c̱hioꞌ caꞌ žin deꞌe cui de lsens goncho ža dezcanzənꞌ.
\p
\v 25-26 Naꞌ Jesoꞌosənꞌ gožeꞌ ḻegaꞌaqueꞌ: —¿Ecabi zaꞌalažəꞌəle deꞌen bablable canꞌ ben deꞌe Rei Dabinꞌ ca tyemp catəꞌən goc Abiatarənꞌ bx̱oz əblaoch? Nan de que to ža cui gotəꞌ deꞌe əsaꞌo deꞌe Dabinꞌ len beṉəꞌ lɉuežɉeꞌ caꞌ naꞌ gosəꞌədoneꞌ. Nach gwyeɉeꞌ ḻoꞌo yoꞌodaoꞌ əblao c̱he c̱hioꞌo beṉəꞌ Izrael. Naꞌ gwxiꞌe yetxtil deꞌen bazɉəncuaꞌ bx̱oz caꞌ par Diozənꞌ, naꞌ gwsaꞌogüeꞌen len beṉəꞌ lɉuežɉeꞌ caꞌ ḻaꞌaṉəꞌəczə cui zɉənaqueꞌ bx̱oz, len yetxtilənꞌ bito de lsens par gao notəꞌətezə beṉəꞌ ḻen, letga bx̱oz caꞌ chac əsaꞌogüeꞌen.
\p
\v 27 Naꞌ ḻeczə gwna Jesoꞌosənꞌ: —Diozənꞌ beneꞌ beṉac̱hənꞌ naꞌ techlə gwleɉeꞌ to ža lao xman par nic̱h beṉac̱hənꞌ gaquə soꞌoneꞌ dezcanz. Bito gwleɉ Diozənꞌ ža dezcanzənꞌ parzə nic̱h soꞌombaꞌaṉeꞌen.
\v 28 Naquən lao naꞌa əṉiaꞌ binꞌ naquən güen goncho ža dezcanzənꞌ, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\c 3
\s1 Beyaque to beṉəꞌ mbižə šḻaꞌa neꞌenəꞌ
\p
\v 1 Naꞌ gozeɉ Jesoꞌosənꞌ to ḻoꞌo yoꞌodaoꞌ c̱he netoꞌ beṉəꞌ Izrael yeto ža dezcanz. Naꞌ ḻoꞌo yoꞌodaꞌonəꞌ zo to beṉəꞌ bambižə šḻaꞌa neꞌenəꞌ.
\v 2 Naꞌ beṉəꞌ fariseo caꞌ žaꞌ yoꞌodaꞌonəꞌ chosəꞌəgüiatezeꞌ Jesoꞌosənꞌ chesəꞌəbezeꞌ šə goyoneꞌ beꞌenəꞌ ža dezcanzənꞌ par nic̱h əsaꞌogüeꞌ xya contr ḻeꞌ.
\v 3 Jesoꞌosənꞌ gožeꞌ benꞌ mbižə neꞌinəꞌ: —Gwzožaꞌ naꞌ da ngalə.
\p Nach bgüiguəꞌ benꞌ gwzecheꞌ laogüeꞌenəꞌ.
\p
\v 4 Jesoꞌosənꞌ gožeꞌ beṉəꞌ caꞌ žaꞌ ḻoꞌo yoꞌodaꞌonəꞌ: —¿Ena ḻeinꞌ goncho deꞌe güen ža dezcanzənꞌ, o šə nan goncho deꞌe mal? ¿Enan goncho par nic̱h cui saꞌat beṉəꞌ, o šə nan goncho par nic̱h saꞌateꞌ?
\p Pero beṉəꞌ caꞌ žaꞌanəꞌ bitobi gosəꞌəneꞌ.
\v 5 Nach Jesoꞌosənꞌ bgüieꞌ ḻegaꞌaqueꞌ znia tant gwzoeꞌ trist c̱hedəꞌ cui chseꞌeneneꞌ seꞌeɉniꞌineꞌ binꞌ cheneꞌe Diozənꞌ soꞌoneꞌ. Nach Jesoꞌosənꞌ gožeꞌ beꞌenəꞌ: —Bḻi naꞌonəꞌ.
\p Nach bḻi naꞌ beꞌenəꞌ naꞌ beyaquen.
\v 6 Nach beṉəꞌ fariseo caꞌ catəꞌ besaꞌaqueꞌ yoꞌodaꞌonəꞌ bosəꞌəxiꞌe len beṉəꞌ caꞌ chsoꞌon txen len Erodənꞌ naclə soꞌoneꞌ par soꞌoteꞌ Jesoꞌosənꞌ.
\s1 Beṉəꞌ zan besəꞌəžag choꞌa Nisdaoꞌ Galileanꞌ
\p
\v 7-8 Jesoꞌosənꞌ len disipl c̱heꞌ caꞌ gwsaꞌaqueꞌ yoꞌodaꞌonəꞌ naꞌ ɉaꞌaqueꞌ choꞌa nisdaꞌonəꞌ. Naꞌ beṉəꞌ zan ɉəsəꞌənaogüeꞌeneꞌ c̱hedəꞌ gwseꞌeneneꞌ dižəꞌ c̱he Jesoꞌosənꞌ canꞌ choneꞌ deꞌe zan deꞌe zaqueꞌe. Naꞌ beṉəꞌ caꞌ zaꞌaqueꞌ do ganꞌ mbane Galileanꞌ, naꞌ do ganꞌ mbane Jodeanꞌ, naꞌ do Jerosalenṉəꞌ, naꞌ do Idomea, naꞌ do yešḻaꞌa yao Jordanṉəꞌ, naꞌ do ganꞌ mbane Tiro naꞌ Sidon. Zaꞌaqueꞌ c̱hedəꞌ gwseꞌeneneꞌ yesəꞌəleꞌineꞌ Jesoꞌosənꞌ.
\v 9-10 Babeyon Jesoꞌosənꞌ zan beṉəꞌ chsaꞌacšene naꞌ yoguəꞌ beṉəꞌ caꞌ ṉeꞌe chsaꞌacšene besyəꞌəyilɉlažeꞌe naclə soꞌoneꞌ par nic̱h yesəꞌəlapə naꞌagaꞌaquenꞌ ḻeꞌ. Tant beṉəꞌ zan gosəꞌəbiadiꞌeneꞌ xte bosoꞌoc̱hiꞌižoɉeꞌeneꞌ. Deꞌe naꞌanəꞌ Jesoꞌosənꞌ beneꞌ mendad soꞌon disipl c̱heꞌ caꞌ probnid to barcw par ḻeꞌ.
\v 11 Naꞌ beṉəꞌ caꞌ zɉəyoꞌo zɉəyaz deꞌe x̱ioꞌon ḻoꞌo yic̱hɉlaꞌaždaꞌogaꞌaquenꞌ catəꞌ besəꞌəleꞌineꞌ Jesoꞌosənꞌ besəꞌəzo xibgaꞌaqueꞌ laogüeꞌenəꞌ naꞌ deꞌe x̱ioꞌ caꞌ gwsoꞌosyaꞌan gosəꞌənan: —Leꞌ nacoꞌ Xiꞌiṉ Dioz.
\p
\v 12 Pero Jesoꞌosənꞌ beneꞌ mendad len ḻegaꞌaquən cui soꞌen dižəꞌ nonꞌ naqueꞌ.
\s1 Jesoꞌosənꞌ gwleɉeꞌ šižiṉ beṉəꞌ bsiꞌe apostol
\p
\v 13 Naꞌ gwde naꞌ Jesoꞌosənꞌ gwloeꞌ to lao yaꞌa naꞌ goxeꞌ yoguəꞌ disipl c̱heꞌ caꞌ par nic̱h cueɉeꞌ beṉəꞌ caꞌ əsaꞌac apostol c̱heꞌenəꞌ, nach yogueꞌe gosəꞌəbigueꞌe ganꞌ zoeꞌenəꞌ.
\v 14 Naꞌ gwleɉeꞌ šižiṉ beṉəꞌ par yesəꞌədaleneꞌ ḻeꞌ naꞌ par nic̱h əseḻeꞌe ḻegaꞌaqueꞌ žɉəsəꞌədix̱ɉueꞌineꞌ beṉəꞌ canꞌ na Diozənꞌ.
\v 15 Naꞌ bnežɉueꞌ ḻegaꞌaqueꞌ yeḻəꞌ gwnabiaꞌanəꞌ par nic̱h besyəꞌəyoneꞌ beṉəꞌ caꞌ chseꞌi yižgüeꞌ naꞌ par nic̱h goc besyəꞌəbeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ.
\v 16 Gwleɉeꞌ Simon benꞌ bsiꞌe Bed,
\v 17 naꞌ Jacobənꞌ len Juan bišeꞌenəꞌ xiꞌiṉ Sebedeonꞌ. Jesoꞌosənꞌ bsiꞌe Jacobənꞌ naꞌ Juanṉəꞌ Boanerges, c̱hedəꞌ zɉənaqueꞌ beṉəꞌ loc.
\v 18 Naꞌ gwleɉeꞌ Ndresənꞌ, naꞌ Lipənꞌ, naꞌ Bartolomenꞌ, naꞌ Mtionꞌ, naꞌ Tomasənꞌ, naꞌ Jacob xiꞌiṉ Alfeonꞌ, naꞌ Tadeonꞌ, naꞌ Simon benꞌ chon txen len beṉəꞌ caꞌ zɉənziꞌ cananistas.
\v 19 Nach gwleɉeꞌ Jod Iscariotənꞌ benꞌ bdieꞌ Jesoꞌosənꞌ lao naꞌ beṉəꞌ contr caꞌ.
\s1 Gosəꞌəneꞌ de que Jesoꞌosənꞌ bebeɉeꞌ deꞌe x̱ioꞌ caꞌ len yeḻəꞌ guac c̱he Beelsebonꞌ
\p Gwde gwleɉeꞌ disipl c̱heꞌ caꞌ beyeɉeꞌ ližeꞌenəꞌ len ḻegaꞌaqueꞌ.
\v 20 Nach deꞌe yoblə besəꞌədopə beṉəꞌ zan ganꞌ niteꞌenəꞌ xte nic goquə latɉə əsaꞌogüeꞌ.
\v 21 Catəꞌ gwseꞌene famiḻy c̱he Jesoꞌosənꞌ de que cui de latɉə c̱hegaꞌaqueꞌ ni par əsaꞌogüeꞌ, ɉaꞌaqueꞌ ganꞌ zo Jesoꞌosənꞌ par yesyəꞌəc̱heꞌex̱ax̱ɉeꞌeneꞌ c̱hedəꞌ gosəꞌəna beṉəꞌ de que chactonteꞌenəꞌ.
\p
\v 22 Naꞌ ḻeczə baḻə beṉəꞌ Jerosalenṉəꞌ beṉəꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ blaꞌaqueꞌ, naꞌ gosəꞌəneꞌ: —Beelsebo deꞌen chnabiaꞌ deꞌe x̱ioꞌ caꞌ yoꞌo yazən yic̱hɉlaꞌaždaoꞌ benga, naꞌ chebeɉeꞌ deꞌe x̱ioꞌ caꞌ len yeḻəꞌ guac c̱heinəꞌ.
\p
\v 23 Nach Jesoꞌosənꞌ goxeꞌ beṉəꞌ caꞌ par yesəꞌəbigueꞌe ganꞌ zoeꞌenəꞌ naꞌ beꞌe jemplənꞌ len ḻegaꞌaqueꞌ, gožeꞌ: —Satanasənꞌ deꞌen chnabiaꞌ deꞌe x̱ioꞌ caꞌ bito gaquə yebeɉ cuinei ḻoꞌo yic̱hɉlaꞌaždaoꞌ beṉəꞌ.
\v 24 Šə beṉəꞌ žaꞌ to ṉasyon əsaꞌaqueꞌ c̱hoplə naꞌ yesyəꞌədiḻeꞌ entr ḻegaꞌaqueꞌ, əgwžiayiꞌ ṉasyon c̱hegaꞌaqueꞌ naꞌanəꞌ šə caꞌ.
\v 25 Naꞌ šə to famiḻy beṉəꞌ əsaꞌaqueꞌ c̱hoplə naꞌ yesyəꞌədiḻeꞌ entr ḻegaꞌaczeꞌ, ḻeczə yenit famiḻy c̱hegaꞌaqueꞌ naꞌanəꞌ šə caꞌ.
\v 26 Naꞌ ḻeczə caꞌ šə Satanasənꞌ len deꞌe x̱ioꞌ c̱hei caꞌ əsaꞌaquən c̱hoplə naꞌ yesyəꞌədiḻən, cuiayiꞌ yeḻəꞌ chnabiaꞌ c̱hegaꞌaquənṉəꞌ šə caꞌ.
\p
\v 27 Ṉezecho notono no gaquə šoꞌ liž to beṉəꞌ gual par žɉəḻaneꞌ šinḻazeꞌ caꞌ sin cui əgwc̱heɉeꞌeneꞌ to do. Pero šə əgwc̱heɉeꞌeneꞌ guaquə cuaneꞌ šinḻazeꞌ caꞌ.
\p
\v 28 Deꞌe ḻi chniaꞌ leꞌe, bitəꞌətezə deꞌe mal deꞌen chsoꞌon beṉac̱hənꞌ naꞌ bitəꞌətezə dižəꞌ mal deꞌe chsoꞌe contr Diozənꞌ, Diozənꞌ yeziꞌixeneꞌ c̱hegaꞌaqueꞌ šə yesyəꞌədiṉɉeneꞌen.
\v 29 Pero notəꞌətezə beṉəꞌ soeꞌ dižəꞌ contr Spirit c̱he Diozənꞌ cuat yeziꞌixen Diozənꞌ c̱hegaꞌaqueꞌ. Zeɉḻicaṉe yesəꞌəziꞌe castigw c̱hei.
\p
\v 30 Canꞌ gwna Jesoꞌosənꞌ c̱hedəꞌ beṉəꞌ caꞌ chosoꞌosed chosoꞌoloꞌi ḻeinꞌ gosəꞌəneꞌ de que choꞌo chaz deꞌe x̱ioꞌonəꞌ ḻoꞌo yic̱hɉlaꞌaždaꞌogüeꞌenəꞌ.
\s1 Xnaꞌ Jesoꞌosənꞌ naꞌ bišeꞌe caꞌ besəꞌəžineꞌ ganꞌ zoeꞌenəꞌ
\p
\v 31 Gwde deꞌe caꞌ xnaꞌ Jesoꞌosənꞌ len bišeꞌe caꞌ besəꞌəžineꞌ ganꞌ zo Jesoꞌosənꞌ. Naꞌ chyoꞌolə gosəꞌəbezeꞌ gosəꞌəṉabeꞌ soꞌeleneꞌ ḻeꞌ dižəꞌ.
\v 32 Naꞌ beṉəꞌ zan caꞌ zɉəchiꞌ tcuit tcueꞌeɉ Jesoꞌosənꞌ gwseꞌeneꞌ: —Xnaꞌon len beṉəꞌ bišoꞌo caꞌ zɉəzecheꞌ chyoꞌolə naꞌ chseꞌeneneꞌ əsoꞌeleneꞌ leꞌ dižəꞌ.
\p
\v 33 Pero Jesoꞌosənꞌ gožeꞌ ḻegaꞌaqueꞌ: —Nitəꞌ beṉəꞌ yoblə beṉəꞌ bazɉənaquə ca xnaꞌa naꞌ ca bišaꞌa.
\p
\v 34 Nach Jesoꞌosənꞌ bloꞌe beṉəꞌ caꞌ zɉəchiꞌ tcuit tcueꞌeɉeꞌenəꞌ, gwneꞌ: —Beṉəꞌ quinganꞌ bazɉənaqueꞌ ca xnaꞌa naꞌ bazɉənaqueꞌ ca bišaꞌa.
\v 35 Canꞌ naquən len notəꞌətezə beṉəꞌ chsoꞌoneꞌ canꞌ chazlažəꞌ Diozənꞌ, zɉənaqueꞌ ca xnaꞌa naꞌ ca bišaꞌa naꞌ ca zanaꞌ.
\c 4
\s1 Jempl c̱he beṉəꞌ gozənꞌ
\p
\v 1 Naꞌ deꞌe yoblə gwzo Jesoꞌosənꞌ choꞌa nisdaꞌonəꞌ naꞌ goszolaogüeꞌ chsed chloꞌineꞌ. Naꞌ tant beṉəꞌ zan besəꞌədobə ganꞌ zoꞌenəꞌ xte benən byen gwyoꞌo Jesoꞌosənꞌ gwchiꞌe to ḻoꞌo barcw deꞌen chiꞌ gaḻəꞌəzə choꞌa nisdaꞌonəꞌ. Naꞌ yoguəꞌ beṉəꞌ caꞌ besəꞌədobənꞌ gosəꞌəniteꞌe lao yoxənꞌ.
\v 2 Nach Jesoꞌosənꞌ bsed bloꞌineꞌ ḻegaꞌaqueꞌ len zan jempl. Naꞌ beꞌeleneꞌ ḻegaꞌaqueꞌ to jempl bsaquəꞌəlebeneꞌ xtižəꞌ Diozənꞌ ca trigw.
\p
\v 3 Nach gwneꞌ: —Ḻeꞌe gwzenag deꞌe nga. To beṉəꞌ gwzeꞌe zdeꞌ güen trigw.
\v 4 Naꞌ lao choseꞌ trigonꞌ baḻən ɉəsəꞌəchazən choꞌa nez naꞌ bia žia x̱ileꞌe bia chaš ḻeꞌe yobanꞌ gwsaꞌob ḻen.
\v 5 Naꞌ yebaḻən ɉəsəꞌəchazən ga naquə lao yeɉ ga cuitec žia yo. Deꞌe naꞌanəꞌ ḻeꞌe blaꞌacten.
\v 6 Pero naꞌ catəꞌ bežaꞌachgua besəꞌəcuadən naꞌ ḻeꞌe gosəꞌəbižten c̱hedəꞌ bitobi loi gwsoꞌon.
\v 7 Naꞌ yebaḻən besəꞌəgoꞌoṉən lao yo ga nc̱hix̱ə xsa yešəꞌ naꞌ blaꞌaquən txen len xsa yešəꞌənəꞌ. Naꞌ besəꞌəḻoləꞌ yag yešəꞌ caꞌ ḻegaꞌaquən, naꞌ bitobi gosəꞌəbian.
\v 8 Naꞌ yebaḻən besəꞌəgoꞌoṉən lao yo šaoꞌ naꞌ blaꞌaquən, naꞌ gosəꞌəchaꞌon naꞌ baḻən gosəꞌəbian šichoa güeɉə, naꞌ yebaḻən gosəꞌəbian gyon güeɉə, naꞌ yebaḻən gosəꞌəbian to gueyoa güeɉə.
\p
\v 9 Nach gož Jesoꞌosənꞌ ḻegaꞌaqueꞌ: —Leꞌe žia nagle deꞌe chene ḻegwzenag.
\s1 Jesoꞌosənꞌ bzeɉniꞌineꞌ bixc̱henꞌ choꞌeleneꞌ beṉəꞌ jempl
\p
\v 10 Naꞌ catəꞌ cuich nitəꞌ beṉəꞌ zan len Jesoꞌosənꞌ, disipl c̱heꞌ caꞌ šižiṉ naꞌ len yeziquəꞌəchlə beṉəꞌ caꞌ zɉəsəꞌənao ḻeꞌ, gosəꞌəṉabeneꞌ ḻeꞌ bi zeɉen jemplənꞌ.
\v 11 Nach gožeꞌ ḻegaꞌaqueꞌ: —Diozənꞌ choneꞌ par nic̱h leꞌe əṉezele deꞌen cui no gwṉeze antslə de que ḻeꞌ ṉabiꞌe con notəꞌətezə beṉəꞌ soeꞌ latɉə. Pero beṉəꞌ yeziquəꞌəchlə choꞌelengaꞌacaꞌaneꞌ jempl c̱hedəꞌ bito chseꞌeɉḻeꞌe c̱hiaꞌ.
\v 12 Chonaꞌ caꞌ par nic̱h yesəꞌəleꞌineꞌ deꞌen chonaꞌ naꞌ bito saꞌacbeꞌineꞌ bi zeɉen, naꞌ par nic̱h əseꞌeneneꞌ xtižaꞌanəꞌ naꞌ cui seꞌeɉniꞌineꞌen, c̱hedəꞌ bazɉənaqueꞌ beṉəꞌ laꞌaždaoꞌ žod. Žaləꞌ bito zɉənaqueꞌ beṉəꞌ laꞌaždaoꞌ žod, gwseꞌeɉniꞌineꞌ bi zeɉen deꞌen chseꞌeneneꞌenəꞌ, naꞌ yesyəꞌədiṉɉeneꞌ xtoḻəꞌəgaꞌaqueꞌenəꞌ naꞌ Diozənꞌ yeziꞌixeneꞌ c̱hegaꞌaqueꞌ.
\s1 Jesoꞌosənꞌ bzeɉniꞌineꞌ bi zeɉe jempl c̱he beṉəꞌ güen trigonꞌ
\p
\v 13 Nach Jesoꞌosənꞌ gožeꞌ ḻegaꞌaqueꞌ: —¿Ebitoṉəꞌ šeɉniꞌile jempl nga? Šə bito cheɉniꞌilenꞌ ¿nacxa šeɉniꞌile jempl caꞌ yeḻaꞌ?
\v 14 Quinganꞌ zeɉen jempl c̱he beṉəꞌ güen trigonꞌ. Xtižəꞌ Diozənꞌ gwxaquəꞌəleben ca deꞌen gozə beꞌenəꞌ.
\v 15 Naꞌ nitəꞌ beṉəꞌ chosoꞌozenagueꞌ xtižəꞌ Diozənꞌ naꞌ ḻeꞌe chžinte Satanasənꞌ deꞌen chnabiaꞌ deꞌe x̱ioꞌ caꞌ chebeɉən xtižəꞌ Diozənꞌ ḻoꞌo yic̱hɉlaꞌaždaogaꞌaqueꞌenəꞌ. Naꞌ chac c̱hegaꞌaqueꞌ canꞌ goquə len trigonꞌ deꞌen ɉəsəꞌəchaz choꞌa nezənꞌ.
\v 16 Naꞌ ḻeczə nitəꞌ beṉəꞌ chosoꞌozenagueꞌ xtižəꞌ Diozənꞌ naꞌ ḻeꞌe chesyəꞌəbeiteineꞌen pero chac c̱hegaꞌaqueꞌ canꞌ goquə len trigonꞌ deꞌen ɉəsəꞌəchaz lao yo deꞌen žia lao yeɉənꞌ.
\v 17 Zɉənaqueꞌ ca to deꞌe cui bi loi chon, šložga chseꞌeɉḻeꞌe c̱he xtižəꞌ Diozənꞌ. Naꞌ catəꞌ chesəꞌəgueꞌi beṉəꞌ ḻegaꞌaqueꞌ naꞌ chosoꞌoc̱hiꞌ chosoꞌosaqueꞌe ḻegaꞌaqueꞌ laogüe deꞌen chseꞌeɉḻeꞌe xtižəꞌ Diozənꞌ, nach ḻeꞌe chesəꞌəbeɉyic̱hɉteꞌen.
\v 18 Naꞌ nitəꞌ beṉəꞌ chosoꞌozenagueꞌ xtižəꞌ Diozənꞌ naꞌ chac c̱hegaꞌaqueꞌ canꞌ goquəꞌ len trigonꞌ deꞌen ɉəsəꞌəchaz lao yo deꞌen nc̱hix̱ə xsa yešəꞌənəꞌ.
\v 19 Chesyəꞌəlaḻ chesyəꞌəžeɉeneꞌ len bi deꞌen chsoꞌoneꞌ naꞌ chseꞌeneneꞌ yesəꞌəniꞌe, naꞌ chesəꞌəzelažeꞌe gatəꞌ bi deꞌen gatəꞌ c̱hegaꞌaqueꞌ c̱hedəꞌ bazɉənx̱oayagueꞌ chsaꞌaqueneꞌ de que naquən deꞌe žialao. Naꞌ deꞌe caꞌ chsoꞌoneꞌenəꞌ chosoꞌoḻoləꞌən xtižəꞌ Diozənꞌ deꞌen bayoꞌo yic̱hɉlaꞌaždaogaꞌaqueꞌenəꞌ, naꞌ deꞌe naꞌanəꞌ cui chsoꞌoneꞌ canꞌ chazlažəꞌ Diozənꞌ.
\v 20 Naꞌ ḻeczə nitəꞌ beṉəꞌ chosoꞌozenagueꞌ xtižəꞌ Diozənꞌ do yic̱hɉ do lažəꞌəgaꞌaqueꞌ, naꞌ chsoꞌoneꞌ yoguəꞌəḻoḻ canꞌ chazlažəꞌ Diozənꞌ. Chac c̱hegaꞌaqueꞌ canꞌ goquə len trigonꞌ deꞌen ɉəsəꞌəchaz lao yo güenṉəꞌ. Baḻən gosəꞌəbian šichoa güeɉə, naꞌ yebaḻən gosəꞌəbian gyon güeɉə, naꞌ yebaḻən gosəꞌəbian to gueyoa güeɉə.
\s1 Jempl c̱he deꞌen choncho len to yiꞌ
\p
\v 21 Nach Jesoꞌosənꞌ beꞌeleneꞌ disipl c̱heꞌ caꞌ yeto jempl, bsaquəꞌəlebeneꞌ deꞌen chsed chloꞌineꞌenəꞌ ca to yiꞌ, gwneꞌ: —Notono no ggualəꞌ to yiꞌ naꞌ gwdoseꞌen to žomə naꞌ nic no gwcuašəꞌən xan xcamei. Syempr chdeꞌe yiꞌinəꞌ ḻeꞌe zeꞌe par nic̱h əgwseꞌeniꞌin ḻoꞌo cuartənꞌ.
\v 22 Guaquə canꞌ na dicho deꞌen na: “Yoguəꞌəḻoḻ deꞌen ngašəꞌ ṉaꞌa, gwžin ža laꞌalaon, naꞌ yoguəꞌəḻoḻ deꞌen cui no gwseꞌeɉniꞌi antslə, ḻeczə gwžin ža seꞌeɉniꞌi beṉəꞌ ḻen.”
\v 23 Leꞌe žia nagle deꞌe chene, ḻegwzenag.
\p
\v 24 Naꞌ ḻeczə gož Jesoꞌosənꞌ ḻegaꞌaqueꞌ: —Ḻeꞌe gon xbab c̱he deꞌen nga chniaꞌ leꞌe. Con canꞌ chzenagle xtižaꞌanəꞌ ḻeczə canꞌ gonaꞌ par nic̱h šeɉniꞌilen, naꞌ caꞌaczə c̱haꞌoxen deꞌen šeɉniꞌile.
\v 25 Šə chzenagle xtižaꞌanəꞌ əgwzeɉniꞌichdaꞌ leꞌe. Pero naꞌ šə bito chzenagle c̱hei, deꞌe daonꞌ baṉezele ganḻažəꞌəlen.
\s1 Jempl c̱he xoaꞌ biṉ
\p
\v 26 Yeḻəꞌ gwnabiaꞌ c̱he Diozənꞌ benꞌ zo yobanꞌ gwxaquəꞌəleben ca deꞌe nga: To beṉəꞌ chɉezeꞌ xoaꞌ biṉnəꞌ lao yežlyo c̱heꞌenəꞌ.
\v 27 Chde naꞌ cheyeɉeꞌ chɉəyetaseꞌ naꞌ catəꞌ chžin or chaseꞌ naꞌ chaseꞌ. Naꞌ caꞌazə chac chesəꞌəde ža caꞌ naꞌ yel caꞌ. Naꞌ chlaꞌac yel daoꞌ caꞌ naꞌ chesəꞌəchaꞌon. Pero bito ṉeze beꞌenəꞌ nac chaquənꞌ chesəꞌəchaꞌo yel daoꞌ caꞌ.
\v 28 Yežlyo naꞌanəꞌ chonən par nic̱h chlaꞌac yel daoꞌ caꞌ naꞌ chesəꞌəchaꞌon naꞌ chəsəꞌəbian zaꞌa nach chaquən yez.
\v 29 Naꞌ catəꞌ babgüiž yezənꞌ, beꞌenəꞌ gozə ḻen chelapeꞌen c̱hedəꞌ banaquə tyemp par chetobeꞌ cwsešənꞌ.
\s1 Yeḻəꞌ gwnabiaꞌ c̱he Diozənꞌ gwxaquəꞌəleben ca xsa moztasənꞌ
\p
\v 30 Nach gwna Jesoꞌosənꞌ: —Ṉaꞌa əgwloꞌidaꞌ leꞌe par nic̱h əṉezele naquənꞌ gwxaquəꞌəlebe yeḻəꞌ gwnabiaꞌ c̱he Diozənꞌ.
\v 31 Gwxaquəꞌəleben ca to xsa moztas deꞌen chaz to beṉəꞌ lao yežlyo c̱heꞌenəꞌ. Xsa moztasənꞌ naquən ḻeꞌebeyožə deꞌe daoꞌ rizəꞌ lao bitəꞌətezəchlə semiy.
\v 32 Pero naꞌ catəꞌ chlaꞌan chchaꞌon naꞌ chaquən to yag chaꞌodaoꞌ naꞌ chesəꞌəchaꞌo xozeꞌe caꞌ xte bia caꞌ zɉəzo x̱ileꞌe chsoꞌon ližgaꞌaquəb ḻoꞌo xozeꞌe caꞌ.
\s1 Jesoꞌosənꞌ bzeɉniꞌineꞌ beṉəꞌ porzə len jempl
\p
\v 33 Jesoꞌosənꞌ bsed bloꞌineꞌ beṉəꞌ zan caꞌ besəꞌəžag ganꞌ zoꞌenəꞌ porzə len jempl ca deꞌe quinga babzoɉaꞌ, bzeɉniꞌineꞌ beṉəꞌ xte ga zelao gwseꞌeɉniꞌineꞌen.
\v 34 Bitobi bichlə gwneꞌ par bzeɉniꞌineꞌ ḻegaꞌaqueꞌ sino porzə len jempl bzeɉniꞌineꞌ ḻegaꞌaqueꞌ. Pero naꞌ disipl c̱heꞌ caꞌ bzeɉniꞌineꞌ ḻegaꞌaqueꞌ clar bi zeɉen to to jempl caꞌ.
\s1 Jesoꞌosənꞌ bcuezeꞌ beꞌ gualənꞌ lao nisdaꞌonəꞌ
\p
\v 35 Naꞌ ḻeꞌe ža ṉaꞌatezə do chxentg catəꞌ Jesoꞌosənꞌ gožeꞌ disipl c̱heꞌ caꞌ: —Eḻaguəꞌəcho yešḻaꞌalə nisdaꞌonəꞌ.
\p
\v 36 Nach disipl c̱heꞌ caꞌ bosyoꞌocuaꞌaṉeꞌ beṉəꞌ caꞌ nitəꞌənəꞌ naꞌ bosoꞌoseꞌe barconꞌ ganꞌ bayoꞌo Jesoꞌosənꞌ. Nach yebaḻə barconꞌ ganꞌ žaꞌ beṉəꞌ caꞌ ɉəsəꞌənaon ḻegaꞌaqueꞌ.
\v 37 Naꞌ lao zda barconꞌ gwzolao gwyec̱hɉ to beꞌ gual lao nisdaꞌonəꞌ. Naꞌ barconꞌ gwyeɉən nil naꞌaḻə por ni c̱he beꞌenəꞌ, naꞌ chas chatəꞌ nisənꞌ xte gwzolao gwyož barconꞌ nisənꞌ.
\v 38 Pero naꞌ Jesoꞌosənꞌ bachtaseꞌ xniꞌate barconꞌ lao to lmad, tant chɉx̱aqueꞌeneꞌ. Nach bosyoꞌosbaneꞌeneꞌ gwseꞌeneꞌ: —¡Maestr! ¿Ebitobi chacdoꞌ deꞌen bac̱h chbiayiꞌichonꞌ?
\p
\v 39 Nach Jesoꞌosənꞌ gwyaseꞌ lao ṉeꞌe chas chatəꞌ nisdaꞌonəꞌ, nach gwdiḻeꞌ beꞌenəꞌ, naꞌ beneꞌ mendad len nisdaꞌonəꞌ gožeꞌen: —Bebeꞌeži.
\p Nach ḻeꞌe besyəꞌəbeꞌežite beꞌenəꞌ len nisdaꞌonəꞌ.
\v 40 Nach Jesoꞌosənꞌ gožeꞌ disipl c̱heꞌ caꞌ: —Bito žeble. Ḻeꞌe šeɉḻeꞌech c̱hiaꞌ.
\p
\v 41 Naꞌ ḻegaꞌaqueꞌ besyəꞌəbanchgüeineꞌ naꞌ gwseꞌ lɉuežɉgaꞌaqueꞌ: —Bitolɉa naquə benga con to beṉac̱hzə, laꞌ ¿nacxa gon to beṉac̱h par yebecžieꞌ beꞌ gualənꞌ len nisdaꞌonəꞌ?
\c 5
\s1 To beṉəꞌ Gadaranꞌ yoꞌo yazeꞌ deꞌe x̱ioꞌ
\p
\v 1 Jesoꞌosənꞌ naꞌ disipl c̱heꞌ caꞌ besəꞌəžineꞌ yešḻaꞌalə nisdaꞌonəꞌ ganꞌ naquə laž beṉəꞌ Gadara caꞌ.
\v 2 Naꞌ catəꞌ bechoɉ Jesoꞌosənꞌ ḻoꞌo barconꞌ, bezaꞌ to beṉəꞌ Gadaranꞌ capsantənꞌ ɉəšagueꞌ ḻeꞌ. Naꞌ beꞌenəꞌ yoꞌo yaz deꞌe x̱ioꞌ caꞌ yic̱hɉlaꞌaždaogüeꞌenəꞌ.
\v 3 Benga con gwzoeꞌ do capsant. Naꞌ notoch no goquə gwc̱heɉ ḻeꞌ ni len do gual nic len gden.
\v 4 Zan las bosoꞌoc̱heɉeꞌ ṉiꞌa neꞌe caꞌ gden, pero syempr deꞌe x̱ioꞌ caꞌ gwsoꞌonən ca bzoxɉ btineꞌ gdenṉəꞌ, naꞌ notono goquə ṉabiaꞌ ḻeꞌ.
\v 5 Do ža do yel gwdeꞌ do lao yaꞌa caꞌ naꞌ do capsantənꞌ bisyeꞌe naꞌ bene cuineꞌ ziꞌ len yeɉ.
\v 6 Naꞌ catəꞌ bleꞌineꞌ zda Jesoꞌosənꞌ zitəꞌələ naꞌ gwsaꞌadoeꞌ ɉəšagueꞌeneꞌ naꞌ bzo xibeꞌen lao Jesoꞌosənꞌ beꞌelaogüeꞌeneꞌ.
\v 7 Nach deꞌe x̱ioꞌ caꞌ yoꞌo yaz yic̱hɉlaꞌaždaogüeꞌenəꞌ gosəꞌəṉen zižɉo gosəꞌənan: —Partlə leꞌ, partlə netoꞌ Jesoꞌos Xiꞌiṉ Dioz benꞌ naquə ḻeꞌezelaogüe beṉəꞌ blao. Diozənꞌ naqueꞌ testigw c̱hetoꞌ chatəꞌəyoitoꞌ leꞌ cui əgwc̱hiꞌ əgwsacoꞌo netoꞌ.
\p
\v 8 Gosəꞌənan caꞌ c̱hedəꞌ Jesoꞌosənꞌ beneꞌ mendad gožeꞌ ḻegaꞌaquən: —Deꞌe x̱ioꞌ ḻeꞌe yechoɉ yic̱hɉlaꞌaždaoꞌ benga.
\p
\v 9 Nach gož Jesoꞌosənꞌ ḻegaꞌaquən: —¿Bi lele?
\p Naꞌ gosəꞌənan: —Legionṉəꞌ letoꞌ c̱hedəꞌ naquə zantoꞌ.
\p
\v 10 Naꞌ beꞌenəꞌ gotəꞌəyoineꞌ Jesoꞌosənꞌ par cui əseḻeꞌe deꞌe x̱ioꞌ caꞌ fuerlə laž beꞌenəꞌ.
\v 11 Naꞌ to yaꞌa deꞌe zo gaḻəꞌəzə chaš beṉəꞌ chosoꞌoyeꞌ coš zan.
\v 12 Naꞌ deꞌe x̱ioꞌ caꞌ gwsaꞌatəꞌəyoin ḻeꞌ gwseꞌen: —Beꞌešga latɉə žɉəyežoꞌotoꞌ yic̱hɉlaꞌaždaoꞌ coš caꞌ.
\p
\v 13 Nach Jesoꞌosənꞌ beꞌe latɉə. Naꞌ besyəꞌəchoɉ deꞌe x̱ioꞌ caꞌ yic̱hɉlaꞌaždaoꞌ beꞌenəꞌ naꞌ ɉəsyəꞌəžoꞌon yic̱hɉlaꞌaždaoꞌ coš caꞌ. Nach besyəꞌədiṉsesəb ḻeꞌe yaꞌanəꞌ naꞌ ɉesyəꞌəxopəb ḻoꞌo nisdaꞌonəꞌ naꞌ gwsaꞌatəb gwseꞌeɉəb nisənꞌ. Naꞌ ca do c̱hopa mil coš canꞌ zɉənaquə.
\p
\v 14 Naꞌ beṉəꞌ caꞌ chosəꞌəyeꞌ coš caꞌ besəꞌəleꞌineꞌ deꞌen bagoquənꞌ naꞌ deꞌen besəꞌəžebchgüeꞌ besaꞌacdoeꞌ nach ɉəsyəꞌədix̱ɉueꞌineꞌ beṉəꞌ laoꞌ syodanꞌ naꞌ beṉəꞌ nitəꞌ do yoba. Naꞌ beṉəꞌ caꞌ catəꞌ gwseꞌeneneꞌ xtižəꞌ beṉəꞌ goye coš caꞌ ɉaꞌaqueꞌ ɉəsəꞌəgüieꞌ deꞌen bagoquənꞌ.
\v 15 Naꞌ catəꞌ besəꞌəžineꞌ ganꞌ zo Jesoꞌosənꞌ besəꞌəleꞌineꞌ beꞌenəꞌ gwyoꞌo gwyaz deꞌe x̱ioꞌ caꞌ yic̱hɉlaꞌaždaogüeꞌenəꞌ, bachiꞌe nyaz xalaneꞌe, naꞌ babezošaoꞌ yic̱hɉlaꞌaždaogüeꞌenəꞌ, naꞌ besəꞌəžebeꞌ deꞌen goquənꞌ.
\v 16 Naꞌ beṉəꞌ caꞌ besəꞌəleꞌi deꞌen goquənꞌ, gwseꞌe beṉəꞌ caꞌ yeḻaꞌ canꞌ beyaque benꞌ gwyoꞌo deꞌe x̱ioꞌ caꞌ yic̱hɉlaꞌaždaogüeꞌenəꞌ naꞌ canꞌ goquə len coš caꞌ.
\v 17 Nach beṉəꞌ caꞌ žaꞌ ganꞌ mbane Gadaranꞌ ɉseꞌetəꞌəyoineꞌ Jesoꞌosənꞌ yezeꞌe lažgaꞌaqueꞌenəꞌ.
\p
\v 18 Naꞌ catəꞌ Jesoꞌosənꞌ beyoꞌe ḻoꞌo barconꞌ par yezeꞌe len disipl c̱heꞌ caꞌ, benꞌ bechoɉ deꞌe x̱ioꞌ caꞌ yic̱hɉlaꞌaždaogüeꞌenəꞌ gotəꞌəyoineꞌ Jesoꞌosənꞌ šeɉleneꞌ ḻeꞌ.
\v 19 Pero Jesoꞌosənꞌ bito beꞌe latɉə, gožeꞌeneꞌ: —Beyeɉ ližoꞌ ganꞌ žaꞌ famiḻy c̱hioꞌ caꞌ naꞌ ɉəyedix̱ɉueꞌigaꞌaqueneꞌ catec deꞌe mbanꞌ baben X̱ancho Diozənꞌ len leꞌ, naꞌ canꞌ bacheyašəꞌ chežiꞌilažeꞌe leꞌ.
\p
\v 20 Nach bezaꞌ beꞌenəꞌ gwzolaogüeꞌ ɉəyedeꞌ yoguəꞌ syoda caꞌ ganꞌ mbane Decapolisənꞌ ɉəyezeneneꞌ catec deꞌe mbanꞌ baben Jesoꞌosənꞌ len ḻeꞌ. Naꞌ yogueꞌe besyəꞌəbaneneꞌ.
\s1 Jesoꞌosənꞌ beyoneꞌ xiꞌiṉ Jaironꞌ naꞌ yeto noꞌolə beṉəꞌ gwdan lao xadoṉ c̱heꞌenəꞌ
\p
\v 21 Naꞌ catəꞌ besḻaguəꞌ Jesoꞌosənꞌ len disipl c̱heꞌ caꞌ yešḻaꞌalə nisdaꞌonəꞌ besyəꞌəchoɉeꞌ ḻoꞌo barconꞌ. Naꞌ besəꞌəžin beṉəꞌ zan ganꞌ niteꞌe choꞌa nisdaꞌonəꞌ, naꞌ besyəꞌəgaꞌaṉeꞌ naꞌazə.
\v 22 Nach bžin to beṉəꞌ le Jairo, naqueꞌ to beṉəꞌ gwnabiaꞌ c̱he yoꞌodaoꞌ c̱he netoꞌ beṉəꞌ Izrael. Naꞌ catəꞌ bleꞌineꞌ Jesoꞌosənꞌ bzo xibeꞌ laogüeꞌenəꞌ.
\v 23 Naꞌ gotəꞌəyoichgüeineꞌ ḻeꞌ, gožeꞌeneꞌ: —Xiꞌiṉaꞌ noꞌolənꞌ bachatboꞌ. Yoꞌošga canoꞌoboꞌ par nic̱h yeyaqueboꞌ naꞌ par nic̱h əbamboꞌ.
\p
\v 24 Nach Jesoꞌosənꞌ txen len disipl c̱heꞌ caꞌ ɉaꞌacleneꞌ beṉəꞌ gwnabianꞌ. Naꞌ beṉəꞌ zan ɉəsəꞌənaogüeꞌ ḻegaꞌaqueꞌ xte bosoꞌoc̱hiꞌižoɉeneꞌ.
\v 25 Naꞌ entr beṉəꞌ caꞌ len to noꞌolə beṉəꞌ bagoc šižiṉ iz chzoeꞌ bguaꞌa.
\v 26 Naꞌ babžaglaogüeꞌ gwyeɉeꞌ lao zan beṉəꞌ güen rmech caꞌ naꞌ babenditɉei zgade xmechenꞌ len ḻegaꞌaqueꞌ naꞌ notono goquə yeyon ḻeꞌ. Con byaḻəꞌəch yižgüeꞌ c̱heꞌenəꞌ.
\v 27 Naꞌ noꞌolənꞌ babeneneꞌ xtižəꞌ Jesoꞌosənꞌ, naꞌ bgüigueꞌe cožəꞌ Jesoꞌosənꞌ ganꞌ zdeꞌ ladɉo beṉəꞌ caꞌ ɉəsəꞌənao ḻeꞌ nach gwdaneꞌ xadoṉ c̱heꞌenəꞌ.
\v 28 Beneꞌ xbab ḻoꞌo yic̱hɉlaꞌaždaogüeꞌenəꞌ, gwneꞌ: —Šə con canaꞌ xadoṉ c̱heꞌenəꞌ, goyacczədaꞌ.
\p
\v 29 Naꞌ ḻeꞌe gwlezte bguaꞌa deꞌen chzoꞌenəꞌ naꞌ gocbeꞌineꞌ de que babeyaqueneꞌ.
\v 30 Nach Jesoꞌosənꞌ ḻeczə gocbeꞌineꞌ de que babeyoneꞌ to beṉəꞌ len yeḻəꞌ guac c̱heꞌenəꞌ, naꞌ gwyec̱hɉeꞌ bgüieꞌ beṉəꞌ caꞌ zɉəsəꞌənao ḻeꞌ, nach gožeꞌ ḻegaꞌaqueꞌ: —¿Nonꞌ bagwdan xadoṉ c̱hiaꞌanəꞌ?
\p
\v 31 Nach disipl c̱heꞌ caꞌ gwseꞌeneꞌ: —Chleꞌidoꞌ nitəꞌ beṉəꞌ zan nga, naꞌ chosoꞌoc̱hiꞌižoɉeꞌ leꞌ. Naꞌ naoꞌ: “¿Nonꞌ gwdan nadaꞌ?”
\p
\v 32 Pero naꞌ Jesoꞌosənꞌ bgüieꞌ yogueꞌe par nic̱h ḻeꞌineꞌ nonꞌ gwdan ḻeꞌ.
\v 33 Naꞌ noꞌolənꞌ deꞌen gocbeꞌineꞌ babeyaqueneꞌ naꞌ do chaž chžebzeꞌ bgüigueꞌe bzo xibenꞌ lao Jesoꞌosənꞌ par gožeꞌeneꞌ doḻoḻ canꞌ bagoc c̱heꞌ.
\v 34 Nach Jesoꞌosənꞌ gožeꞌeneꞌ: —Xiꞌiṉdaoguaꞌa, babeyacdoꞌ c̱hedəꞌ chonḻilažoꞌo nadaꞌ. Beyeɉ to šaoꞌ to güen naꞌ Diozənꞌ goneꞌ par nic̱h cuich gueꞌidoꞌ yižgüenꞌ nac caꞌ.
\p
\v 35 Ṉeꞌe choꞌete Jesoꞌosənꞌ dižəꞌən caꞌ catəꞌ besəꞌəžin beṉəꞌ gwsaꞌac liž Jaironꞌ benꞌ naquə x̱a biꞌi noꞌolənꞌ ɉseꞌežeꞌeneꞌ: —Bagot biꞌi noꞌol daoꞌ c̱hioꞌonəꞌ. Bitoch gondoꞌ maestrənꞌ zed.
\p
\v 36 Pero Jesoꞌosənꞌ bito beneꞌ cas c̱he deꞌenəꞌ ɉež beꞌenəꞌ, con gožeꞌ Jaironꞌ: —Bito žeboꞌ. Con benḻilažəꞌ nadaꞌ.
\p
\v 37 Naꞌ bito beꞌ Jesoꞌosənꞌ latɉə əžɉaꞌaquəch beṉəꞌ caꞌ len ḻeꞌ, sino Bedənꞌ len Jacobənꞌ naꞌ Juan beṉəꞌ bišəꞌ Jacob naꞌazənꞌ ɉaꞌac len ḻeꞌ.
\v 38 Naꞌ catəꞌ besəꞌəžineꞌ liž beṉəꞌ gwnabianꞌ, Jesoꞌosənꞌ bleꞌineꞌ de que beṉəꞌ caꞌ žaꞌ chaꞌašilənꞌ bachsoꞌoneꞌ scaṉdl naꞌ bachesəꞌəbežchgüeꞌ.
\v 39 Nach catəꞌ gwyoꞌe chaꞌašilənꞌ, gožeꞌ ḻegaꞌaqueꞌ: —¿Bixc̱henꞌ bachonḻe scaṉdl naꞌ chbežle? Bito nacboꞌ biꞌi guat, con chtasboꞌonəꞌ.
\p
\v 40 Naꞌ gosəꞌəziꞌic̱hižəꞌ beṉəꞌ caꞌ žaꞌanəꞌ ḻeꞌ. Nach Jesoꞌosənꞌ bebeɉeꞌ yoguəꞌ beṉəꞌ caꞌ žaꞌanəꞌ, naꞌ gwc̱heꞌe x̱axnaꞌ biꞌi guatənꞌ naꞌ beṉəꞌ caꞌ zɉaꞌaclen ḻeꞌ naꞌ gwsoꞌe ḻoꞌo cuartənꞌ ganꞌ deboꞌonəꞌ.
\v 41 Nach bex̱eꞌe naꞌ biꞌi noꞌolə guat daꞌonəꞌ naꞌ boḻgüižeꞌeboꞌ gožeꞌeboꞌ: —Talita comi—, zeɉe dižəꞌ: “Noꞌol daoꞌ, əchniaꞌ leꞌ, beyas.”
\p
\v 42 Nach ḻeꞌe beyaste biꞌi noꞌol daonꞌ naꞌ bedaboꞌ. Nacboꞌ biꞌi šižiṉ ize. Nach x̱axnaꞌaboꞌon len beṉəꞌ caꞌ yeḻaꞌ žaꞌ ḻoꞌo cuartənꞌ besyəꞌəbanchgüeineꞌ.
\v 43 Jesoꞌosənꞌ beneꞌ mendad cui əsoꞌe dižəꞌ canꞌ goquənꞌ, naꞌ ḻeczə beneꞌ mendad len x̱axnaꞌaboꞌon əsoꞌeboꞌ deꞌe gaoboꞌ.
\c 6
\s1 Bežin Jesoꞌosənꞌ Nasaretənꞌ
\p
\v 1 Naꞌ Jesoꞌosənꞌ len disipl c̱heꞌ caꞌ besaꞌaqueꞌ Capernaunṉəꞌ naꞌ ɉəyaꞌaqueꞌ Nasaret ganꞌ gwchaꞌo Jesoꞌosənꞌ.
\v 2 Naꞌ ža dezcanzənꞌ gwyeɉeꞌ yoꞌodaoꞌ c̱he netoꞌ beṉəꞌ Izrael naꞌ gwzolao bsed əbloꞌineꞌ beṉəꞌ. Naꞌ beṉəꞌ zan beṉəꞌ caꞌ gwseꞌeneneꞌ xtižeꞌenəꞌ, besyəꞌəbaneneꞌ naꞌ gwseꞌe lɉuežɉgaꞌaqueꞌ: —¿Nacxa goquənꞌ ṉeze benga yoguəꞌ deꞌen chsed chloꞌineꞌen ža? ¿No bzeɉniꞌi ḻeꞌ deꞌen naquə deꞌe siꞌinṉəꞌ?, naꞌ ¿nac chaquənꞌ choneꞌ miḻagr?
\v 3 Nombiꞌacho benga. Ḻeꞌenəꞌ carpinter xiꞌiṉ Marianꞌ, naꞌ beṉəꞌ bišəꞌ Jacob, naꞌ Jwse, naꞌ Jodas, naꞌ Simon. Nach zaneꞌ caꞌ nitəꞌ lažcho nga.
\p Naꞌ deꞌen gwsoꞌoneꞌ xbab de que Jesoꞌosənꞌ naqueꞌ con to beṉəꞌ gwlaž c̱hegaꞌaqueꞌ, deꞌe naꞌanəꞌ bito gwseꞌeɉḻeꞌe c̱heꞌ.
\v 4 Naꞌ gož Jesoꞌosənꞌ ḻegaꞌaqueꞌ: —Ḻaꞌaṉəꞌəczə beṉəꞌ zan chsoꞌe yeḻəꞌ balaꞌaṉ c̱he beṉəꞌ caꞌ chsoꞌe xtižəꞌ Diozənꞌ, pero beṉəꞌ gwlaž c̱hegaꞌaqueꞌ caꞌ naꞌ famiḻy c̱hegaꞌaqueꞌ caꞌ naꞌ beṉəꞌ caꞌ nitəꞌ ližgaꞌaqueꞌ bito chsoꞌe ḻegaꞌaqueꞌ yeḻəꞌ balaꞌaṉ.
\p
\v 5 Naꞌ laogüe deꞌen cui gwseꞌeɉḻeꞌe c̱he Jesoꞌosənꞌ, bito beneꞌ zan miḻagr Nasaretənꞌ con deꞌe beneꞌ bx̱oa neꞌenəꞌ to c̱hopə beṉəꞌ naꞌ besyəꞌəyaqueneꞌ.
\v 6 Naꞌ bebane Jesoꞌosənꞌ deꞌen cui gwseꞌeɉḻeꞌe c̱heꞌ. Naꞌ gwdechlə gwyeɉeꞌ len disipl c̱heꞌ caꞌ naꞌ bzeɉniꞌineꞌ beṉəꞌ caꞌ žaꞌ yež caꞌ deꞌen zɉəchiꞌ gaḻəꞌəzə.
\s1 Jesoꞌosənꞌ bseḻeꞌe disipl c̱heꞌ caꞌ šižiṉ ɉəsəꞌədix̱ɉuiꞌe xtižeꞌenəꞌ
\p
\v 7 Jesoꞌosənꞌ botobeꞌ disipl c̱heꞌ caꞌ šižiṉ naꞌ bnežɉueꞌ ḻegaꞌaqueꞌ yeḻəꞌ guac par nic̱h əsaꞌaqueꞌ yesyəꞌəbeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ. Naꞌ bseḻeꞌe c̱hopə güeɉəgaꞌaqueꞌ ɉəsəꞌədix̱ɉuiꞌe xtižeꞌenəꞌ.
\v 8 Naꞌ beneꞌ mendad len ḻegaꞌaqueꞌ bitobi əsoꞌox̱eꞌe tnezənꞌ, sino tozə garrot. Gožeꞌ ḻegaꞌaqueꞌ de que bito cheyaḻəꞌ əsoꞌe bsod, ni yet, ni mech.
\v 9 Beꞌe latɉə yosoꞌoleɉeꞌ šcueꞌ yel, naꞌ əsaꞌazeꞌ tozə camis.
\v 10 Naꞌ zeꞌe saꞌaqueꞌ catəꞌ gožeꞌ ḻegaꞌaqueꞌ: —Catəꞌ əžinḻe liž beṉəꞌ yesyəꞌəbei yosoꞌogüialao leꞌe, naꞌatezə sole naꞌ naꞌatezə yesaꞌacle par žɉaꞌacle ga yoblə.
\v 11 Naꞌ gatəꞌətezə əžinḻe ga cui nono yebei əgüialao leꞌe, naꞌ nic yosoꞌozenagueꞌ c̱hele, ḻeꞌe yesaꞌac latɉənꞌ. Naꞌ catəꞌ yesaꞌaclenꞌ, əgwsiꞌiṉs ṉiꞌalenꞌ par yežib bištenꞌ deꞌen gwžianṉəꞌ, nic̱h əgwloꞌile beṉəꞌ caꞌ de que deꞌe malənꞌ chsoꞌoneꞌ cui chosoꞌozenagueꞌ xtižəꞌ Diozənꞌ deꞌen choꞌelenꞌ. Diozənꞌ beneꞌ par nic̱h byiṉɉ yiꞌ naꞌ sofr laoꞌ syoda Sodomanꞌ naꞌ syoda Gomorranꞌ por ni c̱he deꞌen cui bosoꞌozenag beṉəꞌ caꞌ c̱heꞌ. Naꞌ deꞌe ḻi əchniaꞌ leꞌe catəꞌ əžin ža gon Diozənꞌ castigw zeɉḻicaṉe c̱he yoguəꞌ beṉəꞌ caꞌ chsoꞌon deꞌe malənꞌ, beṉəꞌ caꞌ cui yosoꞌogüialao leꞌe yesəꞌəzaquəꞌəziꞌicheꞌ clezə ca beṉəꞌ caꞌ gwnitəꞌ Sodomanꞌ naꞌ Gomorranꞌ.
\p
\v 12 Nach gwsaꞌac disipl caꞌ naꞌ ɉəsəꞌədix̱ɉuiꞌe de que beṉac̱hənꞌ cheyaḻəꞌ yesyəꞌədiṉɉeneꞌ xtoḻəꞌəgaꞌaqueꞌenəꞌ.
\v 13 Naꞌ ḻeczə besyəꞌəbeɉeꞌ zan deꞌe x̱ioꞌ deꞌen zɉəyoꞌo zɉəyaz yic̱hɉlaꞌaždaoꞌ beṉəꞌ naꞌ bosoꞌošoneꞌ set lao cuerp c̱he zan beṉəꞌ caꞌ chsaꞌacšene naꞌ gwsoꞌoneꞌ par nic̱h besyəꞌəyaqueneꞌ.
\s1 Canꞌ goquə got Juan benꞌ bc̱hoa beṉəꞌ nis
\p
\v 14 Naꞌ Erodənꞌ benꞌ chnabiaꞌ beṉəꞌ Galilea caꞌ beneneꞌ dižəꞌ ca naquə yoguəꞌəḻoḻ deꞌe güen deꞌen ben Jesoꞌosənꞌ, laꞌ beṉəꞌ zan gosəꞌəṉezeneꞌ deꞌe caꞌ ben Jesoꞌosənꞌ. Nach gwna Erodənꞌ: —Benganꞌ deꞌe Juanṉəꞌ benꞌ bc̱hoa beṉəꞌ nis. Babebaneꞌ ladɉo beṉəꞌ guat caꞌ, naꞌ deꞌe naꞌanəꞌ chac choneꞌ miḻagr quinga.
\p
\v 15 Nach yebaḻə beṉəꞌ gosəꞌəneꞌ: —Naqueꞌ profet Ḻiazənꞌ benꞌ beꞌ xtižəꞌ Diozənꞌ canaꞌ.
\p Nach yebaḻeꞌ gosəꞌəneꞌ: —Naqueꞌ to profet benꞌ choeꞌ xtižəꞌ Diozənꞌ canꞌ gwsoꞌon deꞌe profet beṉəꞌ caꞌ gwnitəꞌ canaꞌ.
\p
\v 16 Pero catəꞌ bene Erodənꞌ xtižəꞌ beṉəꞌ caꞌ naꞌ gwneꞌ: —Benganꞌ deꞌe Juanṉəꞌ benꞌ benaꞌ mendad gosəꞌəc̱hogueꞌ yeneꞌ, naꞌ ṉaꞌa babebaneꞌ ladɉo beṉəꞌ guat caꞌ.
\p
\v 17-18 Quinga goquə got Juanṉəꞌ. Erodənꞌ bequeꞌe Erodiasənꞌ ca xoꞌoleꞌ, len Erodiasənꞌ naqueꞌ xoꞌolə Lip bišeꞌenəꞌ. Naꞌ Juanṉəꞌ gožeꞌ Erodənꞌ: “Malənꞌ benoꞌ becaꞌo noꞌol c̱he beṉəꞌ bišoꞌonəꞌ par naqueꞌ xoꞌoloꞌ.” Naꞌ deꞌen gož Juanṉəꞌ Erodənꞌ caꞌ, deꞌe naꞌanəꞌ Erodənꞌ beneꞌ mendad gosəꞌəzeneꞌ Juanṉəꞌ naꞌ gosəꞌəgüeꞌeneꞌ ližyanꞌ, naꞌ bosoꞌoc̱heɉeꞌ ṉiꞌa neꞌe caꞌ gden.
\p
\v 19 Erodiasənꞌ gwloꞌolažeꞌe Juanṉəꞌ por ni c̱he deꞌen gožeꞌ Erodənꞌ caꞌ, naꞌ goneꞌeneꞌ goteꞌeneꞌ, pero bito goquə.
\v 20 Erodənꞌ gocbeꞌineꞌ de que Juanṉəꞌ zdaczeꞌ ḻicha naꞌ de que naqueꞌ to beṉəꞌ güen. Deꞌe naꞌanəꞌ bžeb Erodənꞌ goneꞌ mendad soꞌoteꞌ Juanṉəꞌ naꞌ deꞌe naꞌanəꞌ bito beꞌ Erodənꞌ latɉə bi gone noꞌolənꞌ Juanṉəꞌ. Naꞌ ḻaꞌaṉəꞌəczə bitotec gwyeɉniꞌi Erodənꞌ bi deꞌen gwna Juanṉəꞌ, bebeineꞌ bzenagueꞌ xtižeꞌenəꞌ.
\v 21 Pero naꞌ gotəꞌ to latɉə par got Erodiasənꞌ Juanṉəꞌ. Catəꞌən gwyeꞌi Erodənꞌ iz, beneꞌ to lṉi par beṉəꞌ gwnabiaꞌ c̱heꞌ caꞌ, naꞌ par beṉəꞌ gwnabiaꞌ c̱he soḻdad caꞌ, naꞌ par beṉəꞌ blao caꞌ nitəꞌ Galileanꞌ ganꞌ chnabiꞌenəꞌ.
\v 22 Biꞌi noꞌol c̱he Erodiasənꞌ gwyoꞌoboꞌ ḻoꞌo cuart ganꞌ chsaꞌo beṉəꞌ caꞌ naꞌ byaꞌaboꞌ. Naꞌ ḻechguaḻe bebei Erodənꞌ naꞌ len beṉəꞌ caꞌ chsaꞌolen ḻeꞌ txen canꞌ byaꞌaboꞌ. Nach Rei Erodənꞌ gožeꞌeboꞌ: —Gwṉab bitəꞌətezə deꞌen cheꞌendoꞌ naꞌ goṉaꞌan.
\p
\v 23 Naꞌ beneꞌ lyebe len ḻeboꞌ bzoeꞌ jorament de que əgwnežɉueꞌeboꞌ bitəꞌətezə deꞌe əṉabeboꞌ ḻeꞌ ḻaꞌaṉəꞌəczə šə gašɉə ṉasyon ganꞌ chnabieꞌenəꞌ.
\v 24 Nach bechoɉboꞌ naꞌ gožboꞌ xnaꞌaboꞌonəꞌ: —¿Binꞌ əṉabdaꞌaneꞌ goṉeꞌ?
\p Nach xnaꞌaboꞌonəꞌ gožeꞌeboꞌ: —Gwṉabeneꞌ goṉeꞌ leꞌ yic̱hɉ Juanṉəꞌ benꞌ bc̱hoa beṉəꞌ nis.
\p
\v 25 Nach ḻeꞌe beyoꞌoseste biꞌi noꞌolənꞌ ganꞌ chaolen reinꞌ beṉəꞌ caꞌ yeḻaꞌ, naꞌ gožboꞌ reinꞌ: —Beṉ nadaꞌ ṉaꞌatec ṉaꞌa yic̱hɉ Juanṉəꞌ benꞌ bc̱hoa beṉəꞌ nis bžian to lao plat.
\p
\v 26 Nach reinꞌ gwzochgüeꞌ trist catəꞌ beyož gož biꞌi noꞌolənꞌ ḻeꞌ caꞌ, pero naꞌ bac̱hlə bzoeꞌ jorament len ḻeboꞌ lao beṉəꞌ caꞌ zɉənaquə combidənꞌ. Deꞌe naꞌanəꞌ benšazeꞌ canꞌ gwṉabe biꞌi noꞌolənꞌ ḻeꞌ.
\v 27 Nach ḻeꞌe bente reinꞌ mendad šeɉ to soḻdad žɉəc̱hogueꞌ zelao yen Juanṉəꞌ naꞌ əgwžiꞌe yic̱hɉeꞌenəꞌ to lao plat.
\v 28 Nach gwyeɉ soḻdadənꞌ ližya ganꞌ de Juanṉəꞌ ɉəc̱hogueꞌ yeneꞌenəꞌ naꞌ bžiꞌen to lao plat. Nach beyox̱eꞌen ɉəyenežɉueꞌen biꞌi noꞌolənꞌ, naꞌ biꞌi noꞌolənꞌ bnežɉwboꞌon xnaꞌaboꞌon.
\p
\v 29 Catəꞌ gwseꞌene disipl c̱he deꞌe Juanṉəꞌ deꞌen goquənꞌ, ɉəsyəꞌəxiꞌe cuerp c̱heꞌenəꞌ naꞌ ɉəsəꞌəcuašeꞌen.
\s1 Jesoꞌosənꞌ bguaogüeꞌ gueyəꞌ mil beṉəꞌ byo
\p
\v 30 Naꞌ catəꞌ besyəꞌəžin disipl c̱he Jesoꞌosənꞌ ganꞌ zoeꞌenəꞌ gwsoꞌeleneꞌeneꞌ dižəꞌ canꞌ ɉseꞌeneꞌenəꞌ, naꞌ canꞌ ɉəsəꞌədix̱ɉuiꞌe canꞌ na Diozənꞌ.
\v 31 Jesoꞌosənꞌ gožeꞌ ḻegaꞌaqueꞌ: —Ḻeꞌe da, šeɉcho to latɉə ga cui no nḻaꞌ žɉencho šlož dezcanz.
\p Gwneꞌ caꞌ c̱hedəꞌ beṉəꞌ zan chsaꞌaš ganꞌ niteꞌenəꞌ, naꞌ cui goquə latɉə par gao Jesoꞌosənꞌ len disipl c̱heꞌ caꞌ.
\v 32 Nach Jesoꞌosənꞌ len disipl c̱heꞌ caꞌ gwsoꞌe to ḻoꞌo barcw naꞌ gosəꞌəḻagueꞌe nisdaꞌonəꞌ par besəꞌəžineꞌ to latɉə ga cui no nḻaꞌ.
\v 33 Pero beṉəꞌ zan besəꞌəleꞌineꞌ ḻegaꞌaqueꞌ catəꞌən gwsaꞌaqueꞌ, naꞌ besyəꞌəyombiꞌe Jesoꞌosənꞌ. Nach gwsaꞌacdo beṉəꞌ caꞌ žaꞌ yoguəꞌ yež caꞌ zɉəchiꞌ gaḻəꞌəzə əzɉaꞌaqueꞌ zaquəꞌ galənꞌ əžin Jesoꞌosənꞌ len disipl c̱heꞌ caꞌ naꞌ byobəch besəꞌəžineꞌ cle ca Jesoꞌosənꞌ len disipl c̱heꞌ caꞌ.
\v 34 Naꞌ catəꞌ besəꞌəžineꞌ choꞌa nisdaꞌonəꞌ Jesoꞌosənꞌ bleꞌineꞌ beṉəꞌ zan caꞌ naꞌ beyašəꞌəlažeꞌe ḻegaꞌaqueꞌ, c̱hedəꞌ gocbeꞌineꞌ de que zɉənaqueꞌ ca xiləꞌ caꞌ bianꞌ cui no x̱ane de. Naꞌ Jesoꞌosənꞌ bzeɉniꞌineꞌ ḻegaꞌaqueꞌ deꞌe zan.
\v 35 Naꞌ catəꞌ bachex̱ɉw žeꞌenəꞌ gosəꞌəbiguəꞌ disipl c̱heꞌ caꞌ laogüeꞌenəꞌ naꞌ gwseꞌeneꞌ: —Bachaḻ ṉaꞌa naꞌ zocho to latɉə ga cui no nḻaꞌ.
\v 36 Bitobi de c̱he beṉəꞌ quinga par əseꞌeɉ əsaꞌogüeꞌ. Bzeišgueigaꞌaqueneꞌ dižəꞌ nic̱h žɉəyaꞌaqueꞌ yež caꞌ deꞌen zɉəchiꞌ gaḻəꞌəzə par nic̱h žɉəsəꞌəxiꞌe deꞌe seꞌeɉ əsaꞌogüeꞌ.
\p
\v 37 Nach Jesoꞌosənꞌ gožeꞌ ḻegaꞌaqueꞌ: —Ḻeꞌe gwnežɉo deꞌe saꞌogüeꞌ.
\p Naꞌ gwseꞌeneꞌ: —¿Echeꞌendoꞌ šeɉcho žɉəx̱iꞌicho tmil pes yetxtilənꞌ par əgwnežɉwchon əsaꞌo beṉəꞌ quinga?
\p
\v 38 Nach Jesoꞌosənꞌ gožeꞌ ḻegaꞌaqueꞌ: —¿Baḻə yetxtil c̱hechonꞌ de? Ḻeꞌe güiašc.
\p Naꞌ catəꞌ gosəꞌəṉezeneꞌ, gwseꞌeneꞌ: —Gueyəꞌ yetxtil naꞌ c̱hopə beḻ yaꞌa.
\p
\v 39 Nach ben Jesoꞌosənꞌ mendad gosəꞌəbeꞌ beṉəꞌ zan caꞌ lao yixye daquəꞌənəꞌ, x̱oṉɉ güeɉeꞌ.
\v 40 Naꞌ besəꞌədobə to gueyoa güeɉeꞌ naꞌ šiyon güeɉeꞌ gosəꞌəbiꞌe lao daquəꞌənəꞌ.
\v 41 Naꞌ Jesoꞌosənꞌ gwxiꞌe yetxtil caꞌ gueyəꞌ naꞌ beḻ yaꞌa caꞌ c̱hopə, naꞌ bgüieꞌ yobalə beꞌe yeḻəꞌ chox̱cwlen c̱he Diozənꞌ naꞌ bzoxɉeꞌ yetxtilənꞌ. Naꞌ bnežɉueꞌen disipl c̱heꞌ caꞌ par gwsoꞌe c̱he c̱he beṉəꞌ caꞌ. Ḻeczə caꞌ beneꞌ len beḻ yaꞌa caꞌ c̱hopə, naꞌ gwsoꞌe c̱he yoguəꞌ beṉəꞌ caꞌ.
\v 42 Yogueꞌe gwsaꞌogüeꞌen xte ca gwseꞌelɉeneꞌ.
\v 43 Naꞌ pedas yetxtil caꞌ naꞌ beḻ yaꞌanəꞌ besyəꞌəgaꞌaṉ bosyoꞌotobeꞌen, naꞌ gwsaꞌaquən šižiṉ žomə.
\v 44 Naꞌ beṉəꞌ caꞌ gwsaꞌo yetxtilənꞌ naꞌ beḻ yaꞌanəꞌ zɉənaquə gueyəꞌ mil beṉəꞌ byo cui cuent noꞌolə naꞌ cui cuent bidaoꞌ.
\s1 Jesoꞌosənꞌ gwzeꞌe lao nisdaꞌonəꞌ
\p
\v 45 Gwde naꞌ Jesoꞌosənꞌ beneꞌ mendad yesyəꞌəyoꞌo disipl c̱heꞌ caꞌ ḻoꞌo barconꞌ par yesyəꞌəbialaogüeꞌ yesyəꞌəḻagueꞌe yešḻaꞌalə nisdaꞌonəꞌ par yesyəꞌəžineꞌ Betsaidanꞌ, žlac ṉeꞌe begaꞌaṉ ḻeꞌ bzeineꞌ beṉəꞌ zan caꞌ dižəꞌ.
\v 46 Naꞌ catəꞌ beyož bzei Jesoꞌosənꞌ beṉəꞌ caꞌ dižəꞌ, gwloeꞌ to lao yaꞌa par ɉeneꞌ orasyon.
\v 47 Naꞌ catəꞌ goḻ, barconꞌ ganꞌ zesyəꞌəyoꞌo disipl c̱heꞌ caꞌ bazdan gwchoḻte nisdaꞌonəꞌ, naꞌ yetozə Jesoꞌosənꞌ begaꞌaṉeꞌ lao yaꞌanəꞌ.
\v 48 Naꞌ bleꞌineꞌ de que naquən zdebə par yesəꞌəžiguəꞌəcheꞌ barconꞌ c̱hedəꞌ chec̱hɉ beꞌenəꞌ clelə. Naꞌ do šbaḻ beyetɉ Jesoꞌosənꞌ yaꞌanəꞌ naꞌ gwzeꞌe tlao nisdaꞌonəꞌ naꞌ gwyeɉeꞌ galənꞌ zɉaꞌac disipl c̱heꞌ caꞌ. Naꞌ beneꞌ ze te yešḻaꞌalə galənꞌ zɉaꞌaqueꞌ.
\v 49 Pero naꞌ catəꞌ besəꞌəleꞌineꞌ ḻeꞌ zdeꞌ lao nisdaꞌonəꞌ gwsaꞌaqueneꞌ de que naqueꞌ to beṉəꞌ guat, naꞌ gwsoꞌosyeꞌe.
\v 50 Yogueꞌe besəꞌəleꞌineꞌ ḻeꞌ naꞌ besəꞌəžebchgüeꞌ. Pero naꞌ ḻeꞌe boḻgüižteꞌ ḻegaꞌaqueꞌ naꞌ gožeꞌ: —Ḻeyebei, nadaꞌanəꞌ. Bito žeble.
\p
\v 51 Nach beyoꞌe ḻoꞌo barcw c̱hegaꞌaqueꞌenəꞌ naꞌ ḻeꞌe gwlezte beꞌenəꞌ. Naꞌ ḻechguaḻe besyəꞌəbaneneꞌ,
\v 52 laꞌ bito gwsaꞌacbeꞌineꞌ nonꞌ naquə Jesoꞌosənꞌ ḻaꞌaṉəꞌəczə bguaogüeꞌ beṉəꞌ zan caꞌ len gueyəꞌəzə yetxtilənꞌ c̱hedəꞌ ṉezɉənc̱hoḻ yic̱hɉlaꞌaždaogaꞌaqueꞌenəꞌ.
\s1 Jesoꞌosənꞌ beyoneꞌ beṉəꞌ chsaꞌacšene beṉəꞌ nitəꞌ Genesaretənꞌ
\p
\v 53 Naꞌ catəꞌ beyož besyəꞌəḻagueꞌe nisdaꞌonəꞌ, besəꞌəžineꞌ ganꞌ mbane Genesaretənꞌ. Naꞌ besəꞌəchoɉeꞌ barconꞌ naꞌ bosoꞌoc̱heɉeꞌen choꞌa nisdaꞌonəꞌ.
\v 54 Naꞌ zeꞌe besyəꞌəchoɉeꞌ barconꞌ catəꞌəczlə besyəꞌəyombiaꞌ beṉəꞌ caꞌ žaꞌ Genesaretənꞌ Jesoꞌosənꞌ.
\v 55 Naꞌ gwsaꞌašdoeꞌ yoguəꞌ yež caꞌ zɉəc̱hiꞌ doxen ganꞌ mbane Genesaretənꞌ, naꞌ gosəꞌəc̱heꞌe yoguəꞌ beṉəꞌ caꞌ chsaꞌacšene zɉəx̱oatezeꞌ lao xcamgaꞌaqueꞌenəꞌ par ɉsoꞌeneꞌ ganꞌ gwseꞌeneneꞌ rson zo Jesoꞌosənꞌ.
\v 56 Naꞌ gatəꞌətezə gwyeɉ Jesoꞌosənꞌ šə laoꞌ syoda, o šə laoꞌ yež caꞌ, con bosoꞌoniteꞌe beṉəꞌ caꞌ chsaꞌacšene do choꞌa nezənꞌ naꞌ gwsaꞌatəꞌəyoineꞌ Jesoꞌosənꞌ šə güeꞌe latɉə yesəꞌəganeꞌ ḻachga lox xadoṉ c̱heꞌenəꞌ. Naꞌ yoguəꞌ beṉəꞌ caꞌ gosəꞌəgan ḻen besyəꞌəyaqueneꞌ.
\c 7
\s1 Deꞌe mal deꞌen chc̱hoɉ yic̱hɉlaꞌaždaꞌochonꞌ chonən manch laꞌaždaꞌochonꞌ
\p
\v 1 Baḻə beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwsaꞌaqueꞌ Jerosalenṉəꞌ naꞌ besəꞌəžineꞌ ganꞌ zo Jesoꞌosənꞌ.
\v 2 Naꞌ catəꞌ besəꞌəleꞌineꞌ de que baḻə disipl c̱he Jesoꞌosənꞌ bito bosyoꞌoneꞌe zan las zeꞌe saꞌogüeꞌ, naꞌ gwsaꞌogüeꞌ xya contr disipl caꞌ lao Jesoꞌosənꞌ.
\v 3 Ca naquə costombr c̱he yoguəꞌ netoꞌ beṉəꞌ Izrael naꞌ mazəchlə c̱he beṉəꞌ fariseo caꞌ beṉəꞌ caꞌ ḻeczə zɉənaquə beṉəꞌ gwlaž c̱hetoꞌ, bito chsaꞌogüeꞌ šə cuiṉəꞌ yosyoꞌoneꞌe zan las, laꞌ canꞌ naquə costombr deꞌen gosəꞌənao deꞌe x̱axtaꞌotoꞌ caꞌ.
\v 4 Catəꞌ chɉaꞌaqueꞌ ganꞌ chac yaꞌanəꞌ naꞌ catəꞌ chesyəꞌəžineꞌ ližgaꞌaqueꞌ bito chsaꞌogüeꞌ xte catəꞌəch bagwsaꞌa gosəꞌəyib cuingaꞌaqueꞌ. Naꞌ dech deꞌe zan costombr deꞌe chəsəꞌənaogüeꞌ ca deꞌen chsoꞌoneꞌ xiꞌilažəꞌ tas plat c̱hegaꞌaqueꞌ caꞌ naꞌ yesəꞌ de ya, naꞌ no mes c̱hegaꞌaqueꞌ segon canꞌ na costombr golənꞌ.
\v 5 Deꞌe naꞌanəꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwseꞌe Jesoꞌosənꞌ: —¿Bixc̱henꞌ disipl c̱hioꞌ caꞌ bito chesəꞌənaogüeꞌ costombr caꞌ deꞌen bosyoꞌocuaꞌaṉlen deꞌe x̱axtaꞌocho caꞌ chioꞌo? ¿Bixc̱henꞌ cui chosyoꞌoneꞌe zan las antslə zeꞌe saꞌogüeꞌ canꞌ chontoꞌ?
\p
\v 6 Nach Jesoꞌosənꞌ gožeꞌ ḻegaꞌaqueꞌ: —Naquən deꞌe ḻi canꞌ bzoɉ deꞌe profet Isaiazənꞌ benꞌ beꞌ xtižəꞌ Diozənꞌ canaꞌ c̱he leꞌe beṉəꞌ gox̱oayag. Bzoɉeꞌen nan:
\q1 Beṉəꞌ Izrael caꞌ chəsəꞌəneꞌ de que nadaꞌ Diozənꞌ chsoꞌelaogüeꞌe
\q1 pero ḻoꞌo yic̱hɉlaꞌaždaogaꞌaqueꞌenəꞌ chesəꞌəgueꞌineꞌ nadaꞌ.
\q1
\v 7 Bitobi zeɉen deꞌen chəsəꞌəneꞌ chsoꞌelaogüeꞌe nadaꞌ,
\q1 c̱hedəꞌ laꞌ chosoꞌosed chosoꞌoloꞌineꞌ beṉəꞌ costombr deꞌen gwsaꞌalɉlažəꞌ beṉac̱hənꞌ.
\m
\v 8 Leꞌe chbeɉyic̱hɉle deꞌen non Diozənꞌ mendad gonḻe naꞌ con naozechle costombr golə deꞌen əbx̱e beṉac̱hənꞌ, ca deꞌen chiꞌichgua yic̱hɉle cheyible no yesəꞌ naꞌ no tas plat c̱hele zan las zeꞌe gwc̱hinḻen naꞌ chiꞌichgua yic̱hɉle gonḻe deꞌe zan deꞌe zɉənac caꞌ.
\p
\v 9 Naꞌ gozeꞌe Jesoꞌosənꞌ ḻegaꞌaqueꞌ: —¿Echaquele güenchguanꞌ chonḻe chbeɉyic̱hɉle deꞌen non Diozənꞌ mendad gonḻe parzə nic̱h naole costombr c̱helenꞌ?
\v 10 Leꞌe nale de que chzenagle c̱he deꞌen bzoɉ deꞌe Moisezənꞌ. Deꞌe Moisezənꞌ bzoɉeꞌ canꞌ gož Diozənꞌ ḻeꞌ, nan: “Ḻeꞌe gwnežɉo yeḻəꞌ balaꞌaṉ x̱axnaꞌale.” Naꞌ ḻeczə bzoɉeꞌ: “Notəꞌətezle šə chžia chnitəꞌəle x̱axnaꞌale cheyaḻəꞌ gatle.”
\v 11 Pero naꞌ leꞌe nale de que notəꞌətezə beṉəꞌ guac yeꞌe x̱axneꞌenəꞌ: “Bitoch gaquəlenaꞌ leꞌe c̱hedəꞌ yoguəꞌ mech o bien deꞌen naquə goṉaꞌ par gaquəlenaꞌ leꞌe naquən Corban” (zeɉe dižəꞌ naquən c̱he Diozənꞌ).
\v 12 Naꞌ šə caꞌ yeꞌe x̱axnaꞌ beꞌenəꞌ, ḻeꞌe natele de que bitoch cheyaḻəꞌ gaquəleneꞌ x̱axneꞌenəꞌ.
\v 13 Naꞌ deꞌen naozechle costombr golə c̱hele deꞌen nale naquə deꞌe žialaoch, bachonḻe ḻei c̱he Diozənꞌ ca to deꞌe cui bi bi zaqueꞌe. Naꞌ deꞌe zan deꞌe zɉənaquə ca deꞌe quinga chonḻe.
\p
\v 14 Nach Jesoꞌosənꞌ boḻgüižeꞌ beṉəꞌ caꞌ zɉənžaguənꞌ par gosəꞌəbigueꞌe laogüeꞌenəꞌ, naꞌ gožeꞌ ḻegaꞌaqueꞌ: —Yoguəꞌəle ḻeꞌe gwzenag deꞌen nga əṉiaꞌ leꞌe nic̱h šeɉniꞌilen.
\v 15 Bito ṉacho de que deꞌen cheꞌeɉ chaochonꞌ chonən manch laꞌaždaochonꞌ. Deꞌe mal deꞌen chchoɉ yic̱hɉlaꞌaždaꞌolenꞌ ḻenṉəꞌ chonən manch laꞌaždaꞌolenꞌ.
\v 16 Leꞌe žia nagle deꞌe chene, ḻegwzenag.
\p
\v 17 Catəꞌ bezaꞌ Jesoꞌosənꞌ ganꞌ nitəꞌ beṉəꞌ caꞌ naꞌ beyoꞌe ližeꞌenəꞌ disipl c̱heꞌ caꞌ gosəꞌəṉabeneꞌ ḻeꞌ bi zeɉen jemplənꞌ.
\v 18 Nach gožeꞌ ḻegaꞌaqueꞌ: —¿Eḻezə lenḻe bito cheɉniꞌile de que deꞌen cheꞌeɉ chaochonꞌ bito gaquə gonən manch laꞌaždaꞌochonꞌ?
\v 19 Deꞌen cheꞌeɉ chaochonꞌ bito choꞌon yic̱hɉlaꞌaždaꞌochonꞌ sino que chɉc̱heꞌen ḻoꞌo ḻeꞌechonꞌ naꞌ chžin or cheden.
\p (Canꞌ gwneꞌ bloꞌe de que yoguəꞌ yeḻəꞌ guaonꞌ zɉənaquən güen par gaochon.)
\v 20 Naꞌ gwneꞌ: —Deꞌen chchoɉ yic̱hɉlaꞌaždaꞌolenꞌ ḻenṉəꞌ chonən manch laꞌaždaꞌolenꞌ.
\v 21 Naꞌ ḻoꞌo yic̱hɉlaꞌaždaoꞌ beṉac̱h naꞌanəꞌ chchoɉ yoguəꞌ xbab mal quinga, ca deꞌen nan yesəꞌəgoꞌo xtogaꞌaqueꞌ naꞌ yesəꞌəbeɉyic̱hɉeꞌ noꞌol c̱hegaꞌaqueꞌ o beꞌen c̱hegaꞌaqueꞌ par yesyəꞌəzoleneꞌ beṉəꞌ yoblə, naꞌ ca deꞌen nan soꞌoteꞌ beṉəꞌ.
\v 22 Naꞌ ḻeczə ḻoꞌo yic̱hɉlaꞌaždaoꞌ beṉac̱h naꞌanəꞌ chchoɉ xbab mal deꞌen nan yesəꞌəbangaꞌaqueꞌ bi deꞌe de c̱he beṉəꞌ, naꞌ yesəꞌəzelažeꞌe bi deꞌe de c̱he beṉəꞌ, naꞌ soꞌoneꞌ deꞌe mal, naꞌ yesəꞌəx̱oayagueꞌ beṉəꞌ, naꞌ soꞌonḻeneꞌ cuerp c̱hegaꞌaqueꞌenəꞌ deꞌen naquə deꞌe yeḻəꞌ ztoꞌ, naꞌ saꞌacxiꞌi lɉuežɉgaꞌaqueꞌ, naꞌ yosoꞌožia yosoꞌoniteꞌe lɉuežɉgaꞌaqueꞌ, naꞌ saꞌalažeꞌe naꞌ nan soꞌoneꞌ deꞌen cui zaqueꞌe.
\v 23 Yoguəꞌ deꞌe mal caꞌ deꞌen zɉənac caꞌ chchoɉən yic̱hɉlaꞌaždaoꞌ beṉəꞌ, naꞌ chac manch laꞌaždaꞌogaꞌaqueꞌenəꞌ.
\s1 To noꞌolə cui naqueꞌ beṉəꞌ Izrael chonḻilažeꞌe Jesoꞌosənꞌ
\p
\v 24 Bezaꞌ Jesoꞌosənꞌ latɉənꞌ len disipl c̱heꞌ caꞌ par ɉaꞌaqueꞌ gaḻəꞌəzə ganꞌ mbane Tiro naꞌ Sidon. Naꞌ gwsoꞌe to ḻoꞌo yoꞌo naꞌ bito goneꞌe Jesoꞌosənꞌ no əṉeze ganꞌ niteꞌenəꞌ, pero biaꞌaczə bito goquə yesəꞌəcuašəꞌ cuingaꞌaqueꞌ.
\v 25-26 Naꞌ zo to noꞌolə Sirofenisia beṉəꞌ chšil dižəꞌ griego naꞌ zo to biꞌi noꞌol c̱heꞌ yoꞌo yaz deꞌe x̱ioꞌon yic̱hɉlaꞌaždaꞌoboꞌonəꞌ. Naꞌ lgüegwzə bene noꞌolənꞌ rson ganꞌ zo Jesoꞌosənꞌ, naꞌ gwyeɉeꞌ bzo xibeꞌ lao Jesoꞌosənꞌ. Naꞌ gotəꞌəyoineꞌ Jesoꞌosənꞌ yebeɉeꞌ deꞌe x̱ioꞌ caꞌ yoꞌo yaz yic̱hɉlaꞌaždaoꞌ xiꞌiṉeꞌ noꞌolənꞌ.
\v 27 Pero naꞌ Jesoꞌosənꞌ gožeꞌeneꞌ: —Cheyaḻəꞌ güeꞌecho latɉə zguaꞌatec əsaꞌo biꞌi c̱hecho caꞌ naꞌ techlə əgguao xicoꞌochonꞌ, c̱hedəꞌ bito naquən güen yecaꞌacho yeḻəꞌ guao c̱he xiꞌiṉchonꞌ naꞌ əgwnežɉwchon gao xicoꞌochonꞌ.
\p
\v 28 Naꞌ gocbeꞌi noꞌolənꞌ bsaquəꞌəlebe Jesoꞌosənꞌ beṉəꞌ caꞌ cui zɉənaquə beṉəꞌ Izrael ca becoꞌ, nach gožeꞌeneꞌ: —Ḻeiczədonꞌ X̱anaꞌ. Pero xicoꞌocho caꞌ bianꞌ nitəꞌ xan mesənꞌ guaquə əsaꞌob pedas yeḻəꞌ guaonꞌ deꞌen chosoꞌosan xiꞌiṉcho caꞌ lao yonꞌ.
\p
\v 29 Nach Jesoꞌosənꞌ gožeꞌeneꞌ: —Noꞌolə, güenchguanꞌ bagwnaoꞌ. Guaquə yeyeɉoꞌ ližoꞌ. Babechoɉ deꞌe x̱ioꞌ deꞌen gwyoꞌo gwyaz yic̱hɉlaꞌaždaoꞌ xiꞌiṉoꞌonəꞌ.
\p
\v 30 Naꞌ catəꞌ bežin noꞌolənꞌ ližeꞌenəꞌ, xiꞌiṉeꞌenəꞌ deboꞌ lao xcamboꞌonəꞌ naꞌ babechoɉ deꞌe x̱ioꞌonəꞌ gwyoꞌo gwyaz yic̱hɉlaꞌaždaꞌoboꞌonəꞌ.
\s1 Jesoꞌosənꞌ beyoneꞌ to beṉəꞌ ncuež nagueꞌ naꞌ ḻeczə bito goquə əṉeꞌ binḻo
\p
\v 31 Gwde naꞌ Jesoꞌosənꞌ len disipl c̱heꞌ caꞌ besaꞌaqueꞌ latɉənꞌ ganꞌ mbane Tiro naꞌ besyəꞌədieꞌ ganꞌ mbane Sidonṉəꞌ naꞌ yež caꞌ zɉəchiꞌ ganꞌ mbane Decapolis par besyəꞌəžineꞌ nisdaoꞌ Galileanꞌ.
\v 32 Naꞌ gaḻəꞌəzə nisdaꞌonəꞌ besyəꞌəžagueꞌ beṉəꞌ caꞌ zɉənc̱heꞌe to beṉəꞌ cuež naꞌ ḻeczə bito goquə əṉeꞌ binḻo, naꞌ gwsaꞌatəꞌəyoineꞌ Jesoꞌosənꞌ əx̱oa neꞌenəꞌ beꞌenəꞌ par nic̱h yeyaqueneꞌ.
\v 33 Jesoꞌosənꞌ gwc̱heꞌeneꞌ partlə ganꞌ cui no beṉəꞌ nitəꞌ naꞌ bzeb xbeneꞌenəꞌ ḻoꞌo nag beꞌenəꞌ c̱hopə ḻaꞌa, naꞌ btop x̱eneꞌenəꞌ xbeneꞌenəꞌ nach gwdaneꞌ ložəꞌ beꞌenəꞌ.
\v 34 Nach Jesoꞌosənꞌ bgüieꞌ yobalə, naꞌ gwcuaꞌalažeꞌe gwneꞌ: —¡Efata! —zeɉe dižəꞌ “¡Byalɉo!”.
\p
\v 35 Nach byalɉo nag beꞌenəꞌ, naꞌ ḻeczə ložeꞌenəꞌ beyaquen, naꞌ goc gwṉeꞌ binḻo.
\v 36 Naꞌ Jesoꞌosənꞌ beneꞌ mendad len beṉəꞌ caꞌ cui soꞌe dižəꞌ c̱he deꞌen babeneꞌ, pero mazəchlə gwsoꞌoneꞌ gwsoꞌe dižəꞌ c̱hei.
\v 37 Naꞌ ḻechguaḻe besyəꞌəbane beṉəꞌ caꞌ naꞌ gwseꞌe lɉuežɉgaꞌaqueꞌ: —Chac choneꞌ yoguəꞌəḻoḻ naꞌ yoguəꞌ deꞌen choneꞌ choneꞌen binḻo. Choneꞌ par nic̱h chesyəꞌəyene beṉəꞌ cuež caꞌ naꞌ par nic̱h chesyəꞌəṉe beṉəꞌ mod caꞌ.
\c 8
\s1 Jesoꞌosənꞌ bguaogüeꞌ tapa mil beṉəꞌ
\p
\v 1 Naꞌ goquənꞌ besəꞌəžag beṉəꞌ zan ganꞌ zo Jesoꞌosənꞌ, naꞌ bito bi de c̱hegaꞌaqueꞌ par əsaꞌogüeꞌ. Nach Jesoꞌosənꞌ goxeꞌ disipl c̱heꞌ caꞌ naꞌ gožeꞌ ḻegaꞌaqueꞌ:
\v 2 —Ḻechguaḻe cheyašəꞌədaꞌ beṉəꞌ quinga. Bagoc šoṉə ža niteꞌe nga len chioꞌo, naꞌ bitobi de deꞌe əsaꞌogüeꞌ.
\v 3 Šə yosaꞌagaꞌacaꞌaneꞌ sin cui bi əgwnežɉuaꞌ əsaꞌogüeꞌ, gosyəꞌəc̱hoḻeneꞌ tnezənꞌ, laꞌ baḻeꞌ zaꞌaqueꞌ zitəꞌ.
\p
\v 4 Nach disipl c̱heꞌ caꞌ gwseꞌeneꞌ: —Ganꞌ zocho nga naquən to latɉə ga cui nono nḻaꞌ. ¿Gaxa əželecho deꞌe əsaꞌo yoguəꞌ beṉəꞌ zan quinganꞌ?
\p
\v 5 Nach Jesoꞌosənꞌ gožeꞌ ḻegaꞌaqueꞌ: —¿Baḻə yetxtil c̱hechonꞌ de?
\p Nach gwseꞌeneꞌ: —Gažən.
\p
\v 6 Nach Jesoꞌosənꞌ beneꞌ mendad yesəꞌəbeꞌ beṉəꞌ caꞌ lao yonꞌ. Naꞌ bex̱eꞌe yetxtil daoꞌ caꞌ gažə naꞌ beꞌe yeḻəꞌ chox̱cwlen c̱he Diozənꞌ. Nach bzoxɉeꞌen bnežɉueꞌen disipl c̱heꞌ caꞌ par gwsoꞌe c̱he yoguəꞌ beṉəꞌ caꞌ.
\v 7 Naꞌ ḻeczə de to c̱hopə beḻ yaꞌa daoꞌ, naꞌ Jesoꞌosənꞌ beꞌe yeḻəꞌ chox̱cwlen c̱he Diozənꞌ por ḻegaꞌaquəb, nach beneꞌ mendad len disipl c̱heꞌ caꞌ əsoꞌe c̱he c̱he beṉəꞌ caꞌ.
\v 8 Naꞌ yogueꞌe gwsaꞌogüeꞌ xte ca gwseꞌelɉeneꞌ. Nach pedas caꞌ deꞌen besyəꞌəgaꞌaṉnəꞌ bosyoꞌotobə disipl caꞌ ḻen, naꞌ gwsaꞌaquən gažə žomə.
\v 9 Naꞌ beṉəꞌ caꞌ gwsaꞌo yetxtilənꞌ len beḻ yaꞌanəꞌ zɉənaquə do tapa mileꞌ. Gwde naꞌ bosaꞌ Jesoꞌosənꞌ ḻegaꞌaqueꞌ.
\v 10 Nach ḻeꞌ gwyoꞌe to ḻoꞌo barcw len disipl c̱heꞌ caꞌ naꞌ ɉaꞌaqueꞌ distrit ganꞌ nziꞌ Dalmanota.
\s1 Beṉəꞌ fariseo caꞌ gosəṉabeneꞌ Jesoꞌosənꞌ goneꞌ to deꞌe yesəꞌəleꞌineꞌ ḻeꞌe yobanꞌ
\p
\v 11 Naꞌ besəꞌəžin baḻə beṉəꞌ fariseo ganꞌ zo Jesoꞌosənꞌ naꞌ gwzolao gwsaꞌacyožeꞌeneꞌ. Naꞌ gosəꞌəṉabeneꞌ ḻeꞌ goneꞌ to miḻagr deꞌe yesəꞌəleꞌineꞌ ḻeꞌe yobanꞌ gwsaꞌaqueneꞌ šə cui gaquə goneꞌenṉəꞌ.
\v 12 Jesoꞌosənꞌ gwcuaꞌalažeꞌe naꞌ gožeꞌ ḻegaꞌaqueꞌ: —Ḻeꞌe mbanḻe ṉaꞌa chṉable gonaꞌ to deꞌe leꞌile ḻeꞌe yobanꞌ par nic̱h əṉezele šə Diozənꞌ bseḻeꞌe nadaꞌ. Pero deꞌe ḻi chniaꞌ, leꞌe, bitobi bi gonaꞌ deꞌe leꞌile ḻeꞌe yobanꞌ.
\p
\v 13 Naꞌ beyož gwna Jesoꞌosənꞌ caꞌ bezeꞌe len disipl c̱heꞌ caꞌ ganꞌ nitəꞌ beṉəꞌ caꞌ, naꞌ besyəꞌəyoꞌe ḻoꞌo barconꞌ naꞌ besyəꞌəḻagueꞌe yešḻaꞌalə nisdaꞌonəꞌ.
\s1 Deꞌen chsed chloꞌi beṉəꞌ fariseo caꞌ gwxaquəꞌəleben ca xnaꞌ cuazinꞌ
\p
\v 14 Naꞌ disipl c̱heꞌ caꞌ gwsaꞌacbeꞌineꞌ de que gwsaꞌanḻažeꞌe əsoꞌox̱eꞌe yetxtil deꞌen əsaꞌogüeꞌ. Toga yetxtilənꞌ de c̱hegaꞌaqueꞌ ḻoꞌo barconꞌ.
\v 15 Nach Jesoꞌosənꞌ beneꞌ mendad len ḻegaꞌaqueꞌ gožeꞌ: —Ḻegapə cuidad len xnaꞌ cuazi c̱he beṉəꞌ fariseo caꞌ naꞌ c̱he beṉəꞌ caꞌ chsoꞌon txen len Erodənꞌ.
\p
\v 16 Pero disipl c̱heꞌ caꞌ bito gwseꞌeɉniꞌineꞌ bi zeɉen deꞌen gožeꞌ ḻegaꞌaqueꞌ caꞌ, nach gwseꞌ ḻɉuežɉgaꞌaqueꞌ: —Gwneꞌ caꞌ c̱hedəꞌ gonḻažəꞌəcho guaꞌacho yetxtilənꞌ.
\p
\v 17 Jesoꞌosənꞌ gocbeꞌineꞌ canꞌ gwseꞌe lɉuežɉgaꞌaqueꞌ, nach gožeꞌ ḻegaꞌaqueꞌ: —¿Bixc̱henꞌ chonḻe xbab c̱he yetxtilənꞌ deꞌen gonḻažəꞌəlenꞌ? ¿Ecabiṉəꞌ šeɉniꞌile bi zeɉe deꞌen gwniaꞌ leꞌe? ¿ənaꞌ bito chonḻe xbab c̱hei? ¿Ebiaꞌaczə ṉeꞌe nc̱hoḻ yic̱hɉlaꞌaždaꞌolenꞌ?
\v 18 ¿Ebito chleꞌile deꞌen chonaꞌ? naꞌ ¿əbito chenele deꞌen chzeɉniꞌidaꞌ leꞌe? ¿Ebito zaꞌalažəꞌəle miḻagr deꞌen babenaꞌ?
\v 19 Catəꞌən bguaoguaꞌ gueyaꞌa mil beṉəꞌ byo len gueyəꞌəzə yetxtil daoꞌ ¿baḻə žomə pedas yetxtilənꞌ botoble deꞌen besyəꞌəgaꞌaṉ?
\p Nach gwseꞌeneꞌ: —Šižiṉ žomənꞌ.
\p
\v 20 Naꞌ gozna Jesoꞌosənꞌ: —Catəꞌ bguaoguaꞌ tapa mil beṉəꞌ byo len gažə yetxtil ¿baḻə žomə pedas yetxtil caꞌ botoble deꞌen besyəꞌəgaꞌaṉ?
\p Nach gwseꞌeneꞌ: —Gažə žomən.
\p
\v 21 Nach gožeꞌ ḻegaꞌaqueꞌ: —¿Ebiaꞌaczə bitoṉəꞌ šeɉniꞌile bi zeɉen deꞌen gwniaꞌ leꞌe?
\s1 Jesoꞌosənꞌ beyoneꞌ ɉelao to beṉəꞌ lc̱hoḻ yež deꞌen nziꞌ Betsaida
\p
\v 22 Gwde deꞌe caꞌ besəꞌəžineꞌ Betsaidanꞌ. Naꞌ beṉəꞌ Betsaida caꞌ ɉsoꞌe to beṉəꞌ lc̱hoḻ lao Jesoꞌosənꞌ, naꞌ gwsaꞌatəꞌəyoineꞌ ḻeꞌ caneꞌeneꞌ par nic̱h yeleꞌineꞌ.
\v 23 Naꞌ Jesoꞌosənꞌ bex̱eꞌe naꞌ beꞌenəꞌ naꞌ gwc̱heꞌeneꞌ fuerlə yežənꞌ naꞌ gwdeb x̱eneꞌenəꞌ ɉlao beꞌenəꞌ nach gwdaneꞌeneꞌ. Nach gwṉabeneꞌ ḻeꞌ šə bachac leꞌineꞌ latəꞌ.
\v 24 Beṉəꞌ lc̱hoḻənꞌ bgüieꞌ naꞌ gožeꞌ Jesoꞌosənꞌ: —Chleꞌidaꞌ beṉəꞌ canꞌ chleꞌicho yag caꞌ, pero chesəꞌədeꞌ.
\p
\v 25 Nach Jesoꞌosənꞌ gwdaneꞌ ɉlao beꞌenəꞌ deꞌe yoblə, nach beꞌenəꞌ bgüiayaṉeꞌe, naꞌ beyaque ɉelaogüeꞌenəꞌ naꞌ beleꞌineꞌ binḻo.
\v 26 Nach Jesoꞌosənꞌ gožeꞌeneꞌ: —Bito šeɉoꞌ laoꞌ yežənꞌ, naꞌ nic no yoꞌo canꞌ babenaꞌ len leꞌ.
\p Naꞌ boseꞌeneꞌ beyeɉ ližeꞌenəꞌ.
\s1 Bedənꞌ gwneꞌ c̱he Jesoꞌosənꞌ de que Diozənꞌ bseḻeꞌeneꞌ par gaquəleneꞌ beṉəꞌ caꞌ bagwleɉeꞌ par zɉənaqueꞌ ṉasyon c̱heꞌenəꞌ
\p
\v 27 Naꞌ Jesoꞌosənꞌ len disipl c̱heꞌ caꞌ gwsaꞌaqueꞌ ɉaꞌaqueꞌ yež caꞌ deꞌen zɉəchiꞌ ganꞌ mbane Sesarea de Filipo. Naꞌ lao zɉaꞌaqueꞌ tnezənꞌ Jesoꞌosənꞌ gožeꞌ disipl c̱heꞌ caꞌ: —¿Bi chesəꞌəna beṉəꞌ, nonꞌ nacaꞌ nadaꞌ?
\p
\v 28 Nach gwseꞌeneꞌ: —Baḻeꞌ chesəꞌəneꞌ de que nacoꞌ deꞌe Juan benꞌ bc̱hoa beṉəꞌ nis. Naꞌ yebaḻeꞌ chesəꞌəneꞌ de que nacoꞌ profet Ḻiaz benꞌ beꞌ xtižəꞌ Diozənꞌ canaꞌ. Naꞌ yebaḻeꞌ chesəꞌəneꞌ de que nacoꞌ yeto profet beṉəꞌ ḻeczə beꞌ xtižəꞌ Diozənꞌ canaꞌ.
\p
\v 29 Nach gožeꞌ ḻegaꞌaqueꞌ: —¿C̱hexa leꞌe? ¿bi nale nonꞌ nacaꞌ nadaꞌ?
\p Nach Bedənꞌ gožeꞌeneꞌ: —Leꞌ nacoꞌ Cristənꞌ benꞌ gwleɉ Diozənꞌ par gaquəlenoꞌ netoꞌ bagwleɉeꞌ par naquətoꞌ ṉasyon c̱heꞌenəꞌ.
\p
\v 30 Nach Jesoꞌosənꞌ beneꞌ mendad len ḻegaꞌaqueꞌ de que ni toeꞌ cui əsoꞌe dižəꞌ de que ḻenꞌ naqueꞌ Cristənꞌ benꞌ gwleɉ Diozənꞌ par gaquəleneꞌ beṉəꞌ caꞌ zɉənaquə ṉasyon c̱heꞌenəꞌ.
\s1 Jesoꞌosənꞌ gwdix̱ɉueꞌineꞌ disipl c̱heꞌ caꞌ de que gateꞌ
\p
\v 31 Nach gwzolao Jesoꞌosənꞌ bsed bloꞌineꞌ disipl c̱heꞌ caꞌ. Naꞌ bzeneneꞌ ḻegaꞌaqueꞌ de que deꞌe zan cheyaḻəꞌ c̱hiꞌ saquəꞌ ḻeꞌ naqueꞌ benꞌ bseḻəꞌ Diozənꞌ golɉeꞌ beṉac̱h. Naꞌ gwneꞌ de que beṉəꞌ golə beṉəꞌ blao c̱he ṉasyon Izrael c̱hetonꞌ naꞌ beṉəꞌ gwnabiaꞌ c̱he bx̱oz c̱hetoꞌ caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ bito seꞌeɉḻeꞌe c̱heꞌ. Nach gožeꞌ disipl c̱heꞌ caꞌ de que beṉəꞌ blao caꞌ soꞌoteꞌeneꞌ, pero naꞌ yeyoṉ ža yebaneꞌ ladɉo beṉəꞌ guat caꞌ.
\v 32 Yoguəꞌ deꞌe caꞌ gož Jesoꞌosənꞌ disipl c̱heꞌ caꞌ clar. Nach Bedənꞌ gwleɉeꞌ Jesoꞌosənꞌ latəꞌ daoꞌ caꞌaḻə par gwdiḻeꞌeneꞌ.
\v 33 Pero naꞌ Jesoꞌosənꞌ gwyec̱hɉeꞌ naꞌ bgüieꞌ disipl c̱heꞌ caꞌ naꞌ gwdiḻeꞌ Bedənꞌ, gožeꞌ gwxiyeꞌenəꞌ deꞌen chnabiaꞌ yic̱hɉlaꞌaždaoꞌ Bedənꞌ: —Gwc̱hiꞌižəꞌ caꞌaḻə Satanas.
\p Nach gožeꞌ Bedənꞌ: —Chonoꞌ xbab c̱he deꞌen chacdoꞌ gaquən güen naꞌ bito chonoꞌ xbab naquənꞌ cheneꞌe Diozənꞌ gaquə.
\p
\v 34 Nach Jesoꞌosənꞌ gozeꞌe disipl c̱heꞌ caꞌ naꞌ yeziquəꞌəchlə beṉəꞌ caꞌ zɉənžaguənꞌ gožeꞌ: —Notəꞌətezle šə cheneꞌele gonḻilažəꞌəle nadaꞌ naꞌ gwzenagle c̱hiaꞌ, cheyaḻəꞌ əchoɉyic̱hɉle deꞌen cheneꞌele gon cuinḻe par nic̱h gonḻe con canꞌ cheneꞌe Diozənꞌ, naꞌ bitobi gaquele c̱he deꞌen c̱hiꞌ saquəꞌəle ḻaꞌaṉəꞌəczə šə soꞌot beṉəꞌ leꞌe to ḻeꞌe yag coroz, con gonḻilažəꞌəle nadaꞌ naꞌ gwzenagle c̱hiaꞌ.
\v 35 Naꞌ notəꞌətezə beṉəꞌ chaqueneꞌ goneꞌ par nic̱h cui c̱hiꞌ saqueꞌe o par nic̱h cui no soꞌot ḻeꞌ, beꞌenanꞌ cuiayiꞌ. Naꞌ notəꞌətezə beṉəꞌ chsanḻažəꞌ cuineꞌ c̱hiꞌ saqueꞌe o soꞌot beṉəꞌ ḻeꞌ c̱hedəꞌ chonḻilažeꞌe nadaꞌ naꞌ c̱hedəꞌ cheɉḻeꞌe dižəꞌ güen dižəꞌ cobə c̱hiaꞌanəꞌ, beꞌenanꞌ əbaneꞌ zeɉḻicaṉe.
\v 36 Bitobi deꞌe güen gaquə c̱he to beṉəꞌ ḻaꞌaṉəꞌəczə ṉabiꞌe doxen yežlyonꞌ šə cuiayiꞌe zeɉḻicaṉe.
\v 37 Laꞌ bitəꞌətezə deꞌe gatəꞌ c̱heꞌ bito gaquəlenən ḻeꞌ par nic̱h cui cuiayiꞌe zeɉḻicaṉe.
\v 38 Notəꞌətezle šə chetoꞌile c̱hiaꞌ naꞌ c̱he xtižaꞌanəꞌ lao beṉəꞌ güen deꞌe mal caꞌ beṉəꞌ caꞌ cui chsoꞌelaoꞌ Diozənꞌ, ḻeczə caꞌ nadaꞌ yetoꞌidaꞌ c̱hele, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Yetoꞌidaꞌ c̱hele catəꞌən yidaꞌ deꞌe yoblə nsaꞌa yeḻəꞌ chey cheꞌeniꞌ c̱he X̱aꞌ Diozənꞌ naꞌ nc̱hiꞌa angl c̱hiaꞌ caꞌ.
\c 9
\p
\v 1 Nach gozeꞌe Jesoꞌosənꞌ ḻegaꞌaqueꞌ: —Deꞌe ḻi əchniaꞌ leꞌe de que baḻle cabiṉəꞌ gatle catəꞌən leꞌile canꞌ gon Diozənꞌ əgwloꞌe yeḻəꞌ guac xen c̱heꞌenəꞌ par ṉabiꞌe beṉac̱hənꞌ.
\s1 Jesoꞌosənꞌ goqueꞌ ca to deꞌe chey cheꞌeniꞌ
\p
\v 2 Gwde x̱op ža gwna Jesoꞌosənꞌ deꞌe caꞌ, gwc̱heꞌe Bedənꞌ len Jacobənꞌ len Juanṉəꞌ, con ḻegaꞌaczeꞌ ɉaꞌaqueꞌ to lao yaꞌa sibə. Naꞌ lao niteꞌe lao yaꞌanəꞌ besəꞌəleꞌineꞌ bežaꞌ canꞌ goquə Jesoꞌosənꞌ.
\v 3 Naꞌ xalaneꞌenəꞌ goctitən naꞌ beyaquən šyiš xiləꞌ juisy. Beyaquən šyiš xiləꞌ juisyəch cle ca c̱he notəꞌətezəchlə beṉəꞌ chac c̱hib lachəꞌ yežlyo nga.
\v 4 Naꞌ besəꞌəleꞌineꞌ Ḻiazənꞌ benꞌ beꞌ xtižəꞌ Diozənꞌ canaꞌ naꞌ ḻeczə besəꞌəleꞌineꞌ deꞌe Moisezənꞌ chsoꞌeleneꞌ Jesoꞌosənꞌ dižəꞌ.
\v 5 Nach gož Bedənꞌ Jesoꞌosənꞌ: —X̱antoꞌ, güenchgua zocho nga ṉaꞌa. ¿Egüeꞌendoꞌ gontoꞌ šoṉə ranš?, ton par leꞌ, naꞌ ton par Moisezənꞌ naꞌ yeton par Ḻiazənꞌ.
\p
\v 6 Gožeꞌeneꞌ caꞌ c̱hedəꞌ bito beneꞌ xbab c̱he deꞌen gožeꞌ tant besəꞌəžebeꞌ.
\v 7 Nach betɉ to beɉw bcuašəꞌən ḻegaꞌaqueꞌ, naꞌ ḻoꞌo beɉonꞌ gwseꞌeneneꞌ gwna Diozənꞌ: —Benga Xiꞌiṉaꞌ benꞌ chacchgüeidaꞌ c̱hei. C̱he ḻeꞌenəꞌ ḻeꞌe gwzenag.
\p
\v 8 Naꞌ chosoꞌogüiateꞌ caꞌ catəꞌəczla con cuich no no besəꞌəleꞌineꞌ sino yetozə Jesoꞌosənꞌ.
\p
\v 9 Naꞌ gwde naꞌ lao chesyəꞌəyetɉeꞌ yaꞌanəꞌ, Jesoꞌosənꞌ beneꞌ mendad len ḻegaꞌaqueꞌ cui no no əsoꞌeleneꞌ dižəꞌ c̱he deꞌen babesəꞌəleꞌineꞌenəꞌ xte catəꞌəch soꞌot beṉəꞌ caꞌ Jesoꞌosənꞌ benꞌ bseḻəꞌ Diozənꞌ golɉeꞌ beṉac̱h naꞌ yebaneꞌ ladɉo beṉəꞌ guat caꞌ.
\v 10 Deꞌe naꞌanəꞌ bito bi dižəꞌ gwsoꞌeleneꞌ yeziquəꞌəchlə beṉəꞌ. Pero bito gwseꞌeɉniꞌineꞌ bi zeɉen xtižəꞌ Jesoꞌosənꞌ deꞌen gwneꞌ yebaneꞌ ladɉo beṉəꞌ guat caꞌ naꞌ gosəꞌəṉabeꞌ lɉuežɉgaꞌaqueꞌ bi zeɉenṉəꞌ.
\v 11 Nach gwseꞌe Jesoꞌosənꞌ: —Beṉəꞌ caꞌ chosoꞌosed chosoꞌoloꞌineꞌ ḻeinꞌ chosoꞌosedeneꞌ netoꞌ de que zguaꞌatec profet Ḻiazənꞌ benꞌ gwzo canaꞌ cheyaḻəꞌ yideꞌ lao yežlyo nga deꞌe yoblə antslə zeꞌe yidə benꞌ əseḻəꞌ Diozənꞌ par gaquəleneꞌ ṉasyon c̱hechonꞌ. ¿Bixc̱henꞌ chesəꞌəneꞌ caꞌ ža?
\p
\v 12 Nach Jesoꞌosənꞌ gožeꞌ ḻegaꞌaqueꞌ: —Deꞌe ḻiczə canꞌ chesəꞌəneꞌ de que profet Ḻiazənꞌ benꞌ gwzo canaꞌ ḻetequeꞌ yideꞌ deꞌe yoblə par yeyoneꞌ yoguəꞌəḻoḻ deꞌen cheyaḻəꞌ yeyac. Naꞌ ḻeczə caꞌ nyoɉ Xtižəꞌ Diozənꞌ nan de que benꞌ əseḻəꞌ Diozənꞌ galɉeꞌ beṉac̱h naꞌ deꞌe zan deꞌe c̱hiꞌ saqueꞌe. Beṉac̱hənꞌ soꞌoneneꞌ ḻeꞌ caꞌaczə to beṉəꞌ cui bi bi zaqueꞌe.
\v 13 Pero naꞌ əchniaꞌ leꞌe de que babidə benꞌ bedəyen canꞌ ben Ḻiazənꞌ naꞌ beṉəꞌ Izrael gwlaž c̱hecho caꞌ gwsoꞌoneneꞌ ḻeꞌ con ca gwseꞌeneneꞌ canꞌ nyoɉ Xtižəꞌ Diozənꞌ gaquə.
\s1 Beyon Jesoꞌosənꞌ to biꞌi yoꞌo yaz deꞌe x̱ioꞌ
\p
\v 14 Naꞌ catəꞌ besyəꞌəžineꞌ ganꞌ besyəꞌəgaꞌaṉ disipl caꞌ yeḻaꞌ, besəꞌəleꞌineꞌ beṉəꞌ zan, zɉənyec̱hɉeꞌ disipl caꞌ. Naꞌ ḻeczə nitəꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ chsaꞌacyožeꞌ disipl c̱he Jesoꞌosənꞌ.
\v 15 Nach catəꞌ besəꞌəleꞌi yoguəꞌ beṉəꞌ caꞌ nžaguənꞌ Jesoꞌosənꞌ besyəꞌəbanchgüeineꞌ. Nach gwsaꞌacdoeꞌ ɉəsəꞌəšagueꞌeneꞌ naꞌ gwsoꞌoḻgüižeꞌeneꞌ.
\v 16 Nach Jesoꞌosənꞌ gožeꞌ disipl c̱heꞌ caꞌ: —¿Bi dižəꞌən choꞌelenḻe beṉəꞌ caꞌ chosoꞌosed chosoꞌoloꞌi ḻeinꞌ?
\p
\v 17 Nach entr beṉəꞌ caꞌ zɉənžaguənꞌ toeꞌ gožeꞌeneꞌ: —X̱anaꞌ, nc̱hiꞌa xiꞌiṉaꞌ nga. Yoꞌo yaz deꞌe x̱ioꞌon yic̱hɉlaꞌaždaꞌoboꞌonəꞌ naꞌ chonən par nic̱h nacboꞌ mod.
\v 18 Naꞌ gatəꞌətezə zoboꞌ catəꞌ chṉizən ḻeboꞌ chc̱hix̱ən ḻeboꞌ lao yonꞌ, naꞌ chlaꞌ bžinꞌ choꞌaboꞌonəꞌ, naꞌ chaoyeɉə leyboꞌon naꞌ chatboꞌ šlat. Bagotəꞌəyoidaꞌ disipl c̱hioꞌ caꞌ par nic̱h yesyəꞌəbeɉeꞌ deꞌe x̱iꞌonəꞌ yoꞌo yaz yic̱hɉlaꞌaždaꞌoboꞌonəꞌ, pero bito gwsaꞌaqueꞌ yesyəꞌəbeɉeꞌen.
\p
\v 19 Nach gož Jesoꞌosənꞌ beṉəꞌ caꞌ žaꞌanəꞌ: —Leꞌe nitəꞌəle nga, ¿bixc̱hexanꞌ cui cheɉḻeꞌele c̱hiaꞌ? Bachac sša zoaꞌ napaꞌ yeḻəꞌ chxenḻažəꞌ len leꞌe. ¿Batxanꞌ šeɉḻeꞌele c̱hiaꞌ?
\p Nach gožeꞌ x̱a bidaꞌonəꞌ: —Doaꞌ xiꞌiṉoꞌ nga.
\p
\v 20 Naꞌ catəꞌ zɉsoꞌeboꞌ lao Jesoꞌosənꞌ, bleꞌi deꞌe x̱ioꞌonəꞌ Jesoꞌosənꞌ naꞌ bṉizən bidaꞌonəꞌ, naꞌ benən par nic̱h ḻechguaḻe gwyazboꞌ šonṉəꞌ, naꞌ bc̱hix̱ btoḻən ḻeboꞌ lao yonꞌ, xte blaꞌ bžinꞌ choꞌaboꞌonəꞌ.
\v 21 Nach Jesoꞌosənꞌ gožeꞌ x̱aboꞌonəꞌ: —¿Šna bagoc chacboꞌ caꞌ?
\p Nach x̱aboꞌonəꞌ gožeꞌ Jesoꞌosənꞌ: —Dezd bidaꞌoteboꞌ.
\v 22 Zan las ben deꞌe x̱iꞌonəꞌ par ɉec̱hazboꞌ do lao yiꞌ naꞌ bx̱opən ḻeboꞌ do ḻoꞌo nis par gatboꞌ. Šə bi deꞌe guac gonoꞌ par gaquəlenoꞌ netoꞌ, beyašəꞌəlažəꞌəšguei netoꞌ.
\p
\v 23 Jesoꞌosənꞌ gožeꞌeneꞌ: —Šə cheɉḻiꞌo c̱hiaꞌ, goyonaꞌaboꞌ, laꞌ chac chonaꞌ bitəꞌətezə, con šə cheɉḻiꞌo c̱hiaꞌ.
\p
\v 24 Nach x̱aboꞌonəꞌ ḻeꞌe gožteꞌ Jesoꞌosənꞌ: —Cheɉḻiꞌa c̱hioꞌ. Goclenšga nadaꞌ par nic̱h šeɉḻeꞌechaꞌ c̱hioꞌ.
\p
\v 25 Naꞌ catəꞌ Jesoꞌosənꞌ bleꞌineꞌ bachesəꞌəžag beṉəꞌ zan, nach gwdiḻeꞌ deꞌe x̱ioꞌonəꞌ, gožeꞌen: —Deꞌe x̱ioꞌ, chonoꞌ par nic̱h biꞌi nga nacboꞌ mod naꞌ ncuežboꞌ. Chonaꞌ mendad yechoɉoꞌ yic̱hɉlaꞌaždaoꞌ biꞌi nga naꞌ cuatəch yeyoꞌo yeyazoꞌ deꞌe yoblə.
\p
\v 26 Nach deꞌe x̱ioꞌon bgosyaꞌan ḻeboꞌ naꞌ benən par nic̱h ḻechguaḻe fuert gwyazboꞌ šonṉəꞌ deꞌe yoblə nach bechoɉən ḻeboꞌ naꞌ bocuaꞌaṉən ḻeboꞌ caꞌaczə to biꞌi guat. Naꞌ beṉəꞌ zan gosəꞌəneꞌ de que gotboꞌonəꞌ.
\v 27 Pero naꞌ Jesoꞌosənꞌ bex̱eꞌe naꞌaboꞌonəꞌ par bezožaꞌaboꞌ.
\p
\v 28 Nach Jesoꞌosənꞌ gwyoꞌe to ḻoꞌo yoꞌo naꞌ disipl c̱heꞌ caꞌ gosəꞌəbigueꞌe ganꞌ zo tozeꞌ, naꞌ gwseꞌeneꞌ: —¿Bixc̱hexaczxanꞌ cui goquə yebeɉtoꞌ deꞌe x̱iꞌonəꞌ ža?
\p
\v 29 Nach gožeꞌ ḻegaꞌaqueꞌ: —Par nic̱h gaquə yebeɉle deꞌe x̱ioꞌ caꞌ deꞌen zɉənaquə ca deꞌen bebeɉaꞌ yic̱hɉlaꞌaždaoꞌ biꞌi nga, cheyaḻəꞌ coꞌo gwc̱heɉle cui yeꞌeɉ gaole nic̱h gontezə gonḻe orasyon.
\s1 Deꞌe yoblə gwdix̱ɉueꞌe Jesoꞌosənꞌ de que gateꞌ
\p
\v 30 Naꞌ catəꞌ besaꞌaqueꞌ latɉənꞌ besyəꞌədieꞌ ganꞌ mbane Galileanꞌ, pero Jesoꞌosənꞌ bito goneꞌeneꞌ yesəꞌəṉeze beṉəꞌ ganꞌ zoeꞌ.
\v 31 Con disipl c̱heꞌ caꞌazə əbsed əbloꞌineꞌ. Naꞌ gožeꞌ ḻegaꞌaqueꞌ de que ḻeꞌ naqueꞌ benꞌ bseḻəꞌ Diozənꞌ golɉeꞌ beṉac̱h. Naꞌ gaqueꞌ lao naꞌ beṉəꞌ naꞌ soꞌoteꞌeneꞌ, nach yeyoṉ ža yebaneꞌ ladɉo beṉəꞌ guat caꞌ.
\v 32 Pero naꞌ disipl caꞌ bito gwseꞌeɉniꞌineꞌ dižəꞌ deꞌen beꞌ Jesoꞌosənꞌ naꞌ besəꞌəžebeꞌ par yesəꞌəṉabeneꞌ ḻeꞌ bi zeɉen deꞌe gožeꞌ ḻegaꞌaqueꞌenəꞌ.
\s1 Gwsaꞌacyožə disipl c̱heꞌ caꞌ noeꞌ naquə blaoch
\p
\v 33 Jesoꞌosənꞌ len disipl c̱heꞌ caꞌ besyəꞌəžineꞌ liž Jesoꞌosənꞌ deꞌen zo Capernaunṉəꞌ, naꞌ lao bazɉəniteꞌe ližeꞌenəꞌ gožeꞌ ḻegaꞌaqueꞌ: —¿Bi porənꞌ chacyožle tnezənꞌ?
\p
\v 34 Nach disipl c̱heꞌ caꞌ bito bosyoꞌožiꞌe xtižeꞌenəꞌ, c̱hedəꞌ gwsaꞌaqueneꞌ ztoꞌ deꞌen gwsaꞌacyožeꞌ entr ḻegaꞌaqueꞌ noeꞌ naquə blaoch.
\v 35 Gocbeꞌi Jesoꞌosənꞌ xbab c̱hegaꞌaqueꞌenəꞌ naꞌ gwchiꞌe naꞌ goxeꞌ disipl c̱heꞌ caꞌ par gosəꞌəbigueꞌe laogüeꞌenəꞌ, naꞌ gožeꞌ ḻegaꞌaqueꞌ: —Notəꞌətezle šə cheneꞌele gacle beṉəꞌ blaoch, cheyaḻəꞌ gonḻe xbab c̱he cuinḻe de que bitobi zaquəꞌəle, naꞌ cheyaḻəꞌ gaquəlen lɉuežɉle ca to mos.
\p
\v 36 Nach goxeꞌ to bidaoꞌ naꞌ bzecheꞌeboꞌ laogaꞌaqueꞌenəꞌ nach gwḻeneꞌeboꞌ, gožeꞌ ḻegaꞌaqueꞌ:
\v 37 —Šə chonḻe güen len bidaoꞌ nga o notəꞌətezəchlə bidaoꞌ laogüe deꞌen chaquele c̱hiaꞌ, chonczle güen len nadaꞌanəꞌ. Naꞌ catəꞌ chonḻe güen len nadaꞌ, ḻeczə chonczle güen len Diozənꞌ benꞌ bseḻəꞌ nadaꞌ.
\s1 Benꞌ cui chon contr chioꞌo txenczənꞌ choneꞌ len chioꞌo
\p
\v 38 Nach Juanṉəꞌ gožeꞌeneꞌ: —Maestr, babežagtoꞌ to beṉəꞌ choꞌe laꞌonəꞌ par chebeɉeꞌ deꞌe x̱ioꞌ deꞌen yoꞌo yaz yic̱hɉlaꞌaždaoꞌ beṉəꞌ naꞌ bžontoꞌ goneꞌ caꞌ c̱hedəꞌ bito choneꞌ txen len chioꞌo.
\p
\v 39 Nach Jesoꞌosənꞌ gožeꞌeneꞌ: —Bito gwžonḻe goneꞌ caꞌ, c̱hedəꞌ notəꞌətezə beṉəꞌ choꞌe laꞌanəꞌ par goneꞌ to miḻagr, bito gaquə bi əṉeꞌ contr nadaꞌ.
\v 40 Šə to beṉəꞌ cui choneꞌ contr chioꞌo, txenczənꞌ choneꞌ len chioꞌo.
\v 41 Naꞌ notəꞌətezə beṉəꞌ gaquəlen leꞌe laogüe deꞌen naole nadaꞌ ḻaꞌaṉəꞌ tbaszə nis goṉeꞌ yeꞌeɉle, beꞌenəꞌ gon caꞌ deꞌe ḻiczə gonaꞌ ca soeꞌ mbalaz catəꞌ yežineꞌ yobanꞌ.
\s1 Bito cheyaḻəꞌ goncho ca əxopə beṉəꞌ yoblə goneꞌ deꞌe mal
\p
\v 42 Probchguazə benꞌ gon par nic̱h əxopə to beṉəꞌ chonḻilažəꞌ nadaꞌ goneꞌ deꞌe mal, ḻaꞌaṉəꞌəczə benꞌ əxopənꞌ cuitec bi zaqueꞌe par len beṉac̱hənꞌ. Ncaꞌalə xṉeze žaləꞌ yosoꞌoc̱heɉeꞌ yen benꞌ chon caꞌ to yeɉ yišəꞌ naꞌ žɉəsəꞌəzaḻeꞌeneꞌ ḻoꞌo nisdaꞌonəꞌ par gateꞌ cle ca soeꞌ goneꞌ ca əxopəch beṉəꞌ soꞌoneꞌ deꞌe malənꞌ.
\v 43 Šə deꞌen chonḻe len naꞌalenəꞌ chonən par nic̱h əxople gonḻe deꞌe malənꞌ, güenchlə žaləꞌ əc̱hog naꞌalenꞌ cle ca əxople gonḻe deꞌe malənꞌ. Ncaꞌalə xṉeze nacle beṉəꞌ naꞌ chog yežinḻe lao Diozənꞌ naꞌ əbanḻe zeɉḻicaṉe cle ca cuiayiꞌilenḻen txen lao yiꞌ gabiḻənꞌ deꞌen cui chyol.
\v 44 Zeɉḻicaṉe yesəꞌəžaglaochgua beṉəꞌ caꞌ yesyəꞌəžin lao yiꞌ gabiḻənꞌ c̱hedəꞌ cuat yol yiꞌinəꞌ.
\v 45 Naꞌ šə deꞌen chonḻe len ṉiꞌalenəꞌ chonən par nic̱h əxople gonḻe deꞌe malənꞌ, güenchlə žaləꞌ əc̱hog ṉiꞌalenꞌ cle ca əxople gonḻe deꞌe malənꞌ. Ncaꞌalə xṉeze yežinḻe lao Diozənꞌ nacle beṉəꞌ coj naꞌ əbanḻe zeɉḻicaṉe cle ca cuiayiꞌilenḻen txen lao yiꞌ gabiḻənꞌ deꞌen cui chyol.
\v 46 Zeɉḻicaṉenꞌ yesəꞌəžaglaochgua beṉəꞌ caꞌ yesyəꞌəžin lao yiꞌ gabiḻənꞌ c̱hedəꞌ cuat yol yiꞌinəꞌ.
\v 47 Naꞌ šə deꞌen chleꞌile len ɉelaolenꞌ chonən par nic̱h əxople gonḻe deꞌe malənꞌ yeɉniꞌalə žaləꞌ cueɉlen, c̱hedəꞌ ncaꞌalə xṉeze nacle beṉəꞌ lc̱hoḻ yežinḻe yobanꞌ ganꞌ zo Diozənꞌ chnabiꞌe naꞌ əbanḻe zeɉḻicaṉe, cle ca cuiayiꞌilenḻen txen lao yiꞌ gabiḻənꞌ.
\v 48 Zeɉḻicaṉenꞌ yesəꞌəžaglaochgua beṉəꞌ caꞌ yesyəꞌəžin lao yiꞌ gabiḻənꞌ c̱hedəꞌ cuat yol yiꞌinəꞌ.
\p
\v 49 Bx̱oz caꞌ chsoꞌoseꞌ zedəꞌ lao xpeləꞌ bia caꞌ chosoꞌozeyeꞌ chsoꞌelaogüeꞌe Diozənꞌ par nic̱h beləꞌən chaquən xiꞌilažəꞌ. Naꞌ deꞌen chsiꞌ Diozənꞌ xṉeze chyiꞌ chzaquəꞌəcho, choneꞌ caꞌ par nic̱h chaquəch yic̱hɉlaꞌaždaoꞌ chioꞌo chonḻilažəꞌəchoneꞌ xiꞌilažəꞌ.
\v 50 Ṉezecho de que zedəꞌ naquən güen naꞌ chonən par nic̱h cui chbiayiꞌ yid beləꞌən, pero šə zedəꞌən bitoch bi zxiꞌ naquən, bitoch bi zaquəꞌən naꞌ bito gaquə goncho ca yeyaquən zxiꞌ deꞌe yoblə. Naꞌ par nic̱h gacle ca zedəꞌ deꞌen naquə zxiꞌ cheyaḻəꞌ gacle beṉəꞌ laꞌaždaoꞌ xiꞌilažəꞌ, naꞌ so cuezle binḻo len lɉuežɉle.
\c 10
\s1 Bito yelaꞌacho beꞌen c̱hecho o noꞌol c̱hecho par solencho beṉəꞌ yoblə
\p
\v 1 Jesoꞌosənꞌ len disipl c̱heꞌ caꞌ besaꞌaqueꞌ Capernaunṉəꞌ naꞌ ɉaꞌaqueꞌ yež caꞌ zɉəchiꞌ ganꞌ mbane Jodeanꞌ naꞌ yež caꞌ zɉəchiꞌ yešḻaꞌalə yao Jordanṉəꞌ. Naꞌ besəꞌəžag beṉəꞌ zan ganꞌ zoeꞌenəꞌ, naꞌ deꞌe yoblə bzeɉniꞌineꞌ ḻegaꞌaqueꞌ con canꞌ chzeɉniꞌiczeneꞌ ḻegaꞌaqueꞌ.
\v 2 Nach baḻə beṉəꞌ fariseo caꞌ gosəꞌəbigueꞌe ganꞌ zo Jesoꞌosənꞌ par nic̱h yesəꞌəbeɉeneꞌ dižəꞌ deꞌe yesəꞌəc̱hineꞌ contr ḻeꞌ, naꞌ gosəꞌəṉabeneꞌ ḻeꞌ šə de lsens par beṉəꞌ nšagnaꞌ yeleꞌe xoꞌoleꞌ.
\v 3 Jesoꞌosənꞌ gožeꞌ ḻegaꞌaqueꞌ: —¿Naquənꞌ nyoɉ ḻei deꞌen bzoɉ deꞌe Moisezənꞌ? ¿Binꞌ beneꞌ mendad gonḻe?
\p
\v 4 Nach beṉəꞌ fariseo caꞌ gwseꞌe Jesoꞌosənꞌ: —Deꞌe Moisezənꞌ beꞌe latɉə əgwcos benꞌ nšagnaꞌanəꞌ to act ga güeꞌen dižəꞌ de que besyəꞌəleꞌenəꞌ, nach cueɉyic̱hɉeꞌ noꞌol c̱heꞌenəꞌ.
\p
\v 5 Jesoꞌosənꞌ gožeꞌ ḻegaꞌaqueꞌ: —Deꞌe Moisezənꞌ beꞌe latɉə yelaꞌa noꞌol c̱hele c̱hedəꞌ nacle beṉəꞌ yic̱hɉlaꞌaždaoꞌ žod.
\v 6 Bablabczle canꞌ nyoɉ Xtižəꞌ Diozənꞌ nan de que catəꞌən gwxe yežlyonꞌ Diozənꞌ beneꞌ beṉac̱hənꞌ beṉəꞌ byo naꞌ noꞌolə.
\v 7 Naꞌ ḻeczə nan: “Beṉəꞌ byonəꞌ ḻeꞌe x̱axneꞌe par əgwšagneꞌe siꞌe to noꞌolə.
\v 8 Nach beṉəꞌ caꞌ yosoꞌošagnaꞌanəꞌ əsaꞌaqueꞌ tozə.” Deꞌe naꞌanəꞌ bitoch əsaꞌaqueꞌ c̱hopə beṉəꞌ, sino que əsaꞌaqueꞌ tozə beṉəꞌ.
\v 9 Deꞌe naꞌanəꞌ notono cheyaḻəꞌ yoḻaꞌa ḻegaꞌaqueꞌ laꞌ Dioz nanꞌ banoneꞌ ḻegaꞌaqueꞌ tozə beṉəꞌ.
\p
\v 10 Naꞌ catəꞌ Jesoꞌosənꞌ len disipl c̱heꞌ caꞌ besyəꞌəžineꞌ yoꞌo ganꞌ gosəꞌənitəꞌ disipl c̱heꞌ caꞌ gosəꞌəṉabeneꞌ ḻeꞌ bi zeɉen deꞌen gožeꞌ beṉəꞌ fariseo caꞌ.
\v 11 Naꞌ Jesoꞌosənꞌ gožeꞌ ḻegaꞌaqueꞌ: —Notəꞌətezə beṉəꞌ chelaꞌa noꞌol c̱heꞌenəꞌ par yequeꞌe noꞌolə yoblə tozəczə ca malənꞌ choneꞌ len deꞌen chon beṉəꞌ chgoꞌo xtoi.
\v 12 Naꞌ notəꞌətezə noꞌolə yeleꞌe beꞌen c̱heꞌenəꞌ par yequeꞌe beṉəꞌ yoblə, ḻeczə tozəczə ca malənꞌ chon noꞌolənꞌ len deꞌen chon beṉəꞌ chgoꞌo xtoi.
\s1 Jesoꞌosənꞌ beneꞌ orasyon par bidaoꞌ caꞌ
\p
\v 13 Naꞌ ɉaꞌac beṉəꞌ əɉsoꞌe bidaoꞌ lao Jesoꞌosənꞌ par nic̱h əx̱oa neꞌenəꞌ yic̱hɉgaꞌacboꞌ naꞌ goneꞌ orasyon c̱hegaꞌacboꞌ. Pero disipl c̱heꞌ caꞌ gosəꞌədiḻeꞌ beṉəꞌ caꞌ zɉsoaꞌ bidaoꞌ caꞌ.
\v 14 Catəꞌ bleꞌi Jesoꞌosənꞌ canꞌ chsoꞌon disipl c̱heꞌ caꞌ, bžeꞌe nach gožeꞌ ḻegaꞌaqueꞌ: —Ḻeꞌe güeꞌ latɉə laꞌac bidaoꞌ caꞌ laoguaꞌ nga, naꞌ cui əgwžonḻe. Naꞌ əchniaꞌ leꞌe, beṉəꞌ caꞌ chosoꞌozex̱ɉw yic̱hɉgaꞌaqueꞌ lao Diozənꞌ ca bidaoꞌ caꞌ chosoꞌozex̱ɉw yic̱hɉgaꞌacboꞌ lao x̱axnaꞌagaꞌacboꞌ ḻegaꞌaczeꞌenəꞌ chsoꞌe latɉə chnabiaꞌ Diozənꞌ ḻegaꞌaqueꞌ.
\v 15 Bidaoꞌ caꞌ bito chsoꞌon cuingaꞌacboꞌ xen, naꞌ deꞌe ḻi chniaꞌ leꞌe, notəꞌətezle šə cui yeyacle ca bidaoꞌ par güeꞌele latɉə ṉabiaꞌ Diozənꞌ leꞌe, bito gaquə yežinḻe yobanꞌ ganꞌ zo Diozənꞌ chnabiꞌe.
\p
\v 16 Nach Jesoꞌosənꞌ gwḻeneꞌ bidaoꞌ caꞌ naꞌ gwx̱oa neꞌenəꞌ yic̱hɉgaꞌacboꞌonəꞌ, naꞌ beneꞌ orasyon par ḻegaꞌacboꞌ.
\s1 Beṉəꞌ güegoꞌ benꞌ goquə beṉəꞌ gwniꞌa beꞌeleneꞌ Jesoꞌosənꞌ dižəꞌ
\p
\v 17 Naꞌ zeꞌe yesaꞌaqueꞌ latɉənꞌ to beṉəꞌ güegoꞌ gwsaꞌadoeꞌ bžineꞌ ganꞌ zo Jesoꞌosənꞌ naꞌ bzo xibeꞌen lao Jesoꞌosənꞌ. Naꞌ gožeꞌeneꞌ: —Maestr, leꞌ nacoꞌ beṉəꞌ güen, gwna nadaꞌ bi deꞌen cheyaḻəꞌ gonaꞌ par gatəꞌ yeḻəꞌ mban zeɉḻicaṉe c̱hiaꞌ.
\p
\v 18 Naꞌ par nic̱h gonch beꞌenəꞌ xbab c̱he deꞌen gwneꞌ, Jesoꞌosənꞌ gožeꞌeneꞌ: —¿Bixc̱henꞌ naoꞌ de que beṉəꞌ güen nadaꞌ? Dioz nanꞌ naqueꞌ ḻeꞌezelaogüe beṉəꞌ güen.
\v 19 Ṉezdoꞌ binꞌ na ḻeinꞌ: “Cui coꞌo xtole, naꞌ cui cueɉyic̱hɉle beꞌen c̱hele o noꞌol c̱hele par solenḻe beṉəꞌ yoblə; cui gotle beṉəꞌ; cui cuanḻe; bito gacle testigw faḻs contr saꞌalɉuežɉle; bito x̱oayagle saꞌalɉuežɉ beṉac̱hle; ḻegwnežɉo yeḻəꞌ balaꞌaṉ x̱axnaꞌale.”
\p
\v 20 Nach beṉəꞌ güegonꞌ gožeꞌ Jesoꞌosənꞌ: —Maestr, yoguəꞌəḻoḻ deꞌe caꞌ chzenagaꞌ c̱hei dezd xcuidəꞌətiaꞌ.
\p
\v 21 Jesoꞌosənꞌ bgüieꞌ beꞌenəꞌ naꞌ goqueneꞌ c̱heꞌ naꞌ gožeꞌeneꞌ: —Tozə deꞌen ṉeꞌe chac faḻt gonoꞌ. Ɉəyeyetəꞌ yoguəꞌəḻoḻ deꞌen de c̱hioꞌ, naꞌ mech deꞌen leꞌidoꞌ c̱he deꞌe caꞌ bnežɉon beṉəꞌ yašəꞌ. Nach da denao nadaꞌ ḻaꞌaṉəꞌəczə šə gonclən byen gatoꞌ to ḻeꞌe yag coroz. Naꞌ catəꞌ yežinoꞌ yobanꞌ ganꞌ zo Diozənꞌ, soꞌ mbalaz.
\p
\v 22 Pero naꞌ beṉəꞌ güegonꞌ beyož gož Jesoꞌosənꞌ ḻeꞌ caꞌ, ḻechguaḻe trist gwzoeꞌ c̱hedəꞌ laꞌ to beṉəꞌ gwniꞌachguanꞌ naqueꞌ, naꞌ bezaꞌachoeꞌ trist.
\p
\v 23 Nach Jesoꞌosənꞌ bgüieꞌ beṉəꞌ güegonꞌ, naꞌ gožeꞌ disipl c̱heꞌ caꞌ: —Zdebəchgua naquən par to beṉəꞌ gwniꞌa güeꞌe latɉə ṉabiaꞌ Diozənꞌ ḻeꞌ.
\p
\v 24 Naꞌ besyəꞌəbanchgüei disipl c̱heꞌ caꞌ canꞌ gožeꞌ ḻegaꞌaqueꞌ c̱he beṉəꞌ gwniꞌanəꞌ, nach deꞌe yoblə gozeꞌe Jesoꞌosənꞌ ḻegaꞌaqueꞌ: —Xiꞌiṉdaoguaꞌa, deꞌe ḻi šə to beṉəꞌ zoeꞌ lez gaquəlen yeḻəꞌ gwniꞌa c̱heꞌenəꞌ ḻeꞌ zdebəchgua naquən par žɉəyezoeꞌ yobanꞌ ganꞌ zo Diozənꞌ chnabiꞌe.
\v 25 Zdebəchlə naquən c̱he to beṉəꞌ gwniꞌanəꞌ güeꞌe latɉə ṉabiaꞌ Diozənꞌ ḻeꞌ cle ca to camey teb to ḻoꞌo nag yešəꞌ.
\p
\v 26 Nach disipl c̱heꞌ caꞌ catəꞌ gwseꞌeneneꞌ xtižeꞌenəꞌ besyəꞌəbanchgüeineꞌ naꞌ gwseꞌ lɉuežɉgaꞌaqueꞌ: —Notono gaquə yechoɉ xniꞌa deꞌe malənꞌ šə caꞌ.
\p
\v 27 Jesoꞌosənꞌ bosgüieꞌ ḻegaꞌaqueꞌ naꞌ gozeꞌe: —Beṉac̱hənꞌ bito gaquə soꞌoneꞌ ca yesyəꞌəchoɉeꞌ xniꞌa deꞌe malənꞌ, pero Diozənꞌ guaquə yebeɉeꞌ beṉəꞌ xniꞌa deꞌe malənꞌ. Diozənꞌ chac choneꞌ bitəꞌətezə.
\p
\v 28 Nach Bedənꞌ gožeꞌ Jesoꞌosənꞌ: —X̱antoꞌ, netoꞌ bagwleɉyic̱hɉtoꞌ famiḻy c̱hetoꞌ caꞌ naꞌ len yoguəꞌəḻoḻ deꞌen deitoꞌ par chonḻilažəꞌətoꞌ leꞌ naꞌ chzenagtoꞌ c̱hioꞌ.
\p
\v 29 Nach gož Jesoꞌosənꞌ ḻegaꞌaqueꞌ: —Deꞌe ḻi əchniaꞌ, šə nole bagwleɉyic̱hɉleꞌ ližle, beṉəꞌ bišəꞌəle, beṉəꞌ zanḻe, x̱axnaꞌale, xoꞌolle, xiꞌiṉle, o yežlyo c̱hele c̱hedəꞌ chzenagle c̱hiaꞌ naꞌ c̱hedəꞌ cheɉḻeꞌele c̱he dižəꞌ güen dižəꞌ cobə c̱hiaꞌanəꞌ,
\v 30 Diozənꞌ goṉeꞌ leꞌe deꞌe zaquəꞌəche lao yežlyo nga clezə ca beṉəꞌ caꞌ naꞌ deꞌe caꞌ gwleɉyic̱hɉlenꞌ. Naꞌ ḻeczə gon Diozənꞌ par nic̱h əbanḻe zeɉḻicaṉe. Goṉeꞌ leꞌe deꞌe caꞌ ḻaꞌaṉəꞌəczə lao yežlyo nga de deꞌe zan deꞌe c̱hiꞌ saquəꞌəle.
\v 31 Beṉəꞌ zan zɉənaquə beṉəꞌ blao ṉaꞌa pero gwžin ža catəꞌ cuich əsaꞌaqueꞌ beṉəꞌ blao. Naꞌ beṉəꞌ zan beṉəꞌ cui zɉənaquə beṉəꞌ blao ṉaꞌa, pero gwžin ža catəꞌ əsaꞌaqueꞌ beṉəꞌ blao.
\s1 Deꞌe yoblə gosyix̱ɉueꞌe Jesoꞌosənꞌ de que gateꞌ
\p
\v 32 Nach Jesoꞌosənꞌ naꞌ zan disipl c̱heꞌ caꞌ ɉaꞌaqueꞌ Jerosalenṉəꞌ. Naꞌ lao zɉəngüeꞌe nezənꞌ Jesoꞌosənꞌ gwžialaogüeꞌ laogaꞌaqueꞌenəꞌ, naꞌ besyəꞌəbanchgüei disipl c̱heꞌ caꞌ deꞌen šeɉeꞌ Jerosalenṉəꞌ ganꞌ nitəꞌ beṉəꞌ caꞌ chseꞌene soꞌot ḻeꞌ. Naꞌ do chesəꞌəžebzeꞌ ɉəsəꞌənaogüeꞌeneꞌ. Nach partlə gwleɉ Jesoꞌosənꞌ disipl c̱heꞌ caꞌ šižiṉ naꞌ gwzolaogüeꞌ beꞌeleneꞌ ḻegaꞌaqueꞌ dižəꞌ c̱he deꞌe caꞌ gaquə c̱heꞌ.
\v 33 Naꞌ gožeꞌ ḻegaꞌaqueꞌ: —Diozənꞌ bseḻeꞌe nadaꞌ golɉaꞌ beṉac̱h, naꞌ ṉaꞌa šeɉcho Jerosalenṉəꞌ ganꞌ gacaꞌ lao naꞌ beṉəꞌ gwnabiaꞌ c̱he bx̱oz caꞌ naꞌ lao naꞌ beṉəꞌ caꞌ chosoꞌosed chosoꞌoloꞌi ḻeinꞌ. Yesəꞌəc̱hoglaogüeꞌen c̱hiaꞌ de que cheyaḻəꞌ gataꞌ, naꞌ ḻeczə soꞌoneꞌ nadaꞌ lao naꞌ beṉəꞌ caꞌ cui zɉənaquə beṉəꞌ Izrael.
\v 34 Naꞌ soꞌoneꞌ nadaꞌ borl naꞌ soeꞌ nadaꞌ golp naꞌ yosoꞌožaꞌ x̱eneꞌe choꞌalaoguaꞌanəꞌ. Nach soꞌoteꞌ nadaꞌ, pero yeyoṉ ža yebanaꞌ ladɉo beṉəꞌ guat caꞌ.
\s1 Jacobənꞌ naꞌ Juanṉəꞌ gosəꞌəṉabeꞌ yesəꞌəbiꞌe cuit Jesoꞌosənꞌ ganꞌ ṉabiꞌenəꞌ
\p
\v 35 Nach xiꞌiṉ Sebedeonꞌ Jacobənꞌ len Juanṉəꞌ gosəꞌəbigueꞌe lao Jesoꞌosənꞌ. Naꞌ gwseꞌeneꞌ: —X̱antoꞌ, zedəṉabetoꞌ ḻeꞌ to goclen.
\p
\v 36 Nach Jesoꞌosənꞌ gožeꞌ ḻegaꞌaqueꞌ: —¿Bi goclenṉəꞌ cheneꞌele gonaꞌ?
\p
\v 37 Nach gwseꞌeneꞌ: —Cheneꞌetoꞌ gonoꞌ par nic̱h cueꞌetoꞌ cuitoꞌonəꞌ šḻaꞌa güeɉə catəꞌən əžin ža ṉabiꞌo ṉasyon c̱hechonəꞌ.
\p
\v 38 Nach Jesoꞌosənꞌ gožeꞌ ḻegaꞌaqueꞌ: —Bito chacbeꞌile bi deꞌen chṉabele nadaꞌ. ¿Eguaquə saquəꞌəziꞌile canꞌ saquəꞌəziꞌanəꞌ? ¿Egwzoile gaquə c̱hele canꞌ gaquə c̱hiaꞌanəꞌ?
\p
\v 39 Nach bosyoꞌožiꞌe xtižeꞌenəꞌ gwseꞌeneꞌ: —Gwzoitoꞌ.
\p Jesoꞌosənꞌ gožeꞌ ḻegaꞌaqueꞌ: —Deꞌe ḻiczə c̱hiꞌ saquəꞌəle canꞌ c̱hiꞌ sacaꞌanəꞌ, naꞌ deꞌe ḻiczə gaquə c̱hele canꞌ gaquə c̱hiaꞌanəꞌ.
\v 40 Pero bito naquən par əṉiaꞌ nadaꞌ nonꞌ cueꞌ cuitanꞌ catəꞌən əžin ža ṉabiꞌanəꞌ. X̱aꞌ Diozənꞌ bagwleɉeꞌ beṉəꞌ yesəꞌəbeꞌ cuitaꞌanəꞌ.
\p
\v 41 Nach disipl caꞌ yeši, catəꞌ gwseꞌeneneꞌ deꞌen gwseꞌ Jacobənꞌ naꞌ Juanṉəꞌ ḻeꞌ, besəꞌəžeꞌe ḻegaꞌaqueꞌ.
\v 42 Pero Jesoꞌosənꞌ goxeꞌ yogueꞌe par nic̱h gosəꞌəbigueꞌe laogüeꞌenəꞌ, naꞌ gožeꞌ ḻegaꞌaqueꞌ: —Ṉezele nitəꞌ beṉəꞌ gwnabiaꞌ naꞌ beṉəꞌ blao c̱he to to ṉasyon, naꞌ ḻa fuers chesəꞌənabiꞌe beṉəꞌ caꞌ nitəꞌ xniꞌagaꞌaqueꞌenəꞌ.
\v 43 Pero caguə canꞌ cheyaḻəꞌ gonḻe. Šə no leꞌe cheneꞌele gacle beṉəꞌ blao, cheyaḻəꞌ əgwzex̱ɉw yic̱hɉle naꞌ gaquəlenḻe lɉuežɉle.
\v 44 Naꞌ šə no leꞌe cheneꞌele gaquəchle blaoch ca beṉəꞌ lɉuežɉle caꞌ, caguə canꞌ cheyaḻəꞌ gonḻe sino que cheyaḻəꞌ gon cuiṉle ca xmos beṉəꞌ caꞌ yeḻaꞌ.
\v 45 Diozənꞌ bseḻeꞌe nadaꞌ golɉaꞌ beṉac̱h, naꞌ caguə bidaꞌ par nic̱h beṉac̱hənꞌ əsaꞌacleneꞌ nadaꞌ, sino que bidaꞌ par gaquəlenaꞌ beṉac̱hənꞌ, naꞌ par əgwnežɉo cuinaꞌ c̱hixɉuaꞌ xtoḻəꞌ yoguəꞌəḻoḻ beṉac̱hənꞌ catəꞌən soꞌoteꞌ nadaꞌ.
\s1 Jesoꞌosənꞌ beyoneꞌ to beṉəꞌ lc̱hoḻ le Bartimeo
\p
\v 46 Jesoꞌosənꞌ len disipl c̱heꞌ caꞌ naꞌ len beṉəꞌ zan caꞌ ɉəsəꞌənao Jesoꞌosənꞌ besəꞌəžineꞌ syoda Jericonꞌ. Naꞌ catəꞌ besaꞌaqueꞌ syodanꞌ to beṉəꞌ lc̱hoḻ le Bartimeo, xiꞌiṉ to beṉəꞌ leꞌ Timeo, chiꞌe choꞌa nezənꞌ chṉabeꞌ carida.
\v 47 Naꞌ catəꞌ bene Bartimeonꞌ de que Jesoꞌosənꞌ beꞌenəꞌ naquə beṉəꞌ Nasaretənꞌ bazon əžineꞌ ganꞌ chiꞌenəꞌ, nach gwzolao gwṉeꞌ zižɉo gwneꞌ: —Jesoꞌos, lenꞌ nacoꞌ xiꞌiṉ dia c̱he deꞌe Rei Dabinꞌ. Beyašəꞌəlažəꞌəšguei nadaꞌ.
\p
\v 48 Beṉəꞌ zan gosəꞌədiḻeꞌ beṉəꞌ lc̱hoḻənꞌ par nic̱h zoeꞌ žizə, pero nachlə gwṉeꞌ zižɉochlə gwneꞌ: —Jesoꞌos, lenꞌ nacoꞌ xiꞌiṉ dia c̱he deꞌe Rei Dabinꞌ. Beyašəꞌəlažəꞌəšguei nadaꞌ.
\p
\v 49 Nach Jesoꞌosənꞌ gwlezeꞌ naꞌ gožeꞌ beṉəꞌ caꞌ zɉəsəꞌənao ḻeꞌ: —Ḻeꞌe gax beꞌenəꞌ.
\p Nach gwsaꞌaxeꞌ beṉəꞌ lc̱hoḻənꞌ par bigueꞌe lao Jesoꞌosənꞌ, naꞌ gwseꞌeneꞌ: —Bebei, gwzecha c̱hedəꞌ chaxeꞌ leꞌ.
\p
\v 50 Nach beṉəꞌ lc̱hoḻənꞌ bzaḻəꞌ xadoṉ c̱heꞌenəꞌ naꞌ bxiteꞌe bgüigueꞌe lao Jesoꞌosənꞌ.
\v 51 Jesoꞌosənꞌ gožeꞌeneꞌ: —¿Binꞌ cheꞌendoꞌ gonaꞌ len leꞌ?
\p Nach beṉəꞌ lc̱hoḻənꞌ gožeꞌ Jesoꞌosənꞌ: —X̱anaꞌ, benšga par nic̱h yeleꞌidaꞌ.
\p
\v 52 Jesoꞌosənꞌ gožeꞌeneꞌ: —Guaquə yeyeɉoꞌ. Deꞌen chonḻilažoꞌo nadaꞌ bac̱h goc canꞌ cheꞌendoꞌonəꞌ.
\p Naꞌ ḻeꞌe beleꞌitei beꞌenəꞌ naꞌ gwnaogüeꞌ Jesoꞌosənꞌ lao zɉaꞌaqueꞌ Jerosalenṉəꞌ.
\c 11
\s1 Gwsoꞌelaogüeꞌe Jesoꞌosənꞌ catəꞌ beyoꞌe Jerosalenṉəꞌ
\p
\v 1 Jesoꞌosənꞌ len disipl c̱heꞌ caꞌ naꞌ len beṉəꞌ caꞌ zɉəsəꞌənao ḻegaꞌaqueꞌ besəꞌəžineꞌ gaḻəꞌəzə Jerosalenṉəꞌ. Naꞌ gaḻəꞌəzə Jerosalenṉəꞌ zɉəchiꞌ c̱hopə yež, ton Betfage naꞌ yeton Betania. Zɉəchiꞌin frent to yaꞌa deꞌen nziꞌ Yaꞌa Olibos. Nach Jesoꞌosənꞌ gwleɉeꞌ c̱hopə disipl c̱heꞌ caꞌ.
\v 2 Naꞌ gožeꞌ ḻegaꞌaqueꞌ: —Ḻeꞌe žɉaꞌac yež daoꞌ deꞌen chiꞌ delant, naꞌ catəꞌ šoꞌole laoꞌ yežənꞌ, leꞌile to borr daoꞌ bia cui noṉəꞌ cuia daꞌab yag. Naꞌ əsežleb naꞌ əc̱heꞌeleb ngalə.
\v 3 Naꞌ šə no ṉabe leꞌe bixc̱henꞌ chsežleb, naꞌ yeꞌeleneꞌ de que nadaꞌ X̱anḻe chyažɉdaꞌab, naꞌ de que lgüegwzə žɉəyesanaꞌab.
\p
\v 4 Nach beṉəꞌ caꞌ bseḻəꞌ Jesoꞌosənꞌ gwsaꞌaqueꞌ zɉaꞌaqueꞌ naꞌ lao zɉaꞌaqueꞌenəꞌ besəꞌəleꞌineꞌeb daꞌab yag cuit puert c̱he to yoꞌo deꞌen zo choꞌa nezənꞌ. Nach bosoꞌosežeꞌeb.
\v 5 Naꞌ nitəꞌ baḻə beṉəꞌ naꞌ gwseꞌe disipl caꞌ: —¿Binꞌ chonḻe? ¿Bixc̱henꞌ chsežle borr daꞌonəꞌ?
\p
\v 6 Nach disipl caꞌ gwseꞌe beṉəꞌ caꞌ canꞌ gož Jesoꞌosənꞌ ḻegaꞌaqueꞌ yesəꞌəneꞌ, nach gwsoꞌe latɉə bosoꞌosežeꞌeb.
\v 7 Nach gosəꞌəc̱heꞌeb lao Jesoꞌosənꞌ, naꞌ bosoꞌox̱oa xadoṉ c̱hegaꞌaquenꞌ cožəꞌəbənꞌ, nach gwžia Jesoꞌosənꞌ ḻeb.
\v 8 Naꞌ lao nez ganꞌ zdeꞌenəꞌ beṉəꞌ zan gwsoꞌelaogüeꞌeneꞌ naꞌ bosoꞌošilɉueꞌ xagaꞌaqueꞌenəꞌ ganꞌ zdeꞌ žieꞌ borrənꞌ naꞌ yebaḻeꞌ gosəꞌəc̱hogueꞌ xozəꞌ yag deꞌen ze tchoꞌa nezənꞌ, naꞌ bosəꞌəniteꞌen lao nezənꞌ.
\p
\v 9 Naꞌ beṉəꞌ zan gosəꞌəbialao lao Jesoꞌosənꞌ naꞌ ḻeczə beṉəꞌ zan ɉəsəꞌənao ḻeꞌ. Nach yogueꞌe gosəꞌəgüeꞌe beꞌ lban c̱heꞌ gosəꞌəneꞌ: —Sošgoꞌ mbalaz leꞌ zaꞌo nga, babseḻəꞌ X̱ancho Diozənꞌ leꞌ. Goclenšga netoꞌ.
\v 10 Catec mba gaquə c̱hecho deꞌen bazaꞌ benꞌ ṉabiaꞌ chioꞌo canꞌ gwnabiaꞌ deꞌe Rei Dabinꞌ canaꞌ. Lenczə leꞌe nitəꞌəle ganꞌ zo Diozənꞌ ḻedoyeꞌelaꞌocheꞌ.
\p
\v 11 Caꞌ goquə bežin Jesoꞌosənꞌ Jerosalenṉəꞌ, naꞌ ḻeczə catəꞌən gwyoꞌe yoꞌodaoꞌ əblaonəꞌ. Naꞌ beyož bgüieꞌ yoguəꞌ deꞌen chac ḻoꞌo yoꞌodaoꞌ əblaonəꞌ besaꞌaqueꞌ len disipl c̱heꞌ caꞌ šižiṉ naꞌ ɉaꞌaqueꞌ Betanianꞌ, c̱hedəꞌ bagoḻ.
\s1 Ben Jesoꞌosənꞌ par nic̱h bgüiž yag yix̱güionꞌ
\p
\v 12 Ža beteyo catəꞌ besaꞌaqueꞌ Betanianꞌ par ɉəsyaꞌaqueꞌ Jerosalenṉəꞌ deꞌe yoblə, gwdon Jesoꞌosənꞌ.
\v 13 Naꞌ zitəꞌələ bleꞌineꞌ to yag yix̱güio žia xlagueꞌe. Naꞌ gwyeɉeꞌ ɉəgüieꞌ šə žian yix̱güionꞌ, pero bitobi bželeneꞌ, con zlega xlagueꞌe žia, c̱hedəꞌ ca orənꞌ bito naquə tyemp c̱hei.
\v 14 Nach Jesoꞌosənꞌ gožeꞌ yag yix̱güionꞌ: —Caṉeque cuich bi frot cuioꞌ.
\p Naꞌ gwseꞌencze disipl c̱heꞌ caꞌ canꞌ gwneꞌenəꞌ.
\s1 Jesoꞌosənꞌ bebeɉeꞌ beṉəꞌ caꞌ chsoꞌon yaꞌa chyoꞌo yoꞌodaoꞌ əblao c̱he beṉəꞌ Izrael caꞌ
\p
\v 15 Gwde naꞌ besəꞌəžineꞌ Jerosalenṉəꞌ naꞌ catəꞌ gwyoꞌo Jesoꞌosənꞌ chyoꞌo yoꞌodaoꞌ əblaonəꞌ gwzolaogüeꞌ bebeɉeꞌ yoguəꞌəḻoḻ beṉəꞌ caꞌ chsoꞌon yaꞌa chyoꞌonəꞌ. Nach gwloꞌoṉiꞌaneꞌe mes c̱he beṉəꞌ caꞌ chosoꞌošaꞌ mech, naꞌ ḻeczə caꞌ beneꞌ len yag siy c̱he beṉəꞌ caꞌ əgwsoꞌotəꞌ ngolbexə.
\v 16 Naꞌ Jesoꞌosənꞌ bito beꞌe latɉə par yesəꞌəde notəꞌətezə beṉəꞌ chyoꞌo yoꞌodaoꞌ əblaonəꞌ šə zɉənoeꞌ yoaꞌ.
\v 17 Nach bzeɉniꞌineꞌ ḻegaꞌaqueꞌ, gožeꞌ: —Nyoɉczə Xtižəꞌ Diozənꞌ ganꞌ nan: “Cheꞌendaꞌ yesəꞌəna beṉəꞌ de que ližaꞌan naquən to latɉə ganꞌ soꞌon beṉəꞌ orasyon beṉəꞌ žaꞌ yoguəꞌ ṉasyon caꞌ.” Pero naꞌ leꞌe babenḻen ca to latɉə ganꞌ žaꞌ beṉəꞌ bguan.
\p
\v 18 Naꞌ beṉəꞌ gwnabiaꞌ c̱he bx̱oz caꞌ naꞌ ḻeczə beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwseꞌeneneꞌ canꞌ beꞌ Jesoꞌosənꞌ dižəꞌənəꞌ naꞌ besyəꞌəyilɉlažeꞌe naclə soꞌoneꞌ par əsoꞌoteꞌeneꞌ. Besəꞌəžebeꞌ cuich yosoꞌozenag beṉəꞌ c̱hegaꞌaqueꞌ c̱hedəꞌ yoguəꞌəte beṉəꞌ bosoꞌozenagueꞌ xtižeꞌenəꞌ naꞌ besyəꞌəbaneneꞌ ca güenṉəꞌ bzeɉniꞌineꞌ ḻegaꞌaqueꞌ.
\v 19 Naꞌ catəꞌ bazon gaḻ Jesoꞌosənꞌ len disipl c̱heꞌ caꞌ besaꞌaqueꞌ syodanꞌ naꞌ ɉəsyəꞌəgaꞌaṉeꞌ Betanianꞌ.
\s1 Bgüiž yag yix̱güionꞌ
\p
\v 20 Zil beteyo besaꞌaqueꞌ Betanianꞌ par ɉəyaꞌaqueꞌ Jerosalenṉəꞌ besyəꞌədieꞌ ganꞌ zo yag yix̱güionꞌ deꞌen əgwṉablažəꞌ Jesoꞌosənꞌ əbiž. Naꞌ besəꞌəleꞌi disipl c̱heꞌ caꞌ babgüiž do loi.
\v 21 Nach Bedənꞌ ɉsaꞌalažeꞌe canꞌ goquənꞌ naꞌ gožeꞌ Jesoꞌosənꞌ: —X̱anaꞌ, bgüiašc yag yix̱güionꞌ deꞌen əgwṉablažoꞌo əbiž ṉeɉe babgüižən.
\p
\v 22 Jesoꞌosənꞌ gožeꞌeneꞌ: —Ḻeꞌe gonḻilažəꞌ Diozənꞌ naꞌ gaquə canꞌ əṉabeleneꞌ.
\v 23 Deꞌe ḻi əchniaꞌ leꞌe, šə do yic̱hɉ do lažəꞌəle chonḻilažəꞌəle Diozənꞌ guaquə yeꞌele yaꞌa nga: “Bošaꞌ xišnaꞌonəꞌ naꞌ ɉəyezoꞌ ḻoꞌo nisdaꞌonəꞌ”, naꞌ gaquə canꞌ chonḻe mendadənꞌ deꞌen cheɉḻeꞌele sin cui chac c̱hop lažəꞌəle.
\v 24 Deꞌe naꞌanəꞌ chniaꞌ leꞌe de que bitəꞌətezə deꞌen chṉabele Diozənꞌ catəꞌən chonḻe orasyonṉəꞌ, šə cheɉḻeꞌele de que goneꞌ canꞌ chṉabeleneꞌenəꞌ naꞌ guaquəczənꞌ.
\v 25 Naꞌ catəꞌ solao gonḻe orasyonṉəꞌ, šə yosaꞌalažəꞌəle bi deꞌen baben to beṉəꞌ contr leꞌe, ḻeyeziꞌixen c̱heꞌ, par nic̱h ḻeczə X̱acho Diozənꞌ benꞌ zo yobanꞌ yeziꞌixeneꞌ xtoḻəꞌəlenꞌ.
\v 26 Pero šə leꞌe bito cheziꞌixenḻe c̱he saꞌalɉuežɉ beṉac̱hlenꞌ ḻeczə caꞌ X̱acho Diozənꞌ benꞌ zo yobanꞌ bito yeziꞌixeneꞌ xtoḻəꞌəlenəꞌ.
\s1 Yeḻəꞌ gwnabiaꞌ c̱he Jesoꞌosənꞌ
\p
\v 27 Naꞌ besyəꞌəžineꞌ Jerosalenṉəꞌ deꞌe yoblə. Naꞌ catəꞌ balažəꞌ Jesoꞌosənꞌ chyoꞌo yoꞌodaoꞌ əblaonəꞌ, benꞌ naquəch bx̱oz əblaoch naꞌ beṉəꞌ caꞌ chosoꞌosed chosoꞌoloꞌi ḻeinꞌ, naꞌ len beṉəꞌ golə blao c̱he netoꞌ beṉəꞌ Izrael gosəꞌəbigueꞌe lao Jesoꞌosənꞌ.
\v 28 Naꞌ gwseꞌeneꞌ: —¿Nac goquənꞌ gwxiꞌo yeḻəꞌ gwnabiꞌanəꞌ, naꞌ nonꞌ beṉ leꞌ yeḻəꞌ gwnabiaꞌanəꞌ par gonoꞌ deꞌe caꞌ chonoꞌ?
\p
\v 29 Jesoꞌosənꞌ božiꞌe xtižəꞌəgaꞌaqueꞌenəꞌ gožeꞌ: —Ḻeczə de to deꞌe ṉabdaꞌ leꞌe. Šə gwnale nadaꞌ deꞌen ṉabdaꞌ leꞌe nach əṉiaꞌ leꞌe nonꞌ beṉ nadaꞌ yeḻəꞌ gwnabiaꞌ par gonaꞌ deꞌe caꞌ chonaꞌ.
\v 30 Ḻeṉašc nadaꞌ: ¿nonꞌ bseḻəꞌ deꞌe Juanṉəꞌ bideꞌ bc̱hoeꞌ beṉəꞌ nis? ¿EDioz nanꞌ bseḻeꞌeneꞌ o šə beṉəꞌ yoblənꞌ?
\p
\v 31 Nach bosoꞌoxiꞌe entr ḻegaꞌaqueꞌ gosəꞌəneꞌ: —Šə yeꞌechoneꞌ de que Dioz nanꞌ bseḻeꞌe deꞌe Juanṉəꞌ par bc̱hoeꞌ beṉəꞌ nis, naꞌ yeꞌe chioꞌo: “¿Bixc̱hexanꞌ bito gwyeɉḻeꞌele c̱heꞌ?”
\v 32 Naꞌ nic gac yeꞌechoneꞌ de que beṉəꞌ yoblənꞌ əbseḻəꞌ deꞌe Juanṉəꞌ.
\p Gosəꞌəneꞌ caꞌ c̱hedəꞌ besəꞌəžebeꞌ bi soꞌon beṉəꞌ caꞌ zɉənžaguənꞌ, laꞌ yogueꞌe gwseꞌeɉḻeꞌe de que deꞌe ḻiczə Diozənꞌ bseḻeꞌe deꞌe Juanṉəꞌ par beꞌe xtižeꞌenəꞌ.
\v 33 Deꞌe naꞌanəꞌ gwseꞌe Jesoꞌosənꞌ: —Bito ṉezetoꞌ nonꞌ bseḻəꞌ deꞌe Juanṉəꞌ.
\p Nach gož Jesoꞌosənꞌ ḻegaꞌaqueꞌ: —Ḻeczə caꞌ nadaꞌ bito əṉiaꞌ nonꞌ beṉ nadaꞌ yeḻəꞌ gwnabiaꞌanəꞌ par gonaꞌ deꞌe caꞌ chonaꞌ.
\c 12
\s1 Jempl c̱he mos mal caꞌ
\p
\v 1 Nach Jesoꞌosənꞌ gwzolao beꞌe jempl nga bzeɉniꞌineꞌ ḻegaꞌaqueꞌ de que notəꞌətezə beṉəꞌ šə chsoꞌonczə yic̱hɉlaogaꞌaqueꞌ cui chosoꞌozenagueꞌ c̱heꞌ yesəꞌəbiꞌayiꞌe. Naꞌ gwneꞌ: —To beṉəꞌ gozeꞌ zan yag obasənꞌ yežlyo c̱heꞌenəꞌ. Naꞌ gwloꞌe leꞌeɉ doxenən. Naꞌ naꞌatezə beneꞌ to tanc ganꞌ bosoꞌosiꞌe obasənꞌ par bchoɉ xiseinꞌ. Naꞌ ḻeczə beneꞌ to campnary ganꞌ yesəꞌəcuaꞌa beṉəꞌ əsaꞌapeꞌ güertənꞌ. Nach beneꞌ güertənꞌ lao naꞌ beṉəꞌ par bosəꞌəgüia bosoꞌoyeꞌen, naꞌ gwde naꞌ gwzeꞌe gwyeɉeꞌ zitəꞌ.
\v 2 Catəꞌ bžin tyemp par yosyoꞌotobeꞌ cwsešənꞌ, bseḻeꞌe to mos c̱heꞌ par žɉəyexiꞌe to tlacw cwsešənꞌ deꞌen cheyaḻəꞌ yeziꞌe.
\v 3 Pero naꞌ beṉəꞌ caꞌ chsaꞌapə yag obas c̱heꞌenəꞌ bosoꞌoṉizeꞌ mosənꞌ, naꞌ gosəꞌəyineꞌeneꞌ nach bosyoꞌoseꞌeneꞌ sin cui bi bi bosyoꞌonežɉueꞌeneꞌ.
\v 4 Nach x̱an yag obasənꞌ bseḻeꞌe yeto mosənꞌ, naꞌ beṉəꞌ caꞌ bosoꞌošižeꞌeneꞌ yeɉ, naꞌ gwsoꞌoneꞌ güeꞌ yic̱hɉeꞌenəꞌ naꞌ bosoꞌožia bosoꞌoniteꞌeneꞌ.
\v 5 Nach bosseḻəꞌ x̱an yag obasənꞌ yeto mosənꞌ, naꞌ beṉəꞌ caꞌ chsaꞌapə yag obasənꞌ gwsoꞌoteꞌ ḻeꞌ. Naꞌ gwdechlə x̱an yag obasənꞌ bosseḻeꞌe mos zanch naꞌ beṉəꞌ caꞌ chsaꞌapə yag obasənꞌ gosəꞌəyineꞌ baḻeꞌ naꞌ yebaḻeꞌ gwsoꞌoteꞌ.
\p
\v 6 Naꞌ zo xiꞌiṉ tlišəꞌ x̱an yag obasənꞌ, naꞌ chacchgüeineꞌ c̱heꞌ. Nach ḻeꞌezelaogüe bseḻeꞌe ḻeꞌ. Ḻoꞌo yic̱hɉlaꞌaždaogüeꞌenəꞌ goqueneꞌ: “Gwsaꞌapəlɉeꞌ xiꞌiṉanꞌ respet yosyoꞌonežɉueꞌeboꞌ cwsešənꞌ.”
\v 7 Pero naꞌ beṉəꞌ caꞌ chsaꞌapə güertənꞌ catəꞌ besəꞌəleꞌineꞌ xiꞌiṉeꞌenəꞌ nach gwseꞌ lɉuežɉgaꞌaqueꞌ: “Benganꞌ xiꞌiṉ x̱an yag obasənꞌ, naꞌ ḻeꞌenəꞌ yegaꞌaṉ len bienṉəꞌ. Ḻeda gotchoneꞌ par nic̱h yegaꞌaṉlencho bien c̱he x̱eꞌenəꞌ.”
\v 8 Nach bosoꞌoṉizeꞌeneꞌ, gwsoꞌoteꞌeneꞌ, naꞌ besyəꞌəbeɉeꞌ cuerp c̱heꞌenəꞌ fuerlə güertənꞌ.
\p
\v 9 Beyož beꞌ Jesoꞌosənꞌ jempl nga, gožeꞌ beṉəꞌ caꞌ žaꞌanəꞌ: —¿Nac chactgüeile gon x̱an güertənꞌ len beṉəꞌ caꞌ? Žɉəyeṉitlaogüeꞌ ḻegaꞌaqueꞌ, naꞌ yegüeꞌe yaguənꞌ lao naꞌ beṉəꞌ yoblə.
\p
\v 10 ¿Ecabiṉəꞌ šeɉniꞌile bi zeɉen deꞌen nyoɉ Xtižəꞌ Diozənꞌ ganꞌ nan:
\q1 Yeɉ deꞌen cui gwsoꞌolažəꞌ mues güen yoꞌo caꞌ, ḻenṉəꞌ banaquən yeɉ squin.
\q1
\v 11 X̱ancho Diozənꞌ babzoeꞌ yeɉənꞌ ganꞌ cheyaḻəꞌ son naꞌ deꞌe zaquəꞌ yebanecho canꞌ beneꞌenəꞌ.
\p
\v 12 Nach beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ len beṉəꞌ golə blao caꞌ gwseꞌeneneꞌ yesəꞌəzeneꞌ Jesoꞌosənꞌ c̱hedəꞌ gwseꞌeɉniꞌineꞌ de que Jesoꞌosənꞌ beꞌe jempl nga contr ḻegaꞌaqueꞌ por ni c̱he deꞌen cui chseꞌeɉḻeꞌe c̱heꞌ. Pero bito bi gwsoꞌoneꞌ c̱hedəꞌ besəꞌəžebeꞌ bi soꞌon beṉəꞌ caꞌ žaꞌanəꞌ. Deꞌe naꞌanəꞌ con besaꞌaqueꞌ ganꞌ zo Jesoꞌosənꞌ.
\s1 Gosəꞌəṉabeneꞌ Jesoꞌosənꞌ šə yesəꞌəyixɉueꞌ impuest c̱he gobierṉənꞌ
\p
\v 13 Naꞌ gwde deꞌe caꞌ bosoꞌoseḻeꞌe baḻə beṉəꞌ fariseo caꞌ len yebaḻə beṉəꞌ caꞌ chsoꞌon txen len Erodənꞌ lao Jesoꞌosənꞌ par yesəꞌəbeꞌenaogüeꞌ əchoɉ dižəꞌ choꞌenəꞌ deꞌen yesəꞌəc̱hineꞌ par əsaꞌogüeꞌ xya contr ḻeꞌ lao beṉəꞌ gwnabiaꞌ c̱he gobierṉənꞌ.
\v 14 Nach catəꞌ besəꞌəžin beṉəꞌ canꞌ lao Jesoꞌosənꞌ naꞌ gwseꞌeneꞌ: —Maestr, ṉezetoꞌ de que choꞌo dižəꞌ ḻi naꞌ bito chžeboꞌ binꞌ yesəꞌəna beṉəꞌ yoblə, c̱hedəꞌ bito chonoꞌ cuent c̱he beṉəꞌ šə naqueꞌ blao o šə bito naqueꞌ. Ṉezetoꞌ canꞌ chsed chloꞌidoꞌ beṉəꞌ deꞌen cheneꞌe Diozənꞌ goncho naquən dižəꞌ ḻi. Deꞌe naꞌanəꞌ zedeṉabetoꞌ leꞌ par əṉaoꞌ netoꞌ naquənꞌ cheyaḻəꞌ gontoꞌ. ¿Enaquən güen c̱hixɉwtoꞌ impuest c̱he gobierṉ romanꞌ o šə bito cheyaḻəꞌ c̱hixɉwtoꞌon?
\p
\v 15 Jesoꞌosənꞌ ḻeꞌe gocbeꞌiteineꞌ caguə do lažəꞌəgaꞌaqueꞌenəꞌ. Con chseꞌeneneꞌ yeꞌe ḻegaꞌaqueꞌ to deꞌe yesəꞌəc̱hineꞌ contr ḻeꞌ. Nach gožeꞌ ḻegaꞌaqueꞌ: —¿Bixc̱henꞌ cheneꞌele cueɉle nadaꞌ dižəꞌ deꞌe əgwc̱hinḻe contr nadaꞌ? Ḻeꞌe gwloꞌi nadaꞌ to xmechlenꞌ.
\p
\v 16 Nach bosoꞌoloꞌineꞌ ḻeꞌ ton naꞌ catəꞌ bleꞌi Jesoꞌosənꞌ ḻen gožeꞌ ḻegaꞌaqueꞌ: —¿No diboj c̱heinəꞌ daꞌ laogüenṉəꞌ, naꞌ no leinꞌ nyoɉ laogüenṉəꞌ?
\p Nach gwseꞌeneꞌ: —C̱he Rei Sesar naꞌanəꞌ.
\p
\v 17 Jesoꞌosənꞌ gožeꞌ ḻegaꞌaqueꞌ: —Ḻeꞌe əgwnežɉo Sesarənꞌ deꞌen naquə c̱heꞌ ža, naꞌ ḻeꞌe gwnežɉo Diozənꞌ deꞌen cheyaḻəꞌ əgwnežɉwleneꞌ.
\p Nach beṉəꞌ caꞌ catəꞌ gwseꞌeneneꞌ xtižəꞌ Jesoꞌosənꞌ besyəꞌəbaneneꞌ canꞌ gožeꞌ ḻegaꞌaqueꞌ.
\s1 Gosəꞌəṉabeꞌ naquənꞌ yesyəꞌəban beṉəꞌ guat caꞌ
\p
\v 18 Naꞌ ḻeczə besəꞌəžin baḻə beṉəꞌ sadoseo caꞌ lao Jesoꞌosənꞌ. Naꞌ beṉəꞌ sadoseo caꞌ chosoꞌosed chosoꞌoloꞌineꞌ de que bito yesyəꞌəban beṉəꞌ guat caꞌ. Nach gosəꞌəṉabeneꞌ Jesoꞌosənꞌ gwseꞌeneꞌ:
\v 19 —Maestr, deꞌe Moisezənꞌ bzoɉeꞌ de que šə to beṉəꞌ byo beṉəꞌ nšagnaꞌ gateꞌ naꞌ yegaꞌaṉ noꞌol c̱heꞌenəꞌ sin cui no xiꞌiṉeꞌ gwzo, beṉəꞌ bišəꞌ beꞌenəꞌ bagotənꞌ cheyaḻəꞌ yequeꞌe noꞌolənəꞌ par nic̱h ṉitəꞌ xiꞌiṉ dia c̱he deꞌe beṉəꞌ bišeꞌenəꞌ.
\v 20 Naꞌ goquənꞌ gwnitəꞌ gažə bišəꞌəgaꞌaqueꞌ, naꞌ beṉəꞌ nechənꞌ bšagneꞌe naꞌ catəꞌ goteꞌ notono xiꞌiṉeꞌ gwzo.
\v 21 Naꞌ beṉəꞌ bišeꞌe əgwchopenꞌ bequeꞌe noꞌolənꞌ, naꞌ ḻeczə got beṉəꞌ əgwchopenꞌ naꞌ notono xiꞌiṉeꞌ gwzo. Nach ḻeꞌegatezə caꞌ goquə len beṉəꞌ bišeꞌe əgwyoṉenꞌ.
\v 22 Nach ḻeczə caꞌ goquə len bišəꞌəgaꞌaqueꞌ caꞌ yeḻaꞌ xte besyəꞌəyategaꞌaqueꞌ besyəꞌəqueꞌe noꞌolənꞌ naꞌ besyəꞌəyategaꞌaqueꞌ gwsaꞌat naꞌ notoczə no xiꞌiṉgaꞌaqueꞌ gwnitəꞌ. Naꞌ gwde gwsaꞌat beṉəꞌ caꞌ ḻeczə got noꞌolənꞌ.
\v 23 Naꞌ catəꞌ yesyəꞌəban beṉəꞌ guat caꞌ, ¿noeꞌ entr beṉəꞌ caꞌ gažə gaquə beꞌen c̱he noꞌolənꞌ? Laꞌ yogueꞌen bosyoꞌošagnaꞌaleneꞌ ḻeꞌ.
\p
\v 24 Naꞌ Jesoꞌosənꞌ gožeꞌ ḻegaꞌaqueꞌ: —Bito chonḻe xbab šaoꞌ, laꞌ bito ṉezele naquənꞌ nyoɉ Xtižəꞌ Diozənꞌ, naꞌ nic ṉezele naquənꞌ naquə yeḻəꞌ guac c̱he Diozənꞌ.
\v 25 Catəꞌən yesyəꞌəban beṉəꞌ guat caꞌ bito gacbiaꞌ šə zosoꞌošagneꞌe o šə cui. Naꞌ canaꞌ caguə no yosyoꞌošagnaꞌach. Ḻebze əsaꞌaqueꞌ len angl c̱he Diozənꞌ beṉəꞌ caꞌ nitəꞌ yobanꞌ.
\v 26 Naꞌ ca naquənꞌ chaquele bito yesyəꞌəban beṉəꞌ guat caꞌ, ¿əbito zaꞌalažəꞌəle canꞌ nyoɉ Xtižəꞌ Diozənꞌ deꞌen bzoɉ deꞌe Moisezənꞌ canꞌ gož Diozənꞌ ḻeꞌ. Moisezənꞌ bleꞌineꞌ to yiꞌ beḻ deꞌe chdoḻɉən to ḻoꞌo xis yešəꞌ. Naꞌ gož Diozənꞌ deꞌe Moisezənꞌ: “Nadaꞌ nacaꞌ Dioz c̱he deꞌe x̱axtaꞌole Abraanṉəꞌ, naꞌ Dioz c̱he deꞌe x̱axtaꞌole Isaaquənꞌ, naꞌ Dioz c̱he deꞌe x̱axtaꞌole Jacobənꞌ.”
\v 27 Naꞌ ṉezecho beṉəꞌ caꞌ niteꞌe len Diozənꞌ c̱hedəꞌ Diozənꞌ bito naqueꞌ Dioz c̱he beṉəꞌ guat, sino naqueꞌ Dioz c̱he beṉəꞌ caꞌ zɉəmban. Deꞌe naꞌanəꞌ ḻechguaḻe clelənꞌ cheɉniꞌile naꞌ chsed chloꞌile Xtižəꞌ Diozənꞌ clelə.
\s1 Deꞌen naquə deꞌe blaoch deꞌen non Diozənꞌ mendad goncho
\p
\v 28 Nach bžin to beṉəꞌ chsed chloꞌi ḻei deꞌen bzoɉ deꞌe Moisezənꞌ lao Jesoꞌosənꞌ, c̱hedəꞌ beneneꞌ rson canꞌ gwsaꞌacyožə beṉəꞌ caꞌ Jesoꞌosənꞌ naꞌ gwṉezeneꞌ de que binḻo božiꞌ Jesoꞌosənꞌ xtižəꞌəgaꞌaqueꞌenəꞌ. Nach gožeꞌ Jesoꞌosənꞌ: —Maestr, lao ḻei c̱he Diozənꞌ ¿nonꞌ deꞌen noneꞌ mendad goncho naquən deꞌe blaoch?
\p
\v 29 Jesoꞌosənꞌ gožeꞌeneꞌ: —Deꞌen naquə deꞌe žialaoch lao deꞌe caꞌ noneꞌ mendad goncho nan: “Ḻeꞌe gwzenag leꞌe beṉəꞌ Izrael. Tozə X̱ancho Diozənꞌ zaqueꞌe par güeꞌelaꞌocho.
\v 30 Deꞌe naꞌanəꞌ cheyaḻəꞌ gaquecho c̱he X̱ancho Diozənꞌ do yic̱hɉ do lažəꞌəcho, do fuers balor c̱hecho”, ḻenṉəꞌ naquən deꞌe žialaoch.
\v 31 Naꞌ deꞌe əgwchopenꞌ lebze nan len deꞌe nechənꞌ: “Cheyaḻəꞌ gaquecho c̱he saꞌalɉuežɉcho catg chaquecho c̱he cuincho.” Bito bi de deꞌen non Diozənꞌ mendad goncho deꞌen naquəch deꞌe žialaoch ca deꞌe caꞌ c̱hopə.
\p
\v 32 Nach beꞌenəꞌ chsed chloꞌi ḻeinꞌ gožeꞌ Jesoꞌosənꞌ: —Deꞌe güen canꞌ naoꞌ maestr. Naquən deꞌe ḻi canꞌ naoꞌonəꞌ de que tozə Diozənꞌ zo beꞌenəꞌ zaquəꞌ par güeꞌelaꞌocho.
\v 33 Naꞌ cheyaḻəꞌ gaquecho c̱he Diozənꞌ do yic̱hɉ do lažəꞌəcho do fuers balor c̱hecho. Naꞌ ḻeczə cheyaḻəꞌ gaquecho c̱he saꞌalɉuežɉ beṉac̱hcho catg chaquecho c̱he cuincho. Naꞌ deꞌe ḻi zaquəꞌəchən goncho canꞌ na deꞌe caꞌ non Diozənꞌ mendad goncho cle ca gotcho bia yix̱əꞌ naꞌ gwzeychob par güeꞌelaꞌochoneꞌ. Zaquəꞌəchən cle caꞌ bitəꞌətezəchlə deꞌe chnežɉwcho Diozənꞌ choꞌelaꞌochoneꞌ.
\p
\v 34 Jesoꞌosənꞌ gocbeꞌineꞌ božiꞌi beꞌenəꞌ xtižeꞌen len dižəꞌ sinꞌ, nach gož Jesoꞌosənꞌ ḻeꞌ: —Bazon goꞌo latɉə ṉabiaꞌ Diozənꞌ leꞌ.
\p Naꞌ dezd ža naꞌ bitoch no besyəꞌəyaxɉe bi deꞌe yesəꞌəṉabeneꞌ Jesoꞌosənꞌ.
\s1 Cristənꞌ naqueꞌ xiꞌiṉ dia c̱he deꞌe Rei Dabinꞌ
\p
\v 35 Naꞌ lao ṉeꞌe chsed chloꞌi Jesoꞌosənꞌ beṉəꞌ caꞌ žaꞌ ḻoꞌo yoꞌodaꞌonəꞌ, gožeꞌ ḻegaꞌaqueꞌ: —¿Bixc̱henꞌ chesəꞌəna beṉəꞌ caꞌ chosoꞌosed chosoꞌoloꞌi ḻeinꞌ de que Cristənꞌ naqueꞌ xiꞌiṉ dia c̱he deꞌe Rei Dabinꞌ?
\v 36 Cuin deꞌe Dabinꞌ bzoɉeꞌ canꞌ bloꞌi Spirit c̱he Diozənꞌ ḻeꞌ ganꞌ nan:
\q1 X̱ancho Diozənꞌ gožeꞌ X̱anaꞌan:
\q1 “Gwcheꞌedoꞌ cuitaꞌ nga ṉabiꞌacho txen,
\q1 naꞌ gonaꞌ par nic̱h ṉitəꞌ deꞌe caꞌ chsoꞌon contr leꞌ naꞌ beṉəꞌ contr c̱hioꞌ caꞌ xniꞌonəꞌ.”
\m
\v 37 Naꞌ deꞌen gwna deꞌe Dabinꞌ de que Cristənꞌ naqueꞌ X̱aneꞌ, ¿əcabi zeɉen de que Cristənꞌ naqueꞌ mazəchlə ca xiꞌiṉ dia c̱heꞌ naꞌazənꞌ ža?
\p Nach beṉəꞌ zan caꞌ besyəꞌəbeineꞌ bosoꞌozenagueꞌ c̱heꞌ.
\s1 Xtoḻəꞌ beṉəꞌ caꞌ chosoꞌosed chosoꞌoloꞌi ḻeinꞌ
\p
\v 38 Naꞌ Jesoꞌosənꞌ lao bzeɉniꞌineꞌ beṉəꞌ caꞌ gožeꞌ ḻegaꞌaqueꞌ: —Ḻeꞌe gon xbab nic̱h cui gonḻe canꞌ chsoꞌon beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ. Ḻegaꞌaqueꞌ chesyəꞌəbeineꞌ chəsəꞌəlažeꞌe zɉənyazeꞌ lachəꞌ toṉə naꞌ chesyəꞌəbeineꞌ catəꞌ beṉəꞌ chəsəꞌəguapeꞌ ḻegaꞌaqueꞌ diox naꞌ chəsəꞌənopeꞌe naꞌagaꞌaqueꞌeneꞌ do lao lquey.
\v 39 Ḻegaꞌaqueꞌ chseꞌeneneꞌ yesəꞌəbiꞌe ganꞌ chəsəꞌəbeꞌ beṉəꞌ blao catəꞌ chɉaꞌaqueꞌ yoꞌodaoꞌ naꞌ catəꞌ chac lṉi.
\v 40 Naꞌ chosoꞌox̱oayagueꞌ noꞌolə gozeb caꞌ par nic̱h noꞌol caꞌ chəsəꞌənežɉueꞌ ḻegaꞌaqueꞌ ližgaꞌaqueꞌen len bichlə deꞌen de c̱hegaꞌaqueꞌ. Naꞌ catəꞌ chsoꞌoneꞌ orasyonṉəꞌ chsoꞌechgüeꞌ dižəꞌ par nic̱h chəsəꞌəx̱oayagueꞌ beṉəꞌ. Mazəchlə castigw c̱hegaꞌaqueꞌ əgwnežɉo Diozənꞌ clezə ca c̱he beṉəꞌ yeziquəꞌəchlə c̱hedəꞌ chsoꞌoneꞌ deꞌe mal caꞌ zɉənac caꞌ len zɉəṉezeneꞌ canꞌ na ḻeinꞌ.
\s1 To noꞌolə gozebə beꞌe Diozənꞌ xmecheꞌenəꞌ
\p
\v 41 Naꞌ goquənꞌ to žlas catəꞌ chiꞌ Jesoꞌosənꞌ ḻoꞌo yoꞌodaoꞌ əblaonəꞌ ganꞌ nitəꞌ caj caꞌ ganꞌ chgoꞌo xmech netoꞌ beṉəꞌ Izrael par yoꞌodaoꞌ əblaonəꞌ. Naꞌ bleꞌineꞌ beṉəꞌ caꞌ catəꞌ gosəꞌəgüeꞌe xmechgaꞌaqueꞌenəꞌ ḻoꞌinəꞌ, naꞌ ḻeczə bleꞌineꞌ beṉəꞌ gwniꞌa caꞌ deꞌe sc̱haꞌo mechənꞌ gosəꞌəgüeꞌe.
\v 42 Naꞌ lao chgüieꞌ beṉəꞌ caꞌ, bžin to noꞌolə gozebə noꞌolə yašəꞌ naꞌ gwloꞌe c̱hopə seṉtab daoꞌ c̱heꞌenəꞌ ḻoꞌo cajənꞌ.
\v 43 Nach Jesoꞌosənꞌ goxeꞌ disipl c̱heꞌ caꞌ naꞌ gožeꞌ ḻegaꞌaqueꞌ: —Deꞌe ḻi əchniaꞌ leꞌe, noꞌolə gozebənꞌ naqueꞌ beṉəꞌ yašəꞌ, pero bagwloꞌe deꞌe zaquəꞌəch lao Diozənꞌ ca yoguəꞌ beṉəꞌ caꞌ yeḻaꞌ.
\v 44 Ḻegaꞌaqueꞌ gosəꞌəgoꞌo xmechgaꞌaqueꞌ deꞌe chechoꞌoṉən lao yeḻəꞌ gwniꞌa c̱hegaꞌaqueꞌenəꞌ, pero noꞌolə nga lao yeḻəꞌ yašəꞌ yeḻəꞌ ziꞌ c̱heꞌenəꞌ bagwloꞌe yoguəꞌ ca ga deꞌe daoꞌ de c̱heꞌ.
\c 13
\s1 Jesoꞌosənꞌ gwneꞌ de que gwžin ža yosyoꞌoc̱hiṉɉeꞌ yoꞌodaoꞌ əblaonəꞌ
\p
\v 1 Naꞌ catəꞌ bezaꞌ Jesoꞌosənꞌ yoꞌodaoꞌ əblaonəꞌ, to disipl c̱heꞌenəꞌ gožeꞌeneꞌ: —X̱antoꞌ, bgüiašc catg xoche zɉənoneꞌ yoꞌodaoꞌ əblao nga, naꞌ catg xoche yeɉ quinga zɉənoneneꞌen.
\p
\v 2 Nach gož Jesoꞌosənꞌ beꞌenəꞌ: —Chgüiale catec xoche naquə yoguəꞌ deꞌe caꞌ. Pero ca naquə deꞌen chleꞌile nga ṉaꞌa, gwžin ža yosyoꞌoc̱hiṉɉ beṉəꞌ doxenən naꞌ notoch no leꞌi ḻegaꞌaquən.
\s1 Deꞌen gaquə catəꞌən bazon baozə šoꞌo fin c̱he yežlyonꞌ
\p
\v 3 Naꞌ ɉaꞌaqueꞌ yaꞌa Olibosənꞌ deꞌen zo yešḻaꞌalə bdiṉɉənꞌ ze frent yoꞌodaoꞌ əblaonəꞌ. Naꞌ catəꞌ besəꞌəžineꞌ lao yaꞌanəꞌ gwcheꞌ Jesoꞌosənꞌ. Nach Bedənꞌ, Jacobənꞌ, Juanṉəꞌ len Ndresənꞌ gosəꞌəbigueꞌe lao Jesoꞌosənꞌ naꞌ bgašəꞌəzə gwseꞌeneꞌ:
\v 4 —Cheneꞌetoꞌ əṉezetoꞌ do batəꞌəquənꞌ gaquə deꞌe nga naoꞌ nga. Naꞌ ¿nac gaquə gacbeꞌitoꞌ catəꞌ bazon baozə gaquə canꞌ naꞌonəꞌ?
\p
\v 5 Jesoꞌosənꞌ gožeꞌ ḻegaꞌaqueꞌ: —Ḻeꞌe gapə cuidad par nic̱h notono əx̱oayag leꞌe.
\v 6 Gwžin ža catəꞌ zan beṉəꞌ gox̱oayag šaꞌ lao yežlyo nga yesəꞌəneꞌ de que zɉənaqueꞌ Cristənꞌ benꞌ gwleɉ Diozənꞌ par gaquəleneꞌ leꞌe. Naꞌ beṉəꞌ zan yesəꞌəx̱oayagueꞌ.
\p
\v 7 Pero naꞌ leꞌe bito žeble catəꞌ yenele dižəꞌ de que chac gwdiḻə, o de que guaquə gwdiḻə, c̱hedəꞌ canꞌ cheyaḻəꞌ gaquə. Naꞌ ḻaꞌaṉəꞌəczə šə bachac caꞌ bitoṉəꞌ əžin ža par šoꞌo fin c̱he yežlyonꞌ.
\v 8 Zeꞌe əžin žanꞌ yesyəꞌədiḻə yež contr yež, naꞌ ṉasyon contr ṉasyon. Naꞌ ḻeczə zan yež deꞌe zɉəchiꞌ doxenḻə yežlyonꞌ x̱oꞌochgua, naꞌ gaquə bgüin naꞌ gaquə bichlə deꞌen yesəꞌəzaquəꞌəziꞌe. Naꞌ te gaquə deꞌe quinga ṉeꞌe zaꞌaquəchczə deꞌen yesəꞌəžaglao beṉəꞌ žaꞌ yežlyonꞌ.
\p
\v 9 Naꞌ ca naquə leꞌe ža, cheyaḻəꞌ əṉezele de que beṉəꞌ contr c̱helenꞌ soꞌoneꞌ leꞌe lao naꞌ beṉəꞌ gwnabiaꞌ caꞌ, naꞌ yesəꞌəyineꞌ leꞌe ḻoꞌo yoꞌodaoꞌ c̱hegaꞌaqueꞌ caꞌ. Yesəꞌəc̱heꞌex̱ax̱ɉeꞌ leꞌe do lao goberṉador caꞌ naꞌ do lao rei par əsaꞌogüeꞌ xya contr leꞌe deꞌen chonḻilažəꞌəle nadaꞌ. Canꞌ gaquə güeꞌele xtižaꞌanəꞌ lao beṉəꞌ gwnabiaꞌ caꞌ.
\v 10 Naꞌ ḻeczə zeꞌe əžin žanꞌ šoꞌo fin c̱he yežlyonꞌ, žɉaꞌac beṉəꞌ doxen lao yežlyonꞌ yesəꞌəyix̱ɉuiꞌe dižəꞌ güen dižəꞌ cobə deꞌen chzeɉniꞌin c̱hiaꞌ len beṉəꞌ caꞌ žaꞌ yoguəꞌ ṉasyon.
\v 11 Naꞌ catəꞌ no yesəꞌəc̱heꞌex̱ax̱ɉ leꞌe lao beṉəꞌ gwnabiaꞌ caꞌ bito cueꞌ yic̱hɉle nac yožiꞌile xtižəꞌəgaꞌaqueꞌenəꞌ. Lao or naꞌ Spirit c̱he Diozənꞌ əgwzeɉniꞌin leꞌe binꞌ yeꞌegaꞌacleneꞌ. Deꞌe naꞌanəꞌ leꞌe yeꞌegaꞌacleneꞌ con canꞌ əgwzeɉniꞌi Spiritənꞌ leꞌe, c̱hedəꞌ caguə leꞌenəꞌ güeꞌele xtižaꞌanəꞌ sino que Spirit naꞌanəꞌ güeꞌen ḻen.
\v 12-13 Yoguəꞌ beṉəꞌ cui zɉənombiaꞌ Diozənꞌ yesəꞌəgueꞌineꞌ leꞌe c̱hedəꞌ chonḻilažəꞌəle nadaꞌ. Naꞌ xte no bišəꞌəle naꞌ no x̱ale soꞌoneꞌ leꞌe lao naꞌ beṉəꞌ par nic̱h soꞌoteꞌ leꞌe naꞌ ḻeczə xte no xiꞌiṉle soꞌoneꞌ leꞌe lao naꞌ beṉəꞌ caꞌ soꞌot leꞌe. Pero šə sotezə sole gonḻilažəꞌəle nadaꞌ xte catəꞌəchənꞌ əžin ža gatle, nachənꞌ žɉəyezole len Diozənꞌ.
\p
\v 14 Bablabczle canꞌ bzoɉ deꞌe profet Danielənꞌ benꞌ beꞌ xtižəꞌ Diozənꞌ canaꞌ. Naꞌ deꞌen bzoɉeꞌ nan de que beṉəꞌ mal caꞌ soꞌoneꞌ deꞌen naquə deꞌe zban juisy deꞌen chgueꞌi Diozənꞌ ḻoꞌo yoꞌodaoꞌ əblao c̱he chioꞌo beṉəꞌ Izrael naꞌ yoꞌodaꞌonəꞌ bitoch gonən žin. Naꞌ catəꞌ leꞌile gaquə deꞌe quinga, canaꞌ leꞌe nitəꞌəle Jodeanꞌ cheyaḻəꞌ əgwxoṉɉle naꞌ žɉaꞌacle do yaꞌadaꞌote. (Leꞌe chlable deꞌe nga ḻeꞌe šeɉniꞌin.)
\v 15 Naꞌ šə zo to beṉəꞌ choneꞌ dezcanz lao sotea c̱he ližeꞌenəꞌ catəꞌ gaquə deꞌe caꞌ bagwniaꞌ gaquə, bito gaḻəꞌ yotobeꞌ šinḻazeꞌ caꞌ žaꞌ ližeꞌenəꞌ, con cueɉyic̱hɉeꞌen.
\v 16 Ḻeczə caꞌ beṉəꞌ zda do yoba bito gaḻəꞌ yebiꞌe par žɉəyexiꞌe xadoṉ c̱heꞌenəꞌ ližeꞌenəꞌ.
\v 17 Naꞌ ca tyempənꞌ, ḻechguaḻe zdebə gaquən len noꞌol caꞌ zɉənoaꞌ bdaoꞌ, naꞌ noꞌol caꞌ chesəꞌəguažəꞌ bidaoꞌ.
\v 18 Ḻeꞌe gon orasyon par nic̱h cui cheyaḻəꞌ əgwxoṉɉle tyemp catəꞌ chiꞌ deꞌe zag.
\v 19 Catəꞌ gaquə deꞌe caꞌ ḻechguaḻe c̱hiꞌ saquəꞌ beṉəꞌ Izrael caꞌ žaꞌanəꞌ. Naꞌ dezd catəꞌən gwxe yežlyonꞌ xte ža ṉeža bito əṉacho bagwdiꞌ bagwxaquəꞌ beṉəꞌ canꞌ c̱hiꞌ saquəꞌ beṉəꞌ Izrael caꞌ, naꞌ bito əžinḻažeꞌe gaquə caꞌ len beṉac̱hənꞌ deꞌe yoblə.
\v 20 Žaləꞌ nžia Diozənꞌ biaꞌ yesəꞌəžaglaogüeꞌ sša ni yeto beṉəꞌ cuich zɉəmban catəꞌən yeyož yesəꞌəžaglaogüeꞌenəꞌ žaləꞌ caꞌ. Pero por ni c̱he deꞌen chaque Diozənꞌ c̱he beṉəꞌ caꞌ chsoꞌonḻilažəꞌ ḻeꞌ, beṉəꞌ caꞌ bagwleɉeꞌ par zɉənaqueꞌ xiꞌiṉeꞌ, deꞌe naꞌanəꞌ cui güeꞌe latɉə yesəꞌəžaglaogüeꞌ sša.
\p
\v 21 Naꞌ ža, šə no əyeꞌe leꞌe: “Bgüiašc nga zo Cristənꞌ benꞌ əbseḻəꞌ Diozənꞌ par gaquəleneꞌ chioꞌo”, o šə yeꞌe leꞌe: “Naꞌalə zoeꞌ”, bito šeɉḻeꞌele c̱heꞌ.
\v 22 Zan beṉəꞌ gox̱oayag šaꞌ lao yežlyo nga əseꞌe leꞌe de que zɉənaqueꞌ Cristənꞌ o de que chsoꞌe xtižəꞌ Diozənꞌ. Naꞌ soꞌoneꞌ miḻagr naꞌ soꞌoneꞌ deꞌe naquə yeḻəꞌ goban, par nic̱h yesəꞌəx̱oayagueꞌ beṉəꞌ caꞌ bagwleɉ Diozənꞌ par əsaꞌaqueꞌ xiꞌiṉeꞌ pero bito gaquə yesəꞌəx̱oayagueꞌ ḻegaꞌaqueꞌ.
\v 23 Baṉezele canꞌ gaquə, laꞌ bagwdix̱ɉueꞌidaꞌ leꞌe c̱he deꞌe caꞌ zeꞌe gaquə. Deꞌe naꞌanəꞌ ḻeꞌe so probnid par nic̱h cui x̱oayagle.
\s1 Canꞌ gaquə catəꞌ yidə Jesocristənꞌ deꞌe yoblə
\p
\v 24 Pero naꞌ lao ža caꞌ cate yeyož c̱hiꞌ saquəꞌ beṉac̱hənꞌ, bgüižənꞌ bitoch əgwseꞌeniꞌin naꞌ ḻeczə caꞌ bioꞌonəꞌ.
\v 25 Naꞌ belɉw caꞌ zɉəžia ḻeꞌe yobanꞌ yesəꞌəxopən, c̱hedəꞌ Diozənꞌ əgwsiꞌiṉseꞌ yoguəꞌ deꞌe caꞌ.
\v 26 Naꞌ canaꞌach beṉəꞌ caꞌ žaꞌ yežlyonꞌ yesəꞌəleꞌineꞌ nadaꞌ yidaꞌ deꞌe yoblə to ḻoꞌo beɉw, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Yidaꞌ nsaꞌa yeḻəꞌ guac xen c̱hiaꞌanəꞌ naꞌ yeḻəꞌ chey cheꞌeniꞌ c̱hiaꞌanəꞌ.
\v 27 Naꞌ əseḻaꞌa angl c̱hiaꞌ caꞌ doxenḻə yežlyonꞌ par yosyoꞌotobeꞌ beṉəꞌ caꞌ bagwleɉ Diozənꞌ par zɉənaqueꞌ xiꞌiṉeꞌ gatəꞌətezə zɉənasəlaseꞌ.
\p
\v 28 Ṉezele canꞌ chac do nga len yag yix̱güionꞌ. Catəꞌ bachezolao chebia xḻagueꞌe, chacbeꞌile de que bac̱h zon yelaꞌ yeɉonꞌ.
\v 29 Naꞌ ḻeczə canꞌ catəꞌən leꞌile gaquə deꞌe mal caꞌ bagwniaꞌ gaquə, canaꞌach əṉezele de que bazon əžin ža šoꞌo fin c̱he yežlyonꞌ.
\v 30 Deꞌe ḻi əchniaꞌ leꞌe, bitoṉəꞌ gat leꞌe nitəꞌəle tyemp nga ṉaꞌa catəꞌ solao gaquə yoguəꞌəḻoḻ deꞌe caꞌ.
\v 31 Ca naquə deꞌe caꞌ chleꞌicho ḻeꞌe yobanꞌ naꞌ yežlyonꞌ yesəꞌəde c̱hei, pero ca naquə xtižaꞌanəꞌ caguə deꞌe te cui gaquə canꞌ nanṉəꞌ.
\p
\v 32 Pero naꞌ ca naquə bi ža bi orənꞌ šoꞌo fin che yežlyonꞌ notono no ṉeze, ni que zɉəṉeze angl caꞌ nitəꞌ yobanꞌ, naꞌ ni que ṉezdaꞌ nadaꞌ nacaꞌ Xiꞌiṉ Diozənꞌ. Tozə X̱aꞌ Dioz nanꞌ ṉeze.
\p
\v 33 Deꞌe naꞌanəꞌ ḻeꞌe so probnid, ḻeꞌe gac ca beṉəꞌ nchoɉ bišgal c̱hei naꞌ ḻeꞌe gon orasyonṉəꞌ c̱hedəꞌ bito ṉezele batənꞌ yidaꞌ deꞌe yoblə.
\v 34 Naꞌ deꞌen cuezle batənꞌ yidaꞌ deꞌe yoblə gwxaquəꞌəleben canꞌ chac c̱he to beṉəꞌ cheɉ zitəꞌ. Antslə zeꞌe seꞌe ližeꞌenəꞌ, cheꞌe xmoseꞌ caꞌ bi deꞌen soꞌon to toeꞌ naꞌ ḻeczə caꞌ cheꞌe benꞌ chapə puertənꞌ gapeꞌen do tyempte par nic̱h caꞌ chapəczeꞌen catəꞌən yežineꞌ.
\v 35 Caꞌaczənꞌ naquən len leꞌe, ḻeꞌe so probnid c̱hedəꞌ bito ṉezele batənꞌ yidaꞌ deꞌe yoblə, nadanꞌ gwxaquəꞌəlebedaꞌ ca x̱an yoꞌonəꞌ. Bito ṉezele šə yidaꞌ do bagoḻ o šə do chel o do šbaḻ xen o šə do cheꞌeniꞌ.
\v 36 Ḻeꞌe so ca beṉəꞌ nchoɉ bišgal c̱hei, nic̱h sole probnid naꞌ cui senyalaꞌ leꞌe catəꞌən yidaꞌ deꞌe yoblə.
\v 37 Naꞌ deꞌe caꞌ bagwniaꞌ leꞌe taple ḻeczə əchniaꞌan par yoguəꞌ beṉəꞌ chsoꞌonḻilažəꞌ nadaꞌ. Ḻeso probnid par catəꞌən yidaꞌ deꞌe yoblə.
\c 14
\s1 Bosoꞌoxiꞌe canꞌ soꞌoneꞌ yesəꞌəzeneꞌ Jesoꞌosənꞌ
\p
\v 1 Naꞌ goquənꞌ ṉeꞌe chac faḻt yec̱hopə ža par gaḻəꞌ lṉi pascw c̱he netoꞌ beṉəꞌ Izrael Jerosalenṉəꞌ catəꞌən chaotoꞌ yetxtil deꞌen cui bi xneꞌi nc̱hix̱ə. Naꞌ beṉəꞌ caꞌ chəsəꞌənabiaꞌ bx̱oz caꞌ naꞌ len beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ besyəꞌəyilɉeꞌ naclə soꞌoneꞌ par yesəꞌəzeneꞌ Jesoꞌosənꞌ bgašəꞌəzə naꞌ soꞌoteꞌeneꞌ.
\v 2 Naꞌ gosəꞌəneꞌ: —Bito gotchoneꞌ lao lṉinəꞌ par nic̱h cui yesəꞌədopə beṉəꞌ caꞌ banitəꞌ laoꞌ syodanꞌ naꞌ yesəꞌədiḻəleneꞌ chioꞌo.
\s1 To noꞌolə bcuaseꞌ set zix̱ yic̱hɉ Jesoꞌosənꞌ
\p
\v 3 Naꞌ goquənꞌ zo Jesoꞌosənꞌ Betanianꞌ liž to beṉəꞌ le Simon beꞌenəꞌ güeꞌi yižgüeꞌ deꞌen nziꞌ ḻepr. Naꞌ lao chiꞌ Jesoꞌosənꞌ choꞌa mesənꞌ chaogüeꞌ, bžin to noꞌolə nox̱eꞌe to lmet de yeɉ fin deꞌe yožə to cḻas set deꞌe nziꞌ nardo. Naꞌ setənꞌ ḻechguaḻe zix̱ chḻaꞌan naꞌ ḻechguaḻe leꞌeyəꞌ zaquəꞌən. Naꞌ noꞌolənꞌ gwleꞌe lmetənꞌ ganꞌ yožə setənꞌ naꞌ bcuaseꞌen yic̱hɉ Jesoꞌosənꞌ.
\v 4 Nach baḻə beṉəꞌ caꞌ nitəꞌ len Jesoꞌosənꞌ liž Simonṉəꞌ besəꞌəžeꞌe naꞌ gwseꞌ lɉuežɉgaꞌaqueꞌ: —¿Bixc̱henꞌ con benditɉeineꞌ setənꞌ nox̱eꞌenəꞌ?
\v 5 Güenchlə žaləꞌ beteꞌen laꞌ mazlə tmil gueyəꞌ gueyoa leꞌineꞌ c̱hei žaləꞌ caꞌ, naꞌ mech deꞌen leꞌineꞌ c̱hei əgwnežɉueꞌen beṉəꞌ yašəꞌ par gaquəleneꞌ ḻegaꞌaqueꞌ.
\p Naꞌ gosəꞌədiḻeꞌ noꞌolənꞌ.
\p
\v 6 Nach Jesoꞌosənꞌ gožeꞌ: —Lɉoyeꞌenəꞌ. ¿Bixc̱henꞌ chdiḻleneꞌ? Güenchguanꞌ babeneꞌ len nadaꞌ.
\v 7 Ca naquə beṉəꞌ yašəꞌ caꞌ syempr nitəꞌəczeꞌ len leꞌe, naꞌ guaquə gaquəlengaꞌacleneꞌ batəꞌətezə cheneꞌele. Pero ca nacaꞌ nadaꞌ yešložganꞌ soaꞌ len leꞌe.
\v 8 Deꞌen bcuasəꞌ noꞌolənꞌ setənꞌ yic̱hɉaꞌanəꞌ naꞌ bežonən lao cuerp c̱hiaꞌanəꞌ beneꞌ deꞌen non goneꞌ len nadaꞌ žanꞌ yosoꞌocuašeꞌe nadaꞌ, canꞌ chonḻe chyeble set zix̱ənꞌ cuerp c̱he beṉəꞌ guatənꞌ.
\v 9 Deꞌe ḻi əchniaꞌ leꞌe gatəꞌətezə c̱hix̱ɉueꞌile dižəꞌ güen dižəꞌ cobə deꞌen chzeɉniꞌin c̱hiaꞌanəꞌ ḻeczə c̱hix̱ɉueꞌile canꞌ ben noꞌolə nga len nadaꞌ. Naꞌ šanch beṉəꞌ əsoꞌe dižəꞌ ca güenṉəꞌ beneꞌ.
\s1 Jod Iscariotənꞌ beneꞌ Jesoꞌosənꞌ lao naꞌ beṉəꞌ contr caꞌ
\p
\v 10 Gwde deꞌe caꞌ Jod Iscariotənꞌ benꞌ goquə txen len disipl caꞌ šižiṉ, gwyeɉeꞌ lao beṉəꞌ caꞌ chəsəꞌənabiaꞌ bx̱oz c̱he netoꞌ beṉəꞌ Izrael par gožeꞌ ḻegaꞌaqueꞌ de que əgwdieꞌ Jesoꞌosənꞌ lao naꞌagaꞌaqueꞌenəꞌ.
\v 11 Naꞌ beṉəꞌ caꞌ catəꞌ gwseꞌeneneꞌ xtižəꞌ Jodənꞌ ḻechguaḻe besyəꞌəbeineꞌ. Naꞌ gwsoꞌoneꞌ lyebe yosəꞌənežɉueꞌeneꞌ mech. Nach Jodənꞌ gwzolao gwcheꞌenaogüeꞌ batəꞌəquənꞌ so latɉə goneꞌ Jesoꞌosənꞌ lao naꞌagaꞌaqueꞌenəꞌ.
\s1 Lao gwsaꞌogüeꞌ xšeꞌ Jesoꞌosənꞌ bloꞌineꞌ ḻegaꞌaqueꞌ canꞌ soꞌoneꞌ par žɉesyəꞌəzalažeꞌe bi zeɉen ca deꞌen gateꞌ
\p
\v 12 Naꞌ ža nech c̱he lṉi pasconꞌ catəꞌən chsaꞌogüeꞌ yetxtil deꞌen cui bi xneꞌi nc̱hix̱ə naꞌ ḻeczə chsoꞌoteꞌ xiləꞌ daoꞌ par chɉəsyəꞌəzalažeꞌe canꞌ bebeɉ Diozənꞌ deꞌe x̱axtaꞌogaꞌaqueꞌenəꞌ Egiptonꞌ. Naꞌ ža naꞌanəꞌ gwseꞌ disipl c̱he Jesoꞌosənꞌ ḻeꞌ: —¿Ganꞌ cheꞌendoꞌ žɉeꞌeniꞌatoꞌ deꞌen gaocho xšeꞌ lṉi pasconꞌ?
\p
\v 13 Nach gwleɉeꞌ c̱hopə disipl c̱heꞌ caꞌ naꞌ bseḻeꞌe ḻegaꞌaqueꞌ laoꞌ syodanꞌ gožeꞌ: —Ḻeꞌe žɉaꞌac laoꞌ syodanꞌ naꞌ naꞌ yežagle to beṉəꞌ byo beṉəꞌ noaꞌ cheꞌe nisənꞌ yaꞌayeneꞌ. Naꞌ ḻeꞌe žɉənaoteleneꞌ.
\v 14 Naꞌ šoꞌole len beꞌenəꞌ naꞌ yeꞌele x̱an yoꞌonəꞌ: “Maestrənꞌ neꞌ goṉšgoꞌ to cuart ganꞌ güeꞌeniꞌatoꞌ deꞌen gaolentoꞌoneꞌ xšeꞌ lṉi pasconꞌ, netoꞌ disipl c̱heꞌ.”
\v 15 Nach əgwloꞌineꞌ leꞌe to cuart xen deꞌe zo žcuia laꞌaḻə, naꞌ ḻoꞌo cuartənꞌ zo to mes, naꞌ nitəꞌ ga cueꞌele naꞌ bichlə deꞌe chyažɉele. Ḻoꞌo cuart naꞌanəꞌ əgwsiꞌiniꞌale deꞌen gaocho lao lṉi pasconꞌ.
\p
\v 16 Nach gwsaꞌac disipl c̱heꞌ caꞌ naꞌ catəꞌ besəꞌəžineꞌ syodanꞌ yoguəꞌəḻoḻ canꞌ gožeꞌ ḻegaꞌaqueꞌenəꞌ goquə. Nach bosoꞌosiꞌiniꞌe deꞌen gwsaꞌogüeꞌ xšeꞌ lṉi pasconꞌ.
\p
\v 17 Naꞌ catəꞌ beyož gwx̱en, Jesoꞌosənꞌ len disipl c̱heꞌ caꞌ šižiṉ besəꞌəžineꞌ yoꞌonəꞌ ganꞌ babosoꞌosiꞌiniꞌe deꞌen əsaꞌogüeꞌenəꞌ.
\v 18 Naꞌ lao zɉəchiꞌe choꞌa mesənꞌ chsaꞌogüeꞌ, Jesoꞌosənꞌ gožeꞌ ḻegaꞌaqueꞌ: —Deꞌe ḻi əchniaꞌ leꞌe, entr to leꞌe chaolenḻe nadaꞌ txen gonḻe nadaꞌ lao naꞌ beṉəꞌ contr caꞌ.
\p
\v 19 Nach deꞌe juisy deꞌe gwsaꞌaqueneꞌ catəꞌ beyož gwneꞌ caꞌ, nach tgüeɉə tgüeɉeꞌ gwseꞌe ḻeꞌ: —X̱anaꞌ ¿ənadaꞌan gonaꞌ leꞌ lao naꞌ beṉəꞌ contr caꞌ?
\p
\v 20 Jesoꞌosənꞌ gožeꞌ ḻegaꞌaqueꞌ: —Entr leꞌe šižiṉle tole chneꞌ naꞌalenꞌ ḻoꞌo platənꞌ txen len nadanꞌ, gonḻe nadaꞌ lao naꞌ beṉəꞌ caꞌ.
\v 21 Banaquəczən soꞌot beṉəꞌ nadaꞌ canꞌ nyoɉ Xtižəꞌ Diozənꞌ nan gaquə c̱hiaꞌ nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Pero probchguazə beꞌenəꞌ gon nadaꞌ lao naꞌ beṉəꞌ contr caꞌ. Ncaꞌalə xṉeze žaləꞌ cuiclə golɉeꞌenəꞌ.
\p
\v 22 Naꞌ lao chsaꞌogüeꞌenəꞌ gwxiꞌ Jesoꞌosənꞌ yetxtilənꞌ, naꞌ beꞌe yeḻəꞌ chox̱cwlen c̱he Diozənꞌ. Gwde naꞌ bzoxɉeꞌen, nach beꞌen disipl c̱heꞌ caꞌ, gožeꞌ ḻegaꞌaqueꞌ: —Ḻeꞌe gaon. Ḻenṉəꞌ cuerp c̱hiaꞌanəꞌ.
\p
\v 23 Nach ḻeczə bex̱eꞌe basənꞌ ganꞌ yožə nis obasənꞌ, naꞌ lao nox̱eꞌen beꞌe yeḻəꞌ chox̱cwlen c̱he Diozənꞌ nach bosnežɉueꞌen ḻegaꞌaqueꞌ naꞌ yogueꞌe gwseꞌeɉeꞌen.
\v 24 Nach gožeꞌ ḻegaꞌaqueꞌ: —Ḻenṉəꞌ xc̱henaꞌanəꞌ. Naꞌ xc̱henaꞌ naꞌanəꞌ ḻalɉə por ni c̱he xtoḻəꞌ beṉac̱hənꞌ. Naꞌ deꞌen ḻalɉənṉəꞌ solao gaquə deꞌe cobə deꞌen ben Diozənꞌ lyebe goneꞌ par gaquəleneꞌ beṉac̱hənꞌ.
\v 25 Deꞌe ḻi chniaꞌ leꞌe ṉaꞌa zelao cheꞌeɉaꞌ nis obanꞌ. Pero de yeto deꞌe yebeichecho mazəchlə canꞌ chebeicho cheꞌeɉcho nis obanꞌ, ḻenṉəꞌ deꞌen socho mbalaz zeɉḻicaṉe catəꞌən socho txen ganꞌ ṉabiꞌa len Diozənꞌ.
\s1 Jesoꞌosənꞌ gwneꞌ de que Bedənꞌ cui c̱hebeꞌ šə nombiꞌeneꞌ
\p
\v 26 Naꞌ beyož gwseꞌeɉ gwsaꞌogüeꞌ gwsoꞌoḻeꞌ to imno, nach besəꞌəchoɉeꞌ ɉaꞌaqueꞌ yaꞌa deꞌen nziꞌ Olibos.
\v 27 Naꞌ lao zɉəngüeꞌe nezənꞌ Jesoꞌosənꞌ gožeꞌ disipl c̱heꞌ caꞌ: —Ṉežeꞌ yoguəꞌəle cueɉyic̱hɉle nadaꞌ por ni c̱he deꞌen gaquə c̱hiaꞌ. Gaquə canꞌ nyoɉ Xtižəꞌ Diozənꞌ nan: “Gotaꞌ beṉəꞌ goye xiḻəꞌənəꞌ naꞌ xiḻəꞌ c̱heꞌ caꞌ əsaꞌasəlasəb.”
\v 28 Pero naꞌ catəꞌ yeyas yebanaꞌ ladɉo beṉəꞌ guat caꞌ, yobəchdaꞌ yeyaꞌa Galileanꞌ cle ca leꞌe.
\p
\v 29 Nach Bedənꞌ gožeꞌ Jesoꞌosənꞌ: —Nadaꞌ cuat cueɉəyic̱hɉaꞌ leꞌ ḻaꞌaṉəꞌəczə šə yoguəꞌ beṉəꞌ yeziquəꞌəchlə yesəꞌəbeɉyic̱hɉleꞌ leꞌ.
\p
\v 30 Jesoꞌosənꞌ gožeꞌeneꞌ: —Deꞌe ḻi əchniaꞌ leꞌ ṉežeꞌ antslə zeꞌe cuež ḻeconꞌ c̱hop las, gaquə šoṉ las cui chc̱heboꞌ de que nombiꞌo nadaꞌ.
\p
\v 31 Nach Bedənꞌ gožeꞌ Jesoꞌosənꞌ: —Ḻaꞌaṉəꞌəczə šə chonclən byen guatlenczaꞌ leꞌ bito əṉiaꞌ de que bito nombiꞌa leꞌ.
\p Naꞌ ḻeczə caꞌ əgwseꞌ yoguəꞌ disipl c̱heꞌ caꞌ ḻeꞌ.
\s1 Jesoꞌosənꞌ beneꞌ orasyon ḻoꞌo güert deꞌen nziꞌ Getsemani
\p
\v 32 Naꞌ catəꞌ Jesoꞌosənꞌ len disipl c̱heꞌ caꞌ besəꞌəžineꞌ latɉənꞌ ganꞌ nziꞌ Getsemani, gožeꞌ ḻegaꞌaqueꞌ: —Ngazə ḻecueꞌ žlac šaꞌa deꞌe naꞌ žɉenaꞌ orasyon.
\p
\v 33 Naꞌ gwc̱heꞌe Bedənꞌ len Jacobənꞌ naꞌ Juanṉəꞌ, gwsaꞌaqueꞌ ganꞌ nitəꞌ disipl caꞌ yeḻaꞌ. Naꞌ Jesoꞌosənꞌ gwzolao gwzochgüeꞌ trist, naꞌ deꞌe juisy deꞌe goqueneꞌ ḻoꞌo yic̱hɉlaꞌaždaꞌogüeꞌenəꞌ.
\v 34 Naꞌ gožeꞌ ḻegaꞌaqueꞌ: —Tristchgua zo yic̱hɉlaꞌaždaoguaꞌanəꞌ xte bachonən yeḻəꞌ got. Ḻecuezə nga naꞌ sole əṉaꞌazle len nadaꞌ.
\p
\v 35 Nach gwdieꞌ gwyeɉeꞌ yelatəꞌ delant naꞌ ɉeteꞌe gosc̱hoꞌalə lao yonꞌ. Nach beneꞌ orasyonṉəꞌ gwṉabeneꞌ Diozənꞌ šə guac te caꞌazə deꞌen c̱hiꞌ saqueꞌe.
\v 36 Naꞌ gožeꞌ X̱eꞌenəꞌ: —X̱aꞌ Dioz, leꞌ chac chonoꞌ yoguəꞌəḻoḻ. Benšga ca te caꞌazə deꞌen c̱hiꞌ sacaꞌanəꞌ, pero bito cheꞌendaꞌ gaquə deꞌe əniaꞌ nadaꞌ, sino gaquə con canꞌ ənaoꞌ leꞌ.
\p
\v 37 Nach beyeɉeꞌ ganꞌ nitəꞌ disipl caꞌ šoṉə, naꞌ ɉəyediꞌe ḻegaꞌaqueꞌ chəsəꞌətaseꞌ. Naꞌ gožeꞌ Bedənꞌ: —Simon ¿əchtasoꞌ? ¿Eni to or bito bcheɉdoꞌ ənaꞌazoꞌ len nadaꞌ?
\v 38 Ḻeꞌe ṉaꞌ, naꞌ ḻeꞌe gon orasyon nic̱h cui coꞌo gwxiyeꞌen leꞌe nez mal. Ṉezdaꞌ cheneꞌele əṉaꞌazle len nadaꞌ, pero cui chzoile.
\p
\v 39 Naꞌ gozseꞌe ganꞌ niteꞌenəꞌ deꞌe yoblə, ɉəzeneꞌ orasyonṉəꞌ, naꞌ gwnaczeꞌ canꞌ bagwneꞌ.
\v 40 Naꞌ catəꞌ bezžineꞌ ganꞌ niteꞌenəꞌ deꞌe yoblə, ɉəyezdiꞌiczeꞌ disipl caꞌ šoṉə chesəꞌətaseꞌ, tant cuich chesəꞌəzoineꞌ bišgalənꞌ. Naꞌ xte bito zɉəṉezeneꞌ bi əseꞌe ḻeꞌ.
\v 41 Naꞌ gwzeꞌe deꞌe yoblə ganꞌ niteꞌenəꞌ ɉeneꞌ orasyonṉəꞌ deꞌe gwyoṉ lase, naꞌ catəꞌ bezžineꞌ ganꞌ nitəꞌ disipl caꞌ šoṉə, naꞌ gožeꞌ ḻegaꞌaqueꞌ: —¿Eṉeꞌe chtasle? ¿Eṉeꞌe chonḻe dezcanz? Bac̱h goc ṉaꞌa. Diozənꞌ bseḻeꞌe nadaꞌ golɉaꞌ beṉac̱h naꞌ ṉaꞌa bac̱h bžin or gacaꞌ lao naꞌ beṉəꞌ mal caꞌ par soꞌoteꞌ nadaꞌ.
\v 42 Ḻeꞌe secha, ḻeꞌe šoꞌo. Bazaꞌ benꞌ gon nadaꞌ lažəꞌ naꞌ beṉəꞌ contr caꞌ.
\s1 Gosəꞌəzeneꞌ Jesoꞌosənꞌ
\p
\v 43 Ṉeꞌe choꞌete Jesoꞌosənꞌ dižəꞌən caꞌ catəꞌ bžin Jodənꞌ benꞌ naqueꞌ cuent len disipl caꞌ šižiṉ. Naꞌ žagueꞌ zan beṉəꞌ bosoꞌoseḻəꞌ beṉəꞌ caꞌ chesəꞌənabiaꞌ bx̱oz c̱he netoꞌ beṉəꞌ Izrael naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ, naꞌ beṉəꞌ golə blao c̱he ṉasyon c̱hetoꞌonəꞌ. Beṉəꞌ caꞌ zɉənžag Jodənꞌ zɉənaḻeꞌe spad naꞌ zɉənḻeneꞌ no yag.
\v 44 Jodənꞌ babzeɉniꞌineꞌ ḻegaꞌaqueꞌ canꞌ goneꞌ par əgwdieꞌ Jesoꞌosənꞌ lao naꞌagaꞌaqueꞌenəꞌ, gožeꞌ ḻegaꞌaqueꞌ: —Beꞌenəꞌ gaoguaꞌ bxidənꞌ, ḻeꞌenəꞌ senḻe naꞌ gwc̱heɉleneꞌ par əc̱heꞌeleneꞌ.
\p
\v 45 Nach catəꞌ bžineꞌ ganꞌ zo Jesoꞌosənꞌ ḻeꞌe bgüiguəꞌəteꞌ cuiteꞌenəꞌ naꞌ gožeꞌeneꞌ: —Maestr.
\p Naꞌ gwdaogüeꞌeneꞌ bxidənꞌ, pero caguə do lažeꞌenəꞌ beneꞌ caꞌ.
\v 46 Nach beṉəꞌ caꞌ əzɉaꞌac len Jodənꞌ gwsoꞌox̱eꞌe Jesoꞌosənꞌ naꞌ gosəꞌəc̱heꞌex̱ax̱ɉeꞌ ḻeꞌ.
\p
\v 47 Naꞌ to beṉəꞌ zecha gaḻəꞌəzə gwlec̱hɉ spad c̱heꞌenəꞌ gwdineꞌen šḻaꞌa nag xmos bx̱ozənꞌ benꞌ naquəch əblao, gwc̱hogtechgüeꞌen.
\v 48 Nach Jesoꞌosənꞌ gožeꞌ beṉəꞌ caꞌ: —Zaꞌacle len spad naꞌ len yag zedəx̱enḻe nadaꞌ ca to beṉəꞌ bguan.
\v 49 Yoguəꞌ ža gwchiꞌa len leꞌe bsed bloꞌidaꞌ beṉəꞌ ḻoꞌo yoꞌodaoꞌ əblaonəꞌ naꞌ bito gwxenḻe nadaꞌ. Pero chac deꞌe quinga par nic̱h chac complir canꞌ naꞌ Xtižəꞌ Diozənꞌ deꞌen nyoɉənꞌ gaquə c̱hiaꞌ.
\p
\v 50 Naꞌ lao or naꞌ bosyoꞌoxoṉɉ yoguəꞌ disipl c̱heꞌ caꞌ gosəꞌəbeɉyic̱hɉeꞌeneꞌ.
\s1 Beṉəꞌ güegonꞌ benꞌ bexoṉɉ
\p
\v 51 Naꞌ to beṉəꞌ güegonꞌ ɉənaogüeꞌ Jesoꞌosənꞌ, naꞌ nyazeꞌ to lachəꞌ deꞌe naquə ca to sabana.
\v 52 Naꞌ ca gwsoꞌox̱eꞌeneꞌ gwsoꞌox̱eꞌe slezə xeꞌenəꞌ naꞌ ḻeꞌe bchoɉteꞌ ḻoꞌinəꞌ naꞌ bexoṉɉeꞌ gaꞌalyideꞌ.
\s1 Gosəꞌəc̱heꞌe Jesoꞌosənꞌ lao beṉəꞌ golə beṉəꞌ blao caꞌ chəsəꞌənabiaꞌ ṉasyon Izraelənꞌ
\p
\v 53 Naꞌ beṉəꞌ caꞌ gosəꞌəzen Jesoꞌosənꞌ gosəꞌəc̱heꞌeneꞌ lao Caifasənꞌ benꞌ naquəch bx̱oz əblao c̱he netoꞌ beṉəꞌ Izrael. Nach besəꞌədobə yoguəꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len yeziquəꞌəchlə beṉəꞌ golə blao caꞌ chəsəꞌənabiaꞌ ṉasyon c̱hetoꞌonəꞌ.
\v 54 Nach Bedənꞌ ɉənaogüeꞌ Jesoꞌosənꞌ zitəꞌ zitəꞌ xte bžinteꞌ liž bx̱oz əblaonəꞌ naꞌ gwyoꞌe chyoꞌonəꞌ. Naꞌ beṉəꞌ caꞌ zɉənaquə x̱aꞌag yoꞌodaꞌonəꞌ zɉəchiꞌe choꞌa yiꞌinəꞌ par chəsyəꞌəžeꞌineꞌ. Nach Bedənꞌ ɉəc̱hiꞌe len ḻegaꞌaqueꞌ choꞌa yiꞌinəꞌ.
\p
\v 55 Naꞌ yoguəꞌ bx̱oz əblao caꞌ naꞌ yeziquəꞌəchlə beṉəꞌ golə blao caꞌ chesəꞌənabiaꞌ ṉasyon Izrael c̱hetoꞌonəꞌ gosəꞌəyilɉeꞌ beṉəꞌ əsoꞌe dižəꞌ contr Jesoꞌosənꞌ par nic̱h yesəꞌəc̱hoglaogüeꞌen c̱heꞌ de que gateꞌ, pero notono besəꞌəželeneꞌ.
\v 56 Beṉəꞌ zan gwsoꞌe dižəꞌ güenḻažəꞌ contr Jesoꞌosənꞌ pero xtižəꞌəgaꞌaqueꞌenəꞌ bito besyəꞌədiḻən.
\v 57 Nach baḻə beṉəꞌ gosəꞌəzecheꞌ naꞌ gwsoꞌe dižəꞌ güenḻažəꞌ contr ḻeꞌ gosəꞌəneꞌ:
\v 58 —Benetoꞌ catəꞌ gwneꞌ: “Yoc̱hiṉɉaꞌ yoꞌodaoꞌ əblao nga gwsoꞌon beṉəꞌ, naꞌ lao šoṉə žazə gonaꞌ yeto yoꞌodaoꞌ əblao deꞌen cui gon beṉac̱hənꞌ.”
\p
\v 59 Pero biaꞌaczə bito bediḻe deꞌen gosəꞌəneꞌenəꞌ.
\p
\v 60 Nach gwzožaꞌ benꞌ naquəch bx̱oz əblao gwzecheꞌ gwchoḻgaꞌaqueꞌenəꞌ gožeꞌ Jesoꞌosənꞌ: —¿Ebito bi naoꞌ ca naquə deꞌe nga chosəꞌəcuiš beṉəꞌ quinga leꞌ?
\p
\v 61 Naꞌ Jesoꞌosənꞌ bitobi gwneꞌ. Nach gož benꞌ naquəch bx̱oz əblao ḻeꞌ: —¿Eḻe lenꞌ Cristənꞌ benꞌ gwleɉ Diozənꞌ par gaquəlenoꞌ ṉasyon c̱hechonꞌ? ¿Elenꞌ Xiꞌiṉ Dioz benꞌ choꞌelaꞌocho?
\p
\v 62 Jesoꞌosənꞌ gožeꞌeneꞌ: —Ḻe benꞌ naoꞌ naꞌ nadaꞌ. Diozənꞌ bseḻeꞌe nadaꞌ golɉaꞌ beṉac̱h naꞌ əchniaꞌ leꞌe gwžin ža leꞌile nadaꞌ chiꞌa cuit X̱aꞌ Diozənꞌ benꞌ napə ḻeꞌezelaogüe yeḻəꞌ guac xen naꞌ ṉabiꞌa txen len ḻeꞌ. Naꞌ leꞌile nadaꞌ yetɉaꞌ yobanꞌ to ḻoꞌo beɉw.
\p
\v 63 Catəꞌ bene benꞌ naquəch bx̱oz əblao xtižəꞌ Jesoꞌosənꞌ gwšoꞌ gwc̱hezəꞌ xeꞌenəꞌ goqueneꞌ deꞌe mal juisy canꞌ gwna Jesoꞌosənꞌ, naꞌ gwneꞌ: —¿Nochxa testigonꞌ chyažɉecho?
\v 64 Babenecho chžia chniteꞌe Diozənꞌ deꞌen neꞌ naqueꞌ Xiꞌiṉ Dioz len naqueꞌ con to beṉac̱hzə. ¿Bi nale? ¿Nac gonchoneꞌ?
\p Nach yoguəꞌ beṉəꞌ caꞌ žaꞌanəꞌ gosəꞌəc̱hoglaogüeꞌen c̱heꞌ de que cheyaḻəꞌ gateꞌ.
\p
\v 65 Nach baḻeꞌ bosoꞌožaꞌ x̱eneꞌenəꞌ choꞌalao Jesoꞌosənꞌ, naꞌ bosoꞌocuašeꞌe choꞌalaogüeꞌenəꞌ len to lachəꞌ naꞌ gosəꞌəbažeꞌeneꞌ, gwseꞌeneꞌ: —Gwṉeyaꞌašc ¿nonꞌ chbažəꞌ leꞌ?
\p Nach x̱aꞌag yoꞌodaoꞌ caꞌ ḻeczə gosəꞌəgapeꞌe x̱agueꞌenəꞌ.
\s1 Bedənꞌ bito gwc̱hebeꞌ šə nombiꞌe Jesoꞌosənꞌ
\p
\v 66 Naꞌ lao chac deꞌe quinga Bedənꞌ chiꞌe chyoꞌo c̱he benꞌ naquəch bx̱oz əblaoch naꞌ naꞌ chiꞌe catəꞌ bžin to noꞌol criad c̱he benꞌ naquəch bx̱oz əblaonꞌ.
\v 67 Naꞌ catəꞌ bleꞌineꞌ chiꞌ Bedənꞌ choꞌa yiꞌinəꞌ par chežeꞌineꞌ, noꞌolənꞌ bgüiayaṉeꞌeneꞌ naꞌ gožeꞌeneꞌ: —Ḻeczə lenoꞌ leꞌ nacoꞌ txen Jesoꞌos beṉəꞌ Nasaretənꞌ.
\p
\v 68 Pero Bedənꞌ bito gwc̱hebeꞌ šə naqueꞌ txen len Jesoꞌosənꞌ. Gožeꞌ noꞌolənꞌ: —Bito nombiꞌaneꞌ naꞌ nic ṉezdaꞌ bi dižəꞌən choꞌo.
\p Naꞌ gwyeɉeꞌ ɉəzecheꞌ choꞌa puert saguanṉəꞌ. Nach ḻeꞌe gwchežte to ḻecw.
\v 69 Nach bezleꞌi noꞌolənꞌ ḻeꞌ deꞌe yoblə naꞌ gožeꞌ beṉəꞌ caꞌ žaꞌanəꞌ: —Benga naqueꞌ txen len beṉəꞌ caꞌ.
\p
\v 70 Naꞌ deꞌe yoblə bito gwc̱hebeꞌ šə nombiꞌe Jesoꞌosənꞌ. Naꞌ chaczə šlož beṉəꞌ caꞌ žaꞌanəꞌ gosəꞌəzeꞌe Bedənꞌ: —Deꞌe ḻiczə leꞌ nacoꞌ txen len beṉəꞌ caꞌ c̱hedəꞌ ca nga chṉioꞌ ngazə nacbiaꞌ de que nacoꞌ beṉəꞌ Galilea.
\p
\v 71 Nach Bedənꞌ bzoeꞌ Diozənꞌ testigw gwneꞌ: —Diozənꞌ goṉeꞌ nadaꞌ castigw šə chonḻažaꞌan əṉiaꞌ bito nombiꞌa benꞌ nale caꞌ. Chzoaꞌ jorament lao Diozənꞌ, bito nombiꞌaneꞌ.
\p
\v 72 Naꞌ ḻeꞌe gwchežte ḻeconꞌ deꞌe yoblə. Nach ɉsaꞌalažəꞌ Bedənꞌ canꞌ gož Jesoꞌosənꞌ ḻeꞌ de que zeꞌe gaquə c̱hop las cuež ḻeconꞌ catəꞌ gaquə šon las cui chc̱hebeꞌ de que nombieꞌeneꞌ. Naꞌ catəꞌ beneꞌ xbab c̱he deꞌenəꞌ gwchežyašeꞌe tant deꞌe goqueneꞌ.
\c 15
\s1 Gosəꞌəc̱heꞌe Jesoꞌosənꞌ lao Pilatənꞌ
\p
\v 1 Naꞌ catəꞌ gwyeꞌeniꞌinəꞌ bx̱oz əblao caꞌ naꞌ yeziquəꞌəchlə beṉəꞌ golə blao caꞌ, naꞌ len beṉəꞌ caꞌ chosoꞌosed chosoꞌoloꞌi ḻeinꞌ, naꞌ len yeziquəꞌəchlə beṉəꞌ caꞌ chesəꞌənabiaꞌ ṉasyon Izraelənꞌ besyəꞌədobeꞌ par nic̱h bosoꞌoxiꞌe naclənꞌ soꞌoneꞌ len Jesoꞌosənꞌ naꞌ bosoꞌoc̱heɉeꞌeneꞌ naꞌ gosəꞌəc̱heꞌeneꞌ ɉseꞌeneꞌeneꞌ lao naꞌ Pilatənꞌ.
\v 2 Pilatənꞌ gožeꞌ Jesoꞌosənꞌ: —¿Elenꞌ nacoꞌ rei c̱he beṉəꞌ Izrael caꞌ?
\p Nach Jesoꞌosənꞌ gožeꞌeneꞌ: —Ḻe beꞌen naoꞌ nanꞌ nacaꞌ.
\p
\v 3 Naꞌ deꞌe zan deꞌe gosəꞌəna beṉəꞌ gwnabiaꞌ c̱he bx̱oz caꞌ par bosoꞌocuišeꞌ Jesoꞌosənꞌ.
\v 4 Nach Pilatənꞌ gozeꞌe Jesoꞌosənꞌ: —¿Ebito chožiꞌo xtižəꞌəgaꞌaqueꞌenəꞌ? ¿Ecabi chendoꞌ catec deꞌe zan xya nga chsaꞌogüeꞌ contr leꞌ?
\p
\v 5 Pero Jesoꞌosənꞌ ni to xtižəꞌəgaꞌaqueꞌenəꞌ bito božiꞌe, xte bebanchgüeicze Pilatənꞌ.
\s1 Gosəꞌəc̱hoglaogüeꞌen soꞌoteꞌ Jesoꞌosənꞌ
\p
\v 6 Naꞌ de to costombr c̱hegaꞌaqueꞌ de que ža lṉi pasconꞌ əgwsan Pilatənꞌ to pres, con beṉəꞌ yesəꞌəṉab beṉəꞌ Izrael caꞌ.
\v 7 Naꞌ ližya naꞌ de to pres beṉəꞌ leꞌ Barrabas txen len beṉəꞌ caꞌ bosoꞌox̱e gwdiḻə lao syodanꞌ naꞌ zɉənaqueꞌ beṉəꞌ güet beṉəꞌ.
\v 8 Naꞌ beṉəꞌ zan caꞌ bazɉənžag gosəꞌəbigueꞌe lao Pilatənꞌ naꞌ gosəꞌəṉabeneꞌ ḻeꞌ əgwsaneꞌ to pres canꞌ naquə costombr c̱hegaꞌaqueꞌenəꞌ.
\v 9 Nach Pilatənꞌ gožeꞌ ḻegaꞌaqueꞌ: —¿Echeneꞌele əgwsanaꞌ benꞌ naquə rei c̱he leꞌe beṉəꞌ Izrael?
\p
\v 10 Gwneꞌ caꞌ c̱hedəꞌ ṉezeneꞌ beṉəꞌ caꞌ chesəꞌənabiaꞌ bx̱oz caꞌ zɉəžiagueꞌineꞌ Jesoꞌosənꞌ, deꞌe naꞌanəꞌ bosoꞌodieꞌ ḻeꞌ lao neꞌenəꞌ.
\v 11 Naꞌ beṉəꞌ caꞌ chəsəꞌənabiaꞌ bx̱oz caꞌ gosəꞌəgoꞌoyeḻeꞌe beṉəꞌ zan caꞌ žaꞌanəꞌ par yesəꞌəṉabeꞌ əgwsaneꞌ Barrabasənꞌ lguaꞌa Jesoꞌosənꞌ.
\v 12 Nach Pilatənꞌ gožeꞌ ḻegaꞌaqueꞌ: —¿Bixa gonaꞌ len Jesoꞌosənꞌ benꞌ nale naqueꞌ rei c̱he leꞌe beṉəꞌ Izrael?
\p
\v 13 Nach gwsoꞌosyeꞌe gwseꞌe Pilatənꞌ: —Bdeꞌe ḻeꞌe yag corozənꞌ.
\p
\v 14 Pilatənꞌ gožeꞌ ḻegaꞌaqueꞌ: —¿Bixa deꞌe mal babeneꞌenəꞌ?
\p Pero beṉəꞌ caꞌ gwsoꞌosyeꞌe yeḻatəꞌ zižɉoch gosəꞌəneꞌ: —Bdeꞌe ḻeꞌe yag corozənꞌ.
\p
\v 15 Naꞌ Pilatənꞌ goneꞌeneꞌ soeꞌ güen len beṉəꞌ zan caꞌ. Deꞌe naꞌanəꞌ bsaneꞌ Barrabasənꞌ. Naꞌ beyož gosəꞌəyin soḻdad caꞌ Jesoꞌosənꞌ, Pilatənꞌ beneꞌeneꞌ lao naꞌagaꞌaqueꞌ par yosoꞌodeꞌeneꞌ ḻeꞌe yag corozənꞌ.
\p
\v 16 Nach gosəꞌəc̱heꞌ soḻdad caꞌ Jesoꞌosənꞌ chyoꞌo c̱he yoꞌo ganꞌ chiꞌ Pilatənꞌ naꞌ bosyoꞌotobeꞌ yoguəꞌ soḻdad caꞌ yeḻaꞌ.
\v 17 Nach gosəꞌəyiṉeꞌ xa Jesoꞌosənꞌ naꞌ bosoꞌoguacueꞌeneꞌ to lachəꞌ morad naꞌ gwsoꞌoneꞌ to coron de yešəꞌ naꞌ bosoꞌožineꞌen yic̱hɉeꞌenəꞌ.
\v 18 Naꞌ gwsoꞌoneneꞌ borl gosəꞌəneꞌ: —Biba rei c̱he beṉəꞌ Izrael.
\p
\v 19 Nach soḻdad caꞌ gosəꞌəyineꞌ yic̱hɉeꞌenəꞌ to ya, naꞌ bosoꞌožaꞌ x̱eneꞌen ḻeꞌ naꞌ bosoꞌozo xibgaꞌaqueꞌenəꞌ laogüeꞌenəꞌ chsoꞌoneꞌ ca choꞌelaoꞌ ḻeꞌ.
\v 20 Naꞌ catəꞌ beyož gwsoꞌoneꞌeneꞌ borlənꞌ besyəꞌəyiṉeꞌ lachəꞌ moradənꞌ bosoꞌoguacueꞌeneꞌ naꞌ bosyoꞌoguacueꞌeneꞌ xaczeꞌ. Nach gosəꞌəc̱heꞌeneꞌ par yosoꞌodeꞌeneꞌ ḻeꞌe yag corozənꞌ.
\s1 Bosoꞌodeꞌe Jesoꞌosənꞌ ḻeꞌe yag corozənꞌ
\p
\v 21 To beṉəꞌ Sirene leꞌ Simon x̱a Ḻjandr naꞌ Rofo zeꞌe zezeꞌe yoba catəꞌ bežagueꞌ beṉəꞌ caꞌ zɉənc̱heꞌe Jesoꞌosənꞌ par yosoꞌodeꞌeneꞌ ḻeꞌe yag corozənꞌ. Naꞌ ḻa fuers bosoꞌodeꞌe yag coroz c̱he Jesoꞌosənꞌ cožəꞌ Simonṉəꞌ.
\p
\v 22 Naꞌ gosəꞌəc̱heꞌe Jesoꞌosənꞌ to latɉə deꞌen nziꞌ Golgota, zeɉen dižəꞌ latɉə c̱he yic̱hɉ beṉəꞌ guat.
\v 23 Naꞌ bosoꞌonežɉueꞌeneꞌ bino corrient deꞌen nc̱hix̱ən len to rmech zlaꞌ deꞌen nziꞌ mirra. Pero Jesoꞌosənꞌ bito güeꞌeɉeꞌen.
\v 24 Nach bosoꞌodeꞌeneꞌ ḻeꞌe yag corozənꞌ. Naꞌ soḻdad caꞌ gwsoꞌoneꞌ xalaꞌaneꞌenəꞌ rif entr ḻegaꞌaqueꞌ par gosəꞌəṉezeneꞌ bi partənꞌ yecheḻə to togaꞌaqueꞌ.
\p
\v 25 Naꞌ do cheda ga lsil bosoꞌodeꞌe Jesoꞌosənꞌ ḻeꞌe yag corozənꞌ.
\v 26 Naꞌ yic̱hɉ yag coroz c̱heꞌenəꞌ bosoꞌozoɉeꞌ deꞌen bcuiš ḻeꞌ, nan: “Benganꞌ Rei c̱he beṉəꞌ Izrael caꞌ.”
\v 27 Naꞌ ḻeczə canaꞌ bosoꞌodeꞌe c̱hopə beṉəꞌ bguan ḻeꞌe yec̱hopə yag coroz, toeꞌ gwda cuit Jesoꞌosənꞌ ḻicha naꞌ yetoeꞌ cuiteꞌen yeglə.
\v 28 Naꞌ deꞌen goc caꞌ goc complir canꞌ nyoɉ Xtižəꞌ Diozənꞌ ganꞌ nan: “Soꞌoneneꞌ ḻeꞌ caczənꞌ chsoꞌoneneꞌ beṉəꞌ güen deꞌe mal.”
\p
\v 29-30 Naꞌ beṉəꞌ caꞌ chseꞌeɉ chəsəꞌədeꞌ ganꞌ daꞌ Jesoꞌosənꞌ chəsəꞌəḻoḻəꞌ yic̱hɉgaꞌaqueꞌenəꞌ gwsoꞌoneneꞌ borl gwseꞌeneꞌ: —Lenꞌ gwnaoꞌ guaquə yoc̱hiṉɉoꞌ yoꞌodaoꞌ əblaonəꞌ naꞌ šoṉə žazə yeyonoꞌon, bosla cuinoꞌ naꞌ beyetɉ ḻeꞌe yag corozənꞌ.
\p
\v 31 Naꞌ ḻeczə caꞌ beṉəꞌ gwnabiaꞌ c̱he bx̱oz caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwsoꞌoneꞌeneꞌ borl gosəꞌəneꞌ: —Yeziquəꞌəchlə beṉəꞌ bosleꞌ naꞌ cabi chac yosla cuineꞌ.
\v 32 Šə ḻenꞌ naqueꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ, naꞌ nacteꞌ rei c̱he chioꞌo beṉəꞌ Izrael, yoletɉ cuineꞌ ḻeꞌe yag corozənꞌ ṉaꞌa par nic̱h leꞌicho naꞌ šeɉḻeꞌecho c̱heꞌ.
\p Naꞌ beṉəꞌ caꞌ zɉədaꞌ ḻeꞌe yag corozənꞌ cuiteꞌenəꞌ c̱hopə ḻaꞌa, ḻeczə gwsoꞌoneneꞌ borl.
\s1 Canꞌ goquə catəꞌən got Jesoꞌosənꞌ
\p
\v 33 Naꞌ do gobiž goc žc̱hoḻ doxen yežlyonꞌ bžinte cheda šoṉə.
\v 34 Naꞌ do cheda šoṉə catəꞌ gwṉe Jesoꞌosənꞌ zižɉo gwneꞌ: —Eli, ¿lama sabactani? —zeɉe dižəꞌ: “Dioz c̱hiaꞌ, ¿bixc̱henꞌ bagwleɉyic̱hɉoꞌ nadaꞌ?”
\p
\v 35 Naꞌ beṉəꞌ nitəꞌ gaḻəꞌəzə gwseꞌeneneꞌ canꞌ gwneꞌenəꞌ nach gosəꞌəneꞌ: —Ḻeꞌe gwzenagšc, chaxeꞌ Ḻiazənꞌ benꞌ beꞌ xtižəꞌ Diozənꞌ canaꞌ.
\p
\v 36 Nach bchoɉ to beṉəꞌ gwsaꞌadoeꞌ ɉəx̱iꞌe to spong naꞌ bosgažeꞌen bino corrient deꞌen cui bi nc̱hix̱ə, naꞌ bzoꞌen to lao ya daoꞌ naꞌ bosšineꞌen choꞌa Jesoꞌosənꞌ par nic̱h güeꞌeɉeꞌen naꞌ beꞌenəꞌ gwneꞌ: —Cuezcho yešc šə yidə Ḻiazənꞌ naꞌ yoletɉeꞌeneꞌ.
\p
\v 37 Jesoꞌosənꞌ bisyeꞌe zižɉo nach goteꞌ.
\v 38 Naꞌ ca naquə lachəꞌən deꞌen ze ḻoꞌo yoꞌodaoꞌ əblao c̱he netoꞌ beṉəꞌ Izrael ḻeꞌe gwchezəꞌəte gwchoḻənꞌ gwzaꞌazə yic̱hɉei bechoɉte cheꞌelə.
\v 39 Naꞌ lao orənꞌ got Jesoꞌosənꞌ, capitan c̱he soḻdad caꞌ benꞌ zecha lao Jesoꞌosənꞌ beneneꞌ canꞌ bisyaꞌa Jesoꞌosənꞌ naꞌ bleꞌineꞌ canꞌ goteꞌ naꞌ gwneꞌ: —Deꞌe ḻiczə benga naqueꞌ Xiꞌiṉ Dioz.
\p
\v 40 Naꞌ ḻeczə nitəꞌ zan noꞌolə latɉənꞌ beṉəꞌ gosəꞌəzecha zitəꞌələ par besəꞌəleꞌineꞌ canꞌ goquənꞌ. Naꞌ entr ḻegaꞌaqueꞌ zɉəlen noꞌol quinga: Maria beṉəꞌ Magdala, naꞌ Maria xnaꞌ Jwsenꞌ naꞌ Jacob biꞌin naquəch biꞌi xcuidəꞌ, naꞌ ḻeczə len Salme.
\v 41 Noꞌol caꞌ gosəꞌəzolao chsoꞌonḻilažəꞌ Jesoꞌosənꞌ catəꞌən gwzoeꞌ Galileanꞌ naꞌ gwsaꞌacleneꞌ ḻeꞌ len bi deꞌen byažɉeneꞌ, ḻegaꞌaqueꞌ naꞌ yezan noꞌolə caꞌ besyəꞌənaogüeꞌ Jesoꞌosənꞌ catəꞌən bezeꞌe Galileanꞌ par bežineꞌ Jerosalenṉəꞌ.
\s1 Bosoꞌocuašeꞌe Jesoꞌosənꞌ
\p
\v 42 Naꞌ ṉeꞌe daꞌ Jesoꞌosənꞌ ḻeꞌe yag corozənꞌ catəꞌ gwzolao chex̱ɉw žeꞌenəꞌ, naꞌ ža naꞌanəꞌ catəꞌən chosoꞌosiꞌiniꞌe c̱he lṉi pasconꞌ, naꞌ bachžin or soꞌombaꞌaṉeꞌ ža dezcanzənꞌ.
\v 43 Naꞌ gwzo to beṉəꞌ le Jwse naꞌ naqueꞌ beṉəꞌ Arimatea, naꞌ nacteꞌ to beṉəꞌ blao entr beṉəꞌ caꞌ chesəꞌənabiaꞌ ṉasyon Izrael c̱hetoꞌonəꞌ. Naꞌ Jwsenꞌ gwzoeꞌ lez əžin ža seḻəꞌ Diozənꞌ beṉəꞌ ṉabiaꞌ ṉasyon c̱hetoꞌonəꞌ. Naꞌ laogüe deꞌen bachex̱ɉw žeꞌenəꞌ benc̱hec̱hlažeꞌe gwyeɉeꞌ lao Pilatənꞌ ɉəṉabeꞌ cuerp c̱he Jesoꞌosənꞌ.
\v 44 Pilatənꞌ bebaneneꞌ deꞌen byob got Jesoꞌosənꞌ, nach goxeꞌ capitanṉəꞌ gwṉabeneꞌ ḻeꞌ šə ḻe bagoteꞌenəꞌ.
\v 45 Catəꞌ capitanṉəꞌ gožeꞌeneꞌ de que bagoteꞌ, nach Pilatənꞌ beꞌe ḻatɉə žɉəyeletɉ Jwsenꞌ cuerp c̱he Jesoꞌosənꞌ par yeyoꞌeneꞌ.
\v 46 Naꞌ Jwsenꞌ gwxiꞌe to lachəꞌ fin nach gwyeɉeꞌ ganꞌ daꞌ Jesoꞌosənꞌ naꞌ beletɉeꞌeneꞌ ḻeꞌe yag corozənꞌ nach bolažeꞌeneꞌ lachəꞌənəꞌ, naꞌ gwloꞌeneꞌ to ḻoꞌo bloɉ ba deꞌe bagwc̱heꞌeneꞌ to ḻeꞌe yeɉ. Naꞌ beyož beneꞌ deꞌe caꞌ bḻoḻeꞌ to yeɉ xen deꞌe bseyɉueneꞌ choꞌa banəꞌ.
\v 47 Naꞌ Maria beṉəꞌ Magdalanꞌ naꞌ Maria xnaꞌ Jwsenꞌ yeto, besəꞌəleꞌineꞌ ganꞌ bosoꞌocuašeꞌe cuerp c̱he Jesoꞌosənꞌ.
\c 16
\s1 Jesoꞌosənꞌ bebaneꞌ ladɉo beṉəꞌ guat caꞌ
\p
\v 1 Naꞌ catəꞌ gwde ža dezcanzənꞌ Maria beṉəꞌ Magdalanꞌ, naꞌ Maria xnaꞌ Jacobənꞌ naꞌ len Salmenꞌ ɉəsəꞌəxiꞌe set zix̱ deꞌe yosoꞌoguazɉeꞌ cuerp c̱he Jesoꞌosənꞌ.
\v 2 Naꞌ zil dmigw tempran gwsaꞌaqueꞌ zɉaꞌaqueꞌ choꞌa banꞌ naꞌ besəꞌəžineꞌ choꞌa banꞌ do chlaꞌatg bgüižənꞌ.
\v 3 Naꞌ lao zɉaꞌaqueꞌenəꞌ gwseꞌe lɉuežɉgaꞌaqueꞌ: —¿No gaquə yecaꞌa yeɉənꞌ deꞌen daꞌ choꞌa banꞌ par nic̱h šoꞌocho?
\p
\v 4 Naꞌ ca ṉeꞌe zɉaꞌaqueꞌ zitəꞌələ ganꞌ zo bloɉ banꞌ besəꞌəleꞌineꞌ de que yeɉ xenṉəꞌ deꞌen daꞌ choꞌa banꞌ bac̱h begaꞌan.
\v 5 Catəꞌ besəꞌəžineꞌenəꞌ gwsoꞌe ḻoꞌo bloɉənꞌ naꞌ besəꞌəleꞌineꞌ to beṉəꞌ xcuidəꞌ chiꞌe ḻoꞌinəꞌ šḻaꞌa ḻichalə naꞌ nyazeꞌ to lachəꞌ šyiš toṉə, naꞌ noꞌol caꞌ besəꞌəžebeꞌ catəꞌ besəꞌəleꞌineꞌeneꞌ.
\v 6 Naꞌ gožeꞌ ḻegaꞌaqueꞌ: —Bito žeble. Nadaꞌ ṉezdaꞌ de que cheyilɉle Jesoꞌosənꞌ benꞌ naquə beṉəꞌ Nasaret benꞌ bosoꞌodeꞌe ḻeꞌe yag corozənꞌ. Babebaneꞌ ladɉo beṉəꞌ guat caꞌ. Notoch no nḻaꞌ nga. Ḻegüia latɉə ga nga bosəꞌəx̱oeꞌ cuerp c̱heꞌenəꞌ.
\v 7 Ḻeꞌe žɉəyaꞌac ḻeꞌe žɉəyedix̱ɉueꞌi Bedənꞌ len disipl caꞌ yeḻaꞌ de que gwyobe Jesoꞌosənꞌ yežineꞌ Galileanꞌ ca leꞌe naꞌ Galilea naꞌ gwleꞌiczeleneꞌ, canꞌ gwnaczeꞌ leꞌe.
\p
\v 8 Nach besyəꞌəchoɉeꞌ ḻoꞌo banꞌ besaꞌacdoeꞌ xte gosəꞌəxizeꞌ tant besəꞌəžebeꞌ. Naꞌ notono gwseꞌe binꞌ goquə c̱hedəꞌ besəꞌəžebeꞌ.
\s1 Jesoꞌosənꞌ bloꞌe laogüeꞌ Maria beṉəꞌ Magdalanꞌ
\p
\v 9 Naꞌ zil dmigw tempran catəꞌən beban Jesoꞌosənꞌ ladɉo beṉəꞌ guat caꞌ zguaꞌatec bloꞌe laogüeꞌ Maria beṉəꞌ Magdalanꞌ benꞌ bebeɉeꞌ gažə deꞌe x̱ioꞌ zɉəyoꞌo zɉəyaz yic̱hɉlaꞌaždaogüeꞌenəꞌ.
\v 10 Ḻeꞌ ɉəyedix̱ɉueꞌineꞌ yeziquəꞌəchlə beṉəꞌ caꞌ de que beban Jesoꞌosənꞌ ladɉo beṉəꞌ guat caꞌ. Catəꞌ bžin Marianꞌ chəsəꞌəbežyašəꞌ beṉəꞌ caꞌ naꞌ chəsyəꞌəgüineꞌeneꞌ c̱hedəꞌ gwsoꞌot beṉəꞌ mal caꞌ Jesoꞌosənꞌ.
\v 11 Naꞌ catəꞌ gwseꞌeneneꞌ de que babeban Jesoꞌosənꞌ ladɉo beṉəꞌ guat caꞌ naꞌ de que Marianꞌ bableꞌineꞌ ḻeꞌ, bito gwseꞌeɉḻeꞌe.
\s1 Bloꞌe lao Jesoꞌosənꞌ c̱hopə disipl c̱heꞌ caꞌ
\p
\v 12 Naꞌ bloꞌe lao Jesoꞌosənꞌ c̱hopə disipl c̱heꞌ caꞌ lao zɉaꞌaqueꞌ yoba, pero nžaꞌalə canꞌ besəꞌəleꞌineꞌ ḻeꞌ.
\v 13 Naꞌ ɉəyaꞌaqueꞌ ɉəsyəꞌədix̱ɉueꞌineꞌ beṉəꞌ lɉuežɉgaꞌaqueꞌ caꞌ pero beṉəꞌ caꞌ ḻeczə bito gwseꞌeɉḻeꞌe c̱he ḻegaꞌaqueꞌ.
\s1 Jesoꞌosənꞌ beneꞌ mendad əsoꞌe xtižeꞌenəꞌ yoguəꞌ ṉasyon
\p
\v 14 Naꞌ gwdechlə bloꞌe lao Jesoꞌosənꞌ disipl c̱heꞌ caꞌ šneɉ lao chsaꞌogüeꞌ. Naꞌ gwdiḻeꞌ ḻegaꞌaqueꞌ deꞌen zɉənaqueꞌ beṉəꞌ laꞌaždaoꞌ žod naꞌ deꞌen cui gwseꞌeɉḻeꞌe de que bebaneꞌ ladɉo beṉəꞌ guat caꞌ ḻaꞌaṉəꞌəczə beṉəꞌ caꞌ besəꞌəleꞌi ḻeꞌ gwseꞌe ḻegaꞌaqueꞌ caꞌ.
\v 15 Nach gožeꞌ ḻegaꞌaqueꞌ: —Ḻeꞌe žɉaꞌac ḻeꞌe žɉəsed ḻeꞌe žɉəloꞌi beṉəꞌ caꞌ žaꞌ yoguəꞌəḻoḻ ṉasyon dižəꞌ güen dižəꞌ cobə deꞌen chzeɉniꞌin c̱hiaꞌ.
\v 16 Naꞌ beṉəꞌ caꞌ soꞌonḻilažəꞌ nadaꞌ naꞌ yesəꞌəchoeꞌ nis bito žɉəyaꞌaqueꞌ lao yiꞌ gabiḻənꞌ. Naꞌ beṉəꞌ caꞌ cui soꞌonḻilažəꞌ nadaꞌ yesəꞌəbiayiꞌe lao yiꞌ gabiḻənꞌ.
\v 17 Naꞌ beṉəꞌ caꞌ soꞌonḻilažəꞌ nadaꞌ gwnežɉogaꞌacaꞌaneꞌ yeḻəꞌ guac par soꞌoneꞌ deꞌe quinga: Len yeḻəꞌ guac c̱hiaꞌanəꞌ yesyəꞌəbeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ, naꞌ əsoꞌe gwde gwdelə dižəꞌ deꞌen cui no chac.
\v 18 Guaquə əsoꞌox̱eꞌe no beḻ bia benen naꞌ bitobi gaquə c̱hegaꞌaqueꞌ. Naꞌ šə əseꞌeɉeꞌ benen bitobi gonən len ḻegaꞌaqueꞌ. Guaquə yesəꞌəx̱oaꞌ naꞌagaꞌaqueꞌenəꞌ yic̱hɉ beṉəꞌ caꞌ chsaꞌacšene, naꞌ yesyəꞌəyaque beṉəꞌ caꞌ.
\s1 Jesoꞌosənꞌ beyepeꞌ yobanꞌ
\p
\v 19 Naꞌ catəꞌ beyož beꞌe X̱ancho Jesoꞌosənꞌ dižəꞌən caꞌ len ḻegaꞌaqueꞌ, beziꞌ becaꞌa Diozənꞌ ḻeꞌ yobanꞌ ganꞌ chiꞌe chnabiꞌe txen len X̱acho Diozənꞌ.
\v 20 Naꞌ disipl c̱heꞌ caꞌ ɉaꞌaqueꞌ doxenḻə ɉəsəꞌədix̱ɉueꞌineꞌ dižəꞌ güen dižəꞌ cobə deꞌen chzeɉniꞌin c̱he Jesoꞌosənꞌ, naꞌ ḻeꞌ gocleneꞌ ḻegaꞌaqueꞌ naꞌ beneꞌ par nic̱h gwsoꞌoneꞌ no miḻagr len yeḻəꞌ guac c̱heꞌenəꞌ par bloꞌe de que xtižəꞌəgaꞌaqueꞌenəꞌ naquən deꞌe ḻi.
\p Deꞌe naꞌazənꞌ chzoɉaꞌ.