\id LUK
\ide UTF8
\h SAN LUCAS
\toc1 San Lucas
\mt1 Dižəꞌ Güen Dižəꞌ Cobə Deꞌen Bzoɉ San Locasənꞌ
\c 1
\s1 Deꞌe nga bzoɉ Locasənꞌ par Tioflənꞌ
\p
\v 1–4 Señor Tiofl, chzoɉaꞌ leꞌ dižəꞌ quinga par nic̱h naꞌ əṉezdoꞌ deꞌe ḻi ca naquə deꞌen babendoꞌ naꞌ deꞌen bagoc. Beṉəꞌ zan bac̱h bosoꞌozoɉeꞌ c̱he Jesoꞌosənꞌ ca naquə deꞌen bagoc complir par netoꞌ chonḻilažəꞌətoꞌoneꞌ. Bosoꞌozoɉeꞌen canꞌ bzeɉniꞌi beṉəꞌ caꞌ netoꞌ, beṉəꞌ caꞌ besəꞌəleꞌi canꞌ goquə dezd golɉte Jesoꞌosənꞌ. Naꞌ beṉəꞌ caꞌ gwseꞌen besəꞌəleꞌineꞌ canꞌ goquənꞌ bosoꞌosed bosoꞌoloꞌineꞌ beṉəꞌ yoblə dižəꞌ güen dižəꞌ cobə c̱he Jesocristənꞌ. Naꞌ nadaꞌ catəꞌ beyož gwṉabyožaꞌ canꞌ goquənꞌ, naꞌ gwyazlažaꞌa gwzoɉaꞌan tchoꞌa tšaoꞌ par nic̱h əṉezdoꞌ Señor Tiofl.
\s1 Canꞌ goquə gwdix̱ɉueꞌe to angl de que galɉə Juanṉəꞌ
\p
\v 5 Ca tyemp canꞌ gwnabiaꞌ Rei Erodənꞌ ganꞌ nziꞌ Jodea, naꞌ zo to bx̱oz c̱he beṉəꞌ Izrael caꞌ beṉəꞌ le Zequeria. Beneꞌ žin len x̱oṉɉ bx̱oz beṉəꞌ zɉele Abias. Naꞌ noꞌol c̱he Zequerianꞌ leꞌ C̱habet naꞌ naqueꞌ dia c̱he deꞌe bx̱oz Ronṉəꞌ.
\v 6 Naꞌ Zequerianꞌ len C̱habetənꞌ zɉaꞌacczeꞌ ḻicha par len Diozənꞌ, naꞌ gwsoꞌoneꞌ yoguəꞌəḻoḻ deꞌen non X̱ancho Diozənꞌ mendad deꞌen zɉənyoɉ ḻeꞌe ḻei c̱heꞌenəꞌ.
\v 7 Naꞌ notono xiꞌiṉgaꞌaqueꞌ nitəꞌ, c̱hedəꞌ C̱habetənꞌ naqueꞌ noꞌolə güiž, naꞌ c̱hopteꞌ bazɉənaqueꞌ beṉəꞌ golə.
\p
\v 8 Naꞌ goquənꞌ beyaḻəꞌ Zequerianꞌ len beṉəꞌ lɉuežɉeꞌ caꞌ beṉəꞌ caꞌ zɉənaquə bx̱oz par gwsoꞌoneꞌ deꞌen besyəꞌəyaḻeꞌe soꞌoneꞌ par gwsoꞌelaogüeꞌe Diozənꞌ.
\v 9 Naꞌ de costombr c̱he bx̱oz caꞌ chsoꞌoneꞌ rif par chatəꞌəbiaꞌ noeꞌ əchoɉ par əgwzeyeꞌ yal ḻoꞌo yoꞌodaoꞌ əblao c̱hegaꞌaqueꞌenəꞌ ganꞌ chsoꞌelaogüeꞌe X̱ancho Diozənꞌ Jerosalenṉəꞌ. Nach gwsoꞌoneꞌ rif naꞌ bchoɉ Zequerianꞌ par bzeyeꞌ yalənꞌ ḻoꞌo yoꞌodaꞌonəꞌ.
\v 10 Naꞌ žlac bzeyeꞌ yalənꞌ gwnitəꞌ yoguəꞌəḻoḻ beṉəꞌ zan caꞌ chyoꞌolə gwsoꞌoneꞌ orasyonṉəꞌ.
\v 11 Naꞌ to angl c̱he X̱ancho Diozənꞌ bloeꞌ laogüeꞌ Zequerianꞌ, naꞌ gwzecha anglənꞌ cuit mesənꞌ ḻichalə ganꞌ chəsəꞌəzeyeꞌ yalənꞌ.
\v 12 Catəꞌ bleꞌi Zequerianꞌ anglənꞌ benit bec̱hoḻ goc ḻoꞌo yic̱hɉlaꞌaždaogüeꞌenəꞌ naꞌ bžebchgüeꞌ.
\v 13 Pero anglənꞌ gožeꞌ ḻeꞌ: ―Bito žeboꞌ Zequeria. Diozənꞌ babzenagueꞌ orasyon c̱hioꞌonəꞌ, naꞌ noꞌol c̱hioꞌ C̱habetənꞌ saneꞌ to xiꞌiṉoꞌ, naꞌ əgwsiꞌo leꞌ Juan.
\v 14 Naꞌ soꞌ mbalaz naꞌ yebeidoꞌ, naꞌ ḻeczə beṉəꞌ zan yesyəꞌəbeineꞌ šə bagolɉeꞌ,
\v 15 c̱hedəꞌ gaqueꞌ beṉəꞌ blao lao Diozənꞌ. Bito yeꞌeɉeꞌ bino ni biquəꞌəchlə deꞌen chesəꞌəzože beṉəꞌ, naꞌ catəꞌ galɉeꞌ yoꞌo Spirit c̱he Diozənꞌ ḻoꞌo yic̱hɉlaꞌaždaogüeꞌenəꞌ par ṉabiꞌan ḻeꞌ.
\v 16 Naꞌ goneꞌ par nic̱h zan beṉəꞌ Izrael gwlaž c̱heꞌ caꞌ yesəꞌəšaꞌ yic̱hɉlaꞌaždaꞌogaꞌaqueꞌenəꞌ naꞌ soꞌelaogüeꞌe Diozənꞌ canꞌ cheyaḻəꞌ soꞌelaogüeꞌeneꞌ, Dioz benꞌ naquə X̱angaꞌaqueꞌ.
\v 17 Naꞌ cuialaogüeꞌ lao X̱anchonꞌ naꞌ goneꞌ par nic̱h beṉəꞌ caꞌ cui nitəꞌ binḻo len xiꞌiṉgaꞌaqueꞌ yesyəꞌəniteꞌe binḻo len xiꞌiṉgaꞌaqueꞌ deꞌe yoblə. Naꞌ goneꞌ par nic̱h beṉəꞌ godenag caꞌ yesəꞌəzenagueꞌ c̱he Diozənꞌ. Goneꞌ caꞌ par nic̱h yesəꞌənitəꞌ beṉəꞌ probnid par əsoꞌelaogüeꞌe X̱anchonꞌ catəꞌən yideꞌ. Naꞌ len xbab deꞌen yoꞌo yic̱hɉlaꞌaždaogüeꞌenəꞌ naꞌ len dižəꞌ balə deꞌen güeꞌenəꞌ gaqueꞌ ca profet Ḻiazənꞌ benꞌ gwzo canaꞌ.
\p
\v 18 Nach Zequerianꞌ gožeꞌ anglənꞌ: ―¿Nacxa gaquə əṉezdaꞌ deꞌe nga? Nadaꞌ bac̱h nacaꞌ beṉəꞌ golə naꞌ noꞌol c̱hiaꞌanəꞌ ḻeczə beṉəꞌ golə.
\p
\v 19 Nach anglənꞌ gožeꞌ ḻeꞌ: ―Nadaꞌ nacaꞌ angl Gabryel. Zoaꞌ len Diozənꞌ naꞌ zoaꞌ choꞌelaoguaꞌaneꞌ. Naꞌ bseḻeꞌe nadaꞌ zedetix̱ɉueꞌidaꞌ leꞌ dižəꞌ güen dižəꞌ cobə quinga.
\v 20 Naꞌ leꞌ gacoꞌ mod, cui gaquə əṉioꞌ xte que catəꞌəch əžin ža gaquə deꞌe nga, c̱hedəꞌ cui cheɉḻiꞌo xtižaꞌanəꞌ. Naꞌ deꞌe ḻiczə gwžin ža gaquə complir canꞌ gwniaꞌanəꞌ.
\p
\v 21 Naꞌ beṉəꞌ caꞌ žaꞌ chyoꞌolə gosəꞌəbezeꞌ Zequerianꞌ, nach besyəꞌəbaneneꞌ c̱hedəꞌ gwžeineꞌ ḻoꞌo yoꞌodaoꞌ əblao ganꞌ chsoꞌelaoꞌ beṉəꞌ Izrael caꞌ Diozənꞌ.
\v 22 Catəꞌ bechoɉ Zequerianꞌ, beneꞌ señy len neꞌenəꞌ laꞌ bitoch goquə əṉeꞌ. Bac̱h naqueꞌ beṉəꞌ mod. Nach gwsaꞌacbeꞌi beṉəꞌ caꞌ de que bleꞌidaꞌogüeꞌeneꞌ ḻoꞌo yoꞌodaꞌonəꞌ.
\p
\v 23 Naꞌ catəꞌ bde lazeꞌen deꞌen beneꞌ žin ḻoꞌo yoꞌodaoꞌ əblaonəꞌ beyeɉeꞌ ližeꞌ.
\v 24 Gwde naꞌ, noꞌol c̱heꞌ C̱habetənꞌ bgüendaoꞌ bdaꞌonəꞌ ḻoꞌo ḻeꞌenəꞌ naꞌ gueyəꞌ bioꞌ gwzozeꞌ. Naꞌ gwneꞌ:
\v 25 ―Güenchgua baben X̱anaꞌ Diozənꞌ len nadaꞌ, c̱hedəꞌ babžin ža nžiꞌilažeꞌe ndaꞌ, choneꞌ par nic̱h bitoch soꞌon beṉac̱hənꞌ xbab c̱hiaꞌ de que cui bi zacaꞌa.
\s1 Anglənꞌ gwdix̱ɉuiꞌe galɉə Jesocristənꞌ
\p
\v 26 Goc x̱op bioꞌ noaꞌ C̱habetənꞌ bdaꞌonəꞌ, Diozənꞌ bozseḻeꞌe anglənꞌ benꞌ le Gabryel, gwyeɉeꞌ to syoda deꞌen nziꞌ Nasaret ganꞌ mbane Galileanꞌ.
\v 27 Bseḻeꞌeneꞌ ganꞌ zo to noꞌol güegoꞌ leꞌ Maria. Naꞌ Marianꞌ ṉeꞌe naplažəꞌəchgua cuineꞌ. Naꞌ to beṉəꞌ le Jwse bac̱h naquən gwšagnaꞌaleneꞌ par gaqueꞌ xoꞌoleꞌ. Naꞌ Jwsenꞌ naqueꞌ dia c̱he deꞌe Rei Dabinꞌ.
\v 28 Naꞌ bžin anglənꞌ gwyoꞌe ganꞌ zo Marianꞌ naꞌ gožeꞌeneꞌ: ―Dioxei. X̱ancho Diozənꞌ nžiꞌilažeꞌe leꞌ naꞌ zoeꞌ len leꞌ. Naꞌ goneꞌ par nic̱h sochoꞌ mbalaz ca yoguəꞌəḻoḻ noꞌol caꞌ yeḻaꞌ.
\p
\v 29 Catəꞌ bleꞌi Marianꞌ anglənꞌ, benit bec̱hoḻ goc ḻoꞌo yic̱hɉlaꞌaždaogüeꞌenəꞌ por ni c̱he dižəꞌ deꞌen gožeꞌ ḻeꞌ. Naꞌ beneꞌ xbab bi zeɉen deꞌen bguapeꞌ ḻeꞌ dioxənꞌ caꞌ.
\v 30 Nach anglənꞌ gožeꞌeneꞌ: ―Bito žeboꞌ Maria. Diozənꞌ nžiꞌilažeꞌe leꞌ.
\v 31 Naꞌ leꞌ guaꞌ xiꞌiṉoꞌ, to biꞌi byo daoꞌ, naꞌ sanoꞌoboꞌ, naꞌ əgwsiꞌo laboꞌ Jesoꞌos.
\v 32 Naꞌ Jesoꞌosənꞌ gaqueꞌ to beṉəꞌ blao naꞌ beṉac̱hənꞌ yesəꞌəsiꞌeneꞌ Xiꞌiṉ Dioz, Dioz benꞌ naquə ḻeꞌezelaogüe beṉəꞌ blao. Naꞌ X̱ancho Diozənꞌ goneꞌ par nic̱h ṉabiꞌe ṉasyon Izraelənꞌ canꞌ gwnabiaꞌ deꞌe x̱axtaꞌogüeꞌe Rei Dabinꞌ.
\v 33 Naꞌ ḻeꞌ ṉabiꞌe ṉasyon Izraelənꞌ zeɉḻicaṉe. Naꞌ cuat te yeḻəꞌ gwnabiaꞌ c̱heꞌenəꞌ.
\p
\v 34 Nach gož Marianꞌ anglənꞌ: ―¿Nacxa gaquə sanaꞌ bdaoꞌ? laꞌ bitoṉəꞌ žagaꞌ ndaꞌ beṉəꞌ byo.
\p
\v 35 Nach gož anglənꞌ ḻeꞌ: ―Spirit c̱he Diozənꞌ yidən ganꞌ zoꞌonəꞌ, naꞌ yeḻəꞌ guac c̱he Diozənꞌ son len leꞌ, Dioz benꞌ naquə ḻeꞌezelaogüe beṉəꞌ blao. Deꞌe naꞌanəꞌ biꞌi laꞌaždaoꞌ xiꞌilažəꞌən galɉənəꞌ, yosoꞌosiꞌeboꞌ Xiꞌiṉ Dioz.
\v 36 Naꞌ beṉəꞌ xnaꞌo C̱habetənꞌ ḻeczə bac̱h bgüendaꞌoboꞌ ḻoꞌo ḻeꞌenəꞌ ḻaꞌaṉəꞌəczə banaqueꞌ beṉəꞌ golə. Bagoc x̱op bioꞌ noꞌe to biꞌi byo daoꞌ, len laꞌ gosəꞌəneꞌ c̱heꞌ de que noꞌolə güižənꞌ.
\v 37 Bito bi bi de deꞌe əṉacho cui chac gon Diozənꞌ.
\p
\v 38 Nach gož Marianꞌ anglənꞌ: ―Nga zoaꞌ nacaꞌ xmoseꞌ, gaquə c̱hiaꞌ con bi na X̱anaꞌan.
\p Nach bezaꞌ anglənꞌ ganꞌ zo Marianꞌ.
\s1 Marianꞌ ɉəlaṉeꞌe Chabetənꞌ
\p
\v 39 Gwde naꞌ ḻeꞌe gwyeɉte Marianꞌ to syoda deꞌe žia lao yaꞌa ganꞌ mbane Jodeanꞌ.
\v 40 Naꞌ bžineꞌ liž Zequerianꞌ, gwyoꞌe bguapeꞌ C̱habetənꞌ diox.
\v 41 Naꞌ goquənꞌ catəꞌ C̱habetənꞌ beneneꞌ choḻgüiž Marianꞌ ḻeꞌ nach gocbeꞌiteineꞌ chxitəꞌ chžia chac bdaoꞌ c̱heꞌenəꞌ ḻoꞌo ḻeꞌenəꞌ. Naꞌ Spirit c̱he Diozənꞌ gwnabiꞌan yic̱hɉlaꞌaždaoꞌ C̱habetənꞌ.
\v 42 Naꞌ gwṉeꞌ zižɉo tant bebeineꞌ, naꞌ gožeꞌ Marianꞌ: ―Diozənꞌ babeneꞌ par nic̱h zochoꞌ mbalaz ca yoguəꞌəḻoḻ noꞌol caꞌ yeḻaꞌ. Naꞌ Diozənꞌ goneꞌ par nic̱h gaquə mbalaz c̱he bdaoꞌ c̱hioꞌonəꞌ noꞌonəꞌ.
\v 43 Nactecxanꞌ leꞌ nacoꞌ xnaꞌ X̱anaꞌan zedəlaṉoꞌo nadaꞌ.
\v 44 Mer catəꞌ bene nagaꞌanəꞌ chguapoꞌ nadaꞌ dioxənꞌ, bdaoꞌ c̱hiaꞌanəꞌ bebeiboꞌ naꞌ bxitəꞌ bžiaboꞌ ḻoꞌo ḻiꞌanəꞌ.
\v 45 X̱ancho Diozənꞌ beneꞌ par nic̱h anglənꞌ gwneꞌ leꞌ deꞌen zeꞌe gaquə naꞌ zoꞌ mbalaz deꞌen gwyeɉḻiꞌo de que gaquə complir canꞌ gwneꞌenəꞌ.
\p
\v 46 Nach Marianꞌ gwneꞌ:
\q1 ―Choꞌelaoguaꞌa X̱anaꞌ Diozənꞌ do yic̱hɉ do lažaꞌa.
\q1
\v 47 Naꞌ ḻoꞌo yic̱hɉlaꞌaždaoguaꞌan chebeichgüeidaꞌ Dioz benꞌ chebeɉ nadaꞌ xniꞌa deꞌe malənꞌ.
\q1
\v 48 Babeyašəꞌ bežiꞌilažeꞌe nadaꞌ nacaꞌ xmoseꞌ ḻaꞌaṉəꞌəczə cui bi zacaꞌa.
\q1 Naꞌ dezd ṉaꞌa žtia žtia beṉac̱hənꞌ yesəꞌəneꞌ de que zoaꞌ mbalaz.
\q1
\v 49 Diozənꞌ chac goneꞌ deꞌe cui no zaquə gon, naꞌ babeneꞌ deꞌe güen juisy len nadaꞌ.
\q1 Ḻeꞌenəꞌ naqueꞌ beṉəꞌ laꞌaždaoꞌ xiꞌilažəꞌ juisy.
\q1
\v 50 Naꞌ notəꞌətezə beṉəꞌ chsaꞌapeꞌeneꞌ respet do yic̱hɉ do lažəꞌəgaꞌaqueꞌ,
\q1 Diozənꞌ cheyašəꞌ chežiꞌilažeꞌe ḻegaꞌaqueꞌ naꞌ len xiꞌiṉ dia c̱hegaꞌaqueꞌ.
\q1
\v 51 Bac̱h bloꞌi Diozənꞌ beṉac̱hənꞌ yeḻəꞌ guac c̱heꞌenəꞌ,
\q1 naꞌ babeneꞌ par nic̱h beṉəꞌ yaꞌalažəꞌ caꞌ babosoꞌozex̱ɉw yic̱hɉgaꞌaqueꞌenəꞌ laogüeꞌenəꞌ.
\q1
\v 52 Babeneꞌ par nic̱h beṉəꞌ gwnabiaꞌ caꞌ cuich gosəꞌənabiꞌe,
\q1 naꞌ beṉəꞌ caꞌ cui gwsaꞌac beṉəꞌ blao, Diozənꞌ bcuieꞌ ḻegaꞌaqueꞌ par gwsaꞌaqueꞌ beṉəꞌ blao.
\q1
\v 53 Naꞌ beṉəꞌ caꞌ gwsaꞌacbeꞌineꞌ de que chesəꞌəyažɉeneꞌ yeḻəꞌ chaclen c̱he Diozənꞌ, bagocleneꞌ ḻegaꞌaqueꞌ.
\q1 Naꞌ beṉəꞌ caꞌ gwsaꞌaqueneꞌ bitobi chesəꞌəyažɉeneꞌ,
\q1 boseꞌe ḻegaꞌaqueꞌ sin cui bi bnežɉueꞌ ḻegaꞌaqueꞌ.
\q1
\v 54 Nach bagocwleneꞌ chioꞌo beṉəꞌ Izrael naccho ca xmoseꞌ.
\q1 Babloꞌineꞌ chioꞌo de que bito ganḻažeꞌe par yeyašəꞌ yežiꞌilažeꞌe chioꞌo canꞌ beneꞌ lyebe.
\q1
\v 55 Naꞌ deꞌen beyašəꞌ bežiꞌilažeꞌe deꞌe Abraanṉəꞌ len xiꞌiṉ dia c̱heꞌ,
\q1 beneꞌ complir canꞌ gožeꞌ ḻeꞌ len yebaḻə x̱axtaꞌocho caꞌ.
\q1 Naꞌ zoczeꞌ yeyašəꞌ yežiꞌilažeꞌe xiꞌiṉ dia c̱he deꞌe Abraanṉəꞌ zeɉḻicaṉe.
\m
\v 56 Naꞌ catəꞌ bagoc šoṉ bioꞌ begaꞌaṉ Marianꞌ len C̱habetənꞌ nach beyeɉeꞌ ližeꞌenəꞌ.
\s1 Golɉə Juanṉəꞌ benꞌ bc̱hoa beṉəꞌ nis
\p
\v 57 Naꞌ catəꞌ bžin or par san C̱habetənꞌ, gwxaneꞌ biꞌi byo daoꞌ c̱heꞌenəꞌ.
\v 58 Naꞌ catəꞌ gwseꞌene beṉəꞌ gwliž c̱hegaꞌaqueꞌenəꞌ naꞌ famiḻy c̱hegaꞌaqueꞌenəꞌ de que Diozənꞌ babeyašəꞌ bežiꞌilažeꞌe C̱habetənꞌ, besyəꞌəbeichgüeineꞌ len ḻeꞌ.
\v 59 Naꞌ ža x̱onꞌ beṉəꞌ caꞌ ɉəsəꞌəzoꞌeboꞌ señy deꞌen neꞌ sirconsision. Naꞌ zeɉen de que chseꞌeɉḻeꞌe c̱he lyebe deꞌen ben Diozənꞌ len deꞌe Abraanṉəꞌ. Naꞌ gwseꞌeneneꞌ siꞌ laboꞌ Zequeria canꞌ le x̱aboꞌonəꞌ.
\v 60 Pero xnaꞌaboꞌonəꞌ gwneꞌ: ―Nca, cheyaḻəꞌ siꞌ labonꞌ Juan.
\p
\v 61 Nach ḻegaꞌaqueꞌ gwseꞌe ḻeꞌ: ―Notono famiḻy c̱hele nitəꞌ beṉəꞌ zɉəle caꞌ naꞌ nic x̱axtaꞌole.
\p
\v 62 Nach gwsoꞌoneꞌ señy gosəꞌəṉabeneꞌ x̱aboꞌonəꞌ nac cheneꞌeneꞌ siꞌ la bdaꞌonəꞌ.
\v 63 Nach beneꞌ señy gwṉabeꞌ to yag laꞌ daoꞌ ganꞌ bzoɉeꞌ: “Siꞌ laboꞌ Juan.” Nach yogueꞌe besyəꞌəbaneneꞌ.
\v 64 Ḻeꞌe gocte beṉe Zequerianꞌ naꞌ ḻeꞌe gwzolaote beꞌe dižəꞌ beꞌelaogüeꞌe Diozənꞌ.
\v 65 Naꞌ besəꞌəžebchgua beṉəꞌ gwliž c̱hegaꞌaqueꞌenəꞌ. Naꞌ xtižəꞌəgaꞌaqueꞌenəꞌ gosəꞌ gwlalɉən doxen yež caꞌ zɉəchiꞌ lao yaꞌa caꞌ ganꞌ mbane Jodeanꞌ.
\v 66 Naꞌ yoguəꞌəḻoḻ beṉəꞌ gwseꞌeneneꞌ dižəꞌənəꞌ gwsoꞌoneꞌ xbab ḻoꞌo yic̱hɉlaꞌaždaꞌogaꞌaqueꞌenəꞌ c̱he deꞌe caꞌ, naꞌ gosəꞌəneꞌ:
\m ―¿Bixa gon bdaoꞌ naꞌanəꞌ?
\p Gosəꞌəneꞌ caꞌ c̱hedəꞌ gosəꞌəṉezeneꞌ de que zoczə Diozənꞌ len ḻeboꞌ.
\s1 Dižəꞌ deꞌen beꞌ Zequerianꞌ
\p
\v 67 Nach gwnabiaꞌ Spirit c̱he Diozənꞌ yic̱hɉlaꞌaždaoꞌ x̱aboꞌ Zequerianꞌ. Naꞌ Zequerianꞌ beꞌe xtižəꞌ Diozənꞌ gwneꞌ:
\q1
\v 68 Choꞌelaoguaꞌa X̱anchonꞌ benꞌ naquə Dioz c̱he chioꞌo beṉəꞌ Izrael.
\q1 Cheyašeꞌeneꞌ chioꞌo naccho ṉasyonꞌ c̱heꞌ
\q1 naꞌ babeneꞌ par nic̱h gaquə yechoɉcho xniꞌa deꞌe malənꞌ.
\q1
\v 69 Laꞌ babeneꞌ par nic̱h zo to beṉəꞌ napə yeḻəꞌ guac par yebeɉeꞌ chioꞌo xniꞌa deꞌe malənꞌ,
\q1 naꞌ zaꞌ beꞌenəꞌ lao dia c̱he deꞌe Rei Dabinꞌ benꞌ goquə xmos Diozənꞌ.
\q1
\v 70 Chac canꞌ gwna Diozənꞌ len choꞌa deꞌe profet caꞌ beṉəꞌ caꞌ gwleɉeꞌ par gwsaꞌaqueꞌ lažəꞌ neꞌenəꞌ canaꞌate.
\q1
\v 71 Gwneꞌ de que yosleꞌ chioꞌo lao naꞌ beṉəꞌ contr c̱hecho caꞌ
\q1 naꞌ lao naꞌ yoguəꞌ beṉəꞌ chəsəꞌəgueꞌi chioꞌo.
\q1
\v 72 Naꞌ ḻeczə gožeꞌ deꞌe x̱axtaꞌocho caꞌ de que yeyašəꞌ yežiꞌilažeꞌe ḻegaꞌaqueꞌ len xiꞌiṉ dia c̱hegaꞌaqueꞌ.
\q1 Naꞌ canꞌ choneꞌ ṉaꞌa, choneꞌ par nic̱h chac complir ca naquə deꞌen beneꞌ lyebe goneꞌ par gaquəleneꞌ chioꞌo.
\q1
\v 73 Ben Diozənꞌ cuineꞌ testigw lao deꞌe x̱axtaꞌocho Abraanṉəꞌ
\q1 de que gaquəczə canꞌ beneꞌ lyebenꞌ.
\q1
\v 74 Naꞌ gwneꞌ de que yosleꞌ chioꞌo lao naꞌ beṉəꞌ contr caꞌ par nic̱h caꞌ gaquə güeꞌelaꞌochoneꞌ sin cui žebcho.
\q1
\v 75 Naꞌ gwneꞌ goneꞌ par nic̱h gaquə laꞌaždaꞌochonꞌ xiꞌilažəꞌ par len ḻeꞌenəꞌ
\q1 naꞌ goneꞌ par nic̱h šeɉcho ḻicha güeꞌelaꞌochoneꞌ doxen yeḻəꞌ mban c̱hechonꞌ.
\p
\v 76 Nach Zequerianꞌ gožeꞌ bidaꞌonəꞌ:
\q1 Naꞌ leꞌ xiꞌiṉaꞌ, beṉac̱hənꞌ yesəꞌəneꞌ c̱hioꞌ de que nacoꞌ profet beṉəꞌ choeꞌ xtižəꞌ Diozənꞌ,
\q1 Dioz benꞌ naquə ḻeꞌezelaogüe beṉəꞌ blao.
\q1 Yesəꞌəneꞌ caꞌ c̱hedəꞌ leꞌ cuialaogoꞌ lao X̱anchonꞌ naꞌ goꞌo xtižeꞌenəꞌ
\q1 par nic̱h ṉitəꞌ beṉəꞌ probnid par əsoꞌelaogüeꞌeneꞌ catəꞌən yideꞌ.
\q1
\v 77 Egwsed əgwloꞌidoꞌ netoꞌ canꞌ cheneꞌe Diozənꞌ yebeɉeꞌ chioꞌo xniꞌa deꞌe malənꞌ
\q1 naꞌ canꞌ cheneꞌeneꞌ yeziꞌixeneꞌ xtoḻəꞌəcho caꞌ,
\q1 chioꞌo naccho beṉəꞌ ṉasyon c̱heꞌ.
\q1
\v 78 Diozənꞌ cheyašəꞌ chežiꞌilažeꞌe chioꞌo naꞌ bachseḻeꞌe to beṉəꞌ gaquəleneꞌ chioꞌo.
\q1 Naꞌ gwxaquəꞌəlebe beꞌenəꞌ ca beꞌeniꞌ c̱he bgüižənꞌ.
\q1
\v 79 Ḻeꞌ gwzeɉniꞌineꞌ chioꞌo beṉac̱h naquənꞌ goncho par nic̱h žɉəyezocho ganꞌ zo Diozənꞌ catəꞌ gatcho,
\q1 naꞌ əgwzeɉniꞌineꞌ chioꞌo beṉac̱h naquənꞌ so cuezcho binḻo.
\q1 Canꞌ goneꞌ cueꞌe beꞌeniꞌ ḻoꞌo yic̱hɉlaꞌaždaoꞌ chioꞌo gwxaquəꞌəlebecho ca beṉəꞌ chsaꞌaš ḻoꞌo deꞌe žc̱hoḻənꞌ.
\p
\v 80 Naꞌ Juanṉəꞌ ca bcuaꞌ chchaꞌogüeꞌ, zdate chaquəch yic̱hɉlaꞌaždaogüeꞌen canꞌ cheneꞌe Diozənꞌ. Naꞌ Juanṉəꞌ ɉsoeꞌ latɉə dašənꞌ. Naꞌ nanꞌ ṉezoeꞌ catəꞌən bžin ža gwzolaogüeꞌ gwdix̱ɉuiꞌe xtižəꞌ Diozənꞌ len beṉəꞌ Izrael caꞌ.
\c 2
\s1 Canꞌ goquə catəꞌən golɉə Jesoꞌosənꞌ
\p
\v 1 Naꞌ gwde deꞌe caꞌ, naꞌ ca tyempənꞌ catəꞌən gwnabiaꞌ Sesar Augosto, beneꞌ mendad te cuent naꞌ əsaꞌaḻəꞌ yiš baḻə beṉəꞌ žaꞌ to to yež deꞌe zɉəchiꞌ doxen ganəꞌ chnabiꞌe.
\v 2 Naꞌ bguaḻeꞌe yišənꞌ lao chnabiaꞌ Sirenio ganꞌ nziꞌ Siria. Naꞌ naquən deꞌe nech deꞌen bguaḻeꞌe yiš baḻə beṉəꞌ žaꞌ to to yež.
\v 3 Nach yoguəꞌəḻoḻ beṉəꞌ ɉəyaꞌaqueꞌ lažgaꞌaqueꞌ ɉəsyəꞌəde cuingaꞌaqueꞌ cuent par gwsaꞌaḻəꞌəgaꞌaqueꞌ yiš.
\v 4 Nach Jwsenꞌ naqueꞌ dia c̱he deꞌe Rei Dabinꞌ. Naꞌ bezeꞌe Nasaret ganꞌ mbane Galileanꞌ par beyeɉeꞌ syoda c̱he deꞌe Rei Dabinꞌ deꞌe nziꞌ Belen. Naꞌ chiꞌ syoda Belenṉəꞌ ganꞌ mbane Jodeanꞌ.
\v 5 Beyeɉeꞌ ɉəyede cuineꞌ cuent naꞌ zenc̱heꞌe noꞌol c̱heꞌ Marianꞌ, pero bitoṉəꞌ yesəꞌəcaꞌa lɉuežɉeꞌ. Naꞌ Marianꞌ banoꞌe bdaꞌonəꞌ.
\v 6 Naꞌ goquənꞌ lao niteꞌe Belenṉəꞌ bžin or par saneꞌ.
\v 7 Naꞌ biꞌi nechənꞌ gwxaneꞌ golɉboꞌ biꞌi byo daoꞌ, naꞌ blažeꞌeboꞌ lachəꞌ. Naꞌ gwloꞌeboꞌ to ḻoꞌi ganꞌ chsaꞌo bia yix̱əꞌ, c̱hedəꞌ bito bi latɉə gwyoꞌoch mesonṉəꞌ par ḻegaꞌaqueꞌ.
\s1 Angl caꞌ bosoꞌozeneneꞌ beṉəꞌ goye xiləꞌ caꞌ de que bagolɉə Goslanꞌ
\p
\v 8 Naꞌ lao žeꞌ naꞌ, ḻeꞌe yix̱əꞌ c̱he Belen naꞌatezəczə žaꞌ beṉəꞌ goye xiləꞌ ṉechəsəꞌəṉeꞌe chsaꞌapeꞌ xiləꞌ c̱hegaꞌaqueꞌ caꞌ.
\v 9 Naꞌ angl c̱he X̱anchonꞌ bžineꞌ ganꞌ nitəꞌ beṉəꞌ goye xiləꞌ caꞌ, naꞌ yeḻəꞌ chey cheꞌeniꞌ c̱he Diozənꞌ gwyec̱hɉən bseꞌeniꞌin ganꞌ niteꞌenəꞌ. Naꞌ besəꞌəžebchgüeꞌ.
\v 10 Naꞌ gož anglənꞌ ḻegaꞌaqueꞌ: ―Bito žeble, ṉaꞌa c̱hix̱ɉoꞌidaꞌ leꞌe to dižəꞌ güen deꞌe yeba yezaquəꞌəlažəꞌəchgua yoguəꞌəḻoḻ beṉəꞌ.
\v 11 Laoꞌ syoda c̱he deꞌe Rei Dabinꞌ bagolɉə ṉaꞌa benꞌ chac yebeɉ beṉəꞌ xniꞌa deꞌe malənꞌ. Naqueꞌ Cristənꞌ benꞌ bseḻəꞌ Diozənꞌ par gaquəleneꞌ beṉac̱hənꞌ naꞌ naqueꞌ X̱anchonꞌ.
\v 12 Par yeželele bdaꞌonəꞌ quinga naquə: Žɉəyediꞌileboꞌ lažəꞌəboꞌ lachəꞌ naꞌ deboꞌ ḻoꞌi ganꞌ chsaꞌo bia yix̱əꞌ.
\p
\v 13 Beyož gwna anglənꞌ caꞌ ḻeꞌe besəꞌəžinte angl zanch ganꞌ zo angl nechənꞌ, zaꞌaqueꞌ ganꞌ zo Diozənꞌ. Naꞌ chsoꞌelaogüeꞌe ḻeꞌ, chəsəꞌəneꞌ:
\q1
\v 14 Ḻedoyeꞌelaꞌoch Diozənꞌ benꞌ zo yobanꞌ.
\q1 Naꞌ lao yežlyonꞌ gatəꞌ yeḻəꞌ so cuezə binḻo entr beṉəꞌ caꞌ chebei Diozənꞌ ḻegaꞌaqueꞌ.
\p
\v 15 Naꞌ catəꞌ besyəꞌəsaꞌac angl caꞌ zɉəyaꞌaqueꞌ yobanꞌ, nach beṉəꞌ goye xiləꞌ caꞌ gwseꞌ lɉuežɉgaꞌaqueꞌ: ―Yeyeɉcho Belenṉəꞌ žɉəyegüiacho deꞌen bagoc, ca naquə X̱anchonꞌ bseḻeꞌe angl quinga bedəsəꞌədix̱ɉueꞌineꞌ chioꞌo.
\p
\v 16 Nach besaꞌacses beṉəꞌ goye xiləꞌ caꞌ ɉəyaꞌaqueꞌ Belenṉəꞌ, naꞌ ɉəsyəꞌədiꞌe Marianꞌ len Jwsenꞌ naꞌ len bdaꞌonəꞌ. Naꞌ bdaꞌonəꞌ deboꞌ ḻoꞌi ganꞌ chsaꞌo bia yix̱əꞌ caꞌ.
\v 17 Beyož besəꞌəleꞌineꞌ canꞌ bagoquənꞌ, naꞌ gwsoꞌe dižəꞌ c̱he bdaꞌonəꞌ len yeziquəꞌəchlə beṉəꞌ ca naquə deꞌen gwseꞌ angl caꞌ ḻegaꞌaqueꞌ.
\v 18 Naꞌ yoguəꞌəḻoḻ beṉəꞌ caꞌ əgwseꞌene dižəꞌ deꞌen gwsoeꞌ beṉəꞌ goye xiləꞌ caꞌ besyəꞌəbaneneꞌ.
\v 19 Naꞌ Marianꞌ ḻeczə gwloꞌo yic̱hɉeꞌ yoguəꞌəḻoḻ dižəꞌ deꞌen gwsoeꞌ beṉəꞌ goye xiləꞌ caꞌ naꞌ beneꞌ xbab ḻoꞌo yic̱hɉlaꞌaždaogüeꞌen bi zeɉenṉəꞌ.
\v 20 Nach besyəꞌəsaꞌac beṉəꞌ goye xiləꞌ caꞌ chsoꞌelaogüeꞌe Diozənꞌ naꞌ chsoꞌe ḻeꞌ yeḻəꞌ balaꞌaṉ c̱he yoguəꞌəḻoḻ deꞌen bagwseꞌeneneꞌ naꞌ babesəꞌəleꞌineꞌ ca naquə deꞌen gož anglənꞌ ḻegaꞌaqueꞌ.
\s1 Famiḻy c̱he Jesoꞌosənꞌ ɉsoꞌeboꞌ ḻoꞌo yoꞌodaoꞌ əblaonəꞌ
\p
\v 21 Catəꞌ gwde x̱onꞌ ža naꞌ ɉəsəꞌəzoꞌeboꞌ señy deꞌen neꞌ sirconsision naꞌ bosəꞌəsiꞌe laboꞌ Jesoꞌos, canꞌ ben anglənꞌ mendad catəꞌ zeꞌe guaꞌalə Marianꞌ ḻeboꞌ.
\p
\v 22 Catəꞌ gwde tyempənꞌ babeyac Marianꞌ xiꞌilažəꞌ len bdaꞌonəꞌ segon canꞌ na ḻeinꞌ deꞌen bzoɉ deꞌe Moisezənꞌ, nach gosəꞌəleneꞌeboꞌ Jerosalenṉəꞌ par ɉsoꞌeboꞌ lao Diozənꞌ.
\v 23 Gwsoꞌoneꞌ caꞌ c̱hedəꞌ nyoɉən ḻeꞌe ḻeinꞌ: “Yoguəꞌ biꞌi byo daoꞌ biꞌi nech cheyaḻəꞌ gacboꞌ lao naꞌ Diozənꞌ, naꞌ yoguəꞌ bia yix̱əꞌ bia maš daoꞌ bia nech ḻeczə gaquəb lao naꞌ Diozənꞌ.”
\v 24 Naꞌ gwsoꞌelaogüeꞌe Diozənꞌ gwsoꞌoneꞌ canꞌ na ḻei c̱he X̱ancho Diozənꞌ, nyoɉən: “Cheyaḻəꞌ gotle to csad ngolbexə o c̱hopə plomxtil.”
\p
\v 25-26 Naꞌ Jerosalenṉəꞌ gwzo to beṉəꞌ byo le Simeon. Beꞌenanꞌ gwyeczeꞌ beneꞌ deꞌe güen lao Diozənꞌ naꞌ beꞌelaogüeꞌeneꞌ, naꞌ gwlezeꞌ batəꞌəquənꞌ yidə Cristənꞌ benꞌ gwleɉ X̱ancho Diozənꞌ par gaquəleneꞌ beṉac̱hənꞌ. Naꞌ Spirit c̱he Diozənꞌ gwzon ḻoꞌo yic̱hɉlaꞌaždaoꞌ Simeonṉəꞌ. Naꞌ bzene Spiritənꞌ ḻeꞌ de que antslə zeꞌe gateꞌ leꞌineꞌ Cristənꞌ.
\v 27 Naꞌ Spiritənꞌ benən par nic̱h gwyeɉeꞌ yoꞌodaoꞌ əblaonəꞌ. Naꞌ zoeꞌ yoꞌodaꞌonəꞌ catəꞌ besəꞌəžin x̱axnaꞌ Jesoꞌosənꞌ zɉənḻeneꞌeboꞌ par nic̱h soꞌoneꞌ len ḻeboꞌ canꞌ na ḻeinꞌ.
\v 28 Nach Simeonṉəꞌ gwḻeneꞌeboꞌ, nach beꞌelaogüeꞌe Diozənꞌ gožeꞌeneꞌ:
\q1
\v 29 Ṉaꞌa ža X̱anaꞌ Dioz, bac̱h goc canꞌ gwnaꞌonəꞌ.
\q1 Beꞌ latɉə yeyedaꞌ binḻo ganꞌ zoꞌonəꞌ, nadaꞌ nacaꞌ beṉəꞌ güen žin c̱hioꞌ,
\q1
\v 30 c̱hedəꞌ bableꞌidaꞌ benꞌ zedəyeleɉ netoꞌ xniꞌa deꞌe malənꞌ.
\q1
\v 31 Naqueꞌ benꞌ bžioꞌ biaꞌ əgwseḻoꞌo par yoguəꞌəḻoḻ beṉəꞌ.
\q1
\v 32 Naꞌ cueꞌe beꞌeniꞌ ḻoꞌo yic̱hɉlaꞌaždaoꞌ beṉəꞌ cui zɉənaquə beṉəꞌ Izrael par nic̱h seꞌeɉniꞌineꞌ xtižoꞌonəꞌ.
\q1 Naꞌ ḻeczə goneꞌ par nic̱h beṉəꞌ Izrael caꞌ yesəꞌəziꞌe yeḻəꞌ balaꞌaṉ.
\p
\v 33 Nach x̱aboꞌon len xnaꞌaboꞌon besyəꞌəbaneneꞌ ca naquə dižəꞌ deꞌen beꞌ Simeonṉəꞌ c̱heboꞌ.
\p
\v 34 Naꞌ Simeonṉəꞌ gwṉabeneꞌ Diozənꞌ goneꞌ par nic̱h gaquə güen c̱hegaꞌaqueꞌ, naꞌ gožeꞌ Marianꞌ: ―Beṉəꞌ zan beṉəꞌ Izrael caꞌ yesəꞌəbiayiꞌe c̱hedəꞌ cui soꞌonḻilažeꞌe xiꞌiṉoꞌ nga, naꞌ zaneꞌ yesəꞌəziꞌe yeḻəꞌ mban zeɉḻicaṉe c̱hedəꞌ soꞌonḻilažeꞌeneꞌ, naꞌ beṉəꞌ zan yosoꞌožia yosoꞌoniteꞌeneꞌ catəꞌ yesəṉezeneꞌ c̱heꞌ.
\v 35 Naꞌ goneꞌ par nic̱h gacbiaꞌ nonꞌ əgwzenag c̱he Diozənꞌ naꞌ nonꞌ cui. Naꞌ caczə ga chaz to cwšiy gaquə ḻoꞌo yic̱hɉlaꞌaždaogoꞌonəꞌ tant əžaglaogoꞌ deꞌen gac c̱heꞌ.
\p
\v 36 Naꞌ ḻeczə gwzo to noꞌolə gwle Añy yoꞌodaoꞌ əblaonəꞌ, naꞌ noꞌolənꞌ choꞌe xtižəꞌ Diozənꞌ. Naqueꞌ xiꞌiṉ deꞌe Fanuel, naꞌ naqueꞌ dia c̱he deꞌe Aser. Bšagneꞌe catəꞌən naqueꞌ noꞌol güegoꞌ, pero naꞌ gaž izga bguan beꞌen c̱heꞌenəꞌ. Naꞌ Añyənꞌ banaqueꞌ to beṉəꞌ golə.
\v 37 Bagoc taplalɉ tap iz got beꞌen c̱heꞌenəꞌ. Cuiczə chebižeꞌe yoꞌodaoꞌ əblaonəꞌ. Ḻechguaḻe choꞌelaogüeꞌe Diozənꞌ do ža do yel, xte gwyaz tgüeɉə cui gwdaogüeꞌ par nic̱h bencheꞌ orasyon lao Diozənꞌ.
\v 38 Naꞌ goquənꞌ bgüiguəꞌ Añyənꞌ ganꞌ nitəꞌ Jwsenꞌ len Marianꞌ, naꞌ beꞌe yeḻəꞌ chox̱cwlen c̱he Diozənꞌ deꞌen bac̱h bseḻeꞌe benꞌ gaquəlen ṉasyon Izraelənꞌ. Naꞌ beꞌe dižəꞌ c̱he Jesoꞌosənꞌ len yoguəꞌəḻoḻ beṉəꞌ caꞌ žaꞌ Jerosalenṉəꞌ beṉəꞌ chesəꞌəbezeꞌ batəꞌəquənꞌ əseḻəꞌ Diozənꞌ benꞌ gaquəleneꞌ ḻegaꞌaqueꞌ.
\s1 Ɉəyaꞌaqueꞌ Nasaretənꞌ
\p
\v 39 Nach Jwsenꞌ naꞌ Marianꞌ catəꞌ beyož gwsoꞌoneꞌ yoguəꞌəḻoḻ deꞌen non ḻei c̱he Diozənꞌ mendad soꞌoneꞌ, ɉəyaꞌaqueꞌ lažgaꞌaqueꞌ Nasaret ganꞌ mbane Galileanꞌ.
\v 40 Naꞌ Jesoꞌosənꞌ zda chchaꞌogüeꞌ naꞌ zda chdipeꞌ. Naꞌ ca bcuaꞌ chchaꞌogüeꞌenəꞌ zdach cheɉniꞌicheneꞌ, naꞌ nžiꞌilažəꞌ Diozənꞌ ḻeꞌ.
\s1 Canꞌ ben Jesoꞌosənꞌ ḻoꞌo yoꞌodaoꞌ əblaonəꞌ
\p
\v 41 Naꞌ x̱axneꞌe caꞌ yoguəꞌ iz chɉaꞌaqueꞌ lṉi pascw deꞌen chaḻəꞌ Jerosalenṉəꞌ.
\v 42 Šižiṉ ize Jesoꞌosənꞌ catəꞌ gosəꞌəc̱heꞌ x̱axneꞌe caꞌ ḻeꞌ ɉaꞌaqueꞌ Jerosalenṉəꞌ. Segon ca costombr c̱he beṉəꞌ Izrael caꞌ chɉaꞌaqueꞌ catəꞌ chaḻəꞌ lṉinꞌ.
\v 43 Naꞌ catəꞌ gwde lṉinəꞌ x̱axneꞌe caꞌ besaꞌaqueꞌ, pero Jesoꞌosənꞌ begaꞌaṉeꞌ Jerosalenṉəꞌ. Naꞌ xneꞌenəꞌ len Jwsenꞌ bito gwsaꞌacbeꞌineꞌ,
\v 44 con gwsoꞌoneꞌ xbab šə bazɉəyedeꞌ len beṉəꞌ caꞌ nžaggaꞌaqueꞌ txenṉəꞌ. Naꞌ tža nez babesaꞌac x̱axneꞌe caꞌ gwzolao chəsyəꞌəyilɉeꞌeneꞌ entr famiḻy naꞌ migw c̱hegaꞌaqueꞌ caꞌ.
\v 45 Pero bito besyəꞌəželeneꞌ ḻeꞌ, nach besyəꞌəbiꞌe ɉəyaꞌaqueꞌ Jerosalenṉəꞌ deꞌe yoblə par žɉəsyəꞌədilɉeꞌeneꞌ.
\p
\v 46 Naꞌ goquənꞌ beyoṉ žach besyəꞌəželeneꞌ Jesoꞌosənꞌ ḻoꞌo yoꞌodaoꞌ əblaonəꞌ, chiꞌe gwchoḻ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ. Jesoꞌosənꞌ chzenagueꞌ xtižəꞌəgaꞌaqueꞌenəꞌ naꞌ deꞌe zan chṉabeneꞌ ḻegaꞌaqueꞌ.
\v 47 Naꞌ yoguəꞌəḻoḻ beṉəꞌ caꞌ chosoꞌozenag xtižeꞌenəꞌ chəsyəꞌəbaneneꞌ c̱he yeḻəꞌ cheɉniꞌi c̱heꞌenəꞌ naꞌ canꞌ chožiꞌe xtižəꞌ beṉəꞌ caꞌ chosoꞌosed chosoꞌoloꞌi ḻeinꞌ.
\v 48 Naꞌ catəꞌ besəꞌəleꞌi x̱axneꞌen ḻeꞌ besyəꞌəbaneneꞌ, naꞌ gož xneꞌen ḻeꞌ: ―Xiꞌiṉdaoguaꞌa, ¿bixc̱henꞌ chondoꞌ netoꞌ caꞌ? X̱aoꞌ nga naꞌ nadaꞌ bagwdatoꞌ beyilɉtoꞌ leꞌ naꞌ deꞌe juisy deꞌe chaquetoꞌ.
\p
\v 49 Nach Jesoꞌosənꞌ gožeꞌ ḻegaꞌaqueꞌ: ―¿Bixc̱henꞌ cheyilɉle nadaꞌ? ¿Ecui ṉezele de que cheyaḻəꞌ gonaꞌ deꞌen na X̱aꞌanəꞌ gonaꞌanəꞌ?
\p
\v 50 Pero x̱axneꞌe caꞌ bito gwseꞌeɉniꞌineꞌ bi zeɉe deꞌen gožeꞌ ḻegaꞌaqueꞌenəꞌ.
\p
\v 51 Naꞌ beyeɉeꞌ Nasaretənꞌ len x̱axneꞌe caꞌ, bzenagueꞌ c̱hegaꞌaqueꞌ. Naꞌ gwloꞌo yic̱hɉ xneꞌenəꞌ yoguəꞌəḻoḻ deꞌen goquənꞌ.
\v 52 Naꞌ ca naquə zda gwyeɉniꞌiche Jesoꞌosənꞌ naꞌ zda gwchaꞌocheꞌ, naꞌ Diozənꞌ zda bebeicheneꞌ ḻeꞌ naꞌ ḻeczə caꞌ beṉac̱hənꞌ zdach besyəꞌəbeicheneꞌ ḻeꞌ.
\c 3
\s1 Juan benꞌ bc̱hoa nis gwdix̱ɉuiꞌe dižəꞌ güen dižəꞌ cobə c̱he Diozənꞌ
\p
\v 1 Catəꞌ goc šinoꞌ iz chnabiaꞌ Sesar Tiberionꞌ, goc Ponsio Pilatənꞌ goberṉador c̱he Jodeanꞌ. Naꞌ goc Erodənꞌ goberṉador c̱he Galileanꞌ, naꞌ goc beṉəꞌ bišeꞌe Lipənꞌ goberṉador c̱he Itorea naꞌ c̱he Traconite. Naꞌ goc Lisanias goberṉador c̱he Abilinia.
\v 2 Nach Anas naꞌ Caifas gwsaꞌaquəcheꞌ bx̱oz əblao c̱he beṉəꞌ Izrael caꞌ. Iz naꞌ xiꞌiṉ Zequerianꞌ, benꞌ gwle Juan, gwzoeꞌ latɉə dašənꞌ naꞌ Diozənꞌ beꞌeleneꞌ ḻeꞌ dižəꞌ.
\v 3 Nach Juanṉəꞌ gwyeɉeꞌ yoguəꞌəḻoḻ yež deꞌe zɉənyec̱hɉ zɉəmbiꞌi yao Jordanṉəꞌ, ɉətix̱ɉueꞌineꞌ yoguəꞌ beṉəꞌ de que cheyaḻəꞌ yesyəꞌədiṉɉeneꞌ xtoḻəꞌəgaꞌaqueꞌenəꞌ naꞌ yesəꞌəṉabeneꞌ Diozənꞌ əgwṉitlaogüeꞌen, naꞌ yesəꞌəchoeꞌ nis.
\v 4 Juanṉəꞌ beneꞌ canꞌ bzoɉ deꞌe profet Isaiazənꞌ benꞌ beꞌ xtižəꞌ Diozənꞌ canaꞌ. Quinga nan:
\q1 To beṉəꞌ əṉeꞌ zižɉo latɉə dašənꞌ, əṉeꞌ: “Ḻeꞌe so probnid par əgwzenagle c̱he X̱anchonꞌ catəꞌən yideꞌ.
\q1 Naꞌ šə sole probnid par əgwzenagle c̱heꞌ catəꞌən yideꞌ,
\q1 deꞌen gonḻe caꞌ gwxaquəꞌəleben canꞌ chonḻe chxiꞌ chloale nez caꞌ catəꞌ chidə to beṉəꞌ blao.
\q1
\v 5 Ḻeꞌe yošaꞌ yic̱hɉlaꞌaždaꞌolenꞌ
\q1 par nic̱h gaquən ca to nez güen ganꞌ babosoꞌochix̱eꞌ yaꞌa yao caꞌ par beyaquən to leḻi.
\q1 Naꞌ gaquən ca to nez ganꞌ babosoꞌoxiꞌ babosoꞌoloeꞌ,
\q1 naꞌ bagosəꞌəc̱hogueꞌ xišeꞌen par beyaquən ḻicha.
\q1
\v 6 Naꞌ gwžin ža catəꞌ yoguəꞌəḻoḻ beṉəꞌ yesəꞌəleꞌineꞌ benꞌ seḻəꞌ Diozənꞌ par yebeɉeꞌ beṉəꞌ xniꞌa deꞌe malənꞌ.”
\p
\v 7 Naꞌ beṉəꞌ zan ɉaꞌaqueꞌ ganꞌ gwzo Juanṉəꞌ par nic̱h bc̱hoeꞌ ḻegaꞌaqueꞌ nisənꞌ. Naꞌ Juanṉəꞌ gožeꞌ ḻegaꞌaqueꞌ: ―Leꞌe nacle beṉəꞌ gox̱oayag naꞌ nalɉele. ¿Echaquele de que guaquə yexoṉɉele castigonꞌ deꞌen əseḻəꞌ Diozənꞌ par leꞌe?
\v 8 Cheyaḻəꞌ gonḻe deꞌen naquə güen par nic̱h saꞌacbeꞌi beṉəꞌ yoblə de que babošaꞌ yic̱hɉlaꞌaždaꞌolenꞌ. Naꞌ bito gonḻe xbab de que Diozənꞌ cui goneꞌ leꞌe castigw c̱he xtoḻəꞌəlenꞌ laogüe deꞌen nacle xiꞌiṉ dia c̱he deꞌe Abraanṉəꞌ. Bito ṉacho de que ḻechguaḻe chyažɉe Diozənꞌ leꞌe. Guaquə goneꞌ par nic̱h yeɉ quinga yesyəꞌəyaquən xiꞌiṉ dia c̱he deꞌe Abraanṉəꞌ.
\v 9 Ca naquə leꞌe šə cui chonḻe canꞌ chazlažəꞌ Diozənꞌ, gwxaquəꞌəlebele ca to yag frot deꞌe cui bi frot chbianꞌ. Naꞌ ca naquə yoguəꞌəte yag frot deꞌe cui bi frot choṉ, chəsəꞌəc̱hog beṉəꞌ ḻen naꞌ chəsəꞌəzeyeꞌen.
\p
\v 10 Nach beṉəꞌ caꞌ chəsəꞌəzenag xtižeꞌenəꞌ gosəꞌəṉabeneꞌ Juanṉəꞌ gwseꞌeneꞌ: ―¿Bi ca deꞌe cheyaḻəꞌ gontoꞌ?
\p
\v 11 Nach gožeꞌ ḻegaꞌaqueꞌ: ―Benꞌ napə c̱hopə xadoṉ, cheyaḻəꞌ əgwnežɉueꞌ ton c̱he beṉəꞌ cui bi bi de c̱heꞌ. Naꞌ ḻeczə caꞌ benꞌ de deꞌe gaogüeꞌ, cheyaḻəꞌ əgwnežɉueꞌ c̱he beṉəꞌ cui bi bi de deꞌe gaogüeꞌ.
\p
\v 12 Naꞌ catəꞌ beṉəꞌ goc̱hixɉw caꞌ ḻeczə ɉəsəꞌəbigueꞌe par gwc̱hoa Juanṉəꞌ ḻegaꞌaqueꞌ nis naꞌ gwseꞌeneꞌ: ―Maestr; ¿bi ca deꞌe cheyaḻəꞌəch gontoꞌ?
\p
\v 13 Naꞌ gožeꞌ ḻegaꞌaqueꞌ: ―Bito əgwc̱hixɉwle de mazəchlə ca deꞌen cheyaḻəꞌ əgwc̱hixɉwle.
\p
\v 14 Naꞌ beṉəꞌ caꞌ zɉənaqueꞌ soḻdad ḻeczə gosəꞌəṉabeneꞌ ḻeꞌ gwseꞌeneꞌ: ―¿C̱hexa netoꞌ ža? ¿Bi ca deꞌe cheyaḻəꞌəch gontoꞌ?
\p Nach Juanṉəꞌ gožeꞌ ḻegaꞌaqueꞌ: ―Bitoch əcaꞌale ḻa fuers deꞌen de c̱he beṉəꞌ, naꞌ nic gacle testigw faḻs contr beṉəꞌ yoblə par əcaꞌale xmechgaꞌaqueꞌ. Ḻeꞌe gon banez len laxɉwlenꞌ.
\p
\v 15 Naꞌ beṉəꞌ Izrael caꞌ gwnitəꞌ lez yidə Cristənꞌ benꞌ gwleɉ Diozənꞌ par gaquəleneꞌ ṉasyon c̱hegaꞌaqueꞌenəꞌ, gwsaꞌaqueneꞌ ḻoꞌo yic̱hɉlaꞌaž daogaꞌaqueꞌ šə Juanṉəꞌ naqueꞌ beꞌenəꞌ.
\v 16 Naꞌ Juanṉəꞌ gocbeꞌineꞌ xbab c̱hegaꞌaqueꞌenəꞌ naꞌ gožeꞌ yoguəꞌəgaꞌaqueꞌ: ―Nadaꞌ deꞌe ḻi chc̱hoaczaꞌ beṉəꞌ nis, pero naꞌ zeꞌe yidə benꞌ goneꞌ par nic̱h so Spirit c̱he Diozənꞌ ḻoꞌo yic̱hɉlaꞌaždaꞌochonꞌ naꞌ ṉabiꞌan chioꞌo. Naꞌ Spiritənꞌ naquən ca yiꞌ naꞌ gwxiꞌ gwloan yic̱hɉlaꞌaždaꞌochonꞌ. Benꞌ yidə zaquəꞌəcheꞌ ca nadaꞌ naꞌ bito zacaꞌa par gacaꞌ xmoseꞌ.
\v 17 Beꞌenanꞌ goneꞌ len chioꞌo canꞌ choncho catəꞌ chdecho trigonꞌ rṉer naꞌ chzeycho yix bebənꞌ. Naꞌ šə chonḻilažəꞌəchoneꞌ yotobeꞌ chioꞌo par nic̱h socho txen len ḻeꞌ, naꞌ beṉəꞌ caꞌ cui chsoꞌonḻilažəꞌ ḻeꞌ əseḻeꞌe ḻegaꞌaqueꞌ lao yiꞌ gabiḻənꞌ deꞌen cuiczə cheyol.
\p
\v 18 Naꞌ deꞌe zanch deꞌe gwna Juanṉəꞌ gwdix̱ɉueꞌineꞌ ḻegaꞌaqueꞌ dižəꞌ güen dižəꞌ cobənꞌ naꞌ gwṉeyoineꞌ ḻegaꞌaqueꞌ seꞌeɉḻeꞌen.
\v 19 Nach Juanṉəꞌ beꞌe dižəꞌ c̱he goberṉador Erodənꞌ ca naquə deꞌe mal deꞌen babeneꞌenəꞌ bequeꞌe Erodiasənꞌ ca xoꞌoleꞌ. Laꞌ Erodiasənꞌ naqueꞌ xoꞌolə Lip beṉəꞌ bišəꞌ Erodənꞌ. Naꞌ ḻeczə beꞌe Juanṉəꞌ dižəꞌ ca naquə yoguəꞌ deꞌe malənꞌ babeneꞌ.
\v 20 Naꞌ catəꞌ Erodənꞌ beneneꞌ canꞌ choeꞌ Juanṉəꞌ xtižeꞌenəꞌ naꞌ beneꞌ yetoꞌ deꞌe mal, gwloꞌe Juanṉəꞌ ližya.
\s1 Canꞌ goquə catəꞌən gwchoa Jesoꞌosənꞌ nis
\p
\v 21 Naꞌ žlac ṉeꞌe chc̱hoa Juanṉəꞌ beṉəꞌ nis, beṉəꞌ zan ɉaꞌac laogüeꞌenəꞌ par bc̱hoeꞌ ḻegaꞌaqueꞌ nisənꞌ naꞌ len Jesoꞌosənꞌ gwchoeꞌ nisənꞌ. Naꞌ lao orənꞌ Jesoꞌosənꞌ beneꞌ orasyon naꞌ ḻeꞌe byalɉwte yobanꞌ naꞌ bleꞌineꞌ ganꞌ zo Diozənꞌ.
\v 22 Naꞌ betɉ Spirit c̱he Diozənꞌ bžinən gwzon len ḻeꞌ naꞌ ca orənꞌ naquən ca to ngolbexə. Naꞌ gož Diozənꞌ Jesoꞌosənꞌ: ―Leꞌ nacoꞌ Xiꞌiṉaꞌ, naꞌ chacchgüeidaꞌ c̱hioꞌ. Cheba chezaquəꞌəlažəꞌəchguaꞌ leꞌ.
\s1 Dia c̱he Jesoꞌosənꞌ
\p
\v 23 Naꞌ ca do šichoa ize Jesoꞌosənꞌ catəꞌ gwzolaogüeꞌ beneꞌ yoguəꞌəḻoḻ deꞌen zedeyeneꞌ. Naꞌ beṉəꞌ caꞌ gwnitəꞌ naꞌ gwsoꞌoneꞌ xbab de que xiꞌiṉ Jwse naꞌ Jesoꞌosənꞌ. Naꞌ Jesoꞌosənꞌ naqueꞌ xesoa Eli.
\v 24 Naꞌ Elinꞌ naqueꞌ xiꞌiṉ Matat, naꞌ Matatənꞌ naqueꞌ xiꞌiṉ Lebi, naꞌ Lebinꞌ naqueꞌ xiꞌiṉ Melqui, naꞌ Melquinꞌ naqueꞌ xiꞌiṉ Jana, naꞌ Jananꞌ naqueꞌ xiꞌiṉ Jwse.
\v 25 Naꞌ Jwsenꞌ naqueꞌ xiꞌiṉ Matatias, naꞌ Matatiasənꞌ naqueꞌ xiꞌiṉ Amos, naꞌ Amosənꞌ naqueꞌ xiꞌiṉ Naom, naꞌ Naonṉəꞌ naqueꞌ xiꞌiṉ Esli.
\v 26 Naꞌ Eslinꞌ naqueꞌ xiꞌiṉ Nagai, naꞌ Nagainꞌ naqueꞌ xiꞌiṉ Maat, naꞌ Maatənꞌ naqueꞌ xiꞌiṉ Matatias, naꞌ Matatiasənꞌ naqueꞌ xiꞌiṉ Semei, naꞌ Semeinꞌ naqueꞌ xiꞌiṉ Jwse, naꞌ Jwsenꞌ naqueꞌ xiꞌiṉ Joda.
\v 27 Naꞌ Jodanꞌ naqueꞌ xiꞌiṉ Joana, naꞌ Joananꞌ naqueꞌ xiꞌiṉ Resa, naꞌ Resanꞌ naqueꞌ xiꞌiṉ Sorobabel, naꞌ Sorobabelənꞌ naqueꞌ xiꞌiṉ Salatiel.
\v 28 Naꞌ Salatielənꞌ naqueꞌ xiꞌiṉ Neri, naꞌ Nerinꞌ naqueꞌ xiꞌiṉ Melqui, naꞌ Melquinꞌ naqueꞌ xiꞌiṉ Adi, naꞌ Adinꞌ naqueꞌ xiꞌiṉ Cosam, naꞌ Cosanṉəꞌ naqueꞌ xiꞌiṉ Elmodam, naꞌ Elmodanṉəꞌ naqueꞌ xiꞌiṉ Er.
\v 29 Naꞌ Erənꞌ naqueꞌ xiꞌiṉ Josue, naꞌ Josuenꞌ naqueꞌ xiꞌiṉ Elieser, naꞌ Elieserənꞌ naqueꞌ xiꞌiṉ Jorim, naꞌ Jorinṉəꞌ naqueꞌ xiꞌiṉ Matat.
\v 30 Naꞌ Matatənꞌ naqueꞌ xiꞌiṉ Lebi, naꞌ Lebinꞌ naqueꞌ xiꞌiṉ Simeon, naꞌ Simeonṉəꞌ naqueꞌ xiꞌiṉ Joda, naꞌ Jodanꞌ naqueꞌ xiꞌiṉ Jwse, naꞌ Jwsenꞌ naqueꞌ xiꞌiṉ Jonan, naꞌ Jonanṉəꞌ naqueꞌ xiꞌiṉ Eliaquim.
\v 31 Naꞌ Eliaquinṉəꞌ naqueꞌ xiꞌiṉ Melea, naꞌ Meleanꞌ naqueꞌ xiꞌiṉ Mainan, naꞌ Mainanṉəꞌ naqueꞌ xiꞌiṉ Matata, naꞌ Matatanꞌ naqueꞌ xiꞌiṉ Natan.
\v 32 Naꞌ Natanṉəꞌ naqueꞌ xiꞌiṉ Dabi, naꞌ Dabinꞌ naqueꞌ xiꞌiṉ Isai, naꞌ Isainꞌ naqueꞌ xiꞌiṉ Obed, naꞌ Obedənꞌ naqueꞌ xiꞌiṉ Boos, naꞌ Boosənꞌ naqueꞌ xiꞌiṉ Salmon, naꞌ Salmonṉəꞌ naqueꞌ xiꞌiṉ Naason.
\v 33 Naꞌ Naasonṉəꞌ naqueꞌ xiꞌiṉ Aminadab, naꞌ Aminadabənꞌ naqueꞌ xiꞌiṉ Aram, naꞌ Aranṉəꞌ naqueꞌ xiꞌiṉ Esrom, naꞌ Esronṉəꞌ naqueꞌ xiꞌiṉ Fares. Naꞌ Faresənꞌ naqueꞌ xiꞌiṉ Joda,
\v 34 naꞌ Jodanꞌ naqueꞌ xiꞌiṉ Jacob, naꞌ Jacobənꞌ naqueꞌ xiꞌiṉ Isaac, naꞌ Isaaquənꞌ naqueꞌ xiꞌiṉ Abraam, naꞌ Abraanṉəꞌ naqueꞌ xiꞌiṉ Tare, naꞌ Tarenꞌ naqueꞌ xiꞌiṉ Nacor.
\v 35 Naꞌ Nacorənꞌ naqueꞌ xiꞌiṉ Serog, naꞌ Seroguənꞌ naqueꞌ xiꞌiṉ Ragau, naꞌ Ragaunꞌ naqueꞌ xiꞌiṉ Peleg, naꞌ Peleguənꞌ naqueꞌ xiꞌiṉ Eber.
\v 36 Naꞌ Eberənꞌ naqueꞌ xiꞌiṉ Sala, naꞌ Salanꞌ naqueꞌ xiꞌiṉ Cainan, naꞌ Cainanṉəꞌ naqueꞌ xiꞌiṉ Arfacsad, naꞌ Arfacsadənꞌ naqueꞌ xiꞌiṉ Sem, naꞌ Senṉəꞌ naqueꞌ xiꞌiṉ Noe, naꞌ Noenꞌ naqueꞌ xiꞌiṉ Lamec.
\v 37 Naꞌ Lamequənꞌ naqueꞌ xiꞌiṉ Matosalen, naꞌ Matosalenṉəꞌ naqueꞌ xiꞌiṉ Enoc, naꞌ Enoquənꞌ naqueꞌ xiꞌiṉ Jared, naꞌ Jaredənꞌ naqueꞌ xiꞌiṉ Maalaleel.
\v 38 Naꞌ Maalaleelənꞌ naqueꞌ xiꞌiṉ Cainan, naꞌ Cainanṉəꞌ naqueꞌ xiꞌiṉ Enos, naꞌ Enosənꞌ naqueꞌ xiꞌiṉ Set, naꞌ Setənꞌ naqueꞌ xiꞌiṉ Adan, naꞌ Adanṉəꞌ naqueꞌ xiꞌiṉ Dioz.
\c 4
\s1 Gwxiyeꞌenəꞌ gwloꞌoyeḻəꞌən Jesoꞌosənꞌ goneꞌ deꞌe mal
\p
\v 1 Naꞌ Spirit c̱he Diozənꞌ gwnabiaꞌan yic̱hɉlaꞌaždaoꞌ Jesoꞌosənꞌ. Naꞌ Jesoꞌosənꞌ bezeꞌe choꞌa yao Jordanṉəꞌ, naꞌ Spiritənꞌ benən par nic̱h gwyeɉeꞌ latɉə dašənꞌ.
\v 2 C̱hoa ža gwzoeꞌ latɉə dašənꞌ, naꞌ lao c̱hoa žanꞌ gwxiyeꞌenəꞌ gwloꞌoyeḻəꞌən Jesoꞌosənꞌ goneꞌ deꞌe malənꞌ. Naꞌ lao deꞌe c̱hoa žanꞌ bitobi gwdaogüeꞌ, naꞌ catəꞌ gwde c̱hoa žanꞌ gwdoneꞌ.
\v 3 Naꞌ gož gwxiyeꞌenəꞌ ḻeꞌ: ―Šə lenꞌ nacoꞌ Xiꞌiṉ Diozənꞌ, gož yeɉ nga yeyaquən yetxtil.
\p
\v 4 Nach gož Jesoꞌosənꞌ ḻen: ―Nyoɉczə Xtižəꞌ Diozənꞌ nan: “Caguə yeḻəꞌ guao naꞌazənꞌ əbane chioꞌo beṉac̱h sino ḻeczə chyažɉecho yoguəꞌəḻoḻ dižəꞌ deꞌe na Diozənꞌ par əbancho.”
\p
\v 5 Naꞌ gwc̱heꞌ gwxiyeꞌenəꞌ ḻeꞌ to lao yaꞌa sibə, naꞌ žalṉez bloꞌin ḻeꞌ yoguəꞌ ṉasyon deꞌe zɉəchiꞌ lao yežlyonꞌ.
\v 6 Nach gožən ḻeꞌ: ―Doxen yeḻəꞌ chnabiaꞌ deꞌe de lao yežlyo nga naquən lao naꞌa. Naꞌ əgwnežɉuaꞌan con no cheꞌendaꞌ. Goṉaꞌ leꞌ yeḻəꞌ chnabiaꞌ c̱hiaꞌanəꞌ naꞌ len yoguəꞌ deꞌen naquə güen naꞌ yoguəꞌ deꞌe naquə deꞌe žialao c̱hiaꞌ ca naquə chnabiaꞌa ṉasyon caꞌ deꞌen zɉəchiꞌ yežlyo nga.
\v 7 Šə leꞌ güeꞌelaogoꞌo nadaꞌ yoguəꞌəḻoḻ deꞌe quinga əsaꞌaquən c̱hioꞌ.
\p
\v 8 Nach Jesoꞌosənꞌ gožeꞌ gwxiyeꞌenəꞌ: ―Gwchiꞌižəꞌ caꞌaḻə nga, Satanas. Nyoɉczən ḻeꞌe Xtižəꞌ Diozənꞌ nan: “Cheyaḻəꞌ šeɉṉiꞌalažəꞌəcho X̱ancho Diozənꞌ, naꞌ tozə ḻeꞌ güeꞌelaꞌocho.”
\p
\v 9 Nach gwxiyeꞌenəꞌ gozc̱heꞌen ḻeꞌ yic̱hɉoꞌo yoꞌodaoꞌ əblao deꞌen zo Jerosalenṉəꞌ, naꞌ gwlequən ḻeꞌ ganꞌ naquə ḻeꞌezelaogüe sibə, naꞌ gožen ḻeꞌ: ―Šə lenꞌ nacoꞌ Xiꞌiṉ Diozənꞌ bexitəꞌ nga par cheꞌelə,
\v 10 laꞌ nyoɉczən ḻeꞌe Xtižəꞌ Diozənꞌ:
\q1 Eseḻəꞌ Diozənꞌ angl c̱heꞌ caꞌ par əsaꞌacleneꞌ leꞌ naꞌ əsaꞌapeꞌ leꞌ.
\m
\v 11 Naꞌ ḻeczə caꞌ nan:
\q1 Esoꞌox̱eꞌe leꞌ par nic̱h bito əc̱hegoꞌo no yeɉ.
\p
\v 12 Nach Jesoꞌosənꞌ gožeꞌen: ―Ḻeczə caꞌ nyoɉczən ḻeꞌe Xtižəꞌ Diozənꞌ: “Bito con goncho X̱ancho Diozənꞌ prueb šə ḻeineꞌ canꞌ neꞌenəꞌ.”
\p
\v 13 Beyož gotəꞌəbiaꞌ de que cui gwzoi gwxiyeꞌenəꞌ coꞌoyeḻəꞌən Jesoꞌosənꞌ goneꞌ deꞌe malənꞌ, bebiꞌižəꞌən šlož len ḻeꞌ.
\s1 Jesoꞌosənꞌ gwzolaogüeꞌ chyix̱ɉuiꞌe dižəꞌ güen dižəꞌ cobə c̱he Diozənꞌ
\p
\v 14 Nach Jesoꞌosənꞌ beyeɉeꞌ Galileanꞌ, naꞌ goclen Spirit c̱he Diozənꞌ ḻeꞌ len yeḻəꞌ guac c̱heinəꞌ. Naꞌ yoguəꞌəḻoḻ beṉəꞌ žaꞌ yež deꞌen nyec̱hɉ mbiꞌi Galileanꞌ gwseꞌeneneꞌ c̱he Jesoꞌosənꞌ.
\v 15 Nach Jesoꞌosənꞌ bsed bloꞌineꞌ ḻegaꞌaqueꞌ ḻoꞌo yoꞌodaoꞌ c̱hegaꞌaqueꞌ caꞌ naꞌ yoguəꞌəḻoḻ beṉəꞌ caꞌ gwsoꞌelaogüeꞌe Jesoꞌosənꞌ.
\s1 Bežin Jesoꞌosənꞌ Nasaretənꞌ
\p
\v 16 Naꞌ bežin Jesoꞌosənꞌ Nasaret ganꞌ gwchaꞌogüeꞌ, naꞌ ca costombr c̱heꞌ deꞌe de, gwyoꞌe yoꞌodaꞌonəꞌ ža dezcanzənꞌ naꞌ gwzecheꞌ blabeꞌ.
\v 17 Naꞌ benꞌ yoꞌo lao neꞌi yoꞌodaꞌonəꞌ bnežɉueꞌeneꞌ rollo ganꞌ nyoɉ deꞌen bzoɉ deꞌe profet Isaiazənꞌ, benꞌ beꞌ xtižəꞌ Diozənꞌ canaꞌ. Naꞌ Jesoꞌosənꞌ bsašeꞌ rollonꞌ naꞌ beželeneꞌ partənꞌ ganꞌ nyoɉən:
\q1
\v 18 Zo Spirit c̱he Diozənꞌ len nadaꞌ,
\q1 naꞌ Diozənꞌ gwleɉeꞌ nadaꞌ zedeguaꞌa dižəꞌ güen dižəꞌ cobə len beṉəꞌ yašəꞌ.
\q1 Naꞌ babseḻeꞌe nadaꞌ zedeyenaꞌ par nic̱h yesyəꞌəyaclažəꞌ beṉəꞌ caꞌ zɉənitəꞌ trist.
\q1 Naꞌ zedətix̱ɉueꞌidaꞌ beṉəꞌ caꞌ nitəꞌ xniꞌa gwxiyeꞌenəꞌ de que yebeɉaꞌ ḻegaꞌaqueꞌ xniꞌeinəꞌ.
\q1 Naꞌ zedeyenaꞌ par yesəꞌəleꞌi beṉəꞌ lc̱hoḻ,
\q1 naꞌ beṉəꞌ chyiꞌ chzaquəꞌ, zedeyenaꞌ par nic̱h cuich c̱hiꞌ saqueꞌe.
\q1
\v 19 Naꞌ zedetix̱ɉuiꞌa de que babžin ža bžin or gaquəlen Diozənꞌ beṉac̱hənꞌ.
\p
\v 20 Naꞌ botobə Jesoꞌosənꞌ rollonꞌ naꞌ benežɉueꞌen benꞌ yoꞌo lao neꞌi yoꞌodaꞌonəꞌ, naꞌ Jesoꞌosənꞌ gwchiꞌe. Nach yoguəꞌ beṉəꞌ caꞌ nitəꞌ yoꞌodaꞌonəꞌ chosəꞌəgüiachgüeꞌeneꞌ.
\v 21 Naꞌ gwzolao beꞌe dižəꞌənəꞌ, gwneꞌ: ―Ža ṉeža bachac canꞌ na Xtižəꞌ Diozənꞌ deꞌen babenele.
\p
\v 22 Naꞌ yoguəꞌ beṉəꞌ caꞌ gwseꞌene dižəꞌ deꞌen beꞌenəꞌ besyəꞌəbaneneꞌ catec mba naquə xtižəꞌ Jesoꞌosənꞌ, naꞌ gwsoꞌe dižəꞌ güen c̱heꞌenəꞌ. Naꞌ gwseꞌ lɉuežɉgaꞌaqueꞌ: ―¿Ecaguə benganꞌ xiꞌiṉ Jwsenꞌ?
\p
\v 23 Nach gož Jesoꞌosənꞌ ḻegaꞌaqueꞌ: ―Šəquə güeꞌele nadaꞌ canꞌ na dicho c̱helenꞌ deꞌen na: “Beṉəꞌ güen rmech leꞌ, beyon cuinoꞌ.” Naꞌ güeꞌelɉale nadaꞌ: “Deꞌen babenetoꞌ benoꞌ Capernaum deꞌe zaquəꞌ yebane beṉəꞌ, ḻeczə canꞌ cheyaḻəꞌ gonoꞌ lažcho nga.”
\p
\v 24 Nach gozeꞌe ḻegaꞌaqueꞌ: ―Deꞌe ḻi chniaꞌ leꞌe, beṉəꞌ gwlaž c̱he beṉəꞌ güeꞌ xtižəꞌ Diozənꞌ bito chseꞌeɉḻeꞌe c̱heꞌ.
\v 25 Canꞌ goquə ca tyemp c̱he profet Ḻiazənꞌ bito bi bi yeɉw goquə šoṉ iz yoꞌo gašɉə, naꞌ goc bgüin juisy c̱hegaꞌaqueꞌ doxen ganꞌ zelao mbane Izraelənꞌ. Deꞌe ḻi chniaꞌ leꞌe, gwnitəꞌ zan noꞌolə gozebə Izraelənꞌ canaꞌ.
\v 26 Pero bito bseḻəꞌ Diozənꞌ Ḻiazənꞌ par gaquəleneꞌ ni to ḻegaꞌaqueꞌ. Bseḻeꞌeneꞌ yetolə yež deꞌen nziꞌ Sarepta ga mbane Sidon par gocleneꞌ to noꞌolə gozebə.
\v 27 Naꞌ ḻeczə canꞌ goquə tyemp c̱he deꞌe profet Ḻesionꞌ gwnitəꞌ zan beṉəꞌ Izraelənꞌ beṉəꞌ gwsaꞌacšene len yižgüeꞌ deꞌen neꞌ ḻepr. Ni to ḻegaꞌaqueꞌ cui beyon Ḻesionꞌ. Tozə Naaman beṉəꞌ Siria beyon Ḻesionꞌ.
\p
\v 28 Naꞌ yoguəꞌ beṉəꞌ caꞌ žaꞌ yoꞌodaꞌonəꞌ catəꞌ gwseꞌeneneꞌ dižəꞌ quinga besəꞌəžaꞌachgüeꞌ.
\v 29 Naꞌ ḻeꞌe besyəꞌəzožaꞌateꞌ naꞌ besyəꞌəbeɉeꞌ Jesoꞌosənꞌ syodanꞌ naꞌ gosəꞌəc̱heꞌeneꞌ to lao yaꞌa gaḻəꞌəzə ganꞌ chiꞌ syodanꞌ gwseꞌeneꞌeneꞌ yosoꞌox̱opeꞌeneꞌ par cheꞌelə, pero bito goquə bi soꞌoneneꞌ ḻeꞌ.
\v 30 Con bezaꞌ Jesoꞌosənꞌ bedieꞌ gwchoḻgaꞌaqueꞌenəꞌ.
\s1 Jesoꞌosənꞌ bebeɉeꞌ deꞌe x̱ioꞌ deꞌen yoꞌo yaz yic̱hɉlaꞌaždaoꞌ to beṉəꞌ
\p
\v 31 Naꞌ ɉsoeꞌ syoda Capernaum ganꞌ mbane Galileanꞌ. Naꞌ yoguəꞌ ža dezcanzənꞌ bsed bloꞌineꞌ beṉəꞌ caꞌ žaꞌ ḻoꞌo yoꞌodaꞌonəꞌ.
\v 32 Naꞌ beṉəꞌ caꞌ besyəꞌəbaneneꞌ ca naquə deꞌen bsed əbloꞌineꞌ ḻegaꞌaqueꞌ c̱hedəꞌ bsed bloꞌineꞌ ḻegaꞌaqueꞌ caꞌaczə to beṉəꞌ bansed gax̱ɉw gwcheꞌ.
\p
\v 33 Ḻoꞌo yoꞌodaoꞌ naꞌ gwzo to beṉəꞌ yoꞌo yaz deꞌe x̱ioꞌ yic̱hɉlaꞌaždaogüeꞌenəꞌ. Naꞌ bgosyaꞌan beꞌenəꞌ gwnan:
\v 34 ―Lɉoyetoꞌonəꞌ. Partlə leꞌ, partlə netoꞌ Jesoꞌos beṉəꞌ Nasaret. ¿Ezedežiayiꞌo netoꞌonəꞌ? Ṉezczətoꞌ no leꞌ: Leꞌ nacoꞌ beṉəꞌ laꞌaždaoꞌ xiꞌilažəꞌ juisy naꞌ Diozənꞌ bseḻeꞌe leꞌ.
\p
\v 35 Jesoꞌosənꞌ gwdiḻeꞌ deꞌe x̱iꞌonəꞌ naꞌ gožeꞌen: ―Sšagoꞌ. Bechoɉ yic̱hɉlaꞌaždaoꞌ benga.
\p Naꞌ bchix̱ deꞌe x̱iꞌonəꞌ beꞌenəꞌ gwchoḻ beṉəꞌ caꞌ zɉəžaꞌanəꞌ nach bechoɉən, pero bito benen ḻeꞌ ziꞌ.
\v 36 Naꞌ ḻechguaḻe besyəꞌəbane beṉəꞌ caꞌ nach gwseꞌ lɉuežɉgaꞌaqueꞌ: ―Nactequənꞌ con gwneꞌ caꞌ naꞌ bechoɉ deꞌe x̱iꞌonəꞌ deꞌen yoꞌo yaz yic̱hɉlaꞌaždaoꞌ beꞌenəꞌ. Nacbiaꞌ napeꞌ yeḻəꞌ chnabiaꞌ naꞌ yeḻəꞌ guac deꞌen choneꞌ mendad yesyəꞌəchoɉ deꞌe x̱ioꞌ caꞌ naꞌ chesyəꞌəchoɉən.
\p
\v 37 Naꞌ ca naquə deꞌen ben Jesoꞌosənꞌ gosəꞌ gwlalɉə dižəꞌənəꞌ doxen Galileanꞌ, naꞌ len yež caꞌ deꞌen zɉənyec̱hɉ zɉəmbiꞌi gaḻəꞌəzə Galileanꞌ.
\s1 Jesoꞌosənꞌ beyoneꞌ taobiꞌin c̱he Simonṉəꞌ
\p
\v 38 Naꞌ catəꞌ bezeꞌe yoꞌodaꞌonəꞌ, naꞌ gwyeɉeꞌ liž Simonṉəꞌ. Naꞌ taobinꞌ c̱he Simonṉəꞌ chacšeneneꞌ yoꞌochgüeꞌ deꞌe ḻa naꞌ gwsoꞌoḻgüižeꞌ Jesoꞌosənꞌ yeyoneꞌ noꞌolənꞌ.
\v 39 Naꞌ Jesoꞌosənꞌ gwzecheꞌ cuiteꞌ ganꞌ deꞌenəꞌ naꞌ bchequeꞌe gwdiḻeꞌ deꞌe ḻanəꞌ par bechoɉən noꞌolənꞌ. Nach taobiꞌin c̱he Simonṉəꞌ ḻeꞌe beyasteꞌ naꞌ gocleneꞌ beṉəꞌ caꞌ.
\s1 Jesoꞌosənꞌ beyoneꞌ beṉəꞌ zan
\p
\v 40 Naꞌ catəꞌ bachen bgüižənꞌ, yoguəꞌ beṉəꞌ gosəꞌəc̱heꞌe con beṉəꞌ chseꞌi gwde gwde yižgüeꞌ ɉsoꞌeneꞌ lao Jesoꞌosənꞌ. Naꞌ Jesoꞌosənꞌ gwx̱oa neꞌen yic̱hɉ to togaꞌaqueꞌ naꞌ beyoneꞌ ḻegaꞌaqueꞌ.
\v 41 Naꞌ ḻeczə bebeɉ Jesoꞌosənꞌ deꞌe x̱ioꞌ caꞌ zɉəyoꞌo zɉəyaz ḻoꞌo yic̱hɉlaꞌaždaoꞌ beṉəꞌ zan caꞌ. Naꞌ besyəꞌəchoɉən gosəꞌənan zižɉo: ―Lenꞌ nacoꞌ Xiꞌiṉ Diozənꞌ.
\p Jesoꞌosənꞌ gwdiḻeꞌ ḻegaꞌaquən naꞌ bito beꞌe latɉə yesəꞌəṉen c̱hedəꞌ zɉəṉezczen de que naqueꞌ Cristənꞌ benꞌ gwleɉ Diozənꞌ par gaquəleneꞌ beṉac̱hənꞌ.
\s1 Jesoꞌosənꞌ gwdeꞌ doxenḻə Galileanꞌ bsed bloꞌineꞌ
\p
\v 42 Naꞌ beteyo catəꞌ gwyeꞌeniꞌ, bezeꞌe naꞌ gwyeɉeꞌ to latɉə ganꞌ notono nḻaꞌ. Naꞌ beṉəꞌ caꞌ besyəꞌəyilɉeꞌeneꞌ naꞌ ɉaꞌaqueꞌ ganꞌ zoeꞌenəꞌ. Naꞌ bito gwseꞌeneneꞌ yezaꞌ Jesoꞌosənꞌ lažgaꞌaqueꞌenəꞌ.
\v 43 Jesoꞌosənꞌ gožeꞌ ḻegaꞌaqueꞌ: ―Ḻeczə beṉəꞌ caꞌ nitəꞌ syoda caꞌ yeḻaꞌ cheyaḻəꞌ žɉətix̱ɉueꞌigaꞌacdaꞌaneꞌ dižəꞌ güen dižəꞌ cobənꞌ de que Diozənꞌ ṉabiꞌe con notəꞌətezə beṉəꞌ əsoeꞌ latɉə. Diozənꞌ bseḻeꞌe nadaꞌ par nic̱h žɉətix̱ɉueꞌigaꞌacdaꞌaneꞌ.
\p
\v 44 Caꞌ goquənꞌ Jesoꞌosənꞌ gwdeꞌ to to yežənꞌ ganꞌ mbane Galileanꞌ naꞌ ḻoꞌo yoꞌodaoꞌ c̱hegaꞌaqueꞌ caꞌ bsed bloꞌineꞌ ḻegaꞌaqueꞌ.
\c 5
\s1 Jesoꞌosənꞌ beneꞌ par nic̱h gosəꞌəzeneꞌ bia zan beḻ yaꞌa
\p
\v 1 Naꞌ goquənꞌ lao zecha Jesoꞌosənꞌ choꞌa nisdaonꞌ deꞌen nziꞌ Genesaret, gosəꞌəbiguəꞌ beṉəꞌ zan par bosoꞌozenagueꞌ xtižəꞌ Diozənꞌ deꞌen beꞌenəꞌ.
\v 2 Naꞌ Jesoꞌosənꞌ bleꞌineꞌ nitəꞌ c̱hopə barcw daoꞌ choꞌa nisənꞌ. Naꞌ beṉəꞌ gwxen beḻ yaꞌa caꞌ bac̱h besəꞌəžašeꞌ ḻoꞌo barcw caꞌ naꞌ bachesyəꞌəyibeꞌ yix̱ɉw beḻ c̱hegaꞌaqueꞌenəꞌ.
\v 3 Naꞌ Jesoꞌosənꞌ gwyoꞌe ḻoꞌo barcw c̱he Simonṉəꞌ naꞌ gwṉabeneꞌ ḻeꞌ gocwlen par nic̱h bžigueꞌe barcw c̱heꞌenəꞌ latəꞌ ḻoꞌo nisənꞌ. Naꞌ gwcheꞌ Jesoꞌosənꞌ ḻoꞌo barconꞌ nach bsed bloꞌineꞌ beṉəꞌ caꞌ.
\v 4 Naꞌ ca beyož beꞌe dižəꞌənəꞌ nach gožeꞌ Simonṉəꞌ: ―Bžiguəꞌəch barcw c̱hioꞌonəꞌ ganꞌ naquə nisənꞌ zitɉoch, naꞌ ḻeꞌe əgwzaḻəꞌ yix̱ɉw c̱helenꞌ par senḻe beḻənꞌ.
\p
\v 5 Nach Simonṉəꞌ gožeꞌ Jesoꞌosənꞌ: ―Maestr, babentoꞌ žin bedo yel naꞌ ni to cono no bdoḻeꞌetoꞌ. Pero laogüe deꞌe bagwnaoꞌ leꞌ caꞌ, yoszaḻəꞌəchtoꞌ yix̱ɉw quinga.
\p
\v 6 Naꞌ bosəꞌəzaḻeꞌe yix̱ɉw c̱hegaꞌaqueꞌenəꞌ, naꞌ catəꞌ besyəꞌəbeɉgaꞌaqueꞌen zɉənžaꞌachan beḻənꞌ yelezə yesəꞌəchezəꞌən.
\v 7 Naꞌ beṉəꞌ caꞌ gwnitəꞌ ḻoꞌo barcw c̱he Simonṉəꞌ gwsaꞌaxeꞌ beṉəꞌ lɉuežɉgaꞌaqueꞌ caꞌ zɉəžaꞌ ḻoꞌo barconꞌ yeto par əžɉseꞌecleneꞌ ḻegaꞌaqueꞌ. Naꞌ catəꞌ besəꞌəžin beṉəꞌ caꞌ naꞌ bosyoꞌosšaꞌacheꞌ barcw caꞌ xte ca bac̱h gwzolao chseꞌetɉən xan nisənꞌ.
\v 8 Nach Simonṉəꞌ benꞌ ḻeczə le Bed catəꞌ bleꞌineꞌ canꞌ goquənꞌ, bzo xibeꞌ lao Jesoꞌosənꞌ naꞌ gožeꞌeneꞌ: ―Bebiꞌižəꞌəšga len nadaꞌ X̱anaꞌ, c̱hedəꞌ laꞌ nacaꞌ to beṉəꞌ güen deꞌe mal.
\p
\v 9 Gwneꞌ caꞌ c̱hedəꞌ ḻeꞌ txen len beṉəꞌ caꞌ žaꞌaleneꞌ ḻoꞌo barconꞌ besyəꞌəbanchgüeineꞌ ca naquənꞌ gosəꞌəzeneꞌ beḻ zan caꞌ.
\v 10 Naꞌ ḻeczə caꞌ besyəꞌəbane xiꞌiṉ Sebedeonꞌ c̱hopə bišəꞌəte Jacobənꞌ len Juanṉəꞌ, beṉəꞌ caꞌ chsoꞌon žin txen len Simonṉəꞌ. Nach Jesoꞌosənꞌ gožeꞌ Simonṉəꞌ: ―Bito žeboꞌ. Leꞌ nacoꞌ beṉəꞌ gwxen beḻ. Pero ṉaꞌa gacoꞌ beṉəꞌ güeꞌ xtižaꞌa, naꞌ gonoꞌ par nic̱h soꞌombiaꞌ beṉəꞌ nadaꞌ.
\p
\v 11 Naꞌ catəꞌ besyəꞌəžinḻeneꞌ barcw caꞌ yo biž, gosəꞌəbeɉyic̱hɉeꞌen naꞌ len yoguəꞌ šinḻazgaꞌaqueꞌ nach ɉəsəꞌənaogüeꞌ Jesoꞌosənꞌ.
\s1 Jesoꞌosənꞌ beyoneꞌ to beṉəꞌ cheꞌi yižgüeꞌ deꞌen nziꞌ ḻepr
\p
\v 12 Naꞌ goquən catəꞌ zo Jesoꞌosənꞌ to syoda, bžin to beṉəꞌ chacšenchgüeineꞌ len yižgüeꞌ deꞌen neꞌ ḻepr. Naꞌ beꞌenəꞌ catəꞌ bleꞌineꞌ Jesoꞌosənꞌ bzo xibeꞌ laogüeꞌenəꞌ, naꞌ beḻgüižeꞌeneꞌ gožeꞌeneꞌ: ―X̱anaꞌ, gonšguei ben par nic̱h yeyacdaꞌ.
\p
\v 13 Nach Jesoꞌosənꞌ bḻi neꞌenəꞌ gwdaneꞌeneꞌ naꞌ gožeꞌeneꞌ: ―Guacczə beyaque.
\p Naꞌ ḻeꞌe beyacteineꞌ ca naquə yižgüeꞌ deꞌen cheꞌineꞌenəꞌ.
\v 14 Naꞌ Jesoꞌosənꞌ beneꞌ mendad ni tozə cui no no güeꞌeleneꞌ dižəꞌ ca naquə deꞌen babeneꞌ len leꞌ, naꞌ gožeꞌeneꞌ: ―Gwyeɉ lao bx̱ozənꞌ nic̱h leꞌineꞌ de que bac̱h beyacdoꞌ. Naꞌ gwnežɉoꞌoneꞌ to bia yix̱əꞌ goteꞌ lao Diozənꞌ ca deꞌen non deꞌe Moisezənꞌ mendad par nic̱h yesəꞌəṉeze beṉəꞌ de que babeyacdoꞌonəꞌ.
\p
\v 15 Naꞌ tža tža gwdach dižəꞌ ca naquə miḻagr caꞌ deꞌen chon Jesoꞌosənꞌ. Naꞌ beṉəꞌ zan besəꞌədopə besəꞌəžagueꞌ par bosoꞌozenagueꞌ xtižəꞌ Jesoꞌosənꞌ naꞌ par nic̱h beyoneꞌ con beṉəꞌ caꞌ chsaꞌacšene ca naquə yižgüeꞌ deꞌen chseꞌineꞌ.
\v 16 Naꞌ tšiꞌi güeɉə bechoɉ Jesoꞌosənꞌ beyeɉeꞌ latɉə dašənꞌ par ɉəyeneꞌ orasyonṉəꞌ.
\s1 Jesoꞌosənꞌ beyoneꞌ to beṉəꞌ nat to part cuerp c̱heꞌenəꞌ
\p
\v 17 Naꞌ goquənꞌ to ža zo Jesoꞌosənꞌ ḻoꞌo yoꞌo ganꞌ zoeꞌenəꞌ chsed chloꞌineꞌ beṉəꞌ. Naꞌ gaḻəꞌəzə zɉəchiꞌ to c̱hopə beṉəꞌ Izrael beṉəꞌ caꞌ babesəꞌəchoɉ zɉənziꞌ fariseo por ni c̱he canꞌ chosoꞌosed chosoꞌoloꞌineꞌ. Naꞌ yebaḻə beṉəꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ zɉəleneꞌ ḻegaꞌaqueꞌ. Beṉəꞌ caꞌ žaꞌ naꞌ zaꞌaqueꞌ yoguəꞌəḻoḻ yež ganꞌ mbane Galileanꞌ len Jodeanꞌ, naꞌ ḻeczə baḻeꞌ zaꞌaqueꞌ syoda Jerosalenṉəꞌ. Naꞌ bosoꞌozenagueꞌ dižəꞌ deꞌen beꞌ Jesoꞌosənꞌ. Naꞌ yeḻəꞌ guac c̱he X̱ancho Diozənꞌ gwzon len Jesoꞌosənꞌ par beyoneꞌ beṉəꞌ güeꞌ caꞌ.
\v 18 Naꞌ besəꞌəžin x̱oṉɉ beṉəꞌ zɉənḻeneꞌ to beṉəꞌ nat to part cuerp c̱heꞌenəꞌ, zɉənx̱oeꞌeneꞌ to lao cam daoꞌ. Naꞌ gwsaꞌaclažeꞌe yesəꞌədieꞌ naꞌ əžɉsoꞌeneꞌ lao Jesoꞌosənꞌ.
\v 19 Naꞌ tant beṉəꞌ zan žaꞌ caguə goquə yesəꞌəžinḻeneꞌ beṉəꞌ güeꞌenəꞌ ganꞌ zo Jesoꞌosənꞌ. Naꞌ beṉəꞌ caꞌ gwseꞌepeꞌ yic̱hɉoꞌolə par bosoꞌosalɉueꞌ naꞌ bosoꞌoletɉeꞌeneꞌ len xcameꞌenəꞌ nic̱h bžineꞌ lao Jesoꞌosənꞌ gwchoḻ beṉəꞌ zan caꞌ.
\v 20 Ca naquə gocbeꞌi Jesoꞌosənꞌ de que gwsoꞌonḻilažeꞌeneꞌ, gožeꞌ beṉəꞌ güeꞌenəꞌ: ―Babeziꞌixenaꞌ xtoḻoꞌonəꞌ.
\p
\v 21 Naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ beṉəꞌ fariseo caꞌ gwzolao chsoꞌoneꞌ xbab: “Benga chžia chniteꞌe Diozənꞌ deꞌen chon cuineꞌ ca Dioz. Notono no gaquə yeziꞌixen xtoḻəꞌ beṉac̱hənꞌ šə caguə tozə Diozənꞌ.”
\p
\v 22 Jesoꞌosənꞌ gocbeꞌineꞌ xbabənꞌ deꞌen gwsoꞌoneꞌenəꞌ nach gožeꞌ ḻegaꞌaqueꞌ: ―¿Bixc̱henꞌ chonḻe xbabənꞌ caꞌ ḻoꞌo yic̱hɉlaꞌaždaꞌolenəꞌ?
\v 23 Šə con yapaꞌaneꞌ de que babeziꞌixenaꞌ xtoḻeꞌenəꞌ, bito ṉezele šə napaꞌ yeḻəꞌ gwnabiaꞌ par yeziꞌixenaꞌan. Pero šə yapaꞌaneꞌ: “Gwyas naꞌ gwda”, guatəꞌəbiaꞌ šə napaꞌ yeḻəꞌ gwnabiaꞌanəꞌ par gaquə canꞌ niaꞌanəꞌ.
\v 24 Deꞌe nga gonaꞌ par nic̱h əṉezele de que napaꞌ yeḻəꞌ gwnabiaꞌ lao yežlyo nga par yeziꞌixenaꞌ xtoḻəꞌ beṉac̱hənꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p Nach gožeꞌ beṉəꞌ güeꞌenəꞌ: ―Gwyas, beyoaꞌ xcamoꞌonəꞌ naꞌ beyeɉ ližoꞌonəꞌ to šaoꞌ to güen.
\p
\v 25 Naꞌ ḻeꞌe gwyasseste beꞌenəꞌ, chosəꞌəgüiateꞌ beṉəꞌ caꞌ nitəꞌənəꞌ. Nach beyoaꞌ xcameꞌenəꞌ ganꞌ xoeꞌenəꞌ bezeꞌe zɉəyedeꞌ ližeꞌ choꞌelaogüeꞌe Diozənꞌ.
\v 26 Naꞌ yoguəꞌəḻoḻ beṉəꞌ caꞌ žaꞌanəꞌ besyəꞌəbaneneꞌ naꞌ gwsoꞌelaogüeꞌe Diozənꞌ. Naꞌ do chžebgaꞌaqueꞌ gosəꞌəneꞌ: ―Ṉaꞌa bableꞌicho to deꞌe zaquəꞌ yebanecho.
\s1 Jesoꞌosənꞌ gwleɉeꞌ Lebinꞌ par gwleneꞌ disipl c̱heꞌ caꞌ
\p
\v 27 Gwde naꞌ bezaꞌ Jesoꞌosənꞌ naꞌ bleꞌineꞌ to beṉəꞌ goc̱hixɉw beṉəꞌ le Lebi, chiꞌe latɉə ganꞌ chc̱hixɉueꞌenəꞌ. Naꞌ Jesoꞌosənꞌ gožeꞌeneꞌ: ―Da len nadaꞌ.
\p
\v 28 Nach beꞌenəꞌ ḻeꞌe gwzožaꞌateꞌ gwleɉyic̱hɉeꞌ yoguəꞌ šinḻazeꞌ naꞌ gwyeɉleneꞌ Jesoꞌosənꞌ.
\p
\v 29 Nach Lebinꞌ beneꞌ to lṉi xen ližeꞌenəꞌ par Jesoꞌosənꞌ. Naꞌ ɉaꞌac beṉəꞌ zan beṉəꞌ goc̱hixɉw caꞌ naꞌ beṉəꞌ yeziquəꞌəchlə naꞌ gosəꞌəbeꞌeleneꞌ ḻegaꞌaqueꞌ choꞌa mesənꞌ par gwsaꞌogüeꞌ.
\v 30 Naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len beṉəꞌ fariseo caꞌ gwsaꞌacyožeꞌ disipl c̱he Jesoꞌosənꞌ, gwseꞌe ḻegaꞌaqueꞌ: ―Malənꞌ chonḻe cheꞌeɉ chaole txen len beṉəꞌ goc̱hixɉw naꞌ nochlə beṉəꞌ güen deꞌe mal caꞌ beṉəꞌ cui chonḻentoꞌ txen.
\p
\v 31 Jesoꞌosənꞌ gožeꞌ ḻegaꞌaqueꞌ: ―Benəꞌ cui chsaꞌacšene bito chəsəꞌəyažɉeneꞌ beṉəꞌ güen rmech. Beṉəꞌ caꞌ chsaꞌacšene ḻegaꞌaqueꞌenəꞌ chəsəꞌəyažɉeneꞌ beṉəꞌ güen rmech.
\v 32 Nadaꞌ zaꞌa zedəyenaꞌ par nic̱h beṉəꞌ caꞌ zɉəṉeze de que zɉənaqueꞌ beṉəꞌ güen deꞌe mal yesyəꞌədiṉɉeneꞌ xtoḻəꞌəgaꞌaqueꞌenəꞌ, pero bito zedeyenaꞌ par nic̱h beṉəꞌ caꞌ chsaꞌaqueneꞌ bazɉənaqueꞌ beṉəꞌ güen yesyəꞌədiṉɉeneꞌ xtoḻəꞌəgaꞌaqueꞌenəꞌ.
\s1 Gosəꞌəṉabeneꞌ Jesoꞌosənꞌ bixc̱henꞌ bito gwleɉeꞌ tgüeɉə cui əseꞌeɉ əsaꞌogüeꞌ
\p
\v 33 Nach yebaḻə beṉəꞌ gwseꞌeneꞌ: ―Zan las netoꞌ disipl c̱he Juanṉəꞌ naꞌ ḻeczə caꞌ disipl c̱he beṉəꞌ fariseo caꞌ chzotoꞌ sin cui cheꞌeɉ chaotoꞌ par choꞌelaꞌotoꞌ Diozənꞌ naꞌ chonczətoꞌ orasyon. Pero naꞌ disipl c̱hioꞌ caꞌ chseꞌeɉ chsaꞌogüeꞌ. ¿Bixc̱henꞌ ža?
\p
\v 34 Nach gož Jesoꞌosənꞌ ḻegaꞌaqueꞌ: ―Catəꞌ chac to yeḻəꞌ gošagnaꞌ beṉəꞌ migw c̱he beꞌenəꞌ chšagnaꞌanəꞌ chseꞌeɉ chsaꞌogüeꞌ. Naꞌ caꞌaczənꞌ naquən len nadaꞌ naꞌ len disipl c̱hiaꞌ caꞌ, chseꞌeɉ chsaꞌogüeꞌ lao ṉeꞌe zoaꞌ len ḻegaꞌaqueꞌ.
\v 35 Catəꞌəchənꞌ əžin ža yesəꞌəc̱heꞌex̱ax̱ɉ beṉəꞌ contr c̱hiaꞌ caꞌ nadaꞌ, canaꞌachənꞌ əchoɉ catəꞌ bito əseꞌeɉ əsaꞌo disipl c̱hiaꞌ caꞌ.
\p Jesoꞌosənꞌ gwneꞌ caꞌ bsaquəꞌəlebe cuineꞌ ca beṉəꞌ gošagnaꞌ, naꞌ disipl c̱heꞌ caꞌ ca beṉəꞌ migw c̱he beṉəꞌ gošagnaꞌanəꞌ.
\p
\v 36 Naꞌ gozoꞌeleneꞌ ḻegaꞌaqueꞌ to jempl par nic̱h gwsaꞌacbeꞌineꞌ de que bito gaquə yesəꞌənaogüeꞌ costombr gol c̱hegaꞌaqueꞌ naꞌ yesəꞌənaotieꞌ deꞌen chsed chloꞌineꞌ. Gožeꞌ ḻegaꞌaqueꞌ: ―Notono beṉəꞌ zo beṉəꞌ chc̱hezeꞌe xa cobeꞌen naꞌ yodeꞌen xa goleꞌenəꞌ. Šə goneꞌ caꞌ laꞌ gwx̱iṉɉeꞌ xa cobeꞌ naꞌanəꞌ naꞌ xa goleꞌen bito gaquən lebe len pedas xa cobeꞌenəꞌ.
\v 37 Naꞌ ḻeczə caꞌ notono zo beṉəꞌ chgueꞌe bino cobənꞌ ḻoꞌo yid golə. Šə goneꞌ caꞌ ža, bino cobənꞌ əc̱hezəꞌən yid golənꞌ naꞌ lalɉə binonꞌ naꞌ cuiayiꞌ yidənꞌ.
\v 38 Cle laꞌ cheyaḻəꞌ queꞌe bino cobənꞌ ḻoꞌo yid cobə.
\v 39 Naꞌ ca naquə beṉəꞌ bac̱h yoꞌolaogüeꞌ cheꞌeɉeꞌ bino golənꞌ bito yeneꞌeneꞌ yeꞌeɉeꞌ bino cobənꞌ, c̱hedəꞌ əṉeꞌ: “Bino golənꞌ naquəchən güen.” Ḻeczə canꞌ naquən len beṉəꞌ bac̱h yoꞌo yic̱hɉeꞌ costombr gol c̱heꞌenəꞌ, bito yeneꞌeneꞌ gwzenagueꞌ c̱he deꞌe cobənꞌ.
\c 6
\s1 Ža dezcanz bosoꞌolec̱hɉ disipl caꞌ trigonꞌ par gwsaꞌogüeꞌen
\p
\v 1 Naꞌ gozaquən to ža dezcanz Jesoꞌosənꞌ gwdieꞌ len disipl c̱heꞌ caꞌ ganꞌ nyaž trigonꞌ. Nach disipl c̱heꞌ caꞌ gosəꞌəlec̱hɉeꞌ trigonꞌ, naꞌ gosəꞌəxobeꞌen, naꞌ gwsaꞌogüeꞌen.
\v 2 Nach besəꞌəleꞌi baḻə beṉəꞌ fariseo caꞌ canꞌ gwsoꞌon disipl caꞌ naꞌ gwseꞌe ḻegaꞌaqueꞌ: ―¿Bixc̱henꞌ chonḻe deꞌen bito de lsens goncho ža dezcanzənꞌ?
\p
\v 3 Naꞌ Jesoꞌosənꞌ gožeꞌ ḻegaꞌaqueꞌ: ―¿Ecabi zaꞌalažəꞌəle deꞌen bablable canꞌ ben deꞌe Rei Dabinꞌ catəꞌ ḻeꞌ naꞌ beṉəꞌ lɉuežɉeꞌ caꞌ gosəꞌədoneꞌ?
\v 4 Gwyeɉeꞌ ḻoꞌo yoꞌodaoꞌ əblaonəꞌ naꞌ gwxiꞌe yetxtil deꞌen bazɉəncuaꞌ bx̱oz caꞌ par Diozənꞌ, naꞌ gwdaogüeꞌen len beṉəꞌ lɉuežɉeꞌ caꞌ ḻaꞌaṉəꞌəczə cui zɉənaqueꞌ bx̱oz. Naꞌ yetxtilənꞌ cui de lsens par gao con to beṉəꞌ ḻen, letg bx̱oz caꞌ chac əsaꞌogüeꞌen.
\p
\v 5 Naꞌ ḻeczə gwna Jesoꞌosənꞌ: ―Naquən lao naꞌa əṉiaꞌ binꞌ naquən güen goncho ža dezcanzənꞌ, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\s1 Beyaque to beṉəꞌ mbižə šḻaꞌa neꞌen
\p
\v 6 Naꞌ yeto ža dezcanz gozeɉeꞌ ḻoꞌo yoꞌodaꞌonəꞌ naꞌ bsed bloꞌineꞌ beṉəꞌ caꞌ žaꞌanəꞌ. Naꞌ entr beṉəꞌ caꞌ žaꞌanəꞌ len to beṉəꞌ bambižə neꞌe ḻichanꞌ.
\v 7 Naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ beṉəꞌ fariseo caꞌ niteꞌe naꞌ chosəꞌəgüiatezeꞌ Jesoꞌosənꞌ, chəsəꞌəbezeꞌ šə goyoneꞌ beꞌenəꞌ ža dezcanzənꞌ par nic̱h əsaꞌogüeꞌ xya contr ḻeꞌ.
\v 8 Naꞌ gocbeꞌi Jesoꞌosənꞌ xbab c̱hegaꞌaqueꞌenəꞌ naꞌ gožeꞌ benꞌ mbižə neꞌinəꞌ: ―Da ngalə.
\p Nach bgüiguəꞌ beꞌenəꞌ gwzecheꞌ laogüeꞌenəꞌ.
\v 9 Naꞌ Jesoꞌosənꞌ gožeꞌ ḻegaꞌaqueꞌ: ―Ḻeꞌe gonšc xbab c̱helenꞌ naquənꞌ na ḻeinꞌ. ¿Enan goncho deꞌe güen ža dezcanzənꞌ, o šə nan goncho deꞌe mal? ¿Enan goncho par nic̱h cui saꞌat beṉəꞌ o šə nan goncho par nic̱h saꞌateꞌ?
\p
\v 10 Jesoꞌosənꞌ bgüieꞌ yogueꞌe nach gožeꞌ beꞌenəꞌ: ―Bḻi naꞌonəꞌ.
\p Nach bḻi naꞌ beꞌenəꞌ, naꞌ beyaquen.
\v 11 Naꞌ beṉəꞌ caꞌ chosoꞌosed chosoꞌoloꞌi ḻeinꞌ naꞌ beṉəꞌ fariseo caꞌ ḻechguaḻe besəꞌəžeꞌe, naꞌ gwzolao bosoꞌoxiꞌe entr ḻegaꞌaqueꞌ naclə soꞌoneꞌ len Jesoꞌosənꞌ.
\s1 Jesoꞌosənꞌ gwleɉeꞌ šižiṉ beṉəꞌ bsiꞌe apostol
\p
\v 12 Naꞌ to ža gozeɉ Jesoꞌosənꞌ lao yaꞌan ɉeneꞌ orasyon. Naꞌ bedo yel beneꞌ orasyon lao Diozənꞌ.
\v 13 Naꞌ catəꞌ gwyeꞌeniꞌinəꞌ boḻgüižeꞌ disipl caꞌ par gosəꞌəbigueꞌe ganꞌ zoeꞌenəꞌ nach gwleɉeꞌ šižiṉeꞌ naꞌ əbsiꞌe ḻegaꞌaqueꞌ apostol.
\v 14 Naꞌ beṉəꞌ quinganꞌ gwleɉeꞌ: Simon benꞌ bsiꞌe Bed, naꞌ Ndres beṉəꞌ bišəꞌ Bedənꞌ, naꞌ Jacob, naꞌ Juan, naꞌ Lip, naꞌ Bartolome,
\v 15 naꞌ Matio, naꞌ Tomas, naꞌ Jacob xiꞌiṉ Alfeo, naꞌ Simon Selote,
\v 16 naꞌ Jodas xiꞌiṉ Jacob, nach Jod Iscariot benꞌ əbdieꞌ Jesoꞌosənꞌ lao naꞌ beṉəꞌ contr caꞌ.
\s1 Jesoꞌosənꞌ bzeɉniꞌineꞌ beṉəꞌ daoꞌ beṉəꞌ zil
\p
\v 17 Naꞌ beyetɉeꞌ yaꞌanəꞌ len ḻegaꞌaqueꞌ naꞌ gwzecheꞌ ganꞌ naquə lašəꞌ len disipl c̱heꞌ caꞌ. Naꞌ ḻeczə nitəꞌ beṉəꞌ zan beṉəꞌ zaꞌac doxen Jodeanꞌ, do Jerosalenṉəꞌ naꞌ do ganꞌ mbane Tiro naꞌ Sidon. Naꞌ Tironꞌ len Sidonṉəꞌ zɉəchiꞌin choꞌa nisdaꞌonəꞌ. Naꞌ entr beṉəꞌ caꞌ nitəꞌ chosoꞌozenag xtižəꞌ Jesoꞌosənꞌ zɉəlen baḻə beṉəꞌ chseꞌi yižgüeꞌ, naꞌ Jesoꞌosənꞌ beyoneꞌ ḻegaꞌaqueꞌ.
\v 18 Naꞌ beṉəꞌ caꞌ zɉəyoꞌo zɉəyaz deꞌe x̱ioꞌ yic̱hɉlaꞌaždaogaꞌaqueꞌenəꞌ Jesoꞌosənꞌ bebeɉeꞌ deꞌe x̱ioꞌ caꞌ zɉəyoꞌo zɉəyazeꞌ.
\v 19 Naꞌ yoguəꞌ beṉəꞌ besəꞌəyilɉlažeꞌe naclə soꞌoneꞌ par nic̱h yesəꞌəlapəꞌ naꞌagaꞌaquenꞌ ḻeꞌ c̱hedəꞌ len yeḻəꞌ guac c̱heꞌenəꞌ choneꞌ par chegaꞌa yižgüeꞌ deꞌen chseꞌi to togaꞌaqueꞌ.
\s1 Nonꞌ zo mbalaz naꞌ nonꞌ cui zo mbalaz
\p
\v 20 Naꞌ Jesoꞌosənꞌ gwḻis laogüeꞌenəꞌ bgüieꞌ disipl c̱heꞌ caꞌ naꞌ gožeꞌ ḻegaꞌaqueꞌ: ―Mbalaz zo leꞌe beṉəꞌ yašəꞌ c̱hedəꞌ choꞌele latɉə chnabiaꞌ Diozənꞌ leꞌe.
\p
\v 21 Mbalaz so leꞌe chdonḻe ṉaꞌa, c̱hedəꞌ gwžin ža catəꞌ cuich tonḻe.
\p Naꞌ mbalaz so leꞌe chbežle ṉaꞌa, c̱hedəꞌ Diozənꞌ goneꞌ par nic̱h yebeile.
\p
\v 22 Nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Naꞌ mbalaz sole šə por ni c̱he deꞌen chonḻilažəꞌəle nadaꞌ chəsəꞌəgueꞌi beṉəꞌ leꞌe, naꞌ šə chesyəꞌəbeɉeꞌ leꞌe ḻoꞌo yoꞌodaoꞌ c̱hegaꞌaqueꞌenəꞌ, naꞌ šə chosoꞌožia chosoꞌoniteꞌe leꞌe, naꞌ šə chəsəꞌəneꞌ de que nacle beṉəꞌ mal.
\v 23 Ḻeyebeichgüei catəꞌən chac deꞌe quinga, naꞌ ḻeꞌe so mbalaz, c̱hedəꞌ Diozənꞌ goneꞌ par nic̱h gaquəchgua deꞌe güen c̱hele catəꞌ yežinḻe ganꞌ zoeꞌenəꞌ. Canꞌ chsoꞌoneneꞌ leꞌe caꞌaczənꞌ gwsoꞌone deꞌe x̱axtaꞌogaꞌaqueꞌenəꞌ deꞌe profet caꞌ gwsoꞌe xtižəꞌ Diozənꞌ canaꞌ.
\p
\v 24 Pero probchguazə leꞌe beṉəꞌ gwniꞌa. Chac güen c̱hele ṉaꞌa, pero caguə par zeɉḻicaṉenꞌ gaquə güen c̱hele.
\p
\v 25 Probchguazə leꞌe dechgua deꞌe chaole ṉaꞌa. Gwžin ža catəꞌ cuich bi gatəꞌ c̱hele.
\p Probchguazə leꞌe zole ḻegr ṉaꞌa. Gwžin ža catəꞌ yegüineꞌele naꞌ cuežyašəꞌəle.
\p
\v 26 Probchguazə leꞌe chsoꞌelaoꞌ yoguəꞌəḻoḻ beṉəꞌ leꞌe. Caꞌaczənꞌ gwsoꞌelaoꞌ deꞌe x̱axtaꞌogaꞌaquenꞌ profet gox̱oayag caꞌ.
\s1 Cheyaḻəꞌ gaquecho c̱he beṉəꞌ contr c̱hecho
\p
\v 27 Pero leꞌe chzenagle c̱hiaꞌ, ḻeꞌe gaque c̱he beṉəꞌ contr c̱hele caꞌ, ḻeꞌe gontezə ḻeꞌe gon deꞌe güen len beṉəꞌ caꞌ chəsəꞌəgueꞌi leꞌe.
\v 28 Ḻeꞌe ṉabtezə ḻeꞌe ṉab par nic̱h beṉəꞌ caꞌ chsoꞌon contr leꞌe ṉiteꞌe mbalaz. Ḻeꞌe so ḻeꞌe gon orasyon par beṉəꞌ caꞌ chosoꞌožia leꞌe xyac̱hoḻ.
\v 29 Šə to beṉəꞌ tieꞌ x̱aguəꞌəlenꞌ šḻaꞌa, ḻeꞌe güeꞌe deꞌen yešḻaꞌa. Šə to beṉəꞌ əqueꞌe xadoṉ c̱helenꞌ ḻa fuers, ḻegüeꞌ latɉə c̱hiṉeꞌ len xcamislenꞌ.
\v 30 Notəꞌətezə beṉəꞌ bi ṉabeneꞌ leꞌe, gwnežɉwleneꞌen. Šə to beṉəꞌ əqueꞌe bitəꞌətezə deꞌen de c̱hele, bito yeṉablen.
\v 31 Con yoguəꞌ deꞌe güen deꞌe cheneꞌele soꞌon beṉac̱hənꞌ len leꞌe, con caꞌatezəczənꞌ cheyaḻəꞌ gonḻe len ḻegaꞌaqueꞌ.
\p
\v 32 Šə porzə chaquele c̱he beṉəꞌ caꞌ chsaꞌaque c̱hele, ¿bixa yeɉlaotgualenꞌ? Ḻeꞌegatezə caꞌ chsoꞌon beṉəꞌ güen deꞌe mal caꞌ, chsaꞌaqueneꞌ c̱he beṉəꞌ caꞌ chsaꞌaque c̱hegaꞌaqueꞌ.
\v 33 Ḻeczə šə chonḻe deꞌe güen porzə len beṉəꞌ caꞌ chsoꞌon deꞌe güen len leꞌe, ¿bixa yeɉlaotgualenꞌ? Ḻeꞌegatezə canꞌ chsoꞌon beṉəꞌ güen deꞌe mal caꞌ.
\v 34 Šə porzə chbeɉle bi deꞌen chbeɉle len beṉəꞌ sole lez yesyəꞌəyoṉeꞌen leꞌe, ¿bixa yeɉlaotgualenꞌ? Ḻeꞌegatezə canꞌ chsoꞌon beṉəꞌ güen deꞌe malənꞌ, chesəꞌəbeɉeꞌ bi deꞌen chesəꞌəbeɉeꞌ lɉuežɉgaꞌaqueꞌ naꞌ niteꞌe lez yesyəꞌənežɉueꞌen.
\v 35 Pero naꞌ leꞌe ža, ḻeꞌe so ḻeꞌe gaque c̱he beṉəꞌ contr c̱hele caꞌ, naꞌ ḻeꞌe so ḻeꞌe gon deꞌe güen. Naꞌ ḻeꞌe so ḻeꞌe cueɉ bi deꞌen cueɉle beṉəꞌ naꞌ bito sole lez yesyəꞌəyoṉeꞌen. Šə gonḻe caꞌ, gwloꞌele de que nacle xiꞌiṉ Dioz benꞌ naquə ḻeꞌezelaogüe beṉəꞌ blao, naꞌ Diozənꞌ goṉeꞌ leꞌe yeḻəꞌ balaꞌaṉ xen. Ḻeꞌenəꞌ naqueꞌ gax̱ɉwlažəꞌ len beṉəꞌ caꞌ cui chsoꞌe yeḻəꞌ chox̱cwlen c̱heꞌ naꞌ yeziquəꞌəchlə beṉəꞌ güen deꞌe mal caꞌ.
\v 36 Cheyaḻəꞌ yeyašəꞌ yežiꞌilažəꞌəle lɉuežɉ beṉac̱hle ca X̱achonꞌ benꞌ zo yobanꞌ cheyašəꞌ chežiꞌilažeꞌe yoguəꞌ beṉac̱hənꞌ.
\s1 Bito cheyaḻəꞌ ṉacho c̱he beṉəꞌ de que zɉənapeꞌ doḻəꞌ
\p
\v 37 Bito gonḻe xbab de que zaquəꞌəle par c̱hoglaolen c̱he beṉəꞌ de que zɉənapeꞌ doḻəꞌ. Šə c̱hoglaolen c̱he beṉəꞌ de que zɉənapeꞌ doḻəꞌ, ḻeꞌegatezə caꞌ Diozənꞌ c̱hoglaogüeꞌen c̱hele de que naple doḻəꞌ. Naꞌ bito bi yosbagueꞌele beṉəꞌ de que zɉənapeꞌ doḻəꞌ par nic̱h Diozənꞌ bito bi yosbagueꞌeneꞌ leꞌe de que naple doḻəꞌ. Ḻeꞌe so ḻeꞌe yeziꞌixen c̱he beṉəꞌ par nic̱h Diozənꞌ yeziꞌixeneꞌ c̱hele.
\v 38 Ḻeꞌe so ḻeꞌe gwnežɉo beṉəꞌ šə bi deꞌen chəsəꞌəyažɉeneꞌ. Canꞌ chsoꞌon baḻə beṉəꞌ ḻechguaḻe naḻeꞌe chosoꞌochix̱eꞌ bi deꞌen chsoꞌoteꞌe, chosəꞌəc̱hišeꞌe lao medid c̱hegaꞌaqueꞌen naꞌ chosoꞌosiꞌiṉseꞌen naꞌ chsoꞌoneꞌ xte ca chezoyaꞌan, caꞌaczənꞌ cheyaḻəꞌ gonḻe gwnežɉwle bi deꞌen chəsəꞌəyažɉe beṉəꞌ par nic̱h ḻeczə caꞌ gon Diozənꞌ len leꞌe.
\p
\v 39 Nach Jesoꞌosənꞌ beꞌeleneꞌ beṉəꞌ caꞌ žaꞌanəꞌ yeto jempl. Naꞌ bsaquəꞌəlebeneꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ ca beṉəꞌ lc̱hoḻ c̱hedəꞌ bito gwseꞌeɉniꞌineꞌ deꞌen naquə deꞌe ḻi naꞌ deꞌe naꞌanəꞌ bito goquə yosoꞌosed yosoꞌoloꞌineꞌen beṉəꞌ yoblə. Naꞌ gwneꞌ: ―¿Eguaquə to beṉəꞌ lc̱hoḻ cueꞌe nez yeto beṉəꞌ lc̱hoḻənꞌ? Bito gaqueꞌ. Ṉezecho de que txen žɉəsəꞌəbix̱eꞌ to ḻoꞌo yech.
\v 40 Šə to beṉəꞌ chsedeꞌ len to maestr, bito ṉacho guaquə əgwsedeneꞌ maestrənꞌ. Naꞌ ḻaꞌaṉəꞌəczə šə benꞌ chsed taꞌ yic̱hɉeꞌ yoguəꞌəḻoḻ deꞌen əgwloꞌi maestrənꞌ ḻeꞌ, bito gaqueꞌ beṉəꞌ siꞌinch ca maestrənꞌ, sino cachozəczə gaqueꞌ.
\p
\v 41 Chleꞌile güeꞌ daoꞌ deꞌen žia cožəꞌ beṉəꞌ lɉuežɉle naꞌ cabi cheleꞌile güeꞌ xen deꞌen žia cožəꞌəlenꞌ.
\v 42 Cheꞌ beṉəꞌ lɉuežɉle: “Beꞌ latɉə gonaꞌ rmech güeꞌ daonꞌ deꞌen žia cožoꞌo”, naꞌ bito chonḻe rmech güeꞌ xen deꞌen žia cožəꞌəlenꞌ. Beṉəꞌ gox̱oayag leꞌe, zguaꞌatec ḻeꞌe gon rmech güeꞌ xenṉəꞌ deꞌen žia cožəꞌəlenꞌ naꞌ techlə əṉezele bi rmechənꞌ chyažɉele par gonḻe rmech güeꞌ daonꞌ deꞌen žia cožəꞌ beṉəꞌ lɉuežɉlenꞌ.
\s1 Deꞌen choncho chloꞌin binꞌ yoꞌo ḻoꞌo yic̱hɉlaꞌaždaꞌochonꞌ
\p
\v 43 Bito ṉacho de que to yag frot güen chbian frot deꞌe cui naquə güen, naꞌ nic əṉacho de que yag frot deꞌen cui naquə güen chbian frot güen.
\v 44 Segon canꞌ naquə frot deꞌen chbia to to yaguənꞌ ṉezecho bi cḻas yaguənꞌ. Yag yešəꞌ bito chbian yix̱güionꞌ, nic yag bisgaꞌ chbian obas.
\v 45 To beṉəꞌ laꞌaždaoꞌ xiꞌilažəꞌ choneꞌ deꞌe güen, c̱hedəꞌ laꞌ canꞌ nan ḻoꞌo yic̱hɉlaꞌaždaꞌogüeꞌ nanꞌ choneꞌ. Naꞌ benꞌ chon deꞌe mal choneꞌ caꞌ c̱hedəꞌ chzenagueꞌ c̱he laꞌaždaꞌomaleꞌenəꞌ. Naꞌ yoguəꞌəte dižəꞌ deꞌen chchoɉ choꞌachonꞌ laꞌ ḻoꞌo yic̱hɉlaꞌaždaꞌocho naꞌanəꞌ zaꞌan.
\s1 C̱hopə beṉəꞌ, naꞌ yoꞌo deꞌen gwsoꞌon to toeꞌ
\p
\v 46 ¿Bixc̱henꞌ cheꞌele nadaꞌ “X̱anaꞌ”, naꞌ cui chonḻe canꞌ nonaꞌ mendadənꞌ?
\v 47 Ṉaꞌa ṉiaꞌ leꞌe canꞌ gwxaquəꞌəlebe yoguəꞌ nonꞌ nao nadaꞌ naꞌ chzenagueꞌ xtižaꞌanəꞌ naꞌ choneꞌ canꞌ nonaꞌ mendadənꞌ.
\v 48 Gwxaquəꞌəlebeneꞌ ca to beṉəꞌ ben yoꞌo. Naꞌ gwc̱heꞌeṉeꞌ zitɉw gwlequeꞌ lan yoꞌonəꞌ deꞌen naquə deꞌe gual. Naꞌ catəꞌ bchoɉchgua yaonəꞌ, gwyec̱hɉən ližeꞌenəꞌ naꞌ bito bebix̱ən cuiayiꞌin, c̱hedəꞌ gwzo c̱hec̱hchguan.
\v 49 Naꞌ yoguəꞌ nonꞌ cui chzenagueꞌ c̱he xtižaꞌanəꞌ gwxaquəꞌəlebeneꞌ ca yeto beṉəꞌ ben yoꞌo. Con beneꞌen lao yo naꞌazə sin cui bi lanei gwlequeꞌ. Naꞌ catəꞌ bchoɉchgua yaonəꞌ gwyec̱hɉən ližeꞌenəꞌ, naꞌ bebix̱ən gwžiayiꞌiteczən.
\c 7
\s1 Jesoꞌosənꞌ beyoneꞌ xmos to capitan
\p
\v 1 Naꞌ catəꞌ beyož beꞌ Jesoꞌosənꞌ dižəꞌən len beṉəꞌ caꞌ, beyeɉeꞌ Capernaunṉəꞌ.
\v 2 Naꞌ zo to capitan beṉəꞌ bito naqueꞌ beṉəꞌ Izrael, naꞌ zo to xmoseꞌ chacšenchgüeineꞌ naꞌ yelezə gateꞌ. Naꞌ capitanṉəꞌ chacchgüeineꞌ c̱heꞌ.
\v 3 Naꞌ catəꞌ bene capitanṉəꞌ dižəꞌ c̱he Jesoꞌosənꞌ, bseḻeꞌe baḻə beṉəꞌ golə beṉəꞌ blao c̱he beṉəꞌ Izrael caꞌ par ɉseꞌetəꞌəyoineꞌ Jesoꞌosənꞌ šeɉeꞌ ližeꞌenəꞌ par yeyoneꞌ xmosenꞌ.
\v 4 Nach catəꞌ besəꞌəžineꞌ ganꞌ zo Jesoꞌosənꞌ gwsaꞌatəꞌəyoineꞌ ḻeꞌ gaquəleneꞌ capitanṉəꞌ, naꞌ gwseꞌe Jesoꞌosənꞌ: ―Naqueꞌ to beṉəꞌ zaqueꞌe par gaquəlenoꞌoneꞌ,
\v 5 c̱hedəꞌ chaqueneꞌ c̱he chioꞌo beṉəꞌ Izrael. Naꞌ ḻeꞌ beneꞌ yoꞌodaoꞌ c̱hetoꞌ nga len xmecheꞌ.
\p
\v 6 Nach gwyeɉ Jesoꞌosənꞌ len ḻegaꞌaqueꞌ. Pero zeꞌe yesəꞌəžineꞌ ližeꞌenəꞌ catəꞌ bseḻəꞌ capitanṉəꞌ baḻə beṉəꞌ migw c̱heꞌenəꞌ lao Jesoꞌosənꞌ, naꞌ gwseꞌeneꞌ: ―Capitanṉəꞌ neꞌ de que bito gonziꞌilažoꞌo yidoꞌ ližeꞌenəꞌ, c̱hedəꞌ laꞌ ṉezeneꞌ de que bito zaqueꞌe par šoꞌo ližeꞌenəꞌ.
\v 7 Deꞌe naꞌanəꞌ bito beyaxɉeneꞌ deṉabeneꞌ leꞌ gaquəlenoꞌoneꞌ. Con cheneꞌeneꞌ gonšgoꞌ mendadənꞌ naꞌ yeyaque xmoseꞌenəꞌ.
\v 8 Capitanṉəꞌ neꞌ de que zoeꞌ xniꞌa reinꞌ, pero ḻeczə nitəꞌ soḻdad c̱heꞌ caꞌ xniꞌenəꞌ. Naꞌ catəꞌ cheꞌe toeꞌ: “Gwyeɉ”, naꞌ cheɉeꞌ, naꞌ catəꞌ cheꞌe yetoeꞌ: “Da”, naꞌ chideꞌ. Naꞌ catəꞌ cheꞌe xmosenꞌ: “Deꞌe nga gonoꞌ”, naꞌ choneꞌen. Naꞌ ṉezeneꞌ de que con əṉaoꞌ yeyaque xmoseꞌenəꞌ naꞌ yeyaqueneꞌ.
\p
\v 9 Naꞌ Jesoꞌosənꞌ catəꞌ beneneꞌ dižəꞌ deꞌen əgwseꞌ beṉəꞌ migw c̱he capitanṉəꞌ ḻeꞌ, bebaneneꞌ naꞌ beyec̱hɉeꞌ gožeꞌ beṉəꞌ caꞌ zɉəsəꞌənao ḻeꞌ: ―Echniaꞌ leꞌe, bitoṉəꞌ želdaꞌ beṉəꞌ gonḻilažəꞌ nadaꞌ ca chonḻilažəꞌ capitanṉəꞌ nadaꞌ. Ni to beṉəꞌ Izrael cui chonḻilažəꞌ nadaꞌ ca benga.
\p
\v 10 Nach ɉəyaꞌac beṉəꞌ caꞌ bseḻəꞌ capitanṉəꞌ, naꞌ catəꞌ besyəꞌəžineꞌ ližeꞌenəꞌ babeyaque xmoseꞌenəꞌ.
\s1 Jesoꞌosənꞌ bosbaneꞌ xiꞌiṉ to noꞌolə gozebə
\p
\v 11 Naꞌ gwyeɉ Jesoꞌosənꞌ to syoda deꞌen nziꞌ Nain, nžagueꞌ disipl c̱heꞌ caꞌ naꞌ zan beṉəꞌ yoblə.
\v 12 Bazɉaꞌaqueꞌ gaḻəꞌəzə par yesəꞌəžineꞌ choꞌa puert c̱he syodanꞌ, naꞌ ḻei chəsəꞌəchoɉ x̱oṉɉ beṉəꞌ choꞌa puertənꞌ zɉənḻeneꞌ to beṉəꞌ guat. Naꞌ benꞌ gotənꞌ naqueꞌ beṉəꞌ tlišəꞌ, naꞌ xneꞌen naqueꞌ beṉəꞌ gozebə. Naꞌ beṉəꞌ zan beṉəꞌ laoꞌ syodanꞌ zɉənžagueꞌ xnaꞌ beṉəꞌ guatənꞌ.
\v 13 Naꞌ catəꞌ bleꞌi X̱anchonꞌ noꞌolənꞌ, beyašeꞌeneꞌ ḻeꞌ, nach gožeꞌeneꞌ: ―Bito cuežoꞌ.
\p
\v 14 Nach zdeꞌ naꞌ ɉtaneꞌ yagant ganꞌ xoa beṉəꞌ guatənꞌ, naꞌ beṉəꞌ caꞌ zɉənḻen ḻeꞌenəꞌ gosəꞌəbezeꞌ. Nach gožeꞌ beṉəꞌ guatənꞌ: ―Beṉəꞌ güegoꞌ, beyas.
\p
\v 15 Nach beṉəꞌ guatənꞌ beyaseꞌ gwchiꞌe naꞌ gwzolao cheṉeꞌ. Naꞌ Jesoꞌosənꞌ beyoneꞌ ḻeꞌ lao naꞌ xneꞌenəꞌ.
\v 16 Naꞌ yoguəꞌ beṉəꞌ caꞌ besəꞌəžebeꞌ nach gwsoꞌelaogüeꞌe Diozənꞌ chəsəꞌəneꞌ: ―Bablaꞌ to profet əblao ganꞌ nga zocho ṉaꞌa. Naꞌ Diozənꞌ bagocwleneꞌ chioꞌo naccho ṉasyon c̱heꞌenəꞌ.
\p
\v 17 Naꞌ ca naquə deꞌen ben Jesoꞌosənꞌ gosəꞌ gwlalɉə dižəꞌ c̱heꞌenəꞌ doxen Jodeanꞌ naꞌ yež caꞌ deꞌen zɉənyec̱hɉ zɉəmbiꞌi gaḻəꞌəzə.
\s1 Juanṉəꞌ bseḻeꞌe c̱hopə disipl c̱heꞌ ganꞌ zo Jesoꞌosənꞌ
\p
\v 18 Nach disipl c̱he Juanṉəꞌ ɉəsyeꞌeyeꞌeleneꞌ ḻeꞌ dižəꞌ yoguəꞌ ca naquə deꞌe caꞌ chon Jesoꞌosənꞌ.
\v 19 Nach gox Juanṉəꞌ c̱hopə disipl c̱heꞌ caꞌ nach gožeꞌ ḻegaꞌaqueꞌ: ―Ḻeꞌe žɉaꞌac ganꞌ zo Jesoꞌosənꞌ naꞌ yeꞌeleneꞌ: “¿Elenꞌ benꞌ naquən əseḻəꞌ Diozənꞌ o šə sotoꞌ lez yidə beṉəꞌ yoblənꞌ?”
\p
\v 20 Nach disipl caꞌ catəꞌ besəꞌəžineꞌ ganꞌ zo Jesoꞌosənꞌ gwseꞌeneꞌ: ―Juan benꞌ chc̱hoa beṉəꞌ nis bseḻeꞌe netoꞌ laogoꞌ nga par əṉabetoꞌ leꞌ šə lenꞌ benꞌ naquən əseḻəꞌ Diozənꞌ o šə sotoꞌ lez yidə beṉəꞌ yoblənꞌ.
\p
\v 21 Lao or naꞌatezə žlac ṉeꞌe nitəꞌ disipl c̱he Juanṉəꞌ, Jesoꞌosənꞌ beyoneꞌ beṉəꞌ zan beṉəꞌ caꞌ chsaꞌacšene naꞌ beṉəꞌ chseꞌi yižgüeꞌ gual. Ḻeczə bebejeꞌ deꞌe x̱ioꞌ caꞌ deꞌen zɉəyoꞌo zɉəyaz yic̱hɉlaꞌaždaoꞌ beṉəꞌ, naꞌ beneꞌ par nic̱h besyəꞌəleꞌi beṉəꞌ lc̱hoḻ.
\v 22 Nach Jesoꞌosənꞌ božiꞌe xtižəꞌ beṉəꞌ caꞌ bseḻəꞌ Juanṉəꞌ laogüeꞌenəꞌ gožeꞌ ḻegaꞌaqueꞌ: ―Ḻeꞌe žɉəyaꞌac naꞌ ḻeꞌe žɉəyeyež Juanṉəꞌ doxen deꞌe caꞌ bableꞌile naꞌ deꞌe caꞌ babenele. Bableꞌile chonaꞌ par nic̱h baḻə beṉəꞌ lc̱hoḻ chesyəꞌəleꞌineꞌ, naꞌ baḻə beṉəꞌ coj chesyəꞌədeꞌ, naꞌ yebaḻə beṉəꞌ cuež chesyəꞌəyeneneꞌ, naꞌ ḻeczə baḻə beṉəꞌ gwseꞌi yižgüeꞌ deꞌen neꞌ ḻepr babesyəꞌəyaqueneꞌ. Bableꞌile bosbanaꞌ baḻə beṉəꞌ guat naꞌ babenele choꞌa dižəꞌ güen dižəꞌ cobə c̱hiaꞌanəꞌ len beṉəꞌ yašəꞌ caꞌ.
\v 23 Mbalaz zo beṉəꞌ cheɉḻeꞌe de que Diozənꞌ bseḻeꞌe nadaꞌ.
\p
\v 24 Naꞌ catəꞌ besyəꞌəsaꞌac disipl c̱he Juanṉəꞌ nach Jesoꞌosənꞌ beꞌeleneꞌ beṉəꞌ caꞌ zɉəndobənꞌ xtižəꞌ Juanṉəꞌ, gožeꞌ ḻegaꞌaqueꞌ: ―¿Nacxa naquə benꞌ ɉəleꞌitgüeiczele latɉə dašənꞌ? ¿Ešayec̱hə šayen chaqueꞌ? Bito.
\v 25 ¿Nacxanꞌ goqueꞌ catəꞌ ɉəleꞌileneꞌ? ¿Enyazeꞌ lachəꞌ šaoꞌ? ¿əšə bito? laꞌ beṉəꞌ caꞌ zɉənyaz lachəꞌ šaoꞌ niteꞌe yoꞌo güenchgua ca no liž rei, naꞌ bito bi chesəꞌəyažɉeneꞌ par yesəꞌəchoɉeꞌ ližgaꞌaqueꞌenəꞌ.
\v 26 ¿Noxanꞌ ɉəleꞌilenꞌ ža? ¿Eto profet benꞌ choꞌe xtižəꞌ Diozənꞌ? Deꞌe ḻi naqueꞌ to profet. Pero əchniaꞌ leꞌe caguə con to profetənꞌ.
\v 27 C̱he benganꞌ nyoɉən ḻeꞌe Xtižəꞌ Diozənꞌ nan:
\q1 Nadaꞌ Dioz əseḻaꞌa to beṉəꞌ cuialaogüeꞌ güeꞌe xtižoꞌonəꞌ,
\q1 par nic̱h ṉitəꞌ beṉəꞌ probnid par əsoꞌelaogüeꞌe leꞌ catəꞌən yidoꞌ.
\q1
\v 28 Echniaꞌ leꞌe, notono beṉac̱h ṉeꞌe so beṉəꞌ naquəch beṉəꞌ blaoch ca Juanṉəꞌ. Naꞌ notəꞌətezəchlə beṉəꞌ güeꞌe latɉə ṉabiaꞌ Diozənꞌ ḻeꞌ, ḻaꞌaṉəꞌəczə bito naqueꞌ beṉəꞌ blao gwžin ža catəꞌ šeɉniꞌicheneꞌ c̱hiaꞌ clezə ca Juanṉəꞌ.
\p
\v 29 Naꞌ baḻə beṉəꞌ goc̱hixɉw caꞌ naꞌ len yeziquəꞌəchlə beṉəꞌ caꞌ bc̱hoa Juanṉəꞌ nis, gwsaꞌacbeꞌineꞌ de que deꞌe ḻi zɉənaqueꞌ beṉəꞌ mal lao Diozənꞌ catəꞌ gwseꞌeneneꞌ dižəꞌ deꞌen beꞌ Juanṉəꞌ len ḻegaꞌaqueꞌ.
\v 30 Pero naꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gwsoꞌonczə yic̱hɉlaogaꞌaqueꞌ cui besyəꞌədiṉɉeneꞌ xtoḻəꞌəgaꞌaqueꞌenəꞌ canꞌ goneꞌe Diozənꞌ naꞌ bito bc̱hoa Juanṉəꞌ ḻegaꞌaqueꞌ nis.
\p
\v 31 Nach Jesoꞌosənꞌ gožeꞌ ḻegaꞌaqueꞌ: ―¿Nac əgwsaquəꞌəlebetgüeidaꞌ leꞌe mbanḻe ṉaꞌa? naꞌ ¿nac nacle?
\v 32 Egwsaquəꞌəlebedaꞌ leꞌe ca bidaoꞌ c̱hedəꞌ cuiczə bi de žleb c̱hele. Ca naquə bidaoꞌ caꞌ catəꞌ nitəꞌəboꞌ do ganꞌ chac yaꞌa chseꞌ lɉuežɉgaꞌacboꞌ: “Bentoꞌ ḻegr, bito gwyoꞌolažəꞌəle, naꞌ babentoꞌ bgüine bgüež, peor.”
\v 33 Juan benꞌ chc̱hoa beṉəꞌ nis bideꞌ laole nga. Bito güeꞌeɉ gwdaošaogüeꞌe canꞌ chseꞌeɉ chsaꞌo beṉəꞌ yoblə, naꞌ nic güeꞌeɉeꞌ bino. Nach gwnale c̱heꞌ: “Yoꞌo yaz deꞌe x̱iꞌonəꞌ yic̱hɉlaꞌaždaogüeꞌenəꞌ.”
\v 34 Naꞌ nadaꞌ ža, Diozənꞌ bseḻeꞌe nadaꞌ golɉaꞌ beṉac̱h, naꞌ chleꞌile cheꞌeɉ chaoguaꞌ canꞌ cheꞌeɉ chaole, naꞌ nale c̱hiaꞌ de que nacaꞌ beṉəꞌ lia naꞌ beṉəꞌ güeꞌe zo. Naꞌ ḻeczə nale de que nacaꞌ migw c̱he beṉəꞌ goc̱hixɉw caꞌ naꞌ migw c̱he yeziquəꞌəchlə beṉəꞌ caꞌ chsoꞌon deꞌe mal.
\v 35 Pero naꞌ Diozənꞌ choneꞌ par nic̱h beṉəꞌ caꞌ chosoꞌozenag c̱heꞌ chsoꞌoneꞌ ca nacbiaꞌ de que ḻeꞌ naqueꞌ ḻeꞌezelaogüe beṉəꞌ sinꞌ.
\s1 Jesoꞌosənꞌ gwyeɉeꞌ liž Simon beṉəꞌ fariseo
\p
\v 36 To beṉəꞌ fariseo beneꞌ combid Jesoꞌosənꞌ šeɉeꞌ ližeꞌenəꞌ par əsaꞌogüeꞌ. Naꞌ bžin Jesoꞌosənꞌ liž beꞌenəꞌ naꞌ gwchiꞌe choꞌa mesənꞌ.
\v 37 Naꞌ to noꞌolə beṉəꞌ güen deꞌe mal beṉəꞌ laoꞌ syodanꞌ gwṉezeneꞌ de que Jesoꞌosənꞌ əžineꞌ liž beꞌenəꞌ. Naꞌ Jesoꞌosənꞌ len beṉəꞌ caꞌ yeḻaꞌ baniteꞌe choꞌa mesənꞌ par əsaꞌogüeꞌ catəꞌ bgüiguəꞌ noꞌolənꞌ cuit Jesoꞌosənꞌ nox̱eꞌe to lmet de yeɉ deꞌe yožə to set deꞌe zaqueꞌe deꞌe chḻaꞌ zix̱.
\v 38 Naꞌ noꞌolənꞌ ɉəbigueꞌe gaḻəꞌəzə xniꞌa Jesoꞌosənꞌ, naꞌ gwchežeꞌ. Nis əxchež c̱heꞌenəꞌ bžonən ṉiꞌa Jesoꞌosənꞌ naꞌ bgüisən. Naꞌ bxieꞌ ṉiꞌenəꞌ len yišəꞌ yic̱hɉeꞌenəꞌ, naꞌ bnopeꞌen, naꞌ gwdebeꞌen set zix̱ənꞌ.
\v 39 Naꞌ beṉəꞌ fariseonꞌ benꞌ ben Jesoꞌosənꞌ combid, catəꞌ bleꞌineꞌ canꞌ chon noꞌolənꞌ, naꞌ goqueneꞌ: ―Žaləꞌ beꞌenga naqueꞌ profet, guacbeꞌineꞌ de que noꞌolə nga naqueꞌ beṉəꞌ güen deꞌe mal.
\p
\v 40 Nach Jesoꞌosənꞌ gožeꞌeneꞌ: ―Simon, de to deꞌe cheꞌendaꞌ əṉiaꞌ leꞌ.
\p Nach Simonṉəꞌ gožeꞌ Jesoꞌosənꞌ: ―Gwnan Maestr.
\p
\v 41 Jesoꞌosənꞌ gožeꞌeneꞌ: ―Gwzo to beṉəꞌ, naꞌ gwnitəꞌ c̱hopə beṉəꞌ gwsaꞌaḻeꞌe xmecheꞌ. Toeꞌ goḻeꞌe gueyəꞌ gueyoa mech deꞌen neꞌ denario, naꞌ benꞌ yeto goḻeꞌe šiyon denario.
\v 42 Naꞌ c̱hopte beṉəꞌ caꞌ ni toeꞌ cui de c̱hegaꞌaqueꞌ par yesyəꞌəyixɉueꞌ xyanꞌ, naꞌ benꞌ gwleɉ mechənꞌ bṉitlaogüeꞌ deꞌen chsaꞌaḻeꞌe c̱heꞌenəꞌ. Gwnašc nadaꞌ, ¿noeꞌ entr beṉəꞌ caꞌ c̱hopə gwsaꞌaquecheneꞌ c̱heꞌ?
\p
\v 43 Nach Simonṉəꞌ gožeꞌeneꞌ: ―Šəquə benꞌ əbṉitlaogüeꞌ xya c̱heinꞌ deꞌe xench.
\p Jesoꞌosənꞌ gožeꞌeneꞌ: ―Deꞌe ḻi canꞌ bagwnaꞌonəꞌ.
\p
\v 44 Nach gwyec̱hɉeꞌ bgüieꞌ noꞌolənꞌ naꞌ gožeꞌ Simonṉəꞌ: ―¿Echleꞌidoꞌ noꞌolə nga? Nadaꞌ bagwyoꞌa ližoꞌ nga, naꞌ bito beṉoꞌ nis c̱hib ṉiꞌa, pero noꞌolə nga bagwdibeꞌ ṉiꞌanəꞌ len nis əxchež c̱heꞌenəꞌ, naꞌ bxiꞌen len yišəꞌ yic̱hɉeꞌenəꞌ.
\v 45 Bito bnopoꞌo nadaꞌ, pero naꞌ noꞌolə nga dezd blaꞌatiaꞌ nga chnopeꞌe ṉiꞌanəꞌ.
\v 46 Bito gwdeboꞌ set yic̱hɉaꞌanəꞌ, pero noꞌolə nga bagwdebeꞌ set zix̱ənꞌ ṉiꞌanəꞌ.
\v 47 Naꞌ əchniaꞌ leꞌ, xtoḻeꞌenəꞌ gwsaꞌaquən deꞌe zan, pero babeziꞌixenaꞌ c̱heꞌ. Deꞌe naꞌanəꞌ chacchgüeineꞌ c̱hiaꞌ. Benꞌ bito əžinḻažəꞌ xtoḻeꞌenəꞌ ca xtoḻəꞌ noꞌolə nga, catəꞌ yeziꞌixenaꞌ c̱heꞌ bito gactequeneꞌ c̱hiaꞌ.
\p
\v 48 Nach gožeꞌ noꞌolənꞌ: ―Babeziꞌixenaꞌ xtoḻoꞌonəꞌ.
\p
\v 49 Nach beṉəꞌ caꞌ chsaꞌo len Jesoꞌosənꞌ txen lao mesənꞌ gwzolao chseꞌ lɉuežɉeꞌ: ―¿Noxa benga chaclizeneꞌ de que ḻeꞌenəꞌ cheziꞌixeneꞌ doḻəꞌ?
\p
\v 50 Nach gož Jesoꞌosənꞌ: ―Deꞌen chonḻilažoꞌo nadaꞌ babeziꞌixenaꞌ c̱hioꞌ. Beyeɉ to šaoꞌ to güen.
\c 8
\s1 Noꞌol caꞌ gwsaꞌaclen Jesoꞌosənꞌ
\p
\v 1 Naꞌ techlə gwyeɉ Jesoꞌosənꞌ to to syoda naꞌ to to yež deꞌen zɉənyec̱hɉ zɉəmbiꞌi Galileanꞌ, naꞌ ɉtix̱ɉuiꞌe dižəꞌ güen dižəꞌ cobə de que Diozənꞌ ṉabiꞌe con notəꞌətezə beṉəꞌ soeꞌ latɉə. Naꞌ zɉaꞌaclen beṉəꞌ šižiṉ caꞌ ḻeꞌ, beṉəꞌ caꞌ zɉənziꞌ apostol.
\v 2 Nach x̱oṉɉ noꞌolə ḻeczə zɉaꞌacleneꞌ Jesoꞌosənꞌ, beṉəꞌ caꞌ babeyoneꞌ. Baḻeꞌ babebeɉeꞌ deꞌe x̱ioꞌ deꞌen zɉəyoꞌo zɉəyaz yic̱hɉlaꞌaždaogaꞌaqueꞌenəꞌ, naꞌ yebaḻeꞌ babeyoneꞌ ḻegaꞌaqueꞌ catəꞌ gwsaꞌacšeneneꞌ. Naꞌ entr noꞌol caꞌ len benꞌ le Maria beṉəꞌ Magdala, bebeɉ Jesoꞌosənꞌ gažə deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaogüeꞌenəꞌ.
\v 3 Nach ḻeczə len benꞌ le Xguan, xoꞌolə Chosa. Naꞌ Chosanꞌ yoꞌo lao neꞌe chapeꞌ liž Erodənꞌ naꞌ yežlyo c̱heꞌ caꞌ. Naꞌ ḻeczə len benꞌ le San gwyeɉleneꞌ Jesoꞌosənꞌ, naꞌ yezan beṉəꞌ yeziquəꞌəchlə. Naꞌ noꞌol caꞌ bosoꞌoc̱hineꞌ bitəꞌətezə deꞌen gotəꞌ c̱hegaꞌaqueꞌ par bosəꞌənežɉueꞌ deꞌen byažɉe Jesoꞌosənꞌ len disipl c̱heꞌ caꞌ.
\s1 Jempl c̱he beṉəꞌ gozənꞌ
\p
\v 4 Naꞌ beṉəꞌ zan besəꞌədopeꞌ ganꞌ zo Jesoꞌosənꞌ beṉəꞌ zaꞌac to to syoda caꞌ. Naꞌ beꞌe to jempl bzeɉniꞌineꞌ ḻegaꞌaqueꞌ canꞌ gwxaquəꞌəlebe xtižəꞌ Diozənꞌ. Gwneꞌ:
\v 5 ―To beṉəꞌ gwzeꞌe zdeꞌ güen trigw. Naꞌ lao choseꞌ trigonꞌ baḻən ɉəsəꞌəchazən choꞌa nez, naꞌ bosoꞌoleɉ bosoꞌošošɉ beṉəꞌ ḻen, naꞌ bia žia x̱ileꞌe bia chaš ḻeꞌe yobanꞌ gwsaꞌob ḻen.
\v 6 Naꞌ baḻən ɉəsəꞌəchazən ga naquə lao yeɉ, naꞌ catəꞌ blaꞌaquənṉəꞌ gosəꞌəbižən c̱hedəꞌ caguə bi gopəꞌ denəꞌ.
\v 7 Naꞌ yebaḻən besəꞌəgoꞌoṉən lao yo ga nc̱hix̱ə xsa yešəꞌ naꞌ blaꞌaquən txen naꞌ bosoꞌoḻoləꞌ yag yešəꞌ caꞌ ḻegaꞌaquən.
\v 8 Naꞌ yebaḻən besəꞌəgoꞌoṉən lao yo šaoꞌ naꞌ blaꞌaquən naꞌ gosəꞌəbian to gueyoa güeɉə.
\p Naꞌ beyož beꞌe dižəꞌ quinga gwṉeꞌ zižɉo gwneꞌ: ―Leꞌe žia nagle deꞌe chene, ḻegwzenag.
\s1 Jesoꞌosənꞌ gožeꞌ disipl c̱heꞌ caꞌ bixc̱henꞌ bzeɉniꞌineꞌ beṉəꞌ len jempl
\p
\v 9 Nach disipl c̱heꞌ caꞌ gosəꞌəṉabeneꞌ ḻeꞌ bi zeɉe jemplənꞌ deꞌen beꞌenəꞌ.
\v 10 Naꞌ gož Jesoꞌosənꞌ ḻegaꞌaqueꞌ: ―Diozənꞌ choneꞌ par nic̱h leꞌe əṉezele deꞌen cui no gwṉeze antslə de que ṉabiꞌe con notəꞌətezə beṉəꞌ soeꞌ latɉə. Pero beṉəꞌ yeziquəꞌəchlə choꞌelengaꞌacaꞌaneꞌ jempl c̱hedəꞌ bito chseꞌeɉḻeꞌe c̱hiaꞌ. Chonaꞌ caꞌ par nic̱h yesəꞌəleꞌineꞌ deꞌen chonaꞌ naꞌ bito saꞌacbeꞌineꞌ bi zeɉen, naꞌ par nic̱h əseꞌeneneꞌ xtižaꞌanəꞌ naꞌ cui seꞌeɉniꞌineꞌen.
\s1 Jesoꞌosənꞌ bzeɉniꞌineꞌ bi zeɉe jempl c̱he beṉəꞌ güen trigonꞌ
\p
\v 11 Naꞌ ca naquə jempl nga zeɉen quinga: Ca deꞌen byažənꞌ naquən xtižəꞌ Diozənꞌ.
\v 12 Deꞌen ɉəsəꞌəchaz choꞌa nezənꞌ zeɉen ca beṉəꞌ caꞌ chseꞌene xtižəꞌ Diozənꞌ pero naꞌ ḻeꞌe chžinte gwxiyeꞌenəꞌ chebeɉən xtižəꞌ Diozənꞌ ḻoꞌo yic̱hɉlaꞌaždaogaꞌaqueꞌenəꞌ par nic̱h cui soꞌonḻilažeꞌeneꞌ naꞌ cui yesyəꞌəchoɉeꞌ xniꞌa deꞌe malənꞌ.
\v 13 Naꞌ deꞌe caꞌ besəꞌəgoꞌoṉ ganꞌ naquə lao yeɉ gwxaquəꞌəleben ca beṉəꞌ caꞌ chəsyəꞌəbei chosoꞌozenag xtižəꞌ Diozənꞌ. Pero zɉənaqueꞌ ca to deꞌe cui bi ḻoi chon, šložga chseꞌeɉḻeꞌe c̱he xtižəꞌ Diozənꞌ. Naꞌ catəꞌ chac bi deꞌe mal c̱hegaꞌaqueꞌ ḻeꞌe chəsəꞌəbeɉyic̱hɉteꞌen cuich chosoꞌozenagueꞌ c̱hei.
\v 14 Naꞌ deꞌe caꞌ besəꞌəgoꞌoṉən lao yo ga nc̱hix̱ə xsa yešəꞌ zeɉen ca beṉəꞌ caꞌ bazɉəneneneꞌ xtižəꞌ Diozənꞌ. Pero lao zɉəmbangaꞌaqueꞌ chesyəꞌəlaḻ chesyəꞌəžeɉeneꞌ, naꞌ chseꞌeneneꞌ yesəꞌəniꞌe, naꞌ chəsəꞌədeꞌ ḻegr. Naꞌ deꞌe quinga chsoꞌoneꞌenəꞌ chosoꞌoḻoləꞌən xtižəꞌ Diozənꞌ deꞌen bayoꞌo yic̱hɉlaꞌaždaogaꞌaqueꞌenəꞌ, naꞌ deꞌe naꞌanəꞌ cui chsoꞌonḻilažeꞌeneꞌ canꞌ cheyaḻəꞌ.
\v 15 Naꞌ deꞌe caꞌ besəꞌəgoꞌoṉən lao yo šaꞌonəꞌ zeɉen ca beṉəꞌ laꞌaždaoꞌ güen caꞌ catəꞌən chseꞌeneneꞌ xtižəꞌ Diozənꞌ chəsəꞌəziꞌen chsoꞌonen c̱hegaꞌaqueꞌ. Naꞌ chsoꞌonḻilažeꞌeneꞌ naꞌ chesəꞌəgoꞌo chesəꞌəc̱heɉlažeꞌe len bitəꞌətezə deꞌen chac c̱hegaꞌaqueꞌ par chsoꞌoneꞌ canꞌ cheneꞌe Diozənꞌ.
\s1 Bitobi ngašəꞌ deꞌe ṉacho cui no yene leꞌi
\p
\v 16 Naꞌ Jesoꞌosənꞌ bsaquəꞌəlebeneꞌ deꞌen bsed əbloꞌineꞌenəꞌ ca to yiꞌ, gwneꞌ: ―Notono no guaḻəꞌ to yiꞌ naꞌ gwdoseꞌen to žomə naꞌ nic no gwcuašəꞌən xan xcamei. Syempr chdeꞌe yiꞌinəꞌ ḻeꞌe zeꞌe par nic̱h əgwseꞌeniꞌin len yoguəꞌ beṉəꞌ soꞌo loꞌo cuartənꞌ.
\v 17 Guaquə canꞌ na dicho deꞌen na: “Yoguəꞌəḻoḻ deꞌen ngašəꞌ ṉaꞌa, gwžin ža laꞌalaon, naꞌ yoguəꞌəḻoḻ deꞌen cui no gwseꞌeɉniꞌi antslə, leczə gwžin ža seꞌeɉniꞌi beṉəꞌ ḻen.”
\p
\v 18 Deꞌe naꞌanəꞌ ḻeꞌe coꞌo yic̱hɉle deꞌen chniaꞌ leꞌe, c̱hedəꞌ laꞌ šə chzenagle xtižaꞌanəꞌ əgwzeɉniꞌichdaꞌ leꞌe. Pero naꞌ šə bito chzenagle c̱hei, deꞌe daonꞌ baṉezele ganḻažəꞌəlen.
\s1 Xnaꞌ Jesoꞌosənꞌ naꞌ bišeꞌe caꞌ besəꞌəžineꞌ ganꞌ zoeꞌ
\p
\v 19 Naꞌ xnaꞌ Jesoꞌosənꞌ len beṉəꞌ bišeꞌe caꞌ besəꞌəžineꞌ ganꞌ zo Jesoꞌosənꞌ naꞌ gwsaꞌaclažeꞌe yesəꞌədieꞌ pero tant beṉəꞌ zan žaꞌ caguə goquə yesəꞌəžineꞌ ganꞌ zoeꞌenəꞌ.
\v 20 Naꞌ gwnitəꞌ beṉəꞌ gwseꞌe Jesoꞌosənꞌ: ―Xnaꞌon len beṉəꞌ bišoꞌo caꞌ zɉəzecheꞌ naꞌate, naꞌ chseꞌeneneꞌ əsoꞌeleneꞌ leꞌ dižəꞌ.
\p
\v 21 Nach Jesoꞌosənꞌ gožeꞌ ḻegaꞌaqueꞌ: ―Beṉəꞌ caꞌ chosoꞌozenag xtižəꞌ Diozənꞌ naꞌ chsoꞌoneꞌ canꞌ nan, lenczəgaꞌaqueꞌenəꞌ zɉənaqueꞌ xnaꞌa naꞌ bišaꞌa.
\s1 Jesoꞌosənꞌ bcuezeꞌ beꞌ bdonꞌ lao nisdaꞌonəꞌ
\p
\v 22 Naꞌ gozac to ža Jesoꞌosənꞌ gwyoꞌe to ḻoꞌo barcw len disipl c̱heꞌ caꞌ, naꞌ gožeꞌ ḻegaꞌaqueꞌ: ―Eḻaguəꞌəcho yešḻaꞌalə nisdaꞌonəꞌ.
\p Nach bosoꞌoseꞌe barconꞌ.
\v 23 Lao zda barconꞌ gwtas Jesoꞌosənꞌ. Naꞌ gwzolao gwyec̱hɉ to beꞌ gual lao nisdaꞌonəꞌ naꞌ barconꞌ gwzolao gwyožən nisənꞌ naꞌ besəꞌəxoženeꞌ yesəꞌəbiayiꞌe.
\v 24 Nach bosyoꞌosbaneꞌ Jesoꞌosənꞌ gwseꞌeneꞌ: ―¡Maestr! ¡Maestr! ¡Bac̱h chbiayiꞌicho!
\p Nach catəꞌ gwyaseꞌ ṉeꞌe chas chatəꞌ nisdaꞌonəꞌ naꞌ gwdiḻeꞌen len beꞌenəꞌ, naꞌ ḻeꞌe gosəꞌəbeꞌežiten.
\v 25 Naꞌ gožeꞌ ḻegaꞌaqueꞌ: ―Cheyaḻəꞌ šeɉḻeꞌechle c̱hiaꞌ.
\p Nach ḻegaꞌaqueꞌ besəꞌəžebeꞌ naꞌ besyəꞌəbaneneꞌ naꞌ gwseꞌ lɉuežɉeꞌ: ―Bitolɉa naquə benga con to beṉac̱hzə, laꞌ ¿nacxa gon to beṉac̱h par yebecžieꞌ beꞌ gualənꞌ len nisdaꞌonəꞌ.
\s1 To beṉəꞌ Gadara yoꞌo yazeꞌ deꞌe x̱ioꞌ
\p
\v 26 Naꞌ besəꞌəžineꞌ laž beṉəꞌ Gadara caꞌ, to yež deꞌe chiꞌ delant Galileanꞌ əḻaguəꞌəcho nisdaꞌonəꞌ.
\v 27 Naꞌ catəꞌ bechoɉ Jesoꞌosənꞌ ḻoꞌo barconꞌ, to beṉəꞌ laoꞌ syodanꞌ ɉəšagueꞌ leꞌ, beṉəꞌ bagwža yoꞌo yaz deꞌe x̱ioꞌ caꞌ yic̱hɉlaꞌaždaogüeꞌen. Naꞌ chdeꞌ con cui bi bi xeꞌ chazəcheꞌ, naꞌ bitoch zoeꞌ yoꞌo, con bazoeꞌ do capsant.
\v 28-29 Naꞌ beṉəꞌ gwlaž c̱heꞌ caꞌ bosoꞌoc̱heɉeꞌ ṉiꞌa neꞌe ca gden naꞌ gwsaꞌapeꞌeneꞌ, pero zan las deꞌe x̱ioꞌ caꞌ gwsoꞌonən ca bzoxɉ btineꞌ gdenṉəꞌ naꞌ ḻeczə gwsoꞌonən ca gwyeɉeꞌ ganꞌ cui no beṉəꞌ zɉənḻaꞌ. Naꞌ beꞌenəꞌ catəꞌ bleꞌineꞌ Jesoꞌosənꞌ naꞌ bzo xibeꞌ laogüeꞌenəꞌ naꞌ deꞌe x̱ioꞌ caꞌ bosoꞌogosyaꞌan ḻeꞌ, zižɉo gosəꞌənan: ―Partlə leꞌ, partlə netoꞌ, Jesoꞌos. Nacoꞌ Xiꞌiṉ Dioz benꞌ naquə ḻeꞌezelaogüe beṉəꞌ blao. Chatəꞌəyoitoꞌ leꞌ cui əgwc̱hiꞌ əgwsacoꞌo netoꞌ.
\p Deꞌe x̱ioꞌ caꞌ gosəꞌənan caꞌ c̱hedəꞌ Jesoꞌosənꞌ beneꞌ mendad yesyəꞌəchoɉən ḻoꞌo yic̱hɉlaꞌaždaoꞌ beꞌenəꞌ.
\v 30 Nach Jesoꞌosənꞌ gožgaꞌaquenꞌ: ―¿Bi lele?
\p Naꞌ gosəꞌənan: ―Legion letoꞌ.
\p Gosəꞌənan caꞌ c̱hedəꞌ zanən gwsoꞌon yic̱hɉlaꞌaždaoꞌ beꞌenꞌ.
\v 31 Naꞌ deꞌe x̱ioꞌ caꞌ gwsaꞌatəꞌəyoin Jesoꞌosənꞌ cui goneꞌ ca žɉəsyəꞌədebən ḻoꞌo yech gabiḻənꞌ.
\v 32 Naꞌ to yaꞌa deꞌe zo gaḻəꞌəzə chaš beṉəꞌ chosoꞌoyeꞌ coš zan. Nach deꞌe x̱ioꞌ caꞌ gwsaꞌatəꞌəyoin ḻeꞌ par güeꞌe latɉə žɉesyəꞌəžoꞌon yic̱hɉlaꞌaždaoꞌ coš caꞌ. Naꞌ Jesoꞌosənꞌ beꞌe latɉə.
\v 33 Nach besyəꞌəchoɉ deꞌe x̱ioꞌ caꞌ yic̱hɉlaꞌaždaoꞌ beꞌenəꞌ naꞌ ɉəsyəꞌəžoꞌon yic̱hɉlaꞌaždaoꞌ coš caꞌ. Naꞌ besyəꞌədinses coš caꞌ ḻeꞌe yaꞌanəꞌ naꞌ ɉesyəꞌəxopəb ḻoꞌo nisdaꞌonəꞌ, naꞌ gwsaꞌatəb gwseꞌeɉəb nisənꞌ.
\p
\v 34 Naꞌ beṉəꞌ caꞌ chosoꞌoye coš caꞌ besəꞌəleꞌineꞌ deꞌen bagoquənꞌ naꞌ deꞌen besəꞌəžebchgüeꞌ besaꞌacdoeꞌ nach ɉesyəꞌədix̱ɉueꞌineꞌ beṉəꞌ laoꞌ syodanꞌ, naꞌ beṉəꞌ nitəꞌ do yoba canꞌ bagoquənꞌ.
\v 35 Naꞌ beṉəꞌ caꞌ catəꞌ gwseꞌeneneꞌ xtižəꞌ beṉəꞌ goye coš caꞌ ɉaꞌaqueꞌ ɉəsəꞌəgüieꞌ deꞌen bagoquənꞌ. Naꞌ catəꞌ besəꞌəžineꞌ ganꞌ zo Jesoꞌosənꞌ, besəꞌəleꞌineꞌ beꞌenəꞌ gwyoꞌo gwyaz deꞌe x̱ioꞌ caꞌ yic̱hɉlaꞌaždaogüeꞌenəꞌ bachiꞌe gaḻəꞌəzə cuit Jesoꞌosənꞌ, nyaz xalaneꞌe, naꞌ babezošaoꞌ yic̱hɉlaꞌaždaogüeꞌenəꞌ. Naꞌ besəꞌəžebeꞌ deꞌen goquənꞌ.
\v 36 Naꞌ beṉəꞌ caꞌ besəꞌəleꞌi deꞌen goquənꞌ gwseꞌe beṉəꞌ caꞌ yeḻaꞌ canꞌ beyaque benꞌ gwyoꞌo deꞌe x̱ioꞌ caꞌ yic̱hɉlaꞌaždaogüeꞌenəꞌ.
\v 37 Nach yoguəꞌəḻoḻ beṉəꞌ caꞌ žaꞌ ganꞌ mbane Gadaranꞌ ɉseꞌetəꞌəyoineꞌ Jesoꞌosənꞌ yezeꞌe lažgaꞌaqueꞌenəꞌ c̱hedəꞌ besəꞌəžebchgüeꞌ. Nach beyoꞌo Jesoꞌosənꞌ ḻoꞌo barconꞌ par bezeꞌe.
\v 38 Naꞌ benꞌ bechoɉ deꞌe x̱ioꞌ caꞌ yic̱hɉlaꞌaždaogüeꞌenəꞌ gotəꞌəyoineꞌ Jesoꞌosənꞌ šeɉleneꞌ ḻeꞌ, pero Jesoꞌosənꞌ bito beꞌe latɉə, gožeꞌeneꞌ:
\v 39 ―Beyeɉ ližoꞌ naꞌ ɉəyedix̱ɉueꞌe catec deꞌe mbanꞌ baben Diozənꞌ len leꞌ.
\p Naꞌ bezeꞌe, nach ɉəyedeꞌ doxen lao syodanꞌ ɉəyezeneneꞌ catec deꞌe mbanꞌ baben Jesoꞌosənꞌ len leꞌ.
\s1 Jesoꞌosənꞌ beyoneꞌ xiꞌiṉ Jaironꞌ naꞌ yeto noꞌolə beṉəꞌ gwdan lao xadoṉ c̱heꞌenəꞌ
\p
\v 40 Naꞌ catəꞌ bežin Jesoꞌosənꞌ Capernaunṉəꞌ beṉəꞌ zan banitəꞌ chəsəꞌəbezeꞌeneꞌ naꞌ besyəꞌəbeichgüeineꞌ deꞌe bežineꞌenəꞌ.
\v 41 Naꞌ bžin to beṉəꞌ le Jairo, benꞌ naquə beṉəꞌ gwnabiaꞌ c̱he yoꞌodaoꞌ c̱he beṉəꞌ Izrael caꞌ. Naꞌ bzo xibeꞌ lao Jesoꞌosənꞌ gotəꞌəyoineꞌ ḻeꞌ šeɉleneꞌ ḻeꞌ ližeꞌenəꞌ
\v 42 c̱hedəꞌ bazon gat biꞌi noꞌol c̱heꞌenəꞌ. Nacboꞌ biꞌi tlišəꞌəzə naꞌ šižiṉ izgueiboꞌ. Naꞌ lao zda Jesoꞌosənꞌ len ḻeꞌ, beṉəꞌ zan gosəꞌəbiadiꞌeneꞌ xte bosoꞌoc̱hiꞌižoɉeneꞌ.
\p
\v 43 Naꞌ len to noꞌolə bagoc šižiṉ iz chzoeꞌ bguaꞌa naꞌ babenditɉei zgade xmechenꞌ len beṉəꞌ güen rmech caꞌ. Naꞌ notono goquə gon ḻeꞌ rmech.
\v 44 Naꞌ bgüiguəꞌ noꞌolənꞌ cožəꞌ Jesoꞌosənꞌ naꞌ gwdaneꞌ lox xadoṉ c̱heꞌenəꞌ, naꞌ ḻeꞌe gwlezte bguaꞌa deꞌen chzoꞌenəꞌ.
\p
\v 45 Naꞌ gož Jesoꞌosənꞌ beṉəꞌ caꞌ zɉaꞌaclen ḻeꞌ: ―¿Nonꞌ bagwdan nadaꞌ?
\p Naꞌ yogueꞌe bito gosəꞌəc̱hebeꞌ de que gosəꞌəganeꞌ ḻeꞌ. Nach Bedənꞌ len beṉəꞌ caꞌ zɉaꞌaclen Jesoꞌosənꞌ gwseꞌeneꞌ: ―Maestr, beṉəꞌ zan žaꞌ nga, naꞌ chesəꞌəc̱hiꞌižoɉeꞌ leꞌ.
\p
\v 46 Nach Jesoꞌosənꞌ gožeꞌ ḻegaꞌaqueꞌ: ―To beṉəꞌ bagwdaneꞌ nadaꞌ. Naꞌ chacbeꞌidaꞌ de que beyaqueneꞌ len yeḻəꞌ guac c̱hiaꞌanəꞌ.
\p
\v 47 Nach noꞌolənꞌ catəꞌ gocbeꞌineꞌ de que cabi bgašəꞌ deꞌen beneꞌenəꞌ, bgüigueꞌe lao Jesoꞌosənꞌ do chaž chžebeꞌ, naꞌ bzo xibeꞌ laogüeꞌenəꞌ beꞌe dižəꞌ lao yoguəꞌ beṉəꞌ caꞌ žaꞌanəꞌ bixc̱henꞌ gwdaneꞌeneꞌ naꞌ canꞌ goquə ḻeꞌe beyacteineꞌ.
\v 48 Nach gož Jesoꞌosənꞌ noꞌolənꞌ: ―Xiꞌiṉdaoguaꞌa, babeyacdoꞌ c̱hedəꞌ chonḻilažoꞌo nadaꞌ. Beyeɉ to šaoꞌ to güen.
\p
\v 49 Ṉeꞌe choꞌete Jesoꞌosənꞌ dižəꞌən caꞌ catəꞌ bžin to beṉəꞌ gwzaꞌ liž Jaironꞌ ɉežeꞌeneꞌ: ―Bagot biꞌi noꞌol daoꞌ c̱hioꞌonəꞌ. Bitoch gondoꞌ maestrənꞌ zed.
\p
\v 50 Pero naꞌ catəꞌ bene Jesoꞌosənꞌ dižəꞌənəꞌ gožeꞌ Jaironꞌ: ―Bito žeboꞌ. Con benḻilažəꞌ nadaꞌ.
\p
\v 51 Naꞌ catəꞌ besəꞌəžineꞌ liž beꞌenəꞌ Jesoꞌosənꞌ bito beꞌe latɉə soꞌo beṉəꞌ caꞌ zɉaꞌaclen ḻeꞌ sino Bedənꞌ len Juanṉəꞌ len Jacobənꞌ naꞌ len x̱axnaꞌ biꞌi guat naꞌazə.
\v 52 Naꞌ bac̱h chacchgua scaṉdl c̱hedəꞌ yoguəꞌ beṉəꞌ caꞌ žaꞌanəꞌ chəsəꞌəbežchgüeꞌ, pero gož Jesoꞌosənꞌ ḻegaꞌaqueꞌ: ―Bito cuežle. Bito nacboꞌ biꞌi guat, con chtasboꞌonəꞌ.
\p
\v 53 Naꞌ gosəꞌəziꞌic̱hiꞌižeꞌeneꞌ c̱hedəꞌ zɉəṉezeneꞌ de que bagotboꞌonəꞌ.
\v 54 Pero Jesoꞌosənꞌ bex̱eꞌe naꞌ biꞌi noꞌolə guat daꞌonəꞌ naꞌ boḻgüižeꞌeboꞌ cheꞌeboꞌ: ―Noꞌol daoꞌ beyas.
\p
\v 55 Nach bebamboꞌ naꞌ ḻeꞌe beyasteboꞌ. Naꞌ ben Jesoꞌosənꞌ mendadənꞌ əsoꞌeboꞌ deꞌe gaoboꞌ.
\v 56 Naꞌ besyəꞌəbanchgüei x̱axnaꞌaboꞌon, pero Jesoꞌosənꞌ beneꞌ mendad cui əsoꞌe dižəꞌ canꞌ goquənꞌ.
\c 9
\s1 Jesoꞌosənꞌ bseḻeꞌe disipl c̱heꞌ caꞌ šižiṉ ɉəsəꞌədix̱ɉuiꞌe xtižeꞌenəꞌ
\p
\v 1 Jesoꞌosənꞌ betobeꞌ disipl c̱heꞌ caꞌ šižiṉ naꞌ bnežɉueꞌ ḻegaꞌaqueꞌ yeḻəꞌ guac par nic̱h əsaꞌaqueꞌ yesyəꞌəbeɉeꞌ deꞌe x̱ioꞌ zɉəyoꞌo zɉəyaz yic̱hɉlaꞌaždaoꞌ beṉəꞌ, naꞌ ḻeczə par nic̱h əsaꞌaqueꞌ yesyəꞌəyoneꞌ beṉəꞌ chsaꞌacšene.
\v 2 Naꞌ ḻeczə beneꞌ mendad žɉəsəꞌədix̱ɉuiꞌe de que Diozənꞌ ṉabiꞌe con notəꞌətezə beṉəꞌ soeꞌ latɉə. Naꞌ beneꞌ mendad yesyəꞌəyoneꞌ no beṉəꞌ güeꞌ.
\v 3 Naꞌ gožeꞌ ḻegaꞌaqueꞌ: ―Bito bi gox̱əꞌəle tnezənꞌ. Bito yeyilɉle garot gox̱əꞌəle, nic guaꞌale bsod, ni yet, ni mech, naꞌ bito guaꞌale c̱hopə xadoṉ.
\v 4 Naꞌ gatəꞌətezə əžinḻe naꞌ no ližei šoꞌole, naꞌatezə sole naꞌ naꞌatezə əsaꞌacle par šeɉəchle.
\v 5 Naꞌ gatəꞌətezə yež əžinḻe ga cui yesəꞌəgüialaogüeꞌ leꞌe, catəꞌ yesaꞌacle yežənꞌ əgwsiꞌiṉs ṉiꞌalenꞌ par yežib bište deꞌen gwžianṉəꞌ. Gonḻe caꞌ par nic̱h əgwloꞌigaꞌaqueleneꞌ de que deꞌe malənꞌ chsoꞌoneꞌ cui chosoꞌozenagueꞌ xtižəꞌ Diozənꞌ deꞌen choꞌele.
\p
\v 6 Nach disipl caꞌ ɉaꞌaqueꞌ to to yež, ɉəsəꞌədix̱ɉuiꞌe dižəꞌ güen dižəꞌ cobənꞌ naꞌ besyəꞌəyoneꞌ no beṉəꞌ güeꞌ.
\s1 Bagwsoꞌoteꞌ Juan benꞌ bc̱hoa beṉəꞌ nis
\p
\v 7 Naꞌ goberṉador Erodənꞌ goqueneꞌ tolə catəꞌ beneneꞌ yoguəꞌəḻoḻ deꞌen chon Jesoꞌosənꞌ len disipl c̱heꞌ caꞌ. Gocžeɉlažeꞌe c̱hedəꞌ baḻə beṉəꞌ gwseꞌeneꞌ de que babeban deꞌe Juanṉəꞌ ladɉo beṉəꞌ guat caꞌ naꞌ choneꞌ deꞌe quinga.
\v 8 Naꞌ yebaḻeꞌ gwseꞌeneꞌ de que profet Ḻiazənꞌ babelaꞌ yežlyo nga deꞌe yoblə naꞌ choneꞌ deꞌe quinga. Yebaḻeꞌ gosəꞌəneꞌ de que to profet beṉəꞌ gwzo canaꞌate babebaneꞌ ladɉo beṉəꞌ guat caꞌ naꞌ choneꞌ deꞌe quinga.
\v 9 Naꞌ Erodənꞌ gwneꞌ: ―Benaꞌ mendad gosəꞌəc̱hogueꞌ yen deꞌe Juanṉəꞌ, pero ¿noxa benga babendaꞌ dižəꞌ c̱hei?
\p Naꞌ gwdilɉlažeꞌe naclə goneꞌ par leꞌineꞌ Jesoꞌosənꞌ.
\s1 Bguao Jesoꞌosənꞌ gueyəꞌ mil beṉəꞌ
\p
\v 10 Naꞌ catəꞌ besyəꞌəžin disipl caꞌ ganꞌ zo Jesoꞌosənꞌ gwseꞌeneꞌ canꞌ ɉseꞌeneꞌenəꞌ. Naꞌ gwc̱heꞌe ḻegaꞌaqueꞌ partlə naꞌ ɉaꞌaqueꞌ to latɉə ganꞌ mbane syoda deꞌen nziꞌ Betsaida.
\v 11 Catəꞌ gwsaꞌacbeꞌi beṉəꞌ caꞌ nitəꞌ ganꞌ gwzo Jesoꞌosənꞌ de que bagwzeꞌe len disipl c̱heꞌ caꞌ nach ɉəsəꞌənaogüeꞌ ḻegaꞌaqueꞌ. Jesoꞌosənꞌ bebeineꞌ bgüialaogüeꞌ ḻegaꞌaqueꞌ naꞌ bsed bloꞌineꞌ de que Diozənꞌ ṉabiꞌe con notəꞌətezə beṉəꞌ soeꞌ latɉə. Naꞌ beyoneꞌ beṉəꞌ caꞌ chsaꞌacšene.
\p
\v 12 Catəꞌ gwzolao chxoa bgüižənꞌ nach disipl caꞌ šižiṉ gwseꞌe Jesoꞌosənꞌ: ―Bseḻəꞌ beṉəꞌ quinga yež caꞌ deꞌen nyec̱hɉ mbiꞌi nga par yesəꞌəyilɉeꞌ ganꞌ yesəꞌətaseꞌ naꞌ par nic̱h yesəꞌəželeneꞌ deꞌe seꞌeɉ əsaꞌogüeꞌ c̱hedəꞌ latɉə ganꞌ zocho nga naquən to ga cui no nḻaꞌ.
\p
\v 13 Pero naꞌ gož Jesoꞌosənꞌ ḻegaꞌaqueꞌ: ―Ḻeꞌe gwnežɉo deꞌe saꞌogüeꞌ.
\p Naꞌ gwseꞌeneꞌ: ―Gueyəꞌəga yetxtil naꞌ c̱hopga beḻ yaꞌa de c̱hecho. Lete šə siꞌichchon par gaquen əsaꞌo yoguəꞌ beṉəꞌ quinga.
\p
\v 14 Gosəꞌəneꞌ caꞌ c̱hedəꞌ laꞌ žaꞌ ca gueyəꞌ mil beṉəꞌ byo. Nach Jesoꞌosənꞌ gožeꞌ disipl c̱heꞌ caꞌ: ―Leꞌe gon mendad yesəꞌəbeꞌ šiyon güeɉə beṉəꞌ caꞌ.
\p
\v 15 Nach disipl caꞌ gwsoꞌoneꞌ mendad yesəꞌəbeꞌ yoguəꞌ beṉəꞌ caꞌ.
\v 16 Naꞌ Jesoꞌosənꞌ gwxiꞌe gueyəꞌ yetxtilənꞌ naꞌ c̱hopə beḻ yaꞌanəꞌ, naꞌ bgüieꞌ yobalə beꞌe yeḻəꞌ chox̱cwlen c̱he Diozənꞌ, naꞌ bzoxɉeꞌen naꞌ bnežɉueꞌen disipl c̱heꞌ caꞌ par gwsoꞌe c̱he c̱he beṉəꞌ caꞌ.
\v 17 Naꞌ yogueꞌe gwsaꞌogüeꞌen xte ca gwseꞌelɉeneꞌ. Nach pedas caꞌ besyəꞌəgaꞌaṉənꞌ bosyoꞌotobeꞌen, naꞌ gwsaꞌaquən šižiṉ žomə.
\s1 Bedənꞌ gwneꞌ de que Jesoꞌosənꞌ naqueꞌ benꞌ bseḻəꞌ Diozənꞌ
\p
\v 18 Naꞌ gozac yeto nitəꞌ disipl c̱heꞌ caꞌ len ḻeꞌ naꞌ Jesoꞌosənꞌ choneꞌ orasyon tozeꞌ. Nach gožeꞌ ḻegaꞌaqueꞌ: ―¿Binꞌ chəsəꞌəna beṉəꞌ zan caꞌ, nonꞌ nacaꞌ nadaꞌ?
\p
\v 19 Naꞌ gwseꞌe ḻeꞌ: ―Baḻeꞌ chəsəꞌəneꞌ nacoꞌ deꞌe Juan benꞌ bc̱hoa beṉəꞌ nis, naꞌ yebaḻeꞌ chəsəꞌəneꞌ de que nacoꞌ profet Ḻiazənꞌ benꞌ gwzo canaꞌ, naꞌ yebaḻeꞌ chəsəꞌəneꞌ de que nacoꞌ yeto profet beṉəꞌ gwzo canaꞌate naꞌ ḻeꞌenəꞌ babeban ladɉo beṉəꞌ guat caꞌ.
\p
\v 20 Nach gožeꞌ ḻegaꞌaqueꞌ: ―¿C̱hexa leꞌe? ¿bi nale? ¿nonꞌ nacaꞌ?
\p Nach gož Bedənꞌ ḻeꞌ: ―Lenꞌ nacoꞌ Crist benꞌ gwleɉ Diozənꞌ par gaquəlenoꞌ ṉasyon c̱hechonꞌ.
\s1 Jesoꞌosənꞌ gwdix̱ɉueꞌineꞌ disipl c̱heꞌ caꞌ de que gateꞌ
\p
\v 21 Nach Jesoꞌosənꞌ beneꞌ mendad len ḻegaꞌaqueꞌ de que ni toeꞌ cui əsoꞌe dižəꞌ de que ḻenꞌ naqueꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hegaꞌaqueꞌenəꞌ.
\v 22 Naꞌ gožeꞌ ḻegaꞌaqueꞌ: ―Nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Naꞌ deꞌe zan deꞌe chonən byen c̱hiꞌ sacaꞌa. Naꞌ ca naquə beṉəꞌ golə blao c̱he ṉasyon Izrael c̱hechonꞌ naꞌ beṉəꞌ blao c̱he bx̱oz c̱hecho caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ, cabi seꞌeɉḻeꞌe c̱hiaꞌ, naꞌ soꞌoteꞌ nadaꞌ, pero naꞌ yeyoṉ ža yosban Diozənꞌ nadaꞌ ladɉo beṉəꞌ guat caꞌ.
\p
\v 23 Nach gožeꞌ yoguəꞌ disipl c̱he caꞌ: ―Notəꞌətezle šə cheneꞌele gonḻilažəꞌəle nadaꞌ naꞌ gwzenagle c̱hiaꞌ, cheyaḻəꞌ əchoɉyic̱hɉle deꞌen cheneꞌele gon cuinḻe par nic̱h gonḻe con canꞌ cheneꞌe Diozənꞌ, naꞌ bito bi gaquele c̱he deꞌen c̱hiꞌ saquəꞌəle, ḻaꞌaṉəꞌəczə šə soꞌot beṉəꞌ leꞌe to ḻeꞌe yag coroz, con gonḻilažəꞌəle nadaꞌ naꞌ gwzenagle c̱hiaꞌ.
\v 24 Notəꞌətezle chaquele gonḻe par nic̱h cui c̱hiꞌ saquəꞌəle o par nic̱h cui no soꞌot leꞌe, cuiayiꞌile. Naꞌ notəꞌətezle chsanḻažəꞌ cuinḻe c̱hiꞌ saquəꞌəle o soꞌot beṉəꞌ leꞌe por ni c̱hiaꞌ bade yeḻəꞌ mban zeɉḻicaṉe c̱hele.
\v 25 Bito bi deꞌe güen gaquə c̱he to beṉəꞌ ḻaꞌaṉəꞌəczə ṉabiꞌe doxen yežlyonꞌ šə cuiayiꞌe cui gatəꞌ yeḻəꞌ mban c̱heꞌ zeɉḻicaṉe.
\v 26 Notəꞌətezle šə chetoꞌile c̱hiaꞌ naꞌ c̱he xtižaꞌanəꞌ, ḻeczə caꞌ nadaꞌ yetoꞌidaꞌ c̱hele, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Yetoꞌidaꞌ c̱hele catəꞌən yidaꞌ deꞌe yoblə nsaꞌa yeḻəꞌ chey cheꞌeniꞌ c̱hiaꞌanəꞌ naꞌ yeḻəꞌ chey cheꞌeniꞌ c̱he X̱aꞌ Diozənꞌ, naꞌ yeḻəꞌ chey cheꞌeniꞌ c̱he angl c̱he Diozənꞌ.
\v 27 Echniaꞌ de que baḻle cabiṉəꞌ gatle catəꞌ leꞌile canꞌ gon Diozənꞌ əgwloꞌe yeḻəꞌ gwnabiaꞌ c̱heꞌenəꞌ.
\s1 Jesoꞌosənꞌ goqueꞌ ca to deꞌe chey cheꞌeniꞌ
\p
\v 28 Naꞌ goc to xman gwna Jesoꞌosənꞌ caꞌ, gwyeɉeꞌ to lao yaꞌa ɉeneꞌ orasyon, naꞌ gwc̱heꞌe Bedənꞌ len Juanṉəꞌ naꞌ Jacobənꞌ.
\v 29 Naꞌ lao beneꞌ orasyonṉəꞌ goc choꞌalaogüeꞌenəꞌ ca deꞌe chey cheꞌeniꞌ, naꞌ xalaneꞌenəꞌ beyaquən šyiš xiləꞌ xte gwṉatitən.
\v 30 Naꞌ lao or naꞌ deꞌe Moisezənꞌ len profet Ḻiazənꞌ benꞌ gwzo canaꞌ besyəꞌəžineꞌ ganꞌ zo Jesoꞌosənꞌ naꞌ Jesoꞌosənꞌ beꞌeleneꞌ ḻegaꞌaqueꞌ dižəꞌ.
\v 31 Gwsoꞌe dižəꞌ ca naquənꞌ bazon gateꞌ Jerosalenṉəꞌ. Naꞌ yeḻəꞌ chey cheꞌeniꞌ c̱he Diozənꞌ gwyec̱hɉən ḻegaꞌaqueꞌ.
\v 32 Naꞌ Bedənꞌ len beṉəꞌ caꞌ yec̱hopə ḻechguaḻe gwsaꞌac šə tasgaꞌaqueꞌ. Pero catəꞌ bechoɉ bišgal c̱hegaꞌaqueꞌenəꞌ besəꞌəleꞌineꞌ Jesoꞌosənꞌ len yeḻəꞌ chey cheꞌeniꞌ c̱heꞌenəꞌ, zecheꞌ choꞌeleneꞌ deꞌe Moisezənꞌ len profet Ḻiazənꞌ dižəꞌ.
\v 33 Naꞌ žlac besyəꞌəṉitlao deꞌe Moisezənꞌ len profet Ḻiazənꞌ, Bedənꞌ gožeꞌ Jesoꞌosənꞌ: ―Maestr, güenchgua zocho nga ṉaꞌa. ¿Eguaquə gontoꞌ šoṉə ranš, ton par leꞌ, naꞌ yeton par Moisezənꞌ, naꞌ yeton par Ḻiazənꞌ?
\p Gwneꞌ caꞌ c̱hedəꞌ bito beneꞌ xbab c̱he deꞌen gwneꞌ.
\v 34 Naꞌ lao gwneꞌ caꞌ gwyec̱hɉ beɉonꞌ ḻegaꞌaqueꞌ naꞌ besəꞌəžebeꞌ laogüe deꞌen goc caꞌ.
\v 35 Naꞌ gwseꞌeneneꞌ gož Diozənꞌ ḻegaꞌaqueꞌ: ―Benganꞌ xiꞌiṉaꞌ, benꞌ chacchgüeidaꞌ c̱hei. C̱he ḻeꞌenəꞌ ḻeꞌe gwzenag.
\p
\v 36 Naꞌ catəꞌ beyož gož Diozənꞌ ḻegaꞌaqueꞌ caꞌ, besəꞌəleꞌineꞌ yetozə Jesoꞌosənꞌ. Naꞌ ca tyemp naꞌ bitobi dižəꞌ gwsoꞌeleneꞌ yeziquəꞌəchlə beṉəꞌ ca naquə deꞌen bagwseꞌen besəꞌəleꞌineꞌenəꞌ. Con gwnitəꞌətezeꞌ žizə c̱he deꞌe caꞌ.
\s1 Beyon Jesoꞌosənꞌ to biꞌi yoꞌo yaz deꞌe x̱ioꞌ
\p
\v 37 Naꞌ beteyo catəꞌ bac̱h besyəꞌəyetɉeꞌ yaꞌanəꞌ, ɉəsəꞌəšag beṉəꞌ zan ḻegaꞌaqueꞌ ganꞌ niteꞌenəꞌ.
\v 38 Naꞌ entr beṉəꞌ zan caꞌ toeꞌ gwṉeꞌ zižɉo naꞌ gožeꞌ Jesoꞌosənꞌ: ―Maestr, chatəꞌəyoidaꞌ leꞌ gaquəlenšgoꞌ xiꞌiṉaꞌ nga, c̱hedəꞌ nacboꞌ xiꞌiṉaꞌ tlišəꞌ.
\v 39 Chṉiz deꞌe x̱iꞌonəꞌ ḻeboꞌ, naꞌ ḻeꞌe chgosyaꞌaten ḻeboꞌ, naꞌ chonen par chazboꞌ šon xte chlaꞌ bžinꞌ choꞌaboꞌ, naꞌ chonən ḻeboꞌ ziꞌ, naꞌ caṉe chechoɉənꞌ ḻeboꞌ.
\v 40 Bagotəꞌəyoidaꞌ disipl c̱hioꞌ caꞌ par nic̱h yesyəꞌəbeɉeꞌ deꞌe x̱iꞌonəꞌ choꞌo chaz yic̱hɉlaꞌaždaꞌoboꞌonəꞌ, pero bito gwsaꞌaqueꞌ yesyəꞌəbeɉeꞌen.
\p
\v 41 Naꞌ Jesoꞌosənꞌ gožeꞌ beṉəꞌ caꞌ žaꞌanəꞌ: ―¿Bixc̱hexanꞌ cui cheɉḻeꞌele c̱hiaꞌ? Clellənꞌ chonḻe naꞌ nalɉele. Bachac sša zoaꞌ napaꞌ yeḻəꞌ chxenḻažəꞌ len leꞌe. ¿Batxanꞌ šeɉḻeꞌele c̱hiaꞌ?
\p Nach gožeꞌ x̱a bidaꞌonəꞌ: ―Doaꞌ xiꞌiṉoꞌ nga.
\p
\v 42 Naꞌ lao zɉsoꞌeboꞌ lao Jesoꞌosənꞌ bṉiz deꞌe x̱iꞌonəꞌ ḻeboꞌ, naꞌ benən par nic̱h ḻechguaḻe fuert gwyazboꞌ šonṉəꞌ, naꞌ bchix̱ btoḻən ḻeboꞌ lao yonꞌ. Naꞌ Jesoꞌosənꞌ gwdiḻeꞌ deꞌe x̱iꞌonəꞌ par nic̱h bechoɉən ḻoꞌo yic̱hɉlaꞌaždaꞌoboꞌonəꞌ naꞌ beyaqueboꞌ. Gwde naꞌ beyoneꞌeboꞌ lao naꞌ x̱aboꞌonəꞌ.
\v 43 Naꞌ yogueꞌe besyəꞌəbaneneꞌ besəꞌəleꞌineꞌ yeḻəꞌ guac c̱he Diozənꞌ.
\s1 Deꞌe yoblə gwdix̱ɉueꞌe Jesoꞌosənꞌ de que gateꞌ
\p Naꞌ besyəꞌəbaneneꞌ c̱he yoguəꞌ deꞌen chon Jesoꞌosənꞌ. Naꞌ lao niteꞌe caꞌ, Jesoꞌosənꞌ gožeꞌ disipl c̱heꞌ caꞌazə:
\v 44 ―Ḻegon par nic̱h dižəꞌ nga šoꞌon yic̱hɉlaꞌaždaꞌolenꞌ, c̱hedəꞌ laꞌ nadaꞌ gacaꞌ lao naꞌ beṉəꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 45 Pero naꞌ disipl caꞌ bito gwseꞌeɉniꞌineꞌ dižəꞌ deꞌen beꞌ Jesoꞌosənꞌ len ḻegaꞌaqueꞌ, c̱hedəꞌ bito gožeꞌ ḻegaꞌaqueꞌ clar bi zeɉen, naꞌ besəꞌəžebeꞌ par yesəꞌəṉabeneꞌ ḻeꞌ bi zeɉen deꞌe gožeꞌ ḻegaꞌaqueꞌ.
\s1 Gwsaꞌacyožə disipl c̱heꞌ caꞌ noeꞌ naquə blaoch
\p
\v 46 Naꞌ gwsaꞌacyožə disipl c̱heꞌ caꞌ entr ḻegaꞌaqueꞌ noeꞌ naquə beṉəꞌ blaoch.
\v 47 Jesoꞌosənꞌ gocbeꞌineꞌ xbab deꞌen gwsoꞌoneꞌenəꞌ naꞌ goxeꞌ to bidaoꞌ naꞌ bsoꞌeboꞌ cuiteꞌenəꞌ.
\v 48 Naꞌ gožeꞌ ḻegaꞌaqueꞌ: ―Šə chonḻe güen len bidaoꞌ nga o len notəꞌətezəchlə bidaoꞌ laogüe deꞌen chaquele c̱hiaꞌ, chonczle güen len nadaꞌanəꞌ. Naꞌ catəꞌ chonḻe güen len nadaꞌ, ḻeczə chonczle güen len Diozənꞌ benꞌ bseḻəꞌ nadaꞌ. Naꞌ notəꞌətezle catəꞌ chonḻe xbab c̱he cuinḻe de que cuitec bi zaquəꞌəle, banaquəczle beṉəꞌ blao.
\s1 Benꞌ cui chon contr chioꞌo txenczənꞌ choneꞌ len chioꞌo
\p
\v 49 Nach Juanṉəꞌ gožeꞌeneꞌ: ―Maestr, babežagtoꞌ to beṉəꞌ choꞌe laꞌonəꞌ par chebeɉeꞌ deꞌe x̱ioꞌ deꞌen yoꞌo yaz yic̱hɉlaꞌaždaoꞌ beṉəꞌ, naꞌ bžontoꞌ goneꞌ caꞌ c̱hedəꞌ bito choneꞌ txen len chioꞌo.
\p
\v 50 Nach Jesoꞌosənꞌ gožeꞌeneꞌ: ―Bito gwžonḻe goneꞌ caꞌ c̱hedəꞌ šə to beṉəꞌ cui choneꞌ contr chioꞌo, txenczənꞌ choneꞌ len chioꞌo.
\s1 Jesoꞌosənꞌ gwdiḻeꞌ Jacobənꞌ naꞌ Juanṉəꞌ
\p
\v 51 Naꞌ laogüe bazon baozə par yeziꞌ yecaꞌa Diozənꞌ ḻeꞌ, gwc̱hoglažeꞌe šeɉeꞌ Jerosalenṉəꞌ.
\v 52 Naꞌ bseḻeꞌe to c̱hopə beṉəꞌ gosəꞌəbialao laogüeꞌenəꞌ. Naꞌ ɉaꞌaqueꞌ to yež ganꞌ mbane Samarianꞌ par nic̱h žɉəsəꞌəsiꞌiniꞌe ganꞌ so Jesoꞌosənꞌ len disipl c̱heꞌ caꞌ.
\v 53 Pero beṉəꞌ Samaria caꞌ bito besəꞌəgüialaogüeꞌ ḻegaꞌaqueꞌ, c̱hedəꞌ Jesoꞌosənꞌ len disipl c̱heꞌ caꞌ chɉaꞌaqueꞌ Jerosalenṉəꞌ.
\v 54 Naꞌ disipl c̱heꞌ caꞌ c̱hopə, Juanṉəꞌ len Jacobənꞌ, catəꞌ besəꞌəleꞌineꞌ canꞌ gwsoꞌon beṉəꞌ Samaria caꞌ nach gosəꞌəṉabeneꞌ Jesoꞌosənꞌ gwseꞌeneꞌ: ―Maestr, ¿əcheꞌendoꞌ gontoꞌ canꞌ ben profet Ḻiazənꞌ benꞌ gwzo canaꞌ, əṉabetoꞌ Diozənꞌ əseḻeꞌe yiꞌ par əgwzeyən beṉəꞌ quinga?
\p
\v 55 Pero Jesoꞌosənꞌ gwyec̱hɉeꞌ naꞌ gwdiḻeꞌ ḻegaꞌaqueꞌ gožeꞌ: ―Leꞌe bito ṉezele nonꞌ chnabiaꞌ yic̱hɉlaꞌaždaꞌolenꞌ.
\v 56 Laꞌ nadaꞌ bito bidaꞌ par əgwžiayiꞌa beṉac̱hənꞌ, sino bidaꞌ par nic̱h gonaꞌ ca cui žɉəyaꞌaqueꞌ lao yiꞌ gabiḻənꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p Nach ɉaꞌaqueꞌ yež yoblə.
\s1 Canꞌ gož Jesoꞌosənꞌ beṉəꞌ caꞌ gwseꞌene yesəꞌənaogüeꞌeneꞌ
\p
\v 57 Lao zɉaꞌaqueꞌenəꞌ to beṉəꞌ gožeꞌ ḻeꞌ: ―Saꞌalenaꞌ leꞌ gatəꞌətezə šeɉoꞌ.
\p
\v 58 Nach gož Jesoꞌosənꞌ ḻeꞌ: ―Zɉəde liž becoyoꞌo caꞌ naꞌ ḻeczə caꞌ zɉəde liž bia caꞌ zo x̱ileꞌe bia chaš yoba, pero bito bi xlatɉaꞌ de ganꞌ gonaꞌ dezcanz, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 59 Naꞌ Jesoꞌosənꞌ gožeꞌ yeto beṉəꞌ: ―Denao nadaꞌ.
\p Pero beꞌenəꞌ gožeꞌ ḻeꞌ: ―X̱anaꞌ beꞌ latɉə zguaꞌatec yegaꞌaṉlenaꞌ x̱aꞌanəꞌ xte catəꞌ əžin ža gateꞌ par nic̱h əgwcuašaꞌaneꞌ.
\p
\v 60 Naꞌ gož Jesoꞌosənꞌ ḻeꞌ: ―Beṉəꞌ caꞌ zɉənaquə len yic̱hɉlaꞌaždaꞌogaꞌaquenꞌ ca beṉəꞌ guat guaquə yesəꞌəcuašeꞌe beṉəꞌ guat caꞌ. Pero leꞌ ɉətix̱ɉueꞌe de que Diozənꞌ ṉabiꞌe con notəꞌətezə beṉəꞌ soeꞌ latɉə.
\p
\v 61 Nach ḻeczə yetoeꞌ gožeꞌ Jesoꞌosənꞌ: ―Saꞌalenaꞌ leꞌ X̱anaꞌ, pero zguaꞌatec beꞌešga latɉə žɉəyezeidaꞌ famiḻy c̱hiaꞌ dižəꞌ.
\p
\v 62 Jesoꞌosənꞌ gožeꞌ ḻeꞌ: ―Beṉəꞌ bagwzolao naogüeꞌ nadaꞌ šə bito naogüeꞌ do yic̱hɉ do lažeꞌe, naꞌ šə yoꞌo yic̱hɉeꞌ c̱he deꞌe caꞌ bocuaꞌaṉeꞌ, bito zaqueꞌe par goneꞌ xšin Diozənꞌ. Naꞌ gwxaquəꞌəlebeneꞌ ca to beṉəꞌ chgüia traslə žlac chguaꞌaṉeꞌ goꞌoṉ.
\c 10
\s1 Jesoꞌosənꞌ bseḻeꞌe gyonši beṉəꞌ žɉəsəꞌədix̱ɉuiꞌe xtižeꞌenəꞌ
\p
\v 1 Gwde deꞌe quinga, X̱anchonꞌ gwleɉeꞌ gyonši beṉəꞌ. Naꞌ beneꞌ mendad yesəꞌəbialaogüeꞌ əžɉaꞌac c̱hopə güeɉeꞌ to to syoda naꞌ to to yež ganꞌ zeꞌe šeɉ ḻeꞌ.
\v 2 Naꞌ antslə zeꞌe žɉaꞌaqueꞌ gožeꞌ ḻegaꞌaqueꞌ: ―Deꞌen chonaꞌanəꞌ gwxaquəꞌəleben ca to cwseš xen deꞌen chotobaꞌ. Naꞌ chyažɉdaꞌ beṉəꞌ zan saꞌacleneꞌ nadaꞌ, pero to c̱hopgale nitəꞌ. Deꞌe naꞌanəꞌ ḻeṉabe X̱ancho Diozənꞌ əseḻəꞌəcheꞌ beṉəꞌ zanch par əsaꞌacleneꞌ chioꞌo c̱hix̱ɉueꞌecho xtižeꞌenəꞌ.
\v 3 Naꞌ ḻeꞌe gon xbab de que nadanꞌ chseḻaꞌa leꞌe žɉətix̱ɉueꞌile xtižaꞌan len beṉəꞌ caꞌ gwxaquəꞌəlebe ca bež, naꞌ leꞌe gwxaquəꞌəlebele ca xiləꞌ daoꞌ ladɉogaꞌaqueꞌenəꞌ. Canꞌ chsoꞌon bež caꞌ chsoꞌotteb xiləꞌ daoꞌ, ḻeczə canꞌ seꞌene beṉəꞌ soꞌoteꞌ leꞌe.
\v 4 Bito guaꞌale mech, ni xalaꞌanḻe, ni xelle, naꞌ bito šeile ganꞌ əgguaple beṉəꞌ diox beṉəꞌ yežagle tnez.
\v 5 Naꞌ notəꞌətezə ližei šoꞌole, zguaꞌatec əṉale: “Chṉablažəꞌəšga so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ, leꞌe nitəꞌəle nga.”
\v 6 Šə naꞌ zo to beṉəꞌ cheneꞌeneꞌ so cuezeꞌ binḻo len xbab deꞌen yoꞌo ḻoꞌo yic̱hɉlaꞌaždaogüeꞌenəꞌ, naꞌ gaquə canꞌ bagwṉablažəꞌəle par so cuezeꞌ binḻo. Pero šə bito no zo no chon ca so cuezeꞌ binḻo len xbab deꞌen yoꞌo ḻoꞌo yic̱hɉlaꞌaždaogüeꞌen, bito gaquə ca deꞌen bagwṉablažəꞌəlenꞌ.
\v 7 Naꞌ ḻeꞌe yoꞌo naꞌatezə yegaꞌaṉle. Bito yeyilɉle ga yoblə sole. Ḻeꞌe yeꞌeɉ ḻeꞌe gao bitəꞌətezə deꞌen soꞌoṉeꞌ yeꞌeɉ gaole. Ca to beṉəꞌ güen žin cheyaḻəꞌ siꞌe laxɉueꞌ, ḻeꞌegatezə caꞌ leꞌe zaquəꞌəle par soꞌoṉeꞌ deꞌe yeꞌeɉ deꞌe gaole.
\v 8 Naꞌ catəꞌ əžinḻe to yež ga əsoꞌelaogüeꞌe leꞌe, yeꞌeɉ gaotezle deꞌen soꞌoṉeꞌ leꞌe.
\v 9 Ḻeꞌe yeyon beṉəꞌ güeꞌ nitəꞌ yež ganꞌ əžinḻenꞌ, naꞌ ḻeꞌe yeꞌegaꞌaqueꞌ: “Babžin ža cheneꞌe Diozənꞌ güeꞌele latɉə ṉabiꞌe leꞌe.”
\v 10 Pero naꞌ catəꞌ əžinḻe to yež ga cui yesəꞌəgüialaogüeꞌ leꞌe, ḻežɉaꞌac lao lqueyənꞌ naꞌ ḻeꞌe yeꞌegaꞌaqueꞌ:
\v 11 “Bište c̱he lažle nga deꞌen žia ṉiꞌatoꞌ quinga yosiꞌiṉstoꞌon par nic̱h əgwloꞌitoꞌ leꞌe de que deꞌe malənꞌ chonḻe bito chzenagle xtižəꞌ Diozənꞌ deꞌen choꞌetoꞌonəꞌ. Pero naꞌ chyix̱ɉueꞌitoꞌ leꞌe de que Diozənꞌ cheneꞌeneꞌ güeꞌele latɉə ṉabiꞌe leꞌe.”
\p
\v 12 Naꞌ gož Jesoꞌosənꞌ beṉəꞌ gyonši caꞌ: ―Diozənꞌ beneꞌ par nic̱h byiṉɉ yiꞌ naꞌ sofr laoꞌ syoda Sodomanꞌ por ni c̱he deꞌen cui bosoꞌozenag beṉəꞌ caꞌ c̱heꞌ. Naꞌ deꞌe ḻi əchniaꞌ leꞌe, žanꞌ gaquə juisyənꞌ beṉəꞌ caꞌ cui yosoꞌogüialao leꞌe yesəꞌəzaquəꞌəziꞌicheꞌ clezə ca beṉəꞌ caꞌ gwnitəꞌ Sodomanꞌ.
\s1 Beṉəꞌ caꞌ cui chosoꞌozenag xtižəꞌ Jesoꞌosənꞌ
\p
\v 13 Nach gozna Jesoꞌosənꞌ: ―¡Probchguazə leꞌe beṉəꞌ Corazin! ¡Probchguazə leꞌe beṉəꞌ Betsaida! Beṉəꞌ caꞌ nitəꞌ Tiro naꞌ Sidon ḻeꞌe besyəꞌədiṉɉteineꞌ xtoḻəꞌəgaꞌaqueꞌenəꞌ žaləꞌ bloꞌigaꞌacdaꞌaneꞌ yeḻəꞌ guac c̱hiaꞌanəꞌ ca deꞌen babloꞌidaꞌ leꞌe. Žaləꞌ goquə caꞌ saꞌazlɉeꞌ lachəꞌ zešəꞌ naꞌ zosəꞌəžaꞌalɉa cuingaꞌaqueꞌ de par nic̱h saꞌacbeꞌi beṉəꞌ de que babesyəꞌədiṉɉeneꞌ xtoḻəꞌəgaꞌaqueꞌenəꞌ.
\v 14 Saquəꞌəziꞌichle clezə ca beṉəꞌ caꞌ nitəꞌ Tiro naꞌ Sidon catəꞌ əžin ža gaquə juisyənꞌ.
\v 15 Leꞌe nitəꞌəle Capernaunṉəꞌ chonḻe xbabənꞌ de que Diozənꞌ goṉchgüeꞌ leꞌe yeḻəꞌ balaꞌaṉ. Pero bito goṉeꞌ leꞌe yeḻəꞌ balaꞌaṉ, sino goṉeꞌ leꞌe castigw zeɉḻicaṉe deꞌen cui cheɉḻeꞌele c̱hiaꞌ.
\p
\v 16 Nach Jesoꞌosənꞌ gozeꞌe beṉəꞌ gyonši caꞌ: ―Beṉəꞌ gwzenag xtižəꞌəlenꞌ ḻeczə gwzenagueꞌ xtižaꞌanəꞌ, naꞌ beṉəꞌ gonczə yic̱hɉlaogüe cui gwzenagueꞌ xtižəꞌəlenꞌ, ḻeczə bito gwzenagueꞌ c̱hiaꞌ nadaꞌ. Naꞌ beṉəꞌ gonczə yic̱hɉlaogüe cui gwzenagueꞌ xtižaꞌanəꞌ, ḻeczə bito gwzenagueꞌ xtižəꞌ Diozənꞌ benꞌ bseḻəꞌ nadaꞌ.
\s1 Besyəꞌəžin beṉəꞌ gyonši caꞌ
\p
\v 17 Beṉəꞌ gyonši caꞌ catəꞌ beyož ɉəsəꞌədix̱ɉuiꞌe xtižəꞌ Jesoꞌosənꞌ besyəꞌəžineꞌ ganꞌ zoeꞌ, naꞌ besyəꞌəbeichgüeineꞌ. Nach gwseꞌe Jesoꞌosənꞌ: ―X̱antoꞌ, deꞌe zan miḻagr babentoꞌ choꞌetoꞌ laꞌonəꞌ par chebeɉtoꞌ deꞌe x̱ioꞌ caꞌ deꞌen zɉəyoꞌo zɉəyaz yic̱hɉlaꞌaždaoꞌ beṉəꞌ naꞌ chosoꞌozenaguən c̱hetoꞌ.
\p
\v 18 Naꞌ gožeꞌ ḻegaꞌaqueꞌ: ―Bleꞌidaꞌ canꞌ gwnit yeḻəꞌ gwnabiaꞌ c̱he Satanasənꞌ to žalṉez.
\v 19 Babeṉaꞌ leꞌe yeḻəꞌ guac par nic̱h əgwleɉ əgwšošɉle no beḻ əzniaꞌ naꞌ no bex̱goniꞌ, naꞌ ḻeczə əgwleɉ əgwšošɉle gwxiyeꞌenəꞌ. Naꞌ bito bi de deꞌe soi gonen leꞌe ziꞌ.
\v 20 Pero bito yebeitequele de que deꞌe x̱ioꞌ caꞌ chosoꞌozenaguən c̱hele, sino ḻeꞌe yebeichgüei de que Diozənꞌ babzoɉeꞌ lalenꞌ ḻeꞌe ḻibrənꞌ ganꞌ zɉənyoɉ la yoguəꞌəḻoḻ xiꞌiṉeꞌ caꞌ.
\s1 Bebeichgüei Jesoꞌosənꞌ
\p
\v 21 Lao or naꞌatezə ben Spirit c̱he Diozənꞌ ca bebeichgüei Jesoꞌosənꞌ. Naꞌ beneꞌ orasyon lao Diozənꞌ, gwneꞌ: ―X̱aꞌ lenꞌ chnabiꞌo beṉəꞌ caꞌ žaꞌ yobanꞌ naꞌ yežlyonꞌ. Naꞌ choṉaꞌ yeḻəꞌ chox̱cwlen c̱hioꞌ de que babzeɉniꞌidoꞌ baḻə beṉəꞌ canꞌ cheꞌendoꞌ soꞌe latɉə ṉabiꞌo yic̱hɉlaꞌaždaꞌogaꞌaqueꞌenəꞌ. Babzeɉniꞌidoꞌon beṉəꞌ caꞌ gwsaꞌacbeꞌi chəsəꞌəyažɉeneꞌ no əgwsed əgwloꞌi ḻegaꞌaqueꞌ naꞌ bito bzeɉniꞌidoꞌon beṉəꞌ caꞌ chsoꞌon xbab de que zɉənaqueꞌ beṉəꞌ sinꞌ naꞌ beṉəꞌ zɉənyeɉniꞌi. Benoꞌ caꞌ ža X̱a, c̱hedəꞌ canꞌ gwyazlažoꞌo.
\p
\v 22 Nach gožeꞌ beṉəꞌ caꞌ žaꞌanəꞌ: ―X̱aꞌanəꞌ babeneꞌ lao naꞌa chonaꞌ par nic̱h chombiaꞌ beṉəꞌ ḻeꞌ. Ḻeꞌ nombiꞌayaṉeꞌe nadaꞌ naꞌ nadaꞌ nombiꞌayaṉaꞌa ḻeꞌ. Naꞌ beṉəꞌ caꞌ bagwleɉaꞌ par zɉənombiꞌe X̱aꞌanəꞌ, chonaꞌ par nic̱h zɉənombiꞌeneꞌ. Naꞌ notono no nochlə zɉənombiaꞌ X̱aꞌanəꞌ naꞌ ni nadaꞌ.
\p
\v 23 Naꞌ gwyec̱hɉ Jesoꞌosənꞌ bgüieꞌ disipl c̱heꞌ caꞌ naꞌ gožeꞌ ḻegaꞌaczeꞌ: ―Mbalaz zole ca deꞌen chleꞌile nadaꞌ naꞌ chleꞌiteile deꞌe caꞌ chonaꞌ.
\v 24 Echniaꞌ leꞌe, beṉəꞌ zan profet naꞌ rei gwseꞌeneneꞌ yesəꞌəleꞌineꞌ nadaꞌ, pero bitoch goḻəꞌ yesəꞌəleꞌineꞌ nadaꞌ. Naꞌ gwseꞌeneneꞌ yesəꞌəṉezeneꞌ deꞌen ṉezele, pero bitoch goḻəꞌ yesəꞌəṉezeneꞌen.
\s1 Jempl c̱he to beṉəꞌ güen beṉəꞌ Samaria
\p
\v 25 Naꞌ gwzecha to beṉəꞌ chsed chloꞌi ḻei deꞌen bzoɉ deꞌe Moisezənꞌ. Goneꞌeneꞌ goneꞌ Jesoꞌosənꞌ prueb binꞌ əṉeꞌ naꞌ gožeꞌeneꞌ: ―Maestr, ¿bi cheyaḻəꞌ gonaꞌ par nic̱h gatəꞌ yeḻəꞌ mban zeɉḻicaṉe c̱hiaꞌ?
\p
\v 26 Naꞌ gož Jesoꞌosənꞌ ḻeꞌ: ―¿Binꞌ nyoɉən ḻeꞌe ḻeinꞌ? ¿Nac nan?
\p
\v 27 Naꞌ benꞌ cheɉniꞌichgüei c̱he ḻeinꞌ božiꞌe xtižəꞌ Jesoꞌosənꞌ gožeꞌeneꞌ: ―Ḻei c̱hechonꞌ nan: “Cheyaḻəꞌ gaquecho c̱he X̱ancho Diozənꞌ do yic̱hɉ do lažəꞌəcho, do fuers balor c̱hecho, naꞌ gaquecho c̱he lɉuežɉcho catg chaquecho c̱he cuincho.”
\p
\v 28 Nach gož Jesoꞌosənꞌ ḻeꞌ: ―Deꞌe ḻiczə canꞌ bagwnaoꞌ. Canꞌ cheyaḻəꞌ gonoꞌ par əbanoꞌ zeɉḻicaṉe.
\p
\v 29 Naꞌ beꞌenəꞌ goneꞌeneꞌ əgwloꞌe de que zdaczeꞌ ḻicha canꞌ nanṉəꞌ naꞌ gožeꞌ Jesoꞌosənꞌ: ―¿Nonꞌ naquə lɉuežɉaꞌ benꞌ cheyaḻəꞌ gaquədaꞌ c̱hei?
\p
\v 30 Naꞌ Jesoꞌosənꞌ gožeꞌeneꞌ: ―To beṉəꞌ bezeꞌe Jerosalenṉəꞌ par yežineꞌ Jerico naꞌ ɉəsyəꞌəxen beṉəꞌ bguan ḻeꞌ. Naꞌ gosəꞌəyiṉeꞌ xalaꞌaneꞌenəꞌ naꞌ gwsoꞌot gosəꞌəyineꞌ ḻeꞌ nach besaꞌaqueꞌ bosyoꞌocuaꞌaṉeꞌeneꞌ caczə to beṉəꞌ guat.
\v 31 Naꞌ goquənꞌ to bx̱oz gwdieꞌ tnezənꞌ naꞌ catəꞌ bleꞌineꞌ benꞌ deꞌenəꞌ, nach gwdieꞌ yešḻaꞌalə nezənꞌ.
\v 32 Ḻeczə canꞌ ben to beṉəꞌ golɉə lao dia c̱he deꞌe Lebinꞌ. (Beṉəꞌ caꞌ yoꞌo lao naꞌagaꞌaqueꞌ soꞌoneꞌ mendad ḻoꞌo yoꞌodaoꞌ əblaonəꞌ.) Zdeꞌ tnezənꞌ naꞌ catəꞌ bžineꞌ ganꞌ bleꞌineꞌ de beꞌenəꞌ naꞌ gwdieꞌ yešḻaꞌalə nezənꞌ.
\v 33 Pero to beṉəꞌ Samaria lao ngüeꞌe nezənꞌ nḻagueꞌ xporrenꞌ bžineꞌ ganꞌ de beꞌenəꞌ naꞌ ca bleꞌineꞌ ḻeꞌ beyašəꞌəlažeꞌeneꞌ.
\v 34 Naꞌ bgüigueꞌe ganꞌ deꞌenəꞌ, naꞌ bšoneꞌ set naꞌ bino lao güeꞌenəꞌ, naꞌ bc̱heɉeꞌen lachəꞌ. Nach božieꞌeneꞌ cožəꞌ xporreꞌenəꞌ. Naꞌ bec̱heꞌeneꞌ ganꞌ zo to meson ganꞌ bgüia byeꞌeneꞌ.
\v 35 Naꞌ beteyo gwleɉeꞌ c̱hopə mech deꞌen nziꞌ denario bnežɉueꞌen x̱an mesonṉəꞌ naꞌ gožeꞌeneꞌ: “Bgüia bye benga naꞌ šə bichlə deꞌen gonoꞌ gast naꞌ c̱hixɉuaꞌan catəꞌ zezaꞌa.”
\v 36 Beyož beꞌ Jesoꞌosənꞌ dižəꞌ canꞌ goc c̱he benꞌ ɉəsyəꞌəxen beṉəꞌ bguan caꞌ, nach gožeꞌ benꞌ chsed chloꞌi ḻeinꞌ: ―¿Bi chacdoꞌ? ¿noeꞌ beṉəꞌ caꞌ goqueneꞌ de que beṉəꞌ probənꞌ naquə lɉuežɉeꞌ benꞌ cheyaḻəꞌ gaqueneꞌ c̱hei?
\p
\v 37 Nach benꞌ chsed chloꞌi ḻeinꞌ gožeꞌ Jesoꞌosənꞌ: ―Benꞌ beyašəꞌ bežiꞌilažəꞌ benꞌ ɉəsyəꞌəxen beṉəꞌ bguan caꞌ.
\p Nach gož Jesoꞌosənꞌ ḻeꞌ: ―Ḻeczə canꞌ cheyaḻəꞌ gonoꞌ dezd ṉaꞌa, yeyašəꞌ yežiꞌilažoꞌo yoguəꞌəḻoḻ beṉəꞌ.
\s1 Jesoꞌosənꞌ ɉəlaṉeꞌe Martənꞌ naꞌ Marianꞌ
\p
\v 38 Naꞌ lao zɉaꞌaqueꞌ besyəꞌəžineꞌ to yež, naꞌ to noꞌolə le Mart beneꞌ ḻeꞌ combid naꞌ Jesoꞌosənꞌ gwyeɉeꞌ ližeꞌen.
\v 39 Naꞌ zo to bileꞌ leꞌ Maria. Naꞌ Marianꞌ gwchiꞌe cuit Jesoꞌosənꞌ par bzenagueꞌ xtižeꞌenəꞌ.
\v 40 Pero naꞌ Martənꞌ belaḻchgüeineꞌ bsiꞌiniꞌe deꞌen saꞌogüeꞌ. Naꞌ gwyeɉeꞌ lao Jesoꞌosənꞌ naꞌ gožeꞌeneꞌ: ―X̱anaꞌ, ¿əcabi bi chacdoꞌ de que bilaꞌanəꞌ bocuaꞌaṉleneꞌ nadaꞌ mendadənꞌ tozaꞌ? Benšga mendad gaquəleneꞌ nadaꞌ.
\p
\v 41 X̱anchonꞌ gožeꞌ ḻeꞌ: ―Mart, chiꞌichgua yic̱hɉoꞌ c̱he xmendadoꞌonəꞌ naꞌ chacžeɉlažoꞌo laogüe deꞌen nyanchguan.
\v 42 Maria nga bagwleɉeꞌ deꞌen naquəch deꞌe güen, chiꞌichgua yic̱hɉeꞌ chzenagueꞌ c̱hiaꞌ. Naꞌ bito gwžoncho goneꞌ caꞌ. Ḻezən deꞌen žialao gonḻe.
\c 11
\s1 Jesoꞌosənꞌ bloꞌineꞌ canꞌ soꞌoneꞌ orasyon
\p
\v 1 Naꞌ gwzo Jesoꞌosənꞌ to latɉə beneꞌ orasyon. Catəꞌ beyož beneꞌ orasyonṉəꞌ to disipl c̱heꞌ caꞌ gožeꞌeneꞌ: ―X̱antoꞌ, bsed bloꞌišguei netoꞌ naquənꞌ cheyaḻəꞌ gontoꞌ orasyonṉəꞌ, canꞌ bsed əbloꞌi deꞌe Juanṉəꞌ disipl c̱heꞌ caꞌ.
\p
\v 2 Naꞌ Jesoꞌosənꞌ gožeꞌ ḻegaꞌaqueꞌ: ―Catəꞌ gonḻe orasyonṉəꞌ quinganꞌ ṉale:
\q1 X̱atoꞌ beṉəꞌ zo yoba, chṉabtoꞌ yoguəꞌəḻoḻ beṉəꞌ əsoꞌelaogüeꞌe leꞌ.
\q1 Chṉabtoꞌ gonoꞌ par nic̱h beṉəꞌ zan əsoꞌe latɉə ṉabiꞌo ḻegaꞌaqueꞌ.
\q1 Gaquəšga canꞌ cheꞌendoꞌonəꞌ lao yežlyo nga canꞌ chac yobanꞌ.
\q1
\v 3 Benšga ṉaꞌa deꞌe gaotoꞌ tža tža.
\q1
\v 4 Naꞌ beziꞌixenšga c̱hetoꞌ
\q1 c̱hedəꞌ ḻeczə netoꞌ cheziꞌixentoꞌ c̱he saꞌalɉuežɉ beṉac̱htoꞌonəꞌ bitəꞌətezə deꞌe chsoꞌoneneꞌ netoꞌ.
\q1 Naꞌ bito goꞌo latɉə gaquə deꞌe ṉabiaꞌ netoꞌ len xbab c̱hetoꞌonəꞌ par gontoꞌ deꞌe malənꞌ,
\q1 mas bcuasəꞌ bcueꞌeɉ netoꞌ len deꞌe malənꞌ.
\p
\v 5 Nach gož Jesoꞌosənꞌ ḻegaꞌaqueꞌ: ―Ḻegon xbab nac gaquə šə šeɉle liž beṉəꞌ migw c̱hele do chel naꞌ yeꞌeleneꞌ: “Migw c̱hiaꞌ, beṉšga nadaꞌ šoṉə yetxtil.
\v 6 Bablaꞌ to migw c̱hiaꞌ beṉəꞌ zaꞌ zitəꞌ, naꞌ bito bi de c̱hiaꞌ par əgwnežɉuaꞌaneꞌ gaogüeꞌ.”
\v 7 Naꞌ migw c̱helenꞌ yoꞌe ḻoꞌo yoꞌote šə yožiꞌe xtižəꞌəlenꞌ, əṉeꞌ: “Bito gondoꞌ nadaꞌ zed, laꞌ banyeyɉw puertənꞌ naꞌ badetoꞌ chtastoꞌ len xiꞌiṉtoꞌ. Bito c̱hasaꞌ par goṉaꞌ deꞌen chyažɉdoꞌ.”
\v 8 Echniaꞌ leꞌe, ḻaꞌaṉəꞌəczə naqueꞌ migw c̱hele bito yeneꞌeneꞌ c̱haseꞌ par goṉeꞌ leꞌe yetxtilənꞌ, pero šə sole yepəyoe ṉabelen ḻeꞌ naꞌ gwyasšazeꞌ naꞌ goṉeꞌ bitəꞌətezə deꞌen chyažɉele.
\v 9 Naꞌ chniaꞌ leꞌe, bitəꞌətezə deꞌen cheneꞌecho gaquə, de deꞌe goncho par nic̱h gaquən. Šə to deꞌe cheneꞌecho soꞌoṉ beṉəꞌ chioꞌo, chṉabchon. Šə to deꞌe cheneꞌecho əželecho, chyilɉchon. Šə puert deꞌen cheneꞌecho əsalɉo beṉəꞌ, chṉecho choꞌa puertənꞌ par nic̱h chsalɉueꞌ. Naꞌ caꞌaczənꞌ cheyaḻəꞌ yeꞌecho Diozənꞌ catəꞌən de deꞌen cheneꞌecho gaquə.
\v 10 Naꞌ notəꞌətezcho šə bi deꞌen chṉabechoneꞌ goṉeꞌ, laꞌ deꞌe goṉczeꞌenəꞌ. Naꞌ notəꞌətezcho šə bi deꞌen chṉabechoneꞌ əgwzeɉniꞌineꞌ chioꞌo, gwzeɉniꞌiczeneꞌen. Naꞌ notəꞌətezcho šə chṉabechoneꞌ gaquə to deꞌen cheneꞌecho gaquə canꞌ chon beṉəꞌ chṉeꞌ choꞌa puertənꞌ, laꞌ deꞌe gaquəczənꞌ.
\p
\v 11 Naꞌ leꞌe nacle x̱a bidaoꞌ, šə xiꞌiṉlenꞌ əṉabeboꞌ leꞌe yetxtil ¿əgwnežɉwleboꞌ to yeɉ? Naꞌ šə əṉabeboꞌ leꞌe to beḻ yaꞌa ¿əgwnežɉwleboꞌ to beḻ bia nxobə ḻeꞌi?
\v 12 Naꞌ šə əṉabeboꞌ leꞌe to žit gaoboꞌ ¿əgwnežɉwleboꞌ to bex̱goniꞌ? Cle bito gonḻe caꞌ.
\v 13 Leꞌe nacle beṉəꞌ mal pero ṉezele chnežɉwle xiꞌiṉlenꞌ deꞌe güen. Naquəchxe güen gon X̱acho Diozənꞌ benꞌ zo yobanꞌ goṉeꞌ Spirit c̱heꞌenəꞌ son ḻoꞌo yic̱hɉlaꞌaždaoꞌ notəꞌətezcho əṉabechoneꞌ ḻen.
\s1 Gosəꞌəneꞌ de que Jesoꞌosənꞌ bebeɉeꞌ deꞌe x̱ioꞌ caꞌ len yeḻəꞌ guac c̱he Beelsebo
\p
\v 14 Naꞌ Jesoꞌosənꞌ bebeɉeꞌ deꞌe x̱ioꞌ yoꞌo yaz yic̱hɉlaꞌaždaoꞌ to beṉəꞌ mod. Naꞌ catəꞌ bechoɉ deꞌe x̱iꞌonəꞌ yic̱hɉlaꞌaždaoꞌ beꞌenəꞌ, goc beṉeꞌ, naꞌ beṉəꞌ caꞌ žaꞌanəꞌ besyəꞌəbanchgüeineꞌ.
\v 15 Pero baḻeꞌ gosəꞌəneꞌ: ―Chebeɉeꞌ deꞌe x̱ioꞌ caꞌ len yeḻəꞌ guac c̱he Beelsebo deꞌen chnabiaꞌ deꞌe x̱ioꞌ caꞌ.
\p
\v 16 Naꞌ yebaḻeꞌ gwseꞌeneneꞌ soꞌoneꞌ ḻeꞌ prueb naclənꞌ goneꞌ, gosəꞌəṉabeneꞌ ḻeꞌ goneꞌ to deꞌe yesəꞌəleꞌineꞌ ḻeꞌe yobanꞌ deꞌe zaquəꞌ yesyəꞌəbaneneꞌ.
\v 17 Pero Jesoꞌosənꞌ gocbeꞌineꞌ xbab deꞌen gwsoꞌoneꞌ, naꞌ gožeꞌ ḻegaꞌaqueꞌ: ―Šə beṉəꞌ žaꞌ to ṉasyon əsaꞌaqueꞌ c̱hoplə naꞌ yesyəꞌədiḻeꞌ entr ḻegaꞌaqueꞌ, əgwžiayiꞌ ṉasyon c̱hegaꞌaqueꞌ naꞌanəꞌ. Naꞌ šə to famiḻy beṉəꞌ əsaꞌaqueꞌ c̱hoplə naꞌ yesyəꞌədiḻeꞌ entr ḻegaꞌaczeꞌ, ḻeczə yenit famiḻy c̱hegaꞌaqueꞌ naꞌanəꞌ.
\v 18 Naꞌ ḻeczə šə Satanasənꞌ len deꞌe x̱ioꞌ c̱hei caꞌ əsaꞌaquən c̱hoplə naꞌ yesyəꞌədiḻən, cuiayiꞌ yeḻəꞌ chnabiaꞌ c̱hegaꞌaquenṉəꞌ. Leꞌe nale de que chebeɉaꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ len yeḻəꞌ guac c̱he Beelsebonꞌ.
\v 19 Žaləꞌ naquən canꞌ nale de que chebeɉaꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ len yeḻəꞌ guac c̱he Beelsebonꞌ, ḻeczə zeɉen de que beṉəꞌ lɉuežɉle caꞌ chəsyəꞌəbeɉeꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ len yeḻəꞌ guac c̱heinꞌ žaləꞌ caꞌ. Beṉəꞌ lɉuežɉle caꞌ seꞌe leꞌe de que clelənꞌ nale c̱hiaꞌ canꞌ chebeɉaꞌanṉəꞌ.
\v 20 Naꞌ deꞌen chebeɉaꞌ deꞌe x̱ioꞌ caꞌ len yeḻəꞌ guac c̱he Diozənꞌ, chloꞌin de que babžin ža catəꞌ Diozənꞌ ṉabiꞌe notəꞌətezle güeꞌele latɉə.
\p
\v 21 Gwxiyeꞌenəꞌ gwxaquəꞌəleben ca to beṉəꞌ gual, naꞌ nadaꞌ naquəchaꞌ beṉəꞌ gualəch. Naꞌ ṉezele de que catəꞌ to beṉəꞌ gual chapeꞌ liženꞌ len spad, yoguəꞌ deꞌen de c̱heꞌ naquən segor.
\v 22 Pero catəꞌ əžin to beṉəꞌ gualəch ca ḻeꞌ naꞌ tiḻəleneꞌeneꞌ, naꞌ benꞌ naquə gualəch ḻenꞌ gon gan. Naꞌ queꞌe spad c̱he beꞌenəꞌ deꞌen zoeꞌ lez gaquəlenən ḻeꞌ. Naꞌ əcaꞌatieꞌ bichlə deꞌe de c̱heꞌ naꞌ c̱hiseꞌen len migw c̱heꞌ caꞌ.
\p
\v 23 Šə cui chonḻe txen len nadaꞌ chonḻe contr nadaꞌ. Naꞌ šə cui chonḻe ca seꞌeɉḻeꞌ beṉəꞌ c̱hiaꞌ, zeɉe dižəꞌ de que chonḻe par nic̱h cui yosoꞌozenagueꞌ c̱hiaꞌ.
\s1 Deꞌe x̱iꞌonəꞌ yeyoꞌon deꞌe yoblə ḻoꞌo yic̱hɉlaꞌaždaoꞌ beṉəꞌ
\p
\v 24 Naꞌ šə to deꞌe x̱ioꞌ deꞌen yoꞌo yaz yic̱hɉlaꞌaždaoꞌ beṉəꞌ yechoɉən nach lažəꞌən nil naꞌaḻə yeyilɉən ga son mbalaz. Naꞌ šə bitobi latɉə želen, nach əṉan: “Deꞌe yobləczə žɉəyežoꞌa yic̱hɉlaꞌaždaoꞌ benꞌ ganꞌ gwyoꞌo gwyazaꞌ antslə.”
\v 25 Naꞌ yeyeɉən deꞌe yoblə ganꞌ zo benꞌ. Catəꞌ leꞌin de que bacheyoneꞌ xbab güen nach bazocheꞌ binḻoch, naꞌ yeyoꞌon deꞌe yoblə.
\v 26 Nach žɉəyetobən yegažə deꞌe x̱ioꞌ caꞌ deꞌen zɉənaquə maləch ca ḻen naꞌ txenṉəꞌ soꞌon ḻoꞌo yic̱hɉlaꞌaždaoꞌ beꞌenəꞌ. Naꞌ šə bagwsoꞌonən caꞌ bachaquəch mal c̱he beꞌenəꞌ clezə canꞌ goc c̱heꞌ antslə.
\s1 Mbalaz nitəꞌ beṉəꞌ caꞌ chosoꞌozenag xtižəꞌ Diozənꞌ
\p
\v 27 Lao beꞌ Jesoꞌosənꞌ dižəꞌ quinga, gwzo to noꞌolə gwchoḻ beṉəꞌ caꞌ zɉəžaꞌ ganꞌ bsed əbloꞌineꞌenəꞌ. Naꞌ noꞌolənꞌ gwṉeꞌ zižɉo gožeꞌeneꞌ: ―Mbalaz zo noꞌolənꞌ gwxan leꞌ naꞌ bguažeꞌe leꞌ.
\p
\v 28 Pero naꞌ Jesoꞌosənꞌ gožeꞌeneꞌ: ―Naquəchxe mbalaz nitəꞌ beṉəꞌ caꞌ chosoꞌozenag xtižəꞌ Diozənꞌ naꞌ chsoꞌoneꞌ canꞌ neꞌenəꞌ.
\s1 Chəsəꞌəṉabeꞌ gon Jesoꞌosənꞌ to miḻagr
\p
\v 29-30 Naꞌ beṉəꞌ zan beyec̱hɉ bebiꞌi cuit Jesoꞌosənꞌ naꞌ gwneꞌ: ―Leꞌe mbanḻe ṉaꞌa naquəchguale beṉəꞌ yic̱hɉlaꞌaždaoꞌ mal. Chṉable gonaꞌ to miḻagr par nic̱h əṉezele šə ḻe Dioz nanꞌ bseḻeꞌe nadaꞌ. Pero bito gonaꞌ canꞌ chṉablenəꞌ. Deꞌe gon Diozənꞌ len nadaꞌ par nic̱h əṉezele de que ḻeꞌenəꞌ bseḻeꞌe nadaꞌ gwxaquəꞌəleben ca deꞌen beneꞌ len deꞌe profet Jonasənꞌ par nic̱h gosəꞌəṉeze beṉəꞌ Ninibe caꞌ de que Dioz nanꞌ bseḻeꞌeneꞌ.
\v 31 Catəꞌ əžin ža gon Diozənꞌ castigw c̱he yoguəꞌ beṉəꞌ chsoꞌon deꞌe malənꞌ, deꞌe noꞌolənꞌ gwnabiaꞌ beṉəꞌ caꞌ gwnitəꞌ galənꞌ chḻaꞌ bgüižənꞌ cuiten ḻichalə yebaneꞌ len yeziquəꞌəchlə beṉəꞌ guat caꞌ naꞌ lao Diozənꞌ gwcuišeꞌ leꞌe mbanḻe ṉaꞌa. Ca naquə ḻeꞌ ža, gwzeꞌe Seba ganꞌ naquə zitəꞌəchgua naꞌ bideꞌ nga par bzenagueꞌ dižəꞌ sinꞌ deꞌen beꞌ deꞌe Rei Salomonṉəꞌ len ḻeꞌ. Naꞌ nadaꞌ zoaꞌ nga naquəchaꞌ beṉəꞌ blaoch cle ca deꞌe Salomonṉəꞌ, naꞌ bito chzenagle c̱hiaꞌ.
\v 32 Naꞌ catəꞌ əžin ža gon Diozənꞌ castigw c̱he yoguəꞌ beṉəꞌ chsoꞌon deꞌe malənꞌ, ḻeczə ža naꞌ yesyəꞌəban beṉəꞌ Ninibe caꞌ. Naꞌ yesəꞌəcuišeꞌ leꞌe nitəꞌəle lao dia nga c̱hedəꞌ besyəꞌədiṉɉeneꞌ xtoḻəꞌəgaꞌaqueꞌenəꞌ catəꞌ deꞌe Jonasənꞌ gwdix̱ɉueꞌineꞌ ḻegaꞌaqueꞌ canꞌ gwna Diozənꞌ. Ḻegonšc xbab de que nadaꞌ zoaꞌ nga naquəchaꞌ beṉəꞌ blaoch cle ca deꞌe Jonasənꞌ, naꞌ bito chzenagle c̱hiaꞌ.
\s1 Deꞌen bsed bloꞌi Jesoꞌosənꞌ gwxaquəꞌəleben ca to yiꞌ
\p
\v 33 Nach Jesoꞌosənꞌ bsaquəꞌəlebeneꞌ xtižeꞌenəꞌ naꞌ len deꞌen choneꞌenəꞌ ca to yiꞌ. Gozneꞌ: ―Notono no ggualəꞌ to yiꞌ naꞌ gwdoseꞌen žomə, naꞌ nic əgwcuašeꞌen ga yoblə ga cui no leꞌi ḻen. Syempr chdeꞌen ḻeꞌe zeꞌe par nic̱h əgwseꞌeniꞌin len yoguəꞌ beṉəꞌ soꞌo ḻoꞌo cuartənꞌ.
\v 34 Žia ɉelaochonꞌ par nic̱h chleꞌicho. Con šə bito bi chaquen, chleꞌiczecho binḻo. Pero šə nc̱hoḻ ɉelaochonꞌ, bito chleꞌicho. Caꞌaczənꞌ naquən len yic̱hɉlaꞌaždaꞌochonꞌ. Šə naccho beṉəꞌ laꞌaždaoꞌ güen, yoꞌo beꞌeniꞌ c̱he Diozənꞌ yic̱hɉlaꞌaždaꞌochonꞌ, pero šə naccho beṉəꞌ laꞌaždaoꞌ mal, nc̱hoḻ yic̱hɉlaꞌaždaꞌochonꞌ.
\v 35 Deꞌe naꞌanəꞌ ḻegon par nic̱h gacle beṉəꞌ laꞌaždaoꞌ güen, naꞌ šoꞌo beꞌeninꞌ yic̱hɉlaꞌaždaꞌolenꞌ. Bito gacle beṉəꞌ laꞌaždaoꞌ mal naꞌ beṉəꞌ yic̱hɉlaꞌaždaoꞌ žc̱hoḻ.
\v 36 Šə nyeꞌeniꞌ yic̱hɉlaꞌaždaꞌolenꞌ naꞌ cui bi deꞌe mal yoꞌon, gwseꞌeniꞌiczən xṉezlenꞌ canꞌ chseꞌeniꞌ to lampara ganꞌ naquə žc̱hoḻ.
\s1 Jesoꞌosənꞌ gožeꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ de que zɉənapeꞌ doḻəꞌ
\p
\v 37 Catəꞌ beyož beꞌ Jesoꞌosənꞌ dižəꞌ quinga, to beṉəꞌ fariseo beneꞌeneꞌ combid šeɉeꞌ ližeꞌen par əsaꞌogüeꞌ. Naꞌ gwyoꞌo Jesoꞌosənꞌ liž beṉəꞌ fariseonꞌ naꞌ gwchiꞌe choꞌa mesənꞌ.
\v 38 Naꞌ beṉəꞌ fariseonꞌ bebaneneꞌ catəꞌ bleꞌineꞌ bito bonaꞌ Jesoꞌosənꞌ antslə zeꞌe gaogüeꞌ canꞌ chosyoꞌonaꞌ ḻegaꞌaqueꞌ chsaꞌaqueneꞌ yebei Diozənꞌ ḻegaꞌaqueꞌ deꞌen chsoꞌoneꞌ caꞌ.
\v 39 X̱anchonꞌ gožeꞌ ḻeꞌ: ―Leꞌe beṉəꞌ fariseo gwxaquəꞌəlebele ca tas plat deꞌen chc̱hin beṉəꞌ naꞌ cui chaꞌa chyibeꞌ ḻoꞌinəꞌ binḻo. Chonḻe par nic̱h chsaꞌaque beṉəꞌ de que nacle beṉəꞌ güen, pero chebeile chcaꞌale bi deꞌe de c̱he beṉəꞌ naꞌ nacle beṉəꞌ mal juisy.
\v 40 Cui bi bi xbab deꞌe zaqueꞌe yoꞌo ḻoꞌo yic̱hɉlaꞌaždaꞌolenꞌ. Chiꞌ yic̱hɉle nac gonḻe par gacle xiꞌilažəꞌ len cuerp c̱hele. Ḻeꞌegatezə caꞌ cheyaḻəꞌ cueꞌ yic̱hɉle nac gonḻe par gacle xiꞌilažəꞌ len yic̱hɉlaꞌaždaꞌolenꞌ, c̱hedəꞌ Diozənꞌ benꞌ ben cuerp c̱hechonꞌ ḻeczə ḻeꞌenəꞌ beneꞌ yic̱hɉlaꞌaždaꞌochonꞌ.
\v 41 Ḻeꞌe gwnežɉo beṉəꞌ bi deꞌen deile, beṉəꞌ chəsəꞌəyažɉeneꞌen. Šə gonḻe caꞌ nacbiaꞌ de que nacle beṉəꞌ laꞌaždaoꞌ xiꞌilažəꞌ.
\p
\v 42 ¡Probchguazə leꞌe beṉəꞌ fariseo! Ḻaꞌaṉəꞌəczə chnežɉwle Diozənꞌ to part lao ši part c̱he yix̱güeɉ, c̱he yeɉ Sant Maria, nach c̱he rcaod c̱hele, bito bi zeɉen, c̱hedəꞌ bito chonḻe deꞌen naquə güen naꞌ bito chaquele c̱he Diozənꞌ. Deꞌen naquə deꞌe žialao gonḻe, gonḻe deꞌen naquə güen naꞌ gaquele c̱he Diozənꞌ. Pero bito cueɉyic̱hɉle əgwnežɉwle deꞌe caꞌ deꞌen chnežɉwle Diozənꞌ.
\p
\v 43 ¡Probchguazə leꞌe beṉəꞌ fariseo! Chzelažəꞌəle cueꞌele ḻoꞌo yoꞌodaoꞌ caꞌ txen len beṉəꞌ golə beṉəꞌ blao caꞌ naꞌ catəꞌ cheɉle do ganꞌ chac yaꞌa cheneꞌele əsoꞌelaoꞌ beṉəꞌ leꞌe.
\p
\v 44 ¡Probchguazə leꞌe chsed chloꞌile ḻei deꞌen bzoɉ deꞌe Moisezənꞌ naꞌ len leꞌe beṉəꞌ fariseo! Cheneꞌele soꞌon beṉəꞌ xbab c̱hele de que nacle beṉəꞌ güen, pero len yic̱hɉlaꞌaždaꞌolenꞌ nacle beṉəꞌ mal. Naꞌ ḻeczə beṉəꞌ caꞌ zedəsəꞌənao leꞌe əsaꞌaqueꞌ canꞌ nacle sin cui saꞌacbeꞌineꞌ.
\p
\v 45 To beṉəꞌ chsed chloꞌi ḻeinꞌ božiꞌe xtižəꞌ Jesoꞌosənꞌ naꞌ gožeꞌeneꞌ: ―Maestr, laogüe deꞌen naoꞌ deꞌe quinga ḻeczə chšašoꞌ c̱hetoꞌonəꞌ.
\p
\v 46 Naꞌ gož Jesoꞌosənꞌ ḻeꞌ: ―Ḻeczə caꞌ leꞌe chsed chloꞌile ḻeinꞌ ¡probchguazlenꞌ! Chzanchle canꞌ na ḻeinꞌ, chonḻen ca to yoaꞌ deꞌe cuiczə no doꞌi naꞌ cheneꞌele soaꞌ beṉəꞌ yoblə ḻen, naꞌ leꞌe bito cheneꞌele guaꞌalen.
\p
\v 47-48 ¡Probchguazə leꞌe chonḻe monoment lao ba c̱he deꞌe profet caꞌ gwsoꞌe xtižəꞌ Diozənꞌ! Chacle tozə len deꞌe x̱axtaꞌocho caꞌ deꞌen gwsoꞌoteꞌ ḻegaꞌaqueꞌ, naꞌ leꞌe chonḻe par nic̱h nacbiꞌaxeɉə de que gwsoꞌoteꞌ deꞌe profet caꞌ laogüe deꞌen chonḻe monoment lao ba c̱he beṉəꞌ caꞌ gwsoꞌoteꞌ.
\p
\v 49 Deꞌe naꞌanəꞌ lao yeḻəꞌ sinꞌ c̱he Diozənꞌ gwneꞌ de que əseḻeꞌe len leꞌe profet c̱heꞌ caꞌ naꞌ apostol c̱heꞌ caꞌ, beṉəꞌ soꞌe xtižeꞌen. Naꞌ gwneꞌ de que leꞌe gotle baḻeꞌ naꞌ gwc̱hiꞌ gwsaquəꞌəle yebaḻeꞌ.
\v 50 Naꞌ deꞌe ḻi bachonḻe canꞌ gwneꞌ. Deꞌe naꞌanəꞌ siꞌile castigw c̱he yeḻəꞌ got c̱he yoguəꞌ profet caꞌ gwsoꞌoteꞌ dezd catəꞌən gwxe yežlyonꞌ xte ža ṉeža, leꞌe mbanḻe ṉaꞌa.
\v 51 Zan beṉəꞌ gwsoꞌot beṉəꞌ yoblə ḻegaꞌaqueꞌ. Naꞌ leꞌe siꞌile castigw c̱he yeḻəꞌ got c̱he yoguəꞌ beṉəꞌ caꞌ gwzolaozən len deꞌe Abeḻənꞌ benꞌ bet deꞌe bišeꞌe Cainṉəꞌ ḻeꞌ naꞌ zelaon len deꞌe Zequerianꞌ. Zequeria naꞌanəꞌ gwsoꞌoteꞌ entr yoꞌodaoꞌ əblaonəꞌ naꞌ entr mes de yeɉ ganꞌ chsoꞌoteꞌ bia yix̱əꞌ par chsoꞌelaogüeꞌe Diozənꞌ.
\p
\v 52 ¡Probchguazə leꞌe chsed chloꞌile ḻeinꞌ! Ca naquə deꞌen chzeɉniꞌile beṉəꞌ ḻei c̱he Diozənꞌ, bito chzeɉniꞌigaꞌaqueleneꞌen ḻicha canꞌ naquən, naꞌ nic chzenagle c̱hei. Naꞌ beṉəꞌ chseꞌeneꞌe yosoꞌozenag c̱hei, nic choꞌele latɉə yosoꞌozenagueꞌ.
\p
\v 53 Naꞌ catəꞌ beyož beꞌ Jesoꞌosənꞌ dižəꞌ quinga, nach beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ gwsaꞌacyožəchgüeꞌ ḻeꞌ naꞌ gwseꞌeneneꞌ yesəꞌəbeɉeꞌ ḻeꞌ dižəꞌ.
\v 54 Naꞌ gosəꞌəbeꞌenaogüeꞌ əchoɉ dižəꞌ choꞌenəꞌ deꞌen yosəꞌədeꞌineꞌ par əsaꞌogüeꞌ xya contr ḻeꞌ.
\c 12
\s1 Yeḻəꞌ gox̱oayag c̱he beṉəꞌ fariseo caꞌ
\p
\v 1 Naꞌ goquənꞌ zan mil beṉəꞌ babesəꞌəžag ganꞌ zo Jesoꞌosənꞌ xte bosəꞌəleɉ bosəꞌəšošɉ ṉiꞌa lɉuežɉgaꞌaqueꞌ. Naꞌ Jesoꞌosənꞌ gwzolaotequeꞌ beꞌe dižəꞌ len disipl c̱heꞌ caꞌ gožeꞌ ḻegaꞌaqueꞌ: ―Ḻeꞌe gapə cuidad nic̱h cui əx̱oayagle beṉəꞌ par əsaꞌaqueneꞌ nacle beṉəꞌ güen canꞌ chsoꞌon beṉəꞌ fariseo caꞌ. Yeḻəꞌ gox̱oayag c̱hegaꞌaqueꞌenəꞌ gwxaquəꞌəleben ca xnaꞌ cuazinꞌ deꞌen chlažəꞌən par chaquən yetxtil.
\v 2 Bito gonḻe canꞌ chsoꞌoneꞌenəꞌ c̱hedəꞌ gaquə canꞌ na dicho deꞌen na: “Yoguəꞌəḻoḻ deꞌen ngašəꞌ ṉaꞌa gwžin ža laꞌalaon, naꞌ yoguəꞌəḻoḻ deꞌen cui no gwseꞌeɉniꞌi antslə, ḻeczə gwžin ža seꞌeɉniꞌi beṉəꞌ ḻen.”
\v 3 Deꞌe naꞌanəꞌ bitəꞌətezə deꞌe əṉale bgašəꞌəzə, beṉəꞌ zan əseꞌeneneꞌen, naꞌ deꞌen əṉale žižizə ḻoꞌo cuart c̱helenꞌ, ḻeczə beṉəꞌ zan yesəꞌəṉeze ḻen.
\s1 Nonꞌ cheyaḻəꞌ žebcho
\p
\v 4 Migw c̱hiaꞌ, əchniaꞌ leꞌe, bito žeble beṉəꞌ caꞌ əsoꞌot leꞌe, c̱hedəꞌ catəꞌ bagotle bitoch bi gaquə soꞌoneneꞌ leꞌe.
\v 5 Choṉaꞌ leꞌe consejw, cheyaḻəꞌ žeble Diozənꞌ c̱hedəꞌ catəꞌ bac̱h bequeꞌe yeḻəꞌ mban c̱helenꞌ ḻeczə napeꞌ yeḻəꞌ guaquənꞌ par yeseḻeꞌe leꞌe gabiḻənꞌ. Deꞌe yoblə əchniaꞌ leꞌe, cheyaḻəꞌ žeble Diozənꞌ.
\p
\v 6 Ṉezecho de que byiṉ daoꞌ caꞌ bitobi zɉəzaquəꞌətequəb, pero naꞌ Diozənꞌ ni tob cui chanḻažeꞌe.
\v 7 Naꞌ ca naquə chioꞌo ža, deꞌe tant chaque Diozənꞌ c̱hecho xte ṉezeneꞌ baḻə yišəꞌ yic̱hɉ to tocho žia ḻaꞌaṉəꞌəczə bitotec bi zɉəzaquəꞌ yišəꞌ yic̱hɉchonꞌ. Deꞌe naꞌanəꞌ bito žeble c̱hedəꞌ zaquəꞌəch leꞌe cle ca bia zan byiṉ daoꞌ.
\s1 Cheyaḻəꞌ güeꞌecho dižəꞌ len beṉəꞌ de que nombiꞌacho Jesocristənꞌ
\p
\v 8 Naꞌ əchniaꞌ leꞌe, notəꞌətezle šə choꞌele dižəꞌ len beṉac̱hənꞌ de que cheɉḻeꞌele c̱hiaꞌ, ḻeczə caꞌ nadaꞌ guaꞌa dižəꞌ len angl c̱he Diozənꞌ de que nacle xiꞌiṉaꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\v 9 Naꞌ notəꞌətezle šə choꞌele dižəꞌ len beṉac̱hənꞌ de que bito cheɉḻeꞌele c̱hiaꞌ, ḻeczə caꞌ nadaꞌ guaꞌa dižəꞌ lao angl c̱he Diozənꞌ de que bito nacle xiꞌiṉaꞌ.
\p
\v 10 Naꞌ notəꞌətezle šə güeꞌele dižəꞌ contr nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h, Diozənꞌ yeziꞌixeneꞌ c̱hele šə yediṉɉele canꞌ nale. Pero notəꞌətezle šə güeꞌele dižəꞌ contr Spirit c̱he Diozənꞌ, cuat yeziꞌixen Diozənꞌ c̱hele.
\p
\v 11 Naꞌ šə yesəꞌəc̱heꞌe leꞌe lao beṉəꞌ gwnabiaꞌ c̱he yoꞌodaꞌonəꞌ o lao beṉəꞌ jostis caꞌ o šə lao yeziquəꞌəchlə beṉəꞌ caꞌ zɉənapə poder, bito cuec yic̱hɉle nac yožiꞌile xtižəꞌəgaꞌaquenꞌ, o šə naclə əṉale.
\v 12 Lao or naꞌatezə Spirit c̱he Diozənꞌ əgwloꞌin leꞌe binꞌ cheyaḻəꞌ əṉale.
\s1 Bito cheyaḻəꞌ cuec yic̱hɉcho tlaozə bi deꞌen deicho
\p
\v 13 Entr beṉəꞌ zan juisy caꞌ toeꞌ gožeꞌ Jesoꞌosənꞌ: ―Maestr, gonšgoꞌ mendad par nic̱h goṉ beṉəꞌ bišaꞌanəꞌ nadaꞌ bien c̱he deꞌe x̱axnaꞌatoꞌ deꞌen cheyaḻəꞌ siꞌa.
\p
\v 14 Pero Jesoꞌosənꞌ gožeꞌ ḻeꞌ: ―Bito nacaꞌ nadaꞌ juez c̱hele naꞌ bito nacaꞌ beṉəꞌ güeꞌe laze c̱he deꞌe deile.
\p
\v 15 Nach gožeꞌ ḻegaꞌaqueꞌ: ―Ḻeꞌe gapə cuidad par nic̱h bito selažəꞌəle bi gatəꞌ c̱hele yežlyonꞌ, c̱hedəꞌ bito əbancho laogüe šə deczə zan deꞌe de c̱hecho.
\p
\v 16 Naꞌ beꞌeleneꞌ ḻegaꞌaqueꞌ to jempl, gwneꞌ: ―To beṉəꞌ gwniꞌa ḻechguaḻe goc cwseš c̱heꞌenəꞌ.
\v 17 Naꞌ beneꞌ xbab ḻoꞌo yic̱hɉlaꞌaždaogüeꞌen gwneꞌ: “¿Nacxa gonaꞌ? c̱hedəꞌ bitoch bi latɉə de par cwseš c̱hiaꞌanəꞌ.”
\v 18 Nach gozneꞌ: “Quinga gonaꞌ, yoc̱hiṉɉaꞌ yoꞌo ganꞌ nga žaꞌ cwseš c̱hiaꞌ quinga naꞌ gonaꞌ yoꞌo xench. Naꞌ gwžaꞌašaoguaꞌa cwsešənꞌ naꞌ bichlə deꞌe de c̱hiaꞌ.
\v 19 Naꞌ laogüe bade deꞌe chyažɉdaꞌ par zan iz, bitoch gonaꞌ žin. Yeꞌeɉ gaotezaꞌ con bi cheꞌendaꞌ naꞌ gonaꞌ ḻegr.”
\v 20 Pero Diozənꞌ gožeꞌ beꞌenəꞌ: “Beṉəꞌ tont leꞌ. Ṉežeꞌ bžin or gatoꞌ, naꞌ ¿nola lao neꞌi gaquə yoguəꞌ deꞌen de c̱hioꞌonəꞌ?”
\v 21 Canꞌ gac c̱he notəꞌətezə beṉəꞌ šə con chbec yic̱hɉeꞌ tlaozə deꞌen deineꞌ žlac mbaneꞌ naꞌ bito choneꞌ ca yebei Diozənꞌ ḻeꞌ.
\s1 Diozənꞌ chapə chyeꞌ xiꞌiṉeꞌ caꞌ
\p
\v 22 Naꞌ gož Jesoꞌosənꞌ disipl c̱heꞌ caꞌ: ―Echniaꞌ leꞌe, bito cuec yic̱hɉle tlaozə deꞌen yeꞌeɉ deꞌen gaole lao mbanḻe. Naꞌ ḻeczə caꞌ bito cuec yic̱hɉle tlaozə deꞌen gacwlenꞌ.
\v 23 Zaquəꞌəch yeḻəꞌ mban c̱helenꞌ ca yeḻəꞌ guaonꞌ. Ḻeꞌegatezə caꞌ cuerp c̱helenꞌ zaquəꞌəchən ca xalaꞌanḻenꞌ.
\v 24 Ḻegontoš xbab, ca naquə bec̱hɉ caꞌ bito chsaꞌazəb bito chəsyəꞌəlapəb, nic zo daꞌa xoaꞌ c̱hegaꞌaquəb, nic zo ganꞌ ncuaꞌ no guangoš c̱hegaꞌaquəb ga žaꞌ deꞌe saꞌob. Pero naꞌ Diozənꞌ chguaoczeꞌ ḻegaꞌaquəb. Naquəchxenꞌ zaquəꞌəle ca bia caꞌ žia x̱ileꞌe.
\v 25 Naꞌ ni tole bito gaquə yostoṉ cuinḻe gašɉ metr šə con cueꞌe yic̱hɉle ətoṉle.
\v 26 Ṉezele bito gaquə yostoṉ cuinḻe naꞌ nic naquən deꞌe zaqueꞌe. Deꞌe naꞌanəꞌ bito gontecle xbab c̱he biquəꞌəchlə deꞌe chyažɉele.
\p
\v 27 Ḻegontoš xbab ca naquə yeɉ caꞌ deꞌen zɉəze yix̱əꞌ chesəꞌəchaꞌoczən. Bito bi žin chsoꞌonən, nic chsaꞌalɉən do. Naꞌ əchniaꞌ leꞌe deꞌe Rei Salomonṉəꞌ goqueꞌ lachəꞌ xoche juisy, pero bito bžinḻažeꞌe xalaneꞌenəꞌ ca yeḻəꞌ xoche c̱he yeɉ caꞌ.
\v 28 Diozənꞌ noneꞌ xoche yix̱əꞌ deꞌen ze yoba len to termzənꞌ zen nach chosoꞌozeyeꞌen, naquəchxe gon Diozənꞌ len leꞌe ggüeꞌeczə yic̱hɉeꞌ goṉeꞌ yoguəꞌəte deꞌen chyažɉele, leꞌe cui cheɉḻeꞌetecle de que goṉeꞌ deꞌen chyažɉele.
\v 29 Leꞌe ža, bito güeꞌelažəꞌəle par gatəꞌ deꞌe yeꞌeɉ deꞌe gaole. Bito gaquəžeɉlažəꞌəle c̱he ḻen.
\v 30 Beṉəꞌ caꞌ cui chsoꞌelaoꞌ Diozənꞌ porzə c̱hei deꞌe canꞌ chsoꞌelažəꞌəzecheꞌ, c̱he deꞌen əseꞌeɉ deꞌen əsaꞌogüeꞌ naꞌ c̱he xalaꞌangaꞌaqueꞌ. Pero X̱acho Diozənꞌ ṉezczeneꞌ biquəꞌ deꞌe caꞌ chyažɉele.
\v 31 Deꞌen güeꞌelažəꞌəle, güeꞌele latɉə par nic̱h Diozənꞌ ṉabiꞌe leꞌe. Naꞌ yoguəꞌ deꞌe caꞌ deꞌen chyažɉelenꞌ goṉczə Diozənꞌ ḻen, deꞌen yeꞌeɉ deꞌen gaole naꞌ xalaꞌanḻe.
\s1 Deꞌe zaquəꞌəche gatəꞌ c̱hecho catəꞌ yežincho yobanꞌ
\p
\v 32 Bito žeble ḻaꞌaṉəꞌəczə naquə to c̱hopzle. Diozənꞌ chebeineꞌ chnabiꞌe leꞌe naꞌ chacleneꞌ leꞌe.
\v 33 Ḻeꞌe yeyotəꞌ deꞌen deile par nic̱h gatəꞌ deꞌe əgwnežɉwle beṉəꞌ caꞌ chesəꞌəyažɉe. Šə gonḻe caꞌ caguə cuiayiꞌ deꞌen deilenꞌ, c̱hedəꞌ laꞌ Diozənꞌ goṉeꞌ leꞌe deꞌe zaquəꞌəche naꞌ deꞌe cui te c̱hei catəꞌ yežinḻe yobanꞌ ganꞌ zoꞌenəꞌ. Naꞌ bito gac šoꞌo beṉəꞌ bguan par əqueꞌen, naꞌ nique gaquə šoꞌo bia daoꞌ əgwžiayiꞌ ḻen.
\v 34 Ganꞌ de deꞌen chaquele c̱hei, nanꞌ zo yic̱hɉlaꞌaždaꞌolenꞌ.
\s1 Cheyaḻəꞌ socho probnid par catəꞌən yidə Cristənꞌ yeto
\p
\v 35-36 Nach Jesoꞌosənꞌ bsed bloꞌineꞌ ḻegaꞌaqueꞌ naquənꞌ gaquə catəꞌən yideꞌ deꞌe yoblə. Naꞌ gwneꞌ: ―Ḻeꞌe so probnid par catəꞌən yidaꞌ yeto, ḻeꞌe so canꞌ nitəꞌ beṉəꞌ chsaꞌapeꞌ liž x̱angaꞌaqueꞌ žlac zdeꞌ yeḻəꞌ gošagnaꞌ, zɉənyazeꞌ xalaꞌangaꞌaqueꞌ naꞌ chaḻəꞌ yiꞌ. Nach catəꞌ yežineꞌ naꞌ əṉeꞌ choꞌa puertənꞌ ḻeꞌe yosəꞌəsalɉwtieꞌ par yeyoꞌe.
\v 37 Mbalaz gaquə c̱he mos caꞌ beṉəꞌ caꞌ nitəꞌ probnid chəsəꞌəbezə x̱angaꞌaqueꞌen catəꞌən yežineꞌ. Šə niteꞌe chəsəꞌəbezeꞌ ḻeꞌ catəꞌən yežineꞌ, nachənꞌ əgwsiꞌiniꞌe deꞌen əsaꞌogüeꞌ naꞌ cuineꞌ gwnežɉueꞌ ḻegaꞌaqueꞌ deꞌen əseꞌeɉ əsaꞌogüeꞌ.
\v 38 Mbalaz gaquə c̱hegaꞌaqueꞌ šə chəsəꞌəbezeꞌ batəꞌəquənꞌ yežineꞌ ḻaꞌaṉəꞌəczə šə yežineꞌ do chel o šə do šbaḻ.
\v 39 Ḻegon xbab c̱he deꞌe nga. Žaləꞌ ṉeze x̱an yoꞌonəꞌ do bi or əžin beṉəꞌ bguanṉəꞌ ližeꞌenəꞌ, laꞌ gwṉazeꞌ par nic̱h bito güeꞌe latɉə šoꞌ beꞌenəꞌ ližeꞌenəꞌ par cuaneꞌ šinḻazeꞌ.
\v 40 Leꞌe ža, cheyaḻəꞌ sole probnid, c̱hedəꞌ catəꞌən cui chonḻe xbab yidaꞌ, ca naꞌan yidaꞌ deꞌe yoblə, nadaꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\s1 Mos benꞌ chon güen naꞌ mos benꞌ cui chon güen
\p
\v 41 Bedənꞌ gožeꞌeneꞌ: ―X̱antoꞌ ¿əchoꞌo jempl nga par netəꞌəzətoꞌonəꞌ o šə par yoguəꞌ beṉac̱hənꞌ?
\p
\v 42 Nach gož Jesoꞌosənꞌ Bedənꞌ: ―Naquən par notəꞌətezə beṉəꞌ šə choneꞌ canꞌ chon mos əblao beṉəꞌ naquə beṉəꞌ sinꞌ naꞌ beṉəꞌ chon complir canꞌ cheyaḻəꞌ goneꞌ. Benꞌ nac caꞌ coꞌ x̱aneꞌenəꞌ lao neꞌe ližeꞌenəꞌ par nic̱h əggüia əgwyeꞌ mos caꞌ yeḻaꞌ naꞌ par nic̱h ggoneꞌ deꞌe əsaꞌo to toeꞌ catəꞌ chžin or əsaꞌogüeꞌ.
\v 43 Šə to beṉəꞌ mosənꞌ chontezə choneꞌ con canꞌ non x̱anenꞌ mendad, mbalaz soeꞌ catəꞌ yežin x̱aneꞌenəꞌ.
\v 44 Deꞌe ḻi əchniaꞌ leꞌe x̱aneꞌen cueꞌe lao naꞌ xmoseꞌenəꞌ yoguəꞌəḻoḻ deꞌen deineꞌ.
\v 45 Pero naꞌ šə mosənꞌ goneꞌ xbabənꞌ naꞌ əṉeꞌ: “Bagwžei x̱ananꞌ”, naꞌ šə solaocleꞌ c̱hineꞌ mos caꞌ yeḻaꞌ naꞌ yeꞌeɉ gaox̱attezeꞌ naꞌ soženeꞌ,
\v 46 nach x̱aneꞌenəꞌ yežineꞌ to ža senyaleꞌ ḻeꞌ to or cui nacbeꞌineꞌ. Naꞌ por ni c̱he deꞌen cui chon mosənꞌ canꞌ cheyaḻəꞌ goneꞌ, x̱aneꞌenəꞌ c̱hinchgüeꞌ ḻeꞌ yid sotənꞌ xte ca gateꞌ. Canꞌ chac len notəꞌətezə mos benꞌ cui chon cuaseḻoḻ canꞌ cheyaḻəꞌ goneꞌ.
\p
\v 47 Naꞌ ca naquə mos beṉəꞌ naquə beṉəꞌ godenag, ḻaꞌaṉəꞌəczə baṉezeneꞌ canꞌ cheneꞌe x̱aneꞌenəꞌ goneꞌ, pero bito choneꞌ caꞌ. Deꞌe naꞌanəꞌ bito zoeꞌ probnid catəꞌ yežin x̱aneꞌenəꞌ, naꞌ x̱aneꞌenəꞌ c̱hinchgüeꞌeneꞌ yid sotənꞌ.
\v 48 Naꞌ beṉəꞌ cui ṉezeneꞌ binꞌ non x̱anenꞌ mendad naꞌ choneꞌ deꞌe ḻeczə zaquəꞌ c̱hineꞌeneꞌ, pero caguə c̱hintequeneꞌ. Notəꞌətezə beṉəꞌ yoꞌo lao neꞌe goneꞌ deꞌe zan deꞌe zaqueꞌe, cheyaḻəꞌ goneꞌ yoguəꞌən. Naꞌ benꞌ yoꞌo lao neꞌe goneꞌ deꞌe zan deꞌe zaqueꞌe, chonchən byen goneꞌ mazəchlə canꞌ cheyaḻəꞌ gon benꞌ cuitec yoꞌo lao neꞌe deꞌe zan deꞌe goneꞌ.
\s1 Yesəꞌədiḻə beṉəꞌ por ni c̱he deꞌen bidə Jesoꞌosənꞌ
\p
\v 49 Nach gwna Jesoꞌosənꞌ: ―Ca naquə beṉac̱hənꞌ yesəꞌədiḻeꞌ naꞌ yesəꞌəšašeꞌ por ni c̱he deꞌen zedeyenaꞌ yežlyo nga, naꞌ deꞌen soꞌoneꞌ caꞌ gwxaquəꞌəleben ca yiꞌ. ¡Žaləꞌ bagoclə deꞌen zedeyenaꞌanəꞌ!
\v 50 Bidaꞌ par c̱hiꞌ sacaꞌa naꞌ gataꞌ. Ḻechguaḻe yoꞌo yic̱hɉaꞌ c̱hei xte catəꞌən əžin ža gaquən.
\v 51 ¿Echonḻe xbabənꞌ de que beṉəꞌ žaꞌ yežlyonꞌ yesəꞌəzo yesəꞌəbezeꞌ binḻo len lɉuežɉgaꞌaqueꞌ laogüe deꞌen bidaꞌ? Echniaꞌ leꞌe, bito yesəꞌəzo yesəꞌəbezəgaꞌaqueꞌ binḻo len lɉuežɉgaꞌaqueꞌ laogüe deꞌen bidaꞌ, sino que yesəꞌədiḻeꞌ naꞌ yosoꞌošašeꞌ.
\v 52 Dezd ṉaꞌa, šə nitəꞌ gueyəꞌ beṉəꞌ famiḻy to yoꞌo, yesəꞌədiḻeꞌ entr ḻegaꞌaqueꞌ, c̱hopeꞌ contr šoṉeꞌ naꞌ šoṉeꞌ contr c̱hopeꞌ.
\v 53 Yediḻə beṉəꞌ byonꞌ contr xiꞌiṉeꞌ, naꞌ xiꞌiṉeꞌen contr ḻeꞌ. Naꞌ noꞌolənꞌ yediḻeꞌ contr xiꞌiṉeꞌ noꞌolə, naꞌ xiꞌiṉeꞌ noꞌolənꞌ contr ḻeꞌenəꞌ. Naꞌ yediḻə noꞌolənꞌ contr xoꞌoližeꞌ naꞌ xoꞌoližeꞌen contr ḻeꞌ.
\s1 Bito gwsaꞌacheꞌineꞌ bi zeɉe deꞌe caꞌ chon Jesoꞌosənꞌ
\p
\v 54 Nach ḻeczə gož Jesoꞌosənꞌ beṉəꞌ caꞌ nitəꞌənəꞌ: ―Catəꞌ chleꞌile chiꞌ beɉw ganꞌ chen bgüižənꞌ naꞌ nale: “Guaquə yeɉw”, naꞌ canꞌ chac.
\v 55 Naꞌ catəꞌ chec̱hɉ to beꞌ deꞌe zaꞌate zaquəꞌ galənꞌ chḻaꞌ bgüižənꞌ cuiten ḻicha, naꞌ nale: “Guaquə zeyəꞌ”, naꞌ chac zeyəꞌ.
\v 56 ¡Beṉəꞌ gox̱oayag leꞌe! Catəꞌ chleꞌile nac chac ḻeꞌe yobanꞌ naꞌ lao yežlyonꞌ ṉezele šə guaquə yeɉw o šə guaquə zeyəꞌ. ¿Bixc̱henꞌ cui chacbeꞌile bi zeɉe deꞌe caꞌ chonaꞌ?
\s1 Cheyaḻəꞌ goncho regl binḻo len beṉəꞌ cheneꞌe əc̱heꞌe chioꞌo lao jostis
\p
\v 57 ¿Bixc̱henꞌ cui chonḻe xbab par nic̱h əṉezele naquənꞌ cheyaḻəꞌ gonḻe?
\v 58 Catəꞌ to beṉəꞌ gonḻe xya c̱heꞌ naꞌ əc̱heꞌe leꞌe lao jostis, naꞌ lao ngoꞌole nezənꞌ ḻegonḻeneꞌ regl binḻo par nic̱h naꞌ cui c̱heꞌe leꞌe lao jostisənꞌ. Šə bito gonḻe caꞌ ža, catəꞌ əžinḻe lao jostisənꞌ goneꞌ leꞌe lao naꞌ poḻsianꞌ par yosəꞌəžeꞌe leꞌe ližya.
\v 59 Echniaꞌ leꞌe, bito yebeɉeꞌ leꞌe xte catəꞌ c̱hixɉwle doxen deꞌen chaḻəꞌəlenꞌ.
\c 13
\s1 Šə bito yediṉɉecho xtoḻəꞌəchonꞌ laꞌ cuiayiꞌichonꞌ
\p
\v 1 Naꞌ lao or naꞌatezə entr beṉəꞌ caꞌ žaꞌ naꞌ gwnitəꞌ baḻə beṉəꞌ gwsoꞌeleneꞌ Jesoꞌosənꞌ dižəꞌ canꞌ goquə c̱he x̱oṉɉ beṉəꞌ Galilea. Gwseꞌeneꞌ de que žlac gwsoꞌot beṉəꞌ Galilea caꞌ bia yix̱əꞌ par chsoꞌelaogüeꞌe Diozənꞌ, soḻdad c̱he Pilatənꞌ ɉseꞌeteꞌ ḻegaꞌaqueꞌ c̱hedəꞌ canꞌ ben Pilatənꞌ mendad.
\v 2 Nach božiꞌi Jesoꞌosənꞌ xtižəꞌəgaꞌaqueꞌenəꞌ gožeꞌ ḻegaꞌaqueꞌ: ―¿Echonḻe xbabənꞌ de que beṉəꞌ caꞌ gwsaꞌat gwsoꞌoncheꞌ deꞌe maləch cle ca beṉəꞌ Galilea caꞌ yeḻaꞌ laogüe deꞌen goc c̱hegaꞌaqueꞌ caꞌ?
\v 3 Echniaꞌ leꞌe caguə caꞌanəꞌ. Šə bito yediṉɉele xtoḻəꞌəle caꞌ gwžin ža cuiayiꞌile canꞌ gosəꞌəbiayiꞌ beṉəꞌ caꞌ.
\v 4 Ṉezele c̱he beṉəꞌ šiꞌiṉšoṉ caꞌ, lao zɉəniteꞌe Siloenꞌ bxopə to campnary naꞌ gwdenən ḻegaꞌaqueꞌ naꞌ gwsaꞌateꞌ. ¿Eḻeczə chonḻe xbabənꞌ goc caꞌ laogüe deꞌe zɉənaquəcheꞌ beṉəꞌ maləch lao yoguəꞌ beṉəꞌ caꞌ žaꞌ Jerosalenṉəꞌ?
\v 5 Echniaꞌ leꞌe caguə caꞌanəꞌ. Šə leꞌe cui yediṉɉele xtoḻəꞌəle caꞌ gwžin ža cuiayiꞌile canꞌ gosəꞌəbiayiꞌ beṉəꞌ caꞌ.
\s1 Jempl c̱he yix̱güionꞌ deꞌen cui bi frot chbia
\p
\v 6 Naꞌ beꞌeleneꞌ ḻegaꞌaqueꞌ jempl nga bzeɉniꞌineꞌ ḻegaꞌaqueꞌ de que cheyaḻəꞌ yesyəꞌədiṉɉeneꞌ xtoḻəꞌəgaꞌaqueꞌenəꞌ. Naꞌ gožeꞌ ḻegaꞌaqueꞌ: ―To beṉəꞌ zo to yag yix̱güio c̱heꞌ ganꞌ žaꞌ yag obas c̱heꞌ caꞌ. Naꞌ gwyeɉeꞌ lao yaguənꞌ ɉəgüieꞌ šə zetgua yix̱güionꞌ gaogüeꞌ, pero bitobi bželeneꞌ.
\v 7 Naꞌ gožeꞌ benꞌ chapə güert c̱heꞌenəꞌ: “Bachac šoṉ iz chedəgüiaꞌ yag nga šə chbian yix̱güio, pero bito bi chbian. Gwc̱hoguən. Lašɉ con zon nḻanən naꞌ nique bi frot chbiazən.”
\v 8 Naꞌ gož benꞌ ḻeꞌ: “X̱anaꞌ, lɉoyenṉəꞌ zezošgan yetgüizənꞌ. Naꞌ əc̱heꞌenaꞌ xaneinꞌ cuecaꞌan yo beb.
\v 9 Naꞌ šə cuian frotənꞌ yetgüiz, bitec deꞌe güen. Pero šə cuiczə bi cuian nach əc̱hogchon.”
\s1 Jesoꞌosənꞌ beyoneꞌ to noꞌolə ža dezcanz
\p
\v 10 Naꞌ to ža dezcanz bsed bloꞌi Jesoꞌosənꞌ beṉəꞌ caꞌ žaꞌ to ḻoꞌo yoꞌodaoꞌ.
\v 11 Naꞌ zo to noꞌolə beṉəꞌ bagoc šiꞌiṉšoṉ iz yoꞌo yaz deꞌe x̱ioꞌon yic̱hɉlaꞌaždaꞌogüeꞌenəꞌ. Naꞌ ben deꞌe x̱iꞌonəꞌ par nic̱h bdobə cuerp c̱heꞌenəꞌ, naꞌ caguə goquəch secheꞌ ḻicha.
\v 12 Naꞌ catəꞌ bleꞌi Jesoꞌosənꞌ ḻeꞌ, goxeꞌeneꞌ, nach gožeꞌeneꞌ: ―Noꞌolə ṉaꞌa yeyacdoꞌ c̱he yižgüeꞌ chioꞌonəꞌ.
\p
\v 13 Naꞌ bx̱oa neꞌenəꞌ lao cuerp c̱he noꞌolənꞌ, naꞌ ḻeꞌe bezechateꞌ ḻicha naꞌ beꞌelaogüeꞌe Diozənꞌ.
\v 14 Pero naꞌ beṉəꞌ gwnabiaꞌ c̱he yoꞌodaꞌonəꞌ bloqueꞌ c̱hedəꞌ Jesoꞌosənꞌ beyoneꞌ beṉəꞌ güeꞌenəꞌ ža dezcanzənꞌ, naꞌ gožeꞌ beṉəꞌ caꞌ nitəꞌ ḻoꞌo yoꞌodaꞌonəꞌ: ―De x̱op ža par gonḻe žin. Ḻeꞌe da lao ža caꞌ par nic̱h yeyaquele c̱he yižgüeꞌ c̱helenꞌ, pero bito laꞌacle ža dezcanzənꞌ par yeyaquele.
\p
\v 15 Nach X̱anchonꞌ gožeꞌeneꞌ: ―¡Leꞌe beṉəꞌ gox̱oayag! ¿Ecaguə lao ža dezcanzənꞌ biaꞌaczə chsežle goꞌoṉ c̱hele o borr c̱hele ganꞌ zɉədaꞌab naꞌ chguaꞌagaꞌacleb güeꞌeɉ nis?
\v 16 Noꞌolə nga naqueꞌ xiꞌiṉ dia c̱he deꞌe Abraanṉəꞌ naꞌ ca naquə ben gwxiyeꞌenəꞌ par nic̱h babdobə cuerp c̱heꞌenəꞌ šiꞌiṉšoṉ iz, naquəczən ḻicha babeyonaꞌaneꞌ ža dezcanzənꞌ.
\p
\v 17 Lao gwneꞌ caꞌ beṉəꞌ caꞌ chəsəꞌəgueꞌi ḻeꞌ gwsaꞌaqueneꞌ ztoꞌ, naꞌ yoguəꞌəḻoḻ beṉəꞌ zan caꞌ yeḻaꞌ nitəꞌ naꞌ besyəꞌəbeichgüeineꞌ len yoguəꞌ deꞌen ben Jesoꞌosənꞌ, laꞌ ḻechguaḻe güen zɉənaquə deꞌen beneꞌenəꞌ.
\s1 Yeḻəꞌ gwnabiaꞌ c̱he Diozənꞌ gwxaquəꞌəleben ca xsa moztas
\p
\v 18 Nach gwna Jesoꞌosənꞌ: ―Naꞌ əgwloꞌidaꞌ leꞌe par nic̱h əṉezele nac gwxaquəꞌəlebe yeḻəꞌ gwnabiaꞌ c̱he Diozənꞌ.
\v 19 Gwxaquəꞌəleben ca to xsa moztas. To beṉəꞌ gozeꞌen, naꞌ catəꞌ blaꞌan gwchaꞌon goquən yag chaꞌodaoꞌ. Naꞌ bia caꞌ zɉəzo x̱ileꞌe gwsoꞌon liždaꞌogaꞌaquəb lao xozeꞌe caꞌ.
\s1 Yeḻəꞌ gwnabiaꞌ c̱he Diozənꞌ gwxaquəꞌəleben ca xnaꞌ cuazinꞌ
\p
\v 20 Nach deꞌe yoblə gozneꞌ: ―¿Nac əgwsaquəꞌəlebecho yeḻəꞌ gwnabiaꞌ c̱he Diozənꞌ?
\v 21 Egwsaquəꞌəlebechon ca xnaꞌ cuazinꞌ deꞌen gwlec noꞌolənꞌ len to rob yezɉ par nic̱h bechaꞌo doxenən.
\s1 Cheyaḻəꞌ yeyilɉlažəꞌəcho naclə goncho par nic̱h socho binḻo len Diozənꞌ
\p
\v 22 Naꞌ gwda Jesoꞌosənꞌ bsed bloꞌineꞌ beṉəꞌ žaꞌ syoda caꞌ naꞌ yež caꞌ ganꞌ bedieꞌ par bežineꞌ Jerosalenṉəꞌ.
\v 23 Naꞌ to beṉəꞌ gožeꞌ Jesoꞌosənꞌ: ―X̱antoꞌ, ¿əcon to c̱hopzə beṉəꞌən cui žɉəyaꞌac lao yiꞌ gabiḻənꞌ?
\p Nach Jesoꞌosənꞌ gožeꞌ ḻegaꞌaqueꞌ:
\v 24 ―Echniaꞌ leꞌe, beṉəꞌ zan seꞌeneꞌeneꞌ ṉiteꞌe binḻo len Diozənꞌ. Pero gwžin ža catəꞌ cuich gaquə soꞌoneꞌ par ṉiteꞌe binḻo len ḻeꞌ. Deꞌen naquə žialao gonḻe, c̱hilɉlažəꞌəle naclə gonḻe par nic̱h sole binḻo len Diozənꞌ,
\v 25 nic̱h cui goneꞌ len leꞌe canꞌ ben to x̱an yoꞌo catəꞌ bžin or par əgwseyɉueꞌ naꞌ gwzožeꞌe bseyɉueꞌ. Naꞌ gwdechlə besəꞌəžin beṉəꞌ bosoꞌosižeꞌ ḻeꞌe puert c̱heꞌenəꞌ naꞌ bito bsalɉueꞌ par soꞌe. Naꞌ gwseꞌeneꞌ: “Bsalɉwšga par šoꞌotoꞌ.” Naꞌ gožeꞌ ḻegaꞌaqueꞌ: “Bito nombiꞌa leꞌe, nic ṉezdaꞌ ganꞌ zaꞌacle.”
\v 26 Canꞌ gaquə len baḻle. Nach solaole yeꞌeleneꞌ: “Güeꞌeɉ gwdaotoꞌ len leꞌ naꞌ bsed bloꞌidoꞌ netoꞌ lao lquey lažtoꞌ.”
\v 27 Pero naꞌ deꞌe yoblə əyeꞌe leꞌe: “Bitoczə ṉezdaꞌ ganꞌ besaꞌacle. Ḻeꞌe žɉəyaꞌac yoguəꞌ leꞌe beṉəꞌ güen deꞌe mal.” Canꞌ yeꞌe leꞌe.
\v 28 Naꞌ leꞌile Abraanṉəꞌ naꞌ Isaaquənꞌ naꞌ Jacobənꞌ naꞌ yoguəꞌ profet beṉəꞌ caꞌ gwsoꞌe xtižəꞌ Diozənꞌ niteꞌe yoba ganꞌ zo Diozənꞌ chnabiꞌe, naꞌ leꞌe bito gac šoꞌolenəꞌ. Naꞌ canaꞌ cuežyašəꞌəle naꞌ gaoyeɉə leylenꞌ catəꞌ gacbeꞌile bito gaquə šoꞌole.
\v 29 Beṉəꞌ zaꞌac doxenḻə yežlyonꞌ yesəꞌəžineꞌ yoba ganꞌ zo Diozənꞌ chnabiꞌe naꞌ yesəꞌəbiꞌe choꞌa mes c̱heꞌenəꞌ saꞌogüeꞌ.
\v 30 Naꞌ ža, nitəꞌ beṉəꞌ bito zɉənaqueꞌ beṉəꞌ blao ṉaꞌa, pero gwžin ža catəꞌ əsaꞌaqueꞌ beṉəꞌ blao. Naꞌ nitəꞌ beṉəꞌ zɉənaqueꞌ beṉəꞌ blao ṉaꞌa, pero ḻeczə gwžin ža catəꞌ ḻegaꞌaqueꞌ bitoch əsaꞌaqueꞌ beṉəꞌ blao.
\s1 Begüineꞌe Jesoꞌosənꞌ por ni c̱he xtoḻəꞌ beṉəꞌ Jerosalen caꞌ
\p
\v 31 Lao or naꞌatezə baḻə beṉəꞌ fariseo caꞌ besəꞌəžineꞌ ganꞌ zo Jesoꞌosənꞌ naꞌ gwseꞌeneꞌ: ―Cheyaḻəꞌ yexoṉɉoꞌ nga ganꞌ chnabiaꞌ Erodənꞌ c̱hedəꞌ cheneꞌeneꞌ goteꞌ leꞌ.
\p
\v 32 Jesoꞌosənꞌ gožeꞌ ḻegaꞌaqueꞌ: ―Erodənꞌ gwxaquəꞌəlebeneꞌ ca to becoyoꞌo por yeḻəꞌ gox̱oayag c̱heꞌenəꞌ. Ḻežɉaꞌac naꞌ yeꞌeleneꞌ de que yeto c̱hopə žazə soaꞌ par yebeɉəchaꞌ deꞌe x̱ioꞌ caꞌ zɉəyoꞌo zɉəyaz yic̱hɉlaꞌaždaoꞌ beṉəꞌ naꞌ par nic̱h yeyonchaꞌ beṉəꞌ chsaꞌacšene, naꞌ caguə sšachənꞌ yeyož gonaꞌ deꞌen cheyaḻəꞌ gonaꞌ.
\v 33 Pero ca naquə deꞌen chonaꞌ nga ṉaꞌa, gonchaꞌan gwx̱e güižɉ c̱hedəꞌ Jerosalen naꞌ ganꞌ chsoꞌoteꞌ profet caꞌ chsoꞌe xtižəꞌ Diozənꞌ, caguə nganꞌ.
\p
\v 34 Leꞌe beṉəꞌ Jerosalenṉəꞌ chotle profet, naꞌ beṉəꞌ caꞌ chseḻəꞌ Diozənꞌ len leꞌe chšižəꞌəgaꞌacleneꞌ yeɉ. Zan las goꞌondaꞌ yetobaꞌ leꞌe ca to ɉeid cheyežəb xiꞌiṉəb, pero bito beꞌele latɉə.
\v 35 Naꞌ bagwleɉəyic̱hɉaꞌ leꞌe. Naꞌ əchniaꞌ leꞌe bitoch leꞌile nadaꞌ xte catəꞌəch əžin ža əṉale: “Choꞌelaꞌotoꞌ beṉəꞌ zaꞌ nga beṉəꞌ babseḻəꞌ X̱ancho Diozənꞌ.”
\c 14
\s1 Jesoꞌosənꞌ beyoneꞌ to beṉəꞌ zo ḻeꞌenəꞌ yi
\p
\v 1 Naꞌ to ža dezcanz Jesoꞌosənꞌ gwyeɉeꞌ liž to beṉəꞌ blao entr beṉəꞌ fariseo caꞌ par gwsaꞌogüeꞌ, naꞌ beṉəꞌ fariseo caꞌ nitəꞌənəꞌ besyəꞌəyatchgüeineꞌ ḻeꞌ.
\v 2 Naꞌ laogüeꞌenəꞌ zecha to beṉəꞌ chacšene, zo ḻeꞌenəꞌ yi.
\v 3 Naꞌ gož Jesoꞌosənꞌ beṉəꞌ fariseo caꞌ naꞌ len beṉəꞌ caꞌ chosoꞌosed chosoꞌoloꞌi ḻeinꞌ deꞌen bzoɉ deꞌe Moisezənꞌ: ―Segon canꞌ na ḻeinꞌ ¿əde lsens yeyoncho to beṉəꞌ güeꞌ ža dezcanzənꞌ o šə bito de lsens?
\p
\v 4 Pero notono božiꞌi xtižeꞌenəꞌ. Nach Jesoꞌosənꞌ bex̱eꞌe naꞌ beꞌenəꞌ naꞌ beyoneꞌeneꞌ, naꞌ gožeꞌeneꞌ: ―Baguaquə yeyeɉoꞌ.
\p
\v 5 Naꞌ gož Jesoꞌosənꞌ beṉəꞌ caꞌ žaꞌ liž beṉəꞌ fariseonꞌ: ―Leꞌe šə zo to borr o to goꞌoṉ c̱hele, naꞌ əxopəb to ḻoꞌo pos, ¿əcabi yebeɉleb lgüegwzə ḻaꞌaṉəꞌəczə naquən ža dezcanz?
\p
\v 6 Naꞌ notono goc yožiꞌi xtižəꞌ Jesoꞌosənꞌ.
\s1 Beṉəꞌ caꞌ gwsaꞌac combid ganꞌ chac to yeḻəꞌ gošagnaꞌ
\p
\v 7 Naꞌ bleꞌi Jesoꞌosənꞌ canꞌ chsoꞌon beṉəꞌ caꞌ zɉənaqueꞌ combid liž beṉəꞌ fariseonꞌ, gosəꞌəbeɉeꞌ siyənꞌ gwseꞌeneneꞌ yesəꞌəbiꞌe ganꞌ zɉəchiꞌ beṉəꞌ blao caꞌ. Naꞌ Jesoꞌosənꞌ gožeꞌ ḻegaꞌaqueꞌ:
\v 8 ―Catəꞌ to beṉəꞌ goneꞌ leꞌe combid ganꞌ chac to yeḻəꞌ gošagnaꞌ, bito cueꞌele ganꞌ cheyaḻəꞌ cueꞌ beṉəꞌ blao caꞌ. Laꞌ šə cueꞌele naꞌ de repent yidə beṉəꞌ naquəch beṉəꞌ blao.
\v 9 Naꞌ yidə x̱an yoꞌonəꞌ yeꞌe leꞌe: “Ḻesožaꞌ nic̱h cueꞌ benga.” Nach do chaquele ztoꞌ cueꞌele ga yoblə len beṉəꞌ caꞌ cui bi bi zɉəzaquəꞌ.
\v 10 Pero naꞌ catəꞌ nacle combid, cueꞌele len beṉəꞌ caꞌ cui bi bi zɉəzaquəꞌ, naꞌ catəꞌ yidə x̱an yoꞌonəꞌ naꞌ yeꞌe leꞌe: “Beṉəꞌ migw c̱hiaꞌ, da cuiꞌo len beṉəꞌ blao caꞌ”, nach siꞌichle yeḻəꞌ balaꞌaṉ lao beṉəꞌ caꞌ zɉəchiꞌ len leꞌe choꞌa mesənꞌ.
\v 11 Notəꞌətezcho choꞌelaoꞌ cuincho, Diozənꞌ goneꞌ par nic̱h gacbeꞌicho de que bitobi zaquəꞌəcho. Naꞌ notəꞌətezcho choncho xbab de que bitotec bi zaquəꞌəcho, Diozənꞌ goṉeꞌ chioꞌo yeḻəꞌ balaꞌaṉ.
\p
\v 12 Nach ḻeczə gož Jesoꞌosənꞌ benꞌ ben ḻeꞌ combid: ―Catəꞌ gonoꞌ to lṉi naꞌ gonoꞌ beṉəꞌ combid əsaꞌogüeꞌ len leꞌ, bito gonoꞌ combid porzə beṉəꞌ migw c̱hioꞌ o beṉəꞌ zɉənaquə beṉəꞌ gwniꞌa. Ḻegaꞌaqueꞌ ḻeczə gosyəꞌəyoneꞌ leꞌ combid ližgaꞌaqueꞌ, naꞌ yosyoꞌogüeꞌe gwzon laogüe deꞌen bengaꞌacoꞌoneꞌ combidənꞌ blaꞌaqueꞌ ližoꞌonəꞌ.
\v 13 Catəꞌ gonoꞌ to lṉi, gonoꞌ combid beṉəꞌ yašəꞌ caꞌ naꞌ beṉəꞌ nchog no ṉiꞌa naꞌagaꞌaqueꞌ, beṉəꞌ coj, naꞌ beṉəꞌ lc̱hoḻ.
\v 14 Šə gonoꞌ ḻegaꞌaqueꞌ combid, Diozənꞌ goneꞌ par nic̱h soꞌ mbalaz, c̱hedəꞌ beṉəꞌ caꞌ bito gaquə yesyəꞌəyoneꞌ leꞌ combid. Soꞌ mbalaz catəꞌ Diozənꞌ yosbaneꞌ leꞌ ladɉo beṉəꞌ guat caꞌ txen len yeziquəꞌəchlə beṉəꞌ caꞌ ɉaꞌac ḻicha lao gosəꞌəbaneꞌ.
\s1 Jempl c̱he to beṉəꞌ ben lṉi
\p
\v 15 Naꞌ to beṉəꞌ chiꞌ choꞌa mesənꞌ txen len Jesoꞌosənꞌ beneneꞌ xtižeꞌenəꞌ naꞌ gožeꞌeneꞌ: ―Mbalaz socho gaocho lao lṉi deꞌen gaquə catəꞌ bachnabiaꞌ benꞌ əseḻəꞌ Diozənꞌ.
\p
\v 16 Nach Jesoꞌosənꞌ gwneꞌ: ―To beṉəꞌ beneꞌ to lṉi xen naꞌ beneꞌ combid əžɉaꞌac beṉəꞌ zan ližeꞌenəꞌ par əsaꞌogüeꞌ.
\v 17 Naꞌ catəꞌ bžin or əsaꞌogüeꞌ, x̱an yoꞌonəꞌ bseḻeꞌe xmoseꞌenəꞌ par žɉətobeꞌ beṉəꞌ caꞌ beneꞌ combid əsaꞌogüeꞌ. Naꞌ catəꞌ ɉəyeꞌ to togaꞌaqueꞌ gožeꞌ ḻegaꞌaqueꞌ: “Ḻešoꞌo, laꞌ babsiꞌiniꞌe deꞌen gaocho.”
\v 18 Naꞌ to togaꞌaqueꞌ gwseꞌe beꞌenəꞌ bixc̱henꞌ cui zɉəzoeꞌ latɉə žɉaꞌaqueꞌ ganꞌ choneꞌ lṉinꞌ. Toeꞌ gwneꞌ: “Zeꞌe gwxiꞌa to yežlyo. Cheyaḻəꞌ žɉəgüiaꞌan. Naꞌ yeꞌešgoꞌ x̱anoꞌon de que bito gac yidaꞌ.”
\v 19 Yetoeꞌ gwneꞌ: “Zeꞌe gwxiꞌa gueyəꞌ cueꞌ goꞌoṉ naꞌ ṉaꞌa əžɉengaꞌacaꞌab prueb. Yeꞌešgoꞌ x̱anoꞌon siꞌixeneꞌ c̱hiaꞌ bito gaquə yidaꞌ.”
\v 20 Naꞌ yetoeꞌ gožeꞌeneꞌ: “Zeꞌe bšagnaꞌa. Deꞌe naꞌanəꞌ bito gaquə yidaꞌ.”
\v 21 Naꞌ mosənꞌ beyeɉeꞌ naꞌ gožeꞌ x̱aneꞌenəꞌ canꞌ gwseꞌ beṉəꞌ caꞌ ḻeꞌ. Nach x̱an yoꞌonəꞌ benꞌ chon lṉinꞌ bžeꞌe, nach gožeꞌ xmoseꞌenəꞌ: “Gwyeɉ ɉtadoꞌ yoguəꞌ lqueyənꞌ naꞌ yoguəꞌ nez laoꞌ syodanꞌ, naꞌ əgwtoboꞌ beṉəꞌ yašəꞌ caꞌ naꞌ beṉəꞌ caꞌ nchog no ṉiꞌa naꞌagaꞌaqueꞌ, naꞌ beṉəꞌ coj caꞌ naꞌ beṉəꞌ lc̱hoḻ caꞌ par laꞌaqueꞌ əsaꞌogüeꞌ.”
\v 22 Gwde beneꞌ caꞌ nach gožeꞌ ḻeꞌ: “X̱anaꞌ, baɉətobaꞌ beṉəꞌ caꞌ gwnaꞌonəꞌ naꞌ ṉedechczə latɉə par beṉəꞌ yoblə.”
\v 23 Nach x̱aneꞌenəꞌ gožeꞌ ḻeꞌ: “Gwyeɉ fuer syodanꞌ naꞌ gonoꞌ byen daꞌac beṉəꞌ caꞌ nitəꞌ do tnezənꞌ naꞌ žɉəx̱iꞌo beṉəꞌ caꞌ zɉəžaꞌ yix̱əꞌ, gonoꞌ byen daꞌaqueꞌ ližaꞌ nga əsaꞌogüeꞌ par nic̱h šaneꞌ xte ca cuich bi latɉə šoꞌ.
\v 24 Naꞌ ca naquə beṉəꞌ caꞌ benaꞌ combid nechte, bito guaꞌa latɉə əsaꞌo ḻegaꞌaqueꞌ deꞌen babsiꞌiniꞌanəꞌ.”
\s1 Deꞌen cheyaḻəꞌ goncho par nic̱h ṉaocho Jesocristənꞌ
\p
\v 25 Naꞌ beṉəꞌ zan juisy ɉəsəꞌənaogüeꞌ Jesoꞌosənꞌ. Naꞌ gwyec̱hɉeꞌ gožeꞌ ḻegaꞌaqueꞌ:
\v 26 ―Notəꞌətezle šə gaquəchele c̱he x̱ale, xnaꞌale, xoꞌolle, xiꞌiṉle, bišəꞌəle, zanḻe naꞌ cuinḻe mazəchlə canꞌ chaquele c̱hiaꞌ, bito gaquə ṉaole nadaꞌ par gacle disipl c̱hiaꞌ.
\v 27 Naꞌ notəꞌətezle šə laogüe deꞌen chaquele yosoꞌoc̱hiꞌ yosoꞌosaquəꞌ beṉəꞌ leꞌe o soꞌoteꞌ leꞌe to ḻeꞌe yag coroz deꞌe nanꞌ bito chonḻilažəꞌəle nadaꞌ, ḻeczə bito gaquə ṉaole nadaꞌ par gacle disipl c̱hiaꞌ šə caꞌ.
\v 28 Šə to leꞌe cheneꞌele gonḻe to campnary, zguaꞌatec cueꞌele nach gonḻe xbab naꞌ gwzaquəꞌəle ca do ɉaꞌaquəꞌətəꞌ chyažɉele par gonḻen naꞌ šə de mech c̱helenəꞌ par yeyož campnaryənꞌ.
\v 29 Šə cui əgwchix̱ə əgwtoḻəꞌ xbab c̱helenꞌ ɉaꞌaquəꞌətəꞌ deꞌen chyažɉele, catəꞌ bagwlecle laneinəꞌ naꞌ gacbeꞌile de que bitoch bi mech de par yeyožən. Naꞌ yoguəꞌ beṉəꞌ yesəꞌəleꞌi laneinꞌ soꞌoneꞌ leꞌe borl.
\v 30 Naꞌ yesəꞌəneꞌ: “Benga gwzolao beneꞌ to campnary pero bito goquə yesyožeꞌ deꞌen gwzolaogüeꞌ.”
\v 31 Naꞌ šə to rei choneꞌ xbab tiḻeꞌ len yeto rei ḻeczə zguaꞌatec gongax̱ɉeꞌ xbab šə len si mil soḻdad c̱heꞌ caꞌ guaquə goneꞌ gan len reinꞌ yeto benꞌ yidə len gaḻɉə mil soḻdad.
\v 32 Naꞌ šə chacbeꞌineꞌ cui goneꞌ gan, lao ṉezo reinꞌ yeto zitəꞌələ, əseḻeꞌe beṉəꞌ žɉəsəꞌədieꞌ xtižeꞌen lao reinꞌ yeto yesəꞌəṉabeꞌ yesyəꞌəniteꞌe binḻo.
\v 33 Canꞌ naquən len leꞌe, notəꞌətezle šə cui cueɉyic̱hɉle famiḻy c̱hele, bia yix̱əꞌ c̱hele naꞌ yoguəꞌəḻoḻ cuantəchlə bi deꞌe de c̱hele, bito gaquə ṉaole nadaꞌ par gacle disipl c̱hiaꞌ.
\s1 Gwxaquəꞌəlebecho ca zedəꞌ
\p
\v 34 Zedəꞌən naquən güenchgua, pero naꞌ šə bitoch naquən zxiꞌ, ¿nacxa goncho par nic̱h yeyaquən zxiꞌ?
\v 35 Bitobi zaquəꞌən, nic gaquəlenən yežlyonꞌ, nic gaquə gwc̱hinchon par beb, ḻete c̱hoꞌoṉchon. Canꞌ gwxaquəꞌəlebele šə bitoch chzenagle c̱hiaꞌ do yic̱hɉ do lažəꞌəle. Leꞌe žia nagle deꞌe chene, ḻegwzenag.
\c 15
\s1 Jempl c̱he xiləꞌ bianꞌ goquəžeɉe
\p
\v 1 Naꞌ beṉəꞌ goc̱hixɉw caꞌ naꞌ yeziquəꞌəchlə beṉəꞌ caꞌ chsoꞌon deꞌe mal, yogueꞌe gosəꞌəbigueꞌe ganꞌ zo Jesoꞌosənꞌ par gwseꞌeneneꞌ xtižeꞌenəꞌ.
\v 2 Naꞌ beṉəꞌ fariseo caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ chəsəꞌəṉelaogüeꞌe, chəsəꞌəneꞌ: ―Benga chgüialaogüeꞌ beṉəꞌ caꞌ chsoꞌon deꞌe malənꞌ naꞌ chaoleneꞌ ḻegaꞌaqueꞌ.
\p
\v 3 Nach Jesoꞌosənꞌ beꞌe to jempl, gožeꞌ ḻegaꞌaqueꞌ:
\v 4 ―Šə nitəꞌ to gueyoa xiləꞌ c̱hele naꞌ gaquəžeɉe tob, ¿əcabi yocuaꞌaṉle bia caꞌ taplalɉ tgualɉ ganꞌ žaꞌab latɉə dašənꞌ naꞌ žɉəyedilɉle bianꞌ goquəžeɉenəꞌ xte ca yeželeleb?
\v 5 Naꞌ catəꞌ yeželobənꞌ yebeichgüeile naꞌ yex̱oaleb yaꞌa yenḻe yeyoꞌaleb.
\v 6 Naꞌ catəꞌ yežinḻe ližle əgwtoble beṉəꞌ migw c̱hele naꞌ beṉəꞌ gwliž c̱hele naꞌ yeꞌele ḻegaꞌaqueꞌ: “Ḻeyebei len nadaꞌ, c̱hedəꞌ babežel xiləꞌ c̱hiaꞌ bianꞌ goquəžeɉe.”
\v 7 Echniaꞌ leꞌe, gobeiche Diozənꞌ naꞌ angl c̱heꞌ caꞌ catəꞌ to beṉəꞌ chon deꞌe mal yediṉɉeneꞌ xtoḻeꞌenəꞌ clezə canꞌ chəsyəꞌəbeineꞌ len taplalɉ tgualɉ beṉəꞌ zɉənaquə beṉəꞌ güen lao Diozənꞌ beṉəꞌ bito de xtoḻəꞌəgaꞌaqueꞌ par yesyəꞌədiṉɉeneꞌen.
\s1 Jempl c̱he mech deꞌen gwnit
\p
\v 8 Naꞌ no noꞌolənꞌ šə de ši mech pḻat c̱heꞌ naꞌ šə ṉit ton, ¿əcabi əggualeꞌe to yiꞌ naꞌ gwḻoeꞌ ḻoꞌo yoꞌo c̱heꞌenəꞌ naꞌ yeyilɉyožeꞌen xte ca yeželeneꞌen?
\v 9 Naꞌ catəꞌ yeželeneꞌen naꞌ əgwtobeꞌ noꞌolə migw c̱heꞌ caꞌ naꞌ beṉəꞌ gwliž c̱heꞌ caꞌ, naꞌ yeꞌe ḻegaꞌaqueꞌ: “Ḻeyebei len nadaꞌ c̱hedəꞌ babeželdaꞌ mech c̱hianꞌ deꞌen gwnitənꞌ.”
\v 10 Echniaꞌ leꞌe, ḻeczə chesyəꞌəba chesyəꞌəzaquəꞌəlažəꞌ angl c̱he Diozənꞌ catəꞌ to beṉəꞌ chon deꞌe mal chediṉɉeneꞌ xtoḻeꞌenəꞌ.
\s1 Jempl c̱he benꞌ benditɉei xiꞌiṉenꞌ xmecheꞌ
\p
\v 11 Naꞌ ḻeczə gožeꞌ ḻegaꞌaqueꞌ: ―Gwzo to beṉəꞌ naꞌ gwnitəꞌ c̱hopə xiꞌiṉeꞌ beṉəꞌ byo.
\v 12 Naꞌ bžin ža beṉəꞌ xcuidənꞌ gožeꞌ x̱enꞌ: “X̱a, beṉ nadaꞌ deꞌen cheyaḻəꞌ siꞌa deꞌen deidoꞌ.” Nach x̱eꞌen bnežɉueꞌeneꞌ deꞌen cheyaḻəꞌ siꞌenəꞌ.
\v 13 Gwde yeto c̱hopə ža naꞌ beṉəꞌ xcuidənꞌ btobeꞌ yoguəꞌəḻoḻ cuantzə bi deꞌen de c̱heꞌ naꞌ gwzeꞌe gwyeɉeꞌ ṉasyon zitəꞌ. Naꞌ porzə deꞌe cui zaqueꞌe ɉeneꞌ. Naꞌ lao zdaleneꞌ deꞌe malənꞌ benditɉeineꞌ xmecheꞌenəꞌ.
\v 14 Naꞌ catəꞌ beya xmecheꞌenəꞌ, goc to bgüin juisy lao doxen ṉasyonṉəꞌ, naꞌ bitoch bi bi gotəꞌ par siꞌe deꞌe yeꞌeɉ gaogüeꞌ naꞌ bichlə deꞌe byažɉeneꞌ.
\v 15 Deꞌe naꞌanəꞌ gwyeɉeꞌ ganꞌ zo to beṉəꞌ ṉasyonṉəꞌ naꞌ gwṉabeꞌ žin. Naꞌ beꞌenəꞌ bseḻeꞌeneꞌ yix̱əꞌ ganꞌ žaꞌ bia zan xcošeꞌ par nic̱h ɉəyeꞌeb.
\v 16 Naꞌ tant gwdoneꞌ xte goclažeꞌe gaogüeꞌ deꞌen chsaꞌo coš caꞌ, pero ni ḻen cui bosoꞌonežɉueꞌeneꞌ gaogüeꞌ.
\v 17 Naꞌ beyoneꞌ to xbab šaoꞌ naꞌ gwneꞌ: “Nitəꞌ mos zan c̱he x̱aꞌanəꞌ, naꞌ dechgua deꞌe chsaꞌogüeꞌ, naꞌ nadaꞌ gatədaꞌ yeḻəꞌ chdon.
\v 18 Yezaꞌa nga naꞌ yeyaꞌa ganꞌ zo x̱aꞌanəꞌ, naꞌ yapaꞌaneꞌ: X̱a, babenaꞌ deꞌe mal lao Diozənꞌ naꞌ laogoꞌ leꞌ.
\v 19 Naꞌ bitoch zacaꞌa gonoꞌ nadaꞌ cuent ca xiꞌiṉoꞌ, con šə goꞌo latɉə gacaꞌ xmosoꞌ.”
\v 20 Nach bezeꞌe beyeɉeꞌ ganꞌ zo x̱eꞌenəꞌ. Naꞌ zitəꞌələ zeꞌe yežineꞌ catəꞌ bleꞌi x̱eꞌen ḻeꞌ, naꞌ gwsaꞌadoeꞌ ɉəšagueꞌeneꞌ, naꞌ gwdeḻeꞌeneꞌ gwdaogüeꞌeneꞌ bxid c̱hedəꞌ beyašəꞌ bežiꞌilažeꞌeneꞌ.
\v 21 Nach gož xiꞌiṉeꞌenəꞌ ḻeꞌ: “X̱a, babenaꞌ deꞌe mal lao Diozənꞌ naꞌ laogoꞌ leꞌ, naꞌ bitoch zacaꞌa gonoꞌ nadaꞌ cuent ca xiꞌiṉoꞌ.”
\v 22 Naꞌ x̱eꞌenəꞌ gožeꞌ xmoseꞌen: “Ɉəleɉ tgot lachəꞌ šaoꞌ naꞌ guacoꞌoboꞌon. Naꞌ ɉəx̱iꞌ to niy naꞌ gwdioꞌon xbemboꞌon, naꞌ ɉəx̱iꞌ šcueꞌ yel naꞌ gwdioꞌon ṉiꞌaboꞌonəꞌ.
\v 23 Naꞌ ɉəx̱iꞌ goꞌoṉ daꞌonəꞌ bianꞌ chaṉəꞌ naꞌ betəb par gaochob, naꞌ goncho lṉi.
\v 24 Laꞌ xiꞌiṉaꞌ nga babenaꞌaboꞌ cuent ca to biꞌi guat, pero ṉaꞌa zoboꞌ mbamboꞌ. Gwleɉyic̱hɉboꞌ chioꞌo, pero ṉaꞌa babeḻaꞌaboꞌ.” Naꞌ gwzolao chsoꞌoneꞌ lṉinꞌ.
\p
\v 25 Naꞌ xiꞌiṉeꞌ nechənꞌ zdeꞌ yoba catəꞌən bežin xiꞌiṉeꞌen yeto. Naꞌ catəꞌ zezaꞌ benꞌ gwyeɉ yobanꞌ bazon yežineꞌ liž x̱eꞌenəꞌ catəꞌ beneneꞌ chosoꞌocuežeꞌ naꞌ chosoꞌoyeꞌe.
\v 26 Naꞌ goxeꞌ to mosənꞌ naꞌ gwṉabeneꞌ ḻeꞌ bixc̱henꞌ chsoꞌoneꞌ lṉinꞌ.
\v 27 Naꞌ mosənꞌ gožeꞌeneꞌ: “Biꞌi bišoꞌonəꞌ babeḻaꞌaboꞌ naꞌ x̱aꞌonəꞌ babeteꞌ goꞌoṉ daoꞌ bianꞌ chaṉəꞌ c̱hedəꞌ beḻaꞌaboꞌ to šaoꞌ to güen.”
\v 28 Nach xiꞌiṉeꞌ nechənꞌ bžeꞌe, naꞌ bito goneꞌeneꞌ yeyoꞌe liž x̱eꞌenəꞌ. Nach bchoɉ x̱eꞌenəꞌ gotəꞌəyoineꞌ ḻeꞌ yeyoꞌe.
\v 29 Pero xiꞌiṉeꞌ nechənꞌ gožeꞌ x̱eꞌenəꞌ: “Zan iz bachac zoaꞌ nga chontezaꞌ žin con canꞌ chonoꞌ mendad. Naꞌ bitoṉəꞌ gacaꞌ beṉəꞌ godenag. Naꞌ ni tozə šib daoꞌ cuiṉəꞌ goṉoꞌ nadaꞌ par gotaꞌab gonaꞌ lṉinꞌ len beṉəꞌ migw c̱hiaꞌ caꞌ.
\v 30 Naꞌ ṉaꞌa belaꞌ xiꞌiṉoꞌ nga biꞌin benditɉei yoguəꞌəḻoḻ deꞌen bnežɉoꞌoboꞌ gwzaꞌalemboꞌ noꞌolə sargat, naꞌ betoꞌ par ḻeboꞌ to goꞌoṉ daoꞌ bianꞌ chaṉəꞌəch.”
\v 31 Naꞌ x̱eꞌenəꞌ gožeꞌeneꞌ: “Xiꞌiṉdaoguaꞌa, leꞌ zotezoꞌ len nadaꞌ, naꞌ yoguəꞌəḻoḻ deꞌe deidaꞌ naquən c̱hioꞌ.
\v 32 Pero cheyaḻəꞌ goncho lṉi nga ṉaꞌa tant chebeicho babelaꞌ biꞌi bišoꞌonəꞌ, c̱hedəꞌ babenaꞌaboꞌ cuent ca to biꞌi guat, pero ṉaꞌa zoboꞌ mbamboꞌ. Gwleɉyic̱hɉboꞌ chioꞌo pero ṉaꞌa babeḻaꞌaboꞌ.”
\c 16
\s1 Jempl c̱he to mos əblao benꞌ benditɉei deꞌen de c̱he x̱aneꞌ
\p
\v 1 Naꞌ ḻeczə gož Jesoꞌosənꞌ disipl c̱heꞌ caꞌ: ―Gwzo to beṉəꞌ gwniꞌa naꞌ gwzo to mos əblao c̱heꞌ beṉəꞌ gwyoꞌo lao neꞌe bia yix̱əꞌ c̱heꞌ caꞌ naꞌ biquəꞌəchlə deꞌen de c̱heꞌ. Naꞌ beṉəꞌ gwniꞌanəꞌ beneneꞌ rson de que xmosenꞌ babenditɉeineꞌ deꞌen de c̱heꞌ.
\v 2 Nach x̱aneꞌen goxeꞌ ḻeꞌ naꞌ gožeꞌeneꞌ: “Babendaꞌ to dižəꞌ canꞌ chonoꞌ. Cheyaḻəꞌ gonoꞌ cuent c̱he yoguəꞌəḻoḻ deꞌen babc̱hinoꞌ c̱hiaꞌ c̱hedəꞌ bitoch gaquə gonoꞌ xšinaꞌanəꞌ ṉaꞌa.”
\v 3 Nach mosənꞌ beneꞌ xbabənꞌ: “¿Bixa gonaꞌ? X̱anaꞌan bacholagueꞌ nadaꞌ cuich gaquə gonaꞌ xšineꞌenəꞌ, naꞌ nic chac gonaꞌ žin gual naꞌ gaquədaꞌ ztoꞌ šə ṉabaꞌ carida.
\v 4 Ṉezdaꞌ bi gonaꞌ par nic̱h ṉitəꞌ beṉəꞌ yesəꞌəgüialaogüeꞌ nadaꞌ catəꞌ cuich chonaꞌ žin c̱he x̱anaꞌan.”
\v 5 Naꞌ goxeꞌ yoguəꞌ beṉəꞌ caꞌ chsaꞌaḻəꞌ xmech x̱aneꞌenəꞌ tgüeɉə tgüeɉeꞌ. Naꞌ gožeꞌ beṉəꞌ nechənꞌ: “¿Ɉaꞌaquəꞌ chaḻoꞌo c̱he x̱anaꞌanəꞌ?”
\v 6 Naꞌ beꞌenəꞌ gožeꞌeneꞌ: “Chaḻaꞌa c̱he tapa mil ḻitr set.” Nach gož mosənꞌ beꞌenəꞌ: “Gwcheꞌedoꞌ, naꞌ bzoɉ lao cuentənꞌ de que chaḻoꞌo c̱he c̱hopa mil ḻitrzə setənꞌ.”
\v 7 Gwde naꞌ gožeꞌ beṉəꞌ əgwchopenꞌ: “¿Ɉaꞌaquənꞌ chaḻoꞌo c̱he x̱anaꞌanəꞌ?” Nach beꞌenəꞌ gožeꞌeneꞌ: “C̱he to mil rob trigw.” Nach mosənꞌ gožeꞌ beꞌenəꞌ: “Gwcheꞌedoꞌ, naꞌ bzoɉ lao cuent c̱hioꞌonəꞌ de que chaḻoꞌo c̱he x̱onꞌ gueyoa robzə trigonꞌ.”
\v 8 Naꞌ x̱an mos gox̱oayaguənꞌ gocbeꞌineꞌ ḻechguaḻe bib naquə beꞌenəꞌ deꞌen beneꞌ xbab naclənꞌ goneꞌ par nic̱h soeꞌ binḻo len lɉuežɉeꞌ caꞌ beṉəꞌ caꞌ chsaꞌaḻəꞌ c̱he x̱aneꞌen. Nadaꞌ chniaꞌ leꞌe de que beṉəꞌ caꞌ zɉəchiꞌ yic̱hɉgaꞌaqueꞌ porzə deꞌen chac lao yežlyonꞌ chsoꞌonchgüeꞌ xbab naclənꞌ soꞌoneꞌ len deꞌen zɉədeineꞌ. Pero zan beṉəꞌ caꞌ bazɉəyoꞌo beꞌeniꞌ c̱he Diozənꞌ ḻoꞌo yic̱hɉlaꞌaždaꞌogaꞌaqueꞌenəꞌ bito chsoꞌoneꞌ xbab naclənꞌ yesəꞌəc̱hineꞌ deꞌen zɉədeineꞌ.
\p
\v 9 Ṉaꞌa əchniaꞌ leꞌe, deꞌen deile yežlyo nga deꞌe te c̱heinꞌ, pero ḻegwc̱hin ḻen par nic̱h ṉitəꞌ migw c̱hele, naꞌ catəꞌ babeya bi deꞌen deile yežlyo nga, ṉitəꞌ beṉəꞌ yozeneꞌe leꞌe catəꞌ yežinḻe yobanꞌ ganꞌ sole zeɉḻicaṉe.
\p
\v 10 Šə to beṉəꞌ choneꞌ canꞌ cheyaḻəꞌ goneꞌ len deꞌe cuitec zaquəꞌ ḻeczə goneꞌ canꞌ cheyaḻəꞌ len deꞌe zaquəꞌəchgüei, naꞌ beṉəꞌ cui choneꞌ canꞌ cheyaḻəꞌ goneꞌ len deꞌe cuitec zaquəꞌ, ḻeczə bito goneꞌ canꞌ cheyaḻəꞌ len deꞌe zaquəꞌəchgüei.
\v 11 Šə leꞌe cui chonḻe canꞌ cheyaḻəꞌ gonḻe len deꞌen deile yežlyo nga deꞌe te c̱hei, bito goṉ Diozənꞌ leꞌe deꞌe zaquəꞌəche deꞌen cui te c̱hei.
\v 12 Deꞌen deile yežlyo nga c̱he Dioz naꞌanəꞌ, caguə c̱helenꞌ. Naꞌ šə bito chonḻe canꞌ cheyaḻəꞌ gonḻe len deꞌen naquə c̱heꞌenəꞌ, bito goṉeꞌ leꞌe deꞌe zaquəꞌəche deꞌe cui te c̱hei.
\p
\v 13 Notono no gaquə so liž c̱hopə x̱an žin par gaqueꞌ xmosgaꞌaqueꞌ tšiꞌizə, c̱hedəꞌ laꞌ šə goneꞌ caꞌ, gueꞌineꞌ to x̱an žinṉəꞌ naꞌ gaqueneꞌ c̱he yetoeꞌ, o goneꞌ žin c̱he toeꞌ do yic̱hɉ do lažeꞌe naꞌ bito bi respet gapeꞌ c̱he x̱aneꞌen yeto par goneꞌ xšineꞌenəꞌ. Ḻeczə caꞌ leꞌe bito gaquə gonḻe xšin Diozənꞌ do yic̱hɉ do lažəꞌəle naꞌ gonte xšinḻe par gacle beṉəꞌ gwniꞌa.
\p
\v 14 Naꞌ ḻeczə gwnitəꞌ beṉəꞌ fariseo caꞌ gwseꞌeneneꞌ xtižəꞌ Jesoꞌosənꞌ naꞌ gwsoꞌoneneꞌ borl, c̱hedəꞌ gwsoꞌelažəꞌəcheꞌ əsaꞌaqueꞌ beṉəꞌ gwniꞌa.
\v 15 Naꞌ gož Jesoꞌosənꞌ ḻegaꞌaqueꞌ: ―Leꞌe ža, chonḻe par nic̱h beṉac̱hənꞌ chesəꞌəneꞌ c̱hele de que zdaczle ḻicha, pero Diozənꞌ ṉez nḻeꞌineꞌ yic̱hɉlaꞌaždaꞌolenꞌ. Zɉəde deꞌen chsaꞌaque beṉac̱hənꞌ zɉənaquən deꞌe žialao xen pero baḻən zɉənaquən deꞌe chgueꞌi Diozənꞌ.
\s1 Ḻei c̱he Diozənꞌ naꞌ beṉəꞌ caꞌ chnabiꞌe
\p
\v 16 Naꞌ gozna Jesoꞌosənꞌ: ―Antslə con ḻei deꞌen bzoɉ deꞌe Moisezənꞌ naꞌ len deꞌen bosoꞌozoɉ profet caꞌ bzeɉniꞌin chioꞌo c̱he Diozənꞌ. Pero ṉaꞌa deꞌe Juanṉəꞌ babedətix̱ɉuiꞌe dižəꞌ güen dižəꞌ cobənꞌ de que Diozənꞌ ṉabiꞌe con notəꞌətezə beṉəꞌ soeꞌ latɉə, naꞌ ḻeczə caꞌ netoꞌ chyix̱ɉueꞌetoꞌon. Naꞌ beṉəꞌ zan chesəꞌəzo chesəꞌəbiꞌe naclə soꞌoneꞌ par nic̱h ṉabiaꞌ Diozənꞌ ḻegaꞌaqueꞌ.
\p
\v 17 Ca naquə bitəꞌətezə pont daoꞌ c̱he ḻei c̱he Diozənꞌ bito te c̱hei pero ca naquə yežlyonꞌ len deꞌe caꞌ zɉəžia ḻeꞌe yobanꞌ yesəꞌəde c̱hegaꞌaquei.
\s1 Bito yelaꞌacho beꞌen c̱hecho o noꞌol c̱hecho par solencho beṉəꞌ yoblə
\p
\v 18 Notəꞌətezə beṉəꞌ chelaꞌa noꞌol c̱heꞌenəꞌ par yequeꞌe noꞌolə yoblə, tozəczə ca malənꞌ naquən len deꞌen chon beṉəꞌ chgoꞌo xtoeꞌ. Naꞌ yoguəꞌ no beṉəꞌ yošagneꞌe len to noꞌolə beṉəꞌ belaꞌa benꞌ c̱hei ḻeꞌ, ḻeczə tozəczə ca malənꞌ naquən len deꞌen chon beṉəꞌ chgoꞌo xtoeꞌ.
\s1 Beṉəꞌ gwniꞌa naꞌ Lac̱hənꞌ
\p
\v 19 Nach gozna Jesoꞌosənꞌ: ―Gwzo to beṉəꞌ gwniꞌa, naꞌ ḻechguaḻe xoche goquə xalaꞌaneꞌenəꞌ, naꞌ ḻechguaḻe gwdaošaogüeꞌe yoguəꞌ ža.
\v 20 Naꞌ to beṉəꞌ yašəꞌ leꞌ Lac̱h yoguəꞌ ža bzo beṉəꞌ ḻeꞌ choꞌa puert zaguan c̱he beṉəꞌ gwniꞌanəꞌ par gwṉabeꞌ carida. Naꞌ Lac̱hənꞌ ḻechguaḻe gwžia yežəꞌ doxen cuerp c̱heꞌenəꞌ.
\v 21 Naꞌ tant gwdoneꞌ goneꞌeneꞌ gaogüeꞌ pedas daoꞌ yeḻəꞌ guao c̱he beṉəꞌ gwniꞌanəꞌ deꞌen besəꞌəxopə lao yonꞌ. Naꞌ becoꞌ caꞌ ɉaꞌaquəb ɉəsəꞌəḻeꞌeb yežəꞌən gwžia cuerp c̱heꞌenəꞌ.
\v 22 Naꞌ catəꞌ got beṉəꞌ probənꞌ, nach angl caꞌ besyəꞌəziꞌ besyəꞌəqueꞌe ḻeꞌ yobanꞌ ganꞌ zoeꞌ len deꞌe x̱axtaꞌocho Abraanṉəꞌ. Naꞌ ḻeczə got beṉəꞌ gwniꞌanəꞌ naꞌ bosəꞌəcuašeꞌeneꞌ.
\v 23 Naꞌ beyeɉeꞌ ganꞌ žaꞌ beṉəꞌ caꞌ bagwsaꞌat. Naꞌ lao chžaglaogüeꞌ naꞌ gwḻis laogüeꞌenəꞌ naꞌ bleꞌineꞌ zitəꞌələ nitəꞌ Abraanṉəꞌ leneꞌ Lac̱hənꞌ yobanꞌ.
\v 24 Naꞌ gwṉeꞌ zižɉo gwneꞌ: “X̱a Abraam, beyašəꞌəlažəꞌəšguei nadaꞌ, naꞌ bseḻəꞌ Lac̱hənꞌ par yosbiseꞌ ložaꞌan len latəꞌ nis deꞌen yexopə xbeneꞌenəꞌ c̱hedəꞌ laꞌ ḻechguaḻe chžaglaoguaꞌ ḻoꞌo yiꞌ nga.”
\v 25 Pero naꞌ Abraanṉəꞌ gožeꞌ ḻeꞌ: “Xiꞌiṉaꞌ bosaꞌalažəꞌ catəꞌ lao bguanoꞌ yežlyonꞌ porzə deꞌe šaoꞌ deꞌe güen gotəꞌ c̱hioꞌ, naꞌ Lac̱h nga porzə deꞌe mal goc c̱heꞌ. Naꞌ bazoeꞌ mbalaz nga ṉaꞌa, naꞌ leꞌ chžaglaogoꞌ.
\v 26 Bito gaquə goneꞌ canꞌ cheꞌendoꞌ c̱hedəꞌ laꞌ Diozənꞌ bac̱h bzieꞌ to bdiṉɉ xen ga cui no zaquəꞌ te entr netoꞌ naꞌ leꞌe par nic̱h caꞌ bito gaquə yidətoꞌ ganꞌ zolenꞌ, naꞌ nic gaquə daꞌac leꞌe nga.”
\v 27 Nach beṉəꞌ gwniꞌanəꞌ gožeꞌ Abraanṉəꞌ: “Beṉəꞌ gol daoꞌ, chatəꞌəyoidaꞌ leꞌ, bseḻəꞌəšga Lac̱hənꞌ liž x̱aꞌanəꞌ.
\v 28 Nitəꞌ gueyəꞌ beṉəꞌ bišaꞌa, naꞌ cheꞌendaꞌ c̱hix̱ɉueꞌineꞌ ḻegaꞌaqueꞌ naquənꞌ soꞌoneꞌ par nic̱h Diozənꞌ bito əseḻeꞌe ḻegaꞌaqueꞌ latɉə nga ganꞌ yesəꞌəžaglaogüeꞌ.”
\v 29 Abraanṉəꞌ gožeꞌ ḻeꞌ: “Deczə ḻibr deꞌen bzoɉ deꞌe Moisezənꞌ naꞌ ḻibr deꞌen bosoꞌozoɉ deꞌe profet caꞌ beṉəꞌ caꞌ gwsoꞌe xtižəꞌ Diozənꞌ. Cheyaḻəꞌ yosoꞌozenagueꞌ c̱he deꞌe caꞌ zɉənyoɉənꞌ.”
\v 30 Naꞌ gožeꞌ Abraanṉəꞌ: “Bito beṉəꞌ gol daoꞌ. Žaləꞌ to beṉəꞌ yebaneꞌ ladɉo beṉəꞌ guat caꞌ güeꞌeleneꞌ ḻegaꞌaqueꞌ dižəꞌ, laꞌ gosyəꞌədiṉɉeneꞌ xtoḻəꞌəgaꞌaqueꞌenəꞌ.”
\v 31 Nach gož Abraanṉəꞌ ḻeꞌ: “Šə bito chosoꞌozenagueꞌ c̱he deꞌen bzoɉ deꞌe Moisezənꞌ naꞌ deꞌe profet caꞌ, ḻaꞌaṉəꞌəczə šə yeban to beṉəꞌ ladɉo beṉəꞌ guat caꞌ, bito seꞌeɉḻeꞌe c̱he Diozənꞌ.”
\c 17
\s1 Bito cheyaḻəꞌ goncho ca əxopə beṉəꞌ yoblə goneꞌ deꞌe mal
\p
\v 1 Nach gož Jesoꞌosənꞌ disipl c̱heꞌ caꞌ: ―Syempr de deꞌen gonən ca yesəꞌəxopə beṉəꞌ soꞌoneꞌ deꞌe malənꞌ. Pero probchguazə beṉəꞌ choneꞌ ca yesəꞌəxopeꞌ soꞌoneꞌ deꞌe malənꞌ.
\v 2 Ncaꞌalə xṉeze žaləꞌ yosoꞌoc̱heɉeꞌ yeneꞌenəꞌ to yeɉ yišəꞌ naꞌ žɉəsəꞌəzaḻeꞌeneꞌ ḻoꞌo nisdaꞌonəꞌ cle ca soeꞌ goneꞌ ca əxopə beṉəꞌ goneꞌ deꞌe malənꞌ ḻaꞌaṉəꞌ tozə beṉəꞌ cuitec bi zaquəꞌ len beṉac̱hənꞌ.
\p
\v 3 Ḻeꞌe gon xbab c̱hele, šə to beṉəꞌ bišəꞌəcho beṉəꞌ bachonḻilažəꞌ Diozənꞌ goneꞌ mal contr tole, benꞌ beneꞌ contr cheyaḻəꞌ gatəꞌəyoineꞌ ḻeꞌ yediṉɉeneꞌ xtoḻeꞌenəꞌ, naꞌ šə yediṉɉeneꞌ xtoḻeꞌenəꞌ cheyaḻəꞌ yeziꞌixeneꞌ c̱heꞌ.
\v 4 Ḻaꞌaṉəꞌəczə gaž las lao tža goneꞌ deꞌe mal contr beṉəꞌ bišeꞌenəꞌ, šə gaž laste əṉeꞌ: “Babeyeɉdaꞌ c̱he deꞌen benaꞌ, beziꞌixen c̱hiaꞌ”, naꞌ cheyaḻəꞌ yeziꞌixeneꞌ c̱heꞌ.
\s1 Gwseꞌeneneꞌ soꞌonḻilažəꞌəcheꞌ Diozənꞌ
\p
\v 5 Nach gwseꞌ apostol caꞌ X̱anchonꞌ: ―Gaquəlenšgoꞌ netoꞌ par nic̱h gonḻilažəꞌəchtoꞌ Diozənꞌ.
\p
\v 6 Nach gož X̱anchonꞌ ḻegaꞌaqueꞌ: ―Xsa yag moztasənꞌ naquən deꞌe daoꞌ rizəꞌ. Naꞌ ḻaꞌaṉəꞌəczə deꞌen chonḻilažəꞌəle Diozənꞌ gwxaquəꞌəleben ca to xsa moztasənꞌ laogüe deꞌen cuiṉəꞌ gonḻilažəꞌəchgualeneꞌ, guac yeꞌele yag yix̱güio nga: “Bošaꞌ xišnaꞌo nga naꞌ žɉəyezoꞌ ḻoꞌo nisdaꞌonəꞌ”, naꞌ guaquəczə canꞌ ṉalenəꞌ.
\s1 Deꞌen cheyaḻəꞌ soꞌon mos caꞌ
\p
\v 7 Ca naquə costombr c̱helenꞌ šə mos c̱helenꞌ chguaꞌaṉeꞌ goꞌoṉ o chapə chyeꞌ xiləꞌ, catəꞌ cheleꞌe goyebənꞌ bito cheꞌeleneꞌ: “Beyoꞌo ngalə gwcheꞌedoꞌ gaogoꞌ xšeꞌ.”
\v 8 Cle cheꞌeleneꞌ: “Bsiꞌiniꞌa deꞌen yeꞌeɉ gaoguaꞌ naꞌ gwdioꞌ deꞌen gaoguaꞌanəꞌ. Te yedaoguaꞌanəꞌ nach gaogoꞌ.”
\v 9 Naꞌ bito choꞌeleneꞌ yeḻəꞌ chox̱cwlen catəꞌ babeneꞌ deꞌen gožleneꞌ goneꞌ.
\v 10 Naꞌ ḻeczə caꞌ leꞌe nacle disipl c̱hiaꞌ, catəꞌ babenḻe yoguəꞌəḻoḻ deꞌen nonaꞌ mendad gonḻe cheyaḻəꞌ əṉale: “Bito bi zaquəꞌətoꞌ par goṉoꞌ yeḻəꞌ chox̱cwlen c̱hetoꞌ, c̱hedəꞌ deꞌen babentoꞌonəꞌ laꞌ deꞌe cheyaḻəꞌəczə gontoꞌonəꞌ.”
\s1 Jesoꞌosənꞌ beyoneꞌ ši beṉəꞌ chseꞌi yižgüeꞌ deꞌen nziꞌ ḻepr
\p
\v 11 Lao zdaꞌ Jesoꞌosənꞌ Jerosalenṉəꞌ len disipl c̱heꞌ caꞌ naꞌ gwdieꞌ ganꞌ zɉəndiḻ distrit c̱he Samaria len Galileanꞌ.
\v 12 Naꞌ besəꞌəžineꞌ to choꞌa yež daoꞌ naꞌ besəꞌəchoɉ ši beṉəꞌ zɉesəꞌəšagueꞌ Jesoꞌosənꞌ, beṉəꞌ caꞌ chseꞌi yižgüeꞌ deꞌen nziꞌ ḻepr, naꞌ gosəꞌəzecheꞌ zitəꞌələ.
\v 13 Naꞌ gosəꞌəṉeꞌ zižɉo gwseꞌeneꞌ: ―Maestr Jesoꞌos, beyašəꞌəlažəꞌəšguei netoꞌ.
\p
\v 14 Naꞌ Jesoꞌosənꞌ catəꞌ bleꞌineꞌ ḻegaꞌaqueꞌ gožeꞌ ḻegaꞌaqueꞌ: ―Ḻežɉəyaꞌac lao bx̱oz caꞌ nic̱h yesəꞌəgüieꞌ leꞌe.
\p Naꞌ goquənꞌ lao zezyəꞌəngüeꞌe nezənꞌ besyəꞌəyaqueneꞌ.
\v 15 Nach toeꞌ catəꞌ gocbeꞌineꞌ de que bac̱h beyaqueneꞌ naꞌ bebiꞌe naꞌ gwṉeꞌ zižɉo beꞌelaogüeꞌe Diozənꞌ.
\v 16 Naꞌ bzo xibeꞌ lao Jesoꞌosənꞌ naꞌ beꞌeneꞌ yeḻəꞌ chox̱cwlen. Beꞌenəꞌ ben caꞌ naqueꞌ to beṉəꞌ Samaria.
\v 17 Nach gwna Jesoꞌosənꞌ: ―Ši beṉəꞌ canꞌ beyonaꞌ. ¿Gaṉxa beṉəꞌ caꞌ yeganꞌ?
\v 18 Tozə beṉəꞌ zitəꞌ nga bebiꞌe par choꞌelaogüeꞌe Diozənꞌ.
\p
\v 19 Nach gož Jesoꞌosənꞌ beꞌenəꞌ: ―Bezožaꞌ naꞌ beyeɉ to šaoꞌ to güen. Babeyacdoꞌ c̱hedəꞌ c̱honḻilažoꞌo nadaꞌ.
\s1 Yeḻəꞌ chnabiaꞌ c̱he Diozənꞌ
\p
\v 20 Naꞌ goquənꞌ beṉəꞌ fariseo caꞌ gosəꞌəṉabeneꞌ ḻeꞌ batxanꞌ yidə benꞌ əseḻəꞌ Diozənꞌ par ṉabiꞌe ṉasyon Izraelənꞌ. Nach božiꞌ Jesoꞌosənꞌ xtižəꞌəgaꞌaqueꞌenəꞌ gwneꞌ: ―Ca naquənꞌ ṉabiꞌenəꞌ bito naquən to deꞌe leꞌicho.
\v 21 Notono no cheyaḻəꞌ əṉeꞌ: “Bgüiašc nga chnabiꞌe”, o “Naꞌ chnabiꞌe”, c̱hedəꞌ bazoeꞌ ṉaꞌa entr leꞌe chnabiꞌe.
\p
\v 22 Nach gožeꞌ disipl c̱heꞌ caꞌ: ―Gwžin ža catəꞌən ṉale: “Žaləꞌəga ṉaꞌa bac̱h zocho yobanꞌ ganꞌ chnabiaꞌ benꞌ bseḻəꞌ Diozənꞌ.” Pero bito gaquə canꞌ chṉablažəꞌəlenəꞌ.
\v 23 Nitəꞌ beṉəꞌ əseꞌe leꞌe: “Bgüiašc nga chnabiꞌe”, o “Bgüiašc naꞌ chnabiꞌe”, pero leꞌe bito ṉaole beṉəꞌ caꞌ əseꞌe leꞌe caꞌ.
\v 24 Canꞌ chac catəꞌ chep yesənꞌ chseꞌeniꞌin doxenḻə ḻeꞌe yobanꞌ to de repentzə, ḻeczə canꞌ gaquə catəꞌən əžin ža yidaꞌ deꞌe yoblə, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h yidaꞌ to deꞌe repentzə naꞌ yoguəꞌəḻoḻ beṉəꞌ yesəꞌəleꞌineꞌ nadaꞌ.
\v 25 Zguaꞌatec de deꞌe zan deꞌe cheyaḻəꞌ c̱hiꞌ sacaꞌa, naꞌ ṉezdaꞌ de que beṉəꞌ caꞌ žaꞌ ṉaꞌa bito seꞌeɉḻeꞌe c̱hiaꞌ.
\v 26 Ḻeczə canꞌ goquə ca tyemp c̱he Noenəꞌ, ḻeczə canꞌ gaquə catəꞌən bazon əžin ža yidaꞌ deꞌe yoblə, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\v 27 Beṉəꞌ gwnitəꞌ ca tyemp c̱he Noenꞌ gwžaꞌazecheꞌ gwseꞌeɉ gwsaꞌogüeꞌ naꞌ gwsoꞌelaozechgaꞌaqueꞌ bosəꞌəšagneꞌe naꞌ bosoꞌošagueꞌ naꞌ no xiꞌiṉgaꞌaqueꞌ xte catəꞌən bžin ža gwyoꞌo Noenꞌ ḻoꞌo barconꞌ, naꞌ goc to yeɉw sioꞌ juisy nach gosəꞌəbiayiꞌ yoguəꞌ beṉəꞌ caꞌ cui gwsoꞌo ḻoꞌo barconꞌ.
\v 28 Ḻeczə canꞌ goquə ca tyemp c̱he Lotənꞌ. Beṉəꞌ Sodoma caꞌ gwžaꞌazecheꞌ gwseꞌeɉ gwsaꞌogüeꞌ, gwsoꞌoteꞌe no bia yix̱əꞌ c̱hegaꞌaqueꞌ naꞌ bichlə deꞌe de c̱hegaꞌaqueꞌ, naꞌ gosəꞌəziꞌe bi deꞌen besəꞌəyažɉeneꞌ naꞌ gwsaꞌaz gwsaꞌaṉeꞌ naꞌ gwsoꞌon ližgaꞌaqueꞌ.
\v 29 Pero naꞌ žanꞌ bezaꞌ Lotənꞌ Sodomanꞌ, Diozənꞌ beneꞌ par nic̱h ḻechguaḻe byiṉɉ yiꞌ naꞌ sofr yobanəꞌ naꞌ gosəꞌəbiayiꞌ yogueꞌe.
\v 30 Canꞌ gaquə catəꞌən yidaꞌ deꞌe yoblə, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h, naꞌ yoguəꞌəḻoḻ beṉəꞌ yesəꞌəleꞌineꞌ nadaꞌ.
\p
\v 31 Naꞌ žanꞌ yidaꞌ šə naꞌaclə zo to beṉəꞌ choneꞌ dezcanz lao sotea c̱heꞌ ližeꞌenəꞌ naꞌ šinḻazeꞌenəꞌ žaꞌan ḻoꞌo yoꞌonəꞌ, cui yeyetɉeꞌ par yetobeꞌ šinḻazeꞌenəꞌ, con cueɉyic̱hɉeꞌen. Naꞌ ḻeczə caꞌ benꞌ zo do yoba bito gaqueneꞌ yeyeɉ ližeꞌ.
\v 32 Ḻeꞌe žɉsaꞌalažəꞌ canꞌ goc c̱he noꞌol c̱he Lotənꞌ.
\v 33 Notəꞌətezə beṉəꞌ chaqueneꞌ goneꞌ par nic̱h cui c̱hiꞌ saqueꞌe o par nic̱h cui no got ḻeꞌ, beꞌenanꞌ cuiayiꞌ. Naꞌ notəꞌətezə beṉəꞌ chsanḻažəꞌ cuineꞌ c̱hiꞌ saqueꞌe o soꞌot beṉəꞌ ḻeꞌ por ni c̱hiaꞌ, bade yeḻəꞌ mban c̱heꞌenəꞌ zeɉḻicaṉe.
\p
\v 34 Echniaꞌ leꞌe, quinga gaquə žeꞌenəꞌ catəꞌən yidaꞌ deꞌe yoblə: C̱hopə beṉəꞌ zɉədieꞌ chəsəꞌətaseꞌ, toeꞌ yeziꞌ yecaꞌa Diozənꞌ naꞌ toeꞌ yegaꞌaṉ.
\v 35 Naꞌ c̱hopə noꞌolə ṉitəꞌ txen chsoꞌoteꞌ, toeꞌ yeziꞌ yecaꞌa Diozənꞌ, naꞌ toeꞌ yegaꞌaṉ.
\v 36 Naꞌ c̱hopə beṉəꞌ ṉitəꞌ do yoba, toeꞌ yeziꞌ yecaꞌa Diozənꞌ naꞌ ḻeczə yegaꞌaṉ toeꞌ.
\p
\v 37 Catəꞌ gwseꞌeneneꞌ dižəꞌ quinga, gwseꞌeneꞌ: ―¿Ganꞌ gaquə deꞌe quinga X̱antoꞌ?
\p Nach Jesoꞌosənꞌ gožeꞌ ḻegaꞌaqueꞌ: ―Ngaleꞌen chonen c̱he benꞌ neꞌ: “Ganꞌ de bia guat nanꞌ chesəꞌəžag šod caꞌ.”
\c 18
\s1 Jempl c̱he to noꞌolə gozebə len to juez mal
\p
\v 1 Naꞌ beꞌeleneꞌ ḻegaꞌaqueꞌ to jempl par nic̱h bsed bloꞌineꞌ ḻegaꞌaqueꞌ de que cheyaḻəꞌ soꞌontezə soꞌoneꞌ orasyon sin cui žɉəx̱aquəꞌəlažəꞌəgaꞌaqueꞌ. Naꞌ gožeꞌ ḻegaꞌaqueꞌ:
\v 2 ―Gwcheꞌ to syoda ganꞌ gwzo to juez. Naꞌ juezənꞌ bito gwdapeꞌ Diozənꞌ respet naꞌ nic gwcheꞌ yic̱hɉeꞌ šə chsaꞌazlažəꞌ beṉac̱hənꞌ canꞌ choneꞌenəꞌ.
\v 3 Naꞌ lao syodanꞌ gwzo to noꞌolə gozebə naꞌ goxɉzə cheɉeꞌ lao juezənꞌ naꞌ cheꞌe ḻeꞌ: “Bosla nadaꞌ lao naꞌ beṉəꞌ contr c̱hiaꞌanəꞌ.”
\v 4 Bagoc sša bito bzenagueꞌ c̱heꞌ, pero gwdelə beneꞌ xbabənꞌ naꞌ gwneꞌ: “Bito chapaꞌ Diozənꞌ respet naꞌ nic chiꞌ yic̱hɉaꞌ šə chsaꞌazlažəꞌ beṉac̱hənꞌ canꞌ chonaꞌ.
\v 5 Pero yoslaꞌ noꞌolə nga lao naꞌ beṉəꞌ contr c̱heꞌ laꞌ ḻechguaḻe zed choneꞌeneꞌ nadaꞌ. Šə bito gonaꞌ yeḻəꞌ jostis c̱heꞌenəꞌ bitoch soidaꞌ tant zed chedeyeneneꞌ nadaꞌ.”
\p
\v 6 Nach gož X̱anchonꞌ ḻegaꞌaqueꞌ: ―Ḻeꞌe gon xbab c̱he deꞌen gwna juezənꞌ benꞌ cui zda ḻicha.
\v 7 Naquəchxe gon Diozənꞌ gwzenagueꞌ c̱he beṉəꞌ caꞌ bagwleɉeꞌ par zɉənaqueꞌ xiꞌiṉeꞌ, beṉəꞌ caꞌ chsoꞌolgüiž ḻeꞌ do ža do yel. Goslaczeꞌ ḻegaꞌaqueꞌ lao naꞌ beṉəꞌ contr c̱hegaꞌaqueꞌ caꞌ ḻaꞌaṉəꞌəczə šə əsaꞌaqueneꞌ de que bachžeineꞌ.
\v 8 Echniaꞌ leꞌe, to žalṉezdaoꞌ Diozənꞌ yosleꞌ ḻegaꞌaqueꞌ lao naꞌ beṉəꞌ contr c̱hegaꞌaqueꞌ caꞌ. Pero catəꞌ nadaꞌ yidaꞌ yežlyo nga yetlas, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h, cuili ṉeꞌe ṉitəꞌ beṉəꞌ ṉeꞌe chsoꞌonḻilažeꞌe nadaꞌ par yoslaꞌ ḻegaꞌaqueꞌ lao naꞌ beṉəꞌ contr c̱hegaꞌaqueꞌ caꞌ.
\s1 Jempl c̱he to beṉəꞌ fariseo len to beṉəꞌ goc̱hixɉw
\p
\v 9 Naꞌ gwnitəꞌ baḻəꞌ beṉəꞌ zɉənapəchgua confyanz cuingaꞌaqueꞌ de que zɉənaqueꞌ beṉəꞌ güen lao Diozənꞌ ca deꞌen chsoꞌoneꞌenəꞌ. Beṉəꞌ caꞌ zɉənoneꞌen de que beṉəꞌ yeziquəꞌəchlə bito bi zɉəzaqueꞌe. Naꞌ Jesoꞌosənꞌ beꞌe jempl nga par beṉəꞌ caꞌ zɉənapəchgua confyanz cuingaꞌaqueꞌ, gwneꞌ:
\v 10 ―C̱hopə beṉəꞌ ɉaꞌaqueꞌ ḻoꞌo yoꞌodaoꞌ əblaonəꞌ ɉseꞌeneꞌ orasyon, toeꞌ beṉəꞌ fariseo naꞌ benꞌ yeto beṉəꞌ goc̱hixɉw.
\v 11 Beṉəꞌ fariseonꞌ gwzecheꞌ naꞌ beneꞌ orasyonṉəꞌ choꞌelaoꞌ cuineꞌ naꞌ gwneꞌ quinga: “Dioz, choṉaꞌ yeḻəꞌ chox̱cwlen c̱hioꞌ c̱hedəꞌ bito chonaꞌ canꞌ chsoꞌon yeziquəꞌəchlə beṉəꞌ. Bito chcaꞌa bi deꞌe de c̱he beṉəꞌ yoblə, naꞌ bito chonaꞌ bichlə deꞌe mal. Bito nacaꞌ beṉəꞌ ggoꞌo xtoi, nic chbeɉyic̱hɉaꞌ noꞌol c̱hiaꞌ par solenaꞌ beṉəꞌ yoblə, naꞌ nic nacaꞌ beṉəꞌ mal canꞌ naquə beṉəꞌ goc̱hixɉw nga.
\v 12 C̱hopə ža lao to xman chzoaꞌ cui chaoguaꞌ. Naꞌ yoguəꞌəḻoḻ gan deꞌen chonaꞌ, chonaꞌan ši cueꞌelə naꞌ chnežɉuaꞌ tcueꞌen par yoꞌodaꞌonəꞌ.”
\v 13 Naꞌ beṉəꞌ goc̱hixɉonꞌ gwzechatezeꞌ zitəꞌələ, naꞌ xte nic cheyaxɉeneꞌ əḻis laogüeꞌenəꞌ əggüieꞌ yobanꞌ, naꞌ chbažəꞌ lc̱hoꞌenəꞌ gwneꞌ: “Dioz, beyašəꞌəlažəꞌəšguei nadaꞌ beṉəꞌ güen deꞌe mal.”
\v 14 Caꞌazə deꞌe gwna beṉəꞌ goc̱hixɉonꞌ. Naꞌ əchniaꞌ leꞌe, Diozənꞌ beziꞌixeneꞌ c̱he beṉəꞌ goc̱hixɉonꞌ, naꞌ beyeɉeꞌ ližeꞌ sin cui bi xtoḻeꞌe gotəꞌ. Caguə caꞌ beṉəꞌ fariseonꞌ. Naꞌ notəꞌətezcho choꞌelaoꞌ cuincho, Diozənꞌ goneꞌ par nic̱h gacbeꞌicho de que bitobi zaquəꞌəcho. Naꞌ notəꞌətezcho choncho xbab de que bitotec bi zaquəꞌəcho, Diozənꞌ goṉeꞌ chioꞌo yeḻəꞌ balaꞌaṉ.
\s1 Ɉsoaꞌ beṉəꞌ bidaoꞌ lao Jesoꞌosənꞌ
\p
\v 15 Naꞌ ɉaꞌac beṉəꞌ ɉsoꞌe bidaoꞌ lao Jesoꞌosənꞌ par nic̱h əx̱oa neꞌenəꞌ yic̱hɉgaꞌacboꞌ naꞌ goneꞌ orasyon c̱hegaꞌacboꞌ. Naꞌ catəꞌ besəꞌəleꞌi disipl caꞌ canꞌ chsoꞌoneꞌenəꞌ, gosəꞌədiḻeꞌ ḻegaꞌaqueꞌ.
\v 16 Pero naꞌ Jesoꞌosənꞌ goxgaꞌaqueꞌeboꞌ naꞌ gožeꞌ disipl c̱heꞌ caꞌ: ―Ḻeꞌe güeꞌ latɉə laꞌac bidaoꞌ caꞌ laoguaꞌ nga, naꞌ cui əgwžonḻe. Naꞌ əchniaꞌ leꞌe, beṉəꞌ caꞌ chəsəꞌəzex̱ɉw yic̱hɉgaꞌaqueꞌ lao Diozənꞌ canꞌ chəsəꞌəzex̱ɉw yic̱hɉ bidaoꞌ caꞌ lao x̱axnaꞌagaꞌacboꞌ, ḻegaꞌaczeꞌenəꞌ chsoꞌe latɉə chnabiaꞌ Diozənꞌ ḻegaꞌaqueꞌ.
\v 17 Bidaoꞌ caꞌ bito chsoꞌon cuingaꞌacboꞌ xen, naꞌ deꞌe ḻi chniaꞌ leꞌe, notəꞌətezle šə cui yeyacle ca bidaoꞌ par güeꞌele latɉə ṉabiaꞌ Diozənꞌ leꞌe, bito gaquə yežinḻe yobanꞌ ganꞌ zo Diozənꞌ chnabiꞌe.
\s1 Beṉəꞌ güegoꞌ benꞌ goquə beṉəꞌ gwniꞌa
\p
\v 18 To beṉəꞌ gwnabiaꞌ gožeꞌ Jesoꞌosənꞌ: ―Maestr, leꞌ nacoꞌ beṉəꞌ güen, gwna nadaꞌ bi deꞌen cheyaḻəꞌ gonaꞌ par nic̱h gatəꞌ yeḻəꞌ mban zeɉḻicaṉe c̱hiaꞌ.
\p
\v 19 Naꞌ par nic̱h gon beꞌenəꞌ xbab c̱he deꞌen neꞌ, Jesoꞌosənꞌ gožeꞌeneꞌ: ―¿Bixc̱henꞌ naoꞌ de que nacaꞌ beṉəꞌ güen? Dioz nanꞌ naqueꞌ ḻeꞌezelaogüe beṉəꞌ güen.
\v 20 Leꞌ ṉezdoꞌ binꞌ na ḻeinꞌ: “Cui coꞌo xtole, naꞌ cui cueɉyic̱hɉle beꞌen c̱hele o noꞌol c̱hele par solenḻe beṉəꞌ yoblə; cui gotle beṉəꞌ; cui cuanḻe; bito gacle testigw faḻs contr saꞌalɉuežɉle; gwnežɉwle yeḻəꞌ balaꞌaṉ x̱axnaꞌale.”
\p
\v 21 Nach gož beꞌen ḻeꞌ: ―Yoguəꞌəḻoḻ deꞌe quinga chonaꞌan dezd xcuidaꞌa.
\p
\v 22 Nach catəꞌ bene Jesoꞌosənꞌ xtižeꞌen naꞌ gožeꞌeneꞌ: ―Tozə deꞌen ṉeꞌe chac faḻt gonoꞌ. Ɉəyeyetəꞌ yoguəꞌəḻoḻ bi deꞌe de c̱hioꞌ, naꞌ mech deꞌen leꞌidoꞌ c̱he deꞌe caꞌ bnežɉon beṉəꞌ yašəꞌ, nach da denao nadaꞌ. Naꞌ catəꞌ yežinoꞌ yobanꞌ ganꞌ zo Diozənꞌ, deꞌe zaquəꞌəche gatəꞌ c̱hioꞌ.
\p
\v 23 Pero naꞌ beꞌenəꞌ catəꞌ beyož beneneꞌ dižəꞌ deꞌen gož Jesoꞌosənꞌ ḻeꞌ, gwzechachoeꞌ trist, c̱hedəꞌ laꞌ goqueꞌ to beṉəꞌ gwniꞌachgua.
\v 24 Naꞌ bgüia Jesoꞌosənꞌ beṉəꞌ gwniꞌanəꞌ, naꞌ gwneꞌ: ―Zdebəchgua naquən par to beṉəꞌ gwniꞌa güeꞌe latɉə par nic̱h ṉabiaꞌ Diozənꞌ ḻeꞌ.
\v 25 Zdebəchlə naquən par to beṉəꞌ gwniꞌa güeꞌe latɉə ṉabiaꞌ Diozənꞌ ḻeꞌ cle ca par to camey teb to ḻoꞌo nag yešəꞌ.
\p
\v 26 Naꞌ beṉəꞌ caꞌ bosoꞌozenagueꞌ xtižeꞌenəꞌ gwseꞌeneꞌ: ―¿Noxanꞌ yechoɉ xniꞌa deꞌe malənꞌ ža?
\p
\v 27 Naꞌ Jesoꞌosənꞌ gožeꞌ ḻegaꞌaqueꞌ: ―Deꞌen cui gaquə gon beṉac̱hənꞌ, bito ṉacho cui gaquə gon Diozənꞌ ḻen.
\p
\v 28 Nach Bedənꞌ gožeꞌ ḻeꞌ: ―Netoꞌ bagwleɉyic̱hɉtoꞌ famiḻy c̱hetoꞌ caꞌ naꞌ len deꞌen deitoꞌ par chonḻilažəꞌətoꞌ leꞌ naꞌ chzenagtoꞌ c̱hioꞌ.
\p
\v 29 Naꞌ gož Jesoꞌosənꞌ ḻegaꞌaqueꞌ: ―Deꞌe ḻi chniaꞌ, šə nole bagwleɉyic̱hɉle ližle, xoꞌolle, bišəꞌəle, x̱axnaꞌale o xiꞌiṉle c̱hedəꞌ choꞌele latɉə chnabiaꞌ Diozənꞌ leꞌe,
\v 30 Diozənꞌ goṉeꞌ leꞌe deꞌe zaquəꞌəche lao yežlyo nga ṉaꞌa clezə ca deꞌe caꞌ naꞌ beṉəꞌ caꞌ bagwleɉyic̱hɉle. Naꞌ catəꞌ yežinḻe yobanꞌ goneꞌ par nic̱h əbanḻe zeɉḻicaṉe.
\s1 Deꞌe yoblə gosyix̱ɉueꞌe Jesoꞌosənꞌ de que gateꞌ
\p
\v 31 Naꞌ gwleɉ Jesoꞌosənꞌ apostol caꞌ šižiṉ caꞌalə, naꞌ gožeꞌ ḻegaꞌaqueꞌ: ―Ṉaꞌa šeɉcho Jerosalenṉəꞌ ganꞌ gaquə yoguəꞌəḻoḻ deꞌen babosoꞌozoɉ deꞌe profet caꞌ c̱hiaꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\v 32 Gacaꞌ lao naꞌ beṉəꞌ caꞌ cui zɉənaquə beṉəꞌ Izrael, naꞌ soꞌoneꞌ nadaꞌ borl naꞌ yesəꞌəziꞌic̱hižeꞌe nadaꞌ, nach yosoꞌožaꞌ x̱eneꞌe choꞌalaoguaꞌanəꞌ.
\v 33 Yesəꞌəyineꞌ nadaꞌ yid sot nach soꞌoteꞌ nadaꞌ, pero yeyoṉ ža yebanaꞌ ladɉo beṉəꞌ guat caꞌ.
\p
\v 34 Pero disipl c̱heꞌ caꞌ bito gwseꞌeɉniꞌineꞌ deꞌen gožeꞌ ḻegaꞌaqueꞌ. Zɉənc̱hoḻ yic̱hɉlaꞌaždaꞌogaꞌaqueꞌenəꞌ, deꞌe naꞌanəꞌ bito gwseꞌeɉniꞌineꞌen.
\s1 To beṉəꞌ lc̱hol beṉəꞌ Jerico beleꞌineꞌ
\p
\v 35 Nach lao bazon əžin Jesoꞌosənꞌ Jericonꞌ, to beṉəꞌ lc̱hoḻ chiꞌe choꞌa nezənꞌ chṉabeꞌ carida.
\v 36 Naꞌ beneneꞌ chesəꞌəde beṉəꞌ zan, naꞌ gwṉabeꞌ binꞌ chac.
\v 37 Nach gwseꞌeneꞌ: ―Jesoꞌos beṉəꞌ Nasaretənꞌ chdieꞌ laogoꞌonəꞌ.
\p
\v 38 Naꞌ gwṉeꞌ zižɉo gwneꞌ: ―Jesoꞌos, lenꞌ nacoꞌ xiꞌiṉ dia c̱he deꞌe Rei Dabinꞌ, ¡beyašəꞌəlažəꞌəšguei nadaꞌ!
\p
\v 39 Nach beṉəꞌ caꞌ zɉəžialao lao Jesoꞌosənꞌ gosəꞌədiḻeꞌ beṉəꞌ lc̱hoḻənꞌ gwseꞌeneꞌ de que cheyaḻəꞌ soeꞌ žizə, pero nachle gwṉeꞌ zižɉochlə gwneꞌ: ―Lenꞌ nacoꞌ xiꞌiṉ dia c̱he deꞌe Rei Dabinꞌ, ¡beyašəꞌəlažəꞌəšguei nadaꞌ!
\p
\v 40 Jesoꞌosənꞌ gwlezeꞌ nach beneꞌ mendad əžɉsoꞌe beṉəꞌ lc̱hoḻənꞌ laogüeꞌenəꞌ naꞌ catəꞌ bgüiguəꞌ beṉəꞌ lc̱hoḻənꞌ lao Jesoꞌosənꞌ nach gožeꞌeneꞌ:
\v 41 ―¿Bi cheꞌendoꞌ gonaꞌ len leꞌ?
\p Nach beṉəꞌ lc̱hoḻənꞌ gožeꞌeneꞌ: ―X̱anaꞌ benšga par nic̱h yeleꞌidaꞌ.
\p
\v 42 Jesoꞌosənꞌ gožeꞌeneꞌ: ―Beleꞌi. Deꞌen chonḻilažoꞌo nadaꞌ bac̱h goc canꞌ cheꞌendoꞌonəꞌ.
\p
\v 43 Naꞌ ḻeꞌe beleꞌiteineꞌ naꞌ gwnaogüeꞌ Jesoꞌosənꞌ beꞌelaogüeꞌe Diozənꞌ, naꞌ ḻeczə caꞌ yoguəꞌ beṉəꞌ caꞌ besəꞌəleꞌineꞌ canꞌ goquənꞌ gwsoꞌelaogüeꞌe Diozənꞌ.
\c 19
\s1 Jesoꞌosənꞌ naꞌ Saqueonꞌ
\p
\v 1 Nach Jesoꞌosənꞌ gwyoꞌe Jericonꞌ naꞌ gwdezeꞌ yešḻaꞌa syodanꞌ.
\v 2 Naꞌ zo to beṉəꞌ leꞌ Saqueo. Naqueꞌ beṉəꞌ gwnabiaꞌ c̱he beṉəꞌ goc̱hixɉw caꞌ, naꞌ naqueꞌ beṉəꞌ gwniꞌa.
\v 3 Gwdilɉlažeꞌe naclə leꞌineꞌ Jesoꞌosənꞌ pero bito goquə, c̱hedəꞌ nitəꞌ beṉəꞌ zan len Jesoꞌosənꞌ naꞌ Saqueonꞌ goqueꞌ to beṉəꞌ bc̱hecw daoꞌ.
\v 4 Deꞌe naꞌanəꞌ gwsaꞌadoeꞌ gwdieꞌ lao beṉəꞌ caꞌ par ɉəšepeꞌ to lao yag yix̱güio nic̱h goc bleꞌineꞌ Jesoꞌosənꞌ, c̱hedəꞌ bazon te Jesoꞌosənꞌ naꞌ.
\v 5 Pero naꞌ catəꞌ bžin Jesoꞌosənꞌ xan yaguənꞌ, bgüieꞌ lao yaguənꞌ naꞌ gožeꞌeneꞌ: ―Saqueo, beyetɉdodoꞌ, c̱hedəꞌ cheyaḻəꞌ yegaꞌaṉaꞌ ližoꞌon ṉežeꞌ.
\p
\v 6 Nach Saqueonꞌ beyetɉdoeꞌ chebeineꞌ nach bec̱heꞌeneꞌ ližeꞌenəꞌ naꞌ beꞌelaogüeꞌeneꞌ.
\v 7 Pero naꞌ beṉəꞌ caꞌ zɉənžag len Jesoꞌosənꞌ catəꞌ besəꞌəleꞌineꞌ canꞌ goquənꞌ, yogueꞌe gosəꞌəṉelaogüeꞌe gosəꞌəneꞌ: ―Bazdeꞌ liž to beṉəꞌ güen deꞌe mal par soꞌenəꞌ.
\v 8 Naꞌ Saqueonꞌ gwzecheꞌ nach gožeꞌ X̱anchonꞌ: ―X̱anaꞌ, gašɉə deꞌen deidaꞌ gwnežɉuaꞌan beṉəꞌ yašəꞌ, naꞌ deꞌen bagwcuaꞌa c̱he beṉəꞌ caꞌ bx̱oayagaꞌ nic̱h gosəꞌəyixjueꞌ mazəchlə ca deꞌen cheyaḻəꞌ yesəꞌəyixɉueꞌ, yonežɉuaꞌ ḻegaꞌaqueꞌ tap tantənꞌ.
\p
\v 9 Naꞌ Jesoꞌosənꞌ gožeꞌeneꞌ: ―Ṉeža babebeɉ Diozənꞌ leꞌ lao deꞌe malənꞌ len famiḻy c̱hioꞌ, naꞌ deꞌe ḻi banacle xiꞌiṉ dia c̱he deꞌe Abraanṉəꞌ laogüe deꞌen bachonḻilažəꞌəle Diozənꞌ canꞌ ben deꞌe x̱axtaꞌocho Abraanṉəꞌ.
\v 10 Ca nacaꞌ nadaꞌ, bseḻəꞌ Diozənꞌ nadaꞌ golɉaꞌ beṉac̱h par zedəloꞌidaꞌ beṉəꞌ caꞌ bachəsəꞌəbiayiꞌ de que nžiꞌilažaꞌa ḻegaꞌaqueꞌ naꞌ par nic̱h con noeꞌ soꞌonḻilažəꞌ nadaꞌ yebeɉəgaꞌacaꞌaneꞌ xniꞌa deꞌe malənꞌ.
\s1 Jempl c̱he ši beṉəꞌ bnežɉw x̱angaꞌaqueꞌen ḻegaꞌaqueꞌ c̱hopə gueyoa pes güeɉə
\p
\v 11 Naꞌ žlac ṉezɉənžag beṉəꞌ chseꞌeneneꞌ dižəꞌ deꞌen choeꞌ Jesoꞌosənꞌ, beꞌeleneꞌ ḻegaꞌaqueꞌ to jempl c̱hedəꞌ baniteꞌe gaḻəꞌəzə Jerosalenṉəꞌ naꞌ gwsaꞌaqueneꞌ de que ḻeꞌe solaote ṉabiꞌe ṉasyon Izraelənꞌ.
\v 12 Nach gwneꞌ: ―Lao to famiḻy blao bchoɉ to beṉəꞌ gwyeɉeꞌ to ṉasyon zitəꞌ ɉeneꞌ deꞌen cheyaḻəꞌ goneꞌ par nic̱h solao ṉabiꞌe ṉasyon c̱heꞌenəꞌ catəꞌ yežineꞌ.
\v 13 Naꞌ antslə zeseꞌe gwleɉeꞌ ši mos c̱heꞌenəꞌ naꞌ bnežɉueꞌ to toeꞌ c̱hopə gueyoa pes güeɉə. Nach gožeꞌ ḻegaꞌaqueꞌ: “Mech nga gonele ṉegosy lao cui zoaꞌ.”
\v 14 Pero beṉəꞌ gwlaž c̱heꞌ caꞌ besəꞌəgueꞌineꞌ ḻeꞌ. Nach catəꞌ beyož gwzeꞌe bosoꞌoseḻeꞌe beṉəꞌ lao x̱aneꞌenəꞌ benꞌ naquə reinꞌ ɉseꞌežeꞌeneꞌ: “Bito cheneꞌetoꞌ ṉabiaꞌ benga netoꞌ.”
\v 15 Nach catəꞌ bežin beꞌenəꞌ lažeꞌen deꞌe yoblə gwzolao gwnabiꞌe, nach beneꞌ mendad əžɉaꞌac xmoseꞌ caꞌ ši laogüeꞌenəꞌ, beṉəꞌ caꞌ bocuaꞌaṉleneꞌ mechənꞌ. Goneꞌeneꞌ əṉezeneꞌ ɉaꞌaquəꞌətəꞌ gwsoꞌoneꞌ gan len mechənꞌ deꞌen bocuaꞌaṉleneꞌ to togaꞌaqueꞌ.
\v 16 Beṉəꞌ nechənꞌ bžineꞌ laogüeꞌenəꞌ naꞌ gožeꞌeneꞌ: “X̱anaꞌ, xmechoꞌ deꞌen bocuaꞌaṉlenoꞌ nadaꞌ benən gan ši tant ca deꞌen bocuaꞌaṉoꞌ.”
\v 17 Nach x̱aneꞌen gožeꞌeneꞌ: “Babenoꞌ deꞌe güen. Nacoꞌ mos güen naꞌ syempr chonoꞌ complir canꞌ cheyaḻəꞌ gonoꞌ. Benoꞌ canꞌ cheyaḻəꞌ gonoꞌ len deꞌe daꞌon bocuaꞌaṉlenaꞌ leꞌ, naꞌ deꞌe nanꞌ gonaꞌ par nic̱h ṉabiꞌo ši syoda.”
\v 18 Naꞌ beṉəꞌ əgwchopenꞌ bžineꞌ lao x̱aneꞌenəꞌ naꞌ gožeꞌeneꞌ: “X̱anaꞌ, xmechoꞌ deꞌen bocuaꞌaṉlenoꞌ ndaꞌ benən gan gueyəꞌ tant ca deꞌen bocuaꞌaṉoꞌ.”
\v 19 Nach gožeꞌ ḻeꞌ: “Leꞌ ṉabiꞌo gueyəꞌ syoda.”
\v 20 Nach bžin yetoeꞌ lao x̱aneꞌenəꞌ naꞌ gožeꞌeneꞌ: “X̱anaꞌ, nga de xmechoꞌ deꞌen bocuaꞌaṉlenoꞌ nadaꞌ. Bablažəꞌəc̱hec̱haꞌan bey nga.
\v 21 Bžebaꞌ leꞌ laꞌ nacoꞌ to beṉəꞌ znia. Chonoꞌ gan deꞌen cui benoꞌ žin c̱hei, naꞌ chziꞌo cwseš c̱he deꞌen chsaꞌaz beṉəꞌ yoblə.”
\v 22 Nach gož x̱anenꞌ ḻeꞌ: “Deꞌen bagwnaoꞌ caꞌ chloꞌin de que napoꞌ doḻəꞌ. Nacoꞌ mos mal. Chacdoꞌ de que nacaꞌ to beṉəꞌ znia, de que chonaꞌ gan deꞌen cui benaꞌ žin c̱hei, naꞌ chziꞌa cwseš c̱he deꞌen chsaꞌaz beṉəꞌ yoblə.
\v 23 Naꞌ šə chacdoꞌ chonaꞌ caꞌ, ¿bixc̱henꞌ cui gwleɉoꞌ xmechaꞌan beṉəꞌ yoblə par nic̱h yeziꞌan len yic̱hɉei ṉaꞌa babeḻaꞌa?”
\v 24 Nach gožeꞌ beṉəꞌ caꞌ zɉəzecha cuiteꞌenəꞌ: “Yecaꞌale xmechaꞌan deꞌen bocuaꞌaṉlenaꞌaneꞌ naꞌ gwnežɉwlen benꞌ banox̱əꞌ c̱hopa mil.”
\v 25 Nach gwseꞌeneꞌ: “X̱antoꞌ, banox̱əꞌəczeꞌ ši tant ca deꞌen bocuaꞌaṉlenoꞌoneꞌ.”
\v 26 Nach gož beṉəꞌ gwnabiaꞌan ḻegaꞌaqueꞌ: “Echniaꞌ leꞌe, benꞌ chon güen len deꞌen chnežɉuaꞌaneꞌ, gwnežɉochczaꞌ c̱heꞌ. Pero naꞌ beꞌenəꞌ cui chgon žin deꞌen chnežɉuaꞌaneꞌ, yecaꞌa deꞌe daꞌon nox̱eꞌenəꞌ.
\v 27 Naꞌ ca naquə beṉəꞌ caꞌ chəsəꞌəgueꞌi nadaꞌ, beṉəꞌ caꞌ bito chseꞌene ṉabiꞌagaꞌacaꞌaneꞌ, ḻeꞌe žɉəx̱iꞌigaꞌaqueꞌ naꞌ gotgaꞌacleneꞌ laoguaꞌ nga.”
\s1 Gwsoꞌelaogüeꞌe Jesoꞌosənꞌ catəꞌ beyoꞌe Jerosalenṉəꞌ
\p
\v 28 Naꞌ catəꞌ beyož beꞌ Jesoꞌosənꞌ jempl nga, gwzeꞌe zdeꞌ Jerosalenṉəꞌ.
\v 29 Naꞌ catəꞌ bgüigueꞌe yež Betfage naꞌ Betania, ganꞌ zo yaꞌa deꞌen nziꞌ yaꞌa Olibos, naꞌ gwleɉeꞌ c̱hopə disipl c̱heꞌ caꞌ.
\v 30 Naꞌ gožeꞌ ḻegaꞌaqueꞌ: ―Ḻeꞌe žɉaꞌac yežənꞌ chiꞌ naꞌ, naꞌ catəꞌ šoꞌole laoꞌ yežənꞌ leꞌile to borr daoꞌ daꞌab yag, bia cui noṉəꞌ cuia. Naꞌ əsežleb naꞌ əc̱heꞌeleb ngalə.
\v 31 Šə nonꞌ yeꞌe leꞌe: “¿Bixc̱henꞌ chsežleb?” naꞌ yeꞌeleneꞌ: “X̱antoꞌ nanꞌ chyažɉeneꞌeb.”
\p
\v 32 Nach beṉəꞌ caꞌ bseḻəꞌ Jesoꞌosənꞌ gwsaꞌaqueꞌ naꞌ besəꞌəleꞌineꞌeb daꞌab ganꞌ gož Jesoꞌosənꞌ ḻegaꞌaqueꞌ caꞌ.
\v 33 Nach lao chosəꞌəsežeꞌeb, x̱amb caꞌ gwseꞌe ḻegaꞌaqueꞌ: ―¿Bixc̱henꞌ chsežle borr daꞌonəꞌ?
\p
\v 34 Nach disipl caꞌ gwseꞌe ḻegaꞌaqueꞌ: ―C̱hedəꞌ X̱antoꞌon chyažɉeneꞌeb.
\p
\v 35 Nach gosəꞌəc̱heꞌeb lao Jesoꞌosənꞌ naꞌ besəꞌəx̱oa xadoṉ c̱hegaꞌaquenꞌ cožəꞌəbənꞌ, nach bosoꞌožieꞌ Jesoꞌosənꞌ cožəꞌəbənꞌ.
\v 36 Naꞌ lao zdeꞌ Jerosalenṉəꞌ žieꞌ cožəꞌ borrənꞌ, lao nez ganꞌ zdeꞌenəꞌ bosoꞌošilɉw xalaꞌan beṉac̱hənꞌ.
\v 37 Naꞌ gosəꞌəbigueꞌe gaḻəꞌəzə Jerosalenṉəꞌ naꞌ besəꞌəžineꞌ ganꞌ yesyəꞌəyetɉeꞌ yaꞌa Olibosənꞌ. Nach yoguəꞌəḻoḻ disipl zan c̱heꞌ caꞌ zɉaꞌacleneꞌ ḻeꞌ gwzolao ḻechguaḻe besyəꞌəbeineꞌ naꞌ gwzolao gwsoꞌelaogüeꞌe Diozənꞌ zižɉo gwsoꞌe dižəꞌ c̱he yoguəꞌəḻoḻ deꞌen babesəꞌəleꞌineꞌ deꞌe zaquəꞌ yebanecho.
\v 38 Nach gosəꞌəneꞌ: ―Sošga Rei c̱hechonꞌ mbalaz benꞌ bazaꞌ nga bseḻəꞌ X̱ancho Diozənꞌ ḻeꞌ. Ḻedoyeꞌelaꞌoch Diozənꞌ txen len beṉəꞌ caꞌ nitəꞌ ganꞌ zoeꞌenəꞌ c̱hedəꞌ babeneꞌ par nic̱h beṉac̱hənꞌ gaquə ṉiteꞌe binḻo len ḻeꞌ.
\p
\v 39 Naꞌ entr beṉəꞌ zan caꞌ gwnitəꞌ baḻə beṉəꞌ fariseo. Nach to c̱hopeꞌ gwseꞌe Jesoꞌosənꞌ: ―Maestr, ben mendad ṉitəꞌ disipl c̱hioꞌ caꞌ žizə.
\p
\v 40 Nach božiꞌi Jesoꞌosənꞌ xtižəꞌəgaꞌaqueꞌenəꞌ gwneꞌ: ―Echniaꞌ leꞌe, žaləꞌ beṉəꞌ quinga niteꞌe žizə, yeɉ quinga soꞌosyaꞌan əsoꞌelaꞌon nadaꞌ.
\p
\v 41 Naꞌ lao bežineꞌ gaḻəꞌəzə Jerosalenṉəꞌ bgüieꞌ syodanꞌ naꞌ beneꞌ xbab c̱he beṉəꞌ lao syodanꞌ naꞌ gwchežyašeꞌe.
\v 42 Naꞌ gwneꞌ: ―¡Žaləꞌ bacheɉniꞌile ṉaꞌa nac gonḻe par sole binḻo len Diozənꞌ! Pero ṉaꞌa ṉengašəꞌən len leꞌe.
\v 43 Gwžin ža gwžin or catəꞌ beṉəꞌ contr c̱hele soꞌoneꞌ to yež de yeɉ deꞌen šec̱hɉ syodanꞌ par nic̱h notono gac yechoɉ syodanꞌ.
\v 44 Naꞌ əsoꞌoteꞌ leꞌe naꞌ xiꞌiṉle caꞌ, naꞌ yosyoꞌoc̱hiṉɉeꞌ syodanꞌ naꞌ yesyeꞌeyosḻaseꞌ yeɉ caꞌ. Canꞌ gaquə c̱hedəꞌ bito cheɉḻeꞌele de que Diozənꞌ babseḻəꞌ nadaꞌ laolenꞌ par gaquəlenaꞌ leꞌe.
\s1 Jesoꞌosənꞌ bebeɉeꞌ beṉəꞌ caꞌ chsoꞌon yaꞌa yoꞌodaoꞌ əblaonəꞌ
\p
\v 45 Naꞌ Jesoꞌosənꞌ bžineꞌ yoꞌodaoꞌ əblaonəꞌ naꞌ gwzolaogüeꞌ bebeɉeꞌ yoguəꞌəḻoḻ beṉəꞌ caꞌ chsoꞌon yaꞌa chyoꞌonəꞌ.
\v 46 Naꞌ gožeꞌ ḻegaꞌaqueꞌ: ―Nyoɉczənꞌ ḻeꞌe Xtižəꞌ Diozənꞌ: “Ližaꞌan naquən to latɉə ganꞌ soꞌon beṉəꞌ orasyon”, pero naꞌ leꞌe babenḻen ca to latɉə ganꞌ žaꞌ beṉəꞌ bguan.
\p
\v 47 Naꞌ bsed bloꞌineꞌ beṉəꞌ caꞌ žaꞌ yoꞌodaoꞌ əblaonəꞌ yoguəꞌ ža. Naꞌ bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌineꞌ ḻei deꞌen bzoɉ deꞌe Moisezənꞌ naꞌ nochlə beṉəꞌ blao c̱he beṉəꞌ Izrael caꞌ besyəꞌəyilɉlažeꞌe naclə soꞌoneꞌ par əsoꞌoteꞌ ḻeꞌ.
\v 48 Pero bito besəꞌəželeneꞌ naclə soꞌoneꞌ len ḻeꞌ, c̱hedəꞌ yoguəꞌ beṉəꞌ yeziquəꞌəchlə besyəꞌəbeichgüeineꞌ xtižeꞌenəꞌ.
\c 20
\s1 Yeḻəꞌ gwnabiaꞌ c̱he Jesoꞌosənꞌ
\p
\v 1 To ža lao bsed bloꞌi Jesoꞌosənꞌ beṉəꞌ caꞌ ḻoꞌo yoꞌodaoꞌ əblaonəꞌ naꞌ chyix̱ɉuiꞌe dižəꞌ güen dižəꞌ cobə c̱he Diozənꞌ, besəꞌəžin bx̱oz əblao caꞌ naꞌ nochlə beṉəꞌ golə beṉəꞌ blao c̱he beṉəꞌ Izrael caꞌ naꞌ beṉəꞌ caꞌ chosoꞌosed chosoꞌoloꞌi ḻeinꞌ.
\v 2 Naꞌ gwseꞌeneꞌ: ―Gwnašc netoꞌ, ¿nac goquənꞌ gwxiꞌo yeḻəꞌ gwnabiꞌan naꞌ nonꞌ beṉ leꞌ yeḻəꞌ gwnabiaꞌanəꞌ par gonoꞌ deꞌe caꞌ chonoꞌ?
\p
\v 3 Naꞌ božiꞌe xtižəꞌəgaꞌaquenꞌ gwneꞌ: ―Ḻeczə de to deꞌe ṉabdaꞌ leꞌe, ḻenašc nadaꞌ,
\v 4 ¿nonꞌ bseḻəꞌ deꞌe Juanṉəꞌ bideꞌ bc̱hoeꞌ beṉəꞌ nis? ¿EDioz nanꞌ bseḻeꞌeneꞌ o šə beṉəꞌ yoblənꞌ?
\p
\v 5 Naꞌ bosoꞌoxiꞌe gosəꞌəneꞌ: ―¿Bi ṉacho? Laꞌ šə ṉacho de que Diozənꞌ bseḻeꞌe deꞌe Juanṉəꞌ par bc̱hoeꞌ beṉəꞌ nis, nach əṉeꞌ chioꞌo: “¿Bixc̱henꞌ bito gwyeɉḻeꞌele c̱heꞌ?”
\v 6 Naꞌ šə ṉacho de que bideꞌ to gwlazzeꞌ, nach yoguəꞌ beṉəꞌ quinga yosəꞌəšižeꞌe chioꞌo yeɉ c̱hedəꞌ chseꞌeɉniꞌineꞌ de que deꞌe Juanṉəꞌ goqueꞌ to profet beṉəꞌ bseḻəꞌ Diozənꞌ par beꞌe xtižeꞌenəꞌ.
\p
\v 7 Nach gwseꞌe Jesoꞌosənꞌ de que bito zɉəṉezeneꞌ nonꞌ bseḻəꞌ deꞌe Juanṉəꞌ.
\p
\v 8 Nach Jesoꞌosənꞌ gožeꞌ ḻegaꞌaqueꞌ: ―Ḻeczə caꞌ nadaꞌ bito əṉiaꞌ nonꞌ beṉ nadaꞌ yeḻəꞌ gwnabiaꞌ par gonaꞌ deꞌen chonaꞌ.
\s1 Jempl c̱he mos mal caꞌ
\p
\v 9 Naꞌ beꞌe jempl nga bzeɉniꞌineꞌ beṉəꞌ caꞌ chosoꞌozenag c̱heꞌ de que notəꞌətezə beṉəꞌ šə chonczə yic̱hɉlaogüeꞌ cui cheɉḻeꞌe c̱heꞌ cuiayiꞌe. Naꞌ gwneꞌ: ―To beṉəꞌ gozeꞌ zan yag obasənꞌ naꞌ bocuaꞌaṉeꞌen lao naꞌ beṉəꞌ caꞌ yosoꞌogüia yosoꞌoyeꞌen, naꞌ gwzeꞌe gwyeɉeꞌ ga yoblə naꞌ ɉəyegaꞌaṉeꞌ sša.
\v 10 Catəꞌ bžin ža par yesyəꞌətobeꞌ cwsešənꞌ, bseḻeꞌe to mos c̱heꞌenəꞌ lao beṉəꞌ caꞌ chsaꞌapeꞌ yag obasənꞌ par nic̱h yosyoꞌonežɉueꞌeneꞌ to tlacw c̱he cwsešənꞌ deꞌen cheyaḻəꞌ siꞌ x̱aneꞌen. Naꞌ beṉəꞌ caꞌ chsaꞌapə yag obasənꞌ gosəꞌəyineꞌ mosənꞌ naꞌ bosyoꞌoseꞌeneꞌ sin cui bi bi bosyoꞌonežɉueꞌeneꞌ.
\v 11 Nach x̱angaꞌaqueꞌen bseḻeꞌe yeto mosənꞌ, naꞌ ḻeczə gosəꞌəyineꞌeneꞌ naꞌ gwsoꞌoneꞌeneꞌ borl, naꞌ bosyoꞌoseꞌeneꞌ sin cui bi bi bosyoꞌonežɉueꞌeneꞌ.
\v 12 Nach bseḻəꞌ x̱angaꞌaquenꞌ mos əgwyoṉe, naꞌ ḻeczə gwsoꞌotlateꞌeneꞌ xte gwsoꞌoneneꞌ güeꞌ naꞌ besyəꞌəbeɉeꞌeneꞌ fuerlə.
\p
\v 13 Nach x̱an yag obasənꞌ gwneꞌ: “¿Nacxa gonaꞌ? Egwseḻaꞌa xiꞌiṉaꞌ biꞌin chacchgüeidaꞌ c̱hei, laꞌ šəquə gwsaꞌapəlɉeꞌeboꞌ respet.”
\v 14 Pero beṉəꞌ caꞌ chsaꞌapə yag obasənꞌ catəꞌ besəꞌəleꞌineꞌ xiꞌiṉeꞌenəꞌ gosəꞌəneꞌ entr ḻegaꞌaczeꞌ: “Benganꞌ xiꞌiṉ x̱an yag obasənꞌ naꞌ ḻenꞌ siꞌ bienṉəꞌ. Ḻeda gotchoneꞌ par nic̱h siꞌicho bien c̱he x̱eꞌenəꞌ.”
\v 15 Nach besyəꞌəbeɉeꞌeneꞌ fuerlə güertənꞌ naꞌ gwsoꞌoteꞌeneꞌ. Naꞌ ¿nacxa bentgua x̱an yaguənꞌ len ḻegaꞌaqueꞌenəꞌ ža?
\v 16 Ɉəyeṉitlaogüeꞌ ḻegaꞌaqueꞌ, naꞌ begüeꞌe yaguənꞌ lao naꞌ beṉəꞌ yoblə. Naꞌ beṉəꞌ caꞌ žaꞌanəꞌ catəꞌ gwseꞌeneneꞌ dižəꞌ quinga deꞌen beꞌ Jesoꞌosənꞌ gosəꞌəneꞌ: ―¡Catec deꞌe mal juisy deꞌe caꞌ goquənꞌ!
\p
\v 17 Naꞌ Jesoꞌosənꞌ bgüiachgüeꞌ ḻegaꞌaqueꞌ naꞌ gožeꞌ ḻegaꞌaqueꞌ: ―¿Bixa zeɉen ža, deꞌen nga nyoɉənꞌ ḻeꞌe Xtižəꞌ Diozənꞌ c̱hiaꞌ deꞌen gwxaquəꞌəlebədaꞌ ca yeɉ squin?, nan:
\q1 Yeɉ deꞌen cui gwsoꞌolažəꞌ mues güen yoꞌo caꞌ,
\q1 ḻen banaquən yeɉ squin.
\m
\v 18 Naꞌ yoguəꞌ no cui šeɉḻeꞌ c̱hiaꞌ gwxaquəꞌəlebeneꞌ ca beṉəꞌ əxopə lao yeɉ naꞌ cueꞌežošɉeꞌ. Naꞌ yoguəꞌ no cuiṉəꞌ šeɉḻeꞌ c̱hiaꞌ catəꞌ babžin žanꞌ gaquə juisyənꞌ, gwxaquəꞌəlebeneꞌ ca beṉəꞌ əxopə yeɉ laogüeꞌenəꞌ naꞌ əgwšošɉən ḻeꞌ.
\s1 Gosəꞌəṉabeneꞌ Jesoꞌosənꞌ šə yesəꞌəyixɉueꞌ impuest c̱he gobierṉ
\p
\v 19 Naꞌ lao or naꞌatezə beṉəꞌ caꞌ chosoꞌosed chosoꞌoloꞌi ḻeinꞌ naꞌ beṉəꞌ gwnabiaꞌ c̱he bx̱oz caꞌ gwseꞌeneneꞌ yesəꞌəzeneꞌeneꞌ c̱hedəꞌ gwseꞌeɉniꞌineꞌ de que Jesoꞌosənꞌ beꞌe jemplənꞌ por ni c̱he deꞌen cui chseꞌeɉḻeꞌe c̱heꞌ. Pero bito bi gwsoꞌoneꞌ c̱hedəꞌ besəꞌəžebeꞌ bi soꞌon beṉəꞌ caꞌ žaꞌanəꞌ beṉəꞌ bachseꞌeɉḻeꞌe c̱he Jesoꞌosənꞌ.
\v 20 Naꞌ dezd or naꞌatezə gwzolao gosəꞌəbeꞌenaogüeꞌ Jesoꞌosənꞌ par əchoɉ to dižəꞌ choꞌenəꞌ deꞌen yesəꞌəc̱hineꞌ par əsaꞌogüeꞌ xya c̱heꞌ lao beṉəꞌ gwnabiaꞌ c̱he gobierṉənꞌ. Deꞌe naꞌanəꞌ bosəꞌəseḻeꞌe beṉəꞌ chsoꞌon txen len ḻegaꞌaqueꞌ lao Jesoꞌosənꞌ gwsaꞌaqueneꞌ yesəꞌəx̱oayagueꞌeneꞌ nic̱h goneꞌ xbab de que do lažəꞌəgaꞌaqueꞌ chseꞌeneneꞌ yesəꞌəṉezeneꞌ bi deꞌen naquən güen soꞌoneꞌ.
\v 21 Nach gwseꞌe ḻeꞌ: ―Maestr, ṉezetoꞌ de que choꞌo dižəꞌ ḻi, naꞌ naquən ḻicha deꞌen chsed chloꞌidoꞌ beṉəꞌ caꞌ, naꞌ tozə canꞌ chonoꞌ len notəꞌətezə beṉəꞌ. Naꞌ ṉezetoꞌ de que dižəꞌ ḻinꞌ choꞌo chsed chloꞌidoꞌ beṉəꞌ canꞌ cheneꞌe Diozənꞌ goncho.
\v 22 Naꞌ cheneꞌetoꞌ ṉezetoꞌ ¿əcheyaḻəꞌ c̱hixɉwtoꞌ impuest c̱he gobierṉənꞌ, o šə cui?
\p
\v 23 Pero gocbeꞌi Jesoꞌosənꞌ caguə do lažəꞌəgaꞌaqueꞌenəꞌ chseꞌeneꞌ caꞌ, con chseꞌeneneꞌ yosoꞌox̱oayagueꞌ ḻeꞌ, naꞌ gožeꞌ ḻegaꞌaqueꞌ:
\v 24 ―Ḻeꞌe gwloꞌi nadaꞌ to xmechlenꞌ. ¿No diboj c̱heinꞌ daꞌ laogüenꞌ naꞌ no leinꞌ nyoɉ laogüenꞌ?
\p Nach gwseꞌeneꞌ: ―C̱he Rei Sesar naꞌanəꞌ.
\p
\v 25 Nach gožeꞌ ḻegaꞌaqueꞌ: ―Ḻeꞌe əgwnežɉo Sesarənꞌ deꞌen naquə c̱heꞌ ža, naꞌ ḻeꞌe əgwnežɉo Diozənꞌ deꞌen cheyaḻəꞌ əgwnežɉwleneꞌ.
\p
\v 26 Naꞌ bito gwsaꞌac soꞌoneꞌ xtižeꞌenəꞌ clellə lao beṉəꞌ caꞌ žaꞌanəꞌ, naꞌ besyəꞌəbaneneꞌ canꞌ božiꞌe xtižəꞌəgaꞌaqueꞌenəꞌ, naꞌ bitoch bi gosəꞌəneꞌ.
\s1 Catəꞌ yesyəꞌəban beṉəꞌ guat caꞌ
\p
\v 27 Naꞌ ḻeczə besəꞌəžin baḻəꞌ beṉəꞌ sadoseo caꞌ beṉəꞌ caꞌ cui chseꞌeɉḻeꞌe de que yesyəꞌəban beṉəꞌ guatənꞌ, nach gosəꞌəṉabeneꞌ ḻeꞌ
\v 28 gwseꞌeneꞌ: ―Maestr, deꞌe Moisezənꞌ bzoɉeꞌ canꞌ cheyaḻəꞌ goncho. Naꞌ gwneꞌ: “Šə to beṉəꞌ byo beṉəꞌ nšagnaꞌ gateꞌ naꞌ yegaꞌaṉ noꞌol c̱heꞌenəꞌ sin cui no xiꞌiṉeꞌ gwzo, beṉəꞌ bišəꞌ benꞌ bagotənꞌ cheyaḻəꞌ yequeꞌe noꞌolənəꞌ par nic̱h ṉitəꞌ xiꞌiṉ dia c̱he benꞌ bagotənꞌ.
\v 29 Naꞌ goquənꞌ gwnitəꞌ gažə bišəꞌəgaꞌaqueꞌ, naꞌ toeꞌ bšagneꞌe naꞌ catəꞌ goteꞌ notono xiꞌiṉeꞌ gwzo.
\v 30 Naꞌ beṉəꞌ bišeꞌe əgwchope bequeꞌe noꞌolənꞌ, naꞌ ḻeczə goteꞌ naꞌ notono xiꞌiṉeꞌ gwzo.
\v 31 Naꞌ beṉəꞌ bišeꞌe əgwyoṉe ḻeczə bequeꞌe noꞌolənꞌ, naꞌ ḻeczə caꞌ goquə len ḻeꞌ, nach beṉəꞌ bisəꞌəgaꞌaqueꞌ caꞌ yetap besyəꞌəqueꞌe noꞌolənꞌ naꞌ gwsaꞌateꞌ naꞌ notono xiꞌiṉgaꞌaqueꞌ gwnitəꞌəczə.
\v 32 Gwdelə ḻeczə got noꞌolənꞌ.
\v 33 Naꞌ catəꞌ yesyəꞌəban beṉəꞌ guat caꞌ, ¿noeꞌ entr ḻegaꞌaqueꞌ gaquə beꞌen c̱heꞌ? laꞌ yogueꞌe bosoꞌošagnaꞌaleneꞌ ḻeꞌ.
\p
\v 34 Naꞌ Jesoꞌosənꞌ božiꞌe xtižəꞌəgaꞌaqueꞌenəꞌ naꞌ gožeꞌ ḻegaꞌaqueꞌ: ―Beṉəꞌ caꞌ nitəꞌ lao yežlyo nga chosəꞌəšagneꞌe naꞌ ḻeczə chosoꞌošagueꞌ naꞌ no xiꞌiṉgaꞌaqueꞌ.
\v 35 Pero naꞌ beṉəꞌ caꞌ na Diozənꞌ c̱hegaꞌaqueꞌ de que zɉəzaqueꞌe par yesyəꞌəbaneꞌ ladɉo beṉəꞌ guat caꞌ naꞌ par žɉəsyəꞌəzoeꞌ len ḻeꞌ zeɉḻicaṉe, catəꞌən yesyəꞌəžineꞌ ganꞌ zo Diozənꞌ bito nacbiaꞌ šə zɉənaqueꞌ beṉəꞌ zɉənšagnaꞌ o šə cui, naꞌ caguə no yesyəꞌəšagnaꞌach naꞌanəꞌ.
\v 36 Bitoch saꞌateꞌ. Lebze əsaꞌaqueꞌ len angl caꞌ. Naꞌ zɉənaqueꞌ xiꞌiṉ Dioz c̱hedəꞌ babosban Diozənꞌ ḻegaꞌaqueꞌ ladɉo beṉəꞌ guat caꞌ.
\v 37 Naꞌ ḻeczə deꞌe Moisezənꞌ bzoɉeꞌ canꞌ goquə bleꞌineꞌ to yiꞌ beḻ deꞌe chdoḻɉən to ḻoꞌo xis yešəꞌ sin cui bzeyən ḻen. Naꞌ gwneꞌ c̱he X̱ancho Diozənꞌ de que naqueꞌ Dioz c̱he deꞌe x̱axtaꞌocho Abraanṉəꞌ, naꞌ Dioz c̱he deꞌe x̱axtaꞌocho Isaaquənꞌ naꞌ Dioz c̱he deꞌe x̱axtaꞌocho Jacobənꞌ. Deꞌe naꞌanəꞌ ṉezecho de que beṉəꞌ guat caꞌ yesyəꞌəbaneꞌ.
\v 38 Naꞌ ṉezecho beṉəꞌ caꞌ niteꞌe len Diozənꞌ c̱hedəꞌ Diozənꞌ bito naqueꞌ Dioz c̱he beṉəꞌ guat, sino naqueꞌ Dioz c̱he beṉəꞌ zɉəmban. Naꞌ yoguəꞌ beṉəꞌ bagwsoꞌonḻilažəꞌ Diozənꞌ ṉeꞌe zɉəmbaneꞌ par chsoꞌelaogüeꞌeneꞌ.
\p
\v 39 Naꞌ baḻə beṉəꞌ chosoꞌosed chosoꞌoloꞌineꞌ ḻei deꞌen bzoɉ deꞌe Moisezənꞌ gwseꞌe Jesoꞌosənꞌ: ―Maestr, binḻo božiꞌo xtižəꞌəgaꞌaqueꞌenəꞌ.
\p
\v 40 Naꞌ bitoch besyəꞌəyaxɉeneꞌ ¡bi yesəꞌəṉabeneꞌ ḻeꞌ.
\s1 Cristənꞌ naqueꞌ xiꞌiṉ dia c̱he deꞌe Rei Dabinꞌ
\p
\v 41 Jesoꞌosənꞌ gožeꞌ ḻegaꞌaqueꞌ: ―¿Bixc̱henꞌ chəsəꞌəna beṉəꞌ c̱he Cristənꞌ de que naqueꞌ xiꞌiṉ dia c̱he deꞌe Rei Dabinꞌ?
\v 42 Cuin deꞌe Dabinꞌ bzoɉeꞌ ḻeꞌe ḻibr ganꞌ žia Salmos, gwneꞌ:
\q1 X̱ancho Diozənꞌ gožeꞌ X̱anaꞌanəꞌ:
\q1 “Gwcheꞌedoꞌ cuitaꞌ nga ṉabiꞌacho txen.
\q1
\v 43 Naꞌ gonaꞌ par nic̱h ṉitəꞌ deꞌe caꞌ chsoꞌon contr leꞌ naꞌ beṉəꞌ contr c̱hioꞌ caꞌ xniꞌonəꞌ.”
\m
\v 44 Naꞌ deꞌen gwna deꞌe Dabinꞌ de que Cristənꞌ naqueꞌ X̱aneꞌ, ¿əcabi zeɉen de que Cristənꞌ naqueꞌ mazəchlə ca xiꞌiṉ dia c̱heꞌenəꞌ ža?
\s1 Xtoḻəꞌ beṉəꞌ caꞌ chosoꞌosed chosoꞌoloꞌineꞌ ḻei deꞌen bzoɉ deꞌe Moisezənꞌ
\p
\v 45 Naꞌ gožeꞌ disipl c̱heꞌ caꞌ len yoguəꞌ beṉəꞌ yeziquəꞌəchlə bosoꞌozenag c̱heꞌ, gožeꞌ ḻegaꞌaqueꞌ:
\v 46 ―Ḻeꞌe gon xbab nic̱h cui gonḻe canꞌ chsoꞌon beṉəꞌ caꞌ chosoꞌosed chosoꞌoloꞌineꞌ ḻei deꞌen bzoɉ deꞌe Moisezənꞌ. Ḻegaꞌaqueꞌ chesyəꞌəbeineꞌ chəsəꞌəlažeꞌe zɉənyazeꞌ lachəꞌ toṉə, naꞌ chesyəꞌəbeineꞌ catəꞌ beṉəꞌ chəsəꞌəguapeꞌ ḻegaꞌaqueꞌ diox naꞌ chəsəꞌənopeꞌe naꞌagaꞌaqueꞌenəꞌ do lao lquey. Ḻegaꞌaqueꞌ chseꞌeneneꞌ yesəꞌəbiꞌe ganꞌ chəsəꞌəbeꞌ beṉəꞌ blao catəꞌ chɉaꞌaqueꞌ yoꞌodaoꞌ naꞌ catəꞌ chac lṉi.
\v 47 Naꞌ chosoꞌox̱oayagueꞌ noꞌolə gozebə caꞌ par nic̱h noꞌol caꞌ chəsəꞌənežɉueꞌ ḻegaꞌaqueꞌ ližgaꞌaqueꞌ len bichlə deꞌen de c̱hegaꞌaqueꞌ. Naꞌ catəꞌ chsoꞌoneꞌ orasyon, chsoꞌechgüeꞌ dižəꞌ parzə nic̱h chosoꞌox̱oayagueꞌ beṉəꞌ. Mazəchlə castigw c̱hegaꞌaqueꞌ əgwnežɉo Diozənꞌ clezə ca c̱he beṉəꞌ yeziquəꞌəchlə c̱hedəꞌ chsoꞌoneꞌ deꞌe mal caꞌ zɉənac caꞌ len zɉəṉezeneꞌ canꞌ na ḻeinꞌ.
\c 21
\s1 To noꞌolə gozebə beꞌe Diozənꞌ xmecheꞌenəꞌ
\p
\v 1 Jesoꞌosənꞌ bgüieꞌ ganꞌ bosoꞌonežɉo beṉəꞌ caꞌ mechənꞌ par yoꞌodaoꞌ əblaonəꞌ, naꞌ bleꞌineꞌ beṉəꞌ gwniꞌa caꞌ gosəꞌəgüeꞌe xmechgaꞌaqueꞌ ḻoꞌinəꞌ.
\v 2 Naꞌ ḻeczə bleꞌineꞌ to noꞌolə gozebə noꞌolə yašəꞌ gwloꞌe c̱hopə sentab daoꞌ c̱heꞌenəꞌ ḻoꞌi ganꞌ gosəꞌəgüeꞌe mechənꞌ par yoꞌodaꞌonəꞌ.
\v 3 Nach Jesoꞌosənꞌ gwneꞌ: ―Deꞌe ḻi əchniaꞌ leꞌe, noꞌolə gozebənꞌ naqueꞌ beṉəꞌ yašəꞌ, pero bagwloꞌe deꞌe zaquəꞌəch lao Diozənꞌ ca yoguəꞌ beṉəꞌ caꞌ yeḻaꞌ.
\v 4 Ḻegaꞌaqueꞌ gosəꞌəgoꞌo xmechgaꞌaqueꞌ deꞌe chechoꞌonən lao yeḻəꞌ gwniꞌa c̱hegaꞌaqueꞌenəꞌ, pero noꞌolə nga lao yeḻəꞌ yašəꞌ yeḻəꞌ ziꞌ c̱heꞌenəꞌ bagwloꞌe yoguəꞌ ca ga deꞌe de c̱heꞌ.
\s1 Gwžin ža yosyoꞌoc̱hiṉɉeꞌ yoꞌodaoꞌ əblaonəꞌ
\p
\v 5 Naꞌ ca naquə baḻə disipl caꞌ gwsoꞌe dižəꞌ catec xoche naquə yoꞌodaoꞌ əblaonəꞌ ca naquə gwsoꞌoneꞌen de yeɉ xoche deꞌe zaqueꞌe naꞌ yoꞌon bi deꞌen bosoꞌonežɉo beṉəꞌ.
\v 6 Nach gožeꞌ ḻegaꞌaqueꞌ: ―Ca naquə yoꞌodaoꞌ əblaonəꞌ deꞌen chleꞌile nga, gwžin ža yosyoꞌoc̱hiṉɉ beṉəꞌ doxenənꞌ naꞌ notoch no leꞌi ḻen.
\s1 Deꞌen gaquə catəꞌən bazon baozə šoꞌo fin c̱he yežlyonꞌ
\p
\v 7 Naꞌ gosəꞌəṉabeneꞌ Jesoꞌosənꞌ gwseꞌeneꞌ: ―Maestr ¿do batəꞌəquə gaquə deꞌe nga naoꞌ nga? naꞌ ¿nac gaquə gacbeꞌitoꞌ catəꞌ bazon baozə gaquə canꞌ naꞌonəꞌ?
\p
\v 8 Naꞌ gožeꞌ ḻegaꞌaqueꞌ: ―Ḻeꞌe gon xbab nic̱h notono əx̱oayag leꞌe par nic̱h šeɉle nez yoblə. Beṉəꞌ zan beṉəꞌ gox̱oayag laꞌaqueꞌ yesəꞌəneꞌ: “Nadanꞌ Cristənꞌ naꞌ bazon gaquə juisyənꞌ.” Pero leꞌe bito əgwzenagle xtižəꞌəgaꞌaqueꞌenəꞌ.
\v 9 Naꞌ catəꞌ yeneꞌele dižəꞌ de que chac gwdiḻə o de que guaquə gwdiḻə, bito žeble, c̱hedəꞌ zguaꞌatec deꞌe quinga cheyaḻəꞌ gaquə. Pero naꞌ bitoṉəꞌ žin žanꞌ par šoꞌo fin c̱he yežlyonꞌ.
\p
\v 10 Nach gožeꞌ ḻegaꞌaqueꞌ: ―Zeꞌe šoꞌo fin c̱he yežlyonꞌ yediḻə yež contr yež naꞌ ṉasyon contr ṉasyon.
\v 11 Naꞌ ḻeczə zan yež deꞌe zɉəchiꞌ doxenḻə yežlyonꞌ x̱oꞌochgua, naꞌ gaquə bgüin, naꞌ cueꞌe yižgüeꞌ. Naꞌ yesəꞌəžebchgua beṉac̱hənꞌ catəꞌ yesəꞌəleꞌineꞌ deꞌen gaquə ḻeꞌe yobanꞌ.
\p
\v 12 Pero zeꞌe gaquə yoguəꞌ deꞌe quinga catəꞌ yesəꞌəzeneꞌ leꞌe, naꞌ yosoꞌoc̱hiꞌ yosoꞌosaqueꞌe leꞌe, naꞌ soꞌoneꞌ leꞌe lao naꞌ bx̱oz caꞌ naꞌ yesəꞌəyix̱ɉwgaꞌaqueꞌ leꞌe ližya. Naꞌ yesəꞌəc̱heꞌex̱ax̱ɉeꞌ leꞌe do lao rei naꞌ lao goberṉador par saꞌogüeꞌ xya c̱hele c̱hedəꞌ chonḻilažəꞌəle nadaꞌ.
\v 13 Naꞌ lao chac deꞌe quinga, ḻeꞌe güeꞌech xtižaꞌanəꞌ.
\v 14 Pero naꞌ bito gonḻe xbab nac yožiꞌile xtižəꞌəgaꞌaqueꞌen catəꞌ əžinḻe lao beṉəꞌ gwnabiaꞌ caꞌ ganꞌ saꞌogüeꞌ xya c̱hele.
\v 15 Nadaꞌ goṉaꞌ leꞌe xbab naꞌ yeḻəꞌ sinꞌ par nic̱h gaquə yožiꞌile xtižəꞌəgaꞌaqueꞌenəꞌ sin cui bi yesəꞌəneꞌ naꞌ bito gaquə soꞌoneꞌ par seꞌeɉḻeꞌ beṉəꞌ yoblə de que babenḻe deꞌe mal.
\v 16 Naꞌ tant yesəꞌəgueꞌi beṉəꞌ leꞌe xte x̱axnaꞌale caꞌ naꞌ beṉəꞌ bišəꞌəle naꞌ bišəꞌəlɉuežɉle naꞌ beṉəꞌ migw c̱hele caꞌ soꞌoneꞌ leꞌe lao naꞌ beṉəꞌ contr c̱hele caꞌ naꞌ əsoꞌoteꞌ baḻle.
\v 17 Naꞌ casi yoguəꞌ beṉac̱hənꞌ yesəꞌəgueꞌineꞌ leꞌe c̱hedəꞌ chonḻilažəꞌəle nadaꞌ.
\v 18 Naꞌ ḻeꞌe gon xbab de que chapə chye Diozənꞌ leꞌe. Naꞌ bito güeꞌe latɉə cuiayiꞌile.
\v 19 Naꞌ goṉeꞌ yeḻəꞌ mban zeɉḻicaṉe c̱helenꞌ šə sole coꞌo gwc̱heɉlažəꞌəle len yoguəꞌəḻoḻ deꞌen soꞌoneneꞌ leꞌe.
\p
\v 20 Naꞌ catəꞌ leꞌile soḻdad zan zɉənyec̱hɉ zɉəmbiꞌe Jerosalenṉəꞌ, naꞌ əṉezele de que bazon cuiayiꞌin.
\v 21 Ṉaꞌa ža, leꞌe nitəꞌəle distrit c̱he Jodeanꞌ cheyaḻəꞌ yexoṉɉle catəꞌən bachac caꞌ naꞌ žɉaꞌacle do yaꞌadaꞌote. Naꞌ leꞌe nitəꞌəle laoꞌ syodanꞌ yesaꞌacdole, naꞌ leꞌe nitəꞌəle fuerlə syodanꞌ bito gonḻe xbab yeyoꞌole.
\v 22 Canaꞌ gwnežɉo Diozənꞌ castigw c̱he beṉəꞌ caꞌ žaꞌ syodanꞌ por ni c̱he xtoḻəꞌəgaꞌaqueꞌenəꞌ par nic̱h gaquə canꞌ nyoɉən ḻeꞌe Xtižəꞌ Diozənꞌ.
\v 23 Naꞌ ca tyempənꞌ ḻechguaḻe zdebə gaquə len noꞌol caꞌ zɉənoaꞌ bdaoꞌ naꞌ noꞌol caꞌ chəsəꞌəguažəꞌ bidaoꞌ. Ḻechguaḻe c̱hiꞌ saquəꞌ beṉəꞌ caꞌ žaꞌ doxenḻə Jodeanꞌ, c̱hedəꞌ Diozənꞌ əžaꞌachgüeꞌ ḻegaꞌaqueꞌ.
\v 24 Soḻdad caꞌ soꞌoteꞌ baḻəgaꞌaqueꞌ len spad, naꞌ yebaḻeꞌ yesəꞌəc̱heꞌex̱ax̱ɉ soḻdad caꞌ ṉasyon caꞌ deꞌen zɉəchiꞌ doxenḻə yežlyonꞌ. Naꞌ beṉəꞌ caꞌ cui zɉənaquə beṉəꞌ Izrael yosyoꞌoc̱hiṉɉeꞌ yoꞌo caꞌ deꞌen žaꞌ Jerosalenṉəꞌ naꞌ yosoꞌoleɉ yosəꞌəšošɉeꞌen. Pero naꞌ babžia Diozənꞌ biaꞌ əžin ža catəꞌ beṉəꞌ caꞌ cui zɉənaquə beṉəꞌ Izrael bitoch yesəꞌəṉabiꞌe ṉasyon Izraelənꞌ.
\s1 Yidə Jesocristənꞌ deꞌe yoblə
\p
\v 25 Ca naquə bgüiž, bioꞌ naꞌ belɉw caꞌ, gaquə deꞌe yebanecho len ḻegaꞌaquən. Naꞌ beṉəꞌ žaꞌ yežlyonꞌ saꞌaqueneꞌ tolə naꞌ saꞌacžeɉlažeꞌe tant sšag gon nisdaꞌonəꞌ deꞌen gwḻis beꞌenəꞌ ḻen.
\v 26 Naꞌ beṉəꞌ žaꞌ yežlyo nga saꞌateꞌ šlat tant yesəꞌəžebeꞌ deꞌen gaquə, c̱hedəꞌ Diozənꞌ əgwsiꞌiṉseꞌ yoguəꞌ deꞌe caꞌ chleꞌicho ḻeꞌe yobanꞌ.
\v 27 Naꞌ canaꞌach beṉəꞌ žaꞌ yežlyonꞌ yesəꞌəleꞌineꞌ nadaꞌ yidaꞌ deꞌe yoblə to ḻoꞌo beɉw, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h. Yidaꞌ len yeḻəꞌ guac xen c̱hiaꞌanəꞌ par nic̱h gwloꞌa de que nacaꞌ ḻeꞌezelaogüe beṉəꞌ blao.
\v 28 Naꞌ catəꞌ solao gaquə deꞌe quinga, ḻeꞌe gondiplažəꞌ naꞌ ḻeꞌe yebei, c̱hedəꞌ bazon əžin ža catəꞌ yidaꞌ deꞌe yoblə par yoslaꞌ leꞌe lao yoguəꞌ deꞌe mal.
\p
\v 29 Naꞌ Jesoꞌosənꞌ beꞌeleneꞌ ḻegaꞌaqueꞌ to jempl naꞌ gožeꞌ ḻegaꞌaqueꞌ: ―Ḻeꞌe ggüiašc canꞌ chon yag yix̱güionꞌ o bitəꞌətezə yag yoblə.
\v 30 Catəꞌ chleꞌile bachebia xḻagueꞌe nach ṉezele de que bac̱h zon yelaꞌ yeɉonꞌ.
\v 31 Naꞌ ḻeczə caꞌ catəꞌ leꞌile gaquə deꞌe quinga bagwniaꞌ zeꞌe gaquənꞌ, canaꞌach əṉezele de que bazon əgwloeꞌ Diozənꞌ yeḻəꞌ gwnabiaꞌ c̱heꞌenəꞌ.
\p
\v 32 Deꞌe ḻi əchniaꞌ leꞌe, bitoṉəꞌ gat leꞌe nitəꞌəle tyemp nga catəꞌ solao gaquə yoguəꞌəḻoḻ deꞌe caꞌ.
\v 33 Ca naquə deꞌe caꞌ chleꞌicho ḻeꞌe yobanꞌ naꞌ yežlyonꞌ yesəꞌəde c̱hei, pero ca naquə xtižaꞌanəꞌ caguə deꞌe te cui gaquə canꞌ nanṉəꞌ.
\p
\v 34 Naꞌ ḻeꞌe gon xbab par nic̱h cui gacle beṉəꞌ lia naꞌ beṉəꞌ güeꞌe zo naꞌ par nic̱h cui sole yelaḻ yežeɉele. Nc̱hoḻ yic̱hɉlaꞌaždaoꞌ beṉəꞌ caꞌ zɉənaqueꞌ beṉəꞌ lia naꞌ beṉəꞌ güeꞌe zo naꞌ beṉəꞌ caꞌ chesyəꞌəlaḻ chesyəꞌəžeɉe. Bito ṉiteꞌe probnid catəꞌən seḻəꞌ Diozənꞌ castigw c̱hegaꞌaqueꞌ.
\v 35 Naꞌ ḻeczə yoguəꞌ beṉəꞌ yeziquəꞌəchlə žaꞌ yežlyonꞌ beṉəꞌ cuiṉəꞌ soꞌonḻilažəꞌ nadaꞌ bito ṉiteꞌe probnid.
\v 36 Pero leꞌe ža, ḻeso probnid dote tyemp, ḻeꞌe gon orasyon par nic̱h catəꞌ gaquə deꞌe quinga Diozənꞌ gaquəleneꞌ leꞌe par nic̱h cui bi gaquele naꞌ par nic̱h yedəsole len nadaꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 37 Naꞌ yoguəꞌ ža gwzo Jesoꞌosənꞌ bsed bloꞌineꞌ beṉəꞌ žaꞌ ḻoꞌo yoꞌodaoꞌ əblaonəꞌ. Nach yoguəꞌ žeꞌ beyeɉeꞌ lao yaꞌa deꞌen nziꞌ yaꞌa Olibos.
\v 38 Naꞌ yoguəꞌ zil tempran besəꞌəžin beṉəꞌ zan par bosoꞌozenagueꞌ c̱heꞌ lao bsed bloꞌineꞌ ḻegaꞌaqueꞌ ḻoꞌo yoꞌodaoꞌ əblaonəꞌ.
\c 22
\s1 Bosoꞌoxiꞌe canꞌ soꞌoneꞌ yesəꞌəzeneꞌ Jesoꞌosənꞌ
\p
\v 1 Naꞌ goquənꞌ bazon baozə lṉi pasconꞌ deꞌen chaḻəꞌ Jerosalenṉəꞌ catəꞌən chsaꞌogüeꞌ yetxtil deꞌen cui bi xneꞌi nc̱hix̱ə.
\v 2 Naꞌ bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ besyəꞌəyilɉeꞌ naclə soꞌoneꞌ par ədoḻəꞌ Jesoꞌosənꞌ sin cui no gacbeꞌi naꞌ əsoꞌoteꞌeneꞌ. Gwsoꞌoneꞌ caꞌ c̱hedəꞌ besəꞌəžebeꞌ šə bi soꞌone beṉəꞌ ḻegaꞌaqueꞌ.
\p
\v 3 Nach gwyoꞌo gwyaz Satanasənꞌ yic̱hɉlaꞌaždaoꞌ Jod Iscariotənꞌ benꞌ naquə cuent len apostol caꞌ šižiṉ.
\v 4 Gwyeɉeꞌ lao bx̱oz əblao caꞌ naꞌ lao beṉəꞌ caꞌ zɉənaquə gwnabiaꞌ c̱he x̱aꞌag yoꞌodaonꞌ naꞌ bosəꞌəxiꞌe naclə soꞌoneꞌ par goneꞌ Jesoꞌosənꞌ lao naꞌagaꞌaqueꞌ.
\v 5 Naꞌ ḻechguaḻe besyəꞌəbeineꞌ, naꞌ gwsoꞌoneꞌ lyebe yosəꞌənežɉueꞌeneꞌ mech.
\v 6 Naꞌ Jodənꞌ gwxenḻažeꞌe len ḻegaꞌaqueꞌ naꞌ gwzolao gwcheꞌenaogüeꞌ batəꞌəquənꞌ so latɉə goneꞌ Jesoꞌosənꞌ lao naꞌagaꞌaquenꞌ catəꞌ cui žaꞌ beṉəꞌ zan len ḻeꞌ.
\s1 Gwsaꞌogüeꞌ xšeꞌ naꞌ Jesoꞌosənꞌ bloꞌineꞌ ḻegaꞌaqueꞌ canꞌ soꞌoneꞌ par žɉesyəꞌəzalažeꞌe ca deꞌen gateꞌ
\p
\v 7 Naꞌ bžin žanꞌ catəꞌən chsaꞌogüeꞌ yetxtil deꞌen cui bi xneꞌi nc̱hix̱ən. Naꞌ ža naꞌanəꞌ naquən žanꞌ catəꞌ chsoꞌoteꞌ xiləꞌ daoꞌ par chɉəsyəꞌəzalažeꞌe canꞌ bosla Diozənꞌ deꞌe x̱axtaꞌogaꞌaqueꞌenəꞌ lao naꞌ beṉəꞌ Egipto caꞌ.
\v 8 Nach Jesoꞌosənꞌ gwleɉeꞌ Bedənꞌ len Juanṉəꞌ naꞌ gožeꞌ ḻegaꞌaqueꞌ: ―Ḻeꞌe žɉaꞌac naꞌ ḻeꞌe žɉeꞌesiꞌiniꞌa deꞌen gaocho lao lṉi pasconꞌ.
\p
\v 9 Nach gwseꞌeneꞌ: ―¿Ganꞌ cheꞌendoꞌ žɉeꞌeniꞌatonꞌ?
\p
\v 10 Nach gožeꞌ ḻegaꞌaqueꞌ: ―Catəꞌ bagwyoꞌole syodanꞌ naꞌ yežagle to beṉəꞌ byo benꞌ noaꞌ cheꞌe nis yaꞌa yeneꞌ. Ḻeꞌe žɉənaoteleneꞌ naꞌ šoꞌole len ḻeꞌ ḻoꞌo yoꞌonəꞌ.
\v 11 Naꞌ yeꞌele x̱an yoꞌonəꞌ: “Maestrənꞌ neꞌ goṉšgoꞌ to cuart ganꞌ güeꞌeniꞌatoꞌ deꞌen gaolentoꞌoneꞌ xšeꞌ lṉi pasconꞌ netoꞌ disipl c̱heꞌ.”
\v 12 Nach əgwloꞌineꞌ leꞌe to cuart xen deꞌen zo žcuia laꞌaḻə, naꞌ ḻoꞌo cuartənꞌ zo to mes naꞌ bichlə deꞌe chyažɉecho. Ḻoꞌo cuart naꞌanəꞌ əgwsiꞌiniꞌale deꞌen gaocho lao lṉi pasconꞌ.
\p
\v 13 Nach gwsaꞌaqueꞌ, naꞌ yoguəꞌəḻoḻ cayaṉəꞌənəꞌ gožeꞌ ḻegaꞌaqueꞌenəꞌ goquə. Nach bosəꞌəsiꞌiniꞌe deꞌen gwsaꞌogüeꞌ lṉi pasconꞌ.
\p
\v 14 Naꞌ catəꞌ bžin or, gwchiꞌe choꞌa mesənꞌ len disipl c̱heꞌ caꞌ.
\v 15 Nach gožeꞌ ḻegaꞌaqueꞌ: ―Ḻechguaḻe gwzelažaꞌa gaoguaꞌ yeḻəꞌ guao c̱he lṉi pasconꞌ nga len leꞌe antslə zeꞌe c̱hiꞌ sacaꞌa par gataꞌ.
\v 16 Chniaꞌ leꞌe, zelao ṉaꞌa gaoguaꞌan. Xte catəꞌəch babloeꞌ Diozənꞌ yeḻəꞌ gwnabiaꞌ c̱heꞌenəꞌ, canaꞌach gaoguaꞌan deꞌe yoblə.
\p
\v 17 Naꞌ gwxiꞌe basənꞌ, beꞌe yeḻəꞌ chox̱cwlen c̱he Diozənꞌ nach gwneꞌ: ―Ḻeꞌe siꞌin naꞌ ḻeꞌe yeꞌeɉ yoguəꞌəle latəꞌ güeɉə deꞌen yožə ḻoꞌo bas nga.
\v 18 Chniaꞌ leꞌe zelao ṉaꞌa cheꞌeɉaꞌ bino c̱he obanꞌ nga. Xte catəꞌəch babloeꞌ Diozənꞌ yeḻəꞌ gwnabiaꞌ c̱heꞌenəꞌ, canaꞌach yeꞌeɉaꞌan deꞌe yoblə.
\p
\v 19 Nach gwxiꞌe yetxtilənꞌ naꞌ beꞌe yeḻəꞌ chox̱cwlen c̱he Diozənꞌ naꞌ bzoxɉeꞌen naꞌ bnežɉueꞌen ḻegaꞌaqueꞌ. Naꞌ gožeꞌ ḻegaꞌaqueꞌ: ―Deꞌe nganꞌ cuerp c̱hiaꞌ deꞌen chsanḻažaꞌa por ni c̱he leꞌe. Quinga gonḻe par žɉəyezalažəꞌəle bi zeɉen par leꞌe ca deꞌen soꞌoteꞌ nadaꞌ.
\p
\v 20 Naꞌ ḻeczə bex̱eꞌe basənꞌ catəꞌ babeyož gwsaꞌogüeꞌ xšenꞌ naꞌ gožeꞌ ḻegaꞌaqueꞌ: ―Deꞌen yožə ḻoꞌo bas nga zeɉen deꞌe cobə deꞌen non Diozənꞌ lyebe goneꞌ par gaquəleneꞌ leꞌe. Naꞌ solao goneꞌ canꞌ noneꞌ lyebenꞌ c̱hedəꞌ soꞌoteꞌ nadaꞌ naꞌ lalɉə xc̱henaꞌanəꞌ por ni c̱hele.
\p
\v 21 Naꞌ deꞌe ḻi benꞌ goneꞌ nadaꞌ lao naꞌ beṉəꞌ caꞌ soꞌot nadaꞌ chaoleneꞌ nadaꞌ txen nga.
\v 22 Banaquəczən c̱hiaꞌ gataꞌ, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h, pero ¡probchguazə beꞌenəꞌ gon nadaꞌ lao naꞌ beṉəꞌ caꞌ!
\p
\v 23 Nach disipl caꞌ gosəꞌəzolaogüeꞌ gosəꞌəṉabeneꞌ lɉuežɉgaꞌaqueꞌ noeꞌ entr ḻegaꞌaquenꞌ gon deꞌe malənꞌ nac caꞌ.
\s1 Gwsaꞌacyožeꞌ entr ḻegaꞌaczeꞌ noenꞌ naquəch blao
\p
\v 24 Naꞌ ḻeczə gosəꞌəzolaogüeꞌ gwsaꞌacyožeꞌ entr ḻegaꞌaczeꞌ noenꞌ naquəch beṉəꞌ blao.
\v 25 Naꞌ Jesoꞌosənꞌ gožeꞌ ḻegaꞌaqueꞌ: ―Nitəꞌ rei c̱he to to ṉasyon caꞌ naꞌ chəsəꞌənabiꞌe beṉəꞌ nitəꞌ xniꞌagaꞌaqueꞌ. Naꞌ beṉəꞌ gwnabiaꞌ caꞌ chseꞌeneneꞌ əsoeꞌ beṉəꞌ dižəꞌ c̱hegaꞌaqueꞌ de que zɉənaqueꞌ beṉəꞌ güenchgua.
\v 26 Pero caguə canꞌ. Šə no leꞌe nacle beṉəꞌ blaoch, bito cheyaḻəꞌ yeneꞌele əsoꞌelaoꞌ beṉəꞌ leꞌe. Naꞌ šə no leꞌe nacle beṉəꞌ chgüia chye beṉəꞌ chsoꞌelaoꞌ Diozənꞌ, cheyaḻəꞌ sole par gaquəlen lɉuežɉle.
\v 27 Ḻeꞌe gon xbab nonꞌ naquəch beṉəꞌ blao, ¿əbeꞌenəꞌ chiꞌ choꞌa mesənꞌ, o šə xmoseꞌ benꞌ chon mendadənꞌ? Clarczənꞌ naquən de que benꞌ chiꞌ choꞌa mesənꞌ naquəcheꞌ blao. Ca naquə nadaꞌ zoaꞌ par gaquəlenaꞌ leꞌe ḻaꞌaṉəꞌəczə nacaꞌ X̱anḻe.
\p
\v 28 Leꞌe bito chbeɉyic̱hɉle nadaꞌ lao yoguəꞌəḻoḻ deꞌen chyiꞌ chzacaꞌa.
\v 29 Naꞌ ca naquə X̱aꞌanəꞌ banoꞌe c̱hiaꞌ par nic̱h ṉabiꞌa, ḻeczə nadaꞌ banoꞌa c̱hele par nic̱h ṉabiꞌale.
\v 30 Naꞌ gonaꞌ par nic̱h yeꞌeɉ gaole txen len nadaꞌ catəꞌ yežinḻe ganꞌ ṉabiaꞌa. Naꞌ ḻeczə gonaꞌ par nic̱h leꞌe əggüia əgwyele famiḻy caꞌ šižiṉ, beṉəꞌ caꞌ zɉənaquə xiꞌiṉ dia c̱he deꞌe Izraelənꞌ.
\s1 Jesoꞌosənꞌ gwneꞌ de que Bedənꞌ cui c̱hebeꞌ šə nombiꞌeneꞌ
\p
\v 31 Nach Jesoꞌosənꞌ gožeꞌ Simon Bedənꞌ: ―Ben xbab c̱hioꞌ, bagwṉab Satanasənꞌ gacoꞌ lao neꞌin par nic̱h gonən leꞌ prueb šə güeɉyic̱hɉoꞌ cuich gonḻilažoꞌo nadaꞌ. Naꞌ deꞌen gonən len leꞌ gwxaquəꞌəleben ca deꞌen chon to beṉəꞌ catəꞌ chdieꞌ trigonꞌ rner par chegaꞌaṉ deꞌe güen.
\v 32 Pero naꞌ nadaꞌ babenaꞌ orasyon par leꞌ par nic̱h caꞌ bito cueɉyic̱hɉoꞌ canꞌ chonḻilažoꞌo nadaꞌ. Naꞌ catəꞌ babediṉɉdoꞌ xtoḻoꞌonəꞌ, btiplažəꞌ beṉəꞌ bišoꞌo quinga.
\p
\v 33 Nach Bedənꞌ gožeꞌeneꞌ: ―X̱anaꞌ, bagwc̱hoglažaꞌa saꞌalenaꞌ leꞌ caguə ližya naꞌazə sino xte gatlenczaꞌ leꞌ.
\p
\v 34 Naꞌ Jesoꞌosənꞌ gožeꞌeneꞌ: ―Bed, əchniaꞌ leꞌ bito cuež ḻeconꞌ ṉežeꞌ antslə zeꞌe gaquə šoṉ las cui chc̱heboꞌ de que nombiꞌo nadaꞌ.
\s1 Jesoꞌosənꞌ gožeꞌ disipl c̱heꞌ caꞌ de que bazon yosoꞌoc̱hiꞌ yosoꞌosaquəꞌ beṉəꞌ ḻegaꞌaqueꞌ
\p
\v 35 Naꞌ gožeꞌ disipl c̱heꞌ caꞌ: ―¿Ede deꞌe byažɉele catəꞌ bseḻaꞌa leꞌe ɉətix̱ɉueꞌile xtižaꞌanəꞌ? Bseḻaꞌa leꞌe sin cui biꞌale mech naꞌ nic bsod, naꞌ nic biꞌale xelle.
\p Nach gwseꞌeneꞌ: ―Bitobi byažɉətoꞌ.
\p
\v 36 Naꞌ gožeꞌ ḻegaꞌaqueꞌ: ―Pero ṉaꞌa ža šə naple mech cheyaḻəꞌ guaꞌalen, naꞌ ḻeczə caꞌ guaꞌale bsod. Naꞌ šə bito bi spad c̱helenəꞌ de, ḻeꞌe gotəꞌ xadoṉ c̱helenꞌ par siꞌilen.
\v 37 Echniaꞌ leꞌe gonḻe caꞌ c̱hedəꞌ gaquə c̱hiaꞌ canꞌ nyoɉczən ḻeꞌe Xtižəꞌ Diozənꞌ, nan: “Soꞌoneneꞌ ḻeꞌ canꞌ chsoꞌoneꞌ len beṉəꞌ chon deꞌe mal.” Naꞌ bacheyož chac yoguəꞌəḻoḻ deꞌen nyoɉən c̱hiaꞌ.
\p
\v 38 Naꞌ gwseꞌeneꞌ: ―X̱antoꞌ, bgüiašc nga noꞌatoꞌ c̱hopə spad.
\p Nach gožeꞌ ḻegaꞌaqueꞌ: ―Guaquəczən.
\s1 Jesoꞌosənꞌ beneꞌ orasyon ḻoꞌo güert deꞌen nziꞌ Getsemani
\p
\v 39 Nach bechoɉeꞌ yoꞌonəꞌ naꞌ ca naquə costombr c̱heꞌ beyeɉeꞌ yaꞌa deꞌen nziꞌ Olibos nach disipl c̱heꞌ caꞌ ɉəsəꞌənaogüeꞌeneꞌ.
\v 40 Naꞌ catəꞌ besyəꞌəžineꞌ latɉənꞌ gožeꞌ ḻegaꞌaqueꞌ: ―Ḻeꞌe gon orasyonṉəꞌ nic̱h cui coꞌo gwxiyeꞌenəꞌ leꞌe nez mal.
\p
\v 41 Naꞌ gwleꞌe ḻegaꞌaqueꞌ zitəꞌ ca ganꞌ zelao əžin to yeɉ deꞌe gwzaḻəꞌ to beṉəꞌ, naꞌ bzo xibeꞌ naꞌ beneꞌ orasyonṉəꞌ.
\v 42 Gwneꞌ: ―X̱a, benšga par nic̱h cui c̱hiꞌ sacaꞌa šə canꞌ chazlažoꞌo, pero bito cheꞌendaꞌ deꞌe niaꞌ nadaꞌ gaquə, sino gaquə canꞌ əṉao leꞌ.
\p
\v 43 Naꞌ to angl beṉəꞌ zaꞌ yobanꞌ bloꞌelaogüeꞌ ḻeꞌ naꞌ beꞌe ḻeꞌ fuers balor.
\v 44 Naꞌ žlac ḻechguaḻe chžaglaogüeꞌ len yic̱hɉlaꞌaždaogüeꞌenəꞌ gwzolao chžaglaocheꞌ choneꞌ orasyonṉəꞌ xte beyacḻoḻɉeꞌ naꞌ nis yes c̱heꞌenəꞌ beyaquən ca tlabə güeɉə chen deꞌen naquə c̱heḻsoṉ besəꞌəyiṉɉten lao yonꞌ.
\p
\v 45 Naꞌ bezecheꞌ naꞌ catəꞌ bežineꞌ ganꞌ nitəꞌ disipl c̱he caꞌ ɉəyediꞌe ḻegaꞌaqueꞌ chəsəꞌətaseꞌ tant niteꞌe trist.
\v 46 Naꞌ gožeꞌ ḻegaꞌaqueꞌ: ―¿Bixc̱henꞌ chtasle? Ḻeꞌe c̱has, ḻeꞌe gon orasyon nic̱h cui coꞌo gwxiyeꞌen leꞌe nez mal.
\s1 Jodənꞌ bdieꞌ Jesoꞌosənꞌ lao naꞌ soḻdad caꞌ
\p
\v 47 Naꞌ ca ṉechoꞌete Jesoꞌosənꞌ dižəꞌənəꞌ catəꞌ bžin benꞌ le Jod, benꞌ naquə cuent lao disipl caꞌ šižiṉ, naꞌ nc̱heꞌe beṉəꞌ zan. Naꞌ bgüigueꞌe ganꞌ zo Jesoꞌosənꞌ naꞌ gwdaogüeꞌeneꞌ bx̱idənꞌ, pero caguə do lažeꞌen beneꞌ caꞌ.
\v 48 Nach gož Jesoꞌosənꞌ ḻeꞌ: ―Jod, ¿əlen to bx̱id gonoꞌ nadaꞌ lao naꞌ beṉəꞌ quinga, nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h.
\p
\v 49 Naꞌ catəꞌ besəꞌəleꞌi disipl c̱he Jesoꞌosənꞌ canꞌ gaquə c̱heꞌenəꞌ gwseꞌeneꞌ: ―X̱antoꞌ, ¿əgwyintoꞌ beṉəꞌ quinga spad c̱hetoꞌonəꞌ?
\p
\v 50 Naꞌ toeꞌ gwdinenꞌ mos c̱he beṉəꞌ gwnabiaꞌ c̱he bx̱oz caꞌ, naꞌ gwc̱hogtechgüeꞌ nagueꞌ ḻichanꞌ.
\v 51 Pero Jesoꞌosənꞌ gožeꞌeneꞌ: ―Lɉoyeꞌenəꞌ.
\p Nach gwdaneꞌ nag mosənꞌ naꞌ beyoneꞌ ḻeꞌ.
\v 52 Jesoꞌosənꞌ gožeꞌ bx̱oz əblao caꞌ naꞌ beṉəꞌ gwnabiaꞌ c̱he x̱aꞌag yoꞌodaonəꞌ, naꞌ beṉəꞌ golə beṉəꞌ blao caꞌ, beṉəꞌ caꞌ zɉaꞌac zɉəsəꞌəxeneꞌeneꞌ, gožeꞌ ḻegaꞌaqueꞌ: ―¿Eca to beṉəꞌ bguanṉəꞌ chsaquəꞌəlebele ndaꞌ zaꞌacle len spad len yag zedex̱enḻe nadaꞌ?
\v 53 Yoguəꞌ ža gwchiꞌa len leꞌe ḻoꞌo yoꞌodaoꞌ əblaonəꞌ naꞌ bito gwxenḻe nadaꞌ. Pero ṉaꞌa babžin or par gonele nadaꞌ con canꞌ cheneꞌele, naꞌ babžin or gaquə canꞌ cheneꞌe gwxiyeꞌenəꞌ deꞌen chnabiaꞌ beṉəꞌ caꞌ chsaꞌaš ḻoꞌo deꞌe žc̱hoḻənꞌ.
\s1 Bedənꞌ bito gwc̱hebeꞌ šə nombiꞌe Jesoꞌosənꞌ
\p
\v 54 Nach gosəꞌəzeneꞌ Jesoꞌosənꞌ naꞌ gosəꞌəc̱heꞌeneꞌ liž benꞌ naquəch bx̱oz əblao c̱he ṉasyon Izraelənꞌ. Nach Bedənꞌ zɉənaogüeꞌ Jesoꞌosənꞌ zitəꞌ zitəꞌələ.
\v 55 Naꞌ bosoꞌoxeneꞌ yiꞌ chyoꞌo c̱he bx̱oz əblaonəꞌ naꞌ gosəꞌəbiꞌe choꞌa yiꞌinəꞌ, naꞌ gwcheꞌ Bedənꞌ len ḻegaꞌaqueꞌ.
\v 56 Naꞌ to noꞌolə criad bleꞌineꞌ ḻeꞌ chiꞌe choꞌa yiꞌinəꞌ, naꞌ bgüieꞌ ḻeꞌ naꞌ gwneꞌ: ―Ḻeczə len benga naqueꞌ txen len Jesoꞌosənꞌ.
\p
\v 57 Pero Bedənꞌ bito gwc̱hebeꞌ šə nombiꞌe Jesoꞌosənꞌ, naꞌ gwneꞌ: ―Noꞌolə, bito nombiꞌaneꞌ.
\p
\v 58 Naꞌ chacczə šlož yeto beṉəꞌ bleꞌineꞌ Bedənꞌ naꞌ gožeꞌeneꞌ: ―Lenczonꞌ nacoꞌ txen beṉəꞌ caꞌ.
\p Nach Bedənꞌ gožeꞌeneꞌ: ―Beṉəꞌ, bito lenaꞌ ḻegaꞌaqueꞌ.
\p
\v 59 Gwde to or yetoeꞌ gwneꞌ: ―Deꞌe ḻiczə naquə benga txen len Jesoꞌosənꞌ, c̱hedəꞌ naqueꞌ beṉəꞌ Galilea.
\p
\v 60 Naꞌ Bedənꞌ gožeꞌeneꞌ: ―Beṉəꞌ, bito ṉezdaꞌ bi dižəꞌən choꞌo.
\p Naꞌ lao ṉechoꞌete Bedənꞌ dižəꞌən caꞌ ḻeꞌe gwchežte to ḻecw.
\v 61 Naꞌ X̱anchonꞌ gwyec̱hɉeꞌ bgüieꞌ Bedənꞌ, naꞌ ɉəsaꞌalažəꞌ Bedənꞌ dižəꞌ deꞌen gož X̱anchonꞌ ḻeꞌ catəꞌən gwneꞌ: “Bito cuež ḻeconꞌ ṉežeꞌ antslə zeꞌe gaquə šoṉ las cui c̱heboꞌ de que nombiꞌo nadaꞌ.”
\v 62 Naꞌ Bedənꞌ bechoɉeꞌ ganꞌ žaꞌ beṉəꞌ caꞌ naꞌ gwchežyašəꞌəchgüeꞌ. Naꞌ deꞌe juisy deꞌe goqueneꞌ.
\s1 Gosəꞌəziꞌic̱hižeꞌe Jesoꞌosənꞌ
\p
\v 63 Naꞌ x̱aꞌag yoꞌodaoꞌ caꞌ beṉəꞌ caꞌ gwsoꞌox̱əꞌ Jesoꞌosənꞌ gwsoꞌoneneꞌ borl naꞌ gwsoꞌot gosəꞌəyineꞌ ḻeꞌ.
\v 64 Naꞌ bosoꞌoc̱heɉeꞌ to lachəꞌ lao Jesoꞌosənꞌ naꞌ gosəꞌəyineꞌ ḻeꞌ. Naꞌ gwseꞌeneꞌ: ―Gwṉeyaꞌašc ¿nonꞌ chyin leꞌ?
\p
\v 65 Naꞌ gwyanch dižəꞌ deꞌen gosəꞌəṉeꞌ contr ḻeꞌ gosəꞌəziꞌic̱hižeꞌeneꞌ.
\s1 Gosəꞌəc̱heꞌe Jesoꞌosənꞌ lao beṉəꞌ golə beṉəꞌ blao c̱he ṉasyon Izraelənꞌ
\p
\v 66 Naꞌ catəꞌ gwyeꞌeniꞌinəꞌ beṉəꞌ golə beṉəꞌ blao c̱he ṉasyon Izraelənꞌ naꞌ bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ besyəꞌəžagueꞌ naꞌ gwsoꞌoneꞌ mendad par gwyeɉ Jesoꞌosənꞌ laogaꞌaqueꞌenəꞌ ganꞌ chəsəꞌənabiꞌenəꞌ. Nach gwseꞌeneꞌ: ―Gwnašc netoꞌ šə lenꞌ nacoꞌ benꞌ gwleɉ Diozənꞌ par gaquəlenoꞌ ṉasyon c̱hechonꞌ.
\p Nach gožeꞌ ḻegaꞌaqueꞌ:
\v 67 ―Žaləꞌ ṉiaꞌ de que nacaꞌ Cristənꞌ benꞌ gwleɉ Diozənꞌ par gaquəlenaꞌ ṉasyon c̱hechonꞌ bito šeɉḻeꞌele c̱hiaꞌ.
\v 68 Naꞌ žaləꞌ bi ṉabdaꞌ leꞌe nic yožiꞌile xtižaꞌanəꞌ.
\v 69 Nadanꞌ nacaꞌ benꞌ bseḻəꞌ Diozənꞌ golɉaꞌ beṉac̱h, naꞌ dezd ṉaꞌa cuiꞌa cuit Diozənꞌ par nic̱h ṉabiꞌa txen len ḻeꞌ, Dioz benꞌ chnabiaꞌ doxenḻə.
\p
\v 70 Nach yogueꞌe gwseꞌeneꞌ: ―¿Elenꞌ nacoꞌ Xiꞌiṉ Diozənꞌ?
\p Naꞌ gožeꞌ ḻegaꞌaqueꞌ: ―Ḻe canꞌ nale nanꞌ nacaꞌ.
\p
\v 71 Nach gosəꞌəneꞌ: ―¿Nochxa testigw chyažɉecho? Chioꞌon babenecho ṉaꞌa chžia chniteꞌe Diozənꞌ deꞌen neꞌ caꞌ.
\c 23
\s1 Bosəꞌəcuišeꞌ Jesoꞌosənꞌ lao Pilatənꞌ
\p
\v 1 Naꞌ yoguəꞌəḻol beṉəꞌ zan caꞌ gosəꞌəzecheꞌ nach gosəꞌəc̱heꞌeneꞌ lao Pilatənꞌ.
\v 2 Naꞌ gwzolao bosəꞌəcuišeꞌ Jesoꞌosənꞌ gosəꞌəneꞌ: ―Bagwc̱hoglaotoꞌ c̱he benga de que cheyaḻəꞌ gateꞌ ca deꞌen chta chṉeꞌ ṉasyon Izraelənꞌ. Naꞌ ḻeczə chžoneꞌ c̱hixɉwtoꞌ impuest deꞌen chṉab Rei Sesarənꞌ. Nach ḻeczə neꞌ de que ḻeꞌ naqueꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hetoꞌonəꞌ naꞌ naqueꞌ to rei.
\p
\v 3 Nach Pilatənꞌ gožeꞌeneꞌ: ―¿Elenꞌ nacoꞌ rei c̱he beṉəꞌ Izrael caꞌ?
\p Nach Jesoꞌosənꞌ gožeꞌeneꞌ: ―Ḻe canꞌ naoꞌ nanꞌ nacaꞌ.
\p
\v 4 Nach Pilatənꞌ gožeꞌ bx̱oz caꞌ naꞌ beṉəꞌ zan caꞌ nžag laogüeꞌenəꞌ: ―Bitobi chlaꞌalaon šə bi doḻəꞌ napə benga.
\p
\v 5 Pero naꞌ gosəꞌəṉecheꞌ gosəꞌəneꞌ: ―Chta chṉeꞌ yoguəꞌəḻoḻ beṉəꞌ žaꞌ Jodea nga len deꞌen chsed chloꞌineꞌ. Gwzolao bsed bloꞌineꞌ Galileanꞌ pero lenczə nga bachsed chloꞌineꞌ ṉaꞌa.
\s1 Pilatənꞌ bseḻeꞌe Jesoꞌosənꞌ lao Erodənꞌ
\p
\v 6 Catəꞌ bene Pilatənꞌ canꞌ gosəꞌəneꞌ, gwṉabeꞌ šə Jesoꞌosənꞌ naqueꞌ beṉəꞌ Galilea.
\v 7 Naꞌ catəꞌ gocbeꞌineꞌ de que Jesoꞌosənꞌ zeꞌe Galileanꞌ ganꞌ chnabiaꞌ goberṉador Erodənꞌ, naꞌ bseḻeꞌeneꞌ lao Erodənꞌ, laꞌ ca or naꞌ zo Erodənꞌ Jerosalenṉəꞌ.
\v 8 Catəꞌ Erodənꞌ bleꞌineꞌ ḻeꞌ bebeineꞌ c̱hedəꞌ bagoc sša cheneꞌeneꞌ leꞌineꞌeneꞌ. Babeneneꞌ xtižəꞌ Jesoꞌosənꞌ naꞌ gwzoeꞌ lez leꞌineꞌ to deꞌe zaquəꞌ yebaneneꞌ.
\v 9 Nach deꞌe zan gwṉabeneꞌ Jesoꞌosənꞌ, pero ni to dižəꞌ c̱heꞌenəꞌ cui božiꞌi Jesoꞌosənꞌ.
\v 10 Bx̱oz əblao caꞌ naꞌ beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ gosəꞌəzecheꞌ gaḻəꞌəzə naꞌ bosəꞌəcuišeꞌeneꞌ len zan dižəꞌ.
\v 11 Naꞌ Erodənꞌ len soḻdad c̱heꞌ caꞌ gwzolao gosəꞌəziꞌic̱hižeꞌeneꞌ naꞌ gwsoꞌoneneꞌ borl. Nach catəꞌ beyož bosəꞌəguacueꞌeneꞌ to lachəꞌ xoche juisy, bosəꞌəseḻeꞌeneꞌ lao Pilatənꞌ.
\v 12 Naꞌ dezd ža naꞌ gwsaꞌac Erodənꞌ len Pilatənꞌ migw, c̱hedəꞌ antslə besəꞌəgueꞌi lɉuežɉgaꞌaqueꞌ.
\s1 Gosəꞌəc̱hoglaogüeꞌen gat Jesoꞌosənꞌ
\p
\v 13 Nach Pilatənꞌ betobeꞌ bx̱oz əblao caꞌ naꞌ beṉəꞌ gwnabiaꞌ caꞌ nach len beṉəꞌ žaꞌ ganꞌ chsoꞌoneꞌ yeḻəꞌ jostisənꞌ.
\v 14 Naꞌ gožeꞌ ḻegaꞌaqueꞌ: ―Leꞌe bedəguaꞌale benga laoguaꞌ nga, naꞌ gwnale c̱heꞌ de que chta chṉeꞌ beṉəꞌ Izraelənꞌ. Nadaꞌ bac̱h gwṉabyožədaꞌaneꞌ laole nga, naꞌ ca xyanꞌ deꞌen chaole c̱heꞌ, ni to deꞌe xiṉɉ cui chželdaꞌ šə binꞌ noneꞌ.
\v 15 Naꞌ ḻeczə caꞌ Erodənꞌ bitobi xtoḻeꞌe bželeneꞌ, naꞌ bosseḻeꞌeneꞌ laotoꞌ nga. Naꞌ naquən clar bitobi ben benga deꞌe cheyaḻəꞌ gateꞌ.
\v 16 Naꞌ ṉaꞌa con gonaꞌ mendad yesəꞌəyineꞌeneꞌ naꞌ əgwsanaꞌaneꞌ.
\p
\v 17 Gwneꞌ caꞌ c̱hedəꞌ gotəꞌ to costombr c̱hegaꞌaqueꞌ de que əgwsaneꞌ to beṉəꞌ pres lao yoguəꞌ lṉi pasconꞌ.
\v 18 Naꞌ yoguəꞌ beṉəꞌ caꞌ žaꞌ naꞌ gwsoꞌosyeꞌe, tozə ca gosəꞌəneꞌ: ―¡Echoɉtega benga gateꞌ, naꞌ əgwsanoꞌ Barrabasənꞌ!
\p
\v 19 Naꞌ ca naquə Barrabasənꞌ gosəꞌəyix̱ɉueꞌeneꞌ ližya c̱hedəꞌ ḻeꞌ bx̱ieꞌ gwdiḻə lao syodanꞌ naꞌ goqueꞌ to beṉəꞌ güet beṉəꞌ.
\v 20 Naꞌ Pilatənꞌ deꞌe yoblə gwṉabeneꞌ ḻegaꞌaqueꞌ šə əgwsaneꞌ Jesoꞌosənꞌ.
\v 21 Pero gwsoꞌosyeꞌe gosəꞌəneꞌ: ―¡Bdeꞌe ḻeꞌe yag corozənꞌ! ¡Bdeꞌe ḻeꞌe yag corozənꞌ!
\p
\v 22 Naꞌ deꞌe əgwyoṉ lase gož Pilatənꞌ ḻegaꞌaqueꞌ: ―¿Bi deꞌe mal beneꞌenəꞌ? Ni to deꞌe xiṉɉ cui cheželdaꞌ šə binꞌ noneꞌ. Naꞌ con gonaꞌ mendad yesəꞌəyineꞌeneꞌ nach əgwsanaꞌaneꞌ.
\p
\v 23 Pero con gwsoꞌosyeꞌe yelatəꞌ zižɉoch gosəꞌəṉabeꞌ par əgwdeꞌeneꞌ ḻeꞌe yag corozənꞌ. Naꞌ Pilatənꞌ gwzolaogüeꞌ bzenagueꞌ c̱hegaꞌaqueꞌ.
\v 24 Naꞌ gwc̱hoglaogüeꞌen de que gaquə canꞌ gosəꞌəṉabeneꞌ ḻeꞌ.
\v 25 Naꞌ bsaneꞌ Barrabasənꞌ benꞌ zɉənyix̱ɉueꞌ ližyanꞌ benꞌ gosəꞌəṉabeꞌ əgwsaneꞌ ḻaꞌaṉəꞌəczə Barrabasənꞌ goqueꞌ benꞌ bx̱e gwdiḻənꞌ naꞌ beṉəꞌ güet beṉəꞌ. Naꞌ Pilatənꞌ beneꞌ Jesoꞌosənꞌ lao naꞌagaꞌaqueꞌenəꞌ par soꞌoneꞌ len ḻeꞌ canꞌ chseꞌeneneꞌ.
\s1 Bosoꞌodeꞌe Jesoꞌosənꞌ ḻeꞌe yag corozənꞌ
\p
\v 26 Naꞌ lao zɉənc̱heꞌeneꞌ fuerlə syodanꞌ besyəꞌəžagueꞌ to beṉəꞌ Sirene leꞌ Simon, zeꞌe zezeꞌe fuerlə syodanꞌ. Ḻa fuers bosəꞌədeꞌe yag coroz c̱he Jesoꞌosənꞌ cožeꞌenəꞌ naꞌ gwnaogüeꞌ Jesoꞌosənꞌ.
\p
\v 27 Naꞌ beṉəꞌ zan zɉəsəꞌənao ḻeꞌ naꞌ zɉəlen zan noꞌolə. Naꞌ noꞌol caꞌ gwzolao gwsoꞌosyeꞌe gosəꞌəbežeꞌ c̱heꞌ.
\v 28 Pero naꞌ Jesoꞌosənꞌ gwyec̱hɉeꞌ naꞌ gožeꞌ ḻegaꞌaqueꞌ: ―Noꞌolə laoꞌ syoda Jerosalen, bito cuežle c̱hiaꞌ, yeɉniꞌa ḻecuež c̱hele naꞌ c̱he xiꞌiṉle.
\v 29 Naꞌ deꞌe ḻi gwžin ža catəꞌ yesəꞌəneꞌ: “Mbalaz nitəꞌ noꞌolə güiž noꞌolə cui no gwxan naꞌ cui no biꞌi c̱heꞌ zo par əgguažeꞌe.”
\v 30 Ca naꞌ yesəꞌəṉablažeꞌe yesəꞌəbix̱ə yaꞌa caꞌ par c̱henən ḻegaꞌaqueꞌ, yesəꞌəṉablažeꞌe əcaꞌa bdiṉɉ gotən ḻegaꞌaqueꞌ.
\v 31 Šə soꞌot beṉəꞌ nadaꞌ len cui bi xtoḻaꞌa de, ¡naquəchxe soꞌoneꞌ len leꞌe nacle beṉəꞌ güen deꞌe malənꞌ!
\p
\v 32 Naꞌ ḻeczə gosəꞌəc̱heꞌe c̱hopə beṉəꞌ güen deꞌe malənꞌ par bosoꞌodeꞌe ḻegaꞌaqueꞌ ḻeꞌe yag corozənꞌ canꞌ gwsoꞌoneꞌ len Jesoꞌosənꞌ.
\v 33 Naꞌ catəꞌ besəꞌəžineꞌ latɉə ganəꞌ nziꞌ “Yic̱hɉ Beṉəꞌ Guat”, bosoꞌodeꞌe Jesoꞌosənꞌ ḻeꞌe yag corozənꞌ, naꞌ ḻeczə bosoꞌodeꞌe beṉəꞌ mal caꞌ c̱hopə ḻeꞌe yag corozənꞌ len ḻeꞌ. Toeꞌ gwdaꞌ cuit Jesoꞌosənꞌ ḻicha naꞌ yetoeꞌ cuiteꞌ yeglə.
\v 34 Naꞌ Jesoꞌosənꞌ gwneꞌ: ―X̱a, beziꞌixen c̱he yoguəꞌ beṉəꞌ quinga chəsəꞌəgueꞌi nadaꞌ, laꞌ caguə zɉəṉezeneꞌ binꞌ chsoꞌoneꞌenəꞌ.
\p Naꞌ gwsoꞌoneꞌ xalaꞌaneꞌenəꞌ rif par bosyoꞌoḻeꞌen.
\v 35 Naꞌ beṉəꞌ zan gosəꞌəzecheꞌ naꞌ besyəꞌəyateꞌeneꞌ. Naꞌ beṉəꞌ gwnabiaꞌ c̱hegaꞌaqueꞌ caꞌ gwsoꞌoneneꞌ borl, chəsəꞌəneꞌ: ―Yeziquəꞌəchlə beṉəꞌ bosleꞌ. Šə deꞌe ḻi naqueꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ, ¿bixc̱henꞌ cui chosla cuineꞌ?
\p
\v 36 Nach soḻdad caꞌ ḻeczə gwsoꞌoneneꞌ borl gosəꞌəbigueꞌe gaḻəꞌəzə ganꞌ zo yag corozənꞌ naꞌ bosoꞌonežɉueꞌeneꞌ binagr.
\v 37 Nach gwseꞌeneꞌ: ―Šə lenꞌ nacoꞌ Rei c̱he beṉəꞌ Izraelənꞌ, bosla cuinoꞌ.
\p
\v 38 Naꞌ yic̱hɉ yag coroz c̱heꞌenəꞌ gwzo to deꞌen nyoɉən ca deꞌen bcuiš ḻeꞌ, naꞌ nan: “Benganꞌ Rei c̱he beṉəꞌ Izrael caꞌ.” Naꞌ byoɉən dižəꞌ griego, dižəꞌ latin naꞌ dižəꞌ ebreo.
\p
\v 39 To beṉəꞌ mal benꞌ daꞌ ḻeꞌe yag corozənꞌ cuit Jesoꞌosənꞌ ḻeczə gwziꞌic̱hižeꞌeneꞌ, gožeꞌeneꞌ: ―Šə lenꞌ nacoꞌ benꞌ gwleɉ Diozənꞌ par gaquəlenoꞌ ṉasyon c̱hechonꞌ, bosla cuinoꞌ naꞌ ḻeczə bosla netoꞌ.
\p
\v 40 Pero naꞌ benꞌ yeto gwdiḻeꞌ ḻeꞌ gožeꞌeneꞌ: ―¿Ebito chžeboꞌ Diozənꞌ? len badacho ḻeꞌe yag corozənꞌ par gatcho.
\v 41 Naꞌ deꞌen gatcho naquən ḻicha, c̱hedəꞌ ṉaꞌa chziꞌicho castigw c̱he xtoḻəꞌəchonꞌ laogüe naccho beṉəꞌ güen deꞌe malənꞌ. Pero benga bitobi doḻəꞌ napeꞌ.
\p
\v 42 Nach gožeꞌ Jesoꞌosənꞌ: ―Jesoꞌos, žɉəsaꞌalažəꞌəšgoꞌ nadaꞌ catəꞌ əžin ža ṉabiꞌo.
\p
\v 43 Naꞌ gož Jesoꞌosənꞌ ḻeꞌ: ―Deꞌe ḻi əchniaꞌ leꞌ, ṉeža soczoꞌ len nadaꞌ ganꞌ zo Diozənꞌ.
\s1 Canꞌ goquə catəꞌən got Jesoꞌosənꞌ
\p
\v 44 Naꞌ catəꞌ bžin do gobiž goc žc̱hoḻ doxen lao yežlyonꞌ xte do cheda šoṉə.
\v 45 Bito bseꞌeniꞌ bgüižənꞌ. Naꞌ ca naquə lachəꞌən deꞌen ze ḻoꞌo yoꞌodaoꞌ əblaonəꞌ gwchezə gwchoḻen xte goquən c̱hoplə.
\v 46 Nach Jesoꞌosənꞌ bisyeꞌe gwneꞌ: ―X̱a, chon cuinaꞌ lao naꞌo. Beziꞌ spirit c̱hiꞌanəꞌ.
\p Naꞌ beyož gwneꞌ caꞌ goteꞌ.
\p
\v 47 Naꞌ catəꞌ bleꞌi capitan c̱he soḻdad caꞌ deꞌe quinga, beꞌelaogüeꞌe Diozənꞌ naꞌ gwneꞌ: ―Deꞌe ḻiczə benga naqueꞌ beṉəꞌ zda ḻicha.
\p
\v 48 Naꞌ beṉəꞌ zan besəꞌəžag par besəꞌəleꞌineꞌ canꞌ chac. Naꞌ yoguəꞌəḻoḻeꞌ catəꞌ babesəꞌəleꞌineꞌen ɉəyaꞌaqueꞌ gosəꞌəbažəꞌ lc̱hoꞌogaꞌaqueꞌenəꞌ.
\v 49 Naꞌ yoguəꞌ beṉəꞌ caꞌ gwsoꞌombiaꞌ Jesoꞌosənꞌ naꞌ zɉəlen noꞌolə caꞌ ɉəsəꞌənao ḻeꞌ catəꞌən bezeꞌe Galileanꞌ gosəꞌəzecheꞌ zitəꞌələ besəꞌəleꞌineꞌ deꞌe caꞌ goquənꞌ.
\s1 Bosəꞌəcuašeꞌe Jesoꞌosənꞌ
\p
\v 50 Naꞌ zo to beṉəꞌ laoꞌ syoda Arimatea ganꞌ mbane Jodeanꞌ naꞌ leꞌ Jwse. Naqueꞌ txen len beṉəꞌ caꞌ chesəꞌənabiaꞌ lao beṉəꞌ Izrael caꞌ. Jwsenꞌ naqueꞌ to beṉəꞌ güen, beṉəꞌ zda ḻicha.
\v 51 Gwzoeꞌ lez əžin ža seḻəꞌ Diozənꞌ beṉəꞌ ṉabiꞌe ṉasyon Izraelənꞌ. Bito beneꞌ txen len beṉəꞌ caꞌ catəꞌən gosəꞌəc̱hoglaogüeꞌen soꞌoteꞌ Jesoꞌosənꞌ.
\v 52 Beꞌenaꞌ gwyeɉeꞌ lao Pilatənꞌ naꞌ gwṉabeꞌ cuerp c̱he Jesoꞌosənꞌ.
\v 53 Naꞌ beletɉeꞌeneꞌ ḻeꞌe yag corozənꞌ naꞌ blažeꞌeneꞌ to lachəꞌ naꞌ gwloꞌeneꞌ to ḻoꞌo bloɉ ba. Naꞌ naquən to ba cobə ga cuiczə no no ṉeꞌe šoꞌo.
\v 54 Naꞌ goc deꞌe quinga žanꞌ catəꞌən chsoꞌeniꞌe c̱he lṉi pasconꞌ, naꞌ babžin or par soꞌombaꞌaṉeꞌ ža dezcanzənꞌ.
\p
\v 55 Naꞌ noꞌol caꞌ zaꞌac len Jesoꞌosənꞌ Galileanꞌ ɉəsəꞌənaogüeꞌ Jwsenꞌ par besəꞌəleꞌineꞌ ba c̱he Jesoꞌosənꞌ naꞌ canꞌ gwxoa cuerp c̱heꞌenəꞌ.
\v 56 Nach besaꞌaqueꞌ naꞌ ɉəsyəꞌəyenšaogüeꞌe to deꞌen chḻaꞌ zix̱ deꞌen noneꞌ len mirra naꞌ aloes. Naꞌ ža dezcanzənꞌ gwsoꞌoneꞌ dezcanz segon canꞌ na ḻeinꞌ.
\c 24
\s1 Jesoꞌosənꞌ bebaneꞌ ladɉo beṉəꞌ guat caꞌ
\p
\v 1 Naꞌ baḻ dmigw noꞌolə caꞌ ɉaꞌaqueꞌ choꞌa bloɉ banꞌ deꞌe yoblə naꞌ gwsoꞌox̱eꞌe deꞌe caꞌ bagwsoꞌonšaogüeꞌe deꞌe chḻaꞌ zix̱.
\v 2 Naꞌ catəꞌ besəꞌəžineꞌenəꞌ besəꞌəleꞌineꞌ bitoch bi yeɉənꞌ daꞌ choꞌa banꞌ.
\v 3 Naꞌ gwsoꞌe ḻoꞌo bloɉənꞌ naꞌ bito besyəꞌəželeneꞌ cuerp c̱he X̱ancho Jesoꞌosənꞌ.
\v 4 Lao chsaꞌaqueneꞌ tolə c̱he deꞌe quinga, besəꞌəleꞌineꞌ c̱hopə beṉəꞌ zɉəzecha cuitgaꞌaqueꞌenəꞌ naꞌ zɉənyazeꞌ lachəꞌ deꞌe chactitchgua.
\v 5-6 Naꞌ noꞌol caꞌ besəꞌəžebeꞌ naꞌ besəꞌəc̱hequəꞌ yic̱hɉgaꞌaqueꞌenəꞌ besəꞌəgüieꞌ lao yolə. Nach gwseꞌ beṉəꞌ caꞌ noꞌol caꞌ: ―¿Bixc̱henꞌ cheyilɉle Jesoꞌosənꞌ nga ganꞌ bgašeꞌe? Notoch no nḻaꞌ nga. Babebaneꞌ ladɉo beṉəꞌ guat caꞌ naꞌ mbanczeꞌ. Ḻežɉsaꞌalažəꞌ canꞌ gwneꞌ catəꞌ ṉezole Galileanꞌ.
\v 7 Gwneꞌ de que ḻeꞌ naqueꞌ benꞌ bseḻəꞌ Diozənꞌ golɉeꞌ beṉac̱h naꞌ cheyaḻəꞌ gaqueꞌ lao naꞌ beṉəꞌ mal caꞌ naꞌ soꞌoteꞌ ḻeꞌ yosoꞌodeꞌeneꞌ ḻeꞌe yag corozənꞌ, naꞌ yeyoṉ ža yebaneꞌ ladɉo beṉəꞌ guat caꞌ.
\p
\v 8 Naꞌ noꞌol caꞌ ɉəsyeꞌezalažeꞌe de que gwneꞌ caꞌ.
\v 9 Naꞌ besyəꞌəsaꞌaqueꞌ choꞌa banꞌ naꞌ ɉəsyəꞌədix̱ɉueꞌineꞌ apostol caꞌ šneɉ naꞌ len yeziquəꞌəchlə beṉəꞌ caꞌ nitəꞌ txen len ḻegaꞌaqueꞌ yoguəꞌ deꞌe caꞌ.
\v 10 Naꞌ beṉəꞌ caꞌ ɉəsyəꞌədix̱ɉueꞌineꞌ apostol caꞌ zɉənaqueꞌ beṉəꞌ quinga: Maria beṉəꞌ Magdala, naꞌ Xguan, naꞌ Maria xnaꞌ Jacob, naꞌ len yebaḻə noꞌolə.
\v 11 Naꞌ apostol caꞌ bito gwseꞌeɉḻeꞌe c̱he noꞌol caꞌ, gwsaꞌaqueneꞌ con chesəꞌənazeꞌenəꞌ.
\p
\v 12 Pero naꞌ Bedənꞌ ḻeꞌe gwzechadoteꞌ naꞌ gwsaꞌadoeꞌ bžineꞌ choꞌa banꞌ naꞌ bchequeꞌe naꞌ bleꞌineꞌ lachəꞌ caꞌ zɉəchiꞌin lao yonꞌ, naꞌ bezeꞌe bebanchgüeineꞌ c̱he deꞌe caꞌ bleꞌineꞌ.
\s1 Bloꞌelao Jesoꞌosənꞌ c̱hopə disipl c̱heꞌ caꞌ lao zɉaꞌaqueꞌ Emaus
\p
\v 13 Naꞌ ḻeczə ža dmigw naꞌanəꞌ c̱hopə disiplənꞌ ɉaꞌaqueꞌ yež deꞌe nziꞌ Emaus, do šneɉ kilometros zitəꞌ par Jerosalenṉəꞌ.
\v 14 Naꞌ bosoꞌošileꞌ entr ḻegaꞌaqueꞌ c̱he yoguəꞌ deꞌe caꞌ bagoquənꞌ.
\v 15 Naꞌ ṉechsoꞌoneꞌ xbab naꞌ ṉechsoꞌeteꞌ dižəꞌ c̱he deꞌe caꞌ catəꞌ Jesoꞌosənꞌ bgüigueꞌe len ḻegaꞌaqueꞌ naꞌ gwzaꞌaleneꞌ ḻegaꞌaqueꞌ txen.
\v 16 Pero bito gwsaꞌacbeꞌineꞌ noxanꞌ zdalen ḻegaꞌaqueꞌ.
\v 17 Nach gožeꞌ ḻegaꞌaqueꞌ: ―¿Bi dižəꞌən choꞌele entr leꞌe lao ngoꞌole nezənꞌ? ¿Bixc̱henꞌ zaꞌacchguale trist?
\p
\v 18 Naꞌ toeꞌ benꞌ leꞌ Cleofas božiꞌe xtižeꞌen gožeꞌeneꞌ: ―¿Nacxa chactguanꞌ bagwzaꞌo Jerosalenṉəꞌ naꞌ cuiṉəꞌ gacbeꞌidoꞌ deꞌe caꞌ zeꞌe goc lao syodanꞌ? ¿Edeꞌen nacoꞌ beṉəꞌ zitəꞌ ža?
\p
\v 19 Naꞌ gožeꞌ ḻegaꞌaqueꞌ: ―¿Bi goquənꞌ nale caꞌ?
\p Nach gwseꞌeneꞌ: ―Deꞌen goc c̱he Jesoꞌos beṉəꞌ Nasaret. Goqueꞌ profet, naꞌ Diozənꞌ len beṉac̱hənꞌ besyəꞌəbeineꞌ ḻeꞌ canꞌ bloꞌe yeḻəꞌ guac c̱heꞌenəꞌ naꞌ canꞌ beꞌe dižəꞌənəꞌ.
\v 20 Pero naꞌ bx̱oz əblao c̱hetoꞌ caꞌ len beṉəꞌ gwnabiaꞌ c̱hetoꞌ caꞌ gwsoꞌoneꞌeneꞌ lao naꞌ beṉəꞌ caꞌ naꞌ gosəꞌəc̱hoglaogüeꞌen c̱heꞌ de que cheyaḻəꞌ gateꞌ, naꞌ bosoꞌodeꞌeneꞌ ḻeꞌe yag corozənꞌ.
\v 21 Bachac šoṉə ža ṉaꞌa goc deꞌe quinga. Naꞌ len netoꞌ gwzotoꞌ lez de que Dioz nanꞌ bseḻeꞌeneꞌ par yebeɉeꞌ ṉasyon c̱hetoꞌonəꞌ xniꞌa beṉəꞌ zitəꞌ.
\v 22 Naꞌ noꞌol caꞌ zɉənaquə txen len netoꞌ baḻeꞌ gwsoꞌe dižəꞌ deꞌen chebanetoꞌ. Ɉaꞌaqueꞌ choꞌa banꞌ beꞌi,
\v 23 naꞌ bito besyəꞌəželeneꞌ cuerp c̱heꞌenəꞌ. Catəꞌ besyəꞌəlaꞌaqueꞌ gosəꞌəneꞌ de que besəꞌəleꞌidaogüeꞌeneꞌ angl caꞌ beṉəꞌ gwseꞌe ḻegaꞌaqueꞌ de que babebaneꞌ ladɉo beṉəꞌ guat caꞌ.
\v 24 Naꞌ ḻeczə to c̱hopə beṉəꞌ byo beṉəꞌ caꞌ zɉənaquə txen len netoꞌ ɉaꞌaqueꞌ choꞌa banꞌ naꞌ besəꞌəleꞌineꞌ cayaṉəꞌən gosəꞌəna noꞌol caꞌ naquə, pero bito besəꞌəleꞌineꞌ Jesoꞌosənꞌ.
\p
\v 25 Naꞌ gož Jesoꞌosənꞌ ḻegaꞌaqueꞌ: ―¡Prob leꞌe! Cui cheɉniꞌile naꞌ cui cheɉḻeꞌele yoguəꞌ deꞌen bosoꞌozoɉ profet caꞌ.
\v 26 Benən byen Crist benꞌ gwleɉ Diozənꞌ par gaquəleneꞌ beṉac̱hənꞌ gwxaquəꞌəziꞌe yoguəꞌ deꞌe quinga bagoc, pero naꞌ deꞌe yoblə yeziꞌe yeḻəꞌ chnabiaꞌ c̱heꞌenəꞌ len yeḻəꞌ balaꞌaṉ c̱heꞌenəꞌ.
\p
\v 27 Naꞌ beꞌe dižəꞌ len ḻegaꞌaqueꞌ gwzolaotequeꞌ len deꞌen bzoɉ deꞌe Moisezənꞌ naꞌ len deꞌen bosoꞌozoɉ profet caꞌ yeḻaꞌ, nach bsed bloꞌineꞌ ḻegaꞌaqueꞌ yoguəꞌ deꞌen nyoɉ c̱heꞌenəꞌ ḻeꞌe Xtižəꞌ Diozənꞌ.
\p
\v 28 Naꞌ besəꞌəžineꞌ gaḻəꞌəzə yežənꞌ ganꞌ zɉaꞌaqueꞌ. Naꞌ Jesoꞌosənꞌ beneꞌ ca šeɉəcheꞌ delant.
\v 29 Pero beṉəꞌ caꞌ gwsoꞌoneꞌ byen yegaꞌaṉeꞌ len ḻegaꞌaqueꞌ, gwseꞌeneꞌ: ―Yegaꞌaṉczoꞌ len netoꞌ c̱hedəꞌ bachex̱ɉw žeꞌenəꞌ naꞌ bagwde or par šeɉəchoꞌ.
\p Naꞌ gwyoꞌe par yegaꞌaṉleneꞌ ḻegaꞌaqueꞌ.
\v 30 Naꞌ lao zɉəchiꞌe choꞌa mesənꞌ txen, Jesoꞌosənꞌ gwxiꞌe yetxtilənꞌ naꞌ beꞌe yeḻəꞌ chox̱cwlen c̱he Diozənꞌ, naꞌ bzoxɉeꞌen naꞌ bnežɉueꞌen ḻegaꞌaqueꞌ.
\v 31 Canaꞌach besyəꞌəyacbeꞌineꞌ de que ḻeꞌenəꞌ, naꞌ lao ṉeꞌe niteꞌe caꞌ benitlaogüeꞌ.
\v 32 Nach gwseꞌe lɉuežɉgaꞌaqueꞌ: ―Ḻechguaḻe bebei laꞌaždaꞌochonꞌ catəꞌ beꞌeleneꞌ chioꞌo dižəꞌ tnezənꞌ naꞌ cuaseḻoḻ bsed bloꞌineꞌ chioꞌo canꞌ nyoɉən c̱heꞌ ḻeꞌe Xtižəꞌ Diozənꞌ.
\p
\v 33 Naꞌ lao or naꞌatezə ḻeꞌe besyəꞌəsaꞌacteꞌ ɉəyaꞌaqueꞌ Jerosalenṉəꞌ, naꞌ besyəꞌəžineꞌ ganꞌ zɉəndopə zɉənžag apostol caꞌ šneɉ len beṉəꞌ caꞌ yeḻaꞌ.
\v 34 Naꞌ beṉəꞌ šneɉ caꞌ gwseꞌe beṉəꞌ caꞌ zeꞌe besyəꞌəžin: ―Deꞌe ḻiczə babeban X̱anchonꞌ. Babloꞌelaogüeꞌ Simonṉəꞌ.
\p
\v 35 Nach beṉəꞌ caꞌ c̱hopə gwseꞌe ḻegaꞌaqueꞌ deꞌen goquə lao zɉəngüeꞌe nezənꞌ, naꞌ gwseꞌe ḻegaꞌaqueꞌ de que besyəꞌəyacbeꞌineꞌ de que ḻeꞌenəꞌ lao bzoxɉeꞌ yetxtilənꞌ par saꞌogüeꞌen.
\s1 Jesoꞌosənꞌ bloꞌelaogüeꞌ disipl c̱heꞌ caꞌ
\p
\v 36 Naꞌ ca ṉeꞌe chsoꞌeteꞌ dižəꞌ catəꞌəczla gwzecha Jesoꞌosənꞌ gwchoḻgaꞌaqueꞌenəꞌ nach gožeꞌ ḻegaꞌaqueꞌ: ―Ḻeso binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\p
\v 37 Pero naꞌ ḻechguaḻe besəꞌəžebeꞌ naꞌ besyəꞌəbaneneꞌ c̱hedəꞌ gwsaꞌaqueneꞌ de que chesəꞌəleꞌidaꞌogüeꞌeneꞌ deꞌe beṉəꞌ guat naꞌanəꞌ.
\v 38 Nach Jesoꞌosənꞌ gožeꞌ ḻegaꞌaqueꞌ: ―¿Bixc̱henꞌ chaquele tolə? naꞌ ¿bixc̱henꞌ chonḻe xbabənꞌ caꞌ ḻoꞌo yic̱hɉlaꞌaždaꞌolenꞌ?
\v 39 Ḻeꞌe ggüiašc ṉiꞌa naꞌa quinga par nic̱h əṉezele de que nadaꞌanəꞌ. Ḻeꞌe can nadaꞌ par nic̱h əṉezele. Žaləꞌ nacaꞌ beṉəꞌ guat bito naquə žit beləꞌ c̱hiaꞌ ca deꞌe nga chleꞌile nga.
\p
\v 40 Nach lao gwneꞌ caꞌ, bloꞌineꞌ ḻegaꞌaqueꞌ ṉiꞌa neꞌe caꞌ.
\v 41 Naꞌ ca naquə bitoṉəꞌ seꞌeɉḻeꞌe tant chesyəꞌəbaneneꞌ naꞌ tant chesyəꞌəbeineꞌ, Jesoꞌosənꞌ gožeꞌ ḻegaꞌaqueꞌ: ―¿Ede latəꞌ deꞌe gaoguaꞌ?
\p
\v 42 Nach bosəꞌənežɉueꞌeneꞌ latəꞌ beḻ yaꞌa gaogüeꞌ, nach bosəꞌənežɉueꞌeneꞌ to pedas c̱hixəꞌ bia ser deꞌen yožə šiꞌimb.
\v 43 Gwxiꞌen naꞌ gwdaogüeꞌen laogaꞌaquenꞌ.
\v 44 Nach gožeꞌ ḻegaꞌaqueꞌ: ―Bagwniꞌa leꞌe catəꞌən ṉezolenaꞌ leꞌe de que cheyaḻəꞌ gaquə yoguəꞌəḻoḻ deꞌe caꞌ zɉənyoɉ c̱hiaꞌ ḻeꞌe ḻei deꞌen bzoɉ deꞌe Moisezənꞌ, naꞌ ḻeꞌe ḻibr deꞌen bosoꞌozoɉ deꞌe profet caꞌ, naꞌ ḻeczə caꞌ ḻeꞌe ḻibr ganꞌ žia Salmos caꞌ. Naꞌ deꞌe caꞌ zɉənyoɉ c̱hiaꞌ bac̱h goquən ṉaꞌa.
\p
\v 45 Nach ben Jesoꞌosənꞌ par nic̱h gwseꞌeɉniꞌineꞌ deꞌe caꞌ zɉənyoɉən c̱heꞌ ḻeꞌe Xtižəꞌ Diozənꞌ.
\v 46 Naꞌ gožeꞌ ḻegaꞌaqueꞌ: ―Benən byen goc canꞌ nyoɉən de que nadaꞌ gataꞌ naꞌ yebanaꞌ ladɉo beṉəꞌ guat caꞌ yeyoṉ ža, nadanꞌ nacaꞌ benꞌ gwleɉ Diozənꞌ par gaquəlenaꞌ beṉac̱hənꞌ.
\v 47 Naꞌ leꞌe cheyaḻəꞌ güeꞌele xtižaꞌanəꞌ len beṉəꞌ žaꞌ yoguəꞌ ṉasyon, naꞌ solaotecle güeꞌelen Jerosalenṉəꞌ. Güeꞌele xtižaꞌanəꞌ de que cheyaḻəꞌ yesyəꞌədiṉɉe beṉac̱hənꞌ xtoḻəꞌəgaꞌaqueꞌenəꞌ par nic̱h Diozənꞌ yeziꞌixeneꞌ c̱hegaꞌaqueꞌ.
\v 48 Naꞌ leꞌe nacle testigw naꞌ güeꞌele dižəꞌ c̱he deꞌe quinga bableꞌile deꞌen bagoc c̱hiaꞌ.
\v 49 Naꞌ ḻeczə əseḻaꞌa Spirit c̱he X̱aꞌ Diozənꞌ yedəson len leꞌe canꞌ beneꞌ lyebe. Naꞌ ḻeꞌe yegaꞌaṉ laoꞌ syoda nga xte catəꞌ X̱aꞌ Diozənꞌ goṉeꞌ leꞌe yeḻəꞌ guac deꞌen zaꞌ yobanꞌ.
\s1 Beyep Jesoꞌosənꞌ yobanꞌ
\p
\v 50 Naꞌ Jesoꞌosənꞌ gwc̱heꞌe ḻegaꞌaqueꞌ ɉaꞌaqueꞌ ganꞌ nziꞌ Betania, naꞌ gwḻis neꞌe caꞌ gwṉabeneꞌ Diozənꞌ goneꞌ par nic̱h ṉiteꞌe mbalaz.
\v 51 Naꞌ goquənꞌ beyož gwṉabeꞌen, Diozənꞌ beziꞌ bequeꞌeneꞌ yobanəꞌ.
\v 52 Naꞌ disipl caꞌ besyəꞌəgaꞌaṉeꞌ gwsoꞌelaogüeꞌe Jesoꞌosənꞌ yešlož daoꞌ naꞌ ɉəyaꞌaqueꞌ Jerosalenṉəꞌ chesyəꞌəbeineꞌ xte juisy.
\v 53 Nach gwnitəꞌətezə gwniteꞌe ḻoꞌo yoꞌodaoꞌ əblaonəꞌ chsoꞌelaogüeꞌe Diozənꞌ.
\p Deꞌe naꞌazənꞌ chzoɉaꞌ ṉaꞌa.