\id JHN
\ide UTF8
\h SAN JUAN
\toc1 San Juan
\mt1 Dižəꞌ Güen Dižəꞌ Cobə Deꞌen Bzoɉ San Juanṉəꞌ
\c 1
\s1 Benꞌ naquə Xtižəꞌ Diozənꞌ golɉeꞌ goqueꞌ beṉac̱h
\p
\v 1 Catəꞌ gwxe yežlyonəꞌ bazoczə benꞌ naquə Dižəꞌənəꞌ. Zoeꞌ len Diozənꞌ naꞌ benꞌ naquə Dižəꞌənəꞌ ḻeczə naqueꞌ Dioz.
\v 2 Dezd nechte zoeꞌ len Diozənꞌ.
\v 3 Naꞌ Diozənꞌ beneꞌ par nic̱h benꞌ naquə Dižəꞌən beneꞌ yoguəꞌəḻoḻ beṉac̱h, angl, bia chsaꞌaš, naꞌ yeziquəꞌəchlə deꞌe zɉəde. Bitobi bi de deꞌe gwxe deꞌe gwzil deꞌe cui ben ḻeꞌ.
\v 4 Ḻeꞌ nseꞌe yeḻəꞌ mban zeɉḻicaṉe. Naꞌ beṉəꞌ caꞌ zɉənapeꞌ yeḻəꞌ mban zeɉḻicaṉe, yoꞌo beꞌeniꞌ ḻoꞌo yic̱hɉlaꞌaždaꞌogaꞌaqueꞌenəꞌ.
\v 5 Naꞌ benꞌ naquə Dižəꞌənəꞌ nseꞌe beꞌeniꞌ par yic̱hɉlaꞌaždaoꞌ beṉac̱hənꞌ. Naꞌ ḻaꞌaṉəꞌəczə chacchgua deꞌe malənꞌ yežlyo nga ganꞌ bleꞌenəꞌ, deꞌe malənꞌ bito chgapəꞌən beꞌeniꞌ c̱heꞌenəꞌ.
\p
\v 6 Diozənꞌ bseḻeꞌe to beṉəꞌ leꞌ Juan.
\v 7 Bideꞌ bedəyeꞌe dižəꞌ c̱he benꞌ nsaꞌ beꞌeniꞌinəꞌ par nic̱h yoguəꞌəḻoḻ beṉac̱hənꞌ guaquə soꞌonḻilažeꞌe benꞌ nsaꞌ beꞌeniꞌinəꞌ catəꞌ seꞌeneneꞌ xtižəꞌ Juanṉəꞌ.
\v 8 Caguə Juan naꞌanəꞌ nseꞌe beꞌeniꞌinəꞌ, sino bideꞌ bedəyeꞌe dižəꞌ c̱he benꞌ nsaꞌ beꞌeniꞌ par beṉac̱hənꞌ.
\v 9 Babžin ža blaꞌ beꞌeniꞌ c̱he Diozənꞌ yežlyo nga par šoꞌon ḻoꞌo yic̱hɉlaꞌaždaoꞌ beṉac̱hənꞌ, naꞌ chseꞌeniꞌin len notəꞌətezeꞌ.
\p
\v 10 Benꞌ naquə Dižəꞌənəꞌ gwzoeꞌ yežlyonꞌ. Naꞌ ḻaꞌaṉəꞌəczə ḻenꞌ beneꞌ yežlyonꞌ, beṉəꞌ caꞌ žaꞌ yežlyonꞌ bito gwsaꞌacbeꞌineꞌ nonꞌ naqueꞌ.
\v 11 Golɉeꞌ entr netoꞌ naquətoꞌ beṉəꞌ ṉasyon c̱heꞌenəꞌ, naꞌ casi yoguəꞌ netoꞌ naquətoꞌ beṉəꞌ ṉasyon c̱heꞌ bito gwyeɉḻeꞌetoꞌ c̱heꞌ.
\v 12 Con beṉəꞌ chseꞌeɉḻeꞌe c̱heꞌ, beṉəꞌ chsoꞌonḻilažeꞌeneꞌ, choneꞌ par nic̱h zɉənaqueꞌ xiꞌiṉ Dioz.
\v 13 Zɉənaqueꞌ xiꞌiṉeꞌ caguə por ni c̱he gwsaꞌalɉeꞌ zɉənaqueꞌ beṉəꞌ beləꞌ chen, naꞌ caguə por ni c̱he deꞌen gwzelažəꞌ beṉəꞌ byonꞌ naꞌ noꞌolə, naꞌ caguə por ni c̱he goneꞌe beṉəꞌ byonꞌ so xiꞌiṉeꞌ. Dioz nanꞌ beneꞌ xiꞌiṉeꞌ ḻegaꞌaqueꞌ.
\p
\v 14 Naꞌ benꞌ naquə Dižəꞌənəꞌ golɉeꞌ goqueꞌ beṉac̱h naꞌ gwzoeꞌ len netoꞌ. Bleꞌitoꞌoneꞌ naꞌ gocbeꞌitoꞌ de que naqueꞌ ḻeꞌezelaogüe beṉəꞌ zaqueꞌe laꞌ ḻenꞌ naqueꞌ Xiꞌiṉ tlišəꞌ X̱acho Diozənꞌ. Ḻechguaḻe nžiꞌilažeꞌe beṉac̱hənꞌ naꞌ chzeɉniꞌineꞌ beṉac̱hənꞌ yoguəꞌəḻoḻ dižəꞌ ḻi c̱he Diozənꞌ.
\v 15 Juanṉəꞌ bzeɉniꞌineꞌ c̱heꞌ gwneꞌ: ―C̱he beꞌenaꞌanəꞌ babiꞌa dižəꞌ gwniaꞌ de que benꞌ zeꞌe əchoɉ zaquəꞌəcheꞌ ca nadaꞌ, c̱hedəꞌ bazoczə ḻeꞌenəꞌ antslə zeꞌe soaꞌ nadaꞌ.
\p
\v 16 Naꞌ Xiꞌiṉ Diozənꞌ laogüe deꞌen ḻechguaḻe nžiꞌilažeꞌe chioꞌo, zotezə zoeꞌ chaclenchgüeꞌ yoguəꞌ chioꞌo chonḻilažəꞌəchoneꞌ.
\v 17 Deꞌe Moisezənꞌ bzeɉniꞌineꞌ deꞌe x̱axtaoꞌ netoꞌ beṉəꞌ Izrael ḻei c̱he Diozənꞌ, naꞌ Jesocristənꞌ bedəloꞌe de que nžiꞌilažəꞌ Diozənꞌ chioꞌo beṉac̱h naꞌ chzeɉniꞌineꞌ chioꞌo yoguəꞌəḻoḻ dižəꞌ ḻi c̱he Diozənꞌ.
\v 18 Ni to cui noṉəꞌ leꞌi Diozənꞌ. Xiꞌiṉeꞌ tlišəꞌənəꞌ benꞌ chaqueneꞌ c̱hei babzeɉniꞌiczeneꞌ beṉac̱hənꞌ canꞌ naquə yic̱hɉlaꞌaždaoꞌ Diozənꞌ.
\s1 Juan benꞌ bc̱hoa beṉəꞌ nis beꞌe dižəꞌ c̱he Jesoꞌosənꞌ
\p
\v 19 Beṉəꞌ blao c̱he ṉasyon Izrael c̱hetoꞌon žaꞌ Jerosalenṉəꞌ bosoꞌoseḻeꞌe baḻə bx̱oz lao benꞌ le Juan len yebaḻə beṉəꞌ gwsaꞌalɉə lao dia c̱he deꞌe Lebi beṉəꞌ zɉəyoꞌo lao naꞌagaꞌaqueꞌ soꞌoneꞌ mendad ḻoꞌo yoꞌodaoꞌ əblao c̱he netoꞌ beṉəꞌ Izrael. Bosoꞌoseḻeꞌe beṉəꞌ caꞌ lao Juanṉəꞌ par nic̱h gosəꞌəṉezeneꞌ nonꞌ naqueꞌ.
\v 20 Naꞌ gožeꞌ ḻegaꞌaqueꞌ clar: ―Caguə nadanꞌ Cristənꞌ benꞌ naquən əseḻəꞌ Diozənꞌ par gaquəleneꞌ ṉasyon c̱he chioꞌo beṉəꞌ Izraelənꞌ.
\p
\v 21 Naꞌ gwseꞌeneꞌ: ―¿Noxa leꞌ ža? ¿əšə lenꞌ Ḻiazənꞌ benꞌ beꞌ xtižəꞌ Diozənꞌ canaꞌ?
\p Naꞌ gožeꞌ ḻegaꞌaqueꞌ: ―Caguə nadaꞌanəꞌ.
\p Nach gosəꞌəzeꞌeneꞌ: ―¿Ešə lenꞌ benꞌ naquən yidə par güeꞌeleneꞌ netoꞌ xtižəꞌ Diozənꞌ?
\p Naꞌ božiꞌen gwneꞌ: ―Bitoczə.
\p
\v 22 Nach gwseꞌeneꞌ: ―¿Noxaczə leꞌ? nic̱h žɉəyeyežtoꞌ beṉəꞌ caꞌ bosoꞌoseḻəꞌ netoꞌ. ¿Bi natgoꞌ c̱he cuinoꞌ?
\p
\v 23 Nach gožeꞌ ḻegaꞌaqueꞌ: ―Nadaꞌ nacaꞌ benꞌ chṉe zižɉo latɉə dašənꞌ, əṉiaꞌ: “Ḻeꞌeyošaꞌ yic̱hɉlaꞌaždaꞌolenꞌ par nic̱h əgwzenagle c̱he X̱anchonꞌ catəꞌən yideꞌenəꞌ”, canꞌ gwna deꞌe profet Isaiazənꞌ benꞌ beꞌ xtižəꞌ Diozənꞌ canaꞌ.
\p
\v 24 Naꞌ beṉəꞌ caꞌ ɉaꞌac lao Juanṉəꞌ bosoꞌoseḻəꞌ beṉəꞌ fariseo caꞌ ḻegaꞌaqueꞌ.
\v 25 Naꞌ gwseꞌeneꞌ: ―¿Bixc̱henꞌ chc̱hoꞌ beṉəꞌ nis šə cui nacoꞌ Cristənꞌ, naꞌ šə cui nacoꞌ Ḻiazənꞌ naꞌ šə ni benꞌ naquən yidə par güeꞌeleneꞌ netoꞌ xtižəꞌ Diozənꞌ?
\p
\v 26 Naꞌ Juanṉəꞌ božiꞌe xtižəꞌəgaꞌaqueꞌenəꞌ gožeꞌ: ―Nadaꞌ chc̱hoaꞌ beṉəꞌ nis, pero naꞌ entr leꞌe zo to beṉəꞌ cui nombiꞌale.
\v 27 Beꞌenəꞌ zeꞌe əchoɉeꞌ naꞌ zaquəꞌəcheꞌ ca nadaꞌ naꞌ bito zacaꞌa par gacaꞌ xmoseꞌ.
\p
\v 28 Yoguəꞌ deꞌe quinga goquən yež deꞌen nziꞌ Betabara. Naꞌ yežənꞌ chiꞌin yešḻaꞌalə yao Jordanṉəꞌ ganꞌ chc̱hoa Juanṉəꞌ beṉəꞌ nis.
\s1 Jesoꞌosənꞌ gwxaquəꞌəlebeneꞌ ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ
\p
\v 29 Beteyo bleꞌi Juanṉəꞌ zaꞌ Jesoꞌosənꞌ ganꞌ zoeꞌenəꞌ naꞌ gožeꞌ netoꞌ žaꞌatoꞌonəꞌ: ―Ḻeꞌe güiašc nga zaꞌ benꞌ bseḻəꞌ Diozənꞌ benꞌ gwxaquəꞌəlebe ca xiləꞌ daoꞌ bia caꞌ chotcho par chnitlao xtoḻəꞌəchonꞌ. Ḻeꞌenəꞌ yequeꞌe xtoḻəꞌ beṉac̱hənꞌ con beṉəꞌ soꞌonḻilažəꞌ ḻeꞌ.
\v 30 C̱he benganꞌ biꞌa dižəꞌ catəꞌən gwniaꞌ de que benꞌ zeꞌe əchoɉ zaquəꞌəcheꞌ ca nadaꞌ, c̱hedəꞌ bazoczə ḻeꞌenəꞌ antslə zeꞌe soaꞌ nadaꞌ.
\v 31 Bito gocbeꞌidaꞌ nadaꞌ cate nonꞌ naqueꞌ. Pero ṉaꞌa zaꞌa chc̱hoꞌa beṉəꞌ nis par nic̱h yeziquəꞌəchlə beṉəꞌ Izrael saꞌacbeꞌineꞌ nonꞌ naqueꞌ.
\p
\v 32 Naꞌ Juanṉəꞌ beꞌecheꞌ dižəꞌ c̱he Jesoꞌosənꞌ gwneꞌ: ―Spirit c̱he Diozənꞌ deꞌen zo yobanꞌ len Diozənꞌ bleꞌidaꞌ betɉən ca to ngolbexə naꞌ bžinən gwzon len Jesoꞌosənꞌ.
\v 33 Bito gocbeꞌidaꞌ nadaꞌ nonꞌ naqueꞌ žaləꞌ que Diozənꞌ benꞌ bseḻəꞌ nadaꞌ par chc̱hoaꞌ beṉəꞌ nis gwneꞌ nadaꞌ: “Leꞌidoꞌ yetɉ Spirit c̱hiaꞌanəꞌ ganꞌ zo benꞌ gon ca so Spirit c̱hiaꞌanəꞌ ḻoꞌo yic̱hɉlaꞌaždaꞌolenꞌ naꞌ ṉabiꞌan leꞌe. Naꞌ catəꞌ əžin Spirit c̱hiaꞌanəꞌ ganꞌ zo beꞌenəꞌ, son len ḻeꞌ.”
\v 34 Nadaꞌ bableꞌidaꞌ goc canꞌ gwneꞌenəꞌ naꞌ choꞌa dižəꞌ de que benganꞌ Xiꞌiṉ Diozənꞌ.
\s1 Beṉəꞌ caꞌ gosəꞌənaogüeꞌ Jesoꞌosənꞌ deꞌe neche
\p
\v 35 Ža beteyo zecha Juanṉəꞌ len c̱hopə netoꞌ disipl c̱heꞌ.
\v 36 Naꞌ bleꞌineꞌ gwde Jesoꞌosənꞌ, naꞌ gožeꞌ netoꞌ: ―Ḻeꞌe ggüiašc naꞌ zda benꞌ bseḻəꞌ Diozənꞌ benꞌ gwxaquəꞌəlebe ca xiləꞌ daoꞌ bia caꞌ chotcho par chnitlao xtoḻəꞌəchonꞌ.
\p
\v 37 Naꞌ c̱hopte netoꞌ gožeꞌ caꞌ ɉenaotoꞌ Jesoꞌosənꞌ.
\v 38 Naꞌ beyec̱hɉ Jesoꞌosənꞌ naꞌ bleꞌineꞌ banaotoꞌoneꞌ. Naꞌ gožeꞌ netoꞌ: ―¿Bixc̱henꞌ naole nadaꞌ?
\p Naꞌ gožtoꞌoneꞌ: ―Maestr, ¿ga zoꞌ?
\p
\v 39 Nach gožeꞌ netoꞌ: ―Ḻeꞌe šoꞌo naꞌ leꞌile.
\p Naꞌ gwyeɉlentoꞌoneꞌ naꞌ bleꞌitoꞌ ganꞌ zoeꞌenəꞌ, naꞌ begaꞌaṉlentoꞌoneꞌ do yeto c̱hop or, c̱hedəꞌ ca orənꞌ banaquə ca do cheda tap.
\p
\v 40 Nadaꞌ lenaꞌ Ndres beṉəꞌ bišəꞌ Simon Bedənꞌ benetoꞌ dižəꞌ deꞌen beꞌ Juanṉəꞌ naꞌ gwnaotoꞌ Jesoꞌosənꞌ.
\v 41 Naꞌ Ndresənꞌ antslə zeꞌe goneꞌ bichlə ɉəyeniꞌe Simon bišeꞌenəꞌ naꞌ gožeꞌeneꞌ: ―Babežaglaotoꞌ Mesiasənꞌ―, zeɉe dižəꞌ Cristənꞌ benꞌ gwleɉ Diozənꞌ par gaquəleneꞌ ṉasyon Izrael c̱hetonꞌ.
\p
\v 42 Nach Ndresənꞌ gwc̱heꞌe Simon bišeꞌenəꞌ ganꞌ zo Jesoꞌosənꞌ. Naꞌ lao chgüia Jesoꞌosənꞌ ḻeꞌ gožeꞌeneꞌ: ―Lenꞌ Simon xiꞌiṉ Jonas. Pero yesəꞌəsiꞌ beṉəꞌ leꞌ Sefas―, zeɉe dižəꞌ Bed.
\s1 Jesoꞌosənꞌ gwleɉeꞌ Lipənꞌ naꞌ Natanaelənꞌ par əžɉaꞌacleneꞌ ḻeꞌ
\p
\v 43 Beteyo Jesoꞌosənꞌ gwc̱hoglaogüeꞌen yeyeɉeꞌ Galileanꞌ, naꞌ bežagueꞌ Lipənꞌ naꞌ gožeꞌeneꞌ: ―Yoꞌo len nadaꞌ.
\p
\v 44 Lipənꞌ naqueꞌ beṉəꞌ Betsaida, laž Ndresənꞌ naꞌ laž Bedənꞌ.
\v 45 Nach Lipənꞌ bežagueꞌ Natanaelənꞌ naꞌ gožeꞌeneꞌ: ―Babežaglaotoꞌ benꞌ bzoɉ Moisezənꞌ xtižeꞌe ḻeꞌe ḻibr caꞌ ganꞌ ḻeczə bzoɉeꞌ ḻeinꞌ, naꞌ c̱he ḻeczeꞌen bosoꞌozoɉ beṉəꞌ caꞌ gwsoꞌe xtižəꞌ Diozənꞌ canaꞌ. Ḻenꞌ Jesoꞌosənꞌ beṉəꞌ Nasaret, xiꞌiṉ Jwsenꞌ.
\p
\v 46 Naꞌ gož Natanaelənꞌ ḻeꞌ: ―¿Bat benecho Nasaret naꞌ əchoɉ beṉəꞌ güen?
\p Naꞌ gož Lipənꞌ ḻeꞌ: ―Yoꞌo nic̱h əṉezdoꞌ.
\p
\v 47 Naꞌ catəꞌ Jesoꞌosənꞌ bleꞌineꞌ bachžin Natanaelənꞌ baozə, gwneꞌ c̱heꞌ: ―Naꞌ zaꞌ to beṉəꞌ Izrael gwlaž c̱hecho benꞌ naquə beṉəꞌ güen, naꞌ ni latəꞌəzə cui naqueꞌ beṉəꞌ gox̱oayag.
\p
\v 48 Naꞌ gož Natanaelənꞌ ḻeꞌ: ―¿Nac chac nombiꞌo nadaꞌ?
\p Naꞌ Jesoꞌosənꞌ gožeꞌeneꞌ: ―Antslə zeꞌe əṉeꞌ Lipənꞌ leꞌ, catəꞌən zechaꞌo xan yag yix̱güionəꞌ, bleꞌidaꞌ leꞌ.
\p
\v 49 Nach Natanaelənꞌ gožeꞌeneꞌ: ―Maestr, lenꞌ nacoꞌ Xiꞌiṉ Dioz. Lenꞌ nacoꞌ Rei benꞌ chbezətoꞌ yedəṉabiaꞌ netoꞌ beṉəꞌ Izrael.
\p
\v 50 Naꞌ Jesoꞌosənꞌ gožeꞌeneꞌ: ―¿Epor ni c̱he deꞌen gwniaꞌ de que bleꞌidaꞌ leꞌ xan yag yix̱güionꞌ cheɉḻiꞌo de que Diozənꞌ gwleɉeꞌ nadaꞌ par gaquəlenaꞌ ṉasyon c̱hechonꞌ ža? Deꞌe zaquəꞌəche ca deꞌe nga zeꞌe zaꞌac.
\p
\v 51 Nach Jesoꞌosənꞌ gozeꞌe netoꞌ: ―Deꞌe ḻi əchniaꞌ leꞌe, leꞌixeɉele yobanꞌ ganꞌ zo Diozənꞌ naꞌ angl c̱heꞌ caꞌ əseꞌep seꞌetɉeꞌ yežlyo nga ganꞌ zoaꞌ, laꞌ Dioz nanꞌ bseḻeꞌe nadaꞌ golɉaꞌ beṉac̱h.
\c 2
\s1 Gotəꞌ to yeḻəꞌ gošagnaꞌ yež deꞌen nziꞌ Cana
\p
\v 1 Gwde šoṉə ža nach gotəꞌ to yeḻəꞌ gošagnaꞌ yež deꞌenəꞌ nziꞌ Cana distrit c̱he Galilea, naꞌ gwyeɉ xnaꞌ Jesoꞌosənꞌ.
\v 2 Naꞌ ḻeczə gwsaꞌaxeꞌ Jesoꞌosənꞌ len netoꞌ disipl c̱heꞌ nic̱h gwyeɉtoꞌ ganꞌ chac yeḻəꞌ gošagnaꞌanəꞌ.
\v 3 Naꞌ caguə goque binonꞌ par əseꞌeɉ yoguəꞌ beṉəꞌ caꞌ žaꞌanəꞌ. Nach xnaꞌ Jesoꞌosənꞌ gožeꞌeneꞌ: ―Bito bi bino dech c̱hegaꞌaqueꞌ.
\p
\v 4 Naꞌ gož Jesoꞌosənꞌ ḻeꞌ: ―Nagüe, ¿bixc̱henꞌ chiꞌo nadaꞌ caꞌ? Zeꞌe əžin or gaquəlenaꞌ beṉəꞌ quinga.
\p
\v 5 Naꞌ xneꞌenəꞌ gožeꞌ beṉəꞌ caꞌ chsoꞌon mendadənꞌ: ―Ḻeꞌe gon bitəꞌətezə deꞌe əṉeꞌ.
\p
\v 6 Naꞌ nitəꞌ x̱op yeɉ ga chož nis. Yeɉ caꞌ zɉənac caꞌ chosoꞌoc̱hin beṉəꞌ Izrael gwlaž c̱hetoꞌ caꞌ par chsaꞌa chəsəꞌəyib cuingaꞌaqueꞌ segon canꞌ na ḻei c̱hetoꞌonəꞌ. Naꞌ to to yeɉ caꞌ chožən do x̱onꞌ cheꞌe o do ši cheꞌe nisənꞌ.
\v 7 Naꞌ gož Jesoꞌosənꞌ beṉəꞌ güen mendad caꞌ: ―Ḻeꞌe yosšaꞌ yeɉ caꞌ nisənꞌ.
\p Naꞌ gosəꞌəgueꞌen xte ca gosəꞌəžaꞌan.
\v 8 Nach gozeꞌe ḻegaꞌaqueꞌ: ―Ḻeꞌe gašəꞌ latəꞌən ṉaꞌa, naꞌ ḻeꞌe žɉənežɉonꞌ beꞌen chgüeꞌeɉ chguaonꞌ.
\p Nach gwsaꞌašeꞌen ɉəsəꞌənežɉueꞌen beꞌen chgüeꞌeɉ chguaonꞌ.
\v 9 Naꞌ bnix̱ beꞌen nisənꞌ banaquən bino, pero bito gwṉezeneꞌ ga gwzaꞌanṉəꞌ, con beṉəꞌ caꞌ gwsaꞌašəꞌ ḻen naꞌ zɉəṉeze. Nach goxeꞌ benꞌ chšagnaꞌanəꞌ
\v 10 naꞌ gožeꞌeneꞌ: ―Yoguəꞌ beṉəꞌ chdieꞌ zguaꞌatec bino šaoꞌ, naꞌ catəꞌ beṉəꞌ caꞌ žaꞌanəꞌ bazɉəneꞌeɉeꞌ zilənꞌ, nach choꞌe ḻegaꞌaqueꞌ deꞌe corrient. Pero naꞌ leꞌ bzagoꞌo bino šaoꞌ nga xte ṉaꞌach.
\p
\v 11 Deꞌe nga ben Jesoꞌosənꞌ Cana distrit c̱he Galileanꞌ goquən miḻagr nech deꞌen beneꞌ par bloꞌe de que nseꞌe yeḻəꞌ guac c̱he Diozənꞌ. Naꞌ netoꞌ disipl c̱heꞌ benḻilažəꞌətoꞌoneꞌ.
\p
\v 12 Gwde naꞌ gwyeɉtoꞌ Capernaum len ḻeꞌ naꞌ len xneꞌenəꞌ naꞌ beṉəꞌ bišeꞌe caꞌ. Naꞌ ɉəsotoꞌ naꞌ to c̱hopə šoṉə ža.
\s1 Jesoꞌosənꞌ bebeɉeꞌ beṉəꞌ caꞌ chsoꞌon yaꞌa chyoꞌo yoꞌodaoꞌ əblaonəꞌ
\p
\v 13 Naꞌ bazon gaḻəꞌ lṉi pascw c̱he netoꞌ beṉəꞌ Izrael catəꞌən gwyeɉtoꞌ len Jesoꞌosənꞌ Jerosalenṉəꞌ.
\v 14 Catəꞌ bžintoꞌ chyoꞌo yoꞌodaoꞌ əblao c̱he netoꞌ beṉəꞌ Izrael naꞌ žaꞌ beṉəꞌ chəsyəꞌəyotəꞌ goꞌoṉ naꞌ xiləꞌ naꞌ ngolbexə, naꞌ len beṉəꞌ caꞌ zɉəchiꞌ chosoꞌošeꞌe mech.
\v 15 Nach Jesoꞌosənꞌ beneꞌ to sot de do naꞌ bebeɉeꞌ yoguəꞌəḻoḻ beṉəꞌ caꞌ žaꞌ chyoꞌo c̱he yoꞌodaoꞌ əblaonəꞌ len xiləꞌ caꞌ, len goꞌoṉ caꞌ. Naꞌ beslaseꞌ xmech beṉəꞌ gošaꞌ mech caꞌ, naꞌ gwloꞌoṉiꞌaneꞌe mes c̱hegaꞌaqueꞌ caꞌ.
\v 16 Naꞌ gožeꞌ beṉəꞌ caꞌ chsoꞌotəꞌ ngolbexənꞌ: ―Ḻeꞌe yebeɉ yoguəꞌəḻoḻ bia quinga nga. Cui gonḻe yaꞌa nga liž X̱aꞌanəꞌ.
\p
\v 17 Nach ɉəyezaꞌalažəꞌ netoꞌ disipl c̱heꞌ canꞌ nyoɉ Xtižəꞌ Diozənꞌ ganꞌ nan: “Deꞌe tant chiꞌ yic̱hɉaꞌ c̱he ližoꞌonəꞌ xte cheyožlažaꞌa.”
\p
\v 18 Naꞌ beṉəꞌ caꞌ zɉənaquə beṉəꞌ blao c̱he ṉasyon Izrael c̱hetoꞌon žaꞌanəꞌ gwseꞌeneꞌ: ―¿Bi yeḻəꞌ guac əgwloꞌidoꞌ netoꞌonəꞌ par nic̱h əṉezetoꞌ šə napoꞌ yeḻəꞌ gwnabiaꞌ par bebeɉoꞌ beṉəꞌ caꞌ?
\p
\v 19 Naꞌ Jesoꞌosənꞌ gožeꞌ ḻegaꞌaqueꞌ: ―Ḻeꞌe yoc̱hiṉɉ yoꞌodaoꞌ nga naꞌ šoṉə žazə yeyonaꞌan.
\p
\v 20 Nach beṉəꞌ blao caꞌ gwseꞌeneꞌ: ―X̱opeyon iz gwsoꞌoneꞌ yoꞌodaoꞌ nga, ¿ənaꞌ leꞌ yeyonoꞌon šoṉə žazə?
\p
\v 21 Pero Jesoꞌosənꞌ gwneꞌ caꞌ c̱he cuerp c̱heꞌenəꞌ, chsaꞌaquəꞌəlebeneꞌen ca yoꞌodaꞌonəꞌ.
\v 22 Nach catəꞌ bžin ža bebaneꞌ ladɉo beṉəꞌ guat caꞌ, netoꞌ disipl c̱heꞌ ɉəyezaꞌalažəꞌətoꞌ canꞌ gwneꞌenəꞌ. Naꞌ gwyeɉḻeꞌetoꞌ canꞌ na Xtižəꞌ Diozənꞌ deꞌen nyoɉən de que Jesoꞌosənꞌ yebaneꞌ ladɉo beṉəꞌ guat caꞌ, naꞌ ḻeczə gwyeɉḻeꞌetoꞌ deꞌen gožeꞌ netoꞌ.
\s1 Jesoꞌosənꞌ ṉezeneꞌ binꞌ yoꞌo ḻoꞌo yic̱hɉlaꞌaždaoꞌ beṉac̱hənꞌ
\p
\v 23 Žlac gwzo Jesoꞌosənꞌ Jerosalenṉəꞌ lao lṉi pasconꞌ, beṉəꞌ zan gwsoꞌonḻilažeꞌeneꞌ catəꞌ besəꞌəleꞌineꞌ miḻagr caꞌ deꞌen beneꞌ.
\v 24 Pero naꞌ Jesoꞌosənꞌ bito ben cuineꞌ lao naꞌ beṉəꞌ caꞌ c̱hedəꞌ baṉeze nḻeꞌineꞌ yic̱hɉlaꞌaždaoꞌ beṉac̱hənꞌ.
\v 25 Naꞌ bito byažɉeneꞌ no əgwzeɉniꞌi ḻeꞌ canꞌ naquə yic̱hɉlaꞌaždaoꞌ beṉac̱hənꞌ c̱hedəꞌ ḻeꞌ ṉezeneꞌ binꞌ yoꞌo ḻoꞌo yic̱hɉlaꞌaždaoꞌ to toeꞌ.
\c 3
\s1 Jesoꞌosənꞌ naꞌ benꞌ le Nicodemo
\p
\v 1 Naꞌ zo to beṉəꞌ fariseo benꞌ leꞌ Nicodemo. Naꞌ naqueꞌ beṉəꞌ blao c̱he ṉasyon Izrael c̱hetonꞌ.
\v 2 Nicodemonꞌ gwyeɉeꞌ lao Jesoꞌosənꞌ šeꞌelə naꞌ gožeꞌeneꞌ: ―Maestr, ṉezetoꞌ de que Diozənꞌ bseḻeꞌe leꞌ par chzeɉniꞌidoꞌ netoꞌ, c̱hedəꞌ laꞌ notono no chac gon ca naquə miḻagr caꞌ chonoꞌ šə cui zo Diozənꞌ len ḻeꞌ.
\p
\v 3 Naꞌ gož Jesoꞌosənꞌ ḻeꞌ: ―Deꞌe ḻi əchniaꞌ leꞌ šə nonꞌ cui galɉə yeto bito gaquə soeꞌ ca ṉabiaꞌ Diozənꞌ ḻeꞌ.
\p
\v 4 Nach gož Nicodemonꞌ ḻeꞌ: ―¿Nacxa gon to beṉəꞌ galɉeꞌ šə banaqueꞌ beṉəꞌ golə? ¿Eguaquəch yeyoꞌe ḻoꞌo ḻeꞌe xneꞌe naꞌ galɉeꞌ yeto?
\p
\v 5 Nach gož Jesoꞌosənꞌ ḻeꞌ: ―Deꞌe ḻi əchniaꞌ leꞌ, šə nonꞌ cui galɉə len nis naꞌ len Spirit c̱he Diozənꞌ, bito gaquə soeꞌ ca ṉabiaꞌ Diozənꞌ ḻeꞌ.
\v 6 Beṉəꞌ zɉənaqueꞌ beləꞌ chen chəsəꞌəzan chəsəꞌəbequeꞌ xiꞌiṉgaꞌaqueꞌ ḻeczə biꞌi beləꞌ chen. Beṉəꞌ caꞌ chon Spirit c̱he Diozənꞌ par nic̱h chsaꞌalɉeꞌ, Spiritənꞌ chnežɉon ḻegaꞌaqueꞌ yeḻəꞌ mban zeɉḻicaṉe.
\v 7 Bito yebandoꞌ canꞌ gwniaꞌ leꞌ de que chonən byen galɉə yoguəꞌəle yeto.
\v 8 Ca naquə beꞌenəꞌ deꞌen chec̱hɉ, gatəꞌətezə cheneꞌen chec̱hɉən, naꞌ chendoꞌ choḻən, naꞌ nic ṉezdoꞌ gaxa zaꞌanṉəꞌ naꞌ nic ṉezdoꞌ gaxa šeɉənṉəꞌ. Canꞌ naquən c̱he yoguəꞌəḻoḻ beṉəꞌ chon Spirit c̱he Diozənꞌ par nic̱h chsaꞌalɉeꞌ.
\p
\v 9 Nach Nicodemonꞌ gožeꞌeneꞌ: ―¿Nacxa chactguanꞌ par chac canꞌ naꞌonəꞌ?
\p
\v 10 Naꞌ Jesoꞌosənꞌ gožeꞌeneꞌ: ―Leꞌ nacoꞌ beṉəꞌ blao entr beṉəꞌ caꞌ chosoꞌosed chosoꞌoloꞌi beṉəꞌ Izrael gwlaž c̱hecho caꞌ xtižəꞌ Diozənꞌ, ¿ənaꞌ cui cheɉniꞌidoꞌ deꞌe nganꞌ?
\v 11 Deꞌe ḻi əchniaꞌ leꞌ, deꞌe ṉezetoꞌonəꞌ chyix̱ɉueꞌetoꞌ naꞌ deꞌe bableꞌitoꞌonəꞌ choꞌetoꞌ dižəꞌ c̱hei, naꞌ cui chzenagle.
\v 12 Deꞌen chac yežlyo nganꞌ bagwniaꞌ leꞌe naꞌ cui cheɉḻeꞌele. ¿Nacxa gaquənꞌ šeɉḻeꞌele šə niaꞌ leꞌe deꞌen chac yobanꞌ?
\p
\v 13 Ni to beṉəꞌ cui zo yežlyo nga beṉəꞌ babeyep yobanꞌ par ṉezeneꞌ canꞌ chac yobanꞌ. Pero ca nacaꞌ nadaꞌ ža, gwzoaꞌ yobanꞌ len Diozənꞌ naꞌ bseḻeꞌe nadaꞌ yežlyo nga par golɉaꞌ beṉac̱h, naꞌ zotezə zoaꞌ len Diozənꞌ benꞌ zo yobanꞌ. Deꞌe naꞌanəꞌ ṉezdaꞌ canꞌ chac yobanꞌ.
\v 14 Naꞌ canꞌ gwḻis deꞌe Moisezənꞌ beḻ de bronsənꞌ to ḻeꞌe yag latɉə dašənꞌ, canꞌ cheyaḻəꞌ yesəꞌəḻiseꞌ nadaꞌ to ḻeꞌe yag, nadanꞌ bseḻəꞌ Diozənꞌ golɉaꞌ bꞌeṉac̱h.
\v 15 Naꞌ gaquə c̱hiaꞌ caꞌ par nic̱h notəꞌətezə beṉəꞌ gonḻilažəꞌ nadaꞌ bito cuiayiꞌe, sino gatəꞌ yeḻəꞌ mban zeɉḻicaṉ c̱heꞌ.
\s1 Chaque Diozənꞌ c̱he beṉac̱hənꞌ
\p
\v 16 Ḻechguaḻe chaque Diozənꞌ c̱he chioꞌo beṉac̱h naꞌ beṉ Xiꞌiṉeꞌ tlišəꞌənəꞌ par nic̱h naꞌ notəꞌətezcho chonḻilažəꞌəchoneꞌ bito cuiayiꞌicho mas de yeḻəꞌ mban zeɉḻicaṉe c̱hecho.
\v 17 Diozənꞌ bseḻeꞌe Xiꞌiṉenꞌ yežlyo nga caguə par nic̱h əc̱hoglaogüeꞌen c̱he chioꞌo beṉac̱h de que napcho doḻəꞌ, sino par nic̱h goneꞌ ca cui yeyeɉcho lao yiꞌ gabiḻənꞌ.
\p
\v 18 Chioꞌo chonḻilažəꞌəcho Xiꞌiṉ Diozənꞌ bac̱h nchoglaon c̱hecho de que bito bi doḻəꞌ napcho, pero beṉəꞌ cui chsoꞌonḻilažəꞌ ḻeꞌ nchoglaon c̱hegaꞌaqueꞌ de que zɉənapeꞌ doḻəꞌ c̱hedəꞌ bito chsoꞌonḻilažeꞌe Xiꞌiṉ tlišəꞌ Diozənꞌ.
\v 19 Canꞌ chac, beṉəꞌ caꞌ cui chsoꞌonḻilažəꞌ ḻeꞌ banchoglaon c̱hegaꞌaqueꞌ de que zɉənapeꞌ doḻəꞌ, por ni c̱he deꞌen babidə Xiꞌiṉ Diozənꞌ yežlyonꞌ nseꞌe beꞌeniꞌ par yic̱hɉlaꞌaždaoꞌ beṉac̱hənꞌ, naꞌ chəsyəꞌəbeicheneꞌ deꞌe žc̱hoḻənꞌ cle ca beꞌeniꞌ c̱heꞌenəꞌ c̱hedəꞌ chsoꞌoneꞌ deꞌe malənꞌ.
\v 20 Beṉəꞌ caꞌ chsoꞌon deꞌe malənꞌ chəsəꞌəgueꞌineꞌ beꞌeniꞌ c̱heꞌenəꞌ, naꞌ bito chseꞌeneneꞌ əgwseꞌeniꞌin ḻoꞌo yic̱hɉlaꞌaždaꞌogaꞌaqueꞌenəꞌ, c̱hedəꞌ bito chseꞌeneneꞌ laꞌalaon de que deꞌe malənꞌ chsoꞌoneꞌ.
\v 21 Caguə caꞌ chioꞌo chzenagcho c̱he dižəꞌ ḻi c̱he Diozənꞌ par choncho canꞌ cheyaḻəꞌ goncho. Chioꞌo choꞌecho latɉə chseꞌeniꞌin ḻoꞌo yic̱hɉlaꞌaždaꞌochonꞌ c̱hedəꞌ cheneꞌecho goncho ca saꞌacbeꞌi beṉəꞌ de que Diozənꞌ chacleneꞌ chioꞌo len bi deꞌen chonchonꞌ.
\s1 Juan benꞌ bc̱hoa beṉəꞌ nis beꞌe dižəꞌ c̱he Jesoꞌosənꞌ deꞌe yoblə
\p
\v 22 Gwde naꞌ netoꞌ disipl gwyeɉtoꞌ len Jesoꞌosənꞌ yež daoꞌ caꞌ zɉəchiꞌ ganꞌ mbane Jodeanꞌ. Naꞌ žlac begaꞌaṉtoꞌonəꞌ Jesoꞌosənꞌ beneꞌ par nic̱h netoꞌ bc̱hoatoꞌ beṉəꞌ nis.
\v 23 Naꞌ Juanṉəꞌ ḻeczə chc̱hoeꞌ beṉəꞌ nis yež deꞌen nziꞌ Enon deꞌen chiꞌ gaḻəꞌəzə yež Salim, ganꞌ dechgua nis. Naꞌ ɉaꞌac beṉəꞌ naꞌ gosəꞌəchoeꞌ nisənꞌ.
\v 24 Canaꞌ bitoṉəꞌ gatəꞌ Juanṉəꞌ ližyanꞌ.
\p
\v 25 Naꞌ gotəꞌ to bžaš entr disipl c̱he Juanṉəꞌ naꞌ entr yeto c̱hopə beṉəꞌ Izrael gwlaž c̱hetoꞌ caꞌ c̱he deꞌen chəsəꞌəc̱hoeꞌ beṉəꞌ nis.
\v 26 Naꞌ disipl c̱he Juanṉəꞌ ɉaꞌaqueꞌ laogüeꞌenəꞌ naꞌ gwseꞌeneꞌ: ―Maestr, benꞌ gwzo len leꞌ yešḻaꞌalə yao Jordanṉəꞌ, benꞌ choꞌo xtižeꞌe, ḻeꞌ bachc̱hoeꞌ beṉəꞌ nisənꞌ naꞌ yoguəꞌəzə beṉəꞌ chɉaꞌac gaꞌan zoeꞌenəꞌ.
\p
\v 27 Nach Juanṉəꞌ gožeꞌ ḻegaꞌaqueꞌ: ―Notono no əyeꞌelaoꞌ šə cui gon Diozənꞌ par nic̱h soꞌelaoꞌ beṉəꞌ ḻeꞌ.
\v 28 Leꞌe ṉezele canꞌ bagwniaꞌ de que bito nacaꞌ nadaꞌ Cristənꞌ benꞌ bseḻəꞌ Diozənꞌ par gaquəleneꞌ ṉasyon c̱hechonꞌ. Nadaꞌ nacaꞌ benꞌ bseḻəꞌ Diozənꞌ par choꞌa xtižəꞌ Cristənꞌ nic̱h ṉitəꞌ beṉəꞌ probnid par yosoꞌozenagueꞌ c̱heꞌ catəꞌən yideꞌenəꞌ.
\v 29 Catəꞌ chəsəꞌəšagnaꞌ beṉəꞌ, beṉəꞌ byo benꞌ chšagnaꞌ ḻeꞌenəꞌ chziꞌe noꞌolənꞌ. Naꞌ beṉəꞌ migw c̱he benꞌ chšagnaꞌanəꞌ, zecheꞌ cuiteꞌenəꞌ chebeichgüeineꞌ cheneneꞌ chšil benꞌ chšagnaꞌanəꞌ. Caꞌaczənꞌ chac len nadaꞌ ža, ḻechguaḻe chebeidaꞌ deꞌen chsoꞌelaoꞌ beṉəꞌ Cristənꞌ.
\v 30 Laꞌ ḻeꞌenəꞌ cheyaḻəꞌ šeɉəchlə gaqueꞌ beṉəꞌ blao; pero ca naquə nadaꞌ, šeɉəchlə te c̱hiaꞌ.
\s1 Benꞌ zaꞌ ganꞌ zo Diozənꞌ
\p
\v 31 Ca naquə benꞌ zaꞌ ganꞌ zo Diozənꞌ, ḻeꞌ naqueꞌ blaoch ca notəꞌətezəchlə beṉəꞌ. Naꞌ ca naquə notəꞌətezəchlə beṉəꞌ žaꞌ yežlyo nga, beꞌen c̱he yežlyo nga zɉənaqueꞌ naꞌ xtižəꞌ yežlyo nganꞌ chsoꞌe. Pero naꞌ benꞌ zaꞌ ganꞌ zo Diozənꞌ, ḻeꞌ naqueꞌ beṉəꞌ blaoch ca notəꞌətezəchlə beṉəꞌ.
\v 32 Ḻeꞌ choꞌe dižəꞌ c̱he deꞌen bableꞌineꞌ ganꞌ zo Diozənꞌ naꞌ c̱he deꞌen babeneneꞌ naꞌ, naꞌ notono no chzenag xtižeꞌenəꞌ.
\v 33 Naꞌ šə nonꞌ chosoꞌozenag xtižəꞌ benꞌ zaꞌ ganꞌ zo Diozənꞌ chosoꞌoloꞌe de que zɉəṉezeneꞌ Diozənꞌ choꞌe dižəꞌ ḻi.
\v 34 Naꞌ Xiꞌiṉ Diozənꞌ benꞌ bseḻeꞌenəꞌ choꞌe xtižəꞌ Diozənꞌ c̱hedəꞌ Diozənꞌ choneꞌ par nic̱h zotezə zo Spirit c̱heꞌenəꞌ len ḻeꞌ dote tyemp.
\v 35 Diozənꞌ chaqueneꞌ c̱he Xiꞌiṉeꞌenəꞌ naꞌ babeneꞌ ca cheɉniꞌineꞌ yoguəꞌəḻoḻ par nic̱h ḻeꞌ əgwzeɉniꞌineꞌ beṉac̱hənꞌ.
\v 36 Naꞌ chioꞌo chonḻilažəꞌəcho Xiꞌiṉ Diozənꞌ de yeḻəꞌ mban zeɉḻicaṉe c̱hecho. Naꞌ beṉəꞌ caꞌ chsoꞌonczə yic̱hɉlaogaꞌaqueꞌ cui chsoꞌonḻilažeꞌeneꞌ, bito gatəꞌ yeḻəꞌ mban zeɉḻicaṉe c̱hegaꞌaqueꞌ sino yesəꞌəziꞌe castigw zeɉḻicaṉe.
\c 4
\s1 Jesoꞌosənꞌ beꞌe dižəꞌ len to noꞌolə Samaria
\p
\v 1 Naꞌ beṉəꞌ fariseo caꞌ gwsaꞌacbeꞌineꞌ de que beṉəꞌ zanch ɉəsəꞌənaogüeꞌ Jesoꞌosənꞌ cle ca Juanṉəꞌ naꞌ de que beṉəꞌ zanch chc̱hoeꞌ nis cle ca Juanṉəꞌ.
\v 2 Pero caguə cuin Jesoꞌosənꞌ bc̱hoeꞌ ḻegaꞌaqueꞌ nis sino netoꞌ disipl c̱heꞌ bc̱hoꞌatoꞌ beṉəꞌ nis.
\v 3 Naꞌ ca naquənꞌ gwṉeze Jesoꞌosənꞌ canꞌ bagwsaꞌacbeꞌi beṉəꞌ fariseo caꞌ de que beṉəꞌ zan zɉəsəꞌənao ḻeꞌ nach bezaꞌatoꞌ distrit c̱he Jodeanꞌ naꞌ beyeɉtoꞌ distrit c̱he Galileanꞌ.
\p
\v 4 Par bežintoꞌ Galileanꞌ bedetoꞌ distrit c̱he Samaria naꞌalə.
\v 5 Caꞌ goquənꞌ bežintoꞌ to yež deꞌe nziꞌ Sicar distrit c̱he Samarianꞌ. Naquə yežənꞌ gaḻəꞌəzə len yežlyonꞌ deꞌen bnežɉw deꞌe Jacobənꞌ deꞌe xiꞌiṉeꞌ Jwsenꞌ.
\p
\v 6–8 Naꞌ žia to pos naꞌ deꞌe nziꞌ “Pos c̱he deꞌe Jacobənꞌ”. Jesoꞌosənꞌ bac̱h chɉx̱aqueꞌeneꞌ ngüeꞌe nezənꞌ naꞌ gwchiꞌe choꞌa posənꞌ. Bac̱h naquə ca do gobiž. Naꞌ netoꞌ gwyeɉtoꞌ laoꞌ yežənꞌ par siꞌitoꞌ deꞌe gaotoꞌ. Naꞌ bžin to noꞌolə Samarianꞌ par güeꞌe nis, naꞌ Jesoꞌosənꞌ gožeꞌeneꞌ: ―Doaꞌ latəꞌ nis yeꞌeɉaꞌ.
\p
\v 9 Naꞌ noꞌolə Samarianꞌ gožeꞌeneꞌ: ―¿Nactecxanꞌ leꞌ nacoꞌ beṉəꞌ Izrael chṉabdoꞌ nadaꞌ nis yeꞌeɉoꞌ? len noꞌolə Samaria nadaꞌ―. (Ca naquə beṉəꞌ Izrael gwlaž c̱hetoꞌ caꞌ bito chəsəꞌəṉeꞌ beṉəꞌ Samaria caꞌ.)
\p
\v 10 Naꞌ Jesoꞌosənꞌ gožeꞌeneꞌ: ―Žaləꞌ ṉezdoꞌ deꞌen cheneꞌe Diozənꞌ goṉeꞌ leꞌ naꞌ žaləꞌ chacbeꞌidoꞌ nonꞌ nacaꞌ nadaꞌ chapaꞌa leꞌ: “Doaꞌ latəꞌ nis yeꞌeɉaꞌ”, leꞌ əṉabdoꞌon nadaꞌ naꞌ nadaꞌ goṉaꞌ leꞌ nis deꞌe choṉ yeḻəꞌ mban zeɉḻicaṉe.
\p
\v 11 Naꞌ noꞌolənꞌ gožeꞌeneꞌ: ―Señor, caguə nox̱oꞌo bi gašəꞌədoꞌonṉəꞌ naꞌ pos nga naquən zitɉw. ¿Gaxa siꞌo nis deꞌen choṉ yeḻəꞌ mban zeɉḻicaṉe deꞌen naoꞌ caꞌ?
\v 12 ¿Echacdoꞌ de que zaquəꞌəchoꞌ leꞌ ca deꞌe x̱axtaꞌocho Jacobənꞌ benꞌ bocuaꞌaṉ len netoꞌ pos nga ga güeꞌeɉeꞌ naꞌ xiꞌiṉeꞌ caꞌ naꞌ bia yix̱əꞌ c̱heꞌ caꞌ?
\p
\v 13 Naꞌ gož Jesoꞌosənꞌ ḻeꞌ: ―Notəꞌətezə beṉəꞌ yeꞌeɉ nis nga biaꞌaczə əbiləcheneꞌen deꞌe yoblə.
\v 14 Pero naꞌ notəꞌətezə beṉəꞌ yeꞌeɉ nisənꞌ deꞌen əgwnežɉuaꞌ nadaꞌ cuatəch əbileneꞌen laꞌ gatəꞌ yeḻəꞌ mban zeɉḻicaṉe c̱heꞌenəꞌ. Naꞌ nis deꞌen əgwnežɉuaꞌaneꞌ gaquən ḻoꞌo yic̱hɉlaꞌaždaogüeꞌen ca to nis deꞌe chxitəꞌ chžia chaldin naꞌ deꞌe cuat yebižən.
\p
\v 15 Naꞌ noꞌolənꞌ gožeꞌeneꞌ: ―Señor, beṉ nadaꞌ nisənꞌ naoꞌ caꞌ par nic̱h cuich əbildaꞌ naꞌ cuich yidaꞌ dex̱iaꞌan nga.
\p
\v 16 Jesoꞌosənꞌ gožeꞌeneꞌ: ―Beyeɉ ɉəyeṉe beꞌen c̱hioꞌonəꞌ naꞌ ḻeꞌe da nga.
\p
\v 17 Nach gož noꞌolənꞌ ḻeꞌ: ―Notono beꞌen c̱hiaꞌ zo.
\p Naꞌ gož Jesoꞌosənꞌ ḻeꞌ: ―Ḻeiczədoꞌ canꞌ naoꞌ de que notono beꞌen c̱hioꞌ zo,
\v 18 laꞌ gueyəꞌ beꞌen c̱hioꞌ bagwnitəꞌ beṉəꞌ nšagnaꞌalenoꞌ, naꞌ ca naquə benꞌ zolenoꞌ ṉaꞌa caguə nšagnaꞌalenoꞌoneꞌenəꞌ. Deꞌe ḻi canꞌ bagwnaoꞌ.
\p
\v 19 Naꞌ gož noꞌolənꞌ ḻeꞌ: ―Señor, bachacbeꞌidaꞌ de que leꞌ chyix̱ɉueꞌidoꞌ bi deꞌen na Diozənꞌ.
\v 20 Deꞌe x̱axtaꞌo netoꞌ beṉəꞌ Samaria gwsoꞌelaogüeꞌe Diozənꞌ yaꞌan zo naꞌ, naꞌ leꞌe nale de que Jerosalen naꞌanəꞌ cheyaḻəꞌ güeꞌelaꞌocho Diozənꞌ.
\p
\v 21 Naꞌ gož Jesoꞌosənꞌ ḻeꞌ: ―Noꞌolə, gwyeɉḻeꞌ c̱hiaꞌ de que gwžin ža catəꞌ bitoch gonən byen žɉeꞌelaꞌole X̱acho Diozənꞌ yaꞌan zo naꞌ naꞌ ni Jerosalenṉəꞌ.
\v 22 Leꞌe nacle beṉəꞌ Samaria bito nombiaꞌale benꞌ cheɉṉiꞌalažəꞌəle. Netoꞌ beṉəꞌ Izrael nombiꞌatoꞌ Diozənꞌ benꞌ cheɉṉiꞌalažəꞌətoꞌ. Naꞌ entr netoꞌ beṉəꞌ Izrael əchoɉ benꞌ chac yebeɉ beṉac̱hənꞌ xniꞌa deꞌe malənꞌ.
\v 23 Gwžin ža naꞌ ṉaꞌa bazaꞌan beṉəꞌ caꞌ chseꞌeɉṉiꞌalažeꞌe X̱acho Diozənꞌ canꞌ chazlažeꞌenəꞌ əsoꞌelaogüeꞌeneꞌ do yic̱hɉ do lažəꞌəgaꞌaqueꞌ naꞌ segon deꞌen naquə deꞌe ḻi, c̱hedəꞌ X̱acho Diozənꞌ chyilɉeꞌ beṉəꞌ əsoꞌelaoꞌ ḻeꞌ caꞌ.
\v 24 Diozənꞌ bito naqueꞌ beṉəꞌ beləꞌ chen. Naꞌ beṉəꞌ caꞌ chseꞌeɉṉiꞌalažeꞌe ḻeꞌ cheyaḻəꞌ soꞌelaogüeꞌeneꞌ do yic̱hɉ do lažəꞌəgaꞌaqueꞌ naꞌ segon deꞌen naquə deꞌe ḻi.
\p
\v 25 Naꞌ gož noꞌolənꞌ ḻeꞌ: ―Ṉezdaꞌ de que yidə benꞌ gwleɉ Diozənꞌ par gaquəleneꞌ chioꞌo, benꞌ nziꞌ Mesias o Crist. Catəꞌ yideꞌ naꞌ c̱hix̱ɉueꞌineꞌ chioꞌo yoguəꞌəḻoḻ deꞌe quinga.
\p
\v 26 Nach Jesoꞌosənꞌ gožeꞌeneꞌ: ―Nadaꞌan nacaꞌ benꞌ naoꞌ caꞌ naꞌ choꞌelenaꞌ leꞌ dižəꞌ.
\p
\v 27 Naꞌ ḻei choꞌeleneꞌ noꞌolənꞌ dižəꞌ catəꞌ bežin netoꞌ disipl c̱heꞌ. Naꞌ bebanetoꞌ deꞌen choꞌeleneꞌ to noꞌolə dižəꞌ pero ni totoꞌ cui gwṉabetoꞌoneꞌ bi dižəꞌən choꞌeleneꞌ noꞌolənꞌ o bixc̱henꞌ chšilleneꞌeneꞌ.
\v 28 Nach noꞌolənꞌ bcuaꞌaṉ cheꞌe c̱heꞌenəꞌ naꞌ beyeɉeꞌ yežənꞌ ɉəyežeꞌ beṉəꞌ gwlaž c̱heꞌ caꞌ:
\v 29 ―Ḻeda ḻegüia to beṉəꞌ bagwneꞌ nadaꞌ yoguəꞌəte deꞌen babenaꞌ. ¿Šə bengalizənꞌ Cristənꞌ?
\p
\v 30 Naꞌ besəꞌəžašeꞌ yežənꞌ ɉaꞌaqueꞌ ganꞌ zo Jesoꞌosənꞌ.
\v 31 Žlac zɉəyeda noꞌolənꞌ gotəꞌəyoitoꞌ Jesoꞌosənꞌ cheꞌetoꞌoneꞌ: ―Maestr, gwdao.
\p
\v 32 Naꞌ Jesoꞌosənꞌ gožeꞌ netoꞌ: ―Bito ṉezele de to yeḻəꞌ guao c̱hiaꞌ.
\p
\v 33 Nach gwnatoꞌ entr netoꞌ: ―¿Šə nolizə babedeguaꞌ deꞌe gwdaogüeꞌenəꞌ?
\p
\v 34 Naꞌ gož Jesoꞌosənꞌ netoꞌ: ―Par nadaꞌ naquən ca to yeḻəꞌ guao chonaꞌ canꞌ cheneꞌe benꞌ əbseḻəꞌ nadaꞌ nic̱h gaquə yoguəꞌ deꞌen cheneꞌeneꞌ gaquə.
\v 35 Leꞌe nale: “Ṉeꞌe dech yetap bioꞌ par yedobə cwsešənꞌ.” Naꞌ nadaꞌ əchniaꞌ leꞌe, de yeto cwseš deꞌe cheyaḻəꞌ yedobə, beṉəꞌ caꞌ yosoꞌozenag c̱he Diozənꞌ šə güeꞌelenchgaꞌacchoneꞌ xtižeꞌenəꞌ. Ḻegon xbab de que bagoḻə gatəꞌəyoigaꞌaquechoneꞌ yosoꞌozenagueꞌ c̱heꞌ.
\v 36 Benꞌ chon par nic̱h beṉəꞌ chosoꞌozenagueꞌ c̱he Diozənꞌ chacleneꞌ beṉəꞌ par nic̱h chəsəꞌəziꞌe yeḻəꞌ mban zeɉḻicaṉe. Naꞌ Diozənꞌ choneꞌ ca zoeꞌ mbalaz por ni c̱he deꞌen chacleneꞌ ḻegaꞌaqueꞌ. Canꞌ chac, benꞌ chyix̱ɉuiꞌe xtižəꞌ Diozənꞌ deꞌe neche naꞌ benꞌ chon par nic̱h beṉəꞌ chosoꞌozenagueꞌ c̱hei txenṉəꞌ chəsyəꞌəbeineꞌ.
\v 37 Deꞌe ḻi canꞌ na dižəꞌən deꞌen de: “Beṉəꞌ yoblənꞌ chaz naꞌ beṉəꞌ yoblənꞌ chelap.”
\v 38 Nadaꞌ bac̱h chseḻaꞌa leꞌe ca beṉəꞌ yesyəꞌəlapeꞌ ganꞌ cui gwsoꞌoneꞌ žin. Beṉəꞌ yoblə bagosəꞌəyix̱ɉuiꞌe xtižəꞌ Diozənꞌ naꞌ leꞌe gonḻe par nic̱h beṉəꞌ caꞌ gwseꞌeneneꞌ xtižeꞌenəꞌ yosoꞌozenagueꞌ c̱hei.
\p
\v 39 Naꞌ zan beṉəꞌ žaꞌ laoꞌ yež Sicarənꞌ ganꞌ mbane Samarianꞌ gwsoꞌonḻilažeꞌe Jesoꞌosənꞌ por ni c̱he deꞌen gwna noꞌolənꞌ: “Bagwneꞌ nadaꞌ yoguəꞌəte deꞌe babenaꞌ.”
\v 40 Naꞌ catəꞌ besəꞌəžin beṉəꞌ Sicarənꞌ ganꞌ zoeꞌenəꞌ gwsaꞌatəꞌəyoineꞌ Jesoꞌosənꞌ yegaꞌaṉeꞌ len ḻegaꞌaqueꞌ, naꞌ begaꞌaṉeꞌ c̱hopə ža.
\v 41 Naꞌ beṉəꞌ zanch gwsoꞌonḻilažeꞌeneꞌ por ni c̱he dižəꞌ deꞌen beꞌ cuin Jesoꞌosənꞌ.
\v 42 Naꞌ gwseꞌe noꞌolənꞌ: ―Ṉaꞌa chonḻilažəꞌətoꞌoneꞌ caguə por ni c̱he deꞌen gwnaoꞌ naꞌazənꞌ sino por ni c̱he deꞌen babenetoꞌ choꞌe dižəꞌ cuinczətoꞌ. Baṉezetoꞌ de que deꞌe ḻiczə benganꞌ Cristənꞌ benꞌ gwleɉ Diozənꞌ par yebeɉeꞌ beṉac̱hənꞌ xniꞌa deꞌe malənꞌ con beṉəꞌ seꞌeɉḻeꞌe c̱heꞌ.
\s1 Jesoꞌosənꞌ beyoneꞌ xiꞌiṉ to beṉəꞌ blao
\p
\v 43 Naꞌ catəꞌ goc c̱hopə ža zotoꞌonəꞌ, bezaꞌatoꞌ beyeɉtoꞌ Galileanꞌ.
\v 44 Naꞌ cuin Jesoꞌosənꞌ bagwnaczeꞌ de que beṉəꞌ gwlaž c̱he notəꞌətezə profet beṉəꞌ choꞌe xtižəꞌ Diozənꞌ bito chsoꞌeneꞌ yeḻəꞌ balaꞌaṉ naꞌ nic chseꞌeɉḻeꞌe c̱heꞌ.
\v 45 Pero naꞌ catəꞌ bežintoꞌ Galileanꞌ, beṉəꞌ Galilea caꞌ besyəꞌəbeineꞌ naꞌ bosoꞌozenagueꞌ c̱he Jesoꞌosənꞌ c̱hedəꞌ ḻeczə ḻegaꞌaqueꞌ ɉaꞌaqueꞌ Jerosalenṉəꞌ par lṉi pasconꞌ naꞌ besəꞌəleꞌineꞌ yoguəꞌ deꞌe güen deꞌen beneꞌ bedote lao lṉinəꞌ.
\p
\v 46 Naꞌ gozeɉtoꞌ len Jesoꞌosənꞌ yetšiꞌi yež Cananꞌ distrit c̱he Galileanꞌ ganꞌ beneꞌ par nic̱h beyac nisənꞌ bino. Naꞌ yež Capernaunṉəꞌ zo to beṉəꞌ blao beṉəꞌ chon žin c̱he reinꞌ naꞌ chacšenchgüei xiꞌiṉeꞌenəꞌ.
\v 47 X̱a biꞌinəꞌ catəꞌ beneneꞌ rson bežintoꞌ Galileanꞌ zezaꞌatoꞌ Jodeanꞌ, bideꞌ lao Jesoꞌosənꞌ naꞌ gotəꞌəyoineꞌ ḻeꞌ šeɉeꞌ žɉəyeyeneꞌ xiꞌiṉeꞌenəꞌ, c̱hedəꞌ bazon gatboꞌ.
\v 48 Naꞌ Jesoꞌosənꞌ gožeꞌeneꞌ: ―Šə cui leꞌile miḻagr naꞌ bichlə deꞌe zaquəꞌ yebanele, bito šeɉḻeꞌele c̱hiaꞌ.
\p
\v 49 Nach benꞌ chon žin c̱he reinꞌ gožeꞌ ḻeꞌ: ―Señor, yoꞌošga antslə cuiṉəꞌ gat biꞌi c̱hiaꞌanəꞌ.
\p
\v 50 Naꞌ Jesoꞌosənꞌ gožeꞌeneꞌ: ―Beyeɉ. Bito gat biꞌi c̱hioꞌonəꞌ.
\p Nach gwyeɉḻeꞌ beꞌenəꞌ deꞌen gož Jesoꞌosənꞌ ḻeꞌ naꞌ bezeꞌe.
\v 51 Naꞌ lao bazengüeꞌe nezənꞌ ɉəsəꞌəšag xmoseꞌ caꞌ ḻeꞌ naꞌ gwseꞌeneꞌ: ―Bacheyaque biꞌi c̱hioꞌonəꞌ.
\p
\v 52 Nach gwṉabeneꞌ ḻegaꞌaqueꞌ bi or gwzolao bešaꞌalažəꞌəboꞌ. Naꞌ ḻegaꞌaqueꞌ gwseꞌeneꞌ: ―Ṉeɉe cheda to gobiž bechoɉboꞌ deꞌe ḻanꞌ.
\p
\v 53 Nach x̱aboꞌonəꞌ gocbeꞌineꞌ or naꞌanəꞌ gož Jesoꞌosənꞌ ḻeꞌ de que bito gat biꞌi c̱heꞌenəꞌ. Nach benḻilažeꞌe Jesoꞌosənꞌ, ḻeꞌ naꞌ famiḻy c̱heꞌenəꞌ naꞌ yoguəꞌ beṉəꞌ žaꞌ ližeꞌenəꞌ.
\p
\v 54 Deꞌe nga goc c̱hop las ben Jesoꞌosənꞌ miḻagr catəꞌ zeꞌe bezeꞌe Jodeanꞌ naꞌ bežineꞌ Galileanꞌ.
\c 5
\s1 Jesoꞌosənꞌ beyoneꞌ to beṉəꞌ nat to part cuerp c̱heꞌenəꞌ
\p
\v 1 Gwdenəꞌ goḻəꞌ to lṉi c̱he netoꞌ beṉəꞌ Izrael Jerosalenṉəꞌ naꞌ gwyeɉ Jesoꞌosənꞌ.
\v 2 Jerosalen naꞌ žia to tanc deꞌen nziꞌ Betesda dižəꞌ ebreo. Žian gaḻəꞌəzə choꞌa puert c̱he syodanꞌ deꞌen nziꞌ “C̱he xiləꞌ caꞌ”. Naꞌ nyec̱hɉ mbiꞌi cuit cueꞌeɉ tanquənꞌ gueyəꞌ ca chaꞌašil daoꞌ.
\v 3 Naꞌ beṉəꞌ zan beṉəꞌ güeꞌ zɉədeꞌ ḻoꞌo chaꞌašil daꞌonəꞌ, no beṉəꞌ lc̱hoḻ, beṉəꞌ coj, naꞌ no beṉəꞌ zɉənat to part güeɉə cuerp c̱hegaꞌaqueꞌenəꞌ. Zɉədieꞌ chəsəꞌəbezeꞌ batəꞌəquənꞌ ta nisənꞌ.
\v 4 To angl betɉeꞌ tgüeɉə bteꞌ nisənꞌ, naꞌ con beṉəꞌ chyobe chetɉ ḻoꞌo nisənꞌ catəꞌən cheyož chta anglənꞌ ḻen, ḻeꞌenəꞌ cheyaque c̱he bitəꞌətezə yižgüeꞌ deꞌe cheꞌineꞌ.
\v 5 Naꞌ entr beṉəꞌ caꞌ len to beṉəꞌ byo bagoc šiꞌinšoṉəchoa iz chacšeneneꞌ.
\v 6 Naꞌ Jesoꞌosənꞌ bleꞌineꞌ beꞌenəꞌ naꞌ gocbeꞌineꞌ de que bagwža deꞌ caꞌ. Naꞌ gožeꞌeneꞌ: ―¿Echeꞌendoꞌ yeyacdoꞌ?
\p
\v 7 Naꞌ beṉəꞌ güeꞌenəꞌ gožeꞌeneꞌ: ―Señor, caguə no beṉəꞌ zo cueꞌe nadaꞌ ḻoꞌo tanquənꞌ catəꞌən chda nisənꞌ. Naꞌ žlacte əzyaꞌa nadaꞌ par šoꞌa, beṉəꞌ yoblə chyobeneꞌ chetɉeꞌ ḻoꞌo nisənꞌ.
\p
\v 8 Nach gož Jesoꞌosənꞌ ḻeꞌ: ―Gwyas naꞌ botobə xtaꞌonəꞌ naꞌ gwda.
\p
\v 9 Naꞌ ḻeꞌe beyactei beꞌenəꞌ naꞌ botobeꞌ xteꞌenəꞌ naꞌ gwzolao chdeꞌ. Goc deꞌenəꞌ ža dezcanz.
\v 10 Nach beṉəꞌ blao c̱he netoꞌ beṉəꞌ Izrael gwseꞌe benꞌ beyaquenꞌ: ―Ža dezcanz ṉaꞌa. Bito de lsens yeyoaꞌ xtaꞌonə.
\p
\v 11 Nach gožeꞌ ḻegaꞌaqueꞌ: ―Benꞌ beyone nadaꞌ gožeꞌ nadaꞌ: “Botobə xtaꞌonəꞌ, beyoaꞌan naꞌ gwda.”
\p
\v 12 Naꞌ gwseꞌeneꞌ: ―¿Noxanꞌ gož leꞌ: “Botobə xtaꞌonəꞌ naꞌ gwda”?
\p
\v 13 Naꞌ benꞌ beyaqueneꞌ bito ṉezeneꞌ nonꞌ, c̱hedəꞌ Jesoꞌosənꞌ babebiꞌižeꞌe ganꞌ žaꞌ beṉəꞌ zan caꞌ.
\v 14 Gwdechlə bedil Jesoꞌosənꞌ ḻeꞌ ḻoꞌo yoꞌodaoꞌ əblaonəꞌ naꞌ gožeꞌeneꞌ: ―Bac̱h beyacdoꞌ ṉaꞌa. Bitoch bi deꞌe mal gonoꞌ par nic̱h cui gac c̱hioꞌ to deꞌe maləch.
\p
\v 15 Nach bezaꞌ beꞌenəꞌ naꞌ gwdix̱ɉueꞌineꞌ beṉəꞌ blao c̱he ṉasyon Izrael c̱hetoꞌon de que Jesoꞌos naꞌanəꞌ beyone ḻeꞌ.
\v 16 Naꞌ deꞌe naꞌanəꞌ beṉəꞌ blao caꞌ bosoꞌolagzeɉə bosoꞌolagzideꞌ Jesoꞌosənꞌ chəsəꞌəyilɉlažeꞌe naclənꞌ soꞌoneꞌ par soꞌoteꞌeneꞌ deꞌen beneꞌ miḻagr caꞌ ža dezcanzənꞌ.
\v 17 Naꞌ Jesoꞌosənꞌ gožeꞌ ḻegaꞌaqueꞌ: ―X̱aꞌanəꞌ chelaḻeneꞌ yoguəꞌ ža, naꞌ ḻeczə caꞌ nadaꞌ.
\p
\v 18 Nach beṉəꞌ blao c̱he ṉasyon c̱hetoꞌon mazəchlə gosəꞌəyilɉlažeꞌe naclənꞌ soꞌoneꞌ par soꞌoteꞌeneꞌ por ni c̱he deꞌen gwneꞌ de que Diozənꞌ naquə X̱eꞌ, caguə tlaozə deꞌen cui bembaꞌaṉeꞌ ža dezcanz naꞌanəꞌ. Naꞌ deꞌen gwneꞌ de que Diozənꞌ naqueꞌ X̱eꞌ zeɉen de que tozəczə canꞌ zaqueꞌe len Diozənꞌ.
\s1 Yeḻəꞌ chnabiaꞌ c̱he Xiꞌiṉ Diozənꞌ
\p
\v 19 Naꞌ gož Jesoꞌosənꞌ ḻegaꞌaqueꞌ: ―Deꞌe ḻi chniaꞌ leꞌe, bito gaquə bi gonaꞌ to gwlazzaꞌ, nadanꞌ nacaꞌ Xiꞌiṉ Diozənꞌ. Deꞌen chleꞌidaꞌ chon X̱aꞌanəꞌ, ḻenṉəꞌ chonaꞌ. Yoguəꞌəḻoḻ deꞌen chon X̱aꞌanəꞌ, ḻeczə ḻenṉəꞌ chonaꞌ.
\v 20 X̱aꞌanəꞌ chaqueneꞌ c̱hiaꞌ, naꞌ chloꞌineꞌ nadaꞌ yoguəꞌ deꞌen chon cuineꞌ. Naꞌ əgwloꞌineꞌ nadaꞌ deꞌe zaquəꞌəch ca deꞌe quinga deꞌe gonaꞌ par nic̱h yebanele.
\v 21 X̱aꞌ Diozənꞌ chbeɉeꞌ beṉəꞌ naꞌ choneꞌ ca chatəꞌ yeḻəꞌ mban zeɉḻicaṉe c̱hegaꞌaqueꞌ par nic̱h cui əsaꞌaqueꞌ ca beṉəꞌ guat len yic̱hɉlaꞌaždaꞌogaꞌaqueꞌenəꞌ. Naꞌ caꞌaczənꞌ chonaꞌ nadaꞌ nacaꞌ Xiꞌiṉeꞌ, chbeɉaꞌ beṉəꞌ par chnežɉuaꞌ yeḻəꞌ mban zeɉḻicaṉe c̱hegaꞌaqueꞌ.
\v 22 Bito chc̱hoglao X̱aꞌ Diozənꞌ c̱he ni to beṉəꞌ šə napeꞌ doḻəꞌ, sino babeṉeꞌ nadaꞌ yeḻəꞌ chnabiaꞌanəꞌ par əc̱hoglaoguaꞌan c̱he beṉac̱hənꞌ šə nonꞌ napə doḻəꞌənəꞌ, nadanꞌ nacaꞌ Xiꞌiṉeꞌ.
\v 23 X̱aꞌ Diozənꞌ cheneꞌeneꞌ de que yoguəꞌəḻoḻ beṉəꞌ soꞌoṉeꞌ nadaꞌ yeḻəꞌ balaꞌaṉ canꞌ chsoꞌe ḻeꞌ yeḻəꞌ balaꞌaṉ. Benꞌ cui choṉ nadaꞌ nacaꞌ Xiꞌiṉ Dioz yeḻəꞌ balaꞌaṉ, lente X̱aꞌ Dioz naꞌanəꞌ cui choꞌe yeḻəꞌ balaꞌaṉ, c̱hedəꞌ ḻenꞌ bseḻeꞌe nadaꞌ.
\p
\v 24 Deꞌe ḻi chniaꞌ leꞌe, benꞌ chzenag xtižaꞌanəꞌ naꞌ chonḻilažeꞌe Diozənꞌ benꞌ əbseḻəꞌ nadaꞌ de yeḻəꞌ mban zeɉḻicaṉe c̱heꞌ. Naꞌ cuat siꞌe castigonꞌ, c̱hedəꞌ bitoch naqueꞌ len yic̱hɉlaꞌaždaogüeꞌen ca beṉəꞌ guat, sino bade yeḻəꞌ mban zeɉḻicaṉe c̱heꞌ.
\v 25 Deꞌe ḻi chniaꞌ leꞌe gwžin ža catəꞌən beṉəꞌ caꞌ zɉənaqueꞌ len yic̱hɉlaꞌaždaꞌogaꞌaqueꞌenəꞌ ca beṉəꞌ guat əseꞌeneneꞌ xtižaꞌa nadaꞌ Xiꞌiṉ Dioz, naꞌ beṉəꞌ caꞌ yosoꞌozenag c̱hiaꞌ yesəꞌəbaneꞌ zeɉḻicaṉe. Naꞌ bac̱h chzolao chac caꞌ ṉaꞌa.
\v 26 X̱aꞌ Diozənꞌ nseꞌe yeḻəꞌ mban zeɉḻicaṉe naꞌ chac gwnežɉueꞌen beṉac̱hənꞌ, naꞌ caꞌaczə babeneꞌ par nic̱h nadaꞌ nsaꞌa yeḻəꞌ mban zeɉḻicaṉenꞌ naꞌ chac chnežɉuaꞌan c̱he beṉac̱hənꞌ, nadanꞌ nacaꞌ Xiꞌiṉeꞌenəꞌ.
\v 27 Naꞌ ḻeczə beṉeꞌ nadaꞌ yeḻəꞌ chnabiaꞌanəꞌ par nic̱h əc̱hoglaoguaꞌan nonꞌ napə doḻəꞌ c̱hedəꞌ bseḻeꞌe nadaꞌ golɉaꞌ beṉac̱h.
\v 28 Bito yebanele deꞌe nga. Gwžin ža catəꞌ yoguəꞌəḻoḻ beṉəꞌ guat caꞌ žaꞌ ḻoꞌo banꞌ əseꞌeneneꞌ əṉiaꞌ ḻegaꞌaqueꞌ.
\v 29 Naꞌ beṉəꞌ caꞌ gwsoꞌon deꞌe güen žlac gosəꞌəbaneꞌ yesyəꞌəchoɉeꞌ par yesəꞌəbancheꞌ zeɉḻicaṉe. Naꞌ beṉəꞌ caꞌ gwsoꞌon deꞌe mal žlac gosəꞌəbaneꞌ yesyəꞌəchoɉeꞌ par əsaꞌaqueꞌ castigw.
\s1 Jesoꞌosənꞌ bzeɉniꞌineꞌ de que napeꞌ yeḻəꞌ chnabiaꞌ
\p
\v 30 Bito bi gaquə gonaꞌ deꞌe biaꞌazəlažaꞌa. Chzenagaꞌ binꞌ na X̱aꞌanəꞌ par nic̱h ṉezdaꞌ naquənꞌ chc̱hoglaoguaꞌan c̱he beṉac̱hənꞌ šə nonꞌ napə doḻəꞌ. Naꞌ chc̱hoglaoguaꞌan c̱he to toeꞌ canꞌ cheyaḻəꞌəczə gaquə c̱hedəꞌ bito chonaꞌan deꞌe biaꞌazəlažaꞌa. Chonaꞌan con canꞌ cheneꞌe X̱aꞌanəꞌ benꞌ əbseḻəꞌ nadaꞌanəꞌ.
\v 31 Žaləꞌ tozaꞌ nadaꞌ choꞌa dižəꞌ nonꞌ nacaꞌ, bito naquən deꞌe šeɉḻeꞌele c̱hiaꞌ.
\v 32 Pero zo X̱aꞌanəꞌ choꞌe dižəꞌ nonꞌ nacaꞌ, naꞌ ṉezdaꞌ de que dižəꞌ deꞌen choꞌe c̱hiaꞌanəꞌ naquən deꞌe ḻi.
\v 33 Bac̱h bseḻəꞌəle beṉəꞌ lao Juanṉəꞌ par ɉəsəꞌəṉabeneꞌ ḻeꞌ c̱hiaꞌ. Naꞌ Juanṉəꞌ beꞌe dižəꞌ ḻi nonꞌ nacaꞌ.
\v 34 Pero ca nacaꞌ nadaꞌ bito chyažɉdaꞌ əṉezdaꞌ dižəꞌ deꞌe güeꞌ ni to beṉac̱hənꞌ c̱hiaꞌ. Parzə nic̱h leꞌe šeɉḻeꞌele c̱hiaꞌ naꞌ gonaꞌ ca cui yeyeɉle lao yiꞌ gabiḻənꞌ, deꞌe naꞌanəꞌ cheꞌendaꞌ yosaꞌalažəꞌəle deꞌen gwna Juanṉəꞌ c̱hiaꞌ.
\v 35 Juanṉəꞌ goqueꞌ ca to lampara deꞌe chseꞌeniꞌichgua, naꞌ goneꞌele bebeile šlož canꞌ bsed əbloꞌineꞌenəꞌ.
\v 36 De to deꞌe choꞌen xtižaꞌa deꞌe zaquəꞌəche ca dižəꞌ c̱hiaꞌ deꞌen choeꞌ Juanṉəꞌ. Nadaꞌ chonaꞌ yoguəꞌəḻoḻ deꞌen chon X̱aꞌanəꞌ lao naꞌa gonaꞌ, naꞌ deꞌen chonaꞌ choꞌen dižəꞌ de que ḻeꞌenəꞌ bseḻeꞌe nadaꞌ.
\v 37 Naꞌ ḻeczə X̱aꞌanəꞌ benꞌ bseḻəꞌ nadaꞌ cuineꞌ babeꞌe xtižaꞌa. Naꞌ bitoṉəꞌ gwzenagle xtižeꞌenəꞌ nic ṉeꞌe leꞌile canꞌ naqueꞌenəꞌ.
\v 38 Bitoṉəꞌ gone c̱hele xtižeꞌenəꞌ c̱hedəꞌ bito chonḻilažəꞌəle nadaꞌ nacaꞌ benꞌ əbseḻeꞌenəꞌ.
\v 39 Chsedyaṉəꞌəle Xtižəꞌ Diozənꞌ deꞌen nyoɉən, chaquele naple yeḻəꞌ mban zeɉḻicaṉe laogüe deꞌen chsedlen. Naꞌ deꞌe caꞌ zɉənyoɉən chsoꞌen xtižaꞌa.
\v 40 Pero cui cheneꞌele gonḻilažəꞌəle nadaꞌ par gaple yeḻəꞌ mban zeɉḻicaṉe.
\p
\v 41 Par nadaꞌ bito bi nonən šə beṉac̱hənꞌ soꞌoṉeꞌ nadaꞌ yeḻəꞌ balaꞌaṉ o šə cui.
\v 42 Nadaꞌ nombiꞌa leꞌe naꞌ ṉezdaꞌ cabi chaquele c̱he Diozənꞌ.
\v 43 X̱aꞌanəꞌ bseḻeꞌe nadaꞌ naꞌ beṉeꞌ nadaꞌ yeḻəꞌ chnabiaꞌ par chonaꞌ con canꞌ neꞌenəꞌ naꞌ cabi cheɉḻeꞌele c̱hiaꞌ. Naꞌ šə beṉəꞌ yoblə yideꞌ to gwlazzeꞌ, gwyeɉḻeꞌele c̱heꞌ.
\v 44 Bito gaquə šeɉḻeꞌele c̱hiaꞌ c̱hedəꞌ laꞌ chiꞌ yic̱hɉle chonḻe ca soꞌoṉ lɉuežɉle caꞌ leꞌe yeḻəꞌ balaꞌaṉ naꞌ cui cheyilɉle naclənꞌ gonḻe par nic̱h Diozənꞌ goṉeꞌ leꞌe yeḻəꞌ balaꞌaṉ. Tozə ḻeꞌenəꞌ choꞌe yeḻəꞌ balaꞌaṉ deꞌen naquə deꞌe zaqueꞌe.
\v 45 Bito gonḻe xbab de que nadaꞌ guaꞌa leꞌe part lao X̱aꞌanəꞌ. Deꞌe Moisezənꞌ, benꞌ zole lez gaquəlen leꞌe lao Diozənꞌ, ḻeꞌenəꞌ güeꞌe leꞌe part lao X̱aꞌanəꞌ.
\v 46 Žaləꞌ gwyeɉḻeꞌele c̱he deꞌe Moisezənꞌ naꞌ šeɉḻeꞌetele len c̱hiaꞌ nadaꞌ, c̱hedəꞌ c̱hiaꞌ nadanꞌ bzoɉeꞌ.
\v 47 Naꞌ ca naquənꞌ cui cheɉḻeꞌe deꞌen bzoɉeꞌenəꞌ, ¿nacxa gonczle šeɉḻeꞌele deꞌen bagwniaꞌ leꞌe?
\c 6
\s1 Jesoꞌosənꞌ bguaogüeꞌ gueyəꞌ mil beṉəꞌ byo
\p
\v 1 Gozde deꞌe caꞌ gwyeɉtoꞌ len Jesoꞌosənꞌ yešḻaꞌalə Nisdaoꞌ Galileanꞌ. Naꞌ nisdaꞌonəꞌ ḻeczə nziꞌin Nisdaoꞌ Tiberias.
\v 2 Naꞌ beṉəꞌ zan bedəsəꞌənao ḻeꞌ c̱hedəꞌ besəꞌəleꞌineꞌ miḻagr caꞌ deꞌen choneꞌ cheyoneꞌ beṉəꞌ güeꞌ caꞌ.
\v 3 Naꞌ gwloetoꞌ to lao yaꞌa len Jesoꞌosənꞌ naꞌ naꞌ gwcheꞌetoꞌ len ḻeꞌ.
\v 4 Naꞌ bazon baozə gaḻəꞌ lṉi c̱he netoꞌ beṉəꞌ Izrael deꞌen nziꞌ lṉi pascw.
\v 5 Naꞌ catəꞌ bgüia Jesoꞌosənꞌ naꞌ bleꞌineꞌ de que bazaꞌac beṉəꞌ zan ganꞌ zoeꞌenəꞌ, naꞌ gožeꞌ Lipənꞌ: ―¿Gaxa siꞌicho deꞌe əsaꞌo yoguəꞌ beṉəꞌ quinga?
\p
\v 6 Jesoꞌosənꞌ gwneꞌ caꞌ parzə nic̱h yeꞌ Lipənꞌ nac chaqueneꞌ cheyaḻəꞌ gontoꞌ, laꞌ baṉezczeneꞌ naquənꞌ goneꞌ.
\v 7 Naꞌ gož Lipənꞌ ḻeꞌ: ―Tmil pes cabi gaquen siꞌicho deꞌe əsaꞌogüeꞌ latəꞌ güeɉən.
\p
\v 8 Naꞌ zo to disipl c̱he Jesoꞌosənꞌ, benꞌ le Ndres, bišəꞌ Simon Bedənꞌ. Naꞌ Ndresənꞌ gožeꞌ Jesoꞌosənꞌ:
\v 9 ―Nga zo to biꞌi byo naꞌ de gueyəꞌ yetxtil de sebad c̱heboꞌ naꞌ yec̱hopə beḻ yaꞌa. Pero bi de gon deꞌe quinga laꞌ beṉəꞌ zanṉəꞌ.
\p
\v 10 Nach Jesoꞌosənꞌ gožeꞌ netoꞌ: ―Ḻeꞌe gon mendad yesəꞌəbeꞌ beṉəꞌ caꞌ.
\p Chiꞌichgua yixye daquəꞌ latɉənꞌ, nach gosəꞌəbeꞌ beṉəꞌ caꞌ laogüeinəꞌ. Naquə ca do gueyəꞌ mil beṉəꞌ byo cui cuent noꞌolə naꞌ cui cuent bidaoꞌ.
\v 11 Nach gwxiꞌ Jesoꞌosənꞌ yetxtil caꞌ. Naꞌ beyož beꞌe yeḻəꞌ chox̱cwlen c̱he Diozənꞌ beṉeꞌ c̱he c̱he netoꞌ disipl par beꞌetoꞌ c̱he beṉəꞌ caꞌ bazɉəchiꞌ. Naꞌ ḻeczə caꞌatezəczə beneꞌ len beḻ yaꞌa caꞌ. Beꞌetoꞌ ḻegaꞌaqueꞌ con catəꞌətəꞌ deꞌe gwseꞌeneneꞌ.
\v 12 Naꞌ catəꞌ beyož gwseꞌelɉeneꞌ nach gožeꞌ netoꞌ: ―Ḻeꞌe yetobə pedas caꞌ deꞌen begaꞌaṉ par nic̱h cui bi cuiayiꞌ.
\p
\v 13 Nach botobətoꞌ pedas caꞌ deꞌen besyəꞌəgaꞌaṉ beyož gwsaꞌo beṉəꞌ caꞌ, naꞌ goquən šižiṉ žomə lao gueyəꞌ yetxtil de sebadənꞌ.
\v 14 Naꞌ beṉəꞌ caꞌ catəꞌ besəꞌəleꞌineꞌ miḻagr deꞌen ben Jesoꞌosənꞌ nach gosəꞌəneꞌ: ―Deꞌe ḻiczə benganꞌ profetənꞌ benꞌ bagwlezcho seḻəꞌ Diozənꞌ yežlyo nga par gaquəleneꞌ chioꞌo.
\p
\v 15 Naꞌ catəꞌ gocbeꞌi Jesoꞌosənꞌ de que gwseꞌeneneꞌ yesəꞌəc̱heꞌex̱ax̱ɉeneꞌ par soꞌoneneꞌ rei c̱hegaꞌaqueꞌenəꞌ, nach bebiꞌižeꞌe gozeɉeꞌ yaꞌadaꞌonəꞌ tozeꞌ.
\s1 Gwda Jesoꞌosənꞌ lao nisdaꞌonəꞌ
\p
\v 16 Naꞌ catəꞌ bex̱ɉw žeꞌenəꞌ netoꞌ disipl c̱he Jesoꞌosənꞌ beyetɉtoꞌ choꞌa nisdaꞌonəꞌ.
\v 17 Naꞌ beyoꞌotoꞌ to ḻoꞌo barcw par zɉəyedatoꞌ Capernaunṉəꞌ. Bagoḻ, naꞌ Jesoꞌosənꞌ bitoṉəꞌ yeleꞌe ganꞌ zɉəyedatoꞌonəꞌ.
\v 18 Naꞌ chas chatəꞌ nisdaꞌonəꞌ laꞌ to beꞌ fuert chec̱hɉ.
\v 19 Ca do c̱hopə legw babezaꞌatoꞌ lao nisdaꞌonəꞌ catəꞌ bleꞌitoꞌ zezaꞌ Jesoꞌosənꞌ lao nisənꞌ galənꞌ zda barconꞌ. Naꞌ bžebtoꞌ.
\v 20 Nach gožeꞌ netoꞌ: ―Nadaꞌanəꞌ. Bito žeble.
\p
\v 21 Nach netoꞌ chebeitoꞌ begoꞌotoꞌoneꞌ ḻoꞌo barconꞌ. Nach ḻeꞌe bežintetoꞌ choꞌa nisdaꞌonəꞌ.
\s1 Beṉəꞌ zan chəsyəꞌəyilɉeꞌ Jesoꞌosənꞌ
\p
\v 22 Naꞌ beteyo beṉəꞌ caꞌ besyəꞌəgaꞌaṉ yešḻaꞌalə nisdaꞌonəꞌ bito besyəꞌəželeneꞌ Jesoꞌosənꞌ. Gwsaꞌacbeꞌineꞌ caguə bi barcw gotəꞌəch sino yetoga deꞌen beyoꞌotoꞌ, naꞌ gosəꞌəṉezeneꞌ bito beyoꞌo Jesoꞌosənꞌ ḻoꞌo barconꞌ ganꞌ beyoꞌo netoꞌ.
\v 23 Nach besəꞌəžin to c̱hopə barcw caꞌ deꞌen zaꞌac syoda deꞌen nziꞌ Tiberias, besəꞌəžinən gaḻəꞌəzə ganꞌ əgwsaꞌogüeꞌ catəꞌən gwde beꞌ X̱ancho Jesoꞌosənꞌ yeḻəꞌ chox̱cwlen c̱he Diozənꞌ.
\v 24 Naꞌ catəꞌ besəꞌəleꞌi beṉəꞌ caꞌ caguə no Jesoꞌosənꞌ nḻaꞌanəꞌ, naꞌ ni netoꞌ disipl c̱heꞌ, nach besyəꞌəyoꞌe ḻoꞌo barcw daoꞌ caꞌ naꞌ ɉaꞌaqueꞌ Capernaunṉəꞌ chesyəꞌəyilɉeꞌeneꞌ.
\s1 Jesoꞌosənꞌ naqueꞌ yeḻəꞌ guao deꞌe chnežɉon yeḻəꞌ mban zeɉḻicaṉe c̱he beṉəꞌ chsoꞌonḻilažeꞌeneꞌ
\p
\v 25 Naꞌ catəꞌ besyəꞌəželeneꞌ Jesoꞌosənꞌ yešḻaꞌalə nisdaꞌonəꞌ naꞌ gwseꞌeneꞌ: ―Maestr, ¿batəꞌəquəꞌ belaꞌo nganꞌ?
\p
\v 26 Naꞌ Jesoꞌosənꞌ gožeꞌ ḻegaꞌaqueꞌ: ―Deꞌe ḻi chniaꞌ leꞌe, cheyilɉle nadaꞌ caguə por ni c̱he bagwyeɉniꞌile bi zeɉen miḻagr caꞌ bableꞌile benaꞌ, sino por ni c̱he deꞌen gwdaole naꞌ belɉele.
\v 27 Bito cueꞌe yic̱hɉle gonḻe par nic̱h gatəꞌ deꞌe yeꞌeɉ gaole deꞌen chde c̱hei, sino ḻecueꞌe yic̱hɉ ḻeꞌe gon par nic̱h gaquə yeꞌeɉ gaole deꞌen goṉ leꞌe yeḻəꞌ mban zeɉḻicaṉe. Diozənꞌ bseḻeꞌe nadaꞌ golɉaꞌ beṉac̱h naꞌ nadaꞌ goṉaꞌ deꞌen yeꞌeɉ gaole par nic̱h əbanḻe zeɉḻicaṉe. Naꞌ Diozənꞌ babeneꞌ par nic̱h ṉezele bseḻeꞌe nadaꞌ.
\p
\v 28 Naꞌ gwseꞌeneꞌ: ―¿Bi cheyaḻəꞌ gontoꞌ par nic̱h yebei Diozənꞌ netoꞌ?
\p
\v 29 Naꞌ gož Jesoꞌosənꞌ ḻegaꞌaqueꞌ: ―Deꞌe nga gonḻe par nic̱h yebei Diozənꞌ leꞌe, gonḻilažəꞌəle nadaꞌ benꞌ əbseḻeꞌenəꞌ.
\p
\v 30 Nach gwseꞌeneꞌ: ―¿Bi miḻagr gonoꞌ par nic̱h gonḻilažəꞌətoꞌ leꞌ? ¿Bi gonoꞌ leꞌitoꞌ ža?
\v 31 Deꞌe x̱axtaꞌocho caꞌ gwsaꞌogüeꞌ mana latɉə dašənꞌ, canꞌ nyoɉ Xtižəꞌ Diozənꞌ nan: “Yeḻəꞌ guao deꞌe zaꞌ yobanꞌ beꞌe ḻegaꞌaqueꞌ gwsaꞌogüeꞌ.”
\p
\v 32 Nach Jesoꞌosənꞌ gožeꞌ ḻegaꞌaqueꞌ: ―Deꞌe ḻi əchniaꞌ leꞌe, caguə deꞌe Moisezənꞌ bnežɉueꞌ ḻegaꞌaqueꞌ yeḻəꞌ guao deꞌen zaꞌ yobanꞌ, sino X̱aꞌ Dioz naꞌanəꞌ. Naꞌ X̱aꞌanəꞌ babseḻeꞌe par leꞌe to yeḻəꞌ guao deꞌe zaquəꞌəche naꞌ deꞌe ḻi zaꞌan yobanꞌ.
\v 33 Naꞌ yeḻəꞌ guao deꞌen babseḻəꞌ X̱aꞌ Diozənꞌ, zaꞌan yobanꞌ naꞌ betɉən yežlyonꞌ naꞌ chnežɉon yeḻəꞌ mban zeɉḻicaṉe c̱he notəꞌətezə beṉəꞌ chao ḻen.
\p
\v 34 Nach gwseꞌeneꞌ: ―Señor, beṉšga netoꞌ yeḻəꞌ guaonꞌ naoꞌ caꞌ yedote.
\p
\v 35 Naꞌ Jesoꞌosənꞌ gožeꞌ ḻegaꞌaqueꞌ: ―Nadaꞌ nacaꞌ yeḻəꞌ guao deꞌen chnežɉon beṉəꞌ yeḻəꞌ mban zeɉḻicaṉe. Notəꞌətezə beṉəꞌ chseꞌeɉḻeꞌ c̱hiaꞌ yesyəꞌəbei laꞌaždaꞌogaꞌaqueꞌenəꞌ zeɉḻicaṉe, naꞌ deꞌen chsoꞌonḻilažeꞌe nadaꞌ, ṉiteꞌe mbalaz zeɉḻicaṉe.
\v 36 Naꞌ bagwniaczaꞌ leꞌe, ḻaꞌaṉəꞌəczə bableꞌile nadaꞌ nacaꞌ yeḻəꞌ guaonəꞌ, bitoczə chonḻilažəꞌəle nadaꞌ.
\v 37 Yoguəꞌ beṉəꞌ caꞌ chbeɉ Diozənꞌ par əsaꞌaqueꞌ nadaꞌ txen, chžin ža catəꞌ chsoꞌonḻilažeꞌe nadaꞌ. Naꞌ notəꞌətezə beṉəꞌ caꞌ chsoꞌonḻilažəꞌ nadaꞌ, chebeidaꞌ chsaꞌaqueꞌ nadaꞌ txen.
\v 38 Nadaꞌ zaꞌa yobanꞌ naꞌ betɉaꞌ yežlyonꞌ caguə par nic̱h gonaꞌ deꞌe biaꞌazəlažaꞌanəꞌ, sino par nic̱h gonaꞌ canꞌ cheneꞌe X̱aꞌanəꞌ benꞌ əbseḻəꞌ nadaꞌ.
\v 39 Naꞌ deꞌe nganꞌ deꞌen cheneꞌe X̱aꞌanəꞌ benꞌ əbseḻəꞌ nadaꞌ, de que yoguəꞌəḻoḻ beṉəꞌ bagwleɉeꞌ par əsaꞌaqueꞌ nadaꞌ txen, ni toeꞌ cui guaꞌa latɉə cuiayiꞌe sino que yosbangaꞌacaꞌaneꞌ ladɉo beṉəꞌ guat caꞌ šə bagwsaꞌateꞌ catəꞌ əžin ža šoꞌo fin c̱he yežlyonꞌ.
\v 40 X̱aꞌanəꞌ cheneꞌeneꞌ de que yoguəꞌəḻoḻ beṉəꞌ seꞌeɉniꞌineꞌ nonꞌ nacaꞌ nadaꞌ naꞌ soꞌonḻilažeꞌe nadaꞌ, par nic̱h əgwnežɉueꞌ ḻegaꞌaqueꞌ yeḻəꞌ mban zeɉḻicaṉe, naꞌ nadaꞌ yosbangaꞌacaꞌaneꞌ ladɉo beṉəꞌ guat caꞌ šə bagwsaꞌateꞌ catəꞌən əžin ža šoꞌo fin c̱he yežlyonꞌ.
\p
\v 41 Naꞌ beṉəꞌ blao c̱he ṉasyon Izrael c̱hetonꞌ besəꞌəžeꞌešeꞌe c̱he Jesoꞌosənꞌ deꞌen gwneꞌ: “Nadaꞌ nacaꞌ yeḻəꞌ guao deꞌen zaꞌ yobanꞌ.”
\v 42 Naꞌ gosəꞌəneꞌ: ―¿Ecaguə benganꞌ Jesoꞌos xiꞌiṉ Jwse benꞌ nombiaꞌacho naꞌ ḻeczə caꞌ xneꞌenəꞌ? ¿Bixc̱hexa nga nalizeꞌ de que zeꞌe yobanꞌ betɉeꞌ yežlyonꞌ?
\p
\v 43 Nach Jesoꞌosənꞌ gožeꞌ ḻegaꞌaqueꞌ: ―Bito žeꞌešəꞌəle c̱hiaꞌ entr leꞌe.
\v 44 Ni to cono no gonḻilažəꞌ nadaꞌ šə X̱aꞌanəꞌ benꞌ əbseḻəꞌ nadaꞌ cui goneꞌ ca seꞌeɉḻeꞌe c̱hiaꞌ. Naꞌ beṉəꞌ caꞌ chseꞌeɉḻeꞌe c̱hiaꞌ yosbangaꞌacaꞌaneꞌ ladɉo beṉəꞌ guat caꞌ šə bagwsaꞌateꞌ catəꞌ əžin ža šoꞌo fin c̱he yežlyonꞌ.
\v 45 Ganꞌ nyoɉ deꞌe caꞌ bosoꞌozoɉ deꞌe profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ nan: “Naꞌ yoguəꞌəḻoḻeꞌ əgwsed əgwloꞌi Diozənꞌ.” Nachənꞌ yoguəꞌəḻoḻ nonꞌ ṉeze canꞌ na X̱aꞌanəꞌ naꞌ chosoꞌozenag c̱heꞌ, yoguəꞌ beṉəꞌ canꞌ chsoꞌonḻilažeꞌe nadaꞌ.
\p
\v 46 Bito ṉacho zo nochlə beṉəꞌ bableꞌineꞌ X̱aꞌanəꞌ sino tozaꞌ nadaꞌ, laꞌ nadanꞌ zaꞌa ganꞌ zo X̱aꞌ Diozənꞌ.
\v 47 Deꞌe ḻi chniaꞌ leꞌe, beṉəꞌ caꞌ chsoꞌonḻilažəꞌ nadaꞌ de yeḻəꞌ mban zeɉḻicaṉe c̱hegaꞌaqueꞌ.
\v 48 Nadaꞌ nacaꞌ yeḻəꞌ guao deꞌen chnežɉon beṉəꞌ yeḻəꞌ mban zeɉḻicaṉe.
\v 49 X̱axtaꞌocho caꞌ gwsaꞌogüeꞌ mananꞌ latɉə dašənꞌ, pero biaꞌaczə gwsaꞌateꞌ.
\v 50 Nadanꞌ choꞌa dižəꞌ de que nacaꞌ yeḻəꞌ guao deꞌen zaꞌ yobanꞌ deꞌen chnežɉon yeḻəꞌ mban zeɉḻicaṉe c̱he beṉəꞌ caꞌ chsaꞌogüeꞌen par nic̱h caꞌ cuich zɉənaqueꞌ len yic̱hɉlaꞌaždaꞌogaꞌaqueꞌenəꞌ ca beṉəꞌ guat.
\v 51 Nadanꞌ nacaꞌ yeḻəꞌ guao deꞌen zaꞌ yobanꞌ. Nsaꞌa yeḻəꞌ mban zeɉḻicaṉenəꞌ naꞌ chac chnežɉuaꞌan beṉac̱hənꞌ. Deꞌe naꞌanəꞌ beṉəꞌ caꞌ saꞌo yeḻəꞌ guao nga yesəꞌəbaneꞌ zeɉḻicaṉe. Naꞌ yeḻəꞌ guao deꞌe əgwnežɉuaꞌ əsaꞌogüeꞌ naquən cuerp c̱hiaꞌanəꞌ, naꞌ əgwnežɉuaꞌan par nic̱h notəꞌətezə beṉac̱h guaquə yesəꞌəziꞌe yeḻəꞌ mban zeɉḻicaṉenəꞌ.
\p
\v 52 Nach gwcheꞌ bžaš entr beṉəꞌ blao c̱he ṉasyon Izrael c̱hetonꞌ gosəꞌəneꞌ: ―¿Nacxa goneꞌen goṉ cuerp c̱heꞌenəꞌ gaocho?
\p
\v 53 Naꞌ Jesoꞌosənꞌ gožeꞌ ḻegaꞌaqueꞌ: ―Deꞌe ḻi chniaꞌ leꞌe, Diozənꞌ bseḻeꞌe nadaꞌ golɉaꞌ beṉac̱h, naꞌ šə cuiṉəꞌ gaole cuerp c̱hiaꞌanəꞌ naꞌ šə cuiṉəꞌ yeꞌeɉle xc̱henaꞌanəꞌ, bito de yeḻəꞌ mban c̱hele zeɉḻicaṉe.
\v 54 Beṉəꞌ caꞌ chsaꞌo cuerp c̱hiaꞌanəꞌ naꞌ chseꞌeɉeꞌ xc̱henaꞌanəꞌ de yeḻəꞌ mban zeɉḻicaṉe c̱hegaꞌaqueꞌ, naꞌ šə bagwsaꞌateꞌ catəꞌ əžin ža šoꞌo fin c̱he yežlyonꞌ, yosbangaꞌacaꞌaneꞌ ladɉo beṉəꞌ guat caꞌ.
\v 55 Naꞌ cuerp c̱hiaꞌanəꞌ naquən yeḻəꞌ guao deꞌe ḻeꞌezelaogüe deꞌe zaqueꞌe, naꞌ xc̱henaꞌanəꞌ deꞌen chseꞌeɉeꞌenəꞌ naquən ḻeꞌezelaogüe deꞌe zaqueꞌe.
\v 56 Naꞌ beṉəꞌ caꞌ chsaꞌo cuerp c̱hiaꞌanəꞌ naꞌ chseꞌeɉeꞌ xc̱henaꞌanəꞌ nitəꞌətezə niteꞌe len nadaꞌ naꞌ nadaꞌ zotezə zoaꞌ len ḻegaꞌaqueꞌ.
\v 57 X̱aꞌanəꞌ benꞌ zo zeɉḻicaṉe ḻeꞌenəꞌ bseḻeꞌe nadaꞌ, naꞌ zoaꞌ c̱hedəꞌ ḻeꞌ choneꞌ ca zoaꞌ, naꞌ caꞌatezəczənꞌ benꞌ gao cuerp c̱hiaꞌanəꞌ soeꞌ c̱hedəꞌ gonaꞌ ca soeꞌ.
\v 58 Cuerp c̱hiaꞌanəꞌ naquən yeḻəꞌ guao deꞌen zaꞌ yobanꞌ. Naꞌ yeḻəꞌ guao nga bito naquən ca mananꞌ deꞌen gwsaꞌo x̱axtaꞌocho caꞌ naꞌ biaꞌaczə gwsaꞌateꞌ. Beṉəꞌ caꞌ chsaꞌogüeꞌ yeḻəꞌ guao nga niaꞌ caꞌ ṉiteꞌe zeɉḻicaṉe.
\p
\v 59 Deꞌe quinga əbsed əbloꞌi Jesoꞌosənꞌ ḻoꞌo yoꞌodaoꞌ Capernaunṉəꞌ.
\s1 Xtižəꞌ Jesoꞌosənꞌ chnežɉon yeḻəꞌ mban zeɉḻicaṉe c̱he beṉəꞌ caꞌ chosoꞌozenag c̱hei
\p
\v 60 Naꞌ beṉəꞌ zan beṉəꞌ caꞌ zɉəsəꞌənao Jesoꞌosənꞌ catəꞌ gwseꞌeneneꞌ canꞌ gožeꞌ ḻegaꞌaqueꞌ nach gosəꞌəneꞌ: ―Ziꞌichgua naquə dižəꞌ quinga. ¿Noxaczə šeɉḻeꞌe c̱heꞌ?
\p
\v 61 Naꞌ gocbeꞌi Jesoꞌosənꞌ de que chəsəꞌəžeꞌešeꞌe por ni c̱he deꞌen gožeꞌ ḻegaꞌaqueꞌ, naꞌ gozneꞌ: ―¿Epor ni c̱he deꞌen gwniaꞌ canꞌ cheneꞌele yebiguəꞌəle gosxanḻə?
\v 62 ¿Naquəchxa gonḻenꞌ šə leꞌile nadaꞌ yeyepaꞌ ganꞌ gwzoaꞌ antslə? nadanꞌ bseḻəꞌ Diozənꞌ golɉaꞌ beṉac̱h.
\v 63 Caguə por ni c̱he deꞌen golɉle beṉac̱h de yeḻəꞌ mban zeɉḻicaṉe c̱hele sino šə yoꞌo Spirit c̱he Diozənꞌ ḻoꞌo yic̱hɉlaꞌaždaꞌolenꞌ de yeḻəꞌ mban zeɉḻicaṉe c̱hele. Dižəꞌ deꞌen babiꞌa len leꞌe zaquəꞌən par yic̱hɉlaꞌaždaꞌolenꞌ naꞌ əbanḻe zeɉḻicaṉe šə šeɉḻeꞌele c̱hei.
\v 64 Ṉeꞌe nitəꞌ baḻle cui chonḻilažəꞌəle nadaꞌ.
\p Jesoꞌosənꞌ gwneꞌ caꞌ c̱hedəꞌ dezd gwzolao zɉəsəꞌənao beṉəꞌ ḻeꞌ ṉezeneꞌ noquəꞌ beṉəꞌ caꞌ cui gwsoꞌonḻilažeꞌeneꞌ naꞌ nonꞌ əgwde ḻeꞌ lao naꞌ beṉəꞌ caꞌ chəsəꞌəgueꞌi ḻeꞌ.
\v 65 Naꞌ gožeꞌ ḻegaꞌaqueꞌ: ―Chac canꞌ gwniaꞌanəꞌ de que notono no chac gonḻilažəꞌ nadaꞌ šə X̱aꞌanəꞌ benꞌ əbseḻəꞌ nadaꞌ cui choneꞌ par nic̱h gonḻilažeꞌe nadaꞌ.
\p
\v 66 Nach besyəꞌəbiꞌižəꞌ beṉəꞌ zan beṉəꞌ bagosəꞌədaleneꞌ Jesoꞌosənꞌ, bitoch gosəꞌənaogüeꞌeneꞌ.
\v 67 Naꞌ Jesoꞌosənꞌ gožeꞌ šižiṉte netoꞌ: ―¿Elen leꞌe cheneꞌele žɉəyaꞌacle?
\p
\v 68 Naꞌ gož Simon Bedənꞌ ḻeꞌ: ―X̱antoꞌ, notono nochlə de no zaquəꞌ əgwzenagtoꞌ c̱hei. Ṉezetoꞌ de que leꞌ choṉoꞌ yeḻəꞌ mban zeɉḻicaṉe c̱he notəꞌətezə netoꞌ chzenagtoꞌ xtižoꞌonəꞌ.
\v 69 Netoꞌ bacheɉḻeꞌetoꞌ naꞌ baṉezetoꞌ de que lenꞌ nacoꞌ Cristənꞌ benꞌ bagwleɉ Diozənꞌ par gaquəleneꞌ ṉasyon c̱hechonꞌ. Nacoꞌ Xiꞌiṉ Dioz benꞌ zo zeɉḻicaṉe.
\p
\v 70 Naꞌ Jesoꞌosənꞌ gožeꞌ netoꞌ: ―Nadaꞌ gwleɉaꞌ leꞌe šižiṉle naꞌ ṉezdaꞌ de que tole chzenagle c̱he gwxiyeꞌenəꞌ.
\p
\v 71 Gwneꞌ caꞌ c̱he Jod Iscariotənꞌ xiꞌiṉ Simonṉəꞌ laꞌ Jod nanꞌ əgwdiꞌeneꞌ lao naꞌ beṉəꞌ caꞌ chəsəꞌəgueꞌi ḻeꞌ, len nacteꞌ txen netoꞌ šižiṉtoꞌ.
\c 7
\s1 Beṉəꞌ bišəꞌ Jesoꞌosənꞌ bito gwsoꞌonḻilažeꞌe ḻeꞌ
\p
\v 1 Catəꞌ bagwde deꞌe caꞌ Jesoꞌosənꞌ gwdaczeꞌ chsed chloꞌineꞌ beṉəꞌ caꞌ žaꞌ distrit c̱he Galileanꞌ. Bito goneꞌeneꞌ yeyeɉeꞌ Jodeanꞌ par soeꞌ naꞌ c̱hedəꞌ beṉəꞌ blao c̱he ṉasyon Izrael c̱hetonꞌ chəsəꞌəyilɉlažeꞌe naclənꞌ soꞌoneꞌ par soꞌoteꞌeneꞌ.
\v 2 Naꞌ bazon gaḻəꞌəzə lṉi c̱he netoꞌ beṉəꞌ Izrael deꞌen nziꞌ “lṉi c̱he yoꞌo de ḻaguəꞌ”.
\v 3 Naꞌ beṉəꞌ bišəꞌ Jesoꞌosənꞌ gwseꞌeneꞌ: ―Bito yegaꞌaṉoꞌ nga, sino gwyeɉ Jodeanꞌ par nic̱h disipl c̱hioꞌ caꞌ šaꞌ naꞌ yesəꞌəleꞌineꞌ deꞌe caꞌ chonoꞌonəꞌ.
\v 4 Ni to beṉəꞌ cui choneꞌ bgašəꞌəzə to deꞌe choneꞌ šə cheneꞌeneꞌ gombiaꞌ beṉəꞌ ḻeꞌ. Šə deꞌe ḻi chonoꞌ miḻagr, ben par nic̱h yesəꞌəṉeze yoguəꞌəḻoḻ beṉəꞌ canꞌ chonoꞌonəꞌ.
\p
\v 5 Beṉəꞌ bišeꞌe caꞌ gosəꞌəṉeꞌ caꞌ c̱hedəꞌ ni ḻegaꞌaqueꞌ cui gwsoꞌonḻilažeꞌe ḻeꞌ.
\v 6 Nach gož Jesoꞌosənꞌ ḻegaꞌaqueꞌ: ―Bitoṉəꞌ žin ža par gwloꞌa nonꞌ nacaꞌ, pero ca naquə leꞌe ža, guaquə žɉaꞌacle lṉinꞌ batəꞌətezənꞌ.
\v 7 Beṉəꞌ caꞌ cui zɉənombiaꞌ Diozənꞌ bito chəsəꞌəgueꞌineꞌ leꞌe, pero chəsəꞌəgueꞌineꞌ nadaꞌ, c̱hedəꞌ chzeɉniꞌigaꞌacdaꞌaneꞌ de que chsoꞌoneꞌ deꞌe malənꞌ.
\v 8 Ḻeꞌe žɉaꞌac lṉinəꞌ. Nadaꞌ bito saꞌa ṉaꞌa c̱hedəꞌ bitoṉəꞌ žin ža c̱hiaꞌanəꞌ par saꞌa lṉinꞌ.
\p
\v 9 Naꞌ beyož gožeꞌ ḻegaꞌaqueꞌ caꞌ begaꞌaṉeꞌ Galileanꞌ yeto c̱hopə ža.
\s1 Jesoꞌosənꞌ gwyeɉeꞌ Jerosalenṉəꞌ ganꞌ yoꞌo lṉinəꞌ
\p
\v 10 Nach gwde gwsaꞌac beṉəꞌ bišeꞌe caꞌ əzɉaꞌaqueꞌ lṉinəꞌ ḻeczə gwzaꞌ ḻeꞌ zdeꞌ lṉinəꞌ, pero caguə zaquəꞌəlao sino bgašəꞌəzə.
\v 11 Naꞌ beṉəꞌ blao c̱he ṉasyon Izrael c̱hetoꞌonəꞌ besyəꞌəyilɉeꞌ ḻeꞌ lao lṉinəꞌ naꞌ gosəꞌəneꞌ: ―¿Ganxa beꞌenaꞌanəꞌ?
\p
\v 12 Naꞌ beṉəꞌ caꞌ zɉənžag lao lṉinəꞌ zaneꞌ gwsoꞌe dižəꞌ c̱he Jesoꞌosənꞌ len lɉuežɉgaꞌaqueꞌ. Naꞌ caguə tozə canꞌ gosəꞌəneꞌ c̱heꞌ. Baḻeꞌ gosəꞌəneꞌ: ―Naqueꞌ beṉəꞌ güenṉəꞌ.
\p Naꞌ yebaḻeꞌ gosəꞌəneꞌ: ―Abi, chonḻeizeneꞌ beṉəꞌənəꞌ.
\p
\v 13 Pero ni toeꞌ cui gwsoꞌe dižəꞌ c̱heꞌ zaquəꞌəlao c̱hedəꞌ besəꞌəžebeꞌ beṉəꞌ blao c̱he ṉasyon c̱hetoꞌonəꞌ.
\p
\v 14 Naꞌ do gašɉə zda lṉinəꞌ catəꞌ gwyoꞌo Jesoꞌosənꞌ ḻoꞌo yoꞌodaoꞌ əblao c̱he netoꞌ beṉəꞌ Izrael naꞌ gwzolao chsed chloꞌineꞌ.
\v 15 Naꞌ chəsyəꞌəbane beṉəꞌ blao caꞌ, chəsəꞌəneꞌ: ―¿Bixa cheɉniꞌi benganꞌ len caguə babsedeꞌ canꞌ nsed chioꞌonəꞌ?
\p
\v 16 Nach Jesoꞌosənꞌ gožeꞌ ḻegaꞌaqueꞌ: ―Deꞌen chloꞌidaꞌanəꞌ caguə deꞌe chalɉəlažaꞌanəꞌ, sino benꞌ əbseḻəꞌ nadaꞌ bloꞌineꞌen nadaꞌ.
\v 17 Notəꞌətezə beṉəꞌ cheneꞌeneꞌ goneꞌ canꞌ cheneꞌe Diozənꞌ, ḻeꞌ əṉezeneꞌ šə deꞌen chloꞌidaꞌanəꞌ naquən c̱he Diozənꞌ o šə naquən deꞌe biaꞌazəlažaꞌa.
\v 18 Beṉəꞌ caꞌ chsoꞌe dižəꞌ deꞌe biaꞌazəlažəꞌəgaꞌaqueꞌ chəsyəꞌəyilɉeꞌ no soꞌe ḻegaꞌaqueꞌ yeḻəꞌ balaꞌaṉ. Caguə caꞌ nadaꞌ c̱hedəꞌ cheyilɉaꞌ naclə gonaꞌ par nic̱h Diozənꞌ benꞌ bseḻəꞌ nadaꞌ siꞌe yeḻəꞌ balaꞌaṉ. Deꞌe naꞌanəꞌ guaquə gaple confyans de que nadaꞌ choꞌa dižəꞌ ḻi, naꞌ bito chx̱oayagaꞌ beṉəꞌ.
\p
\v 19 Leꞌe choꞌelaꞌole deꞌe Moisezənꞌ benꞌ bzoɉ ḻei c̱he Diozənꞌ, len ni tole cui chonḻe canꞌ nanṉəꞌ. ¿Bixc̱henꞌ chyilɉlažəꞌəle naclənꞌ gonḻe par gotle nadaꞌ?
\p
\v 20 Naꞌ beṉəꞌ caꞌ zɉənžaguənꞌ gwseꞌeneꞌ: ―Chac tontoꞌ. ¿No chyilɉlažəꞌ naclə goneꞌ par goteꞌ leꞌ?
\p
\v 21 Jesoꞌosənꞌ gožeꞌ ḻegaꞌaqueꞌ: ―Tozə miḻagr deꞌen babenaꞌ ža dezcanzənꞌ naꞌ deꞌe naꞌanəꞌ yoguəꞌəle chebanele.
\v 22 Deꞌe Moisezənꞌ bzoɉeꞌ de que cheyaḻəꞌ socho señy deꞌen neꞌ sirconsision. Pero caguə gwzolaon len ḻeꞌ sino len deꞌe x̱axtaꞌocho caꞌ beṉəꞌ caꞌ gwnitəꞌ antslə ca ḻeꞌ. Naꞌ leꞌe chzole biꞌi byo daoꞌ caꞌ señy deꞌen neꞌ sirconsision ža dezcanzənꞌ.
\v 23 Ṉaꞌa ža, šə chaquele chonən byen gwzole no bidaoꞌ señy deꞌen neꞌ sirconsision ža dezcanzənꞌ par gonḻe complir canꞌ na ḻei deꞌen bzoɉ deꞌe Moisezənꞌ, ¿bixc̱henꞌ chžaꞌale nadaꞌ deꞌen beyonaꞌ to beṉəꞌ ža dezcanzənꞌ len yoguəꞌəḻoḻ deꞌen chac c̱heꞌ?
\v 24 Bito con gonḻe xbab de que to deꞌe chleꞌile chon beṉəꞌ naquən deꞌe mal, sino ḻeꞌe coꞌo rson nic̱h əṉezele šə deꞌe ḻi choneꞌ deꞌe mal o šə choneꞌ deꞌe güen.
\s1 Jesoꞌosənꞌ beꞌe dižəꞌ de que gwzeꞌe ganꞌ zo Diozənꞌ
\p
\v 25 Nach to c̱hopə beṉəꞌ Jerosalen caꞌ gosəꞌəneꞌ: ―¿Ecaguə benganꞌ chəsyəꞌəyilɉeꞌ par nic̱h soꞌoteꞌeneꞌ?
\v 26 Ḻeꞌe ggüiašc canꞌ choꞌe dižəꞌ nga zaquəꞌəlao naꞌ bitobi chseꞌeneꞌ. De repentlɉa beṉəꞌ gwnabiaꞌ caꞌ bac̱h chsoꞌoneꞌ xbab de que naquəczeꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ.
\v 27 Pero naꞌ ṉezecho ga beṉəꞌ beꞌenga, mas catəꞌ yidə Cristənꞌ ni to cono əṉeze ga beꞌenəꞌ.
\p
\v 28 Ṉeꞌe chsed chloꞌi Jesoꞌosənꞌ ḻoꞌo yoꞌodaoꞌ əblao c̱he netoꞌ beṉəꞌ Izrael catəꞌən gosəꞌəneꞌ caꞌ. Nach gwṉeꞌ zižɉo gožeꞌ ḻegaꞌaqueꞌ: ―Nadaꞌ nombiꞌale naꞌ ṉezele ga beṉəꞌ nadaꞌ. Naꞌ caguə con zaꞌa deꞌe biaꞌazəlažaꞌanəꞌ. Deꞌe ḻi zo benꞌ əbseḻəꞌ nadaꞌ ḻaꞌaṉəꞌəczə leꞌe bito nombiꞌaleneꞌ.
\v 29 Nadaꞌ nombiaꞌaneꞌ c̱hedəꞌ ganꞌ zoeꞌ nanꞌ gwzaꞌa naꞌ ḻenꞌ bseḻeꞌe nadaꞌ.
\p
\v 30 Nach chəsəꞌəyilɉlažeꞌe naclənꞌ soꞌoneꞌ par yesəꞌəzeneꞌ Jesoꞌosənꞌ, pero notono no gwzen ḻeꞌ c̱hedəꞌ bitoṉəꞌ əžin ža par gaqueꞌ lao naꞌagaꞌaqueꞌenəꞌ.
\v 31 Naꞌ beṉəꞌ zan gwsoꞌonḻilažeꞌe Jesoꞌosənꞌ naꞌ gosəꞌəneꞌ: ―Catəꞌən yidə Cristənꞌ bitolɉa goneꞌ miḻagr zanch canꞌ chon benga.
\s1 X̱aꞌag yoꞌodaoꞌ caꞌ ɉaꞌaqueꞌ par žɉəsəꞌəxeneꞌ Jesoꞌosənꞌ
\p
\v 32 Naꞌ beṉəꞌ fariseo caꞌ gwseꞌeneneꞌ beṉəꞌ zan chsoꞌe dižəꞌ c̱he Jesoꞌosənꞌ. Nach bosoꞌoxiꞌe len bx̱oz əblao c̱he ṉasyon Izrael c̱hetonꞌ bosoꞌoseḻeꞌe x̱aꞌag yoꞌodaoꞌ c̱hetoꞌ caꞌ par žɉəsəꞌəxeneꞌ ḻeꞌ.
\v 33 Naꞌ Jesoꞌosənꞌ chsed chloꞌicheneꞌ gwneꞌ: ―Gwzochaꞌ yeto tyemp daoꞌ len leꞌe nach yeyaꞌa ganꞌ zo benꞌ əbseḻəꞌ nadaꞌ.
\v 34 Yeyilɉle nadaꞌ naꞌ cabi yeželele nadaꞌ, laꞌ ganꞌ soaꞌ nadaꞌ, leꞌe bito gaquə yidle.
\p
\v 35 Nach beṉəꞌ blao c̱he ṉasyon Izrael c̱hetonꞌ gosəꞌəneꞌ entr ḻegaꞌaqueꞌ: ―¿Ga yeyeɉ benganꞌ cui yeželechoneꞌ? ¿Ešə šeɉleneꞌ beṉəꞌ gwlaž c̱hecho caꞌ zɉənaselas entr beṉəꞌ griego caꞌ naꞌ žɉəsedeneꞌ beṉəꞌ griego caꞌ?
\v 36 ¿Bi zeɉe dižəꞌ deꞌe nga gwna benga? Gwneꞌ: “Yeyilɉle nadaꞌ naꞌ cui yeželele nadaꞌ.” Naꞌ ḻeczə gwneꞌ: “Gaꞌan soaꞌ nadaꞌ, leꞌe bito gaquə yidle.”
\s1 Jesoꞌosənꞌ beꞌe dižəꞌ c̱he Spirit c̱he Diozənꞌ
\p
\v 37 Naꞌ ža ḻeꞌezelaogüe naꞌ ža xen c̱he lṉinəꞌ gwzecha Jesoꞌosənꞌ ganꞌ chsed chloꞌineꞌ naꞌ gwneꞌ zižɉo: ―Notəꞌətezle šə deꞌe tant cheneꞌele gatəꞌ yeḻəꞌ mban zeɉḻicaṉe c̱hele xte banacle ca to beṉəꞌ chbillažeꞌe, ḻegonḻilažəꞌ nadaꞌ naꞌ goṉaꞌ yeḻəꞌ mban zeɉḻicaṉe c̱hele.
\v 38 Leꞌe chonḻilažəꞌəle nadaꞌ, so deꞌen ṉabiaꞌ yic̱hɉlaꞌaždaꞌolenꞌ canꞌ na Xtižəꞌ Diozənꞌ deꞌen nyoɉən, gonən par nic̱h gaquəlenḻe yeziquəꞌəchlə beṉəꞌ par yesəꞌəziꞌe yeḻəꞌ mban zeɉḻicaṉe. Deꞌe naꞌanəꞌ saquəꞌəlebele ca yao caꞌ deꞌen chsoꞌonən par nic̱h yežlyonꞌ de tchoꞌalaogaꞌaquən chosc̱haꞌon bitəꞌətezə.
\p
\v 39 Jesoꞌosənꞌ gwneꞌ caꞌ c̱hedəꞌ gwṉezeneꞌ Spirit c̱he Diozənꞌ yedəson ḻoꞌo yic̱hɉlaꞌaždaoꞌ chioꞌo chonḻilažəꞌəcho ḻeꞌ par nic̱h gaquəlencho beṉəꞌ yesəꞌəziꞌe yeḻəꞌ mban zeɉḻicaṉe. Naꞌ ca naquə Spiritənꞌ bitoṉəꞌ yedəson ḻoꞌo yic̱hɉlaꞌaždaoꞌ beṉəꞌ ca orənꞌ, c̱hedəꞌ beṉəꞌ caꞌ chəsəꞌəgueꞌi Jesoꞌosənꞌ bitoṉəꞌ soꞌoteꞌeneꞌ, naꞌ bitoṉəꞌ güeꞌ Diozənꞌ ḻeꞌ yeḻəꞌ balaꞌaṉ xen.
\s1 Gwsaꞌaqueꞌ c̱hoplə por ni c̱he Jesoꞌosənꞌ
\p
\v 40 Beṉəꞌ caꞌ žaꞌanəꞌ gwseꞌeneneꞌ chsed chloꞌi Jesoꞌosənꞌ naꞌ baḻeꞌ gosəꞌəneꞌ: ―Deꞌe ḻiczə benganꞌ profetənꞌ benꞌ naquən yidə.
\p
\v 41 Naꞌ yebaḻeꞌ gosəꞌəneꞌ: ―Benganꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ. Pero baḻeꞌ gosəꞌəneꞌ: ―¿Enaꞌ ṉacho de que Galilea naꞌ əchoɉ Cristənꞌ?
\v 42 ¿Ecaguə na Xtižəꞌ Diozənꞌ deꞌen nyoɉən de que Cristənꞌ galɉeꞌ lao dia c̱he deꞌe Rei Dabinꞌ naꞌ de que galɉeꞌ yež Belen laž deꞌe reinꞌ?
\p
\v 43 Naꞌ gotəꞌ bžaš entr beṉəꞌ caꞌ žaꞌanəꞌ naꞌ gwsaꞌaqueꞌ c̱hoplə por ni c̱he Jesoꞌosənꞌ.
\v 44 Baḻeꞌ gwsaꞌaqueneꞌ cheyaḻəꞌ yesəꞌəzeneꞌeneꞌ, pero bito gwsoꞌoneꞌ caꞌ.
\s1 Beṉəꞌ gwnabiaꞌ c̱he beṉəꞌ Izrael caꞌ bito gwseꞌeɉḻeꞌe c̱he Jesoꞌosənꞌ
\p
\v 45 Naꞌ x̱aꞌag yoꞌodaoꞌ c̱he netoꞌ beṉəꞌ Izrael besyəꞌəžineꞌ lao beṉəꞌ caꞌ bosoꞌoseḻəꞌ ḻegaꞌaqueꞌ. Naꞌ bx̱oz əblao c̱he ṉasyon c̱hetonꞌ naꞌ beṉəꞌ fariseo caꞌ gwseꞌe ḻegaꞌaqueꞌ: ―¿Bixc̱henꞌ cui əgwc̱heꞌeleneꞌ?
\p
\v 46 Naꞌ x̱aꞌag yoꞌodaoꞌ caꞌ gwseꞌe ḻegaꞌaqueꞌ: ―Xte ža ṉeža ni tozə beṉəꞌ cuiṉəꞌ ṉeꞌ güen ca güenṉəꞌ chṉe benganꞌ.
\p
\v 47 Nach beṉəꞌ fariseo caꞌ gwseꞌe ḻegaꞌaqueꞌ: ―¿Elente leꞌe bagwxoayagle?
\v 48 Ni tozə netoꞌ naquətoꞌ beṉəꞌ blao naꞌ naquətoꞌ beṉəꞌ fariseo cuiṉəꞌ šeɉḻeꞌetoꞌ c̱heꞌ.
\v 49 Pero beṉəꞌ zan quinga žaꞌ nga bito zɉənombiꞌe ḻei deꞌen bzoɉ deꞌe Moisezənꞌ, naꞌ bazɉəmbiꞌayiꞌe.
\p
\v 50 Naꞌ Nicodemonꞌ, benꞌ gwyeɉ lao Jesoꞌosənꞌ šeꞌelə, leneꞌ beṉəꞌ blao caꞌ. Naꞌ Nicodemonꞌ gožeꞌ ḻegaꞌaqueꞌ:
\v 51 ―Ḻei c̱hechonꞌ bito choꞌen latɉə c̱hoglaochon c̱he to beṉəꞌ de que malənꞌ beneꞌ sin cui güeꞌe dižəꞌ nac goquə naꞌ sin cui əžaš əcheꞌenə bixa beneꞌenəꞌ.
\p
\v 52 Nach gwseꞌ beṉəꞌ caꞌ ḻeꞌ: ―¿Enaꞌ ṉacho lenoꞌ lenꞌ nacoꞌ beṉəꞌ Galilea? Bsed naꞌ əṉezdoꞌ de que ni to profet cuiṉəꞌ əchoɉ Galileanꞌ.
\s1 Besyəꞌədoḻeꞌeneꞌ to noꞌolə len xtoeꞌ
\p
\v 53 Naꞌ besaꞌaqueꞌ ɉəyaꞌaqueꞌ ližgaꞌaqueꞌ.
\c 8
\p
\v 1 Nach Jesoꞌosənꞌ gwyeɉeꞌ yaꞌa deꞌen neꞌ Yaꞌa Olibos.
\v 2 Naꞌ beteyo catəꞌ gwyeꞌeniꞌ gwyeɉeꞌ deꞌe yoblə yoꞌodaoꞌ əblao c̱he netoꞌ beṉəꞌ Izrael. Naꞌ yoguəꞌ beṉəꞌ caꞌ žaꞌ naꞌ gosəꞌəbigueꞌe laogüeꞌenəꞌ naꞌ Jesoꞌosənꞌ gwchiꞌe naꞌ gwzolaogüeꞌ chsed chloꞌineꞌ ḻegaꞌaqueꞌ.
\v 3 Nach beṉəꞌ caꞌ chosoꞌosed chosoꞌoloꞌi ḻei deꞌen bzoɉ deꞌe Moisezənꞌ naꞌ len beṉəꞌ fariseo caꞌ bedəsəꞌəgüeꞌe to noꞌolə beṉəꞌ besyəꞌədoḻeꞌeneꞌ len xtoeꞌ. Naꞌ bosoꞌozecheꞌeneꞌ gwchoḻ beṉəꞌ caꞌ lao Jesoꞌosənꞌ.
\v 4 Naꞌ gwseꞌe Jesoꞌosənꞌ: ―Maestr, noꞌol nga babedoḻəꞌətoꞌoneꞌ mer deleneꞌ to xtoeꞌ.
\v 5 Naꞌ ḻei deꞌen bzoɉ deꞌe Moisezənꞌ chonən mendad gotcho noꞌol caꞌ chsoꞌon caꞌ əgwšižəꞌəgaꞌacchoneꞌ yeɉ. ¿Bixa ənaoꞌ leꞌ? ¿bi cheyaḻəꞌ gonechoneꞌ?
\p
\v 6 Gwseꞌe Jesoꞌosənꞌ caꞌ c̱hedəꞌ gwseꞌeneneꞌ yesəꞌəbeɉeꞌeneꞌ dižəꞌ deꞌe yesəꞌəc̱hineꞌ contr leꞌ. Nach Jesoꞌosənꞌ con bchequeꞌe naꞌ bzoɉeꞌ lao yonꞌ len xbeneꞌ.
\v 7 Naꞌ gwnitəꞌəc̱hec̱heꞌ chəsəꞌəṉabeneꞌ ḻeꞌ nacxa əṉeꞌenəꞌ. Nach gwcheꞌešaꞌogüeꞌe naꞌ gožeꞌ ḻegaꞌaqueꞌ: ―Guaquə con to leꞌe beṉəꞌ cui de xtoḻeꞌe solaole əgwšižəꞌəle noꞌolə nga yeɉənꞌ.
\p
\v 8 Nach bchequeꞌe deꞌe yoblə bzoɉeꞌ lao yonꞌ.
\v 9 Naꞌ beṉəꞌ blao caꞌ beṉəꞌ caꞌ chəsəꞌəcuiš noꞌolənꞌ catəꞌ gwseꞌeneneꞌ deꞌen gož Jesoꞌosənꞌ ḻegaꞌaqueꞌ, gosəꞌəṉezeneꞌ ḻoꞌo yic̱hɉlaꞌaždaꞌogaꞌaqueꞌenəꞌ de que yogueꞌe de xtoḻəꞌəgaꞌaqueꞌ. Nach gwzolao besyəꞌəchoɉ tgüeɉə tgüeɉeꞌ, gwzolaotec besyəꞌəchoɉ beṉəꞌ caꞌ zɉəngoləch nach beṉəꞌ caꞌ yeḻaꞌ xte begaꞌaṉ yetozə Jesoꞌosənꞌ len noꞌolənꞌ ladɉo beṉəꞌ caꞌ chosoꞌozenag c̱heꞌ.
\v 10 Naꞌ catəꞌ bebeꞌešaoꞌ Jesoꞌosənꞌ caguə no beṉəꞌ caꞌ bleꞌicheneꞌ laogüeꞌenəꞌ sino yetozə noꞌolənꞌ. Naꞌ gožeꞌeneꞌ: ―Noꞌolə, ¿gaṉ beṉəꞌ caꞌ chosoꞌocuiš ḻeꞌ? ¿Eni toeꞌ cui beṉ leꞌ castigw?
\p
\v 11 Nach noꞌolənꞌ gožeꞌeneꞌ: ―Ni toeꞌ Señor.
\p Nach Jesoꞌosənꞌ gožeꞌeneꞌ: ―Ni nadaꞌ bito goṉaꞌ leꞌ castigw. Beyeɉ naꞌ cuich gonoꞌ deꞌe malənꞌ.
\s1 Jesoꞌosənꞌ nseꞌe beꞌeniꞌ par yic̱hɉlaꞌaždaoꞌ beṉac̱hənꞌ
\p
\v 12 Naꞌ Jesoꞌosənꞌ gozoeꞌ dižəꞌən yetšiꞌi len beṉəꞌ caꞌ žaꞌanəꞌ, gožeꞌ ḻegaꞌaqueꞌ: ―Nadaꞌ nsaꞌa beꞌeniꞌ par yic̱hɉlaꞌaždaoꞌ beṉac̱hənꞌ. Beṉəꞌ caꞌ chsoꞌonḻilažeꞌe nadaꞌ naꞌ chosoꞌozenagueꞌ c̱hiaꞌ bitoch chsoꞌontezə chsoꞌoneꞌ deꞌe malənꞌ. Yoꞌo beꞌeniꞌin ḻoꞌo yic̱hɉlaꞌaždaꞌogaꞌaqueꞌenəꞌ c̱hedəꞌ zɉənapeꞌ yeḻəꞌ mban zeɉḻicaṉe.
\p
\v 13 Nach beṉəꞌ fariseo caꞌ gwseꞌeneꞌ: ―Leꞌetezə choꞌo dižəꞌ c̱he cuinoꞌ, naꞌ bito naquən deꞌe seꞌeɉḻeꞌ beṉəꞌ.
\p
\v 14 Naꞌ gož Jesoꞌosənꞌ ḻegaꞌaqueꞌ: ―Ḻaꞌaṉəꞌəczə choꞌa dižəꞌ c̱he cuinaꞌ, xtižaꞌanəꞌ naquən deꞌe ḻi. Nadaꞌ ṉezdaꞌ ganꞌ gwzaꞌa naꞌ ganꞌ yeyaꞌa, pero leꞌe bito ṉezele ganꞌ gwzaꞌa naꞌ ganꞌ yeyaꞌa.
\v 15 Leꞌe con to chosbaguəꞌəle nadaꞌ de que napaꞌ doḻəꞌ por ni c̱he bi deꞌen chleꞌile chonaꞌ. Nadaꞌ bito zaꞌa par c̱hoglaoguaꞌan c̱he beṉəꞌ de que zɉənapeꞌ doḻəꞌ.
\v 16 Pero naꞌ šə catəꞌ c̱hoglaoguaꞌan c̱he notəꞌətezə beṉəꞌ de que zɉənapeꞌ doḻəꞌ, zaquəꞌəczə canꞌ əṉiaꞌanəꞌ c̱hedəꞌ bito c̱hoglaoguaꞌan c̱he beṉəꞌ to gwlazzaꞌ sino con canꞌ na X̱aꞌanəꞌ benꞌ bseḻəꞌ nadaꞌ.
\v 17 Ḻei c̱hechonꞌ deꞌen bzoɉ deꞌe Moisezənꞌ nyoɉən nan de que dižəꞌ deꞌen əsoꞌe c̱hopə testigw cheyaḻəꞌ šeɉḻeꞌecho de que naquən deꞌe ḻi šə tozə canꞌ yesəꞌəneꞌ.
\v 18 Nadaꞌ choꞌa dižəꞌ c̱he cuinaꞌ naꞌ X̱aꞌanəꞌ ḻeczə choꞌe dižəꞌ c̱hiaꞌ, naꞌ ḻeꞌenəꞌ bseḻeꞌe nadaꞌ. Netoꞌ naquətoꞌ testigw caꞌ c̱hopə.
\p
\v 19 Naꞌ gwseꞌeneꞌ: ―¿Gaxa zo x̱aꞌonəꞌ?
\p Naꞌ gwna Jesoꞌosənꞌ: ―Ni nadaꞌ ni X̱aꞌanəꞌ cui nombiꞌale. Žaləꞌ nombiꞌale nadaꞌ ḻeczə nombiꞌale X̱aꞌanəꞌ.
\p
\v 20 Dižəꞌ caꞌ beꞌ Jesoꞌosənꞌ bsed bloꞌineꞌ ganꞌ chəsəꞌəgüeꞌe mech ḻoꞌo yoꞌodaoꞌ əblao c̱he netoꞌ beṉəꞌ Izrael. Naꞌ ni to cono gwxen ḻeꞌ c̱hedəꞌ cuiṉəꞌ žin ža par gaqueꞌ lao naꞌ beṉəꞌ caꞌ chəsəꞌəgueꞌi ḻeꞌ.
\s1 Jesoꞌosənꞌ gwneꞌ: “Ganꞌ yeyaꞌanəꞌ leꞌe cabi gaquə daꞌacle”
\p
\v 21 Naꞌ gož Jesoꞌosənꞌ ḻegaꞌaqueꞌ yetšiꞌi: ―Nadaꞌ yeyaꞌa, naꞌ leꞌe yeyilɉle nadaꞌ, pero ganꞌ yeyaꞌanəꞌ leꞌe cabi gaquə daꞌacle, c̱hedəꞌ leꞌe gatle catəꞌ cuiṉəꞌ yediṉɉele xtoḻəꞌəle caꞌ.
\p
\v 22 Naꞌ beṉəꞌ blao c̱he ṉasyon Izrael c̱hetoꞌon gosəꞌəneꞌ: ―¿Eyeyot cuineꞌenəꞌ ža, deꞌen neꞌ ganꞌ yeyeɉeꞌ bito gaquə šeɉcho?
\p
\v 23 Naꞌ gožeꞌ ḻegaꞌaqueꞌ: ―Leꞌe chzenagle c̱he gwxiyeꞌenəꞌ, naꞌ nadaꞌ chzenagaꞌ c̱he Diozənꞌ. Leꞌe chonḻe canꞌ chsoꞌon yeziquəꞌəchlə beṉəꞌ cui zɉənombiaꞌ Diozənꞌ, naꞌ nadaꞌ bito chonaꞌ caꞌ.
\v 24 Deꞌe naꞌanəꞌ gwniaꞌ leꞌe de que gatle catəꞌ cuiṉəꞌ yediṉɉele xtoḻəꞌəlenꞌ. Šə cui cheɉḻeꞌele de que nadaꞌ nacaꞌ doxen canꞌ gwniaꞌanəꞌ, gatle sin cui yediṉɉele xtoḻəꞌəle caꞌ.
\p
\v 25 Naꞌ gwseꞌeneꞌ: ―¿No nacoꞌ leꞌenəꞌ?
\p Naꞌ gož Jesoꞌosənꞌ ḻegaꞌaqueꞌ: ―Nadaꞌ nacaꞌ benꞌ bagwniaꞌ leꞌe bedote.
\v 26 Ṉeꞌe dech deꞌe zan deꞌe əṉiaꞌ c̱hele gwzeɉniꞌidaꞌ ca naquə xtoḻəꞌəle caꞌ. X̱aꞌanəꞌ bseḻeꞌe nadaꞌ par choꞌa dižəꞌ len beṉac̱hənꞌ deꞌen babendaꞌ gwneꞌ. Naꞌ X̱aꞌ naꞌanəꞌ choꞌe dižəꞌ ḻi.
\p
\v 27 Jesoꞌosənꞌ beꞌe dižəꞌ c̱he X̱eꞌ Diozənꞌ, naꞌ ḻegaꞌaqueꞌ bito gwseꞌeɉniꞌineꞌ šə c̱he Dioz nanꞌ choꞌe dižəꞌ.
\v 28 Naꞌ Jesoꞌosənꞌ gožeꞌ ḻegaꞌaqueꞌ: ―Diozənꞌ bseḻeꞌe nadaꞌ golɉaꞌ beṉac̱h, naꞌ te gotle nadaꞌ ḻeꞌe yag corozənꞌ canaꞌ əṉezele de que nacaꞌ benꞌ gwniaꞌanəꞌ. Naꞌ ḻeczə əṉezele de que cabi bi chonaꞌ deꞌe biaꞌazəlažaꞌa, sino con binꞌ babzeɉniꞌi X̱aꞌanəꞌ nadaꞌ, ḻenṉəꞌ chniaꞌ.
\v 29 X̱aꞌanəꞌ babseḻeꞌe nadaꞌ naꞌ zoczeꞌ len nadaꞌ. Bito chbeɉyic̱hɉeꞌ nadaꞌ c̱hedəꞌ do tyempte chonaꞌ deꞌen chazlažeꞌenəꞌ.
\p
\v 30 Naꞌ žlac choeꞌ Jesoꞌosənꞌ dižəꞌ quinga beṉəꞌ zan gwsoꞌonḻilažeꞌe ḻeꞌ.
\s1 Noquəꞌən zɉənaquə xiꞌiṉ Dioz naꞌ noquəꞌən nitəꞌ xniꞌa deꞌe malənꞌ
\p
\v 31 Naꞌ Jesoꞌosənꞌ gožeꞌ baḻə beṉəꞌ gwlaž c̱hetoꞌ caꞌ bachseꞌeɉḻeꞌe c̱heꞌ: ―Šə sotezə sole gonḻe deꞌe chniaꞌ leꞌe gwloꞌen de que deꞌe ḻiczə banacle disipl c̱hiaꞌ.
\v 32 Naꞌ šə sotezə sole gonḻe deꞌen chniaꞌ leꞌe, nach əṉezele bi zeɉe dižəꞌ ḻi c̱hiaꞌanəꞌ, naꞌ šə baṉezele bi zeɉen, bitoch gacle ca esclabos.
\p
\v 33 Naꞌ gwseꞌeneꞌ: ―Dia c̱he deꞌe Abraanṉəꞌ naquətoꞌ naꞌ xte ža ṉeža bitoṉəꞌ gactoꞌ ca esclabos. ¿Bixac̱henꞌ naoꞌ leꞌ de que bitoch gaquətoꞌ ca esclabos?
\p
\v 34 Naꞌ gož Jesoꞌosənꞌ ḻegaꞌaqueꞌ: ―Deꞌe ḻi chniaꞌ leꞌe, yoguəꞌ beṉəꞌ chsoꞌon deꞌe malənꞌ niteꞌe xniꞌa deꞌe malənꞌ ca esclabos.
\v 35 Beṉəꞌ naquə esclabo caguə do tyempte gaqueꞌ cuent len famiḻyənꞌ ganꞌ naqueꞌ esclabo, pero beṉəꞌ golɉeꞌ lao famiḻyənꞌ, do tyempte gaqueꞌ cuent len famiḻyənꞌ.
\v 36 Naꞌ šə nadaꞌ Xiꞌiṉ Diozənꞌ gonaꞌ ca əchoɉle xniꞌa deꞌe malənꞌ par nic̱h cuich gacle ca esclabos, deꞌe ḻiczə əchoɉlenꞌ.
\v 37 Ṉezdaꞌ de que nacle xiꞌiṉ dia c̱he deꞌe Abraanṉəꞌ pero biaꞌaczə cheyilɉlažəꞌəle naclənꞌ gonḻe par nic̱h gotle nadaꞌ, naꞌ chonḻe caꞌ c̱hedəꞌ bito chone c̱hele xtižaꞌanəꞌ.
\v 38 Nadaꞌ choꞌa dižəꞌ c̱he deꞌen babloꞌi X̱aꞌanəꞌ nadaꞌ, naꞌ leꞌe chonḻe canꞌ na x̱alenꞌ.
\p
\v 39 Naꞌ gwseꞌ beṉəꞌ caꞌ Jesoꞌosənꞌ: ―Netoꞌ naquətoꞌ xiꞌiṉ dia c̱he deꞌe Abraanṉəꞌ.
\p Naꞌ gož Jesoꞌosənꞌ ḻegaꞌaqueꞌ: ―Žaləꞌ nacle doalɉe xiꞌiṉ dia c̱he deꞌe Abraanṉə gonḻe canꞌ ben deꞌe Abraanṉəꞌ žaləꞌ caꞌ.
\v 40 Naꞌ ḻaꞌaṉəꞌəczə babzeɉniꞌidaꞌ leꞌe dižəꞌ ḻi deꞌen babsed bloꞌi Diozənꞌ nadaꞌ, leꞌe cheneꞌele gotle nadaꞌ. Deꞌe Abraanṉəꞌ cabi beneꞌ canꞌ chonḻenꞌ.
\v 41 Tozəczə canꞌ chonḻe len x̱alenəꞌ.
\p Nach gwseꞌe ḻeꞌ: ―Tozə Diozənꞌ naqueꞌ X̱atoꞌ naꞌ bito chzenagtoꞌ c̱he nochlə beṉəꞌ.
\p
\v 42 Naꞌ Jesoꞌosənꞌ gožeꞌ ḻegaꞌaqueꞌ: ―Žaləꞌ Diozənꞌ naquə x̱ale guaquele c̱hiaꞌ, c̱hedəꞌ nadaꞌ gwzaꞌa ganꞌ zo Diozənꞌ. Caguə zaꞌa deꞌe biaꞌazəlažaꞌanəꞌ. Ḻenꞌ əbseḻeꞌe nadaꞌ.
\v 43 ¿Bixc̱henꞌ cui cheɉniꞌile deꞌen chniaꞌ leꞌe? Bito cheɉniꞌile c̱hedəꞌ laꞌ bito cheneꞌele gwzenagle xtižaꞌanəꞌ.
\v 44 Gwxiyeꞌ nanꞌ naquə x̱ale. Nachənꞌ chebeile chonḻe canꞌ cheneꞌenṉəꞌ. Ḻen naquən güet beṉəꞌ dezd catəꞌən gwxe yežlyonꞌ, naꞌ cui chdalenən dižəꞌ ḻi c̱he Diozənꞌ c̱hedəꞌ cui yoꞌo dižəꞌ ḻinꞌ ḻoꞌo yic̱hɉlaꞌaždaꞌogüeꞌenṉəꞌ. Catəꞌ chnen deꞌe güenḻažəꞌ chnen con canꞌ naquə cuinei c̱hedəꞌ naquən güenḻažəꞌ naꞌ yoguəꞌ dižəꞌ güenḻažəꞌ zaꞌan c̱hei.
\v 45 Naꞌ cabi cheɉḻeꞌele c̱hiaꞌ nadaꞌ, c̱hedəꞌ nadaꞌ əchniaꞌ leꞌe dižəꞌ ḻi.
\v 46 Ni tole cui gaquə əgwloꞌele de que babenaꞌ bi deꞌe malənꞌ. Nadaꞌ choꞌa dižəꞌ ḻi, ¿bixc̱henꞌ cui cheɉḻeꞌele c̱hiaꞌ?
\v 47 Beṉəꞌ caꞌ zɉənaquə xiꞌiṉ Dioz chosoꞌozenagueꞌ c̱he xtižeꞌenəꞌ. Naꞌ ca naquə leꞌe cui nacle xiꞌiṉeꞌ, deꞌe naꞌanəꞌ bito chzenagle c̱heꞌ.
\s1 Zeꞌe galɉlə deꞌe Abraanṉəꞌ bazoczə Cristənꞌ
\p
\v 48 Naꞌ beṉəꞌ blao c̱he ṉasyon Izrael c̱hetonꞌ gwseꞌeneꞌ: ―Ḻeiczetoꞌ canꞌ natoꞌ de que leꞌ nacoꞌ beṉəꞌ Samaria naꞌ de que chac tontoꞌonəꞌ.
\p
\v 49 Naꞌ gož Jesoꞌosənꞌ ḻegaꞌaqueꞌ: ―Bito chac tontaꞌ. Nadaꞌ əchnežɉuaꞌ yeḻəꞌ balaꞌaṉ c̱he X̱aꞌanəꞌ naꞌ leꞌe chnitle yeḻəꞌ balaꞌaṉ c̱hiaꞌanəꞌ.
\v 50 Nadaꞌ caguə chyilɉaꞌ no goṉ nadaꞌ yeḻəꞌ balaꞌaṉnəꞌ. X̱aꞌanəꞌ choṉeꞌ nadaꞌ yeḻəꞌ balaꞌaṉ, naꞌ ḻenꞌ əgwloꞌe nonꞌ napə doḻəꞌ naꞌ nonꞌ cui napə doḻəꞌ.
\v 51 Deꞌe ḻi chniaꞌ leꞌe, notəꞌətezə beṉəꞌ chosoꞌozenag xtižaꞌanəꞌ, cuat ṉabiaꞌ yeḻəꞌ gotənꞌ ḻegaꞌaqueꞌ.
\p
\v 52 Nach beṉəꞌ blao c̱he ṉasyon Izrael c̱hetonꞌ gwseꞌeneꞌ: ―Ṉaꞌa babeyož gwṉezetoꞌ de que chac tontoꞌonəꞌ. Deꞌe x̱axtaꞌocho Abraanṉəꞌ goteꞌ naꞌ ḻeczə deꞌe profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ. Naꞌ leꞌ naoꞌ de que beṉəꞌ caꞌ chosoꞌozenag c̱hioꞌ cuat ṉabiaꞌ yeḻəꞌ gotənꞌ ḻegaꞌaqueꞌ.
\v 53 ¿Ezaquəꞌəchoꞌ leꞌ ca deꞌe x̱axtaꞌocho Abraanṉəꞌ? Ḻenꞌ goteꞌ naꞌ ḻeczə caꞌ deꞌe profet caꞌ. ¿Noxanꞌ chacdoꞌ nacoꞌ?
\p
\v 54 Naꞌ gwna Jesoꞌosənꞌ: ―Žaləꞌ nadaꞌ choeꞌ cuinaꞌ yeḻəꞌ balaꞌaṉ, cabi zaquəꞌ yeḻəꞌ balaꞌaṉnəꞌ. Pero X̱aꞌanəꞌ choṉeꞌ nadaꞌ yeḻəꞌ balaꞌaṉ, benꞌ nale naquə Dioz c̱helenꞌ.
\v 55 Leꞌe bito nombiaꞌaleneꞌ, pero nadaꞌ nombiꞌaneꞌ. Žaləꞌ niaꞌ cui nombiaꞌaneꞌ gacaꞌ beṉəꞌ güenḻažəꞌ ca leꞌe. Nadaꞌ nombiaꞌaneꞌ ža, naꞌ chzenagaꞌ xtižeꞌenəꞌ.
\v 56 Deꞌe x̱axtaꞌocho Abraanṉəꞌ bebeineꞌ gwyeɉḻeꞌe de que leꞌineꞌ tyemp ni zoaꞌ yežlyo ni. Naꞌ bableꞌineꞌen ṉaꞌa naꞌ zoeꞌ mbalaz.
\p
\v 57 Naꞌ gwseꞌ beṉəꞌ blao c̱he ṉasyon Izrael c̱hetonꞌ ḻeꞌ: ―Ni šiyon iz cuiṉəꞌ žinoꞌ. ¿Enaꞌ ṉezleꞌidoꞌ deꞌe Abraanṉəꞌ?
\p
\v 58 Naꞌ gož Jesoꞌosənꞌ ḻegaꞌaqueꞌ: ―Deꞌe ḻi əchniaꞌ leꞌe, ca zeꞌe galɉlə deꞌe Abraanṉəꞌ bazoczaꞌ nadaꞌ.
\p
\v 59 Nach gosəꞌəziꞌe yeɉ par yosoꞌošižeꞌeneꞌen. Naꞌ Jesoꞌosənꞌ bocuašeꞌe naꞌ bezeꞌe yoꞌodaoꞌ əblaonəꞌ. Bito gwsaꞌacbeꞌineꞌ catəꞌ bedieꞌ gwchoḻgaꞌaqueꞌenəꞌ zɉəyedeꞌ.
\c 9
\s1 Jesoꞌosənꞌ beneꞌ par nic̱h bleꞌi to beṉəꞌ golɉeꞌ nc̱hoḻeꞌ
\p
\v 1 Naꞌ txen chdatoꞌ len Jesoꞌosənꞌ catəꞌ bleꞌitoꞌ to beṉəꞌ byo beṉəꞌ golɉeꞌ nc̱hoḻeꞌ.
\v 2 Naꞌ gožtoꞌoneꞌ: ―Maestr, ¿no napə doḻəꞌ deꞌen golɉə benganꞌ nc̱hoḻeꞌ? ¿əḻeꞌ o šə x̱axneꞌenəꞌ?
\p
\v 3 Naꞌ Jesoꞌosənꞌ gožeꞌ netoꞌ: ―Benga golɉeꞌ nc̱hoḻeꞌ caguə por ni c̱he xtoḻeꞌenəꞌ, naꞌ caguə por ni c̱he xtoḻəꞌ x̱axneꞌenəꞌ, sino par nic̱h laꞌalaon canꞌ gon Diozənꞌ len ḻeꞌ.
\v 4 Cheyaḻəꞌ goncho xšin Diozənꞌ benꞌ bseḻəꞌ nadaꞌ žlac ṉede latɉə. Gwžin catəꞌ cuich gatəꞌ latɉə gonchon.
\v 5 Žlac ṉezoaꞌ yežlyo nga chguaꞌa beꞌeniꞌ ḻoꞌo yic̱hɉlaꞌaždaoꞌ beṉəꞌ.
\p
\v 6 Beyož gwneꞌ caꞌ gwchoꞌoṉ x̱eneꞌen lao yonꞌ naꞌ beneꞌ beṉɉw len xenꞌ c̱heꞌenəꞌ. Naꞌ gwdebeꞌ beṉɉonꞌ ɉelao beṉəꞌ lc̱hoḻənꞌ.
\v 7 Naꞌ gožeꞌeneꞌ: ―Gwyeɉ ɉəyedib ɉelaogoꞌonəꞌ choꞌa tanc deꞌen nziꞌ Siloe―. Naꞌ Siloe zeɉen dižəꞌ Nseḻəꞌ.
\p Naꞌ gwyeɉeꞌ naꞌ beyib ɉelaogüeꞌ caꞌ. Naꞌ bezeꞌe ɉəyedeꞌ bachleꞌineꞌ.
\v 8 Naꞌ beṉəꞌ gwliž c̱heꞌ caꞌ naꞌ beṉəꞌ caꞌ besəꞌəleꞌi ḻeꞌ yoguəꞌ las catəꞌ ṉeꞌe nc̱hoḻeꞌ gosəꞌəneꞌ: ―¿Ecaguə benganꞌ bableꞌicho bedote chiꞌe chṉabeꞌ caridanꞌ?
\p
\v 9 Baḻeꞌ gosəꞌəneꞌ: ―Benganꞌ.
\p Naꞌ baḻeꞌ gosəꞌəneꞌ: ―Cabi naquə ḻeꞌ sino ca naquə benganꞌ naqueꞌ.
\p Naꞌ ḻeꞌ gwneꞌ: ―Nadaꞌanəꞌ.
\p
\v 10 Naꞌ gwseꞌeneꞌ: ―¿Nacxa goquənꞌ gwzolao chleꞌidoꞌ?
\p
\v 11 Naꞌ gožeꞌ ḻegaꞌaqueꞌ: ―To beṉəꞌ le Jesoꞌos beneꞌ beṉɉw naꞌ gwdebeꞌen ɉelaoguaꞌanəꞌ naꞌ gožeꞌ nadaꞌ: “Gwyeɉ choꞌa tanc deꞌen nziꞌ Siloenꞌ naꞌ ɉəyedibən.” Naꞌ gwyaꞌa naꞌ beyibaꞌan, naꞌ gwzolao chleꞌidaꞌ.
\p
\v 12 Nach gwseꞌ beṉəꞌ caꞌ ḻeꞌ: ―¿Ganxa beꞌenəꞌ?
\p Naꞌ gožeꞌ ḻegaꞌaqueꞌ: ―Bito ṉezdaꞌ.
\s1 Beṉəꞌ fariseo caꞌ gosəꞌəṉabeneꞌ beꞌenəꞌ nac goquənꞌ chleꞌineꞌ
\p
\v 13 Naꞌ gosəꞌəc̱heꞌe benꞌ goquə beṉəꞌ lc̱hoḻənꞌ ganꞌ nitəꞌ beṉəꞌ fariseo caꞌ.
\v 14 Naꞌ naquə ža dezcanz catəꞌən ben Jesoꞌosənꞌ beṉɉonꞌ deꞌen gwdebeꞌ ɉelao beꞌenəꞌ par bleꞌineꞌ.
\v 15 Naꞌ beṉəꞌ fariseo caꞌ ḻeczə gosəꞌəṉabeneꞌ ḻeꞌ nac goquənꞌ bachleꞌineꞌ. Naꞌ ḻeꞌ gožeꞌ ḻegaꞌaqueꞌ: ―Benꞌ beyone nadaꞌ gwdebeꞌ beṉɉonꞌ ɉelaoguaꞌanəꞌ naꞌ beyibanꞌ naꞌ gwzolao chleꞌidaꞌ.
\p
\v 16 Nach to c̱hopə beṉəꞌ fariseo caꞌ gosəꞌəneꞌ: ―Ṉezecho bito zo Diozənꞌ len benga c̱hedəꞌ bito chombaꞌaṉeꞌ ža dezcanzənꞌ.
\p Naꞌ baḻeꞌ gosəꞌəneꞌ: ―¿Nac gon to beṉəꞌ güen deꞌe mal goneꞌ miḻagr quinga?
\p Naꞌ gwsaꞌaqueꞌ c̱hoplə entr ḻegaꞌaqueꞌ.
\v 17 Nach deꞌe yoblə gwseꞌe beꞌen golɉə nc̱hoḻənꞌ: ―¿Bi naoꞌ leꞌ c̱he benꞌ ben par nic̱h chleꞌidoꞌ?
\p Naꞌ ḻeꞌ gwneꞌ: ―Naqueꞌ to profet beṉəꞌ bseḻəꞌ Diozənꞌ.
\p
\v 18 Naꞌ beṉəꞌ blao c̱he ṉasyon Izrael c̱hetonꞌ bito gwseꞌeɉḻeꞌe c̱he benꞌ šə ḻenꞌ golɉeꞌ nc̱hoḻeꞌ naꞌ ṉaꞌa bachleꞌineꞌ xte que gwsaꞌaxeꞌ x̱axneꞌenəꞌ.
\v 19 Naꞌ gosəꞌəṉabeneꞌ ḻegaꞌaqueꞌ gwseꞌeneꞌ: ―¿Ebenganꞌ xiꞌiṉlenꞌ benꞌ nale golɉeꞌ nc̱hoḻeꞌ? ¿Nacxa goquənꞌ chleꞌineꞌ ṉaꞌa?
\p
\v 20 Naꞌ gwseꞌ x̱axneꞌe caꞌ ḻegaꞌaqueꞌ: ―Ṉezetoꞌ de que benganꞌ xiꞌiṉtoꞌonəꞌ, naꞌ de que golɉeꞌ nc̱hoḻeꞌ.
\v 21 Mas nac chaquənꞌ bachleꞌineꞌ bito ṉezetoꞌ, nic ṉezetoꞌ noxa ben par nic̱h bachleꞌineꞌ. Ḻeꞌ bazeɉəczeneꞌ. Ḻeṉabe ḻeꞌ, güeꞌeczeꞌ dižəꞌ naquənꞌ goc c̱heꞌ.
\p
\v 22 X̱axneꞌe caꞌ gosəꞌəneꞌ caꞌ deꞌen besəꞌəžebeꞌ beṉəꞌ blao c̱he ṉasyon Izrael c̱hetoꞌonəꞌ, c̱hedəꞌ ḻegaꞌaqueꞌ bac̱h zɉənoneꞌen de que notəꞌətezə beṉəꞌ güeꞌe dižəꞌ de que Jesoꞌosənꞌ naqueꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hetonꞌ, cabi əsoꞌe latɉə šoꞌocheꞌ ḻoꞌo yoꞌodaꞌonəꞌ.
\v 23 Deꞌe naꞌanəꞌ gosəꞌəna x̱axneꞌe caꞌ: “Bazeɉəczeneꞌ. Ḻeṉabe ḻeꞌ.”
\p
\v 24 Nach deꞌe yoblə gwsaꞌaxeꞌ benꞌ golɉə nc̱hoḻ gwseꞌeneꞌ: ―Beꞌelaoꞌ Diozənꞌ naꞌ gwzoꞌoneꞌ testigw de que clelənꞌ babeꞌelenoꞌ netoꞌ dižəꞌ bac̱he. Ṉetoꞌ ṉezetoꞌ de que Jesoꞌosənꞌ naqueꞌ to beṉəꞌ güen deꞌe mal.
\p
\v 25 Naꞌ gwneꞌ: ―Šə naqueꞌ beṉəꞌ güen deꞌe mal, bito ṉezdaꞌ. Deꞌen ṉezdaꞌ, nadaꞌ gocaꞌ beṉəꞌ lc̱hoḻ naꞌ ṉaꞌa chleꞌidaꞌ.
\p
\v 26 Naꞌ deꞌe yoblə gwseꞌeneꞌ: ―¿Bi beneneꞌ leꞌenəꞌ? ¿Nac benenꞌ par nic̱h bachleꞌidoꞌ?
\p
\v 27 Naꞌ gožeꞌ ḻegaꞌaqueꞌ: ―Bagwniaꞌ leꞌe naꞌ cui chzenagle. ¿Bixc̱henꞌ cheneꞌele yenele deꞌe yoblə? ¿Elen leꞌe cheneꞌele gacle disipl c̱heꞌenəꞌ?
\p
\v 28 Naꞌ gwsaꞌadeꞌeneꞌ dižəꞌ gwseꞌeneꞌ: ―Leꞌ nacoꞌ disipl c̱heꞌ, pero netoꞌ naquətoꞌ disipl c̱he deꞌe Moisezənꞌ.
\v 29 Ṉezetoꞌ de que Diozənꞌ beꞌeleneꞌ deꞌe Moisezənꞌ dižəꞌ choꞌa, pero benga bito ṉezetoꞌ ganꞌ zeꞌenəꞌ.
\p
\v 30 Naꞌ benꞌ golɉə nc̱hoḻənꞌ gožeꞌ ḻegaꞌaqueꞌ: ―Nactequənꞌ leꞌe cui ṉezele ga zeꞌenəꞌ, len babeneꞌ par nic̱h chleꞌidaꞌ.
\v 31 Naꞌ ṉezecho de que Diozənꞌ cabi chzenagueꞌ c̱he beṉəꞌ caꞌ chsoꞌon deꞌe mal. Con beṉəꞌ chsoꞌeneꞌ yeḻəꞌ balaꞌaṉ naꞌ chsoꞌoneꞌ canꞌ cheneꞌeneꞌenəꞌ, ḻegaꞌaczeꞌ chzenag Diozənꞌ c̱hei.
\v 32 Dezd gwxe yežlyonꞌ ni to conoṉəꞌ yene de que bagwzo beṉəꞌ choneꞌ par nic̱h chleꞌi beṉəꞌ golɉə nc̱hoḻ.
\v 33 Žaləꞌ cui zo Diozənꞌ len ḻeꞌ caguə bi miḻagr gaquə goneꞌ.
\p
\v 34 Naꞌ beṉəꞌ blao caꞌ gwseꞌeneꞌ: ―Pendejw, lenꞌ golɉoꞌ nc̱hoḻoꞌ yeḻəꞌ beṉəꞌ mal c̱hioꞌonəꞌ, ¿əna leꞌ əgwseddoꞌ netoꞌonəꞌ?
\p Naꞌ besyəꞌəbeɉeꞌeneꞌ fuer.
\s1 Beṉəꞌ caꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ
\p
\v 35 Gocbeꞌi Jesoꞌosənꞌ de que babesyəꞌəbeɉeꞌ beꞌenəꞌ fuer, naꞌ ɉəšagueꞌeneꞌ gožeꞌeneꞌ: ―¿Echonḻilažoꞌo leꞌ Xiꞌiṉ Diozənꞌ?
\p
\v 36 Naꞌ gož benꞌ ḻeꞌ: ―¿Noxaꞌan ža? señor, par nic̱h gonḻilažaꞌaneꞌ.
\p
\v 37 Naꞌ gož Jesoꞌosənꞌ ḻeꞌ: ―Nadaꞌanəꞌ benꞌ bableꞌidoꞌ antslə naꞌ nadaꞌanəꞌ choꞌelenaꞌ leꞌ dižəꞌ.
\p
\v 38 Nach beꞌenəꞌ bzo xibeꞌ beꞌelaogüeꞌe Jesoꞌosənꞌ, gwneꞌ: ―X̱anaꞌ, chonḻilažaꞌa leꞌ.
\p
\v 39 Naꞌ gwnach Jesoꞌosənꞌ: ―Nadaꞌ zaꞌa yežlyo nga par nic̱h laꞌalaon c̱he beṉac̱hənꞌ nonꞌ zɉənapə doḻəꞌ naꞌ nonꞌ cui zɉənapə doḻəꞌ. Zaꞌa chguaꞌa beꞌeniꞌ par beṉəꞌ caꞌ chsaꞌacbeꞌineꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ, naꞌ zaꞌa par yecaꞌa beꞌeniꞌ c̱he beṉəꞌ caꞌ chsaꞌaqueneꞌ cui zɉənc̱hoḻ yic̱hɉlaꞌaždaꞌogaꞌaqueꞌenəꞌ.
\p
\v 40 Naꞌ baḻə beṉəꞌ fariseo caꞌ nitəꞌ gaḻəꞌəzə gwseꞌeneneꞌ deꞌe nga. Naꞌ gwseꞌe Jesoꞌosənꞌ: ―¿Echacdoꞌ len netoꞌ nc̱hoḻ yic̱hɉlaꞌaždaꞌotoꞌonəꞌ?
\p
\v 41 Naꞌ gož Jesoꞌosənꞌ ḻegaꞌaqueꞌ: ―Žaləꞌ cui cheɉniꞌile bito bi xtoḻəꞌəle de. Pero por ni c̱he deꞌen nale de que cheɉniꞌile, deꞌe naꞌanəꞌ deczə xtoḻəꞌəlenꞌ.
\c 10
\s1 Jempl c̱he xleꞌeɉ xiləꞌ caꞌ
\p
\v 1 Deꞌe ḻi chniaꞌ leꞌe, beꞌen cui choꞌo choꞌa puert xleꞌeɉ xiləꞌ caꞌ naꞌ ga yoblə chepeꞌ par choꞌe, beṉəꞌ bguan beꞌenəꞌ.
\v 2 Beꞌen choꞌo choꞌa puertənꞌ, ḻeꞌenəꞌ goye xiləꞌənəꞌ.
\v 3 Naꞌ beꞌen chapə puert c̱he xleꞌeɉ xiləꞌ caꞌ chsalɉueꞌ par nic̱h choꞌo beṉəꞌ goyebənꞌ. Naꞌ xiləꞌ caꞌ chosoꞌozenaguəb xtižeꞌenəꞌ c̱hedəꞌ zɉənombiaꞌab ḻeꞌ, naꞌ chaxeꞌeb choꞌe lagaꞌaquəb catəꞌ chbeɉeꞌeb.
\v 4 Naꞌ catəꞌ bagwleɉeꞌ yoguəꞌ bia c̱heꞌ caꞌ ḻoꞌo xleꞌeɉgaꞌaquəbənꞌ, chbialaogüeꞌ laogaꞌaquəbənꞌ naꞌ chɉəsəꞌənaob ḻeꞌ c̱hedəꞌ zɉənombiꞌab šiꞌenəꞌ.
\v 5 Naꞌ bito žɉəsəꞌənaob beṉəꞌ yoblə, sino yesəꞌəxoṉɉəb ḻeꞌ c̱hedəꞌ cui zɉənombiꞌab šiꞌenəꞌ.
\p
\v 6 Jesoꞌosənꞌ beꞌe jempl nga par bzeɉniꞌineꞌ beṉəꞌ caꞌ žaꞌanəꞌ, pero bito gwseꞌeɉniꞌineꞌ bi zeɉen deꞌen gožeꞌ ḻegaꞌaqueꞌ caꞌ.
\s1 Jesoꞌosənꞌ chgüia chyeꞌ chioꞌo ca to goye xiləꞌ beṉəꞌ chgüia chyeꞌ bia c̱heꞌ caꞌ binḻo
\p
\v 7 Nach gozṉe Jesoꞌosənꞌ gožeꞌ ḻegaꞌaqueꞌ: ―Deꞌe ḻi əchniaꞌ leꞌe, nadaꞌ gwxaquəꞌəlebədaꞌ ca choꞌa puert c̱he xleꞌeɉ xiləꞌ caꞌ.
\v 8 Yoguəꞌ beṉəꞌ gox̱oayag caꞌ bablaꞌac antslə ca nadaꞌ chəsəꞌəneꞌ de que Diozənꞌ bseḻeꞌe ḻegaꞌaqueꞌ pero gwxaquəꞌəlebəgaꞌaqueneꞌ ca beṉəꞌ bguan. Naꞌ ca xiləꞌ caꞌ cui chosoꞌozenaguəb xtižəꞌ beṉəꞌ cui zɉənombiꞌab, caꞌaczənꞌ beṉəꞌ caꞌ chsoꞌonḻilažəꞌ nadaꞌ cui chosoꞌozenagueꞌ c̱he beṉəꞌ gox̱oayag caꞌ.
\v 9 Nadaꞌ gwxaquəꞌəlebədaꞌ ca choꞌa puert c̱he xleꞌeɉ xiləꞌ caꞌ. Xiləꞌ caꞌ chəsyəꞌəyoꞌob ḻoꞌo xleꞌeɉgaꞌaquəb naꞌ chəsəꞌəchoɉəb par chəsəꞌəyilɉəb deꞌe chsaꞌob. Naꞌ ca xleꞌeɉ xiləꞌ caꞌ chcueꞌeɉən ḻegaꞌaquəb par nic̱h cui bi gac c̱hegaꞌaquəb, caꞌaczənꞌ chcueꞌeɉaꞌ beṉəꞌ caꞌ chsoꞌonḻilažəꞌ nadaꞌ par nic̱h cui bi gac c̱hegaꞌaqueꞌ.
\p
\v 10 Beṉəꞌ gox̱oayag caꞌ gwxaquəꞌəlebəgaꞌaqueneꞌ ca beṉəꞌ bguan beṉəꞌ caꞌ chdaꞌac ḻechguaḻe con to deꞌe yesəꞌəbaneꞌ, naꞌ soꞌoteꞌ, naꞌ yesəꞌənitlaogüeꞌ. Nadaꞌ zaꞌa par nic̱h chnežɉuaꞌ yeḻəꞌ mban zeɉḻicaṉe c̱he beṉəꞌ caꞌ chsoꞌonḻilažəꞌ nadaꞌ naꞌ par nic̱h niteꞌe mbalaz juisy.
\v 11 Nadaꞌ chgüia chyaꞌ beṉəꞌ caꞌ chsoꞌonḻilažəꞌ nadaꞌ canꞌ chon to beṉəꞌ goye xiləꞌ beṉəꞌ chgüia chyeꞌ xiləꞌ c̱heꞌ caꞌ binḻo. Naꞌ deꞌen chgüia chyegaꞌacaꞌaneꞌ chsanḻažəꞌ cuinaꞌ soꞌot beṉəꞌ nadaꞌ.
\v 12 Baḻə beṉəꞌ caꞌ chosoꞌoyeꞌ xiləꞌ chesəꞌəziꞌe laxɉwgaꞌaqueꞌ, laꞌ xiləꞌ caꞌ bito zɉənaquəb bia c̱hegaꞌaqueꞌ. Deꞌe naꞌanəꞌ chəsəꞌəbeɉyic̱hɉeꞌeb naꞌ chosoꞌoxoṉɉeꞌ catəꞌ chəsəꞌəleꞌineꞌ zaꞌ no becoyoꞌo, c̱hedəꞌ bito zɉənaqueꞌ x̱an xiləꞌ caꞌ. Chsoꞌe latɉə chṉiz becoyoꞌonəꞌ xiləꞌ caꞌ naꞌ choslasəb ḻegaꞌaquəb.
\v 13 Chesəꞌəxoṉɉeꞌ c̱hedəꞌ bito zɉənžiꞌineꞌ xiləꞌ caꞌ deꞌen cui zɉənaquəb bia c̱hegaꞌaqueꞌ, con zɉənaqueꞌ goyeb.
\p
\v 14 Nadaꞌ chgüia chyaꞌ beṉəꞌ caꞌ chsoꞌonḻilažəꞌ nadaꞌ ca to beṉəꞌ goye xiləꞌ beṉəꞌ chgüia chyeꞌ xiləꞌ c̱heꞌ caꞌ binḻo. Naꞌ nombiꞌa beṉəꞌ caꞌ chsoꞌonḻilažəꞌ nadaꞌ, naꞌ ḻegaꞌaqueꞌ zɉənombiꞌe nadaꞌ.
\v 15 Nombiꞌagaꞌacaꞌaneꞌ ca X̱aꞌanəꞌ nombiꞌe nadaꞌ naꞌ nadaꞌ nombiꞌa X̱aꞌanəꞌ. Naꞌ deꞌen chgüia chyegaꞌacaꞌaneꞌ chsanḻažəꞌ cuinaꞌ soꞌot beṉəꞌ nadaꞌ.
\v 16 Naꞌ nitəꞌ beṉəꞌ ga yoblə beṉəꞌ cui zɉənaquə beṉəꞌ Izrael beṉəꞌ soꞌonḻilažəꞌ nadaꞌ naꞌ yosoꞌozenagueꞌ c̱hiaꞌ. Ḻeczə ḻegaꞌaqueꞌ cheyaḻəꞌ əgwtobaꞌ par nic̱h yoguəꞌəḻoḻ no soꞌonḻilažəꞌ nadaꞌ əsaꞌaqueꞌ tozə len lɉuežɉgaꞌaqueꞌ naꞌ tozaꞌ nadaꞌ ggüia gwyaꞌ yoguəꞌəḻoḻgaꞌaqueꞌ.
\p
\v 17 Chsanḻažəꞌ cuinaꞌ soꞌot beṉəꞌ nadaꞌ pero techlə yebanaꞌ. Naꞌ chaquəche X̱aꞌan c̱hiaꞌ deꞌen chazlažaꞌa chonaꞌ caꞌ.
\v 18 Ni to cono yequeꞌe yeḻəꞌ mban c̱hiaꞌanəꞌ sino chsanḻažəꞌ cuinaꞌ soꞌot beṉəꞌ nadaꞌ. Napaꞌ yeḻəꞌ gwnabiaꞌanəꞌ par gwsanḻažəꞌ cuinaꞌ soꞌoteꞌ nadaꞌ, naꞌ napaꞌ yeḻəꞌ gwnabiaꞌ par yeyas yebanaꞌ ladɉo beṉəꞌ guat caꞌ. Naꞌ X̱aꞌanəꞌ babeneꞌ mendad gonaꞌ caꞌ.
\p
\v 19 Naꞌ deꞌe yoblə gwsaꞌac beṉəꞌ blao c̱he ṉasyon Izrael c̱hetonꞌ c̱hoplə por ni c̱he dižəꞌ caꞌ deꞌen gwseꞌeneneꞌ beꞌe.
\v 20 Zan beṉəꞌ caꞌ gosəꞌəneꞌ: ―Chac tonteꞌenəꞌ, bito chacbeꞌineꞌ bi dižəꞌən choꞌe. ¿Bixc̱henꞌ chzenagle c̱heꞌ?
\p
\v 21 Naꞌ baḻeꞌ gosəꞌəneꞌ: ―Dižəꞌ quinga caguə naquən ca c̱he beṉəꞌ chac tontənꞌ. ¿Eguaquə gon to beṉəꞌ chac tont par leꞌi beṉəꞌ lc̱hoḻ?
\s1 Beṉəꞌ blao c̱he beṉəꞌ Izrael caꞌ cuiczə gwseꞌeneneꞌ seꞌeɉḻeꞌe c̱he Jesoꞌosənꞌ
\p
\v 22 Naꞌ Jerosalenṉəꞌ chac lṉi c̱he yoꞌodaoꞌ əblao c̱he netoꞌ beṉəꞌ Izrael deꞌen neꞌ “Dedicasion”. Naꞌ naquə tyemp zag.
\v 23 Naꞌ Jesoꞌosənꞌ chdeꞌ chaꞌašil c̱he yoꞌodaoꞌ əblaonəꞌ part deꞌen chəsəꞌəneꞌ “Chaꞌašil c̱he Salomon”.
\v 24 Naꞌ gwseꞌec̱hɉ beṉəꞌ blao c̱he ṉasyon Izrael c̱hetonꞌ Jesoꞌosənꞌ naꞌ gwseꞌeneꞌ: ―¿Bixc̱henꞌ ṉeꞌe chonoꞌ par chacžeɉlažəꞌətectoꞌ šə lenꞌ Cristənꞌ benꞌ gwleɉ Diozənꞌ par gaquəleneꞌ ṉasyon c̱hetonꞌ? Šə leꞌenəꞌ Cristənꞌ, gwna netoꞌ clar.
\p
\v 25 Naꞌ gož Jesoꞌosənꞌ ḻegaꞌaqueꞌ: ―Bagwniaꞌ leꞌe naꞌ cui cheɉḻeꞌele. Miḻagr caꞌ deꞌen babenaꞌ len yeḻəꞌ guac c̱he X̱aꞌanəꞌ chəsəꞌəloꞌen de que ḻeꞌenəꞌ bseḻeꞌe nadaꞌ.
\v 26 Naꞌ leꞌe bito cheɉḻeꞌele c̱hiaꞌ c̱hedəꞌ cui nacle txen len beṉəꞌ caꞌ chsoꞌonḻilažəꞌ nadaꞌ.
\v 27 Nombiꞌa beṉəꞌ caꞌ chsoꞌonḻilažeꞌe nadaꞌ naꞌ ḻegaꞌaqueꞌ chosoꞌozenagueꞌ c̱hiaꞌ.
\v 28 Naꞌ nadaꞌ chnežɉogaꞌacaꞌaneꞌ yeḻəꞌ mban zeɉḻicaṉe, naꞌ cuat yesəꞌəbiayiꞌe. Ni to cui no no əcaꞌax̱ax̱ɉ ḻegaꞌaqueꞌ lao naꞌanəꞌ.
\v 29 X̱aꞌanəꞌ bagwleɉeꞌ ḻegaꞌaqueꞌ par nic̱h chgüia chyegaꞌacaꞌaneꞌ. Naꞌ ni to cui no no gaquə əcaꞌax̱ax̱ɉ ḻegaꞌaqueꞌ lao naꞌ X̱aꞌanəꞌ c̱hedəꞌ napeꞌ ḻeꞌezelaogüeꞌ yeḻəꞌ chnabiaꞌ xen.
\v 30 Nadaꞌ naꞌ X̱aꞌanəꞌ tozə canꞌ naquə yic̱hɉlaꞌaždaꞌotoꞌonəꞌ, tozə canꞌ naquə yeḻəꞌ guac c̱hetoꞌonəꞌ naꞌ tozə canꞌ chontoꞌ.
\p
\v 31 Nach beṉəꞌ blao c̱he ṉasyon Izrael c̱hetonꞌ gosəꞌəziꞌe yeɉ par yosoꞌošižeꞌeneꞌen.
\v 32 Naꞌ gož Jesoꞌosənꞌ ḻegaꞌaqueꞌ: ―Deꞌe zan deꞌe güen bableꞌile benaꞌ len yeḻəꞌ guac c̱he X̱aꞌanəꞌ. ¿Nonꞌ deꞌe caꞌ babenaꞌ chonən par əgwšižəꞌəle nadaꞌ yeɉənꞌ?
\p
\v 33 Naꞌ beṉəꞌ blao caꞌ gwseꞌe ḻeꞌ: ―Caguə por ni c̱he bi deꞌe güen deꞌen babenoꞌon əgwšižəꞌətoꞌ leꞌ yeɉənꞌ, sino por ni c̱he chžia chnitoꞌo Diozənꞌ. Con beṉac̱hzə leꞌ naꞌ naoꞌ de que nacoꞌ Dioz.
\p
\v 34 Naꞌ gož Jesoꞌosənꞌ ḻegaꞌaqueꞌ: ―Leꞌe chsedle Xtižəꞌ Diozənꞌ deꞌen nyoɉ ganꞌ nan: “Nadaꞌ gwniaꞌ de que leꞌe nacle ca Dioz.”
\v 35 Naꞌ Xtižəꞌ Diozənꞌ deꞌen nyoɉən caguə deꞌe te c̱heinəꞌ. Naꞌ ḻenṉəꞌ nan de que Diozənꞌ gwneꞌ c̱he beṉəꞌ caꞌ əbnežɉueꞌ xtižeꞌenəꞌ de que gwsaꞌaqueꞌ ca Dioz.
\v 36 Ca naquə Diozənꞌ gwneꞌ zɉənaqueꞌ ca cuineꞌ, ¿bixc̱henꞌ nale de que chžia chnitaꞌa Diozənꞌ deꞌen gwniaꞌ nacaꞌ Xiꞌiṉeꞌ? Ḻeꞌenəꞌ gwleɉeꞌ nadaꞌ par gaquəlenaꞌ beṉac̱hənꞌ naꞌ bseḻeꞌe nadaꞌ yežlyo nga.
\v 37 Žaləꞌ deꞌe caꞌ chonaꞌanəꞌ bito zɉənaquən deꞌen chon X̱aꞌanəꞌ, bito šeɉḻeꞌele c̱hiaꞌ.
\v 38 Pero naꞌ deꞌen zɉənaquən deꞌen choneꞌenəꞌ, cheyaḻəꞌ šeɉḻeꞌele de que nacaꞌ Xiꞌiṉeꞌ ḻaꞌaṉəꞌəczə cui cheɉḻeꞌele xtižaꞌanəꞌ. Šə šeɉḻeꞌele c̱he deꞌe caꞌ chonaꞌanəꞌ naꞌ əṉezele de que X̱aꞌanəꞌ zoeꞌ len nadaꞌ naꞌ nadaꞌ zoaꞌ len ḻeꞌ.
\p
\v 39 Naꞌ deꞌe yoblə bosəꞌəsyeꞌ naclənꞌ gaquə ədoḻeꞌe, pero bito besyəꞌəželeneꞌ naclənꞌ soꞌoneꞌ.
\p
\v 40 Naꞌ gwsaꞌatoꞌ len Jesoꞌosənꞌ ɉəsotoꞌ yešḻaꞌalə yao Jordanṉəꞌ ganꞌ gwzo deꞌe Juanṉəꞌ antslə catəꞌən bc̱hoeꞌ beṉəꞌ nis.
\v 41 Naꞌ zan beṉəꞌ bdaꞌaqueꞌ ganꞌ zotoꞌ par bosoꞌozenagueꞌ xtižəꞌ Jesoꞌosənꞌ naꞌ gosəꞌəneꞌ c̱heꞌ: ―Ḻaꞌaṉəꞌəczə deꞌe Juanṉəꞌ ni to miḻagr cui beneꞌ, yoguəꞌəḻoḻ deꞌen gwneꞌ c̱he benga naquən deꞌe ḻi.
\p
\v 42 Naꞌ beṉəꞌ zan beṉəꞌ nitəꞌ naꞌ gwsoꞌonḻilažeꞌe Jesoꞌosənꞌ.
\c 11
\s1 Canꞌ goquə catəꞌən got benꞌ le Lac̱h
\p
\v 1-2 Naꞌ goquən chacšene to beṉəꞌ Betania beṉəꞌ le Lac̱h. Betania nanꞌ naquən laž Maria naꞌ Marta, naꞌ ḻegaꞌaqueꞌenəꞌ zɉənaqueꞌ beṉəꞌ zan Lac̱hənꞌ. Maria nga benꞌ bcuaseꞌ set zix̱ ṉiꞌa X̱ancho Jesoꞌosənꞌ naꞌ bxieꞌ ṉiꞌenəꞌ len yišəꞌ yic̱hɉeꞌenəꞌ.
\v 3 Naꞌ beṉəꞌ zan Lac̱hənꞌ bosoꞌoseḻeꞌe rson ganꞌ zo Jesoꞌosənꞌ gwseꞌeneꞌ: ―X̱antoꞌ, beꞌen chacdoꞌ c̱hei chacšeneneꞌ.
\p
\v 4 Naꞌ catəꞌ gwṉeze Jesoꞌosənꞌ naꞌ gwneꞌ: ―Yižgüeꞌ c̱heꞌenəꞌ bito naquən deꞌe gatteczeꞌ, sino par əyeꞌ Diozənꞌ yeḻəꞌ balaꞌaṉənꞌ chacšeneneꞌ naꞌ par nic̱h nadaꞌ siꞌa yeḻəꞌ balaꞌaṉ, nadaꞌ nacaꞌ Xiꞌiṉ Diozənꞌ.
\p
\v 5-6 Gwde gwṉeze Jesoꞌosənꞌ de que chacšene Lac̱hənꞌ, ṉebegaꞌaṉeꞌ yec̱hopə ža ganꞌ zoeꞌenəꞌ ḻaꞌaṉəꞌəczə chaqueneꞌ c̱he Martənꞌ, c̱he beṉəꞌ bileꞌenəꞌ naꞌ c̱he Lac̱hənꞌ.
\v 7 Nach gožeꞌ netoꞌ: ―Ḻəšoꞌo Jodeanꞌ deꞌe yoblə.
\p
\v 8 Nach gožtoꞌoneꞌ: ―Maestr, bi ža naꞌazənꞌ gwsaꞌaclažəꞌ beṉəꞌ blao c̱he ṉasyon c̱hechonꞌ yosoꞌošižeꞌe leꞌ yeɉ. ¿Enaꞌ deꞌe yoblə šeɉoꞌ naꞌanəꞌ?
\p
\v 9 Naꞌ gwna Jesoꞌosənꞌ: ―¿Ecaguə šižiṉ orənꞌ naquə težanꞌ? Beṉəꞌ chda teža bito chc̱hegüeꞌe c̱hedəꞌ laꞌ nyeꞌeniꞌinəꞌ.
\v 10 Mas beṉəꞌ chda šeꞌelə chc̱hegüeꞌe c̱hedəꞌ cuich nyeꞌeniꞌ. Caꞌaczə naquən len nadaꞌ, bito bi bi gaquə c̱hiaꞌ žlac cuiṉəꞌ əžin ža par soꞌoteꞌ nadaꞌ.
\p
\v 11 Gwde gwneꞌ caꞌ gozneꞌ netoꞌ: ―Beṉəꞌ migw c̱hecho Lac̱hənꞌ bagwtaseꞌ, naꞌ šaꞌa žɉəyesbanaꞌaneꞌ.
\p
\v 12 Naꞌ gožtoꞌoneꞌ: ―X̱antoꞌ, šə bachtaseꞌenəꞌ goyacczeneꞌ.
\p
\v 13 Jesoꞌosənꞌ gwneꞌ caꞌ c̱hedəꞌ gwṉezeneꞌ bagot Lac̱hənꞌ, naꞌ netoꞌ bentoꞌ xbab de que gwneꞌ caꞌ c̱he bišgalənꞌ.
\v 14 Nach Jesoꞌosənꞌ gwneꞌ netoꞌ clar: ―Bagot Lac̱hənꞌ.
\v 15 Naꞌ chebeidaꞌ cui gwzoaꞌ lao chacšeneneꞌ, par nic̱h ṉaꞌa gonaꞌ ca šeɉḻeꞌechle c̱hiaꞌ. Ḻeꞌe šoꞌo ganꞌ deꞌenəꞌ.
\p
\v 16 Nach beṉəꞌ lɉuežɉtoꞌ Tomasənꞌ gožeꞌ netoꞌ: ―Ḻeꞌe šoꞌo par nic̱h len chioꞌo soꞌoteꞌ šə bachsoꞌoteꞌ Jesoꞌosənꞌ.
\p Tomas naꞌanəꞌ benꞌ bosoꞌosiꞌe Didimo c̱hedəꞌ naqueꞌ beṉəꞌ cuaš.
\s1 Jesoꞌosənꞌ chosbaneꞌ beṉəꞌ guat caꞌ
\p
\v 17 Nach gwyeɉtoꞌ len Jesoꞌosənꞌ Betanianꞌ, naꞌ catəꞌ bžintoꞌonəꞌ gwseꞌ beṉəꞌ caꞌ ḻeꞌ de que bagoc tap ža bosoꞌocuašeꞌe Lac̱hənꞌ.
\v 18 Naꞌ Betanianꞌ chiꞌin gaḻəꞌəzə Jerosalenṉəꞌ ca do gašɉə ḻegw.
\v 19 Naꞌ beṉəꞌ zan beṉəꞌ Izrael gwlaž c̱hetoꞌ caꞌ žaꞌ Jerosalenṉəꞌ besəꞌəžineꞌ ganꞌ zo Martənꞌ naꞌ Marianꞌ par chsoꞌe ḻegaꞌaqueꞌ yeḻəꞌ chxenḻažəꞌ deꞌen got beṉəꞌ zangaꞌaqueꞌenəꞌ.
\v 20 Nach Martənꞌ catəꞌ gwṉezeneꞌ bazon əžintoꞌ naꞌ bchoɉeꞌ bedəšagueꞌ netoꞌ, naꞌ Marianꞌ bito bchoɉeꞌ ližgaꞌaqueꞌenəꞌ.
\v 21 Nach Martənꞌ gožeꞌ Jesoꞌosənꞌ: ―X̱anaꞌ, žaləꞌ gwzoꞌ catəꞌən gocšene beṉəꞌ zanaꞌanəꞌ bito goteꞌ žaləꞌ caꞌ.
\v 22 Pero ḻaꞌaṉəꞌ bagoteꞌ, ṉezdaꞌ de que Diozənꞌ goneꞌ bitəꞌətezə deꞌen əṉabdoꞌoneꞌ.
\p
\v 23 Nach gož Jesoꞌosənꞌ ḻeꞌ: ―Goban beṉəꞌ zanoꞌonəꞌ.
\p
\v 24 Nach Martənꞌ gožeꞌeneꞌ: ―Ṉezdaꞌ de que gobaneꞌ catəꞌən yesyəꞌəban beṉəꞌ guat caꞌ žanꞌ šoꞌo fin c̱he yežlyonꞌ.
\p
\v 25 Naꞌ gož Jesoꞌosənꞌ ḻeꞌ: ―Nadaꞌ chac chosbanaꞌ beṉəꞌ guat caꞌ naꞌ nadaꞌ nsaꞌa yeḻəꞌ mban zeɉḻicaṉe par beṉəꞌ caꞌ chsoꞌonḻilažəꞌ nadaꞌ. Deꞌe naꞌanəꞌ beṉəꞌ caꞌ chsoꞌonḻilažəꞌ nadaꞌ ḻaꞌaṉəꞌəczə saꞌateꞌ, de yeḻəꞌ mban zeɉḻicaṉe c̱hegaꞌaqueꞌ.
\v 26 Naꞌ notəꞌətezə beṉəꞌ chsoꞌonḻilažeꞌe nadaꞌ zɉənapeꞌ yeḻəꞌ mban zeɉḻicaṉe naꞌ cuat ṉabiaꞌ yeḻəꞌ gotənꞌ ḻegaꞌaqueꞌ. ¿Echeɉḻiꞌo deꞌe nga?
\p
\v 27 Naꞌ gožeꞌeneꞌ: ―X̱anaꞌ, cheɉḻiꞌa de que nacoꞌ Xiꞌiṉ Dioz. Cheɉḻiꞌa de que nacoꞌ Cristənꞌ benꞌ babseḻəꞌ Diozənꞌ yežlyo nga par gaquəleneꞌ netoꞌ.
\s1 Jesoꞌosənꞌ gwchežeꞌ choꞌa ba c̱he Lac̱hənꞌ
\p
\v 28 Beyož gwna Martənꞌ caꞌ nach beyeɉeꞌ naꞌ ɉəyeyežeꞌ Maria bileꞌenəꞌ žižizə: ―Bazaꞌ Maestrənꞌ naꞌ chṉeꞌ leꞌ.
\p
\v 29 Naꞌ Marianꞌ catəꞌ beneneꞌ canꞌ gož Martənꞌ ḻeꞌ ḻeꞌe gwzožaꞌateꞌ bideꞌ ganꞌ zotoꞌ len Jesoꞌosənꞌ.
\v 30 Naꞌ caguə babžintoꞌ lao yežənꞌ ca orənꞌ, ṉenaguəꞌətoꞌ ganꞌ bedəšag Martənꞌ netoꞌ.
\v 31 Naꞌ beṉəꞌ Jerosalen caꞌ nitəꞌ len Marianꞌ ližeꞌenəꞌ, beṉəꞌ caꞌ chsoꞌe ḻegaꞌaqueꞌ yeḻəꞌ chxenḻažəꞌ, catəꞌ besəꞌəleꞌineꞌ gwzaꞌ Marianꞌ nach gosəꞌənaogüeꞌeneꞌ chsaꞌaqueneꞌ choꞌa ba naꞌan zdeꞌ zɉəc̱hežeꞌ.
\p
\v 32 Naꞌ Marianꞌ catəꞌ bleꞌe ganꞌ zotoꞌonəꞌ bleꞌineꞌ Jesoꞌosənꞌ, naꞌ bzo xibeꞌ laogüeꞌenəꞌ naꞌ gožeꞌeneꞌ: ―X̱anaꞌ, žaləꞌ leꞌ gwzoꞌ nga catəꞌən chacšene beṉəꞌ zanaꞌanəꞌ, bito goteꞌ žaləꞌ caꞌ.
\p
\v 33 Naꞌ catəꞌ bleꞌi Jesoꞌosənꞌ chbež Marianꞌ naꞌ ḻeczə chəsəꞌəbež beṉəꞌ Jerosalen caꞌ nžagueꞌenəꞌ, deꞌe juisy deꞌe goqueneꞌ naꞌ bžaglaogüeꞌ ḻoꞌo yic̱hɉlaꞌaždaꞌogüeꞌenəꞌ.
\v 34 Naꞌ gožeꞌ ḻegaꞌaqueꞌ: ―¿Ga əbcuašəꞌəleneꞌ?
\p Naꞌ ḻegaꞌaqueꞌ gwseꞌeneꞌ: ―X̱antoꞌ, yoꞌo naꞌ leꞌidoꞌ.
\p
\v 35 Naꞌ gwchež Jesoꞌosənꞌ.
\v 36 Naꞌ gosəꞌəna beṉəꞌ Jerosalen caꞌ: ―Ḻeꞌe ggüiašc catequənꞌ chaqueneꞌ c̱heꞌ.
\p
\v 37 Naꞌ baḻə beṉəꞌ caꞌ gosəꞌəneꞌ: ―Ḻeꞌ nganꞌ beneꞌ par nic̱h bleꞌi beṉəꞌ lc̱hoḻ caꞌ. ¿Ecui gaquənꞌ žaləꞌ beneꞌ par nic̱h cui gat Lac̱hənꞌ?
\s1 Jesoꞌosənꞌ bosbaneꞌ Lac̱hənꞌ ladɉo beṉəꞌ guat caꞌ
\p
\v 38 Naꞌ deꞌe yoblə deꞌe juisy deꞌe goque Jesoꞌosənꞌ ḻoꞌo laꞌaždaogüeꞌenəꞌ. Nach yoguəꞌətoꞌ gwyeɉtoꞌ choꞌa banꞌ len Jesoꞌosənꞌ. Naꞌ banꞌ naquən to bloɉ naꞌ daꞌ to yeɉ choꞌinəꞌ.
\v 39 Nach gož Jesoꞌosənꞌ: ―Ḻecaꞌa yeɉənꞌ.
\p Naꞌ Mart zan deꞌe beṉəꞌ guatənꞌ gožeꞌeneꞌ: ―X̱anaꞌ, bachḻaꞌ benꞌ zban, laꞌ bac̱h goc tap ža ṉaꞌa goteꞌ.
\p
\v 40 Naꞌ gož Jesoꞌosənꞌ ḻeꞌ: ―Bagwniaꞌ leꞌ šə chonḻilažoꞌo nadaꞌ nach šeɉniꞌidoꞌ bi zeɉe ca deꞌen gwloꞌe Diozənꞌ yeḻəꞌ guac xen c̱heꞌenəꞌ.
\p
\v 41 Nach beṉəꞌ caꞌ gosəꞌəqueꞌe yeɉənꞌ. Naꞌ Jesoꞌosənꞌ gwḻis laogüeꞌen yobalə gwneꞌ: ―X̱aꞌ, chox̱cwlenoꞌ babzenagoꞌ c̱hiaꞌ.
\v 42 Nadaꞌ ṉezdaꞌ de que syempr chzenagoꞌ c̱hiaꞌ. Pero əniaꞌ caꞌ par nic̱h beṉəꞌ caꞌ žaꞌ nga seꞌeɉḻeꞌe de que lenꞌ əbseḻoꞌo nadaꞌ.
\p
\v 43 Naꞌ beyož gwneꞌ caꞌ lao orasyonṉəꞌ, beḻgüižeꞌ deꞌe beṉəꞌ guatənꞌ gwṉeꞌ zižɉo gožeꞌeneꞌ: ―Lac̱h bechoɉ.
\p
\v 44 Nach ḻeꞌe bechoɉte Lac̱hənꞌ, zɉəncheləyoy ṉiꞌa neꞌe caꞌ cint de lachəꞌ naꞌ to bey nazɉə laogüeꞌenəꞌ. Naꞌ gož Jesoꞌosənꞌ ḻegaꞌaqueꞌ: ―Ḻeꞌe yozašeꞌ lachəꞌənəꞌ naꞌ ḻeꞌe gwsaneꞌ yeyeɉeꞌ.
\s1 Bosoꞌoxiꞌe yesəꞌəzeneꞌ Jesoꞌosənꞌ
\p
\v 45 Naꞌ zan beṉəꞌ Jerosalen caꞌ beṉəꞌ caꞌ zɉaꞌac len Marianꞌ besəꞌəleꞌineꞌ miḻagr deꞌen ben Jesoꞌosənꞌ naꞌ gwsoꞌonḻilažeꞌe ḻeꞌ.
\v 46 Pero baḻeꞌ ɉaꞌaqueꞌ lao beṉəꞌ fariseo caꞌ ɉseꞌežeꞌ ḻegaꞌaqueꞌ canꞌ beneꞌ bosbaneꞌ Lac̱hənꞌ.
\v 47 Nach bx̱oz əblao c̱he ṉasyon Izrael c̱hetonꞌ naꞌ beṉəꞌ fariseo caꞌ besəꞌətobeꞌ yoguəꞌəḻoḻ beṉəꞌ caꞌ chəsəꞌənabiaꞌ ṉasyon c̱hetonꞌ. Nach bosoꞌoxiꞌe gosəꞌəneꞌ: ―¿Naclə gonchonꞌ? laꞌ miḻagr zanṉəꞌ chon benga.
\v 48 Laꞌ šə gaquecho lɉoyeꞌenəꞌ, yoguəꞌ beṉəꞌ soꞌonḻilažeꞌe ḻeꞌ, nach daꞌac beṉəꞌ ṉasyon Roma naꞌ yosoꞌožiayeꞌe yoꞌodaoꞌ əblao c̱hecho nga naꞌ len ṉasyon c̱hechonꞌ.
\p
\v 49 Entr beṉəꞌ golə beṉəꞌ blao caꞌ toeꞌ le Caifas naꞌ naquəcheꞌ bx̱oz əblao ca izənꞌ. Naꞌ gožeꞌ ḻegaꞌaqueꞌ: ―Leꞌe caguə bi ṉezelenꞌ.
\v 50 Nic chonḻe xbab de que napən chioꞌo cuentənꞌ tozə benꞌ gotcho lguaꞌa cuiayiꞌ yoguəꞌəcho len ṉasyon c̱hecho nga.
\p
\v 51 Caifasənꞌ naquəcheꞌ bx̱oz əblao ca izənꞌ naꞌ caguə con gwneꞌ caꞌ to gwlazzeꞌenəꞌ. Dioz nanꞌ beneꞌ par gwdix̱ɉuiꞌe de que soꞌoteꞌ Jesoꞌosənꞌ por ṉasyon Izrael c̱hetoꞌonəꞌ.
\v 52 Naꞌ caguə soꞌoteꞌeneꞌ par ṉasyon c̱hetoꞌ naꞌazənəꞌ. Ḻeczə soꞌoteꞌeneꞌ par nic̱h yoguəꞌ beṉəꞌ caꞌ bagwleɉ Diozənꞌ par əqueꞌe ca xiꞌiṉeꞌ gatəꞌətezə ṉasyon, yesyəꞌəyaqueꞌ tozə soꞌelaogüeꞌeneꞌ.
\v 53 Naꞌ ža naꞌ gwzolao bosoꞌoxiꞌe naclənꞌ soꞌoneꞌ par soꞌoteꞌeneꞌ.
\p
\v 54 Naꞌ deꞌe nanꞌ bitoch gwda Jesoꞌosənꞌ zaquəꞌəlao entr beṉəꞌ gwlaž c̱hetoꞌ caꞌ. Naꞌ gwzaꞌatoꞌ gwyeɉtoꞌ to yež deꞌen nziꞌ Efrain, chiꞌin gaḻəꞌəzə latɉə dašənꞌ. Naꞌ gwzotoꞌ naꞌ len ḻeꞌ.
\p
\v 55 Naꞌ lṉi pascw c̱he netoꞌ beṉəꞌ Izrael bazon baozə. Naꞌ beṉəꞌ zan beṉəꞌ zaꞌac to to yež ɉaꞌaqueꞌ Jerosalenṉəꞌ antslə zeꞌe gaḻəꞌ lṉi pasconꞌ par gwsoꞌon cuingaꞌaqueꞌ xiꞌilažəꞌ canꞌ na ḻei c̱hetoꞌonəꞌ.
\v 56 Naꞌ besyəꞌəyilɉeꞌ Jesoꞌosənꞌ, naꞌ ca niteꞌe chyoꞌo yoꞌodaoꞌ əblao c̱hetonꞌ gwseꞌe lɉuežɉeꞌ: ―¿Bi xbab chontguale? ¿əgüideꞌ lṉi nga?
\p
\v 57 Gosəꞌəneꞌ caꞌ c̱hedəꞌ bx̱oz əblao c̱he ṉasyon Izrael c̱hetonꞌ naꞌ beṉəꞌ fariseo caꞌ bagwsoꞌoneꞌ mendad de que notəꞌətezə beṉəꞌ əṉezeneꞌ ganꞌ zo Jesoꞌosənꞌ gwzeneneꞌ ḻegaꞌaqueꞌ par nic̱h yesəꞌəzeneꞌeneꞌ.
\c 12
\s1 Marianꞌ chgüeꞌe set zix̱ ṉiꞌa Jesoꞌosənꞌ
\p
\v 1 Naꞌ x̱op ža antslə lṉi pasconꞌ, gwyeɉlentoꞌ Jesoꞌosənꞌ Betanianꞌ ganꞌ zo Lac̱hənꞌ benꞌ bosbaneꞌ ladɉo beṉəꞌ guat caꞌ.
\v 2 Naꞌ baḻə beṉəꞌ Betania caꞌ bosoꞌosiꞌiniꞌe to xšeꞌ par Jesoꞌosənꞌ, naꞌ Martənꞌ bdieꞌ deꞌen güeꞌeɉ gwdaotoꞌ len ḻeꞌ. Naꞌ Lac̱hənꞌ chiꞌe choꞌa mesənꞌ txen len Jesoꞌosənꞌ naꞌ len netoꞌ naꞌ beṉəꞌ caꞌ yeḻaꞌ.
\v 3 Naꞌ Marianꞌ de tya set zix̱ c̱heꞌ deꞌe zaquəꞌəchgüei naꞌ gwloꞌen ṉiꞌa Jesoꞌosənꞌ. Naꞌ bxieꞌ ṉiꞌenəꞌ len yišəꞌ yic̱hɉeꞌenəꞌ. Naꞌ doxen yoꞌonəꞌ gwḻaꞌachgua ze set zix̱ənꞌ gwloꞌe ṉiꞌenəꞌ.
\v 4 Naꞌ zo Jod Iscariotənꞌ, benꞌ naquə netoꞌ txen. Ḻeꞌenəꞌ banaquən əgwdieꞌ Jesoꞌosənꞌ lao naꞌ beṉəꞌ caꞌ chəsəꞌəgueꞌi ḻeꞌ. Jodənꞌ naqueꞌ xiꞌiṉ to beṉəꞌ le Simon. Naꞌ Jodənꞌ gwneꞌ:
\v 5 ―¿Bixc̱henꞌ cui beteꞌe set zix̱ nga? Zaquəꞌən do tmil gueyəꞌ gueyoa. Naꞌ mechənꞌ deꞌen leꞌineꞌ c̱hei əgwnežɉueꞌen beṉəꞌ yašəꞌ žaləꞌ caꞌ.
\p
\v 6 Jodənꞌ beneꞌ xbabənꞌ caꞌ caguə por ni c̱he beyašeꞌeneꞌ beṉəꞌ yašəꞌ caꞌ sino por ni c̱he naqueꞌ beṉəꞌ bguan. Ḻenꞌ bex̱eꞌe mech deꞌen bc̱hin yoguəꞌətoꞌ naꞌ gwleɉlaneꞌ mechənꞌ.
\v 7 Nach Jesoꞌosənꞌ gožeꞌeneꞌ: ―Lɉoyeꞌenəꞌ. Babeneꞌ deꞌen non goneneꞌ nadaꞌ žanꞌ əgašaꞌanəꞌ.
\v 8 Ca naquə beṉəꞌ yašəꞌ caꞌ, syempr nitəꞌəczeꞌ len leꞌe, pero nadaꞌ caguə syempr soaꞌ len leꞌe.
\s1 Bx̱oz əblao caꞌ bosoꞌoxiꞌe soꞌoteꞌ Lac̱hənꞌ
\p
\v 9 Naꞌ beṉəꞌ zan beṉəꞌ Izrael gwlaž c̱hetonꞌ gwsaꞌacbeꞌineꞌ de que Jesoꞌosənꞌ zoeꞌ naꞌ. Naꞌ ɉaꞌaqueꞌ, pero caguə por ni c̱he Jesoꞌos naꞌazənꞌ, sino par besəꞌəleꞌineꞌ Lac̱hənꞌ, benꞌ bosban Jesoꞌosənꞌ ladɉo beṉəꞌ guat caꞌ.
\v 10 Naꞌ bx̱oz əblao c̱he ṉasyon c̱hetonꞌ ḻeczə bosoꞌoxiꞌe soꞌoteꞌ len Lac̱hənꞌ,
\v 11 c̱hedəꞌ beṉəꞌ zan beṉəꞌ Izrael gwlaž c̱hetonꞌ ɉaꞌaqueꞌ naꞌ gwsoꞌonḻilažeꞌe Jesoꞌosənꞌ por ni c̱he ḻeꞌ.
\s1 Jesoꞌosənꞌ beyoꞌe Jerosalenṉəꞌ
\p
\v 12 Naꞌ beteyo gwzaꞌatoꞌ Betanianꞌ len Jesoꞌosənꞌ naꞌ gwyeɉtoꞌ Jerosalenṉəꞌ. Naꞌ ca orənꞌ beṉəꞌ zan chəsəꞌəžag Jerosalenṉəꞌ beṉəꞌ zɉaꞌac lṉi pasconꞌ. Naꞌ gosəꞌəṉezeneꞌ de que Jesoꞌosənꞌ yežineꞌ Jerosalenṉəꞌ.
\v 13 Naꞌ deꞌe naꞌanəꞌ besəꞌəchoɉeꞌ bedəsəꞌəlezeꞌ netoꞌ, zɉənox̱eꞌe no zin, naꞌ chəsəꞌəgüeꞌe beꞌ lban c̱heꞌ chəsəꞌəneꞌ: ―Leꞌ nacoꞌ Rei c̱he ṉasyon Izrael c̱hechonꞌ, goclenšga netoꞌ. Sošgoꞌ mbalaz leꞌ bazaꞌo nga, babseḻəꞌ X̱ancho Diozənꞌ leꞌ.
\p
\v 14 Naꞌ bžel to borr daoꞌ bia gwžia Jesoꞌosənꞌ lao zdeꞌ. Goc canꞌ nyoɉczən nan:
\q1
\v 15 Leꞌe žaꞌale Jerosalenṉəꞌ bito žeble.
\q1 Ḻeꞌe ggüiašc bazaꞌ Rei c̱helenꞌ žieꞌ to borr daoꞌ.
\p
\v 16 Naꞌ netoꞌ disipl c̱heꞌ bito gwyeɉniꞌitoꞌ categazə de que goc c̱heꞌ con canꞌ bosoꞌozoɉ deꞌe profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ. Gwde gwsoꞌot beṉəꞌ Jesoꞌosənꞌ naꞌ Diozənꞌ beꞌeneꞌ yeḻəꞌ balaꞌaṉ xen, naꞌ cananꞌ ɉəyezaꞌalažəꞌətoꞌ dižəꞌ caꞌ zɉənyoɉ c̱heꞌ naꞌ gocbeꞌitoꞌ gwsoꞌoneꞌeneꞌ ḻeꞌ canꞌ nyoɉənṉəꞌ.
\p
\v 17 Beṉəꞌ caꞌ gwnitəꞌ len Jesoꞌosənꞌ catəꞌən boḻgüižeꞌ Lac̱hənꞌ naꞌ bosbaneꞌeneꞌ par bechoɉeꞌ ḻoꞌo banꞌ gwsoꞌe dižəꞌ len beṉəꞌ caꞌ žaꞌ syodanꞌ canꞌ beneꞌenəꞌ.
\v 18 Deꞌe naꞌanəꞌ bedəsəꞌəlezeꞌeneꞌ c̱hedəꞌ gosəꞌəṉezeneꞌ ca miḻagr deꞌen beneꞌ.
\v 19 Naꞌ gosəꞌəna beṉəꞌ fariseo caꞌ entr ḻegaꞌaqueꞌ: ―Bachleꞌile cuiczə bi de gonchonꞌ. Yoguəꞌ beṉac̱hənꞌ zɉəsəꞌənao ḻeꞌ.
\s1 To c̱hopə beṉəꞌ griego gwseꞌeneneꞌ əsoꞌeleneꞌ Jesoꞌosənꞌ dižəꞌ
\p
\v 20 Naꞌ zɉəlen baḻəꞌ beṉəꞌ griego, beṉəꞌ ɉaꞌac lṉinəꞌ par gwsoꞌelaogüeꞌe Diozənꞌ.
\v 21 Beṉəꞌ quinga besəꞌəžineꞌ ganꞌ zo Lip beṉəꞌ Betsaida distrit c̱he Galileanꞌ. Naꞌ gwsaꞌatəꞌəyoineꞌ Lipənꞌ gwseꞌeneꞌ: ―Gwziꞌixenšga, cheneꞌetoꞌ güeꞌelentoꞌ Jesoꞌosənꞌ dižəꞌ.
\p
\v 22 Nach gwyeɉ Lipənꞌ ɉəyeꞌ Ndresənꞌ. Nach Ndresənꞌ len Lipənꞌ ɉəsəꞌəyeꞌ Jesoꞌosənꞌ.
\v 23 Nach Jesoꞌosənꞌ gožeꞌ ḻegaꞌaqueꞌ: ―Ṉaꞌa bachžin ža soꞌot beṉəꞌ nadaꞌ par nic̱h Diozənꞌ goṉeꞌ nadaꞌ yeḻəꞌ balaꞌaṉ xen. Ḻenꞌ bseḻeꞌe nadaꞌ golɉaꞌ beṉac̱h.
\v 24 Deꞌe ḻi əchniaꞌ leꞌe, šə to trigonꞌ cui yexiṉɉən catəꞌ əxopən lao yonꞌ, chegaꞌaṉczə tozən, pero šə yexiṉɉən naꞌ yelaꞌan, deꞌe zan trigonꞌ yeyaquən.
\v 25 Notəꞌətezə beṉəꞌ chaqueneꞌ goneꞌ par nic̱h cui c̱hiꞌ saqueꞌe o par nic̱h cui no soꞌot ḻeꞌ, beꞌenanꞌ cuiayiꞌ. Naꞌ notəꞌətezə beṉəꞌ chsanḻažəꞌ cuineꞌ c̱hiꞌ saqueꞌe o soꞌot beṉəꞌ ḻeꞌ por ni c̱hiaꞌ, bade yeḻəꞌ mban zeɉḻicaṉe c̱heꞌenəꞌ.
\v 26 Naꞌ notəꞌətezə beṉəꞌ cheneꞌeneꞌ goneꞌ xšinaꞌanəꞌ, c̱heyaḻəꞌ gonḻilažeꞌe nadaꞌ naꞌ gwzenagueꞌ c̱hiaꞌ. Naꞌ gaꞌan soaꞌ naꞌ so benꞌ gon xšinaꞌanəꞌ. Naꞌ beṉəꞌ caꞌ soꞌon xšinaꞌanəꞌ, X̱aꞌanəꞌ güeꞌe ḻegaꞌaqueꞌ yeḻəꞌ balaꞌaṉ.
\s1 Jesoꞌosənꞌ gwdix̱ɉueꞌe de que soꞌot beṉəꞌ ḻeꞌ
\p
\v 27 Bachžaglaoguaꞌ ḻoꞌo yic̱hɉlaꞌaždaoguaꞌanəꞌ. ¿Echaquele ṉabdaꞌ X̱aꞌanəꞌ yosleꞌ nadaꞌ lao deꞌe caꞌ zeꞌe gaquə c̱hiaꞌ ṉaꞌa? Abi. Babidaꞌ par nic̱h gaquəczə c̱hiaꞌ caꞌanəꞌ.
\p
\v 28 Nach beneꞌ orasyonṉəꞌ gwneꞌ: ―X̱aꞌ, ben par nic̱h leꞌ siꞌichoꞌ yeḻəꞌ balaꞌaṉ.
\p Nach Diozənꞌ benꞌ zo yobanꞌ gwṉeꞌ gožeꞌeneꞌ: ―Babenaꞌ ca gwxiꞌa yeḻəꞌ balaꞌaṉ, naꞌ zeꞌe gonchaꞌ ca siꞌichaꞌanṉəꞌ.
\p
\v 29 Beṉəꞌ zan zɉənžagueꞌ netoꞌ ca orənꞌ naꞌ catəꞌ gwseꞌeneneꞌ deꞌen gwna Diozənꞌ, baḻeꞌ gosəꞌəneꞌ de que gwṉinṉəꞌ. Naꞌ yebaḻeꞌ gosəꞌəneꞌ: ―To anglənꞌ əgwṉe ḻeꞌ.
\p
\v 30 Naꞌ Jesoꞌosənꞌ gožeꞌ netoꞌ: ―Diozənꞌ gwṉeꞌ nadaꞌ zižɉo caguə par nic̱h nadaꞌ əṉezdaꞌ de que chzenagueꞌ c̱hiaꞌanəꞌ, sino par nic̱h əṉeze leꞌenəꞌ.
\v 31 Bachžin ža catəꞌ Diozənꞌ əgwnežɉueꞌ castigw zeɉḻicaṉe c̱he beṉəꞌ caꞌ cui zɉənombiaꞌ ḻeꞌ. Naꞌ bachžin ža catəꞌ gwxiyeꞌenəꞌ deꞌen chnabiaꞌ beṉəꞌ caꞌ cui zɉənombiaꞌ Diozənꞌ nit yeḻəꞌ gwnabiaꞌ c̱heinəꞌ.
\v 32 Naꞌ catəꞌ gwsoꞌoteꞌ nadaꞌ ḻeꞌe yag corozənꞌ, gonaꞌ par nic̱h yoguəꞌəḻoḻ beṉəꞌ bagwleɉ Diozənꞌ par əsaꞌaqueꞌ xiꞌiṉeꞌ soꞌonḻilažeꞌe nadaꞌ.
\p
\v 33 Naꞌ deꞌe nganꞌ gwneꞌ chzeɉniꞌineꞌ netoꞌ de que soꞌot beṉəꞌ ḻeꞌ yosoꞌodeꞌeneꞌ to ḻeꞌe yag coroz.
\v 34 Nach baḻə beṉəꞌ zan caꞌ žaꞌanəꞌ gwseꞌeneꞌ: ―Netoꞌ babenetoꞌ chosoꞌosed chosoꞌoloꞌi beṉəꞌ canꞌ na Xtižəꞌ Diozənꞌ deꞌen nyoɉən, naꞌ ṉezetoꞌ nan de que Cristənꞌ benꞌ gwleɉ Diozənꞌ par gaquəleneꞌ ṉasyon c̱hechonꞌ soeꞌ zeɉḻicaṉe. Naꞌ leꞌ naoꞌ de que Diozənꞌ bseḻeꞌe leꞌ golɉoꞌ beṉac̱h. ¿Bixc̱henꞌ naoꞌ leꞌ de que soꞌot beṉəꞌ leꞌ to ḻeꞌe yag coroz? ¿Ebseḻəꞌ Diozənꞌ leꞌ golɉoꞌ beṉac̱h?
\p
\v 35 Nach Jesoꞌosənꞌ gožeꞌ ḻegaꞌaqueꞌ: ―Nadaꞌ zaꞌa par əchguaꞌa beꞌeniꞌ ḻoꞌo yic̱hɉlaꞌaždaoꞌ beṉac̱hənꞌ. Naꞌ yeto term daꞌoganꞌ soaꞌ par əgwsed əgwloꞌidaꞌ leꞌe. Ḻeꞌe šeɉḻeꞌ xtižaꞌanəꞌ žlac ṉeꞌe de latɉə par nic̱h cui cuiayiꞌile zeɉḻicaṉe. Beṉəꞌ caꞌ cui chseꞌeɉḻeꞌe xtižaꞌanəꞌ bito chsaꞌacbeꞌineꞌ de que yesəꞌəbiayiꞌe. Zɉənaqueꞌ ca to beṉəꞌ chda ganꞌ naquə žc̱hoḻ naꞌ bito chacbeꞌineꞌ ganꞌ chdeꞌ.
\v 36 Ḻeꞌe gonḻilažəꞌ nadaꞌ ṉaꞌa žlac ṉeꞌe de latɉə par nic̱h šoꞌo beꞌeniꞌ c̱hianꞌ ḻoꞌo yic̱hɉlaꞌaždaꞌolenꞌ naꞌ par nic̱h əgwnežɉwle beꞌeniꞌ c̱he yeziquəꞌəchlə beṉəꞌ. Gwde gwna Jesoꞌosənꞌ caꞌ bezeꞌe bocuašeꞌeneꞌ ḻegaꞌaqueꞌ.
\s1 Zan beṉəꞌ Izrael caꞌ bito gwsoꞌonḻilažeꞌe Jesoꞌosənꞌ
\p
\v 37 Ḻaꞌaṉəꞌəczə besəꞌəleꞌi beṉəꞌ Izrael gwlaž c̱hetonꞌ ben Jesoꞌosənꞌ zan miḻagr, casi yogueꞌe bito gwsoꞌonḻilažeꞌeneꞌ.
\v 38 Naꞌ deꞌen goc caꞌ goc complir canꞌ bzoɉ deꞌe profet Isaiazənꞌ benꞌ beꞌ xtižəꞌ Diozənꞌ canaꞌ, nan:
\q1 X̱antoꞌ, casi notono no chosoꞌozenag dižəꞌ deꞌen chyix̱ɉueꞌetoꞌonəꞌ.
\q1 Naꞌ casi notono chsaꞌacbeꞌi de que babesəꞌəleꞌineꞌ bloꞌo yeḻəꞌ guac c̱hioꞌonəꞌ.
\m
\v 39 Bito goquə seꞌeɉḻeꞌe, c̱hedəꞌ chac c̱hegaꞌaqueꞌ canꞌ na yeto deꞌen bzoɉ deꞌe profet Isaiazənꞌ, nan:
\q1
\v 40 Diozənꞌ babeneꞌ par nic̱h nažɉo yic̱hɉlaꞌaždaoꞌ beṉəꞌ quinga naꞌ par nic̱h zɉənaqueꞌ beṉəꞌ godenag.
\q1 Babeneꞌ par nic̱h chəsəꞌəleꞌineꞌ pero cabi chsaꞌacbeꞌineꞌ bi zeɉen deꞌen chəsəꞌəleꞌineꞌenəꞌ,
\q1 naꞌ chseꞌeneneꞌ pero bito chseꞌeɉniꞌineꞌ bi zeɉen deꞌen chseꞌeneneꞌenəꞌ.
\q1 Gosyəꞌədiṉɉlɉei xtoḻəꞌəgaꞌaqueꞌenə naꞌ gwsoꞌelɉeꞌ latɉə yocobə Diozənꞌ yic̱hɉlaꞌaždaꞌogaꞌaqueꞌenəꞌ žaləꞌ chseꞌeɉniꞌineꞌen naꞌ žaləꞌ chsaꞌacbeꞌineꞌ bi zeɉen.
\m
\v 41 Deꞌe quinga gwna deꞌe profet Isaiazənꞌ c̱hedəꞌ bleꞌineꞌ yeḻəꞌ chey cheꞌeniꞌ c̱he Jesoꞌosənꞌ naꞌ beꞌe dižəꞌ c̱heꞌ.
\p
\v 42 Ḻaꞌaṉəꞌəczə beṉəꞌ zanch lao ṉasyon Izrael c̱hetonꞌ bito gwseꞌeɉḻeꞌe c̱he Jesoꞌosənꞌ, biaꞌaczə zaneꞌ gwsoꞌonḻilažeꞌeneꞌ, naꞌ len no beṉəꞌ gwnabiaꞌ c̱hetoꞌ caꞌ. Pero naꞌ bito gwsoꞌe dižəꞌ de que chsoꞌonḻilažeꞌeneꞌ c̱hedəꞌ besəꞌəžebeꞌ cabich əsoꞌe beṉəꞌ fariseo caꞌ latɉə par soꞌe ḻoꞌo yoꞌodaꞌonəꞌ.
\v 43 Gwseꞌencheneꞌ soꞌe beṉac̱hənꞌ ḻegaꞌaqueꞌ yeḻəꞌ balaꞌaṉ cle ca soꞌoneꞌ ca güeꞌ Diozənꞌ ḻegaꞌaqueꞌ yeḻəꞌ balaꞌaṉ.
\s1 Xtižəꞌ Jesoꞌosənꞌ zɉənaquən deꞌe žialao xen
\p
\v 44 Naꞌ Jesoꞌosənꞌ gwṉeꞌ zižɉo gožeꞌ ḻegaꞌaqueꞌ: ―Beṉəꞌ caꞌ chsoꞌonḻilažəꞌ nadaꞌ caguə nadəꞌəzanꞌ chsoꞌonḻilažeꞌe sino lenczə X̱aꞌanəꞌ benꞌ əbseḻəꞌ nadaꞌ.
\v 45 Benꞌ chleꞌi nadaꞌ ḻeczə chleꞌineꞌ X̱aꞌanəꞌ benꞌ bseḻəꞌ nadaꞌ.
\v 46 Nadaꞌ zaꞌa yežlyo nga par nic̱h chguaꞌa beꞌeniꞌ ḻoꞌo yic̱hɉlaꞌaždaoꞌ beṉəꞌ caꞌ chsoꞌonḻilažəꞌ nadaꞌ. Chguaꞌa beꞌeniꞌ ḻoꞌo yic̱hɉlaꞌaždaꞌogaꞌaqueꞌenəꞌ par nic̱h cuich soꞌontezə soꞌoneꞌ deꞌe malənꞌ.
\v 47 Naꞌ notəꞌətezə beṉəꞌ chseꞌene xtižaꞌanəꞌ naꞌ bito chosoꞌozenagueꞌ c̱hei caguə nadaꞌ c̱hoglaoguaꞌan c̱hegaꞌaqueꞌ de que zɉənapeꞌ doḻə, c̱hedəꞌ bito zaꞌa yežlyo nga par nic̱h c̱hoglaoguaꞌan c̱he beṉac̱hənꞌ de que zɉənapeꞌ doḻəꞌ sino par nic̱h gonaꞌ ca cui žɉəyaꞌaqueꞌ lao yiꞌ gabiḻənꞌ šə soꞌonḻilažeꞌe nadaꞌ.
\v 48 Xtižaꞌanəꞌ deꞌen babiꞌa len ḻegaꞌaqueꞌ c̱hoglaon c̱hegaꞌaqueꞌ de que zɉənapeꞌ doḻəꞌ c̱hedəꞌ bito chseꞌeɉḻeꞌe c̱hiaꞌ naꞌ nic chosoꞌozenagueꞌ c̱he xtižaꞌanəꞌ. C̱hoglaon c̱hegaꞌaqueꞌ de que zɉənapeꞌ doḻəꞌ catəꞌ əžin ža šoꞌo fin c̱he yežlyonꞌ.
\v 49 Dižəꞌ deꞌen babiꞌanəꞌ bito biꞌan deꞌe biaꞌazəlažaꞌa. X̱aꞌanəꞌ bseḻeꞌe nadaꞌ naꞌ ḻeꞌenəꞌ noneꞌ mendad binꞌ cheyaḻəꞌ niaꞌ naꞌ binꞌ əgwsed əgwloꞌidaꞌ beṉəꞌ.
\v 50 Naꞌ notəꞌətezə beṉəꞌ yosoꞌozenag c̱he xtižəꞌ X̱aꞌanəꞌ deꞌen noneꞌ mendad choꞌelenaꞌ beṉac̱hənꞌ, əgwnežɉueꞌ yeḻəꞌ mban zeɉḻicaṉe c̱hegaꞌaqueꞌ. Deꞌe naꞌanəꞌ choꞌelenaꞌ leꞌe dižəꞌ con canꞌ bagwna X̱aꞌanəꞌ.
\c 13
\s1 Gwdib Jesoꞌosənꞌ ṉiꞌa disipl c̱heꞌ caꞌ
\p
\v 1 Naꞌ ca naquə Jesoꞌosənꞌ, bedote chaqueneꞌ c̱he netoꞌ chonḻilažəꞌətoꞌ ḻeꞌ yežlyo nga. Naꞌ ṉezeneꞌ de que bachžin ža yezeꞌe yežlyo nga par yeyeɉeꞌ ganꞌ zo X̱eꞌenəꞌ. Deꞌe naꞌanəꞌ catəꞌ zeꞌe zaꞌalə lṉi pasconꞌ bloꞌicheneꞌ netoꞌ canꞌ ḻechguaḻe chaqueneꞌ c̱hetoꞌ.
\p
\v 2 Naꞌ bac̱h gwloꞌo gwxiyeꞌenəꞌ xbabənꞌ ḻoꞌo yic̱hɉlaꞌaždaoꞌ Jod Iscariot xiꞌiṉ Simonṉəꞌ par əgwdieꞌ Jesoꞌosənꞌ lao naꞌ beṉəꞌ contr c̱heꞌ caꞌ.
\v 3 Naꞌ ṉeze Jesoꞌosənꞌ de que X̱eꞌenəꞌ babeneꞌ par nic̱h napeꞌ ḻeꞌezelaogüe yeḻəꞌ chnabiaꞌ xen, naꞌ ṉezeneꞌ de que ganꞌ zo Dioz nanꞌ gwzeꞌe naꞌ ganꞌ zo Dioz nanꞌ yeyeɉeꞌ.
\v 4 Naꞌ lao chaotoꞌ xšeꞌenəꞌ Jesoꞌosənꞌ gwzožeꞌe naꞌ gwcuaꞌa xadoṉ c̱heꞌenəꞌ naꞌ gwxiꞌe to lachəꞌ naꞌ bc̱heɉeꞌen lsineꞌenəꞌ.
\v 5 Nach gwxiꞌe nisənꞌ gwdeꞌen to ḻoꞌo šaꞌ naꞌ gwzolaogüeꞌ gwdibeꞌ ṉiꞌatoꞌonəꞌ ca to mos. Naꞌ bosbižeꞌ ṉiꞌatoꞌonəꞌ len lachənꞌ deꞌe ncheɉ lsineꞌenəꞌ.
\p
\v 6 Naꞌ catəꞌ bžineꞌ ganꞌ chiꞌ Simon Bedənꞌ, Bedənꞌ gožeꞌ ḻeꞌ: ―X̱anaꞌ ¿əleꞌ c̱hiboꞌ ṉiꞌanəꞌ?
\p
\v 7 Naꞌ gož Jesoꞌosənꞌ ḻeꞌ: ―Deꞌe nga chonaꞌ cabi cheɉniꞌidoꞌon ṉaꞌa, pero gwyeɉniꞌidoꞌon telə.
\p
\v 8 Naꞌ gož Bedənꞌ ḻeꞌ: ―Leꞌ cuat c̱hiboꞌ ṉiꞌanəꞌ.
\p Naꞌ Jesoꞌosənꞌ gožeꞌeneꞌ: ―Šə cui gaꞌa c̱hibaꞌ leꞌ caguə lenoꞌ nadaꞌanəꞌ.
\p
\v 9 Naꞌ Bedənꞌ gožeꞌeneꞌ: ―X̱anaꞌ caguə ṉiꞌa naꞌazənꞌ, sino doxenczaꞌ.
\p
\v 10 Nach gož Jesoꞌosənꞌ ḻeꞌ: ―Beṉəꞌ nošəꞌ nazɉə, ṉiꞌe naꞌazə chyažɉe c̱hibeꞌ, laꞌ banaquəczə doxen cuerp c̱heꞌenəꞌ xiꞌilažəꞌ. Ca naquə leꞌe ža, naquəczle xiꞌilažəꞌ ḻaꞌaṉəꞌəczə caguə yoguəꞌəle.
\p
\v 11 Jesoꞌosənꞌ ṉezeneꞌ nonꞌ əgwde ḻeꞌ lao naꞌ beṉəꞌ contr c̱heꞌ caꞌ, naꞌ deꞌe naꞌanəꞌ gwneꞌ: “Caguə yoguəꞌəle nacle xiꞌilažəꞌ”, naꞌ zeɉen caguə yoguəꞌətoꞌ naquətoꞌ beṉəꞌ laꞌaždaoꞌ xiꞌilažəꞌ.
\p
\v 12 Naꞌ catəꞌ beyož gwdibeꞌ ṉiꞌatoꞌonəꞌ, naꞌ beyaz xadoṉ c̱heꞌenəꞌ naꞌ bebiꞌe deꞌe yoblə choꞌa mesənꞌ. Naꞌ gožeꞌ netoꞌ: ―¿Echeɉniꞌile bi zeɉen deꞌen babenaꞌ len leꞌe?
\v 13 Deꞌe nga zeɉen. Leꞌe nsiꞌile nadaꞌ Maestr naꞌ X̱anḻe, naꞌ güenczənꞌ nale c̱hedəꞌ canꞌ nacaꞌ.
\v 14 Naꞌ nadaꞌ nacaꞌ X̱anḻenꞌ naꞌ nactiaꞌ Maestr c̱helenꞌ bagwdibaꞌ ṉiꞌalenꞌ ca to mos, deꞌe naꞌanə leꞌe ḻeczə cheyaḻəꞌ gaquəlen lɉuežɉle ca to mos.
\v 15 Bagwdibaꞌ ṉiꞌalenꞌ parzə nic̱h gwloꞌidaꞌ leꞌe de que cheyaḻəꞌ gonḻe canꞌ babenaꞌanəꞌ.
\v 16 Deꞌe ḻi əchniaꞌ leꞌe notəꞌətezə mos bito naqueꞌ blaoch ca x̱aneꞌenəꞌ, ni benꞌ cheɉ mendadənꞌ cui naqueꞌ blaoch ca benꞌ chseḻəꞌ ḻeꞌ.
\v 17 Šə cheɉniꞌile deꞌe quinga naꞌ gonḻe canꞌ niaꞌanəꞌ, nachənꞌ sole mbalaz.
\p
\v 18 Caguə niaꞌ caꞌ c̱he yoguəꞌəlenꞌ. Nadaꞌ ṉezdaꞌ nac naquə yic̱hɉdaꞌaždaoꞌ leꞌe bagwleɉaꞌ par nacle disipl c̱hiaꞌ. Pero naꞌ gwleɉaꞌ leꞌe par nic̱h gaquə complir canꞌ na Xtižəꞌ Diozənꞌ deꞌen nyoɉən nan: “Beꞌen gwdaolenaꞌ txen bableɉ bšošɉeꞌ nadaꞌ.”
\v 19 Nadaꞌ əchniaꞌ leꞌe deꞌe nga ṉaꞌa antslə cuiṉəꞌ gaquən, par nic̱h catəꞌ gaquən šeɉḻeꞌele de que nadaꞌ nacaꞌ benꞌ bagwniaꞌ leꞌe.
\v 20 Deꞌe ḻi əchniaꞌ leꞌe benꞌ choꞌelaoꞌ notəꞌətezə beṉəꞌ əchseḻaꞌa, nadaꞌanəꞌ choꞌelaogüeꞌe. Naꞌ benꞌ choꞌelaoꞌ nadaꞌ, benꞌ əbseḻəꞌ nadaꞌ naꞌanəꞌ choꞌelaogüeꞌe.
\s1 Jesoꞌosənꞌ beꞌe dižəꞌ c̱he benꞌ naquən əgwde ḻeꞌ lao naꞌ beṉəꞌ caꞌ chəsəꞌəgueꞌi ḻeꞌ
\p
\v 21 Beyož gwna Jesoꞌosənꞌ deꞌe caꞌ bachžaglaogüeꞌ ḻoꞌo yic̱hɉlaꞌaždaogüeꞌenəꞌ, naꞌ gwneꞌ clar: ―Deꞌe ḻi əchniaꞌ leꞌe de que to leꞌe əgwdele nadaꞌ lao naꞌ beṉeꞌ caꞌ chəsəꞌəgueꞌi nadaꞌ.
\p
\v 22 Nach netoꞌ bgüia lao lɉuežɉtoꞌ chaquetoꞌ notoꞌ c̱heinꞌ neꞌ caꞌ.
\v 23 Nach nadaꞌ chiꞌa cuiteꞌenəꞌ c̱hedəꞌ chacchgüeineꞌ c̱hiaꞌ.
\v 24 Naꞌ Bedənꞌ beneꞌ señy len nadaꞌ par nic̱h gwṉabdaꞌ Jesoꞌosənꞌ no c̱heinꞌ gwneꞌ caꞌ.
\v 25 Nach bgüigaꞌa bao gožaꞌ Jesoꞌosənꞌ: ―X̱anaꞌ, ¿nonꞌ?
\p
\v 26 Nach gož Jesoꞌosənꞌ nadaꞌ: ―Beꞌen əgwnežɉuaꞌ to pedas yetənꞌ catəꞌ babloꞌoɉaꞌan xoɉənꞌ, ḻeꞌenəꞌ.
\p Nach bloꞌoɉeꞌ yetənꞌ xoɉənꞌ naꞌ bnežɉueꞌen Jod Iscariot xiꞌiṉ Simonṉəꞌ.
\v 27 Naꞌ beyož bnežɉueꞌ Jodənꞌ yetənꞌ ḻeꞌe gwyoꞌo gwyazte Satanasənꞌ deꞌen chnabiaꞌ de x̱ioꞌ caꞌ ḻoꞌo yic̱hɉlaꞌaždaoꞌ Jodənꞌ. Nach Jesoꞌosənꞌ gožeꞌeneꞌ: ―Deꞌen gonoꞌonəꞌ benən lgüegwzə.
\p
\v 28 Naꞌ ni to netoꞌ žaꞌatoꞌonəꞌ cui gwyeɉniꞌitoꞌ bixc̱henꞌ gožeꞌ ḻeꞌ caꞌ.
\v 29 Jodənꞌ nox̱eꞌe bols mechənꞌ naꞌ deꞌe naꞌanəꞌ baḻətoꞌ bentoꞌ xbab de que Jesoꞌosənꞌ gožeꞌ ḻeꞌ šeɉeꞌ žɉəx̱iꞌe deꞌe chyažɉetoꞌ lao lṉinꞌ o de que cheyaḻəꞌ əgwnežɉueꞌ latəꞌ mechənꞌ beṉəꞌ yašəꞌ caꞌ.
\v 30 Naꞌ catəꞌ beyož gwdao Jodənꞌ pedas yetənꞌ deꞌen bnežɉw Jesoꞌosənꞌ ḻeꞌ, ḻeꞌe bchoɉteꞌ. Naꞌ ca orənꞌ bagoḻ.
\s1 To deꞌe cobə deꞌe non Jesoꞌosənꞌ mendad goncho
\p
\v 31 Naꞌ gwde bchoɉ Jodənꞌ Jesoꞌosənꞌ gwneꞌ: ―Diozənꞌ bseḻeꞌe nadaꞌ golɉaꞌ beṉac̱h, naꞌ ṉaꞌa soꞌot beṉəꞌ nadaꞌ naꞌ goṉeꞌ nadaꞌ yeḻəꞌ balaꞌaṉ xen. Naꞌ ḻeczə Diozənꞌ siꞌe yeḻəꞌ balaꞌaṉ xen ca deꞌen gaquə c̱hiaꞌ.
\v 32 Naꞌ ca naquə Diozənꞌ siꞌe yeḻəꞌ balaꞌaṉ ca deꞌen gaquə c̱hiaꞌ, ḻeczə ḻeꞌenəꞌ goṉeꞌ nadaꞌ yeḻəꞌ balaꞌaṉ, naꞌ ḻeꞌe solaote goṉeꞌ nadaꞌ yeḻəꞌ balaꞌaṉnəꞌ ṉaꞌa.
\v 33 Xiꞌiṉdaoguaꞌa, yešlož daꞌoganꞌ soaꞌ len leꞌe. Naꞌ yeyilɉle nadaꞌ, naꞌ canꞌ gožaꞌ beṉəꞌ blao c̱he ṉasyon Izrael c̱hechonꞌ, ḻeczə canꞌ əchniaꞌ leꞌe ṉaꞌa de que ganꞌ yeyaꞌa bito gaquə saꞌalenḻe nadaꞌ.
\v 34 Nach to deꞌe cobə chonaꞌ mendad gonḻe, de que gaque c̱he lɉuežɉle tole yetole canꞌ chacdaꞌ c̱hele, ḻeczə canꞌ ḻeꞌe gaque c̱he lɉuežɉle tole yetole.
\v 35 Naꞌ yesəꞌəṉeze yoguəꞌəḻoḻ beṉəꞌ de que nacle disipl c̱hiaꞌ šə gaquele c̱he lɉuežɉle tole yetole.
\s1 Jesoꞌosənꞌ neꞌ de que Bedənꞌ cui c̱hebeꞌ de que nombiꞌeneꞌ
\p
\v 36 Naꞌ gož Bedənꞌ ḻeꞌ: ―X̱anaꞌ, ¿ganꞌ yeyeɉoꞌ?
\p Naꞌ gož Jesoꞌosənꞌ ḻeꞌ: ―Ganꞌ yeyaꞌa bito gaquə denaogoꞌ nadaꞌ ṉaꞌa, pero telə denaogoꞌ.
\p
\v 37 Naꞌ gož Bedənꞌ ḻeꞌ: ―X̱anaꞌ ¿bixc̱henꞌ cui gaquə denaoguaꞌ leꞌ ṉaꞌa? Gwsanḻažəꞌ cuinaꞌ soꞌot beṉəꞌ nadaꞌ laogüe deꞌen chacdaꞌ c̱hioꞌ šə chonclən byen.
\p
\v 38 Naꞌ gož Jesoꞌosənꞌ ḻeꞌ: ―¿Echacdoꞌ gwsanḻažəꞌ cuinoꞌ soꞌot beṉəꞌ leꞌ laogüe deꞌen chacdoꞌ c̱hiaꞌ? Deꞌe ḻi əchniaꞌ leꞌ de que bito cuež ḻeconꞌ antslə zeꞌe gaquə šoṉ las cui chc̱heboꞌ de que nombiꞌo nadaꞌ.
\c 14
\s1 Beṉəꞌ caꞌ chsoꞌonḻilažəꞌ Jesocristənꞌ zɉənombiꞌe X̱eꞌ Diozənꞌ
\p
\v 1 Bito gaquəžeɉlažəꞌəle c̱hiaꞌ nadaꞌ. Ḻegonḻilažəꞌ Diozənꞌ, naꞌ ḻeczə ḻegonḻilažəꞌ nadaꞌ.
\v 2 Ganꞌ zo X̱aꞌ Diozənꞌ naquən ca to yoꞌo xen ganꞌ žaꞌ deꞌe zan cuart. Gwniaꞌ leꞌ žaləꞌ cui bi cuart de par leꞌe. Naꞌ yeyaꞌa žɉəyeyenšaoguaꞌa cuart par to tole.
\v 3 Naꞌ catəꞌən babeyož ɉəyeyenšaoguaꞌa cuart c̱helenꞌ, yidaꞌ yetšiꞌi naꞌ yec̱hiꞌa leꞌe socho txen par nic̱h ganꞌ soaꞌ naꞌ so leꞌe.
\v 4 Banombiꞌale ganꞌ yeyaꞌa naꞌ baṉezele naquənꞌ gonḻe par yedaꞌacle naꞌ.
\p
\v 5 Naꞌ gož Tomasənꞌ ḻeꞌ: ―X̱antoꞌ, bito ṉezetoꞌ ganꞌ yeyeɉoꞌ. ¿Naꞌ nacxa gaquənꞌ əṉezetoꞌ nac gontoꞌ par yelaꞌatoꞌ naꞌ?
\p
\v 6 Jesoꞌosənꞌ gožeꞌeneꞌ: ―Deꞌen cheyaḻəꞌ gonḻe gonḻilažəꞌəle nadaꞌ par nic̱h yežinḻe ganꞌ zo X̱aꞌanəꞌ. Nadaꞌ ṉezdaꞌ naꞌ chzeɉniꞌidaꞌ yoguəꞌəḻoḻ deꞌen naquə deꞌe ḻi c̱he Diozənꞌ. Naꞌ nadaꞌ nsaꞌa yeḻəꞌ mban zeɉḻicaṉe par beṉəꞌ caꞌ chsoꞌonḻilažəꞌ nadaꞌ. Ni to cono yežin ganꞌ zo X̱aꞌanəꞌ šə cui gonḻilažeꞌe nadaꞌ.
\v 7 Žaləꞌ nombiꞌayaṉəꞌəle nadaꞌ, lente X̱aꞌanəꞌ nombiꞌale žaləꞌ caꞌ. Naꞌ dezd ṉaꞌa banombiꞌaleneꞌ naꞌ bableꞌileneꞌ.
\p
\v 8 Naꞌ gož Lipənꞌ ḻeꞌ: ―Ben par nic̱h leꞌitoꞌ X̱aꞌonəꞌ. Ḻezən deꞌen cheneꞌetoꞌ.
\p
\v 9 Jesoꞌosənꞌ gožeꞌeneꞌ: ―Ḻip, sša xen bagwzoaꞌ len leꞌe, ¿ənaꞌ cuiṉəꞌ gombiꞌo nadaꞌanəꞌ? Notəꞌətezə beṉəꞌ bableꞌi nadaꞌ lenczə X̱aꞌanəꞌ bableꞌineꞌ. ¿Bixc̱henꞌ naoꞌ gonaꞌ par nic̱h leꞌile X̱aꞌanə?
\v 10 ¿Ecui cheɉḻiꞌo de que nadaꞌ zoaꞌ len X̱aꞌanəꞌ naꞌ X̱aꞌanəꞌ zoeꞌ len nadaꞌ? Dižəꞌ quinga choꞌa nadaꞌ, caguə choꞌan deꞌe biaꞌazəlažaꞌanəꞌ. X̱aꞌ naꞌanəꞌ zoeꞌ len nadaꞌ naꞌ ḻenꞌ choneꞌ par nic̱h choꞌa dižəꞌ quinga naꞌ chonaꞌ yoguəꞌəḻoḻ deꞌen chonaꞌ.
\v 11 Ḻeꞌe šeɉḻeꞌ c̱hiaꞌ ca deꞌen əṉiaꞌ de que zoaꞌ len X̱aꞌanəꞌ naꞌ ḻeꞌ zoeꞌ len nadaꞌ. Naꞌ šə cui cheɉḻeꞌele xtižaꞌanəꞌ, ḻeꞌe šeɉḻeꞌ c̱hiaꞌ por ni c̱he deꞌen bableꞌile chonaꞌanəꞌ.
\v 12 Deꞌe ḻi əchniaꞌ leꞌe benꞌ chonḻilažəꞌ nadaꞌ, ca deꞌe caꞌ chonaꞌ ḻeczə goneꞌen. Naꞌ deꞌe zaquəꞌəch ca deꞌe caꞌ goneꞌ c̱hedəꞌ nadaꞌ yeyaꞌa ganꞌ zo X̱aꞌanəꞌ.
\v 13 Naꞌ yoguəꞌ deꞌe əṉabele X̱aꞌanəꞌ gonaꞌ laogüe deꞌen chonḻilažəꞌəle nadaꞌ, gonaꞌan par nic̱h X̱aꞌanəꞌ siꞌe yeḻəꞌ balaꞌaṉ ca deꞌen gonaꞌ nacaꞌ Xiꞌiṉeꞌ.
\v 14 Bitəꞌətezə deꞌe əṉable gonaꞌ por ni c̱he deꞌen chonḻilažəꞌəle nadaꞌ, nadaꞌ gonaꞌan.
\s1 Jesoꞌosənꞌ beneꞌ lyebe seḻeꞌe Spirit c̱he Diozənꞌ
\p
\v 15 Šə chaquele c̱hiaꞌ cheyaḻəꞌ gonḻe canꞌ nonaꞌ mendad gonḻe.
\v 16 Naꞌ ṉabdaꞌ X̱aꞌanəꞌ par əseḻeꞌe Spirit c̱heꞌenəꞌ len leꞌe par gaquəlenən leꞌe canꞌ babenaꞌ nadaꞌ. Naꞌ son len leꞌe zeɉḻicaṉe. Spirit c̱he Diozənꞌ əgwzeɉniꞌin leꞌe deꞌen naquə deꞌe ḻi.
\v 17 Beṉəꞌ caꞌ cui zɉənombiaꞌ Diozənꞌ bito chsoꞌelaogüeꞌe Spiritənꞌ c̱hedəꞌ bito chesəꞌəleꞌineꞌen naꞌ nic zɉənombiꞌen. Pero leꞌe nombiꞌalen c̱hedəꞌ zon len leꞌe ṉaꞌa naꞌ gwžin ža catəꞌ son ḻoꞌo laꞌaždaꞌolenꞌ.
\v 18 Bito gwcuaꞌaṉaꞌa leꞌe ca gozebə. Güidaꞌ yeto nga ganꞌ zole.
\v 19 Naꞌ yešlož daꞌozə naꞌ beṉəꞌ caꞌ cui zɉənombiaꞌ Diozənꞌ cabich yesəꞌəleꞌineꞌ nadaꞌ, pero leꞌe gwleꞌile nadaꞌ. Naꞌ laogüe deꞌen zoaꞌ nsaꞌa yeḻəꞌ mban zeɉḻicaṉe c̱he beṉəꞌ chsoꞌonḻilažəꞌ nadaꞌ, deꞌe naꞌanəꞌ leꞌe sole zeɉḻicaṉe.
\v 20 Naꞌ catəꞌ əžin ža laꞌ Spirit c̱he Diozənꞌ son ḻoꞌo laꞌaždaꞌolenꞌ cananꞌ əṉezele de que nadaꞌ zoaꞌ len X̱aꞌanəꞌ, naꞌ leꞌe zole len nadaꞌ, naꞌ nadaꞌ zoaꞌ len leꞌe.
\v 21 Benꞌ ṉeze canꞌ nonaꞌ mendad naꞌ choneꞌ canꞌ əniꞌanəꞌ, benaꞌan chaque c̱hiaꞌ. Naꞌ benꞌ chaque c̱hiaꞌ ḻeczə chaque X̱aꞌanəꞌ c̱heꞌ, naꞌ gwzochczaꞌ gaquədaꞌ c̱heꞌ naꞌ gonaꞌ par nic̱h əṉezeneꞌ de que zotezə zoaꞌ len ḻeꞌ.
\p
\v 22 Naꞌ Jodənꞌ pero caguə Jod Iscariotənꞌ gožeꞌ ḻeꞌ: ―X̱antoꞌ ¿bixc̱henꞌ gonoꞌ par nic̱h netoꞌ leꞌichetoꞌ leꞌ naꞌ cui gonoꞌ par nic̱h beṉəꞌ yoblə yesəꞌəleꞌicheneꞌ leꞌ?
\p
\v 23 Naꞌ Jesoꞌosənꞌ gožeꞌeneꞌ: ―Leꞌe chaquele c̱hiaꞌ chzenagle xtižaꞌanəꞌ. Naꞌ X̱aꞌanəꞌ ḻeczə chaqueneꞌ c̱hele naꞌ netoꞌ desotoꞌ len leꞌe.
\v 24 Beṉəꞌ caꞌ cui chsaꞌaque c̱hiaꞌ bito chosoꞌozenagueꞌ xtižaꞌanəꞌ. Dižəꞌ deꞌen chenele əniaꞌ leꞌe, caguə choꞌan deꞌe biaꞌazəlažaꞌanəꞌ, sino choꞌa dižəꞌ deꞌen cheneꞌe X̱aꞌanəꞌ benꞌ əbseḻəꞌ nadaꞌ.
\p
\v 25 Deꞌe quinga bagwniaꞌ leꞌe žlac ṉeꞌe zoaꞌ len leꞌe.
\v 26 Naꞌ X̱aꞌanəꞌ əseḻeꞌe Spirit c̱heꞌenəꞌ son ḻoꞌo laꞌaždaoꞌ leꞌe chonḻilažəꞌəle nadaꞌ nic̱h gaquəlenən leꞌe. Naꞌ Spiritənꞌ əgwzeɉniꞌin leꞌe yoguəꞌəḻoḻ deꞌen cheyaḻəꞌ əṉezele naꞌ gonən ca žɉəyezaꞌalažəꞌəle yoguəꞌəḻoḻ deꞌen bagwniaꞌ leꞌe.
\p
\v 27 Chonaꞌ par nic̱h so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ ca binḻo zo chbezaꞌ len xbab deꞌen yoꞌo ḻoꞌo yic̱hɉlaꞌaždaoguaꞌanəꞌ. Nadaꞌ chonaꞌ ca zo chbezəchle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ cle ca chsoꞌon beṉac̱hənꞌ par so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ. Bito gaquəžeɉlažəꞌəle, nic žeble.
\v 28 Babenele canꞌ bagwniaꞌ de que yeyaꞌa ganꞌ zo X̱aꞌanəꞌ, naꞌ de que yidaꞌ deꞌe yoblə ganꞌ zolenꞌ. Žaləꞌ chaquele c̱hiaꞌ canꞌ cheyaḻəꞌənəꞌ, gobeile deꞌen yeyaꞌa, c̱hedəꞌ X̱aꞌanəꞌ zaquəꞌəcheꞌ ca nadaꞌ.
\v 29 Ṉaꞌa ža bagwniaꞌ leꞌe deꞌe caꞌ antslə cuiṉəꞌ saꞌaquən par nic̱h catəꞌ saꞌaquən šeɉḻeꞌele de que nacaꞌ benꞌ bagwniaꞌ leꞌe.
\p
\v 30 Bitoch guaꞌa dižəꞌ zan len leꞌe c̱hedəꞌ bazaꞌ gwxiyeꞌ deꞌen chnabiaꞌ beṉəꞌ caꞌ cui chsoꞌonḻilažəꞌ nadaꞌ naꞌ tiḻəlenən nadaꞌ. Pero bito soin nadaꞌ.
\v 31 Chonaꞌ con canꞌ non X̱aꞌanəꞌ mendad par nic̱h əṉeze beṉac̱hənꞌ de que chacdaꞌ c̱he X̱aꞌanəꞌ. Ṉaꞌa ža ḻešoꞌo šeɉəchcho.
\c 15
\s1 Jesoꞌosənꞌ gwxaquəꞌəlebeneꞌ ca to yag oba
\p
\v 1 Nadaꞌ gwxaquəꞌəlebədaꞌ ca to yag oba deꞌen naquə ḻeꞌezelaogüe yag zaqueꞌe. X̱aꞌanəꞌ gwxaquəꞌəlebeneꞌ ca benꞌ chonšiꞌi yaguənꞌ.
\v 2 Naꞌ leꞌe chonḻilažəꞌəle nadaꞌ gwxaquəꞌəlebele ca xozəꞌ yaguənꞌ. To to xozeꞌe caꞌ cui bi frot chbian, chc̱hogueꞌen. Naꞌ to to xozeꞌe caꞌ deꞌe chəsəꞌəbia frot, chpeꞌen par nic̱h chbiachən frot zanch.
\v 3 Canꞌ banaquə yic̱hɉlaꞌaždaꞌolenꞌ c̱hedəꞌ chzenagle xtižaꞌanəꞌ deꞌen babiꞌa len leꞌe.
\v 4 Ḻesotezə ḻeso len nadaꞌ par nic̱h nadaꞌ gaquə sotezə soaꞌ len leꞌe. Ca c̱he xozəꞌ yag frotənꞌ, bito bi frot cuian to gwlazzen šə cui zon ncaꞌan ḻeꞌe yaguənꞌ, canꞌ naquən len leꞌe, bito gaquə gonḻe deꞌen chazlažəꞌ Diozənꞌ šə cui sotezə sole len nadaꞌ.
\p
\v 5 Deꞌe yoblə əhiaꞌ de que nadaꞌ gwxaquəꞌəlebədaꞌ ca yag obanꞌ naꞌ leꞌe ca xozeꞌenəꞌ. Notəꞌətezle šə zotezə zole len nadaꞌ naꞌ nadaꞌ zotezə zoaꞌ len leꞌe, gonchguale deꞌen chazlažəꞌ Diozənꞌ. Pero cuiczə gac gonḻe deꞌen chazlažeꞌenəꞌ to gwlazle.
\v 6 Beṉəꞌ cui zotezə zo len nadaꞌ əhoɉeꞌ caꞌaḻə, ca c̱he xozəꞌ yag obanꞌ deꞌe caꞌ chc̱hog benꞌ chonšiꞌi yaguənꞌ naꞌ chəsəꞌəbižən. Nach chtobeꞌen chadeꞌen yiꞌ par chseꞌeyən.
\p
\v 7 Šə leꞌe zotezə zole len nadaꞌ naꞌ šə yoꞌo yic̱hɉle xtižaꞌanəꞌ do tyempte, bitəꞌətezə deꞌe cheneꞌele əṉable len orasyonṉəꞌ deꞌe siꞌiczlenəꞌ.
\v 8 Yeḻəꞌ balaꞌaṉ chziꞌ X̱aꞌanəꞌ catəꞌən chonchguale canꞌ chazlažeꞌenəꞌ, naꞌ bac̱h chloꞌele de que chonḻilažəꞌəle nadaꞌ naꞌ chzenagle c̱hiaꞌ canꞌ cheyaḻəꞌ gonḻe šə bachonchguale deꞌen chazlažeꞌenəꞌ.
\v 9 Ca X̱aꞌanəꞌ chaqueneꞌ c̱hiaꞌ, ḻeczə caꞌ nadaꞌ bachacdaꞌ c̱hele. Ḻeꞌe so ḻegon ca gacbeꞌile de que chacdaꞌ c̱hele.
\v 10 Šə chonḻe canꞌ nonaꞌ mendadənꞌ, nachənꞌ gacbeꞌile de que chacdaꞌ c̱hele, ca nadaꞌ chonaꞌ canꞌ non X̱aꞌanəꞌ mendadənꞌ naꞌ chacbeꞌidaꞌ de que chaqueneꞌ c̱hiaꞌ.
\p
\v 11 Bagwniaꞌ leꞌe caꞌ par nic̱h sole mbalaz ca mbalazənꞌ zoaꞌ nadaꞌ. Cheꞌendaꞌ sole mbalaz juisy.
\v 12 Deꞌe nga chonaꞌ mendad gonḻe, gaquele c̱he lɉuežɉle tole yetole canꞌ chacdaꞌ c̱hele.
\v 13 Notono nḻaꞌ beṉəꞌ chaquecheneꞌ c̱he lɉuežɉeꞌ mazəchlə canꞌ chaque benꞌ chsanḻažəꞌ cuineꞌ soꞌot beṉəꞌ ḻeꞌ par gaquəleneꞌ beṉəꞌ migw c̱heꞌ caꞌ.
\v 14 Leꞌe nacle migw c̱hiaꞌ šə chonḻe canꞌ nonaꞌ mendadənꞌ.
\v 15 Bitoch əniaꞌ leꞌe mos c̱hiaꞌ c̱hedəꞌ beṉəꞌ zɉənaquə mos bito zɉəṉezeneꞌ bi chon x̱angaꞌaqueꞌenəꞌ. Baniaꞌ leꞌ migw c̱hiaꞌ, c̱hedəꞌ yoguəꞌəḻoḻ deꞌe caꞌ babendaꞌ gwna X̱aꞌanəꞌ babzeɉniꞌidaꞌan leꞌe.
\v 16 Caguə leꞌe gwleɉle nadaꞌ par nacaꞌ X̱anḻe. Nadaꞌ bagwleɉaꞌ leꞌe par chonḻilažəꞌəle nadaꞌ. Naꞌ chseḻaꞌa leꞌe par nic̱h šeɉəchle gonchguale canꞌ chazlažəꞌ X̱aꞌanəꞌ naꞌ caguə deꞌe te c̱he deꞌe caꞌ gonḻenꞌ. Naꞌ šə gonḻe canꞌ chazlažeꞌenəꞌ, yoguəꞌəḻoḻ deꞌen əṉabele X̱aꞌanəꞌ laogüe deꞌen chonḻilažəꞌəle nadaꞌ, goṉeꞌen.
\v 17 Deꞌe nga deꞌen chonaꞌ mendad gonḻe, de que gaquele c̱he lɉuežɉle tole yetole.
\s1 Beṉəꞌ caꞌ cui zɉənombiaꞌ Diozənꞌ chəsəꞌəgueꞌineꞌ beṉəꞌ caꞌ chosoꞌozenag c̱he Jesoꞌosənꞌ
\p
\v 18 Bito yebanele deꞌen chəsəꞌəgueꞌi beṉəꞌ caꞌ cui zɉənombiaꞌ Diozənꞌ leꞌe. Ḻegon xbab de que zguaꞌatec nadanꞌ besəꞌəgueꞌineꞌ antslə ca leꞌe.
\v 19 Žaləꞌ nacle txen len beṉəꞌ caꞌ cui zɉənombiaꞌ Diozənꞌ, gwsaꞌaqueneꞌ c̱hele canꞌ chsaꞌaqueneꞌ c̱he beṉəꞌ caꞌ zɉənaqueꞌ txen. Nadaꞌ bagwleɉaꞌ leꞌe par naole nadaꞌ, naꞌ bitoch nacle txen len beṉəꞌ caꞌ cui zɉənombiaꞌ Diozənꞌ, naꞌ deꞌe naꞌanəꞌ chəsəꞌəgueꞌineꞌ leꞌe.
\v 20 Ḻeꞌe žɉsaꞌalažəꞌ deꞌen bagwniaꞌ leꞌe: “Notəꞌətezə mos bito naqueꞌ blaoch ca x̱aneꞌenəꞌ.” Canꞌ babosoꞌolagzeɉə bosoꞌolagzideꞌ nadaꞌ, ḻeczə canꞌ yosoꞌolagzeɉə yosoꞌolagzideꞌ leꞌe. Žaləꞌ bosoꞌozenagueꞌ xtižaꞌanəꞌ, ḻeczə gosəꞌəzenagueꞌ xtižəꞌəlenꞌ.
\v 21 Naꞌ yoguəꞌ deꞌe caꞌ soꞌoneꞌ len leꞌe c̱hedəꞌ leꞌe chonḻilažəꞌəle nadaꞌ naꞌ ḻegaꞌaqueꞌ bito zɉənombiꞌe X̱aꞌanəꞌ benꞌ bseḻəꞌ nadaꞌ.
\p
\v 22 Žaləꞌ nadaꞌ cui bidaꞌ, naꞌ žaləꞌ cui biaꞌa dižəꞌ len ḻegaꞌaqueꞌ, bito zɉənapeꞌ doḻəꞌ ca naquənꞌ chəsəꞌəgueꞌineꞌ nadaꞌ. Naꞌ ṉaꞌa cuiczə bi de bi yosoꞌodeꞌineꞌ par yesəꞌəneꞌ cui bi doḻəꞌ zɉənapeꞌ.
\v 23 Benꞌ chgueꞌi nadaꞌ, lenczə X̱aꞌ nanꞌ chgueꞌineꞌ.
\v 24 Žaləꞌ cui benaꞌ entr ḻegaꞌaqueꞌ miḻagr deꞌe cuiṉəꞌ gon ni to beṉəꞌ yoblə, bito zɉənapeꞌ doḻəꞌ ca naquənꞌ chəsəꞌəgueꞌineꞌ nadaꞌ. Pero ṉaꞌa babesəꞌəleꞌineꞌ deꞌe caꞌ chonaꞌ naꞌ biaꞌaczə chəsəꞌəgueꞌineꞌ nadaꞌ naꞌ len X̱aꞌanəꞌ.
\v 25 Pero naꞌ chac caꞌ par nic̱h chac complir canꞌ na Xtižəꞌ Diozənꞌ ganꞌ nyoɉən nan: “Besəꞌəgueꞌineꞌ nadaꞌ sin cui bi bi deꞌe mal benaꞌ.”
\p
\v 26 Bagwniaꞌ leꞌe de que seḻaꞌa Spirit c̱he X̱aꞌ Diozənꞌ par gaquəlenən leꞌe naꞌ par əgwzeɉniꞌin leꞌe deꞌen naquə deꞌe ḻi. Spiritənꞌ saꞌan ganꞌ zo X̱aꞌanəꞌ laꞌ seḻaꞌan par güeꞌen xtižaꞌanəꞌ.
\v 27 Naꞌ ḻeczə caꞌ leꞌe güeꞌele xtižaꞌanəꞌ, c̱hedəꞌ bagwzole len nadaꞌ dezd catəꞌən gwzolao chyix̱ɉuiꞌa xtižəꞌ X̱aꞌ Diozənꞌ.
\c 16
\p
\v 1 Bagwniaꞌ leꞌe deꞌe caꞌ par nic̱h cui yebiguəꞌəle gosxanḻə.
\v 2 Yesyəꞌəbeɉeꞌ leꞌe ḻoꞌo yoꞌodaoꞌ c̱hegaꞌaqueꞌ caꞌ. Naꞌ bazon əžin ža catəꞌ notəꞌətezə beṉəꞌ seꞌeneneꞌ soꞌoteꞌ leꞌe soꞌoneꞌ xbab yebei Diozənꞌ ḻegaꞌaqueꞌ deꞌen soꞌoneꞌ caꞌ.
\v 3 Soꞌoneꞌ caꞌ len leꞌe c̱hedəꞌ cui zɉənombiꞌe X̱aꞌanəꞌ naꞌ ni nadaꞌ cui zɉənombiꞌe.
\v 4 Naꞌ bagwniaꞌ leꞌe caꞌ par nic̱h catəꞌ əžin ža gac caꞌ žɉəsaꞌalažəꞌəle de que bagwniaꞌ leꞌe canꞌ gaquən.
\s1 Deꞌe chon Spirit c̱he Diozənꞌ
\p Catəꞌən gwleɉaꞌ leꞌe par nacle disipl c̱hiaꞌ bito gwniaꞌ leꞌe yoguəꞌ deꞌe caꞌ gac c̱hele, c̱hedəꞌ gwṉezdaꞌ sochaꞌ len leꞌe.
\v 5 Naꞌ ḻaꞌaṉəꞌəczə yeyaꞌa ṉaꞌa ganꞌ zo X̱aꞌanəꞌ benꞌ əbseḻəꞌ nadaꞌ, ni tole cui chṉabele nadaꞌ bi zeɉen deꞌen yeyaꞌanəꞌ.
\v 6 Naꞌ deꞌen bagwniaꞌ leꞌe deꞌe caꞌ bachacchgüeile ḻoꞌo laꞌaždaꞌolenꞌ.
\v 7 Pero deꞌe ḻi əchniaꞌ leꞌe napən leꞌe cuent yeyaꞌa, laꞌ šə cui yeyaꞌa Spirit c̱he Diozənꞌ deꞌen gaquəlen leꞌe bito yedəson ḻoꞌo laꞌaždaꞌolenꞌ. Naꞌ deꞌen yeyaꞌanəꞌ əseḻaꞌan len leꞌe.
\v 8 Naꞌ catəꞌəch yidəꞌən əgwzeɉniꞌin beṉac̱hənꞌ de que zɉənapeꞌ doḻəꞌ, əgwzeɉniꞌin ḻegaꞌaqueꞌ de que nacaꞌ ḻeꞌezelaogüe beṉəꞌ güen, naꞌ əgwzeɉniꞌin ḻegaꞌaqueꞌ de que gatəꞌ castigw zeɉḻicaṉe c̱he notəꞌətezə beṉəꞌ cui chosoꞌozenag c̱hiaꞌ.
\v 9 Egwzeɉniꞌin ḻegaꞌaqueꞌ de que zɉənapeꞌ doḻəꞌ deꞌen cui chsoꞌonḻilažeꞌe nadaꞌ.
\v 10 Egwzeɉniꞌin ḻegaꞌaqueꞌ de que nacaꞌ ḻeꞌezelaogüe beṉəꞌ güen c̱hedəꞌ yeyaꞌa ganꞌ zo X̱aꞌanəꞌ naꞌ bitoch leꞌile nadaꞌ.
\v 11 Naꞌ əgwzeɉniꞌin ḻegaꞌaqueꞌ de que gatəꞌ castigw zeɉḻicaṉe c̱he notəꞌətezə beṉəꞌ cui chosoꞌozenag c̱hiaꞌ, c̱hedəꞌ gwxiyeꞌ deꞌen chnabiaꞌ beṉəꞌ caꞌ cui zɉənombiaꞌ Diozənꞌ banchoglaon c̱hei de que siꞌin castigw zeɉḻicaṉe.
\p
\v 12 Ṉedech deꞌe zan deꞌe əṉiaꞌ leꞌe, pero zdebə naquən ṉaꞌa par šeɉniꞌilen.
\v 13 Pero catəꞌ yedəso Spirit c̱he Diozənꞌ ḻoꞌo laꞌaždaꞌolenꞌ par əgwzeɉniꞌin leꞌe deꞌen naquə deꞌe ḻi, əgwsed əgwloꞌin leꞌe yoguəꞌəḻoḻ deꞌen cheyaḻəꞌ əṉezele c̱hiaꞌ nadaꞌ. Bito güeꞌen dižəꞌ deꞌe biaꞌazəlažeꞌi sino güeꞌen bitəꞌətezə dižəꞌ deꞌen chzene X̱aꞌanəꞌ ḻen naꞌ c̱hix̱ɉueꞌin leꞌe biquəꞌ deꞌe zeꞌe zaꞌac.
\v 14 Goṉən nadaꞌ yeḻəꞌ balaꞌaṉ, c̱hedəꞌ əgwzeɉniꞌin leꞌe c̱hiaꞌ nadaꞌ.
\v 15 X̱aꞌanəꞌ babeneꞌ ca ṉezdaꞌ yoguəꞌəḻoḻ deꞌen ṉezeneꞌ naꞌ deꞌe naꞌanəꞌ gwniaꞌ de que Spirit c̱heꞌenəꞌ əgwzeɉniꞌin leꞌe deꞌe caꞌ ṉezdaꞌ.
\s1 Jesoꞌosənꞌ gožeꞌ disipl c̱heꞌ caꞌ de que ṉiteꞌe trist to tyemp daoꞌ naꞌ techlə yesyəꞌəbeineꞌ
\p
\v 16 Yeto tyemp daoꞌ leꞌe bitoch leꞌile nadaꞌ. Naꞌ techlə yeto tyemp daoꞌ yoblə naꞌ yezleꞌile nadaꞌ nach yeyaꞌa ganꞌ zo X̱aꞌanəꞌ.
\p
\v 17 Naꞌ baḻə netoꞌ disipl c̱heꞌ gož lɉuežɉtoꞌ: ―¿Bi zeɉen deꞌe nga cheꞌe chioꞌo de que yeto tyemp daꞌozə naꞌ bitoch leꞌichoneꞌ naꞌ de que techlə yeto tyemp daoꞌ yoblə naꞌ yezleꞌichoneꞌ? ¿Naꞌ bi zeɉen deꞌen neꞌ yeyeɉeꞌ ganꞌ zo X̱eꞌenəꞌ?
\v 18 ¿Bi zeɉen deꞌen neꞌ yeto tyemp daꞌozə ža? Cuili bixc̱henꞌ neꞌ caꞌ.
\p
\v 19 Naꞌ gocbeꞌi Jesoꞌosənꞌ de que cheneꞌetoꞌ ṉabetoꞌoneꞌ bi zeɉenṉəꞌ, naꞌ gožeꞌ netoꞌ: ―¿Edeꞌe nganꞌ deꞌen chṉabe lɉuežɉle? ¿Echeneꞌele əṉezele bi zeɉen ca deꞌen gwniaꞌ leꞌe de que yeto tyemp daꞌozə naꞌ bitoch leꞌile nadaꞌ, naꞌ techlə yeto tyemp daoꞌ yoblə naꞌ yezleꞌile nadaꞌ?
\v 20 Deꞌe ḻi chniaꞌ leꞌe de que bazon cuežle naꞌ yegüineꞌele naꞌ beṉəꞌ caꞌ cui zɉənombiaꞌ Diozənꞌ yesyəꞌəbeineꞌ. Yeyašəꞌəlažəꞌəle pero con to tyemp daꞌozənꞌ naꞌ techlə yebeile.
\v 21 Šə catəꞌ chzan to noꞌolə, chžaglaogüeꞌ lao chaqueꞌ bes c̱he yeḻəꞌ sanṉəꞌ. Pero naꞌ catəꞌ bagolɉə bdaꞌonəꞌ bitoch choneꞌ xbab c̱he deꞌen bžaglaogüeꞌenəꞌ deꞌe tant chebeineꞌ de que bagolɉə yeto beṉac̱h yežlyo nga.
\v 22 Ḻeczə canꞌ len leꞌe, ṉaꞌa sole trist, pero catəꞌ yežagcho deꞌe yoblə canaꞌ yebeile ḻoꞌo laꞌaždaꞌolenꞌ. Naꞌ ni to cono yecaꞌa yeḻəꞌ chebei c̱helenꞌ.
\p
\v 23 Naꞌ catəꞌ babžin ža soaꞌ ganꞌ zo X̱aꞌanəꞌ deꞌe yoblə bito yažɉele bi əṉable gonaꞌ par leꞌe. Deꞌe ḻi əchniaꞌ leꞌe bitəꞌətezə deꞌe əṉabele X̱aꞌanəꞌ laogüe deꞌen chonḻilažəꞌəle nadaꞌ, goṉeꞌen par leꞌe.
\v 24 Xte ṉaꞌa cuiczə bi ṉeꞌe ṉabele X̱aꞌanəꞌ yeꞌeleneꞌ de que chṉablen por ni c̱he deꞌen chonḻilažəꞌəle nadaꞌ. Naꞌ ṉaꞌa ḻeṉabe X̱aꞌanəꞌ bi deꞌen əṉabeleneꞌ yeꞌeleneꞌ caꞌ, naꞌ goneꞌ canꞌ əṉabeleneꞌ par nic̱h sole mbalaz juisy.
\s1 Jesocristənꞌ babeneꞌ par nic̱h gwxiyeꞌenəꞌ cuich ṉabiaꞌan chioꞌo
\p
\v 25 Deꞌe zan deꞌe caꞌ bagwniaꞌ leꞌe babzeɉniꞌidaꞌan len jempl. Ežin žanꞌ catəꞌ bitoch əgwzeɟniꞌidaꞌ leꞌe len jempl sino clar c̱hix̱ɉueꞌidaꞌ leꞌe c̱he X̱aꞌanəꞌ.
\v 26 Naꞌ catəꞌ babžin ža soaꞌ ganꞌ zo X̱aꞌanəꞌ deꞌe yoblə, canaꞌach əṉabele X̱aꞌanəꞌ bi deꞌen əṉabeleneꞌ yeꞌeleneꞌ de que chṉablen por ni c̱he deꞌen chonḻilažəꞌəle nadaꞌ. Naꞌ bito əniaꞌ leꞌe de que nadaꞌ ṉabaꞌ lao X̱aꞌanəꞌ par nic̱h gaquəleneꞌ leꞌe.
\v 27 Cuinczə X̱aꞌanəꞌ chaqueneꞌ c̱hele por ni c̱he deꞌen bachaquele c̱hiaꞌ naꞌ deꞌen bacheɉḻeꞌele de que gwzaꞌa ganꞌ zoeꞌenəꞌ.
\v 28 Ganꞌ zo X̱aꞌanəꞌ gwzaꞌa babidaꞌ yežlyo nga. Naꞌ ṉaꞌa yezaꞌa yežlyo nga naꞌ yeyaꞌa ganꞌ zo X̱aꞌanəꞌ.
\p
\v 29 Naꞌ netoꞌ disipl c̱heꞌ gožtoꞌoneꞌ: ―Ṉaꞌa choꞌo dižəꞌən clar. Bito choꞌo dižəꞌ len jempl deꞌe cui cheɉniꞌitoꞌ.
\v 30 Naꞌ chacbeꞌitoꞌ de que ṉez nḻeꞌidoꞌ xbab c̱he beṉac̱hənꞌ. Bito chyažɉdoꞌ no əṉa leꞌ binꞌ chseꞌeneꞌeneꞌ yesəꞌəṉezeneꞌ. Deꞌe naꞌanəꞌ cheɉḻeꞌetoꞌ de que gwzaꞌo ganꞌ zo Diozənꞌ.
\p
\v 31 Naꞌ gwna Jesoꞌosənꞌ netoꞌ: ―¿Eṉaꞌa cheɉḻeꞌele ža?
\v 32 Gwžin or naꞌ ṉaꞌa bazaꞌan catəꞌ gasəꞌəlasle. To tole caꞌale xṉez c̱he c̱hele naꞌ əgwcuaꞌaṉle tozaꞌ. Pero caguə zoaꞌ tozaꞌanəꞌ c̱hedəꞌ X̱aꞌanəꞌ zoeꞌ len nadaꞌ.
\v 33 Bagwniaꞌ leꞌe caꞌ par nic̱h so cuezle binḻo len xbab deꞌe yoꞌo ḻoꞌo yic̱hɉlaꞌaždaꞌolenꞌ laogüe deꞌen chonḻilažəꞌəle nadaꞌ. Yežlyo nga c̱hiꞌ saquəꞌəle, pero bito žeble, nadaꞌ babenaꞌ par nic̱h gwxiyeꞌenəꞌ cuich ṉabiaꞌan leꞌe.
\c 17
\s1 Jesoꞌosənꞌ beneꞌ orasyon par nic̱h gaquəlen Diozənꞌ disipl c̱heꞌ caꞌ
\p
\v 1 Gwde gwna Jesoꞌosənꞌ caꞌ, bgüieꞌ yobalə naꞌ gwneꞌ: ―X̱aꞌ, babžin or par gaquə c̱hiaꞌ canꞌ babžioꞌ biaꞌ gaquə. Beṉ nadaꞌ yeḻə balaꞌaṉ par nic̱h ḻeczə caꞌ nadaꞌ goṉaꞌ leꞌ yeḻəꞌ balaꞌaṉ, nadanꞌ nacaꞌ Xiꞌiṉoꞌ.
\v 2 Babeṉoꞌ nadaꞌ yeḻəꞌ chnabiaꞌ lao yoguəꞌ beṉac̱h par nic̱h chnežɉuaꞌ yeḻəꞌ mban zeɉḻicaṉe c̱he yoguəꞌəḻoḻ noquəꞌ beṉəꞌ caꞌ bagwleɉoꞌ par chsoꞌonḻilažeꞌe nadaꞌ.
\v 3 Naꞌ beṉəꞌ caꞌ zɉənapə yeḻəꞌ mban zeɉḻicaṉenꞌ zɉənombiꞌe leꞌ ca tozonꞌ zacoꞌo par güeꞌelaꞌotoꞌ, naꞌ ḻeczə zɉənombiꞌe nadaꞌ Jesocrist benꞌ əbseḻoꞌonəꞌ.
\p
\v 4 Babeṉaꞌ leꞌ yeḻəꞌ balaꞌaṉ yežlyo nga ca deꞌen babeyož benaꞌ yoguəꞌəḻoḻ deꞌen gwloꞌo lao naꞌa gonaꞌ.
\v 5 Ṉaꞌa ža X̱aꞌ, ben par nic̱h yeziꞌa yeḻəꞌ balaꞌaṉ c̱hiaꞌanəꞌ catəꞌ yelaꞌa ganꞌ zoꞌonəꞌ ca yeḻəꞌ balaꞌaṉ deꞌen gwdapaꞌ catəꞌən gwzoaꞌ len leꞌ antslə zeꞌe x̱e yežlyo nga.
\p
\v 6 Bagwleɉoꞌ baḻə beṉac̱h par chsoꞌonḻilažeꞌe nadaꞌ naꞌ babloꞌigaꞌacdaꞌaneꞌ naquənꞌ naquə yic̱hɉlaꞌaždaogoꞌonəꞌ naꞌ naquənꞌ chonoꞌ. Zɉənaqueꞌ xiꞌiṉoꞌ, naꞌ benoꞌ par nic̱h chsoꞌonḻilažeꞌe nadaꞌ naꞌ chsoꞌoneꞌ canꞌ nonoꞌ mendadənꞌ.
\v 7 Naꞌ bazɉəṉezeneꞌ de que yoguəꞌəḻoḻ deꞌen chonaꞌ naꞌ yoguəꞌ dižəꞌ deꞌen choꞌa zaꞌan c̱he cuinoꞌ.
\v 8 Babeꞌelenaꞌ ḻegaꞌaqueꞌ dižəꞌ deꞌen benoꞌ mendad güeꞌelengaꞌacaꞌaneꞌ, naꞌ bazɉənonen c̱hegaꞌaqueꞌ. Naꞌ bachsaꞌacbeꞌineꞌ de que deꞌe ḻiczə gwzaꞌa ganꞌ zoꞌonəꞌ, naꞌ chseꞌeɉḻeꞌe de que lenꞌ əbseḻoꞌo nadaꞌ.
\p
\v 9 Chṉabdaꞌ leꞌ gaquəlenoꞌ ḻegaꞌaqueꞌ. Caguə chṉabdaꞌ leꞌ gaquəlenoꞌ yoguəꞌ beṉac̱hənꞌ, sino gaquəlenoꞌ beṉəꞌ caꞌ zɉənaquə xiꞌiṉoꞌ, beṉəꞌ caꞌ gwleɉoꞌ par chsoꞌonḻilažeꞌe nadaꞌ.
\v 10 Naꞌ yoguəꞌ beṉəꞌ caꞌ chsoꞌonḻilažəꞌ nadaꞌ zɉənaqueꞌ xiꞌiṉoꞌ. Naꞌ caꞌaczənꞌ naquən, notəꞌətezə beṉəꞌ zɉənaquə xiꞌiṉoꞌ ḻeczə zɉənaqueꞌ xiꞌiṉaꞌ. Echziꞌa yeḻəꞌ balaꞌaṉ deꞌen chsoꞌonḻilažeꞌe nadaꞌ naꞌ deꞌen chsoꞌoneꞌ bichlə deꞌen chsoꞌoneꞌenəꞌ.
\p
\v 11 Naꞌ ṉaꞌa caguə sochaꞌ yežlyo nganꞌ, pero beṉəꞌ quinga ṉitəꞌəczeꞌ yežlyo nga. Nadaꞌ bazezaꞌa ganꞌ zoꞌonəꞌ. X̱aꞌ, nacoꞌ ḻeꞌezelaogüe beṉəꞌ laꞌaždaoꞌ xiꞌilažəꞌ. Naꞌ ca naquə beṉəꞌ caꞌ gwleɉoꞌ par chsoꞌonḻilažeꞌe nadaꞌ, bcuasəꞌ bcueꞌeɉgaꞌaqueꞌ len deꞌe malənꞌ por yeḻəꞌ chnabiaꞌ c̱hioꞌonəꞌ. Bcuasəꞌ bcueꞌeɉgaꞌaqueꞌ len deꞌe malənꞌ par nic̱h əsaꞌaqueꞌ tozə len lɉuežɉgaꞌaqueꞌenəꞌ ca chioꞌo naccho tozə.
\v 12 Bedote žlac zoaꞌ len ḻegaꞌaqueꞌ babcuasəꞌ bcueꞌeɉgaꞌacaꞌaneꞌ len deꞌe malənꞌ por yeḻəꞌ chnabiaꞌ c̱hioꞌonəꞌ. Deꞌe naꞌanəꞌ ni togaꞌaqueꞌ cui gwžiayiꞌ sino tozə benꞌ banaquəczən cuiayiꞌe par nic̱h gaquə complir canꞌ na Xtižoꞌonəꞌ deꞌen nyoɉən.
\p
\v 13 Naꞌ ṉaꞌa bazezaꞌa ganꞌ zoꞌonəꞌ, naꞌ choꞌa dižəꞌ quinga lao orasyonṉəꞌ žlac ṉeꞌe zoaꞌ yežlyo nga par nic̱h ḻegaꞌaqueꞌ ṉitəꞌəchgüeꞌ mbalaz ca mbalazənꞌ zoaꞌ nadaꞌ.
\v 14 Nadaꞌ babeꞌelengaꞌacaꞌaneꞌ xtižoꞌonəꞌ. Pero naꞌ beṉəꞌ caꞌ cui zɉənombiaꞌ leꞌ chəsəꞌəgueꞌineꞌ beṉəꞌ caꞌ chsoꞌonḻilažəꞌ nadaꞌ por ni c̱he deꞌen cuich zɉənaqueꞌ txen len ḻegaꞌaqueꞌ, ca nadaꞌ cui nacaꞌ txen len beṉəꞌ caꞌ cui zɉənombiaꞌ leꞌ.
\v 15 Naꞌ ca naquə beṉəꞌ caꞌ chsoꞌonḻilažəꞌ nadaꞌ, caguə chṉabdaꞌ leꞌ yecaꞌagaꞌacoꞌoneꞌ lao yežlyo nganꞌ, sino chṉabdaꞌ leꞌ par əgwcuasəꞌ əgwcueꞌeɉgaꞌacoꞌoneꞌ len deꞌen chon gwxiyeꞌenəꞌ.
\v 16 Bito zɉənaqueꞌ txen len beṉəꞌ caꞌ cui zɉənombiaꞌ leꞌ ca nadaꞌ cui nacaꞌ txen len beṉəꞌ caꞌ cui zɉənombiaꞌ leꞌ.
\v 17 Ben par nic̱h beṉəꞌ caꞌ chsoꞌonḻilažəꞌ nadaꞌ soꞌon cuingaꞌaqueꞌ lažəꞌ naꞌonəꞌ laogüe deꞌen bazɉənombiꞌe dižəꞌ ḻi c̱hioꞌonəꞌ. Yoguəꞌəḻoḻte deꞌen babzeɉniꞌidoꞌ ḻegaꞌaqueꞌ naquən deꞌe ḻi.
\v 18 Lenꞌ bseḻoꞌo nadaꞌ yežlyo nga par chzeɉniꞌidaꞌ beṉac̱hənꞌ dižəꞌ ḻi c̱hioꞌonəꞌ, naꞌ ḻeczə caꞌ nadaꞌ bachseḻaꞌa ḻegaꞌaqueꞌ par yosoꞌozeɉniꞌineꞌ beṉac̱hənꞌ dižəꞌ ḻi c̱hioꞌonəꞌ.
\v 19 Zoaꞌ chon cuinaꞌ lažəꞌ naꞌonəꞌ c̱hedəꞌ chacdaꞌ c̱he beṉəꞌ caꞌ chsoꞌonḻilažəꞌ nadaꞌ. Naꞌ chonaꞌ caꞌ par nic̱h ḻegaꞌaqueꞌ soꞌon cuingaꞌaqueꞌ lažəꞌ naꞌonəꞌ laogüe deꞌen bazɉənombiꞌe dižəꞌ ḻi c̱hioꞌonəꞌ.
\p
\v 20 Naꞌ ca naquə chṉabaꞌ gaquəlenoꞌ beṉəꞌ caꞌ, bito chṉabaꞌ gaquəlenoꞌ ḻegaꞌaczeꞌ sino ḻeczə gaquəlenoꞌ beṉəꞌ caꞌ soꞌonḻilažəꞌ nadaꞌ catəꞌ əseꞌeneneꞌ dižəꞌ deꞌen əsoeꞌ beṉəꞌ caꞌ.
\v 21 X̱aꞌ, ben par nic̱h yoguəꞌəḻoḻeꞌ əsaꞌaqueꞌ tozə len lɉuežɉgaꞌaqueꞌ ca leꞌ nacoꞌ tozə len nadaꞌ naꞌ nadaꞌ nacaꞌ tozə len leꞌ. Ben ca əsaꞌaqueꞌ tozə laogüe deꞌen zɉəngodeꞌe txen len chioꞌo, par nic̱h beṉəꞌ caꞌ cui zɉənombiaꞌ leꞌ seꞌeɉḻeꞌe de que lenꞌ əbseḻoꞌo nadaꞌ.
\v 22 Babenoꞌ par nic̱h chsaꞌacbeꞌi beṉəꞌ de que noṉoꞌ nadaꞌ yeḻəꞌ balaꞌaṉ, caꞌaczənꞌ chonaꞌ nadaꞌ par nic̱h chsaꞌacbeꞌineꞌ de que chnežɉuaꞌ ḻegaꞌaqueꞌ yeḻəꞌ balaꞌaṉ. Naꞌ chonaꞌ caꞌ par nic̱h əsaꞌaqueꞌ tozə len lɉuežɉgaꞌaqueꞌ ca chioꞌo naccho tozə.
\v 23 Ḻegaꞌaqueꞌ zɉəngodeꞌe txen len nadaꞌ naꞌ nadaꞌ ngodaꞌa txen len leꞌ nic̱h yoguəꞌəcho gaccho tozə naꞌ caꞌ beṉəꞌ caꞌ cui zɉənombiaꞌ leꞌ yesəꞌəṉezeneꞌ de que lenꞌ əbseḻoꞌo nadaꞌ naꞌ de que chacdoꞌ c̱he beṉəꞌ caꞌ zɉəngodəꞌ txen len nadaꞌ canꞌ chacdoꞌ c̱hiaꞌ.
\p
\v 24 X̱aꞌ, bachacdoꞌ c̱hiaꞌ antslə zeꞌe x̱e yežlyo nga. Deꞌe naꞌanəꞌ beṉoꞌ nadaꞌ yeḻəꞌ chey cheꞌeniꞌinəꞌ. Naꞌ cheꞌendaꞌ de que beṉəꞌ caꞌ bagwleɉoꞌ par chsoꞌonḻilažeꞌe nadaꞌ ṉiteꞌe len nadaꞌ ganꞌ soꞌanəꞌ par nic̱h yesəꞌəleꞌineꞌ yeḻəꞌ chey cheꞌeniꞌ c̱hiaꞌanəꞌ.
\v 25 X̱aꞌ, leꞌ nacoꞌ ḻeꞌezelaogüe beṉəꞌ güen, naꞌ ca naquə beṉəꞌ caꞌ cui chsoꞌonḻilažəꞌ nadaꞌ bito zɉənombiꞌe leꞌ, pero nadaꞌ nombiꞌa leꞌ naꞌ beṉəꞌ caꞌ bagwleɉoꞌ par chsoꞌonḻilažeꞌe nadaꞌ bazɉəṉezeneꞌ de que lenꞌ əbseḻoꞌo nadaꞌ.
\v 26 Naꞌ babenaꞌ par nic̱h zɉəṉezeneꞌ canꞌ naquə yic̱hɉlaꞌaždaogoꞌonəꞌ naꞌ canꞌ chonoꞌ, naꞌ ṉeꞌe gonchczaꞌ ca yesəꞌəṉezeneꞌ. Chzeɉniꞌigaꞌacdaꞌaneꞌ canꞌ naquə yic̱hɉlaꞌaždaogoꞌonəꞌ naꞌ canꞌ chonoꞌ par nic̱h əsaꞌacbeꞌineꞌ de que chacdoꞌ c̱hegaꞌaqueꞌ canꞌ chacdoꞌ c̱hiaꞌ nadaꞌ naꞌ par nic̱h sotezə soaꞌ len ḻegaꞌaqueꞌ.
\c 18
\s1 Jodənꞌ bdieꞌ Jesoꞌosənꞌ lao naꞌ soḻdad caꞌ
\p
\v 1 Naꞌ ca beyož gwna Jesoꞌosənꞌ deꞌe caꞌ, netoꞌ disipl c̱heꞌ gwzaꞌatoꞌ len ḻeꞌ gwyeɉtoꞌ šḻaꞌa yao Sedron ganꞌ gotəꞌ to güert, naꞌ gwyoꞌotoꞌ len ḻeꞌ.
\v 2 Naꞌ Jodənꞌ benꞌ banaquən goneꞌ Jesoꞌosənꞌ lao naꞌ beṉəꞌ caꞌ chəsəꞌəgueꞌi ḻeꞌ nombiꞌe güertənꞌ, c̱hedəꞌ zan las bagwyeɉtoꞌ len Jesoꞌosənꞌ ḻoꞌo güertənꞌ.
\v 3 Naꞌ bx̱oz əblao caꞌ naꞌ beṉəꞌ fariseo caꞌ bosoꞌoseḻeꞌe x̱oṉɉ soḻdad naꞌ len x̱aꞌag yoꞌodaoꞌ caꞌ zɉaꞌacleneꞌ Jodənꞌ par ɉəsəꞌəxeneꞌ Jesoꞌosənꞌ ḻoꞌo güertənꞌ. Zɉaꞌaqueꞌ ganꞌ zo Jesoꞌosənꞌ zɉənox̱eꞌe lintern, yiꞌ yech naꞌ spad.
\v 4 Jesoꞌosənꞌ baṉezeneꞌ yoguəꞌəḻoḻ deꞌen gaquə c̱heꞌ, nach bchoɉeꞌ ɉəšagueꞌ ḻegaꞌaqueꞌ nach gožeꞌ: ―¿Nonꞌ cheyilɉle?
\p
\v 5 Naꞌ gwseꞌeneꞌ: ―Jesoꞌos beṉəꞌ Nasaret.
\p Naꞌ gož Jesoꞌosənꞌ ḻegaꞌaqueꞌ: ―Nadaꞌanəꞌ.
\p Naꞌ len Jodənꞌ ḻegaꞌaqueꞌ, benꞌ banaquən goneꞌ Jesoꞌosənꞌ lao naꞌagaꞌaqueꞌenəꞌ.
\v 6 Naꞌ catəꞌ gožeꞌ ḻegaꞌaqueꞌ: “Nadaꞌanəꞌ”, ḻeꞌe besyəꞌəbiguəꞌəteꞌ gosxanḻə naꞌ gosəꞌəbix̱eꞌ gwsaꞌateꞌe lao yonꞌ.
\v 7 Naꞌ deꞌe yoblə gožeꞌ ḻegaꞌaqueꞌ: ―¿Nonꞌ cheyilɉle?
\p Naꞌ ḻegaꞌaqueꞌ gosəꞌəzeꞌeneꞌ: ―Cheyilɉtoꞌ Jesoꞌos beṉəꞌ Nasaret.
\p
\v 8 Naꞌ gwna Jesoꞌosənꞌ: ―Bagwniaꞌ leꞌe de que nadaꞌanəꞌ. Naꞌ šə nadanꞌ cheyilɉle, ḻeꞌe güeꞌ latɉə žɉəyaꞌac beṉəꞌ quinga.
\p
\v 9 Gožeꞌ caꞌ par nic̱h goc complir canꞌ gwneꞌ de que ni to beṉəꞌ caꞌ bagwleɉ Diozənꞌ par chsoꞌonḻilažeꞌeneꞌ cui yesəꞌəbiayiꞌe.
\v 10 Naꞌ Simon Bedənꞌ noꞌe to spad naꞌ golɉeꞌen gwc̱hogueꞌ nag ḻicha xmos beṉəꞌ gwnabiaꞌ c̱he bx̱oz caꞌ. Naꞌ mosənꞌ leꞌ Malco.
\v 11 Naꞌ Jesoꞌosənꞌ gožeꞌ Bedənꞌ: ―Begoꞌo spad c̱hioꞌonəꞌ ḻoꞌo liže. ¿Echaquele gonḻe par nic̱h cui c̱hiꞌ sacaꞌa canꞌ babsiꞌ X̱aꞌanəꞌ xṉeze c̱hiꞌ sacaꞌa?
\s1 Gosəꞌəc̱heꞌe Jesoꞌosənꞌ lao benꞌ le Anas
\p
\v 12 Nach soḻdad caꞌ len capitan c̱hegaꞌaqueꞌenəꞌ naꞌ zɉəlen x̱aꞌag yoꞌodaoꞌ c̱he ṉasyon Izrael c̱hetonꞌ gosəꞌəzeneꞌ Jesoꞌosənꞌ naꞌ bosoꞌoc̱heɉeꞌeneꞌ.
\v 13 Naꞌ gosəꞌəc̱heꞌeneꞌ zguaꞌatec lao Anas xtaꞌobinꞌ c̱he Caifasənꞌ. Caifasənꞌ naquəcheꞌ bx̱oz əblao c̱he ṉasyon c̱hetonꞌ ca izənꞌ.
\v 14 Naꞌ Caifas naꞌanəꞌ babnežɉueꞌ beṉəꞌ blao c̱he ṉasyon Izrael c̱hetonꞌ consejonꞌ de que napən ḻegaꞌaqueꞌ cuent tozə benꞌ soꞌoteꞌ lguaꞌa yesəꞌəbiayiꞌ yogueꞌe len ṉasyon c̱hetoꞌonəꞌ.
\s1 Bedənꞌ bito gwc̱hebeꞌ šə leneꞌ Jesoꞌosənꞌ
\p
\v 15 Simon Bedənꞌ naꞌ nadaꞌ ɉənaotoꞌ Jesoꞌosənꞌ. Naꞌ nombiaꞌ bx̱oz əblaonəꞌ nadaꞌ. Deꞌe naꞌanəꞌ goc gwyoꞌa len Jesoꞌosənꞌ chyoꞌo c̱he bx̱oz əblaonəꞌ.
\v 16 Naꞌ Bedənꞌ begaꞌaṉeꞌ choꞌa puertənꞌ fuerlə. Naꞌ bechoɉaꞌ naꞌ beꞌelenaꞌ noꞌolənꞌ chapə choꞌa puertənꞌ dižəꞌ, nach gwloꞌo noꞌolənꞌ Bedənꞌ c̱hedəꞌ nombiaꞌ bx̱oz əblaonəꞌ nadaꞌ.
\v 17 Nach noꞌolənꞌ chapə choꞌa puertənꞌ gožeꞌ Bedənꞌ: ―¿Ecaguə lenoꞌ lenꞌ nacoꞌ disipl c̱he beꞌenəꞌ?
\p Naꞌ gwneꞌ: ―Bito lenaꞌ nadaꞌ.
\p
\v 18 Naꞌ mos caꞌ naꞌ x̱aꞌag yoꞌodaoꞌ caꞌ bagosəꞌəbequeꞌ yiꞌ yaꞌalɉ c̱hedəꞌ chac zag. Naꞌ zɉəzecheꞌ choꞌa yiꞌinəꞌ par chəsyəꞌəžeꞌineꞌ. Naꞌ len Bedənꞌ zecheꞌ len ḻegaꞌaqueꞌ choꞌa yiꞌinəꞌ par chežeꞌineꞌ.
\s1 Gosəꞌəṉabeneꞌ Jesoꞌosənꞌ c̱he deꞌen chsed chloꞌineꞌ
\p
\v 19 Naꞌ bx̱oz əblaonəꞌ gwṉabeneꞌ Jesoꞌosənꞌ c̱he netoꞌ disipl c̱heꞌ naꞌ c̱he deꞌen chsed chloꞌineꞌ.
\v 20 Nach Jesoꞌosənꞌ gožeꞌeneꞌ: ―Nadaꞌ zaquəꞌəlao babiꞌa dižəꞌ len beṉac̱hənꞌ. Syempr babsed bloꞌidaꞌ ḻoꞌo yoꞌodaoꞌ c̱hecho caꞌ naꞌ ḻeczə caꞌ ḻoꞌo yoꞌodaoꞌ əblaonəꞌ ganꞌ chəsəꞌəžag yoguəꞌ beṉəꞌ Izrael gwlaž c̱hechonꞌ. Bito bi bi dižəꞌ ṉeꞌe guaꞌa bgašəꞌəzə.
\v 21 ¿Bixc̱henꞌ chṉabdoꞌ nadaꞌ? Gwṉabe beṉəꞌ caꞌ bagwseꞌene deꞌen babsed babloꞌidaꞌ. Ḻegaꞌaqueꞌ zɉəṉezeneꞌ bi dižəꞌən babeꞌelengaꞌacaꞌaneꞌ.
\p
\v 22 Gwde gwna Jesoꞌosənꞌ caꞌ, to x̱aꞌag yoꞌodaoꞌ beṉəꞌ zechanꞌ gwdapeꞌe x̱agueꞌenəꞌ, nach gožeꞌeneꞌ: ―¿Ecaꞌ chožiꞌo xtižəꞌ benꞌ naquə bx̱oz əblaonəꞌ?
\p
\v 23 Nach gož Jesoꞌosənꞌ ḻeꞌ: ―Šə bi deꞌe mal bagwniaꞌ, beꞌ dižəꞌ c̱he bi deꞌe malənꞌ. Naꞌ šə gwniaꞌ deꞌe güen, ¿bixc̱henꞌ chgapoꞌo nadaꞌ?
\p
\v 24 Nach Anasənꞌ bdieꞌ Jesoꞌosənꞌ ncheɉeꞌ lao Caifasənꞌ benꞌ naquəch bx̱oz əblaonəꞌ.
\s1 Deꞌe yoblə Bedənꞌ bito gwc̱hebeꞌ šə leneꞌ Jesoꞌosənꞌ
\p
\v 25 Naꞌ Bedənꞌ ṉeꞌe zecheꞌ choꞌa yiꞌinəꞌ par chežeꞌineꞌ naꞌ beṉəꞌ caꞌ zɉəzecha naꞌ gosəꞌəzeꞌeneꞌ: ―¿Ecaguə ḻeczə lenonꞌ nacoꞌ disipl c̱he beꞌenəꞌ?
\p Naꞌ bito gwc̱hebeꞌ, naꞌ gwneꞌ: ―Bito lenaꞌ nadaꞌ.
\p
\v 26 To xmos beṉəꞌ gwnabiaꞌ c̱he bx̱oz caꞌ naqueꞌ famiḻy c̱he benꞌ əgwc̱hog Bedənꞌ nagueꞌ, naꞌ gožeꞌ Bedənꞌ: ―¿Ecaguə zleꞌidaꞌ leꞌ len Jesoꞌosənꞌ ḻoꞌo güertənꞌ?
\p
\v 27 Naꞌ Bedənꞌ deꞌe yoblə bito gwc̱hebeꞌ, naꞌ ḻeꞌe gwchežte to ḻecw.
\s1 Gosəꞌəc̱heꞌe Jesoꞌosənꞌ lao Pilatənꞌ
\p
\v 28 Naꞌ do cheꞌeniꞌiḻas bx̱oz əblao caꞌ gosəꞌəbeɉeꞌ Jesoꞌosənꞌ ganꞌ zo Caifasənꞌ naꞌ gosəꞌəc̱heꞌeneꞌ ganꞌ chon Pilatənꞌ yeḻəꞌ jostisənꞌ. Naꞌ ḻegaꞌaqueꞌ bito gwsoꞌe len Jesoꞌosənꞌ ganꞌ chon Pilatənꞌ yeḻəꞌ jostisənꞌ c̱hedəꞌ segon costombr c̱hegaꞌaqueꞌ bito gaquə əsaꞌogüeꞌ deꞌe caꞌ gwsoꞌoneꞌ par xšeꞌ lṉi pasconꞌ šə soꞌe ḻoꞌo yoꞌo c̱he beṉəꞌ caꞌ cui chəsəꞌənao costombr c̱hegaꞌaqueꞌ caꞌ.
\v 29 Deꞌe naꞌanəꞌ Pilatənꞌ bchoɉeꞌ ganꞌ nitəꞌ beṉəꞌ blao c̱he ṉasyon Izrael c̱hetonꞌ naꞌ gožeꞌ ḻegaꞌaqueꞌ: ―¿Bi ben benganꞌ? ¿Ede bi deꞌe chaole xya?
\p
\v 30 Naꞌ gwseꞌeneꞌ: ―Žaləꞌ benga cui naqueꞌ beṉəꞌ mal bito əgwdetoꞌoneꞌ lao naꞌonəꞌ.
\p
\v 31 Naꞌ gož Pilatənꞌ ḻegaꞌaqueꞌ: ―Ḻeꞌe yec̱heꞌe naꞌ ḻeꞌe gon yeḻəꞌ jostis c̱heꞌenəꞌ segon ḻei c̱helenꞌ.
\p Naꞌ beṉəꞌ blao c̱he ṉasyon Izrael c̱hetonꞌ gwseꞌeneꞌ: ―Bito bi lsens c̱hetoꞌ de par no gottoꞌ.
\p
\v 32 Ca goquənꞌ goc complir canꞌ gwna Jesoꞌosənꞌ bzeɉniꞌineꞌ naquənꞌ gaquə soꞌoteꞌeneꞌ.
\v 33 Nach Pilatənꞌ beyoꞌe ganꞌ choneꞌ yeḻəꞌ jostisənꞌ, naꞌ goxeꞌ Jesoꞌosənꞌ nach gožeꞌeneꞌ: ―¿Elenꞌ nacoꞌ Rei c̱he beṉəꞌ Izrael caꞌ?
\p
\v 34 Jesoꞌosənꞌ gožeꞌeneꞌ: ―¿Econ deꞌe babidzən yic̱hɉoꞌonəꞌ naoꞌ caꞌ, o šə beṉəꞌ yoblə gosəꞌəneꞌ leꞌ caꞌanəꞌ?
\p
\v 35 Pilatənꞌ gožeꞌeneꞌ: ―¿Echacdoꞌ nacaꞌ nadaꞌ beṉəꞌ Izraelənꞌ? Beṉəꞌ gwlaž c̱hioꞌ caꞌ naꞌ bx̱oz əblao c̱hele canꞌ bosoꞌodieꞌ leꞌ lao naꞌa nga. ¿Bi deꞌe xiṉɉənꞌ benoꞌ?
\p
\v 36 Nach Jesoꞌosənꞌ gozeꞌeneꞌ: ―Nžaꞌalə canꞌ chnabiaꞌ nadaꞌ naꞌ nžaꞌalənꞌ chəsəꞌənabiaꞌ notəꞌətezəchlə beṉəꞌ gwnabiaꞌ. Yeḻəꞌ gwnabiaꞌ c̱hiꞌanəꞌ bito zaꞌan c̱he beṉəꞌ žaꞌ yežlyo nga. Žaləꞌ zaꞌan c̱he beṉəꞌ žaꞌ yežlyo nga beṉəꞌ caꞌ chəsəꞌənabiꞌanəꞌ yesəꞌədiḻeꞌ par nic̱h cui gacaꞌ lao naꞌ beṉəꞌ Izrael gwlaž c̱hiaꞌ quinga. Pero yeḻəꞌ chnabiaꞌ c̱hiaꞌanəꞌ bito zaꞌan c̱he yežlyo nga.
\p
\v 37 Nach gož Pilatənꞌ ḻeꞌ: ―¿Enaꞌ reinꞌ nacoꞌ?
\p Naꞌ gwna Jesoꞌosənꞌ: ―Deꞌe ḻinꞌ bagwnaoꞌ de que nadaꞌ nacaꞌ rei. Babidaꞌ yežlyo nga golɉaꞌ par nic̱h ṉabiꞌa naꞌ par nic̱h əgwzeɉniꞌidaꞌ beṉac̱hənꞌ dižəꞌ ḻi c̱he Diozənꞌ. Beṉəꞌ caꞌ bachosoꞌozenag c̱he dižəꞌ ḻi c̱he Diozənꞌ ḻeczə chosoꞌozenagueꞌ c̱hiaꞌ.
\p
\v 38 Nach gož Pilatənꞌ leꞌ: ―Cuili binꞌ naquə dižəꞌ ḻinꞌ.
\s1 Gosəꞌəc̱hoglaogüeꞌen soꞌoteꞌ Jesoꞌosənꞌ
\p Naꞌ beyož gwna Pilatənꞌ caꞌ bchoɉeꞌ yetšiꞌi ganꞌ nitəꞌ beṉəꞌ blao c̱he ṉasyon Izrael c̱hetonꞌ naꞌ gožeꞌ ḻegaꞌaqueꞌ: ―Bito bi chlaꞌalaon šə bi doḻəꞌənəꞌ napə benga.
\v 39 Naꞌ ca naquə de costombr c̱hele de que to beṉəꞌ presənꞌ gwsanaꞌ lao lṉi pasconꞌ, ¿əcheneꞌele gwsanaꞌ benga naquə Rei c̱he leꞌe beṉəꞌ Izrael?
\p
\v 40 Nach gwsoꞌosyeꞌe gosəꞌəneꞌ: ―Bito gwsanoꞌ beꞌenaꞌ. Barrabas naꞌ əgwsanoꞌ.
\p Len Barrabasənꞌ naqueꞌ to beṉəꞌ bguan.
\c 19
\p
\v 1 Nach ben Pilatənꞌ mendad gosəꞌəyineꞌ Jesoꞌosənꞌ.
\v 2 Naꞌ soḻdad caꞌ gwsoꞌoneꞌ to coron de xis yešəꞌ naꞌ bosoꞌožineꞌen yic̱hɉeꞌenəꞌ. Naꞌ bosoꞌoguacueꞌeneꞌ to cḻas lachəꞌ morad ca deꞌen chəsəꞌəc̱hin rei caꞌ.
\v 3 Naꞌ gwoꞌoneneꞌ borl gosəꞌəneꞌ: ―Biba Rei c̱he beṉəꞌ Izrael.
\p Naꞌ gosəꞌəgapeꞌe x̱agueꞌenəꞌ.
\p
\v 4 Nach Pilatənꞌ bchoɉeꞌ chyoꞌonəꞌ deꞌe yoblə naꞌ gožeꞌ beṉəꞌ Izrael caꞌ žaꞌanəꞌ: ―Ṉaꞌa cueɉaꞌaneꞌ par nic̱h əṉezele ca xyanꞌ deꞌen chaole c̱heꞌ, ni to deꞌe xiṉɉ cui cheželdaꞌ šə binꞌ noneꞌ.
\p
\v 5 Naꞌ bchoɉ Jesoꞌosənꞌ chyoꞌonəꞌ, zo coron de yešəꞌənəꞌ yic̱hɉeꞌenəꞌ, naꞌ nyazeꞌ lachəꞌ moradənꞌ. Naꞌ gož Pilatənꞌ ḻegaꞌaqueꞌ: ―Ḻeꞌe ggüia, nga zecha beꞌenəꞌ.
\p
\v 6 Naꞌ bx̱oz əblao caꞌ naꞌ x̱aꞌag yoꞌodaoꞌ caꞌ, catəꞌ besəꞌəleꞌineꞌ ḻeꞌ gwsoꞌosyeꞌe gosəꞌəneꞌ: ―¡Bdeꞌe ḻeꞌe yag corozənꞌ! ¡Bdeꞌe ḻeꞌe yag corozənꞌ!
\p Pilatənꞌ gožeꞌ ḻegaꞌaqueꞌ: ―Ḻeꞌe ḻec̱heꞌe naꞌ ḻegwdeꞌe ḻeꞌe yag corozənꞌ c̱hedəꞌ ca xyanꞌ chaole c̱heꞌ, ni to deꞌe xiṉɉ cui cheželdaꞌ šə binꞌ noneꞌ.
\p
\v 7 Naꞌ gwseꞌ beṉəꞌ blao c̱he ṉasyon Izrael c̱hetonꞌ ḻeꞌ: ―Segon ḻei c̱hetoꞌ deꞌen de cheyaḻəꞌ gotchoneꞌ c̱hedəꞌ neꞌ naqueꞌ xiꞌiṉ Dioz ḻaꞌaṉəꞌəczə naqueꞌ con to beṉac̱hzə.
\p
\v 8 Bachžeb Pilatənꞌ ca deꞌen bachaquənꞌ, naꞌ catəꞌ beneneꞌ gosəꞌəneꞌ caꞌ c̱he Jesoꞌosənꞌ nachlə bžebəcheꞌ.
\v 9 Nach beyoꞌo Pilatənꞌ len Jesoꞌosənꞌ deꞌe yoblə ganꞌ choneꞌ yeḻəꞌ jostisənꞌ. Naꞌ gožeꞌ Jesoꞌosənꞌ: ―¿Ga beṉəꞌ leꞌ?
\p Pero Jesoꞌosənꞌ bito božiꞌe xtižeꞌenəꞌ.
\p
\v 10 Nach Pilatənꞌ gožeꞌeneꞌ: ―¿Ecui chožiꞌo xtižaꞌanəꞌ? ¿Ecui ṉezdoꞌonəꞌ nadaꞌ napaꞌ yeḻəꞌ chnabiaꞌ par gwsanaꞌ leꞌ naꞌ napaꞌ yeḻəꞌ chnabiaꞌ par əgwdaꞌ leꞌ ḻeꞌe yag corozənꞌ?
\p
\v 11 Jesoꞌosənꞌ gožeꞌeneꞌ: ―Bito bi yeḻəꞌ gwnabiaꞌ napoꞌ len nadaꞌ žaləꞌ Diozənꞌ cui noṉeꞌen leꞌ. Naꞌ benꞌ əbde nadaꞌ lao naꞌonəꞌ doḻəꞌ xench napeꞌ cle ca leꞌ.
\p
\v 12 Nach gwdilɉlažəꞌ Pilatənꞌ naclə goneꞌ əgwsaneꞌeneꞌ. Pero beṉəꞌ blao c̱he ṉasyon Izrael c̱hetonꞌ gwsoꞌosyeꞌe gosəꞌəneꞌ: ―Šə əgwsanoꞌ benga, contr Rei Sesar nanꞌ gonoꞌ šə caꞌ. Notəꞌətezə beṉəꞌ neꞌ de que naqueꞌ rei, contr Rei Sesarənꞌ choneꞌ.
\p
\v 13-14 Nach Pilatənꞌ beyož beneneꞌ deꞌen əgwseꞌ beṉəꞌ caꞌ ḻeꞌ, gwleɉeꞌ Jesoꞌosənꞌ chyoꞌonəꞌ. Naꞌ ḻeczə bchoɉ ḻeꞌ chyoꞌonəꞌ ganꞌ nao yeɉ, ganꞌ nziꞌin dižəꞌ ebreo Gabata. Naꞌ gwchiꞌe ganꞌ chbiꞌe catəꞌ choneꞌ yeḻəꞌ jostisənꞌ. Nach gožeꞌ beṉəꞌ blao c̱he ṉasyon Izrael c̱hetonꞌ: ―Nga zo Rei c̱helenꞌ.
\p Naꞌ do gobiž catəꞌən gožeꞌ ḻegaꞌaqueꞌ caꞌ, naꞌ beṉəꞌ Izrael gwlaž c̱hetoꞌ caꞌ chosoꞌosiꞌiniꞌe par lṉi pasconꞌ žanəꞌ.
\p
\v 15 Nach ḻegaꞌaqueꞌ gwsoꞌosyeꞌe gosəꞌəneꞌ: ―¡Gwcueꞌe! ¡Bdeꞌe ḻeꞌe yag corozənꞌ!
\p Naꞌ gož Pilatənꞌ ḻegaꞌaqueꞌ: ―¿Erei c̱hele nga gonaꞌ mendad yosoꞌodeꞌeneꞌ ḻeꞌe yag corozənꞌ?
\p Nach bx̱oz əblao caꞌ gwseꞌeneꞌ: ―Caguə rei c̱hetoꞌ benga. Tozə Sesarənꞌ naqueꞌ rei c̱hetoꞌ.
\p
\v 16 Caꞌ goquənꞌ bdieꞌ Jesoꞌosənꞌ lao naꞌagaꞌaqueꞌenəꞌ par teꞌe ḻeꞌe yag corozənꞌ.
\s1 Bosoꞌodeꞌe Jesoꞌosənꞌ ḻeꞌe yag corozənꞌ
\p
\v 17 Nach gosəꞌəc̱heꞌe Jesoꞌosənꞌ fuerlə syodanꞌ ganꞌ bosoꞌodaꞌ soḻdad caꞌ ḻeꞌ ḻeꞌe yag corozənꞌ. Latɉənꞌ nziꞌin Golgota dižəꞌ ebreo, zeɉen dižəꞌ latɉə c̱he yic̱hɉ beṉəꞌ guat. Naꞌ gwzeꞌe zdeꞌ noaꞌ coroz c̱heꞌenəꞌ.
\v 18 Naꞌ Golgota naꞌ bosoꞌodeꞌeneꞌ ḻeꞌe yag corozənꞌ. Naꞌ len yec̱hopə beṉəꞌ yoblə bosoꞌodeꞌe ḻeꞌe yec̱hopə yag coroz tgüeɉeꞌ cuiteꞌenəꞌ, Jesoꞌosənꞌ gwyoꞌe gwchoḻ.
\v 19 Naꞌ Pilatənꞌ beneꞌ mendad byoɉ to c̱hopə ḻetr deꞌe gwdaꞌ yic̱hɉ yag coroz c̱he Jesoꞌosənꞌ, bosoꞌozoɉeꞌen nan: “Jesoꞌos beṉəꞌ Nasaret, Rei c̱he beṉəꞌ Izrael.”
\v 20 Bosoꞌozoɉeꞌen dižəꞌ ebreo, dižəꞌ griego naꞌ dižəꞌ latin. Naꞌ zan beṉəꞌ Izrael gwlaž c̱hetonꞌ bosoꞌolabeꞌ deꞌenəꞌ byoɉənꞌ, c̱hedəꞌ ganꞌ gwdaꞌ Jesoꞌosənꞌ ḻeꞌe yag corozənꞌ naquən gaḻəꞌəzə syodanꞌ.
\v 21 Deꞌe naꞌanəꞌ beṉəꞌ caꞌ zɉənaquə bx̱oz əblao c̱he ṉasyon Izrael c̱hetonꞌ gwseꞌe Pilatənꞌ: ―Bšaꞌan par nic̱h cui ṉan de que naqueꞌ rei c̱he netoꞌ beṉəꞌ Izrael, sino ṉan de que ḻenꞌ gwneꞌ naqueꞌ rei c̱hetoꞌ.
\p
\v 22 Naꞌ Pilatənꞌ gwneꞌ: ―Deꞌen benaꞌ mendad bosoꞌozoɉeꞌ, banyoɉənṉəꞌ.
\p
\v 23 Nach soḻdad caꞌ, beyož bosoꞌodeꞌe Jeoꞌosənꞌ ḻeꞌe yag corozənꞌ gosəꞌəziꞌe xalaneꞌe caꞌ naꞌ gwsoꞌoneꞌen taplə, to part güeɉən gosəꞌəziꞌe. Naꞌ ḻeczə caꞌ gosəꞌəziꞌe xeꞌenəꞌ deꞌen naquə ca xadoṉ chaꞌo. Pero lachəꞌənəꞌ naquən de to golizə. Bito bi dia nyazən.
\v 24 Naꞌ gwseꞌe lɉuežɉeꞌ: ―Bito əgwzoxɉchonꞌ sino gonchon rif. Yešc no yechelən.
\p Naꞌ gwsoꞌoneꞌ caꞌ par nic̱h goc canꞌ nyoɉ Xtižəꞌ Diozənꞌ ganꞌ nan: “Yosyoꞌoleꞌe xalanaꞌanəꞌ entr ḻegaꞌaqueꞌ naꞌ soꞌoneꞌen rif.” Naꞌ caꞌanəꞌ gwsoꞌon soḻdad caꞌ.
\p
\v 25 Naꞌ cuit coroz c̱he Jesoꞌosənꞌ zecha xneꞌenəꞌ len beṉəꞌ bileꞌenəꞌ naꞌ len Maria noꞌol c̱he Cleofas naꞌ Maria beṉəꞌ Magdala.
\v 26 Naꞌ catəꞌ Jesoꞌosənꞌ bleꞌineꞌ zecha xneꞌenəꞌ gaḻəꞌəzə naꞌ nadaꞌ zechaꞌ cuiteꞌenəꞌ, nach gožeꞌeneꞌ: ―Naogüe, benga gaqueꞌ ca xiꞌiṉoꞌ.
\p
\v 27 Nach gožeꞌ nadaꞌ: ―Bžiꞌilažəꞌ xnaꞌa nga ca xnaꞌonəꞌ.
\p Naꞌ lao žanəꞌ nadaꞌ gwcuaꞌaneꞌ benaꞌaneꞌ ca famiḻy c̱hiaꞌaczaꞌ.
\s1 Canꞌ goquə catəꞌən got Jesoꞌosənꞌ
\p
\v 28 Jesoꞌosənꞌ ṉezeneꞌ de que bac̱h goc yoguəꞌəḻoḻ deꞌen cheyaḻəꞌ gaquən. Naꞌ par nic̱h gaquə canꞌ na Xtižəꞌ Diozənꞌ deꞌenəꞌ nyoɉən gwneꞌ: ―Chbildaꞌ nis.
\p
\v 29 Naꞌ de latəꞌ bino corrient deꞌe yožə to ḻoꞌo xguaguə daoꞌ. Naꞌ to beṉəꞌ bosgažeꞌe to sponj len bino corrientənꞌ naꞌ bosšineꞌen choꞌa Jesoꞌosənꞌ bsoꞌen to lao xis deꞌen neꞌ isopo.
\v 30 Naꞌ beyož gwxop Jesoꞌosənꞌ bino corrientənꞌ gwneꞌ: ―Bac̱h goc yoguəꞌəḻoḻ deꞌen cheyaḻəꞌ gaquənꞌ.
\p Naꞌ bc̱hequəꞌ yic̱hɉeꞌenəꞌ goteꞌ.
\s1 To soḻdadənꞌ godeꞌe lanz cuit ḻeꞌe Jesoꞌosənꞌ
\p
\v 31 Nach beṉəꞌ blao c̱he ṉasyon Izrael c̱hetonꞌ gosəꞌəṉabeneꞌ Pilatənꞌ goneꞌ mendad yesəꞌəyišɉw soḻdad caꞌ ṉiꞌa beṉəꞌ caꞌ zɉədaꞌ ḻeꞌe yag corozənꞌ nic̱h yob saꞌateꞌ par nic̱h caꞌ yesyəꞌəqueꞌe ḻegaꞌaqueꞌ. Bito gwseꞌeneneꞌ yesyəꞌəgaꞌaṉ cuerp caꞌ ḻeꞌe yag corozənꞌ xte yeteyo, c̱hedəꞌ yeteyonꞌ naquən ža dezcanz naꞌ ža lṉi xen.
\v 32 Nach Pilatənꞌ beneꞌ mendad ɉaꞌac soḻdad caꞌ naꞌ gosəꞌəyišɉueꞌ c̱hopə laꞌa ṉiꞌa benꞌ bosoꞌodeꞌe to šḻaꞌa cuit Jesoꞌosənꞌ. Naꞌ ḻeczə caꞌ gwsoꞌoneꞌ len benꞌ gwdaꞌ ḻeꞌe yag corozənꞌ cuiteꞌen yešḻaꞌa.
\v 33 Naꞌ catəꞌ besəꞌəžineꞌ ganꞌ daꞌ Jesoꞌosənꞌ, besəꞌəleꞌineꞌ bagoteꞌ, naꞌ bito gosəꞌəyišɉueꞌ ṉiꞌe caꞌ.
\p
\v 34 Pero to soḻdadənꞌ godeꞌe lanzənꞌ cuit ḻeꞌe Jesoꞌosənꞌ, naꞌ ḻeꞌe bchoɉten chen len nis.
\v 35 Nadaꞌ bleꞌidaꞌ canꞌ goquənꞌ naꞌ ṉezdaꞌ de que dižəꞌ deꞌen choꞌa naquən deꞌe ḻi. Naꞌ choꞌa dižəꞌənəꞌ par nic̱h lenczə leꞌe šeɉḻeꞌele.
\v 36 Goc caꞌ par nic̱h goc complir canꞌ na Xtižəꞌ Diozənꞌ deꞌen nyoɉən ganꞌ nan: “Ni to žit yoꞌe cui yesəꞌəyišɉueꞌ.”
\v 37 Naꞌ len yeto ganꞌ nan: “Yosoꞌogüieꞌ benꞌ əgwsaꞌadeꞌe lanzənꞌ.”
\s1 Bosoꞌocuašeꞌe Jesoꞌosənꞌ
\p
\v 38 Naꞌ gwde naꞌ Jwse beṉəꞌ Arimatea gwṉabeneꞌ Pilatənꞌ gwnežɉueꞌ lsens yequeꞌe cuerp c̱he Jesoꞌosənꞌ. Naꞌ Pilatənꞌ beꞌe lsens. Nach gwyeɉ Jwsenꞌ naꞌ bequeꞌe cuerpənꞌ. Jwsenꞌ naqueꞌ disipl c̱he Jesoꞌosənꞌ pero bgašəꞌəzə por ni c̱he bžebeꞌ beṉəꞌ blao c̱he ṉasyon Izrael c̱hetonꞌ.
\v 39 Naꞌ ḻeczə gwyeɉlen Nicodemonꞌ ḻeꞌ benꞌ bagwyeɉ antslə ganꞌ zo Jesoꞌosənꞌ to šeꞌelə. Naꞌ Nicodemonꞌ noꞌe to deꞌe chḻaꞌ zix̱ deꞌe noneꞌ len mirra naꞌ aloes, ca do tapa robənꞌ.
\v 40 Naꞌ bosoꞌoc̱heleꞌ cuerp c̱he Jesoꞌosənꞌ sint de lachəꞌ naꞌ len deꞌen chḻaꞌ zix̱ənꞌ, ca costombr c̱he netoꞌ beṉəꞌ Izrael catəꞌən chcuašəꞌətoꞌ beṉəꞌ guat.
\v 41 Naꞌ gaḻəꞌəzə ganꞌ gwsoꞌoteꞌ Jesoꞌosənꞌ ḻeꞌe yag corozənꞌ gotəꞌ to güert. Naꞌ ḻoꞌo güertənꞌ bazo to bloɉ ba deꞌe cobə deꞌe bagwc̱heꞌeṉ Jwsenꞌ ḻeꞌe yeɉ ga cuiczə no beṉəꞌ guat ṉeꞌe šoꞌo.
\v 42 Naꞌ bosoꞌocuašeꞌe Jesoꞌosənꞌ ḻoꞌo bloɉ banəꞌ laogüe deꞌe zon gaḻəꞌəzə c̱hedəꞌ chsaꞌacbyeneneꞌ por ni c̱he deꞌe naquə yeteyo ža dezcanz naꞌ ža xen c̱he lṉi pasconꞌ.
\c 20
\s1 Beban Jesoꞌosənꞌ ladɉo beṉəꞌ guat caꞌ
\p
\v 1 Naꞌ bal dmigw Maria beṉəꞌ Magdalanꞌ gwyeɉeꞌ choꞌa bloɉ banꞌ. Naꞌ bleꞌineꞌ yeɉənꞌ daꞌ choꞌinəꞌ babgaꞌan.
\v 2 Nach bezaꞌadoeꞌ beyedeꞌ gaꞌan zotoꞌ len Simon Bedənꞌ, nach gwneꞌ netoꞌ: ―Babesyəꞌəbeɉeꞌ X̱anchonꞌ ḻoꞌo banꞌ, naꞌ bito ṉezecho galə besyəꞌəyoꞌeneꞌ.
\p
\v 3 Nach gwzaꞌatoꞌ len Bedənꞌ gwyeɉtoꞌ choꞌa bloɉ banꞌ.
\v 4 C̱hoptetoꞌ gwsaꞌadotoꞌ pero nadaꞌ gwsaꞌadochaꞌ ca Bedənꞌ naꞌ zguaꞌatec nadaꞌ bžinaꞌ.
\v 5 Naꞌ bchecaꞌa bgüiaꞌ ḻoꞌo banꞌ naꞌ bleꞌidaꞌ lachəꞌ caꞌ ganꞌ zɉəchiꞌin, pero bito gwyoꞌa.
\v 6 Ḻeꞌe blaꞌate Simon Bedənꞌ naꞌ ḻeꞌ gwyoꞌe ḻoꞌo banꞌ naꞌ ḻeczə bleꞌineꞌ lachəꞌ caꞌ ganꞌ zɉəchiꞌin.
\v 7 Naꞌ bey deꞌen bosyoꞌoguazɉeꞌ laogüeꞌenəꞌ bito lenən lachəꞌ caꞌ yeḻaꞌ, ndobən chiꞌin caꞌaḻə.
\v 8 Naꞌ ḻaꞌaṉəꞌəczə nadəꞌətecaꞌ byob bžinaꞌ, gwdechlə gwyoꞌa ḻoꞌo banꞌ, naꞌ catəꞌ bleꞌidaꞌ deꞌe caꞌ gwyeɉḻiꞌa de que beban Jesoꞌosənꞌ.
\v 9 Laꞌ ca orənꞌ bito ṉeꞌe šeɉniꞌitoꞌ Xtižəꞌ Diozənꞌ deꞌenəꞌ nyoɉən nan de que yeban Jesoꞌosənꞌ ladɉo beṉəꞌ guat caꞌ.
\v 10 Naꞌ bezaꞌatoꞌ beyeɉ ližtoꞌ.
\s1 Maria beṉəꞌ Magdalanꞌ bleꞌineꞌ de que mbanczə Jesoꞌosənꞌ
\p
\v 11 Naꞌ Marianꞌ begaꞌaṉeꞌ chbežeꞌ choꞌa bloɉ banꞌ. Naꞌ lao chbežeꞌenəꞌ bchequeꞌe bgüieꞌ ḻoꞌinəꞌ.
\v 12 Naꞌ bleꞌineꞌ c̱hopə angl zɉənyazeꞌ lachəꞌ šyiš zɉəchiꞌe ḻoꞌo banꞌ, toeꞌ chiꞌ zda yic̱hɉlei naꞌ yetoeꞌ chiꞌ zda xniꞌalei ganꞌ gotəꞌ cuerp c̱he Jesoꞌosənꞌ.
\v 13 Nach gwseꞌe noꞌolənꞌ: ―¿Bixc̱henꞌ chbežoꞌ noꞌolə?
\p Naꞌ ḻeꞌ božiꞌen gožeꞌ ḻegaꞌaqueꞌ: ―C̱hedəꞌ babesyəꞌəyoꞌe X̱anaꞌanəꞌ, naꞌ cabi ṉezdaꞌ galə ɉəsyəꞌəsaneꞌeneꞌ.
\p
\v 14 Ca beyož gwna Marianꞌ caꞌ, gwyec̱hɉeꞌ bgüieꞌ traslə naꞌ bleꞌineꞌ Jesoꞌosənꞌ zecheꞌ cožeꞌenəꞌ, pero bito beyombiaꞌ Marianꞌ ḻeꞌ.
\v 15 Nach gož Jesoꞌosənꞌ ḻeꞌ: ―Noꞌolə ¿bixc̱henꞌ chbežoꞌ? ¿Nonꞌ cheyilɉoꞌ?
\p Naꞌ Marianꞌ beneꞌ xbab de que benꞌ chapə güert naꞌanəꞌ, naꞌ gožeꞌeneꞌ: ―Šə leꞌ babeyoꞌoneꞌenəꞌ, gwna nadaꞌ galə ɉəyesanoꞌoneꞌenəꞌ naꞌ nadaꞌ yeyoꞌaneꞌ.
\p
\v 16 Jesoꞌosənꞌ gožeꞌ ḻeꞌ: ―Maria.
\p Naꞌ Marianꞌ gwyec̱hɉeꞌ deꞌe yoblə naꞌ gožeꞌeneꞌ: ―Raboni―, naquən dižəꞌ ebreo naꞌ zeɉen Maestr.
\p
\v 17 Jesoꞌosənꞌ gožeꞌ ḻeꞌ: ―Bito gox̱oꞌo nadaꞌ, laꞌ bito ṉeꞌe yeyepaꞌ gaꞌan zo X̱aꞌanəꞌ. Beyeɉ lao disipl c̱hiaꞌ caꞌ yeḻaꞌ beṉəꞌ caꞌ zɉənaquə ca bišaꞌa naꞌ zanaꞌ naꞌ gožgaꞌaqueꞌ de que yeyepaꞌ gaꞌan zo X̱aꞌanəꞌ, benꞌ ḻeczə naqueꞌ X̱ale. Naqueꞌ Dioz benꞌ choꞌelaoguaꞌa naꞌ ḻeczə naqueꞌ Dioz benꞌ choꞌelaꞌole.
\p
\v 18 Nach bezaꞌ Maria beṉəꞌ Magdalanꞌ bedəyedix̱ɉueꞌineꞌ netoꞌ disipl de que bableꞌineꞌ X̱anchonꞌ. Naꞌ beꞌeleneꞌ netoꞌ dižəꞌ deꞌen gož Jesoꞌosənꞌ ḻeꞌ.
\s1 Disipl c̱he Jesoꞌosənꞌ besəꞌəleꞌineꞌ de que mbanczeꞌ
\p
\v 19 Naꞌ ca bex̱ɉw žeꞌ ža dmigonꞌ netoꞌ disipl c̱heꞌ nžagtoꞌ txen. Naꞌ zɉənyeyɉw puert caꞌ por ni c̱he deꞌen bžebtoꞌ beṉəꞌ blao c̱he ṉasyon Izrael c̱hetonꞌ. Catəꞌəczla gocbeꞌitoꞌ bazecha Jesoꞌosənꞌ gwchoḻtoꞌonəꞌ. Nach gožeꞌ netoꞌ: ―Ḻeso binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\p
\v 20 Ca beyož gwneꞌ caꞌ bloꞌineꞌ netoꞌ ḻoꞌo taqueꞌe caꞌ naꞌ cuit ḻeꞌenəꞌ. Naꞌ bebeitoꞌ bleꞌitoꞌ X̱anchonꞌ.
\v 21 Nach gozeꞌe netoꞌ yetšiꞌi: ―Ḻeso binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ. Canꞌ bseḻəꞌ X̱aꞌanəꞌ nadaꞌ yežlyo nga par chonaꞌ xšineꞌenəꞌ, caꞌaczənꞌ əchseḻaꞌa leꞌe par gonḻe xšinaꞌanəꞌ.
\p
\v 22 Beyož gwneꞌ caꞌ blobeꞌ netoꞌ nach gožeꞌ netoꞌ: ―Ḻeꞌe siꞌ Spirit c̱he Diozənꞌ.
\v 23 Beṉəꞌ caꞌ yesyəꞌədiṉɉe xtoḻəꞌəgaꞌaqueꞌenəꞌ naple yeḻəꞌ chnabiaꞌ par yeꞌegaꞌacleneꞌ de que bagwnitlaon. Pero beṉəꞌ caꞌ cui yesyəꞌədiṉɉe xtoḻəꞌəgaꞌaqueꞌenəꞌ naple yeḻəꞌ chnabiaꞌ par yeꞌegaꞌacleneꞌ de que bito ṉitlaon.
\s1 Tomasənꞌ bleꞌineꞌ de que mban Jesoꞌosənꞌ
\p
\v 24 Naꞌ Tomas benꞌ bosoꞌosiꞌe Didimo laogüe deꞌen naqueꞌ beṉəꞌ cuaš, leneꞌ netoꞌ šižiṉtoꞌ, pero bito zoeꞌ len netoꞌ catəꞌən bedəyeloꞌelao Jesoꞌosənꞌ.
\v 25 Naꞌ netoꞌ gožtoꞌoneꞌ: ―Bableꞌitoꞌ X̱anchonꞌ.
\p Nach Tomasənꞌ gožeꞌ netoꞌ: ―Xte que leꞌidaꞌ taqueꞌe caꞌ naꞌ əgwzebə xbenaꞌanəꞌ ganꞌ gwdebə clab caꞌ, naꞌ əgwzebə naꞌanəꞌ cuit ḻeꞌenəꞌ, nach šeɉḻiꞌa.
\p
\v 26 Gozde to xman zezzotoꞌ ḻoꞌo yoꞌonəꞌ deꞌe yoblə, naꞌ zo Tomasənꞌ len netoꞌ. Naꞌ ḻeczə zɉənyeyɉw puert caꞌ, catəꞌəczla bezlaꞌ Jesoꞌosənꞌ naꞌ gozzecheꞌ gwchoḻtoꞌonəꞌ, naꞌ gwneꞌ: ―Ḻeso binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\p
\v 27 Nach gožeꞌ Tomasənꞌ: ―Bgüia ḻoꞌo tacaꞌa quinga naꞌ bzeb xbenoꞌonəꞌ. Naꞌ bzeb naꞌonəꞌ cuit ḻiꞌa nga par nic̱h šeɉḻiꞌo. Naꞌ cui gacoꞌ to beṉəꞌ cui cheɉḻeꞌ.
\p
\v 28 Nach Tomasənꞌ gožeꞌeneꞌ: ―X̱anaꞌ, naꞌ Dioz c̱hiaꞌ.
\p
\v 29 Nach gož Jesoꞌosənꞌ ḻeꞌ: ―Xte que bleꞌidoꞌ nadaꞌ nach gwyeɉḻiꞌo. Mbalazəch len beṉəꞌ cui yesəꞌəleꞌi nadaꞌ naꞌ seꞌeɉḻeꞌe.
\s1 Ḻibr nga nyoɉən par nic̱h šeɉḻeꞌ beṉəꞌ de que Jesoꞌosənꞌ naqueꞌ Xiꞌiṉ Dioz
\p
\v 30 Naꞌ deꞌe zan miḻagr deꞌe ben Jesoꞌosənꞌ ganꞌ zotoꞌonəꞌ pero bito bzoɉgaꞌacaꞌan nga.
\v 31 Pero zɉənyoɉ deꞌe quinga par nic̱h sotezə sole šeɉḻeꞌele de que Jesoꞌos naꞌan Xiꞌiṉ Diozənꞌ benꞌ gwleɉ Diozənꞌ par gaquəleneꞌ beṉac̱hənꞌ, naꞌ par nic̱h gatəꞌ yeḻəꞌ mban zeɉḻicaṉe c̱hele laogüe deꞌen chonḻilažəꞌəleneꞌ.
\c 21
\s1 Jesoꞌosənꞌ bloꞌelaogüeꞌ gažə disipl c̱heꞌ caꞌ
\p
\v 1 Gwde goc deꞌe caꞌ, Jesoꞌosənꞌ bozloeꞌ laogüeꞌ netoꞌ disipl c̱heꞌ yetšiꞌi choꞌa nisdaoꞌ Galilea deꞌen ḻeczə nziꞌ Tiberias. Quinga bloꞌelaogüeꞌ netoꞌ:
\v 2 Txen zotoꞌonəꞌ Simon Bedənꞌ, len Tomasənꞌ, naꞌ Natanaelənꞌ naꞌ nadaꞌ naꞌ beṉəꞌ bišaꞌa naꞌ yec̱hopə disiplənꞌ. Natanaelənꞌ naqueꞌ beṉəꞌ Cana, to yež deꞌe chiꞌ ganꞌ mbane Galileanꞌ. Naꞌ Tomasənꞌ deꞌen naqueꞌ beṉəꞌ cuaš nachənꞌ bosoꞌosiꞌeneꞌ Didimo.
\v 3 Simon Bedənꞌ gožeꞌ netoꞌ: ―Šaꞌayetošcaꞌ gwxen beḻ.
\p Naꞌ gožtoꞌoneꞌ: ―Ḻeczə gwzaꞌ netoꞌ.
\p Nach gwzaꞌatoꞌ gwyeɉtoꞌ choꞌa nisdaꞌonəꞌ naꞌ gwyoꞌotoꞌ to ḻoꞌo barcw. Pero žeꞌenəꞌ cuiczə no no bdoleꞌetoꞌ.
\v 4 Naꞌ cheꞌeniꞌilas blaꞌ Jesoꞌosənꞌ choꞌa nisdaꞌonəꞌ pero naꞌ netoꞌ bito beyombiꞌatoꞌ šə ḻeꞌenəꞌ.
\v 5 Jesoꞌosənꞌ gwṉeꞌ zižɉo gožeꞌ netoꞌ: ―Xiꞌiṉdaꞌoguaꞌa ¿gaṉ beḻ yaꞌa gaocho?
\p Naꞌ božiꞌitoꞌ xtižeꞌenəꞌ gožtoꞌoneꞌ: ―Notono de.
\p
\v 6 Nach gožeꞌ netoꞌ: ―Ḻeꞌe gwzaḻəꞌ yix̱ɉw beḻ c̱helenꞌ cuit barconꞌ ḻichalə naꞌ əželeleb.
\p Nach bzaḻəꞌətoꞌ yix̱jw beḻ c̱hetoꞌonəꞌ naꞌ xte caguə gwzoitoꞌ yecuetoꞌon ḻoꞌo barconꞌ tant beḻ zan gwžaꞌ ḻoꞌinəꞌ.
\v 7 Nach nadaꞌ gožaꞌ Bedənꞌ: ―X̱ancho naꞌanəꞌ.
\p Nach Simon Bedənꞌ cate gožaꞌaneꞌ: “X̱ancho naꞌanəꞌ”, ḻeꞌe beyacwteꞌ xalaneꞌenəꞌ, laꞌ deꞌe choꞌo ḻoꞌolzənꞌ nacueꞌ par nic̱h choneꞌ žinṉəꞌ, naꞌ ḻeꞌe bexitəꞌəteꞌ lao nisənꞌ par nic̱h byob bežineꞌ ganꞌ zo Jesoꞌosənꞌ.
\v 8 Naꞌ netoꞌ zeyoꞌotoꞌ ḻoꞌo barcw daꞌonəꞌ zeꞌe zenxobətoꞌ yix̱ɉw beḻənꞌ ganꞌ žaꞌ beḻ yaꞌa caꞌ. Caguə nactequəch zitəꞌ choꞌa nisdaꞌonəꞌ, ca do yeto gueyoa metrzənꞌ.
\v 9 Naꞌ catəꞌ bežintoꞌ choꞌa nisdaꞌonəꞌ beyetɉtoꞌ ḻoꞌo barconꞌ naꞌ bleꞌitoꞌ chiꞌ yiꞌ yaꞌalɉənꞌ naꞌ xoa to beḻ yaꞌa laogüenꞌ, naꞌ len yet.
\v 10 Jesoꞌosənꞌ gožeꞌ netoꞌ: ―Ḻeꞌe yeyox̱əꞌ laꞌ beḻ yaꞌa caꞌ zeꞌe gwxenḻe niḻə.
\p
\v 11 Naꞌ Simon Bedənꞌ gwyeɉeꞌ ganꞌ chiꞌ barconꞌ naꞌ ɉəyesežeꞌ yix̱ɉw beḻənꞌ ganꞌ ncheɉən. Nach bexobətoꞌon yo bižlə. Naꞌ žaꞌan to gueyoa šiꞌiṉeyon beḻ xen. Naꞌ bito gwchezə yix̱ɉonꞌ ḻaꞌaṉəꞌəczə bia zanṉəꞌ gwžaꞌ ḻoꞌinəꞌ.
\v 12 Jesoꞌosənꞌ gožeꞌ netoꞌ: ―Ḻeꞌe da gaole xsil.
\p Naꞌ ni totoꞌ cui beyaxɉetoꞌ yeꞌetoꞌoneꞌ: “¿No leꞌ?” laꞌ gocbeꞌitoꞌ de que X̱ancho naꞌaczənəꞌ.
\v 13 Jesoꞌosənꞌ bgüigueꞌe gwxiꞌe yetənꞌ naꞌ beṉeꞌ c̱he c̱hetoꞌ. Naꞌ ḻeczə caꞌ beneꞌ len beḻənꞌ.
\p
\v 14 Deꞌe nga beyoṉ las bloꞌelao Jesoꞌosənꞌ netoꞌ disipl c̱heꞌ lao bebaneꞌ ladɉo beṉəꞌ guat caꞌ.
\s1 Jesoꞌosənꞌ beꞌeleneꞌ Simon Bedənꞌ dižəꞌ
\p
\v 15 Naꞌ ca bedaotoꞌonəꞌ Jesoꞌosənꞌ gožeꞌ Simon Bedənꞌ: ―Simon xiꞌiṉ Jonas ¿əchaquəchdoꞌ c̱hiaꞌ canꞌ chsaꞌaque beṉəꞌ quinga c̱hiaꞌ?
\p Naꞌ božiꞌen gožeꞌ: ―X̱anaꞌ leꞌ ṉezdoꞌ de que chacdaꞌ c̱hioꞌ.
\p Jesoꞌosənꞌ gožeꞌ ḻeꞌ: ―Bsed bloꞌi beṉəꞌ caꞌ zeꞌe gwzolao chsoꞌonḻilažəꞌ nadaꞌ.
\p
\v 16 Naꞌ deꞌe əgwchop lase gozeꞌeneꞌ: ―Simon xiꞌiṉ Jonas ¿əchacdoꞌ c̱hiaꞌ?
\p Naꞌ Bedənꞌ gožeꞌeneꞌ: ―X̱anaꞌ leꞌ ṉezdoꞌ de que chacdaꞌ c̱hioꞌ.
\p Jesoꞌosənꞌ gožeꞌ ḻeꞌ: ―Bgüia bye beṉəꞌ caꞌ chsoꞌonḻilažəꞌ nadaꞌ.
\p
\v 17 Deꞌe əgwyoṉ lase gožeꞌeneꞌ: ―Simon xiꞌiṉ Jonas, ¿əchacdoꞌ c̱hiaꞌ?
\p Naꞌ Bedənꞌ gocchgüeineꞌ deꞌe gožeꞌeneꞌ deꞌe gwyoṉ lase: “¿Echacdoꞌ c̱hiaꞌ?” Naꞌ gožeꞌ ḻeꞌ: ―X̱anaꞌ leꞌ ṉeze nḻeꞌidoꞌ yoguəꞌəḻoḻ. Leꞌ ṉezdoꞌ de que chacdaꞌ c̱hioꞌ.
\p Jesoꞌosənꞌ gožeꞌ ḻeꞌ: ―Bsed bloꞌi beṉəꞌ caꞌ chsoꞌonḻilažəꞌ nadaꞌ.
\v 18 Deꞌe ḻi əchniaꞌ leꞌ catəꞌ gocoꞌ beṉəꞌ güegoꞌ cuinoꞌ boc̱heɉ doxpeyoꞌonəꞌ naꞌ gwyeɉoꞌ con ga nazən c̱hioꞌ. Pero catəꞌ gacoꞌ beṉəꞌ golə, əgwḻi naꞌonəꞌ naꞌ beṉəꞌ yoblə yoc̱heɉeꞌ doxpeyoꞌonəꞌ naꞌ yesəꞌəc̱heꞌe leꞌ ga cui cheꞌendoꞌ.
\p
\v 19 Naꞌ deꞌen gožeꞌeneꞌ caꞌ zeɉe dižəꞌ de que Bedənꞌ goneꞌ ca siꞌ Diozənꞌ yeḻəꞌ balaꞌaṉ ca deꞌen gaquə Bedənꞌ lao naꞌ beṉəꞌ mal caꞌ par soꞌoteꞌeneꞌ. Gwde gwna Jesoꞌosənꞌ canꞌ gaquə c̱he Bedənꞌ nach gožeꞌ Bedənꞌ: ―Da len nadaꞌ.
\s1 Jesoꞌosənꞌ goqueneꞌ c̱he Juanṉəꞌ
\p
\v 20 Naꞌ beyec̱hɉ Bedənꞌ bleꞌineꞌ nadaꞌ naoguaꞌ ḻegaꞌaqueꞌ naꞌ beneꞌ xbab canꞌ chaque Jesoꞌosənꞌ c̱hiaꞌ, laꞌ nadaꞌan gwchiꞌa cuit Jesoꞌosənꞌ ženꞌ gwdaotoꞌ xšeꞌenəꞌ txen catəꞌən gožaꞌaneꞌ: “X̱anaꞌ, ¿noxaczxənꞌ əgwde leꞌ lao naꞌ beṉəꞌ caꞌ?”
\v 21 Nach Bedənꞌ gožeꞌ Jesoꞌosənꞌ: ―X̱anaꞌ ¿nac gaquə c̱he benga?
\p
\v 22 Jesoꞌosənꞌ gožeꞌ ḻeꞌ: ―Šə cheꞌendaꞌ ṉeꞌe zoczə benga xte catəꞌən yidaꞌ yetlas ¿bixa zedənꞌ chacoꞌ? Con gwzotezə gwzo benḻilažəꞌ nadaꞌ naꞌ bzenag c̱hiaꞌ.
\p
\v 23 Deꞌe naꞌanəꞌ gwditɉ dižəꞌənəꞌ entr beṉəꞌ caꞌ chsoꞌonḻilažəꞌ Cristənꞌ de que nadaꞌ bito gataꞌ. Pero Jesoꞌosənꞌ caguə gožeꞌ Bedənꞌ cui gataꞌanəꞌ sino gožeꞌeneꞌ: “Šə nadaꞌ cheꞌendaꞌ ṉeꞌe zoczeꞌ xte catəꞌən yidaꞌ yetlas ¿bixa zedənꞌ chacoꞌ?”
\p
\v 24 Nadaꞌan nacaꞌ disiplənꞌ benꞌ goqueneꞌ c̱hei naꞌ ṉezdaꞌ canꞌ goquə yoguəꞌ deꞌe quinga babzoɉaꞌ. Naꞌ ḻeczə leꞌe ṉezczele de que dižəꞌ ḻinꞌ choꞌa.
\p
\v 25 Zanch deꞌe de deꞌe ben Jesoꞌosənꞌ deꞌe cui zɉənyoɉ. Žaləꞌ zɉənyoɉ yoguəꞌən naꞌ tgüeɉə tgüeɉən ḻibr zan juisy zɉəde žaləꞌ caꞌ.
\pc Deꞌe naꞌazənꞌ chzoɉaꞌ.