\id ROM
\ide UTF-8
\h ROMANOS
\toc1 Romanos
\mt1 Cart Deꞌen Bzoɉ San Pabənꞌ Par Beṉəꞌ Roma Caꞌ
\c 1
\s1 Pabənꞌ chguapeꞌ diox beṉəꞌ caꞌ chsoꞌelaoꞌ Cristənꞌ Romanꞌ
\p
\v 1 Nadaꞌ Pab nacaꞌ beṉəꞌ güen žin c̱he Jesocristənꞌ. Diozənꞌ gwleɉeꞌ nadaꞌ par nacaꞌ apostol naꞌ bseḻeꞌe nadaꞌ par nic̱h əchyix̱ɉuiꞌa deꞌe güen deꞌe cobə c̱heꞌenəꞌ.
\p
\v 2 Ca niꞌite ben Diozənꞌ mendad bosoꞌozoɉ profet caꞌ Xtižeꞌenəꞌ ca naquə lyebe deꞌen beneꞌ de que əgwseḻeꞌe dižəꞌ güen dižəꞌ cobə c̱heꞌenəꞌ.
\v 3 Deꞌe güen deꞌe cobənꞌ choꞌen dižəꞌ c̱he Xiꞌiṉ Diozənꞌ, X̱ancho Jesocristənꞌ. Jesocristənꞌ golɉeꞌ yežlyo nga lao dia c̱he deꞌe Rei Dabinꞌ.
\v 4 Naꞌ ṉezecho de que Jesocristənꞌ ḻeczə naqueꞌ doalɉe Xiꞌiṉ Diozənꞌ c̱hedəꞌ bebaneꞌ ladɉo beṉəꞌ guat caꞌ. Naꞌ deꞌen bebaneꞌenəꞌ ṉezecho de que napeꞌ yeḻəꞌ guac c̱he Spirit c̱he Diozənꞌ.
\v 5 Chonḻilažaꞌa Jesocristənꞌ naꞌ deꞌe naꞌanəꞌ Diozənꞌ banoeꞌ c̱hiaꞌ nḻanaꞌ žin c̱he apostol. Gwleɉeꞌ nadaꞌ par chonaꞌ ca šaꞌ beṉəꞌ soꞌonḻilažəꞌ ḻeꞌ yoguəꞌ ṉasyon naꞌ soꞌoneꞌ canꞌ neꞌenəꞌ par nic̱h siꞌe yeḻəꞌ balaꞌaṉ.
\v 6 Naꞌ lenczə leꞌe gwleɉ Jesocristənꞌ par nic̱h nacle xiꞌiṉeꞌ, len beṉəꞌ caꞌ yeḻaꞌ beṉəꞌ ḻeczə chsoꞌonḻilažəꞌ ḻeꞌ naꞌ chsoꞌoneꞌ canꞌ neꞌenəꞌ.
\p
\v 7 Nadaꞌ Pab chzoɉaꞌ cart nga par yoguəꞌ leꞌe nitəꞌəle Romanꞌ ca leꞌe chaque Diozənꞌ c̱hele. Diozənꞌ gwleɉeꞌ leꞌe par nic̱h nacle lažəꞌ neꞌenəꞌ. Chonaꞌ orasyon par nic̱h X̱acho Diozənꞌ naꞌ X̱ancho Jesocristənꞌ əsaꞌacleneꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Pabənꞌ goneꞌeneꞌ žɉəlaṉeꞌe beṉəꞌ Roma caꞌ
\p
\v 8 Chonaꞌ orasyon choꞌa yeḻəꞌ chox̱cwlen c̱he Diozənꞌ por leꞌe, naꞌ Jesocristənꞌ chacleneꞌ nadaꞌ par chonaꞌ orasyonṉəꞌ. Choꞌa yeḻəꞌ chox̱cwlen c̱heꞌ ca naquə doxenḻə yežlyonəꞌ chsoeꞌ beṉəꞌ dižəꞌ de que yoguəꞌ leꞌe chonḻilažəꞌəle Jesocristənꞌ.
\v 9 Diozənꞌ ṉezeneꞌ yoguəꞌ las catəꞌ chonaꞌ orasyonṉəꞌ chṉabaꞌ gaquəleneꞌ leꞌe. Ḻeꞌenəꞌ choꞌelaoguaꞌa do yic̱hɉ do lažaꞌa ca deꞌen chyix̱ɉuiꞌa deꞌe güen deꞌe cobə deꞌen chzeɉniꞌin c̱he Xiꞌiṉeꞌenəꞌ.
\v 10 Naꞌ chṉabaꞌ lao Diozənꞌ güeꞌe latɉə par delaṉaꞌa leꞌe ṉaꞌa.
\v 11 Laꞌ zelažəꞌəchguaꞌ delaṉaꞌa leꞌe par dezeɉniꞌidaꞌ leꞌe deꞌen babsed babloꞌineꞌ nadaꞌ par nic̱h sole gonḻilažəꞌəchleneꞌ.
\v 12 Cheꞌendaꞌ delaṉaꞌa leꞌe par güeꞌ lɉuežɉcho balor nga ngaḻə, c̱hedəꞌ laꞌ leꞌe naꞌ nadaꞌ chonḻilažəꞌəcho Jesocristənꞌ.
\p
\v 13 Beṉəꞌ bišəꞌ, cheꞌendaꞌ əṉezele de que zan las bagoꞌondaꞌ yidaꞌ delaṉaꞌa leꞌe pero xte ṉaꞌa bitoṉəꞌ gac. Cheꞌendaꞌ yedəyenaꞌ par nic̱h gonchle canꞌ chazlažəꞌ Diozənꞌ canꞌ baɉenaꞌ entr yeziquəꞌəchlə beṉəꞌ cui zɉənaquə beṉəꞌ Izrael.
\v 14 Ṉezdaꞌ cheyaḻəꞌ guaꞌa dižəꞌ güen dižəꞌ cobə c̱he Jesocristənꞌ len beṉəꞌ caꞌ žaꞌ syoda, naꞌ len beṉəꞌ yix̱əꞌ naꞌ ḻeczə caꞌ len beṉəꞌ chsaꞌac ḻetr naꞌ beṉəꞌ cui chsaꞌac ḻetr.
\v 15 Deꞌe naꞌanəꞌ cheꞌenchgüeidaꞌ gonaꞌ ga zelao saquəꞌədaꞌ c̱hix̱ɉueꞌidaꞌ leꞌe deꞌe güen deꞌe cobə c̱he Jesocristənꞌ, leꞌe žaꞌale Romanꞌ.
\s1 Dižəꞌ güen dižəꞌ cobənꞌ nsaꞌan yeḻəꞌ guac c̱he Diozənꞌ par beṉəꞌ chseꞌeɉḻeꞌe c̱hei
\p
\v 16 Diozənꞌ napeꞌ yeḻəꞌ guac xen. Naꞌ dižəꞌ güen dižəꞌ cobə c̱heꞌenəꞌ nsaꞌan yeḻəꞌ guac c̱heꞌenəꞌ, par nic̱h caꞌ beṉəꞌ chseꞌeɉḻeꞌ c̱hei, ḻeꞌ yebeɉeꞌ ḻegaꞌaqueꞌ xniꞌa deꞌe malənꞌ. Diozənꞌ cheꞌenchgüeineꞌ yebeɉeꞌ chioꞌo beṉəꞌ Izrael xniꞌa deꞌe malənꞌ naꞌ ḻeczə cheneꞌeneꞌ yebeɉeꞌ chioꞌo cui naccho beṉəꞌ Izrael xniꞌa deꞌe malənꞌ. Deꞌe naꞌanəꞌ bito chetoꞌidaꞌ c̱he dižəꞌ güen dižəꞌ cobə c̱he Jesocristənꞌ.
\v 17 Dižəꞌ güen dižəꞌ cobə c̱he Jesocristənꞌ chzeɉniꞌin chioꞌo de que Diozənꞌ neꞌ naccho beṉəꞌ güen laogüeꞌenəꞌ c̱hedəꞌ chonḻilažəꞌəcho Jesocristənꞌ naꞌ canꞌ chonczeꞌ len notəꞌətezə beṉəꞌ chsoꞌonḻilažəꞌ ḻeꞌ. Canꞌ nyoɉ Xtižeꞌenəꞌ, nan: “Šə chonḻilažəꞌəcho Diozənꞌ, ḻeꞌenəꞌ neꞌ de que naccho beṉəꞌ güen laogüeꞌenəꞌ, naꞌ deꞌe naꞌanəꞌ guatəꞌəczə yeḻəꞌ mban c̱hecho zeɉḻicaṉe šə chonḻilažəꞌəchoneꞌ.”
\s1 De xtoḻəꞌ beṉac̱hənꞌ
\p
\v 18 Naꞌ Diozənꞌ chloꞌineꞌ chioꞌo beṉac̱h, zozeꞌ yoba naꞌate, canꞌ əgwnežɉueꞌ castigw zeɉḻicaṉe c̱he yoguəꞌ beṉəꞌ caꞌ cabi chsoꞌelaoꞌ ḻeꞌ naꞌ nic chsoꞌoneꞌ canꞌ cheyaḻəꞌ soꞌoneꞌ. Naꞌ yeḻəꞌ güen deꞌe mal c̱hegaꞌaqueꞌenəꞌ bito choꞌen latɉə yesəꞌəṉeze beṉəꞌ yoblə deꞌen naquə deꞌe ḻi.
\v 19 Bazɉəṉezeneꞌ deꞌen de deꞌe guaquə ṉezecho c̱he Diozənꞌ c̱hedəꞌ Diozənꞌ babloꞌineꞌen yoguəꞌəcho.
\v 20 Naꞌ bito bi bi de deꞌe yosoꞌodeꞌi beṉəꞌ cui chsoꞌelaoꞌ Diozənꞌ yesəꞌəneꞌ cui zɉəṉezeneꞌ šə zoeꞌenəꞌ. Laꞌ gwzolaozən dezd catəꞌən əbx̱iꞌe yežlyonəꞌ xte ža ṉeža chgüiacho beṉəꞌ caꞌ naꞌ bia caꞌ naꞌ deꞌe caꞌ beneꞌenəꞌ. Deꞌe naꞌanəꞌ caguə naquən zdebə gombiꞌacho deꞌe caꞌ cui zɉənḻaꞌ c̱he Diozənꞌ, ca yeḻəꞌ gwnabiaꞌ c̱heꞌenəꞌ deꞌen de zeɉḻicaṉe naꞌ deꞌen cheyaḻəꞌ güeꞌelaꞌochoneꞌ.
\v 21 Naꞌ ca naquə beṉəꞌ caꞌ cui chsoꞌelaoꞌ Diozənꞌ, zɉəṉezeneꞌ de que zo Diozənꞌ pero bito chsoꞌelaogüeꞌeneꞌ, nic chsoꞌe yeḻəꞌ chox̱cwlen c̱heꞌ. Ca naquə xbab c̱hegaꞌaqueꞌenəꞌ bito bi zaquəꞌən naꞌ bazɉənc̱hoḻ yic̱hɉlaꞌaždaꞌogaꞌaqueꞌenəꞌ.
\v 22 Chəsəꞌəneꞌ zɉənaqueꞌ beṉəꞌ sinꞌ pero chsoꞌoneꞌ xbab deꞌe cui bi zaquəꞌ.
\v 23 Chosoꞌozoeꞌ Diozənꞌ caꞌaḻə, bito chsoꞌelaogüeꞌeneꞌ, len Dioz nanꞌ naqueꞌ ḻeꞌezelaogüe beṉəꞌ zaqueꞌe naꞌ zoeꞌ zeɉḻicaṉe. Bito chsoꞌelaogüeꞌeneꞌ, chsoꞌonchsoꞌoneꞌ deꞌe yoblə, chsoꞌelaꞌozecheꞌ no lguaꞌa lsaquəꞌ beṉac̱h beṉəꞌ te c̱hei, naꞌ ḻeczə chsoꞌelaogüeꞌe lguaꞌa lsaquəꞌ bia zo x̱ileꞌe, bia yix̱əꞌ bia žia tap ṉiꞌa neꞌi naꞌ bia zɉənxobə ḻeꞌi.
\p
\v 24 Ca naquə beṉəꞌ caꞌ chsoꞌon deꞌe caꞌ zɉənac caꞌ, Diozənꞌ bagwleɉyic̱hɉeꞌ ḻegaꞌaqueꞌ par chsoꞌoneꞌ deꞌe mal canꞌ nan ḻoꞌo yic̱hɉlaꞌaždaꞌogaꞌaqueꞌenəꞌ naꞌ deꞌe naꞌanəꞌ chsoꞌonchgüeꞌ yeḻəꞌ ztoꞌ c̱he cuerp c̱hegaꞌaqueꞌenəꞌ.
\v 25 Bagwleɉyic̱hɉeꞌ ḻegaꞌaqueꞌ par chsoꞌoneꞌ deꞌe caꞌ c̱hedəꞌ ḻegaꞌaqueꞌ bagosəꞌəbeɉyic̱hɉeꞌ dižəꞌ ḻi c̱heꞌenəꞌ par chseꞌeɉḻeꞌe deꞌe güenḻažəꞌ. Chseꞌeɉṉiꞌalažəꞌəzecheꞌ naꞌ chsoꞌelaꞌozecheꞌ deꞌe caꞌ ben Diozənꞌ naꞌ bito chsoꞌoneꞌ cas c̱he Diozənꞌ benꞌ ben yoguəꞌəḻoḻ beṉac̱h naꞌ yoguəꞌ bia chaš naꞌ yeziquəꞌəchlə deꞌe caꞌ yeḻaꞌ. Bito chsoꞌoneꞌ cas c̱heꞌ ḻaꞌaṉəꞌəczə naqueꞌ benꞌ cheyaḻəꞌ güeꞌelaꞌocho zeɉḻicaṉe. Laꞌ canꞌ naquən.
\p
\v 26 Deꞌe naꞌanəꞌ Diozənꞌ bagwleɉyic̱hɉeꞌ ḻegaꞌaqueꞌ par chsoꞌoneꞌ yeḻəꞌ ztoꞌ canꞌ nan ḻoꞌo yic̱hɉlaꞌaždaꞌogaꞌaqueꞌenəꞌ. Ca naquə noꞌol caꞌ bito chəsəꞌəqueꞌe beṉəꞌ byo, ḻete chəsyəꞌəzolentezə ḻeꞌe lɉuežɉ noꞌolzəgaꞌaqueꞌ par nic̱h chsoꞌoneꞌ deꞌe cui cheyaḻəꞌ soꞌoneꞌ.
\v 27 Naꞌ ḻeꞌegatezəczə caꞌ chsoꞌon beṉəꞌ byo caꞌ chəsyəꞌəzolen lɉuežɉ beṉəꞌ byogaꞌaqueꞌ lguaꞌa deꞌe yesəꞌəcaꞌa noꞌol c̱hegaꞌaqueꞌ. Naꞌ naquən to yeḻəꞌ ztoꞌ deꞌen chsoꞌon beṉəꞌ byo con beṉəꞌ byogaꞌac, tant chəsəꞌəzelažəꞌ lɉuežɉgaꞌaqueꞌ. Naꞌ deꞌen chac c̱he cuerp c̱hegaꞌaqueꞌenəꞌ naquən to castigw deꞌen cheyaḻəꞌ yesəꞌəziꞌe lao yeḻəꞌ güen deꞌe mal c̱hegaꞌaqueꞌenəꞌ.
\p
\v 28 Naꞌ laogüe deꞌe cui chseꞌeneneꞌ soꞌoneꞌ cas c̱he Diozənꞌ, Diozənꞌ bagwleɉyic̱hɉeꞌ ḻegaꞌaqueꞌ len xbab mal c̱hegaꞌaqueꞌenəꞌ, naꞌ chsoꞌoneꞌ deꞌe cui cheyaḻəꞌ soꞌoneꞌ.
\v 29 Por deꞌe cui cheyaḻəꞌ soꞌoneꞌen chsoꞌoneꞌ. Zɉənalɉeneꞌ. Chesyəꞌəbeineꞌ chsoꞌoneꞌ contr beṉəꞌ. Chəsəꞌəzelažeꞌe bi de c̱he beṉəꞌ yoblə, naꞌ no bia yix̱əꞌ c̱hegaꞌaqueꞌ naꞌ no beṉəꞌ nitəꞌ ližgaꞌaqueꞌ. Zɉənaqueꞌ beṉəꞌ xiꞌa juisy naꞌ ḻeczə chsaꞌacxiꞌi lɉuežɉeꞌ. Syempr chsoꞌot lɉuežɉeꞌ, chəsəꞌədiḻeꞌ, chosoꞌox̱oayagueꞌ, naꞌ chəsyəꞌəyoneꞌ clelələ dižəꞌ deꞌe chseꞌeneꞌeneꞌ. Naꞌ zɉənaqueꞌ beṉəꞌ goc̱hitɉ dižəꞌ.
\v 30 Chəsəꞌəṉeꞌ mal c̱he beṉəꞌ yoblə. Chəsəꞌəgueꞌineꞌ Diozənꞌ. Bitobi respet zɉənombiꞌe par beṉəꞌ yoblə. Chsaꞌalažeꞌe. Zɉənaqueꞌ beṉəꞌ güeꞌelaoꞌ cuine. Chəsəꞌəyilɉlažeꞌe naꞌ chəsəꞌəželeneꞌ canꞌ chsoꞌoneꞌ deꞌe mal. Bito chosoꞌozenagueꞌ c̱he x̱axnaꞌagaꞌaqueꞌ.
\v 31 Bito chseꞌeɉniꞌineꞌ. Bito chsoꞌoneꞌ complir bi lyebe deꞌe chsoꞌoneꞌ. Bito chsaꞌaqueneꞌ c̱he beṉəꞌ yoblə. Zɉənaqueꞌ beṉəꞌ ggoꞌolažeꞌe. Bito zɉənombiꞌe yeḻəꞌ cheyašeꞌe lɉuežɉe.
\v 32 Zɉəṉezczeneꞌ binḻo de que Dioz nanꞌ nc̱hoglaogüeꞌen cheyaḻəꞌ yeyeɉcho lao yiꞌ gabiḻənꞌ šə goncho canꞌ chsoꞌoneꞌenəꞌ. Pero ḻegaꞌaqueꞌ ṉeꞌe zɉaꞌacczeꞌ chsoꞌoneꞌ caꞌ naꞌ chesyəꞌəbeineꞌ chsoꞌon beṉəꞌ yoblə canꞌ chsoꞌoneꞌenəꞌ.
\b
\m Pab
\c 2
\s1 Diozənꞌ zdaczeꞌ ḻicha ca deꞌen choneꞌ beṉac̱hənꞌ castigw c̱he xtoḻəꞌəgaꞌaqueꞌenəꞌ
\p
\v 1 Deꞌe nanꞌ notəꞌətezə naccho bito gaquə əṉacho bito bi xtoḻəꞌəcho de catəꞌ choncho xbab c̱he beṉəꞌ yoblə de que naqueꞌ beṉəꞌ mal, c̱hedəꞌ catəꞌən choncho xbab c̱he beṉəꞌ yoblə de que naqueꞌ beṉəꞌ mal, chioꞌotezənꞌ chchix̱ə cuincho. Chacbeꞌicho de que beṉəꞌ yoblə choneꞌ deꞌe mal len ḻeczə canꞌ chon chioꞌo.
\v 2 Ṉezecho šə choncho deꞌe caꞌ zɉənac caꞌ Diozənꞌ neꞌ c̱hecho de xtoḻəꞌəcho, naꞌ zdaczeꞌ ḻicha deꞌen neꞌ caꞌ.
\v 3 De repent chaquecho de que Diozənꞌ bito goṉeꞌ castigw c̱hecho ca deꞌen choncho xbab c̱he beṉəꞌ yoblə de que chsoꞌoneꞌ deꞌe mal len ḻeczə canꞌ choncho. Bito cheyaḻəꞌ gaquecho de que cui goṉeꞌ castigw c̱hecho, laꞌ goṉczeꞌen.
\v 4 De repent bito choncho cas ca naquə deꞌe güenchgua deꞌen chon Diozənꞌ len chioꞌo lao yeḻəꞌ beṉəꞌ güen c̱heꞌenəꞌ naꞌ yeḻəꞌ xenḻažəꞌ c̱heꞌenəꞌ. Naꞌ de repent bito choncho cas c̱heꞌ laogüe deꞌen cui ḻeꞌe choṉtieꞌ chioꞌo castigw. Diozənꞌ choneꞌ güen len chioꞌo par nic̱h gaquəchgüeicho ḻoꞌo yic̱hɉlaꞌaždaꞌochonəꞌ c̱he deꞌe mal deꞌen choncho par nic̱h caꞌ yediṉɉechon.
\v 5 Pero nacteccho beṉəꞌ žod šə bito chediṉɉecho do yic̱hɉ do lažəꞌəcho ca naquə xtoḻəꞌəchonꞌ. Naꞌ šə bito chediṉɉechon choncho ca gonch Diozənꞌ chioꞌo castigw catəꞌ əžin ža Diozənꞌ əgwloꞌe de que ḻeꞌ zdaczeꞌ ḻicha ca deꞌen goṉeꞌ castigw zeɉḻicaṉe c̱he xtoḻəꞌəchonꞌ.
\v 6 Goṉeꞌ chioꞌo castigw o goneꞌ par nic̱h gaquə deꞌe güen c̱he chioꞌo beṉac̱h segon nac babencho.
\v 7 Diozənꞌ goṉeꞌ chioꞌo yeḻəꞌ mban zeɉḻicaṉe šə zotezə zocho choncho deꞌe güen, c̱hedəꞌ šə choncho caꞌ chloꞌecho de que cheyilɉlažəꞌəcho naclə gaquə par nic̱h yežincho ganꞌ zoꞌenəꞌ, naꞌ par nic̱h goṉeꞌ chioꞌo yeḻəꞌ balaꞌaṉ, naꞌ par nic̱h socho zeɉḻicaṉe.
\v 8 Naꞌ šə chṉecho contr Diozənꞌ naꞌ cabi chzenagcho c̱he dižəꞌ ḻi c̱heꞌenəꞌ, chzenagzechcho c̱he deꞌe malənꞌ, ḻechguaḻe əžaꞌalažəꞌ Diozənꞌ chioꞌo naꞌ goṉeꞌ chioꞌo castigw zeɉḻicaṉe.
\v 9 Zguaꞌatec chioꞌo beṉəꞌ Izrael benecho xtižəꞌ Diozənꞌ, naꞌ šə choncho deꞌe mal c̱hiꞌ saquəꞌəcho naꞌ əžaglaocho. Naꞌ chioꞌo cui naccho beṉəꞌ Izrael gwdechlə benecho xtižeꞌenəꞌ, pero ḻeczə c̱hiꞌ saquəꞌəcho naꞌ əžaglaocho šə choncho deꞌe malənꞌ.
\v 10 Naꞌ šə choncho deꞌe güenṉəꞌ gwžin ža catəꞌ Diozənꞌ goneꞌ par nic̱h gaccho beṉəꞌ blao, naꞌ goṉeꞌ chioꞌo yeḻəꞌ balaꞌaṉ, naꞌ goneꞌ par nic̱h socho binḻo len yic̱hɉlaꞌaždaꞌochonꞌ. Goneꞌ güen len chioꞌo beṉəꞌ Izrael, pero naꞌ ḻeczə goneꞌ güen len chioꞌo ḻaꞌaṉəꞌəczə cui naccho beṉəꞌ Izrael.
\p
\v 11 Tozə canꞌ chon Diozənꞌ len yoguəꞌ chioꞌo beṉac̱h.
\v 12 Yoguəꞌ chioꞌo šə babencho deꞌe mal sin cuiṉəꞌ gombiꞌacho ḻei deꞌen bzoɉ deꞌe Moisezənꞌ, Diozənꞌ əc̱hoglaogüeꞌen c̱hecho cuiayiꞌicho por ni c̱he deꞌen babencho deꞌe malənꞌ ḻaꞌaṉəꞌəczə šə cui ṉezecho canꞌ na ḻeinꞌ. Naꞌ yoguəꞌ chioꞌo banombiꞌacho ḻeinꞌ, Diozənꞌ əc̱hoglaogüeꞌen c̱hecho cuiayiꞌicho por ni c̱he deꞌen cui bencho canꞌ nanṉəꞌ.
\v 13 Caguə con yenecho ḻei naꞌanəꞌ naꞌ əṉa Diozənꞌ c̱hecho bitobi xtoḻəꞌəcho de. Pero šə choncho canꞌ na ḻeinꞌ, Diozənꞌ əṉeꞌ c̱hecho bitobi xtoḻəꞌəcho de.
\v 14 Notəꞌətezə beṉəꞌ cui naquə beṉəꞌ Izrael naꞌ cui nombiꞌe ḻei deꞌen bzoɉ deꞌe Moisezənꞌ, zolə catəꞌ choneꞌ to c̱hopə canꞌ na ḻeinꞌ con deꞌe chidzən ḻoꞌo yic̱hɉlaꞌaždaogüeꞌe. Ḻaꞌaṉəꞌəczə cui nombiꞌe ḻeinꞌ, deꞌen chon yic̱hɉḻaꞌaždaꞌogüenꞌ mendad goneꞌ naquən ca to ḻei.
\v 15 Benꞌ chon caꞌ ža chloꞌe de que ḻoꞌo yic̱hɉlaꞌaždaogüeꞌe naꞌ yoꞌo deꞌen naquə ca ḻeinꞌ. Naꞌ catəꞌ choneꞌ deꞌen choneꞌ, ḻoꞌo yic̱hɉlaꞌaždaogüeꞌe naꞌ choneꞌ xbab de que deꞌe malənꞌ choneꞌ o choneꞌ xbab de que deꞌe güenṉəꞌ choneꞌ.
\v 16 Gwžin ža catəꞌ Diozənꞌ goneꞌ par nic̱h Jesocristənꞌ əc̱hoglaogüeꞌen c̱he xbab c̱he chioꞌo beṉac̱h deꞌen bencho bgašəꞌəzə, šə bencho xbab güen o šə bencho xbab mal. Canꞌ chniaꞌ catəꞌ əchyix̱ɉuiꞌa dižəꞌ güen dižəꞌ cobə c̱he Jesocristənꞌ.
\s1 Beṉəꞌ Izrael caꞌ gwsaꞌaqueneꞌ de que gwniteꞌe binḻo len Diozənꞌ c̱hedəꞌ zɉənombiꞌe ḻeinꞌ
\p
\v 17 Baḻle chonḻe xbab de que zole binḻo len Diozənꞌ c̱hedəꞌ nacle beṉəꞌ Izrael naꞌ nsedle ḻei deꞌen bzoɉ deꞌe Moisezənꞌ. Chaꞌalažəꞌəle de que choꞌelaꞌole Diozənꞌ.
\v 18 Ṉezele deꞌen choꞌolažəꞌ Diozənꞌ. Ṉezele deꞌen naquə deꞌe güen. Choꞌele dižəꞌ c̱hei de que naquən deꞌe güen, c̱hedəꞌ laꞌ ḻei naꞌanəꞌ nsedle.
\v 19 Deꞌe tant chaquele cheɉniꞌile c̱he Diozənꞌ chonḻe xbab de que ṉezele par coꞌole beṉəꞌ nez naꞌ par əgwzeɉniꞌile beṉəꞌ caꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ.
\v 20 Naꞌ chonḻe xbab de que ṉezele par əgwzeɉniꞌile beṉəꞌ cui chseꞌeɉniꞌi naꞌ par gacle maestr c̱he biꞌi xcuidəꞌ. Laogüe deꞌen nsedle ḻei deꞌen bzoɉ deꞌe Moisezənꞌ chaquele cheɉniꞌile naꞌ chaquele ṉezele deꞌen naquə deꞌe ḻi.
\v 21 Leꞌe chsed chloꞌile beṉəꞌ yoblə, ¿bixc̱henꞌ cui choloꞌi cuinḻe? Chsed chloꞌile bito no cuan, len chbanḻe.
\v 22 Chsed chloꞌile de que bito no coꞌ xtoi naꞌ bito no cueɉyic̱hɉ beꞌen c̱hei o noꞌol c̱hei par soleneꞌ beṉəꞌ yoblə, len chonczle yoguəꞌ deꞌen nale cui no gon. Naꞌ chgueꞌile lguaꞌa lsaquəꞌ caꞌ deꞌen chseꞌeɉṉiꞌalažəꞌ beṉəꞌ, len biaꞌaczə chɉeḻanḻe bitəꞌətezə deꞌen zɉəde do ḻoꞌo yoꞌo ganꞌ zɉəžaꞌ lguaꞌa lsaquəꞌ caꞌ.
\v 23 Chaꞌalažəꞌəle deꞌe nsedle ḻei deꞌen bzoɉ deꞌe Moisezənꞌ, pero laogüe deꞌe cui chonḻe canꞌ na ḻeinꞌ, chṉitle yeḻəꞌ balaꞌaṉ c̱he Diozənꞌ.
\v 24 Deꞌe ḻi chonḻe canꞌ nyoɉ Xtižəꞌ Diozənꞌ ganꞌ nan: “Deꞌen chonḻe deꞌe mal, zan beṉəꞌ cui zɉənaquə beṉəꞌ Izrael chəsəꞌəṉeꞌ contr Diozənꞌ.”
\p
\v 25 Chioꞌo beṉəꞌ Izrael nsaꞌacho to señy lao cuerp c̱hechonꞌ deꞌen neꞌ sirconsision, naꞌ zeɉen de que Diozənꞌ gaquəleneꞌ chioꞌo canꞌ beneꞌ lyebe. Naꞌ señyənꞌ zaquəꞌən par chioꞌo šə choncho canꞌ na ḻeinꞌ. Pero šə cui choncho canꞌ na ḻeinꞌ, bitobi zaquəꞌ señy deꞌen zochonəꞌ.
\v 26 Šə cui nsaꞌacho señy deꞌen neꞌ sirconsisionṉəꞌ pero choncho canꞌ na ḻeinꞌ, gaccho cuent ca beṉəꞌ nsaꞌaczə señy deꞌen neꞌ sirconsisionṉəꞌ ḻaꞌaṉəꞌəczə cui nsaꞌachon.
\v 27 Baḻle bito bi señy deꞌen neꞌ sirconsisionṉəꞌ nsaꞌale, pero chonḻe complir canꞌ na ḻeinꞌ. Naꞌ laogüe deꞌen chonḻe complir canꞌ na ḻeinꞌ, chonḻe ca nacbiaꞌ de que deczə xtoḻəꞌ beṉəꞌ caꞌ zɉənsaꞌ señy deꞌen neꞌ sirconsisionṉəꞌ, c̱hedəꞌ nyoɉ ḻeinꞌ naꞌ zɉənombiꞌen, pero bito chsoꞌoneꞌ canꞌ nanṉəꞌ.
\v 28 Zan beṉəꞌ chsaꞌalɉeꞌ lao dia c̱he Izraelənꞌ naꞌ əzɉaꞌacczeꞌ chsoꞌoneꞌ canꞌ naquə costombr c̱he beṉəꞌ Izraelənꞌ, pero lao Diozənꞌ bito zɉənaqueꞌ beṉəꞌ Izrael, naꞌ nic zaquəꞌ señy deꞌen chosoꞌozo cuerp c̱hegaꞌaqueꞌenəꞌ.
\v 29 Pero chioꞌo deꞌe ḻi naccho beṉəꞌ Izrael šə chonḻilažəꞌəcho Diozənꞌ canꞌ cheyaḻəꞌ gonḻilažəꞌəchoneꞌ. Naꞌ deꞌen babocobə Diozənꞌ yic̱hɉlaꞌaždaꞌochonꞌ gwxaquəꞌəleben ca señy deꞌen neꞌ sirconsision, naꞌ zeɉen de que bagwleɉeꞌ chioꞌo par naccho xiꞌiṉeꞌ. Babšeꞌe yic̱hɉlaꞌaždaꞌochonꞌ, caguə con nsaꞌacho to señy lao cuerp c̱hechonꞌ. Naꞌ šə chonḻilažəꞌəchoneꞌ, Diozənꞌ əṉeꞌ de que choncho güen, ḻaꞌaṉəꞌəczə šə notono no nochlə əṉa de que choncho güen.
\c 3
\p
\v 1 ¿Bi deꞌe güen zedeguaꞌan c̱he chioꞌo beṉəꞌ Izrael laogüe deꞌen naccho beṉəꞌ Izrael? ¿Bi deꞌe güen deꞌe zedeguaꞌan deꞌen zocho señy deꞌen neꞌ sirconsisionṉəꞌ?
\v 2 Deꞌe xen deꞌe zedeguaꞌan. Naꞌ to deꞌen zedeguaꞌan ca deꞌen əbnežɉw Diozənꞌ x̱axtaꞌocho caꞌ Xtižeꞌenəꞌ deꞌen nyoɉənꞌ.
\v 3 Naꞌ baḻeꞌ cui gwseꞌeɉḻeꞌe c̱hei. Pero bito gwde Diozənꞌ caꞌazə cui goneꞌ canꞌ na Xtižeꞌenəꞌ ḻaꞌaṉəꞌəczə baḻeꞌ cui gwseꞌeɉḻeꞌe c̱hei.
\v 4 Gonczeꞌ canꞌ neꞌenəꞌ. Yoguəꞌ laste əṉaczeꞌ deꞌe ḻinəꞌ ḻaꞌaṉəꞌəczə šə yoguəꞌəḻoḻ beṉəꞌ yesəꞌəṉeꞌ dižəꞌ güenḻažəꞌənəꞌ. Chac canəꞌ bzoɉ to profet gožeꞌ Diozənꞌ:
\q1 Leꞌ əgwloꞌidoꞌ beṉac̱hənꞌ de que choꞌo dižəꞌ ḻi.
\q1 Naꞌ ca naquə beṉəꞌ caꞌ chsoꞌon xbab de que bito chonoꞌ complir canꞌ naꞌonəꞌ,
\q1 əsaꞌacbeꞌineꞌ de que chonczoꞌ canꞌ naꞌonəꞌ.
\p
\v 5 Quinga chəsəꞌəna baḻə beṉəꞌ cui chseꞌeɉniꞌi c̱he Diozənꞌ. Chəsəꞌəneꞌ de que deꞌe mal deꞌen choncho chloꞌin beṉac̱hənꞌ de que Diozənꞌ naqueꞌ beṉəꞌ chon deꞌe güen. Naꞌ chəsəꞌəneꞌ de que Diozənꞌ bito zdeꞌ ḻicha deꞌen goṉeꞌ castigw c̱he deꞌe mal deꞌen chonchonꞌ.
\v 6 Ḻechguaḻe clelənꞌ chsoꞌoneꞌ xbabənꞌ. Žaḻəꞌ deꞌe ḻi canꞌ chsaꞌaqueneꞌenəꞌ bitoczə gaquə gon Diozənꞌ yeḻəꞌ jostis c̱he chioꞌo beṉac̱h canꞌ cheyaḻəꞌənəꞌ. Pero laꞌ gonczeꞌen.
\p
\v 7 Naꞌ beṉəꞌ caꞌ chsoꞌon xbabənꞌ caꞌ ḻeczə chəsəꞌəneꞌ de que catəꞌ chsoꞌonḻažeꞌe chsoꞌoneꞌ ca chesyəꞌəyacbeꞌi beṉəꞌ de que Diozənꞌ naqueꞌ beṉəꞌ güen ca naquənꞌ choꞌe por dižəꞌ ḻi. Deꞌe naꞌanəꞌ chsaꞌaqueneꞌ de que bito cheyaḻəꞌ c̱hoglao Diozənꞌ c̱hegaꞌaqueꞌ de que zɉənapeꞌ doḻəꞌ ca deꞌen chsoꞌonḻažeꞌe.
\v 8 Baḻə beṉəꞌ chsoꞌoneꞌ contr netoꞌ, naꞌ chsoꞌoneꞌ choꞌatoꞌonəꞌ chəsəꞌəneꞌ de que natoꞌ ¿bixc̱henꞌ cui goncho deꞌe malənꞌ par nic̱h gaquə deꞌe güenṉəꞌ? Ca cheyaḻəꞌəczənꞌ əgwnežɉo Diozənꞌ castigw c̱he nonꞌ ṉa caꞌ.
\s1 Notono nḻaꞌ no cui napə doḻəꞌ
\p
\v 9 ¿Bixanꞌ ža? ¿Enaquəch chioꞌo beṉəꞌ Izrael beṉəꞌ güench cle ca chioꞌo cui naccho beṉəꞌ Izrael? Bito. Canꞌ bagwniaꞌ, tozəczə canꞌ chac c̱he chioꞌo beṉəꞌ Izrael naꞌ c̱he chioꞌo cui naccho beṉəꞌ Izrael, yoguəꞌəcho zocho xniꞌa deꞌe malənꞌ.
\v 10 Canꞌ nyoɉczə Xtižəꞌ Diozənꞌ nan:
\q1 Notono zo beṉəꞌ zda ḻicha, ni tlišəꞌəzeꞌ.
\q1
\v 11 Notono nḻaꞌ beṉəꞌ cheɉniꞌi c̱he Diozənꞌ,
\q1 naꞌ notono nḻaꞌ beṉəꞌ cheyilɉeꞌeneꞌ.
\q1
\v 12 Yoguəꞌ beṉac̱hənꞌ bagosəꞌəqueꞌe nez mal.
\q1 Yogueꞌe bitobi zɉəzaqueꞌe.
\q1 Ni tlišəꞌəzə beṉəꞌ chon deꞌe güen notono nḻaꞌ.
\q1
\v 13 Len xtižəꞌəgaꞌaqueꞌenəꞌ chəsəꞌəx̱oayagueneꞌen beṉəꞌ,
\q1 naꞌ ca benen c̱he bgüizəꞌ gwxaquəꞌəlebe dižəꞌ deꞌen chsoꞌenəꞌ.
\q1 Ca zbanṉəꞌ chḻaꞌ cuerp c̱he bia guatənꞌ catəꞌən bachožəꞌən, caꞌ zbanṉəꞌ naquə xtižəꞌəgaꞌaqueꞌenəꞌ.
\q1
\v 14 Por dižəꞌ mal dižəꞌ əzban žaꞌ choꞌagaꞌaqueꞌenəꞌ.
\q1
\v 15 Con bizə deꞌen chosoꞌodeꞌineꞌ par chsoꞌoteꞌ beṉəꞌ.
\q1
\v 16 Gatəꞌətezə chɉaꞌaqueꞌ con laꞌ ggoꞌo yeḻəꞌ yašəꞌ yeḻəꞌ zinꞌ chɉaꞌaqueꞌ.
\q1
\v 17 Naꞌ bito chesəꞌəzo chesəꞌəbezeꞌ binḻo len lɉuežɉgaꞌaqueꞌenəꞌ.
\q1
\v 18 Bito chsaꞌapeꞌ Diozənꞌ respet.
\p
\v 19 Naꞌ ṉezecho ca naquə yoguəꞌ deꞌen na ḻei c̱he Diozənꞌ goncho, nyoɉən par chioꞌo naꞌ x̱axtaꞌocho caꞌ beṉəꞌ caꞌ bnežɉueꞌ ḻeinꞌ. Pero ca naquə cui choncho canꞌ nanṉəꞌ, ni tozə chioꞌo bito gaquə əṉacho de que naccho beṉəꞌ güen. Deꞌe naꞌanəꞌ Diozənꞌ əc̱hoglaogüeꞌen c̱hecho de que siꞌicho castigw c̱he xtoḻəꞌəchonꞌ canꞌ əc̱hoglaogüeꞌen c̱he yeziquəꞌəchlə beṉac̱hənꞌ.
\v 20 Ni to chioꞌo beṉac̱h bito ṉa Diozənꞌ c̱hecho de que naccho beṉəꞌ güen por ni c̱he bi deꞌen choncho deꞌen na ḻeinꞌ, c̱hedəꞌ laꞌ ni tocho bito choncho cayaṉəꞌən nanṉəꞌ. Ḻei naꞌanəꞌ chzeɉniꞌin chioꞌo de que choncho deꞌe malənꞌ.
\s1 Cheyaḻəꞌ gonḻilažəꞌəcho Jesocristənꞌ par nic̱h gaccho beṉəꞌ güen lao Diozənꞌ
\p
\v 21-22 Diozənꞌ babloꞌe canꞌ neꞌ c̱he notəꞌətezcho de que naccho beṉəꞌ güen laogüeꞌenəꞌ šə chonḻilažəꞌəcho Jesocristənꞌ. Ḻeinꞌ naꞌ deꞌen bosoꞌozoɉ profet caꞌ beṉəꞌ caꞌ gwsoꞌe xtižəꞌ Diozənꞌ canaꞌ ḻeczə chsoꞌen dižəꞌ de que canꞌ goneꞌ. Chioꞌo chonḻilažəꞌəcho Jesocristənꞌ bito chon Diozənꞌ cuent c̱hecho šə bi deꞌe choncho complir deꞌen na ḻei c̱heꞌenəꞌ. Naꞌ notəꞌətezcho tozəczə canꞌ chon Diozənꞌ len chioꞌo ḻaꞌaṉəꞌəczə šə naccho beṉəꞌ Izrael o šə cui naccho.
\v 23 Yoguəꞌəḻoḻcho babencho deꞌe mal naꞌ deꞌe naꞌanəꞌ ni tocho bito gaquə əṉacho de que naccho beṉəꞌ güen ca beṉəꞌ güenṉəꞌ naquə Diozənꞌ.
\v 24 Nžiꞌilažeꞌe chioꞌo chonḻilažəꞌəcho Cristo Jesoꞌosənꞌ. Naꞌ caguə bi chziꞌ Dioz naꞌanəꞌ neꞌ c̱hecho de que naccho beṉəꞌ güen laogüeꞌenəꞌ, c̱hedəꞌ laꞌ bagwdixɉw Cristo Jesoꞌosənꞌ xtoḻəꞌəchonꞌ.
\v 25 Antslənꞌ bagwdapə Diozənꞌ yeḻəꞌ chxenḻažəꞌənəꞌ bagwzoineꞌ bguoꞌo bc̱heɉeꞌ c̱he deꞌe mal deꞌen bagwsoꞌon beṉac̱hənꞌ tšiꞌi, naꞌ bito bloꞌe canꞌ chnežɉueꞌ castigw c̱he notəꞌətezə beṉəꞌ chsoꞌon deꞌe malənꞌ. Pero ṉaꞌa par bloꞌe de que ḻeꞌ chnežɉwczeꞌ castigw c̱he beṉəꞌ chsoꞌon deꞌe malənꞌ, gwleɉeꞌ Cristo Jesoꞌosənꞌ par gwdixɉueꞌ xtoḻəꞌ beṉac̱hənꞌ. Naꞌ Diozənꞌ chṉitlaogüeꞌ xtoḻəꞌ con beṉəꞌ chsoꞌonḻilažəꞌ Cristo Jesoꞌosənꞌ.
\v 26 Naꞌ deꞌen əbseḻeꞌeneꞌenəꞌ ṉezecho de que Diozənꞌ zdaczeꞌ ḻicha deꞌen neꞌ c̱he yoguəꞌ chioꞌo chonḻilažəꞌəcho Jesoꞌosənꞌ de que naccho beṉəꞌ güen laogüeꞌenəꞌ.
\p
\v 27 Bito cheyaḻəꞌ güeꞌelaoꞌ cuincho əṉacho de que naccho beṉəꞌ güen. Ni tocho cui naccho beṉəꞌ güen por ni c̱he bi deꞌe güen deꞌen choncho. Pero šə chonḻilažəꞌəcho Jesoꞌosənꞌ Diozənꞌ neꞌ de que naccho beṉəꞌ güen laogüeꞌenəꞌ.
\v 28 Canꞌ cheɉniꞌichon, šə chonḻilažəꞌəcho Jesoꞌosənꞌ Diozənꞌ neꞌ de que naccho beṉəꞌ güen laogüeꞌenəꞌ sin cui choneꞌ cuent c̱hecho šə bi deꞌe choncho complir deꞌen na ḻeinꞌ.
\p
\v 29 ¿EDiozənꞌ naqueꞌ X̱an chioꞌo beṉəꞌ Izrael naꞌazənꞌ? ¿Ecaguə ḻeczə naqueꞌ X̱an chioꞌo cui naccho beṉəꞌ Izrael?
\v 30 Cle naqueꞌ X̱an yoguəꞌəḻoḻ beṉəꞌ. Naꞌ neꞌ c̱he yoguəꞌəcho šə bachonḻilažəꞌəcho Jesoꞌosənꞌ naccho beṉəꞌ güen laogüeꞌenəꞌ. Tozəczə canꞌ choneꞌ len chioꞌo nsaꞌacho señy deꞌen neꞌ sirconsisionṉəꞌ naꞌ len chioꞌo cui nsaꞌachon.
\v 31 ¿Echoncho ḻei deꞌen bzoɉ deꞌe Moisezənꞌ ca to deꞌe cui bi zaqueꞌenəꞌ laogüe chonḻilažəꞌəcho Jesoꞌosənꞌ? Bito chonchon ca to deꞌe cui bi zaqueꞌe, sino choꞌelechchon balorənꞌ.
\c 4
\s1 Abraanṉəꞌ benḻilažeꞌe Diozənꞌ naꞌ deꞌe nanꞌ goqueꞌ beṉəꞌ güen lao Diozənꞌ
\p
\v 1 Deꞌe x̱axtaꞌocho Abraam beꞌenəꞌ naccho dia, ¿bixa əṉacho c̱heꞌenəꞌ?
\v 2 Žaləꞌ por ni c̱he deꞌe güen deꞌen beneꞌ naꞌanəꞌ gwna Diozənꞌ de que naqueꞌ beṉəꞌ güen laogüeꞌenəꞌ, zaquəꞌəczeꞌ par beꞌelaoꞌ cuineꞌ žaləꞌ caꞌ. Pero bito beꞌelaoꞌ cuineꞌ lao Diozənꞌ.
\v 3 Ḻeꞌe Xtižəꞌ Diozənꞌ deꞌen nyoɉən nan: “Abraanṉəꞌ benḻilažeꞌe Diozənꞌ naꞌ deꞌe nanꞌ gwc̱hoglaon c̱heꞌ de que naqueꞌ beṉəꞌ güen lao Diozənꞌ.”
\v 4 Catəꞌ to beṉəꞌ choneꞌ žin choneꞌ gan laxɉueꞌenəꞌ naꞌ bito ṉacho de que x̱an žinṉəꞌ choneꞌ to goclen catəꞌən chnežɉueꞌeneꞌ laxɉueꞌenəꞌ. Naꞌ caꞌaczənꞌ naquən len chioꞌo, žaləꞌ babencho cayaṉəꞌən non Diozənꞌ mendad goncho bito naquən to goclen deꞌen chon Diozənꞌ len chioꞌo catəꞌən neꞌ naccho beṉəꞌ güen laogüeꞌenəꞌ žaləꞌ caꞌ.
\v 5 Pero naquəczən to goclen. Diozənꞌ neꞌ de que naccho beṉəꞌ güen laogüeꞌenəꞌ šə chonḻilažəꞌəchoneꞌ sin cui choncho xbab de que deꞌe güen deꞌen choncho chaclenən par əṉeꞌ de que naccho beṉəꞌ güen laogüeꞌenəꞌ. Naꞌ Diozənꞌ choneꞌ par nic̱h chioꞌo cui beꞌelaꞌochoneꞌ antslə chaccho beṉəꞌ güen laogüeꞌenəꞌ catəꞌ chonḻilažəꞌəchoneꞌ.
\v 6 Ḻeczə deꞌe Dabinꞌ beꞌe dižəꞌ c̱he goclenṉəꞌ deꞌen chon Diozənꞌ len chioꞌo chonḻilažəꞌəchoneꞌ ca deꞌen neꞌ naccho beṉəꞌ güen laogüeꞌenəꞌ sin cui choneꞌ cuent šə bichlə deꞌe güen deꞌen choncho.
\v 7 Deꞌe Dabinꞌ gwneꞌ:
\q1 Mba zocho šə babeziꞌixen Diozənꞌ c̱hecho c̱he deꞌe malənꞌ bencho.
\q1 Mba zocho šə babṉitlaogüeꞌ xtoḻəꞌəchonꞌ.
\q1
\v 8 Mba zocho šə chc̱hoglao Diozənꞌ c̱hecho de que caguə bi xtoḻəꞌəcho denəꞌ.
\p
\v 9 Chioꞌo nsaꞌacho señy deꞌen neꞌ sirconsisionṉəꞌ bito cheyaḻəꞌ goncho xbab de que chioꞌozənꞌ gaquə socho mba canꞌ gwneꞌenəꞌ. Lenczə beṉəꞌ caꞌ cui zɉənsaꞌ señyənꞌ guaquə ṉiteꞌe mba canꞌ gwneꞌenəꞌ. Ṉezecho deꞌen benḻilažəꞌ deꞌe Abraanṉəꞌ Diozənꞌ deꞌe naꞌanəꞌ gwneꞌ c̱heꞌ de que naqueꞌ beṉəꞌ güen laogüeꞌenəꞌ.
\v 10 Naꞌ gwneꞌ c̱he deꞌe Abraanṉəꞌ de que naqueꞌ beṉəꞌ güen laogüeꞌenəꞌ antslə zeꞌe soeꞌ señy deꞌen neꞌ sirconsisionṉəꞌ, caguə beyožlənꞌ.
\v 11 Naꞌ gwdechlə gwzoeꞌ señyənꞌ par gwṉezeneꞌ de que Diozənꞌ bagwneꞌ caꞌ c̱heꞌ. Deꞌe Abraanṉəꞌ gwzolaogüeꞌ chonḻilažeꞌe Diozənꞌ catəꞌən zeꞌe soleꞌ señyənꞌ naꞌ canaꞌ gwna Diozənꞌ naqueꞌ beṉəꞌ güen laogüeꞌenəꞌ. Deꞌe naꞌanəꞌ ṉezecho de que Diozənꞌ neꞌ caꞌ c̱he notəꞌətezə beṉəꞌ cui zɉəzo señy deꞌen neꞌ sirconsisionṉəꞌ con šə chsoꞌonḻilažeꞌeneꞌ. Naꞌ lao Diozənꞌ deꞌe Abraanṉəꞌ naqueꞌ x̱axtaoꞌ yoguəꞌ chioꞌo chonḻilažəꞌəcho Diozənꞌ.
\v 12 Naꞌ ḻeczə ṉezecho de que Diozənꞌ neꞌ c̱he chioꞌo nsaꞌacho señyənꞌ de que naccho beṉəꞌ güen laogüeꞌenəꞌ šə chonḻilažəꞌəchoneꞌ. Naꞌ neꞌ caꞌ caguə por ni c̱he deꞌen zocho señyənꞌ sino por ni c̱he deꞌen chonḻilažəꞌəchoneꞌ canꞌ benḻilažəꞌ deꞌe Abraanṉəꞌ ḻeꞌ.
\s1 Abraanṉəꞌ benḻilažeꞌe Diozənꞌ naꞌ deꞌe naꞌanəꞌ Diozənꞌ beneꞌ lyebe deꞌe beneꞌ len ḻeꞌ
\p
\v 13 Deꞌe Abraanṉəꞌ benḻilažeꞌe Diozənꞌ, naꞌ deꞌe naꞌanəꞌ Diozənꞌ beneꞌ lyebe goneꞌ par nic̱h Abraanṉəꞌ len xiꞌiṉ dia c̱heꞌ caꞌ yesəꞌənabiꞌe doxenḻə yežlyonꞌ. Bito ben Diozənꞌ cuent c̱he Abraanṉəꞌ šə beneꞌ complir canꞌ na ḻei c̱heꞌenəꞌ sino deꞌen benḻilažeꞌe Dioz naꞌanəꞌ gwneꞌ de que naqueꞌ beṉəꞌ güen laogüeꞌenəꞌ naꞌ ḻeczə deꞌe naꞌanəꞌ beneꞌ lyebe yesəꞌənabiꞌe yežlyonꞌ.
\v 14 Nitəꞌ beṉəꞌ chsaꞌaqueneꞌ por ni c̱he deꞌen zɉənaogaꞌaqueꞌ ḻeinꞌ yesəꞌənabiꞌe yežlyonꞌ. Žaləꞌ naꞌaclə ḻegaꞌaqueꞌ yesəꞌənabiꞌe yežlyonəꞌ, bito bi zaquəꞌ deꞌen chsoꞌonḻilažəꞌ beṉəꞌ Diozənꞌ, naꞌ ḻeczə caꞌ bito gon Diozənꞌ complir canꞌ beneꞌ lyebe len xiꞌiṉ dia c̱he deꞌe Abraanṉəꞌ žaləꞌ chac caꞌ.
\v 15 Deꞌen gwdix̱ɉw Diozənꞌ ḻei c̱heꞌenəꞌ naꞌ beṉac̱hənꞌ cui chosoꞌozenagueꞌ c̱hei, Diozənꞌ gwnežɉueꞌ ḻegaꞌaqueꞌ castigw zeɉḻicaṉe c̱he xtoḻəꞌəgaꞌaqueꞌenəꞌ. Žaləꞌ cui zɉəṉezeneꞌ bi deꞌe caꞌ cheyaḻəꞌ soꞌoneꞌ, bitobi xtoḻəꞌəgaꞌaqueꞌ de, pero zɉəṉezczeneꞌen.
\p
\v 16 Caꞌ chaquənꞌ, chioꞌo chonḻilažəꞌəcho Diozənꞌ ṉabiꞌacho yežlyonꞌ. Tant nžiꞌilažəꞌ Diozənꞌ chioꞌo choneꞌ ca ṉabiꞌachon par nic̱h gaquə canꞌ beneꞌ lyebe len yoguəꞌ chioꞌo choneꞌ cuent ca xiꞌiṉ dia c̱he deꞌe Abraanṉəꞌ. Caguə gaquə caꞌ len beṉəꞌ caꞌ zɉəsəꞌənao ḻei naꞌazənꞌ sino ḻeczə len notəꞌətezə beṉəꞌ chsoꞌonḻilažəꞌ Diozənꞌ canꞌ benḻilažəꞌ deꞌe Abraanṉəꞌ ḻeꞌ, laꞌ lao Diozənꞌ deꞌe Abraanṉəꞌ naqueꞌ x̱axtaoꞌ yoguəꞌ chioꞌo chonḻilažəꞌəcho Diozənꞌ.
\v 17 Canꞌ nyoɉczə deꞌen gwna Diozənꞌ: “Banzoaꞌ leꞌ gacoꞌ x̱axtaoꞌ beṉəꞌ šaꞌ ṉasyon zan.” Naꞌ Diozənꞌ napeꞌ yeḻəꞌ guac par yosbaneꞌ beṉəꞌ guat caꞌ naꞌ Diozənꞌ choneꞌ par nic̱h chac bitəꞌətezənꞌ neꞌenəꞌ. Deꞌe naꞌanəꞌ choꞌe dižəꞌ c̱he beṉəꞌ zeꞌe zaꞌac ca chioꞌo beṉac̱h choꞌecho dižəꞌ c̱he beṉəꞌ banitəꞌ.
\p
\v 18 Bito gwṉeze Abraanṉəꞌ nacxa gaquənꞌ gaquə canꞌ gwna Diozənꞌ. Pero gwyeɉḻeꞌe c̱he Diozənꞌ naꞌ gwzoeꞌ lez de que Diozənꞌ gonczeꞌ ḻeꞌ x̱axtaoꞌ beṉəꞌ šaꞌ ṉasyon zan. Con gwyeɉḻeꞌe de que gaquə canꞌ gož Diozənꞌ ḻeꞌ: “Beṉəꞌ zan əsaꞌac xiꞌiṉ dia c̱hioꞌ.”
\v 19 Con gwzoczeꞌ benḻilažeꞌe Diozənꞌ ḻaꞌaṉəꞌəczə gocbeꞌineꞌ banaqueꞌ beṉəꞌ golə par so xiꞌiṉeꞌ. Bazoeꞌ casi to gueyoa iz, naꞌ noꞌol c̱heꞌ Saranꞌ bitoch zoeꞌ xlaogüeꞌe saneꞌ.
\v 20 Gwzotezeꞌ benḻilažeꞌe Diozənꞌ naꞌ bito goquə šeɉlažeꞌe c̱he lyebe deꞌen ben Diozənꞌ len ḻeꞌ, sino que gwzoeꞌ c̱hec̱h benḻilažeꞌeneꞌ naꞌ beꞌelaogüeꞌeneꞌ.
\v 21 Abraanṉəꞌ gwṉezeneꞌ de que Diozənꞌ guac goneꞌ ca deꞌen beneꞌ lyebenꞌ.
\v 22 Naꞌ laogüe deꞌen benḻilažeꞌe Diozənꞌ deꞌe nanꞌ gwchoglaon c̱heꞌ de que naqueꞌ beṉəꞌ güen lao Diozənꞌ.
\p
\v 23 Naꞌ nyoɉən de que deꞌen benḻilažeꞌeneꞌ naꞌanəꞌ gwchoglaon c̱heꞌ de que naqueꞌ beṉəꞌ güen lao Diozənꞌ. Pero caguə nyoɉən par deꞌe Abraam naꞌazənəꞌ.
\v 24-25 Ḻeczə nyoɉən par chioꞌo, laꞌ ḻeczə deꞌen chonḻilažəꞌəcho Diozənꞌ nchoglaon c̱hecho de que naccho beṉəꞌ güen laogüeꞌenəꞌ. Diozənꞌ bseḻeꞌe X̱ancho Jesoꞌosənꞌ par gwsoꞌot beṉəꞌ ḻeꞌ naꞌ boḻis bosbaneꞌeneꞌ ladɉo beṉəꞌ guat caꞌ. Goc caꞌ len Jesoꞌosənꞌ par nic̱h gwdixɉueꞌ xtoḻəꞌəchonꞌ naꞌ par nic̱h Diozənꞌ neꞌ c̱he chioꞌo chonḻilažəꞌəchoneꞌ de que naccho beṉəꞌ güen laogüeꞌenəꞌ.
\c 5
\s1 Zocho binḻo len Diozənꞌ šə chonḻilažəꞌəcho Jesocristənꞌ
\p
\v 1 Diozənꞌ neꞌ de que naccho beṉəꞌ güen laogüeꞌenəꞌ c̱hedəꞌ chonḻilažəꞌəcho Jesocristənꞌ, naꞌ X̱ancho Jesocrist naꞌanəꞌ babeneꞌ par nic̱h zocho binḻo len Diozənꞌ.
\v 2 Deꞌen chonḻilažəꞌəcho Jesocristənꞌ nžiꞌilažəꞌ Diozənꞌ chioꞌo naꞌ gwzoczeꞌ əžiꞌilažeꞌe chioꞌo. Chebeicho ṉezecho goṉ Diozənꞌ chioꞌo yeḻəꞌ balaꞌaṉ xen ca deꞌen de c̱heꞌ.
\v 3 Naꞌ ḻeczə chebeicho catəꞌ chzaquəꞌəziꞌicho, laꞌ ṉezecho šə chgoꞌo chc̱heɉlažəꞌəcho catəꞌən chzaquəꞌəziꞌicho nachənꞌ gwcheɉczecho catəꞌən de bichlə deꞌen saquəꞌəziꞌicho.
\v 4 Šə chgoꞌo chc̱heɉlažəꞌəcho catəꞌən chzaquəꞌəziꞌichonꞌ, Diozənꞌ chebeineꞌ canꞌ choncho. Naꞌ catəꞌ chebeineꞌ canꞌ choncho, ṉezecho de que gaquəlencheꞌ chioꞌo.
\v 5 Naꞌ catəꞌən ṉezecho de que gaquəlench Diozənꞌ chioꞌo, bito chžaꞌa yic̱hɉcho c̱hedəꞌ ṉezecho babseḻeꞌe Spirit c̱heꞌenəꞌ par zon len chioꞌo, chṉen ḻoꞌo laꞌaždaꞌochonꞌ nan de que Diozənꞌ chacchgüeineꞌ c̱hecho.
\p
\v 6 Lao ṉeꞌe zocho xniꞌa deꞌe malənꞌ, Cristənꞌ bnežɉw cuineꞌ gwsoꞌot beṉəꞌ ḻeꞌ. Ben Cristənꞌ caꞌ par gwdixɉueꞌ xtoḻəꞌ chioꞌo cui beꞌelaꞌocho Diozənꞌ. Naꞌ gwsoꞌoteꞌeneꞌ catəꞌ bžin orənꞌ banžiaꞌ Diozənꞌ biaꞌ.
\v 7 Ca naquə chioꞌo beṉac̱h, zdebə chonən par əc̱hebcho gwnežɉo cuincho soꞌot beṉəꞌ chioꞌo lguaꞌa to beṉəꞌ yoblə ḻaꞌaṉəꞌəczə šə lguaꞌa to beṉəꞌ zda ḻicha. Pero gwchoɉlɉa to beṉəꞌ yeyaxɉeneꞌ gwnežɉo cuineꞌ soꞌoteꞌeneꞌ lguaꞌa to beṉəꞌ naquə beṉəꞌ žiꞌilažəꞌ.
\v 8 Pero catəꞌən chioꞌo ṉenaccho beṉəꞌ güen deꞌe mal, Diozənꞌ bseḻeꞌe Cristənꞌ bnežɉw cuineꞌ por ni c̱hecho gwsoꞌot beṉəꞌ ḻeꞌ. Deꞌe naꞌanəꞌ ṉezecho ḻechguaḻe chaque Diozənꞌ c̱hecho.
\v 9 Diozənꞌ neꞌ de que naccho beṉəꞌ güen laogüeꞌenəꞌ c̱hedəꞌ Cristənꞌ blalɉ xc̱heneꞌenəꞌ par gwdixɉueꞌ xtoḻəꞌəchonꞌ. Naꞌ ḻeczə caꞌ ṉezecho de que Cristənꞌ bagocleneꞌ chioꞌo chonḻilažəꞌəchoneꞌ par nic̱h caꞌ Diozənꞌ bito goṉeꞌ castigw c̱hecho zeɉḻicaṉe.
\v 10 Beṉəꞌ contr c̱he Dioz nanꞌ goccho. Pero naꞌ Xiꞌiṉeꞌ Cristənꞌ bnežɉw cuineꞌ por ni c̱hecho gwsoꞌot beṉəꞌ ḻeꞌ. Ben Cristənꞌ caꞌ par bozoeꞌ chioꞌo binḻo len Diozənꞌ. Naꞌ ṉezecho ḻeczə zo Cristənꞌ choneꞌ par nic̱h gaquə yic̱hɉlaꞌaždaꞌochonꞌ güen canꞌ naquə yic̱hɉlaꞌaždaꞌogüeꞌenəꞌ c̱hedəꞌ ngodəꞌəcho txen len ḻeꞌ.
\v 11 Naꞌ ḻeczə dech deꞌen c̱hebeicho. Ḻeczə chebeicho deꞌen nombiꞌacho Diozənꞌ, c̱hedəꞌ laꞌ Jesocrist naꞌanəꞌ bac̱h bozoeꞌ chioꞌo binḻo len Diozənꞌ.
\s1 Deꞌe Adanṉəꞌ bx̱iꞌe deꞌe malənꞌ yežlyo nga, naꞌ Jesocristənꞌ bedəyeneꞌ par nic̱h chac deꞌe güen
\p
\v 12 Yeḻəꞌ godenag c̱he beṉəꞌ nechənꞌ benꞌ gwle Adanṉəꞌ, gwzolao deꞌe malənꞌ yežlyo nga, naꞌ deꞌe mal nanꞌ nsaꞌ yeḻəꞌ gotənꞌ. Naꞌ deꞌe nanꞌ den de que yoguəꞌ beṉac̱hənꞌ chsaꞌateꞌ naꞌ yogueꞌe chsoꞌoneꞌ deꞌe mal.
\v 13 Gwsoꞌonczə beṉac̱hənꞌ deꞌen malənꞌ dezd tyemp c̱he Adanṉəꞌ antslə cuiṉəꞌ c̱hix̱ɉw Diozənꞌ ḻei c̱heꞌenəꞌ. Naꞌ catəꞌ cuiṉəꞌ c̱hix̱ɉueꞌ ḻei c̱heꞌenəꞌ nžaꞌalə canꞌ gwc̱hoglaogüeꞌen c̱he beṉac̱hənꞌ catəꞌən gwsoꞌoneꞌ deꞌe malənꞌ.
\v 14 Pero naꞌ gwzolaozən dezd tyemp c̱he deꞌe Adanṉəꞌ bžinte tyemp c̱he deꞌe Moisezənꞌ benən byen yoguəꞌ beṉəꞌ gwsaꞌateꞌ canꞌ chsaꞌateꞌ ṉaꞌa, c̱hedəꞌ yogueꞌe gwsoꞌoneꞌ deꞌe malənꞌ, ḻaꞌaṉəꞌəczə deꞌe mal deꞌen gwsoꞌoneꞌ bito naquən ca deꞌe mal deꞌen ben deꞌe Adanṉəꞌ. Deꞌe Adan naꞌanəꞌ bedəyeneꞌ par nic̱h gwxe yeḻəꞌ gotənꞌ yežlyo nga, pero naꞌ Jesocristənꞌ benꞌ banaquəczən yidə dezd canaꞌateczə, ḻeꞌenəꞌ bedəyeneꞌ par nic̱h de yeḻəꞌ mban zeɉḻicaṉe c̱he notəꞌətezcho chonḻilažəꞌəchoneꞌ.
\p
\v 15 Deꞌe xen nžaꞌ yeḻəꞌ goclen deꞌen ben Diozənꞌ len chioꞌo catəꞌən bseḻeꞌe Jesocristənꞌ naꞌ ca deꞌe malənꞌ deꞌen ben deꞌe Adanṉəꞌ. Por ni c̱he deꞌe malənꞌ deꞌen ben deꞌe Adanṉəꞌ beṉəꞌ zan gwsaꞌat. Pero naꞌ Diozənꞌ beneꞌ to deꞌe zaqueꞌe, beneꞌ to yeḻəꞌ žiꞌilažəꞌ xen naꞌ to yeḻəꞌ goclen xen par beṉəꞌ zan. Diozənꞌ chacleneꞌ chioꞌo ca deꞌen bseḻeꞌe Jesocristənꞌ par cheyašəꞌ chežiꞌilažeꞌe yoguəꞌ chioꞌo beṉac̱h.
\v 16 Nžaꞌ deꞌe malənꞌ deꞌen ben deꞌe Adanṉəꞌ ca goclen deꞌen ben Diozənꞌ len beṉac̱hənꞌ. Por ni c̱he deꞌe malənꞌ deꞌen ben deꞌe Adanṉəꞌ, deꞌe naꞌanəꞌ Diozənꞌ gwc̱hoglaogüeꞌen c̱he chioꞌo beṉac̱h de que siꞌicho castigw zeɉḻicaṉe. Pero naꞌ dadzənꞌ goclen Diozənꞌ chioꞌo ca deꞌen bseḻeꞌe Xiꞌiṉeꞌ Jesocristənꞌ, naꞌ chioꞌo chonḻilažəꞌəchoneꞌ neꞌ de que naccho beṉəꞌ güen laogüeꞌenəꞌ ḻaꞌaṉəꞌəczə babencho deꞌe zan deꞌe mal.
\v 17 Por ni c̱he tozə beꞌenəꞌ ben deꞌe malənꞌ de yeḻəꞌ got c̱he chioꞌo beṉac̱h. Pero naꞌ Diozənꞌ ḻechguaḻe nžiꞌilažeꞌe chioꞌo, naꞌ dadzə neꞌ c̱he chioꞌo chonḻilažəꞌəchoneꞌ de que naccho beṉəꞌ güen laogüeꞌenəꞌ. Deꞌe naꞌanəꞌ de yeḻəꞌ mban c̱hecho zeɉḻicaṉe naꞌ ṉabiꞌacho txen len Jesocristənꞌ.
\p
\v 18 Canꞌ naquən, por ni c̱he deꞌe mal deꞌen ben deꞌe Adanṉəꞌ, Diozənꞌ gwc̱hoglaogüeꞌen de que to to chioꞌo beṉac̱h siꞌicho castigw c̱he xtoḻəꞌəchonꞌ. Naꞌ por ni c̱he deꞌen naquə Jesocristənꞌ beṉəꞌ güen lao Diozənꞌ, Dioz naꞌanəꞌ neꞌ c̱he yoguəꞌ chioꞌo chonḻilažəꞌəcho Jesocristənꞌ de que naccho beṉəꞌ güen laogüeꞌenəꞌ naꞌ choṉeꞌ chioꞌo yeḻəꞌ mban zeɉḻicaṉe.
\v 19 Naꞌ deꞌen cui əbzenag deꞌe Adanṉəꞌ c̱he Diozənꞌ, deꞌe naꞌanəꞌ yoguəꞌ chioꞌo beṉac̱h naccho beṉəꞌ güen deꞌe mal. Pero naꞌ deꞌen əbzenag Jesocristənꞌ c̱he Diozənꞌ, yoguəꞌ chioꞌo chonḻilažəꞌəcho Jesocristənꞌ naccho beṉəꞌ güen lao Diozənꞌ.
\p
\v 20 Diozənꞌ gwdix̱ɉueꞌ ḻei c̱heꞌenəꞌ naꞌ deꞌe naꞌanəꞌ gwchaꞌo gwxench deꞌe malənꞌ c̱hedəꞌ beṉac̱hənꞌ bito bosoꞌozenagueꞌ c̱hei. Pero catəꞌ gwchaꞌo gwxen deꞌe malənꞌ, deꞌe xen gwchaꞌo gwxench yeḻəꞌ žiꞌilažəꞌ c̱he Diozənꞌ par nic̱h beziꞌixeneꞌ c̱he chioꞌo chonḻilažəꞌəchoneꞌ.
\v 21 Gwchaꞌo gwxench yeḻəꞌ žiꞌilažəꞌ c̱heꞌenəꞌ par nic̱h guaquə əṉeꞌ c̱he yoguəꞌ chioꞌo beṉac̱h de que naccho beṉəꞌ güen laogüeꞌenəꞌ šə gonḻilažəꞌəcho X̱ancho Jesocristənꞌ. Naꞌ canꞌ de yeḻəꞌ got c̱he yoguəꞌ chioꞌo beṉac̱h deꞌen naccho beṉəꞌ güen deꞌe malənꞌ ḻeczə nžiꞌilažəꞌ Diozənꞌ yoguəꞌ chioꞌo beṉac̱h naꞌ choṉeꞌ chioꞌo yeḻəꞌ mban zeɉḻicaṉe šə chonḻilažəꞌəchoneꞌ.
\c 6
\s1 Diozənꞌ beneꞌ par nic̱h cuich šoꞌo c̱hazcho deꞌe malənꞌ
\p
\v 1 ¿Nacxanꞌ cheyaḻəꞌ goncho ṉaꞌa baṉezecho de que nžiꞌilažəꞌ Diozənꞌ chioꞌo? ¿Econ šeɉczcho goncho deꞌe malənꞌ par nic̱h yeziꞌixentezə yeziꞌixen Diozənꞌ c̱hechonꞌ?
\v 2 Caguə canꞌ cheyaḻəꞌ goncho. Diozənꞌ babeneꞌ par nic̱h cuich šoꞌo c̱hazcho deꞌe malənꞌ šə gwzenagcho c̱heꞌ. Deꞌe nanꞌ bito cheyaḻəꞌ sochcho əgwzenagcho c̱he laꞌaždaꞌomalchonꞌ.
\v 3 Bagwchoacho nisənꞌ par nic̱h caꞌ nacbiaꞌ de que ngodəꞌəcho txen len Jesocristənꞌ. Naꞌ ca deꞌen gwchoacho nisənꞌ zeɉen ca gotcho len Crist naꞌanəꞌ.
\v 4 Naꞌ deꞌen zeɉen ca gotcho len Cristənꞌ, ḻeczə zeɉen ca bgašəꞌəcho len ḻeꞌ. Goc caꞌ par nic̱h ca deꞌen boḻis bosban X̱acho Diozənꞌ ḻeꞌ len yeḻəꞌ guac xen c̱heꞌenəꞌ, gwšaꞌacho yeḻəꞌ chzo yeḻəꞌ chbez c̱hechonꞌ naꞌ socho ca beṉəꞌ cobə.
\p
\v 5 Ndiḻ ngodəꞌəcho Cristənꞌ txenṉəꞌ catəꞌən gwsoꞌoteꞌeneꞌ, naꞌ ḻeczə ndiḻ ngodəꞌəcho ḻeꞌ txenṉəꞌ catəꞌən beyas bebaneꞌ ladɉo beṉəꞌ guat caꞌ. Deꞌe naꞌanəꞌ cheyaḻəꞌ yocobə xbab c̱hechonꞌ par nic̱h gaquə yic̱hɉlaꞌaždaꞌochonꞌ canꞌ naquə yic̱hɉlaꞌaždaogüeꞌenəꞌ.
\v 6 Ca deꞌen ndiḻ ngodəꞌəcho Cristənꞌ txen catəꞌən gwsoꞌoteꞌeneꞌ ḻeꞌe yag corozənꞌ, zeɉen de que laꞌaždaꞌomalchonꞌ gotən. Gotən par nic̱h bitoch ṉabiaꞌan chioꞌo naꞌ par nic̱h bitoch šoꞌo c̱haz deꞌe malənꞌ yic̱hɉlaꞌaždaꞌochonꞌ.
\v 7 Beṉəꞌ bagot bitoch chnabiaꞌ laꞌaždaꞌomalenꞌ ḻeꞌ.
\v 8 Naꞌ ca naquə gotlencho Cristənꞌ cheɉḻeꞌecho de que zocho mbancho len ḻeꞌ naꞌ de que sochcho əbancho len ḻeꞌ.
\v 9 Ṉezecho de que Dioz nanꞌ bosbaneꞌ Cristənꞌ ladɉo beṉəꞌ guat caꞌ. Naꞌ bitoch soꞌoteꞌeneꞌ deꞌe yoblə. Yeḻəꞌ gotənꞌ bitoch soin ḻeꞌ deꞌe yoblə.
\v 10 Ca deꞌen gwsoꞌoteꞌ Cristənꞌ, tšiꞌizənꞌ bnežɉw cuineꞌ par nic̱h bebeɉeꞌ chioꞌo xniꞌa deꞌe malənꞌ. Bitoch soꞌoteꞌ ḻeꞌ yetḻas. Naꞌ ṉaꞌa zoeꞌ chnežɉueꞌ Diozənꞌ yeḻəꞌ balaꞌaṉ.
\v 11 Ḻegon xbab de que Diozənꞌ babeneꞌ par nic̱h cuich šoꞌo c̱hazcho deꞌe malənꞌ. Pero naꞌ ḻeczə ḻegon xbab de que ndiḻ ngodəꞌəcho txen len Cristənꞌ catəꞌən beyas bebaneꞌ ladɉo beṉəꞌ guat caꞌ. Deꞌe naꞌanəꞌ mbancho par əgwnežɉwcho Diozənꞌ yeḻəꞌ balaꞌaṉ. Gonḻe xbabənꞌ caꞌ c̱hedəꞌ ngodəꞌəcho txen len X̱ancho Cristo Jesoꞌosənꞌ.
\p
\v 12 Bito güeꞌecho latɉə šoꞌo c̱haz deꞌe malənꞌ cuerp c̱hechonꞌ deꞌen gat par goncho ca deꞌe malənꞌ zelažəꞌ laꞌaždaꞌochonꞌ.
\v 13 Bito gon cuincho lao naꞌ gwxiyeꞌenəꞌ par goncho deꞌe mal len cuerp c̱hechonꞌ. Cheyaḻəꞌ gon cuincho lao naꞌ Diozənꞌ par goncho deꞌe güenṉəꞌ. Gon cuincho lao neꞌenəꞌ c̱hedəꞌ bitoch naccho len yic̱hɉlaꞌaždaꞌochonꞌ ca beṉəꞌ guat, sino bade yeḻəꞌ mban zeɉḻicaṉe c̱hechonꞌ.
\v 14 Antslə goquecho goncho canꞌ na ḻeinꞌ, pero deꞌen cui goc goncho canꞌ nanṉəꞌ, bloꞌin chioꞌo de que zocho xniꞌa deꞌe malənꞌ. Pero ṉaꞌa deꞌen nžiꞌilažəꞌ Diozənꞌ chioꞌo babebeɉeꞌ chioꞌo xniꞌa deꞌe malənꞌ, naꞌ deꞌe naꞌanəꞌ chac chon cuincho lao neꞌenəꞌ par goncho deꞌe güenṉəꞌ.
\s1 Cheyaḻəꞌ cueɉyic̱hɉcho cuich goncho deꞌe malənꞌ
\p
\v 15 ¿Egontezcho deꞌe malənꞌ deꞌen ṉezecho nžiꞌilažəꞌ Diozənꞌ chioꞌo naꞌ deꞌen bito chebeineꞌ chioꞌo por ni c̱he šə choncho canꞌ na ḻei c̱heꞌenəꞌ? Bito.
\v 16 Ṉezecho catəꞌ chzenagcho c̱he to beṉəꞌ naꞌ catəꞌ choꞌecho latɉə chnabiꞌe chioꞌo, xniꞌa beꞌenanꞌ zocho. Naꞌ ḻeczə caꞌ šə chdalenczcho deꞌe malənꞌ naꞌ chzenagcho c̱hei, xniꞌei nanꞌ zocho naꞌ bito žɉəyezocho len Diozənꞌ šə caꞌ. Pero šə chon cuincho lao naꞌ Diozənꞌ naꞌ chzenagcho c̱heꞌ nachənꞌ zdaczcho choncho deꞌe güenṉəꞌ.
\v 17 Antslənꞌ gwzocho xniꞌa deꞌe malənꞌ. Pero chox̱cwlen Diozənꞌ lenczə leꞌe bachzenagle ṉaꞌa do yic̱hɉ do lažəꞌəle deꞌen babloꞌitoꞌ leꞌe.
\v 18 Diozənꞌ babebeɉeꞌ chioꞌo xniꞌa deꞌe malənꞌ. Deꞌe naꞌanəꞌ banon cuincho lao naꞌ Diozənꞌ par šeɉcho goncho deꞌe güenṉəꞌ.
\v 19 Choꞌa dižəꞌənəꞌ canꞌ zocho xniꞌa nonꞌ chzenagcho c̱hei par nic̱h šeɉniꞌile. Caꞌatezənꞌ ben cuinḻe lao naꞌ gwxiyeꞌenəꞌ par benḻe deꞌen naquə yeḻəꞌ ztoꞌ naꞌ bichlə deꞌen bito cheyaḻəꞌ goncho, ḻeczə canꞌ cheyaḻəꞌ gon cuincho lao naꞌ Diozənꞌ par goncho deꞌe güenṉəꞌ nic̱h gaquə yic̱hɉlaꞌaždaꞌochonꞌ güen canꞌ naquə yic̱hɉlaꞌaždaoꞌ Diozənꞌ.
\p
\v 20 Catəꞌən ṉeꞌe zocho xniꞌa deꞌe malənꞌ, bito bzenagcho c̱he Diozənꞌ par goncho deꞌe güen.
\v 21 Naꞌ bitobi deꞌe güen bleꞌicho lao deꞌe mal caꞌ deꞌen ɉənaochonəꞌ. Bachetoꞌicho ṉaꞌa c̱he deꞌe caꞌ benchonəꞌ. Žaləꞌ chonchcho deꞌe mal caꞌ zɉənac caꞌ bito žɉəyezocho len Diozənꞌ.
\v 22 Pero Diozənꞌ babebeɉeꞌ chioꞌo xniꞌa deꞌe malənꞌ naꞌ babeneꞌ par nic̱h non cuincho lao neꞌenəꞌ. Deꞌe naꞌanəꞌ zda chaquəch yic̱hɉlaꞌaždaꞌochonəꞌ canꞌ naquə yic̱hɉlaꞌaždaoꞌ ḻeꞌenəꞌ naꞌ žɉəyezocho len Diozənꞌ zeɉḻicaṉe.
\v 23 Šə zocho choncho deꞌe malənꞌ yeyeɉcho lao yiꞌ gabiḻənꞌ. Pero šə ngodəꞌəcho txen len X̱ancho Cristo Jesoꞌosənꞌ, Diozənꞌ choṉeꞌ chioꞌo dadzə yeḻəꞌ mban zeɉḻicaṉenꞌ.
\c 7
\s1 Ḻeinꞌ chnabiꞌan beṉac̱hənꞌ žlac zɉəmbaneꞌ
\p
\v 1 Beṉəꞌ bišəꞌ leꞌe nombiꞌale ḻeinꞌ naꞌ ṉezele de que ḻeinꞌ chnabiꞌan chioꞌo žlac mbancho naꞌazə.
\v 2 To noꞌolə csad, žlac mban beꞌen c̱heꞌenəꞌ cheyaḻəꞌ soeꞌ len ḻeꞌ, laꞌ canꞌ chon ḻeinꞌ mendad. Xte catəꞌəch gat beꞌen c̱heꞌenəꞌ canaꞌachənꞌ babechoɉ latɉeꞌ len ḻei deꞌen chon mendad soeꞌ len beꞌen c̱heꞌenəꞌ.
\v 3 Naꞌ šə noꞌolənꞌ yequeꞌe beṉəꞌ yoblə len mban beꞌen c̱heꞌenəꞌ, beṉəꞌ ggoꞌo xtoinꞌ naqueꞌ. Pero šə bagot beꞌen c̱heꞌenəꞌ babechoɉ latɉeꞌ len ḻeinꞌ. Guaquə yošagnaꞌaleneꞌ beṉəꞌ yoblə, naꞌ bito ṉacho naqueꞌ beṉəꞌ ggoꞌo xtoi laogüe deꞌen yošagneꞌe deꞌe yoblə.
\p
\v 4 Canꞌ naquən beṉəꞌ bišəꞌ, ngodəꞌəcho txen len Cristənꞌ, naꞌ deꞌe bnežɉw cuineꞌ gwsoꞌoteꞌeneꞌ, deꞌe naꞌanəꞌ baṉezecho bito chaccho beṉəꞌ güen lao Diozənꞌ por ni c̱he choncho bi deꞌen na ḻei deꞌen bzoɉ deꞌe Moisezənꞌ. Cristənꞌ beyas bebaneꞌ ladɉo beṉəꞌ guat caꞌ naꞌ chioꞌo baben cuincho lao neꞌenəꞌ par nic̱h goncho canꞌ cheneꞌe Diozənꞌ.
\v 5 Antslə ṉezocho chzenagcho c̱he laꞌaždaꞌomalchonꞌ. Naꞌ catəꞌən gwṉezecho ca deꞌen non ḻei deꞌen bzoɉ deꞌe Moisezənꞌ mendad goncho, nachlə beꞌelažəꞌəchcho bzenagcho c̱he deꞌe malənꞌ deꞌen yoꞌo yic̱hɉlaꞌaždaꞌochonəꞌ naꞌ bencho con canꞌ goneꞌecho. Žaləꞌ ṉeꞌe choncho caꞌ bito žɉəyezocho len Diozənꞌ.
\v 6 Pero ṉaꞌa babocobə Spirit c̱he Diozənꞌ yic̱hɉlaꞌaždaꞌochonꞌ naꞌ ṉezecho bito chaccho beṉəꞌ güen lao Diozənꞌ por ni c̱he choncho bi deꞌen na ḻeinꞌ. Antslə bencho bi deꞌe güen parzə nic̱h goncho complir canꞌ byoɉ ḻeinꞌ gwlalte nan naquən cheyaḻəꞌ goncho. Pero ṉaꞌa choncho canꞌ cheneꞌe Diozənꞌ c̱hedəꞌ babocobə Spirit c̱heꞌenəꞌ yic̱hɉlaꞌaždaꞌochonꞌ.
\s1 Yoꞌo deꞌe malənꞌ yic̱hɉlaꞌaždaꞌochonꞌ
\p
\v 7 Bito cheyaḻəꞌ goncho xbab de que ḻei deꞌen bzoɉ deꞌe Moisezənꞌ naquən deꞌe mal. Bito gocbeꞌidaꞌ ndaꞌ chonaꞌ deꞌe malənꞌ žaləꞌ cui bzeɉniꞌi ḻeinꞌ nadaꞌ bi deꞌen cui cheyaḻəꞌ gonaꞌ. Naꞌ bito əgwṉezdaꞌ de que deꞌe malənꞌ chonaꞌ chzelažaꞌa bitəꞌətezə deꞌe de c̱he beṉəꞌ žaləꞌ que ḻeinꞌ nan: “Bito selažəꞌəle bitəꞌətezə deꞌe de c̱he beṉəꞌ.”
\v 8 Nach catəꞌ gwṉezdaꞌ canꞌ na ḻein, deꞌe mal deꞌen yoꞌo yic̱hɉlaꞌaždaoguaꞌanəꞌ nachle benən ca gwzelažəꞌəchaꞌ. Naꞌ bito gocbeꞌidaꞌ de xtoḻaꞌa žaləꞌ cui bembiꞌa ḻeinꞌ.
\v 9 Gwzoaꞌ to tyemp sin cui bembiꞌa ḻei deꞌen bzoɉ deꞌe Moisezənꞌ. Pero catəꞌ gwṉezdaꞌ binꞌ nonən mendad gonaꞌ, nachle bzenaguəchaꞌ c̱he deꞌe malənꞌ deꞌen yoꞌo yic̱hɉlaꞌaždaꞌoguaꞌanəꞌ. Deꞌe naꞌanəꞌ gwṉezdaꞌ siꞌa castigw zeɉḻicaṉe c̱he xtoḻaꞌa.
\v 10 Naꞌ ca naquə ḻei deꞌen bzoɉ deꞌe Moisezənꞌ, naquən par gwzenagaꞌ c̱hei nic̱h caꞌ gatəꞌ yeḻəꞌ mban zeɉḻicaṉe c̱hiaꞌ. Pero deꞌen cui bzenagaꞌ c̱hei deꞌe naꞌanəꞌ gwṉezdaꞌ siꞌa castigw zeɉḻicaṉe.
\v 11 Ca deꞌen nombiꞌa ḻeinꞌ, deꞌe malənꞌ deꞌen yoꞌo yic̱hɉlaꞌaždaoguaꞌanəꞌ bx̱oayaguən nadaꞌ, benən ca bito bzenagaꞌ c̱he deꞌen nonən mendad gonaꞌ. Naꞌ deꞌe naꞌanəꞌ gwṉezdaꞌ siꞌa castigw zeɉḻicaṉe c̱he xtoḻaꞌanəꞌ.
\p
\v 12 Ca naquə ḻei deꞌen bzoɉ deꞌe Moisezənꞌ, zaꞌan c̱he Diozənꞌ. To to deꞌen nonən mendad goncho zaꞌan c̱he Diozənꞌ naꞌ zɉənaquən deꞌe ḻicha naꞌ deꞌe güen.
\v 13 ¿Eḻei deꞌen naquə deꞌe güenṉəꞌ benən par nic̱h siꞌa castigw zeɉḻicaṉe c̱he xtoḻaꞌanəꞌ? Bito naquə ḻen. Deꞌe malənꞌ deꞌen yoꞌo yic̱hɉlaꞌaždaoguaꞌanəꞌ bito beꞌen latɉə gonaꞌ canꞌ cheyaḻəꞌ gonaꞌ. Naꞌ deꞌen cui chonaꞌ canꞌ na ḻeinꞌ, deꞌe nanꞌ gwṉezdaꞌ siꞌa castigw zeɉḻicaṉe c̱he xtoḻaꞌanəꞌ. Ca chac nanꞌ nḻaꞌalaon nacaꞌ beṉəꞌ mal deꞌen cui chonaꞌ canꞌ na ḻeinꞌ, naꞌ nḻaꞌalao de que deꞌe mal juisyənꞌ chonaꞌ cui chonaꞌ canꞌ noneꞌ mendad gonaꞌ.
\p
\v 14 Naquən clar de que ḻeinꞌ guaquəlenən nadaꞌ len xbab deꞌen yoꞌo ḻoꞌo yic̱hɉlaꞌaždaoguaꞌanəꞌ žaləꞌ chzenagaꞌ c̱hei. Pero nadaꞌ nacaꞌ beṉəꞌ laꞌaždaoꞌ mal, zoaꞌ yoꞌo yazaꞌ deꞌe malənꞌ.
\v 15 Bito chonaꞌ deꞌe güen deꞌen cheꞌendaꞌ gonaꞌ. Deꞌe mal deꞌen cui cheꞌendaꞌ gonaꞌ ḻelənṉəꞌ chonaꞌ. Bito cheyacbeꞌidaꞌ c̱hiaꞌ bixc̱henꞌ chonaꞌ caꞌ.
\v 16 Cheꞌendaꞌ gonaꞌ canꞌ na ḻei deꞌen bzoɉ deꞌe Moisezənꞌ, pero bito chonaꞌan yoguəꞌ las. Naꞌ catəꞌ cui chonaꞌ canꞌ nanṉəꞌ ḻechguaḻe deꞌe chacdaꞌ, c̱hedəꞌ ṉezdaꞌ ḻeinꞌ naquən deꞌe güen.
\v 17 Caguə nadaꞌanəꞌ chonaꞌ deꞌen cui cheꞌendaꞌ gonaꞌ. Deꞌe mal deꞌen yoꞌo yic̱hɉlaꞌaždaoguaꞌa nanꞌ chonən par nic̱h chonaꞌ deꞌen cui cheꞌendaꞌ gonaꞌ.
\v 18-19 Ṉezdaꞌ bito nacaꞌ beṉəꞌ güen, c̱hedəꞌ yoꞌo deꞌe malənꞌ ḻoꞌo yic̱hɉlaꞌaždaoguaꞌanəꞌ. Cheꞌendaꞌ gonaꞌ deꞌe güenṉəꞌ, pero bito chonaꞌan. Deꞌe mal deꞌen cui cheꞌendaꞌ gonaꞌ ḻelənṉəꞌ chonaꞌ.
\v 20 Naꞌ ca deꞌen chonaꞌ deꞌen cui cheꞌendaꞌ gonaꞌ, caguə chonaꞌan nadaꞌanəꞌ. Deꞌe mal deꞌen yoꞌo yic̱hɉlaꞌaždaoguaꞌa nanꞌ nžiguəꞌən nadaꞌ chonaꞌ deꞌe mal deꞌen cui cheꞌendaꞌ gonaꞌ.
\p
\v 21 Naꞌ syempr catəꞌən cheꞌendaꞌ gonaꞌ deꞌe güenṉəꞌ, deꞌe mal deꞌen yoꞌo yic̱hɉlaꞌaždaoguaꞌanəꞌ chžonən gonaꞌan.
\v 22 Chebeidaꞌ ḻei c̱he Diozənꞌ ḻoꞌo yic̱hɉlaꞌaždaoguaꞌanəꞌ.
\v 23 Pero naꞌ chacbeꞌidaꞌ de deꞌen yoꞌo yic̱hɉlaꞌaždaoguaꞌanəꞌ deꞌen cui choꞌen latɉə gonaꞌ canꞌ ṉezdaꞌ cheyaḻəꞌ gonaꞌ. Deꞌe mal deꞌen yoꞌo yaz cuerp c̱hiaꞌanəꞌ chnabiꞌan nadaꞌ.
\p
\v 24-25 Ḻoꞌo yic̱hɉlaꞌaždaꞌochonꞌ cheneꞌecho goncho deꞌen non ḻei c̱he Diozənꞌ mendad goncho, pero naꞌ laꞌaždaꞌomalchonꞌ chonczən ca choncho deꞌe malənꞌ. ¡Prob chioꞌo! ¿No soi laꞌaždaꞌomalchonꞌ deꞌenəꞌ chnabiaꞌ chioꞌo? Ṉezecho siꞌicho castigw zeɉḻicaṉe šə soczcho gwzenagcho c̱hei. Chox̱cwlen Diozənꞌ, choneꞌ par nic̱h X̱ancho Jesocristənꞌ soineꞌ laꞌaždaꞌomalchonꞌ.
\c 8
\s1 Cheyaḻəꞌ goncho canꞌ cheneꞌe Spirit c̱he Diozənꞌ
\p
\v 1 Deꞌe naꞌanəꞌ Diozənꞌ neꞌ c̱he chioꞌo šə ngodəꞌəcho txen len Cristo Jesoꞌosənꞌ de que bito bi xtoḻəꞌəcho de. Chioꞌo ngodəꞌəcho txen len Cristo Jesoꞌosənꞌ bachoncho canꞌ cheneꞌe Spirit c̱he Diozənꞌ. Bito choncho canꞌ na laꞌaždaꞌomalchonꞌ.
\v 2 Ṉezdaꞌ Spirit c̱he Diozənꞌ chnabiꞌan nadaꞌ naꞌ choṉən yeḻəꞌ mban zeɉḻicaṉe c̱hiaꞌ laogüe deꞌen ngodaꞌa txen len Cristo Jesoꞌosənꞌ. Catəꞌ gwzoaꞌ xniꞌa deꞌe malənꞌ ḻenṉəꞌ benən par nic̱h gwc̱hoglao Diozənꞌ c̱hiaꞌ siꞌa castigw zeɉḻicaṉe. Pero Spirit c̱he Diozənꞌ babebeɉən nadaꞌ xniꞌa deꞌe malənꞌ.
\v 3-4 Ḻei deꞌen bzoɉ deꞌe Moisezənꞌ bito gwzoin par yebeɉən chioꞌo xniꞌa deꞌe malənꞌ c̱hedəꞌ naccho beṉəꞌ laꞌaždaoꞌ mal. Diozənꞌ gwzoineꞌ bebeɉeꞌ chioꞌo xniꞌa deꞌe malənꞌ deꞌen bseḻeꞌe Xiꞌiṉeꞌen golɉeꞌ yežlyo nga, gocczə cuerp c̱heꞌenəꞌ ca cuerp c̱he chioꞌo beṉəꞌ güen deꞌe mal. Naꞌ Xiꞌiṉ Dioz naꞌanəꞌ gwdixɉueꞌ xtoḻəꞌəchonꞌ par nic̱h chioꞌo beṉac̱h guaquə yechoɉcho xniꞌa deꞌe malənꞌ naꞌ guaquə šeɉcho ḻicha goncho canꞌ non ḻeinꞌ mendad, con šə goncho canꞌ cheneꞌe Spirit c̱he Diozənꞌ naꞌ bito goncho canꞌ na laꞌaždaꞌomalchonꞌ.
\p
\v 5 Šə zoczcho choncho canꞌ na laꞌaždaꞌomalchonəꞌ, yoꞌo yic̱hɉcho deꞌen cheneꞌen goncho. Pero šə zocho choncho canꞌ na Spirit c̱he Diozənꞌ yoꞌo yic̱hɉcho canꞌ nan naꞌanəꞌ.
\v 6 Naꞌ šə con yoꞌo yic̱hɉcho deꞌen cheneꞌe laꞌaždaꞌomalchonəꞌ, siꞌicho castigw zeɉḻicaṉe. Pero šə con yoꞌo yic̱hɉcho deꞌenəꞌ cheneꞌe Spirit c̱he Diozənꞌ, guatəꞌ yeḻəꞌ mban zeɉḻicaṉe c̱hecho naꞌ so cuezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonəꞌ.
\v 7 Contr Dioz nanꞌ choncho šə con yoꞌo yic̱hɉcho deꞌen cheneꞌe laꞌaždaꞌomalchonꞌ goncho. Naꞌ šə con yoꞌo yic̱hɉcho ḻen, bito chzenagcho c̱he ḻei c̱he Diozənꞌ, naꞌ nique gaquəczə gwzenagcho c̱he Diozənꞌ šə caꞌ.
\v 8 Šə zocho choncho canꞌ na laꞌaždaꞌomalchonꞌ bito gaquə naquəchlə goncho par nic̱h yebei Diozənꞌ chioꞌo.
\p
\v 9 Pero chioꞌo ža, šə zo Spirit c̱he Diozənꞌ ḻoꞌo laꞌaždaꞌochonəꞌ, bitoch zocho choncho canꞌ na laꞌaždaꞌomalchonꞌ, sino zocho chzenagcho c̱he Spiritənꞌ. Naꞌ šə cui zo Spirit c̱he Cristənꞌ ḻoꞌo laꞌaždaꞌochonəꞌ, deꞌen ḻeczə naquən Spirit c̱he Diozənꞌ, bito naccho xiꞌiṉ Dioz.
\v 10 Cristənꞌ zoeꞌ len chioꞌo chonḻilažəꞌəchoneꞌ, naꞌ Diozənꞌ neꞌ de que naccho beṉəꞌ güen laogüeꞌenəꞌ. Naꞌ deꞌe naꞌanəꞌ de yeḻəꞌ mban zeɉḻicaṉe c̱hecho ḻaꞌanəꞌəczə gatcho len cuerp c̱hechonꞌ por ni c̱he deꞌe malənꞌ.
\v 11 Diozənꞌ boḻis bosbaneꞌ Cristo Jesoꞌosənꞌ ladɉo beṉəꞌ guatənꞌ. Naꞌ šə Spirit c̱he Diozənꞌ zon ḻoꞌo laꞌaždaꞌochonꞌ, ḻeczə gwžin ža catəꞌ Diozənꞌ yoḻis yosbaneꞌ chioꞌo len cuerp c̱hecho quinga deꞌenəꞌ saꞌat. Yoḻis yosbaneꞌ chioꞌo c̱hedəꞌ yoꞌo Spirit c̱heꞌenəꞌ ḻoꞌo laꞌaždaꞌochonꞌ.
\p
\v 12 Canꞌ ža beṉəꞌ bišəꞌ, bito cheyaḻəꞌ goncho canꞌ na laꞌaždaꞌomalchonꞌ.
\v 13 Siꞌicho castigw zeɉḻicaṉe šə zoczcho choncho deꞌen cheneꞌe laꞌaždaꞌomalchonəꞌ. Pero šə güeꞌecho latɉə gaquəlen Spirit c̱he Diozənꞌ chioꞌo par nic̱h cuich gwzenagcho c̱he laꞌaždaꞌomalchonꞌ, nachənꞌ gatəꞌ yeḻəꞌ mban zeɉḻicaṉe c̱hecho.
\p
\v 14 Naꞌ yoguəꞌ chioꞌo šə chzenagcho c̱he deꞌen chsed chzeɉniꞌi Spirit c̱he Diozənꞌ chioꞌo goncho, naccho xiꞌiṉ Dioz.
\v 15 Diozənꞌ beṉeꞌ chioꞌo Spirit c̱heꞌenəꞌ catəꞌən gwcueꞌe chioꞌo ca xiꞌiṉeꞌ. Naꞌ deꞌe naꞌanəꞌ bito chžebcho Diozənꞌ canꞌ chžebcho to beṉəꞌ znia catəꞌ choncho xšineꞌenəꞌ. Lguaꞌa žebchoneꞌ choḻgüižchoneꞌ cheꞌechoneꞌ: “X̱a.”
\v 16 Spirit c̱he Diozənꞌ nan ḻoꞌo yic̱hɉlaꞌaždaꞌochonꞌ de que chioꞌo naccho xiꞌiṉ Dioz.
\v 17 Naꞌ šə naccho xiꞌiṉ Dioz, gwžin ža catəꞌ yoguəꞌ deꞌen de c̱he Cristənꞌ gaquən c̱hecho txen lencho ḻeꞌ. Gaquən c̱hecho con šə gwsanḻažəꞌ cuincho yosoꞌoc̱hiꞌ yosoꞌosaquəꞌ beṉəꞌ chioꞌo por ni c̱he deꞌen chonḻilažəꞌəcho Cristənꞌ, canꞌ bosoꞌoc̱hiꞌ bosoꞌosaqueꞌe ḻeꞌenəꞌ. Naꞌ šə yosoꞌoc̱hiꞌ yosoꞌosaqueꞌe chioꞌo, Diozənꞌ goṉeꞌ chioꞌo yeḻəꞌ balaꞌaṉ xen ca deꞌen babnežɉueꞌ c̱he Cristənꞌ.
\p
\v 18 Yežlyo nga de deꞌen chzaquəꞌəziꞌ chzaquəꞌəyašəꞌəcho. Pero nadaꞌ chonaꞌ xbab caguə deꞌe bi deꞌenəꞌ ca deꞌen yebeicho catəꞌən əžin ža goṉ Diozənꞌ chioꞌo yeḻəꞌ balaꞌaṉ xen ca deꞌen napə Cristənꞌ.
\v 19 Diozənꞌ beneꞌ beṉac̱h, beneꞌ bia chsaꞌaš naꞌ beneꞌ cuantzə bi deꞌen zɉəde. Naꞌ yoguəꞌəcho len ḻegaꞌaquən bazocho lao juisy batəꞌəquənꞌ goṉ Diozənꞌ yeḻəꞌ balaꞌaṉ deꞌen siꞌ chioꞌo naccho xiꞌiṉeꞌ, naꞌ ḻeczə len yoguəꞌ bia caꞌ chsaꞌaš chəsəꞌəbezəb batəꞌəquənꞌ əžin ža goneꞌ caꞌ.
\v 20 Naꞌ yoguəꞌ deꞌe caꞌ ben Diozənꞌ caguə zɉənac šaꞌonəꞌ. Naꞌ caguə con ca gwseꞌeneꞌenṉəꞌ zɉənaquən. Zeꞌe gonšaꞌocheꞌ ḻegaꞌaquənṉəꞌ, naꞌ zeꞌe gonšaꞌocheꞌ yoguəꞌ bia chsaꞌaš naꞌ ḻeczə caꞌ chioꞌo beṉac̱h. Naꞌ ḻeczə Dioz nanꞌ beneꞌ par nic̱h chəsəꞌəbezən naꞌ par nic̱h chəsəꞌəbezə beṉac̱hənꞌ naꞌ par nic̱h ḻeczə chəsəꞌəbezə bia caꞌ chsaꞌaš.
\v 21 Chəsəꞌəbezən batəꞌəquənꞌ əžin ža yesyəꞌəyaquən binḻo juisy naꞌ bito te c̱hegaꞌaquən. Naꞌ ḻeczə canꞌ chəsəꞌəbezə bia caꞌ əsaꞌac c̱hegaꞌaquəb. Naꞌ caꞌaczənꞌ gac c̱he chioꞌo naccho xiꞌiṉ Dioz, catəꞌən siꞌicho yeḻəꞌ balaꞌaṉ xen deꞌen goṉ Diozənꞌ chioꞌo, yeyac cuerp c̱hechonꞌ deꞌe cobə naꞌ cuatəch soi yeḻəꞌ gotənꞌ chioꞌo.
\v 22 Naꞌ ṉezecho, xte ža ṉeža yoguəꞌ deꞌe caꞌ ben Diozənꞌ chsoꞌonən ca beṉəꞌ chbežgüeꞌ, chesəꞌəžaglaon ca to noꞌolə beṉəꞌ chzan. Naꞌ ḻeczə yoguəꞌ bia caꞌ chsaꞌaš chəsəꞌəbežgüeꞌeb chəsəꞌəžaglaob ca to noꞌolə beṉəꞌ chzan.
\v 23 Naꞌ caguə deꞌe caꞌazənꞌ. Ḻeczə len chioꞌo chbežgüeꞌecho. Diozənꞌ babeṉeꞌ chioꞌo Spirit c̱heꞌenəꞌ par nic̱h ṉezecho gwžin ža gaquəch güen c̱hecho. Naꞌ chbežgüeꞌecho ḻoꞌo laꞌaždaꞌochonꞌ chbezcho batəꞌəquənꞌ goṉ Diozənꞌ cuerp cobə c̱hechonꞌ par əgwloꞌe de que banqueꞌe chioꞌo ca xiꞌiṉeꞌ.
\v 24 Catəꞌən bebeɉ Diozənꞌ chioꞌo xniꞌa deꞌe malənꞌ, ca nanꞌ gwzolao chbezcho gwžin ža gaquəch güen c̱hecho. To deꞌe bagoc bitoch socho lez cuezcho gaquən. Notono zo no ṉezoeꞌ lez gaquə deꞌen ṉezeneꞌ bagoc.
\v 25 Pero ca naquə deꞌen zocho lez gwžin ža gaquəch güen c̱hecho, zocho chgoꞌo chc̱heɉlažəꞌəcho batəꞌəquənꞌ gaquən.
\p
\v 26 Ca naquə Spirit c̱he Diozənꞌ zon chaclenən chioꞌo c̱hedəꞌ bitotec bi chac goncho sin cui zon len chioꞌo. Bito chac goncho orasyon canꞌ cheyaḻəꞌ gonchon, poro naꞌ Spirit c̱he Diozənꞌ chṉen fabor chioꞌo laogüeꞌenəꞌ ḻaꞌaṉəꞌəczə cui cheželecho naclə güeꞌelenchoneꞌ dižəꞌ c̱he deꞌen chnalažəꞌəcho.
\v 27 Naꞌ Diozənꞌ ngüia nyeꞌ laꞌaždaꞌochonꞌ naꞌ ḻeczə caꞌ cheɉniꞌineꞌ binꞌ cheneꞌe Spirit c̱heꞌenəꞌ catəꞌən chṉen fabor chioꞌo bagwleɉeꞌ par naccho lažəꞌ neꞌenəꞌ. Naꞌ canꞌ cheneꞌe Diozənꞌ ṉen fabor chioꞌo.
\s1 Diozənꞌ deꞌe chioꞌo, deꞌe naꞌanəꞌ notono no soi chioꞌo
\p
\v 28 Naꞌ ṉezecho de que lao yoguəꞌ deꞌen chaquənꞌ, Diozənꞌ choneꞌ par nic̱h gaquə güen c̱he chioꞌo chaquecho c̱heꞌ. Chioꞌon bac̱h gwleɉeꞌ par chonḻilažəꞌəchoneꞌ segon canꞌ gwc̱hoglaogüeꞌen.
\v 29 Nombiaꞌ Diozənꞌ chioꞌo dezd gwlalte, naꞌ əbsiꞌe xṉeze par nic̱h tozə gaquə yic̱hɉlaꞌaždaꞌochonꞌ len yic̱hɉlaꞌaždaoꞌ Xiꞌiṉeꞌ Jesocristənꞌ. Beneꞌ par nic̱h Jesocristənꞌ naqueꞌ beṉəꞌ nech entr chioꞌo beṉəꞌ bišeꞌe zan.
\v 30 Naꞌ ca naquə əbsiꞌ Diozənꞌ xṉeze par nic̱h gaquə yic̱hɉlaꞌaždaꞌochonꞌ tozə len yic̱hɉlaꞌaždaoꞌ Xiꞌiṉeꞌ Jesocristənꞌ, ḻeczə gwleɉeꞌ chioꞌo par chonḻilažəꞌəchoneꞌ naꞌ bagwc̱hoglaogüeꞌen c̱hecho de que naccho beṉəꞌ güen laogüeꞌenəꞌ. Naꞌ ḻeczə canꞌ goṉczeꞌ chioꞌo yeḻəꞌ balaꞌaṉnəꞌ.
\p
\v 31 Catec güenṉəꞌ chon Diozənꞌ len chioꞌo deꞌen bsiꞌe xṉeze gac c̱hecho yoguəꞌ deꞌe caꞌ. Naꞌ ṉezecho Diozənꞌ deꞌe chioꞌo, naꞌ deꞌe naꞌanəꞌ notono no soi chioꞌo.
\v 32 Diozənꞌ bito bžoneꞌ saquəꞌəziꞌ Xiꞌiṉeꞌenəꞌ por ni c̱he yoguəꞌəḻoḻ chioꞌo ca deꞌen bseḻeꞌeneꞌ gwsoꞌot beṉəꞌ ḻeꞌ. Naꞌ canꞌ bseḻeꞌe Xiꞌiṉeꞌ Jesocristənꞌ par chioꞌo, caꞌaczənꞌ goṉeꞌ yoguəꞌ deꞌe güenṉəꞌ dadzə len chioꞌo.
\v 33 Diozənꞌ bagwleɉeꞌ chioꞌo par naccho xiꞌiṉeꞌ naꞌ bagwc̱hoglaogüeꞌen c̱hecho de que bito bi xtoḻəꞌəcho de. Deꞌe naꞌanəꞌ notono no soi əgwcuiš chioꞌo laogüeꞌenəꞌ.
\v 34 Notono zo no gaquə gon par nic̱h əṉa Diozənꞌ c̱hecho de que de xtoḻəꞌəchonꞌ. Por ni c̱hechonꞌ bsanḻažəꞌ cuin Cristənꞌ gwsoꞌot beṉəꞌ ḻeꞌ naꞌ Diozənꞌ boḻis bosbaneꞌeneꞌ ladɉo beṉəꞌ guat caꞌ. Naꞌ ṉaꞌa chiꞌe cuit Diozənꞌ chnabiꞌe txen len ḻeꞌ, naꞌ chṉeꞌ fabor chioꞌo.
\v 35 ¿Ede deꞌe əgwžon par nic̱h Cristənꞌ cuich gaqueneꞌ c̱hecho? ¿Egwžon no deꞌe mal deꞌen gaquə c̱hecho? ¿Egwžon no deꞌe yašəꞌ deꞌe ziꞌ deꞌe gaquə c̱hecho? ¿Egwžon no yeḻəꞌ xiꞌa c̱he beṉəꞌ chgueꞌi chioꞌo? ¿Egwžon no yeḻəꞌ chbiḻ chdon c̱hecho? ¿Egwžon laogüe deꞌen cui de xalaꞌancho? ¿Egwžon šə bi lxož deꞌe zaꞌ len chioꞌo? ¿Egwžon par nic̱h Cristənꞌ cuich gaqueneꞌ c̱hecho šə to beṉəꞌəclə nox̱eꞌe cwšiyənꞌ goteꞌ chioꞌo? Bitobi bi de deꞌe əgwžon par nic̱h Cristənꞌ cuich gaqueneꞌ c̱hecho.
\v 36 Canꞌ nyoɉczə Xtižəꞌ Diozənꞌ nan:
\q1 Por ni c̱he chonḻilažəꞌətoꞌ leꞌ, chseꞌene beṉəꞌ soꞌoteꞌ netoꞌ do tyempte.
\q1 Chsoꞌoneꞌ xbab de que netoꞌ naquətoꞌ ca to xiləꞌ bia soꞌoteꞌ.
\m
\v 37 Pero catəꞌən zaꞌac bi deꞌe mal gac c̱hecho, bito chac c̱hop lažəꞌəcho, sino chebeichgüeicho laꞌ ṉezecho zoczə Cristənꞌ chaqueneꞌ c̱hechonꞌ.
\v 38 Nadaꞌ ṉezdaꞌ de que notono gaquə gwžon par nic̱h Diozənꞌ len Cristənꞌ cuich əsaꞌaqueneꞌ c̱hecho. Yeḻəꞌ gotənꞌ bito gaquə bi gonən, ni yeḻəꞌ mbanṉəꞌ, ni no angl bzelao, ni nochlə beṉəꞌ blao c̱he angl bzelao, ni angl bzelao beṉəꞌ gwnabiaꞌ, ni deꞌe chac c̱hecho ṉaꞌa naꞌ šə bichlə deꞌe zeꞌe zaꞌac.
\v 39 Ni deꞌe de ḻeꞌe yobanꞌ, ni deꞌe de gabiḻənꞌ, ni bichlə deꞌen ben Diozənꞌ bito gaquə yesəꞌəžonən par nic̱h Diozənꞌ cuich gaqueneꞌ c̱hecho. Nic yesəꞌəžon no beṉəꞌ, nic yesəꞌəžon bitəꞌətezə deꞌe gac c̱hecho par nic̱h Diozənꞌ cuich gaqueneꞌ c̱hecho, laꞌ Diozənꞌ bseḻeꞌe X̱ancho Cristo Jesoꞌosənꞌ bloꞌineꞌ chioꞌo canꞌ chaqueneꞌ c̱hecho.
\c 9
\s1 Diozənꞌ gwcueꞌe beṉəꞌ Izrael ca xiꞌiṉeꞌ
\p
\v 1-2 Deꞌen ngodaꞌa txen len Cristənꞌ choꞌa dižəꞌ ḻi niaꞌ de que zochgua trist, naꞌ chacchgüeidaꞌ ḻoꞌo laꞌaždaꞌoguaꞌanəꞌ ca naquə zan beṉəꞌ gwlaž c̱hiaꞌ caꞌ bito chsoꞌonḻilažeꞌe Cristənꞌ. Spirit c̱he Diozənꞌ chonən par nic̱h ṉezdaꞌ ḻoꞌo yic̱hɉlaꞌaždaꞌoguaꞌanəꞌ de que choꞌa dižəꞌ ḻi catəꞌ niaꞌ
\v 3 xte zelažaꞌa cuiayiꞌa žaləꞌ naꞌanəꞌ yecuiꞌižəꞌ Diozənꞌ nadaꞌ cuit Cristənꞌ par nic̱h beṉəꞌ gwlaž c̱hiaꞌ caꞌ soꞌonḻilažeꞌeneꞌ. Cheꞌendaꞌ soꞌonḻilažeꞌeneꞌ c̱hedəꞌ ḻegaꞌaqueꞌ gwsaꞌalɉeꞌ zɉənaqueꞌ beṉəꞌ Izrael ca nadaꞌ.
\v 4 Diozənꞌ gwcueꞌe chioꞌo beṉəꞌ Izrael ca xiꞌiṉeꞌ. Naꞌ gwzoeꞌ len deꞌe x̱axtaꞌocho caꞌ to ḻoꞌo beɉw deꞌen chey cheꞌeniꞌ. Naꞌ beneꞌ lyebe gaquəleneꞌ ḻegaꞌaqueꞌ. Naꞌ ḻeczə bnežɉueꞌ ḻegaꞌaqueꞌ ḻei deꞌen bzoɉ deꞌe Moisezənꞌ. Naꞌ Dioz nanꞌ əbloꞌineꞌ ḻegaꞌaqueꞌ naquənꞌ seꞌeɉṉiꞌalažeꞌeneꞌ. Naꞌ ḻeczə bencheꞌ lyebe deꞌe beneꞌ len ḻegaꞌaqueꞌ.
\v 5 Beṉəꞌ golə blao beṉəꞌ zaꞌ cheꞌelte zɉənaqueꞌ x̱axtaoꞌ chioꞌo beṉəꞌ Izrael. Cristənꞌ benꞌ bseḻəꞌ Diozənꞌ par gaquəleneꞌ beṉac̱hənꞌ golɉeꞌ lao dia c̱he beṉəꞌ Izrael. Ḻeꞌ naqueꞌ Dioz naꞌ chnabiꞌe yoguəꞌəte, chnabiꞌe beṉac̱h naꞌ bia caꞌ chsaꞌaš, naꞌ yoguəꞌəḻoḻ cuantzə deꞌe zɉəde. Cheyaḻəꞌ socho güeꞌelaꞌochoneꞌ zeɉḻicaṉe. Canꞌ gonšgaczcho.
\p
\v 6 Clelənꞌ choncho xbabənꞌ šə chaquecho de que Diozənꞌ bito beneꞌ complir ca lyebe deꞌen beneꞌ. Deꞌe ḻi caguə yoguəꞌ beṉəꞌ caꞌ əgwsaꞌalɉə lao dia c̱he Izraelənꞌ zɉənaqueꞌ beṉəꞌ Izrael lao Diozənꞌ.
\v 7 Naꞌ caguə beṉəꞌ caꞌ əgwsaꞌalɉə lao dia c̱he deꞌe Abraanṉəꞌ chon Diozənꞌ cuent zɉənaqueꞌ xiꞌiṉ dia c̱he deꞌe Abraanṉəꞌ. Quinga gož Diozənꞌ Abraanṉəꞌ: “Xiꞌiṉ dia c̱he Isaac gonaꞌ cuent lao dia c̱hioꞌonəꞌ.”
\v 8 Deꞌe nga chloꞌin chioꞌo de que caguə ni c̱he deꞌe golɉcho lao dia c̱he beṉəꞌ Izraelənꞌ naccho xiꞌiṉ Dioz. Naccho xiꞌiṉ Dioz c̱hedəꞌ cheɉḻeꞌecho c̱he lyebe deꞌen beneꞌ len deꞌe Abraanṉəꞌ, gwneꞌ de que əqueꞌe ca xiꞌiṉeꞌ con beṉəꞌ soꞌonḻilažəꞌ ḻeꞌ.
\v 9 Catəꞌən ben Diozənꞌ lyebe len deꞌe Abraanṉəꞌ gwneꞌ: “Ḻeczə ca tyemp nga ṉaꞌa yidaꞌ yetgüiz, naꞌ canaꞌ bazo to biꞌi c̱he Sar ni.”
\p
\v 10 Naꞌ ḻeczə beꞌ Diozənꞌ dižəꞌ len deꞌe Rebequənꞌ catəꞌən gwzoeꞌ biꞌe biꞌi cuaš caꞌ, xiꞌiṉ deꞌe x̱axtaꞌocho Isaaquənꞌ.
\v 11 Zeꞌe saꞌalɉlə biꞌi cuaš caꞌanəꞌ, naꞌ ni deꞌe güen ni deꞌe mal cuiṉəꞌ soꞌomboꞌ. Naꞌ lao cuiṉəꞌ gatəꞌəbiaꞌ naquənꞌ soꞌomboꞌ, gwleɉ Diozənꞌ toboꞌ par gaquə güen c̱heboꞌ. Con bagwc̱hoglaogüeꞌ canꞌ gaquə c̱hegaꞌacboꞌ naꞌ beneꞌ canꞌ bansiꞌe xṉezenꞌ.
\v 12 Deꞌe naꞌanəꞌ gožeꞌ deꞌe Rebequənꞌ: “Biꞌin galɉə nech soboꞌ xniꞌa biꞌin yedenao ḻeboꞌ.”
\v 13 Naꞌ nyoɉczə deꞌen gwna Diozənꞌ c̱he biꞌi cuaš caꞌ: “Chacdaꞌ c̱he Jacobənꞌ naꞌ chgueꞌidaꞌ Esaꞌonꞌ.”
\p
\v 14 Bito cheyaḻəꞌ goncho xbab de que Diozənꞌ bito zdeꞌ ḻicha deꞌen gwneꞌ caꞌ. Zdaczeꞌ ḻichanꞌ.
\v 15 Zeꞌ Diozənꞌ deꞌe Moisezənꞌ: “Yeyašəꞌəlažaꞌa len beṉəꞌ cheꞌendaꞌ yeyašəꞌəlažaꞌa, naꞌ əžiꞌilažaꞌa len beṉəꞌ cheꞌendaꞌ əžiꞌilažaꞌa.”
\v 16 Quinga naquən: Diozənꞌ nžiꞌilažeꞌe chioꞌo caguə por ni c̱he cheꞌenecho əžiꞌilažeꞌe chioꞌonəꞌ. Naꞌ caguə por ni c̱he zocho lao juisy əžiꞌilažeꞌe chioꞌonəꞌ nžiꞌilažeꞌe.
\v 17 Nyoɉczə Xtižəꞌ Diozənꞌ canꞌ gožeꞌ deꞌe Rei Faraonṉəꞌ: “Nadaꞌ benaꞌ par nic̱h nacoꞌ rei parzə nic̱h gonaꞌ len leꞌ ca yesəꞌəṉeze beṉəꞌ canꞌ naquə yeḻəꞌ guac c̱hiaꞌanəꞌ. Gonaꞌ par nic̱h yoguəꞌəḻoḻ beṉəꞌ žaꞌ yežlyonꞌ yesəꞌəṉezeneꞌ nonꞌ nacaꞌ nadaꞌ.”
\v 18 Canꞌ naquən, Diozənꞌ cheyašəꞌəlažeꞌe beṉəꞌ cheneꞌeneꞌ yeyašəꞌəlažeꞌe, naꞌ choneꞌ par nic̱h nitəꞌ beṉəꞌ žod beṉəꞌ cheneꞌeneꞌ cui yosoꞌozenagueꞌ c̱heꞌ.
\p
\v 19 Naꞌ deꞌen chon Diozənꞌ caꞌ de repent chonḻe xbab nale: “Chioꞌo beṉac̱h choncho con canꞌ banžiaꞌ Diozənꞌ biaꞌ. ¿Bixc̱henꞌ neꞌ de xtoḻəꞌəchonꞌ?”
\v 20 Pero ¿no naquə chioꞌon ža par gaquəyožcho Diozənꞌ? ¿Egüeꞌ to yesəꞌ benꞌ ben ḻen: “¿Bixc̱he nga benoꞌ nadaꞌ quinga?” Ṉezecho bito yeꞌen ḻeꞌ caꞌ.
\v 21 Beṉəꞌ güen yesəꞌ xguaguənꞌ, chac goneꞌ no yesəꞌ par gonən žin len deꞌe naquə deꞌe xoche. Naꞌ ḻeꞌe gonꞌ naꞌatezə ḻeczə goneꞌ yesəꞌ par gonən žin len deꞌe cui naquə xoche.
\p
\v 22 Ca cheyaḻəꞌəczənꞌ nžiaꞌ Diozənꞌ biaꞌ gwnežɉueꞌ castigw zeɉlicaṉe c̱he beṉəꞌ caꞌ cui chosoꞌozenag c̱heꞌ, naꞌ canꞌ nžieꞌ biaꞌ goneꞌ bichlə par gwloꞌineꞌ yeḻəꞌ guac c̱heꞌenəꞌ. Naꞌ deꞌe cheyaḻəꞌəczənꞌ canꞌ nžia Diozənꞌ biaꞌ goneꞌ c̱hedəꞌ bagwzoineꞌ bagwdapeꞌ yeḻəꞌ chxenḻažəꞌ len ḻegaꞌaqueꞌ ḻaꞌaṉəꞌəczə zɉəzaqueꞌe par yesəꞌəziꞌe castigw zeɉḻicaṉenꞌ, naꞌ yesyəꞌəžineꞌ lao yiꞌ gabiḻənꞌ.
\v 23-24 Naꞌ ca cheyaḻəꞌəczənꞌ ca deꞌen bsiꞌe xṉezenəꞌ antslə par goṉeꞌ chioꞌo chonḻilažəꞌəchoneꞌ yeḻəꞌ balaꞌaṉ, chioꞌo cheyašəꞌ chežiꞌilažeꞌe. Beneꞌ caꞌ par nic̱h nacbiaꞌ ḻechguaḻe deꞌe güen juisy choneꞌ chacleneꞌ chioꞌo gwleɉeꞌ par chonḻilažəꞌəchoneꞌ entr beṉəꞌ Izrael naꞌ entr beṉəꞌ cui zɉənaquə beṉəꞌ Izrael.
\v 25 Canꞌ na ḻeꞌe ḻibr deꞌen bzoɉ deꞌe profet Oseasənꞌ, Diozənꞌ gwneꞌ:
\q1 Beṉəꞌ cui zɉənaquə xiꞌiṉaꞌ naꞌ ṉiaꞌ ḻegaꞌaqueꞌ xiꞌiṉaꞌ.
\q1 Naꞌ beṉəꞌ caꞌ cui goquədaꞌ c̱hegaꞌaqueꞌ yapəgaꞌacaꞌaneꞌ de que chacdaꞌ c̱hegaꞌaqueꞌ.
\m
\v 26 Naꞌ ḻeczə nan:
\q1 Ganꞌ gož Diozənꞌ beṉəꞌ caꞌ: “Leꞌe bito nacle xiꞌiṉaꞌ”,
\q1 ḻeczə naꞌanəꞌ yeꞌe ḻegaꞌaqueꞌ de que zɉənaqueꞌ xiꞌiṉeꞌ, Dioz benꞌ zo zeɉḻicaṉe.
\m
\v 27 Ḻeczə canꞌ gwna deꞌe profet Isaiazənꞌ c̱he beṉəꞌ Izrael caꞌ: “Ḻaꞌaṉəꞌəczə chioꞌo beṉəꞌ Izrael šancho ca yox deꞌe chiꞌ choꞌa nisdaoꞌ baḻgachonꞌ yechoɉcho xniꞌa deꞌe malənꞌ.
\v 28 Laꞌ X̱ancho Diozənꞌ goneꞌ canꞌ banc̱hoglaogüeꞌen len chioꞌo beṉac̱h, naꞌ to žalṉez goneꞌ yoguəꞌəḻoḻ deꞌen bangüieꞌ goneꞌ.”
\v 29 Ḻeczə deꞌe Isaiazənꞌ gwneꞌ antslə:
\q1 Žaləꞌ X̱ancho Diozənꞌ benꞌ napə ḻeꞌezelaogüe yeḻəꞌ guac xen cui bocuaꞌaṉeꞌ to c̱hopə beṉəꞌ lao ṉasyon Izrael c̱hechonꞌ,
\q1 canꞌ goc c̱he beṉəꞌ Sodoma naꞌ beṉəꞌ Gomorra caꞌ goc c̱hecho žaləꞌ caꞌ.
\s1 Con beṉəꞌ chsoꞌonḻilažəꞌ Cristənꞌ nchoglaon c̱hegaꞌaqueꞌ de que zɉənaqueꞌ beṉəꞌ güen lao Diozənꞌ
\p
\v 30 Quinganꞌ naquən, beṉəꞌ caꞌ cui zɉənaquə beṉəꞌ Izrael bito besyəꞌəyilɉeꞌ naclənꞌ soꞌoneꞌ par nic̱h Diozənꞌ əṉeꞌ de que zɉənaqueꞌ beṉəꞌ güen laogüeꞌenəꞌ, pero baḻeꞌ bac̱h chsoꞌonḻilažeꞌe Cristənꞌ naꞌ Diozənꞌ neꞌ c̱hegaꞌaqueꞌ de que zɉənaqueꞌ beṉəꞌ güen laogüeꞌenəꞌ.
\v 31 Naꞌ beṉəꞌ Izrael caꞌ ɉəsəꞌənaogüeꞌ to ḻei deꞌe chon mendad naclənꞌ soꞌoneꞌ par nic̱h əsaꞌaqueꞌ beṉəꞌ güen lao Diozənꞌ. Pero bito gwsoꞌoneꞌ canꞌ nanṉəꞌ. Deꞌe nanꞌ Diozənꞌ gwc̱hoglaogüeꞌen c̱hegaꞌaqueꞌ de que bito zɉənaqueꞌ beṉəꞌ güen laogüeꞌenəꞌ.
\v 32 Naꞌ gwc̱hoglaogüeꞌen c̱hegaꞌaqueꞌ caꞌ c̱hedəꞌ caguə gwsoꞌonḻilažeꞌe Dioz naꞌanəꞌ con gwsaꞌaqueneꞌ soꞌoneꞌ canꞌ na ḻeinꞌ par nic̱h əsaꞌaqueꞌ beṉəꞌ güen laogüeꞌenəꞌ. Deꞌe naꞌanəꞌ gwxaquəꞌəlebəgaꞌaqueneꞌ ca beṉəꞌ ɉtiꞌi to yeɉ.
\v 33 Goc canꞌ nyoɉczə Xtižəꞌ Diozənꞌ nan:
\q1 Ganꞌ nziꞌ Sion naꞌ əseḻaꞌa to beṉəꞌ gwxaquəꞌəlebeneꞌ ca to yeɉ deꞌe əc̱hegoꞌo beṉəꞌ naꞌ ca to yeɉ deꞌen zɉəsəꞌəžoꞌe naꞌ yesəꞌəbix̱eꞌ.
\q1 Naꞌ beṉəꞌ soꞌonḻilažəꞌ benꞌ gwxaquəꞌəlebe ca yeɉənꞌ bitobi ztoꞌ əsaꞌaqueneꞌ c̱he deꞌen soꞌonḻilažeꞌeneꞌ.
\c 10
\p
\v 1 Beṉəꞌ bišəꞌ, do yic̱hɉ do lažaꞌa cheꞌendaꞌ par nic̱h beṉəꞌ Izrael gwlaž c̱hiaꞌ caꞌ yesyəꞌəchoɉeꞌ xniꞌa deꞌe malənꞌ, naꞌ deꞌe naꞌanəꞌ chonaꞌ orasyon chṉabaꞌ gaquəlen Diozənꞌ ḻegaꞌaqueꞌ.
\v 2 Ṉezdaꞌ canꞌ chseꞌeneneꞌ deꞌe zan deꞌe soꞌoneꞌ chsaꞌaqueneꞌ par yebei Diozənꞌ. Pero bito zɉəṉezeneꞌ binꞌ cheneꞌe Diozənꞌ.
\v 3 Bito chseꞌeɉniꞌineꞌ naquənꞌ baben Diozənꞌ par nic̱h ṉeꞌ c̱he beṉəꞌ de que zɉənaqueꞌ beṉəꞌ güen laogüeꞌenəꞌ. Ḻeꞌe ḻegaꞌactezeꞌ chseꞌeneꞌeneꞌ yesyəꞌəyilɉeꞌ naquənꞌ soꞌoneꞌ par nic̱h əsaꞌaqueꞌ beṉəꞌ güen lao Diozənꞌ. Bito chseꞌeneꞌeneꞌ soꞌonḻilažeꞌeneꞌ par nic̱h əṉeꞌ c̱hegaꞌaqueꞌ de que zɉənaqueꞌ beṉəꞌ güen laogüeꞌenəꞌ.
\v 4 Pero notəꞌətezə beṉəꞌ chonḻilažəꞌ Cristənꞌ, Diozənꞌ neꞌ c̱heꞌ de que naqueꞌ beṉəꞌ güen laogüeꞌenəꞌ ḻaꞌaṉəꞌəczə šə cui chonyaṉeꞌe canꞌ na ḻeinꞌ.
\p
\v 5 Deꞌe Moisezənꞌ bzoɉeꞌen de que notəꞌətezə beṉəꞌ choneꞌ cuaseḻoḻ canꞌ na ḻeinꞌ nachənꞌ naqueꞌ beṉəꞌ güen lao Diozənꞌ naꞌ gaquə baneꞌ zeɉḻicaṉe.
\v 6-7 Pero nžaꞌalənꞌ nyoɉ Xtižəꞌ Diozənꞌ c̱he beṉəꞌ caꞌ na Diozənꞌ zɉənaquə beṉəꞌ güen laogüe deꞌen chsoꞌonḻilažeꞌeneꞌ. Nan: “Bito goncho xbab ḻoꞌo laꞌaždaꞌochonꞌ gaquecho: Notono no gaquə cue yobanꞌ o notono no gaquə yetɉ ganꞌ žaꞌ beṉəꞌ guat caꞌ”, žaləꞌ naꞌaclə chyažɉecho žɉəxiꞌicho Cristənꞌ nich gonḻilažəꞌəchoneꞌ.
\v 8 Naꞌ ḻeczə nyoɉənꞌ nan: “Banombiaꞌacho dižəꞌ deꞌen chaclen chioꞌo. Choncho xbab c̱hei naꞌ choꞌecho dižəꞌ canꞌ nan.” Naꞌ ḻenṉəꞌ dižəꞌ deꞌen chzeɉniꞌitoꞌ beṉəꞌ par nic̱h soꞌonḻilažeꞌe Cristənꞌ.
\v 9 Quinganꞌ cheyaḻəꞌ goncho par nic̱h Diozənꞌ yebeɉeꞌ chioꞌo xniꞌa deꞌe malənꞌ. Cheyaḻəꞌ güeꞌecho dižəꞌ len beṉəꞌ yoblə par nic̱h yesəꞌəṉezeneꞌ de que chonḻilažəꞌəcho X̱ancho Jesoꞌosənꞌ, naꞌ ḻeczə cheyaḻəꞌ šeɉḻeꞌecho do yic̱hɉ do lažəꞌəcho de que Dioz nanꞌ boḻis bosbaneꞌ Jesoꞌosənꞌ ladɉo beṉəꞌ guat caꞌ.
\v 10 Diozənꞌ neꞌ de que naccho beṉəꞌ güen laogüeꞌenəꞌ šə cheɉḻeꞌecho do yic̱hɉ do lažəꞌəcho de que cuineꞌenəꞌ boḻis bosbaneꞌ Jesoꞌosənꞌ ladɉo beṉəꞌ guat caꞌ. Naꞌ šə choꞌecho dižəꞌ len beṉəꞌ yoblə par nic̱h yesəꞌəṉezeneꞌ de que bachonḻilažəꞌəcho X̱ancho Jesoꞌosənꞌ, nachənꞌ Diozənꞌ yebeɉeꞌ chioꞌo xniꞌa deꞌe malənꞌ.
\p
\v 11 Xtižəꞌ Diozənꞌ deꞌen nyoɉən nan: “Notəꞌətezə beṉəꞌ chsoꞌonḻilažəꞌ Diozənꞌ bitobi ztoꞌ saꞌaqueneꞌ c̱he deꞌen chsoꞌonḻilažeꞌeneꞌ.”
\v 12 Chioꞌo beṉəꞌ Izrael naꞌ chioꞌo cui naccho beṉəꞌ Izrael, tozəczə canꞌ chon Diozənꞌ len yoguəꞌəcho, laꞌ X̱ancho Jesoꞌosənꞌ naqueꞌ X̱an yoguəꞌəḻoḻ beṉəꞌ. Ḻeꞌ ḻechguaḻe cheyašəꞌ chežiꞌilažeꞌe yoguəꞌəcho con šə chṉabcho gaquəleneꞌ chioꞌo.
\v 13 Canꞌ na Xtižəꞌ Diozənꞌ deꞌen nyoɉənꞌ: “Notəꞌətezə beṉəꞌ yesəꞌəṉab goclen laoguaꞌ nadaꞌ nacaꞌ X̱anḻe, guaquəlenczaꞌ ḻegaꞌaqueꞌ.”
\v 14 Pero ¿nacxa soꞌon beṉəꞌ yesəꞌəṉabeꞌ goclen laogüeꞌenəꞌ šə bito chsoꞌonḻilažeꞌeneꞌ? Naꞌ ¿nacxa soꞌoneꞌen soꞌonḻilažeꞌe ḻeꞌ šə cuiṉəꞌ seꞌeneneꞌ xtižeꞌenəꞌ? Naꞌ ¿nacxa gaquə əseꞌeneneꞌ xtižeꞌe naꞌanəꞌ šə cui zo beṉəꞌ güeꞌ xtižeꞌenəꞌ len ḻegaꞌaqueꞌ?
\v 15 ¿Nacxa soꞌon beṉəꞌ yesəꞌəyix̱ɉuiꞌe dižəꞌənəꞌ šə bito zo no chseḻəꞌ ḻegaꞌaqueꞌ par yesəꞌəyix̱ɉuiꞌen? Canꞌ nyoɉczə Xtižəꞌ Diozənꞌ nan: “Chebeichgüeicho len beṉəꞌ chesəꞌəyix̱ɉuiꞌe guac socho binḻo len Diozənꞌ, chesəꞌəyix̱ɉuiꞌe dižəꞌ güen dižəꞌ cobə c̱heꞌenəꞌ.”
\p
\v 16 Pero ḻaꞌaṉəꞌəczə catəꞌ chseꞌene beṉəꞌ dižəꞌ güen dižəꞌ cobə c̱he Diozənꞌ, caguə yogueꞌe chosoꞌozenagueꞌ c̱hei. Deꞌe Isaiazənꞌ gwneꞌ: “X̱anaꞌ casi notono no chosoꞌozenag dižəꞌ deꞌen chyix̱ɉueꞌetoꞌonəꞌ.”
\v 17 Cheyaḻəꞌ əseꞌene beṉəꞌ dižəꞌ güen dižəꞌ cobə deꞌen gwzeɉniꞌin ḻegaꞌaqueꞌ c̱he Cristənꞌ par soꞌonḻilažeꞌeneꞌ.
\p
\v 18 Pero chṉabaꞌ: ¿əcabi ṉeꞌe seꞌene beṉəꞌ Izrael caꞌ dižəꞌ güen dižəꞌ cobə deꞌen chzeɉniꞌin c̱he Cristənꞌ? Bac̱h gwseꞌeneneꞌen. Bac̱h chac canꞌ nyoɉ Xtižəꞌ Diozənꞌ nan:
\q1 Doxenḻə yežlyonꞌ bac̱h gosəꞌ gwlalɉə dižəꞌənəꞌ.
\q1 Zbiꞌizcan yežlyonꞌ babseḻəꞌ Diozənꞌ xtižeꞌenəꞌ.
\m
\v 19 Naꞌ chṉabaꞌ deꞌe yoblə: ¿əcui gwseꞌeɉniꞌi beṉəꞌ Izrael caꞌ dižəꞌ deꞌen chzeɉniꞌin c̱he Crist naꞌanəꞌ? Zseꞌeɉniꞌiczeneꞌen. Deꞌe Moisezənꞌ gwdix̱ɉuiꞌe canꞌ gwna Diozənꞌ, gwneꞌ:
\q1 Nadaꞌ Dioz gonaꞌ güen len beṉəꞌ caꞌ cui zɉənaquə ṉasyon c̱hiaꞌ.
\q1 Deꞌe naꞌanəꞌ gueꞌile ḻegaꞌaqueꞌ.
\q1 Naꞌ gonaꞌ güen len beṉəꞌ žaꞌ ṉasyon caꞌ beṉəꞌ cui bi chseꞌeɉniꞌi,
\q1 naꞌ deꞌe naꞌanəꞌ əžaꞌale.
\m
\v 20 Naꞌ deꞌe profet Isaiazənꞌ bito bžebeꞌ gwdix̱ɉuiꞌe canꞌ gwna Diozənꞌ:
\q1 Beṉəꞌ cui besyəꞌəyilɉ nadaꞌ, bedəsyəꞌədiꞌe nadaꞌ.
\q1 Naꞌ beṉəꞌ cui gosəꞌəṉab nadaꞌ, naꞌ benaꞌ par nic̱h gwsoꞌombiꞌe nadaꞌ.
\m
\v 21 Naꞌ deꞌe profet Isaiazənꞌ ḻeczə gwdix̱ɉuiꞌe canꞌ gwna Diozənꞌ c̱he beṉəꞌ Izrael caꞌ, gwneꞌ: “Do tyempte chaxaꞌ beṉəꞌ caꞌ cui chosoꞌozenag c̱hiaꞌ par nic̱h yosoꞌozenagueꞌ. Beṉəꞌ žod beṉəꞌ godenag zɉənaquəgaꞌaqueꞌ len xtižaꞌanəꞌ.”
\c 11
\s1 Diozənꞌ bito bechoɉlažeꞌe beṉəꞌ Izrael caꞌ
\p
\v 1 Bito cheyaḻəꞌ goncho xbab de que Diozənꞌ bechoɉlažeꞌe chioꞌo naccho dia c̱he Izraelənꞌ. Ḻeczə beṉəꞌ Izrael nadaꞌ, zaꞌa lao dia c̱he deꞌe Abraam, nacaꞌ xiꞌiṉ xesoa deꞌe Benjamin.
\v 2 Bito bechoɉlažəꞌ Diozənꞌ chioꞌo naccho dia c̱he Izraelənꞌ, chioꞌon gwleɉeꞌ gwlalte par naccho ṉasyon c̱heꞌenəꞌ. Ḻegon xbab canꞌ nyoɉən ḻeꞌe ḻibr Xtižəꞌ Diozənꞌ canꞌ ben Ḻiazənꞌ orasyonṉəꞌ laogüeꞌenəꞌ canaꞌ, gwṉeꞌ contr beṉəꞌ Izrael gwlaž c̱heꞌ, gwneꞌ:
\v 3 “Bagwsoꞌot beṉəꞌ Izrael quinga profet c̱hioꞌ caꞌ X̱anaꞌ. Bagosəꞌəgoꞌoṉiꞌaneꞌe mes de yeɉ c̱hioꞌ ganꞌ cheyaḻəꞌ əsoꞌelaogüeꞌe leꞌ. Yetoga nadaꞌ zoaꞌ naꞌ ḻeczə chseꞌeneꞌeneꞌ soꞌoteꞌ nadaꞌ.”
\v 4 Pero Diozənꞌ božiꞌen gožeꞌeneꞌ: “Ṉeꞌe nitəꞌ gaža mil beṉəꞌ bagwleɉaꞌ par zɉənaqueꞌ lažəꞌ naꞌanəꞌ beṉəꞌ cuiṉəꞌ yesəꞌəzo xibeꞌ to lao lguaꞌa lsaquəꞌ deꞌen chseꞌeɉṉiꞌalažəꞌ beṉəꞌ deꞌen nziꞌ Baal.”
\v 5 Ḻeczə canꞌ naquən xte ža ṉeža, ḻaꞌaṉəꞌəczə bito naccho beṉəꞌ zan, pero Diozənꞌ bagwleɉeꞌ chioꞌo par choꞌelaꞌochoneꞌ c̱hedəꞌ nžiꞌilažeꞌe chioꞌonəꞌ.
\v 6 Diozənꞌ gwleɉeꞌ chioꞌo par choꞌelaꞌochoneꞌ c̱hedəꞌ chebeineꞌ chacleneꞌ chioꞌo. Gwleɉeꞌ chioꞌo caguə por ni c̱he bichlə deꞌe güen deꞌen benchonəꞌ. Žaləꞌ Diozənꞌ gwleɉeꞌ chioꞌo laogüe bencho deꞌe güen, bito naquən con to goclenzə deꞌen gwleɉeꞌ chioꞌo.
\p
\v 7 Ca naquə beṉəꞌ Izrael gwlaž c̱hiaꞌ caꞌ, zaneꞌ bito besəꞌəželeneꞌ naclənꞌ soꞌoneꞌ par nic̱h Diozənꞌ yebeineꞌ ḻegaꞌaqueꞌ. Pero chioꞌo chonḻilažəꞌəcho Diozənꞌ, cuineꞌenəꞌ gwleɉeꞌ chioꞌo par choꞌelaꞌochoneꞌ naꞌ chebeineꞌ chioꞌo, ḻaꞌaṉəꞌəczə beṉəꞌ Izrael caꞌ yeḻaꞌ bito gwseꞌeɉniꞌineꞌ biꞌin cheneꞌe Diozənꞌ.
\v 8 Chac c̱hegaꞌaqueꞌ canəꞌ nyoɉ Xtižəꞌ Diozənꞌ nan: “Diozənꞌ beneꞌ par nic̱h zɉənaqueꞌ ca beṉəꞌ cuiczə zɉənanṉəꞌ cuiczə zɉəntei. Naꞌ xte ža ṉeža gwxaquəꞌəlebəgaꞌaqueneꞌ ca beṉəꞌ cui chəsəꞌəleꞌi len ɉlaogaꞌaquenꞌ naꞌ ca beṉəꞌ ncuež naggaꞌaquenꞌ.”
\v 9 Ḻeczə bzoɉ deꞌe Dabinꞌ gwneꞌ:
\q1 Gaquəšga yoguəꞌ deꞌen chəsyəꞌəbeineꞌenəꞌ ca to ga gaon ḻegaꞌaqueꞌ
\q1 naꞌ ca to ga žɉəsəꞌəxopeꞌ naꞌ ca to ga saꞌacšgueꞌ castigw.
\q1
\v 10 Yesəꞌəc̱hoḻšga yic̱hɉlaꞌaždaꞌogaꞌaqueꞌenəꞌ,
\q1 naꞌ yedote yesəꞌəzaquəꞌəziꞌišgueꞌ canꞌ chzaquəꞌəziꞌ beṉəꞌ nḻegw cožeꞌenəꞌ noꞌe yoaꞌ ziꞌi.
\s1 Diozənꞌ babeneꞌ par nic̱h baḻə beṉəꞌ cui zɉənaquə beṉəꞌ Izrael chsoꞌonḻilažeꞌeneꞌ
\p
\v 11 Ca naquə bagwyoꞌo yeɉənꞌ ṉiꞌa beṉəꞌ Izrael caꞌ, bito cheyaḻəꞌ goncho xbab de que ḻeczə gosəꞌəbix̱eꞌenəꞌ. Pero ca deꞌen cui bosoꞌozenagueꞌ c̱he Diozənꞌ, goc caꞌ par nic̱h lenczə leꞌe cui nacle beṉəꞌ Izrael yechoɉle xniꞌa deꞌe malənꞌ con leꞌe chonḻilažəꞌəleneꞌ. Naꞌ ḻeczə goc caꞌ par nic̱h beṉəꞌ caꞌ cuiṉəꞌ soꞌonḻilažəꞌ Diozənꞌ, beṉəꞌ gwsaꞌalɉə lao dia c̱he Izraelənꞌ, yesəꞌəzelažeꞌe gon Diozənꞌ len ḻegaꞌaqueꞌ canꞌ bachoneꞌ len leꞌe cui nacle beṉəꞌ Izrael, leꞌe chonḻilažəꞌəleneꞌ.
\v 12 Naꞌ ca deꞌen cui bosoꞌozenag beṉəꞌ Izrael caꞌ, goc caꞌ par nic̱h yeziquəꞌəchlə beṉəꞌ žaꞌ yežlyonꞌ ṉiteꞌe mbalaz šə soꞌonḻilažeꞌe Diozənꞌ. Naꞌ ca deꞌen cuich chon Diozənꞌ cuent c̱he zan beṉəꞌ Izrael caꞌ de que zɉənaqueꞌ ṉasyon c̱heꞌenəꞌ, goc caꞌ par nic̱h leꞌe cui nacle beṉəꞌ Izrael zole mbalaz, leꞌe chonḻilažəꞌəle Diozənꞌ. Naquəchxa deꞌe mbanꞌ gaquə catəꞌ yoguəꞌəḻoḻte beṉəꞌ Izrael caꞌ soꞌoneꞌ ca yebei Diozənꞌ ḻegaꞌaqueꞌ deꞌe yoblə.
\p
\v 13 Leꞌe cui nacle beṉəꞌ Izrael, cheꞌendaꞌ əṉezele de que nadaꞌ nacaꞌ apostol c̱he Diozənꞌ naꞌ bseḻeꞌe nadaꞌ choꞌa xtižeꞌenəꞌ entr leꞌe cui nacle beṉəꞌ Izrael. Chonaꞌ xte ga zelao saquəꞌədaꞌ par nic̱h zan leꞌe cui nacle beṉəꞌ Izrael gonḻilažəꞌəle Diozənꞌ.
\v 14 Chonaꞌan par nic̱h ḻeczə yeziquəꞌəchlə beṉəꞌ Izrael gwlaž c̱hiaꞌ caꞌ yesəꞌəzelažeꞌe gon Diozənꞌ len ḻegaꞌaqueꞌ canꞌ choneꞌ len leꞌe cui nacle beṉəꞌ Izrael, naꞌ con yoguəꞌ no soꞌonḻilažəꞌ ḻeꞌ, yebeɉeꞌ ḻegaꞌaqueꞌ xniꞌa deꞌe malənꞌ.
\v 15 Diozənꞌ babniteꞌe zan beṉəꞌ Izrael caꞌ caꞌaḻə, naꞌ laogüe deꞌen babniteꞌe ḻegaꞌaqueꞌ caꞌaḻə babozoeꞌ zan leꞌe cui nacle beṉəꞌ Izrael binḻo len ḻeꞌ. Pero naꞌ gwžin ža catəꞌ gon Diozənꞌ ca yesəꞌəbiguəꞌ beṉəꞌ Izrael caꞌ len ḻeꞌ deꞌe yoblə. Naꞌ ḻechguaḻe deꞌe mbanꞌ gaquə catəꞌ baben Diozənꞌ ca besyəꞌəbigueꞌe deꞌe yoblə len ḻeꞌ.
\v 16 Ṉezecho de costombr c̱he chioꞌo beṉəꞌ Izrael catəꞌ choncho yetxtil chnežɉwcho Diozənꞌ to bḻoḻ daoꞌ cuazinꞌ, naꞌ zeɉen de que doḻoḻ cuazi nanꞌ naquənꞌ c̱heꞌ. Canꞌ naquən len chioꞌo beṉəꞌ Izrael. Baḻcho banon Diozənꞌ chioꞌo cuent ca xiꞌiṉeꞌ, pero naꞌ cheneꞌeneꞌ de que yoguəꞌəcho gaccho xiꞌiṉeꞌ. Naꞌ catəꞌ nacho de que to lo yag naquən c̱he Diozənꞌ, ḻeczə c̱heꞌ xozeꞌe caꞌ.
\p
\v 17 Chioꞌo beṉəꞌ Izrael gwxaquəꞌəlebecho ca xozəꞌ yag olibənꞌ deꞌen naquə güen. Naꞌ Diozənꞌ bniteꞌe baḻcho caꞌaḻə. Naꞌ deꞌen beneꞌ caꞌ gwxaquəꞌəleben ca deꞌen chon to beṉəꞌ catəꞌ chc̱hogueꞌ xozəꞌ yaguənꞌ. Naꞌ yoguəꞌ leꞌe cui nacle beṉəꞌ Izrael gwxaquəꞌəlebele ca xozəꞌ yag olibo deꞌen ze yix̱əꞌ, naꞌ beneꞌ leꞌe ca to yag deꞌe choneꞌ injert, bozoeꞌ leꞌe lao yag güenṉəꞌ. Naꞌ loinꞌ nox̱əꞌən leꞌe naꞌ ḻeczə nox̱əꞌən xozeꞌe caꞌ yeḻaꞌ, naꞌ xnižeꞌin chguažəꞌən leꞌe naꞌ chguažəꞌəten xozeꞌe caꞌ yeḻaꞌ.
\v 18 Bito gaquele de que naquəchle beṉəꞌ güen cle ca beṉəꞌ Izrael caꞌ, beṉəꞌ caꞌ gwxaquəꞌəlebəgaꞌaqueꞌ ca xozəꞌ yag deꞌen gwchoguənꞌ. Caguə leꞌe chnežɉwle yeḻəꞌ mban c̱he lo yag naꞌanəꞌ, sino que lo yag naꞌalənꞌ choṉən leꞌe yeḻəꞌ mbanṉəꞌ.
\p
\v 19 Leꞌe cui nacle beṉəꞌ Izrael de repent nale: “Gwc̱hogueꞌ xozəꞌ yaguənꞌ par nic̱h beneꞌ netoꞌ injert.”
\v 20 Naꞌ deꞌe ḻiczə canꞌ nalenəꞌ. Naꞌ laogüe deꞌe cui gwsoꞌonḻilažəꞌ beṉəꞌ Izrael caꞌ Dioz nanꞌ, beneꞌ len ḻegaꞌaqueꞌ ca xozəꞌ yag deꞌen bagwc̱hogueꞌenəꞌ. Naꞌ babozoeꞌ leꞌe lguaꞌa ḻegaꞌaqueꞌ laogüe deꞌen chonḻilažəꞌəle Cristənꞌ. Deꞌe nanꞌ ža, bito gonḻe xbab de que Diozənꞌ chebeicheneꞌ leꞌe cle ca beṉəꞌ Izrael caꞌ, sino ḻeso ḻegon xbab par sotezə sole gonḻilažəꞌəleneꞌ.
\v 21 Diozənꞌ bito gwziꞌixeneꞌ c̱he beṉəꞌ caꞌ chsaquəꞌəlebeneꞌ ca xozəꞌ yaguənꞌ deꞌen zɉənaquə doalɉe, naꞌ ḻeczə bito siꞌixeneꞌ c̱he leꞌe šə bito sotezə sole gonḻilažəꞌəleneꞌ.
\v 22 Ḻegonšc xbab c̱hele canꞌ nžiꞌilažəꞌ Diozənꞌ beṉəꞌ chsoꞌonḻilažəꞌ ḻeꞌ, naꞌ canꞌ chbeɉyic̱hɉeꞌ beṉəꞌ cui chsoꞌonḻilažeꞌeneꞌ. Diozənꞌ gwleɉyic̱hɉeꞌ beṉəꞌ Izrael caꞌ besəꞌəxopə cui gwsoꞌonḻilažeꞌeneꞌ, naꞌ nžiꞌilažeꞌe leꞌe cui nacle beṉəꞌ Izrael laogüe deꞌen chonḻilažəꞌəleneꞌ. Pero šə cui sotezə sole gonḻilažəꞌəleneꞌ, ḻeczə cueɉyic̱hɉeꞌ leꞌe.
\v 23 Naꞌ deꞌe yoblə Diozənꞌ yozoeꞌ beṉəꞌ Izrael caꞌ naꞌ yeyoneꞌ ḻegaꞌaqueꞌ injertar lao xozəꞌ yaguənꞌ šə soꞌonḻilažeꞌe Cristənꞌ. Diozənꞌ napeꞌ yeḻəꞌ guac par goneꞌ caꞌ len ḻegaꞌaqueꞌ.
\v 24 Leꞌe nacle ca xožəꞌ yag olibo deꞌe ze yix̱əꞌ, naꞌ gwc̱hog Diozənꞌ leꞌe, naꞌ beneꞌ leꞌe injertar bozoeꞌ leꞌe lao xozəꞌ yag olibo güenṉəꞌ. Bezole gocle injertar lao xozəꞌ yag olibo güenṉəꞌ, len caguə nacle xozeꞌe doalɉenꞌ. Ṉezecho ḻeczə gwžin ža catəꞌ yeyon Diozənꞌ injertar deꞌe yoblə xozəꞌ yag olibo deꞌe caꞌ zɉənaquə xozeꞌe doalɉe.
\s1 Gwžin ža yebeɉ Diozənꞌ yoguəꞌ beṉəꞌ Izrael caꞌ xniꞌa deꞌe malənꞌ
\p
\v 25 Beṉəꞌ bišəꞌ, cheꞌendaꞌ əṉezele deꞌe nga deꞌe cui no gwneze antslə par nic̱h cui gaquele de que yeḻəꞌ beṉəꞌ sinꞌ c̱helenꞌ nžiꞌilažəꞌ Diozənꞌ leꞌe. Baḻə beṉəꞌ Izrael caꞌ zɉənaqueꞌ beṉəꞌ yic̱hɉ žod, bito chseꞌeɉniꞌineꞌ biꞌin cheneꞌe Diozənꞌ. Naꞌ nic seꞌeɉniꞌiczeneꞌen xte que catəꞌəch əžin ža bac̱h de yeḻəꞌ mban zeɉḻicaṉe c̱he beṉəꞌ caꞌ cui zɉənaquə beṉəꞌ Izrael, con yoguəꞌ beṉəꞌ caꞌ əgwnežɉo Diozənꞌ yeḻəꞌ mban c̱hegaꞌaqueꞌ.
\v 26 Nach yoguəꞌ beṉəꞌ Izrael caꞌ yebeɉ Diozənꞌ ḻegaꞌaqueꞌ xniꞌa deꞌe malənꞌ canꞌ nyoɉczə Xtižeꞌenəꞌ, nan:
\q1 To beṉəꞌ syoda Sion yebeɉeꞌ beṉəꞌ xniꞌa deꞌe malənꞌ.
\q1 Naꞌ yeḻəꞌ güen deꞌe mal c̱he xiꞌiṉ dia c̱he deꞌe Jacobənꞌ, ḻeꞌ yequeꞌen.
\q1
\v 27 Naꞌ deꞌe nganꞌ chonaꞌ lyebe gonaꞌ len xiꞌiṉ dia c̱he deꞌe Jacobənꞌ,
\q1 yecaꞌa deꞌe mal c̱hegaꞌaqueꞌenəꞌ deꞌen chsoꞌoneꞌenəꞌ.
\p
\v 28 Canꞌ naquən. Deꞌen chsoꞌon beṉəꞌ Izrael caꞌ contr Diozənꞌ, bito chseꞌeɉḻeꞌe c̱he dižəꞌ güen dižəꞌ cobə c̱heꞌenəꞌ, deꞌe naꞌanəꞌ Diozənꞌ gwleɉeꞌ leꞌe cui nacle beṉəꞌ Izrael par goneꞌ leꞌe cuent len ṉasyon c̱heꞌenəꞌ. Pero Diozənꞌ chaqueneꞌ c̱hegaꞌaqueꞌ laogüe deꞌen gwleɉeꞌ deꞌe x̱axtaꞌogaꞌaqueꞌenəꞌ par gwsaꞌaqueꞌ ṉasyon c̱heꞌ.
\v 29 Naꞌ Diozənꞌ bito cheyeɉeneꞌ c̱he deꞌe caꞌ chnežɉueꞌ beṉac̱hənꞌ, naꞌ nic cheyeɉeneꞌ c̱he beṉəꞌ caꞌ mbeɉeꞌ par zɉənaqueꞌ ṉasyon c̱heꞌenəꞌ.
\v 30 Ca naquə leꞌe, antslə bito bzenagle c̱he Diozənꞌ, pero ṉaꞌa ža bachzenagle c̱heꞌ naꞌ bacheyašəꞌ chežiꞌilažeꞌe leꞌe laogüe deꞌen cui bosoꞌozenag beṉəꞌ Izrael caꞌ c̱heꞌ.
\v 31 Diozənꞌ cheyašəꞌ chežiꞌilažeꞌe leꞌe laogüe deꞌen cui chosoꞌozenag beṉəꞌ Izrael caꞌ. Pero gwžin ža catəꞌ ḻeczə yeyašəꞌ yežiꞌilažeꞌe beṉəꞌ Izrael caꞌ deꞌe yoblə.
\v 32 Diozənꞌ gwleɉyic̱hɉeꞌ yoguəꞌ beṉac̱hənꞌ par nic̱h cui bosoꞌozenagueꞌ c̱heꞌ. Beneꞌ caꞌ par nic̱h ḻeczə yeyašəꞌ yežiꞌilažeꞌe yoguəꞌəḻoḻgaꞌaqueꞌ.
\p
\v 33 Ḻechguaḻe beṉəꞌ sinꞌ Diozənꞌ. Ṉezeneꞌ yoguəꞌəḻoḻ. Bito gaquə əṉezecho deꞌen nžieꞌ biaꞌ gaquə. Bito gaquə šeɉniꞌiyaṉeꞌecho deꞌen choneꞌenəꞌ.
\v 34 Nyoɉ Xtižeꞌenəꞌ nan: “Bito gaquə əṉezecho yoguəꞌ xbab c̱he X̱ancho Diozənꞌ. Bito bi de deꞌe əgwsed əgwloꞌichoneꞌ chioꞌo.”
\v 35 Naꞌ nan: “Bito gaquə goncho byen c̱hixɉw X̱ancho Diozənꞌ šə biclə deꞌe babeꞌechoneꞌ.”
\v 36 Diozənꞌ beneꞌ yoguəꞌəḻoḻ, beneꞌ bia chsaꞌaš, beneꞌ beṉac̱h, naꞌ yeziquəꞌəchlə deꞌe zɉəde. Diozənꞌ chgüia chyeꞌ yoguəꞌəḻoḻ, chgüia chyeꞌ beṉac̱hənꞌ naꞌ bia chsaꞌaš naꞌ yoguəꞌ cuantzə deꞌe zɉəde. Ḻenꞌ beneꞌ beṉac̱h naꞌ yeziquəꞌəchlə deꞌe zɉəde par nic̱h siꞌe yeḻəꞌ balaꞌaṉ. Ḻedoyeꞌelaꞌocheꞌ zeɉḻicaṉe. Canꞌ gonšgaczcho.
\c 12
\s1 Cheyaḻəꞌ gon cuincho lažəꞌ naꞌ Diozənꞌ
\p
\v 1 Beṉəꞌ bišəꞌ, bacheyašəꞌ chežiꞌilažəꞌ Diozənꞌ chioꞌo. Deꞌe naꞌanəꞌ chṉeyoidaꞌ leꞌe ḻegon cuerp c̱helenꞌ lažəꞌ naꞌ Diozənꞌ ṉaꞌa mbanḻe. Ḻeꞌe güeꞌen ca to regal. Cheyaḻəꞌ gaccho beṉəꞌ laꞌaždaoꞌ xiꞌilažəꞌ par nic̱h gon cuincho lažəꞌ naꞌ Diozənꞌ c̱hedəꞌ canꞌ choꞌolažeꞌe. Šə choncho caꞌ, do yic̱hɉ do lažəꞌəchonꞌ choꞌelaꞌochoneꞌ.
\v 2 Bito goncho canꞌ chsoꞌon beṉəꞌ caꞌ cui zɉənombiaꞌ Diozənꞌ. Cheyaḻəꞌ güeꞌecho latɉə par nic̱h Diozənꞌ gwšeꞌe xbab c̱hechonꞌ, par nic̱h əṉezecho biꞌin cheneꞌeneꞌ. Diozənꞌ cheneꞌeneꞌ goncho deꞌen naquə deꞌe güen naꞌ con yoguəꞌ deꞌen choꞌolažeꞌe.
\p
\v 3 Diozənꞌ banoꞌe c̱hiaꞌ nacaꞌ apostol naꞌ deꞌe naꞌanəꞌ zaquəꞌən əṉiaꞌ naquənꞌ cheyaḻəꞌ goncho. Bito cheyaḻəꞌ gon cuincho xen, sino que syempr goncho xbab de que noꞌe c̱he to tocho chonḻilažəꞌəchoneꞌ bi xšineꞌenəꞌ goncho naꞌ bito gaquə goncho xšineꞌenəꞌ žaləꞌ ḻeꞌ cui chacleneꞌ chioꞌo.
\v 4 Zan part nsaꞌ cuerp c̱hechonꞌ. Pero to to partənꞌ caguə tozə žin deꞌe chsoꞌonən.
\v 5 Ḻeczə canꞌ naquən len chioꞌo. Beṉəꞌ zanṉəꞌ naccho chonḻilažəꞌəcho Cristənꞌ, pero yoguəꞌəcho ngodəꞌəcho txen len ḻeꞌ naꞌ gwxaquəꞌəlebecho ca tozə cuerp.
\p
\v 6 Diozənꞌ lao yeḻəꞌ chaclen c̱henꞌ len chioꞌo, noꞌe c̱hecho de que gwde gwdelə deꞌe gaquə gon to tocho. Šə baḻcho chac c̱hix̱ɉueꞌecho bi deꞌen bagwna Diozənꞌ chioꞌo cheyaḻəꞌ c̱hix̱ɉueꞌechon segon canꞌ banoeꞌ Diozənꞌ c̱hecho laogüe deꞌen chonḻilažəꞌəchoneꞌ.
\v 7 Šə Diozənꞌ banoꞌe c̱hecho gaquəlencho beṉəꞌ, cheyaḻəꞌ gaquəlenchoneꞌ do yic̱hɉ do lažəꞌəcho. Naꞌ šə Diozənꞌ banoꞌe c̱hecho əgwsed əgwloꞌicho beṉəꞌ, cheyaḻəꞌ əgwsed əgwloꞌigaꞌaquechoneꞌ binḻo.
\v 8 Šə Diozənꞌ banoꞌe c̱hecho əṉeyoicho beṉəꞌ yoblə par soꞌoneꞌ deꞌe güen, cheyaḻəꞌ sotezə socho əṉeyoigaꞌaquechoneꞌ. Naꞌ šəꞌ banoꞌe c̱hecho bi deꞌe əgwnežɉwcho beṉəꞌ yoblə, cheyaḻəꞌ gwnežɉwchon do yic̱hɉ do lažəꞌəcho. Šə banoꞌe c̱hecho gaccho beṉəꞌ blao par əggüia əgwye lɉuežɉ chioꞌo choꞌelaꞌochoneꞌ, cheyaḻəꞌ cueꞌ yic̱hɉcho par əggüia əgwyegaꞌacchoneꞌ canꞌ cheneꞌe Diozənꞌ. Šə noeꞌ Diozənꞌ c̱hecho yeyašəꞌ yežiꞌilažəꞌəcho beṉəꞌ yoblə, cheyaḻəꞌ yebeicho naꞌ yeyašəꞌ yežiꞌilažəꞌəchoneꞌ.
\s1 Canꞌ cheyaḻəꞌ gon notəꞌətezcho chonḻilažəꞌəcho Cristənꞌ
\p
\v 9 Cheyaḻəꞌ gaque c̱he lɉuežɉcho do yic̱hɉ do lažəꞌəcho. Naꞌ cheyaḻəꞌ cueɉyic̱hɉcho deꞌe malənꞌ naꞌ gueꞌichon, par nic̱h caꞌ zeɉḻi goncho deꞌe güenṉəꞌ
\v 10 Canꞌ cheyaḻəꞌ gaquecho c̱he bišəꞌ golɉcho, caꞌaczənꞌ cheyaḻəꞌ gaque c̱he lɉuežɉcho. Cheyaləꞌ gapəchcho respet beṉəꞌ lɉuežɉcho clezə ca cuincho.
\p
\v 11 Bito gaccho beṉəꞌ xagüed. Do yic̱hɉ do lažəꞌəcho goncho bitəꞌətezə deꞌen goncho, con yoguəꞌ deꞌen cheneꞌe X̱ancho Diozənꞌ goncho.
\p
\v 12 Naꞌ cheyaḻəꞌ yebeicho c̱hedəꞌ ṉezecho soch Diozənꞌ goneꞌ güen len chioꞌo. Ḻeczə cheyaḻəꞌ coꞌo gwc̱heɉlažəꞌəcho catəꞌ chyiꞌ chzaquəꞌəcho. Naꞌ ḻeczə cheyaḻəꞌ gontezə goncho orasyon do tyempte.
\p
\v 13 Cheyaḻəꞌ gaquəlencho šə bi deꞌe chesəꞌəyažɉe beṉəꞌ lɉuežɉcho beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ. Naꞌ cheyaḻəꞌ yeyašeꞌecho beṉəꞌ zitəꞌ.
\p
\v 14 Cheyaḻəꞌ ṉabcho gaquə deꞌe šaoꞌ deꞌe güen c̱he beṉəꞌ chosoꞌoc̱hiꞌ chosoꞌosaquəꞌ chioꞌo. Cheyaḻəꞌ ṉabcho gaquə deꞌe güen c̱hegaꞌaqueꞌ, caguə deꞌe mal.
\p
\v 15 Cheyaḻəꞌ yebeicho txen len beṉəꞌ chəsyəꞌəbei. Cheyaḻəꞌ cuežcho len beṉəꞌ chəsəꞌəbež.
\p
\v 16 Yoguəꞌəcho cheyaḻəꞌ goncho tozə xbab c̱hecho. Bito gaꞌalažəꞌəcho. Cheyaḻəꞌ yoḻgüižcho beṉəꞌ yašəꞌ beṉəꞌ cui bi chac, naꞌ bito gon cuincho beṉəꞌ sinꞌ.
\p
\v 17 Šə bi deꞌe mal chon beṉəꞌ len chioꞌo, bito əṉacho ḻeczə deꞌe mal yožiꞌichon len ḻeꞌ. Cheyaḻəꞌ cueꞌ yic̱hɉcho par nic̱h goncho deꞌe güen, par nic̱h yesəꞌəna yeziquəꞌəchlə beṉəꞌ de que ḻe naquəczə güen deꞌen chonchonəꞌ.
\v 18 Cheyaḻəꞌ goncho xte ga zelao saquəꞌəcho par nic̱h caꞌ socho binḻo len yoguəꞌəḻoḻ beṉəꞌ.
\v 19 Beṉəꞌ bišəꞌ daoꞌ, cheyaḻəꞌ əgwzeɉ əgwdecho caꞌaḻə bitəꞌəzə deꞌen chsoꞌone beṉəꞌ chioꞌo. Gwyeczə Diozənꞌ nac goneꞌ len beṉəꞌ caꞌ chc̱hiꞌ chsaquəꞌ chioꞌo. Xtižeꞌenəꞌ nyoɉən nan: “Quinga na X̱ancho Diozənꞌ: Nadanꞌ coꞌolažaꞌaneꞌ naꞌ nadanꞌ gonaꞌaneꞌ castigw.”
\v 20 Naꞌ ḻeczə nan: “Šə beṉəꞌ contr c̱hechonəꞌ chbiḻ chdoneꞌ, cheyaḻəꞌ güeꞌechoneꞌ deꞌe yeꞌeɉ deꞌe gaogüeꞌ. Šə goncho güen len ḻeꞌ de repent ḻechguaḻe yeyeɉeneꞌ c̱he deꞌe malənꞌ choneꞌ len chioꞌo.”
\v 21 Catəꞌ chsoꞌon beṉəꞌ deꞌe malənꞌ len chioꞌo, bito güeꞌecho latɉə ṉabiaꞌ deꞌe malənꞌ chioꞌo par yožiꞌicho deꞌe mal len ḻegaꞌaqueꞌ. Yožiꞌicho deꞌe güenṉəꞌ len ḻegaꞌaqueꞌ par nic̱h yesyəꞌəyeɉeneꞌ c̱he deꞌe malənꞌ chsoꞌoneꞌ.
\c 13
\p
\v 1 To tocho cheyaḻəꞌ əgwzenagcho c̱he jostis caꞌ beṉəꞌ caꞌ chəsəꞌənabiaꞌ, c̱hedəꞌ Dioz nanꞌ niteꞌe yoguəꞌəḻoḻgaꞌaqueꞌ par nic̱h chəsəꞌənabiꞌe.
\v 2 Šə bito chzenagcho c̱he jostis caꞌ, choncho contr deꞌen nžia Diozənꞌ biaꞌ goncho. Naꞌ šə bito chzenagcho c̱hegaꞌaqueꞌ, chyilɉzə xtoḻəꞌəchonꞌ par gaccho castigw.
\v 3 Ca naquə jostis caꞌ beṉəꞌ caꞌ chəsəꞌənabiaꞌ, bito cheyaḻəꞌ žebgaꞌacchoneꞌ šə choncho deꞌe güen, pero beṉəꞌ caꞌ chsoꞌon deꞌe mal, ḻegaꞌaquenꞌ cheyaḻəꞌ yesəꞌəžebeꞌ jostis caꞌ. Šə cheneꞌecho socho sin cui žebcho jostis caꞌ, cheyaḻəꞌ goncho deꞌe güen par nic̱h caꞌ yesəꞌəna jostis caꞌ de que deꞌe güenṉəꞌ choncho.
\v 4 Jostis caꞌ chsoꞌoneꞌ xšin Diozənꞌ par nic̱h socho güen. Pero šə choncho deꞌe mal, cheyaḻəꞌ žebgaꞌacchoneꞌ. Caguə con zɉəndoḻəꞌəlizeneꞌ yeḻəꞌ chnabiaꞌ naꞌanəꞌ, par soꞌoneꞌ castigonꞌ zɉəndoḻeꞌeneꞌen, c̱hedəꞌ Diozənꞌ banežɉueꞌen ca xšin beṉəꞌ jostis caꞌ chsoꞌoneꞌ castigw beṉəꞌ caꞌ chsoꞌon deꞌe malənꞌ.
\v 5 Deꞌe nanꞌ cheyaḻəꞌ əgwzenagcho c̱he jostis caꞌ par nic̱h cui siꞌicho castigw, naꞌ ḻeczə par nic̱h gacbeꞌicho ḻoꞌo yic̱hɉlaꞌaždaꞌochonꞌ de que deꞌe güenṉəꞌ choncho.
\v 6 Naꞌ ḻeczə deꞌe naꞌanəꞌ cheyaḻəꞌ c̱hixɉwcho no c̱he bien naꞌ goncho no žinḻaoꞌ. Con yoguəꞌ deꞌe yosoꞌoc̱hixɉueꞌ chioꞌo naꞌ šə bi deꞌe yosoꞌogoneꞌ chioꞌo, cheyaḻəꞌ gwzenagcho c̱hegaꞌaqueꞌ c̱hedəꞌ Dioz nanꞌ choneꞌ mendad goncho caꞌ.
\p
\v 7 C̱hixɉwcho šə bi chaḻəꞌəcho c̱he beṉəꞌ. Šə chaḻəꞌəcho gwzon c̱he beṉəꞌ, yogoꞌochon. Šə chaḻəꞌəcho c̱he bien, c̱hixɉwchon. Šə chaḻəꞌəcho c̱he impuest, c̱hixɉwchon. Naꞌ gapcho respet beṉəꞌ cheyaḻəꞌ ədap respet. Naꞌ güeꞌelaꞌocho beṉəꞌ cheyaḻəꞌ əyeꞌelaoꞌ.
\v 8 Ni to cui no gaḻəꞌəcho c̱hei sin cui c̱hixɉwchon. Naꞌ deꞌen naquə deꞌe žialao goncho, gaquecho c̱he saꞌalɉuežɉcho tocho yetocho. Naꞌ šə bachaque c̱he saꞌalɉuežɉchonꞌ, bachonczcho canꞌ non ḻei c̱he Diozənꞌ mendad goncho.
\v 9 Ḻeinꞌ nan: “Bito coꞌo x̱tole naꞌ bito cueɉyic̱hɉle beꞌen c̱hele o noꞌol c̱hele par solenḻe beṉəꞌ yoblə, bito gotle beṉəꞌ, bito cuanḻe, bito gacle testigw faḻs, bito selažəꞌəle bitəꞌətezə deꞌe de c̱he beṉəꞌ.” Naꞌ dech deꞌen na ḻeinꞌ, pero naꞌ šə choncho canꞌ nyoɉən nan: “Ḻegaque c̱he saꞌalɉuežɉle catg chaque c̱he cuinḻe”, ḻeczə chonczcho complir yoguəꞌ deꞌe caꞌ yeḻaꞌ deꞌen nanṉəꞌ.
\v 10 Bazoczcho choncho cuaseḻoḻ canꞌ na ḻeinꞌ šə chaquecho c̱he yeziquəꞌəchlə beṉəꞌ. C̱hedəꞌ šə chaquecho c̱hegaꞌaqueꞌ bitobi deꞌe mal goncho contr ḻegaꞌaqueꞌ.
\p
\v 11 Catəꞌən gwzolao benḻilažəꞌəcho Cristənꞌ gwṉezecho gwžin ža yideꞌ deꞌe yoblə. Naꞌ ṉaꞌa bazon baozə əžin ža əžin orənꞌ yideꞌ. Deꞌe naꞌanəꞌ bitoch cheyaḻəꞌ gaccho ca beṉəꞌ chtas, beṉəꞌ cui bi xbab chon.
\v 12 Naꞌ ca naquənꞌ bazon əžin ža par yideꞌenəꞌ, cheyaḻəꞌ cueɉyic̱hɉcho cuich goncho deꞌe malənꞌ deꞌen bencho catəꞌən ṉeꞌe nc̱hoḻ ḻoꞌo yic̱hɉlaꞌaždaꞌochonꞌ. Naꞌ ṉaꞌa bagwyoꞌo beꞌeniꞌ c̱he Diozənꞌ ḻoꞌo yic̱hɉlaꞌaždaꞌochonꞌ cheyaḻəꞌ goncho deꞌe güen.
\v 13 Ḻeꞌe do gonch canꞌ cheyaḻəꞌ goncho ṉaꞌa bayoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌochonꞌ. Bito cheyaḻəꞌ lencho lṉi ganꞌ chac scandl, naꞌ bito cheyaḻəꞌ gaccho beṉəꞌ güeꞌe zo, naꞌ beṉəꞌ zargat, naꞌ beṉəꞌ ggoꞌo x̱toi. Naꞌ ḻeczə bito cheyaḻəꞌ tiḻəlen lɉuežɉcho, naꞌ bito gueꞌicho beṉəꞌ.
\v 14 Cheyaḻəꞌ gon cuincho lažəꞌ naꞌ X̱ancho Jesocristənꞌ par nic̱h gaquə yic̱hɉlaꞌaždaꞌochonꞌ canꞌ naquə yic̱hɉlaꞌaždaꞌogüeꞌenəꞌ, naꞌ bito goncho canꞌ cheneꞌe laꞌaždaꞌomalchonꞌ goncho.
\c 14
\s1 Bito cheyaḻəꞌ əṉacho c̱he lɉuežɉcho de que deꞌe malənꞌ chsoꞌoneꞌ
\p
\v 1 Šə to beṉəꞌ bachonḻilažeꞌe Cristənꞌ ṉechacžeɉlažeꞌe naꞌ bito ṉeꞌe šeɉniꞌineꞌ naquən cheyaḻəꞌ goneꞌ, ḻegwleneꞌ par gaqueꞌ txen len leꞌe. Pero canꞌ naquə xbab c̱heꞌenəꞌ, bito cheyaḻəꞌ gaquəyožleneꞌ.
\v 2 Zo beṉəꞌ choneꞌ xbab de que bito napeꞌ doḻəꞌ šə gaogüeꞌ bitəꞌətezə yeḻəꞌ guao. Pero zo beṉəꞌ bito ṉeꞌe šeɉniꞌineꞌ šə guaquə gaogüeꞌ bitəꞌətezə yeḻəꞌ guao sin cui gapeꞌ doḻəꞌ, naꞌ deꞌe naꞌanəꞌ šə chaogüeꞌ porzə yix̱əꞌ cuan.
\v 3 Benꞌ chao bitəꞌətezə yeḻəꞌ guao bito cheyaḻəꞌ gueꞌineꞌ benꞌ cui chao bitəꞌətezə yeḻəꞌ guao. Naꞌ benꞌ cui chao bitəꞌətezə yeḻəꞌ guao bito cheyaḻəꞌ əṉeꞌ c̱he benꞌ cheꞌeɉ chao bitəꞌətezə de que malənꞌ choneꞌ cheꞌeɉ chaotezeꞌ. Ṉezecho de que Dioz nanꞌ banoneꞌ c̱hopteꞌ ca xiꞌiṉeꞌ.
\v 4 ¿Noxa naquə chioꞌo naꞌanəꞌ par əgwlažəꞌ c̱hecho šə nac chon benꞌ bagwcuaꞌ Diozənꞌ ca xiꞌiṉeꞌ? Dioz nanꞌ naqueꞌ X̱an xiꞌiṉeꞌ caꞌ naꞌ ḻeꞌenəꞌ ṉezeneꞌ c̱he to tocho šə choncho güen o šə choncho mal. Naꞌ X̱ancho Cristənꞌ goneꞌ ca šeɉczcho goncho deꞌe güen c̱hedəꞌ napeꞌ yeḻəꞌ guac par goneꞌ caꞌ.
\p
\v 5 Nitəꞌ beṉəꞌ chsoꞌoneꞌ xbab de que nchoɉ to ža xen naꞌ deꞌe žialao lao yoguəꞌ ža caꞌ yeḻaꞌ. Pero naꞌ ḻeczə nitəꞌ beṉəꞌ chsoꞌoneꞌ xbab de que tozəczə canꞌ zɉənaquə yoguəꞌəte ža caꞌ. To tocho cheyaḻəꞌ socho do yic̱hɉ do lažəꞌəcho gonḻilažəꞌəcho de que choncho canꞌ cheyaḻəꞌ gonchonəꞌ.
\v 6 Beṉəꞌ caꞌ chsoꞌon xbab de que de ža deꞌe žialaoch cle ca ža caꞌ yeḻaꞌ chsoꞌoneꞌ xbabənꞌ caꞌ par chsoꞌelaogüeꞌe X̱ancho Cristənꞌ. Naꞌ beṉəꞌ caꞌ chsoꞌon xbab de que tozəczə canꞌ zɉənaquə yoguəꞌəte ža caꞌ, ḻeczə deꞌen chsoꞌelaogüeꞌe X̱ancho Crist nanꞌ chsoꞌoneꞌ xbabənꞌ caꞌ. Naꞌ benꞌ chao bitəꞌətezə yeḻəꞌ guao, chaogüeꞌen par choꞌelaogüeꞌe X̱ancho Cristənꞌ, c̱hedəꞌ ḻeczə yeḻəꞌ chox̱cwlen c̱he Dioz nanꞌ choꞌe. Naꞌ benꞌ cui chao bitəꞌətezə yeḻəꞌ guao ḻeczə par choꞌelaogüeꞌe X̱ancho Crist naꞌanəꞌ cui chaogüeꞌen c̱hedəꞌ ḻeczə chnežɉueꞌ yeḻəꞌ chox̱cwlen c̱he Diozənꞌ.
\p
\v 7 Ni to chioꞌo cui zocho par nic̱h goncho con deꞌe biaꞌazəlažəꞌəcho. Naꞌ ni to chioꞌo cui gatcho šə tant cheneꞌecho gatcho.
\v 8 Lao zocho mbancho, zocho par goncho canꞌ cheneꞌe X̱ancho Cristənꞌ. Naꞌ gatcho catəꞌən əṉeꞌ gatcho. Canꞌ naquən gatcho o mbancho, naquəczcho lao naꞌ X̱ancho naꞌanəꞌ.
\v 9 Par nanꞌ got Cristənꞌ naꞌ beyas bebaneꞌ deꞌe yoblə ladɉo beṉəꞌ guat caꞌ par nic̱h caꞌ naqueꞌ X̱an beṉəꞌ zɉəmban naꞌ X̱an beṉəꞌ bagwsaꞌat.
\p
\v 10 Pero bito cheyaḻəꞌ əṉacho de que beṉəꞌ bišəꞌəcho caꞌ zɉənapeꞌ doḻəꞌ šə por ni c̱he deꞌen cui chsoꞌoneꞌ canꞌ choncho naꞌazənꞌ. Naꞌ ḻeczə bito cheyaḻəꞌ gueꞌicho beṉəꞌ bišəꞌəcho caꞌ. Yoguəꞌəcho techo lao Cristənꞌ par əc̱hogbiꞌen c̱hecho šə de xtoḻəꞌəcho o šə cui bi de.
\v 11 Nyoɉczə ganꞌ na X̱ancho Diozənꞌ neꞌ:
\q1 Deꞌe ḻi nadaꞌ nacaꞌ Dioz zoaꞌ mbanaꞌ,
\q1 naꞌ deꞌe naꞌanəꞌ yoguəꞌ beṉəꞌ desəꞌəzo xibeꞌ laoguaꞌanəꞌ
\q1 naꞌ yogueꞌe əsoꞌelaogüeꞌe nadaꞌ.
\m
\v 12 Canꞌ naquən, yoguəꞌəchonꞌ əgwdecho cuent lao Diozənꞌ šə biquəꞌ deꞌe babencho lao bguancho.
\s1 Bito goncho ca yesəꞌəxopə beṉəꞌ yoblə soꞌoneꞌ deꞌe mal
\p
\v 13 Naꞌ bito cheyaḻəꞌ əṉacho c̱he ni to beṉəꞌ bišəꞌəcho caꞌ de que zɉənapeꞌ doḻəꞌ šə por ni c̱hezə cui chsoꞌoneꞌ canꞌ choncho naꞌanəꞌ əṉacho c̱hegaꞌaqueꞌ caꞌ. Pero chioꞌo cheyaḻəꞌ cueɉyic̱hɉcho cuich goncho bichlə deꞌen choncho šə chonən par nic̱h beṉəꞌ bišəꞌəcho caꞌ chsaꞌacžeɉlažeꞌe o chesəꞌəxopeꞌ chsoꞌoneꞌ deꞌe malənꞌ.
\v 14 Bitobi yeḻəꞌ guao de deꞌe chonən manch yic̱hɉlaꞌaždaꞌochonꞌ, nadaꞌ ṉezdaꞌ c̱hedəꞌ ngodaꞌa txen len X̱ancho Jesoꞌosənꞌ. Pero šə to beṉəꞌ choneꞌ xbab de que de yeḻəꞌ guao deꞌe chonən manch yic̱hɉlaꞌaždaꞌochonꞌ, par ḻenꞌ naquən mal šə gaogüeꞌen.
\v 15 Šə por ni c̱he bi yeḻəꞌ guao deꞌen chaochonəꞌ chaque beṉəꞌ bišəꞌəchonəꞌ tolə, bitoch cheyaḻəꞌ gaochon, c̱hedəꞌ por ni c̱he beṉəꞌ bisəꞌəcho naꞌanəꞌ Cristənꞌ bnežɉw cuineꞌ gwsoꞌot beṉəꞌ ḻeꞌ. Deꞌe naꞌanəꞌ cheyaḻəꞌ gaquecho c̱heꞌ naꞌ bito goncho ca cueɉyic̱hɉeꞌ cuich gonḻilažeꞌe Cristənꞌ naꞌ cuiayiꞌe.
\v 16 Šə choncho to deꞌe chaquecho naquən güen par chioꞌo pero par beṉəꞌ bišəꞌəcho caꞌ naquən mal, bito gonchon par nic̱h cui yesəꞌəneꞌ choncho deꞌe mal.
\v 17 Šə bazocho chnabiaꞌ Diozənꞌ chioꞌo, deꞌen cheꞌeɉ chaochonꞌ bito naquən deꞌe žialao xen. Deꞌe naquə deꞌe žialao xen šeɉcho ḻicha, socho binḻo len beṉəꞌ yoblə naꞌ gon Spirit c̱he Diozənꞌ ca socho mbalaz.
\v 18 Benꞌ zda ḻicha, naꞌ zoeꞌ mbalaz, naꞌ zoeꞌ binḻo len beṉəꞌ yeziquəꞌəchlə, benaꞌanəꞌ choꞌelaoꞌ Cristənꞌ, naꞌ Diozənꞌ chebeineꞌ ḻeꞌ, naꞌ yeziquəꞌəchlə beṉəꞌ ḻeczə chəsəꞌəneꞌ deꞌe güenṉəꞌ choneꞌ.
\p
\v 19 Deꞌe naꞌanəꞌ cheyaḻəꞌ goncho ca socho binḻo tocho yetocho, naꞌ ḻeczə caꞌ gaquəlen lɉuežɉcho par nic̱h caꞌ gonḻilažəꞌəchcho Diozənꞌ.
\v 20 Diozənꞌ babebeɉeꞌ lɉuežɉ chioꞌo chonḻilažəꞌəchoneꞌ xniꞌa deꞌe malənꞌ par nic̱h soꞌoneꞌ deꞌe güen. Naꞌ bito cheyaḻəꞌ goncho par nic̱h soꞌoneꞌ deꞌe malənꞌ. Deꞌe naꞌanəꞌ šə por ni c̱he deꞌen chaocho to deꞌen chaocho naꞌazənꞌ gonən par nic̱h beṉəꞌ bišəꞌəchonꞌ goneꞌ deꞌe malənꞌ, bitoch cheyaḻəꞌ gaochon. Bito bi yeḻəꞌ guao de deꞌe chonən manch yic̱hɉlaꞌaždaꞌochonꞌ. Pero malənꞌ choncho šə chaocho deꞌen chon par nic̱h beṉəꞌ bišəꞌəchonəꞌ goneꞌ deꞌe malənꞌ.
\v 21 Ncaꞌalə xṉezenꞌ cuich gaocho beləꞌənəꞌ naꞌ niquəch yeꞌeɉcho binonꞌ, naꞌ nic goncho bichlə deꞌen choncho šə chonən par nic̱h beṉəꞌ bišəꞌəchonəꞌ gaquəžeɉlažeꞌe o əxopeꞌ goneꞌ deꞌe mal o cui gwzenagueꞌ c̱he Diozənꞌ.
\v 22 Šə choncho xbab de que bito naquən doḻəꞌ ca deꞌen choncho bitəꞌətezə deꞌen choncho, c̱hopzcho lencho Dioz nanꞌ ṉezecho. Bito yeꞌecho beṉəꞌ yoblə soꞌoneꞌ canꞌ chaque chioꞌo güen goncho. Šə bito chacžeɉlažəꞌəcho c̱he bitəꞌətezə deꞌen choncho de que naquən güen, nachənꞌ zocho mbalaz.
\v 23 De xtoḻəꞌ benꞌ chao to yeḻəꞌ guao šə chacžeɉlažeꞌe chaqueneꞌ de que bitolɉa cheyaḻəꞌ gaogüeꞌenṉəꞌ, c̱hedəꞌ bito chonḻilažeꞌe de que deꞌe güenṉəꞌ choneꞌ chaogüeꞌen. De xtoḻəꞌəcho šə choncho bitəꞌətezə deꞌen chaquecho bito cheyaḻəꞌ goncho. Napcho doḻəꞌ c̱hedəꞌ cabi chonḻilažəꞌəcho de que deꞌe güenṉəꞌ choncho par chioꞌo.
\c 15
\s1 Bito goncho porzə deꞌen əṉa chioꞌo
\p
\v 1 Chioꞌo bacheɉniꞌišaogüeꞌecho naꞌ baṉezecho naquənꞌ cheyaḻəꞌ goncho. Deꞌe naꞌanəꞌ cheyaḻəꞌ gapcho yeḻəꞌ chxenḻažəꞌ len beṉəꞌ caꞌ chseꞌeɉniꞌi latəꞌəlaszə. Bito cheyaḻəꞌ goncho con porzə deꞌen əṉa chioꞌo.
\v 2 Cheyaḻəꞌ goncho deꞌe güen deꞌe chsaꞌazlažəꞌ saꞌalɉuežɉcho, par nic̱h caꞌ soꞌonḻilažəꞌəcheꞌ Diozənꞌ.
\v 3 Goncho caꞌ c̱hedəꞌ ni Cristənꞌ bito beneꞌ con deꞌe gwyazlažəꞌəzə ḻeꞌ. Naꞌ nyoɉczən de que Cristənꞌ gožeꞌ Diozənꞌ: “Beṉəꞌ contr c̱hioꞌ caꞌ tant chəsəꞌəžeꞌe leꞌ, naꞌ lenaꞌ bosoꞌožia bosoꞌoṉiteꞌe.”
\v 4 Naꞌ Xtižəꞌ Diozənꞌ deꞌen bosoꞌozoɉ beṉəꞌ canaꞌ nyoɉən chzeɉniꞌin chioꞌo, par nic̱h zotezcho chgoꞌo chc̱heɉlažəꞌəcho catəꞌ de deꞌen chsaquəꞌəziꞌicho. Naꞌ Xtižəꞌ Diozənꞌ deꞌen nyoɉən ḻeczə chtipəchən lažəꞌəcho. Deꞌe naꞌanəꞌ zocho lez gaquə güen c̱hecho deꞌen gon Diozənꞌ len chioꞌo.
\v 5 Diozənꞌ choneꞌ par zotezcho chgoꞌo chc̱heɉlažəꞌəcho bitəꞌətezə deꞌen chac c̱hecho naꞌ chtipeꞌ lažəꞌəcho. Naꞌ ṉaꞌa chṉabaꞌ goneꞌ par nic̱h tozə ca gaquə yic̱hɉlaꞌaždaꞌolenꞌ, c̱hedəꞌ canꞌ cheneꞌe Cristo Jesoꞌosənꞌ.
\v 6 Chṉabaꞌ goneꞌ caꞌ par nic̱h tozə ca ṉale güeꞌelaꞌole Diozənꞌ, X̱a X̱ancho Jesocristənꞌ.
\s1 Cristənꞌ beneꞌ par nic̱h beṉəꞌ caꞌ cui zɉənaquə beṉəꞌ Izrael gaquə əsoꞌelaogüeꞌe Diozənꞌ
\p
\v 7 Caꞌ ža, ḻeꞌe so güen tole yetole canꞌ ben Cristənꞌ gwcueꞌe to tocho ca xiꞌiṉeꞌ. Ḻegon caꞌ par nic̱h Diozənꞌ siꞌe yeḻəꞌ balaꞌaṉ.
\v 8 Echniaꞌ leꞌe de que Cristo Jesoꞌosənꞌ bideꞌ par gocleneꞌ zguaꞌatec beṉəꞌ Izrael caꞌ. Bedəyeneꞌ complir ca lyebe deꞌen ben Diozənꞌ len x̱axtaoꞌ chioꞌo beṉəꞌ Izrael, par nic̱h bloꞌe de que Diozənꞌ choꞌe dižəꞌ ḻi.
\v 9 Naꞌ ḻeczə bidə Cristənꞌ par nic̱h beṉəꞌ caꞌ cui zɉənaquə beṉəꞌ Izrael guaquə əsoꞌelaogüeꞌe Diozənꞌ deꞌen cheyašəꞌ chežiꞌilažəꞌ Diozənꞌ ḻegaꞌaqueꞌ. Chac canꞌ nyoɉ Xtižəꞌ Diozənꞌ nan:
\q1 Deꞌe nanꞌ ža güeꞌelaoguaꞌa leꞌ,
\q1 goḻaꞌ ganꞌ žaꞌ beṉəꞌ caꞌ cui zɉənaquə beṉəꞌ Izrael par güeꞌelaoguaꞌa leꞌ.
\m
\v 10 Naꞌ yeto ganꞌ nan:
\q1 Leꞌe cui nacle beṉəꞌ Izrael, ḻeyebei txen len beṉəꞌ Izrael caꞌ, beṉəꞌ caꞌ gwleɉ Diozənꞌ par zɉənaqueꞌ ṉasyon c̱heꞌ.
\m
\v 11 Naꞌ ḻeczə nan:
\q1 Yoguəꞌ leꞌe cui nacle beṉəꞌ Izrael, ḻegüeꞌelaoꞌ X̱ancho Diozənꞌ.
\q1 Yoguəꞌəle cheyaḻəꞌ güeꞌelaꞌoleneꞌ.
\m
\v 12 Naꞌ ḻeczə deꞌen bzoɉ deꞌe profet Isaiazənꞌ nan:
\q1 To beṉəꞌ yidə benꞌ zaꞌ lao dia c̱he deꞌe Isainꞌ.
\q1 Ḻeꞌ ṉabiꞌe yoguəꞌəḻoḻ beṉəꞌ.
\q1 Naꞌ baḻə beṉəꞌ caꞌ cui zɉənaquə beṉəꞌ Izrael yesəꞌəbezeꞌ gaquəlen beꞌenəꞌ zaꞌanəꞌ ḻegaꞌaqueꞌ.
\p
\v 13 Diozənꞌ choneꞌ par nic̱h ṉezecho zotezə zoeꞌ chacleneꞌ chioꞌo. Naꞌ gonšgueꞌ par nic̱h sole mbalaz juisy naꞌ so cuezle binḻo juisy len xbab deꞌen yoꞌo ḻoꞌo yic̱hɉlaꞌaždaꞌolenꞌ laogüe deꞌen chonḻilažəꞌəle Cristənꞌ. Naꞌ šə bazole mbalaz juisy naꞌ bachzo chbezle binḻo juisy len xbab deꞌen yoꞌo ḻoꞌo yic̱hɉlaꞌaždaꞌolenꞌ, nachənꞌ Spirit c̱he Diozənꞌ gonən par sotezə sole yebeile deꞌen gaquəlench Diozənꞌ leꞌe.
\p
\v 14 Beṉəꞌ bišəꞌ, ṉezdaꞌ de que Diozənꞌ babeneꞌ par nic̱h nacle beṉəꞌ güenchgua naꞌ cheɉniꞌichgüeile. Ṉezdaꞌ chac choeꞌ lɉuežɉle consejw tole yetole.
\v 15 Pero deꞌen gwleɉ Diozənꞌ nadaꞌ par gonaꞌ xšineꞌenəꞌ cheyaxɉdaꞌ chzoɉaꞌ leꞌe clar c̱he deꞌe caꞌ baṉezczele par nic̱h yosaꞌalažəꞌəgaꞌaclen.
\v 16 Gwleɉeꞌ nadaꞌ par nic̱h chonaꞌ xšin Jesocristənꞌ ladɉo beṉəꞌ caꞌ cui zɉənaquə beṉəꞌ Izrael. Naꞌ choꞌelengaꞌacaꞌaneꞌ dižəꞌ güen dižəꞌ cobə c̱he Diozənꞌ par nic̱h Diozənꞌ yebeineꞌ ḻegaꞌaqueꞌ catəꞌ soꞌonḻilažeꞌeneꞌ. Naꞌ Spirit c̱heꞌenəꞌ gonən par nic̱h əsaꞌaqueꞌ beṉəꞌ laꞌaždaoꞌ xiꞌilažəꞌ par nic̱h Diozənꞌ šoꞌolažeꞌe ḻegaꞌaqueꞌ.
\p
\v 17 Deꞌen ngodaꞌa txen len Cristo Jesoꞌosənꞌ chebeidaꞌ choꞌa dižəꞌ c̱he xšin Diozənꞌ deꞌen chonaꞌ.
\v 18 Bito cheyaxɉdaꞌ guaꞌa dižəꞌ c̱he bi deꞌe baben beṉəꞌ yoblə, sino choꞌa dižəꞌ c̱he deꞌen baben Cristənꞌ ca naquənꞌ gocleneꞌ nadaꞌ chonaꞌ xšineꞌenəꞌ. Ḻeꞌ beneꞌ par nic̱h biaꞌa dižəꞌ len beṉəꞌ caꞌ cui zɉənaquə beṉəꞌ Izrael, naꞌ gocleneꞌ nadaꞌ benaꞌ caꞌ par nic̱h baḻeꞌ bachosoꞌozenagueꞌ c̱heꞌ.
\v 19 Spirit c̱he Diozənꞌ goclenən nadaꞌ len yeḻəꞌ guac c̱heinəꞌ par nic̱h benaꞌ miḻagr naꞌ bichlə deꞌe zaquəꞌ yesyəꞌəbane beṉəꞌ. Goclenən nadaꞌ par nic̱h babiꞌa dižəꞌ güen dižəꞌ cobə deꞌe chzeɉniꞌin c̱he Cristənꞌ doxen, gwzolaozaꞌ Jerosalenṉəꞌ biꞌan, nach bežintiaꞌ ganꞌ nziꞌ Ilirico.
\v 20 Babenaꞌ byen baɉiꞌa dižəꞌ güen dižəꞌ cobə deꞌen chzeɉniꞌin c̱he Cristənꞌ ganꞌ žaꞌ beṉəꞌ cuiṉəꞌ seꞌene ḻen. Bito gwyaꞌa ga baɉseꞌeczə beṉəꞌ yoblə xtižəꞌ Cristənꞌ.
\v 21 Canꞌ nyoɉczə Xtižəꞌ Diozənꞌ nan:
\q1 Ca naquə beṉəꞌ caꞌ cui noṉəꞌ c̱hix̱ɉueꞌi ḻegaꞌaqueꞌ xtižəꞌ Diozənꞌ, ḻegaꞌaqueꞌ yesəꞌəṉezeneꞌen.
\q1 Naꞌ beṉəꞌ caꞌ cuiṉəꞌ seꞌenen, seꞌeɉniꞌineꞌen.
\s1 Pabənꞌ beneꞌ xbab šeɉeꞌ Romanꞌ
\p
\v 22 Caꞌ chaquənꞌ ža, zan las catəꞌən goꞌondaꞌ yidaꞌ ganꞌ nitəꞌəlenꞌ bito goquə yidaꞌ.
\v 23 Canaꞌatenꞌ zelažaꞌa yidaꞌ, pero xte naꞌach babeyož benaꞌ deꞌen nžiaꞌ Diozənꞌ biaꞌ gonaꞌ latɉə nga.
\v 24 Naꞌ catəꞌ šaꞌa Españanꞌ canaꞌ cheꞌendaꞌ tiaꞌ əgwlaṉaꞌa leꞌe. Mbalaz soaꞌ yeyož əgwlaṉaꞌa leꞌe, nach gaquəlenḻe nadaꞌ par šaꞌa Españanꞌ.
\v 25 Pero ṉaꞌa yeyaꞌa Jerosalenṉəꞌ žɉəyesanaꞌ deꞌe chəsəꞌəyažɉe beṉəꞌ caꞌ nitəꞌənəꞌ, beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 26 Beṉəꞌ Masedonia caꞌ naꞌ beṉəꞌ Acaya caꞌ gwsaꞌazlažeꞌe bosoꞌotobeꞌ mechənꞌ par beṉəꞌ yašəꞌ prob caꞌ žaꞌ entr beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ beṉəꞌ nitəꞌ Jerosalenṉəꞌ.
\v 27 Naꞌ deꞌen gwsaꞌazlažeꞌe bosoꞌotobeꞌ mechənꞌ naquən to goclen deꞌe cheyaḻəꞌ yesyəꞌəyontoczeꞌ len beṉəꞌ Izrael caꞌanəꞌ. Caguə beṉəꞌ Izrael ḻegaꞌaqueꞌ, pero bazɉəleneꞌ beṉəꞌ Izrael caꞌ chəsəꞌəziꞌe deꞌen chaclen yic̱hɉlaꞌaždaꞌogaꞌaqueꞌenəꞌ, naꞌ deꞌe naꞌanəꞌ cheyaḻəꞌ saꞌacleneꞌ beṉəꞌ Izrael caꞌ len deꞌen chəsəꞌəyažɉ chəsəꞌəc̱hineneꞌ.
\v 28 Catəꞌ yeyaꞌa Jerosalenṉəꞌ žɉəyenežɉogaꞌacaꞌaneꞌ mechənꞌ deꞌen bdobənꞌ, canaꞌ tiaꞌ əgwlaṉaꞌa leꞌe catəꞌən šaꞌa Españanəꞌ.
\v 29 Nadaꞌ ṉezdaꞌ catəꞌ laꞌa ganꞌ nitəꞌəlenꞌ naꞌ güeꞌelenchaꞌ leꞌe dižəꞌ güen dižəꞌ cobə c̱he Cristənꞌ, ḻechguaḻe mbanꞌ gon Diozənꞌ len chioꞌo.
\p
\v 30 Chaquecho c̱he X̱ancho Jesocristənꞌ naꞌ Spirit c̱he Diozənꞌ chonən par nic̱h gaque c̱he lɉuežɉcho tocho yetocho. Deꞌe naꞌanəꞌ ža beṉəꞌ bišəꞌ, chṉabaꞌ goclen len leꞌe gacle ndaꞌ txen goncho orasyon lao Diozənꞌ xte ga zelao saqueꞌecho par nic̱h gaquəleneꞌ ndaꞌ.
\v 31 Ṉabechoneꞌ goneꞌ ca cui gacaꞌ lao naꞌ beṉəꞌ Jodea caꞌ, beṉəꞌ caꞌ cui chsoꞌonḻilažəꞌ Cristənꞌ, naꞌ ḻeczə ṉabcho par nic̱h beṉəꞌ Jerosalen caꞌ beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ soꞌolažeꞌe deꞌen güeꞌegaꞌacaꞌaneꞌenəꞌ.
\v 32 Canꞌ goncho orasyonṉəꞌ, naꞌ šə Diozənꞌ güeꞌe latɉə, nadaꞌ yebeidaꞌ yidaꞌ delaṉaꞌa leꞌe, naꞌ gonaꞌ dezcanz ganꞌ nitəꞌəlenəꞌ.
\v 33 Diozənꞌ benꞌ chon par chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ, gaquəleneꞌ yoguəꞌəle. Caꞌašgaczənꞌ gaquə.
\c 16
\s1 Pabənꞌ chguapeꞌ diox beṉəꞌ caꞌ nombiꞌe
\p
\v 1 Chṉeyoidaꞌ leꞌe ḻegon txen len beṉəꞌ zancho Febe catəꞌən leꞌe ganꞌ zolenəꞌ. Leneꞌ nchoɉeꞌ naqueꞌ comisyon c̱he beṉəꞌ caꞌ chəsəꞌədopə chəsəꞌəžag chsoꞌelaogüeꞌe Jesocristənꞌ lao yež Sencreanꞌ.
\v 2 Ḻegon txen len ḻeꞌ, c̱hedəꞌ canꞌ cheyaḻəꞌ gon chioꞌo naccho lažəꞌ naꞌ Diozənꞌ. Canꞌ chonḻilažəꞌəcho X̱ancho Jesocristənꞌ ḻeczə canꞌ chonḻilažəꞌ Febenꞌ ḻeꞌ. Ḻegacleneꞌ šə bi deꞌe chyažɉ chc̱hineneꞌ, c̱hedəꞌ beṉəꞌ zan bagocleneꞌ, naꞌ ḻeczə caꞌ bagocleneꞌ nadaꞌ.
\p
\v 3 Ḻegguap Prisilanꞌ naꞌ beꞌen c̱heꞌ Aquilanꞌ diox. Ḻegaꞌaqueꞌ bagwsoꞌoneꞌ žin c̱he Cristo Jesoꞌosənꞌ txen len nadaꞌ.
\v 4 Bosoꞌosanḻažəꞌ cuingaꞌaqueꞌ saꞌateꞌ par gwsaꞌacleneꞌ nadaꞌ nic̱h cui gwsoꞌot beṉəꞌ nadaꞌ. Chseḻaꞌa yeḻəꞌ chox̱cwlen c̱hegaꞌaqueꞌ canꞌ gwsoꞌoneꞌ, naꞌ ḻeczə caꞌ yoguəꞌ beṉəꞌ cui zɉənaquə beṉəꞌ Izrael beṉəꞌ caꞌ chəsəꞌədopə chəsəꞌəžag chsoꞌelaogüeꞌe Diozənꞌ ga yoblə ḻeczə chosoꞌoseḻeꞌe yeḻəꞌ chox̱cwlen c̱hegaꞌaqueꞌ.
\v 5 Ḻegguap diox beṉəꞌ caꞌ chəsəꞌədopə chəsəꞌəžag liž Prisilanꞌ naꞌ Aquilanꞌ chsoꞌelaogüeꞌe Diozənꞌ. Ḻeczə ḻegguap diox Epenetonꞌ beꞌenəꞌ chacdaꞌ c̱hei. Ḻeꞌ naqueꞌ beṉəꞌ nech benḻilažeꞌe Cristənꞌ entr beṉəꞌ Acaya caꞌ.
\v 6 Ḻegguap diox Marianꞌ, laꞌ babenchgüeꞌ žin par leꞌe.
\v 7 Ḻegguap diox beṉəꞌ gwlaž c̱hiaꞌ Andronico naꞌ Jonias. Txen gotəꞌətoꞌ ližya len ḻegaꞌaqueꞌ. Naꞌ ḻegaꞌaqueꞌ zɉənaqueꞌ beṉəꞌ blao entr netoꞌ apostol, naꞌ ḻegaꞌaqueꞌ byob gwsoꞌonḻilažeꞌe Cristənꞌ ca nadaꞌ.
\p
\v 8 Ḻegguap diox Ampliasənꞌ. Chonḻilažeꞌe X̱ancho Cristənꞌ, naꞌ chacdaꞌ c̱heꞌ.
\v 9 Ḻegguap diox Orbano benꞌ chon txen len chioꞌo choncho xšin Cristo Jesoꞌosənꞌ, naꞌ ḻeczə caꞌ Estaquis beꞌenəꞌ chacdaꞌ c̱hei.
\v 10 Ḻegguap diox Apeles benꞌ babloꞌechgua de que chonḻilažeꞌe Cristənꞌ. Ḻeczə ḻegguap diox beṉəꞌ caꞌ nitəꞌ liž Aristobolo.
\v 11 Ḻegguap diox beṉəꞌ gwlaž c̱hiaꞌ Erodion, naꞌ beṉəꞌ nitəꞌ liž Narsisonꞌ beṉəꞌ chsoꞌonḻilažəꞌ X̱ancho Cristənꞌ.
\v 12 Ḻegguap diox Trifena naꞌ Trifosa beṉəꞌ güen žin c̱he X̱anchonꞌ. Naꞌ ḻeczə caꞌ ḻegguap diox Persida beꞌenəꞌ c̱hacdaꞌ c̱hei. Babenchgüeꞌ xšin X̱anchonꞌ.
\v 13 Ḻegguap diox Rofo. Ḻeꞌ naqueꞌ beṉəꞌ blao entr chioꞌo chonḻilažəꞌəcho X̱anchonꞌ. Naꞌ ḻeczə ḻegguap diox xneꞌenəꞌ beꞌenəꞌ ḻeczə naquə ca xnaꞌa.
\v 14 Ḻegguap diox Asincrito, Flegonte, Ermas, Patrobas, Ermes naꞌ len beṉəꞌ bišəꞌəcho caꞌ nitəꞌ len ḻegaꞌaqueꞌ.
\v 15 Ḻegguap diox Filologo naꞌ Jolia naꞌ Nereo naꞌ beṉəꞌ zaneꞌ, naꞌ Olimpas, naꞌ yoguəꞌ beṉəꞌ yeziquəꞌəchlə nitəꞌ len ḻegaꞌaqueꞌ beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\p
\v 16 Naꞌ catəꞌ chežagle ḻeyolguiž lɉuežɉle dižəꞌ šaoꞌ par nic̱h gacbiaꞌ de que chaque c̱he lɉuežɉle. Naꞌ beṉəꞌ caꞌ nitəꞌ nga naꞌ len beṉəꞌ caꞌ nitəꞌ ga yoblə chəsəꞌədopə chəsəꞌəžag chsoꞌelaogüeꞌe Cristənꞌ, yoguəꞌəgaꞌaqueꞌ chosoꞌoguapeꞌ leꞌe diox.
\p
\v 17 Chṉeyoidaꞌ ḻeꞌe beṉəꞌ bišəꞌ par gaple cuidad len beṉəꞌ caꞌ zɉənaquə beṉəꞌ gotiḻ naꞌ chsoꞌoneꞌ par nic̱h beṉəꞌ yeziquəꞌəchlə chsoꞌoneꞌ deꞌe mal. Beṉəꞌ caꞌ chsoꞌon caꞌ chsoꞌoneꞌ contr deꞌen babsedcho c̱he Diozənꞌ. Naꞌ bito gonḻe txen len ḻegaꞌaqueꞌ.
\v 18 Beṉəꞌ caꞌ chsoꞌon caꞌ bito chosoꞌozenagueꞌ c̱he X̱ancho Jesocristənꞌ, con chsoꞌoneꞌ deꞌe biaꞌazəlažəꞌəgaꞌaqueꞌ. Xochechgua chsoꞌe dižəꞌ chosoꞌopeineꞌ beṉəꞌ caꞌ chseꞌeɉḻeꞌedazə, naꞌ chosoꞌox̱oayagueꞌ ḻegaꞌaqueꞌ.
\v 19 Yoguəꞌ beṉəꞌ zɉəṉezeneꞌ de que leꞌe chzenagle c̱he Diozənꞌ, naꞌ deꞌe naꞌanəꞌ chebeidaꞌ. Naꞌ cheꞌendaꞌ sole cueꞌ yic̱hɉle par gonḻe deꞌe güen caguə par gonḻe deꞌe mal.
\v 20 Naꞌ Diozənꞌ benꞌ chon par chzo chbezcho binḻo ḻeczə ḻeꞌ goneꞌ par nic̱h lgüegwzə əgwleɉ əgwšošɉle xtižəꞌ gwxiyeꞌenəꞌ. Naꞌ X̱ancho Jesocristənꞌ sotezə soeꞌ gaquəlenšgaczeꞌ leꞌe.
\p
\v 21 Temtioꞌ benꞌ chonḻen nadaꞌ žin chguapeꞌ leꞌe diox. Naꞌ ḻeczə caꞌ bišəꞌ lɉuežɉaꞌ quinga chosoꞌoguapeꞌ leꞌe diox, Losionꞌ, Jasonṉəꞌ naꞌ Sosipaterənꞌ.
\p
\v 22 Nadaꞌ Tersio chzoɉaꞌ cart nga con canꞌ na Pabənꞌ, ḻeczə əchguapaꞌ leꞌe diox, ca naquə leꞌe chonḻilažəꞌəle X̱anchonꞌ canꞌ chonḻilažaꞌaneꞌ nadaꞌ.
\p
\v 23 Chguap Gayonꞌ leꞌe diox. Nadaꞌ Pab zoaꞌ ližeꞌenəꞌ. Naꞌ ḻeczə ližeꞌ naꞌ chəsəꞌəžag beṉəꞌ caꞌ chsoꞌelaoꞌ Cristənꞌ. Erasto benꞌ naquə tesorer c̱he syodanꞌ chguapeꞌ leꞌe diox, naꞌ beṉəꞌ bišəꞌəcho Cuarto.
\p
\v 24 Chṉabaꞌ gaquəlen X̱ancho Jesocristənꞌ yoguəꞌəḻoḻle. Naꞌ caꞌašgaczənꞌ gaquə.
\s1 Choꞌelaogüeꞌe Diozənꞌ
\p
\v 25–27 Ḻedoyeꞌelaꞌoch Diozənꞌ zeɉḻicaṉe, Dioz benꞌ naquə ḻeꞌezelaogüe beṉəꞌ sinꞌ. Ḻenꞌ napeꞌ yeḻəꞌ guac par chacleneꞌ chioꞌo nic̱h sotezə socho gonḻilažəꞌəchoneꞌ naꞌ chaclenczeꞌ canꞌ na deꞌen əchyix̱ɉuiꞌa c̱he Jesocristənꞌ. Deꞌen əchyix̱ɉuiꞌa naꞌanəꞌ naquən to dižəꞌ güen dižəꞌ cobə deꞌen cui no gwṉeze dezd ža gwlasdaꞌote, pero ṉaꞌa Diozənꞌ babloꞌineꞌen chioꞌo. Diozənꞌ babeneꞌ ca baṉezechon, babzeɉniꞌineꞌ chioꞌo bi zeɉen deꞌen bosoꞌozoɉ deꞌe profet caꞌ. Dioz benꞌ zo zeɉḻicaṉe beneꞌ mendad par nic̱h yoguəꞌ chioꞌo beṉac̱h əṉezecho dižəꞌ güen dižəꞌ cobə c̱he Jesocristənꞌ par əgwzenagcho c̱heꞌ naꞌ gonḻilažəꞌəcho Jesocristənꞌ. Naꞌ Jesocrist naꞌanəꞌ gaquəleneꞌ chioꞌo par güeꞌelaꞌocho Diozənꞌ zeɉḻicaṉe. Naꞌ caꞌašgaczənꞌ gaquə.
\b
\m Pab