\id 1CO
\ide UTF-8
\h 1 CORINTOS
\toc1 1 Corintios
\mt1 Cart Nech Deꞌen Bzoɉ San Pabənꞌ Par Beṉəꞌ Corinto Caꞌ
\c 1
\s1 Pabənꞌ chzoɉeꞌ beṉəꞌ caꞌ chsoꞌelaoꞌ Cristənꞌ Corintonꞌ
\p
\v 1-2 Nadaꞌ Pab chzoɉaꞌ leꞌe cart nga. Ṉezczele de que Diozənꞌ gwleɉeꞌ nadaꞌ par nacaꞌ apostol c̱he Jesocristənꞌ, c̱hedəꞌ canꞌ gwnalažeꞌe. Chzoɉaꞌ cart nga par leꞌe bagwleɉ Diozənꞌ nic̱h chdopə chžagle choꞌelaꞌole Jesocristənꞌ laoꞌ syoda Corintonꞌ. Nadaꞌ len beṉəꞌ bišəꞌəcho Sostenesənꞌ chguaptoꞌ leꞌe diox. Diozənꞌ bagwleɉeꞌ leꞌe canꞌ gwleɉeꞌ netoꞌ par naccho lao neꞌenəꞌ laogüe deꞌen ngodəꞌəcho txen len Cristo Jesoꞌosənꞌ. Chzoɉaꞌ cart nga par yoguəꞌəḻoḻ beṉəꞌ gatəꞌətezə niteꞌe, beṉəꞌ chsoꞌon orasyon chsoꞌoḻgüižeꞌ X̱ancho Jesocristənꞌ. Naqueꞌ X̱angaꞌaqueꞌ naꞌ ḻeczə naqueꞌ X̱ancho.
\v 3 Chṉabaꞌ lao X̱acho Diozənꞌ naꞌ lao X̱ancho Jesocristənꞌ əsaꞌaclenšgueꞌ leꞌe naꞌ soꞌoneꞌ par so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Cristənꞌ choneꞌ par nic̱h zocho mbalaz
\p
\v 4 Syempr choꞌa yeḻəꞌ chox̱cwlen c̱he Diozənꞌ canꞌ choneꞌ par nic̱h Cristo Jesoꞌosənꞌ chacleneꞌ leꞌe.
\v 5 Deꞌen chonḻilažəꞌəleneꞌ chaclenchgüeꞌ leꞌe par nic̱h cheɉniꞌile yoguəꞌ deꞌe caꞌ babzeɉniꞌi Diozənꞌ leꞌe naꞌ choꞌele dižəꞌ c̱hei.
\v 6 Naꞌ bachonḻe ca nacbiaꞌ de que xtižəꞌ Cristənꞌ deꞌen cheɉḻeꞌele naquən deꞌe ḻi.
\v 7 Chaclen Diozənꞌ leꞌe len xbab deꞌen yoꞌo ḻoꞌo yic̱hɉlaꞌaždaꞌolenꞌ par gonḻilažəꞌəchleneꞌ naꞌ par nic̱h gonchle canꞌ chazlažeꞌenəꞌ žlac chbezcho yidə X̱ancho Jesocristənꞌ yetlas.
\v 8 Diozənꞌ gaquəleneꞌ leꞌe soczle gonḻe canꞌ chazlažeꞌenəꞌ par nic̱h catəꞌən yidə X̱ancho Jesocristənꞌ yetlas notono gaquə əṉeꞌ de que naple doḻəꞌ.
\v 9 Diozənꞌ zotezə zoeꞌ choneꞌ complir canꞌ neꞌenəꞌ. Ḻeꞌenəꞌ bagwleɉeꞌ leꞌe par nic̱h naquə yic̱hɉlaꞌaždaꞌolenꞌ tozə len yic̱hɉlaꞌaždaoꞌ Xiꞌiṉeꞌ Jesocristənꞌ benꞌ naquə X̱anchonꞌ.
\s1 Beṉəꞌ caꞌ chsoꞌelaoꞌ Cristənꞌ Corintonꞌ bito zɉənaqueꞌ tozə
\p
\v 10 Beṉəꞌ bišəꞌ, laogüe deꞌen chonḻilažəꞌəcho X̱ancho Jesocristənꞌ chṉeyoidaꞌ leꞌe gonḻe txen len lɉuežɉle naꞌ bito tiḻə gwšašle. Tozə xbab gonḻe naꞌ tozə canꞌ əgwžiale biaꞌ.
\v 11 Beṉəꞌ bišəꞌ, beṉəꞌ caꞌ nitəꞌ liž Cloe babosoꞌozeneneꞌ nadaꞌ de que chdiḻə chšašle.
\v 12 Eniaꞌ chdiḻə chšašle, c̱hedəꞌ baḻle nale: “Naoguaꞌ deꞌen chsed chloꞌi Pab.” Naꞌ yebaḻle nale: “Naoguaꞌ deꞌen chsed chloꞌi Apolos.” Naꞌ yebaḻle nale: “Naoguaꞌ deꞌen chsed chloꞌi Bed.” Naꞌ yebaḻle nale: “Naoguaꞌ deꞌen bsed bloꞌi Cristənꞌ.”
\v 13 ¿Echaquele bseḻəꞌ Diozənꞌ Cristənꞌ par yebeɉeꞌ to c̱hopzle xniꞌa deꞌe malənꞌ? ¿Enaꞌ chaquele nadaꞌ Pabənꞌ gwsoꞌoteꞌ ḻeꞌe yag corozənꞌ par gwdixɉuaꞌ xtoḻəꞌəle caꞌ? Naꞌalɉe ¿əpor la nadaꞌanəꞌ gwchoale nisənꞌ? Bito.
\v 14 Crispo naꞌ Gayo naꞌazənꞌ bc̱hoꞌa nis. Naꞌ chox̱cwlen Diozənꞌ notoch no zo entr leꞌe beṉəꞌ yesəꞌəneꞌ de que ḻeczə nadaꞌ bc̱hoꞌagaꞌacaꞌaneꞌ nis.
\v 15 Bito cheꞌendaꞌ no əṉa de que por laꞌ naꞌanəꞌ gwchoeꞌ nisənꞌ.
\v 16 Naꞌ ḻeczə nadaꞌ bc̱hoaꞌ beṉəꞌ caꞌ nitəꞌ liž Estefanasənꞌ nis. Naꞌ bitoch chɉsaꞌalažaꞌa šə noch zo beṉəꞌ bc̱hoꞌa nis.
\v 17 Ṉezdaꞌ Cristənꞌ bito bseḻeꞌe nadaꞌ par gwc̱hoꞌa beṉəꞌ nis. Bseḻeꞌe nadaꞌ par chyix̱ɉuiꞌa dižəꞌ güen dižəꞌ cobə c̱heꞌenəꞌ. Naꞌ catəꞌ chyix̱ɉuiꞌan bito choꞌa dižəꞌ zdebə deꞌe cui seꞌeɉniꞌi beṉəꞌ. Bito cheꞌendaꞌ no gaque de que nadaꞌ nacaꞌ beṉəꞌ sinꞌ, c̱hedəꞌ šə soꞌoneꞌ xbab c̱he yeḻəꞌ sinꞌ c̱hiaꞌanəꞌ bito əsaꞌaqueneꞌ de que deꞌe zaqueꞌenəꞌ ca deꞌen bnežɉw cuin Cristənꞌ gwsoꞌot beṉəꞌ ḻeꞌ ḻeꞌe yag corozənꞌ.
\s1 Cristənꞌ bedəloꞌe yeḻəꞌ chnabiaꞌ naꞌ yeḻəꞌ sinꞌ c̱he Diozənꞌ
\p
\v 18 Beṉəꞌ caꞌ cui chosoꞌozenag c̱he Diozənꞌ yesəꞌəbiayiꞌe zejḻicaṉe. Ḻegaꞌaqueꞌ bito chseꞌeneneꞌ no güeꞌelen ḻegaꞌaqueꞌ dižəꞌ canꞌ gwsoꞌot beṉəꞌ Cristənꞌ ḻeꞌe yag corozənꞌ. Pero Cristənꞌ babeneꞌ par nic̱h chioꞌo cui yeyeɉcho lao yiꞌ gabiḻənꞌ. Naꞌ ṉezecho de que zaquəꞌəchgua dižəꞌ deꞌen choꞌecho de que gwsoꞌoteꞌeneꞌ ḻeꞌe yag corozənꞌ, c̱hedəꞌ dižəꞌ nanꞌ chzeɉniꞌin beṉəꞌ de que Diozənꞌ napeꞌ yeḻəꞌ guac par chocobeꞌ yic̱hɉlaꞌaždaoꞌ notəꞌətezcho chonḻilažəꞌəchoneꞌ.
\v 19 Chac canꞌ na Xtižəꞌ Diozənꞌ deꞌen nyoɉən:
\q1 Nadaꞌ gonaꞌ par nic̱h nacbiaꞌ de que beṉəꞌ sinꞌ caꞌ caguə deꞌe ḻi zɉənsineꞌenəꞌ,
\q1 naꞌ gonaꞌ par nic̱h beṉəꞌ caꞌ chseꞌeɉniꞌi deꞌe zan lao yežlyo nga bito bi bi de gon ca deꞌen chseꞌeɉniꞌineꞌenəꞌ.
\p
\v 20 Nitəꞌ beṉəꞌ bazɉənsed yeḻəꞌ sinꞌ c̱he beṉac̱hənꞌ, naꞌ nitəꞌ beṉəꞌ chosoꞌosed chosoꞌoloꞌi ḻei c̱he Diozənꞌ, naꞌ nitəꞌ beṉəꞌ chsoꞌe dižəꞌ c̱he deꞌen chac lao yežlyo nga. Beṉəꞌ caꞌ chsaꞌaqueneꞌ chsoꞌoneꞌ xbab sinꞌ, pero lao Diozənꞌ bito bi bi zaquəꞌ xbab c̱hegaꞌaqueꞌenəꞌ.
\v 21 Diozənꞌ naqueꞌ beṉəꞌ sinꞌ naꞌ ḻeꞌenəꞌ beneꞌ par nic̱h yeḻəꞌ sinꞌ c̱he beṉac̱hənꞌ bito chaclenən beṉəꞌ par soꞌombiꞌeneꞌ. Pero naꞌ con beṉəꞌ seꞌeɉḻeꞌ xtižeꞌenəꞌ deꞌen chyix̱ɉueꞌetoꞌ, Diozənꞌ chazlažeꞌe yebeɉeꞌ ḻegaꞌaqueꞌ xniꞌa deꞌe malənꞌ, ḻaꞌaṉəꞌəczə beṉəꞌ caꞌ cui zɉənombiaꞌ Diozənꞌ chsaꞌaqueneꞌ de que bito bi bi zaquəꞌ dižəꞌ deꞌen chyix̱ɉueꞌetoꞌ.
\p
\v 22 Ca naquə beṉəꞌ Izrael caꞌ cui chsoꞌonḻilažəꞌ Cristənꞌ, chəsəꞌəṉabeꞌ yesəꞌəleꞌineꞌ miḻagr par yesəꞌəṉezeneꞌ šə ḻe Dioz nanꞌ bseḻeꞌe Cristənꞌ, naꞌ ḻeꞌegatezə caꞌ beṉəꞌ caꞌ cui zɉənaquə beṉəꞌ Izrael naꞌ cui chsoꞌonḻilažeꞌe Cristənꞌ, zɉəchiꞌ yic̱hɉgaꞌaqueꞌ porzə c̱he bitəꞌətezə dižəꞌ cobə deꞌen chsaꞌaqueneꞌ naquən dižəꞌ sinꞌ.
\v 23 Pero naꞌ netoꞌ chyix̱ɉueꞌetoꞌ canꞌ gwsoꞌoteꞌ Cristənꞌ ḻeꞌe yag corozənꞌ. Naꞌ catəꞌ chyix̱ɉueꞌetoꞌon beṉəꞌ Izrael caꞌ bito chsaꞌazlažeꞌe naꞌ bito chseꞌeɉḻeꞌe c̱hei. Naꞌ ḻeczə beṉəꞌ caꞌ cui zɉənaquə beṉəꞌ Izraelənꞌ catəꞌ chseꞌeneneꞌ dižəꞌ deꞌen chyix̱ɉueꞌetoꞌ, ḻeczə chsaꞌaqueneꞌ de que bito bi bi zaquəꞌən.
\v 24 Pero chioꞌo bagwleɉ Diozənꞌ par naccho xiꞌiṉeꞌ, chioꞌo naccho beṉəꞌ Izrael naꞌ chioꞌo cui naccho beṉəꞌ Izrael, ṉezecho de que Diozənꞌ chloꞌe yeḻəꞌ chnabiaꞌ c̱heꞌenəꞌ naꞌ yeḻəꞌ sinꞌ c̱heꞌenəꞌ ca deꞌen bseḻeꞌe Cristənꞌ gwsoꞌoteꞌeneꞌ por ni c̱hecho.
\v 25 Naꞌ deꞌen bseḻeꞌeneꞌ gwsoꞌot beṉəꞌ ḻeꞌ por ni c̱hechonꞌ beṉac̱hənꞌ chsaꞌaqueneꞌ de que bito bi zaquəꞌ deꞌen chon Diozənꞌ, naꞌ chsaꞌaqueneꞌ de que bito bi yeḻəꞌ chnabiaꞌ napə Diozənꞌ. Naꞌ ca deꞌen bseḻeꞌeneꞌ chloꞌen de que Diozənꞌ ḻechguaḻe beṉəꞌ sinꞌ naqueꞌ cle ca beṉac̱hənꞌ naꞌ ḻechguaḻe chnabiꞌacheꞌ ca beṉac̱hənꞌ.
\v 26 Ḻeꞌe gon xbab beṉəꞌ bišəꞌ, Diozənꞌ gwleɉeꞌ chioꞌo par naccho xiꞌiṉeꞌ. Bito naquə zancho beṉəꞌ sinꞌ segon canꞌ chsoꞌon beṉac̱hənꞌ xbab c̱hecho, naꞌ nic naquə zancho beṉəꞌ gwnabiaꞌ, naꞌ nic naquə zancho beṉəꞌ blao.
\v 27 Diozənꞌ gwleɉeꞌ chioꞌo par naccho xiꞌiṉeꞌ, ḻaꞌaṉəꞌəczə bito naccho beṉəꞌ sinꞌ naꞌ ḻaꞌaṉəꞌəczə bito naccho beṉəꞌ gwnabiaꞌ. Gwleɉeꞌ chioꞌo par nic̱h chzeɉniꞌineꞌ beṉəꞌ caꞌ cui zɉənombiꞌeneꞌ de que yeḻəꞌ sinꞌ naꞌ yeḻəꞌ gwnabiaꞌ c̱hegaꞌaqueꞌenəꞌ bito bi zɉəzaquəꞌən laogüeꞌenəꞌ.
\v 28 Chioꞌo cui naccho beṉəꞌ blao naꞌ cui bi zaquəꞌəcho par beṉac̱hənꞌ. Deꞌe naꞌanəꞌ beṉəꞌ caꞌ cui zɉənombiaꞌ Diozənꞌ chəsəꞌəgueꞌineꞌ chioꞌo. Pero Dioz naꞌanəꞌ gwleɉeꞌ chioꞌo par naccho xiꞌiṉeꞌ nic̱h saꞌacbeꞌineꞌ de que bitobi bi zaquəꞌ xbab c̱hegaꞌaqueꞌenəꞌ ca deꞌen chosoꞌozoeꞌ Diozənꞌ caꞌaḻə.
\v 29 Naꞌ Diozənꞌ babeneꞌ par nic̱h notono no gaquə güeꞌelaoꞌ cuine laogüeꞌenəꞌ.
\v 30 Dioz naꞌanəꞌ babeneꞌ par nic̱h ngodəꞌəcho txen len Cristo Jesoꞌosənꞌ. Diozənꞌ banoneꞌ chioꞌo beṉəꞌ sinꞌ c̱hedəꞌ Cristənꞌ naqueꞌ beṉəꞌ sinꞌ. Banoneꞌ par nic̱h naccho beṉəꞌ güen laogüeꞌenəꞌ, c̱hedəꞌ Cristənꞌ naqueꞌ beṉəꞌ güen laogüeꞌenəꞌ. Banoneꞌ laꞌaždaꞌochonꞌ xiꞌilažəꞌ c̱hedəꞌ Cristənꞌ naqueꞌ beṉəꞌ laꞌaždaoꞌ xiꞌilažəꞌ. Naꞌ ḻeczə ḻeꞌenəꞌ babeneꞌ par nic̱h cui bi xtoḻəꞌəchonꞌ de, c̱hedəꞌ Cristənꞌ gwdixɉueꞌ xtoḻəꞌəchonꞌ.
\v 31 Naꞌ nyoɉ Xtižəꞌ Diozənꞌ nan: “Bito cheyaḻəꞌ güeꞌelaoꞌ cuincho sino cheyaḻəꞌ güeꞌelaꞌocho X̱ancho Diozənꞌ.”
\c 2
\s1 Pabənꞌ beꞌe xtižəꞌ Cristənꞌ benꞌ gwsoꞌot beṉəꞌ mal caꞌ ḻeꞌe yag corozənꞌ
\p
\v 1 Beṉəꞌ bišəꞌ, catəꞌ bedəyaꞌa xtižəꞌ Diozənꞌ ganꞌ zolenꞌ bito biꞌa dižəꞌ zdebə deꞌe cui šeɉniꞌile, naꞌ caguə biꞌa dižəꞌ par nic̱h gonḻe xbab de que nadaꞌ nacaꞌ beṉəꞌ sinꞌ.
\v 2 Gwniaꞌ ḻoꞌo laꞌaždaoguaꞌa de que žlac soaꞌ len leꞌe bito bi bichlə dižəꞌ guaꞌa sino que guaꞌa dižəꞌ c̱he Jesocristənꞌ naꞌ canꞌ gwsoꞌoteꞌeneꞌ ḻeꞌe yag corozənꞌ, naꞌ benaꞌ canꞌ gwniaꞌ ḻoꞌo laꞌaždaoguaꞌanəꞌ catəꞌən bidaꞌ ganꞌ zolenəꞌ.
\v 3 Gocbeꞌidaꞌ bito bi gaquə gonaꞌ par nic̱h šeɉḻeꞌele dižəꞌ deꞌen guaꞌanəꞌ naꞌ deꞌe naꞌanəꞌ ḻechguaḻe bžebaꞌ naꞌ goləꞌ gwxizaꞌ catəꞌ benaꞌ xbab šə gwzenagle c̱hiaꞌ.
\v 4 Naꞌ catəꞌ biꞌa dižəꞌ c̱he Cristənꞌ bito biꞌa dižəꞌ len yeḻəꞌ sinꞌ c̱hiaꞌ par nic̱h gonḻe canꞌ gwniꞌanəꞌ. Spirit c̱he Diozənꞌ gocwlenən leꞌe len yeḻəꞌ guac c̱heinəꞌ par nic̱h gocbeꞌile de que dižəꞌ ḻinꞌ biꞌa.
\v 5 Biꞌa dižəꞌən caꞌ par nic̱h notono no gaquə əṉa de que chonḻilažəꞌəle Diozənꞌ por ni c̱he yeḻəꞌ sinꞌ c̱hiaꞌanəꞌ. Ṉezczecho de que Dioz nanꞌ gocwleneꞌ leꞌe len yeḻəꞌ guac c̱heꞌenəꞌ par nic̱h chonḻilažəꞌəleneꞌ.
\s1 Spirit c̱he Diozənꞌ chonən par nic̱h cheɉniꞌitoꞌ
\p
\v 6 Naꞌ deꞌe ḻi chaclen Diozənꞌ netoꞌ par nic̱h choꞌetoꞌ dižəꞌ sinꞌ len beṉəꞌ caꞌ bachseꞌeɉniꞌi xtižeꞌenəꞌ. Pero naꞌ yeziquəꞌəchlə beṉəꞌ žaꞌ yežlyo nga bito chsaꞌaqueneꞌ de que xtižəꞌətoꞌon naquən deꞌe sinꞌ. Naꞌ ni que chsaꞌaque beṉəꞌ gwnabiaꞌ caꞌ žaꞌ yežlyo nga de que choꞌetoꞌ dižəꞌ sinꞌ. Naꞌ ca naquə beṉəꞌ gwnabiaꞌ caꞌ žaꞌ yežlyo nga, gwžin ža catəꞌ te yeḻəꞌ gwnabiaꞌ c̱hegaꞌaqueꞌenəꞌ.
\v 7 Naꞌ dižəꞌ sinꞌ deꞌen choꞌetoꞌ, Dioz nanꞌ babzeɉniꞌineꞌen netoꞌ. Notono gwṉeze dižəꞌ sinꞌ c̱heꞌenəꞌ antslə, pero ṉaꞌa babzeɉniꞌineꞌen netoꞌ. Lao yeḻəꞌ beṉəꞌ sinꞌ c̱he Diozənꞌ gwc̱hoglaogüeꞌen nac goneꞌ par nic̱h goṉeꞌ chioꞌo yeḻəꞌ balaꞌaṉ.
\v 8 Naꞌ ni tozə beṉəꞌ gwnabiaꞌ beṉəꞌ žaꞌ yežlyo nga bito gwseꞌeɉniꞌineꞌ yeḻəꞌ sinꞌ c̱he Diozənꞌ. Laꞌ žaləꞌ gwseꞌeɉniꞌineꞌen, bito bosoꞌodeꞌe X̱ancho Jesocristənꞌ ḻeꞌe yag corozənꞌ, benꞌ naquə ḻeꞌezelaogüe beṉəꞌ zaqueꞌe.
\v 9 Naꞌ Xtižəꞌ Diozənꞌ deꞌen nyoɉən nan:
\q1 Notono ṉeꞌe leꞌi deꞌe šaoꞌ deꞌe güen deꞌen gon Diozənꞌ len beṉəꞌ caꞌ chsaꞌaqueneꞌ c̱heꞌ,
\q1 naꞌ nic noṉəꞌ yesəꞌəṉeze canꞌ goneꞌ,
\q1 naꞌ nic noṉəꞌ gon xbab c̱hei ḻoꞌo yic̱hɉlaꞌaždaogüeꞌenəꞌ.
\m
\v 10 Pero ṉaꞌa ža, Diozənꞌ babeneꞌ par nic̱h Spirit c̱heꞌenəꞌ bzeɉniꞌin chioꞌo ca naquə deꞌe güen deꞌen choneꞌ len chioꞌo chaquecho c̱heꞌ. Tchoꞌa tšaoꞌ cheɉniꞌi Spirit c̱he Diozənꞌ canꞌ choneꞌenəꞌ, naꞌ ḻeczə ṉez nleꞌin deꞌen ngašəꞌ len beṉac̱hənꞌ.
\p
\v 11 Notono no ṉeze bi xbab chon beṉəꞌ yoblə, c̱hedəꞌ con to tocho ṉezecho bi xbabənꞌ choncho. Naꞌ nic no ṉeze bi xbabənꞌ chon Diozənꞌ. Spirit c̱heꞌ naꞌazənꞌ ṉezen bi xbabənꞌ choneꞌ.
\v 12 Naꞌ Diozənꞌ bseḻeꞌe Spirit c̱heꞌenəꞌ zon ḻoꞌo laꞌaždaꞌochonꞌ par nic̱h chṉezecho yoguəꞌəḻoḻ deꞌe šaoꞌ deꞌe güen deꞌen chon Diozənꞌ len chioꞌo laogüe deꞌen nžiꞌilažeꞌe chioꞌo. Deꞌe naꞌanəꞌ bitoch choncho xbab ca xbab deꞌen chsoꞌon beṉəꞌ yeziquəꞌəchlə žaꞌ yežlyo nga.
\v 13 Netoꞌ choꞌetoꞌ dižəꞌ c̱he deꞌe caꞌ chon Diozənꞌ len chioꞌo, pero caguə choꞌetoꞌon lao yeḻəꞌ beṉəꞌ sinꞌ c̱hetoꞌonəꞌ. Spirit c̱he Dioz nanꞌ chzeɉniꞌin netoꞌ dižəꞌ deꞌen choꞌetoꞌonəꞌ. Naꞌ beṉəꞌ caꞌ bayoꞌo Spirit c̱he Diozənꞌ ḻoꞌo yic̱hɉlaꞌaždaꞌogaꞌaqueꞌenəꞌ, ḻegaꞌaczeꞌenəꞌ chseꞌeɉniꞌineꞌ deꞌen chsed chloꞌigaꞌaquetoꞌoneꞌ.
\p
\v 14 Naꞌ beṉəꞌ caꞌ cui yoꞌo Spirit c̱he Diozənꞌ ḻoꞌo yic̱hɉlaꞌaždaꞌogaꞌaqueꞌenəꞌ, bito gaquə seꞌeɉniꞌineꞌ deꞌen chsed chloꞌi Spiritənꞌ c̱hedəꞌ chsaꞌaqueneꞌ bito bi bi zaquəꞌən par ḻegaꞌaqueꞌ. Bito chseꞌeɉniꞌineꞌen c̱hedəꞌ bito yoꞌo Spiritənꞌ ḻoꞌo yic̱hɉlaꞌaždaꞌogaꞌaqueꞌenəꞌ par gaquəlenən ḻegaꞌaqueꞌ seꞌeɉniꞌineꞌen.
\v 15 Chioꞌo bayoꞌo Spirit c̱he Diozənꞌ ḻoꞌo yic̱hɉlaꞌaždaꞌochonꞌ, deꞌe naꞌanəꞌ chaclenən chioꞌo par nic̱h chacbeꞌicho c̱he bitəꞌətezə deꞌen goncho šə naquən güen o šə naquən mal gonchon. Pero naꞌ beṉəꞌ yeziquəꞌəchlə bito chseꞌeɉniꞌineꞌ de que deꞌen cheneꞌe Spirit c̱he Diozənꞌ gon chioꞌo naquən deꞌe güen.
\v 16 Naꞌ Xtižəꞌ Diozənꞌ deꞌen nyoɉən nan: “Notono zo no cheɉniꞌi xbab c̱he X̱ancho Diozənꞌ to gwlazzeꞌ. Naꞌ Diozənꞌ bito bi de deꞌe əgwsed əgwloꞌi beṉac̱hənꞌ ḻeꞌ.” Pero Diozənꞌ babeneꞌ par nic̱h choncho xbab canꞌ chazlažəꞌ Cristənꞌ.
\c 3
\s1 Txenṉəꞌ gwsoꞌoneꞌ xšin Diozənꞌ
\p
\v 1 Beṉəꞌ bišəꞌ, catəꞌ biꞌa xtižəꞌ Diozənꞌ len leꞌe, bito biꞌan canꞌ choꞌan len beṉəꞌ caꞌ bachosoꞌozenag c̱he Spirit c̱he Diozənꞌ, c̱hedəꞌ leꞌe ṉeꞌe chzenagle c̱he laꞌaždaꞌomallenꞌ. Ḻaꞌaṉəꞌəczə bachonḻilažəꞌəle Cristənꞌ gwxaquəꞌəlebele ca bidaoꞌ.
\v 2 Catəꞌ zeꞌe gwzolaole chonḻilažəꞌəle Cristənꞌ gwxaquəꞌəlebele ca bidaoꞌ ṉeꞌe chsaꞌažəꞌ laogüe deꞌen cuiṉəꞌ šeɉniꞌišaꞌogüeꞌele deꞌe caꞌ cheneꞌe Diozənꞌ šeɉniꞌile. Deꞌe naꞌanəꞌ bsed bloꞌidaꞌ leꞌe deꞌe caꞌ cui naquə zdebə šeɉniꞌile, naꞌ xte ža ṉeža ṉeꞌe chsed chloꞌidaꞌ leꞌe caꞌ c̱hedəꞌ cuiṉəꞌ gac šeɉniꞌile deꞌen naquə zdebə.
\v 3 Nacbiaꞌ bitoṉəꞌ gac šeɉniꞌile deꞌen naquə zdebə, c̱hedəꞌ ṉeꞌe chzenagle c̱he laꞌaždaꞌomallenꞌ. Deꞌen chgueꞌi lɉuežɉle naꞌ chdiḻə chžašle zeɉe dižəꞌ chzenagczle c̱he laꞌaždaꞌomallenꞌ canꞌ chsoꞌon beṉəꞌ caꞌ cui chsoꞌonḻilažəꞌ Cristənꞌ.
\v 4 Chzenagle c̱he laꞌaždaꞌomallenꞌ ca deꞌen na baḻle: “Deꞌen chsed chloꞌi Pabənꞌ naoguaꞌ”, naꞌ yebaḻle nale: “Deꞌen chsed chloꞌi Apolosənꞌ naoguaꞌ.” Deꞌe naꞌanəꞌ niaꞌ chonḻe canꞌ chsoꞌon beṉəꞌ caꞌ cui chsoꞌonḻilažəꞌ Cristənꞌ.
\p
\v 5 ¿Noxa nadaꞌ Pab naꞌ noxa Apolosənꞌ? Netoꞌ naquətoꞌ beṉəꞌ güen xšin Diozənꞌ naꞌ netoꞌ beꞌelentoꞌ leꞌe xtižeꞌenəꞌ. Naꞌ cuin Diozənꞌ beneꞌ par nic̱h baḻle benḻilažəꞌəle Cristənꞌ catəꞌ biꞌa dižəꞌ güen dižəꞌ cobə c̱heꞌenəꞌ len leꞌe naꞌ ḻeczə beneꞌ par nic̱h yebaḻle benḻilažəꞌəle Cristənꞌ catəꞌən Apolosənꞌ beꞌeleneꞌen leꞌe.
\v 6 Zguaꞌatec nadanꞌ beꞌelenaꞌ leꞌe xtižəꞌ Diozənꞌ naꞌ gwxaquəꞌəlebədaꞌ ca to beṉəꞌ chaz. Naꞌ laogüe deꞌen ḻeczə bsed bloꞌi Apolosənꞌ leꞌe, gwxaquəꞌəlebeneꞌ ca beꞌen chyil. Naꞌ canꞌ chon Diozənꞌ nic̱h chchaꞌo chxen deꞌen chazcho, ḻeczə canꞌ beneꞌ par nic̱h gwyeɉleꞌele xtižeꞌenəꞌ deꞌen beꞌelentoꞌ leꞌe.
\v 7 Bitotec bi zacaꞌa nadaꞌ deꞌen beꞌelenaꞌ leꞌe xtižəꞌ Diozənꞌ, naꞌ nic Apolosənꞌ deꞌen bsed bloꞌicheneꞌen leꞌe. Dioz nanꞌ zaquəꞌ c̱hedəꞌ ḻeꞌenəꞌ beneꞌ par nic̱h gwyeɉḻeꞌele xtižeꞌenəꞌ.
\v 8 Benꞌ chyix̱ɉueꞌe xtižəꞌ Diozənꞌ deꞌe neche naꞌ benꞌ chyix̱ɉueꞌen deꞌe gwchope, txenṉəꞌ chsoꞌoneꞌ xšin Diozənꞌ naꞌ tozəczə canꞌ cheyaḻəꞌ gapəgaꞌacchoneꞌ respet. Naꞌ Diozənꞌ goneꞌ par nic̱h to toeꞌ yesəꞌəniteꞌe mbalaz segon canꞌ gwsoꞌoneꞌ xšineꞌenəꞌ.
\v 9 Netoꞌ ža, txenṉəꞌ chontoꞌ xšin Diozənꞌ entr leꞌe. Deꞌe naꞌanəꞌ gwxaquəꞌəlebetoꞌ ca beṉəꞌ goz goꞌoṉ naꞌ leꞌe gwxaquəꞌəlebele ca yežlyonꞌ ganꞌ chac žinṉəꞌ.
\p Naꞌ ḻeczə leꞌe chdopə chžagle choꞌelaꞌole Cristənꞌ yoguəꞌəle txen gwxaquəꞌəlebele ca to yoꞌo c̱he Diozənꞌ naꞌ netoꞌ gwxaquəꞌəlebetoꞌ ca beṉəꞌ ben yoꞌonəꞌ.
\v 10 Diozənꞌ gocleneꞌ nadaꞌ par nic̱h naca beṉəꞌ nech benaꞌ xšineꞌenəꞌ entr leꞌe. Deꞌe naꞌanəꞌ gwxaquəꞌəlebədaꞌ ca beṉəꞌ bx̱e lan yoꞌo. Naꞌ benaꞌ xšineꞌenəꞌ ca chon to mues beṉəꞌ chacchgua. Naꞌ nitəꞌ beṉəꞌ yoblə beṉəꞌ ḻeczə bosoꞌosed bosoꞌoloꞌineꞌ leꞌe naꞌ ḻegaꞌaqueꞌ gwxaquəꞌəlebəgaꞌaqueneꞌ ca beṉəꞌ gosəꞌəbec zeꞌenəꞌ. Naꞌ šə nochlə beṉəꞌ yosoꞌosed yosoꞌoloꞌineꞌ leꞌe, cheyaḻəꞌ soꞌoneꞌ xbab par nic̱h yosoꞌosed yosoꞌoloꞌineꞌ leꞌe porzə deꞌen naquə deꞌe ḻi.
\v 11 Leꞌe chdopə chžagle choꞌelaꞌole Jesocristənꞌ yoguəꞌəle txenṉəꞌ gwxaquəꞌəlebele ca to yoꞌo deꞌen chac, naꞌ Jesocristənꞌ gwxaquəꞌəlebeneꞌ ca lan yoꞌonəꞌ. Naꞌ šə no cheneꞌe əgwx̱e laneinəꞌ deꞌe yoblə, bitoch gaquə, c̱hedəꞌ tozə Jesocristənꞌ zaqueꞌe par gonḻilažəꞌəchoneꞌ.
\v 12 Ṉezecho chcheɉe bitəꞌətezə zeꞌe deꞌe chx̱e beṉəꞌ lao lan yoꞌonəꞌ segon šə noneꞌen de or, de pḻat, de yeɉ fin, de yag, de yix, o de dod. Canꞌ gwxaquəꞌəlebe deꞌen yosoꞌosed yosoꞌoloꞌi beṉəꞌ leꞌe.
\v 13 Naꞌ catəꞌ əžin ža c̱hoglao Diozənꞌ c̱he yoguəꞌəḻoḻ beṉəꞌ, canaꞌach laꞌalaon c̱he to to beṉəꞌ bosoꞌosed bosoꞌoloꞌineꞌ leꞌe šə bosoꞌosed bosoꞌoloꞌineꞌ leꞌe deꞌen naquə deꞌe ḻi, o šə cui. Naꞌ šə bosoꞌosed bosoꞌoloꞌineꞌ leꞌe deꞌen naquə deꞌe ḻi, gwxaquəꞌəlebəgaꞌaqueneꞌ ca to beṉəꞌ ben yoꞌo de or de pḻat o de yeɉ fin c̱hedəꞌ deꞌe caꞌ bito chseꞌeyən. Pero naꞌ šə bosoꞌosed bosoꞌoloꞌineꞌ leꞌe clelə, gwxaquəꞌəlebəgaꞌaqueneꞌ ca to beṉəꞌ ben yoꞌo de yag, de yix, o de dod c̱hedəꞌ deꞌe caꞌ chseꞌeyən. Catəꞌ əžin žanꞌ c̱hoglao Diozənꞌ c̱he yoguəꞌəḻoḻ beṉəꞌ, goneꞌ ca laꞌalaon šə deꞌen ben to to beṉəꞌ güen xšineꞌenəꞌ naquən deꞌe zaqueꞌe o šə bito bi zaquəꞌən. Caꞌaczənꞌ nḻaꞌalaon c̱he to to yoꞌo segon naquənꞌ zɉənaquən.
\v 14 Beṉəꞌ caꞌ bosoꞌosed bosoꞌoloꞌineꞌ leꞌe deꞌen naquə deꞌe ḻi, cuin Diozənꞌ goneꞌ ca yesəꞌəziꞌ benəꞌ caꞌ yeḻəꞌ balaꞌaṉ.
\v 15 Pero beṉəꞌ caꞌ bosoꞌosed bosoꞌoloꞌineꞌ leꞌe clelə gwxaquəꞌəlebəgaꞌaqueneꞌ ca beṉəꞌ šey liženꞌ. Naꞌ nacchguaze gaquə yesəꞌəchoɉeꞌ par cui seꞌeyeꞌ, bito bi yeḻəꞌ balaꞌaṉ yesəꞌəziꞌe c̱hedəꞌ bito bosoꞌosed bosoꞌoloꞌineꞌ leꞌe canꞌ cheyaḻəꞌ.
\p
\v 16 Chioꞌo chdopə chžagcho choꞌelaꞌocho Jesocristənꞌ, yoguəꞌəcho txenṉəꞌ gwxaquəꞌəlebecho ca to yoꞌodaoꞌ ganꞌ chsoꞌelaoꞌ beṉəꞌ Diozənꞌ c̱hedəꞌ Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ.
\v 17 Naꞌ šə to beṉəꞌ goneꞌ par nic̱h chioꞌo chdopə chžagcho choꞌelaꞌocho Cristənꞌ cueɉyic̱hɉcho dižəꞌ ḻi c̱he Diozənꞌ, Diozənꞌ gwnežɉueꞌ castigw zeɉḻicaṉə c̱he benꞌ gon caꞌ, c̱hedəꞌ bagwleɉ Diozənꞌ chioꞌo par naccho lažəꞌ neꞌenəꞌ naꞌ zo Spirit c̱heꞌenəꞌ ḻoꞌo yic̱hɉlaꞌaždaꞌochonꞌ.
\p
\v 18 Šə nocho chaquecho nsiꞌincho, bito cheyaḻəꞌ xoayagcho. Cheyaḻəꞌ gacbeꞌicho de que bitotec bi zaquəꞌ xbab c̱hechonꞌ nic̱h caꞌ Diozənꞌ goṉeꞌ chioꞌo yeḻəꞌ sinꞌ c̱heꞌenəꞌ.
\v 19 Beṉəꞌ caꞌ cui zɉənombiaꞌ Diozənꞌ yeḻəꞌ sinꞌ c̱hegaꞌaqueꞌenəꞌ bitobi zaquəꞌən lao Diozənꞌ. Laꞌ nyoɉczə Xtižəꞌ Diozənꞌ nan: “Beṉəꞌ caꞌ chsaꞌaqueneꞌ zɉənaqueꞌ beṉəꞌ sinꞌ, Diozənꞌ goneꞌ par nic̱h yesəꞌəbiayiꞌe por ni c̱he xbab mal c̱hegaꞌaqueꞌenəꞌ.”
\v 20 Naꞌ yeto ganꞌ nyoɉən nan: “X̱ancho nanꞌ ṉeze de que xbab c̱he beṉəꞌ sinꞌ caꞌ bito gaquəlenən ḻegaꞌaqueꞌ par soꞌombiꞌeneꞌ.”
\v 21 Ca naquə netoꞌ əbsed əbloꞌitoꞌ leꞌe, bito gonḻe xbab de que naquətoꞌ ḻeꞌebeyože beṉəꞌ zaqueꞌe. Dioz naꞌaczənꞌ bseḻeꞌe yoguəꞌətoꞌ par chaclentoꞌ leꞌe naꞌ bsiꞌe xṉeze par nic̱h bitəꞌətezəchlə deꞌe zɉəde naꞌ deꞌe caꞌ chac chsaꞌaclenən leꞌe.
\v 22 Diozənꞌ bseḻeꞌe nadaꞌ naꞌ Apolosənꞌ naꞌ Bedənꞌ par chaclentoꞌ leꞌe. Naꞌ beneꞌ yežlyonꞌ par nic̱h ḻeczə chaclenən chioꞌo. Naꞌ choneꞌ par nic̱h bitəꞌətezə deꞌen chac c̱hecho lao mbancho o catəꞌən gatcho əsaꞌaclenən chioꞌo ṉaꞌa naꞌ batəꞌətezəchlə.
\v 23 Naꞌ laogüe deꞌen choꞌelaꞌocho Cristənꞌ ngodəꞌəcho txen len ḻeꞌ canꞌ ngodeꞌe txen len X̱eꞌ Diozənꞌ.
\c 4
\s1 Deꞌen gwloꞌo Diozənꞌ lao naꞌ apostol caꞌ par gwsoꞌoneꞌ
\p
\v 1 Cheyaḻəꞌ gonḻe xbab de que naquətoꞌ beṉəꞌ güen xšin Cristənꞌ. Diozənꞌ babzeɉniꞌineꞌ netoꞌ deꞌen cui no gwṉeze antslə, deꞌe naꞌanəꞌ Cristənꞌ ngüeꞌe lao naꞌatoꞌ chsed chloꞌitoꞌon beṉəꞌ.
\v 2 Naꞌ chonən byen gontoꞌ complir deꞌen ngüeꞌe lao naꞌatoꞌ gontoꞌ.
\v 3 Naꞌ ca nacaꞌ nadaꞌ bitobi nonən len nadaꞌ ḻaꞌaṉəꞌəczə šə jostis o šə leꞌe chaquele de que bito chonaꞌ canꞌ cheyaḻəꞌ gonaꞌ. Bito niaꞌ šə chonaꞌ canꞌ cheyaḻəꞌ gonaꞌ o šə cui.
\v 4 Nadaꞌ chacdaꞌ de que bito bi doḻəꞌ napaꞌ len bitəꞌətezə deꞌe chonaꞌ, pero caguə ni c̱he deꞌe naꞌanəꞌ əṉa Diozənꞌ c̱hiaꞌ de que bito bi xtoḻaꞌa de. X̱ancho Cristənꞌ əṉeꞌ šə chonaꞌ canꞌ cheyaḻəꞌ gonaꞌ o šə cui.
\v 5 Deꞌe naꞌanəꞌ bito cheyaḻəꞌ bi əṉacho c̱he notəꞌətezə beṉəꞌ šə choneꞌ canꞌ cheyaḻəꞌ goneꞌ o šə cui. Catəꞌəchənꞌ yidə X̱ancho Cristənꞌ yeto, ca naꞌachənꞌ goneꞌ par nic̱h əṉezecho deꞌen cui noṉəꞌ ṉeze ṉaꞌa. Goneꞌ par nic̱h yeyacbeꞌicho xbab deꞌen yoꞌo ḻoꞌo yic̱hɉlaꞌaždaoꞌ to tocho, naꞌ canaꞌachənꞌ Diozənꞌ əṉeꞌ šə nochonꞌ chon güen.
\p
\v 6 Beṉəꞌ bišəꞌ, babiꞌa xtižəꞌ Apolosənꞌ naꞌ xtižaꞌa par nic̱h šeɉniꞌile canꞌ na xtižəꞌ Diozənꞌ de que bito cheyaḻəꞌ güeꞌelaꞌocho c̱he to beṉəꞌ šə naquənꞌ chsed chloꞌineꞌ naꞌ nique gueꞌicho c̱he yetoeꞌ.
\v 7 ¿Echaquele de que zaquəꞌəchle cle ca beṉəꞌ caꞌ yeḻaꞌ? ¿Ede bi deꞌe de c̱hele deꞌe cui beṉ Diozənꞌ? Bito bi de. Ṉezele naquən deꞌe beṉ Diozənꞌ leꞌe, deꞌe naꞌanəꞌ bito cheyaḻəꞌ gaꞌalažəꞌəle len deꞌen deilenꞌ?
\p
\v 8 Chaclɉeile bitoch bi chyažɉele, naꞌ de que bazole mbalaz ḻaꞌaṉəꞌəczə cui chac c̱hetoꞌ caꞌ. Yebeitoꞌ žaləꞌ deꞌe ḻiczə zole mbalaz naꞌ sotoꞌ mbalaz txen len leꞌe žaləꞌ caꞌ.
\v 9 Diozənꞌ bseḻeꞌe netoꞌ apostol naquətoꞌ ca to beṉəꞌ ḻeꞌezelaogüe cui zaqueꞌe o ca beṉəꞌ nchoglaon c̱heꞌ gateꞌ. Naꞌ Diozənꞌ bsiꞌe xṉeze par nic̱h angl caꞌ naꞌ beṉəꞌ caꞌ žaꞌ yežlyonꞌ chəsəꞌəgüieꞌ canꞌ chac c̱hetoꞌ canꞌ chəsəꞌəgüia beṉəꞌ to comedy.
\v 10 Beṉac̱hənꞌ chsaꞌaqueneꞌ bito bi bi zaquəꞌətoꞌ por ni c̱he deꞌen chontoꞌ xšin Cristənꞌ. Pero naꞌ leꞌe ža, chonḻe par nic̱h chsaꞌaqueneꞌ nacle beṉəꞌ sinꞌ ḻaꞌaṉəꞌəczə ngodəꞌəle txen len Cristənꞌ. Netoꞌ ṉezetoꞌ caguə bi chac gontoꞌ, pero leꞌe chaquele chac gonḻe bitəꞌətezə. Chsoꞌelaoꞌ beṉəꞌ leꞌe naꞌ chəsəꞌəgueꞌineꞌ netoꞌ.
\v 11 Xte ža ṉeža zan las cui de deꞌe yeꞌeɉ deꞌe gaotoꞌ, naꞌ bito bi xalaꞌantoꞌ de, naꞌ chəsəꞌəbažəꞌ beṉəꞌ netoꞌ, naꞌ nic bi ližtoꞌ de.
\v 12 Naꞌ len ṉiꞌa naꞌatoꞌ chontoꞌ žin par nic̱h chon cuintoꞌ mantener. Naꞌ catəꞌ chosoꞌožia chosoꞌonitəꞌ beṉəꞌ netoꞌ, nachle chṉabtoꞌ ṉiteꞌe mbalaz, naꞌ catəꞌ chosoꞌoc̱hiꞌ chosoꞌosaquəꞌ beṉəꞌ netoꞌ, chgoꞌo chc̱heɉlažəꞌətoꞌ ca deꞌen chosoꞌoc̱hiꞌ chosoꞌosaqueꞌe netoꞌ.
\v 13 Naꞌ catəꞌ beṉəꞌ chṉeꞌ clellə c̱hetoꞌ, nachle choꞌelengaꞌactoꞌoneꞌ dižəꞌ šaoꞌ. Naꞌ xte ža ṉeža nitəꞌ beṉəꞌ chəsəꞌəgueꞌineꞌ netoꞌ ca chəsəꞌəgueꞌineꞌ no beb naꞌ canꞌ chsəꞌəgueꞌineꞌ no deꞌe naquə zban.
\p
\v 14 Naꞌ ca naquə deꞌe caꞌ deꞌen bac̱h bzoɉaꞌ leꞌe, bito bzoɉaꞌan par nic̱h gaquele ztoꞌ. Nacle ca xiꞌiṉaꞌ naꞌ chacdaꞌ c̱hele. Deꞌe naꞌanəꞌ choṉaꞌ leꞌe conseɉw quinga.
\v 15 Nitəꞌəlɉa ši mil beṉəꞌ chosoꞌosed chosoꞌoloꞌineꞌ leꞌe c̱he Cristənꞌ, pero tozaꞌ nadaꞌ nacaꞌ ca x̱ale c̱hedəꞌ zguaꞌatec nadaꞌ gwdix̱ɉuiꞌa dižəꞌ güen dižəꞌ cobə c̱he Cristo Jesoꞌosənꞌ len leꞌe par nic̱h chonḻilažəꞌəleneꞌ.
\v 16 Naꞌ deꞌen nacaꞌ ca x̱ale deꞌe naꞌanəꞌ chṉeyoidaꞌ leꞌe gonḻe canꞌ chonaꞌanəꞌ.
\p
\v 17 Deꞌe naꞌanəꞌ bseḻaꞌa Temtionꞌ ganꞌ zolenəꞌ. Banonaꞌaneꞌ ca xiꞌiṉaꞌ beṉəꞌ chacdaꞌ c̱hei laogüe deꞌe bsed bloꞌidaꞌaneꞌ par chonḻilažeꞌe X̱ancho Cristənꞌ. Naꞌ zotezeꞌ choneꞌ complir canꞌ cheyaḻəꞌ goneꞌ. Naꞌ Temtio naꞌanəꞌ goneꞌ par nic̱h əžɉsaꞌalažəꞌəle deꞌen babsed babloꞌidaꞌ leꞌe c̱he Cristənꞌ ca deꞌen chsed chloꞌidaꞌ beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ gatəꞌətezə niteꞌe.
\v 18 Baḻle nale de que bito bi zacaꞌa parzə nic̱h chon cuinḻe xen naꞌ chonḻe caꞌ laogüe deꞌen chonḻe xbab de que bitoch yidaꞌ ganꞌ zolenəꞌ.
\v 19 Pero caguə chžach yidaꞌ ganꞌ zolenəꞌ šə X̱ancho Diozənꞌ güeꞌe latɉə. Naꞌ catəꞌ yidaꞌ canaꞌ degüiaꞌ gonḻe canꞌ nalenəꞌ.
\v 20 Ca naquə beṉəꞌ caꞌ chnabiaꞌ Diozənꞌ ḻegaꞌaqueꞌ, Diozənꞌ choneꞌ par nic̱h gaquə soꞌoneꞌ canꞌ chsoꞌe dižəꞌən. Caguə con chəsəꞌənazeꞌenəꞌ.
\v 21 ¿Nac cheneꞌele gonaꞌ? ¿Egüidaꞌ ganꞌ zolenəꞌ par gonaꞌ leꞌe castigw o šə yidaꞌ gwloꞌa canꞌ chacdaꞌ c̱hele sin cui bi dižəꞌ əṉiaꞌ leꞌe? Ḻegon xbab naquənꞌ cheneꞌele gonaꞌ.
\c 5
\s1 To beṉəꞌ gwzolen noꞌol c̱he x̱eꞌenəꞌ ca xoꞌoləczeꞌ
\p
\v 1 Chsoꞌechgua beṉəꞌ xtižəꞌəle de que zo to beṉəꞌ byo entr leꞌe beṉəꞌ zoleneꞌ noꞌol c̱he x̱eꞌenəꞌ ca xoꞌoləczeꞌ. Beṉəꞌ caꞌ cui chsoꞌelaoꞌ Diozənꞌ bito chžinḻažeꞌe deꞌe yeləꞌ ztonꞌ chsoꞌoneꞌ ca deꞌe yeḻəꞌ ztoꞌonəꞌ chon beꞌenəꞌ.
\v 2 Naꞌ ḻaꞌaṉəꞌəczə chac caꞌ choꞌelaoꞌ cuinḻe. Bito güeꞌelaoꞌ cuinḻe. Cheyaḻəꞌ yegüineꞌele naꞌ cuich güeꞌele latɉə goneꞌ txen len leꞌe.
\v 3 Ḻaꞌaṉəꞌəczə bito zoaꞌ naꞌ len leꞌe, bagwc̱hoglaoguaꞌan canꞌ cheyaḻəꞌ gonḻe len beꞌen chon deꞌe malənꞌ. Naꞌ leꞌe ža, ḻeꞌe gon cuent lažəꞌəle de que naquəczcho txenṉəꞌ šə bachonḻe caꞌ.
\v 4 Naꞌ catəꞌ bandopə nžagle choꞌelaꞌole X̱ancho Jesocristənꞌ, zoczeꞌ chacleneꞌ leꞌe len yeḻəꞌ chnabiaꞌ c̱heꞌenəꞌ, naꞌ nadaꞌ chonczaꞌ txen len leꞌe.
\v 5 Catəꞌ bandopə nžagle txen, ḻegwžon gon beꞌenəꞌ txen len chioꞌo chonḻilažəꞌəcho Jesocristənꞌ naꞌ leꞌe cueɉeꞌ caꞌaḻə par nic̱h gon Satanasənꞌ con nac cheneꞌen len ḻeꞌ. De repent šə c̱hiꞌ saqueꞌe ṉaꞌa len cuerp c̱heꞌenəꞌ gošaꞌalɉa yic̱hɉlaꞌaždaogüeꞌenəꞌ nic̱h cui siꞌe castigw zeɉḻicaṉe catəꞌən əžin ža c̱hoglao X̱ancho Jesocristənꞌ naquənꞌ gac c̱he to to beṉac̱hənꞌ.
\p
\v 6 Bito naquən güen canꞌ chonḻe choꞌelaoꞌ cuinḻe chaquele chebei Diozənꞌ leꞌe. Ṉezele catəꞌ choncho yetxtil latəꞌ xneꞌin chonən par nic̱h cheyas doxen coazinꞌ. Ḻeꞌegatezəczə caꞌ catəꞌ choꞌele latɉə chchaꞌo chxench bitəꞌətezə deꞌe mal entr leꞌe, yoguəꞌəlenꞌ chaple doḻəꞌ c̱hedəꞌ yoguəꞌəlenꞌ c̱honḻenḻe benꞌ chon deꞌe malənꞌ txen.
\v 7-8 Beṉəꞌ Izrael gwlaž c̱hetoꞌ caꞌ chsaꞌapeꞌ cuidad cui chsaꞌogüeꞌ yetxtil deꞌe nc̱hix̱ə xneꞌi lao lṉi pasconꞌ naꞌ chsaꞌapeꞌ cuidad par nic̱h cui bi bi xnaꞌ cuazinꞌ chegaꞌaṉ ḻoꞌo yoꞌo ližgaꞌaqueꞌ lao lṉinꞌ. Caꞌatezəczənꞌ chioꞌo chonḻilažəꞌəcho Cristənꞌ cheyaḻəꞌ gapcho cuidad do tyempte par nic̱h cui bi deꞌe mal goncho naꞌ cui bi deꞌe mal taꞌ əchen yic̱hɉlaꞌaždaꞌochonꞌ. Cheyaḻəꞌ cueɉyic̱hɉcho deꞌe malənꞌ c̱hedəꞌ Cristənꞌ gwdixɉueꞌ xtoḻəꞌəchonꞌ par bebeɉeꞌ chioꞌo xniꞌa deꞌe malənꞌ. Naꞌ deꞌen gwsoꞌoteꞌ ḻeꞌ por ni c̱hecho gwxaquəꞌəlebeneꞌ ca xiləꞌ daonꞌ bianꞌ chsoꞌot beṉəꞌ Izrael caꞌ lao lṉi pasconꞌ. Deꞌen chonḻilažəꞌəcho Cristənꞌ ža, cheyaḻəꞌ cueɉyic̱hɉcho deꞌe malənꞌ naꞌ goncho porzə deꞌe güen.
\p
\v 9 Bzoɉaꞌ to cart par leꞌe naꞌ gwniaꞌ de que bito cheyaḻəꞌ socho binḻo len beṉəꞌ chgoꞌo xtoi naꞌ beꞌenəꞌ chbeɉyic̱hɉ noꞌol c̱hei o beꞌen c̱heꞌ par chzoleneꞌ beṉəꞌ yoblə.
\v 10 Catəꞌ niaꞌ cabi cheyaḻəꞌ socho binḻo len ḻegaꞌaqueꞌ, bito choꞌa dižəꞌ c̱he beṉəꞌ caꞌ cui naccho txen choꞌelaꞌocho Cristənꞌ sino que choꞌa dižəꞌ c̱he lɉuežɉcho beṉəꞌ ḻeczə chsoꞌelaoꞌ Cristənꞌ. Naꞌ ḻeczə caꞌ niaꞌ bito socho binḻo len beṉəꞌ chəsəꞌəzelažəꞌ bi deꞌe de c̱he beṉəꞌ, nic len beṉəꞌ chəsəꞌəcaꞌa bi deꞌe de c̱he beṉəꞌ, naꞌ nic len beṉəꞌ chsoꞌelaoꞌ lguaꞌa lsaquəꞌ. Niaꞌ caꞌ c̱he lɉuežɉcho beṉəꞌ caꞌ naccho txen choꞌelaꞌocho Cristənꞌ. Žaləꞌ cui chac socho binḻo len beṉəꞌ caꞌ cui chsoꞌelaoꞌ Cristənꞌ, bitoch gac socho yežlyo nga žaləꞌ caꞌ.
\v 11 Šə entr leꞌe nitəꞌ beṉəꞌ nacho bišəꞌəcho beṉəꞌ chəsəꞌəžaꞌ xtogaꞌaqueꞌ o beṉəꞌ chəsəꞌəbeɉyic̱hɉ noꞌol c̱hegaꞌaquei o beꞌen c̱hegaꞌaquei par chəsəꞌəzoleneꞌ beṉəꞌ yoblə, o beṉəꞌ chəsəꞌəzelažəꞌ bi deꞌe de c̱he beṉəꞌ, o beṉəꞌ chseꞌeɉṉiꞌalažəꞌ lguaꞌa lsaquəꞌ, o beṉəꞌ chosoꞌožia chosoꞌonitəꞌ lɉuežɉgaꞌaqueꞌ, o beṉəꞌ güeꞌe zo, o beṉəꞌ bgüan, bito cheyaḻəꞌ sole binḻo len ḻegaꞌaqueꞌ. Naꞌ bito cheyaḻəꞌ gaolengaꞌacleneꞌ txen.
\v 12 Beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ txen len chioꞌo cheyaḻəꞌ c̱hoglaochon c̱hegaꞌaqueꞌ catəꞌ əsaꞌapeꞌ doḻəꞌ, pero bito bi cheyaḻəꞌ əṉacho c̱he beṉəꞌ caꞌ cui chsoꞌelaoꞌ Cristənꞌ txen len chioꞌo.
\v 13 Diozənꞌ əṉeꞌ c̱he beṉəꞌ caꞌ cui chsoꞌelaoꞌ Cristənꞌ de que zɉənapeꞌ doḻəꞌ. Naꞌ ca naquə beꞌenəꞌ chon deꞌe malənꞌ benꞌ choꞌelaoꞌ Cristənꞌ txen len chioꞌo, cheyaḻəꞌ cueɉchoneꞌ caꞌaḻə.
\c 6
\s1 Bito yeꞌecho beṉəꞌ cui zɉənombiaꞌ Diozənꞌ soꞌoneꞌ yeḻəꞌ jostis c̱hechonꞌ
\p
\v 1 Catəꞌ chaole xya tole yetole chɉəṉabele beṉəꞌ caꞌ cui chosoꞌozenag c̱he Diozənꞌ par soꞌoneꞌ yeḻəꞌ jostis c̱helenꞌ lguaꞌa ṉabele beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenə. ¿Ebito chacbeꞌile clellənꞌ chonḻe?
\v 2 ¿Ecabi ṉezele de que gwžin ža catəꞌ chioꞌo naccho lažəꞌ naꞌ Diozənꞌ goncho yeḻəꞌ jostis c̱he beṉəꞌ yeziquəꞌəchlə žaꞌ yežlyo nga? Naꞌ ca naquə goncho yeḻəꞌ jostis c̱hegaꞌaqueꞌen, guaquəczə goncho yeḻəꞌ jostis c̱he deꞌe caꞌ cuitec zɉəzaqueꞌe.
\v 3 Ḻeczə əgwžin ža goncho yeḻəꞌ jostis c̱he angl caꞌ. Naꞌ naquəchxenꞌ gaquə goncho yeḻəꞌ jostis c̱he deꞌe chsoꞌon beṉəꞌ lao yežlyo nga.
\v 4 Naꞌ catəꞌ gaquəyožə lɉuežɉle, bito cheyaḻəꞌ žɉaꞌacle lao beṉəꞌ caꞌ cui chsoꞌonḻilažəꞌ Cristənꞌ par soꞌoneꞌ yeḻəꞌ jostis c̱helenꞌ, c̱hedəꞌ bitotec bi zɉəzaqueꞌe par chioꞌo chdopə chžagcho choꞌelaꞌocho Cristənꞌ.
\v 5-6 Cheꞌendaꞌ gaquəchgüeile ḻoꞌo yic̱hɉlaꞌaždaꞌolenꞌ ca deꞌen chɉaꞌacle lao jostis caꞌ cui chsoꞌonḻilažəꞌ Cristənꞌ chɉətaole xya tole yetole leꞌe nacle bišəꞌəcho. ¿Eniga tole cui nacle beṉəꞌ siꞌinṉəꞌ par gon yeḻəꞌ jostis c̱he lɉuežɉle catəꞌ binꞌ chac c̱hele?
\p
\v 7 Ḻechguaḻe clelənꞌ chonḻe batəꞌətezə chaole xya tole yetole. Mbalazəch zole žaləꞌ chdele caꞌaḻə šə bi deꞌen chone lɉuežɉlenꞌ leꞌe, naꞌ mbalazəch zole žaləꞌ güeꞌele latɉə yesəꞌəqueꞌe bi deꞌe de c̱hele.
\v 8 Chebandaꞌ canꞌ chonḻe contr lɉuežɉle naꞌ chcaꞌale bi deꞌe de c̱hegaꞌaqueꞌ ḻaꞌaṉəꞌəczə zɉənaqueꞌ txen len chioꞌo chonḻilažəꞌəcho Cristənꞌ.
\p
\v 9 Bito goncho xbabənꞌ clellə. Notəꞌətezcho šə zotezcho choncho deꞌe malənꞌ bito gaquə yežincho yobanꞌ ganꞌ zo Diozənꞌ chnabiꞌe. Nitəꞌ beṉəꞌ chəsəꞌəgoꞌo xtoi naꞌ beṉəꞌ chsoꞌon bichlə deꞌe yeləꞌ ztoꞌ deꞌen nac caꞌ. Nitəꞌ beṉəꞌ chsoꞌelaoꞌ lguaꞌa lsaquəꞌ. Nitəꞌ beṉəꞌ chəsəꞌəbeɉyic̱hɉ noꞌol c̱hei o beꞌen c̱hei par chəsəꞌəzoleneꞌ beṉəꞌ yoblə, naꞌ beṉəꞌ chəsəꞌəzolentezə ḻeꞌe lɉuežɉ beṉəꞌ byogaꞌaqueꞌ lguaꞌa deꞌe yesəꞌəcaꞌa noꞌol c̱hegaꞌaqueꞌ, naꞌ noꞌol caꞌ chəsəꞌəzolentezə lɉuežɉ noꞌoləgaꞌaqueꞌ lguaꞌa yesəꞌəqueꞌe beṉəꞌ byo.
\v 10 Nitəꞌ beṉəꞌ chəsəꞌəban naꞌ beṉəꞌ chəsəꞌəzelažəꞌ bi de c̱he beṉəꞌ; naꞌ beṉəꞌ güeꞌe zo; naꞌ beṉəꞌ chosoꞌožia chosoꞌonitəꞌ lɉuežɉgaꞌaqueꞌ; naꞌ beṉəꞌ chəsəꞌəx̱oayagueꞌ par nic̱h yesəꞌəqueꞌe bi deꞌe de c̱he beṉəꞌ. Ni to beṉəꞌ chon deꞌe mal caꞌ cui gaquə yesyəꞌəžineꞌ yobanꞌ ganꞌ zo Diozənꞌ chnabiꞌe.
\v 11 Baḻcho bencho deꞌe mal caꞌ antslə. Pero ṉaꞌa deꞌen chonḻilažəꞌəcho X̱ancho Jesocristənꞌ, Spirit c̱he Dioz c̱hechonꞌ babocobən yic̱hɉlaꞌaždaꞌochonꞌ par nic̱h naccho beṉəꞌ laꞌaždaoꞌ xiꞌilažəꞌ, naccho lažəꞌ naꞌ Diozənꞌ naꞌ naccho beṉəꞌ güen laogüeꞌenəꞌ.
\s1 Cheyaḻəꞌ goncho len cuerp c̱hechonꞌ ca siꞌ Diozənꞌ yeḻəꞌ balaꞌaṉ
\p
\v 12 Nitəꞌ beṉəꞌ chəsəꞌəneꞌ de que de lsens par goncho bitəꞌətezə, pero ṉezecho caguə yoguəꞌ deꞌen gonchonꞌ naquən güen par chioꞌo. Naꞌ ḻaꞌaṉəꞌəczə šə chəsəꞌəna beṉəꞌ de que de lsens par goncho bitəꞌətezə, bito cheyaḻəꞌ güeꞌecho latɉə par nic̱h bi deꞌen goncho ṉabiaꞌan chioꞌo.
\v 13 Ḻeczə nitəꞌ beṉəꞌ chəsəꞌəneꞌ: “Nsaꞌ ḻeꞌechonꞌ par yeḻəꞌ guao, naꞌ deczə yeḻəꞌ guaonꞌ par ḻenṉə.” Deꞌe ḻiczə canꞌ chəsəꞌəneꞌenəꞌ, pero naꞌ ḻeꞌechonꞌ len yeḻəꞌ guaonꞌ, əžin ža catəꞌ gon Diozənꞌ par nic̱h te c̱hegaꞌaquən. Naꞌ cuerp c̱hechonꞌ bito naquən par nic̱h coꞌo xtocho o par nic̱h goncho bichlə yeḻəꞌ ztoꞌ deꞌen nac caꞌ. Naquə cuerp c̱hechonꞌ par nic̱h socho güeꞌelaꞌocho X̱ancho Cristənꞌ, naꞌ X̱anchonꞌ zoczeꞌ par gaquəleneꞌ chioꞌo.
\v 14 Diozənꞌ bosbaneꞌ X̱ancho Cristənꞌ ladɉo beṉəꞌ guatənꞌ, naꞌ ḻeczə caꞌ əžin ža catəꞌ yosbaneꞌ chioꞌo ladɉo beṉəꞌ guatənꞌ len yeḻəꞌ guac c̱heꞌenəꞌ.
\p
\v 15 ¿Ecabi ṉezele de que ngodəꞌəcho txen len Cristənꞌ par nic̱h ṉabiꞌe cuerp c̱hechonꞌ? Naꞌ deꞌen ngodəꞌəcho txen len ḻeꞌ, bito cheyaḻəꞌ so xtocho beṉəꞌ gon cuerp c̱hechonꞌ lao neꞌe.
\v 16 Catəꞌ to beṉəꞌ chatəꞌəleneꞌ xtoeꞌ cuerp c̱hegaꞌaqueꞌenəꞌ chsaꞌaquən tozə, canꞌ nyoɉ deꞌen gwna Diozənꞌ: “Beṉəꞌ caꞌ c̱hopə əsaꞌaqueꞌ tozə cuerp.”
\v 17 Pero chioꞌo ngodəꞌəcho txen len X̱ancho Cristənꞌ naꞌ naquə yic̱hɉlaꞌaždaꞌochonꞌ tozə len ḻeꞌ.
\p
\v 18 Deꞌe naꞌanəꞌ bito coꞌo xtocho naꞌ bito goncho bitəꞌətezəchlə deꞌe caꞌ zɉənac caꞌ. Deꞌe mal caꞌ yeziquəꞌəchlə bitotec chsoꞌonən contr cuerp c̱hechonꞌ, pero šə coꞌo xtocho o šə goncho bichlə deꞌe yeḻəꞌ ztoꞌ deꞌen nac caꞌ, ḻegaꞌaquən chsoꞌonən contr cuerp c̱hechonꞌ.
\v 19 Spirit c̱he Diozənꞌ zon loꞌo yic̱hɉlaꞌaždaoꞌ to tocho ca to beṉəꞌ zo ḻoꞌo yoꞌo c̱heꞌ. Dioz nanꞌ bseḻeꞌe Spirit c̱heꞌenəꞌ zon ḻoꞌo laꞌaždaꞌochonꞌ par chnabiaꞌan chioꞌo. Caguə chioꞌo əṉacho naquənꞌ gonchonꞌ.
\v 20 X̱ancho Cristənꞌ gwdixɉueꞌ xtoḻəꞌəchonꞌ par nic̱h naccho xiꞌiṉ Dioz. Deꞌe naꞌanəꞌ cheyaḻəꞌ goncho len cuerp c̱hechonꞌ naꞌ len yic̱hɉlaꞌaždaꞌochonꞌ ca siꞌ Diozənꞌ yeḻəꞌ balaꞌaṉ.
\c 7
\s1 Choꞌe dižəꞌ c̱he yeḻəꞌ gošagnaꞌanəꞌ
\p
\v 1 Naꞌ deꞌe caꞌ bzoɉle nadaꞌ ḻeꞌe cartənꞌ, de deꞌen cheꞌendaꞌ ṉiaꞌ leꞌe. Šə no beṉəꞌ byo bito cheneꞌeneꞌ siꞌe noꞌolə gaqueꞌ xoꞌoleꞌ, güenṉəꞌ choneꞌ.
\v 2 Pero naꞌ deꞌe nxož coꞌo xtole, deꞌe naꞌanəꞌ naquəchən güen əgwšagnaꞌale par nic̱h caꞌ to to beṉəꞌ byo so xoꞌoleꞌ naꞌ to to noꞌolə so beꞌen c̱heꞌ.
\v 3 Naꞌ leꞌe beṉəꞌ byo, yeyatəꞌəlen noꞌolə c̱he c̱hele. Ḻeꞌegatezəczə caꞌ leꞌe noꞌolə yeyatəꞌəlen beꞌen c̱he c̱hele.
\v 4 Ca naquə noꞌolənꞌ caguə ḻeꞌ əṉeꞌ nac goneꞌ len cuerp c̱heꞌenəꞌ. Ḻeꞌegatezə caꞌ beṉəꞌ byonꞌ ḻeczə caguə ḻeꞌenə əṉeꞌ nac goneꞌ len cuerp c̱heꞌenəꞌ. C̱hopteꞌen cheyaḻəꞌ yosoꞌozenag c̱he lɉuežɉgaꞌaqueꞌ.
\v 5 Naꞌ leꞌe beṉəꞌ nšagnaꞌ bito əgwžonḻe yeyatəꞌəlen beꞌen c̱hele o noꞌol c̱hele. Pero deꞌe gaquəczənꞌ šə yeḻəꞌ goxia c̱he c̱hople cuezle to term güeɉə par nic̱h sotezle gonḻe orasyon. Naꞌ te termənꞌ yeyatəꞌəlen beꞌen c̱hele o noꞌol c̱hele deꞌe yoblə par nic̱h Satanasənꞌ cui gaquə coꞌoyeḻəꞌən leꞌe gonḻe deꞌe malənꞌ laogüe deꞌe tant nan solen lɉuežɉle.
\p
\v 6 Deꞌe quinga niaꞌ c̱hedəꞌ de lsens par nic̱h to to beṉəꞌ byo siꞌ xoꞌoleꞌ naꞌ to to noꞌolə siꞌ beꞌen c̱heꞌ, pero bito ṉacho de que chon Diozənꞌ mendad goncho caꞌ.
\v 7 Chebeidaꞌ žaləꞌ yoguəꞌəle sole ca nadaꞌ, cui no xoꞌolaꞌ zo. Pero naꞌ nžaꞌ canꞌ baben Diozənꞌ par zo to tocho naꞌ nžaꞌ canꞌ cheneꞌeneꞌ goncho.
\p
\v 8 Leꞌe cuiṉəꞌ gwšagnaꞌale, chacdaꞌ naquəchən güen yegaꞌaṉle canꞌ zoaꞌ nadaꞌ naꞌ cui əgwšagnaꞌale. Naꞌ leꞌe bagot beꞌen c̱hele o noꞌol c̱hele, chacdaꞌ ḻeczə naquəchən güen cui yošagnaꞌale.
\v 9 Pero naꞌ leꞌe beṉəꞌ byo šə ḻechguaḻe nan solenḻe noꞌolənꞌ, naꞌ ḻeꞌegatezə caꞌ leꞌe noꞌolə šə ḻechguaḻe nan solenḻe beṉəꞌ byo, mejor əgwšagnaꞌale par nic̱h caꞌ bito ṉabiaꞌ yeḻəꞌ chzelažəꞌənəꞌ leꞌe.
\p
\v 10 Leꞌe noꞌolə leꞌe nšagnaꞌale, chonaꞌ mendad bito yelaꞌale beꞌen c̱hele. Naꞌ bito gaquele de que nadəzaꞌan əniaꞌ caꞌ. Naquən to deꞌe chon X̱ancho Cristənꞌ mendad cui goncho.
\v 11 Naꞌ šə noꞌolənꞌ yeleꞌe beꞌen c̱heꞌenəꞌ, cheyaḻəꞌ yegaꞌaṉeꞌ sin cui yequeꞌe beṉəꞌ yoblə o cheyaḻəꞌ yeyeɉeꞌ žɉəyezoleneꞌ beꞌen c̱heꞌenəꞌ deꞌe yoblə. Naꞌ leꞌe beṉəꞌ byo leꞌe nšagnaꞌale, bito yelaꞌale xoꞌollenəꞌ.
\p
\v 12 Naꞌ leꞌe beṉəꞌ yeziquəꞌəchlə, əṉiaꞌ canꞌ chonaꞌ xbab cheyaḻəꞌ gonḻe, ḻaꞌaṉəꞌəczə X̱ancho Cristənꞌ bito bi gwneꞌ c̱he deꞌe caꞌ. Šə entr leꞌe zo to beṉəꞌ zo xoꞌoleꞌ noꞌolə cuiṉəꞌ gonḻilažəꞌ Cristənꞌ, naꞌ šə zo noꞌolənꞌ gan par sotezeꞌ yegaꞌaṉleneꞌ beꞌen c̱heꞌenəꞌ, bito cheyaḻəꞌ yelaꞌa beṉəꞌ byonꞌ ḻeꞌ.
\v 13 Naꞌ šə entr leꞌe zo to noꞌolə naꞌ cuiṉəꞌ gonḻilažəꞌ beꞌen c̱heꞌenəꞌ Cristənꞌ, šə beꞌen c̱heꞌenəꞌ zoeꞌ gan par yesəꞌəniteꞌe, bito cheyaḻəꞌ yesyəꞌəleꞌe.
\v 14 Bito naquən mal lao Diozənꞌ par noꞌolənꞌ chonḻilažəꞌ Cristənꞌ soleneꞌ beꞌen c̱heꞌenəꞌ ḻaꞌaṉəꞌəczə šə beꞌen c̱heꞌenəꞌ cuiṉəꞌ gonḻilažeꞌe Cristənꞌ. Ḻeczə bito naquən mal lao Diozənꞌ par beṉəꞌ byonꞌ chonḻilažəꞌ Cristənꞌ soleneꞌ noꞌol c̱heꞌenəꞌ ḻaꞌaṉəꞌəczə noꞌolənꞌ cuiṉəꞌ gonḻilažeꞌe Cristənꞌ. Žaləꞌ chgueꞌi Diozənꞌ yesəꞌəzolen lɉuežɉgaꞌaqueꞌ ḻeczə gwgüeꞌi Diozənꞌ biꞌi c̱hegaꞌaqueꞌenəꞌ, pero Diozənꞌ chaqueneꞌ c̱he xiꞌiṉgaꞌaqueꞌenəꞌ.
\v 15 Pero naꞌ šə beṉəꞌ byonꞌ o noꞌolənꞌ benꞌ cui chonḻilažəꞌ Cristənꞌ bitoch cheneꞌeneꞌ soleneꞌ beꞌen c̱heꞌ o noꞌol c̱heꞌ benꞌ chonḻilažəꞌ Cristənꞌ, bito gwžonḻe yesyəꞌəlaꞌagaꞌaqueꞌ. Bito chonən byen yesyəꞌəgaꞌaṉlen lɉuežɉgaꞌaqueꞌ c̱hedəꞌ laꞌ Diozənꞌ cheneꞌeneꞌ socho binḻo len beꞌen c̱hecho o noꞌol c̱hecho.
\v 16 Leꞌe noꞌolə leꞌe chonḻilažəꞌəle Cristənꞌ, šə sotezle len beꞌen c̱hele beꞌen cuiṉəꞌ gonḻilažeꞌe Cristənꞌ, de repent guaquəlenḻeneꞌ par nic̱h gonḻilažeꞌe Cristənꞌ. Naꞌ leꞌe beṉəꞌ byo leꞌe chonḻilažəꞌəle Cristənꞌ, šə sotezle len noꞌol c̱helenꞌ ḻaꞌaṉəꞌəczə cuiṉəꞌ gonḻilažeꞌe Cristənꞌ, de repent guaquəlenḻeneꞌ par nic̱h gonḻilažeꞌeneꞌ.
\p
\v 17 Naꞌ ca naquə žin deꞌen nḻanḻe catəꞌ gwleɉ Diozənꞌ leꞌe par chonḻilažəꞌəle Cristənꞌ guaquəczə gonchlen. Naꞌ šə banšagnaꞌale catəꞌən gwleɉ Diozənꞌ leꞌe par chonḻilažəꞌəle Cristənꞌ, con caꞌaczənꞌ cheyaḻəꞌ so cuezle, c̱hedəꞌ canꞌ noꞌe X̱ancho Cristənꞌ c̱hele gonḻe. Ḻeczə canꞌ babenaꞌ mendad len beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ gatəꞌətezəchlə, ḻeczə canꞌ chonaꞌ mendad len leꞌe.
\v 18 Šə bazole señy deꞌen neꞌ sirconsisionṉəꞌ catəꞌən gwleɉ Diozənꞌ leꞌe par chonḻilažəꞌəle Cristənꞌ bito gonḻe par nic̱h yenit señyənꞌ. Naꞌ šə baḻle cuiṉəꞌ sole señy deꞌen neꞌ sirconsisionṉəꞌ catəꞌən gwleɉ Diozənꞌ ḻeꞌe par chonḻilažəꞌəle Cristənꞌ, bito gonḻe byen par solen.
\v 19 Bito naquən to deꞌe žialao len chioꞌo šə nsaꞌacho señy deꞌen neꞌ sirconsisionṉəꞌ o šə cui nsaꞌachon. Deꞌen naquə deꞌe žialao len chioꞌo, goncho con canꞌ non Diozənꞌ mendad.
\v 20 Con canꞌ naccho yoguəꞌəcho catəꞌən gwleɉ Diozənꞌ chioꞌo par chonḻilažəꞌəcho Cristənꞌ, šə nsaꞌacho señy deꞌen neꞌ sirconsisionṉəꞌ o šə cui nsaꞌachon, caꞌatezəczənꞌ cheyaḻəꞌ so cuezcho.
\v 21 Šə nacle esclabo catəꞌən gwleɉ Diozənꞌ leꞌe par chonḻilažəꞌəle Cristənꞌ, bito bi gaquele c̱he deꞌenəꞌ. Pero naꞌ šə guatəꞌ latɉə c̱hixɉwle nic̱h əchoɉle xniꞌa x̱anḻenꞌ, ḻec̱hixɉw nic̱h əchoɉle.
\v 22 Naꞌ ḻaꞌaṉəꞌəczə nacle esclabo catəꞌ Diozənꞌ gwleɉeꞌ leꞌe par chonḻilažəꞌəle X̱ancho Cristənꞌ, nacle beṉəꞌ zaqueꞌe lao X̱anchonꞌ. Naꞌ ḻaꞌaṉəꞌəczə cui naccho esclabo catəꞌ Diozənꞌ gwleɉeꞌ chioꞌo par chonḻilažəꞌəcho Cristənꞌ, pero ṉaꞌa ža Cristənꞌ banaqueꞌ X̱ancho. Deꞌe nanꞌ cheyaḻəꞌ gwzenagcho c̱heꞌ.
\v 23 Cristənꞌ gwdixɉueꞌ xtoḻəꞌəchonꞌ par nic̱h naccho xiꞌiṉ Dioz. Deꞌe naꞌanəꞌ cheyaḻəꞌ gwzenagəchcho c̱heꞌ cle ca gwzenagcho c̱he bi deꞌen chesəꞌəna beṉəꞌ.
\v 24 Beṉəꞌ bišəꞌ, šə nacle esclabo catəꞌən gwleɉ Diozənꞌ leꞌe par chonḻilažəꞌəle Cristənꞌ, bito bi gaquele. Guaquə so cuezle caꞌ ṉaꞌa ngodəꞌəle Diozənꞌ txen.
\p
\v 25 Bito bi mendad ben X̱ancho Cristənꞌ canꞌ goncho par len noꞌol güegoꞌ caꞌ. Pero nada əṉiaꞌ leꞌe canꞌ chacdaꞌ cheyaḻəꞌ goncho par len ḻegaꞌaqueꞌ. Naꞌ laogüe deꞌen babeyašəꞌ bežiꞌilažəꞌ X̱anchonꞌ nadaꞌ naꞌ chacleneꞌ nadaꞌ par chonaꞌ complir canꞌ cheyaḻəꞌ gonaꞌanəꞌ, dižəꞌ deꞌe nga choꞌa naquən deꞌe zaqueꞌe par əgwzenagle c̱hei.
\v 26 Deꞌen chacdaꞌ nadaꞌ, notəꞌətezə beṉəꞌ šə nšagneꞌe catəꞌən gwleɉ Diozənꞌ ḻeꞌ par chonḻilažeꞌe Cristənꞌ, con canꞌ cheyaḻəꞌ so cuezeꞌ, o šə bito nšagneꞌe, ḻeczə canꞌ chacdaꞌ naquən güen so cuezeꞌ. Niaꞌ caꞌ por ni c̱he canꞌ c̱hiꞌ saquəꞌəcho tyemp nga zocho ṉaꞌa.
\v 27 Leꞌe nšagnaꞌale bito yelaꞌale xoꞌolle, naꞌ leꞌe cui no xoꞌolle zo, bito c̱hilɉle xoꞌolle.
\v 28 Pero naꞌ notəꞌətezle bito gaple doḻəꞌ šə əgwšagnaꞌale, naꞌ ni leꞌe noꞌol güegoꞌ bito gaple doḻəꞌ šə əgwšagnaꞌale. Pero deꞌen gac c̱hele deꞌe zan deꞌe c̱hiꞌ saquəꞌəle lao yežlyo nganꞌ, ḻenṉəꞌ cui cheꞌendaꞌ gac c̱hele əniaꞌ caꞌ.
\p
\v 29 Beṉəꞌ bišəꞌ, cheꞌendaꞌ niaꞌ leꞌe de que bito socho zan iz par goncho xšin Diozənꞌ. Deꞌe naꞌanəꞌ šə nitəꞌ xoꞌolle, cheyaḻəꞌ gwzenagle c̱he Diozənꞌ naꞌ gonczle xšineꞌenəꞌ canꞌ gonḻen žaləꞌ cui no xoꞌolle zo.
\v 30 Naꞌ šə chegüineꞌecho por ni c̱he bi deꞌen chac c̱hecho, cheyaḻəꞌ soczcho goncho xšin Diozənꞌ caczə chon beṉəꞌ cui bi bi chac c̱hei. Naꞌ šə de deꞌen cheba chezaquəꞌəlažəꞌəcho, cheyaḻəꞌ gonczcho xšin Diozənꞌ canꞌ goncho žaləꞌ cui chac to deꞌe güen c̱hecho deꞌen goncho xbab c̱hei. Naꞌ šə bagwxiꞌicho to deꞌe gwc̱hincho, bito cheyaḻəꞌ gonteccho xbab c̱hei sino cheyaḻəꞌ gonczcho xšin Diozənꞌ canꞌ goncho žaləꞌ cui gwxiꞌichon.
\v 31 Ca naquə zocho yežlyo nga naꞌ chc̱hincho bi deꞌe caꞌ deꞌen de yežlyo nga, bito cheyaḻəꞌ cueꞌechgua yic̱hɉcho c̱he bi deꞌen deicho o bi deꞌen chac c̱hecho c̱hedəꞌ deꞌe te c̱hei yežlyo nga chleꞌicho ṉaꞌa.
\p
\v 32 Naꞌ cheꞌendaꞌ bito bi cuec yic̱hɉle c̱he deꞌen chac yežlyo nga. Šə to beṉəꞌ cui zo xoꞌoleꞌ, deczə latɉə par goneꞌ xbab c̱he xšin X̱ancho Diozənꞌ deꞌen choneꞌ, naꞌ deczə latɉə par güeꞌelažeꞌe goneꞌ deꞌen yebei X̱anchonꞌ.
\v 33 Pero šə to beṉəꞌ zo xoꞌoleꞌ, chbeꞌ yic̱hɉeꞌ c̱he deꞌen chac yežlyo nga naꞌ canꞌ goneꞌ par nic̱h yebei xoꞌolenꞌ.
\v 34 Naꞌ ḻeczə nžaꞌ canꞌ chac len noꞌolənꞌ nšagnaꞌ naꞌ noꞌolənꞌ cui nšagnaꞌ. Noꞌolənꞌ cui nšagnaꞌ nḻatɉeꞌ par cueꞌ yic̱hɉeꞌ c̱he deꞌen cheneꞌe X̱ancho Diozənꞌ naꞌ par gon cuineꞌ lažəꞌ neꞌenəꞌ nic̱h goneꞌ canꞌ cheneꞌe Diozənꞌ len cuerp c̱heꞌenəꞌ naꞌ len yic̱hɉlaꞌaždaꞌogüeꞌenəꞌ. Pero noꞌolənꞌ zo beꞌen c̱hei, chbeꞌ yic̱hɉeꞌ c̱he deꞌen chac yežlyo nga naꞌ nac goneꞌ par yebei beꞌen c̱heꞌenəꞌ.
\p
\v 35 Bagwniaꞌ leꞌe caꞌ par nic̱h gaquəlenən leꞌe, caguə deꞌe əgwžonaꞌ əgwšagnaꞌalenəꞌ. Con cheꞌendaꞌ güeꞌelažəꞌəle par gonḻe deꞌe güen naꞌ güeꞌelažəꞌəle par gonḻe xšin X̱anchonꞌ sin cui bi bi gwžon gonḻen.
\p
\v 36 Naꞌ šə to beṉəꞌ chaqueneꞌ bito choneꞌ güen ca deꞌen cui chšagueꞌ naꞌ xiꞌiṉeꞌ noꞌolənꞌ, naꞌ šə noꞌolənꞌ bangoleꞌ naꞌ cheneꞌeneꞌ əgwšagneꞌe, naquəczən güen gwšag x̱eꞌenəꞌ neꞌe šə canꞌ chazlažeꞌe goneꞌ. Bito choneꞌ deꞌe mal šə əgwšagueꞌ naꞌ xiꞌiṉeꞌ noꞌolənꞌ len benꞌ chṉab ḻeꞌ par gaqueꞌ xoꞌoleꞌ.
\v 37 Pero šə to beṉəꞌ zoeꞌ chaqueneꞌ choneꞌ güen len xiꞌiṉeꞌ noꞌolənꞌ deꞌen bito cheneꞌeneꞌ no siꞌ ḻeꞌ, con šə cui cheneꞌe xiꞌiṉeꞌen əgwšagneꞌe naꞌ šə chaqueneꞌ cui de bichlə deꞌen chonən byen par əgwšagnaꞌ xiꞌiṉeꞌenəꞌ, de lsens par goneꞌ canꞌ chazlažeꞌe naꞌ chonczeꞌ güen canꞌ bagwc̱hoglažeꞌe goneꞌ.
\v 38 Naꞌ ḻeczə chon benꞌ güen beꞌenəꞌ chšagueꞌ naꞌ xiꞌiṉeꞌ noꞌolənꞌ, pero güench chon beꞌenəꞌ cui chšagueꞌ naꞌ xiꞌiṉeꞌ noꞌolənꞌ.
\p
\v 39 Naꞌ ca naquə notəꞌətezə noꞌolə caꞌ zɉənšagnaꞌ, cheyaḻəꞌ yesəꞌəniteꞌe len beꞌen c̱hegaꞌaqueꞌ caꞌ, c̱hedəꞌ canꞌ chon ḻeinꞌ mendad. Pero šə saꞌatclə beꞌen c̱hegaꞌaqueꞌ caꞌ, guac yesyəꞌəqueꞌe beṉəꞌ yoblə, con šə beṉəꞌ chsoꞌonḻilažəꞌ X̱ancho Cristənꞌ.
\v 40 Pero chacdaꞌ nadaꞌ yesəꞌənitəꞌəcheꞌ mbalaz šə yesyəꞌəgaꞌaṉeꞌ sin cui no yesyəꞌəqueꞌe cle ca yesyəꞌəqueꞌe beṉəꞌ yoblə. Naꞌ chacdaꞌ xbab c̱hianꞌ naquən tozə len xbab c̱he Spirit c̱he Diozənꞌ.
\c 8
\s1 Yeḻəꞌ guao deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌe
\p
\v 1 Baḻle nale bito cheyaḻəꞌ gaocho yeḻəꞌ guao deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌe, naꞌ yebaḻle nale bito gonən mal gaochon c̱hedəꞌ ṉezecho bito bi zɉəzaquəꞌ lguaꞌa lsaquəꞌ caꞌ. Naꞌ əchniaꞌ leꞌe bito cheyaḻəꞌ gon cuincho xen laogüe deꞌen chaquecho ḻechguaḻe ṉezecho to deꞌen ṉezecho, sino c̱heyaḻəꞌ gaquecho c̱he yeziquəꞌəchlə beṉəꞌ chsoꞌonḻilažəꞌ Cristənꞌ naꞌ gaquəlengaꞌacchoneꞌ.
\v 2 Naꞌ šə chaquecho ḻechguaḻe ṉezecho to deꞌen ṉezecho, cheyaḻəꞌ gacbeꞌicho de que bito bi bi de deꞌen cheɉniꞌicho canꞌ cheyaḻəꞌ šeɉniꞌichon.
\v 3 Pero šə chaquecho c̱he Diozənꞌ, chebeineꞌ chioꞌo.
\p
\v 4 Naꞌ ca naquə gwṉable šə guac gaocho yeḻəꞌ guao deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌenəꞌ, deꞌe ḻiczə canꞌ nalenəꞌ, lguaꞌa lsaquəꞌ caꞌ caguə bi zɉəzaquəꞌən. Diozənꞌ naquə X̱ancho, naꞌ ḻeꞌenəꞌ cheyaḻəꞌ šeɉṉiꞌalažəꞌəcho.
\v 5 Deꞌe zan deꞌe de yobanꞌ naꞌ yežlyonꞌ deꞌen chseꞌeɉṉiꞌalažəꞌ beṉəꞌ chəsəꞌəneꞌ zɉənaquən x̱angaꞌaqueꞌ.
\v 6 Pero chioꞌo ṉezecho tozə X̱acho Dioz nanꞌ zo naꞌ tozə X̱ancho Jesocristənꞌ par güeꞌelaꞌocho naꞌ par güeꞌegaꞌacchoneꞌ yeḻəꞌ balaꞌaṉ. Naꞌ X̱acho Dioz naꞌanəꞌ beneꞌ par nic̱h X̱ancho Jesocristənꞌ beneꞌ yoguəꞌəḻoḻ beṉəꞌ naꞌ yoguəꞌ bia chsaꞌaš, naꞌ yoguəꞌ bichlə deꞌe zɉəde.
\p
\v 7 Baḻə beṉəꞌ bišəꞌəcho bito chseꞌeɉniꞌineꞌ ca deꞌen cheɉniꞌicho. Ṉeꞌe chsaꞌaqueneꞌ beṉəꞌ zaquəꞌ lguaꞌa lsaquəꞌ caꞌ, naꞌ deꞌe naꞌanəꞌ chsaꞌaqueneꞌ chsoꞌoneꞌ deꞌe mal catəꞌ chsaꞌogüeꞌ yeḻəꞌ guao deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌe, c̱hedəꞌ cuiṉəꞌ seꞌeɉniꞌišaogüeꞌeneꞌ de que bitobi zɉəzaquəꞌ lguaꞌa lsaquəꞌ caꞌ.
\v 8 Bitobi zaquəꞌ yeḻəꞌ guaonꞌ par nic̱h Diozənꞌ yebeicheneꞌ chioꞌo. Diozənꞌ chebeineꞌ chioꞌo caguə por ni c̱he deꞌen chaocho bitəꞌətezə yeḻəꞌ guaonꞌ len caguə por ni c̱he šə cui chaochon.
\v 9 Pero bito cheyaḻəꞌ goncho par nic̱h beṉəꞌ lɉuežɉcho caꞌ yesəꞌəxopeꞌ soꞌoneꞌ deꞌe mal laogüe deꞌen cuiṉəꞌ seꞌeɉniꞌišaꞌogüeꞌeneꞌ de que bitobi zɉəzaquəꞌ lguaꞌa lsaquəꞌ caꞌ.
\v 10 Leꞌe nacle beṉəꞌ cheɉniꞌi, naꞌ šə cueꞌele naꞌ yeꞌeɉ gaole ganꞌ chsoꞌon beṉəꞌ lṉi c̱he lguaꞌa lsaquəꞌ, de repent no beṉəꞌ chsoꞌonḻilažəꞌ Jesocristənꞌ yesəꞌəleꞌineꞌ leꞌe naꞌ ḻeczə seꞌeneneꞌ saꞌogüeꞌ deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌe. Naꞌ baḻeꞌ əsaꞌaqueneꞌ de que əsaꞌapeꞌ doḻəꞌ šə saꞌogüeꞌen c̱hedəꞌ ṉeꞌe chsaꞌaqueneꞌ beṉəꞌ zaqueꞌe lguaꞌa lsaquəꞌ caꞌ.
\v 11 Naꞌ chioꞌo bacheɉniꞌicho de que bito bi zɉəzaquəꞌ lguaꞌa lsaquəꞌ caꞌ, bito cheyaḻəꞌ goncho bitəꞌətezə deꞌe gon par nic̱h beṉəꞌ bišəꞌəcho caꞌ cuich soꞌonḻilažeꞌe Cristənꞌ naꞌ yesəꞌəbiayiꞌe. Cristənꞌ bnežɉw cuineꞌ gwsoꞌot beṉəꞌ ḻeꞌ lenczə por ni c̱he beṉəꞌ bišəꞌəcho caꞌ beṉəꞌ caꞌ cuiṉəꞌ seꞌeɉniꞌišaogüeꞌe de que bito bi zɉəzaquəꞌ lguaꞌa lsaquəꞌ caꞌ.
\v 12 Contr beṉəꞌ bišəꞌəcho canꞌ choncho šə choncho par nic̱h saꞌogüeꞌ deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌenəꞌ. Naꞌ catəꞌ choncho contr ḻegaꞌaqueꞌ, ḻeczə contr Crist nanꞌ choncho, naꞌ chapcho doḻəꞌ laogüeꞌenəꞌ.
\v 13 Deꞌe naꞌanəꞌ niaꞌ šə por ni c̱he beləꞌ deꞌen chaoguaꞌ gonən par nic̱h beṉəꞌ bišəꞌəcho caꞌ yesəꞌəxopeꞌ soꞌoneꞌ deꞌe mal, cuatəch gaoguaꞌan par nic̱h cui yesəꞌəxopeꞌ soꞌoneꞌ deꞌe malənꞌ.
\c 9
\s1 Pabənꞌ beꞌe dižəꞌ de que naqueꞌ doalɉe apostol
\p
\v 1 Ṉezele de que nadaꞌ nacaꞌ apostol, naꞌ napaꞌ yeḻəꞌ chnabiaꞌ par əṉiaꞌ naquənꞌ gonaꞌ. Ṉezele de que bableꞌidaꞌ X̱ancho Jesoꞌosənꞌ naꞌ de que chonḻilažəꞌəleneꞌ c̱hedəꞌ nadaꞌ beꞌelenaꞌ leꞌe dižəꞌ güen dižəꞌ cobə c̱heꞌenəꞌ.
\v 2 Ḻaꞌaṉəꞌəczə šə beṉəꞌ caꞌ yeḻaꞌ bito chseꞌeɉḻeꞌe de que nacaꞌ apostol, pero leꞌe cheɉḻeꞌele. Naꞌ deꞌen chonḻilažəꞌəle X̱anchonꞌ benꞌ bseḻəꞌ nadaꞌ chloꞌele de que deꞌe ḻi nacaꞌ apostol c̱heꞌenəꞌ.
\p
\v 3 Deꞌe nga niaꞌ chzoaꞌ rson lao beṉəꞌ caꞌ chəsəꞌəneꞌ cui bseḻəꞌ Diozənꞌ nadaꞌ par nacaꞌ apostol.
\v 4 Nadaꞌ napaꞌ yeḻəꞌ chnabiaꞌ par ṉabaꞌ gonḻe nadaꞌ mantener žaləꞌ yeꞌendaꞌ gonḻe caꞌ.
\v 5 Deczə lsens par əgwšagnaꞌa len noꞌolə chonḻilažəꞌ Cristənꞌ. Naꞌ žaləꞌ gwšagnaꞌa deczə lsens par əc̱hiꞌaneꞌ con ga šaꞌa, canꞌ chon Bedənꞌ naꞌ apostol caꞌ yeḻaꞌ naꞌ beṉəꞌ caꞌ zɉənaquə bišəꞌ X̱ancho Jesocristənꞌ.
\v 6 Zaquəꞌəczə Bernabenꞌ naꞌ nadaꞌ par cuich gontoꞌ žin len ṉiꞌa naꞌatoꞌ nic̱h gonḻe netoꞌ mantener žaləꞌ caꞌ, laꞌ yeziquəꞌəchlə beṉəꞌ caꞌ chosoꞌosed chosoꞌoloꞌi xtižəꞌ Diozənꞌ bito chsoꞌoneꞌ žin len ṉiꞌanaꞌagaꞌaqueꞌ.
\v 7 Ca naquə soḻdad bito chyixɉueꞌ c̱he gast c̱heꞌenəꞌ sino que nitəꞌəczə beṉəꞌ chəsəꞌəyixɉw ḻen. Naꞌ notono gazə zan yag obanꞌ šə cui gaogüeꞌ frot daoꞌ c̱heinꞌ catəꞌ yesəꞌəbian, naꞌ nic no əgwye x̱oṉɉ baquəꞌ šə cui yeꞌeɉeꞌ latəꞌ ḻec̱h c̱hebənꞌ.
\v 8 Ca deꞌen niaꞌ caꞌ bito naquən xbab c̱he beṉac̱h, sino ḻeczə canꞌ na ḻei deꞌen bzoɉ deꞌe Moisezənꞌ.
\v 9 Quinga bzoɉeꞌ ḻeꞌe ḻeinꞌ: “Bito əgwseyɉwle choꞌa goꞌoṉ caꞌ žlac chosoꞌoleɉ chosoꞌošošɉəb trigonꞌ par chchoɉ xeinəꞌ.” Caguə por ni c̱he deꞌen chiꞌ yic̱hɉ Diozənꞌ goꞌoṉ caꞌazənꞌ beneꞌ mendad par bzoɉ deꞌe Moisezənꞌ caꞌ.
\v 10 Chzeɉniꞌineꞌ chioꞌo de que naquəczən güen goncho mantener beṉəꞌ caꞌ chsoꞌon xšin Diozənꞌ entr chioꞌo, naꞌ ḻeczə deꞌe naꞌanəꞌ nyoɉən de que benꞌ chguaꞌaṉ goꞌoṉ naꞌ benꞌ chonšaoꞌ trigw cheyaḻəꞌ yesəꞌəziꞌe latəꞌ güeɉə cwseš c̱he deꞌen chsoꞌoneꞌ.
\v 11 Bac̱h goclentoꞌ leꞌe par nic̱h cheɉniꞌile xtižəꞌ Diozənꞌ naꞌ deꞌe naꞌanəꞌ bito naquən mazəchlə deꞌen cheyaḻəꞌ gonḻe žaləꞌ ṉabtoꞌ gonḻe netoꞌ mantener.
\v 12 Chonḻe mantener yeziquəꞌəchlə beṉəꞌ chosoꞌosed chosoꞌoloꞌineꞌ leꞌe naꞌ netoꞌ zaquəꞌəchtoꞌ par gonḻe netoꞌ mantener cle ca ḻegaꞌaqueꞌ.
\p Pero bito chṉabtoꞌ gonḻe netoꞌ mantener. Chgoꞌo chc̱heɉlažəꞌətoꞌ bitəꞌətezə deꞌen chac c̱hetoꞌ par nic̱h cui bi bi gwžon šanch chioꞌo chzenagcho c̱he dižəꞌ güen dižəꞌ cobə c̱he Cristənꞌ.
\v 13 Caꞌaczənꞌ chac len beṉəꞌ caꞌ chsoꞌon mendad ḻoꞌo yoꞌodaoꞌ əblao c̱he netoꞌ beṉəꞌ Izrael, chsaꞌaqueꞌ mantener len deꞌen chəsəꞌənežɉo beṉəꞌ Izrael caꞌ ḻegaꞌaqueꞌ. Naꞌ bx̱oz caꞌ chosoꞌozey bia yix̱əꞌ par chsoꞌelaogüeꞌe Diozənꞌ, chosyoꞌocuaꞌaṉeꞌ latəꞌ güeɉə deꞌe chsaꞌogüeꞌ c̱he bia caꞌ chsoꞌoteꞌenəꞌ.
\v 14 Naꞌ caꞌaczənꞌ baben X̱ancho Jesocristənꞌ mendad de que beṉəꞌ caꞌ chosoꞌozenag c̱he dižəꞌ güen dižəꞌ cobə c̱heꞌenəꞌ cheyaḻəꞌ soꞌoneꞌ mantener beṉəꞌ caꞌ chəsəꞌəyix̱ɉuiꞌen len ḻegaꞌaqueꞌ.
\v 15 Pero nadaꞌ ža, bitoṉəꞌ ṉabaꞌ gonḻe nadaꞌ mantener, naꞌ caguə chzoɉaꞌ deꞌe nga ṉaꞌa par nic̱h gonḻe caꞌ. Yebeichlədaꞌ gataꞌ caguə ca ṉabaꞌ gonḻe nadaꞌ mantener, c̱hedəꞌ ḻechguaḻe chebeidaꞌ canꞌ guac əṉiaꞌ de que bito bi bi gan chonaꞌ deꞌen əchyix̱ɉuiꞌa dižəꞌ güen dižəꞌ cobə c̱he Jesocristənꞌ len leꞌe.
\p
\v 16 Bito gaquə əṉiaꞌ de que to goclen xenṉəꞌ chonaꞌ laogüe deꞌen chyix̱ɉueꞌidaꞌ beṉəꞌ dižəꞌ güen dižəꞌ cobə c̱he Jesocristənꞌ. Diozənꞌ gwleɉeꞌ nadaꞌ par chyix̱ɉuiꞌan naꞌ chonən byen gonaꞌ con canꞌ neꞌenəꞌ, naꞌ probchguazə nadaꞌ žaləꞌ cui chzenagaꞌ par c̱hix̱ɉuiꞌa dižəꞌ güen dižəꞌ cobə c̱heꞌenəꞌ.
\v 17 Žaləꞌ chyix̱ɉuiꞌan por ni c̱he deꞌen na xbab c̱hiaꞌan gonaꞌ caꞌ, ṉabaꞌ gonḻe nadaꞌ mantener. Pero bito əṉacho de que naquən xbab c̱hiaꞌ gonaꞌ caꞌ. Diozənꞌ gwleɉeꞌ nadaꞌ par əchyix̱ɉuiꞌan naꞌ deꞌe naꞌanəꞌ cheyaḻəꞌ c̱hix̱ɉuiꞌan.
\v 18 Naꞌ cheba chezaquəꞌəlažaꞌa deꞌen cui chṉabaꞌ gonḻe nadaꞌ mantener ca deꞌen chyix̱ɉuiꞌa dižəꞌ güen dižəꞌ cobə c̱he Jesocristənꞌ len leꞌe. Bitobi laxɉuaꞌ chziꞌa ca deꞌen chyix̱ɉuiꞌan, ḻaꞌaṉəꞌəczə zacaꞌa par gonḻe nadaꞌ mantener.
\p
\v 19 Chzex̱ɉw yic̱hɉaꞌ chon cuinaꞌ ca xmos yoguəꞌəḻoḻ beṉəꞌ par nic̱h šanch beṉəꞌ soꞌonḻilažəꞌ Cristənꞌ, ḻaꞌaṉəꞌəczə Diozənꞌ noneꞌ nadaꞌ beṉəꞌ gwnabiaꞌ.
\v 20 Catəꞌ zoaꞌ len beṉəꞌ Izrael caꞌ chonaꞌ con canꞌ chon netoꞌ beṉəꞌ Izrael naꞌ ḻeczə chonaꞌ yoguəꞌ deꞌe caꞌ zɉənyoɉ ḻeꞌe ḻei deꞌen bzoɉ deꞌe Moisezənꞌ, ḻaꞌaṉəꞌəczə ṉezdaꞌ bito chyažɉən gonaꞌ caꞌ par nic̱h yebei Diozənꞌ nadaꞌ. Pero naoguaꞌ costombr caꞌ par nic̱h caꞌ ḻegaꞌaqueꞌ yosoꞌozenagueꞌ c̱hiaꞌ naꞌ soꞌonḻilažeꞌe Cristənꞌ.
\v 21 Naꞌ catəꞌ zoaꞌ len beṉəꞌ cui zɉənombiaꞌ ḻei deꞌen bzoɉ deꞌe Moisezənꞌ bito naoguaꞌ costombr caꞌ deꞌen chon ḻeinꞌ mendad ṉaotoꞌ, par nic̱h caꞌ beṉəꞌ caꞌ cui zɉənombiaꞌ ḻei deꞌen bzoɉ deꞌe Moisezənꞌ yosoꞌozenagueꞌ c̱hiaꞌ naꞌ soꞌonḻilažeꞌe Cristənꞌ. Bito ṉacho cui chzenagaꞌ c̱he ḻei c̱he Diozənꞌ, c̱hedəꞌ laꞌ zoaꞌ chzenagaꞌ c̱he Cristənꞌ.
\v 22 Catəꞌ zoaꞌ len beṉəꞌ cuiṉəꞌ seꞌeɉniꞌišaogüeꞌeneꞌ canꞌ cheneꞌe Diozənꞌ goncho, bito chonaꞌ deꞌe saꞌaqueneꞌ zɉənaquən deꞌe mal goncho ḻaꞌaṉəꞌəczə ṉezdaꞌ bito zɉənaquən mal. Chiꞌ yic̱hɉaꞌ naclə gonaꞌ par nic̱h yosoꞌozenagueꞌ c̱hiaꞌ naꞌ soꞌonḻilažəꞌəcheꞌ Cristənꞌ. Chonaꞌ xte ganꞌ zelao chzaquəꞌədaꞌ par chaquəlenaꞌ yoguəꞌəḻoḻ beṉəꞌ par nic̱h caꞌ šə baḻeꞌ soꞌonḻilažeꞌe Cristənꞌ.
\v 23 Yoguəꞌəḻoḻ deꞌen chonaꞌ, chonaꞌan par nic̱h seꞌeɉḻeꞌ beṉəꞌ dižəꞌ güen dižəꞌ cobə c̱he Cristənꞌ, c̱hedəꞌ laꞌ cheꞌendaꞌ šancho naꞌ txen socho mbalaz.
\p
\v 24 Ṉezecho catəꞌ beṉəꞌ chsoꞌoneꞌ carrer yogueꞌe chsaꞌacdoeꞌ par nic̱h chatəꞌəbiaꞌ noeꞌ chon gan, naꞌ tozə benꞌ chon gan chziꞌe premio. Pero naꞌ chioꞌo, to tocho cheyaḻəꞌ güeꞌelažəꞌəcho goncho cayaṉəꞌən cheneꞌe Diozənꞌ par nic̱h caꞌ gaquə goneꞌ ca so to tocho mbalaz catəꞌən yežincho ganꞌ zoeꞌenəꞌ.
\v 25 Beṉəꞌ deportist caꞌ chəsəꞌəgoꞌo chəsəꞌəc̱heɉlažeꞌe cui chsoꞌoneꞌ con canꞌ na cuerp c̱hegaꞌaqueꞌenəꞌ par nic̱h chsaꞌaquəcheꞌ beṉəꞌ gual. Chsoꞌoneꞌ caꞌ c̱hedəꞌ chseꞌeneneꞌ soꞌoneꞌ competir naꞌ yesəꞌəziꞌe to premio, ḻaꞌaṉəꞌəczə naquən to premio deꞌe te c̱hei. Naꞌ chioꞌo bito cheyaḻəꞌ güeꞌecho latɉə ṉabiaꞌ laꞌaždaꞌomalchonꞌ chioꞌo par nic̱h Diozənꞌ goneꞌ ca socho mbalaz catəꞌ yežincho ganꞌ zoeꞌenəꞌ. Naꞌ premio deꞌen goṉ Diozənꞌ chioꞌo caguə deꞌe te c̱heinꞌ.
\v 26 Ca naquə beṉəꞌ deportist caꞌ, ḻaꞌaṉəꞌəczə šə chsaꞌacdoeꞌ, bito soꞌoneꞌ gan šə cui zɉəṉezeneꞌ ga zelao yesəꞌəžineꞌ. Naꞌ šə beṉəꞌ chsoꞌoneꞌ bocsear, cheyaḻəꞌ yesəꞌəṉezeneꞌ nac yosoꞌoc̱hitɉeꞌ ponetənꞌ par nic̱h soꞌoneꞌ gan. Naꞌ nadaꞌ gwxaquəꞌəlebədaꞌ ca to deportist beṉəꞌ chacchgua laogüe deꞌen chonaꞌ do yic̱hɉ do lažaꞌa yoguəꞌəḻoḻ canꞌ na Diozənꞌ.
\v 27 Naꞌ bito chzenagaꞌ c̱he laꞌaždaꞌomalaꞌan bitəꞌətezə deꞌe mal deꞌen nan gonaꞌ len cuerp c̱hiaꞌanəꞌ. Žaləꞌ chzenagaꞌ c̱he laꞌaždaꞌomalaꞌan bito yebei Diozənꞌ nadaꞌ ḻaꞌaṉəꞌəczə bagwdix̱ɉuiꞌa dižəꞌ güen dižəꞌ cobə c̱he Jesocristənꞌ len beṉəꞌ yoblə.
\c 10
\s1 Bito cheyaḻəꞌ goncho txen len beṉəꞌ caꞌ chseꞌeɉṉiꞌalažəꞌ lguaꞌa lsaquəꞌ
\p
\v 1 Beṉəꞌ bišəꞌ, cheꞌendaꞌ əṉezele de que Diozənꞌ gwzoeꞌ len yoguəꞌəḻoḻ deꞌe x̱axtaoꞌ netoꞌ beṉəꞌ Izrael, beṉəꞌ caꞌ besyəꞌəchoɉ Egiptonꞌ. Yogueꞌe ɉəsəꞌənaogüe beɉonꞌ ganꞌ yoꞌo Diozənꞌ naꞌ yogueꞌe gosəꞌədieꞌ Nisdaoꞌ Exṉanꞌ lao goquən c̱hoplə par blaꞌ yo biž.
\v 2 Naꞌ yoguəꞌəḻoḻeꞌ gwsaꞌaqueꞌ txen len deꞌe Moisezənꞌ ca deꞌen gwc̱heꞌe ḻegaꞌaqueꞌ gosəꞌədieꞌ nisdaꞌonəꞌ naꞌ gatəꞌətezəchlə ɉaꞌaqueꞌ bedote gwzo Diozənꞌ len ḻegaꞌaqueꞌ ḻoꞌo beɉonꞌ.
\v 3 Naꞌ yoguəꞌəḻoḻ deꞌe x̱axtaꞌotoꞌ caꞌ gwsaꞌogüeꞌ tozə cḻas yeḻəꞌ guao deꞌen bnežɉw Diozənꞌ ḻegaꞌaqueꞌ.
\v 4 Naꞌ yogueꞌe tozə nis deꞌen bnežɉw Diozənꞌ ḻegaꞌaqueꞌ gwseꞌeɉeꞌ. Naꞌ Cristənꞌ gwxaquəꞌəlebeneꞌ ca yeɉənꞌ ganꞌ bchoɉ nisənꞌ deꞌen gwseꞌeɉeꞌ, c̱hedəꞌ Cristənꞌ gwdaleneꞌ beṉəꞌ caꞌ naꞌ gocleneꞌ ḻegaꞌaqueꞌ.
\v 5 Naꞌ ḻaꞌaṉəꞌəczə Diozənꞌ beneꞌ güen len yogueꞌe con to c̱hopgueꞌ gwsoꞌoneꞌ canꞌ chazlažəꞌ Diozənꞌ, naꞌ deꞌe naꞌanəꞌ Diozənꞌ beneꞌ par nic̱h gosəꞌəbiayiꞌ beṉəꞌ caꞌ yeḻaꞌ latɉə dašənꞌ.
\p
\v 6 Beṉəꞌ caꞌ gosəꞌəzelažeꞌe gatəꞌ bi deꞌe gatəꞌ c̱hegaꞌaqueꞌ deꞌen cui goneꞌe Diozənꞌ gwnežɉueꞌ ḻegaꞌaqueꞌ. Naꞌ deꞌen goc c̱hegaꞌaqueꞌ chzeɉniꞌin chioꞌo de que bito cheyaḻəꞌ selažəꞌəcho goncho bi deꞌen naquə deꞌe mal.
\v 7 Bito cheyaḻəꞌ šeɉṉiꞌalažəꞌəcho lguaꞌa lsaquəꞌ nic bitəꞌətezəchlə deꞌen chseꞌeɉṉiꞌalažəꞌ beṉəꞌ caꞌ cui zɉənombiaꞌ Diozənꞌ. Zan beṉəꞌ Izrael caꞌ gwseꞌeɉṉiꞌalažeꞌe lguaꞌa lsaquəꞌ naꞌ nyoɉ Xtižəꞌ Diozənꞌ choꞌen dižəꞌ canꞌ gwsoꞌoneꞌ lao lguaꞌa lsaquəꞌ goꞌoṉ daoꞌ bianꞌ gwseꞌeɉṉiꞌalažeꞌe, nan: “Gosəꞌəbiꞌe gwseꞌeɉ gwsaꞌogüeꞌ naꞌ gosəꞌəniteꞌe gwsoꞌoneꞌ ḻegr.”
\v 8 Naꞌ ḻeczə caꞌ bito cheyaḻəꞌ coꞌo xtocho o goncho bichlə deꞌe yeḻəꞌ ztoꞌ deꞌen nac caꞌ. To ža zan beṉəꞌ Izrael caꞌ bosoꞌožaꞌ xtogaꞌaqueꞌ, naꞌ lao ža naꞌ gwsaꞌat šoṉechoa milgaꞌaqueꞌ.
\v 9 Bito cheyaḻəꞌ goncho X̱ancho Diozənꞌ prueb šə ḻeineꞌ canꞌ neꞌenəꞌ. Zan beṉəꞌ Izrael caꞌ gwsoꞌoneneꞌ prueb šə ḻeineꞌ canꞌ neꞌenəꞌ, naꞌ Diozənꞌ bseḻeꞌe beḻ əznia gwsaꞌob ḻegaꞌaqueꞌ naꞌ zaneꞌ gwsaꞌat.
\v 10 Zan beṉəꞌ Izrael caꞌ besəꞌəžeꞌešeꞌe len Diozənꞌ. Deꞌe naꞌanəꞌ Diozənꞌ bseḻeꞌe to angl beteꞌ ḻegaꞌaqueꞌ. Naꞌ chioꞌo ža bito cheyaḻəꞌ əžeꞌešəꞌəcho len Diozənꞌ.
\p
\v 11 Yoguəꞌ deꞌe caꞌ goc c̱hegaꞌaqueꞌ zɉənyoɉən par chəsəꞌəzeɉniꞌin naquənꞌ cheyaḻəꞌ gon chioꞌo zocho tyemp nga babidə X̱ancho Jesocristənꞌ.
\v 12 Deꞌe naꞌanəꞌ notəꞌətezcho šə chaquecho zocho chonḻilažəꞌəcho Jesocristənꞌ, cheyaḻəꞌ gapcho cuidad par nic̱h cui goncho deꞌe malənꞌ.
\v 13 Bitəꞌətezə deꞌe mal deꞌen chgoꞌoyeḻəꞌ gwxiyeꞌen chioꞌo goncho, bito ṉacho zdebəchlə chac c̱hecho cle ca c̱he notəꞌətezəchlə beṉəꞌ. Naꞌ Diozənꞌ zoczeꞌ chacleneꞌ chioꞌo canꞌ neꞌenəꞌ. Choṉeꞌ chioꞌo fuers balor par nic̱h cui gwzenagcho c̱he gwxiyeꞌenəꞌ, naꞌ chzeɉniꞌineꞌ chioꞌo naquənꞌ goncho par nic̱h soicho cui goncho deꞌe malənꞌ.
\p
\v 14 Deꞌe naꞌanəꞌ xiꞌiṉdaoguaꞌa, bito gonḻe txen len beṉəꞌ caꞌ chseꞌeɉṉiꞌalažəꞌ lguaꞌa lsaquəꞌ.
\v 15 Bacheɉniꞌile. Deꞌe naꞌanəꞌ ḻegon xbab c̱he deꞌe quinga chzeɉniꞌidaꞌ leꞌe par nic̱h əṉezele de que choṉaꞌ leꞌe to consejw güen.
\v 16 Naꞌ ca naquə deꞌen cheꞌeɉ chaocho par chɉəyezaꞌalažəꞌəcho bi zeɉen par chioꞌo deꞌen gwsoꞌoteꞌ Cristənꞌ, yeḻəꞌ chox̱cwlen c̱he Dioz nanꞌ choꞌecho catəꞌən cheꞌeɉ chaochon. Naꞌ ca deꞌen cheꞌeɉ chaochonꞌ zeɉen de que chioꞌo chonḻilažəꞌəcho Cristənꞌ naccho tozə, c̱hedəꞌ Crist naꞌanəꞌ bnežɉw cuineꞌ gwsoꞌoteꞌeneꞌ naꞌ blalɉ xc̱heneꞌenəꞌ par gwdixɉueꞌ xtoḻəꞌəchonꞌ.
\v 17 Tozə yetxtilənꞌ chzoxɉcho naꞌ yoguəꞌəcho chaocho latəꞌ güeɉən par chɉəyezaꞌalažəꞌəcho bi zeɉen deꞌen gwsoꞌoteꞌ Cristənꞌ. Ḻaꞌaṉəꞌəczə naccho beṉəꞌ zan, deꞌen chao yoguəꞌəcho tozə yetxtilənꞌ chloꞌen de que yoguəꞌ chioꞌo chonḻilažəꞌəcho Cristənꞌ naccho ca tozə famiḻy laogüe deꞌen ngodəꞌəcho txen len ḻeꞌ.
\p
\v 18 Naꞌ ḻegon xbab c̱he deꞌe nga. Beṉəꞌ Izrael gwlaž c̱hiaꞌ caꞌ catəꞌ chsoꞌelaꞌogüeꞌe Diozənꞌ chsoꞌoteꞌ bia yix̱əꞌ to lao mes deꞌen naquə par Diozənꞌ. Naꞌ baḻtezə beṉəꞌ chsaꞌogüeꞌ xpeləꞌ bianꞌ chsoꞌoteꞌ lao mesənꞌ naquəgaꞌaqueꞌ txen chsoꞌelaogüeꞌe Diozənꞌ.
\v 19 Naꞌ caꞌaczənꞌ naquən len chioꞌo, šə gaocho yeḻəꞌ guao deꞌen chosoꞌožia beṉəꞌ lao lguaꞌa lsaquəꞌən chseꞌeɉṉiꞌalažeꞌenəꞌ, soꞌoneꞌ xbab de que zocho lez gaquəlen lguaꞌa lsaquəꞌ caꞌ chioꞌonəꞌ. Bito əṉacho de que lguaꞌa lsaquəꞌ caꞌ zɉəzaquəꞌən par əsaꞌaclenən beṉəꞌ, naꞌ nic bi zaquəꞌ ca deꞌen chɉəsəꞌəžieꞌ yeḻəꞌ guaonꞌ laogaꞌaquenꞌ.
\v 20 Cheꞌendaꞌ əṉezele de que beṉəꞌ caꞌ cui zɉənombiaꞌ Diozənꞌ catəꞌ chɉəsəꞌəžieꞌ yeḻəꞌ guaonꞌ lao lguaꞌa lsaquəꞌən chseꞌeɉṉiꞌalažeꞌenəꞌ, caguə par Dioz naꞌanəꞌ chɉəsəꞌəžieꞌen, sino par deꞌe x̱ioꞌ caꞌanəꞌ. Naꞌ bito cheꞌendaꞌ gonḻenḻe deꞌe x̱ioꞌ caꞌ txen.
\v 21 Bito cheyaḻəꞌ yeꞌeɉ gaocho deꞌen cheꞌeɉ chaocho par chɉəyezaꞌalažəꞌəcho bi zeɉen par chioꞌo deꞌen gwsoꞌot beṉəꞌ X̱ancho Cristənꞌ šə ḻeczə yeꞌeɉ gaocho deꞌen chɉəsəꞌəžia beṉəꞌ par deꞌe x̱ioꞌ caꞌ.
\v 22 Contr Dioz nanꞌ choncho šə cheꞌeɉ chaocho deꞌen chɉəsəꞌəžia beṉəꞌ par deꞌe x̱ioꞌ caꞌ, naꞌ šə cheꞌeɉ chaochon choncho ca chžaꞌa Diozənꞌ chioꞌo. Naꞌ bito əṉacho naquəchcho beṉəꞌ gualəch cle ca Diozənꞌ par nic̱h cui bi gac c̱hecho šə goncho contr ḻeꞌ.
\s1 Bito goncho deꞌen naquə mal par lɉuežɉcho
\p
\v 23 Naꞌ ḻaꞌaṉəꞌəczə chəsəꞌəneꞌ: “De lsens par goncho bitəꞌətezə”, cheyaḻəꞌ žɉəsaꞌalažəꞌəcho de que caguə yoguəꞌ deꞌen gonchonꞌ naquən güen par chioꞌo. Naꞌ ḻaꞌaṉəꞌəczə šə chaquecho deczə lsens par goncho bitəꞌətezə, caguə yoguəꞌənṉəꞌ gaquəlenən chioꞌo.
\v 24 Ni tocho bito cheyaḻəꞌ goncho bitəꞌətezə deꞌen goncho šə naquən mal par lɉuežɉcho, ḻaꞌaṉəꞌəczə chaquecho naquən to deꞌe güen par chioꞌo.
\p
\v 25 Bitəꞌətezə beləꞌ deꞌen chsoꞌoteꞌe yaꞌanəꞌ ḻegaon sin cui əṉable šə bosoꞌožieꞌen lao lguaꞌa lsaquəꞌən chseꞌeɉṉiꞌalažeꞌe. Niaꞌ caꞌ par nic̱h cui gaquəžeɉlažəꞌəle šə naple doḻəꞌ por ni c̱he deꞌen gaolen.
\v 26 Ṉezecho de que guac siꞌicho bitəꞌətezə beləꞌ deꞌen chsoꞌoteꞌe yaꞌanəꞌ, c̱hedəꞌ Xtižəꞌ Diozənꞌ nyoɉən nan: “C̱he X̱ancho Diozənꞌ yežlyo nga, beṉac̱hənꞌ, bia yix̱əꞌ naꞌ yoguəꞌ deꞌe zɉəde lao yežlyonꞌ.”
\p
\v 27 Naꞌ catəꞌ beṉəꞌ cui chsoꞌonḻilažəꞌ Cristənꞌ soꞌoneꞌ chioꞌo combid ližgaꞌaqueꞌenəꞌ par əxɉtaocho, šə šeɉcho con gaotezcho bitəꞌətezə deꞌen soꞌoneꞌ gaocho. Bito əṉabgaꞌaquechoneꞌ šə bosoꞌožieꞌen lao lguaꞌa lsaquəꞌən chseꞌeɉṉiꞌalažeꞌenəꞌ. Diozənꞌ bito cheneꞌeneꞌ gaquəžeɉlažəꞌəcho šə napcho doḻəꞌ por ni c̱he šə bi deꞌen gaocho.
\v 28 Naꞌ šə no yeꞌ chioꞌo de que babosoꞌožieꞌ beləꞌən to lao lguaꞌa lsaquəꞌən chseꞌeɉṉiꞌalažeꞌe, bito gaochon šə caꞌ par nic̱h beꞌen yeꞌ chioꞌo caꞌ cui goneꞌ xbab de que lenczchonꞌ cheɉṉiꞌalažəꞌəcho lguaꞌa lsaquəꞌ caꞌ naꞌ par nic̱h cui goneꞌ xbab de que napcho doḻəꞌ šə gaochon.
\v 29 Bito əṉacho de que naquən deꞌe mal gaochon, pero par nic̱h benꞌ gwna chioꞌo de que babosoꞌožieꞌen lao lguaꞌa lsaquəꞌən cui gaqueneꞌ de que choncho deꞌe mal, deꞌe naꞌanəꞌ cui gaochon.
\p De repent chonḻe xbab bixc̱henꞌ cheyaḻəꞌ cueɉyic̱hɉcho cui goncho bitəꞌətezə deꞌen goncho šə por ni c̱he deꞌen gonchonꞌ əsaꞌaque beṉəꞌ lɉuežɉchonꞌ de que napcho doḻəꞌ.
\v 30 Naꞌ de repent chonḻe xbab bixc̱henꞌ əṉa lɉuežɉchonꞌ choncho deꞌe mal chaocho to yeḻəꞌ guao šə choꞌecho yeḻəꞌ chox̱cwlen c̱he Diozənꞌ por ḻen.
\v 31 Quinga naquən, bitəꞌətezə deꞌen goncho cheyaḻəꞌ gonchon ca gaquəlenən beṉəꞌ yoblə par nic̱h əsoꞌelaogüeꞌe Diozənꞌ, naꞌ bito yeꞌeɉ gaocho deꞌen gonən par nic̱h beṉəꞌ yoblə cui əsoꞌelaogüeꞌe Diozənꞌ.
\v 32 Naꞌ bito goncho par nic̱h notəꞌətezə beṉəꞌ yesəꞌəxopeꞌ soꞌoneꞌ deꞌe malənꞌ, ḻaꞌaṉəꞌəczə šə beṉəꞌ Izrael, o šə beṉəꞌ cui zɉənaquə beṉəꞌ Izrael, naꞌ ḻaꞌaṉəꞌəczə naqueꞌ lɉuežɉ chioꞌo bagwleɉ Diozənꞌ par chdopə chžagcho choꞌelaꞌocho Cristənꞌ o šə cui naqueꞌ.
\v 33 Caꞌaczə nadaꞌ ža, bitəꞌətezə deꞌen chonaꞌ əchyilɉəlažaꞌa naclənꞌ chonaꞌan par nic̱h gaquəlenən beṉəꞌ yoblə. Chonchaꞌ xbab c̱he deꞌen gaquəlen beṉəꞌ yeziquəꞌəchlə cle ca chonaꞌ xbab c̱he deꞌen gaquəlen nadaꞌ, c̱hedəꞌ cheꞌendaꞌ beṉəꞌ zan yesyəꞌəchoɉ xniꞌa deꞌe malənꞌ.
\c 11
\p
\v 1 Nadaꞌ ža chchoɉyic̱hɉaꞌ deꞌen cheꞌendaꞌ gonaꞌ par nic̱h chonaꞌ deꞌen naquə güen par beṉəꞌ yeziquəꞌəchlə. Naꞌ ḻegonšga caꞌ c̱hedəꞌ nadaꞌ chonaꞌ canꞌ ben Cristənꞌ.
\s1 Canꞌ cheyaḻəꞌ soꞌon noꞌol caꞌ lao coltənꞌ
\p
\v 2 Ḻechguaḻe chebeidaꞌ de que chonḻe xbab c̱hiaꞌ yoguəꞌ las naꞌ de que chɉsaꞌalažəꞌəle deꞌen bsed bloꞌidaꞌ leꞌe. Güenchguanꞌ chonḻe chzenagle c̱he deꞌe caꞌ bsed bloꞌidaꞌ leꞌe.
\v 3 Naꞌ cheꞌendaꞌ əṉezele de que notəꞌətezə beṉəꞌ byo cheyaḻəꞌ əgwzex̱ɉw yic̱hɉeꞌ par nic̱h Cristənꞌ ṉabiꞌeneꞌ. Naꞌ noꞌol caꞌ cheyaḻəꞌ yesəꞌəzex̱ɉw yic̱hɉgaꞌaqueꞌ par nic̱h beꞌen c̱hegaꞌaqueꞌ caꞌ yesəꞌənabiꞌe ḻegaꞌaqueꞌ, canꞌ chon Cristənꞌ chzex̱ɉw yic̱hɉeꞌ par nic̱h Diozənꞌ chnabiꞌeneꞌ.
\v 4 Leꞌe beṉəꞌ byo catəꞌ gonḻe orasyon naꞌ catəꞌ c̱hix̱ɉueꞌele bi deꞌen bagwna Diozənꞌ leꞌe, bito gwzo xḻapəꞌəlenꞌ. Laꞌ šə nzotezlen naquən to yeḻəꞌ ztoꞌ par leꞌe naꞌ zeɉen de que beṉac̱hənꞌ chnabiꞌe leꞌe, caguə Crist naꞌazənꞌ.
\v 5 Naꞌ leꞌe noꞌolə catəꞌ gonḻe orasyon o catəꞌ c̱hix̱ɉueꞌele bi deꞌen bagwna Diozənꞌ leꞌe, ḻeꞌe gwcuašəꞌ yic̱hɉle canꞌ chonczle batəꞌətezə chchoɉle nic̱h nacbiaꞌ de que beṉəꞌ byo caꞌ chəsəꞌənabiꞌe leꞌe. Yoguəꞌəcho ṉezecho naquən to yeḻəꞌ ztoꞌ c̱he noꞌolənꞌ catəꞌən nšib yic̱hɉeꞌen pelon, naꞌ caꞌaczə naquən len leꞌe noꞌolə šə cui chcuašəꞌ yic̱hɉlenꞌ catəꞌən chonḻe orasyon o catəꞌən chyix̱ɉueꞌele bi deꞌen bagwna Diozənꞌ leꞌe.
\v 6 Naꞌ šə cui chonḻe canꞌ naquə costombr c̱hele deꞌen chcuašəꞌ yic̱hɉlenꞌ batəꞌətezə chchoɉle, yeɉniꞌa əgwšib yic̱hɉlenꞌ. Naꞌ šə chaquele ztoꞌ par əgwšiblen, mejor əgwcuašəꞌəczlen canꞌ chsoꞌon noꞌol caꞌ yeḻaꞌ.
\v 7 Naꞌ ca naquə leꞌe beṉəꞌ byo, bito cheyaḻəꞌ əgwcuašəꞌ yic̱hɉlenꞌ catəꞌ gonḻe orasyon naꞌ catəꞌ c̱hix̱ɉueꞌele bi deꞌen bagwna Diozənꞌ leꞌe, c̱hedəꞌ Diozənꞌ beneꞌ leꞌe par nic̱h naple yeḻəꞌ chnabiaꞌ canꞌ napə ḻeꞌenəꞌ naꞌ par əgwloꞌele ca güenṉəꞌ choneꞌenəꞌ. Naꞌ leꞌe noꞌolə, Diozənꞌ beneꞌ leꞌe par əgwloꞌele ca güenṉəꞌ chsoꞌon beꞌen c̱helenꞌ.
\v 8 Diozənꞌ bito beneꞌ beṉəꞌ byonꞌ len costiy c̱he noꞌolənꞌ sino que gwleɉeꞌ costiy c̱he beṉəꞌ nechənꞌ par beneꞌen noꞌolənꞌ.
\v 9 Naꞌ Diozənꞌ bito beneꞌ beṉəꞌ byonꞌ par gaquəleneꞌ noꞌolənꞌ sino que beneꞌ noꞌolənꞌ par gaquəleneꞌ beṉəꞌ byonꞌ.
\v 10 Deꞌe naꞌanəꞌ noꞌol caꞌ cheyaḻəꞌ yesəꞌəloꞌe de que chəsəꞌənabiaꞌ beṉəꞌ byo caꞌ ḻegaꞌaqueꞌ. Cheyaḻəꞌ soꞌoneꞌ caꞌ c̱hedəꞌ angl caꞌ chəsəꞌəgüieꞌ naquənꞌ chon chioꞌo beṉac̱h.
\v 11 Pero ngodəꞌəczcho txen len X̱ancho Jesocristənꞌ ḻaꞌaṉəꞌəczə šə naccho beṉəꞌ byo o šə naccho noꞌolə, naꞌ deꞌe naꞌanəꞌ bito cheyaḻəꞌ soꞌon noꞌolə caꞌ xbab de que bito chəsəꞌəyažɉeneꞌ beṉəꞌ byo naꞌ nic netoꞌ beṉəꞌ byo gontoꞌ xbab de que bito chyažɉetoꞌ noꞌolə.
\v 12 Naquən deꞌe ḻi canꞌ ben Diozənꞌ gwleɉeꞌ costiy c̱he beṉəꞌ byo nechənꞌ par beneꞌen noꞌolə nechənꞌ, naꞌ ṉezecho yoguəꞌəte beṉəꞌ byo gwxan noꞌolə ḻegaꞌaqueꞌ. Naꞌ Dioz naꞌanəꞌ beneꞌ beṉac̱h, beneꞌ bia caꞌ chsaꞌaš, naꞌ beneꞌ bitəꞌətezəchlə deꞌe zɉəde.
\p
\v 13 Ḻegon xbab c̱hele naꞌ gacbeꞌile de que caguə deꞌe šoꞌolažəꞌəcho šə no noꞌolə goneꞌ orasyon sin cui əgwcuašəꞌ yic̱hɉeꞌenəꞌ, c̱hedəꞌ canꞌ naquə costombr c̱hechonꞌ.
\v 14 Naꞌ ḻeczə ṉezecho bito c̱hazlažəꞌəcho šə beṉəꞌ byonꞌ cui əgwšib yic̱hɉeꞌenəꞌ, con güeꞌe latɉə ətoṉən. Naquən to yeḻəꞌ ztoꞌ c̱heꞌ šə goneꞌ caꞌ.
\v 15 Pero naꞌ noꞌolənꞌ xochechgua yišəꞌ yic̱hɉeꞌen šə žian deꞌe toṉə. Diozənꞌ noneꞌ par nic̱h yišəꞌ yic̱hɉ noꞌol caꞌ chaquən deꞌe toṉə par chcuašəꞌən yic̱hɉgaꞌaqueꞌenəꞌ.
\v 16 Naꞌ šə nole bito chazlažəꞌəle deꞌe quinga babzoɉaꞌ naꞌ šə chaquele əgwšašle c̱hei, əṉiaꞌ leꞌe clar de que netoꞌ apostol bito choꞌetoꞌ latɉə soꞌon noꞌol caꞌ orasyon lao ndopə nžagcho sin cui yosoꞌocuašəꞌ yic̱hɉgaꞌaqueꞌenəꞌ, naꞌ nic chsoeꞌ beṉəꞌ lɉuežɉtoꞌ caꞌ latɉə soꞌoneꞌ caꞌ gatəꞌətezəchlə žaꞌ beṉəꞌ bagwleɉ Diozənꞌ par chəsəꞌədopə chəsəꞌəžagueꞌ chsoꞌelaogüeꞌe Cristənꞌ.
\s1 Catəꞌən gwseꞌeɉ gwsaꞌogüeꞌ txen bito ɉəsyəꞌəzaꞌalažeꞌe canꞌ bnežɉw cuin X̱ancho Jesocristənꞌ por ni c̱hegaꞌaqueꞌ
\p
\v 17 Ḻeczə de deꞌe yoblə deꞌen əṉiaꞌ leꞌe naꞌ ca naquə ḻenṉəꞌ bito gaquə əṉiaꞌ de que chonḻe güen. Deꞌen chonḻe lao chdopə chžagle txen par choꞌelaꞌole Cristənꞌ chonən mal len leꞌe lguaꞌa deꞌe gaquəlenən leꞌe.
\v 18 Eniaꞌ caꞌ c̱hedəꞌ babendaꞌ dižəꞌ de que catəꞌ chdopə chžagle par choꞌelaꞌole Cristənꞌ bito chonḻe txen len beṉəꞌ lɉuežɉle. Naꞌ de repent dižəꞌ deꞌen babendaꞌ naquən deꞌe ḻi.
\v 19 Deꞌe ḻi ṉitəꞌ baḻə beṉəꞌ entr leꞌe cui chsoꞌoneꞌ txen len yoguəꞌəle. Naꞌ deꞌen cui chsoꞌoneꞌ txen chloeꞌen nonꞌ chonḻilažəꞌ Cristənꞌ do yic̱hɉ do lažeꞌe naꞌ nonꞌ cui.
\v 20 Naꞌ catəꞌ chežagle par chaole txen, bito chonḻe ca žɉəyezaꞌalažəꞌəle deꞌen bnežɉw cuin X̱ancho Jesocristənꞌ por ni c̱hecho catəꞌən gwsoꞌoteꞌeneꞌ, ḻaꞌaṉəꞌəczə chedopə chežagle par žɉəyezaꞌalažəꞌəlen.
\v 21 To tole cheꞌeɉ chaole deꞌen nox̱əꞌəle sin cui chbezə lɉuežɉle caꞌ. Bito chonḻen tozə par nic̱h yoguəꞌəle gaolen. Deꞌe naꞌanəꞌ baḻle ṉeꞌe chdonḻe catəꞌ chedaole naꞌ yebaḻle chzožele deꞌe tant cheꞌeɉ chaox̱atle.
\v 22 Ncaꞌalə xṉeze yegaꞌaṉ ližle yeꞌeɉ gaole cle ca yeꞌeɉ gaole lao beṉəꞌ cui de c̱hegaꞌaqueꞌ šə cui əgwnežɉwle c̱hegaꞌaqueꞌ. Chongaꞌaquele lɉuežɉle ca beṉəꞌ cui bi zɉəzaquəꞌ, ḻaꞌaṉəꞌəczə txen len chioꞌo bagwleɉ Diozənꞌ ḻegaꞌaqueꞌ par chsoꞌelaogüeꞌe Jesocristənꞌ: Chonḻe ca chsaꞌaqueneꞌ tolə deꞌen cui de c̱hegaꞌaqueꞌ. Bito gonḻe xbab əṉiaꞌ de que güenṉəꞌ chonḻe deꞌen chonḻe caꞌ.
\s1 Cheꞌeɉ chaocho par chɉəyezaꞌalažəꞌəcho deꞌen bnežɉw cuin X̱ancho Jesocristənꞌ por ni c̱hecho
\p
\v 23 X̱ancho Jesoꞌosənꞌ beneꞌ par nic̱h ṉezdaꞌ canꞌ cheneꞌeneꞌ goncho par žɉəyezaꞌalažəꞌəcho deꞌen bnežɉw cuineꞌ por ni c̱hecho catəꞌən gwsoꞌoteꞌeneꞌ. Naꞌ babzeɉniꞌidaꞌ leꞌe de que žeꞌenəꞌ catəꞌən Jodənꞌ bdieꞌ X̱ancho Jesoꞌosənꞌ lao naꞌ beṉəꞌ mal caꞌ, X̱ancho naꞌanəꞌ bex̱eꞌe to yetxtilənꞌ.
\v 24 Naꞌ lao nox̱eꞌen beꞌe yeḻəꞌ chox̱cwlen c̱he Diozənꞌ. Nach bzoxɉeꞌen, naꞌ gwneꞌ: “Ḻegao yetxtil nga. Ḻenṉəꞌ naquən cuerp c̱hiaꞌ deꞌen əgwnežɉuaꞌ por ni c̱hele. Quinga gonḻe par žɉəyezaꞌalažəꞌəle ca deꞌen gwnežɉuaꞌan.”
\v 25 Beyož gwsaꞌogüeꞌ yetxtilənꞌ bex̱eꞌe to tas nis obanꞌ naꞌ ḻeczə beꞌe yeḻəꞌ chox̱cwlen c̱he Diozənꞌ. Naꞌ gožeꞌ beṉəꞌ caꞌ: “Deꞌen yožə ḻoꞌo tas nga zeɉen de que Diozənꞌ solao goneꞌ deꞌe cobə deꞌen noneꞌ lyebe goneꞌ par gaquəleneꞌ leꞌe. Naꞌ goneꞌen c̱hedəꞌ soꞌoteꞌ nadaꞌ naꞌ lalɉə xc̱henaꞌanəꞌ por ni c̱hele. Naꞌ batəꞌətezə yeꞌeɉlen canꞌ yeꞌeɉlen ṉaꞌa, ḻeꞌe yosaꞌalažəꞌ ca deꞌe gwnežɉo cuinaꞌ por ni c̱hele.”
\v 26 Naꞌ nadaꞌ Pab chezniaꞌ leꞌe, yoguəꞌ las catəꞌən gaocho yetxtilənꞌ naꞌ catəꞌən yeꞌeɉcho nis obanꞌ deꞌen cheꞌeɉ chaocho par chɉəyezaꞌalažəꞌəcho ca deꞌen bnežɉw cuin X̱ancho Jesocristənꞌ por ni c̱hecho, choncho ca yesəꞌəṉeze beṉəꞌ de que gwdixɉueꞌ xtoḻəꞌəchonꞌ catəꞌən gwsoꞌoteꞌeneꞌ. Naꞌ canꞌ gonchcho xte catəꞌən yideꞌ deꞌe yoblə.
\s1 Canꞌ cheyaḻəꞌ goncho catəꞌ cheꞌeɉ chaocho par chɉəyezaꞌalažəꞌəcho deꞌen bnežɉw cuin X̱ancho Jesocristənꞌ por ni c̱hecho
\p
\v 27 Deꞌe naꞌanəꞌ šə bito güeꞌelaꞌocho X̱ancho Jesocristənꞌ do yic̱hɉ do lažəꞌəcho bito naquən güen yeꞌeɉ gaocho deꞌen cheꞌeɉ chaocho par chɉəyezaꞌalažəꞌəcho ca deꞌen bnežɉw cuin X̱ancho Jesocristənꞌ por ni c̱hecho. Naꞌ ḻeczə bito naquən güen yeꞌeɉ gaochon catəꞌ cui zocho binḻo len Diozənꞌ o len lɉuežɉcho. Gapcho doḻəꞌ šə yeꞌeɉ gaochon caꞌ, c̱hedəꞌ goncho ca cui bi zaquəꞌ deꞌen bnežɉw cuin X̱ancho Jesocristənꞌ blalɉ xc̱heneꞌenəꞌ por ni c̱hecho.
\v 28 Catəꞌən cheꞌeɉ chaocho par chɉəyezaꞌalažəꞌəcho ca deꞌen bnežɉw cuin X̱ancho Jesocristənꞌ por ni c̱hecho, to tocho cheyaḻəꞌ gonyaṉəꞌəcho xbab šə zocho binḻo len Diozənꞌ naꞌ len lɉuežɉcho caꞌ par nic̱h yeꞌeɉ gaocho deꞌen de yeꞌeɉ gaocho.
\v 29 Naꞌ šə cheꞌeɉ chaochon sin cui goncho xbab ca deꞌen bnežɉw cuin X̱anchonꞌ por ni c̱hecho Diozənꞌ goṉeꞌ chioꞌo castigw.
\v 30 Naꞌ deꞌen cheꞌeɉ chaolen sin cui chonḻe xbab bi zeɉen, deꞌen naꞌanəꞌ baḻə beṉəꞌ lɉuežɉlenꞌ bagwsaꞌat naꞌ zanḻe chacšene.
\v 31 Pero naꞌ šə gonyaṉəꞌəcho xbab naquənꞌ goncho par nic̱h socho binḻo len Diozənꞌ naꞌ len lɉuežɉcho, nachənꞌ bito goṉ Diozənꞌ chioꞌo castigw por ni c̱he canꞌ cheꞌeɉ chaochonꞌ.
\v 32 Catəꞌ napcho doḻəꞌ naꞌ cheꞌeɉ chaochon, X̱ancho Diozənꞌ choṉeꞌ chioꞌo castigw par nic̱h cheyacbeꞌicho de que deꞌe malənꞌ choncho. Choneꞌ caꞌ par nic̱h cui siꞌicho castigw zeɉḻicaṉe canꞌ gac c̱he beṉəꞌ caꞌ cui chsoꞌelaoꞌ ḻeꞌ.
\p
\v 33 Deꞌe naꞌanəꞌ beṉəꞌ bišəꞌ, catəꞌ ədopə əžagle txen par yeꞌeɉ gaole, ḻecuezə lɉuežɉle caꞌ par nic̱h yeꞌeɉ gao yoguəꞌəle txen.
\v 34 Šə deꞌen chbiḻ chdonḻe naꞌazə, ncaꞌalə xṉeze yegaꞌaṉ ližle yeꞌeɉ gaole, caguə ca goṉ Diozənꞌ leꞌe castigw canꞌ chonḻe catəꞌən chdopə chžagle. Naꞌ ṉeꞌe deczə deꞌen cheꞌendaꞌ gwzeɉniꞌidaꞌ leꞌe naquənꞌ gonḻe, pero catəꞌ yidaꞌ deꞌe yoblə ganꞌ zolenəꞌ canaꞌach əgwzeɉniꞌidaꞌ leꞌe c̱he deꞌe caꞌ.
\c 12
\s1 Spirit c̱he Diozənꞌ chaclenən to tocho par goncho bi deꞌen cheneꞌen goncho
\p
\v 1 Beṉəꞌ bišəꞌ, de deꞌen cheꞌendaꞌ əṉezele c̱he deꞌen chon Spirit c̱he Diozənꞌ chaclenən chioꞌo chonḻilažəꞌəcho Jesocristənꞌ.
\p
\v 2 Ṉezele catəꞌən cuiṉəꞌ gombiꞌale Diozənꞌ banxoayagle par cheɉṉiꞌalažəꞌəle lguaꞌa lsaquəꞌ caꞌ con canꞌ bzeɉniꞌi beṉəꞌ leꞌe, ḻaꞌaṉəꞌəczə lguaꞌa lsaquəꞌ caꞌ bito zɉənyeꞌen biš xṉe.
\v 3 Pero ṉaꞌa ža, cheꞌendaꞌ əṉezele de que Spirit c̱he Diozənꞌ bito chonən par nic̱h no əṉa de que Jesoꞌosənꞌ naqueꞌ beṉəꞌ maldit. Naꞌ notono no əṉa de que Jesoꞌosənꞌ naqueꞌ X̱aneꞌ šə cui chon Spirit c̱he Diozənꞌ par əṉeꞌ caꞌ.
\p
\v 4 Tozə Spirit c̱he Diozənꞌ zon naꞌ nžaꞌ nžaꞌ canꞌ chaclenən to tocho par goncho bi deꞌen goncho naꞌ par əṉezecho bi deꞌen ṉezecho.
\v 5 Tozə X̱ancho Jesocristənꞌ choꞌelaꞌocho ḻaꞌaṉəꞌəczə nžaꞌ nžaꞌ canꞌ chac gon to tocho xšineꞌenəꞌ.
\v 6 Ḻeczə tozə Dioz nanꞌ zo ḻaꞌaṉəꞌəczə nžaꞌ nžaꞌ canꞌ choneꞌ len to tocho par nic̱h choncho xšineꞌenəꞌ.
\v 7 Naꞌ Spirit c̱he Diozənꞌ zon len to tocho par nic̱h caꞌ chac choncho deꞌen chaclenən lɉuežɉcho.
\v 8 Spirit c̱he Diozənꞌ chonən par nic̱h baḻcho choꞌecho dižəꞌ c̱he Diozənꞌ deꞌen naquən ḻechguaḻe dižəꞌ sinꞌ, naꞌ ḻeczə Spirit naꞌanəꞌ chaclenən yebaḻcho par cheɉniꞌicho c̱he Diozənꞌ naꞌ par choꞌecho xtižeꞌenəꞌ.
\v 9 Naꞌ Spirit naꞌanəꞌ chonən ca baḻcho chonḻilažəꞌəchguacho Diozənꞌ par nic̱h chac bitəꞌətezə deꞌen chṉabechoneꞌ gaquə. Naꞌ ḻeczə Spirit naꞌanəꞌ chonən par nic̱h baḻcho chac choncho ca chəsyəꞌəyaque beṉəꞌ chsaꞌacšene.
\v 10 Naꞌ Spiritənꞌ chonən par nic̱h baḻcho choncho miḻagr, naꞌ baḻcho chyix̱ɉueꞌecho bi deꞌen bagwna Diozənꞌ chioꞌo. Naꞌ ḻeczə Spirit nanꞌ chaclenən yebaḻcho par nic̱h chṉezecho c̱he bitəꞌətezə deꞌen chsoꞌon beṉəꞌ šə zaꞌan c̱he Spirit c̱he Diozənꞌ o šə c̱he deꞌe x̱ioꞌonəꞌ. Naꞌ Spirit naꞌaczənꞌ chaclenən yebaḻcho par chchoɉ catəꞌ choꞌecho gwde gwdelə dižəꞌ deꞌen cui cheɉniꞌicho, naꞌ chaclenən yebaḻcho par chozeɉniꞌigaꞌaquechoneꞌ bi zeɉe dižəꞌ deꞌen choꞌechonꞌ.
\v 11 Tozə Spiritənꞌ chaclenən yoguəꞌəcho par nic̱h choncho yoguəꞌ deꞌe caꞌ cheneꞌen gon to tocho.
\s1 Yoguəꞌ chioꞌo chonḻilažəꞌəcho Cristənꞌ naccho tozə, canꞌ naquə cuerp c̱hechonꞌ
\p
\v 12 Cuerp c̱hechonꞌ nsaꞌan zan part pero deꞌen zɉəngodəꞌən txen naquən tozə cuerp. Caꞌaczə naquən len yoguəꞌ chioꞌo chonḻilažəꞌəcho Cristənꞌ, naccho tozə canꞌ naquə cuerp c̱hechonꞌ.
\v 13 Baḻə chioꞌo naccho beṉəꞌ Izrael naꞌ yebaḻcho bito naccho beṉəꞌ Izrael. Baḻcho naccho beṉəꞌ esclabos naꞌ yebaḻcho bito naccho. Pero yoguəꞌəcho gwchoacho nis par chloꞌen de que Spirit c̱he Diozənꞌ babenən ca ngodəꞌəcho txen len Cristənꞌ. Naꞌ tozə Spirit naꞌanəꞌ zon ḻoꞌo yic̱hɉlaꞌaždaoꞌ yoguəꞌəcho.
\p
\v 14 Cuerp c̱hechonꞌ nsaꞌan zan part, naꞌ nžaꞌ naquə to to partənꞌ.
\v 15 Žaləꞌ ṉiꞌachonꞌ əṉan: “Bito nacaꞌ tozə len cuerpənꞌ c̱hedəꞌ bito nacaꞌ neꞌinəꞌ”, caguə ni c̱he deꞌen əṉan caꞌanəꞌ cui naquən tozə len cuerpənꞌ.
\v 16 Ḻeꞌegatezə caꞌ žaləꞌ nagchonꞌ əṉan: “Bito nacaꞌ nadaꞌ tozə len cuerpənꞌ c̱hedəꞌ bito nacaꞌ ɉelaogüei.”
\v 17 Žaləꞌ doxen cuerp c̱hechonꞌ naquən ɉelaocho, bito gaquə yenecho. Ḻeꞌegatezə caꞌ žaləꞌ doxen cuerpənꞌ naquən nagcho, bito gaquə ḻeꞌicho.
\v 18 Pero Diozənꞌ bsiꞌe xṉeze par nic̱h cuerp c̱hechonꞌ nsaꞌan zan part deꞌe chsoꞌon žin con canꞌ gwyazlažeꞌe.
\v 19 Bito nyaꞌ cuerp c̱hechonꞌ žaləꞌ nsaꞌan tozə part.
\v 20 Cuerp c̱hechonꞌ nsaꞌan zan part pero deꞌen zɉəngodəꞌən txen naquən tozə cuerp.
\p
\v 21 Deꞌe naꞌanəꞌ ɉelaochonꞌ bito gaquə yeꞌen naꞌachonꞌ: “Bito chyažɉdaꞌ leꞌ.” Naꞌ nic gaquə yeꞌ yic̱hɉchonꞌ ṉiꞌachonꞌ: “Bito chyažɉdaꞌ leꞌ.”
\v 22 Ḻaꞌaṉəꞌəczə cuerp c̱hechonꞌ nsaꞌan baḻə part deꞌe cuitec bi fuers c̱hei de, biaꞌaczə ḻechguaḻe chyažɉechon.
\v 23 Naꞌ part caꞌ nsaꞌ cuerp c̱hechonꞌ deꞌen chaquecho cuitec bi zaquəꞌ, chiꞌ yic̱hɉchon ca deꞌen cheyacw xacho. Naꞌ part caꞌ deꞌe cui cheneꞌecho leꞌi beṉəꞌ, chcuašəꞌəchon len xacho deꞌen chacwcho.
\v 24 Pero part deꞌen nsaꞌ cuerp c̱hechonꞌ deꞌen banaquə xoche bito chcuašəꞌəchon. Naꞌ Diozənꞌ noneꞌ cuerp c̱hechonꞌ ca chiꞌ yic̱hɉcho c̱he part caꞌ deꞌen cui zɉənaquə xoche.
\v 25 Caꞌaczənꞌ bsiꞌe xṉeze par nic̱h chioꞌo choꞌelaꞌocho Cristənꞌ goncho txen tocho yetocho naꞌ cueꞌ yic̱hɉcho gaquəlen lɉuežɉcho.
\v 26 Naꞌ šə binꞌ chac c̱he tocho, yoguəꞌəcho c̱hiꞌ saquəꞌəcho txen. Naꞌ šə chac güen c̱he yetocho, yoguəꞌəcho socho mbalaz.
\p
\v 27 Yoguəꞌəcho ngodəꞌəcho txen len Cristənꞌ naꞌ to tocho gwxaquəꞌəlebecho ca to part cuerp c̱heꞌenəꞌ.
\v 28 Naꞌ entr chioꞌo chdopə chžagcho choꞌelaꞌocho Cristənꞌ, Dioz nanꞌ gwleɉeꞌ netoꞌ naquətoꞌ apostol, naꞌ deꞌen ngüeꞌe lao naꞌatoꞌ gontoꞌ naquən deꞌe zaquəꞌəchgüei. Naꞌ ḻeczeꞌen gwleɉeꞌ yebaḻeꞌ par chəsəꞌəyix̱ɉuiꞌe deꞌen neꞌenəꞌ. Naꞌ deꞌen chsoꞌoneꞌenəꞌ ḻeczə naquən deꞌe zaqueꞌe. Naꞌ yebaḻeꞌ gwleɉ Diozənꞌ par chosoꞌosed chosoꞌoloꞌineꞌ xtižeꞌenəꞌ. Naꞌ deꞌen chosoꞌosed chosoꞌoloꞌineꞌ xtižeꞌenəꞌ ḻeczə naquən deꞌe zaqueꞌe. Naꞌ ḻeczə gwleɉ Diozənꞌ beṉəꞌ chsoꞌon miḻagr naꞌ beṉəꞌ chsoꞌon par chəsyəꞌəyaque beṉəꞌ chsaꞌacšene, naꞌ beṉəꞌ chsaꞌaclen yeziquəꞌəchlə beṉəꞌ šə bi deꞌen chəsəꞌəyažɉeneꞌ. Naꞌ gwleɉeꞌ beṉəꞌ chəsəꞌənabiaꞌ chioꞌo chdopə chžagcho choꞌelaꞌocho Cristənꞌ, naꞌ gwleɉeꞌ beṉəꞌ chsoꞌe gwde gwdelə dižəꞌ deꞌen cui chseꞌeɉniꞌineꞌ con catəꞌ chon Spiritənꞌ ca chsoꞌen.
\v 29 Pero caguə yoguəꞌəcho naccho apostol. Naꞌ Diozənꞌ bito gwleɉeꞌ yoguəꞌəcho par c̱hix̱ɉueꞌecho bi deꞌen bagwneꞌ chioꞌo, naꞌ nic gwleɉeꞌ yoguəꞌəcho par əgwsed əgwloꞌicho xtižeꞌenəꞌ, naꞌ nic gwleɉeꞌ yoguəꞌəcho par goncho miḻagr.
\v 30 Caguə yoguəꞌəcho chac goncho ca yesyəꞌəyaque beṉəꞌ chsaꞌacšene, naꞌ caguə yoguəꞌəchonꞌ chon Spirit c̱he Diozənꞌ par güeꞌecho gwde gwdelə dižəꞌ deꞌen cui cheɉniꞌicho, naꞌ caguə yoguəꞌəchonꞌ chac yozeɉniꞌicho bi zeɉen dižəꞌ deꞌen chon Spiritənꞌ ca chsoꞌe.
\v 31 Chonḻe güen šə chzelažəꞌəle gaquəlen Spirit c̱he Diozənꞌ leꞌe gonḻe deꞌe caꞌ deꞌen naquəch deꞌe zaqueꞌe. Pero əgwloꞌidaꞌ leꞌe yeto deꞌe gonḻe deꞌen naquə deꞌe žialao xench.
\c 13
\s1 Cheyaḻəꞌ gaque c̱he lɉuežɉ beṉac̱hcho
\p
\v 1 Ḻaꞌaṉəꞌəczə šə chaccho gwde gwdelə dižəꞌ deꞌen chsaꞌac beṉac̱hənꞌ naꞌ deꞌen chsaꞌac angl caꞌ, pero šə bito chaquecho c̱he lɉuežɉ beṉac̱hcho, bito bi bi zaquəꞌəcho. Con gwxaquəꞌəlebecho ca pedas ya deꞌen chsoꞌon sšag naꞌ ca platiy deꞌen chosoꞌosiž beṉəꞌ gocuež caꞌ laꞌ xtižəꞌəchonꞌ bitobi bi zaquəꞌən.
\v 2 Naꞌ ḻaꞌaṉəꞌəczə šə bagocwlen Spirit c̱he Diozənꞌ chioꞌo par nic̱h chyix̱ɉueꞌecho bi deꞌen bagwneꞌ chioꞌo len yeḻəꞌ guac c̱he Spiritənꞌ, bito bi zaquəꞌəcho šə bito chaquecho c̱he lɉuežɉ beṉac̱hcho. Ḻaꞌaṉəꞌəczə šə ṉezecho yoguəꞌəḻoḻ deꞌen cui no gwṉeze antslə, len ḻaꞌaṉəꞌəczə šə cheɉniꞌicho yoguəꞌəḻoḻ deꞌen naquə deꞌe zaqueꞌe, bitoczə bi zaquəꞌəcho šə cui chaquecho c̱he lɉuežɉ beṉac̱hchonꞌ. Naꞌ ḻaꞌaṉəꞌəczə šə ḻechguaḻe chonḻilažəꞌəcho Diozənꞌ par nic̱h choneꞌ bitəꞌətezə deꞌe zdebə deꞌen chṉabechoneꞌ goneꞌ, bitoczə bi zaquəꞌəcho šə cui chaquecho c̱he lɉuežɉ beṉac̱hcho.
\v 3 Naꞌ šə cui chaquecho c̱he lɉuežɉ beṉac̱hchonꞌ bito bi zedəguaꞌan par chioꞌo ḻaꞌaṉəꞌəczə šə əgwnežɉwcho beṉəꞌ yašəꞌən yoguəꞌ deꞌen deicho. Ḻeꞌegatezə caꞌ šə cui chaquecho c̱he lɉuežɉ beṉac̱hchonꞌ bitobi zedəguaꞌan par chioꞌo ḻaꞌaṉəꞌəczə šə əgwnežɉo cuincho yosoꞌozeyeꞌ.
\p
\v 4 Šə chaquecho c̱he lɉuežɉ beṉac̱hcho, napcho yeḻəꞌ chxenḻažəꞌ len ḻegaꞌaqueꞌ, naꞌ choncho güen len ḻegaꞌaqueꞌ; bito chgueꞌigaꞌaquechoneꞌ šə chac güen c̱hegaꞌaqueꞌ; naꞌ bito choꞌelaoꞌ cuincho; naꞌ bito chaꞌalažəꞌəcho.
\v 5 Naꞌ catəꞌ chaquecho c̱he lɉuežɉ beṉac̱hcho, bito choncho nacze len ḻegaꞌaqueꞌ, bito choncho xbab c̱he cuinzcho, bito naccho beṉəꞌ xtišɉw, naꞌ bito naccho beṉəꞌ ggoꞌolažeꞌe.
\v 6 Naꞌ catəꞌ chaquecho c̱he lɉuežɉ beṉac̱hcho bito chebeicho šə nonꞌ chon deꞌe mal, sino que chebeicho šə nonꞌ chon deꞌe güen.
\v 7 Šə chaquecho c̱he lɉuežɉ beṉac̱hcho chapcho yeḻəꞌ chxenḻažəꞌ bitəꞌətezə deꞌen chsoꞌone beṉəꞌ chioꞌo, naꞌ choncho xbab güen c̱he yoguəꞌəḻoḻ beṉəꞌ, naꞌ zocho lez soꞌon beṉəꞌ güen yoguəꞌ las, naꞌ chgoꞌo chc̱heɉlažəꞌəcho len bitəꞌətezə deꞌen chac.
\p
\v 8 Cuat əžin ža catəꞌ cuich cheyaḻəꞌ gaquecho c̱he lɉuežɉ beṉac̱hcho. Pero gwžin ža catəꞌ cuich gon Diozənꞌ par nic̱h no c̱hix̱ɉueꞌe bi deꞌen bagožeꞌeneꞌ. Naꞌ gwžin ža catəꞌ Spirit c̱heꞌenəꞌ gonən ca cuich əsoꞌe gwde gwdelə dižəꞌ deꞌe cui chseꞌeɉniꞌi beṉəꞌ yoblə. Naꞌ ḻeczə gwžin ža catəꞌ te c̱he yoguəꞌəḻoḻ deꞌen ṉeze chioꞌo beṉac̱h lao yežlyo nga.
\v 9 Bitoṉəꞌ ṉezecho yoguəꞌəḻoḻ deꞌe əṉezecho naꞌ niqueṉəꞌ gac c̱hix̱ɉueꞌecho yoguəꞌəḻoḻ deꞌen bagwna Diozənꞌ chioꞌo.
\v 10 Pero gwžin ža catəꞌ gaquə cayaṉəꞌən cheneꞌe Diozənꞌ gaquə, naꞌ canaꞌachənꞌ cuich bi bi yegaꞌaṉ deꞌen cui gaquə cayaṉəꞌən cheneꞌe Diozənꞌ.
\p
\v 11 Catəꞌ goccho bidaoꞌ beꞌecho dižəꞌ canꞌ chsoeꞌ notəꞌətezə bidaoꞌ dižəꞌ, naꞌ ḻeczə xbab c̱hechonꞌ goquən ca xbab c̱hegaꞌacboꞌonəꞌ, naꞌ gwyeɉniꞌicho con canꞌ chseꞌeɉniꞌiboꞌ. Naꞌ ṉaꞌa bagwchaꞌocho bitoch choncho canꞌ chsoꞌon bidaoꞌ.
\v 12 Pero bitoṉəꞌ šeɉniꞌicho binḻo c̱he Diozənꞌ. Deꞌe naꞌanəꞌ gwxaquəꞌəlebecho ca beṉəꞌ chgüieꞌ beṉəꞌ yoblə to ḻoꞌo spejw deꞌe cuitec chloeꞌ binḻo. Pero gwžin ža catəꞌ šeɉniꞌiyaṉeꞌecho c̱he Diozənꞌ canꞌ cheɉniꞌineꞌ c̱hecho ṉaꞌa.
\v 13 Ṉaꞌa ža, deꞌe quinga šoṉə chon Diozənꞌ mendad goncho zeɉḻicaṉe: gonḻilažəꞌəchoneꞌ, socho lez gaquə güen c̱hecho, gaquecho c̱he Diozənꞌ naꞌ c̱he lɉuežɉ beṉac̱hcho. Pero deꞌen naquə deꞌe žialaoch goncho entr šoṉə deꞌe quinga, gaquecho c̱he Diozənꞌ naꞌ c̱he lɉuežɉ beṉac̱hcho.
\c 14
\s1 Beṉəꞌ caꞌ chsoꞌelen Diozənꞌ gwde gwdelə dižəꞌ deꞌen cui chseꞌeɉniꞌineꞌ
\p
\v 1 Cheyaḻəꞌ güeꞌelažəꞌəcho par gaquechecho c̱he Diozənꞌ naꞌ c̱he lɉuežɉ beṉac̱hcho, naꞌ ḻeczə cueꞌ yic̱hɉcho gaquəlen Spirit c̱heꞌenəꞌ chioꞌo par goncho xšineꞌenəꞌ. Naꞌ mazəchlə cheyaḻəꞌ cueꞌ yic̱hɉcho par gaquəlenən chioꞌo c̱hix̱ɉueꞌecho deꞌen əṉa Diozənꞌ chioꞌo.
\v 2 Baḻcho chon Spiritənꞌ par nic̱h chchoɉ catəꞌ choꞌelencho Diozənꞌ gwde gwdelə dižəꞌ deꞌen cui cheɉniꞌicho. Naꞌ catəꞌ choꞌelencho Diozənꞌ gwde gwdelə dižəꞌən caꞌ, caguə beṉac̱h naꞌanəꞌ choꞌelenchon c̱hedəꞌ bito chseꞌeɉniꞌineꞌ dižəꞌən. Spirit nanꞌ chonən par nic̱h choꞌecho dižəꞌ deꞌen cheɉniꞌi tozə Diozənꞌ.
\v 3 Pero catəꞌ chyix̱ɉueꞌecho deꞌen bagwna Diozənꞌ chioꞌo choncho par nic̱h lɉuežɉcho caꞌ ṉitəꞌətezə ṉiteꞌe soꞌonḻilažeꞌe ḻeꞌ, naꞌ chtipcho lažəꞌəgaꞌaqueꞌ, naꞌ ḻeczə choꞌegaꞌacchoneꞌ balor par ṉiteꞌe mbalaz.
\v 4 Catəꞌ Spirit c̱he Diozənꞌ chonən par nic̱h choꞌelenchoneꞌ gwde gwdelə dižəꞌ deꞌen cui cheɉniꞌicho, yic̱hɉlaꞌaždaꞌocho naꞌaganꞌ chaclenən. Pero catəꞌ Spirit c̱he Diozənꞌ chaclenən par nic̱h chyix̱ɉueꞌecho deꞌen bagwna Diozənꞌ chioꞌo, chaclenən yoguəꞌ chioꞌo chdopə chžagcho choꞌelaꞌocho Cristənꞌ.
\p
\v 5 Yebeidaꞌ žaləꞌ Spiritənꞌ gonən par nic̱h yoguəꞌəle güeꞌelenḻe Diozənꞌ gwde gwdelə dižəꞌ, pero gobeichdaꞌ žaləꞌ gaquəlenən yoguəꞌəle par c̱hix̱ɉueꞌele deꞌen yeꞌe leꞌe. Benꞌ chyix̱ɉueꞌe deꞌen bagož Diozənꞌ ḻeꞌ, choneꞌ to deꞌe zaquəꞌəche cle ca deꞌen chon benꞌ choꞌelen Diozənꞌ gwde gwdelə dižəꞌ. Laꞌ šə cui no zo no əgwzeɉniꞌi yeziquəꞌəchlə beṉəꞌ chsoꞌelaoꞌ Cristənꞌ bi dižəꞌən choꞌe, bito no gaquəlenən.
\v 6 Beṉəꞌ bišəꞌ, ṉezdaꞌ bito gaquəlenən leꞌe šə güeꞌelenaꞌ Diozənꞌ gwde gwdelə dižəꞌ catəꞌən yidaꞌ dezlaṉaꞌa leꞌe. Pero guaquəlenən leꞌe šə əgwzeɉniꞌidaꞌ leꞌe bi deꞌen babsed babloꞌi Diozənꞌ nadaꞌ. Naꞌ guaquəlenczən šə əgwzeɉniꞌidaꞌ leꞌe bichlə deꞌen ṉezdaꞌ c̱he Diozənꞌ. Guaquəlenczən šə c̱hix̱ɉueꞌidaꞌ deꞌen əṉa Diozənꞌ nadaꞌ. Naꞌ ḻeczə guaquəlenən šə gwsed gwloꞌidaꞌ leꞌe bi zeɉe xtižeꞌenəꞌ.
\p
\v 7 Ca naquə flaudənꞌ, šə tozə canꞌ gwcuež beṉəꞌ gocuežənꞌ ḻen dote tyemp, notono gacbeꞌi bi piesənꞌ chcuežeꞌ. Ḻeꞌegatezə caꞌ arpənꞌ šə tozə canꞌ ggoḻ beṉəꞌ gocuežənꞌ ḻen dote tyemp, notono gacbeꞌi bi piesənꞌ chgoḻeꞌ.
\v 8 Catəꞌ zo to beṉəꞌ chcuežeꞌ cornetənꞌ par nic̱h chəsəꞌəṉeze soḻdad caꞌ naquənꞌ soꞌoneꞌ, šə bito əgwcuežeꞌen clar, bito seꞌeɉniꞌineꞌ naquənꞌ cheyaḻəꞌ soꞌoneꞌ.
\v 9 Ḻeꞌegatezə caꞌ chioꞌo ža, šə güeꞌelencho Diozənꞌ dižəꞌ deꞌen cui chseꞌeɉniꞌi beṉəꞌ, bito gaquəlenən ḻegaꞌaqueꞌ.
\v 10 Ṉezecho de que beṉəꞌ žaꞌ doxen yežlyo nga gwde gwdelə dižəꞌ deꞌe chsaꞌaqueꞌ, naꞌ to togaꞌaqueꞌ chseꞌeɉniꞌi xtižəꞌ lɉuežɉgaꞌaqueꞌ.
\v 11 Naꞌ šə chioꞌo bito chaccho dižəꞌ deꞌe chac yeto beṉəꞌ, ṉezecho ḻeꞌ naqueꞌ beṉəꞌ zitəꞌ naꞌ chioꞌo naccho beṉəꞌ zitəꞌ.
\v 12 Naꞌ leꞌe chiꞌ yic̱hɉle gaquəlen Spirit c̱he Diozənꞌ leꞌe, caꞌaczənꞌ coꞌ yic̱hɉle gonḻe xšineꞌenəꞌ par gaquəlen lɉuežɉle. Gonḻe caꞌ nic̱h yoguəꞌəle chdopə chžagle choꞌelaꞌole Cristənꞌ sotezə sole gonḻilažəꞌəleneꞌ.
\p
\v 13 Naꞌ šə Spiritənꞌ gonən ca əchoɉ catəꞌ güeꞌelencho Diozənꞌ gwde gwdelə dižəꞌ, cheyaḻəꞌ ṉabecho Diozənꞌ gaquəlencheꞌ chioꞌo par nic̱h əgwzeɉniꞌicho beṉəꞌ bi zeɉen dižəꞌ deꞌen choꞌelenchoneꞌenəꞌ.
\v 14 Naꞌ catəꞌ choncho orasyonṉəꞌ šə Spirit c̱he Diozənꞌ chonən par choꞌelenchoneꞌ dižəꞌ deꞌe cui cheɉniꞌicho, bito bi xbab choncho ḻoꞌo yic̱hɉlaꞌaždaꞌochonꞌ catəꞌən choꞌechon, con chacbeꞌicho de que Dioz naꞌaczənꞌ choꞌelaꞌocho.
\v 15 Quinganꞌ cheyaḻəꞌ goncho, catəꞌ goncho orasyonṉəꞌ güeꞌecho dižəꞌ deꞌen əgwzeɉniꞌi Spirit c̱he Diozənꞌ chioꞌo, pero goncho xbab c̱he dižəꞌ deꞌen choꞌechonꞌ. Naꞌ catəꞌ goḻcho, goḻcho bi deꞌen əgwzeɉniꞌi Spirit c̱he Diozənꞌ chioꞌo, naꞌ ḻeczə goncho xbab c̱he deꞌen choḻchonꞌ.
\v 16 Ḻegon xbab nac gaquə šə güeꞌecho yeḻəꞌ chox̱cwlen c̱he Diozənꞌ len dižəꞌ deꞌen cui cheɉniꞌi yoguəꞌəcho. Beṉəꞌ cuiṉəꞌ yesəꞌəṉeze naquənꞌ choncho lao chdopə chžagcho choꞌelaꞌocho Cristənꞌ, bito seꞌeɉniꞌineꞌ binꞌ nacho naꞌ deꞌe naꞌanəꞌ bito əsoꞌe yeḻəꞌ chox̱cwlen c̱he Diozənꞌ txen len chioꞌo.
\v 17 Bito gaquəlenən ḻegaꞌaqueꞌ šə goncho orasyon len dižəꞌ deꞌe cui seꞌeɉniꞌineꞌ ḻaꞌaṉəꞌəczə šə deꞌe ḻi güeꞌecho yeḻəꞌ chox̱cwlen c̱he Diozənꞌ binḻo.
\v 18 Choꞌa yeḻəꞌ chox̱cwlen c̱he Diozənꞌ de que Spirit c̱heꞌenəꞌ chonən par nic̱h choꞌelenchaꞌaneꞌ gwde gwdelə dižəꞌ mazəchlə ca chonən len notəꞌətezəchle.
\v 19 Pero catəꞌ ndopə nžagcho choꞌelaꞌocho Cristənꞌ ḻaꞌaṉəꞌ gueyəꞌəzə dižəꞌ deꞌen cheɉniꞌi yoguəꞌəcho gwsed gwloꞌidaꞌ leꞌe zeɉəchen cle ca guaꞌa ši mil dižəꞌ deꞌen cui cheɉniꞌicho.
\p
\v 20 Beṉəꞌ bišə, naquəczən güen gaccho ca biꞌi cheꞌeṉ daoꞌ laogüe deꞌen cui goncho deꞌe mal. Pero cheyaḻəꞌ šoꞌocho xbab c̱he beṉəꞌ chaꞌo naꞌ bito šoꞌocho xbab c̱he biꞌi cuiṉəꞌ šeɉniꞌi.
\v 21 Xtižəꞌ Diozənꞌ nyoɉən nan: “Nadaꞌ Dioz gonaꞌ par nic̱h beṉəꞌ zitəꞌ caꞌ əsoꞌeleneꞌ beṉəꞌ Izrael caꞌ dižəꞌ deꞌe cui seꞌeɉniꞌineꞌ, naꞌ yesyəꞌəbane beṉəꞌ Izrael caꞌ, pero biaꞌaczə bito yosoꞌozenagueꞌ c̱hiaꞌ.” Canꞌ na X̱ancho Diozənꞌ.
\v 22 Šə nitəꞌ beṉəꞌ cui chseꞌeɉḻeꞌe c̱he Diozənꞌ naꞌ chosoꞌozenagueꞌ catəꞌ güeꞌelenḻe Diozənꞌ gwde gwdelə dižəꞌ deꞌen cui cheɉniꞌile yesyəꞌəbaneneꞌ naꞌ saꞌacbeꞌilɉeineꞌ de que zoczə Diozənꞌ len leꞌe. Naꞌ ca naquə chioꞌo choꞌelaꞌocho Cristənꞌ, baṉezecho de que zoczə Diozənꞌ len chioꞌo. Naꞌ catəꞌ to beṉəꞌ chyix̱ɉueꞌineꞌ bi deꞌen bagož Diozənꞌ ḻeꞌ, chaclenən chioꞌo chonḻilažəꞌəcho Cristənꞌ ḻaꞌaṉəꞌəczə cui chaclenən beṉəꞌ cui chsoꞌonḻilažeꞌeneꞌ.
\v 23 Ḻegon xbab nac gaquə šə lao ndopə nžagcho txen choꞌelaꞌocho Cristənꞌ yoguəꞌəcho solao güeꞌelenchoneꞌ gwde gwdelə dižəꞌ deꞌe cui cheɉniꞌicho. Naꞌ šə daꞌacclə beṉəꞌ cui chsoꞌonḻilažəꞌ Cristənꞌ o beṉəꞌ cuiṉəꞌ yesəꞌəṉeze naquənꞌ choncho choꞌelaꞌochoneꞌ, əseꞌeneneꞌ choꞌelenchoneꞌ gwde gwdelə dižəꞌ naꞌ soꞌoneꞌ xbab de que chac tontchonꞌ.
\v 24 Pero nžaꞌan šə to tocho chyix̱ɉueꞌecho bi deꞌen bagwna Diozənꞌ chioꞌo. Šə yezidəclə to beṉəꞌ cuiṉəꞌ gonḻilažəꞌ Cristənꞌ o to beṉəꞌ cuiṉəꞌ ṉeze naquənꞌ choncho choꞌelaꞌochoneꞌ, gacbeꞌineꞌ de que de xtoḻeꞌe catəꞌ to tocho chyix̱ɉueꞌecho bi deꞌen bagwna Diozənꞌ chioꞌo.
\v 25 Naꞌ catəꞌ gacbeꞌineꞌ de que laꞌaždaogüeꞌenəꞌ naquən mal lao Diozənꞌ gwzolɉa xibeꞌ güeꞌelaogüeꞌeneꞌ naꞌ əṉeꞌ de que zoczə Diozənꞌ len chioꞌo chonḻilažəꞌəcho Cristənꞌ.
\s1 Cheyaḻəꞌ gwsaꞌacho coltənꞌ binḻo naꞌ cui gonchon chac yazə
\p
\v 26 Ṉaꞌa ža beṉəꞌ bišəꞌ, catəꞌən chdopə chžagle txen baḻle goḻle to imno, naꞌ baḻle de deꞌe əgwsed gwloꞌi lɉuežɉle, naꞌ baḻle güeꞌele dižəꞌ c̱he to deꞌen babzeɉniꞌi Spirit c̱he Diozənꞌ leꞌe, naꞌ baḻle güeꞌelaꞌole Diozənꞌ güeꞌelenḻeneꞌ gwde gwdelə dižəꞌ deꞌen cui cheɉniꞌile, naꞌ yebaḻle yozeɉniꞌile dižəꞌ deꞌen gwsoꞌelen beṉəꞌ lɉuežɉle caꞌ Diozənꞌ. Naquəczən güen gonḻe yoguəꞌ deꞌe caꞌ con šə gonḻen ca saꞌaclenən beṉəꞌ lɉuežɉle caꞌ soꞌonḻilažəꞌəcheꞌ Cristənꞌ, beṉəꞌ caꞌ nacle txen choꞌelaꞌoleneꞌ.
\v 27 Naꞌ šə nole güeꞌelenḻe Diozənꞌ gwde gwdelə dižəꞌ deꞌen cui cheɉniꞌile, ḻegüeꞌeleneꞌen pero do c̱hopzle o šoṉzle naꞌ tgüeɉə tgüeɉle. Nach te naꞌ əchoɉ to beṉəꞌ yozeɉniꞌineꞌ bi zeɉe dižəꞌ deꞌen beꞌelenḻe Diozənꞌ.
\v 28 Naꞌ šə cui no zo no yozeɉniꞌi bi zeɉe dižəꞌ caꞌ, bitoclə güeꞌelenḻe Diozənꞌ dižəꞌən nac caꞌ zižɉo lao ndopə nžagle txen. Con ḻoꞌo laꞌaždaꞌole naꞌazə güeꞌelenḻeneꞌenəꞌ.
\v 29 Naꞌ leꞌe bagocwlen Spiritənꞌ par chyix̱ɉueꞌi lɉuežɉle deꞌen bagwna Diozənꞌ leꞌe, ḻeczə do c̱hopzle o šoṉzle əchoɉle c̱hix̱ɉueꞌelen lao ndopə nžagle, nic̱h beṉəꞌ caꞌ yeḻaꞌ yosoꞌozenagueꞌ naꞌ soꞌoneꞌ xbab šə deꞌen na to tole zaꞌan c̱he Diozənꞌ.
\v 30 Naꞌ šə lao choeꞌ toeꞌ dižəꞌən Diozənꞌ əgwzeɉniꞌineꞌ yetoeꞌ to deꞌe c̱hix̱ɉuiꞌe, benꞌ bachoꞌeczə dižəꞌən cheyaḻəꞌ cuezeꞌ žlac güeꞌ benꞌ yeto dižəꞌənəꞌ.
\v 31 Chaclenczə Spiritənꞌ yoguəꞌəle par nic̱h tgüeɉə tgüeɉle chyix̱ɉueꞌele bi deꞌen bagwna Diozənꞌ leꞌe, chozeɉniꞌi lɉuežɉle naꞌ chtiplažəꞌ lɉuežɉle.
\v 32 Spirit c̱he Diozənꞌ chonən par nic̱h baḻle chac c̱hix̱ɉueꞌelen bi deꞌen bagwna Diozənꞌ leꞌe. Naꞌ c̱hix̱ɉueꞌelen con catəꞌəzənꞌ chacbeꞌile naquən güen par c̱hix̱ɉueꞌelen.
\v 33-34 Diozənꞌ cheneꞌeneꞌ əgwsaꞌ colt c̱hechonꞌ binḻo naꞌ cui šaꞌacho chac yazə.
\p Naꞌ gatəꞌətezə chəsəꞌədopə chəsəꞌəžag beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ, bito cheyaḻəꞌ soeꞌ noꞌol caꞌ dižəꞌ lao coltənꞌ. Cheyaḻəꞌ yesəꞌəloꞌe de que chosoꞌozenagueꞌ c̱he chioꞌo beṉəꞌ byo laꞌ canꞌ na Xtižəꞌ Diozənꞌ deꞌen nyoɉənꞌ.
\v 35 Naꞌ šə de bi deꞌe chseꞌeneꞌe noꞌol caꞌ yesəꞌəṉezeneꞌ, cheyaḻəꞌ yesəꞌəṉabeꞌ beꞌen c̱he to togaꞌaqueꞌ catəꞌ yesyəꞌəžineꞌ ližgaꞌaqueꞌ, c̱hedəꞌ naquən to yeḻəꞌ ztoꞌ šə noꞌolənꞌ güeꞌe dižəꞌ lao ndopə nžagcho choꞌelaꞌocho Diozənꞌ.
\p
\v 36 Leꞌe beṉəꞌ Corinto, bito cheyaḻəꞌ gonḻe xbab de que leꞌezənꞌ zaquəꞌəle par əṉale naquənꞌ gon chioꞌo chonḻilažəꞌəcho Cristənꞌ. Caguə zguaꞌatec leꞌen gwdisle xtižəꞌ Diozənꞌ, len caguə leꞌezənꞌ nombiꞌalen.
\v 37 Baḻle nale chon Spirit c̱he Diozənꞌ par nic̱h chyix̱ɉueꞌele bi deꞌen bagwna Diozənꞌ leꞌe, naꞌ baḻle nale de que Spirit c̱he Diozənꞌ chaclenən leꞌe par chonḻe bichlə deꞌen cheneꞌe Diozənꞌ. Šə deꞌe ḻi chaclen Spiritənꞌ leꞌe nachənꞌ guacbeꞌiczele de que mendad c̱he X̱ancho Crist naꞌanəꞌ chzoɉaꞌ leꞌe yoguəꞌ deꞌe quinga.
\v 38 Šə nole cui cheɉḻeꞌele de que Cristənꞌ choneꞌ par nic̱h chzoɉaꞌ deꞌe quinga, bito chaclen Spirit c̱he Diozənꞌ leꞌe šə caꞌ.
\p
\v 39 Ṉaꞌa ža beṉəꞌ bišəꞌ, deꞌe yoblə chniaꞌ leꞌe, ḻeṉabe Diozənꞌ gaquəlen Spirit c̱heꞌenəꞌ leꞌe par nic̱h c̱hix̱ɉueꞌele deꞌen əṉa Diozənꞌ leꞌe. Naꞌ šə Spirit c̱he Diozənꞌ gonən par nic̱h beṉəꞌ lɉuežɉle caꞌ əsoꞌeleneꞌ Diozənꞌ gwde gwdelə dižəꞌ, bito gwžonḻe əsoꞌeleneꞌen ḻeꞌ.
\v 40 Pero bitəꞌətezə deꞌen gonḻe lao coltənꞌ, ḻegwsaꞌan binḻo, naꞌ bito gonḻen chac yazə.
\c 15
\s1 Beban Jesocristənꞌ ladɉo beṉəꞌ guat caꞌ
\p
\v 1 Beṉəꞌ bišəꞌ, cheꞌendaꞌ yosaꞌalažəꞌəle dižəꞌ güen dižəꞌ cobə c̱he Cristənꞌ deꞌen babeꞌelenaꞌ leꞌe antslə. Babzenagle c̱hei naꞌ zotezə zole chdalenḻen.
\v 2 Naꞌ šə talenczle dižəꞌ güen dižəꞌ cobə c̱he Cristənꞌ deꞌen babeꞌelenaꞌ leꞌe, ṉezele de que žɉəyezole len Diozənꞌ. Pero šə bito talenḻe dižəꞌ güen dižəꞌ cobə c̱heꞌenəꞌ bitobi zeɉen deꞌen nale de que bacheɉḻeꞌele c̱he dižəꞌ güen dižəꞌ cobə c̱heꞌenəꞌ.
\p
\v 3 Diozənꞌ bzeneneꞌ nadaꞌ deꞌen zɉənaquə deꞌe žialao xench ca bitəꞌətezəchlə naꞌ bac̱h bsed bloꞌidaꞌan leꞌe. Gwniaꞌ leꞌe de que gwsoꞌot beṉəꞌ Cristənꞌ gwdixɉueꞌ xtoḻəꞌəchonꞌ, con canꞌ byoɉ Xtižəꞌ Diozənꞌ gaquə.
\v 4 Ḻeczə bgašəꞌ Cristənꞌ pero naꞌ beyas bebaneꞌ ladɉo beṉəꞌ guat caꞌ beyoṉ ža con canꞌ byoɉ Xtižəꞌ Diozənꞌ gaquə.
\v 5 Naꞌ biꞌa dižəꞌ canꞌ ben Cristənꞌ beyož bebaneꞌ ladɉo beṉəꞌ guat caꞌ, ɉəyeloeꞌ laogüeꞌ Bedənꞌ naꞌ gwde naꞌ ɉəyeloeꞌ laogüeꞌ yeziquəꞌəchlə disipl c̱heꞌ caꞌ lao niteꞌe txen, beṉəꞌ caꞌ gwsaꞌac šižiṉeꞌ antslə.
\v 6 Naꞌ gwde naꞌ ɉəyezloeꞌ laogüeꞌ mazlə gueyəꞌ gueyoa beṉəꞌ zɉənitəꞌ tšiꞌizə chsoꞌelaoꞌ ḻeꞌ. Naꞌ zan beṉəꞌ caꞌ ṉezɉəmban ṉaꞌa ḻaꞌaṉəꞌəczə bagwsaꞌat baḻeꞌ.
\v 7 Ḻeꞌegatezə caꞌ ɉəyezloeꞌ laogüeꞌ Jacobənꞌ nach gwde naꞌ ɉəyezloeꞌ laogüeꞌ yoguəꞌ apostol caꞌ.
\p
\v 8-9 Naꞌ ḻeꞌezelaogüe bedeyeloeꞌ laogüeꞌ nadaꞌ. Naꞌ gwxaquəꞌəlebədaꞌ ca to biꞌi golɉə sin cuiṉəꞌ žin ža, c̱hedəꞌ ca tyempənꞌ bitoṉəꞌ gonḻilažaꞌa Cristənꞌ, gwdaꞌ bc̱hiꞌ bsacaꞌa beṉəꞌ caꞌ bagwleɉ Diozənꞌ par chəsəꞌədopə chəsəꞌəžagueꞌ chsoꞌelaogüeꞌe Cristənꞌ. Deꞌe naꞌanəꞌ chacdaꞌ nacaꞌ ḻeꞌezelaogüe apostol beṉəꞌ cui bi zaquəꞌ entr beṉəꞌ lɉuežɉaꞌ caꞌ, naꞌ chacdaꞌ bitoczə zacaꞌa par nacaꞌ apostolənꞌ.
\v 10 Pero biaꞌaczə nžiꞌilažəꞌ Diozənꞌ nadaꞌ. Deꞌe naꞌanəꞌ gwleɉeꞌ nadaꞌ par nacaꞌ apostol c̱heꞌenəꞌ, naꞌ deꞌe naꞌanəꞌ bagocwleneꞌ nadaꞌ par nic̱h chonchaꞌ xšineꞌenəꞌ mazəchlə ca deꞌen chsoꞌon yoguəꞌ apostol caꞌ yeḻaꞌ. Pero bito əṉacho tozaꞌ nadaꞌ chonaꞌ xšineꞌenəꞌ sino que Dioz naꞌaczənꞌ chacleneꞌ nadaꞌ par chonaꞌan.
\v 11 Naꞌ bacheɉḻeꞌele c̱he dižəꞌ güen dižəꞌ cobə c̱he Cristənꞌ deꞌen babzeɉniꞌidaꞌ leꞌe naꞌ deꞌen babosoꞌozeɉniꞌi apostol caꞌ yeḻaꞌ leꞌe.
\s1 Yesyəꞌəban beṉəꞌ guat caꞌ
\p
\v 12 Naꞌ bac̱h bsed bloꞌitoꞌ leꞌe de que Cristənꞌ beyas bebaneꞌ ladɉo beṉəꞌ guat caꞌ. Pero leꞌe ža, ¿bixc̱henꞌ na baḻle de que bito yesyəꞌəban beṉəꞌ guat caꞌ?
\v 13 Žaləꞌ naquən deꞌe ḻi canꞌ nalenꞌ de que Diozənꞌ bito yosbaneꞌ beṉəꞌ guat caꞌ, bitolɉa bosbaneꞌ Cristənꞌ žaləꞌ caꞌ.
\v 14 Naꞌ žaləꞌ cui bosban Diozənꞌ Cristənꞌ ladɉo beṉəꞌ guat caꞌ, bito bi zaquəꞌ xtižeꞌenəꞌ deꞌen babeꞌelentoꞌ leꞌe naꞌ bitobi zeɉen deꞌen chonḻilažəꞌəchoneꞌ žaləꞌ cui bebaneꞌ.
\v 15 Deꞌen babsed bloꞌitoꞌ leꞌe de que Diozənꞌ bosbaneꞌ Cristənꞌ ladɉo beṉəꞌ guat caꞌ, babeꞌetoꞌ dižəꞌ güenḻažəꞌ žaləꞌ bito naquən deꞌe ḻi. Žaləꞌ deꞌe ḻi bito yosbaneꞌ beṉəꞌ guat caꞌ, bito bosbaneꞌ Cristənꞌ žaləꞌ caꞌ.
\v 16 Deꞌe naꞌanəꞌ bito cheyaḻəꞌ goncho xbab de que Diozənꞌ bito yosbaneꞌ beṉəꞌ guat caꞌ, c̱hedəꞌ laꞌ bosbaneꞌ Cristənꞌ.
\v 17 Bito bi bi zedəguaꞌan deꞌen chonḻilažəꞌəcho Cristənꞌ žaləꞌ cui bosban Diozənꞌ ḻeꞌ ladɉo beṉəꞌ guat caꞌ. Bito gaquə əgwnitlaogüeꞌ xtoḻəꞌəchonꞌ žaləꞌ cui bebaneꞌ.
\v 18 Beṉəꞌ caꞌ bagwsaꞌat beṉəꞌ gwsoꞌonḻilažəꞌ Cristənꞌ žlac gosəꞌəbaneꞌ bagosəꞌəbiayiꞌe naꞌ bito niteꞌe len Diozənꞌ ṉaꞌa žaləꞌ cui beyas beban Cristənꞌ ladɉo beṉəꞌ guat caꞌ.
\v 19 Probchguazə chioꞌo žaləꞌ yežlyo ngazənꞌ zocho lez gaquəlen Cristənꞌ chioꞌo. Chx̱oayagzə cuincho mazəchlə ca notəꞌətezəchlə beṉəꞌ žaləꞌ caꞌ.
\p
\v 20 Naꞌ deꞌe ḻiczə Dioz nanꞌ boḻis bosbaneꞌeneꞌ ladɉo beṉəꞌ guat caꞌ, par nic̱h ṉezecho de que caꞌaczənꞌ goneꞌ len beṉəꞌ yeziquəꞌəchlə beṉəꞌ chsoꞌonḻilažəꞌ ḻeꞌ.
\v 21 To beṉəꞌən ben par nic̱h chsaꞌat beṉac̱hənꞌ, naꞌ to beṉəꞌən gon par yesyəꞌəbaneꞌ.
\v 22 Adan nanꞌ ben par nic̱h chsaꞌat yoguəꞌ beṉac̱hənꞌ, naꞌ Crist nanꞌ gon par yesyəꞌəban yoguəꞌ beṉəꞌ chsoꞌonḻilažəꞌ ḻeꞌ.
\v 23 To tocho yebancho con catəꞌən babsiꞌe xṉeze. Zguaꞌatec Cristənꞌ bebaneꞌ ladɉo beṉəꞌ guat caꞌ, naꞌ catəꞌən yideꞌ yeto ḻeꞌegatezəczə caꞌ yesyəꞌəban beṉəꞌ caꞌ bagwsaꞌat, con beṉəꞌ gwsoꞌonḻilažeꞌeneꞌ.
\v 24-26 Cristənꞌ chnabiꞌe doxenḻə. Naꞌ əgwleɉ əgwšošɉeꞌ yoguəꞌ beṉəꞌ contr c̱heꞌ caꞌ naꞌ bichlə deꞌe caꞌ chsoꞌon contr ḻeꞌ, naꞌ queꞌe yeḻəꞌ gwnabiaꞌ c̱he deꞌe x̱ioꞌ caꞌ naꞌ c̱he angl bzelao caꞌ naꞌ c̱he notəꞌətezəchlə beṉəꞌ gwnabiaꞌ beṉəꞌ cui chsoꞌelaoꞌ ḻeꞌ. Naꞌ catəꞌ Cristənꞌ babeyož bleɉ bšošɉeꞌ yoguəꞌ beṉəꞌ contr c̱heꞌ caꞌ naꞌ bichlə deꞌe caꞌ chsoꞌon contr ḻeꞌ, nach gwcuezeꞌ yeḻəꞌ gotənꞌ naꞌ šoꞌo fin c̱he yežlyonꞌ. Naꞌ canaꞌachənꞌ Cristənꞌ cueꞌe lao naꞌ X̱eꞌ Diozənꞌ yoguəꞌ deꞌen nḻaneꞌ chnabiꞌe naꞌ yoguəꞌ nonꞌ chnabiꞌe.
\v 27 Xtižəꞌ Diozənꞌ deꞌen nyoɉən nan: “Diozənꞌ bansiꞌe xṉeze de que gwžin ža catəꞌ Cristənꞌ ṉabiꞌe yoguəꞌəḻoḻ beṉəꞌ naꞌ biquəꞌəchlə deꞌen zɉəde.” Pero ca deꞌen nan de que Cristənꞌ ṉabiꞌe yoguəꞌəḻoḻ beṉəꞌ naꞌ biquəꞌəchlə deꞌen zɉəde, bito ṉacho zeɉen de que ḻeczə Cristənꞌ ṉabiꞌe X̱eꞌ Diozənꞌ.
\v 28 Naꞌ catəꞌ Cristənꞌ bagwloꞌe lao naꞌ X̱eꞌ Diozənꞌ yoguəꞌəte beṉəꞌ naꞌ len yeziquəꞌəchlə deꞌe zɉəde, canaꞌach əgwloꞌe de que ḻeczə ḻeꞌ yoꞌe lao naꞌ X̱eꞌ Diozənꞌ. Nach yoguəꞌəḻoḻ beṉəꞌ əsaꞌacbeꞌineꞌ de que Diozənꞌ naqueꞌ x̱angaꞌaqueꞌ, naꞌ ḻeczə caꞌ saꞌacbeꞌi angl naꞌ deꞌe x̱ioꞌ caꞌ.
\p
\v 29 Nitəꞌ beṉəꞌ chəsəꞌəchoeꞌ nis deꞌe non c̱he beṉəꞌ caꞌ bagwsaꞌat. Bito soꞌoneꞌ caꞌ žaləꞌ cui chseꞌeɉḻeꞌe de que gwžin ža yesyəꞌəban beṉəꞌ guat caꞌ.
\p
\v 30 Nadaꞌ ža, do tyempte nitəꞌ beṉəꞌ chseꞌeneneꞌ soꞌoteꞌ nadaꞌ laogüe deꞌen choꞌa xtižəꞌ Cristənꞌ.
\v 31 Beṉəꞌ bišəꞌ, deꞌe ḻi yoguəꞌ ža chsanḻažəꞌ cuinaꞌ gaquə bitəꞌətezə deꞌe gaquə c̱hiaꞌ. Cheꞌendaꞌ ṉezele de que chsanḻažəꞌ cuinaꞌ canꞌ baṉezele de que chebeichgüeidaꞌ deꞌen chonḻilažəꞌəle X̱ancho Jesocristənꞌ.
\v 32 Naꞌ guac əṉacho de que por bež əznianꞌ ɉətiḻəlenaꞌ catəꞌən ɉsoaꞌ Efesonꞌ c̱hedəꞌ gwsoꞌonchgua beṉəꞌ caꞌ contr nadaꞌ. Pero žaꞌalə cui yesyəꞌəban beṉəꞌ guat caꞌ, bitobi bi zaquəꞌ ca deꞌen goquə c̱hiaꞌ. Naꞌ žaləꞌ bito yesyəꞌəban beṉəꞌ guat caꞌ yeɉniꞌa gonecho c̱he deꞌen na: “Yeꞌeɉ gaotezcho, laꞌ gwx̱ezənꞌ gatcho.”
\p
\v 33 Bito güeꞌele latɉə no əx̱oayag leꞌe, c̱hedəꞌ deꞌe ḻi canꞌ nyoɉən nan: “Šə socho txen len beṉəꞌ chsoꞌon deꞌe mal, laꞌ solao goncho canꞌ chsoꞌoneꞌenəꞌ.”
\v 34 Ḻegwšaꞌ xbab c̱helenꞌ naꞌ cuich gonḻe deꞌe malənꞌ. Niaꞌ caꞌ c̱hedəꞌ baḻle bitoṉəꞌ gombiꞌale Diozənꞌ naꞌ cheꞌendaꞌ gaquəchgüeile ḻoꞌo laꞌaždaꞌolenꞌ deꞌen cui nombiꞌaleneꞌ.
\s1 Deꞌe cobə yeyac cuerp c̱he beṉəꞌ caꞌ yesyəꞌəban ladɉo beṉəꞌ guat caꞌ
\p
\v 35 De repent gwṉablɉeile nadaꞌ nac gaquənꞌ yesyəꞌəban beṉəꞌ guat caꞌ o nac gaquə cuerp c̱hegaꞌaqueꞌenəꞌ catəꞌən yesyəꞌəbaneꞌ.
\v 36 Nc̱hoḻ yic̱hɉlaꞌaždaꞌolenꞌ šə chaquele cui gaquə yesyəꞌəbaneꞌ. Ṉezecho de que to to xoaꞌ daoꞌ deꞌen chazcho cheyaḻəꞌ yexiṉɉən par yelaꞌan yel daoꞌ.
\v 37 Naꞌ bito əṉacho de que catəꞌən chazchonṉəꞌ chazcho yel daoꞌ. Naꞌ canꞌ šə biquəꞌəchlə deꞌe cheneꞌecho laꞌac, con xsei nanꞌ gazcho.
\v 38 Naꞌ Diozənꞌ choneꞌ par nic̱h chlaꞌ deꞌen chazchonꞌ naꞌ to ton chaquən segon bi deꞌen chazchonꞌ.
\v 39 Caꞌaczənꞌ naquən caguə tozə ca naquə cuerp c̱hechonꞌ len cuerp c̱he bia caꞌ chsaꞌaš. Nžaꞌan naquə cuerp c̱he beṉac̱hənꞌ naꞌ nžaꞌan naquə cuerp c̱he bia žia tap ṉiꞌaneꞌi, naꞌ nžaꞌan naquə c̱he bia chsaꞌaš ḻoꞌo nis, naꞌ nžaꞌan naquə c̱he bia chsaꞌaš lao beꞌ.
\v 40 Naꞌ nžaꞌan zɉənaquə beṉac̱h caꞌ naꞌ bia caꞌ chsaꞌaš lao yežlyonꞌ, naꞌ nžaꞌan zɉənaquə deꞌe caꞌ chleꞌicho ḻeꞌe yobanꞌ. Nžaꞌ yeḻəꞌ xoche c̱he deꞌe caꞌ chleꞌicho ḻeꞌe yobanꞌ naꞌ nžaꞌ yeḻəꞌ xoche c̱he beṉac̱h caꞌ naꞌ bia caꞌ chsaꞌaš lao yežlyo nga.
\v 41 Nžaꞌ canꞌ chseꞌeniꞌ bgüižənꞌ naꞌ nzaꞌ canꞌ chseꞌeniꞌ bioꞌonəꞌ naꞌ ḻeczə nžaꞌ canꞌ chosoꞌoseꞌeniꞌ to to belɉw caꞌ.
\v 42 Ḻeꞌegatezəczə caꞌ catəꞌ yesyəꞌəban beṉəꞌ caꞌ gwsoꞌonḻilažəꞌ Cristənꞌ žlac gosəꞌəbaneꞌ, nžaꞌan gaquə cuerp c̱hegaꞌaqueꞌenəꞌ. Cuerp c̱hegaꞌaqueꞌenəꞌ deꞌen besəꞌəgašəꞌ ḻoꞌo banꞌ bagwsoꞌožəꞌən, pero catəꞌ yesyəꞌəbaneꞌ ladɉo beṉəꞌ guat caꞌ yeyac cuerp c̱hegaꞌaqueꞌenəꞌ deꞌe cobə naꞌ bitoch saꞌateꞌ.
\v 43 Bitobi bi zaquəꞌ cuerp c̱he beṉəꞌ guat caꞌ, laꞌ zɉənaquən cuerp šen. Deꞌe naꞌanəꞌ chcuašəꞌəchon. Pero catəꞌən yesyəꞌəbaneꞌ yetlas, šə gwsoꞌonḻilažeꞌe Cristənꞌ žlac gosəꞌəbaneꞌ, yesyəꞌəyac cuerp c̱hegaꞌaqueꞌenəꞌ deꞌe zaquəꞌəche naꞌ deꞌe gualəch clezə canꞌ əgwsaꞌaquən antslə.
\v 44 Cuerp c̱he beṉəꞌ guat caꞌ deꞌen chcuašəꞌəchonꞌ zɉənaquən de beləꞌ chen, pero nžaꞌan yesyəꞌəyaquən catəꞌən yesyəꞌəbaneꞌ šə gwsoꞌonḻilažeꞌe Cristənꞌ. Canaꞌachənꞌ yesyəꞌəyaquən por cuerp cobə deꞌen gon canꞌ əṉa Spirit c̱he Diozənꞌ. Ṉaꞌa zɉənaquə cuerpənꞌ de beləꞌ chen, pero gwžin ža gatəꞌ cuerp cobə deꞌen gon canꞌ əṉa Spirit c̱he Diozənꞌ.
\p
\v 45 Xtižəꞌ Diozənꞌ nyoɉən nan de que Adanṉəꞌ benꞌ naquə beṉəꞌ nechənꞌ gwzoeꞌ bguaneꞌ. Pero naꞌ zo yeto beṉəꞌ gwxaquəꞌəlebeneꞌ ca Adanṉəꞌ, ḻeꞌenəꞌ Cristənꞌ. Naꞌ deꞌen bebaneꞌ ladɉo beṉəꞌ guat caꞌ choṉeꞌ yeḻəꞌ mban zeɉḻicaṉenꞌ.
\v 46 Ṉaꞌa naccho beṉəꞌ beləꞌ chen pero gwžin ža catəꞌən gatəꞌ cuerp cobə c̱hechonꞌ deꞌen gon canꞌ əṉa Spirit c̱he Diozənꞌ.
\v 47 Adanṉəꞌ benꞌ goquə beṉəꞌ nech, Diozənꞌ beneꞌ ḻeꞌ len bište yo naꞌ gwzoeꞌ yežlyo ngazə. Pero benꞌ gwxaquəꞌəlebe ca Adanṉəꞌ deꞌen bx̱ieꞌ yeḻəꞌ mban zeɉḻicaṉe bazoczeꞌ yobanꞌ antslə zeꞌe yideꞌ galɉeꞌ yežlyo nga, ḻeꞌenəꞌ X̱ancho Cristənꞌ.
\v 48 Naꞌ chioꞌo beṉac̱h cuerp c̱hechonꞌ naquən canꞌ goquə cuerp c̱he deꞌe Adanṉəꞌ deꞌen ben Diozənꞌ len bište yonꞌ, naꞌ deꞌe naꞌanəꞌ naccho beṉəꞌ c̱he yežlyo nga. Pero naꞌ chioꞌo chonḻilažəꞌəcho Cristənꞌ gwžin ža catəꞌ gatəꞌ cuerp cobə c̱hecho deꞌen gaquə ca cuerp c̱he Cristənꞌ benꞌ zo yobanꞌ.
\v 49 Ṉaꞌa ṉenaccho ca benꞌ ben Diozənꞌ len bište yonꞌ pero gwžin ža gaccho ca Cristənꞌ benꞌ zo yobanꞌ.
\p
\v 50 Beṉəꞌ bišəꞌ əchniaꞌ leꞌe catəꞌən yežincho žɉəyezocho len Diozənꞌ zeɉḻicaṉe bito gaquə əbanecho cuerp c̱hechonꞌ de beləꞌ chenṉəꞌ. Deꞌe te c̱he cuerp c̱hechonꞌ naꞌ deꞌe naꞌanəꞌ bito gaquə əbanechon catəꞌ žɉəyezocho len Diozənꞌ zeɉḻicaṉe.
\v 51 Ṉaꞌa əchniaꞌ leꞌe deꞌen cui noṉəꞌ ṉeze antslə, caguə yoguəꞌəchonꞌ gatcho, pero yoguəꞌəchonꞌ yežaꞌ canꞌ gacchonꞌ.
\v 52 Xtitṉez yežaꞌ canꞌ gacchonꞌ catəꞌən cuež trompet c̱he Diozənꞌ par šoꞌo fin c̱he yežlyonꞌ. Cuež trompet c̱he Diozənꞌ par yesyəꞌəban yoguəꞌ beṉəꞌ bagwsaꞌat con beṉəꞌ gwsoꞌonḻilažəꞌ Cristənꞌ. Naꞌ cananꞌ yeyac cuerp c̱hegaꞌaqueꞌenəꞌ deꞌe cobə deꞌen cui te c̱hei naꞌ ḻeczə canꞌ yeyac cuerp c̱he chioꞌo ṉeꞌe mbancho.
\v 53 Cuerp c̱hecho deꞌen mbanecho yežlyo nga ṉaꞌa deꞌe te c̱heinꞌ c̱hedəꞌ gožəꞌən catəꞌən gatcho. Pero catəꞌən yeyac cuerp c̱hechonꞌ deꞌe cobə bito gožəꞌən naꞌ bito te c̱hei.
\v 54 Naꞌ catəꞌ bade cuerp cobə c̱hecho deꞌen cui gožəꞌ naꞌ deꞌen cui te c̱hei, canaꞌachənꞌ bagoc complir canꞌ nyoɉ Xtižəꞌ Diozənꞌ nan: “Diozənꞌ gwzoineꞌ bcuezeꞌ yeḻəꞌ gotənꞌ c̱hedəꞌ ḻeꞌenəꞌ choṉeꞌ yeḻəꞌ mban zeɉḻicaṉe.”
\v 55 Naꞌ canaꞌachənꞌ əṉacho: “Bitoch soi yeḻəꞌ gotənꞌ chioꞌo naꞌ bitoch gonən chioꞌo gan.”
\v 56 De yeḻəꞌ got c̱he chioꞌo beṉac̱h c̱hedəꞌ choncho deꞌe malənꞌ. Naꞌ deꞌen ṉezecho binꞌ non ḻei c̱he Diozənꞌ mendad goncho nachle chzenaguəchcho c̱he deꞌe malənꞌ.
\v 57 Chox̱cwlen Diozənꞌ bseḻeꞌe X̱ancho Jesocristənꞌ benꞌ chon par nic̱h cuich chzoi deꞌe malənꞌ chioꞌo, naꞌ ḻeꞌenəꞌ babeneꞌ par nic̱h chioꞌo chonḻilažəꞌəchoneꞌ šə gatcho ḻeczə əžin ža yebancho ladɉo beṉəꞌ guat caꞌ.
\p
\v 58 Deꞌe naꞌanəꞌ beṉəꞌ bišəꞌ daoꞌ, ḻesotezə ḻeso ḻegonḻilažəꞌ X̱ancho Jesocristənꞌ sin cui žɉəxaquəꞌəlažəꞌəle naꞌ sin cui gaquəžeɉlažəꞌəle. Naꞌ zeɉḻi ḻegonchgua xšin X̱anchonꞌ laꞌ ṉezczele de que bito gaquə dadən.
\c 16
\s1 Chosoꞌotobeꞌ mech par chsaꞌacleneꞌ beṉəꞌ caꞌ chsoꞌonḻilažəꞌ Cristənꞌ Jerosalenṉəꞌ
\p
\v 1 Ṉaꞌa ža cheꞌendaꞌ əṉiaꞌ leꞌe naquənꞌ gonḻe catəꞌ əgwtoble mechənꞌ par gaquəlenḻe beṉəꞌ Jerosalen caꞌ bagwleɉ Diozənꞌ par zɉənaqueꞌ lažəꞌ neꞌenəꞌ. Ḻegon canꞌ benaꞌ mendad soꞌon beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ to to yež deꞌen zɉəchiꞌ Galasianꞌ.
\v 2 Naꞌ yoguəꞌ ža dmigw to tole cueɉle latəꞌ güeɉə mech segon ca deꞌen benḻe gan lao xmanṉəꞌ naꞌ coꞌošaꞌolen par nic̱h den catəꞌən yidaꞌ dezlaṉaꞌa leꞌe. Ḻegon caꞌ par nic̱h bito əgwtoblen catəꞌən yidaꞌanəꞌ.
\v 3 Naꞌ catəꞌən yidaꞌanəꞌ canaꞌ əseḻaꞌa beṉəꞌ caꞌ bagwleɉlenꞌ par əxɉsoꞌe xmechlenꞌ Jerosalenṉeꞌ, naꞌ əgox̱əꞌətegaꞌacaꞌaneꞌ to c̱hopə cart.
\v 4 Pero šə gwxenḻažəꞌəcho de que nadaꞌ šaꞌa naꞌ saꞌacleneꞌ nadaꞌ txen.
\s1 Pabənꞌ choneꞌ xbab žɉəlaṉeꞌe ḻegaꞌaqueꞌ
\p
\v 5 Naꞌ yidaꞌ ganꞌ zolenꞌ catəꞌ yeyož tiaꞌ Masedonianꞌ, c̱hedəꞌ ḻeczə cheyaḻəꞌ šaꞌa žɉəlaṉaꞌa beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ naꞌ.
\v 6 Naꞌ de repent yegaꞌaṉaꞌ len leꞌe do tbioꞌ o c̱hop bioꞌ o šə yegaꞌaṉczaꞌ dote tyemp zaguənꞌ. Naꞌ catəꞌ yezaꞌa ganꞌ zolenꞌ leꞌe gaquəlenḻe nadaꞌ par yeyaꞌa ga yoblə.
\v 7 Bito yidaꞌ delaṉaꞌa leꞌe ṉaꞌa c̱hedəꞌ to tezaꞌan šə bazaꞌa, laꞌ cheꞌendaꞌ desoaꞌ sša len leꞌe catəꞌən yidaꞌanəꞌ šə X̱ancho Diozənꞌ güeꞌe latɉə.
\v 8 Cheꞌendaꞌ yegaꞌaṉaꞌ Efeso nga xte catəꞌ gaḻəꞌ lṉi deꞌen neꞌ Pentecostes.
\v 9 Yegaꞌaṉaꞌ c̱hedəꞌ beṉəꞌ zan nitəꞌ nga beṉəꞌ chseꞌeneꞌe yosoꞌozenagueꞌ c̱he xtižəꞌ Diozənꞌ pero ḻeczə nitəꞌ beṉəꞌ zan cui chseꞌeneneꞌ c̱hix̱ɉuiꞌan.
\p
\v 10 Naꞌ catəꞌ yidə Temtionꞌ ganꞌ zolenꞌ cheyaḻəꞌ gapleneꞌ respet par nic̱h cui žebeꞌ əgwsed əgwloꞌineꞌ leꞌe, c̱hedəꞌ ḻeczə canꞌ chonaꞌ nadaꞌ xšin X̱ancho Diozənꞌ caꞌaczənꞌ chon ḻeꞌ.
\v 11 Deꞌe naꞌanəꞌ ža bito gonḻe xbab de que bitobi zaqueꞌe, sino que cheyaḻəꞌ sole güen len ḻeꞌ naꞌ len beṉəꞌ caꞌ žagueꞌenəꞌ catəꞌ laꞌaqueꞌ ganꞌ zolenəꞌ. Naꞌ catəꞌ yesaꞌaqueꞌ cheyaḻəꞌ gaquəlengaꞌacleneꞌ par deyaꞌaqueꞌ ganꞌ zoaꞌ nga to šaoꞌ to güen laꞌ chbezəgaꞌacaꞌaneꞌenəꞌ.
\p
\v 12 Naꞌ ca naquə beṉəꞌ bišəꞌəcho Apolosənꞌ ža, ḻeczə gotəꞌəyoidaꞌaneꞌ par yidəleneꞌ Temtionꞌ naꞌ len beṉəꞌ bišəꞌəcho caꞌ desəꞌəlaṉeꞌe leꞌe, pero beneꞌ xbabənꞌ mejor bito yideꞌ ṉaꞌa. Pero güideꞌ catəꞌ soeꞌ to latɉə.
\s1 Yeto c̱hopə deꞌen cheꞌ Pabənꞌ beṉəꞌ Corinto caꞌ
\p
\v 13 Cheyaḻəꞌ gaple cuidad par nic̱h cui xoayagle len deꞌe malənꞌ, naꞌ cheyaḻəꞌ sotezə sole gonḻilažəꞌəle Diozənꞌ con canꞌ chonḻilažəꞌəczleneꞌ. Bito žeble sino ḻeso ḻegon canꞌ cheneꞌe Diozənꞌ.
\v 14 Naꞌ ḻegaque c̱he Diozənꞌ naꞌ c̱he beṉac̱hənꞌ bitəꞌətezə deꞌen chonḻe.
\p
\v 15 Naꞌ ṉaꞌa ža beṉəꞌ bišəꞌ, de to deꞌe cheꞌendaꞌ əṉiaꞌ leꞌe. Ṉezele de que famiḻy c̱he Estefanas zɉənaqueꞌ beṉəꞌ nech gwsoꞌonḻilažeꞌe Cristənꞌ Acayanꞌ, naꞌ baṉezczele canꞌ chsoꞌonczeꞌ, ḻechguaḻe chsaꞌacleneꞌ notəꞌətezəchlə beṉəꞌ bazɉənaqueꞌ lažəꞌ naꞌ Diozənꞌ.
\v 16 Deꞌe naꞌanəꞌ əchniaꞌ leꞌe de que cheyaḻəꞌ əgwzenagle c̱he ḻegaꞌaqueꞌ naꞌ lenczə c̱he notəꞌətezəchlə beṉəꞌ chsoꞌonchgua xšin Diozənꞌ naꞌ c̱he beṉəꞌ caꞌ chsaꞌaclenchgua beṉəꞌ bišəꞌəcho caꞌ.
\v 17 Chebeidaꞌ babḻaꞌac Estefanasənꞌ, Fortonatonꞌ naꞌ Acaiconꞌ ganꞌ zoaꞌ nga, naꞌ bagwsaꞌacleneꞌ nadaꞌ par nic̱h bitoch zoaꞌ trist deꞌen cui zole nga len nadaꞌ.
\v 18 Ḻechguaḻe bagwsoꞌoneꞌ ca chebeidaꞌ, canꞌ bagwsoꞌoneꞌ len leꞌe. Deꞌe naꞌanəꞌ cheyaḻəꞌ gapəgaꞌacchoneꞌ respet.
\p
\v 19 Naꞌ ṉaꞌa ža əchniaꞌ leꞌe de que beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ doxen Asianꞌ chəsəꞌəguapeꞌ leꞌe diox. Naꞌ ḻeczə len Aquila naꞌ noꞌol c̱heꞌ Prisilanꞌ nach zɉəlenczə beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ ližgaꞌaqueꞌenəꞌ, ḻeczə chəsəꞌəguapchgüeꞌ leꞌe diox. Ḻegaꞌaqueꞌ chsoꞌonḻilažəꞌəczeꞌ X̱ancho Jesocristənꞌ canꞌ chonḻilažəꞌəchoneꞌ chioꞌo.
\v 20 Naꞌ yoguəꞌəḻoḻ beṉəꞌ bišəꞌəcho caꞌ nitəꞌ nga chəsəꞌəguapeꞌ leꞌe diox. Naꞌ catəꞌ chežagle ḻeyoḻgüiž lɉuežɉle dižəꞌ šaoꞌ par nic̱h gacbiaꞌ de que chaque c̱he lɉuežɉle.
\p
\v 21 Cuinczaꞌ nadaꞌ Pabənꞌ chzoɉaꞌ part daoꞌ c̱he cart nga par əchguapaꞌ yoguəꞌəle diox.
\p
\v 22 Naꞌ šə ṉenc̱hix̱ə nole cuiṉəꞌ gonḻe cas par gaquele c̱he X̱ancho Jesocristənꞌ, cuiayiꞌišazəchle zeɉḻicaṉenꞌ. X̱ancho Jesocristənꞌ yideꞌ deꞌe yoblə.
\p
\v 23 Naꞌ ṉaꞌa ža, X̱ancho Jesocrist nanꞌ sotezə soeꞌ gaquəlenšgaczeꞌ leꞌe.
\v 24 Naꞌ chniaꞌ leꞌe de que chacchgüeidaꞌ c̱he yoguəꞌəle laogüe deꞌen chonḻilažəꞌəle Cristo Jesoꞌosənꞌ. Deꞌe naꞌazənꞌ əchniaꞌ leꞌe.
\b
\m Pab