\id 2CO
\ide UTF-8
\h 2 CORINTOS
\toc1 2 Corintios
\mt1 Cart Egwchope Deꞌen Bzoɉ San Pabənꞌ par Beṉəꞌ Corinto Caꞌ
\c 1
\s1 Pabənꞌ chzoɉeꞌ beṉəꞌ caꞌ chsoꞌonḻilažəꞌ Cristənꞌ Corintonꞌ
\p
\v 1-2 Nadaꞌ Pab nacaꞌ apostol c̱he Jesocristənꞌ con canꞌ gwnalažəꞌ Diozənꞌ. Nadaꞌ chzoɉaꞌ cart nga par leꞌe bagwleɉ Diozənꞌ nic̱h chdopə chžagle choꞌelaꞌole Cristənꞌ laoꞌ syoda Corintonꞌ, naꞌ notəꞌətezəchle bagwleɉ Diozənꞌ par nacle lažəꞌ neꞌenəꞌ, leꞌe nitəꞌəle doxen ganꞌ mbane Acayanꞌ. Nadaꞌ len beṉəꞌ bišəꞌəcho Temtionꞌ chontoꞌ orasyon chṉabtoꞌ lao X̱acho Diozənꞌ naꞌ X̱ancho Jesocristənꞌ əsaꞌaclenšgueꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Deꞌe caꞌ gwdiꞌ gwxaquəꞌ Pabənꞌ
\p
\v 3 Cheyaḻəꞌ socho güeꞌelaꞌocho X̱acho Diozənꞌ. Ḻeꞌ naqueꞌ X̱a X̱ancho Jesocristənꞌ naꞌ X̱ancho Jesocristənꞌ ḻeczə choꞌelaogüeꞌe ḻeꞌ. X̱acho Diozənꞌ cheyašəꞌ chežiꞌilažeꞌe chioꞌo naꞌ ḻeꞌenəꞌ cheyonxenḻažeꞌe chioꞌo šə bi deꞌen chac c̱hecho.
\v 4 Ca naquə nadaꞌ ža, ḻeꞌenəꞌ cheyonxenḻažeꞌe nadaꞌ catəꞌ chyiꞌ chzacaꞌa par nic̱h ḻeczə chac cheyonxenḻažaꞌa beṉəꞌ yoblə catəꞌ chəsəꞌəyiꞌ chəsəꞌəzaqueꞌe. Naꞌ canꞌ chon Diozənꞌ cheyonxenḻažeꞌe nadaꞌ ḻeczə canꞌ cheyonxenḻažaꞌa beṉəꞌ.
\v 5 Ḻechguaḻe chyiꞌ chzacaꞌa canꞌ gwdiꞌ gwxaquəꞌ Cristənꞌ, pero naꞌ con zoczə Diozənꞌ cheyonxenḻažəꞌəchgüeꞌ nadaꞌ c̱hedəꞌ chonḻilažaꞌa Cristənꞌ.
\v 6 Chyiꞌ chzacaꞌa laogüe deꞌen chzeɉniꞌidaꞌ leꞌe canꞌ gonḻe par žɉəyezole len Diozənꞌ. Chac c̱hiaꞌ caꞌ par nic̱h cheyonxenḻažaꞌa leꞌe len bi deꞌen chyiꞌ chzaquəꞌəle. Naꞌ deꞌen cheyonxenḻažəꞌ Diozənꞌ nadaꞌ catəꞌ binꞌ chac c̱hiaꞌ, choneꞌ caꞌ par nic̱h nadaꞌ cheyonxenḻažaꞌa leꞌe. Deꞌe naꞌanəꞌ chonḻilažəꞌəle Cristənꞌ naꞌ chgoꞌo chc̱heɉlažəꞌəle catəꞌən chyiꞌ chzaquəꞌəle canꞌ chyiꞌ chzacaꞌa nadaꞌ.
\v 7 Naꞌ zotezə zoaꞌ chbezaꞌ de que leꞌe coꞌo gwc̱heɉlažəꞌəle catəꞌ saquəꞌəziꞌile. Ṉezdaꞌ de que con canꞌ chyiꞌ chzacaꞌanəꞌ ḻeczə canꞌ chyiꞌ chzaquəꞌəle, naꞌ canꞌ cheyonxenḻažəꞌ Diozənꞌ nadaꞌ, ḻeczə canꞌ cheyonxenḻažeꞌe leꞌe.
\p
\v 8 Beṉəꞌ bišəꞌ, cheꞌendaꞌ əṉezele catequənꞌ gwxaquəꞌəziꞌ gwxaquəꞌəyašaꞌa catəꞌən gwzoaꞌ Asianꞌ xte cuichczə bi goquə gonaꞌ, con beyož bedolažaꞌa naꞌ xte bžinczə catəꞌ benaꞌ xbab laꞌ gatczaꞌanəꞌ.
\v 9 Deꞌe ḻi benaꞌ xbab ḻoꞌo yic̱hɉlaꞌaždaꞌoguaꞌanəꞌ de que laꞌ gatczaꞌanəꞌ. Pero naꞌ goc c̱hiaꞌ caꞌ par nic̱h cui benaꞌ xbab de que gwzoiczədaꞌ nadəꞌəzaꞌ yocuižaꞌa deꞌen chyiꞌ chzacaꞌanəꞌ. Naꞌ deꞌen goc caꞌ benən par nic̱h chonḻilažəꞌəchaꞌ Diozənꞌ, Dioz benꞌ yosban beṉəꞌ guat caꞌ.
\v 10 Naꞌ catəꞌən benaꞌ xbab laꞌ gatczaꞌanəꞌ, Diozənꞌ bosleꞌ nadaꞌ par cui gotaꞌ. Naꞌ ṉechoslaczeꞌ nadaꞌ. Naꞌ con bazoczaꞌ lez chbezaꞌ yosleꞌ nadaꞌ šə bazezoclaꞌ choꞌa yeḻəꞌ gotənꞌ.
\v 11 Yosleꞌ nadaꞌ c̱hedəꞌ lenczə leꞌe chaclenḻe nadaꞌ chonḻe orasyonṉəꞌ laogüeꞌenəꞌ chṉabeleneꞌ yosleꞌ nadaꞌ. Naꞌ beṉəꞌ zan naccho choncho orasyon lao Diozənꞌ par nic̱h gaquəleneꞌ nadaꞌ. Naꞌ te gaquəleneꞌ nadaꞌ, yoguəꞌəḻoḻcho güeꞌecho yeḻəꞌ chox̱cwlen c̱he Diozənꞌ deꞌen bagocleneꞌ nadaꞌ.
\s1 Pabənꞌ gwžeineꞌ šeɉeꞌ Corintonꞌ
\p
\v 12 Ṉezdaꞌ ḻoꞌo yic̱hɉlaꞌaždaoguaꞌanəꞌ de que chonaꞌ güen len yoguəꞌəḻoḻ beṉəꞌ naꞌ mazəchlə chonaꞌ güen len leꞌe. Deꞌe naꞌanəꞌ choꞌa dižəꞌ de que do yic̱hɉ do lažaꞌa chonaꞌ güen len yoguəꞌəḻoḻ beṉəꞌ c̱hedəꞌ Diozənꞌ babeyoneꞌ laꞌaždaꞌoguaꞌanəꞌ xiꞌilažəꞌ. Bito chonaꞌ con canꞌ na xbab c̱hiaꞌanəꞌ, sino chonaꞌ canꞌ na Diozənꞌ por yeḻəꞌ chaclen c̱heꞌenəꞌ.
\v 13 Cart quinga chzoɉaꞌ leꞌe, bito cheyaḻəꞌ gonḻe xbab šə naquəchlə zeɉen sino canꞌ nyoɉən nanꞌ šeɉniꞌilen. Naꞌ zoaꞌ lez šeɉniꞌilen.
\v 14 Bac̱hgaczə cheɉniꞌile de que do yic̱hɉ do lažaꞌa chonaꞌ yoguəꞌəḻoḻ deꞌen chonaꞌ, naꞌ cheꞌendaꞌ šeɉniꞌilen binḻo. Naꞌ catəꞌən əžin ža yidə X̱ancho Jesoꞌosənꞌ deꞌe yoblə, cheꞌendaꞌ yebeile deꞌen babeꞌelenaꞌ leꞌe xtižeꞌenəꞌ, ca nadaꞌ chebeidaꞌ deꞌen cheɉḻeꞌele c̱hei.
\p
\v 15 Naꞌ zoaꞌ segor šeɉniꞌile de que do yic̱hɉ do lažaꞌan chonaꞌ bitəꞌətezə deꞌen chonaꞌ. Deꞌe naꞌanəꞌ gwzelažaꞌa yidaꞌ deꞌe yoblə delaṉaꞌa leꞌe par nic̱h gaquəlenchaꞌ leꞌe.
\v 16 Gwzelažaꞌa tiaꞌ əgwlaṉaꞌa leꞌe catəꞌən gwyaꞌa Masedonianꞌ deꞌe yoblə, naꞌ catəꞌ bezaꞌa Masedonianꞌ, ḻeczə gwzelažaꞌa yediaꞌ əgwlaṉaꞌa leꞌe. Naꞌ goꞌondaꞌ leꞌe gaquəlenḻe nadaꞌ par yeyaꞌa Jodeanꞌ.
\v 17 Deꞌe ḻiczə goꞌondaꞌ yediaꞌ əgwlaṉaꞌa leꞌe. Bito chacaꞌ šayec̱hə šayen canꞌ chsaꞌac beṉəꞌ caꞌ cui zɉənombiaꞌ Diozənꞌ, to əṉiaꞌ gonaꞌ to deꞌe gonaꞌ naꞌ to əṉiaꞌ cui gonaꞌan. Ḻechguaḻe deꞌe chacdaꞌ catəꞌ cui chac gonaꞌ canꞌ bagwniaꞌ gonaꞌ.
\v 18 Diozənꞌ choneꞌ complir canꞌ neꞌenəꞌ. Naꞌ ṉezeneꞌ bito gocaꞌ šayec̱hə šayen catəꞌən gwniaꞌ yidaꞌ deꞌe yoblə delaṉaꞌa leꞌe ḻaꞌaṉəꞌəczə cui bidaꞌ.
\v 19 Nadaꞌ len Silbanonꞌ naꞌ Temtionꞌ gwdix̱ɉueꞌitoꞌ leꞌe xtižəꞌ Jesocrist Xiꞌiṉ Diozənꞌ. Cristənꞌ bito chaqueꞌ šayec̱hə šayen. Syempr choneꞌ complir canꞌ neꞌenəꞌ.
\v 20 Yoguəꞌ deꞌen ben Diozənꞌ lyebe goneꞌ, babseḻeꞌe Jesocristənꞌ par bedəyeneꞌen. Deꞌe naꞌanəꞌ ṉacho “Amen” catəꞌən choꞌelaꞌocho Diozənꞌ naꞌ zeɉen de que ṉezecho chon Diozənꞌ complir canꞌ neꞌenəꞌ.
\v 21 Baben Diozənꞌ par nic̱h leꞌe len nadaꞌ zotezə zocho chonḻilažəꞌəcho Cristənꞌ. Naꞌ bagwleɉeꞌ chioꞌo par nic̱h choncho xšineꞌenəꞌ.
\v 22 Bseḻeꞌe Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ par nic̱h nacbiaꞌ naccho xiꞌiṉeꞌ naꞌ par nic̱h əṉezecho de que gwžin ža catəꞌ gaquə lao naꞌacho deꞌen goṉəch Diozənꞌ chioꞌo.
\p
\v 23 Bito bidaꞌ Corintonꞌ deꞌe yoblə delaṉaꞌa leꞌe c̱hedəꞌ beyeɉdaꞌ bitolə detiḻaꞌ leꞌe. Diozənꞌ ṉezeneꞌ dižəꞌ ḻinꞌ choꞌa əṉiaꞌ caꞌ. Šə chonḻažaꞌa Diozənꞌ goneꞌ nadaꞌ castigw.
\v 24 Leꞌe bazotezə zole chonḻilažəꞌəle Cristənꞌ, bito natoꞌ leꞌe deꞌe niczənꞌ šeɉḻeꞌele. Lete deꞌen chontoꞌ len leꞌe, chaclentoꞌ leꞌe par ṉitəꞌəchle mbalaz.
\c 2
\p
\v 1 Ca naquə bec̱hoglažaꞌa, bitolə bidaꞌ deꞌe yoblə delaṉaꞌa leꞌe par nic̱h cui gwdiḻəchaꞌ leꞌe c̱he deꞌe malənꞌ chonḻenꞌ, c̱hedəꞌ bito goꞌondaꞌ socho trist.
\v 2 Laꞌ žaꞌalə bidaꞌ dezoaꞌ leꞌe trist notono nḻaꞌ no soꞌon ca soaꞌ mbalaz.
\v 3 Leꞌe cheyaḻəꞌ gonḻe par nic̱h soaꞌ mbalaz. Deꞌe naꞌanəꞌ bzoɉaꞌ cartənꞌ gotəꞌəyoidaꞌ leꞌe cueɉyic̱hɉle deꞌe malənꞌ par nic̱h catəꞌən yidaꞌ deꞌe yoblə delaṉaꞌa leꞌe cui soaꞌ trist canꞌ chonḻenꞌ. Bzoɉaꞌ leꞌe c̱hedəꞌ ṉezdaꞌ de que yoguəꞌəle yebeile gonḻe ca soaꞌ mbalaz.
\v 4 Tristchgua zoaꞌ catəꞌ bzoɉaꞌ cart deꞌen bseḻaꞌa naꞌ chegüiꞌinchgüeidaꞌ ḻoꞌo yic̱hɉlaꞌaždaoguaꞌanəꞌ xte gwchežaꞌ. Bzoɉaꞌ cartənꞌ caguə par nic̱h sole trist sino par nic̱h əṉezele de que nadaꞌ chacchgüeidaꞌ c̱hele.
\s1 Cheyaḻəꞌ yeziꞌixencho c̱he beṉəꞌ caꞌ chsoꞌon deꞌe malənꞌ
\p
\v 5 Deꞌe ḻi gwzoaꞌ trist canꞌ ben tole, pero caguə nadəꞌəzanꞌ gwzoaꞌ trist, casi yoguəꞌ leꞌe gwzole trist por ni c̱he deꞌen ben beꞌenəꞌ. Niaꞌ casi yoguəꞌəle c̱hedəꞌ bito ṉezdaꞌ šə yoguəꞌəczle gwzole trist.
\v 6 Ca naquə leꞌe gwyanḻe par bchoɉ yeḻəꞌ goxiaꞌ c̱helenꞌ benḻeneꞌ castigw, əchniaꞌ leꞌe bac̱h goc to caꞌatəꞌətəꞌ gaqueꞌ castigw.
\v 7 Bito cheyaḻəꞌ gonchleneꞌ castigonꞌ. Cheyaḻəꞌ yeziꞌixenḻe c̱heꞌ naꞌ güeꞌeleneꞌ yeḻəꞌ chxenḻažəꞌ par nic̱h cui cueɉyic̱hɉeꞌ Diozənꞌ por ni c̱he deꞌen zochgüeꞌ trist.
\v 8 Chṉeyoidaꞌ leꞌe ḻegon par nic̱h əṉezeneꞌ de que chaquele c̱heꞌ.
\v 9 Bzoɉaꞌ leꞌe par əṉezdaꞌ šə gwzenagle c̱hiaꞌ ca naquə yoguəꞌəḻoḻ deꞌen gwniaꞌ gonḻe.
\v 10 Naꞌ ca naquə cheziꞌixenḻe c̱he beꞌenəꞌ, lenczaꞌ nadaꞌ cheziꞌixenaꞌ c̱heꞌ. Naꞌ šə bi deꞌen beneꞌ len nadaꞌ, ṉezcze Cristənꞌ de que babeziꞌixenaꞌ c̱heꞌ c̱hedəꞌ cheꞌendaꞌ gaquəlenaꞌ leꞌe.
\v 11 Cheyaḻəꞌ yeziꞌixencho c̱heꞌ par nic̱h cui soi gwxiyeꞌenəꞌ chioꞌo par goncho bichlə deꞌe mal. Ṉezczecho ca naquənꞌ cheneꞌen əx̱oayaguən chioꞌo.
\s1 Pabənꞌ goꞌonchgüeineꞌ yežagueꞌ Titonəꞌ
\p
\v 12 Catəꞌ bežinaꞌ Troas par c̱hix̱ɉuiꞌa dižəꞌ güen dižəꞌ cobə c̱he Cristənꞌ, X̱ancho Diozənꞌ beneꞌ par nic̱h gwnitəꞌ beṉəꞌ gwseꞌeneneꞌ yosoꞌozenagueꞌen.
\v 13 Pero benchguaꞌ xbab c̱he beṉəꞌ bišəꞌəcho Titonəꞌ deꞌen cui bežagaꞌaneꞌ naꞌ. Deꞌe naꞌanəꞌ bzeidaꞌ beṉəꞌ bišəꞌəcho caꞌ dižəꞌ nach bezaꞌa beyaꞌa Masedonianꞌ.
\s1 Cristənꞌ bebeɉeꞌ chioꞌo xniꞌa deꞌe malənꞌ par nic̱h chnabiꞌe chioꞌo
\p
\v 14 Chox̱cwlen Diozənꞌ babebeɉ Cristənꞌ chioꞌo xniꞌa deꞌe malənꞌ par nic̱h chnabiꞌe chioꞌo, naꞌ ṉaꞌa ngodəꞌəcho txen len ḻeꞌ. Naꞌ ḻeczə chon Diozənꞌ par nic̱h gatəꞌətezə zocho naꞌ gatəꞌətezə cheɉcho choncho ca chsaꞌacbeꞌi beṉəꞌ ca beṉəꞌ güenṉəꞌ naquə Cristənꞌ.
\v 15 Chebei Diozənꞌ deꞌen choncho ca chsaꞌacbeꞌi beṉəꞌ ca beṉəꞌ güenṉəꞌ naquə Cristənꞌ. Baḻə beṉəꞌ caꞌ babesyəꞌəchoɉ xniꞌa deꞌe malənꞌ naꞌ yebaḻeꞌ bachəsəꞌəbiayiꞌ.
\v 16 Catəꞌ choncho ca chsaꞌacbeꞌi beṉəꞌ ca beṉəꞌ güenṉəꞌ naquə Cristənꞌ, beṉəꞌ caꞌ cui chsoꞌonḻilažeꞌeneꞌ chsaꞌacbeꞌineꞌ de que yesəꞌəbiayiꞌe. Pero naꞌ beṉəꞌ caꞌ chsoꞌonḻilažəꞌ Cristənꞌ chəsyəꞌəbeineꞌ deꞌen chloꞌecho ca beṉəꞌ güenṉəꞌ naqueꞌenəꞌ, c̱hedəꞌ bade yeḻəꞌ mban c̱hegaꞌaqueꞌ zeɉḻicaṉe naꞌ yesyəꞌəžineꞌ ganꞌ zo Diozənꞌ. ¿No chioꞌo chonḻilažəꞌəcho Cristənꞌ zaquəꞌəcho par əgwloꞌecho ca beṉəꞌ güenṉəꞌ naqueꞌenəꞌ žaꞌalə cui zo Diozənꞌ chacleneꞌ chioꞌo?
\v 17 Nitəꞌ beṉəꞌ zan chosoꞌox̱oayagueꞌ chəsəꞌəšeꞌe canꞌ na xtižəꞌ Diozənꞌ parzə nic̱h beṉəꞌ caꞌ chosoꞌopeineꞌ len xtižəꞌəgaꞌaqueꞌenəꞌ chosoꞌonežɉueꞌ ḻegaꞌaqueꞌ mech. Nadaꞌ bito chonaꞌ caꞌ. Do lažaꞌa zotezəczaꞌ chyix̱ɉuiꞌa xtižəꞌ Diozənꞌ c̱hedəꞌ ḻeꞌenəꞌ beneꞌ mendad chyix̱ɉuiꞌan. Diozənꞌ ṉeze nḻeꞌineꞌ naquənꞌ chonaꞌ chyix̱ɉuiꞌa xtižeꞌenəꞌ, nadaꞌ ngodaꞌa txen len Cristənꞌ.
\c 3
\s1 Deꞌe cobə deꞌen non Diozənꞌ lyebe goneꞌ par gaquəleneꞌ beṉac̱hənꞌ
\p
\v 1 Chezonḻɉale xbab de que choꞌelaoꞌ cuinaꞌ ca dižəꞌ deꞌen choꞌa, pero caguə caꞌanəꞌ. Ṉezczele de que chonaꞌ xšin Diozənꞌ do lažaꞌa. Naꞌ bito chonən byen gox̱aꞌa cart par nic̱h əṉezele nac nacaꞌ, naꞌ nic chonən byen gwzoɉle cart deꞌe gox̱aꞌa catəꞌ šaꞌa ga yoblə canꞌ chonən byen len baḻə beṉəꞌ.
\v 2 Ḻechguaḻe chacdaꞌ c̱hele. Nadaꞌ gwdix̱ɉueꞌidaꞌ leꞌe dižəꞌ güen dižəꞌ cobə c̱he Cristənꞌ par bocobə yic̱hɉlaꞌaždaꞌolenꞌ. Deꞌe naꞌanəꞌ bito chyažɉdaꞌ cart deꞌen na de que nacaꞌ beṉəꞌ güen, laꞌ yoguəꞌ no zɉənombiaꞌ leꞌe zɉəṉezeneꞌ canꞌ goquəlenaꞌ leꞌe par chonḻilažəꞌəle Cristənꞌ.
\v 3 Catəꞌən beꞌelenaꞌ leꞌe xtižəꞌ Cristənꞌ benḻilažəꞌəleneꞌ naꞌ beneꞌ par nic̱h Spirit c̱he Dioz benꞌ zo zeɉḻicaṉe bocobən yic̱hɉlaꞌaždaꞌolenꞌ. Naꞌ deꞌen nacbiaꞌ babocobə yic̱hɉlaꞌaždaꞌolenꞌ zaquəꞌəchən cle ca to cart deꞌen nyoɉ ḻeꞌe yiš naꞌ cle ca ḻei c̱he Diozənꞌ deꞌen byoɉ ḻeꞌe c̱hopə yeɉ taꞌa.
\p
\v 4 Deꞌen chonḻilažəꞌəle Cristənꞌ ṉezdaꞌ de que ḻeꞌenəꞌ chacleneꞌ nadaꞌ par chonaꞌ xšineꞌenəꞌ canꞌ chebei Diozənꞌ.
\v 5 Ca naquə nadaꞌ bito de choꞌa əṉiaꞌ de que to gwlazzaꞌ chonaꞌ xšin Diozənꞌ. Bito gaquə əṉiaꞌ caꞌ, laꞌ Dioz nanꞌ zoeꞌ chacleneꞌ nadaꞌ naꞌ choneꞌ par nic̱h chac chonaꞌ xšineꞌenəꞌ.
\v 6 Dioz naꞌanəꞌ babeneꞌ par nic̱h chac chyix̱ɉuiꞌa canꞌ naquə deꞌe cobə deꞌen noneꞌ lyebe goneꞌ par gaquəleneꞌ chioꞌo beṉac̱h. Deꞌe cobənꞌ deꞌen noneꞌ lyebe goneꞌ bito naquən ca ḻei c̱heꞌenəꞌ deꞌen nyoɉən chzeɉniꞌin chioꞌo de que cuiayiꞌicho deꞌen cui choncho complir yoguəꞌəḻoḻ canꞌ nanṉəꞌ. Diozənꞌ noneꞌ lyebe goṉ Spirit c̱heꞌenəꞌ yeḻəꞌ mban zeɉḻicaṉe c̱he notəꞌətezcho gonḻilažəꞌəchoneꞌ.
\p
\v 7 Catəꞌ bzoɉ Diozənꞌ ḻei c̱heꞌenəꞌ ḻeꞌe yeɉ taꞌa caꞌ naꞌ bnežɉueꞌen deꞌe Moisezənꞌ, deꞌe zan deꞌe beneꞌ par gosəꞌəṉeze beṉəꞌ Izrael caꞌ catequənꞌ zaquəꞌ ḻei c̱heꞌenəꞌ deꞌen chzeɉniꞌin chioꞌo beṉac̱h de que cuiayiꞌicho. Naꞌ deꞌe tant goctit choꞌalao deꞌe Moisezənꞌ xte bito goquə yesəꞌəgüia beṉəꞌ Izrael caꞌ choꞌalaogüeꞌenəꞌ. Pero šoꞌolažəꞌ begaꞌa yeḻəꞌ chactit c̱he choꞌalaogüeꞌenəꞌ.
\v 8 Zaquəꞌəczə ḻeinꞌ pero naꞌ zaquəꞌəch dižəꞌ güen dižəꞌ cobə c̱he Cristənꞌ deꞌen chyix̱ɉueꞌidaꞌ, laꞌ notəꞌətezcho chonḻilažəꞌəchoneꞌ, Spirit c̱he Diozənꞌ choṉən yeḻəꞌ mban zeɉḻicaṉe c̱hecho.
\v 9 Diozənꞌ bloꞌe de que zaquəꞌəczə ḻeinꞌ ḻaꞌaṉəꞌəczə nan de que yoguəꞌ chioꞌo beṉac̱h de xtoḻəꞌəcho deꞌen cui choncho complir canꞌ nanṉəꞌ. Pero zaquəꞌəch dižəꞌ güen dižəꞌ cobə c̱he Cristənꞌ c̱hedəꞌ laꞌ notəꞌətezcho chonḻilažəꞌəchoneꞌ, Diozənꞌ noneꞌ chioꞌo beṉəꞌ güen.
\v 10 Naꞌ ṉaꞌa deꞌen babidə Cristənꞌ, zaquəꞌəchgua dižəꞌ güen dižəꞌ cobə c̱heꞌenəꞌ, naꞌ deꞌe naꞌanəꞌ ḻeinꞌ bac̱h naquən ca to deꞌe cui bi zaquəꞌ.
\v 11 Deꞌe te c̱hei ḻeinꞌ ḻaꞌaṉəꞌəczə naquən to deꞌe zaqueꞌe. Pero ca naquə dižəꞌ güen dižəꞌ cobə c̱he Cristənꞌ caguə deꞌe te c̱heinəꞌ. Deꞌe naꞌanəꞌ zaquəꞌəch dižəꞌ güen dižəꞌ cobə c̱heꞌenəꞌ.
\p
\v 12 Nadaꞌ ṉezdaꞌ de que caguə deꞌe te c̱hei dižəꞌ güen dižəꞌ cobə c̱he Cristənꞌ. Deꞌe naꞌanəꞌ choꞌa dižəꞌ c̱hei clar.
\v 13 Moisezənꞌ bcuašəꞌ choꞌalaogüeꞌenəꞌ len to lachəꞌ nic̱h cui besəꞌəleꞌi beṉəꞌ Izrael caꞌ nac goc begaꞌa yeḻəꞌ chactit c̱he choꞌalaogüeꞌenəꞌ. Nadaꞌ bito chcuašaꞌa dižəꞌ güen dižəꞌ cobə c̱he Cristənꞌ, sino chyix̱ɉuiꞌan nic̱h chəsəꞌəṉeze yoguəꞌəḻoḻ beṉəꞌ.
\v 14 Beṉəꞌ Izrael caꞌ bito gwseꞌeɉniꞌineꞌ deꞌen chebei Diozənꞌ naꞌ xte ža ṉeža catəꞌ chosoꞌolabeꞌ ḻei deꞌen bzoɉ deꞌe Moisezənꞌ, bito chseꞌeɉniꞌineꞌ bi zeɉen. Con beṉəꞌ caꞌ chsoꞌonḻilažəꞌ Cristənꞌ chseꞌeɉniꞌineꞌ bi zeɉen, naꞌ casi yoguəꞌ beṉəꞌ Izrael gwlaž c̱hiaꞌ caꞌ bito chsoꞌonḻilažeꞌeneꞌ.
\v 15 Deꞌe ḻi xte ža ṉeža yoguəꞌ las catəꞌ chosoꞌolabeꞌ ḻei deꞌen bzoɉ deꞌe Moisezənꞌ bito chseꞌeɉniꞌineꞌ bi zeɉen.
\v 16 Pero catəꞌəch chzolao chsoꞌonḻilažeꞌe X̱ancho Cristənꞌ, canaꞌachənꞌ chseꞌeɉniꞌineꞌ bi zeɉen ḻei deꞌen bzoɉ deꞌe Moisezənꞌ.
\v 17 Naꞌ ca naquə chioꞌo chonḻilažəꞌəcho X̱ancho Cristənꞌ, zo Spirit c̱he Diozənꞌ ḻoꞌo yic̱hɉlaꞌaždaꞌochonꞌ chaclenən chioꞌo par choncho canꞌ cheneꞌe Diozənꞌ. Bitoch choncho xbab de que por ni c̱he šə choncho deꞌen na ḻeinꞌ chebei Diozənꞌ chioꞌo. Naꞌ Spirit c̱he Diozənꞌ ḻeczə naquən Spirit c̱he X̱ancho Cristənꞌ.
\v 18 Ca to spejw chloꞌen choꞌalao beṉəꞌ, caꞌaczə dižəꞌ güen dižəꞌ cobə deꞌen chzeɉniꞌin c̱he X̱ancho Cristənꞌ chloꞌin yoguəꞌ chioꞌo chonḻilažəꞌəchoneꞌ de que naqueꞌ ḻeꞌezelaogüe beṉəꞌ zaqueꞌe. Naꞌ Spirit c̱he X̱ancho Cristənꞌ zon ḻoꞌo yic̱hɉlaꞌaždaoꞌ chioꞌo cheɉniꞌicho dižəꞌ güen dižəꞌ cobə c̱heꞌenəꞌ chaclenən chioꞌo par nic̱h zdach chaquəchcho beṉəꞌ šaoꞌ beṉəꞌ güen canꞌ naquə Cristənꞌ.
\c 4
\p
\v 1 Yeḻəꞌ beṉəꞌ güen c̱he Diozənꞌ gwleɉeꞌ nadaꞌ par chyix̱ɉuiꞌa dižəꞌ güen dižəꞌ cobə c̱he Jesocristənꞌ. Naꞌ deꞌe naꞌanəꞌ bito chɉəx̱aquəꞌəlažaꞌa ca deꞌen chyix̱ɉuiꞌan.
\v 2 Bitobi chonaꞌ deꞌe əgwcuašaꞌa o deꞌe gaquədaꞌ ztoꞌ par yesəꞌəṉeze beṉəꞌ. Bito chx̱oayagaꞌ beṉəꞌ, naꞌ bito chzeɉniꞌidaꞌ xtižəꞌ Diozənꞌ clelə. Nadaꞌ chsed chloꞌidaꞌ beṉəꞌ xtižəꞌ Diozənꞌ tchoꞌa tšaoꞌ naꞌ yoguəꞌəḻoḻeꞌ zɉəṉezeneꞌ ḻoꞌo yic̱hɉlaꞌaždaꞌogaꞌaqueꞌenəꞌ de que choꞌa dižəꞌ ḻi. Naꞌ ḻeczə ṉeze nḻeꞌi Diozənꞌ canꞌ babenaꞌ.
\v 3 Con beṉəꞌ caꞌ bachəsəꞌəbiayiꞌ por ni c̱he deꞌen cui chsoꞌonḻilažeꞌeneꞌ ḻegaꞌaczeꞌ bito chseꞌeɉniꞌineꞌ dižəꞌ güen dižəꞌ cobə c̱he Jesocristənꞌ deꞌen chyix̱ɉuiꞌa.
\v 4 Gwxiyeꞌ nanꞌ chnabiaꞌan ḻegaꞌaqueꞌ naꞌ chonən par nc̱hoḻ yic̱hɉlaꞌaždaꞌogaꞌaqueꞌenəꞌ. Deꞌe naꞌanəꞌ bito choꞌo beꞌeniꞌin ḻoꞌo yic̱hɉlaꞌaždaꞌogaꞌaqueꞌenəꞌ ḻaꞌaṉəꞌəczə chzengaꞌacdaꞌaneꞌ dižəꞌ güen dižəꞌ cobə c̱he Cristənꞌ. Ḻeꞌenəꞌ naqueꞌ ḻeꞌezelaogüe beṉəꞌ zaqueꞌe, naꞌ naquə yic̱hɉlaꞌaždaogüeꞌenəꞌ cayaṉəꞌən naquə yic̱hɉlaꞌaždaoꞌ Diozənꞌ naꞌ tozə canꞌ chsoꞌoneꞌ.
\v 5 Bitobi dižəꞌ choꞌa par güeꞌelaoꞌ cuinaꞌ. Con chyix̱ɉuiꞌa de que cheyaḻəꞌ gwzenagcho c̱he X̱ancho Jesocristənꞌ. Naꞌ nadaꞌ con zoczaꞌ par gaquəlenaꞌ leꞌe xte ga zelao saquəꞌədaꞌ c̱hedəꞌ chacdaꞌ c̱he Jesoꞌosənꞌ.
\v 6 Chyix̱ɉueꞌetoꞌ dižəꞌ güen dižəꞌ cobə c̱he Jesocristənꞌ c̱hedəꞌ Dioz benꞌ ben par nic̱h chatəꞌ beꞌeniꞌ yežlyo nga ḻeczə ḻeꞌenəꞌ babeneꞌ par nic̱h beꞌeniꞌ c̱heꞌenəꞌ yoꞌon ḻoꞌo yic̱hɉlaꞌaždaꞌochonꞌ. Naꞌ deꞌe naꞌanəꞌ ca naquə chioꞌo banombiꞌacho Jesocristənꞌ ṉezecho de que Diozənꞌ naqueꞌ ḻeꞌezelaogüe beṉəꞌ zaqueꞌe c̱hedəꞌ yic̱hɉlaꞌaždaoꞌ Diozənꞌ naquən cayaṉəꞌən naquə yic̱hɉlaꞌaždaoꞌ Jesocristənꞌ naꞌ tozə canꞌ chsoꞌoneꞌ.
\s1 Apostol caꞌ gwnitəꞌətezə gwniteꞌe gwsoꞌonḻilažeꞌe Diozənꞌ
\p
\v 7 Chioꞌo ni latəꞌəzə cui zaquəꞌəcho par chzeɉniꞌicho beṉəꞌ c̱he Cristənꞌ, pero Diozənꞌ chacleneꞌ chioꞌo par chzeɉniꞌigaꞌaquechoneꞌen. Deꞌe naꞌanəꞌ chsaꞌacbeꞌi beṉəꞌ de que por yeḻəꞌ guac xen c̱he Dioz nanꞌ choncho deꞌen choncho, caguə por ni c̱he deꞌe zaquəꞌəcho gonchonṉəꞌ.
\v 8 Naꞌ ca naquə nadaꞌ syempr chyiꞌ chzacaꞌa pero bito chbeɉəyic̱hɉaꞌ xšineꞌenəꞌ. Zan las catəꞌ cuichczə chežellažaꞌa naclə gonaꞌ, pero ṉezdaꞌ zo Diozənꞌ chacleneꞌ nadaꞌ.
\v 9 Chosoꞌolagzeɉə chosoꞌolagzidə beṉəꞌ nadaꞌ pero Diozənꞌ bito chbeɉyic̱hɉeꞌ nadaꞌ. Chosoꞌoc̱hiꞌ chosoꞌosaquəꞌ beṉəꞌ nadaꞌ pero bito choeꞌ Diozənꞌ latɉə par soꞌoteꞌ nadaꞌ.
\v 10 Gatəꞌətezə chaꞌa con do tyemp chosoꞌoc̱hiꞌ chosoꞌosaquəꞌ beṉəꞌ nadaꞌ naꞌ chseꞌeneneꞌ soꞌoteꞌ nadaꞌ canꞌ gwsoꞌot beṉəꞌ mal caꞌ Jesoꞌosənꞌ. Diozənꞌ choꞌe latɉə chyiꞌ chzacaꞌa yoguəꞌ deꞌe quinga par nic̱h nḻaꞌalaon de que zoczə Jesoꞌosənꞌ chacleneꞌ nadaꞌ par chonaꞌ canꞌ chazlažeꞌenəꞌ.
\v 11 Nadaꞌ žlac ṉeꞌe mbanaꞌ syempr chɉtiꞌa beṉəꞌ chosoꞌoc̱hiꞌ chosoꞌosaqueꞌe nadaꞌ laogüe deꞌen chseꞌeneneꞌ soꞌoteꞌ nadaꞌ. Chəsəꞌəgueꞌineꞌ nadaꞌ c̱hedəꞌ əchyix̱ɉuiꞌa xtižəꞌ Jesoꞌosənꞌ. Naꞌ ḻaꞌaṉəꞌəczə chac caꞌ naꞌ ḻaꞌaṉəꞌ chax̱əꞌ cuerp c̱hiaꞌanəꞌ zoczə Jesoꞌosənꞌ chacleneꞌ nadaꞌ par chonaꞌ canꞌ chazlažeꞌenəꞌ.
\v 12 Gwžinḻɉa ža soꞌoteꞌ nadaꞌ, pero caguə deꞌe bi deꞌenəꞌ, con laꞌ bade yeḻəꞌ mban zeɉḻicaṉe c̱helenꞌ deꞌen babzeɉniꞌidaꞌ leꞌe xtižəꞌ Diozənꞌ naꞌ banonen c̱hele.
\p
\v 13 Deꞌe Dabinꞌ bzoɉeꞌ to Salmo ganꞌ nan: “Chonḻilažaꞌa Diozənꞌ naꞌ deꞌe naꞌanəꞌ choꞌa dižəꞌ c̱heꞌ.” Canꞌ benḻilažəꞌ deꞌe Dabinꞌ Diozənꞌ, caꞌaczənꞌ chonḻilažaꞌaneꞌ nadaꞌ. Deꞌe naꞌanəꞌ choꞌa xtižeꞌenəꞌ.
\v 14 Diozənꞌ bosbaneꞌ X̱ancho Jesoꞌosənꞌ ladɉo beṉəꞌ guat caꞌ. Naꞌ ṉezecho canꞌ bosbaneꞌeneꞌenəꞌ, ḻeczə canꞌ yosbaneꞌ chioꞌo naꞌ yeyeɉcho ganꞌ zoeꞌenəꞌ par nic̱h žɉəyezocho txen len ḻeꞌ.
\v 15 Yoguəꞌəḻoḻ deꞌen babžaglaoguaꞌ, bžaglaoguaꞌan par gaquəlenaꞌ leꞌe. Deꞌe naꞌanəꞌ bagwyanch chioꞌo chonḻilažəꞌəcho X̱ancho Jesoꞌosənꞌ, naꞌ banaccho beṉəꞌ zan choꞌecho yeḻəꞌ chox̱cwlen c̱he Diozənꞌ catequənꞌ nžiꞌilažeꞌe chioꞌo.
\p
\v 16 Naꞌ bito chɉx̱aquəꞌəlažaꞌa ca deꞌen chyix̱ɉuiꞌa xtižəꞌ X̱ancho Jesoꞌosənꞌ ḻaꞌaṉəꞌəczə tža tža zda chax̱əꞌ cuerp c̱hiaꞌanəꞌ. Tža tža choṉəch Diozənꞌ nadaꞌ fuers balor par yic̱hɉlaꞌaždaoguaꞌanəꞌ.
\v 17 Yob te c̱he bitəꞌətezə deꞌe daoꞌ deꞌen chžaglaocho lao zocho yežlyo nga. Pero deꞌe caꞌ chžaglaochonꞌ chsaꞌaclenən chioꞌo nic̱h socho probnid žɉəyezocho mbalaz juisy len Diozənꞌ zeɉḻicaṉe.
\v 18 Chioꞌo bito chiꞌ yic̱hɉcho c̱he deꞌe caꞌ chleꞌicho yežlyo nga, chiꞌ yic̱hɉcho c̱he deꞌe caꞌ cui chleꞌicho. Deꞌe caꞌ chleꞌicho zɉəde yežlyo nga, deꞌe yesəꞌəde c̱heinəꞌ, pero deꞌe caꞌ cui chleꞌicho yežlyo nga caguə deꞌe yesəꞌəde c̱heinəꞌ, zɉənaquən par zeɉḻicaṉe.
\c 5
\p
\v 1 Ca naquə cuerp c̱hechonꞌ gwxaquəꞌəleben ca to ranšzə. Žalṉez te c̱hei catəꞌən gatcho. Pero naꞌ ṉezecho Diozənꞌ goneꞌ par nic̱h žɉəyezocho zeɉḻicaṉe yobanꞌ ganꞌ zoeꞌenəꞌ. Naꞌ ganꞌ žɉəyezochonꞌ gwxaquəꞌəleben ca to yoꞌo gual c̱hedəꞌ naquən to deꞌe ben Diozənꞌ naꞌ caguə deꞌe te c̱heinəꞌ.
\v 2 Deꞌe ḻi žlac ṉezoaꞌ mbanaꞌ yežlyo nga chbežəyašaꞌa ḻoꞌo laꞌaždaoguaꞌanəꞌ zelažaꞌa xte juisy goṉ Diozənꞌ cuerp cob c̱hiaꞌanəꞌ deꞌen gatəꞌ c̱hiaꞌ yobanꞌ.
\v 3 Zelažaꞌa gatəꞌ cuerp cobə c̱hiaꞌ sin cui gataꞌ c̱hedəꞌ bito cheꞌendaꞌ soaꞌ sin cuerp.
\v 4 Cuerp c̱hechonꞌ deꞌe te c̱heinꞌ. Deꞌe naꞌanəꞌ chbežəyašaꞌa ḻoꞌo laꞌaždaoguaꞌan, caguə deꞌen cheꞌendaꞌ gataꞌ, pero deꞌen zelažaꞌa goṉ Diozənꞌ cuerp cobə c̱hianꞌ deꞌen cui te c̱hei naꞌ žɉəyezoaꞌ len ḻeꞌ zeɉḻicaṉe.
\v 5 Dioz naꞌanəꞌ babocobeꞌ yic̱hɉlaꞌaždaꞌochonꞌ naꞌ ḻeꞌenəꞌ babseḻeꞌe Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ par nic̱h caꞌ ṉezecho gwžin ža goṉeꞌ chioꞌo to cuerp cobə deꞌen cui te c̱hei.
\p
\v 6 Deꞌe naꞌanəꞌ yic̱hɉlaꞌaždaoguaꞌanəꞌ zon mba bitəꞌətezə chac. Ṉezdaꞌ žlac zoaꞌ mbanaꞌ len cuerp c̱hiaꞌanəꞌ, bito gaquə soaꞌ yobanꞌ ganꞌ zo X̱ancho Jesocristənꞌ.
\v 7 Pero ḻaꞌaṉəꞌəczə cui chleꞌidaꞌ X̱anchonꞌ zoczaꞌ chonḻilažaꞌaneꞌ.
\v 8 Naꞌ yic̱hɉlaꞌaždaoguaꞌanəꞌ zon mba deꞌen ṉezdaꞌ žɉəyezoaꞌ len X̱ancho Jesocristənꞌ catəꞌən gataꞌ. Deꞌe naꞌanəꞌ yeɉniꞌa gataꞌ naꞌ gožəꞌ cuerp c̱hiaꞌanəꞌ cle ca sochaꞌ yežlyo nga.
\v 9 Naꞌ žlac ṉeꞌe mbanaꞌ choꞌelažaꞌa chonaꞌ ca chebei Diozənꞌ nadaꞌ naꞌ ca yebeineꞌ nadaꞌ catəꞌən bagotaꞌ.
\v 10 Chonaꞌ caꞌ c̱hedəꞌ chonən byen yoguəꞌəcho techo lao Cristənꞌ par əc̱hogbiꞌen c̱he to tocho segon naquənꞌ bencho lao bguancho, šə bencho deꞌe güen o šə bencho deꞌe mal. Ec̱hogbiꞌen c̱he to tocho šə socho mbalaz o šə siꞌicho castigw.
\s1 Notəꞌətezə beṉəꞌ chsoꞌonḻilažəꞌ Cristənꞌ niteꞌe binḻo len Diozənꞌ
\p
\v 11 Naꞌ nadaꞌ ža ca naquənꞌ ṉezdaꞌ de que cheyaḻəꞌ əgwdecho cuent lao Cristənꞌ c̱he yoguəꞌəḻoḻ deꞌen chonchonꞌ, chonaꞌ xte ga zelao saquəꞌədaꞌ par seꞌeɉḻeꞌe beṉəꞌ c̱he xtižeꞌenəꞌ. Diozənꞌ ṉezeneꞌ de que chonaꞌ xšineꞌenəꞌ do lažaꞌa, naꞌ ḻeczə zoaꞌ lez de que leꞌe baṉezelen.
\v 12 Deꞌe yoblə niaꞌ de que bito choꞌelaoꞌ cuinaꞌ sino cheꞌendaꞌ əṉezele canꞌ chonaꞌ nic̱h yebeile naꞌ güeꞌele dižəꞌ len beṉəꞌ caꞌ chəsəꞌəṉelaoꞌ c̱hiaꞌ yeꞌegaꞌacleneꞌ de que chonaꞌ xšin Diozənꞌ do lažaꞌa. Beṉəꞌ caꞌ chəsəꞌəṉelaoꞌ c̱hiaꞌ chsoꞌelaoꞌ cuingaꞌaqueꞌ por ni c̱he šə bi deꞌen bazɉənsedeꞌ, naꞌ c̱he señyənꞌ zɉəzoeꞌ naꞌ c̱he no lao dia c̱hei gwsaꞌalɉeꞌ. Naꞌ bito bi nonən len ḻegaꞌaqueꞌ nac zɉənaquə yic̱hɉlaꞌaždaꞌogaꞌaqueꞌenəꞌ.
\v 13 Šə chaquele chac tontaꞌanəꞌ por ni c̱he canꞌ babenaꞌ, ḻegon xbab de que par beꞌelaoguaꞌa Dioz nanꞌ babenaꞌ bi deꞌen babenaꞌ. Naꞌ šə chonḻe xbab zo šaꞌoczə yic̱hɉlaꞌaždaoguaꞌanəꞌ, ḻegon xbab de que par chaquəlenaꞌ leꞌenəꞌ chonaꞌ bi deꞌen chonaꞌ.
\v 14 Ḻechguaḻe chaque Cristənꞌ c̱hecho, naꞌ deꞌe naꞌanəꞌ bitobi chonaꞌ deꞌe biaꞌazəlažaꞌa. Chonaꞌ con canꞌ cheneꞌeneꞌ c̱hedəꞌ bsanḻažəꞌ cuineꞌ gwsoꞌoteꞌeneꞌ por ni c̱he yoguəꞌ chioꞌo beṉac̱h, naꞌ deꞌe naꞌanəꞌ guaquə əṉacho de que yoguəꞌəcho gotcho.
\v 15 Por ni c̱he yoguəꞌ chioꞌo beṉac̱hənꞌ Cristənꞌ bsanḻažəꞌ cuineꞌ gwsoꞌoteꞌeneꞌ par nic̱h bitoch goncho con deꞌe biaꞌazəlažəꞌəcho sino goncho canꞌ cheneꞌe ḻeꞌ, chioꞌo bade yeḻəꞌ mban zeɉḻicaṉe c̱hecho. Por ni c̱he chioꞌon bsanḻažəꞌ cuin Cristənꞌ gwsoꞌoteꞌeneꞌ naꞌ ḻeczə por ni c̱hechonꞌ bebaneꞌ ladɉo beṉəꞌ guatənꞌ.
\v 16 Catəꞌən cuiṉəꞌ gonḻilažaꞌa Cristənꞌ benaꞌ xbab de que cui zaqueꞌe, c̱hedəꞌ benaꞌ xbab c̱heꞌ naꞌ c̱he yoguəꞌəte beṉəꞌ de que zɉəzaqueꞌe segon nac zɉənaqueꞌ, naꞌ nac chsoꞌoneꞌ, naꞌ bi deꞌe de c̱hegaꞌaqueꞌ. Pero ṉaꞌa bitoch chonaꞌ xbabənꞌ caꞌ c̱he Cristənꞌ o c̱he notəꞌətezəchlə beṉəꞌ.
\v 17 Chioꞌo bandiḻ ngodəꞌəcho len Cristənꞌ Diozənꞌ babocobeꞌ yic̱hɉlaꞌaždaꞌochonꞌ. Naꞌ bitoch chebeicho deꞌe caꞌ bebeicho antslə, naꞌ ḻeczə bitoch choncho canꞌ bencho antslə. Bazocho ca beṉəꞌ cobə, naꞌ banžaꞌ yeḻəꞌ chzo yeḻəꞌ chbez c̱hechonꞌ.
\p
\v 18 Ca deꞌen banaccho ca beṉəꞌ cobə, goc caꞌ c̱hedəꞌ Diozənꞌ bocobeꞌ yic̱hɉlaꞌaždaꞌochonꞌ. Ben Diozənꞌ par bezocho binḻo len ḻeꞌ ca deꞌen bnežɉw cuin Cristənꞌ por ni c̱hecho. Naꞌ Diozənꞌ noꞌe c̱hiaꞌ chaquəlenaꞌ beṉəꞌ par nic̱h yesyəꞌəniteꞌe binḻo len ḻeꞌ.
\v 19 Diozənꞌ bsiꞌe xṉeze ben Cristənꞌ par nic̱h notəꞌətezə beṉəꞌ chsoꞌonḻilažəꞌ ḻeꞌ chəsyəꞌəniteꞌe binḻo len Diozənꞌ, naꞌ bitoch choneꞌ cuent c̱he deꞌe mal caꞌ bagwsoꞌoneꞌ. Naꞌ deꞌe naꞌanəꞌ noeꞌ Diozənꞌ c̱hiaꞌ chyix̱ɉueꞌidaꞌ beṉac̱hənꞌ naquənꞌ soꞌoneꞌ par yesyəꞌəniteꞌe binḻo len ḻeꞌ.
\v 20 Cristənꞌ bseḻeꞌe nadaꞌ ca lgüeꞌe, naꞌ Diozənꞌ choneꞌ par nic̱h chṉeyoidaꞌ leꞌe ca cuinczə Cristənꞌ, leꞌe cuiṉəꞌ gonḻilažəꞌəleneꞌ, par yezole binḻo len Diozənꞌ. Deꞌe naꞌanəꞌ ḻeyenitəꞌ binḻo len ḻeꞌ.
\v 21 Cristənꞌ bitobi deꞌe mal beneꞌ, pero par nic̱h cui siꞌicho castigw c̱he deꞌe mal c̱hechonꞌ deꞌen choncho, Diozənꞌ beneꞌ par nic̱h Cristənꞌ gwxaquəꞌəziꞌe caczə ṉacho ḻeleꞌen beneꞌ deꞌe malənꞌ. Naꞌ laogüe deꞌen gwxaquəꞌəziꞌ Cristənꞌ lguaꞌa chioꞌo, Diozənꞌ banoneꞌ chioꞌo beṉəꞌ güen canꞌ naquə cuineꞌ chioꞌo chonḻilažəꞌəcho Cristənꞌ.
\c 6
\p
\v 1 Nadaꞌ chonaꞌ xšin Diozənꞌ txen len ḻeꞌ. Deꞌe naꞌanəꞌ chṉeyoidaꞌ leꞌe ḻegon canꞌ chazlažəꞌ Diozənꞌ par nic̱h gacbiaꞌ de que chaclenən leꞌe ca deꞌen chonḻilažəꞌəle Diozənꞌ benꞌ nžiꞌilažəꞌ leꞌe.
\v 2 Nyoɉ canꞌ gwna Diozənꞌ:
\q1 Catəꞌ bžin tyemp deꞌen bžiaꞌ biaꞌ gonaꞌ, bzenagaꞌ c̱hioꞌ.
\q1 Naꞌ catəꞌ bžin ža benaꞌan, canaꞌachənꞌ goquəlenaꞌ leꞌ.
\m Canꞌ nyoɉən. Naꞌ ža ṉeža babžin tyempənꞌ gwneꞌ caꞌ, laꞌ ža ṉeža zoczeꞌ par yebeɉeꞌ leꞌe xniꞌa deꞌe malənꞌ leꞌe cuiṉəꞌ gonḻilažəꞌəleneꞌ.
\p
\v 3 Bito chonaꞌ deꞌe əgwžon par nic̱h beṉəꞌ cui soꞌonḻilažeꞌe Cristonꞌ nic̱h caꞌ cui nono ṉelaoꞌ c̱he xšin Diozənꞌ deꞌen chonaꞌ.
\v 4 Lguaꞌa deꞌe gonaꞌ caꞌ, bitəꞌətezə deꞌe chonaꞌ chonaꞌan ca chsaꞌacbeꞌi beṉəꞌ de que chonaꞌ canꞌ cheyaḻəꞌ soꞌon beṉəꞌ güen xšin Diozənꞌ. Chgoꞌo chc̱heɉlažaꞌa catəꞌ chosoꞌoc̱hiꞌ chosoꞌosaquəꞌ beṉəꞌ nadaꞌ naꞌ catəꞌ chzaquəꞌəziꞌ chzaquəꞌəyašaꞌa, naꞌ catəꞌ zaꞌac bichlə deꞌe mal len nadaꞌ.
\v 5 Ḻeczə chgoꞌo chc̱heɉlažaꞌa catəꞌ chɉətiꞌa beṉəꞌ chəsəꞌəyin nadaꞌ, naꞌ catəꞌ chəsəꞌəyix̱ɉueꞌ nadaꞌ ližya, naꞌ catəꞌ chəsəꞌəbiadiꞌe nadaꞌ chəsəꞌəneꞌ de que nacaꞌ beṉəꞌ mal, naꞌ catəꞌ chɉx̱aquəꞌədaꞌ por ni c̱he yoguəꞌəḻoḻ deꞌen chonaꞌ, naꞌ catəꞌ chžaglaoguaꞌ chbeɉaꞌ yel bišgal, naꞌ catəꞌ chbil chdonaꞌ. Yoguəꞌ deꞌe quinga chɉtiꞌa pero chgoꞌo chc̱heɉlažaꞌa.
\v 6 Chonaꞌ ca chsaꞌacbeꞌi beṉəꞌ de que chonaꞌ canꞌ cheyaḻəꞌ soꞌon beṉəꞌ güen xšin Diozənꞌ. Chloꞌa de que bito bi deꞌe mal daꞌ əchen yic̱hɉlaꞌaždaoguaꞌanəꞌ. Chloꞌa de que cheɉniꞌidaꞌ canꞌ cheneꞌeneꞌ goncho, napaꞌ yeḻəꞌ chxenḻažəꞌ len beṉəꞌ yoblə, chonaꞌ güen len beṉəꞌ yoblə, chonaꞌ canꞌ na Spirit c̱he Diozənꞌ, naꞌ do lažaꞌa chacdaꞌ c̱he beṉəꞌ yoblə.
\v 7 Choꞌa xtižeꞌenəꞌ deꞌen naquə deꞌe ḻi, naꞌ deꞌen baben Diozənꞌ par nic̱h nacaꞌ beṉəꞌ güen laogüeꞌenəꞌ deꞌe naꞌanəꞌ choṉeꞌ nadaꞌ yeḻəꞌ guac c̱heꞌenəꞌ par chonaꞌ xšineꞌenəꞌ naꞌ par chdiḻəlenaꞌ gwxiyeꞌenəꞌ.
\v 8 Chonaꞌ ca chsaꞌacbeꞌi beṉəꞌ de que chonaꞌ canꞌ cheyaḻəꞌ soꞌon beṉəꞌ güen xšin Diozənꞌ ḻaꞌaṉəꞌəczə šə chsoꞌelaogüeꞌe nadaꞌ o šə chəsəꞌəgueꞌineꞌ nadaꞌ naꞌ ḻaꞌaṉəꞌəczə šə chəsəꞌəṉeꞌ güen c̱hiaꞌ o šə chəsəꞌəṉeꞌ mal c̱hiaꞌ. Dižəꞌ deꞌen choꞌa naquən deꞌe ḻi, ḻaꞌaṉəꞌəczə nitəꞌ beṉəꞌ chəsəꞌəṉeꞌ nacaꞌ beṉəꞌ gox̱oayag.
\v 9 Naꞌ ḻaꞌaṉəꞌəczə nitəꞌ beṉəꞌ chsaꞌaqueneꞌ bito bseḻəꞌ Diozənꞌ nadaꞌ, leꞌe ṉezele de que Diozənꞌ bseḻeꞌe nadaꞌ nacaꞌ apostol. Zan las chonaꞌ xbab gatczaꞌanəꞌ, pero ṉembanaꞌ. Ca deꞌen chon Diozənꞌ par chac c̱hiaꞌ yoguəꞌ deꞌe quinga chžaglaoguaꞌ, choneꞌ caꞌ par nic̱h gaquəchaꞌ beṉəꞌ güen, caguə choneꞌ par nic̱h gataꞌanəꞌ.
\v 10 Ḻaꞌaṉəꞌəczə deꞌe zan deꞌe chac par soaꞌ trist, syempr chebeidaꞌ ḻoꞌo laꞌaždaoguaꞌanəꞌ. Ḻaꞌaṉəꞌəczə ngaꞌaṉ yašaꞌa, chonaꞌ ca beṉəꞌ zan niteꞌe mbalaz. Ḻaꞌaṉəꞌəczə bito bi de c̱hiaꞌ, Diozənꞌ choṉeꞌ bitəꞌətezə deꞌen chyažɉdaꞌ.
\p
\v 11 Con yoguəꞌ dižəꞌ deꞌen ṉezdaꞌ naꞌ deꞌen naquə güen babiꞌan len leꞌe beṉəꞌ Corinto deꞌen chacchgüeidaꞌ c̱hele.
\v 12 Naꞌ ca naquənꞌ cui zole binḻo len nadaꞌ, naquən por ni c̱he deꞌen cuitec chaquele c̱hiaꞌ, caguə deꞌen cui chacdaꞌ c̱hele.
\v 13 Chatəꞌəyoichgüeidaꞌ leꞌe canꞌ chatəꞌəyoidaꞌ no xiꞌiṉaꞌ ḻeso ḻegaque c̱hiaꞌ canꞌ chacchgüeidaꞌ c̱hele.
\s1 Spirit c̱he Diozənꞌ zon ḻoꞌo yic̱hɉlaꞌaždaoꞌ beṉəꞌ chsoꞌonḻilažəꞌ ḻeꞌ
\p
\v 14 Bito cheyaḻəꞌ əgwcodəꞌ lɉuežɉcho len beṉəꞌ cui chsoꞌonḻilažəꞌ Cristənꞌ. Benꞌ zda ḻicha bito gaquə goneꞌ txen len benꞌ chon deꞌe mal. Naꞌ benꞌ yoꞌo beꞌeniꞌ c̱he Diozənꞌ ḻoꞌo yic̱hɉlaꞌaždaogüeꞌenəꞌ bito naquə yic̱hɉlaꞌaždaogüeꞌen tozə len yic̱hɉlaꞌaždaoꞌ benꞌ cui yoꞌo beꞌeniꞌ c̱he Diozənꞌ.
\v 15 Cristənꞌ bito chac goneꞌ txen len deꞌe gwxiyeꞌenəꞌ. Naꞌ benꞌ chonḻilažəꞌ Cristənꞌ bito cheyaḻəꞌ gaqueꞌ txen len benꞌ cui chonḻilažəꞌ Cristənꞌ.
\v 16 Naꞌ chioꞌo choꞌelaꞌocho Dioz benꞌ zo zeɉḻicaṉe bito gaquə goncho txen len bitəꞌətezə deꞌen naquə c̱he lguaꞌa lsaquəꞌ deꞌen chseꞌeɉṉiꞌalažəꞌ beṉəꞌ, c̱hedəꞌ Spirit c̱he Diozənꞌ zon ḻoꞌo yic̱hɉlaꞌaždaꞌochonꞌ ca beṉəꞌ zo ližeꞌ. Chac canꞌ gwna Diozənꞌ:
\q1 Soaꞌ len ḻegaꞌaqueꞌ naꞌ talengaꞌacaꞌaneꞌ.
\q1 Gacaꞌ benꞌ soꞌelaogüeꞌe, naꞌ ḻegaꞌaqueꞌ əsaꞌaqueꞌ xiꞌiṉaꞌ.
\m
\v 17 Deꞌe naꞌanəꞌ cheyaḻəꞌ goncho canꞌ gwna X̱ancho Diozənꞌ:
\q1 Ḻeꞌe yechoɉ entr beṉəꞌ caꞌ cui chsoꞌelaoꞌ nadaꞌ naꞌ bitoch gonḻe txen len ḻegaꞌaqueꞌ.
\q1 Bitoch gonḻe deꞌe malənꞌ.
\q1 Ḻegon par nic̱h yebeidaꞌ leꞌe.
\q1
\v 18 Naꞌ nadaꞌ gacaꞌ X̱ale naꞌ leꞌe gacle xiꞌiṉaꞌ.
\q1 Canꞌ na Dioz benꞌ napə ḻeꞌezelaogüe yeḻəꞌ guac xenṉəꞌ.
\c 7
\p
\v 1 Beṉəꞌ bišəꞌədaoguaꞌa, ṉezecho gon Diozənꞌ len chioꞌo canꞌ na lyebe quinga deꞌen babiꞌa dižəꞌ c̱hei. Deꞌe naꞌanəꞌ cheyaḻəꞌ cueɉyic̱hɉcho cuich goncho bitəꞌətezə deꞌe mal naꞌ bitəꞌətezə xbab mal deꞌen choncho, par nic̱h cui bi deꞌe mal taꞌ əchen cuerp c̱hechonꞌ o yic̱hɉlaꞌaždaꞌochonꞌ. Naꞌ ca deꞌen napcho Diozənꞌ respet, cheyaḻəꞌ gwzenaguəchcho c̱heꞌ par nic̱h yic̱hɉlaꞌaždaꞌochonꞌ šeɉəch gaquəchən xiꞌilažəꞌ.
\s1 Beṉəꞌ Corinto caꞌ gosəꞌəbeɉyic̱hɉeꞌ deꞌe malənꞌ
\p
\v 2 Naꞌ chṉeyoidaꞌ leꞌe, ḻegaque c̱hiaꞌ canꞌ chacdaꞌ c̱hele. Ni to beṉəꞌ cui bi bi chondaꞌaneꞌ. Bito bi bi chonaꞌ par əgwx̱iṉɉən yic̱hɉlaꞌaždaoꞌ beṉəꞌ yoblə. Bito chx̱oayagaꞌ beṉəꞌ.
\v 3 Ḻaꞌaṉəꞌəczə baḻle nale de que chonaꞌ caꞌ, bito chdiḻaꞌ leꞌe. Bagwniaꞌaczaꞌ antslə ḻechguaḻe chacdaꞌ c̱hele. Chacdaꞌ c̱hele ṉaꞌa mbanaꞌ naꞌ ḻeczə xte ža yeḻəꞌ gotaꞌ ṉeꞌe guaquəczədaꞌ c̱hele.
\v 4 Ḻechguaḻe chebeidaꞌ leꞌe naꞌ zoaꞌ segor gonḻe canꞌ cheneꞌe Diozənꞌ. Babeyacxenḻažaꞌa deꞌen blaꞌ rson ca güenṉəꞌ chonḻe, naꞌ zochguaꞌ mbalaz, ḻaꞌaṉəꞌəczə deꞌe zan deꞌe chyiꞌ chzacaꞌa.
\p
\v 5 Catəꞌ bežinaꞌ Masedonianꞌ deꞌe ḻi bito gotəꞌ latɉə yeziꞌilažaꞌa. Do tyempte bosoꞌoc̱hiꞌ bosoꞌosaquəꞌ beṉəꞌ caꞌ nadaꞌ, naꞌ bžebaꞌ ḻoꞌo yic̱hɉlaꞌaždaoguaꞌanəꞌ gocdaꞌ nac gonḻe.
\v 6 Pero Diozənꞌ syempr cheyonxenḻažeꞌe beṉəꞌ nitəꞌ trist. Ḻeꞌ beyonxenḻažeꞌe nadaꞌ deꞌen belaꞌ Titonəꞌ.
\v 7 Beyacxenḻažaꞌa caguə deꞌen beleꞌe naꞌazənꞌ sino por ni c̱he rson deꞌen zenoꞌenəꞌ de que bebeichgüeineꞌ canꞌ chonḻe. Beꞌe dižəꞌ de que zelažəꞌəchguale yidaꞌ deꞌe yoblə delaṉaꞌa leꞌe. Naꞌ ḻeczə neꞌ de que chegüiꞌinchgüeile ḻoꞌo yic̱hɉlaꞌaždaꞌolenꞌ ca naquə deꞌe mal deꞌen benḻenꞌ naꞌ chiꞌ yic̱hɉle gonḻe canꞌ gwniaꞌ leꞌe. Naꞌ bebeichgüeidaꞌ deꞌen beleꞌenəꞌ pero mazəchlə bebeidaꞌ dižəꞌ deꞌen beꞌe c̱hele.
\p
\v 8-9 Chacbeꞌidaꞌ tristənꞌ bzoaꞌ leꞌe ca deꞌen gwniaꞌ leꞌe ḻeꞌe cartənꞌ. Gwdechlə beyeɉdaꞌ ca naquənꞌ bzoaꞌ leꞌe tristənꞌ, pero ṉaꞌa bitoch cheyeɉdaꞌ c̱hedəꞌ šložzənꞌ gwzole trist. Caguə chebeidanꞌ bosgüiꞌindaꞌ yic̱hɉlaꞌaždaꞌolenꞌ. Con chebeidaꞌ de que lao zole chegüiꞌinḻažəꞌəle ḻoꞌo yic̱hɉlaꞌaždaꞌolenəꞌ bediṉɉele deꞌe mal c̱hele deꞌen benḻe. Naꞌ chebei Diozənꞌ de que bediṉɉelen. Canꞌ naquən bitobi deꞌe mal benən len leꞌe deꞌen bzoɉaꞌ leꞌe cartənꞌ, sino goclenən leꞌe.
\v 10 Chebei Diozənꞌ catəꞌ notəꞌətezə beṉəꞌ zo trist chediṉɉeneꞌ c̱he deꞌe malənꞌ babeneꞌ, naꞌ Diozənꞌ cheziꞌixeneꞌ c̱he benꞌ chediṉɉe xtoḻeꞌenəꞌ par nic̱h cui yeyeɉeꞌ lao yiꞌ gabiḻənꞌ. Naꞌ šə babediṉɉecho xtoḻəꞌəcho caꞌ cuat socho trist deꞌen bediṉɉechon. Beṉəꞌ zan žaꞌ yežlyo nga bito chesyəꞌədiṉɉeneꞌ xtoḻəꞌəgaꞌaqueꞌenəꞌ catəꞌ niteꞌe trist, naꞌ deꞌe naꞌanəꞌ gwžin ža žɉəyaꞌaqueꞌ lao yiꞌ gabiḻənꞌ.
\v 11 Chebei Diozənꞌ canꞌ bediṉɉele xtoḻəꞌəlenꞌ catəꞌən gwzole trist. Naꞌ deꞌen gwzole trist, ḻechguaḻe goneꞌele benḻe canꞌ cheneꞌe Diozənꞌ gonḻe, naꞌ ḻechguaḻe goneꞌele ṉezdaꞌ de que bito benḻe txen len benꞌ ben deꞌe malənꞌ, naꞌ bžaꞌale por ni c̱he deꞌe malənꞌ ben beꞌenəꞌ, naꞌ bžeble chaquele šə yidaꞌ yedeyenaꞌ leꞌe castigw. Ḻechguaḻe goneꞌele gonḻe ca yebeidaꞌ. Ḻechguaḻe gwcheꞌ yic̱hɉle gonḻe canꞌ na Diozənꞌ. Naꞌ ḻeczə deꞌen gwzole trist benən par nic̱h bnežɉwle castigw c̱he benꞌ ben deꞌe malənꞌ. Naꞌ lao yoguəꞌəḻoḻ deꞌe quinga bagoc, naquən clar de que bitoch bi xtoḻəꞌəle de.
\v 12 Bito bzoɉaꞌ leꞌe parzə nic̱h benꞌ ben deꞌe malənꞌ siꞌe castigw, nique ṉacho parzə nic̱h benꞌ goquə deꞌe mal c̱hei yeyacxenḻažeꞌe. Ḻeczə bzoɉaꞌ leꞌe par nic̱h lao Diozənꞌ gocbeꞌile de que ṉeꞌe chaquele c̱hiaꞌ naꞌ ṉeꞌe cheneꞌele gonḻe canꞌ niaꞌanəꞌ.
\v 13 Naꞌ babeyacxenḻažaꞌa deꞌen bzenagle c̱hiaꞌ.
\p Naꞌ bebeichgüeidaꞌ c̱hedəꞌ benḻe ca bebei Titonəꞌ. Yoguəꞌəle benḻe ca zoeꞌ mbalaz.
\v 14 Beꞌelaoguaꞌa leꞌe catəꞌ biꞌa dižəꞌ len Titonəꞌ naꞌ benḻe canꞌ gožaꞌ Titonꞌ gonḻe. Deꞌe naꞌanəꞌ bito chacdaꞌ tolə. Yoguəꞌəḻoḻ deꞌen bagwniaꞌ leꞌe babiꞌa dižəꞌ ḻi, naꞌ ḻeczə catəꞌən biꞌa dižəꞌ len Titonəꞌ beꞌelaoguaꞌa leꞌe benḻe par nic̱h nacbiaꞌ biꞌa dižəꞌ ḻi.
\v 15 Naꞌ chaquəcheneꞌ c̱hele c̱hedəꞌ choneꞌ xbab canꞌ yoguəꞌ leꞌe bzenagle c̱heꞌ naꞌ choneꞌ xbab canꞌ gwcheꞌechgua yic̱hɉle par benḻe canꞌ gožeꞌ leꞌe.
\v 16 Naꞌ chebeidaꞌ zoaꞌ segor gonḻe yoguəꞌəḻoḻ canꞌ cheyaḻəꞌ gonḻe.
\c 8
\s1 Besəꞌəzaneneꞌ deꞌen gotəꞌ c̱hegaꞌaqueꞌ par gwsaꞌacleneꞌ beṉəꞌ yoblə
\p
\v 1 Beṉəꞌ bišəꞌ, cheneꞌetoꞌ əṉezele canꞌ bagoclen Diozənꞌ tcuen tcuen beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ ganꞌ mbane Masedonianꞌ.
\v 2 Lao yeḻəꞌ yašəꞌ yeḻəꞌ ziꞌ c̱hegaꞌaqueꞌenəꞌ bagoclen Diozənꞌ ḻegaꞌaqueꞌ par niteꞌe mbalaz. Naꞌ ḻaꞌaṉəꞌəczə bazɉənaquəchgüeꞌ beṉəꞌ yašəꞌ, besyəꞌəbeineꞌ bosəꞌənežɉueꞌ deꞌen besəꞌəyažɉe beṉəꞌ chsoꞌelaoꞌ Cristənꞌ Jodeanꞌ.
\v 3 Ṉezdaꞌ naꞌ choꞌa dižəꞌ de que to toeꞌ bosoꞌonežɉochgüeꞌ deꞌe besəꞌəyažɉe beṉəꞌ caꞌ ḻaꞌaṉəꞌəczə cui bi gotəꞌ par cuingaꞌaqueꞌ, naꞌ con xbab c̱hegaꞌaqueꞌenəꞌ gwsoꞌoneꞌ caꞌ.
\v 4 Gosəꞌəṉeyoineꞌ nadaꞌ guaꞌa latɉə yosoꞌonežɉueꞌ mech par əsaꞌacleneꞌ beṉəꞌ Jodea caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 5 Naꞌ gwsoꞌoncheꞌ mazəchlə canꞌ benaꞌ xbab soꞌoneꞌ deꞌen gwsoꞌon cuingaꞌaqueꞌ lažəꞌ naꞌ X̱ancho Cristənꞌ naꞌ lažəꞌ naꞌanəꞌ c̱hedəꞌ gwsaꞌacbeꞌineꞌ canꞌ cheneꞌe Diozənꞌ soꞌoneꞌ. Naꞌ ḻeczə bosoꞌonežɉueꞌ mechənꞌ.
\v 6 Ṉezecho de que Titonꞌ bideꞌ ganꞌ zole naꞌ btipeꞌ lažəꞌəle par btoble mechənꞌ. Naꞌ catəꞌ gwṉezdaꞌ deꞌen gwsoꞌon beṉəꞌ Masedonia caꞌ, gotəꞌəyoidaꞌ Titonəꞌ yeyedeꞌ yeto ganꞌ zolenꞌ par nic̱h gaquəleneꞌ leꞌe yeyož əgwtoble mechənꞌ.
\v 7 Güenchguanꞌ chonḻe ca deꞌen ḻechguaḻe chonḻilažəꞌəle Cristənꞌ, naꞌ choꞌechguale xtižeꞌenəꞌ, naꞌ deꞌe zan deꞌe cheɉniꞌile c̱he Diozənꞌ, naꞌ chonḻe xšineꞌenəꞌ do yic̱hɉ do lažəꞌəle, naꞌ chacchgüeile c̱hetoꞌ. Naꞌ deꞌe naꞌanəꞌ chṉeyoidaꞌ leꞌe gonšgaczle güen əgwtoble deꞌe sc̱haꞌo par əgwnežɉwle beṉəꞌ Jodea caꞌ.
\p
\v 8 Bito chonaꞌ mendad əgwnežɉwle mechənꞌ, con babiꞌa dižəꞌ len leꞌe canꞌ bosoꞌonežɉo beṉəꞌ mech. Naꞌ šə gonḻe canꞌ gwsoꞌon ḻegaꞌaqueꞌ gwloꞌele de que do lažəꞌəlenꞌ chaquele c̱he Diozənꞌ.
\v 9 Ṉezele de que X̱ancho Jesocristənꞌ napeꞌ yeḻəꞌ gwnabiaꞌ naꞌ yeḻəꞌ balaꞌaṉ xen. Pero deꞌen nžiꞌilažeꞌe chioꞌo bzaneneꞌ gwleɉyic̱hɉeꞌ yeḻəꞌ gwnabiaꞌ naꞌ yeḻəꞌ balaꞌaṉ c̱heꞌenəꞌ par nic̱h bedəyeneꞌ ca siꞌicho yeḻəꞌ balaꞌaṉ xen.
\p
\v 10 Godgüize goneꞌele gaquəlenḻe beṉəꞌ yašəꞌ caꞌ naꞌ gwzolao btoble mechənꞌ. Naꞌ ṉaꞌa chniaꞌ leꞌe de que naquən güen yeyož əgwtoblen.
\v 11 Naꞌ gwnežɉwle deꞌen de c̱hele xte ga zelao saqueꞌele par nic̱h yeyož gonḻe canꞌ goneꞌele gonḻe.
\v 12 Šə to beṉəꞌ cheneꞌeneꞌ əgwnežɉueꞌ to deꞌe əgwnežɉueꞌ, gobeicze Diozənꞌ canꞌ goneꞌenəꞌ ḻaꞌaṉəꞌəczə latəꞌəzə deꞌen gaquə əgwnežɉueꞌ, pero naꞌ šə cui bi de c̱heꞌ bito əṉa Diozənꞌ cheyaḻəꞌ əgwnežɉueꞌ deꞌe cui de c̱heꞌ.
\p
\v 13 Bito niaꞌ de que gonḻe ca cuich bi bi yegaꞌaṉ c̱hele naꞌ gatəꞌ c̱he beṉəꞌ yoblə.
\v 14 Con cheꞌendaꞌ gatəꞌ deꞌe chyažɉe yoguəꞌəle. Ṉaꞌa de c̱he leꞌe, naꞌ cheyaḻəꞌ gaquəlenḻe ḻegaꞌaqueꞌ chəsəꞌəyažɉeneꞌ ṉaꞌa. C̱hexa šə gwžin tyemp catəꞌ gatəꞌ c̱he ḻegaꞌaqueꞌ naꞌ leꞌe əyažɉele, ḻegaꞌaqueꞌ cheyaḻəꞌ saꞌacleneꞌ leꞌe par nic̱h gatəꞌ deꞌe chyažɉe yoguəꞌəle.
\v 15 Nach gaquə canꞌ nyoɉ Xtižəꞌ Diozənꞌ, nan: “Benꞌ betobə deꞌe sc̱haꞌo bito gotəꞌəch mazəchlə ca deꞌen byažɉeneꞌ, naꞌ benꞌ betobə latəꞌ daꞌozənꞌ gotəꞌ c̱heꞌ deꞌen byažɉeneꞌ.”
\s1 Titonꞌ naꞌ beṉəꞌ lɉuežɉeꞌ caꞌ
\p
\v 16 Chox̱cwlen Diozənꞌ beneꞌ par nic̱h Titonəꞌ cheꞌenchgüeineꞌ gaquəleneꞌ leꞌe caꞌaczənꞌ cheꞌendaꞌ nadaꞌ gaquəlenaꞌ leꞌe.
\v 17 Catəꞌ gotəꞌəyoidaꞌaneꞌ yeyedeꞌ ganꞌ zolenꞌ par gaquəleneꞌ leꞌe, ḻeꞌ gwneꞌ yaꞌo, caguə deꞌen gotəꞌəyoidaꞌaneꞌ naꞌazə sino deꞌen bacheꞌenchgüeiczeneꞌ yeyedeꞌ ganꞌ zolenꞌ par gaquəleneꞌ leꞌe.
\p
\v 18 Chseḻaꞌa yeto beṉəꞌ bišəꞌəcho len Titonəꞌ. Naꞌ tcuen tcuen beṉəꞌ caꞌ chəsəꞌədopə chəsəꞌəžag chsoꞌelaogüeꞌe Jesocristənꞌ chsoꞌe dižəꞌ güen c̱he beṉəꞌ bišəꞌəchonəꞌ catequənꞌ xoche chzeɉniꞌineꞌ beṉəꞌ ca naquə dižəꞌ güen dižəꞌ cobə c̱he Jesocristənꞌ.
\v 19 Nachənꞌ bagosəꞌəbeɉeꞌeneꞌ par saꞌaleneꞌ nadaꞌ catəꞌ žɉəyesanaꞌ mechənꞌ deꞌen chtobcho par gaquəlencho beṉəꞌ bišəꞌəcho yašəꞌ caꞌ nitəꞌ Jodeanꞌ. Chtobchon par nic̱h X̱ancho Diozənꞌ chziꞌe yeḻəꞌ balaꞌaṉ naꞌ par nic̱h nḻaꞌalao de que cheneꞌecho gaquəlencho beṉəꞌ chyažɉ chc̱hine.
\v 20-21 Yoꞌo yic̱hɉaꞌ gonaꞌ deꞌen naquə güen lao X̱ancho Diozənꞌ naꞌ lao beṉac̱hənꞌ. Deꞌe naꞌanəꞌ ḻeꞌ saꞌaleneꞌ nadaꞌ par nic̱h notono əṉa de que bito chonaꞌ canꞌ cheyaḻəꞌ gonaꞌ len mech xen deꞌen gox̱aꞌanəꞌ.
\p
\v 22 Naꞌ ḻeczə len Titonꞌ chseḻəꞌətoꞌ yeto beṉəꞌ bišəꞌəcho. Zan las bableꞌitoꞌ de que do yic̱hɉ do lažeꞌe choneꞌ xšin Diozənꞌ. Ṉezeneꞌ de que leꞌe ḻechguaḻe cheneꞌele gonḻe canꞌ cheyaḻəꞌ gonḻe, naꞌ deꞌe naꞌanəꞌ banachguan yideꞌ ganꞌ zolenꞌ par gaquəleneꞌ leꞌe.
\v 23 Šə no ṉabe leꞌe bixc̱henꞌ zaꞌ Titonꞌ naꞌ beṉəꞌ bišəꞌəcho caꞌ yec̱hopə, ḻeyeꞌegaꞌaqueꞌ de que Titonꞌ choneꞌ txen len nadaꞌ chontoꞌ xšin Diozənꞌ par chaclentoꞌ leꞌe. Naꞌ beṉəꞌ caꞌ yec̱hopə ža, tcuen tcuen beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ chəsəꞌəseḻeꞌe ḻegaꞌaqueꞌ par saꞌacleneꞌ leꞌe, naꞌ chsoꞌoneꞌ ca chziꞌ Cristənꞌ yeḻəꞌ balaꞌaṉ.
\v 24 Ṉaꞌa ža chṉeyoidaꞌ leꞌe ḻegon güen len ḻegaꞌaqueꞌ par nic̱h yesəꞌəṉeze tcuen tcuen beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ de que chaquele c̱he Diozənꞌ. Naꞌ ḻegon par nic̱h laꞌalaon de que dižəꞌ ḻinꞌ gwniaꞌ catəꞌən beꞌelaoguaꞌa leꞌe.
\c 9
\s1 Bosoꞌotobeꞌ mech par gwsaꞌacleneꞌ beṉəꞌ caꞌ chsoꞌonḻilažəꞌ Cristənꞌ Jodeanꞌ
\p
\v 1 Bito chonən byen gwzoɉaꞌ leꞌe de que cheyaḻəꞌ əgwnežɉwle mech par gaquəlenḻe beṉəꞌ Jodea caꞌ bagwleɉ Diozənꞌ par zɉənaqueꞌ lažəꞌ neꞌenəꞌ,
\v 2 c̱hedəꞌ ṉezdaꞌ de que leꞌe cheneꞌele gaquəlengaꞌacleneꞌ. Choꞌelaoguaꞌa leꞌe choꞌa dižəꞌ len beṉəꞌ Masedonia caꞌ chapəgaꞌacaꞌaneꞌ de que leꞌe beṉəꞌ Acaya goneꞌele gaquəlenḻe beṉəꞌ yašəꞌ caꞌ godgüize naꞌ gwzolao btoble mechənꞌ. Naꞌ deꞌen benḻe caꞌ do yic̱hɉ do lažəꞌəle ḻeczə zan beṉəꞌ Masedonianꞌ chseꞌeneneꞌ saꞌacleneꞌ ḻegaꞌaqueꞌ.
\v 3 Naꞌ ṉaꞌa chseḻaꞌa beṉəꞌ bišəꞌəcho caꞌ ganꞌ zolenꞌ naꞌ saꞌacleneꞌ leꞌe yeyož əgwtoblen par nic̱h caꞌ sole probnid əgwnežɉwlen. Cheꞌendaꞌ laꞌalaon de que dižəꞌ ḻinꞌ biꞌa beꞌelaoguaꞌa leꞌe de que gaquəlenḻe beṉəꞌ yašəꞌ caꞌ.
\v 4 ¿C̱hexa šə əsaꞌaclə to c̱hopə beṉəꞌ Masedonianꞌ catəꞌ yeyedaꞌ ganꞌ zolenꞌ? Šə bito ṉeꞌe yeyož əgwtoble mechənꞌ catəꞌ yeyedaꞌ, gaquədaꞌ ztoꞌ deꞌen gožəgaꞌacaꞌaneꞌ ca güenṉəꞌ gonḻe naꞌ ḻeczə leꞌe gaquele ztoꞌ deꞌen cui benḻe complir deꞌen gwzolao benḻe.
\v 5 Deꞌe naꞌanəꞌ zencuialaoguaꞌ beṉəꞌ bišəꞌəcho caꞌ šoṉə zeyaꞌaqueꞌ ganꞌ nitəꞌəlenəꞌ c̱hedəꞌ chacdaꞌ chonən byen saꞌacleneꞌ leꞌe yeyož əgwtoble mech deꞌen benḻe lyebe əgwtoble par gaquəlenḻe beṉəꞌ yašəꞌ caꞌ. Ḻegwtobən antslə cuiṉəꞌ yeyedaꞌ par nic̱h baden catəꞌ yeyedaꞌ, naꞌ gacbiaꞌ de que gonḻen do yic̱hɉ do lažəꞌəle caguə gonḻen la fuers.
\p
\v 6 Benꞌ chaz latəꞌəzə, latəꞌəzə chelapeꞌ, naꞌ benꞌ chaz deꞌe sc̱haꞌo, deꞌe sc̱haꞌo chelapeꞌ. Caꞌaczənꞌ chac len chioꞌo, šə zanecho deꞌe sc̱haꞌo par gaquəlencho beṉəꞌ, nachənꞌ socho mbalaz juisy.
\v 7 To tole cheyaḻəꞌ əgwnežɉwle ɉaꞌaquəꞌətəꞌ deꞌe yebeile əgwnežɉwle c̱hedəꞌ ḻechguaḻe chebei Diozənꞌ benꞌ chebeineꞌ chnežɉueꞌ deꞌe chnežɉueꞌ par xšin Diozənꞌ. Bito cheyaḻəꞌ əgwnežɉwcho deꞌe əgwnežɉwcho la fuers sino əgwnežɉwchon do lažəꞌəcho.
\v 8 Diozənꞌ napeꞌ yeḻəꞌ guac par chaclenchgüeꞌ chioꞌo len bitəꞌətezə deꞌe chyažɉecho. Naꞌ chac goneꞌ ca gatəꞌ yoguəꞌəḻoḻ deꞌe chyažɉecho do tyempte par nic̱h gaquə əgwnežɉwcho bi deꞌe chyažɉe beṉəꞌ yoblə naꞌ goncho bichlə deꞌen naquə güen.
\v 9 Nyoɉ Xtižəꞌ Diozənꞌ canꞌ ben to beṉəꞌ nan:
\q1 Bagocleneꞌ beṉəꞌ zan, bnežɉueꞌ deꞌe besəꞌəyažɉe beṉəꞌ yašəꞌ.
\q1 Naꞌ cuat ganḻažəꞌ Diozənꞌ deꞌe güenṉəꞌ deꞌen ben beꞌenəꞌ.
\m
\v 10 Diozənꞌ choneꞌ par nic̱h chatəꞌ no xoaꞌ biṉ naꞌ bitəꞌətezəchlə deꞌen chazcho, naꞌ ḻeꞌenəꞌ choneꞌ par nic̱h chatəꞌ deꞌe cheꞌeɉ deꞌe chaocho. Ḻeꞌegatezə caꞌ ḻeꞌenəꞌ goneꞌ ca gatəꞌ bichlə deꞌe chyažɉecho naꞌ gone ca c̱haꞌo x̱enchən par nic̱h šeɉəch gonchcho deꞌe güenṉəꞌ.
\v 11 Naꞌ bitəꞌətezə deꞌen chac c̱hele Diozənꞌ choneꞌ par nic̱h chebeile chnežɉwle deꞌe sc̱haꞌo deꞌe chəsəꞌəyažɉe beṉəꞌ yoblə naꞌ catəꞌ netoꞌ žɉənežɉotoꞌ beṉəꞌ yašəꞌ caꞌ deꞌen babtoble, nach əsoꞌe yeḻəꞌ chox̱cwlen c̱he Diozənꞌ.
\v 12 Naꞌ catəꞌ chioꞌo chnežɉwcho deꞌe chəsəꞌəyažɉe yeziquəꞌəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ chaclengaꞌacchoneꞌ par nic̱h chatəꞌ deꞌen chəsəꞌəyažɉeneꞌ, naꞌ ḻeczə caꞌ choncho par nic̱h beṉəꞌ caꞌ chaclencho chsoꞌechgüeꞌ yeḻəꞌ chox̱cwlen c̱he Diozənꞌ.
\v 13 Naꞌ catəꞌ yeyož əgwtoble deꞌe sc̱haꞌo deꞌen əgwnežɉwcho beṉəꞌ yašəꞌ caꞌ əgwloꞌen de que do yic̱hɉ do lažəꞌəle chzenagle c̱he dižəꞌ güen dižəꞌ cobə c̱he Cristənꞌ. Naꞌ catəꞌ beṉəꞌ yašəꞌ caꞌ yesəꞌəziꞌe deꞌen əgwnežɉwle ḻegaꞌaqueꞌ nach əsoꞌelaogüeꞌe Diozənꞌ canꞌ chseḻəꞌəle deꞌe sc̱haꞌo mech deꞌe gaquəlenən ḻegaꞌaqueꞌ naꞌ əsoꞌelaogüeꞌe Diozənꞌ canꞌ chaclenḻe notəꞌətezəchlə beṉəꞌ chsoꞌelaoꞌ Cristənꞌ.
\v 14 Naꞌ soꞌoneꞌ orasyon par yesəꞌəṉabeꞌ yeḻəꞌ chaclen c̱he Diozənꞌ par leꞌe naꞌ əsaꞌaqueneꞌ c̱hele yesyəꞌəbeineꞌ canꞌ bagocwlenchgua Diozənꞌ leꞌe len xbab deꞌen yoꞌo ḻoꞌo yic̱hɉlaꞌaždaꞌolenꞌ par nic̱h chnežɉwle deꞌen chəsəꞌəyažɉe beṉəꞌ yoblə.
\v 15 Chox̱cwlen Diozənꞌ ca naquə goclen xen deꞌen beneꞌ len chioꞌo beṉac̱h catəꞌən bseḻeꞌe Xiꞌiṉeꞌenəꞌ por ni c̱hecho. Bito de dižəꞌ deꞌe güeꞌecho catec zaquəꞌən deꞌen bseḻeꞌeneꞌ.
\c 10
\s1 Yeḻəꞌ chnabiaꞌ c̱he Pabənꞌ deꞌen naqueꞌ apostol
\p
\v 1 Naꞌ ca nacaꞌ nadaꞌ Pab de yeto deꞌe ṉiaꞌ leꞌe canꞌ gonḻe. Chəsəꞌəna beṉəꞌ de que nadaꞌ chžebaꞌ par bi gonaꞌ o par bi ṉiaꞌ leꞌe catəꞌən zoaꞌ len leꞌe naꞌ con catəꞌ zoaꞌ zitəꞌ chzoɉaꞌ leꞌe ca beṉəꞌ cui chžeb. Bito naquən caꞌ sino chonaꞌ len leꞌe canꞌ bentezə ben Cristənꞌ len beṉəꞌ lao yeḻəꞌ chxenḻažəꞌ c̱heꞌenəꞌ naꞌ yeḻəꞌ beṉəꞌ gax̱ɉwlažəꞌ c̱heꞌenəꞌ.
\v 2 Deꞌe naꞌanəꞌ chṉeyoidaꞌ leꞌe ḻegon ca cui gonən byen tiḻaꞌ leꞌe catəꞌən yidaꞌ. Bangüiaꞌ tiḻaꞌ beṉəꞌ caꞌ chəsəꞌəneꞌ chonaꞌ con canꞌ na xbab c̱hiaꞌanəꞌ.
\v 3 Ḻaꞌaṉəꞌəczə nacaꞌ beṉac̱h bito chonaꞌ con canꞌ na xbab c̱hiaꞌanəꞌ ca deꞌen chonchguaꞌ xte ga zelao saquəꞌədaꞌ par nic̱h beṉəꞌ yoblə yosoꞌozenagueꞌ c̱he Cristənꞌ.
\v 4 Ṉezdaꞌ de que bitəꞌətezə deꞌen chac chon cuinzaꞌ bito chaclenən nadaꞌ par gonaꞌ ca yosoꞌozenag beṉəꞌ c̱he Cristənꞌ. Pero Diozənꞌ chacleneꞌ nadaꞌ par chzoaꞌ caꞌaḻə bi deꞌen chžon par nic̱h beṉəꞌ yosoꞌozenagueꞌ c̱he Cristənꞌ.
\v 5 Naꞌ len yeḻəꞌ chnabiaꞌ c̱heꞌ deꞌen babeṉeꞌ nadaꞌ, chonaꞌ ca chəsəꞌəzex̱ɉwyic̱hɉ beṉəꞌ lao Cristənꞌ par chosoꞌozenagueꞌ c̱heꞌ naꞌ chsoꞌoneꞌ xbab güen canꞌ cheneꞌe Cristənꞌ. Chonaꞌ ca cuich chsoꞌon cuingaꞌaqueꞌ xen sino chəsəꞌəbeɉyic̱hɉeꞌ bitəꞌətezə deꞌen chžon par seꞌeɉḻeꞌe dižəꞌ ḻi c̱he Diozənꞌ.
\v 6 Chbezaꞌ par nic̱h yoguəꞌ leꞌe gwzenagle c̱he Cristənꞌ do yic̱hɉ do lažəꞌəle, pero naꞌ notəꞌətezle šə cui gwzenagle, zoaꞌ dispuest par gonaꞌ leꞌe castigw.
\p
\v 7 Ḻegon xbab šə deꞌen chəsəꞌəna beṉəꞌ naquən deꞌe ḻi. Nitəꞌ beṉəꞌ chəsəꞌəneꞌ zɉəṉezeneꞌ bseḻəꞌ Cristənꞌ ḻegaꞌaqueꞌ. Beṉəꞌ caꞌ cheyaḻəꞌ soꞌoneꞌ xbab de que ḻeczə Cristənꞌ bseḻeꞌe nadaꞌ.
\v 8 Žaləꞌ güeꞌechaꞌ dižəꞌ mazəchlə canꞌ babiꞌan antslə əniaꞌ de que Cristənꞌ bseḻeꞌe nadaꞌ naꞌ beṉeꞌ yeḻəꞌ chnabiaꞌ par bi deꞌen chonaꞌ, guatəꞌəbiaꞌ de que choꞌa dižəꞌ ḻi. X̱ancho Cristənꞌ bseḻeꞌe nadaꞌ naꞌ beṉeꞌ nadaꞌ yeḻəꞌ chnabiaꞌ par nic̱h gaquəlenaꞌ leꞌe, caguə par gonaꞌ ca cueɉyic̱hɉle cuich gonḻilažəꞌəleneꞌenəꞌ.
\v 9 Echniaꞌ caꞌ par nic̱h cui gonḻe xbab de que chzoɉaꞌ cart quinga par əgwšebaꞌ leꞌenəꞌ.
\v 10 Beṉəꞌ caꞌ chəsəꞌəṉelaoꞌ c̱hiaꞌ chəsəꞌəneꞌ de que cart caꞌ chzoɉaꞌ zɉənaquən deꞌe žialao. Naꞌ chəsəꞌəneꞌ bito chžebaꞌ bi əniaꞌ leꞌe ḻeꞌe cartənꞌ pero bito cheyaxɉdaꞌ par bi gonaꞌ catəꞌ zoaꞌ len leꞌe naꞌ de que xtižaꞌanəꞌ bito bi zaquəꞌən.
\v 11 Beṉəꞌ caꞌ chəsəꞌəṉelaoꞌ c̱hiaꞌ cheyaḻəꞌ yesəꞌəṉezeneꞌ de que canꞌ niaꞌ ḻeꞌe cart caꞌ deꞌen chzoɉaꞌ leꞌe catəꞌ zoaꞌ zitəꞌ, ḻeczə canꞌ əṉiaꞌ naꞌ ḻeczə canꞌ gonaꞌ catəꞌən soaꞌ len leꞌe.
\p
\v 12 Bito cheꞌendaꞌ gonḻebədaꞌ beṉəꞌ caꞌ chsoꞌelaoꞌ cuingaꞌaqueꞌ. Beṉəꞌ caꞌ chsaꞌaqueneꞌ de que chsoꞌonyaṉeꞌe canꞌ cheyaḻəꞌ soꞌoneꞌ naꞌ chsaꞌaqueneꞌ de que güenchguanꞌ chosoꞌosed chosoꞌoloꞌineꞌ c̱hedəꞌ tozə canꞌ chosoꞌosed chosoꞌoloꞌi yogueꞌe, len bito bi zaquəꞌ deꞌen chsoꞌoneꞌ xbabənꞌ caꞌ.
\v 13 Nadaꞌ bito güeꞌelaoꞌ cuinaꞌ əṉiaꞌ de que benaꞌ bi deꞌe güen šə cui benaꞌan cuinaꞌ. Con guaꞌa dižəꞌ c̱he deꞌen babenaꞌ ganꞌ babseḻəꞌ Diozənꞌ nadaꞌ, naꞌ ṉezdaꞌ de que lenczə ganꞌ zole naꞌanəꞌ bseḻeꞌe nadaꞌ.
\v 14 Naꞌ ca nacaꞌ nadaꞌ babidaꞌ beꞌelenaꞌ leꞌe xtižəꞌ Diozənꞌ catəꞌən cui noṉəꞌ güeꞌeleneꞌen leꞌe, deꞌe naꞌanəꞌ naquəczən əṉiaꞌ leꞌe canꞌ cheyaḻəꞌ gonḻe.
\v 15 Bito choꞌa dižəꞌ c̱he xšin Diozənꞌ deꞌen ben beṉəꞌ yoblə ga cui bseḻəꞌ Diozənꞌ nadaꞌ par c̱hix̱ɉuiꞌa xtižeꞌenəꞌ. Nadaꞌ zoaꞌ lez de que leꞌe gonḻilažəꞌəchle Cristənꞌ naꞌ catəꞌ cuich chyažɉele əggüia əgwyaꞌ leꞌe, nach šaꞌachaꞌ ga yoblə ganꞌ əseḻəꞌ Diozənꞌ nadaꞌ par c̱hix̱ɉuiꞌa xtižeꞌenəꞌ.
\v 16 Naꞌ c̱hix̱ɉuiꞌa dižəꞌ güen dižəꞌ cobə c̱he Cristənꞌ ga yoblə ganꞌ cui no ṉeꞌe c̱hix̱ɉueꞌen. Naꞌ guaꞌa dižəꞌ c̱he xšin Diozənꞌ deꞌen baben cuinaꞌ lguaꞌa güeꞌelaoꞌ cuinaꞌ c̱he deꞌen baben beṉəꞌ yoblə.
\p
\v 17 Bito cheyaḻəꞌ güeꞌelaoꞌ cuincho sino cheyaḻəꞌ güeꞌelaꞌocho X̱ancho Diozənꞌ.
\v 18 Ḻaꞌaṉəꞌəczə šə əṉa to beṉəꞌ de que choneꞌ güen, caguə deꞌe naꞌ šeɉḻeꞌecho de que ḻe güenṉəꞌ choneꞌ. Pero šə Diozənꞌ güeꞌelaogüeꞌeneꞌ nachənꞌ ṉezecho beꞌenəꞌ choneꞌ güen.
\c 11
\s1 Pabənꞌ naꞌ beṉəꞌ caꞌ gwsoꞌon cuingaꞌaqueꞌ ca apostol
\p
\v 1 Žaləꞌəšga əgwzenagle yeto c̱hopə dižəꞌ deꞌen əṉiaꞌ leꞌe ḻaꞌaṉəꞌəczə šə gaquele bito bi zɉəzaquəꞌən. Ḻegwzenag žlac əṉiaꞌan.
\v 2 Nadaꞌ bzeɉniꞌidaꞌ leꞌe xtižəꞌ Cristənꞌ naꞌ deꞌe naꞌanəꞌ cheꞌenchgüeidaꞌ gaquele c̱he tozə Cristənꞌ ca to noꞌol güegoꞌ naplažəꞌ cuineꞌ naꞌ chaqueneꞌ c̱he tozə benꞌ siꞌ ḻeꞌ. Caꞌaczənꞌ cheneꞌe Diozənꞌ gaquele c̱he Cristənꞌ.
\v 3 Chxoždaꞌ yesəꞌəx̱oayag beṉəꞌ leꞌe par nic̱h cuich gonḻilažəꞌəle Cristənꞌ do lažəꞌəle naꞌ cuich gaquele c̱he tozə ḻeꞌ, canꞌ bx̱oayag beḻənꞌ deꞌe noꞌolə nechənꞌ benꞌ gwle Eb yeḻəꞌ bia bib c̱hebənꞌ.
\v 4 ¿Egüenchguanꞌ chonḻe ža? Bablaꞌac beṉəꞌ ganꞌ zolenꞌ chosoꞌozeɉniꞌineꞌ leꞌe c̱he Jesoꞌosənꞌ nžaꞌalə canꞌ babzeɉniꞌidaꞌ leꞌe. Deꞌen chosoꞌozeɉniꞌineꞌen zdan clelə len dižəꞌ güen dižəꞌ cobə c̱he Cristənꞌ deꞌen bagwyeɉḻeꞌele c̱hei. Pero leꞌe bito chaquele zdebə chzenagle c̱hegaꞌaqueꞌ.
\v 5 Malənꞌ chonḻe banonḻe beṉəꞌ caꞌ ca apostol c̱hele naꞌ chongaꞌacleneꞌ xen. ¿Ecabi ḻeczə zacaꞌa nadaꞌ canꞌ zɉəzaqueꞌenəꞌ?
\v 6 Ḻaꞌaṉəꞌəczə cui chac choꞌa dižəꞌ güenchgua, cheɉniꞌidaꞌ deꞌen choꞌa dižəꞌ c̱hei. Bableꞌiczele yoguəꞌəte deꞌen babenaꞌ naꞌ ṉezczele de que cheɉniꞌidaꞌ xtižəꞌ Diozənꞌ deꞌen choꞌelenaꞌ leꞌe.
\p
\v 7 ¿Echaquele malənꞌ benaꞌ cui bi laxɉuaꞌ gwxiꞌa catəꞌən beꞌelenaꞌ leꞌe dižəꞌ güen dižəꞌ cobə c̱he Diozənꞌ? Nadaꞌ ben cuinaꞌ ca to beṉəꞌ cui bi zaquəꞌ deꞌen cui bi laxɉuaꞌ gwxiꞌa parzə nic̱h benaꞌ ca zole mbalaz.
\v 8 ¿Egwṉacho malənꞌ benaꞌ gwxiꞌa mech deꞌen gwsoꞌon beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ ga yoblə? Gwxiꞌan par nic̱h beꞌelenaꞌ leꞌe xtižəꞌ Diozənꞌ sin cui benḻe nadaꞌ mantener.
\v 9 Catəꞌ gwzoaꞌ len leꞌe ḻaꞌaṉəꞌ cui gotəꞌ deꞌen byažɉdaꞌ, bito gwṉabdaꞌan leꞌe. Beṉəꞌ bišəꞌəcho caꞌ zeyaꞌac Masedonianꞌ ḻegaꞌacleꞌ gwsoꞌoṉeꞌ deꞌen cui gotəꞌ c̱hiaꞌ. Naꞌ gwdapaꞌ cuidad cui bi zed bendaꞌ leꞌe par gonḻe nadaꞌ mantener, naꞌ batəꞌətezəchlə bitoczə bi bi zed gondaꞌ leꞌe.
\v 10 Canꞌ ṉezdaꞌ chaclen Cristənꞌ nadaꞌ par choꞌa dižəꞌ ḻi, caꞌaczənꞌ ṉezdaꞌ de que cuat gondaꞌ leꞌe zed par gonḻe nadaꞌ mantener. Chebeidaꞌ guaquə ṉiaꞌ de que bito bi gan chonaꞌ deꞌen chyix̱ɉuiꞌa xtižəꞌ Diozənꞌ len leꞌe o len beṉəꞌ žaꞌ gatəꞌətezəchlə ganꞌ mbane Acayanꞌ.
\v 11 Caguə deꞌen cui chacdaꞌ c̱helenꞌ cui gonczədaꞌ leꞌe zed gonḻe nadaꞌ mantenerənꞌ. Diozənꞌ ṉezeneꞌ chacdaꞌ c̱hele.
\p
\v 12 Gonchaꞌ canꞌ chonczaꞌ cui bi laxɉuaꞌ chziꞌa par nic̱h beṉəꞌ caꞌ chəsəꞌəna cui nacaꞌ apostol cuich yesəꞌəželeneꞌ bi yesəꞌəneꞌ c̱hiaꞌ.
\v 13 Ḻegaꞌaqueꞌ chseꞌeneneꞌ goncho xbab de que zɉənaqueꞌ apostol, pero bito zɉənaqueꞌ. Chosoꞌosed chosoꞌoloꞌineꞌ dižəꞌ güenḻažəꞌ naꞌ chəsəꞌəx̱oayagueꞌ par nic̱h chaquele de que Crist nanꞌ əbseḻeꞌe ḻegaꞌaqueꞌ.
\v 14 Bito yebanecho deꞌen chəsəꞌəx̱oayagueꞌ, c̱hedəꞌ laꞌ caꞌaczənꞌ chx̱oayag gwxiyeꞌen chioꞌo par nic̱h chaquecho de que deꞌen cheneꞌen goncho naquən to deꞌe güen.
\v 15 Naꞌ deꞌen chon gwxiyeꞌenəꞌ caꞌ, beṉəꞌ caꞌ chosoꞌozenag c̱hei ḻeczə chosoꞌox̱oayagueꞌ par nic̱h gaquele de que chosoꞌozeɉniꞌineꞌ beṉəꞌ deꞌen naquə deꞌe güen. Gwžin ža gon Diozənꞌ par nic̱h gatəꞌ castigw c̱hegaꞌaqueꞌ segon deꞌe mal deꞌen chsoꞌoneꞌenəꞌ.
\s1 Deꞌen gwdiꞌ gwxaquəꞌ Pabənꞌ deꞌen naqueꞌ apostol
\p
\v 16 Deꞌe yoblə əchniaꞌ, bito gaquele de que chonaꞌ xbab deꞌe cui bi zaquəꞌ. Leꞌe chzenagle c̱he beṉəꞌ caꞌ deꞌe ḻiczə chsoꞌon xbab deꞌe cui bi bi zaquəꞌ. Caꞌaczə ḻegwzenag c̱hiaꞌ žlac gonḻebədaꞌ ḻegaꞌaqueꞌ guaꞌa to c̱hopə dižəꞌ c̱he deꞌe güenṉəꞌ deꞌen chonaꞌ.
\v 17 Guaꞌa dižəꞌən caꞌ ḻaꞌaṉəꞌəczə ṉezdaꞌ Cristənꞌ bito beꞌe dižəꞌən caꞌ. Gonaꞌ ca beṉəꞌ chon xbab deꞌe cui zaqueꞌe.
\v 18 Beṉəꞌ zan chsoꞌe dižəꞌ de que zɉənaqueꞌ beṉəꞌ güen por ni c̱he canꞌ zɉənaqueꞌ, o por ni c̱he šə bi deꞌen bagwsoꞌoneꞌ o bi deꞌen bagoc c̱hegaꞌaqueꞌ. Caꞌaczənꞌ nadaꞌ guaꞌa dižəꞌ c̱he cuinaꞌ c̱hedəꞌ zɉəde deꞌen nac caꞌ deꞌe guaꞌa dižəꞌ c̱hei.
\v 19 Deꞌe tant non cuinḻe beṉəꞌ sinꞌ deꞌe naꞌalɉanꞌ chebeile chzenagle c̱he beṉəꞌ caꞌ chsoꞌon xbab deꞌe cui bi zaqueꞌe.
\v 20 Deꞌen chzenagle c̱hegaꞌaqueꞌ bazɉənzoeꞌ leꞌe xniꞌagaꞌaqueꞌenəꞌ ca esclabos c̱hegaꞌaqueꞌ Chosoꞌox̱oayagueꞌ leꞌe par nic̱h chnežɉwle ḻegaꞌaqueꞌ bi deꞌen de c̱hele naꞌ par nic̱h chontezle binꞌ chəsəꞌəneꞌ. Chsoꞌelaoꞌ cuingaꞌaqueꞌ naꞌ chəsəꞌəbažeꞌe leꞌe par nic̱h chzenagle c̱hegaꞌaqueꞌ, naꞌ leꞌe chebeile chonḻe canꞌ chəsəꞌəneꞌenəꞌ.
\v 21 Gobeichlɉeile žaləꞌ chondaꞌ leꞌe canꞌ chsoꞌon ḻegaꞌaqueꞌenəꞌ.
\p Ḻeczə guaquəczə guaꞌa dižəꞌ par əgwloꞌidaꞌ leꞌe de que nacaꞌ beṉəꞌ blao canꞌ chsoꞌon beṉəꞌ caꞌ, ḻaꞌaṉəꞌəczə šə gaquele de que bito bi zaquəꞌən.
\v 22 Chsoꞌelaoꞌ cuingaꞌaqueꞌ de que gwsaꞌalɉəleneꞌ beṉəꞌ chsoꞌe dižəꞌ ebreo. Ḻeczə caꞌ nadaꞌ golɉəlenaꞌ beṉəꞌ chsoꞌe dižəꞌ ebreo. Chsoꞌelaoꞌ cuingaꞌaqueꞌ de que zɉənaqueꞌ beṉəꞌ Izrael. Pero ḻeczə beṉəꞌ Izrael nadaꞌ. Chsoꞌelaoꞌ cuingaꞌaqueꞌ de que zɉənaqueꞌ xiꞌiṉ dia c̱he deꞌe Abraanṉəꞌ. Pero ḻeczə xiꞌiṉ dia c̱he deꞌe Abraam naꞌ nadaꞌ.
\v 23 Chəsəꞌəneꞌ de que Crist nanꞌ bseḻeꞌe ḻegaꞌaqueꞌ par chsoꞌoneꞌ xšineꞌenəꞌ. Ḻeczə ḻenꞌ əbseḻeꞌe nadaꞌ. Naꞌ güeꞌelaꞌoch cuinaꞌ canꞌ chsoꞌelaoꞌ cuin ḻegaꞌaqueꞌ ṉiaꞌ canꞌ bagoc c̱hiaꞌ. Ḻechguaḻe babenaꞌ xšin Diozənꞌ mazəchlə ca ḻegaꞌaqueꞌ. Naꞌ zan las bagotaꞌa ližya por ni c̱he deꞌen əchyix̱ɉuiꞌa xtižəꞌ Cristənꞌ, naꞌ ḻeczə zan las bagosəꞌəyin jostis caꞌ nadaꞌ. Naꞌ zan las babelazə cui gotaꞌ por ni c̱he deꞌe caꞌ bagoc c̱hiaꞌ.
\v 24 Gueyəꞌ las gosəꞌəyin beṉəꞌ Izrael gwlaž c̱hiaꞌ caꞌ nadaꞌ yid sot tgualɉechoa las.
\v 25 Šoṉ las beṉəꞌ jostis caꞌ gosəꞌəyineꞌ nadaꞌ xis. Naꞌ yetlas bosoꞌošižəꞌ beṉəꞌ nadaꞌ yeɉ xte yelatəꞌəzə cui gwsoꞌoteꞌ nadaꞌ. Naꞌ lao zyaꞌa yež zitəꞌ to ḻoꞌo barcw, ḻeczə šoṉ las boc̱hiṉɉ nisdaꞌon barconꞌ naꞌ caṉe bžinaꞌ yo biž. Naꞌ lao šoṉ lasənꞌ beyiṉɉənṉəꞌ tšiꞌi gwxoa lao nisdaꞌonəꞌ tža tyel to lao yag.
\v 26 Naꞌ lao gwyaꞌa ɉətix̱ɉuiꞌa xtižəꞌ Cristənꞌ zan las belaꞌ cui gotaꞌ o soꞌot beṉəꞌ nadaꞌ. Zan las goc zdebə tiaꞌ yao caꞌ, zo catəꞌ gocaꞌ lao naꞌ beṉəꞌ bguan, naꞌ zo catəꞌ beṉəꞌ Izrael gwlaž c̱hiaꞌ caꞌ gwseꞌeneneꞌ soꞌoteꞌ nadaꞌ, naꞌ ḻeczə zo catəꞌ beṉəꞌ cui zɉənaquə beṉəꞌ Izrael gwseꞌeneneꞌ soꞌoteꞌ nadaꞌ. Naꞌ yelatəꞌəzə cui gotaꞌ do syodanꞌ naꞌ do ga cui no beṉəꞌ žaꞌ. Naꞌ bašə gataꞌ lao nisdaꞌonəꞌ. Naꞌ do tyemp chxoždaꞌ cuiayiꞌ xšin Diozənꞌ por ni c̱he beṉəꞌ caꞌ chsaꞌaš chəsəꞌəneꞌ de que zɉəleneꞌ chioꞌo pero caguə do lažəꞌəgaꞌaqueꞌenəꞌ.
\v 27 Naꞌ lao benaꞌ xšin Diozənꞌ zan las ɉx̱aquəꞌəchgüeidaꞌ naꞌ zan las bguoꞌo bc̱heɉaꞌ cui gwtasaꞌ. Nombiꞌa yeḻəꞌ chbil chdon c̱hedəꞌ zan las cui gotəꞌ deꞌe yeꞌeɉ gaoguaꞌ. Naꞌ zan las beyagaꞌ cui gotəꞌ xaꞌ deꞌe byažɉdaꞌ.
\p
\v 28 Naꞌ deꞌe zanch deꞌe chyiꞌ chzacaꞌa deꞌen cui choꞌa dižəꞌ c̱hei. Pero mazəchlə chyiꞌ chzacaꞌa, deꞌen chiꞌichguaꞌ yic̱hɉaꞌ yoguəꞌ ža nac chac c̱he leꞌe chdopə chžagle choꞌelaꞌole Cristənꞌ to to yež.
\v 29 Naꞌ notəꞌətezle catəꞌ cui chzoile par gonyaṉəꞌəle canꞌ cheneꞌe Diozənꞌ, chzochguaꞌ trist caꞌaczə əṉacho nadaꞌan cui chonaꞌan. Ḻeꞌegatezə caꞌ catəꞌ beṉəꞌ chəsəꞌəx̱opeꞌ leꞌe par chonḻe deꞌe mal, ḻechguaḻe deꞌe chacdaꞌ deꞌen cheꞌenchgüeidaꞌ yebeɉaꞌ leꞌe lao deꞌe malənꞌ.
\v 30 Chacdaꞌ chyažɉele guaꞌa dižəꞌ c̱he cuinaꞌ, naꞌ deꞌe naꞌanəꞌ güeꞌešazaꞌ dižəꞌ c̱he deꞌe caꞌ chəsəꞌəloꞌe canꞌ chac faḻt fuers balor c̱hiaꞌ, naꞌ canꞌ bito zacaꞌa bi gonaꞌ žaləꞌ cui zo Diozənꞌ len nadaꞌ.
\v 31 Dioz benꞌ cheyaḻəꞌ güeꞌelaꞌocho zeɉḻicaṉe ṉezczeneꞌ choꞌa dižəꞌ ḻi. Ḻenꞌ naqueꞌ X̱a X̱ancho Jesocristənꞌ naꞌ X̱ancho Jesocristənꞌ ḻeczə choꞌelaogüeꞌe ḻeꞌ.
\v 32 Naꞌ catəꞌən gwzoaꞌ Damasconꞌ benꞌ goquə goberṉador žlac gwnabiaꞌ Rei Aretas bniteꞌe beṉəꞌ gwsaꞌapə choꞌa puert deꞌen zo ḻeꞌe zeꞌe deꞌen nyec̱hɉ syodanꞌ par yesəꞌəzeneꞌ nadaꞌ catəꞌ yechoɉaꞌ.
\v 33 Pero beṉəꞌ bišəꞌəcho caꞌ gosəꞌəgüeꞌe nadaꞌ to ḻoꞌo žomə soa naꞌ bosyoꞌoletɉeꞌ nadaꞌ ḻeꞌe zeꞌe c̱he syodanꞌ choꞌa to bentan par nic̱h caꞌ cui gwsaꞌacbeꞌineꞌ par yesəꞌəzeneꞌ nadaꞌ.
\c 12
\s1 Pabənꞌ beꞌe dižəꞌ c̱he deꞌen bleꞌidaꞌogüeꞌeneꞌ naꞌ deꞌen bzeɉniꞌi Jesocristənꞌ ḻeꞌ
\p
\v 1 Chonən byen guaꞌa dižəꞌ c̱he cuinaꞌ ḻaꞌaṉəꞌəczə cui gaquəlenən nadaꞌ. Naꞌ guaꞌa dižəꞌ c̱he baḻə deꞌen bableꞌidaogüeꞌedaꞌ naꞌ c̱he baḻə deꞌen babzeɉniꞌi X̱ancho Jesocristənꞌ nadaꞌ.
\v 2-3 Goc ždaꞌ iz ben Diozənꞌ par nic̱h gwyaꞌa yobanꞌ naꞌ ṉezdaꞌ bžinaꞌ ganꞌ zoꞌenəꞌ, naꞌ bachonḻilažaꞌa Cristənꞌ ca orənꞌ. Pero bito gocbeꞌidaꞌ šə gwyaꞌa do cuerp c̱hiaꞌ o šə cui. Dioz naꞌazənꞌ ṉezeneꞌ naquənꞌ goquə.
\v 4 Con ṉezdaꞌ de que bžinaꞌ mer ganꞌ zo Diozənꞌ naꞌ bendaꞌ chsoeꞌ beṉəꞌ caꞌ žaꞌ naꞌ dižəꞌ deꞌe cui chsaꞌac beṉac̱hənꞌ yežlyo nga naꞌ naquən dižəꞌ deꞌen cui de lsens əgwzeɉniꞌidaꞌ beṉəꞌ.
\v 5 Žaləꞌ nan c̱hiaꞌ güeꞌelaoꞌ cuinaꞌ güeꞌelaoꞌ cuinaꞌ deꞌen baben Diozənꞌ len nadaꞌ. Pero con guaꞌa dižəꞌ c̱he deꞌe caꞌ chosoꞌoloꞌeꞌ canꞌ bito zacaꞌa bi gonaꞌ žaləꞌ cui zo Diozənꞌ len nadaꞌ.
\v 6 Žaləꞌ guaꞌa dižəꞌ ca mbanꞌ baben Diozənꞌ len nadaꞌ catəꞌən gwyaꞌa yobanꞌ naquən dižəꞌ ḻi, pero soꞌonḻɉa beṉəꞌ xbab de que naquəchaꞌ beṉəꞌ zaqueꞌe mazəchlə canꞌ nacaꞌ. Bito gueꞌechaꞌ dižəꞌ c̱he deꞌenəꞌ c̱hedəꞌ laꞌ cheꞌendaꞌ yoguəꞌ beṉəꞌ soꞌoneꞌ xbab c̱hiaꞌ segon binꞌ chəsəꞌəleꞌineꞌ chonaꞌ naꞌ segon canꞌ chyix̱ɉuiꞌa xtižəꞌ Diozənꞌ.
\p
\v 7 Diozənꞌ bito cheneꞌeneꞌ gon cuinaꞌ xen por ni c̱he deꞌe caꞌ bleꞌidaogüeꞌedaꞌ naꞌ deꞌe caꞌ bzeɉniꞌineꞌ nadaꞌ deꞌe cuiṉəꞌ seꞌen yesəꞌəleꞌi yeziquəꞌəchlə beṉəꞌ. Deꞌe naꞌanəꞌ beneꞌ par nic̱h chžaglaoguaꞌ len to deꞌen chac c̱he cuerp c̱hiaꞌ nga. Deꞌen chžaglaoguaꞌ len ḻen gwxaquəꞌəleben caczə ga chaꞌa to yešəꞌ. Naꞌ ḻechguaḻe chon gwxiyeꞌen ca gaquədaꞌ tolə deꞌen chac c̱hiaꞌ caꞌ. Dioz nanꞌ choneꞌ par nic̱h chac c̱hiaꞌ caꞌ nic̱h cui gonaꞌ xbab de que ḻechguaḻe zacaꞌa.
\v 8 Šoṉ las gwṉabdaꞌ X̱ancho Cristənꞌ goneꞌ par nic̱h yegaꞌa deꞌen chžaglaoguaꞌ len cuerp c̱hiꞌanəꞌ.
\v 9 Nach X̱anchonꞌ gwneꞌ: “Bito gonaꞌ ca cuich əžaglaogoꞌ. Con sotezə soaꞌ gaquəlenaꞌ leꞌ. Lezən deꞌen chyažɉdoꞌ. Naꞌ ca naquənꞌ cui chac bi gonoꞌ, nadaꞌ gaquəlenaꞌ leꞌ len yeḻəꞌ guac c̱hiaꞌanəꞌ.” Caꞌ gožeꞌ nadaꞌ. Deꞌe naꞌanəꞌ chebeilədaꞌ choꞌa dižəꞌ canꞌ cui chac bi gonaꞌ, c̱hedəꞌ deꞌen chac c̱hiaꞌ caꞌ chloꞌen ca yeḻəꞌ guaquənꞌ napə Cristənꞌ par chacleneꞌ nadaꞌ.
\v 10 Deꞌen chonḻilažaꞌa Cristənꞌ chebeidaꞌ bitəꞌətezə deꞌen chloeꞌ canꞌ chyažɉdaꞌ yeḻəꞌ chaclen c̱heꞌenəꞌ. Chebeidaꞌ catəꞌ chosoꞌožia chosoꞌonitəꞌ beṉəꞌ nadaꞌ. Chebeidaꞌ catəꞌ chac faḻt bi deꞌen chyažɉdaꞌ. Chebeidaꞌ catəꞌ chosoꞌolagzeɉə chosoꞌolagzidə beṉəꞌ nadaꞌ. Chebeidaꞌ catəꞌ bichlə deꞌe chžaglaoguaꞌ. Chebeidaꞌ c̱hedəꞌ catəꞌ chac c̱hiaꞌ caꞌ chaclench Cristənꞌ nadaꞌ len yeḻəꞌ guac c̱heꞌenəꞌ.
\s1 Pabənꞌ gwcheꞌechgua yic̱hɉeꞌ beṉəꞌ caꞌ chsoꞌonḻilažəꞌ Cristənꞌ Corintonꞌ
\p
\v 11 Babenḻe byen biꞌa dižəꞌ c̱he cuinaꞌ ḻaꞌaṉəꞌəczə ṉezdaꞌ bitotec bi zaquəꞌən güeꞌecho dižəꞌən caꞌ. Žaləꞌ leꞌe choꞌele dižəꞌ de que nadaꞌ nacaꞌ beṉəꞌ zaqueꞌe, bito benən byen biꞌa dižəꞌ quinga. Ṉezdaꞌ bitobi zacaꞌa žaləꞌ cui zo Diozənꞌ len nadaꞌ, pero ḻechguaḻe zaquəꞌəchaꞌ cle ca beṉəꞌ caꞌ banonele apostol c̱hele, beṉəꞌ caꞌ chonḻe xen.
\v 12 Diozənꞌ babloꞌe de que nacaꞌ doalɉe apostol c̱heꞌenəꞌ. Bagocleneꞌ nadaꞌ bguoꞌo bc̱heɉlažaꞌa benaꞌ xšineꞌenəꞌ entr leꞌe ḻaꞌaṉəꞌəczə deꞌe zan deꞌe bagoc c̱hiaꞌ. Gocleneꞌ nadaꞌ benaꞌ xšineꞌenəꞌ len yeḻəꞌ guac c̱heꞌenəꞌ naꞌ ḻeczə len yeḻəꞌ guac c̱heꞌenəꞌ benaꞌ miḻagr naꞌ bichlə deꞌe zaquəꞌ yesyəꞌəbane beṉəꞌ.
\v 13 Tozə ca güenṉəꞌ benaꞌ len leꞌe naꞌ canꞌ benaꞌ len beṉəꞌ caꞌ chəsəꞌədopə chəsəꞌəžag chsoꞌelaꞌogüeꞌe Cristənꞌ ga yoblə. ¿Echaquele benchaꞌ güen len ḻegaꞌaqueꞌ cle ca canꞌ benaꞌ len leꞌe deꞌen cui gwṉabdaꞌ leꞌe gonḻe nadaꞌ mantener? Ḻesiꞌixen c̱hiaꞌ šə malənꞌ benaꞌ.
\p
\v 14 Bazoaꞌ probnid par yidaꞌ dezlaṉaꞌa leꞌe deꞌe gwyoṉ lase. Naꞌ catəꞌ yidaꞌ bito guaꞌa latɉə gonḻe nadaꞌ mantener. Bito cheꞌendaꞌ goṉle nadaꞌ bi deꞌen de c̱hele, cheꞌendaꞌ gon cuinḻe lažəꞌ naꞌ Cristənꞌ. Bito naquən par bidaoꞌ caꞌ soꞌomboꞌ mantener x̱axnaꞌagaꞌacboꞌ, sino x̱axnaꞌagaꞌacboꞌ nanꞌ cheyaḻəꞌ soꞌoneꞌ ḻegaꞌacboꞌ mantener.
\v 15 Caꞌaczənꞌ naquən len nadaꞌ ža, yebeidaꞌ əzandaꞌ bitəꞌətezə deꞌen de c̱hiaꞌ naꞌ lente cuinaꞌ par gaquəlenchaꞌ leꞌe gwzenagle c̱he Cristənꞌ. Ḻaꞌaṉəꞌəczə ḻechguaḻe chacdaꞌ c̱hele, pero nachle bitotec chaquele c̱hiaꞌ.
\p
\v 16 Baḻle chṉelaole c̱hiaꞌ nale de que chx̱oayagaꞌ leꞌe deꞌen bito biꞌa latɉə gonḻe nadaꞌ mantener parzə nic̱h cueɉəlanaꞌ mechənꞌ deꞌen chtoble par gaquəlenḻe beṉəꞌ bišəꞌəcho caꞌ zɉənaqueꞌ beṉəꞌ yašəꞌ.
\v 17 ¿Ecabi ṉezele bito bx̱oayagaꞌ leꞌe len notəꞌətezə beṉəꞌ babseḻaꞌa ganꞌ zolenꞌ?
\v 18 Gwṉeyoidaꞌ Titonꞌ bideꞌ bedəlaṉeꞌe leꞌe naꞌ bseḻaꞌa beṉəꞌ bišəꞌəchonꞌ yeto len ḻeꞌ. ¿Ecabi ṉezele de que bito bx̱oayag Titonꞌ leꞌe? Naꞌalɉe ¿əcabi tozə canꞌ chonaꞌ len canꞌ beneꞌenəꞌ? Naꞌ canꞌ cheꞌendaꞌ gaquəlenaꞌ leꞌe caꞌaczənꞌ goneꞌeneꞌ.
\p
\v 19 De repent chaquele choꞌa dižəꞌ quinga parzə nic̱h leꞌe cui gonḻe xbab de que chonaꞌ bi deꞌe mal. Pero caguə caꞌanəꞌ. Ṉezdaꞌ ngodaꞌa txen len Cristənꞌ naꞌ de que Diozənꞌ ṉeze nḻeꞌineꞌ naquənꞌ chonaꞌ naꞌ binꞌ əniaꞌ. Deꞌe naꞌanəꞌ choꞌa dižəꞌ quinga, beṉəꞌ bišəꞌ daoꞌ, par nic̱h chaquəlenaꞌ leꞌe.
\v 20 Chžebaꞌ əželdaꞌ šə bi deꞌen cui chonḻe güen canꞌ cheꞌendaꞌ gonḻe catəꞌən yidaꞌ ganꞌ zolenꞌ, naꞌ šə əželdaꞌ chonḻe deꞌe malənꞌ bito šoꞌolažəꞌəle canꞌ gonaꞌ castigw c̱helenꞌ. Chonaꞌ xbab, c̱hexa šə chdiḻə chšašle naꞌ chgueꞌi lɉuežɉle, o šə əchloc lɉuežɉle naꞌ chonḻe parzə nic̱h gaquə güen c̱he cuinzle. Naꞌ c̱hexa šə chṉele mal c̱he lɉuežɉle naꞌ c̱hexa šə nacle beṉəꞌ goc̱hitɉ dižəꞌ o šə chon cuinḻe xen o šə žaꞌale chac yazə.
\v 21 Chžebaꞌ de que catəꞌən yidaꞌ dezlaṉaꞌa leꞌe zanḻe cuiṉəꞌ cueɉyic̱hɉle ca deꞌen chgoꞌo xtole naꞌ chbeɉyic̱hɉle beꞌen c̱hele o noꞌol c̱hele par chzolenḻe beṉəꞌ yoblə naꞌ bitəꞌətezəchlə yeḻəꞌ ztoꞌ deꞌen chonḻe len cuerp c̱helenꞌ. Naꞌ Dioz c̱hiaꞌan goneꞌ par nic̱h yetoꞌidaꞌ naꞌ yegüiꞌindaꞌ c̱he nolenꞌ cui gwleɉyic̱hɉle deꞌe malənꞌ chonḻe.
\c 13
\s1 Pabənꞌ gwdixɉuiꞌe de que gwnežɉueꞌ castigw c̱he beṉəꞌ caꞌ chsoꞌon deꞌe malənꞌ, naꞌ chguapeꞌ beṉəꞌ Corinto caꞌ diox
\p
\v 1 Deꞌe gwyoṉ lase dezlaṉaꞌa leꞌe ṉaꞌa. Naꞌ gaquə canꞌ nyoɉ Xtižəꞌ Diozənꞌ nan: “Catəꞌ no gao xya c̱he to beṉəꞌ de que napeꞌ doḻəꞌ, c̱hoglaochon c̱heꞌ de que napeꞌ doḻəꞌ šə yotiḻən ca yesəꞌəna c̱hopə o šoṉə testigw beṉəꞌ chsoꞌe dižəꞌ de que babeneꞌ deꞌe mal.”
\v 2 Bagožaꞌ beṉəꞌ caꞌ chsoꞌon deꞌe malənꞌ antslə catəꞌən bedəlaṉaꞌa leꞌe deꞌe əgwchope de que bito yeyašəꞌədaꞌ ḻegaꞌaqueꞌ šə cui yesyəꞌədiṉɉeneꞌ xtoḻəꞌəgaꞌaqueꞌenəꞌ. Naꞌ deꞌe yoblə ṉaꞌa lao cuiṉəꞌ yezidaꞌ ganꞌ zolenꞌ ṉiaꞌ notəꞌətezəchlə bachonḻe deꞌe malənꞌ bito yeyašəꞌədaꞌ leꞌe catəꞌən yidaꞌ.
\v 3 Naꞌ catəꞌ gonaꞌ castigw c̱he leꞌe cui chediṉɉele xtoḻəꞌəlenꞌ canaꞌachənꞌ əṉezele de que deꞌen chniaꞌ zaꞌan c̱he Cristənꞌ, canꞌ nale cheneꞌele əṉezele. Naꞌ bito ṉacho de que Cristənꞌ bito gaquə goneꞌ castigw c̱helenꞌ, laꞌ napeꞌ yeḻəꞌ guac xen, naꞌ babloꞌe yeḻəꞌ guac c̱heꞌenəꞌ len leꞌe.
\v 4 Deꞌe ḻi Cristənꞌ ben cuineꞌ ca beṉəꞌ cui bi chac gon catəꞌən gwsoꞌot beṉəꞌ ḻeꞌ bosoꞌodeꞌeneꞌ ḻeꞌe yag corozənꞌ. Pero zoczeꞌ ṉaꞌa c̱hedəꞌ Diozənꞌ bosbaneꞌeneꞌ len yeḻəꞌ guac c̱heꞌenəꞌ. Ḻeꞌegatezə caꞌ nacaꞌ nadaꞌ ca beṉəꞌ cui bi bi chac gon. Pero ṉezdaꞌ ngodaꞌa txen len Cristənꞌ naꞌ catəꞌən yezidaꞌ ganꞌ zolenꞌ gwloꞌidaꞌ leꞌe canꞌ zo yeḻəꞌ guac c̱he Diozənꞌ len nadaꞌ.
\p
\v 5 Ḻegonyaṉəꞌ xbab c̱hele šə deꞌe ḻiczə chonḻilažəꞌəle Jesocristənꞌ. Naꞌ sə deꞌe ḻi chonḻilažəꞌəleneꞌ gacbeꞌile de que zoeꞌ len leꞌe. Pero šə chacbeꞌile bito zoeꞌ len leꞌe guacbeꞌiczele de que caguə chonḻilažəꞌəleneꞌenəꞌ.
\v 6 Pero zoaꞌ lez gacbeꞌile de que zoczeꞌ len leꞌe par nic̱h caꞌ gacbeꞌiteile de que nacaꞌ doalɉe apostol c̱heꞌ.
\v 7 Chonaꞌ orasyon chṉabaꞌ gaquəlen Diozənꞌ leꞌe par nic̱h cueɉyic̱hɉle cuich gonḻe deꞌe malənꞌ. Bitobi nonən len nadaꞌ šə gonaꞌ ca gacbeꞌile de que bseḻəꞌ Diozənꞌ nadaꞌ o šə cui, con šə leꞌe sotezle gonḻe deꞌe güen.
\v 8 Laꞌ šə chzenagle c̱he dižəꞌ ḻi c̱he Jesocristənꞌ bito əyažɉən gonaꞌ castigw c̱hele. Con gwnežɉuaꞌ castigw c̱he beṉəꞌ caꞌ cui chosoꞌozenag c̱hei.
\v 9 Chebeidaꞌ catəꞌ leꞌe chonḻe deꞌe güen naꞌ bito chyažɉən gwloꞌa yeḻəꞌ chnabiaꞌ c̱hiaꞌanəꞌ par gonaꞌ castigw c̱hele, laꞌ ḻeczə chonaꞌ orasyon chṉabaꞌ gaquəlen Diozənꞌ leꞌe par nic̱h gonḻe xbabənꞌ canꞌ cheyaḻəꞌ gonḻe deꞌe yoblə.
\v 10 Babzoɉaꞌ deꞌe quinga antslə zeꞌe yidaꞌ ganꞌ zolenəꞌ par nic̱h yediṉɉele xtoḻəꞌəlenꞌ naꞌ cui goṉaꞌ castigw c̱helenꞌ catəꞌən yidaꞌanəꞌ. Diozənꞌ bseḻeꞌe nadaꞌ nacaꞌ apostol c̱heꞌenəꞌ par nic̱h gonaꞌ ca soꞌonḻilažəꞌəch beṉəꞌ ḻeꞌ, caguə par gonaꞌ ca yesəꞌəbeɉyic̱hɉeꞌ cuich soꞌonḻilažeꞌeneꞌ.
\p
\v 11 Ṉaꞌa ža beṉəꞌ bišəꞌ, babzoɉaꞌ deꞌen goꞌondaꞌ əṉezele. Ḻeꞌe gon xbab canꞌ cheyaḻəꞌ gonḻe deꞌe yoblə. Ḻegwzenag consejw quinga choṉaꞌ leꞌe. Ḻegac tozə len lɉuežɉle. Ḻeso binḻo tole yetole. Dioz benꞌ chaque c̱hecho naꞌ benꞌ chon par chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ sošgueꞌ len leꞌe.
\v 12 Catəꞌ chežagle ḻeyolgüiž lɉuežɉle dižəꞌ šaoꞌ par nic̱h gacbiaꞌ de que chaque c̱he lɉuežɉle.
\v 13 Yoguəꞌ beṉəꞌ caꞌ nitəꞌ nga beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ chosoꞌoguapeꞌe leꞌe diox.
\p
\v 14 X̱ancho Jesocristənꞌ sotezə soeꞌ gaquəlenšgueꞌ leꞌe. Naꞌ Diozənꞌ gonšgueꞌ par nic̱h gacbeꞌichele de que chaqueneꞌ c̱hele. Naꞌ Spirit c̱he Diozənꞌ gonšgan par nic̱h yoguəꞌəle gonḻe tozə xbab. Deꞌe naꞌazənꞌ əchniaꞌ leꞌe.
\b
\m Pab