\id GAL
\ide UTF8
\h GÁLATAS
\toc1 Gálatas
\mt1 Cart Deꞌen Bzoɉ San Pabənꞌ Par Beṉəꞌ Galasia Caꞌ
\c 1
\s1 Pabənꞌ chguapeꞌ diox beṉəꞌ caꞌ chsoꞌelaoꞌ Cristənꞌ Galasianꞌ
\p
\v 1-2 Nadaꞌ Pab chzoɉaꞌ leꞌe chdopə chžagle choꞌelaꞌole Cristənꞌ yež caꞌ deꞌen zɉəchiꞌ ganꞌ nziꞌ Galasia. Chguaptoꞌ leꞌe diox txen len yoguəꞌ beṉəꞌ bišəꞌəcho caꞌ nitəꞌ nga. Caguə beṉac̱h naꞌanəꞌ gwleɉ nadaꞌ o bseḻeꞌe nadaꞌ par nacaꞌ apostol. Jesocristənꞌ txen len X̱eꞌ Diozənꞌ benꞌ bosban ḻeꞌ ladɉo beṉəꞌ guat caꞌ, ḻegaꞌaqueꞌen gosəꞌəbeɉeꞌ nadaꞌ par nacaꞌ apostol.
\v 3 Chonaꞌ orasyon par nic̱h X̱acho Diozənꞌ naꞌ X̱ancho Jesocristənꞌ əsaꞌacleneꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\v 4 Beṉəꞌ caꞌ žaꞌ yežlyo nga tyemp nga zocho ṉaꞌa niteꞌe xniꞌa deꞌe malənꞌ. Jesocristənꞌ bnežɉw cuineꞌ gwsoꞌot beṉəꞌ ḻeꞌ par gwdixɉueꞌ xtoḻəꞌəchonꞌ nic̱h caꞌ bebeɉeꞌ chioꞌo xniꞌa deꞌe malənꞌ. Beneꞌ caꞌ c̱hedəꞌ canꞌ gwyazlažəꞌ X̱acho Diozənꞌ goneꞌ.
\v 5 Ḻedoyeꞌelaꞌoch Diozənꞌ zeɉḻicaṉe. Canꞌ gonsgaczcho.
\s1 Bitoch bi dižəꞌ de deꞌe guac əṉacho dižəꞌ güen dižəꞌ cobə
\p
\v 6 Diozənꞌ gwleɉeꞌ leꞌe par nic̱h Xiꞌiṉeꞌ Cristənꞌ chacleneꞌ leꞌe. Naꞌ chebandaꞌ canꞌ chonḻenꞌ lgüegwzə bachbeɉyic̱hɉle Diozənꞌ. Naꞌ lguaꞌa deꞌe gwzenagle dižəꞌ güen dižəꞌ cobə deꞌen chzeɉniꞌin c̱he Jesocristənꞌ deꞌen beꞌelenaꞌ leꞌe, bachzenagzechle c̱he yeto deꞌen chaquele naquə dižəꞌ güen dižəꞌ cobə.
\v 7 Pero bito naquən dižəꞌ güen dižəꞌ cobə. Beṉəꞌ caꞌ chosoꞌosed chosoꞌoloꞌineꞌ to deꞌe zda clelə naꞌ chsoꞌoneꞌ ca chacžeɉlažəꞌəle c̱he deꞌen bsed əbloꞌitoꞌ leꞌe.
\v 8 Žaləꞌ netoꞌ əchyix̱ɉueꞌetoꞌ yeto deꞌen bito naquən lebe len dižəꞌ güen dižəꞌ cobə deꞌen chzeɉniꞌin c̱he Cristənꞌ deꞌen babsed babloꞌitoꞌ leꞌe, Diozənꞌ goneꞌ par nic̱h cuiayiꞌitoꞌ zeɉḻicaṉe, naꞌ ḻaꞌaṉəꞌ to angl beṉəꞌ zaꞌ yobanꞌ c̱hix̱ɉuiꞌe xtižəꞌ Cristənꞌ clelə, ḻeczə cuiayiꞌe.
\v 9 Canꞌ bagwniaꞌ antslə, ḻeczə canꞌ chniaꞌ ṉaꞌa. Notəꞌətezə beṉəꞌ c̱hix̱ɉuiꞌe deꞌen bito naquən lebe len dižəꞌ güen dižəꞌ cobə deꞌen chzeɉniꞌin c̱he Cristənꞌ deꞌen babsed bloꞌitoꞌ leꞌe, Diozənꞌ goneꞌ par nic̱h cuiayiꞌe zeɉḻicaṉe.
\p
\v 10 Echniaꞌ caꞌ par nic̱h yebei Diozənꞌ len nadaꞌ, caguə par nic̱h yebei beṉac̱hənꞌ nadaꞌ, naꞌ caguə par soꞌolažeꞌe canꞌ chonaꞌ naꞌanəꞌ. Žaləꞌ chiꞌ yic̱hɉaꞌ naclə gonaꞌ par nic̱h soꞌolažəꞌ beṉac̱hənꞌ canꞌ chonaꞌ bito chzenagaꞌ c̱he Cristənꞌ žaləꞌ caꞌ.
\s1 Diozənꞌ gwleɉeꞌ Pabənꞌ par goqueꞌ apostol
\p
\v 11 Beṉəꞌ bišəꞌ, cheꞌendaꞌ əṉezele de que dižəꞌ güen dižəꞌ cobə deꞌen chzeɉniꞌin c̱he Cristənꞌ deꞌen babeꞌelenaꞌ leꞌe bito naquən xbab c̱he beṉac̱h.
\v 12 Caguə beṉac̱h naꞌanəꞌ bzeneneꞌ nadaꞌ dižəꞌ güen dižəꞌ cobə deꞌen chzeɉniꞌin c̱he Jesocristənꞌ naꞌ nique əṉacho beṉac̱h naꞌanəꞌ beneꞌ ca gwyeɉniꞌichdaꞌan. Cuin Jesocristənꞌ bzeɉniꞌineꞌ nadaꞌ dižəꞌ güen dižəꞌ cobənꞌ.
\p
\v 13 Babenczele dižəꞌ canꞌ benaꞌ antslə catəꞌən ṉeꞌe naoguaꞌ costombr c̱he netoꞌ beṉəꞌ Izrael. Ḻechguaḻe blagzeɉə blagzidaꞌ beṉəꞌ caꞌ chsoꞌonḻilažəꞌ Cristənꞌ, goꞌondaꞌ yonitlaogaꞌacaꞌaneꞌ.
\v 14 Naꞌ gwcheꞌechguaꞌ yic̱hɉaꞌ c̱he costombr deꞌen gosəꞌənao deꞌe x̱axtaꞌoguaꞌa caꞌ canꞌ gwseꞌeɉṉiꞌalažeꞌe Diozənꞌ, naꞌ bichlə deꞌen gwsoꞌoneꞌ gwsaꞌaqueneꞌ par yebei Diozənꞌ ḻegaꞌaqueꞌ laogüe deꞌen gosəꞌənaogüeꞌen. Bsedəchaꞌ deꞌe caꞌ mazəchlə canꞌ bosoꞌosed zan beṉəꞌ Izrael lɉuežɉaꞌ caꞌ beṉəꞌ caꞌ gwsaꞌalɉə ca tyempənꞌ golɉaꞌanəꞌ.
\v 15 Catəꞌ cuiṉəꞌ galɉaꞌ Diozənꞌ bsiꞌe xṉeze gonaꞌ xšineꞌenəꞌ. Gwleɉeꞌ nadaꞌ par gonaꞌan c̱hedəꞌ nžiꞌilažeꞌe nadaꞌ.
\v 16 Naꞌ catəꞌ bžin ža ben Diozənꞌ canꞌ gwc̱hoglaogüeꞌen goneꞌ, nach bzeɉniꞌineꞌ nadaꞌ de que Jesoꞌosənꞌ naqueꞌ Xiꞌiṉeꞌ. Bzeɉniꞌineꞌ nadaꞌ par nic̱h chɉətix̱ɉuiꞌa xtižeꞌenəꞌ len beṉəꞌ caꞌ cui zɉənaquə beṉəꞌ Izrael. Naꞌ dezd ža naꞌ notono gwṉabdaꞌ əgwzeɉniꞌineꞌen nadaꞌ.
\v 17 Naꞌ nic gwyaꞌa Jerosalenṉəꞌ par nic̱h beṉəꞌ caꞌ zɉənaquə apostol antslə ca nadaꞌ yosoꞌosed yosoꞌoloꞌineꞌ nadaꞌ c̱he Jesoꞌosənꞌ. Zguaꞌatec gwyaꞌa ganꞌ nziꞌ Arabia, naꞌ Arabia naꞌ bezaꞌa bežinaꞌ Damasconꞌ.
\p
\v 18 Gwde šoṉ iz gwyaꞌa Damasconꞌ nach gwyaꞌa Jerosalenṉəꞌ ɉəlaṉaꞌa Bedənꞌ naꞌ ɉsoaꞌ len ḻeꞌ ždaꞌobiž.
\v 19 Pero bito bžagaꞌ apostol caꞌ yeḻaꞌ sino tozə Jacob beṉəꞌ bišəꞌ X̱anchonꞌ.
\v 20 Ṉezcze Diozənꞌ de que deꞌe nga chzoɉaꞌ leꞌe naquən deꞌe ḻi.
\p
\v 21 Nach gwyaꞌa yež caꞌ zɉəchiꞌ ganꞌ nziꞌ Siria naꞌ Silisia.
\v 22 Naꞌ ca naquə beṉəꞌ caꞌ chesəꞌədopə chesəꞌəžag chsoꞌelaogüeꞌe Cristənꞌ yež caꞌ zɉəchiꞌ ganꞌ nziꞌ Jodea, bitoṉəꞌ soꞌombiꞌe nadaꞌ ca orənꞌ.
\v 23 Con bazɉəneneneꞌ rson de que bitoch chlagzeɉə chlagzidaꞌ beṉəꞌ caꞌ chsoꞌonḻilažəꞌ Cristənꞌ naꞌ de que bachyix̱ɉuiꞌa xtižeꞌenəꞌ, len antslə goꞌondaꞌ gonaꞌ ca yesəꞌəbeɉyic̱hɉ beṉəꞌ caꞌ ḻen.
\v 24 Naꞌ beṉəꞌ Jodea caꞌ chsoꞌonḻilažəꞌ Cristənꞌ gwsoꞌelaꞌocheꞌ Diozənꞌ deꞌen bachonḻilažaꞌa Cristənꞌ.
\c 2
\s1 Apostol caꞌ yeḻaꞌ gwzaꞌazlažeꞌe canꞌ ben Pabənꞌ
\p
\v 1 Naꞌ gwde ždaꞌ iz gwyaꞌa Jerosalenṉəꞌ nach gwyaꞌa deꞌe yoblə len Bernabenꞌ, naꞌ ḻeczə gwc̱hiꞌa Titonꞌ.
\v 2 Diozənꞌ beneꞌ mendad šaꞌa, naꞌ deꞌe naꞌanəꞌ gwyaꞌa. Naꞌ btobaꞌ beṉəꞌ caꞌ zɉənaquə blao entr beṉəꞌ caꞌ chsoꞌelaoꞌ Cristənꞌ Jerosalenṉəꞌ naꞌ ḻegaꞌaczeꞌ bzeɉniꞌidaꞌ binꞌ chyix̱ɉuiꞌa len beṉəꞌ caꞌ cui zɉənaquə beṉəꞌ Izrael catəꞌən choꞌelenaꞌ ḻegaꞌaqueꞌ dižəꞌ güen dižəꞌ cobə deꞌen chzeɉniꞌin c̱he Cristənꞌ. Bzeɉniꞌigaꞌacdaꞌaneꞌ binꞌ chsed chloꞌidaꞌ c̱hedəꞌ goꞌondaꞌ əsaꞌazlažeꞌe deꞌen chsed chloꞌidaꞌ beṉəꞌ caꞌ par nic̱h caꞌ cui yesəꞌəneꞌ de que bito bi zaquəꞌ deꞌen chonaꞌ naꞌ deꞌen babenaꞌ.
\v 3 Ca goquənꞌ bito cholə gwsoꞌoneꞌ byen so beṉəꞌ lɉuežɉaꞌ Titonꞌ señy deꞌen neꞌ sirconsision, ḻaꞌaṉəꞌəczə cui naqueꞌ beṉəꞌ Izrael.
\v 4 Goc caꞌ ḻaꞌaṉəꞌəczə gwnitəꞌ beṉəꞌ gosəꞌəneꞌ cheyaḻəꞌ soeꞌ señyənꞌ. Gwnitəꞌ beṉəꞌ gosəꞌəlen beṉəꞌ bišəꞌəcho caꞌ Jerosalenṉəꞌ ca orənꞌ, parzə nic̱h yesəꞌəgüieꞌ šə naotoꞌ costombr caꞌ deꞌen nyoɉ ḻeꞌe ḻei c̱he netoꞌ beṉəꞌ Izrael. Gwseꞌeneneꞌ gwsoꞌoneꞌ byen yoguəꞌ beṉəꞌ soꞌonḻilažeꞌe Cristənꞌ yesəꞌənaogüeꞌ costombr caꞌ len laꞌ ṉezecho chebei Diozənꞌ chioꞌo por ni c̱he deꞌen chonḻilažəꞌəcho Cristənꞌ, caguə por ni c̱he šə choncho complir bi deꞌen na ḻeinꞌ.
\v 5 Pero nadaꞌ naꞌ Bernabenꞌ ni latəꞌəzə bito bzenagtoꞌ c̱he beṉəꞌ caꞌ. Con gwzoc̱hec̱htezətoꞌ bentoꞌ par nic̱h gaquə talenchle dižəꞌ güen dižəꞌ cobə deꞌen chzeɉniꞌin c̱he Cristənꞌ deꞌen babeꞌelentoꞌ leꞌe naꞌ deꞌen naquə deꞌe ḻi, sin cui bi bichlə gonḻe.
\p
\v 6 Naꞌ beṉəꞌ caꞌ gwsaꞌac blao entr beṉəꞌ caꞌ chsoꞌonḻilažəꞌ Cristənꞌ Jerosalenṉəꞌ, bito gwseꞌeneneꞌ gwšaꞌa canꞌ chsed chloꞌidaꞌ c̱he Cristənꞌ. Eṉiaꞌ caꞌ ḻaꞌaṉəꞌəczə bito bi nonən len nadaꞌ šə gwsaꞌaqueꞌ beṉəꞌ blao o šə cui gwsaꞌaqueꞌ, laꞌ par len Diozənꞌ tozəczə canꞌ zaquəꞌ yoguəꞌəḻoḻ beṉəꞌ.
\v 7 Gwsaꞌacbeꞌineꞌ de que Diozənꞌ ngüeꞌe lao naꞌa əchyix̱ɉuiꞌa dižəꞌ güen dižəꞌ cobə deꞌen chzeɉniꞌin c̱he Cristənꞌ len beṉəꞌ caꞌ cui zɉənaquə beṉəꞌ Izrael canꞌ ngüeꞌen lao naꞌ Bedənꞌ chyix̱ɉuiꞌen len beṉəꞌ Izrael gwlaž c̱hetoꞌ caꞌ.
\v 8 Diozənꞌ len yeḻəꞌ guac c̱heꞌenəꞌ chacleneꞌ Bedənꞌ par nic̱h chyix̱ɉuiꞌe xtižəꞌ Cristənꞌ len beṉəꞌ Izrael gwlaž c̱hetoꞌ caꞌ. Naꞌ ḻeczeꞌenəꞌ chacleneꞌ nadaꞌ len yeḻəꞌ guac c̱heꞌenəꞌ par nic̱h əchyix̱ɉuiꞌa xtižəꞌ Cristənꞌ len beṉəꞌ caꞌ cui zɉənaquə beṉəꞌ Izrael.
\p
\v 9 Jacobənꞌ len Bedənꞌ naꞌ len Juanṉəꞌ zɉənaquəcheꞌ beṉəꞌ blao entr beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ Jerosalenṉəꞌ. Naꞌ catəꞌ ḻegaꞌaqueꞌ gwsaꞌacbeꞌineꞌ canꞌ chaclen Diozənꞌ nadaꞌ par chonaꞌ xšineꞌenəꞌ nach gwsoꞌox̱eꞌe naꞌanəꞌ len naꞌ Bernabenꞌ par bosoꞌoloꞌe de que chsaꞌazlažeꞌe canꞌ chontoꞌ txen len ḻegaꞌaqueꞌ. Naꞌ gwsaꞌaqueneꞌ güenczənꞌ gontoꞌ xšin Diozənꞌ entr beṉəꞌ caꞌ cui zɉənaquə beṉəꞌ Izrael naꞌ ḻegaꞌaqueꞌ soꞌoneꞌen entr beṉəꞌ Izrael gwlaž c̱hetoꞌ caꞌ.
\v 10 Tozə deꞌen gwseꞌe netoꞌ gontoꞌ, gaquəlentoꞌ beṉəꞌ yašəꞌ caꞌ chsoꞌelaoꞌ Cristənꞌ. Naꞌ deꞌe ḻiczə chiꞌichgua yic̱hɉaꞌ gaquəlenaꞌ beṉəꞌ yašəꞌ caꞌ.
\s1 Pabənꞌ gwdiḻeꞌ Bedənꞌ Antioquianꞌ
\p
\v 11 Naꞌ gwdechlə gwyaꞌa Antioquianꞌ. Naꞌ žlac zoaꞌ naꞌ bidə Bedənꞌ ganꞌ nitəꞌ beṉəꞌ caꞌ chəsəꞌədopə chəsəꞌəžag chsoꞌelaogüeꞌe Cristənꞌ naꞌ gwdiḻaꞌaneꞌ canꞌ choneꞌ, c̱hedəꞌ blaꞌalaon choneꞌ deꞌe mal.
\v 12 Quinganꞌ goquə catəꞌ zeꞌe bžineꞌ Antioquianꞌ, gwzolaogüeꞌ cheꞌeɉ chaogüeꞌ txen len beṉəꞌ caꞌ chsoꞌonḻilažəꞌ Cristənꞌ ḻaꞌaṉəꞌəczə cui zɉənaqueꞌ beṉəꞌ Izrael, pero gwdechlə catəꞌ besəꞌəžin beṉəꞌ Jerosalen caꞌ beṉəꞌ caꞌ bseḻəꞌ Jacobənꞌ, bitoch goneꞌeneꞌ yeꞌeɉ gaogüeꞌ txen len beṉəꞌ caꞌ cui zɉənaquə beṉəꞌ Izrael. Bžebeꞌ bi yesəꞌəna beṉəꞌ caꞌ chsoꞌon xbab de que notəꞌətezə beṉəꞌ chonḻilažəꞌ Cristənꞌ cheyaḻəꞌ soeꞌ señy deꞌen neꞌ sirconsision.
\v 13 Nach beṉəꞌ Izrael caꞌ yeḻaꞌ nitəꞌ Antioquianꞌ chsoꞌonḻilažeꞌe Cristənꞌ ḻeczə besyəꞌəbižeꞌe cuich əgwseꞌeɉ əgwsaꞌogüeꞌ txen len beṉəꞌ caꞌ cui zɉənaquə beṉəꞌ Izrael, naꞌ gosəꞌəgoꞌoyeḻeꞌe Bernabenꞌ par nic̱h lenczeꞌ bebižeꞌe. Naꞌ besyəꞌəbižeꞌe parzə nic̱h yesyəꞌəbei beṉəꞌ Jerosalen caꞌ ḻegaꞌaqueꞌ, ḻaꞌaṉəꞌəczə gosəꞌəṉezeneꞌ naquən güen əseꞌeɉ əsaꞌogüeꞌ txen len beṉəꞌ caꞌ cui zɉənaquə beṉəꞌ Izrael.
\v 14 Gocbeꞌidaꞌ bitoch chsoꞌoneꞌ canꞌ cheyaḻəꞌ gon chioꞌo nombiꞌacho dižəꞌ güen dižəꞌ cobə deꞌen chzeɉniꞌin c̱he Cristənꞌ naꞌ deꞌen naquə deꞌe ḻi. Deꞌe naꞌanəꞌ gwdiḻaꞌ Bedənꞌ lao yoguəꞌ beṉəꞌ caꞌ chesəꞌədopə chesəꞌəžag chsoꞌelaogüeꞌe Cristənꞌ, gožaꞌaneꞌ: “Leꞌ nacoꞌ beṉəꞌ Izrael, pero bagwleɉyic̱hɉoꞌ costombr c̱he chioꞌo beṉəꞌ Izrael par chonoꞌ txen len beṉəꞌ caꞌ cui zɉənaquə beṉəꞌ Izrael. Deꞌe naꞌanəꞌ bito cheyaḻəꞌ gonoꞌ byen soꞌon beṉəꞌ caꞌ cui zɉənaquə beṉəꞌ Izrael canꞌ na costombr c̱he chioꞌo beṉəꞌ Izrael.”
\s1 Con beṉəꞌ chsoꞌonḻilažəꞌ Jesocristənꞌ zɉənaqueꞌ beṉəꞌ güen lao Diozənꞌ
\p
\v 15 Netoꞌ golɉətoꞌ naquətoꞌ beṉəꞌ Izrael, naꞌ bito golɉətoꞌ entr beṉəꞌ caꞌ cui chsoꞌelaoꞌ Diozənꞌ.
\v 16 Diozənꞌ bito əṉeꞌ de que naccho beṉəꞌ güen laogüeꞌenəꞌ por ni c̱he bi deꞌen choncho. Con beṉəꞌ caꞌ chsoꞌonḻilažəꞌ Jesocristənꞌ zɉənaqueꞌ beṉəꞌ güen lao Diozənꞌ. Lenczə netoꞌ bachonḻilažəꞌətoꞌ Cristənꞌ par nic̱h Diozənꞌ neꞌ c̱hetoꞌ de que banaquətoꞌ beṉəꞌ güen laogüeꞌenəꞌ. Bito neꞌ caꞌ c̱he notəꞌətezcho por ni c̱he šə choncho bi deꞌen na ḻeinꞌ goncho.
\p
\v 17 Naꞌ notəꞌətezə chioꞌo naccho beṉəꞌ Izrael, antslə zeꞌe əṉa Diozənꞌ de que naccho beṉəꞌ güen laogüeꞌenəꞌ, bzeɉniꞌineꞌ chioꞌo de que tozə ca beṉəꞌ malənꞌ naccho len yeziquəꞌəchlə beṉəꞌ güen deꞌe mal caꞌ, pero ḻaꞌaṉəꞌəczə bzeɉniꞌineꞌ chioꞌo de que tozə ca beṉəꞌ malənꞌ naccho len yeziquəꞌəchlə beṉəꞌ güen deꞌe mal caꞌ bito əṉacho de que Crist nanꞌ beneꞌ par nic̱h naccho beṉəꞌ mal. Naꞌ šə canꞌ chaquecho ḻechguaḻe clelənꞌ choncho xbabənꞌ.
\v 18 Chioꞌo babechoɉcho xniꞌa costombr caꞌ deꞌen zɉənyoɉ ḻeꞌe ḻei c̱hechonꞌ naꞌ šə yozo cuincho xniꞌagaꞌaqueinəꞌ deꞌe yoblə, ḻeꞌe nacbiaꞌate de que deꞌe malənꞌ choncho.
\v 19 Ḻeinꞌ chzeɉniꞌin chioꞌo de que naccho beṉəꞌ mal par nic̱h ṉezecho bito naccho beṉəꞌ güen lao Diozənꞌ por ni c̱he deꞌen choncho bi deꞌen na ḻeinꞌ. Naꞌ ṉaꞌa chioꞌo chonḻilažəꞌəcho Cristənꞌ con yoꞌo yic̱hɉcho sotezə socho gwzenagcho c̱he Diozənꞌ.
\v 20 Nadaꞌ ṉezdaꞌ de que ndiḻ ngodaꞌa txen len Cristənꞌ catəꞌən gwsoꞌoteꞌeneꞌ ḻeꞌe yag corozənꞌ. Naꞌ bitoch zoaꞌ to gwlazaꞌ sino Cristənꞌ zoleneꞌ nadaꞌ. Naꞌ deꞌen chonaꞌ ṉaꞌa chonaꞌan con canꞌ na Xiꞌiṉ Diozənꞌ benꞌ chonḻilažaꞌa. Ḻenꞌ chaqueneꞌ c̱hecho naꞌ bnežɉw cuineꞌ gwsoꞌoteꞌeneꞌ por ni c̱hecho.
\v 21 Diozənꞌ nžiꞌilažeꞌe chioꞌo naꞌ bseḻeꞌe Cristənꞌ par nic̱h gonḻilažəꞌəchoneꞌ naꞌ gaccho beṉəꞌ güen lao Diozənꞌ. Naꞌ bito cheꞌendaꞌ gwzoaꞌ caꞌaḻə deꞌen beneꞌ caꞌ, gaquədaꞌ de que por ni c̱he bi deꞌen chonaꞌ nacaꞌ beṉəꞌ güen lao Diozənꞌ. Žaləꞌ por ni c̱he deꞌen choncho bi deꞌen na ḻeinꞌ əṉa Diozənꞌ de que naccho beṉəꞌ güen laogüeꞌenəꞌ bito byažɉən əgwnežɉo cuin Cristənꞌ por ni c̱hecho žaləꞌ caꞌ.
\c 3
\s1 Naccho beṉəꞌ güen lao Diozənꞌ c̱hedəꞌ chonḻilažəꞌəcho Cristənꞌ, caguə por ni c̱he deꞌen choncho complir canꞌ na ḻeinꞌ
\p
\v 1 Leꞌe beṉəꞌ Galasia, nc̱hoḻ yic̱hɉlaꞌaždaꞌolenꞌ ca deꞌen babosoꞌox̱oayag beṉəꞌ leꞌe par chaquele cheyaḻəꞌ naole costombr caꞌ deꞌen na ḻeinꞌ. Clar juisy babzeɉniꞌidaꞌ leꞌe canꞌ gwsoꞌoteꞌ Cristənꞌ ḻeꞌe yag corozənꞌ por ni c̱hecho.
\v 2 Deꞌe ngazənꞌ chṉabdaꞌ leꞌe: ¿Ezo Spirit c̱he Diozənꞌ ḻoꞌo yic̱hɉlaꞌaždaꞌolenꞌ por ni c̱he deꞌen chonḻe complir canꞌ na ḻeinꞌ? Bito, sino zon ḻoꞌo yic̱hɉlaꞌaždaꞌolenꞌ por ni c̱he deꞌen bachonḻilažəꞌəle Cristənꞌ.
\v 3 Spirit c̱he Diozənꞌ zon ḻoꞌo yic̱hɉlaꞌaždaꞌolenꞌ dezd catəꞌən gwzolao chonḻilažəꞌəle Cristənꞌ. Naꞌalɉe ¿ədeꞌe tant nc̱hoḻ yic̱hɉlaꞌaždaꞌole naꞌanəꞌ chaquele chyažɉən so señyənꞌ lao cuerp c̱helenꞌ par yeyož gonḻe canꞌ cheneꞌe Diozənꞌ?
\v 4 Deꞌe zan deꞌe babosoꞌoc̱hiꞌ bosoꞌosaquəꞌ beṉəꞌ leꞌe laogüe deꞌen chonḻilažəꞌəle Cristənꞌ. Naꞌ ¿bixa parənꞌ bguoꞌo bc̱heɉlažəꞌəle len deꞌe caꞌ šə ṉaꞌa sole señy deꞌen neꞌ sirconsision? Pero bitolɉa əṉacho de que sole señyənꞌ, laꞌ šə solen cueɉyic̱hɉle deꞌen chonḻilažəꞌəle Crist naꞌanəꞌ.
\v 5 Ṉezczele de que Diozənꞌ babeṉeꞌ Spirit c̱heꞌenəꞌ zon ḻoꞌo yic̱hɉlaꞌaždaꞌolenꞌ naꞌ choneꞌ miḻagr entr leꞌe, c̱hedəꞌ bachonḻilažəꞌəle Cristənꞌ naꞌ bachzenagle c̱heꞌ, caguə chac caꞌ por ni c̱he deꞌen chonḻe complir bi deꞌen na ḻeinꞌ.
\p
\v 6 Naꞌ caꞌaczənꞌ nyoɉ Xtižəꞌ Diozənꞌ choꞌen dižəꞌ c̱he deꞌe Abraanṉəꞌ nan de que benḻilažeꞌe Diozənꞌ naꞌ deꞌe naꞌanəꞌ Diozənꞌ gwneꞌ c̱heꞌ de que naqueꞌ beṉəꞌ güen laogüeꞌenəꞌ.
\v 7 Cheyaḻəꞌ əṉezele de que yoguəꞌ beṉəꞌ chsoꞌonḻilažəꞌ Diozənꞌ canꞌ benḻilažəꞌ deꞌe Abraanṉəꞌ ḻeꞌ, lao Diozənꞌ zɉənaqueꞌ xiꞌiṉ dia c̱he deꞌe Abraanṉəꞌ.
\v 8 Diozənꞌ bsiꞌe xṉeze par nic̱h choneꞌ len leꞌe cui nacle beṉəꞌ Izrael canꞌ choneꞌ len netoꞌ beṉəꞌ Izrael, ca deꞌen neꞌ c̱he notəꞌətezcho chonḻilažəꞌəchoneꞌ de que naccho beṉəꞌ güen laogüeꞌenəꞌ. Deꞌe naꞌanəꞌ gožeꞌ deꞌe Abraanṉəꞌ dižəꞌ güen dižəꞌ cobə nga: “Gonaꞌ güen len beṉəꞌ caꞌ žaꞌ yoguəꞌ ṉasyon, beṉəꞌ caꞌ soꞌonḻilažəꞌ nadaꞌ canꞌ chonḻilažoꞌo nadaꞌ.”
\v 9 Naꞌ canꞌ naquən, Diozənꞌ choneꞌ güen len beṉəꞌ caꞌ chsoꞌonḻilažəꞌ ḻeꞌ canꞌ beneꞌ güen len deꞌe Abraanṉəꞌ por ni c̱he deꞌen benḻilažəꞌ deꞌe Abraanṉəꞌ ḻeꞌ.
\p
\v 10 Naꞌ notəꞌətezə beṉəꞌ chon xbab de que gaqueꞌ beṉəꞌ güen lao Diozənꞌ por ni c̱he šə choneꞌ bi deꞌen na ḻei deꞌen bzoɉ deꞌe Moisezənꞌ, deꞌe mal juisy gaquə c̱heꞌ šə caꞌ, c̱hedəꞌ notono no yesəꞌəzoi par soꞌoneꞌ cayaṉəꞌən nanṉəꞌ. Canꞌ nyoɉ Xtižəꞌ Diozənꞌ nan: “Deꞌe mal juisy gaquə c̱he notəꞌətezə beṉəꞌ šə cui ṉitəꞌətezə ṉiteꞌe soꞌoneꞌ complir yoguəꞌəḻoḻ canꞌ na ḻeinꞌ dote tyemp.”
\v 11 Naꞌ Xtižəꞌ Diozənꞌ nyoɉən nan: “Diozənꞌ neꞌ c̱he beṉəꞌ chsoꞌonḻilažəꞌ ḻeꞌ de que zɉənaqueꞌ beṉəꞌ güen laogüeꞌenəꞌ, naꞌ deꞌe naꞌanəꞌ guatəꞌəczə yeḻəꞌ mban c̱hegaꞌaqueꞌ zeɉḻicaṉe.” Naꞌ deꞌen nan caꞌ ṉezecho de que Diozənꞌ bito əṉeꞌ c̱he notəꞌətezcho de que naccho beṉəꞌ güen laogüeꞌenəꞌ por ni c̱he šə choncho bi deꞌen na ḻeinꞌ goncho.
\v 12 Beṉəꞌ zan chsaꞌaqueneꞌ soꞌoneꞌ canꞌ na ḻeinꞌ sin cui chsoꞌonḻilažeꞌe Diozənꞌ, con yoꞌo yic̱hɉgaꞌaqueꞌ deꞌen nan: “Notəꞌətezə beṉəꞌ chon cuaseḻoḻ canꞌ na ḻeinꞌ gaquə baneꞌ zeɉḻicaṉe.”
\p
\v 13 Cristənꞌ gwdixɉueꞌ xtoḻəꞌəchonꞌ par nic̱h caꞌ cui gaquə deꞌe mal juisy c̱hecho ca deꞌen cui chzoicho par goncho cuaseḻoḻ canꞌ na ḻeinꞌ. Bnežɉw cuineꞌ goc deꞌe mal juisy c̱heꞌ lguaꞌa chioꞌo. Goc c̱heꞌ canꞌ nyoɉən nan: “Deꞌe mal juisy chac c̱he notəꞌətezə beṉəꞌ chsoꞌoteꞌ chosoꞌodeꞌeneꞌ ḻeꞌe yag.”
\v 14 Goc caꞌ par nic̱h lenczə beṉəꞌ caꞌ cui zɉənaquə beṉəꞌ Izrael soꞌonḻilažeꞌeneꞌ naꞌ ṉiteꞌe mbalaz ca mbalazənꞌ gwzo deꞌe Abraanṉəꞌ laogüe deꞌen benḻilažeꞌe Diozənꞌ. Naꞌ chioꞌo chonḻilažəꞌəcho Jesocristənꞌ ža, Diozənꞌ bseḻeꞌe Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ canꞌ beneꞌ lyebe.
\s1 Ḻei deꞌen bzoɉ deꞌe Moisezənꞌ naꞌ lyebe deꞌen ben Diozənꞌ len deꞌe Abraanṉəꞌ
\p
\v 15-16 Ca naquə Diozənꞌ beneꞌ lyebe len deꞌe Abraanṉəꞌ canꞌ goneꞌ güen len xiꞌiṉ dia c̱heꞌenəꞌ, beꞌe dižəꞌ c̱he tozə xiꞌiṉ dia c̱he deꞌe Abraanṉəꞌ, naꞌ c̱he Crist nanꞌ beꞌe dižəꞌən caꞌ. Beṉəꞌ bišəꞌ, quinganꞌ naquən len notəꞌətezə beṉəꞌ chosoꞌozaꞌ yiš, catəꞌ babeyož bosoꞌozeꞌen bito gaquə əṉa toeꞌ de que cui goneꞌ canꞌ nanṉəꞌ naꞌ bito gaquə gwzanch yetoeꞌ canꞌ nanṉəꞌ.
\v 17 Naꞌ lyebe deꞌen ben Diozənꞌ len deꞌe Abraanṉəꞌ ža, gwxaquəꞌəleben ca to yiš deꞌen chosoꞌozaꞌ beṉəꞌ, c̱hedəꞌ laꞌ Diozənꞌ bito gwšeꞌe canꞌ beneꞌ lyebe len deꞌe Abraanṉəꞌ. Ṉeꞌe chonczeꞌ con canꞌ gožeꞌeneꞌenəꞌ. Naꞌ bagwde tap gueyoa šichoa iz ben Diozənꞌ lyebe len deꞌe Abraanṉəꞌ nach beneꞌ par nic̱h bzoɉ deꞌe Moisezənꞌ ḻei c̱heꞌenəꞌ. Naꞌ ḻaꞌaṉəꞌəczə Diozənꞌ bnežɉueꞌ ḻeinꞌ bito ənacho cuich choneꞌ canꞌ beneꞌ lyebe len deꞌe Abraanṉəꞌ.
\v 18 Žaləꞌ Diozənꞌ neꞌ de que beṉəꞌ caꞌ chsoꞌon cuaseḻoḻ canꞌ na ḻeinꞌ zɉənaqueꞌ beṉəꞌ güen, bito chacleneꞌ beṉəꞌ canꞌ beneꞌ lyebe gaquəleneꞌ žaləꞌ caꞌ. Pero cuineꞌen neꞌ c̱he chioꞌo chonḻilažəꞌəchoneꞌ de que naccho beṉəꞌ güen laogüeꞌenəꞌ por ni c̱he lyebe deꞌen beneꞌ len deꞌe Abraanṉəꞌ.
\p
\v 19-20 Ḻeczə byažɉe ḻei deꞌen bzoɉ deꞌe Moisezənꞌ. Diozənꞌ bnežɉueꞌen par beṉəꞌ caꞌ gwnitəꞌ bedote catəꞌən cuiṉəꞌ yidə Cristənꞌ par nich gwsaꞌacbeꞌineꞌ de que chsoꞌoneꞌ contr canꞌ non Diozənꞌ mendad soꞌoneꞌ. Cristənꞌ golɉeꞌ lao dia c̱he deꞌe Abraanṉəꞌ naꞌ c̱he ḻeꞌenəꞌ beꞌ Diozənꞌ dižəꞌ catəꞌən beneꞌ lyebe len deꞌe Abraanṉəꞌ. Naꞌ ca naquə ḻeinꞌ Diozənꞌ beneꞌ par nic̱h angl caꞌ bosoꞌonežɉueꞌen deꞌe Moisezənꞌ. Naꞌ Diozənꞌ bc̱hineꞌ deꞌe Moisezənꞌ par bzeɉniꞌineꞌ beṉəꞌ Izrael caꞌ canꞌ na ḻeinꞌ. Pero catəꞌ ben Diozənꞌ lyebe len deꞌe Abraanṉəꞌ notono no bc̱hineꞌ par əgwzeɉniꞌineꞌ deꞌe Abraanṉəꞌ.
\s1 Ḻeinꞌ chzeɉniꞌin chioꞌo de que choncho deꞌe mal
\p
\v 21 Naꞌ bito cheyaḻəꞌ goncho xbab de que ḻei deꞌen bzoɉ deꞌe Moisezənꞌ chonən contr canꞌ non Diozənꞌ lyebe goneꞌ. Pero ḻeinꞌ bito gaquə yocobən yic̱hɉlaꞌaždaꞌochonꞌ. Žaləꞌ gaquə yocobən yic̱hɉlaꞌaždaꞌochonꞌ guaquə goncho canꞌ na ḻeinꞌ nach gaccho beṉəꞌ güen lao Diozənꞌ žaləꞌ caꞌ.
\v 22 Pero Xtižəꞌ Diozənꞌ deꞌen nyoɉən nan de que yoguəꞌəḻoḻ beṉac̱hənꞌ yesəꞌəziꞌe castigw zeɉḻicaṉe por ni c̱he xtoḻəꞌəgaꞌaqueꞌenəꞌ. Naꞌ nyoɉən caꞌ par nic̱h con beṉəꞌ soꞌonḻilažəꞌ Jesocristənꞌ bito yesəꞌəziꞌe castigonꞌ, sino gaquə güen c̱hegaꞌaqueꞌ canꞌ ben Diozənꞌ lyebe len deꞌe Abraanṉəꞌ.
\p
\v 23 Ca naquə netoꞌ beṉəꞌ Izrael catəꞌən bitoṉəꞌ əgwzeɉniꞌi Diozənꞌ netoꞌ de que cheyaḻəꞌ gonḻilažəꞌətoꞌ Cristənꞌ, nchoglaon c̱hetoꞌ de que siꞌitoꞌ castigw zeɉḻicaṉe c̱hedəꞌ nombiꞌatoꞌ ḻei deꞌen bzoɉ deꞌe Moisezənꞌ naꞌ bito chontoꞌ canꞌ nanṉəꞌ.
\v 24 Par netoꞌ ḻeinꞌ gwxaquəꞌəleben ca to mos əznia beṉəꞌ chgüia chyeꞌ xiꞌiṉ beṉəꞌ, deꞌe zan deꞌe cheꞌeboꞌ gomboꞌ naꞌ deꞌe cui gomboꞌ. Pero ṉaꞌa babidə Cristənꞌ naꞌ baḻtezətoꞌ chonḻilažəꞌətoꞌoneꞌ Diozənꞌ neꞌ de que naquətoꞌ beṉəꞌ güen laogüeꞌenəꞌ naꞌ canꞌ neꞌ c̱he notəꞌətezcho.
\v 25 Naꞌ deꞌen babidə Cristənꞌ bitoch gwxaquəꞌəlebe ḻeinꞌ ca to mos əznia par netoꞌ beṉəꞌ Izrael, netoꞌ bachonḻilažəꞌətoꞌoneꞌ.
\p
\v 26 Yoguəꞌ chioꞌo chonḻilažəꞌəcho Jesocristənꞌ naccho xiꞌiṉ Dioz.
\v 27 Naꞌ notəꞌətezcho šə bagwchoacho nisənꞌ par bloꞌecho de que ngodəꞌəcho txen len Jesocristənꞌ, bachzolao chac yic̱hɉlaꞌaždaꞌochonꞌ canꞌ naquə yic̱hɉlaꞌaždaꞌogüeꞌenəꞌ.
\v 28 Naꞌ tozəczə canꞌ zaquəꞌəcho lao Diozənꞌ šə naccho beṉəꞌ Izrael o šə cui naccho, šə naccho beṉəꞌ esclabo o šə cui naccho, naꞌ šə naccho beṉəꞌ byo o šə naccho noꞌolə. Yoguəꞌəcho banaccho tozə laogüe deꞌen ngodəꞌəcho txen len Jesocristənꞌ.
\v 29 Naꞌ deꞌen ngodəꞌəcho txen len Jesocristənꞌ, lao Diozənꞌ naccho xiꞌiṉ dia c̱he deꞌe Abraanṉəꞌ naꞌ len chioꞌonəꞌ gon Diozənꞌ güen canꞌ beneꞌ lyebe goneꞌ len xiꞌiṉ dia c̱he deꞌe Abraanṉəꞌ.
\c 4
\p
\v 1 To beṉəꞌ gwniꞌa šə zo xiꞌiṉeꞌ, biꞌinanꞌ siꞌ byen c̱heꞌenəꞌ. Pero naꞌ žlac ṉeꞌe nacboꞌ bidaoꞌ bito ṉacho mbalazəch chac c̱heboꞌ cle ca c̱he to mos ḻaꞌaṉəꞌəczə gwžin ža gaquə lao naꞌaboꞌ yoguəꞌ deꞌen de c̱he x̱aboꞌonəꞌ.
\v 2 Beṉəꞌ caꞌ nitəꞌ ḻoꞌo yoꞌo ližboꞌonəꞌ ṉeꞌe chosoꞌogüia chosoꞌoyeꞌeboꞌ naꞌ ṉeꞌe chesəꞌənabiꞌeboꞌ žlac cuiṉəꞌ c̱haꞌoboꞌ naꞌ žlac əžin ža coꞌo x̱aboꞌonəꞌ lao naꞌaboꞌ deꞌen deineꞌenəꞌ.
\v 3 Canꞌ goquə len netoꞌ beṉəꞌ Izrael, žlac cuiṉəꞌ yidə Cristənꞌ gwxaquəꞌəlebetoꞌ ca xiꞌiṉ beṉəꞌ gwniaꞌanəꞌ. Diozənꞌ beneꞌ mendad ṉaotoꞌ yoguəꞌəḻoḻ costombr deꞌen na ḻeinꞌ. Naꞌ deꞌe naꞌanəꞌ par netoꞌ ḻeinꞌ gwxaquəꞌəleben ca beṉəꞌ caꞌ chəsəꞌənabiaꞌ xiꞌiṉ beṉəꞌ gwniꞌanəꞌ žlac cuiṉəꞌ žin ža siꞌiboꞌ deꞌen de c̱he x̱aboꞌonəꞌ.
\v 4 Pero catəꞌ bžin ža bžia Diozənꞌ biaꞌ bseḻeꞌe Xiꞌiṉeꞌenəꞌ yežlyo nga, gwxan to noꞌolə ḻeꞌ. Naꞌ Xiꞌiṉ Diozənꞌ ḻeczə bzenagueꞌ c̱he ḻeinꞌ.
\v 5 Naꞌ ḻeꞌenəꞌ bedəyeneꞌ par nic̱h yoguəꞌ chioꞌo chonḻilažəꞌəchoneꞌ zocho mbalaz ca mbalazənꞌ so xiꞌiṉ beṉəꞌ gwniꞌanəꞌ catəꞌən əžin ža gaquə lao naꞌaboꞌ byenṉəꞌ. Cristənꞌ bedəyeneꞌ par nic̱h ṉezecho bitoch chonən byen ṉaocho costombr caꞌ deꞌen zɉənyoɉ ḻeꞌe ḻei c̱he netoꞌ beṉəꞌ Izrael.
\p
\v 6 Naꞌ deꞌen bagwcuaꞌ Diozənꞌ chioꞌo ca xiꞌiṉeꞌ, babseḻeꞌe Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ deꞌen ḻeczə naquə Spirit c̱he Xiꞌiṉeꞌ Cristənꞌ. Naꞌ Spiritənꞌ chaclenən chioꞌo par nic̱h choḻgüižcho Diozənꞌ cheꞌechoneꞌ: “X̱a.”
\v 7 Diozənꞌ bagwcueꞌe chioꞌo ca xiꞌiṉeꞌ caguə par cueꞌe yic̱hɉcho costombr caꞌ deꞌen non ḻeinꞌ mendad. Gwcueꞌe chioꞌo ca xiꞌiṉeꞌ par nic̱h chac güen c̱hecho canꞌ beneꞌ lyebe gaquə c̱he xiꞌiṉ dia c̱he deꞌe Abraanṉəꞌ.
\s1 Pabənꞌ chiꞌ yic̱hɉeꞌ naquənꞌ chsoꞌon beṉəꞌ caꞌ chsoꞌonḻilažəꞌ Cristənꞌ
\p
\v 8 Antslə catəꞌən cuiṉəꞌ gombiꞌale Diozənꞌ gwyeɉṉiꞌalažəꞌəle bi deꞌe caꞌ cui zɉəzaquəꞌ par šeɉṉiꞌalažəꞌəcho, naꞌ ḻegaꞌaquən gosəꞌənabiꞌan xbab c̱helenꞌ.
\v 9 Pero ṉaꞌa banombiꞌale Diozənꞌ o šə güench əṉacho de que Diozənꞌ banombiꞌe leꞌe. Chebanchgüeidaꞌ c̱hele deꞌen chebiguəꞌəle gosxanḻə naꞌ bachezo cuinḻe xniꞌa costombr caꞌ c̱he biquəꞌ deꞌen yeꞌeɉ gaocho, c̱he ža caꞌ, naꞌ c̱he cuerp c̱hechonꞌ. Costombr caꞌ bito gwsaꞌaquən par yesyəꞌəbeɉən chioꞌo xniꞌa deꞌe malənꞌ naꞌ ḻeczə caguə bi zɉəzaquəꞌən ṉaꞌa par əsaꞌaclenən chioꞌo.
\v 10 Bagwzolao naole costombr c̱he netoꞌ beṉəꞌ Izrael c̱he lṉi caꞌ, c̱he ža caꞌ, c̱he bioꞌ caꞌ, c̱he tyemp caꞌ naꞌ c̱he iz caꞌ.
\v 11 Chžebaꞌ šə cuich əgwzenagle c̱he deꞌen babsed bloꞌidaꞌ leꞌe, laꞌ šə cuich gwzenagle c̱hei, cuiayiꞌ deꞌen benaꞌ entr leꞌe.
\p
\v 12 Beṉəꞌ bišəꞌ, chatəꞌəyoidaꞌ leꞌe gonḻe canꞌ babenaꞌ nadaꞌ deꞌen babchoɉyic̱hɉaꞌ costombr c̱he netoꞌ beṉəꞌ Izrael deꞌen zɉənyoɉ ḻeꞌe ḻeinꞌ nic̱h zoaꞌ chonaꞌ žin entr leꞌe: Naꞌ ca naquə bedəsoaꞌ len leꞌe bito ṉacho de que babenḻe mal len nadaꞌ.
\v 13 Ṉezczele chacšendaꞌ deꞌen bidaꞌ deꞌe neche, naꞌ gwdix̱ɉuiꞌa dižəꞌ güen dižəꞌ cobə deꞌen chzeɉniꞌin c̱he Cristənꞌ len leꞌe.
\v 14 Naꞌ deꞌen chacšendaꞌ ca orənꞌ zaquəꞌən par gueꞌile nadaꞌ, pero bito bgueꞌile nadaꞌ, sino bzenagczle xtižaꞌanəꞌ. Naꞌ do yic̱hɉ do lažəꞌəle bgüialaole nadaꞌ caꞌaczə chgüialaogüe to angl c̱he Diozənꞌ o caꞌaczə cuin Jesocristənꞌ.
\v 15 Mbalaz gwzole deꞌen benḻe caꞌ len nadaꞌ, naꞌ ¿bixc̱henꞌ cuich chonḻe caꞌ ṉaꞌa ža? Ṉezdaꞌ deꞌe tant goquele c̱hiaꞌ xte bebeile bzanele bitəꞌətezə deꞌen deile naꞌ lente cuinḻe par goclenḻe nadaꞌ.
\v 16 ¿Epor ni c̱he deꞌen choꞌelenaꞌ leꞌe dižəꞌ ḻinꞌ bachaquele de que nacaꞌ beṉəꞌ contr c̱hele ža?
\p
\v 17 Beṉəꞌ caꞌ chosoꞌosed chosoꞌoloꞌi leꞌe ṉaꞌa ḻechguaḻe zɉəchiꞌ yic̱hɉgaꞌaqueꞌ leꞌe, pero caguə par nic̱h soꞌoneꞌ güen len leꞌenəꞌ sino par nic̱h yesyəꞌəbeɉeꞌ leꞌe cuich gonḻe txen len netoꞌonəꞌ naꞌ par nic̱h cueꞌe yic̱hɉle ḻegaꞌaczeꞌenəꞌ.
\v 18 Naquəczən güen yesəꞌəbeꞌeyic̱hɉ beṉəꞌ leꞌe do tyempte, caguə catəꞌəzənꞌ zoaꞌ len leꞌe naꞌ con šə soꞌoneꞌ güen len leꞌe.
\v 19 Xiꞌiṉdaoguaꞌa, deꞌe yoblə chžaglaoguaꞌa ḻoꞌo laꞌaždaꞌoguaꞌanəꞌ por ni c̱he leꞌe canꞌ chžaglao to noꞌolə beṉəꞌ chzan, naꞌ əžaglaochczaꞌ xte catəꞌəch gaquə yic̱hɉlaꞌaždaꞌolenꞌ canꞌ naquə yic̱hɉlaꞌaždaoꞌ Cristənꞌ.
\v 20 Žaləꞌəšga zoaꞌ len leꞌe ṉaꞌa, nžaꞌalə canꞌ gaquə ṉiaꞌ leꞌe. Deꞌe ḻi ḻechguaḻe chacžeɉlažaꞌa c̱hele.
\s1 Deꞌe Agar naꞌ deꞌe Sarənꞌ
\p
\v 21 Leꞌe cheneꞌele ṉaole costombr c̱he netoꞌ beṉəꞌ Izrael deꞌen zɉənyoɉ ḻeꞌe ḻei deꞌen bzoɉ deꞌe Moisezənꞌ, ¿əbitoṉəꞌ yenele canꞌ na deꞌen nyoɉənṉəꞌ?
\v 22 Nan de que gwnitəꞌ c̱hopə xiꞌiṉ deꞌe Abraanṉəꞌ biꞌi byo, tobo gwxan to noꞌolə naquə esclabo c̱heꞌ naꞌ yetoboꞌ gwxan noꞌol c̱heczeꞌ noꞌolənꞌ bito naquə esclabo.
\v 23 Naꞌ biꞌin gwxan noꞌolə esclabonꞌ golɉboꞌ c̱hedəꞌ gwzolen deꞌe Abraanṉəꞌ ḻeꞌ pero biꞌin gwxan noꞌol c̱heczeꞌ golɉboꞌ c̱hedəꞌ Diozənꞌ beneꞌ par nic̱h goc complir canꞌ beneꞌ lyebe de que saneꞌ ḻaꞌaṉəꞌəczə naqueꞌ beṉəꞌ güiž.
\v 24 Naꞌ deꞌen goc c̱he noꞌol caꞌ chzeɉniꞌin chioꞌo c̱he c̱hopte lyebe deꞌen ben Diozənꞌ naclənꞌ gaquəleneꞌ beṉəꞌ Izrael caꞌ. Noꞌolə esclabo benꞌ le Agar gwxaquəꞌəlebeneꞌ ca ḻei deꞌen ben Diozənꞌ mendad bzoɉ deꞌe Moisezənꞌ. Bzoɉeꞌen par deꞌe x̱axtaꞌo netoꞌ beṉəꞌ Izrael lao yaꞌa Sinainꞌ beṉəꞌ caꞌ gwxaquəꞌəlebe ca esclabos.
\v 25 Naꞌ doxen ṉasyon Izraelənꞌ gwxaquəꞌəleben ca deꞌe Agarənꞌ noꞌolə esclabo c̱he deꞌe Abraanṉəꞌ. Diozənꞌ bnežɉueꞌ deꞌe x̱axtaꞌotoꞌ caꞌ ḻeinꞌ lao yaꞌa Sinainꞌ ganꞌ nziꞌ Arabia, naꞌ xte ža ṉeža beṉəꞌ Izrael gwlaž c̱hetoꞌ caꞌ zɉənaqueꞌ ca esclabos c̱hedəꞌ chsaꞌaqueneꞌ chonən byen yesəꞌənaogüeꞌ yoguəꞌ costombr caꞌ deꞌen na ḻeinꞌ.
\v 26 Pero yoguəꞌ chioꞌo chonḻilažəꞌəcho Cristənꞌ, babozoeꞌ chioꞌo binḻo len Diozənꞌ, naꞌ naquən to goclen deꞌen beneꞌ. Deꞌe naꞌanəꞌ ṉezecho bito chonən byen ṉaocho costombr caꞌ deꞌen na ḻeinꞌ.
\v 27 Diozənꞌ beneꞌ par nic̱h to profet beṉəꞌ beꞌ xtižeꞌenəꞌ canaꞌ bzoɉeꞌen de que beṉəꞌ zanch soꞌonḻilažəꞌ Cristənꞌ cle ca beṉəꞌ caꞌ yesəꞌənao costombr caꞌ deꞌen na ḻeinꞌ. Naꞌ quinga na deꞌen bzoɉeꞌenəꞌ.
\q1 Bebei noꞌolə güiž, noꞌolə cui no chzan,
\q1 Bisyaꞌa yeḻəꞌ chebei c̱hioꞌ, leꞌ cuiṉəꞌ gacoꞌ bes c̱he yeḻəꞌ sanṉəꞌ, c̱hedəꞌ sanoꞌ biꞌi zan.
\q1 Naꞌ leꞌ cui no xiꞌiṉoꞌ ṉeꞌe so,
\q1 Ṉitəꞌəch xiꞌiṉoꞌ clezə canꞌ nitəꞌ xiꞌiṉ noꞌolənꞌ bagwxan to xiꞌiṉ beꞌen c̱hioꞌonəꞌ.
\p
\v 28 Ca naquə Isaaquənꞌ xiꞌiṉ deꞌe Abraanṉəꞌ golɉboꞌ por yeḻəꞌ guac c̱he Diozənꞌ c̱hedəꞌ canꞌ beneꞌ lyebe len deꞌe Abraanṉəꞌ. Ḻeꞌegatezə caꞌ chioꞌo ža, por yeḻəꞌ guac c̱he Dioz naꞌanəꞌ bachoneꞌ chioꞌo cuent ca xiꞌiṉ dia c̱he deꞌe Abraanṉəꞌ c̱hedəꞌ canꞌ beneꞌ lyebe goneꞌ.
\v 29 Biꞌi c̱he deꞌe Agarənꞌ, biꞌin golɉə por ni c̱he deꞌen gwzolen deꞌe Abraanṉəꞌ ḻeꞌ blagzeɉə blagzidboꞌ Isaaquənꞌ biꞌin ben Spirit c̱he Diozənꞌ par gwxan deꞌe Sarənꞌ noꞌolənꞌ goquə beṉəꞌ güiž. Ḻeꞌegatezə caꞌ ža ṉeža beṉəꞌ Izrael caꞌ chesəꞌənao costombr caꞌ deꞌen na ḻeinꞌ chosoꞌolagzeɉə chosoꞌolagzideꞌ chioꞌo chonḻilažəꞌəcho Cristənꞌ.
\v 30 Naꞌ Xtižəꞌ Diozənꞌ deꞌen nyoɉən nan de que Diozənꞌ gožeꞌ deꞌe Abraanṉəꞌ: “Bebeɉ noꞌolə esclabonꞌ len biꞌi c̱heꞌenəꞌ, c̱hedəꞌ biꞌi c̱heꞌenəꞌ bito əgwnežɉuaꞌaboꞌ deꞌen nonaꞌ lyebe əgwnežɉuaꞌ biꞌin gwxan noꞌol c̱hioꞌonəꞌ.”
\v 31 Deꞌe naꞌanəꞌ beṉəꞌ bišəꞌ ṉezecho laogüe deꞌen chonḻilažəꞌəcho Cristənꞌ gwxaquəꞌəlebecho ca xiꞌiṉ deꞌe Sarənꞌ noꞌolənꞌ bito goquə esclabo, caguə ca xiꞌiṉ deꞌe noꞌolə esclabonꞌ.
\c 5
\s1 Bito chonən byen ṉaocho costombr deꞌen na ḻeinꞌ
\p
\v 1 Catəꞌən benḻilažəꞌəcho Cristənꞌ ḻeꞌ bebeɉeꞌ chioꞌo lao yoguəꞌ deꞌen choncho chaquecho chebei Diozənꞌ chioꞌo laogüe deꞌen chonchonꞌ. Deꞌe naꞌanəꞌ bito əṉacho yebeiche Diozənꞌ chioꞌo šə ṉaocho costombr caꞌ canꞌ na ḻei c̱he netoꞌ beṉəꞌ Izrael.
\p
\v 2 Nadaꞌ Pab əchniaꞌ leꞌe to deꞌe žialao. Šə sole señy deꞌen neꞌ sirconsisionṉəꞌ ṉaꞌa bachonḻilažəꞌəle Cristənꞌ, bito bibi zaquəꞌən deꞌen bagwzolao chonḻilažəꞌəleneꞌ šə caꞌ.
\v 3 Echniaꞌ clar de que notəꞌətezə beṉəꞌ soeꞌ señy deꞌen neꞌ sirconsision, ḻeczə cheyaḻəꞌ goneꞌ complir yoguəꞌəḻoḻ bitəꞌətezəchlə deꞌen na ḻeinꞌ.
\v 4 Naꞌ šə chaquele gonḻe cuaseḻoḻ canꞌ na ḻeinꞌ par nic̱h gacle beṉəꞌ güen lao Diozənꞌ, bachzole Cristənꞌ caꞌaḻə šə canꞌ chaquele, naꞌ bitoch chonḻe cas canꞌ nžiꞌilažəꞌ Diozənꞌ chioꞌo.
\v 5 Chioꞌo chonḻilažəꞌəcho Jesocristənꞌ zo Spirit c̱he Diozənꞌ ḻoꞌo laꞌaždaꞌochonꞌ naꞌ chonən ca baṉezecho de que Diozənꞌ əṉeꞌ naccho beṉəꞌ güen laogüeꞌenəꞌ catəꞌ yežincho ganꞌ zoeꞌenəꞌ.
\v 6 Ca naquə chioꞌo chonḻilažəꞌəcho Jesocristənꞌ bito bi nonən len Diozənꞌ šə socho señy deꞌen neꞌ sirconsision, o šə cui zochon. Laꞌ deꞌen naquə deꞌe žialao xen len Diozənꞌ, sotezə socho gonḻilažəꞌəcho Cristənꞌ naꞌ gaquecho c̱he lɉuežɉcho par nic̱h gacbiaꞌ de que chonḻilažəꞌəchoneꞌenəꞌ.
\p
\v 7 To tyemp babenḻe canꞌ chebei Diozənꞌ, pero ṉaꞌa chebandaꞌ babeꞌele latɉə chəsəꞌəžon beṉəꞌ cuich ṉaole deꞌen naquə deꞌe ḻinꞌ.
\v 8 Dioz benꞌ gwleɉ leꞌe par nacle xiꞌiṉeꞌ, bito ṉacho ḻeꞌenəꞌ choneꞌ par nic̱h chzenagle c̱he beṉəꞌ caꞌ.
\v 9 Naꞌ deꞌen bachzenagle c̱he consejw malənꞌ yobəch əgwzenagle c̱he bitəꞌətezəchlə deꞌe chon contr xtižəꞌ Diozənꞌ. Chonḻe canꞌ na dicho nga: “Latəꞌəzə xnaꞌ cuazinꞌ chonən par nic̱h cheyas doxen cuazinꞌ.”
\v 10 Pero naꞌ zoaꞌ lez gon X̱ancho Jesocristənꞌ par nic̱h yezolao ṉaole deꞌe caꞌ babzeɉniꞌidaꞌ leꞌe. Naꞌ notəꞌətezə zɉənaquə beṉəꞌ caꞌ chsoꞌon par nic̱h chacžeɉlažəꞌəle, Diozənꞌ əgwnežɉueꞌ castigw c̱hegaꞌaqueꞌ.
\p
\v 11 Naꞌ ca nacaꞌ nadaꞌ, nitəꞌ beṉəꞌ chəsəꞌəneꞌ chsed chloꞌidaꞌ de que yoguəꞌ chioꞌo chonḻilažəꞌəcho Cristənꞌ cheyaḻəꞌ socho señy deꞌen neꞌ sirconsision. Bitolɉa zɉənḻagzeɉə zɉənḻagzidə beṉəꞌ nadaꞌ žaləꞌ chsed chloꞌidaꞌ caꞌ. Len bito gaquə zdebə no gwzenag žaləꞌ caꞌ, c̱hedəꞌ bitoch gonən byen soꞌonḻilažeꞌe Cristənꞌ benꞌ gwsoꞌoteꞌ bosoꞌodeꞌeneꞌ ḻeꞌe yag corozənꞌ.
\v 12 Yebeichlədaꞌ žaləꞌ beṉəꞌ caꞌ chsoꞌon par nic̱h chacžeɉlažəꞌəle šə chebei Diozənꞌ leꞌe deꞌen cui zole señyənꞌ yesəꞌəc̱hog cuingaꞌaqueꞌ yelatəꞌ.
\p
\v 13 Beṉəꞌ bišəꞌ, Diozənꞌ gwleɉeꞌ chioꞌo par chonḻilažəꞌəcho Cristənꞌ. Deꞌe naꞌanəꞌ bitoch chonən byen ṉaocho costombr caꞌ canꞌ na ḻei c̱he netoꞌ beṉəꞌ Izrael. Pero bito de lsens goncho bitəꞌətezə deꞌe mal deꞌen na laꞌaždaꞌomalchonꞌ goncho. Deꞌen cheneꞌe Diozənꞌ goncho, gaque c̱he lɉuežɉcho naꞌ gaquəlen lɉuežɉcho tocho yetocho.
\v 14 Naꞌ bazoczcho choncho yoguəꞌəḻoḻ canꞌ na ḻeinꞌ šə choncho canꞌ nyoɉən nan: “Goque c̱he saꞌalɉuežɉoꞌ catg chaque c̱he cuinoꞌ.”
\v 15 Pero šə chacyožə lɉuežɉcho o chdiḻəlen lɉuežɉcho chžiayiꞌicho deꞌen non Diozənꞌ par naccho tozə.
\s1 Canꞌ goncho šə gwzenagcho c̱he Spirit c̱he Diozənꞌ
\p
\v 16 Deꞌen naquə deꞌe žialao xen goncho, cheyaḻəꞌ sotezə socho goncho canꞌ cheneꞌe Spirit c̱he Diozənꞌ. Naꞌ šə goncho caꞌ bito gwzenagcho c̱he laꞌaždaꞌomalchonꞌ.
\v 17 Catəꞌ chzenagcho c̱he laꞌaždaꞌomalchonꞌ bito choꞌen latɉə əgwzenagcho c̱he Spirit c̱he Diozənꞌ. Naꞌ ca naquə deꞌen cheneꞌe laꞌaždaꞌomalchonꞌ goncho naquən contr deꞌen cheneꞌe Spirit c̱he Diozənꞌ. Pero šə choncho canꞌ cheneꞌe Spirit c̱he Diozənꞌ, bito choncho canꞌ na laꞌaždaꞌomalchonꞌ. Naꞌ deꞌen zo Spiritənꞌ len chioꞌo bito choncho canꞌ goncho žaləꞌ cui zon len chioꞌo.
\v 18 Naꞌ šə chzenagcho c̱he deꞌen chsed chzeɉniꞌi Spirit c̱he Diozənꞌ chioꞌo goncho, bitoch naocho costombr caꞌ deꞌen na ḻei deꞌen bzoɉ deꞌe Moisezənꞌ.
\p
\v 19 Šə chzenagcho c̱he laꞌaždaꞌomalchonꞌ choncho notəꞌətezən deꞌe mal quinga: Chbeɉyic̱hɉcho noꞌol c̱hecho o beꞌen c̱hecho par chzolencho beṉəꞌ yoblə; chgoꞌo xtocho; chebeicho bichlə deꞌe yeḻəꞌ ztoꞌ deꞌen zɉənac caꞌ;
\v 20 cheɉṉiꞌalažəꞌəcho lguaꞌa lsaquəꞌ; naocho deꞌen chsoꞌon beṉəꞌ caꞌ chesəꞌəṉelen deꞌe x̱ioꞌ; bito zocho binḻo len lɉuežɉcho; chdiḻə chšašcho; chgueꞌi lɉuežɉcho; chloccho; chiꞌ yic̱hɉcho gaquə güen c̱he cuinzcho sin cui choncho xbab nac gaquə c̱he lɉuežɉcho; naccho beṉəꞌ gotiḻ; bito choncho txen len lɉuežɉcho;
\v 21 chzelažəꞌəcho bi deꞌen de c̱he beṉəꞌ yoblə; chotcho beṉəꞌ; naccho beṉəꞌ güeꞌe zo; chlencho no lṉi ganꞌ chac scandl; naꞌ choncho bichlə deꞌe mal deꞌen zɉənaquə ca deꞌe mal quinga bagwniaꞌ. Naꞌ deꞌe yoblə chniaꞌ leꞌe canꞌ bagwniaꞌaczaꞌ antslə, bito yežincho yobanꞌ ganꞌ zo Diozənꞌ chnabiꞌe šə choncho deꞌe mal caꞌ zɉənac caꞌ.
\p
\v 22 Naꞌ šə chzenagcho c̱he Spirit c̱he Diozənꞌ, goncho yoguəꞌ deꞌe quinga: Gaquecho c̱he lɉuežɉ beṉac̱hcho; socho mbalaz deꞌen nombiꞌacho Diozənꞌ; socho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ; gapcho yeḻəꞌ chxenḻažəꞌ len lɉuežɉ beṉac̱hcho bitəꞌətezə deꞌen chsoꞌoneneꞌ chioꞌo; goncho güen len beṉəꞌ yeziquəꞌəchlə naꞌ əžiꞌilažəꞌəgaꞌacchoneꞌ; goncho complir šə binꞌ yeꞌecho beṉəꞌ goncho;
\v 23 gaccho beṉəꞌ gax̱ɉwlažəꞌ; bito güeꞌecho latɉə ṉabiaꞌ laꞌaždaꞌomalchonꞌ chioꞌo. Naꞌ šə bachzenagcho c̱he Spirit c̱he Diozənꞌ, bito bi bi ḻei de deꞌen əṉa choncho deꞌe mal.
\v 24 Naꞌ chioꞌo bangodəꞌəcho txen len Cristo Jesoꞌosənꞌ bitoch choꞌecho latɉə ṉabiaꞌ laꞌaždaꞌomalchonꞌ chioꞌo par goncho bi deꞌen chzelažəꞌən.
\v 25 Spirit c̱he Diozənꞌ babeṉən yeḻəꞌ mban zeɉḻicaṉe c̱hechonꞌ, naꞌ deꞌe naꞌanəꞌ cheyaḻəꞌ socho goncho canꞌ cheneꞌenṉəꞌ.
\p
\v 26 Naꞌ bito cheyaḻəꞌ gon cuincho xen gaquecho ḻechguaḻe chebei Diozənꞌ chioꞌo, laꞌ šə goncho caꞌ yesəꞌəžaꞌa beṉəꞌ lɉuežɉchonꞌ chioꞌo naꞌ yesəꞌəgueꞌineꞌ chioꞌo.
\c 6
\s1 Cheyaḻəꞌ gaquəlen lɉuežɉcho
\p
\v 1 Beṉəꞌ bišəꞌ, šə to beṉəꞌ lɉuezɉchonꞌ babxopeꞌ beneꞌ to deꞌe mal, chioꞌo chzenagcho c̱he Spirit c̱he Diozənꞌ cheyaḻəꞌ gaquəlenchoneꞌ par nic̱h yezoeꞌ binḻo len Diozənꞌ deꞌe yoblə. Naꞌ güeꞌechoneꞌ consejw dižəꞌ šaoꞌ əžɉsaꞌalažəꞌəcho de que ḻeczə caꞌ chioꞌo nxož əxopcho goncho deꞌe malənꞌ.
\v 2 To tocho cheyaḻəꞌ gaquəlen beṉəꞌ lɉuežɉcho caꞌ bitəꞌətezə deꞌe chsaꞌac c̱hegaꞌaqueꞌ. Šə goncho caꞌ goncho complir canꞌ cheneꞌe Cristənꞌ gonchonꞌ.
\p
\v 3 Naꞌ šə goncho xbab de que naccho beṉəꞌ blao len cui naccho, chx̱oayagzə cuinchonꞌ šə caꞌ.
\v 4 To tocho cheyaḻəꞌ goncho xbab šə deꞌen babenchonꞌ naquən deꞌe güen o deꞌe mal. Naꞌ yebeicho šə babencho deꞌen naquə güen, pero bito goncho xbab de que güench chon chioꞌo clezə ca beṉəꞌ yoblə.
\v 5 Laꞌ to tochonꞌ c̱hoglao Diozənꞌ c̱hecho šə bencho güen o šə bencho mal.
\p
\v 6 Šə no chosoꞌosed chosoꞌoloꞌi chioꞌo xtižəꞌ Diozənꞌ, bito goncho rgüin len ḻegaꞌaqueꞌ. Cheyaḻəꞌ əgwnežɉogaꞌacchoneꞌ latəꞌ šə bi deꞌe šaoꞌ deꞌe güen deꞌe de c̱hecho.
\p
\v 7 Bito güeꞌele latɉə no əx̱oayag leꞌe, bito gaquə əgwzocho Diozənꞌ caꞌaḻə. Laꞌ segon deꞌen chonchonꞌ goneꞌ par nic̱h socho mbalaz o par nic̱h siꞌicho castigw. Canꞌ chac, con deꞌen chazcho nanꞌ chelapcho.
\v 8 Benꞌ chon con canꞌ cheneꞌe laꞌaždaꞌomaleꞌenəꞌ gwžin ža cuiayiꞌe zeɉḻicaṉe, pero benꞌ chon canꞌ cheneꞌe Spirit c̱he Diozənꞌ, Spiritənꞌ gonən par nic̱h əbaneꞌ zeɉḻicaṉe.
\v 9 Naꞌ bito cheyaḻəꞌ žɉəx̱aquəꞌəlažəꞌəcho par goncho deꞌe güenṉəꞌ, c̱hedəꞌ laꞌ gwžin ža catəꞌ Diozənꞌ goneꞌ par nic̱h socho mbalaz juisy, con šə cui cueɉyic̱hɉcho goncho canꞌ cheneꞌeneꞌenəꞌ.
\v 10 Cheyaḻəꞌ goncho güen len yoguəꞌəḻoḻ beṉəꞌ batəꞌətezə zo latɉə, pero mazəchlə cheyaḻəꞌ goncho güen len yeziquəꞌəchlə beṉəꞌ chsoꞌonḻilažəꞌ Cristənꞌ.
\s1 Yeto c̱hopə deꞌen cheꞌ Pabənꞌ ḻegaꞌaqueꞌ
\p
\v 11 Ḻeꞌe güiašc ḻetr chaꞌo quinga, laꞌ cuinaꞌan chzoɉaꞌan leꞌe.
\v 12 Beṉəꞌ caꞌ chsoꞌon byen sole señy deꞌen neꞌ sirconsision chsoꞌoneꞌ caꞌ c̱hedəꞌ chseꞌeneneꞌ yesyəꞌəbei beṉəꞌ ḻegaꞌaqueꞌ šə babosoꞌozoeꞌ leꞌe señyənꞌ. Chsoꞌoneꞌ byen solen par nic̱h cui no gwlagzeɉə gwlagzidə ḻegaꞌaqueꞌ canꞌ chosoꞌolagzeɉə chosoꞌolagzidə beṉəꞌ netoꞌ laogüe deꞌen chzenetoꞌ ca naquənꞌ bnežɉw cuin Cristənꞌ gwsoꞌoteꞌeneꞌ ḻeꞌe yag corozənꞌ por ni c̱hecho.
\v 13 Beṉəꞌ caꞌ zɉəzo señy deꞌen neꞌ sirconsisionṉəꞌ zɉəchiꞌ yic̱hɉgaꞌaqueꞌ ḻei deꞌen bzoɉ deꞌe Moisezənꞌ, pero ni ḻegaꞌaqueꞌ cui chsoꞌoneꞌ canꞌ nanṉəꞌ. Con chseꞌeneneꞌ sole señyənꞌ par nic̱h əsoꞌelaoꞌ cuingaꞌaqueꞌ naꞌ yesyəꞌəbei beṉəꞌ ḻegaꞌaqueꞌ.
\v 14 Ca nacaꞌ nadaꞌ, bitoczə güeꞌelaoꞌ cuinaꞌ, naꞌ bitobi nonən len nadaꞌ šə beṉac̱hənꞌ yebeineꞌ nadaꞌ. Güeꞌelaꞌoguaꞌa X̱ancho Jesocristənꞌ naꞌ ḻeꞌenəꞌ cheꞌendaꞌ yebeineꞌ nadaꞌ. Deꞌen ṉezdaꞌ bnežɉw cuineꞌ gwsoꞌot beṉəꞌ ḻeꞌ ḻeꞌe yag corozənꞌ por ni c̱hecho bitobi nonən len nadaꞌ šə beṉac̱hənꞌ yesyəꞌəbeineꞌ nadaꞌ.
\v 15 Ṉezdaꞌ bito bi nonən šə zocho señy deꞌen neꞌ sirconsisionṉəꞌ o šə cui zochon, pero deꞌe zaquəꞌəchgüei deꞌen babocobə Diozənꞌ yic̱hɉlaꞌaždaꞌochonꞌ.
\v 16 Chioꞌo naccho doalɉə beṉəꞌ Izrael lao Diozənꞌ šə bachonḻilažəꞌəcho Jesocristənꞌ naꞌ šə cuich naocho costombr deꞌen zɉənyoɉ ḻeꞌe ḻeinꞌ. Naꞌ leꞌe šə bachiꞌ yic̱hɉle tlaozə canꞌ cheneꞌeneꞌenəꞌ, Diozənꞌ gonšgueꞌ par so cuezəchle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ naꞌ sotezeꞌ yeyašəꞌ yežiꞌilažeꞌe leꞌe.
\p
\v 17 Naꞌ par delant bitoch bi xbab clelə gonḻe c̱he deꞌen babzoɉaꞌ leꞌe. Ḻegwzenag c̱hiaꞌ c̱hedəꞌ cuerp c̱hiaꞌanəꞌ nsaꞌan yiž c̱he deꞌen babosoꞌoc̱hiꞌ babosoꞌosaquəꞌ beṉəꞌ nadaꞌ por ni c̱he deꞌen əchyix̱ɉuiꞌa xtižəꞌ X̱ancho Jesoꞌosənꞌ.
\p
\v 18 Beṉəꞌ bišəꞌ, X̱ancho Jesocristənꞌ sotezə soeꞌ gaquəlenšgaczeꞌ leꞌe len xbab deꞌen yoꞌo ḻoꞌo yic̱hɉlaꞌaždaꞌolenꞌ. Deꞌe naꞌazənꞌ chzoɉaꞌ ṉaꞌa.
\b
\m Pab