\id EPH
\ide UTF-8
\h EFESIOS
\toc1 Efesios
\mt1 Cart Deꞌen Bzoɉ San Pabənꞌ Par Beṉəꞌ Efeso Caꞌ
\c 1
\s1 Apostol Pabənꞌ bzoɉeꞌ cart par beṉəꞌ caꞌ chsoꞌelaoꞌ Jesocristənꞌ Efesonꞌ
\p
\v 1 Nadaꞌ Pab nacaꞌ apostol c̱he Jesocristənꞌ con canꞌ gwnalažəꞌ Diozənꞌ. Naꞌ chzoɉaꞌ cart nga par leꞌe nitəꞌəle Efesonꞌ, leꞌe bagwleɉ Diozənꞌ par nacle lažəꞌ neꞌenəꞌ. Zotezə zole chzenagle c̱heꞌ naꞌ ngodəꞌəle txen len Cristo Jesoꞌosənꞌ.
\v 2 Chonaꞌ orasyon chṉabaꞌ lao X̱acho Diozənꞌ naꞌ X̱ancho Jesocristənꞌ əsaꞌacleneꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Diozənꞌ chacleneꞌ chioꞌo ngodəꞌəcho txen len Jesocristənꞌ
\p
\v 3 Ḻedoyeꞌelaꞌoch Diozənꞌ benꞌ naquə X̱a X̱ancho Jesocristənꞌ naꞌ ḻeczə choꞌelaoꞌ X̱ancho Jesocristənꞌ ḻeꞌ. Ca naquənꞌ ngodəꞌəcho len Cristənꞌ, Diozənꞌ bagocleneꞌ chioꞌo len xbab deꞌen yoꞌo ḻoꞌo yic̱hɉlaꞌaždaꞌochonꞌ par nic̱h bac̱h chzo chbezcho binḻo canꞌ socho catəꞌən yežincho yobanꞌ.
\v 4 Chioꞌo ngodəꞌəcho txen len Cristənꞌ, catəꞌ cuiṉəꞌ x̱e yežlyonꞌ Diozənꞌ gwleɉeꞌ yoguəꞌ chioꞌo par nic̱h gaquə laꞌaždaꞌochonꞌ xiꞌilažəꞌ naꞌ par nic̱h cui bi xtoḻəꞌəcho gatəꞌ laogüeꞌenəꞌ.
\v 5 Chaque Diozənꞌ c̱hecho. Deꞌe nanꞌ bsiꞌe xṉezenəꞌ antslə par nic̱h gwcueꞌe chioꞌo ca xiꞌiṉeꞌ, naꞌ deꞌe naꞌanəꞌ bseḻeꞌe Jesocristənꞌ por ni c̱hecho. Diozənꞌ gwcueꞌe chioꞌo c̱hedəꞌ canꞌ gwyazlažeꞌe naꞌ canꞌ goneꞌeneꞌ.
\v 6 Bseḻeꞌe Xiꞌiṉeꞌ Jesocristənꞌ benꞌ chaqueneꞌ c̱hei par gocleneꞌ chioꞌo par nic̱h caꞌ güeꞌelaꞌochoneꞌ laogüe deꞌenəꞌ nžiꞌilažəꞌətequeꞌ chioꞌo.
\v 7 Tant nžiꞌilažəꞌ Diozənꞌ chioꞌo, bseḻeꞌe Jesocristənꞌ bnežɉw cuineꞌ blalɉ xc̱heneꞌenəꞌ par gwdixɉueꞌ xtoḻəꞌəchonꞌ catəꞌən gwsoꞌoteꞌeneꞌ par nic̱h caꞌ Diozənꞌ beziꞌixeneꞌ xtoḻəꞌəcho caꞌ.
\v 8 Diozənꞌ nžiꞌilažəꞌəchgüeꞌ chioꞌo, beṉeꞌ chioꞌo zan cḻas yeḻəꞌ sinꞌ naꞌ beneꞌ par nic̱h chacbeꞌicho ca güenṉəꞌ choneꞌ len chioꞌo.
\v 9 Naꞌ bzeɉniꞌineꞌ chioꞌo deꞌen cui no gwṉeze antslə deꞌen goneꞌeneꞌ gaquə, ca naquə deꞌen bžieꞌ biaꞌ gon Cristənꞌ.
\v 10 Bžieꞌ biaꞌ de que gwžin ža catəꞌ Cristənꞌ ṉabiꞌe doxenḻə naꞌ goneꞌ par nic̱h yoguəꞌəḻoḻ beṉəꞌ žaꞌ yobanꞌ naꞌ beṉəꞌ žaꞌ yežlyonꞌ txen yosoꞌozenagueꞌ c̱heꞌ.
\p
\v 11 Naꞌ chioꞌo ngodəꞌəcho txen len Cristənꞌ, Diozənꞌ bsiꞌe xṉeze par gwcueꞌe chioꞌo ca xiꞌiṉeꞌ par nic̱h gaquə lao naꞌacho deꞌen goṉeꞌ chioꞌo naccho xiꞌiṉeꞌ. Naꞌ zoeꞌ choneꞌ par nic̱h gaquə yoguəꞌəḻoḻ canꞌ gwc̱hoglaogüeꞌen naꞌ canꞌ cheneꞌeneꞌ gaquə.
\v 12 Naꞌ ca naquə netoꞌ chbezətoꞌ yidə Cristənꞌ naꞌ chonḻilažəꞌətoꞌoneꞌ antslə ca leꞌe, bsiꞌe xṉeze par nic̱h zguaꞌatec netoꞌ beꞌelaꞌotoꞌoneꞌ laogüe deꞌen naqueꞌ ḻeꞌezelaogüe beṉəꞌ zaqueꞌe.
\v 13 Naꞌ leꞌe ngodəꞌəle txen len Cristənꞌ, c̱hedəꞌ ḻeczə bzenagle c̱he dižəꞌ güen dižəꞌ cobə deꞌen naquə deꞌe ḻi. Naꞌ nan de que cui yeyeɉcho lao yiꞌ gabiḻənꞌ šə gonḻilažəꞌəcho Cristənꞌ. Naꞌ catəꞌən benḻilažəꞌəle Cristənꞌ blaꞌ Spirit c̱he Diozənꞌ zon ḻoꞌo yic̱hɉlaꞌaždaꞌolenꞌ. Zon len chioꞌo chonḻilažəꞌəchoneꞌ canꞌ beneꞌ lyebe par nic̱h ṉezecho bagwcueꞌe chioꞌo ca xiꞌiṉeꞌ.
\v 14 Naꞌ zon ḻoꞌo yic̱hɉlaꞌaždaꞌochonꞌ par nic̱h ṉezecho de que gwžin ža catəꞌ gaquə lao naꞌacho deꞌen goṉəch Diozənꞌ chioꞌo naccho xiꞌiṉeꞌ. Naꞌ gaquən lao naꞌacho catəꞌ goṉeꞌ cuerp cobə c̱hechonꞌ. Beṉeꞌ chioꞌo Spirit c̱heꞌenəꞌ par nic̱h güeꞌelaꞌochoneꞌ deꞌen naqueꞌ ḻeꞌezelaogüe beṉəꞌ zaqueꞌe.
\s1 Pabənꞌ gwṉabeꞌ de que Diozənꞌ əgwsed əgwloꞌineꞌ beṉəꞌ caꞌ chsoꞌonḻilažəꞌ Cristənꞌ
\p
\v 15 Babendaꞌ dižəꞌ ca naquənꞌ chonḻilažəꞌəle X̱ancho Jesoꞌosənꞌ naꞌ ca naquənꞌ chaquele c̱he yoguəꞌ beṉəꞌ caꞌ yeḻaꞌ beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 16 Deꞌe naꞌanəꞌ nadaꞌ catəꞌ chonaꞌ orasyonṉəꞌ yoguəꞌ laste choꞌa yeḻəꞌ chox̱cwlen c̱he Diozənꞌ canꞌ chonḻenꞌ.
\v 17 Naꞌ chṉabaꞌ de que Diozənꞌ goneꞌ par nic̱h šeɉniꞌichele c̱heꞌ naꞌ gombiꞌachleneꞌ. X̱ancho Jesocristənꞌ ḻeczə choꞌelaogüeꞌe Diozənꞌ benꞌ naquə X̱eꞌ naꞌ benꞌ naquə ḻeꞌezelaogüe beṉəꞌ zaqueꞌe.
\v 18 Chṉabdaꞌ Diozənꞌ šoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌolenꞌ par nic̱h əṉezele bi deꞌe güenṉəꞌ zocho lez goneꞌ len chioꞌo bagwleɉeꞌ naccho xiꞌiṉeꞌ. Naꞌ chṉabaꞌ goneꞌ par nic̱h šoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌolenꞌ par nic̱h əṉezele catec yeḻəꞌ balaꞌaṉ xen juisy goṉeꞌ chioꞌo bagwleɉeꞌ par naccho lažəꞌ neꞌenəꞌ.
\v 19 Ḻeczə chṉabdaꞌaneꞌ šoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌolenꞌ par nic̱h əṉezele de que yeḻəꞌ guac xenṉəꞌ napeꞌ par gaquəleneꞌ chioꞌo chonḻilažəꞌəchoneꞌ. Babloꞌineꞌ beṉac̱hənꞌ canꞌ naquə yeḻəꞌ guac xen c̱heꞌenəꞌ.
\v 20 Bloꞌen ca deꞌen bosbaneꞌ Cristənꞌ ladɉo beṉəꞌ guatənꞌ naꞌ nzoꞌeneꞌ cuitenꞌ ganꞌ chiꞌe chnabiꞌe par nic̱h caꞌ Cristənꞌ chnabiꞌe txen len ḻeꞌ.
\v 21 Deꞌe naꞌanəꞌ Cristənꞌ chnabiꞌacheꞌ ca notəꞌətezə angl. Chnabiꞌacheꞌ ca beṉac̱h, naꞌ ca deꞌe x̱ioꞌ, naꞌ ca bi deꞌen chseꞌeɉṉiꞌalažeꞌe naꞌ ca notəꞌətezəchlə napə yeḻəꞌ gwnabiaꞌ ṉaꞌa naꞌ tyemp deꞌen zeꞌe zaꞌ.
\v 22-23 Diozənꞌ beneꞌ par nic̱h zoczə Cristənꞌ chnabiꞌe yoguəꞌəḻoḻ beṉəꞌ naꞌ biquəꞌəchlə. Naꞌ canꞌ zoczə Cristənꞌ chnabiꞌe doxenḻə, ḻeczə ben Diozənꞌ par nic̱h zoczə Cristənꞌ chnabiꞌe chioꞌo choꞌelaꞌochoneꞌ. Deꞌe naꞌanəꞌ chioꞌo choꞌelaꞌochoneꞌ gwxaquəꞌəlebecho ca to cuerp. Naꞌ Cristənꞌ gwxaquəꞌəlebeneꞌ ca yic̱hɉ cuerpənꞌ, c̱hedəꞌ chnabiꞌe chioꞌo canꞌ chon xbab deꞌen yoꞌo ḻoꞌo yic̱hɉchonꞌ chnabiꞌan cuerp c̱hechonꞌ.
\c 2
\s1 Chioꞌo chonḻilažəꞌəcho Diozənꞌ bito yeyeɉcho lao yiꞌ gabiḻənꞌ c̱hedəꞌ nžiꞌilažeꞌe chioꞌo
\p
\v 1 Diozənꞌ babocobeꞌ yic̱hɉlaꞌaždaꞌolenꞌ canꞌ babocobeꞌ c̱hetoꞌonəꞌ. Antslə goccho len yic̱hɉlaꞌaždaꞌochonꞌ ca beṉəꞌ guat laogüe deꞌen cui bzenagcho c̱he Diozənꞌ.
\v 2 Con gwzoczcho bencho deꞌe malənꞌ canꞌ chsoꞌon yeziquəꞌəchlə beṉəꞌ caꞌ žaꞌ yežlyo nga. Bencho canꞌ cheneꞌe gwxiyeꞌenəꞌ deꞌen chnabiaꞌ deꞌe x̱ioꞌ caꞌ. Ḻegaꞌaquən zɉənyec̱hɉ zɉəmbiꞌin beṉac̱hənꞌ naꞌ chəsəꞌənabiꞌan yic̱hɉlaꞌaždaoꞌ beṉəꞌ caꞌ cui chseꞌene yosoꞌozenag c̱he Diozənꞌ.
\v 3 Caꞌaczənꞌ ben yoguəꞌəcho antslə, bito bzenagcho c̱he Diozənꞌ. Con gwdaczcho bencho con canꞌ gwna laꞌaždaꞌomalchonꞌ, naꞌ bencho con canꞌ gwna xbab c̱hechonꞌ. Deꞌe naꞌanəꞌ gwc̱hoglaogüeꞌen c̱hecho goṉeꞌ chioꞌo castigw zeɉḻicaṉe, canꞌ goneꞌ len yeziquəꞌəchlə beṉac̱h deꞌen cui chosoꞌozenagueꞌ c̱heꞌ.
\v 4–6 Goccho ca beṉəꞌ guat len yic̱hɉlaꞌaždaꞌochonꞌ c̱hedəꞌ bito bzenagcho c̱he Diozənꞌ. Pero Diozənꞌ ḻechguaḻe cheyašəꞌ chežiꞌilažeꞌe chioꞌo naꞌ chacchgüeineꞌ c̱hecho. Naꞌ deꞌen nžiꞌilažəꞌ Diozənꞌ chioꞌo, deꞌe nanꞌ beneꞌ par nic̱h cui yeyeɉcho lao yiꞌ gabiḻənꞌ. Bžin ža ben Diozənꞌ len chioꞌo canꞌ beneꞌ len Cristənꞌ catəꞌən bosbaneꞌeneꞌ ladɉo beṉəꞌ guat caꞌ. Diozənꞌ bocobeꞌ yic̱hɉlaꞌaždaꞌochonꞌ par nic̱h cuich naccho ca beṉəꞌ guat naꞌ beneꞌ ca ndiḻ ngodəꞌəcho Cristənꞌ txen par nic̱h bac̱h chzo chbezcho binḻo canꞌ socho catəꞌən bachiꞌilenchoneꞌ yobanꞌ ganꞌ chiꞌenəꞌ.
\v 7 Beneꞌ caꞌ par nic̱h tyemp deꞌenəꞌ zeꞌe zaꞌ əgwloꞌe catequənꞌ nžiꞌilažeꞌe chioꞌo naꞌ catec deꞌe güenṉəꞌ choneꞌ len chioꞌo ngodəꞌəcho txen len Cristo Jesoꞌosənꞌ.
\v 8-9 Deꞌen nžiꞌilažəꞌ Diozənꞌ chioꞌo beneꞌ par nic̱h chioꞌo chonḻilažəꞌəchoneꞌ bito yeyeɉcho lao yiꞌ gabiḻənꞌ. Con to goclenṉəꞌ beneꞌ caꞌ, caguə por ni c̱he bencho bi deꞌe güenṉəꞌ. Deꞌe naꞌanəꞌ notono chioꞌo cheyaḻəꞌ güeꞌelaoꞌ cuincho deꞌen cui yeyeɉcho lao yiꞌ gabiḻənꞌ.
\v 10 Naꞌ par nic̱h goncho deꞌe güen Diozənꞌ bocobeꞌ yic̱hɉlaꞌaždaꞌochonəꞌ naꞌ beneꞌ par nic̱h ndiḻ ngodəꞌəcho txen len Cristo Jesoꞌosənꞌ. Bsiꞌe xṉezenəꞌ antslə par nic̱h sotezə socho goncho deꞌe güen.
\s1 Cristənꞌ beneꞌ par nic̱h beṉəꞌ Izrael caꞌ naꞌ beṉəꞌ caꞌ cui zɉənaquə beṉəꞌ Izrael ṉiteꞌe binḻo toeꞌ yetoeꞌ
\p
\v 11 Ḻeꞌe gon xbab ca naquə netoꞌ golɉətoꞌ naquətoꞌ beṉəꞌ Izrael zotoꞌ señy deꞌen neꞌ sirconsision naꞌ zeɉen de que Diozənꞌ gaquəleneꞌ netoꞌ canꞌ noneꞌ lyebe. Antslə netoꞌ gwṉetoꞌ c̱he leꞌe golɉle cui nacle beṉəꞌ Izrael: “Leꞌe cui zole señy deꞌen neꞌ sirconsision”. Naꞌ señyənꞌ naquən con to señy deꞌen chosoꞌozo beṉəꞌ lao cuerp c̱hetoꞌonəꞌ.
\v 12 Naꞌ ḻeꞌe gon xbab de que tyemp deꞌen bagwde bito bembiꞌale Cristənꞌ. Bito nacle ṉasyon c̱he Diozənꞌ canꞌ naquə netoꞌ beṉəꞌ Izrael. Bito bi lyebe ben Diozənꞌ par gaquəleneꞌ leꞌe ca lyebe deꞌen beneꞌ len netoꞌ beṉəꞌ Izrael. Bito gwzole lez gaquəlen Diozənꞌ leꞌe naꞌ bito bembiꞌale Diozənꞌ.
\v 13 Antslə bito gwzole binḻo len Diozənꞌ, pero ṉaꞌa leꞌe len netoꞌ bangodəꞌəcho txen len Cristo Jesoꞌosənꞌ naꞌ Diozənꞌ chacleneꞌ chioꞌo c̱hedəꞌ Cristənꞌ bnežɉw cuineꞌ blalɉ xc̱heneꞌenəꞌ por ni c̱he xtoḻəꞌəchonꞌ catəꞌən gwsoꞌoteꞌeneꞌenəꞌ.
\v 14 Naꞌ antslə netoꞌ beṉəꞌ Izrael naꞌ leꞌe cui nacle beṉəꞌ Izrael goccho beṉəꞌ contr tocho yetocho. Pero ṉaꞌa Cristənꞌ babeneꞌ par nic̱h naccho tozə naꞌ zocho binḻo tocho yetocho.
\v 15 Deꞌen bnežɉw cuin Cristənꞌ por ni c̱hecho catəꞌən gwsoꞌoteꞌeneꞌ, bitoch chonən byen cueꞌ yic̱hɉcho par goncho yoguəꞌəḻoḻ canꞌ na ḻei deꞌen bzoɉ deꞌe Moisezənꞌ, ca costombr caꞌ deꞌen nan naꞌ bichlə deꞌen chonən mendad goncho. Yoguəꞌ chioꞌo chonḻilažəꞌəcho Cristənꞌ beneꞌ chioꞌo ca tozə yež, netoꞌ beṉəꞌ Izrael naꞌ leꞌe cui nacle beṉəꞌ Izrael. Deꞌe naꞌanəꞌ zocho binḻo tocho yetocho.
\v 16 Cristənꞌ bnežɉw cuineꞌ gwsoꞌoteꞌeneꞌ ḻeꞌe yag corozənꞌ par bozoeꞌ chioꞌo binḻo len Diozənꞌ. Deꞌe naꞌanəꞌ naccho tozə naꞌ bito chgueꞌi lɉuežɉcho.
\p
\v 17 Par leꞌe cui nacle beṉəꞌ Izrael naꞌ netoꞌ naquətoꞌ beṉəꞌ Izrael, Cristənꞌ bedəyeꞌe dižəꞌ canꞌ gaquə socho binḻo len Diozənꞌ.
\v 18 Naꞌ deꞌen chonḻilažəꞌəcho Cristənꞌ, tozə Spirit c̱he Diozənꞌ chaclenən chioꞌo par nic̱h chac choꞌelencho X̱acho Diozənꞌ dižəꞌ.
\v 19 Deꞌe naꞌanəꞌ leꞌe cui nacle beṉəꞌ Izrael bitoch nacle ca beṉəꞌ zitəꞌ len netoꞌ, sino banacle beṉəꞌ lɉuežɉtoꞌ naꞌ banactele beṉəꞌ famiḻy c̱he Diozənꞌ txen len netoꞌ bagwleɉ Diozənꞌ par naccho lažəꞌ neꞌenəꞌ.
\v 20 Naꞌ yoguəꞌəcho gwxaquəꞌəlebecho ca to yoꞌo de yeɉ. Netoꞌ chsed chzeɉniꞌitoꞌ leꞌe c̱he Cristənꞌ naquətoꞌ ca laneinəꞌ, netoꞌ apostol naꞌ len yeziquəꞌəchlə beṉəꞌ chsoꞌe xtižəꞌ Cristənꞌ. Naꞌ Jesocristənꞌ, gwxaquəꞌəlebeneꞌ ca yeɉ squin nech c̱he to yoꞌo.
\v 21 Naꞌ deꞌen ngodəꞌəcho txen len Cristənꞌ, gwxaquəꞌəlebecho ca yeɉ caꞌ deꞌen zɉəncuaꞌ zɉəngodəꞌən ganꞌ chac yoꞌo de yeɉənꞌ. Zɉəngodəꞌən txen par nic̱h šaꞌ yoꞌonəꞌ naꞌ par nic̱h gaquən gual. Canꞌ naquən gwxaquəꞌəlebecho ca to yoꞌo ganꞌ zo Diozənꞌ, c̱hedəꞌ ngodəꞌəcho txen len X̱ancho Jesocristənꞌ.
\v 22 Netoꞌ len leꞌe txenṉəꞌ naccho ca to yoꞌo ganꞌ zo Diozənꞌ c̱hedəꞌ zo Spirit c̱heꞌenəꞌ ḻoꞌo yic̱hɉlaꞌaždaoꞌ chioꞌo chonḻilažəꞌəcho Cristənꞌ.
\c 3
\s1 Diozənꞌ bseḻeꞌe Apostol Pabənꞌ ɉetix̱ɉuiꞌe xtižeꞌenəꞌ len beṉəꞌ cui zɉənaquə beṉəꞌ Izrael
\p
\v 1 Nadaꞌ Pab diaꞌ ližya nga c̱hedəꞌən əchyix̱ɉuiꞌa xtižəꞌ Cristo Jesoꞌosənꞌ len leꞌe cui nacle beṉəꞌ Izrael.
\v 2 Leꞌe chacbeꞌile c̱hiaꞌ ca naquənꞌ nžiꞌilažəꞌ Diozənꞌ nadaꞌ naꞌ bsiꞌe xṉeze par nic̱h chzeɉniꞌidaꞌ leꞌe xtižeꞌenəꞌ.
\v 3 Chacbeꞌile ca naquə Diozənꞌ bloꞌineꞌ nadaꞌ deꞌen cui no gwṉeze antslə, canꞌ chzoɉaꞌ leꞌe to c̱hopə dižəꞌ ḻeꞌe cart nga.
\v 4 Naꞌ catəꞌ gwlable deꞌen chzoɉaꞌ nga gacbeꞌile de que nadaꞌ cheɉniꞌidaꞌ deꞌen cui no gwṉeze c̱he Cristənꞌ.
\v 5 Antslə Spirit c̱he Diozənꞌ bito bzeɉniꞌin beṉəꞌ deꞌen cui no gwṉeze c̱he Cristənꞌ, pero ṉaꞌa netoꞌ apostol c̱he Diozənꞌ babzeɉniꞌin netoꞌ ḻen, naꞌ ḻeczə babzeɉniꞌin yeziquəꞌəchlə beṉəꞌ chsoꞌe xtižəꞌ Cristənꞌ. Babzeɉniꞌin netoꞌ bagwleɉ Diozənꞌ par naquətoꞌ lažəꞌ neꞌenəꞌ.
\v 6 Babzeɉniꞌin netoꞌ de que notəꞌətezcho šə bacheɉḻeꞌecho c̱he dižəꞌ güen dižəꞌ cobə deꞌen chzeɉniꞌin c̱he Cristənꞌ, nachənꞌ bangodəꞌəcho txen len Cristo Jesoꞌosənꞌ. Deꞌe naꞌanəꞌ leꞌe cui nacle beṉəꞌ Izrael naꞌ len netoꞌ beṉəꞌ Izrael txenṉəꞌ siꞌicho deꞌen goṉəch Diozənꞌ chioꞌo naccho xiꞌiṉeꞌ, naꞌ txenṉəꞌ ngodəꞌəcho naccho ca tozə famiḻy, naꞌ txenṉəꞌ chaclen Diozənꞌ chioꞌo canꞌ babeneꞌ lyebe.
\v 7 Diozənꞌ gwleɉeꞌ nadaꞌ len yeḻəꞌ guac c̱heꞌenəꞌ par nic̱h əchyix̱ɉuiꞌa dižəꞌ güen dižəꞌ cobənəꞌ. Naꞌ banoꞌe c̱hiaꞌ chyix̱ɉuiꞌan c̱hedəꞌ nžiꞌilažeꞌe nadaꞌ.
\v 8 Nadaꞌ chacdaꞌ ni latəꞌəzə cui zacaꞌa entr chioꞌo bagwleɉ Diozənꞌ par naccho lažəꞌ neꞌenəꞌ, pero Diozənꞌ noꞌe c̱hiaꞌ chyix̱ɉueꞌidaꞌ beṉəꞌ cui zɉənaquə beṉəꞌ Izrael catec deꞌe güen juisy goneꞌ len yoguəꞌəḻoḻ chioꞌo chonḻilažəꞌəcho Cristənꞌ. Tant deꞌe šaoꞌ deꞌe güen gaquə c̱hecho, cabi bi de deꞌe saquəꞌəlebe deꞌe güen deꞌen goneꞌ len chioꞌo.
\v 9 Diozənꞌ beneꞌ yoguəꞌəḻoḻ beṉəꞌ, yoguəꞌəḻoḻ bia chaš, naꞌ yoguəꞌəḻoḻ deꞌe de. Naꞌ dezd ža gwlasdaꞌote bito beꞌ Diozənꞌ latɉə yesəꞌəṉeze beṉac̱hənꞌ binꞌ babžieꞌ biaꞌ gaquə. Pero ṉaꞌa noꞌe c̱hiaꞌ chzeɉniꞌidaꞌ yoguəꞌəḻoḻ beṉəꞌ de que bachac canꞌ nžieꞌ biaꞌ.
\v 10 Naꞌ Diozənꞌ chloꞌineꞌ angl əblao caꞌ naꞌ angl gwnabiaꞌ caꞌ beṉəꞌ nitəꞌ yobanəꞌ de que napeꞌ deꞌe zan cḻas yeḻəꞌ sinꞌ, chloꞌineꞌ ḻegaꞌaqueꞌ deꞌe güenṉəꞌ deꞌen choneꞌ len chioꞌo ncodəꞌ lɉuezɉcho choꞌelaꞌocho Cristənꞌ.
\v 11 Choneꞌ canꞌ nžieꞌ biaꞌ dezd nechte catəꞌən gwc̱hoglaogüeꞌen seḻeꞌe X̱ancho Jesocristənꞌ.
\v 12 Naꞌ chioꞌo ngodəꞌəcho txen len Cristənꞌ bito chžebcho Diozənꞌ, sino chebeicho ṉezecho de que chac choꞌelencho Diozənꞌ dižəꞌ c̱hedəꞌ chonḻilažəꞌəcho Cristənꞌ.
\v 13 Ḻaꞌaṉəꞌəczə diaꞌ ližya nga laogüe deꞌen bagwdix̱ɉueꞌidaꞌ leꞌe dižəꞌ güen dižəꞌ cobə deꞌen chzeɉniꞌin c̱he Cristənꞌ, chatəꞌəyoidaꞌ leꞌe bito yeyašəꞌəlažəꞌəle ca naquə nga chyiꞌ chzacaꞌa. Ḻeyebei c̱hedəꞌ chac c̱hiaꞌ caꞌ par nic̱h chaquəlenaꞌ leꞌe.
\s1 Cristənꞌ ḻechguaḻe chaqueneꞌ c̱he chioꞌo chonḻilažəꞌəchoneꞌ
\p
\v 14 Catəꞌ chonaꞌ xbab ca güenṉəꞌ baben Diozənꞌ par nic̱h nacle tozə len netoꞌ beṉəꞌ Izrael, chzo xibaꞌ chonaꞌ orasyon lao X̱a X̱ancho Jesocristənꞌ.
\v 15 Ḻeꞌenəꞌ bx̱ieꞌ yoguəꞌ famiḻy c̱he chioꞌo zocho lao yežlyo nga naꞌ c̱he beṉəꞌ žaꞌ yobanꞌ.
\v 16 Chṉabaꞌ lao X̱acho Diozənꞌ goṉ Spirit c̱heꞌenəꞌ fuers balor par yic̱hɉlaꞌaždaꞌolenꞌ par nic̱h gonḻe yoguəꞌəḻoḻ canꞌ cheneꞌeneꞌ. Naꞌ Dioz naꞌanəꞌ goneꞌ par nic̱h gatəꞌ fuers balor c̱he yic̱hɉlaꞌaždaꞌolenꞌ c̱hedəꞌ naqueꞌ ḻeꞌezelaogüe beṉəꞌ zaqueꞌe naꞌ napeꞌ ḻeꞌezelaogüe yeḻəꞌ guac xen.
\v 17 Chṉabaꞌ soczle gonḻilažəꞌəle Cristənꞌ par nic̱h sotezə soeꞌ len leꞌe. Naꞌ ḻeczə caꞌ leꞌe sotezə sole gaquele c̱he Diozənꞌ canꞌ cheyaḻəꞌ gaquele c̱heꞌ, naꞌ gaquele c̱he lɉuežɉle canꞌ cheyaḻəꞌ gaquele c̱hegaꞌaqueꞌ.
\v 18 Chṉabaꞌ deꞌe quinga par nic̱h leꞌe txen len yeziquəꞌəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ šeɉniꞌile de que ḻechguaḻe chaque Cristənꞌ c̱he chioꞌo. Naꞌ yeḻəꞌ chaque c̱heꞌenəꞌ len chioꞌo gwxaquəꞌəleben caczə ganꞌ nžilɉw nisdaꞌonəꞌ, pero mazəchlə canꞌ nžilɉw nisdaꞌonəꞌ chaqueneꞌ c̱hecho. Naꞌ ṉezecho de que toṉchgua de yežlyonꞌ, pero mazəchlə canꞌ denṉəꞌ chaque Cristənꞌ c̱hecho. Naꞌ ḻechguaḻe zitɉw minṉəꞌ, pero mazəchlə ca zitɉonꞌ naquənṉəꞌ chaque Cristənꞌ c̱hecho. Ḻeꞌegatezə canꞌ yobanꞌ ḻechguaḻe sibə zen, pero mazəchlə ca sibənꞌ zenṉəꞌ chaque Cristənꞌ c̱hecho.
\v 19 Chṉabaꞌ gon Diozənꞌ par nic̱h əṉezele de que Cristənꞌ chaquecheneꞌ c̱hecho mazəchlə ca deꞌen chon notəꞌətezcho xbabənꞌ. Naꞌ ḻeczə gon Diozənꞌ par nic̱h gaquə yic̱hɉlaꞌaždaꞌolenꞌ tozə canꞌ naquə yic̱hɉlaꞌaždaꞌogüeꞌenəꞌ par nic̱h caꞌ gacle canꞌ naqueꞌenəꞌ.
\p
\v 20 Diozənꞌ chac choneꞌ yoguəꞌəḻoḻ. Deꞌe naꞌanəꞌ chac choneꞌ mazəchlə ca deꞌen chṉabechoneꞌ o deꞌen choncho xbab goneꞌenəꞌ. Naꞌ choneꞌ par nic̱h Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ chaclenən chioꞌo len yeḻəꞌ guac c̱heꞌenəꞌ.
\v 21 Chioꞌo ncodəꞌ lɉuežɉcho choꞌelaꞌocho Cristənꞌ, ḻedoyeꞌelaꞌoch Diozənꞌ ṉaꞌa naꞌ zeɉḻicaṉe c̱hedəꞌ ngodəꞌəcho txen len Cristo Jesoꞌosənꞌ. Naꞌ canꞌ gonšgaczcho.
\c 4
\s1 Spirit c̱he Diozənꞌ babeyonən yic̱hɉlaꞌaždaꞌochonꞌ tozə
\p
\v 1 Nadaꞌ diaꞌ ližya nga c̱hedəꞌ əchyix̱ɉuiꞌa xtižəꞌ X̱ancho Jesocristənꞌ. Bagwleɉ Diozənꞌ leꞌe par nacle xiꞌiṉeꞌ canꞌ gwleɉeꞌ netoꞌ. Deꞌe naꞌanəꞌ chatəꞌəyoidaꞌ leꞌe šeɉšgaczle gonḻe canꞌ cheyaḻəꞌ gon yoguəꞌ chioꞌo bagwleɉ Diozənꞌ par naccho xiꞌiṉeꞌ.
\v 2 Chatəꞌəyoidaꞌ leꞌe bito gon cuinḻe xen. Ḻegac beṉəꞌ gax̱ɉwlažəꞌ naꞌ ḻegapə yeḻəꞌ chxenḻažəꞌ len beṉəꞌ yoblə. Chatəꞌəyoidaꞌ leꞌe gaque c̱he lɉuežɉle naꞌ gwdele caꞌaḻə šə bi chac c̱hele entr tole yetole.
\v 3 Babeyon Spirit c̱he Diozənꞌ yic̱hɉlaꞌaždaꞌolenꞌ tozə. Naꞌ chatəꞌəyoidaꞌ leꞌe ḻeso binḻo tole yetole par nic̱h sotezə sole gaquə yic̱hɉlaꞌaždaꞌolenꞌ tozə.
\v 4 Yoguəꞌ chioꞌo choꞌelaꞌocho Diozənꞌ naccho ca tozə famiḻy. Naꞌ tozə Spirit c̱he Diozənꞌ zon ḻoꞌo yic̱hɉlaꞌaždaoꞌ yoguəꞌəcho, naꞌ tozə canꞌ zocho lez gon Diozənꞌ güen len chioꞌo c̱hedəꞌ bagwleɉeꞌ yoguəꞌəcho par naccho xiꞌiṉeꞌ.
\v 5 Tozə X̱ancho Jesocristənꞌ naquə, naꞌ tozə canꞌ chonḻilažəꞌəchoneꞌ, naꞌ tozə canꞌ zeɉen deꞌen gwchoacho nisənꞌ.
\v 6 Tozə Diozənꞌ zo benꞌ naquə X̱a yoguəꞌ chioꞌo. Ḻeꞌenəꞌ chnabiꞌe yoguəꞌəcho, naꞌ chc̱hineꞌ yoguəꞌəcho par choncho xšineꞌenəꞌ, naꞌ zoczeꞌ len yoguəꞌətecho.
\p
\v 7 Naꞌ segon canꞌ chaclen Cristənꞌ chioꞌo, noꞌe c̱hecho gwde gwdelə deꞌe gaquə gon to tocho.
\v 8 Chac canꞌ nyoɉ deꞌen gwna Diozənꞌ c̱he Cristənꞌ:
\q1 Catəꞌən beyepeꞌ yobanꞌ beneꞌ deꞌe x̱ioꞌ caꞌ gan,
\q1 naꞌ beꞌe c̱he beṉac̱hənꞌ gwde gwdelə deꞌe gaquə soꞌon to togaꞌaqueꞌ.
\p
\v 9 Naꞌ deꞌen gwneꞌ: “Beyepeꞌ yobanꞌ”, zeɉen de que betɉeꞌ naꞌ bḻeꞌe lao yežlyo nga antslə zeꞌe yeyepeꞌ yobanəꞌ.
\v 10 Naꞌ benꞌ betɉənꞌ ḻeczə ḻeꞌenəꞌ beyepeꞌ yobanꞌ ganꞌ zo Diozənꞌ. Deꞌe naꞌanəꞌ zoeꞌ chnabiꞌe doxenḻə.
\v 11 Ḻeꞌegatezə ḻeꞌenəꞌ noꞌe c̱he baḻə chioꞌo par nic̱h naccho apostol, naꞌ baḻcho noꞌe c̱hecho chyix̱ɉueꞌecho bi deꞌen bagwneꞌ chioꞌo. Yebaḻcho noꞌe c̱hecho chɉeꞌecho dižəꞌ güen dižəꞌ cobə deꞌen chzeɉniꞌin c̱heꞌ. Yebaḻcho noꞌe c̱hecho chgüia chyecho beṉəꞌ chsoꞌelaoꞌ ḻeꞌ naꞌ chsed chloꞌigaꞌaquechoneꞌ.
\v 12 Cristənꞌ noꞌe c̱hecho chaclen lɉuežɉ chioꞌo bagwleɉ Diozənꞌ par naccho lažəꞌ neꞌenəꞌ par nic̱h yoguəꞌəcho choncho xšineꞌenəꞌ naꞌ zda chonḻilažəꞌəchcho Cristənꞌ, chioꞌo naccho ca famiḻy c̱heꞌ.
\v 13 Naꞌ zocho chaclen lɉuežɉcho tocho yetocho par nic̱h gaccho tozə gonḻilažəꞌəcho Xiꞌiṉ Diozənꞌ naꞌ gombiꞌachoneꞌ. Canaꞌ gacyaṉəꞌəcho canꞌ cheyaḻəꞌ gaccho, gaccho beṉəꞌ šaoꞌ beṉəꞌ güen canꞌ naquə Cristənꞌ.
\v 14 Bito cheyaḻəꞌ šoꞌocho xbab ca c̱he to bidaoꞌ, šeɉcho qui šeɉcho caꞌaḻə ṉaocho to to yeḻəꞌ cheɉṉiꞌalažəꞌ deꞌen chsaꞌalɉlažəꞌ beṉəꞌ güenḻažəꞌ naꞌ beṉəꞌ gwxiyeꞌ caꞌ par chəsəꞌəx̱oayagueꞌ chioꞌo.
\v 15 Cheyaḻəꞌ ṉaocho deꞌen naquə deꞌe ḻi, naꞌ zeɉḻi gaque c̱he lɉuežɉcho tocho yetocho. Cheyaḻəꞌ šeɉcho gaquəchcho beṉəꞌ šaoꞌ beṉəꞌ güen canꞌ naquə Cristənꞌ benꞌ chnabiaꞌ chioꞌo.
\v 16 Ca naquə cuerp c̱hechonꞌ, to to partənꞌ ngodəꞌən naꞌ nox̱əꞌ lɉuežɉe len beləꞌ naꞌ len bin deꞌen ncaꞌan nic̱h to to partənꞌ chonən žin c̱he c̱hei naꞌ nic̱h cuerpənꞌ naquən gual. Caꞌaczənꞌ chioꞌo choꞌelaꞌocho Cristənꞌ ngodəꞌəcho txen tocho yetocho. Naꞌ catəꞌ to tocho choncho deꞌen noeꞌ Diozənꞌ c̱hecho goncho, nachənꞌ Cristənꞌ choneꞌ par nic̱h yoguəꞌəcho txen zda chaquəchcho beṉəꞌ šaoꞌ beṉəꞌ güen naꞌ zda chaquechecho c̱he lɉuežɉcho.
\s1 Diozənꞌ babocobeꞌ yic̱hɉlaꞌaždaoꞌ chioꞌo chonḻilažəꞌəchoneꞌ
\p
\v 17 Ṉaꞌa əchniaꞌ leꞌe deꞌen non X̱ancho Jesocristənꞌ mendad əgwzeɉniꞌidaꞌ leꞌe de que bito cheyaḻəꞌ goncho canꞌ chsoꞌon beṉəꞌ caꞌ cui zɉənombiaꞌ Diozənꞌ. Xbab c̱hegaꞌaqueꞌenəꞌ bito bi zaquəꞌən.
\v 18 Nc̱hoḻ yic̱hɉlaꞌaždaꞌogaꞌaqueꞌenəꞌ. Naꞌ laogüe deꞌen zɉənaqueꞌ beṉəꞌ godenag, bito chseꞌeɉniꞌineꞌ binꞌ chazlažəꞌ Diozənꞌ. Deꞌe naꞌanəꞌ bitobi yeḻəꞌ mban zeɉḻicaṉe c̱hegaꞌaqueꞌ de ca naquə deꞌen choṉ Diozənꞌ chioꞌo.
\v 19 Bito bi ztoꞌ zɉənombiꞌe c̱he deꞌe malənꞌ chsoꞌoneꞌ. Chsoꞌontezeꞌ bitəꞌətezə deꞌe mal deꞌen nan soꞌoneꞌ. Do tyempte con chsoꞌelažeꞌe chsoꞌoneꞌ yoguəꞌ cḻaste yeḻəꞌ ztoꞌ.
\v 20 Leꞌe ṉezele de que Cristənꞌ bito cheneꞌeneꞌ goncho deꞌen nac caꞌ.
\v 21 Laꞌ babzenagle c̱he dižəꞌ ḻi deꞌen chzeɉniꞌin c̱he Jesoꞌosənꞌ naꞌ babletɉeꞌ xbabənꞌ yic̱hɉlaꞌaždaꞌolenꞌ.
\v 22 Antslə gwdacho bencho con canꞌ na laꞌaždaꞌomalchonꞌ. Laꞌaždaꞌomalchonꞌ chebein deꞌe malənꞌ naꞌ deꞌe naꞌanəꞌ chx̱oayaguən chioꞌo par nic̱h goncho deꞌe mal canꞌ chzelažəꞌənṉəꞌ. Pero baṉezele de que cheyaḻəꞌ cueɉyic̱hɉcho cuich gwzenagcho c̱he laꞌaždaꞌomalchonꞌ.
\v 23 Naꞌ ḻeczə ṉezele de que cheyaḻəꞌ gwšaꞌacho xbab deꞌen choncho ḻoꞌo yic̱hɉlaꞌaždaꞌochonꞌ.
\v 24 Cheyaḻəꞌ güeꞌecho latɉə yocobə Diozənꞌ yic̱hɉlaꞌaždaꞌochonꞌ par nic̱h sotezə socho goncho deꞌe güen canꞌ chon ḻeꞌ, naꞌ par nic̱h gaccho beṉəꞌ laꞌaždaoꞌ xiꞌilažəꞌ canꞌ naquə ḻeꞌ. Goncho caꞌ c̱hedəꞌ banombiꞌacho xtižəꞌ Diozənꞌ deꞌen naquə deꞌe ḻi.
\p
\v 25 Deꞌe naꞌanəꞌ bitoch gonḻažəꞌəcho sino güeꞌelen lɉuežɉcho dižəꞌ ḻi c̱hedəꞌ ncodəꞌ lɉuežɉcho naccho ca tozə famiḻy.
\p
\v 26 Catəꞌ chžaꞌacho bito cheyaḻəꞌ goncho deꞌe mal. Cheyaḻəꞌ yeyacxenḻažəꞌəcho lgüegwzə lao yeḻəꞌ chžaꞌa c̱hechonꞌ, bito žaꞌacho do ža.
\v 27 Bito güeꞌecho latɉə ṉabiaꞌ gwxiyeꞌenəꞌ chioꞌo par goncho deꞌe mal.
\p
\v 28 Šə nocho naccho beṉəꞌ bguan, bitoch cheyaḻəꞌ cuancho. Cheyaḻəꞌ so tacho goncho žin deꞌen naquə deꞌe güen, par nic̱h gatəꞌ deꞌe əgwnežɉwcho beṉəꞌ chyažɉ chc̱hine.
\p
\v 29 Bito güeꞌecho dižəꞌ zban dižəꞌ deꞌe cui zaqueꞌe. Cheyaḻəꞌ güeꞌecho dižəꞌ güen dižəꞌ deꞌe zaqueꞌe par gaquəlen latəꞌən beṉəꞌ əseꞌene ḻen. Güeꞌecho dižəꞌ deꞌe gaquəlen beṉəꞌ lɉuežɉcho caꞌ par nic̱h soꞌonḻilažəꞌəcheꞌ Jesocristənꞌ.
\v 30 Naꞌ bito goncho ca so Spirit c̱he Diozənꞌ trist, laꞌ zo Spiritənꞌ ḻoꞌo yic̱hɉlaꞌaždaꞌochonꞌ par nic̱h ṉezecho gwžin ža goṉ Diozənꞌ chioꞌo cuerp cobənꞌ naꞌ goneꞌ par nic̱h gaquə yic̱hɉlaꞌaždaꞌochonꞌ cayaṉəꞌən cheneꞌeneꞌ.
\p
\v 31 Cheyaḻəꞌ cueɉyic̱hɉcho yoguəꞌ deꞌe malənꞌ. Bitoch coꞌolažəꞌəcho. Bitoch əloccho. Bitoch əžaꞌacho. Bitoch güeꞌecho dižəꞌ loc dižəꞌ lžeɉ. Bitoch əgwžia gwnitəꞌəcho beṉəꞌ. Naꞌ bitoch gaccho beṉəꞌ xiꞌa.
\v 32 Cheyaḻəꞌ goncho güen len lɉuežɉcho naꞌ ḻeczə cheyaḻəꞌ yeyašeꞌe lɉuežɉcho tocho yetocho. Cristənꞌ bagwdixɉueꞌ xtoḻəꞌəchonꞌ par nic̱h babeziꞌixen Diozənꞌ c̱hecho. Naꞌ canꞌ babeziꞌixeneꞌ c̱hecho, caꞌaczənꞌ cheyaḻəꞌ yeziꞌixen c̱he lɉuežɉcho tocho yetocho catəꞌ bi deꞌen chsoꞌone beṉəꞌ lɉuežɉchonꞌ chioꞌo.
\c 5
\s1 Chioꞌo naccho xiꞌiṉ Dioz cheyaḻəꞌ goncho canꞌ chon Diozənꞌ
\p
\v 1 Ṉaꞌa ža cheyaḻəꞌ goncho canꞌ chon Diozənꞌ c̱hedəꞌ banaccho xiꞌiṉeꞌ naꞌ chaqueneꞌ c̱hecho.
\v 2 Cheyaḻəꞌ sotezcho gaquecho c̱he lɉuežɉcho canꞌ chaqueꞌ Cristənꞌ c̱hecho. Laꞌ por ni c̱hechonəꞌ bnežɉw cuineꞌ gwdixɉueꞌ xtoḻəꞌəchonꞌ catəꞌən gwsoꞌoteꞌeneꞌenəꞌ, naꞌ chebei Diozənꞌ deꞌen beneꞌ caꞌ.
\p
\v 3 Bito cheyaḻəꞌ coꞌo x̱tocho naꞌ bito cheyaḻəꞌ cueɉyic̱hɉ beꞌen c̱hecho o noꞌol c̱hecho par solencho beṉəꞌ yoblə, naꞌ bito goncho bichlə deꞌe yeḻəꞌ ztoꞌ. Naꞌ cuat selažəꞌəczcho goncho deꞌe mal caꞌ deꞌen zɉənac caꞌ. Bagwleɉ Diozənꞌ chioꞌo par naccho lažəꞌ neꞌenəꞌ.
\v 4 Naꞌ deꞌen banombiꞌacho Diozənꞌ bito cheyaḻəꞌ goncho deꞌen naquə deꞌe yeḻəꞌ ztoꞌ yeḻəꞌ zlaꞌan naꞌ bito güeꞌecho dižəꞌ zban naꞌ nic güeꞌecho dižəꞌ deꞌe cui ncaꞌa xṉeze. Deꞌen cheyaḻəꞌ goncho, güeꞌecho yeḻəꞌ chox̱cwlen c̱he Diozənꞌ.
\v 5 Baṉezecho de que beꞌenəꞌ chgoꞌo x̱toi naꞌ beꞌenəꞌ chbeɉyic̱hɉ noꞌol c̱hei o beꞌen c̱heꞌ par chzoleneꞌ beṉəꞌ yoblə, naꞌ ḻeczə caꞌ beꞌenəꞌ chzelažəꞌ gon bichlə deꞌe yeḻəꞌ ztoꞌ, ni to beṉəꞌ caꞌ bito bi deꞌe güen yesəꞌəziꞌe ca deꞌen siꞌ chioꞌo choꞌecho latɉə chnabiaꞌ Cristənꞌ naꞌ Diozənꞌ chioꞌo. Naꞌ šə no chebeineꞌ choneꞌ deꞌe yeḻəꞌ ztoꞌ, tozəczə ca mal naquən len deꞌen chsoꞌon beṉəꞌ chseꞌeɉṉiꞌalažəꞌ lguaꞌa lsaquəꞌ.
\v 6 Bito güeꞌecho latɉə no əx̱oayag chioꞌo len dižəꞌ güenḻažəꞌ. Diozənꞌ gwnežɉueꞌ castigw zeɉḻicaṉe c̱he beṉəꞌ caꞌ cui chosoꞌozenagueꞌ c̱heꞌ, chsoꞌelaꞌozecheꞌ chsoꞌoneꞌ deꞌe mal caꞌ bagwniaꞌ caꞌ.
\v 7 Bito gongaꞌacchoneꞌ txen goncho deꞌe malənꞌ.
\p
\v 8 Antslənꞌ nc̱hoḻ yic̱hɉlaꞌaždaꞌochonꞌ, pero ṉaꞌa bayoꞌo beꞌeniꞌ c̱he X̱ancho Jesocristənꞌ ḻoꞌo yic̱hɉlaꞌaždaꞌochonꞌ. Deꞌe naꞌanəꞌ ḻedoyen deꞌe güenṉəꞌ canꞌ cheyaḻəꞌ gon chioꞌo bayoꞌo beꞌeniꞌ c̱he X̱anchonꞌ ḻoꞌo yic̱hɉlaꞌaždaꞌochonꞌ.
\v 9 Naꞌ deꞌen bayoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌochonꞌ goncho deꞌe güen naꞌ goncho deꞌe zda ḻicha naꞌ güeꞌecho dižəꞌ ḻi.
\v 10 Naꞌ cheyaḻəꞌ gwsedcho par əṉezecho binꞌ chazlažəꞌ X̱anchonꞌ nic̱h gonchon.
\v 11 Bito goncho txen len beṉəꞌ caꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ naꞌ chsoꞌoneꞌ deꞌe cui bi zaquəꞌən. Cheyaḻəꞌ yeꞌegaꞌacchoneꞌ de que deꞌe malənꞌ chsoꞌoneꞌ.
\v 12 Naꞌ ca deꞌen chsoꞌon beṉəꞌ caꞌ do bgašəꞌəzə, naquən deꞌe cheyaḻəꞌ gaquecho ztoꞌ güeꞌecho dižəꞌ c̱hei.
\v 13 Pero chioꞌo yoꞌo beꞌeniꞌ c̱he Diozənꞌ ḻoꞌo yic̱hɉlaꞌaždaꞌochonꞌ, catəꞌ yeꞌegaꞌacchoneꞌ de que deꞌe malənꞌ chsoꞌoneꞌ, yesyəꞌəyacbeꞌineꞌ de que ḻe malənꞌ chsoꞌoneꞌ. Beꞌeniꞌ c̱he Dioz naꞌanəꞌ chloꞌin chioꞌo šə deꞌen choncho naquən deꞌe güen o šə naquən deꞌe mal.
\v 14 Deꞌe naꞌanəꞌ cheꞌecho beṉəꞌ:
\q1 Nacle len yic̱hɉlaꞌaždaꞌolenꞌ ca beṉəꞌ guat deꞌen cui chzenagle c̱he Diozənꞌ.
\q1 Deꞌe naꞌanəꞌ ḻeꞌe gwzenag c̱heꞌ par nic̱h Cristənꞌ goṉeꞌ leꞌe beꞌeniꞌ c̱heꞌenəꞌ.
\p
\v 15 Cheyaḻəꞌ ggüiacho naquənꞌ chzo chdacho. Cui tacho ca beṉəꞌ cuiczə nacbeꞌi sino tacho ca chda beṉəꞌ cheɉniꞌi.
\v 16 Do tyempte cheyaḻəꞌ goncho deꞌe güen, c̱hedəꞌ tyemp nga ṉaꞌa zan beṉəꞌ nitəꞌ chsoꞌoneꞌ deꞌe mal.
\v 17 Bito goncho ca beṉəꞌ cui bi xbab nyeꞌ. Cheyaḻəꞌ šeɉniꞌicho naꞌ goncho canꞌ cheneꞌe X̱ancho Jesocristənꞌ.
\v 18 Bito gaccho beṉəꞌ güeꞌe zo beṉəꞌ cui bi yeḻəꞌ ztoꞌ nombiaꞌ. Deꞌen cheyaḻəꞌ gonchonꞌ, güeꞌecho latɉə ṉabiaꞌ Spirit c̱he Diozənꞌ yic̱hɉlaꞌaždaꞌochonꞌ.
\v 19 Catəꞌ chdopə chžagcho txen cheyaḻəꞌ goḻcho no imno naꞌ gwlabcho no salmo naꞌ goḻcho no deꞌen na Spirit c̱he Diozənꞌ goḻcho. Ḻeczə goḻcho ḻoꞌo laꞌaždaꞌochonꞌ par güeꞌelaꞌocho X̱ancho Jesocristənꞌ.
\v 20 Cheyaḻəꞌ güeꞌecho yeḻəꞌ chox̱cwlen c̱he X̱acho Diozənꞌ zeɉḻi bitəꞌətezə deꞌe chac c̱hecho naꞌ lao yoguəꞌəḻoḻ deꞌen babeṉeꞌ chioꞌo, c̱hedəꞌ laꞌ chonḻilažəꞌəcho X̱ancho Jesocristənꞌ.
\s1 To tocho cheyaḻəꞌ solencho famiḻy c̱hecho canꞌ chazlažəꞌ Cristənꞌ
\p
\v 21 Ca deꞌen napcho Diozənꞌ respet cheyaḻəꞌ əgwzex̱ɉw yic̱hɉcho tocho yetocho.
\p
\v 22 Naꞌ ca naquə leꞌe noꞌolə leꞌe nšagnaꞌale, ḻeꞌe gwzenag c̱he beꞌen c̱hele. Šə gonḻe caꞌ lenczə c̱he X̱ancho Jesocristənꞌ chzenagle.
\v 23 Ḻeꞌe gwzenag c̱he beꞌen c̱he to tole c̱hedəꞌ ḻegaꞌaqueꞌ chəsəꞌənabiꞌe leꞌe ca Cristənꞌ chnabiꞌe chioꞌo choꞌelaꞌochoneꞌ. Chioꞌo gwxaquəꞌəlebecho ca to to part c̱he cuerp c̱he Cristənꞌ naꞌ ḻeꞌenəꞌ babebeɉeꞌ chioꞌo xniꞌa deꞌe malənꞌ.
\v 24 Naꞌ ca naquə chioꞌo choꞌelaꞌocho Cristənꞌ cheyaḻəꞌ gwzenagcho c̱heꞌ, ḻeꞌegatezə caꞌ leꞌe noꞌolə leꞌe nšagnaꞌale, ḻegwzenag yoguəꞌ binꞌ na beꞌen c̱he to tole.
\p
\v 25 Naꞌ leꞌe beṉəꞌ byo leꞌe nšagnaꞌale, ḻeꞌe gaque c̱he noꞌol c̱helenꞌ to tole canꞌ chaque Cristənꞌ c̱he yoguəꞌ chioꞌo choꞌelaꞌochoneꞌ naꞌ bnežɉw cuineꞌ por ni c̱hecho catəꞌən gwsoꞌoteꞌeneꞌ.
\v 26 Bnežɉw cuineꞌ par nic̱h beyaꞌa beyibeꞌ laꞌaždaoꞌ chioꞌo chonḻilažəꞌəchoneꞌ. Naꞌ catəꞌ gwchoacho nisənꞌ beꞌecho dižəꞌ gwnacho de que chonḻilažəꞌəcho Cristənꞌ. Deꞌe naꞌanəꞌ beneꞌ laꞌaždaꞌochonꞌ xiꞌilažəꞌ.
\v 27 Naꞌ beneꞌ par nic̱h əžincho laogüeꞌenəꞌ sin cui bi manch daꞌ əchen laꞌaždaꞌochonꞌ, naꞌ sin cui bi xtoḻəꞌəcho de, naꞌ nic bichlə deꞌe mal yoꞌo yaz ḻoꞌo laꞌaždaꞌochonəꞌ deꞌe cui chazlažəꞌ Diozənꞌ. Cristənꞌ beneꞌ par nic̱h chioꞌo choꞌelaꞌochoneꞌ gaquə laꞌaždaꞌochonꞌ xiꞌilažəꞌ naꞌ bito bi xtoḻəꞌəcho gatəꞌ.
\v 28 Canꞌ nžiꞌi Cristənꞌ chioꞌo, caꞌaczənꞌ leꞌe beṉəꞌ byo leꞌe nšagnaꞌale cheyaḻəꞌ žiꞌile noꞌol c̱he to tole canꞌ nžiꞌile cuerp c̱helenꞌ. Benꞌ nžiꞌi xoꞌoleꞌ nžiꞌiczeꞌ cuineꞌ ca deꞌen choneꞌ caꞌ.
\v 29 Notono zo beṉəꞌ chgueꞌineꞌ cuerp c̱heꞌenəꞌ sino nžiꞌineꞌen naꞌ chapəšiꞌen, canꞌ chon Cristənꞌ nžiꞌineꞌ chioꞌo naꞌ chapəšiꞌe chioꞌo choꞌelaꞌochoneꞌ.
\v 30 Cristənꞌ nžiꞌineꞌ chioꞌo naꞌ chapəšiꞌe chioꞌo c̱hedəꞌ laꞌ to to chioꞌo gwxaquəꞌəlebecho ca to to part c̱he cuerp c̱heꞌenəꞌ, ca žit deꞌen yoꞌe naꞌ ca xpeleꞌenəꞌ.
\v 31 Naꞌ nyoɉczə Xtižəꞌ Diozənꞌ nan: “Beṉəꞌ byonəꞌ ḻeꞌe x̱axneꞌe par əgwšagneꞌe siꞌe to noꞌolə naꞌ əsaꞌaqueꞌ tozə.”
\v 32 Deꞌen babzoɉaꞌ nga naquən deꞌe cui no gwṉeze antslə naꞌ naquən deꞌe žialao xen par chioꞌo. Naꞌ zeɉen de que chioꞌo choꞌelaꞌocho Cristənꞌ naccho tozə len ḻeꞌenəꞌ.
\v 33 Naꞌ ḻeczə zeɉen de que to to leꞌe beṉəꞌ byo cheyaḻəꞌ gaquele c̱he noꞌol c̱helenꞌ canꞌ chaquele c̱he cuinḻe. Naꞌ ḻeczə caꞌ leꞌe noꞌolə leꞌe nšagnaꞌale, to tole cheyaḻəꞌ gaple respet beꞌen c̱helenꞌ.
\c 6
\p
\v 1 Leꞌe bidaoꞌ biꞌi xcuidəꞌ, ḻeꞌe əgwzenag c̱he x̱axnaꞌale. Gonḻe caꞌ c̱hedəꞌ leꞌe len netoꞌ ngodəꞌəcho txen len X̱ancho Cristənꞌ naꞌ naquəczən deꞌe cheyaḻəꞌ gonḻenꞌ.
\v 2-3 Naꞌ deꞌe nga ben Diozənꞌ mendad goncho gwneꞌ: “Ḻegwnežɉo yeḻəꞌ balaꞌaṉ x̱axnaꞌale. Naꞌ šə gonḻe caꞌ gaquə güen c̱hele naꞌ gaquə banḻe sša lao yežlyo nga.” Naꞌ entr yoguəꞌ deꞌe caꞌ beneꞌ mendad goncho deꞌe nganꞌ naquə deꞌe žialao deꞌen nsaꞌ lyebe, nan de que gaquə güen c̱he beṉəꞌ chosoꞌozenagueꞌ c̱hei naꞌ de que gaquə yesəꞌəbaneꞌ sša lao yežlyonꞌ.
\p
\v 4 Naꞌ leꞌe x̱axnaꞌ bidaoꞌ, ḻeyosgol ḻeyosc̱haꞌo biꞌi c̱hele caꞌ par yosoꞌozenagboꞌ c̱he X̱ancho Cristənꞌ. Bito con gonḻe ca yesəꞌəžaꞌa yesəꞌəlocboꞌ, pero ḻegüeꞌegaꞌacboꞌ consejw šaoꞌ consejw güen.
\p
\v 5 Naꞌ leꞌe mos ḻegwzenag yoguəꞌəḻoḻ canꞌ na x̱an žinṉəꞌ naꞌ ḻegapəgaꞌaqueꞌ respet. Naꞌ ḻegon xšingaꞌaqueꞌenəꞌ do yic̱hɉ do lažəꞌəle. Ḻegon caꞌ c̱hedəꞌ ḻeczə c̱he Crist nanꞌ chzenagle catəꞌən chzenagle c̱hegaꞌaqueꞌ.
\v 6 Bito gonḻeile x̱an žinṉəꞌ gonḻizle ca beṉəꞌ chonchgua žinṉəꞌ catəꞌəzənꞌ chgüieꞌ leꞌe. Ḻegon žinṉəꞌ do yic̱hɉ do lažəꞌəle canꞌ cheneꞌe Diozənꞌ c̱hedəꞌ nacle beṉəꞌ güen xšin Cristənꞌ.
\v 7 Naꞌ cheyaḻəꞌ güeꞌelažəꞌəle gonḻe žin c̱he beṉəꞌ nic̱h yebei X̱ancho Cristənꞌ leꞌe, caguə par nic̱h yebei benꞌ naquə x̱an žin naꞌazənəꞌ.
\v 8 Ṉezecho šə choncho deꞌe güen ḻeꞌegatezəczə caꞌ gon X̱ancho Cristənꞌ güen len chioꞌo notəꞌətezə naccho, ḻaꞌaṉəꞌəczə šə syempr choncho xšin beṉəꞌ yoblə o šə cui.
\p
\v 9 Naꞌ leꞌe beṉəꞌ x̱an žin, ḻeczə cheyaḻəꞌ gonḻe güen len beṉəꞌ güen žin c̱helenꞌ. Bito coꞌogaꞌacleneꞌ šeb, c̱hedəꞌ ṉezele X̱anchonꞌ benꞌ zo yobanꞌ ḻeczeꞌ X̱an beṉəꞌ güen žin caꞌanəꞌ. Naꞌ lao Diozənꞌ benꞌ zo yobanəꞌ tozə canꞌ zaquəꞌ chioꞌo beṉac̱h.
\s1 Naquənꞌ cheyaḻəꞌ goncho par nic̱h deꞌe malənꞌ cui gonən chioꞌo gan
\p
\v 10 Ṉaꞌa ža beṉəꞌ bišəꞌ, cheyaḻəꞌ gwc̱hincho fuers balor deꞌen choṉ Cristənꞌ par yic̱hɉlaꞌaždaꞌochonꞌ, naꞌ cheyaḻəꞌ güeꞌecho latɉə gaquəleneꞌ chioꞌo len yeḻəꞌ guac xen c̱heꞌenəꞌ.
\v 11 Cheyaḻəꞌ goncho yoguəꞌəḻoḻ canꞌ cheneꞌe Diozənꞌ par nic̱h socho c̱hec̱h cui šeɉḻeꞌecho c̱he gwxiyeꞌenəꞌ catəꞌən chyilɉlažəꞌən naclənꞌ gonən par əx̱oayaguən chioꞌo.
\v 12 Caguə chdiḻəlencho beṉac̱h beṉəꞌ naquə beləꞌ chenṉəꞌ sino que chdiḻəlencho deꞌe x̱ioꞌ caꞌ, naꞌ angl bzelao caꞌ, naꞌ deꞌe caꞌ yeziquəꞌəchlə deꞌen chəsəꞌənabiaꞌ beṉəꞌ mal caꞌ žaꞌ yežlyo nga, beṉəꞌ caꞌ chsaꞌaš ḻoꞌo deꞌe žc̱hoḻənꞌ. Chdiḻəlencho deꞌe mal caꞌ ganꞌ chsaꞌašən par nic̱h caꞌ cui šeɉḻeꞌecho c̱hegaꞌaquən.
\v 13 Deꞌe naꞌanəꞌ cheyaḻəꞌ goncho yoguəꞌəḻoḻ canꞌ cheneꞌe Diozənꞌ par nic̱h soicho gwxiyeꞌenəꞌ len bichlə deꞌe mal caꞌ catəꞌən seꞌeneꞌen yesəꞌəgoꞌoyeḻəꞌən chioꞌo par goncho deꞌe malənꞌ. Nach cheyaḻəꞌ sotezə socho cui šeɉḻeꞌecho c̱hegaꞌaquən. Naꞌ šə goncho yoguəꞌəḻoḻ canꞌ cheneꞌe Diozənꞌ, saquəꞌəlebecho ca to soḻdad beṉəꞌ nox̱əꞌ spad c̱heꞌenəꞌ naꞌ nyazeꞌ xeꞌ deꞌen naquə deꞌe ya par chcueꞌeɉən ḻeꞌ catəꞌ chdiḻəleneꞌ beṉəꞌ contr c̱heꞌ caꞌ.
\v 14 Naꞌ par nic̱h soczcho cui šeɉḻeꞌecho c̱he gwxiyeꞌenəꞌ naꞌ bichlə deꞌe mal caꞌ, cheyaḻəꞌ güeꞌecho por dižəꞌ ḻi. Naꞌ deꞌen güeꞌecho dižəꞌ ḻinꞌ saquəꞌəleben ca dobey deꞌen chcheɉ soḻdadənꞌ lsineꞌenəꞌ. Naꞌ cheyaḻəꞌ goncho porzə deꞌe güen nic̱h gwcueꞌeɉən chioꞌo ca xa soḻdadənꞌ deꞌen naquə de ya chcueꞌeɉən choꞌalc̱hoꞌenəꞌ.
\v 15 Ḻeczə caꞌ cheyaḻəꞌ sotezə socho šeɉḻeꞌecho c̱he dižəꞌ güen dižəꞌ cobə deꞌen chzeɉniꞌin chioꞌo par zocho binḻo len Diozənꞌ. Naꞌ šə sotezə socho šeɉḻeꞌecho c̱hei, guaquəlenczən chioꞌo socho probnid par tiḻəlencho gwxiyeꞌenəꞌ naꞌ bichlə deꞌe mal caꞌ ca spat deꞌen nḻeɉ soḻdadənꞌ chaclenən ḻeꞌ.
\v 16 Pero naꞌ deꞌen naquən deꞌe žialao xench ca biquəꞌəchlə deꞌen choncho, cheyaḻəꞌ sotezə socho gonḻilažəꞌəcho Diozənꞌ. Naꞌ ca deꞌen gonḻilažəꞌəcho Diozənꞌ guaquəlenczən chioꞌo ca to escodo deꞌen chcueꞌeɉ soḻdadənꞌ par nic̱h xis gox̱itəꞌ caꞌ deꞌen chsaꞌaḻəꞌəṉiṉ cui chəsəꞌəyidɉon ḻeꞌ. Gwxiyeꞌenəꞌ bito gaquə coꞌon xbab mal ḻoꞌo yic̱hɉlaꞌaždaꞌochonꞌ šə sotezə socho gonḻilažəꞌəcho Diozənꞌ.
\v 17 Naꞌ cheyaḻəꞌ yosaꞌalažəꞌəcho de que Diozənꞌ bac̱h bebeɉeꞌ chioꞌo xniꞌa deꞌe malənꞌ. Naꞌ šə yosaꞌalažəꞌəcho de que babebeɉeꞌ chioꞌo xniꞌa deꞌe malənꞌ gaquəlenən chioꞌo ca to lapəꞌ de ya deꞌen zo yic̱hɉ soḻdadənꞌ chaclenən ḻeꞌ nic̱h beṉəꞌ contr c̱heꞌ caꞌ bito chsoꞌoneꞌ ḻeꞌ gan. Naꞌ ḻeczə cheyaḻəꞌ güeꞌecho xtižəꞌ Diozənꞌ deꞌen chzeɉniꞌi Spirit c̱heꞌenəꞌ chioꞌo. Naꞌ deꞌen güeꞌechon gaquəlenən chioꞌo par nic̱h gwxiyeꞌen cui soin chioꞌo, canꞌ chaclen spad c̱he soḻdadənꞌ ḻeꞌ par chdiḻəleneꞌ beṉəꞌ contr c̱heꞌ caꞌ.
\v 18 Do tyemp cheyaḻəꞌ goncho orasyon lao Diozənꞌ naꞌ ṉabcho gaquəleneꞌ chioꞌo canꞌ chzeɉniꞌi Spirit c̱heꞌenəꞌ chioꞌo goncho. Cheyaḻəꞌ gaccho beṉəꞌ banḻažəꞌ par nic̱h goncho orasyonṉəꞌ sin cui žɉəx̱aquəꞌəlažəꞌəcho, əṉabcho gaquəlen Diozənꞌ yoguəꞌ beṉəꞌ caꞌ yeḻaꞌ bagwleɉeꞌ par zɉənaqueꞌ lažəꞌ neꞌenəꞌ.
\v 19 Naꞌ ḻeṉab gaquəlen Diozənꞌ nadaꞌ par nic̱h əṉezdaꞌ binꞌ chayaḻəꞌ əṉiaꞌ naꞌ par nic̱h bito žebaꞌ guaꞌa dižəꞌ gwzeɉniꞌidaꞌ beṉəꞌ yoblə c̱he Cristənꞌ, naꞌ naquən to deꞌe güen deꞌe cobə deꞌen cui no gwṉeze antslə.
\v 20 Par nic̱h guaꞌa dižəꞌ güen dižəꞌ cobə naꞌanəꞌ bseḻəꞌ Diozənꞌ nadaꞌ ca lgüeꞌe, naꞌ por ni c̱he deꞌe naꞌanəꞌ zoaꞌ nga nacaꞌ pres. Deꞌe naꞌanəꞌ ḻeṉabe Diozənꞌ gaquəleneꞌ nadaꞌ par guaꞌa xtižəꞌ Cristənꞌ sin cui žebaꞌ c̱hedəꞌ canꞌ cheyaḻəꞌ guaꞌanṉəꞌ.
\s1 Apostol Pabənꞌ btipeꞌ lažəꞌəgaꞌaqueꞌ
\p
\v 21 Naꞌ par nic̱h əṉezele canꞌ chac c̱hiaꞌ naꞌ binꞌ chonaꞌ, əchseḻaꞌa beṉəꞌ bišəꞌədaꞌocho Tiquiconꞌ. Ḻeꞌenəꞌ zotezə zoeꞌ choneꞌ canꞌ cheyaḻəꞌ goneꞌ par chacleneꞌ nadaꞌ chonaꞌ xšin X̱ancho Jesocristənꞌ.
\v 22 Echseḻaꞌaneꞌ par nic̱h əgwzeɉniꞌineꞌ leꞌe əṉeꞌ yoguəꞌəte canꞌ chac c̱hetoꞌ ni, naꞌ par nic̱h güeꞌe leꞌe balor.
\p
\v 23 Beṉəꞌ bišəꞌ, chonḻilažəꞌəle X̱ancho Jesocristənꞌ naꞌ X̱eꞌ Diozənꞌ. Deꞌe naꞌanəꞌ soꞌonšgueꞌ par nic̱h yoguəꞌəle so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ naꞌ soꞌonšgueꞌ ca gaquele c̱he lɉuežɉle.
\v 24 Naꞌ Diozənꞌ sotezə soeꞌ gaquəlenšgaczeꞌ yoguəꞌ leꞌe chaquele c̱he X̱ancho Jesocristənꞌ tozə canꞌ chaquele c̱heꞌ. Deꞌe naꞌazənꞌ chzoɉaꞌ ṉaꞌa.
\b
\m Pab