\id PHP
\ide UTF8
\h FILIPENSES
\toc1 Filipenses
\mt1 Cart Deꞌen Bzoɉ San Pabənꞌ Par Beṉəꞌ Filipos Caꞌ
\c 1
\s1 Pabənꞌ chzoɉeꞌ beṉəꞌ caꞌ žaꞌ Filiposənꞌ lao dieꞌ ližyanꞌ
\p
\v 1-2 Nadaꞌ Pab chzoɉaꞌ cart nga par leꞌe nitəꞌəle Filiposənꞌ yoguəꞌ leꞌe nacle lao naꞌ Diozənꞌ laogüe deꞌen ngodəꞌəle txen len Cristo Jesoꞌosənꞌ. Naꞌ ḻeczə chzoɉaꞌan par leꞌe naquə lao naꞌale chgüia chyele yeziquəꞌəchlə beṉəꞌ caꞌ chsoꞌonḻilažəꞌ Cristənꞌ naꞌ leꞌe nchoɉle nacle comisyon c̱he leꞌe chonḻilažəꞌəle Cristənꞌ naꞌ. Temtionꞌ naꞌ nadaꞌ chṉabtoꞌ saꞌaclenšga X̱acho Diozənꞌ naꞌ X̱ancho Jesocristənꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ, netoꞌ naquətoꞌ beṉəꞌ güen xšin Jesocristənꞌ.
\s1 Pabənꞌ choneꞌ orasyon par beṉəꞌ caꞌ chsoꞌonḻilažəꞌ Cristənꞌ Filiposənꞌ
\p
\v 3 Batəꞌətezə chonaꞌ xbab c̱hele choꞌa yeḻəꞌ chox̱cwlen c̱he Diozənꞌ canꞌ chonḻenꞌ.
\v 4 Naꞌ yoguəꞌ las chebei laꞌaždaꞌoguaꞌanəꞌ catəꞌ chṉabaꞌ gaquəlen Diozənꞌ leꞌe.
\v 5 Choꞌa yeḻəꞌ chox̱cwlen c̱heꞌ de que dezd catəꞌən gwzolao chonḻilažəꞌəle Jesocristənꞌ xte ža ṉeža, choncho txen par nic̱h beṉəꞌ zan seꞌeɉḻeꞌe c̱he dižəꞌ güen dižəꞌ cobə deꞌen chzeɉniꞌin c̱heꞌenəꞌ.
\v 6 Diozənꞌ bagwzolaogüeꞌ choneꞌ to deꞌe güen ḻoꞌo yic̱hɉlaꞌaždaꞌolenꞌ. Naꞌ ṉezdaꞌ gwzotezeꞌ gonczeꞌ caꞌ par nic̱h babeyožən catəꞌən əžin ža yidə Jesocristənꞌ deꞌe yoblə.
\v 7 Naꞌ naquəczən güen deꞌen ṉezdaꞌ gwzotezə Diozənꞌ gonczeꞌ deꞌe güen ḻoꞌo yic̱hɉlaꞌaždaꞌolenꞌ c̱hedəꞌ chacchgüeidaꞌ c̱hele. Diozənꞌ nžiꞌilažeꞌe chioꞌo txen naꞌ leꞌe chonḻe txen len nadaꞌ ḻaꞌaṉəꞌəczə diaꞌ ližya nga chsed chloꞌidaꞌ de que dižəꞌ güen dižəꞌ cobə deꞌen chzeɉniꞌin c̱he Jesocristənꞌ naquən deꞌe ḻi, naꞌ chonaꞌ par nic̱h beṉəꞌ zanch chsoꞌonḻilažeꞌeneꞌ.
\v 8 Ṉezcze Diozənꞌ chacchgüeidaꞌ c̱he yoguəꞌəle canꞌ chaque Jesocristənꞌ c̱hecho.
\v 9 Naꞌ chonaꞌ orasyon par leꞌe chṉabaꞌ gonšgaczə Diozənꞌ par nic̱h šeɉəch gaquəchele c̱he lɉuežɉle, naꞌ goṉšgueꞌ leꞌe yeḻəꞌ sinꞌ par nic̱h šeɉniꞌile binꞌ chazlažəꞌ Diozənꞌ yoguəꞌ las.
\v 10 Gonšgueꞌ caꞌ par nic̱h gacbeꞌile noquəꞌənṉəꞌ naquə güenchgua gonḻe yoguəꞌ laste nic̱h yic̱hɉlaꞌaždaꞌolenꞌ gaquən xiꞌilažəꞌ, naꞌ cui bi doḻəꞌ gaple catəꞌən əžin ža yidə Cristənꞌ yeto.
\v 11 Naꞌ canꞌ sotezə sole gonḻe deꞌe güen c̱hedəꞌ zo Jesocristənꞌ chacleneꞌ leꞌe. Naꞌ šə sotezə socho goncho deꞌe güen, nachənꞌ əyeɉlao Diozənꞌ naꞌ ḻeczə əsoꞌelaoꞌ beṉəꞌ ḻeꞌ.
\s1 Pabənꞌ choꞌe dižəꞌ de que naqueꞌ tozə len Cristənꞌ deꞌen chiꞌ yic̱hɉeꞌ tlaozə deꞌen cheneꞌe Cristənꞌ
\p
\v 12 Beṉəꞌ bišəꞌ, cheꞌendaꞌ əṉezele deꞌen diaꞌ ližya nga beṉəꞌ zan chsoꞌombiꞌe dižəꞌ güen dižəꞌ cobə deꞌen chzeɉniꞌin c̱he Jesocristənꞌ.
\v 13 Yoguəꞌ soḻdad caꞌ beṉəꞌ caꞌ chsaꞌapə liž reinꞌ bazɉəṉezeneꞌ de que diaꞌ ližya nga laogüe deꞌen əchyix̱ɉuiꞌa xtižəꞌ Cristənꞌ naꞌ beṉəꞌ žaꞌ doxenḻə laoꞌ syodanꞌ bazɉəṉezeneꞌ.
\v 14 Naꞌ casi yoguəꞌ beṉəꞌ bišəꞌəcho caꞌ bachsaꞌapəcheꞌ balor par chsoꞌonḻilažeꞌe X̱ancho Cristənꞌ laogüe deꞌe bagwseꞌeneneꞌ de que bito chžebaꞌ ḻaꞌaṉəꞌəczə diaꞌ ližya nga. Naꞌ deꞌe naꞌanəꞌ ḻegaꞌaqueꞌ chsoꞌecheꞌ xtižəꞌ Diozənꞌ sin cui chəsəꞌəžebeꞌ.
\p
\v 15 Deꞌe ḻi nitəꞌ baḻə beṉəꞌ do lažəꞌəgaꞌaqueꞌ chsoꞌoneꞌ güen chəsəꞌəyix̱ɉuiꞌe xtižəꞌ Cristənꞌ. Pero yebaḻeꞌ caguə do lažəꞌəgaꞌaqueꞌenəꞌ chəsəꞌəyix̱ɉuiꞌen, con chseꞌeneneꞌ yosoꞌozenag beṉəꞌ c̱hegaꞌaqueꞌ cle ca c̱hiaꞌ nadaꞌ.
\v 16 Beṉəꞌ caꞌ chəsəꞌəgueꞌi nadaꞌ chəsəꞌəyix̱ɉuiꞌe xtižəꞌ Cristənꞌ parzə nic̱h əyeɉlaogaꞌaqueꞌ, caguə chəsəꞌəyix̱ɉuiꞌen do lažəꞌəgaꞌaqueꞌenəꞌ. Con chseꞌeneneꞌ soꞌoneꞌ par nic̱h ḻechguaḻe deꞌe gaquədaꞌ lao diaꞌ ližya nga.
\v 17 Beṉəꞌ caꞌ chsaꞌaqueꞌ c̱hiaꞌ naꞌ chsaꞌaqueneꞌ c̱he Cristənꞌ chəsəꞌəyix̱ɉuiꞌe xtižeꞌenəꞌ do lažəꞌəgaꞌaqueꞌ. Zɉəṉezeneꞌ de que Diozənꞌ babeꞌe latɉə diaꞌ ližya nga par chsed chloꞌidaꞌ de que dižəꞌ güen dižəꞌ cobə deꞌen chzeɉniꞌin c̱he Jesocristənꞌ naquən deꞌe ḻi.
\v 18 Nitəꞌ beṉəꞌ chəsəꞌəyix̱ɉuiꞌe xtižəꞌ Cristənꞌ pero caguə do lažəꞌəgaꞌaqueꞌ. Naꞌ nitəꞌ beṉəꞌ yoblə chəsəꞌəyix̱ɉuiꞌen do lažəꞌəgaꞌaqueꞌ. Pero naquətezə chəsəꞌəyix̱ɉuiꞌe xtižəꞌ Cristənꞌ chebeidaꞌ, naꞌ batəꞌətezəchlə gobeichczədaꞌ.
\p
\v 19 Ṉezdaꞌ yechoɉaꞌ güen len yoguəꞌ deꞌe caꞌ chac c̱hiaꞌ c̱hedəꞌ chonḻe orasyon c̱hiaꞌ naꞌ chaclen Spirit c̱he Jesocristənꞌ nadaꞌ deꞌen ḻeczə naquən Spirit c̱he Diozənꞌ.
\v 20 Naꞌ deꞌen cheꞌenchgüeidaꞌ naꞌ zoaꞌ lez yeyož gonaꞌ yoguəꞌəḻoḻ canꞌ cheneꞌe Diozənꞌ nic̱h cui gaquədaꞌ ztoꞌ laogüeꞌenəꞌ, naꞌ cui žebaꞌ bitəꞌətezə gaquə c̱hiaꞌ, šə sochaꞌ o šə gataꞌ. Naꞌ caꞌ saꞌacbeꞌi beṉəꞌ canꞌ bagwsaꞌacbeꞌineꞌ bedote de que Cristənꞌ naqueꞌ ḻeꞌezelaogüe beṉəꞌ šaoꞌ beṉəꞌ güen.
\v 21 Quinga naquən len nadaꞌ: Ṉaꞌa mbanaꞌ nacaꞌ tozə len Cristənꞌ naꞌ chiꞌ yic̱hɉaꞌ tlaozə deꞌen cheneꞌeneꞌ, naꞌ catəꞌ gataꞌ mbalazəchlə soaꞌ len ḻeꞌ.
\v 22 Šə sochaꞌ guaquə gonchaꞌ xšin Diozənꞌ par nic̱h soꞌombiaꞌ beṉəꞌ ḻeꞌ. Pero bito gaquə əṉiaꞌ nonꞌ naquəch güen, šə sochaꞌ o šə gataꞌ.
\v 23-24 Cheꞌendaꞌ žɉəyezoaꞌ len Cristənꞌ, laꞌ ḻechguaḻe mbalazəch soaꞌ len ḻeꞌ, pero leꞌe chyažɉele sochaꞌ par gaquəlenaꞌ leꞌe. Deꞌe naꞌanəꞌ bito gaquə əṉiaꞌ šə güench sochaꞌ o šə güench gataꞌ.
\v 25 Zoaꞌ segor chyažɉele sochaꞌ par gaquəlenaꞌ leꞌe naꞌ deꞌe naꞌanəꞌ ṉezdaꞌ sochaꞌ len leꞌe naꞌ gonaꞌ par nic̱h šeɉəch gonḻilažəꞌəleneꞌ naꞌ sole mbalaz deꞌen chonḻilažəꞌəleneꞌ.
\v 26 Naꞌ güeꞌelaꞌochguale Cristo Jesoꞌosənꞌ catəꞌ babeneꞌ ca soaꞌ len leꞌe deꞌe yoblə.
\p
\v 27 Naꞌ šə sochaꞌ len leꞌe o šə cui, ḻegon byen ḻegon canꞌ cheyaḻəꞌ goncho laogüe deꞌen bachzenagcho c̱he dižəꞌ güen dižəꞌ cobə deꞌen chzeɉniꞌin c̱he Cristənꞌ. Ḻegon par nic̱h yendaꞌ rson de que yoguəꞌəle nitəꞌəczle c̱hec̱h chzenagle c̱he Spirit c̱he Diozənꞌ naꞌ yendaꞌ de que tozə canꞌ chon yoguəꞌəle xbab naꞌ de que txen chonḻe xte ga zelao saqueꞌele par seꞌeɉḻeꞌe beṉəꞌ c̱he dižəꞌ güen dižəꞌ cobə deꞌen chzeɉniꞌin c̱he Cristənꞌ.
\v 28 Ḻegon par nic̱h yendaꞌ rson de que bito chžeble beṉəꞌ contr c̱hele caꞌ bitəꞌətezə deꞌe chsoꞌoneꞌ par chosoꞌošebeꞌ leꞌe. Naꞌ šə bito chžeble beṉəꞌ caꞌ chosoꞌošebeꞌ leꞌe gwsaꞌacbeꞌilɉeineꞌ de que Diozənꞌ əgwnežɉueꞌ ḻegaꞌaqueꞌ castigw zeɉḻicaṉe naꞌ goneꞌ par nic̱h leꞌe cui yeyeɉle lao yiꞌ gabiḻənꞌ. Naꞌ ḻeꞌenəꞌ goneꞌ par nic̱h cui žeble naꞌ par nic̱h əsaꞌacbeꞌineꞌ deꞌe caꞌ.
\v 29 Deꞌen chaque Diozənꞌ c̱hecho babsiꞌe xṉeze par nic̱h chonḻilažəꞌəcho Cristənꞌ naꞌ ḻeꞌegatezə caꞌ deꞌen chaque Diozənꞌ c̱hecho babsiꞌe xṉeze par nic̱h chyiꞌ chzaquəꞌəcho laogüe deꞌen choꞌecho xtižəꞌ Cristənꞌ.
\v 30 Bableꞌile canꞌ bosoꞌoc̱hiꞌ bosoꞌosaquəꞌ beṉəꞌ nadaꞌ antslə laogüe deꞌen chonaꞌ xšin Diozənꞌ naꞌ chenczele rson de que ḻeczə canꞌ chac c̱hiaꞌ ṉaꞌa. Naꞌ canꞌ chac c̱hiaꞌ nadaꞌ ḻeczə canꞌ chac c̱he leꞌe deꞌen ḻeczə chonḻe xšin Diozənꞌ.
\c 2
\s1 Cristənꞌ gwleɉyic̱hɉeꞌ yoguəꞌ deꞌe güen deꞌen de c̱heꞌ par bideꞌ yežlyo nga, pero ṉaꞌa naqueꞌ ḻeꞌezelaogüe beṉəꞌ blaoch
\p
\v 1 Cristənꞌ chtipeꞌ lažəꞌəle. Chaqueneꞌ c̱hele naꞌ deꞌe naꞌanəꞌ chebeile chzenagle c̱heꞌ. Ṉezczele bazo Spirit c̱he Diozənꞌ len leꞌe. Naꞌ ḻeczə bachon Cristənꞌ par nic̱h chaquele c̱he lɉuežɉle naꞌ cheyašəꞌəgaꞌaqueleneꞌ.
\v 2 Deꞌe naꞌanəꞌ chṉeyoidaꞌ leꞌe ḻegac tozə len lɉuežɉle. Naꞌ ḻeꞌe gaque c̱he lɉuežɉle tole yetole naꞌ tozə ca ḻegon yoguəꞌəle xbab. Ḻegon caꞌ par nic̱h ḻechguaḻe yebeidaꞌ.
\v 3 Bito gonḻe ca gaquə güen c̱he cuinzle, naꞌ nic gonḻe ca əsoꞌelao beṉəꞌ leꞌe. Bito gon cuinḻe xen. Naꞌ to tole ḻegon xbab güen c̱he notəꞌətezə canꞌ chonḻe len beṉəꞌ zɉənaquəch beṉəꞌ blao ca leꞌe.
\v 4 Naꞌ to tole ḻeꞌe yeyilɉlažəꞌ naclə gonḻe par nic̱h gaquə güen c̱he lɉuežɉle caguə c̱he cuinzle.
\p
\v 5–7 Naquə yic̱hɉlaꞌaždaoꞌ Cristo Jesoꞌosənꞌ cayaṉəꞌən naquə yic̱hɉlaꞌaždaoꞌ X̱eꞌ Diozənꞌ naꞌ napeꞌ yeḻəꞌ gwnabiaꞌ naꞌ yeḻəꞌ balaꞌaṉ tozəczə canꞌ napə X̱eꞌenəꞌ. Pero bito que bchoɉyic̱hɉ Cristo Jesoꞌosənꞌ yeḻəꞌ gwnabiaꞌ c̱heꞌenəꞌ naꞌ yeḻəꞌ balaꞌaṉ c̱heꞌenəꞌ. Bchoɉyic̱hɉeꞌ deꞌe caꞌ par nic̱h golɉeꞌ goqueꞌ beṉac̱h naꞌ goqueꞌ ca notəꞌətezə beṉəꞌ güen žin. Naꞌ chioꞌo ḻeczə cheyaḻəꞌ goncho xbab ca xbabənꞌ ben Cristo Jesoꞌosənꞌ.
\v 8 Bzenagueꞌ c̱he Diozənꞌ, bzex̱ɉw yic̱hɉeꞌ beꞌe latɉə gwsoꞌot beṉəꞌ ḻeꞌ bosoꞌodeꞌeneꞌ ḻeꞌe yag corozənꞌ canꞌ chsoꞌoneꞌ len beṉəꞌ caꞌ zɉənaquə beṉəꞌ mal juisy.
\v 9 Naꞌ deꞌen bsanḻažəꞌ cuineꞌ, Diozənꞌ beꞌeneꞌ yeḻəꞌ balaꞌaṉ xen mazəchlə ca deꞌen gotəꞌ c̱heꞌ antslə. Naꞌ Diozənꞌ bito choꞌe notəꞌətezəchlə beṉac̱h o angl yeḻəꞌ balaꞌaṉ xen ca deꞌen beꞌe Cristo Jesoꞌosənꞌ. Naꞌ beneꞌ par nic̱h naqueꞌ ḻeꞌezelaogüe beṉəꞌ blao.
\v 10-11 Beneꞌ caꞌ par nic̱h yoguəꞌ beṉəꞌ žaꞌ yobanꞌ naꞌ beṉəꞌ žaꞌ yežlyo nga naꞌ nochlə beṉəꞌ bagwsaꞌat, naꞌ len yoguəꞌ angl caꞌ yesəꞌəzo xibgaꞌaqueꞌ lao Cristo Jesoꞌosənꞌ yesəꞌəneꞌ de que naqueꞌ X̱angaꞌaqueꞌ. Naꞌ len yoguəꞌ deꞌe x̱ioꞌ caꞌ naꞌ angl bzelao caꞌ yesəꞌəzo xibgaꞌaquən laogüeꞌenəꞌ, yesəꞌənan de que naqueꞌ X̱angaꞌaquei. Naꞌ X̱acho Diozənꞌ siꞌe yeḻəꞌ balaꞌaṉ catəꞌən gaquə caꞌ.
\s1 Chioꞌo chonḻilažəꞌəcho Cristənꞌ gwxaquəꞌəlebecho ca belɉw deꞌen chosoꞌoseꞌeniꞌ lao naquə žc̱hoḻ
\p
\v 12 Ṉaꞌa ža chacdaꞌ c̱hele naꞌ chebeidaꞌ de que chzenagczle c̱he Diozənꞌ catəꞌən zoaꞌ len leꞌe. Naꞌ chatəꞌəyoidaꞌ leꞌe gwzenagle c̱heꞌ mazəchlə ṉaꞌa cui zoaꞌ len leꞌe. Ḻegon yoguəꞌəḻoḻ deꞌen cheneꞌe Diozənꞌ par nic̱h laꞌalaon de que babebeɉeꞌ leꞌe xniꞌa deꞌe malənꞌ, naꞌ ḻegonən do yic̱hɉ do lažəꞌəle naꞌ con cuidad, laꞌ ṉezczele Diozənꞌ goneꞌ chioꞌo castigw šə cui goncho canꞌ cheneꞌeneꞌ.
\v 13 Dioz naꞌanəꞌ chocobeꞌ xbab c̱helenꞌ par nic̱h cheneꞌele chonḻe deꞌe güen canꞌ chazlažeꞌenəꞌ naꞌ ḻeczeꞌenəꞌ chacleneꞌ leꞌe par nic̱h chonḻen.
\p
\v 14 Ḻegon bitəꞌətezə əṉa Diozənꞌ gonḻe sin cui əžeꞌešəꞌəle naꞌ sin cui gaquəyožle.
\v 15 Ḻegon caꞌ par nic̱h cui bi doḻəꞌ gaple naꞌ cui bi deꞌe mal šoꞌo ḻoꞌo yic̱hɉlaꞌaždaꞌolenꞌ. Diozənꞌ cheneꞌeneꞌ de que chioꞌo naccho xiꞌiṉeꞌ bitobi deꞌe mal taꞌ əchen yic̱hɉlaꞌaždaꞌochonꞌ, ḻaꞌaṉəꞌəczə yežlyo nga chdacho entr beṉəꞌ caꞌ chsoꞌon clelə naꞌ beṉəꞌ zɉənaquə beṉəꞌ mal juisy, naꞌ deꞌe naꞌanəꞌ gwxaquəꞌəlebecho ca belɉw caꞌ deꞌen chosoꞌoseꞌeniꞌ lao naquə žc̱hoḻ.
\v 16 Naꞌ ḻegwzeɉniꞌi beṉəꞌ dižəꞌ güen dižəꞌ cobə deꞌen chzeɉniꞌin c̱he Cristənꞌ par nic̱h seꞌeɉḻeꞌe c̱hei naꞌ gatəꞌ yeḻəꞌ mban zeɉḻicaṉe c̱hegaꞌaqueꞌ. Šə gonḻe caꞌ yebeidaꞌ leꞌe catəꞌən əžin ža yidə Cristənꞌ deꞌe yoblə, c̱hedəꞌ laꞌ zeɉen de que bzenagle c̱he deꞌen bsed bloꞌidaꞌ leꞌe, caguə con bendadaꞌ xšin Diozənꞌ bedote.
\v 17 Leꞌe chebeile deꞌen chonḻilažəꞌəle Cristənꞌ, naꞌ nadaꞌ chebeidaꞌ deꞌen babiꞌa xtižəꞌ Cristənꞌ len leꞌe par nic̱h chonḻilažəꞌəleneꞌ. Naꞌ gwzoczaꞌ yebeidaꞌ len leꞌe ḻaꞌaṉəꞌəczə šə soꞌot beṉəꞌ nadaꞌ por ni c̱he deꞌen əchyix̱ɉuiꞌa xtižəꞌ Cristənꞌ.
\v 18 Ḻeꞌegatezə caꞌ ḻeꞌe yebei txen len nadaꞌ.
\s1 Temtionꞌ naꞌ Epafroditonꞌ
\p
\v 19 Naꞌ zoaꞌ lez gon X̱ancho Jesoꞌosənꞌ par nic̱h yob gaquə seḻaꞌa Temtionꞌ ganꞌ zolenꞌ par yeyoꞌe rson nac chac c̱hele. Naꞌ ḻechguaḻe yeyacxenḻažaꞌa catəꞌ bagwṉezdaꞌ nac chac c̱hele.
\v 20 Notoch no zo no əseḻaꞌa beṉəꞌ gon xbab c̱hele do yic̱hɉ do lažeꞌe canꞌ chon Temtionꞌ.
\v 21 Beṉəꞌ yeziquəꞌəchlə zɉəchiꞌ yic̱hɉgaꞌaqueꞌ bi deꞌen chseꞌeneneꞌ gaquə c̱hegaꞌaqueꞌ, naꞌ bito zɉəchiꞌ yic̱hɉgaꞌaqueꞌ əyeꞌelaoꞌ Cristo Jesoꞌosənꞌ.
\v 22 Ṉezele canꞌ bachon Temtionꞌ güen yoguəꞌ laste. Naꞌ ca naquənꞌ chonaꞌ par nic̱h soꞌombiaꞌach beṉəꞌ dižəꞌ güen dižəꞌ cobə deꞌen chzeɉniꞌin c̱he Cristo Jesoꞌosənꞌ, chacleneꞌ nadaꞌ canꞌ chon to beṉəꞌ len x̱eꞌ.
\v 23 Deꞌe naꞌanəꞌ bagwleɉaꞌaneꞌ par əseḻaꞌaneꞌ ganꞌ zolenꞌ naꞌ əseḻaꞌaneꞌ lgüegwzə catəꞌ bagotəꞌəbiaꞌ šə gochoɉaꞌ ližyanꞌ o šə cui.
\v 24 Naꞌ chonḻilažaꞌa de que X̱ancho Cristo Jesoꞌosənꞌ goneꞌ par nic̱h lenczaꞌ nadaꞌ yob yidaꞌ ganꞌ zolenꞌ.
\p
\v 25 Pero naꞌ por mientrzə chacdaꞌ chonən byen yoseḻaꞌa beṉəꞌ bišəꞌəcho Epafroditonꞌ par yeyedeꞌ ganꞌ zolenꞌ. Bseḻəꞌəleneꞌ nga par gocleneꞌ nadaꞌ, naꞌ babeneꞌ txen len nadaꞌ ca naquə xšin Diozənꞌ deꞌen bentoꞌ naꞌ len yoguəꞌ canꞌ bagwdiḻəlentoꞌ gwxiyeꞌenəꞌ.
\v 26 Cheꞌenchgüeineꞌ yežagle deꞌe yoblə, c̱hedəꞌ zoeꞌ trist deꞌen benele rson gocšeneneꞌ.
\v 27 Deꞌe ḻi bašə gateꞌ, pero naꞌ Diozənꞌ beyašəꞌ bežiꞌilažeꞌeneꞌ naꞌ beneꞌ par nic̱h beyaqueneꞌ. Naꞌ caguə Epafrodito naꞌazənꞌ beyašəꞌ bežiꞌilažeꞌe sino lenczaꞌ nadaꞌanəꞌ par nic̱h bito gotəꞌəch deꞌe soaꞌ trist.
\v 28 Deꞌe naꞌanəꞌ chosaꞌaneꞌ yeyedeꞌ lgüegwzə par nic̱h caꞌ yebeile naꞌ lenczaꞌ nadaꞌ cuitec soaꞌ trist c̱he leꞌe šə caꞌ.
\v 29 Ḻegon güen len ḻeꞌ catəꞌ yeleꞌe naꞌ ḻegwloꞌineꞌ de que chebeichgüeile canꞌ babeneꞌenəꞌ, c̱hedəꞌ nacle txen chonḻilažəꞌəle X̱ancho Cristo Jesoꞌosənꞌ. Beṉəꞌ caꞌ chsoꞌon canꞌ baben Epafroditonꞌ zɉəzaqueꞌe par güeꞌegaꞌacchoneꞌ yeḻəꞌ balaꞌaṉ.
\v 30 Epafroditonꞌ bsanḻažəꞌ cuineꞌ gateꞌ par goneꞌ xšin Cristənꞌ deꞌen bseḻəꞌəleneꞌ nga goneꞌ, naꞌ deꞌe ḻi gocšenchgüeineꞌ xte yelatəꞌəzə cui goteꞌ. Gocwlenchgüeꞌ nadaꞌ canꞌ gon leꞌe žaləꞌ zole nga.
\c 3
\s1 Canꞌ goncho par gaccho beṉəꞌ güen lao Diozənꞌ
\p
\v 1 Ṉaꞌa ža beṉəꞌ bišəꞌ, ṉedech deꞌen əṉiaꞌ leꞌe. Cheyaḻəꞌ sotezə socho yebeicho c̱hedəꞌ ngodəꞌəcho txen len X̱ancho Cristənꞌ. Bito chacdaꞌ zed chzoɉaꞌ c̱he deꞌen babzoɉczaꞌ antslə, c̱hedəꞌ chyažɉele gonchle xbab c̱hei.
\v 2 Ḻegapə cuidad nic̱h cui gwzenagle c̱he beṉəꞌ caꞌ chəsəꞌəneꞌ cheyaḻəꞌ sole señy deꞌen neꞌ sirconsision. Ḻegaꞌaqueꞌ ḻechguaḻe zɉənalɉəgaꞌaqueneꞌ naꞌ chsoꞌoneꞌ deꞌe mal.
\v 3 Naꞌ chioꞌo de to señy c̱hecho par ṉezecho naccho xiꞌiṉ Dioz. Señyənꞌ naquən ca deꞌen baben Diozənꞌ chioꞌo Spirit c̱heꞌenəꞌ par chaclenən chioꞌo choꞌelaꞌochoneꞌ. Chebeicho deꞌen chonḻilažəꞌəcho Cristo Jesoꞌosənꞌ naꞌ ṉezecho bito chyažɉecho señy lao cuerp c̱hechonꞌ par gaccho xiꞌiṉ Diozənꞌ.
\v 4–6 Nadaꞌ nacaꞌ beṉəꞌ Izrael naꞌ golɉaꞌ lao dia c̱he deꞌe Benjaminṉəꞌ naꞌ bosoꞌozoeꞌ nadaꞌ señy c̱he sirconsisionṉəꞌ to xmanzədaꞌ. Naꞌ golɉəlenaꞌ dižəꞌ ebreo laogüe deꞌen zɉənaquə x̱axnaꞌa caꞌ beṉəꞌ ebreo. Naꞌ ca naquə ḻei deꞌen bzoɉ deꞌe Moisezənꞌ, gocaꞌ txen len beṉəꞌ fariseo caꞌ beṉəꞌ caꞌ zɉəchiꞌichgua yic̱hɉgaꞌaqueꞌ to to pont c̱he ḻeinꞌ. Naꞌ deꞌe tant gwcheꞌ yic̱hɉaꞌ c̱he deꞌe caꞌ zɉəsəꞌənao beṉəꞌ Izrael gwlaž c̱hiaꞌ caꞌ xte blagzeɉə blagzidaꞌ beṉəꞌ caꞌ chsoꞌonḻilažəꞌ Cristənꞌ. Naꞌ ca naquə deꞌen na ḻeinꞌ cheyaḻəꞌ goncho naꞌ deꞌen nan cui goncho, bzenagaꞌ c̱he yoguəꞌən xte ga zelao gwxaquəꞌədaꞌ. Žaləꞌ chacdaꞌ chebei Diozənꞌ nadaꞌ por deꞌe caꞌ, guaquə gonaꞌ xbab de que chebeicheneꞌ nadaꞌ mazəchlə canꞌ chebeineꞌ len beṉəꞌ caꞌ yeziquəꞌəchlə.
\v 7 Yoguəꞌənṉəꞌ benaꞌ xbab əsaꞌaclenən nadaꞌ par nic̱h Diozənꞌ yebeineꞌ nadaꞌ, pero ṉaꞌa bachacbeꞌidaꞌ bito gwsaꞌaclenən nadaꞌ. Naꞌ benən byen gwleɉeyic̱hɉgaꞌacaꞌan par nic̱h benḻilažaꞌa Cristənꞌ.
\v 8 Deꞌen banombiꞌa Cristo Jesoꞌosənꞌ benꞌ naquə X̱anaꞌ zaquəꞌəchguan par nadaꞌ. Deꞌe naꞌanəꞌ bitoch bibi zɉəzaquəꞌ yoguəꞌəḻoḻ deꞌe caꞌ goquədaꞌ antslə əsaꞌaclenən nadaꞌ. Deꞌen banombiꞌaneꞌ naꞌanəꞌ bagwnit yoguəꞌ deꞌe caꞌ bebeidaꞌ antslə, naꞌ ṉaꞌa nonaꞌ ḻegaꞌaquən ca to beb deꞌe gwchoꞌoṉaꞌ par nic̱h gombiaꞌachaꞌaneꞌ.
\v 9 Naꞌ ḻeczə nonaꞌ ḻegaꞌaquən ca to beb deꞌe gwchoꞌoṉaꞌ par nic̱h gacbiaꞌ de que ngodaꞌa txen len Cristənꞌ. Cheꞌendaꞌ əṉa Diozənꞌ c̱hiaꞌ de que nacaꞌ beṉəꞌ güen laogüeꞌenəꞌ. Eṉeꞌ caꞌ por ni c̱he deꞌen chonḻilažaꞌa Cristənꞌ, caguə por ni c̱he deꞌen chonaꞌ complir bi deꞌen na ḻeinꞌ.
\v 10 Cheꞌendaꞌ gombiaꞌachaꞌ Cristənꞌ, naꞌ cheꞌendaꞌ yocobəcheꞌ yic̱hɉlaꞌaždaoguaꞌanəꞌ. Deꞌen beyas bebaneꞌ ladɉo beṉəꞌ guat caꞌanəꞌ chac yocobeꞌ yic̱hɉlaꞌaždaoguaꞌanəꞌ. Naꞌ cheꞌendaꞌ c̱hiꞌ sacaꞌa deꞌen chonaꞌ xšin Cristənꞌ canꞌ gwdiꞌ gwxaqueꞌenəꞌ naꞌ ḻeczə cheꞌendaꞌ gacbeꞌichdaꞌ bi zeɉen deꞌen ngodaꞌa txen len ḻeꞌ catəꞌən gwsoꞌot beṉəꞌ ḻeꞌ.
\v 11 Canꞌ chzo chbezaꞌ ṉaꞌa c̱hedəꞌ ḻechguaḻe cheꞌendaꞌ yoḻis yosban Diozənꞌ nadaꞌ ladɉo beṉəꞌ guat caꞌ catəꞌ bagotaꞌ.
\s1 Choꞌelažaꞌa chonaꞌ par nic̱h gaquə yic̱hɉlaꞌaždaꞌoguaꞌan canꞌ naquə yic̱hɉlaꞌaždaoꞌ Cristo Jesoꞌosənꞌ
\p
\v 12 Bito əṉiaꞌ de que bac̱h naquə yic̱hɉlaꞌaždaoguaꞌanəꞌ canꞌ cheꞌendaꞌ gaquən, laꞌ bito ṉeꞌe gaquən canꞌ naquə yic̱hɉlaꞌaždaoꞌ Cristo Jesoꞌosənꞌ. Pero naꞌ cheyilɉəlažaꞌa naclə gonaꞌ par nic̱h caꞌ gaquə yic̱hɉlaꞌaždaꞌoguaꞌanəꞌ canꞌ naquə yic̱hɉlaꞌaždaoꞌ Cristo Jesoꞌosənꞌ, laꞌ par nanꞌ gwleɉeꞌ nadaꞌ nacaꞌ xiꞌiṉeꞌ.
\v 13 Beṉəꞌ bišəꞌ ṉezdaꞌ bitoṉəꞌ gac yic̱hɉlaꞌaždaꞌoguaꞌ canꞌ cheꞌendaꞌ gaquən, pero babchoɉyic̱hɉaꞌ yoguəꞌəḻoḻ deꞌen goquə deꞌe zaqueꞌe par nadaꞌ antslə, len bi deꞌen benaꞌ, c̱hedəꞌ bagocbeꞌidaꞌ bitobi zɉəzaquəꞌən. Naꞌ tlaozə deꞌen chiꞌ yic̱hɉaꞌ ṉaꞌa deꞌen choꞌelažaꞌa chonaꞌ canꞌ cheneꞌe Diozənꞌ par nic̱h gaquə yic̱hɉlaꞌaždaꞌoguaꞌanəꞌ canꞌ naquə yic̱hɉlaꞌaždaoꞌ Cristo Jesoꞌosənꞌ.
\v 14 Zaquəꞌəchguan par nadaꞌ deꞌen gwleɉ Diozənꞌ nadaꞌ par yežinaꞌ yobanꞌ ganꞌ zoꞌenəꞌ laogüe deꞌen chonḻilažaꞌa Cristo Jesoꞌosənꞌ. Naꞌ deꞌe naꞌanəꞌ choꞌelažaꞌa chonaꞌ canꞌ chsaꞌazlažeꞌenəꞌ par nic̱h gon Diozənꞌ ca gaquə yic̱hɉlaꞌaždaꞌoguaꞌanəꞌ canꞌ naquə yic̱hɉlaꞌaždaoꞌ Cristo Jesoꞌosənꞌ.
\p
\v 15 Naꞌ baḻtezcho šə bazda chaccho canꞌ cheneꞌe Cristənꞌ gaccho cheyaḻəꞌ cueɉyic̱hɉcho deꞌe caꞌ goquecho zɉənaquən deꞌe zaqueꞌe par chioꞌo antslə naꞌ cheyaḻəꞌ cueꞌ yic̱hɉcho par goncho ca gaquə yic̱hɉlaꞌaždaꞌochonꞌ canꞌ naquə yic̱hɉlaꞌaždaꞌogüeꞌenəꞌ. Naꞌ šə nole ṉeꞌe yoꞌole bichlə xbab yoblə Diozənꞌ goneꞌ ca gacbeꞌile.
\v 16 Naꞌ cheyaḻəꞌ šeɉəchcho goncho canꞌ babzeɉniꞌi Diozənꞌ chioꞌo goncho.
\p
\v 17 Beṉəꞌ bišəꞌ yoguəꞌəle ḻegon canꞌ chonaꞌ nadaꞌ, naꞌ canꞌ chsoꞌon yeziquəꞌəchlə beṉəꞌ caꞌ bachsoꞌon canꞌ chontoꞌonəꞌ.
\v 18 Deꞌe yoblə əṉiaꞌ leꞌe canꞌ bagwniaꞌ zan las antslə, de que nitəꞌ beṉəꞌ zan beṉəꞌ chsoꞌoneꞌ ca chṉezecho deꞌen chsaꞌaqueneꞌ bito bi zaquəꞌən deꞌen gwdixɉw Cristənꞌ xtoḻəꞌəchonꞌ ḻeꞌe yag corozənꞌ. Chbežaꞌ deꞌen nitəꞌ beṉəꞌ chsoꞌon caꞌ.
\v 19 Yesəꞌəbiayiꞌ beṉəꞌ caꞌ c̱hedəꞌ laꞌ lguaꞌa soꞌelaꞌogüeꞌe Diozənꞌ con chsoꞌelažəꞌ chseꞌeɉ chsaꞌogüeꞌ naꞌ chsoꞌoneꞌ bichlə deꞌen na cuerp c̱hegaꞌaqueꞌenəꞌ. Chesyəꞌəbeineꞌ chsoꞌoneꞌ deꞌen naquə deꞌe yeḻəꞌ ztoꞌ, naꞌ zɉəchiꞌ yic̱hɉgaꞌaqueꞌ tlaozə deꞌen chac yežlyo nga.
\v 20 Naꞌ chioꞌo ža, bitoch choncho xbab de que yežlyo nga naquən lažcho, sino choncho xbabənꞌ de que lažchonꞌ naquən yobanꞌ ganꞌ zaꞌ X̱ancho Jesocristənꞌ benꞌ babebeɉ chioꞌo xniꞌa deꞌe malənꞌ naꞌ yideꞌ nga deꞌe yoblə.
\v 21 Naꞌ catəꞌən yideꞌenəꞌ goneꞌ par nic̱h cuerp c̱hecho de beləꞌ chenṉəꞌ yeyaquən to cuerp cobə deꞌen gaquə ḻechguaḻe güen canꞌ naquə cuerp c̱he ḻeꞌenəꞌ. Goneꞌ caꞌ c̱hedəꞌ napeꞌ yeḻəꞌ guac par nic̱h bitəꞌətezə deꞌe zɉəde yosoꞌozenaguən c̱heꞌ.
\c 4
\s1 Cheyaḻəꞌ yebeicho deꞌen chonḻilažəꞌəcho X̱ancho Jesocristənꞌ
\p
\v 1 Beṉəꞌ bišəꞌ daoꞌ, chacdaꞌ c̱hele naꞌ cheꞌenchgüeidaꞌ leꞌi lɉuežɉcho. Chebeichgüeidaꞌ deꞌen zotezə zole chonḻilažəꞌəle Jesocristənꞌ, naꞌ por leꞌe sochguaꞌ mbalaz. Deꞌe naꞌanəꞌ gonc̱hec̱hlažəꞌəšgaczle gonḻilažəꞌəle X̱ancho Jesocristənꞌ.
\p
\v 2 Naꞌ chatəꞌəyoidaꞌ leꞌ Ebodia naꞌ ḻeczə caꞌ leꞌ Sintique, ḻesošga binḻo ḻegon txen tole yetole c̱hedəꞌ c̱hoptele chonḻilažəꞌəle X̱anchonꞌ.
\v 3 Naꞌ leꞌ Sinsigos, lenꞌ babenoꞌ xšin Diozənꞌ do yic̱hɉ do lažoꞌo txen len nadaꞌ, ḻeczə chṉeyoidaꞌ leꞌ gaquəlenoꞌ beṉəꞌ zancho Ebodianꞌ naꞌ Sintiquenꞌ c̱hedəꞌ ḻegaꞌaqueꞌ ḻeczə gwsoꞌoneꞌ xšin Diozənꞌ txen len nadaꞌ catəꞌən gwdix̱ɉuiꞌa dižəꞌ güen dižəꞌ cobə deꞌen chzeɉniꞌin c̱he Jesocristənꞌ ganꞌ zolenꞌ. Naꞌ lenczə Clementənꞌ naꞌ yebaḻə beṉəꞌ lɉuežɉcho caꞌ gwsoꞌoneꞌ txen len nadaꞌ. Naꞌ zɉənyoɉ lagaꞌaqueꞌenəꞌ ḻeꞌe ḻibr c̱he Diozənꞌ ganꞌ zɉənyoɉ la yoguəꞌ beṉəꞌ bazɉənapə yeḻəꞌ mban zeɉḻicaṉe.
\p
\v 4 Ḻeꞌe yebei do tyempte deꞌen chonḻilažəꞌəle X̱ancho Jesocristənꞌ. Deꞌe yoblə əchniaꞌ, ḻeꞌe yebei.
\v 5 Ḻegon par nic̱h yoguəꞌəḻoḻ beṉəꞌ yesəꞌəṉezeneꞌ de que nacle beṉəꞌ gax̱ɉwlažəꞌ c̱hedəꞌ bazon yidə X̱anchonꞌ deꞌe yoblə.
\p
\v 6 Bito gaquele tolə bitəꞌətezə deꞌen chac c̱hele. Ḻegon orasyon lao Diozənꞌ c̱he yoguəꞌ deꞌen chac naꞌ ṉable yeḻəꞌ chaclen c̱heꞌenəꞌ naꞌ ḻeczə güeꞌeleneꞌ yeḻəꞌ chox̱cwlen catəꞌ bi deꞌen əṉabeleneꞌ.
\v 7 Šə gonḻe caꞌ Diozənꞌ gaquəleneꞌ leꞌe par so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ do tyempte xte ni que gacbeꞌile bixc̱henꞌ bazo chbezle caꞌ. Gaquəleneꞌ leꞌe c̱hedəꞌ ngodəꞌəcho txen len Cristo Jesoꞌosənꞌ.
\s1 Cueꞌ yic̱hɉcho c̱he deꞌe caꞌ zɉənaquə deꞌe güen
\p
\v 8 Naꞌ yetoꞌ consejw deꞌen nga choṉaꞌ leꞌe beṉəꞌ bišəꞌ, cueꞌ yic̱hɉle par güeꞌele por dižəꞌ ḻi, par gonḻe ca beṉəꞌ yoblə əsaꞌapeꞌ leꞌe respet, par gonḻe deꞌe zda ḻicha, naꞌ par gonḻe deꞌe cui bi deꞌe mal nsaꞌ. Cueꞌ yic̱hɉle par gacle beṉəꞌ šaoꞌ, naꞌ par gonḻe deꞌen zɉəṉeze beṉac̱hənꞌ zɉənaquən deꞌe güen. Bitəꞌətezə deꞌe zaqueꞌe lao Diozənꞌ naꞌ bitəꞌətezə deꞌen chebei Diozənꞌ, c̱he ḻegaꞌaquənṉəꞌ cueꞌ yic̱hɉle.
\p
\v 9 Bzenagle c̱hiaꞌ catəꞌ bzeɉniꞌidaꞌ leꞌe binꞌ cheyaḻəꞌ gonḻe, naꞌ baben bableꞌiczele chonaꞌ caꞌ. Ḻesotezə ḻeso ḻegon canꞌ bagwniaꞌ leꞌe. Naꞌ šə gonḻe caꞌ, Dioz benꞌ chon par chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ sotezə soeꞌ gaquəleneꞌ leꞌe.
\s1 Canꞌ gwsaꞌaclen beṉəꞌ Filipos caꞌ Apostol Pabənꞌ
\p
\v 10 Chebeichgüeidaꞌ lao X̱ancho Cristo Jesoꞌosənꞌ de que deꞌe yoblə ṉaꞌa bac̱h bloꞌile canꞌ chonḻe xbab c̱hiaꞌ ca deꞌen bseḻəꞌəle deꞌen goquəlen nadaꞌ. Naꞌ ṉezdaꞌ chonczle xbab c̱hiaꞌanəꞌ, pero cuiṉəꞌ goṉən gaquəlenḻe nadaꞌ antslə.
\v 11 Naꞌ chebeidaꞌ deꞌen bseḻəꞌəlenṉəꞌ, caguə por ni c̱he deꞌe byažɉdaꞌ bi deꞌen byažɉdaꞌ. Diozənꞌ babzeɉniꞌineꞌ nadaꞌ par nic̱h zoaꞌ mbalaz catəꞌ de deꞌen chyažɉdaꞌ naꞌ catəꞌ cui bi bi de.
\v 12 Yoꞌolaoczaꞌ yeḻəꞌ yašəꞌ yeḻəꞌ ziꞌ, naꞌ yoꞌolaoczaꞌ yeḻəꞌ šaoꞌ. Diozənꞌ babzeɉniꞌineꞌ nadaꞌ par zoaꞌ mbalaz bitəꞌətezə chac ḻaꞌaṉəꞌ catəꞌ de deꞌe cheꞌeɉ chaoguaꞌ o ḻaꞌaṉəꞌ catəꞌ chdonaꞌ, naꞌ ḻaꞌaṉəꞌ catəꞌ de bichlə deꞌen chyažɉdaꞌ o catəꞌ cui bi bi de.
\v 13 Chac chonaꞌ bitəꞌətezə deꞌe cheyaḻəꞌ gonaꞌ, c̱hedəꞌ ngodaꞌa txen len Cristənꞌ benꞌ choṉ nadaꞌ fuers balor.
\v 14 Pero ca naquənꞌ goclenḻe nadaꞌ, naquən deꞌe güenchgua deꞌen chonḻe txen len nadaꞌ lao deꞌen chyiꞌ chzacaꞌa.
\p
\v 15 Naꞌ leꞌe nitəꞌəle Filiposənꞌ ṉezele canꞌ goquəlenḻe nadaꞌ catəꞌən bagoc to tyemp daoꞌ bedətix̱ɉueꞌidaꞌ leꞌe dižəꞌ güen dižəꞌ cobə deꞌen chzeɉniꞌin c̱he Cristənꞌ deꞌe neche, naꞌ babenən byen bezaꞌa Masedonianꞌ. Caguə nochlə beṉəꞌ caꞌ chesəꞌədopə chesəꞌəžag par chsoꞌelaogüeꞌe Cristənꞌ gwsoꞌon txen len nadaꞌ par yosoꞌoseḻeꞌe mech deꞌen gaquəlen nadaꞌ, pero naꞌ leꞌe bseḻəꞌəle deꞌen bc̱hinaꞌ.
\v 16 Naꞌ caguə ca naꞌazənꞌ bseḻəꞌəlen, ḻeczə bseḻəꞌəlen yeto c̱hop las catəꞌ gwzoaꞌ Tesalonicanꞌ par bi deꞌen byažɉdaꞌ.
\v 17 Caguə deꞌe chzelažaꞌa bi deꞌen choṉle nadaꞌ sino chzelažaꞌa gonchle deꞌe güen par nic̱h Diozənꞌ yebeicheneꞌ leꞌe.
\v 18 Doxen deꞌen bseḻəꞌəle len Epafroditonꞌ bac̱h gwxiꞌan naꞌ bitoch bi bi chyažɉdaꞌ, deꞌe sc̱haꞌo bade c̱hiaꞌ ṉaꞌa. Naꞌ deꞌen bseḻəꞌəlenꞌ gwxaquəꞌəleben ca to yal deꞌen chḻaꞌ zix̱ deꞌe chzey bx̱ozənꞌ lao Diozənꞌ. Diozənꞌ chebeichgüeineꞌ canꞌ babenḻenꞌ.
\v 19 Yoꞌo lao naꞌ Dioz c̱hechonꞌ yoguəꞌəḻoḻte deꞌen de par əgwnežɉueꞌen con nonꞌ cheneꞌeneꞌ. Naꞌ goneꞌ deꞌe güen juisy par nic̱h gatəꞌ yoguəꞌəḻoḻ deꞌe chyažɉele, c̱hedəꞌ ngodəꞌəle txen len Cristo Jesoꞌosənꞌ.
\v 20 Ḻedoyeꞌelaoch X̱acho Diozənꞌ zeɉḻicaṉe. Canꞌ gonšgaczcho.
\s1 Bzeineꞌ ḻegaꞌaqueꞌ dižəꞌ
\p
\v 21 Ḻeꞌe gguap diox yoguəꞌəḻoḻ beṉəꞌ Filipos caꞌ beṉəꞌ zɉənaquə lažəꞌ naꞌ Diozənꞌ laogüe deꞌen zɉəngodeꞌe txen len Jesocristənꞌ. Naꞌ beṉəꞌ bišəꞌəcho caꞌ nitəꞌ txen len nadaꞌ nga chosoꞌoguapeꞌ leꞌe diox.
\v 22 Naꞌ ḻeczə caꞌ yoguəꞌ beṉəꞌ Roma quinga beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ chosoꞌoguapeꞌ leꞌe diox, naꞌ mazəchlə beṉəꞌ caꞌ chsoꞌon žin liž reinꞌ chosoꞌoguapeꞌ leꞌe diox.
\p
\v 23 X̱ancho Jesocristənꞌ sošgueꞌ gaquəlenšgaczeꞌ leꞌe len xbab deꞌen yoꞌo ḻoꞌo yic̱hɉlaꞌaždaꞌolenꞌ. Deꞌe naꞌazənꞌ deꞌen chzoɉaꞌ ṉaꞌa.
\b
\m Pab