\id COL
\ide UTF8
\h COLOSENSES
\toc1 Colosenses
\mt1 Cart Deꞌen Bzoɉ San Pabənꞌ Par Beṉəꞌ Colosas Caꞌ
\c 1
\s1 Pabənꞌ chzoɉeꞌ beṉəꞌ caꞌ chsoꞌelaoꞌ Jesocristənꞌ Colosasənꞌ
\p
\v 1-2 Nadaꞌ Pab nacaꞌ apostol c̱he Jesocristənꞌ con canꞌ gwnalažəꞌ Diozənꞌ. Nadaꞌ chzoɉaꞌ leꞌe nitəꞌəle Colosasənꞌ leꞌe banacle lažəꞌ naꞌ Diozənꞌ laogüe deꞌen ngodəꞌəle txen len Cristənꞌ, c̱hedəꞌ txen len netoꞌ naccho famiḻy c̱heꞌenəꞌ. Beṉəꞌ bišəꞌəcho Temtionꞌ naꞌ nadaꞌ chṉabtoꞌ lao X̱acho Diozənꞌ sotezə soeꞌ gaquəlenšgaczeꞌ leꞌe naꞌ gonšgueꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Pabənꞌ choneꞌ orasyonṉəꞌ par beṉəꞌ caꞌ chsoꞌonḻilažəꞌ Cristənꞌ Colosasənꞌ
\p
\v 3 Yoguəꞌ las catəꞌ chonaꞌ orasyon par leꞌe choꞌa yeḻəꞌ chox̱cwlen c̱he Diozənꞌ par leꞌe, Dioz benꞌ naquə X̱a X̱ancho Jesocristənꞌ.
\v 4 Babendaꞌ rson canꞌ chonḻilažəꞌəle Jesocristənꞌ naꞌ canꞌ chaquele c̱he yeziquəꞌəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 5 Choꞌa yeḻəꞌ chox̱cwlen c̱he Diozənꞌ de que lenḻe zocho lez žɉəyezocho len Diozənꞌ, canꞌ gwyeɉniꞌile catəꞌən gwzolao bzenagle c̱he dižəꞌ güen dižəꞌ cobə c̱he Jesocristənꞌ deꞌen naquən deꞌe ḻi.
\v 6 Dižəꞌ ḻi c̱he Jesocristənꞌ deꞌen chzenagle c̱hei bagosəꞌəlasən doxenḻə naꞌ beṉəꞌ caꞌ chosoꞌozenag c̱hei ga yoblə ḻeczə chsoꞌoneꞌ güen naꞌ chosoꞌozeɉniꞌineꞌen beṉəꞌ yoblə canꞌ chon leꞌe dezd žanꞌ catəꞌən bzenaglen deꞌe nech naꞌ gwṉezele de que deꞌe ḻi nžiꞌilažəꞌ Diozənꞌ leꞌe.
\v 7 Epafras daꞌonəꞌ bzeɉniꞌineꞌ leꞌe xtižəꞌ Cristənꞌ lguaꞌa nadaꞌ. Choneꞌ xšin Cristənꞌ canꞌ chonaꞌ par chacleneꞌ leꞌe naꞌ zotezə zoeꞌ choneꞌ complir canꞌ cheyaḻəꞌ goneꞌ.
\v 8 Epafras naꞌanəꞌ bagwneꞌ nadaꞌ canꞌ baben Spirit c̱he Diozənꞌ par nic̱h chaquele c̱he lɉuežɉle naꞌ chacteile c̱hiaꞌ.
\p
\v 9 Deꞌe naꞌanəꞌ dezd catəꞌən gwṉezdaꞌ canꞌ chonḻenꞌ, yoguəꞌ laste chonaꞌ orasyon lao Diozənꞌ par leꞌe chṉabaꞌ goṉ Spirit c̱heꞌenəꞌ leꞌe yoguəꞌ cḻaste yeḻəꞌ sinꞌ naꞌ yeḻəꞌ cheɉniꞌi par nic̱h caꞌ əṉezele tchoꞌa tšaoꞌ canꞌ cheneꞌeneꞌ gonḻe.
\v 10 Chṉabaꞌ əṉezele canꞌ cheneꞌeneꞌ gonḻe par nic̱h caꞌ šeɉəchle gonḻe canꞌ cheyaḻəꞌ gon chioꞌo nombiꞌacho X̱anchonꞌ naꞌ gonḻe doxen canꞌ chazlažeꞌenəꞌ, gonḻe yoguəꞌ cḻaste deꞌe güen, naꞌ šeɉəch gombiaꞌachle Diozənꞌ.
\v 11 Naꞌ chṉabaꞌ gaquəlen Diozənꞌ leꞌe len yeḻəꞌ guac xen c̱heꞌenəꞌ par nic̱h gaple yeḻəꞌ chxenḻažəꞌ naꞌ sotezə sole gonḻilažəꞌəleneꞌ bitəꞌətezə deꞌen chac naꞌ sole mbalaz. Chṉabaꞌ gaquəleneꞌ leꞌe caꞌ c̱hedəꞌ napeꞌ ḻeꞌezelaogüe yeḻəꞌ guac xen.
\v 12 Naꞌ ḻeczə güeꞌele yeḻəꞌ chox̱cwlen c̱he X̱acho Diozənꞌ c̱hedəꞌ ḻeꞌenəꞌ beneꞌ par nic̱h txen len yeziquəꞌəchlə beṉəꞌ caꞌ bagwleɉeꞌ par zɉənaqueꞌ lažəꞌ neꞌenəꞌ gaquə žɉəyezocho len ḻeꞌ ganꞌ chey cheꞌeniꞌichgua.
\v 13 Diozənꞌ babebeɉeꞌ chioꞌo xniꞌa gwxiyeꞌenəꞌ deꞌen chnabiaꞌ beṉəꞌ caꞌ chsaꞌaš ḻoꞌo deꞌe žc̱hoḻənꞌ naꞌ beneꞌ par nic̱h chnabiaꞌ Xiꞌiṉeꞌ Jesocristənꞌ chioꞌo benꞌ chaqueneꞌ c̱hei.
\v 14 Xiꞌiṉeꞌ Jesocrist naꞌanəꞌ gwdixɉueꞌ xtoḻəꞌəchonꞌ par nic̱h Diozənꞌ cheziꞌixeneꞌ c̱hecho.
\s1 Cristənꞌ chozoeꞌ chioꞌo binḻo len Diozənꞌ
\p
\v 15 Yic̱hɉlaꞌaždaoꞌ Cristənꞌ naquən cayaṉəꞌən naquə yic̱hɉlaꞌaždaoꞌ X̱eꞌ Diozənꞌ benꞌ cui no chleꞌi, naꞌ tozə canꞌ chsoꞌoneꞌ. Bazoczə Cristənꞌ catəꞌən cuiṉəꞌ x̱e yežlyonꞌ, catəꞌən cuiṉəꞌ ṉitəꞌ angl caꞌ naꞌ beṉac̱h caꞌ, naꞌ catəꞌ cuiṉəꞌ gatəꞌ bitəꞌətezə deꞌen zɉəde.
\v 16 Ḻeꞌenəꞌ beneꞌ yobanꞌ naꞌ yežlyonꞌ naꞌ beneꞌ beṉəꞌ žaꞌ yobanꞌ naꞌ beṉəꞌ žaꞌ yežlyonꞌ, naꞌ bia yix̱əꞌ caꞌ, naꞌ biquəꞌəchlə deꞌen zɉəde yobanꞌ naꞌ yežlyonꞌ. Beneꞌ par nic̱h zɉəde deꞌe caꞌ chleꞌicho naꞌ deꞌe caꞌ cui chleꞌicho. Beneꞌ par nic̱h nitəꞌ angl əblao caꞌ, nitəꞌ spirit mal caꞌ chəsəꞌənabiaꞌan beṉəꞌ caꞌ cui chosoꞌozenag c̱he Diozənꞌ, nitəꞌ deꞌe x̱ioꞌ naꞌ nitəꞌ biquəꞌəchlə deꞌe caꞌ zɉənapə poder. Naꞌ Crist nanꞌ beneꞌ par nic̱h nitəꞌ deꞌe caꞌ, naꞌ nitəꞌ beṉəꞌ caꞌ, nic̱h siꞌe yeḻəꞌ balaꞌaṉ.
\v 17 Cristənꞌ bazoczeꞌ catəꞌən cuiṉəꞌ ṉitəꞌ beṉac̱h, angl, bia yix̱əꞌ naꞌ biquəꞌəchlə deꞌen zɉəde, naꞌ noeꞌ c̱he to toeꞌ zɉənaqueꞌ canꞌ zɉənaqueꞌ naꞌ to ton zɉənaquən canꞌ zɉənaquən, c̱hedəꞌ Cristənꞌ noneꞌ mendad par chac caꞌ.
\v 18 Naꞌ Crist naꞌanəꞌ chnabiꞌe chioꞌo chdopə chžagcho choꞌelaꞌochoneꞌ naꞌ ḻenꞌ beṉeꞌ chioꞌo yeḻəꞌ mban zeɉḻicaṉenꞌ. Ḻenꞌ naqueꞌ beṉəꞌ nech bebaneꞌ ladɉo beṉəꞌ guat caꞌ par chnabiꞌe naꞌ deꞌe naꞌanəꞌ naqueꞌ ḻeꞌezelaogüe beṉəꞌ blao naꞌ chnabiꞌe yoguəꞌəḻoḻ beṉəꞌ naꞌ biquəꞌəchlə.
\v 19 Diozənꞌ chazlažeꞌe de que cayaṉəꞌən naquə yic̱hɉlaꞌaždaogüeꞌenəꞌ caꞌaczənꞌ naquə yic̱hɉlaꞌaždaoꞌ Xiꞌiṉeꞌ Cristənꞌ, cayaṉəꞌən naquə yeḻəꞌ guac c̱he Diozənꞌ caꞌaczənꞌ naquə yeḻəꞌ guac c̱he Cristənꞌ, naꞌ tozəczə canꞌ chsoꞌoneꞌ.
\v 20 Naꞌ ḻeczə chazlažəꞌ Diozənꞌ de que yoguəꞌ beṉəꞌ žaꞌ yobanꞌ naꞌ beṉəꞌ žaꞌ yežlyo nga guac yesəꞌəṉiteꞌe binḻo len ḻeꞌ laogüe deꞌen blalɉ xc̱hen Cristənꞌ ḻeꞌe yag corozənꞌ.
\p
\v 21-22 Goccho beṉəꞌ contr c̱he Diozənꞌ antslə por ni c̱he xbab malənꞌ deꞌen gwyoꞌo ḻoꞌo yic̱hɉlaꞌaždaꞌochonꞌ naꞌ por ni c̱he deꞌe malənꞌ bencho. Pero ṉaꞌa Cristənꞌ babozoeꞌ chioꞌo binḻo len Diozənꞌ ca deꞌen bnežɉw cuineꞌ por ni c̱hecho catəꞌən gwsoꞌoteꞌeneꞌenəꞌ. Babozoeꞌ chioꞌo binḻo len Diozənꞌ par nic̱h caꞌ gaccho beṉəꞌ laꞌaždaoꞌ xiꞌilažəꞌ naꞌ bito bi doḻəꞌ gapcho catəꞌən yežincho ganꞌ zo Diozənꞌ naꞌ catəꞌən əc̱heꞌe chioꞌo laogüeꞌenəꞌ, naꞌ notono soi əgwcuiš chioꞌo lao Diozənꞌ.
\v 23 Naꞌ yežincho laogüeꞌenəꞌ sin cui bi doḻəꞌ napcho šə zotezə zocho chonḻilažəꞌəcho Cristənꞌ, šə zocho len tozə xbab, naꞌ šə zocho lez žɉəyezocho len Diozənꞌ laogüe deꞌen babzenagcho c̱he dižəꞌ güen dižəꞌ cobə c̱he Cristənꞌ. Dižəꞌ güen dižəꞌ cobə c̱heꞌ naꞌanəꞌ bagosəꞌ gwlalɉən gatəꞌətezə žaꞌ beṉac̱hənꞌ naꞌ Dioz nanꞌ gwleɉeꞌ nadaꞌ Pab par nic̱h əchyix̱ɉuiꞌan.
\s1 Pabənꞌ chacleneꞌ beṉəꞌ caꞌ chesəꞌədopə chesəꞌəžag chsoꞌelaogüeꞌe Cristənꞌ
\p
\v 24 Chebeidaꞌ ḻaꞌaṉəꞌəczə chyiꞌ chzacaꞌa laogüe deꞌen əchyix̱ɉuiꞌa xtižəꞌ Cristənꞌ len leꞌe cui nacle beṉəꞌ Izrael, naꞌ cheꞌendaꞌ gaquə c̱hiaꞌ bichlə deꞌen ṉeꞌe chac faḻt par yeyož gaquəlenaꞌ leꞌe. Cristənꞌ gwdiꞌ gwxaqueꞌe par gocleneꞌ chioꞌo chdopə chžagcho choꞌelaꞌochoneꞌ, chioꞌo gwxaquəꞌəlebecho ca cuerp c̱heꞌenəꞌ, naꞌ canꞌ chac c̱hiaꞌ par chaquəlenaꞌ leꞌe.
\v 25 Diozənꞌ gwleɉeꞌ nadaꞌ par chonaꞌ xšineꞌenəꞌ entr leꞌe cui nacle beṉəꞌ Izrael par nic̱h caꞌ gwzeɉniꞌidaꞌ leꞌe doxen canꞌ na xtižeꞌenəꞌ.
\v 26 Dezd gwlalte de deꞌen bito no gwyeɉniꞌi canꞌ na xtižeꞌenəꞌ pero ṉaꞌa babzeɉniꞌi Diozənꞌ chioꞌo ḻen, chioꞌo bagwleɉeꞌ par naccho lažəꞌ neꞌenəꞌ.
\v 27 Diozənꞌ cheneꞌeneꞌ əṉezecho de que ḻechguaḻe deꞌe güen juisy choneꞌ len notəꞌətezcho chonḻilažəꞌəchoneꞌ ḻaꞌaṉəꞌəczə cui naccho beṉəꞌ Izrael. Deꞌe naꞌanəꞌ bachzeɉniꞌineꞌ chioꞌo deꞌen cui no gwṉeze antslə de que chioꞌo chonḻilažəꞌəcho Cristənꞌ ngodəꞌəcho txen len ḻeꞌ naꞌ deꞌe naꞌanəꞌ zocho lez žɉəyezocho len Diozənꞌ ganꞌ chey cheꞌeniꞌichgua.
\p
\v 28 Choꞌelentoꞌ yoguəꞌəḻoḻ beṉəꞌ dižəꞌ c̱he Cristənꞌ chatəꞌəyoigaꞌaquetoꞌoneꞌ par nic̱h yosoꞌozenagueꞌ c̱heꞌ naꞌ chzeɉniꞌigaꞌaquetoꞌoneꞌ naquənꞌ neꞌ. Choꞌetoꞌ xtižeꞌen len yoguəꞌ cḻas yeḻəꞌ sinꞌ par nic̱h caꞌ catəꞌ yežincho lao Diozənꞌ yoguəꞌ beṉəꞌ caꞌ bosoꞌozenag c̱hetoꞌ əsaꞌaqueꞌ cayaṉəꞌən cheneꞌe Diozənꞌ əsaꞌaqueꞌ laogüe deꞌen zɉəngodeꞌe txen len Cristənꞌ canꞌ ngodəꞌ chioꞌo.
\v 29 Naꞌ deꞌe naꞌanəꞌ chonchguaꞌ xte ga zelao chzaquəꞌədaꞌ əchyix̱ɉuiꞌa xtižeꞌenəꞌ len doxen fuers balor deꞌen choṉ Cristənꞌ nadaꞌ.
\c 2
\p
\v 1-2 Naꞌ cheꞌendaꞌ əṉezele canꞌ chonaꞌ xte ga zelao chzaquəꞌədaꞌ par nic̱h əchtipaꞌ lažəꞌəle naꞌ lažəꞌ beṉəꞌ caꞌ nitəꞌ Laodiseanꞌ naꞌ yeziquəꞌəchlə beṉəꞌ caꞌ chsoꞌonḻilažəꞌ Cristənꞌ do naꞌ, beṉəꞌ cuiṉəꞌ gombiꞌagaꞌacaꞌ. Chonaꞌ xte ga zelao chzaquəꞌədaꞌ par nic̱h yoguəꞌəle gaque c̱he lɉuežɉle tole yetole naꞌ par nic̱h ṉezele tchoꞌa tšaoꞌ canꞌ cheyaḻəꞌ gonḻe xbab yoguəꞌ laste naꞌ par nic̱h šeɉniꞌile c̱he Cristənꞌ. Cui no gwṉeze antslə deꞌen bachzeɉniꞌi Diozənꞌ chioꞌo c̱he Cristənꞌ.
\v 3 Naꞌ šə binꞌ cheneꞌecho ṉezecho, doxen yeḻəꞌ sinꞌ naꞌ yeḻəꞌ cheɉniꞌi c̱he Diozənꞌ napə Cristənꞌ ḻen par chzeɉniꞌineꞌen chioꞌo.
\v 4 Echniaꞌ caꞌ par nic̱h cui no yopei leꞌe len dižəꞌ yoblə par x̱oayagle.
\v 5 Ḻaꞌaṉəꞌəczə bito zoaꞌ naꞌ len leꞌe, syempr chonaꞌ xbab c̱hele naꞌ chebeidaꞌ deꞌen chonḻe canꞌ cheyaḻəꞌ gonḻe naꞌ zotezə zole chonḻilažəꞌəle Cristənꞌ.
\p
\v 6 Deꞌe naꞌanəꞌ con canꞌ babsedle c̱he Jesocristənꞌ naꞌ canꞌ bachonḻilažəꞌəleneꞌ ca X̱anḻe, con caꞌašgaczənꞌ sotezə sole len ḻeꞌ.
\v 7 Naꞌ ḻeꞌe sotezə ḻeso ḻegonḻilažəꞌ Cristənꞌ canꞌ babzeɉniꞌi Epafrasənꞌ leꞌe par nic̱h gacle ca to yag deꞌe chaz ḻoinəꞌ zitɉw naꞌ chchaꞌochguan. Naꞌ ḻeꞌe güeꞌechgua yeḻəꞌ chox̱cwlen c̱he Diozənꞌ canꞌ chacleneꞌ leꞌe.
\s1 Cristənꞌ babocobeꞌ yic̱hɉlaꞌaždaꞌochonꞌ
\p
\v 8 Ḻeꞌe gapə cuidad par nic̱h notono yesəꞌəx̱oayag leꞌe len xbab c̱hegaꞌaczeꞌ par ṉaole deꞌen chosoꞌosed chosoꞌoloꞌineꞌ. Ḻegaꞌaqueꞌ chosoꞌosed chosoꞌoloꞌineꞌ deꞌen cui bi zaquəꞌ c̱he costombr gol caꞌ deꞌen zɉəde, c̱he deꞌen yeꞌeɉ gaocho, c̱he ža caꞌ naꞌ c̱he cuerp c̱hechonꞌ lguaꞌa yosoꞌosed yosoꞌoloꞌineꞌ c̱he Cristənꞌ.
\p
\v 9 Cristənꞌ lao goqueꞌ beṉəꞌ beləꞌ chen goc yic̱hɉlaꞌaždaogüeꞌenəꞌ doxen canꞌ naquə yic̱hɉlaꞌaždaoꞌ Diozənꞌ naꞌ caꞌaczənꞌ naqueꞌ ṉaꞌa. Gwdapeꞌ yeḻəꞌ guac cayaṉəꞌən napə Diozənꞌ naꞌ caꞌaczənꞌ napeꞌen ṉaꞌa. Beneꞌ tozəczə canꞌ chon Diozənꞌ naꞌ caꞌaczən choneꞌ ṉaꞌa.
\v 10 Naꞌ Cristənꞌ chnabiꞌacheꞌ ca notəꞌətezə angl əblao naꞌ notəꞌətezə deꞌe x̱ioꞌ. Naꞌ chioꞌo laogüe deꞌen ngodəꞌəcho txen len Cristənꞌ bitoch bi bi chyažɉəchecho par so cuezcho binḻo.
\v 11 Naꞌ ḻeczə deꞌen ngodəꞌəcho txen len ḻeꞌ zocho to señy deꞌen zeɉen ca señy deꞌen neꞌ sirconsisionṉəꞌ. Bito naquən señy deꞌen bzo beṉəꞌ lao cuerp c̱hechonꞌ, sino deꞌen bagwleɉyic̱hɉcho cuich chzenagcho c̱he laꞌaždaꞌomalcho naꞌanəꞌ. Cristənꞌ babocobeꞌ yic̱hɉlaꞌaždaꞌochonꞌ.
\v 12 Naꞌ ca deꞌen bagwchoacho nisənꞌ zeɉen ca gotcho naꞌ bgašəꞌəcho txen len Cristənꞌ naꞌ ḻeczə zeɉen ca boḻis bosban Diozənꞌ chioꞌo ladɉo beṉəꞌ guat caꞌ. Diozənꞌ boḻis bosbaneꞌ Cristənꞌ ladɉo beṉəꞌ guat caꞌ, naꞌ catəꞌən benḻilažəꞌəchoneꞌ par bocobeꞌ yic̱hɉlaꞌaždaꞌochonꞌ, cananꞌ beneꞌ par nic̱h cuich naccho ca beṉəꞌ guat.
\v 13 Antslə gwxaquəꞌəlebecho ca beṉəꞌ guat len yic̱hɉlaꞌaždaꞌochonꞌ c̱hedəꞌ bito bzenagcho c̱he Diozənꞌ, bzenagzechcho c̱he laꞌaždaꞌomalchonꞌ. Pero naꞌ canꞌ ben Diozənꞌ par nic̱h Cristənꞌ bebaneꞌ ladɉo beṉəꞌ guat caꞌ, ḻeczə canꞌ bocobeꞌ yic̱hɉlaꞌaždaꞌochonꞌ par nic̱h cuich naccho ca beṉəꞌ guat naꞌ babeziꞌixeneꞌ yoguəꞌəte xtoḻəꞌəchonꞌ.
\v 14 Diozənꞌ bseḻeꞌe Cristənꞌ gwdixɉueꞌ xtoḻəꞌəchonꞌ ḻeꞌe yag corozənꞌ par nic̱h cui siꞌicho castigw por ni c̱he deꞌen cui bencho complir yoguəꞌəḻoḻ canꞌ na ḻei c̱heꞌenəꞌ deꞌen nyoɉənꞌ. Deꞌe naꞌanəꞌ ḻeinꞌ bitoch güeꞌen dižəꞌ contr chioꞌo canꞌ benən antslə.
\v 15 Diozənꞌ bequeꞌe yeḻəꞌ gwnabiaꞌ c̱he angl bzelao caꞌ naꞌ deꞌe x̱ioꞌ caꞌ par nic̱h cuich yesəꞌənabiaꞌan chioꞌo. Bloꞌineꞌ beṉac̱hənꞌ de que banitəꞌən xniꞌenəꞌ catəꞌən Cristənꞌ gwdixɉueꞌ xtoḻəꞌəchonꞌ ḻeꞌe yag corozənꞌ.
\s1 Cheyaḻəꞌ cuec yic̱hɉcho deꞌe caꞌ zɉəzaquəꞌ len Diozənꞌ
\p
\v 16 Deꞌe naꞌanəꞌ bito gwzenagle c̱he beṉəꞌ caꞌ chəsəꞌəna chonḻe deꞌe mal ca deꞌen bito naole costombr caꞌ deꞌen na ḻei deꞌen bzoɉ deꞌe Moisezənꞌ naꞌ bichlə costombr c̱hegaꞌaqueꞌenəꞌ deꞌen chəsəꞌəneꞌ cheyaḻəꞌ yeꞌeɉ gaocho, o goncho lṉi, o canꞌ goncho catəꞌ naquə bioꞌ cheꞌeṉ, o deꞌen cheyaḻəꞌ gombaꞌaṉcho ža deꞌen chsaꞌaqueneꞌ naquən deꞌe žialao.
\v 17 Diozənꞌ beneꞌ par nic̱h deꞌe Moisezənꞌ bzoɉeꞌ c̱he costombr caꞌ parzə nic̱h bzeɉniꞌineꞌ chioꞌo latəꞌ daoꞌ c̱he Cristənꞌ antslə zeꞌe yideꞌ. Pero ṉaꞌa babidə Cristənꞌ naꞌ costombr caꞌ bito zɉəzaquəꞌən canꞌ zaquəꞌ deꞌen nombiꞌacho Cristənꞌ.
\v 18 Nitəꞌ beṉəꞌ chosoꞌosed chosoꞌoloꞌineꞌ de que cheyaḻəꞌ gon cuincho ca to deꞌe cui bi zaquəꞌ naꞌ cheyaḻəꞌ güeꞌelaꞌocho no angl naꞌ goncho bichlə deꞌen chəsəꞌəneꞌ besəꞌəleꞌidaogüeꞌenəꞌ. Bito gwzenagle c̱hegaꞌaqueꞌ catəꞌ əseꞌe leꞌe de que cui chonḻe canꞌ cheyaḻəꞌ gonḻe. Con chsoꞌon cuingaꞌaqueꞌ xen c̱hedəꞌ chosoꞌozenagueꞌ c̱he laꞌaždaꞌomalgaꞌaqueꞌenəꞌ.
\v 19 Ḻegaꞌaqueꞌ bito zɉəngodeꞌe txen len Cristənꞌ benꞌ chnabiaꞌ chioꞌo chdopə chžagcho choꞌelaꞌochoneꞌ. Pero chioꞌo chdopə chžagcho choꞌelaꞌochoneꞌ ngodəꞌəccho txen len ḻeꞌ naꞌ len lɉuežɉcho caꞌ ca to to part c̱he cuerp c̱hechonꞌ ngodəꞌən txen len bec̱hɉ bniaꞌ caꞌ. Naꞌ deꞌen ngodəꞌəcho txen len Cristənꞌ Diozənꞌ chacleneꞌ chioꞌo par nic̱h chaquəchcho beṉəꞌ šaoꞌ beṉəꞌ güen.
\p
\v 20 Ca naquənꞌ ngodəꞌəcho txen len Cristənꞌ catəꞌən goteꞌ, bito cheyaḻəꞌ cueꞌech yic̱hɉcho c̱he costombr deꞌen zɉəsəꞌənao beṉəꞌ caꞌ cui chosoꞌozenag c̱he Diozənꞌ, costombr c̱he deꞌen yeꞌeɉ gaocho, c̱he ža caꞌ naꞌ c̱he cuerp c̱hechonꞌ. Laꞌ chioꞌo bitoch naccho txen len beṉəꞌ caꞌ cui chosoꞌozenag c̱he Diozənꞌ naꞌ deꞌe naꞌanəꞌ bito cheyaḻəꞌ goncho canꞌ chsoꞌoneꞌenəꞌ.
\v 21 Deꞌe naꞌanəꞌ bito gwzenagle c̱he beṉəꞌ caꞌ chəsəꞌəna: “Bito gox̱əꞌəle deꞌe nga, bito yeꞌeɉ gaole deꞌe naꞌ, naꞌ bito canḻe deꞌen yeto.”
\v 22 Costombr caꞌ zaꞌaquən c̱he beṉac̱hənꞌ, laꞌ yoguəꞌ deꞌe caꞌ deꞌen chəsəꞌəneꞌ cui gox̱əꞌəcho, cui yeꞌeɉ gaocho naꞌ cui cancho, deꞌen chc̱hinchon chəsəꞌəde c̱hei.
\v 23 Chsaꞌaque beṉəꞌ de que costombr caꞌ zɉənaquən deꞌe sinꞌ. Len deꞌe chsaꞌalɉlažəꞌ beṉac̱h caꞌazənəꞌ par chseꞌeɉṉiꞌalažeꞌe angl caꞌ naꞌ par chsoꞌon cuingaꞌaqueꞌ ca to deꞌe cui bi zaquəꞌ naꞌ par chəsəꞌəžaglaogüeꞌ len cuerp c̱hegaꞌaqueꞌenəꞌ, pero bito saꞌaclenən chioꞌo par nic̱h cui əgwzenagcho c̱he laꞌaždaꞌomalchonꞌ.
\c 3
\p
\v 1 Canꞌ boḻis bosban Diozənꞌ Cristənꞌ ladɉo beṉəꞌ guat caꞌ, ḻeczə canꞌ babocobeꞌ yic̱hɉlaꞌaždaꞌochonꞌ. Deꞌe naꞌanəꞌ cheyaḻəꞌ cuec yic̱hɉcho c̱he deꞌe caꞌ zɉənaquə deꞌe zaqueꞌe ganꞌ zo Cristənꞌ chnabiꞌe txen len Diozənꞌ.
\v 2 Cheyaḻəꞌ cueꞌ yic̱hɉcho c̱he deꞌe caꞌ zɉəzaqueꞌe len Diozənꞌ caguə deꞌe caꞌ zɉəzaqueꞌe len beṉac̱hənꞌ.
\v 3 Bagwleɉyic̱hɉcho cuich chzenagcho c̱he laꞌaždaꞌomalchonꞌ naꞌ mbancho par goncho canꞌ cheneꞌe Diozənꞌ. Naꞌ zocho txen len Diozənꞌ laogüe deꞌen ngodəꞌəcho txen len Cristənꞌ ḻaꞌaṉəꞌəczə cui chsaꞌacbeꞌi beṉəꞌ.
\v 4 De yeḻəꞌ mban c̱hecho zeɉḻicaṉe c̱hedəꞌ chonḻilažəꞌəcho Cristənꞌ naꞌ Cristənꞌ zotezə zoeꞌ len chioꞌo. Naꞌ catəꞌ yideꞌ deꞌe yoblə goneꞌ par nic̱h yic̱hɉlaꞌaždaꞌochonꞌ yeyož gaquən ca yic̱hɉlaꞌaždaogüeꞌenəꞌ naꞌ goneꞌ par nic̱h cuerp c̱hechonꞌ yeyaquən to cuerp cobə deꞌen gaquə ḻechguaḻe güen canꞌ naquə cuerp c̱he ḻeꞌenəꞌ.
\s1 Canꞌ bencho antslə naꞌ canꞌ cheyaḻəꞌ goncho ṉaꞌa
\p
\v 5 Naꞌ laogüe deꞌen babocobeꞌ yic̱hɉlaꞌaždaꞌochonꞌ, cheyaḻəꞌ cueɉyic̱hɉcho deꞌe mal caꞌ deꞌen cheneꞌe laꞌaždaꞌomalchonꞌ goncho žlac zocho yežlyo nga. Bito coꞌo xtocho nic cueɉyic̱hɉcho noꞌol c̱hecho o beꞌen c̱hecho par solencho beṉəꞌ yoblə. Bito goncho bichlə deꞌe yeḻəꞌ ztoꞌ. Bito yebeicho bitəꞌətezə deꞌen naquə deꞌe yeḻəꞌ ztoꞌ. Bito selažəꞌəcho goncho bitəꞌətezə deꞌe mal. Naꞌ bito selažəꞌəcho deꞌe zan deꞌe gatəꞌ c̱hecho, c̱hedəꞌ tozəczə ca mal naquən len deꞌen chsoꞌon beṉəꞌ chseꞌeɉṉiꞌalažeꞌe lguaꞌa lsaquəꞌ.
\v 6 Gwžin ža catəꞌ Diozənꞌ goneꞌ castigw zeɉḻicaṉe c̱he beṉəꞌ caꞌ chsoꞌelaꞌozecheꞌ chsoꞌoneꞌ deꞌe mal caꞌ zɉənac caꞌ.
\v 7 Antslə gwdaczle benḻe deꞌe malənꞌ ca deꞌe caꞌ bagwniꞌanəꞌ.
\v 8 Pero ṉaꞌa cheyaḻəꞌ cueɉyic̱hɉle yoguəꞌ deꞌe mal caꞌ. Bito əžaꞌa lɉuežɉle naꞌ bito locle. Bito gaquəxiꞌi lɉuežɉle, bito gwžia əgwnitəꞌ lɉuežɉle, naꞌ bito güeꞌele dižəꞌ zban.
\v 9 Bito güeꞌele dižəꞌ güenḻažəꞌ len lɉuežɉle. Bitoch gonḻe deꞌe caꞌ c̱hedəꞌ bagwzolao chbeɉyic̱hɉle cuich chzenagle c̱he laꞌaždaꞌomallenꞌ len deꞌe mal caꞌ deꞌen nan gonḻe.
\v 10 Diozənꞌ benꞌ ben yoguəꞌəcho babocobeꞌ yic̱hɉlaꞌaždaꞌochonꞌ, naꞌ chzeɉniꞌineꞌ chioꞌo par nic̱h zda chaquəch yic̱hɉlaꞌaždaꞌochonꞌ canꞌ naquə yic̱hɉlaꞌaždaogüeꞌenəꞌ.
\v 11 Bitobi nonən par len Diozənꞌ šə naccho beṉəꞌ Izrael o šə cui naccho beṉəꞌ Izrael. Bitobi nonən par ḻeꞌ šə zocho señy deꞌen neꞌ sirconsision o šə cui zochon. Naꞌ ḻeczə bitobi nonən par ḻeꞌ šə naccho beṉəꞌ zitəꞌ ḻaꞌaṉəꞌəczə šə zaꞌacho yež deꞌe ḻechguaḻe ṉeꞌe naquə serrado. Naꞌ ḻeꞌegatezə caꞌ bitobi nonən par ḻeꞌ šə naccho esclabos o šə cui naccho esclabos. Deꞌen naquə deꞌe žialao xen, gonḻilažəꞌəcho Cristənꞌ. Naꞌ notəꞌətezə naccho šə bachonḻilažəꞌəchoneꞌ ngodəꞌəcho txen len ḻeꞌ.
\p
\v 12 Diozənꞌ bagwleɉeꞌ chioꞌo par naccho lažəꞌ neꞌenəꞌ naꞌ chaqueneꞌ c̱hecho. Deꞌe naꞌanəꞌ ḻegon canꞌ cheyaḻəꞌ gon chioꞌo bagwleɉ Diozənꞌ par naccho xiꞌiṉeꞌ. Ḻeꞌe yeyašəꞌ ḻeyežiꞌilažəꞌ lɉuežɉle naꞌ ḻegon güen len lɉuežɉle. Bito gon cuinḻe xen. Ḻeꞌe gac beṉəꞌ gax̱ɉwlažəꞌ, naꞌ ḻeꞌe gapə yeḻəꞌ chxenḻažəꞌ len lɉuežɉle.
\v 13 Naꞌ ḻeꞌe gwde caꞌaḻə šə bi chac c̱hele entr tole yetole, naꞌ ḻeꞌe yeziꞌixen c̱he lɉuežɉle šə chaquele bi babeneneꞌ leꞌe. Con canꞌ babeziꞌixen Cristənꞌ c̱hecho caꞌaczənꞌ cheyaḻəꞌ yeziꞌixencho c̱he lɉuežɉcho.
\v 14 Naꞌ deꞌen naquəch deꞌe žialao xench lao yoguəꞌ deꞌe caꞌ, cheyaḻəꞌ gaque c̱he lɉuežɉcho c̱hedəꞌ šə chaquecho c̱he lɉuežɉcho nachənꞌ ḻeczə goncho bitəꞌətezəchlə deꞌen cheneꞌe Diozənꞌ goncho.
\v 15 Diozənꞌ gwleɉeꞌ chioꞌo par so cuezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ naꞌ par socho binḻo len lɉuežɉchonꞌ. Deꞌe naꞌanəꞌ ḻegon ca gaquəlen Diozənꞌ leꞌe so cuezle caꞌ, laꞌ yoguəꞌ chioꞌo chonḻilažəꞌəcho Cristənꞌ banaccho ca tozə famiḻy. Naꞌ ḻeꞌe güeꞌ yeḻəꞌ chox̱cwlen c̱he Diozənꞌ canꞌ chacleneꞌ leꞌe.
\p
\v 16 Ḻesotezə ḻeso ḻegon xbab c̱he deꞌe caꞌ babzeɉniꞌi Cristənꞌ chioꞌo. Ḻeꞌe gwzeɉniꞌi beṉəꞌ lɉuežɉle caꞌ naꞌ ḻeꞌe gatəꞌəyoigaꞌaqueneꞌ len yoguəꞌ cḻas yeḻəꞌ sinꞌ par yosoꞌozenagueꞌ c̱he Cristənꞌ. Ḻegoḻ no salmos naꞌ no imnos, naꞌ bichlə deꞌen na Spirit c̱he Diozənꞌ goḻle, güeꞌele yeḻəꞌ chox̱cwlen c̱heꞌ ḻoꞌo yic̱hɉlaꞌaždaꞌolenꞌ canꞌ chaclen X̱anchonꞌ leꞌe.
\v 17 Naꞌ bitəꞌətezə deꞌe gonḻe naꞌ bitəꞌətezə dižəꞌən güeꞌele, ḻegonən naꞌ ḻeꞌe güeꞌen par nic̱h X̱ancho Jesoꞌosənꞌ siꞌe yeḻəꞌ balaꞌaṉ. Naꞌ do tyempte güeꞌele yeḻəꞌ chox̱cwlen c̱he X̱acho Diozənꞌ canꞌ chaclen X̱ancho Jesoꞌosənꞌ leꞌe.
\s1 Quinganꞌ cheyaḻəꞌ gon chioꞌo babocobə Diozənꞌ yic̱hɉlaꞌaždaꞌochonꞌ
\p
\v 18 Leꞌe noꞌolə leꞌe nšagnaꞌale, ḻeꞌe gwzenag c̱he beꞌen c̱he to tole canꞌ cheyaḻəꞌ gon chioꞌo chonḻilažəꞌəcho X̱ancho Cristənꞌ.
\v 19 Naꞌ leꞌe beṉəꞌ byo leꞌe nšagnaꞌale, ḻegaque c̱he noꞌol c̱he to tole naꞌ bito gonḻe znia len ḻegaꞌaqueꞌ.
\v 20 Naꞌ leꞌe biꞌi xcuidəꞌ, ḻeꞌe gwzenag c̱he x̱axnaꞌale yoguəꞌəḻoḻ binꞌ seꞌe leꞌe, c̱hedəꞌ canꞌ chazlažəꞌ X̱anchonꞌ gonḻe.
\v 21 Naꞌ leꞌe nacle x̱axnaꞌ biꞌi xcuidəꞌ, bito con gonḻe ca yesəꞌəžaꞌa yesəꞌəlocboꞌ, laꞌ šə gonḻe caꞌ bitobi de gost ṉitəꞌəboꞌ naꞌ bitoch yosoꞌozenagboꞌ c̱hele.
\v 22 Naꞌ leꞌe nacle mos, cheyaḻəꞌ əgwzenagle yoguəꞌəḻoḻ canꞌ na x̱an žinṉəꞌ. Bito gonḻeile x̱an žinṉəꞌ gonḻizle ca beṉəꞌ chonchgua žinṉəꞌ catəꞌəzənꞌ chgüieꞌ leꞌe. Pero leꞌe do yic̱hɉ do lažəꞌəle ḻegon žinṉəꞌ laogüe deꞌe chaple Diozənꞌ respet naꞌ cui cheneꞌele əžeꞌe leꞌe.
\v 23 Naꞌ bitəꞌətezə deꞌen gonḻe, gonḻen do yic̱hɉ do lažəꞌəle par nic̱h yebei X̱ancho Cristənꞌ leꞌe, caguə par nic̱h yebei x̱an žin naꞌazənəꞌ.
\v 24 Ḻegon caꞌ c̱hedəꞌ ṉezczele de que X̱ancho Cristənꞌ goneꞌ par nic̱h chioꞌo choncho canꞌ chazlažeꞌenəꞌ yežincho ganꞌ zoeꞌenəꞌ. Naꞌ deꞌen goneꞌ par nic̱h yežincho ganꞌ zoeꞌenəꞌ zaquəꞌəchən ca laxɉwchonꞌ.
\v 25 Naꞌ notəꞌətezə zɉənaquə beṉəꞌ caꞌ chsoꞌon deꞌe malənꞌ, X̱anchonꞌ əgwnežɉueꞌ castigw c̱he to togaꞌaqueꞌ segon naquənꞌ gwsoꞌoneꞌ.
\c 4
\p
\v 1 Naꞌ leꞌe x̱an žin, ḻegon güen len beṉəꞌ caꞌ chsoꞌon xšinḻenꞌ, c̱hedəꞌ ṉezele ḻezə zo X̱anḻe benꞌ zo yobanꞌ.
\p
\v 2 Ḻegac beṉəꞌ banḻažəꞌ par nic̱h sotezə sole gonḻe orasyon, güeꞌele yeḻəꞌ chox̱cwlen c̱he Diozənꞌ canꞌ chacleneꞌ leꞌe.
\v 3 Naꞌ ḻeṉabe Diozənꞌ goneꞌ par nic̱h gaquə latɉə güeꞌelenchaꞌ beṉəꞌ xtižeꞌenəꞌ nic̱h yesəꞌəṉezeneꞌ deꞌen cui no gwṉeze antslə c̱he Cristənꞌ. Laꞌ por ni c̱he deꞌen biꞌa xtižəꞌ Crist naꞌanəꞌ diaꞌ ližya nga.
\v 4 Ḻeṉabe Diozənꞌ əgwzeɉniꞌineꞌ nadaꞌ nic̱h əṉezdaꞌ naquənꞌ yapəgaꞌacaꞌaneꞌ par nic̱h seꞌeɉniꞌineꞌen.
\p
\v 5 Naꞌ žlac ṉaꞌa ṉeꞌe de tyemp par gonḻen, ḻegon güen len beṉəꞌ caꞌ cui zɉənaquə txen len chioꞌo canꞌ cheɉniꞌile cheyaḻəꞌ goncho.
\v 6 Ḻegüeꞌ dižəꞌ šaoꞌ dižəꞌ güen naꞌ dižəꞌ deꞌen naquə deꞌe zaqueꞌe yoguəꞌ laste. Naꞌ ḻegon xbab par nic̱h əṉezele naclənꞌ cheyaḻəꞌ yožiꞌile xtižəꞌ to to beṉəꞌ.
\s1 Chguapeꞌ beṉəꞌ migw c̱heꞌ caꞌ diox
\p
\v 7 Tiquiconꞌ əṉeꞌ leꞌe yoguəꞌəḻoḻ canꞌ chac c̱hiaꞌ. Ḻeꞌ naqueꞌ beṉəꞌ bišəꞌəcho naꞌ chacdaꞌ c̱heꞌ. Zotezə zoeꞌ choneꞌ complir canꞌ cheyaḻəꞌ goneꞌ par chacleneꞌ nadaꞌ chonaꞌ xšin X̱ancho Cristənꞌ.
\v 8 Echseḻaꞌaneꞌ par nic̱h əṉezele canꞌ chac c̱hiaꞌ naꞌ par nic̱h əgwtipeꞌ lažəꞌəle.
\v 9 Naꞌ txen len ḻeꞌ choseḻaꞌa beṉəꞌ bišəꞌəcho Onesimonꞌ benꞌ naquə beṉəꞌ gwlaž c̱hele naꞌ benꞌ chaquecho c̱hei. Lenczə ḻeꞌ zotezə zoeꞌ choneꞌ complir canꞌ cheyaḻəꞌ goneꞌ. Echseḻəꞌəgaꞌacaꞌaneꞌ par nic̱h yesəꞌəneꞌ leꞌe yoguəꞌ deꞌen chontoꞌ nga.
\p
\v 10 Aristarconꞌ benꞌ de ližya nga len nadaꞌ chguapeꞌ leꞌe diox. Naꞌ Marcos beṉəꞌ sobrin c̱he Bernabenꞌ ḻeczə chguapeꞌ leꞌe diox. Bagwniaꞌ canꞌ cheyaḻəꞌ gonḻe güen len Marcosənꞌ catəꞌ leꞌe ganꞌ zolenꞌ.
\v 11 Naꞌ Jesoꞌos benꞌ zɉənsiꞌe Josto ḻeczə chguapeꞌ leꞌe diox. Caguə nochlə beṉəꞌ Izrael chsaꞌacleneꞌ nadaꞌ len deꞌen chonaꞌ par nic̱h ṉabiaꞌ Diozənꞌ beṉəꞌ zanch sino beṉəꞌ caꞌ šoṉzə. Naꞌ zochaꞌ mbalaz laogüe deꞌe chsaꞌacleneꞌ nadaꞌ.
\v 12 Nach ḻeczə beṉəꞌ gwlaž c̱hele Epafrasənꞌ benꞌ chon xšin Cristənꞌ chguapeꞌ leꞌe diox. Yoguəꞌ laste catəꞌ choneꞌ orasyonṉəꞌ chṉabchgüeꞌ əgwzeɉniꞌi Diozənꞌ leꞌe yoguəꞌəḻoḻ deꞌen cheneꞌeneꞌ gonḻe naꞌ par nic̱h yeyož gonḻen naꞌ gacle cayaṉəꞌən cheneꞌe Diozənꞌ gacle.
\v 13 Cheꞌendaꞌ əṉezele canꞌ chonchgüeꞌ orasyon par leꞌe chonḻilažəꞌəle Cristənꞌ Colosas, Laodisea naꞌ Ierapolis.
\v 14 Naꞌ lenczə Locas benꞌ naquə beṉəꞌ güen rmech benꞌ chacdaꞌ c̱hei chguapeꞌ leꞌe diox naꞌ ḻeczəꞌ caꞌ Demasənꞌ chguapeꞌ leꞌe diox.
\p
\v 15 Ḻeꞌe gguapšga diox beṉəꞌ bišəꞌəcho caꞌ žaꞌ Laodiseanꞌ, len Ninfas naꞌ beṉəꞌ caꞌ chesəꞌədopə chesəꞌəžag chsoꞌelaogüeꞌe Diozənꞌ ližeꞌenəꞌ.
\v 16 Naꞌ catəꞌ yeyož gwlable cart nga, əgwnežɉwlen beṉəꞌ caꞌ chesəꞌədopə chesəꞌəžag chsoꞌelaogüeꞌe Diozənꞌ Laodiseanꞌ par nic̱h yosoꞌolabeꞌen. Naꞌ ḻeczə ḻeꞌe gwlab cartənꞌ deꞌen bseḻaꞌa par beṉəꞌ Laodisea caꞌ.
\v 17 Naꞌ ḻeꞌe yeꞌ Arquiponꞌ de que chṉeyoidaꞌaneꞌ goneꞌ seguir len xšin Diozənꞌ deꞌen choneꞌenəꞌ par nic̱h yeyož goneꞌ yoguəꞌəḻoḻ deꞌen gwleɉ X̱ancho Cristənꞌ ḻeꞌ goneꞌ.
\p
\v 18 Part daoꞌ c̱he cart nga nadaꞌ Pab chzoɉaꞌan cuinczaꞌ. Bito ganḻažəꞌəle canꞌ diaꞌ ližya nga. Diozənꞌ sošgueꞌ gaquəlenšgaczeꞌ leꞌe. Deꞌe naꞌazə chzoɉaꞌ ṉaꞌa.
\b
\m Pab