\id 1TH
\ide UTF-8
\h 1 TESALONICENSES
\toc1 1 Tesalonicenses
\mt1 Cart Nech Deꞌen Bzoɉ San Pabənꞌ Par Beṉəꞌ Tesalonica Caꞌ
\c 1
\s1 Pabənꞌ len beṉəꞌ lɉuežɉeꞌ caꞌ bosoꞌozoɉeꞌ beṉəꞌ caꞌ chsoꞌelaogüeꞌe Jesocristənꞌ
\p
\v 1 Nadaꞌ Pab chzoɉaꞌ leꞌe nitəꞌəle Tesalonicanꞌ, leꞌe chdopə chžagle choꞌelaꞌole X̱acho Diozənꞌ naꞌ X̱ancho Jesocristənꞌ laogüe deꞌen ngodəꞌəle txen len ḻegaꞌaqueꞌ. Naꞌ nadaꞌ lenaꞌ Silbano naꞌ Temtionꞌ chṉabtoꞌ lao X̱acho Diozənꞌ naꞌ lao X̱ancho Jesocristənꞌ əsaꞌacleneꞌ leꞌe naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Besəꞌəloeꞌ beṉəꞌ Tesalonica caꞌ de que chsoꞌonḻilažeꞌe Jesocristənꞌ
\p
\v 2 Yoguəꞌ laste catəꞌ chontoꞌ orasyon choꞌetoꞌ yeḻəꞌ chox̱cwlen c̱he Diozənꞌ par yoguəꞌəle, naꞌ chṉabtoꞌ gaquəleneꞌ leꞌe.
\v 3 Naꞌ catəꞌ chontoꞌ orasyon lao X̱acho Diozənꞌ chɉsaꞌalažəꞌəczətoꞌ yoguəꞌəḻoḻ deꞌe güen deꞌen chonḻe laogüe deꞌen chonḻilažəꞌəle Diozənꞌ naꞌ chaquele c̱heꞌ. Naꞌ chɉsaꞌalažəꞌəczətoꞌ canꞌ chgoꞌo chc̱heɉlažəꞌəle catəꞌən chzaquəꞌəziꞌ chzaquəꞌəyašəꞌəle c̱hedəꞌ zole lez yidə X̱ancho Jesocristənꞌ yeto.
\v 4 Ṉezetoꞌ beṉəꞌ bišəꞌ, de que Diozənꞌ chaqueneꞌ c̱hele naꞌ bagwleɉeꞌ leꞌe par nacle xiꞌiṉeꞌ.
\v 5 Naꞌ Spirit c̱he Diozənꞌ goclenən leꞌe len yeḻəꞌ guac c̱heinꞌ par nic̱h gwṉezele de que dižəꞌ güen dižəꞌ cobə deꞌen bzeɉniꞌitoꞌ leꞌe c̱he Jesocristənꞌ naquən deꞌe ḻi. Caguə naquən con to dižəꞌ. Naꞌ ṉezczele canꞌ bentezə bentoꞌ deꞌe güen entr leꞌe par nic̱h goclentoꞌ leꞌe.
\p
\v 6 Naꞌ leꞌe zole chonḻe canꞌ bentoꞌ naꞌ canꞌ ben X̱ancho Jesocristənꞌ. Naꞌ Spirit c̱he Diozənꞌ chonən ca chebeile ḻaꞌaṉəꞌəczə deꞌe zan deꞌe bagwdiꞌ bagwxaquəꞌəle por ni c̱he deꞌen babzenagle deꞌen gwdix̱ɉueꞌitoꞌ leꞌe c̱he Jesocristənꞌ.
\v 7 Beṉəꞌ caꞌ chsoꞌonḻilažəꞌ Jesocristənꞌ Masedonianꞌ naꞌ Acayanꞌ bazɉəṉezeneꞌ canꞌ chonḻe naꞌ deꞌe naꞌanəꞌ zɉəṉezeneꞌ naquənꞌ cheyaḻəꞌ soꞌoneꞌ.
\v 8 Babenḻe ca zɉəṉeze beṉəꞌ c̱he X̱ancho Jesocristənꞌ c̱hedəꞌ doxenḻənꞌ banasəꞌ nḻalɉən, caguə Masedonianꞌ naꞌ caguə Acaya naꞌazənꞌ. Naꞌ ḻeꞌegatezə caꞌ yoguəꞌəzə beṉəꞌ bazɉəṉezeneꞌ canꞌ chonḻilažəꞌəle Diozənꞌ, naꞌ deꞌe nanꞌ bitoch bi de ənatoꞌ c̱hele.
\v 9 Naꞌ beṉəꞌ zan chsoꞌe dižəꞌ ca güenṉəꞌ benḻe len netoꞌ catəꞌən bedəlaṉəꞌətoꞌ leꞌe naꞌ canꞌ goquə gwzolao chonḻilažəꞌəle Diozənꞌ. Bagwleɉyic̱hɉle cuich cheɉṉiꞌalažəꞌəle lguaꞌa lsaquəꞌ c̱hele caꞌ naꞌ ṉaꞌa bachonḻilažəꞌəle Diozənꞌ, naꞌ bachoꞌelaꞌole Diozənꞌ benꞌ zo zeɉḻicaṉe. Ḻenꞌ zaquəꞌ par güeꞌelaꞌocho.
\v 10 Naꞌ chsoꞌe dižəꞌ canꞌ chbezle əchoɉ Xiꞌiṉeꞌ Jesoꞌosənꞌ yobanꞌ yideꞌ yežlyo nga yetlas, beꞌen bosban Diozənꞌ ladɉo beṉəꞌ guat caꞌ. Naꞌ deꞌen chonḻilažəꞌəcho Jesoꞌosənꞌ, Diozənꞌ bito goṉeꞌ chioꞌo castigw catəꞌən əžin ža goneꞌ castigw zeɉḻicaṉe c̱he beṉəꞌ caꞌ cui chsoꞌonḻilažəꞌ Jesoꞌosənꞌ.
\c 2
\s1 Xšin Diozənꞌ deꞌe ben Pabənꞌ Tesalonicanꞌ
\p
\v 1 Leꞌe ṉezczele beṉəꞌ bišəꞌ, catəꞌən bedəlaṉəꞌətoꞌ leꞌe naꞌ gwdix̱ɉueꞌitoꞌ leꞌe dižəꞌ güen dižəꞌ cobə c̱he Diozənꞌ zochgua yeḻəꞌ guac c̱heꞌenəꞌ len netoꞌ.
\v 2 Ṉezele canꞌ gwdiꞌ gwxaquəꞌətoꞌ Filiposənꞌ, canꞌ bosoꞌožia bosoꞌonitəꞌ beṉəꞌ caꞌ netoꞌ lao gwdix̱ɉueꞌitoꞌ c̱he Jesocristənꞌ. Pero naꞌ Diozənꞌ beneꞌ ca cui bžebtoꞌ gwdix̱ɉueꞌitoꞌ leꞌe dižəꞌ güen dižəꞌ cobə c̱heꞌenəꞌ ḻaꞌaṉəꞌəczə deꞌe zan deꞌe besəꞌəžon par c̱hix̱ɉueꞌetoꞌon.
\v 3 Deꞌen chatəꞌəyoitoꞌ leꞌe gwzenagle c̱he Diozənꞌ, bito ṉacho chontoꞌ clelə naꞌ nic chzelažəꞌətoꞌ gontoꞌ bi deꞌe mal, naꞌ nic cheneꞌetoꞌ əx̱oayagtoꞌ leꞌe.
\v 4 Diozənꞌ ṉezeneꞌ de que zotezə zotoꞌ chzenagtoꞌ c̱heꞌ, naꞌ deꞌe naꞌanəꞌ gwleɉeꞌ netoꞌ par chyix̱ɉueꞌetoꞌ dižəꞌ güen dižəꞌ cobə c̱heꞌenəꞌ. Caꞌ chaquənꞌ chzenetoꞌon leꞌe. Chyix̱ɉueꞌitoꞌon leꞌe caguə par nic̱h yebei beṉəꞌ deꞌen chontoꞌ naꞌanəꞌ, sino par nic̱h yebei Diozənꞌ canꞌ chontoꞌonəꞌ. Ḻeꞌ ṉezeneꞌ yoguəꞌəte xbab deꞌen yoꞌo ḻoꞌo yic̱hɉlaꞌaždaꞌochonꞌ.
\v 5 Ṉezele canꞌ chontoꞌ, ni šlinzə cuiṉəꞌ gwpeitoꞌ leꞌe len dižəꞌ deꞌen choꞌetoꞌonəꞌ, naꞌ niqueṉəꞌ x̱oayagtoꞌ leꞌe par nic̱h goṉle netoꞌ bi deꞌen de c̱hele. Cuin Diozənꞌ ṉezeneꞌ de que canꞌ naquən.
\v 6 Naꞌ nic chyilɉlažəꞌətoꞌ naclə gontoꞌ par nic̱h əsoꞌelaoꞌ beṉəꞌ netoꞌ. Nique əṉacho cheneꞌetoꞌ par nic̱h leꞌe güeꞌelaꞌole netoꞌ, naꞌ nic cheneꞌetoꞌ yeziquəꞌəchlə beṉəꞌ əsoꞌelaꞌogüeꞌe netoꞌ. Zaquəꞌətoꞌ par gontoꞌ ca gwzenagle c̱hetoꞌ la fuers por ni c̱he deꞌen bseḻəꞌ Cristənꞌ netoꞌ par choꞌetoꞌ xtižeꞌenəꞌ, pero bito chontoꞌ ca gwzenagle c̱hetoꞌ la fuers.
\v 7 Nžiꞌitoꞌ leꞌe caczə nžiꞌi to noꞌolə xiꞌiṉeꞌ biꞌi chosgol chosc̱haꞌogüeꞌ.
\v 8 Naꞌ deꞌen chaquetoꞌ c̱hele, choꞌelentoꞌ leꞌe dižəꞌ güen dižəꞌ cobə c̱he Diozənꞌ. Naꞌ caguə deꞌe naꞌazənꞌ chontoꞌ, sino ḻeczə chsanḻažəꞌ cuintoꞌ chontoꞌ xte ga zelao chzaqueꞌetoꞌ par chaclentoꞌ leꞌe c̱hedəꞌ chaquetoꞌ c̱hele.
\v 9 Zaꞌalažəꞌəczle beṉəꞌ bišəꞌ, catəꞌən gwzotoꞌ len leꞌe ḻechguaḻe bentoꞌ žin xte ɉx̱aqueꞌetoꞌ par ben cuintoꞌ mantener. Bentoꞌ žin teža naꞌ do šeꞌelə par nic̱h cui bi gast əbzotoꞌ leꞌe. Canꞌ bentoꞌ gwdix̱ɉueꞌitoꞌ leꞌe dižəꞌ güen dižəꞌ cobə c̱he Diozənꞌ.
\p
\v 10 Txenczənꞌ nacle len Diozənꞌ ṉezele ca güenṉəꞌ bentoꞌ catəꞌən gwzolentoꞌ leꞌe chonḻilažəꞌəle Jesocristənꞌ. Benczətoꞌ con canꞌ chazlažəꞌ Diozənꞌ. Bentoꞌ par nic̱h ni to cui no gwna de que napətoꞌ doḻəꞌ.
\v 11 Ṉezele canꞌ gotəꞌəyoitoꞌ leꞌe gwzenagle c̱he Diozənꞌ naꞌ canꞌ əbtiptoꞌ lažəꞌ to tole canꞌ chon to beṉəꞌ byo len xiꞌiṉeꞌ.
\v 12 Bentoꞌ mendad de que gonšgaczle deꞌe güen canꞌ cheyaḻəꞌ gon chioꞌo bagwleɉ Diozənꞌ par ṉabiꞌe chioꞌo naꞌ par goṉeꞌ chioꞌo yeḻəꞌ balaꞌaṉ.
\p
\v 13 Bito chbezətoꞌ choꞌetoꞌ yeḻəꞌ chox̱cwlen c̱he Diozənꞌ canꞌ bzenagle xtižeꞌenəꞌ catəꞌən gwdix̱ɉueꞌitoꞌon leꞌe. Zacbeꞌiczele bito naquən xtižəꞌ beṉac̱hənꞌ sino naquən dižəꞌ deꞌen chon Diozənꞌ par choꞌetoꞌ. Naꞌ deꞌen gwyeɉḻeꞌele xtižəꞌ Dioz naꞌanəꞌ chšaꞌan xbab deꞌen yoꞌo ḻoꞌo yic̱hɉlaꞌaždaꞌolenꞌ.
\v 14 Beṉəꞌ bišəꞌ, leꞌe bagoc c̱hele canꞌ goc c̱he beṉəꞌ caꞌ chəsəꞌədopə chəsəꞌəžag choꞌelaogüeꞌe Jesocristənꞌ zan part Jodeanꞌ, beṉəꞌ caꞌ chsoꞌonḻilažəꞌ Jesocristənꞌ ca chioꞌo chonḻilažəꞌəchoneꞌ. Naꞌ ḻeꞌegatezə caꞌ babosoꞌoc̱hiꞌ bosoꞌosaquəꞌ beṉəꞌ Izrael caꞌ beṉəꞌ gwlaž c̱hegaꞌaqueꞌ caꞌ chsoꞌonḻilažəꞌ Jesocristənꞌ, naꞌ canꞌ bosoꞌoc̱hiꞌ bosoꞌosaquəꞌ beṉəꞌ gwlaž c̱hele caꞌ leꞌe.
\v 15 Beṉəꞌ Izrael caꞌanəꞌ gwsoꞌoteꞌ X̱ancho Jesoꞌosənꞌ canꞌ gwsoꞌoteꞌ beṉəꞌ caꞌ gwsoꞌeleneꞌ ḻegaꞌaqueꞌ xtižəꞌ Diozənꞌ canaꞌ. Naꞌ ḻeczə canꞌ gwsoꞌoneꞌ bosoꞌolagzeɉə bosoꞌolagzideꞌ netoꞌ. Naꞌ xte ža ṉeža por deꞌe cui chazlažəꞌ Diozənꞌ chsoꞌoneꞌ, naꞌ ḻeczə chsoꞌoneꞌ contr yoguəꞌəḻoḻ beṉac̱hənꞌ.
\v 16 Beṉəꞌ Izrael caꞌ chosoꞌožoneꞌ əgwzeɉniꞌitoꞌ beṉəꞌ cui zɉənaquə beṉəꞌ Izrael bi deꞌen cheyaḻəꞌ goncho par nic̱h cui yeyeɉcho lao yiꞌ gabiḻənꞌ. Canꞌ chsoꞌoneꞌ deꞌe naꞌanəꞌ do tyemp chosoꞌozanch xtoḻəꞌəgaꞌaqueꞌenəꞌ. Bagwc̱hoglao Diozənꞌ c̱hegaꞌaqueꞌ de que zeɉḻicaṉe yesəꞌəziꞌe castigonꞌ.
\s1 Pabənꞌ goneꞌeneꞌ žɉezlaṉeꞌe beṉəꞌ caꞌ nitəꞌ Tesalonicanꞌ
\p
\v 17-18 Naꞌ netoꞌ beṉəꞌ bišəꞌ, bachacchgüeitoꞌ c̱hedəꞌ bitochəṉəꞌ leꞌi lɉuežɉcho, pero chontoꞌ xbab c̱hele. Nadaꞌ Pab zan las goꞌondaꞌ delaṉaꞌa leꞌe, naꞌ bchoɉ catəꞌ beyilɉlažəꞌətoꞌ naclə gontoꞌ par nic̱h yežagcho deꞌe yoblə. Pero catəꞌ goneꞌetoꞌ yidətoꞌ par delaṉəꞌətoꞌ leꞌe, Satanasənꞌ deꞌen chnabiaꞌ deꞌe x̱ioꞌ caꞌ bito beꞌen latɉə.
\v 19 Zotoꞌ lez sotezə sole gonḻilažəꞌəle X̱ancho Jesocristənꞌ. Naꞌ ḻeczə chebeitoꞌ canꞌ chonḻilažəꞌəleneꞌ ṉaꞌa. Naꞌ catəꞌən yideꞌ yeto, sotoꞌ mbalaz güeꞌetoꞌ dižəꞌ canꞌ chonḻenꞌ.
\v 20 Leꞌe chonḻe ca siꞌitoꞌ yeḻəꞌ balaꞌaṉ naꞌ leꞌe chonḻe ca zotoꞌ mbalaz.
\c 3
\p
\v 1-2 Naꞌ cuich bc̱heɉetoꞌ laogüe deꞌen cui chleꞌi lɉuežɉchonꞌ. Deꞌe naꞌanəꞌ bseḻəꞌətoꞌ beṉəꞌ bišəꞌəcho Temtionꞌ ganꞌ zolenəꞌ naꞌ begaꞌaṉ netəzətoꞌ Atenas nga. Temtionꞌ naqueꞌ beṉəꞌ güen xšin Diozənꞌ naꞌ choneꞌ txen len netoꞌ chyix̱ɉueꞌetoꞌ dižəꞌ güen dižəꞌ cobə deꞌen chzeɉniꞌin beṉəꞌ c̱he Cristənꞌ. Bseḻəꞌətoꞌoneꞌ btipəcheꞌ lažəꞌəle naꞌ bedəyeneꞌ ca benḻilažəꞌəchle Cristənꞌ.
\v 3 Bseḻəꞌətoꞌoneꞌ ganꞌ zolenəꞌ par nic̱h ni tole cui gaquəžeɉlažəꞌəle bixc̱henꞌ chyiꞌ chzaquəꞌəle, c̱hedəꞌ laꞌ baṉezele Diozənꞌ nsiꞌe xṉeze techo yeḻəꞌ yašəꞌ yeḻəꞌ ziꞌ yežlyo nga.
\v 4 Catəꞌən gwzolentoꞌ leꞌe antslə bzenetoꞌ leꞌe de que yosoꞌoc̱hiꞌ yosoꞌosaquəꞌ beṉəꞌ chioꞌo. Naꞌ ṉezele de que bachac canꞌ gwnatoꞌonəꞌ.
\v 5 Naꞌ laogüe cuich chc̱heɉdaꞌ deꞌen cuichəṉəꞌ leꞌi lɉuežɉcho, bseḻaꞌa Temtionꞌ ganꞌ zolenəꞌ par nic̱h gwṉezdaꞌ šə zdaczle chonḻilažəꞌəle Cristənꞌ. Goꞌondaꞌ əṉezdaꞌ šə bagwzoi gwxiyeꞌenəꞌ bx̱oayaguən leꞌe. Laꞌ šə babx̱oayaguən leꞌe, bendadtoꞌ xšin Dioz naꞌanəꞌ entr leꞌe šə caꞌ.
\p
\v 6 Beyacxenḻazəꞌətetoꞌ catəꞌ beḻaꞌ Temtionꞌ deꞌen bideꞌ ganꞌ zolenəꞌ. Bedəyezeɉniꞌineꞌ netoꞌ ca güenṉəꞌ chonḻe chonḻilažəꞌəle Cristənꞌ naꞌ chaquele c̱he yoguəꞌəḻoḻ beṉəꞌ. Naꞌ ḻeczə gwneꞌ canꞌ chiꞌ yic̱hɉle netoꞌ naꞌ canꞌ zelažəꞌəle yežagcho deꞌe yoblə ḻeczə canꞌ cheneꞌe netoꞌ.
\v 7 Caꞌaczənꞌ beṉəꞌ bišəꞌ, ṉeꞌe chžaglaotoꞌ naꞌ ṉeꞌe chyiꞌ chzaquəꞌətoꞌ pero babeyondiplažəꞌətoꞌ gwṉezetoꞌ de que zotezə zole chonḻilažəꞌəle Cristənꞌ.
\v 8 Deꞌe ḻi babeyacxenḻažəꞌətoꞌ naꞌ zotoꞌ mbalaz deꞌen zotezə zole chonḻilažəꞌəle X̱ancho Cristənꞌ.
\v 9 Naꞌ deꞌe naꞌanəꞌ ḻechguaḻe chebeitoꞌ lao Diozənꞌ canꞌ chonḻe naꞌ choꞌechguatoꞌ yeḻəꞌ chox̱cwlen c̱heꞌ canꞌ chacleneꞌ leꞌe.
\v 10 Ḻechguaḻe chontoꞌ orasyon do ža do yel chṉabetoꞌoneꞌ goneꞌ ca leꞌi lɉuežɉcho nic̱h əgwzeɉniꞌichetoꞌ leꞌe par nic̱h šeɉəchle gonḻilažəꞌəchleneꞌ c̱hedəꞌ bitoṉəꞌ gonḻilažəꞌəleneꞌ canꞌ cheneꞌe Diozənꞌ.
\p
\v 11 Chṉabetoꞌ X̱acho Diozənꞌ naꞌ len X̱ancho Jesocristənꞌ əsoꞌe latɉə yedəzlaṉəꞌətoꞌ leꞌe.
\v 12 Naꞌ chṉabetoꞌ X̱anchonꞌ goneꞌ ca gaquəche c̱he lɉuežɉle tole yetole naꞌ goneꞌ ca gaquəchele c̱he yoguəꞌ beṉac̱h con catezənꞌ chaquetoꞌ c̱he leꞌe.
\v 13 Chṉabczətoꞌoneꞌ goneꞌ ca gaquə laꞌaždaꞌolenꞌ xiꞌilažəꞌ lao X̱acho Diozənꞌ sin cui bi doḻəꞌ gaple catəꞌən yidə X̱ancho Jesoꞌosənꞌ deꞌe yoblə nc̱heꞌe yoguəꞌəḻoḻ beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\c 4
\s1 Pabənꞌ bzeɉniꞌineꞌ canꞌ cheneꞌe Diozənꞌ yesəꞌəzo yesəꞌəbezeꞌ
\p
\v 1 Ṉaꞌa ža beṉəꞌ bišəꞌ, bac̱h bsed bloꞌitoꞌ leꞌe gonḻe canꞌ cheneꞌe Diozənꞌ, naꞌ bac̱h zole chonḻe caꞌ. Naꞌ deꞌen chonḻilažəꞌəle X̱ancho Jesocristənꞌ chatəꞌəyoitoꞌ leꞌe naꞌ chontoꞌ mendad əžɉaꞌaquəchle gonchle deꞌen cheneꞌe Diozənꞌ.
\p
\v 2 Baṉezczele de que deꞌen bentoꞌ mendad gonḻe naquən deꞌen na X̱ancho Jesoꞌosənꞌ.
\v 3 Diozənꞌ cheneꞌeneꞌ sotezə socho gaccho beṉəꞌ laꞌaždaoꞌ xiꞌilažəꞌ. Naꞌ bito cheneꞌeneꞌ cueɉyic̱hɉcho noꞌol c̱hecho o beꞌen c̱hecho par solencho beṉəꞌ yoblə, naꞌ bito cheneꞌeneꞌ əgwžaꞌ xtocho.
\v 4 Naꞌ ḻeczə cheneꞌeneꞌ əṉeze totole naquənꞌ cheyaḻəꞌ c̱hilɉle xoꞌollenꞌ sin cui gaple doḻəꞌ naꞌ sin cui no əṉa de que chonḻe deꞌe mal.
\v 5 Bito gonḻebele beṉəꞌ ca cui chsoꞌonḻilažəꞌ Diozənꞌ naꞌ c̱hilɉle xoꞌolle par gonḻe canꞌ chzelažəꞌ laꞌaždaꞌomallenꞌ, sino c̱hilɉleneꞌ par solenḻeneꞌ canꞌ cheneꞌe Diozənꞌ.
\v 6 Ni tole bito cheyaḻəꞌ solenḻe noꞌol c̱he beṉəꞌ yoblə c̱hedəꞌ laꞌ contr beꞌen c̱heꞌ naꞌ gonḻe šə gonḻe caꞌ. Babeꞌetoꞌ dižəꞌ antslə par bosnisetoꞌ leꞌe de que X̱anchonꞌ chṉežɉueꞌ castigw c̱he beṉəꞌ chsoꞌon bitəꞌətezə deꞌe malənꞌ zɉənac caꞌ.
\v 7 Diozənꞌ gwleɉeꞌ chioꞌo par gaccho beṉəꞌ laꞌaždaoꞌ xiꞌilažəꞌ, caguə par coꞌo xtocho o goncho bichlə deꞌe mal caꞌ zɉənac caꞌ.
\v 8 Deꞌe naꞌanə notəꞌətezle šə nacle beṉəꞌ godenag len deꞌe caꞌ chsed chloꞌitoꞌ leꞌe, c̱he Dioz nanꞌ cui chzenagle, caguə c̱he netəzətoꞌ. Ḻeꞌenəꞌ beṉeꞌ chioꞌo Spirit c̱heꞌenəꞌ c̱hedəꞌ cheneꞌeneꞌ gaccho beṉəꞌ laꞌaždaoꞌ xiꞌilažəꞌ.
\p
\v 9 Bito chyažɉele gwzoɉaꞌ leꞌe par əṉezele de que cheyaḻəꞌ gaque c̱he lɉuežɉ chioꞌo chonḻilažəꞌəcho Diozənꞌ. Dioz naꞌanəꞌ babsedeneꞌ leꞌe par nic̱h chaque c̱he lɉuežɉle tole yetole.
\v 10 Naꞌ canꞌ bachaquele c̱he yoguəꞌ beṉəꞌ bišəꞌəcho caꞌ nitəꞌ doxen Masedonianꞌ. Naꞌ chatəꞌəyoitoꞌ leꞌe beṉəꞌ bišəꞌ, ḻegaquəche c̱hegaꞌaqueꞌ.
\v 11 To tole ḻeꞌe yeyilɉlažəꞌ naclənꞌ gonḻe žin par nic̱h sole binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ naꞌ bito con ggüiale bi chsoꞌon beṉəꞌ yoblə. Naꞌ gonḻe bitəꞌəzə žin yix̱əꞌ o žin deꞌe de yoꞌo canꞌ bentoꞌ mendad.
\v 12 Ḻeꞌe gon caꞌ par nic̱h beṉəꞌ caꞌ cui zɉənaquə txen len chioꞌo bito yesəꞌəṉeꞌ mal c̱hele, naꞌ ḻeczə par nic̱h cui gaquə faḻt šə bi deꞌen chyažɉ chc̱hinele.
\s1 Canꞌ gaquə catəꞌən yidə Jesocristənꞌ deꞌe yoblə
\p
\v 13 Ḻeꞌegatezə caꞌ beṉəꞌ bišəꞌ, cheneꞌetoꞌ əṉezele canꞌ gac c̱he beṉəꞌ guat caꞌ, beṉəꞌ caꞌ gwsoꞌonḻilažəꞌ Diozənꞌ lao gosəꞌəniteꞌe yežlyonꞌ. Cheneꞌetoꞌ əṉezelen par nic̱h cui sole trist ca tristənꞌ chəsəꞌənitəꞌ beṉəꞌ yeziquəꞌəchlə catəꞌ chat no chat c̱hegaꞌaqueꞌ laꞌ cui niteꞌe lez žɉəsyəꞌəzoeꞌ len Diozənꞌ.
\v 14 Ṉezecho gwsoꞌot beṉəꞌ Jesoꞌosənꞌ naꞌ bebaneꞌ ladɉo beṉəꞌ guat caꞌ. Ḻeꞌegatezə caꞌ ṉezecho de que Diozənꞌ goneꞌ par nic̱h yidə Jesoꞌosənꞌ deꞌe yoblə naꞌ nc̱heꞌe beṉəꞌ caꞌ bagwsaꞌat con beṉəꞌ gwsoꞌonḻilažəꞌ ḻeꞌ.
\p
\v 15 Naꞌ dižəꞌ nga chzenetoꞌ leꞌe naquən xtižəꞌ X̱ancho Jesoꞌosənꞌ deꞌen noneꞌ mendad gwzenetoꞌ. Chioꞌo mbancho ṉaꞌa chonḻilažəꞌəchoneꞌ, šə ṉeꞌe mbancho catəꞌən yideꞌ deꞌe yoblə, bito ṉacho yobəch yežaglaochoneꞌ cle ca beṉəꞌ caꞌ bagwsaꞌat.
\v 16 Naꞌ ca naquə X̱ancho Jesoꞌosənꞌ, cuineꞌen yetɉeꞌ ḻeꞌe yobanꞌ, naꞌ əṉeꞌ zižɉo goneꞌ mendad yesyəꞌəban beṉəꞌ guat caꞌ, naꞌ to angl əblaonəꞌ əṉeꞌ, naꞌ yenecho cuež trompet c̱he Diozənꞌ. Nach beṉəꞌ caꞌ bagwsaꞌat beṉəꞌ caꞌ gwsoꞌonḻilažəꞌ Cristənꞌ ḻegaꞌactequeꞌ yesyəꞌəbaneꞌ ladɉo beṉəꞌ guat caꞌ.
\v 17 Naꞌ te naꞌ chioꞌo chonḻilažəꞌəchoneꞌ šə ṉeꞌe mbancho yežlyo nga, gon Diozənꞌ par nic̱h txen len ḻegaꞌaqueꞌ šepcho ḻeꞌe yobanəꞌ to ḻoꞌo beɉw naꞌ yežaglaocho X̱ancho Jesoꞌosənꞌ ḻeꞌe yobanəꞌ. Nach žɉəyezocho len ḻeꞌ zeɉḻicaṉe.
\v 18 Deꞌe naꞌanəꞌ ḻedogwtipəchlažəꞌ lɉuežɉcho tocho yetocho güeꞌecho dižəꞌ canꞌ gaquə.
\c 5
\p
\v 1 Beṉəꞌ bišəꞌ, bito chyažɉen gwzoɉaꞌ leꞌe par gwzendaꞌ leꞌe bi ža bi orənꞌ yidə X̱ancho Jesoꞌosənꞌ yeto.
\v 2 Ṉezele de que gwžin ža əgwnežɉueꞌ castigw c̱he beṉəꞌ caꞌ chsoꞌon deꞌe malənꞌ. Senyaleꞌ ḻegaꞌaqueꞌ canꞌ chon to beṉəꞌ bguan beṉəꞌ chda šeꞌelə.
\v 3 Naꞌ šlac chəsəꞌəna beṉəꞌ zan: “Mbanꞌ zocho, bitobi gaquə c̱hecho”, catəꞌ to de repentzə əžin ža əgwnežɉueꞌ castigw c̱hegaꞌaqueꞌenəꞌ. Canꞌ chac c̱he noꞌolə catəꞌ to deꞌe repentzə chaqueꞌ bes c̱he yeḻəꞌ sanṉəꞌ, caꞌatezəczənꞌ gaquə c̱he beṉəꞌ caꞌ cui zɉənitəꞌ probnid catəꞌən əgwnežɉo X̱ancho Jesoꞌosənꞌ castigw c̱hegaꞌaqueꞌenəꞌ. Bito gaquə yosoꞌoxoṉɉeꞌ.
\v 4 Pero chioꞌo beṉəꞌ bišəꞌ, chioꞌo cui nc̱hoḻ yic̱hɉlaꞌaždaꞌochonꞌ, deꞌe naꞌanəꞌ bito ədoḻəꞌəcho senyal X̱anchonꞌ chioꞌo catəꞌən əžin ža əgwnežɉueꞌ castigw c̱he beṉəꞌ caꞌ cui chsoꞌonḻilažeꞌeneꞌ, naꞌ bito gac c̱hecho canꞌ chac c̱he beṉəꞌ chzenyal bguanṉəꞌ ḻeꞌ to de repentzə.
\v 5 Bayoꞌo beꞌeṉiꞌ c̱he Diozənꞌ ḻoꞌo yic̱hɉlaꞌaždaoꞌ yoguəꞌ chioꞌo, naꞌ deꞌe naꞌanəꞌ bito choncho deꞌe mal canꞌ chsoꞌon beṉəꞌ caꞌ ṉeꞌe nc̱hoḻ yic̱hɉlaꞌaždaꞌogaꞌaquenꞌ.
\v 6 Cheyaḻəꞌ gonyaṉəꞌəcho xbab naquənꞌ cheneꞌe Diozənꞌ goncho naꞌ ṉabiaꞌ cuincho par goncho canꞌ chazlažeꞌenəꞌ par nic̱h bito bi gac c̱hecho catəꞌ əgwnežɉo X̱ancho Jesoꞌosənꞌ castigw c̱he beṉəꞌ caꞌ cui chsoꞌonḻilažeꞌeneꞌ. Beṉəꞌ caꞌ cui chsoꞌon cas c̱heꞌ gwxaquəꞌəlebəgaꞌaqueneꞌ ca beṉəꞌ zɉəntas.
\v 7 Deꞌen zɉənc̱hoḻ yic̱hɉlaꞌaždaꞌogaꞌaqueꞌenəꞌ gwxaquəꞌəlebəgaꞌaqueneꞌ ca beṉəꞌ zɉəntas naꞌ ca beṉəꞌ chəsəꞌəzože.
\v 8 Pero chioꞌo bayoꞌo beꞌeniꞌ c̱he Diozənꞌ ḻoꞌo laꞌaždaꞌochonꞌ. Deꞌe naꞌanəꞌ cheyaḻəꞌ ṉabiaꞌ cuincho par goncho canꞌ chazlažeꞌenəꞌ. Cheyaḻəꞌ gonḻilažəꞌəcho Diozənꞌ naꞌ gaque c̱he lɉuežɉcho naꞌ yebeicho deꞌen ṉezecho žɉəyezocho len Diozənꞌ. Šə goncho yoguəꞌ deꞌe caꞌ gaquəlenən chioꞌo par nic̱h bitobi gac c̱hecho catəꞌ gwnežɉo X̱ancho Jesoꞌosənꞌ castigw c̱he beṉəꞌ caꞌ cui chsoꞌonḻilažeꞌeneꞌ. Gaquəlenən chioꞌo ca xa soḻdad deꞌen naquə deꞌe ya chaclenən ḻeꞌ par nic̱h cui bi chac c̱heꞌ catəꞌ chdiḻəlen beṉəꞌ ḻeꞌ.
\v 9 Caguə gwleɉ Diozənꞌ chioꞌo par nic̱h goṉeꞌ castigw c̱hechonꞌ. Gwleɉeꞌ chioꞌo par nic̱h chonḻilažəꞌəcho X̱ancho Jesocristənꞌ naꞌ cui yeyeɉcho lao yiꞌ gabiḻənꞌ.
\v 10 Jesocrist naꞌanəꞌ bnežɉw cuineꞌ por ni c̱hecho catəꞌən gwsoꞌot beṉəꞌ ḻeꞌ par nic̱h sotezə socho len ḻeꞌ lao mbancho naꞌ ḻeczə caꞌ catəꞌ bagotcho.
\v 11 Deꞌe naꞌanəꞌ ḻeꞌe gwtiplažəꞌ lɉuežɉle tole yetole naꞌ ḻeꞌe gaclen lɉuežɉle par nic̱h sotezə sole gonḻilažəꞌəchle Jesocristənꞌ con canꞌ chonczle.
\s1 Pabənꞌ bzeɉniꞌineꞌ beṉəꞌ caꞌ chsoꞌonḻilažəꞌ Jesocristənꞌ canꞌ cheyaḻəꞌ soꞌoneꞌ
\p
\v 12 Chatəꞌəyoitoꞌ leꞌe beṉəꞌ bišəꞌ, gaple respet beṉəꞌ caꞌ chsoꞌon xšin X̱ancho Jesocristənꞌ entr leꞌe chosoꞌogüia chosoꞌoyeꞌ leꞌe naꞌ chosoꞌozeɉniꞌineꞌ leꞌe naquənꞌ cheyaḻəꞌ so cuezle.
\v 13 Gapəchguagaꞌacleneꞌ respet naꞌ gaquəchgüeile c̱hegaꞌaqueꞌ c̱hedəꞌ laꞌ xšin X̱ancho nanꞌ chsoꞌoneꞌ. Naꞌ leꞌe len ḻegaꞌaqueꞌ ḻeꞌe so binḻo tole yetole.
\p
\v 14 Ḻeꞌegatezə caꞌ beṉəꞌ bišəꞌ, ḻeꞌe güeꞌ consejw beṉəꞌ cui chseꞌene soꞌon žin, naꞌ ḻeꞌe gwtiplažəꞌ beṉəꞌ chsaꞌaqueneꞌ zdebə chosoꞌozenagueꞌ c̱he Jesocristənꞌ, naꞌ ḻeꞌe gaclen beṉəꞌ cuiṉəꞌ seꞌeɉniꞌišaogüeꞌeneꞌ naquənꞌ cheyaḻəꞌ soꞌoneꞌ. Ḻeso ḻegapə yeḻəꞌ chxenḻažəꞌ len yoguəꞌəḻoḻ beṉəꞌ.
\p
\v 15 Šə bi deꞌe mal chsoꞌon beṉəꞌ len leꞌe ḻegon byen cui yožiꞌile deꞌe mal len ḻegaꞌaqueꞌ. Zeɉḻi ḻeyeyilɉlažəꞌ naclənꞌ gonḻe güen len lɉuežɉle tole yetole naꞌ len notəꞌətezəchlə beṉəꞌ.
\p
\v 16 Do tyempte ḻeꞌe yebei.
\v 17 Ḻesotezə ḻeso ḻegon orasyon.
\v 18 Ḻegüeꞌ yeḻəꞌ chox̱cwlen c̱he Diozənꞌ bitəꞌətezə deꞌen chac c̱hele, c̱hedəꞌ canꞌ cheneꞌeneꞌ gon chioꞌo chonḻilažəꞌəcho Cristo Jesoꞌosənꞌ.
\p
\v 19 Bito gwžonḻe gon Spirit c̱he Diozənꞌ canꞌ cheneꞌen len leꞌe o len beṉəꞌ yoblə.
\v 20 Ḻeꞌe gon xbab de que to deꞌe zaqueꞌe chsoꞌon beṉəꞌ chəsəꞌəyix̱ɉuiꞌe deꞌen bagož Diozənꞌ ḻegaꞌaqueꞌ.
\v 21 Naꞌ ḻegonyaṉəꞌ xbab c̱he yoguəꞌəḻoḻ dižəꞌ deꞌen chsoꞌe par nic̱h gonen c̱hele yoguəꞌ deꞌen naquə güen.
\v 22 Naꞌ bito gonḻe bitəꞌətezə deꞌe naquə deꞌe mal.
\p
\v 23 Diozənꞌ choneꞌ ca chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ. Naꞌ chṉabdaꞌaneꞌ goneꞌ par nic̱h gacle beṉəꞌ laꞌaždaoꞌ xiꞌilažəꞌ. Naꞌ ḻeczə gonšgueꞌ par nic̱h bito bi deꞌe mal gonḻe len yic̱hɉlaꞌaždaꞌolenꞌ naꞌ nic len cuerp c̱helenꞌ par nic̱h bito bi doḻəꞌ gaple catəꞌən yidə X̱ancho Jesocristənꞌ yeto.
\v 24 Diozənꞌ benꞌ bagwleɉeꞌ chioꞌo par naccho xiꞌiṉeꞌ choneꞌ complir canꞌ neꞌenəꞌ, naꞌ deꞌe naꞌanəꞌ goneꞌ par nic̱h güeꞌelažəꞌəle gonḻe canꞌ chazlažeꞌenəꞌ, naꞌ goneꞌ par nic̱h cui gaple doḻəꞌ.
\s1 Pabənꞌ gwṉabeꞌ gaquəlen Diozənꞌ beṉəꞌ Tesalonica caꞌ
\p
\v 25 Beṉəꞌ bišəꞌ ḻeꞌe so ḻeꞌe gon orasyon par netoꞌ.
\p
\v 26 Naꞌ catəꞌ chežagle ḻeyolgüiž lɉuežɉle dižəꞌ šaoꞌ par nic̱h gacbiaꞌ de que chaque c̱he lɉuežɉle.
\p
\v 27 Canꞌ na X̱ancho Jesocristənꞌ, chonaꞌ mendad gwlable cart nga par əseꞌene yoguəꞌəḻoḻ beṉəꞌ bišəꞌəcho caꞌ nitəꞌ ganꞌ zolenəꞌ.
\p
\v 28 Naꞌ sotezə sošga X̱ancho Jesocristənꞌ gaquəlenšgueꞌ leꞌe. Deꞌe naꞌazənꞌ chzoɉaꞌ ṉaꞌa.
\b
\m Pab