\id 2TH
\ide UTF-8
\h 2 TESALONICENSES
\toc1 2 Tesalonicenses
\mt1 Cart Egwchope Deꞌen Bzoɉ San Pabənꞌ Par Beṉəꞌ Tesalonica Caꞌ
\c 1
\s1 Pabənꞌ len beṉəꞌ lɉuežɉeꞌ caꞌ bosoꞌozoɉeꞌ beṉəꞌ caꞌ chsoꞌelaogüeꞌe Jesocristənꞌ
\p
\v 1-2 Nadaꞌ Pab chzoɉaꞌ leꞌe chdopə chžagle choꞌelaꞌole X̱acho Diozənꞌ naꞌ X̱ancho Jesocristənꞌ laoꞌ syoda Tesalonicanꞌ. Naꞌ nadaꞌ lenaꞌ Silbanonꞌ naꞌ Temtionꞌ chṉabtoꞌ lao X̱acho Diozənꞌ naꞌ X̱ancho Jesocristənꞌ əsaꞌaclenšgueꞌ leꞌe naꞌ soꞌonšgueꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Catəꞌən yidə Cristənꞌ deꞌe yoblə Diozənꞌ əgwnežɉueꞌ castigw c̱he beṉəꞌ caꞌ chsoꞌon deꞌe malənꞌ
\p
\v 3 Beṉəꞌ bišəꞌ, netoꞌ cheyaḻəꞌ sotezə sotoꞌ güeꞌetoꞌ yeḻəꞌ chox̱cwlen c̱he Diozənꞌ por leꞌe canꞌ chonczətoꞌ. Naquən güen chontoꞌ caꞌ laꞌ zda chonḻilažəꞌəchle Diozənꞌ naꞌ zdach chaquele c̱he lɉuežɉle.
\v 4 Deꞌe naꞌanəꞌ chebeitoꞌ choꞌetoꞌ xtižəꞌəlenꞌ len yeziquəꞌəchlə beṉəꞌ caꞌ bagwleɉ Diozənꞌ par chəsəꞌədopə chəsəꞌəžagueꞌ chsoꞌelaogüeꞌe Jesocristənꞌ ga yoblə. Choꞌetoꞌ dižəꞌ ca güenṉəꞌ chonḻe deꞌen chgoꞌo chc̱heɉlažəꞌəle len deꞌen chosoꞌolagzeɉə chosoꞌolagzidə beṉəꞌ leꞌe naꞌ canꞌ zotezə zole chonḻilažəꞌəle Diozənꞌ ḻaꞌaṉəꞌəczə deꞌe zan deꞌe chžaglaole.
\v 5 Naꞌ ca naquə zotezə zole chonḻilažəꞌəle Diozənꞌ ṉezecho de que zdaczeꞌ ḻicha par c̱hoglaogüeꞌen nac gaquə c̱he to to beṉac̱h. Naꞌ ḻeꞌ choꞌe latɉə chyiꞌ chzaquəꞌəle par nic̱h əṉeꞌ de que zaqueꞌele par yeyeɉle yobanꞌ ganꞌ zoeꞌ chnabiꞌe.
\p
\v 6 Naꞌ naquəczən ḻicha canꞌ chon Diozənꞌ chc̱hiꞌ chsaqueꞌe beṉəꞌ chosəꞌəc̱hiꞌ chosəꞌəsaquəꞌ leꞌe.
\v 7 Leꞌe naꞌ len netoꞌ chyiꞌ chzaquəꞌəcho ṉaꞌa, pero Diozənꞌ goneꞌ ca cuezə yoguəꞌəte deꞌen chyiꞌ chzaquəꞌəchonꞌ catəꞌən leꞌicho yetɉ X̱ancho Jesocristənꞌ ḻeꞌe yobanꞌ len angl c̱heꞌ caꞌ beṉəꞌ caꞌ zɉənapə yeḻəꞌ guac. Yideꞌ nyec̱hɉeꞌ yiꞌ beḻ.
\v 8 Naꞌ gwnežɉueꞌ castigw c̱he beṉəꞌ caꞌ cui zɉənombiaꞌ Diozənꞌ, naꞌ nic gwseꞌeɉḻeꞌe c̱he dižəꞌ güen dižəꞌ cobə deꞌen chzeɉniꞌin chioꞌo c̱he X̱ancho Jesocristənꞌ.
\v 9 Ḻegaꞌaqueꞌ əsaꞌaqueꞌ castigw zeɉḻicaṉe. Cuat yesyəꞌəžineꞌ lao Diozənꞌ, nic əseꞌen yesəꞌəleꞌineꞌ yeḻəꞌ guac xen c̱heꞌenəꞌ naꞌ yeḻəꞌ chey cheꞌeniꞌ c̱heꞌenəꞌ.
\v 10 Yidə Jesocristənꞌ deꞌe yoblə catəꞌən əžin žanəꞌ, par nic̱h chioꞌo chonḻilažəꞌəchoneꞌ naꞌ bagwleɉ Diozənꞌ chioꞌo par naccho lažəꞌ neꞌenəꞌ yoguəꞌəcho güeꞌechoneꞌ yeḻəꞌ balaꞌaṉ naꞌ yebanecho ca güenṉəꞌ naqueꞌ. Txen len leꞌe güeꞌechoneꞌ yeḻəꞌ balaꞌaṉ naꞌ yebanecho ca güenṉəꞌ naqueꞌ, c̱hedəꞌ lenḻe cheɉḻeꞌele c̱he dižəꞌ deꞌen beꞌelentoꞌ leꞌe.
\p
\v 11 Deꞌe naꞌanəꞌ chontezətoꞌ orasyon par leꞌe. Chṉabetoꞌ Diozənꞌ gaquəleneꞌ leꞌe gonḻe ca əṉeꞌ de que zaquəꞌəle par deꞌen gwleɉeꞌ leꞌe nacle xiꞌiṉeꞌ. Naꞌ chṉabtoꞌ gaquəleneꞌ leꞌe len yeḻəꞌ guac c̱heꞌenəꞌ par nic̱h yeyož gonḻe yoguəꞌ deꞌe güen deꞌen bagwc̱hoglaole gonḻe naꞌ len biquəꞌəchlə deꞌen cheneꞌele gonḻe laogüe deꞌen chonḻilažəꞌəleneꞌ.
\v 12 Chṉabtoꞌ gonḻe ca siꞌ X̱ancho Jesocristənꞌ yeḻəꞌ balaꞌaṉ, naꞌ ḻeꞌ goneꞌ ca siꞌile yeḻəꞌ balaꞌaṉ c̱hedəꞌ X̱acho Diozənꞌ naꞌ X̱ancho Jesocristənꞌ chsaꞌacleneꞌ leꞌe.
\c 2
\s1 Ec̱hoɉ benꞌ gonchgua deꞌe malənꞌ
\p
\v 1 Beṉəꞌ bišəꞌ, deꞌe yoblə əchniaꞌ leꞌe ca naquənꞌ yidə X̱ancho Jesocristənꞌ yeto par deyetobeꞌ chioꞌo žɉəyezocho txen len ḻeꞌ.
\v 2 Babzeɉniꞌitoꞌ leꞌe canꞌ gaquə, naꞌ deꞌe yoblə chatəꞌəyoitoꞌ leꞌe ḻegonyaṉəꞌ xbab par nic̱h cui cueɉyic̱hɉle deꞌen babsed babloꞌitoꞌ leꞌe. Naꞌ ḻeczə bito gaquəžeɉlažəꞌəle šə no yidəclə dezeɉniꞌineꞌ leꞌe de que Spirit c̱he Diozənꞌ bagwnan de que babžin ža əgwnežɉo X̱ancho Jesoꞌosənꞌ castigw c̱he beṉəꞌ caꞌ cui chsoꞌonḻilažeꞌeneꞌ. Naꞌ nic gaquəžeɉlažəꞌəle šə bi rson yenele o šə laꞌaclə no cart faḻs deꞌe chon choaꞌa əniaꞌ de que babžin žanꞌ.
\v 3 Bito güeꞌele latɉə no x̱oayag leꞌe šə bi əṉeꞌ o šə bi deꞌe goneꞌ. Laꞌ catəꞌən zeꞌe yidə X̱ancho Jesoꞌosənꞌ par əgwnežɉueꞌ castigonꞌ beṉəꞌ zan əsaꞌaseꞌ contr Diozənꞌ naꞌ ḻeczə canaꞌ əchoɉ to beṉəꞌ blao beṉəꞌ gonchgüeꞌ deꞌe mal contr Cristənꞌ. Beꞌenanꞌ əgwnežɉo X̱ancho Jesoꞌosənꞌ castigw c̱heꞌ zeɉḻicaṉe.
\v 4 Gon cuineꞌ xen naꞌ goneꞌ contr Diozənꞌ naꞌ contr bitəꞌətezəchlə deꞌen chseꞌeɉṉiꞌalažəꞌ beṉəꞌ. Naꞌ cuiꞌe ḻoꞌo yoꞌodaoꞌ əblao ganꞌ chseꞌeɉṉiꞌalažəꞌ beṉəꞌ Diozənꞌ naꞌ əṉeꞌ de que naqueꞌ Dioz.
\p
\v 5 Cheyaḻəꞌ əžɉsaꞌalažəꞌəle de que catəꞌən gwzoaꞌ len leꞌe bzeɉniꞌidaꞌ leꞌe canꞌ gaquə catəꞌən yidə Jesocristənꞌ deꞌe yoblə naꞌ canꞌ gaquə catəꞌən zeꞌe yideꞌ.
\v 6 Naꞌ ṉezczele deꞌen chžon əchoɉ benꞌ gonchgua deꞌe malənꞌ, pero catəꞌən babžin ža bžin or nanꞌ əchoɉeꞌ.
\v 7 Bachac deꞌe malənꞌ ṉaꞌa deꞌen naquə contr Diozənꞌ pero ṉengašəꞌən. Naꞌ gwžin ža laꞌalaon catəꞌ cuich zo deꞌen chžon gaquə deꞌe malənꞌ.
\v 8 Canaꞌachənꞌ əchoɉ beṉəꞌ blao benꞌ gonchgua deꞌe malənꞌ. Pero X̱ancho Jesoꞌosənꞌ yideꞌ nseꞌe yeḻəꞌ guac xen c̱heꞌenəꞌ naꞌ yonitlaogüeꞌeneꞌ laꞌ catəꞌ leꞌineꞌ X̱anchonꞌ naꞌ yeneneꞌ dižəꞌ deꞌen güeꞌ X̱anchonꞌ nach gateꞌ.
\v 9 Naꞌ ca naquənꞌ əchoɉ benꞌ gonchgua deꞌe malənꞌ, Satanas deꞌen chnabiaꞌ deꞌe x̱ioꞌ caꞌ gonən par nic̱h əchoɉeꞌ naꞌ gonən par nic̱h gapəchgüeꞌ yeḻəꞌ guac naꞌ par nic̱h goneꞌ miḻagr naꞌ bichlə deꞌe zaqueꞌe yesyəꞌəbane beṉəꞌ parzə əx̱oayagueꞌ ḻegaꞌaqueꞌ.
\v 10 Yoguəꞌ cḻaste deꞌe mal goneꞌ əx̱oayagueꞌ beṉəꞌ caꞌ banaquən əgwnežɉo X̱ancho Jesoꞌosənꞌ castigonꞌ zeɉḻicaṉe. Naꞌ ca naquə dižəꞌ ḻi deꞌen zaquəꞌ par seꞌeɉḻeꞌe par nic̱h cui žɉəyaꞌaqueꞌ lao yiꞌ gabiḻənꞌ, bito yesyəꞌəbeineꞌen. Deꞌe naꞌanəꞌ əgwnežɉueꞌ ḻegaꞌaqueꞌ castigw zeɉḻicaṉenꞌ.
\v 11 Naꞌ deꞌe naꞌanəꞌ Diozənꞌ goneꞌ par nic̱h gaquə yic̱hɉlaꞌaždaꞌogaꞌaqueꞌenəꞌ žc̱hoḻ naꞌ yosoꞌozenagzecheꞌ c̱he dižəꞌ güenḻažəꞌənəꞌ.
\v 12 Nach X̱ancho Jesoꞌosənꞌ əgwnežɉueꞌ ḻegaꞌaqueꞌ castigonꞌ zeɉḻicaṉe c̱hedəꞌ besyəꞌəbeicheneꞌ deꞌe malənꞌ naꞌ bito gwseꞌeɉḻeꞌe c̱he dižəꞌ ḻi c̱he X̱anchonꞌ.
\s1 Diozənꞌ chbeɉeꞌ beṉəꞌ par goneꞌ ca cui žɉəyaꞌaqueꞌ lao yiꞌ gabiḻənꞌ
\p
\v 13 Beṉəꞌ bišəꞌ, chaque X̱ancho Jesocristənꞌ c̱hele. Naꞌ ca naquə netoꞌ ža, cheyaḻəꞌ sotezə sotoꞌ güeꞌetoꞌ yeḻəꞌ chox̱cwlen c̱he Diozənꞌ deꞌen gwleɉeꞌ leꞌe catəꞌən cuiṉəꞌ x̱e yežlyonꞌ par nic̱h beneꞌ ca cui yeyeɉle lao yiꞌ gabiḻənꞌ. Naꞌ catəꞌən gwzolaole cheɉḻeꞌele c̱he dižəꞌ ḻi c̱he Diozənꞌ nach bseḻeꞌe Spirit c̱heꞌenəꞌ chonən par nic̱h nacle beṉəꞌ laꞌaždaoꞌ xiꞌilažəꞌ.
\v 14 Par cui yeyeɉle lao yiꞌ gabiḻənꞌ gwleɉ Diozənꞌ leꞌe. Naꞌ deꞌen gwyeɉḻeꞌele c̱he dižəꞌ güen dižəꞌ cobə c̱he Diozənꞌ deꞌen beꞌelentoꞌ leꞌe, əžin ža catəꞌən cuin Diozənꞌ goṉeꞌ leꞌe yeḻəꞌ balaꞌaṉ ca deꞌen de c̱he X̱ancho Jesocristənꞌ.
\p
\v 15 Deꞌe naꞌanəꞌ beṉəꞌ bišəꞌ, ḻesotezə ḻeso ḻegonḻilažəꞌ Diozənꞌ. Naꞌ ḻeꞌe talentezə deꞌen bzeɉniꞌitoꞌ leꞌe, šə dižəꞌ deꞌen beꞌelentoꞌ leꞌe o šə deꞌen babzoɉtoꞌ.
\v 16-17 X̱acho Diozənꞌ chaqueneꞌ c̱hecho. Naꞌ deꞌen nžiꞌilažeꞌe chioꞌo naꞌanəꞌ bseḻeꞌe Xiꞌiṉeꞌenəꞌ. Canꞌ ben Diozənꞌ par nic̱h zocho mbalaz zeɉḻicaṉe naꞌ par nic̱h zocho lez goneꞌ güen len chioꞌo. Naꞌ chṉabdaꞌ cuin X̱ancho Jesocristənꞌ txen len X̱acho Diozənꞌ yosoꞌotipšgueꞌ lažəꞌəle naꞌ əsaꞌaclenšgueꞌ leꞌe par nic̱h gonḻe porzə deꞌe güen naꞌ güeꞌele por dižəꞌ güen.
\c 3
\s1 Gwṉab Pabənꞌ soꞌoneꞌ orasyon par ḻeꞌ len beṉəꞌ lɉuežɉeꞌ caꞌ
\p
\v 1 Ṉaꞌa ža beṉəꞌ bišəꞌ, gonšgale orasyon par netoꞌ nic̱h yob žɉətix̱ɉueꞌitoꞌ c̱he X̱ancho Jesocristənꞌ doxenḻə naꞌ par nic̱h beṉəꞌ yeziquəꞌəchlə yob soꞌoneꞌen c̱hegaꞌaqueꞌ catəꞌ seꞌeneneꞌen canꞌ baben leꞌe.
\v 2 Biaꞌaczə nitəꞌ beṉəꞌ mal beṉəꞌ cui soꞌonḻilažəꞌ X̱ancho Jesocristənꞌ naꞌ zɉənalɉəgaꞌaqueneꞌ. Deꞌe naꞌanəꞌ ḻeczə ṉabšgale par nic̱h beṉəꞌ caꞌ bito yesəꞌəžoneꞌ c̱hix̱ɉueꞌetoꞌ xtižəꞌ X̱ancho Jesocristənꞌ.
\v 3 X̱ancho Jesocristənꞌ zotezə zoeꞌ choneꞌ complir canꞌ neꞌenə naꞌ ḻeczenꞌ gaquəleneꞌ leꞌe par nic̱h sotezə sole gonḻilažəꞌəleneꞌ. Naꞌ ḻeczə ḻeꞌenəꞌ əgwcuasəꞌ gwcueꞌeɉeꞌ leꞌe len deꞌe malənꞌ.
\v 4 Naꞌ zotoꞌ segor de que chaclenczeꞌ leꞌe par nic̱h chonḻe canꞌ babentoꞌ mendadənꞌ naꞌ zotoꞌ lez gaquəleneꞌ par nic̱h ṉitəꞌəczle gonḻe caꞌ.
\v 5 Naꞌ chṉabdaꞌ X̱ancho Jesocristənꞌ goneꞌ ca gaquəchele c̱he Diozənꞌ. Naꞌ ḻeczə chṉabdaꞌaneꞌ goneꞌ ca sotezə sole gonḻilažəꞌəleneꞌ canꞌ ben Jesocristənꞌ gwzotezə gwzoeꞌ benḻilažəꞌəchgüeꞌ X̱eꞌ Diozənꞌ lao yoguəꞌəḻoḻte deꞌen gwdiꞌ gwxaqueꞌe yežlyo nga.
\s1 Pabənꞌ beneꞌ mendad soꞌoneꞌ žin par soꞌon cuingaꞌaqueꞌ mantener
\p
\v 6 Beṉəꞌ bišəꞌ, chzenetoꞌ leꞌe canꞌ chon X̱ancho Jesocristənꞌ mendad. Bito cheyaḻəꞌ gonḻe txen len no beṉəꞌ bišəꞌəchonꞌ šə naqueꞌ beṉəꞌ xagüed o šə bito chzenagueꞌ c̱he deꞌen əbsed əbloꞌitoꞌ leꞌe.
\v 7 Netoꞌ syempr bentoꞌ žin catəꞌən gwzotoꞌ len leꞌe, naꞌ deꞌe naꞌanəꞌ ṉezczele de que cheyaḻəꞌ sole gonḻe žin.
\v 8 Bito beꞌetoꞌ latɉə no gon netoꞌ mantener, sino que bentoꞌ žin pesad teža naꞌ lente do šeꞌelə par nic̱h ben cuintoꞌ mantener naꞌ nic̱h caꞌ bito əbsotoꞌ leꞌe gast.
\v 9 Zaquəꞌəczətoꞌ par gonḻe netoꞌ mantener catəꞌən gwzotoꞌ bentoꞌ xšin Diozənꞌ ganꞌ zolenəꞌ pero ben cuintoꞌ mantener nic̱h bloꞌitoꞌ leꞌe de que canꞌ cheyaḻəꞌ gonḻe.
\v 10 Catəꞌən gwzotoꞌ len leꞌe bentoꞌ mendad gwnatoꞌ: “Šə no cui goneꞌ žin, bito güeꞌele latɉə gaogüeꞌ.”
\v 11 Pero naꞌ babenetoꞌ dižəꞌ de que baḻle bito bi žin chonḻe, con nitəꞌəle chgüiale binꞌ chsoꞌon beṉəꞌ yoblə.
\v 12 Naꞌ šə nole chgüedle naꞌ bito bi bi žin chonḻe, chontoꞌ mendad naꞌ chatəꞌəyoitoꞌ leꞌe gonḻe canꞌ cheneꞌe X̱ancho Jesocristənꞌ. Ḻegonšazə byen ḻeyezolao ḻegon žinṉəꞌ par nic̱h gon cuinḻe mantener, naꞌ ḻeso ḻecuezə binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\p
\v 13 Naꞌ yoguəꞌəle beṉəꞌ bišəꞌ, bito žɉx̱aquəꞌəlažəꞌəle gonḻe deꞌe güen.
\v 14 Chontoꞌ mendad əgwzenagle c̱he yoguəꞌ deꞌen babzoɉtoꞌ leꞌe. Naꞌ šə no gon godenag, ḻeꞌe gwzoeꞌ to šḻaꞌalə. Bitoch gonḻe txen len ḻeꞌ par nic̱h gaqueneꞌ ztoꞌ c̱he deꞌen choneꞌenəꞌ.
\v 15 Pero ḻaꞌaṉəꞌəczə šə babzoleneꞌ to šḻaꞌalə, bito gueꞌileneꞌ, sino əgwzeɉniꞌileneꞌ dižəꞌ šaoꞌ c̱hedəꞌ laꞌ naqueꞌ beṉəꞌ bišəꞌəcho.
\s1 Pabənꞌ gwṉabeneꞌ Diozənꞌ gaquəleneꞌ beṉəꞌ Tesalonica caꞌ
\p
\v 16 X̱ancho Jesocristənꞌ choneꞌ ca chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ. Naꞌ ḻeꞌenəꞌ gonšgaczeꞌ par nic̱h so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ dote tyemp bitəꞌətezə deꞌen chac. Sošgaczeꞌ len yoguəꞌəle.
\p
\v 17 Naꞌ chzendaꞌ leꞌe de que cuinczaꞌ nadaꞌ Pabənꞌ chzoɉaꞌ part daoꞌ c̱he cart nga əchguapaꞌ leꞌe diox. Canꞌ chonczaꞌ len yoguəꞌ cart deꞌen əchseḻaꞌa par nic̱h nacbiaꞌ de que nadanꞌ chseḻaꞌan, laꞌ banombiꞌaczle canꞌ chzoɉaꞌ.
\v 18 X̱ancho Jesocristənꞌ gaquəlenšgueꞌ yoguəꞌəle. Deꞌe naꞌazənꞌ chzoɉaꞌ ṉaꞌa.
\b
\m Pab