\id 1TI
\ide UTF8
\h 1 TIMOTEO
\toc1 1 Timoteo
\mt1 Cart Nech Deꞌen Bzoɉ San Pabənꞌ Par Temtionꞌ
\c 1
\s1 Pabənꞌ chzoɉeꞌ cart par Temtionꞌ
\p
\v 1 Nadaꞌ Pab nacaꞌ apostol c̱he Jesocristənꞌ. Diozənꞌ babebeɉeꞌ chioꞌo xniꞌa deꞌe malənꞌ naꞌ zocho lez gon Cristo Jesoꞌosənꞌ par nic̱h žɉəyezocho len Diozənꞌ. Ḻegaꞌaqueꞌenəꞌ gwsoꞌoneꞌ mendad par nacaꞌ apostol.
\v 2 Naꞌ chzoɉaꞌ leꞌ Temtio daoꞌ. Banonaꞌ leꞌ ca xiꞌiṉaꞌ laogüe deꞌen bsed bloꞌidaꞌ leꞌ par chonḻilažoꞌo X̱ancho Cristo Jesoꞌosənꞌ. Chonaꞌ orasyon chṉabaꞌ lao X̱acho Diozənꞌ naꞌ lao X̱ancho Cristo Jesoꞌosənꞌ əsaꞌaclenšgueꞌ leꞌ, naꞌ yesyəꞌəyašəꞌ yesyəꞌəžiꞌilažeꞌe leꞌ, naꞌ soꞌonšgueꞌ ca so cuezoꞌ binḻo len xbab deꞌen yoꞌo ḻoꞌo yic̱hɉlaꞌaždaꞌogoꞌonəꞌ.
\s1 Nitəꞌ beṉəꞌ chosoꞌosed chosoꞌoloꞌineꞌ dižəꞌ güenḻažəꞌ
\p
\v 3 Catəꞌən gwzaꞌa Efesonꞌ par gwyaꞌa Masedonianꞌ, gožaꞌ leꞌ yegaꞌaṉoꞌ Efesonꞌ. Benaꞌ mendad yegaꞌaṉoꞌ par nic̱h əgwzeɉniꞌidoꞌ baḻə beṉəꞌ nitəꞌ naꞌ de que cuich yosoꞌosed yosoꞌoloꞌineꞌ bitəꞌətezə dižəꞌ deꞌen cui zdan txen len xtižəꞌ Diozənꞌ. Naꞌ cheꞌendaꞌ sotezoꞌ gonoꞌ caꞌ.
\v 4 Naꞌ ḻeczə bzeɉniꞌigaꞌaqueneꞌ de que bitoch cueꞌ yic̱hɉgaꞌaqueꞌ c̱he deꞌe x̱axtaꞌocho caꞌ. Dia c̱hegaꞌaqueꞌ caꞌ zɉənaqueꞌ beṉəꞌ zan. Naꞌ deꞌe zan cuent chsoꞌe c̱hegaꞌaqueꞌ. Gaquəyožcho šə cueꞌ yic̱hɉcho c̱he deꞌe caꞌ. Naꞌ bito chsaꞌaclenən chioꞌo par nic̱h gonḻilažəꞌəcho Diozənꞌ canꞌ cheneꞌeneꞌ goncho.
\p
\v 5 Cheyaḻəꞌ əgwzeɉniꞌicho beṉəꞌ par nic̱h soꞌonḻilažeꞌe Diozənꞌ do yic̱hɉ do lažəꞌəgaꞌaqueꞌ naꞌ soꞌe latɉə yeyaꞌ yeyib Diozənꞌ yic̱hɉlaꞌaždaꞌogaꞌaqueꞌenəꞌ. Naꞌ šə soꞌoneꞌ caꞌ nachənꞌ saꞌacbeꞌineꞌ ḻoꞌo yic̱hɉlaꞌaždaꞌogaꞌaqueꞌenəꞌ de que bito bi deꞌe mal chsoꞌoneꞌ. Egwzeɉniꞌicho ḻegaꞌaqueꞌ soꞌoneꞌ caꞌ par nic̱h əsaꞌaqueneꞌ c̱he Diozənꞌ naꞌ c̱he lɉuežɉgaꞌaqueꞌ.
\v 6 Nitəꞌ beṉəꞌ bagosəꞌəqueꞌe nez malənꞌ. Bito chsoꞌonḻilažeꞌe Diozənꞌ do yic̱hɉ do lažəꞌəgaꞌaqueꞌ. Bito chsoꞌe latɉə yeyaꞌ yeyibeꞌ yic̱hɉlaꞌaždaꞌogaꞌaqueꞌenəꞌ naꞌ zɉəṉezeneꞌ de que chsoꞌoneꞌ deꞌe mal. Deꞌe naꞌanəꞌ chsoꞌechgüeꞌ dižəꞌ deꞌe bito bi zaquəꞌən.
\v 7 Chseꞌeneneꞌ yosoꞌosed yosoꞌoloꞌineꞌ beṉəꞌ yoblə ḻei deꞌen bzoɉ deꞌe Moisezənꞌ len bito chseꞌeɉniꞌineꞌ bi dižəꞌən chsoꞌe naꞌ nic chseꞌeɉniꞌineꞌ bi zeɉe deꞌe caꞌ chəsəꞌəneꞌ zɉənaquən deꞌe žialao xen goncho.
\p
\v 8 Naꞌ ṉezecho de que ḻeinꞌ naquən güen con šə gwc̱hinchon par əgwzeɉniꞌicho beṉəꞌ de que bito cheyaḻəꞌ soꞌoneꞌ deꞌe mal.
\v 9 Cheyaḻəꞌ ṉezecho de que beṉəꞌ caꞌ bachsoꞌon canꞌ cheneꞌe Diozənꞌ bito chəsəꞌəyažɉeneꞌ to ḻei deꞌe gwzeɉniꞌin ḻegaꞌaqueꞌ de que cheyaḻəꞌ soꞌoneꞌ deꞌe güen. Diozənꞌ bnežɉueꞌ ḻeinꞌ par beṉəꞌ caꞌ cui chsoꞌon canꞌ nan naꞌ par beṉəꞌ godenag caꞌ naꞌ par beṉəꞌ caꞌ cui chsoꞌelaoꞌ ḻeꞌ, naꞌ par beṉəꞌ caꞌ chsoꞌontezə chsoꞌoneꞌ deꞌe malənꞌ, naꞌ par beṉəꞌ caꞌ cui chsoꞌon cas c̱he Diozənꞌ, naꞌ par beṉəꞌ caꞌ chesəꞌəgueꞌi deꞌen naquə deꞌe zaqueꞌe lao Diozənꞌ, naꞌ par beṉəꞌ caꞌ chsoꞌot x̱axnaꞌagaꞌaqueꞌ, naꞌ par yeziquəꞌəchlə beṉəꞌ güet beṉəꞌ.
\v 10 Naꞌ ḻeczə bnežɉueꞌ ḻeinꞌ par beṉəꞌ caꞌ chesəꞌəgoꞌo xtogaꞌaqueꞌ naꞌ par beṉəꞌ caꞌ chesəꞌəbeɉyic̱hɉeꞌ noꞌol c̱hegaꞌaqueꞌ o beꞌen c̱hegaꞌaqueꞌ par chəsəꞌəzoleneꞌ beṉəꞌ yoblə, naꞌ par beṉəꞌ byo caꞌ chesyəꞌəzolentezə lɉuežɉ beṉəꞌ byogaꞌaqueꞌ, naꞌ par beṉəꞌ chəsəꞌəc̱heꞌe beṉəꞌ yoblə la fuers naꞌ chesəꞌədiꞌeneꞌ lao naꞌ beṉəꞌ yoblə, naꞌ par beṉəꞌ güenḻažəꞌ, naꞌ par beṉəꞌ caꞌ chsaꞌac testigw faḻs contr lɉuežɉgaꞌaqueꞌ lao jostis, naꞌ par notəꞌətezəchlə beṉə chsoꞌon contr dižəꞌ güen deꞌen chsed chloꞌicho c̱he Diozənꞌ.
\v 11 Ḻei naꞌanəꞌ chonən txen len dižəꞌ güen dižəꞌ cobə c̱he Diozənꞌ benꞌ choꞌelaꞌocho. Naꞌ ḻeꞌenəꞌ babeneꞌ lao naꞌa par chyix̱ɉuiꞌa dižəꞌ cobə c̱heꞌenəꞌ deꞌen naquə deꞌe güen juisy.
\s1 Pabənꞌ beꞌe yeḻəꞌ chox̱cwlen c̱he Diozənꞌ
\p
\v 12 Choꞌa yeḻəꞌ chox̱cwlen c̱he X̱ancho Jesocristənꞌ, c̱hedəꞌ ḻeꞌenəꞌ choṉeꞌ fuers balor c̱hiaꞌ par chyix̱ɉuiꞌa xtižeꞌenəꞌ. Naꞌ ḻeꞌenəꞌ gwleɉeꞌ nadaꞌ par gonaꞌ xšineꞌenəꞌ c̱hedəꞌ gwṉezeneꞌ de que zotezə zoaꞌ chonaꞌ complir canꞌ cheyaḻəꞌ gonaꞌ.
\v 13 Ḻechguaḻe bachacleneꞌ nadaꞌ, len antslə zeꞌe gombiꞌaneꞌ bžia bnitaꞌaneꞌ naꞌ gwziꞌic̱hižaꞌaneꞌ, naꞌ bc̱hiꞌ bsacaꞌa beṉəꞌ caꞌ chsoꞌonḻilažeꞌeneꞌ. Beyašəꞌ bežiꞌilažeꞌe nadaꞌ ḻaꞌaṉəꞌəczə benaꞌ caꞌ c̱hedəꞌ cuiṉəꞌ gonḻilažaꞌaneꞌ naꞌ bito gocbeꞌidaꞌ binꞌ chonaꞌ.
\v 14 Naꞌ X̱ancho Cristo Jesoꞌosənꞌ bloꞌineꞌ nadaꞌ catequənꞌ nžiꞌilažeꞌe nadaꞌ ca deꞌen chacleneꞌ nadaꞌ par nic̱h bachonḻilažaꞌaneꞌ naꞌ bachacdaꞌ c̱he yeziquəꞌəchlə beṉəꞌ laogüe deꞌen ngodaꞌa txen len Cristo Jesoꞌosənꞌ.
\p
\v 15 Dižəꞌ quinga naquən deꞌe ḻi naꞌ zɉəzaquəꞌən par šeɉḻeꞌecho, de que “Jesucristənꞌ bideꞌ yežlyo nga par nic̱h chebeɉeꞌ beṉəꞌ xniꞌa deꞌe malənꞌ.” Naꞌ nadaꞌ chacdaꞌ gocaꞌ ḻeꞌezelaogüe beṉəꞌ güen deꞌe mal.
\v 16 Pero ḻaꞌaṉəꞌəczə gocaꞌ ḻeꞌezelaogüe beṉəꞌ güen deꞌe mal, Jesocristənꞌ bežiꞌilažeꞌe nadaꞌ par nic̱h bloꞌe catec yeḻəꞌ chxenḻažəꞌ napeꞌ. Naꞌ deꞌen bežiꞌilažeꞌe nadaꞌ yoguəꞌ beṉəꞌ zeꞌe soꞌonḻilažeꞌeneꞌ naꞌ zeꞌe yesəꞌəziꞌe yeḻəꞌ mban zeɉḻicaṉe saꞌacbeꞌineꞌ de que napeꞌ yeḻəꞌ chxenḻažəꞌ xen.
\v 17 Ḻedoyeꞌelaoch Rei c̱hechonꞌ ṉaꞌa naꞌ zeɉḻicaṉe, benꞌ cui te c̱hei naꞌ zoeꞌ zeɉḻicaṉe. Cheyaḻəꞌ güeꞌechoneꞌ yeḻəꞌ balaꞌaṉ. Ḻeꞌenəꞌ cui no chac leꞌi, naꞌ naqueꞌ beṉəꞌ sinꞌ. Tozə ḻeꞌ zaqueꞌe par güeꞌelaꞌochoneꞌ. Naꞌ canꞌ naquəczən.
\p
\v 18 Xiꞌiṉdaꞌoguaꞌa Temtio, deꞌe quinga chzoɉaꞌ leꞌ ḻeꞌe cart nga, chonaꞌ mendad gonoꞌ xšin Diozənꞌ do yic̱hɉ do lažoꞌo ḻaꞌaṉəꞌəczə catəꞌ naquən zdebə. Cheꞌendaꞌ žɉəsaꞌalažoꞌo canꞌ gwsoꞌon beṉəꞌ golə blao entr chioꞌo chonḻilažəꞌəcho Cristənꞌ, bagwsoꞌe dižəꞌ bosoꞌozeneneꞌ chioꞌo de que bagwleɉ Diozənꞌ leꞌ par gonoꞌ xšineꞌenəꞌ. Benšga xšin Diozənꞌ canꞌ gosəꞌəneꞌ.
\v 19 Naꞌ ḻeczə gwzo c̱hec̱h gonḻilažoꞌo Cristənꞌ, naꞌ gonoꞌ ca əṉezdoꞌ ḻoꞌo yic̱hɉlaꞌaždaogoꞌo de que bitobi deꞌe mal chonoꞌ. Baḻə beṉəꞌ bito besyəꞌədiṉɉeneꞌ xtoḻəꞌəgaꞌaqueꞌenəꞌ ḻaꞌaṉəꞌəczə gosəꞌəṉezeneꞌ ḻoꞌo yic̱hɉlaꞌaždaogaꞌaqueꞌenəꞌ de que bagwsoꞌoneꞌ deꞌe malənꞌ, naꞌ deꞌe naꞌanəꞌ bitoch chsoꞌonḻilažeꞌe Diozənꞌ.
\v 20 Canꞌ bagwsoꞌon Imeneo naꞌ Ljandr. Chžonaꞌ soꞌon beṉəꞌ caꞌ txen len chioꞌo chonḻilažəꞌəcho Cristənꞌ naꞌ chṉabdaꞌ Diozənꞌ güeꞌe latɉə gon Satanasənꞌ con nac cheneꞌen len ḻegaꞌaqueꞌ par nic̱h əsaꞌacbeꞌineꞌ de que bito cheyaḻəꞌ yosoꞌožia yosoꞌoniteꞌe Diozənꞌ.
\c 2
\s1 Nac cheyaḻəꞌ goncho orasyonṉəꞌ
\p
\v 1 Naꞌ chniaꞌ leꞌ de yeto deꞌen naquə deꞌe žialao gon yoguəꞌəcho. Catəꞌ ndopə nžagcho par choꞌelaꞌocho Diozənꞌ cheyaḻəꞌ goncho orasyon par yoguəꞌəḻoḻ beṉəꞌ, ṉabcho gaquəlen Diozənꞌ ḻegaꞌaqueꞌ, naꞌ güeꞌecho yeḻəꞌ chox̱cwlen c̱he Diozənꞌ por ḻegaꞌaqueꞌ.
\v 2 Ḻeczə cheyaḻəꞌ goncho orasyonṉəꞌ par no rei naꞌ par yoguəꞌ beṉəꞌ gwnabiaꞌ caꞌ, par nic̱h gaquə so cuezcho binḻo, naꞌ par nic̱h bitobi əgwžon güeꞌelaꞌocho Diozənꞌ. Cheyaḻəꞌ goncho deꞌen naquə güen laogüeꞌenəꞌ naꞌ lao beṉac̱hənꞌ.
\v 3 Naquən güen goncho orasyonṉəꞌ caꞌ, laꞌ Diozənꞌ benꞌ babebeɉ chioꞌo xniꞌa deꞌe malənꞌ choꞌolažeꞌe goncho caꞌ.
\v 4 Diozənꞌ cheneꞌeneꞌ yebeɉeꞌ yoguəꞌ beṉəꞌ xniꞌa deꞌe malənꞌ. Ḻeczə cheneꞌeneꞌ yesəꞌəṉezeneꞌ naꞌ seꞌeɉḻeꞌe dižəꞌ ḻi c̱heꞌenəꞌ.
\v 5 Tozə Diozənꞌ zaqueꞌe par güeꞌelaꞌochoneꞌ, naꞌ tozə benꞌ zo fabor chioꞌo lao Diozənꞌ, ḻeꞌenəꞌ Jesocristənꞌ benꞌ golɉə beṉac̱h.
\v 6 Jesocrist nanꞌ bnežɉw cuineꞌ gwdixɉueꞌ xtoḻəꞌ yoguəꞌ beṉac̱h. Dezd gwlalte Diozənꞌ bsiꞌe xṉeze ṉitəꞌ beṉəꞌ yesəꞌəyix̱ɉuiꞌe c̱he Jesocristənꞌ naꞌ catəꞌən bžin žanꞌ bžieꞌ biaꞌanəꞌ, gosəꞌəyix̱ɉuiꞌe de que Jesocristənꞌ bnežɉw cuineꞌ gwsoꞌoteꞌeneꞌ por ni c̱hecho.
\v 7 Naꞌ ḻeczə deꞌe naꞌanəꞌ gwleɉ Diozənꞌ nadaꞌ par nacaꞌ apostol c̱heꞌ naꞌ par əchyix̱ɉuiꞌa dižəꞌ ḻi c̱heꞌenəꞌ. Bseḻeꞌe nadaꞌ chsed chloꞌidaꞌan beṉəꞌ caꞌ cui zɉənaquə beṉəꞌ Izrael par nic̱h soꞌonḻilažeꞌeneꞌ. Choꞌa dižəꞌ ḻi notono chx̱oayagaꞌ əṉiaꞌ caꞌ.
\p
\v 8 Naꞌ yeto deꞌe cheꞌendaꞌ gonḻe, yoguəꞌ latɉə ganꞌ chdopə chžagle par choꞌelaꞌole Diozənꞌ, beṉəꞌ byo caꞌ cheyaḻəꞌ soꞌoneꞌ orasyonṉəꞌ lao ndopə nžagle. Cheyaḻəꞌ gaquə laꞌaždaꞌogaꞌaqueꞌen xiꞌilažəꞌ, naꞌ notono yesəꞌəžeꞌe naꞌ notono saꞌacyožeꞌ par nic̱h Diozənꞌ əgwzenagueꞌ c̱hegaꞌaqueꞌ catəꞌ soꞌoneꞌ orasyonṉəꞌ.
\v 9 Naꞌ ḻeczə noꞌol caꞌ cheyaḻəꞌ yosoꞌopaꞌa cuingaꞌaqueꞌ ca cui ṉiteꞌe zban. Pero bito cheyaḻəꞌ cueꞌ yic̱hɉgaꞌaqueꞌ porzə par ṉiteꞌe xoche, o par yesəꞌəgualeꞌe bga o ret de or o de perlas. Naꞌ bitotec yesəꞌəbeꞌ yic̱hɉgaꞌaqueꞌ gaquə yišəꞌ yic̱hɉgaꞌaqueꞌen xoche o par yesəꞌəziꞌe xagaꞌaqueꞌ de leꞌeyəꞌ.
\v 10 Cheyaḻəꞌ ṉiteꞌe soꞌoneꞌ deꞌe güen, canꞌ cheneꞌe Diozənꞌ soꞌon notəꞌətezəchlə noꞌolə bagwsoꞌon lyebe de que əsoꞌelaogüeꞌeneꞌ.
\v 11 Noꞌolə caꞌ cheyaḻəꞌ yesəꞌəzex̱ɉw yic̱hɉgaꞌaqueꞌ yosoꞌozenagueꞌ c̱he beṉəꞌ caꞌ chosoꞌosed chosoꞌoloꞌineꞌ xtižəꞌ Diozənꞌ naꞌ bitobi dižəꞌ əsoꞌe lao coltənꞌ.
\v 12 Bito choꞌa latɉə par nic̱h noꞌol caꞌ yosoꞌosed yosoꞌoloꞌineꞌ xtižəꞌ Diozənꞌ lao coltənꞌ, con nitəꞌətezeꞌ žizə. Naꞌ bito yesəꞌənabiꞌe beṉəꞌ byo.
\v 13 Chniaꞌ caꞌ laꞌ Diozənꞌ zguaꞌatec beneꞌ Adanṉəꞌ naꞌ techlə beneꞌ Ebənꞌ.
\v 14 Naꞌ catəꞌ gwxiyeꞌen benən par nic̱h beṉəꞌ nech caꞌ gwsoꞌoneꞌ deꞌe malənꞌ bito bx̱oayaguən Adanṉəꞌ, sino bx̱oayaguən noꞌol c̱heꞌenəꞌ par nic̱h besəꞌəxopeꞌ gwsoꞌoneꞌ deꞌe malənꞌ.
\v 15 Deꞌe naꞌanəꞌ noꞌol caꞌ chəsəꞌəžaglaogüeꞌ catəꞌ chəsəꞌəzaneꞌ. Pero žɉəsyəꞌəniteꞌe len Diozənꞌ zeɉḻicaṉe šə nitəꞌətezə ṉiteꞌe soꞌonḻilažeꞌeneꞌ. Ḻeczə c̱heyaḻəꞌ saꞌaqueneꞌ c̱he Diozənꞌ naꞌ əsaꞌac laꞌaždaꞌogaꞌaqueꞌenəꞌ xiꞌilažəꞌ naꞌ bito soꞌe latɉə ṉabiaꞌ laꞌaždaꞌomalgaꞌaqueꞌenəꞌ ḻegaꞌaqueꞌ.
\c 3
\s1 Nac cheyaḻəꞌ soꞌon beṉəꞌ caꞌ chosoꞌogüia chosoꞌoyeꞌ beṉəꞌ caꞌ chsoꞌonḻilažəꞌ Jesocristənꞌ
\p
\v 1 Deꞌe ḻi canꞌ chesəꞌəneꞌ: “Notəꞌətezə beṉəꞌ šə cheneꞌeneꞌ əggüia əgwyeꞌ yeziquəꞌəchlə beṉəꞌ chsoꞌonḻilažəꞌ Jesocristənꞌ, cheneꞌeneꞌ goneꞌ to žin deꞌen zaquəꞌəchgua.”
\v 2 Catəꞌ cueɉle to beṉəꞌ par əggüia əgwyeꞌ yeziquəꞌəchlə beṉəꞌ chsoꞌonḻilalzəꞌ Jesocristənꞌ, ḻecueɉ to beṉəꞌ zotezə zoeꞌ choneꞌ ca notono gaquə əṉeꞌ de que deꞌe malənꞌ choneꞌ. Ḻecueɉ beṉəꞌ zo tozə noꞌol c̱hei, beṉəꞌ cui choeꞌ latɉə ṉabiaꞌ laꞌaždaꞌomaleꞌenəꞌ ḻeꞌ, beṉəꞌ chnabiaꞌ cuineꞌ par choneꞌ canꞌ chazlažəꞌ Diozənꞌ, beṉəꞌ chon ca beṉəꞌ yoblə chsaꞌapeꞌeneꞌ respet, beṉəꞌ chebei chgüialaogüeꞌ beṉəꞌ ližeꞌenəꞌ, naꞌ beṉəꞌ ṉeze nac əgwsed əgwloꞌineꞌ xtižəꞌ Diozənꞌ binḻo.
\v 3 Bito cueɉle beṉəꞌ güeꞌe zo, o beṉəꞌ naquə beṉəꞌ gotiḻ, o beṉəꞌ chzelažəꞌ goneꞌ gan mechənꞌ, o beṉəꞌ chon znia par nic̱h yosoꞌozenag beṉəꞌ c̱heꞌ, sino cueɉle beṉəꞌ naquə gax̱ɉwlažəꞌ.
\v 4 Ḻecueɉ beṉəꞌ chnabiaꞌ xiꞌiṉeꞌ caꞌ binḻo len notəꞌətezəchlə beṉəꞌ nitəꞌ ližeꞌenəꞌ. Ḻecueɉ beṉəꞌ chon byen yosoꞌozenag xiꞌiṉeꞌ caꞌ c̱heꞌ naꞌ beṉəꞌ chon ca chsaꞌapboꞌ ḻeꞌ respet bitəꞌətezə deꞌen choneꞌ.
\v 5 Laꞌ šə to beṉəꞌ bito chac ṉabiꞌe famiḻy c̱heꞌenəꞌ binḻo, bito ṉezeneꞌ nac goneꞌ par əggüia əgwyeꞌ beṉəꞌ caꞌ bagwleɉ Diozənꞌ par chesəꞌədopə chesəꞌəžagueꞌ chsoꞌelaogüeꞌe Jesocristənꞌ.
\v 6 Bito cueɉle to beṉəꞌ zeꞌe gwzolao chonḻilažeꞌe Diozənꞌ, laꞌ šə cueɉle to beṉəꞌ cobə gonḻɉa cuineꞌ xen canꞌ ben deꞌe gwxiyeꞌenəꞌ naꞌ siꞌe castigw ca castigonꞌ siꞌ ḻenṉəꞌ.
\v 7 Cueɉle beṉəꞌ chon par nic̱h beṉəꞌ caꞌ cui zɉənaqueꞌ txen len chioꞌo yesəꞌəṉezeneꞌ de que choneꞌ deꞌe güen, laꞌ šə cui zotezə zoeꞌ choneꞌ deꞌe güen, gwžinḻɉa ža catəꞌ yosoꞌožia yosoꞌonitəꞌ beṉəꞌ ḻeꞌ naꞌ əxopeꞌ lao naꞌ deꞌe gwxiyeꞌenəꞌ.
\s1 Nac cheyaḻəꞌ saꞌac beṉəꞌ caꞌ əsaꞌaqueꞌ comisyon c̱he chioꞌo chonḻilažəꞌəcho Jesocristənꞌ
\p
\v 8 Naꞌ catəꞌ cueɉle beṉəꞌ caꞌ əsaꞌac comisyon c̱he leꞌe chonḻilažəꞌəle Jesocristənꞌ ganꞌ zolenꞌ, ḻecueɉ beṉəꞌ zɉəzaquəꞌ par gapəgaꞌachoneꞌ respet, naꞌ beṉəꞌ bito zɉənaquə beṉəꞌ gox̱oayag, beṉəꞌ cui zɉənaquə beṉəꞌ güeꞌe zo, beṉəꞌ cui chesəꞌəzelažəꞌ soꞌoneꞌ gan mechənꞌ len xšin Diozənꞌ.
\v 9 Ḻecueɉ beṉəꞌ nitəꞌətezə niteꞌe chseꞌeɉḻeꞌe c̱he deꞌen babzeɉniꞌi Diozənꞌ chioꞌo c̱he Jesocristənꞌ deꞌen cui no gwṉeze antslə, beṉəꞌ chsoꞌon ca chesəꞌəṉezeneꞌ ḻoꞌo yic̱hɉlaꞌaždaꞌogaꞌaqueꞌenəꞌ de que chsoꞌoneꞌ canꞌ chazlažəꞌ Diozənꞌ.
\v 10 Cheyaḻəꞌ ggüiale canꞌ chsoꞌon beṉəꞌ caꞌ chaquele cueɉle par əsaꞌaqueꞌ comisyon c̱hele šə chsoꞌoneꞌ canꞌ bagwniaꞌ cheyaḻəꞌ soꞌoneꞌ, naꞌ šə yesəꞌəchoɉeꞌ binḻo sin cui bi bi faḻt c̱hegaꞌaqueꞌ əžel, nachənꞌ cueɉle ḻegaꞌaqueꞌ par əsaꞌaqueꞌ comisyonṉəꞌ.
\v 11 Ḻeczə caꞌ noꞌol caꞌ chsoꞌon xšin Diozənꞌ cheyaḻəꞌ əsaꞌaqueꞌ beṉəꞌ zɉəzaqueꞌe par gapəgaꞌacchoneꞌ respet, cheyaḻəꞌ əsaꞌaqueꞌ beṉəꞌ cui chosoꞌožia chosoꞌoniteꞌe beṉəꞌ yoblə, cheyaḻəꞌ əsaꞌaqueꞌ beṉəꞌ cui chsoꞌe latɉə ṉabiaꞌ laꞌaždaꞌomalgaꞌaqueꞌen ḻegaꞌaqueꞌ, naꞌ cheyaḻəꞌ əsaꞌaqueꞌ beṉəꞌ nitəꞌətezə niteꞌe chsoꞌoneꞌ complir con canꞌ cheneꞌe Diozənꞌ.
\v 12 Naꞌ catəꞌ cueɉle beṉəꞌ caꞌ əsaꞌac comisyon c̱he leꞌe chonḻilažəꞌəle Jesocristənꞌ ganꞌ zole, ḻecueɉ beṉəꞌ zɉəzo tgüeɉzə noꞌol c̱hei naꞌ ḻecueɉ beṉəꞌ chesəꞌənabiaꞌ xiꞌiṉgaꞌaqueꞌ naꞌ notəꞌətezəchlə beṉəꞌ nitəꞌ ližgaꞌaqueꞌ canꞌ chazlažəꞌ Diozənꞌ.
\v 13 Beṉəꞌ caꞌ zɉənchoɉ par zɉənaqueꞌ comisyonṉəꞌ šə soꞌoneꞌ binḻo yesəꞌəziꞌe yeḻəꞌ balaꞌaṉ xen, naꞌ ḻeczə soꞌonḻilažəꞌəchgüeꞌ Jesocristənꞌ naꞌ bito yesəꞌəžebeꞌ laogüeꞌenəꞌ.
\s1 Notono gwṉeze antslə deꞌen babzeɉniꞌi Diozənꞌ chioꞌo
\p
\v 14-15 Zoaꞌ lez yob yidaꞌ delaṉaꞌa leꞌ, pero bzoɉaꞌ deꞌe caꞌ c̱hedəꞌ bito ṉezdaꞌ batənꞌ gaquə yidaꞌ naꞌ cheꞌendaꞌ əṉezdoꞌ nac cheyaḻəꞌ gon chioꞌo naccho famiḻy c̱he Diozənꞌ. Dioz benꞌ zo zeɉḻicaṉe bagwleɉeꞌ chioꞌo par chdopə chžagcho choꞌelaꞌocho Jesocristənꞌ naꞌ deꞌe naꞌanəꞌ naccho famiḻy c̱heꞌ. Naꞌ Diozənꞌ babzeɉniꞌineꞌ chioꞌo dižəꞌ ḻi c̱heꞌenəꞌ par chzeɉniꞌichon beṉəꞌ.
\v 16 Notono gwṉeze antslə deꞌen babzeɉniꞌi Diozənꞌ chioꞌo ṉaꞌa, naꞌ cheɉḻeꞌechon naꞌ naquən deꞌe žialao xen.
\q1 Jesocristənꞌ bideꞌ golɉeꞌ beṉac̱h,
\q1 naꞌ Spirit c̱he Diozənꞌ bloꞌen de que naqueꞌ doalɉe xiꞌiṉ Dioz.
\q1 Angl caꞌ besyəꞌəbeineꞌ besəꞌəleꞌineꞌ ḻeꞌ.
\q1 Naꞌ bžin ža beyepeꞌ yobanꞌ beziꞌe yeḻəꞌ gwnabiaꞌ c̱heꞌenəꞌ naꞌ yeḻəꞌ balaꞌaṉ c̱heꞌenəꞌ.
\q1 Naꞌ beṉəꞌ caꞌ chsoꞌe xtižeꞌenəꞌ bagosəꞌəyix̱ɉuiꞌen yoguəꞌ ṉasyon,
\q1 naꞌ zan beṉəꞌ žaꞌ doxen yežlyo nga bachsoꞌonḻilažeꞌeneꞌ.
\c 4
\s1 Ežin ža yesəꞌəbeɉyic̱hɉ beṉəꞌ dižəꞌ ḻi c̱he Diozənꞌ
\p
\v 1 Clar bagwna Spirit c̱he Diozənꞌ de que əžin ža baḻə beṉəꞌ yesəꞌəbeɉyic̱hɉeꞌ dižəꞌ ḻi c̱he Diozənꞌ. Yesəꞌəbeɉyic̱hɉeꞌen ca deꞌen yosoꞌozenagueꞌ c̱he beṉəꞌ caꞌ yosoꞌosed yosoꞌoloꞌi dižəꞌ güenḻažəꞌ, naꞌ yosoꞌozenagueꞌ c̱he beṉəꞌ caꞌ yosoꞌosed yosoꞌoloꞌi dižəꞌ deꞌen zaꞌac c̱he deꞌe x̱ioꞌ caꞌ.
\v 2 Beṉəꞌ gox̱oayag caꞌ beṉəꞌ caꞌ yosoꞌosed yosoꞌoloꞌi dižəꞌ güenḻažəꞌ naꞌ bitoch bibi əsaꞌaqueneꞌ ḻoꞌo yic̱hɉlaꞌaždaꞌogaꞌaqueꞌenəꞌ catəꞌən yesəꞌəx̱oayagueꞌ o catəꞌən soꞌoneꞌ bichlə deꞌe mal.
\v 3 Yosoꞌožoneꞌ no yosoꞌošagnaꞌ, naꞌ yesəꞌəneꞌ de que bito gaquə gaocho baḻə yeḻəꞌ guao ḻaꞌaṉəꞌəczə Diozənꞌ beneꞌ par nic̱h zɉəden. Naꞌ beneꞌ yoguəꞌ yeḻəꞌ guao caꞌ par nic̱h chioꞌo chonḻilažəꞌəchoneꞌ naꞌ nombiꞌacho deꞌen naquə deꞌe ḻi gaogaꞌacchon naꞌ güeꞌechoneꞌ yeḻəꞌ chox̱cwlen.
\v 4 Naꞌ deꞌen beneꞌ yoguəꞌ deꞌe caꞌ ṉezecho zɉənaquən güen naꞌ bito zɉənaquən par gueꞌigaꞌaquechon, con güeꞌecho Diozənꞌ yeḻəꞌ chox̱cwlen par deꞌe caꞌ choṉeꞌ chioꞌo.
\v 5 Zɉənaquən güen par gaogaꞌacchon c̱hedəꞌ choꞌecho Xtižeꞌenəꞌ catəꞌ choncho orasyon choꞌecho yeḻəꞌ chox̱cwlen c̱heꞌ par ḻegaꞌaquən.
\s1 Nac cheyaḻəꞌ soꞌon beṉəꞌ caꞌ yosoꞌosed yosoꞌoloꞌineꞌ xtižəꞌ Jesocristənꞌ
\p
\v 6 Naꞌ Temtio, par nic̱h yebeichgüei Jesocristənꞌ canꞌ chonoꞌ xšineꞌenəꞌ cheyaḻəꞌ əgwzeɉniꞌidoꞌ beṉəꞌ bišəꞌəcho beṉəꞌ caꞌ chsoꞌonḻilažəꞌ Jesocristənꞌ deꞌe caꞌ bagwniaꞌ leꞌ. Šə gonoꞌ caꞌ gaquəlenən leꞌ par sotezə soꞌ gonḻilažəꞌəchoꞌ Jesocristənꞌ naꞌ talenchoꞌ dižəꞌ ḻi c̱he Diozənꞌ deꞌen bachdalenoꞌ ṉaꞌa.
\v 7 Bito gone c̱hioꞌ dižəꞌ güenḻažəꞌ deꞌen chsaꞌalɉḻažəꞌ beṉəꞌ caꞌ cui chsoꞌelaoꞌ Diozənꞌ. Chsoꞌe dižəꞌ ca dižəꞌən chsoeꞌ baḻə noꞌolə gol caꞌ len bidaoꞌ caꞌ deꞌe cui zaquəꞌ šeɉḻeꞌecho c̱hei. Pero naꞌ leꞌ bsed par nic̱h šeɉəch gonchoꞌ canꞌ cheneꞌe Diozənꞌ.
\v 8 Ṉezecho de que catəꞌ choncho jersisy chaclenən cuerp c̱hechonꞌ, naꞌ catəꞌ choncho canꞌ cheneꞌe Diozənꞌ caguə cuerp c̱hecho naꞌazənꞌ chaclenən, sino chaclenczən chioꞌo par zocho mbalaz ṉaꞌa lao mbancho naꞌ caꞌaczə catəꞌ žɉəyezocho len Diozənꞌ.
\v 9 Naquən deꞌe ḻi naꞌ zaquəꞌən par šeɉḻeꞌecho c̱hei.
\v 10 Naꞌ Diozənꞌ choneꞌ par nic̱h de yoguəꞌ deꞌe chyažɉe yoguəꞌ beṉəꞌ par nic̱h zɉəmbaneꞌ, naꞌ choṉeꞌ yeḻəꞌ mban zeɉḻicaṉe c̱he chioꞌo chonḻilažəꞌəchoneꞌ. Naꞌ deꞌen zocho lez žɉəyezocho len Dioz benꞌ zo zeɉḻicaṉe, chonchguacho xšineꞌenəꞌ naꞌ chgoꞌo chc̱heɉlažəꞌəcho catəꞌ chəsəꞌəziꞌic̱hižəꞌ beṉəꞌ chioꞌo.
\p
\v 11 Bsed bloꞌi beṉəꞌ deꞌe quinga babzeɉniꞌidaꞌ leꞌ naꞌ gonoꞌ mendad soꞌoneꞌ canꞌ bagwniaꞌ.
\v 12 Ḻaꞌaṉəꞌəczə ṉeꞌe nacoꞌ beṉəꞌ xcuidəꞌ bito goꞌo latɉə yesəꞌəzo beṉəꞌ leꞌ caꞌaḻə cui yosoꞌozenagueꞌ c̱hioꞌ. Len bitəꞌətezə əṉaoꞌ naꞌ len yoguəꞌ deꞌen chonoꞌ bloꞌi beṉəꞌ caꞌ chsoꞌonḻilažəꞌ Jesocristənꞌ nac cheyaḻəꞌ soꞌoneꞌ, naꞌ naquənꞌ cheyaḻəꞌ saꞌaqueneꞌ c̱he Diozənꞌ naꞌ c̱he lɉuežɉgaꞌaqueꞌ naꞌ nac cheyaḻəꞌ ṉitəꞌətezə ṉiteꞌe soꞌonḻilažeꞌe Jesocristənꞌ, naꞌ nac cheyaḻəꞌ soꞌoneꞌ par nic̱h laꞌaždaꞌogaꞌaqueꞌenəꞌ əsaꞌaquən xiꞌilažəꞌ.
\v 13 Mientr yidaꞌ ganꞌ zoꞌonəꞌ gwlec yic̱hɉoꞌ blab Xtižəꞌ Diozənꞌ deꞌen nyoɉən len beṉəꞌ caꞌ chesəꞌədopə chesəꞌəžag chsoꞌelaogüeꞌe Jesocristənꞌ naꞌ gwdix̱ɉueꞌi dižəꞌ güen dižəꞌ cobə c̱heꞌenəꞌ, naꞌ bzeɉniꞌi beṉəꞌ bi zeɉe xtižəꞌ Diozənꞌ.
\v 14 Ben yoguəꞌəḻoḻ deꞌen gwleɉ Diozənꞌ leꞌ par gonoꞌ catəꞌən bosoꞌox̱oa naꞌ beṉəꞌ golə beṉəꞌ blao caꞌ yic̱hɉoꞌon naꞌ bosoꞌozeneneꞌ leꞌ de que Diozənꞌ gwleɉeꞌ leꞌ par gonoꞌ xšineꞌenəꞌ.
\p
\v 15 Gwlec yic̱hɉoꞌ ben yoguəꞌ canꞌ gwniaꞌ par nic̱h yoguəꞌ beṉəꞌ yesəꞌəleꞌineꞌ canꞌ zdach chonoꞌ canꞌ cheneꞌe Diozənꞌ.
\v 16 Gwdapə cuidad ben con canꞌ chazlažəꞌ Diozənꞌ, naꞌ bsed bloꞌi beṉəꞌ soꞌoneꞌ caꞌ. Šə gonoꞌ caꞌ gaquəlenən beṉəꞌ caꞌ chosoꞌozenag xtižoꞌonəꞌ par yesyəꞌəchoɉeꞌ xniꞌa deꞌe malənꞌ naꞌ ḻeczə gaquəlenən leꞌ.
\c 5
\s1 Canꞌ cheyaḻəꞌ goncho len beṉəꞌ caꞌ chsoꞌonḻilažəꞌ Cristənꞌ
\p
\v 1 Šə bi deꞌen chon to beṉəꞌ golə, bito tiḻoꞌoneꞌ sino gwṉeyoineꞌ canꞌ cheyaḻəꞌ goneꞌ, ben canꞌ chonoꞌ len x̱aoꞌ. Naꞌ šə bi deꞌen chon to beṉəꞌ xcuidəꞌ bzeɉniꞌineꞌ ca bišoꞌo.
\v 2 Naꞌ šə bi deꞌen chon to noꞌolə golə, bzeɉniꞌineꞌ canꞌ chonoꞌ len xnaꞌo, naꞌ šə bi deꞌen chon to noꞌolə xcuidəꞌ bzeɉniꞌineꞌ ca to zanoꞌ par nic̱h notono gaquə əṉeꞌ de que deꞌe malənꞌ chonoꞌ.
\p
\v 3 Cheyaḻəꞌ goncho mantener noꞌol caꞌ bagwsaꞌat beꞌen c̱hegaꞌaqueꞌ, šə zɉənaqueꞌ doalɉe gozebə.
\v 4 Pero šə nitəꞌ xiꞌiṉgaꞌaqueꞌ o xesoagaꞌaqueꞌ bzeɉniꞌi beṉəꞌ caꞌ de que cheyaḻəꞌ soꞌoneꞌ ḻegaꞌaqueꞌ mantener c̱hedəꞌ beṉəꞌ gol caꞌ babosyoꞌosgoleꞌ ḻegaꞌaqueꞌ. Chazlažəꞌ Diozənꞌ goncho mantener beṉəꞌ golə lao famiḻy c̱he c̱hecho.
\v 5 Noꞌol caꞌ zɉənaquə doalɉe gozebə, beṉəꞌ caꞌ notono famiḻy c̱hegaꞌaqueꞌ nitəꞌ, niteꞌe lez gaquəlen Diozənꞌ ḻegaꞌaqueꞌ naꞌ chsoꞌontezə chsoꞌoneꞌ orasyon teža naꞌ šeꞌelə. Deꞌe naꞌanəꞌ zɉəzaqueꞌe par goncho ḻegaꞌaqueꞌ mantener.
\p
\v 6 Noꞌolə gozeb caꞌ chsoꞌon xbab soꞌoneꞌ con canꞌ chseꞌeneneꞌ zɉənaquəgaꞌaqueꞌ ca beṉəꞌ guat len yic̱hɉlaꞌaždaꞌogaꞌaqueꞌenəꞌ deꞌen cui chosoꞌozenagueꞌ c̱he Diozənꞌ.
\v 7 Yoguəꞌ deꞌe caꞌ bagwniꞌanəꞌ gonoꞌ mendad soꞌon beṉəꞌ caꞌ chsoꞌonḻilažəꞌ Cristənꞌ par nic̱h notono gaquə əṉeꞌ de que chioꞌo chonḻilažəꞌəcho Cristənꞌ bito choncho canꞌ cheyaḻəꞌ goncho.
\v 8 Šə nocho cui gaquəlencho no parient c̱hecho len deꞌen chəsəꞌəyažɉeneꞌ, bito choncho canꞌ cheyaḻəꞌ gon chioꞌo chonḻilažəꞌəcho Cristənꞌ naꞌ napəchcho doḻəꞌ cle ca beṉəꞌ caꞌ cui zɉənombiaꞌ Cristənꞌ. Naꞌ peorəch šə cui choncho mantener noꞌol c̱hecho, xiꞌiṉcho, naꞌ x̱axnaꞌacho.
\p
\v 9 Quinga ṉezele noeꞌ noꞌolə gozeb caꞌ cueɉle par nic̱h leꞌe chdopə chžagle choꞌelaꞌole Cristənꞌ gonḻe ḻegaꞌaqueꞌ mantener. Šə baṉiteꞌe gyon iz o mazlə, naꞌ šə gwnitəꞌ tgüeɉzə beꞌen c̱hegaꞌaqueꞌ,
\v 10 naꞌ šə beṉəꞌ zan chəsəꞌəneꞌ bagwsoꞌonchgüeꞌ deꞌe güen ca deꞌen bosəꞌəsgoleꞌ no bidaoꞌ o chəsəꞌəgüialaogüeꞌ beṉəꞌ zitəꞌ ližgaꞌaqueꞌenəꞌ, o chsaꞌaclenchgüeꞌ yeziquəꞌəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ, o chsaꞌacleneꞌ beṉəꞌ chəsəꞌəyiꞌ chəsəꞌəzaqueꞌe, o šə bagwsoꞌonchgüeꞌ bitəꞌətezəchlə deꞌe güen nachənꞌ zɉəzaqueꞌe par cueɉgaꞌacleneꞌ.
\p
\v 11 Pero bito cueɉle noꞌolə gozeb caꞌ zɉənaquə beṉəꞌ xcuidəꞌ laꞌ gwžinḻɉa ža seꞌeneneꞌ yesəꞌəbeɉyic̱hɉeꞌ xšin Cristənꞌ naꞌ seꞌeneneꞌ yesyəꞌəšagneꞌe deꞌe yoblə.
\v 12 Naꞌ šə yesəꞌəbeɉyic̱hɉeꞌ xšin Cristənꞌ əsaꞌapeꞌ doḻəꞌ deꞌen cuich soꞌoneꞌ canꞌ gwsoꞌoneꞌ lyebe.
\v 13 Naꞌ noꞌolə gozebə xcuidəꞌ caꞌ bito gongaꞌacleneꞌ mantener. Deꞌen yesəꞌəlažeꞌe liž beṉəꞌ, soꞌolaogüeꞌ cui soꞌoneꞌ žin naꞌ əsaꞌaqueꞌ beṉəꞌ güilɉ gwxan dižəꞌ naꞌ yesəꞌəgüiazecheꞌ binꞌ chsoꞌon beṉəꞌ yoblə, naꞌ soꞌe dižəꞌ c̱he deꞌen cui cheyaḻəꞌ soꞌe dižəꞌ c̱hei.
\v 14 Chacdaꞌ güen šə noꞌolə gozebə xcuidəꞌ caꞌ yesyəꞌəšagneꞌe deꞌe yoblə naꞌ yesəꞌəzaneꞌ naꞌ yosyoꞌosgol xiꞌiṉgaꞌaqueꞌ, naꞌ yosəꞌəgüia yosoꞌoyeꞌ xmendadgaꞌaqueꞌ deꞌe de ližgaꞌaqueꞌ, par nic̱h notono beṉəꞌ contr c̱hecho gaquə əṉeꞌ de que deꞌe malənꞌ choncho.
\v 15 Baḻə noꞌolə gozebə xcuidəꞌ caꞌ bagosəꞌəbeɉyic̱hɉeꞌ Cristənꞌ par zɉəsəꞌənaogüeꞌ Satanasənꞌ deꞌen chnabiaꞌ deꞌe x̱ioꞌ caꞌ.
\p
\v 16 Notəꞌətezə beṉəꞌ chsoꞌonḻilažəꞌ Cristənꞌ šə lao famiḻy c̱hegaꞌaqueꞌenəꞌ nitəꞌ noꞌol caꞌ bagwsaꞌat benꞌ c̱hegaꞌaqueꞌ, cheyaḻəꞌ soꞌoneꞌ ḻegaꞌaqueꞌ mantener par nic̱h beṉəꞌ caꞌ chəsəꞌədopə chəsəꞌəžag chsoꞌelaogüeꞌe Jesocristənꞌ bito soꞌoneꞌ ḻegaꞌaqueꞌ mantener, sino soꞌoneꞌ mantener noꞌol caꞌ zɉənaquə doalɉe gozebə.
\p
\v 17 Beṉəꞌ caꞌ bagwleɉle par zɉənaqueꞌ beṉəꞌ golə beṉəꞌ blao lao leꞌe chonḻilažəꞌəle Cristənꞌ šə chsoꞌoneꞌ binḻo deꞌen ngoꞌo lao naꞌagaꞌaqueꞌ soꞌoneꞌ, zɉəzaqueꞌe par gaple ḻegaꞌaqueꞌ respet naꞌ par c̱hixɉwle c̱he gast c̱hegaꞌaqueꞌenəꞌ, naꞌ mazəchlə šə noeꞌ chesəꞌəyix̱ɉuiꞌe xtižəꞌ Diozənꞌ naꞌ chosoꞌosed chosoꞌoloꞌineꞌ bi zeɉenṉəꞌ.
\v 18 Zɉəzaqueꞌe par gonḻe caꞌ laꞌ nyoɉən ḻeꞌe Xtižəꞌ Diozənꞌ nan: “Bito əgwseyɉwle choꞌa goꞌoṉ caꞌ par nic̱h cui gaquə saꞌob žlac chosoꞌoleɉ chosoꞌošošɉəb trigonꞌ par chchoɉ xeinəꞌ.” Naꞌ ḻeczə nyoɉən nan: “To beṉəꞌ güen žin cheyaḻəꞌ siꞌe laxɉueꞌ.”
\p
\v 19 Bito gonoꞌ cas šə no gao xyanꞌ contr to beṉəꞌ golə beṉəꞌ blao lao leꞌe chonḻilažəꞌəle Cristənꞌ šə cui zo yeto o yec̱hopə testigw beṉəꞌ əsoꞌe dižəꞌ de que deꞌe malənꞌ chon beꞌenəꞌ.
\v 20 Pero šə deꞌe ḻi choneꞌ deꞌe malənꞌ, cheyaḻəꞌ tiḻoꞌoneꞌ lao yoguəꞌ beṉəꞌ caꞌ chəsəꞌədopə chəsəꞌəžag chsoꞌelaogüeꞌe Jesocristənꞌ par nic̱h yeziquəꞌəchlə beṉəꞌ caꞌ chsoꞌelaoꞌ Jesocristənꞌ yesəꞌəžebeꞌ soꞌoneꞌ deꞌe malənꞌ.
\v 21 Diozənꞌ naꞌ X̱ancho Jesocristənꞌ naꞌ angl beṉəꞌ caꞌ zɉənchoɉ par chsoꞌoneꞌ mendad c̱he Diozənꞌ zɉənaqueꞌ testigw c̱hiaꞌ deꞌen chonaꞌ mendad gonoꞌ canꞌ bagwniaꞌ leꞌ ḻeꞌe cart nga. Tozəczə canꞌ gonoꞌ len notəꞌətezə beṉəꞌ, ni toeꞌ cui gonoꞌ xench.
\v 22 Bito yob cueɉoꞌ notəꞌətezə beṉəꞌ par gaqueꞌ beṉəꞌ golə beṉəꞌ blao lao leꞌe chonḻilažəꞌəle Cristənꞌ, laꞌ šə əxopeꞌ goneꞌ deꞌe mal lenczoꞌ leꞌ gapoꞌ doḻəꞌ šə caꞌ. Ben par nic̱h gactezə gaquə yic̱hɉlaꞌaždaꞌogoꞌonəꞌ xiꞌilažəꞌ.
\p
\v 23 Deꞌen chacšendoꞌ telizə, bitoch yeꞌeɉoꞌ slezə nis, sino güeꞌeɉ latəꞌ bino par nic̱h gaquəlenən ḻiꞌonəꞌ.
\p
\v 24 Nacbiaxeɉə deꞌe mal deꞌen chsoꞌon baḻə beṉəꞌ antslə zeꞌe əžin ža əsaꞌaqueꞌ castigw c̱he xtoḻəꞌəgaꞌaqueꞌenəꞌ. Pero naꞌ yebaḻeꞌ bito yob gacbeꞌicho šə chsoꞌoneꞌ deꞌe mal.
\v 25 Naꞌ ḻeczə canꞌ naquən len beṉəꞌ chsoꞌon deꞌe güenṉəꞌ. Baḻeꞌ nacbiaxeɉə deꞌe güenṉəꞌ chsoꞌoneꞌ, naꞌ yebaḻeꞌ bito nacbiaꞌ pero gwžin ža laꞌalaon.
\c 6
\p
\v 1 Yoguəꞌ mos beṉəꞌ caꞌ chsoꞌonḻilažəꞌ Cristənꞌ cheyaḻəꞌ əsaꞌapeꞌ x̱angaꞌaqueꞌenəꞌ respet, par nic̱h x̱angaꞌaqueꞌ caꞌ bito yesəꞌəṉeꞌ contr Diozənꞌ benꞌ choꞌelaꞌocho naꞌ contr deꞌen chsed chloꞌicho.
\v 2 Naꞌ šə x̱angaꞌaqueꞌ caꞌ ḻeczə chsoꞌonḻilažeꞌe Cristənꞌ, mos caꞌ bito cheyaḻəꞌ soꞌoneꞌ xbab cui yosoꞌozenagueꞌ c̱hegaꞌaqueꞌ por ni c̱he deꞌen zɉənaqueꞌ txen chsoꞌonḻilažeꞌe Cristənꞌ. Mazəchlə cheyaḻəꞌ soꞌoneꞌ žinṉəꞌ do yic̱hɉ do lažəꞌəgaꞌaqueꞌ c̱hedəꞌ x̱angaꞌaqueꞌ beṉəꞌ caꞌ chsoꞌoneꞌ žin c̱hei chsoꞌonḻilažeꞌe Cristənꞌ naꞌ Diozənꞌ chaqueneꞌ c̱hegaꞌaqueꞌ. Gwdix̱ɉueꞌe deꞌe caꞌ babzeɉniꞌidaꞌ leꞌ naꞌ bsed bloꞌin.
\s1 Cheyaḻəꞌ socho content len deꞌe de c̱hecho laogüe deꞌen chonḻilažəꞌəcho Jesocristənꞌ
\p
\v 3 Nitəꞌ beṉəꞌ chosoꞌosed chosoꞌoloꞌineꞌ dižəꞌ deꞌen cui zdan lebe len deꞌen bagwniaꞌ leꞌ naꞌ len dižəꞌ güen c̱he X̱ancho Jesocristənꞌ naꞌ len bitəꞌətezəchlə deꞌen chzeɉniꞌicho beṉəꞌ par chsoꞌelaogüeꞌe Diozənꞌ.
\v 4 Beṉəꞌ caꞌ chosoꞌosed chosoꞌoloꞌineꞌ clelə chsoꞌon cuingaꞌaqueꞌ xen chsaꞌaqueneꞌ zɉəṉezeneꞌ len laꞌ bitobi chseꞌeɉniꞌineꞌ. Beṉəꞌ caꞌ chsoꞌon caꞌ con zɉəchiꞌ yic̱hɉgaꞌaqueꞌ chesəꞌədiḻə chesəꞌəšašleneꞌ beṉəꞌ yoblə, naꞌ chsoꞌe dižəꞌ c̱he no pont daoꞌ deꞌen chosoꞌosed chosoꞌoloꞌineꞌ deꞌen cui naquə deꞌe žialao. Deꞌen chesəꞌədiḻə chesəꞌəšašeꞌ c̱he bizə deꞌen nac caꞌ chonən par nic̱h chsaꞌacxiꞌi lɉuežɉgaꞌaqueꞌ, naꞌ chsaꞌacyožeꞌ beṉəꞌ, naꞌ chosoꞌožia chosoꞌoniteꞌe beṉəꞌ, naꞌ chsoꞌoneꞌ xbab mal c̱he beṉəꞌ,
\v 5 naꞌ chesəꞌəžaꞌa lɉuežɉgaꞌaqueꞌ toeꞌ yetoeꞌ. Beṉəꞌ caꞌ chsoꞌon caꞌ chosoꞌozenagueꞌ c̱he laꞌaždaꞌomalgaꞌaqueꞌenəꞌ naꞌ bito zɉənombiꞌe deꞌen naquə deꞌe ḻi. Malənꞌ chsoꞌoneꞌ chosoꞌosed chosoꞌoloꞌineꞌ c̱he Diozənꞌ parzə nic̱h soꞌoneꞌ gan. Bito gonoꞌ txen len beṉəꞌ caꞌ chsoꞌon caꞌ.
\v 6 Deꞌe ḻiczə deꞌe xen deꞌe zedeguaꞌan par chioꞌo šə choꞌelaꞌocho Diozənꞌ naꞌ šə zocho mbalaz len deꞌe daoꞌ de c̱hecho.
\v 7 Canꞌ na dicho nga: “Gaꞌalchonꞌ catəꞌən blaꞌacho yežlyo nga naꞌ gaꞌalchonꞌ yezaꞌacho.”
\v 8 Cheyaḻəꞌ socho mbalaz šə de deꞌen cheꞌeɉ deꞌen chaocho, naꞌ šə de xalaꞌancho, naꞌ ganꞌ chtascho.
\v 9 Beṉəꞌ caꞌ zɉəchiꞌ yic̱hɉgaꞌaqueꞌ gatəꞌ deꞌe zan šinḻazgaꞌaqueꞌ, deꞌe zan bien c̱hegaꞌaqueꞌ o mech xen c̱hegaꞌaqueꞌ chosoꞌozenagueꞌ c̱he deꞌe malənꞌ. Canꞌ chac chesəꞌəxopeꞌ lao naꞌ gwxiyeꞌen. Chosoꞌozenagueꞌ c̱he laꞌaždaꞌomalgaꞌaqueꞌenəꞌ par chsoꞌoneꞌ deꞌe zan deꞌe cui zɉəzaquəꞌ naꞌ deꞌen chsoꞌon mal len ḻegaꞌaqueꞌ. Beṉəꞌ caꞌ chsoꞌon caꞌ yesəꞌəbiayiꞌe naꞌ əsaꞌaqueꞌ castigw zeɉḻicaṉe.
\v 10 Laꞌaždaꞌomalchonꞌ gwzenaguən c̱he bitəꞌətezə deꞌe mal šə chebeichgüeicho mechənꞌ. Baḻə beṉəꞌ deꞌen chesyəꞌəbeichgüeineꞌ mechənꞌ bagosəꞌəbeɉyic̱hɉeꞌ dižəꞌ ḻi c̱he Diozənꞌ naꞌ deꞌe zan deꞌen chesəꞌəžaglaogüeꞌ yeḻəꞌ güen deꞌe mal c̱hegaꞌaqueꞌenəꞌ.
\s1 Cheyaḻəꞌ cuec yic̱hɉcho goncho xšin Diozənꞌ do yic̱hɉ do lažəꞌəcho
\p
\v 11 Pero naꞌ leꞌ nacoꞌ beṉəꞌ güen xšin Diozənꞌ, bito yebeidoꞌ deꞌe caꞌ zɉənac caꞌ, sino güeꞌelažoꞌo gonoꞌ deꞌen naquə güen lao Diozənꞌ, naꞌ šeɉəch gonchoꞌ canꞌ cheneꞌeneꞌenəꞌ naꞌ gonḻilažəꞌəchoꞌoneꞌ, naꞌ gaquəchdoꞌ c̱heꞌ naꞌ c̱he beṉac̱hənꞌ, naꞌ sotezə soꞌ gonḻilažoꞌo Diozənꞌ catəꞌ de deꞌe saquəꞌəziꞌo, naꞌ gaquəchoꞌ beṉəꞌ gax̱ɉwlažəꞌ.
\v 12 Ca to deportist choneꞌ do yic̱hɉ do lažeꞌe yoguəꞌ deꞌen cheyaḻəꞌ goneꞌ par nic̱h siꞌe premio, ḻeꞌegatezə caꞌ leꞌ gwlec yic̱hɉoꞌ ben xšin Diozənꞌ do yic̱hɉ do lažoꞌo laogüe deꞌen chonḻilažoꞌoneꞌ. Gwlec yic̱hɉoꞌ deꞌen žɉəyezoꞌ len Diozənꞌ zeɉḻicaṉe c̱hedəꞌ Diozənꞌ gwleɉeꞌ leꞌ par žɉəyezoꞌ len ḻeꞌ, naꞌ biꞌo dižəꞌ li lao beṉəꞌ zan de que chonḻilažoꞌoneꞌ.
\v 13 Caꞌaczənꞌ beꞌ Jesocristənꞌ dižəꞌ ḻi lao Ponsio Pilatənꞌ de que chonḻilažeꞌe Diozənꞌ. Naꞌ ṉaꞌa lao Jesocristənꞌ naꞌ lao Diozənꞌ benꞌ chnežɉo yeḻəꞌ mban c̱he beṉac̱hənꞌ, naꞌ bia chsaꞌaš, naꞌ biquəꞌəchlə deꞌe zɉəmban,
\v 14 chonaꞌ mendad gonoꞌ yoguəꞌ deꞌen ṉezdoꞌ cheneꞌe Diozənꞌ gonoꞌ. Benən xte ca yidə X̱ancho Jesocristənꞌ deꞌe yoblə par nic̱h notono gaquə əṉa de que cui chonoꞌ canꞌ cheneꞌe Diozənꞌ.
\v 15 Yidə Jesocristənꞌ deꞌe yoblə catəꞌ əžin ža əžin or əgwžia Diozənꞌ biaꞌ yideꞌ. Tozə Diozənꞌ chnabiꞌe doxenḻə, naꞌ ḻeꞌenəꞌ choꞌelaꞌocho. Ḻeꞌenəꞌ naqueꞌ Rei benꞌ chnabiaꞌ yoguəꞌ rei caꞌ yeḻaꞌ, naꞌ naqueꞌ X̱ancho benꞌ chnabiaꞌ yoguəꞌ beṉəꞌ gwnabiaꞌ caꞌ yeḻaꞌ.
\v 16 Tozə ḻeꞌ choṉeꞌ chioꞌo yeḻəꞌ mban zeɉḻicaṉe naꞌ tant yoꞌo yeḻəꞌ chey cheꞌeniꞌ c̱heꞌenəꞌ ganꞌ zoꞌenəꞌ xte notono nochlə gaquə bigueꞌe ganꞌ zoꞌenəꞌ. Notono beṉəꞌ lao yežlyo nga ṉeꞌe leꞌineꞌ ḻeꞌ naꞌ notono no gaquə leꞌineꞌ ḻeꞌ. Cheyaḻəꞌ güeꞌelaꞌochoneꞌ laꞌ ḻeꞌenəꞌ chnabiꞌe zeɉḻicaṉe. Naꞌ canꞌ gonšgaczcho.
\p
\v 17 Naꞌ ca naquə beṉəꞌ ca zɉənaqueꞌ beṉəꞌ gwniꞌa yežlyo nga, ben mendad bito əsaꞌaqueꞌ beṉəꞌ yaꞌalažəꞌ, naꞌ bito soꞌoneꞌ xbab ṉiteꞌe mbalaz por ni c̱he yeḻəꞌ gwniꞌa c̱hegaꞌaqueꞌenəꞌ c̱hedəꞌ ca naquə yeḻəꞌ gwniꞌanəꞌ deꞌe te c̱heinꞌ. Cheyaḻəꞌ ṉiteꞌe lez gon Diozənꞌ ca ṉiteꞌe mbalaz, laꞌ ḻeꞌenəꞌ choṉeꞌ chioꞌo yoguəꞌ deꞌen naquə deꞌe güen par nic̱h yebeichon.
\v 18 Beṉəꞌ gwniꞌa caꞌ cheyaḻəꞌ cueꞌ yic̱hɉgaꞌaqueꞌ par soꞌoneꞌ porzə deꞌe güen, soꞌoneꞌ deꞌen chebei Diozənꞌ, yesəꞌəc̱hineꞌ xmechgaꞌaqueꞌenəꞌ par əsaꞌacleneꞌ beṉəꞌ, naꞌ bito əsaꞌaqueꞌ beṉəꞌ rgüin.
\v 19 Šə bac̱h chsoꞌoneꞌ caꞌ, bachsoꞌoneꞌ canꞌ cheneꞌe Diozənꞌ gon chioꞌo de yeḻəꞌ mban zeɉḻicaṉe c̱hecho naꞌ gaquəlenən ḻegaꞌaqueꞌ tyemp deꞌen zezaꞌ.
\s1 Yeto deꞌen gožeꞌ Temtionꞌ
\p
\v 20 Temtio daoꞌ gwlecchgua yic̱hɉoꞌ yoguəꞌ deꞌen babzeɉniꞌi Diozənꞌ leꞌ. Bitobi cas gonoꞌ c̱he bitəꞌətezə deꞌen yesəꞌəna beṉəꞌ caꞌ chsoꞌonḻažəꞌ chəsəꞌəneꞌ de que xtižəꞌəgaꞌaqueꞌenəꞌ naquən deꞌe sinꞌ, c̱hedəꞌ bitobi zaquəꞌən lao Diozənꞌ.
\v 21 Beṉəꞌ caꞌ chesəꞌəna caꞌ bagosəꞌəbeɉyic̱hɉeꞌ dižəꞌ ḻi c̱he Diozənꞌ naꞌ bitoch chsoꞌonḻilažeꞌeneꞌ.
\p Ṉaꞌa ža gaquəlenšga Diozənꞌ leꞌ. Deꞌe naꞌazənꞌ chzoɉaꞌ.
\b
\m Pab