\id 2TI
\ide UTF8
\h 2 TIMOTEO
\toc1 2 Timoteo
\mt1 Cart Egwchope Deꞌen Bzoɉ San Pabənꞌ Par Temtionꞌ
\c 1
\s1 Pabənꞌ chzoɉeꞌ Temtionꞌ
\p
\v 1 Nadaꞌ Pab nacaꞌ apostol c̱he Jesocristənꞌ con canꞌ gwnalažəꞌ Diozənꞌ. Gwleɉeꞌ nadaꞌ par nacaꞌ apostol par nic̱h chyix̱ɉuiꞌa canꞌ beneꞌ lyebe de que gatəꞌ yeḻəꞌ mban zeɉḻicaṉe c̱he notəꞌətezə beṉəꞌ gonḻilažəꞌ Jesocristənꞌ.
\v 2 Naꞌ chzoɉaꞌ leꞌ Temtio daoꞌ, lenꞌ banonaꞌ ca xiꞌiṉaꞌ. Chonaꞌ orasyon chṉabaꞌ lao X̱acho Diozənꞌ naꞌ lao X̱ancho Jesocristənꞌ əsaꞌaclenšgueꞌ leꞌ naꞌ yesyəꞌəyašəꞌ yesyəꞌəžiꞌilažeꞌe leꞌ naꞌ soꞌonšgueꞌ ca so cuezoꞌ binḻo len xbab deꞌen yoꞌo ḻoꞌo yic̱hɉlaꞌaždaꞌogoꞌonəꞌ.
\s1 Cheyaḻəꞌ güeꞌecho dižəꞌ c̱he Jesocristənꞌ
\p
\v 3 Do yic̱hɉ do lažaꞌa choꞌelaoguaꞌa Diozənꞌ canꞌ gwsoꞌon deꞌe x̱axtaoguaꞌa caꞌ, naꞌ ṉezdaꞌ ḻoꞌo yic̱hɉlaꞌaždaꞌoguaꞌan de que chonaꞌ canꞌ chazlažəꞌ Diozənꞌ. Naꞌ yoguəꞌ laste catəꞌ chonaꞌ orasyonṉəꞌ choꞌa yeḻəꞌ chox̱cwlen c̱heꞌ par leꞌ.
\v 4 Chɉzaꞌalažaꞌa canꞌ gwchežoꞌ catəꞌ bezaꞌa ganꞌ zoꞌ, teža naꞌ šeꞌelə chzelažəꞌəchguaꞌ leꞌi lɉuežɉcho par nic̱h yebeichgüeidaꞌ ḻoꞌo yic̱hɉlaꞌaždaoguaꞌan.
\v 5 Naꞌ chonaꞌ xbab canꞌ chonḻilažoꞌo Diozənꞌ do yic̱hɉ do lažoꞌo canꞌ chsoꞌon xnaꞌagoloꞌ Loida naꞌ xnaꞌo Eunise bedote, naꞌ zoaꞌ segor de que chonḻilažoꞌoneꞌ canꞌ chsoꞌon ḻegaꞌaqueꞌ.
\p
\v 6 Deꞌe naꞌanəꞌ chṉeyoidaꞌ leꞌ, ben xte ga zelao saquəꞌədoꞌ par gonoꞌ ca deꞌen ben Diozənꞌ lao naꞌo gonoꞌ catəꞌən bx̱oa naꞌatoꞌonəꞌ yic̱hɉoꞌonəꞌ par bloꞌetoꞌ de que Diozənꞌ gwleɉeꞌ leꞌ par gonoꞌ xšineꞌenəꞌ.
\v 7 Diozənꞌ babeṉeꞌ chioꞌo Spirit c̱heꞌenəꞌ zon ḻoꞌo yic̱hɉlaꞌaždaꞌochonꞌ. Deꞌe naꞌanəꞌ bito cheyaḻəꞌ žebcho. Naꞌ deꞌen zo Spirit c̱heꞌenəꞌ len chioꞌo, ṉezecho chaclen Diozənꞌ chioꞌo len yeḻəꞌ guac c̱heꞌenəꞌ naꞌ chactezə chaquecho c̱he lɉuežɉcho naꞌ chnabiaꞌ cuincho par choncho canꞌ chazlažəꞌ Diozənꞌ.
\v 8 Deꞌe naꞌanəꞌ bito yetoꞌidoꞌ goꞌo xtižəꞌ X̱ancho Jesocristənꞌ naꞌ nic yetoꞌidoꞌ c̱hiaꞌ deꞌen nacaꞌ pres laogüe deꞌen chyix̱ɉuiꞌa xtižeꞌenəꞌ. Cheyaḻəꞌ coꞌo gwc̱heɉlažəꞌəcho əžaglaocho ca deꞌen gac c̱hecho laogüe deꞌen chyix̱ɉueꞌecho dižəꞌ güen dižəꞌ cobə c̱he Jesocristənꞌ, naꞌ Diozənꞌ gaquəleneꞌ chioꞌo len yeḻəꞌ guac c̱heꞌenəꞌ catəꞌən əžaglaocho.
\v 9 Catəꞌ cuiṉəꞌ x̱e yežlyonꞌ Diozənꞌ bsiꞌe xṉeze gwleɉeꞌ chioꞌo par naccho lažəꞌ neꞌenəꞌ. Naꞌ catəꞌ gwzolao benḻilažəꞌəcho Jesocristənꞌ Diozənꞌ bebeɉeꞌ chioꞌo xniꞌa deꞌe malənꞌ. Naꞌ deꞌen gwleɉeꞌ chioꞌo par naccho lažəꞌ neꞌenəꞌ, bito beneꞌ caꞌ por ni c̱he bilə deꞌe güenṉəꞌ bencho. Gwleɉeꞌ chioꞌo c̱hedəꞌ nžiꞌilažeꞌe chioꞌo.
\v 10 Diozənꞌ babloꞌineꞌ chioꞌo canꞌ nžiꞌilažeꞌe chioꞌo deꞌen bseḻeꞌe Jesocristənꞌ benꞌ bebeɉ chioꞌo xniꞌa deꞌe malənꞌ. Jesocrist naꞌanəꞌ beneꞌ par nic̱h əžin ža cuezə yeḻəꞌ gotənꞌ. Naꞌ deꞌen cheɉḻeꞌecho dižəꞌ güen dižəꞌ cobə c̱heꞌenəꞌ ṉezecho de que deczə yeḻəꞌ mban zeɉḻicaṉe c̱hecho.
\p
\v 11 Diozənꞌ gwleɉeꞌ nadaꞌ par nic̱h əchyix̱ɉuiꞌa dižəꞌ güen dižəꞌ cobə c̱he Jesocristənꞌ naꞌ par nic̱h nacaꞌ apostol c̱heꞌenəꞌ naꞌ chsed chloꞌidaꞌ xtižeꞌenəꞌ beṉəꞌ caꞌ cui zɉənaquə beṉəꞌ Izrael.
\v 12 Naꞌ deꞌen chsed chloꞌidaꞌ xtižeꞌenəꞌ deꞌe naꞌanəꞌ chžaglaoguaꞌ nga. Pero bito chetoꞌidaꞌ c̱he deꞌen chžaglaoguaꞌ diaꞌ ližya nga, c̱hedəꞌ nombiꞌa Diozənꞌ benꞌ chonḻilažaꞌa. Baben cuinaꞌ lao neꞌenəꞌ naꞌ ṉezdaꞌ de que napeꞌ yeḻəꞌ guac par goneꞌ ca sotezə soaꞌ gonḻilažaꞌaneꞌ xte catəꞌəch əžin ža yidə Jesocristənꞌ deꞌe yoblə.
\p
\v 13 Gwnaošga yoguəꞌ deꞌen babsed babloꞌidaꞌ leꞌ, laꞌ ḻenṉəꞌ naquən güen, naꞌ bito cueɉyic̱hɉoꞌ deꞌen chonḻilažoꞌo Jesocristənꞌ naꞌ deꞌen chacdoꞌ c̱heꞌ naꞌ c̱he beṉac̱hənꞌ.
\v 14 Beꞌ latɉə gaquəlen Spirit c̱he Diozənꞌ leꞌ par nic̱h sotezə soꞌ əgwsed əgwloꞌidoꞌ dižəꞌ ḻi deꞌen babzeɉniꞌidaꞌ leꞌ, c̱hedəꞌ Spirit nanꞌ zon ḻoꞌo yic̱hɉlaꞌaždaꞌochonꞌ.
\p
\v 15 Ṉezdoꞌ de que Figelonꞌ naꞌ Ermogenesənꞌ naꞌ yezan beṉəꞌ lɉuežɉcho caꞌ nitəꞌ Asianꞌ bagosəꞌəbeɉyic̱hɉeꞌ nadaꞌ.
\v 16 Pero naꞌ Onesiforonꞌ bito betoꞌineꞌ c̱hiaꞌ deꞌen diaꞌ ližya nga, sino btipeꞌ lažaꞌa zan las. X̱ancho Diozənꞌ gwloeꞌešgueꞌ canꞌ nžiꞌilažeꞌe ḻeꞌ naꞌ famiḻy c̱heꞌenəꞌ.
\v 17 Catəꞌ bideꞌ Roma nga beneꞌ byen beyilɉeꞌ nadaꞌ naꞌ beželeneꞌ nadaꞌ diaꞌ ližya nga.
\v 18 Naꞌ ṉezdoꞌ canꞌ goclenchgüeꞌ nadaꞌ Efesonꞌ. Chṉabaꞌ lao X̱ancho Diozənꞌ əgwloꞌineꞌ ḻeꞌ canꞌ nžiꞌilažeꞌeneꞌ catəꞌ əžin ža c̱hoglao X̱ancho Diozənꞌ c̱he yoguəꞌ beṉəꞌ šə zɉənapeꞌ doḻəꞌ o šə cui zɉənapeꞌ doḻəꞌ.
\c 2
\s1 Cheyaḻəꞌ coꞌo gwc̱heɉlažəꞌəcho len deꞌen əžaglaocho lao goncho xšin Jesocristənꞌ
\p
\v 1 Ṉaꞌa xiꞌiṉdaoguaꞌa, deꞌen chaclen Jesocristənꞌ leꞌ benc̱hec̱hlažoꞌo ben xšineꞌenəꞌ.
\v 2 Naꞌ yoguəꞌ deꞌen babsed babloꞌidaꞌ leꞌ lao beṉəꞌ lɉuežɉcho zan caꞌ, bsed bloꞌin beṉəꞌ caꞌ nitəꞌətezə niteꞌe chsoꞌoneꞌ complir canꞌ cheyaḻəꞌ soꞌoneꞌ, beṉəꞌ gaquə yosoꞌosed yosoꞌoloꞌineꞌen beṉəꞌ yoblə.
\p
\v 3 Bguoꞌo bc̱heɉ len bitəꞌətezə deꞌen əžaglaogoꞌ lao gonoꞌ xšin Jesocristənꞌ par nic̱h caꞌ saquəꞌəlebədoꞌ ca to soḻdad gual.
\v 4 Ṉezecho de que notono beṉəꞌ gaquə goneꞌ xšineꞌ žlac zdeꞌ yeḻəꞌ soḻdadənꞌ, c̱hedəꞌ cheyaḻəꞌ goneꞌ con canꞌ na benꞌ chnabiaꞌ ḻeꞌ.
\v 5 Naꞌ ṉezecho de que benꞌ naquə deportist bito gaquə siꞌe premio šə bito chzenagueꞌ c̱he yoguəꞌ reglas caꞌ catəꞌən chyitɉeꞌ.
\v 6 Naꞌ ḻeczə ṉezecho de que benꞌ chelaḻe chon žin yix̱əꞌənəꞌ chziꞌe part nech c̱he cwsešənꞌ par cuineꞌ antslə zeꞌe chnežɉueꞌ c̱he beṉəꞌ yoblə.
\v 7 Ben xbab c̱he deꞌen chzeɉniꞌidaꞌ leꞌ, naꞌ X̱ancho Jesocristənꞌ gaquəleneꞌ par nic̱h šeɉniꞌidoꞌ canꞌ cheyaḻəꞌ gonoꞌ xšineꞌenəꞌ.
\p
\v 8 Naꞌ ben xbab c̱he Jesocristənꞌ benꞌ golɉə yežlyo nga lao dia c̱he deꞌe Rei Dabinꞌ, naꞌ bebaneꞌ ladɉo beṉəꞌ guat caꞌ canꞌ chyix̱ɉuiꞌa dižəꞌ güen dižəꞌ cobə c̱heꞌenəꞌ.
\v 9 Naꞌ deꞌen chyix̱ɉuiꞌa dižəꞌ güen dižəꞌ cobə c̱heꞌenəꞌ deꞌe naꞌanəꞌ chžaglaoguaꞌ naꞌ diaꞌ ližya nga ca to beṉəꞌ mal juisy. Pero ḻaꞌaṉəꞌəczə nadaꞌ diaꞌ ližya nga, bitobi gaquə soꞌon beṉəꞌ par nic̱h cui gasəꞌ lalɉə xtižəꞌ Diozənꞌ doxenḻə.
\v 10 Ḻaꞌaṉəꞌəczə chžaglaoguaꞌ nga zotezə zoaꞌ chyix̱ɉuiꞌa xtižəꞌ Diozənꞌ. Chyix̱ɉuiꞌan par nic̱h yeziquəꞌəchlə beṉəꞌ bagwleɉ Diozənꞌ par əsaꞌaqueꞌ xiꞌiṉeꞌ soꞌonḻilažeꞌe Jesocristənꞌ. Naꞌ šə soꞌonḻilažeꞌeneꞌ, yebeɉeꞌ ḻegaꞌaqueꞌ xniꞌa deꞌe malənꞌ naꞌ gwnežɉueꞌ ḻegaꞌaqueꞌ yeḻəꞌ mban zeɉḻicaṉe.
\v 11 Dižəꞌ quinga zɉənaquən deꞌe ḻi:
\q1 Šə ngodəꞌəcho txen len Cristənꞌ ca deꞌen gwsoꞌot beṉəꞌ ḻeꞌ,
\q1 ḻeczə ngodəꞌəcho txen len ḻeꞌ ca deꞌen bebaneꞌ ladɉo beṉəꞌ guat caꞌ par nic̱h žɉəyezocho len ḻeꞌ.
\q1
\v 12 Šə chioꞌo chonḻilažəꞌəcho Cristənꞌ chgoꞌo chc̱heɉlažəꞌəcho catəꞌən chžaglaocho,
\q1 ḻeczə ṉabiꞌacho txen len ḻeꞌ.
\q1 Šə cueɉyic̱hɉcho Cristənꞌ ḻeczə caꞌ ḻeꞌ cueɉyic̱hɉeꞌ chioꞌo.
\q1
\v 13 Naꞌ ḻaꞌaṉəꞌəczə šə chioꞌo cui goncho complir canꞌ ṉacho goncho, biaꞌaczə zo ḻeꞌ goneꞌ con canꞌ neꞌenəꞌ,
\q1 laꞌ naquəczeꞌ beṉəꞌ chon complir len bitəꞌətezə deꞌen neꞌ.
\s1 Canꞌ goncho xšin Jesocristənꞌ binḻo
\p
\v 14 Ben par nic̱h beṉəꞌ lɉuežɉcho caꞌ chsoꞌonḻilažəꞌ Cristənꞌ žɉəsyəꞌəzalažeꞌe deꞌe caꞌ bagwniaꞌ, naꞌ ben mendad cui yesəꞌədiḻə yesəꞌəšašeꞌ entr lɉuežɉgaꞌaqueꞌ por ni c̱he bizə dižəꞌ deꞌe cui zeɉe. X̱ancho Diozənꞌ naqueꞌ testigw canꞌ chsoꞌoneꞌ. Naꞌ šə yesəꞌədiḻə yesəꞌəšašeꞌ beṉəꞌ caꞌ chosoꞌozenag c̱hegaꞌaqueꞌ cui seꞌeɉḻeꞌe xtižəꞌ Diozənꞌ.
\v 15 Bentezə ben xte ga zelao saquəꞌədoꞌ par nic̱h yebei Diozənꞌ canꞌ chonoꞌonəꞌ naꞌ par nic̱h bito gaquədoꞌ ztoꞌ deꞌen chonoꞌ xšineꞌenəꞌ. Naꞌ əgwsed əgwloꞌidoꞌ cayaṉəꞌən zeɉe xtižəꞌ Diozənꞌ.
\v 16 Bitobi cas gonoꞌ c̱he bitəꞌətezə dižəꞌ deꞌen yesəꞌəna beṉəꞌ deꞌen cui naquə deꞌe zaqueꞌe lao Diozənꞌ, c̱hedəꞌ dižəꞌ caꞌ chx̱oayaguən beṉəꞌ par nic̱h chyaləꞌəch chsoꞌoncheꞌ deꞌe malənꞌ.
\v 17 Naꞌ xtižəꞌ beṉəꞌ caꞌ chosoꞌosed chosoꞌoloꞌi deꞌe caꞌ zɉənac caꞌ chonən par nic̱h beṉəꞌ caꞌ chosoꞌozenag c̱hegaꞌaqueꞌ chəsəꞌəbeɉyic̱hɉeꞌ deꞌen chsoꞌonḻilažeꞌe Cristənꞌ, ca chen deꞌen naquə mal chyitɉən doxen lao cuerp c̱hechonꞌ naꞌ chžiayiꞌin ḻen. Imeneonꞌ naꞌ Filetonꞌ chosoꞌosed chosoꞌoloꞌineꞌ dižəꞌ güenḻažəꞌ deꞌen nac caꞌ.
\v 18 Ḻegaꞌaqueꞌ bagosəꞌəbeɉyic̱hɉeꞌ deꞌen naquə deꞌe ḻi c̱hedəꞌ chosoꞌosed chosoꞌoloꞌineꞌ de que chioꞌo chonḻilažəꞌəcho Cristənꞌ babebancho ladɉo beṉəꞌ guat caꞌ ca deꞌen bocobeꞌ yic̱hɉlaꞌaždaꞌochonꞌ naꞌ cuat əžin ža yoḻis yosbaneꞌ chioꞌo len cuerp c̱hechonꞌ. Naꞌ deꞌen chosoꞌosed chosoꞌoloꞌineꞌ caꞌ, baḻə beṉəꞌ chsoꞌonḻilažəꞌ Cristənꞌ chsaꞌacžeɉlažeꞌe šə xtižəꞌ Cristənꞌ naquən deꞌe ḻi.
\v 19 Chioꞌo chonḻilažəꞌəcho Cristənꞌ gwxaquəꞌəlebecho ca to lan yoꞌo deꞌen naquə deꞌe gual. Naꞌ nyoɉ Xtižeꞌenəꞌ c̱hecho nan: “Diozənꞌ ṉezeneꞌ nonꞌ zɉənaquə xiꞌiṉeꞌ.” Naꞌ ḻeczə nyoɉən nan: “To to beṉəꞌ chesəꞌəneꞌ de que chsoꞌonḻilažeꞌe X̱ancho Diozənꞌ cheyaḻəꞌ yesəꞌəbeɉyic̱hɉeꞌ cuich soꞌoneꞌ deꞌe malənꞌ.”
\p
\v 20 Ṉezecho de que ḻoꞌo liž beṉəꞌ gwniꞌa caꞌ zɉəde no yesəꞌ xguaguə naꞌ no šaꞌ de or naꞌ de pḻat, naꞌ ḻeczə zɉəde no xguaguə naꞌ no šaꞌ de yag naꞌ de gonꞌ. Baḻən chsoꞌonən žin par len deꞌen zɉənaquə xoche naꞌ yebaḻən chsoꞌonən žin par len deꞌen zɉənaquə deꞌe zban.
\v 21 Notəꞌətezcho šə bito naocho deꞌen chosoꞌosed chosoꞌoloꞌi beṉəꞌ güenḻažəꞌ caꞌ gwxaquəꞌəlebecho ca to yesəꞌ o to xguaguə deꞌe chon žin len deꞌen naquə xoche c̱hedəꞌ guaquə goncho xšin Cristənꞌ deꞌen zaquəꞌəchgua. Laꞌ šə cui naocho deꞌen chosoꞌosed chosoꞌoloꞌi beṉəꞌ güenḻažəꞌənəꞌ nachənꞌ guaquə gon cuincho lažəꞌ naꞌ Diozənꞌ naꞌ socho probnid par goncho bitəꞌətezə deꞌe güen deꞌen cheneꞌe Cristənꞌ goncho.
\p
\v 22 De deꞌen cheneꞌe laꞌaždaꞌomalchonꞌ goncho žlac ṉeꞌe naccho beṉəꞌ xcuidəꞌ, pero leꞌ bito gonoꞌ bitəꞌətezə deꞌe caꞌ. Beꞌelažəꞌ ben deꞌen naquə güen lao Cristənꞌ, naꞌ gwzotezə gwzo benḻilažəꞌ ḻeꞌ, naꞌ goque c̱he lɉuežɉ beṉac̱hoꞌ, naꞌ ḻeczə gwzo gwlezə binḻo len ḻegaꞌaqueꞌ. Beꞌelažəꞌ ben yoguəꞌ deꞌe caꞌ canꞌ chsoꞌon yeziquəꞌəchlə beṉəꞌ chsoꞌonḻilažəꞌ X̱ancho Cristənꞌ beṉəꞌ caꞌ zɉənaquə yic̱hɉlaꞌaždaꞌogaꞌaqueꞌenəꞌ xiꞌilažəꞌ.
\v 23 Bito əgwzenagoꞌ c̱he beṉəꞌ caꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ naꞌ chesəꞌədiḻə chəsəꞌəšašeꞌ por ni c̱he bizə dižəꞌ, c̱hedəꞌ šə əgwzenagcho c̱he dižəꞌ caꞌ zɉənac caꞌ gonən par nic̱h gaquəyožcho beṉəꞌ.
\v 24 Chioꞌo naccho beṉəꞌ güen xšin X̱ancho Cristənꞌ bito cheyaḻəꞌ tiḻə gwšašlencho beṉəꞌ. Cheyaḻəꞌ goncho güen len yoguəꞌ beṉəꞌ, naꞌ cheyaḻəꞌ ṉezecho nac əgwsed əgwloꞌicho beṉəꞌ xtižəꞌ Diozənꞌ binḻo, naꞌ cheyaḻəꞌ coꞌo gwc̱heɉlažəꞌəcho bitəꞌətezə deꞌen chsoꞌone beṉəꞌ chioꞌo.
\v 25 Cheyaḻəꞌ gaccho beṉəꞌ gax̱ɉwlažəꞌ catəꞌ güeꞌecho consejw beṉəꞌ caꞌ chsoꞌonczə yic̱hɉlaogaꞌaqueꞌ cui chseꞌeɉḻeꞌe dižəꞌ ḻi c̱he Cristənꞌ. Šə canꞌ goncho, de repent gaquəlen Diozənꞌ ḻegaꞌaqueꞌ par nic̱h yesyəꞌədiṉɉeneꞌ xtoḻəꞌəgaꞌaqueꞌenəꞌ naꞌ saꞌacbeꞌicheneꞌ deꞌen naquə deꞌe ḻi.
\v 26 Naꞌ šə yesyəꞌədiṉɉeneꞌ xtoḻəꞌəgaꞌaqueꞌenəꞌ yesyəꞌəchoɉeꞌ xniꞌa gwxiyeꞌen ganꞌ niteꞌe ṉaꞌa chsoꞌoneꞌ con canꞌ chazlažəꞌənṉəꞌ.
\c 3
\s1 Naquənꞌ soꞌon beṉəꞌ catəꞌ bazon yidə X̱ancho Cristənꞌ deꞌe yoblə
\p
\v 1 Cheyaḻəꞌ šeɉniꞌidoꞌ de que catəꞌ bazon yidə X̱ancho Cristənꞌ deꞌe yoblə, ḻechguaḻe deꞌe zan deꞌe žaglao chioꞌo chonḻilažəꞌəchoneꞌ.
\v 2 Ca tyemp naꞌ ṉitəꞌəchgua beṉəꞌ yesyəꞌəbeineꞌ soꞌonchgüeꞌ con canꞌ na laꞌaždaꞌomalgaꞌaqueꞌenəꞌ, naꞌ yesyəꞌəbeichgüeineꞌ mech, naꞌ soꞌelaoꞌ cuingaꞌaqueꞌ, naꞌ saꞌalažeꞌe. Yosoꞌožia yosoꞌoniteꞌe beṉəꞌ naꞌ Diozənꞌ, naꞌ bito yosoꞌozenagueꞌ c̱he x̱axnaꞌagaꞌaqueꞌ. Bito soꞌe yeḻəꞌ chox̱cwlen c̱he Diozənꞌ naꞌ bito saꞌapeꞌeneꞌ respet.
\v 3 Naꞌ xte bito güeꞌen latɉə əsaꞌaqueneꞌ c̱he beṉəꞌ yoblə, əsaꞌaqueꞌ beṉəꞌ ggoꞌolažəꞌ, əsaꞌalɉlažeꞌe par yosoꞌox̱ieꞌ gwdiḻə, bito gaquə yesəꞌəbezeꞌ cuich soꞌoneꞌ bitəꞌətezə deꞌe malənꞌ deꞌen nan soꞌoneꞌ. Soꞌoneꞌ znia len lɉuežɉgaꞌaqueꞌ canꞌ chsoꞌon bia yix̱əꞌ, naꞌ yesəꞌəgueꞌineꞌ bitəꞌətezə deꞌen naquə deꞌe güen.
\v 4 Yesəꞌəx̱oayagueꞌ beṉəꞌ parzə nic̱h yosoꞌodieꞌ ḻegaꞌaqueꞌ lao naꞌ beṉəꞌ contr c̱hegaꞌaqueꞌ caꞌ, naꞌ yesəꞌəṉeꞌ dižəꞌ loc dižəꞌ lžeɉ naꞌ soꞌontezeꞌ deꞌe malənꞌ sin cui bi xbab soꞌoneꞌ. Soꞌon cuingaꞌaqueꞌ xen, naꞌ yesyəꞌəbeineꞌ soꞌoneꞌ ḻegr lguaꞌa əsaꞌaqueneꞌ c̱he Diozənꞌ.
\v 5 Naꞌ soꞌoneꞌ ca əsaꞌaque beṉəꞌ yeziquəꞌəchlə de que chsoꞌelaogüeꞌe Diozənꞌ, pero bito soꞌe latɉə yocobə Diozənꞌ yic̱hɉlaꞌaždaꞌogaꞌaqueꞌenəꞌ.
\p Bito gonoꞌ txen len beṉəꞌ caꞌ soꞌon deꞌe caꞌ bagwniaꞌ.
\v 6 Soꞌoneꞌ canꞌ chsoꞌon baḻə beṉəꞌ caꞌ chɉaꞌac liž beṉəꞌ par chosoꞌosed chosoꞌoloꞌineꞌ dižəꞌ güenḻažəꞌ. Naꞌ chosoꞌox̱oayagueꞌ noꞌol caꞌ chsaꞌac šayec̱hə šayen len xtižəꞌ Diozənꞌ, noꞌol caꞌ nyan xtoḻəꞌəgaꞌaqueꞌenəꞌ. Chosoꞌozenagtezə noꞌol caꞌ c̱he bitəꞌətezə deꞌen na laꞌaždaꞌomalgaꞌaqueꞌenəꞌ soꞌoneꞌ.
\v 7 Deꞌe naꞌanəꞌ chosoꞌozenagueꞌ c̱he notəꞌətezə beṉəꞌ gox̱oayag, bitəꞌətezə deꞌen chosoꞌozeɉniꞌineꞌ ḻegaꞌaqueꞌ, naꞌ bito chžin ža əseꞌeɉniꞌineꞌ deꞌen naquə deꞌe ḻi.
\v 8 Canꞌ gwsoꞌon deꞌe Janes naꞌ deꞌe Jambres contr deꞌe Moisezənꞌ catəꞌən cui gwseꞌeneneꞌ yosoꞌozenagueꞌ c̱he dižəꞌ ḻi deꞌen beꞌelen deꞌe Moisezənꞌ ḻegaꞌaqueꞌ, ḻeczə canꞌ chsoꞌon beṉəꞌ gox̱oayag quinga contr Diozənꞌ por ni c̱he deꞌen cui chosoꞌozenagueꞌ c̱he dižəꞌ ḻi c̱heꞌenəꞌ. Zɉənc̱hoḻ yic̱hɉlaꞌazdaꞌogaꞌaqueꞌenəꞌ yeḻəꞌ güen deꞌe mal c̱hegaꞌaqueꞌenəꞌ naꞌ bito chsoꞌonḻilažeꞌe Diozənꞌ par yebeineꞌ ḻegaꞌaqueꞌ.
\v 9 Pero caguə yosəꞌəx̱oayagueꞌ beṉəꞌ sša, laꞌ əžin ža catəꞌ yoguəꞌ beṉəꞌ saꞌacbeꞌineꞌ de que zɉənc̱hoḻ yic̱hɉlaꞌaždaꞌogaꞌaqueꞌ naꞌanəꞌ canꞌ gwsaꞌacbeꞌi beṉəꞌ de que gosəꞌəc̱hoḻ yic̱hɉlaꞌaždaoꞌ deꞌe Janesənꞌ naꞌ deꞌe Jambresənꞌ catəꞌən gwsoꞌoneꞌ contr deꞌe Moisezənꞌ.
\s1 Consejw ḻeꞌezelaogüe deꞌen bzoɉ Pabənꞌ par Temtionꞌ
\p
\v 10 Naꞌ leꞌ Temtio, baṉezdoꞌ binḻo yoguəꞌ deꞌen chsed chloꞌidaꞌ c̱he Diozənꞌ, naꞌ yoguəꞌ canꞌ chonaꞌ. Ṉezdoꞌ canꞌ chiꞌ yic̱hɉaꞌ par nic̱h gonaꞌ porzə deꞌen chazlažəꞌ Diozənꞌ. Ṉezdoꞌ canꞌ zotezə zoaꞌ chonḻilažaꞌa Diozənꞌ naꞌ canꞌ chgoꞌo chc̱heɉlažaꞌa len deꞌen chyiꞌ chzacaꞌa. Ṉezdoꞌ canꞌ zotezə zoaꞌ chacdaꞌ c̱he Diozənꞌ naꞌ c̱he beṉac̱hənꞌ, naꞌ canꞌ bito chbeɉəyic̱hɉaꞌ xšin Diozənꞌ catəꞌ chosoꞌoc̱hiꞌ chosoꞌosaquəꞌ beṉəꞌ nadaꞌ.
\v 11 Ṉezdoꞌ canꞌ bosoꞌoc̱hiꞌ bosoꞌosaqueꞌe nadaꞌ catəꞌən gwzocho Antioquianꞌ naꞌ Iconionꞌ naꞌ Listranꞌ, naꞌ ṉezdoꞌ bichlə deꞌen babžaglaoguaꞌ. Naꞌ ḻeczə ṉezdoꞌ canꞌ bosla X̱ancho Cristənꞌ nadaꞌ lao yoguəꞌ deꞌe caꞌ bžaglaoguaꞌ.
\v 12 Deꞌe ḻi nitəꞌ beṉəꞌ yosoꞌoc̱hiꞌ yosoꞌosaqueꞌe notəꞌətezcho ngodəꞌəcho txen len Cristoꞌ Jesoꞌosənꞌ naꞌ chiꞌ yic̱hɉcho chzenagcho c̱he Diozənꞌ.
\v 13 Naꞌ ca naquə beṉəꞌ mal caꞌ naꞌ beṉəꞌ gox̱oayag caꞌ zɉaꞌaquəcheꞌ soꞌoncheꞌ deꞌe malənꞌ. Yosoꞌox̱oayagueꞌ beṉəꞌ yoblə naꞌ seꞌeɉḻeꞌe c̱he dižəꞌ güenḻažəꞌ deꞌen soeꞌ beṉəꞌ.
\p
\v 14 Pero ca nacoꞌ leꞌ Temtio daoꞌ, gwzotezə gwzo bzenag c̱he yoguəꞌ deꞌen bacheɉniꞌidoꞌ c̱he Cristo Jesoꞌosənꞌ naꞌ deꞌen bacheɉḻiꞌo c̱hei, laꞌ ṉezczədoꞌ noquəꞌətoꞌon bzeɉniꞌitoꞌon leꞌ.
\v 15 Dezd xcuidəꞌətioꞌonəꞌ nombiꞌo Xtižəꞌ Diozənꞌ deꞌen nyoɉən. Naꞌ Xtižəꞌ Diozənꞌ deꞌen nyoɉən chzeɉniꞌin chioꞌo de que cheyaḻəꞌ gonḻilažəꞌəcho Cristo Jesoꞌosənꞌ par nic̱h Diozənꞌ yebeɉeꞌ chioꞌo xniꞌa deꞌe malənꞌ.
\v 16 Cuin Diozənꞌ bzeɉniꞌineꞌ beṉəꞌ caꞌ bosoꞌozoɉ Xtižeꞌenəꞌ xbab c̱heꞌenəꞌ par nic̱h caꞌ bosoꞌozoɉeꞌen. Deꞌe naꞌanəꞌ doxen Xtižəꞌ Diozənꞌ deꞌen nyoɉən zaquəꞌəchguan par chzeɉniꞌin chioꞌo c̱he Diozənꞌ, naꞌ par chdiḻən chioꞌo catəꞌən choncho deꞌe malənꞌ, naꞌ par choṉən chioꞌo consejw, naꞌ par chzeɉniꞌin chioꞌo naquənꞌ goncho deꞌen naquə güen lao Diozənꞌ.
\v 17 Xtižəꞌ Diozənꞌ deꞌen nyoɉən chaclenən chioꞌo chzenagcho c̱he Diozənꞌ par nic̱h caꞌ chṉezecho yoguəꞌəḻoḻ deꞌen cheyaḻəꞌ əṉezecho par sotezə socho goncho yoguəꞌ cḻaste deꞌen naquə güenṉəꞌ.
\c 4
\p
\v 1 Yidəꞌ X̱ancho Jesocristənꞌ deꞌe yoblə dec̱hoglaogüeꞌen naquənꞌ gaquə c̱he to to beṉac̱h beṉəꞌ ṉeꞌe zɉəmban naꞌ beṉəꞌ bagwsaꞌat, naꞌ techlə ṉabiꞌe. Naꞌ Temtio daoꞌ, Jesocristənꞌ naꞌ X̱acho Diozənꞌ zɉənaqueꞌ testigw c̱hiaꞌ de que chonaꞌ mendad
\v 2 sotezə soꞌ c̱hix̱ɉuiꞌo xtižəꞌ Diozənꞌ. Gwdix̱ɉueꞌen catəꞌ nḻatɉoꞌ naꞌ catəꞌ chacdoꞌ cui nḻatɉoꞌ. Beꞌelen beṉəꞌ dižəꞌ par nic̱h yesəꞌəṉezeneꞌ de que deꞌe malənꞌ chsoꞌoneꞌ, gwdiḻəgaꞌaqueꞌ c̱he deꞌe malənꞌ chsoꞌoneꞌ par nic̱h yesyəꞌədiṉɉeneꞌen, beꞌegaꞌaqueꞌ consejw, naꞌ gwzotezə gwzo bzeɉniꞌigaꞌaqueneꞌ sin cui žɉəx̱aquəꞌəlažoꞌo.
\v 3 Gwžin ža catəꞌ cuich əseꞌene beṉac̱hənꞌ yosoꞌozenagueꞌ c̱he no əgwzeɉniꞌi ḻegaꞌaqueꞌ deꞌen naquə deꞌe güen. Deꞌe naꞌanəꞌ yosoꞌotobeꞌ beṉəꞌ zan beṉəꞌ yosoꞌosed yosoꞌoloꞌi ḻegaꞌaqueꞌ dižəꞌ deꞌen chesyəꞌəbeineꞌ.
\v 4 Yesəꞌəbeɉyic̱hɉeꞌ cuich yosoꞌozenagueꞌ c̱he dižəꞌ ḻinꞌ naꞌ yosoꞌozenagzecheꞌ c̱he dižəꞌ güenḻažəꞌ deꞌen chsaꞌalɉlažəꞌ beṉəꞌ.
\v 5 Pero ca naquə leꞌ ža, do tyempte gwnabiaꞌ cuinoꞌ par gonoꞌ canꞌ chazlažəꞌ Diozənꞌ, naꞌ gwzotezə gwzo bguoꞌo bc̱heɉlažəꞌ catəꞌən de deꞌe chžaglaogoꞌ, naꞌ gwzotezə gwzo beꞌ dižəꞌ güen dižəꞌ cobə c̱he Jesocristənꞌ, naꞌ ben doxen deꞌen baben Diozənꞌ lao naꞌonəꞌ gonoꞌ.
\p
\v 6 Gwzotezə gwzo ben xšin Diozənꞌ, c̱hedəꞌ laꞌ bazon baozə soꞌoteꞌ nadaꞌ naꞌ žɉəyezoaꞌ len Diozənꞌ.
\v 7 Nadaꞌ babenaꞌ xte ga zelao gwxaquəꞌədaꞌ par chonaꞌ canꞌ chazlažəꞌ Diozənꞌ. Babenaꞌ yoguəꞌəḻoḻ deꞌen ngoꞌo Diozənꞌ lao naꞌa gonaꞌ, naꞌ zotezə zoaꞌ chonḻilažaꞌa Jesocristənꞌ.
\v 8 Naꞌ catəꞌ žɉəyezoaꞌ len Diozənꞌ, goneꞌ par nic̱h soaꞌ mbalaz c̱hedəꞌ bentezə benaꞌ deꞌe güen laogüeꞌenəꞌ. X̱ancho Jesocristənꞌ zdaczeꞌ ḻicha naꞌ catəꞌ əžin ža əṉeꞌ binꞌ gaquə c̱he yoguəꞌ beṉac̱hənꞌ, caguə nadəꞌəzanꞌ soaꞌ mbalaz, ḻeczə mbalaz ṉitəꞌ notəꞌətezəchlə beṉəꞌ chesyəꞌəbeineꞌ ṉiteꞌe lez yidə Jesocristənꞌ deꞌe yoblə.
\s1 Deꞌen cheneꞌe Pabənꞌ gon Temtionꞌ
\p
\v 9 Ben byen par nic̱h yob yidoꞌ nga.
\v 10 Niaꞌ caꞌ c̱hedəꞌ Demasənꞌ bagwleɉyic̱hɉeꞌ nadaꞌ naꞌ bazɉəyedeꞌ Tesalonicanꞌ deꞌen chiꞌichgua yic̱hɉeꞌ binꞌ gatəꞌ c̱heꞌ lao yežlyo nga. Naꞌ ca naquə beṉəꞌ caꞌ yeḻaꞌ ža, Cresentənꞌ bazdeꞌ Galasianꞌ, naꞌ Titonꞌ bazdeꞌ Dalmasianꞌ.
\v 11 Yetoga Locasənꞌ ngaꞌaṉleneꞌ nadaꞌ. C̱heꞌešgoꞌ Marconꞌ catəꞌən yidoꞌ, laꞌ ḻechguaḻe chacleneꞌ nadaꞌ.
\v 12 Babseḻaꞌa Tiquiconꞌ Efesonꞌ.
\v 13 Naꞌ catəꞌ yidoꞌ gox̱əꞌəšgoꞌ xadoṉ c̱hiaꞌ deꞌen bocuaꞌaṉaꞌ Troasənꞌ liž Carponꞌ, naꞌ bex̱əꞌ ḻibr caꞌ pero naꞌ deꞌe žialao xench bex̱əꞌəšga rollos caꞌ deꞌen zɉənyoɉ.
\p
\v 14 Lɉandr benꞌ chon žin len cobre babenchgüeꞌ contr nadaꞌ. X̱ancho Diozənꞌ əgwnežɉueꞌ ḻeꞌ castigw c̱he deꞌen babeneꞌ.
\v 15 Gapəšgoꞌ cuidad len ḻeꞌ, laꞌ babenchgüeꞌ contr nadaꞌ par nic̱h cui c̱hix̱ɉuiꞌa xtižəꞌ Diozənꞌ.
\p
\v 16 Catəꞌ bosoꞌodieꞌ nadaꞌ lao jostis caꞌ deꞌe nech, ni tozə cui no bidə par əṉeꞌ fabor nadaꞌ. Yoguəꞌ beṉəꞌ caꞌ benaꞌ xbab əṉeꞌ fabor nadaꞌ gosəꞌəbeɉyic̱hɉeꞌ nadaꞌ. Chonaꞌ orasyon lao Diozənꞌ chṉabaꞌ yeziꞌixeneꞌ c̱hegaꞌaqueꞌ deꞌen gosəꞌəbeɉyic̱hɉeꞌ nadaꞌ.
\v 17 Biaꞌaczə zoczə X̱ancho Diozənꞌ len nadaꞌ. Ḻenꞌ goquəleneꞌ nadaꞌ par nic̱h biꞌa xtižeꞌenəꞌ clar naꞌ beneꞌ par nic̱h zan beṉəꞌ cui zɉənaquə beṉəꞌ Izrael gwseꞌeneneꞌ xtižeꞌenəꞌ. Naꞌ X̱ancho Dioz naꞌ bosleꞌ nadaꞌ lao naꞌ beṉəꞌ contr c̱hiaꞌ caꞌ.
\v 18 Naꞌ ṉezdaꞌ goslaczə X̱anchonꞌ nadaꞌ lao bitəꞌətezə deꞌe gaquə c̱hiaꞌ, naꞌ əgwcuasəꞌ gwcueꞌeɉczeꞌ nadaꞌ len deꞌe malənꞌ par nic̱h žɉəyezoaꞌ len ḻeꞌ ganꞌ chnabiꞌe. Ḻedoyeꞌelaꞌocheꞌ ṉaꞌa naꞌ zeɉḻicaṉe. Naꞌ canꞌ gonšgaczcho.
\s1 Chguapeꞌ diox yeto c̱hopeꞌ naꞌ chṉablažeꞌe gaquəlen Diozənꞌ ḻegaꞌaqueꞌ
\p
\v 19 Eguapšgoꞌ Priscanꞌ naꞌ beꞌen c̱heꞌ Aquilanꞌ diox, naꞌ ḻeczə famiḻy c̱he Onesiforonꞌ.
\v 20 Erastonꞌ begaꞌaṉeꞌ Corintonꞌ, naꞌ bocuaꞌaṉaꞌ Trofimonꞌ syoda Miletonꞌ chacšeneneꞌ.
\v 21 Ben xte ga zelao saquəꞌədoꞌ par yidoꞌ antslə zeꞌe gaquə zag. Ḻeczə Eubolonꞌ chguapeꞌ leꞌ diox, len Podentenꞌ, naꞌ Linonꞌ naꞌ Claudianꞌ naꞌ len yoguəꞌ beṉəꞌ bišəꞌəcho caꞌ nitəꞌ nga.
\p
\v 22 X̱ancho Jesocristənꞌ gaquəlenšgueꞌ leꞌ len xbab deꞌen yoꞌo ḻoꞌo yic̱hɉlaꞌaždaꞌogoꞌonəꞌ, naꞌ gaquəlenšgueꞌ yoguəꞌəle. Deꞌe naꞌazənꞌ chzoɉaꞌ.
\b
\m Pab