\id TIT
\ide UTF-8
\h TITO
\toc1 Tito
\mt1 Cart Deꞌen Bzoɉ San Pabənꞌ Par Titonꞌ
\c 1
\s1 Pabənꞌ chzoɉeꞌ Titonꞌ
\p
\v 1 Nadaꞌ Pab nacaꞌ beṉəꞌ güen xšin Diozənꞌ naꞌ nacaꞌ apostol c̱he Jesocristənꞌ. Diozənꞌ gwleɉeꞌ nadaꞌ nic̱h chyix̱ɉuiꞌa xtižeꞌenəꞌ len beṉəꞌ caꞌ bagwleɉeꞌ par əsaꞌaqueꞌ xiꞌiṉeꞌ, par nic̱h soꞌonḻilažeꞌeneꞌ naꞌ seꞌeɉniꞌineꞌ deꞌen naquə deꞌe ḻi naꞌ par nic̱h soꞌoneꞌ canꞌ cheneꞌe Diozənꞌ.
\v 2 Naꞌ chaquəlengaꞌacaꞌaneꞌ par nic̱h yesəꞌəṉezeneꞌ de que žɉəsyəꞌəniteꞌe len Diozənꞌ zeɉḻicaṉe. Zeꞌe x̱e yežlyonꞌ Diozənꞌ beneꞌ lyebe de que beṉəꞌ soꞌonḻilažəꞌ ḻeꞌ žɉəsyəꞌəniteꞌe len ḻeꞌ zeɉḻicaṉe. Naꞌ ṉezecho de que bito chonḻažəꞌ Diozənꞌ.
\v 3 Naꞌ ṉaꞌa catəꞌ bžin ža bžin or canꞌ bžieꞌ biaꞌanəꞌ, Diozənꞌ benꞌ babebeɉ chioꞌo xniꞌa deꞌe malənꞌ bzeɉniꞌineꞌ chioꞌo dižəꞌ güen dižəꞌ cobə c̱heꞌenəꞌ. Naꞌ gwleɉeꞌ nadaꞌ naꞌ beneꞌ mendad c̱hix̱ɉuiꞌan len beṉəꞌ yoblə.
\v 4 Chzoɉaꞌ leꞌ Tito, lenꞌ nacoꞌ ca doalɉe xiꞌiṉaꞌ c̱hedəꞌ bzeɉniꞌidaꞌ leꞌ par nic̱h chonḻilažoꞌo X̱ancho Jesocristənꞌ canꞌ chonḻilažaꞌaneꞌ nadaꞌ. Chonaꞌ orasyon lao X̱acho Diozənꞌ naꞌ lao X̱ancho Jesocristənꞌ benꞌ babebeɉ chioꞌo xniꞌa deꞌe malənꞌ, chṉabaꞌ əsaꞌaclenšgueꞌ leꞌ naꞌ yesyəꞌəyašəꞌ yesyəꞌəžiꞌilažeꞌe leꞌ naꞌ soꞌonšgueꞌ par nic̱h so cuezoꞌ binḻo len xbab deꞌen yoꞌo ḻoꞌo yic̱hɉlaꞌaždaꞌogoꞌonəꞌ.
\s1 Xšin Diozənꞌ deꞌen chon Titonꞌ ganꞌ nziꞌ Creta
\p
\v 5 Bocuaꞌaṉaꞌ leꞌ Cretanꞌ par nic̱h yeyož gonoꞌ xšin Diozənꞌ deꞌen gwzolaoguaꞌ beṉaꞌ. Naꞌ ḻeczə benaꞌ mendad cueɉoꞌ beṉəꞌ yosoꞌogüia yosoꞌoyeꞌ yeziquəꞌəchlə beṉəꞌ chsoꞌonḻilažəꞌ Jesocristənꞌ to to yež.
\v 6-7 Šə no beṉəꞌ chsoꞌon ca notono əṉa chsoꞌoneꞌ deꞌe malənꞌ, šə nitəꞌ tgüeɉzə noꞌol c̱hegaꞌaqueꞌ, naꞌ šə xiꞌiṉgaꞌaqueꞌ caꞌ chsoꞌonḻilažeꞌe Jesocristənꞌ naꞌ šə xiꞌiṉgaꞌaqueꞌ caꞌ bito chsoꞌonditɉeineꞌ mech par soꞌoneꞌ ḻegr naꞌ nic zɉənaqueꞌ beṉəꞌ godenag, ca beṉəꞌ canꞌ cueɉoꞌ par yosoꞌogüia yosoꞌoyeꞌ yeziquəꞌəchlə beṉəꞌ chsoꞌonḻilažəꞌ Jesocristənꞌ. Gwleɉ beṉəꞌ soꞌon ca notono əṉa chsoꞌoneꞌ deꞌe malənꞌ, c̱hedəꞌ laꞌ xšin Dioz naꞌanəꞌ soꞌoneꞌ. Bito cueɉoꞌ beṉəꞌ zɉənaquə godenag, beṉəꞌ loc, beṉəꞌ güeꞌe zo, o beṉəꞌ chsoꞌon znia par yosoꞌozenag beṉəꞌ c̱hegaꞌaqueꞌ, naꞌ nic cueɉoꞌ beṉəꞌ zɉəzelažəꞌ soꞌoneꞌ gan mech len xšin Diozənꞌ deꞌen soꞌoneꞌenəꞌ.
\v 8 Gwleɉ beṉəꞌ chəsyəꞌəbeineꞌ chosoꞌogüialaogüeꞌ beṉəꞌ yoblə ližgaꞌaqueꞌenəꞌ naꞌ beṉəꞌ chəsyəꞌəbei deꞌe güenṉəꞌ lguaꞌa deꞌe malənꞌ, beṉəꞌ chesəꞌənabiaꞌ cuingaꞌaqueꞌ par chsoꞌoneꞌ canꞌ chazlažəꞌ Diozənꞌ, naꞌ beṉəꞌ chsoꞌon güen len lɉuežɉgaꞌaqueꞌ, naꞌ beṉəꞌ chsoꞌon canꞌ chebei Diozənꞌ, naꞌ beṉəꞌ cui chsoꞌe latɉə ṉabiaꞌ laꞌaždaꞌomalgaꞌaqueꞌenəꞌ ḻegaꞌaqueꞌ.
\v 9 Beṉəꞌ caꞌ yosoꞌogüia yosoꞌoyeꞌ yeziquəꞌəchlə beṉəꞌ chsoꞌonḻilažəꞌ Cristənꞌ, cheyaḻəꞌ ṉitəꞌətezə ṉiteꞌe yosoꞌozenagueꞌ c̱he dižəꞌ ḻinꞌ deꞌen chsed chloꞌicho c̱he Jesocristənꞌ laꞌ naquən deꞌe güen. Šə yosoꞌozenagueꞌ c̱hei, gaquə yosoꞌozeɉniꞌineꞌen beṉəꞌ caꞌ chəsəꞌəṉe contr, naꞌ gacbiaꞌ de que beṉəꞌ contr caꞌ chsoꞌe dižəꞌən clelə.
\p
\v 10 Gwleɉ beṉəꞌ caꞌ chsoꞌon canꞌ bagwniꞌanəꞌ par yosoꞌogüia yosoꞌoyeꞌ yeziquəꞌəchlə beṉəꞌ chsoꞌonḻilažəꞌ Cristənꞌ c̱hedəꞌ nitəꞌ zan beṉəꞌ Izrael naꞌ baḻə beṉəꞌ cui zɉənaquə beṉəꞌ Izrael chsoꞌoneꞌ txen len chioꞌo chonḻilažəꞌəcho Jesocristənꞌ, pero bito chseꞌeneneꞌ ṉabiaꞌ Diozənꞌ ḻegaꞌaqueꞌ. Chsoꞌechgüeꞌ dižəꞌ deꞌen bitobi zɉəzaquəꞌ naꞌ chesəꞌəx̱oayagueꞌ beṉəꞌ.
\v 11 Cheyaḻəꞌ gonoꞌ par nic̱h beṉəꞌ caꞌ chsoꞌon caꞌ Cretanꞌ ṉiteꞌe žizə cuich yosoꞌosed yosoꞌoloꞌineꞌ dižəꞌ güenḻažəꞌənəꞌ c̱hedəꞌ chsoꞌoneꞌ par nic̱h zan famiḻy bito niteꞌe binḻo len lɉuežɉgaꞌaqueꞌ. Naꞌ parzə nic̱h soꞌoneꞌ gan mechənꞌ chosoꞌosed chosoꞌoloꞌineꞌ deꞌe caꞌ cui cheyaḻəꞌ yosoꞌosed yosoꞌoloꞌineꞌ.
\p
\v 12 To profet c̱hegaꞌaqueꞌ ḻeczə beṉəꞌ Creta bzoɉeꞌ c̱hegaꞌaqueꞌ gwneꞌ: “Beṉəꞌ Creta caꞌ syempr zɉənaqueꞌ beṉəꞌ güenḻažəꞌ naꞌ gwxaquəꞌəlebəgaꞌaqueneꞌ ca bia znia yeḻəꞌ güen deꞌe mal c̱hegaꞌaqueꞌenəꞌ, naꞌ ḻeczə zɉənaqueꞌ beṉəꞌ lia naꞌ beṉəꞌ xagüed.”
\v 13 Deꞌen bzoɉeꞌ c̱hegaꞌaqueꞌ naquən deꞌe ḻi. Deꞌe naꞌanəꞌ cheyaḻəꞌ tiḻoꞌ ḻegaꞌaqueꞌ c̱he deꞌe malənꞌ chsoꞌoneꞌ par nic̱h yesəꞌədaleneꞌ dižəꞌ güen c̱he Jesocristənꞌ.
\v 14 Naꞌ tiḻəgaꞌacoꞌoneꞌ par nic̱h cui yosoꞌozenagueꞌ c̱he dižəꞌ güenḻažəꞌ deꞌen chsaꞌalɉlažəꞌ beṉəꞌ Izrael caꞌ, naꞌ cui yosoꞌozenagueꞌ c̱he beṉəꞌ caꞌ bagosəꞌəbeɉyic̱hɉeꞌ deꞌen naquə deꞌe ḻi bitəꞌətezə deꞌe əseꞌe ḻegaꞌaqueꞌ soꞌoneꞌ.
\p
\v 15 Beṉəꞌ caꞌ zɉənaqueꞌ beṉəꞌ laꞌaždaoꞌ xiꞌilažəꞌ guaquə saꞌogüeꞌ bitəꞌətezə yeḻəꞌ guao sin cui soꞌonən manch yic̱hɉlaꞌaždaꞌogaꞌaqueꞌenəꞌ. Pero naꞌ beṉəꞌ caꞌ cui chsoꞌonḻilažəꞌ Jesocristənꞌ bitəꞌətezə deꞌe soꞌoneꞌ, yic̱hɉlaꞌaždaogaꞌaqueꞌenəꞌ zɉənaquəchguan manch lao Diozənꞌ. Chosoꞌozenagtezeꞌ c̱he laꞌaždaꞌomalgaꞌaqueꞌenəꞌ naꞌ bitobi chsaꞌaqueneꞌ catəꞌən chsoꞌoneꞌ deꞌe malənꞌ.
\v 16 Chəsəꞌəneꞌ de que zɉənombiꞌe Diozənꞌ pero laogüe deꞌen chsoꞌontezə chsoꞌoneꞌ deꞌe malənꞌ nacbiaꞌ de que bito zɉənombiꞌeneꞌ. Chsoꞌoneꞌ deꞌen chgueꞌi Diozənꞌ. Naꞌ zɉənaqueꞌ beṉəꞌ godenag, naꞌ bito chac soꞌoneꞌ bitəꞌətezə deꞌen naquə güen.
\c 2
\s1 Deꞌe güen deꞌen chsed chloꞌicho c̱he Jesocristənꞌ
\p
\v 1 Pero naꞌ leꞌ Tito, bsed bloꞌi porzə deꞌen chonən txen len deꞌen chsed chloꞌidaꞌ c̱he Jesocristənꞌ, laꞌ naquən deꞌe güen.
\v 2 Ben mendad de que beṉəꞌ byo gol caꞌ cui soꞌe latɉə ṉabiaꞌ laꞌaždaꞌomalgaꞌaqueꞌenəꞌ ḻegaꞌaqueꞌ. Cheyaḻəꞌ soꞌoneꞌ par nic̱h beṉəꞌ yoblə əsaꞌapəgaꞌaqueneꞌ respet, naꞌ cheyaḻəꞌ yesəꞌənabiaꞌ cuingaꞌaqueꞌ par soꞌoneꞌ canꞌ chazlažəꞌ Diozənꞌ. Cheyaḻəꞌ yesəꞌədaleneꞌ dižəꞌ güen c̱he Jesocristənꞌ, cheyaḻəꞌ ṉitəꞌətezə ṉiteꞌe əsaꞌaqueneꞌ c̱he lɉuežɉgaꞌaqueꞌ, naꞌ cheyaḻəꞌ ṉitəꞌətezə ṉiteꞌe soꞌonḻilažeꞌe Diozənꞌ catəꞌ chesəꞌəyiꞌ chesəꞌəzaqueꞌe.
\v 3 Naꞌ ḻeczə caꞌ ben mendad de que noꞌolə gol caꞌ ṉitəꞌətezə ṉiteꞌe soꞌelaogüeꞌe Diozənꞌ bitəꞌətezə deꞌe soꞌoneꞌ. Naꞌ ben mendad cui yosoꞌožia yosoꞌoniteꞌe beṉəꞌ naꞌ bito əsaꞌaqueꞌ beṉəꞌ güeꞌe zo. Cheyaḻəꞌ yosoꞌosed yosoꞌoloꞌineꞌ beṉəꞌ binꞌ naquə deꞌe güen soꞌoneꞌ.
\v 4 Cheyaḻəꞌ yosoꞌosed yosoꞌoloꞌineꞌ noꞌolə xcuidəꞌ caꞌ canꞌ cheyaḻəꞌ yesəꞌəžiꞌilažeꞌe beꞌen c̱hegaꞌaqueꞌ naꞌ xiꞌiṉ c̱hegaꞌaqueꞌ caꞌ.
\v 5 Naꞌ ḻeczə noꞌolə gol caꞌ cheyaḻəꞌ yosoꞌosed yosoꞌoloꞌineꞌ noꞌolə xcuidəꞌ caꞌ canꞌ yesəꞌənabiaꞌ cuingaꞌaqueꞌ par soꞌoneꞌ canꞌ chazlažəꞌ Diozənꞌ, naꞌ canꞌ cheyaḻəꞌ soꞌoneꞌ par nic̱h gactezə gaquə yic̱hɉlaꞌaždaꞌogaꞌaqueꞌenəꞌ xiꞌilažəꞌ, naꞌ canꞌ cheyaḻəꞌ yosoꞌogüia yosoꞌoyeꞌ ližgaꞌaqueꞌenəꞌ naꞌ soꞌon xšingaꞌaqueꞌ. Yosoꞌosed yosoꞌoloꞌineꞌ ḻegaꞌaqueꞌ canꞌ cheyaḻəꞌ soꞌoneꞌ güen len yoguəꞌəḻoḻ beṉəꞌ naꞌ canꞌ cheyaḻəꞌ yosoꞌozenagueꞌ c̱he beꞌen c̱hegaꞌaqueꞌ. Noꞌolə gol caꞌ cheyaḻəꞌ yosoꞌosed yosoꞌoloꞌineꞌ noꞌolə xcuidəꞌ caꞌ canꞌ soꞌoneꞌ par nic̱h bito yesəꞌəṉe beṉəꞌ contr xtižəꞌ Diozənꞌ.
\p
\v 6 Naꞌ ḻeczə caꞌ cheyaḻəꞌ əṉeyoidoꞌ beṉəꞌ xcuidəꞌ caꞌ par nic̱h yesəꞌənabiaꞌ cuingaꞌaqueꞌ par soꞌoneꞌ canꞌ chazlažəꞌ Diozənꞌ.
\v 7 Naꞌ bitəꞌətezə deꞌe gonoꞌ leꞌ, gonoꞌon güen par nic̱h saꞌacbeꞌi beṉəꞌ de que ḻeczə cheyaḻəꞌ soꞌoneꞌ caꞌ. Naꞌ catəꞌ əgwsed əgwloꞌidoꞌ beṉəꞌ, cheyaḻəꞌ əgwsed əgwloꞌigaꞌacdoꞌoneꞌ porzə deꞌe güen naꞌ əgwsed əgwloꞌigaꞌacdoꞌoneꞌ binḻo par nic̱h əsaꞌapeꞌ leꞌ respet.
\v 8 Naꞌ bsed bloꞌigaꞌaqueneꞌ dižəꞌ ḻi par nic̱h notono gaquə əṉeꞌ de que xtižoꞌonəꞌ naquən mal. Gonoꞌ caꞌ par nic̱h beṉəꞌ contr c̱hecho caꞌ yesyəꞌətoꞌineꞌ naꞌ bito gaquə yesəꞌəṉecheꞌ contr chioꞌo.
\p
\v 9 Ben mendad de que mos caꞌ yosəꞌəzex̱ɉw yic̱hɉgaꞌaqueꞌ par yosoꞌozenagueꞌ c̱he x̱angaꞌaqueꞌenəꞌ naꞌ soꞌoneꞌ bitəꞌətezə deꞌe gon x̱angaꞌaquenꞌ mendad sin cui yosyoꞌožiꞌ yosyoꞌolebeꞌ xtižeꞌenəꞌ.
\v 10 Ben mendad cui yesəꞌəqueꞌe bi deꞌe de c̱he x̱angaꞌaqueꞌenəꞌ, sino ṉitəꞌətezə ṉiteꞌe soꞌoneꞌ canꞌ cheyaḻəꞌ soꞌoneꞌ. Bitəꞌətezə deꞌe soꞌoneꞌ cheyaḻəꞌ soꞌoneꞌen güen par nic̱h əsaꞌacbeꞌi beṉəꞌ yoblə de que deꞌen chsed chloꞌicho c̱he Diozənꞌ naquən deꞌe güen, Dioz benꞌ babebeɉ chioꞌo xniꞌa deꞌe malənꞌ.
\p
\v 11 Diozənꞌ babloꞌe de que nžiꞌilažeꞌe chioꞌo beṉac̱h naꞌ napeꞌ yeḻəꞌ guac par yebeɉeꞌ chioꞌo xniꞌa deꞌe malənꞌ.
\v 12 Deꞌe naꞌanəꞌ ṉezecho de que cheyaḻəꞌ cueɉyic̱hɉcho yoguəꞌ deꞌen chsoꞌon beṉəꞌ mal caꞌ deꞌen chzelažəꞌ laꞌaždaꞌomalchonꞌ goncho naꞌ bitəꞌətezəchlə deꞌen cui chazlažəꞌ Diozənꞌ. Naꞌ ṉezecho naquənꞌ cheyaḻəꞌ so cuezcho yežlyo nga, cheyaḻəꞌ ṉabiaꞌ cuincho par goncho canꞌ chazlažəꞌ Diozənꞌ, cheyaḻəꞌ goncho deꞌe güen, naꞌ cheyaḻəꞌ əgwzenagcho c̱he Diozənꞌ.
\v 13 Naꞌ zocho mbalaz deꞌen ṉezecho əžin ža yidə Jesocristənꞌ deꞌe yoblə nseꞌe yeḻəꞌ balaꞌaṉ xen c̱heꞌenəꞌ. Jesocristənꞌ naqueꞌ Dioz c̱hecho, naqueꞌ ḻeꞌezelaogüe beṉəꞌ zaqueꞌe, naꞌ babebeɉeꞌ chioꞌo xniꞌa deꞌe malənꞌ.
\v 14 Bnežɉw cuineꞌ gwsoꞌot beṉəꞌ ḻeꞌ par gwdixɉueꞌ xtoḻəꞌəchonꞌ nic̱h bebeɉeꞌ chioꞌo xniꞌa yoguəꞌ deꞌe mal, naꞌ beneꞌ par nic̱h laꞌaždaꞌochonꞌ naquən xiꞌilažəꞌ. Beneꞌ deꞌe caꞌ par nic̱h naccho xiꞌiṉ Diozənꞌ, naꞌ par nic̱h chebeicho choncho deꞌe güenṉəꞌ.
\p
\v 15 Leꞌ Tito, beꞌ dižəꞌ c̱he deꞌen babzeɉniꞌidaꞌ leꞌ, gwṉeyoi beṉəꞌ par yosoꞌozenagueꞌ c̱hei, naꞌ beꞌegaꞌaqueꞌ consejw par nic̱h yesəꞌəbeɉyic̱hɉeꞌ deꞌe malənꞌ, c̱hedəꞌ laꞌ Diozənꞌ bagwleɉeꞌ leꞌ par gonoꞌ deꞌe caꞌ. Bito goꞌo latɉə yesəꞌəzo beṉəꞌ leꞌ caꞌaḻəꞌ cui yosoꞌozenagueꞌ c̱hioꞌ.
\c 3
\s1 Deꞌen cheyaḻəꞌ gon chioꞌo chonḻilažəꞌəcho Jesocristənꞌ
\p
\v 1 Ben par nic̱h žɉəsəꞌəzaꞌalažeꞌe de que cheyaḻəꞌ yosoꞌozex̱ɉw yic̱hɉgaꞌaqueꞌ yosoꞌozenagueꞌ c̱he jostis caꞌ naꞌ c̱he beṉəꞌ gwnabiaꞌ c̱hegaꞌaqueꞌ caꞌ, naꞌ cheyaḻəꞌ ṉiteꞌe probnid par soꞌoneꞌ bitəꞌətezə deꞌe güen deꞌe soꞌoneꞌ mendad.
\v 2 Gožgaꞌaqueꞌ de que bito yesəꞌəṉeꞌ mal c̱he notəꞌətezə beṉəꞌ, naꞌ bito yesəꞌədiḻə yesəꞌəšašeꞌ len beṉəꞌ yoblə. Cheyaḻəꞌ əsaꞌaqueꞌ gax̱ɉwlažəꞌ naꞌ cheyaḻəꞌ əsaꞌapeꞌ yeḻəꞌ chxenḻažəꞌ len yoguəꞌəḻoḻ beṉəꞌ.
\p
\v 3 Antslənꞌ gwc̱hoḻ yic̱hɉlaꞌaždaꞌochonꞌ, naꞌ goccho beṉəꞌ godenag. Gwxoayagcho len deꞌe malənꞌ naꞌ gwzocho xniꞌa laꞌaždaꞌomalchonꞌ ca naquənꞌ bencho bitəꞌətezənꞌ gwzelažəꞌən naꞌ bitəꞌətezənꞌ gwnan parzə nic̱h gwdacho ḻegr. Con gwdacho bencho mal len beṉəꞌ naꞌ gocxiꞌi lɉuežɉcho. Besəꞌəgueꞌi beṉəꞌ chioꞌo naꞌ bgueꞌigaꞌaquechoneꞌ.
\v 4 Pero naꞌ bžin ža catəꞌ Diozənꞌ benꞌ babebeɉ chioꞌo xniꞌa deꞌe malənꞌ bloꞌineꞌ chioꞌo ca beṉəꞌ güenṉəꞌ naqueꞌ naꞌ catequənꞌ chaqueneꞌ c̱he chioꞌo beṉac̱h.
\v 5 Naꞌ baḻtezcho chonḻilažəꞌəcho Jesocristənꞌ, Diozənꞌ bebeɉeꞌ chioꞌo xniꞌa deꞌe malənꞌ c̱hedəꞌ cheyašəꞌ chežiꞌilažeꞌe chioꞌo. Bito bebeɉeꞌ chioꞌo por ni c̱he bilə deꞌe güen deꞌe bencho. Beyaꞌa beyibeꞌ yic̱hɉlaꞌaždaꞌochonꞌ naꞌ beneꞌ par nic̱h Spirit c̱heꞌenəꞌ bocobən ḻen.
\v 6 Diozənꞌ bseḻeꞌe Spiritənꞌ zon ḻoꞌo yic̱hɉlaꞌaždaꞌochonꞌ par chaclenchguan chioꞌo c̱hedəꞌ Jesocristənꞌ babebeɉeꞌ chioꞌo xniꞌa deꞌe malənꞌ.
\v 7 Deꞌen cheyašəꞌ chežiꞌilažəꞌ Diozənꞌ chioꞌo bseḻeꞌe Spirit cheꞌenəꞌ zon ḻoꞌo laꞌaždaꞌochonꞌ par nic̱h gaquə əṉeꞌ c̱hecho de que naccho beṉəꞌ güen laogüeꞌenəꞌ. Naꞌ ḻeczə bseḻeꞌen par nic̱h ṉezecho žɉəyezocho len leꞌ zeɉḻicaṉe.
\p
\v 8 Deꞌe caꞌ bagwniaꞌ nga zɉənaquən deꞌe ḻi. Naꞌ cheꞌendaꞌ sotezə soꞌ c̱hix̱ɉuiꞌo de que deꞌe caꞌ babzeɉniꞌidaꞌ leꞌ zɉənaquən deꞌe žialao xen gwzenagcho c̱hei. Gonoꞌ caꞌ par nic̱h yoguəꞌ beṉəꞌ caꞌ chsoꞌonḻilažəꞌ Diozənꞌ ṉitəꞌətezə ṉiteꞌe soꞌoneꞌ deꞌe güen. Deꞌe caꞌ bagwniaꞌ zɉənaquən deꞌe güen naꞌ saꞌaclenən notəꞌətezə beṉəꞌ yosoꞌozenag c̱hei.
\v 9 Pero naꞌ bito gwzenagoꞌ c̱he beṉəꞌ caꞌ zɉənc̱hoḻ yic̱hɉlaꞌaždaꞌogaꞌaqueꞌenəꞌ naꞌ chesəꞌədiḻə chesəꞌəšašeꞌ por ni c̱he bizə dižəꞌ. Naꞌ bito cueꞌ yic̱hɉoꞌ c̱he dia c̱he deꞌe x̱axtaꞌotoꞌ caꞌ. Bito gwzenagoꞌ c̱he beṉəꞌ caꞌ chsaꞌacyožə naꞌ chesəꞌədiḻə chesəꞌəšašeꞌ por ni c̱he canꞌ chseꞌeɉniꞌineꞌ to to pont daoꞌ c̱he ḻei deꞌen bzoɉ deꞌe Moisezənꞌ. Dižəꞌ caꞌ zɉənac caꞌ bito chaclenən beṉəꞌ naꞌ bitobi zaquəꞌən.
\p
\v 10 Beꞌ consejw c̱he notəꞌətezə beṉəꞌ chsed chloꞌineꞌ xtižəꞌ Diozənꞌ clelə beṉəꞌ cheneꞌe yesəꞌənao beṉəꞌ deꞌen chzeɉniꞌineꞌ. Šə babiꞌoneꞌ consejw to c̱hop las naꞌ cui chzenagueꞌ, bebeɉeꞌ caꞌaḻə.
\v 11 Deꞌen bito bzenagueꞌ c̱hioꞌ nachənꞌ ṉezdoꞌ nalɉeneꞌ. Naꞌ deꞌe malənꞌ choneꞌ chloꞌen de que napeꞌ doḻəꞌ.
\s1 Deꞌen chon Pabənꞌ mendad gon Titonꞌ
\p
\v 12 Catəꞌ əseḻaꞌa Artemasənꞌ o Tiquiconꞌ ganꞌ zoꞌ, yob yidəšgoꞌ par yežagcho syoda Nicopolisənꞌ, c̱hedəꞌ bagwc̱hoglažaꞌa yegaꞌaṉaꞌ Nicopolisənꞌ lao tyemp zaguənꞌ.
\v 13 Ben xte ga zelao saquəꞌədoꞌ par gaquəlenoꞌ Zenas benꞌ babsed ḻeinꞌ gax̱ɉw gwcheꞌ naꞌ Apolosənꞌ catəꞌ yesaꞌaqueꞌ ganꞌ zoꞌ par nic̱h bitobi yesəꞌəyažɉeneꞌ tnezənꞌ.
\v 14 Naꞌ bzeɉniꞌišguei beṉəꞌ lɉuežɉcho caꞌ chsoꞌonḻilažəꞌ Diozənꞌ par nic̱h yesəꞌəbeꞌ yic̱hɉgaꞌaqueꞌ porzə par soꞌoneꞌ deꞌe güen. Cheyaḻəꞌ saꞌaclen lɉuežɉgaꞌaqueꞌ šə de bi deꞌen chesəꞌəyažɉe to togaꞌaqueꞌ, naꞌ cheyaḻəꞌ soꞌoneꞌ con canꞌ chazlažəꞌ Diozənꞌ.
\s1 Beṉəꞌ caꞌ nitəꞌəlen Pabənꞌ chesəꞌəguapeꞌ Titonꞌ diox
\p
\v 15 Yoguəꞌ beṉəꞌ caꞌ chsoꞌon xšin Diozənꞌ txen len nadaꞌ nga chesəꞌəguapeꞌ leꞌ diox. Naꞌ beṉəꞌ caꞌ zolenoꞌ txen beṉəꞌ caꞌ chsaꞌaque c̱hecho c̱hedəꞌ chonḻilažəꞌəcho Diozənꞌ əgguapšgagaꞌacoꞌoneꞌ diox.
\p Gaquəlenšga Diozənꞌ yoguəꞌəle. Deꞌe naꞌazənꞌ chzoɉaꞌ ṉaꞌa.
\b
\m Pab