\id PHM
\ide UTF8
\h FILEMÓN
\toc1 Filemón
\mt1 Cart Deꞌen Bzoɉ San Pabənꞌ Par Filemón
\c 1
\s1 Pabənꞌ chguapeꞌ Filemonṉəꞌ diox
\p
\v 1 Nadaꞌ Pab diaꞌ lizya nga c̱hedəꞌ chyix̱ɉuiꞌa xtižəꞌ Cristo Jesoꞌosənꞌ. Naꞌ txen len beṉəꞌ bišəꞌəcho Temtionꞌ chzoɉtoꞌ leꞌ Filemon. Chaquetoꞌ c̱hioꞌ naꞌ nacoꞌ txen len netoꞌ choncho xšin Diozənꞌ.
\v 2 Naꞌ chzoɉtoꞌ leꞌ zandaꞌotoꞌ Apia, nach leꞌ Arquipo lenꞌ chonoꞌ xšin X̱anchonꞌ txen len netoꞌ. Nach ḻeczə caꞌ chzoɉtoꞌ leꞌe chdopə chžagle liž Filemonṉəꞌ par choꞌelaꞌole Jesocristənꞌ.
\v 3 Chontoꞌ orasyon lao X̱acho Diozənꞌ naꞌ lao X̱ancho Jesocristənꞌ chṉabtoꞌ əsaꞌaclenšgueꞌ leꞌe, naꞌ soꞌoneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\s1 Canꞌ chonḻilažəꞌ Filemonṉəꞌ Jesocristənꞌ naꞌ chaque c̱he lɉuežɉeꞌ
\p
\v 4 Naꞌ leꞌ Filemon, yoguəꞌ laste catəꞌ chonaꞌ orasyon choꞌa yeḻəꞌ chox̱cwlen c̱he Diozənꞌ canꞌ chonoꞌ.
\v 5 Babendaꞌ dižəꞌ ca naquənꞌ chonḻilažoꞌo X̱ancho Jesocristənꞌ, naꞌ canꞌ chacdoꞌ c̱he notəꞌətezəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 6 Naꞌ chonaꞌ orasyon chṉabaꞌ de que sotezə soꞌ gonoꞌ güen len ḻegaꞌaqueꞌ laogüe deꞌen chonḻilažoꞌo X̱ancho Jesocristənꞌ, par nic̱h yogueꞌe saꞌacbeꞌineꞌ de que Cristo Jesoꞌosənꞌ babenchgüeꞌ güen len chioꞌo chonḻilažəꞌəchoneꞌ.
\v 7 Beṉəꞌ bišəꞌ catəꞌ bendaꞌ canꞌ chacdoꞌ c̱he yeziquəꞌəchlə beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ naꞌ canꞌ chaclenoꞌ ḻegaꞌaqueꞌ par nic̱h niteꞌe mbalaz, ḻechguaḻe bebeidaꞌ naꞌ zoaꞌ mbalaz.
\s1 Pabənꞌ gwṉabeꞌ yeziꞌixen Filemonṉəꞌ c̱he Onesimonꞌ
\p
\v 8 Laogüe deꞌen nacaꞌ beṉəꞌ güen žin c̱he Cristənꞌ napaꞌ yeḻəꞌ chnabiaꞌ par gonaꞌ mendad canꞌ cheyaḻəꞌ gonoꞌ,
\v 9 pero laogüe deꞌen chaquecho c̱he Cristənꞌ naꞌ c̱he lɉuežɉcho chṉeyoidaꞌ leꞌ gonoꞌ to deꞌen cheꞌendaꞌ gonoꞌ. Nadaꞌ Pab banacaꞌ beṉəꞌ golə, naꞌ ḻeczə ṉaꞌa diaꞌ ližyanꞌ c̱hedəꞌ chyix̱ɉuiꞌa xtižəꞌ Jesocristənꞌ.
\v 10 Chṉabaꞌ goclen laogoꞌon par Onesimonꞌ benꞌ banonaꞌ ca xiꞌiṉaꞌ. Lao diaꞌ ližya nga bsed bloꞌidaꞌaneꞌ par nic̱h chonḻilažeꞌe Jesocristənꞌ.
\p
\v 11 Antslə bito goqueꞌ mos güen par leꞌ, pero ṉaꞌa banaqueꞌ mos güen par leꞌ naꞌ ḻeczə par nadaꞌ.
\v 12 Chosseḻaꞌaneꞌ laogoꞌonəꞌ, naꞌ chṉabdaꞌ leꞌ yogüialaogoꞌoneꞌ naꞌ soꞌ binḻo len ḻeꞌ c̱hedəꞌ ḻechguaḻe chacdaꞌ c̱heꞌ.
\v 13 Yebeidaꞌ žaləꞌ gaquə yegaꞌaṉleneꞌ nadaꞌ par nic̱h gaquəleneꞌ nadaꞌ canꞌ gaquəlenoꞌ ndaꞌ lao diaꞌ ližyanꞌ žaləꞌ zoꞌ nga.
\v 14 Pero bito gwṉabdaꞌaneꞌ yegaꞌaṉleneꞌ nadaꞌ c̱hedəꞌ cheꞌendaꞌ əṉaoꞌ leꞌ binꞌ goneꞌ. Bito cheꞌendaꞌ gonaꞌ byen gaquəlenoꞌ nadaꞌ pero yebeidaꞌ šə canꞌ chazlažoꞌo gonoꞌ.
\v 15 De repent Diozənꞌ beꞌe latɉə bezeꞌe ližoꞌon par to tyemp par nic̱h gacle tozə zeɉḻicaṉe.
\v 16 Ṉaꞌa bitoch gaqueꞌ con to mos naꞌazə, laꞌ naqueꞌ bišəꞌədaꞌocho. Ḻechguaḻe chacdaꞌ c̱heꞌ naꞌ mazəchlə gaquədoꞌ c̱heꞌ deꞌen banaqueꞌ txen len chioꞌo chonḻilažəꞌəcho X̱ancho Jesocristənꞌ naꞌ ḻeczə naqueꞌ xmosoꞌ.
\p
\v 17 Naꞌ ca naquə chonoꞌ nadaꞌ cuent de que nacaꞌ txen len leꞌ, yogüialaošgoꞌoneꞌ caczənꞌ chgüialaogoꞌ nadaꞌ catəꞌ chedelaṉaꞌa leꞌ.
\v 18 Naꞌ šə bi deꞌe malənꞌ beneꞌ contr leꞌ, o šə bi deꞌen chaḻeꞌe c̱hioꞌ, nadaꞌ c̱hixɉuaꞌan.
\v 19 Cuinczaꞌ nadaꞌ Pab chzoɉaꞌ leꞌ, nadaꞌ c̱hixɉwczaꞌan. Naꞌ bitobi əchniaꞌ c̱he deꞌen chaḻoꞌo c̱he yeḻəꞌ mban zeɉḻicaṉe c̱hioꞌ laogüe deꞌen bsed bloꞌidaꞌ leꞌ par nic̱h chonḻilažoꞌo Jesocristənꞌ.
\v 20 Beṉəꞌ bišəꞌ daoꞌ, laogüe deꞌen chaquecho c̱he X̱ancho Jesocristənꞌ cheꞌendaꞌ gonoꞌ deꞌe nga par nic̱h soaꞌ mbalaz. Deꞌen chaquecho c̱he X̱anchonꞌ, benšga par nic̱h yebeidaꞌ.
\p
\v 21 Chzoɉaꞌ leꞌ c̱hedəꞌ zoaꞌ lez gwzenagoꞌ c̱hiaꞌ, naꞌ ṉezdaꞌ de que gonoꞌ mazəchlə ca deꞌen niaꞌ leꞌ.
\v 22 Naꞌ ḻeczə chṉabdaꞌ leꞌ gonšgoꞌ probnid to cuart par nadaꞌ. Zoaꞌ lez yesəꞌəsaneꞌ nadaꞌ šə gonchle orasyon par nadaꞌ par nic̱h gaquə deyelaṉaꞌa leꞌe.
\s1 Beṉəꞌ caꞌ nitəꞌ len Pabənꞌ chəsəꞌəguapeꞌ Filemonṉəꞌ diox
\p
\v 23 Epafrasənꞌ dieꞌ ližya nga txen len nadaꞌ deꞌen chyix̱ɉuiꞌe xtižəꞌ Cristo Jesoꞌosənꞌ naꞌ chguapeꞌ leꞌe diox.
\v 24 Naꞌ Marcosənꞌ, len Aristarconꞌ, len Demasənꞌ, naꞌ len Locasənꞌ, beṉəꞌ caꞌ chsoꞌon xšin Diozənꞌ txen len nadaꞌ, ḻeczə chəsəꞌəguapeꞌ leꞌe diox.
\p
\v 25 X̱ancho Jesocristənꞌ sošgueꞌ gaquəlenšgaczeꞌ leꞌe len xbab deꞌen yoꞌo ḻoꞌo yic̱hɉlaꞌaždaꞌolenꞌ. Deꞌe naꞌazənꞌ chzoɉaꞌ leꞌ.
\b
\m Pab