\id HEB
\ide UTF8
\h HEBREOS
\toc1 Hebreos
\mt1 Cart Deꞌen Nyoɉ Par Beṉəꞌ Ebreo Caꞌ
\c 1
\s1 Diozənꞌ babeꞌeleneꞌ chioꞌo dižəꞌ ca deꞌen bseḻeꞌe Xiꞌiṉeꞌenəꞌ
\p
\v 1 Tyemp deꞌen bagwde, Diozənꞌ bseḻeꞌe zan profet beṉəꞌ gwsoeꞌ xtižeꞌenəꞌ len deꞌe x̱axtaꞌocho caꞌ. Zan las profet caꞌ gwsoꞌe xtižeꞌenəꞌ len deꞌe x̱axtaꞌocho caꞌ, nžaꞌ nžaꞌ canꞌ gwsoꞌen.
\v 2 Pero tyemp nga zocho ṉaꞌa nžaꞌalə babeneꞌ. Ṉaꞌa babeꞌeleneꞌ chioꞌo dižəꞌ ca deꞌen bseḻeꞌe Xiꞌiṉeꞌenəꞌ benꞌ ben yobanꞌ, yežlyonꞌ naꞌ deꞌe caꞌ chleꞌicho ḻeꞌe yobanꞌ, naꞌ bengaꞌaqueꞌen con canꞌ ben Diozənꞌ mendad. Naꞌ gwžin ža catəꞌ gaquə lao na Xiꞌiṉ Diozənꞌ yoguəꞌ beṉac̱h, yoguəꞌ bia caꞌ chsaꞌaš, naꞌ biquəꞌəchlə deꞌe caꞌ beneꞌ.
\v 3 Xiꞌiṉ Diozənꞌ nseꞌe doxen yeḻəꞌ chey cheꞌeniꞌ c̱he X̱eꞌenəꞌ naꞌ cayaṉəꞌən naquə yic̱hɉlaꞌaždaoꞌ X̱eꞌ Dioz nanꞌ naquə yic̱hɉlaꞌaždaogüeꞌenəꞌ. Naꞌ Xiꞌiṉ Diozənꞌ choneꞌ par nic̱h yobanꞌ, yežlyonꞌ naꞌ deꞌe caꞌ chleꞌicho ḻeꞌe yobanꞌ chsoꞌonən žin, c̱hedəꞌ napeꞌ yeḻəꞌ guac par nic̱h chac con canꞌ neꞌenəꞌ. Bsanḻažəꞌ cuineꞌ gwsoꞌot beṉəꞌ ḻeꞌ par nic̱h chṉitlaogüeꞌ xtoḻəꞌ yoguəꞌ chioꞌo chonḻilažəꞌəchoneꞌ. Naꞌ gwde naꞌ beyepeꞌ yobanꞌ zɉəyechiꞌe cuit X̱eꞌ Diozənꞌ benꞌ naquə ḻeꞌezelaogüe beṉəꞌ zaqueꞌe par chnabiꞌe txen len ḻeꞌ.
\s1 Xiꞌiṉ Diozənꞌ naquəcheꞌ beṉəꞌ zaquəꞌəche cle ca angl caꞌ
\p
\v 4 Naꞌ nḻaꞌalao de que Xiꞌiṉ Diozənꞌ naquəcheꞌ beṉəꞌ zaquəꞌəche cle ca angl caꞌ, c̱hedəꞌ Diozənꞌ babnežɉueꞌeneꞌ yeḻəꞌ balaꞌaṉ mazəchlə ca deꞌen babnežɉueꞌ angl caꞌ. Naꞌ babeneꞌ par nic̱h naquəcheꞌ beṉəꞌ blaoch.
\v 5 Diozənꞌ bitoṉəꞌ yeꞌe ni tozə angl canꞌ gožeꞌ Xiꞌiṉeꞌenəꞌ, gožeꞌeneꞌ:
\q1 Lenꞌ nacoꞌ xiꞌiṉaꞌ.
\q1 Ṉeža babenaꞌ par nic̱h solao ṉabiꞌo len nadaꞌ.
\m Naꞌ nic ṉeꞌe güeꞌe dižəꞌ c̱he notəꞌətezə angl canꞌ gwṉeꞌ c̱he Xiꞌiṉeꞌenəꞌ, gwneꞌ:
\q1 Nadaꞌ gonaꞌ par nic̱h gacbiaꞌ nacaꞌ X̱eꞌ,
\q1 naꞌ gonaꞌ par nic̱h gacbiaꞌ de que naqueꞌ Xiꞌiṉaꞌ.
\m
\v 6 Xiꞌiṉ Diozənꞌ naqueꞌ ḻeꞌezelaogüe beṉəꞌ zaqueꞌe. Deꞌe naꞌanəꞌ catəꞌən Diozənꞌ bseḻeꞌeneꞌ yežlyonꞌ gwneꞌ:
\q1 Yoguəꞌəḻoḻ angl c̱hiaꞌ caꞌ cheyaḻəꞌ əsoꞌelaogüeꞌeneꞌ.
\m
\v 7 Nach gozneꞌ c̱he angl caꞌ:
\q1 Chonaꞌ par nic̱h angl c̱hiaꞌ caꞌ beṉəꞌ caꞌ chsoꞌon mendad c̱hiaꞌ
\q1 chsaꞌaqueꞌ ca beꞌ deꞌen chec̱hɉ naꞌ ca yiꞌ beḻ.
\m
\v 8 Naꞌ nžaꞌalə canꞌ beꞌe dižəꞌ len Xiꞌiṉeꞌenəꞌ gožeꞌeneꞌ:
\q1 Lenꞌ nacoꞌ Dioz naꞌ chnabiꞌo zeɉḻicaṉe.
\q1 Naꞌ ḻechguaḻe güen chnabiꞌo.
\q1
\v 9 Chebeidoꞌ deꞌen zda ḻicha naꞌ chgueꞌidoꞌ deꞌe malənꞌ.
\q1 Deꞌe naꞌanəꞌ nadaꞌ Diozənꞌ benꞌ choꞌelaogoꞌo
\q1 babenaꞌ par nic̱h zochoꞌ mbalazəch cle ca beṉəꞌ lɉuežɉoꞌ caꞌ.
\m
\v 10 Naꞌ deꞌe yoblə gož Diozənꞌ Xiꞌiṉeꞌenəꞌ:
\q1 Leꞌ nacoꞌ X̱an yežlyonꞌ.
\q1 Lenꞌ benoꞌon ža gwlasdaꞌote.
\q1 Naꞌ yoguəꞌ deꞌen chleꞌicho ḻeꞌe yobanꞌ, ḻeczə lenꞌ benoꞌon.
\m
\v 11-12 Naꞌ gwžin ža catəꞌ te c̱he yoguəꞌ deꞌen chleꞌicho ḻeꞌe yobanꞌ naꞌ yežlyo nga.
\q1 Pero leꞌ bito te c̱hioꞌ; syempr soczoꞌ zeɉḻicaṉe.
\q1 Naꞌ gwšaꞌ ḻeꞌe yobanꞌ naꞌ yežlyonꞌ ca to beṉəꞌ chšaꞌ xeꞌ catəꞌ babeyoin naꞌ chazeꞌ yeton.
\q1 Gonoꞌ len ḻeꞌe yobanꞌ naꞌ yežlyonꞌ canꞌ chon to beṉəꞌ catəꞌ chetobə xeꞌ.
\q1 Pero leꞌ, tozəczə canꞌ gacoꞌ zeɉḻicaṉe, naꞌ bito əžin iz ṉacho te c̱hioꞌ.
\m
\v 13 Diozənꞌ bitoṉəꞌ yeꞌe ni to angl ca deꞌen gožeꞌ Xiꞌiṉeꞌenəꞌ, gožeꞌeneꞌ:
\q1 Gwcheꞌedoꞌ cuitaꞌ nga ṉabiꞌacho txen,
\q1 naꞌ gonaꞌ par nic̱h ṉitəꞌ deꞌe caꞌ chsoꞌon contr leꞌ naꞌ beṉəꞌ contr c̱hioꞌ caꞌ xniꞌonəꞌ.
\m
\v 14 Ca naquə angl caꞌ, yogueꞌe zɉənaqueꞌ beṉəꞌ chsoꞌon mendad c̱he Diozənꞌ, chseḻeꞌe ḻegaꞌaqueꞌ par chsaꞌacleneꞌ chioꞌo bagwleɉ Diozənꞌ par nic̱h žɉəyezocho len ḻeꞌ.
\c 2
\s1 Cheyaḻəꞌ əgwzenagcho c̱he xtižəꞌ Diozənꞌ par nic̱h žɉəyezocho len ḻeꞌ
\p
\v 1 Naꞌ laogüe deꞌen naquə Xiꞌiṉ Diozənꞌ beṉəꞌ blaoch naꞌ beṉəꞌ zaquəꞌəche ca angl caꞌ, do yic̱hɉ do lažəꞌəcho cheyaḻəꞌ əgwzenagcho xtižeꞌenəꞌ deꞌen babenecho, c̱hedəꞌ laꞌ šə bito əgwzenagcho c̱hei do yic̱hɉ do lažəꞌəcho, guanḻažəꞌəchon naꞌ cueɉyic̱hɉchon.
\v 2 Ḻei c̱he Diozənꞌ deꞌen gosəꞌəyix̱ɉueꞌe angl caꞌ naquəczən deꞌe žialao xen. Naꞌ deꞌe naꞌanəꞌ Diozənꞌ bnežɉueꞌ castigw c̱he deꞌe x̱axtaꞌocho caꞌ batəꞌətezə cui bosoꞌozenagueꞌ c̱hei segon deꞌe mal deꞌen gwsoꞌon to togaꞌaqueꞌ.
\v 3 Naꞌ naquən segor de que Diozənꞌ goṉeꞌ chioꞌo castigw šə bito goncho canꞌ na X̱ancho Jesocristənꞌ. Zguaꞌatec X̱ancho Jesocristənꞌ beꞌe dižəꞌ güen juisy canꞌ cheyaḻəꞌ goncho par nic̱h žɉəyezocho len ḻeꞌ. Nach gwdenəꞌ beṉəꞌ caꞌ gosəꞌədalen ḻeꞌ ḻeczə bosoꞌozeɉniꞌineꞌ chioꞌo canꞌ gwneꞌenəꞌ, c̱hedəꞌ gosəꞌəṉezeneꞌ de que naquən güen.
\v 4 Naꞌ Diozənꞌ beneꞌ par nic̱h gwsoꞌoneꞌ miḻagr naꞌ bichlə deꞌe zaquəꞌ yebanecho, naꞌ Diozənꞌ bnežɉueꞌ ḻegaꞌaqueꞌ zan cḻas yeḻəꞌ guac, naꞌ Spirit c̱heꞌenəꞌ benən par nic̱h gwsoꞌoneꞌ deꞌe zan deꞌe güen len yeḻəꞌ guac c̱heinꞌ segon canꞌ gwyazlažəꞌ Diozənꞌ, par nic̱h əṉezecho de que xtižəꞌəgaꞌaqueꞌenəꞌ naquən deꞌe ḻi.
\s1 Goc Jesoꞌosənꞌ doxen canꞌ naquə chioꞌo beṉac̱h
\p
\v 5 Catəꞌ te c̱he yežlyo nga naꞌ gatəꞌ yežlyo cobə deꞌen choꞌa dižəꞌ c̱hei, Diozənꞌ bito goneꞌ ca yesəꞌənabiaꞌ angl caꞌ.
\v 6 Naꞌ nyoɉ canꞌ gwna deꞌe Rei Dabinꞌ gožeꞌ Diozənꞌ:
\q1 ¿Bixc̱henꞌ chacdoꞌ c̱he beṉac̱hənꞌ? ca naquə bitotec bi zɉəzaqueꞌe.
\q1 Naꞌ ¿bixc̱henꞌ chaclengaꞌacoꞌoneꞌ?
\q1
\v 7 Benoꞌ par nic̱h beṉac̱hənꞌ bito zɉənaqueꞌ beṉəꞌ blao canꞌ zɉənaquə angl caꞌ pero caguə syempr gaquən caꞌ.
\q1 Biaꞌaczə benoꞌ par nic̱h zɉəzaquəꞌ beṉac̱hənꞌ naꞌ bnežɉwgaꞌacoꞌoneꞌ yeḻəꞌ balaꞌaṉ.
\q1
\v 8 Benoꞌ par nic̱h yoguəꞌəḻoḻte deꞌe zɉəde əsaꞌaquən lao naꞌ beṉac̱hənꞌ,
\q1 naꞌ len yoguəꞌəḻoḻ bia caꞌ chsaꞌaš, ḻeczə əsaꞌaquəb lao naꞌagaꞌaqueꞌ.
\m Naꞌ ca naquə ben Diozənꞌ par nic̱h yoguəꞌəḻoḻte deꞌe zɉəde əsaꞌaquən lao naꞌ beṉac̱hənꞌ naꞌ yoguəꞌ bia caꞌ chsaꞌaš ḻeczə əsaꞌaquəb lao naꞌagaꞌaqueꞌ, deꞌe naꞌanəꞌ beṉac̱hənꞌ yesəꞌənabiꞌe lao yoguəꞌəte deꞌen zɉəde, ḻaꞌaṉəꞌəczə ṉaꞌa ṉezecho bitoṉəꞌ yesəꞌənabiꞌe.
\v 9 Naꞌ ca naquə Jesoꞌosənꞌ, žlac goqueꞌ beṉac̱h bito goqueꞌ beṉəꞌ blao canꞌ zɉənaquə angl caꞌ. Naꞌ deꞌe tant nžiꞌilažəꞌ Diozənꞌ chioꞌo beṉac̱h beneꞌ par nic̱h Jesoꞌosənꞌ bsanḻažəꞌ cuineꞌ por ni c̱hecho catəꞌən gwsoꞌot beṉəꞌ ḻeꞌ, naꞌ deꞌe naꞌanəꞌ Jesoꞌosənꞌ banziꞌe yeḻəꞌ balaꞌaṉ xen naꞌ banaquəchgüeꞌ beṉəꞌ zaqueꞌe.
\p
\v 10 Diozənꞌ beneꞌ bia chsaꞌaš, beneꞌ beṉac̱h naꞌ yeziquəꞌəchlə deꞌe zɉəde par nic̱h chziꞌe yeḻəꞌ balaꞌaṉ. Naꞌ beneꞌ güen ca deꞌen bsiꞌe xṉeze par nic̱h gwxaquəꞌəziꞌ Jesocristənꞌ benꞌ babebeɉ chioꞌo xniꞌa deꞌe malənꞌ. Naꞌ deꞌen gwxaquəꞌəziꞌenəꞌ chac choneꞌ par nic̱h beṉəꞌ zan əsaꞌaqueꞌ xiꞌiṉ Diozənꞌ naꞌ žɉəsyəꞌəniteꞌe len ḻeꞌ yobanꞌ.
\v 11 Jesoꞌosənꞌ bagwleɉeꞌ chioꞌo par naccho lažəꞌ naꞌ Diozənꞌ. Deꞌe naꞌanəꞌ txen len ḻeꞌ naccho xiꞌiṉ Diozənꞌ naꞌ bito chetoꞌineꞌ par əṉeꞌ c̱he chioꞌo de que naccho beṉəꞌ bišeꞌe naꞌ beṉəꞌ zaneꞌ.
\v 12 Quinga gwna Jesoꞌosənꞌ gožeꞌ Diozənꞌ:
\q1 Guaꞌa dižəꞌ par nic̱h beṉəꞌ bišaꞌa caꞌ naꞌ beṉəꞌ zanaꞌ caꞌ yesəꞌəṉezeneꞌ nonꞌ nacoꞌ.
\q1 Naꞌ lao zɉəndopə zɉənžagueꞌ chsoꞌelaogüeꞌe leꞌ,
\q1 nadaꞌ guaꞌa dižəꞌ ca beṉəꞌ güenṉəꞌ nacoꞌ.
\m
\v 13 Nach gwneꞌ:
\q1 Sotezə soaꞌ gonḻilažaꞌa Diozənꞌ.
\m Naꞌ deꞌe yoblə gozneꞌ:
\q1 Nga zoaꞌ txen len beṉəꞌ caꞌ beṉ Diozənꞌ nadaꞌ par nic̱h zɉənaqueꞌ xiꞌiṉaꞌ.
\p
\v 14 Naꞌ chioꞌo naccho beṉəꞌ beləꞌ chen, chioꞌonəꞌ naccho xiꞌiṉeꞌ. Deꞌe naꞌanəꞌ ḻeczə ḻeꞌ golɉeꞌ goqueꞌ beṉəꞌ beləꞌ chen naꞌ bsanḻažəꞌ cuineꞌ gwsoꞌot beṉəꞌ ḻeꞌ par nic̱h bṉitlaogüeꞌ yeḻəꞌ gwnabiaꞌ c̱he gwxiyeꞌen deꞌen chon par nic̱h chatcho.
\v 15 Beneꞌ par nic̱h chioꞌo chonḻilažəꞌəchoneꞌ bitoch žebcho gatcho. Beṉəꞌ caꞌ cui chsoꞌonḻilažeꞌeneꞌ syempr chəsəꞌəžebeꞌ saꞌateꞌ.
\v 16 Jesoꞌosənꞌ bideꞌ yežlyo nga caguə par gocleneꞌ angl caꞌ, sino par gocleneꞌ beṉəꞌ caꞌ chsoꞌonḻilažəꞌ Diozənꞌ canꞌ benḻilažəꞌ deꞌe Abraanṉəꞌ Diozənꞌ.
\v 17 Benən byen goc Jesoꞌosənꞌ doxen canꞌ naquə chioꞌo beṉac̱h par nic̱h caꞌ chacleneꞌ chioꞌo lao Diozənꞌ canꞌ gwsoꞌon deꞌe bx̱oz əblao caꞌ len deꞌe x̱axtaꞌo chioꞌo beṉəꞌ Izrael gwsaꞌacleneꞌ ḻegaꞌaqueꞌ. Cheyašəꞌ chežiꞌilažəꞌ Jesoꞌosənꞌ chioꞌo naꞌ choneꞌ complir canꞌ neꞌenəꞌ. Canꞌ chon Jesoꞌosənꞌ beꞌenəꞌ checaꞌa xtoḻəꞌ chioꞌo chonḻilažəꞌəchoneꞌ.
\v 18 Jesoꞌosənꞌ cuat beneꞌ deꞌe mal pero bžaglaogüeꞌ catəꞌən gwloꞌoyeḻəꞌ gwxiyeꞌen ḻeꞌ par goneꞌ deꞌe malənꞌ naꞌ catəꞌ goc bitəꞌətezəchlə deꞌe mal len ḻeꞌ. Deꞌe naꞌanəꞌ ṉezeneꞌ naclənꞌ choneꞌ chacleneꞌ chioꞌo catəꞌ chgoꞌoyeḻəꞌ gwxiyeꞌen chioꞌo par goncho deꞌe malənꞌ naꞌ catəꞌ chac bitəꞌətezə deꞌe mal len chioꞌo.
\c 3
\s1 Jesoꞌosənꞌ zaquəꞌəcheꞌ cle ca deꞌe Moisezənꞌ
\p
\v 1 Beṉəꞌ bišəꞌ, laogüe deꞌen bagwleɉ Diozənꞌ yoguəꞌ chioꞌo par naccho lažəꞌ neꞌenəꞌ, cheyaḻəꞌ goncho xbab c̱he Cristo Jesoꞌosənꞌ benꞌ bseḻəꞌ Diozənꞌ par naqueꞌ bx̱oz əblao c̱hecho. Diozənꞌ bseḻeꞌeneꞌ bedətix̱ɉuiꞌe xtižeꞌenəꞌ deꞌen cheɉḻeꞌecho c̱hei.
\v 2 Diozənꞌ gwleɉeꞌ ḻeꞌ par chacleneꞌ chioꞌo ca to bx̱oz əblao. Naꞌ Jesoꞌosənꞌ lao bideꞌ yežlyonꞌ naꞌ ṉaꞌa choneꞌ con canꞌ na Diozənꞌ, caꞌaczənꞌ ben deꞌe Moisezənꞌ benꞌ ḻeczə gocleneꞌ yoguəꞌ beṉəꞌ gwsaꞌac famiḻy c̱he Diozənꞌ.
\v 3 Pero naꞌ Jesoꞌosənꞌ zaquəꞌəcheꞌ cle ca Moisezənꞌ. Jesoꞌos naꞌanəꞌ bx̱ieꞌ famiḻy c̱he Diozənꞌ ca deꞌen beneꞌ par nic̱h chioꞌo chonḻilažəꞌəcho Diozənꞌ ṉaꞌa naꞌ len beṉəꞌ caꞌ gwsoꞌonḻilažəꞌ ḻeꞌ canaꞌ naccho famiḻy c̱he Diozənꞌ. Naꞌ ca naquə deꞌe Moisezənꞌ ža, goqueꞌ con to beṉəꞌ lao famiḻy c̱he Diozənꞌ.
\v 4 Naꞌ gwnitəꞌ beṉəꞌ bx̱e to to famiḻy nitəꞌ lao yežlyonꞌ, pero Jesoꞌosənꞌ caguə bx̱ieꞌ famiḻy c̱he Dioz naꞌazənꞌ, sino ḻeczə bx̱ieꞌ yoguəꞌəte deꞌe zɉəde, c̱hedəꞌ ḻenꞌ naqueꞌ Dioz.
\v 5 Naꞌ ca naquə deꞌe Moisezənꞌ, beneꞌ canꞌ gwna Diozənꞌ par gocleneꞌ yoguəꞌ beṉəꞌ gwsaꞌac famiḻy c̱he Diozənꞌ ḻaꞌaṉəꞌəczə goqueꞌ con to xmos Diozənꞌ. Naꞌ deꞌe Moisezənꞌ beꞌe dižəꞌ c̱he deꞌe caꞌ zeꞌe əsaꞌac ca tyempənꞌ deꞌe caꞌ bagwsaꞌaquən ṉaꞌa.
\v 6 Cristənꞌ ḻeczə beneꞌ complir canꞌ gwna Diozənꞌ par gocleneꞌ beṉəꞌ zɉənaquə famiḻy c̱he Diozənꞌ. Naꞌ beneꞌ caꞌ c̱hedəꞌ naquəczeꞌ Xiꞌiṉ Diozənꞌ, caguə ca to mos. Naꞌ famiḻy c̱he Dioz naꞌanəꞌ naquə chioꞌo šə zotezə zocho chonḻilažəꞌəcho Diozənꞌ do yic̱hɉ do lažəꞌəcho catəꞌən yidə Cristənꞌ deꞌe yoblə, naꞌ šə chebeicho deꞌen yidə Cristənꞌ.
\s1 Guaquə socho mbalaz len Diozənꞌ
\p
\v 7-8 Cheyaḻəꞌ goncho xbab canꞌ gwna Spirit c̱he Diozənꞌ deꞌen nyoɉən nga:
\q1 Catəꞌ Diozənꞌ əṉeꞌ to deꞌe gonḻe ṉaꞌa,
\q1 bito gacle beṉəꞌ godenag canꞌ gwsaꞌac beṉəꞌ Izrael caꞌ canaꞌ
\q1 catəꞌ gwsoꞌoneꞌ contr Diozənꞌ latɉə dašənꞌ.
\q1 Gwsoꞌoneꞌ prueb šə ḻeineꞌ de que gwnežɉueꞌ castigw c̱hegaꞌaqueꞌenəꞌ.
\q1
\v 9 Nach Diozənꞌ gwneꞌ:
\q1 Deꞌe x̱axtaꞌole caꞌ bito gwseꞌeɉḻeꞌe c̱hiaꞌ ḻaꞌaṉəꞌəczə c̱hoa iz besəꞌəleꞌineꞌ deꞌe caꞌ benaꞌ par goquəlengaꞌacaꞌaneꞌ.
\q1 Con gwsoꞌoneꞌ prueb šə ḻeidaꞌanəꞌ.
\q1
\v 10 Deꞌe naꞌanəꞌ bito bebeigaꞌacdaꞌaneꞌ,
\q1 naꞌ gwniaꞌ: “Do tyemp naquəgaꞌaqueꞌ beṉəꞌ yic̱hɉlaꞌaždaoꞌ žod,
\q1 bitoṉəꞌ seꞌeneneꞌ seꞌeɉniꞌineꞌ canꞌ chonaꞌ.”
\q1
\v 11 Naꞌ deꞌen bžaꞌa ḻegaꞌaqueꞌ deꞌe nanꞌ gwniaꞌ c̱hegaꞌaqueꞌ de que cuat ṉiteꞌe mbalaz len nadaꞌ.
\p
\v 12 Ḻegapə cuidad beṉəꞌ bišəꞌ, par nic̱h ni tole cui gacle beṉəꞌ yic̱hɉlaꞌaždaoꞌ mal. Ḻesotezə ḻeso ḻegonḻilažəꞌ Diozənꞌ par nic̱h cui cueɉyic̱hɉleneꞌ c̱hedəꞌ ḻeꞌenəꞌ zoeꞌ zeɉḻicaṉe.
\v 13 Žlac ṉaꞌa ṉeꞌe de tyemp par əgwzenagle c̱he Diozənꞌ, ḻegwtiplažəꞌ lɉuežɉle tža tža par nic̱h cui gonḻe deꞌe malənꞌ, laꞌ catəꞌ choncho deꞌe malənꞌ chx̱oayaguən chioꞌo par nic̱h cuich bi bi chaquecho catəꞌən chonchchon.
\v 14 Ngodəꞌəcho txen len Cristənꞌ šə ṉeꞌe zotezə zocho chonḻilažəꞌəchoneꞌ catəꞌən yideꞌ deꞌe yoblə con canꞌ gwzolaoczcho chonḻilažəꞌəchoneꞌ.
\p
\v 15 Naꞌ nyoɉ Xtižəꞌ Diozənꞌ par chioꞌo ganꞌ nan:
\q1 Catəꞌ Diozənꞌ əṉeꞌ to deꞌe gonḻe ṉaꞌa
\q1 bito gacle beṉəꞌ godenag canꞌ gwsaꞌac beṉəꞌ Izrael caꞌ canaꞌ.
\m
\v 16 Naꞌ deꞌen nyoɉən nan caꞌ choꞌen dižəꞌ c̱he beṉəꞌ caꞌ ɉəsyəꞌənao deꞌe Moisezənꞌ catəꞌən ɉəyeleɉeꞌ ḻegaꞌaqueꞌ Egiptonꞌ. Bosoꞌozenagueꞌ canꞌ ben Diozənꞌ mendad par besyəꞌəchoɉeꞌ Egiptonꞌ, pero beyožzə besyəꞌəchoɉeꞌenəꞌ bitoch bosoꞌozenagueꞌ c̱heꞌ.
\v 17 Deꞌe naꞌanəꞌ bžeꞌe ḻegaꞌaqueꞌ c̱hoa iz deꞌen gwsoꞌoneꞌ deꞌe malənꞌ cuich bosoꞌozenagueꞌ c̱heꞌ, naꞌ gwsaꞌateꞌ latɉə dašənꞌ.
\v 18 Naꞌ Diozənꞌ gwneꞌ de que cuat ṉiteꞌe mbalaz len ḻeꞌ c̱hedəꞌ cui bosoꞌozenagueꞌ c̱heꞌ.
\v 19 Naꞌ ṉezecho de que yeḻəꞌ godenag c̱hegaꞌaqueꞌenəꞌ cui goquə ṉiteꞌe mbalaz len ḻeꞌ.
\c 4
\p
\v 1 Ṉaꞌa ža, ṉezecho canꞌ goc c̱he beṉəꞌ godenag caꞌ beṉəꞌ caꞌ gwsaꞌat latɉə dašənꞌ. Deꞌe naꞌanəꞌ cheyaḻəꞌ žebcho par nic̱h cui goncho canꞌ gwsoꞌoneꞌenəꞌ, c̱hedəꞌ šə goncho canꞌ gwsoꞌoneꞌenəꞌ bito gaquə socho mbalaz len Diozənꞌ canꞌ beneꞌ lyebe.
\v 2 Babenecho to dižəꞌ güen dižəꞌ cobə de que guaquə socho mbalaz len Diozənꞌ ca dižəꞌ deꞌen gwseꞌene ḻegaꞌaqueꞌ. Pero ca naquə ḻegaꞌaqueꞌ deꞌen cui gwseꞌeɉḻeꞌe c̱hei, deꞌe nanꞌ bito goquəlenən ḻegaꞌaqueꞌ.
\v 3 Naꞌ chioꞌo cheɉḻeꞌecho c̱he deꞌen na Diozənꞌ bazocho mbalaz len ḻeꞌ. Deꞌe naꞌanəꞌ bito na Diozənꞌ c̱hecho canꞌ gwneꞌ c̱he beṉəꞌ caꞌ gwneꞌ:
\q1 Deꞌen bžaꞌa ḻegaꞌaqueꞌ naꞌ gwniaꞌ de que cuat ṉiteꞌe mbalaz len nadaꞌ.
\m Naꞌ ca naquə Diozənꞌ ṉezecho babeyož bx̱ieꞌ yobanꞌ naꞌ yežlyonꞌ naꞌ deꞌe naꞌanəꞌ zoeꞌ mbalaz.
\v 4 Canꞌ nyoɉ to part Xtižeꞌenəꞌ nan:
\q1 X̱op ža ben Diozənꞌ yobanꞌ, yežlyonꞌ, beṉac̱hənꞌ, bia yix̱əꞌən naꞌ biquəꞌəchlə deꞌe zɉəde.
\q1 Naꞌ catəꞌ bžin ža gažənꞌ, bitoch bi bi beneꞌ, con zoeꞌ mbalaz.
\m
\v 5 Naꞌ deꞌe yoblə goncho xbab c̱he deꞌen gwneꞌ:
\q1 Cuat ṉiteꞌe mbalaz len nadaꞌ.
\m
\v 6 Deꞌe ḻi baḻə beṉəꞌ ṉiteꞌe mbalaz len Diozənꞌ. Pero ca naquə beṉəꞌ caꞌ gwseꞌeneneꞌ dižəꞌ güen dižəꞌ cobə c̱heꞌenəꞌ canaꞌate, bito goquə ṉiteꞌe mbalaz len ḻeꞌ c̱hedəꞌ bito bosoꞌozenagueꞌ c̱heꞌ.
\v 7 Naꞌ catəꞌ bagwde zan iz Diozənꞌ gwneꞌ deꞌe yoblə de que guaquə ṉitəꞌ beṉəꞌ mbalaz len ḻeꞌ. Beneꞌ par nic̱h bzoɉ deꞌe Rei Dabinꞌ dižə deꞌen na:
\q1 Catəꞌ Diozənꞌ əṉeꞌ to deꞌe gonḻe ṉaꞌa bito gacle beṉəꞌ godenag.
\m
\v 8 Deꞌe Josuenꞌ gwc̱heꞌe deꞌe x̱axtaꞌo chioꞌo beṉəꞌ Izrael ganꞌ gosəꞌəziꞌe yežlyonꞌ deꞌen bnežɉw Diozənꞌ ḻegaꞌaqueꞌ. Pero ḻegaꞌaqueꞌ bito gwniteꞌe mbalaz len Diozənꞌ. Deꞌe naꞌanəꞌ gwdechlə Diozənꞌ beneꞌ par nic̱h deꞌe Dabinꞌ bzoɉeꞌ gwneꞌ de que gwžin ža ṉitəꞌ beṉəꞌ mbalaz len ḻeꞌ.
\v 9 Nachənꞌ ṉezecho de que chioꞌo chonḻilažəꞌəcho Diozənꞌ chac socho mbalaz len ḻeꞌ.
\v 10 Naꞌ beṉəꞌ caꞌ banitəꞌ mbalaz len Diozənꞌ bitoch chsoꞌoneꞌ canꞌ na xbab c̱hegaꞌaqueꞌenəꞌ, sino que chsoꞌoneꞌ canꞌ na Diozənꞌ. Deꞌe naꞌanəꞌ nacho de que niteꞌe mbalaz canꞌ zo Diozənꞌ deꞌen beyož bx̱ieꞌ yoguəꞌ deꞌe caꞌ zɉəde.
\v 11 Naꞌ cheyaḻəꞌ yeyilɉlažəꞌəcho nac goncho par nic̱h socho mbalaz len Diozənꞌ. Cheyaḻəꞌ gwzenagcho c̱heꞌ par nic̱h caꞌ ni tocho cui gac c̱hecho canꞌ goc c̱he deꞌe x̱axtaꞌocho caꞌ deꞌen cui bosoꞌozenagueꞌ c̱he Diozənꞌ.
\p
\v 12 Xtižəꞌ Diozənꞌ chazən ḻoꞌo yic̱hɉlaꞌaždaoꞌ beṉəꞌ, naꞌ chaclenən notəꞌətezə chosoꞌozenag c̱hei. Naꞌ gwxaquəꞌəleben ca to spad deꞌen nḻachgua c̱hopə ḻaꞌate. Pero mazəchlə canꞌ chon to spad chon Xtižəꞌ Diozənꞌ, c̱hedəꞌ chloꞌin chioꞌo no c̱heinꞌ chzenagcho, əc̱he Spirit c̱he Diozənꞌ o šə c̱he laꞌaždaꞌomalchonꞌ. Ḻeczə caꞌ chzeɉniꞌin chioꞌo c̱he xbab deꞌen yoꞌo ḻoꞌo yic̱hɉlaꞌaždaꞌochonꞌ naꞌ c̱he yoguəꞌəḻoḻ deꞌen chzelažəꞌəcho šə naquən güen o šə naquən mal. Deꞌe naꞌanəꞌ gwxaquəꞌəleben ca to spad deꞌe chc̱hog entr bec̱hɉ bnia caꞌ naꞌ entr bin caꞌ.
\v 13 Diozənꞌ ṉeze nḻeꞌineꞌ to to beṉac̱h, naꞌ to to angl, naꞌ to to deꞌe x̱ioꞌ, naꞌ cuantzə bi deꞌen zɉəde. Diozənꞌ ṉeze nḻeꞌineꞌ yic̱hɉlaꞌaždaꞌochonꞌ. Naꞌ laogüeꞌ naꞌanəꞌ əgwdecho cuent šə biquəꞌ deꞌe babencho.
\s1 Jesoꞌosənꞌ naqueꞌ bx̱oz əblao c̱hechonꞌ
\p
\v 14 Jesoꞌos Xiꞌiṉ Diozənꞌ babeyepeꞌ yobanꞌ ganꞌ zo Diozənꞌ par gaquəleneꞌ chioꞌo. Deꞌe naꞌanəꞌ Jesoꞌosənꞌ naqueꞌ bx̱oz əblao c̱hecho, benꞌ naquə ḻeꞌezelaogüe beṉəꞌ zaqueꞌe. Naꞌ deꞌe naꞌanəꞌ cheyaḻəꞌ sotezə socho gonḻilažəꞌəchoneꞌ canꞌ chonczcho.
\v 15 Naꞌ Jesoꞌosənꞌ, benꞌ naquə bx̱oz əblao c̱hechonꞌ, chacbeꞌineꞌ catəꞌ chaquecho zdebə goncho to deꞌe güen. Gwxiyeꞌen gwloꞌoyeḻəꞌən ḻeꞌ goneꞌ deꞌe mal pero bito beneꞌen naꞌ bžaglaogüeꞌ cayaṉəꞌən chžaglao chioꞌo beṉac̱h.
\v 16 Naꞌ cheyaḻəꞌ güeꞌelencho Diozənꞌ dižəꞌ sin cui žebcho, əṉabechoneꞌ yeziꞌixeneꞌ c̱hecho naꞌ gaquəleneꞌ chioꞌo batəꞌətezə chyažɉecho yeḻəꞌ chaclen c̱heꞌenəꞌ, c̱hedəꞌ ḻeꞌenəꞌ nžiꞌilažeꞌe chioꞌo.
\c 5
\p
\v 1 Beṉəꞌ caꞌ besəꞌəchoɉ gwsaꞌaqueꞌ bx̱oz əblao c̱he ṉasyon Izrael c̱hechonꞌ tyemp deꞌen bagwde ɉsoꞌe bi deꞌen ɉsoꞌe lao Diozənꞌ naꞌ gwsoꞌoteꞌ bia yix̱əꞌ besəꞌəlalɉeꞌ xc̱hengaꞌaquəbənꞌ par nic̱h Diozənꞌ beziꞌixeneꞌ xtoḻəꞌ deꞌe x̱axtaꞌocho caꞌ. Naꞌ yoguəꞌ bx̱oz caꞌ gwsaꞌaqueꞌ con to beṉəꞌ.
\v 2 Naꞌ bx̱oz əblao caꞌ gwsaꞌapeꞌ yeḻəꞌ chxenḻažəꞌ len beṉəꞌ caꞌ cuiṉəꞌ seꞌeɉniꞌi canꞌ cheyaḻəꞌ soꞌoneꞌ naꞌ len beṉəꞌ caꞌ bazɉənxoayag len deꞌe malənꞌ, c̱hedəꞌ ḻeczə beṉac̱hənꞌ zɉənaqueꞌ naꞌ naquən zdebə par soꞌoneꞌ deꞌe güenṉəꞌ.
\v 3 Naꞌ deꞌen zɉənaqueꞌ beṉac̱hənꞌ benən byen gwsoꞌoteꞌ bia yix̱əꞌ naꞌ besəꞌəḻalɉə xc̱hengaꞌaquəbənꞌ par gosəꞌəṉabeꞌ yeziꞌixen Diozənꞌ xtoḻəꞌəgaꞌaqueꞌenəꞌ canꞌ gosəꞌəṉabeꞌ yeziꞌixeneꞌ xtoḻəꞌ beṉəꞌ caꞌ yeḻaꞌ.
\p
\v 4 Naꞌ notono gwleɉ cuineꞌ par gaqueꞌ bx̱oz əblao, sino Diozənꞌ gwleɉgaꞌaqueneꞌ canꞌ gwleɉeꞌ deꞌe Ronṉəꞌ.
\v 5 Ḻeꞌegatezə caꞌ Cristənꞌ bito ben cuineꞌ xen cueɉlize cuineꞌ par gaqueꞌ bx̱oz əblao. Diozənꞌ gwleɉeꞌeneꞌ naꞌ Dioz naꞌanəꞌ gožeꞌeneꞌ:
\q1 Lenꞌ nacoꞌ Xiꞌiṉaꞌ.
\q1 Ṉeža babenaꞌ par nic̱h solao ṉabiꞌo len nadaꞌ.
\m
\v 6 Naꞌ ga yoblə nyoɉ yeto deꞌen gožeꞌeneꞌ:
\q1 Nacoꞌ bx̱oz beṉəꞌ zo zeɉḻicaṉe,
\q1 naꞌ nacoꞌ ca bx̱oz Melquisedequənꞌ.
\m
\v 7 Naꞌ Jesoꞌosənꞌ catəꞌ gwzoeꞌ yežlyo nga beneꞌ orasyon lao X̱eꞌ Diozənꞌ benꞌ gac yosleꞌeneꞌ par nic̱h cui gateꞌ. Jesoꞌosənꞌ gwṉeꞌ zižɉo naꞌ gwchežeꞌ gwṉabeꞌ yeḻəꞌ chaclen c̱heꞌ, naꞌ Diozənꞌ bzenagueꞌ naꞌ beneꞌ par nic̱h yeḻəꞌ gotənꞌ cui gwnabiꞌan ḻeꞌ c̱hedəꞌ benḻilažeꞌeneꞌ.
\v 8 Naꞌ ḻaꞌaṉəꞌəczə Jesoꞌosənꞌ naqueꞌ Xiꞌiṉ Dioz, Diozənꞌ bzeɉniꞌineꞌ ḻeꞌ de que cheyaḻəꞌ əžaglaogüeꞌ par yeyož goneꞌ yoguəꞌəḻoḻ deꞌe caꞌ naquən goneꞌ. Deꞌe naꞌanəꞌ Jesoꞌosənꞌ bžaglaogüeꞌ len yoguəꞌəḻoḻ deꞌen goc c̱heꞌ yežlyo nga.
\v 9 Naꞌ beyož goc c̱he Jesoꞌosənꞌ yoguəꞌəḻoḻ canꞌ goneꞌe Diozənꞌ, nach gwzolao choneꞌ par nic̱h yoguəꞌəḻoḻ beṉəꞌ caꞌ chosoꞌozenag c̱heꞌ, ṉiteꞌe len ḻeꞌ zeɉḻicaṉe.
\v 10 Diozənꞌ gwleɉeꞌ ḻeꞌ par naqueꞌ bx̱oz əblao c̱hecho naꞌ gwxaquəꞌəlebeneꞌ ca bx̱oz Melquisedequənꞌ.
\s1 Gapcho cuidad par nic̱h cui cueɉyic̱hɉcho xtižəꞌ Diozənꞌ deꞌen bacheɉḻeꞌecho c̱hei
\p
\v 11 Naꞌ ṉeꞌe dech deꞌe zan deꞌen cheꞌendaꞌ əṉiaꞌ leꞌe c̱he deꞌen naquə Jesoꞌosənꞌ bx̱oz c̱hechonꞌ, pero naquən zdebə əṉiꞌan par šeɉniꞌilen, c̱hedəꞌ bitoch chebeile gwzenagle c̱he Diozənꞌ.
\v 12 Bagoḻəꞌ əgwsed əgwloꞌile beṉəꞌ yeziquəꞌəchlə xtižeꞌenəꞌ, pero latɉe deꞌe gonḻe caꞌ, chyažɉlele to beṉəꞌ par əgwsed əgwloꞌineꞌ leꞌe deꞌe yoblə ca deꞌen babsedle deꞌe nechənꞌ. Naꞌ laogüe deꞌen chyažɉele əgwsedəchle deꞌe caꞌ, gwxaquəꞌəlebele ca bidaoꞌ caꞌ ṉeꞌe chsaꞌažəꞌ, biꞌi cuiṉəꞌ gac saꞌo.
\v 13 Naꞌ benꞌ naquə ca bidaoꞌ ṉeꞌe chažəꞌ, bitoṉəꞌ šeɉniꞌineꞌ xtižə Diozənꞌ deꞌen naquəch zdebə.
\v 14 Naꞌ xtižəꞌ Diozənꞌ deꞌen naquəch zdebə gwxaquəꞌəleben ca yeḻəꞌ guao deꞌen chao beṉəꞌ chaꞌo. Naꞌ beṉəꞌ caꞌ chseꞌeɉniꞌi ḻen chsaꞌacbeꞌineꞌ c̱he bitəꞌətezə dižə šə naquən deꞌe ḻi o šə naquən dižəꞌ güenḻažəꞌ. Chsaꞌacbeꞌineꞌ c̱hedəꞌ laꞌ bazɉəyoꞌolaogüeꞌ chosoꞌozenagueꞌ c̱he Diozənꞌ.
\c 6
\p
\v 1 Naꞌ ca bidaoꞌ caꞌ chəsəꞌəzolao chsaꞌoboꞌ yeḻəꞌ guao catəꞌ bazɉənchaꞌoboꞌ caꞌaczənꞌ chioꞌo cheyaḻəꞌ solaocho cueꞌ yic̱hɉcho c̱he xtižəꞌ Diozənꞌ deꞌen naquəch zdebə par nic̱h gaquəch yic̱hɉlaꞌaždaꞌochonꞌ canꞌ naquə yic̱hɉlaꞌaždaoꞌ Cristənꞌ. Catəꞌən gwzolao benḻilažəꞌəcho Cristənꞌ gwyeɉniꞌicho canꞌ yediṉɉecho xtoḻəꞌəchonꞌ naꞌ bediṉɉechon. Naꞌ ṉaꞌa bitoch chyažɉən yediṉɉecho c̱he deꞌe caꞌ deꞌe yoblə, naꞌ nic chyažɉən yezolaocho gonḻilažəꞌəchoneꞌ deꞌe yoblə.
\v 2 Baṉezczecho bi zeɉen catəꞌən chchoꞌacho nisənꞌ, naꞌ ḻeczə canꞌ baṉezecho bi zeɉen catəꞌən chx̱oa naꞌachonꞌ yic̱hɉ beṉəꞌ yoblə chṉabcho yeḻəꞌ chaclen c̱he Diozənꞌ par ḻegaꞌaqueꞌ naꞌ bitoch chyažɉən no gwzeɉniꞌiche chioꞌo bi zeɉe deꞌe caꞌ. Ḻeꞌegatezə caꞌ bitoch chyažɉecho no gwzeɉniꞌiche chioꞌo canꞌ yoḻis yosban Diozənꞌ beṉəꞌ guat caꞌ o canꞌ goneꞌ yeḻəꞌ jostis c̱he beṉəꞌ caꞌ chsoꞌon deꞌe malənꞌ. Baṉezczegaꞌaquechonṉəꞌ.
\v 3 Pero ṉaꞌa ža, šə Diozənꞌ güeꞌe latɉə yeyilɉlažəꞌəcho nac goncho par nic̱h gaquə yic̱hɉlaꞌaždaꞌochonꞌ canꞌ naquə yic̱hɉlaꞌaždaoꞌ Cristənꞌ.
\p
\v 4 Ṉitəꞌ beṉəꞌ bachseꞌeɉniꞌi xtižəꞌ Diozənꞌ naꞌ bazɉənapeꞌ yeḻəꞌ mban zeɉḻicaṉe deꞌen choṉ Diozənꞌ chioꞌo chonḻilažəꞌəchoneꞌ, naꞌ ḻeczə caꞌ bazo Spirit c̱he Diozənꞌ ḻoꞌo yic̱hɉlaꞌaždaꞌogaꞌaqueꞌenəꞌ.
\v 5 Bazɉəṉezeneꞌ ca güenṉəꞌ naquə xtižəꞌ Diozənꞌ naꞌ bazɉənombiꞌe miḻagr naꞌ bichlə yeḻəꞌ guac c̱he Diozənꞌ ḻaꞌaṉəꞌəczə zeꞌe yesəꞌəleꞌicheneꞌ yeḻəꞌ guac deꞌen gwloꞌecheꞌ catəꞌ əžin ža gatəꞌ yežlyo cobə.
\v 6 Naꞌ šə gwžinclə ža yesəꞌəgueꞌi beṉəꞌ caꞌ Diozənꞌ šə yesəꞌəbeɉyic̱hɉcleꞌ xtižeꞌenəꞌ, bitoch gaquə yesyəꞌədiṉɉeneꞌ xtoḻəꞌəgaꞌaqueꞌenəꞌ deꞌe yoblə, c̱hedəꞌ ḻoꞌo yic̱hɉlaꞌaždaꞌogaꞌaqueꞌenəꞌ soꞌoneꞌ txen len beṉəꞌ caꞌ bosoꞌodaꞌ Xiꞌiṉ Diozənꞌ ḻeꞌe yag corozənꞌ, naꞌ soꞌoneꞌ par nic̱h beṉəꞌ yeziquəꞌəchlə ḻeczə yesəꞌəgueꞌineꞌ ḻeꞌ.
\v 7 Ca naquə yežlyo güen ganꞌ chsaꞌaz beṉəꞌ, šə chacchgua yeɉonꞌ, nach chac deꞌen chsaꞌazeꞌenəꞌ naꞌ chatəꞌ deꞌen chəsəꞌəyažɉeneꞌ, naꞌ Diozənꞌ chebeineꞌ deꞌe chac cwseš c̱hegaꞌaqueꞌenəꞌ. Canꞌ gwxaquəꞌəlebecho šə zotezə zocho chzenagcho c̱he Diozənꞌ.
\v 8 Pero šə bagwleɉyic̱hɉcho cuich chzenagcho c̱he Diozənꞌ gwxaquəꞌəlebecho ca yežlyonꞌ ganꞌ chḻaꞌac por yag yešəꞌ naꞌ no yix̱əꞌ cuan deꞌe cui chac gaocho. Yežlyonꞌ deꞌen nac caꞌ bito bi bi zaquəꞌən par x̱an yežlyonꞌ, nach chbeɉyic̱hɉeꞌen naꞌ chžin ža catəꞌ chzeyeꞌ deꞌe caꞌ chlaꞌac laogüenṉəꞌ.
\s1 Zotezə zocho chonḻilažəꞌəcho Diozənꞌ c̱hedəꞌ ṉezecho žɉəyezocho len ḻeꞌ
\p
\v 9 Naꞌ ca naquə leꞌe, ḻaꞌaṉəꞌəczə babiꞌa dižəꞌən caꞌ, chacdaꞌ c̱hele, naꞌ zoaꞌ segor bito gonḻe canꞌ bagwniaꞌ chsoꞌon beṉəꞌ caꞌ. Ṉezdaꞌ gonšgaczle canꞌ cheyaḻəꞌ goncho laogüe deꞌen babebeɉ Diozənꞌ chioꞌo xniꞌa deꞌe malənꞌ.
\v 10 Diozənꞌ naqueꞌ beṉəꞌ güen. Naꞌ bito ganḻažeꞌe canꞌ babenḻe xšineꞌenəꞌ, naꞌ canꞌ ṉeꞌe chonczlen ṉaꞌa chaclenḻe yeziquəꞌəchlə beṉə bagwleɉeꞌ par zɉənaqueꞌ lažəꞌ neꞌenəꞌ, chonḻen laogüe deꞌen chaquele c̱heꞌenəꞌ.
\v 11 Ṉezele žɉəyezole len Cristənꞌ. Naꞌ deꞌe naꞌanəꞌ yedote žlac cuiṉəꞌ yideꞌ deꞌe yoblə cheyaḻəꞌ cueꞌ yic̱hɉle deꞌen žɉəyezole len ḻeꞌ, canꞌ bachiꞌ yic̱hɉle ṉaꞌa par chaclen lɉuežɉle.
\v 12 Bito gacle beṉəꞌ godenag len xtižəꞌ Diozənꞌ. Ḻegonḻilažəꞌ Diozənꞌ canꞌ bagwsoꞌon beṉəꞌ caꞌ bagwnitəꞌ, beṉəꞌ caꞌ gosəꞌəziꞌ deꞌen ben Diozənꞌ lyebe əgwnežɉueꞌ ḻegaꞌaqueꞌ. Ḻaꞌaṉəꞌəczə cui gosəꞌəziꞌen cate, con gwsoꞌonḻilažəꞌətezeꞌeneꞌ.
\p
\v 13 Diozənꞌ beneꞌ lyebe de que xiꞌiṉ dia c̱he deꞌe Abraanṉəꞌ əsaꞌaqueꞌ beṉəꞌ zan. Naꞌ deꞌen naqueꞌ Dioz naꞌ notoch no no nḻaꞌ beṉəꞌ yoblə beṉəꞌ napəch yeḻəꞌ gwnabiaꞌ cle ca ḻeꞌ, deꞌe naꞌanəꞌ bzo cuineꞌ testigw gwneꞌ: “Guaquəczə canꞌ niaꞌanəꞌ c̱hedəꞌ zoaꞌ nacaꞌ Dioz.”
\v 14 Gwneꞌ: “Deꞌe ḻi gonczaꞌ par nic̱h gaquə güen c̱hioꞌ. Naꞌ deꞌe ḻi gonczaꞌ par nic̱h xiꞌiṉ dia c̱hioꞌonəꞌ əsaꞌaqueꞌ beṉəꞌ zan.”
\v 15 Naꞌ sša gwzo deꞌe Abraanṉəꞌ benḻilažəꞌətezeꞌ Diozənꞌ xte que bžin ža goc canꞌ ben Diozənꞌ lyebe len ḻeꞌ.
\v 16 Beṉac̱hənꞌ chəsəꞌəzoeꞌ jorament chəsəꞌəneꞌ de que beꞌenəꞌ chnabiaꞌach ca ḻegaꞌaqueꞌ gwnežɉueꞌ castigw c̱hegaꞌaqueꞌ šə cui soꞌoneꞌ complir canꞌ chosoꞌozoeꞌ jorament. Chsoꞌoneꞌ caꞌ par nic̱h beṉəꞌ caꞌ chsaꞌacyožə ḻegaꞌaqueꞌ seꞌeɉḻeꞌe c̱hegaꞌaqueꞌ naꞌ yesyəꞌəyacxenḻažeꞌe.
\v 17 Beṉəꞌ caꞌ chon Diozənꞌ cuent zɉənaqueꞌ xiꞌiṉ dia c̱he deꞌe Abraanṉəꞌ laogüe deꞌen chsoꞌonḻilažeꞌe Diozənꞌ, Diozənꞌ beneꞌ par nic̱h nitəꞌəchgüeꞌ segor de que guaquəczə canꞌ beneꞌ lyebe, naꞌ bito chšeꞌe canꞌ bansiꞌe xṉeze goneꞌ. Deꞌe naꞌanəꞌ bzo cuineꞌ testigw gwneꞌ: “Guaquəczən c̱hedəꞌ zoaꞌ nacaꞌ Dioz.”
\v 18 Ca naquə Diozənꞌ beneꞌ lyebe naꞌ ḻeczə bzo cuineꞌ testigw gwneꞌ: “Guaquəczə canꞌ niaꞌanəꞌ c̱hedəꞌ zoaꞌ nacaꞌ Dioz”, beneꞌ caꞌ par nic̱h ṉezecho de que caguə deꞌe te canꞌ gwneꞌenəꞌ. Naꞌ bito chac güeꞌe dižəꞌ güenḻažəꞌ. Diozənꞌ beneꞌ lyebe naꞌ bzo cuineꞌ testigw par nic̱h bito žebcho sino yebeicho deꞌen ṉezecho žɉəyezocho len ḻeꞌ, chioꞌo bagwṉabechoneꞌ beziꞌixeneꞌ xtoḻəꞌəchonꞌ.
\v 19 Naꞌ deꞌen ṉezecho žɉəyezocho len Diozənꞌ bito chac c̱hop lažəꞌəcho sino zotezə zocho chonḻilažəꞌəchoneꞌ c̱hedəꞌ laꞌ ṉezecho de que Jesoꞌosənꞌ chṉeꞌ fabor chioꞌo lao Diozənꞌ ca bx̱oz əblao c̱hecho.
\v 20 Jesoꞌosənꞌ bazɉəyezoeꞌ ganꞌ zo Diozənꞌ naꞌ choneꞌ par nic̱h ḻeczə chioꞌo žɉəyezocho len ḻeꞌ. Naꞌ Jesoꞌosənꞌ naqueꞌ bx̱oz əblao c̱hecho, benꞌ gwxaquəꞌəlebe ca bx̱oz Melquisedequənꞌ.
\c 7
\s1 Jesoꞌosənꞌ naqueꞌ ca bx̱oz Melquisedequənꞌ
\p
\v 1 Naꞌ Melquisedequənꞌ goqueꞌ rei ganꞌ nziꞌ Salem naꞌ Diozənꞌ benꞌ naquə ḻeꞌezelaogüe beṉəꞌ blao gwleɉeꞌ ḻeꞌ par goqueꞌ bx̱oz. Naꞌ catəꞌ bezaꞌ deꞌe Abraanṉəꞌ beyož beneꞌ gan lao rei caꞌ beṉəꞌ caꞌ gosəꞌədiḻəlen beṉəꞌ Sodoma caꞌ, bx̱oz Melquisedequənꞌ ɉəšagueꞌ ḻeꞌ naꞌ len yeḻəꞌ guac c̱he Diozənꞌ beneꞌ par nic̱h goc deꞌe šaoꞌ deꞌe güen c̱he deꞌe Abraanṉəꞌ.
\v 2 Naꞌ deꞌe Abraanṉəꞌ botobeꞌ deꞌe caꞌ gosəꞌəban rei caꞌ c̱he beṉəꞌ Sodoma caꞌ naꞌ bniteꞌen ši cuen deꞌe naquə lebe nach gwleɉeꞌ tcuenən par bnežɉueꞌen bx̱oz Melquisedequənꞌ. Melquisedequənꞌ zeɉe dižəꞌ “rei beṉəꞌ chnabiaꞌ güen”. Naꞌ gwnabiꞌe ganꞌ nziꞌ Salem, naꞌ Salemənꞌ zeɉe dižəꞌ “gwnitəꞌ beṉəꞌ binḻo”.
\v 3 Bito nyoɉən šə no goquə deꞌe x̱axnaꞌ Melquisedequənꞌ naꞌ nique nyoɉən šə no goquə deꞌe x̱axtaꞌogüeꞌe, naꞌ nic nyoɉən batəꞌəquəꞌ golɉeꞌ naꞌ batəꞌəquəꞌ goteꞌ. Deꞌe naꞌanəꞌ ṉezecho cuiṉəꞌ te yeḻəꞌ naquə bx̱oz c̱heꞌenəꞌ naꞌ ḻeczə deꞌe naꞌanəꞌ gwxaquəꞌəlebeneꞌ ca Xiꞌiṉ Diozənꞌ.
\p
\v 4 Ḻeꞌe gon xbab de que bx̱oz Melquisedequənꞌ goqueꞌ beṉəꞌ blao. Deꞌe naꞌanəꞌ deꞌe x̱axtaꞌocho Abraanṉəꞌ lao ši cuen güeɉə deꞌe caꞌ gwleɉeꞌ, bnežɉueꞌ tcuenən bx̱oz Melquisedequənꞌ.
\v 5 Naꞌ beṉəꞌ caꞌ gwsaꞌalɉə lao dia c̱he deꞌe Lebinꞌ, beṉəꞌ caꞌ besyəꞌəyaḻəꞌ par gwsaꞌaqueꞌ bx̱oz, nyoɉən ḻeꞌe ḻei deꞌen bzoɉ deꞌe Moisezənꞌ de que yesəꞌəziꞌe tcuen lao ši cuen yoguəꞌ cuantzə deꞌe gotəꞌ c̱he beṉəꞌ Izrael caꞌ yeḻaꞌ ḻaꞌaṉəꞌəczə yoguəꞌəḻoḻgaꞌaqueꞌ zɉənaqueꞌ xiꞌiṉ dia c̱he deꞌe Abraanṉəꞌ.
\v 6 Melquisedequənꞌ bito əṉacho golɉeꞌ lao dia c̱he deꞌe Lebinꞌ, pero gwxiꞌe tcuen lao ši cuen deꞌen botobə deꞌe Abraanṉəꞌ naꞌ len yeḻəꞌ guac c̱he Diozənꞌ beneꞌ par nic̱h goc güen c̱he deꞌe Abraanṉəꞌ benꞌ ben Diozənꞌ lyebe əsaꞌac xiꞌiṉ dia c̱heꞌenəꞌ beṉəꞌ zan.
\v 7 Naꞌ nacbiaꞌ de que Melquisedequənꞌ zaquəꞌəcheꞌ cle ca deꞌe Abraanṉəꞌ c̱hedəꞌ Melquisedec naꞌanəꞌ gwdapeꞌ yeḻəꞌ guac c̱he Diozənꞌ naꞌ beneꞌ par nic̱h goc deꞌe güen c̱he deꞌe Abraanṉəꞌ.
\v 8 Naꞌ beṉəꞌ caꞌ gwsaꞌac bx̱oz segon canꞌ na ḻei deꞌen bzoɉ deꞌe Moisezənꞌ gosəꞌəziꞌe tcuen lao ši cuen cuantzə bi deꞌen gotəꞌ c̱he beṉəꞌ Izrael caꞌ yeḻaꞌ. Bx̱oz caꞌ gwsaꞌaqueꞌ beṉac̱h naꞌ gwsaꞌateꞌ. Pero Melquisedequənꞌ benꞌ gwxiꞌ tcuen lao ši cuen deꞌen botobə deꞌe Abraanṉəꞌ, choꞌen dižəꞌ c̱heꞌ ca beṉəꞌ ṉeꞌe zoczə.
\v 9-10 Naꞌ ca naquə deꞌe Abraanṉəꞌ bnežɉueꞌ Melquisedequənꞌ tcuen lao ši cuen deꞌe caꞌ botobeꞌ deꞌen gosəꞌəban rei caꞌ, deꞌen naꞌanəꞌ guaquə əṉacho de que deꞌe Lebinꞌ ḻeczə bnežɉueꞌ Melquisedequənꞌ tcuen güeɉə lao ši cuen deꞌe caꞌ botobə deꞌe Abraanṉəꞌ. Guac əṉacho caꞌ c̱hedəꞌ deꞌe Lebinꞌ golɉeꞌ lao dia c̱he deꞌe Abraanṉəꞌ ḻaꞌaṉəꞌəczə bitoṉəꞌ galɉeꞌ catəꞌən Melquisedequənꞌ ɉəšagueꞌ deꞌe Abraanṉəꞌ. Deꞌe Lebinꞌ goqueꞌ x̱a beṉəꞌ nech caꞌ əgwsaꞌac bx̱oz c̱he beṉəꞌ Izrael gwlaž c̱hecho caꞌ canaꞌ, naꞌ ḻei deꞌen bzoɉ deꞌe Moisezənꞌ nan de que yesəꞌəziꞌe tcuen lao ši cuen cuantzə bi deꞌen de c̱he beṉəꞌ Izrael caꞌ yeḻaꞌ.
\p
\v 11 Žaləꞌ bx̱oz caꞌ beṉəꞌ caꞌ gwsaꞌalɉə lao dia c̱he deꞌe Lebinꞌ goc soꞌoneꞌ par nic̱h yic̱hɉlaꞌaždaoꞌ beṉəꞌ gwlaž c̱hecho caꞌ əsaꞌaquən canꞌ cheneꞌe Diozənꞌ, bito byažɉecho yeto bx̱oz žaləꞌ caꞌ. Pero deꞌen cui goquə soꞌoneꞌ par nic̱h əsaꞌac yic̱hɉlaꞌaždaoꞌ beṉəꞌ canꞌ cheneꞌe Diozənꞌ, deꞌe naꞌanəꞌ bidə Jesoꞌosənꞌ par naqueꞌ bx̱oz c̱hechonꞌ naꞌ gwxaquəꞌəlebeneꞌ ca Melquisedequənꞌ.
\v 12 Jesoꞌosənꞌ naquəczeꞌ bx̱oz c̱hechonꞌ ḻaꞌaṉəꞌəczə cui naqueꞌ dia c̱he deꞌe Lebinꞌ. Deꞌe naꞌanəꞌ ṉezecho banžaꞌ ḻei deꞌen choeꞌ dižəꞌ c̱he bx̱oz c̱he ṉasyon Izrael c̱hechonꞌ.
\v 13 Bx̱oz c̱hecho benꞌ choꞌecho dižəꞌ c̱hei, golɉeꞌ lao dia c̱he deꞌe Jodanꞌ, naꞌ bitoch bchoɉ no gaque bx̱oz entr beṉəꞌ caꞌ əgwsaꞌalɉəch lao dia c̱he deꞌe Jodanꞌ.
\v 14 Ṉezczecho de que X̱anchonꞌ golɉeꞌ lao dia c̱he deꞌe Jodanꞌ, pero deꞌen bzoɉ deꞌe Moisezənꞌ ḻeꞌe ḻeinꞌ nan de que beṉəꞌ caꞌ gwsaꞌalɉə lao dia c̱he deꞌe Lebinꞌ əsaꞌaqueꞌ bx̱oz.
\p
\v 15-16 Bx̱oz c̱hecho Jesoꞌosənꞌ naqueꞌ ca bx̱oz Melquisedequənꞌ. Bito golɉeꞌ lao dia c̱he deꞌe Lebinꞌ naꞌ bito naqueꞌ bx̱oz canꞌ na ḻei deꞌen bzoɉ deꞌe Moisezənꞌ. Naqueꞌ bx̱oz c̱hedəꞌ bito gwzoi yeḻəꞌ gotənꞌ ḻeꞌ, naꞌ zoczeꞌ zeɉḻicaṉe.
\v 17 Naꞌ deꞌe nga nyoɉən canꞌ gož Diozənꞌ Jesoꞌosənꞌ nan:
\q1 Nacoꞌ bx̱oz beṉəꞌ zo zeɉḻicaṉe
\q1 naꞌ nacoꞌ ca bx̱oz Melquisedequənꞌ.
\m
\v 18 Ca naquə bx̱oz caꞌ beṉəꞌ caꞌ ben Diozənꞌ mendad gwnitəꞌ canaꞌ, bitoch noneꞌ mendad ṉiteꞌe ṉaꞌa c̱hedəꞌ deꞌen gwsoꞌoneꞌenəꞌ bito zaquəꞌən par əsaꞌac yic̱hɉlaꞌaždaoꞌ beṉac̱hənꞌ canꞌ cheneꞌe Diozənꞌ, naꞌ bito nsaꞌan yeḻəꞌ guac c̱he Diozənꞌ.
\v 19 Ḻeinəꞌ bito zaquəꞌən gonən par nic̱h yic̱hɉlaꞌaždaoꞌ beṉəꞌ əsaꞌaquən canꞌ cheneꞌe Diozənꞌ. Pero ṉaꞌa bazo Jesoꞌosənꞌ choneꞌ par nic̱h chac yic̱hɉlaꞌaždaꞌochonꞌ canꞌ cheneꞌe Diozənꞌ. Naꞌ ṉezecho chaquəch güen c̱hecho cle ca c̱he beṉəꞌ caꞌ zɉənombiaꞌ ḻeinꞌ. Jesoꞌosənꞌ choneꞌ par nic̱h zocho binḻo len Diozənꞌ.
\p
\v 20 Naꞌ par nic̱h ṉezecho de que Jesoꞌosənꞌ naqueꞌ bx̱oz c̱hechonꞌ, Diozənꞌ bzo cuineꞌ testigw gwneꞌ:
\q1 Naquəczeꞌ bx̱ozənꞌ c̱hedəꞌ zoaꞌ nacaꞌ Dioz.
\m
\v 21 Beṉəꞌ caꞌ gwsaꞌaqueꞌ bx̱oz segon canꞌ bzoɉ deꞌe Moisezənꞌ, Diozənꞌ bito gožeꞌ ḻegaꞌaqueꞌ canꞌ gožeꞌ Jesoꞌosənꞌ. Nyoɉənꞌ canꞌ gožeꞌeneꞌ, nan:
\q1 Diozənꞌ bzo cuineꞌ testigw gwneꞌ:
\q1 “Naquəczoꞌ bx̱ozənꞌ c̱hedəꞌ zoaꞌ nacaꞌ Dioz.
\q1 Naꞌ bito gwšaꞌa canꞌ niꞌanəꞌ.
\q1 Leꞌ nacoꞌ bx̱oz benꞌ zo zeɉḻicaṉe.
\q1 Nacoꞌ ca Melquisedequənꞌ.”
\m
\v 22 Ṉezecho de que Jesoꞌosənꞌ bedəloꞌineꞌ chioꞌo de que Diozənꞌ chonczeꞌ con canꞌ noneꞌ lyebe par gaquəleneꞌ chioꞌo. Naꞌ deꞌen noneꞌ lyebe goneꞌ ṉaꞌa naquəchən güen cle ca deꞌen beneꞌ lyebe goneꞌ antslə.
\v 23 Beṉəꞌ caꞌ gwsaꞌaqueꞌ bx̱oz segon canꞌ na ḻei deꞌen bzoɉ deꞌe Moisezənꞌ, gwsaꞌaqueꞌ beṉac̱h naꞌ gwsaꞌateꞌ, pero benitəꞌəteczə lguaꞌagaꞌaqueꞌ. Deꞌe naꞌanəꞌ gwsaꞌaqueꞌ beṉəꞌ zan.
\v 24 Pero Jesoꞌosənꞌ zoeꞌ zeɉḻicaṉe naꞌ deꞌe naꞌanəꞌ zeɉḻicaṉe naquəczeꞌ bx̱oz c̱hechonꞌ.
\v 25 Naꞌ notəꞌətezə beṉəꞌ chseꞌeneꞌeneꞌ ṉiteꞌe binḻo len Diozənꞌ, Jesoꞌosənꞌ napeꞌ yeḻəꞌ guac par chocobeꞌ yic̱hɉlaꞌaždaꞌogaꞌaqueꞌen con šə chsoꞌonḻilažeꞌeneꞌ. Napeꞌ yeḻəꞌ guac par goneꞌ caꞌ c̱hedəꞌ zoczeꞌ zeɉḻicaṉe chṉabeꞌ goclen lao Diozənꞌ par yoguəꞌ chioꞌo chonḻilažəꞌəchoneꞌ.
\p
\v 26 Naꞌ Jesoꞌos nanꞌ naqueꞌ bx̱oz əblao c̱hechonꞌ naꞌ zaqueꞌe par gaquəleneꞌ chioꞌo c̱hedəꞌ choneꞌ cayaṉəꞌən chazlažəꞌ Diozənꞌ. Bito bi doḻəꞌ napeꞌ, naꞌ bito bi deꞌe mal choneꞌ, naꞌ nic choneꞌ xbab mal. Zoeꞌ ganꞌ zo Diozənꞌ, chṉabiꞌe txen len ḻeꞌ.
\v 27 Bito bi xtoḻeꞌe de naꞌ deꞌe naꞌanəꞌ bito cheyaḻəꞌ goteꞌ bia yix̱əꞌ par yeziꞌixen Diozənꞌ xtoḻeꞌenəꞌ canꞌ gwsoꞌon beṉəꞌ caꞌ gwsaꞌac bx̱oz segon canꞌ na ḻei deꞌen bzoɉ deꞌe Moisezənꞌ. Yoguəꞌ ža zguaꞌatec gwsoꞌoteꞌ bia yix̱əꞌ par nic̱h gosəꞌəṉabeꞌ beziꞌixen Diozənꞌ xtoḻəꞌəgaꞌaqueꞌenəꞌ naꞌ techlə ḻeczə gwsoꞌoteꞌ bia yix̱əꞌ par gosəꞌəṉabeꞌ beziꞌixen Diozənꞌ xtoḻəꞌ beṉəꞌ Izrael caꞌ yeḻaꞌ. Šlinzə bnežɉw cuin Jesoꞌosənꞌ por ni c̱hecho catəꞌən gwsoꞌot beṉəꞌ ḻeꞌ ḻeꞌe yag corozənꞌ naꞌ bitoch gateꞌ yeto.
\v 28 Beṉəꞌ caꞌ gwsaꞌac bx̱oz əblao segon canꞌ na ḻei deꞌen bzoɉ deꞌe Moisezənꞌ gwsaꞌaqueꞌ beṉəꞌ güen deꞌe mal canꞌ zɉənaquə yeziquəꞌəchlə beṉəꞌ. Zan iz bagoc bzoɉ deꞌe Moisezənꞌ ḻei c̱he Diozənꞌ catəꞌ Diozənꞌ bzo cuineꞌ testigw de que seḻeꞌe Xiꞌiṉeꞌenəꞌ par gaqueꞌ bx̱oz əblao c̱hechonꞌ naꞌ gwneꞌ: “Gaquəczeꞌ bx̱oz əblaonꞌ c̱hedəꞌ zoaꞌ nacaꞌ Dioz.” Naꞌ Xiꞌiṉeꞌ naꞌanəꞌ zoczeꞌ zeɉḻicaṉe, naꞌ naquə yic̱hɉlaꞌaždaogüeꞌenəꞌ cayaṉəꞌən cheneꞌe Diozənꞌ.
\c 8
\s1 Cristənꞌ choneꞌ par nic̱h chac deꞌe cobə deꞌen non Diozənꞌ lyebe goneꞌ par gaquəleneꞌ chioꞌo
\p
\v 1 Ṉaꞌa ža zo bx̱oz əblao c̱hechonꞌ, naꞌ chiꞌe yobanꞌ chnabiꞌe txen len Diozənꞌ benꞌ naquə ḻeꞌezelaogüe beṉəꞌ blao. Ḻenṉəꞌ naquən deꞌe žialaoch lao yoguəꞌ deꞌen babeꞌecho dižəꞌ c̱hei.
\v 2-3 Bx̱oz əblao caꞌ beṉəꞌ caꞌ gwsoꞌot bia yix̱əꞌ ḻoꞌo yoꞌodaoꞌ deꞌen gwsoꞌon deꞌe x̱axtaꞌo chioꞌo beṉəꞌ Izrael ɉsoꞌe xc̱hengaꞌaquəbənꞌ ganꞌ nziꞌ “Latɉə ganꞌ zo Diozənꞌ” par nic̱h Diozənꞌ beziꞌixeneꞌ xtoḻəꞌəgaꞌaqueꞌenəꞌ len c̱he beṉəꞌ caꞌ yeḻaꞌ. Naꞌ deꞌen gwsoꞌoneꞌenəꞌ naquən ca deꞌen chac yobanꞌ ganꞌ zo Diozənꞌ. Deꞌe naꞌanəꞌ benən byen bnežɉw cuin Jesoꞌosənꞌ gwsoꞌot beṉəꞌ ḻeꞌ par nic̱h naqueꞌ bx̱oz əblao c̱hechonꞌ ganꞌ zo Diozənꞌ, naꞌ choneꞌ par nic̱h Diozənꞌ cheziꞌixeneꞌ xtoḻəꞌ chioꞌo chonḻilažəꞌəchoneꞌ.
\v 4 Naꞌ bito naqueꞌ bx̱oz žaləꞌ ṉeꞌe zoeꞌ lao yežlyonꞌ, c̱hedəꞌ banitəꞌ bx̱oz caꞌ beṉəꞌ caꞌ chɉsoaꞌ bi deꞌen chɉsoaꞌ lao Diozənꞌ segon canꞌ na ḻeinꞌ.
\v 5 Naꞌ yoguəꞌəḻoḻ deꞌen chsoꞌon bx̱oz caꞌ beṉəꞌ caꞌ chsoꞌon canꞌ na ḻeinꞌ, naquən latəꞌ laszə ca naquə deꞌen chac yobanꞌ. Diozənꞌ beneꞌ mendad len deꞌe Moisezənꞌ antslə zeꞌe soꞌon deꞌe x̱axtaꞌo chioꞌo beṉəꞌ Izrael yoꞌo deꞌe lachəꞌənəꞌ ganꞌ gwsoꞌo bx̱oz caꞌ par gwsoꞌelaogüeꞌe Diozənꞌ, gožeꞌeneꞌ: “Yoguəꞌ deꞌen bagwniaꞌ gonḻe, ḻegonən cayaṉəꞌən bloꞌidaꞌ leꞌ catəꞌən gwzocho lao yaꞌanəꞌ.”
\v 6 Pero naꞌ deꞌen chon Cristənꞌ zaquəꞌəchən cle ca deꞌen gwsoꞌon bx̱oz caꞌ beṉəꞌ caꞌ gwsoꞌon canꞌ na ḻeinꞌ. Naꞌ ḻeczə deꞌe cobə deꞌen chon Diozənꞌ len chioꞌo naquəchən güen cle ca deꞌen beneꞌ antslə, c̱hedəꞌ deꞌe xench deꞌen non Diozənꞌ lyebe goneꞌ par gaquəleneꞌ chioꞌo ṉaꞌa.
\p
\v 7 Žaləꞌ deꞌen ben Diozənꞌ par gocleneꞌ beṉəꞌ Izrael gwlaž c̱hecho caꞌ deꞌe nech benən par nic̱h gwsaꞌac yic̱hɉlaꞌaždaꞌogaꞌaqueꞌenəꞌ canꞌ cheneꞌeneꞌ, bito bseḻeꞌe Cristənꞌ žaləꞌ caꞌ.
\v 8 Pero nacbiaꞌ Diozənꞌ bito bebeineꞌ ḻegaꞌaqueꞌ, nachənꞌ gwneꞌ:
\q1 Chonaꞌ lyebe gonaꞌ to deꞌe cobə par gaquəlenaꞌ leꞌe beṉəꞌ Izrael catəꞌ əžin ža,
\q1 nadaꞌ X̱anḻe Dioz əniaꞌ caꞌ.
\q1
\v 9 Nžaꞌan beṉaꞌ len deꞌe x̱axtaꞌole caꞌ ca tyemp catəꞌən goquəlengaꞌacaꞌaneꞌ par nic̱h besyəꞌəchoɉeꞌ Egiptonꞌ.
\q1 Ḻegaꞌaqueꞌ bito gwsoꞌoneꞌ canꞌ gwsoꞌoneꞌ lyebe len nadaꞌ.
\q1 Deꞌe naꞌanəꞌ nadaꞌ X̱anḻe Dioz bitoch bengaꞌacaꞌaneꞌ cas.
\q1
\v 10 Quinga gonaꞌ par gaquəlenaꞌ leꞌe beṉəꞌ Izrael catəꞌən əžin žanꞌ:
\q1 Nadaꞌ Dioz gonaꞌ par nic̱h šoꞌo yic̱hɉle deꞌe caꞌ nonaꞌ mendad gonḻe,
\q1 naꞌ gonaꞌ par nic̱h yebeilen ḻoꞌo laꞌaždaꞌolenꞌ.
\q1 Naꞌ tozaꞌ nadaꞌ güeꞌelaꞌole naꞌ leꞌe gacle xiꞌiṉaꞌ.
\q1
\v 11 Naꞌ ni tole cui chyažɉən əgwsed əgwloꞌi lɉuežɉle par nic̱h gombiꞌale nadaꞌ
\q1 c̱hedəꞌ canaꞌ yoguəꞌəle gombiꞌale nadaꞌ,
\q1 leꞌe cuitec bi zaquəꞌəle naꞌ len leꞌe nacle beṉəꞌ blao.
\q1
\v 12 Canaꞌach bitoch gonaꞌ xbab c̱he deꞌe mal caꞌ deꞌen babenḻenəꞌ
\q1 c̱hedəꞌ ca orənꞌ babeziꞌixenaꞌ xtoḻəꞌəlenəꞌ.
\m
\v 13 Naꞌ ca naquənꞌ beꞌ Diozənꞌ dižəꞌ c̱he deꞌe cobənꞌ deꞌen gwneꞌ goneꞌ par gaquəleneꞌ ṉasyon c̱hechonꞌ, ṉezecho chde c̱he deꞌen beneꞌ mendad soꞌoneꞌ antslə c̱hedəꞌ banaquən deꞌe golə naꞌ bitoch cheyaḻəꞌ gonchon.
\c 9
\s1 Yoꞌodaoꞌ de lachəꞌ deꞌen gwsoꞌon beṉəꞌ Izrael ca gwxaquəꞌəleben ca ganꞌ zo Diozənꞌ
\p
\v 1 Canaꞌate ben Diozənꞌ mendad naclə soꞌon beṉəꞌ Izrael gwlaž c̱hecho caꞌ par soꞌelaꞌogüeꞌeneꞌ. Naꞌ ḻeczə beneꞌ mendad soꞌoneꞌ to yoꞌodaoꞌ par ḻeꞌ.
\v 2 Yoꞌodaꞌonəꞌ goquən de lachəꞌ. Naꞌ ḻoꞌo cuart nechənꞌ bosoꞌozoeꞌ to candeler naꞌ to mes ganꞌ bosoꞌocueꞌe yetxtil deꞌen naquə par Diozənꞌ. Naꞌ cuart nechənꞌ nziꞌin “Latɉə c̱he Dioz”.
\v 3 Naꞌ cuart əgwchopenꞌ nziꞌin “Latɉə ganꞌ zoczə Diozənꞌ”. Naꞌ entr cuart caꞌ c̱hopə gwze to lachəꞌ.
\v 4 Naꞌ ḻoꞌo cuart əgwchopenꞌ bosoꞌozoeꞌ yeto mes de or ganꞌ bosoꞌozeyeꞌ yal. Naꞌ gosəꞌəyix̱ɉueꞌ to caj naꞌ bosoꞌoguazɉeꞌ doxenən or. Naꞌ ḻoꞌo caj naꞌ bosoꞌozoeꞌ to yesəꞌ de or ganꞌ bosoꞌožeꞌe yeḻəꞌ guao deꞌen gwzaꞌ yoba deꞌen nziꞌ mana, naꞌ ḻeczə ḻoꞌo caj naꞌ gosəꞌəgüeꞌe garrot c̱he deꞌe Ronṉəꞌ deꞌen bex̱eɉə. Naꞌ ḻeczə naꞌ bosoꞌožeꞌe yeɉ taꞌa caꞌ ganꞌ byoɉ deꞌen ben Diozənꞌ mendad soꞌoneꞌ par nic̱h gaquəleneꞌ ḻegaꞌaqueꞌ.
\v 5 Naꞌ lao tap c̱he cajənꞌ bosoꞌoniteꞌe c̱hopə lguaꞌa lsaquəꞌ angl beṉəꞌ gosəꞌəziꞌ querobines. Naꞌ ganꞌ zɉəzecha querobines caꞌ chey cheꞌeniꞌin, par nic̱h nacbiaꞌ de que Diozənꞌ zoeꞌ naꞌ. Toeꞌ gwzecha šyic̱hɉən naꞌ yetoeꞌ yešyic̱hɉən. Naꞌ lao tap c̱he cajənꞌ entr ḻegaꞌaqueꞌ nziꞌin “Latɉə c̱he yeḻəꞌ cheyašəꞌ chežiꞌilažəꞌ c̱he Diozənꞌ”. Pero bitoch cheꞌendaꞌ güeꞌechaꞌ dižəꞌ c̱he to to deꞌe caꞌ.
\p
\v 6 Naꞌ beyož banitəꞌ cuart caꞌ naꞌ beyož bosoꞌoniteꞌe yoguəꞌ deꞌe caꞌ ḻoꞌinəꞌ, yoguəꞌ ža ɉaꞌac bx̱oz caꞌ ḻoꞌo cuart nechənꞌ ganꞌ gwsoꞌoneꞌ canꞌ ben Diozənꞌ mendad soꞌoneꞌ par əsoꞌelaꞌogüeꞌeneꞌ.
\v 7 Naꞌ cuart əgwchopenꞌ tozə bx̱oz əblaonꞌ goc gwyoꞌe ze tgüiz güeɉə. Naꞌ catəꞌən gwyoꞌenəꞌ benən byen bex̱eꞌe chen c̱he bia yix̱əꞌ bžeꞌen lao cajən par nic̱h Diozənꞌ beziꞌixeneꞌ xtoḻeꞌenəꞌ naꞌ beziꞌixenteꞌ xtoḻəꞌ beṉəꞌ caꞌ yeḻaꞌ.
\v 8 Naꞌ deꞌen cui gotəꞌ lsens šoꞌo nochlə beṉəꞌ ḻoꞌo cuartənꞌ, Spirit c̱he Diozənꞌ chzeɉniꞌin chioꞌo de que bito gaquə šoꞌocho ganꞌ zo Diozənꞌ žaləꞌ ṉeꞌe choneꞌ mendad gaquə yoguəꞌəḻoḻ deꞌen gwsoꞌoneꞌ ḻoꞌo yoꞌodaoꞌ deꞌen nsaꞌ c̱hopə cuart.
\v 9 Naꞌ yoꞌodaꞌonəꞌ len yoguəꞌ deꞌe caꞌ gwsoꞌon bx̱oz caꞌ ḻoꞌinəꞌ chloꞌin chioꞌo zocho ṉaꞌa canꞌ naquə yobanꞌ ganꞌ zo Diozənꞌ. Deꞌe zan deꞌen gwsoꞌon deꞌe x̱axtaꞌocho caꞌ gwsoꞌelaꞌogüeꞌe Diozənꞌ ḻoꞌo yoꞌodaꞌonəꞌ pero bito beyac yic̱hɉlaꞌaždaꞌogaꞌaqueꞌen canꞌ cheneꞌe Diozənꞌ ḻaꞌaṉəꞌəczə bosoꞌonežɉueꞌ Diozənꞌ bi deꞌen bosoꞌonežɉueꞌeneꞌ naꞌ ḻaꞌaṉəꞌəczə gwsoꞌoteꞌ bia yix̱əꞌ par gwsoꞌelaogüeꞌeneꞌ.
\v 10 Deꞌe caꞌ bosoꞌonežɉueꞌ Diozənꞌ gwsaꞌaquən no nis yeḻəꞌ guao naꞌ no bia yix̱əꞌ. Naꞌ deꞌe zan costombr c̱hegaꞌaqueꞌ gotəꞌ par gwsaꞌa gosəꞌəyib cuingaꞌaqueꞌ. Naꞌ yoguəꞌ deꞌe caꞌ gwsoꞌoneꞌ nic̱h cuerp c̱hegaꞌaqueꞌenəꞌ goquən xiꞌilažəꞌ canꞌ na ḻeinꞌ. Yoguəꞌ deꞌe caꞌ gwsoꞌoneꞌenəꞌ gwsoꞌonən žin xte catəꞌən bseḻəꞌ Diozənꞌ Cristənꞌ par beneꞌ deꞌe zaquəꞌəche.
\p
\v 11-12 Pero bazo Cristənꞌ ṉaꞌa naqueꞌ bx̱oz əblao c̱hechonꞌ naꞌ choneꞌ par nic̱h chac güen canꞌ gwnitəꞌ deꞌe x̱axtaꞌocho caꞌ lez gaquə. Babeyepeꞌ yobanꞌ naꞌ zoeꞌ ganꞌ zo Diozənꞌ. Naꞌ ganꞌ zoeꞌenəꞌ gwxaquəꞌəleben ca cuart əgwchope c̱he yoꞌodaoꞌ c̱he beṉəꞌ Izrael caꞌ, pero naquəchən deꞌe zaquəꞌəche naꞌ deꞌe güench clezə ca deꞌen gwzo c̱he bx̱oz caꞌ canaꞌ, laꞌ bito naquən deꞌe ben beṉac̱h. Naꞌ Cristənꞌ zaqueꞌe par gwyoꞌe ganꞌ zo Diozənꞌ c̱hedəꞌ bnežɉw cuineꞌ gwsoꞌot beṉəꞌ ḻeꞌ naꞌ blalɉ xc̱heneꞌenəꞌ ḻeꞌe yag corozənꞌ. Bito ṉacho beteꞌ no šib o no goꞌoṉ daoꞌ naꞌ blalɉeꞌ xc̱hembənꞌ par nic̱h beꞌen Diozənꞌ. Šlinzənꞌ gwdixɉueꞌ xtoḻəꞌəchonꞌ len xc̱heneꞌenəꞌ par zeɉḻicaṉe.
\v 13 Ca naquə deꞌe x̱axtaꞌocho caꞌ bito gwsaꞌaqueꞌ xiꞌilažəꞌ canꞌ na ḻeinꞌ šə bagosəꞌəganeꞌ no beṉəꞌ guat. Naꞌ par nic̱h besyəꞌəyac cuerp c̱hegaꞌaqueꞌenəꞌ xiꞌilažəꞌ deꞌe yoblə canꞌ na ḻeinꞌ, bx̱oz caꞌ bosoꞌožeꞌe ḻegaꞌaqueꞌ no xc̱hen šib o no xc̱hen goꞌoṉ naꞌ len de deꞌen gwcheꞌ catəꞌən cheyož chosoꞌozeyeꞌ baquəꞌ daoꞌ.
\v 14 Pero xc̱hen Jesocristənꞌ deꞌen bedəlalɉeꞌ par bequeꞌe xtoḻəꞌəchonꞌ zaquəꞌəchən ca xc̱hen bia yix̱əꞌ caꞌ. Xtoḻəꞌəcho naꞌanəꞌ benən par nic̱h goccho ca beṉəꞌ guat len yic̱hɉlaꞌaždaꞌochonꞌ, pero ṉaꞌa baben Jesocristənꞌ par nic̱h naquə yic̱hɉlaꞌaždaꞌochonꞌ xiꞌilažəꞌ nic̱h choꞌelaꞌocho Diozənꞌ benꞌ zo zeɉḻicaṉe. Spirit c̱he Dioz nanꞌ goclenən Jesoꞌosənꞌ par ben cuineꞌ lažəꞌ naꞌ Diozənꞌ par gwdixɉueꞌ xtoḻəꞌəchonꞌ. Naꞌ ca naquə Jesoꞌosənꞌ bitoczə bi bi xtoḻeꞌenəꞌ gotəꞌ.
\p
\v 15 Naꞌ deꞌen bedəlalɉ xc̱hen Cristənꞌ gwzolao chac deꞌe cobənꞌ deꞌen chon Diozənꞌ lyebe goneꞌ par chacleneꞌ chioꞌo. Naꞌ bachac deꞌe cobənꞌ par nic̱h caꞌ baḻtezə beṉəꞌ bagwleɉ Diozənꞌ žɉəsyəꞌəniteꞌe len ḻeꞌ zeɉḻicaṉe. Deꞌen bedəlalɉ xc̱hen Cristənꞌ gwdixɉueꞌ lente deꞌe mal caꞌ bencho žlac ṉeꞌe chac deꞌe neche deꞌen ben Diozənꞌ lyebe goneꞌ par gocleneꞌ deꞌe x̱axtaoꞌ chioꞌo beṉəꞌ Izrael.
\v 16 Catəꞌ to beṉəꞌ babeneꞌ testament, bito gaquə canꞌ na testamentənꞌ xte catəꞌəch ṉezecho de que bagoteꞌ.
\v 17 Naꞌ ca naquə testamentənꞌ bito gaquə canꞌ nanṉəꞌ žlac ṉeꞌe mban beꞌenəꞌ ben ḻen. Catəꞌ bagoteꞌ canaꞌanəꞌ gaquə canꞌ nanṉəꞌ.
\v 18 Naꞌ par nic̱h gwzolao goc deꞌe neche deꞌen ben Diozənꞌ lyebe goneꞌ par gocleneꞌ deꞌe x̱axtaꞌocho caꞌ, beneꞌ mendad bosoꞌolalɉeꞌ xc̱hen bia yix̱əꞌ.
\v 19 Deꞌe naꞌanəꞌ catəꞌ deꞌe Moisezənꞌ beyož beꞌeleneꞌ beṉəꞌ caꞌ dižəꞌ c̱he yoguəꞌəḻoḻ deꞌen ben Diozənꞌ mendad soꞌoneꞌ canꞌ na ḻei c̱heꞌenəꞌ, nach deꞌe Moisezənꞌ bžeꞌe ḻegaꞌaqueꞌ xc̱hen goꞌoṉ daoꞌ naꞌ xc̱hen šib nach nis. Bžeꞌe ḻegaꞌaqueꞌ deꞌe caꞌ len latəꞌ yišəꞌ xa xiləꞌ deꞌen mben color əxṉa naꞌ len to xis yix̱əꞌ daoꞌ deꞌen naquə ca gwreg. Naꞌ ḻeczə bžeꞌen ḻibrənꞌ ganꞌ nyoɉ ḻeinəꞌ.
\v 20 Naꞌ deꞌe Moisezənꞌ gožeꞌ ḻegaꞌaqueꞌ: “Chen ni ben Diozənꞌ mendad əgwžaꞌa leꞌe par nic̱h goneꞌ canꞌ noneꞌ lyebe goneꞌ par gaquəleneꞌ chioꞌo.”
\v 21 Nach bžaꞌateꞌen yoꞌodaoꞌ de lachəꞌən naꞌ len yesəꞌ caꞌ naꞌ šaꞌ caꞌ deꞌen bosoꞌoc̱hineꞌ ganꞌ gwsoꞌelaꞌogüeꞌe Diozənꞌ.
\v 22 Ḻei deꞌen bzoɉ deꞌe Moisezənꞌ benən mendad bosoꞌožeꞌe chenṉəꞌ par nic̱h zan deꞌen bosoꞌoc̱hineꞌ gwsaꞌaquən xiꞌilažəꞌ canꞌ na ḻeinꞌ. Diozənꞌ bito beziꞌixeneꞌ xtoḻəꞌ beṉəꞌ žaləꞌ cui bosoꞌolalɉeꞌ chen c̱he bia yix̱əꞌ.
\s1 Deꞌen bnežɉw cuin Cristənꞌ gwsoꞌoteꞌeneꞌ chac chequeꞌe xtoḻəꞌ chioꞌo chonḻilažəꞌəchoneꞌ
\p
\v 23 Deꞌe naꞌanəꞌ benən byen bosoꞌožeꞌe xc̱hen bia yix̱əꞌən deꞌe caꞌ besəꞌəc̱hineꞌ ḻoꞌo yoꞌodaꞌonəꞌ par nic̱h gwsaꞌaquən xiꞌilažəꞌ canꞌ na ḻeinꞌ. Pero xc̱hen bia yix̱əꞌ caꞌ bito gaquə gonən ca gaquə yic̱hɉlaꞌaždaꞌochonꞌ canꞌ cheneꞌe Diozənꞌ par nic̱h šoꞌocho ganꞌ zoeꞌenəꞌ. Tozə xc̱hen Jesocrist nanꞌ zaquəꞌən par chonən ca chac yic̱hɉlaꞌaždaꞌochonꞌ canꞌ cheneꞌe Diozənꞌ.
\v 24 Catəꞌ Cristənꞌ gwdixɉueꞌ xtoḻəꞌəchonꞌ bito gwyoꞌe ḻoꞌo cuart əgwchope c̱he yoꞌodaꞌonəꞌ canꞌ gwsoꞌon bx̱oz caꞌ canaꞌ sino beyepeꞌ yobanꞌ ganꞌ zo Diozənꞌ, naꞌ naꞌ zoczeꞌ ṉaꞌa chṉeꞌ fabor chioꞌo lao Diozənꞌ. Naꞌ cuart əgwchope c̱he yoꞌodaoꞌ c̱he beṉəꞌ Izrael naꞌanəꞌ gwzon par bzeɉniꞌin chioꞌo canꞌ naquə ganꞌ zo Diozənꞌ.
\v 25 Bx̱oz əblao caꞌ ze tgüiz güeɉə gwsoꞌe ḻoꞌo yoꞌodaꞌonəꞌ ganꞌ nziꞌ latɉə ganꞌ zoczə Diozənꞌ bosoꞌožeꞌe chen c̱he bia yix̱əꞌ. Pero Cristənꞌ bito byažɉən əgwnežɉo cuineꞌ soꞌoteꞌeneꞌ zan las. Šlinzənꞌ blalɉ xc̱heneꞌenəꞌ par gwdixɉueꞌ xtoḻəꞌəchonꞌ.
\v 26 Žaləꞌ byažɉən lalɉə xc̱heneꞌen zan las, babnežɉw cuineꞌ zan las dezd catəꞌən gwxe yežlyonꞌ žaləꞌ caꞌ. Pero caguə caꞌanəꞌ. Bnežɉw cuineꞌ šlinzə catəꞌən bžin or c̱heꞌenəꞌ, naꞌ deꞌen gwsoꞌoteꞌeneꞌ šlinzə canaꞌ, gwdixɉueꞌ xtoḻəꞌəchonꞌ zeɉḻicaṉe.
\v 27 Naꞌ Diozənꞌ bansiꞌe xṉeze de que əžin ža saꞌat to to beṉac̱hənꞌ naꞌ šlinzənꞌ saꞌateꞌ. Naꞌ techlə əṉa Diozənꞌ c̱he to togaꞌaqueꞌ šə yesəꞌəziꞌe castigw o šə ṉiteꞌe mbalaz len ḻeꞌ.
\v 28 Naꞌ ca deꞌen saꞌat beṉac̱hənꞌ šlinzə ḻeczə šlinzənꞌ bnežɉw cuin Cristənꞌ gwsoꞌoteꞌeneꞌ gwdixɉueꞌ xtoḻəꞌ beṉac̱hənꞌ. Nach əžin ža yideꞌ deꞌe yoblə, caguə par c̱hixɉocheꞌ xtoḻəꞌəchonꞌ sino par nic̱h deyex̱iꞌe beṉəꞌ caꞌ chəsəꞌəbezə batəꞌəquənꞌ yideꞌenəꞌ.
\c 10
\p
\v 1 Ḻei deꞌen bzoɉ deꞌe Moisezənꞌ chzeɉniꞌin chioꞌo latəꞌəlaszə c̱he deꞌe güen deꞌen gaquə c̱hecho catəꞌ yežincho yobanꞌ ganꞌ zo Diozənꞌ. Pero ḻeinəꞌ bito goquə gonən par nic̱h yic̱hɉlaꞌaždaoꞌ beṉəꞌ caꞌ gwsoꞌon canꞌ nanṉəꞌ əsaꞌaquən canꞌ cheneꞌe Diozənꞌ, ḻaꞌaṉəꞌəczə gwsoꞌoteꞌ bia yix̱əꞌ yoguəꞌ iz par beziꞌixen Diozənꞌ xtoḻəꞌəgaꞌaqueꞌenəꞌ.
\v 2 Žaləꞌ deꞌen gwsoꞌoteꞌ bia caꞌ benən par nic̱h cuich soꞌoneꞌ deꞌe malənꞌ bitoch besəꞌəyažɉeneꞌ soꞌotəcheꞌeb žaləꞌ caꞌ. Pero deꞌen gwsaꞌacbeꞌineꞌ ṉeꞌe chsoꞌoneꞌ deꞌe malənꞌ nachənꞌ yoguəꞌ iz gwsoꞌoteꞌeb.
\v 3 Naꞌ deꞌen gwsoꞌoneꞌ caꞌ bito gwsaꞌanḻažeꞌe de que zɉənapeꞌ doḻəꞌ.
\v 4 Naꞌ gwsoꞌoneꞌ caꞌ yoguəꞌ iz c̱hedəꞌ chen c̱he no goꞌoṉ daoꞌ o no šib bito zaquəꞌən par yecaꞌan xtoḻəꞌ beṉəꞌ.
\p
\v 5 Deꞌe naꞌanəꞌ catəꞌ Cristənꞌ bideꞌ yežlyo nga gožeꞌ X̱eꞌ Diozənꞌ:
\q1 Ṉezdaꞌ to deꞌen chazlažəꞌəchoꞌ mazəchlə ca bia yix̱əꞌ bianꞌ chsoꞌot beṉəꞌ par chsoꞌelaꞌogüeꞌe leꞌ,
\q1 naꞌ mazəchlə ca bichlə deꞌen chsoꞌoṉeꞌ leꞌ.
\q1 Deꞌen chazlažoꞌonəꞌ əgwnežɉo cuinaꞌ par c̱hixɉuaꞌ xtoḻəꞌ beṉac̱hənꞌ.
\q1
\v 6 Ḻenṉəꞌ deꞌen chebeidoꞌ mazəchlə ca bianꞌ chsoꞌoteꞌ par chosoꞌozeyeꞌ,
\q1 naꞌ mazəchlə ca xc̱hen bia yix̱əꞌ deꞌen chəsəꞌəlalɉeꞌ catəꞌ chəsəꞌəṉabeꞌ yeziꞌixenoꞌ xtoḻəꞌəgaꞌaqueꞌenəꞌ.
\q1
\v 7 Deꞌe naꞌanəꞌ gožaꞌ leꞌ canꞌ nyoɉən ḻeꞌe ḻibrənꞌ ganꞌ nan:
\q1 “Dioz c̱hiaꞌ, zaꞌa nga zedəyenaꞌ con canꞌ chazlažoꞌonəꞌ.”
\m
\v 8 Zguaꞌatec Cristənꞌ gožeꞌ X̱eꞌ Diozənꞌ: “Ṉezdaꞌ deꞌen chazlažəꞌəchoꞌ naꞌ deꞌen chebeichdoꞌ ca deꞌen chsoꞌoteꞌ bia yix̱əꞌ naꞌ ca bichlə deꞌen chsoꞌoṉeꞌ leꞌ, naꞌ ca deꞌen chosoꞌozeyeꞌ bia caꞌ chsoꞌoteꞌ naꞌ ḻeczə ca deꞌen chəsəꞌəlalɉeꞌ xc̱hengaꞌacobənꞌ par chəsəꞌəṉabeꞌ cheziꞌixenoꞌ xtoḻəꞌəgaꞌaqueꞌenəꞌ.” Gwneꞌ caꞌ ḻaꞌaṉəꞌəczə ḻei deꞌen bzoɉ deꞌe Moisezənꞌ benən mendad gwsoꞌoteꞌ bia yix̱əꞌ naꞌ gwsoꞌoneꞌ bichlə deꞌe caꞌ gwsoꞌoneꞌenəꞌ.
\v 9 Nach Cristənꞌ gožeꞌ Diozənꞌ: “Nadaꞌ zaꞌa zedəyenaꞌ con canꞌ chazlažoꞌonəꞌ.” Deꞌe naꞌanəꞌ ṉezecho de que Diozənꞌ bitoch cheneꞌeneꞌ gotcho bia yix̱əꞌ canꞌ na ḻeinꞌ c̱hedəꞌ Cristənꞌ bagwdixɉueꞌ xtoḻəꞌəchonꞌ.
\v 10 Cristənꞌ beneꞌ con canꞌ gwyazlažəꞌ Diozənꞌ. Šlinzənꞌ bnežɉw cuineꞌ gwsoꞌot beṉəꞌ ḻeꞌ par beyoneꞌ yic̱hɉlaꞌaždaoꞌ yoguəꞌ chioꞌo chonḻilažəꞌəchoneꞌ xiꞌilažəꞌ.
\p
\v 11 Beṉəꞌ caꞌ zɉənaquə bx̱oz, yoguəꞌ ža nitəꞌətezə niteꞌe chsoꞌoteꞌ bia yix̱əꞌ par xtoḻəꞌ beṉəꞌ Izrael caꞌ yeḻaꞌ, len laꞌ xc̱hen bia yix̱əꞌən bito gaquə yecaꞌan xtoḻəꞌ beṉəꞌ.
\v 12 Pero naꞌ Cristənꞌ bnežɉw cuineꞌ šlinzə par gwdixɉueꞌ xtoḻəꞌəchonꞌ. Naꞌ beyožənꞌ zɉəyechiꞌe ganꞌ chnabiꞌe len Diozənꞌ.
\v 13 Naꞌ zoeꞌ naꞌ chbezeꞌ əžin ža ṉitəꞌ yoguəꞌ deꞌe caꞌ chsoꞌon contr ḻeꞌ naꞌ beṉəꞌ contr c̱heꞌ caꞌ xniꞌenəꞌ.
\v 14 Naꞌ deꞌen gwdixɉw Cristənꞌ xtoḻəꞌəchonꞌ šlinzə canaꞌ, naꞌ beyoneꞌ yic̱hɉlaꞌaždaoꞌ yoguəꞌ chioꞌo chonḻilažəꞌəchoneꞌ xiꞌilažəꞌ, ḻeczə babeneꞌ par nic̱h chac yic̱hɉlaꞌaždaꞌochonꞌ canꞌ cheneꞌe Diozənꞌ gaquən zeɉḻicaṉe.
\v 15 Naꞌ caguə nadəꞌəzaꞌ choꞌa dižəꞌ c̱he deꞌe caꞌ. Ḻeczə Spirit c̱he Diozənꞌ benən ca byoɉən caꞌ par nic̱h ṉezecho naquən deꞌe ḻi, nan:
\q1
\v 16 Quinga nonaꞌ lyebe gonaꞌ len ḻegaꞌaqueꞌ catəꞌ əžin žanꞌ:
\q1 Nadaꞌ Dioz gonaꞌ par nic̱h šoꞌo yic̱hɉgaꞌaqueꞌ deꞌe caꞌ nonaꞌ mendad soꞌoneꞌ,
\q1 naꞌ gonaꞌ par nic̱h yesyəꞌəbeineꞌen ḻoꞌo laꞌaždaꞌogaꞌaqueꞌenəꞌ.
\m
\v 17 Nach nyoɉ yeto deꞌen nan:
\q1 Cuatəch žɉsaꞌalažaꞌa c̱he deꞌe mal caꞌ bagwsoꞌoneꞌ naꞌ c̱he xtoḻəꞌəgaꞌaqueꞌenəꞌ.
\m
\v 18 Naꞌ catəꞌ babeziꞌixen Diozənꞌ xtoḻəꞌəchonꞌ, bitoch chyažɉecho gotcho bia yix̱əꞌ par əṉabcho yeziꞌixeneꞌen.
\s1 Cheyaḻəꞌ socho güeꞌelaꞌocho Diozənꞌ naꞌ goncho orasyon laogüeꞌenəꞌ
\p
\v 19 Ṉaꞌa ža beṉəꞌ bišəꞌ, laogüe deꞌe blalɉ Jesocristənꞌ xc̱heneꞌenəꞌ par gwdixɉueꞌ xtoḻəꞌəchonꞌ guaquəczə šoꞌocho ganꞌ zo Diozənꞌ sin cui žebcho.
\v 20 Deꞌen ben Jesocristənꞌ par nic̱h šoꞌocho ganꞌ zo Diozənꞌ naquən to deꞌe cobə laꞌ antslə “Latɉə ganꞌ zo Diozənꞌ” ḻoꞌo yoꞌodaꞌonəꞌ bgašəꞌən len to lachəꞌ. Pero ṉaꞌa deꞌen bnežɉw cuin Jesocristənꞌ por ni c̱hechonꞌ bito bi de deꞌen chcuašəꞌən latɉə ganꞌ zo Diozənꞌ yobanꞌ len chioꞌo chonḻilažəꞌəcho Jesocristənꞌ.
\v 21-22 Naꞌ deꞌen naquə Jesocristənꞌ bx̱oz əblao c̱hecho, naꞌ deꞌen chacleneꞌ chioꞌo naccho ca famiḻy c̱he Diozənꞌ, deꞌe naꞌanəꞌ cheyaḻəꞌ socho güeꞌelaꞌocho Diozənꞌ naꞌ goncho orasyon laogüeꞌenəꞌ do yic̱hɉ do lažəꞌəcho, gonḻilažəꞌəchoneꞌ sin cui gaquəžeɉlažəꞌəcho. Goncho caꞌ laogüe deꞌen blalɉ xc̱hen Jesocristənꞌ par bequeꞌe xtoḻəꞌəchonꞌ. Naꞌ ḻeczə bagwchoacho nisənꞌ.
\v 23 Naꞌ canꞌ gwzolaocho chonḻilažəꞌəcho Jesocristənꞌ, caꞌaczənꞌ cheyaḻəꞌ sotezə socho gonḻilažəꞌəchoneꞌ naꞌ yebeicho deꞌen žɉəyezocho len ḻeꞌ, c̱hedəꞌ laꞌ Diozənꞌ benꞌ ben lyebe žɉəyezocho len ḻeꞌ, choneꞌ complir canꞌ neꞌenəꞌ.
\v 24 Naꞌ ḻeczə cheyaḻəꞌ güeꞌe lɉuežɉcho balor par nic̱h gaquəchecho c̱he lɉuežɉcho naꞌ gonchcho deꞌe güen to yetocho.
\v 25 Naꞌ bito cueɉyic̱hɉcho deꞌen chdopcho txen par choꞌelaꞌocho Diozənꞌ, canꞌ chsoꞌon baḻə beṉəꞌ chəsəꞌəbeɉyic̱hɉeꞌen. Cheyaḻəꞌ gwtiplažəꞌ lɉuežɉcho par nic̱h sochcho c̱hec̱h gonḻilažəꞌəcho Cristənꞌ. Gonchcho caꞌ c̱hedəꞌ bazon baozə yidə Cristənꞌ yeto.
\p
\v 26 Naꞌ šə chioꞌo cueɉyic̱hɉcho dižəꞌ ḻi c̱he Diozənꞌ deꞌen banombiꞌacho par gontezcho deꞌe malənꞌ, bitoch gaquəlenən chioꞌo deꞌen blalɉ xc̱hen Jesocristənꞌ par bequeꞌe xtoḻəꞌəchonꞌ.
\v 27 Naꞌ šə goncho caꞌ, cheyaḻəꞌ žebcho castigw deꞌen goṉ Diozənꞌ chioꞌo, c̱hedəꞌ notəꞌətezcho choncho contr ḻeꞌ əseḻeꞌe chioꞌo ḻoꞌo yiꞌ ganꞌ cuiayiꞌicho.
\v 28 Ca naquə beṉəꞌ caꞌ chsaꞌaqueneꞌ bitobi zaquəꞌ ḻei deꞌen bzoɉ deꞌe Moisezənꞌ naꞌ bito chosoꞌozenagueꞌ c̱hei, beṉəꞌ gwlaž c̱hecho caꞌ chsoꞌoteꞌ ḻegaꞌaqueꞌ sin cui chesyəꞌəyašeꞌeneꞌ ḻegaꞌaqueꞌ, con šə nitəꞌ c̱hopə o šoṉə testigw beṉəꞌ chsoꞌe dižəꞌ de que deꞌe malənꞌ bagwsoꞌoneꞌ.
\v 29 Pero chioꞌo ža šə gueꞌicho Xiꞌiṉ Diozənꞌ naꞌ Spirit c̱heꞌenəꞌ deꞌen nžiꞌilažəꞌ chioꞌo, zaquəꞌəczən par siꞌicho castigw gualəch, naꞌ ḻeꞌegatezə caꞌ šə gaquecho cui bi zaquəꞌ xc̱heneꞌenəꞌ. Ḻenṉəꞌ bedəlalɉeꞌ par nic̱h gwzolao chac deꞌe cobə deꞌen ben Diozənꞌ lyebe goneꞌ par chacleneꞌ chioꞌo naꞌ bedəlalɉeꞌen par nic̱h yic̱hɉlaꞌaždaoꞌ chioꞌo chonḻilažəꞌəchoneꞌ beyaquən xiꞌilažəꞌ.
\v 30 Ṉezecho de que Diozənꞌ gwneꞌ: “Nadanꞌ coꞌolažaꞌa beṉəꞌ caꞌ chsoꞌon contr nadaꞌ naꞌ nadanꞌ gongaꞌacaꞌaneꞌ castigw.” Naꞌ ḻeczə nyoɉən nan: “Diozənꞌ gwnežɉueꞌ castigw c̱he beṉəꞌ caꞌ bagwcueꞌe caꞌ xiꞌiṉeꞌ šə soꞌoneꞌ deꞌe malənꞌ.”
\v 31 Naꞌ šə cueɉyic̱hɉcho Diozənꞌ benꞌ zo zeɉḻicaṉe, ḻechguaḻe deꞌe žebcho ca naquə castigonꞌ deꞌen goṉeꞌ chioꞌo.
\p
\v 32 Ḻeꞌe žɉsaꞌalažəꞌ canꞌ bcheɉele ḻaꞌaṉəꞌəczə deꞌe zan deꞌe gwdiꞌ gwxaquəꞌəle ca tyempənꞌ catəꞌən zeꞌe gwzolao gwyeɉniꞌile c̱he Cristənꞌ.
\v 33 Besyəꞌəbei beṉəꞌ contr c̱hele caꞌ bosoꞌogüieꞌ canꞌ bžaglaole catəꞌən bosoꞌožia bosoꞌoniteꞌe leꞌe naꞌ catəꞌən gosəꞌəqueꞌe deꞌen gotəꞌ c̱helenꞌ. Naꞌ ḻeczə bcheɉele par benḻe txen len beṉəꞌ lɉuežɉcho caꞌ catəꞌən goc c̱hegaꞌaqueꞌ caꞌ.
\v 34 Beyašəꞌ bežiꞌilažəꞌəle lɉuežɉcho caꞌ beṉəꞌ caꞌ gwsaꞌatəꞌ ližya naꞌ gwzole mbalaz ḻaꞌaṉəꞌəczə gosəꞌəcaꞌ beṉəꞌ deꞌen gotəꞌ c̱hele, c̱hedəꞌ laꞌ gwṉezele de que laogüe deꞌen chonḻilažəꞌəle Cristənꞌ de deꞌe zaquəꞌəche c̱hele yobanꞌ deꞌe cui te c̱hei.
\v 35 Ṉaꞌa ža, bito cueɉyic̱hɉle ca deꞌen chonḻilažəꞌəleneꞌ, c̱hedəꞌ gwžin ža catəꞌ sole mbalaz.
\v 36 Bito žɉx̱aquəꞌəlažəꞌəle par yeyož gonḻe yoguəꞌəḻoḻ canꞌ cheneꞌe Diozənꞌ laꞌ šə gonḻe canꞌ cheneꞌeneꞌenəꞌ žɉəyezole len ḻeꞌ zeɉḻicaṉe canꞌ beneꞌ lyebe.
\v 37 Nyoɉən canꞌ gwna Diozənꞌ nan:
\q1 Ḻechguaḻe lgüegwzə əžin ža catəꞌ yidə benꞌ əseḻaꞌa, naꞌ bito šeicheneꞌ.
\q1
\v 38 Naꞌ beṉəꞌ caꞌ zɉənaqueꞌ beṉəꞌ güen laoguaꞌanəꞌ cheyaḻəꞌ ṉiteꞌe soꞌonḻilažeꞌe nadaꞌ.
\q1 Naꞌ beṉəꞌ caꞌ chəsyəꞌəbižəꞌ cuich chsoꞌonḻilažeꞌe nadaꞌ, bitoczə yebeigaꞌacdaꞌaneꞌ.
\m
\v 39 Pero naꞌ chioꞌo ža, bito ṉacho naccho ca beṉəꞌ caꞌ chesyəꞌəbižəꞌ cuich chsoꞌonḻilažeꞌe Diozənꞌ, beṉəꞌ caꞌ yesəꞌəbiayiꞌ. Chioꞌo zotezə zocho chonḻilažəꞌəchoneꞌ naꞌ deꞌe naꞌanəꞌ ṉezecho žɉəyezocho len ḻeꞌ zeɉḻicaṉe.
\c 11
\s1 Diozənꞌ chebeineꞌ beṉəꞌ laogüe deꞌen chsoꞌonḻilažeꞌeneꞌ
\p
\v 1 Deꞌen chonḻilažəꞌəcho Diozənꞌ ṉezecho guaquə deꞌen chbezcho gaquə, naꞌ ṉezecho deꞌe ḻiczə canꞌ na Diozənꞌ c̱he deꞌe caꞌ cui chleꞌicho.
\v 2 Naꞌ beṉəꞌ caꞌ gwnitəꞌ gwlalte, bebei Diozənꞌ ḻegaꞌaqueꞌ laogüe deꞌen gwsoꞌonḻilažeꞌeneꞌ.
\p
\v 3 Naꞌ deꞌen chonḻilažəꞌəchoneꞌ cheɉniꞌicho de que con beneꞌ mendad goc yobanꞌ naꞌ yežlyonꞌ. Bito bi bc̱hineꞌ par beneꞌen.
\p
\v 4 Naꞌ ca naquə deꞌe Abeḻənꞌ, deꞌen benḻilažeꞌe Diozənꞌ, goqueꞌ beṉəꞌ güen lao Diozənꞌ naꞌ bebei Diozənꞌ deꞌen bnežɉw deꞌe Abeḻənꞌ ḻeꞌ cle ca deꞌen bnežɉw deꞌe Cainṉəꞌ. Naꞌ ḻaꞌaṉəꞌəczə cuich zo deꞌe Abeḻənꞌ, deꞌen benḻilažeꞌe Diozənꞌ chzeɉniꞌin chioꞌo de que canꞌ cheyaḻəꞌ goncho.
\p
\v 5 Naꞌ Enoquənꞌ ḻeczə benḻilažeꞌe Diozənꞌ, naꞌ deꞌe naꞌanəꞌ Diozənꞌ beziꞌ bequeꞌeneꞌ sin cui goteꞌ. Notoch no bleꞌi ḻeꞌ. Naꞌ nyoɉən c̱heꞌ de que chebei Diozənꞌ ḻeꞌ antslə zeꞌe yeziꞌ yequeꞌeneꞌ.
\v 6 Diozənꞌ bito chebeineꞌ notəꞌətezə beṉəꞌ cui chonḻilažəꞌ ḻeꞌ. Naꞌ šə no güeꞌelaoꞌ ḻeꞌ, cheyaḻəꞌ šeɉḻeꞌe de que zoczə Diozənꞌ naꞌ de que gwzenagczə Diozənꞌ c̱heꞌ šə bi deꞌen əṉabeneꞌ ḻeꞌ do yic̱hɉ do lažeꞌe.
\p
\v 7 Naꞌ ca naquə deꞌe Noenꞌ ža, ḻeczə benḻilažeꞌe Diozənꞌ. Naꞌ Diozənꞌ bosniseneꞌ ḻeꞌ canꞌ zeꞌe gaquə naꞌ deꞌe Noenꞌ gwyeɉḻeꞌe c̱heꞌ. Deꞌe naꞌanəꞌ Noenꞌ beneꞌ to barcw ganꞌ gwyoꞌe len famiḻy c̱heꞌ caꞌ par nic̱h bito gwsaꞌateꞌ len nisənꞌ. Naꞌ yeḻəꞌ chonḻilažəꞌ c̱heꞌenəꞌ len Diozənꞌ bloꞌin beṉəꞌ caꞌ yeziquəꞌəchlə gwžaꞌ yežlyonꞌ de que gwsaꞌapeꞌ doḻəꞌ. Naꞌ ḻeczə deꞌen benḻilažeꞌe Diozənꞌ, deꞌe naꞌanəꞌ Diozənꞌ gwneꞌ c̱heꞌ de que naqueꞌ beṉəꞌ güen laogüeꞌenəꞌ.
\p
\v 8 Naꞌ deꞌen benḻilažəꞌ deꞌe Abraanṉəꞌ Diozənꞌ, bzenagueꞌ catəꞌ Diozənꞌ beneꞌ mendad šeɉeꞌ zitəꞌ. Naꞌ ganꞌ gwyeɉeꞌ Diozənꞌ bloꞌineꞌ ḻeꞌ yežlyonꞌ deꞌen gaquə c̱heꞌ. Naꞌ gwyeɉeꞌ ḻaꞌaṉəꞌəczə bito nombiꞌe latɉənꞌ ca orənꞌ.
\v 9 Naꞌ deꞌen benḻilažəꞌ deꞌe Abraanṉəꞌ Diozənꞌ, gwzoeꞌ laž beṉəꞌ zitəꞌ ganꞌ ben Diozənꞌ lyebe gwnežɉueꞌ xiꞌiṉ dia c̱heꞌ caꞌ. Naꞌ deꞌe Abraanṉəꞌ gwzoeꞌ ḻoꞌo yoꞌo de lachəꞌəzə, naꞌ ḻeczə ḻoꞌo yoꞌo de lachəꞌəzə gosəꞌənitəꞌ deꞌe xiꞌiṉeꞌ Isaaquənꞌ naꞌ deꞌe xiꞌiṉ xesoeꞌ Jacobənꞌ, beṉəꞌ caꞌ ḻeczə gosəꞌəbezeꞌ gwnežɉo Diozənꞌ xiꞌiṉ dia c̱hegaꞌaqueꞌ caꞌ yežlyonꞌ.
\v 10 Bito bi goque deꞌe Abraanṉəꞌ deꞌen gwniteꞌe ḻoꞌo yoꞌo de lachəꞌəzə, c̱hedəꞌ gwzoeꞌ lez əžin ža soeꞌ ganꞌ zo Diozənꞌ, ganꞌ naquə to syoda güen deꞌe cui te c̱hei, syoda deꞌen ben Diozənꞌ.
\p
\v 11 Naꞌ ca naquə deꞌe Sar noꞌol c̱he deꞌe Abraanṉəꞌ, benḻilažeꞌe Diozənꞌ naꞌ deꞌe naꞌanəꞌ Diozənꞌ beneꞌ par nic̱h biꞌe bdaoꞌ naꞌ gwxaneꞌeboꞌ ḻaꞌaṉəꞌəczə cuich zoeꞌ xlaogüeꞌe saneꞌ. Diozənꞌ beneꞌ caꞌ len deꞌe Sarənꞌ c̱hedəꞌ Sarənꞌ gwyeɉḻeꞌe de que Diozənꞌ goneꞌ canꞌ beneꞌ lyebe.
\v 12 Deꞌe naꞌanəꞌ ḻaꞌaṉəꞌəczə deꞌe Abraanṉəꞌ naqueꞌ beṉəꞌ golə par so xiꞌiṉeꞌ, xiꞌiṉ dia c̱heꞌ caꞌ gwsaꞌaqueꞌ beṉəꞌ zan canꞌ zɉənaquə belɉw caꞌ deꞌen zɉəžia ḻeꞌe yobanꞌ naꞌ canꞌ naquə yox deꞌen chiꞌ choꞌa nisdaꞌonəꞌ, notono no gaquə gwlabeꞌ xiꞌiṉ dia c̱heꞌenəꞌ.
\p
\v 13 Deꞌe Abraanṉəꞌ, deꞌe Isaaquənꞌ naꞌ deꞌe Jacobənꞌ, naꞌ nochlə beṉəꞌ caꞌ, ṉeꞌe chsoꞌonḻilažəꞌəczeꞌ Diozənꞌ catəꞌ bžin ža gwsaꞌateꞌ ḻaꞌaṉəꞌəczə cuiṉəꞌ gac canꞌ ben Diozənꞌ lyebenꞌ. Bito gwsaꞌacžeɉlažeꞌe, sino que gwseꞌeɉḻeꞌeczeꞌ de que gwžin ža goneꞌ canꞌ gwneꞌenəꞌ. Naꞌ ḻegaꞌaqueꞌ gwsaꞌacbeꞌineꞌ de que zɉənaqueꞌ ca beṉəꞌ zitəꞌ len beṉəꞌ žaꞌ lao yežlyonꞌ naꞌ de que bito bi lažgaꞌaqueꞌ de lao yežlyo nga.
\v 14 Naꞌ deꞌen gwsaꞌaqueneꞌ cui bi lažgaꞌaqueꞌ de lao yežlyonꞌ, nacbiaꞌ de que gwseꞌeneneꞌ yesəꞌəžineꞌ ga yoblə ganꞌ gaquə lažgaꞌaqueꞌenəꞌ.
\v 15 Žaləꞌ gwsoꞌoneꞌ xbab c̱he yežənꞌ ganꞌ gwsaꞌalɉeꞌ de que naquən lažgaꞌaqueꞌenəꞌ, zɉəsyəꞌənitəꞌəlɉeꞌ naꞌ žaləꞌ caꞌ.
\v 16 Pero gwsoꞌoneꞌ xbab de que yobanꞌ naquən lažgaꞌaqueꞌenəꞌ naꞌ gwseꞌenchgüeineꞌ yesyəꞌəžineꞌ naꞌ, c̱hedəꞌ laꞌ güench naquən cle ca yežlyonꞌ. Deꞌe naꞌanəꞌ Diozənꞌ bito chetoꞌineꞌ c̱hegaꞌaqueꞌ par əṉeꞌ de que naqueꞌ Dioz c̱hegaꞌaqueꞌ benꞌ chsoꞌelaogüeꞌe, naꞌ ḻeꞌ babenšaogüeꞌe to syoda par ḻegaꞌaqueꞌ.
\p
\v 17-18 Naꞌ ca naquə deꞌe Abraanṉəꞌ benḻilažeꞌe Diozənꞌ, deꞌe naꞌanəꞌ bzenagueꞌ catəꞌ Diozənꞌ beneneꞌ prueb gožeꞌeneꞌ: “Bet xiꞌiṉoꞌ Isaaquənꞌ canꞌ chotoꞌ bia yix̱əꞌ caꞌ naꞌ chlalɉoꞌ xc̱hengaꞌaquəbənꞌ par choꞌelaogoꞌo nadaꞌ.” Naꞌ gwṉeze deꞌe Abraanṉəꞌ de que Diozənꞌ beneꞌ lyebe len ḻeꞌ deꞌe zan deꞌe güen deꞌe gaquə por xiꞌiṉ dia c̱heꞌenəꞌ. Naꞌ c̱he biꞌi nanꞌ gož Diozənꞌ deꞌe Abraanṉəꞌ: “Xiꞌiṉ dia c̱he Isaac naꞌazə gonaꞌ cuent lao dia c̱hioꞌonəꞌ.” Pero biaꞌaczə bzenag deꞌe Abraanṉəꞌ ca deꞌen gož Diozənꞌ ḻeꞌ got xiꞌiṉeꞌ tlišəꞌənəꞌ. Naꞌ bžin orənꞌ, Diozənꞌ bito beꞌe latɉə goteꞌeboꞌ.
\v 19 Deꞌe Abraanṉəꞌ bzenagueꞌ par goteꞌeboꞌ c̱hedəꞌ gwṉezeneꞌ de que Diozənꞌ chac yosbaneꞌ beṉəꞌ guat caꞌ. Naꞌ ca naquə Diozənꞌ bito beꞌe latɉə goteꞌ xiꞌiṉeꞌenəꞌ guac əṉacho de que Diozənꞌ bosbaneꞌeboꞌ ladɉo beṉəꞌ guat caꞌ.
\p
\v 20 Nach ḻeczə deꞌe Isaaquənꞌ benḻilažeꞌe Diozənꞌ, naꞌ deꞌe naꞌanəꞌ gwṉabeneꞌ Diozənꞌ goneꞌ güen len xiꞌiṉeꞌ caꞌ deꞌe Jacobənꞌ naꞌ deꞌe Esaꞌonꞌ.
\v 21 Ḻeczə deꞌe Jacobənꞌ benḻilažeꞌe Diozənꞌ, naꞌ deꞌe naꞌanəꞌ catəꞌ bazon gateꞌ gwṉabeneꞌ Diozənꞌ goneꞌ güen len xiꞌiṉ xesoeꞌ caꞌ, xiꞌiṉ deꞌe Jwsenꞌ. Naꞌ bc̱hequəꞌ yic̱hɉeꞌenəꞌ beꞌelaꞌogüeꞌe Diozənꞌ žiašaꞌatezə garrot c̱heꞌenəꞌ.
\v 22 Naꞌ deꞌe Jwsenꞌ ḻeczə benḻilažeꞌe Diozənꞌ naꞌ gwyeɉḻeꞌe de que əžin ža yesyəꞌəchoɉ beṉəꞌ Izrael caꞌ Egiptonꞌ canꞌ ben Diozənꞌ lyebe. Deꞌe naꞌanəꞌ catəꞌ bazon gateꞌ beneꞌ mendad yesyəꞌəyoꞌe žit c̱he cuerp c̱heꞌenəꞌ catəꞌ žɉəyaꞌaqueꞌ Canaanṉəꞌ.
\p
\v 23 Naꞌ catəꞌ golɉə deꞌe Moisezənꞌ, deꞌe tant gwsoꞌonḻilažəꞌ deꞌe x̱axneꞌe caꞌ Diozənꞌ, bito besəꞌəžebeꞌ soꞌoneꞌ contr canꞌ ben deꞌe reinꞌ mendad soꞌoneꞌ ca deꞌen gožeꞌ beṉəꞌ Izrael caꞌ soꞌot biꞌi c̱hegaꞌaqueꞌ caꞌ. Šoṉə bioꞌ bosoꞌocuašeꞌe deꞌe Moisezənꞌ ližgaꞌaqueꞌenəꞌ, c̱hedəꞌ gwsaꞌaqueneꞌ nacboꞌ xochechgua. Naꞌ catəꞌ bitoch goquə yosoꞌocuašeꞌeboꞌ, xiꞌiṉ reinꞌ bequeꞌeboꞌ bosc̱haꞌogüeꞌeboꞌ.
\v 24 Naꞌ catəꞌ bagwchaꞌo deꞌe Moisezənꞌ, benḻilažeꞌe Diozənꞌ naꞌ deꞌe naꞌanəꞌ bito goneꞌeneꞌ gaqueꞌ cuent ca biꞌi c̱he deꞌe xiꞌiṉ Rei Faraonṉəꞌ.
\v 25 Gwyazlažəꞌəcheꞌ bžaglaogüeꞌ txen len beṉəꞌ Izrael caꞌ ca deꞌen gosəꞌəzaquəꞌəziꞌ gosəꞌəzaquəꞌəyašeꞌe, cle ca goneꞌ bi deꞌen chəsyəꞌəbei beṉəꞌ mal caꞌ chsoꞌoneꞌ, laꞌ deꞌe te c̱hei deꞌe caꞌ.
\v 26 Deꞌen bžaglao deꞌe Moisezənꞌ gwxaquəꞌəleben ca deꞌen gwxaquəꞌəziꞌ Cristənꞌ. Naꞌ gocbeꞌineꞌ de que deꞌe zaquəꞌəche əžaglaogüeꞌ yoguəꞌ deꞌe caꞌ cle ca siꞌe doxen yeḻəꞌ gwniꞌa c̱he Egiptonꞌ. Gwṉezeneꞌ gwžin ža catəꞌ gon Diozənꞌ par nic̱h soeꞌ mbalaz.
\v 27 Naꞌ deꞌen benḻilažeꞌe Diozənꞌ bito bžebeꞌ reinꞌ catəꞌ bžin ža besyəꞌəchoɉeꞌ Egiptonꞌ ḻaꞌaṉəꞌəczə reinꞌ bžaꞌachgüeꞌ ḻegaꞌaqueꞌ. Naꞌ deꞌe Moisezənꞌ gwloꞌo gwc̱heɉlažeꞌe len deꞌe caꞌ bžaglaogüeꞌ lao beneꞌ par besyəꞌəchoɉeꞌ Egiptonꞌ c̱hedəꞌ gwṉezeneꞌ zoczə Diozənꞌ len ḻeꞌ ca ṉacho chleꞌiczeneꞌ ḻeꞌ. Ḻaꞌaṉəꞌəczə Diozənꞌ cui no chac leꞌi ḻeꞌ.
\p
\v 28 Naꞌ deꞌe Moisezənꞌ deꞌen benḻilažeꞌe Diozənꞌ beneꞌ mendad len to to famiḻy beṉəꞌ Izrael caꞌ gwsoꞌoteꞌ xiləꞌ daoꞌ caꞌ canꞌ gož Diozənꞌ ḻeꞌ naꞌ bosoꞌožeꞌe xc̱hengaꞌaquəbənꞌ ližgaꞌaqueꞌenəꞌ par nic̱h anglənꞌ benꞌ bseḻəꞌ Diozənꞌ bito beteꞌ biꞌi nech caꞌ lao yoguəꞌ famiḻy c̱hegaꞌaqueꞌenəꞌ.
\v 29 Naꞌ beṉəꞌ Izrael caꞌ deꞌen gwsoꞌonḻilažeꞌe Diozənꞌ, Diozənꞌ beneꞌ par nic̱h Nisdaoꞌ Exṉanꞌ goquən c̱hoplə xte blaꞌ yo biž par nic̱h goc gosəꞌədieꞌ yešḻaꞌalə. Pero naꞌ beṉəꞌ Egipto caꞌ catəꞌ gwsaꞌaclažeꞌe yesəꞌədieꞌ, beyeyɉw nisənꞌ ganꞌ chəsəꞌədiꞌenəꞌ naꞌ gwsaꞌateꞌ gwseꞌeɉeꞌ nisənꞌ.
\p
\v 30 Naꞌ ḻeczə deꞌen gwsoꞌonḻilažəꞌ beṉəꞌ Izrael caꞌ Diozənꞌ, deꞌe naꞌanəꞌ Diozənꞌ beneꞌ par nic̱h bebix̱ə zeꞌe deꞌen gwyec̱hɉ doxen syoda Jericonꞌ catəꞌ beṉəꞌ Izrael caꞌ ɉəsəꞌəžec̱hɉeꞌen yoguəꞌ ža lao gažə ža.
\v 31 Naꞌ deꞌe Raabənꞌ noꞌolənꞌ goquə sargat antslə, ḻeczə benḻilažeꞌe Diozənꞌ. Naꞌ deꞌen benḻilažeꞌeneꞌ bito gwžiayeꞌe len beṉəꞌ Jerico caꞌ beṉəꞌ caꞌ cui bosoꞌozenag c̱he Diozənꞌ, c̱hedəꞌ ḻeꞌ ža bgüialaogüeꞌ beṉəꞌ Izrael caꞌ ližeꞌenəꞌ beṉəꞌ caꞌ ɉəsəꞌəgüia ɉəsəꞌəyeꞌ lažeꞌenəꞌ.
\p
\v 32 ¿Bichxanꞌ əṉiaꞌ ža? Bito nḻatɉaꞌ par guaꞌa dižəꞌ c̱he deꞌe Gedeonṉəꞌ, c̱he deꞌe Baraquənꞌ, c̱he deꞌe Sansonṉəꞌ, c̱he deꞌe Jeftenꞌ, c̱he deꞌe Dabinꞌ, c̱he deꞌe Samuelənꞌ naꞌ c̱he yeziquəꞌəchlə beṉəꞌ caꞌ gwsoeꞌ xtižəꞌ Diozənꞌ canaꞌ.
\v 33 Naꞌ laogüe deꞌen gwsoꞌonḻilažeꞌe Diozənꞌ baḻeꞌ besəꞌəchoɉeꞌ gwsoꞌoneꞌ gan catəꞌ gosəꞌədiḻəleneꞌ no rei, naꞌ yebaḻeꞌ gwsoꞌoneꞌ byen par nic̱h beṉəꞌ yoblə gwsoꞌoneꞌ deꞌen naquə deꞌe güen. Naꞌ yebaḻeꞌ ben Diozənꞌ lyebe goneꞌ to deꞌe goneꞌ len ḻegaꞌaqueꞌ naꞌ goc canꞌ beneꞌ lyebenꞌ, nach ḻeczə yebaḻeꞌ Diozənꞌ beneꞌ par nic̱h bež əznia caꞌ cui bi gwsoꞌoneꞌeb ḻegaꞌaqueꞌ.
\v 34 Naꞌ ḻeczə deꞌen gwsoꞌonḻilažeꞌe Diozənꞌ, baḻeꞌ bito gwseꞌeyeꞌ ḻoꞌo yiꞌinəꞌ, naꞌ yebaḻeꞌ besyəꞌəla catəꞌ gwseꞌeneꞌe beṉəꞌ soꞌoteꞌ ḻegaꞌaqueꞌ len spadənꞌ, naꞌ yebaḻeꞌ bnežɉw Diozənꞌ ḻegaꞌaqueꞌ fuers balor catəꞌ cui bi fuers c̱hegaꞌaqueꞌ gotəꞌ, naꞌ yebaḻeꞌ gwsaꞌaqueꞌ soḻdad gual, naꞌ yebaḻeꞌ gwsoꞌoneꞌ gan soḻdad zitəꞌ beṉəꞌ besəꞌəžin gosəꞌədiḻəleneꞌ ḻegaꞌaqueꞌ.
\v 35 Gwnitəꞌ noꞌolə gwsoꞌonḻilažəꞌ Diozənꞌ naꞌ laogüe deꞌen gwsoꞌonḻilažeꞌeneꞌenəꞌ bosbaneꞌ no famiḻy c̱hegaꞌaqueꞌ ladɉo beṉəꞌ guat caꞌ.
\p Naꞌ gwnitəꞌ beṉəꞌ gwsoꞌonḻilažəꞌ Diozənꞌ naꞌ bito gwseꞌeneneꞌ yesəꞌəbeɉyic̱hɉeꞌeneꞌ par yesyəꞌəchoɉeꞌ lao deꞌen chəsəꞌəc̱hiꞌ chəsəꞌəsaquəꞌ beṉəꞌ ḻegaꞌaqueꞌ, c̱hedəꞌ gwniteꞌe lez yoḻis yosban Diozənꞌ ḻegaꞌaqueꞌ ladɉo beṉəꞌ guat caꞌ par žɉəsyəꞌəniteꞌe len ḻeꞌ.
\v 36 Naꞌ gwnitəꞌ beṉəꞌ ḻechguaḻe gosəꞌəziꞌic̱hižəꞌ beṉəꞌ ḻegaꞌaqueꞌ naꞌ gwsoꞌot gosəꞌəyineꞌ ḻegaꞌaqueꞌ naꞌ bosoꞌoc̱heɉeꞌ ḻegaꞌaqueꞌ gden, naꞌ gosəꞌəyix̱ɉueꞌ ḻegaꞌaqueꞌ ližya.
\v 37 Naꞌ beṉəꞌ mal caꞌ bosoꞌošižeꞌe baḻə beṉəꞌ caꞌ chsoꞌonḻilažəꞌ Diozənꞌ yeɉ, naꞌ bosoꞌozoxɉeꞌ cuerp c̱he yebaḻeꞌ len syer, naꞌ gosəꞌəgoꞌoyeḻeꞌe yebaḻeꞌ par yesəꞌəbeɉyic̱hɉeꞌ Diozənꞌ, pero bito gosəꞌəbeɉyic̱hɉeꞌeneꞌ, naꞌ gwsoꞌoteꞌ yebaḻeꞌ len spad. Naꞌ baḻə beṉəꞌ caꞌ gwsoꞌonḻilažəꞌ Diozənꞌ gwsaꞌašeꞌ yix̱əꞌ zɉənyazeꞌ no xa xiləꞌ naꞌ no xa šib. Bitobi bi gotəꞌ c̱hegaꞌaqueꞌ. Ḻechguaḻe nyašəꞌ goc c̱hegaꞌaqueꞌ. Naꞌ ḻechguaḻe bosoꞌoc̱hiꞌ bosoꞌosaquəꞌ beṉəꞌ ḻegaꞌaqueꞌ.
\v 38 Gosəꞌəlažeꞌe do latɉə dašənꞌ naꞌ do yaꞌadaoꞌ naꞌ do ga ze bḻoɉ naꞌ ga zo no liž bia yix̱əꞌ. Yoguəꞌ deꞌe caꞌ goc c̱he beṉəꞌ caꞌ gwsoꞌonḻilažəꞌ Diozənꞌ, len laꞌ zɉəzaquəꞌəcheꞌ lao Diozənꞌ cle ca yoguəꞌ beṉəꞌ caꞌ cui gwsoꞌonḻilažeꞌeneꞌenəꞌ.
\v 39 Naꞌ ḻaꞌaṉəꞌəczə bebei Diozənꞌ yoguəꞌ beṉəꞌ caꞌ gwsoꞌonḻilažəꞌ ḻeꞌ, bito beneꞌ ca gaquə yoguəꞌəḻoḻ deꞌe caꞌ beneꞌ lyebe žlac gwnitəꞌ ḻegaꞌaqueꞌ.
\v 40 Diozənꞌ bito goneꞌeneꞌ gaquə c̱he ḻegaꞌaczeꞌ deꞌen beneꞌ lyebe, sino beneꞌ par nic̱h txen len ḻegaꞌaqueꞌ bagoc c̱hecho canꞌ beneꞌ lyebe gaquə par nic̱h chac yic̱hɉlaꞌaždaꞌochonꞌ canꞌ cheneꞌeneꞌenəꞌ, naꞌ ḻechguaḻe mbalaz canꞌ beneꞌenəꞌ.
\c 12
\s1 Cheyaḻəꞌ sotezə socho goncho xbab c̱he Jesoꞌosənꞌ
\p
\v 1 Deꞌen gwsoꞌon yoguəꞌ beṉəꞌ caꞌ gwsoꞌonḻilažəꞌ Diozənꞌ žlac gosəꞌəbaneꞌ yežlyo nga chzeɉniꞌin chioꞌo canꞌ cheyaḻəꞌ gonḻilažəꞌəchoneꞌ. Deꞌe nanꞌ cheyaḻəꞌ gwcuiꞌižəcho caꞌaḻə šə bi deꞌen chžon par gonḻilažəꞌəchcho Diozənꞌ, naꞌ cueɉyic̱hɉcho šə bi deꞌe mal deꞌen choncho. Naꞌ cheyaḻəꞌ coꞌo gwc̱heɉlažəꞌəcho len bitəꞌətezə deꞌe chac c̱hecho par nic̱h sotezə socho gonḻilažəꞌəcho Diozənꞌ naꞌ goncho canꞌ neꞌenəꞌ.
\v 2 Cheyaḻəꞌ sotezə socho goncho xbab c̱he Jesoꞌosənꞌ c̱hedəꞌ tozə ḻeꞌ chonḻilažeꞌe Diozənꞌ cayaṉəꞌən cheyaḻəꞌ gonḻilažəꞌəchoneꞌ chioꞌo. Gwṉeze Jesoꞌosənꞌ zeꞌe gon Diozənꞌ par nic̱h soeꞌ mbalaz len ḻeꞌ, naꞌ deꞌe naꞌanəꞌ gwloꞌo gwc̱heɉlažeꞌe deꞌen gwxaquəꞌəziꞌe catəꞌən gwsoꞌot beṉəꞌ ḻeꞌ ḻeꞌe yag corozənꞌ naꞌ beꞌe latɉə beyaꞌ gwsoꞌone beṉəꞌ caꞌ ḻeꞌ. Pero ṉaꞌa chiꞌileneꞌ Diozənꞌ yobanꞌ naꞌ chəsəꞌənabiꞌe txen.
\p
\v 3 Cheyaḻəꞌ goncho xbab c̱he Jesoꞌosənꞌ canꞌ gwloꞌo gwc̱heɉlažeꞌe len yoguəꞌ deꞌen gwsoꞌon beṉəꞌ mal caꞌ contr ḻeꞌ par nic̱h coꞌo gwc̱heɉlažəꞌəcho naꞌ cui gaquecho zdebə goncho canꞌ cheneꞌe Diozənꞌ.
\v 4 Naꞌ chioꞌo ža, deꞌe zan babžaglaocho c̱hedəꞌ choncho xte ga zelao chzaqueꞌecho par cui choncho deꞌe malənꞌ, pero notonoṉəꞌ got chioꞌo.
\v 5 Cheyaḻəꞌ žɉsaꞌalažəꞌəcho de que Diozənꞌ choṉeꞌ chioꞌo consejw canꞌ chsoꞌon beṉəꞌ len xiꞌiṉgaꞌaqueꞌ. Naꞌ consejonꞌ choṉeꞌ chioꞌo nyoɉən nan:
\q1 Xiꞌiṉdaoguaꞌa, bito gaquele de que cui bi zeɉen ca deꞌen choṉaꞌ castigw c̱helenꞌ catəꞌ chonḻe bi deꞌe malənꞌ,
\q1 naꞌ bito gaquele tolə catəꞌ chdiḻaꞌ leꞌe, nadaꞌ nacaꞌ X̱anḻe.
\q1
\v 6 Deꞌe naꞌanəꞌ nadaꞌ chnežɉuaꞌ castigw c̱he beṉəꞌ caꞌ chacdaꞌ c̱hei catəꞌ chsoꞌoneꞌ deꞌe malənꞌ,
\q1 naꞌ chonaꞌ par nic̱h chəsəꞌəžaglao beṉəꞌ caꞌ bagwcuaꞌa ca xiꞌiṉaꞌ catəꞌ cui chosoꞌozenagueꞌ c̱hiaꞌ.
\m
\v 7 Deꞌe nanꞌ ža, Diozənꞌ choṉeꞌ chioꞌo castigw c̱hedəꞌ chosgoleꞌ chioꞌo canꞌ chsoꞌon beṉac̱hənꞌ chosyoꞌosgoleꞌ xiꞌiṉgaꞌaqueꞌenəꞌ biꞌi chsaꞌaqueneꞌ c̱hei, chsoꞌoneꞌ castigw c̱hegaꞌacboꞌ catəꞌ chsoꞌomboꞌ deꞌe malənꞌ.
\v 8 Naꞌ šə cui bi castigw c̱hechonꞌ choṉ Diozənꞌ catəꞌ choncho deꞌe malənꞌ, zeɉe dižəꞌ de que bito naccho xiꞌiṉeꞌ, laꞌ yoguəꞌ chioꞌo bagwcueꞌe ca xiꞌiṉeꞌ catəꞌ choncho deꞌe malənꞌ choṉeꞌ castigw c̱hecho.
\v 9 X̱axnaꞌacho caꞌ bosyoꞌosgoleꞌ chioꞌo yežlyo nga naꞌ gwsoꞌoṉeꞌ castigw c̱hecho c̱he bi deꞌe mal deꞌen bencho naꞌ bzenagcho c̱hegaꞌaqueꞌ. Naquəchxe cheyaḻəꞌ əgwzex̱ɉw yic̱hɉchonꞌ gwzenagcho con binꞌ əṉa X̱acho Diozənꞌ benꞌ choṉ yeḻəꞌ mban zeɉḻicaṉe c̱he chioꞌo chonḻilažəꞌəchoneꞌ.
\v 10 Naꞌ x̱axnaꞌacho caꞌ lao to c̱hop izənꞌ gwsoꞌoneꞌ castigw c̱hecho con canꞌ gwnan c̱hegaꞌaqueꞌenəꞌ. Pero naꞌ Diozənꞌ choneꞌ chioꞌo castigw parzə nic̱h gaquəleneꞌ chioꞌo, par nic̱h caꞌ gaccho beṉəꞌ laꞌaždaoꞌ xiꞌilažəꞌ canꞌ naqueꞌenəꞌ.
\v 11 Naꞌ lao orənꞌ bito chazlažəꞌəcho bitəꞌətezə castigw deꞌen chaccho. Pero galɉ chdelə cheyacbeꞌicho naquənꞌ goncho c̱hedəꞌ castigw deꞌen chaccho chaclenən chioꞌo par nic̱h sotezə socho goncho deꞌe güenṉəꞌ.
\s1 Diozənꞌ goneꞌ castigw c̱hecho šə cui gwzenagcho c̱heꞌ
\p
\v 12 Deꞌe naꞌanəꞌ ḻesotezə ḻeso ḻegonḻilažəꞌ Diozənꞌ naꞌ ḻeꞌe coꞌo gwc̱heɉlažəꞌ bitəꞌətezə deꞌen chyiꞌ deꞌen chzaquəꞌəle.
\v 13 Ḻeso ḻegon con canꞌ cheneꞌe Diozənꞌ. Ḻegonən par nic̱h beṉəꞌ lɉuežɉle caꞌ yosoꞌozenaguəcheꞌ c̱he Diozənꞌ caguə ca yesəꞌəxopeꞌ soꞌoncheꞌ deꞌe malənꞌ, c̱hedəꞌ baḻeꞌ cuiṉəꞌ yosoꞌozenagueꞌ c̱he yoguəꞌəḻoḻ deꞌen cheneꞌe Diozənꞌ soꞌoneꞌ.
\p
\v 14 Ḻegon ga zelao saqueꞌele par nic̱h sole binḻo len yoguəꞌ beṉəꞌ chsoꞌonḻilažəꞌ Jesocristənꞌ. Naꞌ ḻeczə ḻegüeꞌ latɉə par nic̱h Diozənꞌ goneꞌ laꞌaždaꞌolenꞌ xiꞌilažəꞌ, c̱hedəꞌ notono no yežin ganꞌ zo Diozənꞌ šə cui naquə laꞌaždaꞌogüeꞌen xiꞌilažəꞌ.
\v 15 Bito güeꞌele latɉə par nic̱h tole cueɉyic̱hɉle cuich talenḻe Diozənꞌ, laꞌ Diozənꞌ nžiꞌilažəꞌəchgüeꞌ yoguəꞌəcho. Naꞌ šə tole cueɉyic̱hɉle Diozənꞌ, nx̱ož yoguəꞌəle gonḻe caꞌ.
\v 16 Bito coꞌo xtole o cueɉyic̱hɉle beꞌen c̱hele o noꞌol c̱hele par solenḻe beṉəꞌ yoblə. Naꞌ bito gueꞌile deꞌen naquə deꞌe zaqueꞌe lao Diozənꞌ. Ṉezecho deꞌe Esaꞌonꞌ por to yeḻəꞌ guao naꞌazə beteꞌe deꞌen banaquən gwnežɉo Diozənꞌ ḻeꞌ deꞌen golɉeꞌ naqueꞌ beṉəꞌ nech.
\v 17 Ṉezele de que gwdechlə goneꞌeneꞌ yeyac lao neꞌe deꞌen bdieꞌ lao naꞌ beṉəꞌ bišeꞌenəꞌ, pero bito goquə bi goneꞌ par nic̱h yeyaquən lao neꞌenəꞌ ḻaꞌaṉəꞌəczə gwchežeꞌ tant goneꞌeneꞌ yeyaquən lao neꞌenəꞌ.
\p
\v 18 Nžaꞌalə chac c̱he chioꞌo ṉaꞌa cle ca canꞌ goc c̱he deꞌe x̱axtaꞌocho caꞌ catəꞌən Diozənꞌ bnežɉueꞌ ḻegaꞌaqueꞌ ḻei c̱heꞌenəꞌ. Betɉeꞌ lao yaꞌa Sinainꞌ naꞌ gwyec̱hɉ yiꞌ beḻ lao yaꞌanəꞌ, naꞌ gwx̱oan žen, naꞌ beyaquən žc̱hoḻ, naꞌ gwyec̱hɉchgua beꞌ.
\v 19 Naꞌ gwseꞌeneneꞌ gwchež to trompet, naꞌ ḻeczə gwseꞌeneneꞌ beꞌ Diozənꞌ dižəꞌ len ḻegaꞌaqueꞌ. Pero deꞌe tant besəꞌəžebeꞌ xte gwsaꞌatəꞌəyoineꞌ deꞌe Moisezənꞌ par nic̱h yeꞌe Diozənꞌ cuich güeꞌeleneꞌ ḻegaꞌaqueꞌ dižəꞌ.
\v 20 Ḻechguaḻe besəꞌəžebeꞌ por ni c̱he deꞌen gož Diozənꞌ ḻegaꞌaqueꞌ antslə de que šə no beṉəꞌ žɉəbigueꞌe yaꞌanəꞌ par yesəꞌəgüieꞌ laogüenꞌ yosoꞌošižeꞌeneꞌ yeɉ, naꞌ ḻeczə caꞌ soꞌoneneꞌ šə bia yix̱əꞌ.
\v 21 Naꞌ ṉezecho ḻechguaḻe deꞌe zaquəꞌ žebchonꞌ goquəczə lao yaꞌa Sinainꞌ, c̱hedəꞌ len deꞌe Moisezənꞌ gwneꞌ: “Ḻechguaḻe chaž chžebaꞌ canꞌ chac.”
\p
\v 22 Pero ṉaꞌa ža chioꞌo banaccho txen len Diozənꞌ benꞌ zo zeɉḻicaṉe naꞌ len yoguəꞌ angl zan c̱heꞌ caꞌ beṉəꞌ caꞌ žeꞌ yoban. Naꞌ yobanꞌ gwxaquəꞌəleben ca syoda Jerosalenṉəꞌ naꞌ ca yaꞌa Sionṉəꞌ.
\v 23 Naꞌ naccho txen len yoguəꞌəḻoḻte beṉəꞌ yeziquəꞌəchlə beṉəꞌ caꞌ ḻeczə chəsəꞌədopə chəsəꞌəžag chsoꞌelaogüeꞌe Jesocristənꞌ, naꞌ yoguəꞌəcho len ḻegaꞌaqueꞌ gwxaquəꞌəlebecho ca to beṉəꞌ golɉə nech lao to famiḻy laogüe deꞌen naccho beṉəꞌ blao lao Diozənꞌ, naꞌ yoguəꞌəcho nyoɉ lachonꞌ ḻeꞌe ḻibr c̱he Diozənꞌ deꞌen de yobanꞌ. Naccho txen len Diozənꞌ benꞌ əc̱hoglaogüeꞌen c̱he yoguəꞌəḻoḻ beṉac̱hənꞌ šə zɉənaqueꞌ beṉəꞌ güen o šə zɉənaqueꞌ beṉəꞌ mal. Ḻeczə naccho txen len beṉəꞌ caꞌ bagwsaꞌat, beṉəꞌ caꞌ gwsoꞌonḻilažəꞌ Cristənꞌ lao gwniteꞌe yežlyonꞌ. Diozənꞌ babeneꞌ par nic̱h yic̱hɉlaꞌaždaoꞌ ḻegaꞌaqueꞌenəꞌ banaquənꞌ cayaṉəꞌən cheneꞌeneꞌ əsaꞌaquən.
\v 24 Ṉaꞌa ža zocho txen len Jesoꞌosənꞌ c̱hedəꞌ ḻeꞌenəꞌ bedəlalɉ xc̱heneꞌenəꞌ par nic̱h gwzolao chon Diozənꞌ deꞌe cobə deꞌen noneꞌ lyebe goneꞌ par gaquəleneꞌ chioꞌo. Naꞌ xc̱hen Jesoꞌosənꞌ deꞌen bedəlalɉeꞌ catəꞌən gwsoꞌoteꞌeneꞌ chloꞌin de que Diozənꞌ cheziꞌixeneꞌ xtoḻəꞌ con beṉəꞌ chsoꞌonḻilažəꞌ Jesoꞌosənꞌ. Caguə canꞌ naquən len xc̱hen deꞌe Abeḻənꞌ deꞌen gwlalɉənꞌ, c̱hedəꞌ ḻenṉəꞌ con bloꞌen de que deꞌe malənꞌ ben beṉəꞌ bišeꞌenəꞌ beteꞌeneꞌ.
\p
\v 25 Naquən deꞌe žialao xen gwzenagcho c̱he xtižəꞌ Diozənꞌ. Ṉezecho de que bnežɉueꞌ castigw c̱he deꞌe x̱axtaꞌocho caꞌ catəꞌən gwsaꞌaqueꞌ godenag len xtižeꞌenəꞌ deꞌen beꞌ deꞌe Moisezənꞌ len ḻegaꞌaqueꞌ. Pero goncheꞌ castigw c̱he chioꞌo šə cui gwzenagcho c̱he xtižeꞌenəꞌ deꞌen bedəzeɉniꞌi Xiꞌiṉeꞌ benꞌ zo yobanꞌ.
\v 26 Ḻechguaḻe gwxoꞌ catəꞌ Diozənꞌ betɉeꞌ yobanꞌ par bžineꞌ lao yaꞌa Sinainꞌ ganꞌ beꞌeleneꞌ beṉəꞌ Izrael caꞌ dižəꞌənəꞌ. Naꞌ gwdechlə gwneꞌ: “Gwžin ža catəꞌ yossiꞌiṉsaꞌ yežlyonꞌ deꞌe yoblə, pero caguə yežlyo naꞌazənꞌ sino que lenczə deꞌe caꞌ chleꞌicho ḻeꞌe yobanꞌ.”
\v 27 Naꞌ deꞌen gwneꞌ de que yossiꞌiṉseꞌen deꞌe yoblə, zeɉen de que canaꞌachənꞌ te c̱he yoguəꞌ deꞌe caꞌ ben Diozənꞌ deꞌen chleꞌicho, ca naquə yežlyonꞌ naꞌ deꞌe caꞌ chleꞌicho ḻeꞌe yobanꞌ. Naꞌ catəꞌ babesyəꞌənit yoguəꞌ deꞌe caꞌ chleꞌichonꞌ Diozənꞌ ṉeꞌe zoczeꞌ choneꞌ par nic̱h chac deꞌe güen deꞌe cui te c̱hei.
\v 28 Deꞌe naꞌanəꞌ cheyaḻəꞌ güeꞌecho yeḻəꞌ chox̱cwlen c̱he Diozənꞌ ca deꞌen cui te c̱he deꞌe mbalaz deꞌen chac ḻoꞌo yic̱hɉlaꞌaždaoꞌ chioꞌo chonḻilažəꞌəchoneꞌ. Naꞌ ḻeczə güeꞌetecho yeḻəꞌ chox̱cwlen c̱heꞌ ca deꞌen cui te c̱he deꞌen žɉəyezocho len ḻeꞌ zeɉḻicaṉe. Cheyaḻəꞌ gapcho Diozənꞌ respet naꞌ güeꞌelaꞌochoneꞌ canꞌ chazlažeꞌenəꞌ.
\v 29 Ṉezecho ca naquə yiꞌinəꞌ chzeyən bitəꞌətezə, naꞌ caꞌaczənꞌ chon Diozənꞌ, choṉeꞌ castigw c̱he bitəꞌətezə deꞌe mal deꞌen chon chioꞌo beṉac̱h, c̱hedəꞌ ḻechguaḻe chgueꞌineꞌ bitəꞌətezə deꞌe malənꞌ.
\c 13
\s1 Deꞌen chazlažəꞌ Diozənꞌ goncho
\p
\v 1 Cheyaḻəꞌ sotezə socho gaquecho c̱he yeziquəꞌəchlə beṉəꞌ chsoꞌonḻilažəꞌ Jesocristənꞌ, c̱hedəꞌ yogueꞌe zɉənaquə bišəꞌəcho naꞌ zancho.
\v 2 Cheyaḻəꞌ əggüialaocho beṉəꞌ zitəꞌ ližchonꞌ naꞌ gongaꞌacchoneꞌ goclen. Baḻə x̱axtaꞌocho caꞌ catəꞌ bosəꞌəgüialaogüeꞌ beṉəꞌ zitəꞌ naꞌ bosəꞌəgüialaogüeꞌ angl c̱he Diozənꞌ sin cui gwsaꞌacbeꞌineꞌ.
\p
\v 3 Cheyaḻəꞌ gaquəlencho beṉəꞌ lɉuežɉcho caꞌ chsaꞌatəꞌ ližya c̱hedəꞌ txenṉəꞌ chžaglaolengaꞌacchoneꞌ šə bi deꞌe chac c̱hegaꞌaqueꞌ. Naꞌ ḻeczə caꞌ gaquəlencho beṉəꞌ lɉuežɉcho caꞌ šə no chosoꞌoc̱hiꞌ chosoꞌosaquəꞌ ḻegaꞌaqueꞌ. Ḻeczə gwžinḻɉa ža c̱hiꞌ saquəꞌ chioꞌo zocho yežlyo nga.
\p
\v 4 Naꞌ leꞌe nšagnaꞌale yoguəꞌəle ḻeso do lažəꞌəle len noꞌol c̱hele o beꞌen c̱hele, canꞌ cheneꞌe Diozənꞌ, naꞌ bito talenḻe notəꞌətezəchlə beṉəꞌ. Diozənꞌ əgwnežɉueꞌ castigw c̱he beṉəꞌ caꞌ chəsəꞌəgoꞌo xtoi, naꞌ beṉəꞌ caꞌ chəsəꞌəbeɉyic̱hɉ noꞌol c̱hegaꞌaqueꞌ o beꞌen c̱hegaꞌaqueꞌ par chəsəꞌənitəꞌəleneꞌ beṉəꞌ yoblə.
\p
\v 5 Bito cheyaḻəꞌ selažəꞌəcho gaccho beṉəꞌ gwniꞌa. Cheyaḻəꞌ socho mbalaz len deꞌen de c̱hecho, c̱hedəꞌ cuin Diozənꞌ bagwneꞌ chioꞌo: “Bito ganḻažaꞌa leꞌe naꞌ bito cueɉəyic̱hɉaꞌ ḻeꞌe.”
\v 6 Deꞌe naꞌanəꞌ bito de deꞌe žebcho. Quinga guac əṉa to tocho:
\q1 X̱anaꞌ Diozənꞌ zoeꞌ chacleneꞌ nadaꞌ.
\q1 Naꞌ bito žebaꞌ šə bi deꞌen gone beṉac̱hənꞌ nadaꞌ.
\p
\v 7 Ḻegon xbab c̱he beṉəꞌ caꞌ bosoꞌosed bosoꞌoloꞌi leꞌe xtižəꞌ Diozənꞌ, beṉəꞌ caꞌ cuich nitəꞌ ṉaꞌa. Ḻegaꞌaqueꞌ gosəꞌəzo gosəꞌəbezeꞌ binḻo yežlyo nga, naꞌ cheyaḻəꞌ sole gonḻilažəꞌəle Diozənꞌ canꞌ gwnitəꞌ ḻegaꞌaqueꞌ gwsoꞌonḻilažəꞌətezeneꞌ.
\p
\v 8 Canꞌ naquə yic̱hɉlaꞌaždaoꞌ Jesocristənꞌ ṉeɉ ṉase, caꞌaczənꞌ naquən ṉaꞌa, naꞌ caꞌaczənꞌ gaquən zeɉḻicaṉe.
\v 9 Beṉəꞌ zan chosoꞌosed chosoꞌoloꞌineꞌ c̱he Cristənꞌ pero naꞌ nžaꞌ xen canꞌ chosoꞌosed chosoꞌoloꞌi baḻeꞌ. Bito güeꞌele latɉə yesəꞌəx̱oayagueꞌ leꞌe len xtižəꞌəgaꞌaqueꞌenəꞌ. Zaquəꞌəchən siꞌicho yeḻəꞌ chaclen c̱he Diozənꞌ ḻoꞌo yic̱hɉlaꞌaždaꞌochonꞌ par nic̱h sotezə socho gonḻilažəꞌəchoneꞌ cle ca cueꞌ yic̱hɉcho c̱he bi deꞌen chəsəꞌəna beṉəꞌ cheyaḻəꞌ yeꞌeɉ gaocho. Deꞌen cheꞌeɉ chaochonꞌ bito chaclenənꞌ yic̱hɉlaꞌaždaꞌochonꞌ.
\p
\v 10 Ṉezecho de que Jesocristənꞌ bagwdixɉueꞌ xtoḻəꞌəchonꞌ ḻeꞌe yag corozənꞌ. Pero naꞌ beṉəꞌ caꞌ ṉeꞌe chsoꞌot bia yix̱əꞌ naꞌ chosoꞌozeyeꞌeb chsaꞌaqueneꞌ par yeziꞌixen Diozənꞌ c̱hegaꞌaqueꞌenəꞌ, bito chaclenən ḻegaꞌaqueꞌ ca deꞌen gwdixɉw Jesocristənꞌ xtoḻəꞌ chioꞌo beṉac̱h.
\v 11 Bx̱oz caꞌ chsoꞌoteꞌ bia yix̱əꞌ ze tgüiz güeɉə chəsəꞌəṉabeꞌ yeziꞌixen Diozənꞌ xtoḻəꞌ yoguəꞌ beṉəꞌ lao ṉasyon c̱hechonꞌ, naꞌ chɉguaꞌ bx̱oz əblaonꞌ chenṉəꞌ ḻoꞌo cuart ganꞌ nac c̱he Diozənꞌ, pero cuerp c̱hegaꞌaquəbənꞌ chosoꞌozeyeꞌen fuerlə syoda.
\v 12 Naꞌ canꞌ goc c̱he Jesoꞌosənꞌ, gwsoꞌoteꞌeneꞌ fuer syodanꞌ, naꞌ yoguəꞌ beṉəꞌ soꞌonḻilažəꞌ Jesoꞌosənꞌ yeyac laꞌaždaꞌogaꞌaqueꞌen xiꞌilažəꞌ por ni c̱he deꞌen blalɉ xc̱heneꞌenəꞌ.
\v 13 Deꞌe naꞌanəꞌ cheyaḻəꞌ gonḻilažəꞌəcho Jesocristənꞌ naꞌ bitoch ṉaocho deꞌe caꞌ ḻaꞌaṉəꞌəczə šə beṉəꞌ zan yesəꞌəgueꞌineꞌ chioꞌo deꞌen cuich ṉaochon.
\v 14 Gatəꞌətezə zocho yežlyo nga, deꞌe te c̱heinꞌ, pero chbezcho yežincho yobanꞌ naꞌ žɉəyezocho syodanꞌ deꞌe cui te c̱hei.
\v 15 Laogüe deꞌen babocobə Jesocristənꞌ yic̱hɉlaꞌaždaꞌochonꞌ cheyaḻəꞌ güeꞌecho yeḻəꞌ chox̱cwlen c̱he Diozənꞌ dote tyemp naꞌ güeꞌelaꞌochoneꞌ len xtižəꞌəcho.
\v 16 Cheyaḻəꞌ sotezə socho goncho yoguəꞌ cḻaste deꞌen naquə güen naꞌ cheyaḻəꞌ əgwnežɉwcho con ɉaꞌaquəꞌ guac əgwnežɉwcho par gaquəlencho beṉəꞌ caꞌ cui de c̱hegaꞌaqueꞌ, c̱hedəꞌ canꞌ cheneꞌe Diozənꞌ goncho.
\p
\v 17 Ḻeꞌe əgwzex̱ɉw yic̱hɉle naꞌ ḻeꞌe gwzenag c̱he beṉəꞌ caꞌ bagwleɉ Diozənꞌ par chosoꞌosed chosoꞌoloꞌineꞌ leꞌe naꞌ par chəsəꞌəgüia chəsəꞌəyeꞌ leꞌe. Ḻegaꞌaqueꞌ chsaꞌacleneꞌ leꞌe par nic̱h caꞌ gonḻilažəꞌəchle Diozənꞌ, naꞌ cheyaḻəꞌ yosoꞌodieꞌ cuent laogüeꞌenəꞌ canꞌ chonḻe. Ḻegwzenag c̱hegaꞌaqueꞌ par nic̱h yesyəꞌəbeineꞌ catəꞌ yosoꞌodieꞌ cuentənꞌ naꞌ cui yesəꞌəniteꞌe trist. Naꞌ šə cui gwzenagle c̱hegaꞌaqueꞌ bitobi deꞌe güen gaquə c̱hele.
\p
\v 18 Ḻegon orasyon par netoꞌ. Zoaꞌ segor de que chontoꞌ canꞌ chazlažəꞌ Diozənꞌ, naꞌ cheneꞌetoꞌ gontoꞌ porzə deꞌe güen.
\v 19 Cheꞌenchgüeidaꞌ gonḻe orasyon c̱hiaꞌ par nic̱h yob gaquə yidəchaꞌ ganꞌ zolenꞌ.
\s1 Chṉabeꞌ gaquəlen Diozənꞌ ḻegaꞌaqueꞌ
\p
\v 20 Laogüe deꞌen bnežɉw cuin X̱ancho Jesocristənꞌ blalɉ xc̱heneꞌenəꞌ, chac chon Diozənꞌ deꞌen noneꞌ lyebe goneꞌ par gaquəleneꞌ chioꞌo. Naꞌ cuat əžin ža cuich goneꞌ canꞌ beneꞌ lyebe goneꞌ. X̱ancho Jesocristənꞌ gwxaquəꞌəlebeneꞌ ca to beṉəꞌ goye xiləꞌ tant nžiꞌilažeꞌe chioꞌo. Diozənꞌ boḻis bosbaneꞌeneꞌ ladɉo beṉəꞌ guat caꞌ, naꞌ Dioz naꞌaczənꞌ choneꞌ par nic̱h chzo chbezcho binḻo len xbab deꞌen yoꞌo ḻoꞌo yic̱hɉlaꞌaždaꞌochonꞌ.
\v 21 Laogüeꞌ nanꞌ chonaꞌ orasyon chṉabaꞌ əgwletɉeꞌ xbab güen ḻoꞌo yic̱hɉlaꞌaždaꞌolenꞌ naꞌ gaquəleneꞌ leꞌe par nic̱h gonḻe yoguəꞌəḻoḻ canꞌ cheneꞌeneꞌ gonḻe. Naꞌ chṉabaꞌ goneꞌ ca gombiꞌachle Jesocristənꞌ par nic̱h caꞌ gaquə yic̱hɉlaꞌaždaꞌolenꞌ con canꞌ chazlažəꞌ Diozənꞌ. Ḻedoyeꞌelaꞌoch Jesocristənꞌ ṉaꞌa naꞌ zeɉḻicaṉe. Naꞌ canꞌ gonšgaczcho.
\p
\v 22 Ḻegon xbab c̱he yoguəꞌ consejw quinga deꞌen babeṉaꞌ leꞌe, c̱hedəꞌ bitotec bzoɉaꞌ dižəꞌ zan c̱he to ton.
\v 23 Naꞌ chyix̱ɉueꞌidaꞌ leꞌe de que Temtionꞌ babechoɉeꞌ ližyanꞌ naꞌ chbezaꞌaneꞌ nga. Naꞌ šə yob yeḻeꞌe nach c̱hiꞌaneꞌ catəꞌ delaṉaꞌa leꞌe.
\p
\v 24 Por part nadaꞌ ḻeꞌe gguap diox beṉəꞌ caꞌ bagwleɉ Diozənꞌ par chosoꞌosed chosoꞌoloꞌineꞌ leꞌe naꞌ par chosoꞌogüia chosoꞌoyeꞌ leꞌe. Naꞌ ḻeczə caꞌ ḻeꞌe gguap diox yoguəꞌ noquəꞌəchlə beṉəꞌ nitəꞌ naꞌ beṉəꞌ bagwleɉ Diozənꞌ par zɉənaqueꞌ lažəꞌ neꞌenəꞌ. Naꞌ beṉəꞌ lɉuežɉcho caꞌ zaꞌac Italianꞌ chosoꞌoguapeꞌ leꞌe diox.
\p
\v 25 Diozənꞌ gaquəlenšgueꞌ leꞌe. Deꞌe naꞌazə deꞌe əchniaꞌ.