\id JAS
\ide UTF8
\h SANTIAGO
\toc1 Santiago
\mt1 Cart Deꞌen Bzoɉ Santiagonꞌ
\c 1
\s1 Santiagonꞌ chguapeꞌ diox beṉəꞌ caꞌ zɉənasəlas zan yež
\p
\v 1 Nadaꞌ Santiago nacaꞌ beṉəꞌ güen žin c̱he Diozənꞌ naꞌ c̱he X̱ancho Jesocristənꞌ. Echguapaꞌ leꞌe diox, leꞌe nacle xiꞌiṉ dia c̱he famiḻy caꞌ šižiṉ c̱he deꞌe Izraelənꞌ, leꞌe chonḻilažəꞌəle Jesocristənꞌ naꞌ nasəlasle zan part yežlyonꞌ.
\s1 Naquənꞌ ṉezecho canꞌ cheneꞌe Diozənꞌ goncho
\p
\v 2 Beṉəꞌ bišəꞌ daoꞌ, ḻeꞌe yebeichgüei bitəꞌətezə deꞌe chac c̱hele ḻaꞌaṉəꞌəczə šə chyiꞌ chzaquəꞌəle.
\v 3 Ṉezecho bitəꞌətezə deꞌen chac c̱hecho chonən chioꞌo prueb šə chonc̱hec̱hlažəꞌəcho chonḻilažəꞌəcho Jesocristənꞌ. Naꞌ catəꞌ chonc̱hec̱hlažəꞌəcho chonḻilažəꞌəcho Jesocristənꞌ zeɉe dižəꞌ chgoꞌo chc̱heɉlažəꞌəcho len deꞌen chac c̱hecho.
\v 4 Deꞌe naꞌanəꞌ cheyaḻəꞌ coꞌo gwc̱heɉlažəꞌəcho len bichlə deꞌen chac c̱hecho par nic̱h sotezə socho gonḻilažəꞌəcho Jesocristənꞌ, əgwzenagcho c̱heꞌ canꞌ cheyaḻəꞌ əgwzenagcho c̱heꞌ naꞌ yeyož gaccho canꞌ cheneꞌeneꞌenəꞌ.
\p
\v 5 Notəꞌətezcho catəꞌən cui ṉezecho binꞌ cheneꞌe Diozənꞌ goncho o šə naquənꞌ cheneꞌeneꞌ goncho, cheyaḻəꞌ əṉabechoneꞌ əgwzeɉniꞌineꞌen chioꞌo. Laꞌ chebeineꞌ chacleneꞌ chioꞌo, naꞌ bito chdiḻeꞌ chioꞌo catəꞌ chṉabechoneꞌ gaquəleneꞌ chioꞌo.
\v 6 Pero naꞌ catəꞌ chṉabechoneꞌ əgwzeɉniꞌineꞌ chioꞌo, cheyaḻəꞌ gonḻilažəꞌəcho de que chzenagczeꞌ c̱hechonꞌ naꞌ bito gaquəžeɉlažəꞌəcho. Beꞌenəꞌ chacžeɉlažəꞌ šə chzenag Diozənꞌ c̱heꞌ gwxaquəꞌəlebeneꞌ ca nisdaꞌonəꞌ deꞌen chas chatəꞌ catəꞌ chec̱hɉ beꞌ laogüenꞌ naꞌ chɉtaꞌan nil naꞌaḻə.
\v 7 Benꞌ chacžeɉlažəꞌ šə chzenag Diozənꞌ c̱heꞌ, bito gaquə əgwnežɉo X̱ancho Diozənꞌ ḻeꞌ bitəꞌətezə deꞌen chṉabeꞌenəꞌ.
\v 8 Naꞌ benꞌ chon caꞌ bito ṉezeneꞌ bi xbabənꞌ choneꞌ, con šayec̱hə šayen chaqueꞌ len bitəꞌətezə deꞌen choneꞌ.
\p
\v 9 Leꞌe beṉəꞌ bišəꞌ leꞌe nacle beṉəꞌ yašəꞌ ḻeꞌe so mbalaz, c̱hedəꞌ laꞌ Diozənꞌ choneꞌ par nic̱h nacle beṉəꞌ zaqueꞌe.
\v 10 Naꞌ leꞌe beṉəꞌ bišəꞌ leꞌe nacle beṉəꞌ gwniꞌa, ḻeꞌe yebei de que lao Diozənꞌ bito zaquəꞌəchle mazəchlə canꞌ zaquəꞌ beṉəꞌ yašəꞌ caꞌ c̱hedəꞌ bitəꞌətezə deꞌen deicho yežlyo nga yob te c̱hegaꞌaquei canꞌ chac len yeɉ caꞌ deꞌen chlaꞌac do yix̱əꞌ.
\v 11 Catəꞌ chzo bgüižənꞌ zniachgua, chesəꞌəcuad yix̱əꞌ caꞌ, nach chəsəꞌəyiṉɉ ḻoɉei caꞌ naꞌ bitoch chosoꞌoloꞌen xoche. Canꞌ chac len yeɉ caꞌ ḻeczə canꞌ gaquə len leꞌe, ṉit yeḻəꞌ gwniꞌa c̱helenꞌ lao chelaḻ chežeɉele.
\s1 Cheyaḻəꞌ sotezə socho gonḻilažəꞌəcho Jesocristənꞌ bitəꞌətezə deꞌen chac c̱hecho
\p
\v 12 Šə chgoꞌo chc̱heɉlažəꞌəcho len deꞌen chac c̱hecho naꞌ chonc̱hec̱hlažəꞌəcho chonḻilažəꞌəcho Jesocristənꞌ nachənꞌ ḻechguaḻe mbalaz zocho. Naꞌ catəꞌ te deꞌen chyiꞌ chzaquəꞌəchonꞌ Diozənꞌ goneꞌ par nic̱h əbancho len ḻeꞌ zeɉḻicaṉe canꞌ beneꞌ lyebe əban yoguəꞌəcho chaquecho c̱heꞌ.
\v 13 Naꞌ notəꞌətezcho catəꞌ nan goncho deꞌe malənꞌ bito gaquə əṉacho de que Dioz naꞌanəꞌ chgoꞌoyeḻeꞌe chioꞌo goncho deꞌe malənꞌ, laꞌ Diozənꞌ bito chgoꞌoyeḻeꞌe beṉəꞌ soꞌoneꞌ deꞌe malənꞌ. Ḻeꞌegatezə caꞌ ḻeꞌ bito bi bi de deꞌe coꞌoyeḻəꞌ ḻeꞌ par goneꞌ deꞌe malənꞌ.
\v 14 Laꞌaždaꞌomalchonꞌ chonən par nic̱h cheneꞌecho goncho deꞌe malənꞌ.
\v 15 Naꞌ bachoncho deꞌe malənꞌ šə chzenagcho c̱he laꞌaždaꞌomalchonəꞌ. Naꞌ šə con zocho choncho deꞌe malənꞌ gwžin ža catəꞌ cueɉyic̱hɉ Diozənꞌ chioꞌo naꞌ bito žɉəyezocho len ḻeꞌ.
\p
\v 16 Beṉəꞌ bišəꞌ daoꞌ, bito əx̱oayag cuinḻe gonḻe xbabənꞌ de que Dioz naꞌanəꞌ chgoꞌoyeḻeꞌe leꞌe par gonḻe deꞌe malənꞌ.
\v 17 Yoguəꞌ deꞌen chon Diozənꞌ len chioꞌo naꞌ yoguəꞌ deꞌen choṉeꞌ chioꞌo zɉənaquən güen, bitobi deꞌe mal zɉənsaꞌan, laꞌ dezd yoba naꞌate zaꞌaquən. X̱acho Dioz benꞌ ben deꞌe caꞌ chleꞌicho ḻeꞌe yobanꞌ choneꞌ par nic̱h gaquə güen c̱hecho, naꞌ bito chšeꞌe canꞌ choneꞌ len chioꞌo, syempr zoczeꞌ choneꞌ güen.
\v 18 Gwyazlažəꞌ Diozənꞌ bocobeꞌ yic̱hɉlaꞌaždaꞌochonꞌ catəꞌən gwyeɉḻeꞌecho c̱he dižəꞌ ḻi c̱heꞌenəꞌ. Bocobeꞌ yic̱hɉlaꞌaždaꞌochonꞌ par nic̱h goṉəcheꞌ chioꞌo yeḻəꞌ balaꞌaṉ mazəchlə canꞌ gwnežɉueꞌen yeziquəꞌəchlə beṉac̱hənꞌ.
\s1 Canꞌ goncho par yebei Diozənꞌ chioꞌo
\p
\v 19 Beṉəꞌ bišəꞌ daoꞌ, ḻeꞌe gwzenag c̱he Diozənꞌ do yic̱hɉ do lažəꞌəle. Naꞌ bito güeꞌelizle dižəꞌ sin cui gonḻe xbab, naꞌ nic ḻeꞌe əžaꞌatele.
\v 20 Catəꞌ chžaꞌacho, bito chac goncho güen canꞌ cheneꞌe Diozənꞌ goncho.
\v 21 Deꞌe naꞌanəꞌ cheyaḻəꞌ cueɉyic̱hɉcho yoguəꞌəḻoḻ deꞌen naquə mal naꞌ bitəꞌətezə deꞌen na laꞌaždaꞌomalchonꞌ goncho. Cheyaḻəꞌ əgwzex̱ɉw yic̱hɉcho naꞌ gwzenagcho dižəꞌ ḻi c̱he Diozənꞌ deꞌen bayoꞌo ḻoꞌo yic̱hɉlaꞌaždaꞌochonꞌ, par nic̱h caꞌ yebeɉən chioꞌo xniꞌa deꞌe malənꞌ.
\p
\v 22 Naꞌ cheyaḻəꞌ goncho deꞌen na dižəꞌ ḻi c̱he Diozənꞌ goncho, caguə con chenecho canꞌ nanṉəꞌ. Laꞌ šə con chenecho canꞌ nanṉəꞌ sin cui gonchon cas, chx̱oayagzə cuinchonꞌ šə caꞌ.
\v 23 Benꞌ chene dižəꞌ ḻi c̱he Diozənꞌ šə bito choneꞌen cas gwxaquəꞌəlebeneꞌ ca to beṉəꞌ chgüia choꞌalaogüeꞌen ḻoꞌo spejw,
\v 24 laꞌ con chgüieꞌ canꞌ naquə choꞌalaogüeꞌen naꞌ catəꞌ babeyož bgüieꞌen ḻeꞌe cheyanḻažəꞌəteꞌ canꞌ naquənṉəꞌ.
\v 25 Xtižəꞌ Diozənꞌ deꞌen nyoɉənꞌ chsed chloꞌin chioꞌo canꞌ babebeɉ Diozənꞌ chioꞌo xniꞌa deꞌe malənꞌ. Naꞌ deꞌen chsed chloꞌin chioꞌo goncho naquən deꞌe güenchgua. Naꞌ šə əgwsedchon naꞌ sotezə socho goncho canꞌ nanṉəꞌ sin cui ganḻažəꞌəchon nachənꞌ socho mbalaz.
\p
\v 26 Notəꞌətezcho šə choncho xbabənꞌ de que choncho canꞌ chebei Diozənꞌ pero šə con choꞌecho dižəꞌ deꞌen na laꞌaždaꞌomalchonꞌ, chx̱oayagzə cuinchonꞌ. Laꞌ xtižəꞌəchonꞌ bito naquən güen lao Diozənꞌ, naꞌ bito chebeineꞌ bitəꞌətezə deꞌen choncho šə caꞌ.
\v 27 Šə choncho canꞌ chebei X̱acho Diozənꞌ, chaclencho noꞌolə gozeb caꞌ naꞌ biꞌi gozeb caꞌ šə biclə deꞌen chesəꞌəyažɉeneꞌ naꞌ chbeɉyic̱hɉcho cuich choncho deꞌe mal deꞌen chsoꞌon beṉəꞌ caꞌ cui zɉənombiaꞌ Diozənꞌ.
\c 2
\s1 Tozəczə canꞌ cheyaḻəꞌ goncho len yoguəꞌ beṉəꞌ
\p
\v 1 Beṉəꞌ bišəꞌ daoꞌ, X̱ancho Jesocristənꞌ naqueꞌ ḻeꞌezelaogüe beṉəꞌ zaqueꞌe, naꞌ šə deꞌe ḻiczə chonḻilažəꞌəcho X̱ancho Jesocristənꞌ, bito ṉacho baḻə beṉəꞌ gonchguagaꞌacchoneꞌ xen, naꞌ yebaḻeꞌ gongaꞌaquechoneꞌ naccze.
\v 2 Šə laꞌac c̱hopə beṉəꞌ ganꞌ chdopə chžagcho choꞌelaꞌocho Jesocristənꞌ, naꞌ toeꞌ naqueꞌ beṉəꞌ gwniꞌa naꞌ nyazeꞌ lachəꞌ šaoꞌ lachəꞌ xoche, naꞌ nde xbeneꞌenəꞌ to niy de or, naꞌ benꞌ yeto naqueꞌ beṉəꞌ yašəꞌ naꞌ nyazeꞌ lachəꞌ golə lachəꞌ bedo bedaꞌ, tozə canꞌ cheyaḻəꞌ goncho len c̱hoptegaꞌaqueꞌ.
\v 3 Bito naquən güen šə goncho beṉəꞌ gwniꞌanəꞌ xen naꞌ yeꞌechoneꞌ: “Gwcheꞌedoꞌ lao yag siy nga.” Naꞌ nique naquən güen šə yeꞌecho beṉəꞌ yašəꞌənəꞌ: “Gwzechatezə do deꞌe naꞌaḻə”, o šə yeꞌechoneꞌ: “Gwcheꞌedoꞌ lao yonꞌ.”
\v 4 Bito naquən güen lao Diozənꞌ šə gon cuincho ca juez par əṉacho noenꞌ zaqueꞌe naꞌ noenꞌ cui zaqueꞌe. Xbab c̱hechonꞌ naquən deꞌe mal šə goncho caꞌ.
\p
\v 5 Beṉəꞌ bišəꞌ daoꞌ, Diozənꞌ bagwleɉeꞌ zan beṉəꞌ yašəꞌ par zɉənaqueꞌ xiꞌiṉeꞌ naꞌ par chsoꞌonḻilažəꞌəchgüeꞌ ḻeꞌ. Naꞌ catəꞌ yesyəꞌəžineꞌ ganꞌ zoꞌenəꞌ goneꞌ par nic̱h yesəꞌənabiꞌe txen len ḻeꞌ laꞌ canꞌ beneꞌ lyebe gon notəꞌətezə chioꞌo chaquecho c̱heꞌ.
\v 6 Pero naꞌ leꞌe chonḻe beṉəꞌ yašəꞌ caꞌ ca beṉəꞌ cui bi bi zɉəzaqueꞌe. Naꞌ beṉəꞌ gwniꞌa caꞌ chongaꞌacleneꞌ ca beṉəꞌ zɉəzaquəꞌəchgua, len laꞌ ḻegaꞌaqueꞌenəꞌ chesəꞌəc̱hiꞌi chesəꞌəsaqueꞌe leꞌe, naꞌ chəsəꞌəc̱heꞌe leꞌe do lao jostis caꞌ.
\v 7 Naꞌ ḻeꞌegatezəczə ḻegaꞌaqueꞌenəꞌ chosoꞌožia chosoꞌoniteꞌe Jesocristənꞌ benꞌ chonḻilažəꞌəchonꞌ lguaꞌa soꞌeneꞌ yeḻəꞌ balaꞌaṉ.
\p
\v 8 Ḻeinꞌ deꞌen naquə deꞌe žialao lao yoguəꞌ deꞌe caꞌ yeḻaꞌ deꞌen nyoɉən ḻeꞌe Xtižəꞌ Diozənꞌ nan: “Ḻegaque c̱he saꞌalɉuežɉ beṉac̱hle catg chaquele c̱he cuinḻe.” Šə deꞌe ḻiczə chonḻe canꞌ nanṉəꞌ chonczle güenṉəꞌ.
\v 9 Pero deꞌe malənꞌ chonḻe šə baḻə beṉəꞌ chongaꞌaqueleneꞌ xen naꞌ yebaḻeꞌ chongaꞌacleneꞌ ca beṉəꞌ cui bi zaqueꞌe. Ḻei c̱he Diozənꞌ chc̱hoglaon c̱hele de que naple doḻəꞌ deꞌen chonḻe caꞌ.
\v 10 Canꞌ naquən, notəꞌətezə beṉəꞌ zoeꞌ choneꞌ cuaseḻoḻ canꞌ na ḻeinꞌ, pero naꞌ ḻaꞌaṉəꞌ tozə pontənꞌ chc̱hoeꞌ, doxen ḻei naꞌanəꞌ chapeꞌ doḻəꞌ.
\v 11 Diozənꞌ benꞌ gwna: “Bito coꞌo xtole, naꞌ cui cueɉyic̱hɉ beꞌen c̱hele o noꞌol c̱hele par solenḻe beṉəꞌ yoblə”, ḻeczeꞌen gwneꞌ: “Cui gotle beṉəꞌ”, naꞌ beneꞌ mendad bichlə deꞌe cui goncho. Šə bitoṉəꞌ goncho to deꞌe mal deꞌe na ḻeinꞌ cui goncho pero babencho yeto deꞌe nan cui goncho, biaꞌaczə napcho doḻəꞌ len ḻeinꞌ.
\v 12 Cheyaḻəꞌ güeꞌecho dižəꞌ con canꞌ cheneꞌe ḻeꞌenəꞌ naꞌ goncho con canꞌ chazlažeꞌenəꞌ c̱hedəꞌ laꞌ ḻeꞌ əṉeꞌ c̱he to tocho šə choncho canꞌ na Xtižeꞌenəꞌ deꞌen nyoɉən o šə bito choncho can nanṉəꞌ. Xtižəꞌ Dioz naꞌanəꞌ chzeɉniꞌin chioꞌo canꞌ babebeɉeꞌ chioꞌo xniꞌa deꞌe malənꞌ par goncho canꞌ cheneꞌeneꞌenəꞌ.
\v 13 Diozənꞌ əgwnežɉueꞌ castigw c̱he beṉəꞌ caꞌ cui chesyəꞌəyašəꞌ chesyəꞌəžiꞌilažəꞌ lɉuežɉ beṉac̱hgaꞌaqueꞌ. Pero beṉəꞌ caꞌ chesyəꞌəyašəꞌ chesyəꞌəžiꞌilažəꞌ lɉuežɉ beṉac̱hgaꞌaqueꞌ, Diozənꞌ yeyašəꞌ yežiꞌilažeꞌe ḻegaꞌaqueꞌ.
\s1 Bitobi zeɉen šə con chonḻilažəꞌəcho Jesocristənꞌ deꞌe dižəꞌəzə
\p
\v 14 Beṉəꞌ bišəꞌ daoꞌ, šə to beṉəꞌ bito chaqueneꞌ c̱he lɉuežɉeꞌ naꞌ bito choneꞌ yeziquəꞌəchlə deꞌe naquə deꞌe güen, bitobi zaquəꞌ deꞌen neꞌ: “Chonḻilažaꞌa Jesocristənꞌ.” Yeyeɉeꞌ lao yiꞌ gabiḻənꞌ šə deꞌe dižəꞌəzənꞌ ṉeꞌ caꞌ.
\v 15 Baḻə beṉəꞌ lɉuežɉcho beṉəꞌ chsoꞌonḻilažəꞌ Jesocristənꞌ cui de deꞌen əseꞌeɉ əsaꞌogüeꞌ naꞌ cui de xalaꞌangaꞌaqueꞌ.
\v 16 Naꞌ šə bito gaquəlengaꞌacchoneꞌ len deꞌen chesəꞌəyažɉeneꞌenəꞌ, šə con yeꞌegaꞌacchoneꞌ: “Ḻežɉəyaꞌac to šaoꞌ to güen naꞌ Diozənꞌ gaquəleneꞌ par nic̱h əželele deꞌen chyažɉelenꞌ”, bitobi zeɉen deꞌen ṉacho chonḻilažəꞌəcho Jesocristənꞌ šə goncho caꞌ.
\v 17 Deꞌe naꞌanəꞌ, šə con ṉacho de que chonḻilažəꞌəcho Jesocristənꞌ, pero bito chaquecho c̱he lɉuežɉcho naꞌ bito choncho yeziquəꞌəchlə deꞌen naquə deꞌe güen, bitoczə bi zeɉen deꞌen ṉacho de que chonḻilažəꞌəchoneꞌ.
\p
\v 18 Nitəꞌ beṉəꞌ chesəꞌəneꞌ de que guaquə soꞌonḻilažeꞌe Jesocristənꞌ sin cui soꞌoneꞌ deꞌen naquə deꞌe güen. Naꞌ ḻeczə nitəꞌ beṉəꞌ chesəꞌəneꞌ con chsoꞌoneꞌ deꞌe güenṉəꞌ pero naꞌ bito chsoꞌonḻilažeꞌe Jesocristənꞌ. Naꞌ nadaꞌ əchniaꞌ leꞌe šə ṉacho de que chonḻilažəꞌəcho Jesocristənꞌ pero bito choncho deꞌe güen, bito debiaꞌ šə chonḻilažəꞌəchoneꞌenəꞌ. Pero šə deꞌe ḻi chonḻilažəꞌəchoneꞌ choncho deꞌe güenṉəꞌ naꞌ nacbiaꞌ de que chonḻilažəꞌəchoneꞌenəꞌ.
\v 19 Cheɉḻeꞌecho de que tozə Diozənꞌ zaqueꞌe par güeꞌelaꞌochoneꞌ, naꞌ caꞌaczənꞌ cheyaḻəꞌ šeɉḻeꞌecho. Pero caguə deꞌe caꞌazənꞌ cheyaḻəꞌ goncho. Deꞌe x̱ioꞌ caꞌ chseꞌeɉḻeꞌen de que tozə Diozənꞌ naqueꞌ beṉəꞌ zaqueꞌe naꞌ chesəꞌəxizən tant chesəꞌəžebən.
\v 20 Choncho deꞌe cui zeɉe šə con ṉacho chonḻilažəꞌəcho Jesocristənꞌ naꞌ bito choncho deꞌe güenṉəꞌ. Bito gatəꞌ yeḻəꞌ mban zeɉḻicaṉe c̱hecho šə con ṉacho chonḻilažəꞌəchoneꞌ.
\v 21 Deꞌe x̱axtaꞌocho Abraanṉəꞌ bloꞌe de que benḻilažeꞌe Diozənꞌ deꞌen bzenagueꞌ con bi gožzə Diozənꞌ ḻeꞌ. Deꞌe naꞌanəꞌ bx̱oa xiꞌiṉeꞌ Isaaquənꞌ lao mes de yeɉənꞌ par goteꞌeboꞌ güeꞌelaꞌogüeꞌe Diozənꞌ, pero naꞌ Diozənꞌ bito beꞌe latɉə goteꞌeboꞌ. Naꞌ deꞌen bzenagueꞌ c̱he Diozənꞌ, deꞌe naꞌanəꞌ Diozənꞌ gwneꞌ c̱heꞌ de que naqueꞌ beṉəꞌ güen laogüeꞌenəꞌ.
\v 22 Naquən clar de que deꞌe Abraanṉəꞌ caguə con benḻilažəꞌəzeꞌ Dioz naꞌanəꞌ, sino ḻeczə bzenagueꞌ c̱heꞌ. Naꞌ deꞌen beneꞌ caꞌ bloꞌe de que benḻilažeꞌe Diozənꞌ.
\v 23 Deꞌe naꞌanəꞌ nyoɉ Xtižəꞌ Diozənꞌ c̱heꞌ nan: “Deꞌe Abraanṉəꞌ benḻilažeꞌe Diozənꞌ naꞌ deꞌe nanꞌ Diozənꞌ gwneꞌ c̱heꞌ de que naqueꞌ beṉəꞌ güen laogüeꞌenəꞌ.” Naꞌ ḻeczə nyoɉən de que Abraanṉəꞌ naqueꞌ beṉəꞌ migw c̱heꞌ.
\p
\v 24 Clar naquən de que caguə ni c̱he deꞌen nacho chonḻilažəꞌəcho Dioz naꞌanəꞌ neꞌ naccho beṉəꞌ güen laogüeꞌenəꞌ, sino que deꞌen chzenagcho c̱heꞌ naꞌanəꞌ neꞌ c̱hecho de que naccho beṉəꞌ güen laogüeꞌenəꞌ.
\v 25 Deꞌe Raabənꞌ benꞌ goquə noꞌolə sargatənꞌ, bzenagueꞌ c̱he Diozənꞌ catəꞌən bgüialaogüeꞌ beṉəꞌ c̱hop caꞌ bseḻəꞌ ṉasyon Izraelənꞌ par ɉəsəꞌəgüia ɉəsəꞌəyeꞌ lažeꞌenəꞌ. Naꞌ bloꞌineꞌ ḻegaꞌaqueꞌ yetolə nez par ɉəyaꞌaqueꞌ par nic̱h bito ɉəsəꞌəxen soḻdad c̱he reinꞌ ḻegaꞌaqueꞌ. Naꞌ deꞌen goquəleneꞌ beṉəꞌ caꞌ bloꞌe de que benḻilažeꞌe Diozənꞌ. Naꞌ gwna Diozənꞌ c̱heꞌ de que naqueꞌ beṉəꞌ güen laogüeꞌenəꞌ.
\v 26 Šə to beṉəꞌ bitoc̱h nyeꞌe biš xṉe ṉezecho naqueꞌ beṉəꞌ guat. Caꞌaczənꞌ gwxaquəꞌəlebe chioꞌo, šə bito choncho deꞌe güen, ṉezecho bito de yeḻəꞌ mban zeɉḻicaṉe c̱hechonꞌ ḻaꞌaṉəꞌəczə šə nacho de que chonḻilažəꞌəcho Jesocristənꞌ.
\c 3
\s1 Choncho deꞌe xiṉɉ len xtižəꞌəchonꞌ
\p
\v 1 Beṉəꞌ bišəꞌ daoꞌ, ṉezecho de que netoꞌ chsed chloꞌitoꞌ beṉəꞌ yoblə xtižəꞌ Diozənꞌ siꞌichtoꞌ castigw šə bito gontoꞌ canꞌ nanṉəꞌ. Deꞌe naꞌanəꞌ əchniaꞌ leꞌe, bito selažəꞌətecle əgwsed əgwloꞌile beṉəꞌ yoblə xtižəꞌ Diozənꞌ.
\v 2 Zan las yoguəꞌəcho choncho deꞌe xiṉɉ. Pero šə to beṉəꞌ bito choneꞌ deꞌe xiṉɉ len xtižeꞌenəꞌ naquəchgüeꞌ beṉəꞌ güen naꞌ gwzoiczeneꞌ ṉabiaꞌ doxen cuerp c̱heꞌenəꞌ šə caꞌ.
\v 3 Chgoꞌocho frenṉəꞌ choꞌa cabey caꞌ par nic̱h yosəꞌəzenaguəb c̱hecho naꞌ žɉaꞌaquəb con gatəꞌətezə cheneꞌecho šeɉlengaꞌacchob.
\v 4 Naꞌ ḻeczə beṉəꞌ caꞌ chosoꞌosaꞌ barcw xen caꞌ chosoꞌoc̱hineꞌ yag daꞌozə deꞌen chsaꞌ ḻegaꞌaquən ḻicha par nic̱h chɉaꞌaquən gatəꞌətezə chseꞌeneneꞌ ḻaꞌaṉəꞌəczə šə chžiguəꞌ beꞌ gualənꞌ ḻegaꞌaquən.
\v 5 Caꞌaczənꞌ naquən len ḻožəꞌəchonꞌ. Tozə deꞌe daoꞌ rizəꞌən naquən par len cuerp c̱hechonꞌ pero chac chṉelenchon dižəꞌ par gon cuincho xen. Naꞌ ca naquə to yiꞌ bziꞌ daoꞌ guaquə əgwzeyən to yaꞌadaoꞌ xen, caꞌaczənꞌ naquənꞌ len ḻožəꞌəchonꞌ catəꞌ chṉelenchon dižəꞌ mal.
\v 6 Gwxaquəꞌəleben ca to yiꞌ. Šə bito chzenagcho c̱he Diozənꞌ choꞌecho yoguəꞌ cḻaste dižəꞌ mal, c̱hedəꞌ ḻožəꞌəchonꞌ chonchən deꞌe mal cle ca bitəꞌətezəchlə part c̱he cuerp c̱hechonꞌ. Naꞌ šə choꞌecho dižəꞌ malənꞌ chyaḻəꞌəch yoguəꞌəḻoḻte deꞌe mal deꞌen chonchonꞌ, naꞌ bitoczə bi güen socho yedote lao əbancho. Laꞌ c̱he gwxiyeꞌ nanꞌ chzenagcho catəꞌən choꞌecho dižəꞌ mal caꞌ.
\v 7 Chsaꞌac max yoguəꞌ cḻaste bia yix̱əꞌ, bia žia tap ṉiꞌa neꞌi, bia žia x̱ileꞌe, bia chda nxobə ḻeꞌi, naꞌ bia caꞌ žaꞌ ḻoꞌo nis. Bagwnitəꞌ beṉəꞌ gwsoꞌonmaxgaꞌaqueꞌeb.
\v 8 Pero ni to chioꞌo bito soicho ḻožəꞌəchonꞌ par nic̱h bito güeꞌelenchon dižəꞌ mal. Do tyempte choꞌecho dižəꞌ naꞌ dižəꞌ deꞌen chchoɉ ḻoꞌo laꞌaždaꞌomalchonꞌ naquən deꞌe mal juisy. Gwxaquəꞌəleben ca benen c̱he to beḻ əznia.
\v 9 Len xtižəꞌəchonꞌ choꞌelaꞌocho X̱acho Diozənꞌ benꞌ ḻeczə naquə X̱ancho. Naꞌ ḻeczə len xtižəꞌəchonꞌ chžia chnitəꞌəcho lɉuežɉ beṉac̱hcho, beṉəꞌ caꞌ ben Diozənꞌ canꞌ naquə cuineꞌ.
\v 10 Naꞌ choꞌacho naꞌanəꞌ chchoɉ dižəꞌ šaoꞌ catəꞌən choꞌelaꞌocho Diozənꞌ naꞌ ḻeczə naꞌanəꞌ chchoɉ dižəꞌ mal catəꞌən chžia chnitəꞌəcho lɉuežɉ beṉac̱hcho. Beṉəꞌ bišəꞌ bito choncho canꞌ cheyaḻəꞌ goncho.
\v 11 Ṉezecho de que bito žia nis šaoꞌ naꞌ nis əzbapɉ tozə beɉ.
\v 12 Naꞌ ḻeczə caꞌ beṉəꞌ bišəꞌ, ṉezecho de que to yag yix̱guionꞌ bito chbian güi naꞌ nic zapɉənꞌ chbianꞌ yix̱güio. Naꞌ ḻeczə caꞌ bito šeɉcho beɉ ganꞌ žia nis əzbapɉənꞌ par žɉəx̱iꞌicho nis šaoꞌ. Caꞌaczənꞌ naquən len chioꞌo ža, bito cheyaḻəꞌ güeꞌecho dižəꞌ mal txen len dižəꞌ güen, sino cheyaḻəꞌ güeꞌecho por dižəꞌ güen.
\s1 Canꞌ goncho šə Diozənꞌ babeṉeꞌ chioꞌo yeḻəꞌ sinꞌ c̱heꞌenəꞌ
\p
\v 13 Notəꞌətezcho šə chaquecho naccho beṉəꞌ sinꞌ naꞌ cheɉniꞌicho xtižəꞌ Diozənꞌ par əgwsed əgwloꞌichon beṉəꞌ yoblə cheyaḻəꞌ goncho yoguəꞌəḻoḻ canꞌ cheneꞌe Diozənꞌ goncho par nic̱h gacbiaꞌ naccho beṉəꞌ sinꞌ, naꞌ bito gon cuincho xen deꞌen naccho beṉəꞌ sinꞌ.
\v 14 Pero naꞌ šə chgueꞌi lɉuežɉcho naꞌ cheneꞌecho gaccho beṉəꞌ blaoch cle ca ḻegaꞌaqueꞌ bito cheyaḻəꞌ əṉacho de que naccho beṉəꞌ sinꞌ par əgwsedecho beṉəꞌ yoblə. Nacbiaꞌ bito naccho beṉəꞌ sinꞌ šə choncho caꞌ.
\v 15 Naꞌ šə chgueꞌi lɉuežɉcho naꞌ cheneꞌecho gaccho beṉəꞌ blaoch ca ḻegaꞌaqueꞌ bito naccho beṉəꞌ sinꞌ par əgwsedecho beṉəꞌ yoblə, con choncho canꞌ na laꞌaždaꞌomalchonꞌ naꞌ canꞌ chsoꞌon beṉəꞌ caꞌ cui zɉənombiaꞌ Diozənꞌ, laꞌ xbab c̱hechonꞌ zaꞌan c̱he deꞌe gwxiyeꞌenəꞌ.
\v 16 Šə chgueꞌi lɉuežɉcho naꞌ cheneꞌecho gaccho beṉəꞌ blaoch ca ḻegaꞌaqueꞌ, bito zocho binḻo len ḻegaꞌaqueꞌ šə caꞌ, naꞌ choncho porzə deꞌe mal.
\v 17 Catəꞌ Diozənꞌ choṉeꞌ chioꞌo yeḻəꞌ sinꞌ c̱heꞌenəꞌ, choncho porzə deꞌe güen, naꞌ bito chx̱echo gwdiḻə entr lɉuežɉcho. Naꞌ catəꞌ choṉeꞌ chioꞌo yeḻəꞌ sinꞌ c̱heꞌenəꞌ naccho gax̱ɉwlažəꞌ naꞌ chzex̱ɉw yic̱hɉcho par nic̱h chzenagcho c̱he lɉuežɉcho. Naꞌ ḻeczə cheyašəꞌ chežiꞌilažəꞌ lɉuežɉcho naꞌ tozə canꞌ chaclencho yogueꞌe naꞌ choꞌecho por dižəꞌ ḻi.
\v 18 Pero catəꞌəch zo chbezcho binḻo naꞌ chaclencho beṉəꞌ yeziquəꞌəchlə par yesəꞌəzo yesəꞌəbezəgaꞌaqueꞌ binḻo, nachənꞌ beṉəꞌ caꞌ chsed chloꞌicho soꞌonḻɉeꞌ deꞌe güenṉəꞌ.
\c 4
\s1 Bito gaquə goncho txen len beṉəꞌ caꞌ cui zɉənombiaꞌ Diozənꞌ
\p
\v 1 Deꞌen chdiḻə chšašle entr lɉuežɉle chonḻe caꞌ c̱hedəꞌ yoꞌo yaz deꞌe malənꞌ ḻoꞌo yic̱hɉlaꞌaždaꞌolenꞌ naꞌ chnabiꞌan leꞌe par chonḻe con canꞌ nan c̱hele.
\v 2 Yoꞌo yaz deꞌe malənꞌ ḻoꞌo yic̱hɉlaꞌaždaꞌolenꞌ. Deꞌe naꞌanəꞌ cheneꞌele deꞌen de c̱he beṉəꞌ lɉuežɉle naꞌ catəꞌ cui chac caꞌalen, xte chotgaꞌacleneꞌ par nic̱h gaquən lao naꞌale. Naꞌ ḻeczə catəꞌ chzelažəꞌəle gatəꞌ deꞌe cui de c̱hele chdiḻəlenḻe beṉəꞌ naꞌ chšašlengaꞌacleneꞌ. Bito de deꞌen chyažɉele c̱hedəꞌ bito chṉabele Diozənꞌ par goneꞌ ca gatəꞌən.
\v 3 Naꞌ tgüeɉə catəꞌ chṉabecho Diozənꞌ goneꞌ par gatəꞌ bi deꞌen gatəꞌ c̱hecho bito choṉeꞌen c̱hedəꞌ con cheneꞌecho gatəꞌ šə binꞌ na laꞌaždaꞌomalchonəꞌ, naꞌ choncho con nactezə nan.
\v 4 Šə choꞌecho latɉə chnabiaꞌ laꞌaždaꞌomalchonꞌ chioꞌo par choncho con canꞌ cheneꞌenṉəꞌ, choncho canꞌ chsoꞌon beṉəꞌ caꞌ cui zɉənombiaꞌ Diozənꞌ naꞌ choncho contr Diozənꞌ. Deꞌe naꞌanəꞌ notəꞌətezcho šə cheneꞌecho goncho txen len beṉəꞌ mal caꞌ, naccho beṉəꞌ contr c̱he Diozənꞌ naꞌ deꞌen cuich chaquecho c̱he Diozənꞌ gwxaquəꞌəlebecho ca to noꞌolə goꞌo xtoi, noꞌolənꞌ cuich chaque c̱he beꞌen c̱heꞌenəꞌ.
\v 5 Chonḻɉale xbab de que Xtižəꞌ Diozənꞌ bitobi zaquəꞌən ganꞌ nyoɉən nan: “Diozənꞌ beṉeꞌ Spirit c̱heꞌenəꞌ zon ḻoꞌo laꞌaždaꞌochonꞌ. Naꞌ Spiritənꞌ ḻechguaḻe nžiꞌilažəꞌən chioꞌo, naꞌ chzelažəꞌəchguan gaquecho c̱he tozə Diozənꞌ.”
\v 6 Diozənꞌ chaclenchgüeꞌ chioꞌo par nic̱h cuich chzenagcho c̱he laꞌaždaꞌomalchonꞌ. Deꞌe naꞌanəꞌ nyoɉən ḻeꞌe Xtižəꞌ Diozənꞌ nan: “Diozənꞌ choneꞌ contr beṉəꞌ caꞌ chsoꞌon cuingaꞌaqueꞌ xen, pero chacleneꞌ beṉəꞌ caꞌ chsoꞌon xbab de que bitotec bi zɉəzaqueꞌe.”
\v 7 Deꞌe naꞌanəꞌ cheyaḻəꞌ gon cuincho lažəꞌ naꞌ Diozənꞌ naꞌ coꞌo gwc̱heɉlažəꞌəcho cui šeɉḻeꞌecho c̱he gwxiyeꞌenəꞌ. Šə goncho caꞌ yebižəꞌən šlož.
\v 8 Cheyaḻəꞌ goncho xbab canꞌ chaque Diozənꞌ c̱hecho naꞌ güeꞌelenchoneꞌ dižəꞌ canꞌ choꞌelencho beṉəꞌ migw c̱hecho caꞌ dižəꞌ. Šə goncho caꞌ, Diozənꞌ gaqueꞌ beṉəꞌ migw c̱hecho. Naꞌ šə choncho deꞌe malənꞌ cheyaḻəꞌ cueɉyic̱hɉchon. Naꞌ šə choncho xbabənꞌ de que guaquə güeꞌelaꞌocho Diozənꞌ naꞌ gontezcho canꞌ cheneꞌe laꞌaždaꞌomalchonꞌ, clelənꞌ choncho xbabənꞌ šə caꞌ naꞌ cheyaḻəꞌ güeꞌecho latɉə yocobə Diozənꞌ yic̱hɉlaꞌaždaꞌochonꞌ.
\v 9 Catəꞌ babencho deꞌe malənꞌ cheyaḻəꞌ yegüineꞌecho naꞌ cuežyašəꞌəcho naꞌ gaquəchgüeicho ḻoꞌo laꞌaždaꞌochonꞌ por ni c̱he deꞌe mal deꞌen babenchonꞌ. Bito cheyaḻəꞌ goncho ḻegr naꞌ nic cheyaḻəꞌ yebeicho, c̱hedəꞌ laꞌ babencho deꞌe malənꞌ. Cheyaḻəꞌ yegüineꞌecho por ni c̱he deꞌe malənꞌ babenchonꞌ naꞌ yediṉɉechon.
\v 10 Cheyaḻəꞌ əgwzex̱ɉw yic̱hɉcho lao X̱ancho Diozənꞌ gacbeꞌicho de que bito naccho beṉəꞌ zaquəꞌəchgüei par nic̱h goṉeꞌ chioꞌo yaḻəꞌ balaꞌaṉ.
\s1 Bito cheyaḻəꞌ əṉacho c̱he lɉuežɉcho de que napeꞌ doḻəꞌ
\p
\v 11 Beṉəꞌ bišəꞌ daoꞌ, bito cheyaḻəꞌ əṉecho c̱he lɉuežɉcho. Benꞌ chṉeꞌ c̱he lɉuežɉeꞌ naꞌ chṉelaoteꞌ, ḻei naꞌanəꞌ chzoeꞌ caꞌaḻə, laꞌ ḻenṉəꞌ nan gaque c̱he lɉuežɉcho. Naꞌ ṉezecho de que benꞌ chon caꞌ bito chzenagueꞌ c̱he ḻeinꞌ. Naꞌ deꞌen chon cuineꞌ ca beṉəꞌ zaqueꞌe par əṉeꞌ c̱he lɉuežɉeꞌ de que napeꞌ doḻəꞌ, choneꞌ ḻei c̱he Diozənꞌ ca to deꞌe cui bi zaqueꞌe.
\v 12 Tozə Dioz nanꞌ bnežɉueꞌ ḻeinꞌ naꞌ tozə ḻeꞌenəꞌ zaqueꞌe par əṉeꞌ c̱he to tocho šə napcho doḻəꞌ. Naꞌ ḻeczeꞌenəꞌ chac goneꞌ par nic̱h cui žɉəyaꞌac beṉəꞌ lao yiꞌ gabiḻənꞌ naꞌ chacte seḻeꞌe beṉəꞌ lao yiꞌ gabiḻənꞌ. Pero chioꞌo bito zaquəꞌəcho əṉacho c̱he lɉuežɉcho de que zɉənapeꞌ doḻəꞌ.
\s1 Bito ṉezecho binꞌ gaquə gwx̱e güižɉ
\p
\v 13 Naꞌ ḻeczə tgüeɉə chc̱hogbiꞌachon šeɉcho to ga šeɉcho par goncho ṉegosy nic̱h goncho gan. Naꞌ chbeɉcho to žanꞌ par šeɉcho naꞌ chc̱hogbiꞌachon de que yegaꞌaṉchonəꞌ tgüiz.
\v 14 Bito güen əc̱hogbiꞌachon caꞌ laꞌ bito ṉezecho binꞌ gaquə c̱hecho o nac goncho gwx̱e güižɉ. Yeḻəꞌ mban c̱hechonꞌ gwxaquəꞌəleben ca to beɉw, laꞌ beɉonꞌ šložzə chleꞌichonꞌ naꞌ cheyasən.
\v 15 Cheyaḻəꞌ əṉacho: “Šə X̱ancho Diozənꞌ güeꞌe latɉə əbancho naꞌ goncho to deꞌe goncho.”
\v 16 Pero naꞌ deꞌe malənꞌ choncho šə chon cuincho xen par chžiacho biaꞌ naquənꞌ goncho sin cui əṉabecho Diozənꞌ.
\v 17 Naꞌ šə ṉezecho deꞌen naquə güen goncho naꞌ bito chonchon, napcho doḻəꞌ lao Diozənꞌ deꞌen cui chonchon.
\c 5
\s1 Ḻechguaḻe deꞌe mal gaquə c̱he beṉəꞌ gwniꞌa caꞌ beṉəꞌ cui chsoꞌonḻilažəꞌ Jesocristənꞌ
\p
\v 1 Naꞌ leꞌe beṉəꞌ gwniꞌa leꞌe cui chonḻilažəꞌəle Jesocristənꞌ, ḻeꞌe so trist, naꞌ ḻeꞌe cuežyašəꞌ, laꞌ ḻechguaḻe deꞌe mal gaquə c̱hele.
\v 2 Bachbiayiꞌ deꞌen deilenꞌ, naꞌ ḻeczə bachsaꞌo beḻ ziləꞌ lachəꞌ šaoꞌ c̱helenꞌ.
\v 3 Mech c̱hele deꞌen naquə de or naꞌ de pḻat bachesəꞌəzen xc̱heꞌi naꞌ deꞌen zɉənzen xc̱heꞌinəꞌ nacbiaꞌ de que bito bc̱hinḻen par gaquəlenḻe beṉəꞌ. Deꞌe naꞌanəꞌ əžin ža əžaglaochguale lao yiꞌ gabiḻənꞌ. Bagwcheꞌ yic̱hɉle tlaozə babtoble deꞌe sc̱haꞌo xmechlenꞌ, ḻaꞌaṉəꞌəczə bazon goṉ Diozənꞌ leꞌe castigw.
\v 4 Ḻeꞌe gon xbab canꞌ benḻe len beṉəꞌ güen žin c̱helenꞌ beṉəꞌ yašəꞌ caꞌ besyəꞌəlap cwseš c̱helenꞌ. Bx̱oayagle ḻegaꞌaqueꞌ deꞌen bito gwdixɉwgaꞌacleneꞌ canꞌ cheyaḻəꞌ. Naꞌ deꞌen cui bnežɉwle laxɉwgaꞌaqueꞌen canꞌ cheyaḻəꞌ, chloꞌen de que nacle beṉəꞌ güen deꞌe mal. Diozənꞌ chzenagueꞌ c̱he beṉəꞌ güen žin caꞌ deꞌen chesyəꞌəgüineꞌeneꞌ, Dioz benꞌ napə ḻeꞌezelaogüe yeḻəꞌ guac xen.
\v 5 Zotezle cheꞌeɉ chaošaꞌole naꞌ chonditɉeile deꞌen deile chonḻe con canꞌ nan c̱hele. Naꞌ laogüe deꞌen chonḻe con canꞌ nan c̱helenꞌ naꞌ bito chacbeꞌile bazon goṉ Diozənꞌ castigw c̱helenꞌ, gwxaquəꞌəlebele ca to bia yix̱əꞌ bianꞌ chgüeꞌeɉ chguaošaꞌocho par nic̱h chaṉəꞌəb antslə zeꞌe gotchob.
\v 6 Babenḻe par nic̱h beṉəꞌ yoblə gwsoꞌoteꞌ beṉəꞌ caꞌ gwsoꞌon deꞌe güen, naꞌ bitobi goquə soꞌoneꞌ par nic̱h cui bi gongaꞌaqueleneꞌ.
\s1 Cuezcho batəꞌəquənꞌ yidə X̱ancho Jesocristənꞌ deꞌe yoblə, naꞌ goncho orasyon
\p
\v 7 Ca naquə leꞌe beṉəꞌ bišəꞌ daoꞌ, ḻeꞌe coꞌo ḻeꞌe gwc̱heɉlažəꞌ len deꞌen chyiꞌ chzaquəꞌəle c̱hedəꞌ bazon yidə X̱ancho Jesocristənꞌ deꞌe yoblə. Beṉəꞌ caꞌ chsaꞌaz chniteꞌe chesəꞌəbezeꞌ cwsešənꞌ, c̱hedəꞌ cwsešənꞌ naquən deꞌe zaqueꞌe. Naꞌ chesəꞌəbezeꞌ chedote lao chac yeɉonꞌ naꞌ catəꞌ chbezə yeɉonꞌ canaꞌach chesyəꞌətobeꞌ cwsešənꞌ.
\v 8 Deꞌe naꞌanəꞌ bitəꞌətezə deꞌe chyiꞌ chzaquəꞌəle cheyaḻəꞌ gonc̱hec̱hlažəꞌəle gonḻilažəꞌəle X̱ancho Jesocristənꞌ c̱hedəꞌ ṉezecho bazon yideꞌ deꞌe yoblə.
\v 9 Beṉəꞌ bišəꞌ daoꞌ, bito yosbagueꞌele lɉuežɉle šə binꞌ chac c̱hele. Šə binꞌ yosbagueꞌele lɉuežɉle X̱anchonꞌ c̱hoglaogüeꞌen c̱hele de que naple doḻəꞌ. Naꞌ bazon baozə yideꞌ deꞌe yoblə.
\v 10 Ḻeꞌe gon xbab c̱he deꞌe profet caꞌ beṉəꞌ caꞌ gwsoeꞌ xtižəꞌ X̱ancho Diozənꞌ canaꞌ. Ḻechguaḻe besəꞌəžaglaogüeꞌ pero biaꞌaczə gwniteꞌe c̱hec̱h gwsoꞌonḻilažeꞌe Diozənꞌ.
\v 11 Mbalaz nitəꞌ beṉəꞌ caꞌ gwnitəꞌətezə gwnitəꞌ gwsoꞌonḻilažəꞌ Diozənꞌ ḻaꞌaṉəꞌəczə besəꞌəžaglaogüeꞌ. Babenele xtižəꞌ deꞌe Jobənꞌ canꞌ benc̱hec̱hlažeꞌe benḻilažeꞌe Diozənꞌ ḻaꞌaṉəꞌəczə deꞌe zan deꞌen gwdiꞌ gwxaqueꞌe. Pero naꞌ catəꞌ gwde deꞌen gwdiꞌ gwxaqueꞌenəꞌ, Diozənꞌ beneꞌ par nic̱h gwzocheꞌ mbalaz clezə canꞌ gwzoeꞌ antslə. Canꞌ ben Diozənꞌ bloꞌe de que ḻechguaḻe cheneꞌeneꞌ gaquəleneꞌ chioꞌo naꞌ ḻechguaḻe cheyašəꞌ chežiꞌilažeꞌe chioꞌo.
\p
\v 12 Beṉəꞌ bišəꞌ daoꞌ, bito əgwsocho jorament por yoba, nic por yežlyo nga, naꞌ nic por bitəꞌətezəchlə. Cheyaḻəꞌ güeꞌecho por dižəꞌ ḻi deꞌe seꞌeɉḻeꞌ beṉəꞌ sin cui əgwzocho testigw de que ḻeiczechonꞌ, par nic̱h Jesocristənꞌ cui c̱hoglaogüeꞌen c̱hecho de que cheyaḻəꞌ siꞌicho castigw.
\p
\v 13 Notəꞌətezcho catəꞌ chyiꞌ chzaquəꞌəcho, cheyaḻəꞌ goncho orasyon. Naꞌ notəꞌətezcho catəꞌ zocho mbalaz, cheyaḻəꞌ goḻcho güeꞌelaꞌocho Jesocristənꞌ.
\v 14 Notəꞌətezcho catəꞌ chacšenecho cheyaḻəꞌ gaxcho beṉəꞌ gol caꞌ gwleɉcho par nic̱h zɉənaqueꞌ beṉəꞌ blao c̱he chioꞌo chdopə chžagcho choꞌelaꞌocho Jesocristənꞌ. Naꞌ yesəꞌəyebeꞌ chioꞌo setənꞌ, naꞌ soꞌoneꞌ orasyon lao Diozənꞌ yesəꞌəṉabeꞌ yeyaquecho c̱hedəꞌ ḻegaꞌaqueꞌ naꞌ chioꞌo chonḻilažəꞌəcho X̱ancho Jesocristənꞌ.
\v 15 Naꞌ chioꞌo choncho orasyonṉəꞌ cheyaḻəꞌ šeɉḻeꞌecho de que chzenagczə X̱ancho Diozənꞌ c̱hecho par nic̱h caꞌ yeyaque šə no chioꞌo chacšene, laꞌ X̱ancho nanꞌ yeyoneꞌ chioꞌo. Naꞌ šə babencho deꞌe mal, goziꞌixenczə X̱anchonꞌ c̱hecho.
\v 16 Deꞌe naꞌanəꞌ cheyaḻəꞌ güeꞌecho dižəꞌ len beṉəꞌ lɉuežɉcho c̱he bitəꞌətezə deꞌe mal babencho contr ḻegaꞌaqueꞌ naꞌ goncho orasyon tocho yetocho par nic̱h caꞌ yezocho güen šə binꞌ chac c̱hecho. Naꞌ šə naccho beṉəꞌ güen lao Diozənꞌ, Diozənꞌ chzenagczeꞌ c̱hecho catəꞌ choncho orasyonṉəꞌ do yic̱hɉ do lažəꞌəcho naꞌ choneꞌ deꞌe zan deꞌe güen deꞌen chṉabechoneꞌ goneꞌ.
\v 17 Ḻeꞌe gon xbab c̱he Ḻiazənꞌ. Goqueꞌ beṉac̱h cayaṉəꞌən naquə chioꞌo. Naꞌ catəꞌ beneꞌ orasyon do yic̱hɉ do lažeꞌe gwṉabeneꞌ Diozənꞌ cui gaquə yeɉw, Diozənꞌ bzenagueꞌ c̱heꞌ naꞌ bito bseḻeꞌe yeɉonꞌ lao šoṉ iz yoꞌo gašɉə.
\v 18 Naꞌ catəꞌ beneꞌ orasyonṉəꞌ gwṉabeneꞌ Diozənꞌ əseḻeꞌe yeɉonꞌ deꞌe yoblə, nach Diozənꞌ bseḻeꞌen. Naꞌ goc cwseš c̱he beṉəꞌ caꞌ deꞌe yoblə.
\p
\v 19 Beṉəꞌ bišəꞌ daoꞌ, catəꞌ to beṉəꞌ lɉuežɉcho bagwleɉyic̱hɉeꞌ deꞌen naquə deꞌe ḻi deꞌen bzeɉniꞌi Diozənꞌ chioꞌo, cheyaḻəꞌ gaquəlenchoneꞌ par nic̱h yediṉɉeneꞌ xtoḻeꞌenəꞌ naꞌ yeyaqueꞌ tozə len chioꞌo.
\v 20 Cheꞌendaꞌ əṉezele de que catəꞌ choncho par nic̱h notəꞌətezə beṉəꞌ chediṉɉeneꞌ xtoḻeꞌenəꞌ, chaclenchoneꞌ par nic̱h cheziꞌixen Diozənꞌ xtoḻeꞌenəꞌ ḻaꞌaṉəꞌəczə šə naquən deꞌe zan, naꞌ cui yeyeɉ beꞌenəꞌ lao yiꞌ gabiḻənꞌ.
\p Deꞌe naꞌazənꞌ chzoɉaꞌ ṉaꞌa.
\b
\m Santiago