\id REV
\ide UTF8
\h APOCALIPSIS
\toc1 Apocalipsis
\mt1 Deꞌen Bzeɉniꞌi Jesocristənꞌ San Juanṉəꞌ Nic̱h Bzoɉeꞌen Par Chioꞌo
\c 1
\s1 Diozənꞌ beneꞌ par nic̱h Jesocristənꞌ bzeɉniꞌineꞌ San Juanṉəꞌ deꞌe quinga
\p
\v 1 Nadaꞌ Juan nacaꞌ beṉəꞌ güen xšin Jesocristənꞌ. Diozənꞌ bloꞌineꞌ Jesocristənꞌ deꞌe quinga deꞌen bzeɉniꞌineꞌ nadaꞌ par gwloꞌidaꞌan yeziquəꞌəchlə beṉəꞌ chsoꞌelaogüeꞌeneꞌ. Bseḻeꞌe angl c̱heꞌenəꞌ par bzeɉniꞌineꞌ nadaꞌ deꞌe quinga par nic̱h əṉezecho deꞌe caꞌ gaquə lgüegwzə.
\v 2 Naꞌ bachoꞌa dižəꞌ c̱he yoguəꞌəḻoḻ deꞌe quinga deꞌen bloꞌineꞌ nadaꞌ, naꞌ yoguəꞌəḻoḻ deꞌen bzene Diozənꞌ nadaꞌ naꞌ deꞌen bzeɉniꞌi Jesocristənꞌ nadaꞌ.
\p
\v 3 Mbalaz ṉitəꞌ beṉəꞌ caꞌ yosoꞌolabeꞌ deꞌe nga chzoɉaꞌ nga deꞌen bzene Diozənꞌ nadaꞌ. Naꞌ mbalaz ṉitəꞌ beṉəꞌ caꞌ əseꞌene ḻen catəꞌ beṉəꞌ yoblə yosoꞌolabeꞌen. Mbalaz ṉiteꞌe šə yosoꞌozenagueꞌen, c̱hedəꞌ bazon gaquə deꞌe caꞌ bloꞌineꞌ nadaꞌ.
\s1 Juanṉəꞌ chzoɉeꞌ beṉəꞌ caꞌ chsoꞌelaoꞌ Jesocristənꞌ yež caꞌ gažə
\p
\v 4 Nadaꞌ Juan chzoɉaꞌ leꞌe chdopə chžagle choꞌelaꞌole Jesocristənꞌ Asianꞌ, leꞌe nitəꞌəle yež caꞌ gažə. Diozənꞌ sošgueꞌ gaquəleneꞌ leꞌe naꞌ goneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ, Dioz benꞌ bazoczə catəꞌən bx̱iꞌe yežlyonꞌ, naꞌ caꞌaczənꞌ soeꞌ catəꞌən yeyož yedon. Naꞌ Spirit c̱he Diozənꞌ deꞌen naquə ca gažə Spirit zon lao Diozənꞌ ganꞌ chiꞌe chnabiꞌe naꞌ sošgan gaquəlenən leꞌe naꞌ gonən ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ.
\v 5 Naꞌ ḻeczə Jesocristənꞌ sošgueꞌ gaquəleneꞌ leꞌe naꞌ goneꞌ ca so cuezle binḻo len xbab deꞌen yoꞌo ḻoꞌo yic̱hɉlaꞌaždaꞌolenꞌ. Jesocristənꞌ beꞌe dižəꞌ c̱he Diozənꞌ naꞌ xtižeꞌenəꞌ naquən deꞌe ḻi. Ḻenꞌ naqueꞌ beṉəꞌ nech bebaneꞌ ladɉo beṉəꞌ guat caꞌ par chnabiꞌe. Jesocristənꞌ chnabiꞌe notəꞌətezə beṉəꞌ chəsəꞌənabiaꞌ yežlyo nga. Chaque Jesocristənꞌ c̱hecho naꞌ babnitlaogüeꞌ xtoḻəꞌ chioꞌo chonḻilažəꞌəchoneꞌ ca deꞌen blalɉ xc̱heneꞌenəꞌ catəꞌən bnežɉw cuineꞌ gwsoꞌoteꞌeneꞌ.
\v 6 Gwleɉeꞌ chioꞌo par nic̱h ṉabiꞌacho txen len ḻeꞌ ca no rei naꞌ par nic̱h sotezə socho güeꞌelaꞌocho X̱eꞌ Diozənꞌ canꞌ gwnitəꞌətezə gwnitəꞌ bx̱oz c̱he beṉəꞌ Izrael caꞌ gwseꞌeɉṉiꞌalažeꞌe Diozənꞌ. Jesocristənꞌ chnabiꞌe zeɉḻicaṉe. Ḻedoyeꞌelaꞌocheꞌ ṉaꞌa naꞌ zeɉḻicaṉe. Canꞌ gonšgaczcho.
\p
\v 7 Ḻeꞌe gon xbab, laꞌ Jesocristənꞌ yetɉeꞌ to ḻoꞌo beɉw. Naꞌ yoguəꞌəḻoḻ beṉəꞌ yesəꞌəleꞌineꞌ ḻeꞌ, lente beṉəꞌ caꞌ gwsoꞌot ḻeꞌ, naꞌ beṉəꞌ caꞌ žaꞌ doxen yežlyonꞌ yesəꞌəbežyašeꞌe deꞌen cui gwsoꞌonḻilažeꞌeneꞌ. Canꞌ na Diozənꞌ, naꞌ caꞌaczənꞌ gaquə.
\p
\v 8 “Nadanꞌ nacaꞌ benꞌ ben yežlyonꞌ naꞌ benꞌ gon par nic̱h te c̱hei.” Canꞌ na X̱ancho Diozənꞌ benꞌ napə ḻeꞌezelaogüe yeḻəꞌ guac xenṉəꞌ, benꞌ bazoczə catəꞌən bx̱iꞌe yežlyonꞌ, naꞌ caꞌaczənꞌ soeꞌ catəꞌən yeyož yedon.
\s1 Juanṉəꞌ bleꞌidaogüeꞌeneꞌ Cristənꞌ len yeḻəꞌ chey cheꞌeniꞌ c̱heꞌenəꞌ
\p
\v 9 Nadaꞌ Juan nacaꞌ beṉəꞌ bišəꞌəle c̱hedəꞌ naccho txen choꞌelaꞌocho Cristənꞌ naꞌ txenṉəꞌ chosoꞌoc̱hiꞌ chosoꞌosaquəꞌ beṉəꞌ chioꞌo. Txenṉəꞌ chnabiaꞌ Diozənꞌ chioꞌo naꞌ txen chgoꞌo chc̱heɉlažəꞌəcho len yoguəꞌ deꞌen chac c̱hecho c̱hedəꞌ ngodəꞌəcho txen len Jesocristənꞌ. Zoaꞌ isla nga deꞌen neꞌ Patmos laꞌ nacaꞌ pres por ni c̱he deꞌen bagwdix̱ɉuiꞌa xtižəꞌ Diozənꞌ naꞌ babiꞌa dižəꞌ c̱he Jesocristənꞌ. Deꞌe naꞌanəꞌ babosoꞌoseḻeꞌe nadaꞌ nga.
\v 10 Naꞌ to ža dmigw Spirit c̱he Diozənꞌ benən par nic̱h bleꞌidaogüeꞌedaꞌ to deꞌen bleꞌidaogüeꞌedaꞌ. Naꞌ bendaꞌ gwṉe to beṉəꞌ cožaꞌanəꞌ zižɉochgua ca zižɉonꞌ chbež trompet.
\v 11 Naꞌ gožeꞌ nadaꞌ: —Nadanꞌ nacaꞌ benꞌ ben yežlyonꞌ naꞌ benꞌ gon par nic̱h te c̱hei. Bzoɉ dižəꞌ c̱he deꞌe quinga leꞌidaogüeꞌedoꞌonəꞌ to ḻeꞌe ḻibr naꞌ seḻoꞌo ḻibrənꞌ lao beṉəꞌ caꞌ chesəꞌədopə chesəꞌəžag chsoꞌelaogüeꞌe nadaꞌ Asia, beṉəꞌ žaꞌ Efesonꞌ naꞌ Esmirna, naꞌ Pergamo, naꞌ Tiatira, naꞌ Sardis naꞌ Filadelfia naꞌ Laodisea.
\p
\v 12 Naꞌ gwyec̱hɉaꞌ bgüiaꞌ nonꞌ choꞌelen nadaꞌ dižəꞌ naꞌ bleꞌidaꞌ gažə candeler de or.
\v 13 Naꞌ gwchoḻ candeler caꞌ gažə bleꞌidaꞌ Xiꞌiṉ Diozənꞌ ca to beṉac̱h. Naꞌ nyazeꞌ to lachəꞌ toṉə deꞌe bžinte yen ṉiꞌe. Naꞌ ncheɉ choꞌalc̱hoꞌenəꞌ to sinš de or.
\v 14 Naꞌ yišəꞌ yic̱hɉeꞌenəꞌ naquən ca xa xiləꞌ šyiš naꞌ ca beꞌeyəꞌ. Naꞌ ɉelaogüeꞌ caꞌ chsaꞌactitən ca to yiꞌ deꞌe chaḻəꞌəṉiṉ.
\v 15 Naꞌ bleꞌidaꞌ ṉiꞌenəꞌ chactitən ca to brons deꞌe nḻachgua catəꞌ xoan lao yiꞌ. Naꞌ xṉe c̱heꞌenəꞌ nenən ca chziž yaonꞌ catəꞌ dechguan.
\v 16 Naꞌ nox̱eꞌe gažə belɉw len neꞌe ḻichanꞌ, naꞌ choꞌenəꞌ zo to spad deꞌe nḻa c̱hopə laꞌate. Naꞌ bleꞌidaꞌ choꞌalaogüeꞌenəꞌ canꞌ chleꞌicho bgüižənꞌ catəꞌən chṉachguan.
\p
\v 17 Naꞌ beyož bleꞌidaꞌaneꞌ bgüix̱aꞌ xniꞌenəꞌ gotaꞌ šlat. Nach bḻi neꞌe ḻichanəꞌ bex̱eꞌe naꞌanəꞌ naꞌ gožeꞌ nadaꞌ: —Bito žeboꞌ. Nadanꞌ nacaꞌ benꞌ ben yežlyonꞌ naꞌ benꞌ gon par nic̱h te c̱hei.
\v 18 Nadaꞌ nacaꞌ Dioz benꞌ zo zeɉḻicaṉe. Ca deꞌen bidaꞌ gocaꞌ beṉac̱h gwsoꞌoteꞌ nadaꞌ, pero naꞌ bebanaꞌ ladɉo beṉəꞌ guat caꞌ naꞌ soaꞌ zeɉḻicaṉe. Nadaꞌ napaꞌ yeḻəꞌ gwnabiaꞌ par əṉiaꞌ batənꞌ saꞌat to to beṉəꞌ naꞌ napaꞌ yeḻəꞌ gwnabiaꞌ par əṉiaꞌ nonꞌ žɉəyaꞌac gabiḻənꞌ.
\v 19 Naꞌ ža bzoɉ dižəꞌ c̱he deꞌe caꞌ bableꞌidoꞌ, naꞌ c̱he deꞌe caꞌ chac ṉaꞌa naꞌ c̱he deꞌe caꞌ zeꞌe zaꞌac.
\v 20 Bito gwyeɉniꞌidoꞌ c̱he belɉw caꞌ gažə deꞌen nox̱aꞌa naꞌ c̱he candeler de or caꞌ gažə. Belɉw caꞌ gažə zeɉen gažə beṉəꞌ caꞌ zɉəyoꞌo lao neꞌi beṉəꞌ caꞌ chesəꞌədopə chesəꞌəžag chsoꞌelaꞌogüeꞌe nadaꞌ yež caꞌ ganꞌ mbane Asia. Naꞌ candeler caꞌ gažə zeɉen gaž cuen beṉəꞌ caꞌ chsoꞌonḻilažəꞌ nadaꞌ.
\c 2
\s1 Dižəꞌ deꞌen beꞌe par beṉəꞌ caꞌ chsoꞌelaoꞌ Jesocristənꞌ yež caꞌ gažə: Deꞌen gožeꞌ beṉəꞌ Efeso caꞌ
\p
\v 1 Bzoɉ deꞌe nga par benꞌ naquə lao neꞌi beṉəꞌ caꞌ chesəꞌədopə chesəꞌəžag chsoꞌelaogüeꞌe nadaꞌ Efesonꞌ naꞌ yoꞌoneꞌ de que nadaꞌ benꞌ bleꞌidoꞌ nox̱əꞌ gažə belɉw caꞌ naꞌ chgüia chyaꞌ candeler de or caꞌ gažə, əchniaꞌ dižəꞌ quinga:
\v 2 “Ṉeze nḻeꞌidaꞌ ca güenṉəꞌ chonḻe, canꞌ zotezə zole chonḻe xšinaꞌanəꞌ sin cui chɉəx̱aquəꞌəlažəꞌəle, naꞌ canꞌ cui chzenagle c̱he beṉəꞌ mal caꞌ chəsəꞌəna zɉənaqueꞌ apostol. Babgüiale canꞌ chsoꞌoneꞌ naꞌ chacbeꞌile de que bito bseḻəꞌəgaꞌacaꞌaneꞌ.
\v 3 Chgoꞌo chc̱heɉlažəꞌəle len deꞌen chyiꞌ chzaquəꞌəle naꞌ zotezle chonḻe xšinaꞌanəꞌ sin cui chɉəx̱aquəꞌəlažəꞌəle.
\v 4 Pero de to deꞌen cui chazlažaꞌa canꞌ chonḻe, cuich chaquele c̱hiaꞌ canꞌ bagoquele c̱hiaꞌ antslə.
\v 5 Ḻeꞌe gon xbab canꞌ gocchgüeile c̱hiaꞌ antslə naꞌ cuich chactequele c̱hiaꞌ ṉaꞌa. Ḻeꞌe gon xbabənꞌ par nic̱h yediṉɉele deꞌen cuich chactequele c̱hiaꞌ naꞌ ḻegonch canꞌ benḻe antslə. Naꞌ šə cui yediṉɉele deꞌe malənꞌ, yedəyenaꞌ leꞌe castigw nach yebižaꞌa len leꞌe. Bitoch gacle candeler c̱hiaꞌ šə cui yediṉɉele xtoḻəꞌəlenꞌ.
\v 6 Pero ḻaꞌaṉəꞌəczə bito chonḻe doxen canꞌ chazlažaꞌanəꞌ, chebeidaꞌ de que chgueꞌile deꞌe malənꞌ chsoꞌon beṉəꞌ caꞌ zɉənziꞌ nicolaitos, laꞌ ḻeczə nadaꞌ chgueꞌidaꞌ canꞌ chsoꞌoneꞌenəꞌ.
\v 7 Leꞌe žia nagle deꞌe chene, ḻeꞌe gwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ. Notəꞌətezle chzoile cui chzenagle c̱he deꞌe malənꞌ, guaꞌa latɉə gaole frotənꞌ deꞌen chbia lao yag yeḻəꞌ mbanṉəꞌ deꞌen zo ganꞌ zo Diozənꞌ.”
\s1 Deꞌen gožeꞌ beṉəꞌ Esmirna caꞌ
\p
\v 8 Naꞌ ḻeczə bzoɉ benꞌ naquə lao neꞌi beṉəꞌ caꞌ chesəꞌədopə chesəꞌəžag chsoꞌelaogüeꞌe nadaꞌ Esmirnanꞌ. Bzoɉeꞌ gožeꞌ de que nadaꞌ nacaꞌ benꞌ ben yežlyonꞌ naꞌ benꞌ gon par nic̱h te c̱hei. Naꞌ gwsoꞌoteꞌ nadaꞌ lao bidaꞌ gocaꞌ beṉac̱h pero bebanaꞌ ladɉo beṉəꞌ guat caꞌ. Naꞌ ḻeczə yoꞌoneꞌ de que nadaꞌ əchniaꞌ dižəꞌ quinga:
\v 9 “Ṉeze nḻeꞌidaꞌ ca güenṉəꞌ chonḻenꞌ, naꞌ ṉeze nḻeꞌidaꞌ canꞌ chosoꞌoc̱hiꞌ chosoꞌosaquəꞌ beṉəꞌ leꞌe naꞌ canꞌ nyašəꞌəchgua chac c̱hele. Pero ḻaꞌaṉəꞌəczə bangaꞌaṉyašəꞌəle ḻechguaḻe mbalaz zole. Ṉezdaꞌ canꞌ chosoꞌožia chosoꞌonitəꞌ beṉəꞌ gwlaž c̱hele caꞌ leꞌe, beṉəꞌ caꞌ gwsaꞌalɉeꞌ lao dia c̱he deꞌe Izraelənꞌ. Lao Diozənꞌ bito zɉənaqueꞌ beṉəꞌ Izrael sino zɉəncodəꞌ lɉuežɉe par chsoꞌoneꞌ txen len gwxiyeꞌenəꞌ deꞌen le Satanas.
\v 10 Bito žeble deꞌe caꞌ zeꞌe zaꞌac deꞌen saquəꞌəziꞌile. Gwxiyeꞌenəꞌ gonən ca yesəꞌəyix̱ɉueꞌ baḻle ližya par nic̱h caꞌ coꞌoyeḻəꞌən leꞌe cueɉyic̱hɉle xtižaꞌanəꞌ. Lao ši ža saquəꞌəziꞌ saquəꞌəyašəꞌəle. Pero naꞌ ḻesotezə ḻeso ḻegwzenag c̱hiaꞌ ḻaꞌaṉəꞌəczə šə soꞌoteꞌ leꞌe por ni c̱he deꞌen chzenagle c̱hiaꞌ. Naꞌ šə sotezə sole gwzenagle c̱hiaꞌ nachənꞌ gonaꞌ ca əbanḻe len nadaꞌ zeɉḻicaṉe.
\v 11 Leꞌe žia nagle deꞌe chene, ḻeꞌe gwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌoleneꞌ. Notəꞌətezle chzoile cui chzenagle c̱he deꞌe malənꞌ, bito gac c̱hele canꞌ gac c̱he beṉəꞌ caꞌ yesəꞌəzaquəꞌəziꞌe zeɉḻicaṉe, deꞌen ṉacho yeḻəꞌ got əgwchope.”
\s1 Deꞌen gožeꞌ beṉəꞌ Pergamo caꞌ
\p
\v 12 Naꞌ ḻeczə bzoɉ benꞌ naquə lao neꞌi beṉəꞌ caꞌ chesəꞌədopə chesəꞌəžag chsoꞌelaꞌogüeꞌe nadaꞌ Pergamonꞌ. Bzoɉeꞌ gožeꞌ de que nadaꞌ benꞌ bleꞌidoꞌ zo spadənꞌ choꞌanəꞌ deꞌe nḻa c̱hopə laꞌate əchniaꞌ dižəꞌ quinga:
\v 13 “Ṉezdaꞌ de que zole lao syodanꞌ ganꞌ chnabiaꞌ Satanasənꞌ naꞌ ganꞌ ḻechguaḻe chosoꞌozenag beṉəꞌ c̱hei. Ṉeze nḻeꞌidaꞌ ca güenṉəꞌ chonḻe, canꞌ zotezə zole chonḻilažəꞌəle nadaꞌ naꞌ canꞌ cui chbeɉyic̱hɉle xtižaꞌanəꞌ deꞌen cheɉḻeꞌele c̱hei, naꞌ nic catəꞌən gwsoꞌoteꞌ Antipasənꞌ ganꞌ zolenꞌ, benꞌ gwzotezə gwzo beꞌe dižəꞌ ḻi c̱hiaꞌanəꞌ lao syoda c̱hele ganꞌ zo Satanasənꞌ.
\v 14 Pero de to c̱hopə deꞌen chonḻe deꞌen cui chazlažaꞌa. Nitəꞌ baḻle chonḻe deꞌe malənꞌ ca deꞌen bzeɉniꞌi deꞌe profet Balaanṉəꞌ deꞌe Rei Balaquənꞌ. Naꞌ Balac naꞌanəꞌ beneꞌ ca besəꞌəxopə beṉəꞌ Izrael caꞌ gwsoꞌoneꞌ deꞌe malənꞌ, zaneꞌ gwsaꞌogüeꞌ yeḻəꞌ guao deꞌen naquə c̱he lguaꞌa lsaquəꞌən gwseꞌeɉṉiꞌalažeꞌe naꞌ bosoꞌožaꞌ xtogaꞌaqueꞌ lao gwseꞌeɉṉiꞌalažeꞌe lguaꞌa lsaquəꞌ c̱he beṉəꞌ Moab caꞌ.
\v 15 Ḻeczə canꞌ chac len leꞌe, baḻle naole deꞌen nac caꞌ deꞌen chsed chloꞌi beṉəꞌ caꞌ zɉənziꞌ nicolaitos deꞌenəꞌ chgueꞌidaꞌ.
\v 16 Deꞌe naꞌanəꞌ ḻeꞌe yediṉɉe deꞌe malənꞌ chonḻe. Šə cui yediṉɉele deꞌe malənꞌ chonḻe, yidaꞌ lgüegwzə naꞌ gonaꞌ par gacle castigw, laꞌ xtižaꞌanəꞌ gwxaquəꞌəleben ca to spad.
\v 17 Leꞌe žia nagle deꞌe chene, ḻeꞌe gwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ. Notəꞌətezle chzoile cui chzenagle c̱he deꞌe malənꞌ, goṉaꞌ leꞌe yoguəꞌəḻoḻ deꞌen chyažɉele par sole mbalaz yobanꞌ zeɉḻicaṉe, naꞌ goṉaꞌ yeɉ fin par to tole nic̱h əṉezele de que chebeidaꞌ leꞌe. Naꞌ ḻeꞌe yeɉənꞌ nyoɉ to la deꞌe cobə naꞌ benꞌ gox̱əꞌ yeɉ naꞌazə əṉezeneꞌ binꞌ nyoɉən.”
\s1 Deꞌen gožeꞌ beṉəꞌ Tiatira caꞌ
\p
\v 18 Bzoɉ deꞌe nga par benꞌ yoꞌo lao neꞌi beṉəꞌ caꞌ chesəꞌədopə chesəꞌəžag chsoꞌelaꞌogüeꞌe nadaꞌ Tiatiranꞌ. Bzoɉeꞌ gožeꞌ de que nadaꞌ nacaꞌ Xiꞌiṉ Diozənꞌ benꞌ bleꞌidoꞌ chsaꞌactit ɉəlaoguaꞌanəꞌ ca to yiꞌ deꞌen chaḻəꞌəṉiṉ naꞌ ṉiꞌanəꞌ ca to brons deꞌen ḻachgua. Naꞌ yoꞌoneꞌ de que nadaꞌ əchniaꞌ dižəꞌ quinga:
\v 19 “Ṉeze nḻeꞌidaꞌ deꞌe güenṉəꞌ chonḻe, naꞌ canꞌ chaquele c̱hiaꞌ naꞌ c̱he lɉuežɉ beṉac̱hle, canꞌ chonḻilažəꞌəle nadaꞌ naꞌ canꞌ chaclen lɉuežɉle. Ṉezdaꞌ canꞌ chgoꞌo chc̱heɉlažəꞌəle len bitəꞌətezə deꞌe chac c̱hele, naꞌ ṉezdaꞌ chonchle güen ṉaꞌa cle ca canꞌ babenḻe catəꞌən gwzolaole chonḻilažəꞌəle nadaꞌ.
\v 20 Pero naꞌ chonḻe deꞌe cui chazlažaꞌa canꞌ choꞌele latɉə par nic̱h noꞌolənꞌ gwxaquəꞌəlebeneꞌ ca deꞌe Reina Jesabelənꞌ chsed chloꞌineꞌ leꞌe neꞌ de que choꞌe xtižəꞌ Diozənꞌ. Chx̱oayagueꞌ baḻə leꞌe chonḻilažəꞌəle nadaꞌ, cheꞌe leꞌe de que naquən güen əgwšaꞌ xtole naꞌ gaole yeḻəꞌ guao deꞌen chəsəꞌəneꞌ naquən c̱he lguaꞌa lsaquəꞌən chseꞌeɉṉiꞌalažəꞌ beṉəꞌ.
\v 21 Babnežɉuaꞌaneꞌ tyemp par yediṉɉeneꞌ deꞌe mal caꞌ choneꞌ, pero bito cheneꞌeneꞌ yediṉɉeneꞌen.
\v 22 Deꞌe naꞌanəꞌ gonaꞌ par nic̱h gaquəšeneneꞌ, naꞌ leꞌe chonḻe txen len ḻeꞌ, gonaꞌ par nic̱h əžaglaochguale šə cui cueɉyic̱hɉle cuich gonḻe deꞌe mal deꞌen chsedeneꞌ leꞌe chonḻe.
\v 23 Naꞌ ca naquə beṉəꞌ caꞌ bagosəꞌəbeɉyic̱hɉeꞌ xtižaꞌanəꞌ par chosoꞌosed chosoꞌoloꞌineꞌ deꞌe malənꞌ gožgaꞌaqueꞌ de que gotgaꞌacaꞌaneꞌ. Naꞌ catəꞌ gonaꞌ caꞌ yoguəꞌəḻoḻ leꞌe chdopə chžagle choꞌelaꞌole nadaꞌ gatəꞌətezə, gacbeꞌile de que ṉeze nḻeꞌiczədaꞌ xbab deꞌen yoꞌo ḻoꞌo laꞌaždaꞌolenꞌ naꞌ binꞌ chebeile. Naꞌ gonaꞌ par nic̱h to tole sole mbalaz o siꞌile castigw segon naquənꞌ babenḻe.
\v 24 Pero naꞌ leꞌe yeḻaꞌale zole Tiatiranꞌ, leꞌe cui naole deꞌen chsed chloꞌi noꞌolənꞌ naꞌ cui nsedle deꞌen chəsəꞌəneꞌ chseꞌeɉniꞌineꞌ c̱he Satanasənꞌ deꞌen ngašəꞌən len beṉəꞌ yeziquəꞌəchlə, bito niaꞌ bichlə deꞌe cheyaḻəꞌ gonḻe.
\v 25 Con sotezə sole gonḻe deꞌe güenṉəꞌ par nic̱h bachonḻe caꞌ catəꞌən yidaꞌ deꞌe yoblə.
\v 26 Notəꞌətezle chzoile cui chzenagle c̱he deꞌe malənꞌ naꞌ zotezə zole chonḻe canꞌ chazlažaꞌanəꞌ xte catəꞌən yidaꞌ deꞌe yoblə, gonaꞌ par nic̱h ṉabiꞌale ṉasyon caꞌ txen len nadaꞌ.
\v 27 Ca X̱aꞌanəꞌ babeneꞌ par nic̱h chnabiaꞌagaꞌacaꞌan, ḻeczə canꞌ leꞌe ṉabiꞌalen txen len nadaꞌ naꞌ goncho ca yesəꞌəzex̱ɉwyic̱hɉ beṉəꞌ ṉasyon caꞌ, naꞌ əgwžiayiꞌigaꞌacchoneꞌ.
\v 28 Naꞌ gonaꞌ par nic̱h gombiꞌayaṉəꞌəle nadaꞌ len yeḻəꞌ chey cheꞌeniꞌ c̱hiaꞌanəꞌ, nadanꞌ gwxaquəꞌəlebədaꞌ ca belɉw xsilənꞌ.
\v 29 Leꞌe žia nagle deꞌe chene, ḻegwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ.”
\c 3
\s1 Deꞌen gožeꞌ beṉəꞌ Sardis caꞌ
\p
\v 1 Bzoɉ deꞌe nga par benꞌ naquə lao neꞌi beṉəꞌ caꞌ chesəꞌdopə chesəꞌəžag chsoꞌelaogüeꞌe nadaꞌ Sardisənꞌ. Bzoɉeꞌ gožeꞌ de que Spirit c̱he Diozənꞌ deꞌen naquə ca gažə spirit zon len nadaꞌ naꞌ gožeꞌ de que nacaꞌ benꞌ bleꞌidoꞌ nox̱aꞌa gažə belɉw caꞌ, naꞌ nadaꞌ əchniaꞌ dižəꞌ quinga: “Ṉeze nḻeꞌidaꞌ canꞌ chonḻenꞌ. Ṉezdaꞌ canꞌ chəsəꞌəna beṉəꞌ de que naple yeḻəꞌ mban zeɉḻicaṉenꞌ, pero zanḻe nacle ca beṉəꞌ guat par len nadaꞌ deꞌen cui chzenagle c̱hiaꞌ.
\v 2 Ḻeyeban binꞌ chonḻe, ḻegonḻilažəꞌəch nadaꞌ naꞌ ḻegaquəche c̱hiaꞌ ṉaꞌa žlac cuiṉəꞌ yeyož cueɉyic̱hɉle nadaꞌ. Ṉezdaꞌ de que Diozənꞌ bito chebeineꞌ canꞌ chonḻe, Dioz benꞌ ḻeczə choꞌelaoguaꞌa.
\v 3 Ḻeꞌe žɉsaꞌalažəꞌ xtižaꞌanəꞌ deꞌen bosoꞌozeɉniꞌi beṉəꞌ leꞌe naꞌ deꞌen bzenagle c̱hei antslə. Ḻeꞌe gwzenag c̱hei deꞌe yoblə naꞌ yediṉɉele deꞌe malənꞌ chonḻe. Laꞌ šə cui gonḻe xbab yediṉɉele deꞌe malənꞌ yedəyenaꞌ leꞌe castigw naꞌ senyalaꞌ leꞌe canꞌ chon to beṉəꞌ bguan benꞌ chidə ca orənꞌ cui chonḻe xbab yideꞌ.
\v 4 Naꞌ ḻaꞌaṉəꞌəczə zanḻe zole Sardisənꞌ cui chonḻe canꞌ chazlažaꞌanəꞌ, biaꞌaczə ṉeꞌe nitəꞌ baḻle cui da əchen deꞌe malənꞌ yic̱hɉlaꞌaždaꞌolenꞌ. Naꞌ leꞌe cui bi deꞌe mal da chen yic̱hɉlaꞌaždaꞌolenꞌ, gwžin ža catəꞌ leꞌe talenḻe nadaꞌ ganꞌ zoaꞌanəꞌ naꞌ c̱hazle lachəꞌ šyiš, c̱hedəꞌ leꞌe zaquəꞌəle par talenḻe nadaꞌ.
\v 5 Notəꞌətezle chzoile cui chzenagle c̱he deꞌe malənꞌ, guacuaꞌ leꞌe lachəꞌ šyiš naꞌ bito yoxiaꞌ lalenꞌ ḻeꞌe ḻibr c̱hiaꞌ ganꞌ nyoɉ la beṉəꞌ caꞌ zɉənapeꞌ yeḻəꞌ mban zeɉḻicaṉe. Naꞌ guaꞌa dižəꞌ len X̱aꞌ Diozənꞌ naꞌ len angl c̱heꞌ caꞌ de que bagwcuaꞌa leꞌe ca xiꞌiṉaꞌ.
\v 6 Leꞌe žia nagle deꞌe chene, ḻegwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ.”
\s1 Deꞌen gožeꞌ beṉəꞌ Filadelfia caꞌ
\p
\v 7 Bzoɉ deꞌe nga par benꞌ naquə lao neꞌi beṉəꞌ caꞌ chesəꞌədopə chesəꞌəžag chsoꞌelaogüeꞌe nadaꞌ Filadelfianꞌ. Bzoɉeꞌ gožeꞌ de que nadaꞌ nacaꞌ beṉəꞌ laꞌaždaoꞌ xiꞌilažəꞌ juisy naꞌ syempr chonaꞌ canꞌ əniaꞌanəꞌ. Nadaꞌ chnabiaꞌ doxenḻə canꞌ bagwnabiaꞌ deꞌe Rei Dabinꞌ Izraelənꞌ. Napaꞌ yeḻəꞌ chnabiaꞌ par əṉiaꞌ nonꞌ yedəso len nadaꞌ naꞌ nonꞌ cui yedəso len nadaꞌ. Naꞌ notono gaquə gon par nic̱h gwšaꞌa canꞌ əṉiaꞌanəꞌ.
\v 8 Bzoɉeꞌ gožeꞌ de que nadaꞌ əchniaꞌ dižəꞌ quinga: “Ṉeze nḻeꞌidaꞌ ca güenṉəꞌ chonḻe. Naꞌ ḻaꞌaṉəꞌəczə cui naquə zanḻe, zotezə zole chonḻe canꞌ əṉiaꞌanəꞌ naꞌ bito chbeɉyic̱hɉle deꞌen chonḻilažəꞌəle nadaꞌ. Deꞌe naꞌanəꞌ babenaꞌ par nic̱h nitəꞌ beṉəꞌ zan beṉəꞌ chseꞌeneneꞌ yosoꞌozenagueꞌ c̱he xtižəꞌ Diozənꞌ deꞌe güeꞌelenḻe ḻegaꞌaqueꞌ naꞌ notono no gaquə gwžon par cui c̱hix̱ɉueꞌilen ḻegaꞌaqueꞌ.
\v 9 Naꞌ ca naquə beṉəꞌ caꞌ gwsaꞌalɉə lao dia c̱he deꞌe Izraelənꞌ beṉəꞌ caꞌ zɉəncodəꞌ lɉuežɉe chsoꞌoneꞌ txen len Satanasənꞌ, lao Diozənꞌ bito zɉənaqueꞌ beṉəꞌ Izrael. Chsoꞌonḻažeꞌe chəsəꞌəneꞌ chebei Diozənꞌ ḻegaꞌaqueꞌ. Naꞌ gonaꞌ par nic̱h yesəꞌəzo xibgaꞌaqueꞌ laolenꞌ yesəꞌəneꞌ de que nacle beṉəꞌ zaqueꞌe len nadaꞌ naꞌ saꞌacbeꞌineꞌ de que chacdaꞌ c̱helenꞌ.
\v 10 Naꞌ ca naquə zotezə zole chzenagle c̱he xtižaꞌanəꞌ deꞌen choꞌen dižəꞌ canꞌ bguoꞌo bc̱heɉlažaꞌa len deꞌe mal deꞌen goquə c̱hiaꞌ, nadaꞌ gonaꞌ par nic̱h yechoɉle güen catəꞌ əžin or saquəꞌəziꞌichgua yoguəꞌ beṉac̱hənꞌ. Canaꞌ ḻaꞌalao nac chon to to beṉac̱hənꞌ, šə chzenagueꞌ c̱hiaꞌ o šə chzenagueꞌ c̱he deꞌe malənꞌ.
\v 11 Bazon əžin ža yidaꞌ deꞌe yoblə. Ḻesotezə ḻeso ḻegon deꞌe güenṉəꞌ par nic̱h caꞌ bito bi gwžon gonaꞌ ca əbanḻe len nadaꞌ zeɉḻicaṉe.
\v 12 Notəꞌətezle chzoile cui chzenagle c̱he deꞌe malənꞌ, gonaꞌ par nic̱h sole txen len Diozənꞌ zeɉḻicaṉe, Dioz benꞌ choꞌelaoguaꞌa. Naꞌ zeɉḻicaṉe yegaꞌaṉlenḻeneꞌ. Naꞌ gonaꞌ par nic̱h gacle xiꞌiṉ Diozənꞌ zeɉḻicaṉe, naꞌ sole syoda Jerosalen deꞌe naquə deꞌe cobə, syoda c̱he Diozənꞌ deꞌen chiꞌ yobanꞌ deꞌen gwletɉeꞌ lao yežlyonꞌ. Naꞌ gwzoɉaꞌ lao xga to tole laꞌanəꞌ deꞌen naquə deꞌe cobə.
\v 13 Leꞌe žia nagle deꞌe chene ḻegwzenag c̱he deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ.”
\s1 Deꞌen gožeꞌ beṉəꞌ Laodisea caꞌ
\p
\v 14 Bzoɉ deꞌe nga par benꞌ naquə lao neꞌi beṉəꞌ caꞌ chesəꞌədopə chesəꞌəžag chsoꞌelaogüeꞌe nadaꞌ Laodiseanꞌ. Bzoɉeꞌ gožeꞌ de que nadaꞌ nacaꞌ benꞌ chon par nic̱h chac canꞌ cheꞌendaꞌanəꞌ. Choꞌa dižəꞌ deꞌen bagwna Diozənꞌ nadaꞌ naꞌ naquən deꞌe ḻi. Nadaꞌ benaꞌ yobanꞌ naꞌ yežlyonꞌ, beṉac̱h, angl, bia chsaꞌaš naꞌ yeziquəꞌəchlə deꞌe zɉəde.
\v 15 Bzoɉeꞌ gožeꞌ de que nadaꞌ əchniaꞌ dižəꞌ quinga: “Ṉeze nḻeꞌidaꞌ canꞌ chonḻenꞌ, bito chgueꞌile nadaꞌ pero ni que chaquele c̱hiaꞌ do yic̱hɉ do lažəꞌəle. Yebeichlədaꞌ žaləꞌ chgueꞌile nadaꞌ o žaləꞌ chaquele c̱hiaꞌ do yic̱hɉ do lažəꞌəle.
\v 16 Naꞌ laogüe deꞌen cuitec chonḻe cas c̱hiaꞌ naꞌ cui chaquele c̱hiaꞌ do yic̱hɉ do lažəꞌəle, ḻaꞌaṉəꞌəczə bito chgueꞌile nadaꞌ, biaꞌaczə žin ža cueɉeyic̱hɉaꞌ leꞌe cuich gonədaꞌ leꞌe ca xiꞌiṉaꞌ.
\v 17 Leꞌe nale zole mbalaz, naꞌ de que chonḻe deꞌe güen juisy, naꞌ de que bito bi bi chac faḻt c̱hele par nic̱h yebei Diozənꞌ leꞌe. Bito chacbeꞌile de que deꞌe malchguanꞌ chonḻe naꞌ deꞌe malchguanꞌ gaquə c̱hele. Bito chebei Diozənꞌ leꞌe. Nc̱hoḻ yic̱hɉlaꞌaždaꞌolenꞌ naꞌ nacbiaꞌaxeɉə chonḻe deꞌe malənꞌ.
\v 18 Deꞌe naꞌanəꞌ choṉaꞌ leꞌe consejw ḻegonḻilažəꞌ nadaꞌ par nic̱h gonaꞌ ca gacle beṉəꞌ güen canꞌ nacaꞌanəꞌ. Ḻeꞌe yediṉɉe xtoḻəꞌəlenꞌ par nic̱h gaquə laꞌaždaꞌolenꞌ xiꞌilažəꞌ naꞌ cuich gonḻe deꞌe malənꞌ lao Diozənꞌ. Naꞌ ḻeꞌe güeꞌ latɉə yocobə Diozənꞌ xbab c̱helenꞌ par nic̱h šoꞌo beꞌeniꞌ c̱heꞌenəꞌ ḻoꞌo yic̱hɉlaꞌaždaꞌolenꞌ.
\v 19 Notəꞌətezə beṉəꞌ chacdaꞌ c̱hei choꞌaneꞌ consejw naꞌ chonaꞌaneꞌ castigw catəꞌ choneꞌ deꞌe mal. Deꞌe naꞌanəꞌ ḻeꞌe cuec yic̱hɉle par yediṉɉele xtoḻəꞌəle caꞌ.
\v 20 Gwxaquəꞌəlebədaꞌ ca to beṉəꞌ zecha choꞌa puert c̱helenꞌ chṉeꞌ naꞌ chsižeꞌ ḻeꞌe puertənꞌ. Notəꞌətezle šə gwzenagle c̱hiaꞌ naꞌ šə əsalɉwle par šoꞌa, yedəsoaꞌ len leꞌe naꞌ gonaꞌ par nic̱h sole mbalaz txen len nadaꞌ.
\v 21 Naꞌ notəꞌətezle šə chzoile cui chzenagle c̱he deꞌe malənꞌ, gonaꞌ par nic̱h cueꞌelenḻe nadaꞌ ganꞌ chiꞌa chnabiꞌa, ca nadaꞌ chiꞌilenaꞌ X̱aꞌanəꞌ chnabiꞌatoꞌ dezd catəꞌən beyož bzoaꞌ gwxiyeꞌenəꞌ xniꞌanəꞌ.
\v 22 Leꞌe žia nagle deꞌe chene, ḻegwzenag deꞌen bagwna Spirit c̱he Diozənꞌ par leꞌe chdopə chžagle choꞌelaꞌole nadaꞌ.”
\c 4
\s1 Bleꞌidaogüeꞌeneꞌ Diozənꞌ chiꞌe chnabiꞌe yobanꞌ
\p
\v 1 Beyož bzoɉaꞌ deꞌe caꞌ gwneꞌ nadaꞌ, bgüiaꞌ naꞌ bleꞌidaꞌ nyalɉo to puert yobanꞌ naꞌ bendaꞌ choꞌelen benꞌ nadaꞌ dižəꞌ, benꞌ bendaꞌ deꞌe nechənꞌ benꞌ naquə xṉe c̱heꞌenəꞌ zižɉochgua ca zižɉonꞌ chbež trompet. Ḻeczeꞌen gwṉechczeꞌ nadaꞌ deꞌe yoblə, gwneꞌ: —Gwyep ganꞌ zoaꞌ nga par nic̱h gwzeɉniꞌidaꞌ leꞌ deꞌe caꞌ zeꞌe gaquə.
\p
\v 2 Nach ca orənꞌ ben Spirit c̱he Diozənꞌ par nic̱h bleꞌidaogüeꞌedaꞌ Diozənꞌ ganꞌ chiꞌe yobanꞌ chnabiꞌe.
\v 3 Naꞌ bleꞌidaꞌ benꞌ chiꞌ chnabiaꞌ naqueꞌ ca to deꞌe chactit, ca yeɉ fin deꞌen nziꞌ jaspe naꞌ cornalina. Naꞌ to deꞌen naquə ca to yitəꞌ gwyec̱hɉən ganꞌ chiꞌenəꞌ de color gaꞌ ca yeɉ fin deꞌen neꞌ esmeralda.
\v 4 Naꞌ cuit cueꞌeɉ Diozənꞌ ganꞌ chiꞌe zɉəchiꞌ tapechoa beṉəꞌ golə beṉəꞌ blao beṉəꞌ chəsəꞌənabiaꞌ txen len ḻeꞌ. Zɉənyazeꞌ lachəꞌ šyiš naꞌ zɉəzo coron de or yic̱hɉ to togaꞌaqueꞌ.
\v 5 Naꞌ ganꞌ chiꞌ Diozənꞌ chep yes naꞌ chac sšag, naꞌ chašɉw chtin. Naꞌ laogüeꞌenəꞌ nitəꞌ gažə yiꞌ deꞌe chaḻəꞌəṉiṉ. Naꞌ yiꞌ caꞌ gažə zɉənaquən Spirit c̱he Diozənꞌ.
\v 6 Naꞌ laogüeꞌ ganꞌ chiꞌenəꞌ nžilɉw to deꞌe chleꞌicho ca to nisdaoꞌ de bidr o de beꞌeyəꞌ.
\p Naꞌ nitəꞌ tap bia ganꞌ chiꞌ Diozənꞌ, tgüɉəb nitəꞌ cuitenꞌ c̱hopə laꞌate, yetob cožeꞌenəꞌ naꞌ yetob laogüeꞌenəꞌ, naꞌ žia deꞌe zan ɉəlaogaꞌaquəb delant naꞌ traslə.
\v 7 Bia nechənꞌ naquəb ca to leon, naꞌ bia əgwchopenꞌ ca to goꞌoṉ, naꞌ choꞌalao bia əgwyoṉenꞌ naquən ca choꞌalao beṉac̱h, naꞌ bia əgwdapenꞌ naquəb ca to bsia bianꞌ chzo.
\v 8 Naꞌ to to bia caꞌ tap žia x̱op güeɉə x̱iləꞌəgaꞌaquəb, naꞌ doxen cuerp c̱hegaꞌaquəbənꞌ žia deꞌe zan ɉelaogaꞌaquəb ḻoꞌolə naꞌ fuerlə. Naꞌ do ža do yel bito chəsəꞌəbezəb, yapəyoe chəsəꞌənab:
\q1 Ḻechguaḻe beṉəꞌ laꞌaždaoꞌ xiꞌilažəꞌ juisy naquə X̱ancho Diozənꞌ benꞌ napə ḻeꞌezelaogüe yeḻəꞌ guac xen.
\q1 Bazoczeꞌ catəꞌən bx̱iꞌe yežlyonꞌ, naꞌ caꞌaczənꞌ soeꞌ catəꞌən yeyož yedon.
\p
\v 9 Naꞌ yoguəꞌ las catəꞌ bia caꞌ chsoꞌeb dižəꞌ chsoꞌelaꞌob Diozənꞌ benꞌ chiꞌ chnabiaꞌ benꞌ zoczə zeɉḻicaṉe, yoguəꞌ laste catəꞌən chsoꞌeb yeḻəꞌ balaꞌaṉ naꞌ yeḻəꞌ chox̱cwlen c̱heꞌ,
\v 10 beṉəꞌ golə beṉəꞌ blao caꞌ tapechoa chəsəꞌəzo xibgaꞌaqueꞌen lao Diozənꞌ benꞌ zo zeɉḻicaṉe chsoꞌelaogüeꞌeneꞌ naꞌ chosoꞌoniteꞌe coron c̱hegaꞌaqueꞌen xniꞌenəꞌ, chəsəꞌəneꞌ:
\q1
\v 11 X̱antoꞌ Dioz, lenꞌ benoꞌ beṉac̱h, angl, bia caꞌ žaꞌ, naꞌ biquəꞌəchlə deꞌen zɉəde,
\q1 c̱hedəꞌ canꞌ gwyazlažoꞌo naꞌ c̱hedəꞌ goꞌondoꞌ nitəꞌ beṉac̱h, angl, bia caꞌ žaꞌ naꞌ biquəꞌəchlə deꞌen zɉəde.
\q1 Deꞌe naꞌanəꞌ zaquəꞌəczoꞌ par chnabiꞌo, par siꞌo yeḻəꞌ balaꞌaṉ, naꞌ par əyeɉlaogoꞌo.
\c 5
\s1 Benꞌ gwxaquəꞌəlebe ca xiləꞌ daoꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ
\p
\v 1 Naꞌ bleꞌidaꞌ Dioz benꞌ chiꞌ chnabiaꞌ nox̱eꞌe to rollo deꞌen nyoɉ c̱hopə ḻaꞌate naꞌ nyeyɉon len gažə sey.
\v 2 Naꞌ bleꞌidaꞌ to angl gual naꞌ gwneꞌ zižɉo: —¿Nonꞌ zaquəꞌ par əgwzoxɉeꞌ sey caꞌ par nic̱h šaš rollonꞌ?
\p
\v 3 Pero ni que no nitəꞌəzə yobanꞌ, ni lao yežlyonꞌ ni ganꞌ žaꞌ beṉəꞌ guat caꞌ no gaquə gwzašeꞌ rollonꞌ naꞌ ni par əggüiazeꞌen.
\v 4 Naꞌ ḻechguaḻe gwchežaꞌ deꞌen cui no de beṉəꞌ zaquəꞌ par əgwzašeꞌ rollonꞌ naꞌ par gwlabeꞌen naꞌ ni par əggüiazeꞌen.
\v 5 Nach to beṉəꞌ golə beṉəꞌ blao entr beṉəꞌ caꞌ zɉəchiꞌ cuit cueꞌeɉ Diozənꞌ gožeꞌ nadaꞌ: —Bito cuežoꞌ. Jesocristənꞌ benꞌ gwxaquəꞌəlebe ca to leon laogüe deꞌen babzoeꞌ gwxiyeꞌenəꞌ xniꞌenəꞌ, ḻeꞌenəꞌ zaqueꞌe par əgwzašeꞌ rollonꞌ naꞌ par əgwzoxɉeꞌ sey caꞌ gažə. Ḻenꞌ golɉeꞌ lao dia c̱he deꞌe Jodanꞌ canꞌ golɉə deꞌe x̱axtaꞌogüeꞌe Rei Dabinꞌ.
\p
\v 6 Nach bleꞌidaꞌaneꞌ zecheꞌ entr Diozənꞌ ganꞌ chiꞌe chnabiꞌe naꞌ bia caꞌ tap. Naꞌ beṉəꞌ golə beṉəꞌ blao caꞌ zɉənyec̱hɉ zɉəmbiꞌe ḻegaꞌaqueꞌ. Bleꞌidaꞌaneꞌ ca to xiləꞌ daoꞌ bianꞌ bagwsoꞌoteꞌ, to xiləꞌ bia žia gažə loze naꞌ gažə ɉelaob. Naꞌ ɉelaob caꞌ gažə zɉənaquən Spirit c̱he Diozənꞌ deꞌen chon xšineꞌenəꞌ doxenḻə lao yežlyonꞌ.
\v 7 Naꞌ Jesocristənꞌ benꞌ bleꞌidaꞌ ca to xiləꞌ bianꞌ bagwsoꞌoteꞌ, ɉəx̱iꞌe rollonꞌ deꞌen nox̱əꞌ Diozənꞌ len naꞌ ḻicheꞌ ganꞌ chiꞌe chnabiꞌe.
\v 8 Naꞌ catəꞌ ɉəx̱iꞌe rollonꞌ bia caꞌ tap besəꞌəzo xibgaꞌaquəb laogüeꞌenəꞌ naꞌ beṉəꞌ golə beṉəꞌ blao caꞌ tapechoa ḻeczə besəꞌəzo xibgaꞌaqueꞌenəꞌ laogüeꞌenəꞌ. Naꞌ beṉəꞌ golə beṉəꞌ blao caꞌ zɉənox̱eꞌe tgüeɉə arpa naꞌ tgüeɉə tas de or ganꞌ chey yalənꞌ, naꞌ yalənꞌ zeɉen orasyon caꞌ deꞌen chsoꞌon beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 9 Naꞌ gwsoꞌoḻeꞌ to imno cobə deꞌen nan:
\q1 Zacoꞌo par ɉəx̱iꞌo rollonꞌ naꞌ par bzoxɉoꞌ sey c̱hei caꞌ,
\q1 c̱hedəꞌ bnežɉw cuinoꞌ par gwsoꞌoteꞌ leꞌ
\q1 naꞌ blalɉ xc̱henoꞌonəꞌ gwdixɉoꞌ xtoḻəꞌətoꞌonəꞌ par nic̱h naquətoꞌ xiꞌiṉ Dioz.
\q1 Netoꞌ naquətoꞌ to to ṉasyon, to to yež, naꞌ to to dia naꞌ choꞌetoꞌ gwde gwdelə dižəꞌ.
\q1
\v 10 Naꞌ gwleɉoꞌ netoꞌ par chnabiꞌatoꞌ txen len leꞌ ca no rei
\q1 naꞌ zotezə zocho choꞌelaꞌocho X̱acho Diozənꞌ canꞌ gwnitəꞌətezə gwnitəꞌ bx̱oz c̱he beṉəꞌ Izrael caꞌ gwseꞌeɉṉiꞌalažeꞌe Diozənꞌ.
\q1 Naꞌ gwžin ža ṉabiꞌacho yežlyonꞌ.
\p
\v 11 Nach bgüiaꞌ naꞌ bleꞌidaꞌ angl zan juisy zɉənyec̱hɉeꞌ ganꞌ chiꞌ Diozənꞌ chnabiꞌe naꞌ ganꞌ žaꞌ bia caꞌ tap naꞌ beṉəꞌ golə beṉəꞌ blao caꞌ. Naꞌ bendaꞌ
\v 12 chsoꞌe dižəꞌən zižɉo chəsəꞌəneꞌ:
\q1 Jesocristənꞌ gwxaquəꞌəlebeneꞌ ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\q1 Naꞌ zaquəꞌəczeꞌ par chnabiꞌe doxenḻə,
\q1 naꞌ par naquə c̱heꞌ yoguəꞌəte deꞌen zɉəde,
\q1 naꞌ par napeꞌ yoguəꞌ cḻaste yeḻəꞌ sinꞌ,
\q1 naꞌ par napeꞌ yeḻəꞌ guac xen, naꞌ par nziꞌe yeḻəꞌ balaꞌaṉ,
\q1 naꞌ par nseꞌe yeḻə chey cheꞌeniꞌ c̱he Diozənꞌ naꞌ par choꞌelaꞌochoneꞌ.
\p
\v 13 Nach bendaꞌ yoguəꞌ beṉac̱h caꞌ žaꞌ yobanꞌ naꞌ yežlyonꞌ naꞌ len beṉəꞌ žaꞌ latɉə c̱he beṉəꞌ guat caꞌ chsoꞌe dižəꞌ chəsəꞌəneꞌ:
\q1 Zeɉḻicaṉe güeꞌelaꞌocho Diozənꞌ benꞌ chiꞌ chnabiaꞌ
\q1 naꞌ güeꞌelaꞌotecho Xiꞌiṉeꞌ Jesocristənꞌ
\q1 benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\q1 Zeɉḻicaṉe güeꞌegaꞌacchoneꞌ yeḻəꞌ balaꞌaṉ
\q1 naꞌ zeɉḻicaṉe güeꞌecho dižəꞌ canꞌ zɉənseꞌe yeləꞌ chey cheꞌeniꞌ
\q1 naꞌ canꞌ zɉənapeꞌ ḻeꞌezelaogüe yeḻəꞌ guac xen.
\m Naꞌ ḻeczə canꞌ gosəꞌəna bia caꞌ chaš yežlyonꞌ, naꞌ bia caꞌ chaš ḻeꞌe yobanꞌ naꞌ ḻoꞌo nis, naꞌ len bitəꞌətezəchlə deꞌe zɉəde.
\p
\v 14 Nach bia caꞌ tap gosəꞌənab: —Caꞌašgaczə gaquə.
\p Naꞌ beṉəꞌ golə beṉəꞌ blao caꞌ tapechoa besəꞌəzo xibgaꞌaqueꞌ naꞌ gwsoꞌelaogüeꞌe Diozənꞌ benꞌ zoczə zeɉḻicaṉe.
\c 6
\s1 Sey caꞌ gažə
\p
\v 1 Naꞌ ca naquə sey caꞌ gažə bleꞌidaꞌ catəꞌ Jesocristənꞌ benꞌ bleꞌidaꞌ ca to xiləꞌ daoꞌ bianꞌ bagwsoꞌoteꞌ bzoxɉeꞌ ton. Naꞌ bendaꞌ entr bia caꞌ tap tob gwṉeb zižɉo ca zižɉonꞌ chašɉw chtin, gwnab: —Da bgüia deꞌe nga.
\p
\v 2 Naꞌ catəꞌən bgüiaꞌ, bleꞌidaꞌ to cabey bia šyiš naꞌ benꞌ žia cožəꞌ cabeyənꞌ nox̱eꞌe to xis gox̱itəꞌ. Naꞌ zo to coron yic̱hɉeꞌenəꞌ naꞌ bchoɉeꞌ chzoeꞌ zan beṉəꞌ xniꞌenəꞌ. Naꞌ zdeꞌ par yeyož əgwzoeꞌ beṉəꞌ xniꞌenəꞌ.
\p
\v 3 Naꞌ catəꞌ Jesocristənꞌ bzoxɉeꞌ sey əgwchopenꞌ, bendaꞌ gwṉe bia əgwchopenꞌ gwnab: —Da bgüia deꞌe nga.
\p
\v 4 Nach bchoɉ to cabey cua yinꞌ, naꞌ benꞌ žia cožəꞌəbənꞌ napeꞌ yeḻəꞌ chnabiaꞌ par nic̱h goneꞌ ca cuich ṉitəꞌ beṉəꞌ caꞌ žaꞌ yežlyonꞌ binḻo len lɉuežɉgaꞌaqueꞌ, naꞌ soꞌot lɉuežɉgaꞌaqueꞌ. Naꞌ benꞌ žia cabeyənꞌ nox̱eꞌe to spad xen.
\p
\v 5 Naꞌ catəꞌ Jesocristənꞌ bzoxɉeꞌ sey əgwyoṉenꞌ bendaꞌ gwṉe bia əgwyoṉenꞌ gwnab: —Da bgüia deꞌe nga.
\p Naꞌ catəꞌ bgüiaꞌ bleꞌidaꞌ to cabey gasɉ naꞌ benꞌ žia cožəꞌəbənꞌ nox̱eꞌe to xigonz.
\v 6 Naꞌ bendaꞌ to deꞌen gocdaꞌ gwna to beṉəꞌ ganꞌ žaꞌ bia caꞌ tap gwneꞌ: —Ben par nic̱h tkilzə trigonꞌ o tyagzə sebadənꞌ guac yesəꞌəziꞌe len laxɉwgaꞌaqueꞌ deꞌen chsoꞌoneꞌ gan tža tža; pero bito gonoꞌ par nic̱h cui əžel set naꞌ binonꞌ.
\p
\v 7 Naꞌ catəꞌ Jesocristənꞌ bzoxɉeꞌ sey əgwdape, bendaꞌ gwṉe bia əgwdapenꞌ, gwnab: —Da naꞌ bgüia deꞌe nga.
\p
\v 8 Naꞌ catəꞌ bgüiaꞌ bleꞌidaꞌ to cabey bia naquə ca color gašəꞌ naꞌ benꞌ žia cožəꞌ cabeyənꞌ leꞌ Yeḻəꞌ Got, naꞌ yeto beṉəꞌ naogüeꞌeneꞌ leꞌ Gabiḻ. Naꞌ goquən lao naꞌagaꞌaqueꞌ gwsoꞌoneꞌ par nic̱h goc gwdiḻə, gocchgua yižgüeꞌ, goc faḻt deꞌe əseꞌeɉ əsaꞌo beṉac̱hənꞌ, naꞌ gwsoꞌot bia znia caꞌ beṉəꞌ zan. Naꞌ lao goc caꞌ, beṉəꞌ zan žaꞌ yežlyonꞌ gwsaꞌateꞌ.
\p
\v 9 Naꞌ catəꞌ bzoxɉeꞌ sey güeyeꞌe bleꞌidaꞌ mes ganꞌ chsoꞌelaoꞌ beṉəꞌ caꞌ žaꞌ yobanꞌ Diozənꞌ. Naꞌ xniꞌa mesənꞌ bleꞌidaꞌ beṉəꞌ guat caꞌ beṉəꞌ caꞌ gwsoꞌot beṉəꞌ mal caꞌ ḻegaꞌaqueꞌ por ni c̱he deꞌen bosoꞌozenagueꞌ xtižəꞌ Diozənꞌ naꞌ gwsoꞌe dižəꞌ de que chsoꞌonḻilažeꞌe Jesocristənꞌ.
\v 10 Naꞌ beṉəꞌ guat caꞌ gosəꞌəṉeꞌ zižɉo gosəꞌəneꞌ: —X̱antoꞌ, leꞌ nacoꞌ beṉəꞌ laꞌaždaoꞌ xiꞌilažəꞌ juisy, naꞌ syempr chonoꞌ canꞌ naꞌonəꞌ. ¿Batəꞌəquənꞌ gwnežɉoꞌ castigw c̱he beṉəꞌ mal caꞌ žaꞌ yežlyonꞌ ca deꞌen gwsoꞌoteꞌ netoꞌ.
\p
\v 11 Nach Diozənꞌ bnežɉueꞌ to to beṉəꞌ guat caꞌ xalaꞌangaꞌaqueꞌ deꞌe šyiš deꞌe gwsaꞌazeꞌ, naꞌ gožeꞌ ḻegaꞌaqueꞌ soꞌoneꞌ dezcanz yeto tyemp daoꞌ xte catəꞌəch babeyož gwsoꞌot beṉəꞌ mal caꞌ beṉəꞌ lɉuežɉgaꞌaqueꞌ caꞌ chsoꞌelaoꞌ Cristənꞌ con caꞌateꞌenəꞌ nžia Diozənꞌ biaꞌ saꞌat.
\p
\v 12 Naꞌ catəꞌ Jesocristənꞌ bzoxɉeꞌ sey deꞌe gwxope, gocbeꞌidaꞌ ḻechguaḻe gwxoꞌ naꞌ bgüižənꞌ beyaquən ca to lachəꞌ gasɉ, naꞌ bioꞌonəꞌ beyaquən ca chen.
\v 13 Nach belɉw caꞌ besəꞌəyiṉɉən besəꞌəžinten lao yežlyonꞌ canꞌ chac len frot deꞌe žia lao yag catəꞌ chec̱hɉchgua beꞌ.
\v 14 Naꞌ ḻeꞌe yobanꞌ benitteczən ca to rollo deꞌen chedobə naꞌ yoguəꞌ yaꞌa caꞌ naꞌ islas caꞌ bosoꞌošaꞌ xišneꞌi.
\v 15 Nach rei caꞌ beṉəꞌ caꞌ chəsəꞌənabiaꞌ lao yežlyonꞌ, len beṉəꞌ blao caꞌ naꞌ beṉəꞌ gwniꞌa caꞌ, len capitan caꞌ, len notəꞌətezəchlə beṉəꞌ napə yeḻəꞌ chnabiaꞌ, naꞌ len beṉəꞌ zɉənaquə esclabos txen len beṉəꞌ caꞌ cui zɉənaquə, yogueꞌe bosoꞌocuašəꞌ cuingaꞌaqueꞌ do ḻoꞌo bloɉ naꞌ entr yeɉ xen caꞌ deꞌen žia lao yaꞌa caꞌ.
\v 16 Naꞌ gosəꞌəneꞌ: —Žaləꞌəšga əcaꞌa bdiṉɉ naꞌ yeɉ quinga naꞌ yaꞌa quinga yesəꞌəyenən chioꞌo nic̱h cui leꞌi Diozənꞌ chioꞌo, Dioz benꞌ chiꞌ chnabiaꞌ, naꞌ nic̱h cui goṉ Jesocristənꞌ castigw c̱hecho, Jesocrist benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\p
\v 17 Gosəꞌəneꞌ caꞌ c̱hedəꞌ gwsaꞌacbeꞌineꞌ babžin ža gaquə juisyənꞌ naꞌ ḻechguaḻe yesəꞌəžaglaogüeꞌ len castigonꞌ deꞌen əgwnežɉo Diozənꞌ ḻegaꞌaqueꞌ.
\c 7
\s1 Beṉəꞌ Izrael caꞌ beṉəꞌ caꞌ zɉənyišəꞌ sey c̱he Diozənꞌ
\p
\v 1 Gwde naꞌ bleꞌidaꞌ tap angl gosəꞌəzecheꞌ tap part lao yežlyonꞌ bosoꞌozagueꞌe beꞌenəꞌ par nic̱h cui gwyec̱hɉən lao yežlyonꞌ, lao nisdaꞌonəꞌ o ganꞌ ze yag caꞌ.
\v 2 Nach bleꞌidaꞌ yeto angl zeꞌe galənꞌ chlaꞌ bgüižənꞌ nox̱eꞌe to deꞌe gwc̱hineꞌ par gwc̱hišeꞌe sey c̱he Diozənꞌ benꞌ zo zeɉḻicaṉe lao xga beṉəꞌ caꞌ chsoꞌelaoꞌ ḻeꞌ. Nach anglənꞌ gwṉeꞌ zižɉo belgüižeꞌ angl caꞌ tap, beṉəꞌ caꞌ naquən lao naꞌagaꞌaqueꞌ soꞌoneꞌ par nic̱h gaquə deꞌe mal lao yežlyonꞌ naꞌ lao nisdaꞌonəꞌ.
\v 3 Gožeꞌ ḻegaꞌaqueꞌ: ―Bito gonḻe par nic̱h gaquə deꞌe mal lao yežlyonꞌ, lao nisdaꞌonəꞌ o ganꞌ ze yag caꞌ xte catəꞌ babeyož bc̱hišəꞌətoꞌ sey c̱he Diozənꞌ lao xga beṉəꞌ caꞌ chsoꞌelaoꞌ ḻeꞌ.
\p
\v 4 Nach gwdechlə bendaꞌ gwna anglənꞌ de que to gueyoa tapeyon mil beṉəꞌ bc̱hišeꞌe seyənꞌ, yogueꞌe zaꞌaqueꞌ lao dia caꞌ šižiṉ c̱he xiꞌiṉ deꞌe Izraelənꞌ.
\v 5 Naꞌ šižiṉa mileꞌ lao dia c̱he deꞌe Jodanꞌ, šižiṉa mileꞌ lao dia c̱he deꞌe Robenṉəꞌ, šižiṉa mileꞌ lao dia c̱he deꞌe Gadənꞌ,
\v 6 naꞌ šižiṉa mileꞌ lao dia c̱he deꞌe Aserənꞌ, šižiṉa mileꞌ lao dia c̱he deꞌe Neftalinꞌ, šižiṉa mileꞌ lao dia c̱he deꞌe Manasesənꞌ,
\v 7 naꞌ šižiṉa mileꞌ lao dia c̱he deꞌe Simeonṉəꞌ, šižiṉa mileꞌ lao dia c̱he deꞌe Lebinꞌ, šižiṉa mileꞌ lao dia c̱he deꞌe Isacarənꞌ,
\v 8 naꞌ šižiṉa mileꞌ lao dia c̱he deꞌe Sabolonṉəꞌ, šižiṉa mileꞌ lao dia c̱he deꞌe Jwsenꞌ naꞌ šižiṉa mileꞌ lao dia c̱he deꞌe Benjaminṉəꞌ.
\s1 Beṉəꞌ zan zɉənyazeꞌ lachəꞌ šyiš
\p
\v 9 Nach gwde naꞌ bgüiaꞌ naꞌ bleꞌidaꞌ beṉəꞌ zan juisy zɉəzecheꞌ lao Diozənꞌ ganꞌ chiꞌe chnabiꞌenəꞌ naꞌ lao Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ. Tant beṉəꞌ zan zɉəzecha xte notono no goquə gwlab ḻegaꞌaqueꞌ, beṉəꞌ naquə to to ṉasyon, to to yež, to to dia naꞌ chsoꞌe gwde gwdelə dižəꞌ. Naꞌ yogueꞌe zɉənyazeꞌ lachəꞌ šyiš naꞌ zɉənox̱eꞌe zin.
\v 10 Naꞌ tant besyəꞌəbeineꞌ yogueꞌe gosəꞌəṉeꞌ zižɉo, gosəꞌəneꞌ:
\q1 Diozənꞌ benꞌ chiꞌ chnabiaꞌ, naꞌ Jesocristənꞌ
\q1 benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ,
\q1 bagwsoꞌoneꞌ par nic̱h cui yeyeɉcho lao yiꞌ gabiḻənꞌ.
\m
\v 11 Naꞌ yoguəꞌəḻoḻ angl caꞌ zɉənyec̱hɉ zɉəmbiꞌe beṉəꞌ golə beṉəꞌ blao caꞌ naꞌ bia caꞌ tap bianꞌ nitəꞌ ganꞌ chiꞌ Diozənꞌ chnabiꞌe, nach angl caꞌ besəꞌəzo xibgaꞌaqueꞌ lao Diozənꞌ naꞌ bchequəꞌ yic̱hɉgaꞌaqueꞌenəꞌ lao yonꞌ gwsoꞌelaꞌogüeꞌeneꞌ,
\v 12 gosəꞌəneꞌ:
\q1 Gaquəšgan quinga. Zeɉḻicaṉe güeꞌelaꞌocho Dioz c̱hechonꞌ.
\q1 Zeɉḻicaṉe güeꞌecho dižəꞌ canꞌ nseꞌe yeḻəꞌ chey cheꞌeniꞌ, canꞌ chnabiꞌe, canꞌ napeꞌ yeḻəꞌ guac xen,
\q1 naꞌ canꞌ nseꞌe yoguəꞌ cḻaste yeḻəꞌ sinꞌ.
\q1 Zeɉḻicaṉe güeꞌecho yeḻəꞌ chox̱cwlen c̱heꞌ naꞌ güeꞌechoneꞌ yeḻəꞌ balaꞌaṉ.
\q1 Caꞌašgaczənꞌ gaquə.
\p
\v 13 Nach to beṉəꞌ golə beṉəꞌ blao benꞌ naqueꞌ txen len beṉəꞌ tapechoa caꞌ gožeꞌ nadaꞌ: ―¿Eṉezdoꞌ no beṉəꞌ quinga zɉənyaz lachəꞌ šyišənꞌ? ¿Eṉezdoꞌ ganꞌ zaꞌaqueꞌ?
\p
\v 14 Naꞌ gožaꞌaneꞌ: —Leꞌ ṉezdoꞌ beṉəꞌ gol daoꞌ.
\p Nach gwneꞌ nadaꞌ: —Jesocristənꞌ gwxaquəꞌəlebeneꞌ ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ, c̱hedəꞌ blalɉ xc̱heneꞌenəꞌ par gwdixɉueꞌ xtoḻəꞌ beṉac̱hənꞌ. Naꞌ beṉəꞌ quinganꞌ gosəꞌəṉabeneꞌ ḻeꞌ bnitlaogüeꞌ xtoḻəꞌəgaꞌaqueꞌenəꞌ. Naꞌ bitoch bi deꞌe mal daꞌ əchen yic̱hɉlaꞌaždaꞌogaꞌaqueꞌenəꞌ. Ḻegaꞌaqueꞌ besəꞌəžaglaochgüeꞌ lao yežlyonꞌ deꞌen chsoꞌonḻilažeꞌe Jesocristənꞌ.
\v 15 Naꞌ deꞌe naꞌanəꞌ niteꞌe lao Diozənꞌ ganꞌ chiꞌe chnabiꞌe chsoꞌe yeḻəꞌ chox̱cwlen c̱heꞌ do ža do yel ganꞌ chsoꞌelaogüeꞌeneꞌ yobanꞌ. Naꞌ Dioz benꞌ chiꞌ chnabiaꞌ zoeꞌ len ḻegaꞌaqueꞌ par chcuasəꞌ chcueꞌeɉeꞌ ḻegaꞌaqueꞌ len deꞌe malənꞌ.
\v 16 Bitoch yesəꞌəbil yesəꞌədongaꞌaqueꞌ. Bgüižənꞌ bitoch gonən mal len ḻegaꞌaqueꞌ naꞌ bitoch yesəꞌəžaglaogüeꞌ len deꞌe zeyəꞌənəꞌ,
\v 17 c̱hedəꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ chapə chyeꞌ ḻegaꞌaqueꞌ. Zoeꞌ ganꞌ chiꞌ Diozənꞌ chnabiꞌe naꞌ choneꞌ par nitəꞌəczeꞌ mbalaz len Diozənꞌ zeɉḻicaṉe. Naꞌ Diozənꞌ goneꞌ par nic̱h cuich yesəꞌəbežeꞌ naꞌ cuich ṉiteꞌe trist.
\c 8
\s1 Sey gažənꞌ
\p
\v 1 Nach Jesocristənꞌ benꞌ bleꞌidaꞌ ca to xiləꞌ daoꞌ bianꞌ bagwsoꞌoteꞌ bzoxɉeꞌ sey gažənꞌ, naꞌ catəꞌ beyož bzoxɉeꞌenṉəꞌ ḻechguaḻe žizə goquə yobanꞌ do gašɉ or.
\v 2 Nach bleꞌidaꞌ gažə angl caꞌ beṉəꞌ caꞌ zɉəzecha ganꞌ zo Diozənꞌ. Diozənꞌ bnežɉueꞌ ḻegaꞌaqueꞌ tgüeɉə trompet.
\v 3 Nach yeto anglənꞌ bedəsecheꞌ choꞌa mesənꞌ ganꞌ chsoꞌelaogüeꞌe Diozənꞌ, mes de or deꞌen zo lao Diozənꞌ ganꞌ chiꞌe chnabiꞌenəꞌ. Anglənꞌ nox̱eꞌe to barser de or ganꞌ yoꞌo deꞌe zan yal naꞌ bcuaseꞌen lao yiꞌ yaꞌalɉ deꞌen žia lao mesənꞌ. Beneꞌ caꞌ par nic̱h Diozənꞌ gwḻeꞌineꞌ žen c̱he yalənꞌ catəꞌ beṉəꞌ chsoꞌoneꞌ orasyonṉəꞌ beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ.
\v 4 Naꞌ lao gwyas žen c̱he yalənꞌ deꞌen nox̱əꞌ anglənꞌ gwḻeꞌi Diozənꞌ ḻen catəꞌ gwsoꞌon beṉəꞌ caꞌ orasyonṉəꞌ.
\v 5 Nach anglənꞌ gwxiꞌe yaꞌalɉ deꞌen žia lao mesənꞌ gwloꞌen ḻoꞌo barserənꞌ naꞌ bzaḻeꞌen lao yežlyonꞌ naꞌ gošɉ gwtin, naꞌ goc bichlə sšag xen, gwyep yes, naꞌ gwxoꞌ.
\s1 Trompet caꞌ
\p
\v 6 Nach angl caꞌ gažə, beṉəꞌ caꞌ zɉənox̱əꞌ trompet caꞌ, bosoꞌozoꞌen choꞌagaꞌaqueꞌenəꞌ par bosoꞌocuežeꞌen.
\p
\v 7 Angl nechənꞌ bcuežeꞌ trompet c̱heꞌenəꞌ. Naꞌ beyož bcuežeꞌenṉəꞌ gwcheꞌechgua yeɉ deꞌen nc̱hix̱ə yiꞌ naꞌ chen lao yežlyonꞌ. Naꞌ yo deꞌen de lao yežlyonꞌ casi gašɉən gwžiayiꞌin tant gwyeyən, naꞌ yag caꞌ zɉəze lao yežlyonꞌ casi gašɉə deꞌe caꞌ gosəꞌəbiayiꞌin, naꞌ yoguəꞌəḻoḻ yix̱əꞌ gaꞌ chiꞌ lao yežlyonꞌ gosəꞌəbiayiꞌin.
\p
\v 8 Naꞌ angl əgwchopenꞌ catəꞌ bcuežeꞌ trompet c̱heꞌenəꞌ to deꞌen naquə ca to yaꞌa xen bxopən ḻoꞌo nisdaꞌonəꞌ chaḻəꞌəṉiṉən, naꞌ casi gašɉə nisdaꞌonəꞌ beyaquən chen.
\v 9 Naꞌ casi gašɉə bia caꞌ žaꞌ ḻoꞌo nisənꞌ gwsaꞌatəb, ḻeczə gosəꞌəbiayiꞌ casi gašɉə barcw caꞌ deꞌe chaš lao nisənꞌ.
\p
\v 10 Nach angl əgwyoṉenꞌ bcuežeꞌ trompet c̱heꞌenəꞌ naꞌ to belɉw xen deꞌen žia ḻeꞌe yobanꞌ bxopən chaḻəꞌəṉiṉən ca to yiꞌ yech. Naꞌ bxopən ḻoꞌo nis c̱he zan yao caꞌ naꞌ beɉ caꞌ.
\v 11 Naꞌ belɉonꞌ nziꞌin Deꞌe Zḻaꞌ. Naꞌ ḻoꞌo nis caꞌ ganꞌ ɉəc̱hazənṉəꞌ besyəꞌəyaquən zḻaꞌ, naꞌ beṉəꞌ zan gwsaꞌat por ni c̱he deꞌen gwseꞌeɉeꞌ nisənꞌ.
\p
\v 12 Nach angl əgwdapenꞌ bcuežeꞌ trompet c̱heꞌenəꞌ naꞌ casi gašɉə bgüižənꞌ beyaquən žc̱hoḻ, naꞌ ḻeczə casi gašɉə bioꞌonəꞌ beyaquən žc̱hoḻ, naꞌ ḻeczə caꞌ gwsaꞌac casi gašɉə belɉw caꞌ. Naꞌ deꞌe naꞌanəꞌ part caꞌ deꞌen besyəꞌəyac žc̱hoḻ bito bosəꞌəseꞌeniꞌin teža naꞌ ni šeꞌelə.
\p
\v 13 Nach bleꞌidaꞌ chda to angl lao beꞌenəꞌ gwchoḻ yobanꞌ naꞌ bendaꞌ gwṉeꞌ zižɉo gwneꞌ: —Probchguazə beṉəꞌ caꞌ žaꞌ lao yežlyonꞌ, ca naquənꞌ gac c̱hegaꞌaqueꞌ catəꞌ yosoꞌocuež trompet c̱he angl caꞌ yešoṉə.
\c 9
\p
\v 1 Nach angl güeyeꞌenəꞌ bcuežeꞌ trompet c̱heꞌenəꞌ naꞌ to angl beṉəꞌ zo yobanꞌ bleꞌidaꞌ betɉeꞌ lao yežlyonꞌ ca to belɉw. Naꞌ ḻeꞌ yoꞌo lao neꞌe salɉueꞌ yech gabiḻənꞌ.
\v 2 Naꞌ bsalɉueꞌ yech gabiḻənꞌ naꞌ gwyaschgua žen ḻoꞌo yechənꞌ canꞌ chas ženṉəꞌ catəꞌ chəsəꞌəbequeꞌ yiꞌ xen ḻoꞌo orn. Naꞌ ženṉəꞌ deꞌen gwyas ḻoꞌo yech gabiḻənꞌ bcuašəꞌən bgüižənꞌ canꞌ chac catəꞌən chiꞌichgua žen daoꞌ.
\v 3 Naꞌ ganꞌ gwyas ženṉəꞌ besəꞌəchoɉ bišəꞌ zan gwyašəb lao yežlyonꞌ. Naꞌ bišəꞌ caꞌ gwsoꞌomb znia canꞌ chsoꞌon bex̱goni bianꞌ chsaꞌaš lao yežlyonꞌ.
\v 4 Naꞌ Diozənꞌ beneꞌ mendad cui saꞌob yix̱əꞌ gaꞌ o bi deꞌen zɉənazeꞌ naꞌ ni yag caꞌ, sino yesəꞌəyižəb beṉəꞌ caꞌ cui nyišəꞌ sey c̱he Diozənꞌ lao xgagaꞌaqueꞌenəꞌ.
\v 5 Bito beꞌe latɉə soꞌotəb ḻegaꞌaqueꞌ sino gwyašəb gueyəꞌ bioꞌ gwsoꞌomb par besəꞌəžaglaochgüeꞌ. Naꞌ beṉəꞌ caꞌ gosəꞌəyižəbənꞌ besəꞌəžaglaochgüeꞌ canꞌ chžaglaocho catəꞌ chyiž bex̱ɉoniꞌin chioꞌo.
\v 6 Naꞌ catəꞌ əžin ža gaquə canꞌ bleꞌidaogüeꞌedaꞌanəꞌ beṉəꞌ caꞌ žaꞌ yežlyonꞌ yesəꞌəṉablažeꞌe saꞌateꞌ, pero bito saꞌateꞌ, naꞌ seꞌeneneꞌ cuich ṉiteꞌe, pero bito yesyəꞌəželeneꞌ nac soꞌoneꞌ.
\p
\v 7 Naꞌ quinga zɉənaquə bišəꞌ caꞌ bleꞌidaꞌ, zɉənaquəb ca cabey bia žɉaꞌac lao gwdiḻə. Nach yic̱hɉgaꞌaquəbənꞌ zo deꞌe naquə ca coron de or. Naꞌ choꞌalaogaꞌaquəbənꞌ bleꞌidaꞌan ca choꞌalao beṉac̱h.
\v 8 Naꞌ zɉəžiab yišəꞌ deꞌen naquə ca yišəꞌ yic̱hɉ noꞌolə, naꞌ leygaꞌaquəbənꞌ zɉənaquən ca ley leon.
\v 9 Naꞌ cuerp c̱hegaꞌaquəbənꞌ zɉənazɉən deꞌen naquə ca deꞌe ya deꞌen chcuasəꞌ chcueꞌeɉ ḻegaꞌaquəb. Naꞌ sšag deꞌen chsoꞌomb len x̱iləꞌəgaꞌaquəbənꞌ nenən ca sšag deꞌen chsoꞌon zan cabey catəꞌ chsaꞌacdob chɉaꞌaquəb lao gwdiḻənꞌ zɉənxobəb caretənꞌ.
\v 10 Naꞌ xbangaꞌaquəbənꞌ zɉənaquən ca xban bex̱goni nic̱h bosoꞌoc̱himb ḻen gosəꞌəyižəb beṉəꞌ lao gueyəꞌ bioꞌonəꞌ.
\v 11 Naꞌ angl bzelao deꞌen chnabiaꞌ gabiḻənꞌ ḻeczə chnabiaꞌan bišəꞌ caꞌ, ḻenṉəꞌ nziꞌ Abadon dižəꞌ ebreo naꞌ ḻeczə nziꞌin Apolion dižəꞌ griego, zeɉe dižəꞌ “chžiayiꞌin”.
\p
\v 12 Bagwde deꞌe mal nechənꞌ naꞌ zeꞌe zaꞌac yec̱hopən.
\p
\v 13 Nach angl əgwxope bcuežeꞌ trompetənꞌ naꞌ bendaꞌ gwṉe angl benꞌ zecha choꞌa mes de orənꞌ deꞌen zo lao Diozənꞌ mes deꞌen žia lozei dap squinte ganꞌ chsoꞌelaogüeꞌe Diozənꞌ.
\v 14 Naꞌ anglənꞌ bolgüižeꞌ angl əgwxopenꞌ benꞌ nox̱əꞌ trompetənꞌ, gožeꞌeneꞌ: —Bosež angl bzelao caꞌ tap deꞌe caꞌ zɉəncheɉ choꞌa yao xen deꞌen nziꞌ Eofrates.
\p
\v 15 Nach anglənꞌ bosežeꞌ angl bzelao caꞌ tap par nic̱h gwsoꞌotən casi gašɉə beṉac̱hənꞌ. Diozənꞌ bito beꞌe latɉə saꞌaš angl bzelao caꞌ antslə. Bzagueꞌe ḻegaꞌaquən par bi izənꞌ, naꞌ bi bioꞌonəꞌ naꞌ bi žanꞌ naꞌ bi orənꞌ goneꞌ mendad saꞌašən.
\v 16 Naꞌ gwṉezdaꞌ nitəꞌ c̱hopə gueyoa millon soḻdad c̱hegaꞌaquən deꞌen zɉəžia cabey.
\p
\v 17 Naꞌ quinga bleꞌidaogüeꞌedaꞌ cabey caꞌ naꞌ deꞌe x̱ioꞌ caꞌ zɉəžia cožəꞌəgaꞌaquəbənꞌ. Deꞌe x̱ioꞌ caꞌ zɉənazɉən to ya deꞌe chcuasəꞌ chcueꞌeɉ choꞌalchoꞌogaꞌaquən naꞌ yanꞌ naquən de šoṉə color, deꞌe xṉa, deꞌe asol naꞌ deꞌe gašəꞌ. Naꞌ yic̱hɉ cabey caꞌ zɉənaquən ca yic̱hɉ leon, naꞌ choꞌagaꞌaquəbənꞌ chchoɉ yiꞌ naꞌ len žen naꞌ len sofr deꞌen chaḻəꞌəṉiṉ.
\v 18 Naꞌ casi gašɉə beṉac̱hənꞌ gwsaꞌateꞌ por ni c̱he yiꞌ naꞌ žen naꞌ sofr deꞌen besəꞌəchoɉ choꞌa cabey caꞌ.
\v 19 Bosoꞌoc̱himb choꞌagaꞌaquəbənꞌ par gwsoꞌotəb beṉəꞌ naꞌ ḻeczə caꞌ xbangaꞌaquəbənꞌ, laꞌ xbangaꞌaquəbənꞌ zɉənaquən ca beḻ, zɉənsaꞌan yic̱hɉei par nic̱h gwsaꞌon beṉəꞌ.
\p
\v 20 Naꞌ beṉəꞌ caꞌ besyəꞌəgaꞌaṉ cui gwsaꞌat catəꞌən gwyaš cabey caꞌ lao yežlyonꞌ, bitoczə besyəꞌədiṉɉeneꞌ deꞌe malənꞌ chsoꞌoneꞌ ca naquənꞌ chsoꞌelaogüeꞌe deꞌe x̱ioꞌ caꞌ naꞌ chseꞌeɉṉiꞌalažeꞌe lguaꞌa lsaquəꞌ de or, de pḻat, de brons, de yeɉ naꞌ de yag. Naꞌ lguaꞌa lsaquənꞌ chseꞌeɉṉiꞌalažeꞌenəꞌ bito chəsəꞌəleꞌin, nic chseꞌenen, naꞌ nic chac yosoꞌota cuingaꞌaquei.
\v 21 Naꞌ bitoczə besyəꞌədiṉɉe beṉəꞌ caꞌ besyəꞌəgaꞌaṉənꞌ c̱he deꞌe malənꞌ chsoꞌoneꞌenəꞌ ca naquənꞌ chsoꞌoteꞌ beṉəꞌ, naꞌ ca naquənꞌ chəsəꞌənaogüeꞌ deꞌen chsoꞌon beṉəꞌ gožaꞌ caꞌ, naꞌ chosoꞌožaꞌ xtogaꞌaqueꞌ naꞌ chsoꞌoneꞌ bitəꞌətezəchlə deꞌe yeḻəꞌ ztoꞌ deꞌen zɉənac caꞌ, naꞌ chəsəꞌəbaneꞌ bi de c̱he beṉəꞌ.
\c 10
\s1 Angl benꞌ nox̱əꞌ ḻibrənꞌ
\p
\v 1 Nach bleꞌidaꞌ yeto angl gual, gwzeꞌe yobanꞌ betɉeꞌ lao yežlyonꞌ to ḻoꞌo beɉw. Naꞌ gwyec̱hɉ to yitəꞌ yic̱hɉeꞌenəꞌ. Naꞌ choꞌalaogüeꞌenəꞌ gwnatitən canꞌ chna bgüižənꞌ naꞌ ṉiꞌe caꞌ bleꞌidaꞌan ca yag bye deꞌen chaḻəꞌəṉiṉ.
\v 2 Anglənꞌ nox̱eꞌe to ḻibr daoꞌ deꞌen nyalɉo naꞌ ṉiꞌe ḻichanꞌ bsoeꞌen lao nisdaꞌonəꞌ naꞌ deꞌe yeglənꞌ lao yežlyonꞌ.
\v 3 Naꞌ bisyeꞌe zižɉochgua canꞌ chosyaꞌa leon caꞌ, naꞌ catəꞌ bisyeꞌenəꞌ gošɉ gwtin gaž las.
\v 4 Naꞌ ca naquə dižəꞌ deꞌen bendaꞌ lao gošɉ gwtinṉəꞌ bazon gwzoɉaꞌan catəꞌəczla to beṉəꞌ zo yobanꞌ gwneꞌ nadaꞌ: —Bito gwzoɉoꞌ dižəꞌ deꞌen bendoꞌ lao gošɉ gwtinṉəꞌ, con gwdapən ḻoꞌo yic̱hɉlaꞌaždaogoꞌonəꞌ.
\p
\v 5 Nach anglənꞌ benꞌ zo šḻaꞌa ṉiꞌenəꞌ lao nisdaꞌonəꞌ naꞌ yešḻaꞌan lao yežlyonꞌ, gwḻis neꞌe ḻichanꞌ yobalə
\v 6 naꞌ bzoeꞌ Dioz benꞌ zo zeɉḻicaṉe testigw de que choꞌe dižəꞌ ḻi, Dioz benꞌ ben beṉac̱h, beneꞌ bia caꞌ žaꞌ, naꞌ len bitəꞌətezəchlə deꞌe zɉəde yobanꞌ, lao yežlyonꞌ naꞌ ḻoꞌo nisənꞌ. Gwneꞌ: —Bitoch cuezə Diozənꞌ par goneꞌ canꞌ bžieꞌ biaꞌ goneꞌ.
\v 7 Catəꞌ angl gažənꞌ solao əgwcuežeꞌ trompet c̱heꞌenəꞌ canaꞌachənꞌ gaquə complir deꞌen nžia Diozənꞌ biaꞌ gaquə ca naquənꞌ babzeɉniꞌineꞌ profet c̱heꞌ caꞌ beṉəꞌ caꞌ gwsoꞌelaoꞌ ḻeꞌ, bzeɉniꞌineꞌ ḻegaꞌaqueꞌ deꞌenəꞌ cuiṉəꞌ seꞌeɉniꞌi beṉəꞌ yeziquəꞌəchlə.
\p
\v 8 Naꞌ benꞌ zo yobanꞌ beꞌelencheꞌ nadaꞌ dižəꞌ deꞌe yoblə gwneꞌ: —Ɉəx̱iꞌ ḻibr daꞌonəꞌ deꞌen nyalɉo deꞌen nox̱əꞌ anglənꞌ benꞌ zecha zo šḻaꞌa ṉiꞌenəꞌ lao nisdaꞌonəꞌ naꞌ deꞌen yešḻaꞌa lao yežlyonꞌ.
\p
\v 9 Nach gwyaꞌa ganꞌ zecha anglənꞌ naꞌ gwṉabaꞌ ḻibr daꞌonəꞌ. Naꞌ anglənꞌ gožeꞌ nadaꞌ: —Bex̱əꞌən naꞌ gwdaon. Naꞌ ḻoꞌo choꞌonəꞌ gaquədoꞌon zix̱ ca šiꞌin bia ser, pero ḻoꞌo ḻiꞌonəꞌ yeyaquən zḻaꞌ.
\p
\v 10 Naꞌ gwxiꞌa ḻibr daꞌonəꞌ nox̱əꞌ anglənꞌ naꞌ gwdaoguaꞌan. Naꞌ ḻoꞌo choꞌanəꞌ goquən zix̱ ca šiꞌin bia ser, pero beyož gwdaoguaꞌanṉəꞌ beyaquən zḻaꞌ ḻoꞌo ḻiꞌanəꞌ.
\v 11 Nach anglənꞌ gožeꞌ nadaꞌ: —Deꞌe yoblə cheyaḻəꞌ goꞌo dižəꞌ nac gaquə c̱he zan yež, naꞌ c̱he zan ṉasyon, naꞌ c̱he beṉəꞌ chsaꞌac gwde gwdelə dižəꞌ, naꞌ c̱he zan rei.
\c 11
\s1 C̱hopə testigw
\p
\v 1 Nach Jesoꞌosənꞌ beṉeꞌ nadaꞌ to ya deꞌe gwchix̱ədaꞌ yoꞌonəꞌ naꞌ gožeꞌ nadaꞌ: —Žɉəx̱iꞌo medid c̱he yoꞌodaoꞌ əblao c̱he Diozənꞌ naꞌ c̱he mesənꞌ ganꞌ choꞌelaꞌochoneꞌ, naꞌ gwlaboꞌ baḻə beṉəꞌ chsoꞌelaogüeꞌeneꞌ.
\v 2 Pero bito siꞌo medid chyoꞌonəꞌ, c̱hedəꞌ naquən par beṉəꞌ caꞌ cui chsoꞌonḻilažəꞌ Diozənꞌ, naꞌ beṉəꞌ caꞌ cui chsoꞌonḻilažəꞌ ḻeꞌ soꞌoncheneꞌ syoda c̱heꞌenəꞌ con nac chseꞌeneneꞌ lao yec̱hopəyon bioꞌ.
\v 3 Eseḻaꞌa c̱hopə testigw c̱hiaꞌ soꞌe xtižaꞌanəꞌ tmil c̱hopə gueyoa gyon ža. Naꞌ saꞌazeꞌ lachəꞌ gasɉ.
\p
\v 4 Testigw caꞌ c̱hopə gwxaquəꞌəlebəgaꞌaqueꞌenəꞌ ca yag olibo caꞌ c̱hopə deꞌen zo lao X̱ancho Diozənꞌ naꞌ ca candeler caꞌ c̱hopə deꞌen zɉəzo laogüeꞌenəꞌ.
\v 5 Naꞌ notəꞌətezə beṉəꞌ yeneꞌe gon mal len ḻegaꞌaqueꞌ əchoɉ yiꞌ choꞌa testigw caꞌ naꞌ əgwzeyən beṉəꞌ caꞌ soꞌon caꞌ. Caꞌ gaquə əsaꞌat beṉəꞌ caꞌ šə bi soꞌoneneꞌ testigw caꞌ.
\v 6 Naꞌ testigw caꞌ naquən lao naꞌagaꞌaqueꞌ soꞌoneꞌ ca cui gaquə yeɉw yedote lao soꞌe xtižəꞌ Diozənꞌ, naꞌ naquən lao naꞌagaꞌaqueꞌ soꞌoneꞌ ca yeyac nis caꞌ chen, naꞌ ḻeczə naquən lao naꞌagaꞌaqueꞌ soꞌoneꞌ ca gaquə bitəꞌətezəchlə deꞌe mal deꞌen seꞌeneneꞌ gaquə.
\v 7 Naꞌ catəꞌ yeyož əsoꞌe xtižaꞌanəꞌ canaꞌach əchoɉ ḻoꞌo yech gabiḻənꞌ to deꞌe x̱ioꞌ deꞌen naquə ca to bia znia naꞌ əxitəꞌən nizən ḻegaꞌaqueꞌ naꞌ gotten ḻegaꞌaqueꞌ.
\v 8 Naꞌ cuerp c̱hegaꞌaqueꞌenəꞌ yegaꞌaṉən šoṉə ža šgobiž lao lquey syoda əblaonəꞌ ganꞌ gwsoꞌoteꞌ nadaꞌ nacaꞌ X̱anḻe. Naꞌ syodanꞌ ganꞌ gwsoꞌoteꞌ nadaꞌ gwxaquəꞌəleben ca syoda Sodomanꞌ naꞌ ca ṉasyon Egiptonꞌ.
\v 9 Naꞌ lao šoṉə ža šgobiž yesəꞌəžag beṉəꞌ zɉənaquə zan ṉasyon, beṉəꞌ zaꞌac zan yež, beṉəꞌ zɉənaquə zan dia naꞌ chsaꞌaqueꞌ gwde gwdelə dižəꞌ, desəꞌəgüieꞌ deꞌe beṉəꞌ guat caꞌ zɉədeꞌ lao lqueyənꞌ naꞌ bito soꞌe latɉə no əgwcuašəꞌ ḻegaꞌaqueꞌ.
\v 10 Naꞌ beṉəꞌ caꞌ žaꞌ lao yežlyonꞌ yesyəꞌəbeineꞌ catəꞌ bagwsaꞌat testigw c̱hiaꞌ caꞌ, tant zed əgwsaꞌaqueneꞌ xtižaꞌanəꞌ deꞌen gwsoꞌeleneꞌ ḻegaꞌaqueꞌ. Nach soꞌoneꞌ ḻegr, naꞌ yosoꞌonežɉo lɉuežɉgaꞌaqueꞌ no regal.
\v 11 Nach bleꞌidaogüeꞌedaꞌ goc doxen canꞌ gwneꞌenəꞌ. Naꞌ catəꞌ goc šoṉə ža šgobiž gwsaꞌat testigw caꞌ, canaꞌach Diozənꞌ bosbaneꞌ ḻegaꞌaqueꞌ naꞌ gosəꞌəzecheꞌ deꞌe yoblə. Naꞌ yoguəꞌ beṉəꞌ caꞌ besəꞌəleꞌi canꞌ besyəꞌəban testigw caꞌ besəꞌəžebchgüeꞌ.
\v 12 Nach testigw caꞌ c̱hopə gwseꞌeneneꞌ gož Diozənꞌ ḻegaꞌaqueꞌ zižɉo: —Ḻeꞌe yeda, ḻeꞌe yeyep nga.
\p Nach besyəꞌəyepeꞌ yobanꞌ to ḻoꞌo beɉw, naꞌ besəꞌəleꞌi beṉəꞌ contr c̱hegaꞌaqueꞌ caꞌ.
\v 13 Naꞌ ca orənꞌ ḻechguaḻe gwxoꞌ naꞌ gwžiayiꞌ to part syodanꞌ naꞌ gaža mil beṉəꞌ gwsaꞌateꞌ catəꞌən gwxoꞌ. Naꞌ beṉəꞌ caꞌ besyəꞌəgaꞌaṉ cui gwsaꞌateꞌ ḻechguaḻe besəꞌəžebeꞌ naꞌ gwsoꞌelaꞌogüeꞌe Diozənꞌ benꞌ zo yobanꞌ.
\p
\v 14 Bagwde deꞌe mal əgwchopenꞌ naꞌ zeꞌe gaquə deꞌe əgwyoṉenꞌ.
\s1 Canꞌ goquə catəꞌ angl beṉəꞌ gažənꞌ bcuežeꞌ trompet c̱heꞌenəꞌ
\p
\v 15 Nach angl beṉəꞌ gažənꞌ bcuežeꞌ trompet c̱heꞌenəꞌ naꞌ beṉəꞌ caꞌ žaꞌ yobanꞌ gosəꞌəṉeꞌ zižɉo gosəꞌəneꞌ:
\q1 X̱ancho Diozənꞌ naꞌ Xiꞌiṉeꞌ Cristənꞌ bagwsoꞌoneꞌ ca zo gwxiyeꞌenəꞌ xniꞌagaꞌaqueꞌenəꞌ,
\q1 naꞌ ḻegaꞌaczeꞌenəꞌ yesəꞌəṉabiꞌe beṉəꞌ žaꞌ yežlyonꞌ zeɉḻicaṉe.
\q1 Crist naꞌanəꞌ gwleɉ Diozənꞌ par chacleneꞌ beṉac̱hənꞌ.
\m
\v 16 Nach beṉəꞌ golə beṉəꞌ blao caꞌ tapechoa, beṉəꞌ caꞌ zɉəchiꞌ chəsəꞌənabiaꞌaleneꞌ Diozənꞌ, besəꞌəzo xibgaꞌaqueꞌ laogüeꞌenəꞌ naꞌ besəꞌəc̱hequəꞌ yic̱hɉgaꞌaqueꞌen lao yonꞌ gwsoꞌelaogüeꞌe Diozənꞌ,
\v 17 gosəꞌəneꞌ:
\q1 Choṉtoꞌ yeḻəꞌ chox̱cwlen c̱hioꞌ, X̱antoꞌ.
\q1 Lenꞌ nacoꞌ Dioz benꞌ napə ḻeꞌezelaogüe yeḻəꞌ guac xen.
\q1 Bazoczoꞌ catəꞌən bx̱iꞌo yežlyonꞌ, naꞌ caꞌaczənꞌ soꞌ catəꞌən yeyož yedon.
\q1 Naꞌ len yeḻəꞌ guac c̱hioꞌonəꞌ chnabiꞌo.
\q1
\v 18 Beṉəꞌ ṉasyon caꞌ žaꞌ yežlyonꞌ besəꞌəžeꞌe leꞌ,
\q1 pero ṉaꞌa babžin ža əgwnežɉoꞌ castigw c̱hegaꞌaqueꞌ.
\q1 Babžin ža əc̱hoglaogoꞌ c̱he yoguəꞌ beṉəꞌ bagwsaꞌat šə nonꞌ napə doḻəꞌ.
\q1 Naꞌ gwnežɉoꞌ yeḻəꞌ balaꞌaṉ c̱he beṉəꞌ caꞌ gwsoꞌon xšinoꞌonəꞌ ca deꞌen gwsoꞌe xtižoꞌonəꞌ,
\q1 naꞌ len yeziquəꞌəchlə beṉəꞌ caꞌ bagwleɉoꞌ par zɉənaqueꞌ lažəꞌ naꞌonəꞌ naꞌ gwsaꞌapeꞌ leꞌ respet.
\q1 Egwnežɉoꞌ ḻegaꞌaqueꞌ yeḻəꞌ balaꞌaṉ ḻaꞌaṉəꞌəczə šə gwsaꞌaqueꞌ beṉəꞌ blao o ḻaꞌaṉəꞌəczə šə cui gwsaꞌaqueꞌ beṉəꞌ blao žlac gosəꞌəniteꞌe yežlyonꞌ.
\q1 Ḻeczə gonoꞌ par nic̱h beṉəꞌ caꞌ chosoꞌožiayiꞌ lɉuežɉgaꞌaqueꞌ o chsoꞌoneꞌ bichlə deꞌe mal lao yežlyonꞌ əsaꞌaqueꞌ castigw lao yiꞌ gabiḻənꞌ.
\p
\v 19 Nach bleꞌidaꞌ nḻaꞌaxeɉə ganꞌ chsoꞌelaogüeꞌe Diozənꞌ yobanꞌ naꞌ bleꞌidaꞌ caj ganꞌ žaꞌ deꞌen nyoɉ canꞌ ben Diozənꞌ mendad soꞌon beṉəꞌ Izrael caꞌ par nic̱h gaquəleneꞌ ḻegaꞌaqueꞌ. Naꞌ lao bleꞌidaꞌ deꞌe caꞌ gwyep yes, gocchgua sšag naꞌ gošɉ gwtin, naꞌ ḻeczə gwxoꞌ naꞌ gwcheꞌechgua yeɉənꞌ.
\c 12
\s1 Noꞌolənꞌ naꞌ gwxiyeꞌenəꞌ
\p
\v 1 Naꞌ ben Diozənꞌ par nic̱h bleꞌidaꞌogüeꞌedaꞌ ḻeꞌe yobanꞌ to deꞌe zaquəꞌ yebanecho, bleꞌidaꞌ to noꞌolə nyazeꞌ bgüižənꞌ ca xeꞌ. Naꞌ zecheꞌ lao bioꞌonəꞌ naꞌ yic̱hɉeꞌenəꞌ zon to coron de šižiṉ belɉw.
\v 2 Noꞌe bdaoꞌ naꞌ bachaqueꞌ bes c̱he yeḻəꞌ sanṉəꞌ naꞌ bisyeꞌe tant chžaglaogüeꞌ lao chzaneꞌenəꞌ.
\v 3 Naꞌ bleꞌidaogüeꞌedaꞌ yeto deꞌe zaquəꞌ yebanecho ḻeꞌe yobanꞌ, bleꞌidaꞌ gwxiyeꞌenəꞌ beyaquən to beḻ gaž yic̱hɉ bia xen naꞌ bia xṉa, naꞌ žia ši lozəb naꞌ tgüeɉə coron nitəꞌ yic̱hɉəb caꞌ.
\v 4 Naꞌ catəꞌ gwda xbambənꞌ bc̱hiṉɉən casi gašɉə belɉw caꞌ zɉəžia ḻeꞌe yobanꞌ naꞌ besəꞌəyiṉɉən lao yežlyonꞌ. Nach beḻənꞌ bianꞌ beyaque gwxiyeꞌenəꞌ gotəꞌəb xniꞌa noꞌolənꞌ, gwlezəb par šebəb bdaꞌonəꞌ catəꞌ saneꞌeboꞌonəꞌ.
\v 5 Noꞌolənꞌ gwxaneꞌ to biꞌi byo, biꞌi ṉabiaꞌ yoguəꞌ ṉasyon. Naꞌ gomboꞌ caꞌ yosoꞌozex̱ɉw yic̱hɉ beṉəꞌ ṉasyon caꞌ yosoꞌozenagueꞌ c̱heboꞌ. Diozənꞌ beziꞌ bequeꞌeboꞌ bec̱heꞌeboꞌ ganꞌ chiꞌe chnabiꞌenəꞌ.
\v 6 Nach noꞌolənꞌ boxoṉɉeneꞌ gwxiyeꞌenəꞌ par šeɉeꞌ to latɉə ganꞌ cui no žaꞌ ganꞌ banonšaoꞌ Diozənꞌ par so noꞌolənꞌ, naꞌ lao soeꞌ naꞌ Diozənꞌ goneꞌ ḻeꞌ mantener tmil c̱hopə gueyoa gyon ža.
\p
\v 7-8 Gwde naꞌ goc gwdiḻənꞌ yobanꞌ, naꞌ angl əblao benꞌ le Miguel naꞌ soḻdad c̱heꞌ caꞌ gosəꞌədiḻəleneꞌ beḻənꞌ bianꞌ beyaque gwxiyeꞌenəꞌ. Naꞌ gwxiyeꞌenəꞌ naꞌ angl bzelao c̱hei caꞌ bito gosəꞌəzoin anglənꞌ len soḻdad c̱heꞌ caꞌ. Besyəꞌəbeɉeꞌ ḻegaꞌaquən yobanꞌ naꞌ bitoch chsoꞌe latɉə žɉəyaꞌaquəchən yobanꞌ deꞌe yoblə.
\v 9 Naꞌ bosyoꞌozaḻeꞌe gwxiyeꞌenəꞌ len angl bzelao c̱hei caꞌ lao yežlyonꞌ. Caꞌ goc c̱he deꞌen beyaque beḻ xenṉəꞌ, deꞌen le Satanas. Zon dezd catəꞌən gwxe yežlyonꞌ chx̱oayaguən yoguəꞌ beṉac̱h.
\p
\v 10 Nach bendaꞌ to beṉəꞌ zo yobanꞌ gwṉeꞌ zižɉo gwneꞌ: —Bac̱h bžin ža bosla Diozənꞌ beṉac̱hənꞌ lao naꞌ gwxiyeꞌenəꞌ len yeḻəꞌ guac deꞌen napeꞌenəꞌ naꞌ chnabiꞌe ḻegaꞌaqueꞌ. Naꞌ babžin ža chiꞌ Cristənꞌ chnabiaꞌaleneꞌ Diozənꞌ, Crist nanꞌ bseḻeꞌe par gocleneꞌ beṉac̱hənꞌ. Babesyəꞌəbeɉeꞌ gwxiyeꞌenəꞌ deꞌen bcuiš beṉəꞌ bišəꞌəcho caꞌ lao Diozənꞌ do ža do yel nan de que de xtoḻəꞌəgaꞌaqueꞌ, naꞌ ṉaꞌa babosoꞌozaḻeꞌen lao yežlyonꞌ.
\v 11 Beṉəꞌ bišəꞌəcho caꞌ beṉəꞌ caꞌ bagwsaꞌat, gosəꞌəzoineꞌ cui bosoꞌozenagueꞌ c̱he gwxiyeꞌenəꞌ lao gosəꞌəniteꞌe c̱hedəꞌ gwsoꞌonḻilažeꞌe Jesocristənꞌ benꞌ blalɉ xc̱heneꞌenəꞌ por ni c̱hecho. Naꞌ ḻeczə gosəꞌəzoineꞌen c̱hedəꞌ gwsoꞌe dižəꞌ de que chsoꞌonḻilažeꞌe Jesocristənꞌ. Gwsaꞌacbeꞌineꞌ yeɉniꞌa saꞌateꞌ cle ca yesəꞌəbeɉyic̱hɉeꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\v 12 Deꞌe naꞌanəꞌ ḻedoyebei chioꞌo zocho yobanꞌ. Probchguazə beṉəꞌ nitəꞌ doxen lao yežlyonꞌ. Probchguazəgaꞌaqueꞌ c̱hedəꞌ babžin gwxiyeꞌenəꞌ ganꞌ niteꞌenəꞌ. Ḻechguaḻe chžaꞌan deꞌen chegaꞌaṉ yetozə tyemp daoꞌ par gonən canꞌ cheneꞌenṉəꞌ naꞌ deꞌe naꞌanəꞌ gonchguan contr beṉac̱hənꞌ.
\p
\v 13 Naꞌ beḻənꞌ bianꞌ beyaque gwxiyeꞌenəꞌ catəꞌ gocbeꞌib de que babesyəꞌəbeɉeꞌeb yobanꞌ naꞌ babžimb lao yežlyonꞌ, nach belagdob noꞌolənꞌ benꞌ gwxan biꞌi byo daꞌonəꞌ.
\v 14 Pero Diozənꞌ gocleneꞌ noꞌolənꞌ, beneꞌ ca gwzo c̱hopə x̱ileꞌe deꞌe xen caczə c̱he to bsia daoꞌ par nic̱h cui gwxen beḻənꞌ ḻeꞌ. Naꞌ gwzoeꞌ bžinteꞌ latɉə dašənꞌ ganꞌ banonšaoꞌ Diozənꞌ soeꞌ naꞌ ganꞌ goneꞌ ḻeꞌ mantener šoṉ iz yoꞌo gašɉə.
\v 15 Nach bchoɉ nis zil choꞌa beḻənꞌ caczə to yao laꞌ goneꞌeb əžinten ganꞌ zo noꞌolənꞌ par guaꞌan ḻeꞌ.
\v 16 Pero naꞌ Diozənꞌ gocleneꞌ noꞌolənꞌ, beneꞌ par nic̱h yežlyonꞌ güeꞌeɉən nisənꞌ deꞌen bchoɉ choꞌa beḻənꞌ.
\v 17 Naꞌ beḻənꞌ bžaꞌachguab noꞌolənꞌ nach ɉəyemb contr xiꞌiṉeꞌ caꞌ yeḻaꞌ, beṉəꞌ caꞌ chsoꞌon canꞌ non Diozənꞌ mendad goncho, beṉəꞌ caꞌ ḻeczə chsoꞌe dižəꞌ de que chsoꞌonḻilažeꞌe Jesoꞌosənꞌ.
\c 13
\s1 C̱hopə bež bia əznia
\p
\v 1 Naꞌ gwzechaꞌ choꞌa nisdaꞌonəꞌ naꞌ bleꞌidaꞌ bchoɉ to bež əznia ḻoꞌo nisdaꞌonəꞌ. Naꞌ nitəꞌ gažə yic̱hɉəb naꞌ žia ši lozəb naꞌ lao to to lozəb caꞌ nitəꞌ tgüeɉə coron. Naꞌ lao to to yic̱hɉəb caꞌ nyoɉ to la deꞌen chloeꞌ de que chon cuimb ca Dioz.
\v 2 Bleꞌidaꞌ bežənꞌ ca to tigr naꞌ bleꞌidaꞌ ṉiꞌanaꞌab caꞌ zɉənaquən ca ṉiꞌanaꞌ os, naꞌ choꞌabənꞌ naquən ca choꞌa leon. Naꞌ beḻənꞌ bianꞌ beyaque gwxiyeꞌenəꞌ bemb par nic̱h gwnabiaꞌ bežənꞌ, naꞌ bnežɉw beḻənꞌ ḻeb yeḻəꞌ guac par nic̱h bemb ca gosəꞌənitəꞌ yoguəꞌəḻoḻ beṉac̱h xniꞌabənꞌ.
\v 3 Naꞌ bleꞌidaꞌ to yic̱hɉ bežənꞌ naquəchguan güeꞌ, naꞌ naquən ca to deꞌe gatlemb pero bito gotəb. Naꞌ yoguəꞌəḻoḻ beṉəꞌ besyəꞌəbaneneꞌ deꞌen beyaquebənꞌ naꞌ gwnitəꞌəczeꞌ xniꞌabənꞌ.
\v 4 Naꞌ gwsoꞌelaogüeꞌe beḻənꞌ bianꞌ beyaque gwxiyeꞌenəꞌ, gwsaꞌacbeꞌineꞌ de que beḻənꞌ bemb par nic̱h chnabiaꞌ bežənꞌ. Naꞌ ḻeczə gwsoꞌelaogüeꞌe bežənꞌ, gosəꞌəneꞌ: —Bež nga chnabiꞌachəb ca notəꞌətezəchlə beṉəꞌ, naꞌ notono no soi tiḻəlen ḻeb.
\p
\v 5 Naꞌ bežənꞌ beꞌeb dižəꞌ de que naquəb ca Diozənꞌ naꞌ beꞌeb bichlə dižəꞌ bžia bnitəꞌəb Diozənꞌ lao c̱hopeyon bioꞌ gwnabiꞌab.
\v 6 Gwṉechguab contr Diozənꞌ, bžia bnitəꞌəb ḻeꞌ naꞌ ḻeczə bžia bnitəꞌəb yobanꞌ naꞌ len beṉəꞌ caꞌ žaꞌ naꞌ.
\v 7 Naꞌ gwyoꞌo lao naꞌ bežənꞌ gwdiḻəlemb beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ naꞌ bzob ḻegaꞌaqueꞌ xniꞌabənꞌ par bc̱hiꞌ bsaquəꞌəb ḻegaꞌaqueꞌ. Nach gwnabiꞌab beṉac̱hənꞌ yoguəꞌ ṉasyon yoguəꞌ yež, yoguəꞌ dia naꞌ yoguəꞌ beṉəꞌ chsoꞌe gwde gwdelə dižəꞌ.
\v 8 Naꞌ yoguəꞌ beṉəꞌ caꞌ cui zɉənyoɉ lagaꞌaqueꞌenəꞌ ḻeꞌe ḻibr c̱he Jesocristənꞌ gwsoꞌelaogüeꞌeb. Catəꞌən zeꞌe x̱e yežlyonꞌ banyoɉ la beṉəꞌ caꞌ zɉənapə yeḻəꞌ mban zeɉḻicaṉe ḻeꞌe ḻibr c̱he Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\p
\v 9 Leꞌe žia nagle deꞌe chene ḻegwzenag deꞌe nga.
\v 10 Beṉəꞌ caꞌ chosoꞌozo beṉəꞌ yoblə xniꞌagaꞌaqueꞌenəꞌ ca pres o ca esclabos, canꞌ chsoꞌoneꞌ caꞌ gac c̱hegaꞌaqueꞌ. Naꞌ beṉəꞌ caꞌ chsoꞌot beṉəꞌ len yes ya, ḻeczə canꞌ saꞌateꞌ. Deꞌe naꞌanəꞌ chonən byen sotezə so chioꞌo bagwleɉ Diozənꞌ par naccho lažəꞌ neꞌenəꞌ gonḻilažəꞌəchoneꞌ bitəꞌətezə chac c̱hecho.
\p
\v 11 Naꞌ bleꞌidaꞌ yeto bež bchoɉəb ḻoꞌo yonꞌ. Naꞌ bežənꞌ žia c̱hopə lozəb ca loz xiləꞌ daoꞌ pero beꞌeb dižəꞌ gox̱oayag canꞌ chon beḻənꞌ bianꞌ beyaque gwxiyeꞌenəꞌ.
\v 12 Naꞌ bežənꞌ bianꞌ bleꞌidaꞌ deꞌe neche bemb par nic̱h bež əgwchopenꞌ gwnabiaꞌab lao ḻeb naꞌ bnežɉob ḻeb doxen yeḻəꞌ gwnabiaꞌ deꞌen gwdapəbənꞌ. Nach bia əgwchopenꞌ bemb par nic̱h beṉəꞌ caꞌ žaꞌ yežlyonꞌ gwsoꞌelaogüeꞌe bia nechənꞌ bianꞌ naquə güeꞌ yic̱hɉeinəꞌ, güeꞌ deꞌen goquə ca to deꞌe gatlemb.
\v 13 Naꞌ bia əgwchopenꞌ bemb deꞌe zan deꞌe zaquəꞌ yesyəꞌəbanchgüei beṉəꞌ, xte bemb par nic̱h beṉac̱hənꞌ besəꞌəleꞌineꞌ yiꞌ ḻeꞌe yobanꞌ naꞌ betɉən lao yežlyonꞌ.
\v 14 Naꞌ laogüe deꞌen bemb deꞌe besyəꞌəbaneneꞌenəꞌ lao bež nechənꞌ, bx̱oayaguəb beṉəꞌ žaꞌ yežlyonꞌ par nic̱h caꞌ gwsoꞌelaogüeꞌe bia nechənꞌ bianꞌ goquə güeꞌ yichɉəbənꞌ len yes yanəꞌ, güeꞌ deꞌen bašə gatlemb. Naꞌ bež əgwchopenꞌ bemb mendad par gwsoꞌoneꞌ to lguaꞌa lsaquəꞌ bež nechənꞌ.
\v 15 Naꞌ goquən lao naꞌ bež əgwchopenꞌ bemb par nic̱h gwyoꞌo lguaꞌa lsaquəꞌ bež nechənꞌ biš xṉe. Naꞌ lguaꞌa lsaquəꞌənəꞌ beꞌeczən dižəꞌ naꞌ benən ca gwsoꞌoteꞌ beṉəꞌ caꞌ cui gwsoꞌelaoꞌ ḻen.
\v 16 Naꞌ ḻeczə benən byen par nic̱h gosoꞌozo yoguəꞌ beṉəꞌ señy c̱he bežənꞌ naꞌagaꞌaqueꞌ ḻicha o lao xgagaꞌaqueꞌ, beṉəꞌ blao naꞌ ḻaꞌaṉəꞌ beṉəꞌ cui zɉənaquə blao, naꞌ ḻaꞌaṉəꞌ beṉəꞌ gwniꞌa o beṉəꞌ yašəꞌ, naꞌ ḻaꞌaṉəꞌ beṉəꞌ zɉənaquə esclabos o beṉəꞌ cui zɉənaquə esclabos.
\v 17 Bitobi bi goquə soꞌoteꞌe naꞌ nic goquə bi yesəꞌəziꞌe šə cui zɉəzoeꞌ señy c̱he bežənꞌ o šə cui zɉəzoeꞌ nomero deꞌen zeɉən labənꞌ.
\v 18 Naꞌ nga de to yeḻəꞌ sinꞌ deꞌe əgwzeɉniꞌin chioꞌo c̱he bežənꞌ, naꞌ šə no cheɉniꞌin cheyaḻəꞌ gwlabeꞌ nomero c̱hebənꞌ. Naꞌ nomero c̱hebənꞌ naquən canꞌ chlab chioꞌo beṉac̱h, x̱op gueyoa gyon x̱op.
\c 14
\s1 Deꞌen gwsoꞌoḻ beṉəꞌ caꞌ to gueyoa tapeyon mil gwsoꞌelaogüeꞌe Diozənꞌ
\p
\v 1 Nach bgüiaꞌ naꞌ bleꞌidaꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ, zecheꞌ lao yaꞌa Sionṉəꞌ len togueyoa tapeyon mil beṉəꞌ yoblə. Naꞌ nyoɉ leꞌenəꞌ naꞌ len la X̱eꞌ Diozənꞌ lao xga beṉəꞌ caꞌ.
\v 2 Naꞌ bendaꞌ chsoꞌoḻ beṉəꞌ zan beṉəꞌ žaꞌ yobanꞌ. Naꞌ bendaꞌan ca chsiž catəꞌ dechgua yaonꞌ naꞌ ca nen catəꞌ ḻechguaḻe chṉiṉ, naꞌ bendaꞌ nenən canꞌ choḻ arpanꞌ catəꞌ chəsəꞌəgoḻeꞌ deꞌe zan tšiꞌizə.
\v 3 Naꞌ bendaꞌ chsoꞌoḻeꞌ to imno cobə lao Diozənꞌ ganꞌ chiꞌe chnabiꞌenəꞌ ganꞌ nitəꞌ bia caꞌ tap naꞌ beṉəꞌ golə blao tapechoa caꞌ. Pero beṉəꞌ caꞌ to gueyoa tapeyon mil naꞌazə goc bosoꞌosedeꞌ imnonꞌ par gwsoꞌoḻeꞌen. Beṉəꞌ caꞌanəꞌ zɉənchoɉeꞌ entr beṉac̱hənꞌ chseꞌeɉḻeꞌe de que Jesocristənꞌ gwdixɉueꞌ xtoḻəꞌəchonꞌ.
\v 4 Beṉəꞌ caꞌ chsaꞌaqueneꞌ c̱he tozə Jesocristənꞌ, naꞌ deꞌe naꞌanəꞌ gwxaquəꞌəlebəgaꞌaqueneꞌ ca beṉəꞌ cui chgoꞌo xtoi. Beṉəꞌ caꞌ chsoꞌoneꞌ con canꞌ na Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ. Ḻegaꞌaqueꞌen zɉənchoɉeꞌ entr beṉac̱hənꞌ chseꞌeɉḻeꞌe de que Jesocristənꞌ gwdixɉueꞌ xtoḻəꞌəchonꞌ.
\v 5 Chsoꞌe por dižəꞌ ḻi, naꞌ bitobi bi deꞌe mal da əchen yic̱hɉlaꞌaždaꞌogaꞌaqueꞌenəꞌ.
\s1 Deꞌen gosəꞌəna šoṉə angl
\p
\v 6 Nach bleꞌidaꞌ yetoꞌ angl gwchoḻ yobanꞌ chdeꞌ lao beꞌ. Gwdix̱ɉueꞌineꞌ beṉəꞌ žaꞌ yežlyonꞌ to dižəꞌ güen dižəꞌ cobə c̱he Diozənꞌ deꞌe zaquəꞌ zeɉḻicaṉe. Naꞌ gwdix̱ɉuiꞌen len beṉəꞌ zɉənaquə to to ṉasyon, to to yež, to to dia, naꞌ beṉəꞌ chsoꞌe gwde gwdelə dižəꞌ.
\v 7 Gwṉeꞌ zižɉo gožeꞌ ḻegaꞌaqueꞌ: —Ḻeꞌe gapə Diozənꞌ respet, ḻeꞌe güeꞌ Diozənꞌ yeḻəꞌ balaꞌaṉ, c̱hedəꞌ babžin or goneꞌ castigw beṉəꞌ caꞌ cui chsoꞌelaoꞌ ḻeꞌ. Ḻeꞌe güeꞌelaoꞌ Diozənꞌ benꞌ ben yobanꞌ, yežlyonꞌ, nisdaꞌonəꞌ naꞌ beɉ caꞌ.
\p
\v 8 Naꞌ gwde naꞌ bchoɉ yeto angl, naꞌ gwneꞌ: —Bac̱h bžin ža cuiayiꞌ syoda Babilonianꞌ laꞌ beṉəꞌ gwnabiaꞌ caꞌ žaꞌ syodanꞌ bagwsoꞌoneꞌ par nic̱h beṉəꞌ caꞌ žaꞌ yoguəꞌ ṉasyon caꞌ chosoꞌozoeꞌ Diozənꞌ caꞌaḻə cuich chsoꞌelaogüeꞌeneꞌ.
\p
\v 9 Nach gwde naꞌ bchoɉ angl əgwyoṉe, naꞌ ḻeczə gwṉeꞌ zižɉo gwneꞌ: —Notəꞌətezə beṉəꞌ chsoꞌelaoꞌ bežənꞌ naꞌ lguaꞌa lsaquəꞌ deꞌen naquə ca ḻeb naꞌ notəꞌətezə bagwsoꞌe latɉə bosoꞌozoeꞌ señy c̱he bežənꞌ lao xgagaꞌaqueꞌ o naꞌagaꞌaqueꞌ,
\v 10 ḻegaꞌaqueꞌenəꞌ gon Diozənꞌ castigw gual zeɉḻicaṉe tant chžeꞌe c̱he deꞌe malənꞌ chsoꞌoneꞌ. Yesəꞌəzaquəꞌəziꞌe ganꞌ chaḻəꞌ yiꞌ naꞌ sofr. Naꞌ angl c̱he Diozənꞌ naꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ yesəꞌəleꞌineꞌ canꞌ gac c̱he beṉəꞌ caꞌ.
\v 11 Naꞌ c̱has žen c̱he yiꞌinəꞌ ganꞌ yesəꞌəžaglaogüeꞌ zeɉḻicaṉe, naꞌ do ža do yel bito bi dezcanz gatəꞌ c̱hegaꞌaqueꞌ. Canꞌ gaquə c̱he beṉəꞌ caꞌ chsoꞌelaoꞌ bežənꞌ naꞌ lguaꞌa lsaquəꞌ deꞌe naquə ca ḻeb beṉəꞌ caꞌ zɉəzo señy c̱he labənꞌ lao xgagaꞌaqueꞌ o naꞌagaꞌaqueꞌ.
\v 12 Deꞌe naꞌanəꞌ chonən byen sotezə so chioꞌo bagwleɉ Diozənꞌ par naccho lažəꞌ neꞌenəꞌ goncho canꞌ noneꞌ mendadənꞌ naꞌ sotezə socho gonḻilažəꞌəcho Jesoꞌosənꞌ.
\p
\v 13 Naꞌ bendaꞌ to beṉəꞌ zo yobanꞌ gožeꞌ nadaꞌ: —Bzoɉ de que dezd ṉaꞌa beṉəꞌ caꞌ chsoꞌonḻilažəꞌ X̱ancho Jesocristənꞌ ṉiteꞌe mbalaz catəꞌən saꞌateꞌ. Bzoɉ de que Spirit c̱he Diozənꞌ nan de que deꞌe ḻi ṉiteꞌe mbalaz c̱hedəꞌ Diozənꞌ gwcuezeꞌ deꞌen gwloꞌe lao naꞌagaꞌaqueꞌ soꞌoneꞌ naꞌ Diozənꞌ əžɉsaꞌalažeꞌe yoguəꞌ deꞌe güen deꞌen bagwsoꞌoneꞌ.
\s1 Catəꞌ Diozənꞌ yotobeꞌ cwseš c̱heꞌenəꞌ
\p
\v 14 Nach bgüiaꞌ naꞌ bleꞌidaꞌ to beɉw šyiš ḻeꞌe yobanꞌ naꞌ chiꞌ Xiꞌiṉ Diozənꞌ cožəꞌ beɉonꞌ, naqueꞌ ca to beṉac̱h. Naꞌ zo to coron de or yic̱hɉeꞌenəꞌ naꞌ nox̱eꞌe to oz deꞌen nḻachgua.
\v 15 Naꞌ bchoɉ yeto angl ḻoꞌi ganꞌ chsoꞌelaogüeꞌe Diozənꞌ yobanꞌ naꞌ gwṉeꞌ zižɉo gožeꞌ benꞌ chiꞌ cožəꞌ beɉonꞌ: —Babžin or yetoboꞌ trigw deꞌen goquə lao yežlyonꞌ, laꞌ bagolən. Naꞌ bec̱hoguən.
\p
\v 16 Nach benꞌ chiꞌ cožəꞌ beɉonꞌ bec̱hogueꞌ trigonꞌ len ozənꞌ par beziꞌe cwsešənꞌ.
\p
\v 17 Naꞌ bezchoɉ yeto anglənꞌ ganꞌ chsoꞌelaogüeꞌe Diozənꞌ yobanꞌ naꞌ ḻeczə nox̱eꞌe to oz deꞌen nḻachgua.
\v 18 Nach bezchoɉ yeto anglənꞌ beṉəꞌ zo ganꞌ zo mes ganꞌ chsoꞌelaogüeꞌe Diozənꞌ, benꞌ chapə yiꞌ deꞌen chaḻəꞌ lao mesənꞌ. Naꞌ anglənꞌ gwṉeꞌ zižɉo boḻgüižeꞌ angl əgwchopenꞌ benꞌ ḻeczə nox̱əꞌ ozənꞌ, gožeꞌeneꞌ: —Bagüe obas caꞌ deꞌen žia lao yežlyonꞌ. Bec̱hoggaꞌaquən len oz c̱hioꞌonəꞌ nic̱h yetobəgaꞌacoꞌon.
\p
\v 19 Nach anglənꞌ bec̱hogueꞌ obas caꞌ deꞌen žia lao yežlyonꞌ naꞌ bzaḻeꞌen ḻoꞌo šaꞌ xen de yeɉ ganꞌ chosoꞌosiꞌen par chechoɉ xiseinꞌ. Naꞌ zeɉen dižəꞌ de que Diozənꞌ botobeꞌ beṉəꞌ caꞌ cui bosoꞌozenag c̱heꞌ par benchgüeꞌ ḻegaꞌaqueꞌ castigw.
\v 20 Beṉəꞌ zan juisyənꞌ botobeꞌ naꞌ bnežɉueꞌ castigw c̱hegaꞌaqueꞌenəꞌ, naꞌ tant besəꞌəžaglaogaꞌaqueꞌ xte bleꞌidaꞌ xc̱hengaꞌaqueꞌenəꞌ ca nis obanꞌ deꞌen bosoꞌosieꞌ ḻoꞌo šanꞌ deꞌen chiꞌ fuerlə syodanꞌ. Naꞌ gwžian deꞌe zil lao yežlyonꞌ, bžinten ca tmetr yoꞌo gašɉə yeḻəꞌ zitɉw naꞌ bšilɉon šoṉə gueyoa kiḻometros.
\c 15
\s1 Angl caꞌ gwsoꞌon par nic̱h gotəꞌ gažə castigw deꞌen bseḻəꞌ Diozənꞌ ḻeꞌezelaogüe
\p
\v 1 Naꞌ bleꞌidaꞌ yeto deꞌe ḻechguaḻe zaquəꞌ yebanecho ḻeꞌe yobanꞌ, to deꞌe žialao xen. Bleꞌidaꞌ gažə angl beṉəꞌ naquə lao naꞌagaꞌaqueꞌ soꞌoneꞌ par nic̱h gaquə yegažə deꞌe mal par yeyož əgwloꞌe Diozənꞌ canꞌ chnežɉueꞌ castigw c̱he beṉəꞌ chsoꞌon deꞌe malənꞌ.
\p
\v 2 Naꞌ bleꞌidaꞌ to deꞌen naquə ca to nisdaoꞌ de bidr nc̱hix̱ən len yiꞌ naꞌ lao nisdaꞌonəꞌ zɉəzecha beṉəꞌ caꞌ gwsoꞌon gan cui gwsoꞌelaogüeꞌe bežənꞌ naꞌ lguaꞌa lsaquəꞌ deꞌe naquə ca ḻeb naꞌ ḻeczə cui gwsoꞌe latɉə yesəꞌəniteꞌe señy c̱heb o nomero deꞌen zeɉen labənꞌ. Naꞌ beṉəꞌ caꞌ zɉənox̱eꞌe tgüeɉə arpa deꞌen bnežɉw Diozənꞌ ḻegaꞌaqueꞌ.
\v 3 Naꞌ chsoꞌoḻeꞌ to imno deꞌen naquə ca deꞌen bzeɉniꞌi deꞌe Moisezənꞌ beṉəꞌ Izrael caꞌ, Moisez benꞌ goquə beṉəꞌ güen xšin Diozənꞌ. Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ bzeɉniꞌineꞌ beṉəꞌ caꞌ bleꞌidaꞌ nic̱h chsoꞌoḻeꞌen, naꞌ nan:
\q1 X̱antoꞌ Dioz, leꞌ chonoꞌ miḻagr xen naꞌ bichlə deꞌe zaquəꞌ yebanetoꞌ.
\q1 Lenꞌ napoꞌ ḻeꞌezelaogüe yeḻəꞌ guac xen.
\q1 Naꞌ zdaczoꞌ ḻicha naꞌ chonoꞌ canꞌ naꞌonəꞌ.
\q1 Lenꞌ chnabiꞌo ṉasyon caꞌ.
\q1
\v 4 Gwžin ža catəꞌ yoguəꞌ beṉac̱hənꞌ əsaꞌapeꞌ leꞌ respet naꞌ əsoꞌelaogüeꞌe leꞌ.
\q1 Lenꞌ nacoꞌ beṉəꞌ laꞌaždaoꞌ xiꞌilažəꞌ juisy.
\q1 Naꞌ beṉəꞌ žaꞌ yoguəꞌəḻoḻ ṉasyon əsoꞌelaogüeꞌe leꞌ catəꞌ laꞌaqueꞌ laogoꞌonəꞌ,
\q1 c̱hedəꞌ babesəꞌəleꞌineꞌ de que yoguəꞌəḻoḻ deꞌen babenoꞌonəꞌ benoꞌon canꞌ cheyaḻəꞌ gaquən.
\p
\v 5 Naꞌ gwde deꞌe caꞌ bleꞌidaꞌ nḻaꞌaxeɉə ganꞌ chsoꞌelaogüeꞌe Diozənꞌ yobanꞌ naꞌ naquən ca yoꞌo de lachəꞌ deꞌen gwsoꞌon beṉəꞌ Izrael caꞌ latɉə dašənꞌ ganꞌ gwzo Diozənꞌ len ḻegaꞌaqueꞌ.
\v 6 Naꞌ angl caꞌ gažə, beṉəꞌ caꞌ bleꞌidaꞌ antslə, besyəꞌəchoɉeꞌ ganꞌ chsoꞌelaogüeꞌe Diozənꞌ yobanꞌ, beṉəꞌ caꞌ naquən lao naꞌagaꞌaqueꞌ soꞌoneꞌ par nic̱h gaquə gažə deꞌe mal caꞌ lao yežlyonꞌ. Naꞌ zɉənyazeꞌ lachəꞌ fin deꞌen naquə deꞌe šyiš xiləꞌ juisy, naꞌ choꞌalc̱hoꞌ to togaꞌaqueꞌ zɉənyec̱hɉən sinš de or.
\v 7 Nach to bia caꞌ tap bia caꞌ nitəꞌ lao Diozənꞌ bnežɉob angl caꞌ gažə tgüeɉə tas de or ganꞌ yoꞌožə to deꞌen gwxaquəꞌəleben ca castigw gual deꞌen əgwnežɉo Diozənꞌ beṉəꞌ caꞌ chsoꞌon deꞌe malənꞌ, Dioz benꞌ zoczə zeɉḻicaṉe.
\v 8 Naꞌ deꞌe tant chey cheꞌeniꞌ ganꞌ zo Diozənꞌ naꞌ tant yeḻəꞌ guac xen napeꞌ xte goc ca to ga chas žen ganꞌ chsoꞌelaogüeꞌeneꞌ yobanꞌ. Deꞌe naꞌanəꞌ notono no goc šoꞌo ganꞌ chsoꞌelaogüeꞌeneꞌ xte que catəꞌəch beyož goc deꞌe mal caꞌ gažə deꞌen naquə lao naꞌ angl caꞌ gažə.
\c 16
\s1 Tas caꞌ ganꞌ yoꞌožə deꞌen gwxaquəꞌəlebe ca castigw deꞌen gwnežɉo Diozənꞌ beṉəꞌ mal caꞌ
\p
\v 1 Nach bendaꞌ gwṉe Diozənꞌ zižɉo ganꞌ chsoꞌelaogüeꞌeneꞌ yobanꞌ gožeꞌ angl caꞌ gažəꞌ: —Ḻeꞌe žɉaꞌac ḻeꞌe žɉəcuasə deꞌen yoꞌožə ḻoꞌo tas c̱hele caꞌ lao yežlyonꞌ, laꞌ deꞌen zɉəyoꞌožənṉəꞌ gwxaquəꞌəleben ca castigw gual deꞌen əgwnežɉuaꞌ beṉəꞌ caꞌ chsoꞌon deꞌe malənꞌ.
\p
\v 2 Nach gwyeɉ angl nechənꞌ ɉəcuaseꞌ deꞌen yoꞌožə ḻoꞌo tas c̱heꞌenəꞌ lao yežlyonꞌ naꞌ yoguəꞌ beṉəꞌ caꞌ zɉəzo señy c̱he bežənꞌ naꞌ chsoꞌelaogüeꞌe lguaꞌa lsaquəꞌ deꞌen naquə ca ḻeb gosəꞌəbieꞌ to cḻas yežəꞌ əzban naꞌ gwlachguan.
\p
\v 3 Nach angl əgwchopenꞌ bcuaseꞌ deꞌen yoꞌožə ḻoꞌo tas c̱heꞌenəꞌ lao nisdaꞌonəꞌ naꞌ nisdaꞌonəꞌ beyaquən ca chen c̱he beṉəꞌ guat. Naꞌ gwsaꞌat yoguəꞌ bia caꞌ žaꞌ ḻoꞌo nisənꞌ.
\p
\v 4 Nach angl əgwyoṉenꞌ bcuaseꞌ deꞌen yoꞌožə ḻoꞌo tas c̱heꞌenəꞌ lao yao caꞌ naꞌ beɉ caꞌ naꞌ ḻeczə besyəꞌəyaquən c̱hen.
\v 5 Naꞌ bendaꞌ deꞌen gož anglənꞌ benꞌ chapə nisənꞌ deꞌen de lao yežlyonꞌ, gožeꞌ Diozənꞌ: —X̱antoꞌ Dioz, lenꞌ nacoꞌ beṉəꞌ laꞌaždaoꞌ xiꞌilažəꞌ juisy. Lenꞌ bazoczoꞌ catəꞌən bx̱iꞌo yežlyonꞌ naꞌ zoczoꞌ ṉaꞌa. Naꞌ zdaczoꞌ ḻicha ca deꞌen chnežɉoꞌ beṉəꞌ mal caꞌ castigw quinga deꞌen chsaꞌaqueꞌ.
\v 6 Ḻegaꞌaqueꞌ bagwsoꞌoteꞌ profet caꞌ beṉəꞌ caꞌ gwsoꞌe xtižoꞌonəꞌ naꞌ bagwsoꞌoteꞌ nochlə beṉəꞌ gwleɉoꞌ par gwsaꞌaqueꞌ lažəꞌ naꞌonəꞌ. Deꞌe naꞌanəꞌ babenoꞌ par nic̱h əseꞌeɉeꞌ nis deꞌen babeyac chen. Caꞌaczənꞌ cheyaḻəꞌ gac c̱hegaꞌaqueꞌ.
\p
\v 7 Naꞌ bendaꞌ yeto angl benꞌ zecha choꞌa mes ganꞌ chsoꞌelaogüeꞌe Diozənꞌ gwneꞌ: —X̱antoꞌ Dioz, lənꞌ napoꞌ ḻeꞌezelaogüe yeḻəꞌ guac xen. Deꞌe ḻi zdaczoꞌ ḻicha canꞌ chnežɉoꞌ castigw c̱he beṉəꞌ mal caꞌ naꞌ chonoꞌ canꞌ naꞌonəꞌ.
\p
\v 8 Naꞌ angl əgwdapenꞌ bcuaseꞌ deꞌen yoꞌožə ḻoꞌo tas c̱heꞌenəꞌ lao bgüižənꞌ naꞌ benən par nic̱h bgüižənꞌ bzeyən beṉac̱hənꞌ len yiꞌ c̱heinəꞌ.
\v 9 Ḻechguaḻe bzeyən beṉac̱hənꞌ, pero bito besyəꞌədiṉɉeneꞌ xtoḻəꞌəgaꞌaqueꞌenəꞌ par əsoꞌelaogüeꞌe Diozənꞌ. Nachle bosoꞌožia bosoꞌoniteꞌe Diozənꞌ benꞌ chon par nic̱h chəsəꞌəžaglaogüeꞌ.
\p
\v 10 Naꞌ angl güeyeꞌenəꞌ bcuaseꞌ deꞌen yoꞌožə ḻoꞌo tas c̱heꞌenəꞌ ganꞌ chiꞌ bežənꞌ chnabiꞌab naꞌ beyac žc̱hoḻ doxen ganꞌ chnabiꞌabənꞌ. Naꞌ beṉəꞌ caꞌ žaꞌ ganꞌ chnabiꞌabənꞌ gwsaꞌoyaꞌa ložəꞌəgaꞌaqueꞌenəꞌ tant besəꞌəyiyaꞌa cuerp c̱hegaꞌaqueꞌenəꞌ.
\v 11 Naꞌ bitoczə besyəꞌədiṉɉeneꞌ deꞌe malənꞌ gwsoꞌoneꞌenəꞌ ḻaꞌaṉəꞌəczə besəꞌəžaglaochgüeꞌ, nachle bosoꞌožia bosoꞌoniteꞌe Dioz benꞌ zo yobanꞌ por ni c̱he deꞌen chseꞌey chəsəꞌəlaꞌ cuerp c̱hegaꞌaqueꞌenəꞌ naꞌ por ni c̱he deꞌen zɉəžieꞌ yežəꞌənəꞌ.
\p
\v 12 Naꞌ angl əgwxopenꞌ bcuaseꞌ deꞌen yoꞌožə ḻoꞌo tas c̱heꞌenəꞌ lao yao xen deꞌen nziꞌ Eofrates naꞌ bebiž nis yaonꞌ naꞌ beyalɉo to nez par nic̱h rei caꞌ zaꞌac ganꞌ chlaꞌ bgüižənꞌ yesəꞌəžineꞌ ganꞌ gaquə gwdiḻənꞌ.
\p
\v 13 Nach šoṉə deꞌe x̱ioꞌ caꞌ besyəꞌəyaquən bḻož. Naꞌ to bḻožənꞌ bleꞌidaꞌ bchoɉəb choꞌa beḻənꞌ bianꞌ beyaque gwxiyeꞌenəꞌ, naꞌ yetob bchoɉəb choꞌa bežənꞌ, naꞌ yetob bchoɉəb choꞌa bež əgwchope bianꞌ choeꞌ dižəꞌ gox̱oayaguənꞌ par nic̱h beṉac̱hənꞌ chsoꞌelaogüeꞌe bež nechənꞌ.
\v 14 Deꞌe x̱ioꞌ quinga gwsoꞌonən miḻagr naꞌ ɉəsəꞌətobən yoguəꞌ beṉəꞌ caꞌ chəsəꞌənabiaꞌ doxenḻə lao yežlyonꞌ. Ɉəsəꞌətobən ḻegaꞌaqueꞌ tozə latɉə par nic̱h ṉiteꞌe probnid yesəꞌədiḻəleneꞌ Diozənꞌ benꞌ napə ḻeꞌezelaogüe yeḻəꞌ guac xen catəꞌən əžin žanꞌ nžieꞌ biaꞌ yesəꞌədiḻəleneꞌeneꞌ.
\v 15 Nach bendaꞌ gwna Xiꞌiṉ Diozənꞌ: —Ḻeꞌe gon xbab de que nadaꞌ yidaꞌ əgwnežɉuaꞌ castigw c̱he beṉəꞌ caꞌ chsoꞌon deꞌe malənꞌ, naꞌ senyalaꞌ ḻegaꞌaqueꞌ canꞌ chon to beṉəꞌ bguan. Mbalaz sole šə bazole probnid chbezle nadaꞌ catəꞌən yidaꞌanəꞌ. Pero šə cuiṉəꞌ yediṉɉele deꞌe malənꞌ chonḻe catəꞌən yidaꞌanəꞌ, gonaꞌ ca saꞌacbeꞌi yoguəꞌəḻoḻ beṉac̱hənꞌ ca naquə yoguəꞌ deꞌe mal caꞌ babenḻenꞌ.
\p
\v 16 Nach bezleꞌidaꞌ to latɉə ganꞌ nziꞌ Armagedon dižəꞌ ebreo. Latɉənꞌ nziꞌ caꞌanəꞌ əbtob deꞌe x̱ioꞌ caꞌ beṉəꞌ caꞌ chəsəꞌənabiaꞌ lao yežlyonꞌ.
\p
\v 17 Naꞌ angl gažənꞌ bcuaseꞌ deꞌen yoꞌožə ḻoꞌo tas c̱heꞌenəꞌ lao beꞌ, naꞌ bendaꞌ gwṉe Diozənꞌ zižɉo ganꞌ chsoꞌelaogüeꞌeneꞌ yobanꞌ ganꞌ ḻeczə chiꞌe chnabiꞌe, gwneꞌ: —Bac̱h bseḻaꞌa yoguəꞌ castigw caꞌ deꞌen nžia biaꞌ əseḻaꞌa.
\p
\v 18 Nach gwyep yes, goc sšag, naꞌ gošɉ gwtin, naꞌ ḻechguaḻe gwxoꞌ mazəchlə canꞌ bagwxoꞌ batəꞌətezəchlə lao žaꞌ beṉac̱hənꞌ yežlyonꞌ.
\v 19 Naꞌ ḻeꞌezelaogüe syoda blaoch deꞌen chiꞌ lao yežlyonꞌ gwžiayiꞌin goquən šoṉlə, naꞌ ḻeczə gwžiayiꞌ syoda caꞌ yeziquəꞌəchlə deꞌen zɉəchiꞌ lao yežlyonꞌ. Diozənꞌ bitoch gwlezeꞌ par bnežɉueꞌ castigw c̱he deꞌe malənꞌ bagwsoꞌontec beṉəꞌ caꞌ chəsəꞌənabiaꞌ Babilonianꞌ naꞌ deꞌe naꞌanəꞌ bnežɉueꞌ ḻegaꞌaqueꞌ castigw gual zeɉḻicaṉe tant chžeꞌe c̱he deꞌe malənꞌ gwsoꞌoneꞌenəꞌ.
\v 20 Naꞌ deꞌe tant gwxoꞌochgua xte benitteczə yoguəꞌəḻoḻ islas caꞌ naꞌ yaꞌa caꞌ.
\v 21 Naꞌ ḻeczə gwcheꞌechgua yeɉ žiꞌa lao yežlyonꞌ naꞌ chaꞌagaꞌaquən tapa rob güeɉə to ton. Besəꞌəžaglaochgua beṉəꞌ caꞌ žaꞌ yežlyonꞌ naꞌ bosoꞌožia bosoꞌoniteꞌe Diozənꞌ deꞌen beneꞌ par nic̱h gwcheꞌ yeɉənꞌ.
\c 17
\s1 Castigw deꞌen bnežɉw Diozənꞌ noꞌolə sargatənꞌ
\p
\v 1 Naꞌ lao angl caꞌ gažə beṉəꞌ caꞌ gwsoꞌox̱əꞌ tas de orənꞌ, toeꞌ gožeꞌ nadaꞌ: —Da gwloꞌidaꞌ leꞌ castigw deꞌen əgwnežɉo Diozənꞌ noꞌolə blao noꞌolə sargatənꞌ chiꞌ lao nisdaoꞌ caꞌ.
\v 2 Yoguəꞌ beṉəꞌ chəsəꞌənabiaꞌ lao yežlyonꞌ bagosəꞌəzoleneꞌeneꞌ. Naꞌ yoguəꞌ beṉəꞌ žaꞌ yežlyonꞌ bagwseꞌeɉeꞌ bino deꞌen bnežɉueꞌ ḻegaꞌaqueꞌ par nic̱h gosəꞌəzelažeꞌe gosəꞌənitəꞌəleneꞌ ḻeꞌ.
\p
\v 3 Nach lao ben Spirit c̱he Diozənꞌ par bleꞌidaogüeꞌedaꞌ deꞌe quinga, anglənꞌ gwc̱hiꞌe nadaꞌ latɉə dašənꞌ. Naꞌ bleꞌidaꞌ to noꞌolə žieꞌ cožəꞌ to bež əxṉa bia gažə yic̱hɉənꞌ naꞌ žia ši lozəb. Naꞌ nyoɉ zan dižəꞌ lao cuerp c̱hebənꞌ deꞌen chloeꞌ de que chon cuimb ca Dioz.
\v 4 Naꞌ noꞌolənꞌ nyazeꞌ lachəꞌ morad naꞌ deꞌe xṉa naꞌ non cuineꞌ xoche len or, len yeɉ fin, naꞌ len perlas. Naꞌ nox̱eꞌe to tas de or ganꞌ yoꞌožə to bino. Naꞌ binonꞌ zeɉen dižəꞌ de que chebeineꞌ choneꞌ yoguəꞌəḻoḻ deꞌen chgueꞌi Diozənꞌ naꞌ deꞌen naquə contr Diozənꞌ.
\v 5 Naꞌ lao xgueꞌ naꞌ nyoɉ leꞌenəꞌ, naꞌ ngašəꞌ canꞌ zeɉen, c̱hedəꞌ nan quinga: “Syoda Babilonia deꞌen naquə deꞌe blao. Nadaꞌ chonaꞌ par nic̱h beṉəꞌ žaꞌ yežlyonꞌ bito chsoꞌelaogüeꞌe Diozənꞌ naꞌ chsoꞌoneꞌ bichlə deꞌen chgueꞌi Diozənꞌ.”
\v 6 Naꞌ bleꞌidaꞌ de que chzože noꞌolə naꞌanəꞌ. Chzoženeꞌ c̱hedəꞌ güeꞌeɉeꞌ xc̱hen beṉəꞌ caꞌ gwsoꞌoteꞌenəꞌ beṉəꞌ caꞌ gwsaꞌaqueꞌ lažəꞌ naꞌ Diozənꞌ naꞌ gwsoꞌe dižəꞌ de que chsoꞌonḻilažeꞌe Jesoꞌosənꞌ. Naꞌ catəꞌ bleꞌidaꞌ noꞌolənəꞌ ḻechguaḻe bebandaꞌ canꞌ naqueꞌenəꞌ.
\v 7 Nach gož anglənꞌ nadaꞌ: —Bito yebandoꞌ. Naꞌ gwzeɉniꞌidaꞌ leꞌ bi zeɉen ca deꞌen bleꞌidoꞌ žia noꞌolənꞌ bežənꞌ bia gažə yic̱hɉənꞌ naꞌ žia ši lozəb.
\v 8 Bežənꞌ bianꞌ bleꞌidoꞌon gwzob to tyemp. Bitoch zob ṉaꞌa, pero güidəb deꞌe yoblə laꞌ əchoɉəb ḻoꞌo yech gabiḻənꞌ ganꞌ yoꞌob ṉaꞌa, naꞌ ḻeczə naꞌan yeyoꞌob gaquəb castigw zeɉḻicaṉe. Naꞌ beṉəꞌ caꞌ žaꞌ yežlyonꞌ beṉəꞌ caꞌ cui zɉənyoɉ lagaꞌaqueꞌenəꞌ ḻeꞌe ḻibr ganꞌ nyoɉ la beṉəꞌ caꞌ zɉənapə yeḻəꞌ mban zeɉḻicaṉenꞌ, yesəꞌənaogüeꞌ bežənꞌ naꞌ yesyəꞌəbaneneꞌ canꞌ gwzob antslə, naꞌ caꞌaczənꞌ sob ṉabiꞌab deꞌe yoblə ḻaꞌaṉəꞌəczə cui zob ṉaꞌa. Catəꞌən cuiṉəꞌ x̱e yežlyonꞌ banyoɉ la beṉəꞌ caꞌ zɉənapə yeḻəꞌ mban zeɉḻicaṉe ḻeꞌe ḻibrənꞌ.
\p
\v 9 Naꞌ nga de to yeḻəꞌ sinꞌ deꞌe əgwzeɉniꞌin chioꞌo c̱he bežənꞌ. Yic̱hɉəb caꞌ gažə zeɉen gažə yaꞌa ganꞌ chiꞌ noꞌolənꞌ.
\v 10 Naꞌ ḻeczə yic̱hɉəb caꞌ gažə zeɉen gažə rei. Gueyeꞌe bagosəꞌənabiꞌe naꞌ bagwnit yeḻəꞌ gwnabiaꞌ c̱hegaꞌaqueꞌenəꞌ. Toeꞌ chnabiaꞌ ṉaꞌa, naꞌ benꞌ yeto zeꞌe yideꞌ par ṉabiꞌe pero naꞌ šložganꞌ ṉabiꞌe.
\v 11 Naꞌ bežənꞌ bianꞌ gwzo antslə naꞌ bitoch zob ṉaꞌa zeɉen yeto rei beṉəꞌ gaquə ca beṉəꞌ caꞌ gažə. Goneꞌ yoguəꞌəḻoḻ deꞌe mal ca deꞌen gwsoꞌoneꞌenəꞌ naꞌ ṉabiꞌe xte catəꞌ gon Diozənꞌ par nic̱h cuiayiꞌe zeɉḻicaṉe.
\p
\v 12 Naꞌ lozəb caꞌ ši deꞌen bleꞌidoꞌ zeɉen ši rei beṉəꞌ zeꞌe zaꞌac par yesəꞌənabiꞌe. Naꞌ bežənꞌ gomb par nic̱h yesəꞌənabiꞌe txen len ḻeb tšiꞌizə pero šložganꞌ yesəꞌənabiꞌe len ḻeb.
\v 13 Rei caꞌ ši tozə canꞌ soꞌoneꞌ xbab naꞌ tozə canꞌ soꞌoneꞌ deꞌe malənꞌ. Naꞌ yeḻəꞌ guac deꞌen gatəꞌ c̱hegaꞌaqueꞌenəꞌ naꞌ len yeḻəꞌ gwnabiaꞌanəꞌ yesəꞌəc̱hineꞌen par soꞌoneꞌ con canꞌ yeneꞌe bežənꞌ.
\v 14 Yesəꞌədiḻəleneꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ, naꞌ Jesocristənꞌ goneꞌ ḻegaꞌaqueꞌ gan naꞌ ṉiteꞌe xniꞌenəꞌ, c̱hedəꞌ ḻeꞌenəꞌ chnabiꞌe notəꞌətezəchlə beṉəꞌ blao naꞌ notəꞌətezəchlə rei. Naꞌ beṉəꞌ caꞌ soꞌon txen len Jesocristənꞌ zɉənaqueꞌ beṉəꞌ caꞌ bagwleɉ Diozənꞌ par zɉənaqueꞌ xiꞌiṉeꞌ, naꞌ nitəꞌətezə niteꞌe chsoꞌonḻilažeꞌeneꞌ naꞌ chosoꞌozenagueꞌ c̱heꞌ.
\p
\v 15 Naꞌ anglənꞌ gozneꞌ nadaꞌ: —Nisdaꞌonəꞌ ganꞌ chiꞌ noꞌolə sargatənꞌ zeɉen dižəꞌ de que beṉəꞌ zan juisy beṉəꞌ zɉənaquə zan yež naꞌ zan ṉasyon naꞌ beṉəꞌ chsaꞌac gwde gwdelə dižəꞌ chosoꞌozenagueꞌ c̱he noꞌolənꞌ.
\v 16 Naꞌ bežənꞌ bianꞌ žieꞌenəꞌ gueꞌib ḻeꞌ, naꞌ ḻeczə canꞌ soꞌon rei caꞌ ši, beṉəꞌ caꞌ bleꞌidoꞌ c̱he ši loz bežənꞌ, ḻeczə yesəꞌəgueꞌineꞌ noꞌolənꞌ naꞌ txen len bežənꞌ yesyəꞌəqueꞌe bitəꞌətezə deꞌen de c̱heꞌ naꞌ yesəꞌəcuaꞌaṉeꞌ gaꞌalyideꞌ. Naꞌ soꞌoteꞌeneꞌ nach əsaꞌogüeꞌ xpeleꞌenəꞌ txen len bežənꞌ naꞌ deꞌen yegaꞌaṉənꞌ yosoꞌozeyeꞌen.
\v 17 Soꞌoneꞌ caꞌ c̱hedəꞌ Diozənꞌ cueꞌe xbabənꞌ ḻoꞌo yic̱hɉlaꞌaždaꞌogaꞌaqueꞌenəꞌ par yosoꞌožiayiꞌe noꞌolənꞌ. Deꞌe naꞌanəꞌ ṉacho de que tozə naquə xbab c̱he ši rei caꞌ par soꞌoneꞌ con canꞌ yeneꞌe bežənꞌ xte soꞌoneꞌ yoguəꞌ canꞌ babžia Diozənꞌ biaꞌ gaquə.
\v 18 Naꞌ noꞌolə sargatənꞌ bleꞌidoꞌon naqueꞌ syoda deꞌen naquə ḻeꞌezelaogüe deꞌe blao lao yežlyonꞌ naꞌ deꞌen chnabiaꞌ rei caꞌ beṉəꞌ caꞌ žaꞌ yežlyonꞌ.
\c 18
\s1 Canꞌ gaquə catəꞌ cuiayiꞌ syoda Babilonianꞌ
\p
\v 1 Naꞌ gwde naꞌ bleꞌidaꞌ yeto angl zeꞌe yobanꞌ betɉeꞌ lao yežlyonꞌ. Naꞌ napeꞌ yeḻəꞌ chnabiaꞌ xen par chac canꞌ neꞌenəꞌ, naꞌ yeḻəꞌ chey cheꞌeniꞌ c̱heꞌenəꞌ bseꞌeniꞌin lao yežlyonꞌ.
\v 2 Naꞌ anglənꞌ gwṉeꞌ zižɉo gwneꞌ: —Babžin ža cuiayiꞌ syoda Babilonianꞌ. Gaquən latɉə c̱he angl bzelao caꞌ naꞌ deꞌe x̱ioꞌ caꞌ naꞌ latɉ c̱he yoguəꞌ cḻaste bia zo x̱ileꞌe bia zɉənaquə bia zban par len beṉac̱hənꞌ.
\v 3 Cuiayiꞌin c̱hedəꞌ beṉəꞌ gwnabiaꞌ c̱he syodanꞌ bagwsoꞌoneꞌ par nic̱h beṉəꞌ caꞌ žaꞌ yoguəꞌ ṉasyonṉəꞌ babosoꞌozoeꞌ Diozənꞌ caꞌaḻə naꞌ cuich chsoꞌelaogüeꞌeneꞌ, naꞌ beṉəꞌ caꞌ chəsəꞌənabiaꞌ doxen lao yežlyonꞌ chosoꞌozenagzecheꞌ c̱he beṉəꞌ gwnabiaꞌ c̱he syodanꞌ cle ca c̱he Diozənꞌ. Naꞌ beṉəꞌ güen dilgens caꞌ žaꞌ lao yežlyonꞌ bagwsoꞌonchgüeꞌ gan chsoꞌoteꞌe bi deꞌen chəsəꞌəziꞌ beṉəꞌ gwnabiaꞌ caꞌ par gwsoꞌoncheꞌ deꞌe malənꞌ.
\p
\v 4 Nach bendaꞌ gwṉe yeto beṉəꞌ zo yobanꞌ gwneꞌ: —Leꞌe nacle xiꞌiṉaꞌ ḻeꞌe yechoɉ syoda Babilonianꞌ par nic̱h cui gonḻe txen len deꞌe malənꞌ chsoꞌon beṉəꞌ Babilonia caꞌ, naꞌ par nic̱h cui siꞌile castigonꞌ txen len ḻegaꞌaqueꞌ naꞌ len yeziquəꞌəchlə beṉəꞌ caꞌ chosoꞌozenag c̱hegaꞌaqueꞌ.
\v 5 Ḻechguaḻe deꞌe zan juisy xtoḻəꞌ beṉəꞌ Babilonia caꞌ. Deꞌe naꞌanəꞌ bitoch cuezə Diozənꞌ par əgwnežɉueꞌ castigw c̱hegaꞌaqueꞌ zeɉḻicaṉe.
\v 6 Naꞌ beṉəꞌ gwnabiaꞌ c̱he Babilonianꞌ naꞌ len beṉəꞌ caꞌ chosoꞌozenag c̱hegaꞌaqueꞌ yesəꞌəyiꞌ yesəꞌəzaqueꞌe canꞌ bosoꞌoc̱hiꞌ bosoꞌosaqueꞌe beṉəꞌ yoblə, yesəꞌəžaglaogüeꞌ mazəchlə canꞌ bosoꞌoc̱hiꞌ babosoꞌosaqueꞌe beṉəꞌ yoblə. Ḻechguaḻe castigw gualəch gaquə deꞌen yesəꞌəziꞌenəꞌ clezə ca deꞌen gwsoꞌoneneꞌ beṉəꞌ caꞌ bosoꞌoc̱hiꞌ bosoꞌosaqueꞌe.
\v 7 Naꞌ ca naquə beṉəꞌ gwnabiaꞌ c̱he Babilonianꞌ ḻechguaḻe bagwsoꞌon cuingaꞌaqueꞌ xen naꞌ ḻechguaḻe bagwsoꞌoneꞌ con binꞌ na laꞌaždaꞌomalgaꞌaqueꞌenəꞌ, caꞌaczənꞌ yesəꞌəyiꞌ yesəꞌəzaqueꞌe naꞌ yesyəꞌəgüineꞌeneꞌ. Soꞌoneꞌ xbab ḻoꞌo yic̱hɉlaꞌaždaꞌogaꞌaqueꞌenəꞌ de que cuat te cuich yesəꞌənabiꞌe naꞌ syempr yosoꞌozenag beṉəꞌ c̱hegaꞌaqueꞌ.
\v 8 Pero lao tozə ža gaquə yoguəꞌ deꞌe caꞌ soꞌoneꞌ xbab cuat gaquə c̱hegaꞌaqueꞌ. Beṉəꞌ zan saꞌateꞌ naꞌ gatəꞌəchgua deꞌe yesyəꞌəgüineꞌeneꞌ naꞌ gatəꞌ yeḻəꞌ chbil chdon naꞌ syodanꞌ šeyən naꞌ cuiayiꞌin. Canꞌ gac c̱he syoda Babilonianꞌ, c̱hedəꞌ laꞌ X̱ancho Diozənꞌ len yeḻəꞌ guac c̱heꞌenəꞌ goneꞌ par nic̱h beṉəꞌ gwnabiaꞌ c̱hei caꞌ naꞌ len beṉəꞌ caꞌ chosoꞌozenag c̱hegaꞌaqueꞌ yesəꞌəziꞌe castigonꞌ.
\p
\v 9 Naꞌ beṉəꞌ gwnabiaꞌ caꞌ žaꞌ lao yežlyonꞌ beṉəꞌ caꞌ bosoꞌozenag c̱he beṉəꞌ Babilonia caꞌ par bosoꞌozoeꞌ Diozənꞌ caꞌaḻə naꞌ par gwsoꞌoneꞌ con canꞌ na laꞌaždaꞌomalgaꞌaqueꞌenəꞌ yesəꞌəbežeꞌ naꞌ yesyəꞌəgüineꞌeneꞌ catəꞌ yesəꞌəleꞌineꞌ šey syodanꞌ naꞌ c̱has žen c̱heinꞌ.
\v 10 Yesəꞌəžebeꞌ par yesyəꞌəbigueꞌe gaḻəꞌəzə. Deꞌe naꞌanəꞌ yesyəꞌəgaꞌaṉeꞌ zitəꞌələ yesəꞌəgüieꞌ, naꞌ yesəꞌəneꞌ: —Deꞌe mal juisy bachac c̱he syoda Babilonia nga deꞌen naquə deꞌe blaoch ca syoda caꞌ yeḻaꞌ lao yežlyonꞌ. Bachbiayiꞌ syodanꞌ deꞌen bagwnabiaꞌach lao deꞌe caꞌ zɉəchiꞌ yežlyonꞌ. Lao tozə or baben Diozənꞌ par chbiayiꞌin.
\p
\v 11 Nach beṉəꞌ güen dilgens caꞌ žaꞌ lao yežlyonꞌ ḻeczə yesəꞌəbežeꞌ naꞌ yesyəꞌəgüineꞌeneꞌ catəꞌ cuiayiꞌ syodanꞌ. Yesyəꞌəgüineꞌeneꞌ c̱hedəꞌ cuich no əžel no yesəꞌəziꞌ deꞌen soꞌoteꞌenəꞌ.
\v 12 Bito əžel no yesəꞌəziꞌ deꞌen seꞌeneneꞌ soꞌoteꞌe deꞌen naquə de or, de pḻat, de yeɉ fin, de perlas, naꞌ no lachəꞌ fin de lino naꞌ de sed, lachəꞌ morad naꞌ lachəꞌ xṉa, naꞌ no yag deꞌe chḻaꞌ zix̱, naꞌ yoguəꞌ deꞌe caꞌ chsoꞌoneꞌ de marfil, de yag fin, de brons, de ya na de marmol,
\v 13 naꞌ no canel naꞌ bichlə rcaud caꞌ, no yal, no mirra, no perfome, no bino, no set, no yezɉ fin, no trigw, no goꞌoṉ, no xiləꞌ, no cabey, no carret, naꞌ len no beṉac̱h beṉəꞌ caꞌ soꞌoteꞌe par əsaꞌaqueꞌ esclabos.
\v 14 Naꞌ yesəꞌəneꞌ c̱he syodanꞌ: —Yoguəꞌ deꞌe caꞌ deꞌen gwsaꞌazlažəꞌəchgua beṉəꞌ Babilonia caꞌ yesəꞌəziꞌe lao yeḻəꞌ gwniꞌa c̱hegaꞌaqueꞌenəꞌ cuich gaquə yesəꞌəziꞌen ṉaꞌa. Caguə no beṉəꞌ gwniꞌa šaꞌach Babilonianꞌ ṉaꞌa par zeɉḻicaṉe, naꞌ notoch no no so no yesəꞌəziꞌ deꞌe šaoꞌ deꞌe güen caꞌ deꞌen gosəꞌəziꞌ beṉəꞌ Babilonia caꞌ antslə.
\p
\v 15 Naꞌ ca naquə beṉəꞌ güen dilgens caꞌ beṉəꞌ caꞌ chsoꞌoteꞌe deꞌe šaoꞌ deꞌe güen caꞌ chəsəꞌəziꞌ beṉəꞌ Babilonia caꞌ, bazɉənaqueꞌ beṉəꞌ gwniꞌa por deꞌen chəsəꞌəziꞌ beṉəꞌ Babilonia caꞌ. Ḻegaꞌaqueꞌ yesəꞌəžebeꞌ catəꞌ yesəꞌəleꞌineꞌ canꞌ gaquə c̱he syodanꞌ naꞌ yesəꞌəzecheꞌ zitəꞌələ yesəꞌəbežeꞌ naꞌ yesyəꞌəgüineꞌeneꞌ.
\v 16 Naꞌ yesəꞌəneꞌ: —Deꞌe mal juisyənꞌ bagoc c̱he syoda nga deꞌen goquə blaoch lao syoda caꞌ yeḻaꞌ deꞌen žaꞌ yežlyonꞌ. Beṉəꞌ caꞌ gwžaꞌ syodanꞌ gwsaꞌazeꞌ lachəꞌ fin naꞌ lachəꞌ deꞌe color morad naꞌ deꞌe xṉa. Gwsoꞌon cuingaꞌaqueꞌ xoche len no or, no yeɉ fin naꞌ no perlas.
\v 17 Naꞌ lao tozə or bagwnit yoguəꞌ deꞌe šaoꞌ deꞌe güen c̱hegaꞌaqueꞌ caꞌ.
\p Nach yoguəꞌ x̱an barcw caꞌ naꞌ nochlə beṉəꞌ caꞌ chosoꞌosaꞌ barcw caꞌ naꞌ beṉəꞌ caꞌ chsoꞌon žin ḻoꞌo barcw caꞌ, naꞌ beṉəꞌ caꞌ chɉaꞌac ga yoblə ḻoꞌo barconꞌ, yogueꞌe yesəꞌəzecheꞌ zitəꞌələ yesəꞌəgüieꞌ.
\v 18 Naꞌ catəꞌ yesəꞌəleꞌineꞌ c̱has ženṉəꞌ lao syodanꞌ əsaꞌacbeꞌineꞌ de que cheyənṉəꞌ, naꞌ yesəꞌəneꞌ: —Bitoch bi syoda yoblə chiꞌ lao yežlyonꞌ deꞌe naquə canꞌ goquə syoda nga.
\p
\v 19 Nach yosoꞌožia yic̱hɉgaꞌaqueꞌen bište yonꞌ tant ṉiteꞌe trist, naꞌ yesəꞌəbežyašeꞌe naꞌ yesyəꞌəgüineꞌeneꞌ, yesəꞌəneꞌ: —Deꞌe mal juisy bagoc c̱he syoda nga deꞌen goquə blaoch ca syoda caꞌ yeḻaꞌ lao yežlyonꞌ. Por yeḻəꞌ gwniꞌa c̱he beṉəꞌ caꞌ gwžaꞌ naꞌ yoguəꞌ chioꞌo bencho gan xen ca naquə žinṉəꞌ babencho len barcw c̱hecho quinga. Naꞌ ṉaꞌa lao tozə or bagwžiayiꞌ syodanꞌ.
\p
\v 20 Naꞌ to beṉəꞌ zo yobanꞌ gwneꞌ: —Ḻedoyebei chioꞌo zocho yobanꞌ, naꞌ ḻeꞌe yebei leꞌe apostol naꞌ leꞌe profet naꞌ len leꞌe yeziquəꞌəchlə bagwleɉ Diozənꞌ par nacle lažəꞌ neꞌenəꞌ, c̱hedəꞌ Diozənꞌ goneꞌ castigw c̱he beṉəꞌ Babilonia caꞌ por ni c̱he deꞌen babosoꞌoc̱hiꞌ babosoꞌosaqueꞌe leꞌe.
\p
\v 21 Nach to angl gual bcoseꞌ to yeɉ xen ca yeɉ caꞌ chsoꞌon žin ganꞌ žaꞌ molin, naꞌ bzaḻeꞌen ḻoꞌo nisdaꞌonəꞌ. Nach gwneꞌ: —Canꞌ gaquə c̱he syoda Babilonianꞌ, ṉitən canꞌ gwnit yeɉ xenṉəꞌ deꞌen bzaḻaꞌa ḻoꞌo nisdaꞌonəꞌ, cuatəch leꞌichon deꞌe yoblə.
\v 22 Cuatəch yesəꞌəcuež beṉəꞌ gocuež caꞌ Babilonianꞌ. Naꞌ cuatəch əsoꞌoḻeꞌ lao lquey c̱he syodanꞌ. Cuatəch yosoꞌogoḻeꞌ arpa o yosoꞌocuežeꞌ bžeɉo lao syodanꞌ. Notoch no ṉitəꞌ no soꞌon žin lao syodanꞌ, naꞌ cuatəch yenecho sšag c̱he yišə deꞌen chsoꞌote noꞌol caꞌ.
\v 23 Ni quech leꞌicho beꞌeniꞌ c̱he lampara lao syodanꞌ, naꞌ ni que yenchecho beṉəꞌ soꞌon ḻegr lao yeḻəꞌ gošagnaꞌ, c̱hedəꞌ notoch no šaꞌach naꞌ. Cuiayiꞌ syoda c̱he beṉəꞌ güen dilgens caꞌ, ḻaꞌaṉəꞌəczə ḻegaꞌaqueꞌ zɉənaqueꞌ beṉəꞌ blao lao yežlyonꞌ. Beṉəꞌ Babilonia caꞌ babesəꞌəx̱oayagueꞌ beṉəꞌ žaꞌ yoguəꞌ ṉasyon ca naquənꞌ gwsoꞌoneꞌenəꞌ.
\p
\v 24 Bagwsoꞌoteꞌ profet caꞌ naꞌ notəꞌətezəchlə beṉəꞌ gwleɉ Diozənꞌ par gwsaꞌaqueꞌ lažəꞌ neꞌenəꞌ, naꞌ beṉəꞌ Babilonia caꞌ zɉənapeꞌ doḻəꞌ c̱he yoguəꞌ nochlə beṉəꞌ bagwsoꞌoteꞌ doxen lao yežlyonꞌ. Deꞌe naꞌanəꞌ cuiayiꞌ syoda c̱hegaꞌaqueꞌenəꞌ.
\c 19
\p
\v 1 Gwde naꞌ bendaꞌ angl zan juisy beṉəꞌ žaꞌ yobanꞌ chsoꞌelaogüeꞌe Diozənꞌ naꞌ zižɉo nen catəꞌən gosəꞌəneꞌ:
\q1 Beṉəꞌ güen juisy naquə Dioz c̱hechonꞌ.
\q1 Ḻeꞌenəꞌ babeneꞌ par nic̱h beṉəꞌ caꞌ chsoꞌonḻilažəꞌ ḻeꞌ cui žɉəyaꞌaqueꞌ lao yiꞌ gabiḻənꞌ.
\q1 Chey cheꞌeniꞌichgua ganꞌ zoeꞌenəꞌ naꞌ napeꞌ yeḻəꞌ guac xen.
\q1
\v 2 Zdaczeꞌ ḻicha ca deꞌen chnežɉueꞌ castigw c̱he beṉəꞌ caꞌ chsoꞌon deꞌe malənꞌ, naꞌ choneꞌ complir canꞌ neꞌenəꞌ.
\q1 Baben Diozənꞌ castigw c̱he syoda əblao deꞌen gwxaquəꞌəlebe ca to noꞌolə sargat
\q1 laogüe deꞌen gwsoꞌon beṉəꞌ gwnabiaꞌ c̱hei caꞌ par nic̱h beṉəꞌ žaꞌ doxen lao yežlyonꞌ bosoꞌozoeꞌ Diozənꞌ caꞌaḻə cui gwsoꞌelaogüeꞌeneꞌ.
\q1 Deꞌe naꞌanəꞌ Diozənꞌ babseḻeꞌe castigw deꞌen cheyaḻəꞌ yesəꞌəziꞌe ca naquənꞌ gwsoꞌoteꞌ beṉəꞌ caꞌ chsoꞌelaoꞌ ḻeꞌ.
\p
\v 3 Nach deꞌe yoblə gosəꞌəneꞌ: —Beṉəꞌ güen juisyənꞌ naquə Diozənꞌ. Zeɉḻicaṉenꞌ c̱has ženṉəꞌ ganꞌ chey syodanꞌ.
\p
\v 4 Nach beṉəꞌ golə beṉəꞌ blao caꞌ tapechoa besəꞌəzo xibeꞌ gwsoꞌelaogüeꞌe Diozənꞌ ganꞌ chiꞌe chnabiꞌenəꞌ, gosəꞌəneꞌ: —Caꞌašgaczə gaquə. Beṉəꞌ güen juisyənꞌ naquəczə Diozənꞌ.
\p Naꞌ ḻeczə caꞌ gwsoꞌon bia caꞌ tap, bia caꞌ nitəꞌ lao Diozənꞌ ganꞌ chiꞌe chnabiꞌenəꞌ.
\p
\v 5 Nach bendaꞌ gwṉe to angl do ganꞌ chiꞌ Diozənꞌ chnabiꞌe, naꞌ gwneꞌ:
\q1 Ḻedoyeꞌelaꞌoch Dioz c̱hechonꞌ, chioꞌo naccho beṉəꞌ güen žin c̱heꞌ naꞌ chapchoneꞌ respet,
\q1 chioꞌo naccho beṉəꞌ blao naꞌ len chioꞌo cui naccho beṉəꞌ blao.
\s1 Yeḻəꞌ gošagnaꞌ c̱he Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ
\p
\v 6 Nach ḻeczə bendaꞌ xṉe c̱he yezan beṉəꞌ chsoꞌelaogüeꞌe Diozənꞌ. Naꞌ xṉenꞌ nenən canꞌ chsiž yaonꞌ catəꞌ dechguan naꞌ ca nen catəꞌən ḻechguaḻe chašɉw chtin. Naꞌ gosəꞌəneꞌ:
\q1 Beṉəꞌ güen juisy naquə X̱ancho Diozənꞌ.
\q1 Napeꞌ ḻeꞌezelaogüe yeḻəꞌ guac xen naꞌ chnabiꞌe.
\q1
\v 7 Ḻedoyebei, ḻedoso mbalaz, naꞌ ḻedoyeꞌelaꞌoch ḻeꞌ,
\q1 c̱hedəꞌ babžin ža əgwšagnaꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\q1 Bazo noꞌolənꞌ siꞌe par gaqueꞌ xoꞌoleꞌ.
\q1
\v 8 Naꞌ baben Jesocristənꞌ par nic̱h noꞌolənꞌ nyazeꞌ lachəꞌ fin deꞌen naquə šyiš xiləꞌ juisy naꞌ deꞌen cui naquə manch.
\m Naꞌ lachəꞌ fin deꞌen ṉacho nyaz noꞌolənꞌ deꞌen naquə deꞌe šyiš zeɉen dižəꞌ de que chioꞌo bagwleɉ Diozənꞌ par naccho lažəꞌ neꞌenəꞌ zotezə zocho choncho deꞌe güenṉəꞌ.
\p
\v 9 Nach anglənꞌ boḻgüižeꞌ nadaꞌ deꞌe yoblə gwneꞌ: —Bzoɉ de que mbalaz beṉəꞌ caꞌ bazɉənaquə combid par əžɉaꞌaqueꞌ ganꞌ gaquə yeḻəꞌ gošagnaꞌ c̱he Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\p Naꞌ anglənꞌ ḻeczə gožeꞌ ndaꞌ: —Diozənꞌ babeneꞌ par nic̱h gwniaꞌ caꞌ, naꞌ naquən deꞌe ḻi.
\p
\v 10 Nach bzo xibaꞌ par güeꞌelaoguaꞌa anglənꞌ, pero anglənꞌ bito beꞌe latɉə, gwneꞌ: —Bito gonoꞌ caꞌ. Beꞌelaoꞌ Diozənꞌ. Nadaꞌ nacaꞌ to beṉəꞌ güen xšineꞌ canꞌ nacoꞌ leꞌ naꞌ lɉuežɉoꞌ caꞌ beṉəꞌ caꞌ ḻeczə chsoꞌe dižəꞌ de que chsoꞌonḻilažeꞌe Jesoꞌosənꞌ.
\p Naꞌ caꞌaczənꞌ naquən, notəꞌətezcho choꞌecho dižəꞌ de que chonḻilažəꞌəcho Jesoꞌosənꞌ, zo Spirit c̱he Diozənꞌ len chioꞌo chonən ca choꞌecho xtižeꞌenəꞌ.
\s1 Benꞌ žia cožəꞌ cabey šyišənꞌ
\p
\v 11 Nach bleꞌidaogüeꞌedaꞌ nḻaꞌaxeɉə yobanꞌ naꞌ bleꞌidaꞌ to cabey šyiš naꞌ Jesoꞌosənꞌ žieꞌ cožəꞌəbənꞌ. Ḻenꞌ choneꞌ par nic̱h chac canꞌ neꞌenəꞌ naꞌ ḻeꞌ syempr choeꞌ dižəꞌ ḻi. Zdaczeꞌ ḻicha ca deꞌen chc̱hoglaogüeꞌen c̱he yoguəꞌəḻoḻ beṉəꞌ šə nonꞌ napə doḻəꞌ, naꞌ zdaczeꞌ ḻicha canꞌ chdiḻəleneꞌ deꞌe malənꞌ.
\v 12 Ɉelaogüeꞌ caꞌ chsaꞌactitən ca to yiꞌ deꞌe chaḻəꞌəṉiṉ, naꞌ zan coron nitəꞌ yic̱hɉeꞌenəꞌ, naꞌ lao xgueꞌenəꞌ nyoɉ yeto leꞌ deꞌen cui nombiaꞌ nochlə beṉəꞌ.
\v 13 Naꞌ nyazeꞌ to lachəꞌ deꞌe dopə chen, naꞌ yosoꞌosiꞌ beṉəꞌ ḻeꞌ Xtižəꞌ Diozənꞌ.
\v 14 Naꞌ angl caꞌ žaꞌ yobanꞌ beṉəꞌ zɉənaquə soḻdad c̱he Diozənꞌ gosəꞌənaogüeꞌeneꞌ, zɉənyazeꞌ lachəꞌ fin deꞌen naquə deꞌe šyiš naꞌ deꞌe cui naquə manch, naꞌ yogueꞌe zɉəžieꞌ cabey šyiš.
\v 15 Naꞌ choꞌenəꞌ zo to spad deꞌe nḻachguan par nic̱h gwzoꞌe beṉəꞌ caꞌ žaꞌ yoguəꞌ ṉasyon xniꞌenəꞌ. Ṉabiꞌe ḻegaꞌaqueꞌ naꞌ goneꞌ ca yesəꞌəzex̱ɉw yic̱hɉgaꞌaqueꞌ laogüeꞌenəꞌ. Ḻeꞌenəꞌ əgwnežɉueꞌ castigw c̱he beṉəꞌ caꞌ chsoꞌon deꞌe malənꞌ, c̱hedəꞌ chžaꞌachgua Diozənꞌ ḻegaꞌaqueꞌ, Dioz benꞌ napə ḻeꞌezelaogüe yeḻəꞌ guac xen.
\v 16 Naꞌ ḻeꞌe xadoṉ c̱he Jesoꞌosənꞌ naꞌ len ḻeꞌe ṉiꞌenəꞌ nyoɉ dižəꞌ quinga: “Nadaꞌ chnabiꞌa notəꞌətezəchlə rei naꞌ notəꞌətezəchlə beṉəꞌ blao.”
\p
\v 17 Nach bleꞌidaꞌ to angl zecheꞌ lao bgüižənꞌ naꞌ boḻgüižeꞌ yoguəꞌ cḻaste šod caꞌ bia caꞌ chaš ḻeꞌe yobanꞌ naꞌ gožeꞌ ḻegaꞌaquəb zižɉo: —Ḻeꞌe da ḻeyedobə nga par gaole to xšeꞌ xen deꞌe goṉ Diozənꞌ leꞌe.
\v 18 Gatəꞌ xpeləꞌ rei, naꞌ xpeləꞌ no comandant naꞌ no beṉəꞌ gual. Gatəꞌ xpeləꞌ cabey naꞌ xpeləꞌ beṉəꞌ caꞌ gosəꞌəbia ḻegaꞌaquəb. Gatəꞌ xpeləꞌ yoguəꞌ cḻaste beṉəꞌ, beṉəꞌ gwsaꞌac esclabos naꞌ beṉəꞌ cui gwsaꞌac esclabos, beṉəꞌ gwsaꞌac beṉəꞌ blao naꞌ beṉəꞌ cui gwsaꞌac beṉəꞌ blao.
\p
\v 19 Naꞌ bleꞌidaꞌ bež gaž yic̱hɉənꞌ naꞌ bežənꞌ yeto len yoguəꞌəḻoḻ rei caꞌ naꞌ yoguəꞌ soḻdad zan c̱he rei caꞌ. Bac̱h niteꞌe probnid par yesəꞌədiḻəleneꞌ Jesoꞌosənꞌ benꞌ žia cožəꞌ cabey šyišənꞌ naꞌ len soḻdad c̱heꞌ caꞌ.
\v 20 Naꞌ bež nechənꞌ len bia əgwchopenꞌ bianꞌ choeꞌ dižəꞌ gox̱oayag par nic̱h beṉac̱hənꞌ chsoꞌelaogüeꞌe bež nechənꞌ, c̱hopteb besəꞌədoḻəꞌ naꞌ gwsaꞌaquəb lao naꞌ Jesoꞌosənꞌ. Bež əgwchope naꞌanəꞌ bianꞌ ben deꞌe zan deꞌe besyəꞌəbane beṉəꞌ lao bež nechənꞌ par bx̱oayaguəb beṉəꞌ caꞌ nitəꞌ señy c̱he bež nechənꞌ naꞌ beṉəꞌ caꞌ chseꞌeɉṉiꞌalažəꞌ lguaꞌa lsaquəꞌ deꞌen naquə ca ḻeb. Naꞌ ṉezɉəmbangaꞌaquəb bzaḻəꞌ Jesoꞌosənꞌ ḻegaꞌaquəb ḻoꞌo yiꞌ gabiḻənꞌ ganꞌ chaḻəꞌ sofrənꞌ, to yiꞌ xen deꞌen naquə ca to nisdaoꞌ.
\v 21 Naꞌ Jesoꞌosənꞌ benꞌ žia cožəꞌ cabey šyišənꞌ beteꞌ rei caꞌ naꞌ soḻdad zan c̱hegaꞌaqueꞌ caꞌ len spadənꞌ deꞌen zo choꞌenəꞌ deꞌen nḻachgua. Nach yoguəꞌəḻoḻ šod caꞌ gwsaꞌoxatəb xpeləꞌəgaꞌaqueꞌenəꞌ.
\c 20
\s1 Canꞌ gaquə lao tmil iz
\p
\v 1 Naꞌ bleꞌidaꞌ to angl beṉəꞌ zo yobanꞌ betɉeꞌ par bsalɉueꞌ yech gabiḻənꞌ, naꞌ nox̱eꞌe to gden xen.
\v 2 Naꞌ anglənꞌ bṉizeꞌ beḻənꞌ bianꞌ beyaque gwxiyeꞌenəꞌ ža gwlasdaꞌote, deꞌen le Satanas, naꞌ bc̱heɉeꞌeb gdenṉəꞌ par tmil iz.
\v 3 Nach bzaḻeꞌeb ḻoꞌo yech gabiḻənꞌ naꞌ ḻeꞌe bseyɉwtieꞌ choꞌa yechənꞌ, naꞌ bc̱hišeꞌen to sey. Beneꞌ caꞌ par nic̱h cuich x̱oayaguəb beṉəꞌ žaꞌ yežlyonꞌ xte catəꞌ te tmil iz. Canaꞌach yosežeꞌeb yechoɉəb yeto tyemp daoꞌ.
\p
\v 4 Nach bleꞌidaꞌ zɉəchiꞌ beṉəꞌ chəsəꞌənabiaꞌ txen len Cristənꞌ naꞌ yogueꞌe len ḻeꞌ gosəꞌəc̱hoglaogüeꞌen c̱he beṉac̱hənꞌ šə nonꞌ napə doḻəꞌ. Naꞌ beṉəꞌ caꞌ chəsəꞌənabiaꞌ len ḻeꞌ zɉənaqueꞌ beṉəꞌ caꞌ cui əgwsoꞌelaoꞌ bežənꞌ nic lguaꞌa lsaquəꞌ deꞌen naquə ca ḻeb, naꞌ bito gwsoꞌe latɉə yosoꞌozoeꞌ señy c̱hebənꞌ lao xgagaꞌaqueꞌenəꞌ o naꞌagaꞌaqueꞌenəꞌ. Gwsoꞌe dižəꞌ de que chsoꞌonḻilažeꞌe Jesoꞌosənꞌ, naꞌ bosoꞌozenagueꞌ c̱he xtižəꞌ Diozənꞌ. Deꞌe naꞌanəꞌ beṉəꞌ caꞌ chəsəꞌəgueꞌi Diozənꞌ gwsoꞌoteꞌ ḻegaꞌaqueꞌ gosəꞌəc̱hogueꞌ yengaꞌaqueꞌenəꞌ. Pero babesyəꞌəbaneꞌ ladɉo beṉəꞌ guat caꞌ nic̱h chəsəꞌənabiꞌe txen len Cristənꞌ tmil iz.
\v 5 Cristənꞌ boḻis bosbaneꞌ ḻegaꞌaqueꞌ ladɉo beṉəꞌ guat caꞌ antslə ca beṉəꞌ yeziquəꞌəchlə. Naꞌ catəꞌ te yesəꞌənabiꞌe tmil iz, canaꞌach yeziquəꞌəchlə beṉəꞌ caꞌ bagwsaꞌat yesyəꞌəbaneꞌ ladɉo beṉəꞌ guat caꞌ.
\v 6 Mbalaz par beṉəꞌ caꞌ baboḻis bosban Cristənꞌ ladɉo beṉəꞌ guat caꞌ antslə zeꞌe solao tmil izənꞌ, beṉəꞌ caꞌ bagwleɉ Diozənꞌ par zɉənaqueꞌ lažəꞌ neꞌenəꞌ. Bito gac c̱hegaꞌaqueꞌ canꞌ gac c̱he beṉəꞌ caꞌ yesəꞌəžaglaochgua zeɉḻicaṉe. Naꞌ deꞌen yesəꞌəžaglaochgüeꞌ zeɉḻicaṉe ḻenṉəꞌ ṉacho yeḻəꞌ got əgwchopenꞌ. Naꞌ beṉəꞌ caꞌ zɉənaqueꞌ lažəꞌ naꞌ Diozənꞌ ṉitəꞌətezə ṉiteꞌe əsoꞌelaogüeꞌeneꞌ naꞌ əsoꞌelaogüeꞌe Cristənꞌ canꞌ gwnitəꞌətezə gwnitəꞌ bx̱oz c̱he beṉəꞌ Izrael caꞌ gwseꞌeɉṉiꞌalažeꞌe Diozənꞌ. Naꞌ beṉəꞌ caꞌ zɉənon cuingaꞌaqueꞌ lažəꞌ naꞌ Diozənꞌ ḻegaꞌaqueꞌ yesəꞌənabiꞌe txen len Cristənꞌ tmil iz.
\p
\v 7 Naꞌ catəꞌ bagoc tmil iz chəsəꞌənabiꞌe, Diozənꞌ güeꞌe latɉə yechoɉ gwxiyeꞌenəꞌ deꞌen leꞌ Satanas ḻoꞌo yech gabiḻənꞌ ganꞌ yoꞌon.
\v 8 Naꞌ yechoɉən par əx̱oayaguən beṉəꞌ caꞌ žaꞌ doxenḻə lao yežlyonꞌ deꞌe yoblə, beṉəꞌ caꞌ chəsəꞌəneꞌ Gog naꞌ Magog. Gwxiyeꞌenəꞌ əx̱oayaguən ḻegaꞌaqueꞌ naꞌ əgwtobən ḻegaꞌaqueꞌ par yesəꞌədiḻəleneꞌ Cristənꞌ. Naꞌ beṉəꞌ zan juisy əgwtobən contr Cristənꞌ ca yox zanṉəꞌ deꞌen chiꞌ choꞌa nisdaoꞌ.
\v 9 Nach bleꞌidaogüeꞌedaꞌ chac caꞌ, zaꞌac beṉəꞌ zan doxenḻə lao yežlyonꞌ naꞌ gwseꞌec̱hɉeꞌ syodanꞌ chaque Diozənꞌ c̱hei ganꞌ žaꞌ beṉəꞌ caꞌ bagwleɉeꞌ par zɉənaqueꞌ lažəꞌ neꞌenəꞌ. Nach Diozənꞌ beneꞌ par nic̱h bchoɉ yiꞌinəꞌ yobanꞌ bžinten lao yežlyonꞌ par bžiayiꞌin beṉəꞌ caꞌ babtob gwxiyeꞌenəꞌ.
\v 10 Naꞌ ca naquə gwxiyeꞌenəꞌ deꞌen bx̱oayag beṉəꞌ žaꞌ yežlyonꞌ, Cristənꞌ bzaḻeꞌen lao yiꞌ gabiḻənꞌ ganꞌ chaḻəꞌ sofrənꞌ, ḻoꞌo yiꞌ xen deꞌen naquə ca to nisdaoꞌ. Bzaḻeꞌen ganꞌ bzaḻeꞌe bež nechənꞌ naꞌ bež əgwchope bianꞌ bx̱oayaguəb beṉac̱hənꞌ len dižəꞌ güenḻažəꞌ c̱hebənꞌ. Naꞌ chəsəꞌəžaglao gwxiyeꞌenəꞌ len bež caꞌ ḻoꞌo yiꞌ gabiḻənꞌ do ža do yel par zeɉḻicaṉe.
\s1 Diozənꞌ gwc̱hoglaogüeꞌen c̱he beṉəꞌ caꞌ bagwsaꞌat šə nonꞌ napə doḻəꞌ
\p
\v 11 Nach bleꞌidaꞌ chiꞌ Diozənꞌ lao to siy xen deꞌen naquə deꞌe šyiš naꞌ chnabiꞌe. Naꞌ ḻeczə bleꞌidaꞌ benitteczə yežlyonꞌ naꞌ deꞌe caꞌ chleꞌicho ḻeꞌe yobanꞌ c̱hedəꞌ bitoch byažɉgaꞌaquen.
\v 12 Naꞌ bleꞌidaꞌ beṉəꞌ caꞌ bagwsaꞌat sin cui gwsoꞌonḻilažeꞌe Jesocristənꞌ, beṉəꞌ caꞌ gwsaꞌac beṉəꞌ blao naꞌ len beṉəꞌ caꞌ cui gwsaꞌac beṉəꞌ blao. Yogueꞌe zɉəzecheꞌ lao Diozənꞌ. Nach Diozənꞌ bzašeꞌ ḻibr caꞌ ganꞌ zɉənyoɉ yoguəꞌ deꞌe caꞌ gwsoꞌon to togaꞌaqueꞌ. Nach gwde naꞌ bzašeꞌ yeto ḻibr ganꞌ zɉənyoɉ la beṉəꞌ caꞌ zɉənapeꞌ yeḻəꞌ mban zeɉḻicaṉenꞌ. Naꞌ yoguəꞌ beṉəꞌ caꞌ gwsaꞌat sin cui gwsoꞌonḻilažeꞌe Jesocristənꞌ gwc̱hoglaogüeꞌen c̱hegaꞌaqueꞌ de que yesəꞌəziꞌe castigw segon binꞌ gwsoꞌon to togaꞌaqueꞌ, con canꞌ nyoɉ ḻeꞌe ḻibr caꞌ.
\v 13 Naꞌ yoguəꞌ beṉəꞌ bagwsaꞌat ḻoꞌo nisdaꞌonəꞌ sin cui gwsoꞌonḻilažeꞌe Jesocristənꞌ lenczəgaꞌaqueꞌ besyəꞌəchoɉeꞌ par gosəꞌəzecheꞌ lao Diozənꞌ naꞌ ḻeꞌegatezə caꞌ yoguəꞌ beṉəꞌ bagwsaꞌat gatəꞌətezəchlə ḻeczə besyəꞌəchoɉeꞌ latɉ c̱he beṉəꞌ guat caꞌ. Naꞌ Diozənꞌ gwc̱hoglaogüeꞌen c̱he to togaꞌaqueꞌ de que yesəꞌəziꞌe castigw segon canꞌ gwsoꞌoneꞌ.
\v 14 Nach Diozənꞌ bcuezeꞌ yeḻəꞌ gotənꞌ deꞌen ṉacho deꞌe neche. Beneꞌ par nic̱h cuich no yežin latɉə c̱he beṉəꞌ guat caꞌ. Naꞌ deꞌen yesəꞌəzaquəꞌəziꞌ beṉəꞌ güen deꞌe mal caꞌ ḻoꞌo yiꞌ gabiḻənꞌ zeɉḻicaṉe, ḻenṉəꞌ deꞌen ṉacho yeḻəꞌ got əgwchopenꞌ.
\v 15 Yoguəꞌ nonꞌ cui nyoɉ leinəꞌ ḻeꞌe ḻibr ganꞌ nyoɉ la beṉəꞌ caꞌ zɉənapeꞌ yeḻəꞌ mban zeɉḻicaṉe, bosoꞌozaḻeꞌeneꞌ ḻoꞌo yiꞌ gabiḻənꞌ deꞌen naquə deꞌe xen ca nisdaoꞌ.
\c 21
\s1 Yežlyonꞌ beyaquən deꞌe cobə len deꞌe caꞌ chleꞌicho ḻeꞌe yobanꞌ
\p
\v 1 Gwde naꞌ bleꞌidaꞌ deꞌe caꞌ chleꞌicho ḻeꞌe yobanꞌ zɉənaquən deꞌe cobə, naꞌ ḻeczə bleꞌidaꞌ yežlyonꞌ deꞌe cobə. Ca naquə deꞌe caꞌ zɉənḻaꞌ ḻeꞌe yobanꞌ antslə, naꞌ ca naquə yežlyonꞌ deꞌen banombiꞌacho, bagwde c̱hegaꞌaquən. Naꞌ ḻeczə nisdaꞌonəꞌ bagwde c̱hei.
\v 2 Nadaꞌ Juan bleꞌidaꞌ syoda c̱he Diozənꞌ, syoda Jerosalenṉəꞌ deꞌen naquə deꞌe cobə deꞌen chiꞌ yobanꞌ ganꞌ zo Diozənꞌ, bleꞌidaꞌ bletɉeꞌen lao yežlyonꞌ. Banonšaogüeꞌen naꞌ banoneꞌen xoche ca to noꞌolə chpaꞌa cuineꞌ catəꞌ chšagneꞌe.
\v 3 Nach do ganꞌ chiꞌ Diozənꞌ chnabiꞌe bendaꞌ gwṉe to anglənꞌ zižɉo gwneꞌ: —Syoda c̱he Diozənꞌ babžinən ganꞌ žaꞌ beṉac̱hənꞌ naꞌ Diozənꞌ soeꞌ len ḻegaꞌaqueꞌ. Beṉac̱h caꞌ əsaꞌaqueꞌ xiꞌiṉeꞌ naꞌ ḻeꞌ gaqueꞌ Dioz c̱hegaꞌaqueꞌ benꞌ əsoꞌelaogüeꞌe.
\v 4 Naꞌ Diozənꞌ goneꞌ par nic̱h cuich ṉiteꞌe trist, notoch no gat, naꞌ notoch no no yegüineꞌe, ni que gaquə bi deꞌen yesəꞌəžaglaogüeꞌ o bi deꞌen gon par yesəꞌəbežeꞌ. Bagwde c̱he yoguəꞌ deꞌe caꞌ zɉənac caꞌ deꞌen gotəꞌ lao yežlyo nechənꞌ.
\p
\v 5 Nach Diozənꞌ benꞌ chiꞌ chnabiaꞌ gwneꞌ: —Nadaꞌ chocobaꞌ yoguəꞌəḻoḻ deꞌen de.
\p Naꞌ ḻeczə gwneꞌ: —Bzoɉ deꞌe quinga c̱hedəꞌ nadaꞌ chonaꞌ canꞌ niaꞌanəꞌ naꞌ syempr choꞌa dižəꞌ ḻi.
\p
\v 6 Nach gozneꞌ nadaꞌ: —Bac̱h goc canꞌ gwniꞌanəꞌ. Nadanꞌ nacaꞌ benꞌ ben yežlyonꞌ naꞌ nadaꞌ nacaꞌ benꞌ gon par nic̱h te c̱hei. Nadanꞌ bazoczaꞌ catəꞌən bx̱iꞌa yežlyonꞌ naꞌ caꞌaczənꞌ soaꞌ catəꞌən yeyož yedon. Notəꞌətezə beṉəꞌ cheneꞌeneꞌ siꞌe deꞌen gwnežɉuaꞌaneꞌ, gwnežɉuaꞌaneꞌ yeḻəꞌ mban zeɉḻicaṉe deꞌen gwxaquəꞌəlebe ca nis yaꞌa deꞌen cheꞌeɉcho catəꞌən chbiḻecho, naꞌ gwnežɉuaꞌaneꞌen sin cui bi yesəꞌəyixɉueꞌ c̱hei.
\v 7 Naꞌ notəꞌətezə beṉəꞌ šə chəsəꞌəzoineꞌ cui chosoꞌozenagueꞌ c̱he deꞌe malənꞌ, gac c̱hegaꞌaqueꞌ yoguəꞌ deꞌe güen caꞌ deꞌen babiꞌa dižəꞌ c̱hei, naꞌ caguə deꞌe te cuich gacaꞌ Dioz benꞌ əsoꞌelaogüeꞌe naꞌ caguə deꞌe te cuich əsaꞌaqueꞌ xiꞌiṉaꞌ.
\v 8 Pero naꞌ ca naquə beṉəꞌ caꞌ chəsəꞌəžeb par yosoꞌozenagueꞌ c̱hiaꞌ, naꞌ beṉəꞌ caꞌ cui chsoꞌonḻilažəꞌ nadaꞌ, naꞌ beṉəꞌ caꞌ chsoꞌon bitəꞌətezə deꞌen chgueꞌidaꞌ, naꞌ beṉəꞌ caꞌ chsoꞌot beṉəꞌ yoblə, naꞌ beṉəꞌ caꞌ chəsəꞌəbeɉyic̱hɉ noꞌol c̱hegaꞌaqueꞌ o beꞌen c̱hegaꞌaqueꞌ par chesəꞌəzoleneꞌ beṉəꞌ yoblə, naꞌ beṉəꞌ chəsəꞌəžaꞌ xtogaꞌaqueꞌ, naꞌ beṉəꞌ caꞌ chəsəꞌənao deꞌen chsoꞌon beṉəꞌ caꞌ chəsəꞌəṉelen deꞌe x̱ioꞌ, naꞌ beṉəꞌ caꞌ chseꞌeɉṉiꞌalažəꞌ lguaꞌa lsaquəꞌ, naꞌ yoguəꞌ beṉəꞌ caꞌ chsoꞌe dižəꞌ güenḻažəꞌ, yoguəꞌəgaꞌaqueꞌenəꞌ yesəꞌəzaquəꞌəziꞌe zeɉḻicaṉe ḻoꞌo yiꞌ gabiḻənꞌ ganꞌ chaḻəꞌ sofrənꞌ, naꞌ yiꞌ gabiḻənꞌ naquən ca to nisdaoꞌ. Naꞌ deꞌen gac c̱hegaꞌaqueꞌ ḻenṉəꞌ yeḻəꞌ got əgwchopenꞌ.
\s1 Syoda Jerosalen deꞌen naquə deꞌe cobə
\p
\v 9 Naꞌ bleꞌidaꞌ angl caꞌ gažə beṉəꞌ caꞌ gwsoꞌox̱əꞌ gažə tas ganꞌ yoꞌožə deꞌen gwxaquəꞌəleben ca gažə castigw deꞌen bnežɉw Diozənꞌ beṉəꞌ mal caꞌ. Naꞌ toeꞌ bgüiguəꞌ ganꞌ zoaꞌanəꞌ naꞌ gožeꞌ nadaꞌ: —Da gwloꞌidaꞌ leꞌ noꞌolənꞌ zeꞌe siꞌ Jesocristənꞌ par gaqueꞌ xoꞌoleꞌ, Jesocrist benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\p
\v 10 Naꞌ Spirit c̱he Diozənꞌ benən par nic̱h anglənꞌ gwc̱heꞌe nadaꞌ to lao yaꞌa xen deꞌen naquə deꞌe sibə par nic̱h bloꞌineꞌ nadaꞌ syoda əblao c̱he Diozənꞌ, syoda Jerosalenṉəꞌ deꞌen gwcheꞌ yobanꞌ ganꞌ zo Diozənꞌ deꞌen babletɉeꞌ lao yežlyonꞌ.
\v 11 Naꞌ bleꞌidaꞌ chey cheꞌeniꞌ syodanꞌ len yeḻəꞌ chey cheꞌeniꞌ c̱he Diozənꞌ, naꞌ bleꞌidaꞌan ca to yeɉ fin deꞌe chactit, ca yeɉ deꞌen neꞌ jaspe deꞌen chleꞌicho ca bidr.
\v 12 Naꞌ bleꞌidaꞌ to zeꞌe xen deꞌe sibə deꞌen nyec̱hɉ syodanꞌ, naꞌ nitəꞌən šižiṉ puert, naꞌ to to choꞌa puertənꞌ zɉəzecha tgüeɉə angl. Naꞌ ca naquə puert caꞌ zɉənyoɉən la šižiṉ famiḻy c̱he beṉəꞌ Izrael caꞌ beṉəꞌ caꞌ zaꞌac lao dia c̱he to to xiꞌiṉ deꞌe Izraelənꞌ.
\v 13 Ḻeꞌe zeꞌe galənꞌ chlaꞌ bgüižənꞌ nitəꞌ šoṉə puert, naꞌ yešoṉən cuitən ḻicha, naꞌ yešoṉən cuitən yeglə, naꞌ yešoṉən galənꞌ chen bgüižənꞌ.
\v 14 Naꞌ bleꞌidaꞌ lan zeꞌenəꞌ deꞌen nyec̱hɉ syodanꞌ, naquən šižiṉ yeɉ xen naꞌ zɉənyoɉ ḻeꞌe yeɉ caꞌ la šižiṉ apostol c̱he Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\p
\v 15 Naꞌ anglənꞌ benꞌ beꞌelen nadaꞌ dižəꞌənəꞌ nox̱eꞌe to ya de or par gwsiꞌe medid c̱he syodanꞌ naꞌ len zeꞌe c̱heinəꞌ naꞌ puert c̱hei caꞌ.
\v 16 Syodanꞌ naquə deꞌe cuadrad, naꞌ tozə canꞌ naquə yeḻəꞌ zlagueꞌi len yeḻəꞌ ltoṉei naꞌ len yeḻəꞌ sib c̱heinꞌ. Naꞌ medid c̱he syodanꞌ goquən c̱hopa mil c̱hopə gueyoa kiḻometros.
\v 17 Nach gwde naꞌ gwxiꞌe zeꞌe deꞌen nyec̱hɉ syodanꞌ medid, naꞌ goquən gyon tap metr yeḻəꞌ sib c̱heinꞌ segon metr deꞌen chesəꞌəc̱hin beṉac̱hənꞌ naꞌ ḻenṉəꞌ bc̱hin anglənꞌ.
\p
\v 18 Zeꞌe deꞌen nyec̱hɉ syodanꞌ naquən de yeɉ deꞌen nziꞌ jaspe, naꞌ bleꞌidaꞌ de que yoꞌo caꞌ žaꞌ syodanꞌ zɉənaquən porzə de or naꞌ nḻaꞌan ca bidr deꞌen naquə xiꞌilažəꞌ.
\v 19 Naꞌ ḻeꞌe to to yeɉ xen caꞌ deꞌen zɉənaquə lan zeꞌe deꞌen nyec̱hɉ syodanꞌ zɉənoneꞌen xoche len yoguəꞌ cḻaste yeɉ fin. Deꞌe nechənꞌ daꞌan jaspe, deꞌe gwchopenꞌ safiro, deꞌe gwyoṉe agata, deꞌe gwdape esmeralda,
\v 20 deꞌe güeyəꞌ onise, deꞌe gwxope cornalina, deꞌe gažə crisolito, deꞌe əgwx̱oneꞌe berilo, deꞌe güei topasio, deꞌe ši crisoprasa, deꞌe šneɉei jasinto, naꞌ deꞌe šižiṉei amatista.
\v 21 Nach puert caꞌ šižiṉ deꞌe nitəꞌ c̱he syodanꞌ to togaꞌaquən zɉənaquən de to perla. Naꞌ lquey c̱he syodanꞌ zɉənaquən porzə de or naꞌ nḻaꞌ ḻeꞌinəꞌ canꞌ nḻaꞌ ḻeꞌi to deꞌen naquə de bidr.
\p
\v 22 Bitobi yoꞌodaoꞌ bleꞌidaꞌ laoꞌ syodanꞌ c̱hedəꞌ laꞌ do tyempte beṉəꞌ caꞌ žaꞌ syodanꞌ niteꞌe lao X̱ancho Diozənꞌ benꞌ napə ḻeꞌezelaogüe yeḻəꞌ guac xenṉəꞌ naꞌ lao Xiꞌiṉeꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ, naꞌ beṉəꞌ caꞌ žaꞌ syodanꞌ chsoꞌelaogüeꞌe ḻegaꞌaqueꞌ.
\v 23 Bito chyažɉe bgüižənꞌ ni bioꞌonəꞌ par yosoꞌoseꞌeniꞌin lao syodanꞌ c̱hedəꞌ nyeꞌeniꞌ syodanꞌ len yeḻəꞌ chey cheꞌeniꞌ c̱he Diozənꞌ naꞌ c̱he Xiꞌiṉeꞌ Jesocristənꞌ.
\v 24 Naꞌ beꞌeniꞌ c̱he syodanꞌ gwseꞌeniꞌin yedote par beṉəꞌ caꞌ chsoꞌonḻilažəꞌ Jesocristənꞌ, beṉəꞌ caꞌ zɉənaquə to to ṉasyon. Naꞌ rei caꞌ chəꞌənabiaꞌ yežlyonꞌ, beṉəꞌ caꞌ chsoꞌonḻilažəꞌ Diozənꞌ, yosoꞌonežɉueꞌeneꞌ yeḻəꞌ gwnabiaꞌ naꞌ yeḻəꞌ balaꞌaṉ deꞌen de c̱hegaꞌaqueꞌ.
\v 25 Bito šeyɉw puert caꞌ teža naꞌ caguə batəꞌəquə gaquə žc̱hoḻ.
\v 26 Naꞌ yeḻəꞌ xoche naꞌ bitəꞌətezəchlə deꞌe zaqueꞌe deꞌen gotəꞌ c̱he ṉasyon caꞌ gatəꞌən laoꞌ syodanꞌ.
\v 27 Bitobi deꞌe mal gaquə laoꞌ syodanꞌ, naꞌ notono gaquə yesyəꞌəžin syodanꞌ no chon deꞌe caꞌ chgueꞌi Diozənꞌ o no choeꞌ dižəꞌ güenḻažəꞌ. Caguə no yesyəꞌəžin syodanꞌ sino beṉəꞌ caꞌ zɉənyoɉ lagaꞌaqueꞌen ḻeꞌe ḻibr c̱he Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ. Ḻeꞌe ḻibr naꞌanəꞌ zɉənyoɉ la beṉəꞌ caꞌ zɉənapə yeḻəꞌ mban zeɉḻicaṉenꞌ.
\c 22
\p
\v 1 Nach bloꞌineꞌ nadaꞌ yao deꞌen yožə nis deꞌen chnežɉon beṉac̱hənꞌ yeḻəꞌ mban zeɉḻicaṉenꞌ. Naꞌ nisənꞌ naquən clar juisy ca beꞌeyəꞌ, naꞌ yaonꞌ chchoɉən ganꞌ chiꞌ Diozənꞌ naꞌ Xiꞌiṉeꞌ Jesocristənꞌ chəsəꞌənabiꞌe, Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ.
\v 2 Naꞌ yaonꞌ chden gwchoḻ lquey xen c̱he syodanꞌ naꞌ ze yag c̱hopə ḻaꞌa choꞌa yaonꞌ, yag deꞌen chnežɉon beṉac̱hənꞌ yeḻəꞌ mban zeɉḻicaṉenꞌ. Naꞌ yoguəꞌ bioꞌ chəsəꞌəbian frot, šižiṉ las lao tgüiz. Naꞌ beṉəꞌ caꞌ žaꞌ syodanꞌ beṉəꞌ zɉənaquə to to ṉasyon chəsəꞌəc̱hineꞌ xlagueꞌi caꞌ par nic̱h niteꞌe güen.
\v 3 Cuat gatəꞌ deꞌe gueꞌi Diozənꞌ laoꞌ syodanꞌ. Diozənꞌ len Xiꞌiṉeꞌ Jesocristənꞌ benꞌ gwxaquəꞌəlebe ca xiləꞌ daoꞌ caꞌ gwsoꞌot beṉəꞌ Izrael caꞌ par gwnitlao xtoḻəꞌəgaꞌaqueꞌenəꞌ zɉəchiꞌe syodanꞌ chesəꞌənabiꞌe, naꞌ yoguəꞌ beṉəꞌ caꞌ žaꞌ syodanꞌ chsoꞌonḻilažeꞌe Diozənꞌ naꞌ nitəꞌətezə niteꞌe chsoꞌelaogüeꞌeneꞌ.
\v 4 Nitəꞌətezə niteꞌe ganꞌ chesəꞌəleꞌineꞌ choꞌalao Diozənꞌ, naꞌ nyoɉ leꞌenəꞌ lao xgagaꞌaqueꞌenəꞌ.
\v 5 Cuat gaquə žc̱hoḻ laoꞌ syodanꞌ. Deꞌe naꞌanəꞌ bito yažɉe beꞌeniꞌ c̱he lampara, nique yažɉe beꞌeniꞌ c̱he bgüižənꞌ, c̱hedəꞌ yeḻəꞌ chey cheꞌeniꞌ c̱he X̱ancho Diozənꞌ chseꞌeniꞌin ganꞌ žaꞌ beṉəꞌ caꞌ chsoꞌelaoꞌ ḻeꞌ naꞌ chesəꞌənabiꞌe len ḻeꞌ zeɉḻicaṉe.
\s1 Bazon əžin ža yidə Cristənꞌ deꞌe yoblə
\p
\v 6 Nach anglənꞌ gwneꞌ nadaꞌ: —Yoguəꞌ deꞌen bagwna Diozənꞌ zɉənaquən deꞌe ḻi naꞌ gaquə canꞌ neꞌenəꞌ. X̱ancho Dioz nanꞌ chbeɉeꞌ beṉəꞌ par chsoꞌe xtižeꞌenəꞌ naꞌ ḻeꞌenəꞌ bseḻeꞌe nadaꞌ par chzeɉniꞌidaꞌ beṉəꞌ caꞌ chsoꞌelaoꞌ ḻeꞌ deꞌe caꞌ bazaꞌ gaquə.
\v 7 Jesoꞌosənꞌ neꞌ de que bazon əžin ža yideꞌ deꞌe yoblə, naꞌ mbalaz ṉitəꞌ beṉəꞌ caꞌ yosoꞌozenag c̱he deꞌe caꞌ babzoɉoꞌ ḻeꞌe ḻibrənꞌ nox̱oꞌonəꞌ, ca naquə deꞌe caꞌ zeꞌe gaquə.
\p
\v 8 Nadaꞌ Juan bzoɉaꞌ deꞌen bendaꞌ naꞌ bleꞌidaꞌ, naꞌ catəꞌ bendaꞌ naꞌ bleꞌigaꞌacdaꞌan bzo xibaꞌ xniꞌa anglənꞌ par güeꞌelaoguaꞌaneꞌ, benꞌ ben par nic̱h bleꞌidaꞌogüeꞌedaꞌ yoguəꞌ deꞌe caꞌ.
\v 9 Pero anglənꞌ bito beꞌe latɉə, naꞌ gwneꞌ: —Bito gonoꞌ caꞌ. Beꞌelaoꞌ Diozənꞌ. Nadaꞌ nacaꞌ to beṉəꞌ güen xšineꞌ canꞌ nacoꞌ leꞌ naꞌ lɉuežɉoꞌ caꞌ beṉəꞌ caꞌ ḻeczə bagwleɉ Diozənꞌ par chsoꞌe xtižeꞌenəꞌ, naꞌ caꞌaczənꞌ yoguəꞌ beṉəꞌ caꞌ yosoꞌozenag c̱he deꞌe caꞌ babzoɉoꞌ ḻeꞌe ḻibrənꞌ nox̱oꞌonəꞌ.
\p
\v 10 Naꞌ ḻeczə gwneꞌ nadaꞌ: —Bito gwcuašoꞌo c̱he deꞌe caꞌ zeꞌe zaꞌac canꞌ na ḻibr nga bzoɉoꞌ, c̱hedəꞌ bazon əžin ža gaquə yoguəꞌ deꞌe caꞌ bzoɉoꞌ ḻeꞌinəꞌ.
\v 11 Bazon əžin ža catəꞌ beṉəꞌ caꞌ chsoꞌon deꞌe malənꞌ yesyəꞌəgaꞌaṉlenczə deꞌe mal c̱hegaꞌaqueꞌenəꞌ gabiḻənꞌ. Naꞌ beṉəꞌ caꞌ chsoꞌon deꞌen naquə yeḻəꞌ ztoꞌ yesyəꞌəgaꞌaṉleneꞌ yeḻəꞌ ztoꞌ c̱hegaꞌaqueꞌenəꞌ gabiḻənꞌ. Naꞌ beṉəꞌ caꞌ zɉənaqueꞌ beṉəꞌ güen lao Diozənꞌ soꞌoncheꞌ deꞌe güenṉəꞌ zeɉḻicaṉe. Bagwleɉ Diozənꞌ ḻegaꞌaqueꞌ par zɉənaqueꞌ lažəꞌ neꞌenəꞌ naꞌ zeɉḻicaṉe yesyəꞌəgaꞌaṉeꞌ lažəꞌ neꞌenəꞌ.
\p
\v 12 Nach Jesoꞌosənꞌ gwneꞌ: —Bazon əžin ža yidaꞌ deꞌe yoblə, naꞌ gonaꞌ castigw c̱he to to beṉac̱h o gonaꞌ par nic̱h gaquə deꞌe güen c̱he to togaꞌaqueꞌ segon nac gwsoꞌoneꞌ.
\v 13 Nadaꞌ nacaꞌ benꞌ ben yežlyonꞌ naꞌ benꞌ gon par nic̱h te c̱hei. Bazoczaꞌ catəꞌən bx̱iꞌa yežlyonꞌ naꞌ caꞌaczənꞌ soaꞌ catəꞌən yeyož yedon.
\p
\v 14 Mbalaz nitəꞌ notəꞌətezə beṉəꞌ bagosəꞌəṉabe nadaꞌ becaꞌa xtoḻəꞌəgaꞌaqueꞌenəꞌ. Naꞌ guaꞌa latɉə soꞌe choꞌa puert c̱he syodanꞌ ganꞌ zoaꞌanəꞌ naꞌ gwnežɉuaꞌ ḻegaꞌaqueꞌ frot c̱he yag yeḻəꞌ mban zeɉḻicaṉenꞌ.
\v 15 Pero naꞌ bito guaꞌa latɉə soꞌo beṉəꞌ caꞌ cui chsoꞌonḻilažəꞌ nadaꞌ choꞌa puert c̱he syodanꞌ. Bito gaquə soꞌo beṉəꞌ caꞌ chesəꞌəṉelen deꞌe x̱ioꞌ, naꞌ beṉəꞌ chəsəꞌəbeɉyic̱hɉ noꞌol c̱hegaꞌaqueꞌ o beꞌen c̱hegaꞌaqueꞌ par chnitəꞌəleneꞌ beṉəꞌ yoblə o beṉəꞌ chəsəꞌəžaꞌ xtogaꞌaqueꞌ. Bito gaquə soꞌo beṉəꞌ chsoꞌot beṉəꞌ, beṉəꞌ chseꞌeɉṉiꞌalažəꞌ lguaꞌa lsaquəꞌ naꞌ notəꞌətezə beṉəꞌ chəsyəꞌəbeineꞌ chsoꞌe dižəꞌ güenḻažəꞌ.
\p
\v 16 Nadaꞌ Jesoꞌos bseḻaꞌa angl c̱hiaꞌanəꞌ par bzeneneꞌ leꞌ yoguəꞌ deꞌen babzoɉoꞌ par beṉəꞌ caꞌ zɉəncodəꞌ lɉuežɉe chsoꞌelaogüeꞌe nadaꞌ. Nadaꞌ golɉaꞌ lao dia c̱he deꞌe Rei Dabinꞌ, naꞌ nacaꞌ benꞌ ben Diozənꞌ lyebe əseḻeꞌe lao dia c̱he deꞌe Rei Dabinꞌ. Naꞌ gwxaquəꞌəlebədaꞌ ca belɉw xsilənꞌ. Ṉezecho catəꞌ chlaꞌ belɉw xsilənꞌ bazon šeꞌeniꞌ, naꞌ deꞌen babidaꞌ yežlyonꞌ ṉezecho bazon gaquə yoguəꞌ deꞌe güen caꞌ zɉənyoɉ ḻeꞌe ḻibr nga.— Canꞌ gwna Jesoꞌosənꞌ nadaꞌ.
\p
\v 17 Chioꞌo chonḻilažəꞌəcho Jesocristənꞌ naccho ca to noꞌolənꞌ siꞌe, naꞌ chioꞌo txen len Spirit c̱he Diozənꞌ chṉablažəꞌəcho yob yideꞌ deꞌe yoblə. Naꞌ yoguəꞌ no yene catəꞌ yosoꞌolabeꞌ ḻibr nga, ḻeczə yesəꞌəṉablažəꞌəšgueꞌ yob yideꞌ deꞌe yoblə.
\p Naꞌ notəꞌətezə beṉəꞌ seꞌeneꞌeneꞌ soꞌonḻilažeꞌe Jesoꞌosənꞌ gatəꞌ yeḻəꞌ mban zeɉḻicaṉe c̱hegaꞌaqueꞌ sin cui bi yesəꞌəyixɉueꞌ c̱hei.
\p
\v 18 Nach gozna Jesoꞌosənꞌ: —Deꞌe nganꞌ əchniaꞌ par yoguəꞌ leꞌe gwlable o yenele catəꞌ beṉəꞌ yosoꞌolabeꞌ deꞌe quinga ben Diozənꞌ mendad zɉənyoɉ ḻeꞌe ḻibr nga. Notəꞌətezle šə gwzanchle ca deꞌen na ḻibr nga catəꞌ əgwzeɉniꞌile beṉəꞌ c̱he deꞌe caꞌ zeꞌe zaꞌac, Diozənꞌ goneꞌ par nic̱h gac c̱hele yoguəꞌ deꞌe mal caꞌ deꞌen zɉənyoɉ ḻeꞌe ḻibr nga.
\v 19 Naꞌ notəꞌətezle catəꞌ əgwzeɉniꞌile beṉəꞌ c̱he deꞌe caꞌ zeꞌe zaꞌac šə cui yeneꞌele əgwzeɉniꞌile ḻegaꞌaqueꞌ yoguəꞌ deꞌe caꞌ ben Diozənꞌ mendad zɉənyoɉ ḻeꞌe ḻibr nga, Diozənꞌ yoxiꞌe lalenꞌ ḻeꞌe ḻibr c̱heꞌenəꞌ naꞌ bito güeꞌe latɉə yežinḻe syoda c̱heꞌenəꞌ. Naꞌ ḻeꞌe ḻibr c̱he Dioz nanꞌ zɉənyoɉ la yoguəꞌ beṉəꞌ caꞌ zɉənapeꞌ yeḻəꞌ mban zeɉḻicaṉenꞌ.
\p
\v 20 Nach Jesoꞌosənꞌ benꞌ bzeɉniꞌineꞌ nadaꞌ yoguəꞌ deꞌe quinga neꞌ: —Deꞌe ḻi yidaꞌ lgüegwzə.
\p Naꞌ nadaꞌ gožaꞌaneꞌ: —Caꞌašgaczə gaquə. Yob yidəšgoꞌ X̱anaꞌ Jesoꞌos.
\p
\v 21 X̱ancho Jesocristənꞌ sotezə soeꞌ gaquəlenšgaczeꞌ yoguəꞌəle. Deꞌe naꞌazənꞌ de chzoɉaꞌ.
\b
\m Juan