\id 2CO
\h 2 Corintios
\toc1 2 Corintios
\mt Stee Guijtz Ni Bacuaa Pabl Lo Guidoo Xten Guedx Corinto
\c 1
\s Ni rojp guijtz ni bacuaa Pabl lo guidoo xten guedx Corinto
\p
\v 1 Narä Pabl nacä apost xten Jesucrist saꞌcsi siꞌc
rlajz Dios te gusuleꞌä xtiidxni. Narä näjza Timoteu,
ni najc bejtznu lo xtidx Dios, rucuaanu guijtzre lojtu
rexpejṉ xquidoo Dios ni yuꞌ guedx Corinto, näjza loj
guiraa rexpejṉ Dios ni rbäjz nez guiraa reguedx Acaya.
\v 2 Rniabnu lo Dios ni najc Xtadnu näjza lo Dad Jesucrist,
gacnäjreni laꞌtu, guscuecdxireni lajztu.
\s Trabajw ni gudejd Pabl
\p
\v 3 Guiliäꞌpnu xpalaꞌn Dios Xtad Jesucrist, nani rulaslajz
nuurnu, nani rustoolajz nuunu.
\v 4 Che rdejdnu trabajw, rbecdxini laaznu te rajcza
rbecdxinu lajz renani cadejd trabajw con lagajc yäḻrbecdxilajz
ni baniidx Dios loonu.
\v 5 Sigajc ni rdedduxhnu trabajwduxh ni gudejd Jesucrist
saꞌcsi rusuleꞌnu xtiidxni, sigajcza rbecdxiduxh Jesucrist
laaznu.
\v 6 Palga rdeednu trabajw, najcni te gustolajz laꞌtu,
te ḻaatu lo dojḻ. Palga ruscuecdxi Dios lajznu, siꞌc
rujnni te cuedxilajztu te guntu huant che tedtu lagajc
trabajw ni cadejdzanu.
\v 7 Rinudzuꞌtz yäḻrunloj ni rajpnu xcuent laꞌtu, saꞌcsi
nadonnu palga rdejdtu lagajc trabajw ni cadejdnu, suscuecdxi
Dios lajztu sigajcni ruscuedxini laaznu.
\p
\v 8 Rebetzä, rlazä gacbeepactu lacti trabajwduxh bideednu
nez reguedx Asia, tudxeꞌnsi dinu nien huant, saꞌcsi gudedcaj
trabajwga, acasislinu. Trabawduxhtejni, benä xhigab sujnni
gaan, suguꞌtni nuurnu.
\v 9 Gulicanu, alabiennu xhigab sejtpacnu. Niluxh dee
gusajcnu te bisieednu naꞌc chaliilajznu lagajc nuurnu,
alga chaliilajznu Dios nani ruspaṉsac rebeṉgut.
\v 10 Saꞌcsi Dios basḻaa nuure lo yäḻgujtga, luxh sinuutis
gusḻaani nuurnu lo yäḻgujt. Salilazduxhnu Diosre susḻaaruni
nuurnu,
\v 11 saꞌcsi cayacnäjtu nuurnu, cabedx-canabtu lo Dios
xcuentnu. Dxejcti palga xhidajl bejṉ cabedx-canab lo
Dios xcuentnu, xhidajlzareni sudeed xquixtios lo Dios
xcuentnu xcuent xcäḻrulaslajz Dios ni baniidxni loonu.
\s Xhicuent di Pabl nij guedx Corinto
\p
\v 12 Dee najc nani ruspaa laaznu: rbedxi xcäriejnnu,
niꞌc ruluii loonu laaca nabajṉnu, con yäḻnadolajz riennu
siꞌcni rnibee Dios; xhet saꞌcsi rajpnu xcäḻnajn rebeṉ
guedxliujdi, alga saꞌcsi racnäj Dios nuure. Siꞌcpac nabajṉnu
lo guedxliujre, luxh maazru che yuꞌnu lojtu.
\v 13 Cacuaanu lojtu rediidx ni sajc goḻtu, ni sajc gacbeetu,
luxh cabäzä sacbesaꞌctu guiragajc rediidx ni gucuaä,
\v 14 lagajc siꞌcni agucbeetu mase gaii xtiidxnu, cabäzä
guibaa lajztu xcuent nuurnu, sigajcni guibaa lajznu xcuent
laꞌtu neṉ dxej ni jiääd Dad Jesucrist.
\p
\v 15 Niꞌcni ganiddoo benä xhigab niädhuiä laꞌtu te
nibalajztu tioꞌp huält.
\v 16 Nalajznu, benä xhigab nidedä roꞌc che saꞌa reguedx
Macedonia, dxejcti stehuält cheni guibiꞌä Macedonia, niädhuisacä
laꞌtu roꞌc te niacnäjtu narä te niaꞌa Judea.
\v 17 ¿Xhaa dina niunsaꞌcä xhigab che benä xhigabre?
¿La rchalotu runä xhigabä siꞌc te beṉ guedxliuj nani
runtiop lajzni, nani tejsi diidx rniini “siaꞌä” nägajcza
“dina chaꞌa”, ä?
\v 18 Dios guluii lojtu guliica rniä lojtu, dinu guinii
tejsi diidx “siaꞌä” nägajc “dina chaꞌa”.
\v 19 Xiꞌn Dios, Jesucrist nani bisuleꞌnu lojtu narä
näjza Silvan, näjza Timoteu dini guntioꞌp lajzni, dini
guinii tejsi diidx “sunäni” näj “dina gunäni”, niluxh
laani guiraa xtiidxni najc “sunäpacni”.
\v 20 Siꞌcza guiraa rediidx ni biaꞌn Dios loonu xcuent
Jesucrist najcreni “sunäpacni”; näjza xcuent laani najcreni
“sugacni siꞌc” par nuurnu, te chäꞌp xpalaꞌn Dios xcuent
nuurnu.
\v 21 Dios cagusudzuꞌtzza nuure näjza laꞌtu lo xtidx
Jesucrist, agulezani nuurnu te jiennu xtzuunni.
\v 22 Abacuaazani xseenni loonu, niꞌcni baniidxni Sprit
Dxan xtenni te cuääzni neṉ lastoonu.
\p
\v 23 Rbedxä loj Dios gacbeeni xhi yuꞌ lastoä, guliipacni
te diruna gutalä xcäḻnajtu, niꞌc dina niälsacä guedx
Corinto.
\v 24 Di rlajznu guinibeenu xho chalilajztu, alga rlajznu
gacnäänutu lo dzuun te guibaa lajztu; guliipac agusudzuꞌtztu
lo xcäḻrililajztu.
\c 2
\p
\v 1 Niluxh lagajc xcuent xcäḻnasaꞌcä benä xhigab dina
jiädhuisacä laꞌtu che cayac-huin lazä.
\v 2 Saꞌcsi palga narä siädyenä gac-huin lajztu, ¿chuniꞌc
gun guibaa lazä? Laꞌtistu, nani benä guc-huin lajzni.
\v 3 Niꞌcni lagajc xcuent niꞌc bacuaä lojtu, te che jiäḻä
lojtu, di rebejṉ gunhuin lazä nani riäjḻ guspaa lazä.
Luxh nancheä palga narä guibaa lazä, nägajc laꞌtu sibaaza
lajztu.
\v 4 Che bacuaä guijtzga lojtu, lacti xhigabduxh benä,
binduxhä; xhet te gac-huindi lajztu, alga te gacbeetu
yäḻsanälazduxh ni sanälazä laꞌtu.
\s Yäḻrusiäjḻ lajz ni yuꞌ par nani bejn falt
\p
\v 5 Palga yuꞌ chu tej ni cayujn cayac-huin lazä, xhet
xtebtis lazä cayunhuinni näjza lajztu cayunhuinni guxii
diidx guiniä saꞌcsi di rlazä guntu xhigabduxh.
\v 6 Alabasacsiduxh xhidajl bejṉ dadeꞌga, naꞌcru gusacsítuni
ṉaj.
\v 7 N̲aj coḻsiäjḻ lajztu xcuent xtojḻni, coḻcuecdxi lajzni
didi gac-huinduxhtej lajzni.
\v 8 Niꞌcni rniabä lojtu, coḻchanälajz bejṉre siꞌc ni
huinälajztuni galoo.
\v 9 Bacuaxgaäza lojtu te gacbeä laa susoobtu xtidxä.
\v 10 N̲aj renani jiäjḻ lajztu xtojḻni, näj narä siäjḻ
lazäni. Sigajcza narä, nani basiäjḻ lazä, palga yuꞌ xhi
basiäjḻ lazä, benäni xcuent xcäḻnasaꞌctu, nez loj Jesucrist,
\v 11 te di gun beṉdxab gaan nuure, saꞌcsi anajnnu xho
najc latsiaj ni rujn beṉdxab.
\s Guyuꞌ Pabl yärsiaꞌ che bidzujṉni guedx Troas
\p
\v 12 Che bidzuṉä guedx Troas, te gusuleꞌä xtidx Jesucrist,
bejn Dad Jesucrist rutliidi badxojndi narä,
\v 13 niluxh guyuduxhä yärsiaꞌ saꞌcsi dina nidxälä Tito,
bejtznu. Niꞌcni basadidxgacäreni, saꞌäti nez reguedx
Macedonia.
\s Jesucrist rujn riennu gaan
\p
\v 14 Xquixtios lo Dios nani con Jesucrist racnäj nuurnu
te dipacnu gunijt, empac rujntisnu gaan, luxh con nuurnu
guiraa nejz ruluilojni xhi saru najc gumbeepac bejṉ
xtidx Dios.
\v 15 Saꞌcsi najczanu siꞌc te guxh xten yalnejxh xten
Jesucrist lo Dios nez loj renani chalilajz xtidx Dios
näjza nez loj rebejṉ nani canijt saꞌcsi naadireni chalilajzreni
xtiidxni.
\v 16 Loj reni di chalilajz xtiidxni, najcnu siꞌc te
guxh ni ruguꞌt, loj renani rililajz xtiidxni, najcnu siꞌc
guxh xten yalnejxh ni rudeed yäḻnabaṉcoob. ¿Chu laa
ni racbee saꞌ recosga?
\v 17 Saꞌcsi dinu gac siꞌc najc xhidajl bejṉ nani rusuleꞌ
xtidx Dios te gunreni gaan meel. Nuure rusulesaꞌcnu
xtidx Dios saꞌcsi rinälaazpacnu Jesucrist luxh siꞌc
ni gunibee Dios, siꞌc rusuleꞌnu, rusuleꞌnu diidx con xcäḻracnäj
Jesucrist nez loj Dios ni cahuii xhiniꞌc riennu.
\c 3
\s Diidx nacoob ni basaꞌn Dios loonu
\p
\v 1 Che rniinu rediidxga, ¿la rchalotu canisacnu didxsaꞌc
lagajc xcuentnu, ä? Yuꞌreni caꞌ guijtz ni rnii najcreni
beṉsaꞌc. ¿La rlajzzatu guiluiinu lojtu saꞌ guijtzga,
o guiniabnu guntu saꞌ guijtzga xcaꞌnu, ä?
\v 2 Laꞌtu najc siꞌc xquijtznu ni rnii xho najcnu. Lastoopacnu
acuajtu. Guiraa rebejṉ rajc rhuii xho huililajztu xtidx
Dios saꞌcsi basuleꞌnu xtiidxni lojtu.
\v 3 Huenliisi rluiloj najctu siꞌc xquijtz Jesucrist,
luxh nuurnu bizuleꞌnu xtiidxni lojtu. Xhet con tintdi
cuaj rediidxga, xhet lojdiza guij cuaj diidxga, Sprit
Dxan xten Dios ni nabajṉ bacuaa rextidx Diosga, bacuaanireni
lastootu.
\p
\v 4 Nadoncheenu redee, niꞌcni xcuent Crist dinu guidxejb
nez loj Dios.
\v 5 Di gacdi jieṉ xtebnu xhitis dzuun ni riennu, riennuni
saꞌcsi laa Dios ni racnäj nuurnu.
\v 6 Laani runiidx yäḻnadaan loonu. Nuurnu najcnu mos
xten xtidxcoobni ni biaꞌnni con nuurnu. Luxh didxcoobga
dini gac siꞌc xleii toMoisés ni bacuaareni lo guij, saꞌcsi
xleiini biädnä dojḻ, dxejc gujtnu. Niluxh didxcoobga
ni rusuleꞌnu biädnä Sprit Dxan xten Diosni, luxh runiidxni
yäḻnabaṉcoob loonu.
\v 7 Leii baluii yuꞌ xtojḻ bejṉ, riäjḻ guetreni. Xhidajl
seen guyuꞌ che bacuaa Dios rediidxga lo guij. Luxh di
niajcdi nuhuii rexpejṉ Israel loj Moisés, bidxejbreni
saꞌcsi rdimbichaꞌ lojni, luxh sanuu cayuii yäḻrdimbichaꞌga.
\v 8 Palga siꞌc gujc che biääd leii, aticaxh ṉaj suꞌru
xcäḻrdimbichaꞌ xleii Sprit Dxan xten Dios, ni najc redidxcoob
nani abasuleꞌnu.
\v 9 Palga xleii toMoisés ni baluiloj yäḻgujt xcuent
dojḻ biädnä yäḻrdimbichaꞌ, aticaxh ṉaj yuꞌ xcäḻrdimbichaꞌ
xtidxcoob Dios ni rudzucaj dojḻ.
\v 10 N̲aj dirunu fii xcäḻrdimbichaꞌ xleii toMoisés saꞌcsi
xtidxcoob Dios rdimbichaꞌru par tejpas.
\v 11 Palga yäḻrdimbichaꞌ nani biuii bianisesduxhni
teraꞌt, stee yäḻrdimbichaꞌre ni najc par tejpas sidimbichasesduxhni.
\p
\v 12 Luxh niꞌc runiidx yäḻrbecdxi lajznu, dipacnu guidxejb
che rusuleꞌnu xtidxcoob Dios.
\v 13 Dinu gac siꞌc toMoisés, ni basäu tlaꞌ lajd lojni
te di fii rexpejṉ Israel cayuii yäḻrdimbichaꞌ ni guyuꞌ
lojni.
\v 14 Niluxh bicäjy xcäriejnreni; lo dxej ṉajli che
rieḻ xleii toMoisés, najcni siꞌcni yuꞌ xhi lajd rusäuu
lastooreni, rudxojn gacbeereni, te di chalilajzreni, xtidx
Jesucristtis rajc rudzucaj lajdga.
\v 15 Lo dxe ṉajli che roḻreni xleii toMoisés, najcni
siꞌcni ruscäjy te lajd xcäriejnreni.
\v 16 Lo xtidx Dios rnii scree: “Niluxh che gusiechlajz
te bejṉ, gudzuréni nez loj Dad, sibicaj lajdga”, nalajznu
sacbeeni xtidx Dios.
\v 17 Dad Jesucrist najc Sprit luxh cadro yuꞌ Sprit
xten Dios badzucaj Diosni lo xleii toMoisés.
\v 18 Niluxh nuure dinu gusäu lajd lojnu, didi guscäjyni
xcäriejnnu. Nuure najcnu siꞌc te guihuajn cadro rdimbichaꞌ
xtuxh Dad Jesucrist, luxh chäi-chäi cadxaanu cayajcnu
siꞌc najcni näjza cacaꞌnu xcäḻrdimbichaꞌ Jesucrist, saꞌcsi
siꞌc cayujn Sprit Dxan xtenni.
\c 4
\p
\v 1 Niꞌcni saꞌcsi agule Dios nuure te gusuleꞌnu xtiidxni,
saꞌcsi balaslajzzani nuure, dipacnu jiäxhan.
\v 2 Niꞌcni rbälaznu recos ni rajc xhigaꞌtz, saꞌcsi rusanxtujyreni.
Dizanu gusguee, dizanu guchaa xtidx Dios, niluxh rniinuni
siꞌcpacni najcni, te siꞌc ruhuii guiraa bejṉ rsiaapacnu
lo xnezyuj Dios.
\v 3 Niluxh palga yuꞌ chu dipac gacbee rextidx Dios
nani rusuleꞌnu, najctisreni rebejṉ nani ala canitloj
par tejpas,
\v 4 saꞌcsi abascäjy beṉdxab ni rnibee guedxliujre xcäriejnreni,
siꞌcni rujnni lo rebejṉ nani di chalilajz xtidx Jesucrist,
te naꞌc fiireni xcäḻrdimbichaꞌ xtidx Dios ni rnii xcuent
xhanij xten Jesucrist, ni najc xtujxh Dios.
\v 5 Che rusuleꞌnu xtidx Jesucrist, dinu guiliäꞌp lagajc
xpalaꞌnnu, rliäꞌpnu ganaxtis xpalaꞌn Dad Jesucrist. Nuure
najcnu xmostu xcuent Jesucrist.
\v 6 Che benchee Dios guedxliuj, guniini: “Lo xcäjy suguirii
te bajl ni gusanij.” Lagajc Diosga abasanij lastoonu
te baniidxni bajl ni najc yäḻriembee xcäḻrdimbichaꞌ
Dios nez loj Jesucrist.
\s Xho guibaṉnu con yäḻrililajz
\p
\v 7 Nuurnu najcnu siꞌc te guesyuj, xhet sajcdinu, niluxh
guidxanu te yäḻnasacduxh, ni najc xtidx Dios xcuent Jesucrist,
te guiluiloj xcäḻnasaꞌc xten xcäḻrnibee Dios lacuaa
xhisi te yäḻnadipbäz xtennu.
\v 8 Rdeednu trabajw guira nejz, niluxh dinu gunijt yäḻrunloj.
Mase di jieṉ xho jiennu, dinu chu yärsiaꞌ.
\v 9 Rusacsíreni nuure, niluxh di Dios cuälaznu, rguijṉreni
nuure, dizareni juꞌt nuure.
\v 10 Cadrotis rionnu rusacsíreni nuure siꞌc basacsíreni
Jesucrist, te siꞌc neṉ tiejxhnu guluilojzani yäḻnabaṉsac
loj rebeṉgut xten Jesucrist.
\v 11 Cadrotis rionnu rlajzreni juꞌtreni nuure saꞌcsi
rusuleꞌnu xtidx Jesucrist te siꞌcza neṉ tiejxhnu guluilojzani
xcäḻnabajṉ Jesucrist loj rebeṉ guedxliujre.
\v 12 Niꞌcni rujn yäḻgujt dzuun loonu, per yäḻnabajṉ
cayujn dzuun lojtu.
\p
\v 13 Saꞌcsi rajpnu lagajc xsprit xten yäḻrililajzga,
sigajc ni caj lo xtidx Dios: “Huililazä niꞌcni basuleꞌä
diidx.” Sigajcza nuure, huililaaznu xtidx Dios, niꞌcni
rusuleꞌnuni.
\v 14 Saꞌcsi nadonnu lagajc nani baspaṉsac Jesucrist
loj rebeṉgut, lagajcza laani gun guibaṉsacnu con Jesucrist
te gunni sunäjnu laꞌtu nez lojni.
\v 15 Rsiajcnu guiraa ni rsiajcnu te xcuentsi laꞌtu
gudeedru bejn xquixtios lo Dios, te guiliäꞌpruzareni
xpalaꞌnni xcuent yäḻrulaslajz ni sanuutis careꞌch lo
xhidajl bejṉ.
\p
\v 16 Niꞌcni dinu gunijt yäḻrunloj, per mase tiejxhre
acayujxh, guixe-guixee cagustioob Dios spritnu.
\v 17 Retrabajw ni cadeednu lo yäḻnabajṉre rdedgajcreni,
niluxh rujnreni gaꞌpnu te yäḻrdimbichaduxh ni gajdnu
guidon, ni najc par tejpas.
\v 18 Dinu fiitis renani ruzeṉ lo guedxliujre saꞌcsi
sinitloj reniꞌc, alga cayenloonu renani di guzeṉ, saꞌcsi
renani di guzeṉ najcreni par tejpas.
\c 5
\p
\v 1 Aracbeenu tiejxhnu najc siꞌc te yuꞌ xten xaimnu
lo guedxliujre, sidzujṉ dxej sinitlojni, nalajznu sejt
tiejxhnu, suniidx Dios te tiejxhnu xten xhaguibaa nani
di nitloj, nalajznu dini guet par tejpas.
\v 2 Guliicani, laḻni dxunnu neṉ tiejxhre, rbedxneṉnu
rdeednu trabajw, niꞌcni rlajznu maläii agojl guidxaa
tiejxh guedxliujre te xcaꞌnu te tiexhcoob ni siääd xhaguibaa.
\v 3 Te siꞌc che acuaꞌnuni, diruni gac siꞌcni suxhabääl
xaimnu, saꞌcsi abicoob tiexhnu.
\v 4 Laḻni dxunnu neṉ tiejxhre rbedxneṉnu, rdeednu trabajw,
saꞌcsi di rlaaznu suxhabääl xaimnu, rlajznu gacwnu tiexhcoobnu,
te tiejxhre nani cayejt, sidebnäjni tiexhcoob ni siääd
xhaguibaa.
\v 5 Nani benchee nuure parpac dee najc Dios, lagajc
nani runiidx Sprit Dxan xtenni loonu siꞌc te seen sujnpacnini.
\p
\v 6 Niꞌcni dinu guidxeeb, saꞌcsi nadonnu laḻni nabajṉnu
lo guedxliujre, di gacdi guibajṉnu xhaguibaa loj Dadga.
\v 7 Saꞌcsi nabajṉnu xcuent nani rililajznu, xhet xcuentdi
nani rajc rhuiinu.
\v 8 Niꞌcni rniä nabajṉnu dinu guidxeeb, rchaloonu hueenru
guisaꞌnnu tiejxhnu lo guedxliujnure, te choläznäänu Jesucrist
xhaguibaa.
\v 9 Niꞌcni tejtis najc xhigabnu, palga lo guedxliujre
o xhaguibaa, rlajztisnu jiennu renani gun guibaa lajzni.
\v 10 Saꞌcsi guiraanu riäjḻ suunu nez loj yagxhiil cadro
gun Jesucrist yäḻguxhtis, te tejganu guicaꞌnu xcuent
nani biennu lo guedxliuj, palga dzunsaꞌcni, o palga dzunguijdxni.
\s Diidx xcuent yäḻrbecdxi lajzni
\p
\v 11 Luxh saꞌcsi rdxejbnu (nalajznu rucuadiaagnu xtidx)
Dad Jesucrist, ruliidxnu rebejṉ te chalilajzreni xtiidxni.
Luxh Dios najn xho nabajṉnu; maläii näjza lo xcäriejntu
guluiloj xho nabajṉnu.
\v 12 Dinu guiliäꞌp lagajc xpalaꞌnnu lojtu stehuält,
rniinu rediidxga lojtu te guibalajztu xcuentnu, te gaꞌptu
xhi diidx gusejctu lo rebejṉ ni rchaglajztis ruhuii
xho rieṉ bejṉ, direni gacbee xhi yuꞌ neṉ lastooreni.
\v 13 Palga najcnu siꞌc bejṉ ni rajc yejcreni, siꞌc najcnu
par Dios, palga najcnu siꞌc bejṉ ni nasaꞌc xcäriejnnu,
najcnuni par laꞌtu.
\v 14 Saꞌcsi sanälazduxh Jesucrist nuure, niꞌc rusoobtisnu
xtiidxni, saꞌcsi nancheenu gujt tejtis par guiraanu, niꞌc
najcni siꞌcni agujt guiraanu nez loj Dios.
\v 15 Luxh Jesucrist gujt xcuent guiraa rebejṉ, te renani
rililajz xtiidxni, naꞌcru guibajṉreni xcuenttis laareni,
alga guibajṉpacreni xcuenttis Jesucrist nani gujt, nani
gubaṉsac xcuent laareni.
\v 16 Niꞌcni nuure dinu fii lo bejṉ siꞌcni najcreni
lo guedxliujre. Galoo biembeenu Jesucrist siꞌcni gujcni
che gubajṉni lo guedxliuj, niluxh ṉaj et siꞌcti riembeenuni.
\v 17 Niꞌcni chutis bejṉ, palga rililajzni xtidx Jesucrist,
sujnnini te beṉcoob, diruni guichaglajz gunruni nani
rajc lo guedxliuj, alga guichaglajzni gunni xtzun Dios.
\p
\v 18 Guiraa dee siääd lo Dios, nani basiäjḻ lajzni xcuent
Jesucrist, dxejcti baniidxni loonu rediidx xcuent xcäḻrusiäjḻ
lajzni te gusuleꞌnu rediidxga,
\v 19 nalajznu, nanab gusuleꞌnu diidxre: Dios guyunäj
Jesucrist, cagusiäjḻlajzni con rebeṉ guedxliuj, te xcaꞌnireni,
saꞌcsi diruni gudzuub xtojḻ reni ahuililajz xtiidxni
lo xcuentreni. Dxejc gule Dios nuure te gusuleꞌnu rediidxpacre
lo rebejṉ.
\v 20 Niꞌcni sioꞌpnu te guiniinu xtidx Jesucrist, najcni
ascanu lagajc Dios canabduxh lojtu che rniabduxhnu lojtu,
coḻgusiäjḻ lajztu, coḻyajc tejsi con Dios.
\v 21 Di Jesucrist niujn nicla tej dojḻ, niluxh saꞌcsi
sanälajz Dios nuunu, xcuentnu bejn Dios gujc Jesucrist
siꞌc te beṉdojḻ che guleꞌcni guiraa rextojḻ guedxliuj
yejc Jesucrist che cuajni lo crujz. Siꞌc gujcni te sajc
gaꞌpnu xcäḻnaya, xcäḻnasaꞌc Dios xcuent Jesucrist.
\c 6
\p
\v 1 Niꞌcni rniabnu lojtu, jiaꞌcnu tejsi lo xtzun Dios,
naꞌc cuälaztu xcäḻracnäj Dios; palga guntu siꞌc, xliaꞌsi
cuaꞌtuni.
\v 2 Saꞌcsi loj xtidx Dios caj scree:
\q Dxej nani riäjḻ gunäni, bacuadiagä xtiidxtu,
\q dxej che gubicaj xtojḻtu gucnää́ laꞌtu.
\q ¡Coḻjiejn! N̲aj najc te tiempsaꞌc,
\q coḻjiejnza, ṉaj najc dxej ni guibicaj xtojḻtu.
\p
\v 3 Naꞌc jiennu nicla tej ni gun guidxeꞌch lajz bejṉ,
didi guiniireni xhet laadi najc xcäḻrusuleꞌnu.
\v 4 Niluxh lo guiraꞌti dzuun ni riennu, guluilojnu lo
rebejṉ najcnu xmos Dios; gacnu nadolajz; jiennu huant
che rusacsíreni nuure; che rdejdnu trabajw; che di jieṉ
xho jiennu;
\v 5 che rguijṉreni nuure; che rusäureni nuure neṉ latzguiib;
che rdejdnu lo bieiduxh; che rdajl xtzuunnu; che reꞌch
bacaḻ yääl; che rucuaꞌnnu;
\v 6 guluilojza najcnu xmos Dios xcuent xcäḻnabaṉsaꞌcnu
lo Dios; näjza xcäḻnansaꞌc xtidx Diosnu; näjza yäḻrajc
nadolajz; saꞌcsi laaca riennu lo saꞌnu; näjza saꞌcsi
rbäjz Sprit Dxan xten Dios neṉ lastoonu; näjza xcuent
yäḻrinälajzpac bejṉ;
\v 7 näjza xcuent didxguliipac; näjza lo xcäḻrnibeduxh
Dios; caꞌzanu siꞌc te madxed xcäḻnaya Dios, caꞌnuni guropṉaanu,
ladbee, näjza ladbäjgw.
\v 8 Ruluilojzanu najcnu xmos Dios palga chäꞌp xpalaꞌnnu,
o palgaza jianxtujynu; palga guiniireni didxsaꞌc xcuentnu,
o palgaza guiniyajreni nuunu; palga naareni najcnu beṉrusguee,
mase najcnu bejṉ ni rnii didxlii.
\v 9 Palga rut rlajzdi gumbee nuunu, o palga guiraꞌti
bejṉ numbee nuunu; acayejtnu, niluxh bahuii, anu anabajṉ;
rusaan Dios rguijṉreni nuure, niluxh dinu guet;
\v 10 najcnu siꞌc bejṉ ni yuꞌ xliajs, niluxh rbalaaznu;
najcnu siꞌc bejṉ ni xhet rajpdi, luxh riennu gapduxh
bejṉ; najcnu siꞌc bejṉ ni xhet rajpdi, niluxh rajpnu
guiraloj.
\p
\v 11 Lojtu, beṉ Corinto, aguniliinu lojtu guiragajc rediidx
ni yuꞌ neṉ lastoonu.
\v 12 Xhetliidi diidxdi bacuaꞌtznu lojtu, niluxh pet
cacuatz lajztu diidx ni nanab guiniitu loonu.
\v 13 N̲aj narä rulidxä laꞌtu siꞌc rulijdx te Dad rexiꞌnni:
¡Coḻguinii loonu rediidx ni yuꞌ neṉ lastootu!
\s Najcnu siꞌc xquidoo Dios ni nabajṉ
\p
\v 14 Naꞌc guchaagtu lo rebejṉ nani di chalilajz xtidx
Dios, saꞌcsi di gacdi gunteblojtu dzuun saꞌcsi tejni
rlajz gun dzunsaꞌc, steeni rlajz gunni dzunguijdx, ¿xho
gac sanäj bajl xcäjy, ä?
\v 15 O ¿xho gac sanäj Jesucrist beṉdxab ni laa Satanás,
ä? O ¿xho gac sanäj te bejṉ nani rililajz xtidx Dios
te bejṉ ni di chalilajz xtidx Dios, ä?
\v 16 ¿Xhixh tebloj najc xquidoo Dios con rebanäjb, ä?
Ni nuunu najcnu xquidoo Dios ni nabajṉ, lagajc siꞌcni
gunii Dios galoo:
\q Cuäzä neṉ lastooreni, sisianää́zareni.
\q Narä sacä Xtiosreni, laareni sajcreni rexpeṉä.
\p
\v 17 Niꞌcni coḻṟii galäiireni, coḻguibicaj lojreni, te
laad coḻcuääz, siꞌc naj Dios:
\q Te gac xcaꞌätu, naꞌc faḻtu recosdxuudx.
\q
\v 18 Dxejc laꞌtu sajctu rexinganä, rexindxaꞌpä,
\q luxh narä gacä xtadtu,
\q siꞌc naj Gueb Dios ni rajp guiralii yäḻrnibee.
\c 7
\p
\v 1 Niꞌcni, laꞌtu ni sanälazä, saꞌcsi abiaꞌn Dios diidxre
loonu, doꞌo guisia xcäriejnnu, lastoonu näjza tiejxhnu,
doꞌo cuäcaj guiraa rexhigabguijdx, guiraa redojḻ, te gac
sanu lo rexnezyudxan Dios con xcäḻrdxejb Dios.
\s Xho basiejch lajz rebeṉ Corinto
\p
\v 2 ¡Coḻchanälajz nuunu neṉ lastootu! Xhet latsiajdi
biennu lojtu. Rut baxhiṉdinu. Rutza basgueedinu.
\v 3 Dina guiniä rediidxre te cueꞌcä xquejtu; ni aguniä
lojtu galooli, laꞌtu yuꞌtu neṉ lastoonu palga tejsi guetnu,
o palga tejsi guibajṉrunu.
\v 4 Laꞌtu nadip lazä, rniduxhä didxsaꞌc xcuenttu lo
bejṉ, rbedxi lastoä, rbalazduxhä loj guiraa retrabajw
ni cadeednu.
\p
\v 5 Niꞌcni che guyuꞌnu reguedx Macedonia, di niajcdi
nusilajznu saꞌcsi guiralajt cadejdnu trabajw, xcuent
yäḻrdijḻ ni guyuꞌ guideb gabinu, xcuentza yäḻrdxejb ni
guyuꞌ lastoonu.
\v 6 Niluxh Dios ni racnäj rebejṉ ni rac-huin lajzreni,
gucnäj nuure, saꞌcsi che bidzujṉ Tito guredxi lastoä.
\v 7 Luxh xhet saꞌcsi bidzujṉtis Tito, näjza saꞌcsi gulecdxitu
lastoo Tito, näjza saꞌcsi biädnäni diidx xho yuꞌtu, xho
rlajztu fiitu narä, xho yuꞌ xliajs lastootu xcuent xtojḻtu,
xho rlazduxhtu guntu siꞌcni guniä lojtu, niꞌcni bibalasduxhäru.
\p
\v 8 Acananä guc-huin lajztu che biḻtu guijtz ni bacuaä
lojtu, niluxh di lazä niac-huin mase che baxhaḻäni guc-huin
lazä, saꞌcsi ṉaj nanä mase bejn guijtzga guc-huin lajztu,
xhet xchejdi guc-huin lajztu.
\v 9 Niluxh ṉaj rbalazä, et saꞌcsi guc-huindi lajztu, alga
saꞌcsi guc-huin lajztu te basiejch lajztu xcuent xtojḻtu,
saꞌcsi guc-huin lajztu siꞌcni rlajz Dios, te di yuꞌ xhi
gunijttu xcuent nuunu.
\v 10 Saꞌcsi yäḻrac-huin ni ruxhaḻ Dios loonu rujn rusiejch
lajznu, te rusḻaa Dios nuurnu lo dojḻ niꞌcni rbaalazä
che bejnni siꞌc. Niluxh yäḻrac-huin xten guedxliuj dini
gun gusiejch lajz rebejṉ rextojḻreni, alga rujnni nitloj
bejṉ tejpas.
\v 11 Laꞌtu bejntu huant xliajs ni baxhaḻ Dios siꞌcni
rchaglajz Dios gac. N̲aj ¡coḻhuii gaṉ! ¡Lacti xhi cossaꞌc
bejnni par laꞌtu! Bejnni bahuisaꞌcpactu xhiniꞌc gujc,
te gac gusulegajctu xcuentni; dxejc bejnni bidxeꞌchtu,
näjza bejnni bidxejbtu, niꞌcni basaantu dojḻga, dxejcti
bejnni rlajzpactu nuhuiitu loä, bejnzani guyuꞌtu yärsiaꞌ
xcuentä, bejnzani rlajztu guntu yäḻguxhtis bejṉ nani
bejn dojḻga. Guiraa redee baluiloj et laꞌditu bejn dojḻ.
\v 12 Niꞌcni, che bacuaä guijtzga, dina nucuaäni loj bejṉ
ni bejn dojḻga, niluxh bacuaä guijtzga lojtu te guiluiloj
xcäḻrsiaꞌtu ni rajptu xcuent narä nez loj Dios.
\v 13 Niꞌcni aguredxi xcäriejnnu.
\p N̲aj aguredxi xcärienä, bibalazduxhäru xcuent xcäḻrbalajz
Tito, saꞌcsi bicoob, bisilajz xpritni xcuent guiraatu.
\v 14 Saꞌcsi palga yuꞌ xhi didxsaꞌc ni räpä lojni xcuenttu,
ditu nusanxtujy narä nez lojni. Niluxh sigajcni guniinu
ganax didxgulii, sigajcza najc guiraa redidxsaꞌc xcuenttu
ni guniä loj Tito, guliipacni.
\v 15 Niꞌcni maazru sanälajzni laꞌtu, che rnaj lajzni
xho basoobtu diidx, xho bejntu cuaꞌtuni che bidzujṉnu,
racsejslitu cadxejbtu.
\v 16 N̲aj rbaalazä saꞌcsi loj guiraꞌti laꞌtu nadip lazä.
\c 8
\s Saru rudeedreni meel
\p
\v 1 N̲aj bejtznu, rlajznu guiniinu lojtu xho badeed Dios xcäḻrulaslajzni lo rebeṉ Macedonia ni huililajz xtidx Dios.
\v 2 Mase gudedduxhreni trabajw, bibalajzreni, mase xhetliidi gojpreni, badeedreni meel siꞌc te beṉ ni rajp.
\v 3 Narä caniliä lojtu, badeedreni xmeelreni siꞌcni gojpreni, luxh badeedrureni loj ni naa bejṉ sajc gudeedreni.
\v 4 Gunabduxhzareni loonu guisaannu gudeedreni xmeelreni te gacnäjreni rexpeṉ Dios.
\v 5 Niluxh direni niujn siꞌcni biennu xhigab gunreni. Ganiddoo badeedreni lagajc laareni loj Dad Jesucrist, näjza loonu siꞌcni rnibee Dios gac.
\v 6 Saꞌcsi batieꞌ rexpeṉ Macedonia meel, niꞌc ṉaj räpä loj Tito chanuupacni gutieꞌni meel lojtu siꞌcni gunii Tito lojtu galoo.
\v 7 Rujntu xhidajl dzunsaꞌc. Rililazsaꞌctu xtidx Dios; rnisaꞌctu xtidx Dios; rajptu yäḻnajn; rchaglajzpactu guntu dzuun; rinälajztu nuunu, niꞌcni naꞌc gusaantu tedcaj gunzatu dzunsaꞌcre, nalajznu, gudeedtu meel.
\p
\v 8 Dina guiniä lojtu coḻyujnpacni; narä rlazätis gacbeetu xho rbaalajz reni rudeed meel te guluiloj don la gulii sanälajzpaczatu rexpejṉ Dios.
\v 9 Saꞌcsi laꞌtu anumbecheetu rulaslajz Dad Jesucrist, te mase najcni riꞌcw, rajpni guiraa xhixten Dios, xcuentu gujcni siꞌc te bejṉ ni xhet rajpdi, te xcuentni gaꞌptu guiraa rexhixten Dios xhaguibaa.
\p
\v 10 Narä siniä lojtu xhi xhigab runä, par lagajc xcäḻnasaꞌctu. Gudebijzli ganiid laꞌtu guslojtu bejntu dzunsaꞌcre, luxh rbaali lajztu rlajzpactu guntuni.
\v 11 N̲aj coḻchanuu, coḻguluux dzuunga siꞌcni guslojtu cayujntuni. N̲aj te luux dzuunga coḻgudeed siꞌcni rajptu.
\v 12 Saꞌcsi palga rlajzduxh te bejṉ gudeed lo Dios, laaca najc gudeedni siꞌctis ni rajppacni. Di Dios guiniab gudeed bejṉ nani dini gaꞌp.
\v 13 Dina guiniä gudeedtejtu te tedtu trabajw te gapduxh stee bejṉ, alga te gacteblojtistu.
\v 14 Nani rajprulu ṉaj niꞌc coḻgudeed te gusalojtu ni cayäädxreni, te stee dxej nani rajpreni laareni sajc suniidxzareni te gusalojreni nani cayäädxtu te siꞌc gacni tebloj.
\v 15 Saꞌcsi lo xtidx Dios caj scree: “Te bejṉ nani batopduxh yäḻnasaꞌc, xhet biaꞌndiru, dxejcti nani guxii batojp yäḻnasaꞌc, xhet biäädxdi.”
\s Tito näjza rexcompanieerni
\p
\v 16 Xquixtios lo Dios nani rudeed lo Tito lagajc yärsiaꞌ ni rapä narä par laꞌtu.
\v 17 Saꞌcsi cuäjbni gunni nani gunabä lojni gunni. Luxh saꞌcsi rlazduxhpacni gunni xtzuun Dios, ṉaj lagajc laani bejnni xhigab jiädhuiini lojtu te luux dzuunre.
\p
\v 18 Caguxhaḻnu xtee bejtznu chanä Tito. Guiraa rebejṉ guidoo rnii didxsaꞌc hueen xcuent bejṉre saꞌcsi laaca rusuleꞌni xtidx Dios.
\v 19 Niꞌctis aguleza rebeṉ guidooni te chunäjni narä te gacnäjni narä lo xtzuun Dios nani cayennu te guiliäꞌpni xpalaꞌn Gueb Dad Jesucrist, te guluilojza lacti rlajzpacni jiennu xtzuunni.
\v 20 Niꞌcni rlazä jiapdaduxhnu te di chu tej ni guiniyaj nuure xcuent melrore ni chosaꞌnnu lo rexpejṉ Dios.
\v 21 Saꞌcsi narä riuduxhä runä nani najc laaca, et ganax nez lojdi Jesucrist, näjza loj rebejṉ.
\p
\v 22 Con guiroꞌp redee, caguxhaḻzanu stee bejtznu, nani agujc balti huält bihuiinu xho rujnni, te bahuiipacnu rlajzpacni gunsaꞌcni xhidajl dzuun, luxh ṉaj rlajzruni gunsaꞌcni redzuunga saꞌcsi nadip lajzni laꞌtu.
\v 23 Palga yuꞌ chu guiniabdiidx xcuent Tito, coḻyejtz lojni laani najc nani cayunnäj narä dzuun lojtu. Dxejcti xcuent stioꞌp bejtznu, laareni najcreni xquixhajg reguidoo, rliäꞌpzareni xpalaꞌn Jesucrist.
\v 24 Niꞌc naꞌc guidxejbtu che yuꞌtu lo rebejṉ reguidoo guluiipactu loj rebejṉga xho sanälajztu, näjza redzuun ni rujntu niꞌc rniinu ganax didxsaꞌc xcuenttu.
\c 9
\s Meel par rebejtznu
\p
\v 1 Niꞌcni dina gucuaäru lojtu xcuent dzuunre, nalajznu,
yäḻracnäj rexpejṉ Dios,
\v 2 saꞌcsi anancheä rlajzpactu guntuni, luxh xcuentpac
niꞌc aguläꞌpä xpalaꞌntu loj rebeṉ Macedonia, räpä lojreni
laꞌtu, rebeṉ Acaya, gudebijzli batieꞌtu meel, luxh saꞌcsi
bejntu siꞌc, xhidajlza rebeṉ Macedonia biniib te badeedzareni
meel.
\v 3 Niꞌcni abaxhaḻä rebejtznu lojtu, te di xliaꞌsi guläꞌpä
xpalaꞌntu xcuent dzuunre, te acabäjzlitu gudeedtu xmeeltu,
sigajc ni agunixgaä lojtu.
\v 4 Didi che jiädnää́ rebeṉ Macedonia jiophuiinu laꞌtu,
xhet rajpditu, dxejc jianxtuyä narä, näjza laꞌtu.
\v 5 Niꞌcni benä xhigab, nanabpac jiädxgaa rebejtznu,
jiädhuiireni laꞌtu, te fiireni don xho gac xcuent meelro
ni galooli biaꞌn diidx gudeedtu, te abatiexgaatu nani
gusalajztu saꞌcsi rlajzpactu gudeedtuni, xhet saꞌcsi
rniinu riäjḻpac gudeedtuni.
\p
\v 6 Rniliä lojtu, nani guxii rbeꞌc, guxiiza yälnasaꞌc
guiliäsni, niluxh nani rbeꞌc xhidajl binij, xhidajlza
yälnasaꞌc guiliäsni.
\v 7 Tejgatu coḻhuii don lacti sajc gudeedni, dxejc siꞌc
sugudeedni siꞌcti ni rlajzni, naꞌc gun tiopdi lajzni,
etza saꞌcsi riäjḻpac gudeednini, saꞌcsi Dios sanälajz
bejṉ ni rbaali lajzni rudeedni meel lojni.
\v 8 Luxh Dios sajc guniidxru xcäḻracnäjni lojlu, te
siꞌc guixe-guixee sajplu xhidajl guiraloj rexhixtenlu,
te gaꞌplu xhitis ni rquiinlu loj guiraꞌti xtzunsaꞌclu.
\v 9 Saꞌcsi lo xtidx Dios caj scree:
\q Abadeduxhni loj rebeṉ ni xhet rajpdi luxh
\q redzunsaꞌc ni rujnni, najcreni par tejpas.
\m
\v 10 Dios nani rudeed binij ni rbeꞌc nani rujn dzuun
loniaa, laani suniidxzani yätxtiil te guidaunu, lagajc
Diosga suniidx, sutajḻza binij cueꞌctu, lagajc laani sustioobnini
te gacduxh yälnasaꞌc xten xtzunsaꞌctu.
\v 11 Te siꞌc gaꞌptu lacti yäḻnasaꞌc te gac gudeedzatu
xhiroob. Luxh xcuent xtzuunnu, meel ni ruxhaḻtu loj rexpejṉ
Dios sujn gudedduxhreni xquixtios lo Dios.
\v 12 Saꞌcsi che racnäjtu rebejtznu, dinu guideed ganaxtis
ni rquiinreni, rujnzanu rudeedrureni xquixtios lo Dios.
\v 13 Che racnäjtu saꞌtu siꞌc, ruluilojtu lacti rusoobtu
xtidx Dios siꞌcni ahuililajztuni, niꞌcni siliäꞌpreni
xpalaꞌn Dios xcuent xcäḻracnäjtu, nalajznu xcuent meel
ni badeedtu lojreni, näjza loj guiraareni.
\v 14 Dxejcti laareni sibedx-siniabzareni lo Dios xcuenttu,
sinälazduxhreni laꞌtu saꞌcsi runidxduxh Dios xcäḻracnäjni
lojtu.
\v 15 ¡Xquixtiosti Dios saꞌcsi baniidxni yäḻnasaꞌcduxhtej
loonu!
\c 10
\s Yäḻrnibee ni rajp Pabl saꞌcsi najcni apost
\p
\v 1 Lagajc narä, Pabl, rniabduxhä lojtu, con guiraa didxdoo,
guiraa didxsaꞌc xten Crist, (narä ni nac beṉnadolajz
che biälä lojtu, niluxh che sugaꞌa zijt lojtu, dxejc nacä
beṉnialajz).
\v 2 Narä canabä lojtu, coḻguibaṉsaꞌc te che jiädhuiä
lojtu, dina gacä nialajz dizana guiniä redidxnaj ni abenä
xhigab guiniä loj gaii bejṉ nani rnii nabaṉä siꞌc te
beṉguedxliuj.
\v 3 Guliicani najcnu beṉguedxliuj, niluxh dinu gucuanäj
saꞌnu guiib nani rcaꞌ beṉ guedxliuj che rcuaareni.
\v 4 Saꞌcsi reguiib ni rcaꞌnu te guidiḻsaꞌnu direni
gac saꞌ guiib ni rcaꞌ beṉ guedxliuj. Nuunu rucuaanu
con xcäḻrnibee Dios te riennu gaan loj guiraa rexcäḻrnibee
guedxliujre.
\v 5 Niꞌcni cagutzujḻnu guiraa rexhigabguijdxreni, näjza
nani rchaloreni najc xhigabro nani rlajzreni guiniyajreni
yäḻrumbee Dios, luxh cacaꞌnu guiralii rexhigabnu cagutednureni
ladzṉaa Jesucrist te gusoobnu rextidx Jesucrist.
\v 6 Cabääztisnu te gunnu yäḻguxhtis loj chutis bejṉ
ni dini gusoob xtidx Dios, che abasoob guiragajctu xtidx
Dios.
\p
\v 7 Laꞌtu cahuiitu redzuun ni rieṉ. Palga yuꞌ chu tejtu
ni rchaloni najcni xpejṉ Crist, sugunsaꞌcni xhigab, fiini
xho najc lastooni, dxejcti sugacbeepacni sigajcni ahuililajzni
xtidx Jesucrist, sigajcza nuure ahuililajzzanuni.
\v 8 Saꞌcsi mase guiliäꞌpäru xpalaꞌnä xcuent yäḻrnibee
ni rapä, ni baniidx Dios te gustiobä xcäḻrililajztu, et
te guxhiṉädi laꞌtu, nicla siꞌc dina guituiä.
\v 9 Dina rlazä guchalotu rlazä guchebä laꞌtu con rexquitzä.
\v 10 Saꞌcsi rniireni: “Lo rexquijtzni caj didxnagajn,
didxnialajz, niluxh che sugaꞌni laapacni, xheti xcäḻsiudzuꞌtzni,
luxh xho rniaj diidx ni rniini.”
\v 11 Luxh ni rii siꞌc, sugacbeepacni dee: siꞌcni najcnu
con rextiidxnu che rucuaanu lojtu che yuꞌnu zijt, sigajcza
najcnu che suganäjpacnu laꞌtu.
\p
\v 12 Dinu gun xhigab najcnu tebloj loj rebejṉ ni runnaro
lagajc laareni. Niluxh reniꞌc rchaloreni siꞌc saꞌcsi
ruhuiireni xho najcreni cuäꞌ stee lagajc saꞌreni. Che
rujnreni siꞌc, nayääl xcäriejnreni.
\v 13 Nuure dinu gunnarotej lagajc nuurnu, niluxh riennu
siꞌcni nungäjḻ jiennu, xcuent yäḻrnibee ni baniidx Dios
loonu te jiennu dzuun cadro yuꞌlitu.
\v 14 Niꞌcni dinu nidedcaj xcäḻrnibeenu che bioꞌpnu
lojtu, saꞌcsi baniidx Dios yäḻrnibee loonu ganiddoo nuunu
gusuleꞌnu xtidx Jesucrist lojtu.
\v 15 Dinu niennaro lagajc nuurnu xcuent xtzuun steꞌca
bejṉ, ascanu lagajc nuunu biennuni. Cabääznu tioobru
xcäḻrililajztu, te gac jienrunu dzuun lojtu, siꞌctis gaḻ
jiennuni.
\v 16 Te gacza gusuleꞌnu xtidx Jesucrist steꞌca lajt
ni riaꞌn zijtru lo guejdx cadro yuꞌtu, naꞌcza gunnaronu
lagajc nuunu xcuent dzuun ni bejn steꞌca bejṉ.
\p
\v 17 Saꞌcsi nani rlajz gacnaro, suguiliäꞌpni xpalaꞌn
Dad Jesucrist.
\v 18 Saꞌcsi et nani rliäꞌp lagajc xpalaꞌndini ni riaꞌn
hueen nez loj Dios, niluxh bejṉ ni rliäꞌp Jesucrist xpalaꞌnni,
niꞌcni rbalaznäj Dios.
\c 11
\s Pabl näjza rebejṉ ni rniisi najcreni apost
\p
\v 1 Maläii chanunäsijctu narä laḻ ni guiniä gaii didxnayäleꞌ,
niluxh asanunäjtu narä.
\v 2 Randzuꞌä laꞌtu con yäḻrandzuꞌ ni baniidx Dios, saꞌcsi
abiaꞌn diidx gutedä laꞌtu ladzṉaa Jesucrist te xcaꞌni
laꞌtu. Rlazä gactu beṉnaya chäätu lojni, siꞌc te dxaꞌp
che ruchṉaani te biꞌn, rut bahuaḻdini.
\v 3 Niluxh rdxebä didi gusguee beṉdxab laꞌtu siꞌc ni
basguee bäḻ Eva con xcäḻnadxällajzni. Didi gunni guichaa
xhigabtu, guibicajtu lo xtidx Jesucrist luxh ṉaj laaca
rajṉpactu Jesucrist, guideb lastootu.
\v 4 Saꞌcsi laꞌtu cagutipduxh lajztu che riädnii steꞌca
bejṉ lojtu xtidx stee Jesús nani digac nani bisuleꞌnu
lojtu; o che naareni xcaꞌtu stee sprit ni digac nani
acuaꞌtu; o che naareni chalilajztu steꞌca diidx nani
najc garenca lo xtidx Dios ni ahuililajztu.
\v 5 Narä runä xhigab dina gacä bejṉ ni guxiiru sajc
loj guiraa reapost.
\p
\v 6 Mase di gacdi guinisaꞌcä, xhet yäḻnajndiza cayädxä;
niluxh niꞌc huenliisi rluiloj guiraa rediidx ni abaluiä
lojtu, guiraa redzuun ni abenä roꞌc.
\p
\v 7 O ¿la benä te dojḻ guyuꞌä lojtu siꞌc te beṉ nadolajz,
te gactu beṉroru, saꞌcsi xhetliidi cuaꞌädi xcuent ni
basuleꞌä xtidx Dios lojtu?
\v 8 Cuaꞌä meel ni baniidx garenca guidoo loä che guyuꞌä
lojtu, te benä xtzun Dios lojtu.
\v 9 Che guyuꞌä lojtu guyuꞌ xhi biquinä, niluxh xhet
cuaꞌädi lojtu, dina nutaḻä xtzuuntu. Saꞌcsi che biääd
rebejtznu ni siääd Macedonia, baniidxreni guiraa ni biquinä.
Loj guiraa redee dina nutaḻä xtzuuntu, luxh siꞌc sinuu
gunä.
\v 10 Guideb didxlii xten Jesucrist ni yuꞌ neṉ lastoä,
rniliä rut sajcdi gudzucaj xcuent xho yuä lojtu, niꞌcni
careꞌch didxroga lo guiraa reguedx Acaya.
\v 11 ¿Xhicuent rniä siꞌc? ¿Laa saꞌcsi dina chanälazä
laꞌtu, ä? ¡Xho gacni siꞌc! ¡Dios anajn lacti sanälazä
laꞌtu!
\v 12 Niluxh nani rungacä, lagajc niꞌc sinuu gunä, te
gudxonä renani rlajz gacnaro, renani rlajz naa rebejṉ
najcreni siꞌcpac najcnu, niluxh direni gac.
\v 13 Direni gac apost, laareni rusgueereni, rujnsireni
siꞌc ni najcreni apost xten Jesucrist, luxh rut najcdireni.
\v 14 Luxh xho dini gac siꞌc, ni lagajc beṉdxab ni laa
Satanás ruluiloj siꞌc te xangl Dios ni rdimbichaꞌ te
rusgueeni bejṉ.
\v 15 Niꞌcni naꞌc guidxelojtu palga näjza rexmos beṉdxab
riääd, rujnsireni siꞌc bejṉ ni rujn dzunsaꞌc, niluxh sinitlojreni
par tejpas xcuent ni rujnreni.
\s Rdejd Pabl trabajw saꞌcsi najcni te apost
\p
\v 16 Rnisacä lojtu, naꞌc guntu xhigab yecä cayajc, niluxh
palga siꞌc rujntu xhigab, coḻgusaanza guiniä siꞌc te
ni rajc yejcni te guniäza didxro lagajc xcuentä.
\v 17 Diidx ni rniä dina guiniäni xcuent xcäḻrnibee
Dios, alga rniäni siꞌc te ni rajc yejcni, lala redidxro
ni rniä xcuent lagajc narä.
\v 18 Saꞌcsi lacti bejṉ yuꞌ ni rnii didxro xcuent redzuun
ni rujnreni lo guedxliujre, sigajcza siniä didxro xcuent
lagajc narä.
\v 19 Ni laꞌtu, saꞌcsi nasiṉduxhtu, sanunäjtu rebejṉ ni
rajc yejcreni.
\v 20 Laꞌtu sanunäjtu chutis ni rnibee lojtu siꞌc te
lam̲, o rusguee laꞌtu te rbajnreni xhi xtentu, o rujnni
runxliaꞌtu xtzuunni o rliäꞌpreni lagajc xpalaꞌreni, o
rgaꞌpreni lojtu.
\v 21 Mase rtuiyä guniäni, dipac niajcdi niniä diidx
lojtu te niacä siꞌc najc rebejṉga. Niluxh loj xhitis
nani runnaroreni, (canisicä siꞌc te beṉnayääl) narä sajcru
gunnaroä.
\p
\v 22 ¿La najcreni xpejṉ hebreos? Sigajcza narä. ¿La
najcreni xpejṉ Israel? Sigajcza narä. ¿La najcreni xajg
toAbram? Sigajcza narä.
\v 23 ¿La najcreni xmos Jesucrist? Narä nacäruni lojreni.
N̲aj rniä siꞌc te bejṉ ni rajc yejcni. Abenäru dzuun
lojreni, agudijnrureni narä loj ni gudijnreni laareni,
abasäurureni narä neṉ latzguiib, nicla gac guigab bal
huält gudijnreni narä; baltiza huält ameer nietä.
\v 24 Gaii huält gudijn rexpejṉ Israel narä, tejga huält
batiäjlreni duguijd detzä gaḻbitzubigaa huält.
\v 25 Choṉ huält bahuajcwreni narä garoꞌt; stee huält
bacuaareni guij yecä; choṉ huält biääz barcw cadro saꞌä
loj nisdoo; teb dxej, teb yääl guyuꞌä lo nisdoo.
\v 26 Huaduxhä biaj, lacti bixuṉ riesgw xcuentä lo gueuu,
xcuent regubaan, xcuent rebeṉladxä, xcuentza rebeṉzijt.
Bixuṉza riesgw neṉ reguedxro, näjza nez lo reyubijdz,
näjza lo nisdoo, näjza xcuent rebejṉ ni rusguee, rniisireni
najcreni bejtznu lo xtidx Jesucrist.
\v 27 Abenduxhä dzuun, agudedduxhä trabajw, balti yääl
dina niesä, balti huält gulanä, bioḻä, balti huält xheti
xhi niauä; agudedäza yäḻnalduxh; guyuꞌ huält xhetiza
xhabä.
\p
\v 28 Luxh xhet loj redeetis rdedä trabajw; guixe-guixee
di lastoä cuedxi xcuent yärsiaꞌ ni ruꞌä xcuent rebeṉ
guidoo ni huililajz xtidx Dios.
\v 29 Che rdxajg tejtu, näjza narä rdxagä. Palga tejtu
riajb lo dojḻ, narä ruduxhä yärsiaꞌ xcuentni.
\v 30 Palga nanab gunnaroä lagajc narä, sunäni xcuent
rediidx nani ruluiloj xcäḻrdxagä.
\v 31 Dios ni najc Xtad Jesucrist, nani riäjl guiliäꞌp
xpalaꞌnni par tejpas, ananchee dina gusgueä laꞌtu.
\v 32 Che guyuꞌä guedx Damasco, gubernadoor nani guyuꞌ
roꞌc, najcni xpejṉ ṟeii Aretas, gunibee gojp rexcuxhtisni
guejdxga te niniaazreni narä te nisäureni narä neṉ latzguiib.
\v 33 Niluxh basiäjtreni narä neṉ te dxim̲ro nez roꞌ
te padeer ni rdejd gabi guejdxga, te siꞌc guḻaä ladzṉaareni.
\c 12
\s Dios baluiiloj lo bacaḻ
\p
\v 1 Mase riäjḻ guiniäni, xhet gunädi gaan guiniä didxro
lagajc xcuentä niꞌcni rlazä chanuu diidx, guiniä xcuent
rebacaḻ näjza xcuent nani baluiloj Dios loä.
\v 2 Numbeä te niguii ni ahuililajz xtidx Jesucrist.
Gutzudaj ijz huijni guibaa ni riojṉga, dina ganä laa
guideb tiejxhni huijni, o la ganax xspritni huij, Diostis
najn.
\v 3 Diostis najn la guideb tiejxhni, o ganax xpritni,
niluxh nanä xho huij niguiiga,
\v 4 guläs Diosni cadro yuꞌpac Dios, luxh roꞌc biejn
diajgni didx-xhigaꞌtz, didxroduxhtej, nani di gacdi guinii
beṉ guedxliuj.
\v 5 Xcuent saꞌ niguiiga sajc guiniä didxro, didxsaꞌc,
niluxh xcuent lagajc narä, di gacdi guiniäni; siniätis
diidx ni ruluiloj xcäḻrdxagä.
\v 6 Mase rlazä guiniä didxro, didxsaꞌc xcuent lagajc
narä, dini gac didxnayääl, saꞌcsi guliicazani. Niluxh
dina guiniäni te di guntu xhigab nacä beṉroru loj ni
rhuiitu runä o nani riejn diajgtu rniä.
\p
\v 7 Baluiloj Dios xhidalduxh cosroduxh loä, niluxh te
naꞌc gacä beṉnaro, basaan Dios gusloj guyuguijdx tiexhä,
siꞌc te guejch huääz tiexhä, ni baxhaḻ beṉdxab xten Satanás
te gusacsíni narä te di gacä te beṉnaro.
\v 8 Choṉ huält agunabä lo Jesucrist xcuent niꞌc, te
guibicajni.
\v 9 Niluxh laani najni loä: “Yäḻracnäj ni gunidxä salduxh
luj, saꞌcsi ruzeṉsaꞌcru xcäḻmilagwrä che xheti yälrutiplajz
te bejṉ.” Niꞌcni hueenru guiniä didxro saꞌcsi xhet yäḻrutiplazädi
rapä, te guzeṉ xcäḻrnibee Jesucrist lastoä.
\v 10 Niꞌcni rbedxilazä xheti xcäḻrutiplazä, rbedxizalazä
rniyajreni narä, näjza che caquinä guiraloj, näjza che
rdedä trabajw xcuent Jesucrist, saꞌcsi che xheti xcäḻrutiplazä,
dxejc runiidx Dios yäḻnadip, yäḻnadaan loä.
\s Yuꞌ Pabl yärsiaꞌ xcuent guidoo ni yuꞌ Corinto
\p
\v 11 Agucä siꞌc te beṉnayääl, lagajc laꞌtu bejntu nacä
siꞌc. Laꞌtu riäjḻ niniitu didxro, didxsaꞌc xcuentä, saꞌcsi
gajdpac biädxädi, nadxagä loj reapost ni sajcru mase
rut nacädi.
\v 12 Redzuun ni benä laḻ ni guyuꞌä lojtu, benäni siꞌc
te ni najcpac apost, huinuutis benäni guideb nadolajz
näjza reseen, näjza remilagwr.
\v 13 ¿Xhi benä lojtu te naatu runä xhigab guxiiru sajctu
loj guiraa reguidoo? Nani benätis najc dee: dina nutaḻä
xtzuuntu, nalajznu dina niniabä niacnäjtu narä siꞌc gucnäj
narä reguidoo ni yuꞌ garenca lajt. ¡Coḻsiäjḻ lajztu
narä dojḻre!
\p
\v 14 N̲aj cayunä xhigab jiädhuiätu, ṉaj gacni choṉ huält
siälä. Di quilä xhixtentu, alga lagajc laꞌtu rguilä.
Di rlazä gutalä xtzuuntu. Di riäjl cuchee rebiuux meel
par xcuzajnreni. Reguzajn ni riäjl cuchee meel par rexiꞌnreni.
\v 15 Xhet najcdi gunitä guiraa nani rapä, näjza lagajc
narä sujiuxä, te ḻaa xaimtu lo dojḻ. Palga chanälazäru
laꞌtu, ¿la guxiiru chanälajztu narä, ä?
\p
\v 16 Niluxh mase siꞌc najcni, di narä nutalä xtzuuntu.
Empac yuꞌreni canii basgueä laꞌtu saꞌcsi nadxällazä.
\v 17 ¿Xhixh naatu cuaꞌä xhi xtentu saꞌcsi baxhaḻä rebejtznu
lojtu, ä?
\v 18 Che baxhaḻä Tito, räpä lojni chanääni stee bejtznu
te jiädhuiireni laꞌtu. ¿Xhixh cuaꞌni xhi xtentu, ä? Xhixh
et tejsi xhigab biennu, tebloj biennu dzuun guiroꞌpnu
che guyuꞌnu lojtu.
\p
\v 19 Laḻni cayoḻtu guiraa rediidxre, cayujntu xhigab
canabnu jiäjḻ lajztu, niluxh xhet siꞌcdini. Caniinu rediidxre
nez loj Dios, caniizanu con xcäḻracnäj Jesucrist te siꞌc
tioobrutu lo xtidx Dios, rebetzä nani rinälazä.
\v 20 Saꞌcsi rdxebä andi che jiädhuiätu fiä ditu gac
siꞌcni rlazä gactu, dxejctiru laꞌtu suhuiizatu dizana
gacä siꞌcni rlajztu gacä. Rdxebä andi yuꞌtu ni cadijḻ,
ni ruguij lajzni xhixten saꞌni, ni cadxeꞌch lo saꞌni,
ni calaꞌ lo saꞌni, ni caniyaj saꞌni, ni cagutajḻ diidx
lo saꞌni; ni cayunnaro lagajc laani, ni cayujnza biejy.
\v 21 Rdxebä andi che jiädhuiätu stehuält, gusanxtujy
Dios narä xcuenttu. Rdxebäza sonduxhä xcuent xhidajltu
nani abanijt, bejntu dojḻ galoo, luxh gajdtu gusiechlajztu
xcuent xtojḻtu. Yuꞌtu ni di guibaṉnaya, resnäjtu bejṉ
ni di gac chäältu, yuꞌza balti dojḻ rujntu.
\c 13
\s Lult yäḻrulijdx xten Pabl
\p
\v 1 N̲aj gac choṉ huält siädhuiä laꞌtu. Guiraꞌti quej
nanab cueꞌcreni con xtidx tioꞌp o choṉ bejṉ ni najnpac
xhi dojḻ bejn tejgani.
\v 2 Mase ruti narä roꞌc, arnixgaä lojtu lagajc diidx
ni guniä che guyuꞌä lojtu ni barojp biälä lojtu, luxh
rniä loj renani abejn dojḻ, näjza loj guiraatu, palga
jiälsacä, diruna gulaslazätu nicla tejtu,
\v 3 saꞌcsi rlajztu fiipactu la gulii runiidx Jesucrist
yäḻrnibee loä te guiniä xtiidxni. Luxh Jesucrist dini
guisisni xcuenttu, niluxh laani rustioobruni xtiidxni
neṉ lastootu.
\v 4 Guliicani che cuajni lo crujz, gucni siꞌc te bejṉ
nani casis, niluxh ṉaj nabajṉni saꞌcsi rapduxhni xcäḻrnibee
Dios. Näjza nuure rsiaꞌcnu siꞌc te bejṉ nani casisnäj
laani niluxh nabaṉnäjnu laani xcuent xcäḻrnibee Dios
ni baniidxza Dios xcuenttu.
\p
\v 5 Coḻninäj lastootu lagajc laꞌtu, coḻhuii la guliipac
ahuililajztu xtidx Dios; coḻhuisaꞌc xho najc lastootu.
¿La ditu gacbee rbäjz Jesucrist neṉ lastootu, ä? Palga
rutini, rusqueetu lastootu, ditu nililajztu xtidx Dios.
\v 6 Narä rlazä gacbeetu, dinu nusguee lastoonu, ahuililajzpacnu
xtidx Dios.
\v 7 Rniabä loj Dios naꞌc guntu cosguijdx, xhet te guiniidi
bejṉ didxsaꞌc xcuentnu, alga te laꞌtu guntu recossaꞌc,
mase guiniireni et laadi cayunä narä.
\v 8 Saꞌcsi xhetliidi rajcdi riennu te nitloj didxgulii,
xcäḻrnibeenu najc te gusuleꞌnu didxlii.
\v 9 Niꞌcni rbaa lajznu che casisnu, niluxh laꞌtu nadip,
nadaantu; rbejdx-rniabzanu lo Dios guizaꞌ xcäḻrililajztu
lo xtidx Dios.
\v 10 Rucuaä reguijtzre lojtu che gajdna jiäḻä, te che
jiäḻä naꞌc tiḻnää́tu siꞌcpacni nungäjḻ tiḻnää́tu xcuent
yäḻrnibee ni baniidx Dad Jesucrist loä, te gac tioobrutu
lo xtidx Dios, xhet te nitditu.
\p
\v 11 Niꞌcni rbejtznu, coḻguibalajz, coḻhuii guisaꞌ xcäḻrililajztu,
coḻcuecdxi lajztu, coḻyennäj saꞌtu tejsi xhigab, dxitis
gubajṉ. Dios xten yäḻrinälajz näjza yäḻrbecdxi lajz
chunäj laꞌtu.
\v 12 Coḻnii: “Xchan” lo resaꞌtu.
\v 13 Guiraa rebejtznu nani ahuililajz ruxhaḻ xtixtios
lojtu.
\p
\v 14 Yäḻracnäj xten Dad Jesucrist, näjza yäḻrinälajz
xten Dios, näjza yäḻracnäj xten Sprit Dxan chu neṉ lastootu.
Sugacni siꞌc.