\id GAL
\h Gálatas
\toc1 Gálatas
\mt Te Guijtz Lo Rebeṉ Gálatas
\c 1
\s Pabl rucuaa guijtz loj rebeṉ guidoo nez región Galacia
\p
\v 1 Narä, Pabl, nacä apost xten Jesucrist. Xhet rebejṉdi
baxhaḻ narä, xhetza bejṉdi gule narä. Lagajc Jesucrist
näjza Xtadni Dios ni yuꞌ xhaguibaa, nani guläs Jesucrist
loj rebeṉgut, laareni agulereni narä.
\v 2 Narä, näjza guiraa resaꞌnu nani yunäj narä, rucuaanu
guijtzre lo rebeṉ guidoo ni yuꞌ nez reguedx Galacia.
\v 3 Xcaꞌ guejbtu xcäḻracnäj Dios con xcäḻrbedxilajz
xten Dios xtadnu näjza xten Dad Jesucrist.
\v 4 Lagajc laani cuäjbni gujtni te gusḻaani nuure lo
dojḻ xten guedxliuj guijdxre, siꞌcni gunibee Xtadnu, Gueb-Dios.
\v 5 Chäꞌp xpalaꞌn Dios par tejpas. Sugacni siꞌc.
\s Xhetdi xhi stee didxcoob ni sajc gusḻaa nuure
\p
\v 6 Rdxeloduxhä lacti riojb cabälaztu Dios ni gurejdx
laꞌtu con xcäḻrinälajz Crist, luxh ṉaj cagusoobtu steꞌca
diidx.
\v 7 Xhetdi stee diidx ni sajc gusḻaa nuure lo dojḻ.
Yuꞌreni rlajz gusiejchreni lajztu con steꞌca diidx, rlajzreni
guchaareni xtidx Jesucrist.
\v 8 Niluxh palga jiääd chu jiädluii lojtu steꞌca diidx
ni rusḻaa bejṉ lo dojḻ, niluxh di diidxga gac siꞌc najc
diidx nani abaluiinu lojtu, bejṉga agubibdeni, chutis
najcnu, mase naräni, mase te xangl Dios ni jiääd xhaguibaali.
\v 9 Siꞌc ni guniä lojtu, siꞌc rnisacä lojtu ṉaj: Pal
yuꞌ chu jiädluii lojtu steꞌca diidx ni rusḻaa bejṉ lo
dojḻ, luxh di diidxga gac siꞌc najc diidx nani abaluiinu
lojtu, bejṉga agubibdeni.
\p
\v 10 ¿Xhi naatu? ¿La rlazä guinisaꞌc bejṉ xcuentä o
la rlazä guinisaꞌc Dios xcuentä, ä? ¿La rlazä guspaä
lajz bejṉ, ä? Paru rlazä guspaä lajz bejṉ, digacdi gacä
xmos Jesucrist.
\s Xtzun Pabl
\p
\v 11 Coḻyacbee saꞌä, diidx ni rusḻaa bejṉ lo dojḻ nani
abasuleꞌä lojtu di diidxga gac xhigab beṉ guedxliuj.
\v 12 Xhet lojdi beṉ guedxliujdi cuaꞌäni, rutza baluiidini
loä, niluxh lagajc Jesucrist baniidx xtiidxni loä.
\p
\v 13 Anajntu xho gucä, xho gubaṉä galoo che rusobätis
rexleii toMoisés. Dxejc basacsíduxhä rebeṉ guidoo ni
huililajz xtidx Jesucrist, siꞌc benä te rlazä nitlojreni.
\v 14 Loj reni rusoob xleii toMoisés narä cagusobäru
xtiidxni, nanduxhäru loj guiraareni. Loj rebejṉ nani
sadxagä ladxä, maazru sanälazä xcostumbr retoxtadgoldoä.
\v 15 Dios gule narä, guleni narä cheni nuuli xnanä narä,
gurejdxni narä saꞌcsi sanälajzni narä.
\v 16 Dxejc bibalajz Dios baluilojni Xiꞌnni Jesucrist
loä te guiniä xtiidxni xcuent xho rusḻaani bejṉ lo dojḻ
loj reni di gac xpejṉ Israel. Che gujc siꞌc rut lojdi
huiyeꞌtzä.
\v 17 Niclaza niaꞌä guedx Jerusalén loj reni ganid gujc
apost loä. Alga huaꞌa nez reguedx Arabia, dxejcti gubisacä
guedx Damasco.
\p
\v 18 Che agudejd siꞌcti choṉ ijz, dxejcru huaꞌa guedx
Jerusalén te biembeä Pedr, dxejc biannää́ni tzun-gubijdx.
\v 19 Niluxh dina nuhuiä loj chu stee apost roꞌc. Lojtis
Jacoob, betzhuin Jesucrist bahuiä.
\v 20 Rniliä́ nez lo Dios, dina guiniä didx-xhii, rediidx
ni cacuaä najc guliipac.
\p
\v 21 Dxejcti huaꞌa reguejdx xten Siria näjza Cilicia.
\v 22 Resaꞌnu ni yuꞌ neṉ xquidoo Crist guideb nez reguedx
Judea, direni gumbee narä.
\v 23 Riejntis diajgreni: “Bejṉ nani basacsíduxh nuure
agujc xchej, abejṉga caguluiini xcuent lagajc xcäḻrililajz
nani galoo rlajzni nunitlojni.”
\v 24 Dxejc rliäꞌpreni xpalaꞌn Dios saꞌcsi huililazäza
xtiidxni.
\c 2
\s Bidxaag Pabl loj reapost
\p
\v 1 Che agudejd tzudaj ijz, dxejcru huaꞌa guedx Jerusalén con Bernabé, näjza Tito huinänu.
\v 2 Gunii Dios loä, gunibeeni chaꞌa roꞌc te gusuleꞌä xho huililajz rebejṉ ni di gac xpejṉ Israel xtidx xcuent Jesucrist ni rusḻaa lo dojḻ. Niluxh lojtis reni rnibee guidoo basuleꞌä diidx, te di xliaꞌsi benä dzuun, o te di xliaꞌsi gunäru dzuun.
\v 3 Sanää́ Tito, te beṉ griegw ni di gac xpejṉ Israel. Nicla lojni direni niäjb chuni bee siꞌc caj lo leii xten Moisés.
\v 4 Niluxh gaii bejṉ ni rujnsi siꞌcni najcreni saꞌnu, bidxaagreni loonu te gulaꞌtzreni xho rajṉnu Dios. Rdxeꞌchreni saꞌcsi nuunu, rexpejṉ Jesucrist, dinu jienru siꞌc ni bejn retoxtadgoldoonu. Laareni rlajzreni guxhiidreni nurnu, rlajzreni gusoobnu rextiidxreni.
\v 5 Dipacnu nicäjb nucuadiajgnu xtiidxreni, saꞌcsi rlaaznu chanuu chalilajztu xtidx Jesucrist nani rusḻaa bejṉ lo dojḻ.
\p
\v 6 Niluxh reni sajc, nalajznu reni rnibee rebeṉ guidoo roꞌc, xhet te didxcoobdi guniireni loä. (Luxh par narä xhet najcdi mase beṉsajcreni, saꞌcsi Dios runtebloj guiraa bejṉ.)
\v 7 Luxh bahuiireni abaniidx Dios xtidx Jesucrist loä, luxh rusuleꞌäni loj rebeṉzijt te guibicaj xtojḻreni, sigajcni rusuleꞌ Pedr xtidx Jesucrist loj rexpeṉ Israel nani rujnpac siꞌc ni caj lo leii.
\v 8 Lagajc Dios nani badeed bejn Pedr dzuun xte apost loj rexpeṉ Israel, lagajcza Diosre baniidx gunä dzuun, te gacä apost loj rebeṉzijt nani di gac xpejṉ Israel.
\p
\v 9 Niꞌcni Jacoob, Pedr, näjza Juan nani najc beṉroru neṉ guidoo xten Jesucrist, gucbeereni laa Dios ni cayacnäj narä. Dxejc baniidxreni ṉaareni loä näj lo Bernabé siꞌc te seen rbalajzreni, te chonnu guiroꞌpnu loj rebeṉzijt. Niluxh laareni chanuureni gusuleꞌreni loj rexpeṉ Israel.
\v 10 Gunabtisreni loonu gacnäjnu rebejṉ ni xhet rajpdi, luxh niꞌcza rlazä gunä.
\s Pabl gudiḻnäj Pedr lo guedx Antioquía
\p
\v 11 Che biääd Pedr lo guedx Antioquía, gudiḻnää́ni, saꞌcsi abejnni dojḻ xhet laadi cayujnni.
\v 12 Galoo gudaunäjni rebeṉzijt, luxh che bidzujṉ gaii xpejṉ Israel ni baxhaḻ Jacoob, dxejcti gubicajni lo rebeṉzijt, diruni niaunäjreni saꞌcsi bidxejbni rexpejṉ Israel ni ruꞌ bee ni bidzujṉ roꞌc.
\v 13 Dxejcti sigajcza bejn guiraa rexpejṉ Israel ni nadxaag Pedr, gujcreni sigajc Pedr, runtioꞌp lajzreni, naareni gusgueereni. Näjli Bernabé bejn siꞌc.
\v 14 Luxh che bahuiä direni gun siꞌcpacni najc xtidx Jesucrist, dxejc räpä loj Pedr nez loj guiraa rebeṉ guidoo: “Palga luj najclu te xpejṉ Israel, luxh nabajṉlu siꞌc rebeṉzijt ni digac xpejṉ Israel, xhet siꞌcdi ni caj loj leii, ¿xhicuent rlajzlu guinibeelu guibajṉ rebeṉzijt siꞌc rexpejṉ Israel nani rusoob xleii toMoisés?”
\s Nungäjḻ chalilajz rexpejṉ Israel, sigajc guiraa bejṉ, te guibicaj xtojḻreni
\p
\v 15 Nuure najcnu rexpejṉ Israel cheni gojllinu; dinu gac beṉdojḻ siꞌc najc rebeṉzijt.
\v 16 Anadonnu rut chu tejti bejṉ sajc guibicaj xtojḻni che gunni siꞌcni caj lo leii, saꞌcsi nanab chalilajznu xtidx Jesucrist. Niꞌcni biolilaaznu xtidx Jesucrist te jia xtojḻnu saꞌcsi rililajznu, xhet saꞌcsi riennu siꞌcni caj loj leii. Di gacdi jia xtojḻ bejṉ xcuent yäḻrusoob xleii toMoisés.
\p
\v 17 Palga laḻ ni rlajznu jia xtojḻnu xcuent xcäḻrililajz xtidx Jesucrist, ruhuiinu cayenrunu dojḻ, la sajc guiniinu: Jesucrist ruluii rienrunu dojḻ, ¿ä? ¡Xho gacni siꞌc!
\v 18 Palga rlazä gunsacä redzuun nani abaṟoꞌnä, lagajc narä rapä dojḻ nacä beṉ dojḻ.
\v 19 Niluxh xcuent leii, anacä siꞌc beṉgut: digacdiru guinibee leii narä saꞌcsi ṉaj nabaṉä lo xnejz Dios. Luxh lagajc leii bejn nacä siꞌc beṉgut che gucbeä di gacdi gusobä guiraa ni caj lo leiiga.
\v 20 Najcni siꞌcni gutnää́ Crist lo crujz. N̲aj xhet narädi ni nabaṉä, laa Crist ni nabajṉ neṉ lastoä. Yäḻnabajṉ ni nabaṉä ṉaj lo guedxliujre nabaṉä saꞌcsi rlilazä xtidx Xiꞌn Dios nani rinälajz narä luxh gujtni te gudijxni xtoḻä.
\v 21 Dina cuälazä xcäḻrulaslajz Dios. Paru sajc gudzucaj leii xtojḻ bejṉ te gacreni beṉnaya nez loj Dios, dxejc xliaꞌsi gujt Jesucrist.
\c 3
\s Yäḻrililajz rusia dojḻ
\p
\v 1 ¡Chipsa nayäältu beṉ Galacia! ¿Chu bascäjytu te
di cuadiajgtu xtidx Jesucrist? Ni nez lojpactu bisuleꞌnu
diidx xho cuaj Jesucrist lo crujz.
\v 2 Tejtis diidx rlazä guiniitu loä. ¿La cuaꞌtu Sprit
Dxan xten Dios saꞌcsi bejntu siꞌcni caj lo leii, ä? o
¿la saꞌcsi huililajztu diidx ni biejn diajgtu?
\v 3 Chipsa nayäältu. Acuaꞌtu Sprit Dxan xten Dios dxejcti
ṉaj rlajztu guntu ni riajbtis yejctu guntu.
\v 4 ¿La xliaꞌsi gudejdtu trabajw? Chugan la gulii xliaꞌsini.
\v 5 Che runiidx Dios Sprit Dxan xtenni lojtu, che rujnni
milaagwr nez lojtu, ¿xho rujnnini? Dini gunni saꞌcsi
rujntu siꞌcni caj lo leii, rujnnini saꞌcsi rililajztu
xtiidxni ni riejn diajgtu.
\p
\v 6 Huililajz toxtadgoldoonu Abram xtidx Dios, niꞌcni
cuaꞌ Diosni siꞌc te bejṉ nani naya lastooni.
\v 7 Niꞌcni coḻyacbee dee: renani rililajz xtiidx Dios
najc xiꞌn toAbram.
\v 8 Galooli najn Dios xcuent yäḻrililajz susia Dios
lastoo rebeṉzijt, niꞌc räjpni lo Abram: “Guiralii rebeṉ
guedxliuj sacleꞌ xcuentlu.” Diidxre cuaj lo guijtz ni
gujc galooli, cadro caj xtidx Dios.
\v 9 Niꞌcni reni rililajz ṉaj agucnäj Diosreni sigajc
gucnäjni toAbram nani huililajz.
\p
\v 10 Guiraa reni rlajz guibajṉreni gunreni siꞌcni caj
lo leii, agubibdereni saꞌcsi scree caj lo leii: “Guiraa
reni digunpac siꞌcni caj lo reguijtz xten leii, sucuibdereni.”
\v 11 Niluxh huenliisi rieṉ rut nayadi nez loj Dios
xcuent leii, saꞌcsi dee najc xtidx Dios: palga rililajz
te bejṉ xtidx Dios, najcni te bennaya nez lo Dios, nabaṉnäjni
Dios xcuent xcäḻrililajzni.
\v 12 Leii dini naa chalilajz bejṉ te xcaꞌni yäḻnabajṉ.
Scree caj lo leii: “Nani gunpac siꞌcni caj loj reguijtz
xten leii, niꞌc nanab guibajṉ lojpac leiiga.”
\p
\v 13 Jesucrist badzucaj nuure loj yäḻrbibde xten leii.
Laani gubibdeni xcuentnu saꞌcsi xtidx Dios naj: “Anabibde
te bejṉ ni najḻ loj te yajg.”
\v 14 Scree gusajc Jesucrist te gusojb diidx ni räjp
Dios loj toAbram, sacnäjni guiraa rebeṉzijt; näjza te
guiraanu ni chalilajznu xtidx Jesucrist xcaꞌnu Sprit
Dxan xten Dios.
\s Leii näj diidx ni biaꞌn Dios loj toAbram
\p
\v 15 Betzä, ṉaj gusäꞌtä te diidx xcuent beṉ guedxliuj.
Cheni rujn bejṉ te guijtz te jiaꞌn diidx lo stee bejṉ,
mase bejṉtis najcreni, che abacuaani lajni lo guijtzga,
rut sajcdi gudzucaj guijtzga. Rutza sajcdi gucuaaru
diidx lojni che anajcni.
\v 16 Luxh anajnnu badeed Dios xtiidxni loj toAbram
näjza loj xagdooni. Dini ninii “rexagdooni” siꞌc loj
xhidajlreni, guniini lo tejtis xagdooni, luxh laani najc
Jesucrist.
\v 17 Diidx ni rlazä guiniä najc scree: Diidx nani biaꞌnpac
Dios loj toAbram gunii Diosni che cayäädx tajp gayuu
gaḻbitzuu ijz gudeedni leii lo Moisés te laani gudeednini
loj rexpejṉ Israel. Niluxh di leiiga nuchaa diidx ni
biaꞌn Dios loj toAbram, laḻtis sajcni.
\v 18 Paru naquiin leii te xcaꞌ bejṉ erens, dxejc xhet
erensdi cuaꞌ Abram lo Dios. Niluxh basaꞌn Dios erens
lojpac Abram saꞌcsi biaꞌnni diidx lojni galooli.
\p
\v 19 ¿Xhicuent badeed Dios leii loj Moisés? Badeed
Dios leii saꞌcsi benduxh rexpejṉ Israel dojḻ, te gacbeereni
xho najc xtojḻreni, laḻ ni jiääd nani najc xagdoo toAbram.
Saꞌcsi biaꞌn Dios diidx con laani sigajc con toAbram.
Rexangl Dios badeed leii loj toMoisés, te laani gujc
siꞌc te bejṉ ni rusiäjḻ diidx.
\v 20 Te ni rusiäjḻ diidx xhet par tejtis bejṉdi najcni,
niluxh Dios tejtis najc.
\s Xcuent leii
\p
\v 21 ¿La garenca najc xleii Moisés lo diidx ni basaꞌn
Dios loj toAbram, ä? ¡Xho gacni siꞌc! Paru nicaꞌnu te
leii ni rajc rudeed yäḻnabajṉ, dxejc sii xcuent leiiga
nicaꞌ bejṉ yäḻnabaṉnaya.
\v 22 Niluxh loj reguijtz xten Dios caj diidx ni rnii:
Guiraa bejṉ niäuu neṉ dojḻ, te reni chalilajz xtidx Dios
siꞌc huililajz toAbram, reniꞌc xcaꞌ xcäḻrililajz diidx
xcuent Jesucrist siꞌcni biaꞌn Dios diidx loj toAbram.
\p
\v 23 Che gajd xcäḻrililajz xcuent Jesucrist jiääd, dxejc
basäuu leii nuure neṉ dojḻ, cabäjztisnu guiricaj xcäḻrililajz
xcuent xtidx Dios.
\v 24 Niꞌcni anajc leii siꞌc xmastrnu te guluiini nuure
nezyuj nez lo Dad Jesucrist te gusiani xtojḻnu con yäḻrililajz
xtiidxni.
\v 25 Niluxh ṉaj saꞌcsi arajpnu yäḻrililajz xcuent xtiidxni,
dirunu guiquiin te mastr, nalajznu leii.
\p
\v 26 Guiraatu najctu xiꞌn Dios xcuent yäḻrililajz xtidx
Jesucrist,
\v 27 saꞌcsi guiraatu ni gurobnistu loj xtidx Jesucrist,
najctu rexpejṉ Jesucrist.
\v 28 N̲aj rutiru rexpeṉ Israel niclaza rebeṉzijt, niclaza
mos, niclaza bejṉtis, niclaza niguii, niclaza gunaa, saꞌcsi
guiraanu najcnu tebloj nez lo Jesucrist.
\v 29 Palga najcnu xpejṉ Jesucrist, dxejc guliipac najcnu
xiꞌn toAbram, dxejc sicaꞌnu yäḻnasaꞌc ni abiaꞌn diidx
gudeed Dios loj Abram.
\c 4
\p
\v 1 Mbaj ṉaj. Nani xcaꞌ yäḻnasaꞌc, che najcni biuux,
najcni sigajc te mos, mase xtenni gac guiraa xhixten
xtadni.
\v 2 Yuꞌ chu te bejṉ ruhuiini, yuꞌza chu rnibee xhixtenni
cheni agurooblini, cheni guidzujṉ dxej xcaꞌni ni gudeed
xtadni.
\v 3 Sigajcza nuure che gucnu siꞌc biuux guyuꞌnu gucnu
mos loj releii, rnibeeni xhiniꞌc digacdi jieṉnu lo guedxliuj.
\v 4 Niluxh che bisaꞌ dxej ni basoob Dios, baxhaḻ Dios
Xiꞌnpacni. Xiꞌn te gunaa gojḻni, loj rexpejṉ Israelza
biädjiäjlni, basoobni leii xten toMoisés.
\v 5 Siꞌc gujc te xcasacni reni rusoobpac leii, te xcaꞌni
nuure gacnu siꞌc te xpisiäjbni.
\p
\v 6 Luxh saꞌcsi anajctu xiꞌnni, niꞌc baxhaḻ Dios Sprit
xten Xiꞌnni te cuääzni neṉ lastoonu. Laani rniini lo
Dios xcuentnu: “Guejblu, Xtadnu.”
\v 7 Niꞌc dirunu gac mos, saꞌcsi anajcnu xiꞌnni. Luxh
palga najcnu xiꞌnni, suniidxza Dios yäḻnasaꞌc loonu xcuent
Dad Jesucrist.
\s Rulijdxni naꞌc gacsac bejṉ mos
\p
\v 8 Che gajdtu gumbee Dios najctu mos xten rebanäjb
ni rajṉtu siꞌc Dios luxh dipacreni gac Dios.
\v 9 Luxh ṉaj anumbeetu Dios o ṉaj anumbee Dios laꞌtu,
xho chachusactu loj redzuun ni guyuꞌtu galoo che gujctu
mos xten rebanäjb.
\v 10 Cayutistu redxej, rebäii, retiemp, reijz.
\v 11 N̲aj rdxebä andi xliaꞌsi gudedä trabajw baluiätu.
\p
\v 12 Rniabduxhä lojtu betzä, coḻyajc siꞌc narä, saꞌcsi
narä ahuililazä xtidx Jesucrist sigajc laꞌtu. Xhetza
xhi dzunguijdxdi bejntu loä che guyuꞌä lojtu.
\v 13 Laꞌtu anajntu galoo che basuleꞌä diidx xcuent
Jesucrist lojtu, benäni saꞌcsi racxhuu tiexhä.
\v 14 Dizatu nuzeꞌ niclaza nibälajztu narä xcuent yäḻracxhuu
ni rajc tiexhä, alga siꞌc te xangl Dios, siꞌc lagajc Jesucrist
cuaꞌtu narä.
\v 15 ¿Con yäḻrbalajz xtentu ni gojptu dxejc? Niluxh
rniä lojtu, paru niajc nibäätu balojtu, nuniidxtuni loä
dxejc, siꞌc niujntu.
\v 16 N̲aj ¿la rdxeꞌchtu loä saꞌcsi caniä didxlii lojtu,
ä?
\p
\v 17 N̲aj yuꞌ gaii bejṉ nani rujnsi siꞌcni sanäreni
leii rujnsireni siꞌcni rinälajzreni laꞌtu. Niluxh rlajzreni
gudzucajreni laꞌtu te gusaantu xtidxä, te chanajltu laareni,
te jiutu xtiidxreni.
\v 18 Laaca chanälajz bejṉ saꞌni, niluxh naꞌc gusgueeni,
naꞌcza che suganää́si laꞌtu chanälajztu narä.
\v 19 Rexiꞌnä, xcuent laꞌtu cadedä trabajwduxh siꞌc te
gunaa ni rajl xpäzni, luxh sinuu sidedä trabajw cheni
arbäjzpacli Jesucrist neṉ lastootu.
\v 20 Maläii gac jiälä lojtu lagajc ṉaj te gac guiniä
xhi stee diidx. Niluxh ṉaj zijt yuꞌä, dina gacbeä xhi
xhigab gunä xcuenttu.
\s Diidx xcuent Agar näj Sara
\p
\v 21 Coḻguinii loä, laꞌtu ni rlajz gun siꞌcni caj lo
leii, ¿la ditu gacbee, la di diajgtu jiejn xhiniꞌc caj
lo leii, ä?
\v 22 ¡Coḻjiejn! Scree caj loj leii: guyuꞌ tioꞌp xiꞌn
toAbram. Tejni najc xiꞌn gunaa ni najc xmos Sara. Steeni
najc xiꞌn chäälpacni.
\v 23 Niluxh xiꞌn xmosni gojl saꞌcsi lagajc laani bejnni
xhigab siꞌc chu xiꞌnni. Luxh xiꞌn chäälpacni gojl saꞌcsi
siꞌc biaꞌn Dios diidx loj Abram.
\v 24 Diidx xcuent regunaare najc siꞌc diidx ni ruluii.
Regunaare najc siꞌc tioꞌp diidx ni biaꞌn Dios. Agar
najc mos, mosga najc siꞌc diidx ni biaꞌn Dios con Moisés
lo dan Sinaí. Rexiꞌn mosga guyuꞌ te gacreni mos lo leii.
\v 25 Agar najc siꞌc dan Sinaí nez lo reguejdx xten
Arabia. Luxh guedx Jerusalén najc siꞌc dan Sinaí, saꞌcsi
ṉaj roꞌc najc cadro ṟeꞌ rexpeṉ Israel con rexiꞌnreni,
sanäreni leii.
\v 26 Niluxh di guedx Jerusalén ni yuꞌ guibaa gac siꞌc
mos, luxh nuurnu najcnu xiꞌnni.
\v 27 Scree caj loj xtidx Dios:
\q Bibalajz, luj gunaa ni gajd xiꞌnlu chu,
\q guredxaꞌ, bibalajz,
\q luj ni gajdlu ted trabajw ni rdejd gunaa che rajl xiꞌnni.
\q Saꞌcsi suꞌru xiꞌn gunaa nani gulälajz chäälni quela
xiꞌn gunaa ni gudiesnäj chääl stee gunaaga.
\p
\v 28 Mbaj ṉaj, rebetzä, nuure, sigajc Isaac, najcnu xiꞌn
toAbram nani chu siꞌcni biaꞌn Dios diidx loj toAbram.
\v 29 Che gojl xiꞌn gunaa ni najc mos, ni gojl saꞌcsi
lagajc laani bejn xhigabga, bidxagdijḻni xiꞌn chäälpac
Abram nani gojl xcuent diidx ni biaꞌn Dios loj Abram.
Sigajcza najcni ṉaj.
\v 30 ¿Xhi caj lo reguijtz? “Barilaagw gunamos näj xiꞌnni,
te di xcaꞌ xiꞌn gunamos yäḻnasaꞌc xtenlu siꞌc ni xcaꞌ
xiꞌn gunaa nani najc chäälpaclu.”
\v 31 N̲aj nuure, betzä, dinu gac siꞌc xiꞌn gunamos te
chunu lo leii. Nuurnu najcnu siꞌc xiꞌn gunaa nani najc
chäälpac toAbram.
\c 5
\s Coḻguzutijp lajztu lo yäḻrililajz xtidx Dios
\p
\v 1 Coḻgusutijp lajztu lo xtidx Dios nani baniidx Jesucrist
loonu saꞌcsi guliipac gulää Jesucrist nuure ladzṉaa
leii, badzucajni xtojḻnu che huililajznu xtiidxni, niꞌcni
naꞌcru gusiejch lajztu te gacsactu mos ladzṉaa leii.
\p
\v 2 Narä Pabl rniä lojtu, palga laꞌtu chutu bee siꞌcni
caj lo leii, dxejc xliaꞌsi chalilajztu xtidx Jesucrist.
\v 3 Rniäza stehuält, guiraa bejṉ nani rlajzpac chu bee,
nanab gunni siꞌcpac ni caj lo leii.
\v 4 Palga rlajztu guntu redzuun ni caj lo leii te guibicaj
xtojḻtu, dxejc agubicajtu lo Jesucrist, agubicajzatu lo
xcäḻracnäj Dios.
\v 5 Niluxh nuure xcuentpac Sprit Dxan xten Dios rililajznu
gudijx Jesucrist xtojḻnu lo crujz, cayenloonu jiädsacni
te guniidxni yäḻbaṉsaꞌc par tejpas loonu.
\v 6 Saꞌcsi loj reni rililajz xtidx Jesucrist xhet sajcdi
chu bejṉ bee, xhetza sajcdi naꞌc chu bejṉ bee, nani sajc
najc chalilajz bejṉ xtidx Dios. Yäḻrililajzga rujn guibaṉsaꞌcnu
te chonälajznu resaꞌnu.
\p
\v 7 Laꞌtu laaca sasajtu. ¿Chu badxojn gusoobtu xtidxlii
Dios?
\v 8 Xhet Diosdi ni guletu badxojnditu.
\v 9 Anajntu tudxeꞌnsi cobgulaj rusaguijni yätxtiil;
siꞌc te cobgulajga najc te niguii ni caguluiitu xtidx
leii.
\v 10 Rialilazä xtidx Dad Jesucrist, niꞌc nadiplazä laꞌtu;
ananä ditu chalilajz stee diidx. Niluxh bejṉ ni cagusgueetu
susacsí Diosni, chutis najcni.
\p
\v 11 Narä rebetzä, paru narä caguluiä chutu bee, siꞌc
ruluii rexpejṉ Israel, ¿xhi xcuent rusacsí rexpejṉ Israel
narä? Paru siꞌc caguluiä, dirutu chalilajz gudijx Jesucrist
xtojḻnu lo crujz. Luxh siꞌcpacza rlajzreni.
\v 12 Rebejṉ nani cagusgueetu caniireni chutu bee, ¡malaiiza
gutiuugreni tejpas lagajc tiejxhreni!
\p
\v 13 Laꞌtu rebetzä, agurejdx Diostu loj xtiidxni te
chalilajztu Jesucrist ni rusḻaa bejṉ lo dojḻ. Coḻhuixgaa
naꞌc xcaꞌtistu rediidxga dxejcti guntu siꞌctis ni rlajz
tiejxhtu, siꞌctis ni riajbza yejctu. Coḻgacnäj saꞌtu
con yäḻrinälajz, tejni sigajc steeni.
\v 14 Saꞌcsi guiraa diidx ni caj lo leii con tejtis
diidxre rsiojbni: “Chanälajztu saꞌtu sigajc rinälajztu
lagajc laꞌtu.”
\v 15 Palga rdijḻtu, rauyaꞌtu saꞌtu, rajwtu saꞌtu, ¡coḻnatiro!
Andi lagajc laꞌtu gunijttu saꞌtu.
\s Nani rchaglajz rebejṉ näj yäḻnabajṉ ni rudeed xtidx Dios
\p
\v 16 Rniä lojtu, coḻguibajṉ siꞌc ruluii xtidx Dios näjza
Sprit Dxan xtenni, te siꞌc naꞌc guibajṉtu siꞌctis ni
rlajz tiejxhtu, siꞌc ni najctis xhigabtu.
\v 17 Saꞌcsi ni najc xhigab xten bejṉ rdxeꞌch loj xhigab
Sprit Dxan xten Dios. Sigajcza xhigab xten Dios dini
gac tebloj con xhigab xte bejṉ. Rudxojṉtu loj saꞌtu,
niꞌcni digacdi guntu dzuun ni rlajztu guntu.
\v 18 Luxh palga cagulijdx Sprit Dxan laꞌtu, dxejc dirutu
quiquiin guntu siꞌc ni caj lo leii.
\p
\v 19 Guyasi jiembee bejṉ xhireniꞌc najc redzuun ni
rujn rebejṉ nani di gumbee xtidx Dios. Dee najc redzuunga:
yäḻrusguee chääl bejṉ, yäḻrusguee chääl saꞌreni, yäḻrusguee
saꞌni che ruchaag saꞌ te dxaꞌp con te biꞌn loj redoḻguijdx,
guiraa redoḻguijdx ni rujn niguii con gunaa,
\v 20 yäḻrajṉ rebanäjb, yäḻbidxaa ni rujn daan bejṉ, yäḻrdxechlajz
loj saꞌni, yäḻrchagdijḻ saꞌni, yäḻnayedx lo saꞌni, yäḻrdxechaꞌ,
yäḻriu lagajctis laani, yäḻrliaꞌ lo saꞌni, yäḻrchaag lo
te cuaa bejṉ. N̲ajza saꞌ dzunguijdxre rujnreni:
\v 21 yäḻrdxeꞌch lajz, yäḻruguꞌt saꞌni, yäḻrsiojz, yäḻrauxhaꞌt,
näjza guiraa dojḻ saꞌ redee. Sigajc ni balidxä laꞌtu
xhi dxejga rulidxä laꞌtu ṉaj. Nani rujn saꞌ redojḻre
direni jiuꞌ loj xcäḻrnibee Dios xhaguibaa.
\p
\v 22 Niluxh xtzuun Sprit Dxan xten Dios najc yäḻrinälajz
saꞌni, yäḻrbalajz lastooni, yäḻrbedxi lajzni, yäḻrbecdxi
lajz saꞌni, yäḻnajc beṉsaꞌc lo chutis bejṉ, yäḻnagodzlajz,
yäḻrililajz,
\v 23 yäḻnadolajz, yäḻrnibee lastooni lo ni rlajz gun
tiejxhni. Xheti te leii ni rudxojn gun bejṉ saꞌ redzuunre.
\v 24 Niluxh renani ahuililajz xtidx Jesucrist, abatioꞌṉreni
guiraa redoḻguijdx ni rlajz gun tiejxhreni.
\v 25 Palga rbäjz Sprit Dxan neṉ lastoonu, doꞌo guibajṉ
siꞌc rnibee Sprit Dxan guibajṉnu.
\p
\v 26 Naꞌc guiliäꞌpnu lagajc xpalaꞌnnu, naꞌc guidxech
lajznu lo saꞌnu, naꞌc gunembiidnu saꞌnu.
\c 6
\s Coḻgacnäj saꞌtu
\p
\v 1 Saꞌä, palga chu tejtu ni abiajb neṉ dojḻ, lagajc
laꞌtu nani aracbeetu xtidx Dios coḻgulijdx bejṉga, coḻgacnäjni
te guiriini neṉ dojḻ. Coḻnii lojni nadolajz, nasiṉlajztu
lagajc laꞌtu didi che guidon nägajcza laꞌtu jiajbtu
neṉ dojḻ.
\v 2 Coḻhuii xhi rquiin resaꞌtu, coḻgacnäjreni te siꞌc
gusoobtu guiraa rediidx ni najc leii xten Jesucrist.
\p
\v 3 Saꞌcsi nani rujn xhigab sacduxhni, yuꞌza chu najcni,
niluxh rut najcdini, rusgueeni lagajcsi laani.
\v 4 Tejgatu coḻcubee xho najc xtzuuntu te fiitu la
laaca najcni, dxejcti sajc guiliäꞌptu lagajc xpalaꞌntu.
Dxejc ditu guiquiin chu stee bejṉ guiliäꞌp xpalaꞌntu.
\v 5 Saꞌcsi tejga bejṉ susuleꞌni diidx lo Dios xhiniꞌc
bejnni.
\p
\v 6 Nani casieed xtidx Dios nanab gacnäj bejṉ nani
ruluiini, gudeedni tudxeꞌn xhixtenni loj nani ruluiini.
\p
\v 7 Naꞌc gusgueelu lagajc luj. Dios digacdi guigueeni,
niꞌc guiraꞌti dzuun ni rujn bejṉ lagajcza niꞌc xcaꞌ
bejṉ.
\v 8 Paru te bejṉ gun dzuun xcuenttis tiejxhni, dxejc
che guidzujṉ dxej xcaꞌni yälnasaꞌc, sinitloj tiejxhni,
dizani jiuꞌ loj xcäḻrnibee Dios. Palga te bejṉ gun dzuun
xcuent Sprit ni badeed Dios lojni, che gal yälnasaꞌc,
sicaꞌni yäḻnabajṉ par tejpas.
\v 9 Niꞌcni naꞌc guidxajgnu jiennu dzunsaꞌc te che guidzujṉ
dxej ni xcaꞌni yäḻnasaꞌc, xcaꞌzanu te yäḻnasaꞌcro.
\v 10 Niꞌcni nanab laḻ ni sajcni, gacnäjnu chutis bejṉ,
ganiddoo resaꞌnu ni ahuililajz.
\s Yälrulijdx näjza xtixtios
\p
\v 11 Coḻhuilaa lacti reletrduxh cacuaä lojtu con ṉaä́pac.
\v 12 Guiraa reni rdxaglajz gun ni rlajztis tiejxhni,
laa reniꞌc ni rlajz chutu bee, tedi tedreni trabajw xcuent
ni cuaj Jesucrist lo crujz.
\v 13 Lagajc reni ruꞌ bee direni gun siꞌcni caj lo leii,
niluxh rlajzreni chutu bee te guibaa lajzreni saꞌcsi
bejnreni gaan guyuꞌ beega tiejxhtu.
\v 14 Luxh narä dilazä guibaa lo saꞌ recosga; rbaatis
lazä saꞌcsi gujt Jesucrist, cuajni lo crujz, te gudijxni
rextojḻnu. Niꞌcni par narä xhetru xhi cos-guijdxdi yuꞌ
lo guedxliujre, diruna guichaglazä gunä redoḻguijdx xten
guedxliujre.
\v 15 Che ahuililajz te bejṉ xtidx Jesucrist, xhetru
sajcdi chu bejṉ bee, xhetza sajcdi naꞌc chu bejṉ bee.
Nani sajctis najc gacni siꞌc te beṉcoob lo xtidx Jesucrist.
\v 16 Guiraa renani nabajṉ siꞌcni ruluii xtidx Jesucrist
sibedxi lajzreni xcuent xcäḻrulaslajz Dios. Näjza rexpeṉ
Israel nani ahuililajz xtidx Jesucrist sibedxi lajzreni.
\p
\v 17 Naꞌcru gucheꞌchtu narä saꞌcsi redib ni yuꞌ tiexhä
najc siꞌc te seen narä anacä te xmos Jesucrist.
\p
\v 18 Rebetzä, gacnäj Dad Jesucrist guiragajctu con Sprit
Dxan xtenni. Sugacni siꞌc.