\id PHP
\h Filipenses
\toc1 Filipenses
\mt Te Guijtz Lo Rebeṉ Filipos
\c 1
\s Latzguiib yuꞌ Pabl bacuaani loj rebeṉguidoo xten guedx Filipos
\p
\v 1 Pabl näjza Timoteu, nani najc rexmos Jesucrist, rucuaanu guijtzre lo guiraa rexpejṉ Jesucrist nani rbäjz guedx Filipos, loj rebejṉ nani ruluii xtidx Dios neṉ reguidoo näjza loj rediaconos.
\v 2 Gacnäj Dios laꞌtu con yäḻrbedxi-lajz xten Xtadnu näjza xten Dad Jesucrist.
\s Rniab Pabl lo Dios xcuent rebejṉ nani rililajz
\p
\v 3 Che rnaj lazä laꞌtu, rudedä xquixtios lo Dios.
\v 4 Che rniabä lo Dios, rbaa lazä rniabä lo Dios xcuent laꞌtu,
\v 5 saꞌcsi abidxaag saꞌnu lo xtidx Jesucrist che guslojli huililajztu hasta ṉajli.
\v 6 Anancheä Dios nani gusloj cayunsaꞌc dzuun neṉ lastootu, lagajc laani suluxsaꞌc dzuunga dxejli ni jiääd Jesucrist.
\v 7 ¿Xhiru xhigab nungäjḻ gunä? Ni rapä laꞌtu neṉ lastoä saꞌcsi cayacnäjtu narä neṉ latzguiib luxh rsiudzuꞌtztu riyeꞌtztu lo bejṉ, gulii najc rediidx nani rusuleꞌä xcuent Jesucrist näjza laꞌtu rusuleꞌtu rediidxga.
\v 8 Dios nanchee xho rbaṉnää́tu, xho sanälazä guiraatu lo xcäḻsanälajz Jesucrist.
\v 9 Rniabä lo Dios te tioobru xcäḻrinälajztu näj xcäḻnajntu nägajc churu xcäriejn guiraatu,
\v 10 te cuetu nani najc dzunsaꞌc te siꞌc guibaṉ nayatu, te naꞌc gaꞌptu nicla tej dojḻ cheni jiääd Jesucrist.
\v 11 Te guidxa lastootu yälnasaꞌc xten te yäḻnabaṉsaꞌc ni runiidx Jesucrist, te guspaa lajztu Dios, guiliäꞌptu xpalaꞌnni.
\s Jesucrist najc xcäḻnabaṉä
\p
\v 12 Rlazä gacbeetu betzä: guiraa nani gusacä niꞌc cayacnäj guireꞌchru xtidx Jesucrist.
\v 13 Niꞌc guiraa rebejṉ, renani yuꞌ jusgaad sigajc renani yuꞌ garenca lajt, anajnreni niäuä latzguiib xcuent Crist.
\v 14 Xhidajlru resaꞌnu cheni gucbeereni yuꞌä latzguiib, gusudzuꞌtzru lajzreni, direni nidxejb, guniirureni xtidx Dios.
\p
\v 15 Guliica yuꞌ reni rusuleꞌ xtidx Jesucrist saꞌcsi rdxeꞌch lajzreni, rdxeꞌchzareni loä. Yuꞌza reni rusuleꞌ xtidx Jesucrist saꞌcsi laaca najc xhigabreni.
\v 16 Yuꞌreni rusuleꞌ xtidx Jesucrist saꞌcsi rdxeꞌchreni, xhet saꞌcsi laaca najc xhigabreni, alga rujnreni xhigab gustioobrureni trabajw nani tedä neṉ latzguiib.
\v 17 Niluxh yuꞌ reni rusuleꞌ rediidxga saꞌcsi sanälajzreni Jesucrist. Anajnreni yuꞌä latzguiibre te gusuleꞌäru guliipac najc xtidx Jesucrist.
\v 18 Niluxh ¿xhiru najcni? Palga rujnsireni laaca o palga guluiipac laaca najc xhigabreni rusuleꞌreni xtidx Crist; rbaa lazä saꞌcsi careꞌch xtiidxni niluxh sibaaru lazä.
\v 19 Ananä laaca guiriä loj guiraa recosre saꞌcsi canabtu lo Dios xcuentä. Luxh xcäḻracnäj Sprit xten Jesucrist
\v 20 rujn runloä, rbäzäza dina jianxtuiä. Niꞌcni dina guidxebä guiniä, siꞌcni runäpac, sigajcza runä ṉaj te gac guiliäꞌpä xpalaꞌn Jesucrist con tiexhä palga guibaṉä o palga guetä.
\v 21 Saꞌcsi palga guibaṉä, suꞌä lo Jesucrist; luxh palga guetä sunäru gaan.
\v 22 Palga guibaṉäru lo guedxliujre, sajcru gunä xtzuun Dad Jesucrist, niꞌcni dina gacbeä xhinic cueä xcaꞌä.
\v 23 Nagajn najcni par narä cueä lo guiroꞌpreni. Te lajt runä xhigab: malaii guetä te chaꞌa cadro yuꞌ Jesucrist saꞌcsi niꞌc najc hueenru par narä.
\v 24 Niluxh stee lajt nancheä nungäjḻ guibaṉäru lo guedxliujre xcuent laꞌtu.
\v 25 Niluxh narä racbeäpac siannää́ru laꞌtu, suꞌäru lojtu te chanuurutu lo xtidx Jesucrist, te guibalajztu lo yäḻrililajz,
\v 26 te guibalajzrutu xcuentä loj Jesucrist che guibisacä lojtu stehuält.
\p
\v 27 Coḻhuiitis guibajṉtu siꞌcpac ni rnii xtidx Jesucrist, te palga jiädhuiätu o palga ruti narä, jiejn diagä sugadzuꞌtztu, rujntu tejsi xhigab, nadxaag saꞌtu rujntu tejsi dzuun con yäḻrililajz xten xtidx Jesucrist.
\v 28 Naꞌc guidxejbditu renani rdxeꞌch lojtu. Laareni huenliisi ruseṉ agunijtreni niꞌc rdxeꞌchreni, niꞌcni laꞌtu huenliisi ruseṉ aguḻaatu neṉ dojḻ siꞌc baniidx Dios, niꞌcni ditu guidxeꞌch.
\v 29 Saꞌcsi lojtu abaniidx Jesucrist chalilajztu xtiidxni. Niluxh xhet niꞌctis; nägajcza tedtu trabajw xcuent laani.
\v 30 Cadejdtu lagajc trabajw ni cahuiitu gudedä luxh ṉaj riejn diajgtu cadedsicä trabajwga.
\c 2
\s Xcäḻnalaslajz näjza xcäḻgurobduxh Jesucrist
\p
\v 1 ¿La ruspaa Jesucrist lajztu? ¿La racnäj xcäḻrinälajztu
laꞌtu? ¿La yuꞌ Sprit Dxan xtenni con laꞌtu? ¿La yuꞌ
xcäḻsanälajzni näj xcäḻrulaslajzni lastootu?
\v 2 Palga yuꞌni, coḻguspaa lazä, coḻyejn tejsi xhigab
con narä, coḻgaꞌp lagajc yäḻsanälajzga, coḻguidxaag saꞌtu,
coḻyejn tejsi xhigab.
\v 3 Naꞌc guntu nicla tej dzuun saꞌcsi cayutu lagajc
laꞌtu, naꞌcza guntu dzuun te chäꞌp xpalaꞌntu. Coḻyejn
xtzuuntu con yäḻnalaslajz, coḻhuii loj saꞌtu siꞌc beṉroru
lojtu.
\v 4 Naꞌc jiu chu tejtu lagajctis xhixtenni, coḻjiu tejgatu
xhixten saꞌni.
\p
\v 5 Coḻgaꞌp lagajc saꞌ xhigab nani gojpza Jesucrist
\v 6 nani mase najcni sigajc Dios, dini niniazdzuꞌtz
xcäḻrnibee Dios,
\v 7 alga basaꞌnni te laad yäḻrnibee nani rajpni con
Xtadni Dios te gujcni mos cheni gojlni lo guedxliujre.
Gujcni siꞌctis te bejṉ.
\v 8 Che gujcni siꞌctis beṉ guedxliuj, gujcni beṉ nadolajz,
beṉ nasobdiidx. Basoobni xtidx Dios, gujtni lo crujz,
luxh yäḻrejt lo crujz najc te yäḻrtuiduxh.
\v 9 Niꞌcni baspaṉsac Diosni, guleꞌcni Crist te lajt
ni najc jiaaru, badeedza Dios sajcru lajni lo laj guiraa
relaj ni rusäꞌt bejṉ.
\v 10 Luxh che jiejn diajgreni laj Jesucrist, suzuxhijb
guiraa reni yuꞌ xhaguibaa, guiraa reni yuꞌ lo guedxliuj,
näjza guiraa reni yuꞌ nez neṉ yuj.
\v 11 Te guiraareni gacbeepac, guiniizareni: “Jesucrist
najc Dad”, te siꞌc chäꞌpduxh xpalaꞌn Xtadnu Dios.
\s Rexpejṉ Jesucrist najc siꞌc bajl ni rusanij lo guedxliuj
\p
\v 12 Niꞌcni, resaꞌä ni sanälazä, sigajcni rusoobtu xtidxä
cheni suganää́ laꞌtu, sigajcza coḻgusoob xtidxä ṉaj ni
yuꞌä zijt, coḻhuii tejgatu xho gac ḻaatu neṉ dojḻ, coḻyajc
bejṉ ni rusoob diidx con yäḻrdxejb.
\v 13 Saꞌcsi Dios najc ni rujn dzuun neṉ lastootu te
rajc rujntu xhigabsaꞌc, dxejc racnäjzani laꞌtu te rajc
rujntu siꞌcni rlajzni.
\p
\v 14 Loj guiraꞌti ni rujntu, naꞌc gusmojm̲tu, naꞌcza gun
tiop lajztu,
\v 15 te rut gucuaquijditu, te gactu bejṉ ni ruchaag
chutis bejṉ, gactu xiꞌn Dios, bejṉ nani xhet xtojḻdini
yuꞌ laḻ ni treꞌtu loj rebeṉguijdx ni rujn redzundxuudx.
Nez lojreni gactu siꞌc te bajl ni rdimbichaꞌ siꞌc rebalxhaguibaa
che nacäjy,
\v 16 saꞌcsi arapdzuꞌtztu xtidx yäḻnabajṉ ni runiidx
Crist neṉ lastootu te guspaatu lazä dxej cheni jiääd
Jesucrist, saꞌcsi xhet xliaꞌdi gujc xtzunä, xhetza xliaꞌdi
cayunä dzuun ṉaj.
\v 17 Mase lagajc xtienä guixeꞌ te guizaꞌ te gojn ni
xcaꞌ Dios xcuent xcäḻrililajztu, rbaa lazä, sibalaznää́za
laꞌtu.
\v 18 Sigajcza coḻguibaa lajztu, coḻguibalaznäj narä.
\s Timoteu con Epafrodito
\p
\v 19 Nez loj Dad Jesucrist cayunloä guxhaḻgacä Timoteu
lojtu te näjza narä guibaa lazä che agucbeä xho yuꞌtu
nejzga.
\v 20 Saꞌcsi rutru rapädi nani rujn tejsi xhigab, tej
ni guliipac gun dzuun, jiupacni laꞌtu.
\v 21 Guiraa rebejṉre rujntis xtzuuncareni, direni jiu
gunreni xtzuun Jesucrist.
\v 22 Niluxh laꞌtu anajntu xho rujn Timoteu; siꞌc racnäj
te biꞌn xtadni, siꞌcza racnäjni narä lo xtidx Jesucrist.
\v 23 Niꞌcni rlazä guxhaḻäni te jiädhuiini laꞌtu, fixgaä́si
don xho sasaj xcuentä ree.
\v 24 Cabäzäza nez lo Dad Jesucrist don la näjza narä
sajl jiädhuigacätu.
\p
\v 25 Niluxh rchaloä nanabpac guxhaḻä bejtznu Epafrodito
ni najc saꞌä loj dzuun, loj retrabajw ni cadejdnu. Lagajc
laꞌtu baxhaḻtuni te jiuni narä, fiini xhiniꞌc rquinä.
\v 26 Laani rlazduxhni fiini lojtu, lacti cayuꞌni yärsiaꞌ
saꞌcsi gucbeetu gucxhuuni.
\v 27 Guliica gucxhuuni cuentro, ameer niejtni, niluxh
Dios balaslajzni laani, luxh xhet laatisni, balaslajzzani
narä te di nidedäru loj yäḻnahuinlajz ni yuꞌä ree.
\v 28 Niꞌcni rlazä guxhaḻgacäni te guibalajztu che fisactu
lojni, näjza te naꞌcru gac-huinlazä xcuent laꞌtu.
\v 29 Coḻcaꞌni con yäḻrbalajz siꞌc bejtztu lo xtidx
Dios, sigajcza coḻyejn reni najc sigajc laani.
\v 30 Xcuent xtzuun Jesucrist ameer niejtni, dini niu
xcäḻnabajṉtisni te bejnni redzuun nani di niajcdi niujntu
lagajc laꞌtu xcuentä.
\c 3
\s Te yäḻnabaṉsaꞌcpac
\p
\v 1 N̲aj rebetzä, coḻguibalajz nez lo Dad Jesucrist.
Xhet najcdi gucuasacä lagajc rediidx nani abacuaä lojtu,
saꞌcsi sacnäjni laꞌtu.
\v 2 Coḻnati renani najc siꞌc bäꞌcw. Coḻnatiza rebejṉ
nani rujn dzun guijdx. Coḻnatiza reni ruꞌ bee tiejxhtisreni
luxh xliaꞌsi rujnreni siꞌc.
\v 3 Renani guliipac yuꞌ bee najc nuure nani ahuililajz
xtidx Dios, rienzanu xtzuunni siꞌcni rlajzni saꞌcsi ayuꞌ
Sprit Dxan xtenni neṉ lastoonu. Rbalaaznu saꞌcsi najcnu
xpejṉ Dad Jesucrist, xhet xcuentdi redzuun ni rujn tiejxhnu.
\v 4 Narä sajcza guibalazä xcuent ni rujn tiexhä. Palga
yuꞌ chu tej ni rbalajz, narä rbalazäru
\v 5 saꞌcsi guyuꞌä bee che guyuꞌä xhujṉ gubijdx; narä
nacä te rexpejṉ Israel; narä nacä tej rexpejṉ toBenjamín,
nacä te hebreo, luxh xtadä najc te beṉ hebreo; xcuent
leii nacä te farisee.
\v 6 Basobduxhä guiralii rextidx Dios ni caj lo leii
niꞌcni basacsiduxhä rexpeṉ Jesucrist; xcuent yäḻnabaṉsaꞌc
xten leii, xhetliidi xtoḻä yuꞌ; basobdzuꞌtzä xtidx leii.
\v 7 Niluxh ṉaj rediidx nani galoo benä xhigab sacduxh,
ṉaj xhet sajcdini saꞌcsi sanälazä Jesucrist.
\v 8 Niluxh maazru runä: runä xhigab xhet sajcdi guiraa
nani rapä, saꞌcsi maazru sacduxh yäḻriembee Jesucrist
ni najc Dad xtenä. Xcuent Jesucrist gulälazä guiraꞌti,
guiraꞌti najc siꞌc guixbiujy nez loä te gunä gaan Jesucrist,
\v 9 te chuꞌä lojni, xhet xcuentdi xcäḻnabaṉsaꞌcä ni
najc xcuent leii, alga xcuent yäḻnabaṉsaꞌc ni najc xcuent
xcäḻrililajz Jesucrist, yäḻnabaṉsaꞌc ni najc xten Dios
xcuent yäḻrililajz.
\v 10 Niꞌcni rlazä gumbeäru Jesucrist loj yäḻrnibee
ni rajpni saꞌcsi huistie gubaṉsaꞌcni sacni loj rebeṉgut,
te gumbeäru retrabajwduxh ni gudejdni, te ganä xho gunä
ni rlajz Dios siꞌc gucbee Jesucrist, bejnzani ni rlajz
Dios che gujtni.
\v 11 Te gac guidzuṉä lo yäḻguibaṉsac loj rebeṉgut te
xcaꞌä yäḻnabajṉ par tejpas lo Dios.
\p
\v 12 Dizana guiniä “abenä gaan” o “anacä beṉsaꞌc”, alga
sanuätis te gunä gaan yäḻnabajṉ nani cuaꞌä lo Jesucrist.
\v 13 Laꞌtu rebetzä, dipacna gunä cuent alabenä gaan,
niluxh tejtis nani runä, riaḻlazä nani agudejd, rusgaä
ṉaä siꞌcni guiniazä nani churu gac.
\v 14 Siꞌcni sanuutis ruxuṉ bejṉ te gunni gaan xhi guzalajzni,
siꞌcza sanuutis cayunä dzuun nani baniidx Jesucrist
loä, te che abenä gaan dzuunga sicaꞌä ni guzalajzni, nalajznu
sibejdx Dios narä chaꞌa loj Jesucrist.
\p
\v 15 Guiraanu nani ahuililajznu, nanab jiennu lagajc
xhigabga, niluxh palga laꞌtu guntu steꞌca xhigab, rchaloä
lagajc Dios suluilojni lojtu xcuent ni et laadi cayujntu.
\p
\v 16 N̲aj, cadrotis abidzuṉnu lo nani abiembeenu, sigajcza
nanab guibaṉsijcnu, chanuutis gusoobnu rediidxga; nungäjḻ
guibajṉnu loj rediidxre, jiennu tejsi xhigab.
\p
\v 17 Rebetzä, coḻtanajl narä, coḻyejn siꞌc runä narä,
coḻhuiiza rebejṉ nani nabajṉ siꞌc nabaṉä.
\v 18 Xhidajl huält aguniä lojtu, ṉaj ronäli rnisacä
lojtu, yuꞌ xhidajl reni rdxeꞌch lojtu, rniyajreni nani
bejn Jesucrist che gudijxni xtojḻnu lo crujz.
\v 19 Redee che luux xnezyujreni sinitlojreni, saꞌcsi
xtioozreni najc yäḻrausaꞌc; luxh rbaali lajzreni rujnreni
dzun xtujy; luxh riutisreni xcäḻnasaꞌc guedxliujre.
\v 20 Niluxh nuure, xhaguibaali najc laadxnu, luxh roꞌcli
cabääznu jiääd nani rusḻaanu neṉ dojḻ, nalaaznu lagajc
Dad Jesucrist.
\v 21 Laani suchaani tiexhnu ni rajpnu lo guedxliujre,
te gac tiexhnu sigajc najc tiejxhni lo xcäḻrnibeeni.
Sujnni dee con yäḻrnibeduxh ni rajpni te rnibeeni loj
guiraliꞌti, guiraa nejz.
\c 4
\s Coḻguibalajztis xcuent Dad Jesucrist
\p
\v 1 Niꞌcni rniä lojtu, rebetzä nani sanälazä, lojtu ni
rlazä fisacä, lojtu ni ruspaa lazä, lojtu ni najc yäḻnasaꞌc
xtenä, coḻsudzuꞌtz loj xtidx Jesucrist.
\p
\v 2 Rniabduxhä lo Evodia näjza lo Síntique, rulidxäreni
gunreni tejsi xhigab xcuent Dad Jesucrist.
\v 3 Sigajcza rniabä lojlu betzä, ni runnäj narä dzuun,
gucnäj regunaare ni bennäj narä dzuun, bideednu trabajw
xcuent xtidx Jesucrist. Gucnäjza Clemente näjza guiraa
reni bennäj narä dzuun; alajreni caj neṉ reguijtz xten
yäḻnabajṉ par tejpas.
\p
\v 4 Coḻguibalaznäjtis Dad Jesucrist; stehuält rniä:
coḻguibalajz.
\v 5 Sugacbee guiraa rebejṉ xho najc xcäḻnabajṉtu lo
xtidx Dios. Asiäddzuṉgajxh dxej xten Dad Jesucrist.
\p
\v 6 Naꞌc guidxejbtu, coḻnabtis lo Dad guiraꞌti, coḻgudeedza
xquixtios lojni laḻ ni cabedx-canabtu lojni.
\v 7 Dios guniidx xcäḻrbedxilazduxhni, nicla guntu xhigab
lacti najc yäḻrbedxilajzga. Yäḻrbedxilajzga gaꞌp lastootu
näjza xcäriejntu loj Dad Jesucrist.
\s Coḻyejn xhigabsaꞌc
\p
\v 8 Mbaj ṉaj, deetis guiniä lojtu rebetzä, saꞌtis rediidxre
gusaantu chu loj rexhigabtu: guiraa ni najc guliipac;
guiraa rediidx ni nanab guiliäꞌpni xpalaꞌnni, guiraꞌti
nani nacsaꞌc; guiraꞌti nani naya; guiraꞌti nani najc
saru; guiraꞌti nani rapsaꞌc xpalaꞌn lajni; näj palga
yuꞌ xhi dzuun ni nacsaꞌcpac, o palga yuꞌ xhi te diidx
ni sajc guiliäꞌp xpalaꞌnni, xcuent guiraa reniꞌc coḻyejn
xhigab.
\v 9 Nani bisieedtu, nani cuaꞌtu, nani biejn diajgtu, nani
bahuiitu benä, niꞌc guntu te Dios ni rbecdxilajz, laani
jiannäjni laꞌtu.
\s Gojṉ xten refilipenses ni xcaꞌ Pabl
\p
\v 10 Rbaduxh lazä nez loj Dad Jesucrist saꞌcsi banasac
lajztu gacnäjtu narä. Guliini; galooli rlajztu niacnäjtu
narä, luxh di niajcdini.
\v 11 Dinä guiniä siꞌc saꞌcsi yuꞌ xhi cayädxä, saꞌcsi
abisiedä guibaali lazä loj xhitis ni rapä.
\v 12 Sajc guibaṉä che guxii rapä; sajc guibaṉä che
xhidal rapä; abisiedä guibaṉä xhotis: sajc gauduxhä,
sajcza guilianä; sajc gapä xhidajl xhixtenä, sajcza tedä
trabajw.
\v 13 Guiraꞌtini sajc gunä saꞌcsi Jesucrist racnäj narä.
\v 14 Niluxh xhet najcdi; laaca dzuun bejntu che bejntu
xhigab gacnäjtu narä laḻ ni cadedä trabajw.
\p
\v 15 Gacbee guejbtu, dad filipenses, che gusloj caguluiä
xtidx Jesucrist lojtu, cheni biriä reguedx Macedonia,
nicla tej guidoo di niacnäj narä, laꞌtistu gucnäj narä.
\v 16 Cheni yuꞌäli guedx Tesalónica, baxhaḻtu meel loä
tej-tioꞌp huält.
\v 17 Niluxh narä di rlazä xcaꞌätis xhixtentu ni guniidxtu,
nani rlazä najc tioobru xcäḻnasaꞌctu nez lo Dios xcuent
dzuun ni rujntu ruxhaḻtu meel loä.
\v 18 N̲aj acuaꞌä guiraa ni baxhaḻtu, arapä xhidajl, arapduxhä
saꞌcsi acuaꞌä nani biädnä Epafradito baxhaḻtu loä, te
gojṉ ni rlianejxh siꞌc guxhyaal, te dzunsaꞌc ni rchaglajz
Dios.
\v 19 Dios xtenä guniidx lojtu guiraa nani riäädx xcaꞌtu,
siꞌctisni rajpni reyäḻnasaꞌcduxh xhaguibaa con Dad Jesucrist.
\v 20 Coḻguiliäꞌp xpalaꞌn Dios xtadnu guixe-guixee par
tejpas. Siꞌc gacni.
\s Lult xtixtios
\p
\v 21 Coḻdeed xtixtios lo guiraa rebejṉ ni abia lastooni
nez loj Dad Jesucrist. Rebejtznu ni yuꞌ ree näj narä
ruxhaḻnu xtixtios lojtu.
\v 22 Guiraa rebeṉree ni abia lastooni nez loj Dad Jesucrist
ruxhaḻ xtixtios, niluxh ruxhaḻru resaꞌ César xtixtios
lojtu.
\p
\v 23 Sugaꞌp xcäḻracnäj Dad Jesucrist lastootu. Sugacni
siꞌc.