\id 2TH
\h 2 Tesalonicenses
\toc1 2 Tesalonicenses
\mt Guijtz Ni R̲ojp Lo Rebeṉ Tesalónica
\c 1
\s Rucuaanu guijtzre lojtu, rexpeṉ Jesucrist ni rbäjz guedx Tesalónica
\p
\v 1 Narä Pabl, näjza Silvan näjza Timoteu, cacuaanu guijtzre
lojtu, rebejtznu ni yuꞌ guidoo lo guedx Tesalónica, reni
yuꞌ lo Dios Xtadnu näjza lo Dad Jesucrist.
\v 2 Gacnäj Dios Xtadnu näj Dad Jesucrist laꞌtu, guscuecdxizareni
lajztu.
\s Gun Dios yäḻguxhtis loj rebeṉdojḻ che guibiꞌ Jesucrist lo guedxliuj
\p
\v 3 Bejtznu, rudeednu xquixtios lo Dios xcuenttu, siꞌc
riäjḻ jiennuni, saꞌcsi xcäḻrililajztu siädroobru, näjza
yäḻrinälajz ni rajp tejgatu näjza saꞌtu siädroobruni.
\v 4 Niꞌcni rliäꞌpnu xpalaꞌntu neṉ reguidoo xten Dios.
Rbaa lajznu saꞌcsi rsiudzuꞌtztu sanuutis rililajztu
xtidx Dios mase rdejdtu trabajw, rusacsí bejṉtu.
\v 5 Dee ruluiipac xcäḻguxhtis Dios najc laaca, niꞌc
rnii Dios riäjḻ jiuꞌtu lo xcäḻrnibeeni saꞌcsi cadejdtu
trabajw xcuent yäḻrnibeega.
\p
\v 6 Saꞌcsi rujn Dios xhigab riäjḻza quiix reni bateedtu
trabajw xtojḻreni, niꞌc suteedzani reniꞌc trabajw.
\v 7 Niluxh laꞌtu ni cadejdtu trabajw, sujn Dios gusilaznäjtu
nuure che guluiiloj Jesucrist, siriini xhaguibaa siädnäjni
rexanglni ni sajc, ni rnibeduxh.
\v 8 Lo te balduxh siäädni, dxejc guisloj susacsíduxhni
reni di gaṉ Dios, dizareni gusoob xtidx Dad Jesucrist
nani rudzucaj dojḻ.
\v 9 Guiraareni sidejdreni trabajw, par tejpas agunijtreni,
zijt chureni lo Dios, lo yäḻrdimbichaꞌ xten xcäḻrnibeeni.
\v 10 Che jiääd Dad guiriini xhaguibaa, dxejga siliäꞌp
rexpejṉni xpalaꞌnni, sidxelojza renani huililajz laani
näjza laꞌtu, saꞌcsi huililajztu diidx ni basuleꞌnu che
guyuꞌnu lojtu.
\p
\v 11 Niꞌc rniabtisnu lo Dios por laꞌtu, rniabnu lo Dios
guinaj lajzni nabajṉtu siꞌc riäjḻ guibajṉ reni guleni.
Rniabzanu guniidx Dios lojtu guntu guiraa redzunsaꞌc
ni rchaglajz Dios guntu, gacnäjzani laꞌtu con xcäḻrnibeeni
te guntu redzuun ni rujntu saꞌcsi rililajztu.
\v 12 Te chäꞌp xpalaꞌn laj Dad Jesucrist siꞌcni nabajṉtu,
te laani guiliäꞌpzani xpalaꞌntu, xcuent yäḻrinälajz xten
Dios näjza Dad Jesucrist.
\c 2
\s Beṉdoḻduxh
\p
\v 1 N̲aj, rniabduxhnu lojtu bejtznu, xcuent dxej ni jiääd
Jesucrist, dxej ni guidojpzanu lojni,
\v 2 naꞌc chugajtu yarsiaꞌ. Naꞌcza gusaantu guchejbreni
laꞌtu con diidx ni ruluii te bejṉ ni najc profeꞌt, nicla
con diidx ni rnii stee bejṉ lojtu, niclaza con diidx
ni naareni lojtu caj loj te guijtz ni naareni baxhaḻnu
lojtu, cadro caj “dxej ni guibiꞌ Jesucrist abidzujṉ”.
\v 3 Naꞌc gusaantu gusguee bejṉ laꞌtu xcuent rediidxre.
Che gajd dxejga guidzujṉ, suꞌ bejṉ ni sibälaz xtidx Dios,
dxejc suluiloj beṉlatsiaduxh, xiꞌn nani sinitloj par
tejpas.
\v 4 Bejṉre siliäꞌp lagajc xpalaꞌnni, sidxeꞌchni lo guiraa
ni sanä laj Dios, näjza xhitis ni rajṉ bejṉ, te cueni
neṉ xquidoo Dios, guluilojni siꞌc lagajc Gueb Dios.
\p
\v 5 ¿La di lajztu guisaj cheni guyusicä lojtu, rniä
rediidxre lojtu, ä?
\v 6 N̲aj laꞌtu anajntu xhiniꞌc ruscuääzni, te naꞌc guiricajni
ansde guisaꞌ redxej xtenni.
\v 7 Te yäḻxhigaꞌtz najc dzunlatsiaj ni alacayajc lo
guedxliuj, cayäädxtis guibicaj nani caguscuääzni galäiini.
\v 8 Dxejc suluiloj beṉlatsiaduxhre. Niluxh Dad Jesucrist,
suguꞌtnini con beroꞌni, che guibiꞌ Jesucrist lo guedxliuj
xpianijni sujn nitlojni.
\v 9 Beṉlatsiaduxhre najc siꞌcpac najc beṉdxab. Che
guidzujṉni, guidzujṉni siꞌc te bejṉ nani rnibee, sujnni
seen, sujnzani milagrw ni rusguee.
\v 10 Con xcäḻlatsiaj bejṉre susgueeni guiraa renani
alagunijt lo Dios saꞌcsi direni nicäjb ninälajzreni
didxlii ni nusḻaareni neṉ dojḻ.
\v 11 Niꞌcni susaan Dios jiääd te yäḻrusgueduxh te chalilajzreni
didx-xhii.
\v 12 Te gabijl jii guiraa renani di nicäjb nililajz
didxlii, alga bidxaglajzreni yäḻlatsiaj.
\s Reni gule Dios guirii neṉ dojḻ
\p
\v 13 Niluxh nuurnu riäjḻ gudeedtisnu xquixhtios lo
Dios por laꞌtu, bejtznu, ni sanälajz Dad Jesucrist. Rudeednu
xquixhtios saꞌcsi galooli gule Dios laꞌtu te gusḻaani
laꞌtu lo dojḻ, xcuent Xsprit Dxanni ni rusia lastootu,
näjza redidxlii ni huililajztu.
\v 14 Niꞌcni che biejn diajgtu diidx ni basuleꞌnu lojtu,
gurejdx Dios laꞌtu, te xcaꞌzatu xcäḻrdimbichaꞌ Jesucrist.
\p
\v 15 N̲aj bejtznu, coḻchanuu, coḻsudzuꞌtz, naꞌcza jiäḻlajztu
rediidx ni balijdxnu laꞌtu che guyuꞌnu roꞌc, näjza rediidx
ni bacuaanu lo guijtz ni baxhaḻnu lojtu.
\v 16 Lagajc Dad Jesucrist, näj Dios Xtadnu, ni sanälajz
nuurnu, ni ruscäjn lajznu par tejpas, ni baniidx xcäḻrbääznu
racnäjni nuunu,
\v 17 guspaani lajztu, gusudzuꞌtzni laꞌtu lo guiraa redidxsaꞌc
ni guiniitu näjza redzuunsaꞌc ni guntu.
\c 3
\s Coḻnab lo Dios xcuent nuurnu
\p
\v 1 Bejtznu, coḻnab lo Dios xcuent nuurnu te chanuu
guireꞌch xtidx Dad Jesucrist, te che gusoob bejṉ diidxga
chäꞌp xpalaꞌn diidxga, sigajcni gujcni con laꞌtu.
\v 2 Coḻnabza lo Dios xcanäjni nuurnu te di tednu ladzṉaa
rebeṉlatsiaj, rebeṉguijdx, saꞌcsi xhet guiraadi bejṉ rajp
yäḻrililajz.
\v 3 Dios rusoob xtiidxni, susudzuꞌtzni laꞌtu, sacnäjzani
laꞌtu te di sactu doḻguijdx.
\v 4 Abascuedxi Dios lastoonu xcuenttu saꞌcsi anancheenu
cayujntu guiraꞌti nani gunibeenu guntu, luxh siꞌcza sinuu
gusoobtu xtiidxnu.
\v 5 Canabä lo Dad Jesucrist guniidxni gacbeerutu xcäḻsanälajz
Dios, canabäza coḻcuecdxi lajztu siꞌcni bejn Crist che
gudejdni trabajw.
\s Nanab jiennu dzuun
\p
\v 6 Bejtznu, con laj Xtad Jesucristnu, rnibeenu guibicajtu
lo chutis te saꞌnu ni ricanzajtis, ni di rlajz gunni
dzuun. Guibicajzatu loj reni di guibajṉ siꞌcni baluiinu
riäjḻ guibajṉtu.
\v 7 Laꞌtu anajntu xho riäjḻ guibajṉtu, chanuutu guntu
siꞌcni riennu nuure. Najntu nuurnu dinu nicanzaj che
guyuꞌnu lojtu saꞌcsi biennu dzuun.
\v 8 Dizanu nidauxliaꞌ xcuꞌn chu tejtu; guiraani bidiixnu,
biennu dzuun dxej-yääl, te di nutaalnu xtzuun chu tejtu.
\v 9 Masä nungäjḻ niniabnu niacnäjtu nuurnu, dinu niniabni;
alga biennu dzuun te baluiinu xho chanuutu.
\v 10 Cheni guyuꞌnu lojtu, gunibeenu scree guntu: Chutis
ni di rlajz gun dzuun di riäjḻ xcaꞌni xhi gauni.
\v 11 Aguniireni loonu baltitu rcanzajtis, direni gun
dzuun, alga rihuiireni xhi cayujn rebejṉ.
\v 12 Rulijdxnu rebejṉre, rnibeenureni con laj Xtad Jesucristnu:
coḻcuedxi, coḻyejn dzuun te gautu.
\p
\v 13 Bejtznu, naꞌc guidxajgtu guntu dzunsaꞌc.
\v 14 Palga yuꞌ chu tejtu di gucuadiajg xtiidxnu ni
caj lo guijtzre, coḻhuii chuniꞌcni te naꞌc guchaagtuni,
te guitujyni.
\v 15 Niluxh naꞌc gaꞌptuni siꞌc ni rdxeꞌch lojtu, coḻguliidxni
siꞌc bejtztu.
\s Rusadiidxnireni
\p
\v 16 Gueb Dios xten yäḻrbedxi, guscuecdxi lajztu guixe-guixee,
masä xhitis sajctu. Jiannäj Dad Jesucrist guiraatu.
\p
\v 17 Narä, Pabl cacuaä xtixtiosre con ṉaäpac siꞌc runä
lo guiraa rexquitzä, scree rucuaä.
\v 18 Gacnäj Xtad Jesucrist guiragajctu. Sugacni siꞌc.