\id JUD
\h Judas
\toc1 Judas
\mt Guijtz Ni Bacuaa Judas
\c 1
\s Judas cagucuaa loj renani agule Dios
\p
\v 1 Narä nacä Judas, ni rujn xtzuun Jesucrist. Narä
nacäza betz Jacoob. Cagucuaä guijtzre loj renani agule
xtadnu Dios, renani sanälazduxhni, nani cayapcheeni par
Jesucrist.
\v 2 Rniabä lo Dios, gulaslazduxhruni laꞌtu, guscuecdxiduxhruni
lastootu, gacnäjni laꞌtu, guniidxruni yäḻsanälajz.
\s Renani ruluii yäḻrusguee
\r (2 Pedro 2:1‑17)
\p
\v 3 Rebetzä nani sanälazä, che cayunduxhä xhigab gucuaä
lojtu xcuent yäḻrusḻaa lo rextojḻnu ni rajpnu, benä xhigab
riojbru gucuaä te guijtz lojtu te gulidxätu sudzuꞌtznu,
gapdzuꞌtztu yäḻrililajz ni basuleꞌreni par tejpas loj
rexpejṉ Dios.
\v 4 Saꞌcsi abiuxhigaꞌtz gaii bejṉ, renani galooli gunii
Dios siäädreni, niluxh sinitlojreni. Najcreni bejṉ ni
di chalilajz xtidx Dios, najcreni beṉguidxduxh, rutzuréreni
xcäḻracnäj Dios, rujnreni xtujy, sanäreni te yäḻnabaṉdxuudx.
Rbälazzareni xpaxhuaannu nani rnibee loonu, Dad Jesucrist.
\p
\v 5 Mase anajntu guiraꞌti rediidxga tejpas, rlazä gusnaä
lajztu che gudejd gulää Dad Jesucrist rexpejṉ Israel
lo guedx Egipto, dxejcti baguꞌtni renani di nililajz
xtiidxni.
\v 6 Rexangl Dios nani di nucuadiajg diidx, ni birii
cadro rlajz Dios chureni, reniꞌc basäu Diosreni cadro
nacäiboo te cabäjzreni gun Dios xcäḻguxhtisni lojreni.
\v 7 Siꞌc bejnni guedx Sodoma näjza Gomorra näjza reguedxbäz
ni treꞌ gajxh roꞌc, saꞌcsi bejnreni dojḻ, reniguii guyunäjreni
niguii birääx, regunaa guyunäjzareni regunabirääx. Dxejc
gudejdreni trabawduxh huejcreni neṉ guiboo par tejpas
xcuent xtojḻreni, niꞌc najc te yälrulijdx loonu.
\p
\v 8 Rebejṉ ni riuꞌ lojtu ṉaj najc siꞌc rebeṉ galoo
ni bejn dojḻ. Nabajṉreni siꞌc ni bisieedreni lo guiraa
nani ruluii yäḻrnixcaḻ, ruxhiṉreni tiejxhreni, rbälazreni
xcäḻrnibee Dios, rniyajzareni rexangl Dios.
\v 9 Miguejl ni rnibeeru loj rexangl Dios, che gudiḻdiidxni
beṉdxab yejc tiejxh toMoisés, dini niniyaj beṉdxab, alga
räjpni: “Sugun Dad Jesucrist yäḻguxhtis lojlu.”
\v 10 Niluxh rebejṉga rniyajreni nicla ganreni xhiniꞌc
rniireni. Niluxh nani racbeepac rebejṉga najc yäḻnajn
nani nicla niquiin nisieedreni, lala saꞌ nani rujnza
reguidxaa, ni xheti xcäriejnni, reniꞌc sujn nitlojreni.
\p
\v 11 ¡Aii! ¡Riazanureni! Sanajlreni xnezyuj Caín, luxh
te gunreni gaan meel ruxhuṉlireni rujnreni saꞌ dojḻ
ni bejn Balaam agujc xchero, näjza saꞌ dojḻ ni bejn Coré,
ni gudiḻnäj Dios, luxh gunitlojni.
\v 12 Laareni najcreni te xtuiduxh lo rexchej ni rajc
guidoo, direni guidxejb gauxchenäjreni laꞌtu, saꞌcsi xqueꞌtisreni
riureni. Najcreni siꞌc te xcäjy ni xhet nisguij siädnäni,
nani sanä bej nezree nezrec; najczareni siꞌc te yagbigool
nani di ninejxh xcaj lojni, tioꞌp huält agujtreni, najcreni
siꞌc te yajg ni abiliäädx.
\v 13 Laareni najc siꞌc nis ni räjs lo nisdoo, che cayajc
te bidoṉduxh, sää, siäädni, carii xtujyreni siꞌc räjs nis
lo nisdoo. Najcreni siꞌc baleꞌ ni rtejb xhaguibaa, rijreni
lo te yäḻnacäiduxh ni benchee Dios par tejpas.
\p
\v 14 Xcuentza redee agunixgaaza Enoc ni najc xagdodoo
Adán, räjpni: “Bahuii, siädnä Dios xhidalduxh xanglni
\v 15 te gunni yäḻguxhtis loj guiraa bejṉ te gusacsíduxhni
guiraa rebejṉ ni di gumbee Dios xcuent redoḻduxh ni
bejnreni, xcuentza redidxnaj ni guniyaj rebeṉdoḻduxhre
Dios.”
\v 16 Rebejṉre laa reni rmojm̲, runduxhreni quej, rujnreni
siꞌctis ni rlajz tiejxhreni, rniireni guiraloj didxnaj,
rniisireni didxsaꞌc loj rebejṉ te gun rebejṉga siꞌc
ni rlajzreni gunreni.
\s Rulijdxni rebejṉ nani ahuililajz xtidx Dios
\p
\v 17 Laꞌtu, betzä ni sanälazä, riäjḻ guinaj lajztu rediidx
nani gunii reapost xten Dad Jesucrist,
\v 18 saꞌcsi guniireni lojtu: “Neṉ redxelult che guibisac
Jesucrist, suꞌ bejṉ ni suxhiznäjreni rextidx Dios, sujnreni
siꞌctis guisiaꞌ lajzreni.”
\v 19 Redee najc renani run rliaꞌ rexpejṉ Dios lo saꞌreni;
rinuuzareni ni yuꞌ lo guedxliuj, diza Xprit Dxan xten
Dios cuääz neṉ lastooreni.
\p
\v 20 Niluxh laꞌtu rebetzä nani sanälazä, coḻtioob loj
xcäḻrililajztu ni siääd lo Diostis, coḻnab lo Dios xcuent
yäḻrnibee xten Xprit Dxan xtenni.
\v 21 Coḻguibajṉtis lo yäḻsanälajz xten Dios, coḻsusiṉtis
laḻ ni cayunlojtu yäḻrulaslajz xten Dad Jesucrist ni
guniidx yäḻnabajṉ par tejpas.
\p
\v 22 Coḻgacnäj renani di chalilazsaꞌc te chalilajzpacreni
xtidx Dios.
\v 23 Coḻyacnäj sgaii te guibicajreni lo dojḻ, gudobxhajxreni,
coḻyejn xhigab lo guiboo cayejcreni. Coḻyacnäj sgaii
bejṉ, coḻgulaslajzreni con yäḻrdxejb, niluxh coḻnatiru
te di guntu lagajc dojḻ ni rujnreni. Gulälaz nani rujnreni,
nani ruxhiṉreni.
\s Redidx lult
\p
\v 24 Coḻguiliäꞌp xpalaꞌn Dios nani racnäj laꞌtu didi
jiajbtu lo dojḻ, nani rujn sajc suutu lo xcäḻrdimbichaꞌ
Dios, nayadujtu, rbaduxh lajztu.
\v 25 Yuꞌ tejtis Dios. Laatisni rajpni yäḻnajn te gusḻaani
nuurnu lo dojḻ xcuent ni bejn xtadnu Jesucrist. Coḻguiliäꞌp
xpalaꞌnni, rajpni guiralii yäḻrnibee, yäḻrdimbichaꞌ, galooli,
näj ṉaj, näjza par tejpas. Sugacni siꞌc.