\id 1TI
\h 1 Timoteo
\toc1 1 Timoteo
\mt1 Primera Carta a Timoteo
\mt2 Viꞌnapø Carta Chøjacayupø Timoteo Apóstol San Pabloꞌis
\c 1
\p
\v 1 Øjchøṉ Pablo Jesucristoꞌis ꞌyapostoles. Diosis tø yaj cotzocpapøꞌis y ndø Comi Jesucristoꞌis ꞌyaṉguiꞌmyajøjtzi vaꞌcø ꞌyapostolesajø. Ndø mustamba que Jesucristojiꞌn maṉba tø pujtame vyøꞌomo.
\v 2 Øtz mi ⁿjajyaꞌmbøjtzi Timoteo. Viyuṉsyepø øjtzø mi une porque mi vaꞌṉjajmu Jesucristo cuando øtz mi ndzajmayu vøjpø ote. Oꞌnømbyøjtzi ndø Janda Dios ndø Comi Jesucristojiꞌṉ vaꞌcø mi ṉgyotzoṉ ñeꞌ vyøꞌajcupit, y vaꞌcø mi ndyoyaꞌṉøyø, y vaꞌcø mi yac it contento.
\s Jiꞌn vyøjø vaꞌcø ndø vaꞌṉjamdam comequepø aṉmaꞌyocuy
\p
\v 3 Mi vaꞌṉgapya vaꞌcø mi ndzøcø øtz mi ⁿnøjayuse cuando øtz maꞌṉøjtzi Macedonia nasomo. Mi vaꞌṉgaꞌyøjtzi vaꞌc mi ñchøꞌy Efeso cumguꞌyomo vaꞌc mi aṉguiꞌmyaj venetaꞌmbø vaꞌcø jana ꞌyaṉmachiꞌyajø eyataꞌmbø ꞌyaṉmaꞌyocupit lo que jiꞌndyet viyuṉbø tiyø.
\v 4 ꞌYaṉguiꞌmyajø vaꞌcø jana chøjcayaj cuenda cuento, ni vaꞌcø jana chøjcayaj cuenda pyeca jata tzuꞌṉguꞌis ñøyitaꞌm jachøꞌyajupø totocøsi. Jetse suniti onguipyajpa; pero jetsepø onguipcuy jiꞌn tø cotzove vaꞌcø ndø vaꞌṉjajmø y vaꞌcø ndø tzøc Diosis chamupø tiyø.
\p
\v 5 Diosis chiꞌu aṉguiꞌmguy vaꞌcø ndø sundam Dios y ndø tøvøtaꞌm cøvajcøyupø ndø tzocopiꞌjtaꞌm, y vøjpø ndø quiꞌpsocupiꞌjtaꞌm, y viyuṉsepø ndø vaṉjajmocupiꞌjtaꞌm.
\v 6 Venetaꞌmbøꞌis jiꞌn ñømaṉyaj cuenta yøcsetaꞌmbø tiyø. Suniti chamyajpa aunque tiyø.
\v 7 Sunba aṉmasyajyaj aṉguiꞌmgutyaꞌm, pero jiꞌn cyønøctyøyøyaje lo que ti nø chamyajupø. Nømyajpa que viyuṉbø tiyete pero jiꞌn cyønøctøyøyaje.
\p
\v 8 Pero ndø mustamba que Diosis ꞌyaṉguiꞌmocuy vøjpø tiyete oꞌca ndø yac yospa jujche syunbase.
\v 9 Tø mustamba que aṉguiꞌmocuꞌis jiꞌn yaꞌinducyaj vøjtaꞌmbø pøn. Pero oꞌca it jiꞌn vyaṉjamyajeꞌis ni ti anguiꞌmocuy, it jiꞌn cyønaꞌtzøyajeꞌis ni iyø, it jiꞌn vyaꞌṉjajmyajeꞌis Dios, it cojapaꞌtyajupø pøn, it jiꞌn suñajepøꞌis lo que Diosis ñe, it tyopaꞌoꞌnøyajpapøꞌis aunque ti vøjpø, it yaj caꞌyajupøꞌis jyata, o myama, it yaj caꞌoyajpapø,
\v 10 it myøtzi ñøꞌityajpaꞌis yomo, it pøn ñøꞌityajuꞌis jyayaṉdøvø como si fuera yomo, it nuꞌmyajpapøꞌis pyøndøvø, it suchajpapø, itqueꞌtuti aṉgømaꞌcøꞌyoyajpapø; y oꞌca it eyapø tiyø chøctocoyajpaꞌis vøjpø aṉmaꞌyocuy, jetsepø tiyø yaꞌinducpa aṉguiꞌmocuꞌis.
\v 11 Y jetseti chamgueꞌtpa Diosis myøjaꞌṉombø vøjpø ꞌyoteꞌis; vøj itpapø Diosis ꞌyoteꞌis. Diosis ø tziꞌu yoscuy vaꞌcø ndzamsaj vøjpø ꞌyote.
\s Ñøjayu Dios yøscøtoya Pabloꞌis porque tyoyaꞌṉøyu
\p
\v 12 Nøjapyøjtzi yøscøtoya Jesucristo ndø Comi. Jeꞌis cotzoṉ øjtzi vaꞌcø mus ndzamsaj ꞌyote, jeꞌis niꞌaṉjam øjtzi que muspø ⁿyosayø, jetcøtoya cojtøjtzi ñe yoscuꞌyomo.
\v 13 Øtz viꞌna ṉgøꞌoꞌnøpyanaꞌṉø Dios, y ⁿyacsutzøcyaj øjtzi vøjtaꞌmbø pøn, y jayatzambanaꞌṉtzi. Pero Diosis toyaꞌṉøꞌyøjtzi porque øtz jiꞌnaꞌṉ musi lo que tinaꞌṉ ndzøcpøjtzi; y jiꞌnaꞌṉ vaꞌṉjajme Jesús.
\v 14 Ndø Comiꞌis vøti cotzoꞌṉøjtzi y toyaꞌṉøꞌyøjtzi. Tziꞌu quiꞌpsocuy vaꞌcø vaꞌṉjam Dios, y vaꞌcø sun Dios, y vaꞌcø suñaj ø mbøndøvø. Porque Cristo Jesusis tø tziꞌpa jetsepø quiꞌpsocuy.
\p
\v 15 Maṉba mi ndzajmatyam viyuṉsyepø ote y sunba vaꞌ mi vaꞌnjamdamø yøti: que Cristo Jesús minu nascøsi vaꞌcø yaj cotzocyaj cojapaꞌtyajupø pøn. Y øtz más cojapaꞌtupø pøn chøṉø que jiꞌn eyataꞌmbø pøndaꞌm.
\v 16 Pero vøti toyaꞌṉøꞌyøjtzi Jesucristoꞌis y yaj cotzojcøjtzi viꞌna, y jetse isindziꞌyaj mumu pøn jujche it vøti pyasencia, y jetsetiqueꞌt eyataꞌmbøꞌis muspa vyaꞌnjamyajqueꞌt Jesús vaꞌcø cyeñaj mumu jamacøtoya.
\v 17 Mumu jama ndø cønaꞌtzøtyaꞌi y ndø møjaꞌṉ vøcotzøctaꞌi møjaꞌṉ Aṉguiꞌmba tumønajcøtoya ijtupø, nunca jiꞌn maṉ cyaꞌepø, jiꞌn ndø isipø porque jiꞌn cyeje, único Dios tumbøtite y mumu ti myuspapøꞌis. Amén.
\p
\v 18 Ø mi une Timoteo, Diosis chiꞌyaj quiꞌpsocuy venetaꞌmbø ø ndøvø vaꞌcø mus chamyajø jujche maṉba ndyuc mijtzi. Por eso como jujche chaꞌmaṉvacyajuse, jetse øtz mi aṉguiꞌmbøjtzi vaꞌcø mi ṉgoquip ndø Comiꞌis ꞌyote como vøjpø soldadose.
\v 19 Vaꞌṉjajmø møꞌchøqui y tzøc Diosis sunbase vaꞌcø mi niꞌaṉjam mi ⁿvin contento porque vøjpø ti mi ndzøjcu. Porque venetaꞌmbøꞌis jiꞌn chøcyaje lo que myusyajpa que vøj vaꞌcø chøcyajø, por eso tocoyaju vyaꞌṉjajmocucyøstaꞌm.
\v 20 Jetse tucyajqueꞌt Himeneo y Alejandro, lo que jutipø ndziꞌocuyajøjtzi Satanasis cyøꞌomo vaꞌcø ꞌyaṉmayajø que jiꞌn vøj vaꞌcø maṉ cyøꞌoꞌnøyaj Dios.
\c 2
\s Hay que vaꞌcø oꞌnøtyam Dios pøngøtoyataꞌm
\p
\v 1 Øtz mi ndzajmatyaꞌmbøjtzi viꞌna vaꞌcø mi oꞌyøndyam Dios, vaꞌcø mi vaꞌctam Dioscøsi vaꞌcø yaj quec bendición para mumu pøngøtoyataꞌm, vaꞌcø mi ⁿnøjatyam Dios yøscøtoya para mumu pøngøtoyataꞌm.
\v 2 Sunba vaꞌcø ndø oꞌnøtyam Dios para gobiernocøtoyataꞌm, y para mumu aṉguiꞌmbacøtoyataꞌm vaꞌc mus ꞌyaṉguiꞌmyaj vøjø, vaꞌcø mus tø ijtam vøjø, y vaꞌcø tø vøṉnetyamø, vaꞌcø ndø cønaꞌndzøtyam Dios, y vaꞌcø tø nømaṉdam vøjpø quiꞌpsocuy.
\v 3 Porque vøj vaꞌ ndø oꞌnøtyam Dios jetse, porque jetseti sunqueꞌtpa Diosis tø Yajcotzocpapøꞌis.
\v 4 Jeꞌis syunba vaꞌcø cyotzocyaj mumu pøn, y vaꞌcø maṉ cyomusyaj lo que viyuṉsyepø tiyete.
\v 5 Porque tumdi it Dios y solo it tumø tø oꞌnøjapapøꞌis Dios para mumu pøngøtoyataꞌm, Jesucristo pøndiqueꞌt. Jeꞌis tø oꞌnøjapya Dios vaꞌcø tø pøjcøchoṉ Diosis.
\v 6 Mumu pøꞌnis cyoja it Diosmø como si fuera jaꞌtze, y Jesusis chiꞌocuyaj vyin vaꞌcø cyoyojay mumu pøꞌnis cyoja Diosmø vaꞌcø libreꞌajyajø. Jetse tzamsajtøju cuando nuꞌc ꞌyora.
\v 7 Jetcøtoya øtz oy cojtøji vaꞌcø ndzaꞌmaṉsajø jetsepø ote; vaꞌcø øtz apostolesajø vaꞌcø ꞌyaṉmayajø lo que jiꞌndyet Israel pøndaꞌm vaꞌcø vyaꞌṉjamyaj Dios, y vaꞌcø vyaꞌṉjaꞌmyaj viyuṉbø tiyø. Øtz viyuṉsye ndzaꞌmbøjtzi como Cristo vaꞌṉjambøjtzi, jiꞌnø aṉgømaꞌcøy ni iyø.
\p
\v 8 Jescøtoya suꞌnbøjtzi vaꞌcø ꞌyoꞌnøyaj Dios pøꞌnistaꞌm aunque juti, vaꞌcø chøcøteꞌñaj cyøꞌ tumø tzocotyaꞌm, vaꞌcø jana quiꞌsycaꞌyajø ni vaꞌ jyana onguipyajø.
\v 9 Jetseti yomoꞌistaꞌm hay que vaꞌcø myesyaj tyucu vøjpø quiꞌpsocujiꞌṉ, vaꞌcø jana myesyaj tzaꞌajcutyaꞌmbø tucu; vaꞌcø jana sun aꞌmdøjø. Jiꞌn mus maṉ myocsitzøcyajø, y vaꞌcø jana cyotyaj ni ti adorno søꞌṉbapø caro coyojataꞌmbø, ni vaꞌc jana myesyaj caro coyojataꞌmbø tucu.
\v 10 Hay que vaꞌcø chøcyaj vøjpø tiyø yomoꞌstaꞌm jujche vøjø vaꞌcø chøcyaj yomoꞌis oꞌca nømyajpa que vyaꞌṉjajmyajpa Dios.
\v 11 Yomoꞌstaꞌm hay que vaꞌ cyømaꞌnøyaj aṉguiꞌmocuy vøṉneyuꞌøc, listo vaꞌcø chøcyajø jujche syunbase Diosis.
\v 12 Yomo jiꞌnø ndziꞌ permiso vaꞌcø ꞌyaṉmayaj pøn, ni vaꞌcø jana ꞌyaṉguiꞌmyaj pøn, sino vaꞌcø vyøṉneyø.
\v 13 Porque Diosis vyiꞌnatzøc Adán y jøsiꞌcam Eva chøjqueꞌtu.
\v 14 Y Adán ja oy aṉgømaꞌcøtyøji, sino yomo oy angømaꞌcøtyøji, y oy cojapaꞌte.
\v 15 Pero yomo maṉba cotzoque cuando yac pøꞌnajpa ꞌyune oꞌca vaꞌṉjajmopya y oꞌca tyoyaꞌṉøꞌopya y oꞌca vøjpø ti chøcpa para Dioscøtoya oꞌca ñøꞌit vøjpø quiꞌpsocuy.
\c 3
\s Jujche vøjø vaꞌcø chøcyaj aṉguiꞌmyajpapøꞌis
\p
\v 1 Viyuṉbø tiyø maṉba mi ndzaꞌmaṉvajcatyame. Oꞌca pønis sunba cyoviꞌnajøꞌajø vyaꞌṉjajmocuy tøvøꞌomo, vøjpø yoscuy sunba chøcø.
\v 2 Entonces coviꞌnajø tiene que vaꞌ it vøjø vaꞌcø jana mus chøjcay cyoja ni iꞌis; tumdi vaꞌcø ñøꞌit yomo, tiene que vaꞌcø yos vøjø. Y tiene que saꞌsa vaꞌcø itø; tiene que vaꞌcø chøc mumu ti vøjpø; vaꞌ pyøjcøchoṉyaj minbapøꞌis tyuꞌñaje, y vøjpøte aṉmaꞌyopya,
\v 3 vaꞌ jyana noꞌta, vaꞌcø jyana quipcumyeꞌtza, vaꞌcø jana aṉsun tumin, vaꞌc ñømaṉjay vøti pasencia, vaꞌcø jana onguipø, vaꞌcø jana ꞌyaṉsun aunque tiyø.
\v 4 Coviꞌnajø tiene que vaꞌcø ꞌyaṉguiꞌm vøjø ñeꞌc tyøjcomdaꞌmbøcøsi, vaꞌcø mus yac tzøcyaj vøjpø tiyø ꞌyune vøjpø quiꞌpsocujiꞌṉ.
\v 5 Porque oꞌca tum pøꞌnis jiꞌn mus ꞌyaṉguiꞌmyaj ñeꞌ fyamilia, entonces jiꞌn mus ma cyoqueñajqueꞌt lo que tuꞌmyajpapø Dios vyaꞌṉjamyajpapøꞌis.
\v 6 Usyaꞌṉomo tøjcøyupø vaꞌṉjajmocuꞌyomo jiꞌn ma mus coviꞌnajøꞌajø, no sea que cyomoꞌpya vyin que ñeꞌcø más myøjaꞌṉombø, y jetse maṉba pyøjcøchoṉ castigo jujche yatzipøꞌis pyøjcøchoṉgueꞌtpa castigo.
\v 7 Tiene que vaꞌcø mi ṉgøpiṉ vøjpø pøn vaꞌcø cyoviꞌnajøꞌajø mi neꞌṉgomdaꞌm. Entonces eyataꞌmbø pøn lo que jiꞌn vaꞌṉjajmocuy tyøvø maṉba nømyaje que vøjpø pøn mi ṉgøpiṉdamu vaꞌcø cyoviꞌnajøꞌajø. Øꞌca jiꞌn vøjpø pøn mi ṉgøpiṉdamu, entonces jic pøn maṉba queque como que Satanasis tyøṉguecpase.
\s Jujche vøjø vaꞌcø chøcyaj cotzoꞌṉoyajpapø
\p
\v 8 Jetseti cotzoꞌṉopyapøꞌis tiene que vaꞌ ñøꞌityaj respeto, y vaꞌcø jana myejtzaṉdzamyajø. Hay que vaꞌcø jana tzotyoꞌṉyaj vøti; vaꞌcø jana syuñajø algo tumin.
\v 9 Tiene que vaꞌcø cyomus møꞌchøqui vaꞌṉjajmocuy lo que viꞌna ni iꞌis jiꞌnaꞌṉ myusyaje, pero yøti Diosis tø tziꞌpa musocuy vaꞌcø ndø mustamø. Tiene que vaꞌcø vøj niꞌaṉjamyaj vyin porque nø vyaꞌṉjamyaju viyuṉse.
\v 10 Viꞌna tiene que vaꞌ mi aꞌmistamø jujche maṉba yosyaje. Oꞌca vøj yosyajpa, y ni iꞌis jiꞌn mus chøjcayaj cyoja, entonces muspa yosyaj como cotzoꞌṉoyajpapøse.
\v 11 Jetseti cotzoꞌṉoyajpapøꞌis yomoꞌis tiene que vaꞌcø ñøꞌityajqueꞌt respeto vaꞌcø jana undzamyajø, vaꞌcø jana cyuꞌtcocøtyajø, vaꞌcø chøcyaj vøjø mumu aunque jujchepø yoscuy.
\v 12 Cotzoꞌṉopyapø pøꞌnis tumdi muspa ñøꞌit yomo. Tiene que vaꞌcø ꞌyaṉguiꞌm vøjø ꞌyune y mumu tyøjcom ityajupø.
\v 13 Porque cotzoꞌṉoyajpapø oꞌca vøj yosyajpa, gyanatzøcyajpa vøjpø tiyø vaꞌcø vyøcotzøcyajtøjø, y jana naꞌtzcuy muspa chaꞌmaṉvacyajø lo que jujche vyaꞌṉjamyaj Cristo Jesús.
\s Ndø vaꞌṉjajmocutyaꞌm
\p
\v 14 Suꞌnbøjtzi más pronto vaꞌcø maṉ mi nduꞌnistamø, pero yøꞌcsepø tiyø mi ⁿjajyaꞌyøjtzi.
\v 15 Que tal será que øtz yaꞌpyøjtzi sone jama yøꞌqui, por eso nø mi ⁿjajyøyu vaꞌcø mi mus jujche vøjø vaꞌcø mi indø Diosis ꞌyuneꞌomdaꞌm lo que tuꞌmyajpapø quenbapø Dioscøtoyataꞌm. Jetsetaꞌmbø tuꞌmyajpapøꞌis ꞌyaṉmayajpa y cyoquipyajpa viyuṉbø ote.
\v 16 Viyuṉsye más myøjaꞌṉomdaꞌmbøte tiyete lo que Diosis tø yac mustambapø, lo que ti vøjø vaꞌcø ndø vaꞌṉjamdamø. Yøcse tujcu:
\q Jet istøju que sispø pønete,
\q Espiritu Santo nømu que vøjpø pønete.
\q Angelesis isyaj jic pøn;
\q tzambotyøju mumu cumguꞌyomo jujche oyu iti.
\q Vaꞌṉjamdøju mumu nasvindumø;
\q ñømaṉdøj møji tzajpomo.
\c 4
\s Chacyajpapøꞌis vyaꞌṉjajmocuy
\p
\v 1 Espiritu Santoꞌis viyuṉsye chamba que jøsiꞌcam minbapø jamaꞌomo veneꞌaṉbøꞌnomo maṉba chacyaj vaꞌṉjajmocuy, maṉba vyaꞌṉjamyaj aṉgømaꞌcøꞌyoyajpapø espiritu, y maṉba vyaꞌṉjamyaj yatziꞌajcuꞌis chamyajpapø.
\v 2 Comecpapø pøꞌnis chamyajpa jetsepø aṉmaꞌyocuy vaꞌcø ꞌyaṉgømaꞌcøꞌyoya. Aunque chøcyajpa yatzipø tiyø, ni jujche jiꞌn niꞌaṉjamyaje oꞌca ti nø chøcyaju. Como cuando tø poṉba sone nac nutzpapø tøꞌṉguiꞌis jiꞌnam tø toꞌyøyi, jetse cuando chøcyajpa sone nac yatzitzocoꞌyajcuy, jiꞌnam chiꞌyaj cuenta oꞌca yatzipø tiyø nø chøcyaju.
\v 3 Yøṉø pøꞌnis maṉba yaꞌinducyaje coꞌtøjcajcuy, y vene cuꞌtcuy maṉba yaꞌinducyaje. Pero Diosis cyot jetsepø cuꞌtcuy vaꞌcø cyuꞌtyajø vyaꞌṉjamyajpapøꞌis y cyomusyajpapøꞌis viyuṉsyepø tiyø, y vaꞌcø nøjayaj Dios yøscøtoya.
\v 4 Porque aunque tiyø lo que Diosis cyojtupø, vøjpø tiyete. Y jiꞌn mus tø yaꞌinducø oꞌca ndø nøjatyam Dios yøscøtoya. Muspa ndø pøjcøchoṉdamø.
\v 5 Porque oꞌca Diosis chamba que vøjpø tiyete, y oꞌca ndø oꞌnøtyam Dios, aunque ti cømasaꞌnøyajupøte.
\s Vøjtaꞌmbø cyøyospapøꞌis Jesucristo
\p
\v 6 Oꞌca mi yac musyajpa ndø tøvøtaꞌm mi ndzajmayuse øjtzi, vøj mi yospapø Jesucristocøtoya. Más maṉba mi mbyømipøqui Diosis ꞌyotepit vaꞌcø mi vyaꞌṉjajmoya, y más maṉba mi mbyømipøjqueꞌte vøjpø aṉmaꞌyocuyjiꞌṉ porque jeꞌtomo mi myaṉgueꞌtpa.
\v 7 U mi ṉgømaꞌnøtyamu jovitaꞌmbø undzame chuveꞌis chamyajpase, pero tziꞌ mi mbømi vaꞌcø mi it jujche Diosis syunbase.
\v 8 Vaꞌcø ndø pømitzøcø ndø coṉñajiꞌṉ, vøjø para usycøtoya, pero vaꞌcø ndø tzøc lo que Diosis sunbase, vøj para mumu ticøtoya. Tø cotzoṉba para yøtipø itcucøtoya, y también para itcucøtoya lo que maṉbapø ndø pøjcøchoṉdam más jøsiꞌcam.
\v 9 Nø mi ndzaꞌmaṉvajcatyam viyuṉbø tiyø, y tiene que mumu aṉbøꞌnis vaꞌcø vyaꞌṉjamyajø.
\v 10 Por eso tø yostamba y toyaꞌistamba cuando nømyajpa que øtz yatzitaꞌmbø pøn chøṉø. Porque ndø vaꞌṉjamdamba quenbapø Diosis maṉba tø cotzoṉdame. Jeꞌis yaj cotzocpa mumu pøn, más sevro yaj cotzocyajpa vyaꞌnjamyajpapøꞌis ñeꞌcø.
\p
\v 11 Jetse sunba vaꞌcø mi aṉguiꞌmyajø y aṉmayajø.
\v 12 Ni iꞌis jiꞌn mus mi myenoschøcø aunque mi ꞌyuneꞌajø, pero sunba vaꞌcø mi ndzøc vøjø, vaꞌcø mus mi isingøpøcyaj eyapø vyaꞌṉjamyajpapøꞌis. Sunba vøj vaꞌcø mi ndzam aunque tiyø, vøj vaꞌcø mi indø, vaꞌcø mi suñaj mumu pøn, vaꞌcø mi nøꞌit vøjpø quiꞌpsocuy vaꞌ mi vyaꞌṉjajmoy møꞌchøqui, vaꞌcø mi nøꞌit cøvajcøyupø mi ndzocoy.
\v 13 Hasta que miꞌnbøjtzi, vejpøꞌjayajø totojaye tyuꞌmyajumø, pømitziꞌyajø y aṉmachiꞌyajø. U mi jajmbøꞌ vaꞌcø mi ndzøc jetse.
\v 14 U mi jajmbøꞌ lo que muspapø mi ndzøcø Diosis mi ñchiꞌuse quiꞌpsocuy. Cuando mi ṉgyojtay cyøꞌ mi ṉgopajcøsi mbiꞌquisyajuꞌøc tzambøndaꞌmbøꞌis vaꞌcø mi mbøjcøchoṉ bendición, entonces tzambøꞌnistaꞌm ñchaꞌmaṉvajcayaju jujche maṉba mi ⁿyose, Diosis chiꞌyaj quiꞌpsocuy vaꞌcø ñchaꞌmaṉvajcayaj jetse.
\p
\v 15 Tziꞌ mi mbømi vaꞌcø mi ndzøc yøꞌcsetaꞌmbø tiyø, naꞌs jetse tzøcø mumu mi mbømijiꞌṉ, vaꞌcø isyaj mumu pøꞌnis jujche quiꞌmba mi musocyuy.
\v 16 Tzøjcay cuenda mi ⁿvin, tzøjcay cuenda mi aṉmaꞌyoṉguy, seguitzøcø vaꞌcø mi ndzøjcaṉøyø jujche mi ndzajmayuse øjtzi. Porque jetse vaꞌcø mi ndzøcø, maṉba mi ṉgyotzoque, y mi ṉgyømaꞌnøyajpapøꞌis maṉba cotzocyajqueꞌte.
\c 5 
\s Jujche vøjø vaꞌcø tø nøtuꞌṉajø
\p
\v 1 U mi ojnayø tzambøn, sino vøpøpit oꞌnøyø jujche mi janda mi oꞌnømba vøpøpit. Oꞌnøy soca jujche oꞌnømbase mi ndøvø mi ndøjcombø.
\v 2 Jujche mi nøvejvejnepyase mi mama, jetse nøvejvejneyajø tzamyomo; y uneyomo nøvejvejneyajø mi ndøvøse vøjpø mi ṉguiꞌpsocujiꞌṉ.
\p
\v 3 Cotzoṉyaj yaṉbac yomotaꞌm oꞌca viyuṉbø yaṉbactaꞌmete.
\v 4 Pero oꞌca it yaṉbajquis ꞌyune o ꞌyocoꞌune, o viñoja, jejtaꞌm tiene que vaꞌcø mi aṉmayajø viꞌna vaꞌcø tyoyaꞌṉøyaj mismo tyøjcomdaꞌmbø y jetse chiꞌvituꞌpa jujche yac tzocyajuse mochiꞌøc. Jetse vøjø y jetse Diosis vyøꞌmøpya.
\v 5 Pero yaṉbac oꞌca viyuṉsyepø yaṉbac, y ni i ja itø, jetse vyaꞌṉjamba que Diosis maṉba cyotzove y vyaꞌcpa mumu ti Dioscøsi y ꞌyoꞌnøpya Dios chuꞌjiꞌṉ jyamajiꞌn.
\v 6 Pero oꞌca yaṉbajquis chøcpa gyusto aunque ticøsi, aunque quenbaꞌctøc, maṉba it como caꞌuse.
\v 7 Jetse aṉguiꞌmyajø, y entonces ni iꞌis jiꞌn mus maṉ cyøtzaꞌmøyajø.
\v 8 Pero oꞌca aunque iꞌis jiꞌn pyøꞌnøy ñe tyøvø ni ñeꞌc tyøjcom ijtupø, entonces syunvaꞌṉjamba. Más peojrete que menos jiꞌn vyaṉjajmepøꞌis Dios.
\p
\v 9 Yaṉbac vaꞌc it jachøꞌyupø ñøyi listacøꞌmø tiene que vaꞌcø it más de sesenta año, tumøpø pøn oyuꞌis ñøꞌiti.
\v 10 Y oꞌca mumu chamyajpa que vøjpø tiyø oy chøqui, oꞌca saꞌsa yac tzocyajuti ꞌyune, oꞌca pyøjcøchoṉu tyuꞌñajpapøꞌis, oꞌca cyøtzeꞌay eyapø vyaꞌṉjajmocuy tyøvøꞌstaꞌm cyoso, oꞌca cyotzoṉu toyaꞌisyajupø, oꞌca oyuti chøc vøjtaꞌmbø tiyø lo que muspaꞌcsyeꞌṉomo; entonces muspa cyot ñøyi listacøsi vaꞌcø aunque iꞌis cyotzoṉa.
\p
\v 11 Pero mastøc unetaꞌmbø u maṉ jachøꞌyaj listacøs ñøyi. Porque cuando ñeꞌc gyusto más sunba chøcyajø que menos vaꞌcø jana chøcyaj Cristoꞌis syunbase, maṉba jayaꞌøyajqueꞌte.
\v 12 Y maṉba chøcyaj cyoja porque ja cumplitzøcyaj lo que jujche chamyajuse viꞌna.
\v 13 Jetse nuꞌṉøyajpa yanbacpø uneyomo vaꞌcø jana chøcyaj ñe yoscuy y vityajpa tøcmaye, jarganvituꞌyajpa. Jiꞌn solo jargaꞌnajyajpa, sino también undzame tzøcyajpa, sunba myusyaj aunque tiyø, y chamyajpa lo que jiꞌn vyøjtaꞌmbø tiyete.
\v 14 Por eso suꞌnbøjtzi que vaꞌc cyoꞌtøjcajyaj yaṉbac yomo unetaꞌmbøtøc vaꞌcø ityaj ꞌyune, vaꞌcø cuendatzøcyaj tyøc, vaꞌcø jana mus nøm ꞌyenemigo que ja chøcyajø.
\v 15 Venetaꞌmbø yaṉbac yomoꞌistaꞌm chacyajuꞌam vøjpø vaꞌṉjajmocuy y maṉu pyaꞌtyaj Satanás.
\p
\v 16 Oꞌca vyaꞌṉjambapøꞌis Jesús ñøꞌityaj tyøjcomo yomopø tyøvø ꞌyaṉbacpø, hay que neꞌcø vaꞌcø pyøꞌnøyaju. Jetse jiꞌndyet pyena eyapø vaꞌṉjajmocuy tyøvøꞌis vaꞌcø pyøꞌnøyajø. Entonces vaꞌnjajmocuy tøvøꞌis muspa pyøꞌnøyaj viyuṉsyepø yaṉbac yomo.
\p
\v 17 Tzamupø vøj aṉguiꞌmoyajpapø tuꞌmguꞌyomo hay que vaꞌcø ndø ndoyaꞌṉøyajø. Vøjpø ote chaꞌmaṉvaꞌcyajpapøꞌis y ꞌyaṉmayajpapøꞌis hay que vaꞌ ndø cotzoṉdamø más.
\v 18 Tø tzajmapya jetse Diosis ꞌyote jachøꞌyupø cuando nømba: “U mi ṉguingøsiꞌnu vacas vaꞌcø jana mus cyuꞌtay puj cuando maṉba maṉgoꞌtze trigo vaꞌcø pyut pyuj”. También nømgueꞌtpa: “Yospapø hay que vaꞌcø ndø coyoja”.
\p
\v 19 Oꞌca tumbøꞌis cyøtzaꞌmøpya tzambøn, u maṉ mi vaꞌṉjajmu. Unico oꞌca isyaj metzcuy tuꞌcapyøꞌis lo que ti nø chøjcupø, entonces muspa mi vaꞌṉjajmø.
\v 20 Oꞌca nø chøc cyoja, hay que vaꞌcø mi ojnayø vøti pøꞌnis vyiꞌnomdaꞌm, vaꞌcø isyaj eyataꞌmbøꞌis que nø ꞌyojnatyøju, y jetse vaꞌcø ñaꞌchajø.
\v 21 Diosis ispa lo que jujche nø mi aṉguiꞌmu y ndø Comi Jesucristoꞌis nømdi isqueꞌtu, y cøpiṉupø angelesis nømdi isyajqueꞌtu. Nø mi aṉguiꞌmu vaꞌcø parejo ꞌyojnayajø ijtuꞌis cyoja, ni i vaꞌcø jyana mi naꞌtzø.
\v 22 U mi nombratzøc pronto ni iyø vaꞌcø cyoviꞌnajøꞌajø tuꞌmgucyøsi. Hay que mi aꞌm viꞌna jujchepø pønete. Øꞌca mi nombratzøcpa yatzipø pøn, maṉba mi ṉgojapaꞌt parejo. Cuidatzøc mi ⁿvin vaꞌcø mi yac it cøvajcøyu mi ndzocoy.
\p
\v 23 Como mi ñchejcaꞌeꞌajpa tantos, uy saṉ nøꞌ mi ndoꞌnu. Toꞌnay usyøc vinu, porque algo mi ngyaꞌcuñapa.
\p
\v 24 Eyataꞌmbøꞌis cyoja ndø isapya viyuṉsye antes que cømeꞌchajtøjpa cyojapit, pero eyataꞌmbøꞌis cyoja jiꞌn quejyaje yøti, pero jøsiꞌjcam maṉba istøj cyoja.
\v 25 Jetsetiqueꞌt vøjpø tiyø lo que chøcyajpa eyataꞌmbøꞌis ispøctøjpa viꞌna; y aunque jiꞌn queje viꞌna, najiꞌndyet chøꞌy como cyøvøꞌnupø, naꞌispøctøjpati jøsiꞌjcam.
\c 6
\p
\v 1 Lo que ijtupøꞌis cyomi nascøspø, hay que vaꞌcø cyønaꞌtzøy ñe cyomi mumu ticøsi; entonces jetse ni iꞌis jiꞌn mus cyøꞌoꞌnøy Dios, ni jiꞌn mus cyøꞌoꞌnøy ndø aṉmaꞌyocutyaꞌm.
\v 2 Oꞌca coyospaꞌis it cyomi y parejo vyaꞌṉjamyajpa Jesús cyomijiꞌṉ, coyospaꞌis jiꞌn mus myenos chøc cyomi porque vaꞌṉjajmocuy tyøvøtitqueꞌt, hay que vaꞌcø yosqueꞌtati masti vøjø porque yosapya vyaꞌṉjajmocuy tøvø lo que syunbapøte. Yøꞌcse aṉmaꞌyoya y yøꞌcse tzaꞌmaṉvacø.
\s Comequepø aṉmaꞌyocuy y viyuṉsepø riquesaꞌajcuy
\p
\v 3 Pero oꞌca aunque iyø eyati aṉmaꞌyopapø y jiꞌn vyøꞌmøy vøjpø aṉmaꞌyocuy lo que ndø Comi Jesucristoꞌis señe, y jiꞌn vøꞌmøy aṉmaꞌyocuy jujche vøjø vaꞌcø ndø cønaꞌtzøy Dios; entonces tzactam jetsepø pøn.
\v 4 Porque jetsepø pøꞌnis cyomoꞌpa vyin como si fuera ñeꞌc más aṉguiꞌmba, pero ni ti jiꞌn myusi. Sino yatzipø quiꞌpsocupit sunba onguip aunque ticøsi. Por jetcøtoya quiꞌsapya vøjpø pøn, y ñøquijpa, ñøꞌonba, yachꞌonba chocoꞌyomo tyøvøcøsi.
\v 5 Onguipyajpa pøn nøꞌityajupøꞌis yach quiꞌpsocuy, y jiꞌn myusyajepøꞌis lo que viyuṉsyepø tiyø. Comoꞌyajpa que vaꞌ ndø cønaꞌtzøy Dios tø ricoꞌajpa. Pero tzacyaj jetsetaꞌmbø pøn.
\v 6 Vaꞌcø ndø cønaꞌtzøy Dios, y vaꞌcø tø it contento, tø itpa como si fuera ndø nøꞌit vøti ricuꞌajcuy.
\v 7 Yøṉ nascøsi jay ndyø nømindam ni tiyø, y viyuṉete cuando tø caꞌpa jiꞌn mus ndø nømaṉdam ni tiyø.
\v 8 Oꞌca ndø nøꞌijtam ndø cuꞌtcuy y ndø nøꞌijtam ndø tucu, jetse hay que vaꞌ tø ijtam contento.
\v 9 Pero oꞌca sunbapø ricuꞌajyajø, jiꞌn gyanatzøcyaje cuando tzøjquisyajtøjpa y yatziꞌajcuꞌis ñucpa como si fuera trampaꞌomse. Y jiꞌn vøjpø quiꞌpsocujiꞌṉ sunba chøcyaje lo que yac tziꞌṉyajpapø aunque tiyø, y al fin toyaꞌisyajpa y tocoyajpa Diosis vyiꞌnaṉdøjquitaꞌm.
\v 10 Vaꞌcø ndø sun tumin, aunque jujchepø yatzitzocoꞌyajcuy minba ndø quiꞌpsocuꞌyomo. Venetaꞌmbøꞌis syuñaju ricuꞌajcuy y jetse tyocoyaj vyaꞌṉjajmocuy y jiꞌnam vyaꞌṉjajmoyaje, y mismo ñeꞌc yac toyaꞌisyaj vyin como si fuera cheꞌtz vyin machinjiꞌṉ.
\s Ay que vaꞌcø ndø coquip vøjø ndø vaꞌṉjajmocuy
\p
\v 11 Pero mitz Diosise yoscuy ndzøjcapyapøꞌis, pojyayø yøꞌcsepø tiyø vaꞌc maṉ mi ndzøc vøjpø tiyø, Dios vaꞌcø mi ngønaꞌtzøyø, vaꞌcø mi vyaꞌṉjajmoya, vaꞌcø mi sun Dios y aunque iyø, vaꞌcø mi nømaṉ pasencia y u mi maṉ møjaꞌṉdzøc mi ⁿvin.
\v 12 Coquipø vøjø viyuṉsepø mi vaꞌṉjajmoṉguy. Pømitziꞌø vaꞌcø mus mi ṉgyen mumu jamacøtoya. Por jetcøtoya mi ⁿvyejay Diosis, y vøti pøꞌnis vyiꞌnomdaꞌm mi ndzamsajuꞌam vøjø jujche mi vaꞌṉjajmoṉguy.
\v 13 Diosis yac itpa mumu tiyø. Jesusis vøj chaꞌmaṉvajcu Poncio Pilatoꞌis viꞌnaṉdøjqui que jujchet vyaꞌṉjajmocuy. Diosis y Cristo Jesusis isyajpa jujche nø mi aṉguiꞌmuse øjtzi.
\v 14 Mi aṉguiꞌmbøjtzi vaꞌcø mi ndzøcø jujche ndø Comiꞌis tø ꞌyaṉguiꞌmbase sin que vaꞌcø jana mi metzaṉdzøcø, vaꞌcø jana mus nøm ni iyø que ja mi ndzøc vøjø, hasta que minba ndø Comi Jesucristo.
\v 15 Cuando nuꞌcpa ꞌyora, Diosis maṉba yaj queje Jesucristo. Dios más møjaꞌṉ aṉguiꞌmbapøte y tumdi aṉguiꞌmbapø que vøj itpapø. Mumu aṉguiꞌmyajpapøꞌis Cyoviꞌnajøtaꞌmete y mumu coviꞌnajøꞌis Cyomite.
\v 16 Jete único jiꞌndi ma cyaꞌe, y jut ijtumø, itpa møjaꞌṉ søꞌṉgø, ni i jiꞌn mus maṉ ñuꞌc tome. Ni iꞌis ja isøtøc y ni iꞌis jiꞌn mus maṉ isø. Jete hay que vaꞌcø ndø vøcotzøctamø y jet más pømiꞌøyupø para mumu jamacøtoya. Amén.
\p
\v 17 Aṉguiꞌmyajø ñøꞌityajupøꞌis nascøspø riquesaꞌajcuy vaꞌcø jana myøjaꞌṉdzøcyaj vyin, ni vaꞌcø jana quiꞌpsyajø que tuminjiꞌn más ityajpa vøj, porque tumin yajpa; sino vaꞌcø quiꞌpsyajø que quenbapø Dios vaꞌcø ndø vaꞌṉjajmø, más tø itpa vøjø. Jeꞌis tø tziꞌpa mumu tiyø møꞌchøqui vaꞌcø tø it contento.
\v 18 Aṉguiꞌmyajø vaꞌcø møꞌchøqui chøcyaj vøjø, vaꞌcø ityaj listo vaꞌcø chiꞌyajø aunque ti pobretaꞌm, y vaꞌcø vyeꞌñajø lo que nøꞌityajupø.
\v 19 Jetse ꞌyaṉnecyajpa riquesaꞌajcutyaꞌm eya jamacøtoya vaꞌcø vyøꞌom putyajø, y jetse pyøjcøchoṉyajpa tumønajcøtoya quenguy.
\s Ultimo tzaꞌmaṉvajcocuy
\p
\v 20 Timoteo, cuidatzøc mi ⁿvin vaꞌcø mi ndzøcø lo que jujche Diosis mi ꞌyaṉguiꞌmuse. Uy mi ṉgømaꞌnøyu ote lo que nø syuni tzamdzamneyajupø lo que jujche chamyajpase jiꞌn cyomusyajeꞌis Dios. Onguipyajpa nømyajpa que ityaj myusocyuy, pero jiꞌndyet jicø.
\v 21 Venetaꞌmbøꞌis vyaꞌṉjamyaju jetsetaꞌmbø y tocoyaju vøjpø vaꞌṉjajmocuy.
\p Pero oꞌnømbyøjtzi Dios vaꞌcø mi ṉgyotzove ñeꞌc vyøꞌajcupit. Amén.