\id 3JN
\h 3 Juan
\toc1 3 Juan
\mt1 Tercera Carta del Apóstol San Juan
\mt2 Tuꞌcaꞌyombø Carta Jyayupø Apóstol San Juaꞌnis 
\c 1
\s Chamba ti chøcpa vøjø Gayoꞌis
\p
\v 1 Øjchøṉ tzambøn goviꞌnajø, øtz mi jajyaꞌmbøjtzi ø mi amigo Gayo. Øtz mi sunbapø chøṉø viyuṉse.
\p
\v 2 Tøvøy mi sunbapø chøṉø, øtz mi vaꞌṉgapya Dioscøsi vøj vaꞌcø mi myaṉø, aunque ticøsi saꞌsa vaꞌcø mi indø, jujche Diosjiꞌṉ vøj it mi ndzocoy.
\v 3 Tziꞌcoꞌn ø ṉgusto cuando miñaju iyø jutipø ndø vaꞌṉjajmocuy tøvø y tzajmayajøjtzi jujche mi ṉgomuspa viyuṉbø tiyø y viyuṉbø tiyø mi ndzøcpa.
\v 4 Ja it ni ti tziꞌpapøꞌistzi más gusta que vaꞌcø tzajmatyøjø que ø uneꞌis chøcyajpa viyuṉbø aṉmaꞌyocuy.
\p
\v 5 Tøvøy mi sunbapø chøṉø, vøj mi ndzøcpa aunque jujche vaꞌcø mi ṉgotzoṉyajø ndø tøvøtaꞌm jiꞌṉaꞌṉ mi ispøcyajepø.
\v 6 Cuando tuꞌmyajpa yøꞌqui ndø tøvøtaꞌm, yaꞌi tzuꞌṉyajupøꞌis mi ñchamyajpa jujche mitz sunyajpa aunque iyø. Tziꞌtamø jic vityajpapø ndø tøvø lo que ti syuñajpa para tuṉgøtoya. Jetse syunba Diosis, y vøj jetse vaꞌcø mi ndzøcø.
\v 7 Porque jiꞌquistaꞌm ñøcøtzoꞌchaju vaꞌcø vityajø porque sunba chøjcayaj Jesucristoꞌis yoscuy. Pero jiꞌn vyaꞌṉjajmoyajepøꞌis ꞌyayuda ja syuñajø.
\v 8 Por eso ø sunba vaꞌcø ndø cotzoṉdamø jetse vityajpapø; jetse ndø cotzoṉdamba vaꞌcø chamboyajø viyuṉbø aṉmaꞌyocuy.
\s Diotrefesis jiꞌn chøc vøjpø tiyø
\p
\v 9 ⁿJajyayajøjtzi carta ndø vaꞌṉjajmocuy tøvøtaꞌm, pero Diotrefesis jiꞌn pyøjcøchoṉ aṉguiꞌmguy, porque ñeꞌc syunba más myøjaꞌṉom ꞌyaṉguim jeꞌtomdaꞌm.
\v 10 Por eso oꞌca maꞌṉbøjtzi mitzcøꞌmdaꞌm, maꞌṉbø mi yac jajmuchøctame oꞌca ti chøcpa Diotrefesis. Jeꞌis cøsujtzøtyaꞌmbøjtzi y tzeꞌmdaꞌmbøjtzi. Ni jiꞌn contentoꞌaj jetse nø chøjcuse, sino que ni jiꞌn pyøjcøchoṉyaj ndø tøvø nuꞌcyajpapø. Y oꞌca eyapøꞌis sunba pyøjcøchoṉyajø, jeꞌis yaꞌinducyajpa, y jiꞌn yac tøjcøyaj tuꞌmnømbamø. Sunbaꞌis pyojcøchoṉyaje, jetjiꞌnducu myacputyajpa.
\p
\v 11 Ø mi sunbapø chøṉø tøvøy, uy chøqui como chøcyajpase yatzitaꞌmbø pøꞌnis, sino tzøcø chøcyajpase vøjtaꞌmbø pøꞌnis. Chøcpapøꞌis vøjpø tiyø, Diosise ñe. Pero chøcpapøꞌis yatzitaꞌmbø tiyø, jiꞌn cyomus Dios.
\s Mumu pøꞌnis vyøcotzøcyajpa Demetrio
\p
\v 12 Mumu nømyajpa que Demetrio vøjpø pønete. Jujche ijtuse viyuṉbø aṉmaꞌyocuy, tø tziꞌpa cuenta jetseti itqueꞌt Demetrio. Y øtztaꞌm jetseti ṉgotzamdaṉqueꞌtpa Demetrio que vøjpø pønete, y mitz mi muspa que øtz ndzamdamba viyuṉbø tiyø.
\s Ultimotaꞌmbø ote
\p
\v 13 Sone tiyø sunba mi ndzajmayø, pero jiꞌn sun ndzøjcaꞌṉøy carta más vøti tintajiꞌṉ y plumajiꞌṉ.
\v 14 Porque suꞌnba mi istoꞌ pronto. Entonces maṉba nay tø oꞌnøtyandøji ndø neꞌctaꞌm.
\p
\v 15 Oꞌnømbyøjtzi Dios vaꞌcø mi it vøjø. Yøꞌctaꞌmbø amigoꞌis mi ngyøꞌvejayajpa dyus. Yuschiꞌyaj ndø amigo tumdumø ñøyicøs nøyicøstaꞌm.