\id Eph Zapotec Lachixio USFM output from Final pdf Aug 2010
\h Efesios
\toc1 Efesios
\toc2 Ef.
\mt Carta nú uquie'e San Pablo ​ ​ lubee bene eyeche Efeso ​ ​ enu nzeli arqui' Jesucristo
\c 1
\s Uxe'la Pablo saludo
\p
\v 1 Li'á Pablo, necaa tucu apóstol Jesucristo equie nú rnibiya' Diose. Rquie'a carta quie' luhua li'ihua enu neli nzeli arqui' stichia' Jesucristo, li'ihua enu necala bee bene' Diose eyeche Efeso.
\v 2 Diose Pa'ahua cuna Jesucristo enu rnibiya' lua'ahua ri'inu nú cha nze'cahua cuna nú nzuxe arqui'hua.
\s Rri'i Diose nú nza nze'ca lu cuenda' bee bene enu nzeli arqui' Jesucristo
\p
\v 3 Che'tsa Diose pa' Jesucristo enu rnibiya' lua'ahua nú chiqui' ñia necanu, xne nee equie nú neca tucunecatse'ahua cuna Jesucristo, uri'ile'yalanu lia'ahua desde liñibe nu chiqui' rri'inu elietsa lua'ahua para nú chequie'ahua stichia'nu.
\v 4 Li'inu ucañinu lia'ahua equie cuenda' Jesucristo hasta chenu lasca' acache' iliulabe para nú huañia'ahua nu lecaxi na'ahua lunu sin dula,
\v 5 xne equie nú seca Diose lia'ahua, uri'inu nú riala nú aca'ahua bee lli'ñinu equie cuenda' Jesucristo, tucu nú uri'inu elliebacu' nú acane.
\v 6 Enze'e, la tsana'ahua nú sucu' aya'ahua Diose equie nú chiqui' ñia necanu, xne uri'i le'yalanu lia'ahua equie cuenda' Lli'ñinu Jesucristo enu secanu.
\v 7 Xne udixiulanu equie cuenda' stula'ahua chenu uri'chia rene'nu lu cruse nu scua uri'ila Diose perdona stula'ahua enze'e rlube' nú chiqui' secanu lia'ahua.
\v 8 Enze'e chiqui' lia uliqui'nu lunú reca elliebacu'ahua cuna nú rria'ahua beya',
\v 9 nu ulube'lanu lua'ahua xa neca elliebacu'nu hasta hua'tu tucu nú uri'inu elliebacu' nú acane.
\v 10 Nu elliebacu'cua' tsalunu chenu riña bichia ze'e, Diose tsa'na ye nú nu' liñibe cuna beenú nu' lu iliulabe ya Jesucristo.
\p
\v 11 Le'ca equie nú neca tucu neca'tse'ahua cuna Jesucristo, ucañila Diose lia'ahua para nú aca'ahua bee bene'nu tucu nú udu' arqui'nu nú ri'inu hasta chenu lasca acache' iliulabe, xne li'inu rrinu yeene tucu nú niarqui'nu nú acane.
\v 12 Nu li'inu uri'ilanu scua para nú lia'ahua enu rluti uyalí arqui' Jesucristo, aca'ahua enu zucu' ayaa Diose equie nú rnibiya'nu.
\v 13 Le'ca li'ihua chenu ubene'hua stichia'nu nú neli neca nú xa tsila'ahua, che uyalí arqui'hua Jesucristo nu unga tucu necatsehua cuna li'inu. Nu tucu nú uni Diose nú liqui'nu Espíritu Santo luhua, nu nee nú nzula Espíritu Santo cuna li'ihua, li'inu necanu xi neca tucu sello nú rlube' nú necalahua para Diose.
\v 14 Equie nú nzula Espíritu Santo cuna lia'ahua enze'e yucua'ahua erencia nú uni Diose nú liqui'nu lua'ahua, chenu ye bee bene'nu nucua'ala liñibe para nú la tsuxe'ahua nú sucu' aya'ahua Diose equie nú rnibiya'nu.
\s Rnacu' Pablo lu Diose nú dete'nu lunú aca elliebacu' bee bene'nu
\p
\v 15 Nu lunú nediyala nú nzeli arqui'hua Jesucristo enu rnibiya', nu le'ca secahua beelá bee bene' Diose,
\v 16 la tsuxea nú rdetea che'tsa lu Diose equie cuenda'hua cada chenu rnacua lunu.
\v 17 Nu li'inu enu neca Diose enu rnibiya' desde liñibe, nu li'inu necanu pa' Jesucristo enu rnibiya' lua'ahua. Le'ca nacua lunu nú ri'inu nú aca elliebacu'hua para nú ri'ihua beya' lunú lube'nu luhua para nú nze chululáhua li'inu.
\v 18 Le'ca nacua lu Diose nú xa'lanu elliebacu'hua para nú ri'ihua beya' xa neca equie nú nzuculuhua hasta chenu ucañinu li'ihua nu ri'ihua beya' nú le'ca chiqui' llene nu ñia neca erencia nú nu'che' Diose para bee bene'nu.
\v 19 Le'ca rnacua lunu nú ri'ihua beya' nú chiqui' llene neca poder, nú rri'i elietsa lua'ahua nú nzeli arquia'ahua li'inu. Le'ca li'i poder llenecua' nú chiqui' ulube' Diose lua'ahua,
\v 20 chenu uri'inu nú uhuañi zeca Jesucristo, nu uzucu' Diose li'inu cue'tse Diose chubee liñibe,
\v 21 elu udete'nu nú rnibiya'nu lunu nú máse seca lu ye elu rnibiya', cuna ye elu usticia cuna ye bee gobierno. Le'ca másela seca elu rnibiya'cua' lu ye bee elurnibiya' nú nu' cuna nú nze chu'ulá lu iliulabe quie'.
\v 22 Chequie utsa'na Diose ye bee elurnibiya' cua' ya Jesucristo enu ucañinu para nú nibiya'nu lu ye bee bene enu nzeli arqui' li'inu.
\v 23 Nu bee bene enu nzeli arqui' Jesucristo, li'inu neli nehuañinu cuna li'ibeella nu catse nzunu xne li'inu necanu enu rnibiya'li.
\c 2
\s Utsila'a Diose lia'ahua equie nú secanu lia'ahua
\p
\v 1 Li'ihua ungahua xi neca bene enu unguti lu Diose equie cuenda' bee dula cuna beenú necha neca
\v 2 uri'ihua, uyanalahua inziu nú necha neca nu uri'ihua tucu nú niarqui' beze'lu nú ri'ihua, nu espíritu nú necha neca cua' neca enu nehuañi cuna bee bene enu la zucu' Stichia' Diose.
\v 3 Ye'ahua le'ca scua uhuañia'ahua tucu nú niarqui'tsia'ahua, nu tucu nú necatsia elliebacua'ahua. Nu le'ca scua tucu nú riala bee bene enu la zucu' Stichia' Diose castiya, le'ca scua ayala'ahua castiya'nu.
\v 4 Pero lunú chiqui' ñia rua'a arqui' Diose lia'ahua, nu lunú chiqui' secanu lia'ahua,
\v 5 añinzuca nú unga'ahua xi neca bene enu unguti lu Diose, equie cuenda' stula'ahua, pero nee rlu'cula'ahua elunehuañi cuna Jesucristo lu Diose. Equie nú chiqui' ñia necanu utsila'ahua.
\v 6 Chenu uri'inu nú uhuañi zeca Jesucristo lu eluti neca xi neca nú le'ca nua'ahua uhuañi zeca'ahua, nu le'ca neca xi neca nú nellunu'la'ahuanu liñibe.
\v 7 Uri'i Diose scua para nú lube'nu lua'ahua bee bichia nú nze'talá nu chiqui' secanu lia'ahua nu ñia nze'canu lua'ahua equie cuenda' Jesucristo.
\v 8 Lunú nze'ca Diose enze'e utsila'anu lia'ahua, la necane nu neca'ahua bene nze'ca lunu, sino que lunú nzeli arquia'ahua Jesucristo enze'e utsila'ahua.
\v 9 Le'ca la necane equie nu uria'ahua nú neca nze'ca utsila'anu lia'ahua para nú lecati aca nelliña.
\v 10 Xne Diose ureche' lia'ahua, nu equie cuenda' Jesucristo uche'enu arquia'ahua lunú necha uhuañia'ahua hua'tu para nú ria'ahua nú neca nze'ca, tucu nú uri'inu elliebacu' nú ria'ahua.
\s Equie cuenda' Jesucristo neca tucunecatse'ahua
\p
\v 11 Enze'e li'ihua enu la neca bee bene Israel ullu'cu arqui'hua xa ulle'cahua hasta hua'tu. Bee bene Israel uhualee li'ihua bee bene enu la uya' seña, xne li'ibeella nuya'beella seña tucu nú rnibiya' ley,
\v 12 le'ca tiembu ze'e la chuluhua Jesucristo, nu la nebacu'hua leta bee bene Israel, nu le'ca la nebacu'hua lunú ucuaqui u'na Diose. Uhuañihua lu iliulabe quie' nu lecaxi nzuquie arqui'hua nu sin nú chuluhua Diose.
\v 13 Pero nee nú nzelila arquia'ahua Jesucristo, li'ihua enu istu utsu arqui' lu Diose, nu nee ube'ta bicalahua lunu equie cuenda' rene' Jesucristo nú uri'chia lu cruse.
\v 14 Xne Jesucristo neca enu rri'i nú nzuxe arquia'ahua. Li'inu unitilunu elu rlee lunú rri'i nú la zela nú aca tucunecatse bee bene Israel cuna bee bene enu la neca bee bene Israel.
\v 15 Nu equie nú unguti Jesucristo ulaxu yebee custumbre nú rnibiya' ley lubee bene Israel nú rri'i beella, li'inu uri'inu nú unga tucunecatse bee bene Israel cuna bee bene enu la neca bee bene Israel xi neca tucu eyeche cuqui, xne neca tucunecatse'ahua cuna li'inu. Scua uri'inu nú uyu'u nú nzuxe arqui' bee bene.
\v 16 Xne equie nú unguti Jesucristo lu cruse, ulaxu nú rlee bee bene Israel lubee bene enu la neca bee bene Israel, nu scua iguale uyala arqui' Diose lua'ahua lunú neca tucu necatse'ahua cuna Jesucristo.
\p
\v 17 Nu li'inu ube'ta tixiule'enu lubee bene Israel cuna lubee bene enu la neca bee bene Israel nú xa chu'u nú nzuxe arquia'ahua lu Diose.
\v 18 Nu equie cuenda' Jesucristo sia bee bene Israel nu sia bee bene enu la neca bee bene Israel, rlu'cula'ahua tucu inziu nú riña'ahua lu Diose xne nzula Espíritu Santo'nu cuna lia'ahua.
\v 19 Enze'e la neca'hua xi neca bene istu nu la neca'hua bene rene lu Diose sino que nebacu'lahua leta bee bene'nu, neca tucunecatsela'ahua cuna bee bene'nu.
\v 20 Li'ihua necahua xi neca tucu ni'i nú recache'e, nu bee apóstol cuna bee profeta neca beella xi neca cimiendu' ni'i quie', nu Jesucristo neca xi neca quiee nú neca equie uzibi' nú recache' ni'i quie'.
\v 21 Nu ze'e uquixie riatsa ni'i quie nú rniru nú neca li'ihua, nu scua nze liqui nze'cae para nú aca tucu necatse'ahua indu' Diose cuna Jesucristo.
\v 22 Nu nee nú neca tucu necatselahua cuna Jesucristo, le'ca neca tucu necatselahua cuna beela bee sa'ahua enu nzeli arqui' li'inu para nú aca'ahua tucu indu elu nehuañi Diose equie cuenda' Espíritu Santo.
\c 3
\s Ucañi Diose Pablo para nú ixiule'ella stichia' Jesucristo ​ ​ lubee bene enu laca bee bene Israel
\p
\v 1 Enze'e li'á Pablo, nchiñia ni'cu' equie nú sibi'a lu Jesucristo para nú rri'á elietsa luhua enu laca bee bene Israel.
\v 2 Li'ihua nediya'hua nú la yala ri'á riña' nú rri'á, pero lunú nze'ca Diose uliqui'nu riña' quie' rri'á para nú ri'á elietsa luhua nú ri'ihua beya' stichia'nu.
\v 3 Nu li'inu ulube'lanu lua xa neca elliebacu'nu hasta hua'tu, tucu nú unilá luhua lu tucu carta.
\v 4 Chenu ulahua carta cua' che ri'ihua beya' nú nediyala xa neca equie cuenda' Jesucristo nú la ri'i bee bene beya' hasta hua'tu.
\v 5 Bee tiembu nú udetela lecali ti uri'i beya' xa neca equie cuenda' Jesucristo, xne ungae xi neca tucu nú a'chi' neca lubee bene, pero nee equie cuenda' Espíritu Santo ulube'la Diose nucua' lubee apóstol cuna lubee profeta.
\v 6 Nu lunú unga xi neca nú a'chi' neca lubee bene, necane equie cuenda' bedichia' nze'ca' Jesucristo, nú le'ca bee bene enu laca bee bene Israel riala beella erencia nú riala bee bene Israel lunú neca tucunecatsela beella, nu nebacu'la beella lunú ucuaqui u'na Diose equie cuenda' Jesucristo.
\p
\v 7 Li'á rixiule'a bedichia' nze'ca' Jesucristo lubee bene, la necane equie cuenda' nú riala nú ri'á scua sino que necane nú ñia nze'ca Diose enze'e lia uliqui'nu elurnibiya'cua' lua para nú zibi'a lunu.
\v 8 Li'á neca enu máse leca tineca lu ye bee bene' Diose, pero lunú ñia nze'ca Diose lia uliqui'nu lua nú ixiule'a lubee bene enu la neca bee bene Israel equie cuenda' eluxene' Jesucristo nú llene neca.
\v 9 Nu para nú ixiule'e nze'caa lu yebeella xa neca elliebacu' Diose enu ureche' ye nú nu', elliebacu' nú né chu alube'nu lubee bene.
\v 10 Para nú equie cuenda' bee bene enu nzeli arqui' Jesucristo ri'i ye bee enu rlu'cu nú rnibiya' liñibe beya' nú Diose rlu'cu ye poder.
\v 11 Nu hasta chenu lasca' quixie iliulabe uri'ila Diose elliebacu' nú acane scua nu nee uyalulane equie cuenda' Jesucristo enu rnibiya' lua'ahua.
\v 12 Nu equie nú nzelila arquia'ahua Jesucristo nu'la modo xa riña'ahua lu Diose sin nú lliquia'ahua chebica'ahua lunu.
\v 13 Enze'e nia luhua nú la tsunehuana arqui'hua lunú nehuana se'caa equie cuenda'hua, xne neca nze'ca nucua' para li'ihua.
\s Chiqui' seca Jesucristo lia'ahua
\p
\v 14 Enze'e súlliquia lu Diose pa' Jesucristo enu rnibiya' lua'ahua,
\v 15 li'inu enu rnibiya' lu ye nú nu' liñibe cuna lu iliulabe.
\v 16 Rnacua lunu, nú lunú chiqui' rlu'cunu poder nú liqui'nu juerza'ahua cuna elurnibiya' luhua equie cuenda' Espíritu Santo para nú tsuta' arqui'hua lunu,
\v 17 nu huañihua cuna Jesucristo equie nú nzeli arqui'hua li'inu para nú scua tucu nú neli nzenalahua eluseca'nu.
\v 18 Scua acahua ri'ihua beya' cuna beelá bee sa'hua enu nzeli arquia'ahua li'inu nú eluseca Diose chiqui' llene neca, nu ni' la ria'ahua beya' xa nia'ahua lunú chiqui' llene necane.
\v 19 Enze'e rnacua lu Diose nú chuluhua eluseca cua' nú chiqui' llene neca, nu másela llene necane luquelá nú rri'i bee bene elliebacu', nu scua neza'li nú huañihua cuna Diose.
\p
\v 20 Nu li'inu enu rlu'cu nú rnibiya' para nú ri'inu másela lunú rri'i bee bene elliebacu', urre másela lunú rnacu' bee bene lunu equie cuenda' Espíritu Santo'nu nú nzu cuna lia'ahua.
\v 21 Nu riala nú zucu' uya'ahua Diose ye bichia nu ye tiembu equie cuenda' Jesucristo, lia'ahua enu nzeli arquia'ahua Jesucristo. Amén.
\c 4
\s Equie cuenda' Espíritu Santo neca tucu necatse'ahua
\p
\v 1 Li'á enu nchiñia ni'cu' lunú sibi'a lu Jesucristo, zequiea luhua nú scua tucu nú necalahua bee bene' Diose, uhuañihua tucu nú riala nú huañi bee bene enu necala bee bene'nu.
\v 2 Aca lle'na arqui'hua nu aca nze'cahua, nu tsuquie arqui'hua, nu uriqui'hua bee sa'hua lunú xi rri'inu beella li'ihua, equie nú secahua beella.
\v 3 Uzu'cu' luhua nú chenalaláhua nú neca tucu necatsehua cuna elietsa' Espíritu Santo, enu rliqui' nú nzuxe arqui'hua, nu rri'i nú neca tucu necatsehua.
\v 4 Lia'ahua neca'ahua xi neca tucutsia bene, nu ye'ahua nzu Espíritu Santo cuna lia'ahua, nu scua tucu nú necala'ahua bee bene' Diose le'ca scua tucutse nellua'aquie'ahua nú liqui'nu lua'ahua.
\v 5 Tucutsia enu rnibiya', tucutsia nú nzutenelí arquia'ahua, nu tucutsia elu rrinza nu',
\v 6 xne nu' tucutsia Diose enu neca Pa'ahua nu li'inu rnibiya'nu lu ye'ahua. Nu li'inu rnibiya'nu lu ye beenú nu', nu nzunu cuna ye'ahua nu rria'ahua lunú niarqui'nu.
\p
\v 7 Pero cada tucua'ahua utsula Jesucristo nú ria'ahua tucu nú uniarqui'nu nú ria'ahua.
\v 8 Tucu nú rni lu ichi' Stichia' Diose:
\q Chenu uquienu liñibe,
\q uri'inu ana lu ye bee elurnibiya',
\q nu udete'nu lubee bene lunú riala ri'i beella.
\p
\v 9 Nu, ¿xi rni elu rni nú “uquienu liñibe”? Rni nucua' nú ube'tanu lu iliulabe.
\v 10 Nu Jesucristo enu ube'ta lu iliulabe, le'ca li'inu uquienu liñibe nu rnibiya'nu diquineca iliulabe.
\v 11 Nu udete'lanu lubee bene lunú riala ri'ibeella, nu'beella enu uyala nú aca bee apóstol, le'ca nu'beella enu uyala aca bee profeta, nu nu' beella enu uyala nú ixiule'e stichia'nu lubee bene, nu le'ca nu' beella enu uyala nú ni bezete' nu zete' bee bene enu nzeli arqui' li'inu.
\v 12 Scua ucañi Jesucristo bee bene'nu para nú zete' beella beelá bee bene enu nzeli arqui' li'inu para nú scua aca beella zibi' beella lunu, nu nzechululá beella li'inu,
\v 13 hasta nú neza'li nú nzeli arquia'ahua nú chulua'ahua lli'ñi Diose para nú ri'ilia'ahua beya' xa riala chenala'ahua Jesucristo tucu nú rialane.
\v 14 Chequie la aca neriña' nú zequienu bee bene lia'ahua xi sequienu bee bene bee endu', la aca'ahua xi neca tucu nú ruya' bii enzichiu' enzerquie equie yelu beenú rdichia' bee enu rla'na nú xa modo zequienu bee bene.
\v 15 Sino que rqui'ña nú nia'ahua nú nelíneca nu chenala'ahuane cuna eluseca nú rlu'cua'ahua, nu lunú neca tucunecatse'ahua cuna Jesucristo enu rnibiya' lua'ahua chenala'ahua tucu nú niarqui'nu nú ria'ahua.
\v 16 Xne equie cuenda' Jesucristo iguale neca'ahua nu neca'ahua xi neca tucutsia bene, ye'ahua enu nzeli arqui' Jesucristo, xne equie cuenda'nu neca tucu necatse'ahua, nu cada tucua'ahua ria'ahua lunú riala ria'ahua para nú ria'ahua elietsa lubee sa'ahua, nu zeca'la'ahua bee sa'ahua.
\s Elunehuañi nú necuqui rliqui' Jesucristo
\p
\v 17 Nu nee equie cuenda' Jesucristo nialuhua: La huañihua xi nehuañi bee bene enu la chulu Diose, xne li'ibeei nehuañitsiabeei lunú necatsia elliebacu'beei
\v 18 nu necabe neca elliebacu'beei. Nu la zucu'lubeei nú huañibeei tucu nú niarqui' Diose nú huañibeei, equie nú la ri'ibeei beya' nu nziti arqui'beei.
\v 19 Leca' xi zeca beei nu utsana' arqui'labeei le'catsia li'ibeei nu rri'ibeei seidu nú nzeri'ibeei yelu clasia' beenú necha neca.
\v 20 Pero li'ihua lá chuluhua Jesucristo para nú huañihua scua,
\v 21 tunu neli nú ubene'la'hua lu cuenda'nu, nu neli nú ungalahua beenú neli neca nze'ta lunu.
\v 22 Utsana arqui'hua lunú uhuañihua chenu lasca' chuluhua li'inu nucua' rnitilutsia li'ihua, xne bee elliebacu' nú necha neca uzequienu li'ihua nu uri'itsiahua tucu nú uniarqui'tsiahua.
\v 23 Uche'elihua xa necahua,
\v 24 para nú acahua xi neca tucu bene cuqui enu ureche' Diose tucu nú niarqui'nu cuna tucu elunehuañi nú leca nú lixiu neca tucu nú rialane, equie cuenda' stichia'nu nú neli neca.
\p
\v 25 Enze'e la nia'hua eluquichia', uni'tsiahua nú neli neca lubee sa'hua xne neca tucu necatsela ye'ahua.
\p
\v 26 Tunu rlehua, la ri'ihua dula. La duche'hua elu rlecua' arqui'hua debichia.
\v 27 Para nú la dete'hua luhuare nu ri'i beze'lu ana luhua.
\p
\v 28 Bene enu rcachi' rqui'ña nú tsana'lla nú rcachi'lla, nu ri'illa riña' para nú equie riña' nze'ca nú rri'illa nu' modo ri'illa elietsa lubee bene enu nu' xi secala'cha'.
\p
\v 29 Le'ca la nihua bee bedichia' nú necha neca, uni'tsiahua puro bedichia' nze'ca nú ri'i elietsa nu zibi' lu beelá bee bene enu yene'e.
\v 30 La ri'ihua nú tsúnehuana arqui' Espíritu Santo' Diose nú nzula cuna li'ihua xi neca tucu seña nú rlube' nú necalahua bee bene'nu para bichia nú riñahua lunu.
\p
\v 31 Utsa'nahua tucu chu ye nú rlee nzu arqui'hua, nu elu rlee, nu elu rana arqui', cuna nú rixialihua lu sa'hua, cuna bee bedichia' chi'qui', cuna ye beenú necha neca.
\v 32 Aca nze'cahua, nu uhua'a arqui'hua bee sa'hua nu uri'ihua perdona bee sa'hua tucu nú uri'i Diose perdona li'ihua equie cuenda' Jesucristo.
\c 5
\s Xa riala huañi bee bene' Diose
\p
\v 1 Scua tucu nú necalahua lli'ñi Diose enu secanu, ula'nahua nú ri'ihua tucu nú rri'inu.
\v 2 Huañi nze'cahua, uzecahua bee sa'hua tucu nú seca Jesucristo lia'ahua nú udete' cuendanu li'inu nú ungutinu equie cuenda'ahua, nu unganu xi neca tucu u'na nú ñia rlia para Diose.
\p
\v 3 Li'ihua enu necala bee bene' Diose, la tsu neyi'hua nu ni' la yala nihua bee bedichia' nú necha see, cuna yelu beenú lecaxi zibi'.
\v 4 La nihua bee bedichia' nú necha see, ni' bee bedichia' nú lecaxi zibi' nu bee bedichia' nú la yala nihua, xne la neca nze'ca bee nucua'. Mejora ude'tehua che'tsa lu Diose.
\v 5 Xne nediya'la'hua nú bee bene enu nehuañi lu eluhuexe, nu bee enu rri'i nú necha neca, nu bee enu neyi' rcua'a nu niarqui' lu'cu huaxi beenú lu'cu, máse seca beei bee nucua' luquelá Diose, leca modo chu'u bee nze'e elurnibiya' Jesucristo nu Diose.
\v 6 La zelahua nú ti zequienu li'ihua cuna bee bedichia' nú lecaxi zibi', xne equie beenú lecaxi zibi' cua' nze'ta castiya' Diose lubee bene enu la zucu' stichia'nu.
\v 7 Enze'e la ri'ihua tucu nú rri'ibeei.
\p
\v 8 Ante uhuañihua xi neca bene enu necabe elliebacu', pero nee lunú neca tucu necatselahua cuna Jesucristo enu neca ellie'e luhua. Enze'e uhuañihua xi nehuañi bee bene enu nzenala ellie'e cua',
\v 9 xne lunú nzenala bee bene ellie'e cua', che rri'illa nú neca nze'ca, tucu nú rialane nu tucu nú neli neca.
\v 10 Ucua'nahua nú ri'ihua tucu nú riu' arqui' Diose.
\v 11 La ri'ihua beenú la zibi' nú rri'i bee bene enu necabe nzu elliebacu', sino que uni'hua lubeei para nú ri'ibeei beya' lunú rri'ibeei.
\v 12 Xne hasta rtu'bene ni lunú rri'i a'chi'beei.
\v 13 Pero equie cuenda' stichia' Jesucristo chu ri'ibeei beya' lunú rri'ibeei.
\v 14 Xne equie cuenda' stichia'nu rri'i bee bene beya' yeene. Enze'e rni lu ichi' Stichia' Diose:
\q Ude'te' ellie'e li'ilu enu nza inziu nú necha neca,
\q utsana' arqui' stulalu che xa'la Jesucristo elliebacu'lu.
\p
\v 15 Enze'e ubi'yahua xa nehuañihua, xne la neca nú lia nehuañihua sino que ubi'yahua xa nehuañihua.
\v 16 Diquila nú nehuañihua la zelahua nú lia xle'e dete bee bichia'hua, uhuañihua tucu nú riala huañihua, xne tiembu quie' necha nehuañi bee bene.
\v 17 Enze'e la huañihua lunú necatsia elliebacu'hua, sino que ucua'nahua nú ri'ihua beya' xa niarqui' Diose nú huañihua.
\v 18 La lluchi'hua, xne elu xuchi' cua' rnitilu bene, mejora uzelahua nú nibiya'li Espíritu Santo luhua.
\v 19 Uni'hua lubee sa'hua bee Salmo, cuna bee himno, cuna bee canto nú neca para Diose, nu diquinu' arqui'hua ula'hua nu uzu'cu' ayahua Diose.
\v 20 Nu equie cuenda' Jesucristo ude'tehua che'tsa lu Pa'ahua Diose ye bichia equie ye beenú rri'inu lua'ahua.
\s Xa riala nú huañi bee bene enu nzeli arqui' Jesucristo
\p
\v 21 Uzu'cu'hua nú rni bee sa'hua equie nú rlu'cuhua ula'na lu Jesucristo.
\p
\v 22 Nu li'ihua bee una'a enu nechia uzu'cu'hua nú rni bee niyu'hua, tucu nú sucu'hua nú rni Jesucristo.
\v 23 Xne niyu rnibiya' lu una'i, tucu nú rnibiya' Jesucristo lubee bene enu nzeli arqui' li'inu, li'inu enu utsila'a li'ibeei.
\v 24 Nu le'ca scua tucu nú sucu' bee bene enu nzeli arqui' Jesucristo stichia'nu, le'ca scua bee una'a enu nechia rqui'ña nú zucu'hua nú rni bee niyu'hua tucu nú rialane.
\p
\v 25 Le'ca li'ihua bee niyu enu nechia uzecahua bee una'hua, tucu nú seca Jesucristo bee bene enu nzeli arqui' li'inu, nu hasta ungutinu equie cuenda'beella.
\v 26 Para nú uquieenu li'ibeella lu cuenda' stula beella. Uquieenu li'ibeella equie cuenda' stichia'nu nu cuna equie cuenda' elu rrinza,
\v 27 para nú ñia naa beella riña beella lunu nu lecaxi na beella, sin ni' tucu equiya nu ni' xitse stucu bee dula, sino que lecalí xi naa beella sin dula.
\v 28 Le'ca scua bee niyu enu nechia rqui'ña nú zeca beella una'a beella, tucu nú seca beella li'ibeella. Nu enu seca una'a seca le'ca li'i.
\v 29 Xne ni' tucu bene la chana arqui' le'catsia li'i, sino que rebaculla li'illa nu ri'yalla li'illa, tucu nú rri'i Jesucristo cuna lia'ahua enu nzeli arqui' li'inu,
\v 30 equie nú neca tucu necatse'ahua cuna li'inu.
\v 31 Enze'e tucu nú rni lu ichi' Stichia' Diose: “Tsa'na niyu pa'lla cuna na'lla para nú aca tucutsialla cuna una'lla, nu rucu beella aca beella xi neca tucutsia bene.”
\v 32 Chiqui' neriña' nú ri'i nze'ca bee bene beya' bee bedichia' quie', pero rniine xne le'ca scua neca Jesucristo cuna bee bene'nu.
\v 33 Nee bee niyu uzecahua bee una'hua tucu nú secahua li'ihua, nu li'ihua bee una'a ulu'cuhua ula'na lubee niyu'hua.
\c 6
\p
\v 1 Le'ca esquie li'ihua bee endu', uzu'cu'hua nú rni bee uzana'hua xne scua rialane, equie nú nzeli arqui'hua Jesucristo.
\v 2 Nu mandamiento rluti nú rni nú yucu cuenda'ahua lunú ucuaqui u'na Diose lua'ahua tunu zucua'ahua mandamiento nú rni: “Ulu'cu ula'na lu pa'lu cuna lu na'lu,
\v 3 para nú huañi nze'calu nu huañixeelu lu iliulabe quie'.”
\p
\v 4 Nu le'ca esquie li'ihua bee paa cuna bee naa, la detehua lunú rri'inuhua bee endu'hua para nú la leebeei equie cuenda' nucua', mejora ubi'ya nze'cahua li'ibeei, uni'hua bezete' lubeei nu uze'tehua li'ibeei tucu nú niarqui' Diose.
\p
\v 5 Nu li'ihua bee enu rri'i riña' bee bene, uzu'cu'hua nú rni bene enu rri'ihua riña'lu lu iliulabe quie', nu diquinu' arqui'hua ulu'cuhua ula'na lubeella, nu uzu'cu'hua nú rni beella, uri'ihua xineca nú rri'ihua riña' Jesucristo.
\p
\v 6 Uri'ihua riña' beella, nu la ri'ihuane chenu ri'yatsia beella luhua para nú ya'na nze'cahua lubeella, sino que uri'ihua riña' beella xi neca nú sibi'hua lu Jesucristo, equie nú neli rri'ihua tucu nú niarqui' Diose nú ri'ihua.
\v 7 Uri'ihua riña' beella diquinu' arqui'hua, uri'ihuane xi neca nú rri'ihua riña' Jesucristo xne la necatsiae riña' bee bene.
\v 8 Nu li'ihua nediya'la'hua nú cada bee bene, mase nú necalla moso' urre lacalla moso', pero dete' Jesucristo lulla nú riala nú ati'lla equie nú neca nze'ca uri'illa.
\p
\v 9 Le'ca esquie li'ihua bee patrón, aca nze'cahua lubee moso'hua, la ri'ihua nú nehuana zeca beella. Xne li'ihua nediya'hua nu li'inu enu rnibiya' lubeella nu luhua nzucunu liñibe nu ante lunu iguale neca ye bee bene.
\s Utsuta' arqui'hua lunú nzeli arqui'hua Jesucristo
\p
\v 10 Le'ca nia luhua bee sa'a enu nzeli arquia'ahua Jesucristo nú utsuta' arqui'hua lunú neca tucu necatsela'ahua cuna li'inu, lunú chiqui' rnibiya'nu. \fig 61 Armor|LB00196B.TIF|COL|||Efesios 6:10|\fig*
\v 11 Ubi'yahua li'ihua cuna elietsa' Diose para nú tsuta' arqui'hua, nu para nú la ri'i beze'lu ana luhua nú zequienui li'ihua.
\v 12 Xne la liunua'ahua bee bene lu iliulabe quie', sino que rliunua'ahua cuna yelu clasia' bee benechiqui', sia bee enu rlu'cu nú rnibiya', cuna enu rlu'cu elu usticia, cuna ye beelá bee espíritu' beze'lu nú nu', nu rnibiya' lu iliulabe quie'.
\v 13 Enze'e ubi'yahua li'ihua cuna poder nú rliqui' Diose luhua para nú riqui'hua lu xitse beenú nehuana nze'ta zecahua, nu utsuta' arqui'hua mase secahua lunú secahua.
\v 14 Utsuta' arqui'hua lunú neli neca nú nediya'la'hua, nu uyanalahua tucu nú riala nú huañihua.
\v 15 Ucua'a tsiñahua para nú ixiule'ehua lubee bene bee bedichia' nze'ca' Jesucristo nú rri'i nú nzuxe arqui' bee bene lu Diose.
\v 16 Nu lu yeene la zañi'hua lunú nzu tenelí arqui'hua, nú neca nú rri'i elietsa luhua luye beenú necha neca nú nze'ta lu beze'lu.
\v 17 Nu lunú utsila'a Diose li'ihua nucua' neca nú recanu' li'ihua, nu stichia'nu neca xi neca tucu espada nú rliqui' Espíritu Santo luhua.
\v 18 La tsana'hua nú rnacu'hua lu Diose. Uzequiehua lunu nu una'cuhua lunu yebichia cuna elietsa' Espíritu Santo. Utsutsiñahua una'cuhua lunu nu la llaca'hua, nu una'cuhua lunu equie cuenda' ye bee bene'nu.
\v 19 Le'ca una'cuhua lu Diose lu cuendaa para nú liqui'nu bee bedichia' nú riala nia para nú aca ixiule'ene lubee bene sin nú lliquia, nu nia bee bedichia' nze'ca' Jesucristo nú rni nú xneca tsila'a bee bene.
\v 20 Uxe'la Diose li'á para nú ixiule'a bee bedichia' nze'ca quie', enze'e nchiñia ni'cu' nee. Pero una'cuhua lu Diose para nú la lliquia nia equie cuenda'nu tucu nú riala nú nia.
\s Último bedichia' nú nequie lu ichi' quie'
\p
\v 21 Tíquico, enu neca tucu bee sa'ahua enu chiqui' se'ca'ahua enu neli rri'i elietsa lua'ahua lunú sibia'ahua lu Jesucristo, li'illa ixiule'ella luhua lu ye nú xa nzucua'a ca'a nu xi rri'á.
\v 22 Xne para enze'e xe'lalla luhua para nú ixiule'ella luhua nú xa nellua'aru ca'a, nu scua du'lla ana arqui'hua.
\p
\v 23 Nacua lu Diose nú ye bee sa'ahua enu nzeli arquia'ahua Jesucristo liqui'nu nú nzuxe arqui'hua, cuna eluseca, cuna nú chililá arqui'hua Pa'ahua Diose nu Jesucristo enu rnibiya'.
\v 24 Diose ri'i nú cha nze'ca lu cuenda' ye bee bene enu neli seca Jesucristo enu rnibiya'. Amén.