\id 1PE I Peter Zapotec Lachixio USFM output from Final pdf Aug 2010
\h 1 Pedro
\toc1 1 Pedro
\mt1 Carta tucu nú uquie'e San Pedro
\c 1
\s Uxe'la San Pedro saludo
\p
\v 1 Li'á Pedro neca tucu apóstol Jesucristo, rquie'a carta quie' luhua enu uri'chia letse diqui bee luhuare, nu nucua'a lubee iliu Ponto, Galacia, Capadocia, Asia nu Bitinia,
\v 2 li'ihua enu ucañi Diose Pa'ahua desde hua'tu tucu nu niarqui'nu nú acane. Equie cuenda' Espíritu Santo'nu uri'inu nú aca'ahua bee bene'nu para nú zucu'hua nú rninu para nú lecaxi nahua lunu equie cuenda rene' Jesucristo. Chiqui' ri'i Diose nú cha nze'ca lu cuenda'hua cuna nu liqui'nu nú nzuxe arqui'hua.
\s Elunehuañi nú nellua'a quia'ahua lu Diose
\p
\v 3 Che'tsa Diose pa' Jesucristo enu rnibiya' lua'ahua nú equie nu ulu'cu arqui'nu lia'ahua rlu'cula'ahua elu nehuañi nú necuqui neca equie cuenda' nú uhuañi zeca Jesucristo, nu chiqui' llene neca lunú nzuquie arquia'ahua lu Diose,
\v 4 nú yucua'ahua rencia nú nuche'e Diose para lia'ahua liñibe, nu neca rencia quie' nú lecaxi na diqui tiembu, nu la uchune nu leca bichia nú nitilue.
\v 5 Equie nu nzeli arqui'hua Diose, li'inu rriucunu li'ihua cuna poder'nu para bichia chenu riña nú laxu iliulabe, che ri'i ye bee bene beya' nú uri'ilanu perdona stulahua.
\p
\v 6 Enze'e ñia utsu arqui'hua, añinzuca nú zecahua huaxilu beenú nehuana zecahua lle'na tiembu.
\v 7 Xne equie beenú nehuana zecahua scua acachee nú neli nzeli arqui'hua Diose tucu nú rri'inu bene oro nú rdu' benene luquii para nú bi'yalla tunu neli nú necane puro oro. Oro cua' necahua' nú nitilu, pero máse seca nú chili arqui' bene Diose mase secalla lunú secalla xne leca bichia nú laxu nucua'. Nu lunú nzu tenelí arqui'hua scua, rialane ula'na cuna nú aca neca equiee bichia chenu riña Jesucristo.
\p
\v 8 Li'ihua la lañi'hua Jesucristo pero secahua li'inu, nu nee nzeli arqui'hua li'inu añinzuca nú la lañi'hua li'inu, nu chiqui' llene neca nu ñia neca lunú ñia nzu arqui'hua hasta nú la llela'hua xa nihua,
\v 9 xne nediya'hua nú equie nú nzeli arqui'hua Jesucristo scua, utsila'la Diose li'ihua lu dula.
\p
\v 10 Hasta hua'tu ucua'na bee profeta cuna nú uzete' beella xa ri'i beella beya' nú tsila'a Diose bee bene, nu uni beella ta nú ri'i Diose cuna li'ihua equie nú ñia necanu.
\v 11 Equie cuenda' Espíritu' Cristo ungabiya' bee profeta hasta hua'tu nú nehuana zecanu, nu lu'cunu nú rnibiya'nu, che ucua'na beella nú ri'i beella beya' ta bene enu zeca scua nu xunga aca ye bee nucua'.
\v 12 Pero uri'i Diose nú ungabiya' beella nu la neca nú uni beella para li'itsia beella, necane para lia'ahua. Nu nee rri'ilahua beya' nucua' equie cuenda' bee enu rixiule'e bedichia' nze'ca' Jesucristo cuna equie nú rnibiya' Espíritu Santo nú nze'ta enza liñibe. Bee nucua' neca nú chiqui' niarqui' bee ángele nú ri'i beenu beya' nú xa mero necane.
\s Diose niarqui' nú huañi nze'cahua
\p
\v 13 Enze'e ucua'atsiñahua nu ri'ihua elliebacu' nú sibi', uzu'cu'luhua lunú liqui' Diose luhua equie nú nze'canu bichia chenu nze'ta zeca Jesucristo.
\v 14 Tucu nú neca bee Lli'ñi Diose enu sucu' nú rninu, la huañia'hua tucu nú uhuañihua hua'tu ante nú chuluhua Diose.
\v 15 Diqui tiembu nú nehuañihua ucua'nahua nú huañihua nú lecaxi natsa arqui'hua lu Diose, xne li'inu necanu enu leca xi natsa, nu la lu'cunu dula.
\v 16 Nu lu ichi' Stichia' Diose rni: “Uhuañihua nú lecaxi natsa arqui'hua lua, xne li'á neca enu lecaxi natsa arqui'.”
\p
\v 17 Nee tunu rlualeehua “Paa” Diose, li'inu enu la cañi chenu rlualunue lu cuenda' bee bene tucu nú rri'i beei, enze'e rqui'ña nú lu'cuhua ula'na lunu diqui tiembu nú nehuañihua lu iliulabe quie'.
\v 18 Xne li'ihua nediya'hua nú utsila'a Diose li'ihua lubee costumbre nú utsa'na bee bene'hua enu udetela luhua, neca costumbre cua' nú lecaxi zibi', nu li'ihua nediya' nze'ca'hua nú né yaxu ni' cuna oro nu ni' cuna plata nú utsila'a Diose li'ihua.
\v 19 Unga nucua' equie cuenda' rene' Jesucristo nú ñia neca, nú uri'chia chenu ungutinu xi neca tucu sanchi lla'na enu unguuti bene equie cuenda' dula, nu lecaxi naí nu leca cá nedi'quií.
\v 20 Hasta hua'tu chenu lasca' quixie iliulabe udu' Diose Jesucristo para nú zecanu scua, nu scua ulle'calanu, xne secanu li'ihua.
\v 21 Equie cuenda' Cristo nzeli arqui'hua Diose, li'inu enu uri'i nú uhuañi zeca Cristo, nu udete'nu nú rnibiya'nu, nu nee itá nzeli arqui'hua Diose nu nzu arqui'hua lunu.
\p
\v 22 Nee lunú rri'ihua tucu nú rni Stichia' Diose nú neli neca, lecaxi natsa arqui'hua lunu para nú zecahua bee sa'hua tucu nú riala nú zecahua beella, Enze'e rqui'ña nú diquinu' arqui'hua uzecahua bee sa'hua.
\v 23 Xne rlu'culahua elu nehuañi nú necuqui neca nu elunehuañi cua' la ye'ta nucua' por tucu bene enu laxu, nze'ta nucua' equie cuenda' Stichia' Diose nú nehuañi nu leca bichia nú laxu.
\v 24 Xne lu ichi' Stichia' Diose rni:
\q Ye bee bene iliulabe neca xi neca bee huañi dañi,
\q nu eluxene' beei neca xi neca quiee nú nu' lue.
\q Ribichi huañicua' nu sana' quiee nú nu' lue;
\p
\v 25 pero Stichia' Diose leca bichia nú laxue.
\p Nu ninguie' neca bedichia' nze'ca' Jesucristo nú ubene'la'hua.
\c 2
\p
\v 1 Enze'e, utsana' arqui'hua ye beenú necha neca, cuna ye beenú sequienuhua bee bene, nu la lube'tsiahua lunú la necahua, utsana' arqui'hua nú ria arqui'hua lubee sa'hua, cuna beenú niquichia'hua lubee sa'hua.
\v 2 Tucu nú neca bee endu' e'ne' enu chiqui' rlia'na' hue' chi', scua ucua'nahua nú ri'ihua beya' Stichia' Diose bichia por bichia para nú scua tsila'a Diose li'ihua,
\v 3 tunu neli nú nediya'hua nú chiqui' nze'ca Diose.
\s Cristo neca xi neca tucu quiee nú nehuañi
\p
\v 4 Uquiaquiehua Jesucristo, li'inu enu neca xi neca quiee nú nehuañi. Nú uhuachú bee bene iliulabe, pero para Diose li'inu necanu enu máse seca, nu ucañi Diose li'inu.
\v 5 Nu nee, equie nú necalahua bee bene' Jesucristo, lu Diose necahua xi neca bee quiee nú nehuañi para nú recache' indu'nu, li'ihua necahua ule'ya Santo'nu, xne añinzuca nú nehuana secahua equie cuenda' Jesucristo pero rri'ihua tucu nú riu' arqui' Diose.
\m
\v 6 Lu ichi' Stichia' Diose rni:
\q Li'á sucua tucu quiee eyeche Sión,
\q1 neca quiee quie' nú mase sibi',
\q1 nú uyañila nú chiqui' huaxi seca,
\q nu enu chili arqui' li'i leca bichia nú tu' nze'e.
\m
\v 7 Para li'ihua enu nzeli arqui'hua Jesucristo, li'inu necanu xi neca tucu quiee nú mase seca; pero para bee bene enu la chili arqui' li'inu lecaxi seca nucua', scua uyalu tucu nú nequie lu ichi' Stichia' Diose elu rni:
\q Quiee nu ulua u'na bee bene enu rreche'e ni'i,
\q quiee ze'e neca nú máse uzibi' nú ungache'e simiendo' ni'i ze'e.
\m
\v 8 Nu le'ca scua uyalu tucu nú niquie stucu luhuare lu ichi' Stichia' Diose elu rni:
\q Li'inu necanu xi neca quiee nu xica cuchiu' bene nu rri'i nú rle bene.
\m Seca beei scua xne la zucu' beei stichia'nu, nu scua rialu nu rni Diose nú seca beei.
\p
\v 9 Pero li'ihua ucañila Diose li'ihua para nú acahua bene'nu, nu li'ihua necalahua ule'ya enu sibi' lunu, li'inu enu neca arre lua'ahua. Li'ihua lecaxi nahua lu Diose, nu ucañinu li'ihua para nú chetixiule'ehua lunú chiqui' ñia rri'i nze'canu, li'inu enu uhua li'ihua lu inziu nú necha neca para nú chequiehua inziu'nu nú chiqui' ñia neca.
\v 10 Hua'tu chenu lasca' chuluhua Diose nu lá acahua bene'nu, pero nee necalahua bene'nu, le'ca lá chuluhua nú rlu'cu arqui' Diose li'ihua hua'tu, pero nee nediya'hua nú rlu'cu arqui' Diose li'ihua.
\s Xa rqui'ña nú huañi bee bene enu nzeli arqui' Diose
\p
\v 11 Bee sa'a enu nzeli arquia'ahua Jesucristo enu chiqui' se'ca, ziquia luhua tucu nú nzela'ahua lu iliulabe quie' chiucu bichia, la tsana'hua nu ri'i elliebacu' nú necha neca ana luhua, xne bee elliebacu' nú necha neca cua' chiqui' rri'i nucua' nú tsana' arqui' bene inziu' Diose.
\v 12 Uhuañi nze'cahua lubee bene enu la chulu Diose. Nu scua añinzuca nú nee se'ta beei li'ihua nú necahua enu necha rri'i, pero chenu lañi'beei nu neca nze'ca lunú rri'ihua che dete' beei ula'na lu Diose bichia chenu dete' bee bene cuenda lu Diose.
\p
\v 13 Equie nú nzeli arqui'hua Jesucristo uzu'cu'hua lunú rni ye bee usticia lu iliulabe quie'. Uzu'cu'hua lunú rni presidente enu rnibiya' lu nación'hua,
\v 14 cuna stichia' gobernador enu uxe'lalla para nú dete' beella castiya bee enu necha rri'i nu zucu' aya beella bee bene enu rri'i nú neca nze'ca.
\v 15 Xne Diose niarqui' nú ri'ihua nú neca nze'ca para nú bee enu lacali cuna bee enu la ri'i beya' leca modo nú ze'ta beei li'ihua.
\p
\v 16 Li'ihua nu' modo ri'ihua tucu nú niarqui'hua, pero la aca equie cuenda' nucua' nú ri'ihua nú necha neca sino que uri'ihua tucu nú riala rri'i bee bene enu neca bee bene' Diose.
\v 17 Ulu'cuhua ula'na lu ye bee bene tucu nu rialane. Uzecahua bee sa'ahua enu nzeli arqui' Jesucristo, ulliquihua Diose, nu ulu'cuhua ula'na lu presidente enu rnibiya' lu nación'hua.
\s Uriqui'hua lunú nehuana secahua
\p
\v 18 Li'ihua bee mozo', uzu'cu'hua ye beenú rni patron'hua, nu la ri'ihua scua lubee patron enu rri'i nze'catsia luhua nu ru'a arqui' li'ihua, sino que le'ca uri'ihua scua lubee patrón enu necha rri'i luhua.
\v 19 Xne neca nze'ca tunu riqui' tucu bene lunú zecalla añinzuca nu la yala nu zecalla scua, sino que equie nú rri'illa lunú niarqui' Diose.
\v 20 Lecaxi zibi' tunu nehuana zecahua lunú necha rri'ihua, pero tunu nehuana zecahua equie nú rri'ihua nú neca nze'ca nu rriqui'hua lunú nehuana secahua scua, nucua' riu' arqui' Diose.
\v 21 Xne para nucua' ubixia Diose li'ihua, nu le'ca chiqui' nehuana ulle'ca Jesucristo equie cuenda' li'ihua, nu scua uzete'nu li'ihua nú xa riala huañihua para nú chequiehua inziu'nu.
\v 22 Li'inu leca xunga uri'inu dula, nu ni' tucu eluquichia' lá ninu.
\v 23 Chenu uni bee bene bedichia' nu necha neca lunu, né cuaquinu ni'tucu bedichia' nú necha neca, chenu uri'i beei nú nehuana ulle'canu, nu né ninu nú a ixiu beei lunú rri'inu beei li'inu, sino que utsa'nanu yeene lu Diose, li'inu enu rri'i elu usticia tucu nú rialane.
\v 24 Jesucristo nehuana ulle'canu lu cruse equie cuenda' stula'ahua para nú tsila'anu lia'ahua lu dula para nú huañia'ahua tucu nú niarqui' Diose nu equie nú udi'qui Jesucristo lu cruse, lecaxi na'ahua lu Diose.
\v 25 Hua'tu li'ihua ungahua xi neca bee sanchi enu uniti, pero nee ubenchila'hua lu Jesucristo, li'inu enu seca li'ihua nu rriucunu li'ihua xi neca tucu bene enu rriucu bee sanchi.
\c 3
\s Xa rqui'ña nú huañi bee bene enu nechiala
\p
\v 1-2 Le'ca scua li'ihua bee una'a enu nechiala, uzu'cu'hua nu rni bee niyu'hua para nú tunu tucu bee niyu'hua enu la niarqui' chili arqui' Stichia' Diose, pero chenu lañi'beei nú xa nehuañihua, nu rlu'cuhua ula'na lubeei. Che chili arqui'beei Stichia' Diose sin nu nihua lubeei.
\v 3 Equie nú suche'hua la dete xe'ta'hua, la tsuche' xe'ta'hua equiehua, nu la ri'itsiahua elliebacu' nú qui'ñahua puro nú neca bee oro urre utuhua puro laquie nú huaxi seca.
\v 4 Mejora ucua'nahua nú aca nze'ca arqui'hua lu Diose cuna nu aca nze'cahua nu aca lle'na arqui'hua bee nucua' leca bichia nú nitilu, xne nucua' neca nú máse seca lu Diose.
\v 5 Xne scua uhuañi bee una'a enu uyaquie inziu' Diose hasta hua'tu, nu uchili arqui'beella Diose nu uzucu' beella nu rni niyu' beella.
\v 6 Scua uri'i Sara, uzucu'lla nu rni niyu'lla Abraham nu cuna ula'na unilla lu niyu'lla “Detá”. Nee necahua xi neca xinchiu'cu Sara, tunu rri'ihua nú neca nze'ca sin nu lliquihua.
\s Xa rqui'ña ri'ihua chenu nu' xi rri'inu bee bene li'ihua
\p
\v 7 Le'ca scua li'ihua bee niyu, uhuañi nze'cahua cuna bee una'hua. Xne mase necachi beenchu lubee niyu, nu le'ca riala beenchu elunehuañi nú leca xunga laxu nú lia rliqui' Diose equie nú nze'canu. Scua uhuañihua para nú ri'i caso Diose stichia'hua chenu rnacu'hua lunu.
\s Xa rqui'ña ri'ihua chenu nu' xi rri'inu bee bene li'ihua
\p
\v 8 Enze'e nia luhua nee, uhuañi nze'ca yehua cuna bee sa'hua aca tucu necatsehua, nu uri'ihua tucutsia elliebacu', uzecahua bee sa'hua xi neca bichihua. Aca nze'cahua nu aca lle'na arqui'hua.
\v 9 La guse'ehua tucu nú necha neca uri'inu bee bene li'ihua, nu la quiexuhua bee bene enu rquiexu li'ihua. A'la unacu'hua lu Diose para nú ri'inu elietsa lubeei, xne para enze'e ucañi Diose li'ihua para nu rialahua elietsa nu rliquinu.
\v 10 Xne lu ichi' Stichia' Diose rni:
\q Enu niarqui' nú huañi nze'ca cuna nu ñia neca,
\q1 rqui'ña nú bi'yalla nú la nilla bedichia' nu necha neca cuna nú la nilla eluquichia'.
\q
\v 11 Rqui'ña nu tsana' arqui'lla beenú necha neca,
\q nú ri'illa nú neca nze'ca,
\q nu cua'nalla nú huañi nze'calla cuna bee sa'lla nu chequieella nú huañilla scua.
\q
\v 12 Xne rriucu Pa'ahua Diose bee bene enu neli rri'i tucu nú niarqui'nu,
\q nu rri'i casonu stichia' beella chenu rnacu' beella lunu,
\q pero rleenu lubee bene enu rri'i nú necha neca.
\p
\v 13 Lecati ri'i nu necha neca luhua, tunu rcua'nahua nú ri'ihua lunú neca nze'ca.
\v 14 Pero ñia nza lu cuenda'hua tunu rri'i bee bene nú nehuana secahua, xne rri'ihua tucu nú rialane. La qui'ña nú chenu arqui'hua nu lliquihua equie cuenda' nucua',
\v 15 sino que ulu'cuhua ula'na nu uzu'cu'luhua lunú rni Jesucristo. Utsutsiñahua para nú cuaquihua lubee bene enu rnidichia' luhua equie cuenda' nú nzeli arqui'hua Jesucristo, pero ucuaqui nze'cahua cuna bedichia' nze'ca lubeei.
\v 16 Uhuañi nze'cahua para nu acahee nu la nchiñi nú necha neca elliebacu'hua para nú tu' bee bene enu se'ta li'ihua equie nú nzeli arqui'hua Jesucristo, cuna nú nehuañihua tucu nu rialane.
\p
\v 17 Xne máse neca nze'ca tunu nehuana zeca bene equie nú rri'illa nú neca nze'ca tunu tsana' Diose nu acane scua, luhuare nú nehuana zecalla equie nu rri'illa nú necha neca.
\v 18 Xne hasta li'i Cristo nehuana ulle'canu, nu ungutinu tucutsia bese equie cuenda' stula'ahua, añinzuca nú né ri'inu dula, pero ungutinu equie cuenda'ahua lia'ahua enu neca bee bene enu rlu'cu dula para nu neca nze'ca arquia'ahua lu Diose. Ungutinu xi neca tucu bene iliulabe, pero uhuañi zecanu equie cuenda' Espíritu'nu.
\v 19 Pero ante nú huañi zecanu, uyani' Espíritu'nu lu espíritu' bee benenguti elu nchiñiche'beei.
\v 20 Bee espíritu cua' neca bee bene enu né zucu' nu uni Diose, tiembu nu uhuañi Noé lu iliulabe quie', nu uriqui' Diose li'ibeei diqui tiembu nu ureche'e Noé barco. Nu xunu tsia neca bee bene enu utsila'a lu inza bichia ze'e. \fig 72 Noah’s ark|CN02094B.TIF|COL|||1 Pedro 3:20|\fig*
\v 21 Inza ze'e neca tucu seña equie cuenda' elu rrinza nú rlucua'ahua nee, nu rlube' nucua' nú utsila'a Diose lia'ahua. Nu la ni nucua' nu neca elu rrinza nú quiee lunú neca cuerpo'ahua, sino para nu nacua'ahua lu Diose nu lá llutse nu necha neca elliebacua'ahua lunu, equie nu rlu'cua'ahua elunehuañi nú necuqui neca, equie cuenda' nú uhuañi zeca Jesucristo.
\v 22 Li'inu enu uquie liñibe nu nzucunu cue'tse Diose chubee elurnibiya' bee ángele, cuna bee espíritu nu rlu'cu elu usticia cuna nú rnibiya'.
\c 4
\s Rqui'ña nú zibi' bene lu Diose lunú udete'nu nú recalla
\p
\v 1 Enze'e tucu nú nehuana ulle'ca Jesucristo, le'ca scua rqui'ña nú nehuana zecahua. Xne equie nú nehuana zeca bene scua sana' arqui' bene bee dula,
\v 2 para nú ri'illa tucu nú riu' arqui' Diose diqui lunú nehuañilla, luhuare nú ri'illa lunú necha neca rle'lla.
\v 3 Li'ihua huaxi tiembu uhuañihua tucu nú uhuañi bee bene enu la chulu Diose. Uhuañitsiahua tucu nú niarqui'tsiahua cuna tucu nú necha neca rle'hua, ulluchi'hua nu uri'ihua eliñi nú lecaxi zibi', ulluchi'tsiahua hasta elu niarqui'hua, nu udete'hua ula'na lu beenú la neca diose nú xiña arqui' Diose.
\v 4 Pero nee lunú la chequiehua nú huañihua tucu nú uhuañi bee bene enu rri'i scua, chequie nzenu arqui'beei lu cuenda'hua nu se'ta beei li'ihua.
\v 5 Pero li'ibeei rqui'ña nú dete'beei cuenda lu Diose lunú uri'ibeei, li'inu enu nzu para nú hualue lu cuenda' bee bene enu nehuañi cuna lu cuenda' bee bene enu unguti.
\v 6 Xne le'ca ubene' bee bene enu unguti Stichia' Diose chenu uhuañi beella lu iliulabe quie', añinzuca nú unguti beella xi unguti beelá bee bene iliulabe, pero para Diose nehuañi beella equie cuenda' espíritu' beella.
\p
\v 7 Nee nze'ta axula nú laxu iliulabe. Enze'e ude'te' llie'ehua elliebacu'hua nu ucua'a tsiñiahua para nú acahua nacu'hua lu Diose diquinu' arqui'hua.
\v 8 Nu la zañi'hua nú zecahua bee sa'hua tucu nú rialane, xne eluseca cua' neca nú rri'i elietsa nu la duche'hua liñi arqui'hua nú rlehua lubee bene añinzuca nú huaxi beenú necha neca rri'inu beei li'ihua.
\v 9 Ude'tehua elu ya'na bee sa'hua enu rriña ni'hua sin nú leehua lubeella.
\v 10 Cada tucuhua lia uliqui' Diose lunú recahua para nú ri'ihua lunú rqui'ña ri'ihua, enze'e uri'ihua elietsa lubee sa'hua lunú acahua ri'ihua para nú acachee nú rri'icahua tucu nú riala nú ri'ihua cuna lunú lia uliqui' Diose lunú recahua.
\v 11 Tunu nu' tucuhua enu rlu'cu nú lia udete' Diose nú recalla para nú zete'lla bee sa'lla, rqui'ña nú zete'lla tucu nú neca Stichia' Diose. Le'ca enu rlu'cu lunú lia udete' Diose lunú recalla para nú ri'illa elietsa lubee sa'lla, rqui'ña nú du'lla juerza'lla lunú lia udete' Diose lulla para nú ri'illa elietsa lubee sa'lla. Ye nú rri'ihua uri'i nze'cahua para nú ni nze'ca bee bene lu Diose equie cuenda' Jesucristo, li'inu enu riala ula'na cuna elurnibiya' diqui tiembu. Amén.
\s Li'ihua bee bene' Diose uriqui'hua lunú secahua
\p
\v 12 Bee sa'a enu nzeli arquia'ahua Jesucristo enu chiqui' se'ca, la lliquihua equie nú chiqui' nehuana secahua xne nucua' neca tucu prueba para li'ihua, la chenu arqui'hua equie nú secahua scua.
\v 13 A'la ñia utsu arqui'hua chenu nu' nú nehuana secahua tucu nú nehuana ulle'ca Jesucristo para nú le'ca ñia tsu arqui'hua lañi'hua ellie' Jesucristo bichia nú riña zecanu stucu bese.
\v 14 Ñia nza lu cuenda'hua chenu rquiexu bee bene li'ihua equie nú nzequiehua Jesucristo, xne ye bichia nzu Espíritu Santo' Diose cuna li'ihua. Li'inu enu rlu'cu nú rnibiya'.
\v 15 Lecaxi zibi' nú nehuana secahua, tunu unguutihua bene urre rri'ihua eluhuana', urre rri'ihua nú necha neca, urre riu'uhua elu la yala nú chu'uhua.
\v 16 Pero tunu nu' bene enu nehuana seca equie nú nzequiella Jesucristo, la yala nú tu'lla sino que a'la dete'lla che'tsa lu Diose equie nú necalalla bene'nu.
\p
\v 17 Uri'ihua beya' nú sela Diose nú nehuana seca bee bene'nu para nú ninu lubeella, tunu lia'ahua nú neca'ahua bene'nu nu se'ca'ahua scua, ¿xa zeca bee bene enu la niarqui' zucu' bedichia' nze'ca' Diose che?
\v 18 Tunu li'i bee bene enu neli nzequie inziu' Diose chiqui' huaxi nú nehuana zeca beella para nú riña beella lu Diose, ¿xa zeca bee bene enu rri'i dula cuna bee enu la du' equie nú rni Diose che?
\v 19 Enze'e bee bene enu sana' arqui' Diose lunú nehuana seca beella, rqui'ña nú che ri'ilá beella lunú neca nze'ca, nu tsa'na beella espíritu' beella ya Diose, li'inu enu ureche'e lia'ahua nu siempre sa'alunu stichia'nu.
\c 5
\s Bezete' para bee bene enu nzeli arqui' Jesucristo
\p
\v 1 Nee nia bezete' quie lubee bene enu rnibiya' letahua, li'á enu rlu'cu nú rnibiya' tucu nú rnibiya' beella, nu le'ca li'á neca enu ulañi' xa nehuana ulle'ca Jesucristo. Chequie le'ca tucutse lañia'ahua nú chiqui' ñia neca equie Jesucristo bichia chenu riña zecanu stucu bese, nu bedichia'quie' neca para li'ibeella.
\v 2 Li'ihua bee enu rnibiya' nia luhua tucu nú rriucu bene enu rriucu bee sanchi scua ri'i ucuhua bee bene' Jesucristo, lunú neca cuenda'hua nú zete'hua li'ibeella para nú chequieelá beella inziu' Diose. La ri'ihua riña' cua' lunú nediya'hua nú neca cuenda'hua nú ri'ihuane, sino que uri'ihuane equie nú nu' ana arqui'hua ri'ihuane, diquinu' arqui'hua uri'ihua riña' cua' tucu nú niarqui' Diose, nu la ri'ihuane equie nú niarqui'hua dimi.
\v 3 La necane equie nú rlu'cuhua nú rnibiya'hua lubee bene enu nzeli arqui' Jesucristo, nú nibiya'hua lubeella tucu nú niarqui' tsiahua sino que li'ihua rqui'ña nu acahua tucu ejemplu lubeella.
\v 4 Nu chenu riña Jesucristo stucu bese, li'inu enu rnibiya' lua'ahua che ati'hua premio nú chiqui' ñia neca nú leca bichia nú laxu.
\p
\v 5 Le'ca esquie li'ihua bee bene enu nere'ne', uzu'cu'hua nú rni bee bene uxu. Yehua masia bee niyu e'ne' urre bee bene uxu aca lle'na rqui'hua, uzu'cu'hua nú rni bee sa'hua:
\q Xne la ri'i Diose caso bee bene enu reca nelliñia,
\q pero rri'i nze'canu lubee bene enu reca lle'na arqui'.
\m
\v 6 Enze'e aca lle'na arqui'hua lu Diose, li'ihua enu rlu'cu ye nú rnibiya' para nú ri'inu nú aca neca equiehua nu zucu' ayanu li'ihua chenu riña bichia ze'e.
\v 7 Utsa'nahua ye nú nzenu arqui'hua lu Diose, xne li'inu la tsana' arqui'nu li'ihua.
\p
\v 8 Ucua'a tsiñiahua nu ubi'yahua li'ihua, xne beze'lu enu rlee luhua neca tucu nú neca bichiee enu rlia'na' nu rcua'na nú acu, scua enzee beze'lu rcua'nai ti ri'i ana lu. \fig 73 Roaring lion|HK00046B.TIF|COL|||1 Pedro 5:8|\fig*
\v 9 Enze'e la tsana'hua nu ri'i beze'lu ana luhua utsuta' arqui'hua lunú nzeli arqui'hua, xne li'ihua nediya'hua nú diqui lu iliulabe le'ca scua nehuana seca beelá bee sa'hua enu nzeli arqui' Jesucristo.
\v 10 Pero chenu udete nu nehuana secahua scua lle'na tiembu, chequie equie beenú nehuana secahua scua ri'i Diose elietsa luhua para nú nzequieehua nu rcua'nahua nú huañihua tucu nú niarqui'nu, nu chiuca tsu arqui'hua cuna nú tsuta' arqui'hua, sin nú za' arqui'hua chequiehua inziu'nu, nu le'ca li'inu necanu Diose enu rri'i elietsa lua'ahua lu ye nú se'ca'ahua, nu ucañilanu lia'ahua para nú chu'uhua elu chiqui' ñia rnaa nzucunu nu leca bichia nú laxue xne neca tucutsia'ahua cuna Jesucristo.
\v 11 Nu chiqui' neli neca nú lu'cua'ahua ula'na lunu, xne li'itsianu necanu enu rlu'cu nú rnibiya' diqui tiembu. Amén.
\s Último bedichia' nú niquie lu ichi' quie'
\p
\v 12 Silvano enu neca sa'ahua enu nediyaa nú nehuañi tucu nú niarqui' Diose, li'illa uri'illa faura nú uquie'ella carta quie' para nú nia luhua chiucu chuna bedichia' nu nia bezete' luhua, cuna nú le'ca ixiule'a luhua nú chiqui' seca Diose lia'ahua. Enze'e le'ca scua uzecahua Diose cuna bee sa'hua.
\v 13 Bee bene enu nzeli arqui' Jesucristo cuna bee bene enu ucañi Diose tucu nú ucañinu li'ihua, li'ibeella enu nucua'a ca'a elu le'ca rniru Babilonia, xe'la beella saludo luhua, le'ca esquie Marcos enu rlucua xi neca tucu endua, xe'lalla saludo luhua.
\v 14 Uri'ihua saludar bee sa'hua cuna eluseca nú rlu'cuhua.
\p Diose liqui' nú nzuxe arqui'hua, li'ihua enu neca tucutsia cuna Jesucristo. Amén.