1
00:00:05,000 --> 00:00:28,100
Naꞌ gwzoa to beṉeꞌ gocšene beṉeꞌ yež Betania leꞌ Lázaro. Betania naquen laž María naꞌ beṉeꞌ bileꞌ Marta, naꞌ ḻegaqueꞌ zjanaqueꞌ beṉeꞌ zan Lázaronꞌ. María nanꞌ bzoeꞌ to set zix̱ ṉiꞌa X̱ancho Jesúsenꞌ naꞌ bosbižeꞌ ṉiꞌen len yišaꞌ yic̱hjeꞌ.

2
00:00:28,100 --> 00:00:38,640
Naꞌ beṉeꞌ zan Lázaronꞌ goseseḻeꞌ dižaꞌ ganꞌ zoa Jesúsenꞌ, cheseꞌe ḻeꞌ: ―X̱antoꞌ, beṉeꞌ xmigoꞌ Lázaronꞌ ba chacšendeꞌ.

3
00:00:38,640 --> 00:01:01,960
Cateꞌ gwṉeze Jesúsenꞌ chacšene Lažaronꞌ, naꞌ gwneꞌ: ―Ca nac yižgüeꞌ c̱henꞌ, bi cheꞌedenꞌ cont yeḻaꞌ gotenꞌ gonen ḻeꞌ gan, san cheꞌedenꞌ cont gacbeꞌele catec beṉeꞌ zacaꞌ nac Diosenꞌ naꞌ gacbeꞌele nacaꞌ beṉeꞌ zacaꞌchgua, nedaꞌ nacaꞌ dogualje Xiꞌiṉ Dios.

4
00:01:01,960 --> 00:01:07,540
Ḻaꞌczḻaꞌ Jesúsenꞌ chacdeꞌ Martanꞌ len beṉeꞌ bilenꞌ naꞌ len Lázaronꞌ,

5
00:01:07,540 --> 00:01:13,440
cateꞌ gwṉezdeꞌ chacšene Lázaronꞌ, begaꞌaṉcheꞌ yec̱hope ža ganꞌ zoenꞌ.

6
00:01:13,440 --> 00:01:20,740
Nach gožeꞌ beṉeꞌ caꞌ zjanaqueꞌ ḻeꞌ txen: ―Ḻe šoꞌo šejcho distritw Judeanꞌ daꞌ yoble.

7
00:01:20,740 --> 00:01:32,780
Naꞌ goseꞌeneꞌ: ―Maestrw, bi ža naꞌzenꞌ beṉeꞌ gwnabiaꞌ c̱he nación c̱hechonꞌ gosaclažeꞌ yesoteꞌ leꞌ yosoc̱heḻeꞌ leꞌ yej. ¿Daꞌ yoble šejoꞌ naꞌ?

8
00:01:32,780 --> 00:01:44,040
Jesúsenꞌ gožeꞌ ḻegaqueꞌ: ―Lagüe žanꞌ nsaꞌ šižiṉw hor, naꞌ beṉeꞌ chda lagüe ža bi chc̱hegüeꞌ, ḻe nseṉiꞌ gwbiženꞌ ḻo yežlionꞌ.

9
00:01:44,040 --> 00:01:48,440
Naꞌ beṉeꞌ chda ba goḻ chc̱hegüeꞌ, ḻe nac c̱hoḻ.

10
00:01:48,440 --> 00:01:56,900
Gwde gwneꞌ caꞌ nach gožeꞌ ḻegaqueꞌ: ―Beṉeꞌ xmigwcho Lázaronꞌ ba chtaseꞌ naꞌ šaꞌa šjaysbanaꞌneꞌ.

11
00:01:56,900 --> 00:02:02,700
Naꞌ goseꞌeneꞌ: ―X̱antoꞌ, še ba chtaseꞌ güeyacczedeꞌ.

12
00:02:02,700 --> 00:02:13,000
Jesúsenꞌ gwneꞌ caꞌ danꞌ gwṉezdeꞌ ba got Lázaronꞌ, naꞌ beṉeꞌ caꞌ zjanaqueꞌ Jesúsenꞌ txen gosacdeꞌ še chtaszenꞌ.

13
00:02:13,000 --> 00:02:19,400
Nach Jesúsenꞌ bochix̱gatenꞌ bi zejenṉaꞌ gwneꞌ caꞌ: ―Ba got Lázaronꞌ.

14
00:02:19,400 --> 00:02:28,840
Naꞌ chebedaꞌ bi gwzoaꞌ naꞌ šlac chacšendeꞌ, cont gonaꞌ šejḻeꞌle c̱hiaꞌ. Ḻe šoꞌo šejcho ganꞌ deꞌnaꞌ.

15
00:02:28,840 --> 00:02:41,800
Nach benꞌ leꞌ Tomás benꞌ bososiꞌe Tomás Cuaš gožeꞌ yezicaꞌchle beṉeꞌ caꞌ zjanaqueꞌ Jesúsenꞌ txen: ―Ḻe šoꞌo cont gatcho txen len Jesúsenꞌ še yesoteꞌneꞌ.

16
00:02:41,800 --> 00:02:53,460
Naꞌ jaꞌaqueꞌ Betanianꞌ len Jesúsenꞌ, naꞌ cateꞌ besežineꞌnaꞌ beṉeꞌ Betania caꞌ bosozendeꞌ ḻeꞌ ba goc tap ža bosocuašeꞌ Lázaronꞌ.

17
00:02:53,460 --> 00:02:57,700
Betanianꞌ chinꞌ gaḻaꞌze Jerusalénṉaꞌ ca do gašjw hor.

18
00:02:57,700 --> 00:03:10,440
Naꞌ beṉeꞌ zan beṉeꞌ gualaž c̱hegaqueꞌ žeꞌ Jerusalénṉaꞌ besežineꞌ ganꞌ zoa Martanꞌ len Maríanꞌ cont yesoꞌe ḻegaqueꞌ yeḻaꞌ chxenḻažeꞌ daꞌ got beṉeꞌ zangaquenꞌ.

19
00:03:10,440 --> 00:03:20,680
Nach Martanꞌ, cateꞌ gwṉezdeꞌ Jesúsenꞌ ba bžineꞌ choꞌa yeženꞌ, naꞌ gwzeꞌe jašagueꞌneꞌ. Naꞌ Maríanꞌ begaꞌaṉeꞌ yoꞌonaꞌ.

20
00:03:20,680 --> 00:03:30,740
Nach Martanꞌ gožeꞌ Jesúsenꞌ: ―X̱anaꞌ, šacaꞌ zoꞌ nga catenꞌ gocšene beṉeꞌ zananꞌ biḻja goteꞌ šacaꞌ.

21
00:03:30,740 --> 00:03:37,180
Naꞌ ṉezdaꞌ ḻaꞌczḻaꞌ ba goteꞌ, biteꞌtez daꞌ ṉabdoꞌ Diosenꞌ goneꞌ, gonczenꞌ.

22
00:03:37,180 --> 00:03:40,980
Nach gož Jesúsenꞌ ḻeꞌ: ―Güeban beṉeꞌ zanonꞌ.

23
00:03:40,980 --> 00:03:49,000
Nach Martanꞌ gožeꞌneꞌ: ―Ṉezdaꞌ yebaneꞌ cateꞌ yesyeban beṉeꞌ guat caꞌ žanꞌ te c̱he yežlionꞌ.

24
00:03:49,000 --> 00:04:06,180
Naꞌ gož Jesúsenꞌ ḻeꞌ: ―Nedaꞌ chac chosbanaꞌ beṉeꞌ guat caꞌ ḻe nsaꞌa yeḻaꞌ mban toḻi tocaṉe. Daꞌnanꞌ beṉeꞌ caꞌ yesejnilažeꞌ nedaꞌ, ḻaꞌczḻaꞌ yesateꞌ, guataꞌ yeḻaꞌ mban c̱hegaqueꞌ toḻi tocaṉe.

25
00:04:06,180 --> 00:04:15,240
Naꞌ noteꞌtez beṉeꞌ niteꞌ chesejnilažeꞌ nedaꞌ, gwbat yesebiayeꞌe. ¿Chejḻiꞌo daꞌ nga chniaꞌ leꞌ?

26
00:04:15,240 --> 00:04:28,380
Naꞌ gož Martanꞌ ḻeꞌ: ―X̱anaꞌ, chejḻiꞌa nacoꞌ dogualje Xiꞌiṉ Dios. Chejḻiꞌa nacoꞌ Cristonꞌ benꞌ ba gwleztoꞌ seḻaꞌ Diosenꞌ yežlionꞌ yedeṉabiꞌe.

27
00:04:28,380 --> 00:04:38,580
Beyož gwna Martanꞌ caꞌ beyejeꞌ jayežeꞌ María bilenꞌ šižize: ―Ba blaꞌ Maestronꞌ choꞌa yeženꞌ naꞌ chṉieꞌ leꞌ.

28
00:04:38,580 --> 00:04:45,580
Naꞌ Maríanꞌ cateꞌ bendeꞌ danꞌ gož Martanꞌ ḻeꞌ ḻaꞌ gwzaꞌteꞌ naꞌ gwyejeꞌ ganꞌ zoa Jesúsenꞌ.

29
00:04:45,580 --> 00:04:52,780
Biṉaꞌ žin Jesúsenꞌ lagüe yeženꞌ ca horenꞌ, ṉeꞌ ngaꞌaṉeꞌ choꞌa yeženꞌ ganꞌ jašag Martanꞌ ḻeꞌ.

30
00:04:52,780 --> 00:05:09,540
Naꞌ beṉeꞌ Jerusalén caꞌ nitaꞌ liž María, beṉeꞌ chesoꞌe ḻeꞌ yeḻaꞌ chxenḻažeꞌ daꞌ got beṉeꞌ zanenꞌ, cateꞌ beseleꞌedeꞌ gwzaꞌ Maríanꞌ nach gosaꞌacleneꞌ ḻeꞌ, gosacdeꞌ zejeꞌ choꞌa blojenꞌ ganꞌ ngašeꞌ zjac̱hežeꞌ.

31
00:05:09,540 --> 00:05:23,460
Naꞌ Maríanꞌ cateꞌ bžineꞌ ganꞌ zoa Jesúsenꞌ naꞌ bleꞌedeꞌ ḻeꞌ, ḻaꞌ bzoate xibeꞌ lagüenꞌ, gožeꞌneꞌ: ―X̱anaꞌ, šacaꞌ zoꞌ nga catenꞌ gocšene daꞌ beṉeꞌ zananꞌ, biḻja goteꞌ šacaꞌ.

32
00:05:23,460 --> 00:05:37,440
Naꞌ cateꞌ bleꞌe Jesúsenꞌ chbež Maríanꞌ naꞌ ḻecze chesebež beṉeꞌ Jerusalén caꞌ zaꞌacleneꞌ ḻeꞌ, daꞌ juisyw daꞌ goque Jesúsenꞌ naꞌ bžaglagüeꞌ ḻoꞌ yic̱hjlaždaꞌogüenꞌ.

33
00:05:37,440 --> 00:05:45,280
Naꞌ gožeꞌ ḻegaqueꞌ: ―¿Ga bcuašeꞌleneꞌ? Naꞌ goseꞌe ḻeꞌ: ―X̱antoꞌ, yoꞌo naꞌ leꞌedoꞌ.

34
00:05:45,280 --> 00:05:47,200
Naꞌ gwchež Jesúsenꞌ.

35
00:05:47,200 --> 00:05:53,620
Naꞌ beṉeꞌ Jerusalén caꞌ goseneꞌ: ―Ḻe ṉaꞌ catequenꞌ chacdeꞌ ḻeꞌ.

36
00:05:53,620 --> 00:06:06,000
Naꞌ baḻeꞌ goseneꞌ: ―Benganꞌ beneꞌ ga bleꞌe beṉeꞌ lc̱hoḻenꞌ, naꞌ šacaꞌ gwzoeꞌ nga catenꞌ gocšene Lázaronꞌ, benḻjeꞌ cont bi goteꞌ.

37
00:06:06,000 --> 00:06:16,700
Naꞌ daꞌ yoble daꞌ juisyw daꞌ goque Jesúsenꞌ ḻoꞌ laždaꞌogüenꞌ. Naꞌ gwyejeꞌ ganꞌ bosocuašeꞌ benꞌ. Naquen to bloj naꞌ daꞌ to yej choꞌenṉaꞌ.

38
00:06:16,700 --> 00:06:29,720
Naꞌ Jesúsenꞌ gožeꞌ beṉeꞌ caꞌ: ―Ḻe caꞌa yejenꞌ. Naꞌ Martanꞌ beṉeꞌ zan daꞌ Lázaronꞌ gožeꞌneꞌ: ―X̱anaꞌ, ba chḻaꞌ benꞌ zigw, ḻe bac̱h goc tap ža goteꞌ.

39
00:06:29,720 --> 00:06:38,700
Naꞌ gož Jesúsenꞌ ḻeꞌ: ―Ba gwniaꞌ leꞌ še šejnilažoꞌ nedaꞌ naꞌ leꞌedoꞌ nac Diosenꞌ beṉeꞌ zacaꞌ juisyw.

40
00:06:38,700 --> 00:06:49,620
Nach beṉeꞌ caꞌ gosequeꞌe yejenꞌ. Naꞌ Jesúsenꞌ gwṉeꞌe yabale naꞌ gwneꞌ: ―X̱aꞌ, chox̱clenoꞌ ba bzenagoꞌ c̱hiaꞌ.

41
00:06:49,620 --> 00:06:59,360
Ṉezdaꞌ yogoꞌ ṉiꞌa chzenagoꞌ c̱hiaꞌ, perw žiaꞌ caꞌ cont beṉeꞌ caꞌ žeꞌ nga yesejḻeꞌe lenꞌ gwseḻoꞌ nedaꞌ.

42
00:06:59,360 --> 00:07:05,740
Beyož boḻ güižeꞌ Diosenꞌ, gwṉeꞌ zižje, gwneꞌ: ―Lázaro, bechoj.

43
00:07:05,740 --> 00:07:21,260
Nach ḻaꞌ bechojte Lázaronꞌ ndobyoy ṉiꞌa neꞌen to cint de lacheꞌ naꞌ to bay ndobe choꞌalagüenꞌ. Naꞌ Jesúsenꞌ gožeꞌ ḻegaqueꞌ: ―Ḻe yozašeꞌ lachenꞌ naꞌ ḻe gwsaneꞌ yeyejeꞌ.

44
00:07:21,260 --> 00:07:31,640
Naꞌ zan beṉeꞌ Jerusalén caꞌ beṉeꞌ jaꞌacleneꞌ Maríanꞌ beseleꞌedeꞌ yeḻaꞌ guac daꞌ ben Jesúsenꞌ naꞌ gosejnilažeꞌneꞌ.

45
00:07:31,640 --> 00:07:41,000
Perw baḻ beṉeꞌ Jerusalén caꞌ jaꞌaqueꞌ lao beṉeꞌ fariseo caꞌ naꞌ jasežeꞌ ḻegaqueꞌ Jesúsenꞌ bosbaneꞌ Lázaronꞌ.

46
00:07:41,000 --> 00:07:59,460
Nach bx̱oz gwnabiaꞌ caꞌ c̱he netoꞌ beṉeꞌ Israel len beṉeꞌ fariseo caꞌ bosyotobeꞌ yogoꞌḻoḻ beṉeꞌ caꞌ chesenabiaꞌ nación c̱hetonꞌ. Naꞌ bosoxiꞌe goseneꞌ: ―¿Nac goncho? ḻe yeḻaꞌ guac zan chon benga.

47
00:07:59,460 --> 00:08:13,820
Naꞌ še ṉacho jayenṉaꞌ, yogoꞌze beṉeꞌ yesejnilažeꞌneꞌ, naꞌ yesid beṉeꞌ nación Roma naꞌ yesequeꞌe yodaoꞌ blao c̱hechonꞌ naꞌ yosožiayeꞌe nación c̱hechonꞌ.

48
00:08:13,820 --> 00:08:25,560
Naꞌ to beṉeꞌ gwnabiaꞌ zoa ca horenꞌ leꞌ Caifás. Ḻeꞌ naqueꞌ bx̱oz blao ḻo izenꞌ. Naꞌ gožeꞌ ḻegaqueꞌ: ―Leꞌe gague bi ṉezele.

49
00:08:25,560 --> 00:08:34,920
Naꞌ bi chacbeꞌele napen chioꞌ cuent toz benꞌ gat, clel ca cuiayiꞌ yogoꞌcho lente nación c̱hecho nga.

50
00:08:34,920 --> 00:08:49,540
Gague con ca gwnalažeꞌze Caifásenꞌ gwneꞌ caꞌ, san daꞌ naqueꞌ bx̱oz blao iznanꞌ, Diosenꞌ beneꞌ ga gwneꞌ caꞌ cont gwdix̱jueꞌedeꞌ gat Jesúsenꞌ ṉec̱he nación c̱hetonꞌ.

51
00:08:49,540 --> 00:09:06,200
Naꞌ ca nac danꞌ gatenꞌ, gague gateꞌ ṉec̱he nación c̱hetoꞌ naꞌzenꞌ san gateꞌ cont yogoꞌ beṉeꞌ ba gwlej Diosenꞌ yesaqueꞌ xiꞌiṉeꞌ gateꞌteze nación, yesaqueꞌ txen yesejnilažeꞌneꞌ.

52
00:09:06,200 --> 00:09:14,700
Caꞌ goquenꞌ, žanaꞌ beṉeꞌ gwnabiaꞌ caꞌ gosezolagüeꞌ bosoxiꞌe nacle yesoneꞌ yesoteꞌ Jesúsenꞌ.

53
00:09:14,700 --> 00:09:34,580
Naꞌ daꞌnanꞌ Jesúsenꞌ bich gwdaczeꞌ con canꞌ nḻaꞌze ganꞌ žeꞌ beṉeꞌ gwnabiaꞌ c̱he nación c̱hetonꞌ. Nach gwzeꞌe distritw Judeanꞌ naꞌ gwc̱heꞌe beṉeꞌ caꞌ zjanaqueꞌ ḻeꞌ txen to yež daꞌ nziꞌ Efraín daꞌ chiꞌ gaḻaꞌze latje dašenꞌ, naꞌ besyegaꞌaṉeꞌ naꞌ.

54
00:09:34,580 --> 00:09:49,140
Naꞌ ba zoa gaḻaꞌ ḻṉi pascw c̱he netoꞌ beṉeꞌ Israel. Naꞌ beṉeꞌ zan beṉeꞌ zaꞌac to to yež zjaꞌaqueꞌ Jerusalénṉaꞌ cateꞌ zaꞌ gaḻaꞌle ḻṉinꞌ cont yeson cuineꞌ xilažeꞌ canꞌ ža ley c̱hetonꞌ.

55
00:09:49,140 --> 00:10:02,120
Naꞌ besyeyiljueꞌ Jesúsenꞌ do ganꞌ zoa yodaoꞌ blaonꞌ naꞌ cateꞌ bi besyeželdeꞌneꞌ naꞌ goseꞌ ḻježeꞌ: ―¿Bi chaquele? ¿Güideꞌ ḻṉi nga, še bi yideꞌ?

56
00:10:02,120 --> 00:10:17,660
Goseneꞌ caꞌ ḻe bx̱oz gwnabiaꞌ c̱hetoꞌ caꞌ naꞌ beṉeꞌ fariseo caꞌ ba gosec̱hoguenꞌ še noteꞌtez beṉeꞌ ṉezdeꞌ ganꞌ zoa Jesúsenꞌ cheyaḻaꞌ gwzendeꞌ ḻegaqueꞌ cont yesezeneꞌ ḻeꞌ.