\id JHN zpt
\h San Juan
\toc1 San Juan
\mt1 Be diꞌizh ten Jesús mkeꞌa Juan
\ip Leꞌa dub xa nsaleaꞌ Juan mkeꞌa sian be ta mluu Jesús, no xteꞌe yak dub men xin Dios. Naꞌanpa uzheꞌeb nseꞌat xa be ta mbin Jesús. Mkeꞌa xa libr ndee ndontsa gungea ladna be men leꞌa Jesús leꞌa nak Cristo, Xin Dios, cha gap bexa dub gealnaban kub. Ndab‑a leꞌa Jesús nak xa mtuꞌub Dios, nak xa Xin Dios myak men. Sian biaj ndab‑a leꞌa be men nsabndoꞌ gungea ladna Jesús. Leꞌa sa na nsayandoꞌ libr ndee ndadiꞌizh‑a xteꞌe ngut Jesús no xteꞌe uban xa, no xtaꞌan lult unibeꞌe xa ndoꞌ be xmen~xa.
\c 1
\s Jesucristo nak Diꞌizh ten Dios myak men
\q1
\v 1 Leꞌa zha ndon leꞌa ned, leꞌa xa nak Diꞌizh nchola.
\q2 No nsoꞌla xa nak Diꞌizh wa wats Dios,
\q2 leꞌa xa wa nak Dios.
\q1
\v 2 Leꞌa zha ndon leꞌa ned wa, leꞌa xa wa nsoꞌla wats Dios.
\q1
\v 3 Leꞌa iteanak be ta ncho leꞌa ta wa ngokndeꞌe juers ten Diꞌizh wa.
\q2 Ni dub taꞌa naꞌanpa yoꞌo tal leꞌa xa wa lá ngundeꞌe‑yá.
\q1
\v 4 Leꞌa xa wa leꞌa nsaꞌa gealnaban ten be men,
\q2 leꞌa gealnaban wa leꞌa nak xeꞌa ten bexa.
\q1
\v 5 Leꞌa xeꞌa wa nsu sa ukaw,
\q2 leꞌa sa ukaw wa lá gun gan yuꞌu xeꞌa wa.
\b
\p
\v 6 Uyoꞌo dub xabgiꞌi leꞌa Dios mtuꞌub, leꞌa ta wa Juan xa ulaleaꞌ be men.
\v 7 Leꞌa xa wa mbidyadiꞌizh cuent ten xa nak xeꞌa wa, ndontsa itea be men gungea ladna xa wa.
\v 8 Leꞌa Juan naꞌanpa leꞌa nak xeꞌa wa, leꞌa xa ndi mbidyadiꞌizhtsa cuent ten xa nak xeꞌa.
\p
\v 9 Leꞌa xa na ta ugeaka nak xeꞌa, xa nsu xeꞌa ten Dios ndoꞌ be men, leꞌa xa wa mbiꞌid ndoꞌ gizhliyo ndee.
\v 10 No ukesea xa ndoꞌ gizhliyo ndee. Leꞌa juers ten xa ngokndeꞌe gizhliyo, parea leꞌa be men ncho ndoꞌ gizhliyo lá igondoꞌ xa.
\v 11 Mbiꞌid xa ndoꞌ bexa Israel, parea leꞌa be ltsaꞌa~xa wa lá isakyoꞌón ta ndab xa.
\v 12 Ná leꞌa itea be men na msakyoꞌón ta ndab xa no mbingea ladna bexa xa, ndoꞌ bexa wa msaꞌa xa juers myak bexa xin Dios.
\v 13 Leꞌa ta na nak bexa xin Dios wa leꞌa ta wa naꞌanpa dub ta ndun be men, leꞌa ta wa ndi dub ta nsaꞌa Dios.
\p
\v 14 Leꞌa xa nak Diꞌizh wa myak men, cha uyoꞌo xa lat besa. Sbeꞌen nkweaꞌ ladna xa be men no sbeꞌen gealngea ndadiꞌizh xa. No uniꞌí besa xteꞌe juert nak xa ta na leꞌa xa ga dubkama nak Xin Dios.
\v 15 Leꞌa Juan wa mluu be men xteꞌe nak xa nak Diꞌizh wa, ugeꞌ ndab Juan ndoꞌ bexa:
\p —Leꞌa cuent ten xa ndee mbidiꞌizh naꞌ, gor na ndáp naꞌ leꞌa xa na ilen tsoꞌo naꞌ wa mas nsak ndoꞌ naꞌ, geal leꞌa xa wa nedka nchola ndoꞌ naꞌ.
\p
\v 16 Leꞌa xa uzhebpa utsin nak ndoꞌ beuna, no uzhebpa ndakno xa beuna itea be wizh.
\v 17 Leꞌa juers ten Moisés leꞌa Dios msaꞌa ley ten na. Parea leꞌa juers ten Jesucristo leꞌa Dios mluu xteꞌe nkweaꞌ ladna xa beuna no xteꞌe nak gealngea ten xa.
\v 18 Ni dub men gol niꞌí Dios. Ná leꞌa xa na ga dubkama nak Xin Dios, xa na nsob wats Tad Dios, leꞌa xa wa mluu ndoꞌ beuna xteꞌe nak Dios.
\s Juan xa ulaleaꞌ be men mbidiꞌizh cuent ten Jesús
\r (Mt. 3:11-12; Mr. 1:7-8; Lc. 3:15-17)
\p
\v 19 Leꞌa dub wizh leꞌa bexa nibeꞌe ten bexa judio mtuꞌub pla be uleꞌay no pla bexa levita, utoꞌo bexa gezh Jerusalén ngwaꞌinabdiꞌizh bexa ndoꞌ Juan xa ngoleaꞌ be men ná ton nak Juan.
\v 20 Leꞌa Juan naꞌanpa ukwiꞌin, ndi gaꞌalka ndab xa ndoꞌ bexa wa:
\p —Leꞌa naꞌ naꞌanpa leꞌa nak Cristo.
\p
\v 21 Leꞌa bexa wa cha unabdiꞌizhgal ndab bexa:
\p —¿Tonxá lu zhaga? ¿Nak lu profet Elí zha?
\p Leꞌa Juan cha ndab leꞌa xa naꞌanpa leꞌa ta wa. Weꞌe unabdiꞌizhgal bexa, ndab bexa:
\p —¿Nati lu profet ndiꞌizh ga ilenka wa?
\p Leꞌa Juan cha ndabgal leꞌa xa naꞌanpa leꞌa ta wa.
\p
\v 22 Leꞌa bexa wa cha ndabgal:
\p —¿Ton nak lu zha? Leꞌa besa juerska gab‑a ndoꞌ bexa na mtuꞌub besa. Nat gud ton nak lu.
\p
\v 23 Leꞌa Juan cha ukaꞌab ndab:
\p —Leꞌa naꞌ ndee leꞌa nak xa na nkeseyadiꞌizh geꞌe sa bid, ugeꞌ ndáp naꞌ: “Bkeasoꞌ bega nes ilen Xa Nibeꞌe.”
\p Leꞌa ta wa ta ndab Isaías tiemp polta.
\p
\v 24 Leꞌa bexa mtuꞌub bexa fariseo wa
\v 25 cha unabdiꞌizhgal ndab bexa:
\p —¿Xtaꞌan ngoleaꞌ lu be men, tal lu lid leꞌa nak Cristo, ni Elí, ni profet ndiꞌizh ga ilenka wa?
\p
\v 26 Leꞌa Juan cha ukaꞌab ndab:
\p —Leꞌa naꞌ nits‑tsa ngoleaꞌ be men, ná leꞌa lat bego ncho dub xa leꞌa bego bi lá nchandoꞌ.
\v 27 Leꞌa xa wa nedla ncho ndoꞌ naꞌ ndee, parea leꞌa xa ilen ndi tsoꞌo naꞌ. Leꞌa naꞌ ni lá isaya kote ndab~xa wa, leꞌa xa wa mas nsak ndoꞌ naꞌ.
\p
\v 28 Leꞌa be ta ndee uyoꞌo gezh Betábara, stub toꞌo yowbeꞌe Jordán, sa na ulaleaꞌ Juan be men.
\s Jesús nak cuent Borreg Ben ten Dios
\p
\v 29 Ngol stubtsa wizh leꞌa Juan uniꞌí leꞌa Jesús nsalayaꞌ gax wats Juan. Cha ndab Juan ndoꞌ be men:
\p —Bwiꞌi bego, leꞌa xa baꞌ leꞌa xa nak cuent Borreg Ben ten Dios, xa ntsuꞌu be ke ten be men.
\v 30 Leꞌa cuent ten xa baꞌ li mbidiꞌizh naꞌ gor na ndáp naꞌ leꞌa tsoꞌo naꞌ ilen dub xa mas nsak ndoꞌ naꞌ, geal leꞌa xa nedla ncho ndoꞌ naꞌ.
\v 31 Leꞌa zha weꞌe leꞌa naꞌ ndee bi lá nchandoꞌ xa, ná leꞌa naꞌ ngwal ulaleaꞌ be men nsea nits, ndontsa li igondoꞌ bexa Israel wa xa.
\p
\v 32 No ndab Juan:
\p —Leꞌa naꞌ uní leꞌa Espíritu ten Dios utoꞌo gibeꞌa cuent dub palom nchaꞌlaꞌ sa nsoꞌ Jesús.
\v 33 Leꞌa zha wa leꞌa naꞌ bi lá nchandoꞌ xa baꞌ, parea leꞌa Dios xa mtuꞌub naꞌ koleaꞌ naꞌ be men nsea nits, leꞌa xa wa ndablaka ndoꞌ naꞌ leꞌa gek~xa na iní naꞌ ilaꞌ Espíritu ten Dios, leꞌa xa wa koleaꞌ men nsea Espíritu ten Dios.
\v 34 Leꞌa naꞌ uní ta wa ta weꞌe ndáp naꞌ ndoꞌ bego leꞌa xa baꞌ nakka Xin Dios.
\s Bexa ndon ned ngok xmen Jesús
\p
\v 35 Ngol stubtsa wizh leꞌa Juan nsoꞌgal sa wa nsea stop xmen~xa.
\v 36 Leꞌa gor uniꞌí Juan nsatid Jesús sa wa, cha ndab Juan ndoꞌ bexa:
\p —Bwiꞌi bego, leꞌa xa baꞌ xa nak cuent Borreg Ben ten Dios.
\p
\v 37 Leꞌa gor na mbiꞌín itop be xmen Juan ta wa, cha usankea bexa tsoꞌo Jesús.
\v 38 Leꞌa Jesús cha mgeaksoꞌ mwiꞌi xteꞌe nchankea bexa tsoꞌo na, cha ndab xa:
\p —¿Xtaꞌan nkwaꞌan bega zha?
\p Leꞌa bexa wa cha ukaꞌab ndab bexa:
\p —Rabí, ¿pa ncho go zha? —leꞌa rabí wa dub diꞌizh gab mech.
\p
\v 39 Leꞌa Jesús cha ndab:
\p —Waꞌa beuna, iniꞌí bega pa‑yá.
\p Leꞌa bexa wa cha nchaꞌbe, uniꞌí bexa pa ncho Jesús. Leꞌa ta wa pa gor nkea udap gor uzhe. Cha uyoꞌono bexa Jesús sa wa idub uzhe wa.
\p
\v 40 Leꞌa itop bexa na li mbiꞌín ta ndab Juan wa cha usankea tsoꞌo Jesús, leꞌa dub xa wa nsaleaꞌ Ndres, wit Simón Pedr.
\v 41 Weꞌe leꞌa Ndres wa ned ngwaꞌkwaꞌan wit~na Simón, cha ndab xa:
\p —Leꞌa besa mzheꞌal xa nak Mesías —leꞌa Mesías wa dub diꞌizh hebreo, gab‑a Cristo, xa mti Dios.
\p
\v 42 Leꞌa Ndres cha mbiꞌi Simón wats Jesús. Leꞌa Jesús cha mwiꞌi ndoꞌ Simón, cha ndab Jesús:
\p —Leꞌa lu Simón, xin Jonás. Leꞌa nat leꞌa lu isaleaꞌ Cefas —leꞌa diꞌizh griego leꞌa ta wa Pedr, dub diꞌizh gab geꞌdaꞌa.
\s Jesús mzheꞌal Julip no Natanael
\p
\v 43 Ngol stubtsa wizh leꞌa Jesús nlad yaꞌ distrit Galilea. Cha mzheꞌal xa dub xabgiꞌi nsaleaꞌ Julip, cha ndab xa:
\p —Usankea tsoꞌo naꞌ.
\p
\v 44 Leꞌa lazh Julip wa gezh Betsaida, lazh Ndres no Pedr.
\v 45 Leꞌa Julip cha ngwaꞌkwaꞌan dub xabgiꞌi nsaleaꞌ Natanael, ndab xa:
\p —Leꞌa besa mzheꞌal xa na mkeꞌa Moisés no be profet cuent ten na. Leꞌa xa wa Jesús xa gezh Nazaret, xin Kosé.
\p
\v 46 Leꞌa Natanael wa cha ndab:
\p —¿Cha syoꞌo gan itoꞌo dub xa wen Nazaret zha?
\p Leꞌa Julip cha ukaꞌab ndab:
\p —Nchaꞌa wa igondoꞌ lu xa.
\p
\v 47 Leꞌa gor na uniꞌí Jesús nchaꞌlayaꞌ gax Natanael wats Jesús, cha ndab Jesús cuent ten Natanael:
\p —Leꞌa xa baꞌ ta ugeakapa nak dub xa Israel, dub xa naꞌanpa nkwiꞌinno be men.
\p
\v 48 Leꞌa Natanael cha ndab:
\p —¿Xteꞌe nchandoꞌ ga naꞌ?
\p Leꞌa Jesús cha ndab:
\p —Naꞌ uníla lu gor na nsob lu xan ya laꞌaw, gor biseata kwezh Julip lu.
\p
\v 49 Weꞌe leꞌa Natanael cha ndab:
\p —Mech, nat uní naꞌ leꞌa go nak Xin Dios, no nak ga Xa Nibeꞌe ten Israel.
\p
\v 50 Leꞌa Jesús cha ndab:
\p —Ta na ndáp naꞌ leꞌa naꞌ uní lu xan ya laꞌaw wa, ¿ta weꞌe ndangea ladna lu leꞌa naꞌ nak Xin Dios zha? Leꞌa lu iniꞌí be ta mas siꞌil ndoꞌ ta uniꞌí lu nat wa.
\p
\v 51 No ndab Jesús ndoꞌ bexa nde sa wa:
\p —Leꞌa naꞌ gáp ndoꞌ bego leꞌa bego iniꞌí leꞌa gibeꞌa yaꞌal, leꞌa be angel ten Dios ikea no ilaꞌ wats naꞌ, Xa Myak Men Ndoꞌ Gizhliyo.
\c 2
\s Jesús myunno nits vin
\p
\v 1 Ngol schon wizh leꞌa gezh Caná ten distrit Galilea uchilyaꞌa dub men. Leꞌa Marí xnaꞌa Jesús no nsoꞌ sa wa.
\v 2 No uyoꞌo kombid ndoꞌ Jesús nsea be xmen~xa.
\v 3 Ngol gor leꞌa vin ubid, leꞌa xnaꞌa Jesús cha ndab ndoꞌ Jesús:
\p —Leꞌa bexa yá lá ndapta vin.
\p
\v 4 Leꞌa Jesús cha ukaꞌab ndab:
\p —Naa, ¿xtaꞌan ngi li ndab go zha? Leꞌa naꞌ biseata gal wizh ulu naꞌ ton nak naꞌ.
\p
\v 5 Parea leꞌa xnaꞌa Jesús cha ndab ndoꞌ bexa ndun tiꞌin sa wa:
\p —Bin bega lak gab xa ndee.
\p
\v 6 Leꞌa sa wa ndebe dub xoꞌop gets ubiꞌi nakchaꞌaw sbeꞌen geꞌ ta nyoꞌo nits len na. Leꞌa nits nyoꞌo len ta wa ta naꞌa bexa, ndontsa umbiꞌi gak bexa ndoꞌ Dios lak nibeꞌe costumbr ten bexa judio. Leꞌa len kadga dub gets wa nyoꞌo pa dub gayoꞌo litr nits.
\v 7 \fig |CN01667B.TIF|col|||Jesús mbin myak nits vin|Jn. 2:7\fig*Leꞌa Jesús cha ndab ndoꞌ bexa ndun tiꞌin wa:
\p —Bchea bega be gets ndee yoo nits‑a.
\p Leꞌa bexa cha mchea be ta wa.
\v 8 Weꞌe leꞌa Jesús cha ndabgal ndoꞌ bexa:
\p —Nat uloꞌo bega dub tuzh‑a, cha biꞌi bega‑yá ndoꞌ xa nchansu gast baꞌ.
\p Cha mbiꞌi bexa‑yá.
\v 9 Leꞌa bexa wa uniꞌí pa utoꞌo‑yá, parea leꞌa xa nchansu gast wa gor na mbin xa preb nits myak vin wa, leꞌa xa lá iniꞌí pa utoꞌo‑yá. Cha utezh xa xabgiꞌi mchilyaꞌa wa,
\v 10 cha ndab xa:
\p —Leꞌa itea ndoꞌ be gast leꞌa be men ned vin wen nsaꞌa. Weꞌe leꞌa gor na yá ngula be men kwaꞌal‑a, weꞌe cha nsaꞌa xa vin mas ndidotsa wen. Parea leꞌa go gast gor nat nsaꞌa vin ndon leꞌa wen.
\p
\v 11 Leꞌa ta na li mbin Jesús gezh Caná ten Galilea wa, leꞌa ta wa uyon ned mbin Jesús. Leꞌa ta wa mluu ta juert nak Jesús, ta weꞌe leꞌa be xmen~xa mgeꞌ ladna xa.
\p
\v 12 Tsoꞌo wa cha mlayoꞌo Jesús gezh Capernaum, no xnaꞌa Jesús no be wit~xa no be xmen~xa. Cha uyoꞌo bexa gezh wa pla wizh.
\s Jesús ulantuꞌub bexa ndiꞌibudoꞌo taꞌa tale ten niꞌi ten Dios
\r (Mt. 21:12-13; Mr. 11:15-18; Lc. 19:45-46)
\p
\v 13 Leꞌa ngol zha yá nsayal gax ujest Pascua, ta ndun bexa judio, leꞌa Jesús no utoꞌo nchaꞌa gezh Jerusalén.
\v 14 Leꞌa ngol sa wa cha uniꞌí Jesús leꞌa tale ten niꞌi ten Dios ndeudoꞌo bexa ngon, no borreg, no palom. No ndebe be men ntil med.
\v 15 Cha usen Jesús dub doꞌo, mbintiꞌin xa‑yá ulantuꞌub xa be borreg no be ngon no bexa na li ndiꞌibudoꞌo bema wats niꞌi ten Dios wa. Cha mtixte xa be mes ten bexa ntil med, mteꞌachso xa be med ten bexa wa.
\v 16 Cha ndab xa ndoꞌ bexa ndiꞌibudoꞌo palom wa:
\p —¡Ulate bega be ta baꞌ sa ndee! ¡Lá gunno bega lid Xus~naꞌ cuent dub ndoꞌ xgeꞌe!
\p
\v 17 Leꞌa gor weꞌe leꞌa be xmen Jesús cha mtseꞌa ladna lak nkeaniꞌi diꞌizh ten Dios, ndab‑a: “Uzhebpa ulach naꞌ lid~go Dios.”\x + \xo 2:17 \xt Sal. 69:9\x*
\p
\v 18 Leꞌa bexa nibeꞌe ten bexa judio cha ndabbe ndoꞌ Jesús:
\p —¿Xtaꞌan ngi lbaꞌa ndun lu? ¿Xtaꞌan dub taꞌa gun lu uluu leꞌa Dios nlad mbin lu ta baꞌ?
\p
\v 19 Leꞌa Jesús cha ukaꞌab ndab:
\p —Blate bega niꞌi ten Dios ndee, leꞌa naꞌ wizh yontsa ixiste‑yá stub biaj.
\p
\v 20 Leꞌa bexa cha ndabbe:
\p —Leꞌa niꞌi ten Dios ndee ngokndeꞌe dub top gaꞌal ncho xoꞌop liꞌin. ¿Ná ndab lu zha chontsa wizh ixistegal lu‑yá?
\p
\v 21 Ná leꞌa Jesús ndab ta wa cuent ten leꞌaka xa.
\v 22 Ta weꞌe leꞌa zha na mas tsoꞌo wa mban Jesús ndoꞌ gealgut, leꞌa be xmen~xa cha mtseꞌa ladna ta li ndab xa wa. Cha mas mbingea ladna bexa lak nkeaniꞌi diꞌizh ten Dios cuent ten Jesús, no ta li ndab Jesús cuent ten leꞌaka xa.
\s Jesús nchandoꞌ ladoꞌo be men
\p
\v 23 Leꞌa zha li ncho Jesús Jerusalén ujest Pascua wa, leꞌa kwaꞌad men mbingea ladna Jesús ta na uniꞌí bexa be uyon mbin Jesús.
\v 24 Ná leꞌa Jesús lá ngungea ladna ta wa, leꞌa Jesús nchandoꞌ xteꞌe ndanbeꞌe bexa.
\v 25 No lá nkiꞌin ton gab ndoꞌ Jesús xteꞌe nak be men, leꞌa Jesús nchandoꞌla ladoꞌo be men.
\c 3
\s Jesús ndadiꞌizhno Nicodemo
\p
\v 1 Uyoꞌo dub xa fariseo nsaleaꞌ Nicodemo, xa no nak dub xa nsak ten bexa judio.
\v 2 \fig |CN01670b.tif|col|||Nicodemo ngwaꞌinabdiꞌizh ndoꞌ Jesús|Jn. 3:2\fig*Leꞌa dub gor teꞌal ulayaꞌ xa wats Jesús, cha ndab xa:
\p —Mech, leꞌa besa uniꞌí leꞌa go Dioska mtuꞌub, ndontsa uluu ga be men. Leꞌa naꞌan ton gun gan gun be uyon ndun ga, tal leꞌa Dios naꞌanpa isoꞌ wats xa.
\p
\v 3 Leꞌa Jesús cha ukaꞌab ndab:
\p —Leꞌa naꞌ gáp ndoꞌ lu leꞌa tal ton lá gal stub biaj, leꞌa xa lá yoo gan iniꞌí sa nibeꞌe Dios.
\p
\v 4 Leꞌa Nicodemo cha ndab:
\p —¿Xteꞌe yoo gan gal dub xa goxla stub biaj zha? Lá yoo gan yoꞌo xa len xnaꞌa~xa, cha galgal xa stub biaj.
\p
\v 5 Leꞌa Jesús cha ndab:
\p —Leꞌa naꞌ gáp ndoꞌ lu leꞌa tal ton lá gal nsea nits no Espíritu ten Dios, lá yoo gan yate xa sa nibeꞌe Dios.
\v 6 Leꞌa bexa na ndal lak ndal be men, leꞌa xa wa mentsa nak. Ná leꞌa bexa na ndal stub biaj lak nsaꞌa Espíritu ten Dios leꞌa xa wa xa ten Espíritu wa.
\v 7 Lá yanseana lu ta ndáp naꞌ leꞌa be men nsabndoꞌka gal stub biaj.
\v 8 Leꞌa mbi ndaꞌ guniꞌi pa nlad na no ndoꞌón lu nbezh‑a, parea leꞌa lu ni lá iniꞌí pa nsea‑yá no pa nchaꞌa‑yá. No liga nak gealnaban nsaꞌa Espíritu ten Dios ndoꞌ be men.
\p
\v 9 Leꞌa Nicodemo cha ndab:
\p —¿Xteꞌe nak ta ndee zha?
\p
\v 10 Leꞌa Jesús cha ndab:
\p —Lu nak mech ten bexa Israel, ¿ná lá yakbeꞌena lu ta ndee zha?
\v 11 Leꞌa naꞌ gáp leꞌa besa ndadiꞌizh ta nchandoꞌ besa no ta uniꞌí besa. Parea leꞌa bega lá ndangea ladna‑yá.
\v 12 Ná tal leꞌa bega lá ndangea ladna gor ndadiꞌizh naꞌ cuent ten be ta ncho ndoꞌ gizhliyo ndee, ¿xteꞌema gungea ladna bega‑yá gor gudiꞌizh naꞌ cuent ten be ta ncho gibeꞌa baꞌ zha?
\p
\v 13 ’Naꞌan ton gol gaꞌ gibeꞌa, nabtsa naꞌ ulen gibeꞌa leꞌa naꞌ nak Xa Myak Men Ndoꞌ Gizhliyo.
\v 14 No lak uxits Moisés dub uzhib giꞌib geꞌe sa bid wa, no liga ixits be men naꞌ, Xa Myak Men Ndoꞌ Gizhliyo,
\v 15 ndontsa tal ton gungea ladna naꞌ lá gak perdid, ndi gap bexa gealnaban nunk lá idub.
\s Dios nkweaꞌ ladna be men
\p
\v 16 ’Leꞌa Dios uzheꞌeb nkweaꞌ ladna be men, ta weꞌe msaꞌa xa dubkama Xin~xa, ndontsa tal ton gungea ladna xa lá gak perdid ndoꞌ Dios, ndi gap xa gealnaban nunk lá idub.
\v 17 Leꞌa Dios mtuꞌub Xin~na ndoꞌ gizhliyo naꞌanpa nsea utsaksi xa be men, leꞌa xa ndi nsealoꞌo be men ndoꞌ be ke ten bexa.
\p
\v 18 ’Leꞌa bexa na ndangea ladna Xin Dios, leꞌa Dios naꞌanpa gab leꞌa bexa wa ndap ke. Parea leꞌa bexa na lá ndangea ladna xa wa, leꞌa Dios ndabla leꞌa bexa wa ndapka ke, geal leꞌa bexa lá ngungea ladna xa nabkama nak Xin Dios.
\v 19 Leꞌa bexa wa ndap ke ndoꞌ Dios geal leꞌa zha ulen xa nak xeꞌa ten Dios ndoꞌ gizhliyo ndee, leꞌa bexa lá nlad xeꞌa wa, ndi sa ukaw nlad bexa leꞌa bexa sbeꞌen be ta ugap ndun.
\v 20 Leꞌa tal ton gun be ta ugap, leꞌa xa wa nxeeno ladna xeꞌa, no lá ibii xa ndoꞌ xeꞌa, ndontsa lá uluꞌu‑yá be ta ugap ndun xa.
\v 21 Parea tal ton gun lak nak gealngea ten Dios, leꞌa xa wa nbii ndoꞌ xeꞌa, ndontsa uluu xeꞌa wa leꞌa xa ndunka lak nlad Dios.
\s Juan mbidiꞌizhgal cuent ten Jesús
\p
\v 22 Tsoꞌo wa leꞌa Jesús cha nchaꞌano be xmen~na distrit Judea, cha uyoꞌo bexa dub ndeꞌep sa wa, no ngoleaꞌ Jesús be men.
\v 23 Leꞌa Juan noga ngoleaꞌ be men sa nsaleaꞌ Enón gax sa nde gezh Salim, geal leꞌa sa wa kwaꞌal nits ncho. Leꞌa be men nchaꞌbe wats Juan, cha ulaleaꞌ xa bexa wa.
\v 24 Leꞌa ta wa zha biseata ikea Juan litgiꞌib.
\p
\v 25 Weꞌe leꞌa be xmen Juan no stapla bexa judio usaxan ndeyotoꞌo cuent ten xteꞌe nsambiꞌi bexa ndoꞌ Dios.
\v 26 Leꞌa be xmen Juan cha ulayaꞌ wats Juan, cha ndab bexa:
\p —Mech, leꞌa xa na li ulen wats go stub toꞌo yowbeꞌe Jordán, xa na li mbidiꞌizh ga cuent ten na, leꞌa xa wa no ngoleaꞌ be men no itea be men nchaꞌbe wats xa.
\p
\v 27 Leꞌa Juan cha ndab:
\p —Naꞌan xtaꞌan yoo gan gun dub men tal leꞌa Dios naꞌanpa usaꞌa‑yá.
\v 28 Leꞌa bego uniꞌí leꞌa naꞌ ndáp leꞌa naꞌ naꞌanpa leꞌa nak Cristo, leꞌa naꞌ ndee ndi nak xa nedtsa mtuꞌub Dios ndoꞌ xa wa.
\v 29 Leꞌa sa nchilyaꞌa dub men leꞌa xagots nak xa tenka xabgiꞌi nchilyaꞌa wa. Leꞌa amig ten xabgiꞌi nchilyaꞌa wa nsoꞌ wats xa no uzhebpa nten ladna xa gor na ndoꞌón xa ti xabgiꞌi wa. No liga leꞌa naꞌ uzhebpa nten ladna nat ta na ndon naꞌ ta ndun Jesús.
\v 30 Nsabndoꞌka leꞌa xa wa nsayak mas dub xa nsak, ná leꞌa naꞌ ndee ndi nsayak dub xa uxee nsak.
\s Xin Dios ulen gibeꞌa
\p
\v 31 ’Leꞌa Jesús xa ulen gibeꞌa, no mas nsak xa ndoꞌ itea be men. Leꞌa bexa ncho ndoꞌ gizhliyo ndee mentsa nak, no ndadiꞌizh bexa ta ncho ndoꞌ gizhliyo. Ta weꞌe leꞌa xa na ulen gibeꞌa wa mas nsak ndoꞌ itea be men.
\v 32 Leꞌa ta uniꞌí xa no ta mbiꞌín xa, ta weꞌe ndadiꞌizh xa, parea leꞌa be men lá ndangea ladna ta wa.
\v 33 Ná leꞌa tal ton ndangea ladna ta ndadiꞌizh Jesús, leꞌa ta wa nluu leꞌa xa ngondoꞌ leꞌa Dios sbeꞌen gealngea ndadiꞌizh.
\v 34 Leꞌa Dios leꞌa mtuꞌub Jesús ndadiꞌizh xa diꞌizh ten Dios, no uzhebpa nsaꞌa Dios Espíritu ten na ndoꞌ xa.
\v 35 Leꞌa Tad Dios nkweaꞌ ladna Xin~na, no msaꞌa Dios itea be taꞌa inibeꞌe xa.
\v 36 Leꞌa tal ton gungea ladna Xin Dios, leꞌa xa wa gap gealnaban nunk lá idub. Parea leꞌa tal ton lá nlad gungea ladna Xin Dios, leꞌa xa wa naꞌanpa gap gealnaban wa, leꞌa Dios ndi utsaksi xa.
\c 4
\s Jesús mbidiꞌizhno dub xagots Samaria
\p
\v 1 Leꞌa Jesús uniꞌí leꞌa bexa fariseo mbiꞌínbe leꞌa Jesús mas kwaꞌad men ndap, no mas kwaꞌad bexa ngoleaꞌ Jesús ndoꞌ Juan.
\v 2 (Parea leꞌa Jesús naꞌanpa leꞌa igoleaꞌ be men, ndi be xmen~xa ulaleaꞌ be men.)
\v 3 Cha utoꞌo Jesús distrit Judea nseaꞌ xa leꞌakagal Galilea.
\v 4 Leꞌa nes nseaꞌ xa wa nsabndoꞌ itid xa distrit Samaria.
\v 5 Weꞌe ulayaꞌ xa toꞌo dub gezh ten Samaria nsaleaꞌ Sicar, gax sa nax yo msaꞌa Jacob xa uyoꞌo polta ndoꞌ xin~xa Kosé.
\v 6 Leꞌa sa wa nsob so nsaleaꞌ so ten Jacob. Leꞌa Jesús mzhanna tant dub usea xa, cha uyatsob xa toꞌo so wa pa gor gawizh.
\v 7 Weꞌe cha ulen dub xagots xa Samaria nsealoꞌo nits. Leꞌa Jesús cha ndab ndoꞌ xa wa:
\p —Bsaꞌa nits goꞌo naꞌ.
\p
\v 8 Leꞌa gor weꞌe leꞌa be xmen Jesús nchaꞌbela gezh Sicar nchaꞌisiꞌi bexa ta gaw bexa.
\p
\v 9 Leꞌa xagots Samaria wa cha ukaꞌab ndab ndoꞌ Jesús:
\p —¿Xteꞌe nab ga nits goo ga ndoꞌ naꞌ zha? Leꞌa go xa judio, ná leꞌa naꞌ ndee xagots Samaria.
\p Li ndab xa geal leꞌa bexa judio naꞌanpa wen nak nsea bexa Samaria.
\p
\v 10 Leꞌa Jesús cha ukaꞌab ndab:
\p —Leꞌa lu lá iniꞌí xtaꞌan nsaꞌa Dios ndoꞌ be men, ni lá iniꞌí lu ton nak naꞌ naꞌab naꞌ nits ndoꞌ lu. Tal lu uniꞌí ta wa, leꞌa lu cha inab nits ndoꞌ naꞌ, leꞌa naꞌ cha usa nits nsaꞌa gealnaban.
\p
\v 11 Leꞌa xagots wa cha ndab:
\p —Señor, leꞌa go ni lá ndap xtaꞌan koꞌo ga nits, ná leꞌa len so ndee wat. ¿Pa yaꞌloꞌo ga nits nsaꞌa gealnaban wa zha?
\v 12 Leꞌa Jacob usan gox polta ten beuna msaꞌa so ndee ndoꞌ beuna. Leꞌa so ndee ngu xa nits no be xin~xa no be xman~xa. ¿Nat ndab go leꞌa go mas nsak ndoꞌ xa wa zha?
\p
\v 13 Leꞌa Jesús ukaꞌab ndab:
\p —Leꞌa tal ton ndo nits ndee gal gor leꞌa xa gakgal ladna stub biaj.
\v 14 Parea leꞌa tal ton goo nits usa naꞌ ndee wa, leꞌa xa wa naꞌantapa gak ladna. Leꞌa nits usa naꞌ wa yak cuent dub sa nsoblen nits, ta nsaꞌa gealnaban nunk lá idub.
\p
\v 15 Leꞌa xagots wa cha ndab:
\p —Señor, bsaꞌa ga nits wa goꞌo naꞌ, ndontsa yá lá gakta lad naꞌ, no ni lá gal lota naꞌ nits sa ndee.
\p
\v 16 Ná leꞌa Jesús cha ndab:
\p —Byaꞌyoꞌo cheꞌal~lu.
\p
\v 17 Leꞌa xagots wa ukaꞌab ndab:
\p —Leꞌa naꞌ lá ndap cheꞌal~naꞌ.
\p Leꞌa Jesús cha ndab:
\p —Leꞌaka ndab lu lá ndap lu cheꞌal~lu.
\v 18 Leꞌa lu ngop dub gaꞌay cheꞌal~la, parea leꞌa xa nchono lu nat ndee wa naꞌanpa cheꞌal~la. Ta ugeaka ta ndab lu wa.
\p
\v 19 Weꞌe leꞌa xagots wa cha ndab:
\p —Señor, nsak naꞌ leꞌa go dub xa ndadiꞌizh sakndoꞌ Dios.
\v 20 Leꞌa be usan gox ten besa ngwankea Dios geꞌe siꞌil ndee, ná leꞌa bego bexa judio ndi ndab gezh Jerusalén nsabndoꞌ yankea be men Dios.
\p
\v 21 Leꞌa Jesús cha ndab:
\p —Xagots, bingea ladna ta gáp naꞌ leꞌa gal dub wizh yankea bega Dios Xus beuna ni geꞌe ndee no ni Jerusalén wa.
\v 22 Nat leꞌa bego xa Samaria ndankea Dios, parea leꞌa bego lá iniꞌíka xteꞌe nak xa. Leꞌa besa xa judio nchandoꞌka Dios xa na ndankea besa, leꞌa lat bexa judio itoꞌo xa koꞌo be men ndoꞌ be ke ten bexa.
\v 23 No yoo dub wizh, leꞌa ta wa nat, leꞌa be men na ta ugeaka yankea Tad Dios wa yankea bexa xa idub ncho ladna bexa lak nak gealngea ten Dios. Leꞌa Dios nkwaꞌan be men na li yankea bexa xa.
\v 24 Leꞌa Dios nak espíritu, ta weꞌe leꞌa be men nsabndoꞌ yankea Dios idub ncho ladna bexa lak nak gealngea ten Dios.
\p
\v 25 Leꞌa xagots wa cha ndab:
\p —Leꞌa naꞌ uní leꞌa ndoꞌ gizhliyo ilen Mesías, xa noga nsaleaꞌ Cristo. Leꞌa zha ilen xa wa cha gudiꞌizh xa itea be taꞌa ndoꞌ besa.
\p
\v 26 Leꞌa Jesús cha ndab:
\p —Leꞌa ta wa naꞌ, xa nsoꞌyadiꞌizhno lu.
\p
\v 27 Leꞌa gor wa leꞌa be xmen Jesús mlaꞌnchaꞌ wats xa, cha ngwanseana bexa geal leꞌa xa nsoꞌyadiꞌizhno dub xagots. Parea ni dub bexa lá inabdiꞌizh ndoꞌ xa ná xtaꞌan nabdiꞌizh xagots wa, no xtaꞌan ndadiꞌizh Jesús ndoꞌ xa.
\v 28 Weꞌe leꞌa xagots wa cha mlausoꞌ te ten na, cha nseaꞌ xa len gezh wa, ndab xa ndoꞌ be men:
\p
\v 29 —Utseawiꞌi bega dub xa ndab itea be taꞌa mbin naꞌ. ¿Naꞌanpa leꞌa xa wa nak Cristo zha?
\p
\v 30 Weꞌe leꞌa bexa wa cha utoꞌo nchaꞌbe sa nsob Jesús.
\v 31 Ndalen wa leꞌa be xmen Jesús ndab ndoꞌ xa:
\p —Mech, udaw ga.
\p
\v 32 Ná leꞌa Jesús cha ndab:
\p —Leꞌa naꞌ ndapka ta ndaw naꞌ, dub ta lá nchandoꞌ bega.
\p
\v 33 Weꞌe leꞌa bexa wa cha ndabbe ndoꞌ be ltsaꞌa~na:
\p —¿Ncho ton men mbiꞌid ulaꞌa ta gaw xa baꞌ zha?
\p
\v 34 Leꞌa Jesús cha ndab:
\p —Leꞌa naꞌ ndun lak nlad Dios xa mtuꞌub naꞌ, no nsandoꞌ naꞌ tiꞌin msaꞌa xa gun naꞌ. Leꞌa be ta wa cuent ta ndaw naꞌ.
\v 35 Ndab bega ndun jwalt sdap mbeꞌe gal zha na ibeleꞌe be taꞌa ndoꞌ yo. Parea leꞌa naꞌ gáp: Bwiꞌi bego nat, leꞌa be men nseabe baꞌ nak cuentta dub taꞌa myazh yá ngugal‑a ibeleꞌe‑yá.
\v 36 Leꞌa bexa nteleꞌe be taꞌa wa nyax ten na. Leꞌa be ta nteleꞌe bexa wa leꞌa ta wa be men gap gealnaban kub, ta nunk lá idub. Weꞌe leꞌa bexa nteleꞌe wa no bexa ndas diꞌizh ten Dios wa junt iten ladnabe.
\v 37 Leꞌa ta ndee nak lak ndab be men, ndab bexa leꞌa dub xa ndas‑a, cha stubga xa nteleꞌe‑yá.
\v 38 Leꞌa naꞌ ntuꞌub bego uteleꞌe bega be men ndoꞌ Dios, bexa gol gudiꞌizh bega ndoꞌ na. Leꞌa be men xaꞌaga ned mbin tiꞌin lat bexa wa, ná nat leꞌa bego usandoꞌ tiꞌin usaxan bexa wa.
\p
\v 39 Leꞌa ta na li mbidiꞌizh xagots wa leꞌa Jesús ndab iteanak be ta mbin xa wa, ta weꞌe leꞌa kwaꞌad bexa Samaria ncho gezh wa mbingea ladna leꞌa Jesús nak Cristo xa mtuꞌub Dios.
\v 40 Weꞌe leꞌa gor ulayaꞌ bexa wats Jesús, cha unab bexa ndoꞌ Jesús weꞌetsa yoo xa gezh wa. Leꞌa Jesús cha uyoꞌo sa wa top wizh.
\v 41 No mas kwaꞌad bexa wa mbingea ladna Jesús, gor na mbiꞌín bexa ta ndadiꞌizh Jesús.
\v 42 Ndab bexa ndoꞌ xagots wa:
\p —Nat ndangea ladna besa Jesús naꞌanpa nabtsa ta ndab lu wa. Leꞌa besa no mbiꞌín ta ndadiꞌizh xa, ta weꞌe uniꞌí besa leꞌa xa baꞌ ta ugeaka leꞌa nak Cristo, xa ngoꞌo be men ndoꞌ be ke ten bexa.
\s Jesús myunyakna xin dub xa nsak
\r (Mt. 8:5-13; Lc. 7:1-10)
\p
\v 43 Leꞌa zha na ngok stop wizh wa leꞌa Jesús cha utoꞌo sa wa nseaꞌ xa Galilea.
\v 44 Leꞌa Jesús leꞌaka ndab leꞌa guniꞌi ton dub profet leꞌa bexa lazh~xa wa lá ndap mod ndoꞌ xa.
\v 45 Leꞌa Galilea ncho bexa ngwaꞌbela ujest Pascua gezh Jerusalén, sa uniꞌí bexa itea be ta mbin Jesús sa wa. Ta weꞌe leꞌa gor mlaꞌnchaꞌ Jesús distrit Galilea, leꞌa bexa wa utsin ngok ndoꞌ xa.
\p
\v 46 Cha nchaꞌagal Jesús gezh Caná ten Galilea, sa myunno xa nits vin. Leꞌa gezh Capernaum ncho dub xa nsak ten xa nibeꞌe sa wa. Leꞌa xin~xa wa kweaꞌ nsak.
\v 47 Leꞌa gor na mbiꞌín xa nsak wa leꞌa Jesús utoꞌo Judea mlaꞌnchaꞌgal xa Galilea, cha ulen xa wats Jesús, ndab xa yaꞌ Jesús yunyakna Jesús xin~xa, leꞌa xin~xa yamer gat.
\v 48 Leꞌa Jesús cha ukaꞌab ndab:
\p —Tal leꞌa bega lá iniꞌí be uyon ndun naꞌ, leꞌa bega naꞌanpa gungea ladna naꞌ.
\p
\v 49 Ná leꞌa xa nsak wa cha ndab:
\p —Señor, uxax nchaꞌ una ndontsa naꞌanpa gat xiꞌín~naꞌ.
\p
\v 50 Weꞌe leꞌa Jesús cha ndab:
\p —Nat byaꞌ ta lid~lu leꞌa xin~lu myaklana.
\p Leꞌa xa nsak wa cha mbingea ladna ta ndab Jesús, cha nseaꞌ xa ta lid~xa.
\v 51 Leꞌa gor mtanseaꞌ xa ta lid~xa, leꞌa bexa ndun tiꞌin ten xa utoꞌolabe, ndab ndoꞌ xa leꞌa xin~xa myaklana.
\v 52 Leꞌa xa cha unabdiꞌizh ndoꞌ bexa ná xá gor usaxan nseayoꞌo wen ladna meꞌed wa. Leꞌa bexa cha ndab:
\p —Naꞌag, gor nkea udub gor uzhe mtoꞌo xlea meꞌed.
\p
\v 53 Leꞌa xus meꞌed wa cha mtseꞌa ladna pa gor weꞌeka ndab Jesús leꞌa xin~xa myaklana. Ta weꞌe cha mbingea ladna xa Jesús no iteata bexa ta lid~xa.
\p
\v 54 Leꞌa ta wa biaj itop utoꞌo Jesús Judea nseaꞌ xa Galilea, cha mbin xa dub uyon sa wa.
\c 5
\s Jesús myunyakna dub xa gizh sa nsaleaꞌ Betesda
\p
\v 1 Tsoꞌo wa nchogal stub ujest ten bexa judio, ta weꞌe leꞌa Jesús cha mkeagal Jerusalén.
\v 2 Leꞌa sa nyote dub nes len gezh wa, leꞌa sa wa nsaleaꞌ Puert Ten Be Borreg. Leꞌa gax sa wa nde dub tank nits siꞌil, sa nsaleaꞌ Betesda diꞌizh hebreo. No ndebe dub gaꞌay ramad sa wa.
\v 3 No ndebe kwaꞌad bexa gizh sa wa: bexa lá naꞌ, no bexa coj, no bexa lá yoo gan isoꞌ. Ndenkeaꞌ bexa zha na iwiꞌin nits wa,
\v 4 geal leꞌa ncho gor ndaꞌukwiꞌin dub angel ten Dios nits wa. Leꞌa xa na ndon ned ilaꞌyoꞌo len nits wa gor na nwiꞌin‑a, leꞌa xa wa cha nyakna guniꞌi xá gealgizh ná nsén xa.
\v 5 Leꞌa sa wa nax dub xabgiꞌi. Leꞌa xa wa gizh dub galntiꞌi bchonla liꞌin.
\v 6 Leꞌa gor na uniꞌí Jesús nax xa sa wa, weꞌe mgenna Jesús leꞌa xa uzhebpa kwenla li gizh, cha unabdiꞌizh Jesús ndoꞌ xa ndab xa:
\p —¿Nlad lu yakna lu zha?
\p
\v 7 Leꞌa xa gizh wa cha ukaꞌab ndab:
\p —Señor, nladka naꞌ, parea leꞌa naꞌ lá ndap ton ulaꞌko naꞌ len nits baꞌ gor nwiꞌin‑a. Leꞌa gor nlad naꞌ ilaꞌyoꞌo naꞌ, leꞌa ncho xa nedla nlaꞌyoꞌo ndoꞌ naꞌ.
\p
\v 8 Leꞌa Jesús cha ndab:
\p —¡Goste! Udob da ten lu baꞌ, cha usea.
\p
\v 9 Zha leꞌa xabgiꞌi wa cha myakna. Cha udob xa da ten xa, cha usaxan nsea xa. Ná leꞌa ta wa wizh neꞌe bexa judio.
\v 10 Ta weꞌe leꞌa bexa nibeꞌe ten bexa judio cha ndab ndoꞌ xa na li myakna wa:
\p —Leꞌa nat wizh neꞌe beuna, ta weꞌe leꞌa lu lá nsabndoꞌ yoꞌo da ten lu baꞌ.
\p
\v 11 Leꞌa xa wa cha ukaꞌab ndab:
\p —Leꞌa xa na myunyakna naꞌ leꞌaka ndab ndoꞌ naꞌ koꞌob naꞌ da ten naꞌ, cha isea naꞌ.
\p
\v 12 Leꞌa bexa wa cha unabdiꞌizh ndab bexa:
\p —¿Ton xa ndab ndoꞌ lu kob lu da ten lu baꞌ, cha isea lu zha?
\p
\v 13 Ná leꞌa xa na li myakna wa ni lá iniꞌí ton xa wa, geal leꞌa Jesús cha mkaꞌan lat be men nde sa wa.
\v 14 Tsoꞌo wa leꞌa Jesús cha mzheal xa wa tale ten niꞌi ten Dios, cha ndab Jesús ndoꞌ xa:
\p —Unaꞌ, nat leꞌa lu yá myakna, yá lá gunta lu be ta ugap, ndontsa naꞌanpa yasea lu stub ta mas kweaꞌ.
\p
\v 15 Leꞌa xabgiꞌi wa cha utoꞌo ngwaꞌyab ndoꞌ bexa nibeꞌe ten bexa judio, leꞌa xa na li myunyakna xa wa leꞌa ta wa Jesús.
\p
\v 16 Weꞌe leꞌa bexa wa cha ngokloo ndoꞌ Jesús, nlad bexa gut bexa Jesús, geal li mbin Jesús wizh neꞌe bexa.
\v 17 Parea leꞌa Jesús cha ndab ndoꞌ bexa wa:
\p —Leꞌa Dios Xus~naꞌ itea wizh ndun tiꞌin ndakno be men. Leꞌa naꞌ no nsabndoꞌ li gun.
\p
\v 18 Leꞌa bexa wa nsak leꞌa ta li mbin Jesús wa dub ta lá nsabndoꞌ gun be men wizh neꞌe bexa. No ndab Jesús leꞌa Dios nak Xus~xa, leꞌa ta wa gab leꞌa xa dubtsa nak no Dios. Ta weꞌe mas nlad bexa gut bexa Jesús.
\s Xin Dios gab ná ton ndap ke
\p
\v 19 Leꞌa Jesús cha ndab ndoꞌ bexa:
\p —Leꞌa naꞌ gáp ndoꞌ bego leꞌa naꞌ xa nak Xin Dios lá yoo gan gun ni dub taꞌa leꞌatsa naꞌ nlad. Leꞌa naꞌ ndi naꞌ xteꞌe ndun Dios Xus~naꞌ cha litsa ndun naꞌ. Leꞌa itea ta ndun Xus~naꞌ, leꞌa naꞌ nokaga li ndun.
\v 20 Leꞌa Dios Xus~naꞌ nkweaꞌ ladna naꞌ, no nluu xa itea be ta ndun xa ndoꞌ naꞌ. No ncho be taꞌa mas siꞌil tiꞌi uluu xa ndoꞌ naꞌ, be ta yanseana bega.
\v 21 Leꞌa lak nxiste Dios be men ngutla cha nsaꞌa xa gealnaban ndoꞌ bexa, no liga leꞌa naꞌ xa nak Xin Dios usaꞌa gealnaban ndoꞌ bexa nlad naꞌ.
\v 22 Leꞌa Xus~naꞌ naꞌanpa leꞌa gab ná ton ndap ke, leꞌa xa ndi msaꞌa ta wa gun naꞌ.
\v 23 Leꞌa xa li mbin ndontsa itea be men yankea naꞌ lak ndankea be men Dios Xus~naꞌ. Leꞌa tal ton lá ndankea naꞌ xa nak Xin Dios, leꞌa xa wa noga lá ndankea Dios Xus~naꞌ, xa mtuꞌub naꞌ ndoꞌ gizhliyo.
\p
\v 24 ’Leꞌa naꞌ gáp ndoꞌ bego, leꞌa tal ton isakyoꞌón ta ndáp naꞌ, no igeꞌ ladna xa Dios xa mtuꞌub naꞌ, leꞌa xa wa ndapla gealnaban nunk lá idub. Naꞌanpa utsaksi Dios xa, leꞌa xa ngok cuent dub xa ngutla, ná nat leꞌa xa ndap gealnaban ndoꞌ Dios.
\v 25 Leꞌa naꞌ gáp ndoꞌ bego leꞌa yoo dub gor leꞌa ta wa nat, leꞌa bexa na lá ndap gealnaban ndoꞌ Dios goꞌón ta gáp naꞌ, cha gap bexa gealnaban.
\v 26 Leꞌa lak nsaꞌa Xus~naꞌ gealnaban ndoꞌ be men, no liga msaꞌa xa juers ndoꞌ naꞌ, ndontsa no naꞌ usa gealnaban ndoꞌ be men.
\v 27 No msaꞌa xa diꞌizh gáp naꞌ ná ton ndap ke, geal leꞌa naꞌ nak Xa Myak Men Ndoꞌ Gizhliyo.
\v 28 Lá yanseana bega ta ndáp naꞌ wa, leꞌa gal gor leꞌa itea bexa ngut goꞌón ti~naꞌ,
\v 29 cha itoꞌo bexa len baꞌa. Leꞌa bexa na mbin be ta wen nak ndoꞌ Dios, leꞌa bexa wa yaste gap bexa gealnaban. Ná leꞌa bexa na mbin be ta ugap, leꞌa bexa wa yaste cha utsaksi Dios bexa.
\s Bexa na nluu ton nak Jesús
\p
\v 30 ’Leꞌa naꞌ lá yoo gan gun ni dub taꞌa leꞌatsa naꞌ nlad. Leꞌa zha na gáp naꞌ ná ton ndap ke, leꞌa ta wa gun naꞌ lakka ndab Xus~naꞌ. Ta weꞌe leꞌa ta gáp naꞌ wa leꞌaka nak, geal leꞌa naꞌ lá ndun laktsa nlad naꞌ, ndi ndun naꞌ lak nlad Xus~naꞌ, xa mtuꞌub naꞌ.
\v 31 Tal leꞌa naꞌ gudiꞌizh cuent tentsa naꞌ, leꞌa ta gudiꞌizh naꞌ wa naꞌanpa nsak.
\v 32 Parea leꞌa Xus~naꞌ ndab ton nak naꞌ, no uní naꞌ leꞌa ta ndab xa wa ta nsakka.
\v 33 Leꞌa bego mtuꞌub pla be men ndoꞌ Juan xa uloleaꞌ be men. Leꞌa Juan cha ta ugeaka ndab ná ton nak naꞌ.
\v 34 Ná leꞌa naꞌ ni lá nkiꞌin men gab ton nak naꞌ. Nseꞌat naꞌ Juan wa ndontsa gungea ladna bega ta ndab xa, cha koꞌo Dios bega ndoꞌ be ke ten bega.
\v 35 Leꞌa Juan wa nak cuent dub xeꞌa aceit nsayolꞌ nsu‑yá xeꞌa ndoꞌ bego. Dub ndeꞌeptsa mten ladna bega mbiꞌín bega ta mbidiꞌizh xa wa.
\p
\v 36 ’Parea ncho stub taꞌa nluu ton nak naꞌ, dub ta mas nsak ndoꞌ ta ndab Juan. Leꞌa ta wa tiꞌin msaꞌa Dios gun naꞌ. Leꞌa be ta ndun naꞌ wa nluu ton nak naꞌ, no nluu‑yá leꞌa Dios Xus~naꞌ leꞌaka mtuꞌub naꞌ.
\v 37 No Xus~naꞌ xa mtuꞌub naꞌ ndab ton nak naꞌ, parea leꞌa bega nunk gol goꞌón ti~xa, no ni gol niꞌíndoꞌ bega xa.
\v 38 No ni naꞌanpa ndangea ladna bega diꞌizh ten Xus~naꞌ, geal leꞌa bega lá ndangea ladna naꞌ, xa mtuꞌub xa.
\v 39 Leꞌa bego uzhebpa ntsid ta nkeaniꞌi diꞌizh ten Dios, ndanbeꞌe bega leꞌa ta weꞌe gap bega gealnaban nunk lá idub. Leꞌa leꞌaka diꞌizh ten Dios wa nkeaniꞌi cuent ten naꞌ,
\v 40 parea leꞌa bega lá kaꞌab ibii wats naꞌ ndontsa gap bega gealnaban wa.
\p
\v 41 ’Leꞌa naꞌ lá nkwaꞌan ta gab be men leꞌa naꞌ xa wen.
\v 42 No uní naꞌ xteꞌe nak bega, leꞌa bega naꞌanpa ta ugea ndankea Dios.
\v 43 Leꞌa Xus~naꞌ leꞌa mtuꞌub naꞌ ndal naꞌ, ná leꞌa bego naꞌanpa nsakyoꞌón ta ndáp naꞌ. Parea tal ilen stubga xa naꞌanpa Dios utuꞌub, leꞌa bega isakyoꞌón ta gab xa wa.
\v 44 ¿Xteꞌe gungea ladna bega naꞌ, tal leꞌa bega nkwaꞌan ta gab be men leꞌa bega xa wen, ná bega ni lá nkwaꞌan ta gab Dios leꞌa bega xa wen?
\v 45 Lá gunbeꞌe bega leꞌa naꞌ leꞌa usake bega ndoꞌ Xus~naꞌ. Leꞌa bega ngeꞌ ladna ta mkeꞌa Moisés, parea leꞌa ta wa leꞌa nluu leꞌa bega ndap ke.
\v 46 Tal leꞌa bega ta ugeaka ndangea ladna ta mkeꞌa Moisés, leꞌa bega no naꞌ gungea ladna, geal leꞌa Moisés mkeꞌa cuent ten naꞌ.
\v 47 Ná tal leꞌa bega lá ndangea ladna ta mkeꞌa Moisés wa, ¿xteꞌema gungea ladna bega ta ndadiꞌizh naꞌ ndee zha?
\c 6
\s Jesús mgaw dub gaꞌay mil xabgiꞌi
\r (Mt. 14:13-21; Mr. 6:30-44; Lc. 9:10-17)
\p
\v 1 Ngol tsoꞌo wa leꞌa Jesús nsea be xmen~na ukea ndoꞌ dub barco, cha utakea bexa stub toꞌo lagun Galilea, no nsaleaꞌ sa wa Tiberias
\v 2 Leꞌa kwaꞌad be men usankea tsoꞌo Jesús, geal leꞌa bexa uniꞌí be uyon mbin Jesús myunyakna xa be men gizh.
\v 3 Weꞌe leꞌa Jesús cha ukea dub bet, cha usob xa no be xmen~xa.
\v 4 Leꞌa zha wa nsayal gax ujest Pascua, dub ujest ten bexa judio.
\v 5 Leꞌa Jesús cha uniꞌí leꞌa be men kwaꞌad no nseabe wats xa. Cha ndab Jesús ndoꞌ Julip:
\p —¿Pa isiꞌi beuna ta gaw itea be men baꞌ zha?
\p
\v 6 Leꞌa Jesús li ndab ndontsa iniꞌí xa ná xteꞌe gab Julip, leꞌa Jesús uniꞌíla xtaꞌan gun Jesús.
\v 7 Leꞌa Julip cha ndab:
\p —Top gayoꞌo med denario lá gal isiꞌi beuna dub tuzhga pan gaw bexa kwaꞌad baꞌ.
\p
\v 8 Leꞌa stub xmen Jesús, xa nsaleaꞌ Ndres wit Simón Pedr, cha ndab ndoꞌ Jesús:
\p
\v 9 —Leꞌa sa ndee nsoꞌ dub meꞌed bgiꞌi nsoꞌno gaꞌay pan cebad no top mbeal. Parea ¿xtiꞌin dub litsa taꞌa wa ndoꞌ dub lbaꞌata men kwaꞌad baꞌ zha?
\p
\v 10 Weꞌe leꞌa Jesús cha ndab ndoꞌ be xmen~na:
\p —Gud bego ndoꞌ be men baꞌ isob bexa.
\p Leꞌa sa wa nchopa gixgi, cha ute be men ndoꞌ‑yá. Leꞌa lat itea bexa wa ncho pa gaꞌay mil xabgiꞌi.
\v 11 Leꞌa Jesús cha usen be pan wa, cha msaꞌa xa xno ndoꞌ Dios. Cha msaꞌa xa‑yá ndoꞌ be xmen~xa utseꞌa bexa‑yá ndoꞌ be men ndebe sa wa. No liga mbinno xa be mbeal wa. Leꞌa be men cha udaw‑a gast plo nlad bexa.
\v 12 Leꞌa gor na yá mzhea bexa, cha ndab Jesús ndoꞌ be xmen~na:
\p —Bteleꞌe bega be ná myaꞌan sobr baꞌ, ndontsa naꞌanpa gazhaꞌa‑yá.
\p
\v 13 Leꞌa bexa wa cha mteleꞌe dub tibtop zhum byux be ná myaꞌan sobr ndoꞌ gaꞌay pan cebad wa.
\v 14 Leꞌa gor na uniꞌí be men uyon li mbin Jesús wa, leꞌa bexa cha ndabbe:
\p —Leꞌa xa ndee ta ugeaka leꞌa nak profet na li ndiꞌizh ga giꞌidka ndoꞌ gizhliyo.
\p
\v 15 Leꞌa Jesús cha mgenna leꞌa be men wa nlad goꞌo Jesús, gunno bexa Jesús dub rey. Ta weꞌe cha mkaꞌan Jesús sa wa, cha nabtsa xa ukeagal bet wa.
\s Jesús useandats ndoꞌ nits
\r (Mt. 14:22-27; Mr. 6:45-52)
\p
\v 16 Leꞌa ngol gor uzhe leꞌa be xmen Jesús cha mlayoꞌo toꞌo nits wa.
\v 17 Cha ukea bexa ndoꞌ barco, cha nchaꞌbe bexa lad gezh Capernaum. Leꞌa ta wa teꞌal‑la, ná leꞌa Jesús bi naꞌan ilaꞌnchaꞌ wats bexa.
\v 18 Leꞌa mbi cha usaxan uzhebpa ulen ndoꞌ nits wa, cha uzhebpa nwiꞌinla nits wa.
\v 19 Leꞌa gor na yá nchabeseala bexa pa dub gaꞌay natal xoꞌop kilómetro ndoꞌ nits wa, weꞌe uniꞌí bexa Jesús nsea gax wats barco, nchaꞌseandats xa ndoꞌ nits. Cha mzheb bexa.
\v 20 Parea leꞌa Jesús cha ndab ndoꞌ bexa:
\p —¡Lá izheb bego! ¡Leꞌa ta ndee naꞌ!
\p
\v 21 Cha mten ladna bexa ukea Jesús ndoꞌ barco. Zha leꞌa barco wa cha ulayaꞌ ndoꞌ yo toꞌo nits, sa na ndiꞌizh nchaꞌbeka bexa.
\s Be men mkwaꞌan Jesús
\p
\v 22 Leꞌa ngol stubtsa wizh leꞌa be men ndebe toꞌo nits sa utoꞌo be xmen Jesús wa mtseꞌa ladna leꞌa be xmen Jesús ukea ndoꞌ stubkama barco nde sa wa, ná leꞌa Jesús naꞌanpa no nchaꞌano bexa.
\v 23 Weꞌe leꞌa stapla barco utoꞌo gezh Tiberias cha mlanseaꞌ sa ndebe be men wa. Leꞌa sa wa gax sa na msaꞌa Jesús xno ndoꞌ Dios cuent ten pan na li udaw bexa wa.
\v 24 Leꞌa gor na uniꞌí be men leꞌa Jesús no be xmen~xa naꞌanpa nde sa wa, weꞌe cha ukea bexa ndoꞌ be barco wa, nchaꞌkwaꞌan bexa Jesús gezh Capernaum.
\s Jesús nak pan nsaꞌa gealnaban
\p
\v 25 Leꞌa gor na mzheal bexa Jesús sa wa cha ndab bexa ndoꞌ Jesús:
\p —Mech, ¿xá gor ulansea ga sa ndee zha?
\p
\v 26 Leꞌa Jesús cha ndab ndoꞌ bexa:
\p —Leꞌa naꞌ gáp leꞌa bego nseabekwaꞌan naꞌ ta na mzheatsa bega udaw bega pan wa, naꞌanpa ta na nyakbeꞌena bega be uyon ndun naꞌ wa.
\v 27 Lá ukwaꞌan bega ta gaw bega be ta nitndoꞌ. Ndi bkwaꞌan bega ta naꞌanpa initndoꞌ, ta usaꞌa gealnaban nunk lá idub. Leꞌa naꞌ, Xa Myak Men Ndoꞌ Gizhliyo, usa ta wa ndoꞌ bega, lak msaꞌa Tad Dios gun naꞌ.
\p
\v 28 Weꞌe leꞌa bexa cha unabdiꞌizh ndoꞌ Jesús, ndab bexa:
\p —¿Xtaꞌan ta nlad Dios gun besa zha?
\p
\v 29 Leꞌa Jesús cha ukaꞌab ndab:
\p —Leꞌa ta ndee ta nlad Dios: gungea ladna bega naꞌ, xa mtuꞌub Dios.
\p
\v 30 Weꞌe cha ndabgal bexa ndoꞌ Jesús:
\p —Tal leꞌa go nlad gungea ladna besa ga, ¿xtaꞌan dub ta gun ga nat ndontsa gungea ladna besa ga?
\v 31 Leꞌa be usan gox polta ten beuna udaw maná utoꞌo gibeꞌa geꞌe sa bid wa, lak nkeaniꞌi diꞌizh ten Dios, ndab‑a: “Leꞌa Moisés msaꞌa pan utoꞌo gibeꞌa udaw bexa.”\x + \xo 6:31 \xt Ex. 16:4; Sal. 78:24\x*
\p
\v 32 Leꞌa Jesús cha ndab:
\p —Leꞌa naꞌ gáp ndoꞌ bego leꞌa Moisés naꞌanpa leꞌa usaꞌa pan utoꞌo gibeꞌa wa. Leꞌa Xus~naꞌ leꞌa nsaꞌa ta na ta ugeaka leꞌa nak pan ntoꞌo gibeꞌa.
\v 33 Leꞌa pan na nsaꞌa Dios wa, leꞌa ta wa ta utoꞌo gibeꞌa, ta nsaꞌa gealnaban ndoꞌ be men nde ndoꞌ gizhliyo.
\p
\v 34 Leꞌa bexa cha ndab:
\p —Señor, sbeꞌen pan weꞌe bsaꞌa go gaw besa.
\p
\v 35 Leꞌa Jesús cha ndab:
\p —Leꞌa naꞌ nak pan nsaꞌa gealnaban. Leꞌa tal ton giꞌid wats naꞌ leꞌa xa wa naꞌantapa ganna. No tal ton gungea ladna naꞌ, leꞌa xa wa naꞌantapa gak ladna.
\v 36 Parea lak ndápka naꞌ ndoꞌ bega, leꞌa bega uniꞌíka be ta ndun naꞌ, ná lá ndangea ladna bega naꞌ.
\v 37 Leꞌa itea bexa na nsaꞌa Xus~naꞌ ndoꞌ naꞌ, bexa weꞌe ndiꞌid wats naꞌ no nunk naꞌ lá uxelad bexa.
\v 38 Leꞌa naꞌ ndee utoꞌo gibeꞌa, naꞌanpa ndal naꞌ gun naꞌ be ta nladtsa naꞌ. Leꞌa naꞌ ndi ndal ndontsa gun naꞌ be ta nlad Dios xa mtuꞌub naꞌ.
\v 39 Leꞌa Xus~naꞌ xa mtuꞌub naꞌ wa lá nlad gak perdid ni dub bexa nsaꞌa xa ndoꞌ naꞌ. Leꞌa xa ndi nlad ixiste naꞌ itea bexa wa ndoꞌ gealgut gal wizh lult.
\v 40 Leꞌa Dios nlad leꞌa itea bexa na ngondoꞌ leꞌa naꞌ nak Xin Dios no ndangea ladna bexa naꞌ, leꞌa bexa wa cha gap gealnaban nunk lá idub. No ixiste naꞌ bexa wa ndoꞌ gealgut gal wizh lult.
\p
\v 41 Weꞌe leꞌa ncho bexa judio cha usaxan nisi Jesús geal ndab Jesús leꞌa Jesús leꞌa nak pan utoꞌo gibeꞌa.
\v 42 Ndab bexa ndoꞌ ltsaꞌa bexa:
\p —¿Naꞌanpa xa baꞌ Jesús xin Kosé wa zha? Leꞌa beuna nchandoꞌ xus~xa no xnaꞌa~xa. ¿Ná xteꞌema gab xa zha leꞌa xa xa ulen gibeꞌa?
\p
\v 43 Leꞌa Jesús cha ndab ndoꞌ bexa:
\p —Blaꞌa bega ta lbaꞌa nisi bega naꞌ.
\v 44 Naꞌan ton yoo gan giꞌid wats naꞌ, tal leꞌa Xus~naꞌ xa mtuꞌub naꞌ lid leꞌa goꞌo xa wats naꞌ. Leꞌa naꞌ ixiste bexa wa ndoꞌ gealgut gal wizh lult.
\v 45 Lak mkeꞌa bexa mbidiꞌizh sakndoꞌ Dios: “Leꞌa Dios uluu itea be men.”\x + \xo 6:45 \xt Is. 54:13\x* Ta weꞌe leꞌa tal ton goꞌón ta ndab Xus~naꞌ, cha gun xa ta wa, leꞌa xa wa giꞌid wats naꞌ.
\p
\v 46 ’Parea naꞌan ton gol niꞌí Dios Xus~naꞌ. Leꞌa dubtsa xa uniꞌíla xa, leꞌa ta wa naꞌ xa utoꞌoka wats Dios.
\v 47 Leꞌa naꞌ gáp ndoꞌ bego leꞌa tal ton gungea ladna naꞌ, leꞌa xa wa gap gealnaban ta nunk lá idub.
\v 48 Leꞌa naꞌ leꞌa nak pan nsaꞌa gealnaban.
\v 49 Leꞌa zha uyoꞌo be usan gox polta ten bega geꞌe sa bid, leꞌa bexa udaw maná, parea tsoꞌo wa leꞌa bexa wa ngutkabe.
\v 50 Ná leꞌa pan nlenka gibeꞌa, leꞌa tal ton gaw pan wa leꞌa xa wa lá gat.
\v 51 Leꞌa naꞌ ndee leꞌa nak pan nban ulen gibeꞌa. Leꞌa tal ton gaw pan ndee, leꞌa xa wa gap gealnaban nunk lá idub. Leꞌa pan usa naꞌ wa beꞌal las~naꞌ, ta usa naꞌ ndontsa gap be men gealnaban ndoꞌ Dios.
\p
\v 52 Leꞌa bexa judio wa cha ndakloo, ndab bexa ndoꞌ be ltsaꞌa~xa:
\p —¿Xteꞌe ndab xa usaꞌa xa beꞌal las~xa gaw beuna zhaga?
\p
\v 53 Leꞌa Jesús cha ndab:
\p —Leꞌa naꞌ gáp ndoꞌ bega leꞌa tal leꞌa bega lá gaw beꞌal las~naꞌ, Xa Myak Men Ndoꞌ Gizhliyo, no lá goo bega ten ten naꞌ, leꞌa bega lá gap gealnaban ndoꞌ Dios.
\v 54 Leꞌa tal ton gaw beꞌal las~naꞌ no goo xa ten ten naꞌ, leꞌa xa wa ndapla gealnaban ta nunk lá idub. No ixiste naꞌ xa wa ndoꞌ gealgut gal wizh lult.
\v 55 Leꞌa beꞌal las~naꞌ nak ta nsabndoꞌ gaw men, no ten ten naꞌ nak ta nsabndoꞌ goo men.
\v 56 Leꞌa tal ton gaw beꞌal las~naꞌ no goo xa ten ten naꞌ, leꞌa xa wa dubtsa nak no naꞌ idub tiemp.
\v 57 Leꞌa Xus~naꞌ xa nban leꞌa mtuꞌub naꞌ, no nban naꞌ juers ten xa. No liga leꞌa tal ton gaw beꞌal las~naꞌ, leꞌa xa wa ibanga juers ten naꞌ.
\v 58 Leꞌa pan utoꞌoka gibeꞌa naꞌanpa ltsaꞌa maná udaw be usan gox polta ten bega, leꞌa bexa ngutkabe. Parea leꞌa tal ton gaw pan ndee nban idub tiemp.
\p
\v 59 Leꞌa be ta ndee mbidiꞌizh Jesús len niꞌi sa nzhealbe bexa judio gezh Capernaum.
\s Be diꞌizh nsaꞌa gealnaban
\p
\v 60 Leꞌa bexa na ndangea ladna Jesús wa gor na mbiꞌín bexa ta li ndab Jesús, leꞌa kwaꞌad bexa cha ndab ndoꞌ be ltsaꞌa~na:
\p —Uzhebpa dub ta ugan ndadiꞌizh xa baꞌ. ¿Tonma gun gan isakyoꞌón‑a?
\p
\v 61 Leꞌa Jesús mgenna leꞌa bexa wa nisi ta ndab xa, cha ndab Jesús ndoꞌ bexa:
\p —¿Lá nsak ladna bega ta ndáp naꞌ wa zha?
\v 62 ¿Xteꞌema gunbeꞌe bega tal leꞌa bega iniꞌí leꞌa naꞌ, Xa Myak Men Ndoꞌ Gizhliyo, ikea gaꞌap, nsea naꞌ leꞌaka sa utoꞌo naꞌ?
\v 63 Leꞌa Espíritu leꞌa nsaꞌa gealnaban kub, leꞌa leꞌatsa be men lá gun gan gap gealnaban wa. Leꞌa diꞌizh ndáp naꞌ wa diꞌizh ten Espíritu ten Dios xa nsaꞌa gealnaban ndoꞌ be men.
\v 64 Parea leꞌa ncho bego bi lá ndangea ladna ta wa.
\p Li ndab Jesús geal leꞌa xa zha nedkata uniꞌí ton bexa na naꞌanpa gungea ladna xa, no ton xa na yun cuent xa.
\v 65 Cha no ndab Jesús:
\p —Ta weꞌe lakka ndáp naꞌ ndoꞌ bego, leꞌa naꞌan ton yoo gan giꞌid wats naꞌ, tal leꞌa Xus~naꞌ lid ned usaꞌa gun xa ta wa.
\p
\v 66 Tsoꞌo wa leꞌa kwaꞌad bexa na ndangea ladna Jesús cha mlaꞌa xa, lá ikeseanota bexa xa.
\v 67 Leꞌa Jesús cha unabdiꞌizh ndoꞌ isatibtop be xmen~na, ndab xa:
\p —¿No bego nlad ulaꞌa naꞌ zha?
\p
\v 68 Leꞌa Simón Pedr cha ukaꞌab ndab:
\p —Señor, ¿tonta ndoꞌ ná yaꞌbe besa zha? Leꞌa go nabtsa ndadiꞌizh diꞌizh nsaꞌa gealnaban nunk lá idub.
\v 69 Leꞌa besa ndangeaka ladna go no uniꞌí besa leꞌa go nak Cristo, Xinka Dios nban.
\p
\v 70 Leꞌa Jesús cha ndab:
\p —Leꞌa naꞌ leꞌa mti isatibtop bega, parea leꞌa dub bega xmen maxuꞌu.
\p
\v 71 Leꞌa Jesús li ndab cuent ten Judas Iscariot, xin dub xa nsaleaꞌ Simón. Leꞌa Judas no dub isatibtop xmen Jesús, parea tsoꞌo wa leꞌa xa leꞌa yun cuent Jesús.
\c 7
\s Be wit Jesús lá ndangea ladna Jesús
\p
\v 1 Ngol tsoꞌo wa leꞌa Jesús cha nkesea idub Galilea. Leꞌa xa lá nlad yaꞌ Judea, geal leꞌa sa wa leꞌa bexa nibeꞌe ten bexa judio nlad gut xa.
\v 2 Ná leꞌa zha wa nsayal gax dub ujest ten bexa judio, zha nyoꞌo bexa sbeꞌen len ramad dub sman.
\v 3 Ta weꞌe leꞌa be wit Jesús cha ndab ndoꞌ xa:
\p —Ikaꞌan beuna sa ndee, waꞌbe beuna Judea, ndontsa no bexa na ndangea ladna lu sa wa iniꞌí be uyon ndun lu.
\v 4 Leꞌa tal ton nlad igondoꞌ be men xa, leꞌa xa wa naꞌanpa xgaꞌach ndun be taꞌa. Ta weꞌe tal gun lu be uyon, bin be ta wa sa iniꞌí itea be men‑a.
\p
\v 5 Li ndab bexa wa geal leꞌa bexa ni lá ndangea ladna leꞌa Jesús nak Cristo.
\v 6 Leꞌa Jesús cha ndab ndoꞌ bexa:
\p —Leꞌa zha nsabndoꞌ gaa naꞌ Judea biseata gal, parea leꞌa bega sak yaꞌbe guniꞌi pol.
\v 7 Leꞌa be men gizhliyo naꞌanpa ndap xtaꞌan ixeeno ladna bega. Parea leꞌa ndoꞌ naꞌ ndee leꞌa bexa nxee ladna, geal leꞌa naꞌ ndadiꞌizh leꞌa be ta ndun bexa ta ugap.
\v 8 Waꞌbe bega ujest Jerusalén. Leꞌa naꞌ naꞌanpa gaa nat, leꞌa wizh na gaa naꞌ biseata gal.
\p
\v 9 Tsoꞌo na li ndab Jesús ndoꞌ bexa wa, cha myaꞌan xa Galilea.
\s Jesús nchaꞌa ujest zha nyoꞌo bexa len ramad
\p
\v 10 Ná leꞌa tsoꞌo na li nchaꞌbe be wit Jesús ujest wa, weꞌe cha no Jesús utoꞌo nchaꞌa sa wa. Parea leꞌa Jesús naꞌanpa ndoꞌ gaꞌal be men nchaꞌa, leꞌa xa ndi nchaꞌa dub mod lá igondoꞌ be men xa.
\v 11 Leꞌa ndoꞌ ujest wa leꞌa bexa nibeꞌe ten bexa judio nkwaꞌan Jesús, nabdiꞌizh bexa ndoꞌ be men ndab bexa:
\p —¿Ma xabgiꞌi weꞌe zha?
\p
\v 12 Leꞌa be men kwaꞌad wa xgaꞌach ndadiꞌizh cuent ten Jesús. Leꞌa ncho bexa ndab leꞌa Jesús dub xa wenka; ná nchoga bexa ndab leꞌa xa nkwiꞌinno be men.
\p
\v 13 Parea ni dub bexa naꞌanpa gaꞌal ngudiꞌizh cuent ten Jesús, geal leꞌa bexa nzheb ndoꞌ bexa nibeꞌe ten bexa judio.
\p
\v 14 Leꞌa ngol wizh na yá nchasea itol ujest wa, leꞌa Jesús cha nchaꞌa sa nde niꞌi ten Dios, cha usaxan nluu xa be men ndebe sa wa.
\v 15 Leꞌa bexa nibeꞌe ten bexa judio ndanseanabe xteꞌe ndadiꞌizh Jesús, ndab bexa ndoꞌ be ltsaꞌa~xa:
\p —¿Xteꞌe uzhebpa ngok xabgiꞌi baꞌ zha, ná xa naꞌanpa utsid?
\p
\v 16 Leꞌa Jesús cha ndab ndoꞌ bexa wa:
\p —Leꞌa ta nluu naꞌ ndee naꞌanpa dub ta naꞌtsa ulabeꞌe. Leꞌa‑yá ndi diꞌizh ten Dios xa mtuꞌub naꞌ.
\v 17 Tal leꞌa bega nladka gun ta nlad Dios, leꞌa bega sgondoꞌ leꞌa ta nluꞌu naꞌ diꞌizh ten Dios, naꞌanpa ndadiꞌizh naꞌ ta ndanbeꞌetsa naꞌ.
\v 18 Leꞌa tal ton gudiꞌizh cuent ten leꞌatsa xa, leꞌa xa nkwaꞌan ná xteꞌe gap be men mod ndoꞌ xa. Parea leꞌa naꞌ ndee nkwan ná xteꞌe gap be men mod ndoꞌ xa mtuꞌub naꞌ, ta weꞌe ndadiꞌizh naꞌ sbeꞌen ta ugea, naꞌanpa nkwiꞌinno naꞌ be men.
\v 19 ¿Lid msaꞌa Moisés ley ten Dios ndoꞌ bega zha? Parea ni dub bega lá nxobgek ndoꞌ ley wa. ¿Cha xtaꞌan nlad bega gut bega naꞌ?
\p
\v 20 Leꞌa be men wa cha ndabbe:
\p —¡Mbi bxin ncho len ladoꞌo ga! ¿Ton nlad gut ga zha?
\p
\v 21 Leꞌa Jesús cha ukaꞌab ndab:
\p —Leꞌa naꞌ dubtsa uyon mbin wizh neꞌe be men, ta weꞌe ndanseana bega.
\v 22 Leꞌa Moisés ndab yoo beꞌe be meꞌed bgiꞌi, ta na no wizh neꞌe be men ndun bega. (Parea leꞌa ta wa naꞌanpa ta ndab Moisés, leꞌa ta wa ta mbin bexa Israel mas polta ndoꞌ Moisés.)
\v 23 Leꞌa bega ngo beꞌe be meꞌed bgiꞌi no wizh neꞌe be men ndontsa uxobgek bega ndoꞌ ley mkeꞌa Moisés. Ta weꞌe, ¿xtaꞌan ndakloo bega myunyakna naꞌ dub men gizh wizh neꞌe be men zha?
\v 24 Naꞌanpa inisi bega naꞌ ta naꞌtsa bega ta ndun naꞌ. Ndi utsin binbeꞌe bega naga utsin nak ta ndun naꞌ wa.
\s Kwaꞌad be men mbingea ladna leꞌa Jesús nak Cristo
\p
\v 25 Weꞌe leꞌa ncho bexa Jerusalén ndebe sa wa ndab ndoꞌ be ltsaꞌa~na:
\p —¿Naꞌanpa xa ndee xa nkwaꞌan bexa gut bexa zha?
\v 26 Bwiꞌi bego xteꞌe ndoꞌ gaꞌal be men ndadiꞌizh xa, ná leꞌa bexa wa naꞌan xteꞌe ndab ndoꞌ xa. ¿Nati no bexa nibeꞌe ten beuna wa ndangea ladna leꞌa xa ndee leꞌa nak Cristo zha?
\v 27 Ná leꞌa zha na ilen Cristo naꞌan ton iniꞌí pa ilen xa. Parea leꞌa xa ndee uniꞌí beuna pa nak lazh~na.
\p
\v 28 Leꞌa gor wa leꞌa Jesús nsoꞌyadiꞌizh ndoꞌ be men tale ten niꞌi ten Dios, cha ugeꞌ ndab xa:
\p —Ndab bega leꞌa bega nchandoꞌ naꞌ no uniꞌí bega pa nak lazh~naꞌ. Parea leꞌa naꞌ naꞌanpa ga nladtsa naꞌ ndal. Leꞌa xa na mtuꞌub naꞌ sbeꞌen gealngea ndadiꞌizh, ná leꞌa bega lá nchandoꞌ xa wa.
\v 29 Parea leꞌa naꞌ nchandoꞌka xa, geal leꞌa naꞌ mtoꞌo wats xa no mtuꞌub xa naꞌ.
\p
\v 30 Weꞌe leꞌa ncho bexa nlad isen Jesús, parea ni dub bexa naꞌan xteꞌe ngunno xa, geal leꞌa wizh ulaꞌa Dios gun bexa ta wa biseata gal.
\v 31 Ná leꞌa kwaꞌad be men mbingea ladna Jesús, ndab bexa ndoꞌ be ltsaꞌa~xa:
\p —Leꞌa xa ndee ta ugeaka leꞌa nak Cristo, leꞌa xa ndun sian be uyon lak nsabndoꞌ gun Cristo gor ilen xa.
\s Bexa fariseo mtuꞌub be men yaꞌisen Jesús
\p
\v 32 Leꞌa gor na mbiꞌín bexa fariseo ta na li xgaꞌach ndab be men cuent ten Jesús wa, weꞌe leꞌa bexa wa no be uleꞌay nibeꞌe cha mtuꞌub pla bexa nlaꞌach niꞌi ten Dios yaꞌbesen bexa Jesús.
\v 33 Leꞌa Jesús cha ndab ndoꞌ be men:
\p —Leꞌa naꞌ stub ndeꞌeptsa nchoꞌo lat bega, weꞌe nsea naꞌ wats xa mtuꞌub naꞌ.
\v 34 Leꞌa bega ukwaꞌan naꞌ, parea leꞌa bega lá izheal naꞌ. No lá gun bega gan yaꞌbe sa yoꞌo naꞌ.
\p
\v 35 Weꞌe leꞌa bexa nibeꞌe ten bexa judio cha ndab ndoꞌ be ltsaꞌa~na:
\p —¿Pa yaꞌ xa baꞌ zha, dub sa na ni lá izheal beuna xa? ¿Nati yaꞌ xa sa sit, sa ndencho be ltsaꞌa beuna xa judio, cha gudiꞌizh xa ndoꞌ bexa naꞌanpa xa judio zha?
\v 36 ¿Xteꞌe gab ta ndab xa baꞌ zha leꞌa beuna ukwaꞌan xa, parea leꞌa beuna lá izheal xa, no lá gun beuna gan yaꞌbe beuna sa yoo xa?
\s Jesús ndab usaꞌa nits nban
\p
\v 37 Leꞌa ngol wizh yandoꞌ ujest wa, wizh mas nsak ten ujest, leꞌa Jesús cha usoꞌ sa nluu xa, cha ugeꞌ ndab xa:
\p —Leꞌa tal ncho bega ndak ladna, utsea bega wats naꞌ, cha usa naꞌ ta goo bega.
\v 38 Leꞌa tal ton gungea ladna naꞌ, leꞌa lak nkeaniꞌi diꞌizh ten Dios leꞌa xa wa gap dub gealnaban kub cuent dub yowbeꞌe uxoꞌon nits len ladoꞌo~xa.
\p
\v 39 Leꞌa ta na li ndab Jesús wa gab leꞌa Dios usaꞌa Espíritu ten na ndoꞌ bexa na ndangea ladna Jesús. Ná leꞌa Espíritu wa biseata ilen, geal leꞌa Jesús biseata ikea gibeꞌa zha wa.
\s Uteyotoꞌo be men ton nak Jesús
\p
\v 40 Leꞌa gor na mbiꞌín be men ta li ndab Jesús, leꞌa ncho bexa ndab ndoꞌ be ltsaꞌa~na:
\p —¡Leꞌa xa baꞌ ta ugeaka leꞌaka profet ndiꞌizh giꞌidka wa!
\p
\v 41 No ncho bexa ndab:
\p —¡Leꞌa xa baꞌ leꞌaka Cristo xa mti Dios!
\p Ná leꞌa ncho stapla bexa ndabga:
\p —¡Leꞌa Cristo naꞌanpa ilen Galilea!
\v 42 Leꞌa diꞌizh ten Dios nkeaniꞌi leꞌa Cristo ilen lat be xin David, leꞌa xa gak xa gezh Belén lazh David.\x + \xo 7:42 \xt Mi. 5:2\x*
\p
\v 43 Ta weꞌe leꞌa bexa wa usaxan ndeyotoꞌobe ke na ndab bexa ná ton nak Jesús.
\v 44 Leꞌa ncho bexa wa nlad isen Jesús, parea ni dub bexa naꞌan xteꞌe ngunno Jesús.
\s Bexa nibeꞌe ten bexa judio lá ndangea ladna Jesús
\p
\v 45 Leꞌa bexa nlaꞌach niꞌi ten Dios wa cha mlaꞌnchaꞌ. Weꞌe leꞌa be uleꞌay nibeꞌe nsea bexa fariseo cha unabdiꞌizh ndoꞌ bexa, ndab bexa:
\p —¿Xtaꞌan lá ngoꞌo bega Jesús zha?
\p
\v 46 Leꞌa bexa nlaꞌach niꞌi ten Dios wa cha ndabbe:
\p —¡Nunk dub xabgiꞌi lá ndadiꞌizh lak ndadiꞌizh xa wa!
\p
\v 47 Weꞌe leꞌa bexa fariseo cha ndabbe:
\p —¿No bego ndangea ladna be gealkwiꞌin wa zha?
\v 48 ¿Lá iniꞌí bega zha leꞌa ni dub xa nibeꞌe ten beuna xa judio no ni dub xa fariseo lá ndangea ladna Jesús?
\v 49 ¡Leꞌa Dios utsaksi be men kwaꞌad wa, bexa na ni lá nchandoꞌ ley mkeꞌa Moisés!
\p
\v 50 Ná leꞌa sa wa nsoꞌ dub xa nsaleaꞌ Nicodemo xa fariseo, xa na ngwaꞌyadiꞌizhno Jesús dub gor teꞌal. Leꞌa xa cha ndab:
\p
\v 51 —¿Nsak bega zha leꞌa ley ten beuna ndab leꞌa dub men ndap ke, gor biseata goꞌón beuna ta ntsakndoꞌ xa, no koxnes beuna ta ndun xa?
\p
\v 52 Leꞌa bexa wa cha ndabbe:
\p —¿Noga lu nak dub xa Galilea zha? Btsid diꞌizh ten Dios, weꞌe iniꞌí lu leꞌa Galilea naꞌanpa itoꞌo ni dub profet ten Dios.
\p
\v 53 Cha nseaꞌbe bexa ta lid bexa.
\c 8
\s Dub xagots ngwaꞌigaꞌano dub xabgiꞌi naꞌanpa xabgiꞌi ten xa
\p
\v 1 Leꞌa Jesús cha nchaꞌa Bet Olivo.
\v 2 Leꞌa ngol ngot xeꞌa wa mlengal Jesús tale ten niꞌi ten Dios. Cha kwaꞌad be men ulansea wats xa. Leꞌa xa cha usob, cha usaxan nluu xa be men.
\v 3 Weꞌe leꞌa pla be mech ten ley nsea bexa fariseo ulenno dub xagots ngwaꞌigaꞌano dub xabgiꞌi naꞌanpa xabgiꞌi ten xa. Cha msoꞌ bexa xagots wa tlaw be men wa.
\v 4 Cha ndab bexa ndoꞌ Jesús:
\p —Mech, leꞌa xagots ndee ngwaꞌigaꞌano dub xabgiꞌi naꞌanpa xabgiꞌi ten xa.
\v 5 Leꞌa ley mkeꞌa Moisés unibeꞌe ulaꞌgeꞌ beuna be xagots ndun lak ta mbin xa ndee wa gast gat xa. ¿Go zha, xteꞌe gab ga?
\p
\v 6 Leꞌa bexa wa ga ndun preb Jesús ná xteꞌe gab Jesús, ndontsa gap bexa xtaꞌan usake bexa Jesús. Weꞌe leꞌa Jesús cha usob, usaxan nkeꞌa xa ndoꞌ yo no ngutsyaꞌa~xa.
\v 7 Ná leꞌa be mech ten ley nsea bexa fariseo dubpa nabdiꞌizh ndoꞌ Jesús. Cha ngwasoꞌ xa, ndab xa ndoꞌ bexa wa:
\p —Tal leꞌa dub xa nsoꞌ lat bega baꞌ lá ndap ni dub ke ndoꞌ Dios, ned xa wa ulaꞌgeꞌ xagots baꞌ.
\p
\v 8 Cha usobgal Jesús, cha mkeꞌagal xa ndoꞌ yo.
\v 9 Ná leꞌa gor na mbiꞌín bexa na li msake xagots wa ta ndab Jesús, cha mbinbeꞌe bexa leꞌa bexa noga ndap ke. Cha ndon ned bexa gox no gast bexa ben mkaꞌan sa wa. Cha myansoꞌ nab xagots wa wats Jesús.
\v 10 Leꞌa Jesús cha ngwasoꞌgal, cha unabdiꞌizh xa ndoꞌ xagots wa, ndab xa:
\p —¿Nat zha ma bexa li msake lu wa nat? ¿Ni dub xa wa naꞌan xtaꞌan ngunno lu zha?
\p
\v 11 Leꞌa xagots wa cha ukaꞌab ndab:
\p —Ni dub xa wa naꞌan xtaꞌan ngunno naꞌ, Señor.
\p Leꞌa Jesús cha ndab:
\p —Ni naꞌ lá gáp leꞌa lu nsabndoꞌ gat. Nat byaꞌ, yá lá gunta lu ta ugap wa.
\s Jesús nak xeꞌa ndoꞌ gizhliyo
\p
\v 12 Leꞌa stub biaj leꞌa Jesús ndadiꞌizh ndoꞌ be men, ndab xa:
\p —Leꞌa naꞌ ndee leꞌa nak xeꞌa ndoꞌ be men nde ndoꞌ gizhliyo. Leꞌa tal ton isankea tsoꞌo naꞌ naꞌanpa ikesea sa ukaw, leꞌa xa ndi gap xeꞌa nsaꞌa gealnaban.
\p
\v 13 Weꞌe leꞌa bexa fariseo cha ndabbe:
\p —Leꞌa lu ndadiꞌizh cuent ten leꞌaka lu, ta weꞌe leꞌa ta ndadiꞌizh lu baꞌ naꞌanpa nsak.
\p
\v 14 Leꞌa Jesús cha ukaꞌab ndab:
\p —Mas leꞌaka naꞌ ndadiꞌizh cuent ten naꞌ, leꞌa ta ndadiꞌizh naꞌ wa ta nsakka, leꞌa naꞌ uní pa ulen naꞌ no pa gaa naꞌ. Parea leꞌa bego ni lá iniꞌí pa ulen naꞌ no pa gaa naꞌ.
\v 15 Leꞌa bego nsake naꞌ laktsa ndanbeꞌe be men, ná leꞌa naꞌ ndee naꞌanpa nsake ni dub men nat.
\v 16 Leꞌa tal usake naꞌ be men, leꞌa ta gáp naꞌ wa ta nsakka, geal leꞌa naꞌ naꞌanpa nabtsa gun ta wa, leꞌa Xus~naꞌ xa mtuꞌub naꞌ no nsoꞌ wats naꞌ.
\v 17 Lak nkeaniꞌi ley ten bega, tal top men dubtsa gab, leꞌa ta ndab bexa wa nsakka.
\v 18 Leꞌa naꞌ ndee ndáp ton nak naꞌ, no Xus~naꞌ xa mtuꞌub naꞌ noga dubtsa ndab ton nak naꞌ.
\p
\v 19 Leꞌa bexa wa cha ndabbe:
\p —¿Ma xus~lu zhaga?
\p Leꞌa Jesús cha ukaꞌab ndab:
\p —Leꞌa bego lá nchandoꞌ naꞌ, no ni lá nchandoꞌ bega Xus~naꞌ. Tal leꞌa bega nchandoꞌ naꞌ, leꞌa bega no Xus~naꞌ nchandoꞌ.
\p
\v 20 Be diꞌizh ndee uníꞌi Jesús gor nluu xa be men len niꞌi ten Dios, sa ndaꞌusaꞌa be men med gon. Parea ni dub bexa lá isen Jesús, geal leꞌa wizh ulaꞌa Dios gun bexa ta wa biseata gal.
\s Leꞌa sa na yaꞌ Jesús leꞌa be men lá yoo gan no yaꞌ
\p
\v 21 Leꞌa Jesús cha mbidiꞌizhgal ndoꞌ bexa ndab xa:
\p —Leꞌa naꞌ ikaꞌan sa ndee. Weꞌe leꞌa bega cha ukwaꞌan naꞌ, parea leꞌa sa na gaa naꞌ leꞌa bega lá gun gan no yaꞌ. No zha na gat bega leꞌa be ke ten bega naꞌanpa yuꞌu.
\p
\v 22 Leꞌa bexa nibeꞌe ten bexa judio cha ndab ndoꞌ be ltsaꞌa~na:
\p —¿Nati gut xa leꞌaka leꞌa xa, ta weꞌe ndab xa leꞌa sa yaꞌ xa leꞌa beuna lá gun gan no yaꞌ sa wa?
\p
\v 23 Leꞌa Jesús cha ndab:
\p —Leꞌa bego xa xan ndee, parea leꞌa naꞌ xa gaꞌap baꞌ. Leꞌa bego xa ndoꞌ gizhliyo ndee, parea leꞌa naꞌ naꞌanpa xa ndoꞌ gizhliyo.
\v 24 Ta weꞌe ndápka naꞌ leꞌa zha na gat bega, leꞌa be ke ten bega naꞌanpa yuꞌu. Tal leꞌa bega lá gungea ladna ton nak naꞌ, leꞌa be ke ten bega naꞌanpa yuꞌu gor na gat bega.
\p
\v 25 Leꞌa bexa cha ndabbe:
\p —¿Tonxá lu zhaga?
\p Leꞌa Jesús cha ndab:
\p —Leꞌa naꞌ zha nedkata ndáp ton naꞌ.
\v 26 Ncho sianta be ta gáp naꞌ cuent ten bega no ta usake naꞌ bega, parea ndoꞌ bego bexa ncho ndoꞌ gizhliyo leꞌa naꞌ ndáptsa ta na ndadiꞌizh xa mtuꞌub naꞌ wa, leꞌa xa gealngeatsa ndadiꞌizh.
\p
\v 27 Parea leꞌa bexa wa lá yakbeꞌena leꞌa Jesús ndadiꞌizh cuent ten Dios Xus~xa.
\v 28 Ta weꞌe no ndab Jesús ndoꞌ bexa:
\p —Leꞌa gor na yá mbinno bega naꞌ ta nlad bega, weꞌe igondoꞌ bega ton nak naꞌ, Xa Myak Men Ndoꞌ Gizhliyo. No iniꞌí bega leꞌa naꞌ naꞌanpa ndun ta nladtsa naꞌ, leꞌa naꞌ ndi ndadiꞌizh lak mluu Xus~naꞌ ndoꞌ naꞌ.
\v 29 Leꞌa Xus~naꞌ xa mtuꞌub naꞌ no nsoꞌ wats naꞌ. Leꞌa xa naꞌanpa nlaꞌa nab naꞌ, geal ndun naꞌ sbeꞌen ta nsak ladna xa.
\p
\v 30 Leꞌa gor na li ndab Jesús ta wa, weꞌe leꞌa kwaꞌad be men cha mbingea ladna Jesús.
\s Gealngea ten Dios uxaꞌak be men
\p
\v 31 Cha ndab Jesús ndoꞌ bexa judio na li mbingea ladna xa:
\p —Tal leꞌa bega sbeꞌen uxobgek ndoꞌ be ta ndáp naꞌ, leꞌa bega ta ugeaka gak xmen~naꞌ.
\v 32 Weꞌe leꞌa bega igondoꞌ gealngea ten Dios, leꞌa gealngea wa uxaꞌak bega.
\p
\v 33 Leꞌa bexa wa cha ndabbe:
\p —Leꞌa Abraham leꞌa nak usan gox polta ten besa. Leꞌa besa nunk lá igayoꞌota ndoꞌ stub men. ¿Ná xteꞌe li ndab lu leꞌa besa yaꞌak zha?
\p
\v 34 Leꞌa Jesús cha ukaꞌab ndab:
\p —Leꞌa naꞌ gáp ndoꞌ bega leꞌa tal ton gun be ta ugap, leꞌa xa wa ndaigayoꞌo ndoꞌ ta ugap wa.
\v 35 Leꞌa dub xa nyoꞌo ndoꞌ stubga men naꞌanpa idub tiemp yoo ta lid xa nibeꞌe xa wa. Parea leꞌa xin~xa nibeꞌe wa idub tiemp ncho ta lid xus~na.
\v 36 No liga tal leꞌa Xin Dios leꞌa uxaꞌak bega ndoꞌ ta ugap, leꞌa bega ta ugeaka myaꞌak.
\v 37 Leꞌa naꞌ uníka leꞌa usan gox polta ten bega Abraham, parea leꞌa bega nlad gut naꞌ, geal leꞌa bega lá nsakyoꞌón be ta ndáp naꞌ.
\v 38 Leꞌa naꞌ ndee ndadiꞌizh be ta nluu Xus~naꞌ ndoꞌ naꞌ, parea leꞌa bego ndun lak ndab xus bega.
\s Bexa na nak maxuꞌu xus~na
\p
\v 39 Leꞌa bexa wa cha ukaꞌab ndab bexa:
\p —Leꞌa Abraham nak xus besa.
\p Leꞌa Jesús cha ndab:
\p —Tal leꞌa bega nak xinka Abraham, leꞌa bega gun ltsaꞌa be ta mbin Abraham.
\v 40 Parea nat leꞌa bega ndi nlad gut naꞌ, geal ndadiꞌizh naꞌ gealngea, ta mbidiꞌizh Dios ndoꞌ naꞌ. Leꞌa Abraham nunk lá ngun ltsaꞌa ta nlad bega gun bega wa.
\v 41 Leꞌa bega ndi ndun lak ndun xus bega.
\p Weꞌe cha ndab bexa:
\p —Leꞌa besa naꞌanpa nak lak dub men ni lá iniꞌí ton nak xus~na. Dubtsa xus besa ncho, leꞌa xa wa Dios.
\p
\v 42 Weꞌe leꞌa Jesús cha ndab:
\p —Tal leꞌa xus bega Dios, leꞌa bega ta ugeaka yankea naꞌ, leꞌa naꞌ wats Dios utoꞌo ndal naꞌ ndoꞌ gizhliyo ndee. Leꞌa Dios leꞌa mtuꞌub naꞌ, naꞌanpa naꞌtsa nlad ndal.
\v 43 ¿Xtaꞌan lá nyakbeꞌena bega ta ndáp naꞌ zha? Leꞌa bega lá nsakyoꞌón diꞌizh ten naꞌ.
\v 44 Leꞌa xus bega nak maxuꞌu, no nlad bega gun bega ta nlad xa wa. Leꞌa maxuꞌu wa gast zha nedkata ndut men. No nunk lá ndadiꞌizh maxuꞌu gealngea, geal leꞌa xa naꞌanpa nchandoꞌ gealngea. Leꞌa gor na ndadiꞌizh xa gealkwiꞌin, leꞌa xa ndun lakka nak xa, leꞌa xa uzheꞌeb dub xa ukwiꞌin, no nkiꞌil xa be men ndun bexa gealkwiꞌin.
\v 45 Ná leꞌa ta na ndadiꞌizh naꞌ gealngea, ta weꞌe leꞌa bega lá ndangea ladna naꞌ.
\v 46 ¿Ton bega gun gan gab dub ta ugap ndun naꞌ zha? Leꞌa naꞌ ndi sbeꞌen gealngea ndadiꞌizh. Ta weꞌe ¿xtaꞌan lá ndangea ladna bega naꞌ zha?
\v 47 Leꞌa tal ton xmenka Dios leꞌa xa wa ndoꞌón ta ndab Dios. Ná leꞌa bego naꞌanpa xmen Dios, ta weꞌe lá nsakyoꞌón bega ta ndab Dios.
\s Cristo nedka ncho ndoꞌ Abraham
\p
\v 48 Leꞌa bexa wa cha ukaꞌab ndab:
\p —Leꞌaka nak ta ndab besa, leꞌa lu dub xa Samaria, no ncho mbi bxin len ladoꞌo~lu.
\p
\v 49 Leꞌa Jesús cha ndab:
\p —Leꞌa naꞌ naꞌanpa ncho mbi bxin len ladoꞌo~naꞌ. Leꞌa naꞌ ndee utsintsa ndadiꞌizh cuent ten Xus~naꞌ, parea leꞌa bega ndi nisi naꞌ.
\v 50 Leꞌa naꞌ lá nkwan xteꞌe gap be men mod ndoꞌ naꞌ. Parea ncho dub xa na nlad gap be men mod ndoꞌ naꞌ, leꞌa xa wa leꞌa gab xteꞌe nak be ta ndun bega.
\v 51 Leꞌa naꞌ gáp ndoꞌ bega leꞌa tal ton uxobgek ndoꞌ diꞌizh ten naꞌ, leꞌa xa wa nunk lá gat.
\p
\v 52 Weꞌe cha ndab bexa nibeꞌe wa:
\p —Nat segurka uniꞌí besa leꞌa ladoꞌo~lu nchoka mbi bxin. Leꞌa Abraham no be profet ngutkabe, ná lu ndab leꞌa tal ton uxobgek ndoꞌ diꞌizh ten lu leꞌa nunk lá gat.
\v 53 ¿Xteꞌe gab lu zha mas nsak lu ndoꞌ Abraham usan gox polta ten besa? Leꞌa xa wa ngutka, no liga be profet. ¿Lu zha, xteꞌe nsak lu ton nak lu?
\p
\v 54 Leꞌa Jesús cha ukaꞌab ndab:
\p —Tal leꞌaka naꞌ gáp leꞌa naꞌ xa nsak, leꞌa ta gáp naꞌ wa ta naꞌan xtiꞌin. Parea leꞌa Xus~naꞌ, xa na ndab bega nak Dios ten bega, xa weꞌe ndab leꞌa naꞌ xa nsakka.
\v 55 Leꞌa bego lá nchandoꞌ xa wa, ná leꞌa naꞌ ndee nchandoꞌka xa. No tal gáp naꞌ leꞌa naꞌ lá nchandoꞌ xa, leꞌa naꞌ no dub xa ukwiꞌin lak ukwiꞌin bego. Parea leꞌa naꞌ ta ugeaka nchandoꞌ xa no nxobgek naꞌ itea be ta ndab xa.
\v 56 Leꞌa Abraham usan gox polta ten bega mten ladna ta na uniꞌí xa leꞌa naꞌ gal ndoꞌ gizhliyo. Leꞌa xa uniꞌíka ta wa, cha mten ladna xa.
\p
\v 57 Weꞌe leꞌa bexa judio wa cha ndabbe:
\p —Lu ni tol gayoꞌo liꞌin lid ncho, ¿ná xteꞌe ndab lu leꞌa lu uniꞌí Abraham?
\p
\v 58 Leꞌa Jesús cha ndab:
\p —Leꞌa naꞌ gáp ndoꞌ bega leꞌa zha na bi naꞌan Abraham yoo, leꞌa naꞌ nchoꞌola.
\p
\v 59 Weꞌe cha usen bexa geꞌ ndiꞌizh ulaꞌgeꞌ bexa Jesús, parea leꞌa Jesús cha mkachndoꞌ utoꞌo xa sa nde niꞌi ten Dios. Utid xa gandid lat bexa wa, cha nchaꞌa xa.
\c 9
\s Jesús myunyakna dub xa lá naꞌ zha ngolta xa
\p
\v 1 Ngol dub wizh nchasea Jesús leꞌa xa uniꞌí dub xabgiꞌi zha ngolta xa lá naꞌ xa.
\v 2 Leꞌa be xmen Jesús cha unabdiꞌizh ndab bexa ndoꞌ Jesús:
\p —Mech, ¿xtaꞌan lbaꞌa lá naꞌ xa baꞌ idub zha ngolta xa zha? ¿Ke ten be usan ten xa‑yá, nati ke tenka xa‑yá?
\p
\v 3 Leꞌa Jesús cha ndab:
\p —Leꞌa xa lbaꞌa nak naꞌanpa ke ten xa no ni ke ten be usan ten xa. Parea leꞌa ta lbaꞌa nak xa baꞌ leꞌa be men iniꞌí juers ten Dios.
\v 4 Nattsa bi tezhea leꞌa naꞌ nsabndoꞌ gun tiꞌin ndab Dios, xa mtuꞌub naꞌ. Leꞌa teꞌal sken ilen, gor na naꞌanta ton gun tiꞌin.
\v 5 Leꞌa nat bi nsoꞌ naꞌ ndoꞌ gizhliyo ndee, leꞌa naꞌ nak xeꞌa ten Dios ndoꞌ be men nde ndoꞌ gizhliyo.
\p
\v 6 \fig |Cn01739B.tif|col|||Jesús myunyakna ngusndoꞌ dub xa lá naꞌ|Jn. 9:6\fig*Leꞌa tsoꞌo na li ndab Jesús, cha mchuk xa ndoꞌ yo, cha mbindeꞌe xa dub tuzh yalan. Cha udaꞌab xa‑yá ngusndoꞌ~xa lá naꞌ wa.
\v 7 Cha ndab Jesús:
\p —Waꞌdaꞌab ngusndoꞌ~lu nits tank sa nsaleaꞌ Siloé —leꞌa ta wa dub diꞌizh gab: xa mtuꞌub.
\p Weꞌe leꞌa xa wa cha nchaꞌdaꞌab ndoꞌ~na sa wa. Leꞌa gor nseaꞌ xa ta lid~xa leꞌa xa naꞌla.
\v 8 Leꞌa bexa ncho gax ta lid~xa, no iteata bexa na uniꞌí leꞌa xa wa ngok dub xa lá naꞌ, leꞌa bexa wa cha ndab ndoꞌ be ltsaꞌa~na:
\p —¿Naꞌanpa leꞌa xa baꞌ xa nsobnab med wa zha?
\p
\v 9 Leꞌa ncho bexa wa ndab:
\p —Leꞌa xa baꞌ leꞌaka ta wa.
\p Ná ncho bexa ndab:
\p —Naꞌan, leꞌa xa baꞌ migabtsa xa wa.
\p Parea leꞌaka xa wa cha ndab:
\p —Leꞌa naꞌ ndee leꞌaka ta wa.
\p
\v 10 Leꞌa bexa wa cha unabdiꞌizh ndoꞌ xa ndab bexa:
\p —¿Xteꞌe uyoꞌo gan naꞌla go nat zhaga?
\p
\v 11 Leꞌa xa cha ukaꞌab ndab:
\p —Leꞌa xa nsaleaꞌ Jesús wa mbindeꞌe yalan, cha udaꞌab xa‑yá ngusndoꞌ~naꞌ, cha ndab xa gadaꞌab naꞌ ndoꞌ naꞌ nits Siloé. Ta weꞌe ngwaa naꞌ, no udaꞌab naꞌ ndoꞌ naꞌ, cha mnaꞌ naꞌ.
\p
\v 12 Leꞌa bexa wa cha unabdiꞌizh ndab bexa:
\p —¿Ma xa wa nat?
\p Leꞌa xa wa cha ukaꞌab ndab xa:
\p —Leꞌa naꞌ lá iní.
\s Bexa fariseo unabdiꞌizh ndoꞌ xa myakna ngusndoꞌ~na
\p
\v 13 Weꞌe leꞌa bexa wa cha mbiꞌi xa na li myakna wa ndoꞌ bexa fariseo.
\v 14 Leꞌa ta wa wizh neꞌe bexa judio, zha na li mbindeꞌe Jesús yalan, cha myunyakna Jesús ngusndoꞌ xa wa.
\v 15 Weꞌe leꞌa bexa fariseo no unabdiꞌizh ndoꞌ xa wa ná xteꞌe myakna ngusndoꞌ~xa. Leꞌa xa cha ukaꞌab ndab:
\p —Leꞌa xa wa udaꞌab yalan ngusndoꞌ~naꞌ, cha udaꞌab naꞌ ndoꞌ~naꞌ, cha mnaꞌ naꞌ.
\p
\v 16 Weꞌe leꞌa ncho bexa fariseo cha ndabbe:
\p —Leꞌa xabgiꞌi weꞌe naꞌanpa nak dub xa mtuꞌub Dios, leꞌa xa ndun ta lá nsabndoꞌ wizh neꞌe beuna.
\p Ná nchoga bexa ndab:
\p —Dub men ugap lá yoo gan gun be uyon ndun xa wa.
\p Ta weꞌe naꞌanpa dubtsa ngudiꞌizh bexa ná ton nak Jesús.
\v 17 Cha unabdiꞌizhgal bexa ndoꞌ xa myakna wa, ndab bexa:
\p —¿Xteꞌe nsak lu? ¿Ton nak xa li myunyakna ngusndoꞌ~lu baꞌ zha?
\p Leꞌa xa wa cha ukaꞌab ndab xa:
\p —Nsak naꞌ leꞌa xa wa dub profet ten Dios.
\p
\v 18 Parea leꞌa bexa nibeꞌe ten bexa judio lá ndangea ladna ti ngok xa wa dub xa lá naꞌ, no uyoꞌo gan mnaꞌ xa. Ta weꞌe mtuꞌub bexa dub men ngwaꞌtezh be usan ten xa.
\v 19 Leꞌa gor na ulen bexa wa, leꞌa bexa nibeꞌe wa cha unabdiꞌizh ndoꞌ bexa, ndab bexa:
\p —¿Xin bega xa ndee, xa ndab bego lá naꞌ zha ngolkata xa wa zha? ¿Xteꞌexá mnaꞌ xa nat zhaga?
\p
\v 20 Leꞌa be usan ten xa wa cha ukaꞌab ndab bexa:
\p —Uniꞌíka besa leꞌa ta baꞌ xinka besa, noga lá naꞌka xa zha ngolta xa.
\v 21 Parea leꞌa besa lá iniꞌí xteꞌe mnaꞌ xa nat, no ni lá iniꞌí besa ton myunyakna xa. Unabdiꞌizh bega ndoꞌ leꞌaka xa, leꞌa xa yá goxla, leꞌa xa sabka‑yá.
\p
\v 22 Li ndab bexa geal leꞌa bexa nzheb ndoꞌ bexa nibeꞌe, leꞌa bexa nibeꞌe wa yá mbidiꞌizh leꞌa guniꞌi ton gab leꞌa Jesús nak Cristo, leꞌa bexa wa kontuꞌub xa len niꞌi sa nzhealbe bexa judio.
\v 23 Ta weꞌe ndab be usan ten xa wa leꞌa xa yá goxla, inabdiꞌizh bexa nibeꞌe wa leꞌaka ndoꞌ xa.
\p
\v 24 Weꞌe leꞌa bexa nibeꞌe wa cha utezhgal xabgiꞌi li myakna wa, cha ndab bexa:
\p —Leꞌa Dios nsobwiꞌi gaꞌal gud ná xteꞌe nak xabgiꞌi wa, leꞌa besa uniꞌí leꞌa xa wa dub xa ndap ke.
\p
\v 25 Leꞌa xa wa cha ndab:
\p —Leꞌa naꞌ lá iní tal leꞌa xa wa xa ndap ke natal naꞌan. Parea dub ta uní naꞌ: leꞌa naꞌ ngok dub xa lá naꞌ, ná nat leꞌa naꞌ naꞌla.
\p
\v 26 Cha ndabgal bexa:
\p —¿Xteꞌe mbinno xa lu zha? ¿Xtaꞌan mbin xa ndontsa lbaꞌa naꞌ lu zha?
\p
\v 27 Leꞌa xa cha ukaꞌab ndab xa:
\p —Leꞌa naꞌ yá ndáp‑a ndoꞌ bego, ná leꞌa bega lá kaꞌab isakyoꞌón‑a. ¿Nat xtaꞌan nlad bega gáp naꞌ‑yá stub biaj? ¿Nati no bega nlad gak xmen~xa wa zha?
\p
\v 28 Cha xela uníꞌi bexa ndoꞌ xa, ndab bexa:
\p —Lu nak xmen~xa wa, parea leꞌa besa nak xmen Moisés.
\v 29 Leꞌa besa uniꞌíka leꞌa Dios mbidiꞌizhno Moisés, parea leꞌa xa weꞌe leꞌa besa ni lá iniꞌí pa utoꞌo xa.
\p
\v 30 Leꞌa xabgiꞌi wa cha ukaꞌab ndab xa:
\p —¡Leꞌa ta ndab bega wa uzhebpa ndanseana naꞌ! Leꞌa xa wa leꞌa myunyakna ngusndoꞌ~naꞌ, parea leꞌa bega lá iniꞌí pa utoꞌo xa.
\v 31 Leꞌa beuna uniꞌíka leꞌa Dios naꞌanpa goꞌón ta inab dub xa ndap ke. Parea leꞌa tal ton yankea Dios no uxobgek xa ndoꞌ Dios, leꞌa Dios soꞌónka ta inab xa wa.
\v 32 Nunk beuna gol goꞌón yoo dub men yunyakna ngusndoꞌ dub xa lá naꞌ zha ngolta xa.
\v 33 Tal leꞌa xa wa naꞌanpa nak dub xa mtuꞌub Dios, leꞌa xa lá yoo gan gun ta wa.
\p
\v 34 Leꞌa bexa cha ukaꞌab ndab bexa:
\p —¡Leꞌa zha ngolkata lu leꞌa lu yá ndapka ke, ná lu nlad leꞌa uluu besa!
\p Cha ulantuꞌub bexa xa sa wa.
\s Bexa lá naꞌ nsea bexa naꞌka
\p
\v 35 Leꞌa Jesús mbiꞌín ta li ulantuꞌub bexa xa wa. Leꞌa ngol gor mzheal Jesús xa, cha ndab Jesús:
\p —¿Ndangea ladna lu Xin Dios zha?
\p
\v 36 Leꞌa xa wa cha ukaꞌab ndab xa:
\p —Señor, gud go ná ton xa wa, ndontsa gungea lad naꞌ xa wa.
\p
\v 37 Leꞌa Jesús cha ndab:
\p —Leꞌa lu yá uniꞌíka xa, leꞌa xa wa naꞌ, xa ndadiꞌizhno lu nat.
\p
\v 38 Leꞌa xa wa cha ndab:
\p —Ndangea lad naꞌ go, Señor.
\p Cha usaxib xa ndoꞌ Jesús.
\p
\v 39 Leꞌa Jesús cha ndab:
\p —Leꞌa naꞌ ndal ndoꞌ gizhliyo iní naꞌ ná xteꞌe nak be men. Li ndontsa leꞌa bexa lá naꞌ wa inaꞌbe, no bexa na nsak leꞌa xa naꞌka leꞌa bexa wa yaꞌan cuent dub xa lá naꞌ.
\p
\v 40 Leꞌa gor na mbiꞌín pla bexa fariseo nde sa wa ta li ndab Jesús, cha ndab bexa ndoꞌ Jesús:
\p —¿Ndab lu zha leꞌa besa ndee naꞌanpa naꞌ?
\p
\v 41 Leꞌa Jesús cha ndab:
\p —Tal leꞌa bega lá naꞌ, leꞌa bega naꞌanpa ndap ke ndoꞌ Dios. Parea leꞌa bega ndab leꞌa bega naꞌka, ta weꞌe leꞌa bega ndapka ke ndoꞌ Dios.
\c 10
\s Jesús mbidiꞌizh dub cuent ten xa nlaꞌach borreg
\p
\v 1 ’Leꞌa naꞌ gáp ndoꞌ bego leꞌa dub sa ndenchonyaw be borreg, tal leꞌa dub xa naꞌanpa nyoꞌo toꞌo puert sa wa cha ndi nyoꞌo xa stub lad, leꞌa xa wa dub waꞌan, dub xa nlat juers be man.
\v 2 \fig |LB00014B.TIF|col|||Corral ten borreg|Jn. 10:2\fig*Parea leꞌa dub xa na nyoꞌo toꞌo puert wa, leꞌa xa wa leꞌa xa nlaꞌach be borreg wa.
\v 3 Leꞌa xa na nlaꞌach toꞌo puert sa wa cha nxaꞌal‑a, cha nyoꞌo xa nlaꞌach be borreg wa. Leꞌa xa cha nbezhleaꞌ kadga dub ma ten xa. Leꞌa bema cha ndoꞌón ti~xa, cha nchaꞌatoꞌono bema xa.
\v 4 Leꞌa gor na yá utatela be borreg ten xa, leꞌa xa nlaꞌach ma cha nsaned ndoꞌ ma. Leꞌa be borreg wa nchandoꞌ ti~xa, cha nsankea bema tsoꞌo xa.
\v 5 Parea leꞌa bema naꞌanpa isankea tsoꞌo dub xa lá nchandoꞌ ma, ndi uxoꞌon bema ndoꞌ xa, geal leꞌa bema lá nchandoꞌ ti~xa.
\p
\v 6 Leꞌa Jesús mbidiꞌizh ta ndee ndoꞌ be men, parea leꞌa bexa lá nyakbeꞌena xteꞌe gab ta wa.
\s Jesús nak cuent dub xa utsin nlaꞌach be borreg
\p
\v 7 Cha no ndab Jesús ndoꞌ bexa wa:
\p —Leꞌa naꞌ gáp ndoꞌ bego leꞌa naꞌ leꞌa nak cuent puert sa nyote be borreg.
\v 8 Leꞌa itea bexa na ned ulen ndoꞌ naꞌ, bexa na mluu dub diꞌizh naꞌanpa ta ugea, leꞌa bexa wa cuent dub waꞌan, dub xa nlat juers be man. Parea leꞌa bexa nak cuent be xborreg~naꞌ lá isakyoꞌón ta ndab bexa wa.
\v 9 Leꞌa naꞌ leꞌa nak cuent puert wa, geal leꞌa tal ton ndangea ladna naꞌ, leꞌa xa wa ndapka gealnaban ndoꞌ Dios. Leꞌa bexa wa nak cuent be borreg nyoꞌo ntoꞌo toꞌo puert no nzheal ma gixgi ndaw ma.
\p
\v 10 ’Leꞌa dub waꞌan nsealawaꞌantsa be borreg, no nseayut xa ma, nlad xa initndoꞌ ma. Parea leꞌa naꞌ ndee ndi ndal ndontsa leꞌa bexa nak cuent be xborreg~naꞌ gap gealnaban ndoꞌ Dios, no uzhebpa wen yoo bexa ndoꞌ Dios.
\v 11 Leꞌa naꞌ leꞌa nak xa utsin nlaꞌach be xmen~naꞌ lak utsin nlaꞌach dub men be xborreg~xa, no nsaꞌa xa leꞌaka leꞌa xa sakndoꞌ bema.
\v 12 Parea leꞌa dub xa nyaxtsa ten na ndontsa ulaꞌach xa bema, leꞌa xa naꞌanpa leꞌa ten ma. Ta weꞌe leꞌa gor na iniꞌí xa nsea dub mbee cha ulaꞌa xa bema ndi uxoꞌon xa. Weꞌe leꞌa mbee wa cha ukendoꞌ bema cha iteꞌachso bema itea lad.
\v 13 Leꞌa xa wa uxoꞌon geal leꞌa xa medtsa nlad, naꞌanpa nyuꞌno ladna xa bema.
\p
\v 14 ’Leꞌa naꞌ nak cuent dub xa utsin nlaꞌach be borreg ten na. Nchandoꞌ naꞌ bexa nak be borreg ten naꞌ, no liga leꞌa bexa nchandoꞌga naꞌ,
\v 15 lak nchandoꞌ Xus~naꞌ naꞌ, no liga nchandoꞌ naꞌ Xus~naꞌ. No nsa naꞌ leꞌaka naꞌ sakndoꞌ be men nak be borreg ten naꞌ.
\v 16 No ncho stub xkwaꞌa be xmen~naꞌ, bexa lá nchandoꞌ bega. Leꞌa bexa wa cuent stub xkwaꞌa borreg ncho stubga corral. Leꞌa naꞌ yunjuntka bexa wa no bexa ndee, no uxobgek bexa ndoꞌ naꞌ. Weꞌe yoo dubtsa xkwaꞌa be xmen~naꞌ, no nab naꞌ gak xa nlaꞌach iteanak bexa.
\p
\v 17 ’Leꞌa Xus~naꞌ nkweaꞌ ladna naꞌ, geal leꞌa naꞌ nsa gealnaban ten naꞌ gat naꞌ ndontsa iban naꞌ stub biaj.
\v 18 Naꞌan ton gut naꞌ, ndi naꞌka usa naꞌ gat naꞌ. Leꞌa naꞌ ndap juers usa naꞌ gealnaban ten naꞌ, no ndap naꞌ juers iban naꞌ stub biaj. Leꞌa ta wa ta unibeꞌe Xus~naꞌ gun naꞌ.
\p
\v 19 Leꞌa gor na mbiꞌín bexa judio be ta li ndab Jesús, cha stub biaj usaxan uteyotoꞌo bexa no be ltsaꞌa~xa.
\v 20 Ncho kwaꞌad bexa ndab:
\p —¿Xtaꞌan nlaꞌach bego ta ndab xa baꞌ zha? Leꞌa xa ncho mbi bxin len ladoꞌo~na no nsak xa gizh tont.
\p
\v 21 Ná leꞌa ncho bexa wa ndabgabe:
\p —Leꞌa xa baꞌ naꞌanpa ndadiꞌizh lak ndadiꞌizh dub men ncho mbi bxin len ladoꞌo~na. No lá gun dub mbi bxin gan inaꞌ dub xa lá naꞌ lak mbin xa baꞌ.
\s Bexa Jerusalén lá kaꞌab gungea ladna Jesús
\p
\v 22 Ngol zha kwal zha na ngo bexa judio dub ujest ten niꞌi ten Dios nde Jerusalén.
\v 23 Leꞌa dub wizh wa, leꞌa Jesús nkesea sa nsaleaꞌ Corredor Salomón ten niꞌi ten Dios.
\v 24 Weꞌe leꞌa ncho bexa judio cha myaklo wats Jesús, ndab bexa:
\p —¿Gast polxá iniꞌí besa ton nak go zhaga? Tal go leꞌa nak Cristo, gud ga‑yá ndoꞌ gaꞌal besa.
\p
\v 25 Leꞌa Jesús cha ukaꞌab ndab:
\p —Leꞌa naꞌ yá ndápka ndoꞌ bega ton nak naꞌ, ná leꞌa bego lá ngungea ladna‑yá. No leꞌa be uyon na ndun naꞌ nsea juers ten Dios Xus~naꞌ, leꞌa ta wa nluukaga ton nak naꞌ.
\v 26 Ná leꞌa bego lá ndangea ladna‑yá geal leꞌa bega naꞌanpa nak be borreg ten naꞌ.
\v 27 Leꞌa bexa nak be borreg ten naꞌ, leꞌa bexa wa ndoꞌón ti~naꞌ, no nchandoꞌ naꞌ bexa, no nsankea bexa tsoꞌo naꞌ.
\v 28 No nsa naꞌ gealnaban nunk lá idub ndoꞌ bexa. Leꞌa bexa idub tiemp yoo wats Dios, no naꞌan ton koꞌo bexa ndoꞌ yaꞌa~naꞌ.
\v 29 Leꞌa Xus~naꞌ, xa msaꞌa bexa ndoꞌ naꞌ, leꞌa xa wa ndon leꞌa nibeꞌe ndoꞌ itea be taꞌa, ta weꞌe naꞌan ton gun gan koꞌo bexa ndoꞌ yaꞌa~xa.
\v 30 Leꞌa naꞌ no Xus~naꞌ leꞌa besa dubtsa nak.
\p
\v 31 Weꞌe leꞌa bexa wa usengal be geꞌ ndiꞌizh gut bexa Jesús.
\v 32 Ná leꞌa Jesús cha ndab ndoꞌ bexa:
\p —Sian be ta wen ndun naꞌ ndoꞌ gaꞌal bega lak msaꞌa Xus~naꞌ gun naꞌ. ¿Ke ten xtaꞌanma dub ta li mbin naꞌ wa ulaꞌgeꞌ bega naꞌ zha?
\p
\v 33 Leꞌa bexa wa cha ukaꞌab ndabbe:
\p —Leꞌa besa naꞌanpa ulaꞌgeꞌ lu ke ten dub ta wen ndun lu. Leꞌa besa ndi ulaꞌgeꞌ lu ke ten ta na kweaꞌ uníꞌi lu ndoꞌ Dios. Leꞌa lu men gizhliyotsa, ná ndab lu leꞌa lu Dios.
\p
\v 34 Leꞌa Jesús cha ukaꞌab ndab:
\p —Leꞌa ley ndeno bega nkeaniꞌi leꞌa Dios ndab ndoꞌ be men: “Ndáp naꞌ leꞌa bega nak be dios.”\x + \xo 10:34 \xt Sal. 82:6\x*
\v 35 Leꞌa beuna uniꞌíka leꞌa itea be ta ndab diꞌizh ten Dios ta ugeaka. Ta weꞌe tal leꞌa Dios li ndab ndoꞌ bexa wa leꞌa bexa no nak dios,
\v 36 ¿xteꞌe ndab bega leꞌa naꞌ kweaꞌ uníꞌi ndoꞌ Dios gor na ndáp naꞌ leꞌa naꞌ Xin Dios? Leꞌa Dios mti naꞌ no mtuꞌub xa naꞌ ndoꞌ gizhliyo ndee.
\v 37 Tal leꞌa naꞌ naꞌanpa ndun be taꞌa lak ndun Xus~naꞌ, leꞌa bega lá nsabndoꞌ gungea ladna naꞌ.
\v 38 Leꞌa bega naꞌanpa ndangea ladna ta ndáp naꞌ, parea nsabndoꞌ gungea ladna bega ta ndun naꞌ. Weꞌe igondoꞌ bega Xus~naꞌ, no gungea ladna bega leꞌa naꞌ no Xus~naꞌ dubtsa nak besa.
\p
\v 39 Weꞌe stubgal biaj nlad bexa isen bexa Jesús, ná leꞌa Jesús cha utid tlaw bexa, naꞌanpa isen bexa xa.
\v 40 Cha nchaꞌagal xa stub toꞌo yowbeꞌe Jordán, sa mas polta ulaleaꞌ Juan be men. Cha weꞌetsa uyoꞌo Jesús dub ndeꞌep.
\v 41 Leꞌa kwaꞌad men nseabegal wats xa, ndab bexa ndoꞌ be ltsaꞌa~xa:
\p —Leꞌa Juan ta ugeaka ni dub uyon lá ngun, parea leꞌa itea ta ndab Juan cuent ten xa ndee, leꞌa ta wa ta ugeaka.
\p
\v 42 Weꞌe leꞌa kwaꞌad bexa nde sa wa mbingea ladna leꞌa Jesús nak Cristo.
\c 11
\s Ngut Lázaro
\p
\v 1 Uyoꞌo dub xabgiꞌi nsaleaꞌ Lázaro usen gealgizh. Leꞌa xa wa xa gezh Betania, sa no nak lazh Marí no Mart itop bsan Lázaro.
\v 2 (Leꞌa Marí bsan Lázaro wa xa ulo ta uxeꞌe xoꞌo Jesús tsoꞌo wa, cha mkwiꞌid xa xoꞌo Jesús nsea gichgek~xa.)
\v 3 Ngol gor leꞌa itop bsan Lázaro wa mtuꞌub dub men ndoꞌ Jesús, ndab xa:
\p —Señor, leꞌa Lázaro amig ten ga usen gealgizh.
\p
\v 4 Leꞌa gor na mbiꞌín Jesús ta wa, cha ndab xa:
\p —Leꞌa gealgizh wa naꞌanpa gut xa. Leꞌa ta wa ndi ndontsa iniꞌí be men juers ten Dios no juers ten Xin Dios.
\p
\v 5 Leꞌa Jesús nkea ladna Mart no Marí beal~xa no Lázaro.
\v 6 Parea leꞌa gor na mbiꞌín Jesús leꞌa Lázaro usen gizh, leꞌa Jesús cha uyoꞌokata sa wa stop wizh.
\v 7 Weꞌe cha ndab xa ndoꞌ be xmen~xa:
\p —Nchaꞌbe beuna stub biaj distrit Judea.
\p
\v 8 Leꞌa be xmen Jesús cha ndabbe:
\p —Mech, ti plama wizh leꞌa bexa judio ncho sa wa nlad gut ga, ná nat, ¿xtaꞌan li nlad go yaꞌgal ga sa wa zha?
\p
\v 9 Leꞌa Jesús cha ukaꞌab ndab:
\p —Ncho dub tibtop gor tezhea kad dub wizh. Leꞌa tal ton ikesea gor tezhea naꞌanpa ikateꞌeb, geal leꞌa xa naꞌ bea ndoꞌ gizhliyo ndee.
\v 10 Parea tal ton ikesea gor teꞌal, leꞌa xa skateꞌeb leꞌa gor wa naꞌan bea.
\p
\v 11 Cha no ndab Jesús:
\p —Leꞌa Lázaro amig ten beuna ngwadgats, ná leꞌa naꞌ ndaukwan xa.
\p
\v 12 Weꞌe leꞌa be xmen Jesús cha ndabbe:
\p —Señor, tal leꞌa xa naxyats, leꞌa xa syakkana.
\p
\v 13 Leꞌa ta li ndab Jesús wa gab leꞌa Lázaro ngutla, ná leꞌa be xmen Jesús ndanbeꞌe leꞌa xa naxyats‑tsa.
\v 14 Weꞌe leꞌa Jesús cha gaꞌal ndab ndoꞌ bexa:
\p —Leꞌa Lázaro ngut.
\v 15 Leꞌa naꞌ nten ladna naꞌanpa ncho beuna sa wa gor ngut xa. Li ndontsa mas igeꞌ ladna bega naꞌ. Nat nchaꞌinaꞌ beuna xa.
\p
\v 16 Leꞌa Tomás, xa no nsaleaꞌ Dídimo, cha ndab ndoꞌ be ltsaꞌa~na:
\p —Nchaꞌbe beuna sa wa, ndontsa no beuna gatno Jesús.
\s Jesús nak xa nxiste be men no xa nsaꞌa gealnaban
\p
\v 17 Leꞌa wizh na ulayaꞌ Jesús toꞌo gezh Betania wa, mbiꞌín xa leꞌa Lázaro mdapla wizh mgaꞌach.
\v 18 Leꞌa Betania nde pa chontsa kilómetro gax Jerusalén.
\v 19 Ta weꞌe leꞌa kwaꞌad bexa judio ncho Jerusalén wa ngwaꞌinaꞌ Mart no Marí, mluꞌuzh be men wa itop bexa ta na ngut bsan bexa.
\v 20 Leꞌa gor na mbiꞌín Mart leꞌa Jesús nsalayaꞌ gaxla, cha utoꞌo xa, ngwaꞌucheꞌalndoꞌ xa Jesús. Ná leꞌa Marí myaꞌan ta niꞌi.
\v 21 Leꞌa Mart cha ndab ndoꞌ Jesús:
\p —Señor, tal leꞌa go ncho sa ndee, leꞌa bsan~naꞌ naꞌanpa ngat.
\v 22 Parea leꞌa naꞌ uní leꞌa guniꞌi xtaꞌan inab go ndoꞌ Dios nat, leꞌa Dios saꞌaka‑yá.
\p
\v 23 Leꞌa Jesús cha ndab ndoꞌ Mart:
\p —Leꞌa bsan~lu sbanka.
\p
\v 24 Leꞌa Mart cha ndab:
\p —Leꞌa naꞌ uní leꞌa xa sbanka gal wizh lult, zha iban itea be men ngut.
\p
\v 25 Leꞌa Jesús cha ndab:
\p —Leꞌa naꞌ nak xa nxiste be men ndoꞌ gealgut, no nak naꞌ xa nsaꞌa gealnaban. Leꞌa tal ton gungea ladna naꞌ, maska ngut xa leꞌa xa sbanka.
\v 26 Leꞌa itea bexa nban tal gungea ladna bexa naꞌ, leꞌa bexa wa naꞌanpa gat idub tiemp. ¿Ndangea ladna lu ta ndáp naꞌ ndee zha?
\p
\v 27 Leꞌa Mart cha ndab:
\p —Ndungeaka lad naꞌ‑yá, Señor. No ndangea lad naꞌ leꞌa go nak Cristo Xin Dios, xa na ndiꞌizh ga giꞌidka ndoꞌ gizhliyo.
\s Jesús mbiꞌinno Lázaro
\p
\v 28 Tsoꞌo na li ndab Mart, weꞌe cha nseaꞌ xa ta lid~xa, xagaꞌtsa ndab xa ndoꞌ Marí beal~xa:
\p —Leꞌa mech nseala no nbezh xa lu.
\p
\v 29 Leꞌa gor na mbiꞌín Marí ta wa, cha uxax utoꞌo xa, nchaꞌinaꞌ xa Jesús.
\v 30 Leꞌa Jesús biseata yate len gezh wa, ndi bi nsoꞌ xa sa mzheꞌal Mart xa.
\v 31 Weꞌe leꞌa bexa ndeuluꞌuzh Marí bexa nde ta lid~xa, leꞌa gor uniꞌí bexa leꞌa Marí uxax utoꞌo nchaꞌa, cha usankea bexa tsoꞌo Marí, ndab bexa leꞌa Marí nchaꞌyoꞌon toꞌo baꞌa ten Lázaro.
\p
\v 32 Leꞌa gor na ulayaꞌ Marí wats Jesús no uniꞌí xa Jesús, cha msaxib xa ndoꞌ Jesús, ndab xa:
\p —Señor, tal leꞌa go ncho sa ndee, leꞌa bsan~naꞌ naꞌanpa ngat.
\p
\v 33 Leꞌa gor na uniꞌí Jesús xteꞌe ndoꞌon Marí, no bexa na li ulanseano Marí wa, leꞌa xa uzhebpa uban myoꞌo ladna no kweaꞌ myoꞌo ladna xa.
\v 34 Cha ndab xa:
\p —¿Pa mkaꞌach bega xa wa zha?
\p Leꞌa bexa wa cha ukaꞌab ndab:
\p —Señor, nchaꞌbe beuna, iniꞌí ga pa‑yá.
\p
\v 35 Leꞌa Jesús cha mbiꞌin.
\v 36 Weꞌe leꞌa bexa nde sa wa cha ndab ndoꞌ ltsaꞌa~na:
\p —Bwiꞌi bego ná xteꞌeta nkweaꞌ ladna xa Lázaro.
\p
\v 37 Ná leꞌa ncho bexa cha ndabbe:
\p —Leꞌa xa ndee myunyakna dub xa lá naꞌ, ¿xtaꞌan naꞌanpa li ngun xa baꞌ gan lá ngat Lázaro zhaga?
\s Lázaro mbangal ndoꞌ gealgut
\p
\v 38 Leꞌa Jesús uzhebpa kweaꞌ myoꞌo ladna gor ulayaꞌ xa toꞌo baꞌa wa. Leꞌa ta wa dub geꞌloꞌo nsoꞌntsaw dub geꞌ siꞌil toꞌo‑yá.
\v 39 Cha ndab Jesús:
\p —Udob bega geꞌ baꞌ.
\p Leꞌa Mart bsan~xa ngut wa cha ndab:
\p —Señor, leꞌa nat leꞌa xa baꞌ ugap nlaꞌala, leꞌa xa mdapla wizh mgaꞌach.
\p
\v 40 Leꞌa Jesús cha ndab ndoꞌ Mart:
\p —¿Cha lid ndápka naꞌ ndoꞌ lu zha, tal leꞌa lu gungea ladna naꞌ, leꞌa lu iniꞌíka juers ten Dios?
\p
\v 41 Weꞌe leꞌa be men cha udob geꞌ toꞌo baꞌa wa. Leꞌa Jesús cha mwiꞌi gaꞌap, cha ndab xa:
\p —Xus~naꞌ, nsa naꞌ xno ndoꞌ go leꞌa go ndoꞌón ta unaꞌab naꞌ ndoꞌ ga.
\v 42 Leꞌa naꞌ uníka leꞌa go ndoꞌónka itea be taꞌa ndáp naꞌ, parea nat li ndáp naꞌ ndontsa gungea ladna be men ndee leꞌa go leꞌaka mtuꞌub naꞌ.
\p
\v 43 Tsoꞌo na li ndab Jesús, cha ugeꞌ ndab xa:
\p —¡Lázaro, utoꞌo sa baꞌ!
\p
\v 44 Leꞌa xa na li ngut wa cha utoꞌo sa wa, bi lima nbixyoꞌo lad yaꞌa~xa no xoꞌo~xa. No ndoꞌ~xa bi li nbixyoꞌo dub bleꞌa lad. \fig |CN01768B.TIF|col|||Jesús mbin mban Lázaro ndoꞌ gealgut|Jn. 11:44\fig* Leꞌa Jesús cha ndab ndoꞌ be men:
\p —Bxaꞌak bega be lad baꞌ, cha blaꞌa bega iseaꞌ xa.
\s Bexa nibeꞌe dubtsa mbidiꞌizh leꞌa gut Jesús
\r (Mt. 26:1-5; Mr. 14:1-2; Lc. 22:1-2)
\p
\v 45 Weꞌe leꞌa bexa judio na li nseano Marí wa uniꞌí ta mbin Jesús, cha kwaꞌad bexa mbingea ladna Jesús.
\v 46 Parea leꞌa ncho bexa wa cha ndi ngwaꞌyab ndoꞌ bexa fariseo xtaꞌan mbin Jesús.
\v 47 Weꞌe leꞌa be uleꞌay nibeꞌe no bexa fariseo cha mchealte itea bexa nibeꞌe ten bexa judio. Cha ndab bexa:
\p —¿Xteꞌe gun beuna zha? Leꞌa Jesús wa sian uyon ndun.
\v 48 Tal leꞌa beuna ulaꞌa li gunta xa ta wa, leꞌa itea be men sangea ladna xa. Weꞌe leꞌa bexa Roma siꞌid ulate niꞌi ten Dios ten beuna no lá ulaꞌata bexa inibeꞌe beuna sa ndee.
\p
\v 49 Leꞌa dub bexa wa xa nsaleaꞌ Caifás, xa nak uleꞌay ndon leꞌa nsak zha wa. Leꞌa xa cha ndab ndoꞌ bexa nibeꞌe wa:
\p —Leꞌa bego naꞌan xtaꞌan iniꞌí.
\v 50 No ni lá nyakbeꞌena bega ndi mas wen gat dubtsa men sakndoꞌ beuna xa Israel, ndontsa naꞌanpa initndoꞌ itea beuna.
\p
\v 51 Leꞌa ta li ndab Caifás wa naꞌanpa ndanbeꞌe leꞌatsa xa. Leꞌa ta na nak xa uleꞌay ndon leꞌa nsak zha wa, ta weꞌe mbintiꞌin Dios xa, ndab xa leꞌa Jesús gat sakndoꞌ bexa Israel.
\v 52 Parea leꞌa ta ndab xa wa naꞌanpa nabtsa gab leꞌa Jesús gat sakndoꞌ bexa Israel. Leꞌa ta wa no gab leꞌa Jesús gat ndontsa yunjunt xa itea bexa nak xin Dios, bexa ncho idub nax ndoꞌ gizhliyo.
\v 53 Leꞌa wizh wa leꞌa bexa nibeꞌe ten bexa judio dubtsa mbidiꞌizh gut bexa Jesús.
\p
\v 54 Ta weꞌe leꞌa zha wa leꞌa Jesús naꞌantapa gaꞌal ikesea Judea. Leꞌa xa ndi mkaꞌan sa wa nchaꞌa xa gezh Efraín gax geꞌe sa bid. Cha uyoꞌo xa sa wa no be xmen~xa.
\p
\v 55 Leꞌa zha wa nsayal gax ujest Pascua ten bexa judio. Ta weꞌe kwaꞌad be men judio ukea nchaꞌbe gezh Jerusalén, ndontsa gun bexa ta isambiꞌi bexa ndoꞌ Dios zha biseata gal ujest wa.
\v 56 Leꞌa be men wa nkwaꞌan Jesús, no nabdiꞌizh bexa ndoꞌ be ltsaꞌa bexa nde sa nde niꞌi ten Dios:
\p —¿Xteꞌe nsak bega zha? ¿Siꞌid Jesús ujest ndee nati naꞌan?
\p
\v 57 Leꞌa be uleꞌay nibeꞌe no bexa fariseo unibeꞌela ndoꞌ be men tal ncho ton iniꞌí pa nsoꞌ Jesús, cha gab xa‑yá ndoꞌ bexa wa ndontsa isen bexa Jesús.
\c 12
\s Marí ulo ta uxeꞌe xoꞌo Jesús
\r (Mt. 26:6-13; Mr. 14:3-9)
\p
\v 1 Sxoꞌop wizh nsob gal ujest Pascua wa, leꞌa Jesús utoꞌo nchaꞌagal Betania, ta lid Lázaro xa mxiste Jesús ndoꞌ gealgut.
\v 2 Leꞌa sa wa mbindeꞌe bexa dub ta gawno bexa Jesús. Leꞌa Mart nkego ta gaw bexa. Leꞌa Lázaro nsob ndoꞌ mes no Jesús.
\v 3 Weꞌe leꞌa Marí usen tol litr sbeꞌen nardo ta uxeꞌe, dub ta uzhebpa uyap nsak. Cha mtob xa‑yá tsoꞌo xoꞌo Jesús, cha mkwiꞌid xa xoꞌo Jesús no gichgek~xa. Leꞌa len niꞌi wa gast idub lita uxeꞌe mlaꞌa.
\v 4 Leꞌa dub xmen Jesús no nsob sa wa xa na leꞌa yun cuent Jesús, xa na nsaleaꞌ Judas Iscariot xin Simón. Leꞌa xa wa cha ndab:
\p
\v 5 —¿Xtaꞌan lid ndi udoꞌo xa ta uxeꞌe baꞌ zha, cha utseꞌa xa med wa ndoꞌ be men uban nak? Leꞌa ta baꞌ nsak pa chon gayoꞌo denario.
\p
\v 6 Parea leꞌa Judas naꞌanpa nyuꞌno ladna bexa uban nak. Ndi li ndab xa geal leꞌa xa nlaꞌach med ten be xmen Jesús, no ncho zha ngowaꞌanga xa med noꞌo xa.
\v 7 Weꞌe leꞌa Jesús cha ndab ndoꞌ Judas:
\p —Blaꞌa xagots baꞌ, leꞌa xa ulochaꞌaw ta baꞌ gast gal zha na igaꞌach naꞌ.
\v 8 Leꞌa bexa uban nak wa guniꞌi polga nchoka lat bega, parea leꞌa naꞌ ndee naꞌanpa kwenta nchoꞌono bega.
\s Be uleꞌay nibeꞌe dubtsa mbidiꞌizh gut Lázaro
\p
\v 9 Leꞌa kwaꞌadpa bexa judio mbiꞌín leꞌa Jesús nchogal gezh Betania, cha nchaꞌbe bexa sa wa. Leꞌa bexa naꞌanpa nabtsa Jesús nchaꞌbewiꞌi, leꞌa bexa nlad iniꞌí no Lázaro xa mbangal ndoꞌ gealgut.
\v 10 Weꞌe leꞌa be uleꞌay nibeꞌe wa dubtsa mbidiꞌizh gut no Lázaro,
\v 11 geal mbangal Lázaro leꞌa kwaꞌad bexa judio nsaulaꞌa be uleꞌay nibeꞌe wa, cha ndi Jesús ndangea ladna bexa.
\s Jesús uyote Jerusalén
\r (Mt. 21:1-11; Mr. 11:1-11; Lc. 19:28-40)
\p
\v 12 Ngol stub wizh wa leꞌa uzhebpa kwaꞌad be men ndencho ujest Pascua gezh Jerusalén. Leꞌa zha mbiꞌín bexa leꞌa Jesús no nchaꞌa Jerusalén,
\v 13 cha ulobtoꞌog bexa be xos ya gin, cha utoꞌo bexa nchaꞌikanes bexa Jesús. No ugeꞌ ndab bexa:
\p —¡Siꞌil nak xa baꞌ! ¡Dios uzhebpa nlaꞌach xa baꞌ, xa na mtuꞌub Dios Xa Nibeꞌe! ¡Leꞌa xa baꞌ leꞌa nibeꞌe beuna xa Israel!
\p
\v 14 Leꞌa Jesús mzheal dub burr tuzh, cha usob xa tsoꞌo~ma. Leꞌa ta wa lak nkeaniꞌi diꞌizh ten Dios, ndab‑a:
\b
\q1
\v 15 Lá izheb bego, men gezh Sion.
\q1 Bwiꞌi bego, leꞌa xa leꞌa nibeꞌe bega
\q2 nsea nsob tsoꞌo dub burr tuzh.\x + \xo 12:15 \xt Zac. 9:9\x*
\b
\p
\v 16 Leꞌa zha wa leꞌa be xmen Jesús lá yakbeꞌena be ta li mbin Jesús wa. Parea tsoꞌo na mbangal Jesús cha nseaꞌ xa gibeꞌa, leꞌa bexa mtseꞌa ladna lak nkeaniꞌi diꞌizh ten Dios cuent ten Jesús, cha uniꞌí bexa leꞌa Jesús lika mbin.
\p
\v 17 Leꞌa zha na utezh Jesús Lázaro len baꞌa, cha mxiste Jesús xa ndoꞌ gealgut, leꞌa bexa nde sa wa cha mbidiꞌizh ta uniꞌí bexa wa ndoꞌ be men.
\v 18 Ta weꞌe li ngwaꞌikanes be men Jesús, geal leꞌa bexa mbiꞌín ta na li mbin Jesús uyon wa.
\v 19 Parea leꞌa bexa fariseo ndab ndoꞌ be ltsaꞌa~na:
\p —Bwiꞌi bega, leꞌa ta na ndun beuna naꞌan xtiꞌin. Leꞌa be men ndi itea nchaꞌbe wats Jesús.
\s Pla bexa naꞌanpa xa judio nlad iniꞌí Jesús
\p
\v 20 Leꞌa lat bexa na li nchaꞌbe yankea Dios gezh Jerusalén ujest Pascua wa, ncho pla bexa naꞌanpa xa judio.
\v 21 Leꞌa bexa wa cha ulen wats Julip xa gezh Betsaida ten Galilea, ndab bexa:
\p —Señor, leꞌa besa nlad iniꞌí Jesús.
\p
\v 22 Leꞌa Julip cha ngwaꞌyab‑a ndoꞌ Ndres, weꞌe itop bexa ngwaꞌyab‑a ndoꞌ Jesús.
\v 23 Leꞌa Jesús cha ukaꞌab ndab:
\p —Yá ngol gor iniꞌí be men ta juert nak naꞌ, Xa Myak Men Ndoꞌ Gizhliyo.
\v 24 Leꞌa naꞌ gáp ndoꞌ bego tal leꞌa dub bid ten trig lá igaꞌach len yo cuent dub ta ngut, leꞌa idub tiemp leꞌa‑yá bidtsa gak. Ná tal leꞌa‑yá igaꞌach, leꞌa‑yá sianpa bid usaꞌa.
\v 25 Leꞌa tal ton ukwaꞌan xteꞌe wen yoo xa, leꞌa xa wa ndi gun perdid gealnaban ten na ndoꞌ Dios. Parea leꞌa tal ton ndi ukwaꞌan gun ta nlad Dios, leꞌa xa wa ndi gap gealnaban nunk lá idub.
\v 26 Leꞌa tal ton nlad gun tiꞌin ndoꞌ naꞌ nsabndoꞌ isankea xa tsoꞌo~naꞌ. Weꞌe leꞌa sa yoꞌo naꞌ leꞌa xa no yoo. Leꞌa tal ton gun tiꞌin ndoꞌ naꞌ, leꞌa Xus~naꞌ gab leꞌa xa wa wenka ndun.
\s Jesús mbidiꞌizh leꞌa gat
\p
\v 27 No ndab Jesús:
\p —Nat uzheꞌeb kweaꞌ ncho lad naꞌ, no ni lá iní naꞌ xteꞌe gáp naꞌ ndoꞌ Xus~naꞌ. Ndanbeꞌe naꞌ gáp naꞌ ndoꞌ xa koꞌo xa naꞌ ndoꞌ gealkweaꞌ ndee, parea leꞌa naꞌ tiꞌin weꞌe ndal ndoꞌ gizhliyo.
\v 28 Leꞌa naꞌ ndi gáp: “Xus~naꞌ, bin ga ta na uluu xteꞌe siꞌil nak go.”
\p Leꞌa gor weꞌe cha mgen ti Dios ulen gibeꞌa, ndab xa ndoꞌ Jesús:
\p —Leꞌa naꞌ mlula xteꞌe siꞌil nak naꞌ, no ulu naꞌ‑yá stub biaj.
\p
\v 29 Leꞌa lat bexa kwaꞌad wa ncho bexa ndab leꞌa ta mbiꞌín bexa wa usiꞌi. No ncho bexa ndab leꞌa‑yá dub angel uníꞌi ndoꞌ Jesús.
\p
\v 30 Leꞌa Jesús cha ndab ndoꞌ be men:
\p —Leꞌa ta mgen wa naꞌanpa ulen por na goꞌón naꞌ‑yá, leꞌa‑yá ndi ulen ndontsa goꞌón bega‑yá.
\v 31 Leꞌa nat leꞌa Dios gab ná ton ndap ke ndoꞌ gizhliyo. No nat kontuꞌub Dios maxuꞌu, xa nibeꞌe ndoꞌ gizhliyo.
\v 32 Leꞌa gor na ixits bexa naꞌ gaꞌap ndoꞌ yo, leꞌa naꞌ gun leꞌa be men ilen wats naꞌ.
\p
\v 33 Leꞌa ta na li mbidiꞌizh Jesús wa gab leꞌa xa gat ndoꞌ cruz.
\v 34 Leꞌa be men wa cha ndab:
\p —Leꞌa besa mbiꞌín leꞌa ley ten Dios nkeaniꞌi leꞌa xa nak Cristo idub tiemp ncho. ¿Ná xteꞌe ndab ga zha leꞌa be men ixits Xa Myak Men Ndoꞌ Gizhliyo gaꞌap ndoꞌ yo? ¿Ton nak Xa Myak Men Ndoꞌ Gizhliyo wa zhaga?
\p
\v 35 Leꞌa Jesús cha ukaꞌab ndab:
\p —Leꞌa nat leꞌa xa nak xeꞌa naꞌanpa kwenta ncho lat bega. Ta weꞌe usea bega nattsa bi ncho xeꞌa, ndontsa leꞌa sa ukaw naꞌanpa gun gan ndoꞌ bega. Leꞌa tal ton nsea sa ukaw, leꞌa xa wa ni lá iniꞌí pa nchaꞌa.
\v 36 Leꞌa nat bi ncho xa nak xeꞌa wa, bingea ladna bega xa, ndontsa isea bega ndoꞌ xeꞌa.
\p Leꞌa tsoꞌo na li ndab Jesús, cha nchaꞌukachndoꞌ xa ndoꞌ be men.
\s Be men lá kaꞌab gungea ladna Jesús
\p
\v 37 Sian be uyon mbin Jesús ndoꞌ gaꞌal be men, ná leꞌa bexa lá ngungea ladna Jesús.
\v 38 Li ngok ta wa lak mbidiꞌizh Isaías sakndoꞌ Dios, ndab xa:
\b
\q1 Señor Dios, ¿tonma ndangea ladna ta ndadiꞌizh besa zha?
\q2 ¿No ton ndoꞌ ná mluu ga xteꞌe juert nak go zha?\x + \xo 12:38 \xt Is. 53:1\x*
\b
\m
\v 39 Ta weꞌe leꞌa be men lá ngungea ladna Jesús, no lak ndab Isaías:
\b
\q1
\v 40 Leꞌa Dios mtsaw ngusndoꞌ bexa,
\q2 no mbin ngud Dios ladoꞌo bexa,
\q1 ndontsa lá inaꞌ bexa,
\q2 no ni lá yakbeꞌena bexa.
\q1 Cha naꞌanpa ilen bexa wats Dios,
\q2 utsuꞌu Dios be ke ten bexa.\x + \xo 12:40 \xt Is. 6:10\x*
\b
\p
\v 41 Li ndab Isaías polta zha na uniꞌí xa xteꞌe siꞌil gak Cristo, cha mbidiꞌizh xa cuent ten Cristo.
\v 42 Mas lika ná ncho kwaꞌad bexa mbingea ladna Jesús, no gast ncho bexa nibeꞌe ten bexa judio. Parea naꞌanpa gaꞌal ngudiꞌizh bexa‑yá, geal leꞌa bexa nzheb leꞌa bexa fariseo kontuꞌub bexa len niꞌi sa nzhealbe bexa judio wa.
\v 43 Leꞌa bexa wa lá nkwaꞌan xteꞌe wen yaꞌan bexa ndoꞌ Dios, ndi mas nkwaꞌan bexa xteꞌe wen yaꞌan bexa ndoꞌ be men.
\s Jesús ngoꞌo be men ndoꞌ be ke ten bexa
\p
\v 44 Leꞌa Jesús cha ugeꞌ ndab:
\p —Leꞌa tal ton gungea ladna naꞌ, leꞌa xa wa naꞌanpa nabtsa naꞌ ndangea ladna. Leꞌa xa wa no xa mtuꞌub naꞌ ndangea ladna.
\v 45 No liga tal ton iniꞌí naꞌ, leꞌa xa wa no iniꞌí xa mtuꞌub naꞌ wa.
\v 46 Leꞌa naꞌ nak xeꞌa ulen ndoꞌ gizhliyo, ndontsa tal ton gungea ladna naꞌ, leꞌa xa wa naꞌantapa yoo sa ukaw.
\p
\v 47 ’Leꞌa tal ton goꞌón diꞌizh ndáp naꞌ, ná lá uxobgek xa ndoꞌ‑yá, leꞌa naꞌ ndee naꞌanpa nak xa usake xa. Leꞌa naꞌ naꞌanpa ndal ndoꞌ gizhliyo usake naꞌ be men, leꞌa naꞌ ndi ndal ko naꞌ be men ndoꞌ be ke ten bexa.
\v 48 Leꞌa tal ton uxelad naꞌ no lá gungea ladna xa be diꞌizh ndáp naꞌ, leꞌa diꞌizh wa leꞌaka usake xa gal wizh lult.
\v 49 Leꞌa naꞌ ndee naꞌanpa ndadiꞌizh ta nladtsa naꞌ, leꞌa Xus~naꞌ xa mtuꞌub naꞌ unibeꞌe xtaꞌan gudiꞌizh naꞌ no xtaꞌan uluꞌu naꞌ.
\v 50 Leꞌa naꞌ uní leꞌa diꞌizh unibeꞌe Xus~naꞌ gáp naꞌ, leꞌa diꞌizh wa ta nsaꞌa gealnaban nunk lá idub. Ta weꞌe li ndadiꞌizh naꞌ lakka ndab Xus~naꞌ ndoꞌ naꞌ.
\c 13
\s Jesús msat xoꞌo be xmen~na
\p
\v 1 Leꞌa zha na nsayal gax ujest Pascua, leꞌa Jesús uniꞌíla yamer gal gor ikaꞌan xa ndoꞌ gizhliyo, cha yaꞌ xa wats Xus~xa. Lak nkweaꞌ ladna Jesús bexa nak xmen~xa ndoꞌ gizhliyo ndee, bi li nkweaꞌ ladna xa bexa no gast gor ikaꞌan xa.
\p
\v 2 Leꞌa ngol gor na nsobyaw xcheꞌe Jesús no be xmen~xa, leꞌa maxuꞌu uyoꞌola gek Judas Iscariot xin Simón yun cuent Jesús.
\v 3 Leꞌa Jesús uniꞌíka leꞌa Dios Xus~xa msaꞌa itea be taꞌa leꞌa xa inibeꞌe. No uniꞌí xa leꞌa xa watska Dios utoꞌo, no sa weꞌekaga yaꞌ xa.
\v 4 Weꞌe ngwasoꞌ xa ndoꞌ mes sa ndeyaw bexa wa, cha ulate xa lad nbix xa. Cha mxi xa dub bleꞌa lad koꞌol len~xa.
\v 5 Cha ulo xa nits len dub cheꞌa. Cha usaxan xa nsat xa xoꞌo be xmen~xa, no nkwiꞌid xa xoꞌo bexa wa no lad wa.
\p
\v 6 Leꞌa gor na ngol xa wats Simón Pedr, leꞌa Pedr cha ndab:
\p —Señor, ¿go baꞌ usat xoꞌo~naꞌ zha?
\p
\v 7 Leꞌa Jesús cha ukaꞌab ndab:
\p —Leꞌa ta lndeꞌe ndun naꞌ, leꞌa lu lá yakbeꞌena‑yá nat. Parea gal zha yakbeꞌena lu‑yá.
\p
\v 8 Leꞌa Pedr cha ndab:
\p —¡Leꞌa naꞌ nunk lá usa xoꞌo~naꞌ usat ga!
\p Leꞌa Jesús cha ndab:
\p —Tal leꞌa naꞌ lá usat xoꞌo~lu, leꞌa lu yá lá gakta xmen~naꞌ.
\p
\v 9 Leꞌa Simón Pedr cha ndab:
\p —¡Señor, naꞌanpa nabtsa xoꞌo~naꞌ usat ga, ndi no yaꞌa~naꞌ no gek~naꞌ usat ga!
\p
\v 10 Leꞌa Jesús cha ukaꞌab ndab:
\p —Leꞌa xa na tiꞌi ngos nsabndoꞌ nabtsa xoꞌo~na yat, leꞌa xa wa yá umbiꞌi nak. Leꞌa bego yá umbiꞌika nak ndoꞌ Dios, parea naꞌanpa itea bega.
\p
\v 11 Leꞌa Jesús yá uniꞌíla ton yun cuent xa, ta weꞌe ndab xa leꞌa dub bexa naꞌanpa umbiꞌi nak.
\p
\v 12 Leꞌa gor na mtaꞌusat Jesús xoꞌo bexa wa, cha ngokgal xa lad nbix xa. Cha usobgal xa ndoꞌ mes, ndab xa:
\p —¿Nyakbeꞌena bega xtaꞌan lbaꞌa mbinno naꞌ bega zha?
\v 13 Leꞌa bega níꞌi ndoꞌ naꞌ Mech no Señor. Leꞌaka nak ta li níꞌi bega wa, geal leꞌa naꞌ lika nak.
\v 14 Leꞌa naꞌ nak Señor ten bega no Mech ten bega, parea nat msat naꞌ xoꞌo bega. No liga leꞌa bego nsabndoꞌ usat xoꞌo ltsaꞌa bega.
\v 15 Leꞌa naꞌ mluu xteꞌe nsabndoꞌ gun bega, ndontsa li gun bego lak mbinno naꞌ bega.
\v 16 Leꞌa naꞌ gáp ndoꞌ bego leꞌa dub mos naꞌanpa mas nsak ndoꞌ xa nibeꞌe xa wa. No liga tal leꞌa dub xa mtuꞌub stubga men, leꞌa xa nchaꞌa wa naꞌanpa mas nsak ndoꞌ xa mtuꞌub xa.
\v 17 Nat tal leꞌa bega nyakbeꞌena be ta ndee, no lika ndun bega, leꞌa Dios gun wen yoo ladna bega.
\p
\v 18 ’Leꞌa ta ndáp naꞌ ndee naꞌanpa ndáp naꞌ cuent ten itea bega. Leꞌa naꞌ mti bega no nchandoꞌ naꞌ bega, parea nsabndoꞌ gak cumplir lak nkeaniꞌi diꞌizh ten Dios, ndab‑a: “Leꞌa xa na ndawno naꞌ, leꞌa xa wa leꞌaka ngokloo ndoꞌ naꞌ.”\x + \xo 13:18 \xt Sal. 41:9\x*
\v 19 Nat ndáp naꞌ ta wa ndoꞌ bego gor na biseata gak‑a, ndontsa gor na gak‑a leꞌa bega gungea ladna ton nak naꞌ.
\v 20 Leꞌa naꞌ gáp ndoꞌ bega leꞌa tal ton utsin gak ndoꞌ dub xa mtuꞌub naꞌ, leꞌa xa wa cuentkata ndoꞌ naꞌ li utsin nak. No liga tal ton utsin nak ndoꞌ naꞌ, leꞌa xa wa utsinga nak ndoꞌ Dios xa na mtuꞌub naꞌ.
\s Jesús ndab leꞌa Judas yun cuent xa
\r (Mt. 26:20-25; Mr. 14:17-21; Lc. 22:21-23)
\p
\v 21 Tsoꞌo na li ndab Jesús ta wa, cha uzheꞌeb kweaꞌ myoꞌo ladna xa. Cha gaꞌal ndab xa ndoꞌ be xmen~xa:
\p —Leꞌa naꞌ gáp ndoꞌ bega leꞌa dub bega yun cuent naꞌ ndoꞌ bexa nlad gut naꞌ.
\p
\v 22 Leꞌa be xmen~xa ni lá iniꞌí ton gun ta na li ndab Jesús wa, ta weꞌe usaxan nwiꞌi bexa ndoꞌ be ltsaꞌa bexa.
\v 23 Leꞌa dub xmen Jesús, xa na leꞌa Jesús uzheꞌeb nkweaꞌ ladna, nsob wats Jesús.
\v 24 Leꞌa Simón Pedr cha mbin sein ndoꞌ xa wa, ndontsa inabdiꞌizh xa ndoꞌ Jesús ná ton xa li gun wa.
\v 25 Leꞌa xa wa cha mas ubisob wats Jesús, cha unabdiꞌizh xa ndab xa:
\p —Señor, ¿ton li yun cuent go zha?
\p
\v 26 Leꞌa Jesús cha ukaꞌab ndab ndoꞌ xa wa:
\p —Leꞌa naꞌ ugazh dub bleꞌa pan ndee. Leꞌa xa na usa naꞌ‑yá ndoꞌ na, leꞌa ta wa xa weꞌe.
\p Leꞌa Jesús cha mgazh dub bleꞌa pan, cha msaꞌa xa‑yá ndoꞌ Judas Iscariot xin Simón.
\v 27 Leꞌa gor na li udaw Judas pan wa, leꞌa maxuꞌu cha uyote len ladoꞌo~xa. Leꞌa Jesús cha ndab ndoꞌ Judas:
\p —Leꞌa ta na li gun lu wa, uxaxtsa bin ta wa.
\p
\v 28 Parea ni dub bexa na li nde ndoꞌ mes wa lá yakbeꞌena xtaꞌan ngi li ndab Jesús.
\v 29 Leꞌa Judas wa xa nlaꞌach med ndantiꞌin bexa wa. Ta weꞌe ncho bexa ndanbeꞌe leꞌa Jesús nlad yaꞌisiꞌi Judas ta guntiꞌin bexa ndoꞌ ujest. No nchoga bexa ndanbeꞌe leꞌa Jesús nlad usaꞌa Judas med ndoꞌ bexa uban nak.
\v 30 Tsoꞌo na li udaw Judas dub bleꞌa pan wa, leꞌa Judas cha utoꞌo nchaꞌa. Leꞌa ta wa gor teꞌal‑la.
\s Dub ta kub unibeꞌe Jesús gun be xmen~xa
\p
\v 31 Weꞌe leꞌa gor yá ukaꞌanla Judas, leꞌa Jesús cha ndab:
\p —Leꞌa nat leꞌa be men iniꞌí xteꞌe siꞌil nak naꞌ, Xa Myak Men Ndoꞌ Gizhliyo. No ta ndun naꞌ wa uluu xteꞌe siꞌil nak Dios.
\v 32 Leꞌa ta na nluu naꞌ ndoꞌ be men xteꞌe siꞌil nak Dios, leꞌa ta ndun Dios noga uluu xteꞌe siꞌil nak naꞌ. Leꞌa ta na gun xa wa yamer gak.
\v 33 Bego nak cuent xiꞌín~naꞌ, yá naꞌantapa kwen nchoꞌo naꞌ lat bega. Leꞌa naꞌ gáp ndoꞌ bega lak ndápla naꞌ ndoꞌ bexa judio nibeꞌe wa: leꞌa bego ukwaꞌan naꞌ, ná leꞌa bega lá gun gan no yaꞌ sa gaa naꞌ.
\v 34 Leꞌa naꞌ nibeꞌe dub ta kub ndoꞌ bega: Bkweaꞌ ladna bega be ltsaꞌa bega. Lak nkweaꞌ lad naꞌ bego, no liga bkweaꞌ ladna bega be ltsaꞌa bega.
\v 35 Tal leꞌa bega li ikweaꞌ ladna be ltsaꞌa~na, leꞌa be men igondoꞌ leꞌa bega xmenka naꞌ.
\s Jesús ndab leꞌa Pedr gab leꞌa lá nchandoꞌ Jesús
\r (Mt. 26:31-35; Mr. 14:27-31; Lc. 22:31-34)
\p
\v 36 Leꞌa Simón Pedr cha unabdiꞌizh ndoꞌ Jesús, ndab xa:
\p —Señor, ¿pa yaꞌ ga zha?
\p Leꞌa Jesús cha ukaꞌab ndab:
\p —Leꞌa sa na yaa naꞌ, leꞌa lu lá yoo gan yaꞌno naꞌ nat. Parea gal zha leꞌa lu noka yaꞌ sa wa.
\p
\v 37 Leꞌa Pedr cha ndab:
\p —Señor, ¿xtaꞌan lá yoo gan gaano naꞌ go nat zhaga? Leꞌa naꞌ usa leꞌaka leꞌa naꞌ gat sakndoꞌ ga.
\p
\v 38 Leꞌa Jesús cha ukaꞌab ndab:
\p —¿Snika lu gat lu sakndoꞌ naꞌ zha? Leꞌa naꞌ gáp ndoꞌ lu leꞌa teꞌal ndee gor na biseata kwezh boy leꞌa lu mkwiꞌinla chon biaj ndab lu leꞌa lu lá nchandoꞌ naꞌ.
\c 14
\s Jesús nak nes ilayaꞌ be men wats Dios
\p
\v 1 ’Lá yuꞌta ladna bega, ndi bgeꞌ ladna bega Dios no bgeꞌ ladna bega naꞌ.
\v 2 Leꞌa ta lid Xus~naꞌ ncho sian sa yoo bega. Leꞌa naꞌ naꞌanpa li gáp ndoꞌ bega tal leꞌa‑yá naꞌanpa li nak. Nat leꞌa naꞌ nsea usaxkwaꞌa sa yoo bega.
\v 3 Leꞌa zha na nsea naꞌ cha usaxkwaꞌa naꞌ be sa yoo bega, weꞌe leꞌa naꞌ leꞌaka ilen yoꞌo bega, ndontsa no bega yoo sa yoꞌo naꞌ.
\v 4 Leꞌa bego uniꞌíka pa nsea naꞌ no nchandoꞌka bega nes nchaꞌa sa wa.
\p
\v 5 Leꞌa Tomás cha ndab:
\p —Señor, leꞌa besa lá iniꞌí pa yaꞌ go. ¿Ta weꞌe xteꞌe ndab go leꞌa besa nchandoꞌ nes nchaꞌa sa wa zha?
\p
\v 6 Leꞌa Jesús cha ukaꞌab ndab:
\p —Leꞌa naꞌ nak nes no nak naꞌ gealngea no nak naꞌ gealnaban. Naꞌan ton ilayaꞌ wats Xus~naꞌ, tal leꞌa xa naꞌanpa ndangea ladna naꞌ.
\v 7 Tal leꞌa bego nchandoꞌ naꞌ, leꞌa bega sgondoꞌka no Xus~naꞌ. Leꞌa nat idub ndoꞌ ndee leꞌa bega yá nchandoꞌ Xus~naꞌ, no mnaꞌla bega xa.
\p
\v 8 Leꞌa Julip cha ndab:
\p —Señor, blaꞌa ga inaꞌ besa Xus~ga, ta weꞌetsa nlad besa.
\p
\v 9 Leꞌa Jesús cha ukaꞌab ndab:
\p —Julip, ¿kwen nkeseano naꞌ bega, ná lá nchandoꞌ lu naꞌ zha? Leꞌa tal ton nchandoꞌ naꞌ, leꞌa xa wa no Xus~naꞌ nchandoꞌ. ¿Xtaꞌan li ndab lu ula naꞌ inaꞌ bega Xus~naꞌ zha?
\v 10 ¿Lá ndangea ladna lu zha leꞌa naꞌ nsea Xus~naꞌ dubtsa nak besa? Leꞌa ta ndadiꞌizh naꞌ naꞌanpa leꞌatsa naꞌ ndadiꞌizh. Leꞌa Xus~naꞌ xa nsoꞌ wats naꞌ nsaꞌa ta li ndun naꞌ wa.
\v 11 Bingea ladna bega ta ndáp naꞌ leꞌa naꞌ nsea Xus~naꞌ dubtsa nak besa. Nati bingea ladna bega naꞌ ke ten be ta ndun naꞌ.
\p
\v 12 ’Leꞌa naꞌ gáp ndoꞌ bega leꞌa tal ton gungea ladna naꞌ, leꞌa xa wa sun ltsaꞌa be ta ndun naꞌ, no gast be ta mas siꞌil sun xa, leꞌa naꞌ nsea wats Xus~naꞌ.
\v 13 No itea be ta inab bega ndoꞌ Xus~naꞌ ta na nak bega xmen~naꞌ, leꞌa ta wa sunka naꞌ ndontsa iniꞌí be men xteꞌe siꞌil nak Xus~naꞌ.
\v 14 Guniꞌi xtaꞌan inab bega ta na nak bega xmen~naꞌ, leꞌa naꞌ sunka ta wa.
\s Jesús ndab leꞌa Dios utuꞌub Espíritu ten na
\p
\v 15 ’Leꞌa tal bega ndankeaka naꞌ, leꞌa bega uxobgek ndoꞌ be ta nibeꞌe naꞌ.
\v 16 Leꞌa naꞌ inaꞌab ndoꞌ Xus~naꞌ, cha utuꞌub xa stub xa gakno bega no yoono xa bega idub tiemp.
\v 17 Leꞌa ta wa Espíritu ten Dios xa na nluu gealngea. Leꞌa be men gizhliyo lá yoo gan yoo wats Espíritu wa, geal leꞌa bexa naꞌanpa naꞌ xa no ni lá nchandoꞌ bexa xa. Parea leꞌa bega nchandoꞌka Espíritu wa, geal leꞌa xa nsoꞌ wats bega no ikeseano xa bega idub tiemp.
\p
\v 18 ’Leꞌa naꞌ naꞌanpa ula yaꞌan bega cuent be meꞌed usaꞌab, leꞌa naꞌ ndi ilenkata.
\v 19 Yamer gal zha leꞌa be men gizhliyo ndee yá naꞌantapa iniꞌí naꞌ, parea leꞌa bega sniꞌíꞌkagal naꞌ. Leꞌa naꞌ sbanka, ta weꞌe no bega ibankaga.
\v 20 Leꞌa gal wizh iban naꞌ leꞌa bega iniꞌí leꞌa naꞌ nsea Xus~naꞌ dubtsa nak besa, no leꞌa bega nsea naꞌ dubtsa nak beuna.
\v 21 Tal ton goꞌón be ta inibeꞌe naꞌ, no uxobgek xa ndoꞌ be ta wa, leꞌa xa wa ta ugeaka ndankea naꞌ. Leꞌa tal ton yankea naꞌ, leꞌa Xus~naꞌ no naꞌ ikweaꞌ ladna xa, no ulundoꞌ naꞌ ndoꞌ xa.
\p
\v 22 Weꞌe leꞌa Judas xa naꞌanpa nsaleaꞌ Iscariot cha ndab ndoꞌ Jesús:
\p —Señor, ¿xtaꞌan li ndoꞌtsa besa ulundoꞌ ga zha, naꞌanpa ulundoꞌ ga ndoꞌ iteata be men zha?
\p
\v 23 Leꞌa Jesús cha ukaꞌab ndab:
\p —Leꞌa tal ton yankeaka naꞌ, leꞌa xa wa sxobgek ndoꞌ ta ndáp naꞌ. Leꞌa Xus~naꞌ cha ikweaꞌ ladna xa. Leꞌa naꞌ no Xus~naꞌ ilen wats xa, cha yoono besa xa.
\v 24 Ná leꞌa tal ton naꞌanpa yankea naꞌ, leꞌa xa wa lá uxobgek ndoꞌ ta ndáp naꞌ. Leꞌa be ta ndáp naꞌ ndoꞌ bega, leꞌa ta wa naꞌanpa ta naꞌtsa ndáp. Leꞌa ta wa ndi ta ndab Xus~naꞌ xa mtuꞌub naꞌ.
\p
\v 25 ’Leꞌa be ta ndee ndáp naꞌ ndoꞌ bega nat bi nsoꞌno naꞌ bega.
\v 26 Parea leꞌa Dios utuꞌub Espíritu ten na ndoꞌ bega, gakno xa bega no yoono xa bega sakndoꞌ naꞌ. Leꞌa xa wa uluu itea taꞌa ndoꞌ bega, no gun xa utseꞌa ladna bega itea be ta ndáp naꞌ ndoꞌ bega.
\p
\v 27 ’Leꞌa zha na uchan naꞌ bega, leꞌa naꞌ gun utsin yoo ladna bega. Leꞌa ta na li gun naꞌ wa naꞌanpa lak ta ndun be men nde ndoꞌ gizhliyo ndee. Ta weꞌe lá yuꞌ ladna bega no lá izheb bega.
\v 28 Leꞌa bega yá mbiꞌínka ta ndáp naꞌ, leꞌa naꞌ nsea, no ilenkagal naꞌ wats bega. Leꞌa tal bega ta ugeaka ndankea naꞌ, leꞌa bega iten ladna geal ndáp naꞌ leꞌa naꞌ nsea wats Xus~naꞌ, geal leꞌa Xus~naꞌ mas nsak ndoꞌ naꞌ.
\v 29 Nattsa ndáp naꞌ ta ndee ndoꞌ bega zha biseata gak‑a ndontsa gal gor gak‑a leꞌa bega mas gungea ladna naꞌ.
\p
\v 30 ’Leꞌa naꞌ naꞌanpa kwenta gudiꞌizhno bega, leꞌa maxuꞌu xa nibeꞌe ndoꞌ gizhliyo ndee nseala. Leꞌa xa wa naꞌanpa nibeꞌe naꞌ ndee.
\v 31 Parea li nsabndoꞌ gak‑a, ndontsa iniꞌí be men nde ndoꞌ gizhliyo ndee leꞌa naꞌ ndankeaka Xus~naꞌ no nxobgek naꞌ ndoꞌ ta nibeꞌe xa.
\p ’Nat gosoꞌ bega, nchaꞌbe beuna.
\c 15
\s Jesús nak cuent dub ya uv
\p
\v 1 ’Leꞌa naꞌ ndee leꞌa xa nak cuent dub ya uv. Leꞌa Xus~naꞌ nak xa na nlaꞌach‑a. \fig |HK00112B.TIF|col|||Dub ya uv|Jn. 15:1\fig*
\v 2 Leꞌa tal ncho xos ya lá usaꞌa uv, leꞌa xa kabtoꞌog‑a. Parea tal leꞌa‑yá nsaꞌaka uv, leꞌa xa ndi utsambiꞌi‑yá ndontsa mas usaꞌa‑yá uv.
\v 3 Leꞌa diꞌizh ndadiꞌizh naꞌ ndoꞌ bega leꞌa mbin msambiꞌi ladoꞌo bega.
\v 4 Dubtsa gok bega no naꞌ, lak nak naꞌ dubtsa no bega. Leꞌa lak dub xos ya naꞌanpa nsob las ya wa lá yoo gan usaꞌa ngus, no liga leꞌa bega lá yoo gan gun lak nlad Dios, tal leꞌa bega naꞌanpa dubtsa gak beuna.
\p
\v 5 ’Leꞌa naꞌ cuent ya uv. Leꞌa bega cuent be xos‑a. Tal leꞌa bega dubtsa nak no naꞌ, leꞌa naꞌ noga dubtsa nak no bega. Weꞌe leꞌa bega sun sianpa be taꞌa nlad Dios. Parea tal leꞌa ncho bega naꞌanpa dubtsa nak no naꞌ, leꞌa bega wa lá isuꞌu gun lak nlad Dios.
\v 6 Leꞌa tal ton naꞌanpa dubtsa nak no naꞌ, leꞌa xa wa cuent dub xos ya yabi dub lad, cha ibid‑a. Weꞌe ibeleꞌe‑yá, cha yolꞌ‑a ndoꞌ giꞌ.
\p
\v 7 ’Leꞌa tal leꞌa bega dubtsa nak no naꞌ, no gunka bega lak mluu naꞌ bega, unab bega guniꞌitsa xtaꞌan nlad bega ndoꞌ Dios, leꞌa Dios saꞌaka‑yá.
\v 8 Tal leꞌa bega gun lak nlad Dios, leꞌa ta wa uluu leꞌa bega xmenka naꞌ, weꞌe iniꞌí be men xteꞌe siꞌil nak Xus~naꞌ.
\v 9 Leꞌa lak nkweaꞌ ladna Xus~naꞌ naꞌ, no liga leꞌa naꞌ nkweaꞌ ladna bega. Lá yalad bega leꞌa naꞌ nkweaꞌ ladna bega.
\v 10 Tal leꞌa bega gun be ta nibeꞌe naꞌ, weꞌe iniꞌí bega leꞌa naꞌ nkweaꞌka ladna bega. Lak ndun naꞌ itea be taꞌa nibeꞌe Xus~naꞌ ta weꞌe uní naꞌ leꞌa xa nkweaꞌka ladna naꞌ.
\v 11 Leꞌa ta wa ndáp naꞌ ndoꞌ bega ndontsa uzheꞌeb iten ladna bega lak nten lad naꞌ.
\p
\v 12 ’Nat ta ndee nibeꞌe naꞌ ndoꞌ bega: bkweaꞌ ladna bega be ltsaꞌa bega, lakta nkweaꞌ lad naꞌ bega.
\v 13 Leꞌa ta na ndon leꞌa mas nluu leꞌa dub men nkweaꞌ ladna stub xa, leꞌa ta wa usaꞌa xa xa gat xa sakndoꞌ be amig ten xa.
\v 14 Nat leꞌa bego nak be amig ten naꞌ, tal leꞌa bega gun ta nibeꞌe naꞌ.
\v 15 Leꞌa naꞌ yá lá gápta leꞌa bega nak bexa ndun tiꞌin ndoꞌ naꞌ, leꞌa dub xa ndun tiꞌin ndoꞌ stub xa lá iniꞌí xtiꞌin ndun xa nibeꞌe xa. Nat ndi gáp naꞌ leꞌa bega be amig ten naꞌ, geal leꞌa naꞌ mbidiꞌizh ndoꞌ bega itea be ta ndab Xus~naꞌ ndoꞌ naꞌ.
\v 16 Leꞌa bega naꞌanpa leꞌa mti naꞌ, leꞌa naꞌ ndi leꞌa mti bega. No ntuꞌub naꞌ bega gun bega ta nlad Dios, ta naꞌanpa initndoꞌ. Weꞌe leꞌa itea ta inab bega ndoꞌ Dios Xus~naꞌ ta na nak bega xmen~naꞌ, leꞌa xa saꞌaka‑yá.
\v 17 Nat nibeꞌe naꞌ ta ndee ndoꞌ bega: bkweaꞌ ladna bega be ltsaꞌa bega.
\s Be men gizhliyo nxee ladna ndoꞌ Jesús no ndoꞌ be xmen~xa
\p
\v 18 ’Tal leꞌa be men gizhliyo ixeeno ladna bega, btseꞌa ladna bega leꞌa bexa wa nedla ndoꞌ naꞌ ndee li nxee ladna, weꞌeta ndoꞌ bego.
\v 19 Tal leꞌa bega nak lak nak be men gizhliyo ndee, leꞌa be men wa utsin sak ndoꞌ bega lak utsin nak bexa ndoꞌ be ltsaꞌa~xa. Parea leꞌa bega naꞌanpa nak men gizhliyo, leꞌa naꞌ mti bega utoꞌo bega lat bexa wa. Ta weꞌe nxeeno ladna bexa bega.
\v 20 Btseꞌa ladna bega ta ndáp naꞌ ndee: Leꞌa dub xa ndun tiꞌin naꞌanpa mas nsak ndoꞌ xa nibeꞌe xa wa. Lak ncho bexa li xela ndanno naꞌ, no liga xela gunno bexa bega. No lak ncho bexa nxobgek ndoꞌ diꞌizh ndáp naꞌ, no liga uxobgekga bexa ndoꞌ ta gab bega.
\v 21 Leꞌa bexa wa li gunno bega ke na nak bega xmen~naꞌ, geal leꞌa bexa lá nchandoꞌ xa mtuꞌub naꞌ.
\p
\v 22 ’Leꞌa tal naꞌ lá ngal ndoꞌ gizhliyo ndee no ni lá ngudiꞌizh naꞌ ndoꞌ bexa, leꞌa ta ugap ndun bexa wa naꞌanpa dub ke ndoꞌ Dios. Parea nat leꞌa bexa lá yoo gan gabbe leꞌa bexa lá iniꞌí ti ta ugap ndun bexa.
\v 23 Leꞌa tal ton ixee ladna ndoꞌ naꞌ, leꞌa xa wa no ndoꞌ Xus~naꞌ nxee ladna.
\v 24 Leꞌa naꞌ mbin be uyon ndoꞌ gaꞌal bexa, ta ni dub men lá gun gan gun. Tal leꞌa bexa naꞌanpa iniꞌí be ta wa, leꞌa bexa naꞌanpa ndap ke ndoꞌ Dios. Parea nat li uniꞌí bexa ta ndun naꞌ wa, ná leꞌa bexa nxee ladna ndoꞌ naꞌ no ndoꞌ Xus~naꞌ.
\v 25 Leꞌa ta wa nak lak nkeaniꞌi ndoꞌ ley ten bexa, ndab‑a: “Leꞌa naꞌ naꞌan xtaꞌan ngunno bexa, ná leꞌa bexa mxeeno ladna naꞌ.”\x + \xo 15:25 \xt Sal. 35:19; 69:4\x*
\p
\v 26 ’Leꞌa gal gor na utuꞌub naꞌ xa gakno bega, leꞌa xa wa itoꞌo wats Xus~naꞌ, cha gudiꞌizh xa ndoꞌ bega cuent ten naꞌ. Leꞌa xa wa Espíritu ten Dios, xa ndadiꞌizh sbeꞌen gealngea.
\v 27 Leꞌa bega cha gudiꞌizh ndoꞌ be men cuent ten naꞌ, geal leꞌa bega leꞌa ukeseano naꞌ zha nedkata usaxan naꞌ mluu naꞌ be men.
\c 16
\p
\v 1 ’Ndáp naꞌ ta ndee ndoꞌ bego ndontsa lá ulaꞌa bega ta ndangea ladna bega naꞌ.
\v 2 Leꞌa be men kontuꞌub bega len be niꞌi sa nzhealbe bexa judio. No gal zha gut bexa bega, gunbeꞌe bexa leꞌa ta wa ta nsak ladna Dios.
\v 3 Li gun bexa geal leꞌa bexa lá nchandoꞌ Xus~naꞌ no ni naꞌ.
\v 4 Leꞌa naꞌ ndáp be ta ndee ndoꞌ bega nat, ndontsa gal gor wa utseꞌa ladna bega leꞌa naꞌ yá mbidiꞌizhka‑yá ndoꞌ bega.
\s Be taꞌa ndun Espíritu ten Dios
\p ’Leꞌa naꞌ naꞌanpa ngáp ta ndee ndoꞌ bega zha nedta, geal leꞌa naꞌ bi leꞌa ukeseano bega.
\v 5 Parea nat leꞌa naꞌ nsea ndoꞌ Xa mtuꞌub naꞌ, ná ni dub bega lá nabdiꞌizh pa yaa naꞌ.
\v 6 Ndi uzheꞌeb uban ncho ladna bega, geal ta na ndáp naꞌ be ta ndee.
\v 7 Parea leꞌa naꞌ gáp mas wen yoo bega tal leꞌa naꞌ yaa. Leꞌa tal naꞌ lá yaa leꞌa Espíritu ten Dios xa gakno bega wa naꞌanpa ilen wats bega. Ná leꞌa tsoꞌo na yaa naꞌ leꞌa naꞌ cha utuꞌub xa wats bega.
\v 8 Leꞌa zha ilen xa leꞌa xa gab ná ton ndap ke, no ton naꞌanpa ndap ke, no ton utsaksi Dios.
\v 9 Leꞌa bexa ndap ke wa, leꞌa ta wa be men lá ndangea ladna naꞌ.
\v 10 Leꞌa xa naꞌanpa ndap ke wa, leꞌa ta wa naꞌ, leꞌa naꞌ nsea wats Xus~naꞌ no yá lá iniꞌíta bega naꞌ.
\v 11 Leꞌa xa utsaksi Dios wa, leꞌa ta wa maxuꞌu xa nibeꞌe ndoꞌ gizhliyo ndee, leꞌa Dios yá mbinbeꞌela leꞌa xa li gunno xa wa.
\p
\v 12 ’Uzhebpa sianta be taꞌa nlad naꞌ gáp naꞌ ndoꞌ bega, parea leꞌa bega lá uxik yakbeꞌena‑yá.
\v 13 Ná leꞌa zha na ilen Espíritu ten Dios xa na nluu gealngea, leꞌa xa wa gun yakbeꞌena bega idub gealngea ten Dios. Leꞌa xa wa naꞌanpa gudiꞌizh ta nitsa xa, leꞌa xa ndi gudiꞌizh be ta goꞌón xa. No gudiꞌizh xa be ta tiꞌi yoo.
\v 14 No uluu xa xteꞌe siꞌil nak naꞌ, geal leꞌa xa gudiꞌizh cuent ten naꞌ ndoꞌ bega.
\v 15 Leꞌa itea be ta ndap Xus~naꞌ leꞌa ta wa ta ten naꞌ. Ta weꞌe ndáp naꞌ leꞌa cuent ten naꞌ leꞌa Espíritu wa gudiꞌizh ndoꞌ bega.
\s Leꞌa ta uban ncho ladna bexa yak ndi ta iten ladna bexa
\p
\v 16 ’Yamer gal zha leꞌa bega yá lá iniꞌíta naꞌ. Parea gal stapla wizh leꞌa bega iniꞌígal naꞌ, geal leꞌa naꞌ yaa wats Xus~naꞌ.
\p
\v 17 Weꞌe leꞌa ncho be xmen Jesús cha ndab ndoꞌ be ltsaꞌa~na:
\p —¿Xtaꞌan gab ta lbaꞌa ndab xa ndee zha? Ndab xa yamer gal zha leꞌa beuna lá iniꞌíta xa, ná gal stapla wizh leꞌa beuna iniꞌígal xa, geal leꞌa xa yaꞌ wats Xus~xa.
\v 18 ¿Xtaꞌan gab “yamer gal zha” wa zha? Lá nyakbeꞌena beuna xtaꞌan ndab xa.
\p
\v 19 Ná leꞌa Jesús mgenna leꞌa bexa nlad inabdiꞌizh, cha ndab Jesús:
\p —Leꞌa bega nabdiꞌizh ndoꞌ ltsaꞌa bega cuent ten ta ndáp naꞌ, leꞌa yamer gal zha leꞌa bega lá iniꞌíta naꞌ, parea gal stapla wizh leꞌa bega iniꞌígal naꞌ.
\v 20 Leꞌa naꞌ gáp ndoꞌ bego leꞌa bega goꞌon no uban yoo ladna bega, parea leꞌa be men gizhliyo iten ladnabe. Mas li uban ncho ladna bega, parea leꞌa ta wa yak ndi ta iten ladna bega.
\v 21 Leꞌa ta wa cuent dub xagots gap meꞌed uzhebpa gealkweaꞌ niꞌí xa geal leꞌa gor gap xa meꞌed wa ngol‑la. Parea gor na ngol‑la medoꞌo leꞌa xa yalad be gealkweaꞌ wa tant nten ladna xa leꞌa ndoꞌ gizhliyo ulanseagal stub meꞌed.
\v 22 No liga nat leꞌa bega uban ncho ladna, parea leꞌa naꞌ inígal bega. Leꞌa gor wa leꞌa bega uzhebpa iten ladna, gast naꞌan ton gun gan uban yoo ladna bega.
\p
\v 23 ’Leꞌa gal wizh wa leꞌa bega yá lá inabdiꞌizhta ndoꞌ naꞌ. Leꞌa naꞌ gáp ndoꞌ bega leꞌa iteanak ta inab bega nak xmenka~naꞌ ndoꞌ Xus~naꞌ, leꞌa xa saꞌaka‑yá.
\v 24 Gast nat naꞌan xtaꞌan nab bega ndoꞌ Xus~naꞌ ta na nak bega xmen~naꞌ. Parea unab bega‑yá, leꞌa Xus~naꞌ saꞌaka‑yá ndontsa itenka ladna bega.
\s Jesús mbinla gan ndoꞌ be ta gizhliyo
\p
\v 25 ’Leꞌa be taꞌa ndadiꞌizh naꞌ wa sbeꞌen ta nsaktabeꞌe naꞌ. Parea gal gor na yá naꞌantapa li gudiꞌizh naꞌ, leꞌa naꞌ ndi gaꞌal gudiꞌizh ndoꞌ bega cuent ten Xus~naꞌ.
\v 26 Leꞌa gal zha weꞌe leꞌa naꞌ naꞌantapa leꞌa inaꞌab ndoꞌ Xus~naꞌ sakndoꞌ bega. Leꞌa bega ndi inab ta nkiꞌin bega ndoꞌ Xus~naꞌ ta na nak bega xmen~naꞌ.
\v 27 Leꞌa Xus~naꞌ leꞌa nkweaꞌ ladna bega, geal leꞌa bega ndankea naꞌ no ndangea ladna bega leꞌa naꞌ watska Dios utoꞌo.
\v 28 Leꞌa naꞌ wats Xus~naꞌ utoꞌo, ndal naꞌ ndoꞌ gizhliyo ndee. Nat leꞌa naꞌ ikaꞌan ndoꞌ gizhliyo ndee, cha nsea naꞌ wats Xus~naꞌ.
\p
\v 29 Leꞌa be xmen Jesús cha ndab:
\p —Nat leꞌa go uzhebpa uyaꞌal ndadiꞌizh. Yá naꞌantapa nsaktabeꞌe ga be ta ndadiꞌizh ga.
\v 30 Nat uniꞌí besa leꞌa go uniꞌí iteanak be taꞌa, naꞌanpa nkiꞌin inabdiꞌizh besa ndoꞌ ga. Ta weꞌe ndangea ladna besa leꞌa go watska Dios utoꞌo.
\p
\v 31 Leꞌa Jesús cha ukaꞌab ndab:
\p —¿Nat zha yá ndangeaka ladna bega naꞌ?
\v 32 Blaꞌach bega leꞌa gal dub gor leꞌa bega iteꞌachso itea lad, ulaꞌa bega nab naꞌ. Parea leꞌa naꞌ naꞌanpa nab yansoꞌ, leꞌa Xus~naꞌ nokaga nsoꞌ wats naꞌ.
\v 33 Leꞌa be ta ndee mbidiꞌizh naꞌ ndontsa wen yoo ladna bega ta na nak bega xmen~naꞌ. Leꞌa ndoꞌ gizhliyo ndee sianpa gealkweaꞌ iniꞌí bega. Parea lá yuꞌ ladna bega, leꞌa naꞌ mbinla gan ndoꞌ itea be ta ncho ndoꞌ gizhliyo ndee.
\c 17
\s Jesús unab gakno Dios be xmen Jesús
\p
\v 1 Leꞌa tsoꞌo na li mbidiꞌizh Jesús, cha mwiꞌi xa gibeꞌa, ndab xa:
\p —Xus~naꞌ, leꞌa nat yá ngol gor uluu ga ndoꞌ be men xteꞌe siꞌil nak naꞌ, ndontsa no naꞌ uluuga xteꞌe siꞌil nak go.
\v 2 Leꞌa go msaꞌa ta nibeꞌe naꞌ ndoꞌ itea be men, ndontsa usa naꞌ gealnaban nunk lá idub ndoꞌ bexa na msaꞌa go ndoꞌ naꞌ.
\v 3 Leꞌa bexa wa ndap gealnaban nunk lá idub, geal leꞌa bexa nchandoꞌ ga, xa ndon leꞌakama nak Dios; no nchandoꞌ bexa naꞌ Jesucristo, xa na mtuꞌub ga.
\p
\v 4 ’Leꞌa naꞌ mluu xteꞌe siꞌil nak go ndoꞌ be men nde ndoꞌ gizhliyo ndee, no msandoꞌ naꞌ tiꞌin msaꞌa go gun naꞌ.
\v 5 Xus~naꞌ, leꞌa zha biseata yoo gizhliyo ndee, leꞌa naꞌ nak xa ndon leꞌa juert lak nak go. Nat blaꞌa ga likagal yak naꞌ wats ga stub biaj.
\p
\v 6 ’Leꞌa go mti bexa ndee ndoꞌ gizhliyo, no msaꞌa ga bexa ndoꞌ naꞌ. Cha mluu naꞌ xteꞌe nak go ndoꞌ bexa. Leꞌa bexa ndee nakla be xmen~ga, cha msaꞌa ga bexa ndoꞌ naꞌ. No nxobgek bexa ndoꞌ diꞌizh ten ga.
\v 7 Nat uniꞌí bexa leꞌa itea be taꞌa ndák naꞌ leꞌa ta wa ta msaꞌaka go.
\v 8 Leꞌa be ta ndab ga ndoꞌ naꞌ wa leꞌa ta wa cha mbidiꞌizh naꞌ ndoꞌ bexa, cha mbingea ladna bexa‑yá. No nat uniꞌíka bexa leꞌa naꞌ watska go utoꞌo, no ndangea ladna bexa leꞌa go leꞌa mtuꞌub naꞌ.
\p
\v 9 ’Leꞌa nat leꞌa naꞌ naꞌab gakno ga bexa ndee. Naꞌanpa naꞌab naꞌ gakno ga be men gizhliyo, leꞌa naꞌ ndi naꞌab gakno ga bexa msaꞌaka go ndoꞌ naꞌ, geal leꞌa bexa wa xmenka go.
\v 10 Leꞌa itea be xmen~naꞌ, leꞌa bexa wa xmenka go. No liga leꞌa itea be xmen~ga, leꞌa bexa wa xmenkaga naꞌ. Li nluu bexa xteꞌe siꞌil nak naꞌ.
\p
\v 11 ’Leꞌa naꞌ yá naꞌantapa yoo ndoꞌ gizhliyo ndee. Leꞌa bexa ndee bi yookata ndoꞌ gizhliyo, ná leꞌa naꞌ ndee ndi ilen wats go. Xus~naꞌ, leꞌa go dubkama nak Dios, nat leꞌa juers ten ga blaꞌach ga bexa na msaꞌa ga ndoꞌ naꞌ, ndontsa dubtsa gak bexa lak dubtsa nak unaꞌ.
\v 12 Leꞌa zha na nkeseano naꞌ bexa ndoꞌ gizhliyo ndee, leꞌa naꞌ nlach bexa nsea juers ten leaꞌ go. Leꞌa itea bexa na msaꞌa ga ndoꞌ naꞌ mlach naꞌ. Ni dub bexa lá isabgix, ndi nabtsa Judas usabgix, ndontsa gak cumplir lak nkeaniꞌi diꞌizh ten ga.
\p
\v 13 ’Parea nat leꞌa naꞌ nseal wats go. Ta ndee ndáp naꞌ nat bi nsoꞌ naꞌ ndoꞌ gizhliyo ndee, ndontsa iten ladna bexa ndee lak nten lad naꞌ.
\v 14 Leꞌa naꞌ mbidiꞌizh be diꞌizh ten ga ndoꞌ bexa ndee, parea leꞌa be men gizhliyo nxeeno ladna bexa, geal leꞌa bexa ndee yá naꞌantapa bexa gizhliyo, lak leꞌa naꞌ naꞌanpa xa gizhliyo ndee.
\v 15 Leꞌa naꞌ naꞌanpa naꞌab koꞌo ga bexa ndee ndoꞌ gizhliyo, ndi naꞌab naꞌ ulaꞌach ga bexa ndoꞌ maxuꞌu.
\v 16 Leꞌa lak naꞌanpa ndun naꞌ lak ndun be men gizhliyo ndee, no liga leꞌa bexa ndee naꞌanpa ndun lak ndun bexa wa.
\v 17 Btsambiꞌi ga ladoꞌo bexa juers ten diꞌizh ten ga, leꞌa diꞌizh wa gealngeaka.
\v 18 Leꞌa lak mtuꞌub ga naꞌ ndoꞌ gizhliyo ndee, no liga ntuꞌub naꞌ bexa ndee ndoꞌ be men gizhliyo.
\v 19 Leꞌa ke ten bexa ndee ndun naꞌ sbeꞌen ta nlad go, ndontsa no bexa gun sbeꞌen ta nladtsa go wa, ta na nchandoꞌ bexa gealngea wa.
\p
\v 20 ’Leꞌa naꞌ naꞌanpa naꞌab gakno ga nabtsa bexa ndee, no naꞌab naꞌ gakno ga bexa tiꞌi gungea ladna naꞌ gor na goꞌón bexa ta gudiꞌizh bexa ndee.
\v 21 Gokno ga bexa wa ndontsa dubtsa gak iteanak bexa, lak dubtsa nak naꞌ nsea go Xus~naꞌ. No dubtsa gak bexa nsea beuna, ndontsa gungea ladna be men gizhliyo leꞌa go leꞌaka mtuꞌub naꞌ.
\v 22 Lak msaꞌa ga juers ndoꞌ naꞌ, no liga msa naꞌ juers ndoꞌ bexa, ndontsa dubtsa gak bexa, lak leꞌa go no naꞌ dubtsa nak.
\v 23 Leꞌa naꞌ nsea bexa ndee dubtsa nak, no go nsea naꞌ dubtsa nak, ndontsa itea beuna dubtsa gak. Ta weꞌe iniꞌí be men leꞌa go leꞌaka mtuꞌub naꞌ, no iniꞌí bexa leꞌa go nkweaꞌ ladna bexa ndee lak nkweaꞌ ladna go naꞌ.
\p
\v 24 ’Xus~naꞌ, leꞌa naꞌ nlad leꞌa sa yoo naꞌ itea bexa na msaꞌa ga ndoꞌ naꞌ wa yoo wats naꞌ, ndontsa iniꞌí bexa juers msaꞌa go ndoꞌ naꞌ, geal leꞌa go nkweaꞌ ladna naꞌ gast zha biseata gakndeꞌe gizhliyo.
\v 25 Xus~naꞌ xa ndon leꞌa wen, leꞌa be men gizhliyo naꞌanpa nchandoꞌ ga, parea leꞌa naꞌ nchandoꞌ ga no uniꞌíka bexa ndee leꞌa go leꞌa mtuꞌub naꞌ.
\v 26 Leꞌa naꞌ mluu ndoꞌ bexa ndee xteꞌe nak go, no uluuta naꞌ ta wa ndoꞌ bexa, ndontsa ikweaꞌ ladna bexa be ltsaꞌa bexa lak nkweaꞌ ladna go naꞌ, no dubtsa gak naꞌ nsea bexa ndee.
\c 18
\s Be soldad nchaꞌbesen Jesús
\r (Mt. 26:47-56; Mr. 14:43-50; Lc. 22:47-53)
\p
\v 1 Leꞌa gor na li mtayadiꞌizhno Jesús Dios, cha utoꞌo xa nchaꞌano xa be xmen~xa stub toꞌo yoꞌow nsaleaꞌ Cedrón, sa nde dub lenya. Cha uyote bexa sa wa.
\v 2 Leꞌa Judas xa na yun cuent Jesús no nchandoꞌ sa wa, geal leꞌa Jesús sianla biaj mbiꞌi be xmen~na sa wa.
\v 3 Ngol gor leꞌa Judas nchaꞌanola pla be soldad no stapla bexa nlaꞌach niꞌi ten Dios, bexa na mtuꞌub be uleꞌay nibeꞌe nsea bexa fariseo. Leꞌa bexa wa noꞌo be xeꞌa aceit no xeꞌa ged no spad.
\v 4 Ná leꞌa Jesús yá uniꞌíka xtaꞌan yasea xa, ta weꞌe utoꞌo xa ndab xa ndoꞌ bexa wa:
\p —¿Ton nkwaꞌan bega?
\p
\v 5 Leꞌa bexa wa cha ukaꞌab ndab:
\p —Leꞌa besa nkwaꞌan Jesús xa gezh Nazaret.
\p Leꞌa Jesús cha ndab:
\p —Leꞌa ta wa naꞌ.
\p Leꞌa Judas xa na nseayun cuent Jesús no nsoꞌ lat bexa wa.
\v 6 Leꞌa gor na li ndab Jesús: “Leꞌa ta wa naꞌ”, leꞌa bexa wa cha msatatsoꞌobe, cha ulayat bexa ndoꞌ yo.
\v 7 Leꞌa Jesús cha unabdiꞌizhgal ndab:
\p —¿Ton nkwaꞌan bega?
\p Leꞌa bexa cha ndabgal:
\p —Nkwaꞌan besa Jesús xa Nazaret.
\p
\v 8 Leꞌa Jesús cha ndab:
\p —Leꞌa naꞌ ndápka leꞌa ta wa naꞌ. Leꞌa tal bega naꞌ ndee nkwaꞌan, blaꞌa bega yaꞌ bexa ndee.
\p
\v 9 Li ndab Jesús ndontsa itid‑a lak ndab leꞌaka Jesús ndoꞌ Xus~xa, leꞌa bexa na msaꞌa Dios ndoꞌ Jesús, ni dub bexa lá isabgix.
\v 10 Weꞌe leꞌa Simón Pedr cha uloꞌo spad ten na, cha ulobtoꞌog xa nchaꞌ~xa nsaleaꞌ Malco, ta lad gaꞌal. Leꞌa Malco wa dub xa ndun tiꞌin ndoꞌ uleꞌay ndon leꞌa nsak.
\v 11 Leꞌa Jesús cha ndab ndoꞌ Pedr:
\p —Ulochaꞌaw spad ten lu. ¿Lá iniꞌí lu zha leꞌa naꞌ nsabndoꞌ itiꞌid be gealkweaꞌ ndab Xus~naꞌ itiꞌid naꞌ wa?
\s Bexa mbiꞌi Jesús ndoꞌ Anás
\r (Mt. 26:57-58; Mr. 14:53-54; Lc. 22:54)
\p
\v 12 Weꞌe leꞌa be soldad no xa nibeꞌe ten bexa wa no bexa nlaꞌach niꞌi ten Dios cha usen bexa Jesús no mxi bexa yaꞌa~xa.
\v 13 Cha mbiꞌi bexa Jesús ndon ned ndoꞌ xa nsaleaꞌ Anás, xuszhaꞌap Caifás, xa nak uleꞌay ndon leꞌa nsak tiemp weꞌe.
\v 14 Leꞌa Caifás wa xa na ndabka ndoꞌ bexa judio mas wen gat dubtsa men sakndoꞌ itea bexa.
\s Pedr ndab leꞌa lá nchandoꞌ Jesús
\r (Mt. 26:69-70; Mr. 14:66-68; Lc. 22:55-57)
\p
\v 15 Leꞌa Simón Pedr cha usankea tsoꞌo Jesús. Leꞌa stub xmen Jesús nchaꞌano Pedr nchandoꞌ xa nak uleꞌay ndon leꞌa nsak, cha uyoꞌono xa Jesús tale ten niꞌi ten uleꞌay wa.
\v 16 Parea leꞌa Pedr myansoꞌ tsoꞌo juer toꞌo puert wa. Weꞌe leꞌa stub xmen Jesús xa na nchandoꞌ uleꞌay wa, cha utoꞌo mbidiꞌizhno xagots nlaꞌach toꞌo puert wa, ndontsa no Pedr uyote.
\v 17 Leꞌa xa nlaꞌach toꞌo puert wa cha ndab ndoꞌ Pedr:
\p —¿Lid no ga dub xmen xabgiꞌi baꞌ zha?
\p Leꞌa Pedr cha ndab:
\p —Leꞌa naꞌ naꞌanpa no xa wa.
\p
\v 18 Leꞌa zha wa kwal, ta weꞌe leꞌa bexa ndun tiꞌin ndoꞌ uleꞌay wa no bexa nlaꞌach niꞌi ten Dios mkwaꞌa giꞌ, cha ndeubizh bexa. Leꞌa lat bexa wa no Pedr nsoꞌubizh.
\s Uleꞌay ndon leꞌa nsak wa unabdiꞌizh ndoꞌ Jesús
\r (Mt. 26:59-66; Mr. 14:55-64; Lc. 22:66-71)
\p
\v 19 Leꞌa Anás xa ngok uleꞌay ndon leꞌa nsak wa cha unabdiꞌizh ndoꞌ Jesús ná ton be xmen Jesús, no xtaꞌan mluu Jesús be men.
\v 20 Leꞌa Jesús cha ukaꞌab ndab:
\p —Leꞌa ta mluu naꞌ wa mbidiꞌizh naꞌ ndoꞌ gaꞌal be men len be niꞌi sa ndaꞌutsid bexa wa no tale ten niꞌi ten Dios, sa nzhealbe iteanak bexa judio. Naꞌanpa xgaꞌach nluu naꞌ be men.
\v 21 ¿Ta weꞌe xtaꞌan nabdiꞌizh ga ndoꞌ naꞌ xtaꞌan mluu naꞌ? Ndi nsabndoꞌ inabdiꞌizh ga ndoꞌ bexa mbiꞌín ta mluu naꞌ wa ná xtaꞌan mbidiꞌizh naꞌ ndoꞌ bexa. Leꞌa bexa uniꞌíka‑yá.
\p
\v 22 Leꞌa gor na li ndab Jesús, leꞌa dub men nsoꞌ sa wa cha utichyaꞌa ndoꞌ Jesús, leꞌa xa dub xa nlaꞌach niꞌi ten Dios. Cha ndab xa ndoꞌ Jesús:
\p —¡Naꞌanpa li nsabndoꞌ ikaꞌab lu ndoꞌ uleꞌay ndon leꞌa nsak baꞌ!
\p
\v 23 Leꞌa Jesús cha ndab:
\p —Tal leꞌa naꞌ ugap ndáp, gud ga ná xtaꞌan lid leꞌa ndáp naꞌ. Ná tal naꞌ leꞌakaga ndáp, ¿xtaꞌan ngi utichyaꞌa ga ndoꞌ naꞌ zha?
\p
\v 24 Weꞌe litsa nchii Jesús leꞌa Anás mtuꞌub xa ndoꞌ Caifás, xa nak uleꞌay ndon leꞌa nsak.
\s Pedr ndab stop biaj leꞌa lá nchandoꞌ Jesús
\r (Mt. 26:71-75; Mr. 14:69-72; Lc. 22:58-62)
\p
\v 25 Ndalen li nsoꞌubizhnota Pedr bexa wa, leꞌa dub xa cha unabdiꞌizh ndoꞌ Pedr ndab:
\p —¿Lid no go xmen xabgiꞌi baꞌ zha?
\p Leꞌa Pedr cha ndabgal:
\p —Leꞌa naꞌ naꞌanpa xmen~xa baꞌ.
\p
\v 26 Leꞌa sa wa no dub xa ndun tiꞌin ndoꞌ uleꞌay ndon leꞌa nsak wa nsoꞌ, dub ltsaꞌa~xa na ulobtoꞌog Pedr nchaꞌ~na wa. Cha ndab xa ndoꞌ Pedr:
\p —¿Naꞌanpa go ta uní naꞌ lenya wa no xabgiꞌi baꞌ zha?
\p
\v 27 Leꞌa Pedr cha ndabgal stub biaj:
\p —Leꞌa naꞌ naꞌanpa leꞌa ta wa.
\p Leꞌa gor wa leꞌa dub boy cha utezh.
\s Jesús nsoꞌ ndoꞌ Pilat
\r (Mt. 27:1-2, 11-14; Mr. 15:1-5; Lc. 23:1-5)
\p
\v 28 Leꞌa gor yá nsayatla xeꞌa, cha utoꞌono bexa Jesús ta lid Caifás, mbiꞌi bexa Jesús ta lid Pilat, sa nsaleaꞌ pretorio. Parea leꞌa bexa nibeꞌe ten bexa judio naꞌanpa yatebe len niꞌi wa, leꞌa tal leꞌa bexa yate sa wa leꞌa bexa gak bzhiꞌik ndoꞌ Dios, cha lá yoo gan gaw bexa ta ten ujest Pascua.
\v 29 Ta weꞌe leꞌa Pilat ndi utoꞌo gast sa ndebe bexa, cha ndab xa ndoꞌ bexa wa: \fig |cn01825B.tif|col|||Jesús nsoꞌ ndoꞌ Pilat|Jn. 18:29\fig*
\p —¿Xtaꞌan nsake bega xa ndee zha?
\p
\v 30 Leꞌa bexa wa cha ukaꞌab ndab:
\p —¡Tal leꞌa xa baꞌ naꞌanpa xa ugap, leꞌa besa naꞌanpa yun cuent xa ndoꞌ ga!
\p
\v 31 Weꞌe leꞌa Pilat cha ndab:
\p —Biꞌi bega xa. Cha binno bega xa lak nibeꞌe ley ten bega.
\p Leꞌa bexa wa cha ndabbe ndoꞌ Pilat:
\p —Leꞌa bega xa Roma naꞌanpa ulaꞌa gut besa dub men.
\p
\v 32 Li ngok cumplir ta mbidiꞌizh Jesús xteꞌe gat Jesús ndoꞌ cruz.
\v 33 Weꞌe leꞌa Pilat cha myoꞌogal len lid~na, cha utezh xa Jesús, cha ndab xa:
\p —¿Lu nak xa nibeꞌe ten bexa judio zha?
\p
\v 34 Leꞌa Jesús cha ukaꞌab ndab:
\p —¿Gotsa mbinbeꞌe ta wa zha? ¿Nati stub men mbidiꞌizh‑a ndoꞌ ga?
\p
\v 35 Leꞌa Pilat cha ndab:
\p —Leꞌa naꞌ ndee naꞌanpa xa judio. Leꞌa be ltsaꞌa~lu xa judio no be uleꞌay nibeꞌe wa myun cuent lu ndoꞌ naꞌ. ¿Xtaꞌan mbin lu zha?
\p
\v 36 Leꞌa Jesús cha ukaꞌab ndab:
\p —Leꞌa naꞌ naꞌanpa nibeꞌe lak nibeꞌe bexa ndoꞌ gizhliyo ndee. Leꞌa tal naꞌ li nibeꞌe, leꞌa be xmen~naꞌ leꞌa kuyobe ndontsa naꞌanpa yak cuent naꞌ ndoꞌ yaꞌa bexa judio. Parea leꞌa naꞌ naꞌanpa li nibeꞌe.
\p
\v 37 Leꞌa Pilat cha ndab:
\p —¿Nat zha xa nibeꞌeka lu?
\p Leꞌa Jesús cha ukaꞌab ndab:
\p —Leꞌa go ndab leꞌa naꞌ nak xa nibeꞌe wa. Leꞌa naꞌ ngol, no ndal naꞌ ndoꞌ gizhliyo ndee ndontsa gudiꞌizh naꞌ gealngea ndoꞌ be men. Leꞌa tal ton nkwaꞌan gealngea, leꞌa xa wa isakyoꞌón ta ndáp naꞌ.
\p
\v 38 Leꞌa Pilat cha ndab:
\p —¿Xtaꞌan gealngea wa zha?
\s Pilat ndab gat Jesús
\r (Mt. 27:15-31; Mr. 15:6-20; Lc. 23:13-25)
\p Tsoꞌo na li ndab Pilat, cha utoꞌogal xa sa ndebe be men wa, cha ndab xa:
\p —Leꞌa naꞌ lá ngaizheal ni dub ke ten xa ndee.
\v 39 Leꞌa lak nak costumbr ten bega itea liꞌin zha ndal ujest Pascua leꞌa naꞌ ngo dub men litgiꞌib dub xa inab bega. ¿Nat nlad bega ula naꞌ xa nak xa nibeꞌe ten bega xa judio zha?
\p
\v 40 Weꞌe leꞌa iteagal bexa ugeꞌ ndab:
\p —¡Naꞌanpa ulaꞌa ga xa baꞌ! ¡Bgoꞌo ga ndi Barrabás!
\p Leꞌa Barrabás wa dub waꞌan.
\c 19
\p
\v 1 Weꞌe leꞌa Pilat cha unibeꞌe goꞌo be soldad Jesús len niꞌi wa, cha kin bexa Jesús.
\v 2 No mbindeꞌe be soldad dub ta rued xos yagich usob gek Jesús cuent coron. No mgak bexa Jesús dub lad koꞌol, ta konch ugats.
\v 3 Cha usalad mbinno be soldad Jesús, ugeꞌ ndab bexa:
\p —¡Siꞌil nak xa nibeꞌe ten bexa judio!
\p No utichyaꞌa bexa ndoꞌ Jesús.
\p
\v 4 Weꞌe leꞌa Pilat cha utoꞌogal stub biaj, cha ndab xa ndoꞌ be men wa:
\p —Bwiꞌi bega, leꞌa naꞌ ko xa sa ndee, ndontsa yakbeꞌena bega leꞌa naꞌ ni dub ke ten xa lá ngaizheal.
\p
\v 5 Leꞌa Jesús cha utoꞌo, nsob coron yagich wa gek~xa, no lad konch ugats wa nak xa. Leꞌa Pilat cha ndab ndoꞌ be men:
\p —Nat bwiꞌi bega xa.
\p
\v 6 Leꞌa gor na uniꞌí be uleꞌay nibeꞌe no bexa nlaꞌach niꞌi ten Dios wa Jesús, cha ugeꞌ ndab bexa:
\p —¡Ikea xa ndoꞌ cruz! ¡Ikea xa ndoꞌ cruz!
\p Leꞌa Pilat cha ndab:
\p —Biꞌi bega xa, cha bkeꞌa bega xa ndoꞌ cruz, leꞌa naꞌ ni dub ke ten xa lá ngaizheal.
\p
\v 7 Leꞌa bexa wa cha ndabbe:
\p —Leꞌa ley ten besa ndab nsabndoꞌ gatka xa, leꞌa xa nkwiꞌin ndab xa leꞌa xa nak Xin Dios.
\p
\v 8 Leꞌa gor na mbiꞌín Pilat ta wa, leꞌa Pilat mas mzheb.
\v 9 Cha myoꞌogal xa len lid~xa, ndab xa ndoꞌ Jesús:
\p —¿Pa utoꞌo lu zha?
\p Parea leꞌa Jesús naꞌanpa ikaꞌab.
\p
\v 10 Leꞌa Pilat cha ndab:
\p —¿Naꞌanpa ikaꞌab lu ndoꞌ naꞌ ndee zha? ¿Lá iniꞌí lu zha leꞌa naꞌ sak inibeꞌe ikea lu ndoꞌ cruz, no sak ndi ula naꞌ lu?
\p
\v 11 Leꞌa Jesús cha ukaꞌab ndab:
\p —Leꞌa tal Dios lá usaꞌa diꞌizh li gun ga, leꞌa go naꞌan xtaꞌan gun gan gunno naꞌ. Ta weꞌe leꞌa xa na myun cuent naꞌ ndoꞌ ga mas uzheꞌeb ndap ke ndoꞌ lak ndap go.
\p
\v 12 Leꞌa gor weꞌe leꞌa Pilat nlad ulaꞌa Jesús, parea leꞌa bexa judio ugeꞌ ndab ndoꞌ Pilat:
\p —Leꞌa tal go ulaꞌa xa baꞌ, leꞌa go naꞌanpa nak amig ten César xa nibeꞌe. Leꞌa tal ton gab leꞌa nak xa nibeꞌe, leꞌa xa wa xela níꞌi ndoꞌ César.
\p
\v 13 Weꞌe leꞌa gor na mbiꞌín Pilat ta wa, cha mbiꞌi xa Jesús sa nsaleaꞌ Tale Geꞌ. Leꞌa sa wa nsaleaꞌ Gabata diꞌizh hebreo. Cha usob Pilat sa nibeꞌe xa sa wa, gab xa ná xteꞌe gunno xa Jesús.
\v 14 Leꞌa ta wa gawizh dub wizh lak geꞌatsa gal ujest Pascua. Cha ndab Pilat ndoꞌ be men kwaꞌad wa:
\p —¡Bwiꞌi bega leꞌa xa ndee xa nibeꞌe ten bega!
\p
\v 15 Ná leꞌa bexa wa ugeꞌ ndabbe:
\p —¡Gat xa! ¡Gat xa! ¡Ikea xa ndoꞌ cruz!
\p Leꞌa Pilat cha ndab:
\p —¿Ukeꞌa naꞌ xa nibeꞌe ten bega ndoꞌ cruz zha?
\p Leꞌa be uleꞌay nibeꞌe cha ndabbe:
\p —¡Nab César nak xa nibeꞌe ten besa!
\p
\v 16 Weꞌe leꞌa Pilat cha ndab ikea Jesús ndoꞌ cruz lak nlad bexa. Cha usen be soldad Jesús, cha mbiꞌi bexa xa.
\s Mkeꞌa bexa Jesús ndoꞌ cruz
\r (Mt. 27:32-44; Mr. 15:21-32; Lc. 23:26-43)
\p
\v 17 \fig |cn01833B.tif|col|||Jesús nchaꞌano cruz ten na|Jn. 19:17\fig*Leꞌa Jesús cha nchaꞌano cruz ten na gast sa nsaleaꞌ Gólgota. Leꞌa ta wa dub diꞌizh hebreo gab‑a tit gek men.
\v 18 Cha mkeꞌa bexa Jesús ndoꞌ cruz. No stop men mkeꞌa bexa ndoꞌ cruz dub lad gaꞌga wats Jesús.
\v 19 No mkeꞌa Pilat dub letr ta ikea gek cruz ten Jesús. Leꞌa ta wa ndab: “JESÚS XA NAZARET, XA NIBEꞋE TEN BEXA JUDIO.”
\v 20 Leꞌa ta wa nkeaniꞌi diꞌizh hebreo no diꞌizh griego no diꞌizh latín. Kwaꞌad bexa judio uniꞌí xteꞌe ndab letr wa, geal leꞌa sa nkea Jesús ndoꞌ cruz wa gax nde Jerusalén.
\v 21 Ná leꞌa be uleꞌay nibeꞌe ten bexa judio ngwaꞌyab ndoꞌ Pilat:
\p —Lá nsabndoꞌ gab ta wa “Xa nibeꞌe ten bexa judio.” Ndi nsabndoꞌ gab‑a “Xa na ndab leꞌa nak xa nibeꞌe ten bexa judio.”
\p
\v 22 Ná leꞌa Pilat cha ukaꞌab ndab:
\p —Lak nkea‑yá, litsa yaꞌan‑a.
\p
\v 23 Leꞌa tsoꞌo na mkeꞌa dap be soldad Jesús ndoꞌ cruz, cha ukaꞌa kadga dub bexa wa dub xab Jesús. Cha usen bexa lad koꞌol ndak Jesús, leꞌa ná wa naꞌanpa ngeꞌal.
\v 24 Cha ndab bexa ndoꞌ be ltsaꞌa~xa:
\p —Naꞌanpa itsaw beuna ta ndee, ndi koꞌo beuna dub suert ndontsa iniꞌí beuna ná ton ikaꞌa‑yá.
\p Li ngok‑a lak nkeaniꞌi diꞌizh ten Dios, ndab‑a:
\b
\q1 Mtseꞌa bexa be xab~naꞌ,
\q2 no uloꞌo bexa suert ná ton ikaꞌa‑yá.\x + \xo 19:24 \xt Sal. 22:18\x*
\b
\p
\v 25 Leꞌa wats cruz ten Jesús wa nsoꞌ xnaꞌa Jesús no beal~xa, no Marí xagots ten Cleofas, no Marí xa gezh Magdala.
\v 26 Leꞌa gor na uniꞌí Jesús xnaꞌa~na junt nsoꞌ wats dub xmen Jesús, xa na leꞌa Jesús uzheꞌeb nkweaꞌ ladna, cha ndab Jesús ndoꞌ xnaꞌa~na:
\p —Naa, leꞌa xa baꞌ ulaꞌach ga cuent dub xin~ga nat.
\p
\v 27 Cha no ndab Jesús ndoꞌ xmen~xa wa:
\p —Nat ulaꞌach lu xa baꞌ cuent xnaꞌa~lu.
\p Leꞌa idub ndoꞌ wa leꞌa xmen Jesús wa cha mlaꞌach xnaꞌa Jesús ta lidka~na.
\s Ngut Jesús ndoꞌ cruz
\r (Mt. 27:45-56; Mr. 15:33-41; Lc. 23:44-49)
\p
\v 28 Ngol tsoꞌo wa leꞌa Jesús uniꞌíka leꞌa xa mbinla itea be ta nlad Dios gun xa. Cha ndab xa:
\p —Leꞌa naꞌ ndak ladna.
\p Leꞌa xa li ndab ndontsa gak‑a lak nkeaniꞌi diꞌizh ten Dios.
\p
\v 29 Leꞌa sa wa nsoꞌ dub vas ncho vin ulaꞌ len‑a. Cha mgazh bexa dub bleꞌa lad xiꞌil len‑a. Cha msob xa ta wa gek dub xos ya hisopo, cha uxits bexa ta wa toꞌo Jesús.
\v 30 Leꞌa gor na ngu Jesús ta wa, cha ndab xa:
\p —Nat leꞌa itea be tiꞌin ndal naꞌ ngokla cumplir.
\p Cha ubixkea gen~xa, cha myun xa cuent gealnaban ten xa ndoꞌ Dios, cha ngut xa.
\s Dub soldad utib lanza wats len Jesús
\p
\v 31 Leꞌa ta wa wizh lak geꞌatsa gal ujest Pascua, ta weꞌe leꞌa bexa judio lá nlad litsa nkea be men wa ndoꞌ be cruz gal wizh uneꞌe bexa wa, leꞌa wizh wa uzhebpa dub wizh nsak. Ta weꞌe unab bexa ndoꞌ Pilat inibeꞌe Pilat kiꞌich be soldad xoꞌo bexa li nkea ndoꞌ cruz, ndontsa mas uxax gat bexa, cha igeꞌe bexa ndoꞌ cruz wizh wa.
\v 32 Leꞌa be soldad wa cha ulenbe, cha utiꞌich bexa xoꞌo dub xa wa. Cha liga mbinno bexa stubga xa nkea ndoꞌ cruz wa.
\v 33 Ná leꞌa gor ngol bexa sa nkea Jesús, leꞌa bexa mnaꞌla leꞌa Jesús ngutla. Cha naꞌanpa igiꞌich bexa xoꞌo Jesús.
\p
\v 34 Parea leꞌa dub soldad wa cha utib dub lanza wats len Jesús. Zha leꞌa sa wa ulen ten no nits.
\v 35 Leꞌa naꞌ ndee uní ta wa no sbeꞌen gealngea ndadiꞌizh naꞌ. Ta weꞌe nkeꞌa naꞌ‑yá, ndontsa no bega gungea ladna Jesús.
\v 36 Leꞌa be ta wa li uyoꞌo lak nkeaniꞌi diꞌizh ten Dios, ndab‑a: “Ni dub tit las~xa lá ngach.”\x + \xo 19:36 \xt Ex. 12:46; Nm. 9:12; Sal. 34:20\x*
\v 37 No lak nkeaniꞌiga diꞌizh ten Dios: “Leꞌa be men iwiꞌi ndoꞌ xa na utib bexa lanza las~na wa.”\x + \xo 19:37 \xt Zac. 12:10\x*
\s Mgaꞌach Jesús
\r (Mt. 27:57-61; Mr. 15:42-47; Lc. 23:50-56)
\p
\v 38 Uyoꞌo dub xabgiꞌi nsaleaꞌ Kosé xa gezh Arimatea, dub xa xgaꞌachtsa ndangea ladna Jesús, geal leꞌa xa nzheb ndoꞌ bexa nibeꞌe ten bexa judio. Leꞌa tsoꞌo na ngut Jesús leꞌa Kosé wa ngwaꞌinab Jesús xa ngut wa ndoꞌ Pilat. Leꞌa Pilat cha ndab goꞌo Kosé Jesús, cha ngwaꞌ Kosé cha mbiꞌi xa Jesús.
\v 39 No Nicodemo xa ngwaꞌinaꞌ Jesús dub gor teꞌal noꞌo xa pa dub galntiꞌi kil ta uxeꞌe, noch‑a mirra nsea áloe.
\v 40 Cha uxeꞌe bexa Jesús ndoꞌ cruz, cha mtixko bexa xa wa be lad lino no be ta uxeꞌe wa, lak nkaꞌach bexa judio be ltsaꞌa~na.
\v 41 Leꞌa sa li ukea Jesús ndoꞌ cruz wa nde gax dub lenya, sa nde dub baꞌa cuent geꞌloꞌo. Leꞌa ta wa dub sa ni dub men gol gaꞌach.
\v 42 Leꞌa gor wa yamer gal wizh ten ujest Pascua ten bexa judio, ta weꞌe baꞌa weꞌetsa mkaꞌach bexa Jesús, leꞌa ta wa gax nsob sa wa.
\c 20
\s Jesús mban
\r (Mt. 28:1-10; Mr. 16:1-8; Lc. 24:1-12)
\p
\v 1 Leꞌa ngol wizh ned ten sman, uzhebpa tempran ndon bi ukaw naꞌ, leꞌa Marí xa Magdala nchaꞌa sa nsob baꞌa mgaꞌach Jesús. Leꞌa gor ulayaꞌ xa uniꞌíla xa leꞌa geꞌ nsoꞌntsaw toꞌo baꞌa wa myoꞌobla.
\v 2 Weꞌe cha utoꞌo xa karrel, ngwaꞌyab xa‑yá ndoꞌ Simón Pedr no ndoꞌ stub xmen Jesús, xa na leꞌa Jesús uzheꞌeb nkweaꞌ ladna. Ndab Marí ndoꞌ bexa wa:
\p —Leꞌa men mbiwaꞌan Jesús len baꞌa wa. Leꞌa besa lá iniꞌí pa ngwaꞌulaꞌa bexa xa.
\p
\v 3 Leꞌa Pedr no stub xmen Jesús wa cha utoꞌo nchaꞌbe sa nsob baꞌa wa.
\v 4 Leꞌa bexa wa karrel nchaꞌbe, parea leꞌa stub xa wa mas karrel nchaꞌa ndoꞌ Pedr, cha ned xa ulayaꞌ toꞌo baꞌa.
\v 5 Cha mwiꞌiko xa len baꞌa, uniꞌí xa be lad lino myuꞌudyoꞌo Jesús, parea lá yoꞌo xa len wa.
\v 6 Weꞌe cha ulen Simón Pedr, cha uyoꞌo xa len baꞌa wa, cha uniꞌí xa be lad wa.
\v 7 No uniꞌí xa leꞌa lad ubixyoꞌo gek Jesús myuꞌudla, naꞌanpa junt nde‑yá no be lad ubixyoꞌo idub Jesús wa.
\v 8 Weꞌe leꞌa stub xmen Jesús, xa na li ned ulayaꞌ wa, cha no uyoꞌo. Uniꞌí xa be taꞌa wa, cha mbingea ladna xa leꞌa Jesús mbanka.
\v 9 Leꞌa gor weꞌe leꞌa bexa bi lá nyakbeꞌena lak nkeaniꞌi diꞌizh ten Dios, leꞌa Cristo nsabndoꞌka iban ndoꞌ gealgut.
\v 10 Leꞌa itop bexa wa cha nseaꞌbe ta niꞌi ndencho bexa.
\s Jesús mlundoꞌ ndoꞌ Marí xa gezh Magdala
\r (Mr. 16:9-11)
\p
\v 11 Leꞌa Marí xa Magdala cha myansoꞌ wats baꞌa wa ndoꞌon xa, cha mwiꞌiko xa len baꞌa wa.
\v 12 Cha uniꞌí xa top angel ten Dios nak be lad nagud. Dub xa nsob sa ngot gek Jesús, leꞌa stub xa nsob sa ute yaꞌaxoꞌo Jesús.
\v 13 Leꞌa be angel wa cha unabdiꞌizh ndoꞌ Marí ndab bexa:
\p —Xagots, ¿xtaꞌan ndoꞌon lu zha?
\p Leꞌa Marí cha ndab:
\p —Leꞌa be men mbiwaꞌan Señor Jesús. Leꞌa naꞌ lá iní pa ngwaꞌulaꞌa bexa xa.
\p
\v 14 Tsoꞌo na li ndab Marí, cha mgeaksoꞌ xa mwiꞌi xa stub lad. Cha uniꞌí xa Jesús nsoꞌ sa wa, ná leꞌa xa lá igondoꞌ ti leꞌa Jesús ta wa.
\v 15 Leꞌa Jesús cha ndab:
\p —Xagots, ¿xtaꞌan ndoꞌon lu zha? ¿Ton nkwaꞌan lu zha?
\p Leꞌa Marí mbinbeꞌe leꞌa ta wa xa nlaꞌach lenya wa, cha ndab Marí:
\p —Señor, tal ga leꞌa mbiꞌi xa, gud go ná pa ngwaꞌulaꞌa ga xa, ndontsa gayoo naꞌ xa.
\p
\v 16 Leꞌa Jesús cha ndab:
\p —¡Marí!
\p Leꞌa xa cha mgeaksoꞌ mwiꞌi ndoꞌ Jesús, cha ndab xa:
\p —¡Raboni! —leꞌa ta wa dub diꞌizh hebreo gab‑a Mech.
\p
\v 17 Leꞌa Jesús cha ndab:
\p —Lá ugal lu naꞌ, leꞌa naꞌ biseata ikea wats Xus~naꞌ. Ndi byaꞌyab ndoꞌ be xmen~naꞌ leꞌa naꞌ yaa wats Xus~naꞌ xa nak Dios ten naꞌ. Leꞌa ta wa leꞌakaga Xus bega no Dios ten bega.
\p
\v 18 Leꞌa Marí cha nseaꞌyab ndoꞌ be xmen Jesús leꞌa xa uniꞌí Jesús, no mbidiꞌizh xa ta ndab Jesús ndoꞌ xa.
\s Jesús mlundoꞌ ndoꞌ pla be xmen~xa
\r (Mt. 28:16-20; Mr. 16:14-18; Lc. 24:36-49)
\p
\v 19 Leꞌa ngol gor na ulaꞌ teꞌal bi leꞌa wizh ned ten sman wa, leꞌa be xmen Jesús mzhealbe len dub niꞌi. Leꞌa toꞌo niꞌi wa nsoꞌnyaw, geal leꞌa bexa nzheb ndoꞌ bexa judio nibeꞌe. Weꞌe leꞌa Jesús cha mlundoꞌ nsoꞌ tlaw bexa, cha ndab xa:
\p —¡Dios gun wen yoo ladna bega!
\p
\v 20 Tsoꞌo na li ndab Jesús, cha mluu xa be yaꞌa~xa no wats len~xa. Cha uzhebpa mten ladna bexa gor uniꞌí bexa leꞌa ta wa Jesús.
\v 21 Leꞌa Jesús cha ndabgal:
\p —Dios gun wen yoo ladna bega. Leꞌa lak mtuꞌub Xus~naꞌ naꞌ, no liga utuꞌub naꞌ bega gun bega tiꞌin ten naꞌ.
\p
\v 22 Cha mlabi xa sa nde bexa, cha ndab xa:
\p —Ulaꞌa bega yoo Espíritu ten Dios len ladoꞌo bega.
\v 23 Tal leꞌa bega gungeꞌ ladna ke ten dub men, leꞌa Dios noga sungeꞌ ladna ta wa. No liga tal leꞌa bega lá gungeꞌ ladna ke ten dub men, leꞌa Dios noga naꞌanpa gungeꞌ ladna ta wa.
\s Jesús mlundoꞌ ndoꞌ Tomás
\p
\v 24 Leꞌa Tomás xa no nsaleaꞌ Dídimo nak dub tibtop xmen Jesús, parea leꞌa xa naꞌanpa no nsoꞌno bexa wa gor na mlundoꞌ Jesús.
\v 25 Leꞌa gor na ulen Tomás leꞌa be xmen Jesús cha ndab ndoꞌ Tomás:
\p —Leꞌa besa uniꞌí Jesús.
\p Leꞌa Tomás cha ndab:
\p —Gast ned iní naꞌ be sa ngwaꞌas clav yaꞌa~xa no ukikoꞌo naꞌ ngutsyaꞌa~naꞌ sa wa, no ukikoꞌo naꞌ yaꞌa~naꞌ wats len~xa, lá ndangea lad naꞌ leꞌa xa mban.
\p
\v 26 Ngol sxoꞌon wizh leꞌa bexa ndebegal len niꞌi wa no Tomás. Leꞌa toꞌo niꞌi wa nsoꞌnyaw, parea leꞌa Jesús cha uyatsoꞌ tlaw bexa, cha ndab xa:
\p —Dios gun wen yoo ladna bega.
\p
\v 27 Cha ndab Jesús ndoꞌ Tomás:
\p —Bwiꞌi ndoꞌ yaꞌa~naꞌ, no ulo ngutsyaꞌa~lu sa ndee. No ulo yaꞌa~la wats len~naꞌ ndee. Yá naꞌantapa gunbeꞌe lu leꞌa naꞌ ngut, ndi bingea ladna leꞌa naꞌ mbangal.
\p
\v 28 Weꞌe leꞌa Tomás cha ukaꞌab ndab:
\p —¡Go nak xa nibeꞌe naꞌ, no Dios ten naꞌ!
\p
\v 29 Cha ndab Jesús:
\p —Tomás, geal uniꞌí lu naꞌ, ta weꞌe mbingea ladna lu leꞌa naꞌ mbankagal. Uzhebpa wen yoo ladna bexa gungea ladna naꞌ, maska lá iniꞌí bexa naꞌ.
\s Libr ndee nkea ndontsa gap be men gealnaban
\p
\v 30 No sianta be uyon mbin Jesús ndoꞌ gaꞌal be xmen~xa, ta na naꞌanpa ikea ndoꞌ libr ndee.
\v 31 Parea leꞌa be taꞌa nkea sa ndee, nkea‑yá ndontsa gungea ladna bega leꞌa Jesús leꞌa nak Cristo, Xin Dios. Tal leꞌa bega li gungea ladna ta wa, leꞌa bega gap gealnaban ndoꞌ Dios.
\c 21
\s Jesús mlundoꞌ ndoꞌ dub gaꞌad be xmen~xa
\p
\v 1 Ngol tsoꞌo wa leꞌa Jesús mlundoꞌgal ndoꞌ be xmen~na toꞌo lagun Tiberias. Leꞌa xa lndeꞌe mlundoꞌ:
\v 2 Leꞌa dub wizh leꞌa pla be xmen Jesús junt ndebe. Leꞌa ta wa Simón Pedr, no Tomás xa nsaleaꞌ Dídimo, no Natanael xa gezh Caná ten Galilea, no itop be xin Zebedeo, nsea stop be xmen Jesús.
\v 3 Leꞌa Simón Pedr cha ndab ndoꞌ bexa wa:
\p —Leꞌa naꞌ ndasen mbeal.
\p Leꞌa bexa cha ndab:
\p —Leꞌa besa no isea.
\p Cha nchaꞌbe bexa, cha ukea bexa ndoꞌ dub barco. Parea leꞌa idub teꞌal wa ni dub mbeal lá isen bexa.
\v 4 Leꞌa ngol gor na yá nsayat xeꞌa, leꞌa be xmen Jesús wa uniꞌí Jesús nsoꞌ toꞌo nits wa, parea leꞌa bexa lá iniꞌí ti leꞌa Jesús ta wa.
\v 5 Leꞌa Jesús cha ndab ndoꞌ bexa:
\p —Bego usa byux, ¿lid usen bega mbeal zha?
\p Leꞌa bexa cha ukaꞌab ndab:
\p —Leꞌa besa ni dub mbeal lá isen.
\p
\v 6 Cha ndab Jesús:
\p —Btsaꞌab bega red baꞌ wats lad gaꞌal barco baꞌ, cha isen bega mbeal.
\p Weꞌe leꞌa bexa cha li mbin, cha uzheꞌeb sian mbeal usen red wa, gast lá uxik bexa koꞌo bexa red len nits wa.
\v 7 Leꞌa dub xmen Jesús, xa na leꞌa Jesús uzheꞌeb nkweaꞌ ladna, cha ndab ndoꞌ Pedr:
\p —¡Leꞌa ta baꞌ Jesús!
\p Leꞌa gor na mbiꞌín Simón Pedr leꞌa ta wa Jesús, cha ngok xa xab xa, ta nbix xa, ta na ulate xa gor usen xa mbeal. Cha nchaꞌa xa len nits, nchaꞌa xa sa nsoꞌ Jesús.
\v 8 \fig |CN01877B.TIF|col|||Jesús utezh be xmen na wats xa|Jn. 21:8\fig*Leꞌa stapla be xmen Jesús wa cha myoꞌo barco wa toꞌo nits. Litsa ngobxazh bexa red na lita sian mbeal ncho len na wa. Leꞌa ta wa pa dub gayoꞌotsa metr sit ndoꞌ nits wa.
\v 9 Leꞌa gor na yá ulaꞌ bexa ndoꞌ barco toꞌo nits wa, leꞌa bexa uniꞌí leꞌa dub mbeal nchoꞌob ndoꞌ bkuꞌu, no dub pan nchoꞌob sa wa.
\v 10 Leꞌa Jesús cha ndab ndoꞌ bexa:
\p —Utseano bega stapla be mbeal usen bega baꞌ.
\p
\v 11 Leꞌa Simón Pedr cha ukea ndoꞌ barco, cha udobxazh xa red gast ndoꞌ yo bid. Leꞌa len red wa ncho dub gayoꞌo itol ncho chon mbeal, bema ubiꞌi, parea ni lá isaw‑a mas lita sian mbeal ncho len‑a.
\v 12 Leꞌa Jesús cha ndab:
\p —Utseadaw bega.
\p Leꞌa ni dub bexa lá inabdiꞌizh ndoꞌ xa ná ton xa, leꞌa bexa uniꞌí leꞌa‑yá Jesús.
\v 13 Weꞌe leꞌa Jesús cha usen pan wa, cha mtseꞌa xa‑yá ndoꞌ bexa. No liga mtseꞌa xa mbeal wa.
\v 14 Leꞌa ta ndee biaj yon mlundoꞌ Jesús ndoꞌ be xmen~na, tsoꞌo na li mban xa ndoꞌ gealgut.
\s Jesús mbidiꞌizhno Pedr
\p
\v 15 Leꞌa gor na mtayaw bexa, leꞌa Jesús cha unabdiꞌizh ndoꞌ Simón Pedr, ndab xa:
\p —Simón xin Jonás, ¿ndankea lu naꞌ mas ndoꞌ lak ndankea bexa ndee naꞌ zha?
\p Leꞌa Pedr cha ukaꞌab ndab:
\p —Señor, go uniꞌíka leꞌa naꞌ ndankeaka go.
\p Leꞌa Jesús cha ndab:
\p —Blaꞌach be borreg ten naꞌ.
\p
\v 16 Cha ndabgal Jesús biaj itop:
\p —Simón xin Jonás, ¿ndankeaka lu naꞌ zha?
\p Leꞌa Pedr cha ndabgal:
\p —Señor, go uniꞌíka leꞌa naꞌ ndankeaka go.
\p Cha ndab Jesús:
\p —Blaꞌach be borreg ten naꞌ.
\p
\v 17 Cha ndabgal Jesús biaj yon:
\p —Simón xin Jonás, ¿ndankeaka lu naꞌ zha?
\p Leꞌa Pedr cha uban myoꞌo ladna geal biaj yon li unabdiꞌizh Jesús naga ndankeaka Pedr Jesús. Cha ndab Pedr:
\p —Señor, leꞌa go uniꞌí itea taꞌa. Uniꞌíka go leꞌa naꞌ ndankeaka go.
\p Cha ndab Jesús:
\p —Blaꞌach be borreg ten naꞌ zhaga.
\v 18 Leꞌa naꞌ gáp leꞌa zha ben lu, leꞌa lu ndak xab~na no nchaꞌa lu tal pa nlad lu. Parea leꞌa zha gak gox lu, leꞌa lu ndi utiꞌil be yaꞌa~lu no xaꞌaga men ugak xab~la. Cha goꞌo xa lu sa na lá nlad lu yaꞌ lu.
\p
\v 19 Leꞌa ta li ndab Jesús wa gab ná xteꞌe mod na gat Pedr, ta uluu xteꞌe juert nak Dios. Cha ndab Jesús ndoꞌ Pedr:
\p —Usankea tsoꞌo naꞌ.
\s Xa na leꞌa Jesús uzheꞌeb nkweaꞌ ladna
\p
\v 20 Leꞌa Pedr cha mgeaksoꞌ mwiꞌi, leꞌa stub xmen Jesús nchankea tsoꞌo Pedr no tsoꞌo Jesús. Leꞌa ta wa xa na leꞌa Jesús uzheꞌeb nkweaꞌ ladna, xa na li nsob wats Jesús zha na lult udaw xcheꞌe bexa, gor unabdiꞌizh xa ndoꞌ Jesús ná ton yun cuent Jesús.
\v 21 Leꞌa gor uniꞌí Pedr xa wa, cha unabdiꞌizh Pedr ndoꞌ Jesús, ndab xa:
\p —Señor, ¿leꞌa xa baꞌ zha xtaꞌan itid?
\p
\v 22 Leꞌa Jesús cha ndab:
\p —Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa. Lu usankeatsa tsoꞌo naꞌ.
\p
\v 23 Leꞌa ta na li ndab Jesús, leꞌa ta wa mgen lat be xmen Jesús leꞌa xmen Jesús wa lá gat. Parea leꞌa Jesús naꞌanpa ngab leꞌa xa wa lá gat. Leꞌa Jesús ndi ndab: “Tal leꞌa naꞌ nlad leꞌa xa baꞌ lbaꞌatsa nban gast zha ilengal naꞌ, naꞌanpa yuꞌ ladna lu ta wa.”
\p
\v 24 Leꞌa xmen Jesús wa xa ndadiꞌizh be ta ndee ndoꞌ be men, no mkeꞌa xa‑yá ndoꞌ git. Leꞌa besa uniꞌíka leꞌa ta ndadiꞌizh xa ta ugeaka.
\p
\v 25 No uzhebpa sianta be taꞌa mbin Jesús. Leꞌa naꞌ nsak tal leꞌa be men ukeꞌa itea be ta wa, leꞌa idub ndoꞌ gizhliyo lá ugal yoo be libr wa.