\id 1TH zpt
\h 1 Tesalonicenses
\toc1 1 Tesalonicenses
\mt1 Git ned mtuꞌub Pabl ndoꞌ bexa gezh Tesalónica
\ip Leꞌa git ndee mkeꞌa Pabl ndoꞌ be xmen Cristo ndencho gezh Tesalónica zha ncho xa gezh Corinto. Leꞌa‑yá git ned mkeꞌa Pabl. Leꞌa xa nlad yaꞌinaꞌ xa bexa, parea leꞌa‑yá lá yoo gan, ta weꞌe mkeꞌa xa git ndee ndoꞌ bexa. Mkeꞌa xa ndoꞌ bexa wa xteꞌe nak be ta yoo zha na ilen Cristo stub biaj, no xteꞌe yasea bexa ngut zha ilen Cristo, bexa na mgondoꞌ Cristo zha bi nban bexa.
\c 1
\s Pabl nidiꞌizh ndoꞌ bexa Tesalónica
\p
\v 1 Leꞌa naꞌ ndee Pabl no be ltsaꞌa~naꞌ Silvano nsea Timoteo nkeꞌa besa git ndee ndoꞌ bego nzhealbe gezh Tesalónica baꞌ, leꞌa bega xmen Tad Dios no Jesucristo Xwan beuna. Naꞌab naꞌ ndoꞌ Tad Dios no ndoꞌ Jesucristo Xwan beuna utsin gak bexa ndoꞌ bega, no gun bexa wen yoo ladna bega.
\s Bexa ndencho Tesalónica utsinpa nak
\p
\v 2 Leꞌa besa nsaꞌa tseꞌe xno ndoꞌ Dios por itea bega, no nab besa ndoꞌ Dios gakno Dios bega.
\v 3 Leꞌa gor na ndadiꞌizhno besa Dios Xus beuna, ntseꞌa ladna besa be ta wen ndun bega geal ngeꞌ ladna bega Cristo, no xteꞌe utsin nak bega ndoꞌ be ltsaꞌa bega geal nkweaꞌ ladna bega bexa, no xteꞌe nkenkeaꞌ bega zha ilen Jesucristo Xwan beuna stub biaj.
\v 4 Bego nak beuna xmen Cristo, leꞌa Dios nkweaꞌ ladna bega, no uniꞌí besa leꞌa xa leꞌa mti bega gak bega xmen~xa.
\v 5 Leꞌa zha mbidiꞌizh besa diꞌizh wen ten Cristo ndoꞌ bega, leꞌa ta wa naꞌanpa sbeꞌen diꞌizhtsa. Leꞌa besa no mbin sian be taꞌa juers ten Espíritu ten Dios, ta mluu leꞌa Dios leꞌaka mtuꞌub besa. Leꞌa bega uniꞌíka xteꞌe utsin ngok besa lat bega geal leꞌa besa nkweaꞌ ladna bega.
\p
\v 6 Leꞌa gor na mbingea ladna bega diꞌizh ten Dios, leꞌa bega myak lak nak besa no lak ngok Jesús Xwan beuna. Leꞌa zha wa leꞌa bega uniꞌí sian gealkweaꞌ, parea leꞌa Espíritu ten Dios mbin mten ladna bega.
\v 7 Weꞌe leꞌa be xmen Jesús ndencho Macedonia no Acaya uniꞌí xteꞌe utsin nak bega, ta weꞌe cha no bexa nlad li gak.
\v 8 Weꞌe leꞌa diꞌizh ten Jesús mteꞌachso idub Macedonia no Acaya. No gast itea lad mbiꞌín be men xteꞌe ndangea ladna bega Dios, gast ni lá nkiꞌinta besa gudiꞌizh xteꞌe nak bega.
\v 9 Leꞌa bexa wa ndadiꞌizhbe ná xteꞌe utsin ngok bega ndoꞌ besa gor ulayaꞌ besa sa baꞌ, no xteꞌe mlaꞌa bega be dios gizhliyo, cha mbingea ladna bega Dios nban, xa ta ugeaka leꞌa nak Dios,
\v 10 no xteꞌe ndenkeaꞌ bega zha ilen Xin Dios gibeꞌa, xa mxiste Dios ndoꞌ gealgut. Leꞌa ta wa Jesús, xa na koꞌo beuna ndoꞌ ta uzheꞌeb utsaksi Dios be men.
\c 2
\s Tiꞌin mbin Pabl gezh Tesalónica
\p
\v 1 Bega nak beuna xmen Cristo, leꞌa bega uniꞌíka leꞌa zha na uyoꞌo besa lat bega wa, leꞌa ta wa uzheꞌeb ngokno bega.
\v 2 Lak uniꞌí bega leꞌa bexa gezh Filipos ugap mbinno besa no unisi bexa besa. Ná leꞌa Dios ngokno besa ndontsa lá izheb besa mbidiꞌizh besa diꞌizh wen ten Dios ndoꞌ bega, maska uzheꞌeb ngoklono be men besa.
\v 3 Leꞌa ta li mbidiꞌizh besa wa ta ugeaka, naꞌanpa nlad besa ugap gunno besa bega no naꞌanpa ukwiꞌinno besa bega.
\v 4 Leꞌa besa ndi ndadiꞌizh diꞌizh wen ten Cristo lak msaꞌa Dios gun besa. Leꞌa besa naꞌanpa ndun ta isak ladna be men, leꞌa besa ndi ndun ta isak ladna Dios, xa nchandoꞌ ladoꞌo beuna.
\v 5 Leꞌa bega uniꞌíka leꞌa besa nunk lá ngudiꞌizh diꞌizh uguꞌud ndontsa isak ladna bega ta nluu besa. Leꞌa Dios nsobwiꞌi leꞌa besa naꞌanpa ngudiꞌizh ta wa ndontsa gun besa gan med.
\v 6 Leꞌa besa ni lid nkwaꞌan xteꞌe utsin gak be men ndoꞌ besa, ni bego no ni bexa xaꞌaga. Leꞌa ta na nak besa apostol ten Cristo, leꞌa besa syoꞌo gan inibeꞌe ndoꞌ bega.
\v 7 Parea leꞌa besa ndi bchaꞌan ngok ndoꞌ bega, lakta utsin nlaꞌach dub xagots be xmeꞌed~na.
\v 8 Uzhebpa nkweaꞌ ladna besa bega. Ta weꞌe naꞌanpa nabtsa diꞌizh wen ten Dios mbidiꞌizh besa, gast no usaꞌa besa leꞌaka leꞌa besa geal leꞌa besa nkweaꞌ ladna bega.
\v 9 Bego nak beuna xmen Cristo, ntseꞌaka ladna bega xteꞌe mbin besa tiꞌin teꞌal tezhea, ndontsa naꞌanpa sbeꞌen bega usaꞌa be ta nkiꞌin besa, zha mbidiꞌizh besa diꞌizh wen ten Dios ndoꞌ bega.
\p
\v 10 Leꞌa bega uniꞌíka no nsobwiꞌi Dios leꞌa besa utsin ngok lat bega ndangea ladna Jesús, no mbin besa lak nsak ladna Dios, no naꞌan xteꞌe yoꞌo gan ngab be men leꞌa besa ugap mbin.
\v 11 No uniꞌíka bega leꞌa besa mbinno bega lak ndanno dub xabgiꞌi be xin~na: mluꞌu besa ná xteꞌe gak kadga dub bega, no mluꞌuzh besa bega,
\v 12 no unibeꞌe besa gun bega lak nsak ladna Dios, xa mti bega yoo bega sa uzhebpa chul sa nibeꞌe Dios.
\s Pabl nsaꞌa xno ndoꞌ Dios por bexa Tesalónica
\p
\v 13 Ta weꞌe leꞌa besa nsaꞌa tseꞌe xno ndoꞌ Dios, leꞌa zha na mbiꞌín bega diꞌizh ten Dios ta na mbidiꞌizh besa, leꞌa bega naꞌanpa ngab leꞌa‑yá diꞌizh ten mentsa. Ndi mbingea ladna bega leꞌa‑yá diꞌizh ten Dioska. Ta weꞌe mas ndun bega ta nsak ladna Dios, bega ndangea ladna Cristo.
\v 14 Bego nak beuna xmen Cristo, leꞌa bexa lazh bega xela mbinno bega, lakta utid be xmen Dios ndencho Judea, bexa ndangea ladna Cristo Jesús. Leꞌa bexa judio leꞌaka bexa lazh~xa xela mbinno bexa ndencho Judea wa.
\v 15 Leꞌa bexa judio wa xa na mbit Jesús lak mbit be usan gox polta ten bexa wa be profet, no liga ulantuꞌub bexa besa lat bexa wa. Leꞌa ta ndun bexa wa ta lá nsak ladna Dios, leꞌa bexa ndi ndakloo ndoꞌ itea be men.
\v 16 Leꞌa zha na nlad besa gudiꞌizh besa ndoꞌ bexa naꞌanpa xa judio ndontsa no bexa gak xmen Dios, weꞌe leꞌa bexa judio wa nka li gun besa. Leꞌa bexa wa ndi mas sian ke nsayap ndoꞌ Dios, no mas utsaksi Dios bexa wa.
\s Pabl nlad yaꞌinaꞌ bexa Tesalónica
\p
\v 17 Bega nak beuna xmen Cristo, leꞌa nat leꞌa besa sit ndencho ndoꞌ bega dub ndeꞌep, parea leꞌa besa lá nyalad bega, no uzhebpa nlad besa inaꞌ besa bega.
\v 18 Nladka besa giꞌid inaꞌ besa bega, ta weꞌe leꞌa naꞌ Pabl ndiꞌizh plala biaj gal inaꞌka naꞌ bega, ná leꞌa maxuꞌu uyontsaw.
\v 19 Leꞌa ta nlad besa wa, ta na leꞌa gun iten ladna besa, ta uluꞌu leꞌa ta mbin besa leꞌaka nak, leꞌa ta wa bego gor na kwe bega ndoꞌ Jesucristo Xwan beuna zha ilen xa stub biaj.
\v 20 Ta ugeaka leꞌa besa nzhinnona bega no ntenno ladna besa bega.
\c 3
\s Pabl mtuꞌub Timoteo gezh Tesalónica
\p
\v 1 Ngol zha leꞌa besa yá lá uxikta nkwaꞌan besa bega, ta weꞌe myaꞌan nab besa gezh Atenas,
\v 2 cha mtuꞌub besa Timoteo ndoꞌ bega. Leꞌa xa wa cuent wit beuna, no ndun xa tiꞌin ndoꞌ Dios ndadiꞌizh xa diꞌizh wen ten Cristo lak ndun besa ndee. Li mtuꞌub besa xa ndoꞌ bega ndontsa utenxeꞌa xa bega mas igeꞌ ladna bega Cristo,
\v 3 ndontsa ni dub bega lá gach ladna ndoꞌ be gealkweaꞌ nsatid bega. Leꞌa bega uniꞌíka leꞌa beuna sian gealkweaꞌ nsabndoꞌ itid.
\v 4 Leꞌa zha na bi ncho besa lat bega, leꞌa besa mbidiꞌizhka leꞌa beuna sian gealkweaꞌ iniꞌí. Cha likaga ngok‑a lak uniꞌí bega wa.
\v 5 Ta weꞌe ta na yá lá uxikta naꞌ wa mtuꞌub naꞌ Timoteo mbiꞌid inaꞌ bega, naga bi ngeꞌ ladna bega Jesús. Leꞌa naꞌ nzheb nchaꞌa maxuꞌu ukwiꞌinno bega, no nchaꞌa itea ta mbin besa lat bega wa naꞌan xtiꞌin.
\s Timoteo ndab xteꞌe wen nak bexa Tesalónica
\p
\v 6 Ná leꞌa gor na mlaꞌnchaꞌ Timoteo ngwaꞌ xa sa baꞌ, leꞌa xa mbidiꞌizh ndoꞌ besa ná xteꞌe bi ngeꞌka ladna bega Cristo, no xteꞌe nkweaꞌ ladna bega be ltsaꞌa bega. No mbidiꞌizh xa ná xteꞌe nten ladna bega gor ntseꞌa ladna bega besa, no nkwaꞌan bega besa lak nkwaꞌan besa bego baꞌ.
\v 7 Bega nak beuna xmen Cristo, uzheꞌeb bid ndesea besa no nsatid besa be gealkweaꞌ. Parea ta na li nchoka bega len nes ten Dios wa leꞌa ndun nten ladna besa.
\v 8 Leꞌa nat uzheꞌeb nkaꞌa besa juers ta na uniꞌí besa leꞌa bega ngeꞌka ladna Jesús.
\v 9 Ni lá iniꞌíta besa xteꞌe usaꞌa besa xno ndoꞌ Dios por bega lak nsabndoꞌ‑yá. Leꞌa be ta li ndun bega wa leꞌa ndun uzheꞌeb nten ladna besa ndoꞌ Dios ten beuna.
\v 10 Leꞌa besa teꞌal tezhea nab ndoꞌ Dios ulaꞌa Dios giꞌid inaꞌ besa bega, uluꞌu besa bega ná xteꞌe mas uzheꞌeb igeꞌ ladna bega Dios.
\p
\v 11 Leꞌa Dios Xus beuna no Jesucristo Xwan beuna gakno besa nes giꞌid inaꞌ besa bega.
\v 12 Leꞌa Jesús gun mas ikweaꞌ ladna bega be ltsaꞌa bega no itea be men, lak uzheꞌeb nkweaꞌ ladna besa bega.
\v 13 Weꞌe leꞌa Dios gun mas igeꞌ ladna bega xa, no umbiꞌi gak ladoꞌo bega ndoꞌ Tad Dios, gor ilen Jesucristo Xwan beuna nsea itea be xmen~xa, bexa umbiꞌi nak ladoꞌo~na ndoꞌ Dios.
\c 4
\s Xteꞌe nsak ladna Dios gak be men
\p
\v 1 Bego nak beuna xmen Cristo, leꞌa besa mluu ndoꞌ bega xteꞌe gun bega ta nsak ladna Dios lakka nchasea ndun bega nat. Leꞌa ta na nak beuna xmen Cristo wa, uzhebpa nab besa ndoꞌ bega gun bega juers mas li gak bega.
\p
\v 2 Leꞌa bega uniꞌíka xteꞌe ndab besa gak bega, lak nlad Jesús gab besa ndoꞌ bega.
\v 3 Leꞌa Dios nlad umbiꞌi gak bega ndoꞌ xa; naꞌanpa ugal bega dub xa naꞌanpa xa ten bega.
\v 4 No utsin gunno bega xagots ten bega lak nsak ladna Dios.
\v 5 Naꞌanpa gun bega be ta nladtsa bega wa, lak ndun be men lá nchandoꞌ Dios.
\v 6 Leꞌa cuent ten be ta ndee wa naꞌanpa ugap gunno bega stub xa, no naꞌanpa ukwiꞌinno bega xa, leꞌa lakka ndab besa ndoꞌ bega leꞌa Dios utsaksi bexa na li gun wa.
\v 7 Leꞌa Dios naꞌanpa mti beuna bzhiꞌik gak beuna, leꞌa xa ndi mti beuna umbiꞌi gak beuna ndoꞌ xa.
\v 8 Ta weꞌe leꞌa tal ton nxelad ta ndáp naꞌ ndee wa, leꞌa xa wa naꞌanpa dub mentsa nxelad, leꞌa xa wa ndi Dios nxelad, xa na nsaꞌa Espíritu ten na ndoꞌ beuna.
\p
\v 9 Leꞌa besa lá nkiꞌinta gab ndoꞌ bega ikweaꞌ ladna bega be ltsaꞌa bega, leꞌa Dios yá mluꞌu ndoꞌ bega leꞌa bega nsabndoꞌ li gun.
\v 10 Leꞌa bega nkweaꞌka ladna itea bexa ndangea ladna Cristo, bexa ndencho idub Macedonia baꞌ. Ná leꞌa besa nab ndoꞌ bega mas ikweaꞌ ladna bega bexa,
\v 11 no bchaꞌan gok bega, no blaꞌach bega tiꞌin tentsa bega, no bin bega tiꞌin ten bega lak unibeꞌe besa.
\v 12 Weꞌe leꞌa be men lá ndangea ladna Jesús gap mod ndoꞌ bega, no gap bega be taꞌa nkiꞌin bega.
\s Xteꞌe ilen Jesús stub biaj
\p
\v 13 Bego nak beuna xmen Cristo, leꞌa besa nlad iniꞌí bega xteꞌe gak be men ngut, ndontsa lá yoo uban ladna bega lak ndun bexa lá nchandoꞌ Dios.
\v 14 Leꞌa lak ndangea ladna beuna leꞌa Jesús ngut no mbangal xa, no liga ndangea ladna beuna leꞌa Dios utuꞌub Jesús ilenno xa bexa ngut, bexa mbingea ladna Jesús zha na bi nban bexa wa.
\p
\v 15 Ta weꞌe ndab besa ndoꞌ bega lak mluꞌu Jesús besa: Leꞌa wizh ilen Jesús leꞌa beuna bi ndenban ndee naꞌanpa ned yaꞌ ndoꞌ bexa ngut wa.
\v 16 Leꞌa leꞌaka Jesús ugeꞌ iníꞌi, cha igen dub ti angel ndon leꞌa nibeꞌe, no kwezh trompet ten Dios, cha ilaꞌ Jesús gibeꞌa. Weꞌe leꞌa bexa ngut wa ned ibanbe, bexa na mbingea ladna Cristo zha bi nban bexa.
\v 17 Weꞌe leꞌa beuna bi ndenban ndee cha ikeano bexa wa, cha izheal beuna Cristo ndoꞌ xkaw ndoꞌ mbi baꞌ. Cha litsa yoono beuna Cristo idub tiemp.
\v 18 Ta weꞌe btenxeꞌa bega be ltsaꞌa bega no ta ndáp naꞌ ndee wa.
\c 5
\p
\v 1 Bega nak beuna xmen Cristo, leꞌa cuent ten bega leꞌa naꞌ lá nkiꞌin ukeꞌa ná pol yoo be ta ndee wa.
\v 2 Leꞌa bega uniꞌíka leꞌa gal wizh ilen Jesús wa, leꞌa xa wa ilen dub gor ni lá ndanbeꞌe bega, cuent nlaꞌ dub waꞌan ta lid dub men gor teꞌal.
\v 3 Leꞌa zha na gab be men: “Itea taꞌa xe nak no naꞌan xtaꞌan yasea beuna”, leꞌa gor weꞌe uxax ilen dub gealkweaꞌ siꞌil tsoꞌo bexa wa, lakta uxax nlen dub gealkweaꞌ gor yamer gap dub xagots xin~na. Leꞌa be men wa lá yoo gan uxoꞌon ndoꞌ gealkweaꞌ wa.
\v 4 Ná leꞌa bega nak beuna xmen Cristo naꞌanpa nde sa ukaw ndontsa naꞌanpa yanseana bega gal zha wa, lak ndanseana dub men gor nlen dub waꞌan ta lid~na.
\v 5 Leꞌa itea bego nde tezhea ndoꞌ xeꞌa ten Dios. Leꞌa beuna naꞌanpa nde sa ukaw.
\v 6 Ta weꞌe leꞌa beuna lá gak lak nak dub men lá iniꞌí xtaꞌan ncho. Leꞌa beuna ndi nsabndoꞌ kwenaꞌ no list kwe beuna.
\v 7 Leꞌa bexa na ndadgats wa, gor teꞌal ndadgats. No bexa na ndun gealgu wa, gor teꞌal ndun gealgu.
\v 8 Ná leꞌa beuna nde ndoꞌ xeꞌa ten Dios, ta weꞌe list kwe beuna. Leꞌa beuna ngeꞌ ladna Dios no ndankea beuna xa. Leꞌa ta wa gakno beuna lak ndakno dub giꞌib ntsaw ladoꞌo soldad. No ngeꞌ ladna beuna usaꞌa Dios gealnaban ndoꞌ beuna, lakta ngeꞌ ladna dub soldad xo giꞌib nsob gek~na.
\p
\v 9 Leꞌa Dios naꞌanpa mti beuna ta na utsaksi Dios beuna, leꞌa xa ndi mti beuna ndontsa gap beuna gealnaban, ta nsaꞌa Jesucristo Xwan beuna.
\v 10 Leꞌa Jesús ngut sakndoꞌ beuna ndontsa junt yoono beuna xa wa, guniꞌi tal ngut beuna natal bi ndenban beuna zha ilen xa.
\v 11 Ta weꞌe btenxeꞌa bega be ltsaꞌa bega lakka nchasea ndun bega, ndontsa lá gach ladna bexa, ndi mas yankea bexa Dios.
\s Pabl mtenxeꞌa be xmen Jesús
\p
\v 12 Bega nak beuna xmen Cristo, leꞌa besa nab ndoꞌ bega utsin gok bega ndoꞌ bexa ndun tiꞌin ten Dios lat bega, bexa leꞌa nchansu bega nak xmen Cristo no ntenxeꞌa bexa bega.
\v 13 Gop bega mod ndoꞌ bexa wa, no bkweaꞌ ladna bega bexa, leꞌa bexa wa bexa ndun tiꞌin ten Dios. No ni lá kuyo bega.
\p
\v 14 No ndab besa ndoꞌ bega utenxeꞌa bega bexa lá kaꞌab gun tiꞌin, no bluꞌuzh bega bexa nzheb, no gokno bega bexa ngi bi lá ndangea ladna Dios, no bxik bega ndoꞌ itea be men.
\p
\v 15 No blaꞌach bega naꞌanpa no bega ugap gunno tal ton ugap ndanno bega. Ndi sbeꞌen utsin bin bega ndoꞌ be ltsaꞌa bega no ndoꞌ itea be men.
\p
\v 16 Bten ladna bega idub tiemp.
\v 17 No gab geꞌal bidiꞌizhno bega Dios.
\v 18 No ndoꞌ itea be taꞌa itid bega bsaꞌa bega xno ndoꞌ Dios, lak nlad Dios gun bega nak xmen Cristo Jesús.
\p
\v 19 Lá uka bega gun Espíritu ten Dios ta nlad na.
\v 20 Naꞌanpa uxelad bega ta ndab bexa ndadiꞌizh sakndoꞌ Dios.
\v 21 Ndi blaꞌach bega naga leꞌa nak ta ndab bexa wa. Leꞌa itea ta na leꞌa nak wa, blaꞌach bega ta wa.
\v 22 Parea lá ulaꞌach bega be ta lid leꞌa nak.
\p
\v 23 Leꞌa Dios xa ndun wen ncho ladna be men wa leꞌaka utsambiꞌi ladoꞌo bega. No utsambiꞌi xa idub bega ndoꞌ iteanak be ta ugap, gal zha ilen Jesucristo Xwan beuna.
\v 24 Leꞌa Dios sunka be ta ndee, leꞌa xa leꞌa mti bega no ndunka xa ta ndab xa.
\p
\v 25 Bego nak beuna xmen Cristo, unab bega ndoꞌ Dios gakno xa besa.
\p
\v 26 Unidiꞌizh bega ndoꞌ itea be xmen Jesús sa baꞌ sakndoꞌ besa, ta na nluu leꞌa bega nkweaꞌ ladna bexa.
\p
\v 27 Leꞌa naꞌ gáp ndoꞌ bega goꞌol bega git ndee ndoꞌ iteanak be xmen Jesús sa baꞌ, leꞌa ta wa ta nlad Dios gun bega.
\p
\v 28 Nat naꞌab naꞌ ndoꞌ Jesucristo Xwan beuna mas uzheꞌeb utsin gunno xa bega. Lika gak‑a.