\id 2TI zpt
\h 2 TIMOTEO
\mt2 Git itop mkeꞌa Pabl ndoꞌ
\mt TIMOTEO
\c 1
\s Pabl nidiꞌizh ndoꞌ Timoteo
\p
\v 1 Leꞌa naꞌ ndee Pabl, xa mtuꞌub Dios gun naꞌ tiꞌin ten Jesucristo, gudiꞌizh naꞌ diꞌizh ten Dios ta nsaꞌa gelnban ndoꞌ bexa nak xmen Cristo Jesús.
\v 2 Nkeꞌa naꞌ git ndee ndoꞌ lu Timoteo, leꞌa naꞌ nkweaꞌladna lu cuent dub xiꞌín‑naꞌ. Naꞌab naꞌ ndoꞌ Dios Xus beuna no ndoꞌ Jesucristo Xwan beuna mas uzheꞌeb utsin gak bexa ndoꞌ lu, no mas ikweaꞌladna bexa lu, no gun bexa wen yooladna lu.
\s Timoteo nsabndoꞌ gudiꞌizh diꞌizh ten Cristo
\p
\v 3 Leꞌa gor na ndadiꞌizh‑no naꞌ Dios teꞌal tezhea ntseꞌalad naꞌ lu no nsa naꞌ xno ndoꞌ Dios, xa na idub ncholad naꞌ ndun naꞌ tiꞌin ndoꞌ na, lak mbin be usan gox ten naꞌ.
\v 4 Leꞌa gor na ntseꞌalad naꞌ xteꞌe mbíꞌin lu, ta weꞌe nlad naꞌ gal inaꞌ naꞌ lu natsa itenlad naꞌ.
\v 5 No ntseꞌalad naꞌ xteꞌe ngeꞌkaladna lu Cristo, lak ned xnaxots‑lu Loida no xnaꞌa‑lu Eunice mgeꞌladna Cristo. Leꞌa naꞌ uní leꞌa lu li‑kaga ngeꞌladna Cristo.
\p
\v 6 Ta weꞌe ndáp naꞌ ndoꞌ lu bin juers guntiꞌin lu ta ndak lu, ta msaꞌa Dios ndoꞌ lu gor mxoꞌob naꞌ yaꞌa‑naꞌ gek‑lu.
\v 7 Leꞌa ta nsaꞌa Dios ndoꞌ beuna naꞌanpa ta izheb beuna. Leꞌa Dios ndi nsaꞌa juers ndoꞌ beuna, ndoꞌontsa ikweaꞌladna beuna be men no gaisaꞌab beuna ndoꞌ be ta ugap.
\p
\v 8 Ta weꞌe lá idoladna lu gudiꞌizh lu cuent ten Cristo Xwan beuna. No naꞌanpa idonoladna lu naꞌ ta nkeꞌa naꞌ latgiꞌib ndee. Ndi lá izheb lu itid lu gelkweaꞌ geal ndadiꞌizh lu diꞌizh wen ten Cristo, leꞌa Dios usaꞌa juers uxik lu ndoꞌ ta wa.
\v 9 Leꞌa Dios uloꞌo beuna ndoꞌ be ke ten beuna, no utezh xa beuna ndoꞌontsa umbiꞌi gak ladoꞌo beuna ndoꞌ xa. Parea naꞌanpa li ngun xa ke na ndun beuna ta wen. Ndi leꞌa zha biseata gakndeꞌe gizhliyo leꞌa Dios mbinbeꞌe li utsin gun‑no xa beuna juers ten Cristo Jesús.
\v 10 Leꞌa nat leꞌa Dios mluu tant nkweaꞌladna xa beuna ta na ulen Jesucristo, xa ngoꞌo beuna ndoꞌ be ke ten beuna. Leꞌa xa wa mbin gan ndoꞌ juers ten gelgut no nsaꞌa xa gelnban nunk lá idub ndoꞌ bexa ndangealadna diꞌizh wen ten xa.
\p
\v 11 Leꞌa Dios leꞌa mti naꞌ gudiꞌizh naꞌ diꞌizh wa. No mtuꞌub xa naꞌ uluu naꞌ‑ya ndoꞌ bexa naꞌanpa xa Israel.
\v 12 Ta weꞌe nat lndeꞌe ntiꞌid naꞌ be gelkweaꞌ ndee. Ná naꞌ ni lá ndoladna, leꞌa naꞌ nchandoꞌ Cristo xa na ngeꞌlad naꞌ. No uní naꞌ leꞌa xa sun‑ka gan ulaꞌach ta na msaꞌa xa ndoꞌ naꞌ wa gast gal wizh ilen‑gal xa.
\p
\v 13 Nat bin lak‑tsa ndab be diꞌizh wen mbidiꞌizh naꞌ ndoꞌ lu cuent ten xteꞌe ngeꞌladna beuna Dios no xteꞌe nkweaꞌladna beuna be men, ta na nak beuna xmen Cristo Jesús.
\v 14 Leꞌa Espíritu ten Dios, xa na ncho len ladoꞌo beuna, gakno lu ulaꞌach lu be diꞌizh msaꞌa Dios ndoꞌ lu.
\p
\v 15 Leꞌa lu yá uniꞌí‑ka leꞌa Figelo no Hermógenes no itea‑ta bexa ndencho Asia yá naꞌantapa ndakno naꞌ.
\v 16 Naꞌab naꞌ ndoꞌ Dios gakno Dios bexa ncho ta lid Onesíforo, geal leꞌa xa sian‑pa biaj ndakno naꞌ, no naꞌanpa idonoladna xa naꞌ maska nkeꞌa naꞌ latgiꞌib.
\v 17 Ndi pa‑tsa ulansea xa Roma ndee cha uzheꞌeb‑pa mkwaꞌan xa naꞌ gast plo mzheal xa naꞌ.
\v 18 Leꞌa naꞌ naꞌab ndoꞌ Dios ikweaꞌladna Dios xa gal wizh isoꞌ xa ndoꞌ Dios, leꞌa lu uniꞌí‑ka xteꞌe ngokno xa besa zha ndencho besa gezh Éfeso.
\c 2
\s Pabl ndab uxik Timoteo ndoꞌ be gelkweaꞌ
\p
\v 1 Lu Timoteo nak cuent xiꞌín‑naꞌ, nat ulo gan gak juert ladoꞌo‑lu ta na nkweaꞌladna Cristo Jesús lu.
\v 2 Leꞌa ta na mbiꞌín lu ndadiꞌizh naꞌ ndoꞌ kwaꞌad be men, nat bluu ta wa ndoꞌ bexa mas ngeꞌladna lu, bexa na suꞌu uluu‑ya ndoꞌ stapla be men.
\p
\v 3 No bxik ndoꞌ be gelkweaꞌ iniꞌí lu ta na nak lu xmen Jesucristo, lak nxik be soldad ndoꞌ itea be gelkweaꞌ niꞌí xa.
\v 4 Ni dub soldad naꞌanpa nsabyoꞌo ndoꞌ be tiꞌin ndun be men, leꞌa xa ndi ndun lak‑tsa nlad xa nibeꞌe xa.
\v 5 No li‑ga leꞌa bexa nkeꞌa karrel lá gun gan tal leꞌa xa lá uxobgek lak nsabndoꞌ‑ya.
\v 6 No li‑ga leꞌa bexa ngo gan ndun tiꞌin geꞌe nsabndoꞌ ned xa ikaꞌa ta usaꞌa‑ya.
\v 7 Binbeꞌe be ta na nkeꞌa naꞌ ndee leꞌa Cristo Xwan beuna gun yakbeꞌena lu itea‑ya.
\p
\v 8 Btseꞌaladna lu ta utid Jesucristo xa ras David. Leꞌa xa mban ndoꞌ gelgut lak ndab diꞌizh wen ndadiꞌizh naꞌ ndoꞌ be men.
\v 9 Leꞌa ke na li ndadiꞌizh naꞌ ta wa, ta weꞌe leꞌa naꞌ sian be gelkweaꞌ nseatiꞌid gast nkeꞌa naꞌ latgiꞌib cuent dub xa ugap. Parea leꞌa diꞌizh ten Dios naꞌanpa no nkeꞌa latgiꞌib.
\v 10 Ta weꞌe nxik naꞌ ndoꞌ itea be gelkweaꞌ ndee geal nkweaꞌlad naꞌ bexa mti Dios, ndoꞌontsa no bexa gap gelnban ndoꞌ Dios no wen‑pa yoo bexa wats Cristo Jesús idub tiemp.
\p
\v 11 Ta ugea‑ka ta gáp naꞌ ndee:
\q1 Leꞌa tal beuna ngut‑no Cristo,
\q2 leꞌa beuna no‑kaga syoꞌo‑no xa.
\q1
\v 12 Leꞌa tal beuna uxik ndoꞌ be gelkweaꞌ,
\q2 leꞌa beuna no‑kaga inibeꞌe‑no xa.
\q1 Leꞌa tal beuna gab leꞌa beuna lá nchandoꞌ xa,
\q2 leꞌa xa no‑ga li gab leꞌa xa lá nchandoꞌ beuna.
\q1
\v 13 Maska lá ndun beuna lak‑ka ndab beuna,
\q2 parea leꞌa xa ndun‑ka ta ndab na,
\q1 leꞌa lak nak xa wa nunk lá izheꞌa.
\s Ta nsabndoꞌ gun dub xa ndun tiꞌin ndoꞌ Dios
\p
\v 14 Lá ulaꞌa lu yalad bexa wa be taꞌa nkeꞌa naꞌ ndee. Ndi gud ndoꞌ bexa leꞌa Dios nsobwiꞌi yá lá kuyotoꞌo‑ta bexa ke ten xteꞌe gab be diꞌizh. Leꞌa ta li nyotoꞌo bexa wa dub ta naꞌan xtiꞌin, leꞌa‑ya ndi ntsaꞌabgix bexa na ndoꞌón‑a wa.
\v 15 Uzheꞌeb‑pa bin juers gaꞌal isoꞌ lu ndoꞌ Dios, utsin bluu gelngea ten Dios, leꞌa dub xa wen ndun tiꞌin naꞌanpa idoladna.
\v 16 Lá gudiꞌizh lu be diꞌizh lá nsakladna Dios be diꞌizh naꞌan xtiꞌin, leꞌa bexa li ndadiꞌizh ta wa mas ugap nsayak.
\v 17 Leꞌa be diꞌizh wa cuent dub gelgizh ugiꞌi nsasen idub xa. Li nak Himeneo no Fileto.
\v 18 Leꞌa bexa mlaꞌa gelngea ten Dios, cha ndi nluu bexa leꞌa Dios yá mxiste‑la bexa ngut. Ta weꞌe ncho bexa yá lá ngeꞌtaladna Cristo.
\v 19 Parea leꞌa gelngea ten Dios nak cuent dub xan niꞌi dub ta naꞌanpa iwiꞌin, no nkeaniꞌi sa wa: “Leꞌa Dios nchandoꞌ be xmen‑na.” No ndab‑a “Blaꞌa bega be ta ugap, bego na nak xmen Dios.”
\p
\v 20 Leꞌa lak be taꞌa ndantiꞌin bexa len dub niꞌi siꞌil, ncho be ta wa nakndeꞌe oro no plata, ta ndantiꞌin bexa zha mas nsak‑tsa. No ncho be taꞌa nakndeꞌe ya no yosid, ta ndantiꞌin bexa iteanak be wizh.
\v 21 No li‑ga leꞌa tal ton ulaꞌa itea be ta ugap nak xa, leꞌa xa wa suꞌu gun dub tiꞌin mas nsak. Weꞌe umbiꞌi gak ladoꞌo xa ndoꞌ Dios, ndoꞌontsa isuꞌu xa guntiꞌin Dios xa no sun xa guniꞌi xtiꞌin be ta wen.
\p
\v 22 Ta weꞌe bxoꞌon ndoꞌ be ta lid leꞌa nak, be ta nlad bexa ben gun bexa. Ndi mas bin lak nsakladna Dios, no mas bgeꞌladna Cristo, no mas bkweaꞌladna be men, no lá kuyo‑no lu bexa. Li bin lak ndun itea bexa na nkwaꞌan Dios, bexa umbiꞌi nak ladoꞌo‑na.
\v 23 Naꞌanpa ulaꞌach lu be diꞌizh naꞌan xtiꞌin, leꞌa lu uniꞌí‑ka leꞌa be ta wa leꞌa ndun nyotoꞌo be men.
\v 24 Leꞌa dub xa ndun tiꞌin ndoꞌ Dios lá nsabndoꞌ kuyotoꞌo‑no be men. Ndi uzheꞌeb‑pa utsin gak xa ndoꞌ itea bexa, no wen uluu xa bexa, no kwen uxik xa ndoꞌ bexa.
\v 25 No diꞌizh chaꞌaw utenxeꞌa xa bexa na nluu be ta lid leꞌa nak wa. Weꞌe naga lid sgo Dios gek bexa yach bexa wats Dios cha igondoꞌ bexa gelngea ten Dios.
\v 26 Cha li itoꞌo bexa ndoꞌ yaꞌa mxuꞌu, xa na nchoyaꞌa bexa ta weꞌe ndun bexa ta nlad xa wa.
\c 3
\s Xteꞌe ugap gak be men gal be wizh lult
\p
\v 1 No nsabndoꞌ yakbeꞌena lu leꞌa gal be wizh lult leꞌa be men uzheꞌeb‑pa juert itid.
\v 2 Leꞌa gal zha wa yoo bexa ikweaꞌladna leꞌa‑tsa xa, no isaꞌabladna bexa gap xa sian med, no izhinnona bexa be taꞌa ndak‑tsa xa, no gunbeꞌe bexa leꞌa xa mas nsak ndoꞌ itea men, no inisi bexa be men, no lá uxobgek bexa ndoꞌ xus‑xa, no nunk bexa lá itenladna dub taꞌa, no lá gun bexa lak nlad Dios.
\v 3 No lá ikweaꞌladna bexa be ltsaꞌa‑xa, no ni lá gungeꞌladna bexa ndoꞌ be men, no gudiꞌizh bexa cuent gix, no gun bexa sbeꞌen be ta nlad‑tsa xa, no xela gun‑no bexa be men, no ixeladna bexa ndoꞌ itea be ta wen nak.
\v 4 No yun bexa cuent leꞌaka ltsaꞌa‑xa, no ni lid ned gunbeꞌe bexa gun bexa dub taꞌa, no gunbeꞌe bexa leꞌa xa uzheꞌeb‑pa dub xa wen, no mas ukwaꞌan bexa be ta nlad‑tsa xa ndoꞌ lak ukwaꞌan bexa Dios.
\v 5 No gun‑ta bexa ndankeꞌa Dios bexa, parea lá ulaꞌa bexa gun juers ten Dios tiꞌin len ladoꞌo bexa. Naꞌanpa uchealtsaꞌa lu bexa li nak wa.
\p
\v 6 Leꞌa ncho bexa wa ndaꞌ ta lid be men, cha nkwiꞌin‑no xa be xagots ndido‑tsa ndak. Leꞌa be xagots wa bexa ndap ke, ndun bexa guniꞌi xtaꞌan be ta ugap ndoꞌón bexa.
\v 7 Nsakyoꞌón bexa be taꞌa ndadiꞌizh be men, parea lá gun bexa gan igondoꞌ bexa gelngea.
\v 8 Lak lá isakladna Janes no Jambres ta mbin Moisés, no li‑ga leꞌa be xabgiꞌi ugap wa lá isakladna gelngea. Leꞌa bexa wa sbeꞌen ta ugap ndanbeꞌe no naꞌanpa ndangealadna bexa Dios.
\v 9 Parea leꞌa bexa lá gun gan ukwiꞌin‑no kwaꞌad men, leꞌa itea be men sniꞌí leꞌa ta ndun bexa wa lid leꞌa nak, lak ngwasea Janes no Jambres.
\s Be ta lult ndab Pabl gun Timoteo
\p
\v 10 Parea leꞌa lu uniꞌí‑ka xteꞌe nluu naꞌ be men, no xteꞌe nak naꞌ, no xteꞌe ndun naꞌ juers gun naꞌ dub tiꞌin, no xteꞌe ngeꞌlad naꞌ Cristo, no xteꞌe nxik naꞌ ndoꞌ be men, no xteꞌe nkweaꞌlad naꞌ be men, no xteꞌe ndun naꞌ tiꞌin ten Dios maska bid‑a.
\v 11 No uniꞌí‑ka lu xteꞌe xela mbin‑no bexa naꞌ, no xteꞌe sian gelkweaꞌ utiꞌid naꞌ gezh Antioquía no gezh Iconio no gezh Listra. Uzheꞌeb‑pa xela mbin‑no bexa naꞌ, parea leꞌa Dios Xa Nibeꞌe uloꞌo naꞌ ndoꞌ ta wa.
\v 12 No li‑ga xela gun‑no be men itea bexa na nlad gun ta wen, bexa ngeꞌladna Cristo Jesús.
\v 13 Parea leꞌa bexa ugap wa no bexa ukwiꞌin wa ndi mas ugap isayak. Leꞌa bexa wa ukwiꞌin‑no be men, no li‑ga ukwiꞌin‑no be men bexa.
\p
\v 14 Parea lá ulaꞌa lu be ta mtsid lu, be ta mbingealadna lu, leꞌa lu nchandoꞌ‑ka besa na mluu ta wa ndoꞌ lu.
\v 15 Leꞌa zha tuzh‑ta lu mtsid lu lak nkeaniꞌi diꞌizh ten Dios. Leꞌa diꞌizh wa sun gan mas gak lu, ndoꞌontsa mas igeꞌladna lu Cristo Jesús no gap lu gelnban ndoꞌ Dios.
\v 16 Leꞌa itea be taꞌa nkeaniꞌi diꞌizh ten Dios wa leꞌa Dios msaꞌa‑ya ndoꞌ bexa na mkeꞌa‑ya. Leꞌa ta wa suꞌu uluu beuna, no ndab‑a xteꞌe nsabndoꞌ gun beuna no xteꞌe yoo beuna nes ten Dios no xteꞌe wen gak beuna,
\v 17 ndoꞌontsa gak be xmen Dios idub lak nlad Dios, no isuꞌu beuna gun beuna itea be ta wen.
\c 4
\s Timoteo gudiꞌizh diꞌizh ten Cristo
\p
\v 1 Leꞌa gal zha ilen Jesucristo inibeꞌe xa ndoꞌ gizhliyo, leꞌa xa gab ndoꞌ bexa nban no ndoꞌ bexa ngut‑la na ton ndap ke. Ta weꞌe leꞌa nat nsobwiꞌi Dios no Jesucristo Xwan beuna leꞌa naꞌ gáp ndoꞌ lu
\v 2 bidiꞌizh diꞌizh ten Dios ndoꞌ be men, no ulo gan li gun lu guniꞌi tal leꞌa bexa nlad goꞌón‑a natal naꞌan. No btenxeꞌa bexa no gud ndoꞌ bexa xteꞌe yoo bexa nes ten Dios. No chaꞌaw‑tsa bluꞌu bexa diꞌizh ten Dios.
\v 3 Leꞌa gal dub wizh leꞌa be men lá isakyoꞌón‑ta gelngea. Ndi ukwaꞌan bexa kwaꞌad be mech gudiꞌizh ta na ndaltsaladna bexa goꞌón bexa.
\v 4 Cha lá isakyoꞌón‑ta bexa gelngea, ndi goꞌón bexa be cuent naꞌan xtiꞌin.
\v 5 Ná leꞌa lu nsabndoꞌ bchaꞌan gak no uxik lu ndoꞌ itea be gelkweaꞌ no gudiꞌizh lu diꞌizh wen ten Cristo no utsin gun lu tiꞌin msaꞌa Dios ndoꞌ lu.
\p
\v 6 Leꞌa naꞌ ndee sken gat, leꞌa wizh ikan naꞌ ndoꞌ gizhliyo ndee yá gax nak.
\v 7 Leꞌa naꞌ uzheꞌeb‑pa ngoꞌo gan ndun tiꞌin ten Dios, mbin naꞌ iteanak ta ndab xa, no sbeꞌen leꞌa xa mgeꞌlad naꞌ.
\v 8 Leꞌa naꞌ nsoꞌnkeꞌa gal dub wizh usaꞌa Dios dub coron ika naꞌ ta uluꞌu leꞌa naꞌ mxobgek ndoꞌ xa wa. Naꞌanpa nab‑tsa ndoꞌ naꞌ usaꞌa xa‑ya, no ndoꞌ itea bexa na ndenkeꞌa gal wizh ilen xa wa.
\s Timoteo nsabndoꞌ gakno Pabl
\p
\v 9 Bin juers uxax gidinaꞌ lu naꞌ,
\v 10 leꞌa Demas mlaꞌa naꞌ nchaꞌa xa gezh Tesalónica, geal leꞌa xa nkwaꞌan be taꞌa ndoꞌ gizhliyo ndee. Leꞌa Crescente nchaꞌa Galacia. Leꞌa Tito nchaꞌa Dalmacia.
\v 11 Nab‑tsa Luc ncho wats naꞌ, ta weꞌe biꞌi Marc sa ndee leꞌa xa no suꞌu gun‑no naꞌ tiꞌin.
\v 12 Leꞌa Tíquico mtuꞌub‑la naꞌ gezh Éfeso.
\v 13 Leꞌa gor na giꞌid lu, goꞌo lu xab koꞌol naꞌ, ta na mchan naꞌ ta lid Carpo gezh Troas. No goꞌo lu be libr ten naꞌ, parea mas nkiꞌin naꞌ be na nakchaꞌaw gid las man wa.
\p
\v 14 Leꞌa Alejandro xa ndandeꞌe be ta giꞌib uzheꞌeb ugap mbin‑no naꞌ. Leꞌa Dios Xa Nibeꞌe wa ukixke ta li mbin‑no xa naꞌ.
\v 15 Gap lu cuent ndoꞌ xa wa, leꞌa xa wa uzheꞌeb‑pa lá nsakladna ndadiꞌizh besa diꞌizh ten Dios.
\p
\v 16 Leꞌa zha ndon ned mtsakndoꞌ naꞌ ndoꞌ bexa naktiꞌin sa ndee, naꞌan ton isoꞌ wats naꞌ, leꞌa itea bexa cha ndi mlaꞌa naꞌ. Nlad naꞌ lá utsaksi Dios bexa ta na li mbin bexa wa.
\v 17 Parea leꞌa Dios Xa Nibeꞌe nsoꞌ‑ka wats naꞌ, msaꞌa xa juers ndoꞌ naꞌ, ndoꞌontsa mbidiꞌizh naꞌ diꞌizh ten Dios ndoꞌ itea bexa naꞌanpa xa Israel nde sa wa. Li uloꞌo Dios naꞌ ndoꞌ yaꞌa bexa, cuent utoꞌo naꞌ toꞌo dub mbiꞌizh ndiꞌizh gaw naꞌ.
\v 18 Leꞌa Dios ndakno‑ta naꞌ ndoꞌ itea be ta ugap, no ulaꞌach xa naꞌ gast yaa naꞌ gibeꞌa sa nibeꞌe xa. ¡Leꞌa nat no idub tiemp gab beuna leꞌa Dios uzheꞌeb‑pa dub xa siꞌil! Li‑ka nak‑a.
\s Pabl unidiꞌizh ndoꞌ pla bexa
\p
\v 19 Unidiꞌizh ndoꞌ Prisca nsea Aquila no ndoꞌ itea bexa ncho ta lid Onesíforo wa sakndoꞌ naꞌ.
\v 20 Leꞌa Erast myaꞌan gezh Corinto. Leꞌa Trófimo kweaꞌ nsak mchan naꞌ gezh Mileto.
\v 21 Bin juers giꞌid lu nat‑tsa biseata gal tiemp kwal. Leꞌa Eubulo no Pudente no Lino no Claudia no itea‑ta be xmen Cristo ncho sa ndee nidiꞌizh ndoꞌ lu.
\p
\v 22 Leꞌa naꞌ naꞌab ndoꞌ Jesucristo Xwan beuna isoꞌ wats lu, no mas uzheꞌeb utsin gun‑no Dios bega. Li‑ka nak‑a.