\id TIT zpt
\h Tito
\toc1 Tito
\mt1 Git mtuꞌub Pabl ndoꞌ Tito
\ip Leꞌa git ndee mkeꞌa Pabl nabtsa ndoꞌ dub xa nsaleaꞌ Tito. Leꞌa ta ndee no 1 Timoteo nsea 2 Timoteo nak be git mtuꞌub Pabl ndoꞌ bexa nak pastor, bexa nchansu be xmen Cristo. Leꞌa Pabl mtenxeꞌa Tito xteꞌe ndon xkwaꞌa gun bexa sa nzhealbe bexa nak xmen Cristo.
\c 1
\s Pabl nidiꞌizh ndoꞌ Tito
\p
\v 1 Leꞌa naꞌ ndee Pabl, xa ndun tiꞌin ndoꞌ Dios no mtuꞌub Jesucristo naꞌ ndoꞌ bexa na mti Dios, ndontsa mas igeꞌ ladna bexa Dios no mas igondoꞌ bexa gealngea, ta ndun mas nsayak bexa lak nlad Dios.
\v 2 Ta weꞌe ndenkeaꞌ bexa gal zha gap bexa gealnaban ta nunk lá idub, ta na uzheꞌeb polta ndab Dios usaꞌa Dios, xa nunk lá ndun gealkwiꞌin.
\v 3 Weꞌe leꞌa Dios mluu diꞌizh ten xa ndoꞌ be men zha nsabndoꞌ‑yá. Leꞌa ta wa ta ndadiꞌizh naꞌ ndoꞌ be men lak unibeꞌe Dios, xa na ngoꞌo beuna ndoꞌ be ke ten beuna.
\v 4 Leꞌa git ndee nkeꞌa naꞌ ndoꞌ lu, Tito, geal leꞌa lu cuent xiꞌín~naꞌ ta na no lu ngeꞌ ladna Cristo. Naꞌab naꞌ ndoꞌ Tad Dios no ndoꞌ Jesucristo Xwan beuna xa na ngoꞌo beuna ndoꞌ be ke ten beuna, uzheꞌeb utsin gak bexa ndoꞌ lu, no ikweaꞌ ladna bexa lu, no gun bexa wen yoo ladna lu.
\s Xteꞌe nsabndoꞌ gak bexa nchansu be xmen Cristo
\p
\v 5 Leꞌa naꞌ mchan lu isla Creta baꞌ, ndontsa utenxeꞌa lu be xmen Cristo be taꞌa ndun jwalt wa, no koxoꞌob lu pla bexa yansu be xmen Cristo kadga be gezh baꞌ, lak unibeꞌe naꞌ ndoꞌ lu.
\v 6 Leꞌa bexa yansu wa nsabndoꞌ uzhebpa utsin gak gast naꞌan ton gab leꞌa xa ndap ke. No nsabndoꞌ dubtsa xagots gap xa. Leꞌa be xin~xa nsabndoꞌ gungea ladna Jesús, no utsin gak bexa, no uxobgek bexa ndoꞌ xus~xa.
\v 7 Leꞌa dub xa nchansu wa nlaꞌach bexa nak xmen Dios, ta weꞌe nsabndoꞌ utsin gak xa, gast naꞌan ton gab leꞌa xa ugap ndun. No lá gunbeꞌe xa leꞌa xa mas nsak, no naꞌanpa uxax gakloo xa, no naꞌanpa gun xa gealgu, no naꞌanpa ukwaꞌan xa uyo, no naꞌanpa ukwiꞌinno xa be men ndontsa gun xa gan med.
\v 8 Ndi utsin gak xa ndoꞌ itea be men nchaꞌa ta lid~xa, no sbeꞌen be ta wen ukwaꞌan xa, no wen gunbeꞌe xa, no utsin gak xa, no umbiꞌi gak xa ndoꞌ Dios, no gun xa gan isensaꞌab xa xa ndoꞌ be ta ugap.
\v 9 No nsabndoꞌ uluu bexa gealngea ten Dios lak mluu beuna‑yá, ndontsa wen utenxeꞌa xa be xmen Cristo, no utsin ikaꞌab xa ndoꞌ be men lá nsak ladna ta nluu xa.
\p
\v 10 Leꞌa sa baꞌ ncho kwaꞌadpa bexa lá nxobgek ndoꞌ Dios, ndadiꞌizh bexa be ta naꞌan xtiꞌin no nkwiꞌinno bexa be men. Leꞌa kwaꞌad bexa li nak wa ndab leꞌa itea be xmen Cristo nsabndoꞌ yoo beꞌe lak ndun bexa judio.
\v 11 Leꞌa lu nsabndoꞌ lá ulaꞌata li gudiꞌizh bexa, leꞌa ke ten bexa wa leꞌa ncho be idub famil nsaulaꞌa nes ten Dios. Nluu bexa be men wa dub ta lid leꞌa nak, ndontsa gun bexa gan med.
\p
\v 12 Leꞌa dub xa ndák ncho leꞌaka isla Creta baꞌ ndab: “Leꞌa bexa Creta sbeꞌen bexa ukwiꞌin, no ugap nak bexa cuent nak be man, no uzhebpa ndaw bexa, no zhaꞌab bexa.”
\v 13 Leꞌa ta li ndab xa wa ta ugeaka. Ta weꞌe nsabndoꞌ uzhebpa kuyo lu bexa wa, ndontsa igeꞌka ladna bexa Dios,
\v 14 no yá lá isakyonta bexa be cuent naꞌan xtiꞌin ten bexa judio, no ni lá ulaꞌachta bexa be ta nibeꞌe be men mxelad gealngea ten Dios.
\p
\v 15 Leꞌa cuent ten be men umbiꞌi nak ladoꞌo~na ndoꞌ Dios, leꞌa itea be taꞌa umbiꞌika. Parea leꞌa cuent ten bexa ugap nak, bexa lá ndangea ladna Jesús, leꞌa ni dub taꞌa naꞌanpa umbiꞌi. Leꞌa bexa wa gast itea ta ndanbeꞌe bexa no itea be ta ncho ladoꞌo bexa bzhiꞌik nak.
\v 16 Ndab bexa leꞌa bexa nchandoꞌ Dios, parea leꞌa be ta ndun bexa nluu leꞌa bexa lá nchandoꞌ Dios. Leꞌa bexa uzhebpa ugap nak, no lá nxobgek bexa ndoꞌ Dios, no lá isuꞌu bexa gun bexa ni dub ta wen.
\c 2
\s Ta nsabndoꞌ uluu Tito ndoꞌ bexa Creta
\p
\v 1 Parea leꞌa lu nsabndoꞌ gudiꞌizh sbeꞌen lak nak gealngea ten Dios.
\v 2 Gud ndoꞌ be xabgiꞌi mas gox baꞌ isensaꞌab bexa xa ndoꞌ ta ugap, no gak bexa dub xa gap men mod ndoꞌ na, no wen gunbeꞌe bexa, no gungea ladna bexa gealngea ten Jesús, no ikweaꞌ ladna bexa be ltsaꞌa bexa, no uxik bexa ndoꞌ itea be taꞌa.
\p
\v 3 Gud ndoꞌ be xagots mas gox baꞌ gun bexa sbeꞌen ta wen, ta nluu leꞌa bexa ndankea Dios. Naꞌanpa gudiꞌizh bexa cuent gix, no naꞌanpa gun xa gealgu. Nsabndoꞌ ndi uluu bexa sbeꞌen be ta wen.
\v 4 No uluu bexa be xagots ben ikweaꞌ ladna bexa xabgiꞌi ten bexa no be xin~xa,
\v 5 no list gak bexa, no yankea bexa dubtsa xabgiꞌi ten bexa, no ulaꞌach bexa ta lid bexa, no utsin gak bexa ndoꞌ be men, no uxobgek bexa ndoꞌ xabgiꞌi ten bexa. Itea be ta ndee nsabndoꞌ gun be xagots ben ndontsa lá inisi be men diꞌizh ten Dios.
\p
\v 6 No liga gud ndoꞌ be xabgiꞌi ben isensaꞌab bexa xa ndoꞌ be ta ugap.
\v 7 Sbeꞌen be ta wen bin ndontsa iniꞌí bexa xteꞌe nsabndoꞌ gun bexa. Leꞌa gor nluu lu bexa wa, utsin bluu bexa lak nsak ladna Dios.
\v 8 Bidiꞌizh sbeꞌen gealngea, ndontsa naꞌanpa xela iníꞌi be men ndoꞌ lu. Weꞌe leꞌa bexa na lá nsak ladna ta nluu lu wa, leꞌa bexa wa sdoka ladna no naꞌan xteꞌe gab bexa ndoꞌ bega.
\p
\v 9 No gud ndoꞌ bexa ndun tiꞌin ndoꞌ stubga men, uxobgek bexa ndoꞌ xa nibeꞌe ten xa, no utsin gun bexa ta nsak ladna xa wa, naꞌanpa ndi ikabtoꞌo bexa ndoꞌ xa wa.
\v 10 No lá gun bexa gealwaꞌan, ndi gun bexa ta nluu leꞌa bexa men wen nak, ndontsa iniꞌí be men ta wen nak diꞌizh ten Dios, xa ngoꞌo beuna ndoꞌ be ke ten beuna wa.
\s Dios nlad leꞌa itea be men gap gealnaban
\p
\v 11 Leꞌa Dios mluꞌu xteꞌe nkweaꞌ ladna xa be men, ta gun gan gap itea be men gealnaban.
\v 12 Leꞌa xa wa nluu leꞌa beuna nsabndoꞌ ulaꞌa itea be taꞌa lá nsak ladna Dios no itea be ta ugap nlad beuna gun beuna. Ndi sbeꞌen be ta wen gunbeꞌe beuna, no umbiꞌi gak ladoꞌo beuna ndoꞌ Dios, no gun beuna ndoꞌ gizhliyo ndee lak nsak ladna Dios.
\v 13 Li nsabndoꞌ gun beuna ndalen kwenkeaꞌ beuna gal wizh uzheꞌeb wen, zha na ilen Jesucristo, xa nak Dios siꞌil ten beuna, xa nsaꞌa gealnaban ndoꞌ beuna.
\v 14 Leꞌa xa wa msaꞌa leꞌaka leꞌa xa sakndoꞌ beuna, ndontsa koꞌo xa beuna ndoꞌ itea be ke ten beuna. No mtsambiꞌi xa ladoꞌo beuna, ndontsa gak beuna xmen~xa, bexa na uzhebpa nlad gun be ta wen.
\p
\v 15 Leꞌa be ta ndee bidiꞌizh ndoꞌ bexa, no utenxeꞌa lu bexa no kuyo lu bexa lakkata dub xa nibeꞌe. Lá ulaꞌa lu uxelad bexa ta ndab lu.
\c 3
\s Xteꞌe nsabndoꞌ gak bexa nak xmen Jesucristo
\p
\v 1 No gud ndoꞌ bexa baꞌ lá yalad bexa uxobgek bexa ndoꞌ bexa naktiꞌin no ndoꞌ itea bexa nibeꞌe. No list kwe bexa gakno bexa be men.
\v 2 No naꞌanpa inisi bexa stubga men, no naꞌanpa kuyotoꞌo bexa. Ndi utsin gak bexa no bchaꞌan gak bexa ndoꞌ itea be men.
\p
\v 3 Leꞌa tiemp polta leꞌa beuna no naꞌanpa utsin ndanbeꞌe, no lá nxobgek beuna ndoꞌ Dios, no usankea beuna tsoꞌo bexa ugap nak, no ndencho beuna ndoꞌ ta ugap ncho ladoꞌo beuna no be ta ndal ladna beuna, no ugap nak beuna, no ndaklono beuna bexa ndap taꞌa. Leꞌa be men nxee ladna ndoꞌ beuna, no liga leꞌa beuna nxee ladna ndoꞌ be men.
\v 4 Parea leꞌa Dios xa ngoꞌo beuna ndoꞌ be ke ten beuna, mluu xa leꞌa xa ta ugeaka dub xa wen, no nkweaꞌ ladna xa be men,
\v 5 leꞌa xa uloꞌo beuna ndoꞌ be ke ten beuna. Parea naꞌanpa li ngun xa ke na ndun beuna ta wen, ndi ta na uzhebpa nkweaꞌ ladna Dios beuna uloꞌo xa beuna. No msaꞌa xa Espíritu ten xa uyoꞌo len ladoꞌo beuna, ndontsa umbiꞌi gak ladoꞌo beuna ndoꞌ xa, no gap beuna dub gealnaban kub.
\v 6 No uzhebpa msaꞌa xa Espíritu ten xa ndoꞌ beuna, ta na ngeꞌ ladna beuna Jesucristo xa ngoꞌo beuna ndoꞌ be ke ten beuna.
\v 7 Leꞌa ta na wen nyaꞌan beuna ndoꞌ Dios wa dub ta ga nsaꞌa xa. Ta weꞌe leꞌa beuna ndenkeaꞌ gal usoꞌ beuna dub gealnaban nunk lá idub.
\p
\v 8 Leꞌa ta ndáp naꞌ ndee wa ta ugeaka. Leꞌa naꞌ nlad inibeꞌe lu ta wa ndoꞌ bexa na ndangea ladna Dios sa baꞌ, ndontsa sbeꞌen be ta wen gun bexa. Leꞌa be ta ndee wa be ta wen no sakno‑yá itea be men.
\v 9 Parea lá gasyoꞌo lu ndoꞌ be ta naꞌan xtiꞌin ndadiꞌizh bexa, be cuent ten bexa uyoꞌo polta, no nyotoꞌo bexa, no nyo bexa ke ten ley mkeꞌa Moisés. Leꞌa be ta li ndun bexa wa ta naꞌan xtiꞌin.
\p
\v 10 Leꞌa tal ton uchealuyo be xmen Cristo, gud ndoꞌ xa wa dub biaj natal top biaj yá lá gunta xa ta wa. Ná tal leꞌa xa lá nsakyoꞌón ta ndab lu wa, yá lá gudiꞌizhnota lu xa.
\v 11 Leꞌa lu uniꞌíka leꞌa xa wa dub xa ugap nak. Leꞌa be ta ndun xa wa leꞌa nluu leꞌa xa ndap ke.
\s Be ta lult mkeꞌa Pabl ndoꞌ Tito
\p
\v 12 Leꞌa nat utuꞌub naꞌ Artemas natal Tíquico ndoꞌ lu. Leꞌa zha na ilanseaꞌ dub xa sa baꞌ, uxax giꞌid inaꞌ lu naꞌ gezh Nicópolis, leꞌa naꞌ ndee mbinbeꞌe yoꞌo naꞌ sa wa idub tiemp kwal.
\v 13 No gokno Zenas xa ntsid ley no Apolos ndontsa gor na ikaꞌan bexa sa baꞌ naꞌan xtaꞌan gun jwalt nes yaꞌbe bexa.
\v 14 Leꞌa bexa na no nak beuna xmen Cristo ndencho sa baꞌ nsabndoꞌ utsid bexa gun bexa be ta wen, usaꞌa bexa be taꞌa nkiꞌin be men, ndontsa isuꞌu bexa gakno bexa men.
\p
\v 15 Leꞌa itea bexa na ndeno naꞌ nidiꞌizh ndoꞌ lu. Unidiꞌizh sakndoꞌ naꞌ ndoꞌ itea bexa nak xmen Jesús sa baꞌ, leꞌa bexa nak amig ten besa. Leꞌa naꞌ naꞌab ndoꞌ Dios mas uzheꞌeb utsin gunno xa bega. Lika gak‑a.