\id 1JN zpt
\h 1 Juan
\toc1 1 Juan
\mt1 Git ned mkeꞌa Juan
\ip Leꞌa git ndee git ned mkeꞌa Juan, ndab‑a dubtsa gak be xmen Dios. No ndab‑a ta wen gun be men nak xin Dios. Leꞌa be xmen Cristo nsabndoꞌ utsaꞌal itea be ta ugap, cha ndi ikweaꞌ ladna bexa be ltsaꞌa~xa. No lá ulaꞌach bexa be ta naꞌanpa ta ugea, be ta nluu be mech ukwiꞌin.
\c 1
\s Jesús nak Diꞌizh nsaꞌa gealnaban
\p
\v 1 Leꞌa zha utexanta gizhliyo leꞌa Jesucristo nchola. Leꞌa besa mbiꞌín ta mbidiꞌizh xa, no uniꞌíndoꞌ besa xa, no uniꞌí besa ta mbin xa, no usen besa xa. Leꞌa xa wa leꞌa nak Diꞌizh nsaꞌa gealnaban, ta nunk lá idub.
\v 2 Leꞌa xa wa ulen wats besa. Leꞌa besa uniꞌí xa no ndadiꞌizh besa cuent ten xa. Nat leꞌa besa ndadiꞌizh ndoꞌ bega leꞌa xa wa xa nsaꞌa gealnaban nunk lá idub, utoꞌo xa wats Tad Dios, cha mlundoꞌ xa ndoꞌ besa.
\v 3 Leꞌa besa ndadiꞌizh ta uniꞌí besa nsea ta mbiꞌín besa, ndontsa no bega dubtsa gak beuna, lak dubtsa nak besa no Tad Dios nsea Xin~xa Jesucristo.
\v 4 Nkeꞌa besa be ta ndee ndoꞌ bega ndontsa mas iten ladna beuna.
\s Dios nak xeꞌa
\p
\v 5 Leꞌa ta ndee ta mluu Jesucristo ndoꞌ besa, no ndadiꞌizh besa‑yá ndoꞌ bega: leꞌa Dios leꞌa nak xeꞌa, leꞌa wats Dios naꞌan sa ukaw.
\v 6 Tal leꞌa beuna ndab dubtsa nak beuna nsea Dios, ná cha ndesea beuna sa ukaw, leꞌa beuna ndun gealkwiꞌin, no naꞌanpa ndun beuna lak nak gealngea.
\v 7 Ná tal leꞌa beuna ndesea ndoꞌ xeꞌa ten Dios lak ncho Dios ndoꞌ xeꞌa, weꞌe leꞌa beuna dubtsa nak nsea be ltsaꞌa beuna. No leꞌa ten ten Jesucristo Xin Dios ntsambiꞌi beuna ndoꞌ itea be ke ten beuna.
\p
\v 8 Tal leꞌa beuna gab leꞌa beuna naꞌanpa ndap ke, leꞌa beuna nkwiꞌinno leꞌaka leꞌa na, no lá nchandoꞌ beuna gealngea.
\v 9 Ná tal leꞌa beuna igondoꞌ be ke ten na ndoꞌ Dios, leꞌa xa sungeꞌ ladna ndoꞌ beuna no utsambiꞌi xa beuna ndoꞌ itea be ta ugap. Li gun Dios leꞌa xa uzheꞌeb dub xa utsin nak, no ndun xa lakka ndab xa.
\v 10 Ná tal leꞌa beuna gab leꞌa beuna lá ndap ke, leꞌa beuna ndanno Dios cuent dub xa ukwiꞌin, no naꞌanpa ta ugea ndangea ladna beuna diꞌizh ten xa.
\c 2
\s Jesucristo nak xa isoꞌ wats beuna ndoꞌ Dios
\p
\v 1 Bega nak cuent xiꞌín~naꞌ, nkeꞌa naꞌ be ta ndee ndoꞌ bega, ndontsa yá lá gunta bega be ta ugap nak. Tal leꞌa beuna mbin dub ta ugap nak, leꞌa beuna ndap dub xa isoꞌ wats beuna ndoꞌ Dios Xus beuna. Leꞌa ta wa Jesucristo xa ndon leꞌa wen.
\v 2 Leꞌa xa wa msaꞌa leꞌaka leꞌa xa ngut xa, ndontsa utsuꞌu Dios be ke ten beuna, nsea be ke ten be men ncho idub ndoꞌ gizhliyo.
\p
\v 3 Tal leꞌa beuna nxobgek be ta unibeꞌe Dios, leꞌa ta wa nluu leꞌa beuna ta ugeaka nchandoꞌ xa.
\v 4 Leꞌa tal ton gab leꞌa xa nchandoꞌ Dios, ná lá nxobgek xa be ta unibeꞌe Dios, leꞌa xa wa dub xa ukwiꞌin, no lá nchandoꞌ xa gealngea.
\v 5 Ná leꞌa tal ton nxobgek ndoꞌ diꞌizh ten Dios, leꞌa xa wa ta ugeakapa nchankea Dios. Li iniꞌí beuna tal leꞌa beuna dubtsa nak nsea Dios natal naꞌan.
\v 6 Leꞌa tal ton gab dubtsa nak nsea Dios, leꞌa xa wa nsabndoꞌ gun lak be ta mbin Jesucristo ndoꞌ gizhliyo.
\s Dub ta tilaw unibeꞌe Dios
\p
\v 7 Bega nak beuna xmen Cristo, leꞌa ta na li nibeꞌe naꞌ ndoꞌ bega wa naꞌanpa dub ta gol goꞌón bega. Leꞌa‑yá ndi dub ta nchandoꞌ bega gast zha ned mbingea ladna bega Cristo, leꞌa‑yá diꞌizh ten Dios mbiꞌín bega zha wa.
\v 8 Parea leꞌa naꞌ nkeꞌa dub ta kub nibeꞌe naꞌ ndoꞌ bega, dub ta nchandoꞌ bega lakka nchandoꞌ Cristo‑yá. Leꞌa tiemp ten ta ukaw nsatid, leꞌa xa na ta ugeaka leꞌa nak xeꞌa ten Dios nsula.
\p
\v 9 Leꞌa tal ton gab leꞌa xa ncho ndoꞌ xeꞌa ten Dios, ná cha nxee ladna xa ndoꞌ ltsaꞌa~xa, leꞌa xa wa bi nkesea sa ukaw.
\v 10 Leꞌa tal ton ikweaꞌ ladna be ltsaꞌa~na, leꞌa xa wa nchoka ndoꞌ xeꞌa ten Dios, no naꞌan xtaꞌan gun gan gailaꞌ xa ndoꞌ ta ugap.
\v 11 Ná leꞌa tal ton ixee ladna ndoꞌ ltsaꞌa~na, leꞌa xa wa nkesea sa ukaw, ni lá iniꞌí xa pa nchaꞌa xa, leꞌa ta ukaw wa leꞌa mbin gan lá inaꞌta xa.
\p
\v 12 Bego nak cuent xiꞌín~naꞌ, nkeꞌa naꞌ git ndee ndoꞌ bega, geal leꞌa Jesucristo mtsuꞌula be ke ten bega.
\v 13 Bego bexa gox, nkeꞌa naꞌ ta ndee ndoꞌ bega leꞌa bega nchandoꞌ Cristo, xa na ncho zha utexanta gizhliyo. Bego bexa ben, nkeꞌa naꞌ ta ndee ndoꞌ bega leꞌa bega mbin gan ndoꞌ maxuꞌu. No ndoꞌ bego na tiꞌi mbingea ladna Cristo, nkeꞌa naꞌ ta ndee leꞌa bego nchandoꞌ Dios Xus beuna.
\v 14 Leꞌa ndoꞌ bego bexa gox, nkeꞌa naꞌ ta ndee leꞌa bego nchandoꞌ Cristo, xa ncho zha utexanta gizhliyo. No ndoꞌ bego xa ben, nkeꞌa naꞌ ta ndee leꞌa bego juert nak, no ncho diꞌizh ten Dios len ladoꞌo bega, no mbin bega gan ndoꞌ maxuꞌu.
\p
\v 15 Lá yankea bega gizhliyo ndee, ni be taꞌa ncho ndoꞌ gizhliyo. Tal ton ndankea gizhliyo, leꞌa xa wa naꞌanpa ndankea Tad Dios.
\v 16 Leꞌa itea be ta ugap ncho ndoꞌ gizhliyo ndee naꞌanpa ta nsaꞌa Dios. Leꞌa bexa gizhliyo nkwaꞌan be ta ugap ndanbeꞌe bexa, no nsaꞌab ladna bexa be ta naꞌ bexa, nsea nzhinnona bexa be ta ndap bexa. Leꞌa be ta li ndun bexa wa naꞌanpa ta nsaꞌa Tad Dios, leꞌa ta wa ndi ta gizhliyotsa.
\v 17 Leꞌa gizhliyo ndee initndoꞌ nsea itea be ta ugap nlad bexa; ná leꞌa tal ton gun lak nlad Dios, leꞌa xa wa iban idub tiemp.
\s Bexa nka gun be men ta nlad Cristo
\p
\v 18 Bega nak cuent xiꞌín~naꞌ, leꞌa tiemp ndee be wizh lult. Leꞌa lak ndoꞌón bega leꞌa gal dub wizh ilen dub xa gak anticristo, xa na uka gun be men ta nlad Cristo. Ná leꞌa nat ncho kwaꞌad bexa li nak. Ta weꞌe uniꞌí beuna leꞌa tiemp ndee be wizh lult.
\v 19 Leꞌa bexa wa utoꞌo lat beuna, parea naꞌanpa ta ugea nak bexa ltsaꞌa beuna. Tal leꞌa bexa nak ltsaꞌa beuna, nal no bexa ndi ncho lat beuna. Ná leꞌa ta na utoꞌo bexa wa nluu leꞌa xa naꞌanpa nak ltsaꞌa beuna nak xmen Cristo.
\p
\v 20 Leꞌa Cristo msaꞌa Espíritu ten Dios ndoꞌ bega, no nchandoꞌ bega gealngea.
\v 21 Nkeꞌa naꞌ ta ndee ndoꞌ bega, leꞌa naꞌ uní leꞌa bega nchandoꞌka gealngea, no uniꞌíka beuna leꞌa ni dub gealkwiꞌin lá ilen lat gealngea.
\v 22 ¿Ton bexa na ndun gealkwiꞌin? Leꞌa ta wa xa na ndab leꞌa Jesús naꞌanpa leꞌa nak Cristo. Leꞌa xa li ndab wa xa nka gun be men ta nlad Cristo, leꞌa xa nxelad Dios Xus beuna no Xin Dios.
\v 23 Leꞌa tal ton gab leꞌa Jesús naꞌanpa nak Xin Dios, leꞌa xa wa lá nchandoꞌ Dios Xus beuna. Ná leꞌa tal ton gab leꞌa Jesús Xinka Dios, leꞌa xa wa nchandoꞌka Dios Xus beuna.
\p
\v 24 Ta weꞌe lá ulaꞌa bega ta mbiꞌín bega zha ned mbingea ladna bega Cristo. Tal leꞌa bega ndunka be ta mbiꞌín bega zha ned wa, leꞌa bega dubtsa nak no Xin Dios no Dios Xus beuna.
\v 25 Leꞌa Cristo ndab leꞌa usaꞌa dub gealnaban kub ndoꞌ beuna, ta nunk lá idub.
\p
\v 26 Nkeꞌa naꞌ be ta ndee ndoꞌ bega, ndontsa gap bega cuent ndoꞌ bexa nlad ukwiꞌinno bega.
\v 27 Leꞌa bego noꞌo Espíritu ten Dios ta na msaꞌa Cristo ndoꞌ bega. Ta weꞌe naꞌanpa nkiꞌin bega ni dub men uluu bega, leꞌa Espíritu wa leꞌa nluu xteꞌe nak itea be taꞌa. Leꞌa ta nluu Espíritu wa ta ugeaka naꞌanpa gealkwiꞌin‑a. Ta weꞌe dubtsa gok bega no Cristo, lak mluu Espíritu ten Dios bega.
\p
\v 28 Bega nak cuent xiꞌín~naꞌ, nat naꞌanpa ulaꞌa beuna Cristo, ndontsa naꞌanpa izheb beuna zha ulundoꞌ xa, no naꞌanpa ido ladna beuna ndoꞌ xa zha ilen xa.
\v 29 Leꞌa bega uniꞌíka leꞌa Jesucristo sbeꞌen ta wen ndun, ta weꞌe nsabndoꞌ iniꞌí bega leꞌa itea bexa na ndun ta wen wa xinka Dios.
\c 3
\s Bexa nak xin Dios
\p
\v 1 Binbeꞌe bego xteꞌe uzheꞌeb nkweaꞌ ladna Tad Dios beuna, ndab xa leꞌa beuna nak xin~xa. Leꞌa be men gizhliyo lá nchandoꞌ xa, ta weꞌe lá iniꞌí bexa leꞌa beuna xin Dios.
\v 2 Bego amig ten naꞌ, nat leꞌa beuna nak xin Dios, parea biseata iniꞌí beuna xteꞌe gak beuna. Leꞌa gal zha na ilen Cristo leꞌa beuna yak lak nak xa, geal leꞌa beuna iniꞌí xteꞌe mer nak xa.
\v 3 Tal ton ndangea ladna li yoo ta wa, leꞌa xa wa ntsambiꞌi leꞌaka leꞌa xa ndoꞌ ta ugap, lak umbiꞌi nak Cristo.
\p
\v 4 Leꞌa itea bexa na ndun be ta ugap, leꞌa bexa wa ndap ke ndoꞌ Dios, leꞌa Dios nibeꞌe naꞌanpa gun bexa be ta ugap wa.
\v 5 Ná leꞌa bego yá uniꞌíka leꞌa Jesucristo mbiꞌid ndoꞌ gizhliyo ndontsa yuꞌu be ke ten beuna, leꞌa xa wa ni dub ke lá ndap.
\v 6 Leꞌa iteanak bexa na dubtsa nak no Cristo naꞌanpa ndunta be ta ugap. Ná leꞌa itea bexa na ndunta be ta ugap, leꞌa bexa wa lá iniꞌí ton nak Cristo, no ni lá nchandoꞌ bexa xa.
\p
\v 7 Bega nak cuent xiꞌín~naꞌ, lá ulaꞌa bega ukwiꞌinno be men bega: leꞌa tal ton ndun be ta wen, leꞌa xa wa xa wenka lak wen nak Cristo.
\v 8 Ná leꞌa tal ton ndunta be ta ugap, leꞌa xa wa xmen maxuꞌu, leꞌa maxuꞌu li ndun be ta ugap zha utexanta gizhliyo. Ta weꞌe ulen Xin Dios mbizhaꞌa xa be tiꞌin ten maxuꞌu.
\p
\v 9 Leꞌa bexa nak xin Dios, leꞌa xa wa yá lá ndunta be ta ugap, geal leꞌa xa ndap gealnaban kub msaꞌa Dios len ladoꞌo xa. Lá yoota gan gun bexa be ta ugap, leꞌa bexa myak dub xin Dios.
\v 10 Leꞌa ta ndee nluu ton nak xin Dios no ton nak xin maxuꞌu: leꞌa itea bexa na lá ndun be ta wen no lá nkweaꞌ ladna xa be ltsaꞌa~xa, leꞌa xa wa naꞌanpa xin Dios.
\s Ikweaꞌ ladna beuna be ltsaꞌa beuna
\p
\v 11 Leꞌa diꞌizh ndee ta mbiꞌín bega zha nedta: ikweaꞌ ladna beuna be ltsaꞌa beuna.
\v 12 Lá gak beuna lak ngok Caín xin maxuꞌu, xa mbit wit~na. ¿Xtaꞌan li mbin xa zha? Li mbin Caín geal ugap nak ta mbin xa, ná leꞌa wit~xa wa utsin nak ta mbin na.
\p
\v 13 Bego nak beuna xmen Cristo, lá yanseana bega tal leꞌa be men ncho ndoꞌ gizhliyo ndee nxeeno ladna bega.
\v 14 Leꞌa ta na nkweaꞌ ladna beuna be ltsaꞌa nak beuna xmen Cristo, ta weꞌe nluu leꞌa beuna nban ndoꞌ gealgut. Ná leꞌa tal ton lá ikweaꞌ ladna be ltsaꞌa~na, leꞌa xa wa bi ncho ndoꞌ gealgut.
\v 15 Leꞌa tal ton ixee ladna ndoꞌ ltsaꞌa~na, leꞌa xa wa cuent nak dub xa ndut men. No uniꞌí bego leꞌa ni dub xa ndut men lá yoo gan gap gealnaban ndoꞌ Dios ta nunk lá idub.
\v 16 Leꞌa beuna yá nchandoꞌ xteꞌe nsabndoꞌ ikweaꞌ ladna beuna be ltsaꞌa beuna: leꞌa Jesucristo msaꞌa gealnaban ten na sakndoꞌ beuna. Ta weꞌe liga nsabndoꞌ usaꞌa beuna gealnaban ten beuna sakndoꞌ be ltsaꞌa nak beuna xmen Cristo.
\v 17 Leꞌa tal ton ndap taꞌa ndoꞌ gizhliyo ndee, cha naꞌ xa leꞌa dub ltsaꞌa~xa uban nak, ná lá gakno xa xa, leꞌa xa wa naꞌanpa nkweaꞌ ladna ltsaꞌa~na wa lak nlad Dios gun xa.
\v 18 Leꞌa bego nak cuent xiꞌín~naꞌ, lá yoo gan ikweaꞌ ladna beuna be ltsaꞌa beuna sbeꞌen diꞌizhtsa. Ndi gakno beuna be ltsaꞌa beuna, ta na nluu leꞌa beuna nkweaꞌka ladna bexa.
\p
\v 19 Tal leꞌa beuna li ndun, leꞌa beuna uniꞌí leꞌa beuna ndun lak nak gealngea ten Dios, no uniꞌí beuna leꞌa beuna gaꞌal nak ndoꞌ Dios.
\v 20 Tal leꞌa beuna nsak leꞌa beuna naꞌanpa gaꞌal nak ndoꞌ Dios, ná leꞌa Dios leꞌa uniꞌí xteꞌe nak beuna, leꞌa xa nchandoꞌ itea be taꞌa.
\v 21 Bego amig ten naꞌ, tal leꞌa beuna uniꞌí len ladoꞌo beuna leꞌa beuna gaꞌal nak ndoꞌ Dios, leꞌa beuna naꞌanpa izheb ibii wats Dios.
\v 22 Leꞌa Dios usaꞌa guniꞌi xtaꞌan inab beuna, tal leꞌa beuna nxobgek ta nibeꞌe Dios, no ndun beuna be ta nsak ladna xa.
\v 23 Leꞌa ta ndee ta nibeꞌe Dios wa: gungea ladna beuna Jesucristo Xin~xa, nsea ikweaꞌ ladna beuna be ltsaꞌa beuna lak ndab xa.
\v 24 Leꞌa tal ton uxobgek ndoꞌ be ta nibeꞌe Dios, leꞌa xa wa dubtsa nak nsea Dios, leꞌa Dios ncho len ladoꞌo~xa. Leꞌa bega uniꞌí leꞌa beuna dubtsa nak nsea Dios, ta na msaꞌa xa Espíritu ten xa ndoꞌ beuna.
\c 4
\s Bexa na ta ugeaka nak xmen Cristo
\p
\v 1 Bego amig ten naꞌ, lá gungea ladna bega iteanak be ta nluu be men, ndi blaꞌach bega naga noꞌo bexa Espíritu ten Dios nate naꞌan, leꞌa ncho kwaꞌad bexa nkwiꞌin ndab leꞌa ndadiꞌizh sakndoꞌ Dios.
\v 2 Lndeꞌe iniꞌí bega ná ton noꞌo Espíritu ten Dios: leꞌa itea bexa na gab leꞌa Jesucristo mbiꞌid ndoꞌ gizhliyo lak nak dub men, leꞌa xa wa noꞌo Espíritu ten Dios.
\v 3 Ná leꞌa itea bexa na gab leꞌa Jesucristo naꞌanpa ngiꞌid lak nak dub men, leꞌa xa wa naꞌanpa noꞌo Espíritu ten Dios, ndi nak xa xmen anticristo. Leꞌa bega yá ndoꞌón leꞌa xa wa ilen, leꞌa juers ten xa wa yá ncho ndoꞌ gizhliyo.
\p
\v 4 Bega nak cuent xiꞌín~naꞌ, leꞌa bega yá nak xmen Dios, no mbin bega gan ndoꞌ bexa ukwiꞌin wa, leꞌa Espíritu ten Dios ncho len ladoꞌo bega mas juert ndoꞌ espíritu ncho ndoꞌ gizhliyo ndee.
\v 5 Leꞌa bexa wa xa gizhliyo, ta weꞌe ndadiꞌizh bexa be ta gizhliyo. Leꞌa be men gizhliyo cha nlaꞌachka ta ndab xa.
\v 6 Parea leꞌa beuna xmen Dios. Leꞌa tal ton nchandoꞌ Dios, leꞌa xa wa nsakyoꞌón ta ndab beuna. Ná leꞌa tal ton naꞌanpa nchandoꞌ Dios, leꞌa xa wa lá isakyoꞌón ta ndab beuna. Li igondoꞌ beuna ná ton noꞌo Espíritu ndadiꞌizh gealngea, no ton noꞌo espíritu ukwiꞌin.
\s Nkweaꞌ ladna Dios be men
\p
\v 7 Bego amig ten naꞌ, nsabndoꞌ ikweaꞌ ladna beuna be ltsaꞌa beuna, leꞌa ta wa dub ta nsaꞌa Dios gun beuna. Leꞌa tal ton ikweaꞌ ladna ltsaꞌa~na, leꞌa xa wa xin Dios no nchandoꞌ xa Dios.
\v 8 Leꞌa tal ton lá ikweaꞌ ladna be ltsaꞌa~na, leꞌa xa wa lá nchandoꞌ Dios, leꞌa Dios sbeꞌen nkweaꞌ ladna be men.
\v 9 Lndeꞌe mluu Dios leꞌa xa nkweaꞌka ladna beuna: leꞌa xa mtuꞌub dubkama Xin~xa ndoꞌ gizhliyo, ndontsa gap beuna gealnaban ta nunk lá idub.
\v 10 Leꞌa Dios uzhebpa nkweaꞌ ladna be men, naꞌanpa lak nak ta ndankea beuna xa, ndi tant nkweaꞌ ladna xa beuna msaꞌa xa Xin~xa ngut xa, ndontsa utsuꞌu xa be ke ten beuna.
\p
\v 11 Bego nak amig ten naꞌ, leꞌa ta na li nkweaꞌ ladna Dios beuna, leꞌa beuna no nsabndoꞌ ikweaꞌ ladna be ltsaꞌa~na.
\v 12 Naꞌan ton gol niꞌí Dios. Ná tal leꞌa beuna nkweaꞌ ladna be ltsaꞌa~na, leꞌa Dios ncho len ladoꞌo beuna, no liga nkweaꞌ ladna beuna bexa lak nkweaꞌ ladna Dios beuna.
\p
\v 13 Lndeꞌe iniꞌí beuna leꞌa beuna dubtsa nak nsea Dios, no ncho Dios len ladoꞌo beuna: leꞌa xa msaꞌa Espíritu ten na ndoꞌ beuna.
\v 14 Leꞌa beuna leꞌa uniꞌí no ndadiꞌizh beuna leꞌa Tad Dios mtuꞌub Xin~na, utix xa be ke ten be men ncho ndoꞌ gizhliyo ndee.
\v 15 Leꞌa tal ton gab leꞌa Jesús leꞌa nak Xin Dios, leꞌa xa wa ncho Dios len ladoꞌo~na, no dubtsa nak xa nsea Dios.
\v 16 Leꞌa beuna mgondoꞌ no ndangea ladna beuna leꞌa Dios nkweaꞌ ladna beuna. Leꞌa Dios sbeꞌen nkweaꞌ ladna be men. Ta weꞌe leꞌa bexa na nkweaꞌ ladna be ltsaꞌa~na, leꞌa bexa wa dubtsa nak nsea Dios, no ncho Espíritu ten Dios len ladoꞌo~xa.
\p
\v 17 Leꞌa ta na li nkweaꞌ ladna beuna be ltsaꞌa beuna wa, leꞌa gal wizh gab Dios ná ton ndap ke, leꞌa beuna naꞌanpa izheb, leꞌa ndoꞌ gizhliyo ndee leꞌa beuna nak lak nak Jesucristo.
\v 18 Leꞌa Dios nkweaꞌka ladna beuna, ta weꞌe lá nzheb beuna ndoꞌ xa. Leꞌa tal ton igondoꞌ leꞌa Dios nkweaꞌ ladna xa, leꞌa xa wa naꞌanpa nzheb ndoꞌ Dios. Leꞌa bexa na nzheb ndoꞌ xa wa, leꞌa bexa wa uniꞌí leꞌa Dios utsaksi bexa. Ta weꞌe tal ton nzheb ndoꞌ Dios, leꞌa xa wa biseata igondoꞌ ta na nkweaꞌ ladna Dios xa.
\p
\v 19 Leꞌa beuna ndankea Dios, geal leꞌa Dios ned mkweaꞌ ladna beuna.
\v 20 Tal ton gab leꞌa ndankea Dios, ná nxee ladna xa ndoꞌ be ltsaꞌa~xa, leꞌa xa wa ndun gealkwiꞌin. Ná leꞌa bexa na lá nkweaꞌ ladna be ltsaꞌa~na, bexa na naꞌ xa wa, ¿xteꞌema yoo gan yankea bexa Dios, dub xa lá naꞌ bexa zha?
\v 21 Leꞌa Jesucristo unibeꞌe ta ndee ndoꞌ beuna: tal leꞌa beuna ndankea Dios, leꞌa beuna no nsabndoꞌ ikweaꞌ ladna be ltsaꞌa~na.
\c 5
\s Xa ngeꞌ ladna Dios ndun gan ndoꞌ gizhliyo
\p
\v 1 Leꞌa tal ton ndangea ladna leꞌa Jesús leꞌa nak Cristo, leꞌa xa wa myak xin Dios. Leꞌa tal ton ndankea Dios Xus beuna, leꞌa xa wa no nkweaꞌ ladna bexa nak xin Dios.
\v 2 Tal leꞌa beuna ndankea Dios no ndun beuna lak ndab Dios, weꞌe uniꞌí beuna leꞌa beuna nkweaꞌ ladna be xin Dios.
\v 3 Tal leꞌa beuna ndankeaka Dios, leꞌa beuna nxobgek ndoꞌ ta nibeꞌe xa, leꞌa ta nibeꞌe xa wa naꞌanpa dub ta bid.
\v 4 Leꞌa itea bexa nak xin Dios ndun gan ndoꞌ be ta gizhliyo. Leꞌa ta na ngeꞌ ladna beuna Cristo, ta weꞌe ndun beuna gan ndoꞌ gizhliyo.
\v 5 ¿Tonma ndun gan ndoꞌ be ta gizhliyo zha? Leꞌa ta wa bexa na ndangea ladna leꞌa Jesús nak Xin Dios.
\s Ta mbidiꞌizh Espíritu ten Dios cuent ten Jesús
\p
\v 6 Leꞌa zha na mbiꞌid Jesucristo, leꞌa xa utaleaꞌ no ngut xa, mtsiꞌi xa ten ten xa. Naꞌanpa nabtsa utaleaꞌ xa, leꞌa xa no ngut mtsiꞌi xa ten. Leꞌa Espíritu ten Dios nluu leꞌa Cristo Xinka Dios, leꞌa Espíritu wa sbeꞌen gealngea ndadiꞌizh.
\v 7 Leꞌa chon bexa ncho gibeꞌa nluu leꞌa Jesús nak Xin Dios: leꞌa ta wa Tad Dios, no Xin Dios xa nak Diꞌizh, no Espíritu ten Dios. Leꞌa yon bexa ndee dubtsa ndab.
\v 8 Nsea ncho chon taꞌa ndoꞌ gizhliyo nsaꞌa cuent leꞌa Jesús nak Xin Dios: leꞌa ta wa ta ndab Espíritu ten Dios, no ta na utaleaꞌ Jesús len nits, no ten ten Jesucristo mtsiꞌi xa ndoꞌ cruz. Leꞌa yon ta ndee wa dubtsa ndab.
\v 9 Leꞌa beuna ndangea ladna be ta ndadiꞌizh be men, parea leꞌa ta ndab Dios wa mas ta nsak, ta ndadiꞌizh xa cuent ten Xin~xa.
\v 10 Leꞌa tal ton igeꞌ ladna Xin Dios, leꞌa xa wa uniꞌí len ladoꞌo~na leꞌa ta ndab Dios wa ta ugeaka. Ná leꞌa tal ton lá gungea ladna ta ndab Dios, leꞌa xa wa ndanno Dios cuent dub xa ukwiꞌin, leꞌa xa lá ngungea ladna ta mbidiꞌizh Dios lak nak Xin Dios.
\v 11 Leꞌa ta ndee ta mbidiꞌizh Dios: leꞌa Dios nsaꞌa dub gealnaban nunk lá idub tal leꞌa beuna ngeꞌ ladna Xin Dios.
\v 12 Leꞌa tal ton igeꞌ ladna Xin Dios, leꞌa xa wa ndap gealnaban wa. Ná leꞌa tal ton lá igeꞌ ladna xa, leꞌa xa naꞌanpa ndap gealnaban wa.
\s Be ta lult mkeꞌa Juan
\p
\v 13 Leꞌa be ta ndee nkeꞌa naꞌ ndoꞌ bego na ngeꞌ ladna Xin Dios, ndontsa iniꞌí bega leꞌa bega ndap gealnaban nunk lá idub, no mas igeꞌ ladna bego Xin Dios.
\v 14 Leꞌa beuna uniꞌíka tal leꞌa beuna inab dub taꞌa ndoꞌ Dios lak nlad Dios, leꞌa xa soꞌónka‑yá.
\v 15 Lak uniꞌí beuna leꞌa Dios ndoꞌón ta nab beuna, no liga uniꞌí beuna leꞌa xa usaꞌaka ta wa.
\p
\v 16 Tal leꞌa dub bega naꞌ leꞌa dub ltsaꞌa bega ndun dub ta ugap nak, dub ta sungeꞌ ladna Dios, weꞌe unab bega ndoꞌ Dios gungeꞌ ladna ndoꞌ xa wa. Leꞌa Dios li gun tal ta mbin xa wa naꞌanpa dub ta uzhebpa ugap nak. Leꞌa ncho be ta ugap ndun be men yá lá gungeꞌta ladna Dios. Leꞌa bexa li ndun ke wa naꞌanpa gáp naꞌ inab bega ndoꞌ Dios gungeꞌ ladna ndoꞌ xa wa.
\v 17 Itea be ta ugap ndun be men, leꞌa ta wa dub ke ndoꞌ Dios. Parea leꞌa ncho be ke wa leꞌa Dios sungeꞌka ladna.
\p
\v 18 No uniꞌí beuna leꞌa bexa nakla xin Dios yá naꞌantapa nsankea tsoꞌo be ta ugap. Leꞌa Xin Dios nlaꞌach bexa wa, ndontsa naꞌan xtaꞌan gunno maxuꞌu bexa.
\p
\v 19 No uniꞌí beuna leꞌa beuna nak xin Dios, maska idub gizhliyo ncho ndoꞌ yaꞌa maxuꞌu.
\p
\v 20 No uniꞌí beuna leꞌa Xin Dios mbiꞌid, no msaꞌa xa ta nyakbeꞌena beuna, ndontsa igondoꞌ beuna xa na ta ugeaka leꞌa nak Dios. Leꞌa ta wa Jesucristo Xin Dios, xa na dubtsa nak no beuna. Leꞌa xa wa ta ugeaka leꞌa nak Dios, xa nsaꞌa gealnaban nunk lá idub.
\v 21 Bego nak cuent xiꞌín~naꞌ, lá yankea bega be ta naꞌanpa leꞌa nak Dios. Lika nak‑a.