\id REV zpt
\h Apocalipsis
\toc1 Apocalipsis
\mt1 Be ta mluu Jesucristo ndoꞌ Juan, be ta tilaw yoo
\ip Leꞌa dub angel ten Dios mluu ndoꞌ Juan be ta tlaw yoo zha na yamer initndoꞌ gizhliyo ncho nat, no xteꞌe gak tiemp inibeꞌe Dios. No ndab Dios ná xtaꞌan ukeꞌa Juan ndoꞌ isagaꞌad xkwaꞌa be xmen Cristo ndencho sa siꞌil nsaleaꞌ Asia, ndab Dios be ta wen ndun bexa no be ta lid leꞌa nak ndun bexa. Leꞌa gal be wizh lult leꞌa Dios utsaksi itea bexa na mbin be ta ugap, no yunchaꞌaw Dios itea be taꞌa. Leꞌa Apocalipsis ndadiꞌizh leꞌa Jesucristo uzheꞌeb ndap juers no uzheꞌeb siꞌil nak xa idub tiemp. No ndab‑a xteꞌe ilen Cristo unitndoꞌ xa itea be ta ugap nak, no leꞌa xa inibeꞌe.
\c 1
\s Jesucristo mluu ndoꞌ Juan be ta tilaw yoo
\p
\v 1 Leꞌa sa ndee nkeaniꞌi be ta mluu Dios ndoꞌ Jesucristo, ndontsa uluu xa ndoꞌ bexa ndun tiꞌin ndoꞌ xa be ta sken yoo. Leꞌa Jesucristo cha mtuꞌub dub angel mbid uluu‑yá ndoꞌ naꞌ xa nsaleaꞌ Juan, dub xa ndun tiꞌin ndoꞌ Cristo.
\v 2 Ta ugeaka gáp naꞌ leꞌa be ta uní naꞌ wa ta tenka Dios, no leꞌaka Jesucristo mluu ta wa ndoꞌ naꞌ.
\v 3 Uzhebpa wen yoo ladna bexa na goꞌol be diꞌizh ten Dios ndee no isakyoꞌón bexa‑yá, leꞌa tiemp yoo be ta wa sken ilen.
\s Juan nidiꞌizh ndoꞌ be xmen Dios ndencho isagaꞌad gezh
\p
\v 4 Leꞌa naꞌ ndee Juan nidiꞌizh ndoꞌ bego nak isagaꞌad xkwaꞌa be xmen Jesucristo ndencho Asia. Leꞌa Dios xa na leꞌaka nak Dios nat no polta no idub tiemp ilen ndee, no isagaꞌad espíritu nde ndoꞌ sa nsob Dios, leꞌa bexa wa utsin gak ndoꞌ bega no gun bexa wen yoo ladna bega.
\v 5 No Jesucristo li gun, leꞌa xa wa gaꞌal mluu xteꞌe wen nak Dios, no ndon ned xa mbin gan ndoꞌ gealgut, no leꞌa xa nak xa nibeꞌe ndoꞌ itea bexa nibeꞌe ndoꞌ gizhliyo. Leꞌa xa wa nkweaꞌ ladna beuna no mtsambiꞌi xa ladoꞌo beuna ndoꞌ be ke ten beuna no ten ten xa.
\v 6 No myunno xa beuna dub xa nibeꞌe no dub uleꞌay ndun tiꞌin ndoꞌ Dios Xus~xa. Idub tiemp yankea beuna Cristo xa ndon leꞌa nibeꞌe. Lika nak‑a.
\b
\q1
\v 7 Blaꞌach bega leꞌa xa ilen ndoꞌ xkaw,
\q2 nsea itea be men iniꞌí xa,
\q2 gast no bexa ndap ke mbit xa wa.
\q1 Nsea itea be ras men nde ndoꞌ gizhliyo
\q2 uzheꞌeb goꞌonno xa.
\q1 Ta ugeaka lika gak‑a.
\b
\p
\v 8 Leꞌa Cristo Xa Nibeꞌe wa xa ndon leꞌa juert nak ndab: “Leꞌa naꞌ ndee nak Alfa nsea Omega. Nak naꞌ xa ned nsea xa lult ndoꞌ itea be taꞌa.” Leꞌa xa wa leꞌaka nak Dios nat no polta no idub tiemp ilen ndee.
\s Cristo mlundoꞌ ndoꞌ Juan
\p
\v 9 Leꞌa naꞌ ndee Juan nak beuna xmen Jesucristo. Leꞌa naꞌ nsatid gealkweaꞌ lak nsatid bega‑yá. No nak beuna bexa nibeꞌe Dios, no ndakno Jesucristo beuna nchaꞌuxik beuna ndoꞌ be gealkweaꞌ. Leꞌa ke na ndadiꞌizh naꞌ diꞌizh ten Dios, no ndadiꞌizh naꞌ xteꞌe nak ta ndun Jesucristo, ta weꞌe mtsaꞌab be men naꞌ isla nsaleaꞌ Patmos cuent dub xa nkea litgiꞌib.
\v 10 Leꞌa ngol dub wizh doming leꞌa Espíritu ten Dios usen naꞌ. Cha weꞌe leꞌa lad tsoꞌo naꞌ mbín naꞌ dub ti men uzhebpa ugeꞌ cuent ti dub trompet,
\v 11 ndab xa:
\p —Leꞌa naꞌ ndee nak Alfa nsea Omega, xa ned no xa lult ndoꞌ itea be taꞌa. Bkeꞌa ndoꞌ git be ta inaꞌ lu, cha btuꞌub‑a ndoꞌ isagaꞌad be gezh nde be xmen~naꞌ sa nsaleaꞌ Asia. Leꞌa be gezh wa nsaleaꞌ Éfeso no Esmirna no Pérgamo no Tiatira no Sardis no Filadelfia nsea Laodicea.
\p
\v 12 Cha mgeaksoꞌ naꞌ lad tsoꞌo naꞌ, ná ton ta na li uníꞌi ndoꞌ naꞌ wa. Cha weꞌe uní naꞌ dub gaꞌad candeler ta oro.
\v 13 Leꞌa tlaw be candeler wa uní naꞌ nsoꞌ dub xa cuent nluu dub men, nak xa dub lad koꞌol gast gendats~xa ndakea‑yá. No nde dub sinch oro ta ladoꞌo~xa.
\v 14 Leꞌa gek~xa no gichgek~xa ndon nagud naꞌ, cuent naꞌ gich borreg ndon mbe xiꞌil naꞌ‑yá. Leꞌa be ngusndoꞌ~xa cuent bealꞌ giꞌ naꞌ.
\v 15 Leꞌa xoꞌo~xa nduꞌu lak nduꞌu dub giꞌib guch ta bronce, dub ta tiꞌi utoꞌo len gor. Leꞌa ti~xa ngen cuent sa nsalaꞌ kwaꞌal nits ndoꞌ dub geꞌdaꞌa.
\v 16 Leꞌa ndoꞌ yaꞌa lad gaꞌal xa ndiꞌib dub gaꞌad ta cuent mbeal ndiꞌib gibeꞌa. Leꞌa toꞌo~xa ntoꞌo dub spad top toꞌo na wach. Leꞌa idub ndoꞌ xa nluu cuent nluu wizh gor na uzhebpa ugiꞌi naꞌ bea.
\p
\v 17 Leꞌa gor uní naꞌ xa, cuent dub xa ngut ulayat naꞌ xan ndats~xa. Leꞌa xa cha mxoꞌob yaꞌa lad gaꞌal xa tsoꞌo naꞌ, cha ndab xa:
\p —Lá izheb lu. Naꞌ leꞌa nak xa ned no xa lult ndoꞌ itea be taꞌa,
\v 18 xa na nban. Leꞌa naꞌ ngut, parea leꞌa nat leꞌa naꞌ nban idub tiemp. No leꞌa naꞌ mas juert ndoꞌ gealgut no mas juert naꞌ ndoꞌ sa ndencho bexa ngut.
\v 19 Bkeꞌa be ta uniꞌí lu wa no be ta ncho nat no be ta tilaw yoo.
\v 20 Nat gáp naꞌ dub ta gol goꞌón lu, xteꞌe nak isagaꞌad mbeal ndiꞌib yaꞌa lad gaꞌal naꞌ ndee nsea isagaꞌad be candeler ndee wa: leꞌa isagaꞌad mbeal ndee nak isagaꞌad be angel nlaꞌach be xmen~naꞌ ndencho isagaꞌad gezh wa; leꞌa isagaꞌad be candeler ta oro ta naꞌ lu ndee nak isagaꞌad xkwaꞌa be xmen~na ndencho be gezh wa.
\c 2
\s Ta mbidiꞌizh Jesucristo ndoꞌ be xmen~xa ndencho Éfeso
\p
\v 1 \fig |HK00378B.TIF|col|Ap. 2:1‑7||Dub mapa nluu isagaꞌad be gezh nseꞌat Apocalipsis|\fig*’Bkeꞌa ta ndee ndoꞌ angel nlaꞌach be xmen~naꞌ ndencho Éfeso: “Lndeꞌe ndab xa nsén dub gaꞌad mbeal ndiꞌib gaꞌap yaꞌa lad gaꞌal na, xa na nkesea lat isagaꞌad candeler ta oro. Ndab xa:
\b
\pi1
\v 2 Naꞌ nchandoꞌ be ta ndun bega, xteꞌe juert ndun bega tiꞌin ten naꞌ no uzhebpa nxik bega. Leꞌa naꞌ uní leꞌa bega naꞌanpa nchealtsaꞌa bexa ugap nak; nsea mbin bega preb bexa nkwiꞌin ndab nak apostol ten naꞌ. Cha uniꞌí bega leꞌa bexa wa ndun gealkwiꞌin.
\v 3 No nxik bega ndoꞌ be gealkweaꞌ nsatid bega. No juert ndun bega tiꞌin ten naꞌ ta na ndankea bega naꞌ, ni lá ndach ladna bega.
\pi1
\v 4 Parea ncho stub taꞌa lá nsak lad naꞌ ndun bega: leꞌa bega yá lá ndankeata naꞌ lakta zha ned wa.
\v 5 Btseꞌa ladna bega xteꞌe wen ngok bega, cha byach bega ndoꞌ naꞌ, cha bin bega lak mbin bega zha ned wa. Tal leꞌa bega lá gun li, leꞌa naꞌ sken ilen, cha ulat naꞌ candeler ten bega tal leꞌa bega lá ulaꞌa ta ugap ndun bega.
\v 6 Parea ncho stub ta wen ndun bega, leꞌa bega lá nsak ladna ta ndun bexa nicolaíta, lak lá nsak lad naꞌ ta ndun bexa wa.
\pi
\v 7 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ. Leꞌa bexa na gun gan ndoꞌ be ta ugap, leꞌa naꞌ usa ngus ten ya nsaꞌa gealnaban gaw bexa wa, ya nsob tlaw be ya xgeꞌa ten Dios.”
\s Ta mbidiꞌizh Jesucristo ndoꞌ be xmen~xa ndencho Esmirna
\p
\v 8 ’Bkeꞌa ta ndee ndoꞌ angel nlaꞌach be xmen~naꞌ ndencho Esmirna: “Lndeꞌe ndab xa nak xa ned no xa lult ndoꞌ itea be taꞌa, xa na ngut no mbangal. Ndab xa:
\b
\pi1
\v 9 Leꞌa naꞌ nchandoꞌ be ta ndun bega, no be gealkweaꞌ nsatid bega, nsea ta uban nak bega, parea leꞌa bega xa rik ndoꞌ Dios. No nchandoꞌ naꞌ xteꞌe kweaꞌ níꞌi be men ndoꞌ bega, bexa nkwiꞌin ndab leꞌa xa xa judio, parea naꞌanpa nak bexa xmen Dios, leꞌa bexa ndi nde ndoꞌ yaꞌa maxuꞌu.
\v 10 Lá izheb bega ndoꞌ be gealkweaꞌ itid bega. Blaꞌach bego, leꞌa maxuꞌu ukeꞌa pla bega litgiꞌib, gun xa preb bega naga ugeaka xmen Dios bega, kweaꞌ yoo bega dub tiꞌi wizh. Dubtsa ulo ladna bega igeꞌ ladna bega naꞌ maska gut bexa bega. Weꞌe leꞌa naꞌ usa dub gealnaban nunk lá idub ndoꞌ bega.
\pi
\v 11 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ: Leꞌa bexa na gun gan ndoꞌ be ta ugap, leꞌa bexa wa naꞌanpa itid ndoꞌ gealgut itop wa.”
\s Ta mbidiꞌizh Jesucristo ndoꞌ be xmen~xa ndencho Pérgamo
\p
\v 12 ’Bkeꞌa ta ndee ndoꞌ angel nlaꞌach be xmen~naꞌ ndencho Pérgamo: “Lndeꞌe ndab xa ndap spad top toꞌo na wach. Ndab xa:
\b
\pi1
\v 13 Leꞌa naꞌ nchandoꞌ be ta ndun bega, no uní naꞌ leꞌa bega ncho dub gezh sa nibeꞌe maxuꞌu. Parea dubtsa ndankea bega naꞌ, no lá ukachko bega ta na ngeꞌ ladna bega naꞌ zha na mbit be men Antipas. Leꞌa xa wa utsin mbidiꞌizh diꞌizh ten naꞌ, ta weꞌe mbit be men xa sa ncho bega baꞌ, dub gezh sa nibeꞌe maxuꞌu.
\pi
\v 14 Parea ncho platsa taꞌa lá nsak lad naꞌ nak bega: leꞌa ncho bega bi ndun ltsaꞌa ta mbin Balaam, xa na mluu Balac xteꞌe gun xa ndontsa isabgix bexa Israel. Mkiꞌil xa bexa wa gaw bexa be xnab ten be dios gizhliyo, no ugal bexa dub xa naꞌanpa xagots ten xa.
\v 15 No ncho bega bi ndankea be ta nluu bexa nicolaíta wa, ta na uzhebpa lá nsak lad naꞌ.
\v 16 Ta weꞌe blaꞌa bega be ta ugap nak bega wa. Tal leꞌa bega naꞌanpa li gun, leꞌa naꞌ sken ilen, no kuyono naꞌ bega na li nak wa nsea spad ntoꞌo toꞌo~naꞌ.
\pi
\v 17 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ: Leꞌa bexa na gun gan ndoꞌ be ta ugap, leꞌa naꞌ usa maná gaw bexa ta lá nchandoꞌ bexa. Nsea usa naꞌ dub geꞌ tuzh ta nagud. Leꞌa las geꞌ wa ikea stub leaꞌ bexa dub ta kub, ta ni dub men lá nchandoꞌ, nabtsa xa na ikaꞌa geꞌ wa iniꞌí‑yá.”
\s Ta mbidiꞌizh Jesucristo ndoꞌ be xmen~xa ndencho Tiatira
\p
\v 18 ’Bkeꞌa ta ndee ndoꞌ angel nlaꞌach be xmen~naꞌ ndencho Tiatira: “Lndeꞌe ndab Xin Dios xa ndap ngusndoꞌ~na cuent bealꞌ giꞌ wa, nsea xoꞌo~xa cuent be giꞌib bronce ta nduꞌu. Ndab xa:
\b
\pi1
\v 19 Leꞌa naꞌ nchandoꞌ be ta ndun bega, xteꞌe utsin nak bega ndoꞌ be ltsaꞌa bega, no xteꞌe ngeꞌ ladna bega naꞌ, no xteꞌe ndun bega be tiꞌin ten naꞌ, nsea uzhebpa nxik bega. No uní naꞌ leꞌa bega mas utsin ndun nat ndoꞌ lak zha ned wa.
\pi
\v 20 Parea ncho platsa taꞌa lá nsak lad naꞌ nak bega: leꞌa bega nlaꞌa leꞌa xagots nsaleaꞌ Jezabel nkwiꞌinno be xmen~naꞌ. Leꞌa xa wa ndab leꞌa ndadiꞌizh sakndoꞌ Dios, parea nkiꞌil xa bexa ugal bexa dub xa naꞌanpa xa ten bexa, no gaw bexa be xnab ten be dios gizhliyo.
\v 21 Leꞌa naꞌ msa dub tiemp ulaꞌa xa be ta bzhiꞌik ndun xa wa, parea leꞌa xa lá kaꞌab ulaꞌa be ta wa.
\pi
\v 22 Leꞌa nat leꞌa naꞌ ula isen dub gealgizh xa, no dub gealkweaꞌ siꞌil iniꞌí bexa na mgal xagots wa, tal leꞌa bexa lá ulaꞌa be ta ugap ndanno bexa xa wa.
\v 23 Leꞌa naꞌ gut be xin xagots wa, weꞌe iniꞌí bega nak xmen~naꞌ leꞌa naꞌ nak xa nchandoꞌ gek bega nsea ladoꞌo bega. Leꞌa naꞌ kix ndoꞌ bega no be ta mbin bega.
\pi
\v 24 Parea leꞌa ncho bega ncho Tiatira baꞌ naꞌanpa no ndankea ta mluu xagots wa, no lá igondoꞌ bega be ta nsaleaꞌ bexa ta ugaꞌach ten maxuꞌu. Leꞌa naꞌ gáp ndoꞌ bega leꞌa naꞌ naꞌanpa inibeꞌe gun bega stubga taꞌa.
\v 25 Parea leꞌa be ta wen nak bega, litsa gok bega gast gal zha ilen naꞌ.
\pi
\v 26 Leꞌa bexa na gun gan ndoꞌ be ta ugap no gun xa lak ndáp naꞌ gast wizh lult, leꞌa naꞌ ula inibeꞌe bexa gast ndoꞌ be nacion.
\v 27 Usa naꞌ juers ndoꞌ bexa lak msaꞌa Xus~naꞌ juers ndoꞌ naꞌ, ndontsa uzheꞌeb inibeꞌe bexa ndoꞌ be nacion, lak nleꞌa men dub gets btsiꞌin no dub bar giꞌib.
\v 28 No usa naꞌ mbeal siꞌil nlen gor tempran ndoꞌ bexa wa.
\v 29 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ.”
\c 3
\s Ta mbidiꞌizh Jesucristo ndoꞌ be xmen~xa ndencho Sardis
\p
\v 1 ’Bkeꞌa ta ndee ndoꞌ angel nlaꞌach be xmen~naꞌ ndencho Sardis: “Lndeꞌe ndab xa nibeꞌe isagaꞌad espíritu ndun tiꞌin ndoꞌ Dios, xa na nsoꞌnsén isagaꞌad mbeal wa, ta ndiꞌib gibeꞌa. Ndab xa:
\b
\pi1 Leꞌa naꞌ nchandoꞌ be ta ndun bega. Leꞌa ncho men ndab leꞌa bega ndap gealnaban ndoꞌ Dios, parea leꞌa cuent ten Dios leꞌa bega ngut.
\v 2 Bsuxeꞌa ladna bega, bxiste bega ta ngeꞌ ladna bega naꞌ, lá ulaꞌa bega initndoꞌ‑yá. Leꞌa naꞌ uní leꞌa ta ndun bega naꞌanpa utsin nak ndoꞌ Dios.
\v 3 Lá yalad bega be ta mbiꞌín bega, no bxobgek bega, nsea blaꞌa bega be ta ugap nak bega. Tal leꞌa bega lá isuxeꞌa ladna, leꞌa naꞌ ilen dub gor ni lá ndanbeꞌe bega lak nlen dub waꞌan.
\pi
\v 4 Parea ncho stapla bega ndencho Sardis baꞌ umbiꞌi nak ndoꞌ Dios. Leꞌa bega wa iseano naꞌ, gak bega lad nagud leꞌa bega yá nsabndoꞌ li gak.
\v 5 Leꞌa bexa na gun gan ndoꞌ be ta ugap, leꞌa bexa wa gak be lad nagud, no lá utsuꞌu naꞌ leaꞌ bexa ndoꞌ libr ten gealnaban, no gáp naꞌ ndoꞌ Xus~naꞌ nsea ndoꞌ be angel ten xa leꞌa bexa wa xmen~naꞌ.
\v 6 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ.”
\s Ta mbidiꞌizh Jesucristo ndoꞌ be xmen~xa ndencho Filadelfia
\p
\v 7 ’Bkeꞌa ta ndee ndoꞌ angel nlaꞌach be xmen~naꞌ ndencho Filadelfia: “Lndeꞌe ndab xa ta ugeaka nak xa umbiꞌi ten Dios, xa nibeꞌe lak unibeꞌe David. Leꞌa sa na nxaꞌal xa, naꞌan ton gun gan utsaw. No liga leꞌa sa ntsaw xa wa, naꞌan ton gun gan uxaꞌal. Ndab xa:
\b
\pi1
\v 8 Leꞌa naꞌ nchandoꞌ be ta ndun bega. Nat leꞌa naꞌ mxaꞌal dub puert ndoꞌ bega, dub ta naꞌan ton gun gan utsaw. Maska ndido juers ncho bega, leꞌa bega nxobgek ndoꞌ diꞌizh ndáp naꞌ, no lá ukachko bega leꞌa bega xmen~naꞌ.
\v 9 Leꞌa nat iniꞌí bega xteꞌe gunno naꞌ bexa nde ndoꞌ yaꞌa maxuꞌu, bexa ndab leꞌa nak xmen Dios parea leꞌa xa naꞌanpa nak xmen Dios, leꞌa bexa ndi ndun gealkwiꞌin. Leꞌa nat leꞌa naꞌ gun ilen bexa ndoꞌ bega isaxib bexa ndoꞌ bega. Weꞌe igondoꞌ bexa leꞌa naꞌ nkweaꞌ ladna bega.
\pi
\v 10 Leꞌa naꞌ ndápka ndoꞌ bega uxik bega, cha lika mbin bega. Ta weꞌe leꞌa naꞌ ulach bega gor na nsea stub gealkweaꞌ ndoꞌ idub gizhliyo, ta na gun preb itea be men nde ndoꞌ gizhliyo.
\v 11 Nat leꞌa naꞌ sken ilen. Lá ulaꞌa bega be ta wen nak bega, ndontsa naꞌan ton ulat ta uzheꞌeb wen usaꞌa Dios ikaꞌa bega.
\v 12 Leꞌa bexa na gun gan ndoꞌ be ta ugap, leꞌa naꞌ gunno xa wa cuent dub yatsoꞌ ten lid Dios, dub ta nunk lá itatsoꞌ sa nsoꞌ na. No ukeꞌa naꞌ leaꞌ Dios ten naꞌ las~xa no leaꞌ gezh siꞌil ten Dios. Leꞌa ta wa Jerusalén kub ten Dios ta itoꞌo gibeꞌa. No ukeꞌa naꞌ leaꞌ kub naꞌ las~xa.
\pi
\v 13 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ.”
\s Ta mbidiꞌizh Jesucristo ndoꞌ be xmen~xa ndencho Laodicea
\p
\v 14 ’Bkeꞌa ta ndee ndoꞌ angel nlaꞌach be xmen~naꞌ ndencho Laodicea: “Lndeꞌe ndab xa lika nak wa, xa na gaꞌal nluu xteꞌe nak Dios, xa na leꞌa usaned zha mbindeꞌe Dios itea be taꞌa. Ndab xa:
\b
\pi1
\v 15 Leꞌa naꞌ nchandoꞌ be ta ndun bega. Ni lid myalꞌ bega no ni lid utii bega. Mas wen myalꞌtsa bega natal utii bega.
\v 16 Parea leꞌa ta na uzheꞌatsa bega, ni naꞌanpa myalꞌ bega no ni naꞌanpa utii bega, leꞌa naꞌ sabna bega.
\v 17 Leꞌa bega ndab leꞌa bega xa rik no sian taꞌa ndap bega, naꞌan xtaꞌan ndun jwalt bega. Ná leꞌa bega lá iniꞌí leꞌa bega cuent dub xa uban nak, dub xa proꞌob ni lá naꞌ ni lá ndap xab~na.
\v 18 Ta weꞌe ntenxeꞌa naꞌ bega isiꞌi bega be ta oro ndoꞌ naꞌ ta msambiꞌi ndoꞌ giꞌ, ndontsa ta ugeaka gak rik bega. No isiꞌi bega lad nagud ta gak bega, ndontsa lá uluu gealudalad ten bega ta lá ndap bega xab bega. No yoo colirio ta ramed ndoꞌ bega, ndontsa utsin inaꞌ bega.
\v 19 Leꞌa naꞌ nbeyo itea bexa nkweaꞌ lad naꞌ no ntsaksi naꞌ bexa. Ta weꞌe idub ncho ladna bega byach bega ndoꞌ naꞌ.
\pi
\v 20 \fig |cn02107B.tif|col|||Jesús nsoꞌ toꞌo puert ten ladoꞌo be men, nlad xa uxaꞌal be men ladoꞌo na|Ap. 3:20\fig*Blaꞌach bego leꞌa naꞌ nsoꞌ toꞌo puert nsea nbeꞌezh naꞌ. Leꞌa tal ton goꞌón ta ndáp naꞌ, no uxaꞌal xa toꞌo puert, weꞌe yoꞌo naꞌ len lid~xa no junt gaw xcheꞌe besa.
\v 21 Leꞌa bexa na gun gan ndoꞌ be ta ugap, leꞌa naꞌ usa dub sa isob bexa wats naꞌ sa inibeꞌe naꞌ, lak mbin naꞌ gan ndoꞌ ta ugap, cha nsoꞌob naꞌ wats Dios Xus~naꞌ sa nibeꞌe xa.
\v 22 Leꞌa bego na ndap nchaꞌ~na, bsakyoꞌón bega ta ndab Espíritu ten Dios ndoꞌ be xmen~naꞌ.”
\c 4
\s Bexa ncho gibeꞌa ndankea Dios
\p
\v 1 Tsoꞌo wa leꞌa naꞌ uní leꞌa gibeꞌa myaꞌal dub ta cuent puert. Leꞌa ti ned xa mbín naꞌ cuent dub trompet wa cha uníꞌigal ndoꞌ naꞌ, ndab xa:
\p —Ukea sa ndee, leꞌa naꞌ uluu ndoꞌ lu be ta tilaw yoo ndoꞌ ta ncho nat.
\p
\v 2 Cha bi leꞌa gor wa leꞌa Espíritu ten Dios usen naꞌ. Cha li uní naꞌ leꞌa dub xa nibeꞌe nsob ndoꞌ dub yaxil siꞌil gibeꞌa.
\v 3 Leꞌa xa nsob sa wa ndon nlaꞌbealꞌ cuent be geꞌ jaspe nsea cornalina. Leꞌa gangeak sa nsoꞌ yaxil wa nkea dub mbeꞌalzhin nlaꞌbealꞌ cuent geꞌ esmeralda.
\v 4 Leꞌa gangeak sa nsoꞌ yaxil wa no nde stub gaꞌal bdap yaxil. Cha uní naꞌ leꞌa ndoꞌ be yaxil wa ndiꞌib dub gaꞌal bdap bexa gox xa nsak, bexa nak be lad nagud, ndiꞌib coron ta oro gek bexa.
\v 5 Leꞌa ndoꞌ yaxil nsoꞌ tlaw wa ntoꞌo bealꞌ usiꞌi no níꞌi usiꞌi nsea ngen ruid siꞌil. Leꞌa lad ndoꞌ yaxil wa ndibyolꞌ dub gaꞌad xeꞌa, leꞌa ta wa isagaꞌad be espíritu ten Dios.
\p
\v 6 Leꞌa lad ndoꞌ yaxil wa nax dub ta cuent nitsdoꞌo gandid xeꞌa lakta naꞌ dub vidr. Leꞌa wats yaxil wa nsea gangeak wats yaxil wa uní naꞌ dap ta nban, idub las‑a nsoꞌ be ngusndoꞌ‑yá lad ndoꞌ‑yá no lad tsoꞌo‑yá.
\v 7 Leꞌa ta nban ta ned wa cuent nak dub mbiꞌizh. Leꞌa ta itop wa cuent nak dub bser. Leꞌa ta yon wa ndap ndoꞌ~na cuent ndoꞌ men. Leꞌa ta idap wa cuent nak dub mtsi nchaꞌnsaꞌab.
\v 8 Leꞌa idap be ta nban wa leꞌa kadga dub‑a ndap dub xoꞌop xkwag~na. Leꞌa gangeak tsoꞌo xkwag‑a no len xkwag‑a ndiꞌib ngusndoꞌ‑yá. No teꞌal tezhea lá nbeasyab be ta wa:
\b
\q1 Ndon go, ndon go, ndon go dubkama nak Dios Xa Nibeꞌe,
\q2 xa ndon leꞌa juert ndoꞌ itea be taꞌa.
\q1 Leꞌa go leꞌa nak Dios tiemp polta, no Dioska go nat,
\q2 no Dioska go idub tiemp ilen.
\b
\p
\v 9 Leꞌa kad biaj li ndab be ta nban wa ndoꞌ Dios xa nsob ndoꞌ yaxil xa nban idub tiemp, ndankea be ta wa xa, no nsaꞌa be ta wa xno ndoꞌ xa.
\v 10 Weꞌe leꞌa isagaꞌal bdap bexa gox wa nsaxib ndoꞌ xa nsob ndoꞌ yaxil, xa nban idub tiemp, gast ndoꞌ yo ndal xtuzh bexa, ndankea bexa wa xa, no nte bexa coron ten bexa lad ndoꞌ yaxil, ndab bexa:
\b
\q1
\v 11 Go Dios Xa Nibeꞌe, leꞌa besa nsabndoꞌ yankea go,
\q2 no gab besa leꞌa go nak dub Dios uzhebpa xa juert.
\q1 Leꞌa go mtexan iteanak be taꞌa;
\q2 ngokndeꞌe‑yá lak nlad go yoo‑yá, no liga ncho‑yá nat.
\c 5
\s Libr nyuꞌud nsea Borreg Ben
\p
\v 1 Cha uní naꞌ leꞌa yaꞌa lad gaꞌal xa na nsob ndoꞌ yaxil wa nchoꞌob dub libr nyuꞌud nkea letr ndoꞌ‑yá, leꞌa tsoꞌo‑yá nsénkea dub gaꞌad se.
\v 2 Cha uní naꞌ dub angel juert ten Dios, ugeꞌ unabdiꞌizh xa, ndab xa:
\p —¿Ton dub xa suꞌu guzhaꞌa be se nsénkea libr baꞌ, cha uxaꞌal xa‑yá?
\p
\v 3 Parea ni dub xa ncho gibeꞌa, no ni dub xa ncho ndoꞌ gizhliyo, no ni dub xa ncho xan gizhliyo lá isuꞌu uxaꞌal‑a ni iwiꞌi xa ndoꞌ‑yá.
\v 4 Cha uzhebpa ndon naꞌ geal lá izheal ni dub xa uxaꞌal libr wa, no goꞌol xa‑yá no ni iwiꞌi xa ndoꞌ‑yá.
\v 5 Parea leꞌa dub xa gox xa nsak wa ndab ndoꞌ naꞌ:
\p —Yá lá goꞌonta lu. Unaꞌ leꞌa xa nsaleaꞌ Mbiꞌizh ten Judá, xa ulen ras ten David, leꞌa xa wa mbin gan ndoꞌ maxuꞌu. Leꞌa nat leꞌa xa wa sun gan guzhaꞌa isagaꞌad se nsénkea libr baꞌ wa, cha uxaꞌal xa‑yá.
\p
\v 6 Cha weꞌe uní naꞌ leꞌa wats yaxil wa, tlaw be idap ta nban wa no tlaw bexa gox xa nsak wa, nsoꞌ dub Borreg Ben cuent nak dub man mbit be men. Ndap ma dub gaꞌad xkach~ma nsea dub gaꞌad ngusndoꞌ~ma, leꞌa ta wa isagaꞌad espíritu mtuꞌub Dios ndoꞌ idub gizhliyo.
\v 7 Weꞌe leꞌa Borreg wa cha ulen usen libr nchoꞌob ndoꞌ yaꞌa lad gaꞌal xa nsob ndoꞌ yaxil wa.
\v 8 Leꞌa gor usen Borreg libr wa, leꞌa idap be ta nban wa nsea be isagaꞌal bdap bexa gox xa nsak wa cha usaxib ndoꞌ Borreg wa, gast ndoꞌ yo ngol xtuzh bexa. Leꞌa itea bexa wa ndap be arpa no be vas oro ncho ta uxeꞌe len na, leꞌa ta wa ta ndadiꞌizhno be men Dios, bexa umbiꞌi nak ndoꞌ Dios.
\v 9 Cha mbiltoꞌo bexa dub cant kub, ndab bexa ndoꞌ Borreg:
\b
\q1 Leꞌa go nsabndoꞌ isen libr baꞌ, no guzhaꞌa ga be se nsénkea‑yá,
\q2 geal leꞌa go ngut, mtsiꞌi ga ten ten ga,
\q1 ta weꞌe myak besa xin Dios ndoꞌ itea be ras be men,
\q2 no itea be diꞌizh ndadiꞌizh xa, no itea be gezh,
\q2 no itea be nacion.
\q1
\v 10 No mbinno ga besa bexa nibeꞌe nsea be uleꞌay ndun tiꞌin ndoꞌ Dios, inibeꞌe besa ndoꞌ gizhliyo.
\b
\p
\v 11 Weꞌe cha mwiꞌi naꞌ, cha mbín naꞌ sian ti be angel idub gangeak sa nsoꞌ yaxil wa, nsea ti be ta nban wa, no ti bexa gox xa nsak wa. Leꞌa bexa wa uzhebpa bexa kwaꞌad luzh, gast lá gun naꞌ gan gáp naꞌ plo bexa.
\v 12 Ugeꞌ ndab bexa:
\b
\q1 Leꞌa Borreg Ben xa na leꞌa be men mbit wa,
\q2 nsabndoꞌ gab beuna leꞌa xa wa xa nibeꞌe,
\q1 no uzheꞌeb sian be taꞌa ndap xa,
\q2 no uzheꞌeb ndák xa,
\q1 no uzheꞌeb xa juert nak xa,
\q2 no yankea beuna xa leꞌa xa uzhebpa xa nsak.
\b
\p
\v 13 Cha mbín naꞌ leꞌa itea be taꞌa mbindeꞌe Dios, be ta ncho gibeꞌa no ndoꞌ gizhliyo no xan gizhliyo no len nitsdoꞌo, leꞌa be ta wa ndab:
\b
\q1 Leꞌa xa nsob ndoꞌ yaxil baꞌ nsea Borreg Ben baꞌ,
\q2 leꞌa beuna idub tiemp nsabndoꞌ yankea bexa baꞌ,
\q1 no yankea beuna bexa ta na uzheꞌeb wen nak bexa,
\q2 no ta na uzheꞌeb juert nak bexa.
\b
\p
\v 14 Leꞌa idap be ta nban wa cha ndab:
\p —¡Lika nak‑a!
\p Leꞌa isagaꞌal bdap bexa gox xa nsak wa cha usaxib gast ndoꞌ yo ngol xtuzh bexa, cha ngwankea bexa wa Dios, xa nban idub tiemp.
\c 6
\s Dap se ned nsénkea libr nyuꞌud
\p
\v 1 Weꞌe cha uní naꞌ leꞌa Borreg Ben wa mbizhaꞌa se ned nsénkea libr nyuꞌud wa, nsea mbín naꞌ leꞌa dub ta nban wa uníꞌi cuent usiꞌi, ndab ta wa:
\p —¡Utseawiꞌi!
\p
\v 2 Cha uní naꞌ dub way nagud. Leꞌa xa nsob tsoꞌo~ma wa nsén dub ya btangin. Cha weꞌe msaꞌa Dios dub coron ndoꞌ xa wa, cha utoꞌo xa gun xa gan lakka ndun xa gan wa.
\p
\v 3 Cha mbizhaꞌa Borreg wa se itop nsénkea git wa, cha mbín naꞌ leꞌa ta nban ta itop wa ndab:
\p —¡Utseawiꞌi!
\p
\v 4 Cha weꞌe utoꞌo dub way nane. Leꞌa Dios msaꞌa juers ndoꞌ xa nsob tsoꞌo way wa, ndontsa gun xa naꞌantapa wen kwe be men ndoꞌ gizhliyo. Cha weꞌe isaxan bexa kuyo bexa, cha gut bexa leꞌaka ltsaꞌa bexa. No msaꞌa Dios dub spad siꞌil ndoꞌ xa wa.
\p
\v 5 Cha mbizhaꞌa Borreg wa se yon nsénkea git wa, cha mbín naꞌ leꞌa ta nban ta yon wa ndab:
\p —¡Utseawiꞌi!
\p Cha mwiꞌi naꞌ cha uní naꞌ dub way nagats. Leꞌa xa nsob tsoꞌo~ma wa nsén dub ta nben be taꞌa.
\v 6 Leꞌa lat idap be ta nban wa mbín naꞌ cuent ti dub men ndab:
\p —Leꞌa dub kil trig natal chon kil cebad izheꞌa dub med denario. Parea lá guzhaꞌa lu aceit nsea vin.
\p
\v 7 Cha mbizhaꞌa Borreg wa se idap nsénkea git wa, cha mbín naꞌ leꞌa ta nban ta idap wa ndab:
\p —¡Utseawiꞌi!
\p
\v 8 Cha uní naꞌ dub way lasan. Leꞌa xa nsob tsoꞌo~ma wa nsaleaꞌ Gealgut. Leꞌa tsoꞌo xa wa nsankea xa nsaleaꞌ Hades, sa ndencho bexa ngut. Leꞌa bexa wa usen juers gut bexa dub cuart be men nde ndoꞌ gizhliyo, gut bexa be men nsea spad, nsea win, nsea gealgizh, nsea be man ugiꞌi.
\s Se isagaꞌay nsénkea libr nyuꞌud
\p
\v 9 Weꞌe leꞌa Borreg wa cha mbizhaꞌa se isagaꞌay wa, cha uní naꞌ xbi be men xan dub altar, bexa na ngut ke na mbidiꞌizh bexa diꞌizh ten Dios.
\v 10 Cha ugeꞌ ndab bexa:
\p —Dios Xa Nibeꞌe, leꞌa go dubkama nak Dios, no ndunka go ta ndab ga. ¿Polxá utsaksi ga be men ncho ndoꞌ gizhliyo, no ukixke ga ta mbit bexa besa zha?
\p
\v 11 Weꞌe leꞌa dub angel ten Dios cha msaꞌa lad nagud gak bexa, cha ndab angel ndoꞌ bexa:
\p —Bneꞌe bega steꞌep ndalen gatta be ltsaꞌa bega, bexa na ndun ltsaꞌa tiꞌin mbin bega, bexa no gat lak ngut bega.
\s Se isaxoꞌop nsénkea libr nyuꞌud
\p
\v 12 Cha uní naꞌ mbizhaꞌa Borreg wa se isaxoꞌop nsénkea libr wa, cha weꞌe ngok dub xoꞌo siꞌil. Leꞌa ndoꞌ wizh cha mkaw cuent dub bleꞌa lad nagats. Leꞌa ndoꞌ mbeꞌe cha mnaꞌ nane cuent ten.
\v 13 Leꞌa be mbeal ndiꞌib gibeꞌa cha ulate ndoꞌ gizhliyo, lak nlate be ngus laꞌaw gor na nkwiꞌin dub mbi siꞌil ya wa.
\v 14 Leꞌa gibeꞌa cha unitndoꞌ cuent dub gor nyuꞌud dub bleꞌa git. Leꞌa itea be geꞌe no be isla gast mzheꞌa be sa nde na.
\v 15 Leꞌa iteanak be men cha mkachndoꞌ len be geꞌloꞌo no lat be geꞌ las be geꞌe ubiꞌi. Leꞌa ta wa bexa mas nibeꞌe ndoꞌ gizhliyo, no bexa nsak, no bexa rik, no bexa naktiꞌin, no bexa juert nak, no iteanak bexa nchaꞌndoꞌo ndoꞌ stub men, no bexa naꞌanpa li nak.
\v 16 Ndab bexa ndoꞌ be geꞌe ubiꞌi nsea ndoꞌ be geꞌ wa:
\p —¡Ulate bega tsoꞌo besa! Bkachko bega besa ndoꞌ Xa Nibeꞌe nsob ndoꞌ yaxil baꞌ, no ndoꞌ ta ndakloo Borreg Ben ndoꞌ besa,
\v 17 leꞌa nat ngol dub wizh uzheꞌeb utsaksi Borreg wa be men. ¿Tonma gun gan uxik ndoꞌ ta wa?
\c 7
\s Bexa nkea se ten Dios xtuzh~na
\p
\v 1 Tsoꞌo wa uní naꞌ dap be angel nde idap skin gizhliyo. Leꞌa bexa wa nsénsaꞌab idap mbi ncho ndoꞌ gizhliyo, natsa lá uxoꞌon mbi ndoꞌ gizhliyo ni ndoꞌ nitsdoꞌo no ni dub ndoꞌ ya.
\v 2 No uní naꞌ stub angel nchaꞌkea lad sa nlen wizh, leꞌa xa wa nsén dub se ten Dios xa nban. Cha ugeꞌ uníꞌi xa ndoꞌ idap angel wa, bexa na msaꞌa Dios juers ndoꞌ na guzhaꞌa bexa gizhliyo no nitsdoꞌo.
\v 3 Ndab angel wa:
\p —Lá guzhaꞌa bega gizhliyo ni nitsdoꞌo no ni be ya baꞌ, gast gor na ukeꞌa besa se xtuzh be men ndun tiꞌin ndoꞌ Dios ten beuna.
\p
\v 4 Cha weꞌe mbín naꞌ plo bexa nkea se wa xtuzh~na: dub gayoꞌo ncho top gaꞌal ncho dap mil bexa nkea se lat itea be ras bexa Israel.
\b
\q1
\v 5 Leꞌa ta wa dub tibtop mil bexa ras ten Judá.
\q1 Nsea stibtop milga bexa ras ten Rubén.
\q1 Nsea stibtop milga bexa ras ten Gad.
\q1
\v 6 Nsea stibtop milga bexa ras ten Aser.
\q1 Nsea stibtop milga bexa ras ten Neftalí.
\q1 Nsea stibtop milga bexa ras ten Manasés.
\q1
\v 7 Nsea stibtop milga bexa ras ten Simeón.
\q1 Nsea stibtop milga bexa ras ten Leví.
\q1 Nsea stibtop milga bexa ras ten Isacar.
\q1
\v 8 Nsea stibtop milga bexa ras ten Zabulón.
\q1 Nsea stibtop milga bexa ras ten Kosé.
\q1 No stibtop milga bexa ras ten Benjamín.
\s Bexa kwaꞌad luzh nak be lad nagud
\p
\v 9 Tsoꞌo wa uní naꞌ uzhebpa kwaꞌad luzh be men, gast naꞌan ton gun gan ulaꞌab bexa. Leꞌa bexa wa bexa itea be nacion, nsea itea be ras, nsea itea be gezh, no itea be diꞌizh ndadiꞌizh bexa. Nde bexa lad ndoꞌ yaxil ten Xa Nibeꞌe no ndoꞌ Borreg Ben. Leꞌa bexa wa nak be lad nagud, nsea dubga xos yagin nsén bexa.
\v 10 Cha uzhebpa ugeꞌ ndab bexa:
\b
\q1 Leꞌa Dios ten beuna xa nsob ndoꞌ yaxil baꞌ nsea Borreg Ben baꞌ,
\q2 leꞌa bexa wa leꞌa ngoꞌo beuna ndoꞌ be ke ten beuna.
\b
\m
\v 11 Leꞌa itea be angel wa nde idub gangeak wats yaxil wa, no wats bexa gox nsak wa, no wats idap be ta nban wa. Cha usaxib be angel wa ndoꞌ xa nsob ndoꞌ yaxil wa, gast ndoꞌ yo ngol xtuzh bexa. Cha ngwankea bexa Dios,
\v 12 ndab bexa:
\b
\q1 ¡Lika nak‑a!
\q1 Idub tiemp gab beuna leꞌa Dios ten beuna dub Dios siꞌil,
\q2 no ndon leꞌa xa juert nak,
\q2 no ndon leꞌa xa nibeꞌe,
\q2 no ndon leꞌa xa ndák.
\q1 Yankea beuna xa, no uzheꞌeb usaꞌa beuna xno ndoꞌ xa idub tiemp.
\q1 ¡Lika nak‑a!
\b
\p
\v 13 Weꞌe leꞌa dub xa gox nsak wa unabdiꞌizh ndoꞌ naꞌ, ndab xa:
\p —¿Nchandoꞌ lu bexa nak lad nagud baꞌ zha? ¿Uniꞌí lu pa utoꞌo bexa baꞌ zha?
\p
\v 14 Leꞌa naꞌ ndáp ndoꞌ xa:
\p —Señor, go leꞌa uniꞌí.
\p Leꞌa xa wa cha ndab ndoꞌ naꞌ:
\p —Leꞌa bexa baꞌ bexa mxik ndoꞌ gealkweaꞌ siꞌil; msat bexa be xab bexa, no msambiꞌi bexa, no mgud xab bexa no ten ten Borreg Ben baꞌ.
\b
\q1
\v 15 Ta weꞌe nde bexa baꞌ wats yaxil nsob Dios,
\q2 teꞌal tezhea ndun bexa tiꞌin ndoꞌ Dios sa ncho Dios.
\q1 Leꞌa xa nsob ndoꞌ yaxil baꞌ leꞌa nsobulaꞌach bexa.
\q1
\v 16 Yá lá gantana bexa, no lá gakta ladna bexa.
\q2 No ni lá uchuta bea bexa, no ni stub xtii lá iniꞌíta bexa.
\q1
\v 17 Leꞌa Borreg nsoꞌ tlaw sa nsoꞌ yaxil baꞌ leꞌa ulaꞌach bexa,
\q2 no goꞌo xa bexa sa ndiblen nits nsaꞌa gealnaban.
\q1 Leꞌa Dios utsambiꞌi itea nitsndoꞌ bexa baꞌ.
\c 8
\s Se isagaꞌad nsénkea libr nyuꞌud
\p
\v 1 Leꞌa Borreg wa cha mbizhaꞌa se isagaꞌad nsénkea libr wa, cha msoꞌ ti gibeꞌa pa dub tol gor.
\v 2 Weꞌe cha uní naꞌ isagaꞌad angel nde ndoꞌ Dios wa, cha usen bexa wa dub gaꞌ trompet.
\v 3 Weꞌe ulen stub angel noꞌo dub tas oro, cha uyatsoꞌ xa lad ndoꞌ altar. Cha usen xa sian be ta uxeꞌe, cha mtsoꞌol xa‑yá len tas ndoꞌ altar ta oro nde sa nsob Dios, ndontsa gast ndoꞌ Dios ilayaꞌ xlaꞌa uxeꞌe wa, no be ta unab bexa nak xmen Dios.
\v 4 Leꞌa ta nsén angel wa utoꞌo zhen ten be ta uxeꞌe wa, ulayaꞌ‑yá ndoꞌ Dios nsea be ta unab be xmen Dios wa.
\v 5 Leꞌa angel wa cha uloꞌo bkuꞌu ncho ndoꞌ altar wa, cha ulo xa‑yá len tas wa, cha mtsaꞌab xa ta wa ndoꞌ gizhliyo. Cha weꞌe uníꞌi usiꞌi, no mgen dub ruid siꞌil, no nlaꞌ bealꞌ usiꞌi, nsea ngok dub xoꞌo siꞌil.
\s Idap be trompet ned
\p
\v 6 Leꞌa isagaꞌad be angel li nsén dub gaꞌga trompet wa listla ndebe ukweꞌezh‑a.
\p
\v 7 Leꞌa angel ned wa cha mkweꞌezh trompet wa, cha ulaꞌ gigeꞌ no giꞌ noch ten. Ulaꞌ‑yá ndoꞌ gizhliyo, cha mtsoꞌol‑a gax itol be ya ncho ndoꞌ gizhliyo nsea itea be gix ugeꞌa.
\p
\v 8 Leꞌa angel itop wa cha mkweꞌezh trompet ten na, weꞌe leꞌa dub ta cuent geꞌe siꞌil nsayolꞌ ulayat ndoꞌ nitsdoꞌo. Cha myak ten gax itol nitsdoꞌo wa.
\v 9 Cha ngut gax itol be man ncho len nitsdoꞌo. Nsea gax itol be barco ndesea ndoꞌ nitsdoꞌo wa ngwazhaꞌa.
\p
\v 10 Leꞌa angel yon wa cha mkweꞌezh trompet ten na, cha ulayat dub mbeal siꞌil nsob gibeꞌa, nsayolꞌ‑a cuent gor nsoꞌbealꞌ dub bleꞌa ged. Ulayat‑a ndoꞌ nits, pa gax itol be yowbeꞌe no be sa ndiblen nits.
\v 11 Leꞌa mbeal wa nsaleaꞌ Ta Ulaꞌ. Leꞌa gax itol be nits wa cha myak ulaꞌ. Weꞌe uzhebpa kwaꞌad be men ngut ta na lita myak ulaꞌ nits wa.
\p
\v 12 Leꞌa angel idap wa cha mkweꞌezh trompet ten na, cha ngwazhaꞌa gax itol wizh no mbeꞌe no be mbeal ndiꞌib gibeꞌa. Cha mkaw ta niꞌi dap gor ten be wizh, no liga be teꞌal dap gor naꞌanpa isu xeꞌa mbeꞌe ni mbeal.
\p
\v 13 Cha mwiꞌi naꞌ no uní naꞌ dub angel nchaꞌnsaꞌab gaꞌap, ugeꞌ ndab xa:
\p —¡Ay, ay, ay! ¡Proꞌob bexa na ncho ndoꞌ gizhliyo gor na ukweꞌezh schon angel be trompet ten na!
\c 9
\s Trompet isagaꞌay
\p
\v 1 Leꞌa angel isagaꞌay wa cha mkweꞌezh trompet ten na, cha uní naꞌ dub mbeal utoꞌo gibeꞌa ulayat ndoꞌ gizhliyo. Leꞌa mbeal wa leꞌa usen liab ten geꞌed doꞌo.
\v 2 Cha mxaꞌal mbeal wa geꞌed wa. Leꞌa sa wa utoꞌo zhen cuent zhen ten dub gor siꞌil. Leꞌa zhen wa mtsaw ndoꞌ xeꞌa wizh, cha mkaw ndoꞌ gizhliyo.
\v 3 Leꞌa lat zhen wa cha utoꞌo mbit, cha mteꞌachso bema ndoꞌ gizhliyo. Leꞌa ma wa ndap juers god ma lak ndod dub nix.
\v 4 Leꞌa angel wa cha ndab ndoꞌ bema wa, lá gaw ma be gix ugeꞌa ncho ndoꞌ gizhliyo nsea ni dub ya ugeꞌa nsea ni dub ya ubiꞌi. Nabtsa be men naꞌanpa noꞌo se ten Dios xtuzh~na god ma.
\v 5 Leꞌa angel wa ndab naꞌanpa gut bema bexa wa, ndi utsaksitsa ma bexa dub gaꞌay mbeꞌe. Leꞌa gealkweaꞌ ten ma wa lak gealkweaꞌ ndod be nix.
\v 6 Leꞌa gal be wizh wa leꞌa be men ukwaꞌan ná xteꞌe gat bexa, ná leꞌa bexa lá yoo gan gat. Nlad xa gat xa, ná leꞌa gealgut ndi uxoꞌon ndoꞌ bexa.
\p
\v 7 Leꞌa be mbit wa cuent nak way list ndebe yaꞌ ndoꞌ guerr. Leꞌa gek~ma nsob dub ta cuent nak coron ta oro. Leꞌa ndoꞌ~ma nak cuent ndoꞌ be men.
\v 8 Leꞌa gichgek~ma nak cuent gichgek xagots. Leꞌa ndeay~ma nak cuent ndeay mbiꞌizh.
\v 9 Leꞌa las~ma ntsaw be xo cuent xo giꞌib. Leꞌa be xkwag~ma nbezh lak nbezh sianpa carret ten way karrel nchaꞌbe ndoꞌ guerr.
\v 10 Leꞌa ndoꞌ xne~ma nsob dub xguꞌuch~ma, ta cuent nak xguꞌuch nix. Leꞌa ta wa ndap juers utsaksi ma be men dub gaꞌay mbeꞌe.
\v 11 Leꞌa xa nibeꞌe ten be mbit wa, leꞌa ta wa dub mbi bxin nibeꞌe geꞌed doꞌo wa. Leꞌa diꞌizh hebreo leꞌa mbi bxin wa nsaleaꞌ Abadón, leꞌa diꞌizh griego leꞌa ta wa Apolión.
\p
\v 12 Li utid gealkweaꞌ ned wa, parea ndun jwalt ilen stop gealkweaꞌ.
\s Trompet isaxoꞌop
\p
\v 13 Leꞌa angel isaxoꞌop wa cha mkweꞌezh trompet ten na, cha mbín naꞌ cuent ti dub men utoꞌo lat idap be xkach altar ta oro wa, ta nde lad ndoꞌ sa nsob Dios.
\v 14 Cha ndab ti men wa ndoꞌ angel isaxoꞌop wa, xa nsén trompet:
\p —Bxaꞌak idap be angel ndenchii sa nax yowbeꞌe siꞌil nsaleaꞌ Eufrates.
\p
\v 15 Cha weꞌe myaꞌak idap be angel wa, bexa ndenkeaꞌ gut gax itol be men nde ndoꞌ gizhliyo. Leꞌa Dios leꞌa ndab ná xá gor‑a no xá wizh na‑yá no xá mbeꞌe na‑yá no xá liꞌin na li gun bexa.
\v 16 Cha mbín naꞌ ndab xa plo kwaꞌad be soldad ndiꞌib tsoꞌo way. Leꞌa ta wa top gayoꞌo millón bexa.
\v 17 Cha uní naꞌ ta mluu Dios ndoꞌ naꞌ, leꞌa be way nsea bexa ndiꞌib tsoꞌo~ma. Leꞌa ta ntsaw ladoꞌo bexa wa nane naꞌ cuent giꞌ, no azul naꞌ‑yá cuent naꞌ zafiro, no guch naꞌ‑yá cuent naꞌ azufre. Leꞌa gek be way wa cuent nak gek mbiꞌizh nak, leꞌa toꞌo~ma ntoꞌo giꞌ no zhen no azufre.
\v 18 Cha ngut gax itol be men nde ndoꞌ gizhliyo, ta na li ntoꞌo giꞌ nsea zhen nsea azufre toꞌo way wa.
\v 19 Leꞌa ta juert nak be way wa, leꞌa ta wa xne~ma nsea toꞌo~ma. Leꞌa xne~ma cuent nak mbeꞌal nak, ndap‑a gek‑a ta weꞌe ndawkeꞌa ma men.
\p
\v 20 Leꞌa iteata be men lá ngat ndoꞌ be gealkweaꞌ wa, ni lika ná lá kaꞌab bexa ulaꞌa bexa be ta ugap ndun bexa, ta ndankea bexa be mbi bxin no be dios gizhliyo, be ta oro, nsea plata, nsea bronce, nsea geꞌ, nsea ya, be taꞌa ni lá naꞌ, no ni lá ndoꞌón, no ni lá nsea.
\v 21 No ni lá nlaꞌa bexa ta ndut bexa men, no ta bruj ndun bexa, no ta na ngal bexa dub men naꞌanpa xa ten bexa, no ta ndun bexa gealwaꞌan.
\c 10
\s Dub angel nsea dub libr tuzh
\p
\v 1 Cha uní naꞌ stub angel juert utoꞌo gibeꞌa, nsea xa lat dub xkaw, no dub mbeꞌalzhin nkea gek~xa. Leꞌa ndoꞌ~xa wa uzheꞌeb nlaꞌbealꞌ cuent ndoꞌ wizh. Leꞌa idub xoꞌo~xa uzhebpa nsoꞌ bealꞌ nsayolꞌ.
\v 2 Leꞌa yaꞌa~xa nsob dub libr tuzh nsaꞌnyaꞌal ndoꞌ na. Leꞌa xoꞌo~xa ná lad gaꞌal cha ulatsoꞌ ndoꞌ nitsdoꞌo, leꞌa ná raves ulatsoꞌ ndoꞌ yo.
\v 3 Cha ugeꞌ utezhat xa cuent gor ngiꞌi dub mbiꞌizh, cha ugeꞌ uníꞌi usiꞌi dub gaꞌad biaj.
\v 4 Leꞌa gor mtaníꞌi usiꞌi wa, leꞌa naꞌ ndiꞌizh ukeꞌa ta ndab usiꞌi wa, parea leꞌa naꞌ mbín dub diꞌizh utoꞌo gibeꞌa, ndab‑a ndoꞌ naꞌ:
\p —Naꞌanpa ukeꞌa lu be ta ndab isagaꞌad usiꞌi wa, ndi nabtsa lu uniꞌí xtaꞌan‑a.
\p
\v 5 Leꞌa angel na li uní naꞌ ulatsoꞌ ndoꞌ nitsdoꞌo no ndoꞌ yo wa, cha uxits xa dub yaꞌa~xa gaꞌap.
\v 6 Cha ndab xa:
\p —Lak ta ugeakapa ncho Dios nban idub tiemp, xa mtexan gibeꞌa no gizhliyo no nitsdoꞌo no iteata be ta ncho, no liga ta ugeakapa nak leꞌa tiemp gun Dios ta mbinbeꞌe xa wa yá ngol.
\v 7 Leꞌa gor na ukweꞌezh angel isagaꞌad wa trompet wa, leꞌa Dios gun itea be ta ugaꞌach mbinbeꞌe xa gun xa, lak mbidiꞌizh bexa polta sakndoꞌ Dios, bexa mbin tiꞌin ndoꞌ xa.
\p
\v 8 Leꞌa ti men na li mbín naꞌ utoꞌo gibeꞌa wa uníꞌigal ndoꞌ naꞌ, ndab xa:
\p —Waꞌ, cha usen libr nsaꞌnyaꞌal ndoꞌ na baꞌ, ta lbaꞌa nsén angel baꞌ wa, xa nsoꞌ ndoꞌ nitsdoꞌo nsea ndoꞌ yo.
\p
\v 9 Cha ngwaa naꞌ ndoꞌ angel, cha ndáp naꞌ usaꞌa xa libr wa ndoꞌ naꞌ. Leꞌa xa cha ndab ndoꞌ naꞌ:
\p —Usen‑a, cha udaw‑a. Leꞌa gor na ncho‑yá toꞌo~lu leꞌa‑yá utiꞌi cuent mzhin, ná leꞌa gor na kab lu‑yá leꞌa‑yá yak ulaꞌ len lu.
\p
\v 10 Cha weꞌe usen naꞌ libr tuzh nsob yaꞌa angel wa, cha udaw naꞌ‑yá. Leꞌa‑yá utiꞌika gor na ncho‑yá toꞌo~naꞌ lak utiꞌi mzhin, ná leꞌa gor na udab naꞌ‑yá, leꞌa‑yá cha myak ulaꞌ len~naꞌ.
\v 11 Leꞌa angel wa cha ndab ndoꞌ naꞌ:
\p —Leꞌa lu nsabndoꞌ gudiꞌizh sakndoꞌ Dios stub biaj xteꞌe gunno Dios be gezh, nsea be nacion, nsea bexa ndadiꞌizh isandoꞌ diꞌizh, nsea bexa nibeꞌe ndoꞌ gizhliyo.
\c 11
\s Itop bexa ndadiꞌizh diꞌizh ten Dios
\p
\v 1 Weꞌe cha usen naꞌ dub lod cuent bar nkeꞌa medid, cha mbín naꞌ dub ta cuent ti men ndab:
\p —Waꞌ, cha bkeꞌa medid niꞌi ten Dios nsea ndoꞌ altar, no blaꞌab bexa ndankea Dios sa wa.
\v 2 Parea naꞌanpa ukeꞌa medid lu no tale ten niꞌi wa, leꞌa sa wa myak cuent ndoꞌ bexa lá nchandoꞌ Dios. Leꞌa bexa wa leꞌa inibeꞌe gezh ten Dios dub top gaꞌal ncho top mbeꞌe.
\v 3 Leꞌa naꞌ utuꞌub top men gudiꞌizh sakndoꞌ Dios dub mil ncho top gayoꞌo ncho chon gaꞌal wizh. Leꞌa bexa wa gak lad nagats, ta na nluu leꞌa bexa uban ncho ladna.
\p
\v 4 Leꞌa itop bexa ndadiꞌizh wa nak cuent top ya olivo nsea top candeler, ta nde ndoꞌ Dios xa nibeꞌe ndoꞌ gizhliyo.
\v 5 Tal ton dub men nlad ugap gunno bexa wa, leꞌa bexa wa itoꞌo bealꞌ toꞌo~na, ta utsoꞌol be men gakloo ndoꞌ bexa wa. Li gat itea be men nlad ugap gunno bexa.
\v 6 Leꞌa itop bexa wa gap juers utsaw bexa gibeꞌa, ndontsa lá ilaꞌ gi idub zha na gudiꞌizh bexa sakndoꞌ Dios. No gap bexa juers yunno bexa nits wa ten, no sian be gealkweaꞌ gast plo nlad bexa utsaksi bexa be men nde ndoꞌ gizhliyo.
\v 7 Leꞌa zha mtayadiꞌizh bexa wa, leꞌa dub man uzheꞌeb itoꞌo len geꞌed doꞌo. Cha kuyono ma itop xa wa, cha gun ma gan gat bexa.
\v 8 Leꞌa bexa ngut wa kwesaꞌal ndoꞌ xgeꞌe ten gezh wa, sa ngut Cristo ndoꞌ cruz. Leꞌa bexa gezh wa ugap nak cuent bexa Sodoma nsea bexa Egipto.
\v 9 Leꞌa bexa itea be gezh, no bexa itea be ras be men, no bexa ndadiꞌizh itea be diꞌizh, nsea bexa itea be nacion iniꞌí ndesaꞌal bexa wa chon wizh itol. No ni lá ulaꞌa bexa igaꞌach bexa ngut wa.
\v 10 Leꞌa be men gizhliyo uzhebpa iten ladna geal ngut bexa wa, gast usaꞌa bexa be regal ikaꞌa be ltsaꞌa bexa, leꞌa itop bexa wa mbin uzhebpa gealkweaꞌ utid be men.
\p
\v 11 Leꞌa zha na ngwaꞌa chon wizh itol wa, leꞌa Dios cha msaꞌa gealnaban ten bexa, mban bexa ndoꞌ gealgut. Cha uzhebpa mzheb be men uniꞌí bexa wa.
\v 12 Cha mbiꞌín itop bexa wa dub diꞌizh ugeꞌ utoꞌo gibeꞌa, ndab‑a:
\p —Ukea bega sa ndee.
\p Weꞌe cha mkea bexa gibeꞌa ndoꞌ dub xkaw, ndewiꞌi bexa ndaklono bexa wa.
\v 13 Cha bi leꞌa gor wa ngok dub xoꞌo siꞌil. Leꞌa dub bleꞌa tuzh gezh wa myubyoꞌo, cha ngut dub gaꞌad mil men. Leꞌa bexa naꞌanpa ngat wa uzhebpa mzheb, ndab bexa leꞌa Dios nsob gibeꞌa uzheꞌeb dub Dios juert nak.
\p
\v 14 Li utidla top gealkweaꞌ wa, parea leꞌa ta yon wa sken ilen.
\s Trompet isagaꞌad
\p
\v 15 Leꞌa angel isagaꞌad wa cha mkweꞌezh trompet ten na. Cha mgen cuent ti be men gibeꞌa ugeꞌ ndab xa:
\b
\q1 Leꞌa sa nibeꞌe be men ndoꞌ gizhliyo
\q2 myak sa nibeꞌe Dios ten beuna nsea Cristo.
\q1 Leꞌa xa wa leꞌa inibeꞌe idub tiemp.
\b
\p
\v 16 Leꞌa isagaꞌal bdap bexa gox xa nsak nde ndoꞌ be yaxil lad ndoꞌ Dios, cha msaxib bexa gast ndoꞌ yo ngol xtuzh bexa, ngwankea bexa Dios,
\v 17 cha ndab bexa:
\b
\q1 Nsaꞌa besa xno ndoꞌ go Dios Xa Nibeꞌe,
\q2 xa ndon leꞌa juert ndoꞌ itea be taꞌa.
\q1 Leꞌa go leꞌa nak Dios nat no polta
\q2 no idub tiemp ilen ndee.
\q1 Leꞌa go nsobno juers siꞌil ten ga,
\q2 nat leꞌa go leꞌa nibeꞌe.
\q1
\v 18 Leꞌa be men gizhliyo ngoklobe ndoꞌ go,
\q2 ná leꞌa nat ngol wizh utsaksi ga bexa.
\q1 No gab go ndoꞌ bexa ngutla
\q2 ná xteꞌe nak be taꞌa mbin bexa.
\q1 No usaꞌa ga ta wen ikaꞌa bexa ndadiꞌizh sakndoꞌ ga,
\q2 bexa ndun tiꞌin ten ga, no bexa umbiꞌi ten ga,
\q1 no itea bexa nxobgek ndoꞌ ga,
\q2 lak bexa nsak no bexa naꞌanpa xa nsak.
\q1 No unitndoꞌ ga bexa ndut be men ndoꞌ gizhliyo.
\b
\p
\v 19 Cha myaꞌal niꞌi ten Dios gibeꞌa. Leꞌa len niꞌi wa mluu caj ten Dios. Cha ulaꞌ bealꞌ usiꞌi, no uzheꞌeb nsoꞌ ruid, no uníꞌi usiꞌi. No ngok dub xoꞌo siꞌil, no uzheꞌeb ulaꞌ gigeꞌ ubiꞌi.
\c 12
\s Dub xagots no dub dragón
\p
\v 1 Cha mluu dub ta uzheꞌeb gibeꞌa. Leꞌa ta wa dub xagots cuent wizh naꞌ xab~xa, nsea xoꞌo~xa ndiꞌib tsoꞌo mbeꞌe, nsea nsob dub coron gek~xa. Leꞌa gek coron wa ndiꞌib dub tibtop ta cuent mbeal ndiꞌib gibeꞌa.
\v 2 Leꞌa xagots wa dub xa nchoxinna, ta weꞌe nbezhat xa nsea gealkweaꞌ gal xin~xa.
\v 3 Cha no mluu stub taꞌa gibeꞌa. Leꞌa ta wa dub dragón nane, dub ma cuent nak wach siꞌil. Ndap ma gaꞌad gek~ma, no dub tiꞌi xkach~ma, nsea dub coron nsob kadga dub gek~ma.
\v 4 Leꞌa xne dragón wa udobxazh gax itol be mbeal ndiꞌib gibeꞌa, cha ulate‑yá ndoꞌ gizhliyo. Cha ngwaꞌisoꞌ ma lad ndoꞌ xagots li gal xin~na wa, ndontsa gaw ma xin xagots wa gor gal meꞌed.
\v 5 Leꞌa xagots wa cha ngop xin~na dub meꞌed bgiꞌi, dub xa uzhebpa juert gak inibeꞌe ndoꞌ itea be nacion. Parea leꞌa dub angel cha myoꞌo meꞌed wa gast ndoꞌ yaxil sa nsob Dios.
\v 6 Leꞌa xagots wa cha mxoꞌon geꞌe sa bid, dub sa yá list nak msaxkwaꞌa Dios, ndontsa sa weꞌe ulaꞌach Dios xa dub mil ncho top gayoꞌo ncho chon gaꞌal wizh.
\p
\v 7 Tsoꞌo wa uyoꞌo dub uyo siꞌil gibeꞌa. Leꞌa Miguel dub angel nibeꞌe nsea be ltsaꞌa~xa uteyono dragón wa nsea be ltsaꞌa dragón.
\v 8 Weꞌe leꞌa dragón no be ltsaꞌa~na wa lá ngun gan. Cha yá naꞌanta sa yoo dragón no be ltsaꞌa~na gibeꞌa.
\v 9 Weꞌe leꞌa Miguel wa cha mtsaꞌab dragón tsoꞌo juer. Leꞌa ma wa mbeꞌal polta nsaleaꞌ maxuꞌu nsea Satanás, ma na li nkedino be men ncho idub nax ndoꞌ gizhliyo. Cha ulayat dragón no be ltsaꞌa~na ndoꞌ gizhliyo.
\p
\v 10 Cha weꞌe mbín naꞌ dub diꞌizh utoꞌo gibeꞌa ugeꞌ ndab:
\b
\q1 Nat ngol wizh leꞌa Dios ten beuna myun libr be xmen~na,
\q2 no mluu xa juers ten xa, no nibeꞌe xa,
\q2 no msoꞌ xa Cristo inibeꞌe xa ndoꞌ gizhliyo.
\q1 Nat leꞌa xa wa ulantuꞌub maxuꞌu
\q2 na li nsake be ltsaꞌa beuna ndoꞌ Dios teꞌal tezhea.
\q1
\v 11 Leꞌa bexa wa mbin gan ndoꞌ maxuꞌu,
\q2 ta na li mtsiꞌi Borreg ten ten na.
\q1 No ta na li mbidiꞌizh bexa diꞌizh ten Dios,
\q2 naꞌanpa izheb bexa gast mbit be men bexa.
\q1
\v 12 ¡Nat bten ladna lu gibeꞌa
\q2 no bego ncho sa baꞌ!
\q1 Parea proꞌob bego na ncho ndoꞌ gizhliyo nsea ndoꞌ nitsdoꞌo,
\q2 leꞌa maxuꞌu uzhebpa ndakloo ulayat ndoꞌ gizhliyo.
\q2 Leꞌa maxuꞌu uniꞌí leꞌa naꞌantapa kwen nkesea.
\b
\p
\v 13 Leꞌa gor na uniꞌí dragón wa leꞌa ma ulayat ndoꞌ gizhliyo, cha usankea ma tsoꞌo xagots na li ngop meꞌed bgiꞌi wa.
\v 14 Cha msaꞌa Dios top xkwag xagots wa cuent xkwag mtsi siꞌil, ndontsa isaꞌab xa sit uxoꞌon xa ndoꞌ dragón wa sa bid. Nchaꞌa xa sa ten xa, sa na ulaꞌach Dios xa chon liꞌin itol.
\v 15 Leꞌa toꞌo dragón wa cha utoꞌo nits mtsaꞌab ma tsoꞌo xagots wa cuent dub yowbeꞌe, ndiꞌizh goꞌo‑yá xagots wa.
\v 16 Parea leꞌa gizhliyo ngokno xagots wa, ubiꞌil ndoꞌ yo, cha ngu‑yá nits na utoꞌo toꞌo dragón wa.
\v 17 Weꞌe leꞌa dragón uzhebpa mxee ladna ndoꞌ xa wa. Cha ngwateyono ma itea be xin xagots wa, bexa na nxobgek ndoꞌ ta nibeꞌe Dios, no ndadiꞌizh bexa gealngea ten Jesucristo.
\c 13
\s Dub man uzheꞌeb utoꞌo len nitsdoꞌo
\p
\v 1 Leꞌa naꞌ nsoꞌ ndoꞌ yux toꞌo nitsdoꞌo, cha uní naꞌ utoꞌo dub man uzheꞌeb ndoꞌ nitsdoꞌo, ndap ma gaꞌad gek~ma nsea tiꞌi xkach~ma. Leꞌa kadga dub xkach~ma wa nsob dub coron. Leꞌa kadga gek~ma wa nkea dub leaꞌ Dios, dub ta nisi ma Dios.
\v 2 Leꞌa naꞌ uní leꞌa las~ma naꞌ cuent naꞌ las mbiꞌizh leopardo. Leꞌa be xoꞌo~ma cuent nak xoꞌo os. Leꞌa toꞌo~ma cuent nak toꞌo mbiꞌizh león. Leꞌa dragón msaꞌa sa nibeꞌe na no juers ten na ndoꞌ man uzheꞌeb wa.
\v 3 Cha uní naꞌ leꞌa dub gek~ma wa mwiꞌi cuent ta ngutla, parea leꞌa sa mwiꞌi wa myaklana. Ta weꞌe leꞌa itea be men ncho ndoꞌ gizhliyo ngwanseana, no usankea bexa tsoꞌo ma.
\v 4 No ngwankea bexa dragón ma na li msaꞌa juers ten na ndoꞌ man uzheꞌeb wa. No ngwankea bexa man uzheꞌeb wa, ndab bexa:
\p —¿Tonma dub xa juert lakta ma baꞌ? ¿No ton dub xa gun gan kuyono ma baꞌ?
\p
\v 5 Leꞌa Dios mlaꞌa izhinna ma be ta ndák ma, no kweaꞌ iníꞌi ma ndoꞌ Dios. No mlaꞌa Dios inibeꞌe ma lak nlad ma dub top gaꞌal ncho top mbeꞌe.
\v 6 Cha unisi ma Dios no leaꞌ Dios no sa nsob Dios nsea bexa ncho wats Dios gibeꞌa.
\v 7 No mlaꞌa Dios kuyono ma be xmen Dios, no gun ma gan ndoꞌ bexa. No msaꞌa xa inibeꞌe ma ndoꞌ itea ras be men, no bexa ncho itea be gezh, no bexa ndadiꞌizh isandoꞌ diꞌizh, no bexa itea be nacion.
\v 8 Leꞌa itea bexa ncho ndoꞌ gizhliyo ngwankea ma, bexa naꞌanpa nkea leaꞌ~na ndoꞌ libr ten Borreg Ben, xa na li ngut sakndoꞌ be men. Gast zha utexanta gizhliyo, leꞌa ndoꞌ libr wa nkeala leaꞌ bexa gap gealnaban nunk lá idub.
\b
\q1
\v 9 Tal leꞌa bega ndap nchaꞌ~na,
\q2 bsakyoꞌón bega ta ndáp naꞌ ndee.
\q1
\v 10 Tal ncho bego nsabndoꞌ yaꞌ litgiꞌib,
\q2 leꞌa bega yaꞌka litgiꞌib.
\q1 No tal leꞌa ncho bega nsabndoꞌ gat ndoꞌ spad,
\q2 leꞌa bega gatka ndoꞌ spad.
\b
\m Leꞌa ta wa gab leꞌa be xmen Dios nsabndoꞌ uxik ndoꞌ be gealkweaꞌ, no igeꞌ ladna bexa Dios.
\s Stub man uzheꞌeb wa utoꞌo ndoꞌ gizhliyo
\p
\v 11 Tsoꞌo wa uní naꞌ stub man uzheꞌeb utoꞌo len yo. Leꞌa ma wa ndap top xkach~na lak nak xkach borreg, parea ndadiꞌizh ma lak ndadiꞌizh dub dragón.
\v 12 Leꞌa ma wa ndap juers msaꞌa ma ned wa, ndontsa no ma inibeꞌe wats ma wa. Leꞌa ma nibeꞌe ndoꞌ itea be men ncho ndoꞌ gizhliyo yankea bexa ma ned wa, ma na li mwiꞌi cha myakna wa.
\v 13 No mbin ma be ta uzheꞌeb ndanseana be men, gast utoꞌo giꞌ gibeꞌa gast ndoꞌ yo ndoꞌ gaꞌal be men.
\v 14 No mkwiꞌinno ma be men ta na mbin ma be ta uzheꞌeb wa juers ten man ned wa. Cha unibeꞌe ma ndoꞌ be men nde ndoꞌ gizhliyo, gundeꞌe xa dub taꞌa lak nak ma ned wa, ma li mwiꞌi ngwa spad gek na wa, cha mban ma.
\v 15 Cha msaꞌa man itop wa gealnaban ndoꞌ ta cuent nak ma ned wa, ndontsa iníꞌi‑yá no inibeꞌe‑yá gat itea bexa na lá yankea‑yá.
\v 16 Leꞌa man itop wa cha unibeꞌe ndoꞌ iteanak be men ikea se yaꞌa lad gaꞌal xa natal xtuzh~xa, bexa nsak nsea bexa naꞌanpa nsak, bexa rik nsea bexa uban nak, bexa libr no bexa nchaꞌndoꞌo ndoꞌ yaꞌa stubga men.
\v 17 Ni dub be men lá yoo gan isiꞌi taꞌa no ni udoꞌo xa taꞌa, tal leꞌa xa naꞌanpa noꞌo se wa, natal xa naꞌanpa noꞌo leaꞌ man ned wa, natal xa naꞌanpa noꞌo numr ten leaꞌ~ma wa.
\v 18 Ta ndee nlad dub xa list nak yakbeꞌena, ulaꞌab xa numr ten man wa, leꞌa ta wa numr ten dub mgiꞌi. Leꞌa numr wa xoꞌop gayoꞌo ncho chon gaꞌal ncho xoꞌop.
\c 14
\s Dub cant kub mbiltoꞌo bexa
\p
\v 1 Leꞌa tsoꞌo wa uní naꞌ leꞌa Borreg Ben wa nsoꞌ gek geꞌe Sion, nsea dub gayoꞌo ncho top gaꞌal ncho dap mil bexa, bexa nkea leaꞌ xa nak Borreg xtuzh~na nsea leaꞌ Xus~xa wa.
\v 2 Cha mbín naꞌ nbezh dub ta ulen gibeꞌa, cuent dub sa nsalaꞌ kwaꞌal nits, nsea cuent níꞌi usiꞌi, nsea cuent ti sianpa arpa ndoꞌol bexa.
\v 3 Nsea ndaltoꞌo bexa dub cant kub lad ndoꞌ yaxil, sa ndiꞌib idap be ta nban wa nsea bexa gox xa nsak wa. Naꞌan ton gun gan utsid goltoꞌo cant wa, nabtsa dub gayoꞌo ncho top gaꞌal ncho dap mil bexa, bexa na uloꞌo Dios lat be men ncho ndoꞌ gizhliyo.
\v 4 Leꞌa xa wa bexa na naꞌanpa ugal ni dub xagots, leꞌa bexa xa umbiꞌi nak ndoꞌ Dios. No nsankea bexa tsoꞌo Borreg Ben guniꞌi pa nchaꞌa xa. Leꞌa bexa wa bexa mti Dios lat be men, nak bexa cuent dub ta ned gak xnab ndoꞌ Dios nsea ndoꞌ Borreg.
\v 5 Leꞌa bexa wa ni dub gealkwiꞌin lá ngun, no umbiꞌi nak bexa kwe bexa ndoꞌ sa nsob Dios.
\s Ta mbidiꞌizh chon angel
\p
\v 6 Cha uní naꞌ stub angel nchaꞌnsaꞌab gibeꞌa, noꞌo diꞌizh wen ten Dios ta nunk lá idub, ta gudiꞌizh angel ndoꞌ be men ncho ndoꞌ gizhliyo itea be nacion, nsea be ras, nsea be diꞌizh, nsea itea be gezh.
\v 7 No uzhebpa ugeꞌ ndab angel wa:
\p —Bzheb bega ndoꞌ Dios, no gud bega leꞌa xa ndon leꞌa xa nsak. Leꞌa nat yá ngol gor na utsaksi xa be men. Wankea bega xa na mbindeꞌe gibeꞌa no gizhliyo no nitsdoꞌo no be sa ndiblen nits.
\p
\v 8 Leꞌa stub angel cha utankea ndab:
\p —Yá ulayat, yá ulayat gezh siꞌil Babilonia. Leꞌa bexa gezh wa mkiꞌil be men itea be nacion ndun bexa ta bzhiꞌik, ngwankea bexa be dios gizhliyo.
\p
\v 9 Leꞌa angel yon wa utankea no ugeꞌ ndab xa:
\p —Tal ton yankea man uzheꞌeb wa, nsea ta cuent nak man wa, no isob se ten ma xtuzh bexa natal yaꞌa bexa,
\v 10 leꞌa bexa wa no iniꞌí be gealkweaꞌ siꞌil utsaꞌab Dios tsoꞌo bexa wa, leꞌa Dios uzheꞌeb ndaklono bexa. Iniꞌí bexa gealkweaꞌ ndoꞌ giꞌ nsea ndoꞌ azufre nsayolꞌ ndoꞌ gaꞌal be angel ten Dios nsea ndoꞌ Borreg Ben wa.
\v 11 Leꞌa zhen sa utsaksi Dios bexa wa lá kweaskea idub tiemp. Teꞌal tezhea lá uneꞌe bexa, bexa na ngwankea man uzheꞌeb wa no ta cuent nak man wa, bexa nkea se ten leaꞌ~ma.
\v 12 Leꞌa bexa umbiꞌi ten Dios nsabndoꞌ uxik ndoꞌ itea be taꞌa, no uxobgek bexa ndoꞌ be ta nibeꞌe Dios, nsea igeꞌ ladna bexa Jesús.
\p
\v 13 Cha mbín naꞌ dub diꞌizh utoꞌo gibeꞌa, ndab ndoꞌ naꞌ:
\p —Bkeꞌa ta ndee: leꞌa nat idub ndoꞌ ndee uzhebpa wen yoo ladna bexa nakla xmen Jesús zha ngut bexa. Leꞌa Espíritu ten Dios ndab: “Ugeaka leꞌa bexa baꞌ uneꞌe ndoꞌ be tiꞌin mbin bexa, leꞌa Dios kix be ta wen mbin bexa.”
\s Mteleꞌe be angel taꞌa ndoꞌ gizhliyo
\p
\v 14 Cha mwiꞌi naꞌ no uní naꞌ dub xkaw nagud. Leꞌa ndoꞌ xkaw wa nsob dub xa cuent dub men nsob dub coron ta oro gek~xa, nsea dub os wach nsob yaꞌa~xa.
\v 15 Leꞌa len niꞌi ten Dios cha utoꞌo stub angel ugeꞌ ndab ndoꞌ xa nsob ndoꞌ xkaw wa:
\p —¡Bintiꞌin os ten lu, uxen be taꞌa ndoꞌ yo! Leꞌa nat yá ngol gor ibeleꞌe be taꞌa ndoꞌ gizhliyo, leꞌa‑yá yá ngugaꞌal‑la.
\p
\v 16 Weꞌe leꞌa xa nsob ndoꞌ xkaw wa mbintiꞌin os ten na ndoꞌ gizhliyo, mteleꞌe xa be taꞌa.
\p
\v 17 Weꞌe utoꞌo stub angel len niꞌi ten Dios nde gibeꞌa. Leꞌa xa no nsob dub os wach yaꞌa~na.
\v 18 Leꞌa sa nde altar wa utoꞌo stub angel nibeꞌe ndoꞌ giꞌ. Cha ugeꞌ ndab xa ndoꞌ angel nsén os wa:
\p —¡Bintiꞌin os ten lu! ¡Uxen be bex uv nde ndoꞌ gizhliyo baꞌ, leꞌa‑yá yá ngugeala!
\p
\v 19 Leꞌa angel wa cha mbintiꞌin os ten na ndoꞌ gizhliyo, uxen xa be bex uv, cha ulo xa uv wa sa gachkeꞌe‑yá. Leꞌa ta wa gab ta uzheꞌeb utsaksi Dios be men ugap.
\v 20 Cha ngochkeꞌe be uv wa dub lad toꞌo gezh wa. Leꞌa len sa ngochkeꞌe uv wa ulen ten. Leꞌa ten wa ngwapyoꞌo dub lak sa ndakea fren ten dub way. Cha li mxoꞌon ten wa pa dub chon gayoꞌo mil metr koꞌol sa.
\c 15
\s Be angel nsea stub sgaꞌad be gealkweaꞌ
\p
\v 1 Cha uní naꞌ dub ta uzheꞌeb gibeꞌa, dub ta ngwanseana naꞌ. Leꞌa ta wa dub gaꞌad angel noꞌo stub sgaꞌad gealkweaꞌ, be ta lult ilen. Cha li yandoꞌ ta ntsaksi Dios be men.
\p
\v 2 No uní naꞌ dub ta cuent nitsdoꞌo waꞌán, cuent naꞌ vidr noch giꞌ. Leꞌa ndoꞌ nitsdoꞌo wa ndebe bexa mbin gan ndoꞌ man uzheꞌeb wa, no ndoꞌ ta cuent nak man wa, no ndoꞌ se ten ma, no ndoꞌ numr ten leaꞌ~ma wa. Leꞌa bexa wa nsén be arpa ten Dios.
\v 3 Ndaltoꞌo bexa dub cant, ta mbiltoꞌo Moisés xa mbin tiꞌin ndoꞌ Dios, no ndaltoꞌo bexa cant ten Borreg Ben wa, ndab bexa:
\b
\q1 Go Dios Xa Nibeꞌe, xa ndon leꞌa juert ndoꞌ itea be taꞌa.
\q2 Uzheꞌeb ndanseana besa ndoꞌ be ta uzhebpa siꞌil ndun go.
\q1 Itea be taꞌa ndun go utsinka nak no gealngea nak‑a,
\q2 leꞌa go nibeꞌe itea be men umbiꞌi ten ga.
\q1
\v 4 ¿Ton lá izheb ndoꞌ go Dios?
\q2 ¿No ton lá gab leꞌa go dub Dios uzheꞌeb juert?
\q1 Leꞌa go nabkama nak Dios umbiꞌi.
\q1 Leꞌa be men itea be nacion ilen ndoꞌ go,
\q2 yankea bexa go,
\q1 leꞌa bexa uniꞌí leꞌa itea be taꞌa ndanno ga bexa
\q2 uzheꞌeb ta nsak no ta nsabndoꞌ.
\b
\p
\v 5 Leꞌa tsoꞌo wa cha mwiꞌi naꞌ, cha uní naꞌ myaꞌal niꞌi ten Dios nde gibeꞌa, sa ncho caj ten Dios.
\v 6 Leꞌa len sa wa cha utoꞌo isagaꞌad be angel noꞌo isagaꞌad gealkweaꞌ, bexa nak be lad lino ta umbiꞌi ndon nlaꞌbealꞌ. Nsea ncho dub sinch oro ta ladoꞌo bexa.
\v 7 Leꞌa dub be ta nban wa msaꞌa dubga vas oro ndoꞌ isagaꞌad be angel wa, ncho be taꞌa ndakloo Dios len na, Dios xa nban idub tiemp.
\v 8 Leꞌa len niꞌi ten Dios wa mzhea ncho zhen, ta nluu leꞌa Dios xa juert no siꞌil nak Dios. No naꞌan ton gun gan yate len niꞌi ten Dios gast yooka isagaꞌad be gealkweaꞌ, ta ncho len be vas nsén be angel wa.
\c 16
\s Isagaꞌad be vas ncho be taꞌa utsaksi Dios be men
\p
\v 1 Cha mbín naꞌ cuent dub ti men utoꞌo len niꞌi ten Dios, ugeꞌ ndab‑a ndoꞌ isagaꞌad be angel wa:
\p —Waꞌ bega, cha blatsob bega ta ncho len isagaꞌad vas baꞌ ndoꞌ gizhliyo, leꞌa ta wa ta utsaksi Dios be men.
\p
\v 2 Leꞌa angel ned wa utoꞌo, ngwaꞌ ulatsob ta ncho len vas ten na ndoꞌ gizhliyo. Cha ulen geꞌezh ugiꞌi las bexa nsob se ten man uzheꞌeb wa, bexa na ndankea ta cuent nak man wa.
\p
\v 3 Leꞌa angel itop wa ngwaꞌ ulatsob ta ncho len vas ten na ndoꞌ nitsdoꞌo. Cha myak‑a cuent ten ten dub xa ngut. Cha ngut iteanak be man ndencho len nitsdoꞌo wa.
\p
\v 4 Leꞌa angel yon wa ngwaꞌ ulatsob ta ncho len vas ten na ndoꞌ be nits yowbeꞌe no be sa ndiblen nits. Leꞌa be nits wa cha myak ten.
\v 5 No mbín naꞌ uníꞌi angel nibeꞌe nits wa, ndab xa:
\b
\q1 Go Dios, xa nak Dios nat no idub tiemp utid wa,
\q2 leꞌa go uzhebpa umbiꞌi nak,
\q2 no utsin ndun ga ntsaksi ga be men lak nsabndoꞌ‑yá.
\q1
\v 6 Leꞌa bexa wa mtsiꞌi ten ten be men umbiꞌi ten go
\q2 no bexa mbidiꞌizh sakndoꞌ go,
\q2 ta weꞌe mtsaksi go bexa ngu bexa ten lak nsabndoꞌ‑yá.
\b
\p
\v 7 No mbín naꞌ stub ti men utoꞌo sa nde altar wa, ndab xa:
\b
\q1 Go Dios Xa Nibeꞌe, xa ndon leꞌa juert ndoꞌ itea be taꞌa.
\q2 Leꞌa ta mtsaksi go be men baꞌ utsinka nak, no nsabndoꞌka li mbin ga.
\b
\p
\v 8 Leꞌa angel idap wa ngwaꞌ ulatsob ta ncho len vas ten na ndoꞌ wizh, ndontsa uchu giꞌ ten wizh wa be men.
\v 9 Cha ulen dub xtii siꞌil mchu be men. Weꞌe leꞌa bexa wa unisi Dios, xa leꞌa nibeꞌe ndoꞌ be gealkweaꞌ wa. Ná leꞌa bexa wa naꞌanpa ulaꞌa ta ugap nak bexa, no lá ngankea bexa Dios.
\p
\v 10 Leꞌa angel isagaꞌay wa ngwaꞌ ulatsob ta ncho len vas ten na sa nsob man uzheꞌeb. Leꞌa sa nibeꞌe man wa cha mkaw. Leꞌa be men gast ndawkeꞌa be luzh~na tant kweaꞌ ndencho bexa.
\v 11 Leꞌa bexa wa cha unisi Dios xa nsob gibeꞌa, ke ten be gealkweaꞌ no be geꞌezh wa. Ná naꞌanpa ulaꞌa bexa ta ugap nak bexa.
\p
\v 12 Leꞌa angel isaxoꞌop wa ngwaꞌ ulatsob ta ncho len vas ten na ndoꞌ nits yowbeꞌe siꞌil nsaleaꞌ Eufrates. Leꞌa nits wa cha ubid ndontsa syoꞌo gan itakea bexa nibeꞌe wa, bexa ntoꞌo lad nlen wizh.
\p
\v 13 Cha uní naꞌ leꞌa toꞌo dragón wa, nsea toꞌo man uzheꞌeb wa, nsea toꞌo profet ukwiꞌin wa utoꞌo dub gaꞌga mbi bxin cuent nak mbid.
\v 14 Leꞌa ta wa mbi bxin ten maxuꞌu, be na ndun be ta ndanseana be men. Nchaꞌbe be na wa ndoꞌ bexa nibeꞌe idub ndoꞌ gizhliyo, izhealbe bexa gal wizh uzheꞌeb ten Dios, ndontsa kuyono bexa Dios, xa ndon leꞌa juert nak.
\v 15 Cha ndab Jesús: “Blaꞌach bego leꞌa naꞌ ilen dub gor ni lá ndanbeꞌe bega cuent nlaꞌ dub waꞌan. Uzhebpa wen bexa ndenaꞌ, no list ndenak bexa xab~xa, ndontsa naꞌanpa xinteꞌe bexa, no ni lá ido ladna bexa gal zha wa.”
\v 16 Cha mchealte be mbi bxin bexa nibeꞌe wa dub sa nsaleaꞌ Armagedón diꞌizh hebreo.
\p
\v 17 Leꞌa angel isagaꞌad wa ngwaꞌ ulatsob ta ncho len vas ten na ndoꞌ mbi. Leꞌa len niꞌi ten Dios sa nsob Dios gibeꞌa wa, cha ulen cuent ti men ugeꞌ ndab:
\p —¡Leꞌa ta wa myandoꞌla!
\p
\v 18 Weꞌe cha ulaꞌ bealꞌ usiꞌi no uzheꞌeb usoꞌ ruid no uníꞌi usiꞌi. No ngok dub xoꞌo siꞌil mas uzheꞌeb mwiꞌin ndoꞌ iteanak be xoꞌo ngok idub zha ndencho be men ndoꞌ gizhliyo.
\v 19 Leꞌa gezh siꞌil Babilonia myak chon bleꞌa, no ulate be gezh ubiꞌi nde ndoꞌ gizhliyo. Leꞌa Dios lá yalad gezh Babilonia wa, leꞌa xa ndi uzheꞌeb mtsaksi‑yá idub lak ta ndakloo xa.
\v 20 Leꞌa iteanak be isla ndesaꞌal ndoꞌ nitsdoꞌo cha unitndoꞌ, nsea itea be geꞌe ubiꞌi.
\v 21 Cha ulaꞌ sian gigeꞌ ubiꞌi tsoꞌo be men. Leꞌa be gigeꞌ wa uzhebpa ta kweꞌa, pa top gaꞌal kil kadga dub‑a. Leꞌa be men cha unisi Dios ta li ulaꞌ gigeꞌ wa, geal utid bexa dub gealkweaꞌ uzhebpa ta siꞌil.
\c 17
\s Dub xagots nsob tsoꞌo man uzheꞌeb
\p
\v 1 Leꞌa lat isagaꞌad angel nsén be vas wa, utoꞌo dub angel cha ndab xa ndoꞌ naꞌ:
\p —Utsea, leꞌa naꞌ uluꞌu plo utsaksi Dios ngots ndun juis mgiꞌi wa, ngots nsob ndoꞌ nits kwaꞌal baꞌ.
\v 2 Leꞌa bexa nibeꞌe ndoꞌ gizhliyo no be men ncho ndoꞌ gizhliyo mcheꞌal xagots wa, cuent usudna bexa no be ta bzhiꞌik ndun xa wa.
\p
\v 3 Leꞌa ndoꞌ ta li mluu Espíritu ten Dios ndoꞌ naꞌ wa, leꞌa angel wa cha mbiꞌi naꞌ dub sa bid. Cha uní naꞌ leꞌa xagots wa nsob tsoꞌo dub man uzheꞌeb, dub man nane. Idub las~ma nkeaniꞌi be leaꞌ Dios ta unisi ma Dios. Leꞌa ma ndap dub gaꞌad gek~ma nsea dub tiꞌi xkach~ma.
\v 4 Leꞌa xagots wa nak dub lad konch ugats no lad nane. Leꞌa las~xa uzhebpa nsoꞌ be ta oro no be geꞌ chul no be perla. Leꞌa yaꞌa~xa nsob dub vas oro. Leꞌa len vas wa ncho be ta uzhebpa ta ugap no ta bzhiꞌik ndun xa.
\v 5 Leꞌa xtuzh~xa wa nkea stub leaꞌ~xa, dub ta ugaꞌach nak, ndab‑a: “Babilonia siꞌil, xa nak xnaꞌa itea be xagots ndun juis mgiꞌi, nsea itea be ta bzhiꞌik ncho ndoꞌ gizhliyo.”
\v 6 Weꞌe uní naꞌ leꞌa xagots wa nsudna nsea ten ten be xmen Dios. Leꞌa bexa wa ndankea Jesús, ta weꞌe mbit be men bexa. Leꞌa gor uní naꞌ xagots wa, leꞌa naꞌ uzhebpa ngwanseana.
\p
\v 7 Weꞌe leꞌa angel wa cha ndab ndoꞌ naꞌ:
\p —¿Xtaꞌan lbaꞌa ndanseana lu? Leꞌa naꞌ gáp ndoꞌ lu xteꞌe gab ta ugaꞌach ten xagots wa, no man uzheꞌeb nsob xa tsoꞌo na, man ndap dub gaꞌad gek~na nsea tiꞌi xkach~na.
\v 8 Leꞌa man uzheꞌeb uniꞌí lu wa, dub man uyoꞌo parea naꞌanpa ncho ma nat. Leꞌa nat leꞌa ma itoꞌogal len geꞌed doꞌo, cha gal zha initndoꞌ ma. Leꞌa itea bexa gizhliyo bexa naꞌanpa nkea leaꞌ~na ndoꞌ libr ten gealnaban gast zha utexanta gizhliyo, leꞌa bexa wa yanseana gor iniꞌí bexa man uzheꞌeb wa. Leꞌa ma wa uyoꞌo polta no naꞌanpa ncho ma nat, parea leꞌa ma ilen stub biaj.
\p
\v 9 ’Leꞌa ta ndee yakbeꞌena bexa list gek~na: leꞌa isagaꞌad gek man wa, leꞌa ta wa isagaꞌad bet sa nsob xagots wa,
\v 10 nsea dub gaꞌad xa nibeꞌe. Leꞌa dub gaꞌay bexa wa yá naꞌantapa inibeꞌe. Dub xa wa nibeꞌe nat, leꞌa stub xa biseata inibeꞌe. Leꞌa gor na ilen xa isagaꞌad wa leꞌa xa naꞌanpa kwen inibeꞌe.
\v 11 Leꞌa man uzheꞌeb wa leꞌa uyoꞌo, no naꞌanpa ncho ma nat, leꞌa ma wa dub xa itoꞌo lat bexa isagaꞌad wa, cha gak xa wa xa isaxoꞌon inibeꞌe. Cha gal zha utsaksi Dios xa.
\p
\v 12 ’Leꞌa isatiꞌi kach uniꞌí lu wa, leꞌa ta wa dub tiꞌi xa nibeꞌe, parea nat biseata inibeꞌe bexa. Leꞌa bexa junt inibeꞌe dubtsa gor no man uzheꞌeb wa.
\v 13 Leꞌa bexa wa dubtsa ndanbeꞌe usaꞌa bexa juers, ndontsa no man uzheꞌeb wa inibeꞌe.
\v 14 Leꞌa bexa wa kuyono Borreg Ben wa, parea leꞌa Borreg wa no be xmen Borreg wa gun gan ndoꞌ bexa wa. Leꞌa xa nak Borreg Ben wa nak Xwan iteanak be taꞌa no Xa Nibeꞌe ndoꞌ iteanak bexa nibeꞌe. Leꞌa be xmen Borreg wa nak bexa utezh Dios, no mti Dios bexa, no nxobgek bexa ndoꞌ Dios.
\p
\v 15 No ndab angel ndoꞌ naꞌ:
\p —Leꞌa be nits uniꞌí lu sa nsob ngots ndun juis mgiꞌi wa, leꞌa ta wa be men sian be gezh no sian ras no sian nacion nsea sian diꞌizh ndadiꞌizh bexa.
\v 16 Leꞌa isatiꞌi be kach ten man uzheꞌeb li uniꞌí lu wa, leꞌa ta wa leꞌa be men nxee ladna ndoꞌ ngots wa. Leꞌa bexa wa ulat be ta ndap xa, no gast xab~xa ulat bexa. No gaw bexa beꞌal las~xa, cha utsoꞌol bexa xa ndoꞌ giꞌ.
\v 17 Leꞌa Dios ulogek bexa gun bexa lak nlad Dios. Leꞌa ta wa dubtsa gudiꞌizh bexa usaꞌa bexa juers inibeꞌe man uzheꞌeb wa, gast gak cumplir be ta ndab Dios.
\v 18 Leꞌa ngots uniꞌí lu wa, leꞌa ta wa gezh siꞌil nibeꞌe ndoꞌ bexa nibeꞌe idub ndoꞌ gizhliyo.
\c 18
\s Zha initndoꞌ Babilonia
\p
\v 1 Tsoꞌo na uyoꞌo be ta ndee wa, leꞌa naꞌ uní stub angel uzheꞌeb juert utoꞌo gibeꞌa gast ndoꞌ gizhliyo nsu xeꞌa ten xa.
\v 2 No ugeꞌpa uníꞌi xa ndab xa:
\b
\q1 ¡Yá ulayat, yá ulayat gezh siꞌil Babilonia!
\q1 Leꞌa sa wa myak dub sa ncho be mbi bxin,
\q2 no iteanak be bi bzhiꞌik,
\q2 nsea sa ncho be man duꞌub man bxin,
\q2 be man nxee ladna be men ndoꞌ na.
\q1
\v 3 Leꞌa gezh wa cuent dub xagots ndun juis mgiꞌi.
\q1 Leꞌa be men ncho idub ndoꞌ gizhliyo
\q2 mbinno bexa gezh wa sian ta ugap,
\q2 ngok bexa cuent dub xa gu.
\q1 Leꞌa bexa nibeꞌe ndoꞌ gizhliyo
\q2 no mbinno bexa ta bzhiꞌik wa.
\q1 Leꞌa bexa nsiꞌi utiꞌix be taꞌa ndoꞌ gizhliyo
\q2 ngok rik no be ta ugap ndal ladna bexa gezh wa.
\b
\p
\v 4 Cha weꞌe mbín naꞌ ti Dios utoꞌo gibeꞌa ugeꞌ ndab:
\b
\q1 Bxoꞌon bego gezh Babilonia baꞌ, bego na nak xmen~naꞌ,
\q2 ndontsa naꞌanpa no bega gun be ta ugap ndun bexa wa,
\q2 no ni lá iniꞌí bega be gealkweaꞌ itid bexa.
\q1
\v 5 Leꞌa bexa wa uzhebpa sian ke ndap ndoꞌ naꞌ,
\q2 gast gibeꞌa nlayaꞌ be ta wa.
\q1 Ta weꞌe leꞌa naꞌ Dios utsaksika naꞌ bexa.
\q1
\v 6 Binno bega bexa lak ugap mbinno bexa stubga men.
\q2 Utix bega top lak mbinno bexa be men.
\q1 Bgoch bega ta goo bexa wa top lak juert nak
\q2 ndoꞌ ta mgo bexa be men.
\q1
\v 7 Lak uzheꞌeb mzhinnona bexa no be ta ugap mbin bexa,
\q2 no liga utsaksi bega bexa kweaꞌ itid bexa,
\q1 geal leꞌa bexa ndanbeꞌe len ladoꞌo~na:
\q2 “Leꞌa besa ndee nde cuent dub xa nibeꞌe.
\q1 Naꞌanpa nak besa cuent dub xagots ngut xabgiꞌi ten na,
\q2 no nunk besa lá iniꞌí gealkweaꞌ.”
\q1
\v 8 Ta weꞌe leꞌa nat dubtsa wizh ilanseaꞌ
\q2 sian gealkweaꞌ tsoꞌo bexa wa.
\q1 Leꞌa ta wa gealgut, no goꞌon bexa,
\q2 no yoo win, no yolꞌ bexa ndoꞌ giꞌ.
\q1 Leꞌa naꞌ ndee leꞌa Dios Xa Nibeꞌe uzhebpa xa juert,
\q2 naꞌ utsaksi bexa wa.
\b
\p
\v 9 Leꞌa bexa nibeꞌe ndoꞌ gizhliyo mbin ta ugap ndun bexa gezh wa, no ngol ladna bexa be ta sian ndap bexa wa. Parea nat leꞌa bexa goꞌonno bexa gezh wa, no uzhebpa uban yoo ladna bexa, gor iniꞌí bexa zhen sa nsayolꞌ gezh wa.
\v 10 Nsea sittsa kwe bexa tant nzheb bexa ndoꞌ be gealkweaꞌ nchaꞌtid gezh wa, ndab bexa:
\b
\q1 ¡Ay, ay! ¡Proꞌob gezh siꞌil Babilonia,
\q2 dub gezh juertpa ngok lu!
\q1 Ná uxaxtsa mnitndoꞌ Dios lu.
\b
\p
\v 11 Leꞌa bexa nsiꞌi utiꞌix taꞌa ndoꞌ gizhliyo uzhebpa goꞌonno gezh wa, nsea uban yoo ladna bexa, geal yá naꞌanta ton isiꞌi be ta nadoꞌo bexa.
\v 12 Leꞌa ta wa be ta oro, nsea ta plata, no be geꞌ chul, nsea be perla, nsea be lad chul ta lino nsea seda, no be lad konch ugats nsea be lad nane, nsea be ya uxeꞌe nlaꞌa, no be taꞌa nakndeꞌe marfil, no be taꞌa nakndeꞌe ya chul, no bronce, no giꞌib, no geꞌ mármol,
\v 13 nsea canel, nsea isandoꞌ be ta uxeꞌe, nsea ta uxeꞌe ta nyolꞌ, nsea mirra, nsea olíbano, nsea vin, nsea aceit, nsea arin lan, nsea trig, no man yoꞌo, nsea borreg, nsea way, nsea carret, nsea bexa nchaꞌndoꞌo ndoꞌ stubga men.
\v 14 Leꞌa bexa nsiꞌi utiꞌix be taꞌa wa cha gab:
\b
\q1 Nat leꞌa bego yá naꞌantapa ndap
\q2 be ta nsaꞌab ladna bego wa.
\q1 Leꞌa bego mlaꞌ iteanak be ta chul no be ta uyap ndap bega,
\q2 cha yá naꞌantapa izheal bega‑yá.
\b
\p
\v 15 Leꞌa bexa nsiꞌi utiꞌix be ta ndee wa, bexa na myak rik juers ten gezh wa, leꞌa bexa wa sit itate ta na nzheb bexa ndoꞌ be gealkweaꞌ nchaꞌtid gezh wa. Leꞌa bexa wa goꞌon, no uban yoo ladna bexa.
\v 16 No gab bexa:
\b
\q1 ¡Ay, ay! ¡Proꞌob gezh siꞌil Babilonia,
\q1 Leꞌa bexa wa ngok lad lino ta chul,
\q2 ta color konch ugats no nane!
\q1 No uzhebpa usoꞌ be ta oro, no be geꞌ chul,
\q2 no perla las bexa.
\q1
\v 17 Xlaꞌal unitndoꞌ be ta sian ten bexa.
\b
\p No iteanak bexa ntseꞌa be barco, no itea bexa na nsea len barco, no bexa ndun tiꞌin len barco, nsea iteata bexa ndun tiꞌin ndoꞌ nitsdoꞌo, leꞌa bexa wa sit utate.
\v 18 Leꞌa gor uniꞌí bexa zhen sa nsayolꞌ gezh wa, cha ugeꞌ ndab bexa:
\p —¡Naꞌan stub gezh nsak lak nsak gezh baꞌ!
\p
\v 19 No mtob bexa yo gek bexa tant uban myoꞌo ladna bexa. Cha utezhat bexa no mbiꞌin bexa, ugeꞌ ndab bexa:
\b
\q1 ¡Ay, ay! Proꞌob gezh siꞌil baꞌ,
\q2 sa na myak rik itea besa ndap barco ndoꞌ nitsdoꞌo,
\q2 leꞌa nat xlaꞌal unitndoꞌ‑yá.
\q1
\v 20 Parea bten ladna bego ndencho gibeꞌa,
\q2 bego nak men umbiꞌi ten Dios,
\q2 no bego nak be apostol,
\q2 no bego ndadiꞌizh sakndoꞌ Dios.
\q1 Leꞌa Dios leꞌa mtsaksi bexa Babilonia ta na li mbinno bexa bega.
\b
\p
\v 21 Weꞌe leꞌa stub angel juert cha usen dub geꞌ siꞌil ta nyajw taꞌa ndoꞌ na, cha mtsaꞌab xa‑yá ndoꞌ nitsdoꞌo, ndab xa:
\b
\q1 Lbaꞌa yaꞌ Babilonia gezh siꞌil,
\q2 yá naꞌanta ton iniꞌí‑yá.
\q1
\v 22 No lá igenta be musk len gezh wa,
\q2 bexa ndoꞌol arpa no bzhee no trompet.
\q1 No ni stub bexa ndun tiꞌin lá yoota,
\q2 ni ruid ten molin lá igenta.
\q1
\v 23 No ni xeꞌa aceit lá isuta sa wa,
\q2 no ni lá igenta ruid ten dub gast sa nchilyaꞌa men.
\q1 Leꞌa bexa nsiꞌi utiꞌix be taꞌa,
\q2 leꞌa bexa wa leꞌa ngok bexa nsak ndoꞌ gizhliyo.
\q1 No uzheꞌeb mkedino bexa gezh wa
\q2 itea be nacion nsea be ta bruj ndun bexa.
\q1
\v 24 Leꞌa bexa wa leꞌa ndap ke ngut bexa mbidiꞌizh sakndoꞌ Dios,
\q2 no bexa umbiꞌi nak ndoꞌ Dios.
\q1 Leꞌa bexa gezh wa no ndap ke
\q2 ngut be men idub ndoꞌ gizhliyo.
\c 19
\s Bexa nten ladna ncho gibeꞌa
\p
\v 1 Tsoꞌo wa mbín naꞌ ti kwaꞌad be men gibeꞌa, ugeꞌ ndab bexa:
\b
\q1 ¡Iteanak beuna yankea Dios!
\q1 Leꞌa Dios ten beuna leꞌa uloꞌo beuna ndoꞌ be ke ten beuna,
\q2 no ndankea beuna xa leꞌa xa uzheꞌeb dub xa wen nak,
\q2 no uzhebpa juert nak xa.
\q1
\v 2 Leꞌa iteanak be ta ndun xa wa gealngea nak no utsin nak‑a,
\q2 lak mtsaksi xa ngots ndun juis mgiꞌi wa,
\q2 xa mtsabgix be men ndoꞌ gizhliyo nsea be ta ugap mbin xa.
\q1 Ke weꞌe leꞌa Dios mkixke ta mbit xa wa be men,
\q2 bexa ndun tiꞌin ndoꞌ Dios.
\b
\p
\v 3 Cha stub biaj ugeꞌ ndab bexa wa:
\b
\q1 ¡Iteanak beuna yankea Dios!
\q2 Leꞌa zhen sa nsayolꞌ xagots wa nunk lá kweaskea idub tiemp.
\b
\p
\v 4 Leꞌa isagaꞌal bdap bexa gox xa nsak no idap be ta nban wa cha usaxib gast ndoꞌ yo ngol xtuzh bexa. Cha ngwankea bexa Dios sa nsob xa ndoꞌ yaxil, ndab bexa:
\p —¡Lika nak‑a! ¡Iteanak beuna ndankea Dios!
\p
\v 5 Leꞌa gast ndoꞌ sa nsob Dios wa ulen dub diꞌizh ndab:
\b
\q1 Wankea bego Dios ten beuna,
\q2 itea bego na ndun tiꞌin ndoꞌ xa,
\q1 bego na nzheb ndoꞌ xa,
\q2 lak bego xa nsak no bega xa naꞌanpa nsak.
\b
\p
\v 6 No mbín naꞌ ti kwaꞌadpa men, cuent nsid dub sa nsalaꞌ kwaꞌal nits, no cuent sa uzheꞌeb uníꞌi usiꞌi, ndab bexa:
\b
\q1 ¡Iteanak beuna yankea Dios,
\q2 leꞌa xa wa leꞌa nak xa nibeꞌe, xa ndon leꞌa juert nak!
\q1
\v 7 ¡Iten ladna beuna no usaꞌa beuna xno ndoꞌ Dios!
\q1 Leꞌa nat ngol zha na uchilyaꞌa xa na nak Borreg Ben,
\q2 leꞌa xagots ikaꞌa xa wa listla nsoꞌ.
\q1
\v 8 Leꞌa xagots wa gak dub lad lino chul,
\q2 lad umbiꞌi ndon nlaꞌbealꞌ.
\b
\m Leꞌa lad lino chul wa, leꞌa ta wa nluu be ta utsin mbin be men umbiꞌi nak ladoꞌo~na ndoꞌ Dios.
\s Bexa gaw xcheꞌe sa nchilyaꞌa Borreg
\p
\v 9 Leꞌa angel wa cha ndab ndoꞌ naꞌ:
\p —Bkeꞌa ta ndee: “Uzhebpa wen yoo ladna bexa na utezh Dios, gaw xcheꞌe bexa sa uchilyaꞌa xa nak Borreg wa.”
\p No ndab xa:
\p —Leꞌa ta ndee be diꞌizh gealngea ten Dios.
\p
\v 10 Cha usaxib naꞌ xan ndats angel wa gast ndoꞌ yo ngol xtuzh~naꞌ ndontsa gankeꞌa naꞌ xa. Zha leꞌa angel wa cha ndab ndoꞌ naꞌ:
\p —¡Naꞌanpa lbaꞌa gun lu, ndi wankea Dios! Leꞌa naꞌ ndee no ndun tiꞌin laktsa ndun lu tiꞌin ndoꞌ Dios nsea bexa ltsaꞌa~lu, bexa nxobgek ndoꞌ diꞌizh ten Jesús. Leꞌa ta ndadiꞌizh bexa sakndoꞌ Dios, leꞌa ta wa nsaꞌa juers ndoꞌ be diꞌizh ten Jesús.
\s Xa na nsob tsoꞌo way nagud
\p
\v 11 Weꞌe cha uní naꞌ leꞌa gibeꞌa myaꞌal, cha mlundoꞌ dub way nagud. Leꞌa xa nsob tsoꞌo ma wa dub xa sunka lak ndab xa, no gealngea nak xa. Leꞌa xa wa utsin nibeꞌe, no utsin ndun xa uyo lak nsabndoꞌ‑yá.
\v 12 Leꞌa ngusndoꞌ~xa cuent naꞌ bealꞌ giꞌ. Nsea gek~xa ndiꞌib sian be coron. Leꞌa stub leaꞌ~xa nkea xtuzh~xa, dub taꞌa ni dub men lá iniꞌí, nabtsa xa uniꞌí‑yá.
\v 13 Nsea nak xa dub lad koꞌol idub nsoꞌ ten. Leꞌa xa wa nsaleaꞌ Diꞌizh Ten Dios.
\v 14 Leꞌa kwaꞌad be soldad gibeꞌa nchankea tsoꞌo xa wa, ndiꞌib bexa tsoꞌo way nagud, no nak bexa lad lino ta uzheꞌeb chul, ta nagud no umbiꞌi.
\v 15 Leꞌa toꞌo~xa wa ntoꞌo dub spad wach, ndontsa utsawiꞌi xa itea be nacion. Leꞌa xa wa juert inibeꞌe ndoꞌ bexa wa, no utsaksi xa be men lakta zha ngichkeꞌe bexa uv itoꞌo nits ten‑a. Leꞌa ta wa ta uzheꞌeb ndakloo Dios xa ndon leꞌa juert nak.
\v 16 Leꞌa las xab~xa no xtaꞌa xoꞌo xa nkeaniꞌi stub leaꞌ~xa ndab: “Xa Nibeꞌe ndoꞌ iteanak bexa nibeꞌe no Xa nak Xwan iteanak be taꞌa.”
\p
\v 17 Cha uní naꞌ stub angel nsoꞌ ndoꞌ wizh, cha ugeꞌ utezh xa iteanak be man nsaꞌab gaꞌap, ndab xa:
\p —Utseabe bego, byakjunt bega sa yoo xcheꞌe siꞌil ten Dios,
\v 18 ndontsa gaw bega beꞌal ten bexa unibeꞌe ndoꞌ be nacion, nsea bexa unibeꞌe be soldad, nsea be soldad. No gaw bega beꞌal ten be way, no bexa utiꞌib tsoꞌo~ma, no beꞌal ten bexa nchaꞌndoꞌo ndoꞌ stubga men nsea bexa naꞌanpa li nak, no bexa nsak nsea bexa naꞌanpa nsak.
\p
\v 19 Cha weꞌe uní naꞌ leꞌa man uzheꞌeb wa, no bexa nibeꞌe ndoꞌ gizhliyo, nsea be soldad ten bexa wa myakjunt ndontsa kuyono bexa xa nsob tsoꞌo way nagud no be soldad ten xa.
\v 20 Cha ngwaꞌigaꞌa man uzheꞌeb wa no profet ukwiꞌin wa. Leꞌa xa wa xa mbin sian be taꞌa ngwanseana be men ndoꞌ gaꞌal man uzheꞌeb wa, ta mkedino xa be men nkea se ten man wa, bexa ngwankea ta cuent nak man wa. Leꞌa xa nsob tsoꞌo way nagud wa usen man uzheꞌeb wa nsea profet ukwiꞌin wa, cha litsa nban bena wa mtsaꞌab xa len lagun giꞌ sa nsayolꞌ azufre.
\v 21 Weꞌe leꞌa xa nsob tsoꞌo way cha mbit iteanak be soldad ten man uzheꞌeb wa nsea spad ntoꞌo toꞌo~xa. Cha weꞌe leꞌa iteanak be man duꞌub udaw be beꞌal ten bexa ngut wa gast plo mzhea bema.
\c 20
\s Dub mil liꞌin ikeanyaw maxuꞌu
\p
\v 1 Cha uní naꞌ stub angel ulen gibeꞌa nsea dub liab ten geꞌed doꞌo, nsea dub caden siꞌil nsob yaꞌa~xa.
\v 2 Cha usen xa dragón wa, leꞌa ta wa mbeꞌal polta, no leꞌakaga maxuꞌu ta wa, xa nsaleaꞌ Satanás. Cha mxi xa maxuꞌu wa nsea caden wa, ndontsa ikenchii maxuꞌu dub mil liꞌin.
\v 3 Cha mtsaꞌab angel wa maxuꞌu wa len geꞌed doꞌo, sa ikeanyaw maxuꞌu dub mil liꞌin. Cha weꞌe mxoꞌob angel dub ta myaw toꞌo geꞌed wa nsea se ten xa, ndontsa lá itoꞌota maxuꞌu, ukedino maxuꞌu be men nde ndoꞌ gizhliyo, gast zha ngok dub mil liꞌin wa. Weꞌe leꞌa maxuꞌu nsabndoꞌ yaꞌak steꞌeptsa.
\p
\v 4 Weꞌe uní naꞌ pla be yaxil nsea bexa nsob ndoꞌ ta wa, bexa na msaꞌa Dios juers inibeꞌe ndoꞌ be men. No uní naꞌ xbi bexa na myabtoꞌog gen~na ke na mbidiꞌizh bexa gealngea ten Jesús nsea diꞌizh ten Dios. No lá ngankea bexa wa man uzheꞌeb wa, ni ta cuent nak man wa. No ni lá ulaꞌa bexa ikea se ten man wa xtuzh bexa no yaꞌa bexa. Leꞌa bexa wa mbangal, cha no bexa unibeꞌe wats Cristo dub mil liꞌin.
\v 5 Leꞌa ta wa zha ned iban be men. Parea leꞌa iteata be men naꞌanpa no iban gast gaꞌa dub mil liꞌin wa.
\v 6 Uzhebpa wen yoo ladna bexa iban zha ned wa, bexa umbiꞌi nak ladoꞌo~na ndoꞌ Dios, leꞌa bexa wa naꞌanpa no gat stub biaj. Leꞌa bexa ndi gak be uleꞌay ten Dios nsea uleꞌay ten Cristo, nsea no bexa inibeꞌe no Cristo dub mil liꞌin.
\s Dios bi leꞌa utsaksi maxuꞌu
\p
\v 7 Leꞌa zha na ngwaꞌa dub mil liꞌin wa, leꞌa maxuꞌu yaꞌak sa nkeanyaw na.
\v 8 Weꞌe itoꞌogal xa ukwiꞌinno xa be men itea be nacion idub ndoꞌ gizhliyo, be sa nsaleaꞌ Gog nsea Magog. Cha yunjunt xa bexa wa gun bexa guerr. Leꞌa bexa wa xa kwaꞌad, cuentta yux nde toꞌo nitsdoꞌo.
\v 9 Cha mteꞌachso bexa idub ndoꞌ gizhliyo, no ulotlaw bexa gezh nkweaꞌ ladna Dios, sa ndebe bexa umbiꞌi nak ndoꞌ Dios. Cha weꞌe leꞌa Dios mtuꞌub giꞌ utoꞌo gibeꞌa myolꞌ sa wa, cha unitndoꞌ bexa wa.
\v 10 Leꞌa Dios cha mtsaꞌab maxuꞌu na li mkedino be men wa len lagun giꞌ sa nsayolꞌ azufre, sa ncho man uzheꞌeb nsea profet ukwiꞌin. Leꞌa sa wa teꞌal no tezhea iniꞌí be na wa gealkweaꞌ uzheꞌeb siꞌil idub tiemp.
\s Iteanak be men kwe ndoꞌ Dios, xa nsob ndoꞌ yaxil nagud
\p
\v 11 Cha uní naꞌ dub yaxil nagud dub ta uzheꞌeb siꞌil, sa nsob Dios. Leꞌa sa nsob xa wa yá lá nluꞌuta ni gizhliyo no ni gibeꞌa no ni lá uluꞌuta be ta wa.
\v 12 Cha uní naꞌ bexa ngut, bexa nsak no bexa naꞌanpa nsak, ndebe ndoꞌ Dios. Cha myaꞌal pla be libr nkeaniꞌi ná xtaꞌan mbin bexa, no stub libr nkeaniꞌi ná ton bexa gap gealnaban. Leꞌa Dios cha ndab xteꞌe nak be ta mbin bexa wa, lak nkeaniꞌi‑yá ndoꞌ be libr wa.
\v 13 Leꞌa bexa ngut ndoꞌ nitsdoꞌo nsea iteata bexa ngut wa mlanseaꞌ ndoꞌ Dios. Cha ndab Dios ná xteꞌe nak be ta mbin bexa.
\v 14 Leꞌa bexa lá ndangea ladna Dios wa, bexa uyoꞌo sa ten bexa ngut wa, leꞌa Dios cha mtsaꞌab bexa wa len lagun nsayolꞌ wa. Leꞌa ta wa nsaleaꞌ gealgut itop.
\v 15 Leꞌa bexa wa lá izheal leaꞌ~na ndoꞌ libr ten gealnaban wa, ta weꞌe mtsaꞌab Dios bexa len lagun giꞌ wa.
\c 21
\s Gibeꞌa kub no gizhliyo kub
\p
\v 1 Weꞌe uní naꞌ dub gibeꞌa kub no dub gizhliyo kub, geal leꞌa gibeꞌa ned wa no gizhliyo ned wa no nitsdoꞌo wa unitndoꞌla.
\v 2 Leꞌa naꞌ Juan uní gezh nsak ten Dios, sa nsaleaꞌ Jerusalén kub, utoꞌo‑yá gibeꞌa wats Dios. Leꞌa gezh wa uzheꞌeb chul nluu, lakta chul nluu dub xagots usaxkwaꞌa uchilyaꞌano xabgiꞌi ikaꞌa na.
\v 3 Cha mbín naꞌ dub diꞌizh utoꞌo gibeꞌa, ugeꞌ ndab‑a ndoꞌ naꞌ:
\p —Bwiꞌi, leꞌa sa ndee ncho Dios nsea be xmen~xa. Leꞌa Dios yoono bexa, no gak bexa xmen~xa idub tiemp, leꞌa Dios leꞌaka nak Dios ten bexa.
\v 4 Leꞌa Dios utsambiꞌi itea nitsndoꞌ bexa, no yá lá gatta bexa. Ni lid uban yoota ladna bexa, no ni lá goꞌonta bexa, no ni stub gealkweaꞌ lá iniꞌí bexa, leꞌa iteanak be ta wa unitndoꞌla.
\p
\v 5 Leꞌa Dios xa nsob ndoꞌ yaxil siꞌil wa cha ndab:
\p —Unaꞌ, leꞌa naꞌ myunno kub iteanak be taꞌa.
\p Cha ndab xa ndoꞌ naꞌ:
\p —Bkeꞌa ta ndee, leꞌa be diꞌizh ndee uzheꞌeb be diꞌizh nsak no gealngea‑yá.
\p
\v 6 Weꞌe cha ndab xa ndoꞌ naꞌ:
\p —Leꞌa iteanak ta wa yá myandoꞌla. Leꞌa naꞌ ndee nak Alfa nsea Omega. Leꞌa naꞌ mtexan iteanak be taꞌa, no leꞌaka naꞌ unitndoꞌ‑yá. Leꞌa tal ton ndak ladna, leꞌa naꞌ ga usa nits nsoblen goo bexa, ta nsaꞌa gealnaban.
\v 7 Leꞌa bexa na gun gan ndoꞌ be ta ugap, usa naꞌ itea be ta wen wa. Leꞌa naꞌ gak Dios ten bexa, leꞌa bexa gak xiꞌín~naꞌ.
\v 8 Ná leꞌa bexa nzheb ndoꞌ men, nsea bexa lá ndangea ladna naꞌ, no bexa ndun be ta lá nsak lad naꞌ, no bexa ndut men, no bexa ngal xa naꞌanpa xa ten xa, no bexa ndun ta bruj, no bexa ndankea be dios gizhliyo, nsea itea bexa ndun gealkwiꞌin, leꞌa iteanak bexa li ndun wa yaꞌbe len lagun sa nsayolꞌ azufre. Leꞌa ta wa ta nsaleaꞌ gealgut itop.
\s Jerusalén kub
\p
\v 9 Weꞌe cha mbiꞌid dub angel wats naꞌ. Leꞌa xa wa utoꞌo lat isagaꞌad be angel, bexa na li usen be vas ncho gealkweaꞌ lult wa. Cha ndab xa ndoꞌ naꞌ:
\p —Utsea sa ndee, leꞌa naꞌ uluu xagots gak cheꞌal xa nak Borreg Ben wa.
\p
\v 10 Leꞌa ndoꞌ ta li mluu Espíritu ten Dios ndoꞌ naꞌ wa, leꞌa angel wa cha mbiꞌi naꞌ dub geꞌe siꞌil sa gaꞌap. Cha mluu xa Jerusalén gezh siꞌil ten Dios, ta nchaꞌlaꞌ gibeꞌa wats Dios.
\v 11 Leꞌa gezh wa nsu xeꞌa ten Dios, nsea ndon nlaꞌbealꞌ‑a cuent dub geꞌ jaspe, dub ta uzhebpa ta chul, no nduꞌu naꞌ‑yá cuent dub vidr.
\v 12 Leꞌa idub gangeak gezh wa nchonyaw dub muro siꞌil no gaꞌap‑a. Nsea ndap‑a dub tibtop toꞌo puert, sa ndeulaꞌach dub tibtopga angel. Leꞌa kadga las puert wa nkea dubga leaꞌ bexa isatibtop ras bexa Israel.
\v 13 Leꞌa lad oriente nsoꞌ chon puert, no schonga‑yá lad nort, no schonga‑yá lad sur, nsea schonga‑yá lad poniente.
\v 14 Leꞌa muro nchonyaw gezh wa ndap dub tibtop geꞌ ubiꞌi nak xan na. Leꞌa kadga las geꞌ wa nkea dub leaꞌ bexa ngok isatibtop be apostol ten xa nak Borreg Ben wa.
\p
\v 15 Leꞌa angel ndadiꞌizhno naꞌ wa noꞌo dub bar ta oro, ukeꞌa medid xa gezh wa nsea be puert ten na nsea muro nchonyaw‑a.
\v 16 Leꞌa gezh wa dub ta skin, lak koꞌol‑a liga uxen‑a. Leꞌa xa wa mkeꞌa medid‑a bar wa. Leꞌa sa wa noꞌo dub top mil ncho top gayoꞌo metr, lak koꞌol‑a no gaꞌap‑a no uxen‑a dubtsa medid noꞌo‑yá.
\v 17 No mkeꞌa medid xa plo gaꞌap muro wa. Leꞌa ta wa dub chon gaꞌal ncho dap metr, lak medid ten be men ndantiꞌin angel wa.
\p
\v 18 Leꞌa muro wa nakndeꞌe geꞌ jaspe, parea leꞌa gezh wa nakndeꞌe sbeꞌen oro umbiꞌi cuent vidr umbiꞌi naꞌ‑yá.
\v 19 Leꞌa be geꞌ ubiꞌi ncho xan muro wa nsoꞌ be geꞌ chul las~na. Leꞌa ta ned wa nsoꞌ geꞌ jaspe las~na. Leꞌa ná itop wa nsoꞌ geꞌ zafiro. Leꞌa ná yon wa nsoꞌ geꞌ ágata. Leꞌa ná idap wa nsoꞌ geꞌ esmeralda.
\v 20 Leꞌa ná isagaꞌay wa nsoꞌ geꞌ ónice. Leꞌa ná isaxoꞌop wa nsoꞌ geꞌ cornalina. Leꞌa ná isagaꞌad wa nsoꞌ geꞌ crisólito. Leꞌa ná isaxoꞌon wa nsoꞌ geꞌ berilo. Leꞌa ná isageꞌa wa nsoꞌ geꞌ topacio. Leꞌa ná isatiꞌi wa nsoꞌ geꞌ crisopraso. Leꞌa ná isatibdub wa nsoꞌ geꞌ jacinto. Leꞌa ná isatibtop wa nsoꞌ geꞌ amatista.
\v 21 Leꞌa isatibtop puert wa leꞌa ta wa isatibtop perla, leꞌa kadga dub puert wa nak dubga perla. Leꞌa nes ten gezh wa sbeꞌen ta oro umbiꞌi gandid xeꞌa‑yá cuent dub vidr.
\p
\v 22 Naꞌanpa iní naꞌ ni dub niꞌi yankea be men Dios sa wa, leꞌa idub len gezh wa leꞌa Dios xa ndon leꞌa juert nchoka nsea Borreg Ben.
\v 23 Leꞌa sa wa naꞌanpa nkiꞌin wizh ni mbeꞌe usu xeꞌa, leꞌa Dios nsea Borreg wa leꞌa nak xeꞌa nsu idub len gezh wa.
\v 24 Leꞌa be men ndencho ndoꞌ gizhliyo bexa nak xmen Dios ikesea ndoꞌ xeꞌa ten gezh wa. Leꞌa bexa nibeꞌe ndoꞌ gizhliyo yun cuent be ta nsak no be ta chul ten na.
\v 25 Leꞌa be puert ten gezh wa naꞌanpa yaw idub tezhea, no leꞌa sa wa naꞌanpa yoo teꞌal.
\v 26 Leꞌa bexa ndencho ndoꞌ gizhliyo yun cuent be ta nsak no be ta chul ten na ndoꞌ gezh wa.
\v 27 Naꞌanpa yate ni dub ta bzhiꞌik gezh wa. No ni dub bexa ndun be ta ugap, no ni dub bexa ndun gealkwiꞌin lá yoo gan yate sa wa, nabtsa bexa nkea leaꞌ~na ndoꞌ libr ten Borreg Ben ta ten gealnaban nunk lá idub.
\c 22
\s Nits nsaꞌa gealnaban
\p
\v 1 Weꞌe leꞌa angel wa cha mluu dub yowbeꞌe umbiꞌi ncho nits nsaꞌa gealnaban, nits waꞌán cuent naꞌ vidr naꞌ. Leꞌa yowbeꞌe wa ntoꞌo sa nsob Dios nsea sa nsob Borreg Ben.
\v 2 No ntid‑a tlaw nes ten gezh wa. Nsea itop toꞌo yowbeꞌe wa ndiꞌib be ya nsaꞌa gealnaban. Leꞌa kadga dub mbeꞌe nsaꞌa‑yá xaꞌaga ngus. Leꞌa la ten ya wa leꞌa nyunyakna be men.
\v 3 Leꞌa sa wa lá yoota be taꞌa lá nsak ladna Dios. Leꞌa len gezh wa kwe sa isob Dios nsea Borreg wa. No be men ndun tiꞌin ndoꞌ Dios yankea bexa xa.
\v 4 No iniꞌíndoꞌ bexa Dios, nsea leaꞌ Dios ikea xtuzh bexa.
\v 5 Yá naꞌantapa yoo teꞌal sa wa, ni lá ikiꞌin bexa xeꞌa ni xeꞌa wizh. Leꞌa Dios Xa Nibeꞌe wa leꞌa nak xeꞌa sa wa, nsea inibeꞌe bexa sa wa idub tiemp.
\s Leꞌa Cristo sken ilen
\p
\v 6 Cha ndab angel wa ndoꞌ naꞌ:
\p —Leꞌa be diꞌizh ndee uzhebpa dub diꞌizh nsak no gealngea‑yá. Leꞌa Dios Xa Nibeꞌe wa, xa na nsaꞌa Espíritu ten na ndoꞌ bexa ndadiꞌizh sakndoꞌ xa wa, leꞌa xa wa mtuꞌub dub angel ten xa ndontsa uluu xa be ta sken yoo wa ndoꞌ bexa ndun tiꞌin ndoꞌ xa.
\p
\v 7 Leꞌa Jesús cha ndab:
\p —¡Blaꞌach bego, leꞌa naꞌ sken ilen! Uzhebpa wen yoo ladna bexa na nsakyoꞌón be diꞌizh ten Dios ta nsoꞌ ndoꞌ libr ndee.
\p
\v 8 Leꞌa naꞌ ndee Juan mbín naꞌ no uní naꞌ be ta ndee wa. Leꞌa tsoꞌo na mbín naꞌ be ta ndee no uní naꞌ‑yá, cha usaxib naꞌ gast ndoꞌ yo ngol xtuzh~naꞌ, ndiꞌizh gankeꞌa naꞌ angel, xa li mluu be ta ndee ndoꞌ naꞌ wa.
\v 9 Parea leꞌa angel wa ndab ndoꞌ naꞌ:
\p —¡Naꞌanpa lbaꞌa gun lu! Leꞌa naꞌ ndee ndun tiꞌin ndoꞌ Dios lak ndunga lu tiꞌin ndoꞌ Dios nsea bexa ltsaꞌa~lu, bexa ndadiꞌizh sakndoꞌ Dios, no bexa na nxobgek ndoꞌ ta nkea ndoꞌ libr ndee. Ndi wankea Dios.
\p
\v 10 Cha ndab xa ndoꞌ naꞌ:
\p —Naꞌanpa ukachko lu be diꞌizh mbidiꞌizh Dios nkea ndoꞌ libr baꞌ, leꞌa tiemp yoo be ta nkea ndoꞌ libr baꞌ yá nsaso gax.
\v 11 Leꞌa bexa ndun be ta ugap no bexa ndun be ta bzhiꞌik, lbaꞌatsa gunta bexa be ta wa. Leꞌa bexa ndun be ta utsin nak, lbaꞌatsa utsin gunta bexa. No liga leꞌa bexa umbiꞌi nak ndoꞌ Dios, lbaꞌatsa umbiꞌi gakta bexa.
\p
\v 12 Cha ndab Jesús:
\p —Blaꞌach bego leꞌa naꞌ sken ilen, cha usa naꞌ ta ikaꞌa kadga dub men lak nak be ta mbin bexa.
\v 13 Leꞌa naꞌ ndee nak Alfa nsea Omega, leꞌa naꞌ mtexan iteanak be taꞌa no leꞌaka naꞌ unitndoꞌ‑yá. No nak naꞌ xa ned no xa tsoꞌo li ndoꞌ itea be taꞌa.
\p
\v 14 Uzhebpa wen yoo ladna bexa umbiꞌi nak ladoꞌo~na ndoꞌ Dios. Leꞌa bexa wa nsabndoꞌ gaw ngus ten ya nsaꞌa gealnaban, no yate bexa toꞌo puert ten gezh wa.
\v 15 Parea leꞌa bexa ugap nak yaꞌanbe tsoꞌo juer. Leꞌa ta wa bexa ndun be ta bruj, no bexa ngal dub xa naꞌanpa xa ten xa, no bexa ndut men, no bexa ndankea be dios gizhliyo, nsea itea bexa ndal ladna ndun be gealkwiꞌin.
\p
\v 16 Cha ndab Jesús:
\p —Leꞌa naꞌ ndee Jesús mtuꞌub angel ten naꞌ gudiꞌizh be ta ndee ndoꞌ bexa nak xmen~naꞌ. Leꞌa naꞌ ndee nak bi leꞌaka ras ten David. No nak naꞌ mbeal siꞌil nsu xeꞌa gor tempran.
\p
\v 17 Cha ukaꞌab Espíritu ten Dios nsea xagots nak cheꞌal Borreg Ben wa, bexa nak be xmen Jesús, ndab bexa:
\p —Utsea go, Jesús.
\p Leꞌa bego na ndoꞌón ta ndee gud bega:
\p —Utsea go, Jesús.
\p Tal ncho bega ndak ladna, nlad bega goo bega nits nsaꞌa gealnaban, utseayoo bega‑yá, leꞌa xa ga nsaꞌa‑yá.
\p
\v 18 Leꞌa naꞌ gáp ndoꞌ itea bexa na ndoꞌón diꞌizh mbidiꞌizh Dios nkea ndoꞌ libr ndee: Tal ton dub xa kota diꞌizh ndoꞌ be diꞌizh ten Dios ndee, leꞌa Dios utsaksi xa no iteanak be gealkweaꞌ nkeaniꞌi ndoꞌ libr ndee.
\v 19 No tal ton koꞌo diꞌizh mbidiꞌizh Dios nkea ndoꞌ libr ndee, leꞌa Dios koꞌoga leaꞌ~xa ndoꞌ libr ten gealnaban, no lá ulaꞌa Dios yate xa gezh nsak ten Dios, lak nkeaniꞌi ndoꞌ libr ndee.
\p
\v 20 Leꞌa xa ndadiꞌizh be ta ndee wa ndab:
\p —Leꞌa naꞌ skenka ilen.
\p Lika gak‑a. ¡Utsea go Jesús Xa Nibeꞌe besa!
\p
\v 21 Nat naꞌab naꞌ ndoꞌ Jesucristo Xa Nibeꞌe, uzheꞌeb utsin gunno xa iteanak bego baꞌ. Lika nak‑a.