\id 1CO
\h 1 Corintios
\toc1 1 Corintios
\mt1 Mwer dxihtsi nin bacaꞌh San Pahblu loh bwiinn Corintu
\c 1
\s GuelrgahpaDxiohs
\p
\v 1 Naꞌh Pahblu naan tuhbi pooxtla xteenn Jesucristu laasii
gulii Dxiohs naꞌh tin guluꞌyiꞌhn xchiꞌdxyi Ñiꞌh laꞌh raꞌ
bwiinn, nee neezaa Sóstenes nin naa tuhbi bwihtsi za nuꞌh
loh xchiꞌdxyi Dxiohs;
\v 2 racaꞌh nu dxihtsi riiꞌ loh tu nin
bagwachiistoꞌ raꞌ ñiꞌh xchiꞌdxyi Dxiohs, nin naa raꞌ bwiinn
xquidoꞌ Dxiohs loh guihdxyi Corintu. Laꞌhtu nin ba
bazuhnayaa Jesucristu laꞌn lastoꞌ raꞌ ñiꞌh laasii pur nin
gwachiistoꞌ tu xchiꞌdxyi Ñiꞌh. Nee laꞌhza tu cun neezaa
garaa snuhn raꞌ bwiinn raꞌ nin gwachiistoꞌ raꞌ ñiꞌh
xchiꞌdxyi Jesucristu loh gaduhbitiiꞌ guidxyiyuh, garaa
tu naa tu xpwiinn Dxiohs nin naa Daada xteenn garaa
raꞌ nuꞌh.
\v 3 Rachinaꞌba nu loh Dxiohs nin naa Xtaada nuꞌh
cun loh Daada Jesucristu gacanee ru Ñiꞌh laꞌh tu,
gusacwachidxyii Ñiꞌh stoꞌ tu.
\s Guelruhnntaaꞌyi xteenn Dxiohs pur xcweenta Jesucristu
\p
\v 4 Rudiꞌhi zahn guelzuxchiilli loh Dxiohs pur xcweenta tu,
nee pur guelruhnntaaꞌyi xteenn Ñiꞌh nin baniꞌhi Ñiꞌh
laꞌhtu pur xcweenta Jesucristu.
\v 5 Pwihsi pur xcweenta za
Ñiꞌh baniꞌhi Dxiohs laꞌhtu garaaloh raꞌ cohsa zaꞌca raꞌ,
tin guluuꞌyi za tu xchiꞌdxyi Ñiꞌh neezaa tin gacabwaꞌ zaꞌca
tu xchiꞌdxyi Ñiꞌh.
\v 6 Ziꞌchi gahca za cun ziga nabahan
zaꞌca tu baluuꞌyi tu gwachii duxa stoꞌ tu xchiꞌdxyi Dxiohs
xcweenta Jesucristu.
\v 7 Niꞌchin llitiiꞌ dxiaꞌdxi tu loh
raꞌ dziꞌn zaꞌca nin runiꞌhi Dxiohs, loh nin cabweeza tu loh
dxyih raꞌ nin guibiaꞌgarii Daada Jesucristu loh guidxyiyuh.
\v 8 Zuhnn nadxiipa Ñiꞌh lastoꞌ tu hasta laꞌn dxyihyi nin
guibiaꞌgarii Ñiꞌh loh guidxyiyuh, tin ziꞌchi ayi chyu
bwiinn guidxeela xtuhlda tu.
\v 9 Dxiohs nahpa ruzaꞌloh Ñiꞌh
xchiꞌdxyi Ñiꞌh; laꞌh Ñiꞌh gudihdxyi Ñiꞌh laꞌhtu tin chuu
tu loh xneziuh Lliiꞌn Ñiꞌh nin naa Daada Jesucristu.
\s Xcweenta ziga cagabihyi raꞌ xpwiinn guidoꞌ Jesucristu
\p
\v 10 Rñiꞌn loh tu bwihtsi lasaaꞌ raꞌn, xcweenta Daada
Jesucristu xteenn nuꞌh; gulguiꞌhnn tuhsi lligaaba, nee ayi
taaꞌha lasaaꞌ tu sino que gulguibahannee lasaaꞌ cun
gulcaꞌstoꞌ lasaaꞌ za.
\v 11 Rñiꞌn squiiꞌ loh tu bwihtsi
lasaaꞌraꞌn laasii laꞌh tuhbi bwiinn famihyi Cloé bieꞌnnaa
loon ziga naa xcweenta tu cun llahn nin cazahcanee lasaaꞌ
tu.
\v 12 Pwihsi guiñiꞌzahn loh tu squiiꞌ laasii nuu raꞌ
bwiinn nin rñiꞌ raꞌ: “Naꞌh naan tuhbi xpwiinn Pahblu”, ya
snuhn raꞌ ba rahbi: “Naꞌh naann tuhbi xpwiinn Apolos”, ya
snuhn raꞌ ba rahbi: “Naꞌh naan tuhbi xpwiinn Pehdru”, ya
snuhn za raꞌ ba nin rahbi: “Naꞌh naan tuhbi xpwiinn
Jesucristu.”
\v 13 ¿Ta ruhnn tu lligaaba Jesucristu ziahan
cwaꞌh naa Ñiꞌh?, o ¿ta ruhnn tu lligaaba Pahblu gucah loh
cruhzi xcweenta xtuhlda raꞌ tu?, o ¿ta gurohbañihsa tu pur
lah Pahblu?
\v 14 Per zuxchiilli Dxiohs ayi ziahan dxiꞌh
bwiinn baroꞌbañiisahn, sola laꞌh Crispu cun Gahyu
baroꞌbañiisahn,
\v 15 pwihsi para ayi chuu nin guiñiꞌ
gurohbañihsa niꞌchi cun laan.
\v 16 Niꞌchin sola
baroꞌbañiisahn laꞌh raꞌ xfamihyi Estéfanas, per ya loh
delaanta ayi gaꞌnnahn gu nuu ru chyu baroꞌbañiisahn,
\v 17 laasii Jesucristu ayi guxeꞌhla Ñiꞌh naꞌh para
guroꞌbañiisahn, sino que guxeꞌhla Ñiꞌh naꞌh tin guluꞌyiꞌhn
xchiꞌdxyi Ñiꞌh xcweenta ziga gutaꞌh Ñiꞌh laꞌh raꞌ bwiinn
loh duhlda, per ayi ruluꞌyiꞌhn cun dxyiꞌdxyi guelnaanntiiꞌ,
tin ayi guziaꞌtiin yihca dziꞌn rooꞌ duxa nin bwiꞌhnn
Jesucristu chin guhchi Ñiꞌh loh cruhzi.
\s Crixtu naa guelrnabwaꞌ cun neezaa guelnasiin xteenn Dxiohs
\p
\v 18 Dxyiꞌdxyi raꞌ nin raluuꞌyi nu ziga guhchi Jesucristu
loh cruhzi tin gutaꞌh Ñiꞌh laꞌh raꞌ bwiinn loh duhlda, naa
raꞌn zigazi dxyiꞌdxyi nin ayi xi galluꞌyi para bwiinn raꞌ
nin zeezaꞌbi loh duhlda, laasii ayi riachiistoꞌ raꞌ ban.
Per garaa raꞌ nuꞌh ziga zoozah nuꞌh nez taꞌh raꞌ nuꞌh loh
duhlda, dxyiꞌdxyi raꞌ riiꞌ naa raꞌn guelrnabwaꞌ xteenn
Dxiohs para laꞌh raꞌ nuꞌh.
\v 19 Squiiꞌ rahbi loh Xchihtsi
Dxiohs:
\q Naꞌh zuxiꞌnaꞌhn loh xquelnasiin raꞌ bwiinn raꞌ
nin ruhnn lligaaba nahpa guelnasiin,
\q nee zibweꞌhecaazahn
guelrahcabwaꞌ xteenn bwiinn nin rahcabwaꞌ.
\p
\v 20 Ya
nnahaxchiꞌh ¿cuun bwiinn nin naann duxa? ¿Cuun bwiinn nin
naa mwehsu? ¿Cuunn bwiinn nin ruchaꞌgalasaaꞌ dxyiꞌdxyi
xcweenta raꞌ cohsa xteenn guidxyiyuh riiꞌ? Pwihsi guelnaann
duxa nin nuu loh guidxyiyuh riiꞌ, laꞌh Dxiohs bwiꞌhnn biahca
raꞌn ziga zi cohsa naxihn raꞌ.
\v 21 Niꞌchin loh xquelnasiin
Dxiohs, bacaꞌbwaꞌ Ñiꞌh ayi chyu bwiinn guidxyiyuh gaca
dxiuꞌnbwaꞌ laꞌh Dxiohs cun guelnasiinsi xteenn guidxyiyuh
riiꞌ, niꞌchin nin gudxiꞌhyi Dxiohs xa bataꞌh Ñiꞌh bwiinn
raꞌ cun xchiꞌdxyi Ñiꞌh tin riachiistoꞌ raꞌ ba xchiꞌdxyi
Ñiꞌh xcweenta Jesucristu. Ya ziga para snuhn raꞌ bwiinn
naa xchiꞌdxyi Dxiohs ziga nin ayi galluꞌyitiiꞌ.
\p
\v 22 Bwiinn Israel raꞌ xclaaꞌdzi raꞌ ba gwaꞌha raꞌ ba sehn
raꞌ xteenn nez llaaꞌndxibaaꞌ, ya laꞌh raꞌ bwiinn griehgu
rdxiꞌhyi raꞌ raꞌ ba guelnasiin,
\v 23 per laꞌhnu raluuꞌyi nu
xchiꞌdxyi Jesucristu nin guhchi loh cruhzi, ya para laꞌh raꞌ
bwiinn Israel naa dxyiꞌdxyi riiꞌ ziga tuhbi dxiah nin rgaꞌha
ñaaꞌ bwiinn, ya ziga laꞌh raꞌ bwiinn raꞌ nin ayi naa raꞌ
bwiinn Israel rwaꞌha raꞌ ba dxyiꞌdxyi riiꞌ ziga dxyiꞌdxyi
mbah,
\v 24 per para laꞌh raꞌ bwiinn raꞌ nin gulii Dxiohs naa
xpwiinn Ñiꞌh, ziga bwiinn Israel o bwiinn nin ayi naa raꞌ
bwiinn Israel; para laꞌh raꞌ ba Crixtu naa guelrnabwaꞌ cun
guelnasiin xteenn Dxiohs.
\v 25 Pwihsi ziga nin ruhnn raꞌ
bwiinn guidxyiyuh lligaaba naa guelmbah xteenn Dxiohs,
niꞌchi naa mahzi guelnaann duxa xteenn Dxiohs loh ziga
xquelnaann raꞌ bwiinn guidxyiyuh; ya ziga nin rluuꞌyi
gulliaaꞌha jweersi loh xteenn Dxiohs, niꞌchi naa mahzi
jweersi rooꞌ loh xjweersi raꞌ bwiinn guidxyiyuh.
\p
\v 26 Bwiitsi raꞌn, gulgahcabwaꞌ Dxiohs gulii laꞌhtu, nicala
gulliaaꞌyiꞌhn tu naa bwiinn nasiin loh raꞌ bwiinn
guidxyiyuh, nee nicala za gulliaaꞌyiꞌhn za tu nahpa
guelrnabwaꞌ, nee nicala gulliaaꞌyiꞌhn za tu naa bwiinn nin
gaca bwiinn lasahca.
\v 27 Per Dxiohs gulii laꞌh raꞌ bwiinn
nin ayi xi gaanntiiꞌ tin gusiaꞌhanxtuhyi raꞌ ba laꞌh raꞌ
bwiinn raꞌ nin ruhnn naanntiiꞌ raꞌ; laꞌhza Ñiꞌh gulii laꞌh
raꞌ bwiinn raꞌ nin gulliaaꞌ rnabwaꞌ tin gusiaꞌhanxtuhyi za
Ñiꞌh laꞌh raꞌ bwiinn raꞌ nin ruhnn lligaaba rnabwaꞌ duxa
raꞌ,
\v 28 nee laꞌh Dxiohs gulii laꞌh raꞌ bwiinn raꞌ nin ayi
guilasahca raꞌ cun bwiinn raꞌ nin nunpaꞌh rwaꞌha raꞌ bwiinn
guidxyiyuh loh raꞌ ñiꞌh, tin gusiaꞌhanxtuhyi Ñiꞌh laꞌh raꞌ
bwiinn raꞌ nin nahpa balaaquiꞌhn guelrnabwaꞌyiꞌhn raꞌ,
\v 29 tin ziꞌchi ayi chyu bwiinn guunn nayaachi cun xcweenta gahca
ba nezloh Dxiohs,
\v 30 ya laꞌh gahca Dxiohs bazuh laꞌhtu loh
Daada Jesucristu; baxeꞌhla za Ñiꞌh Jesucristu loh nuꞌh tin
baziaꞌñih Ñiꞌh laꞌh lastoꞌ nuꞌh tin gahpa raꞌ nuꞌh
guelnasiin xteenn Dxiohs, tin guibahan xnehza nuꞌh nezloh
Dxiohs, tin gaca nayaa lastoꞌ nuꞌh tin guziaꞌtii Ñiꞌh
xtuhlda raꞌ nuꞌh.
\v 31 Ziꞌchi bwiꞌhnn Dxiohs tin guzohba
xchiꞌdxyi Ñiꞌh hasta rñiꞌ squiiꞌ:
\q Sidela chyuulla xclaaꞌdzi guunn nayaachi,
\q per gaca nayaachi
ba loh dziꞌn nin bwiꞌhnn Jesucristu pur laꞌhba.
\c 2
\s Xchiꞌdxyi Crixtu nin gucah loh cruhzi
\p
\v 1 Niꞌchin chin bieꞌldagaluꞌyiꞌhn xchiꞌdxyi Dxiohs laꞌhtu,
bwiitsi raꞌn, bwiꞌhnnañin sin nin tuhbi dxyiꞌdxyi guelnaann
nee ayi guhcazan dxyiꞌdxyi nagahn raꞌ.
\v 2 Pwihsi chin
guyuuꞌhuhn loh tu, ayi guclaaꞌdzihn ñahcabwaꞌ tu xilla
stuhbi cohsa, sino que sola xcweenta Jesucristu, nin gucah
loh cruhzi.
\v 3 Badzihnaꞌhn loh tu cun gaduhbi
guelnadoꞌlaadzi xteꞌnnahn nee guyuuꞌ guelrzaaꞌ zahn nagah
ayi ñuzoꞌbadxiahga tu xchiꞌdxyi Crixtu,
\v 4 per ya chin
guñiꞌn nee baluꞌyiꞌhn xchiꞌdxyi Dxiohs laꞌh tu, ayi guñiꞌn
dxyiꞌdxyi nasiin xteenn guidxyiyuh riiꞌ loh tu, mas nin
guñiꞌn loh tu naa cun dxyiꞌdxyi guelnasiin xteenn Spíritu
Saantu xteenn Dxiohs nee cun ziga naa guelrnabwaꞌ xteenn
Ñiꞌh,
\v 5 tin ayi gaca guelriachiistoꞌ tu xcweenta xteenn
guelnasiin xteenn loh guidxyiyuh riiꞌ, mas gaca
guelriachiistoꞌ tu xcweenta xteenn xquelrnabwaꞌ Dxiohs.
\s Riuꞌnbwaꞌ bwiinn laꞌh Dxiohs pur xcweenta nin ruluuꞌyi Spíritu Saantu xteenn Dxiohs laꞌh ba
\p
\v 6 Rachiñiꞌ za nu loh raꞌ lasaaꞌ raꞌ nuꞌh nin ba zeezah
xnehza loh xchiꞌdxyi Dxiohs dxyiꞌdxyi guelnasiin xteenn
Ñiꞌh, per guelnasiin riiꞌ ayi naan xquelnasiin raꞌ bwiinn
guidxyiyuh nee nin ayiza naan guelnasiin xteenn nin rnabwaꞌ
loh guidxyiyuh riiꞌ nin zadzihn dxyih ñichiloh.
\v 7 Niꞌchin
mahs rachiñiꞌ nu dxyiꞌdxyi ralaꞌn xteenn Dxiohs, dxyiꞌdxyi
ralaꞌn nin nahpa Dxiohs desde chin nagahdxi cwiixchih
guidxyiyuh, niꞌchi naa para guibahan raꞌ nuꞌh loh guelñaꞌñih
xteenn Ñiꞌh.
\v 8 Nin tuhbi raꞌ nin rnabwaꞌ loh guidxyiyuh
riiꞌ ayi rahcabwaꞌ raꞌ ba xcweenta raꞌ cohsa raꞌ riiꞌ; per
sidela laꞌh raꞌ ba ñahcabwaꞌ raꞌ ban, ayi ñucaꞌh raꞌ ba laꞌh
Daada Jesucristu nin nahpa guelñaꞌñih loh cruhzi.
\v 9 Per
naaꞌhan ziga nin caa loh Xchihtsi Dxiohs hasta rñiꞌ squiiꞌ:
\q Laꞌh Dxiohs bwiꞌhnn chaꞌyi para laꞌh raꞌ bwiinn raꞌ nin
rucaꞌhstoꞌ raꞌ ñiꞌh laꞌh Ñiꞌh,
\q ziga cohsa raꞌ nin nagahdxi chyu gwaꞌhatiiꞌ,
\q cun cohsa za nin nagahdxi chyu dxihntiiꞌ,
\q cun ziga nin nagahdxi chyuu guunntiiꞌ lligaaba;
\q cohsa raꞌ riiꞌ laꞌh Dxiohs nuguꞌchaꞌyi para laꞌh raꞌ bwiinn
nin gantsiiꞌhi laꞌh Ñiꞌh.
\p
\v 10 Per laꞌh Dxiohs baluuꞌyi laꞌhnuꞌh xcweenta cohsa raꞌ
riiꞌ cun Spíritu Saantu xteenn Ñiꞌh, laasii laꞌh Spíritu
Saantu naa nin rahcabwaꞌ zaꞌca garaatiiꞌ, hasta cun nee
gahca za hasta cohsa raꞌ ru nin nagaꞌtsi xteenn Dxiohs.
\p
\v 11 Loh raꞌ bwiinn guidxyiyuh, ¿chyu niꞌca rahcabwaꞌ
lligaaba nin ruhnn bwiinn? Pwihsi laꞌhgahca spíritu xteenn
bwiinn naa nin rahcabwaꞌ lligaaba nin nuu ba. Ziꞌchi gahca
za ayi chyu rahcabwaꞌ lligaaba xteenn Dxiohs; sola Spíritu
Saantu chiꞌzi Ñiꞌh rahcabwaꞌ ziga naa lligaaba xteenn
Ñiꞌh,
\v 12 per laꞌh raꞌ nuꞌh ayi chyu gucaꞌha guelnaann
xteenn guidxyiyuh, sino que bachicaꞌha nuꞌh Spíritu Saantu
Dxiohs nin nuu dxibaaꞌ, tin gacabwaꞌ zaꞌca nuꞌh xcweenta raꞌ
cohsa nin baniꞌhi Ñiꞌh laꞌhnuꞌh, laasii balahsastoꞌ Ñiꞌh
laꞌhnuꞌh.
\v 13 Laꞌhnuꞌh rachiñiꞌ nuꞌh xcweenta cohsa raꞌ
riiꞌ cun dxyiꞌdxyi nin baluuꞌyi Spíritu Saantu Dxiohs
laꞌhnuꞌh, per ayi cun dxyiꞌdxyi raꞌ nin naa xcweenta gahca
guelnasiin xteenn nuꞌh, sino que raluuꞌyi nuꞌh dxyiꞌdxyi raꞌ
riiꞌ loh raꞌ bwiinn nin ruhn rbweeza Spíritu Saantu Dxiohs
laꞌn lastoꞌ raꞌ ñiꞌh.
\p
\v 14 Per bwiinn nin zeezahnee ziga naa xigaaba bwiinn
guidxyiyuh, ayi rahcabwaꞌ raꞌ ba lligaaba xteenn Spíritu
Saantu Dxiohs, laasii para laꞌh raꞌ ba naan dxyiꞌdxyi mbah;
ayi rahcabwaꞌ raꞌ ban laasii Spíritu Saantu chiꞌzi xteenn
Dxiohs ruluuꞌyi laꞌh raꞌ bwiinn lligaaba xteenn Ñiꞌh,
\v 15 per ziga bwiinn nin ya guleeza Spíritu Saantu lastoꞌ ñiꞌh
rahca rwaꞌha raꞌ ba garaatiiꞌ nin ruluuꞌyi Spíritu Saantu
xteenn Dxiohs laꞌh raꞌ ba.
\v 16 Pwihsi squiiꞌ rñiꞌ loh
Xchihtsi Dxiohs:
\q ¿Chyu niꞌca laꞌh guhcabwaꞌ xa naa xigaaba Dxiohs tin gaca
guluuꞌyi niꞌchi laꞌh Yuꞌbi Dxiohs?
\q Nicala tuhbi bwiinn, per laꞌhnuꞌh ziga nuu raꞌ lligaaba xteenn Jesucristu,
\q riagannastoꞌ nuꞌh rahcabwaꞌ nuꞌh xchiꞌdxyi Ñiꞌh.
\c 3
\s Bwiinn lasaaꞌ raꞌ nuꞌh nin ruhnn raꞌ dziꞌn nezloh Dxiohs
\p
\v 1 Bwiitsi raꞌn, ayi guhca ñiñiꞌn dxyiꞌdxyi nagahn raꞌ loh
tu ziga rñiꞌn loh raꞌ bwiinn nin zeezahnee lligaaba xteenn
Spíritu Saantu Dxiohs, sino que baluꞌyiꞌhn ganaalla
dxyiꞌdxyi nin guñiꞌn loh tu xcweenta ziga zeezahnee tu
lligaaba xteenn loh guidxyiyuh, laasii naa tu zigazi
bweezuꞌntiiꞌ nez loh xcweenta xchiꞌdxyi Jesucristu.
\v 2 Baniꞌhihn tuhbi guelruluuꞌyi gusiisigah laꞌhtu, ziga zi
tuhbi bweezuꞌhn nin reeꞌ lehchi xlawaaꞌha bweꞌhla nin rahw
raꞌ bwiinn liꞌhila, laasii nagahdxi gaaldaa gacabwaꞌ tun,
nee nagahdxyiza gaaldaaguzuh gacabwaꞌ tun,
\v 3 laasii
zeezaꞌbitiiꞌ tu loh lligaaba raꞌ xteenn bwiinn guidxyiyuh
nee naa za tu bwiinn envidia, cun nuu llahn stoꞌ tu cun
lasaaꞌ tu, niꞌchin nin naa gahcaza tu ziga bwiinn guidxyiyuh
raꞌ nin ayi nuꞌnbwaꞌ xchiꞌdxyi Dxiohs,
\v 4 laasii chin rñiꞌ
tuhbi raꞌ tu squiiꞌ: “Naꞌh naan tuhbi xpwiinn Pahblu”, ya
stuhbi tu rñiꞌ: “Naꞌh gaꞌh naan tuhbi xpwiinn Apolos”,
pwihsi ya xcweenta bwiinn raꞌ nin rñiꞌ squiiꞌ ruluuꞌyi naa
gahca raꞌ ba zigazi tuhbi bwiinn guidxyiyuh.
\p
\v 5 Pwihsi ¿chyu naa Pahblu? nee ¿chyu naa Apolos? Laꞌh
nu naa nu sola tuhbi xmooza Dxiohs nin baluuꞌyi xchiꞌdxyi
Ñiꞌh laꞌh tu tin gwachiistoꞌ tun, per cada tuhbigah nu
ridiꞌhnn nu dziꞌn nin baniꞌhi Dxiohs guidiꞌhnn nu.
\v 6 Mweer naꞌh baluuꞌyiꞌhn xchiꞌdxyi Dxiohs loh tu, chiꞌchi
biꞌgaꞌh Apolos para guhcanee za bi tin guhcabwaꞌ ru tu
xchiꞌdxyi Dxiohs, per laꞌh Dxiohs naa nin nugasiaꞌñih laꞌn lastoꞌ tu, tin para gacabwaꞌ ru tu xchiꞌdxyi Ñiꞌh.
\v 7 Pwihsi niꞌchin nin ziga nin ruluuꞌyi xchiꞌdxyi Dxiohs o
nicala za nin rahcanee rahcabwaꞌ ru za bwiinn raꞌ xchiꞌdxyi
Dxiohs ayi xi lasahcatiiꞌ raꞌ ba; Dxiohs chiꞌhzi lasahca
laasii laꞌh Ñiꞌh naa nin rusiaꞌñih laꞌn lastoꞌ raꞌ
bwiinn.
\v 8 Nuu raꞌ nuꞌh naa nuꞌh ziga zi mooza nin ruhnn
dziꞌn loh yuh, per tuhsi naa raꞌ nuꞌh cun nin rbahchi biñih
cun nin rdxiꞌyi, per laꞌh Dxiohs naa nin chiilli laꞌh cada
tuhbigah raꞌ nuꞌh pur xcweenta dziꞌn nin guidiꞌhnn raꞌ nuꞌh.
\v 9 Naꞌh cun Apolos naa nu mooziꞌhn loh xtsiꞌn Dxiohs, ya
laꞌhtu naa ziga loh yuh nin cayuhnn Dxiohs dziꞌn, o naa za
tu ziga zi tuhbi yuuꞌ nin nugazaꞌ Dxiohs.
\v 10 Nee naazahn
ziga zi tuhbi mwehsu albañihyi; ya baniꞌhi Dxiohs dziꞌn
naꞌh, ziga nahpa guꞌnnahn tin bazuun dxiah loh yuh riiꞌ, ya
stuhbi bwiinn gaca nin gudziiꞌba basuꞌh yihca dxiah riiꞌ,
per cada tuhbigah raꞌ nin guunn dziꞌn loh simieentu riiꞌ
nahpa soobaaxgah ba guunn ba lligaaba xa guiteesa ba baarda
riiꞌ,
\v 11 laasii ayi nuu chyu guzuh guriinca dxiah loh nin
rgaꞌha naa, ya nin rgaꞌha chi naa laꞌh Jesucristu.
\v 12 Yannah sidela chyuulla bwiinn guiteesa cun ohro yihca
simieentu dxiah riiꞌ, o cun plahta, o cun dxiah zaꞌca raꞌ, o
cun dxihlli trihgu, o cun yahga,
\v 13 per zadzihn dxyih nin
guiduꞌhun xa naa xtsiꞌn raꞌ cada tuhbigah raꞌ bwiinn; dxyih
chi naa dxyih nin gaca Jwiisi, laasii laꞌn dxyih raꞌ chi
gadzihnan cun dxih ya dxih chi guunn prehba laꞌh dziꞌn nin
bwiꞌhnn cada tuhbigah raꞌ bwiinn.
\v 14 Sidela chyuulla
tuhbi bwiinn bazaꞌ tuhbi yuuꞌ zaꞌca nin ayi guicaꞌdxih,
zahlla zaꞌca bwiinn chi pur nin bwiꞌhnn ba dziꞌn nin
riuꞌstoꞌ Dxiohs,
\v 15 per sidela chyuulla tuhbi bwiinn guunn
tuhbi yuuꞌ nin guicaꞌdxih, zuñihchi xtsiꞌn ba, nicala laꞌh
ba taꞌh ba ziga zi nin rlaꞌh hastazi rzohba dxih.
\p
\v 16 ¿Tayi gaann tu laꞌhtu naa tu xquidoꞌ Dxiohs, nee nuu
nabahan Spíritu Saantu Dxiohs laꞌn lastoꞌ tu?
\v 17 Sidela
chyuulla gutsihyi xquidoꞌ Dxiohs, zuñihchiloh za Dxiohs
laꞌh bwiinn chi, laasii xquidoꞌ Dxiohs saantun, ya guidoꞌ
chi naa tu laꞌhtu.
\p
\v 18 Ayi gusaaꞌn nin tuhbi tu guisaguiꞌhi; sidela chyuulla tuhbi tu
rahcabwaꞌ tu nasiin tu cun guelnasiin xteenn loh guidxyiyuh
riiꞌ, nahpa gaca bwiinn chi ziga zi tuhbi nin ayi xi gaann
tiiꞌ, tin ziꞌchi guicaꞌha ba guelnasiinn xteenn Dxiohs ya
guluuꞌyi naa ba tuhbi bwiinn nasiin duxa.
\v 19 Pwihsi
guelnasiin xteenn guidxyiyuh riiꞌ naaꞌhan ziga zi tuhbi cohsa
naxihn para Dxiohs, laasii squiiꞌ rñiꞌ loh Xchihtsi
Dxiohs:
\q Dxiohs ruhnn riaaba raꞌ nin nahpa guelnasiin xteenn
guidxyiyuh,
\q laasii laꞌhgahca xquelrusaguiꞌhi raꞌ ba ruhnn
riaaba raꞌ ba.
\p
\v 20 Ya stuhbi lahta rñiꞌ squiiꞌ:
\q Naann chaꞌyi Dxiohs xa naa lligaaba raꞌ nin ruhnn raꞌ
bwiinn guidxyiyuh nin nahpa guelnasiinn xteenn guidxyiyuh,
\q per guelnasiin raꞌ chi ayi xi lasahca raꞌn par laꞌh Dxiohs.
\p
\v 21 Pwihsi niꞌchin nin tuhbi bwiinn ayi guunn nayaachi ba
pur xcweenta tuhbi bwiinn guidxyiyuh, laasii loh tu laꞌh
Dxiohs baluuꞌyi garaatiiꞌ raꞌ cohsa naa xteenn tu,
\v 22 ziga Pahblu, o Apolos, o Pehdru, o guidxyiyuh, o
guelnabahan, o guelguhchi, o cohsa raꞌ nin nuu nnah, o cohsa
raꞌ nin gueꞌdu dxieꞌdxiaꞌlda raꞌ gaca; garaa raꞌ deeꞌ naa
xteenn tu,
\v 23 laasii laꞌhtu naa tu xpwiinn Jesucristu, ya
Crixtu naa Lliiꞌn Dxiohs nin nuu dxibaaꞌ.
\c 4
\s Xtsiꞌn raꞌ pooxtla
\p
\v 1 Niꞌchin laꞌhtu nahpa rwaꞌha tu laꞌhnu ziga zi nin naa raꞌ
xmooza Jesucristu, Jesucristu nin nahpa lligaaba nagaꞌtsi
xteenn Dxiohs, tin galuuꞌyi nun laꞌhtu.
\v 2 Pwihsi, tuhbi
bwiinn nin cayuhnn tuhbi dziꞌn nahpa guzoꞌbadxiahga ba guunn
ba tuhbi dziꞌn zaꞌca.
\v 3 Per para naꞌh gulliaꞌyiꞌhn
riuuꞌhuhn lligaaba nicala zigachiꞌhzi rwaꞌha tu naꞌh, o
nicala xachiꞌhziza gwaꞌha raꞌ
chyuu chiꞌh zi tuhbi raꞌ guxchiisi loh guidxyiyuh naꞌh; nee
nin naꞌh gahca ayi ru riuuꞌhuhn lligaaba pur naꞌh gahca ziga
gu nuu xa naan o ayi xa naan
nezloh Dxiohs.
\v 4 Pwihsi nicala xigaaba gahcahn
ayi ruhnn duhlda xcweeꞌntahn, dee raꞌ ayi nuu gutiꞌdxi
cweenta de que naꞌh ayi xtuhldaꞌhn; laꞌh Daada Jesucristu naa
nin rwaꞌhaloh xa naa xcweeꞌntahn.
\v 5 Niꞌchin laꞌhtu, ayi
gucaꞌhchiah tu xcweenta raꞌ bwiinn chin nagahdxi gadzihn
dxyih nin gacan; gulcwehza dxiꞌ Jesucristu stuhbi chiꞌchi
laꞌh Ñiꞌh zibweꞌhe Ñiꞌhn nezloh biaꞌñih nin nuu loh
nacahyi, per nee zuluuꞌyi za Ñiꞌh xi lligaaba nuu laꞌn
lastoꞌ cada tuhbigah raꞌ bwiinn, ya chiꞌchi cada tuhbigah
raꞌ nuꞌh zuniꞌhi Dxiohs nin ruhnn tucahri cada tuhbigah raꞌ
nuꞌh.
\p
\v 6 Bwitsi raꞌn, rñiꞌn dxyiꞌdxyi raꞌ riiꞌ loh tu tin
gacabwaꞌ ru tu xa guibahan xnehza tu. Cañiꞌn ziga xcweenta
Apolos nee cun neezaa xcweeꞌntazahn, ziga tuhbi guel
ruluuꞌyi xa naa xcweenta nu tin ziꞌchi gacabwaꞌ tu ayi
tidxisuu tiiꞌ tu, mas gapa tu cwidahdu xa chezahnee tu cun
sohla nin ya caa loh Xchihtsi Dxiohs, tin ziꞌchi za ayi chuu
nin tuhbi nin guunn nayaachi ziga tuhbi tu loh raꞌ lasaaꞌ tu
ya cweꞌhestoꞌ tu stuhbi raꞌ bwiinn.
\v 7 ¿Chyu niꞌca ruhnn
ruzeꞌta naa luꞌh bwiinn zaꞌca ru loh snuhnn raꞌ bwiinn?
¿Xi nahpa luꞌh sidela laꞌh Dxiohs ayi ñuniꞌhi Ñiꞌhn yiꞌh?
Ya sidela laꞌh Ñiꞌh baniꞌhi Ñiꞌhn yiꞌh, pwihsi ¿xixnaa
chiꞌh ruhnn nayaachi luꞌh ruhnn luꞌh zigazi gudxiꞌyi luꞌhn
pur xcweenta gahca luꞌh?
\p
\v 8 Ruhnn tu lligaaba nahpa tu ziahan rooꞌ raꞌ cohsa, rñiꞌ
tu rricu tu, ruhnn tu ziga zi tuhbi rrehyi, ya laꞌhnu
cagasiaꞌhan tu tuhbi lahdu. ¡Malaayique ñahca tu tuhbi
rrehyi nin guchii paꞌh naa rrehyi, tin ziꞌchi laꞌhnu
ñachidxiaapa nu parte loh guelrnabwaꞌ xteenn tu!
\v 9 Ruꞌnnahn lligaaba gulii Dxiohs laꞌh raꞌ pooxtla ziga zi
tuhbi bwiinn nin ayi xi lasahca; naa nu ziga bwiinn raꞌ nin
bañihchi gachi, pwihsi ziꞌchi badzihn naa nu ziga zi tuhbi
cohsa raꞌ nin radxyigaaꞌ loh raꞌ bwiinn guidxyiyuh, cun
neezaa aanjla raꞌ.
\v 10 Laꞌhnu rwaꞌha tu loh nu ziga tuhbi
bwiinn mbah pur xcweenta Jesucristu, loh nin gaduhbi laꞌhtu
ruhnn tu lligaaba nasiin duxa tu loh xcweenta xchiꞌdxyi
Jesucristu; laꞌhnu naa nu ziga zi bwiinn nin ayi jweersi, ya
laꞌhtu ruhnn tu nadaꞌn tu; ya bwiinn raꞌ rdxyiꞌchinee raꞌ ba
laꞌhnu, ya laꞌhtu ruhnn lasahca raꞌ ba laꞌhtu.
\v 11 Ya
hasta laꞌn dxyih raꞌ riiꞌ dxyugatiꞌdxiloh nu guelrchiaꞌhn,
nee cun guelrdxahga ñihsa, nee cun ziga riaꞌdxi xahba nu,
nee rniꞌhigolpiza raꞌ ba laꞌhnu cun ayi za chyu nahpa ca
chuu nu;
\v 12 nee laꞌhnu cagadxahga nu dxyudiꞌhnn nu dziꞌn
cun naa nu, ya bwiinn raꞌ chin rguꞌdii raꞌ ba laꞌhnu mas
rachinaꞌba nu loh Dxiohs para guntaaꞌyi Ñiꞌh yihca raꞌ ba,
ya chin rusahcazii raꞌ ba laꞌhnu, rachidiꞌhnn nu waanta.
\v 13 Chin rñiꞌyah raꞌ ba laꞌh nu, mas rachiñiꞌ nu loh raꞌ ba
cun dxyiꞌdoꞌ, dxiꞌzaꞌca, nicala ruhnn raꞌ ba laꞌhnu ziga zi
dxihlli loh guidxyiyuh nin riuuꞌbwih tiiꞌ, ziꞌchi zeezah
ruhnn raꞌ ba hasta laꞌn dxyih raꞌ riiꞌ.
\p
\v 14 Ayi cagacaꞌhn dxyiꞌdxyi raꞌ riiꞌ para gusiaꞌhan
xtuhyiꞌhn laꞌhtu, sino que cañiꞌneen laꞌhtu ziga zi lliiꞌn
raꞌn laasii nadziiꞌhihn laꞌhtu.
\v 15 Pwihsi nicala laꞌhtu
nahpa tu ziga tsiꞌh mihyi raꞌ mwehsu raꞌ nin ruluuꞌyi
xcweenta Jesucristu, pwihsi nin tuhbi raꞌ niꞌchi ayi naa
xtaada tu; laasii pur xcweenta dxyiꞌdxyi zaꞌca nin
baluꞌyiꞌhn laꞌhtu sola naꞌh dxiꞌh. Naan xtaada tu laasii
mweer naꞌh baluꞌyiꞌhn xchiꞌdxyi Dxiohs laꞌhtu.
\v 16 Niꞌchin
rñiꞌn loh tu; gulchezahnee ziga rwaꞌha tu ruꞌnnahn.
\p
\v 17 Pwihsi niꞌchin guixeꞌhlaꞌhn Timoteu loh tu, laasii
laꞌhbi naa bi ziga zi tuhbi lliiꞌnahn, nin ruzoꞌbadxiahga
xchiꞌdxyi Jesucristu. Laꞌhbi zusannah bi lastoꞌ tu ziga
forma nin nabahanahn loh guelnabahan xteenn Crixtu, tal ziga
baluꞌyiꞌhn nezloh garaa raꞌ bwiinn guidoꞌ raꞌ ziahan lahta.
\v 18 Nuu tu dxyihgah cayuhnn nayaachi tu; cayuhnn tu
lligaaba pweda ayi dxieꞌldaguiaꞌhan xa nuu tu,
\v 19 per
nuuꞌhuhn lligaaba dxieꞌldaguiaꞌhahn xa nuu tu, sidela
Dxiohs nnaa Ñiꞌh, ya chiꞌchi gwaꞌhahn cuun nin naa xtsiꞌn
raꞌ bwiinn nayaachi raꞌ chi, nee ayi tan sola dxiꞌh nin rñiꞌ
raꞌ ba,
\v 20 laasii loh xquelrnabwaꞌ Dxiohs ayi naan
ganaalla xcwenta dxyiꞌdxyi raꞌsi, sino que neezaa dziꞌn nin
ruhnn raꞌ ba nin ruluuꞌyiloh xquelrnabwaꞌ Spíritu Saantu
xteenn Dxiohs nin nahpa raꞌ ba.
\v 21 ¿Xa xclaaꞌdzi
tu gadzihnaꞌhn loh tu? ¿Ta gadzihnaꞌhn ziga tuhbi daada
nin nuꞌa tuhbi bahra tin gucaꞌhyaagahn laꞌhtu, o gadzihnaꞌhn
loh tu cun tuhbi dxyiꞌdxyi naguꞌdziꞌhn?
\c 5
\s Xcweenta ziga nahpa gunnee tu tuhbi bwiinn nin rahpa duhlda duxa
\p
\v 1 Pwihsi zaꞌbi dxyiꞌdxyi xcweenta tuhbi tu, bwiinn chi
nahpa ba ziga cheꞌhla ba tuhbi gunnaꞌh nin guhca cheꞌhla
xtaada ba. Dee naa tuhbi duhlda duxa, pwehda nin bwiinn raꞌ
nin ayi nuꞌnbwaꞌ laꞌh Dxiohs ayi dxiaalla raꞌ ba guunn raꞌ
ban,
\v 2 ¡nee ziꞌchi todavia ruhnn bwiinn nayaachi tu,
xlawaaꞌha ñuꞌn tu, nee ñibweꞌhecaa tu bwiinn chi loh tu pur
duhlda nin guluꞌtii ba!
\v 3 Nicala naꞌh ayi zuꞌhn nez loh tu
riꞌca, per laꞌn guhcabwaꞌ la, nee laꞌn bwiꞌhnnla lligaaba xa
gaca xcweenta bwiinn nin guluꞌtii duhlda ca.
\v 4 Pur lah
Daada Jesucristu, gulgadxaꞌga lasaaꞌ, ya naꞌh laꞌn zuꞌnee
gahca laꞌhtu pur xcweenta Spíritu Saantu cun xquelrnabwaꞌ
Daada Jesucristu.
\v 5 Pwihsi laꞌn bwiꞌhnn lligaaba gatiꞌdxi
nuꞌh bwiinn ca laꞌn naa bwiinndxaaba tin gutiꞌdxiloh tihxi
ba guelrzaꞌcazii, ya spíritu xteenn ba taꞌh laꞌn dxyih nin
gabiaꞌgarii Daada Jesucristu stuhbi.
\p
\v 6 Laꞌhtu ayi guunn nayaachi tu cun xcweenta dziꞌn nin
ruhnn tu. ¿Tayi gaann tu tuhbi duhlda naa ziga tuhbi
biꞌtuꞌhn levaduhra nin rusadxih laꞌh garaa cohba nin rahca
pahn?
\v 7 Pwihsi gulcweꞌhe cohba yuꞌxa ca, tin guibahan tu
loh tuhbi guelnabahan nayaa nacuubi ziga tuhbi cohba nayaa
lasaaꞌ nin rahca chaꞌyi pahn nin ayi xi levaduhra riah loh
ñiꞌh par lañih xteenn paascu. Laꞌhtu nabahan loh tuhbi
guelnabahan nayaa laasii guhchi Jesucristu xcweenta nuꞌh
ziga tuhbi lliꞌhyi loh lañih paascu raꞌ bwiinn Israel tin
gudxihlli Ñiꞌh xcweenta xtuhlda raꞌ nuꞌh.
\v 8 Pwihsi nnah,
guidiꞌhnn nuꞌh lañih paascu cun pahn nin ayi rahca chaꞌyi
cun levaduhra, nin ayi naa cohsa dxaaba, cohsa yuꞌxa,
sino que pahn nin naa ganaalla nee nin naa guchiipaꞌhcaa.
\p
\v 9 Loh stuhbi dxihtsi nin bacaꞌhn loh tu squiiꞌ: “Ayi
guchaꞌga tu bwiinn raꞌ nin ruhnn raꞌ cohsa gubwihlli”,
\v 10 ayi cañiꞌ dxiꞌhn gulguiriaꞌcaatiiꞌ loh raꞌ bwiinn guidxyiyuh
nin ruhnn raꞌ cohsa gubwihlli, o nin rzaꞌbi stoꞌ raꞌ ñiꞌh
mweeyi, o nin ruhnn raꞌ gubaꞌn, o bwiinn raꞌ nin raann raꞌ
garaaloh raꞌ rretrahtu raꞌ xteenn dxaan; pwihsi para ayi xi
gapa tu cun laꞌh raꞌ ba, nahpa guiriaꞌh tu loh guidxyiyuh.
\v 11 Nin bacaꞌhn loh dxihtsi chi naa squiiꞌ: “Ayi guchaꞌga
tu laꞌh raꞌ bwiinn raꞌ nin rñiꞌ naa raꞌ lasaaꞌ raꞌ nuꞌh loh
Jesucristu, nee naa raꞌ ba tuhbi bwiinn nin nabahan
gubwihlli o rzaꞌbi stoꞌ ba mweeyi, o raann ba dxaan, o naa
ba tuhbi bwiinn nin ruuꞌyi dxixiꞌhw, o naa ba tuhbi bwiinn
gwaaꞌ, o naa za ba tuhbi bwiinn gubaꞌn.” Niꞌchin nin ayi
gahwnee tu bwiinn raꞌ nin naa raꞌ squiiꞌ,
\v 12-13 laasii
naꞌh ayi nuu guꞌnnahn guelguxchisi xcweenta bwiinn raꞌ nin
ayi naa raꞌ xpwiinn Dxiohs; Dxiohs naa nin guunn
guelguxchisi xcweenta raꞌ ba, per ya ziga laꞌhtu, laꞌhtu naa
tu nin guunn guelguxchisi xcweenta bwiinn raꞌ nin gwachii
stoꞌ raꞌ ñiꞌh xchiꞌdxyi Dxiohs. Pwihsi niꞌchin gulcweꞌhecaa
bwiinn duhlda nin naa ziꞌchi nez loh tu.
\c 6
\s Ayi xchiꞌhn chee tu loh raꞌ bwiinn duhlda tin guunn ba guelguxchisi xcweenta tu
\p
\v 1 Chin laꞌhtu nahpa tuhbi dxixiꞌhw cun stuhbi lasaaꞌ tu
ziga naa tu xpwiinn Jesucristu, ¿xixnaa chiꞌh cheganaaba
guxchisi tu lasaaꞌ tu loh tuhbi bwiinn nin ayi naa xpwiinn
Dxiohs?
\v 2 ¿Tayi gaann tu laꞌh raꞌ xpwiinn Dxiohs baguzuh
para guunn raꞌ ba guelguxchisi xcweenta raꞌ bwiinn
guidxyiyuh? Ya sidela laꞌhtu zuhnn tu guelguxchisi xcweenta
raꞌ bwiinn guidxyiyuh, ¿tayi gaca guunn chiꞌh tu
guelguxchisi loh lasaaꞌ tu xcweenta tuhbi cohsa biꞌtuꞌhn?
\v 3 ¿Ta nagahdxi gacabwaꞌ tu zidiꞌhnn za nuꞌh guelguxchisi
hasta xcweenta raꞌ xaanjla Dxiohs? ¡Lliaꞌlla chiꞌh
xcweenta tuhbi cohsa biꞌtuꞌhn ayi nuu guidiꞌhnn raꞌ nuꞌh
guelguxchiisi ziga xcweenta xteenn raꞌ lasaaꞌ raꞌ nuꞌh loh
guelnabahan riiꞌ!
\v 4 Pwihsi sidela laꞌhtu cadxihndxinee
lasaaꞌ tu pur xcweenta raꞌ cohsa xteenn loh guidxyiyuh riiꞌ,
¿xa chesuu chiꞌh tu loh raꞌ bwiinn duhlda nin ayi chyu naa
loh bwiinn xquidoꞌ Dxiohs?
\v 5 Dee raꞌ sihn rñiꞌn yihca tu
tin gatuhyi loh tu. ¿Tayi guidxeela nin tuhbi lasaaꞌ tu
nin nuu lligaaba nasiin yihca ñiꞌh tin guunn ba guelguxchisi
xcweenta lasaaꞌ tu?
\v 6 ¿Xixnaa rianee tuhbi bwiinn nin ba
gwachiistoꞌ ñiꞌh xchiꞌdxyi Dxiohs xquelchiah bwihtsi ba nin
ba gwachii za stoꞌ ñiꞌh xchiꞌdxyi Dxiohs, loh tuhbi guxchisi
nin ayi naa xpwiinn Dxiohs?
\p
\v 7 Yannah laꞌhtu, guchii paꞌh bañihchi tu, laasii
bagazaꞌloh xchixiꞌhw tu hasta ayi nahpa ñahnee lasaaꞌ tu
lasaaꞌ tu; ¿xixnaa ayi ñuchihpa stoꞌ tu xcweenta raꞌ bwiinn
raꞌ nin rguꞌtii duhlda cun laꞌh tu? ¿Xixnaa ayi gusaaꞌn tu
zuu guicaꞌha raꞌ ba xixteenn tu?
\v 8 Per dela nnah, laꞌh
gahca tu ruñihchi tu loh gahca raꞌ lasaaꞌ tu ziga naa tu
xpwiinn Jesucristu, nee rcaꞌha za tu xixteenn raꞌ lasaaꞌ tu.
\v 9 ¿Tayi gaann tu bwiinn raꞌ nin ayi nabahan xnehza ayi
chuꞌtii raꞌ ba loh xquelrnabwaꞌ Dxiohs? Ayi gusaaꞌn tu
gusaguiꞌhi raꞌ ba laꞌhtu tin laasii ziga tuhbi lasaaꞌ raꞌ
deeꞌ ayi gaca chuꞌtii loh xquelrnabwaꞌ Dxiohs: ziga nin
ruhnn guel gubwihlli, garaa raꞌ ziga nin raann raꞌ dxaan
raꞌ; garaa raꞌ ziga nin ruyihdxinee cheꞌhla stuhbi bwiinn,
garaa raꞌ ndxiꞌhw raꞌ nin ruhnn gunnaꞌh, cun nin naa raꞌ
biraalli;
\v 10 garaa raꞌ nin naa raꞌ gubaꞌn, garaa raꞌ nin
rzaꞌbi stoꞌ raꞌ ñiꞌh xixteenn bwiinn, garaa raꞌ nin naa raꞌ
bwiinn gwaaꞌ, garaa raꞌ nin rñiꞌyah raꞌ, garaa raꞌ nin
rusaguiꞌhi laꞌh raꞌ bwiinn tin rcaꞌha raꞌ ba xmweeyi raꞌ ba;
pwihsi nin tuhbi raꞌ bwiinn raꞌ squiiꞌ ayi gadzihn nez loh
xquelrnabwaꞌ Dxiohs nin nuu dxibaaꞌ.
\v 11 Ziga lasaaꞌ raꞌ
bwiinn raꞌ riiꞌ guhca raꞌ paaldaa tu, per nnah laꞌh Dxiohs
bazuhnayaa lastoꞌ tu, nnah laꞌhtu banaa tu bwiinn nayaa
nezloh Ñiꞌh laasii basiaꞌpitii Ñiꞌh xtuhlda tu pur
xcweenta Jesucristu nee pur xcweenta za Spíritu Saantu
Dxiohs. Niꞌchin nnah ya naa tu xpwiinn Ñiꞌh.
\s Tihxi nuꞌh naa xquidoꞌ Dxiohs
\p
\v 12 Zaꞌbi dxyiꞌdxyi squiiꞌ: “Naꞌh zahca guꞌnnahn cuun
chiꞌh zi nin xclaaꞌdzihn guꞌnnahn”, per ayi garaa raꞌ
dxiꞌhn naa bwen para naꞌh. Naꞌh zahca guꞌnnahn cuun chiꞌh
zi raꞌ nin xclaaꞌdzihn, per ayi gusaꞌnaꞌhn guinabwaꞌ tuhbi
raꞌ cohsa raꞌ riiꞌ naꞌh.
\v 13 Neezaa nuu dxyiꞌdxyi nin naa
squiiꞌ: “Guelwahw naa para laꞌn buuxa stoꞌ bwiinn, ya buuxa
stoꞌ bwiinn naa para guelwahw”, per zadzihn dxyih nin
guñihchiloh Dxiohs garoopa raꞌn. Per ayi guchii dxiꞌh tihxi
nuꞌh naa para guidiꞌhnn nuꞌh cohsa gubwihlli; tihxi nuꞌh naa
para laꞌh Dxiohs, ya Dxiohs naa para tihxi nuꞌh.
\v 14 Pwihsi ziga bataꞌh Dxiohs laꞌh Jesucristu loh raꞌ bwiinn
guuchi, gucwaꞌhn za Ñiꞌh laꞌh raꞌ nuꞌh loh bwiinn guuchi.
\p
\v 15 Ya ziga laꞌhtu, ¿tayi gaann tu tihxi tu naa xteenn
tihxi Jesucristu pur nin gwachii stoꞌ tu xchiꞌdxyi Ñiꞌh?
Sidela tihxi nuꞌh naa tihxi xteenn Jesucristu, ¿ta zahca
chiꞌh chyu gudiꞌhi tihxi ba loh tuhbi gunnaꞌh dxaaba?
Pwihsi ¡ayi nuu chyu guunn ziꞌchi!
\v 16 ¿Tayi gaann tu
chin rdxaꞌga tuhbi ndxiꞌhw laꞌh tuhbi gunnaꞌh dxaaba, naa
garoopa raꞌ ba tuhsi cwerpu?, nee squiiꞌ caa loh Xchihtsi
Dxiohs: “Garoopa raꞌ ba naa ziga tuhsi bwiinn.”
\v 17 Per
bwiinn nin rudiꞌhi lastoꞌ ñiꞌh nezloh Dxiohs naa za tuhsi
cun laꞌh Ñiꞌh laasii rbweeza Spíritu Saantu xteenn Dxiohs
nez laꞌn lastoꞌ ba.
\p
\v 18 Niꞌchin ¡gulguiriaꞌcaa loh duhlda xteenn cohsa
gubwihlli! Xichiꞌ zi stuhbi duhlda nin ruhnn bwiinn, naan
zahca dxiaa tihxi ba, per ziga bwiinn nin ruhnn ziga cohsa
gubwihlli rusiaaba duhldan tihxi ba laꞌh ba.
\v 19 ¿Tayi
gaann tu tihxi tu naa xquidoꞌ Spíritu Saantu Dxiohs nin nuu
dxibaa, ya nuu Spíritu Saantu laꞌn lastoꞌ tu? Niꞌchin
laꞌhtu ayi nuu guinabwaꞌ tu laꞌh gahca tu,
\v 20 laasii laꞌh
Jesucristu gudxihllila xcweenta xtuhlda nuꞌh loh cruhzi cun
llarihn Ñiꞌh, niꞌchin nnah nahpa guidiꞌhnn nuꞌh dziꞌn zaꞌca
nin guunn lasahca laꞌh Dxiohs cun tihxi nuꞌh cun neezaa
spíritu nuꞌh.
\c 7
\s Guelrñiꞌnee xteenn ziga ruchinaa bwiinn
\p
\v 1 Yannah guiñiꞌn loh tu xcweenta dxyiꞌdxyi nin
gunaabadxyiꞌdxyi tu loon chin bacaꞌh tu tuhbi dxihtsi loon
gu guchii paꞌh naa ziga laꞌh tuhbi ndxiꞌhw naa bwen
ayi chuu ba lligaaba guicaꞌha ba gunnaꞌh;
\v 2 laasii nuu raꞌ
ziahantiiꞌ raꞌ biꞌnxtuhbi nin caꞌnzaa loh guelgubwihlli,
niꞌchin mas chaꞌyi nahpa gapaa raꞌ ndxiꞌhw nin gaca cheꞌhla
ba rwaaꞌ yihdzi ba, ziꞌchiza laꞌh raꞌ gunnaꞌh raꞌ nahpa
gapaa raꞌ ba ndxiꞌhw nin gaca xpwiinn ndxiꞌhw raꞌ ba.
\v 3 Pwihsi ziga ndxiꞌhw nahpa guzaꞌloh ba gudiꞌhi ba guxta laꞌh
cheꞌhla ba ziga nanchii guchii paꞌh ba naa ba cheꞌhla
xcunnaꞌh ba; ziꞌchi za gunnaꞌh nahpa guunn za ba gudiꞌhi ba
guxta laꞌh xpwiinn ndxiꞌhw ba,
\v 4 laasii gunnaꞌh ayi
rnabwaꞌ ba laꞌh gahca tihxi ba laasii cheꞌhla ba rnabwaꞌ
tihxi ba.
\v 5 Niꞌchin ayi nuu guziaꞌtii tu tihxi tu loh
cheꞌhla tu ziga tuhbi tu ziga stuhbi tu. Mas chaꞌyi
guldxiꞌhan dxyiꞌdxyi ayi guyihdxi lasaaꞌ tu loh tuhbi
chieempa nin cwiidxyi-guinaaba tu loh Dxiohs, ya chin
chaꞌloh chieempa chi nahpa guyihdxi lasaaꞌ tu stuhbi, tin
ayi guchiꞌhyi bwiinndxaaba laꞌhtu dxiaaba tu loh duhlda.
\p
\v 6 Rñiꞌn dxyiꞌdxyi raꞌ riiꞌ loh tu mas zahca guchinaa nin
guiclaaꞌdzi guchinaa, per ayi cañiꞌn nahpa paꞌcaa guchinaa
tu.
\v 7 Naꞌh xclaaꞌdzihn malahyique garaa tu ñahca xigaaba
tu ziga naa xigaaꞌbahn; per nnah Dxiohs baniꞌhi laꞌh cada
tuhbigah tu guriin-guriin lligaaba.
\p
\v 8 Pwihsi naa xigaaꞌbahn para laꞌh raꞌ biꞌnxtuhbi cun
ndxiꞌhw raꞌ nin ba guhchi cheꞌhla ñiꞌh, naa bwen dxiaꞌhan
raꞌ ba ayi guicaꞌha raꞌ ba gunnaꞌh, gaca raꞌ ba ziga naꞌh,
\v 9 per sidela ayi nuu gusacwahchidxyii xigaaba raꞌ ba,
nicala guicaꞌha raꞌ ba nin gaca cheꞌhla raꞌ ba, laasii naa
bwen guchinaa raꞌ ba xlawaaꞌha chuudxih lasaaꞌzi raꞌ ba.
\p
\v 10 Per ziga laꞌh raꞌ bwiinn raꞌ nin ba bachinaa raꞌ la
rnaꞌbaꞌhn loh raꞌ ba ziga gunnaꞌh raꞌ ayi taaꞌha raꞌ ba laꞌh
xpwiinn ndxiꞌhw raꞌ ba, laasii guelrnabwaꞌ riiꞌ guchiiꞌhin;
ayi naan pur xigaaꞌbahn sino que naan pur xquelrnabwaꞌ Daada
Jesucristu.
\v 11 Per sidela laꞌh tuhbi gunnaꞌh rabii
ba yihdzi cheꞌhla ba pur xilla llahn, gunnaꞌh chi ayi guchinaa ba cun stuhbi
ndxiꞌhw mas bwen guunn ba gusiaꞌlda ba dxyiꞌdxyi cun
cheꞌhla ba. Ziꞌchi za laꞌh tuhbi ndxiꞌhw ayi taaꞌha ba laꞌh
xcunnaꞌh ba.
\p
\v 12 Dxyiꞌdxyi raꞌ riiꞌ naa xigaaꞌbahn, ayi naan dxyiꞌdxyi
raꞌ nin basiaꞌhan Daada Jesucristu. Squiiꞌ rñiꞌn loh tu.
Sidela laꞌh xcunnaꞌh tuhbi ndxiꞌhw nin gwachii stoꞌ ñiꞌh
xchiꞌdxyi Dxiohs ayi riachii stoꞌ ba xchiꞌdxyi Dxiohs, per
naa xigaaba ba guibahannee ba laꞌh ndxiꞌhw nin riachii stoꞌ
ñiꞌh chi xchiꞌdxyi Dxiohs, pwihsi ndxiꞌhw chi ayi taaꞌha ba
laꞌh gunnaꞌh chi.
\v 13 Ziꞌchigahcaza laꞌh tuhbi gunnaꞌh nin
riachii stoꞌ ñiꞌh xchiꞌdxyi Dxiohs nee naa xpwiinn ndxiꞌhw
ba nin ayi riachii stoꞌ xchiꞌdxyi Dxiohs per naa xigaaba ba
guibahannee ba gunnaꞌh chi, ayi za taaꞌha gunnaꞌh chi laꞌh
ba.
\v 14 Pwihsi laꞌh ndxiꞌhw nin ayi riachii stoꞌ ñiꞌh chi
guhca taaꞌyi ba pur nin bachiꞌdxiu-bachaꞌga Dxiohs laꞌh ba
cun tuhbi gunnaꞌh nin riachii stoꞌ ñiꞌh xchiꞌdxyi Dxiohs; ya
ziꞌchi za laꞌh gunnaꞌh nin ayi riachii stoꞌ ñiꞌh xchiꞌdxyi
Dxiohs, pwihsi guhca ntaaꞌyi za ba laasi Dxiohs za
bachiꞌdxiu-bachaꞌga laꞌh ba cun tuhbi ndxiꞌhw nin naa
xpwiinn Dxiohs. Per ya ziga stuhbi forma ziga lliiꞌn tu naa
raꞌ bi ziga zi lliiꞌn raꞌ bwiinn raꞌ nin ayi riachii stoꞌ
raꞌ ñiꞌh xchiꞌdxyi Dxiohs, per nnah laꞌh Dxiohs
bwiꞌhnntaaꞌyi laꞌh raꞌ bi.
\v 15 Per sidela laꞌh ndxiꞌhw o
gunnaꞌh nin ayi naa tuhbi raꞌ ñiꞌh xpwiinn Dxiohs chuu raꞌ
ba lligaaba taaꞌha raꞌ ba cheꞌhla raꞌ ba nin naa xpwiinn
Dxiohs zuu guunn raꞌ ba ziꞌchi, nee ziꞌchiza ndxiꞌhw o
gunnaꞌh nin naa xpwiinn Dxiohs zahcaza gusaaꞌn raꞌ ba bwiinn
raꞌ chi laasii Dxiohs gudihdxyi Ñiꞌh laꞌhnuꞌh tin guibahan
nasaa nuꞌh.
\v 16 Ya ¿xa naann luꞌh yiꞌh gunnaꞌh, zutaꞌh
Dxiohs laꞌh cheꞌhla luꞌh loh duhlda xweenta luꞌh?; o ¿xa
naann luꞌh yiꞌh ndxiꞌhw, zuldaꞌh Dxiohs laꞌh cheꞌhla luꞌh
loh duhlda xcwenta luꞌh?
\p
\v 17 Sola naaꞌhan nin baniꞌhi Jesucristu laꞌh tuhbigah raꞌ
nuꞌh, neezaa ziga chiꞌh zi nin gulii Dxiohs cada tuhbigah
raꞌ nuꞌh, ziꞌchi za rñiꞌn loh tu guunn tu garaa tu nin naa
raꞌ xpwiinn guidoꞌ Dxiohs nin nuu dxibaaꞌ.
\v 18 Sidela laꞌh
Dxiohs rbwihdxyi Ñiꞌh laꞌh tuhbi ndxiꞌhw nin nuu tuhbi bwaꞌ
nin laa circuncisión pwihsi ba nuu ba bwaꞌ chi; ya sidela
laꞌh Ñiꞌh rbwihdxyi Ñiꞌh tuhbi bwiinn nin ayi nuu bwaꞌ nin
laa circunsición chi, nicala ayi guunn ba pur chuu ba bwaꞌ
chi.
\v 19 Ayi xi ruhn nicala nuu ba bwaꞌ chi o nicala ayi
nuu ban; nin xchiꞌhn sihn naa chuu ba guzoꞌbadxiahga ba
dxyiꞌdxyi nin gunabwaꞌ Dxiohs.
\v 20 Pwihsi cada tuhbigah
raꞌ bwiinn cun dxiaꞌhan raꞌ ba ziga naa raꞌ ba chin
gudihdxyi Dxiohs laꞌh raꞌ ba.
\p
\v 21 Sidela yiꞌh naa luꞌh tuhbi mooza nin gudooꞌ tiiꞌ chin
gudihdxyi Dxiohs yiꞌh, ayi xi lligaaba guunn luꞌh pur
niꞌchi; per sidela zahca gutsiiga luꞌh mweeyi loh xlahma
luꞌh, nicala bwiꞌhnnan tin gutaꞌh ba yiꞌh tin gaca luꞌh
tuhbi bwiinn nin ayi chyu guinabwaꞌ ru.
\v 22 Pwihsi bwiinn
nin gudooꞌ chin gwachii stoꞌ ba xchiꞌdxyi Dxiohs, nnah naa
ba naa ziga tuhbi bwiinn nin ayi gudooꞌ tin guunn ba xtsiꞌn
Dxiohs; ya ziꞌchi za laꞌh bwiinn nin ayi gudooꞌ chin
gudihdxyi Dxiohs laꞌh ba, nnah laꞌhza ba naa ziga tuhbi
bwiinn nin gudooꞌ loh Jesucristu laasii guziꞌ Dxiohs laꞌh
ba.
\v 23 Jesucristu naa nin guziꞌ laꞌhtu cun llarihn Ñiꞌh
niꞌchin ayi gusaaꞌn tu guinabwaꞌ raꞌ bwiinn laꞌhtu tin
ziꞌchi gaca guunn tu xtsiꞌn Dxiohs.
\v 24 Pwihsi ziꞌchi,
bwitsi lasaaꞌ raꞌn; gulchezah cun ziga naa tu chin gudihdxyi
Dxiohs laꞌhtu.
\p
\v 25 Ya ziga xcweenta raꞌ bwiinn raꞌ nin nagahdxi guchinaa,
ayi xi guelrnabwaꞌ baniꞌhi Jesucristu naꞌh para laꞌh raꞌ ba;
sola gulii Dxiohs naꞌh tin guluꞌyiꞌhn xchiꞌdxyi Ñiꞌh. Naꞌh
rñiꞌn loh raꞌ ba laasii pur nin naꞌnnahn xchiꞌdxyi Dxiohs,
per rahcanee za Ñiꞌh naꞌh.
\v 26 Ruꞌnnahn lligaaba bwen
gahca nabahan raꞌ ndxiꞌhw ziga ayi guchinaa raꞌ ba, laasii
pur xcweenta raꞌ chieempa raꞌ nagahn duxa nin zeezah cayuuꞌ
loh guidxyiyuh riiꞌ.
\v 27 Sidela yiꞌh bachinaa luꞌh ayi
taaꞌha luꞌh cheꞌhla luꞌh, per sidela nagahdxi guchinaa luꞌh
ayi guunn luꞌh pur chiꞌhyi luꞌh xa guchinaa luꞌh,
\v 28 per
sidela yiꞌh za guchinaa luꞌh ayi xi duhlda rguꞌtii luꞌh; ya
sidela laꞌh tuhbi dxaꞌpa ruchinaa za bi ayi za xi duhlda
rguꞌtii bi, per ya ziga bwiinn raꞌ nin ruchinaa nee gahpa
raꞌ ba dxixiꞌhw loh guelnabahan riiꞌ, niꞌchin naꞌh rñiꞌn loh
tu ayi guchinaa tu tin ayi xclaaꞌdzihn tiidxi tu trabahjw.
\p
\v 29 Bwiitsi lasaaꞌ raꞌn, nin xclaaꞌdzihn guiñiꞌn loh tu
naa deeꞌ raꞌ. Zalliaꞌyiꞌhn nin guibahan nuꞌh loh guidxyiyuh
riiꞌ, niꞌchi ziga nin bachinaa raꞌ ayi guunn raꞌ ba lligaaba
xteenn si guelruchinaa, tin gaca guunn raꞌ ba xtsiꞌn
Dxiohs.
\v 30 Nin cayuꞌn raꞌ, gulguiꞌhnn ziga zi nin ayi
cayuꞌn; nin nuu lehgra raꞌ guunn raꞌ ba ziga zi nin ayi nuu
lehgra; ya nin rziꞌ raꞌ guunn raꞌ ba ziga zi ayi naa xteenn
raꞌ ba nin riiziꞌ raꞌ ba.
\v 31 Ziga nin rahpa raꞌ xica
cohsa raꞌ loh guidxyiyuh riiꞌ, guunn raꞌ ba ziga zi nin ayi
xi nahpa tiiꞌ, laasii guidxyiyuh riiꞌ ziñihchilohon.
\p
\v 32 Naꞌh xclaaꞌdzihn ayi xi guelrzaaꞌ chuu tu. Ziga tuhbi
bwiinn nin nagahdxi guchinaa, mahzi riuuꞌ raꞌ ba lligaaba
xcweenta xtsiꞌn Dxiohs, nee raguuꞌ nasaa raꞌ za ba stoꞌ
Dxiohs,
\v 33 per chin ya bachinaa raꞌ ba, mahzi riuuꞌ raꞌ
ba lligaaba xcweenta raꞌ cohsa guidxyiyuh tin ziꞌchi raguuꞌ
nasaa raꞌ gaꞌh ba stoꞌ xcunnaꞌh raꞌ ba.
\v 34 Ziꞌchi za
laꞌh gunnaꞌh nin nagahdxi guchinaa riuuꞌ za ba lligaaba
xcweenta si Dxiohs tin gaca ba tuhbi gunnaꞌh nin guunsi
xtsiꞌn Dxiohs gaduhbi stoꞌ ba; per ya ziga gunnaꞌh
nin ba bachinaa riuuꞌ za ba xcweenta cohsa guidxyiyuh nee
tin rusiahxi za ba laꞌh cheꞌhla ba.
\p
\v 35 Rñiꞌn dxyiꞌdxyi raꞌ riiꞌ loh tu per ayi naan para gaca
ziahan nin guunn tu; sola naan guelnazaꞌca para laꞌhtu nee
tin guibahan nayaa tu nez loh Dxiohs tin loh si Ñiꞌh chuu
tu guunn tu dziꞌn.
\p
\v 36 Per sidela chyulla tuhbi daada ruhnn ba lligaaba ayi
rgaꞌha ziga nin ayi rziꞌguehlda ba guchinaa lliiꞌn dxaꞌpa ba
laasii zeeyuꞌxa bi, nicala guzaꞌloh xigaaba ba guunn ban,
nee ayi naan duhlda para laꞌh ba,
\v 37 per ya sidela chyulla
stuhbi daada guiñiꞌ stoꞌ ba ayi nahpa guunn ba ziꞌchi, zuu
guzaꞌloh xigaaba ba bwen gahca niꞌchi naa xigaaba ba.
\v 38 Per ziga daada raꞌza nin rudiꞌhi lliiꞌndxaꞌpa ñiꞌh tin
ruchinaa bi, bwengahcaza cayuhnn ba; per bwiinn nin ayi za
rudiꞌhi lliiꞌndxaꞌpa ñiꞌh para guchinaa bi bwiinn chi
cayuhnn ba mahzi ru bwen.
\p
\v 39 Tuhbi gunnaꞌh nin bachinaa nahpa guibahannee ba cheꞌhla ba gaduhbi nin
nabahan cheꞌhla ba, per sidela laꞌh cheꞌhla ba rahchi ya dxiaꞌhan ba viuhda,
chiꞌchi zahca guchinaa ba cun cuun chiꞌh zi ndxiꞌhw nin xclaaꞌdzi ba, todesque
naa ndxiꞌhw chi tuhbi bwiinn nin riachii za stoꞌ ñiꞌh xchiꞌdxyi Dxiohs.
\v 40 Per mahzi za bwen sidela laꞌh ba ayi guchinaa ba, pwihsi squiiꞌ naa
xigaaꞌbahn naꞌh, nee naꞌh rahcabwaꞌn nuu Spíritu Saantu Dxiohs stoꞌn.
\c 8
\s Guelwahw nin rdiiꞌdxi guhn loh raꞌ figuhra raꞌ
\p
\v 1 Rñiꞌn loh tu xcweenta guelwahw nin rudiꞌhi guhn raꞌ
bwiinn loh dxaan raꞌ. Gulii Dxiohs garaa raꞌ
nuꞌh tin nahpa nuꞌh guelnaann xcweenta raꞌ cohsa raꞌ ca, per
guelnaann ruhnn ruchiooꞌ laꞌhnuꞌh loh raꞌ cohsa nin naa
lliaaꞌ zi raꞌ gaduhbi nin laꞌh guelnadziiꞌhi lasaaꞌ ruchiooꞌ
laꞌhnuꞌh loh nin rahcanee lasaaꞌ ru raꞌ nuꞌh.
\v 2 Sidela
chyuulla ruhnn lligaaba naann ba xiilla, rusaguiꞌhi si ba
lastoꞌ gahca ba laasii cayaꞌdxi ru gacabwaꞌ ba ziga nin
nahpa gacabwaꞌtiiꞌ ba.
\v 3 Per sidela chyuulla tuhbi bwiinn
rucaꞌh stoꞌ ba laꞌh Dxiohs, Dxiohs ya nuꞌnbwaꞌ Ñiꞌh laꞌh
bwiinn chi.
\p
\v 4 Niꞌchin ziga guelwahw nin rutiꞌdxi guhn raꞌ bwiinn loh
raꞌ figuhra xteenn dxaan yuh raꞌ, pwihsi naannloh nuꞌh ziga
dxaan raꞌ ayi xi guilasahca raꞌn loh guidxyiyuh, laasii ayi
ziahan Dxiohs sino que tuhbi dxiꞌh Dxiohs nin nuu nez dxibaaꞌ
naa Daada.
\v 5 Pwihsi nicala nuu nin rñiꞌ raꞌ bwiinn naa
raꞌ dxiohsa nez llaaꞌndxibaaꞌ o loh guidxyiyuh ya ziꞌchi
gahca za pur lligaaba chi rñiꞌ bwiinn nuu raꞌ ziahan raꞌ
dxiohsa cun ziahan raꞌ za lahma raꞌ nin rnabwaꞌ raꞌ,
\v 6 per
laꞌh raꞌ nuꞌh naann nuꞌh nuu tuhbi dxiꞌh Dxiohs nin naa
Daada; laꞌh Daada Dxiohs nin bwiꞌhnn chaꞌyi garaa tiiꞌ raꞌ
cohsa, ya laꞌhnuꞌh nabahan nuꞌh pur laꞌh Ñiꞌh. Nuu za
tuhbi dxiꞌh Daada nin rnabwaꞌ loh raꞌ nuꞌh nin laa
Jesucristu. Pwihsi pur xquelrnabwaꞌ Ñiꞌh guhca chaꞌyi
garaa raꞌ cohsa raꞌ, nee pur laꞌh za Ñiꞌh nabahan raꞌ nuꞌh.
\p
\v 7 Per ayi garaa raꞌ dxiꞌh bwiinn naann raꞌ ba cweenta raꞌ
riiꞌ. Nuu raꞌ ba ya biaꞌh raꞌ ba ayi raann raꞌ ba dxaan,
rahw gahca raꞌ ba cohsa raꞌ nin rbwih raꞌ loh dxaan raꞌ
laasii nacahyi ru naa loh xigaaba raꞌ ba, ya ruxiꞌn
guelnacahyi chi loh xigaaba raꞌ ba niꞌchin raann raꞌ ba
dxaan raꞌ.
\v 8 Pwihsi ayi xcweenta dxiꞌh nin ridaꞌw nuꞌh
guunn Dxiohs guibahan zaꞌca ru nuꞌh nez loh Ñiꞌh; ayi
nastoꞌ dxiꞌh tu mahzi ru bwen gaca nuꞌh pur nin guidaꞌw
nuꞌh, o pur ayi guidaꞌw raꞌ nuꞌh.
\v 9 Per nin guunn tu
gulguiaꞌha xcweenta guelnasaa nin nahpa tu tin ayi gacan nin
gusiaaba loh duhlda laꞌh raꞌ bwiinn raꞌ nin gulliaꞌyiꞌhn nuu
guelriachii stoꞌ xteenn Dxiohs laꞌn lastoꞌ ñiꞌh.
\v 10 Pwihsi sidela laꞌh tuhbi bwiinn nin nagahdxi chechii zaꞌca
stoꞌ ba xchiꞌdxyi Dxiohs, nee gwaꞌha cayahw luꞌh guelwahw
nin guzuu loh raꞌ dxaan raꞌ, nee naa luꞌh tuhbi bwiinn nin
riachii stoꞌ ñiꞌh xchiꞌdxyi Dxiohs pwihsi bwiinn nin gueꞌdu
guzoꞌbaloh rucaꞌdxiahga xchiꞌdxyi Dxiohs ayi guchiipastoꞌ ba
zahw za ba cohsa raꞌ nin gudiiꞌdxi guhn loh raꞌ dxaan raꞌ,
ya ziꞌchi zuhnn luꞌh ziaaba ba loh duhlda.
\v 11 Ya ziꞌchi
yiꞌh, pur nin nahpa luꞌh guelnaann cayuhnn luꞌh para
zeenaꞌzu bwihtsi luꞌh nin gulliaaꞌ nuu guelriachii stoꞌ
xteenn Dxiohs stoꞌ ñiꞌh loh nacahyi, nee neezaa para laꞌh ba
guhchi Jesucristu loh cruhzi.
\v 12 Pwihsi ziga ruhnn luꞌh
riaaba bwihtsi luꞌh loh duhlda ziga ruhnn chiohpa luꞌh loh
xigaaba ba ziga nagahdxi chechii zaꞌca stoꞌ ba xchiꞌdxyi
Dxiohs, pwihsi laꞌhtu cayahpa tu duhlda nez loh Jesucristu.
\v 13 Pwihsi niꞌchin, sidela naꞌh guꞌnnahn dxiaaba bwiꞌtsihn
loh duhlda pur xcweenta nin raawuhn, mahzi bwen ru naꞌh ayi
gaawuhn stuhbi guelwahw nin guunn dxiaaba bwiꞌtsihn loh
duhlda.
\c 9
\s Ziga naa xcweenta tuhbi pooxtla
\p
\v 1 Pwihsi ziga naꞌh naꞌpahn derehchu xteenn tuhbi pooxtla,
pwihsi bwaꞌhaloon laꞌh Jesuhs nin naa Daada loh nuꞌh, ya
laꞌh za tu naa tu ziga tuhbi cweenta nin ruluuꞌyi xa naa
xtsiꞌnaꞌhn loh dziꞌn xteenn Dxiohs,
\v 2 per pweda nuu raꞌ
za nin ayi nuꞌnbwaꞌ naꞌh naan ziga tuhbi pooxtla; per laꞌhtu
ba biuꞌnbwaꞌ zaꞌca tu naꞌh naan tuhbi pooxtla laasii naa tu
tuhbi bwiinn raꞌ nin gwachii stoꞌ raꞌ ñiꞌh xchiꞌdxyi
Jesucristu nin baluꞌyiꞌhn laꞌhtu, ya niꞌchin guchii
naan tuhbi pooxtla.
\p
\v 3 Deeꞌ raꞌ naa xchiꞌdxyiꞌhn para laꞌh raꞌ bwiinn raꞌ nin
ruluuꞌyi xcwihin naꞌh. Naꞌpahn derehchu; ayi nnestoꞌdxiꞌh
tu ayi naꞌpañin.
\v 4 Niꞌchin, sidela guiclaaꞌdzihn, naꞌpahn
derehchu guicaꞌhahn garaa nin guniꞌhi tu gaawuhn cun
gueezahn nin chiꞌh zi nin guniꞌhi tu naꞌh para gueeꞌhehn,
\v 5 nee zahca za gaꞌpahn tuhbi cheꞌhlaꞌhn nin gwachii stoꞌ
za ñiꞌh xchiꞌdxyi Dxiohs tin saꞌneezahn ba laꞌh gahca ziga
ruhn raꞌ garaa snuhn raꞌ pooxtla, cun neezaa raꞌ nin naa raꞌ
bwihtsi Daada Jesucristu nee cun neezaa Pehdru.
\v 6 O ¿ta
ruhnn chiꞌh tu lligaaba naꞌh dxiꞌh cun Bernabeh ayi nuu
cweeza guidiꞌhnn nu dziꞌn tin galuuꞌyi nu xchiꞌdxyi Dxiohs
si?
\v 7 ¿Chyu niꞌca gazoꞌba nuꞌh gaca tuhbi suldahdu nee
chiilli ba laꞌh gahca ba nin gahw ba?, o ¿chyu niꞌca guunn
biñih yahga uhva raꞌ nee ayi gahw ba ñinahxi nin rcah loh
raꞌn?, o ¿chyu niꞌca gaapaa raꞌ nuhn chihva nee ayi guee ba
lehchi chin rlliꞌh raꞌ ma?
\v 8 Nee ayi guunn tu lligaaba
cun xigaabagaꞌcahn cañiꞌn dxyiꞌdxyi raꞌ riiꞌ loh tu, sino que
nee loh xlehyi guehtu Moisehs caa dxyiꞌdxyi xcweenta raꞌ
cohsa raꞌ riiꞌ.
\v 9 Pwihsi caa za loh dxihtsi lehyi xteenn
guehtu Moisehs squiiꞌ: “Ayi cuu luꞌh dxihxi lliiꞌ guun chin
cadxihchi ma trihgu.” Pwihsi dxyiꞌdxyi raꞌ riiꞌ ayi guñiꞌ
dxiꞌh Ñiꞌhn pur guun, pur nin nuu Ñiꞌh lligaaba pur laꞌh
ma,
\v 10 sino que naan para xquel nazaꞌca za nuꞌh. Lehyi
riiꞌ gucahan loh dxihtsi tin gacaneen laꞌhnuꞌh, laasii ziga
bwiinn nin raaꞌn loh yuh cun nin rusiaa trihgu cabweeza raꞌ
deeꞌ raꞌ tin gudiꞌhi guxta stoꞌ raꞌ ba xliꞌhn raꞌ ba.
\v 11 Laꞌhtu naa tu ziga zi tuhbi loh yuh hasta bachibahchi nu
biñih laasii baluuꞌyi nu xchiꞌdxyi Dxiohs laꞌhtu. ¿Ta
ruhnn chiꞌh tu lligaaba dziꞌn roo gacanee tu laꞌhnu cun
xixteenn tu?
\v 12 Sidela stuhbi raꞌ bwiinn nahpa raꞌ
derehchu riiꞌ xcweenta tu, ¿xi laꞌhaxchiꞌh laꞌhnu?
\p Per nagahdxi chyu guiñiꞌ squiiꞌ loh tu laasii ayi xclaaꞌdzi
nu gaxiꞌn nu ziga ayi chechii paꞌh stoꞌ tu xchiꞌdxyi
Dxiohs, niꞌchin nin dxugachipa stoꞌ nu cun guelrzaꞌcazii
raꞌ nin cadiiꞌdxi nu.
\v 13 Laꞌhtu naann tu bwiinn raꞌ nin
ruhnn raꞌ dziꞌn laꞌn guidoꞌ rooꞌ rahw raꞌ ba bweꞌhla
maan raꞌ nin rbahchi guhn raꞌ snuhn bwiinn riꞌchi, ya
ziꞌchi za bwiinn raꞌ nin ruhnn dziꞌn loh bacuꞌga guidoꞌ rooꞌ
rahw za raꞌ ba bweꞌhla maan raꞌ nin dziꞌba loh bacuꞌga chi.
\v 14 Ziꞌchi gahca za gunabwaꞌ Daada Jesucristu loh raꞌ nin
ruluuꞌyi raꞌ xcweenta xchiꞌdxyi Ñiꞌh, zuu guicaꞌha raꞌ ba
xi gahw raꞌ ba loh raꞌ bwiinn raꞌ nin chechii stoꞌ raꞌ ñiꞌh
xchiꞌdxyi Dxiohs.
\v 15 Per naꞌh nagahdxi guꞌnnahn ziꞌchi,
nee ayi nuu gucaꞌhn dxyiꞌdxyi raꞌ riiꞌ loh tu tin para xi
guniꞌhi za tu naꞌh; mahzi ru bwen gachiꞌhn tin ayi
guziaꞌtii tuhbi bwiinn guelnasaa stoꞌn nin naa xcweenta
dziꞌn nin ruꞌnnahn nez loh Dxiohs nin nuu dxibaaꞌ.
\p
\v 16 Para naꞌh ayi chyu xclaaꞌdzihn guiñiꞌ zaꞌca pur
xcweeꞌntahn ziga guluꞌyiꞌhn xchiꞌdxyi Dxiohs, laasii ziꞌchi
nahpa guꞌnnahn, laasii ¡prohbi za naꞌh sidela ayi
guluꞌyiꞌhn xchiꞌdxyi Dxiohs!
\v 17 Per sidela naꞌh guꞌnnañin
cun gaduhbi stoꞌn, nuu tuhbi cohsa nin guniꞌhi Dxiohs naꞌh;
per sidela naꞌh, nahpa paꞌhcaa guꞌnnañin pur naan tuhbi
cargu xteꞌnnahn nin baniꞌhi Dxiohs naꞌh, ¿pwihsi xalla
guunchiꞌhn ayi guꞌnnañin?
\v 18 ¿Cuun niꞌca nin guicaꞌhahn?
Nin guicaꞌhahn naa guelnasaa nin guluꞌyiꞌhn xchiꞌdxyi
Jesucristu laꞌh raꞌ bwiinn, per ayi gahllaꞌhn nin tuhbi
santahba sino que sola para chezah zaꞌca raꞌ ba loh xchiꞌdxyi
Dxiohs tin taꞌh raꞌ ba loh duhlda.
\p
\v 19 Ayi chyu xmooza naan, per laꞌh gahca naꞌh bwiꞌhnnaꞌhn
lligaaba gacaꞌhn ziga tuhbi mooza loh garaatiiꞌ bwiinn tin
guꞌnnahn gahn chechii stoꞌ ziahan raꞌ bwiinn xchiꞌdxyi
Dxiohs.
\v 20 Chin zuꞌhn lahda raꞌ bwiinn Israel raꞌ
ruꞌnnahn ziga nin ruhnn raꞌ ba tin guꞌnnahn gahn chechii
stoꞌ raꞌ ba xchiꞌdxyi Dxiohs, nee chin xclaaꞌdzihn guiñiꞌn
loh raꞌ bwiinn nin nabahan raꞌ loh xlehyi guehtu Moisehs,
pwihsi ruꞌnnahn ziga ruhnn raꞌ ba tin ruꞌnnahn gahn chechii
stoꞌ raꞌ ba xchiꞌdxyi Dxiohs nicala naꞌh ayi nabahanahn loh
lehyi chi.
\v 21 Pwihsi para guꞌnnahn gahn laꞌh raꞌ za
bwiinn raꞌ nin ayi nabahan loh xlehyi guehtu Moisehs,
ruꞌnnzahn ziga ruhn raꞌ ba nicala naꞌh nabahan paꞌcaan loh
xlehyi Dxiohs laasii ruzoꞌbadxiaagahn dxyiꞌdxyi raꞌ nin
basiaꞌhan Jesucristu.
\v 22 Chin zuꞌhn nez loh raꞌ bwiinn
raꞌ nin gulliaꞌyiꞌhn riachii stoꞌ xchiꞌdxyi Dxiohs,
ruꞌnnzahn ziga ruhn raꞌ ba, tin ziꞌchi ruꞌnnzahn gahn riachii
stoꞌ ziahan raꞌ ba xchiꞌdxyi Dxiohs.
\v 23 Ruꞌnnahn
garaatiiꞌ xcweenta xchiꞌdxyi Dxiohs nin rutaꞌh laꞌh raꞌ
bwiinn loh duhlda, tin ziꞌchi gachicaꞌha raꞌ nuꞌh
guelnabahan nin banaa para tuꞌpazi xcweenta ziga riachii
stoꞌ raꞌ nuꞌh xchiꞌdxyi Dxiohs.
\p
\v 24 Pwihsi naannza tu ziga loh tuhbi lañih chin riah raꞌ
bwiinn tuhbi carrera sola riuuꞌ nin ruhnn gahn nin mas
rulluꞌn tuhsi niꞌchi rcaꞌha premiu nin rahca riꞌchi. Ziꞌchi
za laꞌhtu gulgahca ziga tuhbi bwiinn nin ruhnn gahn, tin
guicaꞌha za tu tuhbi premiu nin gudiꞌhi Dxiohs laꞌh raꞌ
xpwiinn Ñiꞌh.
\v 25 Garaa raꞌ bwiinn raꞌ nin riah raꞌ loh
tuhbi carrera rahpadaa raꞌ ba tihxi raꞌ ba tin ziꞌchi rahpa
tihxi raꞌ ba jweersi rooꞌ, ya laꞌh raꞌ ba ruhnn raꞌ ba gahn
tuhbi nin naa ziga tuhbi cohsa nin rñihchiloh; per laꞌh raꞌ
nuꞌh ralluꞌn raꞌ nuꞌh tin guniꞌhi Dxiohs guelnabahan nin
ayi ñichilohtiiꞌ laꞌh raꞌ nuꞌh.
\v 26 Per naꞌh ayi
cagalluꞌnaꞌhn ziga zi tuhbi nin ayi gaann ca nehza chee, ayi
cadxihldxihn ziga zi nugacaꞌhn puñehta loh bwih zi,
\v 27 sino que naꞌh rusaꞌcaziin laꞌh tiꞌxihn nee ruꞌnnahn pur
guzoꞌbadxiahgan ziga naa xigaaꞌbahn, nee ziga xclaaꞌdzi za
Dxiohs gaca, tin yaque naꞌh ba baluꞌyiꞌhn xchiꞌdxyi Dxiohs
laꞌh ziahan raꞌ bwiinn ayi gusiaꞌhan xtuhyi tiꞌxihn naꞌh.
\c 10
\s Duhlda nin basieꞌwbacaala yihca raꞌ bwiinn Israel
\p
\v 1 Bwiitsi raꞌn, ayi xclaaꞌdzihn dxiaꞌlda stoꞌ tu xcweenta
ziga guzahca raꞌ guehtu xtaada guldooꞌ raꞌ nuꞌh; guzah raꞌ ba
xpacaala tuhbi xcahyi, cun gudiiꞌdxi garaa raꞌ ba galaayi
ñihsadoꞌ xñaa.
\v 2 Pwihsi xcweenta ziga guzah raꞌ ba
xpacaala xcahyi nee cun ziga gudiiꞌdxi raꞌ ba nez galaayi
ñihsadoꞌ xñaa, niꞌchi guhca tuhbi guelrohbañihsa para
laꞌh raꞌ ba laasii gwah naꞌhla raꞌ ba guehtu Moisehs.
\v 3 Ziꞌchi gahca za garaa raꞌ ba naa nin gudahw tuhbiloh chiꞌh zi
guelwahw nin bateta Dxiohs nez llaaꞌndxibaaꞌ.
\v 4 Ziꞌchi
gahca za garaa raꞌ ba gwaaꞌ raꞌ ba ñihsa tihxi dxiah rooꞌ
laasii ayi ñihsa ñeeꞌ raꞌ ba, per Spíritu Crixtu guzahnee
raꞌ ba nez chiꞌh zi gucaꞌnzaa raꞌ ba nez loh dahan
desiertu, ya niꞌchin pur xquelrnabwaꞌ Ñiꞌh biriaꞌh ñihsa
tihxi dxiah rooꞌ chi nin naa zigazi tihxi Ñiꞌh.
\v 5 Per ya
ziga guyuuꞌ llahn stoꞌ Dxiohs xcweenta ziahan raꞌ ba,
niꞌchin ziahan raꞌ ba guhchi nez loh dahan desiertu.
\p
\v 6 Garaa raꞌ dxyiꞌdxyi raꞌ ca naa ziga tuhbi
guelruuꞌyidxyiꞌdxyi loh raꞌ nuꞌh, tin ayi saꞌbi stoꞌ raꞌ
nuꞌh guidiꞌhnn nuꞌh laꞌhgahca duhlda nin bwiꞌhnn raꞌ xtaada
guldooꞌ raꞌ nu.
\v 7 Pwihsi niꞌchin laꞌhtu ayi gaann tu dxaan
raꞌ ziga bwiꞌhnn nuhn raꞌ ba ziga rñiꞌ loh Xchihtsi Dxiohs
xcweenta raꞌ ba: “Bwiinn raꞌ guzohba raꞌ ba tin gudahw raꞌ
ba nee gwaaꞌ raꞌ ba, ya seguihdu guzaꞌloh riidzihta raꞌ
ba.”
\v 8 Nee ayi za guunn xtuꞌh tu stuhbi gunnaꞌh nin ayi
naa cheꞌhla tu, ziga bwiꞌhnn raꞌ ba. Ya pur xcweenta raꞌ ba
riiꞌ niꞌchin nin guhchi galdabi chohnnaa mihyi raꞌ ba tuhbi
dxiꞌh dxyih.
\v 9 Nee ayi za chyu gudiꞌhi llahn laꞌh Dxiohs
cun xtuhlda raꞌ nuꞌh ziga bwiꞌhnn nuhn raꞌ bwiinn raꞌ chi,
chin gudaꞌwyaaꞌ bweꞌlda laꞌh raꞌ ba ya guhchi raꞌ ba.
\v 10 Nin ayi za xi guiñiꞌnah tu pur laꞌh Dxiohs, ziga bwiꞌhnn
nuhn raꞌ ba, niꞌchin baxeꞌhla Dxiohs aanjla xteenn
guelguhchi gudxiinntiiꞌ ziahan raꞌ ba.
\p
\v 11 Garaa raꞌ cohsa raꞌ riiꞌ guzahca raꞌ guehtu xtaada
guldooꞌ raꞌ nu, niꞌchin biaꞌhanan loh Dxihtsi ziga tuhbi
jeemplu tin gaca nasiin raꞌ nuꞌh ayi chyu guunn cweenta ziga
bwiꞌhnn raꞌ ba, tin ayi guinaꞌzu raꞌ cohsa raꞌ chi laꞌhnuꞌh
loh dxyih raꞌ riiꞌ.
\v 12 Niꞌchin chyu chiꞌh zi nin ruhnn
lligaaba nabahan zaꞌca niꞌchi nez loh Dxiohs, gaapa niꞌchi
cwidadu tin ayi dxiaaba niꞌchi loh duhlda.
\v 13 Pwihsi ziga
guelrzaꞌcazii raꞌ nin nugatiꞌdxiloh tu naan laꞌhgahca
guelrzaꞌcazii nin cagatiꞌdxiloh raꞌ la garaa raꞌ lasaaꞌ tu
loh Jesucristu. Per ayi cweꞌhe stoꞌ Dxiohs laꞌh tu nee ayi
za gusaaꞌn Ñiꞌh sacazii ru tu loh nin zahca guunn tu waanta,
tin loh raꞌ guelrzaꞌcazii nin dxieꞌdxiahlda raꞌ guunn Ñiꞌh
cumpahñu laꞌhtu xa taꞌh tu loh raꞌ guelrzaꞌcazii raꞌ chi.
\p
\v 14 Niꞌchin nin rñiꞌn loh tu bwiitsi raꞌn, ayiru gaann tu
dxaan yuh raꞌ.
\v 15 Rñiꞌn loh tu ziga zi loh tuhbi bwiinn
nasiin; gulgachaꞌga lasaaꞌ xigaaba tu xcweenta dxyiꞌdxyi nin
rñiꞌn loh tu;
\v 16 chin riidaꞌw nuꞌh xchih xteenn Daada
Jesucristu, xchih chi naan tuhbi sehn nabahannee nuꞌh laꞌh
Daada Jesucristu. Cun chin rachidwaa nuꞌh vihnnu nin nuu
laꞌn copa guhcataaꞌyi, rñiꞌ laꞌn lastoꞌ nuꞌh gudxihlli Daada
Jesucristu xcweenta xtuhlda nuꞌh loh cruhzi cun llarihn
Ñiꞌh. Niꞌchin chin riidaꞌw raꞌ nuꞌh pahn, rzaꞌloh ziga naa
xcweenta nuꞌh, naa nuꞌh tuhsi loh tihxi Ñiꞌh nin batiꞌdxi
Ñiꞌh gucah loh cruhzi xcweenta raꞌ nuꞌh.
\v 17 Nicala
ziahan naa nuꞌh per naa raꞌ nuꞌh ziga tuhsi tihxi laasii
garaa nuꞌh riidaꞌw nuꞌh tuhsi pahn chin riidaꞌw nuꞌh xchih
pascu xteenn Daada Jesucristu.
\p
\v 18 ¡Gulguiaꞌha xa ruhn raꞌ bwiinn Israel raꞌ! Rahw raꞌ ba
xpweꞌhla raꞌ guidxaꞌh raꞌ nin rudiꞌhi guhn raꞌ ba nez loh
Dxiohs loh bacuꞌga laꞌn guidoꞌ rooꞌ, ya garaa raꞌ bwiinn
nin caꞌha costumbre raꞌ riiꞌ naa raꞌ ba tuhsi cun laꞌh raꞌ
ba.
\v 19 Ayi cañiꞌn lasahca raꞌ ziga dxaan yuh raꞌ, o
lasahca raꞌ bweꞌhla raꞌ nin rdziiꞌba raꞌ loh dxaan yuh que
ziga xiilla stuhbi clahsa bweꞌhla raꞌ.
\v 20 Nin rñiꞌn naa
xcweenta ziga bwiinn raꞌ nin ayi nuꞌnbwaꞌ laꞌh Dxiohs
laasii cohsa raꞌ nin rudiꞌhi guhn raꞌ ba loh dxaan yuh raꞌ
ayi cayuhn raꞌ ban loh dxaan yuh si sino que nee loh
bwiinndxaaba, ya naꞌh ayi xclaaꞌdzihn guidxaꞌga tu loh raꞌ
bwiinn nin rudiꞌhi guhn nez loh bwiinndxaaba.
\v 21 Ayi nuu
guee tu nin nuu laꞌn xcohpa Daada Jesucristu nin rusiaa
lastoꞌ nuꞌh loh duhlda nee cun neegaꞌh cohpa nin rudiꞌhi raꞌ
ba loh bwiinndxaaba; nee ayi za nu gahw raꞌ za nuꞌh xchih
xteenn Daada Jesucristu sidela neegaꞌh guidaꞌw za nuꞌh xchih
nin rudiꞌhi raꞌ ba loh bwiinndxaaba,
\v 22 o ¿ta xclaaꞌdzi
nuꞌh gachyiꞌchi nuꞌh laꞌh Daada Jesucristu? ¿Gu mahzi
guelrnabwaꞌ ru nadxiaapa nuꞌh que laꞌh Ñiꞌh?
\s Xnehza gulguiꞌhnn tin ziꞌchi guiñiꞌ zaꞌca bwiinn lah Dxiohs
\p
\v 23 Guchii ca, zahca guidiꞌhnn nuꞌh xi chiꞌh zi nin
xclaaꞌdzi nuꞌh, per ayi garaa raꞌ dxiꞌhn naa raꞌn cohsa raꞌ
nin ralluꞌyi para laꞌh raꞌ nuꞌh. Per nuu raꞌ nin ayi
gacanee gachiooꞌ raꞌ nuꞌh loh guelriachii stoꞌ xteenn
Dxiohs.
\v 24 Ayi guunn tu lligaaba chiꞌhyi tu xquelnazꞌaca
gahca tu; mahzi bwen gulchiꞌhyi xquelnazaꞌca bwiinn lasaaꞌ
tu.
\v 25 Gulgahw xi chiꞌh zi bweꞌhla raꞌ nin rdooꞌ loh
dxiaaꞌ sinque ayi guinaabadxyiꞌdxyi tu canehza zeꞌen tin ayi
ziꞌchi nagah guinaꞌzu llahn loh xigaaba tu,
\v 26 laasii loh
Xchihtsi Dxiohs caa dxyiꞌdxyi raꞌ rii: “Guidxyiyuh, cun
garaa raꞌ nin nuu raꞌ lohon, naa xteenn Dxiohs.”
\p
\v 27 Per sidela laꞌh tuhbi ziga bwiinn nin ayi riachii stoꞌ
ñiꞌh xchiꞌdxyi Dxiohs raziꞌlaaꞌdzi ba yiꞌh tuhbi guelwahw,
nee guiñiꞌ stoꞌ luꞌh chenee luꞌh ba, cun gudahw sinque ayi
guinaabadxyiꞌdxyi luꞌh tin ayi gaca chiohpa loh xigaaba
luꞌh.
\v 28 Per sidela chyulla nnaa loh luꞌh: “Bweꞌhla riiꞌ
nin gudziiꞌba loh dxaan raꞌ ziga guhn”, pwihsi ayi gahw
luꞌhn, tin ayi pur niꞌchi guñihchi bwiinn nin guñiꞌ ziꞌchi,
nee tin ayi za gaca chiohpa loh xigaaba chyu chiꞌh zi.
\v 29 Cañiꞌn xcweenta ziga naa xigaaba stuhbi bwiinn chi, ayi
xcweenta dxiꞌh luꞌh. Per ziuuꞌ tuhbi nin guinaabadxyiꞌdxyi:
“¿Xixnaa zohbapaꞌcaa loh stuhbi bwiinn naꞌh pur nin rahca
chiohpa xigaaba ba xcweenta nin ruꞌnnahn?
\v 30 Nee sidela
naꞌh rudiꞌhihn guelzuxchiilli nez loh Dxiohs pur xcweenta
guelwahw nin raawuhn, ¿xixnaa chiꞌh rñiꞌyah raꞌ bwiinn naꞌh
pur nin raawuhn?”
\v 31 Pwihsi niꞌchin sidela laꞌhtu rahw
tu o reeꞌ tu ziga xilla guelwahw raꞌ, o ruhnn tu xilla
stuhbi cohsa, gulguiꞌhnnan para gaca lasahca lah Dxiohs,
\v 32 nee ayi za gucheꞌh tu nin laꞌh raꞌ bwiinn Israel raꞌ,
nee nin laꞌh raꞌ za bwiinn raꞌ nin ayi naa raꞌ bwiinn
Israel, nee nin laꞌh raꞌ za bwiinn nin naa raꞌ xpwiinn
xquidoꞌ Dxiohs.
\v 33 Naꞌh ziga naa za xigaaꞌbahn,
rdxiꞌhyihn tal ziga dxiuꞌ stoꞌ bwiinn; ayi cadxiꞌhyi dxiꞌhn
xcweenta xquelnazaꞌcaꞌhn sino que cadxiꞌhyihn xquelnazaꞌca
raꞌ ziahan duxa raꞌ bwiinn, tin taꞌh raꞌ ba loh duhlda pur
nin gwachii stoꞌ raꞌ ba xchiꞌdxyi Dxiohs.
\c 11
\p
\v 1 Gulguiꞌhnn ziga nin ruꞌnnahn laasii naꞌh ruꞌnnahn ziga
naa xcweenta Jesucristu.
\s Xcweenta ziga nahpa guunn raꞌ gunnaꞌh laꞌn xquidoꞌ Dxiohs
\p
\v 2 Bwiitsi raꞌn, riahxi lastoꞌn pur laꞌhtu laasii
guillii-guillii riagannahstoꞌ tu naꞌh nee zeezahnee za tu
dxyiꞌdxyi raꞌ nin baluꞌyiꞌhn laꞌhtu,
\v 3 per xclaaꞌdzihn
gacabwaꞌ tu laꞌh Crixtu naa nin rnabwaꞌ laꞌh raꞌ cada
tuhbigah raꞌ ndxiꞌhw, ya ndxiꞌhw naa nin rnabwaꞌ laꞌh
gunnaꞌh ziga rnabwaꞌ Dxiohs laꞌh Crixtu.
\v 4 Niꞌchin garaa
raꞌ ndxiꞌhw raꞌ nin rñiꞌ xchiꞌdxyi Dxiohs o ziga chin
rbwihdxyi-rnaaba raꞌ ba loh Dxiohs nahpa guunn ban
llihgayihca ba; sinoon zuziꞌxtuhyyi raꞌ ba laꞌh Crixtu nin
rnabwaꞌ laꞌh raꞌ ba.
\v 5 Per ya ziga garaa raꞌ gunnaꞌh raꞌ
nin rbwihdxyi-rnaaba loh Dxiohs o rñiꞌ ba xchiꞌdxyi Dxiohs
loh stuhbi bwiinn nee llihgayihca gunnaꞌh chi cagasiaꞌhan
xtuhyi ba laꞌh nin rnabwaꞌ laꞌh ba, laasii naa ba ziga zi
tuhbi gunnaꞌh nin bigah yihca ñiꞌh.
\v 6 Ya sidela laꞌh
tuhbi gunnaꞌh ayi gudziiꞌba ba xpaayii ba yihca ba mejor
guigah yihca ba; ya sidela gatuhyi loh gunnaꞌh pur nin
guigah yihca ba, pwihsi mejor gudziiꞌba xpaayii ba yihca ba.
\v 7 Ya ziga ndxiꞌhw raꞌ ayi nuu guzoꞌba ba llumbrehyi yihca
ba o xilla stuhbi cohsa, laasii ndxiꞌhw naa xtuhxa Dxiohs
cun llaꞌñih xteenn Ñiꞌh, ya gunnaꞌh raꞌ naa ziga llaꞌñih
xteenn raꞌ ndxiꞌhw.
\v 8 Pwihsi chin gulahchixchih Dxiohs
laꞌh ndxiꞌhw ayi biinloh ndxiꞌhw tihxi gunnaꞌh sino que
gunnaꞌh biinloh tihxi ndxiꞌhw.
\v 9 Gunnaꞌh biinloh pur laꞌh
ndxiꞌhw, per ayi ndxiꞌhw dxiꞌh pur xcweenta gunnaꞌh.
\v 10 Niꞌchin nahpa dxieꞌw yihca gunnaꞌh laꞌn guidoꞌ ziga tuhbi
sehn xteenn xquelrnabwaꞌ xteenn ndxiꞌhw pur xcweenta aanjla
raꞌ.
\v 11 Per nez loh Dxiohs, nin ndxiꞌhw nee nin gunnaꞌh
za ayi nuu guibahan xtuhbi raꞌ ba.
\v 12 Pwihsi sidela laꞌh
gunnaꞌh biinloh tihxi ndxiꞌhw, ziꞌchi za nnah laꞌh gunnaꞌh
naa nin ruzuh laꞌh tuhbi ndxiꞌhw guidxyiyuh per tuhbi dxiꞌh
Dxiohs ruhnnchaꞌyi laꞌh raꞌ bwiinn.
\p
\v 13 Pwihsi laꞌh gahca tu, ¿xa rwaꞌha tu sidela naa bwen
chin cwiidxyi-guinaaba tuhbi gunnaꞌh Dxiohs, nee ayi tsiiba
baayii yihca raꞌ ba?
\v 14 Pwihsi laꞌh raꞌ nuꞌh nin naa raꞌ
nuꞌh bwiinn ndxiꞌhw raꞌ laꞌh gahca nuꞌh rudiꞌhi xtuhyi loh
raꞌ nuꞌh ziga chioo duxa dxyichihca raꞌ nuꞌh.
\v 15 Ya ziga
gunnaꞌh raꞌ riahxi raꞌ ba naa yihca raꞌ ba ziga nuꞌhla
dxyichihca raꞌ ba laasii ziꞌchi gucaꞌha raꞌ ba naa yihca raꞌ
ba tin rusieꞌwun yihca raꞌ ba,
\v 16 per sidela chyulla
xclaaꞌdzi childxinee dxyiꞌdxyi laꞌh nu cun xcweenta raꞌ
dxyiꞌdxyi raꞌ nin cañiꞌn loh tu, nahpa gacabwaꞌ ba nin laꞌh
nuꞌh nee nin laꞌh raꞌ ba cun nin laꞌh raꞌ za xpwiinn guidoꞌ
Dxiohs ayi chyu nuꞌnbwaꞌ stuhbi costumbre.
\s Xcweenta ziga ruxiꞌn raꞌ ba loh xchih xteenn Daada Jesucristu
\p
\v 17 Per ya loh dxyiꞌdxyi raꞌ riiꞌ nin cagacaꞌhn loh tu, ayi
ru xi guelnasaa cañiꞌn loh tu, laasii chin radiaaꞌha tu laꞌn
xquidoꞌ Dxiohs, xlawaaꞌha guunn tu nin naa bwen, sola
rutahla tu dziꞌn dxaaba raꞌ,
\v 18 laasii ziga mweer puntu
nin naa xcweenta tu, biin dxiaagahn ziga chin radiaaꞌha tu
laꞌn guidoꞌ, rlaaꞌha tu loh lasaaꞌ tu rahca tu chiohpa
cwaꞌha; nee riachii stoꞌn cayahca squiiꞌ.
\v 19 Per naꞌnnahn
nahpa gaca ziꞌca tin gacabwaꞌ tu chyu niꞌca raꞌ nin
rucaꞌhpaꞌh stoꞌ raꞌ ñiꞌh laꞌh Dxiohs, chyu niꞌca raꞌ paꞌh
lasahca ru loh xtsiꞌn Dxiohs.
\v 20 Niꞌchin chin radiaaꞌha
tu o radxaꞌga lasaaꞌ tu, ayi nuu cwih tu loh mweella nin rii
guelwahw xchih xteenn Daada Jesucristu,
\v 21 laasii chin
laꞌh xchih gurih loh mweella, chiꞌchi tuhbigah raꞌ bwiinn
rusiooba raꞌ ba rcaꞌha raꞌ ba xi rahw raꞌ ba. Gaduhbi nin
riigah nuhn raꞌ nin cachiaꞌhan pur nin gueꞌdu gahw raꞌ ba,
ya snuhn raꞌ ba ya gudahwxaꞌta raꞌ ba hasta guzuhdzi raꞌ ba.
\v 22 ¿Tayi yihdzi tu gahw tu nee guee za tu? o ¿xi naa
cabweꞌhe stoꞌ tu xquidoꞌ Dxiohs, niꞌchin nin rusiaꞌhan
xtuhyi tu bwiinn nin ayi xi nahpatiiꞌ? ¿Xi niꞌca guiñiꞌn
loh tu nnah? ¿Gu guiñiꞌzaꞌcaꞌhn loh tu xcweenta nin ruhnn
tu? ¡Gurñah loh tu guiñiꞌzaꞌcaꞌhn loh tu!
\s Xchih xteenn Daada Jesucristu
\r (Mt. 26.26‑29; Mr. 14.22‑25; Lc. 22.14‑20)
\p
\v 23 Baluuꞌyi Daada Jesucristu naꞌh laꞌhgahca nin baluꞌyiꞌhn
loh tu xcweenta ziga bwiꞌhnn Ñiꞌh guxiin nin gudahwnee
Ñiꞌh laꞌh raꞌ xpwiinn Ñiꞌh tuhbi xchih xteenn pascu,
guxiin nin gudooꞌ Ñiꞌh, chin gucaꞌha Ñiꞌh pahn,
\v 24 ya
chin guyaꞌloh badiꞌhi Ñiꞌh guelzuxchiilli loh Dxiohs,
chiꞌchi gudxiꞌzi Ñiꞌh pahn chi ya rahbi Ñiꞌh: “Gulgahw;
deeꞌ naa ziga tiꞌxihn nin gutiꞌdxiꞌhn loh guelguhchi
xcweenta tu. Squiiꞌ guunn tu tin dxiaganna stoꞌ tu naꞌh.”
\v 25 Ziꞌchi gahca za bwiꞌhnn Ñiꞌh cohpa vihnu chin
guluhlla gudahw raꞌ ba, chiꞌchi rahbi Ñiꞌh loh raꞌ xpwiinn
Ñiꞌh: “Nin nuu laꞌn cohpa riiꞌ naa ziga rihn nin nuu
tiꞌxihn nin guixiꞌhn chin chiinn raꞌ ba naꞌh, tin ziꞌchi
gacan tuhbi dxyiꞌdxyi cuubi nin gusiaꞌhan Dxiohs loh raꞌ
bwiinn raꞌ nin bagulii Ñiꞌh naa xpwiinn Ñiꞌh. Pwihsi
squiiꞌ za guunn tu tin dxiagannastoꞌ tu naꞌh.”
\v 26 Chin
gahw tu pahn chi nee chin guee tu nin nuu laꞌn cohpa chi,
cayuhnn tu cagaluuꞌyi tu nin bwiꞌhnn Jesucristu chin
gudxihlli Ñiꞌh xcweenta raꞌ xtuhlda raꞌ nuꞌh loh cruhzi;
pwihsi gulchezahnee xcweenta Ñiꞌh hastayi laꞌn dxyih nin
dxiꞌ Ñiꞌh stuhbi.
\s Xcweenta ziga naa xnehza ziga gaca xchih xteenn Jesucristu
\p
\v 27 Niꞌchin nin rñiꞌn loh tu, chyu chiꞌh zi tuhbi tu nin
rahw pahn nee nin reeꞌ za cohpa nin naa xchih xteenn Daada
Jesucristu, sidela ayi ruzoꞌbadxiahga tu xchiꞌdxyi Dxiohs,
nahpa tu duhlda; naa tu ziga zi tuhbi gahca raꞌ bwiinn raꞌ
nin gudxiinn laꞌh Jesucristu chin billiꞌhi llarihn Ñiꞌh.
\v 28 Pwihsi laꞌh gahca tu gulguiaꞌha dela ayi xi xtuhlda tu,
ya chiꞌchi gulgahw pahn cun gulguee vihnu nin naa xchih
xteenn Daada Jesucristu, laasii ba batiꞌdxi cweenta tu
xtuhlda tu loh Dxiohs.
\v 29 Chyu chiꞌh zi bwiinn nin gahw,
nin guee loh xchih xteenn Daada Jesucristu, gulcaꞌnna stoꞌ
tu xixnaa gahw tu nee guee tu loh xchih xteenn Daada
Jesucristu; sinolaꞌn laꞌh gahca tu guunn tu dxiaaba
xquelnnah Dxiohs yihca tu.
\v 30 Niꞌchin nuu raꞌ ziahan raꞌ
lasaaꞌ tu nin rahcalluꞌhu raꞌ, nin ayi raꞌ jweersi, nee
neezaa nuu raꞌ nin cayahchi.
\v 31 Per sidela guidxiaapa nuꞌh
cwidahdu pur laꞌh gahca nuꞌh, gachinaaba nuꞌh loh Dxiohs
gusiaaca Ñiꞌh xtuhlda raꞌ nuꞌh tin ayi chyu gatiidxiloh
guelnah xteenn Dxiohs.
\v 32 Per chin rutiꞌdxi Ñiꞌh
laꞌhnuꞌh loh tuhbi guelnnah, rusaꞌcazii Ñiꞌh laꞌhnuꞌh, tin
ayi gaca xcweenta nuꞌh guelguxchisi chin guunn Ñiꞌh
guelguxchisi xcweenta raꞌ bwiinn guidxyiyuh raꞌ.
\p
\v 33 Niꞌchin nin rñiꞌn loh tu bwiitsi raꞌn, chin gadiaaꞌha
tu tin gahw tu loh xchih Jesucristu, gulcweeza lasaaꞌ tu tin
tuhsi junta gahw tu.
\v 34 Sidela tuhbi tu rchiaꞌhan, nicala
gahw ba guehta yihdzi ba, tin ziꞌchi ayi guunn Dxiohs
guelguxchisi laꞌhtu. Ya cweenta nin naꞌllaꞌta ru raꞌ naꞌh
gwaꞌhan xa gaca cweenta raꞌ chi chin dxieꞌldaguiaꞌhan cuun
tu.
\c 12
\s Guelrnabwaꞌ nin rudiꞌhi Spíritu Saantu Dxiohs laꞌh cada tuhbigah xpwiinn Jesucristu
\p
\v 1 Bwiitsi raꞌn, xclaaꞌdzihn gacabwaꞌ tu xcweenta
guelrnabwaꞌ nin runiꞌhi Spíritu Saantu xteenn Dxiohs laꞌh
cada tuhbigah raꞌ nuꞌh.
\v 2 Laꞌhtu bwen-bwen naann tu chin
nagahdxi dxiuꞌnbwaꞌ tu xchiꞌdxyi Dxiohs, basaaꞌn tu
gwanaꞌhla tu ziga zi nin ayi riin loh ñiꞌh nez dihtsi raꞌ
dxaan yuh raꞌ nin ayi rñiꞌ.
\v 3 Niꞌchin nin xclaaꞌdzihn
gacabwaꞌ tu, nin tuhbi nin rñiꞌ: “¡Ayi guilasahca
Jesucristu!”, ayi cañiꞌ ban pur Spíritu Saantu Dxiohs, ya
ayi za nin tuhbi nin guiñiꞌ: “Jesuhs naa Daada”, sidela
ayi naan pur xcweenta Spíritu Saantu.
\p
\v 4 Ya nuu ziahan guelrnabwaꞌ nin rudiꞌhi Dxiohs laꞌh raꞌ
cada tuhbigah raꞌ bwiinn raꞌ nin riachii stoꞌ raꞌ ñiꞌh
xchiꞌdxyi Dxiohs, per tuhsi naa Spíritu Saantu Dxiohs nin
ruhnn dziꞌn chi laꞌn lastoꞌ raꞌ nuꞌh.
\v 5 Nuu ziahan foorma
ziga chyu guunn xtsiꞌn Dxiohs, per dziꞌn chi naan nez loh
gahca tuhsi Daada nin nuu dxibaaꞌ,
\v 6 nee ziahan za foorma
nuu ziga guunn luꞌh dziꞌn raꞌ riiꞌ, per tuhsi Dxiohs rudiꞌhi
guelrnabwaꞌ raꞌ riiꞌ laꞌn lastoꞌ raꞌ bwiinn.
\v 7 Tuhbigah
raꞌ bwiinn riinloh guriin-guriin guelrnabwaꞌ xteenn Spíritu
Saantu xteenn Dxiohs nin rudiꞌhi Ñiꞌh laꞌh raꞌ ba, tin para
garaa raꞌ nuꞌh gacanee raꞌ ba laꞌh raꞌ nuꞌh.
\v 8 Ya ziga
rudiꞌhi Spíritu Saantu guelnasiin laꞌh tuhbi raꞌ bwiinn,
ziꞌchi za pur laꞌh gahca Spíritu Saantu radzihn guelnaann
loh stuhbi raꞌ bwiinn.
\v 9 Ziꞌchi gahca za pur Spíritu
Saantu radzihn rahpa duxa tuhbi raꞌ bwiinn guelriachii stoꞌ,
ya snuhn raꞌ ba radzihn rcaꞌha raꞌ ba rusiaaca raꞌ ba bwiinn
raꞌ nin rahcalluꞌhu raꞌ,
\v 10 ya snuhn raꞌ ba radzihn rcaꞌha
raꞌ ba ruhnn raꞌ ba hasta guelmilahgru, ya snuhn raꞌ ba
rcaꞌha raꞌ ba para ruluuꞌyi raꞌ ba xchiꞌdxyi Dxiohs o pur
cohsa raꞌ nin zeꞌyahlda gaca, ya snuhn raꞌ ba radzihn rcaꞌha
raꞌ ba guelrnabwaꞌ tin rahca rahcabwaꞌ raꞌ ba cuun nin naa
Spíritu nin naa guchiipaꞌh nee neezaa cuun nin naa spíritu
nin rusaguiꞌhi; nuu raꞌ gaꞌh raꞌ ba rcaꞌha raꞌ ba
guelrnabwaꞌ tin rñiꞌ raꞌ ba ziahanloh raꞌ dxyiꞌzah raꞌ, nee
hasta nuu raꞌ za nin rcaꞌha guelrnabwaꞌ tin guiñiꞌ raꞌ ba
loh nuꞌh xi rñiꞌ bwiinn nin rahca rñiꞌ guriin-guriin
dxyiꞌzah raꞌ chi.
\v 11 Ya garaa raꞌ dziꞌn raꞌ riiꞌ ruhnn
tuhsi Spíritu, Spíritu nin rahcanee ruhn tuhbigah raꞌ nuꞌh
xtsiꞌn Ñiꞌh ziga chiꞌh zi nin xclaaꞌdzi Ñiꞌh.
\s Garaa raꞌ nuꞌh naa nuꞌh tuhsi tihxi
\p
\v 12 Laasii Crixtu naa ziga tuhbi tihxi nin nahpa ziahan
taaꞌha, pwihsi taaꞌha raꞌ riiꞌ nicala naa raꞌn ziahan
taaꞌha, per naa raꞌn tuhsi tihxi,
\v 13 laasii garaa raꞌ nuꞌh
cun tuhsi Spíritu gurohbañihsa raꞌ nuꞌh loh tuhbi tihxi,
nicala laꞌh raꞌ bwiinn Israel raꞌ o nicala laꞌh raꞌ za
bwiinn nin ayi naa raꞌ bwiinn Israel raꞌ, nicala bwiinn nin
gudooꞌ raꞌ o nicala za bwiinn raꞌ nin ayi gudooꞌ raꞌ, per
tuhsi Spíritu Saantu biaꞌhan laꞌn lastoꞌ raꞌ nuꞌh.
\p
\v 14 Laasii tihxi nuꞌh ayi naan tuhbi taaꞌha, sino que ziahan
taaꞌha.
\v 15 Sidela laꞌh ñaaꞌ nuꞌh guiñiꞌn: “Laasii ayi
naan naa tu, pwihsi ayi naan tihxi tu”, pwihsi ¿ta pur
niꞌchi chiꞌh ayi naan tuhbi lahta xteenn tihxi?
\v 16 Ya
sidela laꞌh tuhbi dxiahga nuꞌh guiñiꞌ: “Naꞌh ayi naan ziga
tuhbi bizloh, niꞌchin ayi naan loh tuhsi tihxi”, ¿ta pur
niꞌchi si chiꞌh ayi naan xteenn tihxi nuꞌh?
\v 17 Sidela
gaduhbi tihxi ñahca xteenn si tuhbi bizloh, ¿caalla nez
ñizohba chiꞌh dxiahga tu? Ya sidela xteenn si gaꞌh za
dxiahga ñahca tihxi, ¿caalla ñuuꞌ chiꞌh ziga nez ñigooꞌba
lliiꞌ tu bwih?
\v 18 Per nnah laꞌh Dxiohs ba basiaꞌhan Ñiꞌh
laꞌh raꞌn cada laꞌh raꞌn cun lahta raꞌn loh tuhbi tihxi ziga
chiꞌh zi bwiꞌhnn Ñiꞌh lligaaba.
\v 19 Sidela garaa raꞌ
taaꞌha raꞌ riiꞌ ñahca raꞌn tuhbigah si taaꞌha raꞌ, ¿caalla
ñuuꞌ chiꞌh tihxi?
\v 20 Per ziga nuuꞌ ziahan taaꞌha raꞌ per
sola naa raꞌn tuhsi tihxi.
\p
\v 21 Ziga tuhbi bizloh ayi nuu guiñiꞌn loh tuhbi naa squiiꞌ: “Ayi xi
xchiꞌhnaꞌhn yiꞌh”, nee nin tuhbi cooca yihca ayi nuu guiñiꞌin loh tuhbi ñaaꞌ:
“Ayi xchiꞌhnnaꞌhn yiꞌh”,
\v 22 sino que nnah lahta xteenn tihxi nin rñah
gulliaꞌyiꞌhn jweersi nahpa raꞌ, niꞌchi raꞌ paꞌh nin mahzi raꞌ xchiꞌhn;
\v 23 ya
laꞌh raꞌ lahta xteenn tihxi nuꞌh nin gulliaꞌyiꞌhn rachidiꞌhnn cweenta raꞌ
nuꞌh, niꞌchi raꞌ nin mahzi ru rachidxiaacu raꞌ nuꞌh cun guelnadaa. Ya ziga
lahta raꞌ hasta naa nuꞌh ndxiꞌhw o lahta hasta naa gunnaꞌh nin rudiꞌhi xtuhyi
loh nuꞌh niꞌchi raꞌ nin mahzi rahpadaa raꞌ nuꞌh,
\v 24 laasii para laꞌhnuꞌh nin
mahzi lasahcaru, ayi gapadaa nuꞌh; per Dxiohs bwiꞌhnnchaꞌyi laꞌh tihxi tin
lahta nin gulliaꞌyiꞌhn xchiꞌhn niꞌchi nin mahzi gapadaa nuꞌh.
\v 25 Bwiꞌhnn
Ñiꞌh ziꞌchi tin ayi ñuuꞌ llahn loh tihxi, tin garaa raꞌ lahta raꞌ gacanee
lasaaꞌ raꞌn.
\v 26 Ya sidela laꞌh tuhbi lahta xteenn tihxi rzaꞌcazii, pwihsi
garaa raꞌ lahta raꞌ chi rzaꞌcazii; ya sidela gaca lasahca tuhbi lahta xteenn
tihxi, ya garaa raꞌ lahta xteenn tihxi gaca lasahca.
\p
\v 27 Niꞌchin garaa nuꞌh naa nuꞌh tihxi Crixtu, ya cada
tuhbigah raꞌ nuꞌh naa tuhbigah lahta xteenn tihxi Ñiꞌh.
\v 28 Pwihsi ya ziꞌchi Dxiohs bazuh nuu raꞌ nuꞌh ziga nahpa
nuꞌh cargu xteenn guidoꞌ, ziga mweer puntu, pooxtla raꞌ,
chiꞌchi laꞌh raꞌ nin ruluuꞌyi xchiꞌdxyi Dxiohs, lwehgu ziga
nin rahca raꞌ mwehsu, ya chiꞌchi ziga nin ruhnn raꞌ gaꞌh
guelmilahgru raꞌ, ya chiꞌchi lwehgu laꞌh raꞌ ziga raꞌ nin
rusiaaca laꞌh raꞌ bwiinn dxyihdxyi raꞌ, lwehgu laꞌh raꞌ nin
ruhnn raꞌ cumpahñu laꞌh raꞌ nin xchiꞌhn gaca cumpahñu, nee
cun neezaa nin rahca rñiꞌ raꞌ guriin-guriin raꞌ dxyiꞌzah
raꞌ.
\v 29 ¿Ta garaa chiꞌh raꞌ ba naa raꞌ ba pooxtla? ¿Ta
garaa raꞌ chiꞌh raꞌ ba ruluuꞌyi raꞌ ba xchiꞌdxyi Dxiohs?
nee ¿ta garaa raꞌ chiꞌh raꞌ ba naa raꞌ mwehsu?, o ¿ta garaa
raꞌ ba ruhnn raꞌ ba guelmilahgru raꞌ?
\v 30 ¿Ta garaa raꞌ ba
nahpa raꞌ ba guelrnabwaꞌ tin dxiaaca raꞌ bwiinn? ¿Ta garaa
tu rahca rñiꞌ tu garaaloh dxyiꞌzah raꞌ? Pwihsi guyaa ayi
garaa dxiꞌh tu,
\v 31 yannah gulguiꞌhnn pur guicaꞌha tu loh
Dxiohs guelrnabwaꞌ nin naa mahzi ru chaꞌyi. Per naꞌh
guluꞌyiꞌhn laꞌh tu tuhbi neziuh zaꞌca nin mahzi lasahca ru
loh garaa raꞌ niꞌca.
\c 13
\s Guelnadziiꞌhi lasaaꞌ
\p
\v 1 Sidela naꞌh rñiꞌn garaaloh raꞌ dxyiꞌzah xteenn raꞌ
bwiinn guidxyiyuh cun xchiꞌdxyi raꞌ xaanjla Dxiohs, per
ayigaꞌh naꞌpahn guelnadziiꞌhi lasaaꞌ cun stuhbi bwiinn,
pwihsi naꞌh naan ziga zi tuhbi dahnbuhrra o ziga tuhbi
platihyi nin zaꞌbi rsiaaꞌ zi rzihdzi.
\v 2 Nee sidela naꞌh
rñiꞌn xchiꞌdxyi Dxiohs xcweenta raꞌ cohsa raꞌ nin gueꞌdu
zeꞌyahlda raꞌ gaca, o rahcabwaꞌ zahn garaa raꞌ cohsa
nagaꞌtsi xteenn Dxiohs nee cun garaa raꞌ za guelnasiin xteenn
guidxyiyuh, nee naꞌpazahn guelriachii stoꞌ ziga zahca
guiñiꞌn loh raꞌ dahan: “Biyaꞌdxu xlugahri luꞌh”, per ya
nin ruhnn gaꞌh chiꞌh sidela ayi naꞌpahn guelnadziiꞌhi lasaaꞌ
cun stuhbi bwiinn, pwihsi ya cun niꞌchi ayi chyu naan.
\v 3 Nee sidela naꞌh chiꞌziꞌhn garaa raꞌ xixteꞌnnahn guicaꞌha
raꞌ bwiinn raꞌ nin ayi xi nahpa raꞌ, o hasta gudiꞌhihn
tiꞌxihn guicaꞌdxih, per ayigaꞌh naꞌpahn guelnadziiꞌhi lasaaꞌ
laꞌn lastoꞌn, pwihsi lliaaꞌ zi naa xtsiꞌnaꞌhn.
\p
\v 4 Bwiinn raꞌ nin nuu guelnadziiꞌhi lasaaꞌ stoꞌ raꞌ ñiꞌh
nahpa raꞌ ba guelpaseensi, nee naa za raꞌ ba bwiinn zaꞌca;
ayi rzaꞌbi stoꞌ raꞌ ba xixteenn lasaaꞌ raꞌ ba, nee ayi za
naa raꞌ ba bwiinn nayaachi raꞌ.
\v 5 Ayi naa raꞌ ba bwiinn
nadoꞌbalaadzi, ayi rdxiꞌyi raꞌ ba xcweenta zi raꞌ ba, ayi
naa raꞌ ba bwiinn llahn, nee ayi za naa raꞌ ba bwiinn
riaꞌllahn stoꞌ ñiꞌh.
\v 6 Ayi riahxi raꞌ ba pur xcweenta
duhlda, sino que riahxi raꞌ ba xcweenta dxyiꞌdxyi nin naa
guchii raꞌ.
\v 7 Nin nahpa guelnadziiꞌhi lasaaꞌ niꞌchi ruhn
waanta loh xi chiꞌh zi raꞌ cohsa nee riachiiza stoꞌ ba bwen
pur xcweenta xi chiꞌh zi raꞌ cohsa, nee neezaa zeezahtiiꞌ
cabweeza ba cun rahca za rutiꞌdxiloh za ba xi chiꞌh zi
trabahjw.
\p
\v 8 Guelnadziiꞌhi lasaaꞌ ayi chuu dxyih nin ñihchilohtiiꞌ,
per zadzihn dxyih ayiru guiñiꞌ bwiinn pur xcweenta cohsa raꞌ
nin gueꞌdu gaca, nee ayiruza chezah guiñiꞌ raꞌ bwiinn
guriin-guriin dxyiꞌzah, nee ayiru za chuu guelnaann;
ziñihchiloh raꞌn.
\v 9 Laasii nnah gulliaꞌyiꞌhn rahcabwaꞌ
raꞌ nuꞌh, nee gulliaꞌyiꞌhn xchiꞌdxyi Dxiohs xcweenta raꞌ
cohsa nin chuu ru gaca rahcabwaꞌ raꞌ nuꞌh niꞌchi rachiñiꞌ
nuꞌh,
\v 10 per chin dxiꞌ Jesucristu nin nahpa guelnasiin, ya
chiꞌchi ziñihchiloh guelnaann mbah xteenn nuꞌh.
\p
\v 11 Chin guhcaꞌhn biñiꞌn, guñiꞌn ziga zi biñiꞌn, guyuuꞌzahn
ziga zi xigaaba biñiꞌn; per ya chin ba biin ca zuꞌhn,
gudiiꞌdxi guzah raꞌ xigaaba xteenn guelbiñiꞌn nin
guyuuꞌhuhn,
\v 12 laasii nnah rwaꞌha nuꞌh ziga loh tuhbi
dxiawahan nacahyi, per chin guibahannee nuꞌh laꞌh Dxiohs
llaaꞌndxibaaꞌ zwaꞌha zaꞌca nuꞌh ziga chin riidiaꞌha lasaaꞌ
nuꞌh; yannah laꞌn nuꞌnbwaꞌ mas taaꞌyiꞌhn, per ya chiꞌchi
zahcabwaꞌn xa nuꞌnbwaꞌ Dxiohs naꞌh.
\v 13 Pwihsi nnah
riaꞌhan xcweenta guelriachii stoꞌ cun xcweenta siguhra
dziꞌtsi gachicaꞌha raꞌ nuꞌh xereensi nuꞌh loh Dxiohs cun
xcweenta guelnadziiꞌhi lasaaꞌ, pwihsi loh gadxioonna raꞌ
deeꞌ nin lasahca ru naa guelnadziiꞌhi lasaaꞌ.
\c 14
\s Xcweenta ziga guiñiꞌ luꞌh dxyiꞌdxyi raꞌ
\p
\v 1 Nin naa mweergaloh gulchiꞌhyi gaapa tu guelnadziiꞌhi
lasaaꞌ laꞌn lastoꞌ tu, nee gulguinaaba za loh Dxiohs tin
guniꞌhi za Ñiꞌh tuhbi xtsiꞌn Ñiꞌh guunn tu, ziga guluuꞌyi
tu xchiꞌdxyi Ñiꞌh.
\v 2 Pwihsi ziga chin rñiꞌ tuhbi bwiinn
tuhbi dxyiꞌdxyi nin ayi chyu bwiinn rahcabwaꞌ, cañiꞌ bwiinn
chi loh Dxiohs ayi loh dxiꞌh bwiinn, laasii ayi chyu bwiinn
rahcabwaꞌ dxyiꞌdxyi nin cañiꞌ ba. Dxiꞌdxyi nin rñiꞌ ba naan
pur xcweenta Spíritu Saantu, per naan tuhbi dxyiꞌdxyi
nagaꞌtsi.
\v 3 Pwihsi ya ziga bwiinn nin ruluuꞌyi xchiꞌdxyi
Dxiohs, ruhnn ban tin rguꞌguiꞌw ba stoꞌ bwiinn nin rñiꞌnee
ba xchiꞌdxyi Dxiohs nee rusiaꞌhan nasaa ba stoꞌ za bwiinn
nin ruzoꞌbadxiahga xchiꞌdxyi Dxiohs.
\v 4 Pwihsi ya ziga
chin rñiꞌ tuhbi bwiinn guriincaa ziga tuhbi dxyiꞌzah nin ayi
rahcabwaꞌ bwiinn raꞌ laꞌn lastoꞌsi ba caguꞌguiꞌw ba ziga
riachii stoꞌ ba xchiꞌdxyi Dxiohs, ya ziga bwiinn nin
ruluuꞌyi xchiꞌdxyi Dxiohs cun ziga cweenta raꞌ nin gueꞌdu
gaca raꞌ, bwiinn chi caguꞌguiꞌw ba stoꞌ raꞌ bwiinn guidoꞌ
raꞌ xteenn Dxiohs, tin ziꞌchi mahziru riaꞌzi raꞌ ba
xchiꞌdxyi Dxiohs.
\p
\v 5 Naꞌh xclaaꞌdzihn malaayque garaa tu guiñiꞌ tu
guriin-guriin dxyiꞌzah, per nin mahzi xclaaꞌdzihn naa
guluuꞌyi tu xchiꞌdxyi Dxiohs, laasii mahzi lasahca nin rahca
ruluuꞌyi xchiꞌdxyi Dxiohs, que nin rahca rñiꞌ guriin-guriin
dxyiꞌzah sidela bwiinn nin rñiꞌ dxyiꞌdxyi nagahn raꞌ chi ayi
nuu guluuꞌyi gaꞌh ba laꞌh raꞌ bwiinn xi zee loh nin cañiꞌ ba
tin ziꞌchi mahziru chuꞌguiꞌw lastoꞌ raꞌ ba xcweenta
xchiꞌdxyi Dxiohs.
\v 6 Pwihsi niꞌchin nnah, bwiitsi raꞌn,
sidela naꞌh dxieꞌldaguiaꞌhan cuun tu nee guiñiꞌn dxyiꞌdxyi
nin ayi gacabwaꞌ tu, pwihsi ayi xi galluꞌyitiiꞌ sidela
ziꞌchi guꞌnnahn mahzi bwen guꞌnnahn guiñiꞌn loh tu tuhbi
dxyiꞌdxyi nin naa xcweenta Dxiohs, dxyiꞌdxyi nin guunn Ñiꞌh
tin gacabwaꞌ nuꞌh, o guniꞌhi Ñiꞌh gacabwaꞌ nuꞌh tuhbi
dxyiꞌdxyi nin naa guchii paꞌh, o guniꞌhi Ñiꞌh tin galuuꞌyi
nuꞌh xchiꞌdxyi Ñiꞌh, o xiilla tuhbi guelruluuꞌyi.
\p
\v 7 Ziga gazoꞌba nuꞌh, nee gazuu nuꞌh cweenta riiꞌ ziga
tuhbi dxiꞌba nin ruꞌlda bwiinn, o sea ziga tuhbi bidxee o
tuhbi harpa; per sidela bwiinn ayi guꞌlda zaꞌca raꞌ ba
dxiꞌba raꞌ riiꞌ, ¿xaalla gacabwaꞌ chiꞌh nuꞌh xi ruꞌlda raꞌ
ba?
\v 8 Ziꞌchi za ziga tuhbi loh guerru, sidela laꞌh
trompeta ayi guiñiꞌin gaduhbi laꞌgaꞌhtiiꞌ para dxihn raꞌ
bwiinn raꞌ nin rii guehrru, pwihsi nin tuhbi raꞌ ba ayi
cuꞌguihn para childxi raꞌ ba.
\v 9 Pwihsi ziꞌchi za laꞌhtu
sidela ayi guiñiꞌ tu dxyiꞌzah nin rahcabwaꞌ bwiinn
nayaa-nayaa, pwihsi ¿xa guunn raꞌ ba para gacabwaꞌ raꞌ ba
xiiñin rñiꞌ luꞌh? Pwihsi ziganaa-zigayaaca guiñiꞌ luꞌh
xchiꞌdxyi luꞌh loh bwiinn cun ayi gacabwaꞌ ba xiñin rñiꞌ
luꞌh.
\v 10 Pwihsi ziga nuu ziahan dxyiꞌzah loh guidxyiyuh,
nee guchii garaaraꞌn nuu xi ruzeꞌtan,
\v 11 ziga sidela naꞌh
ayi gacabwaꞌn dxyiꞌzah nin rñiꞌ tuhbi bwiinn loon, naan ziga
zi tuhbi bwiinn ziitu nez loh bwiinn nin cañiꞌ loon, ya
bwiinn za chi naa ba zigazizaa tuhbi bwiinn ziitu para naꞌh.
\v 12 Niꞌchin laꞌhtu nin xclaaꞌdzi raꞌ guicaꞌha guelrnabwaꞌ
xteenn Spíritu Saantu, gulguiꞌhn para guicaꞌha tu nin
galluꞌyi nin guunn para cuꞌguiꞌwru raꞌ guelriachii stoꞌ
lastoꞌ raꞌ bwiinn raꞌ nin naa raꞌ bwiinn xquidoꞌ Dxiohs.
\p
\v 13 Pwihsi niꞌchin ziga laꞌh tuhbi bwiinn nin rñiꞌ ziga
guriincaa dxyiꞌzah, guinaaba bwiinn chi loh Dxiohs
guelrnabwaꞌ xteenn Ñiꞌh tin gudiꞌhi Ñiꞌh xa guluuꞌyi ba
xcweenta cohsa nin cañiꞌ ba cun xchiꞌdxyi ba.
\v 14 Pwihsi
sidela naꞌh guꞌnnahn cwiidxyi-guinaꞌbaꞌhn loh Dxiohs cun
tuhbi dxyiꞌdxyi dxiꞌzah nin ayi gacabwaꞌn, guchiica
cabwihdxyi-canaꞌbaꞌhn loh Dxiohs cun spírituꞌhn, per ya
ziga loh xigaaꞌbahn ayi cayahcabwaꞌtiiꞌhin.
\v 15 ¿Xa niꞌca
guꞌnnahn pwihsi? Chin cwiidxyi-guinaꞌbaꞌhn loh Dxiohs cun
spíritu, nee cun neezaa cun xigaaꞌbahn guꞌnnañin. Neezaa
chin guꞌldaꞌhn himnu raꞌ cun xcweenta Spíritu Saantu cun
guriin dxiꞌzah, ziꞌchiza cun xigaaꞌbazahn guꞌldaꞌhn himno
raꞌ nin gacabwaꞌ raꞌ bwiinn.
\v 16 Laasii sidela yiꞌh cayuhnn
lasahca luꞌh laꞌh Dxiohs cun spíritu zi, ya ziga bwiinn nin
nacuubi nugacaꞌdxiahga ayi gacabwaꞌ ba loh ziga
cabwihdxyi-canaaba luꞌh loh Dxiohs laasii ayi rahcabwaꞌ ba
xiñin rñiꞌ luꞌh.
\v 17 Ya ziga rbwihdxyi-rnaaba luꞌh, naan
bwen duxa, per stuhbi bwiinn ayigaꞌh rrooꞌ guelriachiistoꞌ
stoꞌ ba.
\v 18 Rudiꞌhihn guelzuxchiilli loh Dxiohs pur nin
rahca rñiꞌn guriin-guriin dxyiꞌdxyi que loh garaa raꞌ tu,
\v 19 per nez laꞌn guidoꞌ xclaaꞌdzihn guiñiꞌn gaꞌyusi
dxyiꞌdxyi nin gacabwaꞌ tu, nin guluuꞌyi laꞌhtu, que loh
tsiꞌh mihyi dxyiꞌdxyi nin guiñiꞌn loh tu cun spíritu
xteꞌnnahn nin ayi chyu tuhbi tu gacabwaꞌ.
\p
\v 20 Bwiitsi raꞌn, ayi ruhnn tu lligaaba ziga lligaaba nin
ruhnn raꞌ biñiꞌn, sino que gulgahca ziga biñiꞌn loh raꞌ dziꞌn
dxaaba per gulgahca ziga tuhbi bwiinn nin baniin cazuu loh
raꞌ dziꞌn nin naa xnehza.
\v 21 Squiiꞌ caa loh dxihtsi lehyi
xteenn guehtu Moisehs xcweenta ziga guñiꞌ Daada Dxiohs loh
ba: “Mahzi guiñiꞌn loh raꞌ bwiinn cun guriincaa dxyiꞌdxyi
nee cun neezaa xchiꞌdxyi raꞌ bwiinn ziitu raꞌ, per nin
squiiꞌ ayi guzoꞌbadxiahga raꞌ ba xchiꞌdxyiꞌhn.”
\v 22 Niꞌchin nin guriin-guriin dxyiꞌzah naa ziga tuhbi sehn loh
raꞌ bwiinn raꞌ nin nagahdxi chechii stoꞌ raꞌ ñiꞌh xcweenta
xchiꞌdxyi Ñiꞌh, ayi loh raꞌ dxiꞌh ziga bwiinn raꞌ nin ba
gwachii stoꞌ raꞌ ñiꞌh xchiꞌdxyi Dxiohs. Per ya ziga
guelruluuꞌyi xteenn xchiꞌdxyi Dxiohs naan nin ruluuꞌyiloh
xquelrnabwaꞌ Dxiohs para laꞌh raꞌ bwiinn nin riachii stoꞌ
raꞌ ñiꞌh xcweenta xchiꞌdxyi Dxiohs, ya ayi para laꞌh raꞌ
dxiꞌh bwiinn raꞌ nin ayi riachii stoꞌ raꞌ ñiꞌh xchiꞌdxyi
Dxiohs.
\v 23 Ziga chin ba radiaaꞌha tu guidoꞌ cañiꞌ tu
guriin-guriin dxyiꞌdxyi nin ayi chyu bwiinn gacabwaꞌ, ya
gadzihn tuhbi bwiinn nin ayi gaann xa naa xcweenta Dxiohs,
ziñiꞌ ba nna ba nuu xi zeegadziiꞌba yihca tu,
\v 24 per
sidela garaa tu cañiꞌ dxyiꞌdxyi nin baniꞌhi Dxiohs, nee
hohra chi chuꞌtii tuhbi bwiinn nin ayi riachii stoꞌ ñiꞌh
xchiꞌdxyi Dxiohs, zahcabwaꞌ bwiinn chi xiñin cañiꞌ tu, nee
zudiꞌhi za ba cweenta nuu xtuhlda ba,
\v 25 ya ziꞌchi ziinloh
loh raꞌ lligaaba nin nagaꞌtsi laꞌn lastoꞌ ba, chiꞌchi
zusiaꞌchyu llihbi ba guzuꞌnllihbi ba nez loh Dxiohs, nee
ziñiꞌ za ba guchii paꞌh zuu Dxiohs galaayi tu.
\s Gulguiꞌhnn garaatiiꞌ xnehza-xnehza
\p
\v 26 Pwihsi, bwiitsi raꞌn, cweenta riiꞌ naa squiiꞌ. Chin
radiaaꞌha tu, nuu tu nahpa tu salmu raꞌ, o tuhbi xchiꞌdxyi
Dxiohs nin guluuꞌyi Ñiꞌh, o xiilla xa baluuꞌyi Dxiohs ziga
para gacabwaꞌ tuhbi bwiinn, o ziga guiñiꞌ bwiinn tuhbi
dxyiꞌdxyi cun guriinnca stuhbi dxyiꞌdxyi, nee chuu za tuhbi
nin gabweꞌhexnehza dxyiꞌdxyi raꞌ chi. Pwihsi gulguiꞌhnn
garaa raꞌ deeꞌ tin chioo ru guelriachii stoꞌ lastoꞌ raꞌ
bwiinn raꞌ nin ba gwachii stoꞌ raꞌ ñiꞌh xchiꞌdxyi Dxiohs.
\v 27 Ya ziga chin riuuꞌ chyu rñiꞌ cun guriinca dxyiꞌdxyi
raꞌ, zuuguiñiꞌ chiohpa o chohnna bwiinn; per tuhbigah raꞌ ba
chuu stuhbi nin gabweꞌhe xnehza ziga guiñiꞌ cada tuhbigah
raꞌ ba.
\v 28 Per sidela ayi chyu gabweꞌhe xnehza xcweenta
dxyiꞌdxyi raꞌ chi, mahzi bwen nicala ayi guiñiꞌ raꞌ ba
guriincaa dxyiꞌdxyi raꞌ nez laꞌn guidoꞌ sino que cada
tuhbigah raꞌ ba guiñiꞌ raꞌ ba loh Dxiohs desde laꞌn lastoꞌ
gahca ba.
\v 29 Ziꞌchi za laꞌh raꞌ bwiinn raꞌ nin ruluuꞌyi
raꞌ dxyiꞌdxyi raꞌ nin rudiꞌhi Dxiohs laꞌh raꞌ ba, zuu guiñiꞌ
chiohpa o chohnna raꞌ ba, ya schiohpa-schohnna raꞌ ba
gucaꞌhdxiahga nin cañiꞌ raꞌ bwiinn raꞌ chi tin guiduꞌhun gu
rgaꞌha cañiꞌ raꞌ ba.
\v 30 Per sidela laꞌh Dxiohs guunn para
gacabwaꞌ stuhbi bwiinn nin zohba gacaꞌdxiahga, ya chiꞌchi
nin mwergaloh chi gucweꞌza ba guiñiꞌ ba.
\v 31 Pwihsi ziꞌchi
garaa tu nin rcaꞌha para rñiꞌ o para ruluuꞌyi xchiꞌdxyi
Dxiohs, zahca guiñiꞌ cada tuhbigah tu, tin ziꞌchi garaa tu
gusiꞌdxi tu nee tin ziꞌchi chioo ru guelriachii stoꞌ lastoꞌ
tu.
\v 32 Nin rñiꞌ raꞌ xchiꞌdxyi Dxiohs nahpa gacabwaꞌ raꞌ
ba xa rucweꞌza laꞌgahca raꞌ ba,
\v 33 laasii Dxiohs naa tuhbi
Dxiohs nin ruhnn garaatiiꞌ raꞌ xnehza-xnehza; ayi naa Ñiꞌh
Dxiohs nin runiꞌhi lligaaba nin zia-zieꞌzi, sino que
rbahchidxyii Ñiꞌh lastoꞌ bwiinn raꞌ nin ba gwachii stoꞌ raꞌ
ñiꞌh xchiꞌdxyi Ñiꞌh.
\p
\v 34 Ya ziga gunnaꞌh raꞌ ayi guluuꞌyi raꞌ ba xchiꞌdxyi Dxiohs nez delanta loh
raꞌ bwiinn guidoꞌ raꞌ, laasii ayi siꞌgueꞌldahn para laꞌh gunnaꞌh ziga guluuꞌyi
ba xchiꞌdxyi Dxiohs, pwihsi mahzi nahpa gaca raꞌ gunnaꞌh guzoꞌbadxiahga raꞌ
ba dxyiꞌdxyi nin rñiꞌ lehyi,
\v 35 ya sidela xclaaꞌdzi tuhbi gunnaꞌh gacabwaꞌ
xiilla, mahzi guinaabadxyiꞌdxyi ban loh xpwiinn ndxiꞌhw ban rwaaꞌ yihdzi raꞌ
ba; laasii ayi naa bwen guiñiꞌ tuhbi gunnaꞌh ziga loh tuhbi cultu.
\p
\v 36 Nahpa gacabwaꞌ tu ayi nez loh dxiꞌh tu biinloh xchiꞌdxyi Dxiohs.
\v 37 Sidela chyuulla tuhbi nin nahpa siguhra naa ba para guluuꞌyi ba xchiꞌdxyi
Dxiohs, o nahpa ba siguhra badiꞌhi Spíritu Saantu tuhbi dziꞌn rooꞌ guunn ba,
nahpa gacabwaꞌ ba cweenta riiꞌ. Garaa raꞌ dxyiꞌdxyi raꞌ nin cagacaꞌhn loh tu,
rucaꞌhñin laasii ziꞌchi gunabwaꞌ Daada Jesucristu gucaꞌhñin.
\v 38 Ya sidela
chyuulla tuhbi tu nin ayi chechii stoꞌ ñiꞌh naꞌpahn xquelrnabwaꞌ Jesucristu,
ayi za chyu chechii stoꞌ ñiꞌh xchiꞌdxyi bwiinn chi.
\v 39 Niꞌchin bwiitsi
raꞌn, gulguiꞌhnn para gaca guluuꞌyi tu xchiꞌdxyi Dxiohs, nee ayi guunn tu pur
guziaꞌtii tu ziga guiñiꞌ raꞌ ba guriin-guriin dxyiꞌdxyi raꞌ,
\v 40 per
gulguiꞌhnnan ziga naa xnehza-xnehza.
\c 15
\s Babahn zaꞌca Jesucristu loh raꞌ bwiinn guuchi
\p
\v 1 Nnah rñiꞌn loh tu bwiitsi raꞌn; gulgasannah stoꞌ tu xcweenta xchiꞌdxyi
Dxiohs nin baluꞌyiꞌhn loh tu nin gwachii stoꞌ tu nin cayuhnn nadxiipa lastoꞌ
tu.
\v 2 Pwihsi neezaa pur xcweenta dxyiꞌdxyi raꞌ riiꞌ basiaꞌpitii Dxiohs
xcweenta xtuhlda tu sidela zeezahnee tun cun gaduhbi stoꞌ tu, sidela ayi guunn
chiohpa stoꞌ tu.
\p
\v 3 Pwihsi nin naa mweergalohtiiꞌ, baluꞌyiꞌhn laꞌhtu
dxyiꞌdxyi raꞌ nin basiꞌdxiꞌhn; baluꞌyiꞌhn laꞌhtu xa guhchi
Jesucristu pur xcweenta xtuhlda raꞌ nuꞌh, ziga nin caa loh
Xchihtsi Dxiohs.
\v 4 Guñiꞌn loh tu xa bigaꞌtsi Ñiꞌh,
ya babahn Ñiꞌh loh raꞌ bwiinn guuchi chin biohnna dxyih ziga
nin rñiꞌ loh Dxihtsi xteenn Dxiohs xcweenta Ñiꞌh,
\v 5 ya
loh nin babahn Ñiꞌh, baluuꞌyiloh za Ñiꞌh loh Pehdru, ya
chiꞌchi baluuꞌyiloh za Ñiꞌh loh raꞌ gadziꞌh bichiohpa
xpooxtla Ñiꞌh,
\v 6 chiꞌchi baluuꞌyiloh za Ñiꞌh loh raꞌ gaꞌyu
gaywaꞌh bwiinn raꞌ tuhbi lahta, ziahan ru raꞌ ba nabahan
nnah, per nuu za raꞌ ba laꞌh raꞌ ba ba guhchi.
\v 7 Ya
seguihdu baluuꞌyiloh za Ñiꞌh loh Jacobo, chiꞌchi loh raꞌ
garaa tiiꞌ raꞌ pooxtla.
\p
\v 8 Pur luulchimatiiꞌ, yaque baluuꞌyiloh Ñiꞌh loh raꞌ garaa
raꞌ ba, chiꞌchi baluuꞌyiloh za Ñiꞌh loon,
\v 9 pwihsi naꞌh
gulliaꞌyiꞌhn lasahcaꞌhn loh raꞌ snuhn pooxtla, nee nin ayi
za ruhn marehsa guiriaꞌhlaan pooxtla, laasii
gucaꞌhnaꞌhlaraꞌn xpwiinn guidoꞌ Jesucristu,
\v 10 per balahsa
duxa stoꞌ Dxiohs naꞌh, niꞌchin naan tuhbi pooxtla nnah, per
ayi lliaaꞌzi balahsa stoꞌ Ñiꞌh naꞌh, laasii naꞌh
bwiꞌhnnruun dziꞌn loh garaa raꞌ ba; per ayi pur xcweenta
gahcadxiꞌhn sino que Dxiohs cayahcanee naꞌh pur nin nadziiꞌhi
Ñiꞌh naꞌh,
\v 11 per ayi xi ruhnn nicala laꞌh raꞌ ba o naꞌh
naa nin mahzi lasahca, sola nin nahpa galuuꞌyi nu naa xa
taꞌh bwiinn loh duhlda xcweenta ziga riachii stoꞌ raꞌ ba
xchiꞌdxyi Dxiohs; ya ziga gwachii stoꞌ tu guhca gulaꞌh tu
loh duhlda.
\s Xcwenta ziga gabahan raꞌ bwiinn nin guhchi
\p
\v 12 Per sidela laꞌhnu cagaluuꞌyi nu xcweenta ziga babahn
zaꞌca Jesucristu loh raꞌ bwiinn guuchi, ¿xixnaa chiꞌh nuu
raꞌ nin rñiꞌ: “Ayi chuu ziga gabahan raꞌ bwiinn guuchi”? 
\v 13 Pwihsi sidela ayi gabahan raꞌ bwiinn guuchi, ziꞌchiza
nin Crixtu ayi babahn loh guelguhchi,
\v 14 ya sidela neezaa
ayi babahn Jesucristu loh guelguhchi, pwihsi ziꞌchiza nin
xchiꞌdxyi Ñiꞌh nin raluuꞌyi raꞌ nu ayi xi guilasahcan, ya
ziga guelriachii stoꞌ nin nuu lastoꞌ tu ayi xi
guilasahcazan.
\v 15 Sidela ziꞌchi pwihsi laꞌhnuꞌh naa nuꞌh
xpwiinn Dxiohs nin rusaguiꞌhizi, nee nicala ya bachiñiꞌ nu
Dxiohs bacwaꞌhn laꞌh Jesucristu loh guelguhchi; ya sidela
ayi guchii dxiꞌh gabahan raꞌ bwiinn guuchi, pwihsi ayi za
guchii dxiꞌh bacwaꞌhn Dxiohs laꞌh Jesucristu loh guelguhchi,
\v 16 laasii sidela laꞌh raꞌ bwiinnguuchi ayi gabahan raꞌ ba,
pwihsi nin laꞌh za Crixtu ayi za babahn Ñiꞌh loh
guelguhchi.
\v 17 Ya sidela Crixtu ayi babahn Ñiꞌh loh
guelguhchi, pwihsi ziꞌchi za guelriachii stoꞌ nin nuu stoꞌ
tu ayi galluꞌyin; ya nuu gahca tu loh duhlda.
\v 18 Ya
sidela ziꞌchi pwihsi hasta cun bwiinn raꞌ nin naa xpwiinn
Ñiꞌh nin baguhchi raꞌ naa raꞌ ba nin baguñihchilohtiiꞌ.
\v 19 Ziꞌchiza garaa raꞌ nuꞌh nin nabahan chiꞌh zi loh
guidxyiyuh riiꞌ ziga naa dxyiꞌdxyi cabweza raꞌ nuꞌh
Jesucristu, naa nuꞌh mahzi bwiinn nin bizaꞌbitiiꞌ loh raꞌ
garaa raꞌ bwiinn guidxyiyuh.
\p
\v 20 Per ziga ya bacwaꞌhn Dxiohs laꞌh Jesucristu loh
guelguhchi, niꞌchin laꞌh Ñiꞌh naa Ñiꞌh mweergaloh nez loh raꞌ
bwiinn guuchi raꞌ nin gabiaꞌgarii gabahan raꞌ.
\v 21 Pwihsi
ziga biinloh guelguhchi pur xcweenta tuhsi ndxiꞌhw loh
guidxyiyuh, ziꞌchi za pur xcweenta tuhsi za ndxiꞌhw biinloh
gabahan raꞌ bwiinn loh guelguhchi.
\v 22 Ziga pur xcweenta
tuhbi ndxiꞌhw nin laa Adahn biinloh guelguhchi ziꞌchi za
nnah pur xcweenta Jesucristu chuu gabahan raꞌ bwiinn loh
guelguhchi, laasii naa raꞌ ba xpwiinn Ñiꞌh.
\v 23 Per cada
tuhbigah raꞌ nuꞌh ziga bwiꞌhnn Dxiohs lligaaba gaca:
Jesucristu naa mweer galoh, ya chin dxiꞌ Ñiꞌh stuhbi garaa
nin naa xpwiinn Ñiꞌh dxieꞌgalliꞌh Ñiꞌh loh guidxyiyuh ziga
nin nabahan raꞌ tantu ziga nin guhchi raꞌ,
\v 24 ya chiꞌchi
gadzihn raꞌ dxyih luulchima raꞌ chin guzaꞌloh Crixtu
guelrnabwaꞌ raꞌ, garaa raꞌ guelguxchisi raꞌ, nee cun
guelrnabwaꞌ raꞌ nin nuu llaaꞌndxibaaꞌ; ya chiꞌchi dxiuꞌn
Ñiꞌh ntriehgu guelrnabwaꞌ loh Xtaada Dxiohs Ñiꞌh,
\v 25 laasii Crixtu caꞌha Ñiꞌh guelrnabwaꞌ cun para hasta laꞌn
dxyih raꞌ nin garah raꞌ bwiinn nin rdxyiꞌchinee laꞌh Ñiꞌh
gutsiiga Dxiohs nez loh Ñiꞌh,
\v 26 ya luulchima nin
rdxyiꞌchinee laꞌh Ñiꞌh nin guzaꞌloh Ñiꞌh naa guelguhchi,
\v 27 laasii laꞌh Dxiohs batsiiga garaa raꞌ cohsa raꞌ nez ñaaꞌ
Crixtu. Per ziga caa loh Xchihtsi Dxiohs garaa raꞌn
gwabiiga nez ñaaꞌ Ñiꞌh, pwihsi guyaa ayi nee dxiꞌh
Daada Dxiohs guinabwaꞌ Jesucristu, laasii laꞌh Daada
Dxiohs naa nin batsiiga garaa raꞌ cohsa raꞌ nez ñaaꞌ
Jesuhs.
\v 28 Ya chin laꞌh Crixtu canabwaꞌ garaa raꞌ cohsa
raꞌ, chiꞌchi ziuꞌn Ñiꞌh ntriehgu garaa guelrnabwaꞌ loh
Xtaada Ñiꞌh nin naa Dxiohs, ya chiꞌchi tuhsi Dxiohs
guinabwaꞌ garaatiiꞌ raꞌ cohsa.
\p
\v 29 Pwihsi ziga ruhnn tu lligaaba ayi gabahan raꞌ bwiinn
loh guelguhchi, ¿xi pur rrohbañihsa chiꞌh tu xcweenta raꞌ
bwiinn guuchi nin gwachiistoꞌ ñiꞌh xchiꞌdxyi Dxiohs?
Ziꞌchiza sidela laꞌh bwiinn ayi gabahan raꞌ ba loh bwiinn
guuchi, ¿xixnaa chiꞌh ruroꞌbañihsa raꞌ ba laꞌhtu xcweenta
raꞌ bwiinn guuchi?
\p
\v 30 Nee ¿xixnaa chiꞌh za dxuu nuꞌh loh raꞌ xica guelyaꞌdxi
raꞌ gaduhbi hohra tiiꞌ?
\v 31 Rñiꞌ naannchiꞌpaꞌhn loh tu,
bwihtsi raꞌn, cayuhnn lasahcaꞌhn xcweenta tu nez loh Daada
Jesucristu Xtaada nuꞌh nin cayuhnn xtsiꞌn Ñiꞌh laꞌn lastoꞌ
tu, ya guiñiꞌn loh tu, garaa dxyih rdxihldxinee raꞌ bwiinn
naꞌh tin chiinn raꞌ ba naꞌh.
\v 32 Pwihsi sidela bwiꞌhnnaꞌhn
lligaaba zigazi tuhbi bwiinn guidxyiyuh chin bacaꞌneen laꞌh
raꞌ bwiinn raꞌ nin naa raꞌ ziga zi maan ñaꞌlaaꞌdzi raꞌ loh
guihdxyi Efesu, ¿xi gahn bwiꞌhnnaꞌhn? Sidela laꞌh raꞌ
bwiinn ayi gabahan loh guelguhchi, niꞌchin ¡gulchoꞌho!,
guidiꞌhnn nuꞌh ziga rñiꞌ raꞌ bwiinn guidxyiyuh: “Gulchoꞌho
guidaꞌw raꞌ nuꞌh nee guidwaa za nuꞌh, laasii guillii gachi
raꞌ nuꞌh.”
\p
\v 33 Ayi gusaaꞌn tu guisaguiꞌhi tu ziga zi rahbi tuhbi
dihchu: “Ayi guchaꞌga luꞌh bwiinn mahn o laꞌn zidiiꞌdxi
luꞌh xtuhxa ba.”
\v 34 Nin guunn tu nnah gulgahca nasiin,
ayi cuꞌtii tu duhlda, laasii nuu raꞌ bwiinn raꞌ loh tu nin
ayi nuꞌnbwaꞌ raꞌ laꞌh Dxiohs nin nuu dxibaaꞌ; cañiꞌn yihca
tu tin gatuhyi loh tu.
\s Xcweenta ziga gabahan raꞌ bwiinn raꞌ nin guhchi
\p
\v 35 Pwihsi ziuuꞌ nin guinaabadxyiꞌdxyi raꞌ: “¿Xa gabahan
raꞌ chiꞌh bwiinn guuchi raꞌ loh guelguhchi? ¿Xa gaca chiꞌh
tihxi raꞌ ba?”
\v 36 Squiiꞌ rñiꞌn loh bwiinn chi. ¡Bwiinn
nahdatiiꞌ! Chin rbahchi luꞌh biñih pwihsi nahpa rachiduꞌh
biñih chi o sea rñihchiloh biñih chi tin ziꞌchi rahpa
yahguiꞌhn xteenn biñih chi guelnabahan.
\v 37 Biñih nin
riaaba laꞌn yuh ayi tihxi dxiꞌh biñih chi rahca yahguiꞌhn
sino que stoꞌ biñih chi rahca yahguiꞌhn, nicala naa biñih chi
trihgu o llooba.
\v 38 Ya chiꞌchi laꞌh Dxiohs rudiꞌhi Ñiꞌh
foorma laꞌh biñih chi ziga naa xigaaba Ñiꞌh.
\v 39 Ayi
garaa dxiꞌh tihxi chyu chiꞌhzi naa tuhbiloh. Ziga tihxi
bwiinn naan guriin, tihxi guidxaꞌh naa zan guriin, ziga
tihxi raꞌ maan raꞌ nin zohba xihyi ñiꞌh guriin naazan;
ziꞌchi za tihxi raꞌ bwehlda guriin naaza tihxi raꞌ ma.
\v 40 Pwihsi ziꞌchi za nuu raꞌ tihxi raꞌ nin naa xteenn nez
llaaꞌndxibaaꞌ, nee cun tihxi za nez loh guidxyiyuh; per ziga
foorma xteenn tihxi llaaꞌndxibaaꞌ guriincaa naan loh tihxi
xteenn loh guidxyiyuh,
\v 41 laasii ziꞌchi za ziga llaꞌñih
xteenn gubihdxyi guriin naan lon llaꞌñih xteenn bweꞌhw, ya
ziꞌchi za ziga dxih llaaꞌndxibaaꞌ cada tuhbigah raꞌn
guriin-guriin naan llaꞌñih raꞌn.
\v 42 Ziꞌchi za naa
xcweenta ziga guelgabahn bwiinn loh guelguhchi, ziga chin
rgaꞌtsi tuhbi bwiinn loh guelguhchi ruuꞌdxyi tihxi ba laꞌn
baꞌ nee rñihchilohon, per chin gabahan ba loh raꞌ bwiinn
guuchi, guriin gaca tihxi ba, ayi ru guudxin laasii banuu
nabahan ba par tuꞌpazi.
\v 43 Rgaꞌtsi tihxi nin rbweꞌhestoꞌ
bwiinn, ya rabahan tihxi nacuubi nin rwaꞌha zaꞌca bwiinn loh
ñiꞌh; rgaꞌtsi tihxi nin ayi jweersi, per rabahan tihxi
nacuubi nin rahca nadxiipa duxa.
\v 44 Chin rgaꞌtsi tihxi
ziga tuhbi bwiinn laꞌn baꞌ, naa tihxi ba chi xteenn
guidxyiyuh, ya ziga tihxi cuubi ba chi nin gabahan naan
tuhbi tihxi cuubi nin rudiꞌhi Dxiohs. Niꞌchin nin nuu tihxi
bwiinn riahcan yuh, ya nuu za tihxi bwiinn ziga nin guzee
para dxibaaꞌ.
\p
\v 45 Pwihsi ziga za caa loh Xchihtsi Dxiohs, ndxiꞌhw galoh
nin laa Adahn, bwiꞌhnn Dxiohs guhca ba tuhbi bwiinn nin
gubahan; per ya Adahn nin biꞌ luulchima, niꞌchi naa
Jesucristu nin naa tuhbi Spíritu nin runiꞌhi guelnabahan
nacuubi laꞌhnuꞌh.
\v 46 Galoh naa guelnabahan xteenn
guidxyiyuh, ya chiꞌchiyi guyuuꞌ tuhbi guelnabahan nacuubi
nin biinloh nez dxibaaꞌ.
\v 47 Ziꞌchi za mweer ndxiꞌhw nin
bwiꞌhnn chaꞌyi Dxiohs guhca ba cun guxuh xteenn yuh nee naa
ba bwiinn guidxyiyuh; ya ndxiꞌhw nin raroopa naa Jesucristu,
laꞌh Ñiꞌh biehta Ñiꞌh nez dxibaaꞌ hasta nuu Dxiohs.
\v 48 Bwiinn guidxyiyuh raꞌ naa raꞌ ba ziga zi laꞌh Adahn nin
bwiꞌhnn Dxiohs cun guxuh, ya bwiinn raꞌ nin naa para
dxibaaꞌ naa raꞌ xpwiinn Jesucristu nin biehta nez guiꞌwdoꞌ
dxiaa dxibaaꞌ.
\v 49 Pwihsi ziga rñah za nuꞌh ziga bwiinn
nin guhca cun guxuh xteenn guidxyiyuh, pwihsi ziꞌchi za
guluuꞌyi guiñah nuꞌh ziga rñah bwiinn nin nuu llaaꞌndxibaaꞌ.
\p
\v 50 Pwihsi xclaaꞌdzihn guiñiꞌn loh tu bwiitsi raꞌn, nin naa
bweꞌhla nee dzihta nin guhlanee nuꞌh ayi nuu chuu raꞌn loh
xquelrnabwaꞌ Dxiohs, nacuubi gaca garaatiiꞌ; pwihsi nin
rñihchiloh ayi nuu chuu niꞌchi loh nin ayi rñihchilohtiiꞌ,
\v 51 per xclaaꞌdzihn gacabwaꞌ tu tuhbi cohsa ralaꞌn. Ayi
garaa raꞌ dxiꞌh nuꞌh gachi, per garaa raꞌ nuꞌh zahca zidxaꞌh
raꞌ nuꞌh.
\v 52 Madxihdu zigazi siin luꞌh, nee lwehgugahca
guillaala loh luꞌh, chin dxihn tu guiñiꞌ luulchima trompeta,
chiꞌchi zabahan raꞌ bwiinn raꞌ nin guhchi ya ayi ru chutiiꞌ
dxyih gachi raꞌ ba; ya neezaa laꞌh raꞌ nuꞌh zidxaꞌh za tihxi
raꞌ nuꞌh,
\v 53 laasii tihxi nuꞌh nin naa xteenn guidxyiyuh
guidxaꞌhan tin gaapa nuꞌh tihxi nuꞌh nin naa xteenn
llaaꞌndxibaaꞌ, laasii tihxi nuꞌh nin naa xteenn guidxyiyuh
rahchin, per ziga tihxi nuꞌh nin naa xteenn dxibaaꞌ ayi para
gachin; ba naan para tuꞌpazi.
\v 54 Ya ziga chin laꞌh tihxi
nuꞌh nin naa xteenn guidxyiyuh bidxaꞌh tin guidxiaapa nuꞌh
tihxi nuꞌh nin naa xteenn llaaꞌndxibaaꞌ, nee neezaa chin
laꞌh tihxi nuꞌh nin zahca gachi bidxaꞌh tin guidxiaapa nuꞌh
tihxi nuꞌh nin ayi gaca gachi, nin chuu para tuꞌpazi; ya
chiꞌchi zizohba xchiꞌdxyi Dxiohs nin rñiꞌ squiiꞌ: “Laꞌh
guelguhchi guñihchiloh laasii bwiꞌhnn Jesucristu gahn loh
guelguhchi.”
\v 55 Guelguhchi, ¿cuun xquelrnabwaꞌ luꞌh para
guinabwaꞌ luꞌh laꞌhnu? Guelguhchi, ¿cuun xchiꞌh xquelnnah
luꞌh nin ñahpa luꞌh?
\v 56 Xquelnayaan xteenn guelguhchi naa
duhlda, ya xquelrnabwaꞌ duhlda naa lehyi,
\v 57 per
zuxchiilli Dxiohs, runiꞌhi Ñiꞌh guelrnabwaꞌ laꞌhnuꞌh pur
xcweenta xteenn Daada Jesucristu.
\p
\v 58 Pwihsi niꞌchin bwiitsi raꞌn, gulchezah nayaa gaduhbi
stoꞌ tu; gulguiꞌhnn xtsiꞌn Dxiohs ayi guiriaꞌh gahn tu,
laasii laꞌhtu naann tu dziꞌn nin guunn tu xcweenta Dxiohs
ayi naan dziꞌn lliaaꞌha.
\c 16
\s Mweeyi raꞌ nin guidiaaꞌha para laꞌh raꞌ xpwiinn Dxiohs
\p
\v 1 Xcweenta mweeyi nin guidiaaꞌha para laꞌh raꞌ bwiitsi raꞌ
nuꞌh loh xchiꞌdxyi Jesucristu; gulguiꞌhnnan ziga gahca
raꞌpihn guunn raꞌ bwiinn guidoꞌ xteenn Galacia.
\v 2 Gazohba
dumingu, cada tuhbigah tu gulcweꞌhecaa tuhbi mweeyi yihca
cada tuhbigah dxyih ziga chiꞌh zi ruhnn tu gahn loh tuhbi
xmahn, gulcuꞌchaꞌyin, tin ayi hohragah laꞌh tu nuu
cagatiaaꞌha mweeyi chin dxieꞌldahn,
\v 3 tin chin gadzihnaꞌhn
guixeꞌhlaꞌhn mweeyi ca cun chiohpa-chohnna dxihtsi chenee
chyu chiꞌhzi bwiinn nin cwii tu chegasiaꞌhanan loh guihdxyi
Jerusalehn,
\v 4 ya sidela naꞌh za chaaꞌhahn, pwihsi sah raꞌ
ba choo nu.
\s Lligaaba nin bwiꞌhnn Pahblu chee ba biahja
\p
\v 5 Loh biahje riiꞌ nahpa tiꞌdxiꞌhn nez loh guihdxyi raꞌ
xteenn guihdxyi Macedonia, ya chiꞌchiyi gadzihnaꞌhn loh
guihdxyi Corintu ca.
\v 6 Pwihsi ya chiꞌchi pwehda
zahcataꞌhn riꞌca mas paaldaa dxyih, o chuuꞌhuhn riꞌca loh
gaduhbi bweꞌhw nahlda raꞌ, ya chiꞌchi laꞌhtu zahca gacanee
tu naꞌh loh biahja nin gazaaꞌhahn stuhbi lahta,
\v 7 laasii
ayi xclaaꞌdzihn tiꞌdxiꞌhn riꞌca tuhbi ladiꞌdxizi, sino que
xclaaꞌdzihn gacataꞌhn riꞌca xchih sidela laꞌh Daada
Jesucristu nnaa Ñiꞌh.
\v 8 Per ya loh guihdxyi Efesu
ziaꞌhanahn riꞌchi, tin gutiꞌdxiꞌhn lañih nin rusanna stoꞌ
raꞌ bwiinn xa biꞌ Spíritu Saantu Dxiohs,
\v 9 laasii riꞌchi
nuu ziahan raꞌ bwiinn nin xclaaꞌdzi gusiꞌdxi xchiꞌdxyi
Dxiohs, nee riꞌchi za nuu raꞌ ziahan raꞌ nin rdxyiꞌchinee
raꞌ naꞌh.
\p
\v 10 Sidela laꞌh Timoteu radzihn riꞌca, gulguiꞌhn pur chuu
nasaa stoꞌ bi tin ayi xi lligaaba chuu bi, laasii laꞌh bi
ruhnn za bi dziꞌn xteenn Daada Jesucristu ziga za naꞌh.
\v 11 Pwihsi niꞌchin nin tuhbi tu ayi cweꞌhe stoꞌ tu laꞌh bi;
mas gulguiꞌhn cumpahñu laꞌh bi loh biahja nin dxiꞌ bi riiꞌ,
laasii cabweꞌzaꞌhn laꞌh bi riiꞌ tuhsi cun spaaldaa raꞌ
bwiitsi lasaaꞌ raꞌ nuꞌh.
\p
\v 12 Pwihsi laꞌn guñiꞌ duxa loh bwiitsi nuꞌh Apolos tin
ñieꞌguiaꞌha ba xa nuu tu cun spaaldaa raꞌ bwiitsi nuꞌh, per
ayi guhca xigaaba ñiꞌ bi; per ziꞌ bi dxyih chiꞌh zi nin gaca
dxiꞌ bi.
\s GuelrgahpaDxiohs luulchima xteenn Pahblu
\p
\v 13 Gulgahca nasiin, nee gulchezah nayaa loh guelriachii
stoꞌ xteenn xchiꞌdxyi Dxiohs. Per loquesi gulgahca ndxiꞌhw,
gulgahca bwiinn nin nadaꞌn rooꞌ.
\v 14 Xi chiꞌh zi cohsa nin
guunn tu, gulguiꞌhnnan cun gaduhbi stoꞌ tu.
\p
\v 15 Laꞌhtu bwiitsi raꞌn, laꞌhtu naann xcweenta raꞌ xfamihyi
Estéfanas, nin mweer gwachii stoꞌ ñiꞌh xchiꞌdxyi Dxiohs
loh guihdxyi Acaya. Naann tu xa ruhnn duxa raꞌ ba cumpahñu
laꞌh raꞌ bwiitsi raꞌ nuꞌh nin nuu raꞌ riꞌca. Nnah rnaba
duxaꞌhn loh tu,
\v 16 gulgazoꞌbadxiahga xchiꞌdxyi raꞌ bwiinn
raꞌ ca, neezaa xchiꞌdxyi garaa raꞌ bwiinn raꞌ nin rahcanee
laꞌh raꞌ xpwiinn Dxiohs, nee cun nin ruhnn raꞌ za xtsiꞌn
Dxiohs.
\v 17 Riahxiꞌhn pur nin riꞌ raꞌ Estéfanas,
Fortunatu cun Acaico; pwihsi bwiinn raꞌ riiꞌ bwiꞌhnn raꞌ ba
dziꞌn raꞌ nin ayi guhca ñuhnn tu laasii ayi tu.
\v 18 Bwiꞌhnn raꞌ ba guyuuꞌ guiꞌw ru stoꞌn nee cun neezaa laꞌhtu,
niꞌchin gulgacabwaꞌ lasahca bwiinn raꞌ squiiꞌ.
\p
\v 19 Laꞌh raꞌ bwiinn xquidoꞌ Jesucristu nin nuu raꞌ nez loh
guihdxyi raꞌ xteenn Asia ruxeꞌhla tuhbi guelrgahpaDxiohs
para laꞌhtu. Aquila cun cheꞌhla ba Priscila, cun neezaa raꞌ
bwiinn raꞌ nin radiaaꞌha loh cultu rwaaꞌ yihdzi raꞌ ba;
ruxeꞌhla za raꞌ ba ziahan duxa guelrgahpaDxiohs para
laꞌhtu.
\v 20 Gulguicaꞌha guelrgahpaDxiohs nin ruxeꞌhla raꞌ
bwiitsi raꞌ nuꞌh riiꞌ para laꞌhtu nee gulgahpaDxiohs lasaaꞌ
ziga tuhbi ziga stuhbi, pur lah Jesucristu.
\p
\v 21 Naꞌh Pahblu ruxeꞌhla zahn tuhbi guelrgahpaDxiohs para
laꞌhtu, laꞌh gahca naꞌh bacaꞌh lehtra riiꞌ.
\p
\v 22 Sidela chyuulla ayi rucaꞌh stoꞌ ñiꞌh laꞌh Daada
Jesucristu, nuu dii bwiinn chi. ¡Gudaaꞌgah Jesucristu Daada
xteenn nuꞌh!
\p
\v 23 Daada Jesucristu guunntaaꞌyi yihca tu.
\v 24 Guelrucaꞌh
stoꞌ nin naꞌpahn xcweenta Daada Jesucristu ruxeꞌhlaꞌhn para
laꞌhtu. Ziꞌchi pwihsi.