\id 2CO
\h 2 Corintios
\toc1 2 Corintios
\mt1 Nin raroopa dxihtsi nin bacaꞌh San Pahblu loh raꞌ bwiinn Corintu
\c 1
\s GuelrgahpaDxiohs
\p
\v 1 Naꞌh Pahblu naan tuhb pooxtla xteenn Jesucristu laasii
ziꞌchi xclaaꞌdzi Dxiohs guluꞌyiꞌhn xchiꞌdxyi Ñiꞌh. Naꞌh
nee neezaa laꞌh Timoteu, nin naa bwiitsi lasaaꞌ nuꞌh pur
xcweenta xchiꞌdxyi Dxiohs; racaꞌh nuꞌh dxihtsi riiꞌ loh tu
bwiinn raꞌ nin naa raꞌ xpwiinn Jesucristu nez loh guihdxyi
Corintu, nee cun neezaa loh raꞌ xpwiinn Dxiohs nin rii raꞌ
nez loh guihdxyi raꞌ nin rnabwaꞌ guihdxyi Acaya.
\v 2 Ranaaba nu loh Dxiohs nin naa Xtaada nuꞌh nee cun neezaa
loh Daada Jesucristu, tin guunn Ñiꞌh cumpahñu laꞌhtu nee
gusacwachidxyii za Ñiꞌh stoꞌ tu.
\s Guelrzaꞌcazii nin batiꞌdxiloh Pahblu
\p
\v 3 Gachidiꞌhnn lasahca nu laꞌh Daada Dxiohs nin naa Xtaada
Jesucristu, laꞌh Ñiꞌh naa Dxiohs nin ralahsa stoꞌ laꞌhnuꞌh,
Dxiohs nin rbahchidxyii stoꞌ raꞌ nuꞌh,
\v 4 laasii chin
ratiꞌdxiloh raꞌ nu guelrzaꞌcazii, ziꞌchi gahca za guidiꞌhnn
nu gahn gasacwachidxyii nu stoꞌ bwiinn raꞌ nin rutiꞌdxiloh
guelrzaꞌcazii raꞌ ziga basacwachidxyii Dxiohs stoꞌ raꞌ
nuꞌh.
\v 5 Ratiꞌdxiloh nu guelrzaꞌcazii duxa nin batiꞌdxiloh
Jesucristu pur nin raluuꞌyi nu xchiꞌdxyi Ñiꞌh, ya ziꞌchi za
pur Jesucristu rdxeela nu guelrbwihdxyii stoꞌ.
\v 6 Pwihsi
niꞌchin, sidela laꞌhnu ratiꞌdxiloh nu guelrzaꞌcazii, naan
guelridxyii stoꞌ para laꞌhtu, tin taꞌh za tu loh duhlda, nee
tin ziꞌchi za guunn tu waanta gutiꞌdxiloh tu laꞌhgahca
guelrzaꞌcazii nin cadiiꞌdxi nu.
\v 7 Nee ayi xi guelrzaaꞌ
riuuꞌ nu pur xcweenta tu, laasii ziga naann nu
cagatiꞌdxilohnee tu laꞌhnu loh guelrzaꞌcazii, pwihsi ziꞌchi
za nee laꞌhtu zusacwachidxyii Dxiohs lastoꞌ tu ziga gahca
rusacwachidxyii Ñiꞌh lastoꞌ nu.
\p
\v 8 Bwiitsi lasaaꞌ raꞌn, xclaaꞌdzihn gacabwaꞌ tu xcweenta
raꞌ guelrzaꞌcazii nin batiꞌdxiloh nu nez loh raꞌ guihdxyi
nin rnabwaꞌ Asia. Guhcan tuhbi guelrzaꞌcazii duxa rooꞌ nin
basiaꞌhan siisii laꞌh nu, nee hasta bachidiꞌhnn nu lligaaba
ayi chyu ñareꞌh riꞌchi cun guelnabahan.
\v 9 Bidiꞌhnn nu
lligaaba riꞌchi chiꞌh zi ñahchi nu; bachizaꞌca nu squiiꞌ tin
basiꞌdxi nu xa chechii stoꞌ nu laꞌh Dxiohs nin rucwaꞌhn
laꞌh raꞌ bwiinn guuchi, ya ayi laꞌh gahca dxiꞌh raꞌ nuꞌh.
\v 10 Dxiohs bataꞌh laꞌhnu loh guelguhchi chi, nee zeezah
nugataꞌh Ñiꞌh laꞌhnu loh guelyaꞌdxi rooꞌ xteenn guelguhchi.
Ya ziga riachii stoꞌ nu laꞌh Dxiohs, laꞌh Ñiꞌh ziazah
gutaꞌh Ñiꞌh laꞌh nu loh raꞌ guelrzaꞌcazii raꞌ,
\v 11 laasii
cayahcanee tu laꞌhnu, ziga cabwihdxyi-canaaba tu loh Dxiohs
xcweenta nu. Ya ziahan za snuhn raꞌ bwiinn zudiꞌhi
guelzuxchiilli loh Dxiohs pur xcweenta guelruhnntaaꞌyi nin
runiꞌhi Ñiꞌh laꞌhnu.
\s Xixnaa ayi gwah Pahblu nez guihdxyi Corintu
\p
\v 12 Pwihsi nuu guelnasaa laꞌn lastoꞌ nu pur xcweenta ziga
naann nu ayi xi duhlda nahpa nu cun ziga naa xtsiꞌn nu,
laasii nabahan nayaa nu nez delaanta loh garaatiiꞌ bwiinn
loh guelnadoꞌlaadzi nin baluuꞌyi Dxiohs laꞌh nu. Xnehza
nabahan nu, ayi chyu nabahan loh guelnasiin xteenn bwiinn
guidxyiyuh, sino que naaꞌhan pur nin cayahcanee Dxiohs laꞌh
nu.
\v 13 Cagacaꞌhn dxyiꞌdxyi raꞌ nin zahca
guꞌlda tu, nin zahca gacabwaꞌ tu, nee cabweꞌzaꞌhn opaꞌh
zahcabwaꞌ tu garaa raꞌ dxyiꞌdxyi raꞌ nin cagacaꞌhn,
\v 14 laꞌhgahca ziga nin ya guhcabwaꞌ tu paaldaa xchiꞌdxyi nu;
naꞌpahn siguhra gadzihn dxyih nin dxiahxi stoꞌ tu pur
xcweenta nu, ziga za dxiahxi stoꞌ nu xcweenta tu laꞌn
dxyih nin dxiꞌ Daada Jesucristu stuhbi.
\p
\v 15 Pwihsi cun lligaaba riiꞌ guclaaꞌdzihn ñaguiaꞌhn laꞌh tu
mwergaloh tin ziꞌchi ñahxi tu ñaguiaꞌhn laꞌh tu nin ñahca
chiohpa bweelta.
\v 16 Bwiꞌhnnaꞌhn lligaaba ñaguiaꞌhn cuun
tu chin zaaꞌhahn nez loh guihdxyi raꞌ xteenn Macedonia, ya
loh nin ñibiaꞌgariigaꞌhn nez loh guihdxyi Macedonia
ñuhnnlaꞌgaꞌhn ñaguiaꞌhn cuun tu nacuubi. Ya ziꞌchi
ñahcaneeza tu naꞌh loh nin ñibiaꞌgariin para nez loh
guihdxyi Judea.
\v 17 Pwehda nastoꞌ tu chin bwiꞌhnnaꞌhn
lligaaba guꞌnnahn squiiꞌ, ayi bwiꞌhnnañin cun lligaaba
guchiipaꞌh. Nee ¿ta ruhnn tu lligaaba naꞌh ruꞌnnahn
lligaaba nin rusiahchyu loh xigaaꞌbahn hohragah, ziga
guiñiꞌn “Yoo”, nee gariaꞌcagaꞌhn “Aacaꞌh”? 
\v 18 Per
Dxiohs naa nin rwaꞌhaloh laꞌhnu ayi chyu rñiꞌ loh tu
“Yoo” loh nin chyu cañiꞌ “Coh”,
\v 19 laasii laꞌh Lliiꞌn
Dxiohs Daada Jesucristu nin raluuꞌyi nu xchiꞌdxyi Ñiꞌh
Silvanu cun Timoteu nee naꞌh, ayi guñiꞌ Ñiꞌh “Yoo”, nee
ñiñiꞌgaꞌh Ñiꞌh “Aacaꞌh”, laasii ayi chuu dxyih nin guunn
Jesucristu ziꞌca,
\v 20 laasii garaa raꞌ dxyiꞌdxyi nin
biaꞌhannee Dxiohs laꞌhnuꞌh xcweenta Jesucristu naa raꞌn
“Yoo paꞌhcaa.” Niꞌchin chin chyu ruhnn lasahca laꞌh
Dxiohs, rachiñiꞌ nuꞌh: “Ziꞌchi gaca pwihsi” pur xcweenta
Jesucristu.
\v 21 Dxiohs cagazuudziꞌtsi laꞌhnu neezaa laꞌhtu
loh xchiꞌdxyi Jesucristu, nee gulii za Ñiꞌh laꞌh raꞌ nuꞌh
tin guidiꞌhnn nuꞌh xtsiꞌn Ñiꞌh.
\v 22 Ya bacaꞌh Ñiꞌh sehyu
xteenn Ñiꞌh laꞌhnuꞌh nee bacweꞌza za Ñiꞌh Spíritu Saantu
laꞌn lastoꞌ nuꞌh.
\p
\v 23 Canaꞌbaꞌhn loh Dxiohs tin gacabwaꞌ Ñiꞌh xi lligaaba
nuu stoꞌn, ziga ayi xclaaꞌdzihn chezahru chindxiruhn laꞌh
tu, niꞌchin nin ayi bieꞌldaguiaꞌhahn cuun tu. Per sidela
naꞌh ayi cañiꞌn dxyiꞌdxyi nin guchii, nicala gadxiinnza
Ñiꞌh naꞌh.
\v 24 Ayi nastoꞌdxiꞌh tu xclaaꞌdzi nu
gachinabwaꞌ nu laꞌh tu loh nin nahpa chechii stoꞌ tu.
Pwihsi ya zeezah xnehza tu xcweenta ziga riachii stoꞌ tu;
nin xclaaꞌdzi nu naa ziga guidxiahcaneeru nu laꞌh tu, tin
ziꞌchi dxiahxiru tu.
\c 2
\p
\v 1 Pwihsi niꞌchin bwiꞌhnnaꞌhn xigaabagahcahn ayiru
ñieꞌldaguiaꞌhahn cuun tu tin ayi ziꞌchi ñibiinnzi stoꞌ tu,
\v 2 laasii sidela naꞌh sola chiꞌhyihn nez guibiin stoꞌ tu,
ya ¿chyuulla guunn chiꞌh para ziga chuu nasaa stoꞌn
sidela sola bwixꞌhnnaꞌhn bibiin stoꞌ tu?
\v 3 Niꞌchin sola
bacaꞌhn dxihtsisi riiꞌ loh tu, laasii ayi xclaaꞌdzihn
ñieꞌldahn tin ayi ñibiinzi lastoꞌ tu, xlawaaꞌha ziga ñiguuꞌ
nasaa tu stoꞌn. Pwihsi naꞌpahn siguhra sidela dxiin stoꞌn
guelnasaa, ziꞌchi za garaatiiꞌ za tu ziin stoꞌ tu
guelnasaa.
\v 4 Pwihsi loh nin cagacaꞌhn dxihtsi riiꞌ,
ziahan lligaaba duxa bwiꞌhnnaꞌhn, hasta ñihsabwii biaaba
loon; per ayi bacaꞌhñin tin gusabiinan stoꞌ tu, sino que tin
gacabwaꞌ tu cuun guelnadziiꞌhi nin naꞌpahn cun laꞌhtu.
\s Guyuuꞌ pardohn xcweenta bwiinn nin bwiꞌhnn duhlda
\p
\v 5 Per sidela chyuulla cayuhnn nuu guelrbiin stoꞌn, ayi
tuhsi dxiꞌh stoꞌn cagasabii ba sino que neezaa lastoꞌ tu
cagasabii ba; gulliaꞌyiꞌhn dxyiꞌdxyi guiñiꞌn laasii ayi
xclaaꞌdzihn guunn tu lligaaba duxa.
\v 6 Banaa ziꞌcachiꞌh
basaꞌcazii ziahan bwiinn laꞌh daada ca, ayi ru gusaꞌcazii tu
laꞌh ba nnah,
\v 7 yannah mas nin guunn tu gulgasiaꞌlda stoꞌ
tu xtuhlda ba nee gulgasiaꞌlda stoꞌ ba, tin ayi chuu
guelrbiin stoꞌ ba.
\v 8 Niꞌchin nin rnaꞌbaꞌhn loh tu
gulgaluuꞌyi xa naa guelnadziiꞌhi lasaaꞌ nin nahpa tu cun
laꞌh ba nin naa desde galohyi.
\v 9 Pwihsi niꞌchin cun
chieempa bacaꞌhn dxihtsi loh tu tin guiduꞌhun zuzoꞌbadxiahga
tu dxyiꞌdxyi raꞌ nin rñiꞌn loh tu.
\v 10 Yannah ziga bwiinn
nin gusiaꞌlda stoꞌ tu xtuhlda ñiꞌh pur xi chiꞌh zi cohsa,
neezaa naꞌh zusiaꞌlda stoꞌn xtuhlda bwiinn chi. Laasii
sidela guyuuꞌ xa pura basiaꞌlda stoꞌn laꞌhtu,
bwiꞌhnnañin nez loh Jesucristu,
\v 11 tin ziꞌchi ayi nuu xa
guunn bwiinndxaaba gahn laꞌhnuꞌh; laasii naannloh nuꞌh ziga
naa xtsiꞌn ba.
\s Guyuuꞌ Pahblu guelrzaaꞌ chin badzihn ba loh guihdxyi Troas
\p
\v 12 Chin badzihnaꞌhn loh guihdxyi Troas para guluꞌyiꞌhn
xchiꞌdxyi Daada Jesucristu, seguihdugahca badxiꞌloon nuhn
bwiinn nin xclaaꞌdzi dxinndxiahga xchiꞌdxyi Jesucristu,
\v 13 per ayi gurihdxyii stoꞌn laasii ayi badxiꞌloon Titu bwihtsi
nuꞌh. Pwihsi niꞌchin gunaꞌzu neezahn para nez guihdxyi
Macedonia.
\s Jesucristu ruhnn ridiꞌhnn nuꞌh gahn
\p
\v 14 Per zuxchiilli Dxiohs zenee Ñiꞌh laꞌhnuꞌh nez loh
xneziuh Jesucristu nin rahcanee ridiꞌhnn nuꞌh gahn loh
garaatiiꞌ, ya pur laꞌhnuꞌh ruhnn Ñiꞌh xa dxiuꞌnbwaꞌ raꞌ
bwiinn nin rii garaa lahta loh guidxyiyuh xchiꞌdxyi Dxiohs
nin naa ziga zi tuhbi bwih nin xchiaꞌhnahxi dzihn.
\v 15 Laasii laꞌh nu naa nu ziga zi guxaꞌhla nin rutiꞌdxi Crixtu
nez loh Dxiohs, ya rzaꞌbi guhxa chi nez yihca raꞌ nin rlaꞌh
loh duhlda nee cun yihca raꞌ za nin cagañihchi raꞌ.
\v 16 Para laꞌh raꞌ nin riigañihchi raꞌ, guxaꞌhla riiꞌ naan ziga
zi tuhbi xchiaꞌ dxaaba nin rusazaꞌ stoꞌ laꞌh raꞌ ba pura
guelguhchi nin cabweeza laꞌh raꞌ ba, per para laꞌh raꞌ nin
rlaꞌh loh duhlda naa guxaꞌhla riiꞌ para laꞌh raꞌ ba ziga
tuhbi xchiaꞌ nahxi xteenn guelnabahan nacuubi nin gudiꞌhi
Dxiohs laꞌh raꞌ ba. ¿Chyu laa nin rahcabwaꞌ lasaaꞌ raꞌ
cohsa raꞌ ca?
\v 17 Pwihsi ayi chyu gaca ziga bwiinn raꞌ nin
rutooꞌ xchiꞌdxyi Dxiohs, laasii laꞌh nu raluuꞌyi nu cun sola
ziga bacaꞌbi Jesucristu gaca, nee cun ziga nin naa
guchiipaꞌh gaca nezloh Dxiohs.
\c 3
\s Dxyiꞌdxyi cuubi raꞌ nin basiaꞌhan Dxiohs loh raꞌ nuꞌh
\p
\v 1 Chin rachiñiꞌ nu dxyiꞌdxyi raꞌ ca, ¿ta rachiñiꞌ nu
dxyiꞌdxyi zaꞌca pur xcweenta gahca nu? Ziga nuu raꞌ nin
rcaꞌh dxihtsi nin rñiꞌ raꞌ naa raꞌ ba zaꞌca duxa, o ¿ta
xclaaꞌdzi tu galuuꞌyi nu loh tu lasaaꞌ raꞌ dxihtsi raꞌ ca?,
o ¿ta guinaaba nu guunn tu lasaaꞌ raꞌ dxihtsi ca gachicaꞌha
nu ziga ruhnn raꞌ nuhn raꞌ bwiinn raꞌ?
\v 2 Laꞌhtu naa ziga
xchihtsi nu nin rñiꞌ xa naa nu, nin caa lastoꞌ tu, ya garaa
raꞌ bwiinn rwaꞌha raꞌ ba xa gwachii stoꞌ tu xchiꞌdxyi Dxiohs
laasii baluuꞌyi nu xchiꞌdxyi Ñiꞌh loh tu.
\v 3 Laꞌhtu naa
tuhbi carta nin caa pur Jesucristu ya badzihnan pur laꞌh nu.
Naan tuhbi carta nin ayi caa cun chiinda, sino que cun
Spíritu Saantu xteenn Dxiohs nin nuu nabahan para tuꞌpazi;
ayi naan tuhbi carta ziga nin rcah loh tuhbi tahblu dxiah
sino que naan nez lastoꞌ bwiinn raꞌ.
\p
\v 4 Naann chaꞌyi nu xcweenta raꞌ riiꞌ, laasii pur xcweenta
Jesucristu ayi guelnadxyiꞌbi stoꞌ nu nez loh Dxiohs,
\v 5 per
ayi nu guidiꞌhnn cada tuhbigah nu dziꞌn xichiꞌh zi dziꞌn
zaꞌca nin rachidiꞌhnn nu pur xcweenta gahca nu, laasii garaa
raꞌ nin rachidiꞌhnn nu naan pur rahcanee Dxiohs laꞌhnu.
\v 6 Pwihsi laꞌh Ñiꞌh runiꞌhi guelnadaꞌn laꞌhnu, ziga naa raꞌ nu
mooza loh xteenn dxyiꞌdxyi cuubi nin biaꞌhan dxyiꞌdxyinee
Ñiꞌh laꞌh nuꞌh. Per dxyiꞌdxyi cuubi ca ayi naan ziga naa
xlehyi guehtu Moisehs nin basaꞌbi laꞌh bwiinn loh duhlda,
sino que dxyiꞌdxyi cuubi nin raluuꞌyi nu, naa nin bieꞌnee
Spíritu Saantu xteenn Dxiohs, ya runiꞌhi Ñiꞌh guelnabahan
nacuubi laꞌhnuꞌh.
\v 7 Lehyi baluuꞌyi guyuuꞌ xtuhlda raꞌ
bwiinn, ya guhchi raꞌ ba. Ziahan sehn guyuuꞌ chin bacaꞌh
Dxiohs dxyiꞌdxyi raꞌ ca loh tahblu dxiah, per ayi guhca
ñwaꞌha raꞌ bwiinn Israel raꞌ loh guehtu Moisehs. Bidxyihbi
raꞌ ba laasii rcaꞌbachaꞌh loh ba, nicala bweꞌhgah-bweꞌhgah
zeeyuuꞌyi guelrcaꞌbachaꞌh chi loh ba.
\v 8 Ya sidela ziꞌca
guhca chin biinloh lehyi, pwihsi nnah zirooꞌ duxa ru naa
guelbachaꞌh rooꞌ nin nahpa lehyi xteenn Spíritu Saantu
Dxiohs, nin naa dxyiꞌdxyi cuubi nin baluuꞌyi nu laꞌhtu.
\v 9 Ya sidela laꞌh xlehyi guehtu Moisehs nin bieꞌnee guelguhchi
pur xcweenta duhlda guhca cun guelrcaꞌbachaꞌh, ¿xi
laꞌhxchiꞌh ayi gaca mahzi ru guelrcaꞌbachaꞌhrooꞌ xchiꞌdxyi
Jesucristu nin ruhnn guibahan nayaa raꞌ nuꞌh?
\v 10 Yannah
ayiru chyu gwaꞌha loh guelrcaꞌbachaꞌh xteenn xlehyi Moisehs
laasii guelbachaꞌh rooꞌ xteenn Dxiohs cun xchiꞌdxyi
Jesucristu mahzi ru rcaꞌbachaꞌh para tuꞌpazi,
\v 11 laasii
sidela nin biuuꞌyi chi guhpa guelrcaꞌbachaꞌh, pwihsi nnah
mahzi ru guelrcaꞌbachaꞌh rooꞌ nahpa nin ayi ñihchilohtiiꞌ.
\p
\v 12 Pwihsi pur nin naannloh nuꞌh xcweenta dxyiꞌdxyi riiꞌ
stoꞌ nuꞌh, niꞌchin ayi chyu rdxyihbi chin raluuꞌyi nu
xchiꞌdxyi Jesucristu.
\v 13 Ayi chyu guunn ziga bwiꞌhnn
guehtu Moisehs; bieꞌw loh ba cun tuhbi vehlu tin ayi ñwaꞌha
raꞌ bwiinn Israel raꞌ cayuuꞌyi guelrcaꞌbachaꞌh nin ayi naa
para tuꞌpazi nez loh ba,
\v 14 per ziga bacahyi loh xigaaba
raꞌ ba; laasii hasta laꞌn dxyih raꞌ riiꞌ chin rusiꞌdxi raꞌ
ba xcweenta dxyiꞌdxyi yuꞌxa, riaꞌhan gahca vehlu nin ayi
riapitii stoꞌ raꞌ ba, nin riapitii sola pur xcweenta
Jesucristu.
\v 15 Niꞌchin hasta laꞌn dxyih raꞌ riiꞌ chin
rusiꞌdxi raꞌ ba chihbru raꞌ xteenn guehtu Moisehs, vehlu chi
ñieꞌwun yihca stoꞌ raꞌ ba,
\v 16 per ziga caa loh Xchihtsi
Dxiohs: “Per ya chin raguꞌdzi stoꞌ tuhbi bwiinn nez loh
Dxiohs, pwihsi riapitii vehlu chi.”
\v 17 Laasii laꞌh Daada
Jesucristu naa Spíritu, nee hasta nuu Spíritu Dxiohs,
riꞌchi basiapitii Dxiohs xlehyi guehtu Moisehs.
\v 18 Pwihsi
niꞌchin laꞌhnuꞌh ziga ayiru ñieꞌw loh raꞌ nuꞌh cun tuhbi
vehlu, pwihsi naa nuꞌh ziga zi tuhbi dxiahwahan nin rcaꞌha
llaꞌñih xteenn Daada Jesucristu, laasii mahzi ru zeezah
cayahpa nuꞌh guel llaꞌñih rooꞌ xteenn Jesucristu, laasii
ziꞌchi cayuhn Spíritu Saantu xteenn Ñiꞌh.
\c 4
\p
\v 1 Pwihsi niꞌchin ayi chuu dxyih guiriaꞌh gahn nu, laasii
Dxiohs cun guelrahcanee xteenn Ñiꞌh basiaꞌhannee Ñiꞌh
dziꞌn riiꞌ laꞌh raꞌ nu.
\v 2 Niꞌchin nin bachileꞌhe stoꞌ nu
cohsa raꞌ nin rahca dxyigahsi raꞌ nin naa raꞌ cohsa xtuhyi
raꞌ; ayi rasaguiꞌhi nu bwiinn raꞌ nee ayiza dxugachaꞌh dxiꞌh
nu xchiꞌdxyi Dxiohs. Nin raluuꞌyi nu naa ziga paꞌh nin
nnaa Ñiꞌh, tin ziꞌchi rñiꞌ raꞌ bwiinn zoozah paꞌh nu loh
xneziuh Dxiohs.
\v 3 Per sidela nuu nin ayi gacabwaꞌ raꞌ
xchiꞌdxyi Dxiohs nin raluuꞌyi nu, naa raꞌ bwiinn raꞌ chi
bwiinn nin laꞌlagaꞌh cañihchiloh para tuꞌpazi,
\v 4 laasii
laꞌh bwiinndxaaba nin rnabwaꞌ loh guidxyiyuh gulahchi gueꞌla
loh xigaaba raꞌ ba; ziꞌchi ruhnn ba loh raꞌ bwiinn raꞌ nin
ayi riachii stoꞌ raꞌ ñiꞌh xchiꞌdxyi Jesucristu, tin ayi
gwaꞌha raꞌ ba loh xquelñaꞌñih xteenn xchiꞌdxyi Dxiohs nin
rñiꞌ xcweenta xaꞌñih xteenn Jesucristu, nin naa xtuhxa
Dxiohs.
\v 5 Chin raluuꞌyi nu xchiꞌdxyi Jesucristu, ayi
ruhnn lasahca nu laꞌhgahca xcweenta raꞌ nu sino que ruhnn
lasahca nu laꞌh Jesucristu nin naa Daada, ya laꞌhnu ziga
xmooza tu xcweenta Jesucristu.
\v 6 Chin bwiꞌhnnchaꞌyi
Dxiohs guidxyiyuh, guñiꞌ Ñiꞌh: “Loh nacahyi dxiinloh
tuhbi biaꞌñih nin guziaꞌñih.” Pwihsi laꞌh gahca Dxiohs
baziaꞌñih Ñiꞌh laꞌn lastoꞌ raꞌ nuꞌh tin bwiꞌhnn Ñiꞌh
biuꞌnbwaꞌ nuꞌh loh llaꞌñih xteenn Ñiꞌh nin ruluuꞌyi
Jesucristu.
\s Squiiꞌ guibahan nuꞌh loh xcweenta guelriachii stoꞌ
\p
\v 7 Laꞌh raꞌ nuꞌh naa nuꞌh ziga tuhbi guihsu nin ayi
guilasahca, per gadxah nuꞌh guelnazaꞌca nin naa xchiꞌdxyi
Dxiohs xcweenta Jesucristu, tin guluuꞌyiloh xquelnazꞌaca
xteenn xquelrnabwaꞌ Dxiohs, ayi xcweenta dxiꞌh nuꞌh.
\v 8 Ratiꞌdxiloh nu guelrzaꞌcazii garaa nehza, per ruluuꞌyi Ñiꞌh
laꞌhnu xa taꞌh nu lohon; mas nicala ayi dxiin xa guidiꞌhnn
nu, per ayi chyu chuu guelrzaaꞌ;
\v 9 nicala bwiinn raꞌ
rusaꞌcazii raꞌ ba laꞌhnu, per ayi rusaaꞌntiiꞌ Dxiohs laꞌhnu
tuhsi; nicala chiindxiah raꞌ ba laꞌhnu loh yuh, per ayi
ñiichiloh raꞌ nu.
\v 10 Nezchiꞌhzi zoo nu rzaꞌcazii nu ziga
basaꞌcazii raꞌ bwiinn laꞌh Jesucristu, tin ziꞌchi za
galuuꞌyi nu xa babahn Jesuhs loh raꞌ bwiinnguuchi.
\v 11 Caa
chiꞌh zi hasta rioo nu xclaaꞌdzi raꞌ bwiinn raꞌ chiinn raꞌ
ba laꞌh nu laasii raluuꞌyi nu xchiꞌdxyi Jesucristu tin
ziꞌchi za tihxi nu guluuꞌyiloh xquelnabahan Jesucristu loh
raꞌ bwiinn guidxyiyuh raꞌ.
\v 12 Niꞌchin rlaꞌh-rlaꞌhsi gachi
nu, tin para gapa tu guelnabahan
\p
\v 13 Laasii nahpa nu laꞌhgahca Spíritu xteenn guelriachii
stoꞌ ziga gahca nin caa loh Xchihtsi Dxiohs: “Gwachii
stoꞌn niꞌchin nin ruluꞌyiꞌhn”, pwihsi ziꞌchi za laꞌh nu;
pwihsi cun guelriachii stoꞌ gahca chi riachii stoꞌ nu, nee
raluuꞌyi za nu.
\v 14 Laasii naann nu laꞌh gahca Dxiohs nin
bacwaꞌhn laꞌh Jesucristu loh guelguhchi; laꞌhgahca za Ñiꞌh
zucwaꞌhn laꞌhnu cun Jesucristu tin guunn Ñiꞌh para zuunee
nu laꞌhtu nez loh Ñiꞌh.
\v 15 Garaa raꞌ deeꞌ raꞌ cazahca
nu pur xcweenta tu tin ziꞌchi taalaa raꞌ bwiinn ziahan nin
gudiꞌhi guelzuxchiilli loh Dxiohs pur xcweenta guelralahsa
stoꞌ xteenn Dxiohs nin cadiꞌchi loh raꞌ ba.
\p
\v 16 Pwihsi ayi chyu riaꞌhgahn, nicala laꞌh tihxi nu
cayuhllan, ya guillii-guillii cagacuubi Dxiohs spíritu nu,
\v 17 laasii guelrzaꞌcazii nin dxyugatiꞌdxiloh nuꞌh loh
guelnabahan riiꞌ rdiiꞌdxigah raꞌn, per ruhnn raꞌn rahpa nuꞌh
guelñaꞌñih nin banaa para tuꞌpazi.
\v 18 Pwihsi ayi chyu
rachidiaꞌha loh raꞌ cohsa nin niin, sino que loh raꞌ nin ayi
guidxiin; laasii cohsa raꞌ nin niin rñihchiloh raꞌn, per nin
ayi guidxiin raꞌ cohsa raꞌ chi banaa para tuꞌpazi.
\c 5
\p
\v 1 Ya ziga rahcabwaꞌ nuꞌh bweꞌltihxi nuꞌh naa ziga xahba
xaalma nuꞌh nnah loh dxyih raꞌ riiꞌ, per ziuuꞌ dxyih nin
guiñihchilohon; laasii zuniꞌhi Dxiohs tuhbi bweꞌltihxi cuubi
nuꞌh nez dxibaaꞌ nin ayi ñichilohtiiꞌ.
\v 2 Ya ziga nnah
rbiin stoꞌ nuꞌh gaduhbi nin nuu nabahan nuꞌh cun bweꞌltihxi
yuꞌxa nuꞌh, pwihsi xclaaꞌdzi nuꞌh ojlaꞌ badzihnla dxyih nin
guibahan nuꞌh cun tuhbi bweꞌltihxi cuubi nuꞌh nin
guidxiaapaa nuꞌh nez dxibaaꞌ,
\v 3 tin ziꞌchi guiñah nuꞌh
ziga zi nin gucaꞌha xahba ñiꞌh ya ayiru guiñah nuꞌh zigazi
nin zuu lligabweꞌhla.
\v 4 Yannah gaduhbi nin nabahan nuꞌh
cun bweꞌltihxi yuꞌxa nuꞌh, rbiin lastoꞌ nuꞌh hasta
rachidxiꞌn nuꞌh pur nin dxyugatiꞌdxiloh nuꞌh guelrzaꞌcazii,
laasii ayi xclaaꞌdzi nuꞌh guidxyuu lligabweꞌhla nuꞌh; mahs
xclaaꞌdzi nuꞌh gachicaꞌha nuꞌh tihxi cuubi nuꞌh, laasii
bweꞌltihxi yuꞌxa nuꞌh riiꞌ laꞌn zeediꞌdxi, ya zuniꞌhi Ñiꞌh
tihxi cuubi nuꞌh nin zeꞌ nez dxibaaꞌ.
\v 5 Laasii Dxiohs naa
nin bwiꞌhnn lligaaba gachidxiaapaa nuꞌh bweꞌltihxi cuubi
nuꞌh, cun baniꞌhi Ñiꞌh Spíritu Saantu laꞌhnuꞌh ziga tuhbi
sehn nin zuzaꞌloh xchiꞌdxyi Ñiꞌh cun laꞌh nuꞌh.
\p
\v 6 Niꞌchin ayi chyu guidxyihbi, laasii naann nuꞌh tal nin
nabahan nuꞌh loh guidxyiyuh riiꞌ, ayi gaca guibahannee nuꞌh
Daada Dxiohs llaaꞌndxibaaꞌ,
\v 7 laasii nabahan nuꞌh cun
xcweenta guelriachii stoꞌ xteenn nuꞌh, ayi xcweenta dxiꞌh
nin rachidiaꞌha nuꞌh.
\v 8 Niꞌchin nin nahpa nuꞌh siguhra
ayi chyu guidxyihbi ya xclaaꞌdzi nuꞌh mas bwen naa ayiru
chyu chuu guibahan cun bweꞌltihxi nuꞌh nin nuu loh
guidxyiyuh riiꞌ, sola cazaꞌbi stoꞌ nuꞌh chuunee nuꞌh
Jesucristu llaaꞌndxibaaꞌ.
\v 9 Niꞌchin nin tuhsi naa xigaaba
raꞌ nuꞌh guidiꞌhnn nuꞌh ziga naa xigaaba Xtaada Dxiohs nuꞌh,
nicala loh guidxyiyuh riiꞌ o nicala nez llaaꞌndxibaaꞌ,
\v 10 laasii garaa raꞌ nuꞌh zadzihn guidxyuu raꞌ nuꞌh nez loh
yahgaxiiyi Jesucristu hasta guunn Ñiꞌh guelguxchisi
xcweenta tuhbigah raꞌ nuꞌh, ya chiꞌchi tuhbigah raꞌ nuꞌh
gachicaꞌha raꞌ nuꞌh xcweenta ziga bidiꞌhnn raꞌ nuꞌh loh
guidxyiyuh, dela dziꞌn zaꞌca o dziꞌn dxaaba.
\s Dxyiꞌdxyi xcweenta guelrbwidxyii stoꞌ
\p
\v 11 Pwihsi coma rdxyihbi nu laꞌh Daada Jesucristu (nin
razoꞌbadxiahga nu xchiꞌdxyi Ñiꞌh), raluuꞌyi nu xchiꞌdxyi
Ñiꞌh loh raꞌ bwiinn tin chechii stoꞌ raꞌ ban. Per Dxiohs ba
naann Ñiꞌhn xa nabahan nu, malaayi neezaa loh xigaaba tu
gacabwaꞌ xa nabahan nu.
\v 12 Ayi chyu cañiꞌ dxiꞌh ziga naa
xcweenta gahca nu, sino que dxuganiꞌhi nu dxyiꞌdxyi loh tu
tin dxiahxi stoꞌ tu xcweenta nu, tin gaapaa tu xi dxyiꞌdxyi
nin gusiaꞌgarii tu nez loh raꞌ bwiinn raꞌ nin ruhnn nayaachi
raꞌ cun ziga rñah raꞌ ba nez loh raꞌ bwiinn, ya ayi
rahcabwaꞌ raꞌ ba xi nuu laꞌn lastoꞌ raꞌ ba.
\v 13 Pwihsi
sidela laꞌh nu rñah nu ziga bwiinn nin rahca yihca ñiꞌh,
pwihsi naa nun pur Dxiohs; ya sidela naa nu ziga bwiinn nin
rii xnehza xigaaba ñiꞌh, pwihsi naa zan para laꞌhtu,
\v 14 laasii rucaꞌh duxa stoꞌ Jesucristu laꞌh raꞌ nuꞌh, niꞌchin
nin razoꞌbadxiahga nu xchiꞌdxyi Ñiꞌh laasii naann dziꞌtsi
nu tuhbi Ñiꞌh naa nin guhchi para garaa raꞌ nuꞌh, niꞌchin
nin naa ziga garaa raꞌ nuꞌh guhchi nez loh Dxiohs.
\v 15 Jesucristu guhchi para garaa raꞌ bwiinn, tin ziꞌchi garaa
raꞌ nin riachii stoꞌ ñiꞌh xchiꞌdxyi Ñiꞌh ya ayiru nabahan
raꞌ ba para laꞌh gahca raꞌ ba sino que para laꞌh Jesucristu,
nin gubiaꞌgarii babahn para laꞌh raꞌ bwiinn raꞌ.
\v 16 Niꞌchin laꞌhnu ayi chyu gwaꞌha loh raꞌ bwiinn ziga naa raꞌ
ba loh guidxyiyuh riiꞌ. Nicala galoh biuꞌnbwaꞌ nu
Jesucristu ziga nin guhca Ñiꞌh chin gubahan Ñiꞌh loh
guidxyiyuh riiꞌ, per nnah ayiru chyu ruhnn lligaaba ziꞌchi
pur laꞌh Ñiꞌh nnah.
\v 17 Pwihsi ziga bwiinn nin ya riachii
stoꞌ xchiꞌdxyi Jesucristu, bwiinn chi ya naa tuhbi bwiinn
nacuubi, laasii ayiru rzaꞌbistoꞌ ba garaa raꞌ cohsa nin
rzaꞌbi stoꞌ raꞌ bwiinn guidxyiyuh raꞌ, mas rzaꞌbi stoꞌ ba
guunn ba xtsiꞌn Dxiohs.
\p
\v 18 Garaa deeꞌ runiꞌhi Dxiohs nin nuu dxibaaꞌ; laꞌh Ñiꞌh
basiaꞌlda stoꞌ Ñiꞌh xtuhlda raꞌ nuꞌh pur nin bwiꞌhnn
Jesucristu, nee bacaꞌbi Ñiꞌh xchiꞌdxyi Ñiꞌh laꞌhnu tin
galuuꞌyi nu pur xcweenta nin basiaꞌlda stoꞌ Ñiꞌh xtuhlda
raꞌ bwiinn.
\v 19 Nin saꞌloh deeꞌ naa squiiꞌ: pur xcweenta
Jesucristu Dxiohs cagadiꞌhi guelnasaa laꞌh raꞌ bwiinn
guidxyiyuh raꞌ cun laꞌh Ñiꞌh, laasii ayiru zenee cweenta
Ñiꞌh xcweenta duhlda xteenn raꞌ bwiinn raꞌ nin riachii stoꞌ
ñiꞌh xchiꞌdxyi Jesucristu; ya laꞌhnu bacaꞌbi Ñiꞌh tin
galuuꞌyi nu xchiꞌdxyi Ñiꞌh nin naa guelnasaa riiꞌ.
\v 20 Pwihsi laꞌhnu zoꞌpa nu ziga bwiinn raꞌ nin ruluuꞌyi
dxyiꞌdxyi xteenn Crixtu, ziga zi laꞌh Dxiohs gaca cañiꞌ loh
tu pur laꞌhnu. Niꞌchin nin ranaaba chihpa nu pur lah Crixtu
gulgahca tuhsi cun Dxiohs.
\v 21 Jesucristu ayi xi xtuhlda
Ñiꞌh guyuuꞌ, per pur laꞌhnuꞌh bwiꞌhnn Dxiohs guhchi Ñiꞌh
ziga zi tuhbi bwiinn nin guyuuꞌ xtuhlda Ñiꞌh, tin ziꞌchi
para laꞌhnuꞌh ziga naa nuꞌh tuhsi cun Jesucristu, gaca nuꞌh
tuhbi bwiinn nayaa nez loh Dxiohs.
\c 6
\p
\v 1 Pwihsi ziga naa nuꞌh tuhsi loh xtsiꞌn Dxiohs, rachiñiꞌ nu loh tu ayi
cweꞌhe stoꞌ tu nin bwiꞌhnn Dxiohs xcweenta tu, sinolaꞌn
lliaaꞌzi ziga gwachii stoꞌ tu xchiꞌdxyi Jesucristu,
\v 2 laasii squiiꞌ rñiꞌ loh xchiꞌdxyi Dxiohs:
\q Dxyih nin bwiꞌhnnaꞌhn lligaaba balahsa stoꞌn laꞌhtu,
\q bacaꞌdxiaagahn xchiꞌdxyi tu nin gunaaba tu loon;
\q ya dxyih nin guyahpitii xtuhlda tu, bwiꞌhnnaꞌhn cumpahñu laꞌhtu.
\p ¡Guldxihn dxyiꞌdxyi! Nnah naa tuhbi dxyih nin galahsa stoꞌ
Dxiohs laꞌhnuꞌh; nnah naa tuhbi dxyih nin gusiaꞌpitii Ñiꞌh
xtuhlda tu.
\v 3 Ayi chyu chiꞌhyi guunn dziꞌn nin guunn
guidxyiꞌchinee bwiinn laꞌhnu, tin ziꞌchi ayiza guiñiꞌ dxaaba
raꞌ bwiinn xcweenta xtsiꞌn nu,
\v 4 tin mahzi ru galuuꞌyi nu
ziga naa nu xmooza Dxiohs; pur pasensi nin nachidxiaapa nu
chin rusaꞌcazii raꞌ bwiinn laꞌh nu, chin ratiꞌdxiloh nu
xiilla stuhbi guelrzaꞌcazii nee chin ayi rahcabwaꞌ nu cuun
nin guidiꞌhnn nu.
\v 5 Ya chin ayi ruluuꞌyiloh xa guidiꞌhnn
nu ziga chin rucaꞌyahga raꞌ bwiinn laꞌhnu, chin rusieꞌw raꞌ
ba laꞌhnu laꞌn lahtsi dxiꞌba, cun chin riahsa raꞌ bwiinn
rucaꞌnee raꞌ ba laꞌhnu, ziga chin ayi chyu rahsi cun
ratiꞌdxiloh za nu guelrchiaꞌhan;
\v 6 neezaa raluuꞌyi nu naa
nu xmooza Dxiohs xcweenta ziga nin nabahan nayaa nu nez loh
Dxiohs. Nee cun ziga naann zaꞌca nu xchiꞌdxyi Dxiohs,
neezaa xcweenta xquelnadoꞌ laadzi nu, nee laasii pur
guelpasensi xteenn nu, neezaa laasii rbweza Spíritu Saantu
Dxiohs laꞌn lastoꞌ raꞌ nu, neezaa ziga nadziiꞌhi nu bwiinn
raꞌ,
\v 7 neezaa pur xcweenta dxyiꞌdxyi guchii paꞌh xteenn
Dxiohs, nee cun neezaa pur guelrnabwaꞌ xteenn Ñiꞌh. Caꞌha
nu tuhbi madxihdu guelnayaa xteenn Ñiꞌh; caꞌha nu guelnayaa
chi garoopa naa nu ziga lahdu derehchu cun lahdu rrabwehsa.
\v 8 Ya ziꞌchiza raluuꞌyi nu naa nu xmooza Dxiohs ziga chaꞌyi
naa xquelrnabwaꞌ nu, o riaꞌhan xtuhyi za nu. Nuu bweelta
nuu nin rñiꞌ zaꞌca xcweenta nu, ya nuu za bweelta rñiꞌnah za
raꞌ ba xcweenta raꞌ nu; nuu za bwelta rñiꞌ raꞌ ba ziga naa
nu bwiinn nin rusaguiꞌhi bwiinn, mas nicala naa nu bwiinn
nin rñiꞌ dxyiꞌdxyi nin naa guchii.
\v 9 Ya nuu bweelta
rwaꞌha raꞌ bwiinn loh nu ziga zi tuhbi bwiinn ziitu nicala
zaꞌbi dxyiꞌdxyi pur laꞌhnu ziahan lahta. Nuu bweelta rahchi
tiiꞌ nu, per rbiaꞌgarii riazah tiiꞌ nabahan nu; rzaꞌcazii
raꞌ nu per ayi rahchi nu.
\v 10 Nicala nuu nu guelrbiin per
garaa dxyih nuu nasaa stoꞌ nu. Nicala naa nu prohbi, per
rachidiꞌhnn rricu raꞌ nu ziahan raꞌ bwiinn loh xchiꞌdxyi
Dxiohs. Nicala naa nu bwiinn nin ayi xi nahpa tiiꞌ, per
nahpa nu garaalohtiiꞌ nin naa xteenn Jesucristu.
\p
\v 11 Bwiinn Corintu raꞌ, laꞌhnu bachiñiꞌ garaa nin naa
guchii loh tu, garaa gahca raꞌ dxyiꞌdxyi raꞌ nin nuu laꞌn
lastoꞌ nu.
\v 12 Nin tuhbi dxyiꞌdxyi ayi chyu bacaꞌtsi loh
tu; sola laꞌhtu rguꞌlaꞌn stoꞌ tu dxyiꞌdxyi nin nahpa guiñiꞌ
tu loh nu.
\v 13 Nnah naꞌh rñiꞌn loh tu ziga zi rñiꞌnee
tuhbi daada lliiꞌn ba: “¡Gulguiñiꞌ loh nu dxyiꞌdxyi raꞌ
nin nu laꞌn lastoꞌ tu!”
\s Naa nuꞌh xquidoꞌ Dxiohs nin nuu nabahan nez dxibaaꞌ
\p
\v 14 Ayi guchaꞌga tu bwiinn raꞌ nin ayi riachii stoꞌ raꞌ
ñiꞌh xchiꞌdxyi Dxiohs, laasii ayi gaca xtsiꞌn tu tuhbiloh,
laasii tuhbi tu xclaaꞌdzi guunn dziꞌn zaꞌca, stuhbi nin
guiclaaꞌdzi guunn dziꞌn dxaaba, ¿xa gaca loh biaꞌñih ziga
naa loh nacahyi?
\v 15 o ¿xa gaca saahnee Jesucristu laꞌh
Satanahs? ¿Xa gaca sahnee tuhbi bwiinn nin riachii stoꞌ
ñiꞌh xchiꞌdxyi Dxiohs laꞌh tuhbi bwiinn nin ayi riachii stoꞌ
ñiꞌh xchiꞌdxyi Dxiohs?
\v 16 ¿Xi nah tu? ¿Gu ziga naa
xquidoꞌ Dxiohs naa za xquidoꞌ dxaan raꞌ? Laasii laꞌhnuꞌh
naa nuꞌh xquidoꞌ Dxiohs nin nuu dxibaaꞌ, ziga gahca guñiꞌ
Dxiohs galoh:
\q Ziuuꞌhuhn nez laꞌn lastoꞌ raꞌ ba, zizaꞌneezaaraꞌn ba;
\q Naꞌh gacaꞌhn Xchiohs tu, ya laꞌhtu gaca tu xpwiiꞌnn raꞌn.
\p
\v 17 Pwihsi neezaa guñiꞌ Daada Dxiohs squiiꞌ:
\q Gulgariaꞌh lahda raꞌ bwiinn, gulguiriaꞌhcaa loh raꞌ ba;
\q ayi guinaꞌzu tu cohsa dxaaba tin ziꞌchi gaannloon laꞌhtu ziga
lliiꞌn raꞌn.
\q
\v 18 Ya chiꞌchi zahcaꞌhn tuhbi Daada loh tu,
\q ya laꞌhtu gaca tu lliiꞌngaꞌn raꞌn cun lliiꞌn dxaꞌpa raꞌn,
\q rñiꞌ Yuꞌbi Dxiohs nin nahpa garaa tiiꞌ guelrnabwaꞌ.
\c 7
\p
\v 1 Pwihsi, bwiitsi raꞌn, ziga ya biaꞌhannee Dxiohs
dxyiꞌdxyi raꞌ riiꞌ laꞌhnuꞌh, nahpa gachidiꞌhnn nayaa nuꞌh
laꞌhnuꞌh loh garaatiiꞌ tin ayi gusiaaba bweꞌhla tihxi raꞌ
nuꞌh laꞌhnuꞌh loh duhlda nee cun xcweenta xigaaba raꞌ nuꞌh
cun lastoꞌ raꞌ za nuꞌh, tin ziꞌchi gaca gachizaꞌ raꞌ nuꞌh
loh neziuh saantu xteenn Dxiohs, per chuu guelnadxyiꞌbi
xteenn Dxiohs laꞌn lastoꞌ raꞌ nuꞌh.
\s Xcweenta ziga badxaꞌh xigaaba raꞌ bwiinn Corintu raꞌ
\p
\v 2 Gulgahca nadziiꞌhi laꞌhnu nez laꞌn lastoꞌ tu, laasii ayi
chyu xi mahla cayuhnn laꞌh chyu tiiꞌ, nee nin ayi za chyu
nugasaguiꞌhi laꞌh chyu tiiꞌ za.
\v 3 Ayi cañiꞌn dxyiꞌdxyi
raꞌ riiꞌ tin para gudziꞌbaꞌhn duhlda yihca tu; pwihsi ziga
laꞌn guñiꞌla loh tu desde galohyi laꞌhtu nuu tu laꞌn
lastoꞌn, tin nicala guibahan nu cun nicalaza gachi nu tuhsi
cun laꞌhtu.
\v 4 Laꞌhtu nadxiipa stoꞌn, laasii pur laꞌh tu
rdxeelaꞌhn dxyiꞌdxyi zaꞌca nin ruluꞌyiꞌhn nez loh raꞌ
bwiinn, ya loh garaa raꞌ ziga guelrzaꞌcazii raꞌ nin
ratiꞌdxiloh raꞌ nu, mas riin stoꞌn guelnadxiipa cun
guelnasaa xteenn Dxiohs pur xcweenta tu.
\p
\v 5 Niꞌchin chin guyuuꞌ nu nez loh raꞌ guihdxyi xteenn
Macedonia, ayi chyu bidxiaapa guelrziꞌlaaꞌdzi laasii garaa
lahta raꞌ batiꞌdxiloh nu guelrzaꞌcazii pur xcweenta
guelrdxihldxinee nin guyuuꞌ nez gadiidxi nu, cun xcweenta za
guelnadxyiꞌbi nin guyuuꞌ stoꞌ nu.
\v 6 Per laꞌh Daada Dxiohs
nin rdiꞌhi guelnasaa stoꞌ bwiinn raꞌ nin riuuꞌ nalaasa stoꞌ,
baniꞌhi Ñiꞌh guelnasaa stoꞌ nu chin badzihnnee Titu
dxyiꞌdxyi pur xcweenta tu.
\v 7 Nee ayi pur nin ziga zi dxiꞌh
nin badzihn Titu, sino que neezaa pur tanto nin riuuꞌguiꞌw
stoꞌ ba pur laꞌhtu. Laꞌh Titu gunah balaaca chiꞌh nin
xclaaꞌdzi tu gwaꞌha tu loh nu, nee gunah za bi cuun
guelnalaasa nin nuu stoꞌ tu pur nin ruhnn tu lligaaba pur
naꞌh. Pwihsi ya cun garaa raꞌ deeꞌ mahzi ru rahcaziahan
guelnasaa stoꞌn.
\p
\v 8 Nicala laꞌh carta nin bacaꞌhn bwiꞌhnn guyuuꞌ nalaasa
stoꞌ tu, per naꞌh ayi bibiin stoꞌn per ya chin guxeꞌhlaꞌhn
carta chi guhca nalaasa stoꞌn laasii nnah naꞌnnahn guzahca
biin stoꞌ tu pur biꞌlda tu carta ca, per ayi xchih dxiꞌh
guhca biin stoꞌ tu.
\v 9 Yannah nuu guelnasaa stoꞌn per ayi
pur dxiꞌh nuu guelrbiin stoꞌ tu, sino que pur nin bwiꞌhnn
guelrbiin chi ziga badxaꞌh xigaaba tu gubiaꞌgarii tu nez loh
Dxiohs. Laꞌhtu bwiꞌhnn tu batiꞌdxiloh tu loh nin ziga
biuuꞌstoꞌ Dxiohs guhca, tin ayi guyuuꞌ xa ñuñihchi tu pur
xcweenta nu.
\v 10 Laasii guelrbiin nin rguꞌnehza Dxiohs loh
raꞌ nuꞌh ruhnn raguꞌdzi stoꞌ raꞌ nuꞌh, tin ziꞌchi rutaꞌh
Dxiohs laꞌh raꞌ nuꞌh loh duhlda niꞌchi nin rzaꞌbi stoꞌn
mahzi ru chin bwiꞌhnn Ñiꞌh ziꞌchi, ya ziꞌchi rbiaꞌtii
guelnalaasa, per guelrbiin xteenn guidxyiyuh ayi ruhnnan gahn
gaguꞌdzi stoꞌ raꞌ bwiinn cun xtuhlda raꞌ ba, mas runnan
rñihchiloh raꞌ bwiinn para tuꞌpazi.
\v 11 Laꞌh tu bwiꞌhnn tu
batiꞌdxiloh tu guelrbiin nin guhca xigaaba Dxiohs guhca,
yannah ¡gulguiꞌaha loh gahn! ¡Balaaca chiꞌh cohsa zaꞌca
bwiꞌhnnan para laꞌhtu! Bwiꞌhnnan bwaꞌha zaꞌca paꞌh tu xi
niꞌca guhca, tin gaca guluuꞌyigahca tu xcweentan, chiꞌchi
bwiꞌhnnan guyuuꞌllahn stoꞌ tu, neezaa bwiꞌhnnan bidxyihbi tu
niꞌchin nin basaaꞌn tu duhlda raꞌ, chiꞌchi bwiꞌhnnan
xclaaꞌdzi tu ñwaꞌha tu loon, guhca za guyuuꞌ guelrzaaꞌ stoꞌ
tu pur naꞌh, bwiꞌhnnzan guunn tu guelguxchisi xcweenta
bwiinn nin bwiꞌhnn duhlda chi. Garaa raꞌ deeꞌ baluuꞌyi ayi
laꞌh dxiꞌh tu guluꞌtii tu duhlda.
\v 12 Niꞌchin chin bacaꞌhn
dxihtsi ca, ayi bacaꞌhñin loh bwiinn nin bwiꞌhnn duhlda
sino que tin para gudiꞌhi tu xcweenta guelrzaaꞌ nin riuuꞌ tu
pur naꞌh nez loh Dxiohs.
\v 13 Niꞌchin bachicaꞌha nu ziga
guridxyii stoꞌ nu.
\p Yannah pur nin ya gurihdxyii stoꞌ nu, mas riahxi duxa nu pur
nin rachidiaꞌha nu nuu riahxi Titu pur laꞌhtu. Pwihsi garaa
tu cayuhnn tu para cayuuꞌ guelnasaa stoꞌ Titu.
\v 14 Pwihsi
sidela nuu xi dxyiꞌdxyi zaꞌca nin raꞌpihn loh bi pur
xcweenta tu, ayi baziꞌxtuhyiꞌhn nez loh bi. Per ziga gahca
rñiꞌ nu ganaalla dxyiꞌdxyi nin guchii, ziꞌchi gahca za
guchii naa garaa raꞌ dxyiꞌdxyi nin bidiꞌtsi loh Titu pur
xcweenta tu.
\v 15 Niꞌchin nin mahzi ru cayahca nadziiꞌhi
stoꞌ Titu cun laꞌhtu chin riagannah stoꞌ bi xa
bazoꞌbadxiahga tu dxyiꞌdxyi, nee xa guunnloh tu bi cun
gaduhbi stoꞌ tu chin badzihn bi nee cun ziga guelnadxyiꞌbi
xteenn tu.
\v 16 Nnah nuu nasaa stoꞌn pur nin nnahyi naꞌpahn
gaduhbitiiꞌ confiansa tun laꞌh tu ya ayi xi guelrzaaꞌ
riuuꞌhuhn cun laꞌhtu.
\c 8
\s Xcweenta guhn para laꞌh raꞌ xpwiinn Dxiohs nin nuu loh guihdxyi Jerusalehn
\p
\v 1 Pwihsi nnah bwiitsi raꞌn, xclaaꞌdzi nu
gachidiꞌyidxyiꞌdxyi nu loh tu xcweenta ziga badiꞌhi Dxiohs
guelriachii stoꞌ nez lastoꞌ raꞌ bwiinn guihdxyi Macedonia
nin gwachii stoꞌ raꞌ ñiꞌh xchiꞌdxyi Dxiohs.
\v 2 Nicala
batiꞌdxiloh raꞌ ba guelrzaꞌcazii pur guelrzaꞌcazii nin
batiꞌdxi Dxiohs laꞌh raꞌ ba per guhca nasaa lastoꞌ raꞌ ba,
nee nicala za naa raꞌ ba prohbi, per badziiꞌba raꞌ ba mweeyi
ziga zi tuhbi bwiinn nin nahpa ziahan mweeyi.
\v 3 Naꞌh
naann nin bwaꞌhaloon, cun gaduhbi stoꞌ raꞌ ba baniꞌhi raꞌ ba
ziga chiꞌh mweeyiꞌhn nin guhca baniꞌhi raꞌ ba, nee hasta
mahziꞌhn ru badiꞌhi raꞌ ba.
\v 4 Gunaaba duxa raꞌ ba loh nu
gasaaꞌn nu gudiꞌhi raꞌ ba xmweeyi raꞌ ba para gacanee raꞌ ba
laꞌh raꞌ xpwiinn Dxiohs.
\v 5 Mahzi ru bariaꞌcaa bwiꞌhnn raꞌ
ba que ziga dxudiꞌhnn nu lligaaba pur laꞌh raꞌ ba, pwihsi
badiꞌhi raꞌ ba laꞌh raꞌ ba mweer galoh nez loh Daada
Jesucristu, chiꞌchi nez loh raꞌ nu ziga gunabwaꞌ Dxiohs
gaca.
\v 6 Pwihsi ziga bachaꞌga raꞌ bwiinn Macedonia raꞌ
mweeyi, ziꞌchi za niꞌchin nnah raꞌpihn loh Titu dxiꞌ za bi
tin guicaꞌha bi mweeyi nin gudiꞌhi tu xcweenta ziga guñiꞌ bi
loh tu galoh.
\v 7 Ruhnn tu ziahan dziꞌn zaꞌca, riahchiipa
stoꞌ tu xchiꞌdxyi Dxiohs, rñiꞌ zaꞌca tu xchiꞌdxyi Dxiohs,
nee nahpa tu guelnasiin, nee rcaꞌhstoꞌ tu guunn tu xtsiꞌn
Dxiohs; nee rantsiiꞌhi za tu laꞌh nu, niꞌchin ayi chesuh tu
guunn tu dziꞌn zaꞌca raꞌ ziga cheezah gudziiꞌba za tu
mweeyi.
\p
\v 8 Ayi guunn tu lligaaba cañiꞌn ziga nahpa guunnpaꞌca tun;
sola xclaaꞌdzihn gacabwaꞌ tu xa naa lastoꞌ raꞌ bwiinn raꞌ
nin rudziiꞌba raꞌ mweeyi, tin ziꞌchi za guluuꞌyi rucaꞌh stoꞌ
tu bwiinn raꞌ nin naa raꞌ xpwiinn Dxiohs,
\v 9 laasii laꞌhtu
ya nuꞌnbwaꞌ tu xa balahsa stoꞌ Daada Jesucristu laꞌhnuꞌh;
laꞌh Ñiꞌh naa Ñiꞌh rricu pur nin caꞌha Ñiꞌh garaa
xixteenn Dxiohs, per guhca Ñiꞌh ziga zi tuhbi bwiinn
prohbitiiꞌ, tin ziꞌchi pur xcweenta Ñiꞌh gaapa tu garaa raꞌ
nin nahpa Dxiohs nez dxibaaꞌ.
\p
\v 10 Naꞌh ziñiꞌn loh tu xi lligaaba ruꞌnnahn para laꞌh gahca
xquelnazaꞌca tu. Guduhbihzayi galoh tu guzaꞌloh tu cayuhnn
tu dziꞌn zaꞌca riiꞌ, laasii gaduhbi stoꞌ tu guzaꞌloh tun.
\v 11 Pwihsi nnah gulchezah hasta guzaꞌloh tun, cun laꞌh
gahca ziga nuu stoꞌ tu chin guzoꞌbaloh tun, nnah xteenn
dziꞌn ca gulgadiꞌhi ziga nin rahpa tu.
\v 12 Laasii sidela
nuu bwiinn cun gaduhbistoꞌ ba xclaaꞌdzi ba gudiꞌhi ba guhn
loh Dxiohs, Dxiohs rcaꞌha Ñiꞌh nin chiꞌhzi rahlaastoꞌ
bwiinn rudiꞌhi ba laasii ayi rnaaba Ñiꞌh nin ayi rahlda
guzuh bwiinn.
\v 13 Ayi cañiꞌn gulgadiꞌhi tin tiidxi tu
guelrzaꞌcazii para gaapaa stuhbi bwiinn, sino que tin gaca
tuhbiloh tu cun xixteenn tu.
\v 14 Nin nahpa tu nnah niꞌchi
gulgadiꞌhi tin guzaꞌloh tu nin cayaꞌdxi raꞌ ba, tin stuhbi
dxyih laꞌh raꞌgaꞌh raꞌ ba chin nahpa raꞌgaꞌh za raꞌ ban
zuniꞌhi za raꞌ ba nin dxiaꞌdxi tu, tin ziꞌchi gaapaa tu
xixteenn tu nin guichiꞌhn tu tuhbiloh.
\v 15 Laasii loh
xchiꞌdxyi Dxiohs caa squii: “Bwiinn nin batiaaꞌha ziahan
duxa guelwahw, ayi xi bwiꞌhnn sohbra; ya bwiinn nin
batiaaꞌha gulliaꞌyiꞌhn, ayi xi biaꞌdxyi ba.”
\s Titu cun bwiinn raꞌ nin zeꞌnee laꞌhba
\p
\v 16 Zuxchiilli Dxiohs nin rudiꞌhi laꞌh Titu laꞌh gahca
guelrzaaꞌ nin naꞌpahn pur laꞌhtu.
\v 17 Pwihsi guziꞌguehlda
bi guunn bi nin gunaꞌbaꞌhn loh bi guunn bi, ya coma ziga
laꞌh gahca bi xclaaꞌdzi duxa bi guunn bi xtsiꞌn Dxiohs nez
loh tu, nnah laꞌh gahca bi bwiꞌhnn bi lligaaba dxieꞌguiaꞌha
bi cuun tu tin guzaꞌloh tu guunn tu dziꞌn riiꞌ.
\p
\v 18 Riiꞌ rachiguꞌnehza nu tuhbi bwihtsi lasaaꞌ nuꞌh tuhsi
juunta cun Titu; laꞌh bin nin rñiꞌ zaꞌca raꞌ bwiinn guidoꞌ
xcweenta ñiꞌh laasii dziꞌn zaꞌca ruhnn bi pur xcweenta
xchiꞌdxyi Dxiohs,
\v 19 nee ayi dee si dxiꞌh, sino que laꞌh
raꞌ bwiinn guidoꞌ raꞌ gulii laꞌh bwihtsi lasaaꞌ nuꞌh riiꞌ
tin sahnee ba laꞌh nu loh xtsiꞌn Dxiohs nin dxudiꞌhnn nu
riiꞌ tin guiñiꞌ zaꞌca bwiinn pur laꞌh Jesucristu, nee tin
dxugaluuꞌyi za nu ziga xclaaꞌdzi nu guidiꞌhnn nu xtsiꞌn
Ñiꞌh,
\v 20 tin ayi ziꞌchi chuu nin guiñiꞌ yihca nu ridiꞌhnn
nu guriꞌxi cun mweeyi rooꞌ nin bidxaꞌga riiꞌ para laꞌh raꞌ
xpwiinn Dxiohs.
\v 21 Pwihsi dxudxiꞌhyi nu xa cayahca raꞌ
deeꞌ tin gariaꞌcaa xnehzan; nee ayi nez loh si dxiꞌh Daada
Jesucristu sino que nezaa nez loh raꞌ bwiinn raꞌ.
\p
\v 22 Garoopa raꞌ bwihtsi raꞌ nuꞌh riiꞌ, raxeꞌhla za nu
stuhbi bwihtsi nuꞌh nin ya guhca paaldaa bweelta bidiaꞌha nu
xa ruhnn ba, nee ziga ya bachidiaꞌha nu xclaaꞌdzi ba guunn
zaꞌca ba ziahan raꞌ dziꞌn, nee nnah mahziru xclaaꞌdzi ba
guunn ba dziꞌn zaꞌca laasii laꞌhtu nadxiipa stoꞌ ba.
\v 23 Sidela chyuulla guinaaba dxyiꞌdxyi laꞌh Titu pur bwiinn
riiꞌ, gulguiñiꞌ loh bwiinn chi laꞌh bi naa bi nin cayuhnnee
naꞌh dziꞌn nez loh tu, o sidela guinaaba dxyiꞌdxyi raꞌ ba
xcweenta schioopa raꞌ lasaaꞌ nuꞌh, gulgahbi loh raꞌ ba laꞌh
raꞌ ba naa raꞌ ba xquixaꞌga raꞌ bwiinn guidoꞌ nee pur
xcweenta raꞌ ba rñiꞌ zaꞌca raꞌ bwiinn pur Jesucristu.
\v 24 Pwihsi para gacabwaꞌ raꞌ bwiinn guidoꞌ raꞌ, gulgaluuꞌyi loh
raꞌ bwiinn chi xa rantsiiꞌhi lasaaꞌ tu, neezaa raꞌ dziꞌn nin
ruhnn tu niꞌchi nin rachiñiꞌ nu ganaalla dxyiꞌdxyi zaꞌca
xcweenta tu.
\c 9
\s Mweeyi para laꞌh raꞌ bwihtsi raꞌ nuꞌh
\p
\v 1 Niꞌchin ayi gucaꞌhruhn loh tu xcweenta dziꞌn raꞌ riiꞌ,
nahstoꞌ nu, guelrahcanee raꞌ laꞌh raꞌ xpwiinn Dxiohs,
\v 2 laasii laꞌn naann xa rucaꞌhstoꞌ tu guunn tun, ya ziga guñiꞌ
zaꞌcaꞌhn pur xcweenta tu loh raꞌ bwiinn Macedonia; guñiꞌn
loh raꞌ ba laꞌhtu bwiinn raꞌ Acaya raꞌ desde guduhbihza
batiaaꞌha tu mweeyi. Pwihsi laasii bwiꞌhnn tu ziꞌchi neezaa
raꞌ ziahan raꞌ bwiinn Macedonia raꞌ bieꞌsuhstoꞌ raꞌ ba
bachaꞌga raꞌ ba mweeyi.
\v 3 Niꞌchin laꞌn guluꞌneezahn
bwiitsi raꞌ nuꞌh nez loh tu, tin ayi gaca lliaaꞌha zi
dxyiꞌdxyi nin guñiꞌn xcweenta tu, tin ziga cabweeza tiiꞌ tu
guchaꞌga tu xmweeyi tu ziga guñiꞌllgaꞌn loh tu desgaloh,
\v 4 tin ayi nagah chin dxieꞌldahn dxieꞌnee raꞌ paaldaa raꞌ
bwiinn Macedonia mahs nee gwaꞌha raꞌ ba ayi biuu tu ñuchaꞌga
tu mweeyi, ya ziꞌchi ziaꞌhan xtuhyiꞌhn cun neezaa laꞌhtu.
\v 5 Niꞌchin nin bwiꞌhnnaꞌhn lligaaba lwehgu si zeꞌ raꞌ
bwiitsi raꞌ nuꞌh riiꞌ, tin zeꞌguiaꞌha raꞌ ba xa gaca
xcweenta mweeyi raꞌ nin biaꞌhan dxyiꞌdxyi nuꞌh desde galohyi
guchaꞌga tu, tin ziꞌchi banaꞌsiin mweeyi nin guhlaastoꞌ tu
bachaꞌga tu, ayi pur ziga dxiꞌh chyu rñiꞌ nahpa cun
lajweersi guunn tun.
\p
\v 6 Gulgasannah stoꞌ tu dxyiꞌdxyi raꞌ rii: Bwiinn nin
rbahchi gulliaꞌhyiꞌhn biñih, ziꞌchi za gulliaꞌhyiꞌhn
jusehchi rcaꞌha ba; ya ziga bwiinn nin rbahchi zirooꞌ biñih,
ziꞌchi za zirooꞌ jusehchi rcaꞌha ba.
\v 7 Cada tuhbigah tu
gulgadiꞌhi ziga chiꞌh rahlaastoꞌ tu gudiꞌhi tu; per ayi
guunn tun cun guelruhnn chiohpa stoꞌ nee gulgahcabwaꞌ ayi
naazan lajweersi, laasii Dxiohs nadziiꞌhi Ñiꞌh laꞌh bwiinn
nin rudiꞌhi mweeyi nez loh Ñiꞌh cun gaduhbi stoꞌ ba,
\v 8 laasii Dxiohs guniꞌhi Ñiꞌh zirooꞌ guelruhnntaaꞌyi xteenn
Ñiꞌh para laꞌhtu, tin ziꞌchi ayi chuu dxyih dxiaꞌdxi tu nin
guichiꞌhn tun nee tin gaapa za tu ziahanan para gacanee tu
garaaloh raꞌ cohsa zaꞌca raꞌ,
\v 9 laasii loh xchiꞌdxyi
Dxiohs rñiꞌ squiiꞌ: “Laꞌh badiꞌhi duxa Ñiꞌh para laꞌh raꞌ
bwiinn prohbi, laasii zahca Ñiꞌh bwen duxa para tuꞌpazi.”
\v 10 Dxiohs nin rniꞌhi biñih nin rbahchibiñih nuꞌh loh yuh
nee cun guelwahw para guidaꞌw nuꞌh; laꞌh Ñiꞌh gutarloohon
para loh dziꞌn liꞌhn xteenn tu, ya ziꞌchi guunn Ñiꞌh tin
chioo raꞌn tin guniꞌhihn tuhbi liꞌn zaꞌca laꞌhtu,
\v 11 tin
ziꞌchi gaapa tu ziahan raꞌ guelnazaꞌca para gacaza gudiꞌhi
tu zirooꞌ. Ya para laꞌhnu, ziga mweeyiꞌhn nin rguꞌnehza tu
para laꞌh raꞌ xpwiinn Dxiohs, zuhnnan para gudiꞌhi duxa raꞌ
ba guelzuxchilli nez loh Dxiohs,
\v 12 laasii chin rahcanee
tu laꞌh raꞌ bwihtsi raꞌ nuꞌh, ayi sola dxiꞌh radiꞌhi nuꞌh
nin rchiꞌhn raꞌ ba sino que neezaa rachidiꞌhnn nuꞌh para
rudiꞌhi raꞌ ba guelzuxchiilli nez loh Dxiohs.
\v 13 Chin
rahcanee tu laꞌh raꞌ lasaaꞌ tu, ruluuꞌyi xcweenta ziga
ruzoꞌbadxiahga tu xchiꞌdxyi Dxiohs nin gwachii stoꞌ tu;
niꞌchin laꞌh raꞌ ba guiñiꞌ zaꞌca raꞌ ba pur laꞌh Dxiohs
xcweenta ziga nin cayahcanee tu laꞌh raꞌ ba pur xcweenta
mweeyi nin guluꞌnehza tu para laꞌh raꞌ ba cun snuhn
raꞌbwihtsi lasaaꞌ raꞌ nuꞌh nin rii raꞌ stuhbi lahta.
\v 14 Ya chiꞌchi laꞌh raꞌ ba zibwihdxyi-zinaaba raꞌ ba loh Dxiohs
tin gacanee Ñiꞌh laꞌhtu, ya zahca nadziiꞌhi raꞌ ba laꞌhtu
laasii runiꞌhi duxa Dxiohs xquelrahcanee Ñiꞌh para laꞌhtu.
\v 15 Zuxchiilli Dxiohs laasii baniꞌhi Ñiꞌh tuhbi cohsa
rooꞌ, cun tuhbi guelnazaꞌca rooꞌ nez loh raꞌ nuꞌh.
\c 10
\s Guelrnabwaꞌ nin nahpa Pahblu xcweenta ziga naa ba pooxtla
\p
\v 1 Naꞌh Pahblu, rnaꞌba duxaꞌhn loh tu, cun garaa raꞌ
dxyiꞌdxyi nadoꞌlaadzi, nee cun dxyiꞌzaꞌca xteenn Jesucristu;
nee zaꞌbi dxyiꞌdxyi naan bwiinn nadoꞌlaadzi chin biaꞌhanahn
loh tu ya chin nuuꞌhuhn stuhbi lahta rucaꞌhn dxyiꞌdxyi nin
dxigah ruriꞌhi laꞌhtu.
\v 2 Pwihsi rnaꞌbaꞌhn loh tu,
gulguibahan zaꞌca tin chin dxieꞌldaguiaꞌhahn cuun tu, ayi
chuu llahn stoꞌn nee tin ayiza guiñiꞌn dxyiꞌdxyinah loh
bwiinn raꞌ nin rñiꞌ: “Pahblu nabahan ziga zi tuhbi bwiinn
guidxyiyuh.”
\v 3 Per laꞌh nu ayi chyu rdxihndxi cun dxiꞌba
nin rutuhbi raꞌ bwiinn guidxyiyuh.
\v 4 Laasii dxiꞌba nin
rulaloh laꞌhnu ayi naaꞌhan ziga dxiꞌba nin rutuhbi raꞌ
bwiinn guidxyiyuh, sino que naan cun ganaalla xquelrnabwaꞌ
Dxiohs tin riidiꞌhnn nu gahn loh raꞌ garaa raꞌ guelrnabwaꞌ
nin nuu loh guidxyiyuh.
\v 5 Niꞌchin nin cagazuꞌhyi nu loh
garaa raꞌ lligaaba dxaaba raꞌ, neezaa ziga nin
ruchiꞌdxiu-ruchaꞌga lligaaba rooꞌ raꞌ nin xclaaꞌdzi raꞌ
bwiinn guiñiꞌyah raꞌ ba xcweenta raꞌ bwiinn nin nuꞌnbwaꞌ
laꞌh Dxiohs; per cacaꞌha nu garaa raꞌ xigaaba raꞌ nu
cagatiꞌdxi raꞌ nu laꞌh raꞌn nez loh naa Jesucristu tin
guzoꞌbadxiahga raꞌ nu xchiꞌdxyi Jesucristu.
\v 6 Nin
cabweeza chiꞌhzi nu naa guidiꞌhnn nu guelguxchisi loh chyu
chiꞌhzi bwiinn nin ayi guzoꞌbadxiahga xchiꞌdxyi Dxiohs, chin
laꞌh garaa tu guyuuꞌ-guyaꞌzi xchiꞌdxyi Dxiohs.
\p
\v 7 Laꞌhtu rwaꞌha tu cohsa raꞌ ziga chiꞌhzi nin rdiiꞌdxi loh
tu. Sidela chyuulla tuhbi tu rguꞌbwaꞌ guchii naa ba xpwiinn
Jesucristu, nahpa gacabwaꞌza ba guunn xigaaba ba neezaa
laꞌhnu naa nu xpwiinn Jesucristu.
\v 8 Pwihsi laasii mahziru
guiñiꞌ zaꞌcaꞌhn xcweenta guelrnabwaꞌ nin naꞌpahn, nin
baniꞌhi Dxiohs naꞌh tin guchiooꞌruhn guelriachii stoꞌ xteenn
tu per ayi laꞌhla dxiꞌh guxiꞌnaꞌhn laꞌhtu nicala gatuhyi
loon pur guiñiꞌn squiiꞌ.
\v 9 Naꞌh ayi xclaaꞌdzihn dxieꞌsuh
guidxyihbi tu nastoꞌ tu ziga nugachibiyaaꞌhahn laꞌhtu pur
dxihtsi raꞌ nin bacaꞌhn.
\v 10 Laasii rñiꞌ raꞌ ba loh
xchiꞌtsihn caa dxyiꞌdxyi nagahn, dxyiꞌdxyi ñaꞌlaaꞌdzi; per
ziga chin rñiꞌn cun rwaaꞌhahn nez loh raꞌ tu rñaꞌn ziga zi
tuhbi bwiinn siisii ya xchiꞌdxyiꞌhn naan ziga zi xchiꞌdxyi
tuhbi bwiinn nin rñiꞌ xilaa-xihlaan.
\v 11 Per bwiinn nin
rñiꞌ ziꞌca, gacabwaꞌ ba deeꞌ: ziga nin naa nu cun xchiꞌdxyi
nu chin racaꞌh nu dxihtsi loh tu ziga chin nuu nu zihtu,
pwihsi ziꞌchi gahcaza naa nu chin dxuunee nu laꞌhtu.
\p
\v 12 Per ayi chyu ruhnn xigaaba naa nu tuhbiloh cun bwiinn
raꞌ nin rñiꞌ zaꞌca pur xcweenta gahca raꞌ ñiꞌh. Laꞌh raꞌ ba
ruhnn raꞌ ba puura lligaaba mbah raꞌ, loh ziga ruchaꞌgabwaꞌ
raꞌ ba xcweenta ziga tuhbi ziga stuhbi raꞌ ba.
\v 13 Per
laꞌhnu ayi chyu guunn nayaachi tsiꞌbaloh nu loh nin nagahdxi
guniꞌhi Dxiohs laꞌhnu, mas sola riidiꞌhnn nu ziga chiꞌh
dziꞌn nin baniꞌhi Dxiohs laꞌhnu, ya laꞌhgahca squiiꞌ ziga
nin baluuꞌyi nu loh guihdxyi Corintu riiꞌ.
\v 14 Niꞌchin ayi
chyu bwiꞌhnn chiohpa loh lligaaba, pwihsi ¿xa ñariaꞌcaa
sidela laꞌhnu ayi ñadzihngah nu para ñaluuꞌyi nu laꞌhtu?
Pwihsi laꞌhnu naa mweer bwiinn raꞌ nin bieꞌnee xchiꞌdxyi
Jesucristu nez loh tu.
\v 15 Ayi chyu ruhnn nayachi loh
xtsiꞌn stuhbi bwiinn, sino que dxuuleꞌza nu chioo guelriachii
stoꞌ xteenn tu, chiꞌchiyi gaca guidiꞌhnn ru nu dziꞌn nez loh
tu, ziga chiꞌhzi gaca guidiꞌhnn nu,
\v 16 tin gaca za
galuuꞌyiru nu xchiꞌdxyi Jesucristu stuhbi lahta loh guihdxyi
raꞌ nin naa zihturu galoo lahdxyi tu, nee ayi za chyu guunn
nayaachinee dziꞌn nin bwiꞌhnn stuhbi bwiinn.
\p
\v 17 Sidela chyuulla xclaaꞌdzi guunn nayaachi, per mahzi
chaꞌyi guunn nayaachi raꞌ ba pur xcweenta Daada Jesucristu,
\v 18 laasii bwiinn nin ruzaꞌloh ruhnn gahn rutiꞌdxiloh xi
chiꞌh zi, ayi laꞌh dxiꞌh ba naa nin rñiꞌ zaꞌca gahca pur
xcweenta ñiꞌh sino que laꞌh Jesucristu nin ruzeꞌta ziga naa
xtsiꞌn bwiinn chi.
\c 11
\s Pahblu cun bwiinn raꞌ nin ayi naa pooxtla
\p
\v 1 ¡Malaayi gwaꞌha nnah tu loon gaduhbi nin guiñiꞌn tuhbi
dxyiꞌdxyi nin naa xilaa-xiilaan! Pwihsi gulgacaꞌdxiahga
xchiꞌdxyiꞌhn
\v 2 laasii riaꞌllahn stoꞌn cun laꞌhtu ya llahn
chi zeꞌ nezloh Dxiohs, laasii ya naa dxyiꞌdxyi gudiꞌhn
laꞌhtu nez loh Jesucristu tin guicaꞌha Ñiꞌh laꞌhtu. Nee
xclaaꞌdzizahn gudiꞌhn laꞌhtu nez loh Ñiꞌh ziga zi tuhbi
dxaꞌpa nin nagahdxi chyu ndxiꞌhw guyihdxitiiꞌ,
\v 3 per nin
rzaꞌcaꞌhn rdxyiibihn laasii ayi nagah guisaguiꞌhi tu ziga
basaguiꞌhi bweꞌlda laꞌh Eva; nagah ziꞌchi za gusaaꞌn tu
gusaguiꞌhi bwiinndxaaba laꞌhtu ya guunn ba gahn guidxaꞌh loh
xigaaba tu, bachiꞌh guiriaꞌhcaa tu loh xneziuh Jesucristu
nin raann tu cun gaduhbi stoꞌ tu.
\v 4 Laasii nnah rwaꞌhahn
mahzi rucaꞌh stoꞌ tu rucaꞌdxiahga tu rwaaꞌ stuhbi bwiinn nin
rñiꞌ nuu stuhbi Jesuhs nin ayi naa xchiꞌdxyi Ñiꞌh dxyiꞌdxyi
nin raluuꞌyi nu, nee rcaꞌha tu cun gaduhbi stoꞌ tu tuhbi
spíritu nin naa guriincaa loh Spíritu nin ya gucaꞌha tu,
nee cun ruhnn za tu rcaꞌha tu guriincaa dxyiꞌdxyi loh
dxyiꞌdxyi nin ba bihn tu nin gutaꞌh laꞌhtu loh duhlda.
\v 5 Naꞌh riinstoꞌn ayi naan bwiinn nin gulliaaꞌha lasahca loh
garaa raꞌ pooxtla.
\p
\v 6 Nicala xchiꞌdxyiꞌhn rzahcastoꞌ tu naan dxyiꞌdxyi nin naa
xilaa-xilaan, per loh xigaaꞌbahn ayi xi riaꞌdxiꞌhn; nin sola
naa bwensi ruluuꞌyiloh garaa raꞌ dxyiꞌdxyi raꞌ nin laꞌn
baluuꞌyi loh tu cun dziꞌn nin bwiꞌhnnaꞌhn riꞌca.
\p
\v 7 O ¿ta bwiꞌhnnaꞌhn duhlda sahca guyuuꞌhuhn lahda tu, ziga
tuhbi bwiinn nadoꞌlaadzi tin gaca tu bwiinn roo raꞌ, nee nin
tuhbi santahba ayi basadxiillihn laꞌhtu xcweenta nin
baluꞌyiꞌhn xchiꞌdxyi Dxiohs?
\v 8 Gucaꞌhahn mweeyi nin
baniꞌhi guriin raꞌ ca bwiinn guidoꞌ naꞌh chin guyuuꞌhuhn loh
tu, tin bwiꞌhnnaꞌhn xtsiꞌn Dxiohs loh tu.
\v 9 Chin
guyuuꞌhuhn loh tu, guyuuꞌ xi bichiꞌhnaꞌhn per ayi basioꞌbahn
laꞌhtu, laasii chin bieꞌ raꞌ bwihtsi raꞌ nuꞌh nin zieꞌ raꞌ
nez guihdxyi Macedonia, laꞌh raꞌ ba baniꞌhi raꞌ ba garaa raꞌ
nin bichiꞌhnaꞌhn, niꞌchin nin ayi xi basioꞌbahn laꞌhtu, ya
ziꞌchi cheezah guꞌnnahn.
\v 10 Pwihsi ziga naꞌpahn siguhra
nuꞌnbwaꞌn xchiꞌdxyi Jesucristu, niꞌchin ayi chyu bwiinn
nahpa para guziaꞌtii dxyiꞌdxyi zaꞌca nin calliiꞌdzi par
naꞌh, ya garaa raꞌ bwiinn guihdxyi Acaya guiñiꞌ raꞌ ba
ruluuꞌyi zihn xchiꞌdxyi Jesucristu ayi chyuloo rzaꞌbi
naaꞌhahn para guicaꞌhahn mweeyi.
\v 11 ¿Xixnaa rñiꞌn loh tu
squiiꞌ? ¿Ta laasii ayi guinadziiꞌhihn laꞌhtu? ¡Dxiohs
naannloh balaaca chiꞌh rucaꞌh stoꞌn laꞌhtu!
\v 12 Per nahpa
chezaꞌhn loh nin cayuꞌnnahn, tin ayi chuu nehza para laꞌh
raꞌ bwiinn raꞌ nin caꞌndxiꞌhyi raꞌ cun dxyiꞌdxyi rusaguiꞌhi
xa gaca raꞌ ba ziga naa nu, per ayi gaca ziꞌchi.
\v 13 Pwihsi laꞌh raꞌ ba ayi naa raꞌ ba pooxtla; laꞌh raꞌ ba sola
rusaguiꞌhi zi raꞌ ba, ruhnn zi raꞌ ba ziga naa raꞌ pooxtla
xteenn Jesucristu, per ayi chyu naa raꞌ ba.
\v 14 Pwihsi
deeꞌ raꞌ ayi rluuꞌyi nagahn raꞌn laasii nee bwiinndxaaba
zahca guiñah ba ziga zi tuhbi aanjla xteenn Dxiohs nin
rcaꞌbachaꞌh tin gusaguiꞌhi ba laꞌh raꞌ bwiinn.
\v 15 Pwihsi
niꞌchin ayi guinagahn ruluuꞌyiloh ziga nin naa raꞌ xpwiinn
ba ziga tuhbi bwiinn nin ruhnn dziꞌn zaꞌca, pwihsi bwiinn
raꞌ chi ziñihchiloh raꞌ para tuꞌpazi cun xcweenta ziga naa
xtsiꞌn raꞌ ba.
\s Rutiꞌdxiloh Pahblu guelrzaꞌcazii xcweenta nin naa ba pooxtla
\p
\v 16 Rñiꞌ zaꞌcaꞌhn loh tu; ayi guunn tu lligaaba yiꞌcahn
cazohbayoꞌba, per ziga nin nuu tu lligaaba ca gulgasaaꞌnza
guiñiꞌn loh tu ziga tuhbi bwiinn nin rahca naxiin yihca ñiꞌh
tin guiñiꞌ loh tu dxyiꞌdxyi zaꞌca pur xcweenta gahcahn.
\v 17 Dxyiꞌdxyi nin cañiꞌn riiꞌ ayi cañiꞌñin cun xquelrnabwaꞌ
Dxiohs, sino que cañiꞌñin ziga zi tuhbi bwiinn nin rahca
naxiin yihca ñiꞌh, nee naa raꞌ dxyiꞌdxyi zaꞌca raꞌ riiꞌ
laꞌhgahca xcweeꞌntahn,
\v 18 laasii ziga nuu za raꞌ bwiinn
raꞌ nin rñiꞌ raꞌ dxyiꞌdxyi nayaachi pur laꞌhgahca xcweenta
xtsiꞌn raꞌ ba nin ruhnn raꞌ ba loh guidxyiyuh riiꞌ, nee
ziꞌchi gahca za ziñiꞌn dxyiꞌdxyi nayaachi xcweenta gaꞌcahn,
\v 19 laasii ziga laꞌhtu nin naa bwiinn nasiin tiiꞌ cayahpa
tu paseensi raꞌ laꞌh bwiinn nin rahca naxiin yihca ñiꞌh.
\v 20 Laꞌhtu zeezahnee chyu chiꞌh zi tuhbi nin rnabwaꞌ loh tu
ziga tuhbi ballwaaꞌn, o rbaaꞌn raꞌ ba xixteenn tu, o rnabwaꞌ
raꞌ ba laꞌhtu, o rusaꞌcazii raꞌ ba laꞌhtu, o rgahpaa raꞌ ba
loh tu.
\v 21 ¡Xiilla xtuhyi guhca nu ziga zi bwiinn siisii
nez loh tu!, per loh xi chiꞌh zi nin ruhnn lasahca raꞌ ba
laꞌhgahca raꞌ ba, nicala naꞌh cañiꞌñin ziga zi nin rahca
yihca ñiꞌh, pwihsi neezaa naꞌh naꞌpahn dxyiꞌdxyi.
\v 22 ¿Sidela naa raꞌ ba bwiinn hebreu? Neezaa naꞌh naañin.
¿Sidela naa raꞌ ba bwiinn Israel? Neezaa naꞌh naañin.
¿Sidela naa raꞌ ba llahga guehtu Abrahn? Neezaa naꞌh
naañin.
\v 23 Sidela naa raꞌ ba bwiinn nin ruluuꞌyi
xchiꞌdxyi Jesucristu, naꞌh dziꞌbalohru mahzi ruluꞌyiꞌhn
xchiꞌdxyi Jesucristu nicala naꞌh cañiꞌn ziga zi tuhbi bwiinn
nin rahca yihca ñiꞌh cun ziga dxyiꞌdxyi raꞌ nin cañiꞌn.
Pwihsi mahzi ru guelrzaꞌcazii batiꞌdxiloon que laꞌh raꞌ ba;
batiꞌdxiloohruhn loh goolpi que laꞌh raꞌ ba, nee bieꞌwruhn
laꞌn lahtsi dxiꞌba que laꞌh raꞌ ba.
\v 24 Ya loh gaꞌyu
bweelta basahcazii raꞌ bwiinn Israel raꞌ naꞌh; bachiehlda
raꞌ ba diꞌtsihn galda bitsiꞌh bigaꞌ cwarta,
\v 25 ya stuhbi
bweelta bacaꞌh dxiah raꞌ ba yiꞌcahn, ya chohnna bweelta
guzaꞌbi ñihsa barcu nin zaaꞌhahn laꞌn ñiꞌh loh ñihsadoꞌ per
biaꞌhanzahn tuhbi dxyih-tuhbi gueꞌla loh ñihsadoꞌ.
\v 26 Nee
ziahan za biahje guzuꞌzahn, nee batiꞌdxiloozahn ziahan raꞌ
yaꞌdxi nez loh guiꞌw raꞌ; batiꞌdxilohzahn guelnadxyiꞌbi loh
raꞌ gubaꞌn, nee cun loh za raꞌ bwiinn guihdxyi laadxyihn,
nee cun nez loh raꞌ za bwiinn ziitu raꞌ nez laꞌn ciudahd raꞌ
nee nez loh dahan raꞌ nee cun loh ñihsadoꞌ raꞌ za, nee cun
nez loh za raꞌ bwiinn rusaguiꞌhi bwiinn nin rñiꞌzi raꞌ naa
xpwiinn Jesucristu.
\v 27 Batiꞌdxiloduuxazahn loh dziꞌn cun
loh dxixiꞌhw; ziahan la za bweelta ayi gutaꞌxgaasihn, cun
biaꞌhanahn ayi gudaawuhn, cun ayi za gwaaꞌhahn ñihsa; nee
bacwaaꞌnahn ziahan bwelta, batiꞌdxiloozahn loh guelnahlda
cun biaꞌdxyi za lahdxi para naꞌh.
\p
\v 28 Per garaaloh raꞌ deeꞌ batiꞌdxiloon guelrzaꞌcazii;
guillii-guillii nuuꞌhuhn guelrzaaꞌ pur xpwiinn xteenn raꞌ
guidoꞌ.
\v 29 Sidela chyuulla tuhbi tu naa bwiinn siisiitiiꞌ,
pwihsi neezaa naꞌh naan bwiinn siisii; ya sidela tuhbi tu
riaaba loh duhlda, naꞌh riuuꞌ duuxaꞌhn guelrzaaꞌ xcweenta
tu.
\v 30 Sidela nayaachiꞌhn, per gaca nayaachiꞌhn xcweenta
cohsa raꞌ nin ruluuꞌyi xcweenta guelsiisii xteꞌnnahn.
\v 31 Dxiohs nin naa Xtaada Jesucristu nin rgaꞌha chyu guiñiꞌ
zaꞌca lah Ñiꞌh tuꞌpazi, naann Ñiꞌh naꞌh cañiꞌn dxyiꞌdxyi
nin naa guchii.
\v 32 Chin guyuuꞌhuhn loh guihdxyi Damascu,
gubernadohr nin guyuuꞌ riꞌchi, naa ba xpwiinn rrehyi Aretas,
gunabwaꞌ ba guhpa raꞌ xcuxchisi ba hasta rwaaꞌ pweerta
xteenn guihdxyi chi tin ñanee raꞌ ba naꞌh ñieꞌwꞌhn laꞌn
lahtsi dxiꞌba,
\v 33 per bidxeela xa batehta raꞌ xpwiinn
Jesucristu naꞌh laꞌn tuhbi tiipi nez tihxi muhru nin nuu
gadiidxi guihdxyi chi ya ziꞌchi zi gulaꞌhn loh raꞌ ba tin
ayi binaꞌzuꞌhn.
\c 12
\s Dxiohs baluuꞌyiloh loh bacaꞌlda
\p
\v 1 Ayica riiꞌ gahn ziga chyu guiñiꞌ zaꞌca ziga xcweenta
gahca raꞌ nu, mas guiñiꞌn xcweenta bacaꞌlda neezaa
xcweenta bihsi nin basagwaꞌha Dxiohs naꞌh.
\v 2 Nuꞌnbwaꞌn
tuhbi ndxiꞌhw nin riachii stoꞌ ñiꞌh xchiꞌdxyi Jesucristu,
nin baguhca tsiꞌdah yihza gwah hastayi naa nin riohnna
dxibaaꞌ. Ayi gaꞌnnahn gu cun gaduhbi ziga naa tihxi ba gwah
ba, o ganaalla xaalma ba gwah; sola Dxiohs naann.
\v 3 Dxiohs chiꞌh zi naann gu gaduhbi tihxi ndxiꞌhw chi o
ganaalla xaalma ba, sola laꞌh chiꞌh zi Ñiꞌh naann Ñiꞌh.
\v 4 Gwah ba hasta naa lahdxyi Dxiohs nin nabahan dziꞌtsi
dxibaaꞌ hasta bihn ba dxyiꞌdxyi raꞌ nin ayi nuu
guuyidxyiꞌdxyi ba loh raꞌ bwiinn.
\v 5 Naꞌh ñahca nayaachi
stoꞌn xcweenta ziga ndxiꞌhw chi, per ayi nuu guelnnayaachi
stoꞌn pur xcwenta gahcan. ¿Xa guiñiꞌ chiꞌhn dxyiꞌdxyi nin
ayi naa guelsiisii xteꞌnnahn?
\v 6 Per sidela naꞌh
xclaaꞌdzihn guiñiꞌ zaꞌcaꞌhn pur xcweeꞌntahn, niꞌchi nin ayi
gacan dxyiꞌdxyi nin riagadziiba zi yiꞌcahn, laasii naꞌh
cañiꞌn pur dxyiꞌdxyi nin naa guchii; per ayi cayuhnn
dxiꞌhñin tin para guunn bwiinn lligaaba mahzi ru bwiinn
lasahcaruhn loh nin rwaꞌhaloh tu ruꞌnnahn o nin rihn dxiahga
tu rñiꞌn.
\p
\v 7 Bwiꞌhnn Dxiohs baluuꞌyiloh ziahan rooꞌ duxa raꞌ cohsa
loon, per ayi pur niꞌchi dxiꞌh chuu guelnayaachi stoꞌn,
sino que guzahca stoꞌn ziga zi nin gudiiꞌdxi tuhbi guihchii
tihxi ñiꞌh pur xcweenta bwiinndxaaba nin laa Satanahs tin
dxiaabaꞌhn loh guelrzaꞌcazii xteenn ba tin ayi gacaꞌhn ziga
tuhbi bwiinn nin gaca lasahca.
\v 8 Biohnnala bweelta laꞌn
gunaaba loh Daada Jesucristu tin guziaꞌtii Ñiꞌh xcweenta
guelrzaꞌcazii riiꞌ,
\v 9 per nah Jesucristu loon squiiꞌ:
“Guelrahcanee nin guniꞌhiꞌhn ayi xi dxiaꞌdxi luꞌh”, pwihsi
niꞌchin nin naꞌh riahxiꞌhn naan bwiinn siisii tin ziꞌchi
guluuꞌyiloh ru xquelrnabwaꞌ Jesucristu pur xcweeꞌntahn.
\v 10 Pwihsi niꞌchin nin riahxiꞌhn pur guelsiisii nee riahxi zahn
loh guelrñiꞌyah nin rñiꞌ raꞌ bwiinn pur naꞌh nee chin
cachiꞌhnaꞌhn ziga garaaloh, nee neezaa chin rutiꞌdxiloon
guelrzaꞌcazii pur xcweenta Jesucristu, laasii chin
siisiitiiꞌhihn, chiꞌchi runiꞌhi Dxiohs mahzi ru guelnadxiipa
cun guelnadaꞌn naꞌh.
\s Guyuuꞌ guelrzaaꞌ Pahblu pur xpwiinn guidoꞌ Jesucristu nin nuu loh guihdxyi Corintu
\p
\v 11 Laꞌn guhca ziga tuhbi bwiinn nin bagaduhbi loh xigaaba
ñiꞌh, per laꞌh gahca tu bwiꞌhnn tu guhca squiiꞌ, laasii
laꞌhtu ruhnn tucahri ñiñiꞌ zaꞌca tu xcweeꞌntahn laasii ayi
xi riaꞌdxiꞌhn nez loh raꞌ snuhn raꞌ bwiinn raꞌ nin naa raꞌ
pooxtla nicala naꞌh ayi chyu naan.
\v 12 Loh dziꞌn nin
bwiꞌhnnaꞌhn cun paseensi nez loh tu, bwiꞌhnnañin ziga
tuhbi nin guchii naa tuhbi pooxtla xteenn Jesucristu, laasii
bwiꞌhnnañin cun milahgru raꞌ nee cun sehn raꞌ.
\v 13 ¿Xi
bwiꞌhnnaꞌhn loh tu tin nah tu ruꞌnnahn lligaaba gulliaaꞌ
lasahca tu que snuhn raꞌ xpwiinn guidoꞌ Jesucristu? Nin
bwiꞌhnn chiꞌh zihn naa deeꞌ: ayi bataalahn xtsiꞌn tu, naann
tu ayi xi gunaꞌbaꞌhn loh tu para ñahcanee tu naꞌh, ziga
cumpahñu nin bwiꞌhnn raꞌ guriin raꞌ bwiinn guidoꞌ naꞌh.
¡Gulguiꞌhnn pardohn naꞌh pur nin ayi xi gunaꞌbaꞌhn loh tu!
\p
\v 14 Pwihsi nnah laꞌn caguꞌguihn tin gazaaꞌ chohnna bweelta
nin rieꞌldaguiaꞌhahn cuun tu, nee ayi xi gutiꞌdxi dziꞌnaꞌhn
laꞌhtu ziga guicaꞌhn nin nahpa tu, sino que laꞌhtu
xclaaꞌdzihn tin cheezah zaꞌca tu loh xneziuh Dxiohs; laasii
laꞌh daada raꞌ rguꞌchaꞌyi raꞌ mweeyi para laꞌh raꞌ lliiꞌn
raꞌ ba ayi laꞌhgaꞌh dxiꞌh lliiꞌn ba cuꞌchaꞌyi mweeyi para
laꞌh ba.
\v 15 Ya naꞌh cun gaduhbi stoꞌn gunaann chiꞌhn cun
gaxtu cun nin guichiꞌhnaꞌhn, nee hasta guunnzahn gaxtu naꞌh
pur xaalma tu nicala rluuꞌyi mahzi ru rucaꞌh stoꞌn laꞌh tu
per laꞌhtu gulliaaꞌ rucaꞌh stoꞌ tu naꞌh.
\p
\v 16 Per mahzi ziga ayi batiꞌdxi dziꞌnaꞌhn laꞌhtu, nicala
nuu raꞌ nin cañiꞌ basaguiꞌhihn laꞌhtu laasii nadxeela
laaꞌdzihn loh guelrsaguiꞌhi.
\v 17 ¿Xa naa ziga
rusaguiꞌhihn laꞌhtu? ¿Ta naan pur tuhbi raꞌ bwiinn raꞌ nin
guxeꞌhlaꞌhn loh tu?
\v 18 Chin guxeꞌhlaꞌhn Titu cun stuhbi
bwihtsi lasaaꞌ raꞌ nuꞌh nin bieꞌguiaꞌha xa nuu tu, ¿ta
basaguiꞌhi Titu laꞌhtu? ¿Tayi guchii dxiꞌhn garoopa nu
tuhsi naa xigaaba nu nee tuhsi za xtsiꞌn nu?
\p
\v 19 Ya gaduhbi nin cayuꞌlda tu loh dxihtsi riiꞌ, pwehda
cayuhnn tu lligaaba dxuugannaaba nu loh tu xa dxiaꞌlda stoꞌ
tu xtuhlda nu, per ayi ziꞌchi dxiꞌh; dxuñiꞌ nu squiiꞌ nez
delaanta loh Dxiohs nee cun lah Daada Jesucristu, tin ziꞌchi
chioo ru tu loh xchiꞌdxyi Dxiohs, bwiitsi raꞌn nin
nadziiꞌhiduuxaraꞌn,
\v 20 laasii rdxyiibihn ziga chin
cheguiaꞌhahn cuun tu, mas ayi rii tu ziga xclaaꞌdzihn nee
naꞌh ayi za gwaꞌha tu naꞌh ziga xclaaꞌdzi tu. Rdxyiibihn
chuu dxixiꞌhw, guelrzaꞌbi stoꞌ lasaaꞌ xixteenn ñiꞌh, llahn,
guelrlaaꞌha lasaaꞌ, guelrñiꞌyah, bwiinn rsah dxyiꞌdxyi, cun
nin ruhnn nayaachi raꞌ nin riahsa-rcaꞌnee laꞌh bwiinn lasaaꞌ
ba.
\v 21 Rdxyiibihn ayi nnagah loh dxieꞌldaguiaꞌhn cuun tu
stuhbi, guunn Xchiohsaꞌhn para gaziꞌxtuhyiꞌhn nez loh tu,
nee dxieꞌsuh za guꞌnaꞌhn xcweenta xtuhlda tu nin nuu ca
chieempa laasii ayi riigasaaꞌn tu dziꞌn dxaaba raꞌ tin
guibahan nayaa tu; sola nuu tu nin naꞌhla nez cayuhnn xtuꞌh
gunnaꞌh nin ayi naa cheꞌhla tu cun ziahan ru raꞌ dziꞌn raꞌ
nin ruhnn tu.
\c 13
\s Luulchima guelruuꞌyi dxyiꞌdxyi xteenn Pahblu
\p
\v 1 Nnah gaca chohnna bweelta dxieꞌldaguiaꞌhahn cuun tu. Xi
chiꞌh zi guelchiah nin guchaꞌga tu nahpa gacan chiohpa o
hasta chohnna bwiinn nin naann paꞌh xa naa guelchiah chi.
\v 2 Laꞌn guñiꞌ la desde galohyi, yannah laꞌn guiñiꞌ stuhbi
ziga zi naꞌh zuꞌhn nez loh tu, yannah nin nuuꞌhuhn zihtu
rucaꞌhn dxihtsi loh raꞌ nin guluuꞌtii duhlda desde galohyi,
nee cun loh garaa ru raꞌ bwiinn; sidela naꞌh dxieꞌldahn
stuhbi, ayi ru guelralahsa stoꞌ xcweenta raꞌ ba,
\v 3 laasii
xclaaꞌdzi tu gwaꞌha tu ta guchii runiꞌhi Jesucristu
guelrnabwaꞌ naꞌh tin guiñiꞌn xchiꞌdxyi Ñiꞌh. Per
Jesucristu ayi naa Ñiꞌh ziga tuhbi bwiinn siisii xcweenta
tu sino que ruhnn Ñiꞌh ruluuꞌyi Ñiꞌh xa naa xquelnadaꞌn
Ñiꞌh nez laꞌn lastoꞌ tu.
\v 4 Guchiica chin gucah Ñiꞌh loh
cruhzi guhca Ñiꞌh ziga zi tuhbi bwiinn siisii nin ayi xi
guelnadaꞌn nahpa, per nabahan Ñiꞌh par nahpa Ñiꞌh zirooꞌ
guelrnabwaꞌ xteenn Dxiohs. Pwihsi ziꞌchi za laꞌhnu nuu nu
loh guelsiisii nin guhpa Ñiꞌh, per cun laꞌh Ñiꞌh zibahan
nu loh guelrnabwaꞌ xteenn Dxiohs laasii nuu nu tuhsi cun
laꞌh Ñiꞌh tin ziꞌchi za gachidxiaacanee nu laꞌhtu.
\p
\v 5 Laꞌh gahca tu gulcaꞌhnaa laꞌn lastoꞌ tu, sidela guchii
paꞌh gwachii stoꞌ tu xchiꞌdxyi Dxiohs. Gulguiaꞌha zaꞌca xa
naa lastoꞌ tu: ¿Tayi rudiꞌhi tu cweenta nuu nabahan
Jesucristu stoꞌ cada tuhbigah tu?, o ¿gu nuu tu nin ayi naa
xpwiinn Ñiꞌh?
\v 6 Naꞌh xclaaꞌdzihn gacabwaꞌ tu, ayi naa nu
bwiinn nin bisaguiꞌhi sino que riachii stoꞌ paꞌcaa nu
xchiꞌdxyi Jesucristu,
\v 7 nee rachibwihdxyi-rachinaaba nu
loh Dxiohs tin ayi xi dziꞌn dxaaba guunn tu, per ayi tin
guiñiꞌ zaꞌca dxiꞌh bwiinn xcweenta nu sino que tin guunn tu
ganaalla dziꞌn zaꞌca, nicala laꞌhnu gariaꞌcaa nu ziga zi
bwiinn nin ayi xi lasahca,
\v 8 laasii ayi nuu xa guidiꞌhnn
nu tin ñichiloh dxyiꞌdxyi nin naa guchii, mas guidiꞌhnn nu
para guilliiꞌdzin.
\v 9 Niꞌchin sola riaꞌhan nasaa stoꞌ nu
chin rihn nu laꞌhtu nahpa guelnadxiipa cun guelnadaꞌn loh
guelriachiistoꞌ xteenn tu nicala laꞌhtu nin ayiru
riagannastoꞌ tu laꞌhnu, per laꞌhnu chiꞌchi paꞌh mahzi ru
riazah rbwihdxyi-rnaaba nu loh Dxiohs tin guunn Ñiꞌh para
guibahan tu ziga naa xigaaba Ñiꞌh.
\v 10 Cagacaꞌhn dxihtsi
riiꞌ loh tu galoh nin riaꞌdxi dxieꞌlda guiaꞌhahn cuun tu,
tin chin dxieꞌldahn, ayi gaca nahda yihca tu cun loh
xquelguxchiiꞌsihn, nin baniꞌhi Daada Jesucristu naꞌh tin
guꞌnnahn para chuu zirooꞌ xquelnadaꞌn tu nez ziga
riachiistoꞌ tu xchiꞌdxyi Dxiohs, ayi para ñichiloh dxiꞌhn.
\p
\v 11 Pwihsi niꞌchin bwihtsiraꞌ nu; guldxiahxi, gulgahca
bwiinn bazaaꞌ guelriachii stoꞌ-stoꞌ ñiꞌh, gulgasaguuꞌdzi
stoꞌ tu, tuhsi lligaaba gulguiꞌhnn, nee gulguibahan cun
guelnadoꞌlaadzi. Dxiohs nin naa xteenn Ñiꞌh guelnadziiꞌhi
lasaaꞌ cun guelrbwihdxyii stoꞌ gaapaa laꞌhtu.
\v 12 GulgahpaDxiohs lasaaꞌ tu ziga tuhbi ziga stuhbi tu.
\v 13 Garaa raꞌ lasaaꞌ raꞌ nuꞌh nin nuu guelriachii stoꞌ raꞌ stoꞌ
ñiꞌh, ruxeꞌhla tuhbi guelrgahpaDxiohs para laꞌhtu.
\p
\v 14 Guelrahcanee xteenn Daada Jesucristu, cun neezaa
guelnadziiꞌhi lasaaꞌ xteenn Dxiohs, cun guelrahcanee xteenn
Spíritu Saantu chuu laꞌn lastoꞌ tu. Ziꞌchi pwihsi.