\id eph
\h Efesios
\toc1 Efesios
\mt1 Dxihtsi nin bacaꞌh San Pahblu loh raꞌ bwiinn Efesu
\c 1
\s GuelrgahpaDxiohs
\p
\v 1 Naꞌh Pahblu, naan tuhbi pooxtla xteenn Jesucristu laasii
ziꞌchi xclaaꞌdzi Dxiohs gaca. Pwihsi cagacaꞌhn dxihtsi riiꞌ
loh tu bwiinn Efesu raꞌ nin baguyuuꞌ-guyaꞌzi guelriachiistoꞌ
xchiꞌdxyi Jesucristu, neezaa loh raꞌ nin ruhnn ziga paꞌhca
xclaaꞌdzi Ñiꞌh gaca.
\v 2 Gulguicaꞌha guelrahcanee cun
guelrbwihdxyii stoꞌ xteenn Xtaada Dxiohs nuꞌh cun nee xteenn
Daada Jesucristu.
\s Ruluuꞌyi Pahblu xcweenta guelrzaꞌcazii nin batiꞌdxiloh Jesucristu pur laꞌhnuꞌh
\p
\v 3 Pwihsi gachiñiꞌzaꞌca nuꞌh lah Daada Dxiohs nin naa
Xtaada Daada Jesucristu, nee ziga naa nuꞌh tuhsi cun
Jesucristu nin nuu llaaꞌndxibaaꞌ niꞌchin nezchi riinloh
garaaloh guelruhntaaꞌyi nin rahcanee Ñiꞌh laꞌhnuꞌh.
\v 4 Dxiohs gulii Ñiꞌh laꞌhnuꞌh pur xcweenta Jesucristu galohyi
chin nagahdxi cwachixchih Dxiohs guidxyiyuh tin ziꞌchi loh
si Ñiꞌh chuu nuꞌh guidiꞌhnn nuꞌh xtsiꞌn Ñiꞌh cun guelnayaa
lastoꞌ xteenn nuꞌh nee laꞌh si Ñiꞌh gacaꞌhstoꞌ nuꞌh.
\v 5 Nee gucaꞌha Ñiꞌh laꞌhnuꞌh tin gaca nuꞌh ziga lliiꞌn
dziꞌtsi paꞌca Ñiꞌh pur xcweenta Jesucristu, laasii ziꞌchi
bwiꞌhnn Ñiꞌh lligaaba pur nin bayuuꞌn stoꞌ Ñiꞌh laꞌhnuꞌh.
\v 6 Pwihsi pur niꞌchin rachiñiꞌzaꞌca nuꞌh lah Dxiohs garaa
dxyih pur ziga bayuuꞌn stoꞌ Ñiꞌh laꞌhnuꞌh, ya bwiꞌhnntaaꞌyi
Ñiꞌh laꞌhnuꞌh pur nin naa nuꞌh tuhsi cun Lliiꞌn Ñiꞌh nin
nadziiꞌhi Ñiꞌh.
\v 7 Ya ziga taantu nin guhca nadziiꞌhi
Dxiohs laꞌhnuꞌh, baldaꞌh Ñiꞌh laꞌhnuꞌh loh duhlda pur
xcweenta rihn nin guxiꞌhi Lliiꞌn Ñiꞌh.
\v 8 Dxiohs
cagaluuꞌyi Ñiꞌh balaaca chiꞌh nin nadziiꞌhi Ñiꞌh laꞌhnuꞌh
ziga caganiꞌhi Ñiꞌh guelnasiin cun guelrahcabwaꞌ laꞌhnuꞌh,
\v 9 nee cagaluuꞌyi za Ñiꞌh laꞌhnuꞌh dxyiꞌdxyi raꞌ nin
nuugulaꞌn Ñiꞌh loh xigaaba Ñiꞌh nin ayi bwiꞌhnn Ñiꞌh para
ñaꞌzidxiahga raꞌ bwiinn dez galohyi laasii bwiꞌhnn Ñiꞌh
lligaaba nahpa guluuꞌyiloh dziꞌn raꞌ chi pur xcweenta
Jesucristu,
\v 10 per nahpa zadzihn dxyih nin soobaa
gariaꞌcaa gaca ziga lligaaba nin bwiꞌhnn Dxiohs, ya loh
dxyih chi zutiaaꞌha Dxiohs garaatiiꞌ raꞌ cohsa nin nuu nez
dxibaaꞌ cun nin rii loh guidxyiyuh tin gutiꞌdxi Ñiꞌh laꞌh
raꞌn nezloh naa Jesucristu tin ziꞌchi guinabwaꞌ Jesucristu
laꞌh raꞌn.
\p
\v 11 Dxiohs rahca ruhnn Ñiꞌh xichiꞌhzi niꞌchin ayi
guinagahn guunn Ñiꞌh ninchiꞌhzi nin guiclaaꞌdzi Ñiꞌh naa
bwen guunn Ñiꞌh; gulii Ñiꞌh laꞌhnuꞌh tin naa nuꞌh tuhsi
cun Jesucristu tin gachicaꞌha nuꞌh hereensi nin bwiꞌhnn
Dxiohs lligaaba guniꞌhi Ñiꞌh laꞌhnuꞌh.
\v 12 Bwiꞌhnn Ñiꞌh
bariaꞌcaa guhca squiiꞌ tin guiñiꞌzaꞌca raꞌ bwiinn ziga naa
lah Ñiꞌh cun xquelrnabwaꞌ Ñiꞌh pur nin gwaꞌha raꞌ ba xa
nazaꞌca naa Dxiohs cun laꞌhnuꞌh nin naa bwiinn raꞌ nin
mwerdoꞌtiiꞌ gwachiistoꞌ raꞌñiꞌh xchiꞌdxyi Jesucristu.
\v 13 Ziꞌchiza laꞌh tu chin bihn tu dxyiꞌdxyi nin naa guchii,
dxyiꞌdxyi nin rutaꞌh laꞌh bwiinn loh duhlda, ya ziꞌchi
gwachiistoꞌ tu laꞌh Jesucristu cun guhcaza tu tuhsi cun
laꞌh Ñiꞌh. Ya niꞌchin gucah tu bwaꞌ xteenn Spíritu Saantu
xteenn Dxiohs laꞌn lastoꞌ tu nin biaꞌhan dxyiꞌdxyi Ñiꞌh
gucaꞌha tu.
\v 14 Dxiohs baniꞌhi Ñiꞌh Spíritu Saantu
xteenn Ñiꞌh lastoꞌ raꞌ nuꞌh tin guiduꞌhun guchiiza
gachicaꞌha nuꞌh hereensi nin gudiꞌhi Dxiohs guicaꞌha raꞌ
xpwiinn Ñiꞌh chin guzaꞌloh Ñiꞌh xtsiꞌn Ñiꞌh, ya squiiꞌ
naa ziga gazaaꞌ ziga gutaꞌh Ñiꞌh laꞌh garaa raꞌ nin
bacaꞌbwaꞌ Ñiꞌh gaca xpwiinn Ñiꞌh, tin guiñiꞌzaꞌca raꞌ ba
lah Ñiꞌh cun xquelrnabwaꞌ Ñiꞌh.
\s Rbwihdxyi-rnaaba Pahblu loh Dxiohs tin guziaꞌñih Ñiꞌh loh xigaaba bwiinn raꞌ nin gwachiistoꞌ raꞌ xchiꞌdxyi Ñiꞌh
\p
\v 15 Pwihsi ziga biindxiaagapaꞌhn xcweenta ziga riachiistoꞌ
tu xchiꞌdxyi Jesucristu nee ziga nahpa za tu guelnadziiꞌhi
lasaaꞌ lastoꞌ tu cun garaa raꞌ xpwiinn Jesucristu,
\v 16 pwihsi niꞌchin nin ayi radxahgaꞌhn rudiꞌhihn guelzuxchiilli
nezloh Dxiohs pur xcweenta tu chin rbwihdxyi-rnaꞌbaꞌhn
nezloh Ñiꞌh.
\v 17 Rbwiidxyi-rnaꞌbaꞌhn loh Dxiohs nin naa
Xtaada Daada Jesucristu, Xtaada Dxiohs Ñiꞌh nin rnabwaꞌ
llaaꞌndxibaaꞌ, tin guniꞌhi Ñiꞌh laꞌh tu tuhbi
guelrahcabwaꞌrooꞌ nee cun tuhbi guelruluuꞌyiloh xteenn raꞌ
lligaaba nin nuulaꞌn tin ziꞌchi gadzihn gacabwaꞌ ru tu xa
naa xcweenta Yuꞌbi Dxiohs,
\v 18 nee cun rnaꞌbazahn tin
guziaꞌñih Ñiꞌh loh xigaaba tu para gacabwaꞌ tu cuun niꞌca
nin naa guelnazaꞌca nin naannloh tu zuniꞌhi Ñiꞌh laꞌh tu
laasii gudihdxyi Ñiꞌh laꞌhtu pur nin riachiistoꞌ tu
xchiꞌdxyi Ñiꞌh ya balaacachiꞌh lasahca guelñaꞌñihrooꞌ nin
gudiꞌhi Ñiꞌh ziga hereensi laꞌh raꞌ xpwiinn Ñiꞌh,
\v 19 nee
cun balaacachiꞌh guelrnabwaꞌ rooꞌ nin naꞌzuu guzuh hasta ayi
riaꞌlohtiiꞌ loh hasta naꞌzuu xquelrnabwaꞌ Ñiꞌh nin nahpa
naꞌzu caꞌha Ñiꞌh para laꞌh nuꞌh ziga naa nuꞌh bwiinn raꞌ
nin ya gwachiistoꞌ xchiꞌdxyi Ñiꞌh. Guelrnabwaꞌ riiꞌ naa
nin laꞌhgahca nin baluuꞌyi Dxiohs cun gaduhbi laꞌgaꞌtiiꞌ
xjweersi Ñiꞌh nee cun gaduhbi guelnadxiipa xteenn Ñiꞌh
\v 20 chin bacwaꞌhn Ñiꞌh laꞌh Jesucristu, ya batiꞌdxi Ñiꞌh
laꞌh Jesucristu tin guzohba Ñiꞌh xladu nanchii Daada
Dxiohs nez dxibaaꞌ tin ziꞌchi ya naꞌzuu caꞌha Ñiꞌh
guelrnabwaꞌ,
\v 21 pwihsi nahpa Ñiꞌh guelrnabwaꞌ loh cuunchiꞌhzi gubieerna,
nee loh cuunchiꞌhzi guelrnabwaꞌ, nee loh
cuunchiꞌhzi guelrdziꞌbaloh loh snuhn raꞌ bwiinn, loh chyu
chiꞌhzi bwiinn nin rnabwaꞌ, nee cun cuunchiꞌhzi lah bwiinn
nin rdziꞌbaloh ruzeꞌta bwiinn nin nuu raꞌ nnah tantu loh
guidxyiyuh riiꞌ nee tantu ziga loh guidxyiyuh cuubi nin
zeꞌ-yahlda dxiꞌ.
\v 22 Ya Dxiohs batsiiga garaatiiꞌ
cohsa nez ñaaꞌ Jesucristu cun neezaa bazuh Dxiohs laꞌh
Jesuhs tin naa Ñiꞌh nin rnabwaꞌ loh garaa raꞌ bwiinn nin
naa xquidoꞌ Ñiꞌh,
\v 23 pwihsi xpwiinn guidoꞌ Ñiꞌh naa raꞌ
ba ziga tihxi Ñiꞌh ya ziga rutiꞌdxi Dxiohs garaatiiꞌ
nezloh Jesucristu, ziꞌchiza laꞌh Ñiꞌh rutiꞌdxi Ñiꞌh garaa
raꞌ za cohsa nezloh raꞌ bwiinn nin naa xquidoꞌ Ñiꞌh.
\c 2
\s Rutaꞌh Dxiohs laꞌh nuꞌh loh duhlda laasii nadziiꞌhi Ñiꞌh laꞌhnuꞌh
\p
\v 1 Galohyi guhca tu zigazi bwiinn guuchi pur xcweenta
garaaloh raꞌ cohsa dxaaba xteenn duhlda nin guluuꞌtii tu nez
loh Dxiohs,
\v 2 pwihsi loh nin gubahan tu squiiꞌ gwanaꞌhla
tu ganaalla xtsiꞌn raꞌ bwiinn loh guidxyiyuh riiꞌ, cun
bwiꞌhnn za tu garaa nin guhca xigaaba bwiinndxaaba nin
rnabwaꞌ loh guidxyiyuh riiꞌ, ziga zeezah rusaziꞌguehlda ba
lastoꞌ bwiinn raꞌ nin nagahdxi guzoꞌbadxiahga xchiꞌdxyi
Dxiohs.
\v 3 Nee hasta laꞌhza nuꞌh gubahan nuꞌh ziga laꞌh
raꞌ ba loh dxyih raꞌ nin ya gudiiꞌdxi, bidiꞌhnn nuꞌh nin
guclaaꞌdzichiꞌhzi tihxi nuꞌh cun bidiꞌhnn za nuꞌh ninchiꞌhzi
nin bieꞌsuh loh xigaaba nu, ya ziꞌchi bariaꞌcaa neezaa nuꞌh
bidxyiꞌchinee Dxiohs laꞌh nuꞌh ziga rdxyiꞌchineeza Ñiꞌh
laꞌh raꞌ snuhn bwiinn guidxyiyuh nin ayi nnaa guzoꞌbadxiahga
xchiꞌdxyi Ñiꞌh.
\v 4 Per Dxiohs, balaaca chiꞌh nin
nazaꞌcaduxa naa Ñiꞌh niꞌchin balahsastoꞌ Ñiꞌh laꞌhnuꞌh,
\v 5 ya baniꞌhi Ñiꞌh guelnabahan laꞌhnuꞌh loh nin guhca nuꞌh
zigazi bwiinnguuchi loh duhlda, yannah nahpa nuꞌh
guelnabahan riiꞌ pur nin naa nuꞌh tuhsi cun Jesucristu, nee
gulaꞌh nuꞌh loh duhlda pur nin balahsastoꞌ Dxiohs laꞌhnuꞌh.
\v 6 Chin bacwaꞌhn Dxiohs laꞌh Jesucristu loh guelguhchi,
neezaa nuꞌh bwiꞌhnn Dxiohs lligaaba gulaꞌh nuꞌh loh duhlda
tin guhca bariaꞌcaa ziga neezaa nuꞌh bacwaꞌhnnee Dxiohs
laꞌhnuꞌh tuhsi cun Jesucristu, ya chin guzohba Jesucristu
lahdu nanchii xteenn Dxiohs nuꞌh neezaa nuꞌh guhldaa nuꞌhn.
\v 7 Bwiꞌhnn Ñiꞌh squiiꞌ tin ruluuꞌyi Ñiꞌh laꞌhnuꞌh loh
dxyih raꞌ nin zeꞌ-yahldaa balaaca chiꞌh naa guelrucaꞌhstoꞌ
cun guelralahsastoꞌ xteenn Ñiꞌh cun laꞌhnuꞌh pur naa nuꞌh
tuhsi cun Jesucristu,
\v 8 pwihsi pur nin balahsastoꞌ Dxiohs
laꞌhnuꞌh, niꞌchin bataꞌh Ñiꞌh laꞌhnuꞌh loh duhlda chin
gwachiistoꞌ nuꞌh xchiꞌdxyi Ñiꞌh. Niꞌchin ayi guunn tu
lligaaba bidxeela tun pur laꞌhgahca xcweenta tu sino que
gucaꞌha tun laasii Dxiohs naa nin baniꞌhin laꞌhtu.
\v 9 Nee
ayiza guhcan pur xcweenta xiilla tuhbi dziꞌn zaꞌca nin ñuhnn
biñaachi tin ziꞌchi ayi chuu nin tuhbi nin guunn nayaachi,
\v 10 laasii Dxiohs naa nin gulahchixchih laꞌh nuꞌh, nee
laꞌhzaÑiꞌh gulahchibiñih laꞌhnuꞌh cun Jesucristu tin
guidiꞌhnn nuꞌh dziꞌn zaꞌca raꞌ nin bwiꞌhnn Ñiꞌh lligaaba
des galohtiiꞌyi nin nahpa guidiꞌhnn nuꞌh.
\s Guridxyiistoꞌ Dxiohs cun laꞌh nuꞌh pur Jesucristu
\p
\v 11 Pwihsi gulgazaꞌstoꞌ tu, laꞌhtu nin ayi naa raꞌ bwiinn
Israel, nin rñiꞌ raꞌ ba loh raꞌ ñiꞌh “bwiinn ziitu” laasii
ayi tu bwaꞌ nin riuuꞌ raꞌ bwiinn Israel, ya cun naa raꞌzi
bwiinn guidxyiyuh riuuꞌ bwaꞌ chi tihxi bwiinn,
\v 12 nee
gulgazaꞌza stoꞌ tu loh dxyih raꞌ nin gudiiꞌdxi ayi nuꞌnbwaꞌ
tu laꞌh Jesucristu, nee cun biaꞌhan zihtuza tu nezloh raꞌ
bwiinn Israel, nee nin ayiza xi cweenta badiꞌhi tu ziga
biaꞌhannee dxyiꞌdxyi Dxiohs laꞌh raꞌ bwiinn Israel. Sola
gucaꞌnzaa tu loh guidxyiyuh nicala zigachiꞌhzi ñaꞌloh
xquelnabahan tu ayi biuꞌnbwaꞌ tu laꞌh Dxiohs nee nin ayiza
xi lligaaba badzihn yihca tu ñidxiꞌhyi tu xa ñacanee Ñiꞌh
laꞌhtu.
\v 13 Per ya ziga nnah, ziga naa tu tuhsi cun
Jesucristu pur xcweenta llarihn Ñiꞌh nin guxiꞌhi Ñiꞌh,
laꞌhtu nin guzah zihtu nez loh Ñiꞌh galoh nnah laꞌhtu
zeezah gahxu nezloh Ñiꞌh,
\v 14 niꞌchin nnah Jesucristu naa
guelridxyiistoꞌ xteenn nuꞌh; laꞌh Ñiꞌh bachiꞌdxiu-bachaꞌga
Ñiꞌh laꞌh raꞌ bwiinn Israel nee cun laꞌh raꞌ za nin ayi naa
raꞌ bwiinn Israel, tin gaca raꞌ ba tuhsi guihdxyi xteenn
Dxiohs loh nin baziaꞌtii Ñiꞌh xcweenta dziꞌn lehyi raꞌ nin
bwiꞌhnn guhpaallahn lasaaꞌ tu,
\v 15 per ya ziga gucah tihxi
Jesuhs loh cruhzi, bwiꞌhnn Ñiꞌh gahn baziaꞌtii Ñiꞌh
dxyiꞌdxyi raꞌ xteenn lehyi nin bwiꞌhnn guyuuꞌllahn stoꞌ raꞌ
bwiinn Israel cun laꞌh raꞌ bwiinn ziitu, ya ziga gwabiiga
garoopa cwaꞌh raꞌ ba nezloh Jesucristu chin gwachiistoꞌ raꞌ
ba xchiꞌdxyi Ñiꞌh, biuhn Ñiꞌh laꞌh raꞌ ba tuhbi guihdxyi
cuubi, tin ziꞌchi gurihdxyiinee lastoꞌ lasaaꞌ raꞌ ba.
\v 16 Nee pur nin guhchi za Ñiꞌh loh cruhzi, bañihchiloh Ñiꞌh
guelrdxihndxinee lasaaꞌ xteenn loh garoopa cwaꞌh bwiinn
guihdxyi raꞌ, ya ziꞌchi badiꞌhi Ñiꞌh gaapaa raꞌ ba
guelnadziiꞌhi lasaaꞌ nezloh Dxiohs tin biahca raꞌ ba tuhsi
tihxi Ñiꞌh.
\p
\v 17 Zigaza caa raꞌ dxyiꞌdxyi raꞌ riiꞌ loh Xchihtsi Dxiohs:
\q Biꞌ Ñiꞌh tin baluuꞌyi Ñiꞌh xa cwidxyiistoꞌ bwiinn cun lasaaꞌ ba nicala bwiinn
nin biaꞌhan zihtu nezloh Dxiohs nee nicalaza nin rii gahxu nezloh Ñiꞌh.
\p
\v 18 Laasii pur xcweenta Jesucristu ziga tuhbi ziga stuhbi
raꞌ nuꞌh rahca zogadzihn nuꞌh nezloh Daada Dxiohs pur tuhsi
Spíritu Saantu nin ruhn biñih Ñiꞌh laꞌn lastoꞌ nuꞌh.
\v 19 Pwihsi niꞌchin nnah laꞌhtu ayiru naa tu bwiinn ziitu, nee
ayiruza nabahan tu zihtu hasta naa lahdxyi tu, laasii nnah
laꞌhtu nuu dxaꞌga loh guihdxyi nin naa xteenn Dxiohs, nee
naa za tu bwiinn nin nuu raꞌ yihdzi Dxiohs.
\v 20 Laꞌhtu
naa tu zigazi tuhbi yuuꞌ rooꞌ nin guyahsa yihca ziga tuhbi
muru dxiah nin naa raꞌ ziga pooxtla raꞌ cun profeta raꞌ, ya
Jesucristu gaꞌh naa ziga dxiah nin mwer guzuh xchihn yuuꞌ
chi.
\v 21 Ya yuuꞌ riiꞌ cagazaꞌ Dxiohsan pur nin naa tu
xteenn garaa lahdu yuuꞌ riiꞌ hasta gadzihn chaꞌloh gacan
xquidoꞌ Daada Jesucristu,
\v 22 ya ziꞌchi laꞌhtu cun neezaa
raꞌ bwiinn Israel nin gwachiistoꞌ, ziga dxiꞌdxiu-dxaꞌga tu
laꞌh Jesucristu, rdxaꞌgalasaaꞌ tu tin ziꞌchi gadzihn gaca tu
tuhbi yuuꞌ nin chuu Dxiohs pur xcweenta Spíritu Saantu
Ñiꞌh.
\c 3
\s Bigaꞌbi Pahblu tin chegaluuꞌyi ba xchiꞌdxyi Dxiohs loh raꞌ bwiinnziitu
\p
\v 1 Pwihsi naꞌh Pahblu, pur xcweenta dxyiꞌdxyi raꞌ riiꞌ nuu
ñieꞌwꞌhn laꞌn lahtsi dxiꞌba pur xcweenta xchiꞌdxyi
Jesucristu nin ruluꞌyiꞌhn loh tu bwiinn raꞌ nin ayi naa raꞌ
bwiinn Israel,
\v 2 pwihsi banaa gulgacabwaꞌ laꞌh Ñiꞌh
bacaꞌbi Ñiꞌh naꞌh tin guluꞌyiꞌhn xchiꞌdxyi Ñiꞌh laꞌhtu.
\v 3 Dxiohs baluuꞌyi naꞌh ziga naa xigaaba lligaꞌtsi xteenn
Ñiꞌh ziga nin ya laꞌn bacaꞌhla dxihtsi loh tu.
\v 4 Ya nin
guꞌlda tu dxihtsi chi zacabwaꞌ tu nuꞌnbwaꞌn xa naa dxyiꞌdxyi
nagaꞌtsi xteenn Jesucristu.
\v 5 Dxyiꞌdxyi nin guhcanagaꞌtsi
raꞌ chi ayi chyu bwiinn baluuꞌyilohtiiꞌin loh ñiꞌh loh dxyih
raꞌ nin bagudiiꞌdxi ziahan duxala yihza, per yannah laꞌh
Dxiohs bwiꞌhnn para baluuꞌyiloh dxyiꞌdxyi nagaꞌtsi raꞌ chi
nezloh raꞌ pooxtla cun nezloh raꞌ profeta raꞌ xteenn Dxiohs
pur xcweenta Spíritu Saantu xteenn Ñiꞌh,
\v 6 ya dxyiꞌdxyi
nagaꞌtsi raꞌ chi naa dee raꞌ: pur xcweenta xchiꞌdxyi
Jesucristu nin rutaꞌh laꞌh raꞌ bwiinn loh duhlda, ruhnn
Dxiohs gaca raꞌ bwiinn raꞌ nin ayi naa raꞌ bwiinn Israel
tuhsi guihdxyi cun bwiinn Israel nin riachiistoꞌ ñiꞌh
xchiꞌdxyi Jesucristu tin garoopa cwaꞌh raꞌ ba gaca xteenn
raꞌ ba hereensi nin biaꞌhan dxyiꞌdxyinee Dxiohs laꞌh raꞌ
bwiinn Israel.
\p
\v 7 Naꞌh bieꞌdxiahldaa bigaꞌbiꞌhn guluꞌyiꞌhn xchiꞌdxyi
Jesucristu pur balahsastoꞌ Dxiohs naꞌh, nee rahca ruꞌnnahn
dziꞌn riiꞌ laasii rcaꞌhahn jweersi rooꞌ nin runiꞌhi Dxiohs
naꞌh,
\v 8 nee nicala naan llihguiꞌhntiiꞌ loh garaa raꞌ
xpwiinn Dxiohs, naꞌh naan nin baniꞌhi Ñiꞌh guelrahcanee
xteenn Ñiꞌh tin guluꞌyiꞌhn xchiꞌdxyi Ñiꞌh loh raꞌ bwiinn
nin ayi naa raꞌ bwiinn Israel tin gacabwaꞌ raꞌ ba balaaca
chiꞌh lasahca nin nahpa Jesucristu para laꞌhnuꞌh,
\v 9 ya
Dxiohs nin bwiꞌhnnchaꞌyi garaatiiꞌ bacaꞌbi Ñiꞌh naꞌh tin
guluꞌyiꞌhn laꞌh garaa raꞌ bwiinn xa naa xcweenta dxyiꞌdxyi
nagaꞌtsi nin guhpachaꞌyi Ñiꞌh loh yihza raꞌ nin gudiiꞌdxi
tin nnahyi cayiinlohon.
\v 10 Cagariaꞌcaa squiiꞌ tin nnah
pur xcweenta bwiinn guidoꞌ raꞌ, garaa raꞌ guelrnabwaꞌ raꞌ
cun garaa raꞌ guxchiisi raꞌ nez dxibaaꞌ gadzihn gacabwaꞌ raꞌ
ba guelnasiin duxa xteenn Dxiohs loh garaa ziga ruhnn Ñiꞌh.
\v 11 Dxiohs bwiꞌhnn Ñiꞌh lligaaba squiiꞌ desde galohtiiꞌyi
niꞌchin biꞌ Daada Jesucristu tin bariaꞌcaa guzohba talpaꞌh
ziga guclaaꞌdzi Dxiohs gaca.
\v 12 Ya pur xcweenta nin
riachiistoꞌ nuꞌh xchiꞌdxyi Jesucristu ayi riuuꞌ guelnadxyiꞌbi
lastoꞌ nuꞌh ziga choobiiga ganaaba nuꞌh nezloh Dxiohs.
\v 13 Ya niꞌchin rnaꞌbaꞌhn loh tu ayi guiriaꞌhgahn tu pur nin
cagatiꞌdxiloon pur xcweenta tu; maz guldxiahxi laasii dee
naa tuhbi guelnazaꞌca para laꞌhtu.
\s Guelnadziiꞌhi lasaaꞌ pur xcweenta Jesucristu
\p
\v 14 Ya pur cweenta riiꞌ niꞌchin nin rusiaꞌchyu lliibihn nez
delaanta loh Daada Dxiohs nin nabahan dziꞌtsi dxibaaꞌ,
\v 15 Dxiohs nin bazaꞌloh garaatiiꞌ raꞌ nin nuu nez llaaꞌndxibaaꞌ
cun loh guidxyiyuh.
\v 16 Pwihsi rbwihdxyi-rnaꞌbaꞌhn loh
Dxiohs tin guutarlooh Ñiꞌh guelnazaꞌca xteenn xquelñaꞌñih
Ñiꞌh para laꞌhtu nin gaca ziga gaca nadxipastoꞌ tu pur
xcweenta Spíritu Saantu xteenn Dxiohs
\v 17 tin ziꞌchi ba
chuu nabahan Jesucristu laꞌn lastoꞌ tu pur tantu nin riachii
stoꞌ tu xchiꞌdxyi Ñiꞌh tin ziꞌchi guinaꞌzu xtulbaaꞌ zaꞌca
tu loh guelnadziiꞌhi lasaaꞌ xteenn Jesucristu,
\v 18 tin
ziꞌchiza gadzihn gacabwaꞌ tu cun snuhn raꞌ xpwiinn
Jesucristu balaaca chiꞌh nabiꞌhyi nee nuꞌhla nee gueeta nee
naa guiyaꞌ loh guelnadziiꞌhi lasaaꞌ xteenn Jesucristu.
\v 19 Rnaꞌbaꞌhn loh tu, pwihsi, tin gulgadxiꞌhyi loh guelnadziiꞌhi
lasaaꞌ xteenn Jesucristu nin naa mahzi gurooꞌrooꞌ loh garaa
raꞌ cohsa rooꞌ nin bidiaꞌha nuꞌh tin ziꞌchi baguibahannee
nuꞌh garaa xquelnazaꞌca Dxiohs.
\p
\v 20 Yannah gaca lasahcaduxa lah Dxiohs nin nahpa
guelrnabwaꞌ para guunn ziahanroo duxa ru cohsa loh nin
ganaaba nuꞌh o nin guidiꞌhnn nuꞌh lligaaba pur xcweenta
xquelrnabwaꞌ Ñiꞌh nin nuu nabahan laꞌn lastoꞌ nuꞌh.
\v 21 Lasahca duxa naa lah Dxiohs nezloh bwiinn guidoꞌ nee pur
xcweenta Jesucristu para loh garaa dxyih nin banaa para
tuꞌpazi. Ziꞌchi gaca pwihsi.
\c 4
\s Radxaꞌga lasaaꞌ nuꞌh pur Spíritu Saantu
\p
\v 1 Pwihsi ziga ñieꞌwꞌhn pur xcweenta xchiꞌdxyi Jesucristu
rnaꞌbaꞌhn loh tu gulguibahan ziga nin rgaꞌha guunn tu laꞌhtu
nin bibwiꞌhi pur xigaaba Dxiohs.
\v 2 Gulgahca bwiinn
nadoꞌlaadzi, bwiinn nazaꞌcaduxa, gulgahpa paseensi, nee
gulgahpa guelnadziiꞌhi lasaaꞌ cun ziga tuhbi cun ziga stuhbi
lasaaꞌ tu,
\v 3 nee gulguiꞌhnn para guibahan tu tuhsi loh
lligaaba tin ayi taaꞌha loh lasaaꞌ tu cun guelrahcanee
xteenn Spíritu Saantu nee pur xcweenta za guelridxyiistoꞌ
nin ruchiꞌdxiu-ruchaꞌga laꞌhtu.
\v 4 Ziꞌchi tuhsi tihxi naa
nuꞌh loh Jesucristu, nee tuhsiza naa xigaaba nuꞌh cun laꞌh
Ñiꞌh, cun tuhsi za hereensi nin naannloh nuꞌh zachicaꞌha
nuꞌh loh nin gudihdxyi laꞌhnuꞌh,
\v 5 nee tuhsi za Daada cun
tuhsi za guelriachiistoꞌ, nee cun tuhsi za guelrohbañihsa,
\v 6 nee nuu za tuhbi dxiꞌh Daada Dxiohs nin rnabwaꞌ loh
garaatiiꞌ, nin zuu galaayillee garaatiiꞌ nee nuu Ñiꞌh loh
garaatiiꞌ.
\p
\v 7 Per cada tuhbigah raꞌ nuꞌh bachicaꞌha raꞌ nuꞌh dziꞌn raꞌ
nin babwiꞌhnn Jesucristu lligaaba bachicaꞌha raꞌ nuꞌh.
\v 8 Pwihsi niꞌchin rñiꞌ loh Xchihtsi Dxiohs squiiꞌ:
\q Chin bacah Ñiꞌh llaaꞌndxibaaꞌ hasta rnabwaꞌ Ñiꞌh,
ya bwiꞌhnn Ñiꞌh gahn loh garaa raꞌ guelrnabwaꞌ,
\q ya chiꞌchi bwiꞌhnntaaꞌyi Ñiꞌh yihca raꞌ xpwiinn Ñiꞌh
tin guunn raꞌ ba xtsiꞌn Ñiꞌh.
\p
\v 9 ¿Xi zee loh dxyiꞌdxyi riiꞌ ziga rñiꞌin, “Bacah
Ñiꞌh”? Pwihsi nin rariaꞌcaa rñiꞌ dxyiꞌdxyi riiꞌ naa
biehtaza Daada Jesucristu hasta riaꞌhan gabihldxyi.
\v 10 Nin biehta chi niꞌchi gahcan nin bacah za hasta naa mahzi
guiyaꞌduxa nez dxibaaꞌ tin ziꞌchi gucaꞌha Ñiꞌh nahpa Ñiꞌh
guelrnabwaꞌ nez dxibaaꞌ cun loh guidxyiyuh.
\v 11 Ya laꞌh
gahca za Ñiꞌh bwiꞌhnn Ñiꞌh lligaaba bazuh Ñiꞌh laꞌh raꞌ
bwiinn nin naa raꞌ pooxtla, ya spaaldaa raꞌ ba bazuh Ñiꞌh
ziga profeta raꞌ, spaaldaa raꞌ ba ziga nin riaguiꞌhnbiñih
xchiꞌdxyi Jesucristu, spaaldaa raꞌ ba ziga gaca pastohr raꞌ,
cun spaaldaa raꞌ ba ziga mwehsu raꞌ.
\v 12 Ya ziꞌchi bazuh
Ñiꞌh nin naa raꞌ xpwiinn Ñiꞌh tin guunn raꞌ ba dziꞌn nin
badiꞌhi Ñiꞌh cada tuhbigah raꞌ ba nee tin ziꞌchi guunn raꞌ
ba chuu ziga lliiꞌdzi tihxi Jesucristu garaa lahdu,
\v 13 hasta gadzihnyi dxyih nin gaca garaa raꞌ nuꞌh tuhsi loh ziga
riachiistoꞌ raꞌ nuꞌh nee gadzihnyi dxiuꞌnbwaꞌ zaꞌca nuꞌh
Lliiꞌn Dxiohs, ya ziꞌchi gaca nuꞌh bwiinn nin baniin ca zuu
loh ziga rahcabwaꞌ nuꞌh xchiꞌdxyi Ñiꞌh, ziga tuhbi bwiinn
nin bagurooꞌ loh xquelrnabwaꞌ Jesucristu.
\v 14 Ya ayiru chyu gusaaꞌn gaca xigaaba nuꞌh ziga xigaaba biñiꞌn
tin biñiꞌn ayi guinagahntiiꞌ ruhnn bwiinn gahn rusaguiꞌhi
raꞌ ba laꞌh raꞌ bi cun dxyiꞌdxyi nin ayi galluꞌyi nin
ruluuꞌyi raꞌ ba laasii nuu raꞌ bwiinn nin nasiin nin ruhnn
raꞌ squiiꞌ.
\v 15 Mahz bwen gabweꞌhecaa
nuꞌh guidiꞌhnn nuꞌh ziga chozah nuꞌh loh dxyiꞌdxyi nanchii
cun guidxiaapaza nuꞌh guelnadziiꞌhi lasaaꞌ lastoꞌ nuꞌh cun
chyuchiꞌhzi bwiinn niꞌchin nahpa guidiꞌhnn nuꞌh para chioo
nuꞌh loh garaatiiꞌ guelnazaꞌca xteenn nin naa Daada nin
dziꞌbaloh loh nuꞌh nin naa laꞌh Jesucristu.
\v 16 Ya pur
Jesucristu rnaꞌzu-dxaꞌga raꞌ xpwiinn Ñiꞌh zigazi tuhbi
tihxi bwiinn tin ziꞌchi naꞌzu zaꞌca raꞌ ba tin rahcanee
lasaaꞌ raꞌ ba pur ziga naa xtsiꞌn cada tuhbigah raꞌ ba, ya
ziꞌchi cadxiꞌhyi raꞌ ba xa cayahca ziahanru raꞌ bwiinn loh
guelnadziiꞌhi xteenn Jesucristu.
\s Tuhbi guelnabahan nacuubi nin rdxeela pur laꞌh Jesucristu
\p
\v 17 Pwihsi dxyiꞌdxyi raꞌ riiꞌ naa nin rñiꞌn loh tu nee
rucaꞌbizañin laꞌhtu pur lah Daada Jesucristu, ayiru chezah
guibahan tu ziga nabahan raꞌ bwiinn nin ayi nuꞌnbwaꞌ laꞌh
Dxiohs, bwiinn raꞌ nin sola nabahan raꞌ loh lligaabachiꞌhzi
nin riagadziiba yihca raꞌ ñiꞌh.
\v 18 Ya nuu nacahyitiiꞌ loh
xigaaba raꞌ ba; laꞌh raꞌ ba ayi rudiꞌhi guuxta stoꞌ raꞌ ba
loh guelnabahan nin runiꞌhi Dxiohs laasii naa raꞌ ba bwiinn
nadiiꞌdxii rwaaꞌ raꞌ ñiꞌh,
\v 19 nee ya guhca dxiipa stoꞌ raꞌ
ba ya gucaꞌha mahn raꞌ ba, ayiru xa dxiaꞌchyu loh xigaaba
raꞌ ba, ya zeezaꞌbi raꞌ ba loh garaaloh cohsa dxaaba raꞌ,
\v 20 per laꞌhtu ayi biuꞌnbwaꞌdxiꞌh tu Jesucristu, tin nee tu
gaca tu bwiinn ziꞌchi raꞌ,
\v 21 ya sidela guchii tu
bazoꞌbadxiahga tu xchiꞌdxyi Jesucristu nee cun sidela neezaa
basiꞌdxi tu xcweenta Ñiꞌh nin naa dxyiꞌdxyi guchii,
\v 22 pwihsi basaaꞌn tu loh garaa cohsa raꞌ nin gudiiꞌdxi-guzah
nin gubahan tu loh ñiꞌh. Pwihsi niꞌchin nnah gulgasiaꞌhan
garaa raꞌ cohsa dxaaba raꞌ chi nez dihtsi tu, laasii niꞌchi
raꞌ nin basaguiꞌhi laꞌhtu loh dxyih raꞌ nin gudiiꞌdxi.
\v 23 Niꞌchin nnah gulgasacuubi lastoꞌ tu cun loh xigaaba tu,
\v 24 nee gulgasacuubi za laꞌhtu loh guelnabahan nacuubi nin
basiinloh Dxiohs pur laꞌhtu tin ziꞌchi pur xcweenta
xchiꞌdxyi Ñiꞌh guluuꞌyi xquelnabahan tu tuhbi guelnabahan
nayaa, tuhbi guelnabahan nin nalluꞌyi para loh xtsiꞌn
Dxiohs.
\p
\v 25 Pwihsi niꞌchin ayiru chezah tu guuyi tu dxixiꞌhw, mahz gulguiñiꞌ
dxyiꞌdxyi nin naa guchii loh raꞌ lasaaꞌ tu laasii laꞌhnuꞌh naa nuꞌh bwiinn raꞌ
nin naa tuhsi famihyi.
\p
\v 26 Sidela laꞌhtu rdxyiꞌchi tu gulguiaꞌha ayi dxiaaba
tu loh duhlda, nee gulguiꞌhnn pur ayi gahw llahn lastoꞌ tu loh gaduhbi dxyih.
\v 27 Ayi gusaaꞌn tu gusiaꞌchi bwiinndxaaba lastoꞌ tu.
\p
\v 28 Bwiinn nin naa bwiinn gubaaꞌn ayiru guunn ba gubaaꞌn, mahzi guunn ba
dziꞌn cun naa ba tin ziꞌchi gaapaa ba nin gacanee ba laꞌh raꞌ bwiinn raꞌ nin
ayi xi nahpa.
\p
\v 29 Nee ayi gusaaꞌn tu guiriaꞌh dxyiꞌdxyi nnah rwaaꞌ tu, mahz gusiaꞌha rwaaꞌ
tu guiñiꞌ tu dxyiꞌdxyi zaꞌca raꞌ tin ziꞌchi guunn tu gahn guchiooꞌ tu ziga
chechiistoꞌ raꞌ snuhn bwiinn nin dxihnn dxiahga raꞌ xchiꞌdxyi tu.
\v 30 Ayi
chiꞌhyi tu nez guibiin lastoꞌ Spíritu Saantu xteenn Dxiohs nin bwiꞌhnn para
gucah tu bwaꞌ laꞌn lastoꞌ tu para hasta loh dxyihyi nin gadzihn chee tu hasta
nuu Dxiohs.
\p
\v 31 Gulcweꞌhe stoꞌ tu garaaloh raꞌ llahn nin cayuhnn naltaa
laꞌn lastoꞌ tu, ziga guelnadxyiꞌchi, guelrbwihdxidxiah cun
guelrbwidxihndxinee lasaaꞌ, nee cun garaaloh raꞌ ru cohsa
dxaaba raꞌ.
\v 32 Gulgahca bwiinn nadoꞌlaadzi nee gulgalahsa
stoꞌ tu lasaaꞌ tu ziga tuhbi ziga stuhbi raꞌ ba, nee
gulguiꞌhnn pardohn lasaaꞌ ziga tuhbi ziga stuhbi za tu
zigaza bwiꞌhnn Dxiohs pardohn laꞌhtu pur xcweenta
Jesucristu.
\c 5
\s Xa nahpa guibahan raꞌ bwiinn raꞌ nin naa raꞌ lliiꞌn Dxiohs
\p
\v 1 Laꞌhtu nin naa raꞌ lliiꞌn Dxiohs nin nadziiꞌhi dziꞌtsi
Ñiꞌh, gulguiꞌhnn pur gaca tu ziga laꞌh Ñiꞌh,
\v 2 gulgahpa
guelnadziiꞌhi lastoꞌ lasaaꞌ tu ziga gahca guhpa Jesucristu
guelnadziiꞌhi lastoꞌ Ñiꞌh cun laꞌhnuꞌh ya basaaꞌn Ñiꞌh
guhchi Ñiꞌh loh cruhzi pur laꞌhnuꞌh tin guhca Ñiꞌh zigazi
tuhbi guhn nin bichiaꞌh nahxi para nezloh Dxiohs.
\p
\v 3 Laꞌhtu nin naapaꞌh xpwiinn Dxiohs nin ayi guuyi tu nin
tuhbitiꞌhn xcweenta cohsa guelgubwihlli nee nin stuhbiza
cohsa dxaaba raꞌ nee nin ayiza saꞌbi stoꞌ tu xteenn stuhbi
bwiinn,
\v 4 nin ayiza guuyi tu dxyiꞌdxyi nin rusiaꞌhan
xtuhyi laꞌh stuhbi bwiinn, nee ayiza guuyi tu dxyiꞌdxyi nin
riagadziibachiꞌhzii yihca tu, nee ayiza gaca tu bwiinn
nadoꞌbalaadzi, laasii dee raꞌ ayi xi galluꞌyi raꞌn mas nin
guunn tu gulgadxiꞌhyi xa gudiꞌhi tu guelzuxchiilli laꞌh
Dxiohs nin nuu dxibaaꞌ,
\v 5 laasii ya naann tu bwiinn nin
naa bwiinn gubwihlli o bwiinn nin riagadziiba garaaloh cosa
dxaaba loh xigaaba ñiꞌh o bwiinn nin rzaꞌbi stoꞌ ñiꞌh
xixteenn lasaaꞌ ñiꞌh, o bwiinn nin raann dxaan; bwiinn raꞌ
squiiꞌ ayi chuꞌtii raꞌ ba loh xquelrnabwaꞌ Jesucristu nin
naa xquelrnabwaꞌ za Dxiohs.
\v 6 Gulguiaꞌha tin ayi chyu
gusaguiꞌhi laꞌhtu cun dxyiꞌdxyi nin ayi galluꞌyi raꞌ, laasii
pur xcweenta raꞌ deeꞌ ziaaba xquelnah xteenn Dxiohs yihca
bwiinn raꞌ nin ayi guzoꞌbadxiahga xchiꞌdxyi Ñiꞌh.
\v 7 Niꞌchin gulguiaꞌha tin ayi guidxaꞌga tu loh raꞌ bwiinn raꞌ
chi.
\p
\v 8 Laꞌhtu cadxyih gubahan tu loh nacahyi xteenn duhlda, per nnah pur nin
badzihn gahxu tu nezloh Jesucristu, niꞌchin baziaꞌñih Ñiꞌh loh xigaaba tu,
niꞌchin gulguibahan zigazi bwiinn raꞌ nin rzah loh xquelñaꞌñih Jesucristu,
\v 9 laasii garaa raꞌ bwiinn raꞌ nin rzah raꞌ loh guelñaꞌñih, ruhnn raꞌ ba dziꞌn
zaꞌca nee zohba dxyiꞌdxyi guchii rwaaꞌ raꞌ ba.
\v 10 Niꞌchin gulchiꞌhyi xa
gusiahxi tu lastoꞌ Daada Jesucristu.
\v 11 Ayi chiꞌhyi tu xa guidxaꞌga tu loh
raꞌ nin rzah raꞌ loh nacahyi xteenn duhlda, mas gulguiꞌhnn xa guluuꞌyi tu laꞌh
raꞌ ba xa nabahan tu loh llaꞌñih xteenn Dxiohs tin ziꞌchi gacabwaꞌ raꞌ ba
nabahan raꞌ ba loh duhlda.
\v 12 Laasii hasta xtuhyi naa chyu guuyi xcweenta
cosa dxaaba nin ruhnn raꞌ ba ralaꞌn.
\v 13 Per chin riinloh raꞌ garaa raꞌ
dziꞌn dxaaba raꞌ riiꞌ loh guelñaꞌñih, riaꞌhan nayaa raꞌn
\v 14 laasii ruziaꞌñih
guelñaꞌñih yihcan. Niꞌchin caa loh dxihtsi squiiꞌ:
\q Babahn yiꞌh nin rahsi xaꞌta luꞌh,
gwastii loh raꞌ bwiinn guuchi,
ya Jesucristu guziaꞌñih yihca luꞌh.
\p
\v 15 Pwihsi niꞌchin gulguibahan zaꞌca; ayi guibahan tu ziga
bwiinn nin naa bwiinn dxiipatiiꞌ raꞌ, sino que gulgahca
bwiinn nasiin.
\v 16 Ayi gusaaꞌn tu tiidxi lliaaꞌha raꞌ
dxyih, laasii laꞌn dxyih raꞌ riiꞌ zeedahlaatiiꞌ bwiinn raꞌ
nin ruhnn raꞌ dziꞌn dxaaba raꞌ.
\v 17 Niꞌchin ayi gusaaꞌn tu
gaca tu bwiinn mbah tiiꞌ; niꞌchin mas gulchiꞌhyi guunn tu
ziga naa xigaaba Daada Jesucristu.
\v 18 Ayi gaca tu bwiinn
gwaaꞌ, laasii guerreeꞌ ruhnn rbweꞌhetiiꞌ duꞌh naa bwiinn cun
ziga dziꞌn dxaaba nin ruhnn raꞌ ba, mas gulgadiꞌhi lastoꞌ tu
guunnyihdzi Spíritu Saantu xteenn Dxiohs.
\v 19 Nin guunn
tu naa mas bwen gulguiꞌdxyiꞌdxyinee lasaaꞌ cun saalmu raꞌ
cun guldxiꞌlda caantu raꞌ nee cun himnu raꞌ laꞌn lastoꞌ tu
para laꞌh Daada Jesucristu,
\v 20 nee garaa dxyih tiiꞌ
gulgadiꞌhi guelzuxchiilli nezloh Daada Dxiohs pur lah
Jesucristu.
\s Ziga nahpa guibahannee lasaaꞌ raꞌ xpwiinn Jesucristu
\p
\v 21 Ziga tuhbi tu ziga stuhbi tu, gulchuu-gulchaꞌzi xchiꞌdxyi lasaaꞌ tu
laasii banaa tu bwiinn raꞌ nin ruzoꞌbadxiahga xchiꞌdxyi Jesucristu.
\p
\v 22 Laꞌhtu gunnaꞌh raꞌ nin ba bachinaa; gulgazoꞌbadxiahga
xchiꞌdxyi cheꞌhla tu ziga ruzoꞌbadxiahga tu xchiꞌdxyi
Jesucristu,
\v 23 laasii ndxiꞌhw naa nin nahpa guinabwaꞌ laꞌh
gunnaꞌh nin naa cheꞌhla ba, ziga naa Jesucristu laꞌh Ñiꞌh
dziꞌbaloh Ñiꞌh loh raꞌ bwiinn nin naa xquidoꞌ Ñiꞌh nin naa
ziga tihxi Ñiꞌh pur nin bataꞌh Ñiꞌh laꞌh raꞌ ba loh
duhlda.
\v 24 Ya ziga ruzoꞌbadxiahga raꞌ bwiinn guidoꞌ ziga
rnabwaꞌ Jesucristu guunn raꞌ ba, ziꞌchi za gunnaꞌh raꞌ nin
nuu raꞌ cheꞌhla raꞌ ñiꞌh nahpa guzoꞌbadxiahga raꞌ ba garaa
raꞌ xchiꞌdxyi cheꞌhla raꞌ ba.
\p
\v 25 Bwiinn raꞌ nin ba bachinaa raꞌ, gulgantsiiꞌhi laꞌh
gunnaꞌh nin naa cheꞌhla tu ziga rucaꞌhstoꞌ Jesucristu laꞌh
raꞌ bwiinn nin naa xquidoꞌ Ñiꞌh ya batiꞌdxiloh Ñiꞌh pur
laꞌh raꞌ ba.
\v 26 Bwiꞌhnn Ñiꞌh squiiꞌ tin basiaa Ñiꞌh
xtuhlda raꞌ bwiinn raꞌ nin naa xquidoꞌ Ñiꞌh tin ziꞌchi gaca
raꞌ ba tuhbi bwiinn nayaa nezloh Ñiꞌh nee biaa za lastoꞌ
raꞌ ba cun xchiꞌdxyi Ñiꞌh, zigazi riaa lahdxi dxiimma cun
ñihsa,
\v 27 tin ziꞌchi guluuꞌyi raꞌ xpwiinn guidoꞌ Ñiꞌh
zigazi tuhbi llaꞌñih rooꞌ nee ayi guidxeela nin tahyi cohsa
dxiimma cun ayiza xi dxiaꞌdxi raꞌ ba, sino que gaca raꞌ ba
bwiinn nin naa para laꞌhsiÑiꞌh, nin ayi xi tuhbi xtuhlda
raꞌ ñiꞌh.
\v 28 Pwihsi ziga nadziiꞌhi tuhbi ndxiꞌhw nin ba
bachinaa tihxi gahca ba, ziꞌchi za nahpa gaca nadziiꞌhi ba
laꞌh gunnaꞌh nin naa cheꞌhla ba. Bwiinn nin nadziiꞌhi laꞌh
gunnaꞌh nin naa cheꞌhla ba nadziiꞌhi za ba laꞌhgahca ba,
\v 29 laasii ayi nin tuhbi bwiinn nin rdxyiꞌchinee tihxi ba,
sino que rahpa ban cun guelnadaa ziga za nahpa Jesucristu
laꞌh raꞌ bwiinn raꞌ nin naa xpwiinn guidoꞌ Ñiꞌh,
\v 30 laasii laꞌhnuꞌh naa nuꞌh ziga tihxi Ñiꞌh.
\v 31 Caa loh
Xchihtsi Dxiohs squiiꞌ: “Niꞌchin laꞌh raꞌ ndxiꞌhw
rusiaꞌhann raꞌ ba laꞌh raꞌ xcuzahn ba tin rcaꞌha ba laꞌh
gunnaꞌh nin naa cheꞌhla ba, ya garoopa raꞌ ba rariaꞌcaa naa
raꞌ ba ziga tuhsi bwiinn.”
\v 32 Dee naa tuhbi cohsa
nagaꞌtsi rooꞌ, per naꞌh cañiꞌn xcweenta Jesucristu nee cun
xcweenta xpwiinn guidoꞌ Ñiꞌh.
\v 33 Niꞌchin loh garaatiiꞌ
cada tuhbigah tu gantsiiꞌhi tu laꞌh gunnaꞌh nin naa cheꞌhla
tu ziga nadziiꞌhi tu laꞌhgahca tu, ya gunnaꞌh raꞌ nahpa chuu
ba chaꞌzi ba xchiꞌdxyi ndxiꞌhw nin naa cheꞌhla ba.
\c 6
\p
\v 1 Biñiꞌniꞌhn raꞌ, gulgazoꞌbadxiahga xchiꞌdxyi xcuzahn tu pur xcweenta
xchiꞌdxyi Jesucristu laasii squiiꞌ rgaꞌha guunn tu,
\v 2 laasii squiiꞌ naa
mweer dxyiꞌdxyi lehyi nin guzaꞌloh guniꞌhi guelnazaꞌca laꞌhtu: “Gulguiꞌhnn
lasahca laꞌh xpah tu cun xmah tu,
\v 3 tin ziꞌchi guibahan nasaa tu nee gaapaa
za tu zirooꞌ guelnabahan loh guidxyiyuh riiꞌ.”
\p
\v 4 Ya laꞌhtu nin naa raꞌ daada raꞌ, ayi chiꞌhyi tu nez guidxyiꞌchi lliiꞌn tu,
mas gulchiꞌhyi xa gusiꞌdxi tu laꞌh raꞌ bi cun gulguiñiꞌnee laꞌh raꞌ bi tin
gaapaa raꞌ bi guelnadziiꞌhi xteenn Daada Jesucristu.
\p
\v 5 Laꞌhtu mooza raꞌ, gulgazoꞌbadxiahga xchiꞌdxyi bwiinn nin ruhnn tu xtsiꞌn
raꞌ ñiꞌh; gulguiꞌhnnan cun gaduhbi guelnadoꞌlaadzi xteenn tu, nee gulcuuꞌ
guelnadxyiꞌbi laꞌn lastoꞌ tu ziga tin ayi gadxeela tu cayaaꞌlla tu loh xtsiꞌn
ballwaaꞌn tu mas gulguiꞌhnnan zigazi cayuhnn tu laꞌgahca xtsiꞌn Jesucristu.
\v 6 Gulguiꞌhnn xtsiꞌn ba cun gaduhbi stoꞌ tu ayi chin zuu si dxiꞌh ba loh tu
tin ayi para guunn si dxiꞌh dxiaꞌhan zaꞌca tu loh ba; maz gulguiꞌhnnan ziga
guluuꞌyi naa paꞌh tu xpwiinn Jesucristu ziga cayuhnn tu cun gaduhbi stoꞌ tu
ziga xclaaꞌdzi Dxiohs gaca.
\v 7 Gulguiꞌhnn xtsiꞌn ba cun gaduhbi stoꞌ tu
zigazi guluuꞌyi cayuhnn tu tuhbi dziꞌn nezloh Daada Jesucristu, ayi nezloh
dxiꞌh tuhbi ndxiꞌhw,
\v 8 laasii banaann tu cada tuhbigah tu nicala naa tu
bwiinn nin gudooꞌ loh dziꞌn o bwiinn nin ayi gudooꞌ loh dziꞌn, zicaꞌha ba loh
Daada Jesucristu ziga naa xcweenta dziꞌn zaꞌca nin bwiꞌhnn ba.
\p
\v 9 Ya laꞌhtu nin naa raꞌ ziga ballwaaꞌn raꞌ, gulgahca
nadoꞌlaadzi za nezloh raꞌ xmooza tu nee ayi gusaꞌcazii tu
laꞌh raꞌ xmooza tu laasii banaann tu laꞌhtu cun laꞌh raꞌ ba
nacweenta tu ziga mooza gahca nezloh Daada Jesucristu nin
nuu dxibaaꞌ laasii laꞌh Ñiꞌh ayi ruhnn Ñiꞌh guriin-guriin
nezloh cada tuhbigah bwiinn.
\s Nin rulaloh laꞌh raꞌ xpwiinn Jesucristu loh xiichiꞌhzi
\p
\v 10 Yannah bwiitsi raꞌn, gulgahca bwiinn nadxiipalaaꞌdzi
loh guelrahcanee xteenn Daada Jesucristu pur xcweenta
guelrnabwaꞌ rooꞌ nin nahpa Ñiꞌh.
\v 11 Gulgahcu ziga lahdxi
dxiꞌba xteenn Dxiohs nin gulaloh laꞌhtu, tin ziꞌchi guunn tu
gahn gutiꞌdxiloh tu loh garaa raꞌ guelrusaguiꞌhi xteenn
bwiinndxaaba,
\v 12 laasii ayi chyu cadxihndxinee laꞌh tuhbi
bwiinn nin caa bweꞌhla cun nin nuu dzihta, sino que
dxudxihndxinee nuꞌh laꞌh spíritu raꞌ nin naa raꞌ ziga bwih
nin zaꞌbi nezloh bwih nez llaaꞌndxibaaꞌ nin caꞌha
guelrnabwaꞌ cun nin caꞌha guelguxchisi, cun nin rnabwaꞌ raꞌ
za loh guidxyiyuh nacahyi riiꞌ, nee cun neezaa nin nahpa
guelrnabwaꞌ nezloh bwih gadiidxi guidxyiyuh.
\v 13 Pwihsi
niꞌchin gulcuꞌguihn gacu tu zigazi tuhbi lahdxi dxiꞌba nin
gulaloh gaduhbi tihxi tu nin naa xteenn Dxiohs, tin ziꞌchi
zahca gutiꞌdxiloh tu loh garaa raꞌ dxyih dxaaba raꞌ tin chin
ba batiꞌdxiloh tu loh dxyih raꞌ chi zahca suh dziꞌtsi tu.
\v 14 Gulsudziꞌtsi pwihsi loh ganaalla nin naa nanchii paꞌh,
nee gulgaca nayaatiiꞌ loh dxyiꞌdxyi nanchii.
\v 15 Gulcwihnasiin, pwihsi, tin guzee tu chegaluuꞌyi tu xchiꞌdxyi
Jesucristu nin rbahchidxyii lastoꞌ raꞌ bwiinn,
\v 16 laasii
guelriachiistoꞌ tu gaca ziga nin suu caa loh raꞌ bahza raꞌ
nin zohba bwehla yihca raꞌ ñiꞌh nin naa xteenn bwiinndxaaba.
\v 17 Pwihsi nin gulaꞌloh loh xigaaba tu naa naann paꞌh tu
gulaꞌh tu loh duhlda, ya xchiꞌdxyi Dxiohs naa ziga tuhbi
spahda nin runiꞌhi Spíritu Saantu laꞌhtu.
\v 18 Pwihsi ayi
gusaaꞌn tu ziga cwiidxyi-guinaaba tu loh Dxiohs garaa dxyih
cun guelrahcanee xteenn Spíritu Saantu, nee gulgahca nasiin
cun ayi guiriaꞌhgahn tu, nee gulcwihdxyi-gulguinaaba pur
xcweenta garaa raꞌ xpwiinn guidoꞌ Dxiohs.
\v 19 Gulguinaaba
za loh Dxiohs pur xcweeꞌntahn tin ziꞌchi guniꞌhi Dxiohs
dxyiꞌdxyi nin guiñiꞌn nee tin ayi guidxyihbihn guiñiꞌn
dxyiꞌdxyi nagaꞌtsi xteenn Jesucristu.
\v 20 Dxiohs guxeꞌhla
naꞌh tin guluꞌyiꞌhn dxyiꞌdxyi riiꞌ, nee pur xcweentan nin
nuuñieꞌwꞌhn nnah. Gulguinaaba loh Dxiohs tin ziꞌchi guiñiꞌn
dxyiꞌdxyi riiꞌ sin ayi guidxyihbihn, nee guigaꞌha guiñiꞌñin.
\s Lulchima guelrgahpa Dxiohs
\p
\v 21 Tíquicu, nin naa bwihtsi dziꞌtsi nuꞌh loh
xcweenta Jesucristu, nee nanchii naa xigaaba bi loh
xtsiꞌn Daada Jesucristu; laꞌhbi dxiꞌ bi tin guuyidxyiꞌdxyi
bi loh tu cweenta ziga cazaꞌcaꞌhn.
\v 22 Pwihsi niꞌchin
guixeꞌhlaꞌhn bi para laꞌhtu tin nnaa bi loh tu xa dxuu nu
tin ziꞌchi cuꞌguiꞌw bi lastoꞌ tu.
\p
\v 23 Daada Dxiohs nee cun Daada Jesucristu guniꞌhi
guelridxyiistoꞌ cun guelrucaꞌhstoꞌ lasaaꞌ nee cun
guelriachiistoꞌ laꞌhtu nin naa raꞌ bwihtsi lasaaꞌ raꞌ nuꞌh
loh Jesucristu.
\v 24 Ya zuhnntaaꞌyi Ñiꞌh yihca tu
garaatiiꞌ tu nin zeezahdziꞌtsi rucaꞌhstoꞌ laꞌh Daada
Jesucristu. Ziꞌchi gaca pwihsi.