\id 2TI
\h 2 Timoteo
\toc1 2 Timoteo
\mt1 Nin raroopa dxihtsi nin bacaꞌh San Pahblu loh Timoteu
\c 1
\s GuelrgahpaDxiohs
\p
\v 1 Naꞌh Pahblu, naan tuhbi pooxtla xteenn Jesucristu;
Dxiohs gulii naꞌh pur guelnabahan nin biaꞌhan Ñiꞌh gudiꞌhi
Ñiꞌh laꞌh raꞌ bwiinn nin naa tuhsi cun Jesucristu.
\v 2 Rucaꞌhn dxitsi riiꞌ loh luꞌh, Timoteu, lliiꞌnahn loh
guelriachiistoꞌ nuꞌh xchiꞌdxyi Dxiohs. Rnaꞌbazahn loh
Xtaada Dxiohs nuꞌh cun loh Daada Jesucristu gacanee Ñiꞌh
yiꞌh, galahsastoꞌ Ñiꞌh yiꞌh, nee gusacwachidxyii za Ñiꞌh
stoꞌ luꞌh.
\s Nahpa guluuꞌyi Timoteu xa chechiistoꞌ bwiinn
\p
\v 3 Chin riagannastoꞌn yiꞌh chin rbwiidxyi-rnaꞌbaꞌhn loh
Dxiohs, dxyih-nagueꞌla rudiꞌhihn guelzuxchiilli loh
Dxiohs, nin cayuꞌnnahn xtsiꞌn Ñiꞌh gaduhbi xigaaba
nayaaꞌhahn nin nuuꞌhuhn loh Ñiꞌh, ziga gahca nin bwiꞌhnn raꞌ
guehtu xtatita raꞌn.
\v 4 Riagannastoꞌn gaduhbi hohra
xcweenta ñihsabwii loh luꞌh, yannah xclaaꞌdzihn gwaꞌhan loh
luꞌh tin dxiagadxah laꞌn lastoꞌn guelriahxi pur xcweenta
luꞌh,
\v 5 laasii riagannastoꞌn guelriachiistoꞌ zaꞌca nin
nahpa luꞌh; laꞌhgahca zan nin galoh gohpa raꞌ xnanihta Loida
luꞌh laꞌn lastoꞌ raꞌ ba cun xmah Eunice luꞌh. Niꞌchin nin
naꞌpahn siguhra neezaa luꞌh nuu guelriachiistoꞌ chi laꞌn
lastoꞌ luꞌh nnah.
\p
\v 6 Pwihsi niꞌchin nin rñiꞌn loh luꞌh nnah, gaca nasiin luꞌh
loh guelrahcabwaꞌ nin baniꞌhi Dxiohs yiꞌh chin
badziiꞌbanaaꞌhahn yihca luꞌh,
\v 7 pwihsi Dxiohs ayi baniꞌhi
Ñiꞌh tuhbi Spíritu nin nadxyiꞌbi laꞌh nuꞌh, sino que tuhbi
Spíritu nin nahpa guelrnabwaꞌ, nin rudiꞌhi guelnadziiꞌhi
lasaaꞌ, cun nin rudiꞌhi ziga xa riahcazaꞌca loh xquelrihn
bwiinn,
\v 8 pwihsi ayi gatuhyi loh luꞌh guiñiꞌ luꞌh
xchiꞌdxyi Daada Jesucristu, nee nin ayi za gatuhyi loh luꞌh
pur naꞌh, pur nin nuu ñieꞌwꞌhn xcweenta Jesucristu; mas
chaꞌyi guyuuꞌnee laꞌh nu loh guelrzaꞌcazii nin rahca para
laꞌh raꞌ nin ruuꞌyidxyiꞌdxyi xchiꞌdxyi Dxiohs tin ziꞌchi
gacanee Dxiohs yiꞌh,
\v 9 laasii Dxiohs nin bataꞌh laꞌh
nuꞌh loh duhlda, gudihdxyi Ñiꞌh laꞌh nuꞌh tin guibahan
nayaa nuꞌh loh si Ñiꞌh. Gudihdxyi Ñiꞌh laꞌh nuꞌh ayi pur
nin bidiꞌhnn dxiꞌh nuꞌh dziꞌn zaꞌca, sino que laasii ziꞌchi
bwiꞌhnn Ñiꞌh lligaaba gaca nee neezaa pur nin balahsastoꞌ
Ñiꞌh laꞌh nuꞌh pur Jesucristu galohyi chin nagahdxi guunn
chaꞌyi Ñiꞌh guidxyiyuh.
\v 10 Per chin biꞌ Jesucristu tin
basiaꞌpitii Ñiꞌh xtuhlda raꞌ nuꞌh loh guidxyiyuh riiꞌ,
baluuꞌyiloh balaaca chiꞌh nin ralahsastoꞌ Dxiohs laꞌh raꞌ
nuꞌh. Ya bañichiloh Jesucristu guelrnabwaꞌ xteenn
guelguhchi, ya xchiꞌdxyi Ñiꞌh nin ruluuꞌyi xa riapitii
duhlda baluuꞌyi guelnabahan, nee cun guelnabahan nin banaa
para tuꞌpazi.
\p
\v 11 Dxiohs gulii naꞌh tin gacaꞌhn tuhbi nin ruluuꞌyi
xchiꞌdxyi Ñiꞌh riiꞌ, nee guxeꞌhla za Ñiꞌh naꞌh tin gacaꞌhn
tuhbi xpooxtla Ñiꞌh cun tuhbi xmwehsu Ñiꞌh tin guluꞌyiꞌhn
xchiꞌdxyi Ñiꞌh laꞌh raꞌ bwiinn raꞌ nin ayi naa raꞌ bwiinn
Israel.
\v 12 Niꞌchin nin cagatiꞌdxiloon guelrzaꞌcazii pur
garaa raꞌ dxyiꞌdxyi raꞌ riiꞌ, per ayi ratuhyi loon laasii
laꞌn naann chyu xchiꞌdxyi gwachiistoꞌn, nee naannzahn
laꞌh Ñiꞌh zahca gapadziꞌtsi Ñiꞌh dziꞌn nin baniꞌhi Ñiꞌh
guꞌnnahn cun para hasta laꞌn dxyihyi nin dxiꞌ Ñiꞌh stuhbi.
\p
\v 13 Gwazahnee guluuꞌyi luꞌh dxyiꞌdxyi zaꞌca nin baluꞌyiꞌhn
yiꞌh, nee gwazahnee chechiistoꞌ luꞌh xchiꞌdxyi Dxiohs cun
neezaa gantsiiꞌhi luꞌh lasaaꞌ raꞌ nuꞌh nin naa nuꞌh tuhsi
loh xneziuh Jesucristu,
\v 14 nee cun gwazahnee dziꞌtsi
guelrahcabwaꞌ nin baniꞌhi Dxiohs yiꞌh pur Spíritu Saantu
xteenn Ñiꞌh nin naanabahan laꞌn lastoꞌ nuꞌh.
\p
\v 15 Pwihsi ya naann luꞌh garaa raꞌ bwiinn Asia raꞌ
guleꞌhestoꞌ raꞌ ba naꞌh; loh raꞌ deeꞌ nuudxaꞌga Figelu cun
Hermógenes,
\v 16 nee laꞌh Daada Jesucristu gacanee laꞌh
garaa bwiinn lasaaꞌ Onesíforu laasii laꞌh bi riiꞌ, ziahan
la bieꞌnee bi tuhbi guelnasiꞌsi lastoꞌn, ayi batuhyi loh bi
pur nin nuuꞌhuhn lahtsidxiꞌba,
\v 17 laasii chin badzihn bi
loh guihdxyi Roma, badxiꞌhyi bi naꞌh tin badxeela bi
naꞌh,
\v 18 nee laꞌh Daada Jesucristu galahsastoꞌ laꞌh bi chi
gadzihn dxyih nin guibiaꞌgarii Ñiꞌh, nee yiꞌh banaann luꞌh
balaaca chiꞌh guhcanee bi laꞌh nuꞌh chin bidxuu nuꞌh
guihdxyi Efesu.
\c 2
\s Tuhbi bwiinn nin ruhnn zaꞌca xtsiꞌn Jesucristu
\p
\v 1 Ya yiꞌh lliiꞌnahn, banaann nuꞌh rahcanee Dxiohs laꞌh
garaa raꞌ nin nuu tuhsi nezloh Jesucristu, niꞌchin
guzuhchihpa loh nin rahcanee Ñiꞌh yiꞌh.
\v 2 Dxyiꞌdxyi raꞌ
nin babihndxiahga luꞌh guñiꞌn loh ziahan raꞌ bwiinn,
laꞌgahca dxyiꞌdxyi raꞌ chi guñiꞌ loh raꞌ bwiinn raꞌ nin
riachii stoꞌ ñiꞌh tin zahca guluuꞌyi raꞌ za ba
dxyiꞌdxyi ca loh snuhn raꞌ bwiinn.
\v 3 Pwihsi yiꞌh,
bazuhchihpa stoꞌ luꞌh gutiꞌdxiloh luꞌh loh guelrzaꞌcazii
ziga tuhbi suldahdu xteenn Jesucristu.
\v 4 Ayi tuhbi
suldahdu nin guunn gahca dziꞌn nin bwiꞌhnn ba chin nagahdxi
gaca ba suldahdu, sino que ruhnn ba xtsiꞌn bwiinn nin gulii
laꞌh ba naa ba suldahdu tin ziꞌchi ruzoꞌbadxiahga ba
xchiꞌdxyi nin gulii laꞌh ba.
\v 5 Ziꞌchi gaca za, nin
rdzihta ayi nuu xi guicaꞌha ba sidela laꞌh ba ayi tsita
zaꞌca ba ziga nahpa tsita ba.
\v 6 Nee bwiinn nin ruhnn
dziꞌn loh dahan dela xclaaꞌdzi ba gutiaaꞌha ba liꞌhn nahpa
galoh gunnee ba loh xuh ba dziꞌn gusiaa ban.
\v 7 Bwiꞌhnn
lligaaba pur nin cañiꞌn loh luꞌh, ya laꞌh Daada Jesucristu
guunn nasiin yiꞌh tin gacabwaꞌ luꞌh garaatiiꞌ.
\p
\v 8 Bazaꞌstoꞌ luꞌh laꞌh Jesucristu, nin babahn loh
guelguhchi nee naa Ñiꞌh llahga guehtu Davihd. Deeꞌ
naa xchiꞌdxyi Dxiohs nin rusiaꞌpitii duhlda ziga nin
ruluꞌyiꞌhn,
\v 9 ya pur xchiꞌdxyi Dxiohs riiꞌ cazaꞌcaziin
hasta lahtsi dxiꞌba nuuꞌhuhn ziga zi tuhbi gubaꞌn, per
xchiꞌdxyi Dxiohs ayi ñieꞌwun lahtsi dxiꞌba.
\v 10 Pwihsi
niꞌchin cazaꞌcaziin tin gacanee raꞌn bwiinn raꞌ nin gulii
Dxiohs tin neezaa raꞌ ba chechiistoꞌ raꞌ ba xchiꞌdxyi Ñiꞌh
tin guibahan raꞌ ba loh llaꞌñih xteenn Jesucristu para
tuꞌpazi.
\v 11 Guchii duxa naa dxyiꞌdxyi raꞌ riiꞌ:
\q sidela guhchinee nuꞌh laꞌh Ñiꞌh, pwihsi zibahannee za nuꞌh
laꞌh Ñiꞌh;
\q
\v 12 sidela zaꞌcazii za nuꞌh pur laꞌh Ñiꞌh, zachinabwaꞌnee za nuꞌh
Ñiꞌh;
\q sidela guidiꞌtsi nuꞌh loh raꞌ bwiinn ayi chyu nuꞌnbwaꞌ
laꞌh Ñiꞌh,
\q neezaa Ñiꞌh gahbi Ñiꞌh ayi nuꞌnbwaꞌ Ñiꞌh laꞌh nuꞌh loh Xtaada
Dxiohs Ñiꞌh;
\q
\v 13 sidela laꞌh nuꞌh ayi chozahnee nuꞌh xchiꞌdxyi Ñiꞌh, per
laꞌh Ñiꞌh zuzoꞌba xchiꞌdxyi Ñiꞌh
\q laasii ayi gaca cweꞌhestoꞌ Ñiꞌh xchiꞌdxyi gahca Ñiꞌh.
\s Nahpa guunn Timoteu dziꞌn ziga xclaaꞌdzi Dxiohs gaca
\p
\v 14 Basazaꞌstoꞌ bwiinn raꞌ dxyiꞌdxyi raꞌ riiꞌ; gunabwaꞌ loh
raꞌ ba pur lah Daada Jesucristu ayi childxineedxyiꞌdxyi raꞌ
ba pur xiilla tuhbi dxyiꞌdxyi laasii lasaaꞌ dxyiꞌdxyi raꞌ
riiꞌ ayi xi guilasahca raꞌn, sola nin ruhnnan ruxiꞌnzin loh
xigaaba raꞌ nin rucaꞌdxiahga raꞌn.
\v 15 Bazuhchihpa stoꞌ
luꞌh tin gadzihn luꞌh loh Dxiohs ziga tuhbi bwiinn nin
ruhnn zaꞌca dziꞌn, nin ayi chuu xi pur gatuhyi loh luꞌh
laasii xnehza ruluuꞌyi luꞌh xchiꞌdxyi guchii xteenn Dxiohs.
\v 16 Guleꞌhestoꞌ luꞌh dxyiꞌdxyi rñiꞌyah raꞌ, neezaa ziahan
dxyiꞌdxyi raꞌ nin ayi xi galluꞌyi raꞌ laasii nin zohba
dxyiꞌdxyi dxaaba raꞌ riiꞌ rwaaꞌ raꞌ ñiꞌh chin rñiꞌ raꞌ ban
mahzi ru zezaꞌbi raꞌ ba loh duhlda,
\v 17 ya lligaaba raꞌ nin
nuu loh dxyiꞌdxyi raꞌ chi rlliiꞌdzi raꞌn ziga tuhbi
gueldxyihdxyi duxa nin ruxiꞌntiiꞌ tihxi bwiinn. Deeꞌ nin
cazahca Himeneu cun Filetu
\v 18 pur nin bañihchi raꞌ ba loh
dxyiꞌdxyi guchii; cañiꞌ raꞌ ba laꞌh ziga gabahan raꞌ bwiinn
loh guelguhchi gudiiꞌdxi la, ziꞌchi cayuhnn raꞌ ba
cariaꞌgahn raꞌ paaldaa bwiinn loh xchiꞌdxyi Dxiohs.
\v 19 Per Dxiohs laꞌh Ñiꞌh bazuh tuhbi dxiah nin baguzuh, nin caa
tuhbi dxyiꞌdxyi nin rñiꞌ: “Laꞌh Daada Dxiohs nuꞌnbwaꞌ Ñiꞌh
bwiinn raꞌ nin naa xpwiinn Ñiꞌh”, nee caa za: “Nahpa chyu
guiriaꞌcaa loh nin ayi naa xnehza garaa raꞌ nin guchii paꞌh
naa xpwiinn Daada Jesucristu.”
\p
\v 20 Ziga tuhbi yuuꞌ rooꞌ, ayi ganaalla si dxiꞌh nin
guhcachaꞌyi cun ohro raꞌ cun plata raꞌ dxiꞌh rii raꞌn laasii
neezaa rii raꞌ nin guhcachaꞌyi raꞌ cun yahga raꞌ cun nin
guhcachaꞌyi cun yuh raꞌ, ya paaldaa raꞌn naa nin xchiꞌhn loh
si tuhbi lañih ya nuu raꞌ nin rahca dziꞌn laꞌn raꞌ ñiꞌh
garaatiiꞌ dxyih raꞌ.
\v 21 Ziꞌchi gahca tuhbi bwiinn nin
xclaaꞌdzi guunn tuhbi dziꞌn rooꞌ xteenn Dxiohs, nahpa
guiriaꞌcaa ba loh xichiꞌhzi nin ayi xi guilasahca, ya
zahcanee Daada Jesucristu laꞌh ba tin guunn ba dziꞌn rooꞌ
xteenn Ñiꞌh.
\p
\v 22 Biriaꞌcaa loh garaalohtiiꞌ raꞌ dziꞌn dxaaba raꞌ nin
ruhnn raꞌ bwiinn; gwazahnee guelnabahan nayaa, gwachiistoꞌ
luꞌh laꞌh Dxiohs cun guntsiiꞌhi laꞌh bwiinn nee gudxiꞌhyi
dxyiriistoꞌ luꞌh cun garaa raꞌ bwiinn, tin gaca luꞌh tuhsi
cun laꞌh raꞌ nin ruhnn xtsiꞌn Dxiohs nayaa lastoꞌ raꞌ ba
rbwihdxyi-rnaaba raꞌ ba loh Ñiꞌh.
\v 23 Ayi gucaꞌdxiahga
luꞌh dxyiꞌdxyi nin ruluuꞌyi raꞌ bwiinn guidxyiyuh, laasii
naann luꞌh dxyiꞌdxyi raꞌ ca ruhnn rdxihndxinee raꞌ bwiinn
lasaaꞌ raꞌ ba,
\v 24 laasii tuhbi mooza xteenn Daada nin nuu
dxibaaꞌ ayi nuu guchaꞌga raꞌ ba bwiinn raꞌ nin naa bwiinn
dxixiꞌhw, neezaa nahpa gaca ba bwiinn zaꞌca cun chyuchiꞌhzi
bwiinn. Nahpa za gaca ba tuhbi bwiinn nin ruluuꞌyi zaꞌca,
nee nahpa chipastoꞌ za ba chin ayi xnehza dxiꞌh ruhnnee
bwiinn laꞌh ba,
\v 25 ya cun gaduhbi guelnadoꞌlaadzi xteenn
luꞌh guluuꞌyi luꞌh laꞌh raꞌ bwiinn raꞌ nin rdxyiꞌchinee yiꞌh
pur dxyiꞌdxyi nin ruluuꞌyi luꞌh; cweeza luꞌh Dxiohs guchaꞌh
xigaaba ba tin Dxiohs guunn gacabwaꞌ ba dxyiꞌdxyi guchii
xteenn Ñiꞌh,
\v 26 tin dxiaꞌñih loh xquelrihn raꞌ ba tin taꞌh
raꞌ ba laꞌn naa bwiinndxaaba, tin guunn raꞌ ba nin xclaaꞌdzi
Dxiohs.
\c 3
\s Squiiꞌ gaca raꞌ bwiinn laꞌn dxyih nin gaduhbi guidxyiyuh
\p
\v 1 Neezaa gacabwaꞌ luꞌh laꞌn dxyih chin gaduhbi guidxyiyuh
zadzihn dxyih sacazii tu,
\v 2 laasii ziuuꞌ raꞌ bwiinn nin
gucaꞌhstoꞌ laꞌhgahca si raꞌ ba, nin rucaꞌhstoꞌ ñiꞌh mweeyi
chiꞌh zi, bwiinn nin rñiꞌyahduxa chiꞌh zi, bwiinn nin ruhnn
lasahca laꞌhgahca raꞌ zi ñiꞌh, bwiinn raꞌ nin rñiꞌyah laꞌh
Dxiohs; nee ziuuꞌ za raꞌ bwiinn nin ayi guzoꞌbadxiahga
xchiꞌdxyi xcuzahn raꞌ ñiꞌh, nee ziuuꞌ raꞌ za bwiinn nin ayi
gudiꞌhi guelzuxchiilli loh Dxiohs pur xichiꞌhzi. Zibahan
raꞌ ba ziga xclaaꞌdzi si tihxi raꞌ ba nee ziga ayi gaann raꞌ
ba nuu Dxiohs.
\v 3 Nee laꞌn dxyih luulchima raꞌ chi ziuuꞌ
bwiinn raꞌ nin ayi ru dxiaa raꞌ ba hasta nin naa lasaaꞌ raꞌ
ba, bwiinn nin ayi rbweeza chindxinee lasaaꞌ raꞌ ñiꞌh, nee
zahca raꞌ ba bwiinn nin rutiꞌdxi duxa dxyiꞌdxyi xtuhlda
snuhn bwiinn, bwiinn raꞌ nin ayi nuu xa gucweꞌza xtuhlda raꞌ
ñiꞌh, bwiinn nahda tiiꞌ, nee zidxyiꞌchinee raꞌ ba laꞌh
garaatiiꞌ nin naa xnehza.
\v 4 Zahca raꞌ ba bwiinn nin
gutooꞌ xamihgu raꞌ ñiꞌh, bwiinn raꞌ nin ayi guidxyihbi guunn
nin guiclaaꞌdzichiꞌhzi raꞌ ñiꞌh, bwiinn raꞌ nin ruhnn
lligaaba naa raꞌ ba bwiinn lasahca duxa, bwiinn raꞌ nin
chiꞌhyi nin xclaaꞌdzi tihxi raꞌ ñiꞌh xlawaaꞌha guunn raꞌ ba
gadxiꞌhyi raꞌ ba laꞌh Dxiohs.
\v 5 Ziñiꞌ raꞌ ba xchiꞌdxyi
Dxiohs riachiistoꞌ raꞌ ba per ayi guluuꞌyi raꞌ ba
xquelrnabwaꞌ xteenn Jesucristu nin ruchaꞌh lastoꞌ raꞌ
bwiinn.
\p
\v 6 Ayi guidxaꞌga luꞌh loh raꞌ bwiinn chi laasii loh raꞌ
bwiinn squiiꞌ nuu raꞌ nin riuuꞌtii rwaaꞌ yihdzi raꞌ gunnaꞌh
raꞌ nin racahyi loh xigaaba ñiꞌh ya rusaguiꞌhi raꞌ ba laꞌh
raꞌ gunnaꞌh raꞌ chi nin zee zaꞌbi raꞌ loh duhlda. Gunnaꞌh
raꞌ riiꞌ ruhnn raꞌ ba garaaloh raꞌ nin xclaaꞌdzichiꞌhzi
tihxi raꞌ ba, ruhnn raꞌ ba garaaloh.
\v 7 Bwiinn raꞌ riiꞌ
rusiꞌdxi duxa raꞌ ba dxyiꞌdxyi cuubi, per ayi riaꞌhan
dxyiꞌdxyi guchii xteenn Jesucristu yihca raꞌ ba.
\v 8 Ziga
guhca guehtu Janes cun guehtu Jambres nin bidxyiꞌchinee laꞌh
guehtu Moisehs, ziꞌchi gahca za naa raꞌ bwiinn raꞌ nin
cadxyiꞌchinee dxyiꞌdxyi nin guchii xteenn Jesucristu; naa
raꞌ ba bwiinn raꞌ nin ya bigaasabuꞌhu loh xquelrihn raꞌ
ñiꞌh, ayi gacabwaꞌ raꞌ ba xchiꞌdxyi Dxiohs, ayiza
guelriachiistoꞌ laꞌn lastoꞌ raꞌ ba,
\v 9 per ayi ru nuu xa
chezah raꞌ ba xchih laasii garaa raꞌ bwiinn guidxyiyuh
zacabwaꞌ naa raꞌ ba tuhbi bwiinn paꞌhyi raꞌ ziga lasaaꞌ raꞌ
garoopa raꞌ nin bidxyiꞌchinee laꞌh guehtu Moisehs.
\s Pahblu rnaaba suudziꞌtsi Timoteu
\p
\v 10 Per yiꞌh gwazahnee loh dxyiꞌdxyi raꞌ nin ruluꞌyiꞌhn,
ziga nabahanahn nee xi pur ruꞌnnahn dziꞌn, nee ziga
riachiistoꞌn xchiꞌdxyi Dxiohs, nee ziga nadoꞌlaadzi stoꞌn,
nee ziga ralahsastoꞌn laꞌh bwiinn cun ziga zeezahdziꞌtsiꞌhn
loh xneziuhn Jesucristu.
\v 11 Naann luꞌh xa gurihnaꞌhla raꞌ
ba naꞌh nee xa gusaꞌcaziin nez laꞌn naa raꞌ bwiinn guihdxyi
Antioquía, neezaa nez guihdxyi Iconiu cun Listra, nee
gallee loh guelrzaꞌcazii nin batiꞌdxiloon per Dxiohs bataꞌh
naꞌh loh garaa raꞌ deeꞌ.
\v 12 Pwihsi guchii garaa raꞌ
bwiinn raꞌ nin chechii stoꞌ raꞌ ñiꞌh xchiꞌdxyi Jesucristu
nahpa gutiiꞌdxiloh raꞌ ba guelrzaꞌcazii,
\v 13 per laꞌh raꞌ
nin ayi ruzoꞌbadxiahga xchiꞌdxyi Dxiohs nee cun bwiinn nin
rusaguiꞌhi raꞌ mahzi ru zeezaꞌbi raꞌ ba loh duhlda, laasii
rusaguiꞌhi raꞌ ba per nee raꞌ ba casaguiꞌhi raꞌ za ba.
\p
\v 14 Per yiꞌh gwazahnee nayaatiiꞌ loh dxyiꞌdxyi raꞌ nin
basiꞌdxi luꞌh nin gwachiistoꞌ luꞌh, yiꞌh banaann luꞌh chyu
baluuꞌyin yiꞌh,
\v 15 pwihsi dez chin naa luꞌh biñiꞌn
nuꞌnbwaꞌ luꞌh xchiꞌdxyi Dxiohs nin ruluuꞌyi xa guiriaꞌcaa
luꞌh loh duhlda tin guicaꞌha luꞌh guelnabahan nin naa para
tuꞌpazi laasii gwachiistoꞌ luꞌh xchiꞌdxyi Jesucristu.
\v 16 Garaa raꞌ xchiꞌdxyi Dxiohs nin caa loh dxihtsi, laꞌh gahca
Dxiohs baniꞌhi Ñiꞌhn tin gucahan loh dxihtsi. Garaa raꞌ
xchiꞌdxyi Ñiꞌh nalluꞌyi tin guluuꞌyin laꞌh raꞌ nuꞌh cuun
nin naa xtuhlda nuꞌh tin neezaa gacaneeꞌhen laꞌh nuꞌh
chozahnee nuꞌh tuhbi guelnabahan nayaa,
\v 17 tin ziꞌchi
bazuusiin bwiinn nin naa xpwiinn Dxiohs nee banaa ba tin
guunn ba garaalohtiiꞌ dziꞌn zaꞌca.
\c 4
\p
\v 1 Rñiꞌn loh luꞌh loh Dxiohs nee cun loh za Daada
Jesucristu nin guibiaꞌgarii ziga tuhbi rrehyi tin guunn Ñiꞌh
guelguxchisi loh raꞌ bwiinn raꞌ nin rii nabahan loh
guidxyiyuh nee cun gallee raꞌ nin guhchi raꞌ za,
\v 2 nahpa
guuyidxyiꞌdxyi luꞌh xchiꞌdxyi Dxiohs, guzuhsiin loh Dxiohs cuun
chiꞌhzi hohra, baluuꞌyi laꞌh raꞌ bwiinn duhlda raꞌ,
gudxihndxi laꞌh raꞌ bwiinn raꞌ nin ayi xclaaꞌdzi raꞌ
guzoꞌbadxiahga xchiꞌdxyi Dxiohs, cun guñiꞌnee za laꞌh raꞌ
lasaaꞌ raꞌ nuꞌh xchiꞌdxyi Dxiohs,
\v 3 laasii zadzihn dxyih
nin ayi dxiuuꞌstoꞌ raꞌ bwiinn gucaꞌdxiahga raꞌ ba
guelrluuꞌyi zaꞌca xteenn xchiꞌdxyi Dxiohs; mahzi ziuuꞌstoꞌ
raꞌ ba nin naachiꞌhzi xigaaba raꞌ ba, niꞌchin zidxiꞌhyi raꞌ
ba ziahan raꞌ daada raꞌ nin ruluuꞌyi tin guluuꞌyi raꞌ ba
laꞌh raꞌ ba nin naa si xigaaba raꞌ ba dxihn raꞌ ba.
\v 4 Ayi
guzoꞌbadxiahga raꞌ ba xchiꞌdxyi Dxiohs; mahzi dxiuuꞌstoꞌ
raꞌ ba xica raꞌ dxyiꞌdxyi nin rdxiꞌnlaadzi raꞌ bwiinn.
\v 5 Per yiꞌh bwaꞌha guzuhchihpa tin batiiꞌdxiloh loh garaa raꞌ
nin guunnee raꞌ ba yiꞌh, nee gwazahnee baluuꞌyi xchiꞌdxyi
Dxiohs nin rutaꞌh laꞌh bwiinn loh duhlda, nee bwiꞌhnn zaꞌca
xtsiꞌn luꞌh.
\p
\v 6 Laasii naꞌh riiꞌ laꞌn zuꞌh tin chiinn raꞌ ba naꞌh; laꞌh
dxyih zeꞌgadzihn gachiꞌhn.
\v 7 Laꞌh xtsiꞌnaꞌhn guluhlla
ziga xtsiꞌn tuhbi suldahdu nin gudxihndxi zaꞌca loh guerru,
laꞌh dxyih raꞌ riiꞌ guyaꞌloh nee guluꞌchaꞌyi dziꞌtsiꞌhn
guelriachiistoꞌhn laꞌh Dxiohs,
\v 8 yannah cabweꞌzaꞌhn
guicaꞌhahn guelnazaꞌca nin guniꞌhi Daada nin nuu dxibaaꞌ
naꞌh, laasii laꞌh Daada riiꞌ naa Jwehsi nin ruhnn zaꞌca
guelguxchisi, per ayi naꞌh si dxiꞌh guniꞌhi Ñiꞌhn sino que
neezaa laꞌh garaa raꞌ bwiinn raꞌ nin cabweeza dziꞌtsi
laꞌh Ñiꞌh chin guibiaꞌgarii Ñiꞌh stuhbi.
\s Dxyiꞌdxyi xteenn Pahblu para loh Timoteu
\p
\v 9 Bwiꞌhnn jweersi dxieꞌguiaꞌha luꞌh cuunaꞌhn,
\v 10 laasii
laꞌh Demas, nin mahzi rucaꞌstoꞌ ñiꞌh guidxyiyuh riiꞌ, laꞌbi
basaaꞌn naꞌh, laꞌh bi zee guihdxyi Tesalónica, ya Cresente
zee loh guihdxyi Galacia, ya Titu zee guihdxyi Dalmacia.
\v 11 Sola laꞌh dxiꞌh Lucas dxuu nu riiꞌ. Badxiꞌhyi laꞌh
Marcu ya dxieꞌnee luꞌh bi laasii zahca gacanee bi naꞌh loh
xtsiꞌn Dxiohs,
\v 12 ya Tíquicu baxeꞌhlaꞌhn loh guihdxyi
Efesu.
\v 13 Chin dxiꞌ luꞌh dxieꞌnee luꞌh lahdxi cahpa nin
basiaꞌhanahn loh guihdxyi Troas rwaaꞌ yihdzi Carpu, cun nee
raꞌ chihbru raꞌ pwihsi ayi dxiaꞌldastoꞌ luꞌh xchihtsi raꞌn.
\v 14 Daada Alejandro, nin ruhnnee dxiꞌba dziꞌn, basaꞌcazii
duxa ba naꞌh; Dxiohs gusadxihlli laꞌh ba ziga gahca nin
bwiꞌhnnee ba laꞌh nuꞌh pur xchiꞌdxyi Dxiohs nin raluuꞌyi
nuꞌh.
\v 15 Yiꞌh guhca nasiin tin ayi xi guunnee ba yiꞌh
laasii rdxyiꞌchinee duxa ba laꞌh nuꞌh pur xchiꞌdxyi Dxiohs
nin raluuꞌyi nuꞌh.
\v 16 Chin mwer guñiꞌn xchiꞌdxyiꞌhn nin
balaloh naꞌh loh raꞌ guxchisi raꞌ, ayi chyu guhcanee naꞌh;
garaa raꞌ ba basaaꞌn raꞌ ba naꞌh nee rnaꞌbaꞌhn loh Dxiohs
ayi gusadxihlli Ñiꞌh nin bwiꞌhnn raꞌ ba,
\v 17 per laꞌh Daada
nin nuu dxibaaꞌ sihn bwiꞌhnn Ñiꞌh cumpahñu naꞌh nee
guzuhchihpanee Ñiꞌh naꞌh tin guhca baluꞌyiꞌhn garaa
xchiꞌdxyi Dxiohs loh raꞌ ba nee tin bazoꞌbadxiahga za raꞌ
nin ayi naa raꞌ bwiinn Israel raꞌ xchiꞌdxyi Dxiohs, per
guhcanee Dxiohs naꞌh bataꞌh Ñiꞌh naꞌh laꞌn naa raꞌ ba
zigazi laꞌn rwaaꞌ tuhbi bweꞌdzi,
\v 18 nee zutaꞌh Ñiꞌh naꞌh
loh garaa raꞌ duhlda, zahpadziꞌtsi Ñiꞌh naꞌh, cun
ziguꞌchaꞌyi Ñiꞌh naꞌh tin chuꞌnee Ñiꞌh naꞌh loh xquelrnabwaꞌ
Ñiꞌh llaaꞌndxibaaꞌ. Lah si Ñiꞌh chuu guiñiꞌ zaꞌca raꞌ
bwiinn para tuꞌpazi. Ziꞌchi gaca pwihsi.
\s GuelrgahpaDxiohs nin riaꞌloh dxihtsi riiꞌ
\p
\v 19 Badiꞌhi tuhbi guelrgahpaDxiohs laꞌh Prisca cun laꞌh
Aquila, nee cun laꞌh raꞌ bwiinn lasaaꞌ Onesíforu.
\v 20 Erastu biaꞌhan loh guihdxyi Corintu, ya laꞌh Trófimo
basiaꞌhanahn loh guihdxyi Miletu laasii rahcalluꞌhu bi.
\v 21 Bwiꞌhnn pur dxiꞌgah luꞌh galoh nin gadzihn bweꞌhw
nahlda raꞌ, nee ruxeꞌhla raꞌ Eubulu, Pudente, Linu, Claudiu
cun garaa ru raꞌ lasaaꞌ nuꞌh nin naa xpwiinn Jesucristu
tuhbi guelrgahpaDxiohs para yiꞌh.
\v 22 Daada Jesucristu
guinabahannee Ñiꞌh yiꞌh, Dxiohs gacanee garaa tu. Ziꞌchi
gaca pwihsi.