\id PHM
\h Filemón
\toc1 Filemón
\mt1 Dxihtsi nin bacaꞌh San Pahblu loh Filemohn
\c 1
\s GuelrgahpaDxiohs
\p
\v 1 Naꞌh Pahblu, nuuꞌhuhn laꞌn lahtsi dxiꞌba laasii pur
xcweenta xchiꞌdxyi Jesucristu nin ruluꞌyiꞌhn. Naꞌh neezaa
bwihtsi lasaaꞌ nuꞌh Timoteu ziga zoozah nuꞌh loh xchiꞌdxyi
Jesucristu, racaꞌh nu dxihtsi riiꞌ loh luꞌh Filemohn, nin
naa tuhbi bwihtsi lasaaꞌ nu loh xtsiꞌn Dxiohs.
\v 2 Racaꞌh
za nu dxihtsi riiꞌ loh Apia, nin naa bizaaꞌn nu loh
guelriachii stoꞌ loh Jesucristu, cun laꞌh Arquipu nin naa
tuhbi lasaaꞌ nu loh dziꞌn riiꞌ, nee cun loh za raꞌ bwiinn
guidoꞌ raꞌ nin radiaaꞌha rwaaꞌ yihdzi luꞌh.
\v 3 Dxiohs
Xtaada nuꞌh nee laꞌh Daada Jesucristu gacanee laꞌhtu, nee
guniꞌhi Ñiꞌh guelnasaa lastoꞌ tu.
\s Guelnazaꞌca stoꞌ nee cun guelriachii stoꞌ xteenn Filemohn
\p
\v 4 Guillii-guillii rudiꞌhihn guelzuxchiilli loh Dxiohs
chin riagannastoꞌn yiꞌh loh nin cabwihdxyi-canaꞌbaꞌhn loh
Dxiohs,
\v 5 laasii bihnaꞌhn xa naa guelnadziiꞌhi xteenn
luꞌh cun guelriachii stoꞌ xteenn luꞌh laꞌh Daada Jesucristu
nee cun garaa raꞌ za nin naa xpwiinn Dxiohs.
\v 6 Rnaꞌbaꞌhn
loh Dxiohs tin chioo ru ziga nin riachii stoꞌ luꞌh gaduhbi
nin cagaluuꞌyi luꞌh xchiꞌdxyi Dxiohs loh raꞌ snuhn bwiinn,
tin ziꞌchi gadzihn gacabwaꞌ raꞌ ba loh raꞌ cohsa zaꞌca raꞌ
nin nadxiaapa raꞌ nuꞌh pur xcweenta Jesucristu.
\v 7 Pwihsi
riahxi duuxaꞌhn cun riaꞌhan nasaa stoꞌn pur xcweenta luꞌh,
laasii pur yiꞌh, bwiitsi lasaaꞌhahn, basagaꞌldiuh luꞌh cun
bwiꞌhnn za luꞌh guridxyii lastoꞌ raꞌ lasaaꞌ raꞌ nuꞌh pur
ziga rucaꞌh stoꞌ luꞌh laꞌh raꞌ ba.
\s Pahblu rnaaba loh Filemohn ayi guidxyiꞌchinee ba laꞌh Onésimu
\p
\v 8 Nicala naꞌpahn guelrnabwaꞌ xteenn Jesucristu zahca
guiñiꞌn loh luꞌh guunn luꞌh xi chiꞌh zi nin nahpa guunn
luꞌh,
\v 9 yannah rnaꞌbaꞌhn loh luꞌh guunn luꞌh tuhbi dziꞌn
zaꞌca, laasii naꞌh Pahblu naan nin nadziiꞌhi luꞌh ya bwiinn
guuhlaꞌhn nee ñieꞌwꞌhn pur xcweenta Daada Jesucristu;
\v 10 canaꞌbaꞌhn guunn luꞌh tuhbi bweniꞌhn para xcweenta Onésimu,
nin naa ziga zi lliiꞌnahn, laasii gwachii stoꞌ bi xchiꞌdxyi
Dxiohs nin baluꞌyiꞌhn laꞌh bi nnah nin ñieꞌwꞌhn laꞌn lahtsi
dxiꞌba.
\p
\v 11 Galohyi, guhca bi tuhbi mooza nin ayi balluꞌyi para
yiꞌh, per nnah zalluꞌyi bi laasii loh garoopa nuꞌh gaca bi
mooza.
\v 12 Pwihsi ruxeꞌhlaꞌhn bi nacuubi stuhbi ya chin
gadzihn bi riꞌca, gaannloh luꞌh bi ziga zi laꞌh bi naa bi
naꞌh.
\v 13 Naꞌh xclaaꞌdzihn ñiaꞌhanee bi naꞌh riiꞌ xcweenta
luꞌh, tin ñuhnn bi dziꞌn loon nnah nin ñieꞌwꞌhn laꞌn lahtsi
dxiꞌba pur xcweenta xchiꞌdxyi Dxiohs,
\v 14 per ayi
xclaaꞌdzihn guꞌnnahn nin naa xigaaba sihn sino que nee cun
xigaaba luꞌh, tin ziga nin guunn luꞌh tuhbi bweniꞌhn naꞌh
ayi gacan cun lajweersi sino que cun pur xigaaba xteenn luꞌh.
\v 15 Pwehda gusahcariin luꞌh pur laꞌh Onésimu loh paaldaa
dxyih nin ayi bwaꞌha luꞌh loh bi, per yannah rcaꞌha luꞌh bi
tin chuu bi loh luꞌh stuhbi para tuꞌpazi,
\v 16 ya ayiru
zigadxiꞌh mooza sino que nin lasahca ru loh tuhbi mooza, o
sea ziga zi tuhbi bwihtsi bihda luꞌh; naꞌh rucaꞌh duxa stoꞌn
laꞌh bi, per yiꞌh mahzi ru bacaꞌh stoꞌ luꞌh laꞌh bi nee ayi
ziga zi tuhbi bwiinn si dxiꞌh sino que ziga bwihtsi paꞌh luꞌh
nez loh xneziuh Jesucristu.
\p
\v 17 Pwihsi naꞌh, sidela riuꞌnbwaꞌ luꞌh naꞌh ziga tuhbi
lasaaꞌ luꞌh loh xneziuh Jesucristu, bwaꞌha loh bi ziga zi
naꞌh gahca.
\v 18 Sidela xiilla batiꞌdxisuu bi loh luꞌh, o
sidela nuzaꞌbi bi loh luꞌh xiilla, loon guñiꞌ ya naꞌh
gadxiilliñin.
\v 19 Naꞌh Pahblu cagacaꞌhn dxihtsi riiꞌ cun
naaꞌhahn cun xlehtraꞌhn; naꞌh zidxiilliñin (tin ayiza
guiñiꞌn loh luꞌh nuzaꞌbi luꞌh hasta yiꞌh gahca loon).
\v 20 Pwihsi bwihtsi, bwiꞌhnn tuhbi bweniꞌhn riiꞌ naꞌh ziga
tuhbi nin nadziiꞌhi gahca laꞌh Dxiohs; baguꞌnasaa stoꞌn
ziga naa nuꞌh bwihtsi raꞌ nuꞌh loh Daada Jesucristu.
\p
\v 21 Rucaꞌhn dxihtsi riiꞌ loh luꞌh laasii rahcabwaꞌn
zuzoꞌbadxiahga luꞌh xchiꞌdxyiꞌhn, nee zuhnn luꞌh hasta ziahan
ru nin canaꞌbaꞌhn loh luꞌh.
\v 22 Pwihsi ziꞌchi gahca za,
bwiꞌhnn siguhra hasta dxiaꞌhanahn laasii cabweꞌzaꞌhn
guluuꞌyi Dxiohs ziga nin canaaba tu loh Ñiꞌh, tin guunn
Dxiohs para dxieꞌldaguiaꞌhahn cuun tu.
\s GuelrgahpaDxiohs xteenn Pahblu cun tuhbi guelruhnntaaꞌyi xteenn ba
\p
\v 23 Epafras, nin nuu ñieꞌwneꞌhn, ruxeꞌhla tuhbi
guelrgahpaDxiohs loh tu. Nuu ñieꞌw nu pur xcweenta
xchiꞌdxyi Jesucristu.
\v 24 Marcu, Aristarcu, Demas, cun
Lucas nin cayahcanee naꞌh loh dziꞌn riiꞌ; ruxeꞌhla raꞌ bi
tuhbi guelrgahpaDxiohs para laꞌhtu.
\p
\v 25 Daada Jesucristu guuntaaꞌyi yihca tu. Ziꞌchi gaca
pwihsi.